ୟାକୁବ୍ସ୍କି ଲେଖ୍ଚ୍କା ଚିଠି
ଭୂମିକା
ପ୍ରାଭୁ ଯୀଶୁସ୍କି ଭାଇ ୟାକୁବ୍ସ୍ ଇ ଚିଠିବନ୍ ଲେଖ୍ଚ୍କାଦାସ୍। ପୁରା ଦୁନିଆଁନୁ ଛିଛିର୍ଛାନ୍ଦ୍ ମାନିକିରି ରାନାବାଲା ୟାହୁଦୀ ଖ୍ରୀସ୍ତ୍ ବିଶ୍ଵାସୀ ଆଲାର୍ଘି ଲାଗାନ୍ ୟାକୁବ୍ସ୍ ଇ ଚିଠିନ୍ ଲେଖ୍ଚ୍କାଦାସ୍। ଇ ଚିଠିନୁ ୟାକୁବ୍ସ୍ ପ୍ରାଭୁ ଯୀଶୁ ଖ୍ରୀସ୍ତ୍ସିନ୍ ବିଶ୍ୱାସ୍ କାମିକିରି ରାନାଘି କାତ୍ଥା ଲେଖ୍ଚ୍କାଦାସ୍। ଖ୍ରୀସ୍ତ୍ ବିଶ୍ଵାସୀ ଆଲାର୍ଘି ଲାଗାନ୍ ଇ ଦୁନିଆଁନୁ ବହୁତ୍ ଦୁଃଖୁ ଆରୁ ତକ୍ଲିବ୍ ସାହିକିରି ରାନା ପାଡ଼୍ରିଦ୍। ଦୁଃଖୁ ଆରୁ ତକ୍ଲିପ୍ନୁ ରାତେହି ଖ୍ରୀସ୍ତ୍ ବିଶ୍ଵାସୀ ଆଲାର୍ ନିଜର୍ ବିଶ୍ୱାସ୍ ମା ଆମ୍ବନା କାତ୍ଥା ଲେକିନ୍ ବିଶ୍ଵାସ୍ନୁ ରୋଜ୍ଦିନ୍ ଆଘ୍ଲି ବାଢ଼୍ର୍ନା କାତ୍ଥା। ଖ୍ରୀସ୍ତ୍ ବିଶ୍ଵାସୀ ଆଲାର୍ ଏନ୍ଦ୍ରିନ୍ କାତ୍ଥାନୁ ନିଜ୍କେନିଜ୍ ବଡ଼୍ପଣି ମା ଏଦ୍ର୍ନା କାତ୍ଥା, ଲେକିନ୍ ଜାମା କାତ୍ଥାନୁ ନରମ୍ ମାନିକିରି ଲାଗାତାର୍ ବିନ୍ତି କାମ୍ତେ ରାନା କାତ୍ଥା। ଖ୍ରୀସ୍ତ୍ ବିଶ୍ଵାସୀ ଆଲାର୍ ବାନେ ନାଲ୍ଖୁହି କାମ୍ନାକାତ୍ଥା। ଖ୍ରୀସ୍ତ୍ ବିଶ୍ଵାସୀ ଆଲାର୍ ବାନେ ନାଲ୍ଖୁନୁ ନିଜର୍ ବିଶ୍ଵାସ୍ଘି ମହତ୍ତ୍ଵବନ୍ ବାତାବାନାଏ। ଯୀଶୁ ଖ୍ରୀସ୍ତ୍କି ମିଆଁ ବିଶ୍ୱାସ୍ କାମିକିରି ବାନେ ନାଲ୍ଖୁ ମା କାମତ୍ ତା ଆଦ୍ ବିଶ୍ୱାସ୍ ପୂର୍ଣ ମାଲ୍ଲିଦ୍। ଖ୍ରୀସ୍ତ୍ ବିଶ୍ଵାସୀ ଆଲାର୍ ନିଜର୍ କାତ୍ଥାବାର୍ତ୍ତା, ବିଚାର୍, ଚାଲିଚଲନ୍ ଇବ୍ଡ଼ା ଜାମା ପ୍ରାଭୁସ୍କି ବଚନ୍ଘି ଅନୁସାର୍ କାମ୍ନାକାତ୍ଥା। ଇବ୍ଡ଼ା ଜାମା କାତ୍ଥା ବହୁତ୍ ବାନେକିରି ବର୍ଣ୍ଣନା କାମା କେର୍କିଚି। ନିମ୍ ଇ ଚିଠିବନ୍ ଧ୍ୟାନ୍ସେ ପାଢ଼୍କେ ଆରୁ ଖ୍ରୀସ୍ତ୍ ବିଶ୍ଵାସ୍ନୁ ଆଘ୍ଲି ବାଢ଼୍ର୍କେ, ହୁଦ୍ଘି ସାଙ୍ଗେ-ସାଙ୍ଗେ ବାନେ ନାଲ୍ଖୁ କାମିକିରି ଖ୍ରୀସ୍ତ୍ ବିଶ୍ଵାସ୍ଘି ମହତ୍ତ୍ୱ ଦୁସ୍ରାରିନ୍ ବାତାବାକେ।
ରୂପ୍ରେଖା
ଯୋହାର୍ ୧:୧
ଖ୍ରୀସ୍ତ୍ ବିଶ୍ୱାସ୍ ଆରୁ ବୁଦ୍ଧିଘି କାତ୍ଥା ୧:୨-୮
ଗରୀବ୍ ଆରୁ ଧନୀ ଆଲାର୍ଘି କାତ୍ଥା ୧:୯-୧୧
ପାପ୍ତି ଦୁର୍ ରାକେ ୧:୧୨-୧୮
ପାର୍ମେଶ୍ଵାର୍ସ୍କି କାତ୍ଥା ମେନା ଆରୁ ଆଦ୍ଘି ଅନୁସାର୍ ଉଜ୍ଜା ୧:୧୯-୨୭
ଜାମାରିନ୍ ସାମାନ୍ ସଚ୍ଚକେ ୨:୧-୧୩
ଖ୍ରୀସ୍ତ୍ ବିଶ୍ଵାସୀ ଆରୁ ବାନେ ନାଲ୍ଖୁ ୨:୧୪-୨୬
ନିଜର୍ ତାଥାବନ୍ କାବୁନୁ ଉଇନା ୩:୧-୧୮
ପାର୍ମେଶ୍ଵାର୍ସ୍କି ବିରୁଦ୍ଧ୍ନୁ ଚାଲ୍ର୍ନାବାଲା ଆଲାର୍ଘି କାତ୍ଥା ୪:୧—୫:୬
ବହୁତ୍ ପ୍ରକାର୍ଘି ଶିକ୍ଷା ୫:୭-୨୦
1ଯୋହାର୍
1ପାର୍ମେଶ୍ୱାର୍ ଆରୁ ପ୍ରାଭୁ ଯୀଶୁ ଖ୍ରୀସ୍ତ୍ସ୍କି ଗୁତ୍ତିୟା ୟାକୁବ୍ସ୍କି ତାର୍ତି ଭିନେ-ଭିନେ ଦୁସ୍ରା ଦେଶ୍ନୁ ଛିଛିର୍ଛାନ୍ଦ୍ ମାନ୍ଚ୍କା ବାର ବାଉଁଶାର୍ଘି ୟାହୁଦୀ ଖ୍ରୀସ୍ତ୍ ବିଶ୍ୱାସୀ ଆଲାର୍ଘି ଯୋହାର୍।
ପାର୍ମେଶ୍ୱାର୍ସିନ୍ ବିଶ୍ୱାସ୍ କାମା ଆରୁ ଧିରାଜ୍ ଧାରା
2ହେ ଏଙ୍ଘାଏ ଭାଇ ଆରୁ ବୁହୁଣୀଜାମାରୋ, ଯେତ୍କବାକେନ୍ ନିମ୍ ନାନାପ୍ରକାର୍ଘି ପରୀକ୍ଷାନୁ ଖାତ୍ରର୍, ହତ୍କବାକେନ୍ ପୁରାପୁରୀ ଖୁସୀଘି କାତ୍ଥା ବୁଲି ବୁଝ୍ରା, 3ଏନ୍ଦେର୍ଗେକା ନିମ୍ ଆହ୍ଦାର୍ କା ନିହ୍ମା ବିଶ୍ଵାସ୍ ଇ ପରୀକ୍ଷାନ୍ତି ଧିରାଜ୍ ଉତ୍ପନ୍ନ କାମିଦ୍। 4ନିହ୍ମା ଜୀବନ୍ନୁ ଧିରାଜ୍ ପୁରାପୁରୀ ଉତ୍ପନ୍ନ ମାନଦ୍କଦ୍ ହତ୍କତକ୍ ନିମ୍ ଧିରାଜ୍ ଧାରିକିରି ରା ତା, ନିମ୍ ପୁରାପୁରୀ ସିଦ୍ଧ୍ ମାନର୍କର୍, ଆରୁ ନିହ୍ମାସାନ୍ ଏନ୍ଦେର୍ହି କାତ୍ଥାଘି ଘାଟି ମା ରାଇ। 5ଯଦି ନିହ୍ମା ଭିତର୍ନୁ ନେକ୍ରିନ୍ ବୁଦ୍ଧିଘି ଘାଟି ରାଇ ତା ପାର୍ମେଶ୍ଵାର୍ସିନ୍ ବିନ୍ତି କାମା ଆରୁ ଆସ୍କେ ବୁଦ୍ଧି ହାଖ୍ଖର, ଏନ୍ଦେର୍ଗେକା ପାର୍ମେଶ୍ୱାର୍ସ୍ ଖୁଲାମନ୍ତି ଆରୁ ଖୁସୀତି ଜାମାର୍ଗେ ଚିଦାସ୍। 6ଲେକିନ୍ ଆର୍ କାଟେହି ସନ୍ଦେହ୍ ମା କାମିକିରି ବିଶ୍ଵାସ୍ତି ନିୟର୍, ଏନ୍ଦେର୍ଗେକା ସନ୍ଦେହ୍ କାମୁର୍ ସାମ୍ଧୁର୍ଘି ଲହ୍ଡ଼ିଘି ଲେଖା ରାନାଏ ଏକାଦ୍ କା ଧୁକାନୁ ବାହିଦ୍ ଆରୁ ଉଛ୍ଲାରାଇଦ୍। 7ସନ୍ଦେହ୍ କାମୁ ଆଲାର୍ ପ୍ରାଭୁସ୍ତି ଏନ୍ଦ୍ରିନ୍ ହାଖ୍ଖମ୍ ବୁଲି ଆମ୍କେ ସୋଚା। 8ଆ ଆଲାସ୍କି ଯୋଡ଼େ ମନ୍ ରାଇ ଆରୁ ଆସ୍ ଜାମା ନାଲ୍ଖୁନୁ ଅସ୍ଥିର୍ ରାଦାସ୍।
ଗରୀବ୍ ଆରୁ ଧନୀ ଆଲାର୍
9ଖ୍ରୀସ୍ତ୍ ବିଶ୍ଵାସୀ ଗରୀବ୍ ଭାଇ ଆରୁ ବୁହୁଣୀରୋ, ନିମ୍ ଦୁସ୍ରାର୍ଘି ନଜର୍ନୁ ଏତ୍କ ଖାସ୍ ମା ରର୍ ହାଲେହି ନିଜର୍ ମନ୍ନୁ ଖୁସ୍ରାନା କାତ୍ଥା, ଏନ୍ଦେର୍ଗେକା ନିମ୍ ପାର୍ମେଶ୍ଵାର୍ସ୍କି ନଜର୍ନୁ ଖାସ୍ ରାଦାର୍। 10ଲେକିନ୍ ହେ ଧନୀ ଆଲାରୋ ନିମାଗେ ନିହ୍ମା ଧାନ୍ନୁଘି ମିଆଁ ବଡ଼୍ପଣି ମା ଏଦେର୍ନା କାତ୍ଥା, ଏନ୍ଦେର୍ଗେକା ନିହ୍ମା ଜାମା ଧାନ୍ନୁ ଘାଁସିଘି ପୁଁପୁ ଲେଖା ମୁର୍ଝାର ଖାତ୍ରଦ୍। 11ଏନ୍ଦେର୍ଗେକା ବିଡ଼ି ଆର୍ଗ୍ତେହି ଜୋର୍ସେ ବିଡ୍ଚ୍କୁନ୍ ଘାଁସିଦ୍ ଏସ୍କେ ହାଇକାଇଦ୍, ଆରୁ ତାଙ୍ଘା ପୁଁପୁଦ୍ ଖାତ୍ରିଚିଦ୍ ଆରୁ ତାଙ୍ଘାଏ ସୁନ୍ଦର୍ବଦ୍ ନଷ୍ଟ ମାନିକାଇ, ହନ୍ନେନ୍ ଧନୀ ଆଲାର୍ ନିଜର୍-ନିଜର୍ ନାଲ୍ଖୁ କାମ୍ତେ-କାମ୍ତେ ନାଶ୍ ମାନ୍ନାଏକାନାଏ।
ପରୀକ୍ଷା ବାକେନ୍ ଧିରାଜ୍ ଧାର୍ନା
12ଧଏନ୍ ରାନାଏ ଆବ୍ଡ଼ା ଆଲାର୍ ଏକାର୍ କା ପରୀକ୍ଷାନୁ ମଜ୍ବୁତ୍ ରାନାଏ, ଏନ୍ଦେର୍ଗେକା ଆବ୍ଡ଼ାର୍ ପରୀକ୍ଷାନ୍ତି ବାନେକିରି ଉର୍ଖିକିରି ଜୀବନ୍ଘି ମୁକୁଟ୍ ହାଖ୍ଖର୍ ଏକାନ୍ କା ପ୍ରାଭୁସ୍ ନିଜର୍ ବାନେ ହାଖ୍ଖୁର୍ଗେ ଚିୟାଗେ ପ୍ରତିଜ୍ଞା କାମ୍ଚ୍କାଦାସ୍। 13ଯେତ୍କବାକେନ୍ ନେଖିନ୍ହି ପରୀକ୍ଷା ମାନିଦ୍ ତା, ଆବ୍ଡ଼ାର୍ ଇ ପରୀକ୍ଷାଦ୍ ପାର୍ମେଶ୍ୱାର୍ସ୍କି ତାର୍ତି ମାନାଲି ବୁଲି ଆମ୍କେ ସୋଚା; ଏନ୍ଦେର୍ଗେକା ଖାରାପ୍ କାତ୍ଥାନୁ ନେଦିନ୍ ପାର୍ମେଶ୍ଵାର୍ସ୍କି ପରୀକ୍ଷା କାମା ପଲ୍ଲନାଇନ୍, ଆରୁ ପାର୍ମେଶ୍ଵାର୍ସ୍ହି ଖାରାପ୍ କାତ୍ଥାନୁ ନେକାନ୍ହି ପରୀକ୍ଷାନୁ ଖାତ୍ରାଗେ ମା ଚିଦାସ୍। 14ଲେକିନ୍ ଜାମା ଆଲାର୍ ନିଜର୍-ନିଜର୍ ଖାରାପ୍ ଇଚ୍ଛାତି ଟାଣ୍ତ୍ରିକିରି ଫାସ୍ର୍ନାଏ କାନାଏ ଆରୁ ପରୀକ୍ଷାନୁ ଖାତ୍ର୍ନାଏ କାନାଏ। 15ଆରୁ ଖାରାପ୍ ଇଚ୍ଛାଘି କାରଣ୍ତି ପାପ୍ କାମ୍ନାଏ ଆରୁ ଯେତ୍କବାକେନ୍ ପାପ୍ ପାର୍ଦି କାଇ ତା ମରନ୍ ମାନିଦ୍। 16ହେ ଏଙ୍ଘାଏ ଦୁଲାଡ଼ି ଭାଇ ଆରୁ ବୁହୁଣୀରୋ, ଧୋଖା ଆମା ମହାଁ। 17ଜାମା ବାନେ ଦାନ୍ ଆରୁ ସିଦ୍ଧ୍ ବାର୍ଦାନ୍ ମିଁତି ବାରିଦ୍, ପାର୍ମେଶ୍ୱାର୍ସ୍ ଆ ଜାମାନ୍ ନାମାଗେ ଚିଦାସ୍, ଆ ପାର୍ମେଶ୍ୱାର୍ସ୍ସିନ୍ ଆକାଶ୍ ତା ବିଲ୍ଲୀନ୍ ବାନାବାଚ୍କାଦାସ୍, ଆ ବିଲ୍ଲୀଦ୍ ନିଜର୍ ବିଲ୍ଲୀନ୍ ବାଦ୍ଲାରାତେ-ବାଦ୍ଲାରାତେ କିନ୍ଦ୍ରାରି ଲେକିନ୍ ପାର୍ମେଶ୍ଵାର୍ସ୍ ଏକ୍ଲାହି ବାଦ୍ଲାରାନାବାଲା ମାଲ୍ଦାସ୍। 18ଆସ୍ ନିଜର୍ ସତ୍ତୁ ବଚନ୍ବନ୍ ନାମାନ୍ ବାତାବାଗେ ଫାଏସ୍ଲା କାମ୍ଚାସ୍, ଏସ୍କେ କା ନାମାଗେ ପୁନା ଜୀବନ୍ ହାଖ୍ଖର ଆରୁ ଆସ୍ ଯେତ୍କ ଜିନିଷ୍ଘି ସୃଷ୍ଟି କାମ୍ଚ୍କାଦାସ୍, ଆବ୍ଡ଼ାର୍ସ୍ତି ପହ୍ଲେ ଫଲ୍ଘି ଲେଖା ଚାଢ଼ାବାଗେ ଆସ୍ ନାମାନ୍ ପୁନା ଜନମ୍ ଚିଚ୍କାଦାସ୍।
ପ୍ରାଭୁସ୍କି ବଚନ୍ବନ୍ ମେନ୍ନା ଆରୁ ପାଲନ୍ କାମ୍ନା
19ହେ ଏଙ୍ଘାଏ ଦୁଲାଡ଼ି ଭାଇ ଆରୁ ବୁହୁଣୀଜାମାରୋ, ନିମ୍ ଇ କାତ୍ଥାନ୍ ବାନେକିରି ବୁଝ୍ରା: ଜାମା ଆଲାର୍ଘି ମେନାଗେ ଇଚ୍ଛା ରାନା କାତ୍ଥା ଆରୁ ତେଙ୍ଗ୍ନାନୁ ଧିରାଜ୍ ଆରୁ ଖୀସାରାଗେ ଧିରା ମାନ୍ନା କାତ୍ଥା। 20ଏନ୍ଦେର୍ଗେକା ଅଣ୍ଟା ଆଲାସ୍ ଯେତ୍କବାକେନ୍ ଖୀସାରାଦାସ୍ ତା ଆସ୍ ପାର୍ମେଶ୍ଵାର୍ସ୍କି ଇଚ୍ଛାଘି ଅନୁସାର୍ ଠିକ୍ ନାଲ୍ଖୁ କାମା ପଲ୍ଲଦାସ୍। 21ହୁଦ୍ଘିଲାଗାନ୍ ନିମ୍ ଜାମା ରକମ୍ଘି ମାଏଲା ଆରୁ ଖାରାପ୍ ଦୁର୍କାମିକିରି, ନରମ୍ ମନ୍ତି ପାର୍ମେଶ୍ଵାର୍ସ୍କି ଆ ବଚନ୍ବନ୍ ଗ୍ରହନ୍ କାମା ଏକାଦ୍ କା ନିହ୍ମା ମନ୍ନୁ ରାଇ ଆରୁ ଏକାଦ୍ ନିହ୍ମା ଜୀବନ୍ବନ୍ ବାଛାବା ଅଙ୍ଗଦ୍। 22ଲେକିନ୍ ବଚନ୍ ମେନିକିରି ଚାଲ୍ରୁ ଆଲ୍ ମାନା, ଆରୁ ଖାଲି ମେନୁ ଆଲ୍ ଆମାମାନା ଏକାର୍ କା ନିଜ୍କେ ନିଜ୍ରିନ୍ ଧୋଖା ଚିନାଏ। 23ଏନ୍ଦେର୍ଗେକା ନେଦ୍ ବଚନ୍ ମେନିକିରି ଆ ବଚନ୍ ଲେଖା ମା ଚାଲ୍ରାନାଏ ତା, ଆର୍ ଆ ଆଲାସ୍ ଲେଖା ଏକାସ୍ କା ତାଙ୍ଘାଏ ଚେହେରାନ୍ ଆଇନାନୁ ଏର୍ଦାସ୍। 24ହୁଦ୍ଘିଲାଗାନ୍ କା ଆସ୍ ତାନ୍ ନିଜ୍କେନିଜ୍ ଆଇନାନୁ ଏର୍ଦାସ୍ ଆରୁ ବୁଙ୍ଗ୍ଦାସ୍ ଆରୁ ହୁଙ୍ଗେନିନ୍ ମଦ୍ର୍ଦାସ୍ ଚିଦାସ୍ କା ଏନ୍ ଏସ୍କେ ରାଦାନ୍। 25ପାର୍ମେଶ୍ଵାର୍ସ୍କି ସିଦ୍ଧ୍ ନିୟମ୍ବନ୍ ଧ୍ୟାନ୍ ଉଇୟ। ଆଦ୍ ନିମାନ୍ ଆଜାଦୀ ଚିଅଦ୍, ଯଦି ନିମ୍ ପାର୍ମେଶ୍ଵାର୍ସ୍କି ନିୟମ୍ବନ୍ ମା ମଦ୍ରର୍ ଆରୁ ଆବନ୍ ପୁରାପୁରୀ ପାଲନ୍ କାମର୍ ତା ପାର୍ମେଶ୍ୱାର୍ସ୍ ନିମାଗେ ବହୁତ୍ ଆଶିଷ୍ ଚିୟସ୍। 26ଯଦି ନେଦିନ୍ ନିଜ୍କେନିଜ୍ ଧର୍ମି ସୋଚ୍ନାଏ ଆରୁ ନିଜର୍ ତାଥାନ୍ କାବୁନୁ ମା ଉଇନାଏ ତା, ନିଜ୍କେନିଜ୍ ଧୋଖା ଚିନାଏ ଆରୁ ଆବ୍ଡ଼ାର୍ଘି ଧାର୍ମିକ୍ତା ବେକାର୍ଦ୍। 27ଆନାଥ୍ ଆରୁ ବିଧ୍ବାରିନ୍ ଦୁଃଖୁନୁ ସାହାରା ଚିଅତ୍ ଆରୁ ଦୁନିଆଁନ୍ତା ଖାରାପ୍ କାତ୍ଥାନ୍ତି ନିଜ୍କେ ଶୁଦ୍ଧ୍ ଉଇୟତ୍, ଇଦ୍ ନାହ୍ମା ବାଙ୍ଗ୍ ପାର୍ମେଶ୍ୱାର୍ସ୍କି ପୁରାପୁରୀ ସାପ୍ଫା ଆରୁ ନିର୍ମଲ୍ ଧରମ୍।
2ଜାମା ଆଲାରିନ୍ ସାମାନ୍ ସୋଚା
1ହେ ଏଙ୍ଘା ଭାଇ ଆରୁ ବୁହୁଣୀଜାମାରୋ, ନିମ୍ ନାହ୍ମା ମାହିମାମୟ ପ୍ରାଭୁ ଯୀଶୁ ଖ୍ରୀସ୍ତ୍ସ୍କି ମିଆଁ ବିଶ୍ଵାସ୍ କାମ୍ଦାର୍ ହୁଦ୍ଘିଲାଗାନ୍ ଜାମା ଆଲାରିନ୍ ସାମାନ୍ ସୋଚା। 2ମନେ କାମା କା ଯଦି ଅଣ୍ଟା ଆଲାସ୍ ସୋନାଘି ମୁଦ୍ଦି ଆରୁ ଦାମିକା ଚିଢ଼ା ଆତ୍ତିକିରି ନିହ୍ମା ସାଭାନୁ ବାରସ୍, ଆରୁ ଅଣ୍ଟା ଗରୀବ୍ ଆଲାସ୍ହି ମାଇଲା ଚିଢ଼ା ଆତ୍ତିକିରି ବାରସ୍, 3ଆରୁ ନିମ୍ ଆ ଦାମିକା ଚିଢ଼ା ଆତ୍ତୁ ଆଲାସ୍କି ଚେହେରା ଏରିକିରି ତେଙ୍ଗର୍, “କା ନିମ୍ ବାନେ ଆଡ୍ଡାନୁ ଅକ୍କା,” ଆରୁ ଆ ଗରୀବ୍ ଆଲାସ୍ସିନ୍ ତେଙ୍ଗର୍, “ନିନ୍ ଇସାନ୍ ଇଜ୍ଜକା ରା” ମାଲ୍ଲାହାଲେ “ଏଙ୍ଘା ହେଡ୍ଡୁ ଚାହାନୁ ଅକ୍କା।” 4ହାଲେ ନିମ୍ ନିଜର୍-ନିଜର୍ ଭିତ୍ରେ ଭେଦ୍ଭାୱ ମା କାମ୍ଦାର୍ ଆରୁ ନିମ୍ ଭୁଲ୍ ବିଚାର୍ କାମିକିରି ଫାଏସ୍ଲା ମା ଶୁଣାବାଦାର୍ କାଁଏ? 5ହେ ଏଙ୍ଘା ଦୁଲାଡ଼ି ଭାଇ ବୁହୁଣୀଜାମାରୋ ମେନା, ପାର୍ମେଶ୍ଵାର୍ସ୍ ଇ ଦୁନିଆଁନ୍ତା ଗରୀବ୍ ଆଲାରିନ୍ ବିଶ୍ଵାସ୍ନୁ ଧନୀ ମାନାଗେ ଆରୁ ପାର୍ମେଶ୍ୱାର୍ସ୍ ତାଙ୍ଗାନ୍ ବାନେ ହାଖ୍ଖୁରିନ୍ ଏକା ରାଜୀବନ୍ ଚିୟାଗେ ବଚନ୍ ଚିଚ୍କାଦାସ୍, ଆ ରାଜୀବନ୍ ଚିୟାଗେ ମାଲ୍ଲା ଚାଜୁସ୍ କାଁଏ? 6ଲେକିନ୍ ନିମ୍ ଆ ଗରୀବ୍ ଆଲାରିନ୍ ଅପ୍ମାନ୍ କାମ୍ଚ୍କାର୍, ଧନୀ ଆଲାର୍ କାଁଏ ନିହ୍ମା ମିଆଁ ଆତ୍ୟାଚାର୍ ମା କାମ୍ନାଏ ଆରୁ ଆବ୍ଡ଼ାର୍ କାଁଏ ନିମାନ୍ କୋଟ୍ କାଚେରୀନୁ ଟାଣାଟାଣା ମା ହନାଏ? 7ନିହ୍ମାଏ ବାନେ ନାମେବନ୍ ଆବ୍ଡ଼ା ଆଲାର୍ହି ନିନ୍ଦା କାମ୍ନାଏ ହାଏ? 8ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇଦ୍, “ନିମ୍ ନିଜର୍ ପାଡ଼ୋଶୀରିନ୍ ନିଜର୍ ଲେଖା ବାନେ ହାଖ୍ଖା” ଯଦି ନିମ୍ ପାବିତାର୍ ଶାସ୍ତ୍ରନ୍ତା ଇ ନିୟମ୍ବନ୍ ସତ୍ତୁନିନ୍ ପୁରାପୁରୀ ପାଲନ୍ କାମ୍ଦାର୍ ତା, ନିମ୍ ବାନେ କାମ୍ଦାର୍, 9ଆରୁ ଯଦି ନିମ୍ ଜାମା ଆଲାରିନ୍ ଏକ୍ସାମାନ୍ ମା ଏର୍ଦାର୍ ତା ପାପ୍ କାମ୍ଦାର୍; ଆରୁ ନିମ୍ ପାର୍ମେଶ୍ଵାର୍ସ୍କି ନିୟମ୍ଘି ଅନୁସାର୍ ଦୋଷୀ ମାନ୍ଦାର୍। 10ଏନ୍ଦେର୍ଗେକା ନେଦିନ୍ ଜାମା ନିୟମ୍ବନ୍ ପାଲନ୍ କାମ୍ନାଏ ଲେକିନ୍ ଅଣ୍ଟା କାତ୍ଥାନ୍ ପାଲନ୍ ମା କାମ୍ନାଏ ହାଲେ ଆର୍ ଜାମା ନିୟମ୍ବନ୍ ପାଲନ୍ ମା କାମ୍ନା ଲେଖା ଦୋଷୀ ମାନ୍ନାଏକାନାଏ। 11ଏନ୍ଦେର୍ଗେକା ନେଦ୍ ବେଭିଚାର୍ ଆମା କାମା ବୁଲି ତେଙ୍କାଚାର୍, ଆବ୍ଡ଼ାର୍ହି ଆଲ୍ ଆମ୍କେ ପିଟାବୁଲି ତେଙ୍କାଚାର୍, ହାଲେ ନିମ୍ ଯଦି ବେଭିଚାର୍ ମା କାମିକିରି ଆଲାରିନ୍ ପିଟର୍ ହାଲେ ନିୟମ୍ବନ୍ ତୋଡ଼୍ନାବାଲା ଠାହ୍ରାରର୍। 12ନିମ୍ ଏକାନ୍ ତେଙ୍ଗ୍ଦାର୍ ଆରୁ କାମ୍ଦାର୍ ଆବ୍ଡ଼ା ଜାମାଦ୍ ପାର୍ମେଶ୍ଵାର୍ସ୍କି ନିୟମ୍ଘି ଅନୁସାର୍ ନ୍ୟାୟ କାମାକୋ, ନିମ୍ ଇବନ୍ ମନେ ଉଇୟା ଇ ନିୟମ୍ଦ୍ ନିମାନ୍ ଆଜାଦୀ ଚିଅଦ୍। 13ଏନ୍ଦେର୍ଗେକା ଯଦି ନିମ୍ ଦୁସ୍ରାରିନ୍ ଦାୟା ମା କାମର୍ ତା ପାର୍ମେଶ୍ୱାର୍ସ୍ହି ନିମାନ୍ ନ୍ୟାୟ କାମ୍ନାଘି ଉଲ୍ଲାନୁ ଦାୟା ମା କାମସ୍, ଲେକିନ୍ ଦାୟାଦ୍ ନ୍ୟାୟଘି ମିଆଁ ଜିତିଦ୍।
ବିଶ୍ଵାସ୍ଦ୍ ନାଲ୍ଖୁଘି ବିନା ବେକାର୍
14ହେ ଏଙ୍ଘା ଭାଇ ବୁହୁଣୀଜାମାରୋ, ଯଦି ନେଦିନ୍ ଏଙ୍ଘା ବିଶ୍ଵାସ୍ ରାଇ ବୁଲି ତେଙ୍ଗ୍ନାଏ ଲେକିନ୍ ବିଶ୍ଵାସ୍ଘି ଅନୁସାର୍ ନାଲ୍ଖୁ ମା କାମ୍ନାଏ ତା, ଇଦ୍ଘି ଏନ୍ଦେର୍ ଫାଏଦା? ଏନ୍ନେ ବିଶ୍ଵାସ୍ଦ୍ କାଁଏ ଆବ୍ଡ଼ାରିନ୍ ବାଛାବା ଅଙ୍ଗଦ୍? 15ମନେ କାମା ଯଦି ଏକା ଭାଇ ଚାହେ ବୁହୁଣୀର୍ଗେ ଆତ୍ତାଗେ ଚିଢ଼ା ମା ହାଖ୍ଖରାଲ୍କିର ଆରୁ ଆବ୍ଡ଼ାର୍ଗେ ରୋଜ୍ ଅନାମହାଗେ ମା ହାଖ୍ଖରାଲ୍କିର, 16ଆରୁ ନିହ୍ମା ଭିତର୍ନୁ ନେଦିନ୍ ଆବ୍ଡ଼ାରିନ୍ ତେଙ୍ଗର୍, “ବାନେକିରି କାଲା, ଗରମ୍ ଚିଢ଼ା ଆତ୍ତା ଆରୁ କୁଲୁଭର୍ ଅନା ମହାଁ”, ଲେକିନ୍ ଏକା ଜିନିଷ୍ ଶରୀର୍ଘି ଲାଗାନ୍ ଦାର୍କାର୍ ରାଇ ଆବନ୍ ଆବ୍ଡ଼ାର୍ଗେ ମା ଚିଅର୍ ତା ଏନ୍ଦେର୍ ଫାଏଦା? 17ନିମ୍ ବିଶ୍ୱାସ୍ କାମ୍ଦାର୍ ହାଲେହି ବିଶ୍ୱାସ୍ଘି ଅନୁସାର୍ ବାନେ ନାଲ୍ଖୁ ମା କାମ୍ଦାର୍ ତା, ଆ ବିଶ୍ୱାସ୍ କେଚ୍ଚା କେର୍କିଚି ଆଦ୍ଘି ଏନ୍ଦେର୍ହି ଫାଏଦା ମାଲ୍ଲାଦିନ୍। 18କେତ୍କ ଲୋକ୍ ଆଲାର୍ ଭାଏଲ୍ ଏନ୍ନେ ତେଙ୍ଗର୍, “କେତ୍କ ଆଲାର୍ଗେ ବିଶ୍ୱାସ୍ ରାଇ ଆରୁ କେତ୍କ ଆଲାର୍ଗେ ବାନେ ନାଲ୍ଖୁ ରାଇ” ଲେକିନ୍ ଏନ୍ ତେଙ୍ଗାଲ୍ଦାନ୍ ଯଦି ନିମ୍ ନିହ୍ମା ବିଶ୍ଵାସ୍ଘି ଅନୁସାର୍ ବାନେ ନାଲ୍ଖୁ ମା କାମ୍ଦାର୍ ତା, ନିମାଗେ ବିଶ୍ୱାସ୍ ରାଇ ଏନ୍ନେ ଏସ୍କେ ତେଙ୍ଗା ଅଙ୍ଗର୍, ଲେକିନ୍ ଏଙ୍ଘା ବିଶ୍ୱାସ୍ ବାନେ ନାଲ୍ଖୁଘି ଦ୍ୱାର୍ନୁ ଏନ୍ ତେଙ୍ଗନ୍। 19ନିମ୍ ତେଙ୍ଗ୍ଦାର୍ କା ଏଙ୍ଗାଗେ ବିଶ୍ୱାସ୍ ରାଇ କା ଅଣ୍ଟା ଖାଲି ପାର୍ମେଶ୍ଵାର୍ସ୍ ରାଦାସ୍; ଇଦ୍ ବାନେ କାତ୍ଥା ଲେକିନ୍ ଭୁତ୍ତୁଦ୍ହି ବିଶ୍ୱାସ୍ କାମିଦ୍ କା, ଅଣ୍ଟା ଖାଲି ପାର୍ମେଶ୍ୱାର୍ସ୍ ରାଦାସ୍ ଆରୁ ଆଦ୍ ଏନ୍ନେ ବିଶ୍ୱାସ୍ କାମିକିରି ଏଲ୍ଚ୍କାତି ଥାର୍ଥାର୍ରିଦ୍ହି। 20ଲେକିନ୍ ହେ ନିର୍ବୁଦ୍ଧିଆ ଆଲାରୋ, ନିମ୍ କାଁଏ ଇବନ୍ ବାଲ୍ଦାର୍ କା ନାଲ୍ଖୁ ବିନା ବିଶ୍ଵାସ୍ ବେକାର୍? 21ଯେତ୍କବାକେନ୍ ନାହ୍ମା ବାଙ୍ଗ୍ ଆବ୍ରାହାମ୍ସ୍ ତାଙ୍ଘା ହାଦ୍ଦୁ ଇସାକ୍ସିନ୍ ବେଦୀନୁ ଚାଢ଼ାବାଚାସ୍ ତା, ଆସ୍ କାଁଏ ତାଙ୍ଘା ନାଲ୍ଖୁତି ଧର୍ମି ମା ମାନ୍ଚାସ୍?22ନିମ୍ ଏରା ଅଙ୍ଗ୍ଦାର୍ କା ଆସ୍କି ବିଶ୍ଵାସ୍ ଆସ୍କି ନାଲ୍ଖୁଗାନେ ମିଲ୍ରିକିରି ପ୍ରଭାବ୍ ଡାଲ୍ଚା, ଆରୁ ତାଙ୍ଘା ନାଲ୍ଖୁତି ତାଙ୍ଘା ବିଶ୍ଵାସ୍ଦ୍ ପୁରା ମାନ୍ଚା। 23ଆରୁ ପାବିତାର୍ ଶାସ୍ତ୍ରନ୍ତା ଇ କାତ୍ଥାଦ୍ ପୁରା ମାନ୍ଚାଦ୍ କା: ଆବ୍ରାହାମ୍ସ୍ ପାର୍ମେଶ୍ଵାର୍ସ୍କି ମିଆଁ ବିଶ୍ଵାସ୍ କାମ୍ଚାସ୍, ଆରୁ ଆଦ୍ଘି କାରଣ୍ତି ଆସ୍ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନ୍ଚାସ୍, “ଆରୁ ଆସ୍ ପାର୍ମେଶ୍ଵାର୍ସ୍କି ସାଙ୍ଗେ” ବୁଲି ଆହା କେରାସ୍। 24ଏନ୍ନେନ୍ ନିମ୍ ଏର୍କାର୍ କା ଆଲାର୍ ବିଶ୍ଵାସ୍ତି ଖାଲି ମାଲ୍ଲା, ଲେକିନ୍ ନାଲ୍ଖୁତି ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନ୍ନାଏ। 25ହନ୍ନେନ୍ ରାହାବ୍ ରାଣ୍ଡିବାଜିଦ୍ହି, ଦୂଁତ୍ଜାମାରିନ୍ ତାଙ୍ଘା ଆଡ଼୍ପାନୁ ପାହି କାମିକିରି ଦୁସ୍ରା ପାବୁନୁ ବିଦା କାମ୍ଚା ତା, ଆଦ୍ କାଁଏ ନାଲ୍ଖୁନୁ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମା ମାନ୍ଚା? 26ଏସ୍କେ କା ଆତ୍ମା ବିନା ଶରୀର୍ କେଚ୍ଚା କେର୍କିଚି, ହନ୍ନେନ୍ ବିଶ୍ଵାସ୍ହି ନାଲ୍ଖୁ ବିନା କେଚ୍ଚା କେର୍କିଚି।
3ତାଥାଲବନ୍ କାବୁନୁ ଉଇନା
1ହେ ଏଙ୍ଘା ଭାଇ ବୁହୁଣୀଜାମାରୋ, ନିହ୍ମା ଭିତର୍ନୁ ଢେର୍ ଆଲାର୍ ଗୁରୁ ଆମାମାନା, ଏନ୍ଦେର୍ଗେକା ନିମ୍ ଆହାଲ୍ଦାର୍କା ନାମା ଗୁରୁରିନ୍ହି ପାର୍ମେଶ୍ୱାର୍ସ୍ ବହୁତ୍ ଶକତ୍ ନ୍ୟାୟ କାମସ୍। 2ନାମ୍ ଜାମାତ୍ ଧିୟାନ୍-ଧିୟାନ୍ ଗଲ୍ତି କାମ୍ଦାତ୍; ଏକାର୍ ନିଜର୍ ବଲୀ ବଚନ୍ନୁ ଗଲ୍ତି ମା କାମ୍ନାଏ ଆର୍ ସିଦ୍ଧ୍ ଆଲାର୍ ଆରୁ ଆବ୍ଡ଼ାର୍ ନିଜର୍ ଶରୀର୍ବନ୍ ପୁରାପୁରୀ କାବୁନୁ ଉଇୟା ଅଙ୍ଗ୍ନାଏ। 3ଯେତ୍କବାକେନ୍ ନାମ୍ ଘୋଣବନ୍ ନିଜର୍ କାବୁନୁ କାମାଗେ ଆଦ୍ଘି ଥୁମ୍ଣାନୁ ଲାଗମ୍ ଲାଗାବାଦାତ୍ ତା, ନାମ୍ ଆଦ୍ଘି ଜାମା ଶରୀର୍ବନ୍ ଘୁମାବାଗେ ଅଙ୍ଗ୍ଦାତ୍ । 4ଆମ୍ମୁ ଜାହାଜ୍ ତା ବହୁତ୍ ବାଡ଼୍କା ରାଇଦ୍ ହାଲେହି, ସାମ୍ଧୁର୍ନୁ ବହୁତ୍ ଆନ୍ଧିଧୁକା ବାର୍ନା ସାମାୟନୁ ଜାହାଜ୍ବନ୍ ଚାଲାବୁ ଆଲାସ୍ ଅଣ୍ଟା ଛୋଟେ-ଛୋଟେ ୩:୪ ପାତିୟା ମତ୍ଲବ୍ ଜାହାଜ୍ବନ୍ ଘୁମାବାନା ଅଣ୍ଟା ଯନ୍ତ୍ରପାତିୟାଘି ଦ୍ୱାର୍ନୁ ନିଜର୍ ଇଚ୍ଛା ଅନୁସାର୍ ଜାହାଜ୍ବନ୍ ଘୁମାବାଦାସ୍। 5ହନ୍ନେନ୍ ତାଥାଦ୍ହି ନାହ୍ମା ଶରୀର୍ତା ଅଣ୍ଟା ଛୋଟେ-ଛୋଟେ ଅଙ୍ଗ ଲେକିନ୍ ଆଦ୍ ବାଡ଼େ-ବାଡ଼େ ଡିଙ୍ଗ୍ ମାରିଦ୍। ଏରା କାଟେ ଫୁଲ୍ଙ୍ଗିତି କେତ୍କ ବାଡ଼୍କା ଜଙ୍ଗଲ୍ନୁ ଚିଚ୍ଚୁ ଲାଗ୍ଗିକାଇ। 6ଅଣ୍ଟା ଆଲାସ୍କି ତାଥାଦ୍ ଚିଚ୍ଚୁଘି ସାମାନ୍ ରାଇଦ୍, ଆଦ୍ ଖାରାପ୍ କାତ୍ଥାତି ନିନ୍ଦିୟାକେର୍କିଚି ଅଣ୍ଟା ଆଲାସ୍କି ତାଥାଦ୍ ତାଙ୍ଘା ପୁରା ଶରୀର୍ବନ୍ ଅଶୁଦ୍ଧ୍ କାମିଚି, ଆରୁ ପୁରା ଜୀବନ୍ବନ୍ ନରକ୍ଘି ଚିଚ୍ଚୁତି ଜାଲାବାଇଚି। 7ଏନ୍ଦେର୍ଗେକା ଜାମା ପ୍ରକାର୍ଘି ଜଙ୍ଗଲ୍ ତା ପଶୁ, ଓଡ଼ା, ଆରୁ କିୟାଁ ଏକୁ ଜନ୍ତୁ ଆରୁ ଆମ୍ମୁନୁ ରୁ ଜନ୍ତୁତା ଆଲାର୍ଘି କାବୁନୁ ମାନା ଅଙ୍ଗିଦ୍, ଆରୁ ମାନ୍ଚାକେର୍କିଚି। 8ଏକା ଆଲାର୍ହି ନିଜର୍ ତାଥାନ୍ କାବୁନୁ କାମା ପଲ୍ଲନାଏ, ଆଦ୍ ଅଣ୍ଟା ନଷ୍ଟ କାମ୍ନାବାଲା ସାଧନ୍ ଆରୁ ଜୀବନ୍ ହୁନା ବିଷ୍ତି ନିନ୍ଦିୟାକେର୍କିଚି। 9ତାଥାତି ନାମ୍ ପ୍ରାଭୁ ଆରୁ ବାଙ୍ଗ୍ ପାର୍ମେଶ୍ୱାର୍ସ୍କି ସ୍ତୁତି କାମ୍ଦାତ୍, ଆରୁ ଆତ୍ତିନିନ୍ ଆଲାରିନ୍ ସାର୍ପାଦାତ୍, ନେକାନ୍ କା ପାର୍ମେଶ୍ଵାର୍ସ୍ ତାଙ୍ଘା ଲେଖା ସୃଷ୍ଟି କାମ୍ଚ୍କାଦାସ୍। 10ଅଣ୍ଟା ଥୁମ୍ଣାତି ଧାନ୍ୟାବାଦ୍ ଆରୁ ସାର୍ପାନା ଯୋଡ଼େଦିନ୍ ଉର୍ଖି, ହେ ଏଙ୍ଘା ଭାଇ ବୁହୁଣୀଜାମାରୋ, ଏନ୍ନେ ମା ମାନ୍ନା କାତ୍ଥା। 11ଅଣ୍ଟା ଝାର୍ନାନ୍ତି ଫାଟିଙ୍ଗ୍ ଆରୁ ହାଡ଼୍ଖା ଆମ୍ମୁ ଉର୍ଖା ଅଙ୍ଗିଦ୍ କାଁଏ? 12ହେ ଏଙ୍ଘା ଭାଇ ବୁହୁଣୀଜାମାରୋ, ଡୁମାରି ମାନ୍ନୁନୁ ଜାଇତୁନ୍ ଲାଗାବା ଅଙ୍ଗତ୍ କାଁଏ, ଚାହେ ଅଙ୍ଗୁର୍ ଲହନୁ ଡୁମାରି ଲାଗାବା ଅଙ୍ଗତ୍ କାଁଏ? ହନ୍ନେନ୍ ହାଡ଼୍ଖା ଝାର୍ନାନ୍ତି ଫାଟିଙ୍ଗ୍ ଆମ୍ମୁ ଉର୍ଖା ପଲ୍ଲୀଦ୍।
ପାର୍ମେଶ୍ଵାର୍ସ୍କି ତାର୍ତି ବାର୍ନାବାଲା ବୁଦ୍ଧି
13ନିହ୍ମା ଭିତର୍ନୁ ବୁଦ୍ଧିମାନ୍ ଆରୁ ସାମାଝ୍ଦାର୍ ନେଦ୍ ରାଦାର୍? ନେଦ୍ ଏନ୍ନେ ରାଦାର୍ ଆବ୍ଡ଼ାର୍ ନିଜର୍ ନାଲ୍ଖୁନ୍ ବାନେ ଚାଲିଚଲନ୍ ଆରୁ ନରମ୍ ମନ୍ତି ଏଦା ଏକାଦ୍ କା ବୁଦ୍ଧିତି ବାର୍ଚ୍କିଚି। 14ଲେକିନ୍ ଯଦି ନିହ୍ମା ମନ୍ନୁ ବହୁତ୍ ହିସ୍ଙ୍ଗା ଆରୁ ନିଜର୍ ଫାଏଦାଘି ଲାଗାନ୍ ସୋଚ୍ଦାର୍, ହାଲେ ସତ୍ତୁଘି ବିରୁଦ୍ଧ୍ନୁ ଘମଣ୍ଡ୍ ଆମା କାମା ଆରୁ ଝୁଟ୍ଟୁ ଆମାତେଙ୍ଗା। 15ଏନ୍ନେ ବୁଦ୍ଧିଦ୍ ପାର୍ମେଶ୍ଵାର୍ସ୍କି ତାର୍ତି ମା ବାରିଦ୍, ଲେକିନ୍ ଆଦ୍ ଦୁନିଆଁନ୍ତା ଶାରୀରିକ୍ ବୁଦ୍ଧିଦ୍ ଏକାଦ୍ କା ଶାଏତାନ୍ଘି ତାର୍ତି ବାରିଦ୍। 16ଏନ୍ଦେର୍ଗେକା ଏକାସାନ୍ ହିସ୍ଙ୍ଗା ଆରୁ ବିରୋଧ୍ ରାଇ, ଆସାନ୍ ଅଶାନ୍ତି ଆରୁ ଜାମା ଲେଖାଘି ଖାରାପ୍ ନାଲ୍ଖୁ ମାନିଦ୍। 17ଲେକିନ୍ ପାର୍ମେଶ୍ଵାର୍ସ୍କି ତାର୍ତି ବାର୍ଚ୍କା ବୁଦ୍ଧିଦ୍ ପହ୍ଲେଦ୍ ତା ପାବିତାର୍ ଆରୁ ଦୁସ୍ରା ଶାନ୍ତି, ସାହ୍ନା ଶକ୍ତି, ଜାମାବାକେନ୍ ମେନାଗେ ତିୟାର୍ ରାନାଏ, ଆରୁ ବାନେ ସୋଚ୍ବିଚାର୍ତି ନିନ୍ଦିୟାକେର୍କିଚି, ନେଖା ପାଖା ମା ମାନ୍ନା ଆରୁ କପଟ୍ ମା କାମ୍ନା। 18ମେଲ୍ମିଲାପ୍ କାମ୍ତୁର୍ ଶାନ୍ତିଘି ବିହ୍ନି ଚାହିକିରି ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନ୍ନାଘି ଫସଲ୍ ହୟନାଏ।
4ପାର୍ମେଶ୍ଵାର୍ସ୍କି ଚାହାଗେ ବାର୍ନା
1ନିହ୍ମା ମାଝାନୁ ଲାଡ଼ାଇ ଆରୁ ଝାଗ୍ଡ଼ା ଏକାସ୍ତି ବାର୍ଚା? ଏନ୍ଦେର୍ ଆବ୍ଡ଼ା ଜାମା ଝାଗ୍ଡ଼ା ଆରୁ ଲାଡ଼ାଇ ନିହ୍ମା ମନ୍ ଉଲ୍ତା ଭୋଗ୍ବିଲାସ୍ତି ମା ବାରିଦ୍? 2ନିମ୍ ଲାଲଚ୍ କାମ୍ଦାର୍, ଲେକିନ୍ ନିମାଗେ ମା ହାଖ୍ଖରି; ହୁଦ୍ଘିଲାଗାନ୍ ନିମ୍ ପିଟ୍ଟଦାର୍। ନିମ୍ ହିସ୍ଙ୍ଗାଦାର୍, ଲେକିନ୍ ଏନ୍ଦେର୍ହି ହାଖ୍ଖା ପଲ୍ଲଦାର୍; ନିମ୍ ଝାଗ୍ଡ଼ା ଆରୁ ଲାଡ଼ାଇ କାମ୍ଦାର୍। ନିମାଗେ ମା ହାଖ୍ଖରିଦ୍ ଏନ୍ଦେର୍ଗେକା ନିମ୍ ପାର୍ମେଶ୍ୱାର୍ସିନ୍ ମା ନିଦାର୍। 3ନିମ୍ ନିଦାର୍ ଲେକିନ୍ ମା ହାଖ୍ଖଦାର୍, ଏନ୍ଦେର୍ଗେକା ନିମ୍ ନିହ୍ମାଏ ଭୋଗ୍ ବିଲାସ୍ଘି ଲାଗାନ୍ ଖାରାପ୍ ସୋଚ୍ତି ନିଦାର୍। 4ହେ ପାର୍ମେଶ୍ୱାର୍ସ୍କି ବଚନ୍ ମା ମାନ୍ନାବାଲା ଆଲାରୋ, ନିମ୍ ବାଲ୍ଦାର୍ କାଁଏ ଦୁନିଆଁ ଗାନେ ସାଙ୍ଗେ ମାନ୍ନା ପାର୍ମେଶ୍ଵାର୍ସ୍କି ବିରୁଦ୍ଧ୍ନୁ ଦୁଶ୍ମାନ୍ ମାନ୍ନା? ଦୁନିଆଁ ଗାନେ ନେଦ୍ ସାଙ୍ଗେ ମାନା ବେଦ୍ଦ୍ନାଏ ଆବ୍ଡ଼ାର୍ ନିଜ୍କେନିଜ୍ ପାର୍ମେଶ୍ଵାର୍ସ୍କି ଦୁଶ୍ମାନ୍ ମାନ୍ନାଏକାନାଏ। 5ଏନ୍ଦେର୍ଗେ ନିମ୍ ଏନ୍ନେ ବୁଝ୍ର୍ଦାର୍ କା ପାବିତାର୍ ଶାସ୍ତ୍ର, ବେକାର୍ ତେଙ୍ଗାଲି, “ଏକା ଆତ୍ମାନ୍ ପାର୍ମେଶ୍ଵାର୍ସ୍ ନାହ୍ମାଏ ମନ୍ ଉଲା ନିନ୍ଦକାଦାସ୍, ଆଦ୍ କାଁଏ ଏନ୍ନେ ଲୋଭ୍ କାମିଦ୍ ଆଦ୍ଘି ଫଲ୍ ହିସ୍ଙ୍ଗା ମାନଦ୍?” 6ଲେକିନ୍ ଆସ୍ ଢେର୍ ଦାୟା କାମିକିରି ମଦେତ୍ କାମ୍ଦାସ୍, ହୁଦ୍ଘିଲାଗାନ୍ ପାବିତାର୍ ଶାସ୍ତ୍ରନୁ ଏନ୍ନେ ଲେଖ୍ଚ୍କା ରାଇଦ୍ କା, “ପାର୍ମେଶ୍ୱାର୍ସ୍ ବଡ଼୍ପଣି ଏଦ୍ରୁରିନ୍ ବିରୋଧ୍ କାମ୍ଦାସ୍ ଆରୁ ନରମ୍ ମନ୍ ଆଲାରିନ୍ ଦାୟା କାମିକିରି ମଦେତ୍ କାମ୍ଦାସ୍।” 7ହୁଦ୍ଘିଲାଗାନ୍ ନିମ୍ ପାର୍ମେଶ୍ୱାର୍ସ୍କି ଅଧିନ୍ନୁ ରା; ଆରୁ ଶାଏତାନ୍ଘି ସାମ୍ନା କାମା, ହାଲେ ଶାଏତାନ୍ଦ୍ ନିହ୍ମାସ୍ତି ବୁଙ୍ଗଚୋ। 8ପାର୍ମେଶ୍ୱାର୍ସ୍କି ଚାହାଗେ ବାରା ଆସ୍ହି ନିହ୍ମା ଚାହାଗେ ବାରସ୍ ହେ ପାପୀ ଆଲାରୋ ନିହ୍ମା ହେଖ୍ଖାନ୍ ସାପ୍ଫା କାମା; ଆରୁ ନେଖାଏ ଯୋଡ଼େ ମନ୍ ରାଇ ଆ ଆଲାର୍ ନିହ୍ମା ମନ୍ବନ୍ ପାବିତାର୍ କାମା। 9ନିମ୍ ଏକାନ୍ କାମ୍ଚ୍କାଦାର୍ ହୁଦ୍ଘିଲାଗାନ୍ ଦୁଃଖୁ ମାନା ଆରୁ ନିହ୍ମା ଦୁଃଖୁନୁ ଗଡ଼୍ଗଡ଼ା ମାନିକିରି ଅହ୍ଲା, ନିହ୍ମା ଆଲ୍ଖ୍ନା ଅହ୍ଲନାନୁ ଆରୁ ନିହ୍ମା ଖୁସୀନ୍ ଦୁଃଖୁନୁ ବାଦ୍ଲା। 10ପ୍ରାଭୁସ୍କି ଚାହାନୁ ନିମ୍ ନିଜ୍କେନିଜ୍ ନରମ୍ କାମା ହାଲେ ଆସ୍ ନିମାନ୍ ମାହାନ୍ କାମସ୍।
ଦୁସ୍ରାର୍ଘି ନିନ୍ଦା ଆମା କାମା
11ହେ ଭାଇ ବୁହୁଣୀଜାମାରୋ, ଏକ୍ ଦୁସ୍ରାର୍ଘି ନିନ୍ଦା ଆମା କାମା। ଏକାର୍ ନିଜର୍ ଭାଇସ୍କି ନିନ୍ଦା କାମ୍ନାଏ ଆରୁ ନିଜର୍ ଭାଇସ୍କି ମିଆଁ ଦୋଷ୍ ଲାଗାବାନାଏ, ଆର୍ ନିୟମ୍ଘି ନିନ୍ଦା କାମ୍ନାଏ ଆରୁ ନିୟମ୍ଘି ମିଆଁ ଦୋଷ୍ ଲାଗାବାନାଏ; ତା ନିମ୍ ନିୟମ୍ନୁ ଚାଲ୍ର୍ନାବାଲା ମାଲ୍ଲା ଲେକିନ୍ ଆଦ୍ଘି ମିଆଁ ବିଚାର୍ କାମ୍ନାବାଲା ମାନ୍ଦାର୍ କାଦାର୍। 12ନିୟମ୍ ଚିଉସ୍ ଆରୁ ବିଚାର୍ କାମୁସ୍ ଅର୍ତୁ ରାଦାସ୍, ଏକାସ୍ କା ବାଛାବା ଆରୁ ନାଶ୍ କାମାଗେ ଅଙ୍ଗ୍ଦାସ୍, ଲେକିନ୍ ନିନ୍ ନେଦ୍, ଯେ ନିଜର୍ ପାଡ଼ୋଶୀର୍ଘି ମିଆଁ ଦୋଷ୍ ଲାଗାବାଦାଏ?
ବଡ଼୍ପଣି ଏଦ୍ରୁର୍ଘି ବିରୁଦ୍ଧ୍ନୁ ଚେତାବାନୀ
13ନିମ୍ ଯେ ଏନ୍ନେ ତେଙ୍ଗ୍ଦାର୍, “ଇନ୍ନା ମାଲ୍ଲାହାଲେ ନେଲା ନାମ୍ ଏକିନ୍ ସହର୍ଗେ କତ୍ ଲେକିନ୍ ଆସାନ୍ ଅନ୍ ବରଷ୍ ରାଇକିରି, ବେପାର୍ କାମିକିରି ଧାନ୍ନୁ କାମାବତ୍।” 14ଲେକିନ୍ ନିମ୍ ବାଲ୍ଦାର୍ କା ନେଲା ଏନ୍ଦେର୍ ମାନଦ୍। ନିମ୍ ମେନାତା, ନିହ୍ମା ଜୀବନ୍ଦ୍ହି ଏନ୍ଦେଦ୍? ନିମ୍ତା କୁହୁଟିଘି ସାମାନ୍ ରାଦାର୍, ଏକାଦ୍ କା ଥୋଡ଼େ ଡେରିଘି ଲାଗାନ୍ ରାଇ ଆରୁ ଥୋଡ଼େ ଡେରିନୁ ଲିଭ୍ରିକି। 15ହୁଦ୍ଘିଲାଗାନ୍, “ପ୍ରାଭୁସ୍କି ଇଚ୍ଛା ମାନ୍ଚ୍କୁନ୍, ନାମ୍ ଉଜ୍ଜିକିରି ଇବନ୍ କାମତ୍ ମାଲ୍ଲାହାଲେ ହାବନ୍ କାମତ୍ ଏନ୍ନେ ତେଙ୍ଗ୍ନା କାତ୍ଥା।” 16ଲେକିନ୍ ନିମ୍ ଆକ୍କୁନ୍ ନିଜର୍-ନିଜର୍ ଭିତ୍ରେ ଜିଦ୍ନୁ ରାଇକିରି ବଡ଼୍ପଣି ଏଦ୍ରାଲ୍ଦାର୍; ଏନ୍ନେ ବଡ଼୍ପଣି ଏଦ୍ର୍ନାଦ୍ ଖାରାପ୍ଦ୍। 17ହୁଦ୍ଘିଲାଗାନ୍ ଏକାସ୍ ଭାଲାଇ କାମାଗେ ଆହ୍ଦାସ୍ ଲେକିନ୍ ମା କାମ୍ଦାସ୍, ଆସ୍ ପାପ୍ କାମ୍ଦାସ୍।
5ଧନୀ ଆଲାର୍ଗେ ଚେତାବାନୀ
1ହେ ଧନୀ ଆଲାରୋ, ଏଙ୍ଘା କାତ୍ଥା ମେନା, ନିମ୍ ନିହ୍ମା ବାର୍ନାବାଲା ଦୁଃଖୁଘି ଲାଗାନ୍ ଚିର୍ରାରା-ଚିର୍ରାରାକିରି ଅହ୍ଲା। 2ନିହ୍ମା ଧନ୍ସମ୍ପତ୍ତି ବାଗ୍ଡ଼ାରାଚା କେର୍କିଚି, ଆରୁ ନିହ୍ମା ଚିଢ଼ାନ୍ ପୋକୁ ମଖ୍ଖେ ଚିଚ୍ଚକିଚି। 3ନିହ୍ମାଏ ସୋନା ରୂପାନୁ ଚିତି ଲାଗ୍ଗିୟା କେର୍କିଚି; ହୁନ୍ନୁନ୍ତା ଚିତିଦ୍ ନିହ୍ମା ବିରୁଦ୍ଧ୍ନୁ ସାକ୍ଷୀ ଚୋ, ଆରୁ ଚିଚ୍ଚୁ ଲେଖା ନିହ୍ମା ଶରୀର୍ବନ୍ ନଷ୍ଟ କାମଦ୍। ନିମ୍ ଆଖ୍ରୀ ଯୁଗ୍ନୁ ଧନ୍ସମ୍ପତ୍ତି ଠୁଡ଼ିୟାଚ୍କାଦାର୍। 4ମେନା, ଏକା ନାଲ୍ଖୁ କାମୁର୍ ନିହ୍ମା ହାଲ୍ଲୁନ୍ତା ଫସଲ୍ବନ୍ ହସ୍ସାର୍ ଆରୁ ନିମ୍ ଆବ୍ଡ଼ାର୍ଘି ମଜ୍ରୀବନ୍ ମା ଚିକିରି ଧୋଖା ଚିଚ୍କାର୍ ଆଦ୍ ନିହ୍ମା ବିରୁଦ୍ଧ ଚିର୍ରାରାଲି, ଆରୁ ନାଲ୍ଖୁ କାମୁର୍ଘି ଚିର୍ରାରାନାଦ୍ହି ମାହାନ୍ ପ୍ରାଭୁସ୍କି ଚାହାଗେ ଆଣ୍ସିଆ କେର୍କିଚି। 5ଦୁନିଆଁନୁ ନିମ୍ ସୁଃଖୁ ଆରୁ ମଉଜ୍-ମଜ୍ଲିସ୍ନୁ ଜୀବନ୍ ବିତାବାଚ୍କାର୍; ଆରୁ ପାର୍ମେଶ୍ୱାର୍ସ୍କି ଦଣ୍ତ୍ଘି ଉଲ୍ଲାଘି ଲାଗାନ୍ ନିମ୍ ନିଜ୍କେନିଜ୍ବନ୍ ତିୟାର୍ କାମ୍ଚ୍କାଦାର୍। 6ଆବ୍ଡ଼ାର୍ ନିହ୍ମା ବିରୋଧ୍ ମା କାମ୍ନାଏ ହାଲେହି ଏକାର୍ ଦୋଷୀ ମାଲ୍ନାଏ ଆବ୍ଡ଼ାରିନ୍ ନିମ୍ ଦୋଷୀ ଠାହ୍ବାଇକିରି ପିଟ୍ଟେଇଚ୍କାର୍।
ଦୁଃଖୁନୁ ଧିରାଜ୍ ଧାର୍ନା
7ହୁଦ୍ଘିଲାଗାନ୍ ହେ ଭାଇ ବୁହୁଣୀଜାମାରୋ, ପ୍ରାଭୁସ୍କି ବାର୍ନାଜୁଟି ଧିରାଜ୍ ଧାରା। ମେନା, ଚାଷୀ ଆଲାର୍ ହାଲ୍ଲୁନ୍ତା ମୂଲ୍ୟବାନ୍ ଫସଲ୍ ହାଖ୍ଖାଗେ ପହ୍ଲେ ଆରୁ ଆଖ୍ରୀ ଚେପୁ ଅନ୍ଦର୍ନାତକ୍ ଧିରାଜ୍ ଧାରିକିରି ରାନାଏ। 8ନିମ୍ହି ଧିରାଜ୍ ଧାରା; ଆରୁ ନିଜର୍ ମନ୍ବନ୍ ଦୃଢ଼୍ କାମା, ଏନ୍ଦେର୍ଗେକା ପ୍ରାଭୁସ୍କି ବାର୍ନାଦ୍ ଚାହାନୁ ରାଇ। 9ହେ ଭାଇ ବୁହୁଣୀଜାମାରୋ, ଏକ୍ ଦୁସ୍ରାରିନ୍ ଦୋଷ୍ ଆମା ଚିଆ, ଏନ୍ଦେର୍ଗେକା ନିମ୍ ଦୋଷୀ ମା ମାନର୍; ଏରା ନ୍ୟାୟ କାମୁସ୍ ବହୁତ୍ ଚାଁଣେ ବାର୍ନାବାଲା ରାଦାସ୍। 10ହେ ଭାଇ ବୁହୁଣୀଜାମାରୋ, ଏକା ନାବୀର୍ ପ୍ରାଭୁସ୍କି ନାମେନୁ କାତ୍ଥା ତେଙ୍କାଚାର୍, ଆବ୍ଡ଼ାରିନ୍ ଦୁଃଖୁ ସାହ୍ନା ଆରୁ ଧିରାଜ୍ ଧାର୍ନାଘି ଅଣ୍ଟା ନମୁନା ଲେଖା ଗ୍ରହନ୍ କାମା। 11ମେନା, ଏକା ଆଲାର୍ ଧିରାଜ୍ ଧାରିକିରି ରାନାଏ ଆବ୍ଡ଼ାରିନ୍ ନାମ୍ ଧଏନ୍ ବୁଲି ସୋଚ୍ଦାତ୍। ନିମ୍ ଆୟୁବ୍ସ୍କି ଧିରାଜ୍ଘି ବାରେନୁତା ମେନ୍ଚ୍କାଦାର୍, ଆରୁ ପ୍ରାଭୁସ୍କି ତାର୍ତି ଏନ୍ଦେର୍ ପ୍ରତିଫଳ୍ ମାନ୍ଚା ଆବନ୍ହି ଆକ୍କାଦାର୍, ପ୍ରାଭୁସ୍ ତା ବହୁତ୍ କାରୁଣାମୟ ଆରୁ ଦାୟାଲୁସ୍। 12ଲେକିନ୍ ହେ ଏଙ୍ଘା ଭାଇ ବୁହୁଣୀଜାମାରୋ, ଜାମାର୍ଘିନ୍ତି ବାଡ଼୍କା କାତ୍ଥାଦ୍ ଇଦ୍ କା କସମ୍ ଆମା ମହାଁ, ସରଗ୍ତା ନା ଧାନ୍ତାରିନ୍ତା, ନା ଦୁସ୍ରା ଏନ୍ଦ୍ରିନ୍ ଜିନିଷ୍ଘି; ଲେକିନ୍ ନିହ୍ମା କାତ୍ଥାଦ୍ ହଁ ତା ହଁ, ଆରୁ ମାଲ୍ଲାତା ମାଲ୍ଲା ମାନଦ୍, ଏସ୍କେ କା ନିମ୍ ଦଣ୍ଡ୍ଘି ଲାଇଗ୍ ମା ମାନର୍।
ବେହ୍ମରିୟାର୍ଘି ଲାଗାନ୍ ବିନ୍ତିଘି ଶକ୍ତି
13ଯଦି ନିହ୍ମା ଭିତ୍ରେ ନେଦିନ୍ ଦୁଃଖୁନୁ ଆତ୍ଲ୍ଦାର୍ ତା, ଆବ୍ଡ଼ାର୍ ବିନ୍ତି କାମର୍। ଯଦି ଖୁସୀନୁ ରାଦାର୍, ତା ଆବ୍ଡ଼ାର୍ ସ୍ତୁତି ମାହିମା କାମର୍। 14ଯଦି ନିହ୍ମା ଭିତର୍ନୁ ନେଦିନ୍ ବେମାର୍ ରାଦାର୍, ତା ମଣ୍ତ୍ଲୀନ୍ତା ମୁଖ୍ୟାଜାମାରିନ୍ ମେହାଁ, ଆରୁ ଆବ୍ଡ଼ାର୍ ପ୍ରାଭୁସ୍କି ନାମେନୁ ଇସୁଙ୍ଗ୍ ଲାଗାବାଇକିରି ଆସ୍କି ଲାଗାନ୍ ବିନ୍ତି କାମର୍, 15ଆରୁ ବିଶ୍ଵାସ୍ଘି ବିନ୍ତି ଦ୍ୱାର୍ନୁ ବେହ୍ମରିୟାସ୍ ବାନେ ମାନସ୍କସ୍, ଆରୁ ପ୍ରାଭୁସ୍ ଆସିନ୍ ଚାଙ୍ଗା କାମଚସ୍; ଆରୁ ଯଦି ଆସ୍ ପାପ୍ହି କାମ୍ଚ୍କା ରସ୍ ହାଲେ, ଆ ପାପ୍ହି ଛେମା କାମାକୋ। 16ହୁଦ୍ଘିଲାଗାନ୍ ନିମ୍ ଏକ୍ ଦୁସ୍ରାର୍ଘି ସାମ୍ନାନୁ ନିଜର୍-ନିଜର୍ ପାପ୍ବନ୍ ସ୍ୱୀକାର୍ କାମା, ଆରୁ ଏକ୍ ଦୁସ୍ରାର୍ଘି ଲାଗାନ୍ ବିନ୍ତି କାମା, ଏସ୍କେ କା ବାନେ ମାନର୍କର୍: ଧାର୍ମିକ୍ ଆଲାସ୍କି ବିନ୍ତିଦ୍ ବହୁତ୍ ଶକ୍ତିଶାଲୀ ରାଇଦ୍ ଆରୁ ଆତ୍ତି ବହୁତ୍କିଛି ମାନା ଅଙ୍ଗିଦ୍।
17ଏଲିୟାସ୍ହି ତା ନାହ୍ମା ଲେଖା ଅଣ୍ଟା ଆଲ୍ ରାଚାସ୍; ଆରୁ ଆସ୍ ମଜ୍ବୁତ୍ ବିଶ୍ଵାସ୍ତି ଚେପୁ ମା ଅନ୍ଦ୍ରାଗେ ବିନ୍ତି କାମ୍ଚାସ୍; ଆରୁ ସାଢ଼େତିନ୍ ବଛର୍ତକ୍ ଦୁନିଆଁନୁ ଚେପୁ ମା ଅନ୍ଦ୍ରା, 18ଆରୁ ଆସ୍ ଆରୁଅହନ୍ ବିନ୍ତି କାମ୍ଚାସ୍ ତା, ଆକାଶ୍ତି ଚେପୁ ବାର୍ଚା ଆରୁ ହାଲ୍ଲୁ ଗଡ୍ଡାନୁ ଫସଲ୍ ମାନାଗେ ଲାଗ୍ଗିୟା।
19ହେ ଏଙ୍ଘା ଭାଇ ଆରୁ ବୁହୁଣୀ ଜାମାରୋ, ଯଦି ନିହ୍ମା ଭିତର୍ନୁ ନେଦିନ୍ ସତ୍ତୁ ପାବୁନ୍ତି ଏଫ୍ସ୍ରର୍କର୍ ତା ନେଦିନ୍ ଆସିନ୍ ସତ୍ତୁ ପାବୁନୁ କିର୍ତାନା ଅନ୍ଦ୍ରନା କାତ୍ଥା, 20ତା ନିମ୍ ଇବନ୍ ମନେ କାମା କା ନେଦିନ୍ ଏକିନ୍ ଭାଟ୍କାରାଚ୍କା ପାପୀରିନ୍ କିର୍ତର୍ ଅନ୍ଦ୍ରର୍ ତା, ଆସ୍ ଆସ୍କି ଆତ୍ମାବନ୍ ମରନ୍ତି ବାଛାବାଦାସ୍ ଆରୁ ଆସ୍କି ଢେର୍ ପାପ୍ଗୁଠିନ୍ ଛେମା କାମ୍ଦାସ୍ଚିଦାସ୍ ଇବନ୍ ଆହା।