ଗାଲାତୀ ପ୍ରଦେଶ୍ତା ଖ୍ରୀସ୍ତ୍ ମଣ୍ତ୍ଲୀର୍ଘି ନାମେନୁ ଯୀଶୁ ଖ୍ରୀସ୍ତ୍କି ଖାସ୍ଚେଲା ପାଉଲୁସ୍କି ଚିଠି
ବହିଘି ପରିଚୟ
ଇ ଚିଠିନ୍ ଯୀଶୁ ଖ୍ରୀସ୍ତ୍କି ଖାସ୍ଚେଲା ପାଉଲୁସ୍ ଗାଲାତୀ ସହର୍ତା ଖ୍ରୀସ୍ତ୍ ମଣ୍ତ୍ଲୀଘି ନାମେନୁ ଖ୍ରୀଷ୍ଟାଦ୍ଦ ୪୯ ନୁ ଲେଖ୍ଚ୍କାଦାସ୍। ପାଉଲୁସ୍ ଆରୁ ବାର୍ନାବାସ୍ ତାହ୍ମା ପହ୍ଲେ ସେବା ନାଲ୍ଖୁ କାମ୍ନା ବାକେନ୍ ଇବ୍ଡ଼ା ସହର୍ନୁ ପ୍ରଚାର୍ କାମ୍ଚ୍କାଚାର୍ ଆରୁ ମଣ୍ଡ୍ଲୀଗୁଠିନ୍ ତିୟାର୍ କାମ୍ଚ୍କାଚାର୍।
ଯେତ୍କବାକେନ୍ ଯୀଶୁସ୍କି ବାରେ ସୁସାମାଚାର୍ ବିନାୟାହୁଦୀର୍ଘି ମାଝାନୁ ଶୁଣାବାଚାର୍, ତା ଏନ୍ନେ ପ୍ରଶ୍ନ ମାନ୍ଚା କା ଅଣ୍ଟା ସତ୍ତୁ ଖ୍ରୀସ୍ତ୍ ବିଶ୍ୱାସୀ ମାନାଗେ ଅଣ୍ଟା ଆଲାସ୍କେ ମୁଶାସ୍କି ନିୟମ୍ବନ୍ ନିହାତି ମାନ୍ନା କାତ୍ଥା କା ମାଲ୍ଲା! ଲେକିନ୍ ପାଉଲୁସ୍ ତେଙ୍ଗ୍ଦାସ୍ କା ଇଦ୍ଘି ଦାର୍କାର୍ ମାଲ୍ଲାଦିନ୍। ବିଶ୍ୱାସ୍ଦ୍ ଅସଲ୍ନୁ ଖ୍ରୀସ୍ତ୍ ବିଶ୍ୱାସୀର୍ଘି ଜୀବନ୍ଘି ଅଣ୍ଟା ଖାଲି ଠୋସ୍ କାତ୍ଥାଦ୍। ଇତ୍ତି ଜାମା ଆଲାର୍ଘି ପାର୍ମେଶ୍ୱାର୍ସ୍ଗାନେ ସମ୍ବନ୍ଧ ସୁଧ୍ରାରିଦ୍। ପାଉଲୁସ୍ ଦୁସ୍ରାଥର୍ ସେବା ନାଲ୍ଖୁ କାମ୍ନା ବାକେନ୍, ଆସ୍ ଇବ୍ଡ଼ା ଗାଲାତୀ ପ୍ରଦେଶ୍ଘି ମଣ୍ତ୍ଲୀବନ୍ ସୁଧ୍ରାଚାସ୍।
ନିମ୍ ଜାମାର୍ ଇ ଚିଠିବନ୍ ଧ୍ୟାନ୍ ପୁର୍ବକ ପାଢ଼ା ଆରୁ ପାର୍ମେଶ୍ୱାର୍ସ୍କି ତାର୍ତି ବହୁତ୍ କ୍ରିପା ଲାଭ୍ କାମା।
ରୂପ୍-ରେଖା
ଯୋହାର୍ ୧:୧-୧୦
ପ୍ରେରିତ୍ସ୍କି ରୂପ୍ନୁ ପାଉଲୁସ୍କି ହକ୍ ୧:୧୧—୨:୨୧
ପାର୍ମେଶ୍ୱାର୍ସ୍କି କ୍ରିପାଘି ସୁସାମାଚାର୍ ୩:୧—୪:୩୧
ଖ୍ରୀସ୍ତ୍ ବିଶ୍ୱାସୀର୍ଘି ଆଜାଦୀ ଆରୁ ଜିମାବାରୀ ୫:୧—୬:୧
ଆଖ୍ରୀ କାତ୍ଥା ୬:୧୧-୧୮
1ଯୋହାର୍
1ଏନ୍ ପାଉଲୁସ୍, ଅଣ୍ଟା ଖାସ୍ଚେଲାନ୍। ଏଙ୍ଗାନ୍ ଆଲାର୍ଘି ତାର୍ତି ମାଲ୍ଲା କା ଏକିନ୍ ଆଲାସ୍କି ତାର୍ତି ମାଲ୍ଲା ଚାଜୁର୍, ଯୀଶୁ ଖ୍ରୀସ୍ତ୍କି ତାର୍ତି ଆରୁ ଯୀଶୁ ଖ୍ରୀସ୍ତ୍ସିନ୍ କେଚ୍ଚକାସ୍ତି ଉଜ୍ଜତାନା ବାଲା ପାର୍ମେଶ୍ୱାର୍ସ୍ ବାଙ୍ଗ୍କି ତାର୍ତି ଚାଜ୍ଜକାଦାସ୍। 2ଏନ୍ ଆରୁ ଏଙ୍ଘା ସାଙ୍ଗେନ୍ ରାନାବାଲା ଜାମା ଭାଇର୍ଘି ତାର୍ତି ଗାଲାତୀୟା ପ୍ରଦେଶ୍ଘି ଜାମା ମଣ୍ତ୍ଲୀର୍ଘି ନାମେନୁ ଇ ଚିଠିନ୍ ଲେଖାଲ୍ଦାମ୍।
3ନାହ୍ମାଏ ବାଙ୍ଗ୍ ପାର୍ମେଶ୍ୱାର୍ ଆରୁ ପ୍ରାଭୁ ଯୀଶୁ ଖ୍ରୀସ୍ତ୍କି ତାର୍ତି ନିମାଗେ କ୍ରିପା ଆରୁ ଶାନ୍ତି ହାଖ୍ର୍ତେ ରାନାଦ୍। 4ନାହ୍ମାଏ ବାଙ୍ଗ୍ ପାର୍ମେଶ୍ୱାର୍ସ୍କି ଇଚ୍ଛାଘି ଲେଖା ଇ ପାପ୍ମୟ ଦୁନିଆଁନ୍ତି ନାମାରିନ୍ ବାଛାବାନାଘି ଲାଗାନ୍ ପ୍ରାଭୁ ଯୀଶୁ ଖ୍ରୀସ୍ତ୍ ନିଜ୍କେନିଜ୍ବନ୍ ନାହ୍ମା ପାପ୍ଘି ଲାଗାନ୍ ବଲୀ ଚିଚ୍ଚାସ୍ ଲାଗ୍ଗିୟାସ୍। 5ଆସ୍କି ମାହିମା ଯୁଗ୍-ଯୁଗ୍ ମାନ୍ନାଦ୍। ଆମେନ୍।
ସତ୍ତୁ ସୁସାମାଚାର୍ ଅଣ୍ଟା ଖାଲି ରାଇଦ୍
6ଏକା ପାର୍ମେଶ୍ୱାର୍ସ୍ ନିମାନ୍ ଖ୍ରୀସ୍ତ୍କି କ୍ରିପାତି ମେହ୍କାଦାସ୍, ଆସିନ୍ ଏତ୍କ ଚାଁଣେ ଆମ୍ବିକିରି ଦୁସ୍ରା ସୁସାମାଚାର୍ ତାରା ନିମ୍ ବୁଙ୍ଗାଲ୍ଦାର୍, ଇଦ୍ଘିଲାଗାନ୍ ଇବନ୍ ଏରିକିରି ଏଙ୍ଗାଗେ ବହୁତ୍ ଆଚ୍ମିତ୍ ଲାଗ୍ଗଦ୍। 7ଲେକିନ୍ ପର୍କୁତ୍ନୁ ଦୁସ୍ରା ସୁସାମାଚାର୍ ତା ବିଲ୍କୁସ୍ ମାଲ୍ଲାଦିନ୍: ଲେକିନ୍ କେତ୍କ ଲୋକ୍ ଏନ୍ନେ ରାନାଏ, ଏକାର୍ କା ନିମାନ୍ ଫୁସ୍ଲ୍ନାଏ, ଆରୁ ଖ୍ରୀସ୍ତ୍ସ୍କି ସୁସାମାଚାର୍ବନ୍ ବିଗ୍ଡ଼ା ବେଦ୍ଦନାଏ। 8ଲେକିନ୍ ଯଦି ଏମ୍ ଚାହେ ଏକିନ୍ ସରଗ୍ ଦୂଁତ୍ହି, ଏକା ସୁସାମାଚାର୍ବନ୍ ଏମ୍ ପ୍ରଚାର୍ କାମ୍ଚ୍କାଚ୍କାମ୍, ଆବନ୍ ଆମ୍ବିକିରି ଆରୁ ଭିନେ ସୁସାମାଚାର୍ ପ୍ରଚାର୍ କାମସ୍ତା ଆସ୍କେ ପାର୍ମେଶ୍ୱାର୍ସ୍ ସବୁଦିନ୍ତକ୍ ଦଣ୍ଡ୍ ଚିୟସ୍। 9ଏସ୍କେ କା ଏମ୍ ପହ୍ଲେ ତେଙ୍କାଚ୍କାମ୍, ଆନ୍ନେନ୍ ଏନ୍ ଆକ୍କୁନ୍ ଆରୁଅହନ୍ ତେଙ୍ଗାଲ୍ଦାନ୍ କା ଏକା ସୁସାମାଚାର୍ବନ୍ ନିମ୍ ଗ୍ରହନ୍ କାମ୍ଚ୍କାଚ୍କାର୍, ଆବନ୍ ଆମ୍ବିକିରି ଯଦି ନେଦିନ୍ ଆରୁ ଭିନେ ସୁସାମାଚାର୍ ପ୍ରଚାର୍ କାମ୍ଦାସ୍ ତା ଆସ୍କେ ପାର୍ମେଶ୍ୱାର୍ସ୍ ସବୁଦିନ୍ତକ୍ ଦଣ୍ଡ୍ ଚିୟସ୍।
10ଏନ୍ ଆକ୍କୁନ୍ ଆଲାରିନ୍ ଖୁସ୍ କାମାଗେ ମାଲ୍ଲା ବେଦ୍ଦୁନ୍, ଆଲାରିନ୍ ଚାହେ ପାର୍ମେଶ୍ୱାର୍ସିନ୍? ଏନ୍ଦେର୍ ଏନ୍ ଆଲାରିନ୍ ଖୁସ୍ କାମାଗେ ଚାହାଁଲ୍ଦାମ୍? ଯଦି ଏନ୍ ଆକ୍କୁନ୍ତକ୍ ଆଲାରିନ୍ ଖୁସ୍ କାମାଗେ ଚାହଁନ୍ ତା ଏନ୍ ଖ୍ରୀସ୍ତ୍କି ସେବକ୍ ମା ମାନନ୍ନେ।
ପାଉଲୁସ୍ ଏସ୍କେ ଖାସ୍ଚେଲା ମାନ୍ଚାସ୍
11ହେ ଭାଇ ଆରୁ ବୁହୁଣୀ ଜାମାରୋ, ଏନ୍ ନିମାନ୍ ତେଙ୍ଗାଲ୍ଦାନ୍ କା ଏକା ସୁସାମାଚାର୍ବନ୍ ଏନ୍ ଶୁଣାବାଚ୍କାଦାନ୍, ଆଦ୍ ଆଲାର୍ଘି ମାଲ୍ଲିଦ୍। 12ଏନ୍ଦେର୍ଗେକା ଇ ସୁସାମାଚାର୍ଦ୍ ଏଙ୍ଗାଗେ ଏକିନ୍ ଆଲାସ୍କି ତାର୍ତି ମାଲ୍ଲା ହାଖ୍ଖରୁ, ଆରୁ ନା ଏକିନ୍ ଆଲାସ୍ ଏଙ୍ଗାନ୍ ଶିଖାବାଚ୍କାଚାସ୍, ବରନ୍ ଯୀଶୁ ଖ୍ରୀସ୍ତ୍ ତାନ୍ ନିଜେ ସୁସାମାଚାର୍ବନ୍ ଏଙ୍ଘାସାନ୍ ପ୍ରକଟ୍ କାମ୍ଚାସ୍। 13ଯେତ୍କବାକେନ୍ ଏନ୍ ୟାହୁଦୀ ଧରମ୍ନୁ ରାଚ୍କାନ୍, ତା ଏନ୍ ଏସ୍କେ ରାଚ୍କାନ୍ ଆଦ୍ଘି ବାରେନୁ ନିମ୍ ମେନ୍ଚ୍କାଦାର୍, ଆରୁ ଇବନ୍ହି ମେନ୍ଚ୍କାଦାର୍ କା ଏନ୍ ପାର୍ମେଶ୍ୱାର୍ସ୍କି ମଣ୍ତ୍ଲୀନ୍ତା ଆଲାରିନ୍ ମୁରୁକ୍ ସାଧାଲ୍କାନ୍ ଆରୁ ଆବ୍ଡ଼ାରିନ୍ ନାଶ୍ କାମାଗେ କୋଶିଷ୍ତକ୍ କାମାଲ୍କାନ୍। 14ୟାହୁଦୀ ଧରମ୍ବନ୍ ମାନ୍ନାନୁ ଏନ୍ ଏଙ୍ଘା ବୟସ୍ତା ୟାହୁଦୀର୍ସ୍ତି ଆଘ୍ଲି ରାଚ୍କାନ୍। ଏନ୍ଦେର୍ଗେକା ଏଙ୍ଘା ପୁର୍ଖା ଆଲାର୍ଘି ଏକା ରୀତିନୀତି ଏଙ୍ଗାଗେ ହାଖ୍ଖର୍କିଚା ଆବନ୍ ଏନ୍ ପୁରା ଜିଆତି ପାଲନ୍ କାମାଲ୍କାନ୍। 15ଲେକିନ୍ ପାର୍ମେଶ୍ୱାର୍ସ୍ ତା ଏଙ୍ଗାନ୍ ଏଙ୍ଘା ଜନମ୍ ମାନ୍ନାଘି ଆଘ୍ଲିନ୍ତିନିନ୍ ଚାଜ୍ଜକାଚାସ୍ ଆରୁ ତାଙ୍ଘା କ୍ରିପାତି ଏଙ୍ଗାନ୍ ମେଁହ୍କାଚାସ୍। 16ଯେତ୍କବାକେନ୍ ବିନାୟାହୁଦୀର୍ଘି ମାଝାନୁ ଆ ପାର୍ମେଶ୍ୱାର୍ସ୍କି ହାଦ୍ଦୁସ୍କି ବାରେନୁ ସୁସାମାଚାର୍ବନ୍ ମେନ୍ତାଗେ ନିଜର୍ ହାଦ୍ଦୁସିନ୍ ଏଙ୍ଗାଗେ ପ୍ରକଟ୍ କାମ୍ନାଘି ଇଚ୍ଛା ମାନ୍ଚାତା ଏନ୍ ଏକ୍ରିନ୍ ଆଲାର୍ସ୍ତି ଏନ୍ଦେର୍ହି ସାଲାହ୍ ମାଲ୍ଲା ହୁନ୍। 17ଆରୁ ନା ଏନ୍ ଯେରୁଶାଲେମ୍ଗେ ଆବ୍ଡ଼ାର୍ସାନ୍ କେର୍କାନ୍ ଏକାର୍ ଏଙ୍ଘାସ୍ତି ପହ୍ଲେ ଖାସ୍ଚେଲା ରାଚାର୍। ଲେକିନ୍ ଚାଁଣେନ୍ ଆରବ୍ ଦେଶ୍ଗେ ଆବ୍ଡ଼ାର୍ସ୍ତି ବୁଙ୍କାନ୍ କେର୍କାନ୍ ଆରୁ ଆସ୍ତି ଦାମାସ୍କସ୍ଗେ କିର୍କାନ୍।
18ଆନ୍ତିନ୍ ତିନ୍ ବଛର୍ଘି ପାଛ୍ଲି ଏନ୍ କେଇଫାସ୍୧:୧୮ କାଇଫାସ୍ ପାତ୍ରାସ୍କି ଦୁସ୍ରା ନାମେ ରାଚା। ଭେଁଟ୍ ମାନାଗେ ଯେରୁଶାଲେମ୍ଗେ କେର୍କାନ୍ ଆରୁ ଆସ୍ଗାନେ ପନ୍ଦର ଦିନ୍ତକ୍ ରାଚ୍କାନ୍। 19ଲେକିନ୍ ପ୍ରାଭୁସ୍କି ଭାଇ ୟାକୁବ୍ସ୍ସିନ୍ ଆମ୍ବିକିରି ଆରୁ ଏକା ଖାସ୍ଚେଲା ଜାମାର୍ଗାନେହି ଭେଁଟ୍ ମା ମାନ୍ଚ୍କାନ୍। 20ଏରା ପାର୍ମେଶ୍ୱାର୍ସ୍ ଆହ୍ଦାସ୍ କା ଏକା କାତ୍ଥାନ୍ ଏନ୍ ନିମାଗେ ଲେଖାଲ୍ଦାନ୍, ଆଦ୍ ଝୁଟ୍ଟୁ ମାଲ୍ଲିଦ୍। 21ଇଦ୍ଘି ପାଛ୍ଲି ଏନ୍ ସିରିଆ ଆରୁ କିଲିକିଆ ପ୍ରଦେଶ୍ କେର୍କାନ୍। 22ଲେକିନ୍ ୟାହୁଦୀଆ ପ୍ରଦେଶ୍ତା ଖ୍ରୀସ୍ତ୍ ମଣ୍ତ୍ଲୀନ୍ତା ଆଲାର୍ ଏଙ୍ଗାନ୍ ଏକ୍ଲାହି ସାମ୍ନାସାମ୍ନି ମାଲ୍ଲା ଏରୁର୍। 23ଏକା ଆଲାସ୍ ପହ୍ଲେ ଖ୍ରୀସ୍ତିୟା ମଣ୍ତ୍ଲୀବନ୍ ସାତାବାଲିଆସ୍ ଆସ୍ ପହ୍ଲେ ବିରୁଦ୍ଧ୍ କାମ୍ନାବାଲା ବିଶ୍ୱାସୀର୍ଘି ବାରେନୁ ଆକ୍କୁନ୍ ପ୍ରଚାର୍ କାମାଲ୍ଦାସ୍। 24ଆରୁ ଆବ୍ଡ଼ାର୍ ଏଙ୍ଘା କାରଣ୍ ପାର୍ମେଶ୍ୱାର୍ସ୍କି ମାହିମା କାମାଲିୟାର୍।
2ପାଉଲୁସ୍କି ଶିକ୍ଷାବନ୍ ଦୁସ୍ରା ଖାସ୍ଚେଲା ଜାମାର୍ହି ଗ୍ରହନ୍ କାମାଲ୍ନାଏ
1ଚଉଦ ବଛର୍ଘି ପାଛ୍ଲି ଏନ୍ ବାର୍ନାବାସ୍ଗାନେ ଆରୁଅହନ୍ ଯେରୁଶାଲେମ୍ଗେ କେର୍କାନ୍ ଆରୁ ତିତୁସ୍ସିନ୍ ହି ସାଙ୍ଗେନ୍ ଅଚ୍କାନ୍ ଆରୁ କେର୍କାନ୍। 2ପାର୍ମେଶ୍ୱାର୍ସ୍ ଏଙ୍ଗାନ୍ ଦର୍ଶନ୍ ଚିଚ୍ଚାସ୍, ହୁଦ୍ଘିଲାଗାନ୍ ଏନ୍ ଆସାନ୍ କେର୍କାଚ୍କାନ୍। ଯେତ୍କବାକେନ୍ ଏନ୍ ଆସାନ୍ ରାଚ୍କାନ୍, ଏନ୍ ଭିନେ ତାରା ମଣ୍ତ୍ଲୀନ୍ତା ମୁଖ୍ୟାଜାମାରିନ୍ ଭେଁଟ୍ ମାନ୍ଚ୍କାନ୍, ଆରୁ ବିନାୟାହୁଦୀ ଆଲାର୍ଘି ମାଝାନୁ ଏନ୍ ପ୍ରଚାର୍ କାମ୍ନାବାଲା ସୁସାମାଚାର୍ବନ୍ ଆବ୍ଡ଼ାରିନ୍ ଶୁଣାବାଚ୍କାନ୍, ଏନ୍ ଇଦ୍ଘିଲାଗାନ୍ କାମ୍ଚ୍କାନ୍ କା ଏକା ଆଘ୍ଲି ଉଲ୍ଲାନୁ କାମ୍ଚ୍କାଚ୍କାନ୍ ଆରୁ ଏକାନ୍ ଏନ୍ ଆକ୍କୁନ୍ ସୁସାମାଚାର୍ବନ୍ ପ୍ରଚାର୍ କାମାଗେଲାଗାନ୍ ବହୁତ୍ ମେହ୍ନତ୍ କାମ୍ଚ୍କାଦାନ୍ ଆଦ୍ ବେକାର୍ ମା ମାନ୍ନାଦ୍। 3ଏଙ୍ଘା ସାଙ୍ଗେ ତିତୁସ୍ ୟୁନାନୀସ୍ ହାଲେହି ଆସିନ୍ ଖାତ୍ନା କାମାଗେ ଯବର୍ଜସ୍ତି ମା କାମ୍ଚାର୍। 4ଆ ଠାକୁୱା ଭାଇର୍ ବିଶ୍ୱାସୀ ମାଲ୍ଲାରୁର୍ ହାଲେହି ବିଶ୍ୱାସୀର୍ ଲେଖା ଏଦ୍ରାଲିୟାର୍, ଆରୁ ଆବ୍ଡ଼ାର୍ ବିଶ୍ୱାସୀର୍ଘି ମାଝାନୁ କାଡ଼େ-କାଡ଼େ କର୍ଚାର୍ କେରାର୍, ଯୀଶୁ ଖ୍ରୀସ୍ତ୍ତି ଏକାଦ୍ ନାମାଗେ ଆଜାଦୀ ହାଖ୍ର୍କିଚି ଆବନ୍ ଲୁଟି ହୋଇକିରି ନାମାନ୍ ୟାହୁଦୀ ନିୟମ୍ଘି ବନ୍ଧନ୍ନୁ ଉଇୟା ବେଦ୍ଦାଲିୟାର୍। 5ଏମ୍ ଆବ୍ଡ଼ାର୍ଘି କାତ୍ଥାନୁ କାଟେହି ରାଜୀ ମା ମାନ୍ଚ୍କାମ୍, ଏନ୍ଦେର୍ଗେକା ନିମ୍ ସୁସାମାଚାର୍ଘି ସତ୍ତୁବନ୍ ବିଶ୍ୱାସ୍ କାମର୍। 6ଆରୁ ଏକାର୍ ସିଆଁଣ୍ ମୁଖ୍ୟା ରାଚାର୍, (ଆବ୍ଡ଼ାର୍ ଚାହେ ଏସ୍କିନ୍ହି ରାଚାର୍, ଏଙ୍ଘାଏ ଏନ୍ଦେର୍ହି ଫରକ୍ ମା ଖାତ୍ରା।) ଏନ୍ଦେର୍ଗେକା ପାର୍ମେଶ୍ୱାର୍ସ୍ ନେଖା ପାଖାହି ମା ମାନ୍ଦାସ୍, ଆବ୍ଡ଼ା ମୁଖ୍ୟାର୍ ଏଙ୍ଗାନ୍ ଏନ୍ଦେର୍ହି ପୁନା ସାଲାହ୍ ମା ଚିଚ୍ଚାର୍। 7ଲେକିନ୍ ଯେତ୍କବାକେନ୍ ଇବ୍ଡ଼ା ମୁଖ୍ୟାର୍ ଏରିୟାର୍ କା ପାର୍ମେଶ୍ୱାର୍ସ୍ ୟାହୁଦୀ ଆଲାରିନ୍ ସୁସାମାଚାର୍ ଶୁଣାବାନା ନାଲ୍ଖୁନ୍ ପାତ୍ରାସ୍କେ ସୋଁପ୍ଚେଇଚାସ୍, ଆନ୍ନେନ୍ ବିନାୟାହୁଦୀ ଆଲାରିନ୍ ସୁସାମାଚାର୍ ଶୁଣାବାନା ନାଲ୍ଖୁନ୍ ଏଙ୍ଗାଗେ ସୋଁପ୍ଚେଇଚାସ୍। 8(ଏନ୍ଦେର୍ଗେକା ଏକାସ୍ ପାତ୍ରାସ୍ସିନ୍ ୟାହୁଦୀ ଜାମାର୍ଘି ମାଝାନୁ ଖାସ୍ଚେଲାର୍ ନାଲ୍ଖୁ କାମାଗେ ଶକ୍ତି ଚିଚ୍ଚାର୍, ଆସିନ୍ ଏଙ୍ଗାହି ବିନାୟାହୁଦୀର୍ଘି ମାଝାନୁ ଖାସ୍ଚେଲାର୍ ନାଲ୍ଖୁ କାମାଗେ ଶକ୍ତି ଚିଚ୍ଚାର୍)। 9ୟାକୁବ୍ ଆରୁ କେଇଫାସ୍ ଆରୁ ଯୋହାନ୍ସ୍, ଏକାରିନ୍ କା ମଣ୍ତ୍ଲୀନ୍ତା ଖାମ୍ବା ଖୁଟା ସୋଚାଲିୟାର୍, ଯେତ୍କବାକେନ୍ ଆବ୍ଡ଼ାର୍ ଏଙ୍ଗାଗେ ପାର୍ମେଶ୍ୱାର୍ସ୍କି ଚିଚ୍ଚକା କ୍ରିପାବନ୍ ଆଖ୍ଖାର୍ ତା ଆବ୍ଡ଼ାର୍ ଏଙ୍ଘାଗାନେ ଆରୁ ବାର୍ନାବାସ୍ଗାନେ ସାଙ୍ଗେନ୍ ନାଲ୍ଖୁ କାମମ୍ବୁଲି ହେଖ୍ଖା ମିଲାବାଚାର୍। ଆରୁ ଆବ୍ଡ଼ାର୍ ରାଜୀ ମାନ୍ଚାର୍ କା ଏମ୍ ବିନାୟାହୁଦୀଆର୍ସାନ୍ ସୁସାମାଚାର୍ ପ୍ରଚାର୍ କାମ୍ତେରମ୍, ଆରୁ ଆବ୍ଡ଼ାର୍ ୟାହୁଦୀଆର୍ସାନ୍ ସୁସାମାଚାର୍ ପ୍ରଚାର୍ କାମ୍ତେ ରର୍। 10ଆବ୍ଡ଼ାର୍ ଖାଲି ଏନ୍ନେ ତେଙ୍ଗିୟାର୍ କା ଏମ୍ ଗରୀବ୍ର୍ଘି ମଦେତ୍ କାମମ୍, ଆରୁ ଇ ନାଲ୍ଖୁବନ୍ କାମାଗେ ଏନ୍ ମୁରୁକ୍ ଇଚ୍ଛା କାମାଲ୍କାନ୍।
ପାଉଲୁସ୍ ପାତ୍ରାସ୍କି ବିରୋଦ୍ଧ କାମାଲ୍ଦାସ୍
11ଲେକିନ୍ ଯେତ୍କବାକେନ୍ କେଇଫାସ୍ ଆନ୍ତାଖିଆଗେ ବାର୍ଚାସ୍, ତା ଏନ୍ ଖୁଲାଖୁଲି ଆସ୍କି ବିରୋଦ୍ଧ କାମ୍ଚ୍କାନ୍, ଏନ୍ଦେର୍ଗେକା ଆସ୍ ଖାରାପ୍ ପାବୁନୁ କେର୍କାଚାସ୍। 12ଏନ୍ଦେର୍ଗେକା ୟାକୁବ୍ସ୍କି ତାର୍ତି ତାଏକା କେତ୍କ ଲୋକ୍ ଆଲାର୍ଘି ବାର୍ନାଘି ଆଘ୍ଲି ଆସ୍ ବିନାୟାହୁଦୀର୍ଗାନେ ଅନା ମହାଁଲିୟାସ୍, ଲେକିନ୍ ଯେତ୍କବାକେନ୍ ଆବ୍ଡ଼ାର୍ ବାର୍ଚାର୍, ତା ୟାହୁଦୀ ଭିଡ଼୍ଘି ଏଲ୍ଚ୍କାତି ଆସ୍ ପାଛ୍ଲି ହାଟ୍ରାସ୍ କେରାସ୍ ଆରୁ ବିନାୟାହୁଦୀର୍ସ୍ତି ଭିନେ ମାନ୍ଚାସ୍ କେରାସ୍। 13ହୁଦ୍ଘିପାଛ୍ଲି ଦୁସ୍ରା ୟାହୁଦୀ ଭାଇର୍ହି କପଟ୍ କାମ୍ଚାର୍ ଆନ୍ନେନିନ୍ ବାର୍ନାବାସ୍ହି କପଟ୍ନୁ ବାର୍ଚାସ୍ କେରାସ୍। 14ଲେକିନ୍ ଯେତ୍କବାକେନ୍ ଏନ୍ ଏର୍କାନ୍ କା ଆବ୍ଡ଼ାର୍ ସୁସାମାଚାର୍ଘି ସତ୍ତୁ ପାବୁନୁ ମା ଚାଲ୍ର୍ନାଏ ତା ଏନ୍ ଜାମାର୍ଘି ଆଘ୍ଲି ପାତ୍ରାସ୍ସିନ୍ ତେଙ୍କାନ୍, “ନିନ୍ ଜନମ୍ତି ୟାହୁଦୀ ରାଦାଏ ହାଲେହି ନିନ୍ ୟାହୁଦୀ ରିତୀନୀତି ଲେଖା ମାଲ୍ଲା ବରନ୍ ବିନାୟାହୁଦୀର୍ଘି ରିତୀନୀତି ଲେଖା ଉଜ୍ଜାଲ୍ଦାର୍। ଏନ୍ନେ ରାଇ ତା ନିମ୍ ବିନାୟାହୁଦୀର୍ରିନ୍ ୟାହୁଦୀର୍ଘି ରିତୀନୀତି ଗ୍ରହନ୍ କାମାଗେ ଏନ୍ଦେର୍ଗେ ଯବର୍ଜସ୍ତି କାମାଲ୍ଦାର୍।”
ବିଶ୍ୱାସ୍ତି ଧାର୍ମିକ୍ ମାନ୍ନା
15ନାମ୍ ତା ଜନମ୍ତି ୟାହୁଦୀତ୍, ଆରୁ ନାହ୍ମାଏ ପାପ୍ ବିନାୟାହୁଦୀର୍ଗାନେ ଏନ୍ଦେର୍ହି ସମ୍ବନ୍ଧ ମାଲ୍ଲାଦିନ୍, 16ହାଲେହି ନାମ୍ ଇବନ୍ ଆହ୍ଦାତ୍ କା ଏକିନ୍ ଆଲାସ୍ ମୁଶାସ୍କି ନିୟମ୍ବନ୍ ପାଲନ୍ ମାନ୍ନାତି ମାଲ୍ଲା, ଖାଲି ଯୀଶୁ ଖ୍ରୀସ୍ତ୍ସ୍କି ମିଆଁ ବିଶ୍ୱାସ୍ କାମ୍ନାତି ପାର୍ମେଶ୍ୱାର୍ସ୍କି ନଜର୍ନୁ ନାମ୍ ନିର୍ଦ୍ଦୋଷ୍ ମାନ୍ଦାତ୍। ନାମ୍ହି ଯୀଶୁ ଖ୍ରୀସ୍ତ୍ସ୍କି ମିଆଁ ବିଶ୍ୱାସ୍ କାମ୍ଚ୍କାଦାତ୍, ହୁଦ୍ଘିଲାଗାନ୍ ନିୟମ୍ବନ୍ ମାନ୍ନାତି ମାଲ୍ଲା, ଲେକିନ୍ ଖ୍ରୀସ୍ତ୍ସିନ୍ ବିଶ୍ୱାସ୍ କାମ୍ନାତି ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନ୍ଦାତ୍, ଏନ୍ଦେର୍ଗେକା ନିୟମ୍ବନ୍ ପାଲନ୍ କାମ୍ନାତି ଏକିନ୍ ଆଲାସ୍ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମା ମାନ୍ଦାସ୍। 17ହାଲେହି ନାମ୍ ଖ୍ରୀସ୍ତ୍କି ଦ୍ୱାରା ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନାଗେ ଚାହଁଦାତ୍ ତା ନାମ୍ ବିନାୟାହୁଦୀର୍ଘି ଲେଖା ପାପୀତ୍ ଏନ୍ନେ ପ୍ରମାଣ୍ ମାନିଦ୍। ଇଦ୍ଘି ମତ୍ଲବ୍ ଇଦ୍ ରାଇଦ୍ କାଁଏ ଖ୍ରୀସ୍ତ୍ସ୍ ପାପ୍ବନ୍ ବାଢ଼୍ର୍ତେ ଚିଦାସ୍ କାଁଏ? ମାଲ୍ଲା ବିଲ୍କୁସ୍ ମାଲ୍ଲା! 18ଏନ୍ଦେର୍ଗେକା ଏକା ନିୟମ୍ବନ୍ ଏନ୍ ଆମ୍ବେଇ ଚିଚ୍କାଦାନ୍ ଆବନିନ୍ ଆରୁଅହନ୍ ପ୍ରଚାର୍ କାମ୍ଦାନ୍ ତା ନିଜ୍କେନିଜ୍ ଦୋଷୀ ତେଙ୍ଗ୍ଦାନ୍। 19ଯେତ୍କବାକେନ୍ ଏନ୍ ନିୟମ୍ ମାନାଲ୍କାନ୍, ଇଦ୍ ଏଙ୍ଗାନ୍ ଦୋଷୀ କାମ୍ଚାଦ୍, ହୁଦ୍ଘିଲାଗାନ୍ ଏନ୍ ନିୟମ୍ବନ୍ ମାନାଗେ ଆମ୍ବେଇଚ୍ଚକାନ୍, ହୁଦଘିଲାଗାନ୍ ଏନ୍ ପାର୍ମେଶ୍ୱାର୍ସ୍କି ଲାଗାନ୍ ଉଜ୍ଜାଅଙ୍ଗନ୍। 20ଏନ୍ ଖ୍ରୀସ୍ତ୍ସ୍ଗାନେ କ୍ରୁଶ୍ନୁ ଠୋକା କେର୍କାଦାନ୍, ଆକ୍କୁନ୍ ଏନ୍ ମାଲ୍ଲା ଉଜ୍ଜୁନ୍, ଲେକିନ୍ ଖ୍ରୀସ୍ତ୍ସ୍ ଏଙ୍ଘାଏନୁ ଉଜ୍ଜାଲ୍ଦାସ୍। (ଏନ୍ ଆକ୍କୁନ୍ ଉଜ୍ଜାଲ୍ଦାନ୍ତା ଏଙ୍ଗାନ୍ ବାନେ ହାଖ୍ଖୀକିରି ଏଙ୍ଘାଲାଗାନ୍ ନିଜ୍କେନିଜ୍ବନ୍ ଚିନାବାଲା ପାର୍ମେଶ୍ୱାର୍ସ୍) ଆରୁ ଏନ୍ ଦୁନିଆଁନୁ ଆକ୍କୁନ୍ ଉଜ୍ଜାଲ୍ଦାନ୍ତା ଖାଲି ଆ ବିଶ୍ୱାସ୍ତି ଉଜ୍ଜାଲ୍ଦାନ୍, ଏକା ବିଶ୍ୱାସ୍ଦ୍ କା ପାର୍ମେଶ୍ୱାର୍ସ୍କି ହାଦ୍ଦୁସ୍କି ମିଆଁ ରାଇ, ଏକାସ୍ ଏଙ୍ଗାନ୍ ବାନେ ହାଖ୍ଖଦାସ୍ ଆରୁ ଏଙ୍ଘାଲାଗାନ୍ ନିଜ୍କେନିଜ୍ ବଲୀ ଚିଚ୍ଚାସ୍ ଲାଗ୍ଗିୟାସ୍। 21ଏନ୍ ପାର୍ମେଶ୍ୱାର୍ସ୍କି କ୍ରିପାବନ୍ ବେକାର୍ ମା କାମ୍ଦାନ୍; ଏନ୍ଦେର୍ଗେକା ଯଦି ନିୟମ୍ବନ୍ ପାଲନ୍ କାମ୍ନାତି ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ରତ୍ନେ ତା ଖ୍ରୀସ୍ତ୍ସ୍କି ଖିନାଦ୍ ବେକାର୍ ମାନଦ୍ନେ।
3ବିଶ୍ୱାସ୍ତି ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନ୍ନା
1ହେ ନିର୍ବୁଦ୍ଦିଆ ଗାଲାତିୟାରୋ, ଯୀଶୁ ଖ୍ରୀସ୍ତ୍ସିନ୍ ଏନ୍ଦେର୍ଗେ କ୍ରୁଶ୍ନୁ ଠୋକାକେରା ଆ କାତ୍ଥାଦ୍ ନିମାଗେ ସାଫା-ସାଫା ଏଥ୍ରାକେରା, ହାଲେହି ନିମାରିନ୍ ନେର୍ ନିଜର୍ତାରା କାମ୍ଚେଚାର୍। 2ଏନ୍ ଖାଲି ନିହ୍ମାସ୍ତି ଏତ୍କ ଆହାଗେ ବେଦ୍ଦାଲ୍ଦାନ୍ କା ନିମ୍ ପାବିତାର୍ ଆତ୍ମାବନ୍ ଏସ୍କେ ହାକ୍କାର୍? ଆ ନିୟମ୍ବନ୍ ପାଲନ୍ କାମ୍ନାଘି କାରଣ୍ତି ଇ ସୁସାମାଚାର୍ବନ୍ ମେନିକିରି ଆରୁ ଆଦ୍ଘି ମିଆଁ ବିଶ୍ୱାସ୍ କାମ୍ନାଘି କାରଣ୍ତି ହାକ୍କାର୍? 3ନିମ୍ ଜାମାର୍ ଖ୍ରୀସ୍ତ୍ ଜୀବନ୍ ପାବିତାର୍ ଆତ୍ମାଘି ମଦେତ୍ତି ସୁରୁ କାମିକିରି ଆକ୍କୁନ୍ହି ଏନ୍ଦେର୍ଗେ ନିଜର୍ ମେହ୍ନତ୍ତି ଉଜ୍ଜାଗେ ଲାଗାନ୍ ମୁଞ୍ଜାଗେ କୋଶିଷ୍ କାମାଲ୍ଦାର୍। 4ହାଲେ ନିମ୍ ବେକାର୍ନୁ ଏତ୍କ ଦୁଃଖୁ ସାହ୍ଚ୍କାର୍ କାଁଏ? ଜରୁର୍ ନିହ୍ମା ଦୁଃଖୁ ଉଠାବାନା ବେକାର୍ ମାଲ୍ଲିଦ୍। 5ପାର୍ମେଶ୍ୱାର୍ସ୍ ନିମାଗେ ପାବିତାର୍ ଆତ୍ମା ଚିକିରି ନିହ୍ମା ମାଝାନୁ ଢେର୍ ଅଦ୍ଭୁତ୍ ନାଲ୍ଖୁ କାମ୍ଚ୍କାଦାସ୍। ନିମ୍ ଜାମାର୍ ନିୟମ୍ବନ୍ ପାଲନ୍ କାମ୍ନାତି ପାର୍ମେଶ୍ୱାର୍ସ୍ ଏନ୍ନେ କାମ୍ଚ୍କାଦାସ୍ କାଁଏ? ଇ ସୁସାମାଚାର୍ବନ୍ ମେନିକିରି ଆସ୍କି ମିଆଁ ବିଶ୍ୱାସ୍ କାମ୍ନାତି ପାର୍ମେଶ୍ୱାର୍ସ୍ ଏନ୍ନେ କାମ୍ଚାସ୍?
6ନାମ୍ ଆବ୍ରାହାମ୍ସ୍କି ବାରେନୁ ଏରତ୍ ତା ପାବିତାର୍ ଶାସ୍ତ୍ରନୁ ଆବ୍ରାହାମ୍ସ୍କି ବାରେନୁ ଏନ୍ନେ ଲେଖା ରାଇ “ଆସିନ୍ ପାର୍ମେଶ୍ୱାର୍ସ୍କି ମିଆଁ ବିଶ୍ୱାସ୍ କାମ୍ଚାସ୍ ହୁଦ୍ଘିଲାଗାନ୍ ଆସ୍ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ଗନ୍ତି ମାନ୍ଚାସ୍। 7ତା ନିମ୍ ଇବନ୍ ଆହା କା ଏକାର୍ ବିଶ୍ୱାସ୍ କାମ୍ନାଏ, ଆବ୍ଡ଼ାର୍ ଆବ୍ରାହାମ୍ସ୍କି ହାଦ୍ଦୁବଚ୍ଚର୍।” 8ଆରୁ ପାବିତାର୍ ଶାସ୍ତ୍ରନୁ ପହ୍ଲେନ୍ତିନିନ୍ ଏନ୍ନେ ଲେଖ୍ଚ୍କା ରାଇ କା, “ପାର୍ମେଶ୍ୱାର୍ସ୍ ବିନାୟାହୁଦୀଆରିନ୍ ବିଶ୍ୱାସ୍ଘି ଦ୍ୱାରା ତାଙ୍ଗା ନଜର୍ନୁ ନିର୍ଦ୍ଦୋଷ୍ ଗନ୍ତି କାମସ୍। ଆରୁ ପହ୍ଲେନ୍ତିନ୍ ଆବ୍ରାହାମ୍ସ୍ସିନ୍ ଇ ସୁସାମାଚାର୍ ମେନ୍ତା କେର୍କିଚା କା ନିଙ୍ଘା ଦ୍ୱାର୍ନୁ ଜାମା ଜାତିନ୍ତା ଆଲାର୍ଗେ ଆଶୀର୍ବାଦ୍ ହାଖ୍ଖରଦ୍।” 9ଇଦ୍ଘିଲାଗାନ୍ ଏକାର୍ ବିଶ୍ୱାସ୍ କାମ୍ନାଏ, ଆବ୍ଡ଼ାର୍ ଆଶୀର୍ବାଦ୍ ହାଖ୍ଖନାଏ, ଏସ୍କେ ଆବ୍ରାହାମ୍ସ୍ ବିଶ୍ୱାସ୍ କାମ୍ଚାସ୍, ଆରୁ ଆଶୀର୍ବାଦ୍ ହାଖ୍ଖୀୟାସ୍।
10ଏକାନ୍ ଆଲାର୍ ନିୟମ୍ବନ୍ ପାଲନ୍ କାମ୍ନାତି ଭାର୍ଷା ଉଇନାଏ ତା ଆବ୍ଡ଼ା ଆଲାର୍ ପାର୍ମେଶ୍ୱାର୍ସ୍କି ଦଣ୍ତ୍ଘି ଲାଇଗ୍ ରାନାଏ ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଏନ୍ନେ ଲେଖ୍ଚ୍କା ରାଇ କା ଏକା ଆଲାର୍ ନିୟମ୍ଘି ବହିନୁ ଲେଖ୍ର୍କା ଜାମା କାତ୍ଥାବନ୍ ପାଲନ୍ ମା କାମ୍ତେ ରାନାଏ ତା ଆବ୍ଡ଼ାର୍ ପାର୍ମେଶ୍ୱାର୍ସ୍କି ଦଣ୍ତ୍ଘି ଲାଇଗ୍ ରାନାଏ। 11ଆରୁ ଇଦ୍ ତା ସାଫା-ସାଫା କାତ୍ଥାଦ୍ କା ନିୟମ୍ବନ୍ ମାନ୍ନାଘି ଲାଗାନ୍ ନେଦ୍ହି ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମା ଠାହ୍ରାରର୍, ଏନ୍ଦେର୍ଗେକା ଆସ୍କି ନଜର୍ନୁ ନିର୍ଦ୍ଦୋଷ୍ ଆଲାର୍ ବିଶ୍ୱାସ୍ତି ଉଜ୍ଜର୍। 12ଲେକିନ୍ ନିୟମ୍ଘି ବିଶ୍ୱାସ୍ଗାନେ ଏନ୍ଦେର୍ହି ସମ୍ବନ୍ଧ ମାଲ୍ଲାଦିନ୍, ଏନ୍ଦେର୍ଗେକା ଶାସ୍ତ୍ରନୁ ଲେଖ୍ଚ୍କା ରାଇ, ଏକାର୍ ନିୟମ୍ବନ୍ ମାନର୍, ଆବ୍ଡ଼ାର୍ ଆଦ୍ଘି ଭାର୍ଷା ଉଜ୍ଜର୍। 13ଖ୍ରୀସ୍ତ୍ସ୍ ନାହ୍ମା ପାପ୍ଘି ଦଣ୍ଡ୍ବନ୍ ତାଙ୍ଘା ମିଆଁ ଅଚ୍ଚାସ୍, ଆରୁ ନିୟମ୍ଘି ଦଣ୍ଡ୍ତି ନାମାନ୍ ବାଛାବାଚାସ୍, ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ଏକାରିନ୍ ମାନ୍ନୁନୁ ଟାଙ୍ଗ୍ନାଏ, ଆବ୍ଡ଼ାର୍ ସାର୍ପାରାଚ୍କାର୍।” 14ପାର୍ମେଶ୍ୱାର୍ସ୍ ନାମାଗେ ପାବିତାର୍ ଆତ୍ମାଘି କାତ୍ଥାବନ୍ ଚିଚ୍ଚକାଦାସ୍। ନାମ୍ ବିଶ୍ୱାସ୍ଘି ଚାଲ୍ତେ ଆ ପାବିତାର୍ ଆତ୍ମାବନ୍ ହାଖ୍ଖାଗେ ଲାଗାନ୍ ଯୀଶୁ ଖ୍ରୀସ୍ତ୍ସ୍ ନାମାନ୍ ବାଛାବାଚ୍କାଦାସ୍। ହୁଦ୍ଘିଲାଗାନ୍ ଆବ୍ରାହାମ୍ସ୍କେ ଚିଚ୍ଚକା ଆଶିଷ୍ ଯୀଶୁ ଖ୍ରୀସ୍ତ୍ସ୍କି ଦ୍ୱାରା ବିନାୟାହୁଦୀର୍ଗେହି ହାଖ୍ରା ଅଙ୍ଗଦ୍।
ପାର୍ମେଶ୍ୱାର୍ସ୍କି ଚିଚ୍ଚକା କାତ୍ଥା ଆରୁ ନିୟମ୍
15ହେ ଭାଇ ଆରୁ ବୁହୁଣୀଜାମାରୋ, ଏନ୍ ନିମାନ୍ ରୋଜ୍ଦିନ୍ତା ଜୀବନ୍ତା ଅଣ୍ଟା ନମୁନା ତେଙ୍ଗାଲ୍ଦାନ୍, ଯେତ୍କବାକେନ୍ ଦୁଇ ଲୋକ୍ ଆଲାର୍ଘି ମାଝାନୁ ରାଜୀନାମା ପାକ୍କା ମାନିତା ନେଦ୍ହି ଆବନ୍ ତୋଡ଼ା ପଲ୍ଲନାଏ କା ଯୋଡ଼ା ପଲ୍ଲନାଏ। 16ହନ୍ନେନ୍ ଆବ୍ରାହାମ୍ ଆରୁ ଆସ୍କି ବାଉଁଶାରିନ୍ କାତ୍ଥା ଚିୟାକେରା। ପାବିତାର୍ ଶାସ୍ତ୍ର ଏନ୍ନେ ମାଲ୍ଲା ତେଙ୍ଗୁ କା, “ବାଉଁଶାର୍” ଢେର୍ ଆଲାରିନ୍ ମାଲ୍ଲା ତେଙ୍ଗାକୁ, “ଆସ୍କି ବାଉଁଶାରିନ୍” ଲେକିନ୍ ଅଣ୍ଟାସ୍କି ବାରେନୁ ତେଙ୍ଗାକେର୍କିଚି, ଆସ୍ ଖ୍ରୀସ୍ତ୍ସ୍। 17ଲେକିନ୍ ଏଙ୍ଘା ତେଙ୍ଗ୍ନାଘି ମତ୍ଲବ୍ ଇଦ୍ କା ଏକା ରାଜୀନାମା ପାର୍ମେଶ୍ୱାର୍ସ୍ ପହ୍ଲେନ୍ତିନିନ୍ ପାକ୍କା କାମ୍ଚ୍କାଚାସ୍, ଆବନ୍ ଚାର୍ଶହ ତିରିଶ୍ ବଛର୍ଘି ପାଛ୍ଲି ବାର୍ଚ୍କା ନିୟମ୍ହି ବାଦ୍ଲା ପଲ୍ଲୀଦ୍ କା ରାଜୀନାମା ବେକାର୍ ମାନା ପଲ୍ଲୀଦ୍। 18ଏନ୍ଦେର୍ଗେକା ଯଦି ବୁଆସ୍କି ସମ୍ପତ୍ତିଘି ହକ୍ ନିୟମ୍ତି ହାଖ୍ଖରିଦ୍, ହାଲେ ତା କାତ୍ଥା ଚିଚ୍ଚକାତି ମା ହାଖ୍ଖରିଦ୍, ଲେକିନ୍ ପାର୍ମେଶ୍ୱାର୍ସ୍ ତାଙ୍ଘା କ୍ରିପାତି ଆବ୍ରାହାମ୍ସ୍କେ ଇ ହକ୍ବନ୍ କାତ୍ଥା ଚିଇକିରି ଚିଚ୍ଚକାଦାସ୍।
19ହାଲେ ନିୟମ୍ ଏନ୍ଦେର୍ଗେ ଚିଆ କେର୍କିଚା? ଆଲାର୍ଘି ପାପ୍ବନ୍ ଏଦାଗେ ନିୟମ୍ ଚିଆ କେର୍କିଚା। ହୁଦଘିଲାଗାନ୍ ଆବ୍ରାହାମ୍ସ୍କି ଆ ବାଉଁଶାସ୍କି ବାର୍ନାତକ୍ ନିୟମ୍ଦ୍ ରଦ୍, ଏକାସ୍କି ବାର୍ନାଘି କାତ୍ଥା ଚିଆ କେର୍କିଚା। ପାର୍ମେଶ୍ୱାର୍ସ୍ ମୁଶାସ୍କେ ନିୟମ୍ବନ୍ ସରଗ୍ଦୂଁତ୍ଘି ଦ୍ୱାର୍ନୁ ଚିଚ୍ଚାସ୍, ଏକାଦ୍ ପାର୍ମେଶ୍ୱାର୍ ଆରୁ ଆଲାର୍ଘି ମାଝାନୁ ମଧ୍ୟସ୍ଥତାଦ୍। 20ମଧ୍ୟସ୍ଥତା ଯୋଡ଼େ ଦଲ୍ଘି ମାଝାନୁ ମାନିଦ୍, ଲେକିନ୍ ପାର୍ମେଶ୍ୱାର୍ସ୍ ତା ଅଣ୍ଟାସ୍।
ବିଶ୍ୱାସ୍ତି ପାର୍ମେଶ୍ୱାର୍ସ୍କି ହାଦ୍ଦୁବଚ୍ଚ ମାନତ୍
21ତା ଏନ୍ଦେର୍ ନିୟମ୍ଦ୍ ପାର୍ମେଶ୍ୱାର୍ସ୍କି କାତ୍ଥା ଚିଚ୍ଚକାଘି ବିରୁଦ୍ଧ୍ନୁ ରାଇ? ବିଲ୍କୁସ୍ ମାଲ୍ଲା! ଏନ୍ଦେର୍ଗେକା ଯଦି ଏନ୍ନେ ନିୟମ୍ ଚିଆକୋଦ୍ନେ ଏକାଦ୍ କା ଜୀବନ୍ ଚିଆ ଅଙ୍ଗଦ୍ନେ, ତା ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନତ୍ନେ। 22ଲେକିନ୍ ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ କା ପୁରା ଦୁନିଆଁଦ୍ ପାପ୍ଘି ବନ୍ଧନ୍ ରାଇଦ୍, ତାକା ନାମ୍ ଯୀଶୁ ଖ୍ରୀସ୍ତ୍ସିନ୍ ବିଶ୍ୱାସ୍ କାମ୍ଚ୍କୁନ୍ ପାର୍ମେଶ୍ୱାର୍ସ୍କି କାତ୍ଥା ଚିଚ୍ଚକାନ୍ ହାଖ୍ଖା ଅଙ୍ଗତ୍।
23ଲେକିନ୍ ବିଶ୍ୱାସ୍ଘି ବାର୍ନାଘି ଆଘ୍ଲି ଆରୁ ଆ ବିଶ୍ୱାସ୍ଘି ପ୍ରକଟ୍ ମାନ୍ନାଘି ସାମାୟତକ୍ ନାମ୍ ନିୟମ୍ଘି ବନ୍ଧନ୍ନୁ ହିର୍କାତ୍ କେର୍କାଚ୍କାତ୍। 24ଇଦ୍ଘିଲାଗାନ୍ ନିୟମ୍ ଖ୍ରୀସ୍ତ୍ସ୍କି ବାର୍ନାତକ୍ ନାହ୍ମାଏ ପାବୁ ଏଦୁ ରାଚା। ଆରୁ ନାମ୍ ବିଶ୍ୱାସ୍ତି ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ଠାହ୍ରାରତ୍। ମା ମାନ୍ନାତକ୍ ନିୟମ୍ଦ୍ ନାମାନ୍ ସାମ୍ଭଡ଼ାଚା ଉଇକିଚା। 25ଲେକିନ୍ ଯେତ୍କବାକେନ୍ ବିଶ୍ୱାସ୍ ବାର୍ଚା କେରା ତା ନାମ୍ ଆକ୍କୁନ୍ ନିୟମ୍ଘି ଅଧିନ୍ନୁ ମାଲ୍କାତିନ୍। 26ଏନ୍ଦେର୍ଗେକା ଯୀଶୁ ଖ୍ରୀସ୍ତ୍ସ୍କି ମିଆଁ ବିଶ୍ୱାସ୍ କାମ୍ନାଘି ଲାଗାନ୍, ନିମ୍ ଜାମାର୍ ପାର୍ମେଶ୍ୱାର୍ସ୍କି ହାଦ୍ଦୁବଚ୍ଚର୍। 27ଆରୁ ନିହ୍ମାସ୍ତି ଯେତ୍କର୍ ଯୀଶୁ ଖ୍ରୀସ୍ତ୍ସ୍କି ମିଆଁ ବିଶ୍ୱାସ୍ କାମିକିରି ଆସ୍ନାନ୍ ଅଚ୍ଚକାଦାର୍, ଆବ୍ଡ଼ାର୍ ଖ୍ରୀସ୍ତ୍ସ୍ଗାନେ ଯୋଡର୍ନାଏ କାନାଏ। 28ହୁଦ୍ଘିଲାଗାନ୍ ଆକ୍କୁନ୍ ନେଦ୍ହି ୟାହୁଦୀ ମାଲ୍ଦାର୍ କା ବିନାୟାହୁଦୀ ମାଲ୍ଦାର୍ କା, ନେଦ୍ହି ଗୁତ୍ତିୟା କା ଆଜାଦୀ କା, ମାର୍ଦ୍ନା କା ମାଏକିନିଆଁ ମାଲ୍ଦାର୍, ଏନ୍ଦେର୍ଗେକା ଯୀଶୁ ଖ୍ରୀସ୍ତ୍ନୁ ନିମ୍ ଜାମାର୍ ଅଣ୍ଟାର୍। 29ଆରୁ ଯଦି ନିମ୍ ଖ୍ରୀସ୍ତ୍କି ଆଲାର୍ ତା, ଆବ୍ରାହାମ୍ସ୍କି ବାଉଁଶାର୍, ଆରୁ ପାର୍ମେଶ୍ୱାର୍ସ୍ ଆବ୍ରାହାମ୍ସ୍କେ ଏକା ଆଶୀର୍ବାଦ୍ ଚିଚ୍କାଚାସ୍, ଆ ଆଶୀର୍ବାଦ୍ ନିମାଗେ ହାଖ୍ଖର।
41ଅଣ୍ଟା ହାଦ୍ଦୁସ୍ ତାଙ୍ଗା ବୁଆସ୍କି ସମ୍ପତ୍ତିଘି ହକ୍ଦାର୍ସ୍ ହାଦ୍ଦୁ ରାଦାସ୍, ଲେକିନ୍ ଯେତ୍କତକ୍ ଆ ହାଦ୍ଦୁସ୍ ରସ୍ ଲେକିନ୍ ହତ୍କତକ୍ ଆସ୍କି ନିଜର୍ ବୁଆସ୍କି ସମ୍ପତ୍ତିଘି ମିଆଁ ତାଙ୍ଘାଏ ଏନ୍ଦେର୍ହି ହକ୍ ମାଲ୍ଲାଦିନ୍ ଆରୁ ଆସ୍କି ଆରୁ ଗୁତ୍ତିୟାର୍ଘିନୁ ଏନ୍ଦେର୍ହି ଫରକ୍ ମାଲ୍ଲାଦିନ୍। 2ଲେକିନ୍ ଆସ୍ ତାଙ୍ଘା ବୁଆସ୍କି ଠାହ୍ର୍ଚ୍କା ସାମାୟତକ୍ ତାଙ୍ଗାନ୍ ଏରୁହଜୁ ଆରୁ ଆସ୍କି ଜାମା ଜିନିଷ୍ବନ୍ ସାମ୍ଭଡ଼ାନା ବାଲାସ୍କି କିୟାଁ ରାଦାସ୍। 3ହନ୍ନେନିନ୍ ନାମ୍ହି ଖ୍ରୀସ୍ତ୍ସିନ୍ ଆହ୍ନାଘି ଆଘ୍ଲି ନାହ୍ମାଏ ଦାଶାଦ୍ହି ହନ୍ନେନ୍ ରାଚା ଆରୁ ନାମ୍ ଛୋଟେ ହାଦ୍ଦୁର୍ ଲେଖା ରାଚ୍କାତ୍ ଆରୁ ଇ ଦୁନିଆଁବନ୍ ଶାସନ୍ କାମ୍ନାବାଲା ଖାରାପ୍ ଆତ୍ମାଘି ଗୁତ୍ତିୟା ରାଚ୍କାତ୍। 4-5ଏକାର୍ ନିୟମ୍ଘି ଅଧିନ୍ନୁ ରାନାଏ ଆବ୍ଡ଼ାରିନ୍ ଆସ୍ ଦାମ୍ ଚିଇକିରି ଛାଡ଼ାବସ୍, ଆରୁ ନାମ୍ ପ୍ରାଭୁସ୍କି ବାଲ୍ପୋଷ୍ ହାଦ୍ଦୁ ମାନତ୍କତ୍। ହୁଦ୍ଘିଲାଗାନ୍ ଯେତ୍କବାକେନ୍ ସାମାୟ ପୁରା ମାନ୍ଚାତା ପାର୍ମେଶ୍ୱାର୍ସ୍ ତାଙ୍ଘା ହାଦ୍ଦୁସିନ୍ ତାଇୟାସ୍, ଆସ୍ ଅଣ୍ଟା ମାଏକିନିଆଁନ୍ତି ଜନମ୍ ମାନ୍ଚାସ୍ ଆରୁ ୟାହୁଦୀ ଜାମାର୍ଘି ନିୟମ୍ଘି କିୟାଁ ରାଚାସ୍। 6ଆରୁ ନିମ୍ ପାର୍ମେଶ୍ୱାର୍ସ୍କି ହାଦ୍ଦୁର୍, ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍ ତାଙ୍ଘା ହାଦ୍ଦୁସ୍କି ଆତ୍ମାବନ୍ ନାହ୍ମା ଜୀଆନୁ ତାଏକାଦାସ୍, ଆ ଆତ୍ମାଦ୍ ଚିର୍ରାରାଇ ଆବ୍ବା, ବୁଆ। 7ହୁଦ୍ଘିଲାଗାନ୍ ନିମ୍ ଆକ୍କୁନ୍ନ୍ତି ଗୁତ୍ତିୟା ମାଲ୍ଦାର୍, ଲେକିନ୍ ପାର୍ମେଶ୍ୱାର୍ସ୍କି ହାଦ୍ଦୁର୍; ଆରୁ ଯଦି ନିମ୍ ତାଙ୍ଘା ହାଦ୍ଦୁର୍, ତା ପାର୍ମେଶ୍ୱାର୍ସ୍ ନିମାନ୍ ବୁଆସ୍କି ସମ୍ପତ୍ତିଘି ହକ୍ଦାର୍ କାମ୍ଚ୍କାଦାସ୍।
ଗାଲାତୀୟା ଜାମାର୍ଘି ଲାଗାନ୍ ପାଉଲୁସ୍ ଚିନ୍ତା କାମାଲ୍ଦାସ୍
8ପହ୍ଲେ ତା ନିମ୍ ଯେତ୍କବାକେନ୍ ପାର୍ମେଶ୍ୱାର୍ସିନ୍ ବାଲ୍ଲକାଚ୍କାର୍, ହତ୍କବାକେନ୍ ଏକାର୍ ଅସଲ୍ନୁ ପାର୍ମେଶ୍ୱାର୍ ମାଲ୍ନାଏ, ଆବ୍ଡ଼ାର୍ଘି ଗୁତ୍ତିୟା ରାଚ୍କାର୍। 9ଲେକିନ୍ ଆକ୍କୁନ୍ ନିମ୍ ପାର୍ମେଶ୍ୱାର୍ସ୍ସିନ୍ ଆକ୍କାଦାର୍, ପାର୍ମେଶ୍ୱାର୍ସ୍ ନିମାନ୍ ଆକ୍କାଦାସ୍, ତା ନିମ୍ ଆ କମ୍ଜୋର୍ ଆରୁ ବେକାର୍ ରୀତିନୀତି ତାରା ଏନ୍ଦେର୍ଗେ କିର୍ରାଲ୍ଦାର୍? ଏନ୍ଦେର୍ଗେ ଆରୁଅହନ୍ ଆଦ୍ଘି ଗୁତ୍ତିୟା ମାନା ବେଦ୍ଦାଲ୍ଦାର୍? 10ନିମ୍ ଖାସ୍ ଉଲ୍ଲା ଆରୁ ମାସ୍ ଆରୁ ଚାନ୍ଦୋ ଆରୁ ବଛର୍ଗୁଠିନ୍ ମାନ୍ତେ ରାଦାର୍। 11ଏନ୍ ନିହ୍ମା ବାରେନୁ ଏଲ୍ଚାଲ୍ଦାନ୍, ଏକାସାନ୍ ଏନ୍ନେ ମା ମାନ୍ନାଦ୍ କା ଏକା ମେହ୍ନତ୍ ଏନ୍ ନିହ୍ମା ଲାଗାନ୍ କାମ୍ଚ୍କାଦାନ୍ ଆଦ୍ ବେକାର୍ ମା ମାନ୍ନାଦ୍।
12ହେ ଭାଇ ଆରୁ ବୁହୁଣୀ ଜାମାରୋ, ଏନ୍ ନିମାନ୍ ଆର୍ଜୀ କାମାଲ୍ଦାନ୍ କା ନିମ୍ ଏଙ୍ଘା ଲେଖା ମାନା, ଏସ୍କେ ଏନ୍ହି ନିହ୍ମା ଲେଖା ମାନ୍ଚ୍କାନ୍ କେର୍କାଦାନ୍। ନିମ୍ ଏଙ୍ଘାଏ ଏନ୍ଦେର୍ହି ଅନ୍ୟାୟ ମାଲ୍ଲା କାମୁର୍। 13ଲେକିନ୍ ନିମ୍ତା ଆହ୍ଦାର୍ କା ଏଙ୍ଘା ମେଦୁ କମ୍ଜୋରି ରାଚା, ହାଲେହି ଏନ୍ ନିମାନ୍ ପହ୍ଲେ ସୁସାମାଚାର୍ ଶୁଣାବାଚ୍କାଚ୍କାନ୍। 14ଆରୁ ଏଙ୍ଘା ମେଦୁଘି କମ୍ଜୋରିଘି ଲାଗାନ୍ ନିହ୍ମା ମିଆଁ ପରୀକ୍ଷା ମାନ୍ଚ୍କିଚା, ହାଲେହି ନିମ୍ ଏଙ୍ଗାନ୍ ତୁଚ୍ଛ ମା ସୋଚ୍କାର୍ କା ମା ହାଁଣ୍କାର୍ ତୁଫ୍କାର୍, ଲେକିନ୍ ନିମ୍ ଏଙ୍ଗାନ୍ ପାର୍ମେଶ୍ୱାର୍ସ୍କି ଦୂଁତ୍ ଲେଖା ଗ୍ରହନ୍ କାମ୍ଚ୍କାର୍ ଆରୁ ଏନ୍ନେ ମାଇନ୍ କାମ୍ଚ୍କାର୍ ଏସ୍କେ ଏନ୍ ନିଜେ ଯୀଶୁ ଖ୍ରୀସ୍ତ୍ ରାଚ୍କାନ୍। 15ତା ନିହ୍ମା ଆ ରୀଜ୍ଝୁ ଏକାତାରା କେରାଦ୍? ଏନ୍ଦେର୍ଗେକା ଏନ୍ ନିଜେ ନିହ୍ମା ବାରେନୁ ତେଙ୍ଗା ଅଙ୍ଗ୍ଦାନ୍ କା ଯଦି ମାନା ଅଙ୍ଗଦ୍ନେତା ନିମ୍ ନିହ୍ମା ହାନ୍ନୁନ୍ ହି ଅଥ୍ରିକିରି ଏଙ୍ଗା ଚିଚ୍କାର୍ ଲାକ୍କାରର୍ନେ। 16ତା ଏନ୍ ନିମାନ୍ ସତ୍ତୁ କାତ୍ଥାନ୍ ତେଙ୍ଗ୍ନାଘି ଲାଗାନ୍ ଏନ୍ ନିହ୍ମା ବିରୋଧି ମାନ୍ଚ୍କାନ୍ କେର୍କାନ୍ କାଁଏ? 17ଆବ୍ଡ଼ାର୍ ନିମାରିନ୍ ଏଙ୍ଘାସ୍ତି ଭିନେ କାମା ବେଦ୍ଦାଲ୍ନାଏ ଆରୁ ନିମ୍ ଆବ୍ଡ଼ାର୍ଘି ସାଙ୍ଗେ ମାନର୍ ହୁଦ୍ଘିଲାଗାନ୍ ଝୁଟ୍ଟୁ ଶିକ୍ଷା ଚିନାବାଲାର୍ ନିମାରିନ୍ ସାଙ୍ଗେ ବାନାବା ବେଦ୍ଦାଲ୍ନାଏ ଲେକିନ୍ ବାନେ ମତ୍ଲବ୍ତି ମାଲ୍ଲା। 18ଲେକିନ୍ ଇଦ୍ହି ଠିକ୍ ରାଇ କା, ଏନ୍ ନିହ୍ମାଗାନେ ରାନାବାକେନ୍ ଖାଲି ମାଲ୍ଲା, ଜାମାବାକେନ୍ ବାନେ କାତ୍ଥାନୁହି ଜାମାବାକେନ୍ ସାଙ୍ଗେ ବାନାବାଗେ କୋଶିଷ୍ କାମ୍ନା କାତ୍ଥା। 19ହେ ଏଙ୍ଘାଏ ହାଦ୍ଦୁରୋ! ନିମ୍ ଜାମାର୍ ପୁରାପୁରୀ ଯୀଶୁ ଖ୍ରୀସ୍ତ୍ସ୍ ଲେଖା ମାନର୍କର୍ ହତ୍କତକ୍ ଏନ୍ ନିହ୍ମା ଲାଗାନ୍ ହାଦ୍ମହଁର୍ନା ଲେଖା ଦୁଃଖୁ ସାହାଲ୍ଦାନ୍। 20ଏନ୍ ନିହ୍ମାସାନ୍ କାଲାଗେ ଚାହାଁଲ୍ଦାନ୍ ତାକା ଏନ୍ ଆରୁହି ଦୁସ୍ରା ପ୍ରକାର୍ନୁ ତେଙ୍ଗନ୍, ଏନ୍ଦେର୍ଗେକା ଏନ୍ ସୋଚା ପଲ୍ଲାଲ୍ଦାନ୍ କା ଏନ୍ ନିମାରିନ୍ ଏନ୍ଦେର୍ ତେଙ୍ଗନ୍।
ସାରା ଆରୁ ହାଗାର୍ଘି ନମୁନା
21ନିମ୍ ଏକାର୍ ନିୟମ୍ଘି ଅଧିନ୍ନୁ ରା ବେଦ୍ଦାଲ୍ଦାର୍, ଏଙ୍ଗାନ୍ ତେଙ୍ଗା, କା ଏନ୍ଦେର୍ ନିମ୍ହି ମା ମେନ୍ଦାର୍ କା ନିୟମ୍ନୁ ଏନ୍ଦେର୍ ଲେଖ୍ଚ୍କା ରାଇ? 22ପାବିତାର୍ ଶାସ୍ତ୍ରନୁ ଏନ୍ନେ ଲେଖ୍ଚ୍କା ରାଇ କା ଆବ୍ରାହାମ୍ସ୍କି ଦୁଇ ଲୋକ୍ କୁକ୍କହାଦ୍ଦୁ ରାଚାସ୍। ଅଣ୍ଟାସ୍ ଗୁତ୍ତିୟାସ୍ତି, ଆରୁ ଅଣ୍ଟାସ୍ ନିଜର୍ ମାଏକିନିଆଁସ୍ତି ଜନମ୍ ମାନ୍ଚାର୍। 23ଲେକିନ୍ ଏକାସ୍ ଗୁତ୍ତିୟାସ୍ତି ଜନମ୍ ମାନ୍ଚାସ୍, ଆସ୍ ଏସ୍କେ ଆଲାର୍ଘି ହାଦ୍ଦୁ ମାନିଦ୍ ଆନ୍ନେନିନ୍ ହାଦ୍ଦୁ ଜନ୍ମା ରାଚାସ୍। ଆରୁ ଏକାସ୍ ନିଜର୍ ମାଏକିନିଆଁସ୍ତି ଜନମ୍ ମାନ୍ଚାସ୍, ଆସ୍କି ଜନମ୍ ପାର୍ମେଶ୍ୱାର୍ସ୍କି ଚିଚ୍କା କାତ୍ଥା ଲେଖା ମାନ୍ଚା। 24ଇ କାତ୍ଥାଘି ମତ୍ଲବ୍ ରାଇ: ଇବ୍ଡ଼ା ଦୁଇ ଲୋକ୍ ମାଏକିନିଆଁର୍ ଯୋଡ଼େ ନିୟମ୍ର୍, ଅଣ୍ଟା ନିୟମ୍ ସିନେଇ ପାର୍ତ୍ତାନ୍ତି ମାନ୍ଚା, ଏକାଦ୍ ଆବ୍ଡ଼ାରିନ୍ ଜନମ୍ କାମ୍ଚାଦ୍ ଏକାର୍ କା ଗୁତ୍ତିୟା ରାଚାର୍; ଆରୁ ଆଦ୍ ହାଗାର୍ଦ୍। 25ଆରୁ ହାଗାର୍ଦ୍ ଆରବ୍ତା ସିନେଇ ପାର୍ତ୍ତାନ୍ ବୁଝାବିଦ୍ ଆରୁ ଆକ୍କୁନ୍ ତା ଯେରୁଶାଲେମ୍ ଆଦ୍ଘି ଲେଖା ରାଇ, ଏନ୍ଦେର୍ଗେକା ଆଦ୍ ତାଙ୍ଘା ହାଦ୍ଦୁ ବଚ୍ଚର୍ଗାନେ ଗୁତ୍ତିୟାର୍ ଲେଖା ରାଇ। 26ଲେକିନ୍ ସରଗ୍ତା ରାନାବାଲା ଯେରୁଶାଲେମ୍ ଆଜାଦ୍ ରାଇ, ଆରୁ ଆଦ୍ ନାହ୍ମାଏ ଆୟାଙ୍ଗ୍ଦ୍। 27ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ କା “ହେ ବାନ୍ଝୀ! ଆକ୍କୁନ୍ ଲୀଝ୍ରୁ; ନିନ୍ ହାଦ୍ମହଁର୍ନାଘି ଦୁଃଖୁନ୍ ବାଲ୍ଲକିନିନ୍ ରୀଜ୍ଝୁଘି ଗୀତୁ ପାଡ଼ୁ। ଏନ୍ଦେର୍ଗେକା ଛାଡ଼୍ପତର୍ ଚିଚ୍କା ମାଏକିନିଆଁଘି ହାଦ୍ଦୁବଚ୍ଚର୍, ମାର୍ଦ୍ନାସ୍ଗାନେ ରୁ ମାଏକିନିଆଁଘି ହାଦ୍ଦୁ ବଚ୍ଚର୍ସ୍ତି ବାଗ୍ଗେ ମାନର୍।”
28ଲେକିନ୍ ହେ ଭାଇ ଆରୁ ବୁହୁଣୀ ଜାମାରୋ, ନିହ୍ମା ଜନମ୍ହି ଇସାକ୍ସ୍କି ଲେଖା କାତ୍ଥା ଚିଚ୍ଚକାଘି ହାଦ୍ଦୁର୍। 29ଆରୁ ଏସ୍କେ ହୁ ସାମାୟନୁ ସାଭାବିକ୍ ଜନମ୍ ମାନ୍ଚ୍କାର୍, ଆତ୍ମାଘି ଶକ୍ତିତି ଜନମ୍ ମାନ୍ଚ୍କାରିନ୍ ସାଧାଲିୟାର୍। ହନ୍ନେନ୍ ଆକ୍କୁନ୍ହି ମାନାଲିଦ୍। 30ଲେକିନ୍ ପାବିତାର୍ ଶାସ୍ତ୍ରନୁ ଏନ୍ଦେର୍ ଲେଖ୍ଚ୍କା ରାଇ? “ଗୁତ୍ତିୟାନ୍ ଆରୁ ତାଙ୍ଘା ହାଦ୍ଦୁସିନ୍ ଅଥ୍ରାଚା, ଏନ୍ଦେର୍ଗେକା ଗୁତ୍ତିୟାଘି ହାଦ୍ଦୁସ୍ ନିଜର୍ ମାଏକିନିଆଁସ୍ତି ଜନମ୍ ମାନ୍ଚ୍କା ହାଦ୍ଦୁସ୍ଗାନେ ବାଙ୍ଗ୍ସ୍କି ସମ୍ପତ୍ତିଘି ହକ୍ଦାର୍ ମାନା ପଲ୍ଲଦାସିନ୍।” 31ହୁଦ୍ଘିଲାଗାନ୍ ହେ ଭାଇ ଆରୁ ବୁହୁଣୀ ଜାମାରୋ, ନାମ୍ ଗୁତ୍ତିୟାଘି ହାଦ୍ଦୁବଚ୍ଚ ମାଲ୍ଲଦାତ୍, ଲେକିନ୍ ନିଜର୍ ମାଏକିନିଆଁସ୍ତି ଜନମ୍ ମାନ୍ଚ୍କା ହାଦ୍ଦୁତ୍।
5ଖ୍ରୀସ୍ତ୍କି ତାର୍ତି ନାମାଗେ ଆଜାଦୀ ହାଖ୍ଖର୍କିଚି
1ଆଜାଦୀଘି ଲାଗାନ୍ହି ଖ୍ରୀସ୍ତ୍ସ୍ ନାମାନ୍ ଆଜାଦ୍ କାମ୍ଚ୍କାଦାସ୍ ଇଦ୍ଘିଲାଗାନ୍ ନିମ୍ ଜାମାର୍ ସ୍ଥିର୍ ରା ଆରୁ ଆରୁଅହନ୍ ନିୟମ୍ଘି ଗୁତ୍ତିୟାର୍ଘି ଗହ୍ଲାତି ଆରୁହନ୍ ଆମା ପୁନ୍ଦା। ଖ୍ରୀସ୍ତ୍ ନାମାନ୍ ଆଜାଦ୍ କାମ୍ଚ୍କାଦାସ୍, ହୁଦ୍ଘିଲାଗାନ୍ ନାମ୍ ଆଜାଦୀନୁ ରତ୍ (ଆରୁ ଗୁତ୍ତିୟାର୍ ଲେଖା ଆମ୍ବତ୍ ରା); ହୁଦ୍ଘିଲାଗାନ୍ ଇନ୍ନୁ ଟିକ୍ରିକିରି ରା, ଆରୁଅହନ୍ ନିୟମ୍ଘି ପାକ୍ସିନୁ ଆମା ହିଁରା। 2ଏରା, ଏନ୍ ପାଉଲୁସ୍ ନିମାନ୍ ତେଙ୍ଗାଲ୍ଦାନ୍ କା ଯଦି ନିମ୍ ଖାତ୍ନା କାମର୍ ତା, ଖ୍ରୀସ୍ତ୍ତି ନିହ୍ମାଏ ଏନ୍ଦେର୍ହି ଫାଏଦା ମାଲ୍ଲାଦିନ୍। 3ହାଲେହି ଏନ୍ ଖାତ୍ନା କାମୁ ଅର୍ତୁ-ଅର୍ତୁ ଆଲାରିନ୍ ଆରୁଅହନ୍ ତେଙ୍ଗାଲ୍ଦାନ୍ କା ଆବ୍ଡ଼ାର୍ଗେ ଜାମା ନିୟମ୍ବନ୍ ମାନା ଖାତ୍ରୋ। 4ନିମ୍ ଏକାର୍ କା ନିୟମ୍ ମାନ୍ନାଘି ଦ୍ୱାର୍ନୁ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନାଗେ ବେଦ୍ଦାଲିୟାର୍, ଆବ୍ଡ଼ାର୍ ଖ୍ରୀସ୍ତ୍ତି ଭିନେ ମାନ୍ଚ୍କାର୍ କେର୍କାଦାର୍ ଆରୁ ପାର୍ମେଶ୍ୱାର୍ସ୍କି କ୍ରିପାବନ୍ ଏଫ୍ସେଇ ଚିଚ୍କାଦାର୍। 5ଲେକିନ୍ ପାବିତାର୍ ଆତ୍ମାଦ୍ ନାମାନ୍ ବିଶ୍ୱାସ୍ କାମ୍ତି କା ପାର୍ମେଶ୍ୱାର୍ସ୍ ନାମାନ୍ ଗ୍ରହନ୍ କାମସ୍ ଏନ୍ଦେର୍ଗେକା ନାମ୍ ଖ୍ରୀସ୍ତ୍କି ମିଆଁ ବିଶ୍ୱାସ୍ କାମ୍ଦାତ୍। 6ଯଦି ନାହ୍ମାଏ ଯୀଶୁ ଖ୍ରୀସ୍ତ୍ସ୍କି ମିଆଁ ବିଶ୍ୱାସ୍ ରାଇ ତା ନାମ୍ ଖାତ୍ନାବାଲାତ୍ କା ବିନାଖାତ୍ନାବାଲାତ୍ ଇଦ୍ଘି ଏନ୍ଦେର୍ହି ମତ୍ଲବ୍ ମାଲ୍ଲାଦିନ୍। ଅଣ୍ଟା ଖାଲି କାତ୍ଥା ରାଇ କା ଯୀଶୁ ଖ୍ରୀସ୍ତ୍ସିନ୍ ବିଶ୍ୱାସ୍ କାମ୍ନା, ଆରୁ ଯଦି ନାମ୍ ନାହ୍ମାଏ ପାଡ଼ୋଶୀରିନ୍ ବାନେ ହାଖ୍ଖଦାତ୍ ତା ନାହ୍ମା ବିଶ୍ୱାସ୍ତି ଆରୁହି ବାଗ୍ଗେ ଆହ୍ତାରିଦ୍। 7ନିମ୍ତା ବାନେ-ବାନେ ନାଲ୍ଖୁ କାମାଲ୍କାର୍। ନିଙ୍ଗାନ୍ ନେର୍ ସତ୍ତୁଘି ପାବୁନୁ ଆଘ୍ଲି ବାଢ଼୍ରାଗେ ରୋକ୍ଚାର୍। 8ଇଦ୍ ପାର୍ମେଶ୍ୱାର୍ସ୍କି ତାର୍ତି ମାଲ୍ଲିଦ୍, ଏକାସ୍ ନିମାନ୍ ମେହ୍କାଦାସ୍। 9ଏକାଦ୍ ସତ୍ତୁ ଶିକ୍ଷା ମାଲ୍ଲିଦ୍, ଆଦ୍ ଏନ୍ନେ ଫାଏଲାରିଦ୍ ଏସ୍କେ କାଟେକେନ୍ ଖାମୀର୍ ଜାମା ସାନ୍ଚ୍କା ଆଟାବନ୍ ଖାମୀର୍ କାମିଚି। 10ଏନ୍ ପ୍ରାଭୁସ୍କି ମିଆଁ ନିହ୍ମା ବାରେନୁ ଭାର୍ଷା ଉଇଦାନ୍କା ନିହ୍ମାଏ ଆରୁ ଦୁସ୍ରା ବିଚାର୍ ମା ମାନଦ୍; ଲେକିନ୍ ଏକାସ୍ ନିମାନ୍ ଘାବ୍ରାଦାସ୍ ଚିଦାସ୍ ଆସ୍ ନେଦିନ୍ ରାନାସ୍, ଆସ୍କେ ପାର୍ମେଶ୍ୱାର୍ସ୍ତି ଦଣ୍ଡ୍ ହାଖ୍ଖରଦ୍। 11ଲେକିନ୍ ହେ ଭାଇ ବୁହୁଣୀଜାମାରୋ, ଯଦି ଏନ୍ ଆକ୍କୁନ୍ତକ୍ ଖାତ୍ନାଘି ପ୍ରଚାର୍ କାମାଲ୍ଦାନ୍ ତା ଆକ୍କୁନ୍ତକ୍ ଏଙ୍ଗାନ୍ ଏନ୍ଦେର୍ଗେ ସାତାବାଲ୍ନାଏ? ଆରୁ ଯଦି ଏନ୍ ଆକ୍କୁନ୍ହି ଖାତ୍ନାଘି ପ୍ରଚାର୍ କାମାଲ୍ଦାନ୍, ତା ଖ୍ରୀସ୍ତ୍କି କ୍ରୁଶ୍ଘି ଲାଗାନ୍ ମାନ୍ନାବାଲା ଏଙ୍ଘାଏ ଜାମା କଷଟ୍ ଖତମ୍ ମାନ୍ନା କାତ୍ଥା। 12ଏକାର୍ ନିମାନ୍ ଡାଗ୍ମାଗ୍ର୍ନାଏ ଚିନାଏ, ଆବ୍ଡ଼ାର୍ଘି ଲାଗାନ୍ ବାନେ ମାନଦ୍ନେ କା ଆବ୍ଡ଼ାର୍ ନିଜର୍ ଅଙ୍ଗବନ୍ହି ମଚର୍ଚର୍ନେ।
13ହେ ଏଙ୍ଘା ଭାଇ ଆରୁ ବୁହୁଣୀ ଜାମାରୋ, ନିମାନ୍ ଆଜାଦ୍ ମାନାଗେ ମେହଁକାରାଇ, ଲେକିନ୍ ଇଦ୍ ମଉଜ୍ମଜ୍ଲିସ୍ଘି ଲାଗାନ୍ ମୋଉକା ମା ମାନ୍ନାଦ୍, ଏକ୍ ଦୁସ୍ରାରିନ୍ ବାନେ ହାଖ୍ଖା ଆରୁ ଏକ୍ ଦୁସ୍ରାର୍ଘି ସେବା କାମା। 14ଏନ୍ଦେର୍ଗେକା ଜାମା ନିୟମ୍ ଇ ଅଣ୍ଟା ଖାଲି ହୁକୁମ୍ନୁ ପୁରା ମାନିଦ୍ କା, “ନିମ୍ ନିହ୍ମା ପାଡ଼ୋଶୀରିନ୍ ନିହ୍ମା ଲେଖା ବାନେ ହାଖ୍ଖା।” 15ଲେକିନ୍ ଯଦି ନିମ୍ ଏକ୍ ଦୁସ୍ରାରିନ୍ ପାର୍ମା-ପାର୍ମି, ମାର୍ପିଟ୍ କାମର୍ ତା ହୁସିୟାର୍ ରାକେ କା ଏକାସାନ୍ ଏନ୍ନେ ମା ମାନ୍ନାଦ୍ କା ନିମ୍ ଏକ୍ ଦୁସ୍ରାରିନ୍ ନାଶ୍ କାମର୍ ଚିଅର୍।
ପାବିତାର୍ ଆତ୍ମାଘି ଆଗୁୱାତି ଜୀବନ୍ ବିତାବା
16ଲେକିନ୍ ଏନ୍ ନିମାନ୍ ତେଙ୍ଗାଲ୍ଦାନ୍, କା ଆତ୍ମାଘି ଆଗୁୱାଇତି ଚାଲ୍ରା, ତା ନିମ୍ ନିଜର୍ ମନ୍ତା ଖାରାପ୍ ଇଚ୍ଛାବନ୍ ପୁରା ମା କାମ୍ଦାର୍। 17ଏନ୍ଦେର୍ଗେକା ମନ୍ତା ଖାରାପ୍ ଇଚ୍ଛାଘି ବିରୁଦ୍ଧ୍ନୁ ଇଚ୍ଛା କାମିଦ୍ ଆରୁ ଆତ୍ମାଦ୍ ମନ୍ତା ଖାରାପ୍ ଇଚ୍ଛାଘି ପାବିତାର୍ ଇଚ୍ଛାଘି ବିରୁଦ୍ଧ୍ନୁ ଇଚ୍ଛା କାମିଦ୍, ଆରୁ ଇବ୍ଡ଼ାଦ୍ ଏକ୍ ଦୁସ୍ରାଘି ବିରୋଧିଦ୍। ହୁଦ୍ଘିଲାଗାନ୍ ନିମ୍ ଏକାନ୍ ଚାହଁଦାର୍ ଆବନ୍ କାମା ପଲ୍ଲଦାରିନ୍। 18ଆରୁ ଯଦି ନିମ୍ ପାବିତାର୍ ଆତ୍ମାଘି ଆଗୁୱାତି ଚାଲ୍ର୍ଦାର୍, ତା ନିମ୍ ନିୟମ୍ଘି ଅଧିନ୍ନୁ ମାଲ୍କାରିନ୍। 19ମନ୍ତା ଖାରାପ୍ ଇଚ୍ଛାତି ଏନ୍ନେ ନାଲ୍ଖୁନ୍ କାମ୍ତିଦ୍ ତା ଆଦ୍ଘି ମତ୍ଲବ୍ ବେଭିଚାର୍, ଖାରାପ୍ ନାଲ୍ଖୁ, ଲାଲଚ୍, 20ମୂର୍ତ୍ତୀ ପୂଜା, ଯାଦୁଟୋନା, ବିରୋଧି, ଝାଗ୍ଡ଼ା, ହିସ୍ଙ୍ଗା, ଖୀସ୍, ବିରୋଧ୍ କାମ୍ନା, ଭାଗ୍ କାମ୍ନା, ଜିଧି, 21ହିସ୍ଙ୍ଗା, ମାତ୍ୱାଡ଼୍, ରୀଜ୍ଝୁ ରଙ୍ଗ୍ ଆରୁ ଇଦ୍ଘି ଲେଖା ଆରୁ, ଆରୁ ନାଲ୍ଖୁ ରାଇ, ଇଦ୍ଘି ବାରେ ଏନ୍ ନିମାନ୍ ଆଘ୍ଲିନ୍ତି ଚେତାବାଲ୍ଦାନ୍ କା ଏସ୍କେ ତେଙ୍କାଚ୍କାନ୍ ହନ୍ନେନ୍ ଆରୁଅହନ୍ ତେଙ୍ଗାଚାଲ୍ଦାନ୍, କା ଏନ୍ନେ ନାଲ୍ଖୁ କାମ୍ନାବାଲାର୍ ପାର୍ମେଶ୍ୱାର୍ସ୍କି ରାଜୀଘି ଅଧିକାରୀ ମାନା ପଲ୍ଲନାଇନ୍। 22ଲେକିନ୍ ପାବିତାର୍ ଆତ୍ମାଘି ଫଲ୍ ବାନେ ହାଖ୍ଖନା, ରୀଜ୍ଝୁ, ଶାନ୍ତି, ଧିରାଜ୍, ଦାୟା, ଦୁସ୍ରାରିନ୍ ମଦେତ୍ କାମୁ, ବିଶ୍ୱାସ୍ କାମ୍ନାଘି ଲାଇଗ୍, 23ନରମ୍, ଆରୁ ନିଜ୍କେ କାବୁନୁ ଉଇନା; ଏନ୍ନେ-ଏନ୍ନେ ନାଲ୍ଖୁଘି ବିରୁଦ୍ଧ୍ନୁ ଏନ୍ଦେର୍ହି ନିୟମ୍ ମାଲ୍ଲାଦିନ୍। 24ଆରୁ ଏକାର୍ ଯୀଶୁ ଖ୍ରୀସ୍ତ୍କିର୍, ଆବ୍ଡ଼ାର୍ ନିଜର୍ ପାପ୍ଘି ପୁରାପୁରୀ ସାଭାବ୍ବନ୍ ଆସ୍କି ମନ୍ତା ଖାରାପ୍ ଇଚ୍ଛାଘି ସାଙ୍ଗେନିନ୍ କ୍ରୁଶ୍ନୁ ଠକ୍ଚେଇ ଚିଚ୍କାନାଏ।
25ଯଦି ନାମ୍ ପାବିତାର୍ ଆତ୍ମାତି ଉଜ୍ଜାଲ୍ଦାତ୍ ତା ନାମ୍ ପାବିତାର୍ ଆତ୍ମାଘି ଦ୍ୱାରା ଜୀବିତ୍ ରାଦାତ୍ ତା ନାମ୍ ପାବିତାର୍ ଆତ୍ମା ଲେଖା ଚାଲ୍ରତ୍। 26ନାମ୍ ବଡ଼୍ପଣି ଏଦ୍ରିକିରି ଏକ୍ ଦୁସ୍ରାରିନ୍ ଆମ୍ବତ୍ ଖୀସାବା ଆରୁ ଏକ୍ ଦୁସ୍ରାରିନ୍ ହିସ୍ଙ୍ଗା ଆମ୍ବତ୍ କାମା।
6ଏକ୍ ଦୁସ୍ରାର୍ଘି ମଦେତ୍ କାମା
1ହେ ଭାଇ ବୁହୁଣୀଜାମାରୋ, ଯଦି ଏକିନ୍ ଆଲାସ୍ ଏକିନ୍ ଦୋଷ୍ନୁ ଧାର୍ରସ୍ ତା ନିମ୍ ଆସିନ୍ ନରମ୍କିରି ବୁଝାବା, ଏନ୍ଦେର୍ଗେକା ନିମ୍ ଆଧ୍ୟାତ୍ମିକ୍ ରାଦାର୍, ଆରୁ ନିହ୍ମା ବାରେନୁହି ହୁସିୟାର୍ ରା କା ନିମ୍ହି ପରୀକ୍ଷାନୁ ମା ଖାତ୍ରୋର୍। 2ନିମ୍ ଏକ୍ ଦୁସ୍ରାର୍ଘି ଭାର୍ ଚେଡ଼ା, ଆରୁ ଏନ୍ନେନ୍ ନିମ୍ ଖ୍ରୀସ୍ତ୍ସ୍କି ନିୟମ୍ ପୁରା କାମର୍। 3ଯଦି ଏକିନ୍ ଆଲାସ୍ ବାଡ଼୍କା ମା ରାଦାସ୍, ହାଲେହି ନିଜ୍କେ ବାଡ଼୍କା ସୋଚ୍ଦାସ୍ ତା, ଆସ୍ ନିଜ୍କେନିଜ୍ ଧୋଖା ଚିଦାସ୍। 4ଲେକିନ୍ ଅର୍ତୁ-ଅର୍ତୁ ଜାମାର୍ ନିଜର୍-ନିଜର୍ ନାଲ୍ଖୁବନ୍ ଯାଞ୍ଚ କାମ୍ନାର୍ ତା, ଆସ୍ ଏକିନ୍ ଦୁସ୍ରାର୍ଘି ସାଙ୍ଗେ ତୁଲ୍ନାନୁ ମାଲ୍ଲା, ନିଜର୍ ବାରେନୁ ବଡ଼୍ପଣି ଏଦ୍ରା ଅଙ୍ଗସ୍। 5ଏନ୍ଦେର୍ଗେକା ହାର୍ ଅଣ୍ଟା ଆଲାସ୍ ନିଜର୍-ନିଜର୍ ଭାର୍ବନ୍ ନିଜେ ଚେଡ଼ସ୍।
6ଲେକିନ୍ ଏକାସ୍ ପାର୍ମେଶ୍ୱାର୍ସ୍କି ବଚନ୍ଘି ଶିକ୍ଷା ହାଖ୍ଖଦାସ୍, ତା ଆସ୍ ତାଙ୍ଘା ଶିଖାବୁସ୍ସିନ୍ ଜାମା ବାନେ-ବାନେ ଜିନିଷ୍ହି ହାଟ୍ଟା ଅଙ୍ଗତ୍। 7ଧୋଖା ଆମା ମହାଁ; ପାର୍ମେଶ୍ୱାର୍ସ୍ସିନ୍ ନିମ୍ ଭାକୁଆ କାମା ପଲ୍ଲଦାରିନ୍, ଏନ୍ଦେର୍ଗେକା ଅଣ୍ଟା ଆଲାସ୍ ଏକାନ୍ ଚାହ୍ଦାସ୍ ଆବନ୍ ହଏଦାସ୍। 8ଏକା ଆଲାସ୍ ନିଜର୍ ମନ୍ଘି ଖାରାପ୍ ଇଚ୍ଛାବନ୍ ପୁରା କାମ୍ନାଘି ଲାଗାନ୍ କୋଶିଷ୍ କାମ୍ଦାସ୍ ଆସ୍ ଆ ଖାରାପ୍ ଇଚ୍ଛାଘି ଦ୍ୱାରା ନାଶ୍ଘି ଫସଲ୍ବନ୍ ହୟସ୍। ଲେକିନ୍ ଏକା ଆଲାସ୍ ପାବିତାର୍ ଆତ୍ମାଘି ଇଚ୍ଛାବନ୍ ପୁରା କାମ୍ନାଘି ଲାଗାନ୍ କୋଶିଷ୍ କାମ୍ଦାସ୍ ଆସ୍ ପାବିତାର୍ ଆତ୍ମାଘି ଦ୍ୱାରା ସବୁଦିନ୍ତା ଜୀବନ୍ଘି ଫସଲ୍ ହୟସ୍। 9ହୁଦ୍ଘିଲାଗାନ୍ ନାମ୍ ବାନେ ନାଲ୍ଖୁ କାମ୍ନାନୁ ଆମ୍ବତ୍ ଥାକ୍ରା, ଏନ୍ଦେର୍ଗେକା ଯଦି ନାମ୍ ବାନେ-ବାନେ ନାଲ୍ଖୁ କାମ୍ନାନୁ ନାମ୍ ମା ଥାକ୍ରତ୍, ତା ଠିକ୍ ସାମାୟନୁ ନାମ୍ ଚାଷ୍ବନ୍ ହୟତ୍। 10ହୁଦ୍ଘିଲାଗାନ୍ ଯେତ୍କବାକେନ୍ ମୋଉକା ହାଖ୍ଖତ୍, ତା ନାମ୍ ଜାମାର୍ଘି ମଦେତ୍ କାମତ୍, ବିଶେଷ୍ କାମିକିରି ବିଶ୍ୱାସୀ ଭାଇବୁହୁଣୀ ଜାମାର୍ଘି ମଦେତ୍ କାମତ୍।
ଆଖ୍ରୀ ଚେତାବାନୀ ଆରୁ ଯୋହାର୍
11ଏରା, ଏନ୍ ଏଙ୍ଘା ହେଖ୍ଖାତି ନିମାଗେ କେତ୍କ ବାଡ଼୍କା-ବାଡ଼୍କା ଅକ୍ଷର୍ତି ଲେଖ୍ଚ୍କାଦାନ୍। 12ଏକାର୍ ଦୁସ୍ରାର୍ସାନ୍ ବାନେ ଏଦ୍ରାଗେ ବେଦ୍ଦନାଏ, ଆବ୍ଡ଼ାରିନ୍ ନିହ୍ମାଏ ଖାତ୍ନା କାମ୍ତାଗେ ଯବର୍ଜସ୍ତି କାମ୍ନାଏ, ଆବ୍ଡ଼ାର୍ ଇଦ୍ଘିଲାଗାନ୍ ଏନ୍ନେ କାମ୍ନାଏ କା ଖ୍ରୀସ୍ତ୍ସ୍କି କ୍ରୁଶ୍ଘି ଲାଗାନ୍ ଆବ୍ଡ଼ାରିନ୍ ସାତାବା ମା କୋ। 13ଏନ୍ଦେର୍ଗେକା ଖାତ୍ନା କାମ୍ତାନା ବାଲାର୍ ତା ନିଜେ ନିୟମ୍ନୁ ମା ଚାଲ୍ର୍ନାଏ, ଲେକିନ୍ ଆବ୍ଡ଼ାର୍ ନିହ୍ମା ମେଦୁଘି ବାରେନୁ ବଡ଼୍ପଣି ଏଦ୍ରା ଅଙ୍ଗର୍ କା ନିମ୍ ଇବନ୍ ଗ୍ରହନ୍ କାମ୍ଚ୍କାଦାର୍, ହୁଦ୍ଘିଲାଗାନ୍ ଆବ୍ଡ଼ାର୍ ନିମାନ୍ ଖାତ୍ନା କାମ୍ତାଗେ ବେଦ୍ଦନାଏ। 14ଲେକିନ୍ ଏନ୍ ଖାଲି ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍କି କ୍ରୁଶ୍ବନ୍ ଆମ୍ବିକିରି ଆରୁ ଏନ୍ଦେର୍ନୁହି ବଡ଼୍ପଣି ମା ଏଦ୍ର୍ଦାନ୍। ଏକାଘି ଦ୍ୱାର୍ନୁ ଦୁନିଆଁଦ୍ ଏଙ୍ଘା ନଜର୍ନୁ ଆରୁ ଏନ୍ ଦୁନିଆଁଘି ନଜର୍ନୁ କ୍ରୁଶ୍ ମିଆଁ କେଚ୍ଚକାନ୍ କେର୍କାଦାନ୍। 15ଏନ୍ଦେର୍ଗେକା ନେଖିନ୍ ଖାତ୍ନା ମାନ୍ଚ୍କିଚି ଚାହେ ଖାତ୍ନା ମାଲ୍ଲା ମାନୁଦ୍, ଇଦ୍ଘି ଏନ୍ଦେର୍ହି ମତ୍ଲବ୍ ମାଲ୍ଲାଦିନ୍, ଲେକିନ୍ ମୁଖ୍ୟା କାତ୍ଥାଦ୍ ଇଦ୍ କା ନାମ୍ ପୁରାପୁରୀ ପୁନା ସିର୍ଜାରାଚ୍କା ମାନତ୍କତ୍। 16ଆରୁ ଯେତ୍କ ଆଲାର୍ ଇ ନିୟମ୍ନୁ ଚାଲ୍ରର୍, ଆବ୍ଡ଼ାର୍ଘି ମିଆଁ ଆରୁ ପାର୍ମେଶ୍ୱାର୍ସ୍କି ଇସ୍ରାଏଲ୍ ଜାମାର୍ଘି ମିଆଁ ଶାନ୍ତି ଆରୁ ଦାୟା ମାନ୍ତେ ରାନାଦ୍।
17ଆକ୍କୁନ୍ତି ନେଦ୍ହି ଏଙ୍ଗାନ୍ ଦୁଃଖୁ ତକ୍ଲିବ୍ ଆମ୍ବର୍ ଚିଆ ଏନ୍ଦେର୍ଗେକା ଏଙ୍ଘା ମେଦୁନ୍ତା ଚିହ୍ନାଦ୍ ଏଦିକା ଏନ୍ ଯୀଶୁ ଖ୍ରୀସ୍ତ୍କି ସେବକ୍ନ୍।
18ହେ ଭାଇ ଆରୁ ବୁହୁଣୀ ଜାମାରୋ, ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍କି କ୍ରିପା ନିହ୍ମା ଆତ୍ମାଗାନେ ରାନାଦ୍। ଆମେନ୍।