ଇଫିସିୟୋ ସହର୍ତା ଖ୍ରୀସ୍ତ୍ ମଣ୍ତ୍ଲୀର୍ଘି ନାମେନୁ ଯୀଶୁ ଖ୍ରୀସ୍ତ୍କି ଖାସ୍ଚେଲା ପାଉଲୁସ୍କି ଚିଠି
ବହିଘି ପରିଚୟ
ଇ ଚିଠିନ୍ ଯୀଶୁ ଖ୍ରୀସ୍ତ୍କି ଖାସ୍ଚେଲା ପାଉଲୁସ୍ ଇଫିସିୟୋ ସହର୍ତା ଖ୍ରୀସ୍ତ୍ ମଣ୍ତ୍ଲୀଘି ନାମେନୁ ଲେଖଚ୍କାଦାସ୍। ଇ ଚିଠିନୁ ପାଉଲୁସ୍ ଏନ୍ନେ ବାତାବିକା ଏକାଦ୍ ସରଗ୍ନୁ ରାଇଦ୍ ଆରୁ ଏକାଦ୍ ଦୁନିଆଁନୁ ରାଇଦ୍ ଆବନ୍ ଖ୍ରୀସ୍ତ୍ନୁ ବିଶ୍ୱାସ୍ କାମ୍ନାଏ ଆ ବିଶ୍ୱାସ୍ଘି ଚାଲ୍ତେ ପାର୍ମେଶ୍ୱାର୍ସ୍ ଜାମାରିନ୍ ଖ୍ରୀସ୍ତ୍ନୁ ଅନ୍ଠାଣ୍ କାମସ୍।
ଇଫିସିୟୋଘି ପହେଲା ଭାଗ୍ନୁ ଲେଖସ୍ ଏକ୍ତାଘି ବାରେ ତେଙ୍ଗାଲ୍ଦାସ୍। ଆ ପାବୁଘି ବାରେ ବାତାବାଗେ ଏକାଘି ଦ୍ୱାର୍ନୁ ବାଙ୍ଗ୍ ପାର୍ମେଶ୍ୱାର୍ସ୍ ତାଙ୍ଘା ଆଲାରିନ୍ ଚାଜ୍ଜିୟାସ୍, କା ଏସ୍କେ ହାଦ୍ଦୁ ଯୀଶୁ ଖ୍ରୀସ୍ତ୍କି ଦ୍ୱାର୍ନୁ ଆବ୍ଡ଼ାର୍ ତାହ୍ମା ପାପ୍ତି ଛେମା ହାଖ୍ଖୀୟାର୍ ଆରୁ ବାଛ୍ରାର୍। ଆରୁ ଏସ୍କେ ପାବିତାର୍ ଆତ୍ମାଘି ଦ୍ୱାର୍ନୁ ପାର୍ମେଶ୍ୱାର୍ସ୍କି ମାହାନ୍ କାତ୍ଥା ଚିଚ୍କା ପୁରା ମାନ୍ନାଘି ଦିଲାସା ଚିଆ କେର୍କିଚି। ଦୁସ୍ରା ଭାଗ୍ନୁ ପାଢ଼ୁରିନ୍ ଏନ୍ନେ ଜୀବନ୍ ବିତାବାଗେ ଉତ୍ସାହ ଚିଦାସ୍ କା ଖ୍ରୀସ୍ତ୍କିନୁ ଆବ୍ଡ଼ାର୍ଘି ଏକ୍ତା ଆବ୍ଡ଼ାର୍ଘି ସାମୁହିକ୍ ଜୀବନ୍ଘି ସତ୍ତୁ ମାନୋ କୋଦ୍।
ଖ୍ରୀସ୍ତ୍ଗାନେ ରାନାବାଲା ପାର୍ମେଶ୍ୱାର୍ସ୍କି ଆଲାର୍ଘି ଏକ୍ତାବନ୍ ବାତାବାଗେ କେତ୍କ ନମୁନାବନ୍ ଲେଖାକେର୍କିଚି: ମଣ୍ତ୍ଲୀଦ୍ ଅଣ୍ଟା ଶରୀର୍ ଲେଖା ରାଇ, ନେଖା କୁକ୍କୁ କା ଖ୍ରୀସ୍ତ୍; ଇଦ୍ ଅଣ୍ଟା ଆଡ଼୍ପା ଲେଖା ରାଇ ଏକାଘି କୋଣାନ୍ତା ଚାଁଚା କା ଖ୍ରୀସ୍ତ୍; ଇଦ୍ ଅଣ୍ଟା ମାଏକିନିଆଁଘି ଲେଖା ରାଇ ନେଖା ମାର୍ଦ୍ନାସ୍ କା ଖ୍ରୀସ୍ତ୍। ପ୍ରେରିତ୍ ପାଉଲୁସ୍କି ଇ ଚିଠିନୁ ଏନ୍ନେ ଲେଖା ରାଇ କା ଯୀଶୁ ଖ୍ରୀସ୍ତ୍କି ମିଆଁ ବିଶ୍ୱାସ୍ କାମ୍ନାଏ ବାକେନ୍ ପାର୍ମେଶ୍ୱାର୍ସ୍କି ତାର୍ତି ନାମାଗେ ବହୁତ୍ କ୍ରିପା ହାଖ୍ଖରି। ଆ କ୍ରିପାଘି ଦ୍ୱାର୍ନୁ ନାମାଗେ ଆତ୍ମିକ ଜୀବନ୍ନୁ ବାଢ଼ର୍ତେ କତ୍। ଇ ଚିଠିନୁ ଯୀଶୁ ଖ୍ରୀସ୍ତ୍କି ବାନେ ହାଖ୍ଖନା, ବଲୀଦାନ୍, ଛେମା ଆରୁ କ୍ରିପାଘି ବାରେନୁ ବର୍ଣ୍ଣନା କାମ୍ନାଏ।
ନିମ୍ ଜାମାର୍ ଇ ଚିଠିବନ୍ ଧ୍ୟାନ୍ ଚିକିରି ପାଢ଼ା ଆରୁ ପାର୍ମେଶ୍ୱାର୍ସ୍କି ତାର୍ତି ଢେର୍ କ୍ରିପା ଲାଭ୍ କାମା।
ରୂପ୍-ରେଖା
ଯୋହାର୍ ୧:୧,୨
ଖ୍ରୀସ୍ତ୍ ଆରୁ ମଣ୍ତ୍ଲୀ ୧:୩—୩:୨୧
ଖ୍ରୀସ୍ତ୍ନୁ ପୁନା ଜୀବନ୍ ୪:୧—୬:୨୦
ଆଖ୍ରୀ କାତ୍ଥା ୬:୨୧-୨୪
1ଯୋହାର୍
1ଏନ୍ ପାଉଲୁସ୍ ପାର୍ମେଶ୍ୱାର୍ସ୍କି ଇଚ୍ଛାତି ଯୀଶୁ ଖ୍ରୀସ୍ତ୍କି ଅଣ୍ଟା ଖାସ୍ଚେଲାନ୍। ଇଫିସୁସ୍ ସହର୍ନୁ ରାନାବାଲା ପାର୍ମେଶ୍ୱାର୍ସ୍କି ପାବିତାର୍ ଆଲାର୍ଗେ ଆରୁ ଯୀଶୁ ଖ୍ରୀସ୍ତ୍କି ମିଆଁ ବିଶ୍ୱାସ୍ କାମୁ ଆଲାର୍ଘି ନାମେନୁ ଚିଠି ଲେଖାଲ୍ଦାନ୍। 2ନାହ୍ମା ବାଙ୍ଗ୍ ପାର୍ମେଶ୍ୱାର୍ସ୍ ଆରୁ ପ୍ରାଭୁ ଯୀଶୁ ଖ୍ରୀସ୍ତ୍ ନିମାଗେ କ୍ରିପା ଆରୁ ଶାନ୍ତି ଚିନାସ୍।
ଖ୍ରୀସ୍ତ୍କି ଦ୍ୱାର୍ନୁ ଆତ୍ମିକ୍ ଆଶିଷ୍
3ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍କି ଆରୁ ବାଙ୍ଗ୍ ପାର୍ମେଶ୍ୱାର୍ସ୍କି ଧାନ୍ୟାବାଦ୍ ମାନ୍ନାଦ୍। ଆରୁ ନାମ୍ ପ୍ରାଭୁ ଯୀଶୁସ୍ଗାନେ ଯୋଡ଼୍ରିକିରି ରାନାଘି ଦ୍ୱାରା ସରଗ୍ତା ଆଡ୍ଡାନୁ ଜାମା ପ୍ରକାର୍ଘି ଆତ୍ମିକ୍ ଆଶୀର୍ବାଦ୍ ଚିଚ୍ଚକାଦାସ୍। 4ଖ୍ରୀସ୍ତ୍ନୁ ପାବିତାର୍ ଆରୁ ତାଙ୍ଘା ନଜର୍ନୁ ନିର୍ଦ୍ଦୋଷ୍ ରତ୍ ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍ ଦୁନିଆଁନ୍ ବାନାବାନାଘି ଆଘ୍ଲି ଆସ୍ ନାମାନ୍ ବାନେ ହାଖ୍ଖୀୟାସ୍ ଆରୁ ନାମାନ୍ ଖ୍ରୀସ୍ତ୍କିନୁ ଚାଜ୍ଜିୟାସ୍। 5ଆରୁ ତାଙ୍ଘା ନିଜର୍ ଇଚ୍ଛାତି ନାମାନ୍ ତାଙ୍ଘା ଲାଗାନ୍ ପହ୍ଲେନ୍ତି ଚାଜ୍ଜିୟାସ୍, ତାକା ଯୀଶୁ ଖ୍ରୀସ୍ତ୍କି ଦ୍ୱାର୍ନୁ ନାମ୍ ଆସ୍କି ନିଜର୍ ପୋଶ୍କା ହାଦ୍ଦୁବଚ୍ଚ ମାନତ୍କତ୍। 6ପାର୍ମେଶ୍ୱାର୍ସ୍କି ମାହିମାଘି ବାଡ଼ାଇତି ଆ ଦୁଲାଡ଼ି ଯୀଶୁ ଖ୍ରୀସ୍ତ୍କି ଦ୍ୱାର୍ନୁ ଆ କ୍ରିପାନ୍ ନାମାଗେ ଖୁଲାମନ୍ତି ଦାନ୍ଘି ରୁପ୍ନୁ ଚିଚ୍ଚକାଦାସ୍ ଇଦ୍ ତାଙ୍ଘା ଢେର୍ବାଗ୍ଗେ କ୍ରିପାଘିଲାଗାନ୍ ସ୍ତୁତି ମାନ୍ନାଦ୍। 7ଯୀଶୁ ଖ୍ରୀସ୍ତ୍କି ହେଁସୁଘି ଦ୍ୱାର୍ନୁ ନାହ୍ମା ପାପ୍ ଜାମାଦ୍ ଛେମା ମାନ୍ଚାକେରା। ଆରୁ ପାର୍ମେଶ୍ୱାର୍ସ୍କି ଦାୟା ନାହ୍ମାଲାଗାନ୍ ବହୁତ୍ ରାଚା, ହୁଦ୍ଘିଲାଗାନ୍ ଖ୍ରୀସ୍ତ୍ ଏନ୍ନେ କାମ୍ଚାସ୍। 8ଆ ଦାୟା ଆସ୍ ଜାମା ରକମ୍ଘି ଜ୍ଞାନ୍ ଆରୁ ବୁଦ୍ଧି ଚିଇକିରି ନାହ୍ମାଲାଗାନ୍ ଢେର୍ବାଗ୍ଗେ କାମ୍ଚ୍କାଦାସ୍। 9ଏନ୍ଦେର୍ଗେକା ଆସ୍ ତାଙ୍ଘା ଇଚ୍ଛାଘି ଭେଦ୍ଦୁନ୍ ଖୁସୀମନ୍ତି ନାମାନ୍ ତେଙ୍ଗିୟାସ୍, ଆସ୍ ଖ୍ରୀସ୍ତ୍କି ଦ୍ୱାରା ନାମାନ୍ ଏଦା ବେଦ୍ଦାଲିୟାସ୍। 10ପାର୍ମେଶ୍ୱାର୍ସ୍କି ଇ ଯୋଜ୍ନା ରାଚା କା ଠିକ୍ ସାମାୟ ବାରଦ୍ ହାଲେ ସରଗ୍ତାର୍ତି ଆରୁ ଦୁନିଆଁନ୍ତା ଜାମା ଜିନିଷ୍ବନ୍ହି ଖ୍ରୀସ୍ତ୍ନୁ ଅନ୍ଠାଣ୍ କାମସ୍।
11ଖ୍ରୀସ୍ତ୍କିନୁ ଯୋଡ଼୍ରିକିରି ରାନାଘି ଦ୍ୱାର୍ନୁ ନାମ୍ହି ପାର୍ମେଶ୍ୱାର୍ସ୍କି ସମ୍ପତ୍ତିଘି ହକ୍ଦାର୍ତ୍। ହୁଦ୍ଘିଲାଗାନ୍ ଏକା ପାର୍ମେଶ୍ୱାର୍ସ୍ ନିଜର୍ ଉଦ୍ଦେଶ୍ୟ ଅନୁସାର୍ ଜାମା ଯୋଜ୍ନାବନ୍ ପୁରା କାମ୍ଦାସ୍ ଆରୁ ତାଙ୍ଘା ଇଚ୍ଛାଘି ଅନୁସାର୍ ନାମ୍ ପହ୍ଲେନ୍ତି ଚାଜ୍ଜର୍କାଦାତ୍। 12ନାମ୍ ଜାମା ୟାହୁଦୀତ୍ ଖ୍ରୀସ୍ତ୍କି ମିଆଁ ଆଘ୍ଲିନ୍ତି ଆଶ୍ରା ଉଇକାଚ୍କାତ୍। ଆରୁ ତାଙ୍ଘା ମାହାନ୍ ନାଲ୍ଖୁଘି ଲାଗାନ୍ ଧାନ୍ୟାବାଦ୍ ଚିଅତ୍। 13ନିମ୍ହି ଖ୍ରୀସ୍ତ୍କି ସାଙ୍ଗେନ୍ ଜୋଡ଼୍ର୍କାର୍ କେର୍କାଦାର୍। ଯେତ୍କବାକେନ୍ ନିମ୍ ସତ୍ତୁଘି ବଚନ୍ବନ୍ ମେନ୍ଚ୍କାର୍ ଏକାଦ୍ କା ନିହ୍ମା ମୁକ୍ତିଘି ସୁସାମାଚାର୍ଦ୍। ଆରୁ ଏକାସ୍କି ମିଆଁ ନିମ୍ ବିଶ୍ୱାସ୍ କାମ୍ଚ୍କାର୍, ଆରୁ ନିହ୍ମା ମିଆଁ ପାବିତାର୍ ଆତ୍ମାଘି ମୋହର୍ ଲାଗ୍ଗିୟା କେର୍କିଚି, ଆଦ୍ଘି ପାବିତାର୍ ଆତ୍ମାଘି ଚିଚ୍ଚକା କାତ୍ଥାବନ୍ ପାର୍ମେଶ୍ୱାର୍ସ୍ କାମ୍ଚ୍କାଚାସ୍। 14ଆ ପାବିତାର୍ ଆତ୍ମାଦ୍ ନାମାନ୍ ତେଙ୍ଗିଦ୍ କା ପାର୍ମେଶ୍ୱାର୍ସ୍କି ଉତ୍ତରାଧିକାରୀ ପାକ୍କା ମାନତ୍କତ୍। ଆରୁ ଆବନ୍ ନାହ୍ମା ଆ ସାମାୟତକ୍ଘି ଲାଗାନ୍ ଚିଆକେର୍କି ରାଇ। ଯେତ୍କବାକେନ୍ ନାମାଗେ ପୁରାପୁରୀ ଛୁଟ୍କାରା ହାଖ୍ଖରିଦ୍। ଇଦ୍ଘି କାରଣ୍ ଆଲାର୍ ପାର୍ମେଶ୍ୱାର୍ସ୍କି ମାହିମାଘି ପ୍ରଶଂସା କାମର୍।
ପାଉଲୁସ୍କି ଧାନ୍ୟାବାଦ୍ ବିନ୍ତି
15ଇଦ୍ଘିଲାଗାନ୍ ଏନ୍ ପ୍ରାଭୁ ଯୀଶୁସ୍କି ମିଆଁ ନିହ୍ମା ବିଶ୍ୱାସ୍ ଆରୁ ଜାମା ପାର୍ମେଶ୍ୱାର୍ସ୍କି ପାବିତାର୍ ଆଲାରିନ୍ ନିହ୍ମା ବାନେ ହାଖ୍ଖନାଘି ବାରେନୁ ମେନ୍ଚ୍କାଦାନ୍। 16ଏନ୍ ନିହ୍ମା ଲାଗାନ୍ ପାର୍ମେଶ୍ୱାର୍ସିନ୍ ଜାମାବାକେନ୍ ଧାନ୍ୟାବାଦ୍ ଚିତେରନ୍। ଏନ୍ ନିହ୍ମା ଲାଗାନ୍ ଲାଗାତାର୍ ବିନ୍ତି କାମ୍ଦାନ୍। 17ନିମ୍ ପାର୍ମେଶ୍ୱାର୍ସିକି ସତ୍ତୁନ୍ ଆହାଗେ ପାର୍ମେଶ୍ୱାର୍ସ୍ ନିମାଗେ ଆତ୍ମିକ୍ ନଜର୍ ଏରାଗେ ଚିୟସ୍। ଏନ୍ନେ ଏନ୍ ମାହିମାମୟ ବାଙ୍ଗ୍ସ୍ ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍କି ବାଙ୍ଗ୍ସାନ୍ ଲାଗାତାର୍ ବିନ୍ତି କାମ୍ଦାନ୍। 18ନିମ୍ ଜାମାର୍ ପାର୍ମେଶ୍ୱାର୍ସ୍କି ପାବିତାର୍ ଆଲାର୍ଘି ଉତ୍ତରାଧିକାରୀ ମାହିମାଘି ଧାନ୍ନୁ ଏସ୍କେ ରାଇ ଆବନ୍ ଆହାଗେ ପାର୍ମେଶ୍ୱାର୍ସ୍ ନିହ୍ମା ମନ୍ତା ହାନ୍ନୁଗେ ବିଲ୍ଲୀ ଚିୟସ୍ ଏନ୍ନେନିନ୍ହି ବିନ୍ତି କାମ୍ଦାନ୍। ଆରୁ ପାର୍ମେଶ୍ୱାର୍ସ୍ ଆ ଆଶ୍ରାଘି ଲାଗାନ୍ ନିହ୍ମା ଆଲାରିନ୍ ମେଁହ୍କାଦାସ୍। 19ତାଙ୍ଘାଏ ବହୁତ୍ ମାହାନ୍ ଶକ୍ତି ରାଇ। ଆ ଶକ୍ତିବନ୍ ନାହ୍ମା ଦ୍ୱାର୍ନୁ ବେଭାର୍ କାମ୍ଦାସ୍। ଏକାର୍ କା ତାଙ୍ଘା ମିଆଁ ବିଶ୍ୱାସ୍ କାମ୍ନାଏ। ଆବ୍ଡାର୍ଗେ ଆ ମାହାନ୍ ଶକ୍ତିବନ୍ ଚିୟାକେର୍କିଚି। 20ଆ ଶକ୍ତିବନ୍ ବେଭାର୍ କାମିକିରି ପାର୍ମେଶ୍ୱାର୍ସ୍ ଖ୍ରୀସ୍ତ୍ସିନ୍ କେଚ୍ଚକାସ୍ତି ଉଜ୍ଜତାଚାସ୍ ଆରୁ ସରଗ୍ନୁ ତାଙ୍ଘା ତିନାତାରା ଅକ୍ତାଚାସ୍। 21ଖାଲି ଇ ଯୁଗ୍ଗୁନୁ ମାଲ୍ଲା ବାର୍ନାବାଲା ଯୁଗ୍ଗୁନୁହି ଖ୍ରୀସ୍ତ୍ସିନ୍ ଜାମାର୍ଘି ମିଆଁ ହକ୍ ଚିୟାକେର୍କିଚି। 22ପାର୍ମେଶ୍ୱାର୍ସ୍ ଜାମାକିଛିନ୍ ଖ୍ରୀସ୍ତ୍କି ହେଡ୍ଡୁ କିୟାଁ କାମ୍ଚେଇଚାସ୍ ଆରୁ ଆସିନ୍ ଜାମାକିଛିଘି ମିଆଁ ହକ୍ ଚିଇକିରି ଖ୍ରୀସ୍ତ୍ ମଣ୍ତ୍ଲୀଘି ମୁଖ୍ୟା କାମ୍ଚାସ୍। 23ମଣ୍ତ୍ଲୀଦ୍ ଖ୍ରୀସ୍ତ୍କି ଶରୀର୍ ଲେଖା ରାଇଦ୍। ଆରୁ ଜାମାକିଛିଦ୍ ଖ୍ରୀସ୍ତ୍କି ଦ୍ୱାର୍ନୁ ପୁରା ମାନ୍ଚ୍କିରି ଆରୁ ଆସ୍ ନିଜେ ଜାମାନ୍ ପୁରା କାମ୍ଦାସ୍।
2ପାର୍ମେଶ୍ୱାର୍ସ୍ ତାଙ୍ଘା ଦାୟାତି ନାମାନ୍ ବାଛାବାଦାସ୍
1ଅଣ୍ଟା ସାମାୟନୁ ନିମ୍ ପାର୍ମେଶ୍ୱାର୍ସିନ୍ ମା ମାନ୍ଚ୍କାର୍ ଆରୁ ବହୁତ୍ ପାପ୍ କାମାଲ୍କାର୍। ଇଦ୍ଘିଲାଗାନ୍ ନିମ୍ ଜାମାର୍ କେଚ୍ଚକା ଆଲାର୍ ଲେଖା ରାଚ୍କାର୍। 2ଆ ଉଲ୍ଲାନୁ ନିମ୍ ଇ ଦୁନିଆଁଘି ଖାରାପ୍ ନାଲ୍ଖୁଘି ଲେଖା ଚାଲ୍ର୍କାର୍ ଆରୁ ଆକାଶ୍ନୁ ଭୁତ୍ତୁବନ୍ ଶାସନ୍ କାମ୍ନାବାଲା ଶାଏତାନ୍ବନ୍ ମାନାଲ୍କାର୍। ଆ ଶାଏତାନ୍ଦ୍ ଆକ୍କୁନ୍ହି ପାର୍ମେଶ୍ୱାର୍ସିନ୍ ମା ମାନ୍ନାବାଲା ଆଲାର୍ଘିନୁହି ନାଲ୍ଖୁ କାମାଲିଦ୍। 3ଇନ୍ନୁ ନାମ୍ହି ଜାମାତ୍ ପହ୍ଲେ ନିଜର୍ ମନ୍ଘି ଖାରାପ୍ ଇଚ୍ଛାତି ଜୀବନ୍ ବିତାବାଲ୍କାତ୍, ମନ୍ଘି ଖାରାପ୍ ଇଚ୍ଛାବନ୍ ପୁରା କାମାଲ୍କାତ୍, ଇଦ୍ଘିଲାଗାନ୍ ଦୁନିଆଁନ୍ତା ନାନ୍ନା ଆଲାର୍ଘି ଲେଖା ନାମ୍ହି ପାର୍ମେଶ୍ୱାର୍ସ୍କି ଦଣ୍ଡ୍ ହାଖ୍ଖନାଘି ଲାଇଗ୍ ମାନ୍ଚ୍କାତ୍ କେର୍କାଚ୍କାତ୍। 4ଲେକିନ୍ ପାର୍ମେଶ୍ୱାର୍ସ୍ ବହୁତ୍ ଦାୟାଲୁସ୍। ନାମ୍ ନାହ୍ମା ପାପ୍ଘି ଲାଗାନ୍ କେଚ୍ଚକାତ୍ କେର୍କାଚ୍କାତ୍, ଲେକିନ୍ ପାର୍ମେଶ୍ୱାର୍ସ୍ ନାମାନ୍ ବାଗ୍ଗେ ବାନେ ହାଖ୍ଖଦାସ୍। 5ଯେତ୍କବାକେନ୍ ନାମ୍ ପାପ୍ଘି କାରଣ୍ତି କେଚ୍ଚକାତ୍ କେର୍କାଚ୍କାତ୍ ତା ଆସ୍ ନାମାନ୍ ଖ୍ରୀସ୍ତ୍ଗାନେ ଉଜ୍ଜତାଚାସ୍ (ପାର୍ମେଶ୍ୱାର୍ସ୍କି କ୍ରିପା ନିମାନ୍ ବାଛାବାଚାଦ୍) 6ଆରୁ ଆସ୍ ନାମାନ୍ ଯୀଶୁ ଖ୍ରୀସ୍ତ୍ଗାନେ ଉଜ୍ଜତାଚାସ୍ ଆରୁ ଆସ୍ଗାନେ ସରଗ୍ତା ରାଜ୍ଗାଦିନୁ ଅକ୍କତାଚାସ୍। 7ଆସ୍ ତାଙ୍ଘା ଦାୟାବନ୍ ଯୀଶୁ ଖ୍ରୀସ୍ତ୍ସିନ୍ ଚିଇକିରି ଏଦିୟାସ୍, ହୁଦ୍ଘିଲାଗାନ୍ ଭବିଷତ୍ନୁ ଆଲାର୍ ତାଙ୍ଘା ମାହାନ୍ ଦାୟାବନ୍ ଏରର୍। 8ପାର୍ମେଶ୍ୱାର୍ସ୍ ନିମାନ୍ ବାଛାବାଚାସ୍, ଏନ୍ଦେର୍ଗେକା ଆସ୍ ଦାୟାଲୁସ୍। ଆରୁ ନିମ୍ ଆସ୍କି ମିଆଁ ବିଶ୍ୱାସ୍ କାମ୍ଚ୍କାର୍। ନିହ୍ମା ବାନେ ନାଲ୍ଖୁଘି ଲାଗାନ୍ ପାର୍ମେଶ୍ୱାର୍ସ୍ ନିମାନ୍ ମାଲ୍ଲା ବାଛାବୁସ୍, ଇଦ୍ ପାର୍ମେଶ୍ୱାର୍ସ୍କି ବାର୍ଦାନ୍ଦ୍। 9ଇଦ୍ ନାହ୍ମା ବାନେ ନାଲ୍ଖୁଘି ଫଲ୍ ମାଲ୍ଲିଦ୍, ହୁଦ୍ଘିଲାଗାନ୍ ନାମ୍ ବଡ଼୍ପଣି ଏଦ୍ରା ପଲ୍ଲଦାତିନ୍। 10ନାମ୍ ବାନେ ନାଲ୍ଖୁ କାମତ୍ ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍ ନାମାନ୍ ବାନାବାଚାସ୍। ଆସ୍ ଯୀଶୁ ଖ୍ରୀସ୍ତ୍କିନୁ ନାମାନ୍ ବାନାବାଚାସ୍। ଏକାନ୍ କା ପାର୍ମେଶ୍ୱାର୍ସ୍ ଆଘ୍ଲିନ୍ତି ଯୋଜ୍ନା କାମ୍ଚ୍କାଚାସ୍। କା ନାମ୍ ଏନ୍ନେନ୍ କାମିକିରି ଜୀବନ୍ ବିତାବତ୍।
ଖ୍ରୀସ୍ତ୍କିନୁ ଜାମାର୍ ଅଣ୍ଟାର୍
11ନିମ୍ ୟାହୁଦୀ ବାଉଁଶାନୁ ଜନମ୍ ମାଲ୍ଲା ମାନୁର୍ ଇ କାତ୍ଥାନ୍ ମନେ ଉଇୟା। ଆରୁ ଶରୀର୍ନୁ ଖାତ୍ନା କାମ୍ଚ୍କା ୟାହୁଦୀ ଆଲାର୍ ନେକାନ୍ କା ଖାତ୍ନାବାଲା ତେଙ୍ଗ୍ନାଏ, ଆବ୍ଡ଼ା ଆଲାର୍ ନିମାରିନ୍ ବିନାଖାତ୍ନାବାଲା ଆଲାର୍ବୁଲି ତେଙ୍ଗାଲିୟାର୍। 12ହୁଦ୍ଘିଲାଗାନ୍ ନିମ୍ ହତ୍କବାକେନ୍ ଯୀଶୁ ଖ୍ରୀସ୍ତ୍ସିନ୍ ବାଲ୍ଲକାଚ୍କାର୍। ହାଲେହି ଇସ୍ରାଏଲ୍ ଦେଶ୍ତା ପାର୍ଜା ମାଲ୍ଲାରୁର୍। ପାର୍ମେଶ୍ୱାର୍ସ୍ ନିଜର୍ ଭକ୍ତରିନ୍ ଏକା ବଚନ୍ବନ୍ ଚିଚ୍କାଚାସ୍ ଆଦ୍ଘି ଅନୁସାର୍ ଚିଚ୍ଚକା କାତ୍ଥାନୁ ଆନ୍ଜାନ୍ ରାଚ୍କାତ୍। ବିନା ଆଶ୍ରା ଆରୁ ବିନା ପାର୍ମେଶ୍ୱାର୍ସ୍କି ଇ ଦୁନିଆଁନୁ ଉଜ୍ଜାଲ୍କାର୍ ଇବନ୍ ମନେ କାମା। 13ଆଘ୍ଲି ନିମ୍ ପାର୍ମେଶ୍ୱାର୍ସ୍ତି ଗେଚ୍ଛାନୁ ରାଚ୍କାର୍, ଲେକିନ୍ ଆକ୍କୁନ୍ ଯୀଶୁ ଖ୍ରୀସ୍ତ୍ଗାନେ ନିହ୍ମା ସମ୍ବନ୍ଧ, ଭାଗିଦାର୍ ରାଇ, ହୁଦ୍ଘିଲାଗାନ୍ ନିମ୍ ଖ୍ରୀସ୍ତ୍କି ହେଁସୁତି ପାର୍ମେଶ୍ୱାର୍ସ୍କି ଚାହାଗେ ବାର୍ଚ୍କାର୍ କେର୍କାଦାର୍। 14ଖ୍ରୀସ୍ତ୍ ନିଜେ ୟାହୁଦୀ ଆରୁ ବିନାୟାହୁଦୀର୍ଘି ମାଝାନୁ ଶାନ୍ତି କାମ୍ଚ୍କାଦାସ୍। ଆଘ୍ଲି ଇ ଦୁଇ ଦଲ୍ଘି ମାଝାନୁ ଏକା ହାଁଣ୍ନା ତୁଫ୍ନାଘି କାଥି ଘେରାରାଚା ଆବନ୍ କ୍ରୁଶ୍ନୁ ତାଙ୍ଘା ନିଜର୍ ଜୀଆ ଚିଇକିରି ଧାସ୍କେଇଚାସ୍ ଆରୁ ଇବ୍ଡ଼ାରିନ୍ ଅଣ୍ଟା କାମ୍ଚେଇଚାସ୍। 15ୟାହୁଦୀ ଆଲାର୍ଘି ବହୁତ୍ ନୀତି ନିୟମ୍ ରାଚା। ଲେକିନ୍ ଖ୍ରୀସ୍ତ୍କି ମରନ୍ତି ଇ ନିୟମ୍ବନ୍ ଖତମ୍ କାମ୍ଚେଇଚାସ୍। ଏନ୍ନେନ୍ ଆସ୍ ୟାହୁଦୀ ଆରୁ ବିନାୟାହୁଦୀରିନ୍ ତାଙ୍ଘାଗାନେ ମେଶାବାଇକିରି ଅଣ୍ଟା ପୁନା ଦଲ୍ ତିୟାର୍ କାମ୍ଚାସ୍ ଆରୁ ଆବ୍ଡ଼ାର୍ଘି ମାଝାନୁ ମେଲ୍ମିଲାପ୍ ଶାନ୍ତି ଅନ୍ଦ୍ରାସ୍। 16ଆରୁ କ୍ରୁଶ୍ନୁ ଯୀଶୁ ଖ୍ରୀସ୍ତ୍କି ମରନ୍ତି ଆସ୍ ଯୋଡ଼େ ଦଲ୍ବନ୍ ଅଣ୍ଟାଦଳ୍ କାମ୍ଚାସ୍। ଆରୁ ପାର୍ମେଶ୍ୱାର୍ସ୍ଗାନେ ମିଲାବାଚାସ୍। ଆରୁ କ୍ରୁଶ୍ନୁ ନିଜର୍ ମରନ୍ଘି ଦ୍ୱାରା ଖୀସ୍ବନ୍ ନାଶ୍ କାମିକିରି ଅଣ୍ଟା ଶରୀର୍ନୁ ଆ ଦୁହି ଲୋକ୍ରିନ୍ ଅନ୍ଠାଣ୍ କାମିକିରି ପାର୍ମେଶ୍ୱାର୍ସ୍ଗାନେ ଆରୁହନ୍ ମିଲାବାଚାସ୍। 17ଯୀଶୁ ଖ୍ରୀସ୍ତ୍ ବାର୍ଚାସ୍ ନିମାନ୍ ବିନାୟାହୁଦୀର୍ ଏକାର୍ କା ପାର୍ମେଶ୍ୱାର୍ସ୍ତି ଢେର୍ ଗେଚ୍ଛାନୁ ରାଚ୍କାର୍, ଆରୁ ଆବ୍ଡ଼ାରିନ୍ ଏକାର୍ ଚାହାନୁ ରାଚାର୍। ଆରୁ ଦୁହି ଲୋକ୍ରିନ୍ ଶାନ୍ତିଘି ସୁସାମାଚାର୍ ଶୁଣାବାଚାସ୍। 18ଏନ୍ଦେର୍ଗେକା ଖ୍ରୀସ୍ତ୍କି ଦ୍ୱାର୍ନୁ ଏମ୍ ଦୁହି ଲୋକ୍ ଅଣ୍ଟା ଆତ୍ମାତି ବାଙ୍ଗ୍ସ୍କି ଚାହାଗେ କାଲାଅଙ୍ଗ୍ଦାମ୍।
19ହୁଦ୍ଘିଲାଗାନ୍ ନିମ୍ ପର୍ଦେଶୀୟା ଚାହେ ବାଲ୍ଲକା ଆଲ୍ ମାଲ୍ଦାର୍। ନିମ୍ତା ଆକ୍କୁନ୍ ପାର୍ମେଶ୍ୱାର୍ସ୍କି ପାବିତାର୍ ଆଲାର୍ଘି ସାଙ୍ଗେସାଥି ମାନ୍ଚ୍କାର୍ କେର୍କାଦାର୍। ନିମ୍ ପାର୍ମେଶ୍ୱାର୍ସ୍କି ପରିବାର୍ତା ମାନ୍ଚ୍କାର୍ କେର୍କାଦାର୍। 20ନିମ୍ ଅଣ୍ଟା ଏନ୍ନେ ଆଡ଼୍ପା ଲେଖା ରାଦାର୍, ଏକାଦ୍ କା ଖାସ୍ଚେଲାର୍ ଆରୁ ନାବୀଜାମାର୍ଘି ନାହିଗାଡ୍ଡିନୁ ଇଜ୍ଜକିଚି। ଆରୁ ନିଜେନିନ୍ ଯୀଶୁ ଖ୍ରୀସ୍ତ୍ ଆ କୋଣାନ୍ତା ଖାସ୍ ଚାଁଚାସ୍। 21ଯୀଶୁ ଖ୍ରୀସ୍ତ୍କି ଦ୍ୱାରା ପୁରା ଆଡ଼୍ପା ଅନ୍ଠାଣ୍ ମାନିକିରି ପ୍ରାଭୁସ୍କିନୁ ଅଣ୍ଟା ପାବିତାର୍ ମନ୍ଦିର୍ ମାନ୍ତେ କାଇଦ୍। 22ଏନ୍ଦେର୍ଗେକା ନିମ୍ ଖ୍ରୀସ୍ତ୍କିନୁ ଅନ୍ଠାଣ୍ ରାଦାର୍ ଆରୁ ନାନ୍ନା ବିଶ୍ୱାସୀ ଜାମାର୍ଗାନେ ମେଶ୍ରକାଦାର୍। ହୁଦ୍ଘିଲାଗାନ୍ ନିମ୍ ଅଣ୍ଟା ମାନ୍ଚ୍କାଦାର୍। ଏକାସାନ୍ କା ପାର୍ମେଶ୍ୱାର୍ସ୍କି ଆତ୍ମାଦ୍ ଡେରା କାମ୍ଚ୍କିଚି।
3ବିନାୟାହୁଦୀ ଜାମାର୍ସାନ୍ ପାଉଲୁସ୍କି ସେବା ନାଲ୍ଖୁ
1ହୁଦ୍ଘିଲାଗାନ୍ ଏନ୍ ପାଉଲୁସ୍ ନିହ୍ମା ବିନାୟାହୁଦୀର୍ଘି ବାନେଘି ଲାଗାନ୍ ଯୀଶୁ ଖ୍ରୀସ୍ତ୍କି କାରଣ୍ତି ଜେହେଲ୍ନୁ ରାଦାନ୍। (ଏନ୍ଦେର୍ଗେକା ଏନ୍ ନିହ୍ମା ବିନାୟାହୁଦୀର୍ସାନ୍ ପ୍ରାଭୁସ୍କି ବଚନ୍ ଶୁଣାବାଚ୍କାନ୍)। 2ନିହ୍ମା ବାନେଘି ଲାଗାନ୍ ପାର୍ମେଶ୍ୱାର୍ସ୍ ଏଙ୍ଗାଗେ ତାଙ୍ଘା କ୍ରିପାଘି ସେବା ନାଲ୍ଖୁ ଏଙ୍ଗାଗେ ସୋଁପଚ୍କାଦାସ୍। ଆବନ୍ତା ନିମ୍ ଜରୁର୍ ମେନ୍ଚ୍କାଦାର୍। 3ପାର୍ମେଶ୍ୱାର୍ସ୍ ତାଙ୍ଘା ଭେଦ୍ଦୁଘି ଯୋଜ୍ନାବନ୍ ଏକାଦ୍ କା ପାର୍ମେଶ୍ୱାର୍ସ୍କି ତାର୍ତି ଦର୍ଶନ୍ଘି ଦ୍ୱାର୍ନୁ ଏଙ୍ଘାସାନ୍ ପ୍ରକଟ୍ କାମ୍ଚାସ୍। ଏସ୍କେ କା ଆଦ୍ଘି ବାରେ ଏନ୍ ଆଘ୍ଲିନ୍ତି କାଟେକେନ୍ ଲେଖ୍ଚ୍କାଦାନ୍। 4ଆରୁ ନିମ୍ ଇବନ୍ ପାଢ଼ର୍ ତା ଆହର୍ କା ଏନ୍ ଖ୍ରୀସ୍ତ୍କି ବାରେନୁ ଭେଦ୍ଦୁବନ୍ ଏନ୍ ବୁଝର୍ଦାନ୍। 5ଇ ଯୋଜ୍ନାବନ୍ ଆଘ୍ଲି ଯୁଗ୍ତି ଆଲାରିନ୍ ମାଲ୍ଲା ଶୁଣାବାକୁ ଲେକିନ୍ ଏସ୍କେ କା ଆକ୍କୁନ୍ ପାବିତାର୍ ଆତ୍ମାତି ପାର୍ମେଶ୍ୱାର୍ସ୍କି ଚାଜ୍ଜକା ଖାସ୍ଚେଲା ଆରୁ ନାବୀଜାମାରିନ୍ ଶୁଣାବାଚ୍କା ରାଇ। 6ଇ ଯୋଜ୍ନାଦ୍ ଇଦ୍ କା ସୁସାମାଚାର୍ଘି ଦ୍ୱାର୍ନୁ ବିନାୟାହୁଦୀ ଆଲାର୍ହି ୟାହୁଦୀ ଆଲାର୍ ଗାନେ ଅଣ୍ଟା ବାଙ୍ଗ୍ସ୍କି ସମ୍ପତ୍ତିଘି ଭାଗିଦାର୍ ଆରୁ ଅଣ୍ଟା ଶରୀର୍ତା ଅଙ୍ଗର୍ ଆରୁ ଯୀଶୁ ଖ୍ରୀସ୍ତ୍କି ବାରେ ଚିଚ୍ଚକା କାତ୍ଥାଘି ଭାଗିଦାର୍।
7ପାର୍ମେଶ୍ୱାର୍ସ୍ ନିଜର୍ ଶକ୍ତିଘି ଅନୁସାର୍ ଏଙ୍ଗାଗେ କ୍ରିପା ଚିଚ୍ଚାସ୍ ଆଦ୍ଘି ଦ୍ୱାରା ଏନ୍ ଆସ୍କି ସୁସାମାଚାର୍ଘି ପ୍ରଚାର୍ କାମ୍ନାବାଲା ଅଣ୍ଟା ସେବକ୍ ମାନ୍ଚ୍କାନ୍ କେର୍କାଦାନ୍। 8ଯଦିଭି ଏନ୍ ଜାମା ପାର୍ମେଶ୍ୱାର୍ସ୍କି ଆଲାର୍ସ୍ତି ଛୋଟେନ୍ତି ଛୋଟେନ୍, ହାଲେହି ଏଙ୍ଗାଗେ ଇ ବାର୍ଦାନ୍ କ୍ରିପା ହାଖ୍ଖର୍କିଚି କା ଏନ୍ ବିନାୟାହୁଦୀର୍ଘି ମାଝାନୁ ଖ୍ରୀସ୍ତ୍କି ସବୁଦିନ୍ତା ଧାନ୍ନୁଘି ସୁସାମାଚାର୍ ଶୁଣାବନ୍। 9ଆରୁ ଏନ୍ ଜାମା ଆଲାରିନ୍ ପାର୍ମେଶ୍ୱାର୍ସ୍କି ଆ ନୁହ୍ର୍କା କାତ୍ଥାଘି ବାରେ ସାଫା-ସାଫା ବୁଝାବନ୍, ଏକାନ୍ କା ଜାମାକିଛିନ୍ ବାନାବୁ ପାର୍ମେଶ୍ୱାର୍ସ୍କି ଦୁନିଆଁଘି ସୁରୁନ୍ତି ନୁହୁର୍କା ରାଇଦ୍। 10ପାର୍ମେଶ୍ୱାର୍ସ୍ ଜାମା ଦୂଁତ୍ଜାମାରିନ୍ ଆରୁ ଜାମା ଭୁତ୍ତୁନ୍ ଏଦେଇଚାସ୍ କା ଆସ୍ ଏସ୍କେ ଜାମା ବାରେନୁ, କାତ୍ଥାନୁ ଜ୍ଞାନୀ ରାଦାସ୍। ଇବନ୍ କାମାଗେ ପାର୍ମେଶ୍ୱାର୍ସ୍ ମଣ୍ତ୍ଲୀବନ୍ ବେଭାର୍ କାମସ୍। 11ଇଦ୍ ତାଙ୍ଘାଏ ଦୁନିଆଁ ସୁରୁ ମାନ୍ନାଘି ଆଘ୍ଲିନ୍ତା ଯୋଜ୍ନା ରାଚା। ଏକାନୁ କା ଆସ୍ ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍ସିନ୍ ପୁରା କାମ୍ଚ୍କାଚାସ୍।। 12ଆ ପ୍ରାଭୁ ଯୀଶୁସିନ୍ ନାମ୍ ବିଶ୍ୱାସ୍ କାମ୍ଦାତ୍ ହୁଦ୍ଘିଲାଗାନ୍ ନାମାଗେ ସାହସ୍ ଆରୁ ଭାର୍ଷାତି ପାର୍ମେଶ୍ୱାର୍ସ୍କି ଚାହାଗେ କାଲାଗେ ହକ୍ ରାଇ। 13ହୁଦ୍ଘିଲାଗାନ୍ ଏନ୍ ଆର୍ଜୀବିନ୍ତି କାମାଲ୍ଦାନ୍ କା ନିହ୍ମା ଲାଗାନ୍ ଏକା ଦୁଃଖୁ ଏନ୍ ସାହାଲ୍ଦାନ୍ ଇଦ୍ଘିଲାଗାନ୍ ନିମ୍ ଦୁଃଖୁ ଆମାମାନା। ଇତ୍ତି ନିମାଗେ ମାଇନ୍ ହାଖ୍ଖରଦ୍।
ପାଉଲୁସ୍ ବିଶ୍ୱାସୀର୍ଘି ଲାଗାନ୍ ବିନ୍ତି କାମାଲ୍ଦାସ୍
14ହୁଦ୍ଘିଲାଗାନ୍ ଏନ୍ ଆ ବାଙ୍ଗ୍ସ୍କି ଆଘ୍ଲି ହାଁଠୁୱାରାଇକିରି ବିନ୍ତି କାମାଲ୍ଦାନ୍। 15ଆବନ୍ ସରଗ୍ନୁ ଆରୁ ଦୁନିଆଁନୁହି ଏନ୍ଦ୍ରିନ୍ହି ରାଇଦ୍ ଆବ୍ଡ଼ା ଜାମାନ୍ କାମ୍ନାବାଲା ରାଦାସ୍। 16ଏନ୍ ବିନ୍ତି କାମାଲ୍ଦାନ୍ କା ପାର୍ମେଶ୍ୱାର୍ସ୍ ନିଜର୍ ମାହିମାଘି ଧାନ୍ନୁତି ନିହ୍ମାଏ ମଦେତ୍ କାମସ୍। ତାଙ୍ଘା ଆତ୍ମାଦ୍ ନିମାଗେ ଶକ୍ତି ଚିଅତ୍। ହୁଦ୍ଘିଲାଗାନ୍ ନିମ୍ ଆତ୍ମିକ୍ ତାକତ୍ବାର୍ ମାନର୍। 17ଆରୁ ବିଶ୍ୱାସ୍ତି ଖ୍ରୀସ୍ତ୍ସ୍ ନିହ୍ମା ଜୀଆନୁ ରସ୍। ପାର୍ମେଶ୍ୱାର୍ସ୍ସିନ୍ ଆରୁ ଏକ୍ ଦୁସ୍ରାରିନ୍ ବାନେ ହାଖ୍ଖା। ବାନେ ହାଖ୍ଖନାନୁ ନିହ୍ମା ଚେରୁ ଆରୁ ନାହି ମଜ୍ବୁତ୍ ମାନ୍ନାଦ୍। 18ଏନ୍ନେନ୍ ନାମ୍ ପାର୍ମେଶ୍ୱାର୍ସ୍କି ପାବିତାର୍ ଆଲାର୍ ଗାନେ ଆହତ୍ କା ଖ୍ରୀସ୍ତ୍ସ୍ ନିମାନ୍ କେତ୍କ ବାନେ ହାଖ୍ଖଦାସ୍। ଖ୍ରୀସ୍ତ୍କି ବାନେ ହାଖ୍ଖନାଘି ଲାମ୍ବା, ଚାଉଡ଼ା, ଉଚ୍ଚା, ଗାଡ୍ଡି କେତ୍କ ରାଇ ଆବନ୍ ବୁଝ୍ରା ଅଙ୍ଗତ୍। 19ଆରୁ ଖ୍ରୀସ୍ତ୍କି ଆ ବାନେ ହାଖ୍ଖନାବନ୍ ଆହାଅଙ୍ଗର୍। ଏକାଦ୍ କା ଜ୍ଞାନ୍ଘି ବାହ୍ରି ରାଇ କା ନିମ୍ ପାର୍ମେଶ୍ୱାର୍ସ୍କି ଭାର୍ପୁରିବନ୍ ଆହର୍ ଆରୁ ଆସ୍ ତାଙ୍ଘା ରୂପ୍ନୁ ଭାର୍ପୁର୍ କାମସ୍ ଚିୟସ୍।
20ଆକ୍କୁନ୍ ଆ ପାର୍ମେଶ୍ୱାର୍ସ୍କି ଲାଗାନ୍ ଏକା ଆ ନିଜର୍ ଶକ୍ତିତି ଏକାଦ୍ ନାହ୍ମାଏନୁ ନାଲ୍ଖୁ କାମାଲିଦ୍ ଯେତ୍କ ନାମ୍ ନିଆଁ ଅଙ୍ଗତ୍ ଚାହେ ଆତ୍କତକ୍ ନାମ୍ ସୋଚା ଅଙ୍ଗତ୍ ଆଦ୍ଘିସ୍ତିହି ଆରୁହି ବାଗ୍ଗେ କାମା ଅଙ୍ଗତ୍। 21ମଣ୍ତ୍ଲୀନୁ ଆରୁ ଖ୍ରୀସ୍ତ୍ ଯୀଶୁସ୍କିନୁ ଆସ୍କି ମାହିମା ପିଢିନ୍ତି ପିଢ଼ିତକ୍ ଯୁଗ୍-ଯୁଗ୍ ମାନ୍ତେ ରାଇଦ୍। ଆମେନ୍!
4ଖ୍ରୀସ୍ତ୍ନୁ ଏକ୍ମତ୍ ମାନ୍ନା
1ଇଦ୍ଘିଲାଗାନ୍ ଏନ୍ ପ୍ରାଭୁସ୍କି ଲାଗାନ୍ ଜେହେଲ୍ନୁ ରାଦାନ୍। ନିଙ୍ଗାନ୍ ବିନ୍ତି କାମାଲ୍ଦାନ୍ କା ପାର୍ମେଶ୍ୱାର୍ସ୍ ନିଙ୍ଗାନ୍ ମେଁହ୍କାଦାସ୍। ଇଦ୍ଘିଲାଗାନ୍ ନିମ୍ ମେହଁନାଘି ଲାଇଗ୍ ଜୀବନ୍ ଉଜ୍ଜା। 2ଜାମା ପ୍ରକାର୍ଘି ଦୀନ୍ତା, ନରମ୍ତି ଆରୁ ଧିରାଜ୍ତି ବାନେ ହାଖ୍ଖନାତି ଏକ୍ ଦୁସ୍ରାର୍ଘି ସାହମ୍। 3ଆରୁ ଶାନ୍ତିଘି ବନ୍ଧନ୍ନୁ ଯୋଡ଼୍ରିକିରି ଆ ଏକ୍ତାବନ୍ ଏକାଦ୍ କା ପାବିତାର୍ ଆତ୍ମା ଚିୟଦ୍ ଆ କୋଶିଷ୍ କାମ୍ତେରତ୍। 4ଅଣ୍ଟା ଶରୀର୍ ରାଇ ଆରୁ ଆତ୍ମାଦ୍ହି ଅଣ୍ଟା ରାଇଦ୍। ଆନ୍ନେନ୍ ନିମାରିନ୍ ଅଣ୍ଟା ଆଶ୍ରାଘି ଲାଗାନ୍ ମେହାଁକେର୍କିଚି। 5ଅଣ୍ଟା ପ୍ରାଭୁସ୍ ରାଦାସ୍, ଅଣ୍ଟା ବିଶ୍ୱାସ୍ ରାଇଦ୍, ଆରୁ ଅଣ୍ଟା ଆସ୍ନାନ୍ ରାଇଦ୍। 6ଆରୁ ଜାମାର୍ଘି ଅଣ୍ଟା ବାଙ୍ଗ୍ ପାର୍ମେଶ୍ୱାର୍ସ୍ ରାଦାସ୍। ଆସ୍ ଜାମାର୍ଘି ମାଲିକ୍ସ୍। ଆସ୍ ନିଜର୍ ଜାମା ଆଲାର୍ଘି ଦ୍ୱାରା ନିଜର୍ ନାଲ୍ଖୁନ୍ କାମ୍ଦାସ୍। ଆରୁ ଆସ୍ ଜାମାର୍ଘି ଜୀଆନୁ ରାଦାସ୍। 7ଲେକିନ୍ ଖ୍ରୀସ୍ତ୍କି ବାର୍ଦାନ୍ଘି ନାପ୍ ଲେଖା ନିମା ଜାମାର୍ଗେ କ୍ରିପା ହାଖ୍ର୍କିଚି। 8ଇଦ୍ଘିଲାଗାନ୍ ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ଯେତ୍କବାକେନ୍ ଆବ୍ଡ଼ାର୍ ମିଆଁ କେରାର୍ ଆରୁ ଜେହେଲ୍ନୁ ରାନାବାଲାରିନ୍ ହିଁକିରି ଅଚ୍ଚାର୍ କେରାର୍। ଆରୁ ଆଲାର୍ଗେ ଜାମା ପ୍ରକାର୍ଘି ବାର୍ଦାନ୍ ହାଖ୍ଖରାଦ୍।”
9ମିଆଁ କେରାର୍ ହୁଦ୍ଘି ମତ୍ଲବ୍ ଏନ୍ଦେର୍? ଇଦ୍ଘି ମତ୍ଲବ୍ ଇଦ୍ ରାଇଦ୍ କା ଖ୍ରୀସ୍ତ୍ ଇ ଦୁନିଆଁନୁ ପହ୍ଲେନ୍ତିନିନ୍ ବାର୍ଚ୍କାଚାସ୍। 10ଯୀଶୁ ଖ୍ରୀସ୍ତ୍ ଇ ଦୁନିଆଁନୁ ବାର୍ଚାସ୍। ଆରୁ ଆସ୍ ଏକାସ୍ କା ଆକାଶ୍ଘି ମିଆଁ କେରାସ୍, ଏସ୍କେ କା ଆସ୍ ଜାମାକିଛିନ୍ ଭାର୍ପୁର୍ କାମ୍ଚାସ୍। 11ଆସ୍ କେତ୍କରିନ୍ ଖାସ୍ଚେଲା ଆରୁ କେତ୍କରିନ୍ ନାବୀ, ଆରୁ କେତ୍କ ଆଲାରିନ୍ ସୁସାମାଚାର୍ ମେନ୍ତାନାବାଲା, ଆରୁ କେତ୍କ ଆଲାରିନ୍ ପାର୍ଚାର୍ ଆରୁ ଗୁରୁ ଚାଜିକିରି ବାର୍ଦାନ୍ ଚିଚ୍ଚାସ୍। 12ହୁଦ୍ଘିଲାଗାନ୍ ବିଶ୍ୱାସୀର୍ ଆରୁହି ମଜ୍ବୁତ୍ ମାନର୍, ଏସ୍କେ କା ଇବ୍ଡ଼ାର୍ ପାର୍ମେଶ୍ୱାର୍ସ୍କି ଆଲାରିନ୍ ଖ୍ରୀସ୍ତ୍ସିନ୍ ସେବା କାମାଗେ ତିୟାର୍ କାମର୍। 13ଯେତ୍କତକ୍ ନାମ୍ ଜାମାତ୍ ବିଶ୍ୱାସ୍ ଆରୁ ପାର୍ମେଶ୍ୱାର୍ସ୍କି ହାଦ୍ଦୁସ୍କି ବୁଦ୍ଧିନୁ ଅଣ୍ଟା ମା ମାନତ୍କତ୍, ଆରୁ ଖ୍ରୀସ୍ତ୍କି ଭାର୍ପୁରୀଘି ଅନୁସାର୍ ନାମ୍ ପୁରାପୁରୀ ରୀତିତି ଆଘ୍ଲି ମା ବାଢ଼୍ରତ୍କତ୍। 14ଇଦ୍ଘିଲାଗାନ୍ ନାମ୍ ଆରୁ ହାଦ୍ଦୁର୍ ଲେଖା ମା ରତ୍, ଆରୁ ଆଲାର୍ଘି ଝୁଟ୍ଟୁ ଶିକ୍ଷା ଆରୁ ଚାଲ୍ବାଜି କାତ୍ଥାନୁ, ଆବ୍ଡ଼ାର୍ଘି ଭୁଲ୍ ଶିକ୍ଷା ଆରୁ ଉପ୍ଦେଶ୍ତି ମା ଡାଗ୍ମାଗ୍ରତ୍, ଆରୁ ମାହି ଭାଟ୍କାରତ୍। 15ବାନେ ହାଖ୍ଖୀକିରି ସତ୍ତୁ ତେଙ୍ଗତ୍ ତା ନାମ୍ ଜାମାତ୍ ଖ୍ରୀସ୍ତ୍କି ଲେଖା ଆରୁହି ବାଢ଼୍ର୍ତେକତ୍। ଆସିନ୍ ନାହ୍ମାଏ କୁକ୍କୁ ଲେଖା ରାଦାସ୍। 16ଏକାନୁ ଜାମା ଶରୀର୍, ଆରୁ ଆ ଶରୀର୍ଦ୍ ନିଜର୍ ଜାମାଗାଁଠିଘି ମଦେତ୍ତି ଯୋଡ଼୍ରିକିରି ଜାମା ଅଙ୍ଗଦ୍ ନିଜର୍ ଜାମା ନାଲ୍ଖୁବନ୍ ବାନେକିରି କାମିଦ୍। ଆ ଅଙ୍ଗଘି ପ୍ରଭାବ୍ଘି ଦ୍ୱାରା ଆବ୍ଡାର୍ ଏକ୍ ଦୁସ୍ରାର୍ଘି ବାନେ ହାଖ୍ଖନାନୁ ବାଢ଼େତେ କାନାଏ।
ନାମ୍ ନାହ୍ମା ଚାଲିଚଲନ୍ବନ୍ ବାଦ୍ଲାବତ୍
17ହୁଦ୍ଘିଲାଗାନ୍ ଏନ୍ ଏନ୍ନେ ତେଙ୍ଗାଲ୍ଦାନ୍ ଆରୁ ପ୍ରାଭୁସ୍କି ନାମେନୁ ଆର୍ଜୀବିନ୍ତି କାମିକିରି ତେଙ୍ଗାଲ୍ଦାନ୍, କା ବିନାୟାହୁଦୀଜାମାର୍ ଏସ୍କେ ନିଜର୍ ମନ୍ତା ବେକାର୍ ଫାଲ୍ତୁ କାତ୍ଥାନୁ ଚାଲ୍ର୍ନାଏ, ନିମ୍ ଆରୁ ଆବ୍ଡ଼ାର୍ ଲେଖା ଏକ୍ଲାହି ମା ଚାଲ୍ରର୍। 18ଆବ୍ଡ଼ା ଆଲାର୍ ତାହ୍ମା ନିର୍ବୁଦ୍ଧିଆଘି କାରଣ୍ ଆରୁ ନିଜର୍-ନିଜର୍ ଜୀଆନ୍ତା କାଠୋର୍ଘି କାରଣ୍ ନିଜର୍-ନିଜର୍ ବୁଦ୍ଧିତି ଉହାନୁ ରାନାଏ ଆରୁ ପାର୍ମେଶ୍ୱାର୍ସ୍ତି ହାଖ୍ଖର୍ନାବାଲା ଜୀବନ୍ତି ଭିନେ ମାନ୍ଚାର୍ କେର୍କାନାଏ। 19ଏନ୍ଦେର୍ଗେକା ଆବ୍ଡ଼ାର୍ ମା ଲାଜ୍ର୍ନାଏ, ନିଜ୍କେନିଜ୍ ଖାରାପ୍ ନାଲ୍ଖୁ କାମାଗେ ସୋଁପ୍ନାଏ ଚିନାଏ ଆରୁ ଆବ୍ଡାର୍ ଆରୁହି ଅଶୁଦ୍ଧ୍ ନାଲ୍ଖୁ କାମାଗେ ଚାହଁନାଏ। 20ଲେକିନ୍ ନିମ୍ ଖ୍ରୀସ୍ତ୍ତି ଏନ୍ନେ ଶିକ୍ଷା ମାଲ୍ଲା ହାଖ୍ଖୁର୍। 21ନିମ୍ତା ସତ୍ତୁନିନ୍ ଯୀଶୁସ୍କି ବାରେ ମେନ୍ଚ୍କାଦାର୍ ଆରୁ ନିମ୍ ଆସ୍କି ସତ୍ତୁ ଶିକ୍ଷାବନ୍ ହାକ୍କାଦାର୍। 22ନିହ୍ମାଏ ପାଚ୍ଚା ଜୀବନ୍ଘି ସମ୍ବନ୍ଧ୍ନୁ ନିମାଗେ ଏନ୍ନେ ଶିକ୍ଷା ଚିଆ କେର୍କିଚା କା, ନିମାରିନ୍ ଭାଟ୍କାନାବାଲା ନିହ୍ମା ମନ୍ଘି ଖାରାପ୍ ଇଚ୍ଛାବନ୍ ପୁରାପୁରୀ ଆମ୍ବନା କାତ୍ଥା। 23ଯେତ୍କବାକେନ୍ ନିମ୍ ପୁରା-ପୁରୀ ରୂପ୍ତି ନିଜର୍ ମନ୍ତି ଆତ୍ମିକ୍ ସାଭାବ୍ନୁ ପୁନାମାନ୍ତେ କାଲାଅଙ୍ଗର୍। 24ପାର୍ମେଶ୍ୱାର୍ସ୍କି ତାଙ୍ଘା ପୁନା ଆ ସାଭାବ୍ବନ୍ ଆପ୍ନାବା, ଆ ସାଭାବ୍ଘି ମିଆଁ ପାର୍ମେଶ୍ୱାର୍ସ୍କି ଲେଖା ସତ୍ତୁ ପାବିତାର୍ ଆରୁ ଧାର୍ମିକ୍ତାନୁ ପାର୍ମେଶ୍ୱାର୍ସ୍ ବାନାବାଚ୍କାଦାସ୍।
25ହୁଦ୍ଘିଲାଗାନ୍ ଝୁଟ୍ଟୁ କାତ୍ଥା ତେଙ୍ଗ୍ନାନ୍ ଆମ୍ବିକିରି ଏକ୍ ଦୁସ୍ରାର୍ଗାନେ ସତ୍ତୁ କାତ୍ଥାନ୍ କାଚ୍ନେଖ୍ରା, ଏନ୍ଦେର୍ଗେକା ନାମ୍ ଜାମାତ୍ ଅଣ୍ଟା ମେଦୁନ୍ତା ଅଙ୍ଗତ୍। 26ଯଦି ନିମ୍ ଖୀସାରର୍ ତା ପାପ୍ ଆମା କାମା। ବିଡ଼ି ଅକ୍କନାତକ୍ ନିହ୍ମା ଖୀସ୍ ମା ରାନା କାତ୍ଥା। 27ଆରୁ ଶାଏତାନ୍ଗେ ମୋଉକା ମା ଚିନା କାତ୍ଥା। 28ହାଡ଼୍ନା ବାଲାସ୍ ଆରୁ ମା ହାଡ଼ସ୍, ଏନ୍ଦେର୍ହି ମା ରାନା ଆଲାର୍ଗେ ଦାନ୍ ଚିନାଘି ଲାଗାନ୍ ଏସ୍କେ ତାଙ୍ଘାସାନ୍ ଏନ୍ଦ୍ରିନ୍ ରଦ୍, ହୁଦ୍ଘିଲାଗାନ୍ ନିଜର୍ ହେଖ୍ଖାତି ମେହ୍ନତ୍ ନାଲଖୁ କାମ୍ନାସ୍। 29ଦୁସ୍ରାର୍ଘି ଦାର୍କାର୍ଘି ଲେଖା ଆବ୍ଡ଼ାର୍ଘି ଉନ୍ନତି ଲାଗାନ୍ ଏକାଦ୍ ଜରୁରୀ ରାଇଦ୍ ଆନ୍ନେ କାତ୍ଥାଦ୍ହି ନିଙ୍ଘା ଥୁମ୍ଣାନ୍ତି ଉର୍ଖ୍ନା କାତ୍ଥା ଆଙ୍ଗେନ୍ ମେନ୍ନାବାଲା ଆଲାର୍ଘି ଲାଗାନ୍ କ୍ରିପା ମାନ୍ନାଦ୍। 30ପାର୍ମେଶ୍ୱାର୍ସ୍କି ପାବିତାର୍ ଆତ୍ମାବନ୍ ଦୁଃଖୁ ଆମା ଚିଆ। ଆଦ୍ଘି ଦ୍ୱାର୍ନୁ ମୁକ୍ତିଘି ଆଖ୍ରୀ ଉଲ୍ଲାଘି ଲାଗାନ୍ ନିହ୍ମାଏନୁ ମଁହର୍ ଲାଗାବାଚ୍କା ରାଇ। 31ଜାମା ରକମ୍ଘି ବିର୍ଝ୍ତାନା, ଖୀସ୍, ହିସ୍ଙ୍ଗା, ଝାଗ୍ଡ଼ା, ନିନ୍ଦା, ଜାମା ଖାରାପ୍ ବେଭାର୍ଗୁଠିନ୍ ନିହ୍ମାସ୍ତି ପୁରାପୁରୀ ହାଟାବା। 32ଏକ୍ ଦୁସ୍ରାର୍ଘି ମିଆଁ ଦାୟାଲୁ ଆରୁ ନରମ୍ ମାନା। ଆରୁ ଏସ୍କେ ପାର୍ମେଶ୍ୱାର୍ସ୍ ଯୀଶୁ ଖ୍ରୀସ୍ତ୍କି ଲାଗାନ୍ ଛେମା କାମ୍ଚାସ୍। ହନ୍ନେନ୍ ନିମ୍ହି ଏକ୍ ଦୁସ୍ରାରିନ୍ ଛେମା କାମା।
5ବିଲ୍ଲୀଘି ହାଦ୍ଦୁ ମାନାକାଲା
1ନିମ୍ ପାର୍ମେଶ୍ୱାର୍ସ୍କି ଦୁଲାଡ଼ି ହାଦ୍ଦୁବଚ୍ଚର୍, ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍ ଲେଖା ଚାଲ୍ରା। 2ଏକ୍ ଦୁସ୍ରାରିନ୍ ବାନେ ହାଖ୍ଖା। ଏସ୍କେ କା ଖ୍ରୀସ୍ତ୍ହି ନିମାନ୍ ବାନେ ହାଖ୍ଖୀୟାସ୍। ଆରୁ ନାହ୍ମାଲାଗାନ୍ ନିଜ୍କେନିଜ୍ ବାନେ ବାସ୍ନା ଭେଁଟ୍ ଆରୁ ବଲୀ ଲେଖା ପାର୍ମେଶ୍ୱାର୍ସ୍କି ଲାଗାନ୍ ଚିଚ୍ଚାସ୍।
3ନାନ୍ନା ଆଲାରିନ୍ ତେଙ୍ଗାଗେ ମୋଉକା ଆମା ଚିଆ କା ନିମ୍ ଖାରାପ୍ ନାଲ୍ଖୁ କାମାଲ୍ଦାର୍। ଲାଜ୍ଜେ ମହ୍ଁନାର୍ଘି ଏନ୍ଦେର୍ହି ନାଲ୍ଖୁ ଆମା କାମା। ଆରୁ ଲାଲଚ୍ ଆମା କାମା। ଏନ୍ଦେର୍ଗେକା ଇବ୍ଡ଼ା ନାଲ୍ଖୁ ଗୁଠିଦ୍ ପାର୍ମେଶ୍ୱାର୍ସ୍କି ପାବିତାର୍ ଆଲାର୍ଘି ଲାଗାନ୍ ବାନେ ମାଲ୍ଲିଦ୍। 4ନିମାଗେ ଲାଜ୍ଜେ ମହ୍ଁନାଘି କାତ୍ଥା ମା କାଚ୍ନେଖ୍ର୍ନା କାତ୍ଥା, ଖାରାପ୍ କାତ୍ଥା, ଆରୁ ମାଜାକ୍ କାତ୍ଥାହି ମା କାଚ୍ନେଖ୍ର୍ନା କାତ୍ଥା। ଇଦ୍ ନିମାଗେ ଠିକ୍ ମାଲ୍ଲିଦ୍। ଲେକିନ୍ ପ୍ରାଭୁସିନ୍ ଧାନ୍ୟାବାଦ୍ ଚିନା କାତ୍ଥା। 5ଏନ୍ଦେର୍ଗେକା ନିମ୍ ଇବନ୍ ଆହ୍ଦାର୍ କା ଏକିନ୍ ବେଭିଚାରୀ ଆଲାସ୍, ଅଶୁଦ୍ଧ୍ ଆଲାସ୍ ଚାହେ ଲୁଭି ଆଲାସ୍ ଏକାସ୍ କା ମୂର୍ତ୍ତୀ ପୂଜା କାମ୍ନାଘି ବାରାବୁରି ରାଦାସ୍। ଏନ୍ନେ ଆଲାସ୍କେ ଖ୍ରୀସ୍ତ୍ସ୍ ଆରୁ ପାର୍ମେଶ୍ୱାର୍ସ୍କି ରାଜୀନୁ ଉତ୍ତାରାଧିକାରୀର୍ଘି ହକ୍ ମାଲ୍ଲାଦିନ୍। 6ନେଦ୍ହି ନିମାନ୍ ଫାଲ୍ତୁ କାତ୍ଥା ତେଙ୍ଗିକିରି ଧୋଖା ମା ଚିନାର୍, ଏନ୍ଦେର୍ଗେକା ଇ କାତ୍ଥାଘି ଲାଗାନ୍ ଏକାର୍ ପାର୍ମେଶ୍ୱାର୍ସ୍କି କାତ୍ଥା ମା ମାନ୍ନାଏ, ଆବ୍ଡ଼ାର୍ଗେ ପାର୍ମେଶ୍ୱାର୍ସ୍କି ତାର୍ତି ଦଣ୍ଡ୍ ହାଖ୍ଖରଦ୍। 7ହୁଦ୍ଘିଲାଗାନ୍ ନିମ୍ ଆବ୍ଡ଼ାର୍ ଗାନେ ଭାଗିଦାର୍ ଆମ୍କେମାନା। 8ଅଣ୍ଟା ସାମାୟ ରାଚା ନିମ୍ ଉହା ଲେଖା ରାଚ୍କାର୍, ଲେକିନ୍ ଆକ୍କୁନ୍ ନିମ୍ ପ୍ରାଭୁସ୍କି ଚେଲା ମାନିକିରି ବିଲ୍ଲୀନୁ କର୍ଚ୍କାଦାର୍। ହୁଦ୍ଘିଲାଗାନ୍ ଏକାର୍ ବିଲ୍ଲୀନୁ ରାନାଏ ଆବ୍ଡ଼ାର୍ ଲେଖା ଚାଲ୍ରା। 9(ଏନ୍ଦେର୍ଗେକା ଏକାସାନ୍ ବିଲ୍ଲୀ ରାଇ ଆସାନ୍ ଜାମା ରକମ୍ଘି ବାନେ-ବାନେ ନାଲ୍ଖୁ, ଧାର୍ମିକ୍ତା, ସତ୍ତୁ ଉପ୍ଜାରିଦ୍।) 10ପ୍ରାଭୁସ୍କେ ଏନ୍ଦେଦ୍ ବାନେ ଖୁସୀ ଲାଗ୍ଗଦ୍ ଆବନ୍ ଜାମାବାକେନ୍ ଆହାଗେ କୋଶିଷ୍ କାମା। 11ଉହାନ୍ତା ବେକାର୍ ନାଲ୍ଖୁନୁ ଭାଗିଦାର୍ ଆମାମାନା। ଆବ୍ଡ଼ାର୍ଘି ଜାମା ଦୋଷ୍ବନ୍ ଜାମାର୍ଘି ଆଘ୍ଲି ଏଦାଚା। 12ଏନ୍ଦେର୍ଗେକା ଏକା ନାଲ୍ଖୁନ୍ ଆବ୍ଡ଼ାର୍ ନୁହ୍ରିକିରି କାମ୍ନାଏ ଆଦ୍ଘି ବାରେନୁ କାଚ୍ନେଖ୍ରାଗେହି ଲାଜ୍ଜେ ଲାଗ୍ଗଦ୍। 13ଲେକିନ୍ ଯେତ୍କ ନାଲ୍ଖୁଘି ଦୋଷ୍ ବିଲ୍ଲୀନୁ ଏଥ୍ରିକାଇ। ଏନ୍ଦେର୍ଗେକା ବିଲ୍ଲୀନୁ ଜାମାକିଛିନ୍ ସାଫା-ସାଫା ଏଥ୍ରିକାଇଦ୍। 14ହୁଦ୍ଘିଲାଗାନ୍ ଆଲାର୍ ତେଙ୍ଗ୍ନାଏ, “ହେ ଚୁତୁୟୋ, ଉସ୍କାରା ଆରୁ କେଚ୍ଚକାସ୍ତି ଉଜ୍ଜା; ଆରୁ ଖ୍ରୀସ୍ତ୍ସ୍କି ବିଲ୍ଲୀ ନିଙ୍ଘା ମିଆଁ ବିଲ୍ଲୀ ମାନକୋ।”
ପାବିତାର୍ ଆତ୍ମାଘି ଦ୍ୱାର୍ନୁ ଜୀବନ୍ ବିତାବତ୍
15ନିମ୍ ଏସ୍କେ ଜୀବନ୍ ବିତାବାଲ୍ଦାର୍ ଆଦ୍ଘି ବାରେନୁ ସାବ୍ଧାନ୍ ରା। ବୁଦ୍ଧି ମାଲ୍କାର୍ ଲେଖା ମାଲ୍ଲା ବୁଦ୍ଧିୟାର୍ ଜାମାର୍ ଲେଖା ଚାଲ୍ରା। 16ସାମାୟବନ୍ ବାନେ ବେଭାର୍ କାମା ଏନ୍ଦେର୍ଗେକା ଇ ସାମାୟଦ୍ ଖାରାପ୍ ରାଇଦ୍। 17ହୁଦ୍ଘିଲାଗାନ୍ ବୁଦ୍ଧି ମାଲ୍କାର୍ ଲେଖା ଆମାମାନା ପ୍ରାଭୁସ୍କି ଇଚ୍ଛା ଏନ୍ଦେଦ୍ ଆବନ୍ ଆହା। 18ଅଙ୍ଗୁର୍ ରାସେ ହାପ୍ପିକିରି ଆମା ଉଙ୍ଖା, ଏନ୍ଦେର୍ଗେକା ଇତ୍ତି ବେଭିଚାର୍ଘି ସୋଚ୍ ବାରିଦ୍। ବରନ୍ ପାବିତାର୍ ଆତ୍ମାତି ଭାର୍ପୁର୍ ମାନାକାଲା। 19ଆରୁ ନିମ୍ ଜାମାର୍ ମେଶ୍ରିକିରି ଗୀତୁ ସ୍ତୁତିଗାନ୍ ଆତ୍ମିକ୍ ଗୀତୁ ପାଡ଼ା ଆରୁ ନିଜର୍-ନିଜର୍ ମନ୍ନୁ ଗୀତୁ ପାଡ଼ିକିରି ପ୍ରାଭୁସ୍କି ସ୍ତୁତି ମାହିମା କାମ୍ତେ ରା। 20ଆରୁ ଜାମାବାକେନ୍ ଜାମା କାତ୍ଥାଘି ଲାଗାନ୍ ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍କି ନାମେନୁ ବାଙ୍ଗ୍ ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିତେ ରା। 21ନାମ୍ ଖ୍ରୀସ୍ତ୍ସିନ୍ ଆଦର୍ କାମ୍ଦାତ୍, ହୁଦ୍ଘିଲାଗାନ୍ ଏକ୍ ଦୁସ୍ରାର୍ଘି କିୟାଁ ରତ୍।
ମାର୍ଦ୍ନା ଆରୁ ମାଏକିନିଆଁଘି ବାରେନୁ ଉପ୍ଦେଶ୍
22ହେ ମାଏକିନିଆଁରୋ, ନିମ୍ ଏସ୍କେ ପ୍ରାଭୁସ୍କି କିୟାଁ ରାଦାର୍, ହନ୍ନେ ନିହ୍ମା ମାର୍ଦ୍ନାର୍ଘି କିୟାଁ ରା। 23ଏନ୍ଦେର୍ଗେକା ମାର୍ଦ୍ନାସ୍ ମାଏକିନିଆଁଘି କୁକ୍କୁସ୍। ଏସ୍କେ କା ଖ୍ରୀସ୍ତ୍ ମଣ୍ତ୍ଲୀଘି କୁକ୍କୁସ୍। ଆନ୍ନେନିନ୍ ମଣ୍ତ୍ଲୀଦ୍ ତାଙ୍ଘା ଶରୀର୍ ଆରୁ ଆସ୍ ମଣ୍ତ୍ଲୀବନ୍ ବାଛାବାନାବାଲା ରାଦାସ୍। 24ଲେକିନ୍ ଏସ୍କେ ମଣ୍ତ୍ଲୀଦ୍ ଖ୍ରୀସ୍ତ୍କି କିୟାଁ ରାଇଦ୍, ହନ୍ନେନ୍ ମାଏକିନିଆଁର୍ହି ଜାମା କାତ୍ଥାନୁ ନିଜର୍-ନିଜର୍ ଆଲାସ୍କି କିୟାଁ ରାନାର୍।
25ହେ ମାର୍ଦ୍ନାରୋ ନିଜର୍-ନିଜର୍ ମାଏକିନିଆଁରିନ୍ ବାନେ ହାଖ୍ଖା, ଏସ୍କେ ଖ୍ରୀସ୍ତ୍ହି ମଣ୍ତ୍ଲୀବନ୍ ବାନେ ହାଖ୍ଖୀୟାସ୍। ଆରୁ ଆଦ୍ଘି ଲାଗାନ୍ ନିଜ୍କେନିଜ୍ବନ୍ ବଲୀ ଚିଚ୍ଚାସ୍ ଲାଗ୍ଗିୟାସ୍। 26-27ଆନ୍ନେନିନ୍ କାମିକିରି ବଚନ୍ ଚାହେ ଆମ୍ମୁତି ସାଫା କାମ୍ନା ଦ୍ୱାରା ମଣ୍ତ୍ଲୀବନ୍ ଶୁଦ୍ଧ୍ କାମ୍ନାଘି ଲାଗାନ୍ ଆରୁ ଚାମ୍କାରାନା କାଁନିଆ କୁକାଏଘି ଲେଖା, ନିସ୍କାଲାଙ୍କ୍ ବିନାଦୋଷ୍, ବିନାଦାଗି, ଆରୁ ବିନାକମି ଆରୁ ପାବିତାର୍ ମାନାଗେ ମଣ୍ତ୍ଲୀବନ୍ ତିଆର୍ କାମ୍ନାଘି କାରଣ୍ ଖ୍ରୀସ୍ତ୍ ନିଜ୍କେନିଜ୍ବନ୍ ବଲୀ ଚିଚ୍ଚାସ୍ ଲାଗ୍ଗିୟାସ୍। 28ଏନ୍ନେନ୍ ମାର୍ଦ୍ନାର୍ଗେ ନିଜର୍-ନିଜର୍ ମାଏକିନିଆଁରିନ୍ ନିଜର୍ ମେଦୁ ଲେଖା ବାନେ ହାଖ୍ଖନା କାତ୍ଥା। ଏକାସ୍ ନିଜର୍ ମାଏକିନିଆଁବନ୍ ବାନେ ହାଖ୍ଖଦାସ୍ ଆସ୍ ନିଜ୍କେନିଜ୍ ବାନେ ହାଖ୍ଖଦାସ୍। 29ନେଦ୍ହି ନିଜର୍ ମେଦୁବନ୍ ମା ହାଁଣ୍ନାଏ, ଲେକିନ୍ ଆଦ୍ଘି ଯତନ୍ ଆରୁ ଲାଲନ୍ପାଲନ୍ କାମ୍ନାଏ, ଏସ୍କେ ଖ୍ରୀସ୍ତ୍ହି ମଣ୍ତ୍ଲୀଗାନେ କାମ୍ଦାସ୍। 30ଏନ୍ଦେର୍ଗେକା ନାମ୍ହି ଖ୍ରୀସ୍ତ୍ସ୍କି ମେଦୁଘି ଅଙ୍ଗତ୍। 31ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ହୁଦ୍ଘିଲାଗାନ୍ ମାର୍ଦ୍ନାସ୍ ନିଜର୍ ଆୟାଙ୍ଗ୍ ବାଙ୍ଗ୍ରିନ୍ ଆମ୍ବିକିରି ନିଜର୍ ମାଏକିନିଆଁଗାନେ ରସ୍ ଆରୁ ଆବ୍ଡ଼ାର୍ ଅଣ୍ଟା ମେଦୁ ମାନର୍କର୍।” 32ଇ ଭେଦ୍ଦୁଦ୍ ତା ବହୁତ୍ ବାଡ଼୍କା ରାଇଦ୍। ଲେକିନ୍ ଏନ୍ ଖ୍ରୀସ୍ତ୍ ଆରୁ ମଣ୍ତ୍ଲୀଘି ବାରେ ଏନ୍ନେ ତେଙ୍ଗାଲ୍ଦାନ୍। 33ନିହ୍ମା ଭିତ୍ର୍ନୁ ଜାମାର୍ ନିଜର୍-ନିଜର୍ ମାଏକିନିଆଁବନ୍ ନିଜର୍ ଲେଖା ବାନେ ହାଖ୍ଖା, ଆରୁ ମାଏକିନିଆଁଦ୍ହି ନିଜର୍-ନିଜର୍ ମାର୍ଦ୍ନାସିନ୍ ଆଦର୍ କାମ୍ନା କାତ୍ଥା।
6ଆୟାଙ୍ଗ୍ବାଙ୍ଗ୍ ଆରୁ ହାଦ୍ଦୁର୍ଘି ଲାଗାନ୍ ଉପ୍ଦେଶ୍
1ହେ ହାଦ୍ଦୁବଚ୍ଚରୋ, ନିମ୍ ଖ୍ରୀସ୍ତ୍ଗାନେ ରାଦାର୍, ହୁଦ୍ଘିଲାଗାନ୍ ନିମ୍ ନିହ୍ମା ଆୟାଙ୍ଗ୍-ବାଙ୍ଗ୍ର୍ଘି କାତ୍ଥାନ୍ ମେନା। ଏନ୍ଦେର୍ଗେକା ଇଦ୍ ଠିକ୍ଦ୍। 2“ନିଜର୍-ନିଜର୍ ଆୟାଙ୍ଗ୍-ବାଙ୍ଗ୍ର୍ଘି ମାଇନ୍ କାମା। (ଇଦ୍ ପହ୍ଲେ ଏନ୍ନେ ଆଜ୍ଞା ରାଚା ଏକାସ୍ ଗାନେ କା ଅଣ୍ଟା କାତ୍ଥାଚିଚ୍ଚକା ଜୁଡ଼୍ରିକିରି ରାଇ)। 3କା ନିଙ୍ଘାଏ ବାନେ ମାନ୍ନାଦ୍, ଆରୁ ନିନ୍ ଦୁନିଆଁନୁ ଢେର୍ଉଲ୍ ଉଜ୍ଜୟ।” 4ହେ ବୁଆ ଜାମାରୋ, ନିଜର୍-ନିଜର୍ ହାଦ୍ଦୁବଚ୍ଚରିନ୍ ଆମା ଖୀସାବା। ବରନ୍ ପ୍ରାଭୁସ୍କି ଉପ୍ଦେଶ୍ ଆରୁ ଚେତାବାନୀ ଚିଇକିରି ଆବ୍ଡ଼ାରିନ୍ ଏରାହଜା।
ମାଲିକ୍ ଆରୁ ଗୁତ୍ତିୟାର୍ଘି ଉପ୍ଦେଶ୍
5ହେ ଗୁତ୍ତିୟାରୋ, ଏକା ଆଲାର୍ ଇ ଦୁନିଆଁନୁ ନିହ୍ମା ମାଲିକ୍ ରାନାଏ, ନିମ୍ ଆବ୍ଡ଼ାର୍ଘି ନିଜର୍ ସାଧାସିଧା ମନ୍ତି ଏଲ୍ଚ୍କା ଆରୁ ଥାର୍ଥାର୍ତେ ଆବ୍ଡ଼ାର୍ଘି କାତ୍ଥାନ୍ ମେନା। ଏସ୍କେ ନିମ୍ ଖ୍ରୀସ୍ତ୍ସ୍କି ହୁକୁମ୍ ମାନ୍ଦାର୍। 6ନିମ୍ ଆଲାରିନ୍ ଖୁସୀ କାମ୍ନାଘି ଉଦ୍ଦେଶ୍ୟନୁ ଏଦ୍ରାଗେ ଖାଲି ମାଲ୍ଲା, ବରନ୍ ପାର୍ମେଶ୍ୱାର୍ସ୍କି ଇଚ୍ଛାବନ୍ ପୁରା କାମ୍ନାବାଲା ଗୁତ୍ତିୟାର୍ ଲେଖା ଏନ୍ନେ କାମର୍। 7ନିହ୍ମା ସେବା ନାଲ୍ଖୁନ୍ ଖୁସୀତି କାମା। ଏସ୍କେ କା ନିମ୍ ଆଲାର୍ଘି ମାଲ୍ଲା, ଲେକିନ୍ ପ୍ରାଭୁସ୍କି ସେବା କାମାଲ୍ଦାର୍। 8ଏନ୍ଦେର୍ଗେକା ନିମ୍ ଆହ୍ଦାର୍ କା ଏକିନ୍ ଆଲାସ୍ ଆସ୍ ଚାହେ ଗୁତ୍ତିୟା ରାନାସ୍, ଚାହେ ଆଜାଦ୍ ରାନାସ୍, ଏସ୍କେ ବାନେ ନାଲ୍ଖୁ କାମସ୍, ଆନ୍ନେ ଆସ୍ ପ୍ରାଭୁସ୍ତି ଫଲ୍ ହାଖ୍ଖସ୍। 9ହେ ମାଲିକ୍ରୋ, ନିମ୍ହି ନିହ୍ମା ଗୁତ୍ତିୟାର୍ଗାନେ ହନ୍ନେନ୍ ବେଭାର୍ କାମର୍। ଆବ୍ଡ଼ାରିନ୍ ଆମା ଏଲ୍ଗ୍ତା; ଏନ୍ଦେର୍ଗେକା ନିମ୍ ଆହ୍ଦାର୍ କା ଆବ୍ଡ଼ାର୍ଘି ଆରୁ ନିହ୍ମା ଦୁହି ଲୋର୍ଘି ମାଲିକ୍ସ୍ ସରଗ୍ନୁ ରାଦାସ୍ ଆରୁ ଆସ୍ ନେଖା ପାଖାହି ମା ମାନ୍ଦାସ୍।
ପାର୍ମେଶ୍ୱାର୍ସ୍କି ହାଥିଆର୍ବନ୍ ଆତ୍ତା
10ଆଖ୍ରୀନୁ ପ୍ରାଭୁସ୍କି ମିଆଁ ଭାର୍ଷା ଉଇନା କାତ୍ଥା ତାକା ଆସ୍ ତାଙ୍ଘା ନିଜର୍ ମାହାନ୍ ଆତ୍ମିକ୍ ଶକ୍ତିତି ନିମାନ୍ ତାକତ୍ବାଲା କାମସ୍ଚସ୍। 11ନିମ୍ ପାର୍ମେଶ୍ୱାର୍ସ୍କି ଜାମା ହାଥିଆର୍ବନ୍ ଧାରା ତାକା ନିମ୍ ଶାଏତାନ୍ଘି ଚାଲ୍ବାଜିଘି ଆଘ୍ଲି ଇଲାଅଙ୍ଗର୍। 12ନାହ୍ମାଏ ଲାଡ଼ାଇ ଆଲାର୍ଘି ବିରୁଦ୍ଧ୍ନୁ ମାଲ୍ଲାଦ୍। ଲେକିନ୍ ଅଧିକାରୀରିନ୍, ମୁଖ୍ୟାରିନ୍, ଇ ଉହା ଦୁନିଆଁନ୍ତା ମୁଖ୍ୟାରିନ୍ ଆରୁ ଆକାଶ୍ ତା ଭୁତ୍ତୁଘି ବିରୁଦ୍ଧ୍ନୁ ଲାଡ଼ାଲ୍ଦାତ୍। 13ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍କି ଜାମା ହାଥିଆର୍ବନ୍ ଧାରା, ଏସ୍କେ ନିମ୍ ଖାରାପ୍ ଉଲ୍ଲାଘି ସାମ୍ନା କାମା ଅଙ୍ଗର୍। ଆରୁ ଜାମାକିଛିନ୍ ପୁରା କାମିକିରି ମଜ୍ବୁତ୍ ରର୍। 14ହୁଦ୍ଘିଲାଗାନ୍ ସତ୍ତୁବନ୍ କାମ୍ନା ଲେଖା ନିହ୍ମା କାଣ୍ମାନୁ ହିଁରା, ଆରୁ ଧାର୍ମିକ୍ତାଘି ଝୀଲମ୍୬:୧୪ ଝୀଲମ୍ ମତ୍ଲବ୍ ଲାଡ଼ାଇ କାମ୍ନା ବାକେନ୍ ଦୁଶ୍ମାନ୍ସ୍ତି ବାଛ୍ରାଗେ ଛାତିନୁ ଅଣ୍ଟା ପାନ୍ନାଘି ପ୍ଲେଟ୍ ଆତ୍ତକାବନ୍ ଝୀଲମ୍ ବାନାଏ। ଆତ୍ତା, 15ଆରୁ ହେଡ୍ଡୁନୁ ଶାନ୍ତିଘି ସୁସାମାଚାର୍ଘି ଜୁତା ଆତ୍ତିକିରି; 16ଆରୁ ଆଦ୍ଘି ସାଙ୍ଗେ-ସାଙ୍ଗେ ବିଶ୍ୱାସ୍ଘି ଢାଲ୍ ଧାରିକିରି ମଜ୍ବୁତ୍ ମାନା ଏସ୍କେ କା ନିମ୍ ଶାଏତାନ୍ଘି ଜାମା ଲାଘ୍ର୍ନା ଚାର୍ବନ୍ ତେବା ଅଙ୍ଗର୍। 17ମୁକ୍ତିଘି କୁକ୍କୁ କାୱାଚ୍ ଆତ୍ତା ଆରୁ ଆତ୍ମାଘି ତାଲ୍ୱାର୍ ମତ୍ଲବ୍ ପାର୍ମେଶ୍ୱାର୍ସ୍କି ବଚନ୍ବନ୍ ଗ୍ରହନ୍ କାମା। 18ପାବିତାର୍ ଆତ୍ମାତି ଜାମାବାକେନ୍ ବିନ୍ତି କାମା। ଜାମା ରକମ୍ଘି ବିନ୍ତି ଆରୁ ଆର୍ଜୀବିନ୍ତି କାମା। ଆରୁ ପାର୍ମେଶ୍ୱାର୍ସ୍କି ଜାମା ଆଲାର୍ଘି ଲାଗାନ୍ ଲାଗାତାର୍ ବିନ୍ତି କାମାଗେ ଚେତ୍ରିକିରି ରା। 19ଏଙ୍ଘା ଲାଗାନ୍ହି ବିନ୍ତି କାମା କା ଏଙ୍ଘା ତେଙ୍ଗ୍ନାବାକେନ୍ ପାର୍ମେଶ୍ୱାର୍ସ୍ ଏଙ୍ଗାଗେ ଏନ୍ନେ ବଚନ୍ ଚିୟସ୍, ଏସ୍କେ କା ଏନ୍ ବିନାଏଲ୍ଚିକିରି ସୁସାମାଚାର୍ଘି ଭେଦ୍ଦୁବନ୍ ତେଙ୍ଗାଅଙ୍ଗନ୍। 20ଆ ସୁସାମାଚାର୍ଘି ଲାଗାନ୍ ଏନ୍ ସିକ୍ଡ଼ିତି ହିର୍କା ରାଜ୍ଦୂଁତ୍ନ୍। ନିମ୍ ବିନ୍ତି କାମା କା ଏଙ୍ଗାଗେ ଏସ୍କେ ତେଙ୍ଗ୍ନା କାତ୍ଥା ଆନ୍ନେ ଏନ୍ ବିନାଏଲ୍ଚିକିରି ତେଙ୍ଗାଅଙ୍ଗନ୍।
ଆଖ୍ରୀ ଯୋହାର୍
21ତୁଖିକୁସ୍ ଏକାସ୍ କା ନାହ୍ମା ପ୍ୟାରା ଭାଇସ୍, ଆରୁ ପ୍ରାଭୁସ୍କି ବିଶ୍ୱାସ୍ କାମ୍ନା ଲାଇଗ୍ ସେବକସ୍, ଏକାସ୍ତି ନିମ୍ ବୁଝ୍ରା ଅଙ୍ଗର୍ କା ଏମ୍ ଏସ୍କେମ୍ ଆରୁ ଏନ୍ଦେର୍ କାମାଲ୍ଦାମ୍। 22ଏନ୍ ଆସିନ୍ ନିହ୍ମାସାନ୍ ଇଦ୍ଘିଲାଗାନ୍ ତାଇୟାଲ୍ଦାନ୍ କା ନିମ୍ ଏହ୍ମା ଦାଶାବନ୍ ଆହର୍ ଆରୁ ଆସ୍ ନିମାନ୍ ଉତ୍ସାହିତ୍ କାମସ୍।
23ବାଙ୍ଗ୍ ପାର୍ମେଶ୍ୱାର୍ସ୍ ଆରୁ ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍କି ତାର୍ତି ଜାମା ବିଶ୍ୱାସୀ ଭାଇ ଆରୁ ବୁହୁଣୀ ଜାମାର୍ଗେ ଶାନ୍ତି, ବିଶ୍ୱାସ୍, ଆରୁ ବାନେ ହାଖ୍ଖନା ହାଖ୍ଖର୍ନାଦ୍। 24ପାର୍ମେଶ୍ୱାର୍ସ୍କି କ୍ରିପା ଆବ୍ଡ଼ା ଜାମାର୍ଘି ମିଆଁ ମାନ୍ନାଦ୍, ଏକାର୍ କା ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍ସିନ୍ ଏକ୍ଲାହି ମା ମୁଞ୍ଜର୍ନାବାଲା ବାନେ ହାଖ୍ଖନାତି ବାନେ ହାଖ୍ଖନାଏ।