ଇବ୍ରାନୀୟାର୍ଘି ନାମେନୁ ଚିଠି
ବହିଘି ପରିଚୟ
ୟାହୁଦୀ ଖ୍ରୀସ୍ତ୍ ବିଶ୍ୱାସୀର୍ଘି ନାମେନୁଘି ନାମେନୁ ଚିଠି ଖ୍ରୀସ୍ତ୍ ବିଶ୍ୱାସୀର୍ଗେ ଅଣ୍ଟା ଭିଡ଼୍ଗେ ଲେଖାକେର୍କିଚା, ଏକାର୍ ବାଢ଼୍ରିକିରି ବିରୋଧ୍ଘି କାରଣ୍, ନିଜର୍ ଖ୍ରୀସ୍ତ୍ ବିଶ୍ୱାସ୍ବନ୍ ଆମ୍ବନାଘି ବିପଦ୍ନୁ ରାଚାର୍। ଲେଖକସ୍ ଆବ୍ଡ଼ାରିନ୍ ନିଜର୍ ବିଶ୍ୱାସ୍ନୁ ସ୍ଥିର୍ ରାନାଘି ଲାଗାନ୍ ଇଚ୍ଛା କାମ୍ତାଦାସ୍, ବିଶେଷ୍କିରି: ଇବନ୍ ଦାର୍ଶାବିକିରି କା ଯୀଶୁ ଖ୍ରୀସ୍ତ୍ହି ପାର୍ମେଶ୍ୱାର୍ସ୍କି ପ୍ରକୃତ୍ ଆରୁ ଆଖ୍ରୀ ବିଲ୍ଲୀସ୍। ଏନ୍ନେ କାମ୍ନା ବାକେନ୍ ଆସ୍ ମୁନ୍ଟା ସତ୍ତୁଘି ମିଆଁ ବଲ୍ ଚିଦାସ୍: (୧) ଯୀଶୁସ୍ ପାର୍ମେଶ୍ୱାର୍ସ୍କି ଅସଲ୍ ହାଦ୍ଦୁସ୍, ଏକାସ୍ ଦୁଃଖୁ ଉଠାବିକିରି ବାଙ୍ଗ୍ସ୍କି ସତ୍ତୁ ଆଦେଶ୍ବନ୍ ଶିଖ୍ରାସ୍। ପାର୍ମେଶ୍ୱାର୍ସ୍କି ହାଦ୍ଦୁସ୍କି ରୂପ୍ନୁ ଯୀଶୁସ୍ ପାଚ୍ଚା ନିୟମ୍ଘି ନାବୀର୍, ସରଗ୍ ଦୂଁତ୍ର୍, ଆରୁ ନିଜେ ମୁଶାସ୍ତି ହି ମାହାନ୍ସ୍। (୨) ଯୀଶୁସ୍ ପାର୍ମେଶ୍ୱାର୍ସ୍କି ଦ୍ୱାର୍ନୁ ସବୁଦିନ୍ତା ମାହାପୁରୋହିତ୍ ଠାହ୍ରାବାକେରା, ପାଚ୍ଚା ନିୟମ୍ଘି ମାହା ପୁରୋହିତ୍ର୍ସ୍ତି ମାହାନ୍ସ୍। (୩) ଯୀଶୁସ୍କି ଦ୍ୱାର୍ନୁ ବିଶ୍ୱାସୀ ପାପ୍, ଏଲ୍ଚ୍କା, ଆରୁ ମରନ୍ତି ବାଛାବା କେର୍କିଚି; ଆରୁ ଯୀଶୁସ୍, ମାହାପୁରୋହିତ୍ସ୍କି ରୂପ୍ନୁ, ସତ୍ତୁ ମୁକ୍ତି ଚିଦାସ୍, ୟାହୁଦୀ ଧରମ୍ଘି ଧରମ୍ ନିୟମ୍ ଆରୁ ଜାନ୍ତୁଘି ବଲୀଘି ଦ୍ୱାର୍ନୁ ଏକାଘି ଖାଲି ଆଘ୍ଲିଘି ନିୟମ୍ ହାଖ୍ଖରିଦ୍।
ଇସ୍ରାଏଲ୍ ଇତିହାସ୍ଘି କେତ୍କ ପ୍ରସିଦ୍ଧ୍ ଆଲାର୍ଘି ବିଶ୍ୱାସ୍ଘି ନମୁନାବନ୍ ତେଙ୍ଗ୍ତେ ହି ଅଧ୍ୟାୟ ୧୧ ଲେଖସ୍ ନିଜର୍ ପାଠସ୍ତି ବିଶ୍ୱାସ୍ତି ମଜ୍ବୁତ୍ ରାନାଘି ଇଚ୍ଛା କାମ୍ଦାସ୍, ଆରୁ ୧୨ ଅଧ୍ୟାୟନୁ ଆସ୍ ନିଜର୍ ପାଠତି ଆର୍ଜୀ କାମ୍ଦାସ୍ କା ଆବ୍ଡ଼ାର୍ ଆଖ୍ରୀତକ୍ ବିଶ୍ୱାସ୍ନୁ ମଜ୍ବୁତ୍ ମାନିକିରି ରର୍ ଆରୁ ନିଜର୍ ହାନ୍ନୁନ୍ ଯୀଶୁସ୍କି ମିଆଁ ଉଇକିରି ରର୍, ଚାହେ ଏକା ଦୁଃଖୁ ଆରୁ ତକ୍ଲିପ୍ ଆବ୍ଡ଼ାର୍ଘି ମିଆଁ ବାରିଦ୍ ଆବନ୍ ଆବ୍ଡ଼ାର୍ ଧିରାଜ୍ତି ସାହର୍। ଇ ଚିଠି ଏନ୍ଦ୍ରିନ୍ ସାଲାହ୍ ଆରୁ ଚେତାବନୀ ଗାନେ ମୁଞ୍ଜରିଦ୍।
ରୂପ୍ରେଖା
ଭୂମିକା: ଖ୍ରୀସ୍ତ୍ସ୍, ପାର୍ମେଶ୍ୱାର୍ସ୍କି ପୁରାପୁରୀ ବିଲ୍ଲୀସ୍ ୧:୧-୩
ଖ୍ରୀସ୍ତ୍ସ୍ ସରଗ୍ ଦୂଁତ୍ର୍ସ୍ତିହି ମାହାନ୍ସ୍ ୧:୪—୨:୧୮
ଖ୍ରୀସ୍ତ୍ସ୍, ମୁଶା ଆରୁ ଯୋଶୁୱାସ୍ତି ହି ମାହାନ୍ସ୍ ୩:୧—୪:୧୩
ଖ୍ରୀସ୍ତ୍ସ୍କି ପୁରୋହିତ୍ ପଦ୍ଘି ମାହାନ୍ତା ୪:୧୪—୭:୨୮
ଖ୍ରୀସ୍ତ୍ସ୍କି ନିୟମ୍ଘି ମାହାନ୍ତା ୮:୧—୯:୨୮
ଖ୍ରୀସ୍ତ୍ସ୍କି ବଲୀଦାନ୍ଘି ମାହାନ୍ତା ୧୦:୧-୩୯
ବିଶ୍ୱାସ୍ଘି ମାହାନ୍ତା ୧୧:୧—୧୨:୨୯
ଆଖ୍ରୀ ଉପ୍ଦେଶ୍ ଆରୁ କାତ୍ଥା ୧୩:୧-୨୫
1ପାର୍ମେଶ୍ୱାର୍ସ୍ ନିଜର୍ ହାଦ୍ଦୁସ୍କି ଦ୍ୱାର୍ନୁ କାତ୍ଥା କାମ୍ଚ୍କାଦାସ୍
1ଆଘ୍ଲି ଯୁଗ୍ଗୁନୁ ପାର୍ମେଶ୍ୱାର୍ସ୍ ନାହ୍ମାଏ ପୁର୍ଖାର୍ସ୍ତି ଦୁସ୍ରା-ଦୁସ୍ରା ସାମାୟନୁ ଆରୁ ଦୁସ୍ରା-ଦୁସ୍ରା ଉପାୟତି ନାବୀଜାମାର୍ଘି ଦ୍ୱାର୍ନୁ କାତ୍ଥା କାମ୍ଚ୍କାଚାସ୍। 2ଲେକିନ୍ ଆକ୍କୁନ୍ ଇ ଆଖ୍ରୀ ସାମାୟନୁ ଆସ୍ ନାହ୍ମାସ୍ତି ହାଦ୍ଦୁସ୍କି ଦ୍ୱାର୍ନୁ କାତ୍ଥା କାମ୍ଦାସ୍। ଆସ୍ ଆ ହାଦ୍ଦୁସ୍କି ଦ୍ୱାର୍ନୁ ଜାମା ଦୁନିଆଁବନ୍ ସିର୍ଜାଚାସ୍ ଆରୁ ଆସ୍ସିନ୍ ଜାମାକିଛିଘି ହକ୍ଦାର୍ ବାନାବାଚାସ୍। 3ଆ ହାଦ୍ଦୁସ୍ ନିଜର୍ ବାଙ୍ଗ୍ସ୍କି ମାହିମାଘି ବିଲ୍ଲୀ, ଆରୁ ଆସ୍କି ସାଭାବ୍ ରୂପ୍ ଲେଖା ରାଦାସ୍। ଆସିନ୍ ଜାମା ଜିନିଷ୍ବନ୍ ନିଜର୍ ଶକ୍ତିଘି ବଚନ୍ତି ସାମ୍ଭଡ଼ାଦାସ୍। ଆସ୍ ନାହ୍ମାଏ ପାପ୍ବନ୍ ନଁଣୀକିରି ମାଇନ୍ ଆରୁ ହକ୍ଘି ଆଡ୍ଡାସାନ୍ ମାହାମହିମ୍ ପାର୍ମେଶ୍ୱାର୍ସ୍କି ତିନାତାରା କାଇକିରି ଅକ୍କିୟାସ୍। 4ଇଦ୍ଘି ଲେଖା ଆସ୍ ସରଗ୍ଦୂଁତ୍ ଜାମାର୍ସ୍ତି ଆତ୍କନିନ୍ ବାନେ ମାନ୍ଚାସ୍ କେରାସ୍ ଯେତ୍କ କା ଆବ୍ଡ଼ାର୍ଘି ନାମେତି ଆ ନାମେଦ୍ ଜାମାର୍ଘିନ୍ତି ବାଡ଼୍କା ରାଇଦ୍ ଏକାନ୍ ହାଦ୍ଦୁସ୍କେ ବାଙ୍ଗ୍ସ୍ ହକ୍ ଚିଚ୍ଚାସ୍।
ପାର୍ମେଶ୍ୱାର୍ସ୍କି ହାଦ୍ଦୁସ୍କି ମାହାନ୍ତା
5ଏନ୍ଦେର୍ଗେକା ପାର୍ମେଶ୍ୱାର୍ସ୍ ଏକ୍ରିନ୍ ସରଗ୍ଦୂଁତ୍ର୍ସ୍ତି ଏକ୍ଲାହି ଏନ୍ନେ ମାଲ୍ଲା ତେଙ୍ଗୁସ୍, ନିନ୍ ଏଙ୍ଘାଏ ହାଦ୍ଦୁୟ, ଇନ୍ନା ଏନ୍ ନିଙ୍ଘାଏ ବାଙ୍ଗ୍ ମାନ୍ଚ୍କାଦାନ୍? ଆରୁ ଏକ୍ଲାହି ଏକ୍ରିନ୍ ସରଗ୍ଦୂଁତ୍ର୍ସ୍ତି ଆସ୍ ଏନ୍ନେ ତେଙ୍କାଦାସ୍ ଏନ୍ ଆସ୍କି ବାଙ୍ଗ୍ ମାନନ୍ ଆରୁ ଆସ୍ ଏଙ୍ଘାଏ ହାଦ୍ଦୁ ମାନସ୍। 6ଆରୁଅହନ୍ ଆସ୍ ଯେତ୍କବାକେନ୍ ନିଜର୍ ପହ୍ଲେ ହାଦ୍ଦୁସିନ୍ ଦୁନିଆଁନୁ ତାଇଦାସ୍ ତା ତେଙ୍ଗ୍ଦାସ୍ ପାର୍ମେଶ୍ୱାର୍ସ୍କି ଜାମା ସରଗ୍ଦୂଁତ୍ ଆସ୍କି ଆରାଧାନା କାମା। 7ଯେତ୍କବାକେନ୍ ଆସ୍ ସରଗ୍ ଦୂଁତ୍ର୍ଘି ବାରେନୁ ଇ ତେଙ୍ଗ୍ଦାସ୍ “ଆସ୍ ନିଜର୍ ଦୂଁତ୍ଜାମାରିନ୍ ହାୱା ଲେଖା ବାନାବାଦାସ୍ ଆରୁ ନିଜର୍ ସେବକ୍ ଜାମାରିନ୍ ହାଓଁ-ହାଓଁ ଚିଚ୍ଚୁ ଲେଖା ବାନାବାଦାସ୍।” 8ଲେକିନ୍ ହାଦ୍ଦୁସ୍କି ବାରେନୁ ଆସ୍କି ତେଙ୍ଗ୍ନାଦ୍: “ପାର୍ମେଶ୍ୱାର୍! ନିଙ୍ଘାଏ ରାଜ୍ଗାଦୀ ଯୁଗ୍ଗୁ ଯୁଗ୍ଗୁନ୍ତାଦ୍, ଆରୁ ନିନ୍ ନିଙ୍ଘାଏ ରାଜୀଘି ଶାସନ୍ ନ୍ୟାୟଘି ସାଙ୍ଗେ କାମୟ। 9ନିନ୍ ଧରମ୍ବନ୍ ବାନେ ହାକ୍କାଏ ଆରୁ ଖାରାପ୍ବନ୍ ହାଁଣ୍କାଏ। ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍, ନିଙ୍ଘାଏ ହି ପାର୍ମେଶ୍ୱାର୍ସ୍ ନିଙ୍ଘା ସାଙ୍ଗେର୍ସ୍ତି ବାଢ଼୍ରିକିରି ରିଝୁଘି ଇସୁଙ୍ଗ୍ତି ନିଙ୍ଗାନ୍ ଆଭିଷେକ୍ କାମ୍ଚାସ୍। 10ଆରୁ ଆରୁହନ୍ ପ୍ରାଭୁ! ନିନ୍ ସୁରୁନୁ ଦୁନିଆଁଘି ନାହିଗାଡ୍ଡି ଆର୍ହ୍ଖାଦାଏ। ସରଗ୍ଦ୍ ନିଙ୍ଘାଏ ହେଖ୍ଖାଘି ନାଲ୍ଖୁଦ୍। 11ଆଦ୍ତା ନାଶ୍ ମାନଦ୍କଦ୍, ଲେକିନ୍ ନିନ୍ ସବୁଦିନ୍ତକ୍ ରୟ ଆରୁ ଆବ୍ଡ଼ା ଜାମାଦ୍ ଚିଢ଼ାଘି ଲେଖା ପାଚ୍ଚା ମାନ କୋଦ୍। 12ନିନ୍ ଆବ୍ଡ଼ାନ୍ ଚାଦର୍ ଲେଖା ଗୁଢ଼ିୟ ଚୟ, ଆରୁ ଆବ୍ଡ଼ାଦ୍ ବାଦ୍ଲାରୋକଦ୍ ଲେକିନ୍ ନିନ୍ ନିନିନ୍ ରାଦାଏ ଆରୁ ନିନ୍ ସବୁଦିନ୍ତକ୍ ରୟ।” 13ପାର୍ମେଶ୍ୱାର୍ସ୍ ଏକ୍ଲାହି ଏକ୍ରିନ୍ ସରଗ୍ଦୂଁତ୍ର୍ସ୍ତି ଏନ୍ନେ ମାଲ୍ଲା ତେଙ୍ଗୁସ୍: “ନିନ୍ ଏଙ୍ଘାଏ ତିନାତାରା ଅକ୍କା କାଲା, ଯେତ୍କତକ୍ ଏନ୍ ନିଙ୍ଘା ଦୁଶ୍ମାନ୍ରିନ୍ ନିଙ୍ଘା ହେଡ୍ଡୁଘି ଚଉକି ମା କାମନ୍ଚନ୍।” 14ଏନ୍ଦେର୍ ଜାମା ସରଗ୍ ଦୂଁତ୍ର୍ ମୁକ୍ତି ହାଖ୍ନା ବାଲାର୍ଘି ସେବାଘି ଲାଗାନ୍ ତାଏକା ମଦେତ୍ କାମୁର୍ ଆତ୍ମାର୍?
2ସାବ୍ଧାନ୍ ରାଗେ ଚେତାବାନୀ
1ଏକାସାନ୍ ଏନ୍ନେ ମା ମାନ୍ନାଦ୍ କା ନାମ୍ ପାବୁସ୍ତି ଭାଟ୍କାରତ୍କତ୍। ହୁଦ୍ଘିଲାଗାନ୍ ନାମାଗେ ଏକା ବଚନ୍ ହାଖ୍ଖର୍କିଚି, ଆଦ୍ଘି ମିଆଁ ବାନେକିରି ଧ୍ୟାନ୍ ଚିନା କାତ୍ଥା। 2ଏନ୍ଦେର୍ଗେକା ଏକା କାତ୍ଥା ସରଗ୍ଦୂଁତ୍ଘି ଦ୍ୱାର୍ନୁ ତେଙ୍ଗାକେର୍କିଚା ଯଦି ଆଦ୍ ସତ୍ତୁ ରଦ୍ ଆରୁ ଜାମା ଅଣ୍ଟା ଦୋଷ୍ ଆରୁ ଆଦେଶ୍ ମା ମାନ୍ନାଘି ଠିକ୍-ଠିକ୍ ଦଣ୍ଡ୍ ହାଖ୍ଖରା। 3ତା ନାମ୍ ଏନ୍ନେ ବାଡ଼୍କା ମୁକ୍ତିତି ଏନ୍ଦେର୍ହି ଚିନ୍ତା ମା କାମିକିରି ବାର୍ନାବାଲା ଦଣ୍ତ୍ତି ଏସ୍କେ ବାଛ୍ରା ଅଙ୍ଗତ୍? ଏକାସ୍କି ଚାର୍ଚା ଜାମାର୍ଘିନ୍ତି ଆଘ୍ଲି, ପ୍ରାଭୁସ୍କି ଦ୍ୱାର୍ନୁ ମାନ୍ଚା, ଆରୁ ମେନ୍ନାବାଲାର୍ଘି ଦ୍ୱାର୍ନୁ ନାମାଗେ ସାବୁତ୍ ଚିଚ୍ଚାସ୍। 4ସତ୍ତୁ କାତ୍ଥାଘି ବାରେନୁ ପାର୍ମେଶ୍ୱାର୍ସ୍ହି ନିଜର୍ ଇଚ୍ଛାଘି ଲେଖା ହୁର୍ମି ଚିହ୍ନା, ଅଦ୍ଭୁତ୍ ନାଲ୍ଖୁ ଆରୁ ମାହାନ୍ ଶକ୍ତିଘି ନାଲ୍ଖୁ ଆରୁ ପାବିତାର୍ ଆତ୍ମାଘି ବାର୍ଦାନ୍ଘି ଦ୍ୱାର୍ନୁ ସାକ୍ଷୀ ଚିତେ ରାଲ୍ନାଏ।
ନାହ୍ମାଏ ମୁକ୍ତିଦାତା
5ପାର୍ମେଶ୍ୱାର୍ସ୍ ଆ ବାର୍ନାବାଲା ଦୁନିଆଁବନ୍, ଏକାଘି ଚାର୍ଚା ନାମ୍ କାମାଲ୍ଦାତ୍, ସରଗ୍ ଦୂଁତ୍ଜାମାର୍ଘି ଅଧିନ୍ ମାଲ୍ଲା କାମୁସ୍। 6ବରନ୍ ଇଦ୍ଘି ବାରେନୁ ପାବିତାର୍ ଶାସ୍ତ୍ରନୁ ଏକ୍ରିନ୍ ଆଡ୍ଡାନୁ ନେଦିନ୍ ଇ ସାକ୍ଷୀ ଚିଚ୍ଚକାନାଏ ଆଲାସ୍ ଏନ୍ଦେର୍ସ୍, କା ନିନ୍ ଆସିନ୍ ସୋଚ୍ଦାଏ: “ମୁନୁଷ୍ ହାଦ୍ଦୁସ୍ ଏନ୍ଦେର୍ସ୍? ଏକାସ୍କି ଲାଗାନ୍ ନିନ୍ ଚିନ୍ତା କାମ୍ଦାଏ। 7ନିନ୍ ଆସିନ୍ ସରଗ୍ଦୂଁତ୍ର୍ସ୍ତି କାଟେ ସାମାୟଘି ଲାଗାନ୍ ଛୋଟେ ବାନାବାଚ୍କାଏ ଆରୁ ଆସିନ୍ ମାହିମା ଆରୁ ମାଇନ୍ଘି ମୁକୁଟ୍ ଆତ୍ତତାଚ୍କାଏ। 8ନିନ୍ ଜାମାକିଛି ଆସ୍କି ହେଡ୍ଡୁଘି କିୟାଁ କାମ୍ଚ୍କେଚ୍କାଏ,”
ହୁଦ୍ଘିଲାଗାନ୍ ଯେତ୍କ କା ପାର୍ମେଶ୍ୱାର୍ସ୍ ଜାମାକିଛିନ୍ ଆସ୍କି କିୟାଁ କାମ୍ଚେଇଚାସ୍, ତା ଆସ୍ ଏନ୍ଦେର୍ହି ମା ଆମ୍ୱିୟାସ୍, ଏକାସ୍ ଯୀଶୁସ୍କି କିୟାଁ ମା ମାନସ୍ ଲେକିନ୍ ନାମ୍ ଆକ୍କୁନ୍ତକ୍ ଜାମାକିଛିନ୍ ଆସ୍କି କିୟାଁ ମାଲ୍ଲା ଏରୁତ୍। 9ଆସିନ୍ ସରଗ୍ଦୂଁତ୍ର୍ସ୍ତି କାଟେ ସାମାୟଘି ଲାଗାନ୍ ଛୋଟେ କାମା କେର୍କିଚା ଲେକିନ୍ ନାମ୍ ଇବନ୍ ଏର୍ଦାତ୍ କା ମରନ୍ଘି କଷଟ୍ ସାହ୍ନାଘି ଲାଗାନ୍ ଯୀଶୁସିନ୍ ମାହିମା ଆରୁ ମାଇନ୍ଘି ମୁକୁଟ୍ ଆତ୍ତା କେର୍କିଚି। ଏକାତି କା ଆସ୍ ପାର୍ମେଶ୍ୱାର୍ସ୍କି କ୍ରିପାତି ଜାମା ଆଲାର୍ଘି ଲାଗାନ୍ କ୍ରୁଶ୍ନୁ କେଚ୍ଚାସ୍କେରାସ୍। 10ଏନ୍ଦେର୍ଗେକା ଏକାସ୍କି ଲାଗାନ୍ ଆରୁ ନେଖା ଦ୍ୱାର୍ନୁ ଜାମା ଦୁନିଆଁ ସିର୍ଜାରାଚା, ବାଗ୍ଗେ ହାଦ୍ଦୁରିନ୍ ବାଡ଼ାଇନୁ କର୍ତାଗେ ଲାଗାନ୍ ଆବ୍ଡ଼ାର୍ଘି ମୁକ୍ତିଦାତାସିନ୍ ଦୁଃଖୁ ଉଠାବାନାଘି ଦ୍ୱାର୍ନୁ ପୁରାପୁରୀ ଶିଦ୍ଧ୍ କାମ୍ନାଘି ଇଚ୍ଛା ରାଚା। 11ଏକାସ୍ ପାବିତାର୍ କାମ୍ଦାସ୍ ଚାହେ ଆବ୍ଡ଼ା ଯେତ୍କର୍, ଏକାରିନ୍ ପାବିତାର୍ କାମାକାଲିଦ୍, ଦୁହି ଲୋକ୍ ଅଣ୍ଟାଇନ୍ ବାଙ୍ଗ୍ସ୍କି ହାଦ୍ଦୁର୍। ହୁଦ୍ଘିଲାଗାନ୍ ଯୀଶୁସ୍ ଆବ୍ଡ଼ାରିନ୍ ଭାଇବୁହୁଣୀ ବାଆଗେ ମା ଲାଜର୍ଦାସ୍। 12ଲେକିନ୍ ତେଙ୍ଗ୍ନାଏ କା “ଏନ୍ ନିଙ୍ଘା ନାମେ ନିଜର୍ ଭାଇଜାମାରିନ୍ ଶୁଣାବନ୍, ସାଭାଘି ମାଝାନୁ ଏନ୍ ନିଙ୍ଘା ବାଡ଼ାଇ କାମନ୍।”
13ଆରୁଅହନ୍ “ଏନ୍ ଆସ୍କି ମିଆଁ ପୁରା ଭାର୍ଷା ଉଇୟନ୍; ଆରୁ ଆରୁଅହନ୍ ଏନ୍ ଆରୁ ଏଙ୍ଘା ହାଦ୍ଦୁ, ଏକାରିନ୍ ପାର୍ମେଶ୍ୱାର୍ସ୍ ଏଙ୍ଗା ଚିଚ୍କାଦାସ୍, ଏନ୍ ଇସାନ୍ ରାଦାନ୍।”
14ହୁଦ୍ଘିଲାଗାନ୍ ପରିବାର୍ତା ଜାମା ଆଲାର୍ଘି ହେଁସୁ ଆରୁ ଆହ୍ଡ଼ା ଅଣ୍ଟାଇନ୍ ମାନିଦ୍, ଆସ୍ହି ନାହ୍ମା ଲେଖା ମୁନୁଷ୍ ମାନ୍ଚାସ୍ କେରାସ୍, ଏକାତି ଆସ୍ ନିଜର୍ ମରନ୍ ଦ୍ୱାର୍ନୁ ମରନ୍ଘି ମିଆଁ ହକ୍ ଉଇନାବାଲା ଶାଏତାନ୍ବନ୍ ହାରାବସ୍। 15ଆରୁ ଯେତ୍କର୍ ମରନ୍ଘି ଏଲ୍ଚ୍କାଘି କାରଣ୍ ଉଜ୍ଜନାତକ୍ ଗୁତ୍ତିୟାର୍ ଲେଖା ଫାସ୍ର୍କାଚାର୍, ଆବ୍ଡ଼ାରିନ୍ ବାଛାବା। 16ଏନ୍ଦେର୍ଗେକା ଇଦ୍ ଏସ୍କ୍ରିନ୍ହି ଆସ୍ ସରଗ୍ଦୂଁତ୍ର୍ଘି ମାଲ୍ଲା, ବରନ୍ ଆବ୍ରାହାମ୍ସ୍କି ବାଉଁଶାରିନ୍ ମଦେତ୍ କାମ୍ଦାସ୍। 17ହୁଦ୍ଘିଲାଗାନ୍ ଆସିନ୍ ଜାମା ଲେଖାସ୍ତି ଆସ୍କି ଭାଇ ବୁହୁଣୀର୍ ଲେଖା ବାନାବା କେରା ତାକା ଆସ୍ ପାର୍ମେଶ୍ୱାର୍ସ୍କି ସେବାନୁ ଦାୟାଲୁ ଆରୁ ବିଶ୍ୱାସ୍ଘି ଲାଇଗ୍ ମାହାପୁରୋହିତ୍ ମାନାଅଙ୍ଗସ୍। ଆରୁ ଆଲାରିନ୍ ତାହ୍ମା ପାପ୍ଘି ଛେମା ଚିନାଘି ଲାଗାନ୍ ବଲୀ ଚିଚ୍ଚାସ୍। 18ଏନ୍ଦେର୍ଗେକା ଆସ୍କି ପରୀକ୍ଷା ହୁଆ କେର୍କିଚି ଆରୁ ଆସ୍ ନିଜେ ଦୁଃଖୁ ସାହଚ୍କାଦାସ୍, ହୁଦ୍ଘିଲାଗାନ୍ ଯୀଶୁସ୍ ପରୀକ୍ଷାନୁ ଦୁଃଖୁ ସାହ୍ନା ବାଲାର୍ଘି ମଦେତ୍ କାମାଅଙ୍ଗସ୍।
3ଯୀଶୁସ୍ ମୁଶାସ୍ତି ମାହାନ୍ସ୍
1ନିମ୍ ସରଗ୍ତା ମେହ୍ଁକାଘି ଭାଗିଦାର୍ ପାବିତାର୍ ଭାଇ ଆରୁ ବୁହୁଣୀ ଜାମାରୋ! ହୁଦ୍ଘିଲାଗାନ୍ ନିମ୍ ନାହ୍ମାଏ ବିଶ୍ୱାସ୍ଘି ଆଗୁୱା ଆରୁ ମାହାପୁରୋହିତ୍ ଯୀଶୁସ୍କି ମିଆଁ ବିଚାର୍ କାମା। 2ଏସ୍କେ ମୁଶାସ୍ ପାର୍ମେଶ୍ୱାର୍ସ୍କି ଆଲାର୍ଘି ଜାମା ନାଲ୍ଖୁନୁ ବିଶ୍ୱାସ୍ଘି ଲାଇଗ୍ ରାଚାସ୍, ଆନ୍ନେନିନ୍ ଯୀଶୁସ୍ହି ପାର୍ମେଶ୍ୱାର୍ସ୍କି ଲାଗାନ୍ ବିଶ୍ୱାସ୍ଘି ଲାଇଗ୍ ରାଚାସ୍, ଏକାସ୍ କା ଆସିନ୍ ଠାହ୍ରାଚାସ୍। 3ଏନ୍ଦେର୍ଗେକା ଆସ୍ ମୁଶାସ୍ତି ଏତ୍କ ବାଢ଼୍ରିକିରି ମାହିମାଘି ଲାଇଗ୍ ବୁଝ୍ରା କେର୍କିଚି, ଯେତ୍କ କା ଆଡ଼୍ପାବନ୍ କାମ୍ନାବାଲା ଆଡ଼୍ପାନ୍ତି ବାଢ଼୍ରିକିରି ମାଇନ୍ ହାଖ୍ଖଦାସ୍। 4ଏନ୍ଦେର୍ଗେକା ଜାମା ଅଣ୍ଟା ଆଡ଼୍ପାବନ୍ ନେଦିନ୍ ନା ନେଦିନ୍ ବାନା-ବାନାବାଲା ରାନାଏ, ଲେକିନ୍ ଏକାସ୍ ଜାମାକିଛିନ୍ ବାନାବାଚ୍କାଦାସ୍ ଆସ୍ ପାର୍ମେଶ୍ୱାର୍ସ୍। 5ମୁଶାସ୍ ପାର୍ମେଶ୍ୱାର୍ସ୍କି ଜାମା ପରିବାର୍ନୁ ଗୁତ୍ତିୟାସ୍ଘି ଲେଖା ବିଶ୍ୱାସ୍ଘି ଲାଇଗ୍ ରାଚାସ୍, ତାକା ଭବିଷତ୍ନୁ ମାନ୍ନାବାଲା କାତ୍ଥାନ୍ ତେଙ୍ଗ୍ନାବାଲା ରାଚାସ୍ ଆଦ୍ଘି ସାକ୍ଷୀସ୍। 6ଲେକିନ୍ ପାର୍ମେଶ୍ୱାର୍ସ୍କି ପରିବାର୍ନୁ ଖ୍ରୀସ୍ତ୍ସ୍ ତା ଅଣ୍ଟା ହାଦ୍ଦୁସ୍କି ରୂପ୍ନୁ ବିଶ୍ୱାସ୍ କାମ୍ନାଘି ଲାଇଗ୍ ରାଦାସ୍ ଆରୁ ଯଦି ନାମ୍ ସବୁଦିନ୍ତକ୍ ନିଜର୍ ସାହସ୍ ଆରୁ ଆ ଆଶ୍ରାନୁ ବିଶ୍ୱାସ୍ବନ୍ ବାନାବାଇକିରି ଉଇୟତ୍ ତା ନାମ୍ହି ଆସ୍କି ପରିବାର୍ତାତ୍।
ବିଶ୍ୱାସ୍ ମା କାମୁର୍ଗେ ଚେତାବାନୀ
7ହୁଦ୍ଘିଲାଗାନ୍ ଏସ୍କେ ପାବିତାର୍ ଆତ୍ମା ତେଙ୍ଗିଦ୍ କା ଯଦି ଇନ୍ନା ନିମ୍ ଆସ୍କି ବଚନ୍ ମେନର୍। 8ତା ନିଜର୍ ମନ୍ବନ୍ କାଠୋର୍ ଆମା କାମା, ଏସ୍କେ କା ଖୀସାବାତାନାଘି ସାମାୟ ଆରୁ ପରୀକ୍ଷାଘି ଉଲ୍ଲା ଶୁନ୍ଶାନ୍ ଆଡ୍ଡାନୁ କାମ୍ଚ୍କାଚାର୍। 9ଏକାସାନ୍ ନିହ୍ମାଏ ପୁର୍ଖାର୍ ଏଙ୍ଗାନ୍ ପରୀକ୍ଷା କାମିକିରି ବିଡ଼୍ଚେ ଏରିୟାର୍ ଆରୁ ଚାଲିଶ୍ ବଛର୍ତକ୍ ଏଙ୍ଘା ନାଲ୍ଖୁନ୍ ଏରିୟାର୍। 10ହୁଦ୍ଘିଲାଗାନ୍ ଏନ୍ ଆ ସାମାୟନ୍ତା ଆଲାରିନ୍ ଖୀସାରାଚ୍କାଚ୍କାନ୍, ଆରୁ ଏନ୍ ତେଙ୍କାନ୍, କା ଇବ୍ଡ଼ାର୍ଘି ମନ୍ ଜାମାବାକେନ୍ ଭାଟ୍କାରାତେ ରାଇଦ୍, ଆରୁ ଇବ୍ଡ଼ାର୍ ଏଙ୍ଘା ପାବୁବନ୍ ମା ଚିହ୍ନଚାର୍। 11ଆଙ୍ଗେନ୍ ଏନ୍ ଖୀସ୍ତି ବାରିକିରି କସମ୍ ମକ୍କାନ୍, କା ଆବ୍ଡ଼ାର୍ ଏଙ୍ଘା ଆରାମ୍ କାମ୍ନା ଆଡ୍ଡାନୁ ବିଲ୍କୁସ୍ କରା ପଲ୍ଲରିନ୍। 12ହେ ଭାଇ ବୁହୁଣୀଜାମାରୋ ସାବ୍ଧାନ୍ ରା, କା ନିହ୍ମାଏନୁ ଏନ୍ନେ ଖାରାପ୍ ଅବିଶ୍ୱାସୀ ମନ୍ ମା ମାନ୍ନାଦ୍, ଏକାର୍ ଜୀବିତ୍ ପାର୍ମେଶ୍ୱାର୍ସ୍ତି ଗେଚ୍ଛା ମାନର୍କର୍। 13ଲେକିନ୍ ଯେତ୍କତକ୍ ଇବନ୍ ଇନ୍ନାନ୍ତା ଉଲ୍ଲା ତେଙ୍ଗାକାଇ, ସବୁଦିନ୍ ଏକ୍ ଦୁସ୍ରାରିନ୍ ସାହସ୍ ଚିତେ ରା, ଏନ୍ନେ ମା ମାନ୍ନାଦ୍ କା, ନିହ୍ମାସ୍ତି ଏକ୍ରିନ୍ ଆଲାର୍ ପାପ୍ଘି ବନ୍ଧନ୍ନୁ ଖାତ୍ରିକିରି କାଠୋର୍ ଆମାମାନା। 14ଯଦି ନାମ୍ ନିଜର୍ ପହ୍ଲେ ଭାର୍ଷାନୁ ଆଖ୍ରୀତକ୍ ବିଶ୍ୱାସ୍ତି ମଜ୍ବୁତ୍ ରତ୍ତା, ନାମ୍ ଖ୍ରୀସ୍ତ୍ସ୍କି ଭାଗିଦାର୍ ମାନ୍ଦାତ୍ କାଦାତ୍। 15ଏସ୍କେ କା ଯଦି ଇନ୍ନା ନିମ୍ ଆସ୍କି ଶବଦ୍ ମେନର୍ ତା, ନିଜର୍ ମନ୍ବନ୍ କାଠୋର୍ ଆମା କାମା, ଏସ୍କେ କା ପାର୍ମେଶ୍ୱାର୍ସ୍କି ବଚନ୍ବନ୍ ଇସ୍ରାଏଲ୍ର୍ ମେନିକିରି ନିଜର୍ ମନ୍ବନ୍ କାଠୋର୍ କାମ୍ଚ୍କାଚାର୍ ହନ୍ନେନ୍ ନିମ୍ ଆମ୍କେ କାମା। 16ଏକା ଆଲାର୍ ବଚନ୍ ମେନିକିରି ଖୀସାବାତାଚାର୍, ଆବ୍ଡ଼ାର୍ ନେର୍ ରାଚାର୍? ଏସ୍କ୍ରିନ୍ହି ଆବ୍ଡ଼ା ଜାମା ଆଲାର୍, ଏକାର୍ ମୁଶାସ୍କି ଦ୍ୱାର୍ନୁ ମିଶର୍ ଦେଶ୍ତି ଉର୍ଖିୟାର୍ ବାର୍ଚ୍କାଚାର୍। 17ଆରୁ ଆସ୍ ଚାଲିଶ୍ ବଛର୍ତକ୍ ଏକା ଆଲାର୍ଘି ମିଆଁ ଖୀସା ରାଚ୍କାଚାସ୍? ଏନ୍ଦେର୍ ଆବ୍ଡ଼ାର୍ସ୍ତିତା ମାଲ୍ଲା, ଏକାର୍ କା ପାପ୍ କାମ୍ଚାର୍, ଆରୁ ଆବ୍ଡ଼ାର୍ ଶୁନ୍ଶାନ୍ ଆଡ୍ଡାନୁ କେଚ୍ଚାର୍ କେରାର୍। 18ଆସ୍ ନେଖାସାନ୍ କସମ୍ ମଖିୟାସ୍ କା ନିମ୍ ଏଙ୍ଘାଏ ଆରାମ୍ ଆଡ୍ଡାନୁ କରା ପଲ୍ଲରିନ୍? ଏନ୍ଦେର୍ ଖାଲି ଆବ୍ଡ଼ାର୍ସ୍ତି ମାଲ୍ଲା ଏକାର୍ କା ପାର୍ମେଶ୍ୱାର୍ସ୍କି ବଚନ୍ବନ୍ ମା ମେନ୍ଚାର୍? 19ହୁଦ୍ଘିଲାଗାନ୍ ନାମ୍ ଏର୍ଦାତ୍ କା ଆବ୍ଡ଼ାର୍ ଅବିଶ୍ୱାସ୍ଘି ଲାଗାନ୍ କରା ପଲ୍ଲିୟାରିନ୍।
4ପାର୍ମେଶ୍ୱାର୍ସ୍କି ଆଲାର୍ଘି ଆରାମ୍
1ହୁଦ୍ଘିଲାଗାନ୍ ଯେତ୍କବାକେନ୍ ପାର୍ମେଶ୍ୱାର୍ସ୍କି ଆରାମ୍ ଆଡ୍ଡାନୁ କର୍ନାଘି କାତ୍ଥା ଚିଚ୍ଚକା ଆକ୍କୁନ୍ତକ୍ ରାଇ ତା, ନାମାଗେ ହୁସିୟାର୍ ରାନା କାତ୍ଥା, ଏନ୍ନେ ମା ମାନ୍ନାଦ୍ କା ନିହ୍ମାସ୍ତି ନେଦିନ୍ ଆ ଆରାମ୍ ଆଡ୍ଡାନୁ କର୍ନାନୁ ମା ବାଛ୍ରର୍କର୍। 2ନାମାଗେ ଆବ୍ଡ଼ାର୍ଘି ଲେଖା ଖୁସୀଘି ସୁସାମାଚାର୍ ଶୁଣାବା କେର୍କିଚି, ଲେକିନ୍ ମେନ୍ଚ୍କା ବଚନ୍ତି ଆବ୍ଡ଼ାର୍ଗେ ଏନ୍ଦେର୍ହି ଫାଏଦା ମା ମାନ୍ଚା, ଏନ୍ଦେର୍ଗେକା ମେନ୍ନାବାଲାର୍ଘି ମନ୍ନୁ ବିଶ୍ୱାସ୍ବନ୍ ଗ୍ରହନ୍ ମା କାମ୍ଚାର୍। 3ଏକାର୍ ବିଶ୍ୱାସ୍ କାମ୍ଚାର୍; ଆ ଆରାମ୍ ଆଡ୍ଡାନୁ କର୍ନାଏ, ଏସ୍କେ ଆସ୍ ତେଙ୍ଗିୟାସ୍ ଏନ୍ ଖୀସାରିକିରି ଇ କସମ୍ ମକ୍କାନ୍ କା: ଆବ୍ଡ଼ାର୍ ଏଙ୍ଘାଏ ଆରାମ୍ ଆଡ୍ଡାନୁ କରା ପଲ୍ଲରିନ୍। ଯଦିଭି ଦୁନିଆଁଘି ସୁରୁ ମାନ୍ନାଘି ସାମାୟନୁ ପାର୍ମେଶ୍ୱାର୍ସ୍କି ନାଲ୍ଖୁ ପୁରା ମାନ୍ଚା କେର୍କିଚା। 4ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ସାତ୍ୱାଁ ଉଲ୍ଲାଘି ବାରେନୁ ଇ ତେଙ୍ଗିଦ୍, “ପାର୍ମେଶ୍ୱାର୍ସ୍ ଛାଟ୍ୱାଁ ଉଲ୍ଲାନୁ ସୃଷ୍ଟିଘି ନାଲ୍ଖୁନ୍ ମୁଞ୍ଜିୟାସ୍ ଆରୁ ସାତ୍ୱାଁ ଉଲ୍ଲାନୁ ଆରାମ୍ କାମ୍ଚାସ୍।” 5ଏନ୍ନେହି ଲେଖା ରାଇ, କା “ଆବ୍ଡ଼ାର୍ ଏଙ୍ଘା ଆରାମ୍ ଆଡ୍ଡାନୁ କରା ପଲ୍ଲରିନ୍।” 6ଏକାରିନ୍ ପହ୍ଲେ ସୁସାମାଚାର୍ ଶୁଣାବା କେର୍କିଚା ଆବ୍ଡ଼ାର୍ ନିଜର୍ ଆଦେଶ୍ ମା ମାନ୍ନାଘି ଲାଗାନ୍ ଆରାମ୍ ଆଡ୍ଡାନୁ କରା ପଲ୍ଲିୟାରିନ୍ ଲେକିନ୍ ଆରୁ ଆଧାର୍ଘି ଲାଗାନ୍ ଆରାମ୍ ଆଡ୍ଡାଘି ବାଲିଦ୍ ଆକ୍କୁନ୍ହି ଖୁଲାରାଇ। 7ପାର୍ମେଶ୍ୱାର୍ସ୍ ଅଣ୍ଟା ଉଲ୍ଲାନ୍ ଆରୁଅହନ୍ ଠାହ୍ରାଚାସ୍: ଇନ୍ନା ଇ ଉଲ୍ଲାଘି ବାରେନୁ ଅଣ୍ଟା ଲାମ୍ବା ସାମାୟଘି ପାଛ୍ଲି ଆସ୍ ଦାଉଦ୍ସ୍କି ଥୁମ୍ଣାନ୍ତି ଇବନ୍ ତେଙ୍କାଚାସ୍ ଠିକ୍ ଏସ୍କେ କା ପହ୍ଲେହି ତେଙ୍କାଚାସ୍: ଯଦି “ଇନ୍ନା ନିମ୍ ଆସ୍କି ବଚନ୍ବନ୍ ମେନର୍ ତା ନିଜର୍ ଜୀଆବନ୍ କାଠୋର୍ ଆମ୍କେ କାମା।” 8ଆରୁ ଯଦି ଯିହୋଶୂୟ ଆବ୍ଡ଼ାରିନ୍ ଆରାମ୍ ଆଡ୍ଡାନୁ ଅଚ୍ଚାସ୍ କେର୍କା ରସ୍ନେ, ତା ଆଦ୍ଘି ପାଛ୍ଲି ଦୁସ୍ରା ଉଲ୍ଲାନ୍ତା ଚାର୍ଚା ମା ମାନଦ୍ନେ। 9ହୁଦ୍ଘିଲାଗାନ୍ ଆକ୍କୁନ୍ହି ପାର୍ମେଶ୍ୱାର୍ସ୍କି ଆଲାର୍ଗେ ଲାଗାନ୍ ଅଣ୍ଟା ଆରାମ୍ ଆଡ୍ଡା କାମା କେର୍କିଚି। 10ଏସ୍କେ ପାର୍ମେଶ୍ୱାର୍ସ୍ ନିଜର୍ ନାଲ୍ଖୁବନ୍ ପୁରା କାମିକିରି ଆରାମ୍ କାମ୍ଚାସ୍ ଆନ୍ନେନିନ୍ ଏକାସ୍ ପାର୍ମେଶ୍ୱାର୍ସ୍କି ଆରାମ୍ ଆଡ୍ଡାନୁ କର୍ଚାସ୍ ଆସ୍ହି ନିଜର୍ ନାଲ୍ଖୁସ୍ତି ଆରାମ୍ ହାଖ୍ଖୀୟାସ୍। 11ହୁଦ୍ଘିଲାଗାନ୍ ନାମ୍ ଆ ଆରାମ୍ ଆଡ୍ଡାନୁ କରାଗେ ମେହ୍ନତ୍ କାମତ୍ ଏନ୍ନେ ମା ମାନ୍ନାଦ୍ କା ନେଦିନ୍ ଆ ଆଲାର୍ଘି ଲେଖା ଆଦେଶ୍ ମା ମାନିକିରି ନାଶ୍ ମାନତ୍କତ୍। 12ଏନ୍ଦେର୍ଗେକା ପାର୍ମେଶ୍ୱାର୍ସ୍କି ବଚନ୍ ଜୀବିତ୍ ରାଇ ଆରୁ ଶକ୍ତିଶାଲୀ, ଆରୁ ହାର୍ ଅଣ୍ଟା ଯୋଡ଼େ ଖଣ୍ଡାସ୍ତିହି ବହୁତ୍ ଧାରେ ରାଇ, ଆତ୍ମା ଆରୁ ଜୀଆବନ୍, ଆରୁ ଗାଁଠି-ଗାଁଠି, ଆରୁ ଗୁଦ୍ଦା-ଗୁଦ୍ଦାବନ୍ ପାଖିଇକିରି, ଇ ପାଖାନ୍ତି ହାପାଖା ଯୋବ୍ଦାସ୍, ଆରୁ ମନ୍ଘି ଇଚ୍ଛାନ୍ ଆରୁ ବିଚାର୍ବନ୍ ବିଡ଼୍ଚେ ଏର୍ଦାସ୍। 13ଆସ୍କି ନଜର୍ଘି ଆଘ୍ଲି ଏନ୍ଦ୍ରିନ୍ହି ଜିନିଷ୍ ନୁହୁର୍କା ମାଲ୍ଲାଦିନ୍ ଯେତ୍କ ଜିନିଷ୍ ଆସ୍କି ଆଘ୍ଲି ସାଫା ଆରୁ ଖୁଲା ରାଇଦ୍, ଆ ପାର୍ମେଶ୍ୱାର୍ସ୍କେ ହିସାବ୍ ଚିନାରାଇ।
ଯୀଶୁସ୍ ନାହ୍ମାଏ ଦାୟାଲୁ ମାହାପୁରୋହିତ୍ସ୍
14ନାହ୍ମାଏ ନିଜର୍ ଅଣ୍ଟା ଦାୟାଲୁ ମାହାପୁରୋହିତ୍ ରାଦାସ୍, ମତ୍ଲବ୍ ପାର୍ମେଶ୍ୱାର୍ସ୍କି ହାଦ୍ଦୁ ଯୀଶୁସ୍, ଏକାସ୍ ସରଗ୍ଗୁଠିନ୍ ପାର୍ କାମା ମୁଞ୍ଜକାଦାସ୍। ହୁଦ୍ଘିଲାଗାନ୍ ନାମ୍ ନିଜର୍ ବିଶ୍ୱାସ୍ନୁ ମଜ୍ବୁତ୍ ରତ୍। 15ନାହ୍ମାଏ ମାହାପୁରୋହିତ୍ ନାହ୍ମା କାମ୍ଜୋରିନୁ ନାମାଗେ ଦିଲାସା ଜରୁର୍ ଚିୟସ୍, ଏନ୍ଦେର୍ଗେକା ଆସ୍ ଜାମା କାତ୍ଥାନୁ ନାହ୍ମା ଲେଖା ବିଡ଼୍ଚେ ଏରିୟାସ୍, ହାଲେହି ଦୋଷୀ ମା ଉର୍ଖିୟାସ୍। 16ହୁଦ୍ଘିଲାଗାନ୍ ବାରା ନାମ୍ ଭାର୍ଷା ଉଇୟିକିରି ରାଜ୍ଗାଦୀଘି ଚାହାନୁ ଆଣସତ୍, ଏକାତି ନାମାଗେ କ୍ରିପା ହାଖ୍ଖର, ତାକା ଦାର୍କାର୍ଘି ସାମାୟନୁ ନାମାଗେ ମଦେତ୍ ହାଖ୍ଖରା ଅଙ୍ଗଦ୍।
51ଯେତ୍କବାକେନ୍ ପାର୍ମେଶ୍ୱାର୍ସ୍ ମାହାପୁରୋହିତ୍ ଚାଜ୍ଦାସ୍। ଆବ୍ଡ଼ା ଆଲାର୍ଘିନ୍ତିନିନ୍ ଅର୍ତୁସିନ୍ ଚାଜ୍ଦାସ୍ ଇ ଆଲାସ୍ ପାର୍ମେଶ୍ୱାର୍ସ୍କି ଆଲାର୍ଘି ଲାଗାନ୍ ସେବା କାମ୍ନା କାତ୍ଥା। ଆସ୍ ଆଲାର୍ଘି ପାପ୍ ଲାଗାନ୍ ଦାନ୍ ଆରୁ ବଲୀଦାନ୍ ଚିନା କାତ୍ଥା। 2ଏନ୍ଦେର୍ଗେକା ଆସ୍ ନିଜେହି କମ୍ଜୋରିଘି କିୟାଁ ରାଦାସ୍, ହୁଦ୍ଘିଲାଗାନ୍ ଆସ୍ ମା ବୁଝ୍ରୁର୍ରିନ୍ ଆରୁ ଭାଟ୍କାରାଚାର୍ କେର୍କାରାନାଏ ଆବ୍ଡ଼ାର୍ ଗାନେ ବାନେ ବେଭାର୍ କାମାଅଙ୍ଗସ୍। 3ଇ କାରଣ୍ ରାଇଦ୍ କା ଆସ୍ ଆଲାର୍ଗେ ଲାଗାନ୍ ଖାଲି ମାଲ୍ଲା, ବରନ୍ ନିଜର୍ ଲାଗାନ୍ହି ପାପ୍ଘି ପାସ୍ତାୱାଘି ବଲୀ ଚାଢ଼ାବା ଖାତ୍ରିଦ୍। 4ଆରୁ ଇ ମାଇନ୍ଘି ପଦ୍ବୀ ନେଦିନ୍ ନିଜ୍କେନିଜ୍ସ୍ତି ମା ହନାଏ, ଯେତ୍କତକ୍ ହାରୁନ୍ସ୍କି ଲେଖା ପାର୍ମେଶ୍ୱାର୍ସ୍କି ତାର୍ତି ଠାହ୍ରା ମା କାଇ। 5ଇଦ୍ଘି ଲେଖା ଖ୍ରୀସ୍ତ୍ହି ମାହାପୁରୋହିତ୍ ମାନ୍ନାଘି ମାହିମାବନ୍ ନିଜେ ଗ୍ରହନ୍ ମା କାମ୍ଚାସ୍, ବରନ୍ ପାର୍ମେଶ୍ୱାର୍ସ୍ ଆସିନ୍ ତେଙ୍ଗିୟାସ୍, “ନିନ୍ ଏଙ୍ଘାଏ ହାଦ୍ଦୁୟ; ଇନ୍ନା ଏନ୍ ନିଙ୍ଘାଏ ବାଙ୍ଗ୍ ମାନ୍ଚ୍କାନ୍।” 6ପାର୍ମେଶ୍ୱାର୍ସ୍ହି ଦୁସ୍ରା ଆଡ୍ଡାନୁହି ତେଙ୍ଗ୍ଦାସ୍, ନିନ୍ ମେଲେଖିସେଦକ୍ସ୍କି ଲେଖା ସବୁଦିନ୍ଘି ଲାଗାନ୍ ପୁରୋହିତ୍ ରୟ। 7ଖ୍ରୀସ୍ତ୍ସ୍ ଇ ଦୁନିଆଁନୁ ରାନାବାକେନ୍ ଚିର୍ରାରା-ଚିର୍ରାରାକିରି ଆରୁ ହାଞ୍ଜାଲୋ ଆମ୍ମୁ ଟିଡ଼ି-ଟିଡ଼ିକିରି ପାର୍ମେଶ୍ୱାର୍ସ୍ତି, ଏକାସ୍ ଆସିନ୍ ମରନ୍ନ୍ତି ବାଛାବା ଅଙ୍କାରସ୍ନେ, ଆରୁ ଆର୍ଜୀବିନ୍ତି କାମ୍ଚାସ୍। ଆରୁ ଭକ୍ତିଘି କାରଣ୍ ଆସ୍କି ବିନ୍ତି ଗ୍ରହନ୍ କାମାକେରା। 8ପାର୍ମେଶ୍ୱାର୍ସ୍କି ହାଦ୍ଦୁସ୍ ହାଲେହି ଆସ୍ ଦୁଃଖୁ ସାହିକିରି ଆଦେଶ୍ ପାଲନ୍ କାମ୍ଚାସ୍। 9ଆରୁ ପୁରାପୁରୀ ବାନେ ମାନିକିରି, ନିଜର୍ ଜାମା ଆଦେଶ୍ ମେନ୍ନାବାଲାର୍ଘି ଲାଗାନ୍ ସବୁଦିନ୍ତକ୍ ମୁକ୍ତିଘି କାରଣ୍ ମାନ୍ଚାସ୍ କେରାସ୍। 10ଆରୁ ଆସ୍କେ ପାର୍ମେଶ୍ୱାର୍ସ୍କି ତାର୍ତି ମେଲେଖିସେଦକ୍ସ୍କି ନିୟମ୍ତି ମାହାପୁରୋହିତ୍ସ୍କି ପଦ୍ବୀ ହାଖ୍ଖରା।
ବିଶ୍ୱାସ୍ତି ଭାଟ୍କାରାନାଘି ଫଲ୍
11ଇଦ୍ଘି ବାରେନୁ ଏମାଗେ ବହୁତ୍ କାତ୍ଥା ତେଙ୍ଗ୍ନା ରାଇ। ହାଲେହି ନିହ୍ମା ବୁଝ୍ର୍ନା କମ୍ଜୋର୍ ରାଇଦ୍ ହୁଦ୍ଘିଲାଗାନ୍ ବୁଝାବାନାହି ବାଗ୍ଗେ କଠିନ୍ ରାଇ। 12ଅସଲ୍ନୁ ତା ନିମାଗେ ଇ ସାମାୟତକ୍ ଗୁରୁ ମାନ୍ନା କାତ୍ଥା, ଲେକିନ୍ ଏନ୍ନେ ଲାଗ୍ଗଦ୍, କା ନିମାଗେ ଆକ୍କୁନ୍ହି ଅଣ୍ଟା ଏନ୍ନେ ଆଲାସ୍କି ଦାର୍କାର୍ ରାଇ ଏକାସ୍ ନିମାରିନ୍ ପାର୍ମେଶ୍ୱାର୍ସ୍କି ବଚନ୍ଘି ଠିକ୍ ଶିକ୍ଷା ଆରୁଅହନ୍ ଶିଖାବସ୍? ନିମ୍ ଏନ୍ନେ ମାନ୍ଚ୍କାର୍ କେର୍କାଦାର୍ କା ନିମାଗେ ଆହାର୍ଘି ବାଦ୍ଲା ଆକ୍କୁନ୍ତକ୍ ଗୁରସ୍ ହି ଦାର୍କାର୍। 13ଏନ୍ଦେର୍ଗେକା ଗୁରସ୍ ହାପ୍ପୁ ବଲୋ ହାଦ୍ଦୁସ୍କେ ବାନେ କାତ୍ଥାନ୍ ଚିହ୍ନାଗେ ଶକ୍ତି ମା ରାଇଦ୍, ଏନ୍ଦେର୍ଗେକା ଆସ୍ ବଲୋ ହାଦ୍ଦୁସ୍। 14ଲେକିନ୍ ମଜ୍ବୁତ୍ ଆହାର୍ ତା ଆ ବାଡ଼୍କା ଆଲାର୍ଗେନିନ୍ ରାଇ ଏକାର୍ ନିଜର୍ ସୋଚ୍ବିଚାର୍ତି ବାନେ ଆରୁ ଖାରାପ୍ବନ୍ ଚିହ୍ନାଗେ ଶିଖ୍ରାର୍ କେର୍କାନାଏ।
61ହୁଦ୍ଘିଲାଗାନ୍ ବାରା ନାମ୍ ଖ୍ରୀସ୍ତ୍ସ୍କି ବାରେନୁ ସୁରୁ ଶିକ୍ଷାଘି ମିଆଁ କାତ୍ଥା କାମ୍ନା ଆମ୍ବିକିରି, ନାମ୍ ପୁରା-ପୁରୀ ତାରା ଆଘ୍ଲି ବାଢ଼୍ର୍ତେକତ୍, ଆରୁ ଖାରାପ୍ ନାଲ୍ଖୁସ୍ତି କିର୍ରିକିରି ଆରୁ ପାର୍ମେଶ୍ୱାର୍ସ୍କି ମିଆଁ ବିଶ୍ୱାସ୍ କାମାଗେ, 2ଆସ୍ନାନ୍୬:୨ ୟାହୁଦୀ ଜାମାର୍ଘି ଶୁଦ୍ଧ୍ କାମ୍ନା ନିୟମ୍ଘି ବାରେ ଶିକ୍ଷା ରାଇ ଘି ଶିକ୍ଷା, ହେଖ୍ଖା ଉଇୟା, ମରନ୍ଘି ପାଛ୍ଲି ଆରୁଅହନ୍ ଜୀଉଠ୍ର୍ନା ଆରୁ ଆ ନ୍ୟାୟ ଏକାସ୍ତି ନାହ୍ମାଏ ସବୁଦିନ୍ତା ଦଣ୍ଡ୍ଘି ବାରେ ରାଇ, 3ଆରୁ ଯଦି ପାର୍ମେଶ୍ୱାର୍ସ୍ ଚାହଁସ୍ ତା ନାମ୍ ଏନ୍ନେନିନ୍ କାମତ୍। 4ଏନ୍ଦେର୍ଗେକା ଏକାର୍ ଅହନ୍ ବିଲ୍ଲୀ ହାକ୍କାନାଏ, ଏକାର୍ ସରଗ୍ତା ବାର୍ଦାନ୍ଘି ଏମ୍ବାନ୍ ଚାଖା ମୁଞ୍ଜକାନାଏ ଆରୁ ପାବିତାର୍ ଆତ୍ମାଘି ଭାଗିଦାର୍ ମାନ୍ଚାର୍ କେର୍କାନାଏ। 5ଆରୁ ପାର୍ମେଶ୍ୱାର୍ସ୍କି ବାନେ ଶିକ୍ଷା ଆରୁ ବାର୍ନାବାଲା ଯୁଗ୍ଗୁଘି ଶକ୍ତିଘି ଏମ୍ବାନ୍ ଚାଖା ମୁଞ୍ଜକାନାଏ 6ଯଦି ଆବ୍ଡ଼ାର୍ ଭାଟ୍କାରର୍କର୍, ତା ଆବ୍ଡ଼ାରିନ୍ ମନ୍ ବାଦ୍ଲାବାଗେ ଲାଗାନ୍ ଆରୁଅହନ୍ ପୁନା କାମାଗେ ମୁସ୍କିଲ୍ ରାଇ ଏନ୍ଦେର୍ଗେକା ଆବ୍ଡ଼ାର୍ ପାର୍ମେଶ୍ୱାର୍ସ୍କି ହାଦ୍ଦୁସିନ୍ ନିଜର୍ଲାଗାନ୍ ଆରୁଅହନ୍ କ୍ରୁଶ୍ ମିଆଁ ଚାଢ଼ାବାନାଏ ଆରୁ ଆସ୍କି ମାଜାକ୍ ଉଡ଼ାବାନାଏ। 7ଏକା ହାଲ୍ଲୁଦ୍ ନିଜର୍ ମିଆଁ ଧିୟାନ୍-ଧିୟାନ୍ ବାର୍ନାବାଲା ଚେପୁ ଆମ୍ମୁନ୍ ଚିଇପିଦ୍ ଆରୁ ଆ ଆଲାର୍ଘି ଲାଗାନ୍ ବାନେ ଫସଲ୍ ଚିଇଦ୍, ଏକାର୍ ଆ ହାଲ୍ଲୁନୁ ଚାଷ୍ କାମ୍ନାଏ ଆବ୍ଡ଼ାର୍ ପାର୍ମେଶ୍ୱାର୍ସ୍ତି ଆଶିଷ୍ ହାଖ୍ଖନାଏ। 8ଲେକିନ୍ ଯଦି ଆ ହାଲ୍ଲୁନୁ ଆଚ୍ଚୁ ଆରୁ ଲାଟ୍ଟା ମାନିଦ୍, ତା ଆଦ୍ ବେକାର୍ ମାନିକାଇ। ଆରୁ ଆଦ୍ଗେ ସାର୍ପାରାନାଘି ଏଲ୍ଚ୍କା ରାଇ। ଆଖ୍ରୀନୁ ଆବନ୍ ବାସ୍ସାଚାକୋ।
9ହେ ଦୁଲାଡ଼ି (ସାଙ୍ଗେରୋ) ଭାଇ ବୁହୁଣୀରୋ! ଯଦିଭି ଏମ୍ ଇଦ୍ଘି ଲେଖା ତେଙ୍ଗାଲ୍ଦାମ୍, ହାଲେହି ଏହ୍ମାଏ ମଜ୍ବୁତ୍ ବିଶ୍ୱାସ୍ ରାଇ କା ନିହ୍ମା ଆଲାର୍ଘି ଦାଶା ଇଦ୍ଘିସ୍ତି ବାଗ୍ଗେ ବାନେ ରାଇ ଆରୁ ନିମ୍ ମୁକ୍ତିଘି ପାବୁନୁ ଚାଲ୍ର୍ଦାର୍। 10ପାର୍ମେଶ୍ୱାର୍ସ୍ ଅନ୍ୟାୟ ମା କାମ୍ଦାସ୍ ନିମ୍ ଆସ୍କି ବାନେ ହାଖ୍ଖନାତି ଖାସ୍ଚେଲା ମାନିକିରି ଏକା କଷଟ୍ ସାହ୍ଚ୍କାର୍, ସାନ୍ତ୍ଜାମାର୍ଘି ଏକା ସେବା କାମ୍ଚ୍କାର୍ ଆରୁ ଆକ୍କୁନ୍ତକ୍ହି କାମାଲ୍ଦାର୍, ପାର୍ମେଶ୍ୱାର୍ସ୍ ଆବ୍ଡ଼ା ଜାମାନ୍ ମଦ୍ରା ପଲ୍ଲଦାସ୍। 11ଏନ୍ ଚାହଁଦାନ୍ କା ନିହ୍ମାସ୍ତିନିନ୍ ଅର୍ତୁ-ଅର୍ତୁ ଆଖ୍ରୀତକ୍ ନିହ୍ମାଏ ଆଶ୍ରା ପୁରା ମାନ୍ନାତକ୍ ଆନ୍ନେନ୍ ଇଚ୍ଛା ଏଦ୍ର୍ତେ ରାନାର୍। 12ତାକା ନିମ୍ କୁଢ଼ିୟା ମା ମାନର୍କର୍; ବରନ୍ ଆସ୍କି ନମୁନା ବାନାବା ଏକାର୍ ନିଜର୍ ବିଶ୍ୱାସ୍ ଆରୁ ଧିରାଜ୍ଘି କାରଣ୍ କାତ୍ଥା ଚିଚ୍ଚକାଘି ଭାଗିଦାର୍ ମାନ୍ନାଏ।
ପାର୍ମେଶ୍ୱାର୍ସ୍କି ପାକ୍କା ଚିଚ୍ଚକା କାତ୍ଥା
13ଆରୁ ପାର୍ମେଶ୍ୱାର୍ସ୍ ଆବ୍ରାହାମ୍ସ୍କେ କାତ୍ଥା ଚିନା ସାମାୟନୁ ଯେତ୍କବାକେନ୍ କସମ୍ ମଁହାଗେ ଲାଗାନ୍ ନେକ୍ରିନ୍ ନିଜର୍ସ୍ତି ବାଡ଼୍କା ମା ହାଖ୍ଖୀୟାସ୍ ତା, ନିଜର୍ କସମ୍ ମହିଁକିରି ତେଙ୍ଗିୟାସ୍। 14କା ଏନ୍ ସତ୍ତୁନିନ୍ ନିଙ୍ଗାଗେ ବାଗ୍ଗେ ଆଶିଷ୍ ଚିଅନ୍, ଆରୁ ନିଙ୍ଘାଏ ହାଦ୍ଦୁରିନ୍ ବାଢ଼ାବାତେ କନ୍। 15ଆରୁ ଇଦ୍ଘି ଲେଖା ଆସ୍ ଧିରାଜ୍ ଉଇୟିକିରି କାତ୍ଥା ଚିଚ୍ଚକାଘି ଫଲ୍ବନ୍ ହାଖ୍ଖୀୟାସ୍। 16ଆଲାର୍ ତା ଆସ୍କି କସମ୍ ମହ୍ଁନାଏ, ନେରିନ୍ ନିଜର୍ସ୍ତି ବାଡ଼୍କାର୍ ଆରୁ ଆ କସମ୍ ଜାମା କାତ୍ଥା ବିଚାର୍ବନ୍ ମୁଞ୍ଜିକିରି ଏନ୍ଦ୍ରିନ୍ଭି ତେଙ୍ଗାକାଇ, ଆବନ୍ ପାକ୍କା କାମିଚି। 17ହୁଦ୍ଘିଲାଗାନ୍ ଯେତ୍କବାକେନ୍ ପାର୍ମେଶ୍ୱାର୍ସ୍ କାତ୍ଥା ଚିଉର୍ସାନ୍ ନିଜ୍କେବନ୍ ଆରୁହି ସାଫା ରୀତିତି ପ୍ରକଟ୍ କାମାଗେ ଚାହଁଚାସ୍ କା ତାଙ୍ଘା ଉଦ୍ଦେଶ୍ୟବନ୍ ବାଦ୍ଲାଗେ ପଲ୍ଲଦାସ୍ ତା କାତ୍ଥା ଚିଚ୍କାନ୍ ମାଝାନୁ ଅନ୍ଦରାସ୍। 18ତା ଆରୁଅହନ୍ ଇ ଯୋଡ଼େ କାତ୍ଥା ରାଇ ଆସ୍କି ଚିଚ୍ଚକା କାତ୍ଥା ଆରୁ କସମ୍ ଏକାଦ୍ ଏକ୍ଲାହି ମା ବାଦ୍ଲାରିଦ୍ ଆରୁ ଏକାଘି ବାରେନୁ ପାର୍ମେଶ୍ୱାର୍ସ୍ ଏକ୍ଲାହି ଝୁଟ୍ଟୁ ମା ତେଙ୍ଗ୍ଦାସ୍। ହୁଦ୍ଘିଲାଗାନ୍ ନାମ୍ ଏକା ପାର୍ମେଶ୍ୱାର୍ସ୍କି ଚାହାନୁ ବାଛ୍ରାଗେ ବାର୍ଚ୍କାଦାତ୍ ଆରୁ ଏକା ଆଶ୍ରା ଆସ୍ ନାମାଗେ ଚିଚ୍ଚକାଦାସ୍, ଆବନ୍ ଧାରିକିରି ବାଗ୍ଗେ ଖୁସୀନୁ ରାଦାତ୍। 19ଇଦ୍ ନାହ୍ମାଏ ଆଶ୍ରା ସରଗ୍ଘି ପାର୍ଦାଘି ଚାହାନୁ ମତ୍ଲବ୍ ପାର୍ମେଶ୍ୱାର୍ସ୍କି ଚାହାନୁ ଆଣ୍ସ୍ତିଚି। 20ଏକାସାନ୍ ଯୀଶୁସ୍ ନାହ୍ମା ତାର୍ତି ନାହ୍ମାଲାଗାନ୍ ନାହ୍ମାସ୍ତି ପହ୍ଲେ କର୍ଚାସ୍। ଆସ୍ ମେଲେଖିସେଦକ୍ସ୍କି ରୀତିନୁ ସବୁଦିନ୍ଘି ଲାଗାନ୍ ମାହାପୁରୋହିତ୍ ମାନ୍ଚାସ୍ କେରାସ୍।
7ମେଲ୍ଖିସେଦକ୍ ପୁରୋହିତ୍ସ୍କି ବାରେନୁ
1ଇ ମେଲେଖିସେଦକ୍ ଶାଲେମ୍ ସହର୍ତା ରାଜା ରାଚାସ୍ ଆରୁ ଜାମାର୍ଘିନ୍ତି ମାହାନ୍ ପାର୍ମେଶ୍ୱାର୍ସ୍କି ପୁରୋହିତ୍ ରାଚାସ୍। ଯେତ୍କବାକେନ୍ ଆବ୍ରାହାମ୍ସ୍କି ରାଜା ଜାମାରିନ୍ ହାରାବିକିରି କିର୍ରାଲିୟାସ୍ ତା ଆସ୍ ଆବ୍ରାହାମ୍ସିନ୍ ଭେଁଟ୍ ମାନ୍ଚାସ୍ ଆରୁ ଆସିନ୍ ଆଶିଷ୍ ଚିଚ୍ଚାସ୍। 2ଆବ୍ରାହାମ୍ସ୍ ଆବ୍ଡ଼ାର୍ଗେ ଜାମା ଜିନିଷ୍ଘି ଦଶ୍ମାଂଶ୍ ଚିଚ୍ଚାସ୍। ମେଲ୍ଖିସେଦକ୍ଘି ମତ୍ଲବ୍ ରାଇ ଧାର୍ମିକ୍ତାଘି ରାଜାସ୍। ଆସ୍ ଶାଲେମ୍ ସହର୍ତା ରାଜାସ୍ହି ରାଦାସ୍, ଏକାଘି ମତ୍ଲବ୍ ଶାନ୍ତିଘି ରାଜା। 3ନେଖା ନା ବାଙ୍ଗ୍, ନା ଆୟାଙ୍ଗ୍, ନା ବାଉଁଶାର୍ ରାନାର୍, ନେଖାଏ ନା ଉଲ୍ଲାଘି ସୁରୁ ରାଇ ଆରୁ ନା ଜୀବନ୍ଘି ଆଖ୍ରୀ ରାଇ; ଲେକିନ୍ ପାର୍ମେଶ୍ୱାର୍ସ୍କି ହାଦ୍ଦୁସ୍କି ଲେଖା ରାଦାସ୍ ଆରୁ ସବୁଦିନ୍ଘି ଲାଗାନ୍ ପୁରୋହିତ୍ ରାଦାସ୍। 4ଆକ୍କୁନ୍ ଇଦ୍ଘି ମିଆଁ ଧ୍ୟାନ୍ କାମା କା ଆସ୍ ଏସ୍କେ ମାହାନ୍ ରାଚାସ୍, ଏକାସିନ୍ ପୁର୍ଖା ଆବ୍ରାହାମ୍ସ୍ ନିଜର୍ ଜାମାର୍ଘିନ୍ତି ବାନେ ଲୁଟ୍କା ଜିନିଷ୍ସ୍ତିନ୍ ଦଶ୍ମାଂଶ୍ ଚିଚ୍ଚାସ୍। 5ଆକ୍କୁନ୍ ଏରା ନିୟମ୍ଘି ଅନୁସାର୍ ଲେବୀ ବାଉଁଶାନ୍ତାର୍ ଏକାର୍ ପୁରୋହିତ୍ ମାନ୍ନାଏ, ଆଲାର୍ସ୍ତି ମତ୍ଲବ୍ ନିଜର୍ ଭାଇର୍ସ୍ତି ଦଶ୍ମାଂଶ୍ ଭାଗୁ ହୁଅର୍। ଯଦିଭି ଆବ୍ଡ଼ାର୍ଘି ଆ ଭାଇର୍ହି ଆବ୍ରାହାମ୍ସ୍କି ବାଉଁଶାନ୍ତାର୍। 6ହାଲେହି ମେଲେଖିସେଦକ୍ସ୍, ଏକାସ୍ ଲେବୀ ବାଉଁଶାନ୍ତାସ୍ ହି ମାଲ୍ଲାରୁସ୍, ଆବ୍ରାହାମ୍ସ୍ତି ଦଶ୍ମାଂଶ୍ ଭାଗ୍ ଅଚ୍ଚାସ୍। ଆରୁ ଆ ଆବ୍ରାହାମ୍ସ୍କେ ଆଶିଷ୍ ଚିଚ୍ଚାସ୍ ଏକାସ୍କିସାନ୍ ପାର୍ମେଶ୍ୱାର୍ସ୍କି ଚିଚ୍କା କାତ୍ଥା ରାଚା। 7ଆରୁ ଆନ୍ନୁ ସନ୍ଦେହ୍ ମାଲ୍ଲାଦିନ୍, କା ଛୋଟେସ୍ ବାଡ଼୍କାସ୍ତି ଆଶିଷ୍ ହାଖ୍ଖଦାସ୍। 8ଆରୁ ଇସାନ୍ତା କେଚ୍ଚକା କେର୍କା ଆଲାର୍ ଦଶ୍ମାଂଶ୍ ହନାଏ ଲେକିନ୍ ଆସାନ୍ ଆସିନ୍ ହଦାସ୍, ଏକାସ୍କି ସାକ୍ଷୀ ଚିଆକାଇ, କା ଆସ୍ ଉଜ୍ଜାଲ୍ଦାସ୍। 9ତା ନାମ୍ ଏନ୍ନେନ୍ ହି ତେଙ୍ଗା ଅଙ୍ଗତ୍, କା ଲେବୀସ୍ହି, ଏକାସ୍ ଦଶ୍ମାଂଶ୍ ହୋଦାସ୍, ଆବ୍ରାହାମ୍ସ୍କି ଦ୍ୱାର୍ନୁ ମେଲେଖିସେଦେକ୍ସ୍ଗେ ଦଶ୍ମାଂଶ୍ ଚିଚ୍ଚାସ୍। 10ଏନ୍ଦେର୍ଗେକା ଏକା ସାମାୟ ମେଲେଖିସେଦକ୍ସ୍ ଲେବୀସ୍କି ବାଙ୍ଗ୍ସ୍ତି ଆବ୍ରାହାମ୍ସ୍ ଗାନେ ଭେଁଟ୍ କାମ୍ଚାସ୍, ଆ ସାମାୟନୁ ଲେବୀସ୍ ଜନମ୍ ମାଲ୍ଲା ମାନ୍ଚ୍କାରୁସ୍।
ମେଲେଖିସେଦକ୍ସ୍କି ଲେଖା ଦୁସ୍ରା ପୁରୋହିତ୍
11ଇସ୍ରାଏଲ୍ତା ପ୍ରାଜାର୍ଗେ ଲେବୀ ଜାମାର୍ଘି ପୁରୋହିତ୍ର୍ଘି ଲେଖା ନିୟମ୍ ହାଖ୍ଖର୍କିଚା। ଯଦି ଇ ପୁରୋହିତ୍ସ୍କି ଦ୍ୱାର୍ନୁ ପୁରାପୁରୀ ହାଖ୍ଖରା ଅଙ୍ଗଦ୍, ତା ଇଦ୍ ଏନ୍ଦେର୍ଗେ ଦାର୍କାର୍ ରାଚା କା ଅଣ୍ଟା ଦୁସ୍ରା ପୁରୋହିତ୍ସ୍କି ଚାର୍ଚା କାମାକୋ, ଏକାଦ୍ ହାରୁନ୍ସ୍କି ମାଲ୍ଲିଦ୍, ବରନ୍ ମେଲେଖିସେଦକ୍ସ୍କି ରିତୀନୁ ବାରସ୍କସ୍? 12ଏନ୍ଦେର୍ଗେକା ଯେତ୍କବାକେନ୍ ପୁରୋହିତ୍ସ୍କି ପଦ୍ ବାଦ୍ଲାରାଇ କାଇଦ୍? ତା ନିୟମ୍ହି ବାଦ୍ଲାରାନା କାତ୍ଥା। 13ଏକା ପୁରୋହିତ୍ସ୍କି ବାରେନୁ ଇ କାତ୍ଥା ତେଙ୍ଗାକେର୍କିଚି, ଆସ୍ ଅଣ୍ଟା ଦୁସ୍ରା ବାଉଁଶାନ୍ତାସ୍ ଆରୁ ଆ ବାଉଁଶାର୍ଘି ଏକ୍ରିନ୍ ଆଲାସ୍ ବେଦୀଘି ସେବକ୍ ମା ମାନ୍ଚାସ୍; 14ଏନ୍ଦେର୍ଗେକା ଇଦ୍ ଆହ୍କା କାତ୍ଥାଦ୍, କା ନାହ୍ମାଏ ପ୍ରାଭୁସ୍ ଯୁଦାସ୍କି ବାଉଁଶାନୁ ଜନମ୍ ମାନ୍ଚ୍କାଚାସ୍ ଆରୁ ଯୁଦାସ୍କି ବାଉଁଶାନୁ ପୁରୋହିତ୍ ପଦ୍ଘି ବାରେନୁ ମୁଶାସ୍କି ନିୟମ୍ନୁ ଏନ୍ଦେର୍ହି ଚାର୍ଚା ମାଲ୍ଲା କାମୁସ୍। 15ଆରୁ ଯେତ୍କବାକେନ୍ ମେଲେଖିସେଦକ୍ସ୍ ଲେଖା ଆରୁ ଅଣ୍ଟା ଏନ୍ନେ ପୁରୋହିତ୍ ଜନମ୍ ମାନ୍ନାବାଲା ରାଚାସ୍। 16ଯୀଶୁସ୍ ଲେବୀ ବାଁଉଶାନ୍ତା ମାଲ୍ଦାସ୍ ହାଲେହି ପାର୍ମେଶ୍ୱାର୍ସ୍ ଆସିନ୍ ମାହାପୁରୋହିତ୍ ବାନାବାଚାସ୍। ଆରୁ ଏକ୍ଲାହି ନାଶ୍ ମା ମାନ୍ନାବାଲା ଖାସ୍ ଜୀବନ୍ ଶକ୍ତିଘି ଦ୍ୱାର୍ନୁ ଆସିନ୍ ମାଁହା ପୁରୋହିତ୍ ବାନାବାଚାସ୍। 17ଏନ୍ଦେର୍ଗେକା ଆସ୍କି ବାରେନୁ ଇ ସାକ୍ଷୀ ଚିଆ କେର୍କିଚି, “କା ନିନ୍ ମେଲେଖିସେଦକ୍ସ୍କି ଲେଖା ସବୁଦିନ୍ଘି ଲାଗାନ୍ ପୁରୋହିତ୍ ରୟ।” 18ଏନ୍ଦେର୍ଗେକା ପହ୍ଲେ ନିୟମ୍ କମ୍ଜୋର୍ ଆରୁ ସଫଲ୍ ମା ମାନ୍ନାଘି କାରଣ୍ତି ମୁଞ୍ଜରାକେରା। 19(ହୁଦ୍ଘିଲାଗାନ୍ ନିୟମ୍ଦ୍ ଏନ୍ଦ୍ରିନ୍ କାତ୍ଥାନୁ ଶିଦ୍ଧ୍ ମାଲ୍ଲା କାମୁ) ଆରୁ ଆସ୍କି ଆଡ୍ଡାନୁ ଅଣ୍ଟା ଏନ୍ନେ ବାନେ ଆଶ୍ରା ଚିଆ କେର୍କିଚି ଏକାସ୍କି ଦ୍ୱାର୍ନୁ ନାମ୍ ପାର୍ମେଶ୍ୱାର୍ସ୍କି ଚାହାନୁ ଆଣସା ଅଙ୍ଗତ୍। 20ଯୀଶୁ ଖ୍ରୀସ୍ତ୍ ସବୁଦିନ୍ଘି ଲାଗାନ୍ ପୁରୋହିତ୍ ମାନସ୍ ଆରୁ ରସ୍ ବୁଲି ପାର୍ମେଶ୍ୱାର୍ସ୍ କସମ୍ ମହିଁକିରି ତେଙ୍ଗିୟାସ୍, ଲେକିନ୍ ପହ୍ଲେ ନେକ୍ରିନ୍ ହି ପାର୍ମେଶ୍ୱାର୍ସ୍ କସମ୍ ମହିଁକିରି ଏନ୍ନେ ମାଲ୍ଲା ତେଙ୍ଗୁସ୍ କା ପୁରୋହିତ୍ ଠାହ୍ରାବାକୋ। 21ଏନ୍ଦେର୍ଗେକା ଖ୍ରୀସ୍ତ୍ସ୍କି ଠାହ୍ରାଚ୍କା ସାମାୟ ପାର୍ମେଶ୍ୱାର୍ସ୍ କସମ୍ ମକ୍କାଚାସ୍। ଏସ୍କେ କା ପାବିତାର୍ ଶାସ୍ତ୍ର ତେଙ୍ଗି, ପାର୍ମେଶ୍ୱାର୍ସ୍କି କସମ୍ ମା ବାଦ୍ଲାରି ନିନ୍ ମେଲେଖିସେଦକ୍ସ୍କି ଲେଖା ସବୁଦିନ୍ଘି ଲାଗାନ୍ ପୁରୋହିତ୍ ମାନୟ ଆରୁ ରୟ। 22ଇ କସମ୍ଘି ଲାଗାନ୍ ଯୀଶୁସ୍ ଆରୁ ଅଣ୍ଟା ବାନେ କାତ୍ଥା ଚିଚ୍କା ଜାମାନାତ୍ ମାନ୍ଚାସ୍ କେରାସ୍। 23ଆବ୍ଡ଼ାର୍ ତା ଢେର୍ ପୁରୋହିତ୍ ମାନ୍ତେ ବାର୍ଚାର୍, ଇଦ୍ଘି କାରଣ୍ ଇଦ୍ ରାଚା କା ମରନ୍ଦ୍ ଆବ୍ଡ଼ାରିନ୍ ରାଗେ ମା ଚିୟାଲାଦ୍। 24ଲେକିନ୍ ଯୀଶୁସ୍ ଜୀବିତ୍ ରାଦାସ୍, ହୁଦ୍ଘିଲାଗାନ୍ ଆସ୍କି ପୁରୋହିତ୍ ପଦ୍ବୀ ହି ସବୁଦିନ୍ଘି ଲାଗାନ୍ ମାନିକିରି ରଦ୍। 25ଯୀଶୁସ୍ ଆବ୍ଡ଼ାର୍ଘି ଲାଗାନ୍ ବିନ୍ତି କାମାଗେ ସବୁଦିନ୍ଘି ଲାଗାନ୍ ଜୀବିତ୍ ରାଦାସ୍, ହୁଦ୍ଘିଲାଗାନ୍ ଏକାର୍ ଆସ୍କି ଦ୍ୱାର୍ନୁ ପାର୍ମେଶ୍ୱାର୍ସ୍କି ଚାହାଗେ ବାର୍ନାଏ, ଆସ୍ ଆବ୍ଡ଼ାର୍ଘି ପୁରାପୁରୀ ମୁକ୍ତି କାମାଅଙ୍ଗସ୍।
26ଇଦ୍ ଉଚିତ୍ ହି ରାଚା କା ନାମାଗେ ଇଦ୍ଘି ଲେଖା ମାହାପୁରୋହିତ୍ ହାଖ୍ଖର ପାବିତାର୍, ନିର୍ଦ୍ଦୋଷ୍, ଦାଗି ମା ଲାକ୍କା, ପାପୀର୍ସ୍ତି ଭିନେ ଆରୁ ସରଗ୍ଗୁଠିନ୍ନ୍ତି ହି ମାହାନ୍ ପଦ୍ବୀ ଚିଆ କେର୍କିଚି। 27ଆରୁ ଆବ୍ଡ଼ା ମାହାପୁରୋହିତ୍ ଜାମାର୍ଘି ଲେଖା ଯୀଶୁସ୍କେ ଦାର୍କାର୍ ମାଲ୍ଲାଦିନ୍ କା ସବୁଦିନ୍ ପହ୍ଲେ ନିଜର୍ ଦୋଷ୍ ଆରୁ, ଆରୁଅହନ୍ ଆଲାର୍ଘି ଦୋଷ୍ଘି ଲାଗାନ୍ ବଲୀ ଚସ୍, ଏନ୍ଦେର୍ଗେକା ଯୀଶୁସ୍ ନିଜେକେ ନିଜ୍ବନ୍ ଅହନ୍ ଖାଲି ବଲୀ ଚିଚ୍ଚାସ୍ ଲାଗ୍ଗିୟାସ୍। 28ଏନ୍ଦେର୍ଗେକା ନିୟମ୍ ତା କମ୍ଜୋର୍ ଆଲାରିନ୍ ମାହାପୁରୋହିତ୍ ଠାହ୍ରିଦ୍, ଲେକିନ୍ ଆ କସମ୍ଘି କାତ୍ଥା ଏକାଦ୍ ନିୟମ୍ ଶାସ୍ତ୍ରଘି ପାଛ୍ଲି ମହାକେର୍କିଚି, ଆ ହାଦ୍ଦୁସିନ୍ ଠାହ୍ରାବାକାଇ ଏକାସିନ୍କା ସବୁଦିନ୍ଘି ଲାଗାନ୍ ପୁରାପୁରୀ କାମା କେର୍କିଚି।
8ଯୀଶୁସ୍ ପୁନା ନିୟମ୍ଘି ମାହାପୁରୋହିତ୍ସ୍
1ଇସାନ୍ ଖାସ୍ ବିଷୟ ଇଦ୍ କା ନାହ୍ମାଏ ଏନ୍ନେ ମାହାପୁରୋହିତ୍ସ୍ ରାଦାସ୍, ଏକାସ୍ ସରଗ୍ନୁ ମାହାମାହିମ୍ସ୍କି ରାଜ୍ଗାଦୀଘି ତିନାତାରା କାଇକିରି ଅକ୍କାଦାସ୍। 2ଆରୁ ପାବିତାର୍ ଆଡ୍ଡାନୁ ଆରୁ ଆ ସତ୍ତୁ ତାମ୍ୱୁଘି ସେବକ୍ ମାନ୍ଚାସ୍, ଏକାସିନ୍ ଏକ୍ରିନ୍ ମୁନୁଷ୍ଘି ଦ୍ୱାର୍ନୁ ମାଲ୍ଲା, ବରନ୍ ପ୍ରାଭୁସ୍କି ଦ୍ୱାର୍ନୁ ତିୟାର୍ କାମ୍ଚାସ୍। 3ଏନ୍ଦେର୍ଗେକା ହାର୍ ଅଣ୍ଟା ମୁଖ୍ୟା ପୁରୋହିତ୍ ଦାନ୍, ଆରୁ ବଲୀଦାନ୍ ଚାଢ଼ାବାନାଘି ଲାଗାନ୍ ଠାହ୍ରାବାକାଇ, ଇଦ୍ଘିଲାଗାନ୍ ଜରୁର୍ ରାଇ, କା ଆସ୍କିସାନ୍ ହି ଏନ୍ଦ୍ରିନ୍ ଚାଢ଼ାବାନାଘି ଲାଗାନ୍ ରଦ୍। 4ଯଦି ଆସ୍ ଦୁନିଆଁନୁ ରସ୍ନେ ତା ଆସ୍ ପୁରୋହିତ୍ ମାନା ପଲ୍ଲସ୍ନେ, ଏନ୍ଦେର୍ଗେକା ଆସାନ୍ ପହ୍ଲେନ୍ତିନିନ୍ ଏନ୍ନେ ପୁରୋହିତ୍ ରାଦାସ୍ ଏକାସ୍ ନିୟମ୍ଘି ଅନୁସାର୍ ଦାନ୍ ଚାଢ଼ାବାଦାସ୍ 5ଆବ୍ଡ଼ାର୍ ନେଖାଏ ସେବା କାମ୍ନାଏ, ଆଦ୍ ସରଗ୍ଘି ବାରେନୁ ଓଁଠୁଘି ନମୁନା ଲେଖା, ଯେତ୍କବାକେନ୍ ମୁଶାସ୍ ତାମ୍ବୁ ବାନାବାନାଘି ଲାଗାନ୍ ସୁରୁ କାମାଲାସ୍ ହତ୍କବାକେନ୍ ପାର୍ମେଶ୍ୱାର୍ସ୍ ତେଙ୍ଗିୟାସ୍ ହୁସିୟାର୍ ରା: ପାର୍ତ୍ତାନୁ ଏକାନ୍ ନିଙ୍ଗାଗେ ଏଦା କେର୍କିଚା, ଆଦ୍ଘି ଲେଖା ଜାମାନ୍ ତିୟାର୍ କାମା। 6ଯୀଶୁସ୍ ଆରୁହି ବାନେ ନିୟମ୍ଘି ମାଝାନୁ ଠାହ୍ରାଚାସ୍, ଏକାଦ୍ ଆରୁ ବାନେ ଚିଚ୍କା କାତ୍ଥାଘି ମଦେତ୍ତି ମାନ୍ଚ୍କିଚି, ହୁଦ୍ଘିଲାଗାନ୍ ଯୀଶୁସ୍କେ ଆବ୍ଡ଼ାର୍ଘି ସେବାସ୍ସ୍ତି ବାଢ଼୍ରିକିରି ହାଖ୍ଖରା। 7ଯଦି ଆ ପହ୍ଲେ ଚିଚ୍କା କାତ୍ଥା ବିନା ନିର୍ଦ୍ଦୋଷ୍ ମାନଦ୍ନେ ତା ଦୁସ୍ରାସ୍କି ଲାଗାନ୍ ମଉକା ମା ବେଦ୍ଦାକଦ୍ନେ? 8ପାର୍ମେଶ୍ୱାର୍ସ୍ ଆବ୍ଡ଼ା ଆଲାର୍ଘି ମିଆଁ ଦୋଷ୍ ଲାଗାବାତେ ହୁଏ ତେଙ୍ଗ୍ଦାସ୍ ପ୍ରାଭୁସ୍ ଇ ତେଙ୍ଗ୍ଦାସ୍: “ଆ ଉଲ୍ଲାଦ୍ ବାରାଲି, ଯେତ୍କବାକେନ୍ ଏନ୍ ଇସ୍ରାଏଲ୍ ପରିବାର୍ଘି ଲାଗାନ୍ ଆରୁ ଯୁଦାସ୍କି ପରିବାର୍ଘି ଲାଗାନ୍ ଅଣ୍ଟା ପୁନା ନିୟମ୍ କାମନ୍। 9ଇଦ୍ ଆ ରାଜୀନାମାଘି ଲେଖା ମା ମାନଦ୍, ଏସ୍କେ ଏନ୍ ଆବ୍ଡ଼ା ପୁର୍ଖାର୍ଘି ଲାଗାନ୍ ଆ ସାମାୟନୁ କାମ୍ଚ୍କାଚ୍କାନ୍, ଯେତ୍କବାକେନ୍ ଏନ୍ ଆବ୍ଡ଼ାରିନ୍ ମିଶର୍ ଦେଶ୍ତି ଅଥ୍ର୍ନାଘି ଲାଗାନ୍ ଆବ୍ଡ଼ାର୍ଘି ହେଖ୍ଖା ଧାର୍ଚ୍କାଚ୍କାନ୍। ଏନ୍ଦେର୍ଗେକା ଆବ୍ଡ଼ାର୍ ଏଙ୍ଘାଏ ରାଜୀନାମାନୁ ସ୍ଥିର୍ ମା ରାଚାର୍ ହୁଦ୍ଘିଲାଗାନ୍ ଆବ୍ଡ଼ାର୍ସ୍ତି ଗେଚ୍ଛା ମାନ୍ଚ୍କାନ୍ କେର୍କାନ୍, ପ୍ରାଭୁସ୍ ଇ ତେଙ୍ଗ୍ଦାସ୍। 10ପ୍ରାଭୁସ୍ ଇ ତେଙ୍ଗ୍ଦାସ୍ କା: ଆବ୍ଡ଼ାର୍ ଏଙ୍ଘା ନିୟମ୍ବନ୍ ପାଲନ୍ ମା କାମ୍ଚାର୍, ହୁଦ୍ଘିଲାଗାନ୍ ଏନ୍ହି ଆବ୍ଡ଼ାର୍ଘି ଶୁଦ୍ଧି ମାଲ୍ଲା ହୁନ୍। ଆସ୍ ଇ ତେଙ୍ଗ୍ଦାସ୍ କା; ଆ ସାମାୟ ବିତ୍ର୍କାଘି ପାଛ୍ଲି ଏନ୍ ଇସ୍ରାଏଲ୍ ପରିବାର୍ଘି ଲାଗାନ୍ ଇ ନିୟମ୍ କାମନ୍ ଏନ୍ ନିଜର୍ ନିୟମ୍ବନ୍ ଆବ୍ଡ଼ାର୍ଘି ମନ୍ନୁ ଉଇୟନ୍ଚନ୍, ଆରୁ ଆବନ୍ ଏନ୍ ଆବ୍ଡ଼ାର୍ଘି ଜୀଆନୁ ଲେଖନ୍ଚନ୍। ଆରୁ ଏନ୍ ଆବ୍ଡ଼ାର୍ଘି ପାର୍ମେଶ୍ୱାର୍ ମାନନ୍, ଆରୁ ଆବ୍ଡ଼ାର୍ ଏଙ୍ଘାଏ ଆଲାର୍ ମାନର୍। 11ଆରୁ ଜାମା ଅଣ୍ଟା ନିଜର୍ ଦେଶ୍ତା ଆଲାରିନ୍ ଆରୁ ନିଜର୍ ଭାଇରିନ୍ ଇ ଶିକ୍ଷା ମା ଚିଅର୍, କା ନିନ୍ ପ୍ରାଭୁସିନ୍ ଚିହ୍ନା, ଏନ୍ଦେର୍ଗେକା ଛୋଟେନ୍ତି ହୋଇକିରି ବାଡ଼୍କାତକ୍ ଜାମାର୍ ଏଙ୍ଗାନ୍ ଆହର୍। 12ଏନ୍ଦେର୍ଗେକା ଏନ୍ ଆବ୍ଡ଼ାର୍ଘି ଦୋଷ୍ ଛେମା କାମନ୍ଚନ୍ ଆରୁ ଆବ୍ଡ଼ାର୍ଘି ପାପ୍ବନ୍ ମନେ ମା କାମନ୍।” 13ପାର୍ମେଶ୍ୱାର୍ସ୍ ଇ ରାଜୀନାମାବନ୍ “ପୁନା” ତେଙ୍ଗିକିରି ତେଙ୍ଗ୍ର୍ଦାସ୍, ହୁଦ୍ଘିଲାଗାନ୍ ଆସ୍ ପହ୍ଲେ ରାଜୀନାମାବନ୍ ବେକାର୍ କାମ୍ଚେଇଚାସ୍। ଏକାଦ୍ ପାଚ୍ଚା ଆରୁ କମ୍ଜୋର୍ ମାନ୍ଚାକେର୍କିଚି ଆଦ୍ ମୁଞ୍ଜର୍ନାବାଲା ରାଇ।
9ପାଚ୍ଚା ନିୟମ୍ଘି ଆରାଧାନା
1ପହ୍ଲେ ନିୟମ୍ନୁ ପାର୍ମେଶ୍ୱାର୍ସ୍କି ଆରୁ ଇସ୍ରାଏଲ୍ର୍ଘି ମାଝାନୁ ଆରାଧାନାଘି ନିୟମ୍ ରାଚା। ଆରୁ ଇ ଦୁନିଆଁନୁ ଆରାଧାନାଘି ଆଡ୍ଡାହି ରାଚା। 2ମତ୍ଲବ୍ ଅଣ୍ଟା ତାମ୍ବୁନୁ ବାନାବା କେର୍କିଚା, ପହ୍ଲେ ବାଖ୍ରାନୁ ବୀଲ୍ଲି ଖୁଟା, ଆରୁ ଟେବୁଲ୍, ଆରୁ ଦାନ୍ଘି ଆସ୍ମା ରାଚା; ଆରୁ ଆଦ୍ ପାବିତାର୍ ଆଡ୍ଡା ତେଙ୍ଗା କାଲିୟାଦ୍। 3ଆରୁ ଦୁସ୍ରା ପାର୍ଦାଘି ପାଛ୍ଲି ଆ ବାଖ୍ରା ରାଚା, ଏକାନ୍ ମାହାପାବିତାର୍ ଆଡ୍ଡା ତେଙ୍ଗା କାଲିୟାଦ୍। 4ଇନ୍ନୁ ଧୁପ୍ଦାନ୍ ଜିନିଷ୍ଘି ଲାଗାନ୍ ସୋନାଘି ଧୁମ୍ମାଲୀ ଆରୁ ସୋନାତି ଚାରିପାଖା ଗୁଢ଼ିଆରାଚ୍କା ବାକ୍ସା ରାଚା। ଇ ବାକ୍ସାନୁ ସୋନାତି ବାନାବାଚ୍କା ମାନ୍ନାଘି ଅଣ୍ଟା ଖୁରୀ ରାଚା, ହାରୁନ୍ସ୍କି ଆ ଠେଙ୍ଗା ରାଚା ଏକାଘି ମିଆଁ ଆଥା ହୋର୍କିଚା, ଆରୁ ନିୟମ୍ ଚାଁଚାଘି ସିଲଟ୍ ରାଚା। 5ଏକା ଆଡ୍ଡାନୁ ପାର୍ମେଶ୍ୱାର୍ସ୍ ପାପ୍ଘି ଛେମା ଚିଦାସ୍ ଆ ଆଡ୍ଡାନୁ କେରୁବ୍ଘି ଡେଣା ଓଁଠୁ କାମ୍ଚ୍କିଚା, ଇଦ୍ଘି ବାରେନୁ ଅଣ୍ଟା-ଅଣ୍ଟା ଆକ୍କୁନ୍ ତେଙ୍ଗ୍ନାଘି ସୁଯୋଗ୍ ମାଲ୍ଲାଦିନ୍।
6ଯେତ୍କବାକେନ୍ ଇବ୍ଡ଼ା ଜିନିଷ୍ଦ୍ ଇ ନିୟମ୍ତି ତିୟାର୍ ମାନା ମୁଞ୍ଜ୍ର୍କିଚା, ହତ୍କବାକେନ୍ ପହ୍ଲେ ବାଖ୍ରାନୁତା ପୁରୋହିତ୍ସ୍ ରୋଜ୍ଦିନ୍ ସେବାଘି ନାଲ୍ଖୁ କାମାଗେ ଲାଗ୍ଗିୟାସ୍। 7ଲେକିନ୍ ମୁଖ୍ୟା ପୁରୋହିତ୍ସ୍, ବଛର୍ନୁ ଅହନ୍ ଖାଲି, ଦୁସ୍ରା ବାଖ୍ରାନୁ ଆସ୍ ହେଁସୁ ହୁଇକିରି କରାଲିୟାସ୍, ଏକାନ୍ ଆସ୍ ନିଜର୍ ଆରୁ ଆଲାର୍ଘି ବାଲ୍ଲିକିରି କାମ୍ଚ୍କା ଦୋଷ୍ଘି ଲାଗାନ୍ ପାସ୍ତାୱାଘି ରୂପ୍ନୁ ଚାଢ଼ାବାଲିୟାସ୍। 8ଇଦ୍ଘି ଲେଖା ପାବିତାର୍ ଆତ୍ମା ଇବନ୍ ଏଦାଗେ ବେଦ୍ଦିଦ୍ କା ଯେତ୍କତକ୍ ପହ୍ଲେ ତାମ୍ବୁ ଇଜ୍ଜକା ରାଇ, ହତ୍କତକ୍ ଆଲାର୍ ପାବିତାର୍ ଆଡ୍ଡାଘି ପାବୁନୁ କରା ପଲ୍ଲରିନ୍। 9ଆଦ୍ ଆକ୍କୁନ୍ ତା ସାମାୟ ଲେଖା ରାଇ। ଆସାନ୍ ଏକା ଦାନ୍ ଆରୁ ବଲୀଦାନ୍ ଚାଢ଼ାବାକାଇ, ଆ ଜାମା ଆରାଧାନା କାମ୍ନାବାଲାର୍ଘି ବିବେକ୍ବନ୍ ନିର୍ଦ୍ଦୋଷ୍ ମା କାମିଦ୍। 10ହୁଦ୍ଘିଲାଗାନ୍ କା ଆବ୍ଡ଼ାର୍ ଖାଲି ହାପ୍ପନା ଅନ୍ନାଘି ଜିନିଷ୍ବନ୍, ଆରୁ ରକମ୍-ରକମ୍ଘି ଶୁଦ୍ଧ୍ କାମ୍ନା ନିୟମ୍ଘି ଲେଖା ଶରୀରିକ୍ ନିୟମ୍ ରାଇ, ଆରୁ ପୁନା ନିୟମ୍ଘି ସାମାୟତକ୍ଘି ଲାଗାନ୍ହି ଲାଗୁ ମାନ୍ନାଏ। 11ଲେକିନ୍ ଯେତ୍କବାକେନ୍ ଖ୍ରୀସ୍ତ୍ସ୍ ବାର୍ନାବାଲା ବାନେ-ବାନେ ଜିନିଷ୍ଘି ମାହାପୁରୋହିତ୍ ମାନିକିରି ବାର୍ଚାସ୍ ତା, ଆସ୍ ଆରୁହି ବାଡ଼୍କା ଆରୁ ସିଦ୍ଧ୍ ତାମ୍ବୁସ୍ତି ପାର୍ ମାନିକିରି କର୍ଚ୍କାଦାସ୍, ଏକାଦ୍ ଆଲାର୍ଘି ହେଖ୍ଖାନ୍ତା କାମ୍ଚ୍କା ମାଲ୍ଲିଦ୍, ମତ୍ଲବ୍ ଇ ଦୁନିଆଁନ୍ତାଦ୍ହି ମାଲ୍ଲିଦ୍। 12ଆରୁ ନା ତା ବୋକା ଆରୁ ବାଛ୍ରୁଘି ହେଁସୁତି, ଲେକିନ୍ ନିଜର୍ ହେଁସୁଘି ଦ୍ୱାର୍ତି ଅହ୍ନାସାରେନ୍ ନାହ୍ମାଲାଗାନ୍ ସବୁଦିନ୍ଘି ଲାଗାନ୍ ପାପ୍ତି ଛୁଟ୍କାରା କାମିକିରି ପାବିତାର୍ ଆଡ୍ଡାନୁ କର୍ଚାସ୍। 13ଏନ୍ଦେର୍ଗେକା ଯେତ୍କବାକେନ୍ ବୋକା ଆରୁ ଓୟୁଘି ହେଁସୁ ଆରୁ ବାଛ୍ରୁଘି ଚିନ୍ଦୁନ୍ ଅଶୁଦ୍ଧ୍ ଆଲାର୍ଘି ମିଆଁ ଛିଛ୍ଣାନାତି ଶରୀର୍ବନ୍ ଶୁଦ୍ଧ୍ କାମାଗେଲାଗାନ୍ ପାବିତାର୍ ନାନି। 14ଯେତ୍କବାକେନ୍ ଇଦ୍ ସତ୍ତୁଦ୍ତା ଖ୍ରୀସ୍ତ୍ସ୍କି ହେଁସୁଦ୍ କେତ୍କ ଶକ୍ତିଶାଲୀଦ୍। ଆସ୍ ସବୁଦିନ୍ତା ଆତ୍ମାଘି ଦ୍ୱାର୍ନୁ ନିଜ୍କେନିଜ୍ବନ୍ ଅଣ୍ଟା ପୁରାପୁରୀ ବଲୀଘି ରୂପ୍ନୁ ପାର୍ମେଶ୍ୱାର୍ସ୍କେ ସୋଁପେଇଚାସ୍। ତା ଆସ୍କି ହେଁସୁଦ୍ ନାହ୍ମାଏ ବିବେକ୍ବନ୍ ଆ ପାପ୍ଘି ନାଲ୍ଖୁତି ଛୁଟ୍କାରା କାମଦ୍ ଏକାଦ୍ ମରନ୍ ତାରା ହୋଇକାଇଦ୍ ତାକା ନାମ୍ ଜୀବିତ୍ ପାର୍ମେଶ୍ୱାର୍ସ୍କି ସେବା କାମା ଅଙ୍ଗତ୍। 15ଖ୍ରୀସ୍ତ୍ସ୍ ଅଣ୍ଟା ପୁନା ରାଜୀନାମାଘି ପାର୍ମେଶ୍ୱାର୍ ଆରୁ ଆଲାର୍ଘି ମାଝାନୁ ରୁ ଆଲାସ୍ ମାନ୍ଚା, ହୁଦ୍ଘିଲାଗାନ୍ ଏକାରିନ୍ ମେହାଁକେର୍କି ରାଇ ଆବ୍ଡ଼ାର୍ ସବୁଦିନ୍ତକ୍ ଆଶିଷ୍ ହାଖ୍ଖର୍। ପାର୍ମେଶ୍ୱାର୍ସ୍ ଆବ୍ଡ଼ାର୍ଗେ କାତ୍ଥା ଚିଚ୍କାଦାସ୍। ପହ୍ଲେ ରାଜୀନାମାଘି ଅଧିନ୍ନୁ କାମ୍ଚ୍କା ପାପ୍ସ୍ତି ଆବ୍ଡ଼ାରିନ୍ ମୁକ୍ତି କାମାଗେଲାଗାନ୍ ବାଦ୍ଲାଘି ରୂପ୍ନୁ ଆସ୍ ନିଜର୍ ଜୀଆ ଚିଆ ମୁଞ୍ଜକାଦାସ୍। 16ଏନ୍ଦେର୍ଗେକା ଏକାସାନ୍ ନିୟମ୍ କାମାକେର୍କି ରାଇ ଆସାନ୍ ନିୟମ୍ କାମ୍ନାବାଲାସ୍କି ମରନ୍ବନ୍ହି ବୁଝୁର୍ନା ହି ଜରୁରୀ ରାଇ। 17ଯେତ୍କବାକେନ୍ତକ୍ ବାସିୟାତ୍ନାମା କାମ୍ନାବାଲାସ୍ ଜୀବିତ୍ ରାଦାସ୍, ହତ୍କତକ୍ ଆ ବାସିୟାତ୍ନାମାଘି ନାଲ୍ଖୁଦ୍ ମା ମାନିଦ୍। 18ହୁଦ୍ଘିଲାଗାନ୍ ପହ୍ଲେ ନିୟମ୍ହି ବିନା ଅଣ୍ଟା ମରନ୍ଘି ଆରୁ ହେଁସୁତି ମାଲ୍ଲା ମାନ୍ଚ୍କିରୁ। 19ଏନ୍ଦେର୍ଗେକା ଯେତ୍କବାକେନ୍ ମୁଶାସ୍ ଜାମା ଆଲାର୍ଘି ଆଘ୍ଲି ନିୟମ୍ଘି ଜାମା ଆଦେଶ୍ବନ୍ ପାଢ଼ିକିରି ଶୁଣାବାଚ୍କାଚାସ୍, ତା ଆସ୍ ଆମ୍ମୁ, ଲାଲ୍ (ରୁଇ) ଆରୁ ଜୁଫେ ହପ୍ପାଘି ଡାଡ଼ାତି ବାଚ୍ଛରୁ ଆରୁ ବୋକାଘି ହେଁସୁ ଅଚ୍ଚକାଚାସ୍ ଆରୁ ଆବନ୍ ନିୟମ୍ଘି ବହିନୁ ଆରୁ ଜାମା ଆଲାର୍ଘି ମିଆଁ ଛିଛ୍ଣାଚାସ୍ ଚିଚ୍ଚାସ୍। 20ଆରୁ ତେଙ୍ଗିୟାସ୍, “କା ଇଦ୍ ଆ ନିୟମ୍ଘି ହେଁସୁଦ୍, ଏକାଘି ଆଦେଶ୍ ପାର୍ମେଶ୍ୱାର୍ସ୍ ନିହ୍ମା ଲାଗାନ୍ ଚିଚ୍କାଦାସ୍।” 21ଆରୁ ଇଦ୍ଘି ଲେଖା ଆସ୍ ତାମ୍ବୁ ଆରୁ ସେବାଘି ଜାମାଜିନିଷ୍ ମିଆଁ ହେଁସୁ ଛିଛ୍ଣାଚାସ୍ ଚିଚ୍ଚାସ୍। 22ଆରୁ ନିୟମ୍ଘି ଅନୁସାର୍ ଲାଗ୍ଭାଗ୍: ଜାମା ଜିନିଷ୍ବନ୍ ହେଁସୁଘି ଦ୍ୱାର୍ନୁ ଶୁଦ୍ଧ୍ କାମାକାଇ; ଆରୁ ହେଁସୁ ମା ବାହାବିକିରି ନାହ୍ମା ପାପ୍ଘି ଛେମା ମା ହାଖ୍ଖରି। 23ହୁଦ୍ଘିଲାଗାନ୍ ଜରୁରୀ ରାଇଦ୍ କା ସରଗ୍ତା ଜିନିଷ୍ ଲେଖାନିନ୍ ଇ ବଲୀଦାନ୍ଘି ଦ୍ୱାର୍ନୁ ଶୁଦ୍ଧ୍ କାମାକାଇ, ଲେକିନ୍ ସରଗ୍ନୁ କାମ୍ଚ୍କା ଜିନିଷ୍, ଇବ୍ଡ଼ାର୍ସ୍ତି ହି ବାନେ ବଲୀଦାନ୍ଘି ଦ୍ୱାର୍ନୁ ଶୁଦ୍ଧ୍ କାମାକାଇ। 24ଏନ୍ଦେର୍ଗେକା ଖ୍ରୀସ୍ତ୍ ଆ ହେଖ୍ଖାତି ବାନାବାଚ୍କା ପାବିତାର୍ ଆଡ୍ଡାସାନ୍ ଏକା ସତ୍ତୁ ପାବିତାର୍ ଆଡ୍ଡାଘି ନମୁନା ରାଇ, ଆସାନ୍ କରା ପଲ୍ଲିୟାସିନ୍, ଲେକିନ୍ ସରଗ୍ନୁନିନ୍ କର୍ଚାସ୍, ତାକା ନିହ୍ମା ଲାଗାନ୍ ଆକ୍କୁନ୍ ପାର୍ମେଶ୍ୱାର୍ସ୍କି ଆଘ୍ଲି ହାଜିର୍ ମାନସ୍। 25ଇଦ୍ ମାଲ୍ଲା କା ଆସ୍ ନିଜ୍କେନିଜ୍ବନ୍ ଜାମାବାକେନ୍ ଚାଢ଼ାବସ୍, ଏସ୍କେ କା ମାହାପୁରୋହିତ୍ସ୍ ଜାମା ବଛର୍ନୁ ଦୁସ୍ରାର୍ଘି ଲାଗାନ୍ ହେଁସୁ ହୋଇକିରି ପାବିତାର୍ ଆଡ୍ଡାସାନ୍ କର୍ଦାସ୍। 26ମାଲ୍ଲାହାଲେ ଦୁନିଆଁଘି ସୁରୁନ୍ତି ହୋଇକିରି ଆସ୍କେ ଜାମାବାକେନ୍ ଦୁଃଖୁ ସାହା ଖାତ୍ରଦ୍ନେ; ଲେକିନ୍ ଆକ୍କୁନ୍ ଯୁଗ୍ଗୁଘି ଆଖ୍ରୀନୁ ଆସ୍ ଅହ୍ନାସାରେନ୍ ପ୍ରକଟ୍ ମାନ୍ଚାସ୍, ତାକା ନିଜର୍ ବଲୀଦାନ୍ଘି ଦ୍ୱାର୍ନୁ ପାପ୍ବନ୍ ଦୁର୍ କାମ୍ଚେଇଚାସ୍। 27ଏସ୍କେ କା ଅହନ୍ ଖାଲି ଖିନା ଆରୁ ଆଦ୍ଘି ପାଛ୍ଲି ନ୍ୟାୟବନ୍ ସାମ୍ନା କାମ୍ନା ଆଲାର୍ଘି ଲାଗାନ୍ ଠାହ୍ରା କେର୍କିଚି। 28ଆନ୍ନେନିନ୍ ଖ୍ରୀସ୍ତ୍ହି ଢେର୍ ଆଲାର୍ଘି ପାପ୍ବନ୍ ଉଠାବାନାଘି ଲାଗାନ୍ ଅହନ୍ ଖାଲି ବଲୀଦାନ୍ ମାନ୍ଚାସ୍। ଆସ୍ ଦୁସ୍ରାଥର୍ ଏଥ୍ରସ୍ ପାପ୍ଘି ଲାଗାନ୍ ମାଲ୍ଲା, ବରନ୍ ଆ ଆଲାର୍ଘି ମୁକ୍ତିଘି ଲାଗାନ୍, ଏକାର୍ ଆସିନ୍ ହଖାଲ୍ନାଏ।
10ଯୀଶୁସ୍କି ସିଦ୍ଧ୍ ବଲୀଦାନ୍
1ନିୟମ୍ଘି ରୀତି ତା ବାର୍ନାବାଲା ବାନେ କାତ୍ଥାଘି ଓଁଠୁ ଏଦିଦ୍। ନିଜ୍କେ ନିଜ୍ନୁ ଆବ୍ଡ଼ା କାତ୍ଥାଦ୍ ମତ୍ଲବ୍ ମାଲ୍ଲାଦିନ୍। ହୁଦ୍ଘିଲାଗାନ୍ ଆବ୍ଡ଼ା ବଲୀଘି ଦ୍ୱାର୍ନୁ ଏକାନ୍ ବଛ୍ର୍କେ ବଛର୍ ଆନ୍ନେନିନ୍ ବଲୀ ଚାଢ଼ାବାକାଇ, ଆରାଧାନାଘି ଲାଗାନ୍ ଚାହାନୁ ବାର୍ନାବାଲାରିନ୍ ସବୁଦିନ୍ଘି ଲାଗାନ୍ ପୁରାପୁରୀ ଶିଦ୍ଧ୍ କାମା ମା କାଇ। 2ଯଦି ଆଦ୍ ଇନ୍ନୁନିନ୍ ଶକ୍ତିଶାଲୀ ରଦ୍ନେ, ତା ବଲୀବନ୍ ମୁଞ୍ଜର୍ଚର୍ନେ; ଏନ୍ଦେର୍ଗେକା ହତ୍କବାକେନ୍ ଆରାଧାନା କାମ୍ନାବାଲାର୍ ସବୁଦିନ୍ଘି ଲାଗାନ୍ ଶୁଦ୍ଧ୍ ମାନର୍କର୍ନେ ଆରୁ ଆବ୍ଡ଼ାର୍ଘି ବିବେକ୍ ଆବ୍ଡ଼ାରିନ୍ ଦୋଷୀ ମା ଠାହ୍ରଦ୍ନେ। 3ଲେକିନ୍ ଆ ବଲୀଦାନ୍ଘି ଦ୍ୱାର୍ନୁ ଜାମା ବଛର୍ ପାପ୍ଘି ମନେ କାମାକାଇ। 4ଏନ୍ଦେର୍ଗେକା ଅସମ୍ଭବ୍ ରାଇ, କା ଓୟୁ ଆରୁ ବୋକାଘି ହେଁସୁଦ୍ ଜାମା ପାପ୍ବନ୍ ଦୁର୍ କାମିଦ୍। 5ହୁଦ୍ଘିଲାଗାନ୍ ଯେତ୍କବାକେନ୍ ଯୀଶୁସ୍ ଇ ଦୁନିଆଁନୁ ବାର୍ଚ୍କାଚାସ୍ ତା ଆସ୍ ତେଙ୍କାଚାସ୍: “ନିନ୍ ବଲୀ ଆରୁ ଏନ୍ଦେର୍ହି ଦାନ୍ ମା ଚାହଁଚ୍କାଏ, ଲେକିନ୍ ଏଙ୍ଘାଲାଗାନ୍ ଅଣ୍ଟା ଶରୀର୍ ତିୟାର୍ କାମ୍ଚ୍କାଦାଏ। 6ନିନ୍ ଏକ୍ରିନ୍ ହୋମ୍ ବଲୀତି ନା ତା ପାପ୍ ବଲୀସ୍ତିନିନ୍ ଖୁସୀ ମା ମାନ୍ଚ୍କାଏ। 7ହୁଦ୍ଘିଲାଗାନ୍ ଏନ୍ ତେଙ୍କାନ୍, ପାର୍ମେଶ୍ୱାର୍ସ୍! ଏନ୍ ନିଙ୍ଘା ଇଚ୍ଛାନ୍ ପୁରା କାମାଗେ ବାର୍ଚ୍କାଦାନ୍, ଏସ୍କେ କା ପାବିତାର୍ ଶାସ୍ତ୍ରନୁ ଏଙ୍ଘା ବାରେନୁ ଲେଖ୍ଚ୍କା ରାଇ। 8ଖ୍ରୀସ୍ତ୍ସ୍ ତେଙ୍ଗ୍ଦାସ୍, କା ନିନ୍ ନା ବଲୀ, ଦାନ୍, ହୋମ୍ ବଲୀ ଆରୁ ପାପ୍ ବଲୀବନ୍ ଚାହଁଚ୍କାଏ, ଆରୁ ନା ଆତ୍ତି ଖୁସୀ ମାନ୍ଚ୍କାଏ,” ଏସ୍କେ କା ଇ ବଲୀଦାନ୍ବଦ୍ ନିୟମ୍ ଶାସ୍ତ୍ରଘି ଲେଖା ଚାଢ଼ାବାକାଇ। 9ଆସ୍ ଇବନ୍ହି ତେଙ୍ଗ୍ଦାସ୍, “ଏରା, ଏନ୍ ବାର୍ଚ୍କାନ୍ କେର୍କାଦାନ୍, ତାକା ନିଙ୍ଘା ଇଚ୍ଛାନ୍ ପୁରା କାମନ୍,” ଆସ୍ ପହ୍ଲେବନ୍ ହାଟାବାଦାସ୍ ଚିଦାସ୍, ତାକା ଦୁସ୍ରାସିନ୍ ଆସ୍କି ଆଡ୍ଡାନୁ ଅନ୍ଦ୍ରା ଅଙ୍ଗସ୍। 10ଯୀଶୁ ଖ୍ରୀସ୍ତ୍ସ୍କି ଶରୀର୍ବନ୍ ଅହ୍ନାସାରେନ୍ ବଲୀ ଚାଢ଼ାବାନାଘି ଲାଗାନ୍ ନାମ୍ ପାର୍ମେଶ୍ୱାର୍ସ୍କି ଇଚ୍ଛାଘି ଲେଖା ପାବିତାର୍ ମାନ୍ଚ୍କାତ୍ କେର୍କାଦାତ୍। 11ହାରେକ୍ ଅଣ୍ଟା ପୁରୋହିତ୍ ଇଲିକିରି ଆନ୍ନେନିନ୍ ବଲୀ ସବୁଦିନ୍ ଦାନ୍ ଚାଢ଼ାବାଦାସ୍, ଏକାଦ୍ ପାପ୍ବନ୍ ଏକ୍ଲାହି ଦୁର୍କାମା ପଲ୍ଲିଦିନ୍। 12ଲେକିନ୍ ଆସ୍ତା ପାପ୍ଘି ବାଦ୍ଲା ଅଣ୍ଟା ବଲୀବନ୍ ସବୁଦିନ୍ଘି ଲାଗାନ୍ ଚାଢ଼ାବାଇକିରି ପାର୍ମେଶ୍ୱାର୍ସ୍କି ତିନାତାରା କାଇକିରି ଅକ୍କିୟାସ୍। 13ଆରୁ ଆ ସାମାୟନ୍ତି ଆସ୍ ଆସିନ୍ ହଖାଲିୟାସ୍ କା ଆସ୍କି ଦୁଶ୍ମାନ୍ ଜାମାରିନ୍ ଆସ୍କି ଅଧିନ୍ନୁ କାମଚସ୍। 14ଏନ୍ଦେର୍ଗେକା ଆସ୍ ଏକା ଆଲାରିନ୍ ପାବିତାର୍ କାମ୍ଦାସ୍, ଆସ୍ ଆବ୍ଡ଼ାରିନ୍ ଅଣ୍ଟା ଖାଲି ବଲୀ ଦ୍ୱାର୍ନୁ ସବୁଦିନ୍ଘି ଲାଗାନ୍ ପୁରାପୁରୀ ଶିଦ୍ଧ୍ କାମ୍ଚେଇଚାସ୍। 15ହୁଦ୍ଘିଲାଗାନ୍ ପାବିତାର୍ ଆତ୍ମାହି ନାମାନ୍ ସାକ୍ଷୀ ଚିଇ। ପହ୍ଲେ ଆଦ୍ ତେଙ୍ଗି। 16ପ୍ରାଭୁସ୍ ଇ ତେଙ୍ଗ୍ଦାସ୍, ଏନ୍ ଆବ୍ଡ଼ାର୍ଘି ଲାଗାନ୍ ଇ ନିୟମ୍ କାମନ୍। ଏନ୍ ନିଜର୍ ନିୟମ୍ଗୁଠିନ୍ ଆବ୍ଡ଼ାର୍ଘି ମନ୍ନୁ ଉଇୟନ୍ଚନ୍, ଆରୁ ଏନ୍ ଆବନ୍ ଆବ୍ଡ଼ାର୍ଘି ଜୀଆନୁ ଲେଖନ୍ଚନ୍। 17ଆରୁ ଇଦ୍ଘି ପାଛ୍ଲି ଆସ୍ ଆରୁଅହନ୍ ତେଙ୍ଗ୍ଦାସ୍ ଏନ୍ ଆବ୍ଡ଼ାର୍ଘି ପାପ୍ ଆରୁ ଦୋଷ୍ବନ୍ ମନେ ହି ମା ଉଇୟନ୍। 18ଯେତ୍କବାକେନ୍ ପାପ୍ ଛେମା କାମା ଚିଆ କେର୍କିଚି, ତା ଆରୁଅହନ୍ ନିହ୍ମା ଲାଗାନ୍ ବଲୀଘି ଦାର୍କାର୍ ମାଲ୍ଲାଦିନ୍।
ନାମ୍ ପୁରାପୁରୀ ବିଶ୍ୱାସ୍ତି ପାର୍ମେଶ୍ୱାର୍ସ୍କି ଚାହାନୁ କତ୍
19ହୁଦ୍ଘିଲାଗାନ୍ ହେ ଭାଇ ଆରୁ ବୁହୁଣୀ ଜାମାରୋ, ଏନ୍ଦେର୍ଗେକା ଯୀଶୁସ୍କି ହେଁସୁଘି ଦ୍ୱାର୍ନୁ ଆ ପୁନା ଆରୁ ଜୀବିତ୍ ପାବୁନ୍ତି ନାମାଗେ ଆ ମାହାପାବିତାର୍ ଆଡ୍ଡାନୁ କରାଗେ ସାହସ୍ ମାନ୍ଚାକେର୍କିଚି। 20ଆସ୍ ନାହ୍ମାଲାଗାନ୍ ଅଣ୍ଟା ପୁନା ଜୀବନ୍ଘି ପାବୁ ଖୋଲ୍ଚେଚ୍କାଦାସ୍, ଏକାର୍ ଆସ୍କି ଶରୀର୍ ରୂପି ପାର୍ଦାସ୍ତି ପାର୍ ମାନିକିରି କାନାଏ। 21ଆରୁ ହୁଦ୍ଘିଲାଗାନ୍ ନାହ୍ମାଏ ଏନ୍ନେ ମାହାପୁରୋହିତ୍ ରାଦାସ୍, ଏକାସ୍ କା ପାର୍ମେଶ୍ୱାର୍ସ୍କି ଆଡ଼୍ପାନ୍ତା ଆଲାରିନ୍ ଶାସନ୍ କାମୁସ୍। 22ହୁଦ୍ଘିଲାଗାନ୍ ନାମ୍ ନିଜର୍ ଜୀଆବନ୍ ପାପ୍ଘି ଦୋଷ୍ତି ମୁକ୍ତି କାମିକିରି ଆରୁ ନିଜର୍ ଶରୀର୍ବନ୍ ସାଫା ଆମ୍ମୁତି ନଣୀକିରି ବିନାକପଟ୍ ଜୀଆତି ମତ୍ଲବ୍ ପୁରାପୁରୀ ବିଶ୍ୱାସ୍ଘି ସାଙ୍ଗେ ପାର୍ମେଶ୍ୱାର୍ସ୍କି ଚାହାଗେ କତ୍। 23ଆକ୍କୁନ୍ ନାମ୍ ଏନ୍ଦେର୍ହି ଶାକ୍ ମା କାମିକିରି ନିଜର୍ ଆ ଆଶ୍ରାନୁ ମଜ୍ବୁତ୍ ରତ୍, ଏକାସିନ୍ ନାମ୍ ଗ୍ରହନ୍ କାମ୍ଚ୍କାଦାତ୍ ଏନ୍ଦେର୍ଗେକା ଏକାସ୍ କାତ୍ଥା ଚିଚ୍ଚକାଦାସ୍, ଆସ୍ ବିଶ୍ୱାସ୍ଘି ଲାଇଗ୍ ରାଦାସ୍। 24ଆରୁ ବାନେ ହାଖ୍ଖନାନୁ, ଆରୁ ବାନେ ନାଲ୍ଖୁନୁ ଦୁସ୍ରାରିନ୍ ବାଢ଼ାବାଗେ ଲାଗାନ୍ ଏକ୍ ଦୁସ୍ରାର୍ଘି ଚିନ୍ତା କାମତ୍। 25ଏସ୍କେ କା ଢେର୍ ଆଲାର୍ କାମ୍ନାଏ, ହନ୍ନେନ୍ ନିମ୍ହି ପାର୍ମେଶ୍ୱାର୍ସ୍କି ଆରାଧାନା କାମାଗେ ଏକ୍ ଦୁସ୍ରାର୍ଗାନେ ମଣ୍ଡ୍ଲୀନୁ ଠୁଡ଼ିୟାରାଗେ ଆମା ଆମ୍ବା, ଲେକିନ୍ ଏକ୍ ଦୁସ୍ରାରିନ୍ ବୁଝାବାତେ ରର୍, ଆରୁ ଏସ୍କେ ପ୍ରାଭୁସ୍କି ଉଲ୍ଲାବନ୍ ଚାହାନୁ ବାର୍ନାନ୍ ଏରର୍, ଆନ୍ନେନିନ୍ ଆରୁହି ବାଗ୍ଗେ ଇବନ୍ କାମ୍ତେ ରର୍।
ଖ୍ରୀସ୍ତ୍ତି ଗେଚ୍ଛା ଆମାକାଲା
26ସତ୍ତୁଘି ବୁଦ୍ଧି ହାଖ୍ଖନାଘି ପାଛ୍ଲି ହି ଯଦି ନାମ୍ ଆହିବୁଝ୍ରିକିରି ପାପ୍ କାମ୍ତେ ରାଦାତ୍, ତା ପାପ୍ଘି ଲାଗାନ୍ ଏନ୍ଦେର୍ହି ବଲୀ ମା ରାଇକାଇଦ୍। 27ବରନ୍ ଆରୁଅହନ୍ ନ୍ୟାୟଘି ଭାୟାନାକ୍ ଦଣ୍ଡ୍ଘି ଆଶ୍ରା ଆରୁ ଢେର୍ ଚିଚ୍ଚୁଘି ସେକ୍ନାଦ୍ ରାଇକାଇଦ୍, ଏକାଦ୍ ପାର୍ମେଶ୍ୱାର୍ସ୍କି ଦୁଶ୍ମାନ୍ ଜାମାରିନ୍ ନାଶ୍ କାମଚୋ। 28ଯେତ୍କବାକେନ୍ ମୁଶାସ୍କି ନିୟମ୍ବନ୍ ମା ମାନ୍ନାବାଲା ଦୁଇ ଚାହେ ତିନ୍ ଲୋକ୍ ଆଲାର୍ଘି ସାକ୍ଷୀତି, ବିନା ଦାୟାତି ପିଟା ଚିଆକାଇ। 29ତା ନିମ୍ ବିଚାର୍ କାମା କା ଏକା ଆଲାସ୍ ପାର୍ମେଶ୍ୱାର୍ସ୍କି ହାଦ୍ଦୁସ୍କି ମାଇନ୍ ମା କାମ୍ଦାସ୍, ଆସ୍ ନିୟମ୍ଘି ଆ ହେଁସୁନ୍ ହାଁଣ୍ଦାସ୍, ଏକାସ୍କି ଦ୍ୱାର୍ନୁ ଆସିନ୍ ପାବିତାର୍ କାମା କେର୍କିଚା, ଆରୁ କ୍ରିପାଘି ଆତ୍ମାବନ୍ ବେଇଜ୍ଜତି କାମ୍ଦାସ୍, ଏନ୍ନେ ଆଲାସିନ୍ ଆରୁହି କେତ୍କ ଭାୟାନାକ୍ ଦଣ୍ଡ୍ଘି ଲାଇଗ୍ ବୁଝ୍ରାକୋ। 30ଏନ୍ଦେର୍ଗେକା ନାମ୍ ପାର୍ମେଶ୍ୱାର୍ସିନ୍ ଆହ୍ଦାତ୍, ଆସ୍ ଆରୁହି ତେଙ୍ଗିୟାସ୍, “ବାଦ୍ଲା ହୋନାଦ୍ ଏଙ୍ଘା ନାଲ୍ଖୁଦ୍, ଏନ୍ନିନ୍ ଦଣ୍ଡ୍ ଚିୟନ୍” ଆରୁଅହନ୍ ଇଦ୍ କା ପ୍ରାଭୁସ୍ ନିଜର୍ ଆଲାର୍ଘି ନ୍ୟାୟ କାମସ୍। 31ଜୀବିତ୍ ପାର୍ମେଶ୍ୱାର୍ସ୍କି ହେଖ୍ଖାନୁ ଖାତ୍ର୍ନା ଭାୟାନାକ୍ କାତ୍ଥାଦ୍। 32ନିମ୍ ଆ ବିତ୍ର୍କା ଉଲ୍ଲାବନ୍ ମନେ କାମା ଯେତ୍କବାକେନ୍ ନିମ୍ ବିଲ୍ଲୀ ହାଖ୍ଖର୍ନାଘି ପାଛ୍ଲି, ଦୁଃଖୁଘି ବାଡ଼୍କା ଝାମେଲାବନ୍ ସାମ୍ନା କାମ୍ତେ ହି ମଜ୍ବୁତ୍ ରାଚ୍କାର୍। 33ହତ୍କବାକେନ୍ ତା ଜାମା ଆଲାର୍ଘି ଆଘ୍ଲି ନିଙ୍ଗାନ୍ ବେଇଜ୍ଜତି କାମାକେରା ଆରୁ ସାତାବା କେରା ଆରୁ ଏକ୍ଲାହି ନେଖାଗାନେ ଏନ୍ନେ ବେଭାର୍ କାମା କାଲିୟାଦ୍, ନିନ୍ ଆବ୍ଡ଼ାରିନ୍ ସାଥ୍ ଚିଚ୍ଚକାଏ। 34ଏନ୍ଦେର୍ଗେକା ନିନ୍ କାଇଦୀ ଜାମାର୍ଘି ଦୁଃଖୁନୁହି ଦୁଃଖୁ ମାନ୍ଚ୍କାଏ, ଆରୁ ନିଜର୍ ଧାନ୍ନୁବନ୍ ହି ଖୁସୀତି ହୁଆଗେ ଚିଚ୍ଚକାଏ; ଇବନ୍ ଆହିକିରି, କା ନିଙ୍ଘାସାନ୍ ଅଣ୍ଟା ଆରୁହି ବାନେ ଆରୁ ସବୁଦିନ୍ଘି ଲାଗାନ୍ ରାନାବାଲା ଧାନ୍ନୁ ରାଇ। 35ପୁରାପୁରୀ ଫଲ୍ ହାଖ୍ଖନାଘି ଲାଗାନ୍ ନିମ୍ ନିଜର୍ ଭାର୍ଷାବନ୍ ମା ଆମ୍ୱର୍। 36ନିମାଗେ ଧିରାଜ୍ଘି ଦାର୍କାର୍ ରାଇ ତାକା ନିମ୍ ଯେତ୍କବାକେନ୍ ପାର୍ମେଶ୍ୱାର୍ସ୍କି ଇଚ୍ଛାବନ୍ ପୁରା କାମା ଅଙ୍ଗର୍ ତା ଏକାସ୍କି ବଚନ୍ବନ୍ ଆସ୍ ଚିଚ୍କାଦାସ୍, ଆବନ୍ ନିମ୍ ହାଖ୍ଖା ଅଙ୍ଗର୍। 37ଏନ୍ଦେର୍ଗେକା ଆକ୍କୁନ୍ ଢେଏରିନ୍ ଥୋଡ଼େ ସାମାୟ ରାଚାକେର୍କିଚି, ଯେତ୍କବାକେନ୍ ବାର୍ନାବାଲାସ୍ ବାରସ୍, ଆରୁ ଦେରି ମା କାମସ୍। 38ଆରୁ ଏଙ୍ଘାଏ ପାର୍ମେଶ୍ୱାର୍ସ୍କି ନଜର୍ନୁ ନେଦ୍ ନିର୍ଦ୍ଦୋଷ୍ ଠାହ୍ରା ରାଚ୍କାନାଏ ଆବ୍ଡ଼ା ଆଲାର୍ ବିଶ୍ୱାସ୍ତି ଜୀବିତ୍ ରର୍, ଆରୁ ଯଦି ନେରିନ୍ ପାଛ୍ଲି କିର୍ରର୍କର୍ ତା ଏଙ୍ଘା ମନ୍ ଆସ୍ତି ଖୁସୀ ମା ମାନ। 39ଲେକିନ୍ ନାମ୍ ଆବ୍ଡ଼ା ଆଲାର୍ଘି ଲେଖା ମାଲ୍ଦାତ୍ ଏକାର୍ ପାଛ୍ଲି କିର୍ନାଏ ଆରୁ ନାଶ୍ ମାନ୍ନାଏକାନାଏ, ବରନ୍ ନାମ୍ ଆବ୍ଡ଼ାର୍ ଲେଖା ରାଦାତ୍ ଏକାର୍ ବିଶ୍ୱାସ୍ କାମ୍ନାଏ ଆରୁ ମୁକ୍ତି ହାଖ୍ଖନାଏ।
11ବିଶ୍ୱାସ୍ଘି ନମୁନା
1ଆକ୍କୁନ୍ ବିଶ୍ୱାସ୍ତି ଆଶ୍ରା କାମ୍ଚ୍କା ଜିନିଷ୍ଦ୍ ଜରୁର୍ ରାଇ ଆରୁ ମା ଏର୍କା ଜିନିଷ୍ଘି ସାବୁତ୍ ହି ରାଇ। 2ହୁଦ୍ଘିଲାଗାନ୍ ଆଘ୍ଲି ସାମାୟନ୍ତି ପୁର୍ଖାର୍ଗେ ପାର୍ମେଶ୍ୱାର୍ସ୍କି ମାଇନ୍ ହାଖ୍ଖର୍କିଚା। 3ବିଶ୍ୱାସ୍ତିନିନ୍ ନାମ୍ ଆହ୍ଦାତ୍ କା ଜାମା ଦୁନିଆଁଘି ସୃଷ୍ଟି ପାର୍ମେଶ୍ୱାର୍ସ୍କି ବଚନ୍ନ୍ତି ମାନ୍ଚ୍କିଚି ଇଦ୍ ମାଲ୍ଲା କା ଏନ୍ଦ୍ରିନ୍ ଏଥ୍ରିଦ୍, ଆଦ୍ ଏର୍କା ଜିନିଷ୍ତି ମାନ୍ଚ୍କିଚି।
4ହାବିଲ୍ସ୍ ବିଶ୍ୱାସ୍ଘି ଲାଗାନ୍ନିନ୍ ପାର୍ମେଶ୍ୱାର୍ସ୍କେ କାଇନ୍ସ୍ତି ହି ବାନେ ଦାନ୍ ଚାଢ଼ାବାଚ୍କାଚାସ୍। ବିଶ୍ୱାସ୍ଘି ଲାଗାନ୍ହି ଆସ୍କେ ଅଣ୍ଟା ଧାର୍ମି ଆଲାସ୍କି ରୂପ୍ନୁ ହତ୍କବାକେନ୍ ମାଇନ୍ ହାଖ୍ଖର୍କିଚା ଯେତ୍କବାକେନ୍ ପାର୍ମେଶ୍ୱାର୍ସ୍ ଆସ୍କି ଦାନ୍ବନ୍ ଗ୍ରହନ୍ କାମ୍ଚାସ୍। ଆରୁ ବିଶ୍ୱାସ୍ଘି ଲାଗାନ୍ନିନ୍ ଆସ୍ ଖିଇକିରି ହି ଆକ୍କୁନ୍ତକ୍ କାତ୍ଥା କାମ୍ଦାସ୍। 5ବିଶ୍ୱାସ୍ତି ହି ହନୋକ୍ସିନ୍ ମିଆଁ ଉଠାବାକେରା କା ମରନ୍ବନ୍ ମାଲ୍ଲା ଏରୁସ୍, ଆରୁ ଆସ୍କି ପାତା ମା ହାଖ୍ଖରା, ଏନ୍ଦେର୍ଗେକା ପାର୍ମେଶ୍ୱାର୍ସ୍ ଆସିନ୍ ମିଆଁ ଉଠାବାଚ୍କାଚାସ୍, ଆରୁ ଆସିନ୍ ଉଠାବାନାଘି ପହ୍ଲେ ଆସ୍କି ବାରେନୁ ଇ ତେଙ୍ଗାକେର୍କିଚା, କା ଆସ୍ ପାର୍ମେଶ୍ୱାର୍ସିନ୍ ଖୁସୀ କାମ୍ଚ୍କାଚାସ୍। 6ବିଶ୍ୱାସ୍ ବିନା ଆସିନ୍ ଖୁସୀ କାମ୍ନା ଅସମ୍ଭବ୍ ରାଇ, ଏନ୍ଦେର୍ଗେକା ପାର୍ମେଶ୍ୱାର୍ସ୍କି ଚାହାନୁ ବାର୍ନାବାଲାର୍ଗେ ବିଶ୍ୱାସ୍ କାମ୍ନା କାତ୍ଥା କା ଆସ୍ ରାଦାସ୍ ଆରୁ ନିଜର୍ ବାନେ ହାଖ୍ଖନାବାଲାର୍ଗେ ଫଲ୍ ଚିଦାସ୍। 7ବିଶ୍ୱାସ୍ତି ନୁଆସ୍ ଆ କାତ୍ଥାଘି ବାରେନୁ ଏକାଦ୍ ଆ ସାମାୟନୁ ମା ଏଥ୍ରାଲାଦ୍, ପାର୍ମେଶ୍ୱାର୍ସ୍ତି ଚେତାବାନୀ ହାଖ୍ଖୀକିରି ଆଦର୍ଘି ସାଙ୍ଗେନ୍ ନିଜର୍ ପରିବାର୍ବନ୍ ବାଛାବାଗେ ଲାଗାନ୍ ଜାହାଜ୍ ତିୟାର୍ କାମ୍ଚାସ୍, ଆରୁ ଆସ୍କି ଦ୍ୱାର୍ନୁ ଆସ୍ ଦୁନିଆଁବନ୍ ଦୋଷୀ ଠାହ୍ରାଚାସ୍, ଆରୁ ଆସ୍ ଆ ଧାର୍ମିକ୍ତାଘି ହକ୍ଦାର୍ ମାନ୍ଚାସ୍, ଏକାଦ୍ ବିଶ୍ୱାସ୍ତି ମାନିଦ୍। 8ବିଶ୍ୱାସ୍ଘି ଲାଗାନ୍ ଆବ୍ରାହାମ୍ସ୍ ପାର୍ମେଶ୍ୱାର୍ସ୍କି ଆଦେଶ୍ବନ୍ ଗ୍ରହନ୍ କାମ୍ଚାସ୍ ଆରୁ ଇବନ୍ ମା ଆହ୍ତେ ହୁଏ ହି ଆସ୍ ଏକାତାରା କାଲ୍ଦାସ୍, ଆସ୍ ଆଦେଶ୍ ତାରା କେରାସ୍, ଏକାଘି କା ଆସ୍ ହକ୍ଦାର୍ ମାନ୍ନାବାଲା ରାଚାସ୍। 9ବିଶ୍ୱାସ୍ଘି ଲାଗାନ୍ ଆସ୍ ପର୍ଦେଶୀୟାର୍ଘି ଲେଖା ଚିଚ୍କା କାତ୍ଥାଘି ଦେଶ୍ନୁ ରାଚାର୍ କେରାର୍ ଆରୁ ଆସାନ୍ ଇସାକ୍ ଆରୁ ୟାକୁବ୍ସ୍କି ସାଙ୍ଗେନ୍, ଏକାର୍ ଅଣ୍ଟାଇନ୍ ଚିଚ୍କା କାତ୍ଥାଘି ହକ୍ଦାର୍ ରାଚାର୍, ଆରୁ ତାମ୍ବୁନୁ ରାଗେ ଲାଗ୍ଗିୟାର୍। 10ଏନ୍ଦେର୍ଗେକା ଆସ୍ ଆ ପାକ୍କା ନାହିଗାଡ୍ଡି ବାଲା ନଗର୍ବନ୍ ହଖାଲିୟାସ୍, ଏକାଘି ଗଠନ୍ କାମ୍ନାବାଲା ଆରୁ ତିୟାର୍ କାମ୍ନାବାଲା ପାର୍ମେଶ୍ୱାର୍ସ୍ ରାଦାସ୍। 11ବିଶ୍ୱାସ୍ତି ସାରାଦ୍ ପାଚ୍ଚ ମାନ୍ତେ ହୁଏ ହି ଗରଭ୍ ମାନ୍ନାଘି ଶକ୍ତି ହାଖ୍ଖୀୟାଦ୍; ଏନ୍ଦେର୍ଗେକା ଆସ୍କି ବିଚାର୍ଦ୍ ଇଦ୍ ରାଚା କା ଏକାସ୍ କାତ୍ଥା ଚିଚ୍କାଚାସ୍, ଆସ୍ ସତ୍ତୁ ରାଚାସ୍। 12ହୁଦ୍ଘିଲାଗାନ୍ ଅଣ୍ଟା ଆଲାର୍ସ୍ତି ଚାହେ ଆବ୍ରାହାମ୍ସ୍ ଏକାସ୍ କେଚ୍ଚକା ଆଲାସ୍ ଲେଖା ରାଚାସ୍, ଆକାଶ୍ଘି ବିନ୍କୋ ଆରୁ ସାମ୍ଧୁର୍ ଖାଁଣିଘି ଚାଲ୍କ୍ରି ଲେଖା, ଗଣା ପଲ୍ଲନା ବାଉଁଶାର୍ ମାନ୍ଚାର୍।
13କାତ୍ଥା ଚିଚ୍ଚକା ଫଲ୍ବନ୍ ବିନା ହାଖ୍ଖୀକିରି ଆବ୍ଡ଼ାର୍ଜାମାର୍ ବିଶ୍ୱାସ୍ କାମିକିରି କେଚ୍ଚାର୍ କେରାର୍। ଆବ୍ଡ଼ାର୍ ଆବନ୍ ଗେଚ୍ଛାନ୍ତି ଏରିୟାର୍ ଆରୁ ଆଦ୍ଘି ସ୍ୱାଗାତ୍ କାମ୍ଚାର୍। ଆବ୍ଡ଼ାର୍ ନିଜ୍କେବନ୍ ଦୁନିଆଁନୁ ପର୍ଦେଶୀୟା ଆରୁ ବାହାରିଆ ସୋଚ୍ଚିୟାର୍। 14ଆବ୍ଡ଼ା ଆଲାର୍ ଏକାର୍ ଏନ୍ନେ କାତ୍ଥା ତେଙ୍ଗ୍ନାଏ, ଆବ୍ଡ଼ାର୍ ଇବନ୍ ଏଦ୍ନାଏ କା ଆବ୍ଡ଼ାର୍ ଅଣ୍ଟା ଏନ୍ନେ ଦେଶ୍ବନ୍ ବେଦ୍ଦାଗେ ଲାକ୍କାନାଏ ଏକାଦ୍ ଆବ୍ଡ଼ାର୍ଘି ନିଜରଦ୍। 15ଆରୁ ଏକା ଦେଶ୍ତି ଆବ୍ଡ଼ାର୍ ଉର୍ଖିକିରି ବାର୍ଚ୍କାଚାର୍, ଯଦି ଆଦ୍ଘି ବାରେନୁ ସୋଚର୍ନେ ତା ଆବ୍ଡ଼ାର୍ଗେ କିର୍ନା କାନାଘି ସୁଯୋଗ୍ ରାଚା। 16ଲେକିନ୍ ଆବ୍ଡ଼ାର୍ ଅଣ୍ଟା ବାନେ ମତ୍ଲବ୍ ସରଗ୍ ଦେଶ୍ତା ଇଚ୍ଛା ରାଇ, ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍ ଆବ୍ଡ଼ାର୍ଘି ପାର୍ମେଶ୍ୱାର୍ସ୍ ତେଙ୍ଗ୍ନାନୁ ଆବ୍ଡ଼ାର୍ସ୍ତି ମା ଲାଜରାସ୍, ତା ଆସ୍ ଆବ୍ଡ଼ାର୍ଘି ଲାଗାନ୍ ଅଣ୍ଟା ସହର୍ ତିୟାର୍ କାମ୍ଚାସ୍।
17ବିଶ୍ୱାସ୍ତିନିନ୍ ଆବ୍ରାହାମ୍ସିନ୍ ଯାଞ୍ଚ କାମ୍ନା ସାମାୟନୁ ଇସାକ୍ସିନ୍ ବଲୀ ଚାଢ଼ାବାଚାସ୍, ହଁ, ଏକା ଆଲାସ୍ କାତ୍ଥା ଚିଚ୍କାବନ୍ ହାକ୍କାଚାସ୍, ଏକାରିନ୍ ତେଙ୍ଗାକେର୍କିଚା କା। 18ଆରୁ ଏକାସିନ୍ ଇ ତେଙ୍କାଚାସ୍, କା ଇସାକ୍ତି ନିଙ୍ଘା ବାଉଁଶା ତେଙ୍ଗାକୋ; ଆସ୍ ନିଜର୍ ପହ୍ଲେ ହାଦ୍ଦୁସିନ୍ ବଲୀଦାନ୍ ଚାଢ଼ାବାଗେ ଲାଗ୍ଗିୟାସ୍। 19ଏନ୍ଦେର୍ଗେକା ଆବ୍ରାହାମ୍ସ୍ ବିଚାର୍ କାମ୍ଚାସ୍, କା ପାର୍ମେଶ୍ୱାର୍ସ୍ ଶକ୍ତିଶାଲୀ ରାଦାସ୍, କା କେଚ୍ଚକାସ୍ତି ଆରୁଅହନ୍ ଉଜ୍ଜତାଦାସ୍ ଏସ୍କେ ଆବ୍ରାହାମ୍ସ୍କେ ଇସାକ୍ସ୍ ଆରୁଅହନ୍ ହାଖ୍ଖର୍ଦାସ୍। 20ବିଶ୍ୱାସ୍ଘି ଲାଗାନ୍ ଇସାକ୍ସ୍ ୟାକୁବ୍ ଆରୁ ଏଷୋବ୍ସିନ୍ ଭବିଷତ୍ଘି ଲାଗାନ୍ ଆଶିଷ୍ ଚିଚ୍ଚାସ୍। 21ବିଶ୍ୱାସ୍ତିନିନ୍ ୟାକୁବ୍ସ୍ ଖିନା ସାମାୟନୁ ଯୋଷେଫ୍ସ୍କି ଯୋଡ଼େ ହାଦ୍ଦୁର୍ସ୍ତି ଅର୍ତୁ ଅର୍ତୁରିନ୍ ଆଶିଷ୍ ଚିଚ୍ଚାସ୍, ଆରୁ ନିଜର୍ ଠେଙ୍ଗାଘି ସାହାରା ହୋଇକିରି କୁକ୍କୁ ନୁହିଁକିରି ପାର୍ମେଶ୍ୱାର୍ସ୍କି ଆରାଧାନା କାମ୍ଚାସ୍। 22ବିଶ୍ୱାସ୍ତିନିନ୍ ଯୋଷେଫ୍ସ୍, ନିଜର୍ ଖିନା ସାମାୟନୁ ଇସ୍ରାଏଲ୍ ଜାମାରିନ୍ ମିଶର୍ତି ଅଥ୍ର୍ନାଘି ବାରେନୁ ତେଙ୍ଗିୟାସ୍, ଆରୁ ନିଜର୍ ହଁଚଲ୍ଘି ବାରେନୁ ହୁକୁମ୍ ଚିଚ୍ଚାସ୍।
23ବିଶ୍ୱାସ୍ତିନିନ୍ ମୁଶାସ୍କି ଆୟାଙ୍ଗ୍ ବାଙ୍ଗ୍ର୍ ଆସିନ୍ ଜନମ୍ ମାନ୍ନାଘି ପାଛ୍ଲି ତିନ୍ ମାହିନାତକ୍ ନୁଡ଼ିକିରି ଉଇୟାର୍; ଏନ୍ଦେର୍ଗେକା ଆବ୍ଡ଼ାର୍ ଏରିୟାର୍, ତା ଆସ୍ ସାଧାରନ୍ ହାଦ୍ଦୁ ମାଲ୍ଲାରୁସ୍ ଆରୁ ଆବ୍ଡ଼ାର୍ ରାଜାସ୍କି ହୁକୁମ୍ତି ମା ଏଲ୍ଚିୟାର୍। 24ବିଶ୍ୱାସ୍ତିନିନ୍ ମୁଶାସ୍ ବାଡ଼୍କା ମାନ୍ଚ୍କା ପାଛ୍ଲି ଫାରୋସ୍କି କୁକାଏ ହାଦ୍ଦୁଘି ହାଦ୍ଦୁ ମାନାଗେ ଗ୍ରହନ୍ ମା କାମ୍ଚାସ୍। 25ହୁଦ୍ଘିଲାଗାନ୍ ମୁଶାସ୍ ପାପ୍ନୁ ଥୋଡ଼େ ଉଲ୍ଲା ସୁଃଖୁଘି ଖୁସୀ ଲାଗାନ୍ ପାର୍ମେଶ୍ୱାର୍ସ୍କି ଆଲାର୍ ଗାନେ ଦୁଃଖୁ ସାହ୍ନା ବାନେ ଲାଗ୍ଗିୟା। 26ମୁଶାସ୍ ଖ୍ରୀସ୍ତ୍ସ୍କି ଲାଗାନ୍ ବେଜ୍ଜତି ସାହାଗେ ମିଶର୍ଘି ଦେଶ୍ତା ଧାନ୍ନୁତି କେତ୍କ ବାଗ୍ଗେ ମୂଲ୍ୟବାନ୍ ବୁଝ୍ରାସ୍ ଏନ୍ଦେର୍ଗେକା ଆସ୍ ନିଜର୍ ଫଲ୍ ହାଖ୍ଖାଗେ ପାବୁ ଏରାଲିୟାସ୍। 27ବିଶ୍ୱାସ୍ତିନିନ୍ ମୁଶାସ୍ ମିଶର୍ ଦେଶ୍ବନ୍ ଆମ୍ବେଇଚାସ୍। ଆସ୍ ରାଜାସ୍କି ଖୀସ୍ତି ମା ଏଲ୍ଚିୟାସ୍, ବରନ୍ ମଜ୍ବୁତ୍ ମାନିକିରି ରାଚାସ୍, ସୋଚା କା ମା ଏଥ୍ର୍ନାବାଲା ପାର୍ମେଶ୍ୱାର୍ସିନ୍ ଏରାଲିୟାସ୍। 28ବିଶ୍ୱାସ୍ତିନିନ୍ ଆସ୍ ପାସ୍କାପରବ୍ ଆରୁ ହେଁସୁ ଛିଟ୍କାନାଘି ନିୟମ୍ବନ୍ ମାନ୍ଚାସ୍, ତାକା ମିଶର୍ ଦେଶ୍ତା ପହ୍ଲେ ହାଦ୍ଦୁସିନ୍ ପିଟ୍ଟନା ବାଲା ଦୂଁତ୍, ଇସ୍ରାଏଲ୍ର୍ଘି ପହ୍ଲେ ହାଦ୍ଦୁରିନ୍ ଏସ୍ରାତକ୍ ପଲ୍ଲର୍। 29ବିଶ୍ୱାସ୍ତିନିନ୍ ଆବ୍ଡ଼ାର୍ ଲାଲ୍ ସାମ୍ଧୁର୍ ମାନିକିରି ଏସ୍କେ କା ହାଏକା ହେଁହ୍ଲାନୁ ପାର୍ ମାନ୍ଚାର୍ ଆରୁ ଯେତ୍କବାକେନ୍ ମିଶର୍ତା ଆଲାର୍ ଆନ୍ନେନିନ୍ କାମାଗେ କୋଶିଷ୍ କାମ୍ଚାର୍ ତା ଆବ୍ଡ଼ାର୍ ମୁହ୍ଲିଆର୍ କେଚ୍ଚାର୍ କେରାର୍। 30ବିଶ୍ୱାସ୍ତିନିନ୍ ଯେରିଖୋ ସହର୍ଘି ଚାରିପାଖାନ୍ତା ଘେରାଦ୍ ଧାସ୍କାରା କେରା, ଯେତ୍କବାକେନ୍ ଇସ୍ରାଏଲ୍ ଜାମାର୍ ସାତ୍ ଦିନ୍ନୁ ସାତ୍ଥର୍ ଆଦ୍ଘି ପାଖା କିନ୍ଦ୍ରା ରାଚ୍କାଚାର୍। 31ବିଶ୍ୱାସ୍ଘି କାରଣ୍ ରାହାବ୍ ନାମେଘି ରାଣ୍ଡିବାଜି ଆଲିଦ୍ ଅବିଶ୍ୱାସୀ ଜାମାର୍ଗାନେ ନାଶ୍ ମାଲ୍ଲାମାନୁ, ଏନ୍ଦେର୍ଗେକା ଆଦ୍ ଯାଞ୍ଚ କାମୁ ଆଲାର୍ଘି ସ୍ୱାଗାତ୍ କାମ୍ଚ୍କିଚା। 32ଆକ୍କୁନ୍ ଏନ୍ ବାଗ୍ଗେ ଆରୁ ଏନ୍ଦେର୍ ତେଙ୍ଗନ୍। ଗିଦିୟନ୍, ବାରାକ୍, ଶିମ୍ସନ୍, ଯେଫଥା, ଦାଉଦ୍, ଶାମୁଏଲ୍ ଆରୁ ଆ ନାବୀଜାମାର୍ଘି ଚାର୍ଚା କାମ୍ନାଘି ଏଙ୍ଘାସାନ୍ ସାମାୟ ମାଲ୍ଲାଦିନ୍। 33ଇବ୍ଡ଼ାର୍ ବିଶ୍ୱାସ୍ଘି ଦ୍ୱାର୍ନୁ ରାଜୀନ୍ ଜିତ୍ୟାର୍, ବାନେ ନାଲ୍ଖୁ କାମ୍ଚାର୍, କାତ୍ଥା ଚିଚ୍ଚକାଘି ଫଲ୍ ହାଖ୍ଖୀୟାର୍, ଡୁକ୍କା ଜାମାର୍ଘି ଥୁମ୍ଣାନ୍ ବନ୍ଦ୍ କାମ୍ଚେଇଚାର୍। 34ବିଶ୍ୱାସ୍ତିନିନ୍ ଆରୁ ଲାଘ୍ର୍ନା ଚିଚ୍ଚୁନ୍ ତେବିଆର୍। ଆବ୍ଡ଼ାର୍ ଖଣ୍ଡା ଧାରେତି ବାଛ୍ରାର୍ ଆରୁ କମ୍ଜୋର୍ ମାନ୍ତେ ହି ତାକତ୍ବାର୍ ମାନ୍ଚାର୍। ଆବ୍ଡ଼ାର୍ ଲାଡ଼ାଇନୁ ହି ସାହସୀ ମାନ୍ଚାର୍ ଆରୁ ପର୍ଦେଶୀୟା ପଲ୍ଟନ୍ ଜାମାରିନ୍ ଖେଦ୍ଦେଇଚାର୍। 35ମାଏକିନିଆଁର୍ ନିଜର୍ କେଚ୍ଚକାରିନ୍ ଆରୁଅହନ୍ ଜୀବିତ୍ ହାଖ୍ଖୀୟାର୍। ଆରୁ ଢେର୍ ଆଲାର୍ ମାର୍ ମହିଁ-ମହିଁକିରି କେଚ୍ଚାର୍ହି କେରାର୍, ଆରୁ ଆଜାଦୀ ମା ଚାହଁଚାର୍, ହୁଦ୍ଘିଲାଗାନ୍ ବାନେ ଜୀଉଠ୍ର୍ନାଘି ଭାଗିଦାର୍ ମାନ୍ଚାର୍। 36କେତ୍କର୍ଗେ ତା ବେଜ୍ଜତ୍ ମାନା ଖାତ୍ରା ଆରୁ କୋଡ଼୍ରା ମାର୍ଘି ସାମ୍ନା ହି କାମାଖାତ୍ରା ଆରୁ କେତ୍କରିନ୍ ସିକ୍ଡ଼ିତି ହିଁକିରି ଜେହେଲ୍ନୁ ଗୁଡ୍ଡେଇଚାର୍। 37କେତ୍କ ଆଲାର୍ ଚାଁଚା ଲେବ୍ଡ଼ାନାତି କେଚ୍ଚାର୍ କେରାର୍, କେତ୍କରିନ୍ ଆରିତି ଚାର୍ରେଇଚାର୍ ଆରୁ କେତ୍କରିନ୍ ଖଣ୍ଡାତି ପିଟ୍ଟେଇଚାର୍। କେତ୍କରିନ୍ ଗରୀବ୍ତି, ସାତାୱାଟ୍ତି, ଦୁଃଖୁ କଷଟ୍ତି ସାହ୍ତେ ହି ଭେଡ଼ି ଆରୁ ଏଡ଼ାଗୁଠିଘି ଚାମ୍ଡ଼ାନ୍ ଢାପ୍ରିକିରି ଇୟା ହୁୟା କୁଦ୍ଦାଲ୍ଲିୟାର୍ ଏନ୍ଦେର୍ଗେକା ଆବ୍ଡ଼ାର୍ ଗରୀବ୍ ରାଚାର୍ ଆରୁ ଆବ୍ଡ଼ାରିନ୍ ଖାରାପ୍ ବେଭାର୍ କାମ୍ଚାର୍। 38ଆରୁ ଜଙ୍ଗଲ୍, ପାର୍ତ୍ତା, ଗୁମ୍ଫାନୁ ଆରୁ ଧାନ୍ତାରିଘି ଗାଡ୍ଡି ଡୋଢ଼ାନୁ ନୁହ୍ରାଲିୟାର୍। ଦୁନିଆଁଦ୍ ଆବ୍ଡ଼ାର୍ଘି ଲାଇଗ୍ ମା ରାଚା। 39ଆରୁ ଇବ୍ଡ଼ା ଜାମାର୍ ବିଶ୍ୱାସ୍ଘି ଦ୍ୱାର୍ନୁ ବାନେ ସାକ୍ଷୀତା ହାଖ୍ଖୀୟାର୍, ଲେକିନ୍ ହାଲେହି ଆବ୍ଡ଼ାର୍ଗେ କାତ୍ଥା ଚିଚ୍ଚକାଘି ଫଲ୍ ମା ହାଖ୍ଖରା। 40ଏନ୍ଦେର୍ଗେକା ପାର୍ମେଶ୍ୱାର୍ସ୍ ନାମାନ୍ ତାଙ୍ଘା ନଜର୍ନୁ ଉଇୟିକିରି ଅଣ୍ଟା ମାହାନ୍ ଯୋଜ୍ନା ବାନାବାଚ୍କାଚାସ୍। ଆସ୍ ଚାହାଁଲାସ୍ କା ଆବ୍ଡ଼ାର୍ ନାହ୍ମାଗାନେନିନ୍ ଶିଦ୍ଧତାତକ୍ ଆଣସର୍।
12ପାର୍ମେଶ୍ୱାର୍ସ୍ ନାହ୍ମାଏ ବାଙ୍ଗ୍ସ୍
1ଯେତ୍କବାକେନ୍ ବିଶ୍ୱାସ୍ଘି ସାକ୍ଷୀର୍ ଏତ୍କ ବାଡ଼୍କା ବାଦ୍ଲିତି ନାମାନ୍ ଘେର୍ଚ୍କା ରାଚାର୍, ତା ବାରା ନାମ୍ ଜାମା ବୋଝ୍ବନ୍ ଦୁର୍କାମିକିରି ଆରୁ ଆ ପାପ୍ ଏକାଦ୍ କା ନାମାନ୍ ସହଜ୍ତି ଜାଲ୍ଲିନୁ ଫାସାବି, ଆବନ୍ ଦୁର୍ କାମତ୍, ଆରୁ ଏକା କୁଦିୟାରାନାନୁ ନାମାଗେ କୁଦିୟାରାନା ରାଇ ବାରା ଆ କୁଦିୟାରାନାନୁ ଧିରାଜ୍ଘି ସାଙ୍ଗେନ୍ କୁଦିୟାରତ୍। 2ଆରୁ ବିଶ୍ୱାସ୍ଘି ସୁରୁ କାମ୍ନାବାଲା ଆରୁ ମଜବୁତ୍ କାମ୍ନାବାଲା ଯୀଶୁସ୍କି ତାରା ଏର୍ତେ ରତ୍, ଏକାସ୍ ଆ ଖୁସୀଘି ଲାଗାନ୍ ଏକାନ୍ ଆସ୍କି ଆଘ୍ଲି ଉଇକାଚାର୍, ଲାଜ୍ଜେଘି ଏନ୍ଦେର୍ହି ଚିନ୍ତା ମା କାମିକିରି, କ୍ରୁଶ୍ଘି କଷଟ୍ ସାହ୍ଚାସ୍, ଆରୁ ପାର୍ମେଶ୍ୱାର୍ସ୍କି ରାଜ୍ଗାଦିଘି ତିନାତାରା କାଇକିରି ଅକ୍କିୟାସ୍। 3ହୁଦ୍ଘିଲାଗାନ୍ ଯୀଶୁସ୍କି ମିଆଁ ଧ୍ୟାନ୍ କାମା, ଏକାସ୍ ନିଜର୍ ବିରୁଦ୍ଧ୍ନୁ ପାପୀର୍ଘି ଏତ୍କ ଆତ୍ୟାଚାର୍ ସାହ୍ଚାସ୍, କା ନିମ୍ ହାତାଶ୍ ମାନିକିରି ହିମ୍ମତ୍ବନ୍ ମା ଆମ୍ୱଚର୍। 4ଆକ୍କୁନ୍ତକ୍ ନିମାଗେ ପାପ୍ଘି ବିରୁଦ୍ଧ୍ ଲାଡ଼୍ନାନୁ ନିଜର୍ ହେଁସୁବନ୍ ବାହାବାଗେ ମା ଖାତ୍ରା। 5ଆରୁ ନିମ୍ ଆ ଆଦେଶ୍ବନ୍, ଏକାନ୍ ନିମାନ୍ ହାଦ୍ଦୁର୍ ଲେଖା ଚିଆକାଇ, ମଦ୍ରେଚ୍କାଦାର୍: “ହେ ଏଙ୍ଘାଏ ହାଦ୍ଦୁରୋ, ପ୍ରାଭୁସ୍କି ଶାସନ୍ବନ୍ ବେକାର୍ କାତ୍ଥା ଆମା ବୁଝ୍ରା, ଆରୁ ଯେତ୍କବାକେନ୍ ଆସ୍ ନିମାନ୍ ଶାସନ୍ କାମସ୍ତା ଧିରାଜ୍ ଆମ୍କେ ଆମ୍ୱା। 6ଏନ୍ଦେର୍ଗେକା ପ୍ରାଭୁସ୍ ନେକାନ୍ ବାନେ ହାଖ୍ଖଦାସ୍, ଆସିନ୍ ଶାସନ୍ କାମ୍ଦାସ୍ ଆରୁ ଏକା ହାଦ୍ଦୁସିନ୍ ଆସ୍ ଗ୍ରହନ୍ କାମ୍ଦାସ୍, ଆସିନ୍ କୋଡ୍ରା ମାର୍ ଚିଦାସ୍।” 7ନିମ୍ ଏକା କଷଟ୍ ସାହ୍ଦାର୍, ଆବନ୍ ବାଙ୍ଗ୍ସ୍କି ଶାସନ୍ ବୁଲି ବୁଝ୍ରର୍, ଏନ୍ଦେର୍ଗେକା ଆସ୍ ଇଦ୍ଘି ସାବୁତ୍ସ୍, କା ପାର୍ମେଶ୍ୱାର୍ସ୍ ନିମାନ୍ ହାଦ୍ଦୁ ସୋଚିକିରି ନିହ୍ମାଗାନେ ବେଭାର୍ କାମ୍ଦାସ୍। ଆରୁ ଏକା ହାଦ୍ଦୁସ୍ ଏନ୍ନେ ରାଦାସ୍, ଏକାସିନ୍ କା ବାଙ୍ଗ୍ସ୍ ଶାସନ୍ ମା କାମ୍ଦାସ୍? 8ପାର୍ମେଶ୍ୱାର୍ସ୍ ଆବ୍ଡ଼ା ଜାମାରିନ୍ ଶାସନ୍ କାମ୍ଦାସ୍, ଯଦି ନିଙ୍ଗାନ୍ ଶାସନ୍ କାମା ମାଲ୍ଲା କୁଦ୍, ନିନ୍ ଆସ୍କି ନିଜର୍ ମାଲ୍ଲା ଲେକିନ୍ ବେଭିଚାରିଘି ହାଦ୍ଦୁୟ। 9ନାହ୍ମାଏ ଦୁନିଆଁନ୍ତା ବାଙ୍ଗ୍ସ୍ହି ନାମାନ୍ ଶାସନ୍ କାମାଲିୟାସ୍, ଆରୁ ନାମ୍ ଆସ୍କି ମାଇନ୍ କାମାଲ୍କାତ୍, ତା ନାମାଗେ କେତ୍କ ବାଗ୍ଗେ ଇଚ୍ଛାତି ନିଜର୍ ଆତ୍ମିକ୍ ବାଙ୍ଗ୍ସ୍କି ଅଧିନ୍ବନ୍ ଗ୍ରହନ୍ କାମ୍ନା କାତ୍ଥା, ଏକାତି ନାମାଗେ ଜୀବନ୍ ହାଖ୍ରା ଅଙ୍ଗ। 10ନାହ୍ମାଏ ବାଙ୍ଗ୍ର୍ କାଟେ ସାମାୟଘି ଲାଗାନ୍ ଏସ୍କେ ଆବ୍ଡ଼ାର୍ ବାନେ ବୁଝ୍ରାର୍, ନାମାନ୍ ଶାସନ୍ କାମ୍ଚାର୍, ଲେକିନ୍ ପାର୍ମେଶ୍ୱାର୍ସ୍ ନାମାନ୍ ନାହ୍ମାଏ ବାନେଘି ଲାଗାନ୍ ଶାସନ୍ କାମ୍ଚ୍କାଦାସ୍, ଏକାତି ନାମ୍ ଆସ୍କି ପାବିତାର୍ଘି ଭାଗିଦାର୍ ମାନା ଅଙ୍ଗତ୍। 11ଯେତ୍କବାକେନ୍ ନେକ୍ରିନ୍ ଶାସନ୍ କାମାକାଲିଆ, ତା ଆଦ୍ ଖୁସୀ ମାଲ୍ଲିଦ୍, ବରନ୍ ଦୁଃଖୁଦ୍; ଲେକିନ୍ ଏକା ଶାସନ୍ଘି ଦ୍ୱାର୍ନୁ ଶିକ୍ଷା ଲାଭ୍ କାମ୍ନାଏ, ଆବ୍ଡ଼ାର୍ ପାଛ୍ଲି ଧାର୍ମିକ୍ତା ଶାନ୍ତିଘି ଫଲ୍ବନ୍ ହାଖ୍ଖନାଏ। 12ହୁଦ୍ଘିଲାଗାନ୍ ନିଜର୍ ଥାକ୍ର୍କା ହେଖ୍ଖା ଆରୁ କମ୍ଜୋର୍ ମୁକାନ୍ ମଜବୁତ୍ କାମା। 13ଆରୁ ସିଧା ପାବୁନୁ ଆଘ୍ଲି ବାଢ଼ର୍ତେ କାଲା, ଏକାତି କା ଲେଙ୍ଗ୍ଡ଼ାସ୍ ମା ଭାଟ୍କାରସ୍ ବରନ୍ ଚାଙ୍ଗା ମାନସ୍କସ୍।
ଉପ୍ଦେଶ୍ ଆରୁ ଚେତାବାନୀ
14ଜାମାର୍ଗାନେ ମେଶ୍ରିକିରି ରାକେ ଆରୁ ପାବିତାର୍ ଜୀବନ୍ନୁ ରାଗେ କୋଶିଷ୍ କାମ୍କେ। ଇଦ୍ଘି ବିନା ନେଦ୍ହି ପ୍ରାଭୁସିନ୍ ଏରା ପଲ୍ଲନାଇନ୍। 15ଇ କାତ୍ଥାଘି ଧ୍ୟାନ୍ ଉଇୟା କାଇ ପାର୍ମେଶ୍ୱାର୍ସ୍କି କ୍ରିପାତି ନେଦ୍ହି ମା ବାଛ୍ରର୍କର୍, ଆରୁ ନିମାଗେ କଷଟ୍ ଆଣ୍ସ୍ତାନା ଆରୁ ଢେର୍ ଆଲାରିନ୍ ଛିଛିର୍ଛାନ୍ଦ୍ କାମ୍ନାଘି ଲାଗାନ୍ ଏକ୍ରିନ୍ ଝାଗ୍ଡ଼ାବାଲା ବିଷ୍ ଚେରୁ ଗାଜା ମା ମାନ। 16ନିହ୍ମାଏନୁ ନା ତା ନେରିନ୍ ବେଭିଚାର୍ ରର୍ ଆରୁ ନା ଏଷୋବ୍ସ୍କି ଲେଖା ନେଦିନ୍ ଅଧର୍ମି ରର୍, ଏକାସ୍ ଅହନ୍ ଖାଲି ଅନ୍ନାଘି ଲାଗାନ୍ ନିଜର୍ ପହ୍ଲେ ହାଦ୍ଦୁସ୍କି ହକ୍ବନ୍ ବିଁସେଚାସ୍। 17ଏସ୍କେ କା ନିମ୍ ଆହ୍ଦାର୍ ପାଛ୍ଲି ଯେତ୍କବାକେନ୍ ଆସ୍ ଇ ବାର୍ଦାନ୍ବନ୍ ହାଖ୍ଖାଗେ ଚାହଁଚାସ୍ ତା ଆସିନ୍ ବିନା ଲାଇଗ୍ ଠାହ୍ରାବାକେରା। ଯଦିଭି ଆସ୍ ଅହ୍ଲି-ଅହ୍ଲିକିରି ଆଶିଷ୍ ହାଖ୍ଖାଗେ ଚାହଁଚାସ୍, ଲେକିନ୍ ଆସ୍ ନିଜର୍ ବାଙ୍ଗ୍ସ୍କି ମନ୍ ବାଦ୍ଲାଗେ ପଲ୍ଲିୟାସିନ୍। 18ଯେତ୍କବାକେନ୍ ପାର୍ମେଶ୍ୱାର୍ସ୍ ସିୟୋନ୍ ପାର୍ତ୍ତା ମିଆଁ ନିୟମ୍ ଶାସ୍ତ୍ର ଚିଚ୍କାଚାସ୍ ଏକାନ୍ କା ଏସ୍ରା ଅଙ୍ଗର୍, ଆ ସାମାୟ ଲାଘ୍ର୍ନା ଚିଚ୍ଚୁଦ୍, ଉହା ମହଁର ବାଦ୍ଲି ଆରୁ ଧୁନ୍ଦୁ ଧୁକା ରାଚା, ଏନ୍ନେ ପାର୍ତ୍ତାଘି ଚାହାନୁ ନିନ୍ ମାଲ୍ଲା ବାରୁୟ। 19ଆବ୍ଡ଼ାର୍ ତୂରୀହି ଘି ଶବଦ୍ ଆରୁ ତେଙ୍ଗ୍ନା ଶବଦ୍ ମେନ୍ଚାର୍ ତା ଆବ୍ଡ଼ାର୍ ପାର୍ମେଶ୍ୱାର୍ସିନ୍ ମା ତେଙ୍ଗାଗେ ବିନ୍ତି କାମ୍ଚାର୍। 20ଏନ୍ଦେର୍ଗେକା ଏକା ଆଦେଶ୍ ଚିଆ କେର୍କିଚା, ଆବ୍ଡ଼ାର୍ ଆବନ୍ ସାହା ପଲ୍ଲିୟାରିନ୍: ଯଦି ଏକ୍ରିନ୍ ଜାନ୍ତୁଦ୍ ଆ ପାର୍ତ୍ତାବନ୍ ଏସ୍ରଦ୍ ତା ଆବନ୍ ଚାଁଚାତି ପିଟାଚାକୋ। 21ଆ ଏଥ୍ର୍ନାଦ୍ ଏତ୍କ ଭାୟାନାକ୍ ରାଚା କା ମୁଶାସ୍ ତେଙ୍ଗିୟାସ୍, “ଏନ୍ ଏଲ୍ଚ୍କାତି ଥାର୍-ଥାର୍ରାଲ୍ଦାନ୍।” 22ଲେକିନ୍ ନିମ୍ ସିୟୋନ୍ ପାର୍ତ୍ତାଘି ଚାହାନୁ, ଆରୁ ଜୀବିତ୍ ପାର୍ମେଶ୍ୱାର୍ସ୍କି ସହର୍ ସରଗ୍ତା ଯେରୁଶାଲେମ୍ନୁ ଗିନ୍ତି କାମା ପଲ୍ଲନା ଦୂଁତ୍ଜାମାର୍ଘି ଭିଡ଼୍ଦ୍, 23ପାର୍ମେଶ୍ୱାର୍ସ୍କି ପହ୍ଲେ ହାଦ୍ଦୁର୍ଘି, ନେଖା ନାମେ ସରଗ୍ନୁ ଲେଖ୍ଚ୍କା ରାଇ, ଆସ୍କି ସାଭାଘି ଚାହାନୁ ଆଣ୍ସ୍କାଦାର୍। ଆରୁ ନିମ୍ ଜାମାର୍ଘି ନ୍ୟାୟ କାମ୍ନାବାଲା ପାର୍ମେଶ୍ୱାର୍ ଆରୁ ଆ ଧାର୍ମିକ୍ତା, ଆରୁ ସିଦ୍ଧ୍ ଆଲାର୍ଘି ଆତ୍ମାର୍। 24ଆରୁ ପୁନା ନିୟମ୍ଘି ମାଝାନୁ ଯୀଶୁସ୍, ଆରୁ ଛିଟ୍କାନା ବାଲା ଆ ହେଁସୁଘି ଚାହାନୁ ବାର୍ଚ୍କାଦାର୍, ଏକାସ୍ ହାବିଲ୍ସ୍କି ହେଁସୁଘିନ୍ତି ବାନେ କାତ୍ଥା ତେଙ୍ଗ୍ଦାସ୍। 25ସାବ୍ଧାନ୍ ରା, ଆରୁ ଆ ତେଙ୍ଗ୍ନାବାଲାସ୍ତି ଥୁମ୍ଣା ଆମ୍କେ ବିଡ଼୍ଦା, ଏନ୍ଦେର୍ଗେକା ଆବ୍ଡ଼ା ଆଲାର୍ ଯଦି ଦୁନିଆଁନ୍ତା ଚେତାବାନୀ ଚିନାବାଲାସ୍ତି ଥୁମ୍ଣା ବିଡ଼୍ଦି କିରି ବାଛ୍ରା ପଲ୍ଲିୟାରିନ୍, ତା ନାମ୍ ସରଗ୍ସ୍ତି ଚେତାବାନୀ ଚିନା ବାଲାସ୍ସ୍ତି ମା ମେନିକିରି ଏସ୍କେ ବାଛ୍ରା ଅଙ୍ଗତ୍? 26ଆ ସାମାୟ ଆସ୍କି ଶବଦ୍ ଦୁନିଆଁବନ୍ ନୁକ୍ଚେଇଚ୍କିଚା; ଲେକିନ୍ ଆକ୍କୁନ୍ ଆସ୍ ଇ ଘୋଷ୍ଣା କାମ୍ଦାସ୍ କା, ଏନ୍ ଅହନ୍ ଖାଲି ଆରୁ ନା ତା ଦୁନିଆଁବନ୍, ବରନ୍ ସରଗ୍ବନ୍ ହି ନୁକନ୍ଚନ୍। 27ଇ ଶବଦ୍ “ଅହନ୍ ଖାଲି ଆରୁ” ଇ କାତ୍ଥାବନ୍ ପ୍ରକଟ୍ କାମିଦ୍ କା, ଏକା ଜିନିଷ୍ଦ୍ ନୁକ୍ରି କାଇଦ୍, ଆବ୍ଡ଼ାଦ୍ ସିର୍ଜାରାଚ୍କା ଜିନିଷ୍ ମାନ୍ନାଘି ଲାଗାନ୍ ରୋକ୍ରକଦ୍, ତାକା ଏକା ଜିନିଷ୍ବନ୍ ନୁକା ମା କାଇ, ଆବ୍ଡ଼ାଦ୍ ସ୍ଥିର୍ ରଦ୍। 28ନାମାଗେ ଏକା ରାଜୀ ହାଖ୍ଖୀର୍କିଚି, ଆଦ୍ ମା ନୁକାକାଇ, ହୁଦ୍ଘିଲାଗାନ୍ ନାମ୍ ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିତେ ରତ୍ ଆରୁ ଆସ୍କି ଇଚ୍ଛା ଲେଖା ଆଦର୍ ଆରୁ ଏଲ୍ଚିକିରି ସାଙ୍ଗେନ୍ ଆସ୍କି ସେବା କାମ୍ତେରତ୍। 29ଏନ୍ଦେର୍ଗେକା ନାହ୍ମା ପାର୍ମେଶ୍ୱାର୍ସ୍ ଅଲ୍ତାନା ବାଲା ଚିଚ୍ଚୁସ୍।
13ଖ୍ରୀସ୍ତ୍ ଜୀବନ୍ ଉଜ୍ଜାଗେ ଉପ୍ଦେଶ୍
1ଭାଇ ଆରୁ ବୁହୁଣୀର୍ଜାମାର୍ ଏକ୍ ଦୁସ୍ରାରିନ୍ ବାନେ ହାଖ୍ଖତେ ରା। 2ଏନ୍ଦେର୍ଗେକା ଇଦ୍ଘିଲାଗାନ୍ କେତ୍କ ଆଲାର୍ ମା ଆହିକିରିହି ନିଜର୍ସାନ୍ ସରଗ୍ ଦୂଁତ୍ର୍ଘି ସ୍ୱାଗାତ୍ କାମିକିରି ଏରିୟାର୍ ହଜିୟାର୍। 3କାଇଦୀର୍ଘି ଏନ୍ନେ ଧ୍ୟାନ୍ ଉୟା ଏସ୍କେ କା ଆବ୍ଡ଼ାର୍ ଗାନେ ନିମ୍ହି ଜେହେଲ୍ନୁ ରାଦାର୍। ଆରୁ ନାହ୍ମାଏ ହି ଶରୀର୍ ରାଇଦ୍ ସୋଚିକିରି ଏକାର୍ ଗାନେ ଖାରାପ୍ ବେଭାର୍ କାମାକାଇ, ଆବ୍ଡ଼ାର୍ଘି ହି ଧ୍ୟାନ୍ ଉୟା। 4ବେଞ୍ଜାଦ୍ ଜାମାର୍ଘି ମାଝାନୁ ଆଦର୍ ମାନ୍ନା କାତ୍ଥାଦ୍। ବେଞ୍ଜା ଜୀବନ୍ନୁ ମୁକ୍କା ଆରୁ ମେତାସ୍ ଏକ୍ ଦୁସ୍ରାର୍ଗାନେ ପାବିତାର୍ ରାନା କାତ୍ଥା। ଏନ୍ଦେର୍ଗେକା ପାର୍ମେଶ୍ୱାର୍ସ୍ ଅଶୁଦ୍ଧ୍ ଆରୁ ବେଭିଚାରିରିନ୍ ନ୍ୟାୟ କାମସ୍। 5ନିହ୍ମାଏ ସାଭାବ୍ଦ୍ ବିନା ଲାଲଚ୍ଘି ମାନ୍ନାଦ୍, ଆରୁ ଏକାଦ୍ ନିହ୍ମାସାନ୍ ରାଇଦ୍, ଆଦ୍ଘି ମିଆଁ ଖୁସୀ ରା, ଏନ୍ଦେର୍ଗେକା ପାର୍ମେଶ୍ୱାର୍ସ୍ ନିଜେନିନ୍ ତେଙ୍କାଦାସ୍, “ଏନ୍ ନିମାନ୍ ଏକ୍ଲାହି ମା ଆମ୍ବଦାନ୍, ଆରୁ ନା ଏକ୍ଲା ନିମାନ୍ ଆମ୍ବନ୍।” 6ହୁଦ୍ଘିଲାଗାନ୍ ନାମ୍ ଭାର୍ଷାଘି ସାଙ୍ଗେ ଇବନ୍ ତେଙ୍ଗା ଅଙ୍ଗତ୍ ପ୍ରାଭୁସ୍ ଏଙ୍ଗାନ୍ ମଦେତ୍ କାମ୍ଦାସ୍। ଏନ୍ ଏକ୍ଲାହି ମା ଏଲ୍ଚନ୍। ଏକ୍ରିନ୍ ଆଲାସ୍ ଏଙ୍ଘାଏ ଏନ୍ଦେର୍ କାମାଅଙ୍ଗସ୍? 7ଏକାର୍ ନିହ୍ମାଏ ଆଗୁୱାର୍, ଆରୁ ଏକାର୍ ନିମାରିନ୍ ପାର୍ମେଶ୍ୱାର୍ସ୍କି ବଚନ୍ବନ୍ ଶୁଣାବାଚାର୍, ଆବ୍ଡ଼ାରିନ୍ ମନେ ଉଇୟା କାଇ ଧିୟାନ୍ତି ଆବ୍ଡ଼ାର୍ଘି ଚାଲିଚଲନ୍ଘି ବିଚାର୍ ଏରିକିରି ଆବ୍ଡ଼ାର୍ଘି ବିଶ୍ୱାସ୍ ଲେଖା କାମା। 8ଯୀଶୁ ଖ୍ରୀସ୍ତ୍ସ୍ ଚେରୋ ହି ଆନ୍ନେନିନ୍ ରାଚାସ୍, ଇନ୍ନାହି ଆନ୍ନେନ୍ ରାଦାସ୍ ଆରୁ ସବୁଦିନ୍ତକ୍ ଆନ୍ନେନିନ୍ ରସ୍। 9ଜାମା ରକମ୍ଘି ଦୁସ୍ରା-ଦୁସ୍ରା ଉପ୍ଦେଶ୍ନୁହି ଆମ୍କେ ବାହ୍କାରା, ଏନ୍ଦେର୍ଗେକା ମନ୍ଘି କ୍ରିପାତି ମଜ୍ବୁତ୍ ରାନାଦ୍ ବାନେଦ୍, ନା ତା ଆ ଅନ୍ନାମହ୍ନାଘି ଜିନିଷ୍ତି ଏକାତି ନାଲ୍ଖୁ ଉଇନା ବାଲାର୍ଗେ ଏନ୍ଦେର୍ହି ଫାଏଦା ମା ମାନ୍ଚା। 10ନାହ୍ମାସାନ୍ ଅଣ୍ଟା ଏନ୍ନେ ବେଦୀ ରାଇ, ଏକାନ୍ତି ଆବ୍ଡ଼ାର୍ଗେ ଏକା ତାମ୍ବୁଘି ସେବା କାମ୍ନାଏ ଅନାମହାଗେ ଏନ୍ଦେର୍ହି ହକ୍ ମାଲ୍ଲାଦିନ୍।। 11ଏନ୍ଦେର୍ଗେକା ଏକା ଜାନ୍ତୁର୍ଘି ହେଁସୁ ମାହାପୁରୋହିତ୍ସ୍ ପାପ୍ ବଲୀ ଲାଗାନ୍ ମାହାପାବିତାର୍ ଆଡ୍ଡାନୁ ହୋଦାସ୍ ଆ ଜାନ୍ତୁର୍ଘି ଶରୀର୍ବନ୍ ତାମ୍ବୁଘି ବାହ୍ରି ଅଲ୍ତାଚାକାଇ। 12ହୁଦ୍ଘିଲାଗାନ୍, ଯୀଶୁସ୍ହି ଆଲାରିନ୍ ନିଜର୍ ହେଁସୁଘି ଦ୍ୱାର୍ନୁ ପାବିତାର୍ କାମାଗେଲାଗାନ୍ ଯେରୁଶାଲେମ୍ ସହର୍ତା ଫାଟକ୍ଘି ବାହ୍ରି ଦୁଃଖୁ ଉଠାବାଚାସ୍। 13ହୁଦ୍ଘିଲାଗାନ୍ ନାମ୍ ପ୍ରାଭୁସ୍କି ନିନ୍ଦାଘି ଭାର୍ବନ୍ ନିଜର୍ ମିଆଁ ହୋଇକିରି ଫାଟକ୍ଘି ବାହ୍ରି ଆସ୍କି ଚାହାନୁ କତ୍। 14ଏନ୍ଦେର୍ଗେକା ଇସାନ୍ ନାହ୍ମାଏ ଏନ୍ଦେର୍ ସ୍ଥିର୍ ରାନାବାଲା ସହର୍ ମାଲ୍ଲାଦିନ୍, ବରନ୍ ନାମ୍ ଅଣ୍ଟା ବାର୍ନାବାଲା ସହର୍ଘି ପାବୁ ଏରାଲ୍ଦାତ୍। 15ହୁଦ୍ଘିଲାଗାନ୍ ନାମ୍ ଯୀଶୁସ୍କି ଦ୍ୱାର୍ନୁ ଧାନ୍ୟାବାଦ୍ ବଲୀଦାନ୍, ମତ୍ଲବ୍ ଆ ଥୁମ୍ଣାଘି ଫଲ୍ ଏକାନ୍ ଆସ୍କି ନାମେତି ଗ୍ରହନ୍ କାମ୍ଦାତ୍ ପାର୍ମେଶ୍ୱାର୍ସିନ୍ ଜାମାବାକେନ୍ ଚାଢ଼ାବତ୍। 16ଭାଲାଇ କାମ୍ନା, ଆରୁ ନିଜର୍ ଜିନିଷ୍ବନ୍ ଦୁସ୍ରାର୍ଗାନେ ହାଟ୍ଟନା ଆମ୍କେ ମଦ୍ରା। ଏନ୍ଦେର୍ଗେକା ଇଦ୍ ଏନ୍ନେ ବଲୀଦ୍, ଏକାଦ୍ ପାର୍ମେଶ୍ୱାର୍ସିନ୍ ଖୁସୀ କାମିଦ୍। 17ନିଜର୍ ଆଗୁୱାର୍ଘି ଆଦେଶ୍ ପାଲନ୍ କାମା, ଆବ୍ଡ଼ାର୍ଘି ଅଧିନ୍ନୁ ରା, ଆବ୍ଡ଼ାର୍ ନିହ୍ମାଏ ଆତ୍ମାବନ୍ ଏର୍ନାଏ ହଜ୍ନାଏ। ଆବ୍ଡ଼ାର୍ ନିହ୍ମାଏ ବାରେନୁ ହିସାବ୍ ଚିନାଏ, ଆବ୍ଡ଼ାର୍ଘି ଲାଗାନ୍ ଇ ନାଲ୍ଖୁଦ୍ ଖୁସୀଘି ବାରେ ରଦ୍ ନା ତା ଦୁଃଖୁତି, ଇଦ୍ ନିହ୍ମା ଲାଗାନ୍ହି ଫାଏଦା ମାନଦ୍। 18ଏହ୍ମା ଲାଗାନ୍ ବିନ୍ତି କାମ୍ତେ ରା। ଏମାଗେ ବିଶ୍ୱାସ୍ ରାଇ କା ଏହ୍ମା ବିବେକ୍ ଶୁଦ୍ଧ୍ ରାଇ ଆରୁ ଏମ୍ ଜାମା ରକମ୍ତି ଆବନ୍ନିନ୍ କାମାଗେ ଚାହାଁଲ୍ଦାମ୍ ଏକାଦ୍ ଠିକ୍ ରାଇ। 19ନିଙ୍ଘାସ୍ତି ଏଙ୍ଘାଏ ବିଶେଷ୍ ଆର୍ଜୀ ରାଇ କା ବିନ୍ତି କାମା କା ଏନ୍ ନିଙ୍ଘାସାନ୍ ଭେଁଟ୍ କାମାଗେ ଜାଲ୍ଦି ବାରା ଅଙ୍ଗନ୍।
ଆଖ୍ରୀ କାତ୍ଥା ଆରୁ ଆଶିଷ୍
20ଆକ୍କୁନ୍ ଶାନ୍ତିଦାତା ପାର୍ମେଶ୍ୱାର୍ସ୍ ଏକାସ୍ ନାହ୍ମାଏ ପ୍ରାଭୁ ଯୀଶୁସିନ୍, ଏକାସ୍ ଭେଡ଼ିର୍ଘି ମାହାନ୍ ଚାର୍ୱାହାସ୍, ନାହ୍ମାଏ ପ୍ରାଭୁସ୍କି ସବୁଦିନ୍ତା ନିୟମ୍ଘି ହେଁସୁଘି ଦ୍ୱାର୍ନୁ କେଚ୍ଚକାସ୍ତି ଜୀବିତ୍ କାମ୍ଚାସ୍। 21ନିଙ୍ଘାଏ ହାର୍ ଅଣ୍ଟା ବାନେ କାତ୍ଥାନୁ ଶିଦ୍ଧ୍ କାମା, ଏକାସ୍ତି ନିମ୍ ଆସ୍କି ଇଚ୍ଛା ପୁରା କାମା। ଏକାଦ୍ ଆସ୍କେ ପସନ୍ଦ୍ ରାଇ, ଆବନ୍ ଯୀଶୁ ଖ୍ରୀସ୍ତ୍କି ଦ୍ୱାର୍ନୁ ନାହ୍ମାଏନୁ ଶିଦ୍ଧ୍ କାମସ୍, ଏକାସ୍କି ମାହିମା ଯୁଗ୍ଗୁ ଯୁଗ୍ଗୁତକ୍ ମାନ୍ତେ ରଦ୍। ଆମେନ୍! 22ହେ ଭାଇ ଆରୁ ବୁହୁଣୀ ଜାମାରୋ ଏନ୍ ନିହ୍ମାସ୍ତି ବିନ୍ତି କାମାଲ୍ଦାନ୍ କା, ଇ ଶିକ୍ଷାଘି କାତ୍ଥାବନ୍ ଧିରାଜ୍ତି ସାହା, ଏନ୍ଦେର୍ଗେକା ଏନ୍ ନିମାଗେ କାଟେକେନ୍ ଲେଖ୍ଚ୍କାଦାନ୍। 23ନିମ୍ ଇବନ୍ ଆହା କା ତୀମଥିଉସ୍ ନାହ୍ମା ଭାଇସିନ୍ ଜେହେଲ୍ତି ଆମ୍ବେଇ ଚିଚ୍ଚକାନାଏ ଆରୁ ଯଦି ଆସ୍ ଜାଲ୍ଦି ବାର୍ଚାସ୍ କେରାସ୍ ତା, ଏନ୍ ଆସ୍ଗାନେ ନିହ୍ମାସାନ୍ ଭେଁଟ୍ କାମାଗେ ବାରନ୍। 24ନିଜର୍ ଜାମା ଆଗୁୱାରୀନ୍ ଆରୁ ଜାମା ପାବିତାର୍ ଆଲାରିନ୍ ଏଙ୍ଘାଏ ଯୋହାର୍, ଇଟାଲୀ ଦେଶ୍ତା ବିଶ୍ୱାସୀ ଆଲାର୍ ନିମାରିନ୍ ଯୋହାର୍ ବାଲ୍ନାଏ। 25ପାର୍ମେଶ୍ୱାର୍ସ୍କି କ୍ରିପା ନିହ୍ମା ଜାମାର୍ଗାନେ ରଦ୍।