କୁଲୁସିୟୋ ସହର୍ତା ଖ୍ରୀସ୍ତ୍ ମଣ୍ତ୍ଲୀର୍ଘି ନାମେନୁ ଯୀଶୁ ଖ୍ରୀସ୍ତ୍କି ଖାସ୍ଚେଲା ପାଉଲୁସ୍କି ଚିଠି
ବହିଘି ପରିଚୟ
ଖାସ୍ଚେଲା ପାଉଲୁସ୍ କୁଲୁସିୟୋ ସହର୍ତା ଖ୍ରୀସ୍ତ୍ ମଣ୍ତ୍ଲୀଘି ନାମେନୁ ଚିଠି ଲେଖ୍ଚ୍କାଦାସ୍। ଆସ୍ ଖ୍ରୀସ୍ତ୍କି ସେବା ନାଲଖୁ କାମ୍ନାଘି କାରଣ୍ତି ଜେହେଲ୍ନୁ ରାନାବାକେନ୍ ଅଣ୍ଟା କୁଲୁସିୟୋନ୍ତା ମୁଖ୍ୟାସ୍ ବାର୍ଚାସ୍। ଆସ୍ ପାଉଲୁସ୍ସିନ୍ ତେଙ୍ଗିୟାସ୍ କା କୁଲୁସିୟୋନ୍ତା ଆଲାର୍ ଝୁଟ୍ଟୁ ଶିକ୍ଷାବନ୍ ଶିଖରାଲ୍ନାଏ। ଏକାର୍ ଇ କାତ୍ଥାନ୍ ଯୋର୍ ଚିଆଲିୟାର୍ କା ପାର୍ମେଶ୍ୱାର୍ସ୍ସିନ୍ ଆହାଗେ ଆରୁ ପୁରାପୁରୀ ପାପ୍ତି ବାଛ୍ରାଗେ ଅଣ୍ଟା ଆଲାସ୍କେ “ଆତ୍ମିକ୍ ମୁଖ୍ୟା ଆରୁ ଅଧିକାରୀର୍” ଘି ଆରାଧାନା ନିହାତି କାମ୍ନାକାତ୍ଥା। ଆରୁ ଆଲାସ୍କେ କେତ୍କ ବିଶେଷ୍ ମୁଖ୍ୟା ଧରମ୍ ରୀତିନୀତି ଏସ୍କେ ଖାତ୍ନାବନ୍ ମାନ୍ନା ଆରୁ ଅନ୍ନାମହ୍ନା ଚାହେ ଦୁସ୍ରା ନିୟମ୍ଗୁଠିନ୍ ନିହାତି ମାନ୍ନା କାତ୍ଥା। ହୁଦ୍ଘିଲାଗାନ୍ ପାଉଲୁସ୍ ଇ ଚିଠିବନ୍ କୁଲୁସିୟୋନ୍ତା ବିଶ୍ୱାସୀ ଜାମାରିନ୍ ସୁଧ୍ରାଗେ ଲେଖ୍ଚ୍କାଦାସ୍। ପାର୍ମେଶ୍ୱାର୍ସ୍ସିନ୍ ଆହାଗେ ଆରୁ ପୁରାପୁରୀ ପାପ୍ତି ବାଛ୍ରାଗେ ଯୀଶୁ ଖ୍ରୀସ୍ତ୍ସାନ୍ ଖାଲି ଶକ୍ତି ରାଇ। ପାଉଲୁସ୍ ଚାହାଁଲିୟାସ୍ କା ବିଶ୍ୱାସୀଜାମାର୍ ଯୀଶୁସ୍କି ସତ୍ତୁ ବଚନ୍ବନ୍ ବିଶ୍ୱାସ୍ କାମର୍ ଆରୁ ଝୁଟ୍ଟୁ ଶିକ୍ଷାନୁ ମା ଚାଲ୍ରର୍।
ନିମ୍ ଜାମାର୍ ଇ ଚିଠିବନ୍ ଧ୍ୟାନ୍ ପୁର୍ବକ ପାଢ଼ା ଆରୁ ପାର୍ମେଶ୍ୱାର୍ସ୍କି ତାର୍ତି ବହୁତ୍ କ୍ରିପା ଲାଭ୍ କାମା।
ରୂପ୍-ରେଖା
ଯୋହାର୍ ୧:୧-୮
ଖ୍ରୀସ୍ତ୍କି ସାଭାବ୍ ଆରୁ ନାଲ୍ଖୁ ୧:୯—୨:୧୯
ଖ୍ରୀସ୍ତ୍କିନୁ ପୁନା ଜୀବନ୍ ୨:୨୦—୪:୬
ଆଖ୍ରୀ କାତ୍ଥା ୪:୭-୧୮
1ଯୋହାର୍
1ଏନ୍ ପାଉଲୁସ୍ ପାର୍ମେଶ୍ୱାର୍ସ୍କି ଇଚ୍ଛାତି ଖ୍ରୀସ୍ତ୍ ଯୀଶୁସ୍କି ଅଣ୍ଟା ଖାସ୍ଚେଲାନ୍, ଆରୁ ଭାଇ ତୀମଥିଉସ୍କି ତାର୍ତି, 2ଖ୍ରୀସ୍ତ୍ଗାନେ ଯୋଡ଼୍ରିକିରି ରାନାବାଲା ଆ ପାବିତାର୍ ଆ ଖ୍ରୀସ୍ତ୍ସିନ୍ ବିଶ୍ୱାସ୍ କାମୁ ଭାଇ ଆରୁ ବୁହୁଣୀର୍ଘି ନାମେନୁ ଚିଠି ଲେଖାଲ୍ଦାମ୍, ଏକାର୍ କା କୁଲୁସିଆନୁ ରାଲିୟାର୍:
ନାହ୍ମା ବାଙ୍ଗ୍ ପାର୍ମେଶ୍ୱାର୍ସ୍କି ତାର୍ତି ନିମାଗେ କ୍ରିପା ଆରୁ ଶାନ୍ତି ହାଖ୍ଖର୍ତେ ରାନାଦ୍।
ପାଉଲୁସ୍ କୁଲୁସିଆ ମଣ୍ତ୍ଲୀଘି ଲାଗାନ୍ ବିନ୍ତି
3ଏମ୍ ନିହ୍ମା ଲାଗାନ୍ ଲାଗାତାର୍ ବିନ୍ତି କାମିକିରି ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍କି ବାଙ୍ଗ୍ସ୍ ମତ୍ଲବ୍ ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିଦାମ୍। 4ଏନ୍ଦେର୍ଗେକା ଏମ୍ ମେନ୍ଚ୍କାଦାମ୍ କା ଯୀଶୁ ଖ୍ରୀସ୍ତ୍କି ମିଆଁ ନିହ୍ମାଏ ବିଶ୍ୱାସ୍ ରାଇ, ଆରୁ ଜାମା ପାର୍ମେଶ୍ୱାର୍ସ୍କି ପାବିତାର୍ ଆଲାରିନ୍ ନିମ୍ ବାନେ ହାଖ୍ଖଦାର୍। 5ଇଦ୍ ଆ ଆଶ୍ରାଘି କାରଣ୍ତି ମାନ୍ଚ୍କିଚି ଏକାଦ୍ କା ନିହ୍ମା ଲାଗାନ୍ ସରଗ୍ନୁ ବାଛ୍ରିକିରି ରାଇ ଆରୁ ନେଖାଏ ବାରେନୁ ନିମ୍ ପହ୍ଲେନ୍ତି ସତ୍ତୁ ଖବର୍ ମତ୍ଲବ୍ ସୁସାମାଚାର୍ଘି ଦ୍ୱାର୍ନୁ ମେନ୍ଚ୍କାଦାର୍। 6ଆ ବଚନ୍ଦ୍ ନିହ୍ମାସାନ୍ ଆଣ୍ସ୍କିଚି ଆରୁ ଗୋଟା ଦୁନିଆଁନୁ ଏସ୍କେ ଫଲ୍ ଅନ୍ଦ୍ରାଲିଦ୍, ଆରୁ ବାଢ଼ର୍ତେ କାଲିଦ୍, ହନ୍ନେନ୍ ନିମ୍ ଏକ୍ଲାନ୍ତି ଆବନ୍ ସତ୍ତୁତି ମେନିକିରି ପାର୍ମେଶ୍ୱାର୍ସ୍କି ସତ୍ତୁ କ୍ରିପାବନ୍ ଆକ୍କାର୍, ଆ ଉଲ୍ଲାନ୍ତି ନିହ୍ମା ମାଝାନୁହି ହୋନ୍ନେନ୍ ମାନ୍ତେ ବାରାଲିଦ୍। 7ନାହ୍ମାଗାନେ ନାଲ୍ଖୁ କାମୁ ପ୍ୟାରା ଏପାଫ୍ରାସ୍ତି ଏନ୍ନେ ଶିକ୍ଷା ହାକ୍କାଦାର୍ ଏକାସ୍ କା ନାହ୍ମାଲାଗାନ୍ ଖ୍ରୀସ୍ତ୍କି ବିଶ୍ୱାସ୍ କାମ୍ନାଘି ଲାଇଗ୍ ସେବକସ୍। 8ଆସ୍ ପାବିତାର୍ ଆତ୍ମାଦ୍ ନିମାଗେ ଚିଚ୍ଚକା ଏକ୍ ଦୁସ୍ରାରିନ୍ ବାନେ ହାଖ୍ଖନାଘି ବାରେନୁହି ଏମାନ୍ ବାତାବାଚ୍କାଦାସ୍। 9ଇଦ୍ଘିଲାଗାନ୍ ଏକ୍ଲାନ୍ତି ଏମ୍ ଇବନ୍ ମେନ୍ଚ୍କାମ୍, ଏମ୍ହି ନିହ୍ମା ଲାଗାନ୍ ଆର୍ଜୀବିନ୍ତି କାମାଗେ ମାଲ୍ଲା ଆମ୍ବୁମ୍, ଏସ୍କେ କା ନିମ୍ ଆତ୍ମିକ୍ ବୁଦ୍ଧି ଆରୁ ବୁଝ୍ରିକିରି ପୁରାପୁରୀ ପାର୍ମେଶ୍ୱାର୍ସ୍କି ଇଚ୍ଛାବନ୍ ଆହାଅଙ୍ଗର୍। 10ଏମ୍ ଏନ୍ନେ ବିନ୍ତି ଇଦ୍ଘିଲାଗାନ୍ କାମ୍ଦାମ୍ କା ନିହ୍ମାଏ ଚାଲିଚଲନ୍ ପ୍ରାଭୁସ୍କି ଲାଇଗ୍ ମାନ୍ନାଦ୍, ଆରୁ ଆସିନ୍ ଖୁସ୍ କାମ୍ନାକାତ୍ଥା ଆରୁ ନିମ୍ ଜାମା ବାନେ-ବାନେ ନାଲ୍ଖୁ କାମର୍ ଆରୁ ପାର୍ମେଶ୍ୱାର୍ସ୍କି ବୁଦ୍ଧିନୁ ବାଢ଼୍ର୍ତେ କାଲା। 11ଏମ୍ ଆରୁହି ବିନ୍ତି କାମ୍ଦାମ୍ କା ନିମ୍ ପାର୍ମେଶ୍ୱାର୍ସ୍କି ମାହିମାଘି ଶକ୍ତି ହାଖ୍ଖୀକିରି ମଜ୍ବୁତ୍ ମାନ୍ତେକାଲା, ଆରୁ ଜାମାକିଛିନ୍ ଖୁସୀ ଆରୁ ଧିରାଜ୍ତି ସାହା ଅଙ୍ଗର୍। 12ଆରୁ ବାଙ୍ଗ୍ସ୍କି ଧାନ୍ୟାବାଦ୍ କାମ୍ତେ ରା। ଆସ୍ ନିମାନ୍ ପାର୍ମେଶ୍ୱାର୍ସ୍କି ଆଲାର୍ଗେ ଏକାର୍ କା ବିଲ୍ଲୀନୁ ରାନାଏ ଆରୁ ଏକା ବୁଆସ୍କି ସମ୍ପତ୍ତି ଆବ୍ଡ଼ାର୍ଘି ଲାଗାନ୍ ଉଇକା ରାଇ ଆଦ୍ଘି ଭାଗିଦାର୍ ମାନର୍। 13ଏନ୍ଦେର୍ଗେକା ଆସ୍ ନାମାନ୍ ଉହାଘି ଶକ୍ତିତି ଛୁଡ଼ାବାଇକିରି ତାଙ୍ଘା ଦୁଲାଡ଼ି ହାଦ୍ଦୁସ୍କି ରାଜୀନୁ ଅନ୍ଦ୍ରାସ୍। 14ଆ ଖ୍ରୀସ୍ତ୍ସ୍ତି ନାମାଗେ ମୁକ୍ତି ମତ୍ଲବ୍ ପାପ୍ତି ଛେମା ହାଖ୍ଖର୍କିଚି।
ଖ୍ରୀସ୍ତ୍କି ମାହାନ୍ତା ଆରୁ ନାଲ୍ଖୁ
15ଯୀଶୁ ଖ୍ରୀସ୍ତ୍ ତା ମା ଏଥ୍ର୍ନା ପାର୍ମେଶ୍ୱାର୍ସ୍କି ପ୍ରତିରୂପ୍ସ୍। ଆରୁ ଜାମା ସୃଷ୍ଟିଘିନ୍ତି ମାହାନ୍ସ୍। 16ଏନ୍ଦେର୍ଗେକା ଆସ୍କି ଶକ୍ତିନ୍ତିନିନ୍ ଜାମାକିଛିଦ୍ ସିର୍ଜାରାଚ୍କିଚି। ଆଦ୍ ଚାହେ ସରଗ୍ତା ରାନାଦ୍ ଚାହେ ଦୁନିଆଁନ୍ତା, ଏଥ୍ର୍ନା ଚାହେ ମା ଏଥ୍ର୍ନା, ରାଜ୍ଗାଦୀ ମାନ୍ନାଦ୍ ଚାହେ ପ୍ରାଧାନ୍ତା, ପ୍ରାଭୁତା ଚାହେ ହକ୍, ଜାମାକିଛିନ୍ ଆସ୍କି ଦ୍ୱାର୍ନୁ ଆରୁ ଆସ୍କି ଲାଗାନ୍ ସୃଷ୍ଟି ମାନ୍ଚ୍କିଚି। 17ଆସ୍ ଜାମା ସୃଷ୍ଟିଘିନ୍ତି ପହ୍ଲେନ୍ତି ରାଦାସ୍, ଆରୁ ଜାମା ସୃଷ୍ଟିଦ୍ ଆସ୍କିନୁ ଟିକ୍ରିକିରି ରାଇଦ୍। 18ଆସିନ୍ ମେଦୁ ମତ୍ଲବ୍ ମଣ୍ତ୍ଲୀନ୍ତା କୁକ୍କୁସ୍; ଆସିନ୍ ସୁରୁ, ଆରୁ କେଚ୍ଚକାସ୍ତି ପହ୍ଲେ ଉଜ୍ଜନାବାଲାନ୍ତି ପହ୍ଲେନ୍ତି ଜାମା କାତ୍ଥାସ୍ତି ଆସିନ୍ ମୁଖିଆସ୍ ଆରୁ ଜାମାର୍ଘିନ୍ତି ମୁଖ୍ୟା ଠାହ୍ରାରାଚାସ୍। 19ଏନ୍ଦେର୍ଗେକା ପାର୍ମେଶ୍ୱାର୍ସ୍ ଚାହାଁଚାସ୍ କା ତାଙ୍ଘା ହାଦ୍ଦୁସ୍କିନୁ ଜାମାକିଛିଦ୍ ଭାର୍ପୁର୍ ରଦ୍। 20ପାର୍ମେଶ୍ୱାର୍ସ୍ ଖ୍ରୀସ୍ତ୍କି ଦ୍ୱାର୍ନୁ ଜାମାକିଛିନ୍ ଚାହେ ଦୁନିଆଁନ୍ତା ଚାହେ ସରଗ୍ନ୍ତା ତାଙ୍ଘାଗାନେ ମେଲ୍ମିଲାପ୍ କାମ୍ତାଚାସ୍। ଆରୁ ଖ୍ରୀସ୍ତ୍କି କ୍ରୁଶ୍ନୁ ବାହାବାଚ୍କା ହେଁସୁଘି ଦ୍ୱାର୍ନୁ ପାର୍ମେଶ୍ୱାର୍ସ୍ ଶାନ୍ତି ଠାହ୍ରାଚାସ୍।
21ଆରୁ ଆଘ୍ଲି ନିମ୍ ଖାରାପ୍ ନାଲ୍ଖୁ କାମିକିରି ପାର୍ମେଶ୍ୱାର୍ସ୍ତି ଭିନେ ମାନ୍ଚ୍କାର୍ କେର୍କାଚ୍କାର୍ ଆରୁ ନିହ୍ମା ମନ୍ନୁ ପାର୍ମେଶ୍ୱାର୍ସ୍କି ବିରୋଧି ରାଚ୍କାର୍। 22ଲେକିନ୍ ଖ୍ରୀସ୍ତ୍ସ୍ ତାଙ୍ଘା ଖିନାବାଲା ମେଦୁଘି ମରନ୍ ଦ୍ୱାର୍ନୁ ପାର୍ମେଶ୍ୱାର୍ସ୍ଗାନେ ନାହ୍ମାଏ ମେଲ୍ମିଲାପ୍ କାମ୍ତାଚ୍କାଦାସ୍। ତାକା ଆସ୍ ନିମାନ୍ ପାବିତାର୍, ବିନାଦୋଷୀ ଆରୁ ବିନାନିନ୍ଦା କାମିକିରି ପାର୍ମେଶ୍ୱାର୍ସ୍କି ଆଘ୍ଲି ଅନ୍ଦ୍ରା ଅଙ୍ଗସ୍। 23ଆରୁ ଯଦି ନିମ୍ ବିଶ୍ୱାସ୍ନୁ ମଜ୍ବୁତ୍ ରର୍ ଆରୁ ଏକା ସୁସାମାଚାର୍ଘି ଆଶ୍ରାବନ୍ ନିମ୍ ଆବନ୍ ମା ଆମ୍ବର୍, ଟିକ୍ରିକିରି ରର୍, ଇ ସୁସାମାଚାର୍ ଆକାଶ୍ କିଆଁନ୍ତା ଜାମା ସୃଷ୍ଟିବନ୍ ମେନ୍ତା କେର୍କିଚା, ଆରୁ ଏନ୍ ପାଉଲୁସ୍ ଆଦ୍ଘି ସେବକ୍ ମାନ୍ଚ୍କାଦାନ୍।
ମଣ୍ତ୍ଲୀଘି ଲାଗାନ୍ ପାଉଲୁସ୍କି ସେବା ନାଲ୍ଖୁ
24ଆକ୍କୁନ୍ ଏନ୍ ନିହ୍ମା ଲାଗାନ୍ ଏକା ଦୁଃଖୁ ସାହାଲ୍ଦାନ୍ ଆଦ୍ଘି ଲାଗାନ୍ ଏନ୍ ଖୁସୀ ରାଦାନ୍। ଖ୍ରୀସ୍ତ୍କି ନିଜର୍ ଶରୀର୍ ମତ୍ଲବ୍ ମଣ୍ତ୍ଲୀଘି ଲାଗାନ୍ ଏକା ଦୁଃଖୁନ୍ ସାହ୍ଚ୍କାଦାସ୍ ଆନ୍ନୁନ୍ ଏକା କମି ରାଚାକେର୍କିଚି ଏନ୍ ଆବନ୍ ନିଜର୍ ଶରୀର୍ନୁ ପୁରା କାମ୍ଦାନ୍। 25ଏନ୍ ପାର୍ମେଶ୍ୱାର୍ସ୍କି ସୁସାମାଚାର୍ବନ୍ ପୁରାପୁରୀ ପ୍ରଚାର୍ କାମନ୍ ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍ ନିହ୍ମା ଫାଇଦାଘି ଲାଗାନ୍ ଏଙ୍ଗା ଏକା ଆଦେଶ୍ ଚିଚ୍କାଦାସ୍ ଆଦ୍ଘି ଲେଖା ଏନ୍ ଆସ୍କି ଅଣ୍ଟା ସେବକ୍ ମାନ୍ଚ୍କାନ୍ କେର୍କାଦାନ୍। 26ଆରୁଅହନ୍ ଆ ଭେଦ୍ଦୁବନ୍ ଏକା ବାକେନ୍ ଆରୁ ପିଢିନ୍ତି ନୁଡ୍କା ରାଇ, ଲେକିନ୍ ଆକ୍କୁନ୍ ଆସ୍କି ଆ ପାର୍ମେଶ୍ୱାର୍ସ୍କି ପାବିତାର୍ ଆଲାର୍ଘି ମିଆଁ ପ୍ରକଟ୍ ମାନ୍ଚ୍କିଚି। 27ପାର୍ମେଶ୍ୱାର୍ସ୍ ଆବ୍ଡ଼ାରିନ୍ ଏଦା ବେଦ୍ଦିୟାସ୍ କା ବିନାୟାହୁଦୀର୍ଘି ମାଝାନୁହି ଇ ଭେଦ୍ଦୁଘି ମାହିମାଘି କେତ୍କ ମୂଲ୍ୟ ରାଇ ଆରୁ ଆ ଭେଦ୍ଦୁଦ୍ ଇଦ୍ କା ଖ୍ରୀସ୍ତ୍ ନାହ୍ମାଏନୁ ରାଦାସ୍, ହୁଦ୍ଘିଲାଗାନ୍ ନାହ୍ମାଏ ଆଶ୍ରା ରାଇ କା ଆସ୍ ନାମାନ୍ ସରଗ୍ନୁ ମାଇନ୍ କାମସ୍। 28ଏସ୍କେ କା ଏମ୍ ଜାମାରିନ୍ ଖ୍ରୀସ୍ତ୍ନୁ ପୁରାପୁରୀ ସିଦ୍ଧ୍ କାମିକିରି ପାର୍ମେଶ୍ୱାର୍ସ୍କି ଆଘ୍ଲି, ଅନ୍ଦ୍ରା ଅଙ୍ଗମ୍। ହୁଦ୍ଘିଲାଗାନ୍ ଏମ୍ ଆ ଖ୍ରୀସ୍ତ୍କି ବାରେ ପ୍ରଚାର୍ କାମ୍ଦାମ୍ ଆରୁ ଅଣ୍ଟା-ଅଣ୍ଟା ଜାମା ଆଲାରିନ୍ ପୁରାପୁରୀ ବୁଦ୍ଧିତି ଶିଖାବାଦାମ୍। 29ଇଦ୍ଘିଲାଗାନ୍ ଏନ୍ ଆସ୍କି ଶକ୍ତିତି ଏକାଦ୍ କା ଏଙ୍ଘାଏନୁ ନାଲ୍ଖୁ କାମାଲିଦ୍, ଆଦ୍ଘି ଲେଖା ଏନ୍ ମନ୍ ଜୀଆ ଚିଇକିରି ଖାଟାଲ୍ଦାନ୍।
21ଏନ୍ ଚାହଁଦାନ୍ କା ନିମ୍ ଆହା କା ନିହ୍ମା ଲାଗାନ୍ ଆରୁ ଲାଉଦୀକିଆନ୍ତା ଆଲାର୍ଘି ଲାଗାନ୍ ଆରୁ ଏକାର୍ ଏଙ୍ଗାନ୍ ଏକ୍ଲାହି ମାଲ୍ଲା ଏରୁର୍, ଆବ୍ଡ଼ାଗେ ଲାଗାନ୍ କେତ୍କ ମେହ୍ନତ୍ କାମାଲ୍ଦାନ୍। 2ତାକା ଆବ୍ଡ଼ାର୍ଘି ମନ୍ଦ୍ ଉତ୍ସାହ ମାନ୍ନାଦ୍ ଆରୁ ଏକ୍ ଦୁସ୍ରାର୍ଗାନେ ବାନେକିରି ରର୍। ଆରୁ ଆବ୍ଡ଼ାର୍ ଭାର୍ପୁର୍ ଧାନ୍ନୁବନ୍ ଏକାଦ୍ କା ସତ୍ତୁ ବୁଦ୍ଧିତି ହାଖ୍ଖରିଦ୍ ଆରୁ ପାର୍ମେଶ୍ୱାର୍ସ୍କି ଭେଦ୍ଦୁବନ୍ ମତ୍ଲବ୍ ଖ୍ରୀସ୍ତ୍ସିନ୍ ଆହାଅଙ୍ଗର୍। 3ଖ୍ରୀସ୍ତ୍କିନୁ ବୁଦ୍ଧି ଆରୁ ବୁଦ୍ଧିଘି ଜାମା ଧାନ୍ନୁ ନୁହ୍ରିକିରି ରାଇଦ୍। 4ଇବନ୍ ଏନ୍ ଇଦ୍ଘିଲାଗାନ୍ ତେଙ୍ଗାଲ୍ଦାନ୍ କା ଏକିନ୍ ଆଲାର୍ ନିମାନ୍ ଏମ୍ବା-ଏମ୍ବା କାତ୍ଥାନୁ କାଁଟ୍ଛାଁଟ୍ କାମିକିରି ନିମାନ୍ ଧୋଖା ମା ଚିୟର୍। 5ଏନ୍ ନିହ୍ମାସ୍ତି ଗେଚ୍ଛାନୁ ରାଦାନ୍, ହାଲେହି ଏଙ୍ଘା ଜୀଆ ନିହ୍ମାସାନ୍ ରାଇଦ୍। ଆରୁ ଏଙ୍ଗା ଖୁସୀ ଲାଗ୍ଗାଲି କା ନିହ୍ମା ଜୀବନ୍ତା ସୁନ୍ଦର୍ ସାରିଆଚ୍କା ଆରୁ ଖ୍ରୀସ୍ତ୍ନୁ ନିହ୍ମା ବିଶ୍ୱାସ୍ଘି ମଜ୍ବୁତ୍ବନ୍ ଏରିକିରି ଖୁସୀ ମାନ୍ଦାନ୍।
ଖ୍ରୀସ୍ତ୍କିନୁ ପୁରାପୁରୀ ଜୀବନ୍ ହାଖ୍ଖରିଦ୍
6ହୁଦ୍ଘିଲାଗାନ୍ ନିମ୍ ଏସ୍କେ ଯୀଶୁ ଖ୍ରୀସ୍ତ୍ସିନ୍ ପ୍ରାଭୁ ବୁଲି ମାନ୍ଚ୍କାଦାର୍, ଆନ୍ନେନ୍ ଆସ୍କିନୁ ରାଇକିରି ଚାଲ୍ର୍ତେ ରା। 7ଆରୁ ଆସ୍କିନୁ ନିହ୍ମା ଚେରୁ ଧାରଦ୍ ଆରୁ ନାହି ମଜ୍ବୁତ୍ ମାନଦ୍; ଆରୁ ଏସ୍କେ ନିମାନ୍ ଶିଖାବା କେର୍କିଚି, ହନ୍ନେନ୍ ବିଶ୍ୱାସ୍ନୁ ମଜ୍ବୁତ୍ ମାନ୍ତେକାଲା, ଆରୁ ବାଗ୍ଗେ ସେ ବାଗ୍ଗେ ଧାନ୍ୟାବାଦ୍ ଚିତେ ରା।
8ଖାବାର୍ଦାର୍ ରା କା ନେଦିନ୍ ନିମାନ୍ ଭୁଲ୍ ଧରମ୍ ଶାସ୍ତ୍ରଘି ଆରୁ ବେକାର୍ ଧୋଖାତି ନିମାନ୍ ମା ଫୁସ୍ଲର୍, ଏକାଦ୍ ଆଲାର୍ଘି ରୀତି ଆରୁ ଦୁନିଆଁନ୍ତା ପହ୍ଲେନ୍ତା ଶିକ୍ଷାନୁ ଲେଖା ରାଇ, ଲେକିନ୍ ଖ୍ରୀସ୍ତ୍କି ଲେଖା ମାଲ୍ଲିଦ୍। 9ଏନ୍ଦେର୍ଗେକା ଖ୍ରୀସ୍ତ୍କିନୁ ପାର୍ମେଶ୍ୱାର୍ସ୍ ତାଙ୍ଘା ଭାର୍ପୁରୀ ମେଦୁ ଲେଖା ଆସ୍କିନୁ ରାଦାସ୍। 10ଆରୁ ଖ୍ରୀସ୍ତ୍କିନୁ ରାଇକିରି ନିମ୍ ଭାର୍ପୁରୀ ମାନ୍ଚ୍କାଦାର୍। ଆସ୍ ଜାମା ଶାସନ୍ କାମୁ ଆରୁ ଅଧିକାରୀର୍ଘି କୁକ୍କସ୍। 11ଖ୍ରୀସ୍ତ୍କି ଦ୍ୱାରା କାମ୍ଚ୍କା ଖାତ୍ନାଘି ଦ୍ୱାର୍ନୁ, ଯେତ୍କବାକେନ୍ ନିହ୍ମା ପାପ୍ମୟ ଜାମା ସାଭାବ୍ବନ୍ ଏତ୍ତାକେର୍କିଚା, ନିହ୍ମାଏ ଏନ୍ନେ ଖାତ୍ନା କାମାକେରା, ଏକାନ୍ ହେଖ୍ଖାତି ମାଲ୍ଲା କାମାକୁ। 12ନିମ୍ ଆସ୍ନାନ୍ ବାକେନ୍ ଆସ୍ଗାନେ ମାଁଣାକେରା, ଆରୁ ଏକା ପାର୍ମେଶ୍ୱାର୍ସ୍ ଆସିନ୍ କେଚ୍ଚକାସ୍ତି ଉଜ୍ଜତାଚାସ୍, ଆ ପାର୍ମେଶ୍ୱାର୍ସ୍କି ଶକ୍ତିବନ୍ ବିଶ୍ୱାସ୍ କାମିକିରି ଖ୍ରୀସ୍ତ୍ଗାନେ ଆରୁଅହନ୍ ଉଜ୍ଜକାଦାର୍। 13ନିମ୍ ଜାମାର୍ ନିଜର୍ ପାପ୍ଘି ଦ୍ୱାରା ଆରୁ ନିଜର୍ ସାଭାବ୍ଘି ଖାତ୍ନା ମା ମାନ୍ନାଘି ଦ୍ୱାରା କେଚ୍ଚକାର୍ କେର୍କାଚ୍କାର୍, ଲେକିନ୍ ପାର୍ମେଶ୍ୱାର୍ସ୍ ନିମାନ୍ ଖ୍ରୀସ୍ତ୍ଗାନେ ଉଜ୍ଜତାଚାସ୍ ଆରୁ ନିହ୍ମା ଜାମା ପାପ୍ବନ୍ ଛେମା କାମ୍ଚେଇଚାସ୍। 14ଆରୁ ନିୟମ୍ଘି ଆ ଲେଖାଦ୍ ଏକାଦ୍ ନାହ୍ମା ନାମେଘି ମିଆଁ ଆରୁ ନାହ୍ମା ବିରୁଦ୍ଧ୍ନୁ ରାଚା ଆବନ୍ ହାଟାବାଚେଇଚାସ୍, ଆରୁ ଆବନ୍ କ୍ରୁଶ୍ନୁ କାଣ୍ଟିତି ଠୋକିକିରି ଚାହାନ୍ତି ହାଟାବାଚେଇଚାସ୍। 15ପାର୍ମେଶ୍ୱାର୍ସ୍ ଜାମା ଖାରାପ୍ ଆତ୍ମାଘି ଅଧିକାରୀ ଆରୁ ଶାସନ୍ କାମୁରିଘି ହାତିଆର୍ ଲୁଟିକିରି ଆବ୍ଡ଼ାରିନ୍ ଦୁନିଆଁଘି ଆଘ୍ଲି ନିଚା ଏଦିୟାସ୍ ଆରୁ କ୍ରୁଶ୍ଘି ଦ୍ୱାରା ଆବ୍ଡ଼ାରିନ୍ ହାରାବାଦାସ୍।
16ହୁଦ୍ଘିଲାଗାନ୍ ଅନ୍ନାମହ୍ନା, ପରବ୍, ପୁନା ଚାନ୍ଦୋ ଚାହେ ଆରାମ୍ ଉଲ୍ଲାଘି ବାରେ ନେଦ୍ହି ନିହ୍ମାଏ ବିଚାର୍ ମା କାମ୍ନାର୍ ଆରୁ ଦୋଷ୍ ମା ଲାଗାବର୍। 17ଇ ଜାମା କାତ୍ଥାଦ୍ ଖାଲି ବାର୍ନାବାଲା କାତ୍ଥାଘି ଏହୁଦ୍ହି, ଲେକିନ୍ ଇ ଏହୁଦ୍ହି ପ୍ରକୃତ୍ କାତ୍ଥାଦ୍ ତା ଖ୍ରୀସ୍ତ୍କିଦିନ୍। 18ଏକିନ୍ ଆଲାସ୍ ନରମ୍ ଆରୁ ଦୂଁତ୍ଜାମାର୍ଘି ପୂଜାନୁ ଲାକ୍କାରର୍ ଆରୁ ନିମାନ୍ ପୁରସ୍କାର୍ ହାଖ୍ଖାଗେ ମା ଚିୟର୍। ଏନ୍ନେ ଆଲାର୍ ଏର୍କା କାତ୍ଥାନୁ ଲାକ୍କାରାନାଏ ଆରୁ ଦୁନିଆଁନ୍ତା ଫାଲ୍ତୁ ସୋଚ୍ନୁ ବଡ଼୍ପଣି ଏଦ୍ର୍ନାଏ। 19ଆରୁ ଆସ୍ ନିଜ୍କେନିଜ୍ ଖ୍ରୀସ୍ତ୍ଗାନେ ଲାଗିକିରି ମା ରାଦାସ୍ ଏକାସ୍ କା ପୁରା ଶରୀର୍ତା ମୁଖ୍ୟାସ୍ ଆରୁ ଚେରୁ ଆରୁ ସିରାଘି ଲାଲନ୍ପାଲନ୍ କାମ୍ଦାସ୍ ଆରୁ ଇବ୍ଡ଼ାଦ୍ ଅନ୍ଠାଣ୍ ରାଇକିରି ପାର୍ମେଶ୍ୱାର୍ସ୍କି ଇଚ୍ଛା ଲେଖା ପାର୍ଦିଦ୍।
ଖ୍ରୀସ୍ତ୍ଗାନେ ଉଜ୍ଜନା ଆରୁ ଖିନା
20ଏନ୍ଦେର୍ଗେକା ନିମ୍ ଖ୍ରୀସ୍ତ୍ଗାନେ କେଚ୍ଚକାର୍ କେର୍କାଦାର୍ ଆରୁ ଦୁନିଆଁନ୍ତା ଶିକ୍ଷାନ୍ତି ଛୁଟ୍କାରା ହାକ୍କାଦାର୍ ତା ନିମ୍ ଦୁନିଆଁନ୍ତା ଆଲାର୍ ଲେଖା ଏନ୍ଦେର୍ଗେ ଜୀବନ୍ ବିତାବାଲ୍ଦାର୍? ଆରୁ ଏନ୍ନେ ନିୟମ୍ଗୁଠିନ୍ ଏନ୍ଦେର୍ଗେ ମାନାଲ୍ଦାର୍? 21ଏସ୍କେ କା “ଇବନ୍ ଆମା ଏସ୍ରା, ଇବନ୍ ଆମା ଟାଟ୍ଟେଚେ ଏରା, ଆରୁ ଇବନ୍ ହେଖ୍ଖା ଆମା ଲାଗାବା!” 22ଇବ୍ଡ଼ା ଜାମା ଜିନିଷ୍ଦ୍ ନାଲ୍ଖୁନୁ ବେଭାର୍ କାମ୍ତେ-କାମ୍ତେ ନାଶ୍ ମାନକୋ, ଏନ୍ଦେର୍ଗେକା ଇଦ୍ ଆଲାର୍ଘି ହୁକୁମ୍ ଆରୁ ଶିକ୍ଷାଘି ଲେଖା ରାଇ, 23ଏନ୍ନେ ଶିକ୍ଷାତା ମନ୍ମର୍ଜୀତି ଆରାଧାନା କାମ୍ନା, ନରମ୍ ଆରୁ ଶରୀର୍ବନ୍ ଦୁଃଖୁ ଚିନାତି ବୁଦ୍ଧିବୁଲି ଆହାକାଇ, ଲେକିନ୍ ଇତ୍ତି ଶରୀର୍ଘି ଇଚ୍ଛାବନ୍ ରୋକାଗେ ଇଦ୍ ଏନ୍ଦେର୍ହି ଫାଏଦା ମା ମାନିଦ୍।
3ଖ୍ରୀସ୍ତ୍କିନୁ ପୁନା ଜୀବନ୍ ହାଖ୍ଖରିଦ୍
1ଯଦି ନିମ୍ ଖ୍ରୀସ୍ତ୍ଗାନେ ଉଜ୍ଜକାଦାର୍ତା ସରଗ୍ତା ଜିନିଷ୍ଗୁଠିଘି ଖୋଜାର୍ନୁ ଲାକ୍କାରା, ଏକାସାନ୍ କା ସରଗ୍ନୁ ପାର୍ମେଶ୍ୱାର୍ସ୍କି ତିନାତାରା ଅକ୍କାଦାସ୍। 2ଦୁନିଆଁନ୍ତା ଜିନିଷ୍ଗୁଠିନ୍ ମାଲ୍ଲା ସରଗ୍ତା ଜିନିଷ୍ଗୁଠିନ୍ ସୋଚା ଆରୁ ଧିୟାନ୍ ଚିଆ। 3ଏନ୍ଦେର୍ଗେକା ନିମ୍ତା କେଚ୍ଚକାର୍ କେର୍କାଦାର୍ ଆରୁ ଜୀବନ୍ଦ୍ ଖ୍ରୀସ୍ତ୍ଗାନେ ପାର୍ମେଶ୍ୱାର୍ସ୍କିନୁ ନୁହ୍ର୍କା ରାଇଦ୍। 4ଖ୍ରୀସ୍ତ୍ ନିହ୍ମା ଜୀବନ୍ନୁ ଯେତ୍କବାକେନ୍ ଆସ୍ ଏଥ୍ରସ୍ ହତ୍କବାକେନ୍ ନିମ୍ହି ଆସ୍କି ମାହିମାନୁ ଏଥ୍ରର୍।
5ହୁଦ୍ଘିଲାଗାନ୍ ନିମ୍ ନିହ୍ମା ଶରୀର୍ନୁ ଏକାଦ୍ ଦୁନିଆଁନ୍ତା କାତ୍ଥାଦ୍ ଆବନ୍ ଖତମ୍ କାମାଚା। ମତ୍ଲବ୍ ବେଭିଚାର୍, ଆପାବିତାର୍, ଖାରାପ୍ ଇଚ୍ଛା, ଖାରାପ୍ ସୋଚ୍ ଲାଲଚ୍ ଆରୁ ଏକାଦ୍ କା ମୂର୍ତ୍ତୀ ପୂଜା ଲେଖା ବାରାବୁରି ରାଇଦ୍। 6ଇ କାତ୍ଥାଘି ଲାଗାନ୍ ପାର୍ମେଶ୍ୱାର୍ସ୍କେ ଖୀସ୍ ପ୍ରକଟ୍ ମାନ୍ନାବାଲା ରାଇଦ୍। 7ଅଣ୍ଟା ସାମାୟ ରାଚା ଯେତ୍କବାକେନ୍ ନିମ୍ହି ଏନ୍ନେ ନାଲଖୁ କାମ୍ତେ ଇଦ୍ଘି ପ୍ରକାର୍ ଜୀବନ୍ ବିତାବାଲ୍କାର୍। 8ଲେକିନ୍ ନିମ୍ହି ଆକ୍କୁନ୍ ଇବ୍ଡ଼ା କାତ୍ଥାଗୁଠିନ୍ ମତ୍ଲବ୍ ଖୀସ୍ରୋସ୍, ହିସ୍ଙ୍ଗା, ନିନ୍ଦା, ଆରୁ ଖାରାପ୍ କାତ୍ଥାଗୁଠିନ୍ ଆମ୍ବା। 9ଏକ୍ ଦୁସ୍ରାର୍ଗାନେ ଝୁଟ୍ଟୁ ଆମା କାଚ୍ନେଖ୍ରା, ଏନ୍ଦେର୍ଗେକା ନିମ୍ତା ପାଚ୍ଚା ସାଭାବ୍ ଆରୁ ଆଦ୍ଘି ନାଲ୍ଖୁଗୁଠିନ୍ ପୁରା ଆମ୍ବେଇଚ୍କାଦାର୍। 10ଆରୁ ପୁନା ସାଭାବ୍ବନ୍ ଧାର୍ଚ୍କାଦାର୍, ଏକାଦ୍ କା ନିହ୍ମା ବାନାବୁସ୍ ଲେଖା ପୁରା-ପୁରା ବୁଦ୍ଧି ହାଖ୍ଖାଗେ ପୁନାମାନ୍ତେ କାଇଦ୍। 11ଏକାସାନ୍ କା ବିନାୟାହୁଦୀ ଚାହେ ୟାହୁଦୀ, ଖାତ୍ନା ବାଲାର୍ ଚାହେ ବିନାଖାତ୍ନା ବାଲାର୍, ଜଙ୍ଗ୍ଲି ନା ସହରିୟାର୍, ନା ଗୁତ୍ତିୟା ନା ଆଜାଦ୍। ଇବ୍ଡ଼ା ଜାମାର୍ଘିନୁ ଖ୍ରୀସ୍ତ୍ ରାଦାସ୍ ଆରୁ ଖ୍ରୀସ୍ତ୍ହି ଜାମାକିଛିସ୍।
12ଏନ୍ଦେର୍ଗେକା ନିମ୍ ପାର୍ମେଶ୍ୱାର୍ସ୍କି ଚାଜ୍ଜକା ପାବିତାର୍ ଆରୁ ପ୍ରିୟ ଆଲାର୍, ହୁଦ୍ଘିଲାଗାନ୍ ଦାୟା, ସୋଗ୍ଗେ, ନରମ୍ଭାବ୍, ନାନ୍ନାର୍ଗାନେ ବାନେ ବେଭାର୍, ଧିରାଜ୍ବନ୍ ଧାରା। 13ନିମ୍ ଏକ୍ ଦୁସ୍ରାରିନ୍ ସାହା ଆରୁ ରା, ଆରୁ ଯଦି ନେଖିନ୍-ନେଖିନ୍ ବିରୁଦ୍ଧ୍ନୁ କାତ୍ଥା ରାଇଦ୍ ହାଲେ ଏକ୍ ଦୁସ୍ରାରିନ୍ ଛେମା କାମାଚା; ଏସ୍କେ କା ପ୍ରାଭୁସ୍ ନିମାନ୍ ଛେମା କାମ୍ଚ୍କାଦାସ୍, ନିମ୍ହି ହୋନ୍ନେନ୍ କାମା। 14ଆରୁ ନିହ୍ମା ମାଝାନୁ ବାନେ ହାଖ୍ଖନାବନ୍ ଉଇୟା, ଇଦ୍ ଜାମା ଏକ୍ତାବନ୍ ପୁରାପୁରୀ ହିଁଇଦ୍ ଉଇଇଦ୍। 15ଖ୍ରୀସ୍ତ୍କି ଶାନ୍ତି ନିହ୍ମା ଜୀଆନୁ ରାଜୀ କାମ୍ନାଦ୍। ଇ ଶାନ୍ତିଘି ଲାଗାନ୍ ନିମ୍ ଅଣ୍ଟା ଶରୀର୍ତା ଅଙ୍ଗ ମାନିକିରି ମେହାଁକେର୍କି ରାଇଦ୍ ଆରୁ ନିମ୍ ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିତେ ରା। 16ଖ୍ରୀସ୍ତ୍କି ବଚନ୍ଦ୍ ନିହ୍ମା ଜୀଆନୁ ଢେର୍ବାଗ୍ଗେ ରାନାଦ୍। ନିମ୍ ଏକ୍ ଦୁସ୍ରାରିନ୍ ପୁରାପୁରୀ ବୁଦ୍ଧିତି ଶିଖାବା ଆରୁ ଚେତାବନୀ ଚିଆ। ଆରୁ ନିଜର୍-ନିଜର୍ ମନ୍ନୁ କ୍ରିପାତି ପାର୍ମେଶ୍ୱାର୍ସ୍କି ଲାଗାନ୍ ଭଜନ୍ ଆରୁ ଆତ୍ମିକ୍ ଗୀତୁ ପାଡ଼ା। 17ଆରୁ ବଚନ୍ ଚାହେ ନାଲ୍ଖୁନ୍ ନିମ୍ ଯେତ୍କଭି କାମ୍ଦାର୍, ଆବ୍ଡ଼ା ଜାମାନ୍ ପ୍ରାଭୁ ଯୀଶୁସ୍କି ନାମେତି କାମା, ଆରୁ ଆସ୍କି ଦ୍ୱାର୍ନୁ ବାଙ୍ଗ୍ ପାର୍ମେଶ୍ୱାର୍ସ୍କି ଧାନ୍ୟାବାଦ୍ ଚିଆ।
ପୁନା ଜୀବନ୍ନୁ ପରିବାର୍ତା ନିୟମ୍
18ହେ ମାଏକିନିଆଁରୋ, ନିଜର୍-ନିଜର୍ ଆଲାସ୍କି କିୟାଁ ରା, ଏସ୍କେ କା ପ୍ରାଭୁସ୍କି ଆଲାର୍ଗେ ଇଦ୍ ଠିକ୍ଦ୍। 19ହେ ମାର୍ଦ୍ନାରୋ, ନିଜର୍-ନିଜର୍ ମାଏକିନିଆଁରିନ୍ ବାନେ ହାଖ୍ଖା, ଆରୁ ଆବ୍ଡ଼ାର୍ ଗାନେ କଠିନ୍ ବେଭାର୍ ଆମା କାମା। 20ହେ ହାଦ୍ଦୁବଚ୍ଚରୋ, ଜାମା କାତ୍ଥାନୁ ନିଜର୍-ନିଜର୍ ଆୟାଙ୍ଗ୍ ବାଙ୍ଗ୍ର୍ଘି କାତ୍ଥାନ୍ ମେନା। ଏନ୍ଦେର୍ଗେକା ପ୍ରାଭୁସ୍ ଇତ୍ତି ଖୁସୀ ମାନ୍ଦାସ୍। 21ହେ ବାଙ୍ଗ୍ ଜାମାରୋ, ନିଜର୍-ନିଜର୍ ହାଦ୍ଦୁବଚ୍ଚରିନ୍ ଆମା ଖୀସାବା, ଏସ୍କେ କା ଆବ୍ଡ଼ାର୍ଘି ସାହସ୍ ମା ଟୁଟ୍ରର୍। 22ହେ ଗୁତ୍ତିୟାରୋ, ଏକାର୍ ଇ ଦୁନିଆଁନୁ ନିହ୍ମା ମାଲିକ୍ ରାନାଏ ଜାମା କାତ୍ଥାନୁ ଆବ୍ଡ଼ାର୍ଘି ହୁକୁମ୍ ମେନ୍କେ। ନିମ୍ ଆଲାରିନ୍ ଖୁସୀ କାମାନାବାଲାର୍ ଲେଖା ଏଦ୍ରାଗେ ମାଲ୍ଲା, ବରନ୍ ପ୍ରାଭୁସିନ୍ ଆଦର୍ କାମିକିରି ମନ୍ତି ଏନ୍ନେ କାମା। 23ନିମ୍ ଏନ୍ଦ୍ରିନ୍ହି କାମା, ପୁରା ମନ୍ ଲାଗାବାଇକିରି କାମା, ଏସ୍କେ କା ଆଲାର୍ଗେ ମାଲ୍ଲା, ପ୍ରାଭୁସ୍କି ଲାଗାନ୍ କାମାଲ୍ଦାର୍। 24ନିମ୍ ଆହ୍ଦାର୍ କା ନିମାଗେ ଇଦ୍ଘି ବାଦ୍ଲି ପ୍ରାଭୁସ୍ସ୍ତି ଆର୍ଶୀବାଦ୍ ହାଖ୍ଖର; ଏନ୍ଦେର୍ଗେକା ନିମ୍ ପ୍ରାଭୁ ଖ୍ରୀସ୍ତ୍କି ସେବା କାମାଲ୍ଦାର୍। 25ଏନ୍ଦେର୍ଗେକା ନେଦ୍ ଖାରାପ୍ ନାଲ୍ଖୁ କାମର୍ ଆସ୍କେ ଆସ୍କି ଫଲ୍ ହାଖ୍ରୋ ଆରୁ ଆସାନ୍ ଆସ୍କି ବାଛାବାନାବାଲା ନେଦ୍ହି ମା ରର୍।
41ହେ ମାଲିକ୍ରୋ, ସରଗ୍ନୁ ନିହ୍ମାଏହି ମାଲିକ୍ ରାନାଏ ବୁଲି ଆହିକିରି ନିଜର୍ନିଜର୍ ଗୁତ୍ତିୟାର୍ଗାନେ ନ୍ୟାୟ ଆରୁ ଠିକ୍-ଠିକ୍ ବେଭାର୍ କାମା।
ପାଉଲୁସ୍କି ସେବା ନାଲ୍ଖୁ ପୁରା ମାନ୍ନାଘି ଲାଗାନ୍ ବିନ୍ତି
2ନିମ୍ ଚେତ୍ରିକିରି ବିନ୍ତି କାମ୍ନାନୁ ଲାକ୍କାରା ଆରୁ ଧାନ୍ୟାବାଦ୍ ଚିନାନୁ ଲାକ୍କାରା। 3ଏହ୍ମା ଲାଗାନ୍ହି ବିନ୍ତି କାମ୍ତେ ରା, ଏସ୍କେ କା ବଚନ୍ ଶୁଣାବାଗେ ପାର୍ମେଶ୍ୱାର୍ସ୍ ଏମାଗେ ବାଲି ଖୋଲଚସ୍, ଆରୁ ଖ୍ରୀସ୍ତ୍କି ଆ ଭେଦ୍ଦୁବନ୍ ଶୁଣାବା ଅଙ୍ଗନ୍, ଏକାସ୍ଘି ଲାଗାନ୍ କା ଏନ୍ ଜେହେଲ୍ନୁ ରାଦାନ୍। 4ଆରୁ ଆବନ୍ ଏନ୍ନେ ପ୍ରକଟ୍ କାମନ୍, ଏସ୍କେ ଏଙ୍ଗାଗେ କାମ୍ନା ଉଚିତ୍ ରାଇ।
5ମୋଉକାଘି ବାନେ ବେଭାର୍ କାମା। ବାହ୍ରିନ୍ତା ଆଲାର୍ ଗାନେ ବୁଦ୍ଧିମାନିତି ବେଭାର୍ କାମା। 6ନିହ୍ମାଏ ବଚନ୍ଦ୍ ଜାମାବାକେନ୍ କ୍ରିପାଘି ସାଙ୍ଗେନ୍ ଆରୁ ଏମ୍ବା ମାନ୍ନାଦ୍ କା ନିଙ୍ଗାଗେ ହାରେକ୍ ଅଣ୍ଟା ଆଲାର୍ଗେ ଉଚିତ୍ ଆରୁ ସଠିକ୍ ଯାବାବ୍ ଚିୟାଗେ ଶିଖ୍ରର୍।
ଆଖ୍ରୀ ଯୋହାର୍ କାତ୍ଥା
7ଏଙ୍ଘାଏ ଇମାନ୍ଦାର୍ ସହୟଗୀ ଆରୁ ଖ୍ରୀସ୍ତ୍କି ସେବାନୁ ଏଙ୍ଘାଏ ସାଙ୍ଗେ ନାହ୍ମାଏ ପ୍ୟାରେ ଭାଇ ତୁଖିକୁସ୍ ନିହ୍ମା ଜାମାରିନ୍ ଏହ୍ମା ବାରେନୁ ତେଙ୍ଗସ୍। 8ତୁଖିକୁସ୍ସିନ୍ ଏନ୍ ଇଦ୍ଘିଲାଗାନ୍ ନିହ୍ମାସାନ୍ ତାଇୟାଲ୍ଦାନ୍ କା ନିମ୍ ଏହ୍ମା ଦାଶାନ୍ ଆହର୍ ଆରୁ ଆସ୍ ନିହ୍ମା ମନ୍ବନ୍ ଶାନ୍ତି ଚିୟସ୍। 9ଇସ୍ଗାନେ ଅନୀସିମସିନ୍ହି ତାଇୟାଲ୍ଦାନ୍ ଏକାସ୍ କା ବିଶ୍ୱାସ୍ଘି ଲାଇଗ୍ ଆରୁ ପ୍ୟାରା ଭାଇସ୍, ଆସ୍ ନିହ୍ମା ଭିତର୍ନୁ ଅର୍ତୁସ୍; ଇବ୍ଡ଼ାର୍ ଦୁହି ଲୋକ୍ ନିମାନ୍ ଇସ୍ତା ଜାମା ଖବର୍ ବାତାବର୍।
10ଆରିସ୍ତାର୍ଖସ୍ ଏକାସ୍ କା ଏଙ୍ଘାଗାନେ ଜେହେଲ୍ନୁ ରାଦାସ୍, ଆରୁ ମାର୍କୁସ୍ ଏକାସ୍ କା ବାର୍ନାବାସ୍କି ଭାଇ ଲାଗ୍ଗଦାସ୍ (ଏକାସ୍କି ବାରେନୁ ନିମ୍ ହୁକୁମ୍ ହାକ୍କାଚ୍କାର୍ କା ଯଦି ଆସ୍ ନିହ୍ମାସାନ୍ ବାରସ୍ ତା ନିମ୍ ଆସିନ୍ ବାନେକିରି ବେଭାର୍ କାମ୍କେ) ନିମ୍ ଆସ୍କି ସ୍ୱାଗାତ୍ କାମର୍। 11ଆରୁ ଯୀଶୁ ଏକାସିନ୍ କା ଯୁସ୍ତୁସ୍ ବାନାଏ ନିମାନ୍ ଯୋହାର୍ ବାଲ୍ଦାସ୍। ୟାହୁଦୀ ବିଶ୍ୱାସୀ ଜାମାର୍ଘି ଭିତର୍ନୁ ଇବ୍ଡ଼ାର୍ ତିନ୍ ଲୋକ୍ ଖାଲି ପାର୍ମେଶ୍ୱାର୍ସ୍କି ରାଜୀଘି ଫାଏଲାନାନୁ ଏଙ୍ଘାଗାନେ ସାଙ୍ଗେନ୍ ନାଲ୍ଖୁ କାମାଲ୍ନାଏ। ଇବ୍ଡ଼ାର୍ସ୍ତି ଏଙ୍ଗା ଦିଲାସା ହାଖ୍ଖରିଦ୍। 12ଏପାଫ୍ରାସ୍ ଏକାସ୍ କା ନିହ୍ମାସ୍ତି ଅର୍ତୁସ୍ ଆରୁ ଯୀଶୁ ଖ୍ରୀସ୍ତ୍କି ଗୁତ୍ତିୟାସ୍, ନିମାନ୍ ଯୋହାର୍ ବାଲ୍ଦାସ୍, ଆରୁ ଜାମାବାକେନ୍ ନିହ୍ମା ଲାଗାନ୍ ମନ୍ ଲାଗାବାଇକିରି ବିନ୍ତି କାମ୍ଦାସ୍, ହୁଦ୍ଘିଲାଗାନ୍ ନିମ୍ ସିଦ୍ଧ୍ ମାନିକିରି ପୁରାପୁରୀ ମନ୍ ଲାଗାବିକିରି ବିଶ୍ୱାସ୍ତି ପାର୍ମେଶ୍ୱାର୍ସ୍କି ଇଚ୍ଛାନ୍ ପୁରା କାମ୍ନାନୁ ସ୍ଥିର୍ ରର୍। 13ଏନ୍ ସାକ୍ଷୀ ଚିଦାନ୍ କା ଆସ୍ ନିହ୍ମା ଲାଗାନ୍ ଆରୁ ଲାଉଦୀକିଆ ଆରୁ ହିୟରାପୁଲିସ୍ ତା ଆଲାର୍ଘି ଲାଗାନ୍ ବହୁତ୍ କଷଟ୍ ସାହାଲ୍ଦାସ୍। 14ପ୍ୟାରା ବଏଦ୍ ଲୁକାସ୍ ଆରୁ ଦେମାସ୍ ନିମାନ୍ ଯୋହାର୍ ତେଙ୍ଗାଲ୍ନାଏ। 15ଲାଉଦୀକିଆନ୍ତା ଭାଇଜାମାରିନ୍, ଆରୁ ନୁମ୍ଫାସ୍ ଆରୁ ଆସ୍ତା ଆଡ଼୍ପାଘି ମଣ୍ତ୍ଲୀବନ୍ ଯୋହାର୍ ତେଙ୍ଗାଲ୍ନାଏ। 16ଯେତ୍କବାକେନ୍ ଇ ଚିଠିନ୍ ନିହ୍ମାସାନ୍ ପାଢ଼ା ମୁଞ୍ଜର୍ ତା ଏନ୍ନେ କାମ୍କେ କା ଲାଉଦୀକିଆ ମଣ୍ତ୍ଲୀନ୍ତାର୍ହି ଇ ଚିଠିନ୍ ପାଢ଼ର୍। ଆରୁ ଲାଉଦୀକିଆନ୍ତି ଏକା ଚିଠି ବାରଦ୍ ଆବନ୍ ନିମ୍ହି ପାଢ଼କେ। 17ଆରୁ ଆର୍ଖିପପ୍ସିନ୍ ତେଙ୍କେ କା ପ୍ରାଭୁସ୍ ନିଙ୍ଗାଗେ ଏକା ସେବା ନାଲ୍ଖୁ ଚିଚ୍ଚକାଦାସ୍, ଆବନ୍ ବାନେକିରି ପୁରା କାମାଗେ ଧ୍ୟାନ୍ ଚିକେ।
18ଏନ୍ ପାଉଲୁସ୍ ଏଙ୍ଘା ହେଖ୍ଖାତି ଇବନ୍ ଲେଖାଲ୍ଦାନ୍। ନିମାନ୍ ଯୋହାର୍। ଏଙ୍ଘା ଜେହେଲ୍ନୁ ରାନାନ୍ ମନେ କାମ୍କେ। ପାର୍ମେଶ୍ୱାର୍ସ୍କି କ୍ରିପା ନିହ୍ମା ମିଆଁ ମାନ୍ତେ ରାନାଦ୍। ଆମେନ୍!