ପ୍ରେରିତ୍ ଜାମାର୍ଘି ନାଲ୍ଖୁ
ବହିଘି ପରିଚୟ
ଖାସ୍ଚେଲାଜାମାର୍ଘି ନାଲ୍ଖୁ ବହିଦ୍ ସନ୍ଥ ଲୁକାସ୍କି ଦ୍ୱାର୍ନୁ ଲେଖାକେର୍କିଚି। ସନ୍ଥ ଲୁକାସ୍ ତାଙ୍ଘା ପହ୍ଲେ ବହିନୁ ଏକା କାତ୍ଥାଘି ବାରେନୁ ଲେଖ୍ଚ୍କାଦାସ୍ ଆଦ୍ଘି ଆଘ୍ଲିନ୍ତା ବର୍ଣ୍ଣନାଦ୍ ଖାସ୍ଚେଲାଜାମାର୍ଘି ନାଲଖୁ ବହିଦ୍। ସନ୍ଥ ଲୁକାସ୍କି ଲେଖଚ୍କା ସୁସାମାଚାର୍ ଆରୁ ଇ ବହିନ୍ ଥୀୟଫିଲ୍ ନାମେଘି ଅଣ୍ଟା ଆଲାସ୍କେ ଲେଖାକେର୍କିଚି। ଇ ଆଲାସ୍ ଅଣ୍ଟା ମୁଖ୍ୟା ରୋମାନ୍ ଲିଡର୍ ରାଚା। ଏକାସ୍ କା ଇବହିଘି କପିବନ୍ ଢେର୍ ଆଲାର୍ଗେ ଚିଆଲିୟାସ୍। ସନ୍ଥ ଲୁକାସ୍ ଥୀୟଫିଲ୍ସିନ୍ ବାତାବାଗେ ବେଦ୍ଦାଲ୍ଦାସ୍ କା ପାର୍ମେଶ୍ୱାର୍ ଯୀଶୁସିନ୍ ସରଗ୍ ତାରା ଅଚ୍ଚାସ୍ କେରାସ୍ ଆରୁ ପାବିତାର୍ ଆତ୍ମା ପ୍ରେରିତ୍ ଜାମାର୍ଗେ ତାଏକା ପାଛ୍ଲି ଆବ୍ଡ଼ାର୍ ଏନ୍ଦେର୍-ଏନ୍ଦେର୍ କାମ୍ଚ୍କାଚାର୍। ସନ୍ଥ ଲୁକାସ୍ ବିଶେଷ୍ କାମିକିରି ଆବ୍ଡ଼ାରିନ୍ ତେଙ୍ଗା ବେଦ୍ଦାଲିୟାସ୍ କା ପାବିତାର୍ ଆତ୍ମା ଖାସ୍ଚେଲା ଜାମାର୍ଗେ ଶକ୍ତି ଚିଚ୍ଚା ତାକା ଆବ୍ଡ଼ାର୍ ଏକା-ଏକାସାନ୍ କେରାର୍ ଆସାନ୍ ଯୀଶୁ ଖ୍ରୀସ୍ତ୍କି ବାରେନୁ ବାତାବର୍। ଆବ୍ଡ଼ାର୍ ଯୀଶୁସ୍କି ସୁସାମାଚାର୍ବନ୍ ଯେରୁଶାଲେମ୍ନୁ ଜାମା ୟାହୁଦୀଆ ଆରୁ ସାମାରୀଆନୁ ଆରୁ ଦୁନିଆଁଘି ଆଖ୍ରୀ ସିଆଁତକ୍ ଫାଏଲାଚାର୍। ଖାସ୍ଚେଲାଜାମାର୍ଘି ନାଲ୍ଖୁ ବହିନୁ ସନ୍ଥ ଲୁକାସ୍ ଯେରୁଶାଲେମ୍ନୁ ମଣ୍ତ୍ଲୀଘି ସୁରୁ ମାନ୍ନାଘି ବାରେନୁ ଲେଖ୍ଚ୍କାଦାସ୍।
(ଖାସ୍ଚେଲାଜାମାର୍ଘି ନାଲ୍ଖୁ ବହିଦ୍ ତିନ୍ ଭାଗ୍ ରାଇ ୧) ଯୀଶୁସ୍କି ସରଗ୍ ତାରା କାନାଘି ପାଛ୍ଲି ଯେରୁଶାଲେମ୍ନୁ ଖ୍ରୀସ୍ତ୍ ଆନ୍ଦୋଲନ୍। ୨. ପାଲେଷ୍ଟାଇନ୍ଘି ଦୁସ୍ରା-ଦୁସ୍ରା ଆଡ୍ଡାନୁ ଯୀଶୁ ଖ୍ରୀସ୍ତ୍କି ବାରେନୁ ପ୍ରଚାର୍ କାମ୍ନା। ୩ ଭୁ-ମଧ୍ୟ ସାଗର୍ଘି ଦେଶ୍ତି ରୋମ୍ତକ୍ ଯୀଶୁସ୍କି ବାରେ ପ୍ରଚାର୍ କାମ୍ନା।
ନିମ୍ ଇ ବହିବନ୍ ଧିୟାନ୍-ଧିୟାନ୍ ପାଢ଼ା ଆରୁ ନିହ୍ମା ଜୀବନ୍ବନ୍ ପାବିତାର୍ ଆତ୍ମାଘି କାବୁନୁ ଉଇୟା ତା ପାବିତାର୍ ଆତ୍ମାଦ୍ ଏସ୍କେ ଖାସ୍ଚେଲାଜାମାରିନ୍ ବେଭାର୍ କାମିକିରି ପ୍ରାଭୁସ୍କି ରାଜୀନ୍ ବାନାବାଚାର୍ ହୋନ୍ନେ ଇ ଯୁଗ୍ଗୁନୁ ନିମାନ୍ ବେଭାର୍ କାମିକିରି ପ୍ରାଭୁସ୍କି ରାଜୀନ୍ ବାନାବର୍।
ରୂପ୍-ରେଖା
ସାକ୍ଷୀ ଚିୟାଗେ ତିୟାର୍ ମାନ୍ନା ୧:୧-୨୬
କ. ଯୀଶୁସ୍କି ଆଖ୍ରୀ ହୁକୁମ୍ ଆରୁ କାତ୍ଥା ଚିଚ୍କା ୧:୧-୧୪
ଖ. ୟାହୁଦାନ୍ତା ଉତ୍ତର୍ ଅଧିକାରୀ ୧:୧୫-୨୬
ଯେରୁଶାଲେମ୍ନୁ ସାକ୍ଷୀ ୨:୧—୮:୩
ୟାହୁଦୀଆ ଆରୁ ସାମାରୀଆନୁ ସାକ୍ଷୀ ୮:୪—୧୨:୨୫
ପାଉଲୁସ୍କି ସେବା ନାଲ୍ଖୁ ୧୩:୧—୨୮:୩୧
କ. ପହ୍ଲେ ପ୍ରଚାର୍ କାମ୍ନା ୧୩:୧—୧୪:୨୮
ଖ. ଯେରୁଶାଲେମ୍ନୁ ସମ୍ମେଲନ୍ ୧୫:୧-୩୫
ଗ. ଦୁସ୍ରାଥର୍ ପ୍ରଚାର୍ କାମ୍ନା ୧୫:୩୬—୧୮:୨୨
ଘ. ତିସ୍ରା ଥର୍ ପ୍ରଚାର୍ କାମ୍ନା ୧୮:୨୩—୨୧:୧୬
ଚ. ଯେରୁଶାଲେମ୍, କାଇସାରିଆ ଆରୁ ରୋମ୍ନୁ ବନ୍ଦୀ ପାଉଲୁସ୍ ୨୧:୧୭—୨୮:୩୧
1ପାବିତାର୍ ଆତ୍ମାବନ୍ ତାଏନାଘି ହୁକୁମ୍
1ହେ ଥୀୟଫିଲ୍, ଏନ୍ ଏଙ୍ଘା ପହ୍ଲେ ବହିନୁ ଆ ଜାମା ନାଲ୍ଖୁଘି ବାରେ ଆରୁ ଉପ୍ଦେଶ୍ଘି ବାରେ ଲେଖ୍ଚ୍କାଦାନ୍ ଏକାନ୍ କା ସୁରୁନ୍ତି ଯୀଶୁସ୍ କାମ୍ତେ ରାଚାସ୍, 2ଆ ଉଲ୍ଲାତକ୍ ଏକ୍ଲା ଯୀଶୁସ୍ ତାଙ୍ଘା ଚାଜ୍ଜକା ଚେଲାଜାମାରିନ୍ ପାବିତାର୍ ଆତ୍ମା ଦ୍ୱାର୍ନୁ ହୁକୁମ୍ ଚିଚ୍ଚକା ପାଛ୍ଲି ସରଗ୍ ତାରା ଉଠାବା କେରାସ୍, 3ଆସ୍ ତାଙ୍ଘା ଦୁଃଖ୍ଭୋଗ୍ଘି ପାଛ୍ଲି ଢେର୍ ସାକ୍ଷୀ ଦ୍ୱାର୍ନୁ ଆବ୍ଡ଼ାର୍ଘି ଚାହାନୁ ନିଜ୍କେନିଜ୍ ଉଜ୍ଜକା ଏଦିୟାସ୍, ଆରୁ ଚାଲିଶ୍ ଦିନ୍ତକ୍ ଧିୟାନ୍-ଧିୟାନ୍ ଆବ୍ଡ଼ାରିନ୍ ଦର୍ଶନ୍ ଚିଇକିରି ପାର୍ମେଶ୍ଵାର୍ସ୍କି ରାଜୀଘି ବାରେନୁ ତେଙ୍ଗାଲିୟାସ୍। 4ଅହନ୍ ଚେଲାର୍ଗାନେ ଅନ୍ନାବାକେନ୍ ଆସ୍ ଆବ୍ଡ଼ାରିନ୍ ଏନ୍ନେ ହୁକୁମ୍ ଚିଚ୍ଚାସ୍ କା, “ନିମ୍ ଯେରୁଶାଲେମ୍ବନ୍ ଆମା ଆମ୍ଵା, ଲେକିନ୍ ଏଙ୍ଘା ବାଙ୍ଗ୍ସ୍ ପାବିତାର୍ ଆତ୍ମା ଚିୟାଗେ ଏକା ହୁକୁମ୍ ଚିଚ୍କାଚାସ୍ ଆଦ୍ଘି ବାରେନୁ ନିମ୍ ଏଙ୍ଘାସ୍ତି ମେନ୍ଚ୍କାଦାର୍, ଆ ହୁକୁମ୍ଘି ପୁରା ମାନ୍ନାବନ୍ ହଖାଲ୍କା ରା। 5ଏନ୍ଦେର୍ଗେକା ଯୋହାନ୍ସ୍ ତା ଆମ୍ମୁତି ଆସ୍ନାନ୍ ଚିଚ୍ଚାସ୍ ସତ୍ତୁଦ୍, ଲେକିନ୍ ନିମାନ୍ ଥୋଡ଼େ ଉଲ୍ଲାଘି ପାଛ୍ଲି ପାବିତାର୍ ଆତ୍ମାତି ଆସ୍ନାନ୍ ଚିଆ କଦ୍।”
ଯୀଶୁସିନ୍ ସରଗ୍ନୁ ଉଠାବାନା
6ଯେତ୍କବାକେନ୍ ଖାସ୍ଚେଲାଜାମାର୍ ଅନ୍ଠାଣ୍ସାନ୍ ମାନ୍ଚାର୍ ତା ଯୀଶୁସିନ୍ ମେନାଗେ ଲାଗ୍ଗିୟାର୍, “ହେ ପ୍ରାଭୁ, ନିମ୍ କାଁଏ ଇ ସାମାୟନୁ ଇସ୍ରାଏଲ୍ ଜାମାର୍ଘି ରାଜୀବନ୍ ଆରୁଅହନ୍ ବାନାବର୍ଚର୍?” 7ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଆ ସାମାୟ ଆରୁ ଉଲ୍ଲାବନ୍ ଆହ୍ନା, ନିହ୍ମାଏ ଦାର୍କାର୍ ମାଲ୍ଲାଦିନ୍ ଏକାନ୍ କା ଏଙ୍ଘା ବାଙ୍ଗ୍ସ୍ ନିଜର୍ ହକ୍ନୁ ଉଇକାଦାସ୍। 8ଲେକିନ୍ ପାବିତାର୍ ଆତ୍ମା ନିହ୍ମା ମିଆଁ ଏତ୍ତ, ଆରୁ ନିମ୍ ଶକ୍ତି ହାଖ୍ଖର୍; ଆରୁ ଯେରୁଶାଲେମ୍ ଆରୁ ପୁରା ୟାହୁଦୀଆ ଆରୁ ସାମାରିଆନୁ, ଆରୁ ଦୁନିଆଁଘି ଆଖ୍ରୀ ସିଆଁତକ୍ ଏଙ୍ଘା ସାକ୍ଷୀ ମାନର୍।” 9ଆସ୍ ଇ ଜାମା କାତ୍ଥା ତେଙ୍କା ପାଛ୍ଲି ଆସିନ୍ ଆବ୍ଡ଼ାର୍ଘି ଏର୍ତେ-ଏର୍ତେ ସରଗ୍ଗେ ହୁଆକେରା ଆରୁ ଅଣ୍ଟା ବାଦ୍ଲିଦ୍ ଆସିନ୍ ଆବ୍ଡ଼ାର୍ଘି ହାନ୍ନୁସ୍ତି ତେବେଇଚା। 10ଆସ୍କି କାନାବାକେନ୍ ଆବ୍ଡ଼ାର୍ ଆକାଶ୍ତାରା ଏକ୍ନଜର୍ନୁ ଏରାଲିୟାର୍ ତା, ହତ୍କବାକେନ୍ ଏରା, ପାଣ୍ଡରୁ ଚିଢ଼ା ଆତ୍ତ୍କା ଦୁଇ ଲୋକ୍ ଆଲାର୍ ବାରିକିରି ଆବ୍ଡ଼ାର୍ଘି ଚାହାନୁ ଇଜ୍ଜାର୍, 11ଆରୁ ଆବ୍ଡ଼ାର୍ ତେଙ୍ଗିୟାର୍, “ହେ ଗାଲିଲୀନ୍ତା ଆଲାରୋ, ଏନ୍ଦେର୍ଗେ ନିମ୍ ଇଲିକିରି ଆକାଶ୍ତାରା ଏରାଲ୍ଦାର୍? ଆ ଯୀଶୁସ୍, ଏକାସ୍ କା ନିହ୍ମା ମାଝାନ୍ତି ସରଗ୍ ତାରା ଉଠାବା କେରାସ୍, ଆସିନ୍ ନିମ୍ ଏସ୍କେ ସରଗ୍ ତାରା କାନାନ୍ ଏର୍କାର୍ ଆନ୍ନେନ୍ ଆସ୍ ଆରୁଅହନ୍ ବାରସ୍।”
ମାତିଆସ୍କେ ଯୁଦାସ୍କି ପଦ୍ ହାଖ୍ଖର୍ନା
12ଆନ୍ତିନ୍ ଖାସ୍ଚେଲାଜାମାର୍, ଜାଇତୁନ୍ ନାମେଘି ପାର୍ତ୍ତାନ୍ତି ଯେରୁଶାଲେମ୍ଗେ କିର୍ରିଆର୍ ବାର୍ଚାର୍। ଆ ପାର୍ତ୍ତାଦ୍ ଯେରୁଶାଲେମ୍ତି ଲାଗ୍ଭାଗ୍ ଏକ୍ କିଲୋମିଟର୍ ଗେଚ୍ଛାନୁ ରାଚା। 13ଆବ୍ଡ଼ାର୍ ଆସାନ୍ ଆଣସିକିରି ମିଁତା ଏକା ବାଖ୍ରାନୁ ରାଲିୟାର୍ ଆସାନ୍ଗେ କେରାର୍। ଇବ୍ଡ଼ାର୍ ପାତ୍ରାସ୍, ଯୋହାନ୍, ୟାକୁବ୍, ଆନ୍ଧ୍ରିୟାସ୍, ଫିଲିପ୍ପସ୍, ଥୋମାସ୍, ବାର୍ଥଲମୀ, ମାତିଆସ୍, ଆଲ୍ଫିସ୍କି ହାଦ୍ଦୁସ୍ ୟାକୁବ୍, ଯୋସ୍ସିଲା ଶିମୋନ୍ ଆରୁ ୟାକୁବ୍ସ୍କି ହାଦ୍ଦୁ ଯୁଦାସ୍ ରାଚାର୍। 14ଇବ୍ଡ଼ାର୍ ଗାନେ କେତ୍କ ଲୋକ୍ ମାଏକିନିଆଁର୍ ଆରୁ ଯୀଶୁସ୍କି ଆୟାଙ୍ଗ୍ ମାରିୟାମ୍ ଆରୁ ଆସ୍କି ଭାଇଜାମାର୍ ରାଚାର୍। ଇବ୍ଡ଼ାର୍ ଜାମାର୍ ମନ୍ ଧିୟାନ୍ସେ ବିନ୍ତି କାମାଗେ ଲାଗ୍ଗିୟାର୍।
15ହତ୍କବାକେନ୍ ପାତ୍ରାସ୍ ଲାଗ୍ଭାଗ୍ ଶୋଏ କୁଡ଼ିଏ ଲୋକ୍ ବିଶ୍ୱାସୀ ଭାଇ ଜାମାର୍ଘି ମାଝାନୁ ଇଲିକିରି ତେଙ୍ଗିୟାସ୍, 16“ହେ ଏଙ୍ଘା ଭାଇ ଜାମାରୋ, ଏକା ଯୁଦାସ୍ ଯୀଶୁସିନ୍ ଧାର୍ତାଗେ ଆଲାର୍ଘି ଆଗୁୱାଇ କାମ୍ଚ୍କାଚାସ୍, ଆସ୍କି ବାରେନୁ ପାବିତାର୍ ଆତ୍ମାଦ୍ ଆଘ୍ଲିନ୍ତିନ୍ ଦାଉଦ୍ସ୍କି ଥୁମ୍ଣାନ୍ତି ଏକାନ୍ ତେଙ୍କିଚା, ଆଦ୍ ପାବିତାର୍ ଶାସ୍ତ୍ରଘି ବଚନ୍ ପୁରା ମାନ୍ନା ଉଚିତ୍ ରାଚାଦ୍। 17ଏନ୍ଦେର୍ଗେକା ଆସ୍ ନାହ୍ମା ଭିତର୍ନୁ ଅଣ୍ଟାସ୍ ରାଚାସ୍ ଆରୁ ଇ ସେବା କାମାଗେ ଆସିନ୍ହି ଚାଜା କେର୍କିଚା। 18(ଯୁଦାସ୍ ତାଙ୍ଘାଏ ବଇମାନ୍ଘି କମାଣିନ୍ତି ଅଣ୍ଟା ହାଲ୍ଲୁ ହେନ୍ଦିୟାସ୍, ଆରୁ ପହ୍ଲେ ତା ଆସ୍ କୁକ୍କୁନ୍ ନୁହିଁକିରି ଖାତ୍ରାସ୍ ଆରୁ ଆସ୍କି କୁଲୁ ପାଲ୍କ୍ରାକେରା ଆରୁ ଆସ୍କି ଜାମା ପଟ୍ଟାଦ୍ ଉର୍ଖାକେରା। 19ଆରୁ ଇ କାତ୍ଥାନ୍ ଯେରୁଶାଲେମ୍ ତା ଜାମା ଆଲାର୍ ଆଖ୍ଖାର୍ କେରାର୍, ଆରୁ ଆ ହାଲ୍ଲୁଘି ନାମେ ତାହ୍ମା ଭାଷାନୁ ‘ହକ୍ଲ୍ଦମା’ ବୁଲି ଆହା କେରା ଇଦ୍ଘି ମତ୍ଲବ୍ ‘ହେଁସୁଘି ହାଲ୍ଲୁ।’) 20ଆରୁ ଗୀତୁ ସଂହିତାନୁ ଲେଖ୍ଚ୍କା ରାଇ, ‘ଆସ୍କି ଆଡ଼୍ପା ଉଝ୍ଡ଼ାରୋକ ଆରୁ ଆସାନ୍ ନେଦ୍ହି ମା ରାନାର୍ ଆରୁ ଆସ୍କି ମୁଖିଆ ପଦ୍ ଦୁସ୍ରାର୍ ନେଦିନ୍ ହୁଅର୍।’
21-22ହୁଦ୍ଘିଲାଗାନ୍ ଯେତ୍କ ଦିନ୍ତକ୍ ପ୍ରାଭୁ ଯୀଶୁସ୍ ନାହ୍ମାଗାନେ କାଲିୟାସ୍ ବାରାଲିୟାସ୍ ମତ୍ଲବ୍ ଯୋହାନ୍ସ୍କି ଆସ୍ନାନ୍ ଚିନା ସାମାୟନ୍ତିନ୍ ସୁରୁ କାମିକିରି ନାହ୍ମା ମାଝାନ୍ତି ସରଗ୍ କାନା ଉଲ୍ଲାତକ୍ ଏକା ଆଲାର୍ ବାରାବର୍ ନାହ୍ମାଗାନେ ରାଚାର୍, ଉଚିତ୍ ରାଇ କା, ଆବ୍ଡ଼ାର୍ଘି ଭିତର୍ନୁ ଅଣ୍ଟା ଆଲାସ୍ ନାହ୍ମାଗାନେ ଆସ୍କି ଉଜ୍ଜନାଘି ସାକ୍ଷୀ ମାନ୍ନାସ୍।” 23ଆଙ୍ଗେନ୍ ଆବ୍ଡ଼ାର୍ ଦୁଇ ଲୋକ୍ରିନ୍ ଚାଜ୍ଜିୟାର୍। ଯୋଷେଫ୍ସ୍ ଏକାସିନ୍କା ବାର୍ସାବ୍ବା ବୁଲି ତେଙ୍ଗାଲିୟାର୍ ଆରୁ ଏକାସ୍କି ଦୁସ୍ରା ନାମେ ଯୁସ୍ତୁସ୍ ରାଚା, ଆରୁ ଦୁସ୍ରା ଆଲ୍ ମାତିଆସ୍। 24ଆନ୍ତିନ୍ ଆବ୍ଡ଼ାରିନ୍ ଭିନେ କାମିକିରି ଏନ୍ନେ ବିନ୍ତି କାମ୍ଚାର୍ “ହେ ପ୍ରାଭୁ, ନିମ୍ତା ଜାମାର୍ଘି ମନ୍ବନ୍ ଆହ୍ଦାର୍, ଏମାନ୍ ଏଦାକା ଇ ଦୁଇ ଲୋକ୍ସ୍ତି ନିମ୍ ନେକାନ୍ ଚାଜ୍ଜକାଦାର୍, 25ଏକାସ୍ କା ଅଣ୍ଟା ଖାସ୍ଚେଲାଘି ରୂପ୍ନୁ ସେବାଘି ଇ ପଦ୍ବନ୍ ଗ୍ରହନ୍ କାମସ୍, ଏକାନ୍ ଯୁଦାସ୍ ଆମ୍ବିକିରି ତାଙ୍ଘାଏ ଆଡ୍ଡାଗେ ବୁଙ୍ଗାସ୍ କେରାସ୍।” 26ଆନ୍ତିନ୍ ଆବ୍ଡ଼ାର୍-ଆବ୍ଡ଼ାର୍ଘି ନାମେନୁ ଚିଠା ଅଥରାର୍, ଆରୁ ମାତିଆସ୍କି ନାମେନୁ ଚିଠା ଉର୍ଖା। ଏନ୍ନେନ୍ ଆସ୍ ଏଗାର ଖାସ୍ ଚେଲାଜାମାର୍ଗାନେ ଗନ୍ତି ମାନ୍ଚାସ୍।
2ପାବିତାର୍ ଆତ୍ମାଘି ଏତ୍ତନା
1ଯେତ୍କବାକେନ୍ ପେନ୍ତେକୋସ୍ତଘି ପରବ୍ ଆଣ୍ସିଆ, ତା ଖାସ୍ଚେଲା ଆରୁ ବିଶ୍ୱାସୀଜାମାର୍ ଯେତ୍କର୍ ଅଣ୍ଟା ଆଡ୍ଡାନୁ ଠୁଡ଼ିୟା ରାଚ୍କାଚାର୍। 2ହତ୍କବାକେନ୍ ହଠାତ୍ ଆକାଶ୍ତି ଅଣ୍ଟା ବାଡ଼୍କା ଆନ୍ଧିଧୁକା ଲେଖା ଶବଦ୍ ମାନ୍ଚା, ଆରୁ ଏକା ଆଡ଼୍ପାନୁ ଆବ୍ଡ଼ାର୍ ଅକ୍କାଚାର୍, ଆ ଆଡ଼୍ପାନୁ ଜାମାତାରା ଫାଏଲାରାଚା କେରା। 3ଆରୁ ତାଥା ଲେଖା ଚିଚ୍ଚୁ ଏଥ୍ରା ଆରୁ ଆନ୍ନୁନ୍ନ୍ତି ଅଣ୍ଟା-ଅଣ୍ଟା ଆସାନ୍ ରୁ ଜାମାର୍ଘି ମିଆଁ ଏତ୍ତିୟା। 4ଆବ୍ଡ଼ାର୍ଜାମାର୍ ପାବିତାର୍ ଆତ୍ମାତି ଭାର୍ପୁର୍ ମାନ୍ଚାର୍ କେରାର୍, ଆରୁ ଏସ୍କେ ଆତ୍ମାଦ୍ ଆବ୍ଡ଼ାର୍ଗେ ତେଙ୍ଗାଗେ ଶକ୍ତି ଚିଚ୍ଚା, ଆନ୍ନେ ଆବ୍ଡ଼ାର୍ ଦୁସ୍ରା-ଦୁସ୍ରା ଭାଷାତି ତେଙ୍ଗାଗେ ଲାଗ୍ଗିୟାର୍।
5ଆକାଶ୍ଘି କିଆଁନ୍ତା ଜାମା ଦେଶ୍ତି ବାର୍ଚ୍କା ଭକ୍ତ ୟାହୁଦୀର୍ ଆସାନ୍ ଯେରୁଶାଲେମ୍ନୁ ରାଲିୟାର୍। 6ଯେତ୍କବାକେନ୍ ଏନ୍ନେ ଶବଦ୍ ମେନ୍ଦ୍ରା ତା ଭିଡ଼୍ ମାନ୍ଚାକେରା ଆରୁ ଆଲାର୍ ଘାବ୍ରାରାଚାର୍ କେରାର୍, ଏନ୍ଦେର୍ଗେକା ଆବ୍ଡ଼ାର୍ଜାମାର୍ ନିଜର୍-ନିଜର୍ ଭାଷାନୁ ଆବ୍ଡ଼ାର୍ଘି ତେଙ୍ଗ୍ନାନ୍ ମେଞ୍ଚାର୍। 7ଆବ୍ଡ଼ାର୍ଜାମାର୍ ଆଚ୍ମିତ୍ ମାନ୍ଚାର୍ କେରାର୍ ଆରୁ ଆଚ୍ମିତ୍ ମାନିକିରି ତେଙ୍ଗାଗେ ଲାଗ୍ଗିୟାର୍, “ଏରା, ଇବ୍ଡ଼ା କାଚ୍ଚନେଖ୍ରୁ ଆଲାର୍ ଜାମାର୍ ଗାଲିଲୀ ମାଲ୍ନାଏ କାଁଏ? 8ତା ନାମ୍ ଜାମାତ୍ ଆବ୍ଡ଼ାରିନ୍ ନାହ୍ମା ନିଜର୍-ନିଜର୍ ଭାଷାନୁ କାଚ୍ଚନେଖ୍ର୍ନାନ୍ ଏସ୍କେ ମେନାଲ୍ଦାତ୍? 9ନାମ୍ ଯେ ପାର୍ର୍ଥୀ ଆରୁ ମେଦି ଆରୁ ଏଲାମୀ ଆରୁ ମେସପୋଟାମିୟାଁ ଆରୁ ୟାହୁଦୀଆ ଆରୁ କାପ୍ପାଦୁକିୟା ଆରୁ ପନ୍ତୁସ୍ ଆରୁ ଆସିଆ, 10ଆରୁ ଫ୍ରୁଗିଆ ଆରୁ ପଂଫୂଲିଆ ଆରୁ ମିଶର୍ତି ଆରୁ ଲେବୀଆ ସହର୍ ଏକାଦ୍ କା କୁରୀଣୀ ସହର୍ଘି ଚାହାନୁ ରାଇ, ଇ ଜାମା ସହର୍ନୁ ରାନାବାଲା ଆରୁ ରୋମ୍ତି ବାର୍ଚ୍କା ଆଲାର୍, 11ଏକାର୍ କା ୟାହୁଦୀର୍ ଆରୁ ୟାହୁଦୀ ଧରମ୍ ଗ୍ରହନ୍ କାମ୍ନାବାଲାର୍, କ୍ରେତେ ଆରୁ ଆରବ୍ତା ରାନା ବାଲାର୍ ହି, ଲେକିନ୍ ନିଜର୍-ନିଜର୍ ଭାଷାନୁ ପାର୍ମେଶ୍ଵାର୍ସ୍କି ବାଡ଼୍କା-ବାଡ଼୍କା ନାଲ୍ଖୁଘି ଚାର୍ଚାବନ୍ ମେନାଲିୟାର୍।” 12ଆରୁ ଜାମାର୍ ଆଚ୍ମିତ୍ ମାନିକିରି ଆରୁ ଘାବ୍ରା ରାଇକିରି ଏକ୍ ଦୁସ୍ରାରିନ୍ ମେନାଗେ ଲାଗ୍ଗିୟାର୍, “ଇଦ୍ଘି ମତ୍ଲବ୍ ଏନ୍ଦେଦ୍?” 13ଲେକିନ୍ ଦୁସ୍ରାର୍ ଖାସ୍ଚେଲାଜାମାର୍ଘି ମାଜାକ୍ ଉଡ଼ାବାଇକିରି ତେଙ୍ଗିୟାର୍, “ଇବ୍ଡ଼ାର୍ ତା ପୁନା ଦାଖ୍ରାସ୍ ହାପ୍ପିକିରି ଉଙ୍ଖିଆର୍ କେର୍କାନାଏ।”
ପାତ୍ରାସ୍ ଭିଡ଼୍ବନ୍ ଉପ୍ଦେଶ୍ ଚିଆଲ୍ଦାସ୍
14ଆନ୍ତିନ୍ ପାତ୍ରାସ୍ ଏଗାର ଲୋକ୍ ଖାସ୍ଚେଲାର୍ଗାନେ ଇଜ୍ଜାସ୍ ଆରୁ ଜୋର୍ସେ ଚିର୍ରା ରାଇକିରି ତେଙ୍ଗାଗେ ଲାଗ୍ଗିୟାସ୍, “ହେ ୟାହୁଦୀ ଆରୁ ହେ ଯେରୁଶାଲେମ୍ନୁ ରାନା ବାଲାରୋ ଜାମାର୍, ଇଦ୍ଘି ମତ୍ଲବ୍ ଏଙ୍ଗାନ୍ ତେଙ୍ଗାଗେ ଚିଆ, ଆରୁ ଏଙ୍ଘା କାତ୍ଥାନ୍ ଧ୍ୟାନ୍ସେ ମେନା। 15ଇବ୍ଡ଼ାର୍ ମାଲ୍ଲା ଉଙ୍ଖୁର୍, ଏସ୍କେ କା ନିମ୍ ସୋଚାଲ୍ଦାର୍ ଏନ୍ଦେର୍ଗେକା ଆକ୍କୁନ୍ ତା ପାଇରିନ୍ତା ନଅ ବାଚ୍କିଚି। 16ଲେକିନ୍ ଇଦ୍ ଆ କାତ୍ଥାଦିନ୍, ଏକାନ୍ କା ଯୋୟେଲ୍ ନାବୀସ୍ ତେଙ୍କାଚାସ୍: 17‘ପାର୍ମେଶ୍ଵାର୍ସ୍ ତେଙ୍ଗ୍ଦାସ୍, କା ଆଖ୍ରୀ ଉଲ୍ଲାନୁ ଏନ୍ନେ ମାନଦ୍ କା ଏନ୍ ଏଙ୍ଘା ଆତ୍ମାନ୍ ଜାମା ଆଲାର୍ଗେ ତୁନ୍ଦନ୍ ଚିଅନ୍ ଆରୁ ନିହ୍ମାଏ ହାଦ୍ଦୁବଚ୍ଚର୍ ଭବିଷତ୍ କାତ୍ଥା ତେଙ୍ଗର୍, ଆରୁ ନିହ୍ମାଏ ଯୁୱାନ୍ ଆଲାର୍ ଦର୍ଶନ୍ ଏରର୍, ଆରୁ ନିହ୍ମାଏ ପାଚ୍କି ଆଲାର୍ ସପନ୍ ଏରର୍। 18ହଁ, ହୁ ଉଲ୍ଲାନୁ ଏନ୍ ଏଙ୍ଘା ସେବକ୍ ଆରୁ ସେବିକା ଜାମାର୍ଗେ ଏଙ୍ଘା ଆତ୍ମାନ୍ ତୁନ୍ଦନ୍ ଚିଅନ୍, ଆରୁ ଆବ୍ଡ଼ାର୍ ଭବିଷତ୍ କାତ୍ଥା ତେଙ୍ଗର୍। 19ଆରୁ ଏନ୍ ମିଁତା ଆକାଶ୍ନୁ ଅଦ୍ଭୁତ୍ ନାଲ୍ଖୁ ଏଦନ୍ ଆରୁ କିୟାଁ ଧାନ୍ତାରିନୁ ଚିହ୍ନା ମତ୍ଲବ୍ ହେଁସୁ, ଚିଚ୍ଚୁ ଆରୁ ଧୁଙ୍ଗିୟାଘି ବାଦ୍ଲି ଏଦନ୍। 20ପ୍ରାଭୁସ୍କି ମାହାନ୍ ଆରୁ ମହିମାମୟ ଉଲ୍ଲା ବାର୍ନାଘି ଆଘ୍ଲି ବିଡ଼ି ଉହା ଆରୁ ଚାନ୍ଦୋଦ୍ ହେଁସୁ ଲେଖା ଲାଲ୍ ମାନକୋ। 21ଆରୁ ହତ୍କବାକେନ୍ ନେଦ୍ ପ୍ରାଭୁସ୍କି ନାମେ ହର୍, ଆବ୍ଡ଼ାର୍ ବାଛ୍ରର୍।’”
22“ହେ ଇସ୍ରାଏଲ୍ତା ଆଲାରୋ, ଇ କାତ୍ଥାନ୍ ମେନା: ନାଜ୍ରେତ୍ତା ଯୀଶୁସ୍ ଅଣ୍ଟା ଏନ୍ନେ ଆଲାସ୍ ରାଚାସ୍ ଏକାସ୍କି କା ପାର୍ମେଶ୍ଵାର୍ସ୍କି ତାର୍ତି ବାର୍ଚ୍କା ଘି ସାକ୍ଷୀ, ଆ ଶକ୍ତିଘି ନାଲ୍ଖୁ, ଅଦ୍ଭୁତ୍ ନାଲ୍ଖୁ ଆରୁ ଚିହ୍ନାତି ପ୍ରକଟ୍ ମାନ୍ଚା, ଏକାନ୍ କା ପାର୍ମେଶ୍ୱାର୍ସ୍ ନିହ୍ମା ମାଝାନୁ ଆସ୍କି ଦ୍ୱାର୍ନୁ ଏଦିୟାସ୍ ଆରୁ ଏକାନ୍ ନିମ୍ ନିଜେ ଆହ୍ଦାର୍। 23ଆ ଯୀଶୁସିନ୍, ପାର୍ମେଶ୍ଵାର୍ସ୍କି ଠାହ୍ରାଚ୍କା ଯୋଜ୍ନା ଆରୁ ଠାହ୍ରାଚ୍କା ଆଘ୍ଲିନ୍ତା ଜ୍ଞାନ୍ଘି ଅନୁସାର୍ ନିହ୍ମା ହେଖ୍ଖାନୁ ସୋଁପାଚା କେରା, ଆରୁ ନିମ୍ ଅଧର୍ମିୟାଁର୍ଘି ମଦେତ୍ତି ଆସିନ୍ କ୍ରୁଶ୍ନୁ ଠୋକ୍ଚ୍କାର୍ ଆରୁ ପିଟ୍ଟେଇ ଚିଚ୍କାର୍। 24ଲେକିନ୍ ପାର୍ମେଶ୍ଵାର୍ସ୍ ଆସିନ୍ ମରନ୍ଘି ବନ୍ଧନ୍ତି ଛଡ଼ାବାଇକିରି ଉଜ୍ଜତାଚାସ୍; ଏନ୍ଦେର୍ଗେକା ଆସ୍କି ଲାଗାନ୍ ମରନ୍ଘି ସ୍ଥିତିନୁ ରାନାଦ୍ ଅସମ୍ଭବ୍ଦ୍। 25ଏନ୍ଦେର୍ଗେକା ଦାଉଦ୍ସ୍ ଆସ୍କି ବାରେନୁ ତେଙ୍ଗ୍ଦାସ୍, ‘ଏନ୍ ପ୍ରାଭୁସିନ୍ ଜାମାବାକେନ୍ ଏଙ୍ଘା ଚାହାନୁ ଏରାଲ୍କାନ୍, ଆରୁ ଏନ୍ ମା ଏଲ୍ଚନ୍ ହୁଦ୍ଘିଲାଗାନ୍ ଆସ୍ ଏଙ୍ଘାଏ ତିନାପାଖା ରାଦାସ୍। 26ଇଦ୍ଘିଲାଗାନ୍ ଏଙ୍ଘାଏ ମନ୍ଦ୍ ଖୁସୀ ମାନ୍ଚା ଆରୁ ଏନ୍ ଖୁସୀତି ଆସ୍କି ସ୍ତୁତି କାମ୍ଚ୍କାନ୍; ଆରୁ ଏଙ୍ଘାଏ ଶରୀର୍ଦ୍ହି ଆଶ୍ରାନୁ ଉଜ୍ଜଦ୍। 27ଏନ୍ଦେର୍ଗେକା ନିମ୍ ଏଙ୍ଘାଏ ଜୀଆବନ୍ ପାତାଲ୍ନୁ ମା ଆମ୍ବଦାର୍; ଆରୁ ନିଜର୍ ପାବିତାର୍ ଆଲାସିନ୍ କିତ୍ତାଗେ ମା ଚିଦାର୍। 28ନିମ୍ ଏଙ୍ଗାନ୍ ସବୁଦିନ୍ତା ଜୀବନ୍ଘି ପାବୁ ଏଦ୍କାଦାର୍; ନିମ୍ ଏଙ୍ଗାନ୍ ନିଜର୍ ଉପସ୍ଥିତିତି ଖୁସୀତି ଭାରର୍ ଚିଅର୍।’”
29“ହେ ଏଙ୍ଘା ଭାଇ ଜାମାରୋ, ଏନ୍ ପୁର୍ଖା ବୁଆ ଦାଉଦ୍ସ୍କି ବାରେନୁ ନିମାନ୍ ବିଶ୍ୱାସ୍ତି ତେଙ୍ଗାଅଙ୍ଗନ୍ କା ଆସ୍ତା କେଚ୍ଚାସ୍କେରାସ୍ ଆରୁ ମାଁଣା କେରାସ୍ ଆରୁ ଆସ୍କି ମାସ୍ଣାଦ୍ ଇନ୍ନାଜୁଟି ନାହ୍ମା ମାଝାନୁ ରାଇଦ୍। 30ଦାଉଦ୍ସ୍ ଅଣ୍ଟା ନାବୀ ରାଚାସ୍, ଆସ୍ ଆହାଲିୟାସ୍ କା ପାର୍ମେଶ୍ଵାର୍ସ୍ କାତ୍ଥା ଚିଇକିରି ଆସିନ୍ ତେଙ୍କାଚାସ୍ କା ଆସ୍ ତାଙ୍ଘା ବାଉଁଶାର୍ସ୍ତି ଅଣ୍ଟା ଆଲାସିନ୍ ତାଙ୍ଘା ରାଜ୍ଗାଦୀନୁ ଅକ୍ତସ୍; 31ଦାଉଦ୍ସ୍ ଆଘ୍ଲି ମାନ୍ନାବାଲା ଘାଟ୍ଣାବନ୍ ଏରିକିରି ଖ୍ରୀସ୍ତ୍ସ୍କି ଉଜ୍ଜନାଘି ବାରେନୁ ଭବିଷତ୍ କାତ୍ଥା ତେଙ୍କାଚାସ୍। ଆସ୍ ତେଙ୍କାଚାସ୍ କା ନା ଆସିନ୍ ପାତାଲ୍ନୁ ଆମ୍ବାକୋ ଆରୁ ନା ଆସ୍କି ମେଦୁଦ୍ ଗାଲ୍ରଦ୍। 32ଇ ଯୀଶୁସିନ୍ ପାର୍ମେଶ୍ଵାର୍ସ୍ ଉଜ୍ଜତାଚାସ୍, ଇଦ୍ଘି ନାମ୍ ଜାମାତ୍ ସାକ୍ଷୀତ୍। 33ଏନ୍ନେନ୍ ଯୀଶୁସ୍ ପାର୍ମେଶ୍ଵାର୍ସ୍କି ତିନାତାରା ଉଚ୍ଚା ପଦ୍ ହାଖ୍ଖୀକିରି, ଆରୁ ବାଙ୍ଗ୍ସ୍ତି ପାବିତାର୍ ଆତ୍ମା ହାଖ୍ଖୀକିରି ଏକାନ୍ ଚିୟାଗେ ଆସ୍ କାତ୍ଥା ଚିଚ୍କାଚାସ୍। ଆସ୍ ଆ ପାବିତାର୍ ଆତ୍ମାବନ୍ ଚିଚ୍କାଦାସ୍ ଏକାନ୍ ନିମ୍ ଇସାନ୍ ଏରାଲ୍ଦାର୍ ଆରୁ ମେନାଲ୍ଦାର୍। 34ଏନ୍ଦେର୍ଗେକା ଦାଉଦ୍ସ୍ତା ସରଗ୍ଗେ ମାଲ୍ଲାକୁସ୍; ଲେକିନ୍ ଆସ୍ ଖୁଦ୍ନିଜେ ତେଙ୍ଗ୍ଦାସ୍, ‘ପ୍ରାଭୁ ପାର୍ମେଶ୍ୱାର୍ସ୍ ଏଙ୍ଘା ପ୍ରାଭୁସିନ୍ ତେଙ୍ଗିୟାସ୍, ଏଙ୍ଘାଏ ତିନାତାରା ଅକ୍କା, 35ଯେତ୍କବାକେନ୍ତକ୍ ଏନ୍ ନିଙ୍ଘାଏ ବିରୋଧି ଜାମାରିନ୍ ନିଙ୍ଘାଏ ହେଡ୍ଡୁ ଉଇନାଘି ଚୋଉକି ଲେଖା ମା କାମନ୍ ଚିଅନ୍।’ 36ହୁଦ୍ଘିଲାଗାନ୍ ଆକ୍କୁନ୍ ଜାମା ଇସ୍ରାଏଲ୍ ଜାମାର୍ ଏସ୍କିନ୍ହି ଆହା କା ଏକା ଯୀଶୁସିନ୍ ନିମ୍ କ୍ରୁଶ୍ନୁ ଠୋକ୍ଚ୍କାଚ୍କାର୍, ପାର୍ମେଶ୍ୱାର୍ସ୍ ଆସିନ୍ ପ୍ରାଭୁ ଆରୁ ଖ୍ରୀସ୍ତ୍ହି ଠାହ୍ରାଚାସ୍।”
37ପାତ୍ରାସ୍କି ଇ କାତ୍ଥା ମେନିକିରି ଆଲାର୍ଘି ମନ୍ଦ୍ ଭେଚ୍ଚାକେରା, ଆରୁ ଆବ୍ଡ଼ାର୍ ପାତ୍ରାସ୍ ଆରୁ ଦୁସ୍ରା ଖାସ୍ଚେଲାରିନ୍ ମେନାଗେ ଲାଗ୍ଗିୟାର୍, “ହେ ଭାଇ ଜାମାରୋ, ଏମ୍ ଏନ୍ଦେର୍ କାମମ୍?” 38ପାତ୍ରାସ୍ ଆବ୍ଡ଼ାରିନ୍ ତେଙ୍ଗିୟାସ୍, “ପାସ୍ତାରା ଆରୁ ନିମ୍ ଜାମାର୍ ନିଜର୍-ନିଜର୍ ପାପ୍ଘି ଛେମାଲାଗାନ୍ ଯୀଶୁ ଖ୍ରୀସ୍ତ୍ସ୍କି ନାମେତି ଆସ୍ନାନ୍ ହୁଆ; ହାଲେ ନିମ୍ ପାବିତାର୍ ଆତ୍ମାଘି ଦାନ୍ ହାଖ୍ଖର୍। 39ଏନ୍ଦେର୍ଗେକା ଇ କାତ୍ଥା ଚିଚ୍ଚକା ନିମାଗେ, ଆରୁ ନିହ୍ମା ହାଦ୍ଦୁ ବଚ୍ଚର୍ଗେ, ଆରୁ ଆ ଜାମା ଗେଚ୍ଛା ଗେଚ୍ଛାନୁ ରୁ ଆଲାର୍ଘି ଲାଗାନ୍ହି ରାଇଦ୍ ଏକାରିନ୍ କା ପ୍ରାଭୁସ୍ ନାହ୍ମାଏ ପାର୍ମେଶ୍ଵାର୍ସ୍ ତାଙ୍ଘା ଚାହାଗେ ମେଁହସ୍।” 40ପାତ୍ରାସ୍ ଆରୁ ଢେର୍ କାତ୍ଥା ଦ୍ୱାର୍ନୁ ସାକ୍ଷୀ ଚିଚ୍ଚାସ୍ ଆରୁ ଚେତାବାନୀ ଚିଇକିରି ତେଙ୍ଗିୟାସ୍ କା ଇ ଅଧର୍ମିୟା ଜାତିନ୍ତି ନିଜ୍କେନିଜ୍ ବାଛାବା। 41ଆଙ୍ଗେନ୍ ଏକାର୍ ଆସ୍କି ବଚନ୍ବନ୍ ଗ୍ରହନ୍ କାମ୍ଚାର୍ ଆବ୍ଡ଼ାର୍ ଆସ୍ନାନ୍ ଅଚ୍ଚାର୍; ଆରୁ ହୁ ଉଲ୍ଲା ଲାଗ୍ଭାଗ୍ ତିନ୍ ହାଜାର୍ ଆଲାର୍ ଖାସ୍ଚେଲାଜାମାର୍ଗାନେ ଭିଡ଼୍ରାର୍। 42ଆରୁ ପୁନା ବିଶ୍ୱାସୀଜାମାର୍ ଖାସ୍ଚେଲା ଜାମାର୍ସ୍ତି ଉପ୍ଦେଶ୍ ମେନାଗେ ଆରୁ ଆବ୍ଡ଼ାର୍ଘି ସାଙ୍ଗେନୁ ରାଗେ, ଆରୁ ଆବ୍ଡ଼ାର୍ ଗାନେ ଅନ୍ନାନୁ, ଆରୁ ବିନ୍ତି କାମ୍ନାନୁ ଲାକ୍କାରାଚାର୍।
ବିଶ୍ଵାସୀ ଜାମାର୍ଘି ସାଙ୍ଗେନ୍ ସଂଗଠନ
43ଆରୁ ଜାମା ଆଲାର୍ଘି ମିଆଁ ଏଲ୍ଚ୍କା ଭିନ୍ଚାକେରା ଏନ୍ଦେର୍ଗେକା ଢେର୍ ଅଦ୍ଭୁତ୍ ନାଲ୍ଖୁ ଆରୁ ଚିହ୍ନା ଚେଲାଜାମାର୍ ଏଦାଲିୟାର୍। 44ଆରୁ ଜାମା ବିଶ୍ୱାସୀର୍ ଅଣ୍ଟାସାନ୍ ରାଲିୟାର୍, ଆରୁ ଆବ୍ଡ଼ାର୍ସାନ୍ ଯେତ୍କ ଜିନିଷ୍ ରାଚା, ଆବନ୍ ଆବ୍ଡ଼ାର୍ଜାମାର୍ ସାଧାରନ୍ ସମ୍ପତ୍ତିବୁଲି ସୋଚାଲିୟାର୍। 45ଆବ୍ଡ଼ାର୍ ନିଜର୍-ନିଜର୍ ସମ୍ପତ୍ତି ଆରୁ ଜିନିଷ୍ବନ୍ ବିଁଶିକିରି ଆ ପାଏସାବନ୍ ନେକା ଏସ୍କେ ଦାର୍କାର୍ ମାନାଲିୟା ଆବ୍ଡ଼ାର୍ଗେ ହାଟ୍ଟାଲିୟାର୍। 46ଆବ୍ଡ଼ାର୍ ରୋଜ୍ଦିନ୍ ଏକ୍ମନ୍ ମାନିକିରି ମନ୍ଦିର୍ନୁ ଠୁଡ଼ିୟା ରାଲିୟାର୍, ଆରୁ ଆଡ଼୍ପା-ଆଡ଼୍ପାନୁ ଆସ୍ମାବନ୍ ଖିଣ୍ଡିକିରି ଖୁସୀ ଆରୁ ନରମ୍ ମନ୍ତି ମେଶ୍ରିକିରି ଅନାମହାଲିୟାର୍, 47ଆରୁ ପାର୍ମେଶ୍ଵାର୍ସ୍କି ସ୍ତୁତି ମାହିମା କାମାଲିଆର୍ ଆରୁ ଜାମା ଆଲାର୍ ଆବ୍ଡ଼ାରିନ୍ ମାନାଲିୟାର୍: ଆରୁ ଏକାର୍ ମୁକ୍ତି ହାଖ୍ଖାଲିୟାର୍, ଆବ୍ଡ଼ାରିନ୍ ପ୍ରାଭୁସ୍ ରୋଜ୍ଦିନ୍ ଆବ୍ଡ଼ାର୍ ଗାନେ ଭିଡ଼ାବା ଚିଆଲିୟାସ୍।
3ପାତ୍ରାସ୍ ଲେଙ୍ଗ୍ଡ଼ା ଭିଖ୍ ନିଉସିନ୍ ବାନେ କାମାଲ୍ଦାସ୍
1ଅନ୍ଦୁଲ୍ ପାତ୍ରାସ୍ ଆରୁ ଯୋହାନ୍ସ୍ ଆଡ଼୍ତି ବିଡ଼ି ତିନ୍ ବାଜେ ବିନ୍ତି କାମ୍ନାଘି ସାମାୟନୁ ମନ୍ଦିର୍ଗେ କାଲିୟାର୍। 2ହତ୍କବାକେନ୍ ଆଲାର୍ ଜନମ୍ ତିନ୍ନିନ୍ ଅଣ୍ଟା ଲେଙ୍ଗ୍ଡ଼ା ଆଲାସିନ୍ ଅନ୍ଦ୍ରାଲିୟାର୍। ଆବ୍ଡ଼ାର୍ ଜାମା ଉଲ୍ଲା ଆସିନ୍ ମନ୍ଦିର୍ଘି “ସୁନ୍ଦର୍” ନାମେଘି ଫାଟକ୍ସାନ୍ ଅକ୍ତାଚାଲିୟାର୍, ତାକା ଆସ୍ ମନ୍ଦିର୍ଗେ କାଲୁ ଆଲାର୍ସ୍ତି ଭିଖ୍ ନିଅସ୍। 3ଯେତ୍କବାକେନ୍ ଆସ୍ ପାତ୍ରାସ୍ ଆରୁ ଯୋହାନ୍ସିନ୍ ମନ୍ଦିର୍ନୁ କର୍ନାନ୍ ଏରିୟାସ୍, ତା ଆସ୍ ଆବ୍ଡ଼ାର୍ସ୍ତି ଭିଖ୍ ନିଚାସ୍। 4ପାତ୍ରାସ୍ ଆରୁ ଯୋହାନ୍ସ୍ ଆସିନ୍ ଧ୍ୟାନ୍ସେ ଏରିୟାର୍ ଆରୁ ପାତ୍ରାସ୍ ତେଙ୍ଗିୟାସ୍, “ଏହ୍ମା ତାରା ଏରା!” 5ଆଙ୍ଗେନ୍ ଆ ଲେଙ୍ଗ୍ଡ଼ା ଆଲାସ୍ ପାତ୍ରାସ୍ ଆରୁ ଯୋହାନ୍ସ୍ତି ଏନ୍ଦ୍ରିନ୍ ହାଖ୍ଖନାଘି ଆଶ୍ରାନୁ ଆବ୍ଡ଼ାର୍ ତାରା ଏରାଗେ ଲାଗ୍ଗିୟାସ୍।
6ଲେକିନ୍ ପାତ୍ରାସ୍ ତେଙ୍ଗିୟାସ୍, “ସୋନା ରୂପା ତା ଏଙ୍ଘାସାନ୍ ମାଲ୍ଲାଦିନ୍, ଲେକିନ୍ ଏକାଦ୍ ଏଙ୍ଘାସାନ୍ ରାଇଦ୍, ଆବନ୍ ନିଙ୍ଗାଗେ ଚିଆଲ୍ଦାନ୍; ନାଜ୍ରେତ୍ତା ଯୀଶୁ ଖ୍ରୀସ୍ତ୍କି ନାମେନୁ ଏକା।” 7ଆରୁ ପାତ୍ରାସ୍ ଆ ଲେଙ୍ଗ୍ଡ଼ା ଆଲାସ୍କି ତିନା ହେଖ୍ଖାନ୍ ଧାରିକିରି ଉଠାବାଚାସ୍; ଆରୁ ହୁଙ୍ଗେନିନ୍ ଆସ୍କି ହେଡ୍ଡୁନ୍ତା ଗାଁଠି ଆରୁ ଗୁଢ଼ିନୁ ଶକ୍ତି ବାର୍ଚା କେରା। 8ଆସ୍ ଉଛ୍ଲାରିକିରି ଇଜ୍ଜାସ୍ ଆରୁ ଏକାଗେ ଲାଗ୍ଗିୟାସ୍; ଆରୁ ଏକ୍ତେ-ଏକ୍ତେ ଆରୁ କୁଦିୟାରାତେ-କୁଦିୟାରାତେ, ପାର୍ମେଶ୍ଵାର୍ସ୍କି ସ୍ତୁତି ବାଡ଼େଇ କାମ୍ତେ ଆବ୍ଡ଼ାର୍ ଗାନେ ମନ୍ଦିର୍ଗେ କେରାସ୍। 9ଜାମା ଆଲାର୍ ଆସ୍କି ଏକ୍ନାନ୍ ଆରୁ ପାର୍ମେଶ୍ଵାର୍ସ୍କି ସ୍ତୁତି ବାଡ଼େଇ କାମ୍ନାନ୍ ଏରିକିରି 10ଆଲାର୍ ଚିହ୍ନଚାର୍ କା ଇସ୍ତା ଆ ଆଲାସିନ୍ ଏକାସ୍ କା ମନ୍ଦିର୍ଘି “ସୁନ୍ଦର୍” ଫାଟକ୍ସାନ୍ ଅକ୍କିକିରି ଭିଖ୍ ନିଆଲିୟାସ୍; ଆରୁ ଆସ୍ଗାନେ ଯେତ୍କ ଘାଟ୍ର୍କିଚା, ଆବନ୍ ଏରିକିରି ଆବ୍ଡ଼ାର୍ ମୁରୁକ୍ ଆଚ୍ମିତ୍ ମାନିକିରି ଚାକ୍ରାରାଚାର୍ କେରାର୍।
ମନ୍ଦିର୍ନୁ ପାତ୍ରାସ୍ ଉପ୍ଦେଶ୍ ଚିଆଲ୍ଦାସ୍
11ଯେତ୍କବାକେନ୍ ଆ ଆଲାସ୍ ପାତ୍ରାସ୍ ଆରୁ ଯୋହାନ୍ସ୍ଗାନେ ରାଚାସ୍ ତା ଜାମା ଆଲାର୍ ମୁରୁକ୍ ଆଚ୍ମିତ୍ ମାନିକିରି ମଣ୍ଡପ୍ସାନ୍ କୁଦ୍ୟାରାତେ ବାର୍ଚାର୍, ଏକାଦ୍ କା ଶୁଲେମାନ୍ସ୍କି ମଣ୍ଡପ୍ ବୁଲି ତେଙ୍ଗାକାଇ। 12ଇବନ୍ ଏରିକିରି ପାତ୍ରାସ୍ ଆଲାରିନ୍ ତେଙ୍ଗିୟାସ୍, “ହେ ଇସ୍ରାଏଲ୍ତା ଆଲାରୋ, ନିମ୍ ଇ ଆଲାସ୍କି ବାରେ ଏନ୍ଦେର୍ଗେ ଆଚ୍ମିତ୍ ମାନାଲ୍ଦାର୍, ଆରୁ ଏହ୍ମା ତାରା ଏକ୍ନଜର୍ନୁ ଏନ୍ଦେର୍ଗେ ଏରାଲ୍ଦାର୍, ଏସ୍କେ କା ଏମ୍ ଏହ୍ମା ଶକ୍ତି ଚାହେ ଭକ୍ତି ଦ୍ୱାର୍ନୁ ଇସିନ୍ ଏକାଗେ ଶକ୍ତି ଚିଚ୍କାଦାମ୍। 13ଆବ୍ରାହାମ୍ ଆରୁ ଇସାକ୍ ଆରୁ ୟାକୁବ୍ସ୍କି ପାର୍ମେଶ୍ୱାର୍ସ୍, ନାହ୍ମାଏ ପୁର୍ଖାର୍ଘି ପାର୍ମେଶ୍ଵାର୍ସ୍, ନିଜର୍ ସେବକ୍ ଯୀଶୁସ୍କି ମାହିମା କାମ୍ଚାସ୍, ଆ ଯୀଶୁସିନ୍ ନିମ୍ ପିଟାଗେ ଧାର୍ତାଚ୍କାର୍, ଆରୁ ଯେତ୍କବାକେନ୍ ପିଲାତୁସ୍ ଆସିନ୍ ଆମ୍ଵା ଚିୟାଗେ ବିଚାର୍ କାମ୍ଚାସ୍ ତା ନିମ୍ ପିଲାତୁସ୍କି ଆଘ୍ଲିନ୍ ଆସିନ୍ ଅସ୍ଵୀକାର୍ କାମ୍ଚ୍କାର୍। 14ନିମ୍ ଆ ପାବିତାର୍ ଆରୁ ଧାର୍ମିକ୍ ଆଲାସିନ୍ ଅସ୍ଵୀକାର୍ କାମ୍ଚ୍କାର୍, ଆରୁ ଅଣ୍ଟା ଆଲ୍ ପିଟୁସିନ୍ ନିହ୍ମା ଲାଗାନ୍ ଆମ୍ଵା ଚିୟାଗେ ଆର୍ଜୀ କାମ୍ଚ୍କାର୍; 15ଆରୁ ନିମ୍ ଜୀବନ୍ଘି ପାବୁ ଏଦୁ ଆଲାସିନ୍ ପିଟ୍ଟେଚିଚ୍କାର୍, ଏକାସିନ୍କା ପାର୍ମେଶ୍ଵାର୍ସ୍ ଖୀଉର୍ସ୍ତି ଉଜ୍ଜତାଚାସ୍; ଆରୁ ଇ କାତ୍ଥାଘି ଏମ୍ ସାକ୍ଷୀମ୍। 16ଆରୁ ନାମ୍ ଯୀଶୁସ୍କି ନାମେନୁ ବିଶ୍ଵାସ୍ କାମ୍ଦାତ୍ ହୁଦ୍ଘିଲାଗାନ୍ ଇଦ୍ ଆସ୍କି ନାମେଦିନ୍ ଏକାଦ୍ ଇ ଆଲାସ୍କେ ଶକ୍ତି ଚିଚ୍ଚକିଚି ଆରୁ ଏକାନ୍ ନିମ୍ ଏରାଲ୍ଦାର୍ ଆରୁ ଆହ୍ଦାର୍ ହି। ଆ ବିଶ୍ଵାସ୍ଦିନ୍ ଏକାଦ୍ ଯୀଶୁସ୍ତି ହାଖ୍ଖରିଦ୍, ନିହ୍ମା ଜାମାର୍ଘି ଆଘ୍ଲି ଇ ଆଲାସିନ୍ ପୁରାପୁରୀ ବାନେ କାମ୍ଚ୍କିଚି।”
17“ଆରୁ ଆକ୍କୁନ୍ ହେ ଭାଇ ଜାମାରୋ, ଏନ୍ ଆହ୍ଦାନ୍ କା ନିମ୍ ଏସ୍କେ ବାଲ୍ଲିକିରି ଇ ନାଲ୍ଖୁନ୍ କାମ୍ଚ୍କାର୍ ହନ୍ନେ ନିହ୍ମାଏ ମୁଖ୍ୟା ଜାମାର୍ହି କାମ୍ଚାର୍। 18ଲେକିନ୍ ପାର୍ମେଶ୍ଵାର୍ସ୍ ଜାମା ନାବୀର୍ଘି ଦ୍ୱାର୍ନୁ ଆଘ୍ଲିନ୍ତି ତେଙ୍କାଚାସ୍ କା, ଆସ୍କି ଖ୍ରୀସ୍ତ୍ସ୍କେ ଦୁଃଖୁ ସାହା ଖାତ୍ରୋ। ଆସ୍ ଆବ୍ଡ଼ା ଜାମାନ୍ ଏନ୍ନେ ପୁରା କାମ୍ଚାସ୍। 19ଆଦ୍ଘି ଲାଗାନ୍ ନିମ୍ ପାସ୍ତାରା ଆରୁ ପାର୍ମେଶ୍ୱାର୍ସ୍ ତାରା କିର୍ରା ବାରାତା ପାର୍ମେଶ୍ୱାର୍ସ୍ ନିମାନ୍ ଛେମା କାମସ୍। 20ହାଲେ ତା ପ୍ରାଭୁସ୍କି ଦ୍ୱାର୍ନୁ ଦିଲାସାଘି ସାମାୟ ବାରୋଦ୍, ଆରୁ ନିହ୍ମା ଲାଗାନ୍ ଖ୍ରୀସ୍ତ୍ସିନ୍ ମତ୍ଲବ୍ ଯୀଶୁସିନ୍ ତାଇୟସ୍ ନେକାନ୍ କା ଆସ୍ ନିହ୍ମା ଲାଗାନ୍ ଚାଜ୍ଜକାଦାସ୍। 21ଯେତ୍କବାକେନ୍ତକ୍ ଜାମା ବିଷୟ ପହ୍ଲେ ଲେଖା ମା ମାନଦ୍ ଏକାଘି ବାରେନୁ କା ଢେର୍ ଆଘ୍ଲିନ୍ତି ପାର୍ମେଶ୍ଵାର୍ସ୍ ନିଜର୍ ପାବିତାର୍ ନାବୀଜାମାର୍ଘି ଥୁମ୍ଣା ଦ୍ୱାର୍ନୁ ତେଙ୍କାଦାସ୍ ଆ ସାମାୟ ମା ବାର୍ନାତକ୍ ଖ୍ରୀସ୍ତ୍ସ୍କେ ଏସ୍କିନ୍ ହାଲେହି ସରଗ୍ନୁ ରା ଖାତ୍ରୋ। 22ଏସ୍କେ କା ମୁଶା ନାବୀସ୍ ତେଙ୍କାଚାସ୍ କା ‘ପ୍ରାଭୁ ପାର୍ମେଶ୍ୱାର୍ସ୍ ନିହ୍ମାଏ ଭାଇ ଜାମାର୍ଘି ଭିତ୍ରୁ ନିହ୍ମା ଲାଗାନ୍ ଏଙ୍ଘା ଲେଖା ଅଣ୍ଟା ନାବୀସିନ୍ ତାଇୟସ୍, ଆରୁ ଆସ୍ ନିମାନ୍ ଏକାନ୍ ତେଙ୍ଗସ୍, ଆ ଜାମାନ୍ ନିମ୍ ମାନର୍। 23ଲେକିନ୍ ଏକା ଆଲାର୍ ଆ ନାବୀସ୍କି କାତ୍ଥା ମା ମେନର୍, ତା ଆବ୍ଡ଼ାରିନ୍ ଆଲାର୍ସ୍ତି ଭିନେ କାମାକୋ।’ 24ଶାମୁଏଲ୍ସ୍ତି ହୋଇକିରି ଆସ୍କି ପାଛ୍ଲିନ୍ତା ଯେତ୍କ ନାବୀର୍ କାତ୍ଥା ତେଙ୍କାଚାର୍ ଆବ୍ଡ଼ାର୍ଜାମାର୍ହି ଇ ଉଲ୍ଲାଘି ବାରେନୁ ପ୍ରଚାର୍ କାମ୍ଚକାନାଏ।”
25“ନିମ୍ ଆ ନାବୀଜାମାର୍ଘି ହାଦ୍ଦୁର୍ ଆରୁ ଆ କାତ୍ଥା ଚିଚ୍ଚକାଘି ଅଧିକାରୀର୍ ଏକାନ୍ କା ପାର୍ମେଶ୍ୱାର୍ସ୍ ନିହ୍ମା ପୁର୍ଖାର୍ଗାନେ କାମ୍ଚ୍କାଚାସ୍। ଏସ୍କେ ଆସ୍ ଆବ୍ରାହାମ୍ସିନ୍ ତେଙ୍କାଚାସ୍, ‘ନିଙ୍ଘା ବାଉଁଶାର୍ଘି ଦ୍ୱାର୍ନୁ ଦୁନିଆଁନ୍ତା ଜାମା ଜାତିୟାର୍ଗେ ଆଶୀର୍ବାଦ୍ ହାଖ୍ରୋ।’
26ପାର୍ମେଶ୍ଵାର୍ସ୍ ତାଙ୍ଘା ସେବକ୍ସିନ୍ ଉଜ୍ଜତାଚାସ୍ତା ପହ୍ଲେ ଆସିନ୍ ନିହ୍ମାସାନ୍ ତାଇୟାସ୍, ତାକା ନିମାନ୍ ଜାମାରିନ୍ ଖାରାପ୍ ପାବୁନ୍ନ୍ତି ହାଟାବାଇକିରି ଆଶୀର୍ବାଦ୍ ଚିୟସ୍”।
4ମାହାସାଭାଘି ଆଘ୍ଲି ପାତ୍ରାସ୍ ଆରୁ ଯୋହାନ୍
1ଯେତ୍କବାକେନ୍ ପାତ୍ରାସ୍ ଆରୁ ଯୋହାନ୍ସ୍ ଆଲାର୍ ଗାନେ କାଚ୍ଚନେଖ୍ରାଲିୟାର୍, ହତ୍କବାକେନ୍ ପୁରୋହିତ୍, ମନ୍ଦିର୍ତା ପଲ୍ଟନ୍ଜାମାର୍ଘି ମୁଖ୍ୟା ଆରୁ ସାଦ୍ଦୂକୀଜାମାର୍ ଆବ୍ଡ଼ାର୍ଘି ଚାହାଗେ ବାର୍ଚାର୍। 2ଆବ୍ଡ଼ାର୍ ମୁରୁକ୍ ଖୀସାରାଚାର୍ କେରାର୍ ଏନ୍ଦେର୍ଗେକା ଖାସ୍ଚେଲା ପାତ୍ରାସ୍ ଆରୁ ଯୋହାନ୍ସ୍ ଆଲାରିନ୍ ଉପ୍ଦେଶ୍ ଚିଆଲିୟାର୍ ଆରୁ ଯୀଶୁସ୍କି ନମୁନା ଚିଇକିରି କେଚ୍ଚକାର୍ସ୍ତି ଉଜ୍ଜନାଘି ବାରେନୁ ଶୁଣାବାଲିୟାର୍। 3ଆଙ୍ଗେନ୍ ଆବ୍ଡ଼ାର୍ ପାତ୍ରାସ୍ ଆରୁ ଯୋହାନ୍ସିନ୍ ଧାରିକିରି ନାନ୍ନୁ ଉଲ୍ଲାତକ୍ ଜେହେଲ୍ନୁ ଉଇୟାର୍, ଏନ୍ଦେର୍ଗେକା ହତ୍କବାକେନ୍ ବିଡ଼ି ଅକ୍କିୟା କେର୍କିଚା। 4ଲେକିନ୍ ବଚନ୍ ମେନୁ ଆଲାର୍ଘି ଭିତର୍ନୁ ଢେର୍ ଆଲାର୍ ଆବନ୍ ବିଶ୍ଵାସ୍ କାମ୍ଚାର୍, ଆରୁ ଆବ୍ଡ଼ାର୍ଘି ଭିତର୍ନୁ ମାର୍ଦ୍ନାର୍ ଲାଗ୍ଭାଗ୍ ପାଞ୍ଚ୍ ହାଜାର୍ ମାନ୍ଚାର୍।
5ଆରୁ ନାନ୍ନୁ ଉଲ୍ଲା ୟାହୁଦୀ ଆଲାର୍ଘି ଶାସନ୍ କାମ୍ନାବାଲାର୍, ପୁର୍ଖାର୍ ଆରୁ ପଣ୍ତିତ୍ଜାମାର୍ ଯେରୁଶାଲେମ୍ନୁ ଠୁଡ଼ିୟାରାଚାର୍। 6ଆରୁ ଆସାନ୍ ମାହାପୁରୋହିତ୍ ହାନ୍ନା, କାଇଫା, ଯୋହାନ୍, ସିକାନ୍ଦାର୍ ଆରୁ ମାହାପୁରୋହିତ୍ ଜାମାର୍ଘି ପରିବାର୍ତା ଜାମା ଆଲାର୍ ଠୁଡ଼ିୟା ରାଚ୍କାଚାର୍। 7ଆରୁ ଆବ୍ଡ଼ାର୍ ଆ ଖାସ୍ଚେଲାଜାମାରିନ୍ ମାଝାନୁ ଇଲ୍ତିକିରି ମେନାଗେ ଲାଗ୍ଗିୟାର୍, “କା ନିମ୍ ଇ ନାଲ୍ଖୁନ୍ ଏକା ଶକ୍ତିତି ଆରୁ ଏକା ନାମେତି କାମାଲ୍ଦାର୍?”
8ଆଙ୍ଗେନ୍ ପାତ୍ରାସ୍ ପାବିତାର୍ ଆତ୍ମାତି ଭାର୍ପୁର୍ ମାନିକିରି ଆବ୍ଡ଼ାରିନ୍ ତେଙ୍ଗିୟାସ୍, “ହେ ଆଲାର୍ଘି ମୁଖ୍ୟାରୋ ଆରୁ ପୁର୍ଖା ଜାମାରୋ, 9ଇନ୍ନା ଯଦି ଅଣ୍ଟା ଲେଙ୍ଗ୍ଡ଼ା ଆଲାସ୍ ଗାନେ କାମ୍ଚ୍କା ବାନେ ନାଲ୍ଖୁଘି ବାରେନୁ ଏମାନ୍ ମେନା କାଇ କା ଇସ୍ ଏସ୍କେ ବାନେ ମାନ୍ଚାସ୍। 10ତା ନିମ୍ ଜାମାର୍ ଆରୁ ଜାମା ଇସ୍ରାଏଲ୍ ଜାମାର୍ ଆହା କା ଇ ନାଲ୍ଖୁଦ୍ ନାଜ୍ରେତ୍ତା ଯୀଶୁ ଖ୍ରୀସ୍ତ୍ସ୍କି ନାମେତି ମାନ୍ଚ୍କିଚି, ନେକାନ୍ କା ନିମ୍ କ୍ରୁଶ୍ନୁ ଠୋକ୍ଚ୍କାର୍, ଆରୁ ନେକାନ୍ ପାର୍ମେଶ୍ଵାର୍ସ୍ ଖିଉର୍ସ୍ତି ଉଜ୍ଜତାଚାସ୍, ହଁ ଆସ୍କି ଦ୍ୱାର୍ନୁ ଇ ଲେଙ୍ଗ୍ଡ଼ା ଆଲାସ୍ ବାନେ ମାନିକିରି ନିହ୍ମା ମାଝାନୁ ଇଜ୍ଜକାଦାସ୍। 11ଆରୁ ପାବିତାର୍ ଶାସ୍ତ୍ରନୁ ଖ୍ରୀସ୍ତ୍ସ୍କି ବାରେନୁ ଲେଖ୍ଚ୍କା ରାଇଦ୍ କା ଖ୍ରୀସ୍ତ୍ ଇ ଚାଁଚା ଲେଖାସ୍ ଏକା ଚାଁଚାନ୍ କା ନିମ୍ ରାଜ୍ମିସ୍ତ୍ରୀଜାମାର୍ ବେକାର୍ ସୋଚ୍କାର୍ ଆଦ୍ କୋଣାନ୍ତା ଅସ୍ଲି ଚାଁଚା ମାନ୍ଚାକେରା। 12ଯୀଶୁ ଖ୍ରୀସ୍ତ୍ସିନ୍ ଆମ୍ଵିକିରି ଆରୁ ନେଖାସାନ୍ହି ମୁକ୍ତି ମା ହାଖ୍ଖରି; ଏନ୍ଦେର୍ଗେକା ଇ ଆକାଶ୍ଘି କିୟାଁ ଆଲାର୍ଘି ମାଝାନୁ ଏନ୍ନେ ନାମେ ମାଲ୍ଲା ଚିଆକୁ, ଏକା ନାମେଘି ଦ୍ୱାର୍ନୁ ନାମ୍ ମୁକ୍ତି ହାଖ୍ଖା ଅଙ୍ଗତ୍।”
13ଯେତ୍କବାକେନ୍ ୟାହୁଦୀ ଜାମାର୍ଘି ମୁଖ୍ୟାର୍ ପାତ୍ରାସ୍ ଆରୁ ଯୋହାନ୍ସ୍କି ସାହସ୍ ଏରିୟାର୍ ଆରୁ ଇବ୍ଡ଼ାର୍ ମାଲ୍ଲା ପାଢ଼ୁର୍ ଆରୁ ସାଧାରନ୍ ଆଲାର୍ବୁଲି ଆଖ୍ଖାର୍ ତା ଆବ୍ଡ଼ାର୍ ଆଚ୍ମିତ୍ ମାନ୍ଚାର୍ କେରାର୍; ଆରୁ ଇବ୍ଡ଼ାର୍ ଯୀଶୁସ୍ଗାନେ ରାଚ୍କାଚାର୍ ଆବନ୍ ଆବ୍ଡ଼ାର୍ ଆହା ଅଙ୍ଗିୟାର୍। 14ଆରୁ ଆ ବାନେ ମାନ୍ଚ୍କା ଆଲାସିନ୍ ପାତ୍ରାସ୍ ଆରୁ ଯୋହାନ୍ସ୍ଗାନେ ଇଜ୍ଜକାନ୍ ଏରିକିରି, ଆବ୍ଡ଼ାର୍ଘି ବିରୁଦ୍ଧନୁ ଇବ୍ଡ଼ାର୍ ଏନ୍ଦେର୍ହି ତେଙ୍ଗା ପଲ୍ଲିୟାର୍। 15ଆଙ୍ଗେନ୍ ଆବ୍ଡ଼ାରିନ୍ ମାହା ସାଭାନ୍ନ୍ତି ବାହାରି ଉର୍ଖାଗେ ହୁକୁମ୍ ଚିଚ୍ଚାର୍ ଆରୁ ଆବ୍ଡ଼ାର୍ ତାମ୍-ତାମ୍ କାଚ୍ନେଖ୍ରିକିରି ବିଚାର୍ କାମାଗେ ଲାଗ୍ଗିୟାର୍, 16“ନାମ୍ ଇବ୍ଡ଼ାର୍ ଗାନେ ଏନ୍ଦେର୍ କାମତ୍? ଏନ୍ଦେର୍ଗେକା ଯେରୁଶାଲେମ୍ନୁ ରୁ ଜାମା ଆଲାର୍ ଆହ୍ନାଏ, କା ଇବ୍ଡ଼ାର୍ ଅଣ୍ଟା ବାଡ଼୍କା ଅଦ୍ଭୁତ୍ ନାଲ୍ଖୁ କାମ୍ଚ୍କାନାଏ ଆରୁ ନାମ୍ ଆବନ୍ ଅସ୍ଵୀକାର୍ କାମା ପଲ୍ଲଦାତ୍; 17ଲେକିନ୍ ଇ କାତ୍ଥାଦ୍ ଏସ୍କେ ଆଲାର୍ଘି ମାଝାନୁ ଆରୁ ବାଗ୍ଗେ ମା ଫାଏଲାରୋ, ହୁଦ୍ଘିଲାଗାନ୍ ଯୀଶୁସ୍କି ନାମେତି ନେକାନ୍ହି ଏକ୍ଲାହି ଏନ୍ଦେର୍ହି କାତ୍ଥା ମା ତେଙ୍ଗାଗେ ନାମ୍ ଇବ୍ଡ଼ାରିନ୍ ଧାମ୍କତ୍।” 18ଇଦ୍ଘି ପାଛ୍ଲି ଆବ୍ଡ଼ାର୍ ପାତ୍ରାସ୍ ଆରୁ ଯୋହାନ୍ସିନ୍ ଆରୁଅହନ୍ ଉଲା ମେହିଁକିରି ଯୀଶୁସ୍କି ନାମେତି ଏକ୍ଲାହି ଏନ୍ଦେର୍ହି ମା ତେଙ୍ଗାଗେ ଆରୁ ଶିକ୍ଷା ମା ଚିୟାଗେ ହୁକୁମ୍ ଚିଚ୍ଚାର୍। 19ଲେକିନ୍ ପାତ୍ରାସ୍ ଆରୁ ଯୋହାନ୍ସ୍ ଆବ୍ଡ଼ାରିନ୍ ଯାବାବ୍ ଚିଚ୍ଚାର୍, “ପାର୍ମେଶ୍ଵାର୍ସ୍କି ହୁକୁମ୍ ମାନ୍ନାନ୍ତି ନିହ୍ମା ହୁକୁମ୍ ମାନ୍ନାଦ୍ ପାର୍ମେଶ୍ଵାର୍ସ୍କି ନଜର୍ନୁ ଠିକ୍ଦ୍କା ମାଲ୍ଲିଦ୍ ଆବନ୍ ନିମ୍ ବିଚାର୍ କାମା। 20ଏନ୍ଦେର୍ଗେକା ଏମ୍ ଏକାନ୍-ଏକାନ୍ ଏର୍କାଦାମ୍ ଆରୁ ମେନ୍ଚ୍କାଦାମ୍ ଆବନ୍ ମା ତେଙ୍ଗିକିରି ରା ପଲ୍ଲଦାମ୍।” 21ଆଙ୍ଗେନ୍ ଆବ୍ଡ଼ାର୍ ଆରୁ ଜୋର୍ସେ ଧାମ୍କିକିରି ପାତ୍ରାସ୍ ଆରୁ ଯୋହାନ୍ସିନ୍ ଆମ୍ଵେଇଚାର୍। ଇବ୍ଡ଼ାରିନ୍ ଏସ୍କେ ଦଣ୍ଡ୍ ଚିଆକୋ ଆବନ୍ ଆବ୍ଡ଼ାର୍ ସୋଚା ପଲ୍ଲିୟାର୍, ଏନ୍ଦେର୍ଗେକା ଏକା ଘାଟ୍ଣା ଘାଟ୍ର୍କିଚା ଆବନ୍ ଏରିକିରି ଜାମା ଆଲାର୍ ପାର୍ମେଶ୍ଵାର୍ସ୍କି ସ୍ତୁତିବାଡ଼ାଇ କାମାଲିଆର୍। 22ଏନ୍ଦେର୍ଗେକା ଏକା ଆଲାସ୍କିନୁ ବାନେ କାମ୍ନାଘି ଅଦ୍ଭୁତ୍ ନାଲ୍ଖୁ କାମା କେର୍କିଚା, ଆସ୍କି ବୟସ୍ ଚାଲିଶ୍ ବଛର୍ତି ବାଗ୍ଗେ ମାନାଲିୟାଦ୍।
ବିଶ୍ଵାସୀ ଜାମାର୍ ସାହସ୍ଘି ଲାଗାନ୍ ବିନ୍ତି କାମାଲ୍ନାଏ
23ଯେତ୍କବାକେନ୍ ୟାହୁଦୀ ଜାମାର୍ଘି ମୁଖ୍ୟାର୍ ପାତ୍ରାସ୍ ଆରୁ ଯୋହାନ୍ସିନ୍ ଆମ୍ବେଇର୍ଚାର୍ ତା ଆବ୍ଡ଼ାର୍ ତାହ୍ମା ସାଙ୍ଗେର୍ଘି ଚାହାଗେ କେରାର୍ ଆରୁ ମୁଖ୍ୟା ପୁରୋହିତ୍ ଆରୁ ପୁର୍ଖାର୍ ଆବ୍ଡ଼ାରିନ୍ ଏନ୍ଦେର୍-ଏନ୍ଦେର୍ ତେଙ୍କାଚାର୍ ଆବ୍ଡ଼ା ଜାମାନ୍ ତେଙ୍ଗିୟାର୍। 24ଇବନ୍ ମେନିକିରି ଆବ୍ଡ଼ାର୍ ଅହ୍ନାସାରେନ୍ ଜୋର୍ସେ ଚିର୍ରା ରାଇକିରି ପାର୍ମେଶ୍ଵାର୍ସାନ୍ ବିନ୍ତି କାମ୍ଚାର୍, “ହେ ପ୍ରାଭୁ ନିମ୍ ଆକାଶ୍, ଦୁନିଆଁ, ସାମ୍ଧୁର୍ ଆରୁ ଆନ୍ନୁ ରାନାବାଲା ଜାମାନ୍ ସୃଷ୍ଟି କାମ୍ଚ୍କାଦାର୍। 25ନିମ୍ ନିହ୍ମା ସେବକ୍ ଆରୁ ଏହ୍ମା ପୁର୍ଖା ବୁଆ ଦାଉଦ୍ସ୍କି ଥୁମ୍ଣାନ୍ତି ପାବିତାର୍ ଆତ୍ମାଘି ଦ୍ୱାର୍ନୁ ଇ କାତ୍ଥା ତେଙ୍କାଦାର୍, ‘ଦୁସ୍ରା ଜାତିୟାର୍ ଏନ୍ଦେର୍ଗେ ଝାଗ୍ଡ଼ା କାମ୍ଚାର୍? ଆରୁ ଆଲାର୍ ଏନ୍ଦେର୍ଗେ ବେକାର୍ କାତ୍ଥାଗୁଠିନ୍ ସୋଚ୍ଚାର୍? 26ପ୍ରାଭୁସ୍କି ବିରୁଦ୍ଧନୁ ଆରୁ ଆସ୍କି ଆଭିଷେକ୍ କାମ୍ଚ୍କା ଖ୍ରୀସ୍ତ୍ସ୍କି ବିରୁଦ୍ଧନୁ ଦୁନିଆଁନ୍ତା ରାଜାଜାମାର୍ ଲାଡ଼େଇ କାମାଗେ ତିୟାର୍ ମାନ୍ଚାର୍, ଆରୁ ଶାସନ୍ କାମୁ ଆଲାର୍ ଅଣ୍ଟାସାନ୍ ଠୁଡ଼ିୟାରାଚାର୍।’ 27ଏନ୍ଦେର୍ଗେକା ସତ୍ତୁନିନ୍ ନିଙ୍ଘା ପାବିତାର୍ ସେବକ୍ ଯୀଶୁସ୍କି ବିରୁଦ୍ଧନୁ ନେକାନ୍ କା ନିନ୍ ଆଭିଷେକ୍ କାମ୍ଚ୍କାଏ, ହେରୋଦ୍ସ୍ ଆରୁ ପନ୍ତୁସ୍ ପିଲାତୁସ୍ହି ବିନାୟାହୁଦୀ ଆରୁ ଇସ୍ରାଏଲ୍ର୍ ଗାନେ ଯେରୁଶାଲେମ୍ ସହର୍ନୁ ଠୁଡ଼ିୟାରାଚାର୍। 28ନିଙ୍ଘାଏ ଶକ୍ତି ଆରୁ ନିଙ୍ଘାଏ ଇଚ୍ଛା ଦ୍ୱାର୍ନୁ ଏକା ଜାମା କାତ୍ଥା ମାନୋବୁଲି ଆଘ୍ଲିନ୍ତି ତେଙ୍ଗାକେର୍କିଚା ଆବନ୍ ପୁରା କାମାଗେ ଠୁଡ଼ିୟା ରାଚ୍କାଚାର୍। 29ହେ ପ୍ରାଭୁ, ଆକ୍କୁନ୍ ୟାହୁଦୀ ଜାମାର୍ଘି ମୁଖ୍ୟାର୍ଘି ଧମକ୍ବନ୍ ଏରା; ଆରୁ ନିଙ୍ଘାଏ ସେବକ୍ରିନ୍ ପୁରା ସାହସ୍ତି ନିଙ୍ଘା ବଚନ୍ବନ୍ ଶୁଣାବାଗେ ଶକ୍ତି ଚିଆ। 30ଆଦ୍ଘି ସାଙ୍ଗେ-ସାଙ୍ଗେ ନିଙ୍ଘାଏ ପାବିତାର୍ ସେବକ୍ ଯୀଶୁସ୍କି ନାମେତି ବାନେ କାମାଗେ ଆରୁ ଚିହ୍ନା ଆରୁ ଅଦ୍ଭୁତ୍ ନାଲ୍ଖୁ କାମାଗେ ନିହ୍ମାଏ ହେଖ୍ଖା ଲାମ୍ବାବା।” 31ଆବ୍ଡ଼ାର୍ ବିନ୍ତି କାମାଗେ ମୁଞ୍ଜିୟାର୍ ତା, ଏକା ଆଡ୍ଡାନୁ ଠୁଡ଼ିୟା ରାଚ୍କାଚାର୍ ଆଦ୍ ନୁକ୍ରା କେରାଦ୍, ଆରୁ ଆବ୍ଡ଼ାର୍ଜାମାର୍ ପାବିତାର୍ ଆତ୍ମାତି ଭାର୍ପୁର୍ ମାନ୍ଚାର୍ କେରାର୍ ଆରୁ ସାହସ୍ତି ପାର୍ମେଶ୍ଵାର୍ସ୍କି ବଚନ୍ ଶୁଣାବାଗେ ଲାଗ୍ଗିୟାର୍।
ବିଶ୍ୱାସୀ ଜାମାର୍ଘି ଏକ୍ ଦୁସ୍ରାରିନ୍ ମଦେତ୍ କାମ୍ନା
32ଜାମା ବିଶ୍ଵାସୀ ଜାମାର୍ ଅଣ୍ଟା ମନ୍ ଆରୁ ଅଣ୍ଟା ଜୀଆ ରାଚାର୍। ଆବ୍ଡ଼ାର୍ଘି ଭିତର୍ନୁ ନେଦ୍ହି ନିଜର୍ ସମ୍ପତ୍ତିବନ୍ ନିଜର୍ ବୁଲି ମା ବାଲିୟାର୍, ଲେକିନ୍ ଆବ୍ଡ଼ାର୍ସାନ୍ ଏକାଦ୍ ରାଚା ଆବନ୍ ତାହ୍ମା-ତାହ୍ମା ଭିତ୍ରେ ହାଟ୍ରାଲିୟାର୍। 33ଚେଲାଜାମାର୍ ମହା ଶକ୍ତିତି ପ୍ରାଭୁ ଯୀଶୁସ୍କି କେଚ୍ଚକାସ୍ତି ଉଜ୍ଜନାଘି ବାରେନୁ ସାକ୍ଷୀ ଚିୟାଗେ ଲାଗ୍ଗିୟାର୍, ଆରୁ ଆବ୍ଡ଼ା ଜାମାର୍ଘି ମିଆଁ ମାହାନ୍ କ୍ରିପା ରାଚା। 34ଆବ୍ଡ଼ାର୍ଘି ଭିତର୍ନୁ ନେକାହି ଏନ୍ଦେର୍ହି ଅଭାବ୍ ମା ମାନାଲିୟାଦ୍। ଏନ୍ଦେର୍ଗେକା ଯେତ୍କ ଆଲାର୍ଘି ଆଡ଼୍ପା ଚାହେ ହାଲ୍ଲୁ ରାଚା, ଆବନ୍ ବିଶିଁକିରି ବିଁସ୍କା ଜିନିଷ୍ଘି ଦାମ୍ବନ୍ ଅନ୍ଦ୍ରିକିରି ଖାସ୍ଚେଲାଜାମାର୍ଘି ହେଡ୍ଡମୁଲିନୁ ଉଇୟାଲିୟାର୍। 35ଆରୁ ନେକା ଯେତ୍କ ଦାର୍କାର୍ ମାନାଲିୟା ଆତ୍କୋ ଆବ୍ଡ଼ାର୍ଗେ ଚିଆଲିୟାର୍।
36ଯୋଷେଫ୍ ନାମେଘି ଅଣ୍ଟା ଆଲାସ୍ ରାଚାସ୍। ଆସ୍କି ଜନମ୍ ସାଇପ୍ରସ୍ନୁ ମାନ୍ଚ୍କିଚା ଆରୁ ଆସ୍ ଲେବୀ ବାଉଁଶାନ୍ତାସ୍ ରାଚାସ୍। ନେଖା ନାମେ କା ଚେଲାଜାମାର୍ ବାର୍ନାବାସ୍ (ମାନେ ଦିଲାସାଘି ହାଦ୍ଦୁସ୍) ଚିଚ୍କାଚାର୍। 37ଆସ୍କି ଅଣ୍ଟା ହାଲ୍ଲୁ ରାଚା, ଆସ୍ ଆବନ୍ ବିଶିଁକିରି ବିଁସ୍କା ଦାମ୍ବନ୍ ଖାସ୍ଚେଲାଜାମାର୍ଘି ହେଡ୍ଡମୁଲିନୁ ଉଇୟେଚାସ୍।
5ହାନ୍ନାନିୟାସ୍ ଆରୁ ସାଫିରା
1ଲେକିନ୍ ହାନ୍ନାନିୟାସ୍ ନାମେଘି ଅଣ୍ଟା ଆଲାସ୍ ତାଙ୍ଘା ଆଲି ସାଫିରା ଗାନେ ତାହ୍ମା ସମ୍ପତ୍ତିନ୍ତି ଥୋଡ଼େ ବିଶିଁୟାର୍ 2ଆରୁ ତାଙ୍ଘାଏ ଆଲିଘି ଆହ୍ତେ ଆସ୍ କେତ୍କ ପାଏସା ତାଙ୍ଗାଗେ ନୁଡ୍ଡାସ୍; ଆରୁ ବାକି ପାଏସା ଅନ୍ଦ୍ରିକିରି ଚେଲାଜାମାର୍ଗେ ଚିଚ୍ଚାସ୍।
3ଆଙ୍ଗେନ୍ ପାତ୍ରାସ୍ ତେଙ୍ଗିୟାସ୍, “ହେ ହାନ୍ନାନିୟାସ୍! ଏନ୍ଦେର୍ଗେ ଶାଏତାନ୍ ନିଙ୍ଘା ମନ୍ନୁ ପୁରାପୁରୀ ଅଧିକାର୍ କାମ୍ଚ୍କିଚି କା ନିନ୍ ପାବିତାର୍ ଆତ୍ମାବନ୍ ଝୁଟ୍ଟୁ ତେଙ୍କାଏ ଆରୁ ହାଲ୍ଲୁଘି ଦାମ୍ସ୍ତି ଥୋଡ଼େ ନିଙ୍ଘାଲାଗାନ୍ ନୁଡ୍କାଏ ଉଇକାଏ? 4ବିଁସ୍ନାଘି ଆଘ୍ଲି ଆଦ୍ ନିଙ୍ଘାଏ ନିଜର୍ ମା ରାଚାଦ୍ କାଁଏ, ଆରୁ ବିଁସ୍କାଘି ପାଛ୍ଲି ଆଦ୍ଘି ଦାମ୍ଦ୍ ନିଙ୍ଘାଏ ହକ୍ନୁ ମା ରାଚା କାଁଏ? ହାଲେ ନିନ୍ ଏସ୍କେ ନିଙ୍ଘାଏ ମନ୍ନୁ ଇଦ୍ଘି ବାରେନୁ ସୋଚ୍କାଏ? ନିନ୍ ଆଲାରିନ୍ ମାଲ୍ଲା, ଲେକିନ୍ ପାର୍ମେଶ୍ୱାର୍ସ୍ସିନ୍ ଠାକ୍ଚ୍କାଏ।” 5ଇ କାତ୍ଥା ମେନିକିରି ହାନ୍ନାନିୟାସ୍ କାଚ୍ଡ଼ାରାଇକିରି ଖାତ୍ରାସ୍ ଆରୁ କେଚ୍ଚାସ୍କେରାସ୍। ଆଙ୍ଗେନ୍ ଯେତ୍କ ଆଲାର୍ ଇବନ୍ ମେନ୍ଚାର୍, ଆବ୍ଡ଼ାର୍ଜାମାର୍ ମୁରୁକ୍ ଏଲ୍ଚିୟାର୍ କେରାର୍। 6ଆରୁ ଯୁୱାନ୍ କୁକ୍କର୍ ଉସ୍କାରାଇକିରି ଆସିନ୍ ଚିଢ଼ାନୁ ଗୁଢ଼ିୟାଚାର୍ ଆରୁ ବାହାରି ହୋଇକିରି ମାଡ଼େଇଚାର୍।
7ଲାଗ୍ଭାଗ୍ ତିନ୍ ଘାଣ୍ଟାଘି ପାଛ୍ଲି ତାଙ୍ଘାଏ ଆଲିଦ୍ ଆ ଆଡ଼୍ପାଗେ ବାର୍ଚା, ଲେକିନ୍ ଏନ୍ଦେର୍ ଘାଟ୍ର୍କିରି ଆଦାନ୍ ଆଦ୍ ବାଲ୍ଲକିଚା। 8ଆରୁ ପାତ୍ରାସ୍ ଆବନ୍ ମେନ୍ଚାସ୍, “ଏଙ୍ଗାନ୍ ତେଙ୍ଗୁ କା, ନିମ୍ ଏତ୍କରିନ୍ ପାଏସାତି ହାଲ୍ଲୁନ୍ ବିଁସ୍କାଚ୍କାର୍ କାଁଏ?” ଆଦ୍ ତେଙ୍ଗିୟାଦ୍, “ହଁ ଏତ୍କରିନ୍ ପାଏସାତି ବିଁସ୍କାଚ୍କାମ୍।” 9ଆଙ୍ଗେନ୍ ପାତ୍ରାସ୍ ଆବନ୍ ତେଙ୍ଗିୟାସ୍, “ନିମ୍ ଦୁହି ଲୋକ୍ ଏନ୍ଦେର୍ଗେ ପ୍ରାଭୁସ୍କି ଆତ୍ମାନ୍ ବିଡ଼୍ଚେ ଏରାଗେ ଏକ୍ମତ୍ ମାନ୍ଚ୍କାର୍? ଏରୁ ନେଦ୍ ନିଙ୍ଘାଏ ଆଲାସିନ୍ ମାଡ଼ିୟାର୍, ଆବ୍ଡ଼ାର୍ ଘୁମାସାନ୍ ଆଣ୍ସିଆରିନ୍ ଆରୁ ଆବ୍ଡ଼ାର୍ ନିଙ୍ଗାନ୍ହି ବାହାରି ଟେକିକିରି ହୁଅର୍କର୍।” 10ଆଖାନେନ୍ ଆଦ୍ ଆସ୍କି ହେଡ୍ଡମୁଲିନୁ କାଚ୍ଡ଼ାରାଇକିରି ଖାତ୍ରାଦ୍ ଆରୁ କେଚ୍ଚାକେରା ଆରୁ ଯୁୱାନ୍ କୁକ୍କର୍ ଉଲା ବାରିକିରି ଆଦାନ୍ କେଚ୍ଚକା ଏରିୟାର୍, ଆରୁ ବାହାରି ଟେକିକିରି ଅଚ୍ଚାର୍ କେରାର୍ ଆରୁ ତାଙ୍ଘାଏ ଆଲାସ୍କି ଚାହାନୁ ଆଦାନ୍ ମାଡ଼େଇଚାର୍। 11ଆଙ୍ଗେନ୍ ଜାମା ମଣ୍ତ୍ଲୀ ଆରୁ ଯେତ୍କ ଆଲାର୍ ଇ କାତ୍ଥାନ୍ ମେନ୍ଚାର୍, ଆବ୍ଡ଼ାର୍ଜାମାର୍ ମୁରୁକ୍ ଏଲ୍ଚିୟାର୍ କେରାର୍।
ଖାସ୍ଚେଲାଜାମାର୍ଘି ଦ୍ୱାର୍ନୁ ଢେର୍ ଆଲାର୍ ବାନେ ମାନାଲ୍ନାଏ
12ଚେଲାଜାମାର୍ ଆଲାର୍ଘି ମାଝାନୁ ଢେର୍ ଚିହ୍ନା ଏଦାଲିୟାର୍ ଆରୁ ଅଦ୍ଭୁତ୍ ନାଲ୍ଖୁ କାମାଲିୟାର୍, ଆରୁ ଜାମା ବିଶ୍ୱାସୀର୍ ଏକ୍ମତ୍ ମାନିକିରି ଶୁଲେମାନ୍ସ୍କି ମଣ୍ଡପ୍ନୁ ଠୁଡ଼ିୟା ରାଲିୟାର୍। 13ଲେକିନ୍ ଦୁସ୍ରା ଆଲାର୍ଘି ଭିତର୍ନୁ ନେଦ୍ହି ଆବ୍ଡ଼ାର୍ ଗାନେ ମେଶ୍ରାଗେ ସାହସ୍ ମା କାମାଲିଆର୍; ହାଲେହି ଆଲାର୍ ଆବ୍ଡ଼ାର୍ଘି ନାମେ କାମାଲିଆର୍। 14ଆରୁ ଢେର୍ ମାର୍ଦ୍ନାର୍ ଆରୁ ମାଏକିନିଆଁର୍ ପ୍ରାଭୁସିନ୍ ବିଶ୍ଵାସ୍ କାମିକିରି ମଣ୍ତ୍ଲୀଗାନେ ମେଶ୍ରାଗେ ଲାଗ୍ଗିୟାର୍। 15ଏତ୍କତକ୍ କା ଆଲାର୍ ବେହ୍ମରିୟାରିନ୍ ପାବୁଗେ ଅନ୍ଦ୍ରିକିରି, ନାଟ୍ରୁ ଆରୁ ପିଟ୍ଟରିନୁ କିଦାଚାଲିୟାର୍ ତାକା ଯେତ୍କବାକେନ୍ ପାତ୍ରାସ୍ ହୁ ପାବୁନୁ ବାରସ୍ ତା ତାଙ୍ଘା ଅଁଠୁ ବେହ୍ମରିୟାର୍ଘି ଭିତର୍ନୁ କମ୍ସେକମ୍ ନେଖିନ୍ ମିଆଁ ଖାତ୍ରଦ୍। 16ଯେରୁଶାଲେମ୍ଘି ଚାହାଚାହାନ୍ତା ସହର୍ସ୍ତି ଢେର୍ ଆଲାର୍ ନିଜର୍-ନିଜର୍ ବେହ୍ମରିୟାରିନ୍ ଆରୁ ଭୁତ୍ତୁ ଲାକ୍କା ଆଲାରିନ୍ହି ଅନ୍ଦ୍ରିକିରି ଅନ୍ଠାଣ୍ସାନ୍ ଠୁଡ଼ିୟା ରାଲିୟାର୍, ଆରୁ ଆବ୍ଡ଼ାର୍ଜାମାର୍ ବାନେ ମାନାଲିୟାର୍।
ପ୍ରେରିତ୍ ଜାମାରିନ୍ ବିରୋଧ୍ କାମାଲ୍ନାଏ
17ଆନ୍ତିନ୍ ମାହାପୁରୋହିତ୍ ଆରୁ ଆସ୍କି ଜାମା ସାଙ୍ଗେର୍ ଏକାର୍ କା ସାଦ୍ଦୂକୀ ଦଲ୍ନ୍ତାର୍ ରାଚାର୍। ଆବ୍ଡ଼ାର୍ ହିସ୍ଙ୍ଗାତି ଜାଲ୍ରାଲିୟାର୍। 18ଆରୁ ଖାସ୍ଚେଲାଜାମାରିନ୍ ଧାରିକିରି ଜେହେଲ୍ନୁ ଗୁଡ୍ଡେଇଚାର୍। 19ଲେକିନ୍ ପ୍ରାଭୁସ୍କି ଅଣ୍ଟା ଦୂଁତ୍, ମାଁହାବାକେନ୍ ଜେହେଲ୍ଘି ବାଲିନ୍ ତିସ୍କେଇଚା ଆରୁ ଖାସ୍ଚେଲାଜାମାରିନ୍ ବାହାରି ଅନ୍ଦ୍ରିକିରି ତେଙ୍ଗିୟା, 20“କାଲା, ମନ୍ଦିର୍ନୁ ଇଲିକିରି ଆଲାରିନ୍ ଇ ପୁନା ଜୀବନ୍ଘି ବାରେନୁ ଜାମାନ୍ ତେଙ୍ଗା।” 21ଇବନ୍ ମେନିକିରି ଖାସ୍ଚେଲାଜାମାର୍ ପାଇରି ବାକେନ୍ ମନ୍ଦିର୍ନୁ କାଇକିରି ଉପ୍ଦେଶ୍ ଚିୟାଗେ ଲାଗ୍ଗିୟାର୍।
ଆଙ୍ଗେନ୍ ମାହାପୁରୋହିତ୍ ଆରୁ ଆବ୍ଡ଼ାର୍ଘି ସାଙ୍ଗେର୍ ବାରିକିରି ମାହାସାଭା ଆରୁ ଇସ୍ରାଏଲ୍ ଜାମାର୍ଘି ପୁର୍ଖାରିନ୍ ମେହିଁକିରି ଅନ୍ଠାଣ୍ ଠୁଡ଼ିୟାଚାର୍, ଆରୁ ଖାସ୍ଚେଲାଜାମାରିନ୍ ଅନ୍ଦ୍ରାଗେ ଜେହେଲ୍ଗେ ପଲ୍ଟନ୍ ଜାମାରିନ୍ ତାଇୟାର୍। 22ଲେକିନ୍ ପଲ୍ଟନ୍ଜାମାର୍ କାଇକିରି ଜେହେଲ୍ନୁ ଆବ୍ଡ଼ାରିନ୍ ମା ହାଖ୍ଖୀୟାର୍ ଆରୁ କିର୍ରିବାରିକିରି ତେଙ୍ଗିୟାର୍, 23“ଏମ୍ ଏର୍କାମ୍ କା, ଜେହେଲ୍ତା ଜୋର୍ସେ ମୁଚ୍ଚକା ରାଇ ଆରୁ ବାଲି ଗୁଠିନୁ ଜାଗୁର୍ ଇଜ୍ଜକାନାଏ, ଲେକିନ୍ ଯେତ୍କବାକେନ୍ ବାଲି ତିସ୍କିକିରି ଉଲା କର୍ଚ୍କାମ୍ ତା ଏମ୍ ନେକାନ୍ହି ମା ହାକ୍କାମ୍।” 24ଇ ଜାମା କାତ୍ଥା ମେନିକିରି ମନ୍ଦିର୍ତା ଜାଗୁୱାର୍ଘି ମୁଖ୍ୟା ଆରୁ ମୁଖ୍ୟା ପୁରୋହିତ୍ଜାମାର୍ ସୋଚାଗେ ଲାଗ୍ଗିୟାର୍ କା ଆକ୍କୁନ୍ ଏନ୍ଦେର୍ ମାନଦ୍ ଆରୁ ଆବ୍ଡ଼ାର୍ଘି ବୁଦ୍ଧି ବାଣାଁ ମାନାଗେ ଲାଗ୍ଗିୟା। 25ଆନ୍ତିନ୍ ଅଣ୍ଟା ଆଲାସ୍ ବାରିକିରି ଆବ୍ଡ଼ାରିନ୍ ଖବର୍ ଚିଚ୍ଚାସ୍ କା, “ଏରା, ନିମ୍ ଜାମାର୍ ଏକା ଆଲାରିନ୍ ଜେହେଲ୍ନୁ ଗୁଡ୍ଡକାଚ୍କାର୍, ଆବ୍ଡ଼ାର୍ ମନ୍ଦିର୍ନୁ ଇଲିକିରି ଆଲାରିନ୍ ଉପ୍ଦେଶ୍ ଚିୟାଲ୍ନାଏ।” 26ଆଙ୍ଗେନ୍ ଜାଗୁର୍ଘି ମୁଖ୍ୟାସ୍, ପଲ୍ଟନ୍ଜାମାର୍ଗାନେ କାଇକିରି ଖାସ୍ଚେଲାଜାମାରିନ୍ ଅନ୍ଦ୍ରାର୍, ଲେକିନ୍ ଯବର୍ଜସ୍ତି ତି ମାଲ୍ଲା ଏନ୍ଦେର୍ଗେକା ଆବ୍ଡ଼ାର୍ ଏଲ୍ଚାଲିୟାର୍ କା କାହିଁ ଆଲାର୍ ଆବ୍ଡ଼ାରିନ୍ ଚାଁଚାତି ମା ଲେବ୍ଡ଼ର୍।
27ଆବ୍ଡ଼ାର୍ ଖାସ୍ଚେଲାଜାମାରିନ୍ ଅନ୍ଦ୍ରିକିରି ମାହାସାଭାଘି ମାଝାନୁ ଇଲ୍ତାଚାର୍। ଆଙ୍ଗେନ୍ ମାହାପୁରୋହିତ୍ସ୍ ଆବ୍ଡ଼ାରିନ୍ ମେନ୍ଚାସ୍, 28“ଏମ୍ ନିମାନ୍ ଇ ନାମେନୁ ଉପ୍ଦେଶ୍ ଚିୟାଗେ ଶକତ୍ ମାନା କାମ୍ଚ୍କାଚ୍କାମ୍, ହାଲେହି ଏରା, ନିମ୍ ନିହ୍ମା ଉପ୍ଦେଶ୍ବନ୍ ପୁରା ଯେରୁଶାଲେମ୍ନୁ ଫାଇଲିକିରି ଇ ଆଲାସ୍କି ମରନ୍ଘି ଦୋଷ୍ବନ୍ ଏହ୍ମା ମିଆଁ ଲାଦାଗେ ବେଦ୍ଦାଲ୍ଦାର୍।” 29ଲେକିନ୍ ପାତ୍ରାସ୍ ଆରୁ ନାନ୍ନା ଚେଲାଜାମାର୍ ଯାବାବ୍ ଚିଚ୍ଚାର୍, “ଏମାଗେ ଆଲାର୍ଘି ହୁକୁମ୍ତି ପାର୍ମେଶ୍ଵାର୍ସ୍କି ହୁକୁମ୍ ମାନ୍ନା ଉଚିତ୍। 30ଏକା ଯୀଶୁସିନ୍ ନିମ୍ କ୍ରୁଶ୍ନୁ ଟାଙ୍ଗିକିରି ପିଟ୍ଟକାଚ୍କାର୍, ଏହ୍ମାଏ ପୁର୍ଖାର୍ଘି ପାର୍ମେଶ୍ଵାର୍ସ୍ ଆସିନ୍ ଉଜ୍ଜତାଚାସ୍। 31ଲେକିନ୍ ପାର୍ମେଶ୍ୱାର୍ସ୍, ଯୀଶୁସିନ୍ ସରଗ୍ଗେ ଅଚ୍ଚାସ୍ ଆରୁ ଆଲାରିନ୍ ଚାଲାବାଗେ ଆରୁ ଆଲାରିନ୍ ବାଛାବାଗେ ହକ୍ ଚିଚ୍ଚାସ୍, ତାକା ଆସ୍ ଇସ୍ରାଏଲ୍ ଜାମାରିନ୍ ପାସ୍ତାରାଗେ ଆରୁ ପାପ୍ ଛେମା ଚିୟସ୍। 32ଆରୁ ଏମ୍ ଇ ଜାମା କାତ୍ଥାଘି ସାକ୍ଷୀମ୍, ଆରୁ ହନ୍ନେନ୍ ଆ ପାବିତାର୍ ଆତ୍ମାଦ୍ହି ସାକ୍ଷୀଦ୍ ଏକାନ୍ କା ପାର୍ମେଶ୍ଵାର୍ସ୍ ତାଙ୍ଘାଏ ହୁକୁମ୍ ମାନୁ ଆଲାର୍ଗେ ଚିଚ୍କାଦାସ୍।”
33ଇ କାତ୍ଥା ମେନିକିରି ଆବ୍ଡ଼ାର୍ ଖୀସ୍ତି ଜାର୍ଜାର୍ରା କେରାର୍ ଆରୁ ଆବ୍ଡ଼ାରିନ୍ ପିଟାଗେ ବେଦ୍ଦିୟାର୍। 34ଲେକିନ୍ ଗମାଲିଏଲ୍ ନାମେଘି ଅଣ୍ଟା ଫାରିସୀସ୍ ଏକାସ୍ କା ୟାହୁଦୀ ନିୟମ୍ଘି ଗୁରୁସ୍ ଆରୁ ଏକାସିନ୍କା ଜାମାର୍ ମାଇନ୍ କାମାଲିୟାର୍, ଆସ୍ ମାହାସାଭାନୁ ଇଲିକିରି ଖାସ୍ଚେଲାଜାମାରିନ୍ କାଟେ ଡେରିଘି ଲାଗାନ୍ ବାହାରି ଅଥ୍ରାଗେ ହୁକୁମ୍ ଚିଚ୍ଚାସ୍। 35ଆରୁ ଆସ୍ ଆବ୍ଡ଼ାରିନ୍ ତେଙ୍ଗିୟାସ୍, “ହେ ଇସ୍ରାଏଲ୍ତା ଆଲାରୋ, ଇବ୍ଡ଼ାର୍ ଗାନେ ନିମ୍ ଏନ୍ଦେର୍ କାମାଗେ ବେଦ୍ଦାଲ୍ଦାର୍, ଆବନ୍ ସୋଚି ବୁଝ୍ରିକିରି କାମ୍କେ। 36ଏନ୍ଦେର୍ଗେକା କେତ୍କ ବଛର୍ଘି ଆଘ୍ଲି ଥିଉଦାସ୍ ନାମେଘି ଅଣ୍ଟା ଆଲାସ୍ ରୋମ୍ ସାର୍କାର୍ଘି ବିରୁଦ୍ଧନୁ ଇଜ୍ଜାସ୍ ଆରୁ ଆସ୍ ଆଲାରିନ୍ ଏନ୍ ଅଣ୍ଟା ବାଡ଼୍କା ଆଲାନ୍ ବୁଲି ତେଙ୍ଗିୟାସ୍, ଆରୁ ଲାଗ୍ଭାଗ୍ ଚାର୍ଶ ଆଲାର୍ ତାଙ୍ଘାଗାନେ ମେସ୍ରାର୍, ଲେକିନ୍ ଆସିନ୍ ପିଟ୍ଟେଇଚାର୍, ଆରୁ ଯେତ୍କ ଆଲାର୍ ଆସ୍ଗାନେ ମେସ୍ର୍କାଚାର୍ ଆବ୍ଡ଼ାର୍ଜାମାର୍ ଛିଛିର୍ଛାନ୍ଦ୍ ମାନ୍ଚାର୍ କେରାର୍ ଆରୁ ଏନ୍ଦେର୍ହି କାମା ପଲ୍ଲିୟାରିନ୍। 37ଆସ୍କି ପାଛ୍ଲି ଘର୍ସମାରୀ କାମ୍ନା ବାକେନ୍ ଗାଲିଲୀନ୍ତା ଯୁଦାସ୍ ନାମେଘି ଅଣ୍ଟା ଆଲାସ୍ ରୋମ୍ ସାର୍କାର୍ଘି ବିରୁଦ୍ଧନୁ ଇଜ୍ଜାସ୍ ଆରୁ ଆଲାରିନ୍ ତାଙ୍ଘା ପାଛ୍ଲି ଟାଣି ଅନ୍ଦ୍ରିକିରି ଲାଡ଼ାଇ କାମ୍ତାଚାସ୍; ଆସିନ୍ହି ପିଟ୍ଟେଇଚାର୍ ଆରୁ ଯେତ୍କ ଆଲାର୍ ତାଙ୍ଘା ପାଛ୍ଲି ମାନ୍ଚାକାଚାର୍, ଆବ୍ଡ଼ାର୍ଜାମାର୍ ଛିଛିର୍ଛାନ୍ଦ୍ ମାନ୍ଚାର୍ କେରାର୍। 38ହୁଦ୍ଘିଲାଗାନ୍ ଆକ୍କୁନ୍ ଏନ୍ ନିମାନ୍ ତେଙ୍ଗାଲ୍ଦାନ୍ କା, ନିମ୍ ଇ ଆଲାରିନ୍ ଏନ୍ଦେର୍ହି ଆମା କାମା ଆମ୍ଵାଚା, ଏନ୍ଦେର୍ଗେକା ଇ ନାଲ୍ଖୁ ଯଦି ଆଲାସ୍ସ୍ତି ମାନ୍ଚ୍କିରି ହାଲେ ଇଦ୍ ମେଟ୍ରକୋ। 39ଲେକିନ୍ ଯଦି ଇଦ୍ ପାର୍ମେଶ୍ଵାର୍ସ୍କି ତାର୍ତି ମାନ୍ଚ୍କିଚି, ହାଲେ ତା ନିମ୍ ଆବ୍ଡ଼ାରିନ୍ ରୋକା ପଲ୍ଲଦାରିନ୍। ଏକାସାନ୍ ଏନ୍ନେ ମା ମାନ୍ନାଦ୍ କା ନିମ୍ ପାର୍ମେଶ୍ଵାର୍ସ୍କି ବିରୁଦ୍ଧନୁ ଲାଡ଼ାଇ କାମ୍ନାବାଲା ଠାହ୍ରାରର୍।”
40ଆବ୍ଡ଼ାର୍ ଆସ୍କି କାତ୍ଥାନୁ ରାଜୀ ମାନ୍ଚାର୍; ଆରୁ ଖାସ୍ଚେଲାଜାମାରିନ୍ ଚାହାଗେ ମେହିଁକିରି ଆବ୍ଡ଼ାରିନ୍ ଡେମ୍ତାଚାର୍ ଆରୁ ଯୀଶୁସ୍କି ନାମେନୁ କାତ୍ଥା ମା ତେଙ୍ଗାଗେ ହୁକୁମ୍ ଚିଇକିରି ଆମ୍ବେଇଚାର୍। 41ଆଙ୍ଗେନ୍ ଆବ୍ଡ଼ାର୍ ଯୀଶୁସ୍କି ନାମେଘି ଲାଗାନ୍ ଅପ୍ମାନ୍ ସାହ୍ନାଘି ଲାଇଗ୍ ବୁଲି ଗନ୍ତି ମାନ୍ଚ୍କାଚାର୍, ଆଦ୍ଘିଲାଗାନ୍ ଆବ୍ଡ଼ାର୍ ଖୁସୀ ମାନ୍ତେ-ମାନ୍ତେ ମାହାସାଭାନ୍ତି ଉର୍ଖିୟାର୍ କେରାର୍। 42ଆରୁ ଆବ୍ଡ଼ାର୍ ରୋଜ୍ଦିନ୍ ମନ୍ଦିର୍ନୁ ଆରୁ ଆଡ଼୍ପା-ଆଡ଼୍ପାନୁ ଉପ୍ଦେଶ୍ ଚିତେ ରାଚାର୍ ଆରୁ ଯୀଶୁସିନ୍ ଖ୍ରୀସ୍ତ୍, ଇ ସୁସାମାଚାର୍ ପ୍ରଚାର୍ କାମ୍ତେ ରାଚାର୍।
6ସାତ୍ ଲୋକ୍ରିନ୍ ସେବା ନାଲ୍ଖୁଘି ଲାଗାନ୍ ଚାଜାଲ୍ନାଏ
1ହୁ ସାମାୟନୁ ଯେତ୍କବାକେନ୍ ଚେଲାଜାମାର୍ଘି ସଂଖ୍ୟା ପାର୍ଦାଗେ ଲାଗ୍ଗିୟା, ହତ୍କବାକେନ୍ ଗ୍ରୀକ୍ ଭାଷା କାଚ୍ନେଖ୍ରୁ ୟାହୁଦୀଜାମାର୍ ଇବ୍ରାନୀ କାଚ୍ନେଖ୍ରୁ ୟାହୁଦୀ ଜାମାର୍ଘି ବିରୁଦ୍ଧ୍ନୁ ବିରୋଧ୍ କାମାଗେ ଲାଗ୍ଗିୟାର୍, ଏନ୍ଦେର୍ଗେକା ରୋଜ୍ଦିନ୍ତା ଅନ୍ନାମହ୍ନା ଜିନିଷ୍ଘି ହାଟ୍ନାନୁ ଆବ୍ଡ଼ାର୍ଘି ରାଣ୍ଡିଜାମାର୍ଘି ମିଆଁ ଧ୍ୟାନ୍ ମା ଚିଆଲିୟାର୍। 2ହୁଦ୍ଘିଲାଗାନ୍ ଆ ବାର ଖାସ୍ଚେଲାଜାମାର୍ ଜାମା ଚେଲାଜାମାରିନ୍ ତାହ୍ମା ଚାହାଗେ ମେହିଁକିରି ତେଙ୍ଗିୟାର୍, “ଏମାଗେ ଇଦ୍ ଠିକ୍ ମାଲ୍ଲି କା ଏମ୍ ପାର୍ମେଶ୍ଵାର୍ସ୍କି ବଚନ୍ବନ୍ ଆମ୍ଵିକିରି ଅନ୍ତାନା ମହଁତାନାନୁ ଲାକ୍କା ରମ୍। 3ହୁଦ୍ଘିଲାଗାନ୍ ହେ ଭାଇ ଜାମାରୋ, ନିହ୍ମା ଭିତର୍ନୁ ଏନ୍ନେ ସାତ୍ ଲୋକ୍ରିନ୍ ଚାଜା ନେଖା ବାରେନୁ କା ଜାମା ଆଲାର୍ ଆହ୍ନା କାତ୍ଥା କା, ଇବ୍ଡ଼ା ଆଲାର୍ ପୁରାପୁରୀ ପାବିତାର୍ ଆତ୍ମାତି ଆରୁ ବୁଦ୍ଧିତି ଭାର୍ପୁର୍ ରାନାଏ। ଆବ୍ଡ଼ାରିନ୍ ଏମ୍ ଇ ନାଲ୍ଖୁଘି ଭାର୍ ଚିଅମ୍ 4ଆରୁ ଏମ୍ ବିନ୍ତିନୁ ଆରୁ ବଚନ୍ଘି ସେବାନୁ ଲାକ୍କା ରମ୍।” 5ଇ କାତ୍ଥା ଜାମା ବିଶ୍ୱାସୀର୍ଗେ ବାନେ ଲାଗ୍ଗିୟା, ଆରୁ ଆବ୍ଡ଼ାର୍ ସ୍ତିଫାନ୍ ନାମେଘି ଅଣ୍ଟା ଆଲାସିନ୍, ଏକାସ୍ କା ବିଶ୍ଵାସ୍ନୁ ମଜ୍ବୁତ୍ ରାଚାସ୍ ଆରୁ ପାବିତାର୍ ଆତ୍ମାତି ଭାର୍ପୁର୍ ରାଚାସ୍ ଆରୁ ଫିଲିପ୍ପସ୍, ପ୍ରଖର୍, ନୀକାନୋର୍, ତୀମୋନ୍, ପାର୍ମନା, ଆରୁ ଆନ୍ତିୟାଖିଆନ୍ତା ନିକଲାସ୍ସିନ୍ ଚାଜ୍ଜିୟାର୍ ଏକାସ୍ କା ୟାହୁଦୀ ଧରମ୍ ଗ୍ରହନ୍ କାମ୍ଚ୍କାଚାସ୍। 6ଇବ୍ଡ଼ାରିନ୍ ପ୍ରେରିତ୍ ଜାମାର୍ଘି ମାଝାନୁ ଇଲ୍ତାଚାର୍ ଆରୁ ଖାସ୍ଚେଲାଜାମାର୍ ବିନ୍ତି କାମିକିରି ଆବ୍ଡ଼ାର୍ଘି ମିଆଁ ହେଖ୍ଖା ଉଇୟାର୍।
7ଏନ୍ନେନ୍ ପାର୍ମେଶ୍ଵାର୍ସ୍କି ବଚନ୍ବଦ୍ ଫାଏଲାରାଗେ ଲାଗ୍ଗିୟା ଆରୁ ଯେରୁଶାଲେମ୍ନୁ ଚେଲାଜାମାର୍ଘି ସଂଖ୍ୟା ଢେର୍ବାଗ୍ଗେ ପାର୍ଦାଗେ ଲାଗ୍ଗିୟା; ଆରୁ ପୁରୋହିତ୍ ଜାମାର୍ଘି ଭିତର୍ତି ଢେର୍ ଆଲାର୍ ଯୀଶୁ ଖ୍ରୀସ୍ତ୍ସିନ୍ ବିଶ୍ୱାସ୍ କାମ୍ଚାର୍।
ୟାହୁଦୀଜାମାର୍ ସ୍ତିଫାନ୍ସ୍କି ବିରୋଧ୍ କାମାଲ୍ନାଏ
8ସ୍ତିଫାନ୍ସ୍ ପାର୍ମେଶ୍ଵାର୍ସ୍କି କ୍ରିପାତି ଆରୁ ଶକ୍ତିତି ଭାର୍ପୁର୍ ରାଚାସ୍ ଆରୁ ଆଲାର୍ଘି ମାଝାନୁ ବାଡ଼କା-ବାଡ଼କା ଅଦ୍ଭୁତ୍ ନାଲ୍ଖୁ ଆରୁ ଚିହ୍ନା ଏଦାଲିୟାସ୍। 9ବନ୍ଦୀ ଖାନାନ୍ତି ଛୁଟ୍ର୍କା ୟାହୁଦୀ ଆଲାର୍ଘି ସାଭା ଆଡ଼୍ପାନ୍ତା କେତ୍କ ଲୋକ୍ ଆଲାର୍ ଆରୁ କୂରୀଣୀୟ, ଆରୁ ସିକାନ୍ଦାର୍ ଆରୁ କିଲିକିଆ ଆରୁ ଆସିଆନ୍ତା ବାର୍ଚ୍କା ୟାହୁଦୀ ଆଲାର୍ ଖ୍ରୀସ୍ତ୍ ବିଶ୍ୱାସୀର୍ଘି ବିରୋଧ୍ କାମାଲିୟାର୍। ଆରୁ ଆବ୍ଡ଼ାର୍ ସ୍ତିଫାନ୍ସ୍ଗାନେ କାଁଟ୍ଛାଁଟ୍ କାମାଗେ ଲାଗ୍ଗିୟାର୍। 10ଲେକିନ୍ ପାବିତାର୍ ଆତ୍ମାଦ୍ ଆସ୍କେ ତେଙ୍ଗାଗେ ବୁଦ୍ଧି ଆରୁ ଶକ୍ତି ଚିଚ୍ଚା ଆରୁ ଆସ୍ ଏକା ବୁଦ୍ଧିମାନିତି ତେଙ୍ଗାଲିୟାସ୍, ଆବ୍ଡ଼ାର୍ ଆଦାନ୍ ରୋକାଗେ ପଲ୍ଲିଆରିନ୍। 11ଆଦ୍ଘିଲାଗାନ୍ ଆବ୍ଡ଼ାର୍ ଆଲାରିନ୍ ଲାଲଚ୍ ଏଦିକିରି ତେଙ୍ଗ୍ତାଚାର୍ ଆରୁ ଆବ୍ଡ଼ାର୍ ତେଙ୍ଗିୟାର୍, “ଏମ୍ ସ୍ତିଫାନ୍ସିନ୍ ମୁଶା ନାବୀସ୍କି ଆରୁ ପାର୍ମେଶ୍ଵାର୍ସ୍କି ବିରୁଦ୍ଧ୍ନୁ ନିନ୍ଦା କାତ୍ଥା ତେଙ୍ଗ୍ନାନ୍ ମେନ୍ଚ୍କାଦାମ୍।” 12ଆରୁ ଆବ୍ଡ଼ାର୍ ଆଲାରିନ୍ ଆରୁ ପୁର୍ଖା ୟାହୁଦୀ ମୁଖ୍ୟାରିନ୍ ଆରୁ ପଣ୍ତିତ୍ ଜାମାରିନ୍ ଚାଢ଼ାବାଇକିରି ଆସିନ୍ ଯବର୍ଜସ୍ତି ଧାରିକିରି ମାହା ସାଭାଗେ ଅନ୍ଦ୍ରାର୍। 13ଆରୁ ଝୁଟ୍ଟୁ ସାକ୍ଷୀ ଜାମାରିନ୍ ଇଲ୍ତାଚାର୍ ଆବ୍ଡ଼ାର୍ ତେଙ୍ଗିୟାର୍, “ଇ ଆଲାସ୍ ଇ ପାବିତାର୍ ଆଡ୍ଡା ଆରୁ ମୁଶାସ୍କି ନିୟମ୍ଘି ବିରୁଦ୍ଧ୍ନୁ ତେଙ୍ଗାଗେ ମା ଆମ୍ବାଲ୍ଦାସ୍। 14ଏନ୍ଦେର୍ଗେକା ଏମ୍ ଇସିନ୍ ଏନ୍ନେ ତେଙ୍ଗ୍ନାନ୍ ମେନ୍ଚ୍କାଦାମ୍ କା ନାଜ୍ରେତ୍ତା ଇ ଯୀଶୁସ୍ ଇ ଆଡ୍ଡାନ୍ ନାଶ୍ କାମଚସ୍, ଆରୁ ମୁଶାସ୍ ନାମାଗେ ଏକା ରୀତିନୀତିବନ୍ ଚିଚ୍କାଦାସ୍, ଆ ଜାମାନ୍ ବାଦ୍ଲୋ ଚସ୍ ବୁଲି ଆସ୍କି ତେଙ୍ଗ୍ନାନ୍ ଏମ୍ ମେନ୍ଚ୍କାଦାମ୍।” 15ହତ୍କବାକେନ୍ ମାହାସାଭାନୁ ଅକ୍କା ଜାମାର୍ ସ୍ତିଫାନ୍କି ତାରା ଏକ୍ନଜର୍ନୁ ଏରିୟାର୍ ଆରୁ ଆସ୍କି ଚେହେରାଦ୍ ସରଗ୍ଦୂଁତ୍ଘି ଚେହେରା ଲେଖା ଏଥ୍ରାଲିୟା।
7ୟାହୁଦୀ ମାହାସାଭାନୁ ସ୍ତିଫାନାସ୍ ଭାଷଣ୍ ଚିଆଲ୍ଦାସ୍
1ଆଙ୍ଗେନ୍ ମାହାପୁରୋହିତ୍ସ୍ ସ୍ତିଫାନ୍ସିନ୍ ମେନ୍ଚାସ୍, “ଇ କାତ୍ଥାଦ୍ ସତ୍ତୁଦ୍ କାଁଏ?” 2ସ୍ତିଫାନ୍ସ୍ ତେଙ୍ଗିୟାସ୍, “ହେ ଭାଇ ଜାମାରୋ, ଆରୁ ବୁଆ ଜାମାରୋ ଏଙ୍ଘା କାତ୍ଥାନ୍ ମେନା। ନାହ୍ମା ପୁର୍ଖା ବୁଆ ଆବ୍ରାହାମ୍ସ୍ ହାରାନ୍ ସହର୍ନୁ ରାନାଘି ଆଘ୍ଲି ଯେତ୍କବାକେନ୍ ମେସପୋଟାମିୟାଁନୁ ରାଚାସ୍; ହତ୍କବାକେନ୍ ମହିମାମୟ ପାର୍ମେଶ୍ଵାର୍ସ୍ ଆସ୍କେ ଦର୍ଶନ୍ ଚିଚ୍ଚାସ୍। 3ଆରୁ ଆସିନ୍ ତେଙ୍ଗିୟାସ୍, ‘ନିନ୍ ନିଙ୍ଘା ଦେଶ୍ ଆରୁ ନିଙ୍ଘା ଜାତି ବନ୍ଧୁର୍ସ୍ତି ଉର୍ଖା ବାରା, ଆରୁ ଏନ୍ ନିଙ୍ଗାନ୍ ଏକା ଦେଶ୍ବନ୍ ଏଦୋନ୍ ଆ ଦେଶ୍ଗେ କାଲା।’ 4ଆଙ୍ଗେନ୍ ଆବ୍ରାହାମ୍ସ୍ କାସାଦିଆ ଦେଶ୍ତି ଉର୍ଖିକିରି ହାରାନ୍ ସହର୍ଗେ କେରାସ୍ ଆରୁ ଆସାନିନ୍ ରାଚାସ୍। ଆରୁ ତାମ୍ଵାସ୍କି କେଚ୍ଚକା ପାଛ୍ଲି ପାର୍ମେଶ୍ଵାର୍ସ୍ ଆସିନ୍ ଆସ୍ତି ଇ ଦେଶ୍ଗେ ଅନ୍ଦ୍ରରାସ୍ ଏକା ଦେଶ୍ନୁ କା ନିମ୍ ଆକ୍କୁନ୍ ରାଦାର୍। 5ପାର୍ମେଶ୍ୱାର୍ସ୍ ଆବ୍ରାହାମ୍ସ୍କେ ଇଦ୍ଘି ଏନ୍ଦେର୍ହି ଉତ୍ତରାଧିକାରୀ ମା ଚିଚ୍ଚାସ୍, ଏତ୍କତକ୍ କା ଅଣ୍ଟା ହେଡ୍ଡୁ ଉଇନାଘି ହତ୍କହି ଆଡ୍ଡା ମା ଚିଚ୍ଚାସ୍, ଆରୁ ହତ୍କବାକେନ୍ ତାଙ୍ଘାଏ ଅଣ୍ଟାହି ହାଦ୍ଦୁବଚ୍ଚ ମା ରାଚାର୍ ହାଲେହି ତାଙ୍ଘା ପାଛ୍ଲି ତାଙ୍ଘା ବାଉଁଶାର୍ଗେ ଇ ଦେଶ୍ବନ୍ ଅଧିକାର୍ କାମାଗେ ଚନ୍ ବୁଲି ପାର୍ମେଶ୍ଵାର୍ସ୍ କାତ୍ଥା ଚିଚ୍ଚାସ୍। 6ଆରୁ ପାର୍ମେଶ୍ଵାର୍ସ୍ ଆବ୍ରାହାମ୍ସିନ୍ ଏନ୍ନେହି ତେଙ୍କାଚାସ୍, ‘ନିଙ୍ଘା ବାଉଁଶାର୍ ପର୍ଦେଶ୍ନୁ ପର୍ଦେଶୀୟା ମାନିକିରି ରର୍ ଆରୁ ଆସ୍ତା ଆଲାର୍ ଇବ୍ଡ଼ାରିନ୍ ଚାର୍ ଶହ୍ ବଛର୍ ଜୁଟି ଗୁତ୍ତିୟାର୍ ଲେଖା ଉଇୟର୍। ଆରୁ ଆବ୍ଡ଼ାରିନ୍ ମୁରୁକ୍ ଦୁଃଖୁ ଚିୟର୍।’ 7ପାର୍ମେଶ୍ଵାର୍ସ୍ ଆରୁହି ତେଙ୍ଗିୟାସ୍, ‘ଆବ୍ଡ଼ାର୍ ଏକା ଆଲାର୍ସାନ୍ ଗୁତ୍ତିୟାର୍ ଲେଖା ରାଚାର୍ ଆବ୍ଡ଼ାର୍ଗେ ଏନ୍ ଦଣ୍ଡ୍ଚନ୍। ହୁଦ୍ଘିପାଛ୍ଲି ଆବ୍ଡ଼ାର୍ ଆସ୍ତି ଉର୍ଖିକିରି ଇ ଆଡ୍ଡାନୁ ଏଙ୍ଘାଏ ଆରାଧାନା କାମର୍।’ 8ଆରୁ ପାର୍ମେଶ୍ଵାର୍ସ୍ ଆବ୍ରାହାମ୍ସିନ୍ ଖାତ୍ନା କାମାଗେ କାତ୍ଥା ଚିଚ୍କାଚାସ୍; ଆରୁ ଆଦ୍ଘି ଅନୁସାର୍ ଆବ୍ରାହାମ୍ସ୍ତି ଇସାକ୍ସ୍ ଜନମ୍ ମାନ୍ଚାସ୍, ଆରୁ ଆଠ୍ୱାଁ ଉଲ୍ଲାନୁ ଆସ୍କି ଖାତ୍ନା କାମ୍ଚାର୍। ଆରୁ ଇସାକ୍ସ୍ତି ୟାକୁବ୍ସ୍ ଜନମ୍ ମାନ୍ଚାସ୍, ଆରୁ ୟାକୁବ୍ସ୍ତି ବାର ବାଉଁଶାର୍ଘି ପୁର୍ଖାର୍ ଜନମ୍ ମାନ୍ଚାର୍।”
9“ଆରୁ ଯୋଷେଫ୍କି ବାଡ଼୍କା ଭାଇର୍ ଯୋଷେଫ୍ସିନ୍ ହିସ୍ଙ୍ଗା କାମାଲିୟାର୍, ହୁଦ୍ଘିଲାଗାନ୍ ଯୋଷେଫ୍ସିନ୍ ଆବ୍ଡ଼ାର୍ ମିଶର୍ ଦେଶ୍ କାନାବାଲା ଆଲାର୍ଗେ ବିଁସେଇଚାର୍, ତାକା ଆସ୍ ଆସାନ୍ ଗୁତ୍ତିୟାର୍ ଲେଖା ରସ୍ ଲେକିନ୍ ପାର୍ମେଶ୍ଵାର୍ସ୍ ଆସ୍ଗାନେ ରାଚାସ୍। 10ଆରୁ ଆସ୍ ଯୋଷେଫ୍ସିନ୍ ଜାମା ଦୁଃଖୁ ତକ୍ଲିବ୍ତି ବାଛାବାଚାସ୍। ପାର୍ମେଶ୍ୱାର୍ସ୍ ଯୋଷେଫ୍ସ୍କେ ବୁଦ୍ଧି ଚିଚ୍ଚାସ୍ ଆରୁ ଆସ୍ ମିଶର୍ ଦେଶ୍ତା ରାଜା ଫାରୋସ୍କି ନଜର୍ନୁ ଅଣ୍ଟା ବୁଦ୍ଧିୟାର୍ସ୍ ବୁଲି ଆହ୍ତାରାଚାସ୍। ମିଶର୍ତା ରାଜା ଫାରୋସ୍ ଆସିନ୍ ମିଶର୍ ଦେଶ୍ତା ରାଜ୍ପାଲ୍ ଆରୁ ତାଙ୍ଘା ଜାମା ଆଡ଼୍ପାପାଲିଘି ମିଆଁ ମାଲିକ୍ ଲେଖା ହକ୍ ଚିଚ୍ଚାସ୍। 11ଇଦ୍ଘି ପାଛ୍ଲି ଜାମା ମିଶର୍ ଆରୁ କାନାନ୍ ଦେଶ୍ନୁ ଆକାଲ୍ ମାନ୍ଚାଦ୍; ଆରୁ ମୁରୁକ୍ ଦୁଃଖୁ ବାର୍ଚା, ଆରୁ ନାହ୍ମା ପୁର୍ଖାର୍ଗେ ଅନାମହାଗେ ମା ହାଖ୍ଖରାଲିୟାଦ୍। 12ଲେକିନ୍ ୟାକୁବ୍ସ୍ ମେନ୍ଚାସ୍ କା ମିଶର୍ ଦେଶ୍ନୁ ଫସଲ୍ ରାଇଦ୍, (ହେସ୍ସୁ ତିହ୍ଲା) ତା ଆସ୍ ନାହ୍ମାଏ ପୁର୍ଖାରିନ୍ ପହିଲ୍ଥର୍ ତାଇୟାସ୍। 13ଆରୁ ଯେତ୍କବାକେନ୍ ଆବ୍ଡ଼ାର୍ ଦୁସ୍ରାଥର୍ ମିଶର୍ଗେ କେରାର୍ ତା ଯୋଷେଫ୍ସ୍ ତାନ୍ ନିଜେ ତାଙ୍ଘା ଭାଇର୍ସାନ୍ ତାଙ୍ଘା ପରିଚୟ ଚିଚ୍ଚାସ୍, ଆରୁ ଫାରୋ ରାଜାସ୍ ଯୋଷେଫ୍ସ୍କି ପରିବାର୍ବନ୍ ଆଖ୍ଖାସ୍। 14ଇଦ୍ଘି ପାଛ୍ଲି ଯୋଷେଫ୍ସ୍ ତାଙ୍ଘା ବୁଆ ୟାକୁବ୍ ଆରୁ ତାଙ୍ଘା ଜାମା ଜାତି କୁଟୁମ୍ଵରିନ୍ ଏକାର୍ କା ଜାମା ଜୁମି ପଞ୍ଚସ୍ତର୍ ଲୋକ୍ ରାଚାର୍ ମେହାଁଗେ ତାଇୟାସ୍। 15ଆଙ୍ଗେନ୍ ୟାକୁବ୍ସ୍ ମିଶର୍ ଦେଶ୍ଗେ କେରାସ୍; ଆରୁ ଆସାନ୍ ୟାକୁବ୍ସ୍ ଆରୁ ନାହ୍ମା ପୁର୍ଖାର୍ କେଚ୍ଚାର୍ କେରାର୍। 16ଆରୁ ଆବ୍ଡ଼ାର୍ଘି ମାଁଣାବନ୍ ଶିଖିମ୍ ସହର୍ଗେ ହୁଆକେରା, ଆବ୍ରାହାମ୍ସ୍ ଆସାନ୍ ହମୋର୍ସ୍କି ହାଦ୍ଦୁ ବଚ୍ଚର୍ସ୍ତି ଏକା ମାସ୍ଣାବନ୍ ରୂପା ପାଏସା ଚିଇକିରି ହେନ୍ଦ୍କାଚାସ୍ ଆନ୍ନୁ ମାଣେଇର୍ଚାର୍।”
17“ଲେକିନ୍ ପାର୍ମେଶ୍ଵାର୍ସ୍ ଆବ୍ରାହାମ୍କେ ଏକା କାତ୍ଥା ଚିଚ୍କାଚାସ୍, ଆଦ୍ ପୁରା ମାନ୍ନାଘି ସାମାୟଦ୍ ଚାହା ଆଣ୍ସିୟା କେରା, ତା ମିଶର୍ନୁ ଆଲାର୍ ପାର୍ଦ୍ତେ କେରାର୍ ଆରୁ ଢେର୍ବାଗ୍ଗେ ମାନ୍ଚାର୍ କେରାର୍। 18ହତ୍କବାକେନ୍ ମିଶର୍ନୁ ଆରୁ ଅଣ୍ଟାସ୍ ରାଜା ମାନ୍ଚାସ୍, ଆସ୍ ଯୋଷେଫ୍ସିନ୍ ବାଲ୍ଲାଲିୟାସ୍। 19ଆସ୍ ନାହ୍ମା ଆଲାର୍ ଗାନେ ଚାଲାକୀ କାମ୍ଚାସ୍, ଆରୁ ନାହ୍ମା ପୁର୍ଖାଜାମାର୍ ନିଜର୍-ନିଜର୍ ହାଦ୍ଦୁବଚ୍ଚରିନ୍ ବାହାରି ଖେବ୍ଡ଼ର୍ଚର୍ ଏସ୍କେ କା ଆବ୍ଡ଼ାର୍ ମା ଉଜ୍ଜର୍, ହୁଦ୍ଘିଲାଗାନ୍ ଆବ୍ଡ଼ାର୍ଘି ମିଆଁ ଖାରାପ୍ ବେଭାର୍ କାମ୍ଚାସ୍। 20ହୁ ସାମାୟନୁ ମୁଶାସ୍ ଜନମ୍ ମାନ୍ଚାସ୍। ଆରୁ ଆସ୍ ପାର୍ମେଶ୍ୱାର୍ସ୍କି ନଜର୍ ବହୁତ୍ ସୁନ୍ଦର୍ ରାଚାସ୍। ଆରୁ ତାଙ୍ଗ୍ୟ ତାମ୍ବାର୍ ଆସିନ୍ ତାହ୍ମା ଆଡ଼୍ପାନୁ ତିନ୍ ମାସ୍ତକ୍ ଲାଲନ୍ପାଲନ୍ କାମ୍ଚାର୍। 21ଆରୁ ଯେତ୍କବାକେନ୍ ମୁଶାସିନ୍ ବାହାରି ଖେବ୍ଡ଼ାକେରା ହତ୍କବାକେନ୍ ଫାରୋସ୍କି ତାଙ୍ଗ୍ଦାଦ୍ ଆସିନ୍ ହୋଇକିରି, ତାଙ୍ଘା ନିଜର୍ ହାଦ୍ଦୁ ଲେଖା ଲାଲନ୍ପାଲନ୍ କାମ୍ଚା। 22ଆରୁ ମୁଶାସ୍କେ ମିଶର୍ ଜାମାର୍ଘି ଜାମା ପାଠନ୍ ପାଢାବା କେରା, ଆରୁ ଆସ୍ ବଚନ୍ ଆରୁ ନାଲ୍ଖୁନୁ ଶକ୍ତିଶାଲୀ ରାଚାସ୍।”
23“ଯେତ୍କବାକେନ୍ ମୁଶାସ୍ ଚାଲିଶ୍ ବଛର୍ତା ମାନ୍ଚାସ୍, ତା ଆସ୍ ଇସ୍ରାଏଲ୍ତା ହାଦ୍ଦୁ ବଚ୍ଚର୍ସାନ୍, ତାଙ୍ଘା ଭାଇ ଜାମାର୍ସାନ୍ କାଲାଗେ ସୋଚ୍ଚାସ୍। 24ହତ୍କବାକେନ୍ ଅର୍ତୁସ୍କି ମିଆଁ ଅନ୍ୟାୟ କାମ୍ନାନ୍ ଏରିକିରି ମୁଶାସ୍ ଆସିନ୍ ବାଛାବାଚାସ୍, ଆରୁ ଆ ମିଶର୍ତା ଆଲାସିନ୍ ପିଟିକିରି ଆ ଅନ୍ୟାୟଘି ବାଦ୍ଲା ଅଚ୍ଚାସ୍। 25ମୁଶାସ୍ ସୋଚାଲିୟାସ୍ କା ତାଙ୍ଘା ଭାଇଜାମାର୍ ବୁଝ୍ରର୍ କା ତାମାନ୍ ବାଛାବାଗେ ପାର୍ମେଶ୍ୱାର୍ସ୍ ଆସିନ୍ ତାଏକାଦାସ୍, ଲେକିନ୍ ଆବ୍ଡ଼ାର୍ ମା ବୁଝ୍ରାର୍। 26ଲେକିନ୍ ନାନ୍ନୁ ଉଲ୍ଲା ଆବ୍ଡ଼ାର୍ ତାହ୍ମା-ତାହ୍ମା ଭିତ୍ରେ ମାର୍ପିଟ୍ ମାନ୍ନା ବାକେନ୍ ମୁଶାସ୍ ଆସାନ୍ ବାର୍ଚାସ୍ ଆରୁ ଆବ୍ଡ଼ାରିନ୍ ମେଲ୍ମିଲାପ୍ କାମ୍ତାଗେ ଏନ୍ନେ ତେଙ୍ଗିକିରି ବୁଝାବାଚାସ୍, ‘ହେ ଭାଇ ଜାମାରୋ, ନିମ୍ତା ଭାଇ, ଭାଇର୍ ନିମ୍ ଏନ୍ଦେର୍ଗେ ଏକ୍ ଦୁସ୍ରାର୍ଘି ମିଆଁ ଅନ୍ୟାୟ କାମାଲ୍ଦାର୍?’”
27“ଲେକିନ୍ ଏକା ଆଲାସ୍ ତାଙ୍ଘା ପାଡ଼ୋଶୀସ୍ଗାନେ ମାର୍ପିଟ୍ କାମାଲିୟାସ୍, ଆ ଆଲାସ୍ ମୁଶାସିନ୍ ତୁକ୍କିକିରି ତେଙ୍ଗିୟାସ୍, ‘ନେଦ୍ ନିଙ୍ଗାନ୍ ଏହ୍ମା ମାଝାନୁ ନ୍ୟାୟ କାମୁ ଆରୁ ରାଜୀ ଚାଲାବୁ ଚାଜ୍ଜକାନାଏ? 28ଏସ୍କେ ନିନ୍ ଚେରୋ ଆ ମିଶର୍ତା ଆଲାସିନ୍ ଡେମ୍ଚ୍କାଏ ପିଟ୍ଟକାଏ, ଆନ୍ନେ ଏଙ୍ଗାନ୍ହି ପିଟା ବେଦ୍ଦାଲ୍ଦାଏ କାଁଏ?’ 29ଇ କାତ୍ଥାନ୍ ମେନିକିରି, ମୁଶାସ୍ ମିଦିୟନ୍ ଦେଶ୍ଗେ ବୁଙ୍ଗିୟାସ୍ କେରାସ୍ ଆରୁ ଆସାନ୍ ପର୍ଦେଶୀ ମାନିକିରି ରାଚାସ୍। ଆସାନ୍ ଆସ୍କି ଦୁଇ ଲୋକ୍ କୁକ୍କହାଦ୍ଦୁ ଜନମ୍ ମାନ୍ଚାର୍।”
30“ମୁଶାସ୍ ମିଦିୟନ୍ ଦେଶ୍ନୁ ରାନାଘି ଚାଲିଶ୍ ବଛର୍ ମାନ୍ଚ୍କାନ୍ତି, ସିନେଇ ପାର୍ତ୍ତାଘି ମରୁଭୂମିନୁ ଅଣ୍ଟା ସରଗ୍ଦୂଁତ୍ ଲାଘ୍ର୍ନା ହପ୍ପାନୁ ମୁଶାସ୍କେ ଦର୍ଶନ୍ ଚିଚ୍ଚାଦ୍। 31ମୁଶାସ୍ ଆ ଲାଘ୍ର୍ନା ହପ୍ପାନ୍ ଏରିକିରି ଆଚ୍ମିତ୍ ମାନ୍ଚାସ୍ କେରାସ୍, ଆରୁ ବାନେକିରି ଏରାଗେ ଆଦ୍ଘି ଚାହାଗେ କାନାବାକେନ୍ ପ୍ରାଭୁସ୍କି ଇ ବଚନ୍ ମେନ୍ଦରା। 32‘ଏନ୍ ନିଙ୍ଘା ପୁର୍ଖାର୍ଘି ପାର୍ମେଶ୍ଵାର୍ନ୍, ଆବ୍ରାହାମ୍, ଇସାକ୍ ଆରୁ ୟାକୁବ୍ସ୍କି ପାର୍ମେଶ୍ଵାର୍ନ୍।’ ଆଙ୍ଗେନ୍ ମୁଶାସ୍ ଥାରଥାରାସ୍ କେରାସ୍ ଆରୁ ବାନେକିରି ଏରାଗେ ସାହସ୍ ମା କାମ୍ଚାସ୍।”
33“ଆଙ୍ଗେନ୍ ପ୍ରାଭୁସ୍ ମୁଶାସିନ୍ ତେଙ୍ଗିୟାସ୍, ‘ନିଙ୍ଘା ହେଡ୍ଡୁନ୍ତା ଜୁତା ଖୋଲ୍ଚା, ଏନ୍ଦେର୍ଗେକା ନିନ୍ ଏକା ଆଡ୍ଡାନୁ ଇଜ୍ଜକାଦାଏ ଆଦ୍ ପାବିତାର୍ ଆଡ୍ଡାଦ୍। 34ମିଶର୍ ଦେଶ୍ନୁ ଏନ୍ ଏଙ୍ଘାଏ ଆଲାର୍ଘି ଦୁଃଖୁ ତକ୍ଲିପ୍ବନ୍ ଏର୍କାଦାନ୍; ଆରୁ ଆବ୍ଡ଼ାର୍ଘି ଅହ୍ଲନାନ୍ ମେନ୍ଚ୍କାଦାନ୍; ଆରୁ ଆବ୍ଡ଼ାରିନ୍ ବାଛାବାଗେ ଏନ୍ ଏତ୍ତକାଦାନ୍ ଆରୁ ଆକ୍କୁନ୍ ବାରା, ଏନ୍ ନିଙ୍ଗାନ୍ ମିଶର୍ ଦେଶ୍ଗେ ତାଇୟନ୍।’”
35“ଏକା ମୁଶାସିନ୍ ଆବ୍ଡ଼ାର୍ ଗ୍ରହନ୍ ମା କାମିକିରି ତେଙ୍କାଚାର୍, ‘ନିଙ୍ଗାନ୍ ନେଦ୍ ଏହ୍ମା ମିଆଁ ରାଜୀ ଚାଲାବୁ ଆରୁ ନ୍ୟାୟ କାମୁ ଚାଜ୍ଜକାନାଏ?’ ଆସିନିନ୍ ପାର୍ମେଶ୍ଵାର୍ସ୍ ରାଜୀ ଚାଲାବୁ ଆରୁ ବାଛାବୁ ଚାଜ୍ଜିୟାସ୍। ଆସିନ୍ ପାର୍ମେଶ୍ଵାର୍ସ୍ ଲାଘ୍ର୍ନା ହପ୍ପାନୁ ଦର୍ଶନ୍ ଚିଚ୍କା ଦୂଁତ୍ଘି ଦ୍ୱାର୍ନୁ ତାଇୟାସ୍। 36ଇ ଆଲାସ୍ ଇସ୍ରାଏଲ୍ ଜାମାରିନ୍ ମିଶର୍ ଦେଶ୍ତି, ଲାଲ୍ ସାମ୍ଧୁର୍ତି ମରୁଭୂମିନ୍ତି ଚାଲିଶ୍ ବଛର୍ତକ୍ ଅଦ୍ଭୁତ୍ ନାଲ୍ଖୁ ଆରୁ ଅଦ୍ଭୁତ୍ ଚିହ୍ନାଗୁଠିନ୍ ଏଦ୍ତେ-ଏଦ୍ତେ ବାହାରି ଅଥ୍ରାସ୍। 37ଇସ୍ ଆ ମୁଶାସିନ୍ ଏକାସ୍ କା ଇସ୍ରାଏଲ୍ ଜାମାରିନ୍ ତେଙ୍କାଚାସ୍, ‘ନିହ୍ମା ଭାଇ ଜାମାର୍ଘି ଭିତର୍ନୁ ପାର୍ମେଶ୍ଵାର୍ସ୍ ଏଙ୍ଘା ଲେଖା ଅଣ୍ଟା ନାବୀସିନ୍ ତାଇୟସ୍।’ 38ଇସ୍ ଆସିନ୍ ଏକାସ୍ କା ମରୁଭୂମିନୁ ଇସ୍ରାଏଲ୍ ମଣ୍ତ୍ଲୀନ୍ତା ଆଲାର୍ ଗାନେ ରାଚାସ୍, ଆରୁ ନାହ୍ମା ପୁର୍ଖାର୍ଗାନେ ରାଚାସ୍, ଆରୁ ଆ ଦୂଁତ୍ଗାନେ ରାଚାସ୍ ଏକାଦ୍ କା ସିନେଇ ପାର୍ତ୍ତାନୁ ଆସ୍ଗାନେ କାଚ୍ନେଖ୍ର୍କିଚା ଆରୁ ଆସ୍ ପାର୍ମେଶ୍ଵାର୍ସ୍କି ବଚନ୍ବନ୍ ନାହ୍ମା ମାଝାନୁ ଶୁଣାବାଚାସ୍।”
39“ଲେକିନ୍ ନାହ୍ମା ପୁର୍ଖାର୍ ଆସ୍କି କାତ୍ଥାନ୍ ମା ମେନ୍ଚାର୍ ଆରୁ ଆସିନ୍ ହାଟାବାଇକିରି, ନିଜର୍-ନିଜର୍ ମନ୍ନୁ ମିଶର୍ ଦେଶ୍ଗେ କିର୍ରାଗେ ସୋଚ୍ଚାର୍। 40ଆରୁ ହାରୁନ୍ସିନ୍ ତେଙ୍ଗିୟାର୍, ‘ଏହ୍ମାଲାଗାନ୍ ଏନ୍ନେ ଦେବ୍ତା କାମା କା ଆଦ୍ ଏହ୍ମା ଆଘ୍ଲି-ଆଘ୍ଲି କଦ୍ ଏନ୍ଦେର୍ଗେକା ଏକା ମୁଶାସ୍ ଏମାନ୍ ମିଶର୍ ଦେଶ୍ତି ବାହାରି ଅଥ୍ରାସ୍ ଅନ୍ଦ୍ରାସ୍, ଆସ୍କି ଏନ୍ଦେର୍ ମାନ୍ଚା ଏମ୍ ଆବନ୍ ବାଲ୍ଦାମିନ୍?’ 41ଆରୁ ହୁ ସାମାୟନୁ ଆବ୍ଡ଼ାର୍ ବାଚ୍ଛୁର୍ଘି ଅଣ୍ଟା ମୂର୍ତ୍ତୀ ତିୟାର୍ କାମ୍ଚାର୍ ଆରୁ ଆ ମୂର୍ତ୍ତୀଘି ଆଘ୍ଲି ବଲୀ ଚାଢ଼ାବାଚାର୍, ଆରୁ ନିଜର୍-ନିଜର୍ ହେଖ୍ଖାତି ତିୟାର୍ କାମ୍ଚ୍କା ଜିନିଷ୍ଘି ଲାଗାନ୍ ଖୁସୀ ମାନାବାଗେ ଲାଗ୍ଗିୟାର୍। 42ଲେକିନ୍ ପାର୍ମେଶ୍ଵାର୍ସ୍ ଆବ୍ଡ଼ାର୍ସ୍ତି ହାଟ୍ଟରିକିରି, ଆବ୍ଡ଼ାରିନ୍ ଆକାଶ୍ ତା ବିଡ଼ି, ଚାନ୍ଦୋ, ଆରୁ ବିନ୍କୋବନ୍ ପୂଜା କାମାଗେ ଆମ୍ବେଇଚାସ୍, ଏସ୍କେ କା ନାବୀଜାମାର୍ଘି ପାବିତାର୍ ଶାସ୍ତ୍ରନୁ ଲେଖଚ୍କା ରାଇଦ୍, ‘ହେ ଇସ୍ରାଏଲ୍ତା ବାଉଁଶାରୋ, ନିମ୍ କାଁଏ ଚାଲିଶ୍ ବଛର୍ତକ୍ ମରୁଭୂମିନୁ ଏଙ୍ଘାଲାଗାନ୍ ପଶୁ ବଲୀ ଆରୁ ଧନ୍ସମ୍ପତ୍ତି ଗୁଠିନ୍ ଚାଢ଼ାବାଚ୍କାର୍? 43ଆରୁ ନିମ୍ ପୂଜା କାମ୍ନାଘି ଲାଗାନ୍ ଏକା ମୂର୍ତ୍ତୀଗୁଠିନ୍ ତିୟାର୍ କାମ୍ଚକାଚ୍କାର୍, ଆ ମଲେଖ୍ ତା ତାମ୍ଵୁ ଆରୁ ରେଫାନ୍ ଦେବ୍ତାଘି ବିନ୍କୋ ଗୁଠିନ୍ ନିମ୍ ଚେଡ଼ା-ଚେଡ଼ା କୁଦ୍ଦାଲ୍କାର୍। ହୁଦ୍ଘିଲାଗାନ୍ ଏନ୍ ନିମାନ୍ ବାବିଲନ୍ ଦେଶ୍ଘି ହାପାଖା ଅଥରନ୍ ଚନ୍।’”
44“ସାକ୍ଷୀଘି ତାମ୍ବୁ ମରୁଭୂମିନୁ ନାହ୍ମାଏ ପୁର୍ଖାର୍ଘି ମାଝାନୁ ରାଚା, ଏସ୍କେ ଆସ୍ ଠାହ୍ରାଚ୍କାଚାସ୍। ପାର୍ମେଶ୍ୱାର୍ସ୍ ମୁଶାସିନ୍ ଏସ୍କେ ତେଙ୍କାଚାସ୍ ଆନ୍ନେ ଆସ୍ ତିୟାର୍ କାମ୍ଚାସ୍। 45ଆରୁ, ନାହ୍ମା ପୁର୍ଖାଜାମାର୍ ଆ ତାମ୍ବୁନ୍ ହାଖ୍ଖୀକିରି, ଯିହୋଶୂୟସ୍କି ଆଗୁୱାଇନୁ କାନାନ୍ ଦେଶ୍ଗେ ଅନ୍ଦରାର୍। ଯେତ୍କବାକେନ୍ କା ଆବ୍ଡ଼ାର୍ ଆ ନାନ୍ନା ଜାତିୟାର୍ଘି ମିଆଁ ହକ୍ ହାଖ୍ଖୀୟାର୍, ନେକାନ୍ କା ପାର୍ମେଶ୍ଵାର୍ସ୍ ନାହ୍ମା ପୁର୍ଖାର୍ଘି ଚାହାନ୍ତି ଅଥ୍ରେଇ ଚିଚ୍କାଦାସ୍, ଆରୁ ଆ ତାମ୍ବୁଦ୍ ଦାଉଦ୍ସ୍କି ସାମାୟତକ୍ ରାଚା। 46ପାର୍ମେଶ୍ଵାର୍ସ୍କି କ୍ରିପା ଦାଉଦ୍ସ୍କି ମିଆଁ ରାଚା ଆରୁ ୟାକୁବ୍ସ୍କି ପାର୍ମେଶ୍ଵାର୍ସ୍କି ଲାଗାନ୍ ଅଣ୍ଟା ମନ୍ଦିର୍ ତିୟାର୍ କାମାଗେ ଦାଉଦ୍ସ୍ ଆର୍ଜୀବିନ୍ତି କାମ୍ଚାସ୍। 47ଲେକିନ୍ ଶୁଲେମାନ୍ସ୍ ଆସ୍କି ଲାଗାନ୍ ଅଣ୍ଟା ଆଡ଼୍ପା ତିୟାର୍ କାମ୍ଚାସ୍। 48ହାଲେହି ଜାମାର୍ଘିନ୍ତି ମିଆଁ ରୁ ପାର୍ମେଶ୍ଵାର୍ସ୍ ହେଖ୍ଖାତି ତିଆର୍ କାମ୍ଚ୍କା ଆଡ଼୍ପାନୁ ମା ରାଦାସ୍, ଏସ୍କେ କା ନାବୀଜାମାର୍ ତେଙ୍କାନାଏ, 49ପ୍ରାଭୁସ୍ ତେଙ୍ଗ୍ଦାସ୍, ‘ସରଗ୍ଦ୍ ଏଙ୍ଘା ରାଜ୍ଗାଦିଦ୍ ଆରୁ ଦୁନିଆଁଦ୍ ଏଙ୍ଘା ହେଡ୍ଡୁ ଉଇନା କାଣ୍ଡୋଦ୍, ନିମ୍ ଏଙ୍ଘାଲାଗାନ୍ ଏସ୍କେ ଆଡ଼୍ପା ତିୟାର୍ କାମର୍? ଆରୁ ଏଙ୍ଘା ଆରାମ୍ କାମ୍ନାଘି ଆଡ୍ଡାଦ୍ ଏକାସାନ୍ ମାନଦ୍? 50ଇବ୍ଡ଼ା ଜାମା ଜିନିଷ୍ଦ୍ କାଁଏ ଏଙ୍ଘା ହେଖ୍ଖାନ୍ତା ତିୟାର୍ କାମ୍ଚ୍କା ମାଲ୍ଲିଦ୍?’”
51“ହେ ମନ୍ ଆରୁ ଜୀଆ ତା କାଠୋର୍ ଆଲାରୋ, ନିମ୍ ପାର୍ମେଶ୍ୱାରସ୍କି ହୁକୁମ୍ବନ୍ ମା ମେନ୍ଦାର୍ ଆରୁ ମା ଚାଲ୍ଦାର୍। ନିମ୍ ଜାମାବାକେନ୍ ପାବିତାର୍ ଆତ୍ମାଘି ବିରୋଧ୍ କାମ୍ଦାର୍, ଏସ୍କେ ନିହ୍ମା ପୁର୍ଖାର୍ କାମାଲିଆର୍ ଆନ୍ନେ ନିମ୍ହି କାମାଲ୍ଦାର୍। 52ନାବୀଜାମାର୍ଘି ଭିତର୍ନୁ ନେକାନ୍ ନିହ୍ମା ପୁର୍ଖାର୍ ମା ସାଧ୍କାଚାର୍? ଏକାର୍ କା ଆ ଧାର୍ମିକ୍ ଆଲାସ୍କି ବାର୍ନାଘି ବାରେନୁ ଆଘ୍ଲିନ୍ତି ତେଙ୍କାଚାର୍, ଆବ୍ଡ଼ାର୍ ଆବ୍ଡ଼ାରିନ୍ହି ପିଟ୍ଟେଇଚାର୍; ଆରୁ ଆକ୍କୁନ୍ ନିମ୍ହି ଆସିନ୍ ବିରୋଧିଜାମାର୍ଘି ହେଖ୍ଖାନୁ ସୋଁପିକିରି ପିଟ୍ଟେଇ ଚିଚ୍କାର୍। 53ନିମ୍ ସରଗ୍ ଦୂଁତ୍ଜାମାର୍ଘି ଦ୍ୱାର୍ନୁ ଠାହ୍ରାଚ୍କା ନିୟମ୍ବନ୍ ତା ହାକ୍କାଚ୍କାର୍, ଲେକିନ୍ ଆବନ୍ ମା ତା ମାନ୍ଚ୍କାର୍।”
ସ୍ତିଫାନ୍ସିନ୍ ଚାଁଚାତି ଡେମା ପିଟାଲ୍ନାଏ
54ଇବ୍ଡ଼ା ଜାମା କାତ୍ଥାନ୍ ମେନିକିରି ସାଭାନୁ ରୁ ୟାହୁଦୀ ମୁଖ୍ୟାର୍ ମୁରୁକ୍ ଜୋର୍ସେ ଖୀସାରାଚାର୍ କେରାର୍ ଆରୁ ଆସ୍କି ମିଆଁ ପାଲ୍ଲୁ ଚାବ୍ରାଗେ ଲାଗ୍ଗିୟାର୍। 55ଲେକିନ୍ ସ୍ତିଫାନ୍ସ୍ ପାବିତାର୍ ଆତ୍ମାତି ଭାର୍ପୁର୍ ମାନିକିରି ସରଗ୍ ତାରା ଏକ୍ ନଜର୍ ଏରିୟାସ୍, ଆରୁ ପାର୍ମେଶ୍ଵାର୍ସ୍କି ମାହିମାବନ୍ ଆରୁ ଯୀଶୁସିନ୍ ପାର୍ମେଶ୍ଵାର୍ସ୍କି ତିନାତାରା ଇଜ୍ଜକାନ୍ ଏରିକିରି ତେଙ୍ଗିୟାସ୍, 56“ଏରା, ଏନ୍ ସରଗ୍ବନ୍ ଖୋଲର୍ କା ଆରୁ ମୁନୁଷ୍ ହାଦ୍ଦୁସିନ୍ ପାର୍ମେଶ୍ଵାର୍ସ୍କି ତିନାତାରା ଇଜ୍ଜକାନ୍ ଏରାଲ୍ଦାନ୍।” 57ଆଙ୍ଗେନ୍ ଆବ୍ଡ଼ାର୍ ଜୋର୍ସେ ଚିର୍ରା ରାଇକିରି ନିଜର୍-ନିଜର୍ ହେବ୍ଦାନ୍ ହେଖ୍ଖାତି ମୁଦ୍ଧେଇଚାର୍। ଆରୁ ଅହ୍ନାସାରେନ୍ ଆସିନ୍ ଡେମାଗେ ଲାଗ୍ଗିୟାର୍; 58ଆରୁ ଆସିନ୍ ଆବ୍ଡ଼ାର୍ ସହର୍ତି ବାହାରି ହୋଇକିରି ଚାଁଚାତି ଲେବ୍ଡ଼ାଗେ ଲାଗ୍ଗିୟାର୍, ଆରୁ ସାକ୍ଷୀ ଆଲାର୍ ଶାଉଲ୍ ନାମେଘି ଅଣ୍ଟା କୁକ୍କସ୍କି ହେଡ୍ଡୁ ମୂଲିନୁ ନିଜର୍-ନିଜର୍ ଚିଢ଼ା ଗୁଠିନ୍ ଉଇୟାର୍। 59ଆରୁ ଯେତ୍କବାକେନ୍ ଆବ୍ଡ଼ାର୍ ସ୍ତିଫାନ୍ସିନ୍ ଚାଁଚାତି ଲେବ୍ଡ଼ାଲିୟାର୍, ହତକ୍ବାକେନ୍ ଆସ୍ ବିନ୍ତି କାମ୍ତେ ରାଚାସ୍, “ହେ ପ୍ରାଭୁ ଯୀଶୁ, ଏଙ୍ଘା ଆତ୍ମାନ୍ ଗ୍ରହନ୍ କାମା।” 60ଆରୁ ହାଁଠୁୱାରାଚାସ୍ ଆରୁ ଜୋର୍ସେ ଚିର୍ରା ରାଇକିରି ତେଙ୍ଗିୟାସ୍, “ହେ ପ୍ରାଭୁ, ଇ ପାପ୍ବନ୍ ଇବ୍ଡ଼ାର୍ଘି ମିଆଁ ଆମା ଲାଗାବା।” ଏତ୍କ ତେଙ୍ଗିକିରି ଆସ୍ ଦୁନିଆଁନ୍ତି ବିଦା ଅଚ୍ଚାସ୍ କେରାସ୍।
81ଶାଉଲ୍ସ୍ ସ୍ତିଫାନ୍କି ପିଟ୍ଟନାନୁ ଏକ୍ମତ୍ ରାଚାସ୍।
ଶାଉଲ୍ସ୍ ବିଶ୍ୱାସୀରିନ୍ ସାତାବାଲ୍ଦାସ୍
ହୁ ଉଲ୍ଲା ଯେରୁଶାଲେମ୍ନ୍ତା ମଣ୍ତ୍ଲୀଘି ମିଆଁ ବହୁତ୍ ସାତାୱାଟ୍ ସୁରୁ ମାନ୍ଚା ଆରୁ ଚେଲାଜାମାରିନ୍ ଆମ୍ବିକିରି ଜାମା ବିଶ୍ୱାସୀଜାମାର୍ ୟାହୁଦୀଆ ଆରୁ ସାମାରିଆ ଦେଶ୍ନୁ ଛିଛିର୍ଛାନ୍ଦ୍ ମାନ୍ଚାର୍ କେରାର୍। 2କେତ୍କ ଲୋକ୍ ଭକ୍ତ ଜାମାର୍ ସ୍ତିଫାନ୍ସିନ୍ ମାଡ଼େଇଚାର୍ ଆରୁ ଆସ୍କି ଲାଗାନ୍ ବହୁତ୍ ଜୋର୍ସେ ଅହ୍ଲାଲିୟାର୍। 3ଶାଉଲ୍ସ୍ ବିଶ୍ୱାସୀ ଜାମାରିନ୍ ସାତାବାଗେ ସୁରୁ କାମ୍ଚାସ୍; ଆରୁ ଆସ୍ ଆଡ଼୍ପା-ଆଡ଼୍ପା କାଇକିରି ମାର୍ଦ୍ନା ଆରୁ ମାଏକିନିଆଁରିନ୍ ଟାଣା-ଟାଣା ହୋଇକିରି ଜେହେଲ୍ନୁ ଗୁଡ଼ାଚାଲିୟାସ୍।
ଫିଲିପ୍ସ୍କି ପ୍ରଚାର୍ ଦ୍ୱାର୍ନୁ ସାମାରିଆନ୍ତା ବହୁତ୍ ଆଲାର୍ ଯୀଶୁସିନ୍ ବିଶ୍ୱାସ୍ କାମ୍ଚାର୍
4ଏକା ବିଶ୍ୱାସୀଜାମାର୍ ୟାହୁଦୀଆ ଆରୁ ସାମାରିଆନୁ ଛିଛିର୍ଛାନ୍ଦ୍ ମାନ୍ଚାର୍ କେର୍କାଚାର୍, ଆବ୍ଡ଼ାର୍ ଜାମାତାରା କାଇକିରି ସୁସାମାଚାର୍ ପ୍ରଚାର୍ କାମାଗେ ଲାଗ୍ଗିୟାର୍; 5ଆରୁ ଫିଲିପ୍ପସ୍ ସାମାରିଆ ସହର୍ଗେ କାଇକିରି ଆଲାର୍ସାନ୍ ଖ୍ରୀସ୍ତ୍ସ୍କି ବାରେ ପ୍ରଚାର୍ କାମାଗେ ଲାଗ୍ଗିୟାସ୍। 6ଯେତ୍କବାକେନ୍ ଆଲାର୍ ଫିଲିପ୍ସ୍କି କାତ୍ଥାନ୍ ମେନ୍ଚାର୍ ଆରୁ ଏକା ଅଦ୍ଭୁତ୍ ଚିହ୍ନାନ୍ ଆସ୍ ଏଦିୟାସ୍ ଆବ୍ଡ଼ାନ୍ ଏରିକିରି, ଆଲାର୍ ଏକା କାତ୍ଥାନ୍ ଫିଲିପ୍ପସ୍ ତେଙ୍ଗାଲିୟାସ୍ ଆବନ୍ ଏକ୍ମନ୍ ମାନିକିରି ଧ୍ୟାନ୍ ଚିଚ୍ଚାର୍। 7ଏନ୍ଦେର୍ଗେକା ଢେର୍ ଭୁତ୍ତୁ ଲାକ୍କା ଆଲାର୍ସ୍ତି ଭୁତ୍ତୁବଦ୍ ଜୋର୍ସେ ଚିର୍ରା ରାଇକିରି ଉର୍ଖାକେରା, ଆରୁ ବହୁତ୍ ଏକ୍ଆଙ୍ଗିୟା ବେହ୍ମରିୟାର୍ ଆରୁ ଲେଙ୍ଗ୍ଡ଼ାର୍ ଚାଙ୍ଗା ମାନାଲିୟାର୍। 8ହୁଦ୍ଘିଲାଗାନ୍ ଆ ସହର୍ତା ଆଲାର୍ ବହୁତ୍ ଖୁସୀ ମାନାବାଗେ ଲାଗ୍ଗିୟାର୍।
ଯାଦୁଗାର୍ ଶିମୋନ୍
9ଶିମୋନ୍ ନାମେଘି ଅଣ୍ଟା ଆଲାସ୍ ରାଚାସ୍, ଏକାସ୍ କା ଢେର୍ଉଲ୍ତି ସାମାରିଆ ସହର୍ନୁ ଯାଦୁ କାମାଲିୟାସ୍ ଆରୁ ହୁ ସହର୍ତା ଆଲାରିନ୍ ଆଚ୍ମିତ୍ କାମାଚିଆଲିୟାସ୍ ଆରୁ ନିଜ୍କେନିଜ୍ ଅଣ୍ଟା ବାଡ଼୍କା ଆଲାନ୍ ବୁଲି ତେଙ୍ଗାଲିୟାସ୍। 10ଛୋଟେନ୍ନ୍ତି ବାଡ଼୍କାତକ୍ ଜାମାର୍ ଆସ୍କି କାତ୍ଥାନ୍ ମନ୍ ଧ୍ୟାନ୍ସେ ମେନିକିରି ଆଚ୍ମିତ୍ ମାନିକିରି ତେଙ୍ଗାଲିୟାର୍, “ଇ ଆଲାସ୍ ପାର୍ମେଶ୍ଵାର୍ସ୍କି ଆ ଶକ୍ତିସ୍, ଏକାଦ୍ କା ମହାନ୍ ଶକ୍ତି ବୁଲି ତେଙ୍ଗାକାଇ।” 11ଆସ୍ ବହୁତ୍ ଉଲ୍ତି ନିଜର୍ ଯାଦୁଘି ନାଲ୍ଖୁତି ଆବ୍ଡ଼ାର୍ରିନ୍ ଆଚ୍ମିତ୍ କାମିକିରି ଉଇକାଚାସ୍, ହୁଦ୍ଘିଲାଗାନ୍ ଆବ୍ଡ଼ାର୍ ଆସିନ୍ ବହୁତ୍ ମାନାଲିୟାର୍। 12ଲେକିନ୍ ଯେତ୍କବାକେନ୍ ଆବ୍ଡ଼ାର୍ ଫିଲିପ୍ପସିନ୍ ବିଶ୍ୱାସ୍ କାମ୍ଚାର୍ ଏକାସ୍ କା ପାର୍ମେଶ୍ଵାର୍ସ୍କି ରାଜୀ ଆରୁ ଯୀଶୁ ଖ୍ରୀସ୍ତ୍କି ନାମେଘି ସୁସାମାଚାର୍ ଶୁଣାବାଲିୟାସ୍, ତା ମାର୍ଦ୍ନାର୍ ଆରୁ ମାଏକିନିଆଁର୍ ଜାମାର୍ ଆସ୍ନାନ୍ ହୁଆଗେ ଲାଗ୍ଗିୟାର୍। 13ଆରୁ ଶିମୋନ୍ସ୍ହି ନିଜେ ବିଶ୍ୱାସ୍ କାମିକିରି ଆସ୍ନାନ୍ ଅଚ୍ଚାସ୍ ଆରୁ ଫିଲିପ୍ପସ୍ଗାନେ ରାଗେ ଲାଗ୍ଗିୟାସ୍। ଆରୁ ନାନାପ୍ରକାର୍ଘି ଚିହ୍ନା ଆରୁ ବାଡ଼େ-ବାଡ଼େ ଅଦ୍ଭୁତ୍ ନାଲ୍ଖୁନ୍ ଏରିକିରି ଆଚ୍ମିତ୍ ମାନା କାଲିୟାସ୍।
ସାମାରୀଆନ୍ତା ବିଶ୍ୱାସୀ ଜାମାର୍ଘି ମିଆଁ ପାବିତାର୍ ଆତ୍ମା ଏତ୍ତାଲି
14ଯେତ୍କବାକେନ୍ ଯେରୁଶାଲେମ୍ନୁ ରୁ ଖାସ୍ଚେଲାଜାମାର୍ ମେନ୍ଚାର୍ କା ସାମାରିଆନ୍ତା ଆଲାର୍ ପାର୍ମେଶ୍ଵାର୍ସ୍କି ବଚନ୍ବନ୍ ଗ୍ରହନ୍ କାମ୍ଚ୍କାନାଏ, ହତ୍କବାକେନ୍ ଆବ୍ଡ଼ାର୍ ପାତ୍ରାସ୍ ଆରୁ ଯୋହାନ୍ସିନ୍ ଆବ୍ଡ଼ାର୍ସାନ୍ ତାଇୟାର୍। 15ପାତ୍ରାସ୍ ଆରୁ ଯୋହାନ୍ସ୍ କାଇକିରି ଏସ୍କେ ଆବ୍ଡ଼ା ଆଲାର୍ ପାବିତାର୍ ଆତ୍ମା ହାଖ୍ଖର ହୁଦ୍ଘିଲାଗାନ୍ ଆବ୍ଡ଼ାର୍ଗେ ବିନ୍ତି କାମ୍ଚାର୍। 16ଏନ୍ଦେର୍ଗେ ଆକ୍କୁନ୍ତକ୍ ପାବିତାର୍ ଆତ୍ମା ଆବ୍ଡ଼ାର୍ଘି ଭିତର୍ନୁ ନେଖା ମିଆଁହି ମାଲ୍ଲା ଏତ୍ତକିରୁ; ଖାଲି ଆବ୍ଡ଼ାର୍ ପ୍ରାଭୁ ଯୀଶୁସ୍କି ନାମେନୁ ଆସ୍ନାନ୍ ଅଚ୍ଚକାଚାର୍। 17ଆଙ୍ଗେନ୍ ପାତ୍ରାସ୍ ଆରୁ ଯୋହାନ୍ସ୍ ଆବ୍ଡ଼ାର୍ଘି ମିଆଁ ହେଖ୍ଖା ଉଇୟାର୍ ଆରୁ ଆବ୍ଡ଼ାର୍ ପାବିତାର୍ ଆତ୍ମା ହାଖ୍ଖୀୟାର୍। 18ଯେତ୍କବାକେନ୍ ଶିମୋନ୍ସ୍ ଏରିୟାସ୍ କା ଖାସ୍ଚେଲାଜାମାର୍ଘି ହେଖ୍ଖା ଉଇନାତି ପାବିତାର୍ ଆତ୍ମା ଚିଆକାଇ, ତା ଆସ୍ ଆବ୍ଡ଼ାର୍ଘି ଚାହାଗେ ରୂପିୟା ଅନ୍ଦ୍ରିକିରି ତେଙ୍ଗିୟାସ୍, 19“ଇ ହକ୍ ଏଙ୍ଗାହି ଚିଆ, କା ନେଖିନ୍ ମିଆଁହି ଏନ୍ ହେଖ୍ଖା ଉଇୟନ୍ ତା ଆବ୍ଡ଼ାର୍ଗେ ପାବିତାର୍ ଆତ୍ମା ହାଖ୍ଖର।” 20ପାତ୍ରାସ୍ ଆସିନ୍ ତେଙ୍ଗିୟାସ୍, “ନିଙ୍ଘା ରୂପିୟା ନିଙ୍ଘାଗାନେ ନାଶ୍ ମାନ୍ନାଦ୍, ଏନ୍ଦେର୍ଗେକା ନିନ୍ ସୋଚ୍କାଏ କା ରୂପିୟାତି ପାର୍ମେଶ୍ଵାର୍ସ୍କି ବାର୍ଦାନ୍ବନ୍ ହେନ୍ଦା ଅଙ୍ଗନ୍। 21ଇ କାତ୍ଥାନୁ ନିଙ୍ଘାଏ ଭାଗ୍ ମାଲ୍ଲାଦିନ୍ ନା ଅଧିକାର୍ ମାଲ୍ଲାଦିନ୍; ଏନ୍ଦେର୍ଗେକା ପାର୍ମେଶ୍ଵାର୍ସ୍କି ଆଘ୍ଲି ନିଙ୍ଘା ମନ୍ ସିଧା ମାଲ୍ଲାଦିନ୍। ଏନ୍ଦେର୍ଗେକା ପାର୍ମେଶ୍ୱାର୍ସ୍ ଆହ୍ଦାସ୍ କା ନିଙ୍ଘା ସୋଚ୍ ଠିକ୍ ମାଲ୍ଲାଦିନ୍। 22ହୁଦ୍ଘିଲାଗାନ୍ ନିନ୍ ନିଙ୍ଘାଏ ଖାରାପ୍ ସୋଚ୍ଘି ଲାଗାନ୍ ପାସ୍ତାରା ଆରୁ ପ୍ରାଭୁସାନ୍ ବିନ୍ତି କାମା, ମାନାଅଙ୍ଗତା ନିଙ୍ଘା ମନ୍ତା ସୋଚ୍ବନ୍ ଛେମା କାମାକୋ। 23ଏନ୍ଦେର୍ଗେକା ଏନ୍ ଏରାଲ୍ଦାନ୍ କା ନିନ୍ କପଟ୍ତି ନିନ୍ଦିକାଏ କେର୍କାଦାଏ ଆରୁ ପାପ୍ଘି ବନ୍ଧନ୍ନୁ ଖାତ୍ର୍କାଏ କେର୍କାଦାଏ।” 24ଆଙ୍ଗେନ୍ ଶିମୋନ୍ସ୍ ଉତ୍ତର୍ ଚିଚ୍ଚାସ୍, “ନିନ୍ ଏଙ୍ଗାଗେ ପ୍ରାଭୁସାନ୍ ବିନ୍ତି କାମା କା ଏକା କାତ୍ଥାନ୍ ନିନ୍ ତେଙ୍କାଦାଏ, ଆନ୍ନୁନ୍ତି ଏକାଦ୍ହି ଏଙ୍ଘା ମିଆଁ ମା ଘାଟ୍ରୋ।”
25ଆନ୍ତିନ୍ ପାତ୍ରାସ୍ ଆରୁ ଯୋହାନ୍ସ୍ ସାକ୍ଷୀ ଚିଇକିରି ଆରୁ ପ୍ରାଭୁସ୍କି ବଚନ୍ ଶୁଣାବାତେ ଯେରୁଶାଲେମ୍ଗେ କିର୍ରିୟାର୍ କେରାର୍, ଆରୁ କିର୍ନାବାକେନ୍ ଆବ୍ଡ଼ାର୍ ସାମାରୀଆଘି ବହୁତ୍ ପାଡ଼ାନୁ ସୁସାମାଚାର୍ ଶୁଣାବାଚାର୍।
କୁଶ୍ ଦେଶ୍ତି ବାର୍ଚ୍କା ଆଲାସିନ୍ ଫିଲିପ୍ପସ୍ ଉପ୍ଦେଶ୍ ଚିଆଲ୍ଦାସ୍
26ଅହନ୍ ପ୍ରାଭୁସ୍କି ଅଣ୍ଟା ସରଗ୍ଦୂଁତ୍ ଫିଲିପ୍ପସ୍ସିନ୍ ତେଙ୍ଗିୟା, “ଉସ୍କାରା ଆରୁ ଦକ୍ଷିଣ୍ ତାରା ଆପାବୁନୁ କାଲା, ଏକାଦ୍ ଯେରୁଶାଲେମ୍ତି ଗାଜାଗେ କାଲିଦ୍।” ଇଦ୍ ଅଣ୍ଟା ଶୁନ୍ଶାନ୍ ପାବୁଦ୍। 27ଆସ୍ ଉସ୍କାରାଚାସ୍ ଆରୁ ବୁଙ୍ଗିୟାସ୍ କେରାସ୍, ଆରୁ ଏରା, କୁଶ୍ ଦେଶ୍ତା ଅଣ୍ଟା ଆଲାସ୍ ବାରାଲିୟାସ୍ ଏକାସ୍ କା ଗାୟା ରାଚାସ୍ ଆସ୍ କୁଶ୍ଦେଶ୍ଘି ରାନୀ କାନ୍ଦାକେଘି ମନ୍ତ୍ରୀ ଆରୁ ତାଙ୍ଘା ଜାମା ଧନ୍ସମ୍ପତ୍ତିଘି ଖାଜାଞ୍ଚୀ ରାଚାସ୍। ଆସ୍ ଆରାଧାନା କାମାଗେ ଯେରୁଶାଲେମ୍ ବାର୍ଚ୍କାଚାସ୍। 28ଆସ୍ ତାଙ୍ଘାଏ ଘୋଣ ଗାଡ଼ିନୁ ଅକ୍କାଚାସ୍, ଆରୁ ଇଶାୟାହ୍ସ୍ ନାବୀସ୍କି ବହିବନ୍ ପାଢ଼୍ତେ-ପାଢ଼୍ତେ କିର୍ରାଲିୟାସ୍। 29ଆନ୍ତିନ୍ ପାବିତାର୍ ଆତ୍ମାଦ୍ ଫିଲିପ୍ପସିନ୍ ତେଙ୍ଗିୟାଦ୍, “ଚାହାନୁ କାଇକିରି ଇ ଘୋଣ ଗାଡ଼ିଘି ସାଙ୍ଗେ ମାନାକାଲା।” 30ଫିଲିପ୍ପସ୍ ଆସ୍ତାରା କୁଦ୍ୟାରାତେ କେରାସ୍ ଆରୁ ଆସ୍ ଆସିନ୍ ଇଶାୟାହ୍ସ୍ ନାବୀସ୍କି ବହି ପାଢ଼୍ନାବନ୍ ମେନ୍ଚାସ୍, ଆରୁ ତେଙ୍ଗିୟାସ୍, “ନିନ୍ ଏକାନ୍ ପାଢ଼ାଲ୍ଦାଏ ଆବନ୍ କାଁଏ ବୁଝ୍ରାଲ୍ଦାଏ ହି?” 31ଆସ୍ ତେଙ୍ଗିୟାସ୍, “ଯେତ୍କତକ୍ ଏଙ୍ଗାନ୍ ନେଦ୍ହି ମା ବୁଝାବର୍ ତା ଏନ୍ ଏସ୍କେ ବୁଝ୍ରନ୍?” ଆରୁ ଆସ୍ ଫିଲିପ୍ପସିନ୍ ଗାଡ଼ିନୁ ଆର୍ଗିକିରି ତାଙ୍ଘାସାନ୍ ଅକ୍କାଗେ ଆର୍ଜୀବିନ୍ତି କାମ୍ଚାସ୍। 32ପାବିତାର୍ ଶାସ୍ତ୍ରନ୍ତା ଏକା ଅଧ୍ୟାୟ ଆସ୍ ପାଢ଼ାଲିୟାସ୍, ଆଦ୍ ଏନ୍ନେ ରାଚା: “ଆସିନ୍ ଭେଡ଼ି ହାଦ୍ଦୁଘି ଲେଖା ପୂଜାଗେ ଅଚ୍ଚାର୍ କେରାର୍, ଆରୁ ଏସ୍କେ ଭେଡ଼ି ହାଦ୍ଦୁଦ୍ ତାଙ୍ଘା ଚୁଟ୍ଟି ମୁର୍କୁର୍ଘି ଚାହାନୁ ଚୁପ୍ଚାପ୍ ରାଇ, ଆନ୍ନେନ୍ ଆସ୍ହି ତାଙ୍ଘା ଥୁମ୍ଣାନ୍ ମା ଖୋଲ୍ଚାସ୍। 33ଆସ୍କି ଅପ୍ମାନ୍ଘି ନ୍ୟାୟ ମାନାଗେ ପଲ୍ଲିୟାଦ୍। ଆସ୍କି ପିଢ଼ିଘି ବର୍ଣ୍ଣନା ନେଦ୍ କାମର୍? ଏନ୍ଦେର୍ଗେକା ଦୁନିଆଁନ୍ତି ଆସ୍କି ଜୀଆବନ୍ ହୁଆକେରା।”
34ଆ ଆଲାସ୍ ଫିଲିପ୍ପସିନ୍ ମେନ୍ଚାସ୍, “ଏନ୍ ନିଙ୍ଗାନ୍ ଆର୍ଜୀ କାମାଲ୍ଦାନ୍, ତେଙ୍ଗା କା ନାବୀସ୍ ଇ କାତ୍ଥାନ୍ ନେଖା ବାରେନୁ ତେଙ୍ଗ୍ଦାସ୍, ନିଜର୍ ବାରେନୁ କା ଆରୁ ଦୁସ୍ରାସ୍କି ବାରେନୁ?” 35ଆନ୍ତିନ୍ ଫିଲିପ୍ପସ୍ ତେଙ୍ଗାଗେ ସୁରୁ କାମ୍ଚାସ୍ ଆରୁ ଇ ପାବିତାର୍ ଶାସ୍ତ୍ରନ୍ତି ହୋଇକିରି ଯୀଶୁସ୍କି ସୁସାମାଚାର୍ ଶୁଣାବାଚାସ୍। 36ପାବୁନୁ ଆଘ୍ଲି କାନାବାକେନ୍ ଆବ୍ଡ଼ାର୍ ଆମ୍ମୁ ରାନା ଅଣ୍ଟା ଆଡ୍ଡାନୁ ଆଣସିୟାର୍। ଆଙ୍ଗେନ୍ ଗାୟା ଆଲାସ୍ ତେଙ୍ଗିୟାସ୍, “ଏରା ଇସାନ୍ ଆମ୍ମୁ ରାଇ, ଆକ୍କୁନ୍ ଏଙ୍ଗା ଆସ୍ନାନ୍ ହୁଆଗେ ଏନ୍ଦେର୍ ରୁକାୱାଟ ରାଇ।” 37(ଫିଲିପ୍ପସ୍ ତେଙ୍ଗିୟାସ୍, “ଯଦି ନିନ୍ ପୁରା ମନ୍ତି ବିଶ୍ୱାସ୍ କାମ୍ଦାଏ କା ଯୀଶୁ ଖ୍ରୀସ୍ତ୍ସ୍ ପାର୍ମେଶ୍ୱାର୍ସ୍କି ହାଦ୍ଦୁସ୍।” ତା ଏନ୍ ନିଙ୍ଗାଗେ ଆସ୍ନାନ୍ ଚିଅନ୍। ଆଙ୍ଗେନ୍ ଆସ୍ ଉତ୍ତର୍ ଚିଚ୍ଚାସ୍, “ଏନ୍ ବିଶ୍ୱାସ୍ କାମାଲ୍ଦାନ୍ କା ଯୀଶୁ ଖ୍ରୀସ୍ତ୍ସ୍ ପାର୍ମେଶ୍ୱାର୍ସ୍କି ହାଦ୍ଦୁସ୍।”) 38ଆନ୍ତିନ୍ ଆ ଆଲାସ୍ ଘୋଣ ଗାଡ଼ିବନ୍ ଇଲ୍ତାଗେ ହୁକୁମ୍ ଚିଚ୍ଚାସ୍, ଆରୁ ଫିଲିପ୍ପସ୍ ଆରୁ ଗାୟାସ୍ ଦୁହି ଲୋକ୍ ଆମ୍ମୁନୁ ଏତ୍ତିୟାର୍ ଆରୁ ଫିଲିପ୍ପସ୍ ଗାୟାସ୍ଗେ ଆସ୍ନାନ୍ ଚିଚ୍ଚାସ୍। 39ଯେତ୍କବାକେନ୍ ଆବ୍ଡ଼ାର୍ ଆମ୍ମୁନ୍ତି ବାହ୍ରି ଉର୍ଖିଆର୍, ତା ପ୍ରାଭୁସ୍କି ଆତ୍ମାଦ୍ ଫିଲିପ୍ପସିନ୍ ଟେକିକିରି ଅଚ୍ଚାକେରା, ଆରୁ ଆ ଗାୟା ଆଲାସ୍ ଆସିନ୍ ଆରୁ ମା ଏରିୟାସ୍, ହାଲେହି ଆସ୍ ଖୁସୀ ମାନ୍ତେ-ମାନ୍ତେ ନିଜର୍ ପାବୁନୁ ବୁଙ୍ଗିୟାସ୍ କେରାସ୍। 40ଫିଲିପ୍ପସ୍ ନିଜ୍କେନିଜ୍ ଆଶଦୋଦ୍ ସହର୍ନୁ ହାଖ୍ଖୀୟାସ୍ ଆରୁ ଯେତ୍କତକ୍ କାଇସିରିଆଗେ ମା ଆଣ୍ସିୟାସ୍, ହତ୍କତକ୍ ସହର୍ ସହର୍ନୁ ସୁସାମାଚାର୍ ଶୁଣାବାତେ କେରାସ୍।
9ଶାଉଲ୍ସ୍କି ମନ୍ ପରିବର୍ତ୍ତନ୍
1ଲେକିନ୍ ଶାଉଲ୍ସ୍ ଆକ୍କୁନ୍ତକ୍ ପ୍ରାଭୁସ୍କି ଚେଲାଜାମାରିନ୍ ପିଟନ୍ ଚିଅନ୍ ବୁଲି ଧାମ୍କାଲିୟାସ୍। ଆସ୍ ମାହାପୁରୋହିତ୍ସ୍କି ଚାହାଗେ କେରାସ୍। 2ଆରୁ ଆସ୍ ଦାମାସ୍କସ୍ ତା ସାଭା ଆଡ଼୍ପାନ୍ତି ଚିଠି ନିଚାସ୍ କା ନେଦ୍ ପ୍ରାଭୁ ଯୀଶୁସିନ୍ ବିଶ୍ୱାସ୍ କାମାଲିଆର୍ ଚାହେ ମାର୍ଦ୍ନାର୍, ଚାହେ ମାଏକିନିଆଁର୍ ନେକାନ୍ ହିଁକିରି ଯେରୁଶାଲେମ୍ଗେ ଅନ୍ଦ୍ରା ଅଙ୍ଗସ୍। 3ଲେକିନ୍ କାତେ-କାତେ ଆସ୍ ଯେତ୍କବାକେନ୍ ଦାମାସ୍କସ୍ ସହର୍ଘି ଚାହା ଆଣ୍ସିୟାସ୍, ତା ଆକାଶ୍ତି ଅହ୍ନାସାରେନ୍ ବିଲ୍ଲୀଦ୍ ତାଙ୍ଘା ଚାରିପାଖା ବିଲ୍ଲୀ ମାନ୍ଚାକେରା। 4ଆଦ୍ଘି ଲାଗାନ୍ ଆସ୍ ହେଁହ୍ଲାନୁ ଖାତ୍ରାସ୍ କେରାସ୍ ଆରୁ ଏନ୍ନେ ଶବଦ୍ ମେନ୍ଚାସ୍, “ହେ ଶାଉଲ୍, ହେ ଶାଉଲ୍, ଏନ୍ଦେର୍ଗେ ନିନ୍ ଏଙ୍ଗାନ୍ ସାତାବାଲ୍ଦାଏ?” 5ଶାଉଲ୍ସ୍ ମେନ୍ଚାସ୍, “ହେ ପ୍ରାଭୁ, ନିନ୍ ନେଦ୍?” ଆରୁ ଆସ୍ ତେଙ୍ଗିୟାସ୍, “ଏନ୍ ଯୀଶୁନ୍, ନେକାନ୍ ନିନ୍ ସାତାବାଲ୍ଦାଏ। 6ଲେକିନ୍ ଆକ୍କୁନ୍ ଉସ୍କାରା ଆରୁ ସହର୍ଗେ କାଲା। ଆସାନ୍ ନିଙ୍ଗାନ୍ ତେଙ୍ଗାକୋ କା ନିଙ୍ଗାଗେ ଏନ୍ଦେର୍ କାମା ଖାତ୍ରୋ।” 7ଆରୁ ଏକା ଆଲାର୍ ତାଙ୍ଘାଗାନେ ସାଙ୍ଗେନୁ ରାଚାର୍, ଆବ୍ଡ଼ାର୍ ଆ ଶବଦ୍ ମେନିକିରି ଆଚ୍ମିତ୍ ମାନ୍ଚାର୍ କେରାର୍; ଏନ୍ଦେର୍ଗେକା ଆବ୍ଡ଼ାର୍ ଶବଦ୍ ତା ମେନ୍ଚାର୍ ଲେକିନ୍ ନେକାନ୍ହି ମା ଏରିୟାର୍। 8ଆନ୍ତିନ୍ ଶାଉଲ୍ସ୍ ହେଁହ୍ଲାନ୍ତି ଉସ୍କାରାଚାସ୍, ଲେକିନ୍ ଯେତ୍କବାକେନ୍ ତାଙ୍ଘା ହାନ୍ନୁ ଖୋଲ୍ଚାସ୍ ତା ଆସ୍ ଏନ୍ଦେର୍ହି ଏରା ପଲ୍ଲିୟାସିନ୍, ଆଦ୍ଘି ଲାଗାନ୍ ଆବ୍ଡ଼ାର୍ ଆସ୍କି ହେଖ୍ଖାନ୍ ଧାରିକିରି ଦାମାସ୍କସ୍ଗେ ଅଚ୍ଚାର୍ କେରାର୍। 9ଆସ୍ ତିନ୍ ଦିନ୍ତକ୍ ଏରା ପଲ୍ଲିୟାସିନ୍ ଆରୁ ଏନ୍ଦେର୍ହି ମା ଅଣ୍ଡାସ୍ ମଖ୍ଖୀୟାସ୍।
10ଦାମାସ୍କସ୍ନୁ ହାନାନିୟାସ୍ ନାମେଘି ଅଣ୍ଟା ଚେଲା ରାଚାସ୍, ଆସିନ୍ ପ୍ରାଭୁସ୍ ଦର୍ଶନ୍ ଚିଇକିରି ତେଙ୍ଗିୟାସ୍, “ହେ ହାନ୍ନାନିୟାସ୍!” ଆସ୍ ତେଙ୍ଗିୟାସ୍, “ହଁ ପ୍ରାଭୁ ହୁକୁମ୍ ଚିଆ।” 11ଆନ୍ତିନ୍ ପ୍ରାଭୁସ୍ ଆସିନ୍ ତେଙ୍ଗିୟାସ୍, “ଉସ୍କାରା ଆରୁ ‘ସିଧା’ ନାମେଘି ପାବୁନୁ କାଲା ଆରୁ ଯୁଦାସ୍କି ଆଡ଼୍ପାନୁ କାଇକିରି ଶାଉଲ୍ ନାମେଘି ଅଣ୍ଟା ତାର୍ସୁସ୍ ସହର୍ତା ଆଲାସ୍କି ବାରେ ମେନାମେନି କାମା; ଏନ୍ଦେର୍ଗେକା ଏରା, ଆସ୍ ବିନ୍ତି କାମାଲ୍ଦାସ୍, 12ଆରୁ ଆସ୍ ଦର୍ଶନ୍ ଏରିୟାସ୍ କା ହାନ୍ନାନିୟାସ୍ ନାମେଘି ଅଣ୍ଟା ଆଲାସ୍ ବାରିକିରି ତାଙ୍ଘା ମିଆଁ ହେଖ୍ଖା ଉଇୟାସ୍; ତାକା ଆସ୍ ଆରୁଅହନ୍ ଏରା ଅଙ୍ଗସ୍।” 13ଲେକିନ୍ ହାନ୍ନାନିୟାସ୍ ଉତ୍ତର୍ ଚିଚ୍ଚାସ୍, “ହେ ପ୍ରାଭୁ, ଏନ୍ତା ଇ ଆଲାସ୍କି ବାରେ ବହୁତ୍ କାତ୍ଥା ମେନ୍ଚ୍କାଦାନ୍ କା ଇସ୍ ଯେରୁଶାଲେମ୍ନୁ ନିଙ୍ଘା ପାବିତାର୍ ଆଲାର୍ ଗାନେ ବାଡ଼୍କା-ବାଡ଼୍କା ଖାରାପ୍ ନାଲ୍ଖୁ କାମ୍ଚ୍କାଦାସ୍; 14ଆରୁ ଇସାନ୍ହି ଯେତ୍କ ଆଲାର୍ ନିଙ୍ଘା ନାମେନୁ ବିଶ୍ୱାସ୍ କାମ୍ନାଏ, ଆବ୍ଡ଼ା ଜାମାରିନ୍ ହିୟାଗେ ଲାଗାନ୍ ଆସ୍ ମୁଖ୍ୟା ପୁରୋହିତ୍ ଜାମାର୍ସ୍ତି ଅଧିକାର୍ ହାକ୍କାଦାସ୍।” 15ଲେକିନ୍ ପ୍ରାଭୁସ୍ ଆସିନ୍ ତେଙ୍ଗିୟାସ୍, “କାଲା; ଏନ୍ଦେର୍ଗେ ଆସ୍ ବିନାୟାହୁଦୀଆ, ରାଜା ଆରୁ ଇସ୍ରାଏଲ୍ ଜାମାର୍ଘି ଆଘ୍ଲି ଏଙ୍ଘା ନାମେ ହୁନାଘି ଲାଗାନ୍ ଏଙ୍ଘା ଅଣ୍ଟା ଚାଜ୍ଜକା ଆଲାସ୍। 16ଆରୁ ଏନ୍ ନିଜେ ଆସିନ୍ ତେଙ୍ଗନ୍ କା ଏଙ୍ଘା ନାମେଘି ଲାଗାନ୍ ଆସ୍କେ କେତ୍କ ଦୁଃଖୁ ସାହା ଖାତ୍ରୋ।” 17ଆନ୍ତିନ୍ ହାନ୍ନାନିୟାସ୍ ଉସ୍କାରାଇକିରି ଆ ଆଡ଼୍ପାଗେ କେରାସ୍ ଆରୁ ଶାଉଲ୍ସ୍କି ମିଆଁ ହେଖ୍ଖା ଉଇୟିକିରି ତେଙ୍ଗିୟାସ୍, “ହେ ଭାଇ ଶାଉଲ୍, ପ୍ରାଭୁ ଯୀଶୁସ୍, ଏକାସ୍ ନିଙ୍ଘା ବାର୍ନା ପାବୁନୁ ଦର୍ଶନ୍ ଚିଚ୍ଚାସ୍ ଆସ୍ ଏଙ୍ଗାନ୍ ତାଏକାଦାସ୍ ତାକା ନିନ୍ ଆରୁଅହନ୍ ଏରା ଅଙ୍ଗୟ ଆରୁ ପାବିତାର୍ ଆତ୍ମାତି ଭାର୍ପୁର୍ ମାନୟକୟ।” 18ହୁଙ୍ଗେନିନ୍ ଆସ୍କି ହାନ୍ନୁନ୍ନ୍ତି କାତି ଲେଖା ଏନ୍ଦେଦ୍ ଖାତ୍ରା ଆରୁ ଏରାଗେ ଲାଗ୍ଗିୟାସ୍, ଆରୁ ଆସ୍ ଉସ୍କାରାଇକିରି ଆସ୍ନାନ୍ ଅଚ୍ଚାସ୍। 19ଆରୁ ଆସ୍ ଅନିମହିଁକିରି ଶକ୍ତି ହାଖ୍ଖୀୟାସ୍।
ଶାଉଲ୍ସ୍ ପ୍ରଚାର୍ କାମ୍ନାଘି ନାଲ୍ଖୁନ୍ ସୁରୁ କାମାଲ୍ଦାସ୍
ଶାଉଲ୍ସ୍ ଦାମାସ୍କସ୍ନୁ ଥୋଡ଼େ ଉଲ୍ ଚେଲାଜାମାର୍ଗାନେ ରାଚାସ୍। 20ଆରୁ ଆସ୍ ହୁଙ୍ଗେନିନ୍ ୟାହୁଦୀର୍ଘି ସାଭା ଆଡ଼୍ପାନୁ ଯୀଶୁସ୍କି ପ୍ରଚାର୍ କାମାଗେ ଲାଗ୍ଗିୟାସ୍। ଆସ୍ ତେଙ୍ଗିୟାସ୍ ଯୀଶୁସ୍ ପାର୍ମେଶ୍ୱାର୍ସ୍କି ହାଦ୍ଦୁସ୍। 21ଆରୁ ଏକାର୍ ଆସ୍କି କାତ୍ଥାନ୍ ମେନ୍ଚାର୍ ଆବ୍ଡ଼ାର୍ଜାମାର୍ ଆଚ୍ମିତ୍ ମାନ୍ଚାର୍ କେରାର୍ ଆରୁ ତେଙ୍ଗାଗେ ଲାଗ୍ଗିୟାର୍, “ଇସ୍ କାଁଏ ଆ ଆଲାସ୍ ମାଲ୍ଦାସ୍ ଏକାସ୍ କା ଯେରୁଶାଲେମ୍ନୁ ଯୀଶୁସ୍କି ନାମେନୁ ବିଶ୍ୱାସ୍ କାମୁ ଆଲାରିନ୍ ପିଟା ବେଦ୍ଦାଲିୟାସ୍; ଆରୁ ଇସ୍ ଇସାନ୍ହି ଆବ୍ଡ଼ାର୍ରିନ୍ ହିଁଇକିରି ମୁଖ୍ୟା ପୁରୋହିତ୍ ଜାମାର୍ଘି ଆଘ୍ଲି ହୁଆଗେ ମାଲ୍ଲା ବାରୁସ୍ କାଁଏ?” 22ଲେକିନ୍ ଶାଉଲ୍ସ୍ ଆରୁ ଢେର୍ବାଗ୍ଗେ ଶକ୍ତିତି ଭାର୍ପୁର୍ ମାନ୍ଚାସ୍ କେରାସ୍, ଆରୁ ଯୀଶୁସିନ୍ ଖ୍ରୀସ୍ତ୍ ଇବନ୍ ପ୍ରମାଣ୍ କାମିକିରି ଦାମାସ୍କସ୍ନ୍ତା ୟାହୁଦୀ ଜାମାର୍ଘି ଥୁମ୍ଣାବନ୍ ବନ୍ଦ୍ କାମା ଚାଲିଆସ୍।
ଶାଉଲ୍ସ୍ ୟାହୁଦୀ ଜାମାର୍ସ୍ତି ବାଛ୍ରାଲ୍ଦାସ୍
23ବହୁତ୍ ଉଲ୍ଲା ବିତ୍ର୍କାଘି ପାଛ୍ଲି, ୟାହୁଦୀଜାମାର୍ ମେଶ୍ରିକିରି ଆସିନ୍ ପିଟାଗେ ଉପାୟ କାମ୍ଚାର୍। 24ଲେକିନ୍ ଆବ୍ଡ଼ାର୍ଘି ଉପାୟବନ୍ ଶାଉଲ୍ସ୍ ଆଖ୍ଖେଇଚାସ୍। ଆବ୍ଡ଼ାର୍ ତା ଏସ୍କେ ଆସିନ୍ ପିଟା ଅଙ୍ଗର୍ ଆଦ୍ଘି ଲାଗାନ୍ ଉଲ୍ଲାନ୍ ମାଁହାନ୍ ସହର୍ଘି ଫାଟକ୍ସାନ୍ ଜାଗାଲିୟାର୍। 25ଲେକିନ୍ ତାଙ୍ଘା ଚେଲାଜାମାର୍ ମାଁହାବାକେନ୍ ଆସିନ୍ ହୋଇକିରି ଅଣ୍ଟା ଝାପିନୁ ଅକ୍ତାଚାର୍ ଆରୁ ଘେରାଘି କିୟାଁ ଏତ୍ତେର୍ଚାର୍।
ଯେରୁଶାଲେମ୍ନୁ ଶାଉଲ୍ସ୍
26ଶାଉଲ୍ସ୍ ଯେରୁଶାଲେମ୍ଗେ ଆଣସିକିରି ଚେଲାର୍ଗାନେ ମିଶ୍ରାଗେ କୋଶିଷ୍ କାମାଲିୟାସ୍; ଲେକିନ୍ ଆବ୍ଡ଼ାର୍ଜାମାର୍ ଆସିନ୍ ଏଲ୍ଚାଲିୟାର୍, ଏନ୍ଦେର୍ଗେକା ଆବ୍ଡ଼ାର୍ଗେ ବିଶ୍ୱାସ୍ ମା ଲାଗ୍ଗାଲିୟା କା ଆସ୍ହି ଅଣ୍ଟା ଚେଲାସ୍। 27ଲେକିନ୍ ବାର୍ନାବାସ୍ ଆସିନ୍ ସାଙ୍ଗେନ୍ ହୋଇକିରି ଖାସ୍ଚେଲାଜାମାର୍ଘି ଚାହାଗେ ଅନ୍ଦ୍ରାସ୍ ଆରୁ ଆସ୍ ଆବ୍ଡ଼ାରିନ୍ ତେଙ୍ଗିୟାସ୍ କା ଶାଉଲ୍ସ୍ ପାବୁନୁ ଏସ୍କେ ପ୍ରାଭୁସ୍କି ଦର୍ଶନ୍ ହାଖ୍ଖୀୟାସ୍ ଆରୁ ପ୍ରାଭୁସ୍ ଆସ୍ଗାନେ ଏସ୍କେ କାତ୍ଥା ତେଙ୍କାଚାସ୍; ଆରୁ ଏସ୍କେ ଆସ୍ ଦାମାସ୍କସ୍ନୁ ଯୀଶୁସ୍କି ନାମେନୁ ସାହସ୍ତି ପ୍ରଚାର୍ କାମ୍ଚାସ୍। 28ଆରୁ ଆସ୍ ଖାସ୍ଚେଲାଜାମାର୍ଗାନେ ଯେରୁଶାଲେମ୍ନୁ ଆଜାଦ୍ସେ କାଲା ବାରାଗେ ଲାଗ୍ଗିୟାସ୍, 29ଆରୁ ପ୍ରାଭୁସ୍କି ନାମେତି ସାହସ୍ କାମିକିରି ପ୍ରଚାର୍ କାମାଗେ ଲାଗ୍ଗିୟାସ୍, ଆରୁ ଆସ୍ ଗ୍ରୀକ୍ ଭାଷା କାଚ୍ନେଖ୍ରୁ ୟାହୁଦୀର୍ଗାନେ କାତ୍ଥାବାର୍ତ୍ତା ଆରୁ କାଁଟ୍ଛାଁଟ୍ କାମାଲିୟାସ୍; ଲେକିନ୍ ଆବ୍ଡ଼ାର୍ ଆସିନ୍ ପିଟାଗେ ବେଦ୍ଦାଲିୟାର୍। 30ଇବନ୍ ଆହିକିରି ବିଶ୍ୱାସୀ ଭାଇଜାମାର୍ ଆସିନ୍ କାଇସିରିଆ ସହର୍ଗେ ଅନ୍ଦରାର୍ ବାର୍ଚାର୍ ଆରୁ ଆସିନ୍ ତାର୍ସୁସ୍ ସହର୍ଗେ ତାଇୟେର୍ଚାର୍।
31ଏନ୍ନେନିନ୍ ଜାମା ୟାହୁଦା ପ୍ରଦେଶ୍ ଆରୁ ଗାଲିଲୀ ଆରୁ ସାମାରିଆ ମଣ୍ତ୍ଲୀନ୍ତା ଆ ସାମାୟ ଶାନ୍ତିନୁ ବିତ୍ରା। ଆରୁ ଆ ମଣ୍ତ୍ଲୀଦ୍ ବାଗ୍ଗେ ଶକ୍ତିଶାଲୀ ମାନ୍ତେକେରା; ଏନ୍ଦେର୍ଗେକା ଆ ମଣ୍ତ୍ଲୀଦ୍ ପ୍ରାଭୁସିନ୍ ଏଲ୍ଚିକିରି ତାଙ୍ଘାଏ ଜୀବନ୍ ବିତାବାଲିୟା ଆରୁ ପାବିତାର୍ ଆତ୍ମାଦ୍ ମଣ୍ତ୍ଲୀବନ୍ ଆରୁ ବାଗ୍ଗେ ଉତ୍ସାହିତ୍ କାମ୍ଚା ହୁଦ୍ଘିଲାଗାନ୍ ବିଶ୍ୱାସୀ ଜାମାର୍ଘି ସଂଖ୍ୟା ବାଢ଼୍ର୍ତେ କେରା।
ଲୁଦ୍ ଆରୁ ଯାଫୋନୁ ପାତ୍ରାସ୍ ଯୀଶୁସ୍କି ନାମେନୁ ବେହ୍ମରିୟାରିନ୍ ଚାଙ୍ଗା କାମାଲ୍ଦାସ୍
32ଇଦ୍ଘି ପାଛ୍ଲି ପାତ୍ରାସ୍ ଜାମାତାରା କୁଦ୍ଦତେ-କୁଦ୍ଦତେ ଲୁଦ୍ନ୍ତା ଧାର୍ମିକ୍ ଆଲାର୍ଘି ଚାହାଗେ ବାର୍ଚାସ୍। 33ଆସାନ୍ ଆସ୍ ଏନିୟାସ୍ ନାମେଘି ଅଣ୍ଟା ଆଲାସିନ୍ ହାଖ୍ଖୀୟାସ୍, ଆସ୍ ଆଠ୍ ବଛର୍ତି ନାଟ୍ରୁନୁ ଖାତ୍ର୍କାଚାସ୍; ଆସ୍କେ ଏକ୍ଆଙ୍ଗିୟା ବେମାର୍ ରାଚା। 34ପାତ୍ରାସ୍ ଆସିନ୍ ତେଙ୍ଗିୟାସ୍, “ଏନିୟାସ୍! ଯୀଶୁ ଖ୍ରୀସ୍ତ୍ ନିଙ୍ଗାନ୍ ଚାଙ୍ଗା କାମାଲ୍ଦାସ୍; ଉସ୍କାରା ନିଙ୍ଘା ନାଟ୍ରୁ ଧାରା।” ହୁଙ୍ଗେନିନ୍ ଆସ୍ ଉସ୍କାରାଚାସ୍। 35ଏନିୟାସ୍ସିନ୍ ଏରିକିରି ଲୁଦ୍ ଆରୁ ଶାରୋନ୍ ସହର୍ନ୍ତା ଆଲାର୍ ଜାମାର୍ ପ୍ରାଭୁସ୍କି ମିଆଁ ବିଶ୍ୱାସ୍ କାମ୍ଚାର୍।
36ଯାଫୋନୁ ତାବିଥା ନାମେଘି ଅଣ୍ଟା ବିଶ୍ୱାସୀ ଚେଲା ରାଚା। ତାବିଥାଘି ଗ୍ରୀକ୍ ଅନୁବାଦ୍ଘି ମତ୍ଲବ୍ ଦର୍କା। ଆଦ୍ ବହୁତ୍ ପ୍ରକାର୍ ବାନେ-ବାନେ ନାଲ୍ଖୁ କାମାଲିଆ ଆରୁ ଗରୀବ୍ ଆଲାର୍ଗେ ଦାନ୍ ଚିଆଲିୟାଦ୍। 37ହୁ ସାମାୟନୁ ଆଦ୍ ବେମାର୍ ରାଚା ଆରୁ କେଚ୍ଚାକେରା; ଆଙ୍ଗେନ୍ ଆବ୍ଡ଼ାର୍ ଆଦିନ୍ ଏମ୍ତାଚାର୍ ଆରୁ ଅଣ୍ଟା ମିଁତା ବାଖ୍ରାନୁ କିଦେଇଚାର୍। 38ଆରୁ ଲୁଦ୍ ସହର୍, ଯାଫୋ ସହର୍ଘି ଚାହାନୁ ରାଚା, ଆରୁ ଯେତ୍କବାକେନ୍ ଚେଲାଜାମାର୍ ମେନ୍ଚାର୍ କା ପାତ୍ରାସ୍ ଆସାନ୍ ରାଚାସ୍, ତା ଦୁଇ ଲୋକ୍ ଆଲାରିନ୍ ତାଙ୍ଘା ଚାହାନୁ ତାଇୟିକିରି ଆସିନ୍ ଆର୍ଜୀବିନ୍ତି କାମ୍ଚାର୍, “ଏହ୍ମାସାନ୍ ବାରାଗେ ଡେରି ଆମା କାମା।” 39ହୁଦ୍ଘିଲାଗାନ୍ ପାତ୍ରାସ୍ ଉସ୍କାରାଇକିରି ଆବ୍ଡ଼ାର୍ ଗାନେ କେରାସ୍। ଯେତ୍କବାକେନ୍ ପାତ୍ରାସ୍ ଆସାନ୍ ଆଣସିୟାସ୍ ତା ଆବ୍ଡ଼ାର୍ ଆସିନ୍ ଆ ମିଁତା ବାଖ୍ରାଗେ ଅଚ୍ଚାର୍ କେରାର୍, ଆରୁ ଜାମା ରାଣ୍ଡି ମାଏକିନିଆଁର୍ ଆସିନ୍ ଘେରିକିରି ଅହ୍ଲାଗେ ଲାଗ୍ଗିୟାର୍, ଆରୁ ଦର୍କା ଆବ୍ଡ଼ାର୍ ଗାନେ ରାନାବାକେନ୍ ଏକା ସାପ୍ଫା ମିର୍ଜୀ ଆରୁ ଚିଢ଼ା ତିୟାର୍ କାମ୍ଚ୍କିଚା, ଆବ୍ଡ଼ାନ୍ ଜାମାନ୍ ଏଦାଗେ ଲାଗ୍ଗିୟାର୍। 40ଲେକିନ୍ ପାତ୍ରାସ୍ ଜାମାରିନ୍ ବାହାରି ଅଥ୍ରିକିରି ହାଁଠୁୱାରାଇକିରି ବିନ୍ତି କାମ୍ଚାସ୍, ଆରୁ ମାଁଣାତାରା କିର୍ରେ ଏରିକିରି ତେଙ୍ଗିୟାସ୍, “ହେ ତାବିଥା ଉସ୍କାରୁ।” ଆଙ୍ଗେନ୍ ଆଦ୍ ହାନ୍ନୁ ଖୋଲ୍ଚା; ଆରୁ ପାତ୍ରାସ୍ସିନ୍ ଏରିକିରି ଉସ୍କାରିକିରି ଅକ୍କିୟା। 41ଆରୁ ଆସ୍ ଆ ଆଲିନ୍ ହେଖ୍ଖା ଧାରିକିରି ଉଠାବାଚାସ୍। ଆରୁ ଧାର୍ମିକ୍ ଆରୁ ରାଣ୍ଡିଜାମାରିନ୍ ମେହିଁକିରି ଆବ୍ଡ଼ାରିନ୍ ଆବନ୍ ଉଜ୍ଜକା ଏଦିୟାସ୍। 42ଇ କାତ୍ଥା ଯାଫୋଘି ଜାମାତାରା ଫାଏଲାରାଚା କେରା; ଆରୁ ବହୁତ୍ ଆଲାର୍ ପ୍ରାଭୁସ୍କି ମିଆଁ ବିଶ୍ୱାସ୍ କାମ୍ଚାର୍। 43ଆରୁ ପାତ୍ରାସ୍ ଯାଫୋନୁ ଢେର୍ଦିନ୍ ଶିମୋନ୍ ନାମେଘି ଅଣ୍ଟା ଚାପ୍ଟାତି ନାଲ୍ଖୁ କାମ୍ନାବାଲା ଆଲାସ୍ସାନ୍ ରାଚାସ୍।
10ପାତ୍ରାସ୍କି କର୍ନେଲିୟୁସ୍ ଗାନେ ଭେଁଟ୍ ମାନ୍ନା
1କାଇସିରିଆ ସହର୍ନୁ କର୍ନେଲିୟୁସ୍ ନାମେଘି ଅଣ୍ଟା ଆଲାସ୍ ରାଚାସ୍, ଏକାସ୍ କା ଇଟାଲୀୟ ନାମେଘି ସିପାହୀଜାମାର୍ଘି ମୁଖ୍ୟା ରାଚାସ୍। 2ଆସ୍ ଧାର୍ମିକ୍ ରାଚାସ୍, ଆରୁ ନିଜର୍ ପୁରା ପରିବାର୍ଗାନେ ପାର୍ମେଶ୍ୱାର୍ସିନ୍ ଏଲ୍ଚାଲିୟାର୍ ଆରୁ ଗରୀବ୍ ଦୁଃଖି ଆଲାର୍ଗେ ବାଗ୍ଗେ ଦାନ୍ ଚିଆଲିୟାସ୍। ଆରୁ ଲାଗାତାର୍ ପାର୍ମେଶ୍ୱାର୍ସାନ୍ ବିନ୍ତି କାମାଲିୟାସ୍। 3ଅନ୍ଦୁଲ୍ ଆଡ଼୍ତି ବିଡ଼ିନ୍ତା ଲାଗ୍ଭାଗ୍ ତିନ୍ବାଜେଗେ ଆସ୍ ଅଣ୍ଟା ଦର୍ଶନ୍ ହାଖ୍ଖୀୟାସ୍, ଆସ୍ ସାଫା-ସାଫା ଏରିୟାସ୍ କା ପାର୍ମେଶ୍ୱାର୍ସ୍କି ଅଣ୍ଟା ସରଗ୍ଦୂଁତ୍ ଆସ୍କି ଚାହାନୁ ବାରିକିରି ତେଙ୍ଗିୟାଦ୍, “ହେ କର୍ନେଲିୟୁସ୍!” 4କର୍ନେଲିୟୁସ୍ ସରଗ୍ ଦୂଁତ୍ବନ୍ ଧ୍ୟାନ୍ସେ ଏରିକିରି ଏଲ୍ଚ୍କାତି ତେଙ୍ଗିୟାସ୍, “ହେ ପ୍ରାଭୁ, ଏନ୍ଦେର୍?” ସରଗ୍ଦୂଁତ୍ ଆସିନ୍ ତେଙ୍ଗିୟାଦ୍, “ନିଙ୍ଘା ବିନ୍ତି ଆରୁ ଗରୀବ୍ ଦୁଃଖିର୍ଗେ ଚିଚ୍କା ନିଙ୍ଘା ଦାନ୍ ନିଙ୍ଗାନ୍ ମନେ କାମାଗେ ପାର୍ମେଶ୍ୱାର୍ସ୍କି ଚାହାଗେ ଆଣସ୍କିଚି; 5ଆରୁ ଆକ୍କୁନ୍ ଯାଫୋ ସହର୍ଗେ ଆଲ୍ ତାୟିଇକିରି ଶିମୋନ୍ସିନ୍ ମେହଁତା, ଏକାସିନ୍ କା ପାତ୍ରାସ୍ ବାନାଏ। 6ଆସ୍ ଶିମୋନ୍ ନାମେଘି ଅଣ୍ଟା, ଚାପ୍ଟାଘି ବେପାର୍ କାମ୍ନାବାଲା ଆଲାସାନ୍ ପାହି ରାଦାସ୍, ଏକାସ୍କି ଆଡ଼୍ପା କା ସାମ୍ଧୁର୍ ଖାଁଣିନୁ ରାଇ।” 7ଯେତ୍କବାକେନ୍ ଆ ସରଗ୍ଦୂଁତ୍ ଏକାଦ୍ କା ଆସ୍ଗାନେ କାତ୍ଥା କାମାଲିଆ ବୁଙ୍ଗିୟା କେରା ତା, କର୍ନେଲିୟୁସ୍ ତାଙ୍ଘା ଦୁଇ ଲୋକ୍ ଗୁତ୍ତିୟାରିନ୍, ଆରୁ ନେଦ୍ ଆସ୍କି ସେବା କାମାଲିଆର୍ ଆବ୍ଡ଼ାର୍ସ୍ତି ଅଣ୍ଟା ଧାର୍ମିକ୍ ସିପାହୀସିନ୍ ମେଁହିୟାସ୍, 8ଆରୁ ଆବ୍ଡ଼ାରିନ୍ ଏକାଦ୍ ଘାଟ୍ର୍କିଚା ଆବ୍ଡ଼ା ଜାମା କାତ୍ଥାନ୍ ତେଙ୍ଗିକିରି ଯାଫୋ ସହର୍ଗେ ତାଇୟାସ୍।
ପାତ୍ରାସ୍ ଦର୍ଶନ୍ ଏରାଲ୍ଦାସ୍
9ନାନ୍ନୁ ଉଲ୍ଲା ଯେତ୍କବାକେନ୍ ଆବ୍ଡ଼ାର୍ ଏକ୍ତେ-ଏକ୍ତେ ସହର୍ଘି ଚାହାନୁ ଆଣସିୟାର୍, ତା ଲାଗ୍ଭାଗ୍ ବାର ବାଜେଗେ ପାତ୍ରାସ୍ ଛାତ୍ ମିଆଁ ବିନ୍ତି କାମାଗେ ଆର୍ଗିୟାସ୍। 10ଆସ୍କେ କୀଡ଼ା ଲାଗ୍ଗିୟା ଆରୁ ଏନ୍ଦ୍ରିନ୍ ମହାଗେ ବେଦ୍ଦାଲିୟାସ୍, ଲେକିନ୍ ଯେତ୍କବାକେନ୍ ଆବ୍ଡ଼ାର୍ ଅନ୍ନାମହ୍ନା ତିଆର୍ କାମାଲିଆର୍ ତା ଆସ୍ ବେହସ୍ ମାନ୍ଚାସ୍ କେରାସ୍; 11ଆରୁ ଆସ୍ ଏରିୟାସ୍, କା ଆକାଶ୍ ଖୋଲ୍ରା କେରା; ଆରୁ ଅଣ୍ଟା ବାଡ଼୍କା ଚାଦର୍ ଲେଖା ଏନ୍ଦେର୍ ଜିନିଷ୍ଦ୍ କିୟାଁ ଏତ୍ତାଲିୟାଦ୍। ଆବନ୍ ଚାରି କୋଣାନୁ ଧାରିକିରି, ଦୁନିଆଁନୁ ଏତ୍ତ୍ତା ଚାଲିୟାର୍। 12ଆନ୍ନୁ ଦୁନିଆଁନ୍ତା ଜାମା ପ୍ରକାର୍ଘି ପଶୁ ଆରୁ ହେଁହ୍ଲାନୁ ଏକ୍ନା ବାଲା ଜାନ୍ତୁ ଆରୁ ଆକାଶ୍ ତା ଓଡ଼ା ରାଚା। 13ଆନ୍ତିନ୍ ଆସ୍କେ ଅଣ୍ଟା ଏନ୍ନେ ଶବଦ୍ ମେନ୍ଦ୍ରାଦ୍, “ହେ ପାତ୍ରାସ୍ ଉସ୍କାରା, ପିଟା ଆରୁ ମହାଁ।” 14ଲେକିନ୍ ପାତ୍ରାସ୍ ତେଙ୍ଗିୟାସ୍, “ମାଲ୍ଲା ପ୍ରାଭୁ ବିଲ୍କୁଲ୍ ମାଲ୍ଲା, ଏନ୍ଦେର୍ଗେକା ଏନ୍ ଏକ୍ଲାହି ଆ ପାବିତାର୍ ଆରୁ ଅଶୁଦ୍ଧ୍ ଜିନିଷ୍ ମାଲ୍ଲା ମହୁଁନ୍।” 15ଆନ୍ତିନ୍ ଦୁସ୍ରାଥର୍ ଆସ୍କେ ଶବଦ୍ ମେନ୍ଦ୍ରା, “ଏନ୍ଦ୍ରିନ୍ ଜିନିଷ୍ବନ୍ ଏକାନ୍ ପାର୍ମେଶ୍ୱାର୍ସ୍ ଶୁଦ୍ଧ୍ ଠାହ୍ରାଚ୍କାଦାସ୍, ଆବନ୍ ନିନ୍ ଅଶୁଦ୍ଧ୍ ଆମା ବା।” 16ତିନ୍ ଥର୍ ଏନ୍ନେନିନ୍ ମାନ୍ଚା; ଆନ୍ତିନ୍ ହୁଙ୍ଗେନିନ୍ ଆ ଜିନିଷ୍ବନ୍ ଆକାଶ୍ଗେ ଟେକା ହୁଆକେରା।
17ଯେତ୍କବାକେନ୍ ପାତ୍ରାସ୍ ନିଜର୍ ମନ୍ନୁ ସୋଚାଲିୟାସ୍, କା ଇ ଦର୍ଶନ୍ବନ୍ ଏନ୍ ଏର୍କାନ୍ ଆଦ୍ ଏନ୍ଦେର୍ ମାନା ଅଙ୍ଗି, ତା ଏରା, ଆ ଆଲାର୍ ଏକାରିନ୍ କର୍ନେଲିୟୁସ୍ ତାଏକାଚାସ୍, ଶିମୋନ୍ସ୍କି ଆଡ଼୍ପାବନ୍ ପାତା ଲାଗାବାଇକିରି ଘୁମାନୁ ବାରିକିରି ଇଜ୍ଜାର୍କେରାର୍। 18ଆରୁ ଚିର୍ରା ରାଇକିରି ମେନାଗେ ଲାଗ୍ଗିୟାର୍, “ଶିମୋନ୍ସ୍ ଏକାସିନ୍କା ପାତ୍ରାସ୍ ବାନାଏ, ଆସ୍ ଇସାନ୍ ପାହି ରାଦାସ୍ କାଁଏ?” 19ପାତ୍ରାସ୍ ଆ ଦର୍ଶନ୍ଘି ବାରେ ସୋଚାଲିୟାସ୍, କା ପାବିତାର୍ ଆତ୍ମାଦ୍ ଆସିନ୍ ତେଙ୍ଗିୟା, “ହେ ଶିମୋନ୍ ଏରା, ତିନ୍ ଲୋକ୍ ଆଲାର୍ ନିଙ୍ଗାନ୍ ବେଦ୍ଦାଲ୍ନାଏ। 20ହୁଦ୍ଘିଲାଗାନ୍ ଉସ୍କାରା ଆରୁ କିୟାଁ କାଲା, ଆରୁ ଏନ୍ଦେର୍ହି ମା ସୋଚିକିରି ଆବ୍ଡ଼ାର୍ ଗାନେ କାଲା; ଏନ୍ଦେର୍ଗେକା ଏନ୍ ଆବ୍ଡ଼ାର୍ରିନ୍ ତାଏକାଦାନ୍।” 21ଆଙ୍ଗେନ୍ ପାତ୍ରାସ୍ କିୟାଁ ଏତ୍ତିୟାସ୍ ଆରୁ ଆ ଆଲାରିନ୍ ତେଙ୍ଗିୟାସ୍, “ଏରା, ଏକାସିନ୍ ନିମ୍ ବେଦ୍ଦାଲ୍ଦାର୍, ଆ ଆଲାନ୍ ଏନିନ୍। ନିମ୍ ଏନ୍ଦେର୍ଗେ ବାର୍ଚ୍କାଦାର୍?” 22ଆବ୍ଡ଼ାର୍ ତେଙ୍ଗିୟାର୍, “ସିପାହୀଜାମାର୍ଘି ମୁଖ୍ୟା କର୍ନେଲିୟୁସ୍ ଏମାନ୍ ତାଏକାଦାସ୍। ଏକାସ୍ କା ପାର୍ମେଶ୍ୱାର୍ସିନ୍ ଏଲ୍ଚ୍ନା ବାଲା ଧାର୍ମିକ୍ ଆଲାସ୍ ଆରୁ ଜାମା ୟାହୁଦୀ ଆଲାର୍ ଆସିନ୍ ଆଦର୍ କାମ୍ନାଏ, ଆସିନ୍ ଅଣ୍ଟା ପାବିତାର୍ ସରଗ୍ଦୂଁତ୍ ନିମାନ୍ ତାଙ୍ଘା ଆଡ଼୍ପା ମେହିଁକିରି ନିହ୍ମାସ୍ତି ବଚନ୍ ମେନାଗେ ତେଙ୍ଗିୟା।” 23ଆଙ୍ଗେନ୍ ପାତ୍ରାସ୍ ଆବ୍ଡ଼ାରିନ୍ ଉଲା ମେହିଁକିରି ପାହି କାମ୍ଚାସ୍।
ପାତ୍ରାସ୍ କର୍ନେଲିୟୁସ୍କି ଆଡ଼୍ପା କାଇକିରି ସୁସାମାଚାର୍ ଶୁଣାବାଲ୍ଦାସ୍
ଆଦ୍ଘି ନାନ୍ନୁ ଉଲ୍ଲା ପାତ୍ରାସ୍ ଆବ୍ଡ଼ାର୍ ଗାନେ କେରାସ୍, ଆରୁ ଯାଫୋ ସହର୍ନ୍ତା ଭାଇ ଜାମାର୍ଘି ଭିତର୍ତି କେତ୍କ ଲୋକ୍ହି ଆବ୍ଡ଼ାର୍ ଗାନେ କେରାର୍। 24ଦୁସ୍ରା ଉଲ୍ଲା ଆବ୍ଡ଼ାର୍ କାଇସିରିଆ ସହର୍ଗେ ଆଣସିୟାର୍, ଆରୁ କର୍ନେଲିୟୁସ୍ ନିଜର୍ ଜାତି ବନ୍ଧୁରିନ୍ ଆରୁ ନିଜର୍ ଖାସ୍ ସାଙ୍ଗେରିନ୍ ଠୁଡ଼ିୟିକିରି ଆବ୍ଡ଼ାର୍ଘି ପାବୁ ଏରାଲିୟାସ୍। 25ଯେତ୍କବାକେନ୍ ପାତ୍ରାସ୍ ଉଲା କରାଲିୟାସ୍ ତା, କର୍ନେଲିୟୁସ୍ ଆସିନ୍ ଭେଁଟ୍ ମାନ୍ଚାସ୍, ଆରୁ ଆସ୍କି ହେଡ୍ଡୁ ମୂଲିନୁ ଖାତ୍ରିକିରି ଯୋହାର୍ କାମ୍ଚାସ୍; 26ଲେକିନ୍ ପାତ୍ରାସ୍ ଆସିନ୍ ଉଠାବାଇକିରି ତେଙ୍ଗିୟାସ୍, “ଇଲା, ଏନ୍ହି ତା ଅଣ୍ଟା ଆଲାନ୍।” 27ଆରୁ ଆସ୍ଗାନେ କାତ୍ଥାବାର୍ତ୍ତା କାମ୍ତେ-କାମ୍ତେ ଉଲା କେରାସ୍, ଆରୁ ଢେର୍ ଆଲାରିନ୍ ଠୁଡ଼ିୟାରାଚ୍କା ଏରିୟାସ୍। 28ପାତ୍ରାସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ଆହ୍ଦାର୍ କା ଅଣ୍ଟା ୟାହୁଦୀସ୍ଗେ ଦୁସ୍ରା ଜାତିୟାର୍ଗାନେ ମେଶ୍ର୍ନା ଆରୁ ଆସ୍କିସାନ୍ କାନା ୟାହୁଦୀ ନିୟମ୍ଘି ବିରୁଦ୍ଧ୍, ଲେକିନ୍ ପାର୍ମେଶ୍ୱାର୍ସ୍ ଏଙ୍ଗାନ୍ ତେଙ୍କାଦାସ୍ କା ଏନ୍ ଏକା ଆଲାରିନ୍ହି ଆ ପାବିତାର୍ ଆରୁ ଅଶୁଦ୍ଧ୍ ମା ତେଙ୍ଗ୍ଦାନ୍। 29ହୁଦ୍ଘିଲାଗାନ୍ ଏଙ୍ଗାନ୍ ଯେତ୍କବାକେନ୍ ମେହାଁକେରା ତା ଏନ୍ ଏନ୍ଦେର୍ହି ମା ସୋଚିକିରି ବାର୍ଚ୍କାନ୍। ହୁଦ୍ଘିଲାଗାନ୍ ଆକ୍କୁନ୍ ଏନ୍ ମେନାଲ୍ଦାନ୍ କା ନିମ୍ ଏଙ୍ଗାନ୍ ଏନ୍ଦେର୍ ନାଲ୍ଖୁଘି ଲାଗାନ୍ ମେହଁକାଦାର୍?”
30ଆଙ୍ଗେନ୍ କର୍ନେଲିୟୁସ୍ ତେଙ୍ଗିୟାସ୍, “ଚାର୍ ଦିନ୍ଘି ଆଘ୍ଲି ଠିକ୍ ଏତ୍କ ବାକେନ୍ ଆଡ଼୍ତି ବିଡ଼ିନ୍ତା ତିନ୍ ବାଜେ ଏନ୍ ଏଙ୍ଘା ଆଡ଼୍ପାନୁ ବିନ୍ତି କାମାଲ୍କାନ୍; ତା ଏରା, ଅହ୍ନାସାରେନ୍ ଅଣ୍ଟା ଆଲାସ୍ ବିଲ୍ଚ୍ନା ଚିଢ଼ା ଆତ୍ତିକିରି ଏଙ୍ଘା ଆଘ୍ଲି ବାରିକିରି ଇଜ୍ଜାସ୍। 31ଆରୁ ତେଙ୍ଗାଗେ ଲାଗ୍ଗିୟାସ୍, ‘ହେ କର୍ନେଲିୟୁସ୍, ନିଙ୍ଘା ବିନ୍ତି ମେନା କେର୍କିଚି ଆରୁ ଗରୀବ୍ ଦୁଃଖିର୍ଗେ ଚିଚ୍କା ନିଙ୍ଘାଏ ଦାନ୍ ପାର୍ମେଶ୍ୱାର୍ସ୍କି ଚାହାନୁ ମନେ କାମା କେର୍କିଚି। 32ହୁଦ୍ଘିଲାଗାନ୍ ନେକିନ୍ ନିନ୍ ଯାଫୋ ସହର୍ ତାଇୟିକିରି ଶିମୋନ୍ସ୍ସିନ୍ ନେକାନ୍ କା ପାତ୍ରାସ୍ ବାନାଏ ମେହାଁଅନ୍ଦ୍ରା। ଆସ୍ ସାମ୍ଧୁର୍ଘି ଖାଁଣିନୁ ଚାପ୍ଟାଘି ବେପାର୍ କାମ୍ନାବାଲା ଶିମୋନ୍ସ୍କି ଆଡ଼୍ପାନୁ ପାହି ରାଦାସ୍।’ 33ହୁଦ୍ଘିଲାଗାନ୍ ଏନ୍ ହୁଙ୍ଗେନିନ୍ ଆଲାରିନ୍ ନିଙ୍ଘାସାନ୍ ତାଏକାନ୍ ଆରୁ ନିନ୍ ଇସାନ୍ ବାରିକିରି ବହୁତ୍ ବାନେ କାମ୍ଚ୍କାଏ। ହୁଦ୍ଘିଲାଗାନ୍ ଆକ୍କୁନ୍ ପ୍ରାଭୁସ୍ ନିଙ୍ଗାନ୍ ଯେତ୍କ ତେଙ୍କାଦାସ୍ ଆବ୍ଡ଼ା ଜାମାନ୍ ମେନାଗେ ଏମ୍ ଜାମାମ୍ ଇସାନ୍ ପାର୍ମେଶ୍ୱାର୍ସ୍କି ଆଘ୍ଲି ରାଦାମ୍।”
କର୍ନେଲିୟୁସ୍କି ଆଡ଼୍ପାନୁ ପାତ୍ରାସ୍ ଉପ୍ଦେଶ୍ ଚିଆଲ୍ଦାସ୍
34ଆନ୍ତିନ୍ ପାତ୍ରାସ୍ ତେଙ୍ଗିୟାସ୍, “ଆକ୍କୁନ୍ ଏନ୍ ବାନେକିରି ଆକ୍କାନ୍ କା ପାର୍ମେଶ୍ୱାର୍ସ୍ ନେଖା ପାଖାହି ମା ମାନ୍ଦାସ୍। 35ଲେକିନ୍ ଜାମା ଜାତିନ୍ତାର୍ ନେଦିନ୍ ଆସିନ୍ ଏଲ୍ଚ୍ନାଏ ଆରୁ ବାନେ ନାଲ୍ଖୁ କାମ୍ନାଏ, ଆବ୍ଡ଼ାରିନ୍ ଆସ୍ ଗ୍ରହନ୍ କାମ୍ଦାସ୍। 36ନିମ୍ ଆହ୍ଦାର୍ କା ଏକା ବଚନ୍ ଆସ୍ ଇସ୍ରାଏଲ୍ ଜାମାର୍ଘି ଚାହାନୁ ତାଇୟାସ୍, ଇଦ୍ ଆ ସନ୍ଦେଶ୍ ଏକାନ୍ କା ଆସ୍ ଯୀଶୁ ଖ୍ରୀସ୍ତ୍କି ଦ୍ୱାର୍ନୁ ଶାନ୍ତିଘି ସୁସାମାଚାର୍ ଶୁଣାବାଚାସ୍। (ଏକାସ୍ କା ଆସ୍ ଜାମାର୍ଘି ପ୍ରାଭୁସ୍।) 37ଇ ଘାଟ୍ଣାବନ୍ ନିମ୍ ଆହ୍ଦାର୍, ଏକାଦ୍ କା ଆସ୍ନାନ୍ ଚିଉ ଯୋହାନ୍ସ୍କି ପ୍ରଚାର୍ଘି ପାଛ୍ଲି ଗାଲିଲୀନ୍ତି ସୁରୁ ମାନିକିରି ଜାମା ୟାହୁଦା ପ୍ରଦେଶ୍ନୁ ଫାଇଲାରାଚାକେରା: 38ନିମ୍ ନାଜ୍ରେତ୍ତା ଯୀଶୁସ୍କି ବାରେ ଆହ୍ଦାର୍ କା ପାର୍ମେଶ୍ୱାର୍ସ୍ ଆସିନ୍ ପାବିତାର୍ ଆତ୍ମା ଆରୁ ଶକ୍ତିତି ଆଭିଷେକ୍ କାମ୍ଚାସ୍। ଆସ୍ ବାନେ ନାଲ୍ଖୁ କାମ୍ତେ-କାମ୍ତେ ଆରୁ ଜାମାରିନ୍ ଏକାର୍ କା ଶାଏତାନ୍ଘି କାବ୍ଜାନୁ ରାଚାର୍, ଆବ୍ଡ଼ାରିନ୍ ଚାଙ୍ଗା କାମ୍ତେ-କାମ୍ତେ ଏସ୍କେ ଜାମାତାରା କୁଦ୍ଦାଲିୟାସ୍। ଏନ୍ଦେର୍ଗେକା ପାର୍ମେଶ୍ୱାର୍ସ୍ ଆସ୍ଗାନେ ରାଚାସ୍।”
39“ଏମ୍ ଆ ଜାମା ନାଲ୍ଖୁଘି ସାକ୍ଷୀମ୍; ଏକାନ୍ କା ଆସ୍ ୟାହୁଦୀ ପ୍ରଦେଶ୍ ଆରୁ ଯେରୁଶାଲେମ୍ନୁହି କାମ୍ଚାସ୍ ଆରୁ ଆବ୍ଡ଼ାର୍ ଆସିନ୍ କ୍ରୁଶ୍ନୁ ଟାଙ୍ଗ୍ଚେଇଚାର୍ ଆରୁ ପିଟ୍ଟେଇଚାର୍। 40ଲେକିନ୍ ପାର୍ମେଶ୍ୱାର୍ସ୍ ତିନ୍ ଦିନ୍ନୁ ଆସିନ୍ ଉଜ୍ଜତାଚାସ୍ ଆରୁ ପ୍ରକଟ୍ହି କାମ୍ଚାସ୍। 41ଜାମା ଆଲାର୍ସାନ୍ ମାଲ୍ଲା ଲେକିନ୍ ପାର୍ମେଶ୍ୱାର୍ସ୍ ଆଘ୍ଲିନ୍ତି ତାଙ୍ଘା ସାକ୍ଷୀ ଚିୟାଗେ ଏମାନ୍ ଚାଜ୍ଜକାଚାସ୍, ଏନ୍ଦେର୍ଗେକା ଏମ୍ ଯୀଶୁସ୍କି କେଚ୍ଚକାନ୍ତି ଉଜ୍ଜକାଘି ପାଛ୍ଲି ଆସ୍ଗାନେ ଅଣ୍ଡକାମ୍ ମକ୍କାମ୍। 42ଆରୁ ଇ ଯୀଶୁସିନ୍ ଏମାନ୍ ହୁକୁମ୍ ଚିଚ୍କାଦାସ୍ କା ଏମ୍ ଆଲାରିନ୍ ଉପ୍ଦେଶ୍ ଚିଅମ୍ ଆରୁ ଇସ୍ ଆସିନ୍ ବୁଲି ସାକ୍ଷୀ ଚିଅମ୍, ଏକାସିନ୍ କା ପାର୍ମେଶ୍ୱାର୍ସ୍ ଖିଉ ଆରୁ ଉଜ୍ଜୁ ଆଲାର୍ଘି ନ୍ୟାୟ କାମାଗେ ଚାଜ୍ଜକାଦାସ୍। 43ଆସ୍କି ବାରେ ଜାମା ନାବୀର୍ ସାକ୍ଷୀ ଚିଚ୍ଚକାନାଏ କା ନେଦିନ୍ ଯୀଶୁ ଖ୍ରୀସ୍ତ୍ସ୍କି ମିଆଁ ବିଶ୍ୱାସ୍ କାମର୍, ଆସ୍କେ ଆସ୍କି ନାମେନୁ ପାପ୍ ଛେମା ହାଖ୍ଖର।”
ବିନାୟାହୁଦୀର୍ଘି ମିଆଁ ପାବିତାର୍ ଆତ୍ମା ଏତ୍ତାଲି
44ପାତ୍ରାସ୍ ଇ କାତ୍ଥାନ୍ ତେଙ୍ଗାଲିୟାସିନ୍ କା ଯେତ୍କ ଆଲାର୍ ତାଙ୍ଘା ବଚନ୍ ମେନାଲିୟାର୍ ଆବ୍ଡ଼ାର୍ଘି ମିଆଁ ପାବିତାର୍ ଆତ୍ମା ଏତ୍ତିୟା। 45ଆଙ୍ଗେନ୍ ୟାହୁଦୀ ବିଶ୍ୱାସୀର୍ ଏକାର୍ ପାତ୍ରାସ୍ଗାନେ ବାର୍ଚ୍କାଚାର୍, ବିନାୟାହୁଦୀର୍ଘି ମିଆଁହି ପାବିତାର୍ ଆତ୍ମାଘି ବାର୍ଦାନ୍ ଚିଆ କେର୍କିଚି, ଇବନ୍ ଏରିକିରି ଆବ୍ଡ଼ାର୍ଜାମାର୍ ଆଚ୍ମିତ୍ ମାନ୍ଚାର୍ କେରାର୍। 46ଏନ୍ଦେର୍ଗେକା ଆବ୍ଡ଼ାର୍ ଆବ୍ଡ଼ାରିନ୍ ଭିନେ-ଭିନେ ଭାଷାନୁ ତେଙ୍ଗ୍ନାନ୍, ଆରୁ ପାର୍ମେଶ୍ୱାର୍ସ୍କି ମାହିମା ସ୍ତୁତି କାମ୍ନାନ୍ ମେନାଲିୟାର୍। ଆଙ୍ଗେନ୍ ପାତ୍ରାସ୍ ତେଙ୍ଗିୟାସ୍, 47“ଇବ୍ଡ଼ାରିନ୍ ଆସ୍ନାନ୍ ଚିୟାଗେ ନେଦିନ୍ ଆମ୍ମୁବନ୍ ରୋକା ଅଙ୍ଗର୍ କାଁଏ, ଏକାର୍ କା ନାହ୍ମା ଲେଖା ପାବିତାର୍ ଆତ୍ମା ହାକ୍କାନାଏ?” 48ଆରୁ ପାତ୍ରାସ୍ ଆବ୍ଡ଼ାରିନ୍ ଯୀଶୁ ଖ୍ରୀସ୍ତ୍ସ୍କି ଆସ୍ନାନ୍ ଚିୟାଗେ ହୁକୁମ୍ ଚିଚ୍ଚାସ୍। ଆନ୍ତିନ୍ କର୍ନେଲିୟୁସ୍ ଆରୁ ତାଙ୍ଘା ସାଙ୍ଗେର୍ ପାତ୍ରାସ୍ସିନ୍ ଆର୍ଜୀବିନ୍ତି କାମ୍ଚାର୍, କା ଆସ୍ ଥୋଡ଼େ ଉଲ୍ ତାହ୍ମାଗାନେ ରସ୍।
11ଯେରୁଶାଲେମ୍ ତା ମଣ୍ତ୍ଲୀନୁ ପାତ୍ରାସ୍ ଉପ୍ଦେଶ୍ ଚିଆଲ୍ଦାସ୍
1ଆନ୍ତିନ୍ ଖାସ୍ଚେଲାଜାମାର୍ ଆରୁ ୟାହୁଦା ପ୍ରଦେଶ୍ନ୍ତା ଭାଇଜାମାର୍ ମେନ୍ଚାର୍ କା ବିନାୟାହୁଦୀ ଜାମାର୍ହି ପାର୍ମେଶ୍ୱାର୍ସ୍କି ବଚନ୍ବନ୍ ଗ୍ରହନ୍ କାମ୍ଚ୍କାନାଏ, 2ତା ଯେତ୍କବାକେନ୍ ପାତ୍ରାସ୍ ଯେରୁଶାଲେମ୍ଗେ ବାର୍ଚାସ୍, ହତ୍କବାକେନ୍ ୟାହୁଦୀ ବିଶ୍ୱାସୀଜାମାର୍ ଆସ୍ଗାନେ ଆଲୋଚନା କାମାଗେ ଲାଗ୍ଗିୟାର୍। 3ଆରୁ ତେଙ୍ଗିୟାର୍, “ନିନ୍ ବିନାୟାହୁଦୀ ଆଲାର୍ଘି ଆଡ଼୍ପାନୁ କାଇକିରି ଆବ୍ଡ଼ାର୍ ଗାନେ ଅଣ୍ଡକାଏ ମକ୍କାଏ।” 4ଆଙ୍ଗେନ୍ ପାତ୍ରାସ୍ ଆବ୍ଡ଼ାରିନ୍ ସୁରୁନ୍ତି ଆଖ୍ରୀତକ୍ ବୁଝାବାଇକିରି ତେଙ୍ଗାଗେ ଲାଗ୍ଗିୟାସ୍, 5“ଯେତ୍କବାକେନ୍ ଏନ୍ ଯାଫୋ ସହର୍ନୁ ବିନ୍ତି କାମାଲ୍କାନ୍, ହତ୍କବାକେନ୍ ବେହସ୍ ମାନିକିରି ଅଣ୍ଟା ଦର୍ଶନ୍ ହାକ୍କାନ୍, କା ଅଣ୍ଟା ବାଡ଼୍କା ଚାଦର୍ ଲେଖା ଏନ୍ଦେର୍ ଜିନିଷ୍ ଆକାଶ୍ତି କିୟାଁ ଏତ୍ତାଲି। ଆବନ୍ ଚାରି କୋଣାନ୍ ଧାରିକିରି ଆକାଶ୍ତି କିୟାଁ ଏତ୍ତାଚାଲିୟାର୍, ଆରୁ ଆଦ୍ ଏତ୍ତିକିରି ଏଙ୍ଘା ଚାହାଗେ ବାର୍ଚା। 6ଯେତ୍କବାକେନ୍ ଏନ୍ ଆବନ୍ ଧ୍ୟାନ୍ସେ ଏର୍କାନ୍ ତା ଆନ୍ନୁ ଦୁନିଆଁନ୍ତା ନାହ୍ଟା ହେଡ୍ଡୁ ରାନା ପଶୁ, ଜଙ୍ଗଲ୍ ତା ପଶୁ, ନେର୍ରୁଗୁଠିନ୍ ଆରୁ ଆକାଶ୍ ତା ଓଡ଼ା ଗୁଠିନ୍ ଏର୍କାନ୍। 7ଆରୁ ଏନ୍ ଏନ୍ନେ ଅଣ୍ଟା ଶବଦ୍ ମେନ୍ଚ୍କାନ୍, ‘ହେ ପାତ୍ରାସ୍ ଉସ୍କାରା, ପିଟା ଆରୁ ମହାଁ।’ 8ଲେକିନ୍ ଏନ୍ ତେଙ୍କାନ୍, ‘ମାଲ୍ଲା ପ୍ରାଭୁ, ବିଲ୍କୁସ୍ ମାଲ୍ଲା ଏନ୍ଦେର୍ଗେକା ଏନ୍ଦେର୍ହି ଆ ପାବିତାର୍ ଚାହେ ଅଶୁଦ୍ଧ୍ ଜିନିଷ୍ ଏଙ୍ଘା ଥୁମ୍ଣାନୁ ଏକ୍ଲାହି ମାଲ୍ଲା କରୁ।’ 9ଆଙ୍ଗେନ୍ ଦୁସ୍ରାଥର୍ ଆକାଶ୍ସ୍ତି ଶବଦ୍ ମେନ୍ଦ୍ରା, ‘ପାର୍ମେଶ୍ୱାର୍ସ୍ ଏକାନ୍ ଶୁଦ୍ଧ୍ ଠାହ୍ରାଚ୍କାଦାସ୍, ଆବନ୍ ନିନ୍ ଅଶୁଦ୍ଧ୍ ବୁଲି ଆମାତେଙ୍ଗା।’ 10ତିନ୍ ଥର୍ ଏନ୍ନେନିନ୍ ମାନ୍ଚା; ଆନ୍ତିନ୍ ଜାମାନ୍ ଆକାଶ୍ତାରା ଆରୁଅହନ୍ ହୁଆକେରା।”
11“ଆରୁ ଏରା, ହୁଙ୍ଗେନିନ୍ କାଇସିରିଆନ୍ତି ଏଙ୍ଘା ଚାହାଗେ ତାଏକା ତିନ୍ ଲୋକ୍ ଆଲାର୍ ବାର୍ଚାର୍। ଆବ୍ଡ଼ାର୍ ଏକା ଆଡ଼୍ପାନୁ ଏନ୍ ରାଚ୍କାନ୍, ଆ ଆଡ଼୍ପାଘି ଆଘ୍ଲି ଇଜ୍ଜକାଚାର୍। 12ଆରୁ ଏନ୍ଦେର୍ହି ମା ସୋଚିକିରି ଆବ୍ଡ଼ାର୍ ଗାନେ କାଲାଗେ ପାବିତାର୍ ଆତ୍ମାଦ୍ ଏଙ୍ଗାନ୍ ତେଙ୍ଗିୟା ଆରୁ ଯାଫୋ ସହର୍ନ୍ତା ଇ ଛଲୋକ୍ ଭାଇ ଜାମାର୍ହି ଏଙ୍ଘାଗାନେ କେରାର୍; ଆରୁ ଏମ୍ ଜାମାମ୍ କର୍ନେଲିୟୁସ୍କି ଆଡ଼୍ପାଗେ କେର୍କାମ୍। 13ଆସ୍ ଏମାନ୍ ବାତାବାଚାସ୍, ଏସ୍କେ ତାଙ୍ଘା ଆଡ଼୍ପାନୁ ଅଣ୍ଟା ସରଗ୍ଦୂଁତ୍ ଦର୍ଶନ୍ ଚିଚ୍ଚଚା, ଆରୁ ଆସିନ୍ ତେଙ୍ଗିୟା ଯାଫୋ ସହର୍ଗେ ଆଲ୍ ତାଇୟିକିରି ଶିମୋନ୍ସିନ୍ ନେକାନ୍ କା ପାତ୍ରାସ୍ ବାନାଏ ଆସିନ୍ ମେହାଁଅନ୍ଦ୍ରା। 14ଆସ୍ ନିମାନ୍ ଏନ୍ନେ ବଚନ୍ ତେଙ୍ଗସ୍, ଏକାଘି ଦ୍ୱାର୍ନୁ କା ନିନ୍ ଆରୁ ନିଙ୍ଘା ପୁରା ପରିବାର୍ ମୁକ୍ତି ହାଖ୍ଖର୍। 15ଯେତ୍କବାକେନ୍ ଏନ୍ ତେଙ୍ଗାଗେ ସୁରୁ କାମ୍ଚ୍କାନ୍, ହତ୍କବାକେନ୍ ପାବିତାର୍ ଆତ୍ମାଦ୍ ଆବ୍ଡ଼ାର୍ଘି ମିଆଁ ଏତ୍ତିୟାଦ୍, ଏସ୍କେ କା ସୁରୁନୁ ନାହ୍ମା ମିଆଁ ଏତ୍ତକିଚା। 16ହତ୍କବାକେନ୍ ପ୍ରାଭୁସ୍କି ତେଙ୍କା ଇ କାତ୍ଥାଦ୍ ଏଙ୍ଗା ମନେ ଖାତ୍ରା; ‘ଯୋହାନ୍ସ୍ ତା ଆମ୍ମୁତି ଆସ୍ନାନ୍ ଚିଚ୍ଚାସ୍, ଲେକିନ୍ ନିମାଗେ ପାବିତାର୍ ଆତ୍ମାତି ଆସ୍ନାନ୍ ଚିଆକୋ।’ 17ଯେତ୍କବାକେନ୍ ନାମ୍ ପ୍ରାଭୁ ଯୀଶୁ ଖ୍ରୀସ୍ତ୍ସିନ୍ ବିଶ୍ୱାସ୍ କାମ୍ଚ୍କାତ୍, ହତ୍କବାକେନ୍ ପାର୍ମେଶ୍ୱାର୍ସ୍ ନାମାଗେ ଏକା ବାର୍ଦାନ୍ ଚିଚ୍ଚାସ୍ ଆବ୍ଡ଼ାର୍ଗେହି ଯଦି ଆସ୍ ଆ ସାମାନ୍ ବାର୍ଦାନ୍ ଚିଚ୍ଚାସ୍ତା ଏନ୍ ନେଦ୍ ଯେ ପାର୍ମେଶ୍ୱାର୍ସିନ୍ ବିରୁଦ୍ଧ କାମନ୍ନେ?” 18ଇ ଜାମା କାତ୍ଥା ମେନିକିରି ଆବ୍ଡ଼ାର୍ କାଡ଼େ-କାଡ଼େ ରାଚାର୍ କେରାର୍ ଆରୁ ପାର୍ମେଶ୍ୱାର୍ସ୍କି ସ୍ତୁତି ବାଡ଼େଇ କାମାଗେ ଲାଗ୍ଗିୟାର୍ ଆରୁ ତେଙ୍ଗିୟାର୍, “ହାଲେ ତା ପାର୍ମେଶ୍ୱାର୍ସ୍ ଦୁସ୍ରାଜାତିୟାର୍ଗେହି ମନ୍ ପରିବର୍ତ୍ତନ୍ଘି ବାର୍ଦାନ୍ ଚିଚ୍କାଦାସ୍, ତାକା ଆବ୍ଡ଼ାର୍ହି ସବୁଦିନ୍ତା ଜୀବନ୍ ହାଖ୍ଖର୍।”
ଆନ୍ତାଖିଆନ୍ତା ମଣ୍ତ୍ଲୀନୁ ସୁସାମାଚାର୍ ପ୍ରଚାର୍
19ସ୍ତିଫାନ୍ସ୍କି ସାମାୟନୁ ଘାଟ୍ର୍କା ଦୁଃଖୁଘି ଲାଗାନ୍ ଏକାର୍ ଛିଛିର୍ଛାନ୍ଦ୍ ମାନ୍ଚାର୍ କେର୍କାଚାର୍, ଆବ୍ଡ଼ାର୍ କୁଦ୍ଦତେ-କୁଦ୍ଦତେ ଫିନୀକୀୟା ରାଜୀ, ସାଇପ୍ରସ୍ ଆରୁ ଆନ୍ତାଖିଆତକ୍ ଆଣ୍ସିୟାର୍; ଆରୁ ଆବ୍ଡ଼ାର୍ ୟାହୁଦୀ ଜାମାରିନ୍ ଆମ୍ବିକିରି ଆରୁ ନେଖାସାନ୍ହି ବଚନ୍ ମା ଶୁଣାବାଲିୟାର୍। 20ଲେକିନ୍ ଆବ୍ଡ଼ା ବିଶ୍ୱାସୀ ଜାମାର୍ଘି ଭିତ୍ରୁ କେତ୍କ ଲୋକ୍ ସାଇପ୍ରସ୍ ଆରୁ କୂରୀଣୀୟନ୍ତା ରାଚାର୍। ଆବ୍ଡ଼ାର୍ ଆନ୍ତାଖିଆଗେ ବାରିକିରି ଗ୍ରୀକ୍ଜାମାର୍ଘି ମାଝାନୁ ପ୍ରାଭୁ ଯୀଶୁସ୍କି ସୁସାମାଚାର୍ଘି ବଚନ୍ ଶୁଣାବାଗେ ଲାଗ୍ଗିୟାର୍। 21ଆରୁ ଆବ୍ଡ଼ାର୍ଘି ମିଆଁ ପ୍ରାଭୁସ୍କି କ୍ରିପା ରାଚା ଆରୁ ଢେର୍ ଆଲାର୍ ବିଶ୍ୱାସ୍ କାମିକିରି ପ୍ରାଭୁସ୍ତାରା କିର୍ୟାର୍ କେରାର୍। 22ଯେତ୍କବାକେନ୍ ଇବ୍ଡ଼ା କାତ୍ଥାନ୍ ଯେରୁଶାଲେମ୍ ମଣ୍ତ୍ଲୀନ୍ତା ଆଲାର୍ ମେନ୍ଚାର୍ ତା ଆବ୍ଡ଼ାର୍ ବାର୍ନାବାସ୍ସିନ୍ ଆନ୍ତାଖିଆ ତାଇୟାର୍। 23ଯେତ୍କବାକେନ୍ ବାର୍ନାବାସ୍ ଆସାନ୍ ଆଣ୍ସିୟାସ୍ ତା ପାର୍ମେଶ୍ୱାର୍ସ୍କି କ୍ରିପା ଏରିକିରି ଖୁସୀ ମାନ୍ଚାସ୍, ଆରୁ ଜାମାରିନ୍ ମନ୍ ଆରୁ ଜୀଆତି ପ୍ରାଭୁସ୍ଗାନେ ରାଗେ ଉତ୍ସାହିତ୍ କାମ୍ଚାସ୍। 24ବାର୍ନାବାସ୍ ଅଣ୍ଟା ବାନେ ଆଲ୍ ରାଚାସ୍ ଆରୁ ଆସ୍ ପାବିତାର୍ ଆତ୍ମା ଆରୁ ବିଶ୍ୱାସ୍ତି ଭାର୍ପୁର୍ ରାଚାସ୍; ଆରୁ ଢେର୍ ଆଲାର୍ ପ୍ରାଭୁସ୍ତାରା ବାର୍ଚାର୍। 25ଆଙ୍ଗେନ୍ ବାର୍ନାବାସ୍ ଶାଉଲ୍ସିନ୍ ବେଦ୍ଦାଗେ ତାର୍ସୁସ୍ ରାଜୀଗେ କେରାସ୍। 26ଯେତ୍କବାକେନ୍ ବାର୍ନାବାସ୍ ଶାଉଲସିନ୍ ହାଖ୍ଖୀୟାସ୍ ତା ଆନ୍ତାଖିଆଗେ ଅନ୍ଦ୍ରାସ୍; ଆରୁ ଏନ୍ନେ ମାନ୍ଚା କା ଆବ୍ଡ଼ାର୍ ଏକ୍ ବଛର୍ତକ୍ ମଣ୍ତ୍ଲୀଗାନେ ରାଇକିରି ଢେର୍ ଆଲାରିନ୍ ଉପ୍ଦେଶ୍ ଚିଚ୍ଚାର୍; ଆରୁ ଆନ୍ତାଖିଆନୁ ଚେଲାଜାମାର୍ ଜାମାର୍ଘିନ୍ତି ଆଘ୍ଲି ଖ୍ରୀଷ୍ଟିୟାନ୍ ବୁଲି ଆହାକେରାର୍।
27ହୁ ସାମାୟନୁ କେତ୍କ ଲୋକ୍ ନାବୀର୍ ଯେରୁଶାଲେମ୍ତି ଆନ୍ତାଖିଆଗେ ବାର୍ଚାର୍। 28ଆବ୍ଡ଼ାର୍ଘି ଭିତ୍ରୁ ଆଗାବ୍ ନାମେଘି ଅଣ୍ଟା ନାବୀସ୍ ପାବିତାର୍ ଆତ୍ମାଘି ପ୍ରେର୍ଣାତି ଇଜ୍ଜାସ୍ ଆରୁ ଏନ୍ନେ ତେଙ୍ଗିୟାସ୍ କା ପୁରା ଦୁନିଆଁନୁ ଅଣ୍ଟା ବାଡ଼୍କା ଆକାଲ୍ ମାନ, ଆ ଆକାଲାଦ୍ କ୍ଲାଉଦିୟାସ୍କି ସାମାୟନୁ ମାନ୍ଚା। 29ଆଙ୍ଗେନ୍ ଚେଲାଜାମାର୍ ସୋଚ୍ଚାର୍ କା ଜାମାର୍ ନିଜର୍-ନିଜର୍ ଶକ୍ତିଘି ଅନୁସାର୍ ୟାହୁଦା ପ୍ରଦେଶ୍ନୁ ରାନାବାଲା ଭାଇ ଜାମାର୍ଘି ମଦେତ୍ଘି ଲାଗାନ୍ ତାଇୟର୍। 30ଆରୁ ଆବ୍ଡ଼ାର୍ ଏନ୍ନେନ୍ କାମ୍ଚାର୍; ଆରୁ ବାର୍ନାବାସ୍ ଆରୁ ଶାଉଲ୍ସ୍କି ହେଖ୍ଖାନୁ ତାହ୍ମା ପାଏସାବନ୍ ପୁର୍ଖାର୍ସାନ୍ ତାଇୟାର୍।
12ହେରୋଦ୍ ରାଜାସ୍ ମଣ୍ତ୍ଲୀବନ୍ ସାତାବାଲ୍ଦାସ୍
1ହୁ ସାମାୟନୁ ହେରୋଦ୍ ରାଜାସ୍ ମଣ୍ତ୍ଲୀନ୍ତା କେତ୍କ ଲୋକ୍ ଆଲାରିନ୍ ସାତାବାଗେ ବନ୍ଦୀ କାମ୍ଚାସ୍। 2ଆସ୍ ଯୋହାନ୍ସ୍କି ଭାଇ ୟାକୁବ୍ସିନ୍ ତାଲ୍ୱାର୍ତି ପିଟ୍ଟତାଚାସ୍। 3ଯେତ୍କବାକେନ୍ ହେରୋଦ୍ସ୍ ଏରିୟାସ୍ କା ଇ ଘାଟ୍ଣାତି ୟାହୁଦୀଜାମାର୍ ଖୁସ୍ ମାନାଲ୍ନାଏ, ତା ଆସ୍ ପାତ୍ରାସ୍ସିନ୍ହି ଧାର୍ଚାସ୍। ହୁ ସାମାୟନୁ ମା ଫୁଲ୍ର୍ନା ଆସ୍ମାଘି ପରବ୍ ରାଚା। 4ହେରୋଦସ୍ ପାତ୍ରାସିନ୍ ଧାରିକିରି ଜେହେଲ୍ନୁ ଗୁଡ୍ଡେଇଚାସ୍, ଆରୁ ଆସିନ୍ ଚାର୍ଚାର୍ ଲୋକ୍ ରାନା ନାହ୍ଟା ସିପାହୀ ଦଲ୍ବନ୍ ଜାଗାଗେ ସୋଁପ୍ଚେଇଚାସ୍। ଏନ୍ନେ ସୋଚିକିରିକା ପାସ୍କାପରବ୍ଘି ପାଛ୍ଲି ଆସିନ୍ ଅଥ୍ରିକିରି ଆଲାର୍ଘି ମାଝାନୁ ଅନ୍ଦ୍ରସ୍। 5ଆଦ୍ଘି ଲାଗାନ୍ ପାତ୍ରାସ୍ ଜେହେଲ୍ନୁ ବନ୍ଦୀ ମାନ୍ଚାସ୍ ରାଚାସ୍; ଲେକିନ୍ ଆସ୍କି ଲାଗାନ୍ ମଣ୍ତ୍ଲୀ ଦ୍ୱାର୍ନୁ ଏକ୍ମନ୍ ମାନିକିରି ପାର୍ମେଶ୍ୱାର୍ସାନ୍ ବିନ୍ତି କାମ୍ତେ ରାଚାର୍।
ପାତ୍ରାସ୍ ଜେହେଲ୍ତି ଉର୍ଖାଲ୍ଦାସ୍
6ପାଛ୍ଲି ହେରୋଦ୍ସ୍ ଏକା ଉଲ୍ଲା ପାତ୍ରାସ୍ସିନ୍ ଅଥ୍ରା ଅନ୍ଦ୍ରାଗେ କାଲିୟାସ୍, ଆ ମାଁହାନୁ ପାତ୍ରାସ୍ ଦୁଇ ଲୋକ୍ ସିପାହୀର୍ଘି ମାଝାନୁ ଚୁତ୍କାଚାସ୍ ଆରୁ ଆସିନ୍ ଯୋଡ଼େ ସିକ୍ଡ଼ିତି ହିଁଇଚ୍କାଚାର୍। ଆରୁ ଜାଗୁୱାର୍ ଫାଟକ୍ସାନ୍ ଜେହେଲ୍ବନ୍ ଜାଗାଲିୟାର୍। 7ଆରୁ ଏରା, ଅହ୍ନାସାରେନ୍ ପ୍ରାଭୁସ୍କି ଅଣ୍ଟା ଦୂଁତ୍ ଆସାନ୍ ବାରିକିରି ଇଜ୍ଜା, ଆରୁ ବାଖ୍ରାଦ୍ ବିଲ୍ଲୀ ମାନ୍ଚାକେରା, ଆରୁ ଆଦ୍ ପାତ୍ରାସ୍କି ହେଖ୍ଖାବନ୍ ଥାପ୍ପିକିରି ଏଜ୍ଜା ଆରୁ ତେଙ୍ଗିୟାଦ୍, “ଚାଁଣେ ଉସ୍କାରା।” ଆରୁ ଆସ୍କି ହେଖ୍ଖାନ୍ତି ସିକ୍ଡ଼ି ଖୋଲ୍ରିକିରି ଖାତ୍ରେଇଚା। 8ଆନ୍ତିନ୍ ଦୂଁତ୍ ଆସିନ୍ ତେଙ୍ଗିୟାଦ୍, “କାଡ଼୍ମାନ୍ ଶାକ୍ତା ଆରୁ ଚପଲ୍ ଆତ୍ତା।” ଆସ୍ ହନ୍ନେନ୍ କାମ୍ଚାସ୍ ଆରୁ ଦୂଁତ୍ ଆସିନ୍ ତେଙ୍ଗିୟାଦ୍, “ଚାଦର୍ ଝାପ୍ରିକିରି ଏଙ୍ଘା ପାଛ୍ଲି-ପାଛ୍ଲି ବାରା।” 9ଆସ୍ ଉର୍ଖିକିରି ଆସ୍କି ପାଛ୍ଲି-ପାଛ୍ଲି କେରାସ୍; ଲେକିନ୍ ଦୂଁତ୍ଘି ଦ୍ୱାର୍ନୁ ଏକାନ୍ କାମାକେରା ଆଦ୍ ଯେ ସତ୍ତୁଦ୍, ଆଦାନ୍ ଆସ୍ ବୁଝ୍ରା ପଲ୍ଲିୟାସିନ୍ ଆରୁ ଦର୍ଶନ୍ ଏରାଲ୍ଦାନ୍ ବୁଲି ସୋଚାଲିୟାସ୍। 10ଯେତ୍କବାକେନ୍ ପାତ୍ରାସ୍ ଆରୁ ଦୂଁତ୍ ପହ୍ଲେ ଆରୁ ଦୁସ୍ରା ଫାଟକ୍ ପାର୍ ମାନିକିରି ଆ ପାନ୍ନାଘି ଫାଟକ୍ସାନ୍ ଆଣସିୟାର୍, ଏକାଦ୍ କା ସହର୍ ତାରା କାଲିୟାଦ୍, ହତ୍କବାକେନ୍ ଆ ଫାଟକ୍ଦ୍ ତାନିନ୍ ଆବ୍ଡ଼ାର୍ଘି ଲାଗାନ୍ ଖୋଲ୍ରା କେରା, ଆରୁ ଆବ୍ଡ଼ାର୍ ଉର୍ଖିକିରି ଅଣ୍ଟା ଗଲି ଚିଇକିରି ଆଖ୍ରୀ ମୁଡ଼ିତକ୍ କେରାର୍, ଆରୁ ହୁଙ୍ଗେନିନ୍ ସରଗ୍ଦୂଁତ୍ ଆସ୍ତି ଲିଭ୍ରା କେରା। 11ହତ୍କବାକେନ୍ ପାତ୍ରାସ୍ ହୋସ୍ନୁ ବାରିକିରି ତେଙ୍ଗିୟାସ୍ କା, “ଆକ୍କୁନ୍ ଏନ୍ ବାନେକିରି ଆହା ଅଙ୍କାନ୍ କା ପ୍ରାଭୁସ୍ ତାଙ୍ଘା ଦୂଁତ୍ବନ୍ ତାଇୟିକିରି ହେରୋଦ୍ସ୍କି ଫାନ୍ଦାନ୍ତି ଆରୁ ୟାହୁଦୀ ଜାମାର୍ଘି ଜାମା ଆଶାବନ୍ ତୋଡ଼ିକିରି ଏଙ୍ଗାନ୍ ବାଛାବାଚ୍କାଦାସ୍।”
12ପାତ୍ରାସ୍ ଇ କାତ୍ଥାନ୍ ଆଖ୍ଖାସ୍ ତା ଆସ୍ ଯୋହାନ୍ସ୍କି ଆୟାଙ୍ଗ୍ ମାରିୟାମ୍ଘି ଆଡ଼୍ପା ବାର୍ଚାସ୍। ଯୋହାନ୍ସିନ୍ ମାର୍କୁସ୍ହି ବାନାଏ। ଆସାନ୍ ଢେର୍ ଆଲାର୍ ଠୁଡ଼ିୟା ରାଇକିରି ବିନ୍ତି କାମାଲିୟାର୍। 13ପାତ୍ରାସ୍ ବାଲିବନ୍ ବାହାରି ତାର୍ତି ଠକ୍ଠକାବାଚାସ୍, ତା ରୋଦା ନାମେଘି ଅଣ୍ଟା ଗୁତ୍ତିୟାଦ୍ ନେଦ୍ବୁଲି ମେନାଗେ କେରା। 14ଆଦ୍ ପାତ୍ରାସ୍କି ଶବଦ୍ବନ୍ ଅଡ଼୍କିକିରି ଆଦ୍ ବହୁତ୍ ଖୁସୀତି ବାଲିବନ୍ ମା ଖୋଲିକିରି କୁଦିୟାରାନାତି ଉଲା କର୍ଚା ଆରୁ ପାତ୍ରାସ୍ ବୁଲି ତେଙ୍ଗିୟାଦ୍। 15ଆବ୍ଡ଼ାର୍ ଆଦିନ୍ ତେଙ୍ଗିୟାର୍, “ନିନ୍ ପାଗ୍ଲି।” ଲେକିନ୍ ଆଦ୍ ଇଦ୍ ସତ୍ତୁ ବୁଲି ଯୋର୍ ଚିଇକିରି ତେଙ୍ଗାଗେ ଲାଗ୍ଗିୟାଦ୍, ଆବ୍ଡ଼ାର୍ ତେଙ୍ଗିୟାର୍, “ଇଦ୍ ଆସ୍କି ସରଗ୍ଦୂଁତ୍ ମାନୋ।” 16ଲେକିନ୍ ପାତ୍ରାସ୍ ବାଲିବନ୍ ଧ୍ୟାନ୍-ଧ୍ୟାନ୍ ଠକ୍ଠକାବାଗେ ଲାଗ୍ଗିୟାସ୍: ତା ଯେତ୍କବାକେନ୍ ଆବ୍ଡ଼ାର୍ ବାଲି ଖୋଲ୍ଚାର୍ ତା ଆସିନ୍ ଏରିକିରି ଆଚ୍ମିତ୍ ମାନ୍ଚାର୍ କେରାର୍। 17ଲେକିନ୍ ଆସ୍ ଆବ୍ଡ଼ାରିନ୍ ଚୁପ୍ରାଗେ ହେଖ୍ଖାତି ଠାରିଆଚାସ୍ ଆରୁ ତେଙ୍ଗିୟାସ୍ କା ଏସ୍କେ ପ୍ରାଭୁସ୍କି ଦୂଁତ୍ ତାଙ୍ଗାନ୍ ଜେହେଲ୍ତି ଅଥ୍ରାଦ୍ ଆରୁ ଅନ୍ଦ୍ରାଦ୍, ଆରୁ ଆସ୍ ତେଙ୍ଗିୟାସ୍, “ଇ ଜାମା କାତ୍ଥାନ୍ ୟାକୁବ୍ ଆରୁ ଦୁସ୍ରା ଭାଇଜାମାରିନ୍ ତେଙ୍କେ ଚିକେ।” ଆନ୍ତିନ୍ ପାତ୍ରାସ୍ ଆସ୍ତି ଉର୍ଖିକିରି ଦୁସ୍ରା ଆଡ୍ଡାଗେ ବୁଙ୍ଗିୟାସ୍ କେରାସ୍।
18ପାଇରି ମାନ୍ଚ୍କାନ୍ତି ପାତ୍ରାସ୍ ଏକାତାରାହ୍ କେରାସ୍ ବୁଲି ସିପାହୀର୍ ଭାଁୱ ଭାଁୱରାର୍ କେରାର୍। 19ଆରୁ ଯେତ୍କବାକେନ୍ ହେରୋଦ୍ସ୍ ଆସିନ୍ ବେଦ୍ଦିୟାସ୍ ଆରୁ ମା ହାଖ୍ଖୀୟାସ୍ ତା ଦାର୍ୱାନ୍ ଜାମାରିନ୍ ମେନ୍ଚାସ୍, ମେନ୍ଚ୍କା ପାଛ୍ଲି ଆବ୍ଡ଼ାରିନ୍ ପିଟାଗେ ହୁକୁମ୍ ଚିଚ୍ଚାସ୍। ଆନ୍ତିନ୍ ହେରୋଦସ୍ ୟାହୁଦା ପ୍ରଦେଶ୍ଘି କାଇସିରିଆଗେ କାଇକିରି ଆସାନ୍ ରାଚାସ୍।
ହେରୋଦ୍ସ୍କି ମରନ୍
20ହୁବାକେନ୍ ହେରୋଦ୍ସ୍ ସୋର୍ ଆରୁ ସିଦୋନ୍ନ୍ତା ଆଲାର୍ଘି ମିଆଁ ବହୁତ୍ ଅସନ୍ତୁଷ୍ଟ ରାଚାସ୍। ଆବ୍ଡ଼ାର୍ ଏକ୍ମତ୍ ମାନିକିରି ହେରୋଦ୍ସାନ୍ ବାର୍ଚାର୍ ଆରୁ ରାଜାସ୍କି ଅଣ୍ଟା ମୁଖ୍ୟା ସେବକ୍ ବାଲାସ୍ତୁସ୍ସିନ୍ ମାନାବୁଝା କାମିକିରି ହେରୋଦ୍ସ୍ ଗାନେ ମେଲ୍ମିଲାପ୍ କାମ୍ତାଗେ ଆର୍ଜୀ କାମାଗେ ଲାଗ୍ଗିୟାର୍; ଏନ୍ଦେର୍ଗେକା ରାଜାସ୍କି ଦେଶ୍ତି ଆବ୍ଡ଼ାର୍ଘି ଦେଶ୍ଗେ ଅନ୍ନାମହ୍ନା ଜିନିଷ୍ କାଲିୟାଦ୍। 21ହୁଦ୍ଘିଲାଗାନ୍ ଅଣ୍ଟା ଠାହ୍ରାଚ୍କା ଉଲ୍ଲାନୁ ହେରୋଦ୍ସ୍ ରାଜାସ୍କି ଚିଢ଼ା ଆତ୍ତିକିରି ରାଜ୍ଗାଦୀନୁ ଅକ୍କିୟାସ୍ ଆରୁ ଆବ୍ଡ଼ାର୍ଘି ଲାଗାନ୍ ଅଣ୍ଟା ଭାଷଣ୍ ଚିୟାଗେ ଲାଗ୍ଗିୟାସ୍। 22ଆଙ୍ଗେନ୍ ଆଲାର୍ ଚିର୍ରାଇକିରି ତେଙ୍ଗାଗେ ଲାଗ୍ଗିୟାର୍, “ଇଦ୍ ତା ଅଣ୍ଟା ଦେବ୍ତାସ୍କି ଶବଦ୍, ଆଲାର୍ଘି ଶବଦ୍ ମାଲ୍ଲିଦ୍।” 23ହୁଙ୍ଗେନିନ୍ ପ୍ରାଭୁସ୍କି ଅଣ୍ଟା ଦୂଁତ୍ ହେରୋଦ୍ସିନ୍ ବେହ୍ମରିୟା କାମ୍ଚେଇଚା, ଏନ୍ଦେର୍ଗେକା ଆସ୍ ପାର୍ମେଶ୍ୱାର୍ସିନ୍ ମାହିମା ମା ଚିଚ୍କାଚାସ୍ ଆରୁ ଆସ୍କିନୁ ପଚ୍କୋ ମାନ୍ଚାକେରା ଆରୁ ଆଦ୍ ଆସିନ୍ ମହାଁଗେ ଲାଗ୍ଗିୟାଦ୍ ଆରୁ ଆସ୍ କେଚ୍ଚାସ୍କେରାସ୍।
24ଲେକିନ୍ ପାର୍ମେଶ୍ୱାର୍ସ୍କି ବଚନ୍ବଦ୍ ବାଢ଼୍ର୍ତେ ଆରୁ ଫାଇଲାରାତେ କେରା।
25ବାର୍ନାବାସ୍ ଆରୁ ଶାଉଲ୍ସ୍ ଯେରୁଶାଲେମ୍ନୁ ନିଜର୍ ସେବା ନାଲ୍ଖୁନ୍ ପୁରା କାମିକିରି ଯୋହାନ୍ସିନ୍ ଏକାସିନ୍ କା ମାର୍କୁସ୍ ବାନାଏ, ଆସିନ୍ ସାଙ୍ଗେନୁ ହୋଇକିରି ଆନ୍ତାଖିଆ କିର୍ୟାର୍ ବାର୍ଚାର୍।
13ବାର୍ନାବାସ୍ ଆରୁ ଶାଉଲସିନ୍ ପ୍ରଚାର୍ କାମାଗେ ତାଇୟାଲ୍ନାଏ
1ହତ୍କବାକେନ୍ ଆନ୍ତାଖିଆନ୍ତା ମଣ୍ତ୍ଲୀନୁ କେତ୍କ ଲୋକ୍ ନାବୀ ଆରୁ ଉପ୍ଦେଶ୍ ଚିଉ ଆଲାର୍ ରାଚାର୍। ଏସ୍କେ କା ବାର୍ନାବାସ୍ ଆରୁ ଶିମୋନ୍ ଏକାସିନ୍କା ନିଗର୍ ବାଲିୟାର୍। କୂରୀଣୀନ୍ତା ଲୁକିୟ ଆରୁ ଚଉଥାଇ ଦେଶ୍ତା ହେରୋଦ୍ ରାଜାସ୍କି ପୋଶ୍କା ମନାହେମ୍ ଆରୁ ଶାଉଲ୍। 2ଯେତ୍କବାକେନ୍ ଆବ୍ଡ଼ାର୍ ଉପାସ୍ କାମିକିରି ପ୍ରାଭୁସ୍କି ଆରାଧାନା କାମାଲିୟାର୍ ତା ପାବିତାର୍ ଆତ୍ମାଦ୍ ତେଙ୍ଗିୟାଦ୍, “ଏକା ନାଲ୍ଖୁଘି ଲାଗାନ୍ ଏନ୍ ବାର୍ନାବାସ୍ ଆରୁ ଶାଉଲ୍ସିନ୍ ମେଁହ୍କାଦାନ୍, ଆ ନାଲ୍ଖୁନ୍ କାମାଗେ, ଏଙ୍ଘାଲାଗାନ୍ ଆବ୍ଡ଼ାରିନ୍ ଭିନେ କାମାଚା।” 3ଆଙ୍ଗେନ୍ ଆବ୍ଡ଼ାର୍ ଉପାସ୍ ଆରୁ ବିନ୍ତି କାମ୍ଚ୍କା ପାଛ୍ଲି ବାର୍ନାବାସ୍ ଆରୁ ଶାଉଲ୍ ଆସ୍କି ମିଆଁ ହେଖ୍ଖା ଉଇୟିକିରି ଆବ୍ଡ଼ାରିନ୍ ତାଇୟାର୍।
ପାଉଲୁସ୍ ପହିଲ୍ଥର୍ ପ୍ରଚାର୍ କାମାଗେ କାଲ୍ଦାସ୍
4ଆଙ୍ଗେନ୍ ବାର୍ନାବାସ୍ ଆରୁ ଶାଉଲ୍ସ୍ ପାବିତାର୍ ଆତ୍ମାଘି ତାଏକା ସେଲୂକିଆଗେ କେରାର୍। ଆରୁ ଆସ୍ତି ଆବ୍ଡ଼ାର୍ ଜାହାଜ୍ନୁ ଅକ୍କିକିରି ସାଇପ୍ରସ୍ଗେ କେରାର୍। 5ଯେତ୍କବାକେନ୍ ଆବ୍ଡ଼ାର୍ ସାଲାମିଗେ ଆଣସିୟାର୍ ତା ଆବ୍ଡ଼ାର୍ ୟାହୁଦୀ ଜାମାର୍ଘି ସାଭା ଆଡ଼୍ପାଗୁଠିନୁ ପାର୍ମେଶ୍ୱାର୍ସ୍କି ବଚନ୍ବନ୍ ପ୍ରଚାର୍ କାମ୍ଚାର୍। ଯୋହାନ୍ସ୍ହି ଆବ୍ଡ଼ାରିନ୍ ମଦେତ୍ କାମାଗେ ଆବ୍ଡ଼ାର୍ ଗାନେ ରାଚାସ୍। 6ଆନ୍ତିନ୍ ଆବ୍ଡ଼ାର୍ ଜାମା ଟାପୁନୁ କୁଦ୍ଦତେ-କୁଦ୍ଦତେ ପାଫ୍ସ୍ ସହର୍ଗେ ବାର୍ଚାର୍। ଆସାନ୍ ଅଣ୍ଟା ଯାଦୁଗାର୍ସ୍ ରାଚାସ୍ ଆସ୍ ଅଣ୍ଟା ଠାକୁୱା ନାବୀ ରାଚାସ୍। ଆସ୍ ୟାହୁଦୀ ରାଚାସ୍, ଆରୁ ଆସ୍କି ନାମେ ବର୍ ଯୀଶୁ ରାଚା। 7ଆସ୍ ରାଜ୍ପାଲ୍ ସିର୍ଗିଉସ୍ ପାଉଲୁସ୍ଗାନେ ରାଲିୟାସ୍। ଆ ରାଜ୍ପାଲ୍ସ୍ ଅଣ୍ଟା ବୁଦ୍ଧିମାନ୍ ଆଲାସ୍ ରାଚାସ୍। ଆସ୍ ବାର୍ନାବାସ୍ ଆରୁ ଶାଉଲ୍ସିନ୍ ତାଙ୍ଘା ଚାହାଗେ ମେଁହିୟାସ୍ ଏନ୍ଦେର୍ଗେକା ଆସ୍ ପାର୍ମେଶ୍ୱାର୍ସ୍କି ବଚନ୍ବନ୍ ମେନା ବେଦ୍ଦାଲିୟାସ୍। 8ଲେକିନ୍ ଆ ଯାଦୁଗାର୍ ଇଲୀମାସ୍ ବାର୍ନାବାସ୍ ଆରୁ ଶାଉଲ୍ସ୍କି ବିରୋଧ୍ କାମ୍ଚାସ୍। ଆସ୍ ରାଜ୍ପାଲ୍ସିନ୍ ବିଶ୍ୱାସ୍ତି ଦୁର୍ କାମାଗେ କୋଶିଷ୍ କାମାଗେ ଲାଗ୍ଗିୟାସ୍। 9ଲେକିନ୍ ଶାଉଲ୍ସ୍ ନେକାନ୍ କା ପାଉଲୁସ୍ହି ବାନାଏ, ପାବିତାର୍ ଆତ୍ମାତି ଭାର୍ପୁର୍ ମାନିକିରି ଇଲୀମାସ୍ସିନ୍ ଏକ୍ ନଜର୍ ଏରିକିରି ତେଙ୍ଗିୟାସ୍, 10“ହେ ଜାମା ଲେଖାଘି କପଟ୍ ଆରୁ ଜାମା ଲେଖାଘି ଚତୁର୍ତି ନିନ୍ଦ୍କା ଶାଏତାନ୍ଘି ହାଦ୍ଦୁ, ଜାମା ବାନେ ନାଲ୍ଖୁଘି ଦୁଶ୍ମାନ୍ ନିନ୍ ପ୍ରାଭୁସ୍କି ସାଧା-ସିଧା ପାବୁବନ୍ ଟେଢ଼ାମେଢ଼ା କାମାଗେ ମା ଆମ୍ବଦାଏ କାଁଏ? 11ଆରୁ ଆକ୍କୁନ୍ ଏରା, ପ୍ରାଭୁସ୍ ନିଙ୍ଗାନ୍ ଦଣ୍ଡ୍ ଚିୟସ୍; ନିନ୍ କାଣାଁ ମାନିକିରି କେତ୍କ ସାମାୟତକ୍ ବିଡ଼ିନ୍ ଏରା ପଲ୍ଲଦାଏ।” ହୁଙ୍ଗେନିନ୍ କୁହୁଟି ଆରୁ ଉହା ଇଲୀମାସିନ୍ ଡାବ୍ଚେଇଚା। ଆରୁ ଆସ୍ ଇୟାହୁଇୟା ବେଦ୍ଦାଗେ ଲାଗ୍ଗିୟାସ୍ କା ନେଦିନ୍ ତାଙ୍ଘା ହେଖ୍ଖା ଧାରିକିରି ତାଙ୍ଗାନ୍ ପାବୁ ଏଦର୍। 12ଆଙ୍ଗେନ୍ ଆ ରାଜ୍ପାଲ୍ସ୍ ଇ ଘାଟ୍ଣାବନ୍ ଏରିକିରି ବିଶ୍ୱାସ୍ କାମ୍ଚାସ୍ ଆରୁ ଆସ୍ ପ୍ରାଭୁସ୍କି ଶିକ୍ଷାନୁ ଆଚ୍ମିତ୍ ମାନ୍ଚାସ୍ କେରାସ୍।
ପାଉଲୁସ୍ ଆରୁ ବାର୍ନାବାସ୍ ପିସିଦିଆନ୍ତା ଆନ୍ତାଖିଆନୁ ପ୍ରଚାର୍ କାମାଲ୍ନାଏ
13ଆନ୍ତିନ୍ ପାଉଲୁସ୍ ଆରୁ ତାଙ୍ଘା ସାଙ୍ଗେର୍ ପାଫ୍ସ୍ତି ଜାହାଜ୍ନୁ ପଂଫୂଲିଆନ୍ତା ପର୍ଗୀ ସହର୍ଗେ ବାର୍ଚାର୍, ଲେକିନ୍ ଯୋହାନ୍ସ୍ ଆବ୍ଡ଼ାରିନ୍ ଆସାନ୍ ଆମ୍ବିକିରି ଯେରୁଶାଲେମ୍ଗେ କିର୍ରିୟାସ୍ କେରାସ୍। 14ପାଉଲୁସ୍ ଆରୁ ବାର୍ନାବାସ୍ ପର୍ଗୀ ସହର୍ସ୍ତି ଆଘ୍ଲି କାଇକିରି ପିସିଦିଆ ରାଜୀନ୍ତା ଆନ୍ତାଖିଆ ସହର୍ଗେ ଆଣସିୟାର୍; ଆରୁ ଆରାମ୍ ଉଲ୍ଲା ସାଭା ଆଡ଼୍ପାନୁ କାଇକିରି ଅକ୍କିୟାର୍। 15ମୁଶାସ୍କି ନିୟମ୍ ଆରୁ ନାବୀଜାମାର୍ଘି ବହିନ୍ତି ପାଢ଼ଚ୍କା ପାଛ୍ଲି ସାଭା ଆଡ଼୍ପାନ୍ତା ମୁଖ୍ୟାଜାମାର୍ ଆବ୍ଡ଼ାର୍ଘି ଚାହାଗେ ତେଙ୍ଗା ତାଇୟାର୍ କା, “ହେ ଭାଇ ଜାମାରୋ ଯଦି ଆଲାର୍ଘି ଲାଗାନ୍ ନିହ୍ମା ମନ୍ନୁ ଏନ୍ଦ୍ରିନ୍ ଉପ୍ଦେଶ୍ଘି କାତ୍ଥା ରାଇ ହାଲେ ତେଙ୍ଗା।”
16ଆଙ୍ଗେନ୍ ପାଉଲୁସ୍ ଇଜ୍ଜାସ୍ ଆରୁ ହେଖ୍ଖାତି ଠାର୍ଇକିରି ତେଙ୍ଗିୟାସ୍, “ହେ ଇସ୍ରାଏଲ୍ ଜାମାରୋ, ଆରୁ ପାର୍ମେଶ୍ୱାର୍ସ୍କି ଆରାଧାନା କାମୁ ଆଲାରୋ ମେନା: 17ଇ ଇସ୍ରାଏଲ୍ ଜାମାର୍ଘି ପାର୍ମେଶ୍ୱାର୍ସ୍ ନାହ୍ମାଏ ପୁର୍ଖାରିନ୍ ଚାଜ୍ଜିୟାସ୍ ଆରୁ ଯେତ୍କବାକେନ୍ ଆବ୍ଡ଼ାର୍ ମିଶର୍ ଦେଶ୍ନୁ ପର୍ଦେଶୀୟାର୍ ଲେଖା ରାଚାର୍, ହତ୍କବାକେନ୍ ଆବ୍ଡ଼ାରିନ୍ ବାଡ଼୍କା କାମ୍ଚାସ୍ ଆରୁ ତାଙ୍ଘା ଶକ୍ତିତି ଆବ୍ଡ଼ାରିନ୍ ମିଶର୍ ଦେଶ୍ତି ଅଥ୍ରାସ୍। 18ଆନ୍ତିନ୍ ଲାଗ୍ଭାଗ୍ ଚାଲିଶ୍ ବଛର୍ତକ୍ ମରୁଭୂମିନୁ ଆବ୍ଡ଼ାର୍ଘି ବେଭାର୍ବନ୍ ସାହ୍ଚାସ୍। 19ଆରୁ କାନାନ୍ ଦେଶ୍ନୁ ସାତ୍ତେଟା ଜାତିବନ୍ ନାଶ୍ କାମିକିରି ଆସ୍ ଆ ଦେଶ୍ବନ୍ ଇସ୍ରାଏଲ୍ ଆଲାର୍ଗେ ଉତ୍ତରାଧିକାରୀଘି ରୁପ୍ନୁ ଚିଚ୍ଚାସ୍ ଲାଗ୍ଗିୟାସ୍। ଆରୁ ଇବ୍ଡ଼ାଜାମାନୁ ଲାଗ୍ଭାଗ୍ ସାଢ଼େ ଚାର୍ଶହ ବଛର୍ ଲାଗ୍ଗିୟା। 20ଇଦ୍ଘି ପାଛ୍ଲି ପାର୍ମେଶ୍ୱାର୍ସ୍ ଶାମୁଏଲ୍ ନାବୀସ୍ତକ୍ ନ୍ୟାୟ କାମୁ ଆଲାରିନ୍ ଚାଜ୍ଜିୟାସ୍। 21ହୁଦ୍ଘିପାଛ୍ଲି ଆବ୍ଡ଼ାର୍ ଅଣ୍ଟା ରାଜାସ୍ସିନ୍ ନିଆଁଗେ ଆର୍ଜୀ କାମ୍ଚାର୍ ତା ପାର୍ମେଶ୍ୱାର୍ସ୍ ବିନ୍ୟାମୀନ୍ସ୍କି ବାଁଉଶାନ୍ତା କିଶସ୍କି ହାଦ୍ଦୁ ଶାଉଲସିନ୍ ଚିଚ୍ଚାସ୍, ଆରୁ ଶାଉଲ୍ସ୍ ଚାଲିଶ୍ ବଛର୍ତକ୍ ଶାସନ୍ କାମ୍ଚାସ୍। 22ଶାଉଲସିନ୍ ହାଟାବାଇକିରି ପାର୍ମେଶ୍ୱାର୍ସ୍ ଦାଉଦ୍ସିନ୍ ଆବ୍ଡ଼ାର୍ଘି ରାଜା ବାନାବାଚାସ୍। ଦାଉଦ୍ସ୍କି ବାରେନୁ ପାର୍ମେଶ୍ୱାର୍ସ୍ ଏନ୍ନେ ସାକ୍ଷୀ ଚିଚ୍କାଚାସ୍, ‘ଏନ୍ ଏଙ୍ଘା ମନ୍ଘି ଅନୁସାର୍ ଅଣ୍ଟା ଆଲାସିନ୍ ହାକ୍କାଦାନ୍ ଆରୁ ଆସ୍ ଯିଶୟକି ହାଦ୍ଦୁ ଦାଉଦସ୍। ଇସ୍ ଏଙ୍ଘା ଜାମା ଇଚ୍ଛା ପୁରା କାମସ୍।’ 23ଦାଉଦସ୍କି ବାଉଁଶାନ୍ତି ପାର୍ମେଶ୍ୱାର୍ସ୍ ତାଙ୍ଘା କାତ୍ଥା ଚିଚ୍ଚକାଘି ଅନୁସାର୍ ଇସ୍ରାଏଲୀ ଜାମାର୍ଘି ଚାହାଗେ ଅଣ୍ଟା ମୁକ୍ତିଦାତା, ମତ୍ଲବ୍ ଯୀଶୁସିନ୍ ତାଇୟାସ୍। 24ଯୀଶୁସ୍କି ବାର୍ନାଘି ଆଘ୍ଲି ଯୋହାନ୍ସ୍ ଇସ୍ରାଏଲ୍ତା ଜାମା ଆଲାର୍ସାନ୍ ମନ୍ ପରିବର୍ତ୍ତନ୍ଘି ଆସ୍ନାନ୍ଘି ଉପ୍ଦେଶ୍ ଚିଆଲିୟାସ୍। 25ଯୋହାନ୍ସ୍ ତାଙ୍ଘା ନାଲ୍ଖୁ ପୁରା କାମ୍ନା ବାକେନ୍ ତେଙ୍ଗିୟାସ୍, ‘ନିମ୍ ଏଙ୍ଗାନ୍ ଏକାସ୍ ବୁଲି ସୋଚାଲ୍ଦାର୍? ଏନ୍ ଆ ଆଲାନ୍ ମାଲ୍ଦାନ୍, ଲେକିନ୍ ଏରା ଆସ୍ ଏଙ୍ଘା ପାଛ୍ଲି ବାରାଲ୍ଦାସ୍, ଆସ୍କି ହେଡ୍ଡୁନ୍ତା ଜୁତା ଖୋଲାଗେହି ଏନ୍ ଲାଇଗ୍ ମାଲ୍ଦାନ୍।’”
26“ହେ ଭାଇ ଜାମାରୋ, ଆବ୍ରାହାମ୍ସ୍କି ବାଉଁଶାର୍ ଆରୁ ପାର୍ମେଶ୍ୱାର୍ସ୍କି ଆରାଧାନା କାମୁ ବିନାୟାହୁଦୀ ଆଲାରୋ; ମୁକ୍ତିଘି ଇ ସନ୍ଦେଶ୍ ନାହ୍ମା ଚାହାଗେ ତାଇୟା କେର୍କିଚି। 27ଯେରୁଶାଲେମ୍ନୁ ରୁ ଆଲାର୍, ଆରୁ ଆବ୍ଡ଼ାର୍ଘି ମୁଖ୍ୟାଜାମାର୍ ଯୀଶୁସିନ୍ ଚିହ୍ନା ପଲ୍ଲିୟାରିନ୍, ଆରୁ ଆସିନ୍ ଦଣ୍ଡ୍ ଚିଇକିରି ଜାମା ଆରାମ୍ ଉଲ୍ଲାନୁ ନାବୀଜାମାର୍ଘି ଏକା ବଚନ୍ବନ୍ ପାଢ଼ା କାଇ ଆବନ୍ ପୁରା କାମ୍ଚାର୍। 28ଆରୁ ମରନ୍ ଦଣ୍ତ୍ଘି ଏନ୍ଦେର୍ହି ଦୋଷ୍ ଆସ୍କିନୁ ମା ହାଖ୍ଖୀୟାର୍, ହାଲେହି ଆବ୍ଡ଼ାର୍ ଆସିନ୍ ମରନ୍ ଦଣ୍ତ୍ ଚିୟାଗେ ପିଲାତୁସ୍ସିନ୍ ଆର୍ଜୀ କାମ୍ଚାର୍। 29ଆରୁ ତାଙ୍ଘା ବାରେନୁ ଏକାଦ୍ ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ ଆବ୍ଡ଼ା ଜାମାନ୍ ପୁରା କାମ୍ଚ୍କା ପାଛ୍ଲି, ଆବ୍ଡ଼ାର୍ ଆସିନ୍ କ୍ରୁଶ୍ତି ଏତ୍ତତିକିରି ଅଣ୍ଟା ମାସ୍ଣାନୁ ଉଇୟାର୍। 30ଲେକିନ୍ ପାର୍ମେଶ୍ୱାର୍ସ୍ ଆସିନ୍ କେଚ୍ଚକା ପାଛ୍ଲି ଆରୁଅହନ୍ ଉଜ୍ଜତାଚାସ୍। 31ଆରୁ ଏକାର୍ ଆସ୍ଗାନେ ଗାଲିଲୀନ୍ତି ଯେରୁଶାଲେମ୍ଗେ ବାର୍ଚାର୍, ଆବ୍ଡ଼ାର୍ଗେ ଆସ୍ ଢେର୍ ଦିନ୍ତକ୍ ଦର୍ଶନ୍ ଚିଚ୍ଚାସ୍ ଆରୁ ଆବ୍ଡ଼ାର୍ ଆଲାର୍ଘି ମାଝାନୁ ଆସ୍କି ସାକ୍ଷୀର୍।
32ଆରୁ ନାହ୍ମା ପୁର୍ଖାର୍ଘି ଚାହାନୁ ଏକା କାତ୍ଥା ଚିଚ୍କାଚାସ୍ ଆଦ୍ଘି ବାରେନୁ ଏମ୍ ନିମାନ୍ ଇ ସୁସାମାଚାର୍ ଶୁଣାବାଲ୍ଦାମ୍, 33କା ପାର୍ମେଶ୍ୱାର୍ସ୍ ଯୀଶୁସିନ୍ ଉଜ୍ଜତିକିରି, ଆ ଚିଚ୍ଚକା କାତ୍ଥା ନାହ୍ମା ହାଦ୍ଦୁର୍ଘି ଲାଗାନ୍ ପୁରା କାମ୍ଚାସ୍; ଏସ୍କେ ଦୁସ୍ରା ଭଜନ୍ ସଂହିତାନୁ ଲେଖ୍ଚ୍କା ରାଇ, ‘ନିନ୍ ଏଙ୍ଘା ହାଦ୍ଦୁୟ; ଏନ୍ ନିଙ୍ଗାନ୍ ଇନ୍ନାନିନ୍ ଜନମ୍ କାମ୍ଚ୍କାଦାନ୍।’ 34ପାର୍ମେଶ୍ୱାର୍ସ୍ ଯୀଶୁସିନ୍ ଖିଉ ଆଲାର୍ସ୍ତି ଉଜ୍ଜତାଚାସ୍ ଆରୁ ଆକ୍କୁନ୍ ଆସ୍ ଏକ୍ଲାହି ମା ଖିଦାସ୍। ଇଦ୍ଘି ବାରେନୁ ପାର୍ମେଶ୍ୱାର୍ସ୍ ଏନ୍ନେ ତେଙ୍କାଦାସ୍, ‘ଏନ୍ ନିଙ୍ଗାଗେ ପାବିତାର୍ ଆରୁ ପାକ୍କା ଆଶୀର୍ବାଦ୍ ଚିଅନ୍, ଏକାନ୍ କା ଏନ୍ ଦାଉଦ୍ସ୍ଗେ ଚିୟାଗେ କାତ୍ଥା କାମ୍କାଚ୍କାନ୍।’ 35ଆରୁ ଆସ୍ ଆରୁ ଅଣ୍ଟା ଭଜନ୍ ସଂହିତାନୁ ତେଙ୍କାଦାସ୍, ‘ନିନ୍ ନିଙ୍ଘା ପାବିତାର୍ ଆଲାସିନ୍ ନାଶ୍ ମାନାଗେ ମା ଚିଦାଏ।’ 36ଏନ୍ଦେର୍ଗେକା ଦାଉଦ୍ସ୍ତା ପାର୍ମେଶ୍ୱାର୍ସ୍କି ଇଚ୍ଛା ଅନୁସାର୍ ତାଙ୍ଘା ସାମାୟନୁ ସେବା ନାଲ୍ଖୁ କାମ୍ଚାସ୍ ଆରୁ କେଚ୍ଚାସ୍କେରାସ୍। ଆରୁ ଆସିନ୍ ତାଙ୍ଘା ପୁର୍ଖାର୍ଘି ଚାହାନୁ ମାଁଣାକେରା ଆରୁ ତାଙ୍ଘା ଲାସ୍ବଦ୍ ଗାଲ୍ରା କେରା। 37ଲେକିନ୍ ନେକାନ୍ ପାର୍ମେଶ୍ୱାର୍ସ୍ କେଚ୍ଚକାର୍ସ୍ତି ଉଜ୍ଜତାଦାସ୍, ଆବ୍ଡ଼ାର୍ ମାଲ୍ଲା ଗାଲ୍ରୁର୍। 38ହୁଦ୍ଘିଲାଗାନ୍ ହେ ଭାଇ ଜାମାରୋ, ନିମ୍ ଆହା କା ଯୀଶୁସ୍କି ଦ୍ୱାର୍ନୁ ପାପ୍ ଛେମା ହାଖ୍ଖରିଦ୍ ଆରୁ ଇବନ୍ ନିହ୍ମା ମାଝାନୁ ପ୍ରଚାର୍ କାମାକାଲି। 39ଆରୁ ମୁଶା ନାବୀସ୍କି ନିୟମ୍ଘି ଦ୍ୱାର୍ନୁ ନିମ୍ ଏକା କାତ୍ଥାନୁ ନିର୍ଦ୍ଦୋଷ୍ ମା ଠାହ୍ରାରାଚ୍କାର୍, ହୁ ଜାମା କାତ୍ଥାନୁ ଏକାର୍ ଯୀଶୁସ୍କି ମିଆଁ ବିଶ୍ୱାସ୍ କାମ୍ନାଏ ଆବ୍ଡ଼ାର୍ ନିର୍ଦ୍ଦୋଷ୍ ଠାହ୍ରାରର୍। 40ହୁଦ୍ଘିଲାଗାନ୍ ସାବ୍ଧାନ୍ ରା, ଏକାସାନ୍ ଏନ୍ନେ ମା ମାନ୍ନାଦ୍ କା ନାବୀଜାମାର୍ଘି ପାବିତାର୍ ଶାସ୍ତ୍ରନୁ ଏକାଦ୍ ଲେଖ୍ଚ୍କା ରାଇଦ୍ ଆଦ୍ ନିହ୍ମା ମିଆଁ ମା ଘାଟ୍ରୋ: 41‘ହେ ନିନ୍ଦା କାମୁରୋ, ନିମ୍ ଏରା, ଆରୁ ଆଚ୍ମିତ୍ ମାନିକିରି ନାଶ୍ ମାନାକାଲା; ଏନ୍ଦେର୍ଗେକା ଏନ୍ ନିହ୍ମା ସାମାୟନୁ ଅଣ୍ଟା ନାଲ୍ଖୁ କାମାଲ୍ଦାନ୍, ଯଦି ନେଦିନ୍ ନିମାନ୍ ଆ ନାଲ୍ଖୁଘି ବାରେନୁ ତେଙ୍ଗର୍, ହାଲେହି ନିମ୍ ଏକ୍ଲାହି ବିଶ୍ୱାସ୍ ମା କାମର୍’।”
42ପାଉଲୁସ୍ ଆରୁ ବାର୍ନାବାସ୍ ସାଭା ଆଡ଼୍ପାନ୍ତି ଉର୍ଖାଲିୟାର୍ ହତ୍କବାକେନ୍ ଆଲାର୍ ବାର୍ନା ଆରାମ୍ ଉଲ୍ଲାନୁ ଇବ୍ଡ଼ା ଜାମା କାତ୍ଥାଗୁଠିନ୍ ଆରୁଅହନ୍ ତେଙ୍ଗାଗେ ଆର୍ଜୀ କାମ୍ଚାର୍। 43ସାଭା ମୁଞ୍ଜର୍କା ପାଛ୍ଲି ଢେର୍ ୟାହୁଦୀଜାମାର୍ ଆରୁ ୟାହୁଦୀ ଧରମ୍ବନ୍ ଗ୍ରହନ୍ କାମୁ ଭକ୍ତ ଜାମାର୍ ପାଉଲୁସ୍ ଆରୁ ବାର୍ନାବାସ୍କି ପାଛ୍ଲି-ପାଛ୍ଲି କେରାର୍। ପାଉଲୁସ୍ ଆରୁ ବାର୍ନାବାସ୍ ଇବ୍ଡ଼ା ଆଲାର୍ ଗାନେ କାତ୍ଥାବାର୍ତ୍ତା କାମ୍ଚାର୍ ଆରୁ ପାର୍ମେଶ୍ୱାର୍ସ୍କି କ୍ରିପାନୁ ମଜ୍ବୁତ୍ ରାଗେ ବୁଝାବାଚାର୍।
ପାଉଲୁସ୍ ଦୁସ୍ରା ଜାତିୟାର୍ଘି ମାଝାନୁ ପ୍ରଚାର୍ କାମାଲ୍ଦାସ୍
44ଆଘ୍ଲିନ୍ତା ଆରାମ୍ ଉଲ୍ଲାନୁ ସହର୍ତା ଲାଗ୍ଭାଗ୍ ଜାମା ଆଲାର୍ ପାର୍ମେଶ୍ୱାର୍ସ୍କି ବଚନ୍ ମେନାଗେ ଠୁଡ଼ିୟା ରାଚ୍କାଚାର୍। 45ଲେକିନ୍ ୟାହୁଦୀଜାମାର୍ ଭିଡ଼୍ବନ୍ ଏରିକିରି ହିସ୍ଙ୍ଗା କାମାଗେ ଲାଗ୍ଗିୟାର୍ ଆରୁ ପାଉଲୁସ୍କି ନିନ୍ଦା କାମାଲିଆର୍, ଆରୁ ଆସ୍କି କାତ୍ଥାନ୍ ବିରୋଧ୍ କାମାଲିଆର୍। 46ଆଙ୍ଗେନ୍ ପାଉଲୁସ୍ ଆରୁ ବାର୍ନାବାସ୍ ସାହସ୍ତି ତେଙ୍ଗିୟାର୍, “ଜାମାର୍ଘିନ୍ତି ପହ୍ଲେ ପାର୍ମେଶ୍ୱାର୍ସ୍କି ବଚନ୍ ନିମାଗେ ଶୁଣାବାନା ଜରୁରୀ ରାଚା; ଲେକିନ୍ ନିମ୍ ଆବନ୍ ଗ୍ରହନ୍ ମା କାମ୍ଚ୍କାର୍ ଆରୁ ନିଜ୍କେନିଜ୍ ସବୁଦିନ୍ତା ଜୀବନ୍ ହାଖ୍ଖାଗେ ଲାଇଗ୍ ମା ଠାହ୍ରାଦାର୍, ତା ଏରା ଏମ୍ ବିନାୟାହୁଦୀର୍ସାନ୍ କାଲ୍ଦାମ୍। 47ଏନ୍ଦେର୍ଗେକା ପ୍ରାଭୁସ୍ ଏମାନ୍ ଏନ୍ନେ ହୁକୁମ୍ ଚିଚ୍ଚକାଦାସ୍, ‘ଏନ୍ ନିମାନ୍ ବିନାୟାହୁଦୀର୍ଘି ଲାଗାନ୍ ବିଲ୍ଲୀ ଲେଖା ଚାଜ୍ଜକାଦାନ୍, ଏସ୍କେ କା ଦୁନିଆଁନ୍ତା ଜାମା ଆଲାର୍ ନିହ୍ମା ଦ୍ୱାର୍ନୁ ମୁକ୍ତି ହାଖ୍ଖର୍।’”
48ଇବନ୍ ମେନିକିରି ବିନାୟାହୁଦୀର୍ ଖୁସୀ ମାନ୍ଚାର୍ କେରାର୍। ଆରୁ ଆବ୍ଡ଼ାର୍ ପାର୍ମେଶ୍ୱାର୍ସ୍କି ବଚନ୍ଘି ମାହିମା କାମା ଲାଗ୍ଗିୟାର୍ ଆରୁ ଯେତ୍କ ଆଲାରିନ୍ ସବୁଦିନ୍ତା ଜୀବନ୍ଘି ଲାଗାନ୍ ଚାଜ୍ଜକାଚାର୍, ଆବ୍ଡ଼ାର୍ ଯୀଶୁସ୍କି ମିଆଁ ବିଶ୍ୱାସ୍ କାମ୍ଚାର୍। 49ଆରୁ ପ୍ରାଭୁସ୍କି ବଚନ୍ଦ୍ ହୁ ଜାମା ଦେଶ୍ନୁ ଫାଏଲାରାଚା କେରା। 50ଲେକିନ୍ ୟାହୁଦୀଜାମାର୍ ଧାର୍ମିକ୍ ମାଏକିନିଆଁରିନ୍ ଆରୁ ସହର୍ତା ମୁଖ୍ୟା ଆଲାରିନ୍ ଚାଢ଼ାବାଚାର୍ ଆରୁ ପାଉଲୁସ୍ ଆରୁ ବାର୍ନାବାସ୍କି ବିରୁଦ୍ଧ ସାତାବିକିରି ଆବ୍ଡ଼ାରିନ୍ ତାହ୍ମା ସୀମାନ୍ତି ଅଥ୍ରେଇଚାର୍। 51ଆଙ୍ଗେନ୍ ପାଉଲୁସ୍ ଆରୁ ବାର୍ନାବାସ୍ ଆବ୍ଡ଼ାର୍ଘି ବିରୁଦ୍ଧନୁ ନିଜର୍-ନିଜର୍ ହେଡ୍ଡୁନ୍ତା ଧୁଲିବନ୍ ହେତ୍ତେଇଚାର୍ ଆରୁ ଇକନୀୟଗେ ବୁଙ୍ଗାର୍ କେରାର୍। 52ଆରୁ ଚେଲା୧୩:୫୨ ଚେଲା ମତଲବ୍ ଯୀଶୁସ୍କି ମିଆଁ ବିଶ୍ୱାସ୍ କାମୁରିନ୍ ବୁଝୁର୍ତାରାଲି। ଜାମାର୍ ଖୁସୀତି ଆରୁ ପାବିତାର୍ ଆତ୍ମାତି ଭାର୍ପୁର୍ ମାନାଗେ ଲାଗ୍ଗିୟାର୍।
14ଇକୁନିୟୁମ୍ ସହର୍ନୁ ପାଉଲୁସ୍ ଆରୁ ବାର୍ନାବାସ୍ ସୁସାମାଚାର୍ ପ୍ରଚାର୍ କାମାଲ୍ନାଏ
1ଇକନୀୟ ସହର୍ନୁହି ଏନ୍ନେ ମାନ୍ଚା କା ପାଉଲୁସ୍ ଆରୁ ବାର୍ନାବାସ୍ ୟାହୁଦୀ ଜାମାର୍ଘି ସାଭା ଆଡ଼୍ପାନୁ କାଇକିରି ଏନ୍ନେ କାତ୍ଥା ତେଙ୍ଗିୟାର୍ ଯେ ୟାହୁଦୀ ଆରୁ ଗ୍ରୀକ୍ଜାମାର୍ଘି ଭିତ୍ରୁ ଢେର୍ ଆଲାର୍ ଯୀଶୁ ଖ୍ରୀସ୍ତ୍କି ମିଆଁ ବିଶ୍ୱାସ୍ କାମ୍ଚାର୍। 2ଲେକିନ୍ ଏକା ୟାହୁଦୀଜାମାର୍ ବିଶ୍ୱାସ୍ ମା କାମ୍ଚାର୍, ଆବ୍ଡ଼ାର୍ ବିନାୟାହୁଦୀର୍ଘି ମନ୍ବନ୍ ଚାଢ଼ାବାଇକିରି ଭାଇ ଜାମାର୍ଘି ବିରୁଦ୍ଧନୁ ଖାରାପ୍ ସୋଚ୍ ନିନ୍ଦେଇଚାର୍। 3ପାଉଲୁସ୍ ଆରୁ ବାର୍ନାବାସ୍ ଢେର୍ ଦିନ୍ତକ୍ ଆସାନ୍ ରାଚାର୍। ଆରୁ ପ୍ରାଭୁସ୍କି ଆଶ୍ରାନୁ ରାଇକିରି ସାହାସ୍ତି ସୁସାମାଚାର୍ ପ୍ରଚାର୍ କାମାଲିୟାର୍। ଆରୁ ପ୍ରାଭୁସ୍ ଆବ୍ଡ଼ାର୍ଘି ହେଖ୍ଖାନ୍ତି ବହୁତ୍ ପ୍ରକାର୍ଘି ଚିହ୍ନା ଆରୁ ଅଦ୍ଭୁତ୍ ନାଲ୍ଖୁ କାମ୍ତିକିରି ତାଙ୍ଘା କ୍ରିପାଘି ବଚନ୍ଘି ମିଆଁ ସାକ୍ଷୀ ଚିଆଲିୟାସ୍। 4ଲେକିନ୍ ସହର୍ତା ଆଲାର୍ ଦୁଇ ଭାଗ୍ ମାନ୍ଚାର୍ କେରାର୍, ଆଧା ଆଲାର୍ ୟାହୁଦୀ ଜାମାର୍ଘି ପାଖା ଆରୁ, ଆରୁ ଆଧା ଆଲାର୍ ଚେଲାଜାମାର୍ଘି ପାଖା ମାନ୍ଚାର୍ କେରାର୍। 5ଲେକିନ୍ ଯେତ୍କବାକେନ୍ ଦୁସ୍ରା ଜାତିୟାର୍ ଆରୁ ୟାହୁଦୀଜାମାର୍ ତାହ୍ମା ମୁଖ୍ୟାର୍ଗାନେ ଆବ୍ଡ଼ାରିନ୍ ଅପ୍ମାନ୍ କାମିକିରି ଚାଁଚାତି ଲେବ୍ଡ଼ାଗେ ଉସ୍କାରାଚାର୍। 6ଯେତ୍କବାକେନ୍ ପାଉଲୁସ୍ ଆରୁ ବାର୍ନାବାସ୍ ଇ କାତ୍ଥାନ୍ ଆଖିୟାର୍, ତା ଆବ୍ଡ଼ାର୍ ଲୁକାୟନିଆ ରାଜୀଘି ଲୁସ୍ତ୍ରା ଆରୁ ଦର୍ବୀ ସହର୍ଗେ ଆରୁ ଚାରିପାଖାନ୍ତା ରାଜୀଗେ ବୁଙ୍ଗିୟାର୍କେରାର୍। 7ଆରୁ ଆସାନ୍ ଆବ୍ଡ଼ାର୍ ସୁସାମାଚାର୍ ପ୍ରଚାର୍ କାମାଗେ ଲାଗ୍ଗିୟାର୍।
ପାଉଲୁସ୍ ଅଣ୍ଟା ଜନମ୍ତି ଲେଙ୍ଗ୍ଡ଼ା ଆଲାସିନ୍ ଚାଙ୍ଗା କାମାଲ୍ଦାସ୍
8ଲୁସ୍ତ୍ରାନୁ ଅଣ୍ଟା ଆଲାସ୍ ରାଚାସ୍, ଆସ୍କି ହେଡ୍ଡୁ ଲୁହ୍ଲା ରାଚା। ଆସ୍ ଜନମ୍ତି ଲେଙ୍ଗ୍ଡ଼ା ରାଚାସ୍ ଆରୁ ଏକ୍ଲାହି ଆସ୍ ମାଲ୍ଲା ଏକୁସ୍। 9ଆ ଆଲାସ୍ ଆସାନ୍ ଅକ୍କାଚାସ୍ ଆରୁ ପାଉଲୁସ୍କି କାତ୍ଥା ମେନାଲିୟାସ୍। ପାଉଲୁସ୍ ଆସିନ୍ ଏକ୍ ନଜର୍ ଏରିକିରି ଚାଙ୍ଗା ମାନାଗେ ଆସ୍କି ବିଶ୍ୱାସ୍ ରାଇ ବୁଲି ଆଖ୍ଖାସ୍। 10ଆରୁ ଜୋର୍ସେ ଚିର୍ରା ରାଇକିରି ତେଙ୍ଗିୟାସ୍, “ନିଙ୍ଘା ହେଡ୍ଡୁତି ସିଧା ଇଲା।” ଆଙ୍ଗେନ୍ ଆସ୍ ଡେକ୍ଚାସ୍ ଆରୁ ଏକାଗେ ଲାଗ୍ଗିୟାସ୍।
11ଆଲାର୍ ପାଉଲୁସ୍କି ଇ ନାଲ୍ଖୁନ୍ ଏରିକିରି ଲୁକାୟନିଆ ଭାଷାତି ଜୋର୍ସେ ଚିର୍ରା ରାଇକିରି ତେଙ୍ଗିୟାର୍, “ଦେବ୍ତା ଜାମାର୍ ଆଲାର୍ଘି ରୂପ୍ନୁ ନାହ୍ମା ମାଝାନୁ ଏତ୍ତିୟାର୍ ବାର୍ଚ୍କାନାଏ।” 12ଆବ୍ଡ଼ାର୍ ବାର୍ନାବାସ୍ସିନ୍ ବୁହପ୍ସତି ଦେବ୍ତା ବୁଲି ତେଙ୍ଗିୟାର୍ ଆରୁ ପାଉଲୁସ୍ସିନ୍ ବୁଦ୍ଧ୍ ଦେବ୍ତା ବୁଲି ତେଙ୍ଗିୟାର୍ ଏନ୍ଦେର୍ଗେକା ପାଉଲୁସ୍ ମୁଖ୍ୟା ତେଙ୍ଗୁ ଆଲାସ୍ ରାଚାସ୍। 13ସହର୍ଘି ସାମ୍ନାନୁ ଅଣ୍ଟା ବୁହପ୍ସତି ମନ୍ଦିର୍ ରାଚା। ଆ ମନ୍ଦିର୍ତା ପୁରୋହିତ୍ସ୍ ଓୟୁ ଆରୁ ପୁଁପୁଘି ମାଲା ସହର୍ଘି ଫାଟକ୍ ଚାହାଗେ ଅନ୍ଦ୍ରାସ୍, ଏନ୍ଦେର୍ଗେକା ପୁରୋହିତ୍ସ୍ ଆଲାର୍ ଗାନେ ଆବ୍ଡ଼ାର୍ଘି ଲାଗାନ୍ ବଲୀ ଚାଢ଼ାବାଗେ ବେଦ୍ଦାଲିୟାସ୍। 14ଲେକିନ୍ ଖାସ୍ଚେଲା ବାର୍ନାବାସ୍ ଆରୁ ପାଉଲୁସ୍ ଯେତ୍କବାକେନ୍ ଇ କାତ୍ଥାନ୍ ମେନ୍ଚାର୍ ତା, ଆରୁ ନିଜର୍-ନିଜର୍ ଚିଢ଼ାବନ୍ ଏଟ୍ଟେଇଚାର୍ ଆରୁ ଆଲାର୍ଘି ମାଝାନୁ କୁଦିୟାରାତେ କେରାର୍ ଆରୁ ଚିର୍ରା ରାଇକିରି ତେଙ୍ଗିୟାର୍, 15“ହେ ଆଲାରୋ, ଏନ୍ଦେର୍ଗେ ନିମ୍ ଏନ୍ନେ କାମାଲ୍ଦାର୍? ଏମ୍ହି ନିହ୍ମା ଲେଖା ସୁଃଖୁ ଦୁଃଖୁ ଭୋଗୁ ଆଲାମ୍। ନିହ୍ମା ଚାହାନୁ ଇ ସୁସାମାଚାର୍ ପ୍ରଚାର୍ କାମାଲ୍ଦାମ୍, ଏସ୍କେ କା ନିମ୍ ଇ ଜାମା ବେକାର୍ ଜିନିଷ୍ତି ଦୁର୍ ମାନିକିରି ଜୀବିତ୍ ପାର୍ମେଶ୍ୱାର୍ସ୍ ତାରା କିର୍ରର୍ ବାରର୍। ଏକାସ୍ କା ସରଗ୍, ଦୁନିଆଁ, ସାମ୍ଧୁର୍ ଆରୁ ଆନ୍ନୁ ରାନାବାଲା ଜାମାନ୍ ସିର୍ଜାଚ୍କାଦାସ୍। 16ଆଘ୍ଲି ଯୁଗ୍ନୁ ପାର୍ମେଶ୍ୱାର୍ସ୍ ଜାମା ଜାତିନ୍ତା ଆଲାରିନ୍ ନିଜର୍-ନିଜର୍ ପାବୁନୁ କାଲାଗେ ଆମ୍ବେଇ ଚିଚ୍କାଚାସ୍। 17ହାଲେହି ଆସ୍ ନିମାନ୍ ବିନା ସାକ୍ଷୀ ଚିଇକିରି ମାଲ୍ଲା ଆମ୍ବୁସ୍; ଏନ୍ଦେର୍ଗେକା ଆସ୍ ନିହ୍ମାଏ ଭାଲାଇ କାମ୍ଚ୍କାଦାସ୍। ଆରୁ ଆକାଶ୍ତି ଚେପୁ ଚିଚ୍ଚାସ୍ ଆରୁ ଫାଡ଼ୁ ଗୁଠିଘି ରୁତୁ ଚିଇକିରି ଆସିନ୍ ଅନାମହାଗେ ଚିଚ୍କାଦାସ୍ ଆରୁ ଖୁସୀତି ନିହ୍ମା ମନ୍ବନ୍ ଭାର୍ପୁର୍ କାମ୍ଚ୍କାଦାସ୍।” 18ଇବ୍ଡ଼ା ଜାମା କାତ୍ଥା ତେଙ୍ଗିକିରି ଖାସ୍ଚେଲାଜାମାର୍ କେତ୍କ କଷଟ୍ନୁ ତାହ୍ମାଲାଗାନ୍ ବଲୀ ଚାଢ଼ାବାନାନ୍ତି ଆଲାରିନ୍ ମାନା କାମ୍ଚାର୍।
19ଲେକିନ୍ ଆନ୍ତାଖିଆ ଆରୁ ଇକନୀୟତି କେତ୍କ ୟାହୁଦୀଜାମାର୍ ବାରିକିରି ଆଲାରିନ୍ ତାହ୍ମା ପାଖା କାମ୍ଚେଇଚାର୍ ଆରୁ ପାଉଲୁସ୍ସିନ୍ ଚାଁଚାତି ଲେବ୍ଡ଼ାଚାର୍, ଆରୁ କେଚ୍ଚାସ୍କେରାସ୍ ବୁଲି ଆସିନ୍ ସହର୍ଘି ବାହ୍ରି ଟାଣ୍ତେ-ଟାଣ୍ତେ ଅଚ୍ଚାର୍ କେରାର୍। 20ଲେକିନ୍ ଯେତ୍କବାକେନ୍ ଚେଲାଜାମାର୍ ପାଉଲୁସ୍କି ଚାରିପାଖା ଘେର୍ଚେଇଚାର୍, ତା ଆସ୍ ଉସ୍କାରାଇକିରି ସହର୍ଗେ କେରାସ୍, ଆରୁ ଆଦ୍ଘି ନାନ୍ନୁ ଉଲା ବାର୍ନାବାସ୍ଗାନେ ଦର୍ବୀଗେ କେରାର୍।
ପାଉଲୁସ୍ ଆରୁ ବାର୍ନାବାସ୍ ସିରିଆଘି ଆନ୍ତାକିୟାଗେ କିର୍ରାଲ୍ନାଏ
21ପାଉଲୁସ୍ ଆରୁ ବାର୍ନାବାସ୍ ହୁ ସହର୍ତା ଆଲାରିନ୍ ସୁସାମାଚାର୍ ଶୁଣାବାଚାର୍ ଆରୁ ବହୁତ୍ ଆଲାରିନ୍ ଚେଲା ବାନାବାଚାର୍। ହୁଦ୍ଘିପାଛ୍ଲି ଲୁସ୍ତ୍ରା, ଇକନୀୟ, ଆରୁ ଆନ୍ତାଖିଆଗେ କିର୍ୟାର୍ ବାର୍ଚାର୍। 22ଆରୁ ଆସାନ୍ ଆବ୍ଡ଼ାର୍ ଚେଲାଜାମାର୍ଘି ମନ୍ବନ୍ ଧିରାଜ୍ ଧାରାଗେ ତେଙ୍ଗାଲିୟାର୍ ଆରୁ ବିଶ୍ୱାସ୍ନୁ ମଜ୍ବୁତ୍ ରାଗେ ଆବ୍ଡ଼ାରିନ୍ ଉତ୍ସାହିତ୍ କାମାଲିୟାର୍। ଆରୁ ତେଙ୍ଗାଲିୟାର୍, “ବହୁତ୍ କଷଟ୍ ସାହିକିରି ନାମାଗେ ପାର୍ମେଶ୍ୱାର୍ସ୍କି ରାଜୀନୁ କରାଗେ ଖାତ୍ରୋ।” 23ଆରୁ ପାଉଲୁସ୍ ଆରୁ ବାର୍ନାବାସ୍ ଜାମା ମଣ୍ତ୍ଲୀନୁ ଆବ୍ଡ଼ାର୍ଘି ଲାଗାନ୍ ପୁର୍ଖାରିନ୍ ଚାଜ୍ଜିୟାର୍, ଆରୁ ଉପାସ୍ ରାଇକିରି ବିନ୍ତି କାମ୍ଚାର୍ ଆରୁ ଏକା ପ୍ରାଭୁସ୍କି ମିଆଁ ଆବ୍ଡ଼ାର୍ ବିଶ୍ୱାସ୍ କାମାଲିଆର୍ ଆ ପ୍ରାଭୁସ୍କି ହେଖ୍ଖାନୁ ଆବ୍ଡ଼ାରିନ୍ ସୋଁପ୍ଚେଇଚାର୍।
24ଆନ୍ତିନ୍ ପାଉଲୁସ୍ ଆରୁ ବାର୍ନାବାସ୍ ପିସିଦିଆ ଚିଇକିରି ପଂଫୂଲିଆଗେ କେରାର୍। 25ଆରୁ ପର୍ଗୀନୁ ସୁସାମାଚାର୍ ପ୍ରଚାର୍ କାମିକିରି ଆତ୍ତାଲିୟାଗେ କେରାର୍। 26ଆରୁ ଆସ୍ତି ଆବ୍ଡ଼ାର୍ ଜାହାଜ୍ନୁ ଆନ୍ତାଖିଆଗେ ବାର୍ଚାର୍, ଆବ୍ଡ଼ାର୍ ଏକା ନାଲ୍ଖୁନ୍ ପୁରା କାମ୍ଚାର୍ ଆବନ୍ କାମାଗେ ପାର୍ମେଶ୍ୱାର୍ସ୍କି କ୍ରିପାନୁ ସୋଁପ୍ରିକିରି ଆ ଆଡ୍ଡାନ୍ତି ଉର୍କାଚାର୍। 27ଆବ୍ଡ଼ାର୍ ଆସାନ୍ ଆଣସିକିରି ମଣ୍ତ୍ଲୀନ୍ତା ଆଲାରିନ୍ ଠୁଡ଼ିୟାଚାର୍ ଆରୁ ପାର୍ମେଶ୍ୱାର୍ସ୍ ଆବ୍ଡ଼ାର୍ ଗାନେ ରାଇକିରି ଏକା ଜାମା ନାଲ୍ଖୁନ୍ କାମ୍ଚାସ୍ ଆରୁ ଦୁସ୍ରା ଜାତିୟାର୍ଘି ଲାଗାନ୍ ବିଶ୍ୱାସ୍ଘି ବାଲି ଖୋଲ୍ଚେଇଚ୍କାଚାସ୍, ଆବ୍ଡ଼ା ଜାମାନ୍ ତେଙ୍ଗିୟାର୍। 28ଆରୁ ପାଉଲୁସ୍ ଆରୁ ବାର୍ନାବାସ୍ ବିଶ୍ୱାସୀ ଜାମାର୍ଗାନେ ଢେର୍ ଦିନ୍ତକ୍ ରାଚାର୍।
15ଯେରୁଶାଲେମ୍ନୁ ଅଣ୍ଟା ସାଭା ମାନ୍ଚା
1ଆଦ୍ଘି ପାଛ୍ଲି କେତ୍କ ଲୋକ୍ ଆଲାର୍ ୟାହୁଦା ପ୍ରଦେଶ୍ନ୍ତି ଆନ୍ତାଖିଆଗେ ବାରିକିରି ଭାଇଜାମାରିନ୍ ଇ ଶିକ୍ଷା ଚିୟାଗେ ଲାଗ୍ଗିୟାର୍: “ମୁଶାସ୍କି ନିୟମ୍ ଅନୁସାର୍ ନିହ୍ମା ଷୋଠି (ଖାତ୍ନା) ମା ମାନ୍ଚ୍କୁନ୍ ନିମାଗେ ମୁକ୍ତି ମା ହାଖ୍ଖରିଦ୍।” 2ପାଉଲୁସ୍ ଆରୁ ବାର୍ନାବାସ୍ ଇ କାତ୍ଥାନୁ ରାଜୀ ମାଲ୍ଲା ମାନୁର୍, ହୁଦ୍ଘିଲାଗାନ୍ ପାଉଲୁସ୍ ଆରୁ ବାର୍ନାବାସ୍କି ଆବ୍ଡ଼ାର୍ ଗାନେ ବହୁତ୍ ଝାଗ୍ଡ଼ା ଆରୁ କାଁଟ୍ଛାଁଟ୍ ମାନ୍ଚା। ଆଙ୍ଗେନ୍ ଭାଇଜାମାର୍ ପାଉଲୁସ୍, ବାର୍ନାବାସ୍ ଆରୁ ଆରୁ କେତ୍କ ଲୋକ୍ ବିଶ୍ୱାସୀରିନ୍ ଇ କାତ୍ଥାଘି ବାରେ ଯେରୁଶାଲେମ୍ ତା ଖାସ୍ଚେଲା ଆରୁ ପୁର୍ଖାର୍ସାନ୍ ତାଇୟାଗେ ସ୍ଥିର୍ କାମ୍ଚାର୍। 3ଆନ୍ତିନ୍ ମଣ୍ତ୍ଲୀଦ୍, ଆବ୍ଡ଼ାରିନ୍ ବିଦା କାମ୍ଚା, ଆରୁ ଆବ୍ଡ଼ାର୍ ଫିନୀକୀୟା ଆରୁ ସାମାରିଆ ଚିଇକିରି କାନାବାକେନ୍ ଆବ୍ଡ଼ାର୍ ଦୁସ୍ରା ଜାତିୟାର୍ଘି ମନ୍ ପରିବର୍ତ୍ତନ୍ଘି ବାରେନୁ ତେଙ୍ଗାଲିୟାର୍, ଆଙ୍ଗେନ୍ ଜାମା ଭାଇଜାମାର୍ ବହୁତ୍ ଖୁସୀ ମାନ୍ଚାର୍ କେରାର୍। 4ହୁଦ୍ଘିପାଛ୍ଲି ଯେତ୍କବାକେନ୍ ଆବ୍ଡ଼ାର୍ ଯେରୁଶାଲେମ୍ଗେ ଆଣସିୟାର୍ ତା, ମଣ୍ତ୍ଲୀ ଆରୁ ଖାସ୍ଚେଲା ଆରୁ ପୁର୍ଖାର୍ ଆବ୍ଡ଼ାରିନ୍ ସ୍ୱାଗାତ୍ କାମ୍ଚାର୍। ଆରୁ ପାର୍ମେଶ୍ୱାର୍ସ୍ ଆବ୍ଡ଼ାର୍ ଗାନେ ରାଇକିରି ଏନ୍ଦେର୍-ଏନ୍ଦେର୍ ନାଲ୍ଖୁ କାମ୍ଚ୍କାଦାସ୍ ଆବନ୍ ତେଙ୍ଗିୟାର୍। 5ଲେକିନ୍ ଫାରିସୀ ଦଲ୍ତା କେତ୍କ ଲୋକ୍ ବିଶ୍ୱାସୀର୍ ଇଲିକିରି ତେଙ୍ଗିୟାର୍, “ଦୁସ୍ରା ଜାତିୟାରିନ୍ ଖାତ୍ନା କାମାଗେ ଆରୁ ମୁଶାସ୍କି ନିୟମ୍ବନ୍ ପାଲନ୍ କାମାଗେ ହୁକୁମ୍ ଚିନା କାତ୍ଥା।”
6ଆଙ୍ଗେନ୍ ଇ କାତ୍ଥାବନ୍ ବିଚାର୍ କାମାଗେ ଖାସ୍ଚେଲା ଆରୁ ପୁର୍ଖାର୍ ଠୁଡ଼ିୟାରାଚାର୍। 7ଆନ୍ତିନ୍ ବହୁତ୍ କାଁଟ୍ଛାଁଟ୍ ମାନ୍ଚ୍କା ପାଛ୍ଲି ପାତ୍ରାସ୍ ଇଜ୍ଜାସ୍ ଆରୁ ଆବ୍ଡ଼ାରିନ୍ ତେଙ୍ଗିୟାସ୍, “ହେ ଭାଇ ଜାମାରୋ, ନିମ୍ ଜାମାର୍ ଆହ୍ଦାର୍ କା ବହୁତ୍ ଉଲ୍ଲାଘି ଆଘ୍ଲି ପାର୍ମେଶ୍ୱାର୍ସ୍ ନିହ୍ମା ଭିତ୍ରୁ ଏଙ୍ଗାନ୍ ଚାଜ୍ଜକାଚାସ୍ ତାକା ଏଙ୍ଘା ତେଙ୍କା ଦ୍ୱାର୍ନୁ ଦୁସ୍ରା ଜାତିୟାର୍ ସୁସାମାଚାର୍ଘି ବଚନ୍ ମେନର୍ ଆରୁ ବିଶ୍ୱାସ୍ କାମର୍। 8ମନ୍ବନ୍ ଯାଁଚନାବାଲା ପାର୍ମେଶ୍ୱାର୍ସ୍ ନାମାଗେ ଏସ୍କେ ପାବିତାର୍ ଆତ୍ମା ଚିଚ୍କାଦାସ୍, ଆନ୍ନେନ୍ ଆବ୍ଡ଼ାର୍ଗେହି ପାବିତାର୍ ଆତ୍ମା ଚିଇକିରି ଆବ୍ଡ଼ାର୍ଘି ବାରେନୁ ସାକ୍ଷୀ ଚିଚ୍କାଦାସ୍। 9ଆରୁ ପାର୍ମେଶ୍ୱାର୍ସ୍ ନାହ୍ମାଏ ଆରୁ ଆବ୍ଡ଼ାର୍ଘି ଭିତ୍ରେ ଏନ୍ଦେର୍ହି ଭେଦ୍ଭାବ୍ ମା ଉଇୟିକିରି ବିଶ୍ୱାସ୍ ଦ୍ୱାର୍ନୁ ଆବ୍ଡ଼ାର୍ଘି ମନ୍ବନ୍ ଶୁଦ୍ଧ୍ କାମ୍ଚ୍କାଦାସ୍। 10ତା ଆକ୍କୁନ୍ ନିମ୍ ଏନ୍ଦେର୍ଗେ ପାର୍ମେଶ୍ୱାର୍ସ୍କି ପରୀକ୍ଷା କାମାଲ୍ଦାର୍। କା ଚେଲାର୍ଘି ହେଁସେର୍ନୁ ଏନ୍ନେ ଭାର୍ ଉଇୟାଲ୍ଦାର୍, ଏକାନ୍ କା ନା ନାହ୍ମା ପୁର୍ଖାର୍ ଚେଡ଼ା ଅଙ୍ଗାଲିୟାର୍ ଆରୁ ନା ତା ନାମ୍ ଚେଡ଼ା ଅଙ୍ଗତ୍? 11ଲେକିନ୍ ନାମ୍ ଏସ୍କେ ପ୍ରାଭୁ ଯୀଶୁସ୍କି କ୍ରିପାତି ମୁକ୍ତି ହାଖ୍ଖତ୍ ଆନ୍ନେନ୍ ଆବ୍ଡ଼ାର୍ହି ମୁକ୍ତି ହାଖ୍ଖର୍ ବୁଲି ନାମ୍ ବିଶ୍ୱାସ୍ କାମାଲ୍ଦାତ୍।”
12ଆଙ୍ଗେନ୍ ସାଭାନ୍ତା ଜାମାର୍ କାଡ଼େ-କାଡ଼େ ରାଚାର୍ ଆରୁ ବାର୍ନାବାସ୍ ଆରୁ ପାଉଲୁସ୍କି ଦ୍ୱାର୍ନୁ ଦୁସ୍ରା ଜାତିୟାର୍ଗେ ପାର୍ମେଶ୍ୱାର୍ସ୍ ଏସ୍କେ ବାଡ଼୍କା-ବାଡ଼୍କା ଅଦ୍ଭୁତ୍ ନାଲ୍ଖୁ ଆରୁ ଚିହ୍ନାଗୁଠିନ୍ ଏଦ୍କାଚାସ୍, ଆବନ୍ ଆବ୍ଡ଼ାର୍ସ୍ତି ମେନାଗେ ଲାଗ୍ଗିୟାର୍। 13ଆବ୍ଡ଼ାର୍ଘି କାତ୍ଥା ମୁଞ୍ଜର୍କା ପାଛ୍ଲି ୟାକୁବ୍ସ୍ ତେଙ୍ଗିୟାସ୍, “ହେ ଭାଇ ଜାମାରୋ, ଏଙ୍ଘା କାତ୍ଥାନ୍ ମେନା। 14ଶିମୋନ୍ସ୍ ତେଙ୍ଗିୟାସ୍ କା ପାର୍ମେଶ୍ୱାର୍ସ୍ ପହ୍ଲେ ଦୁସ୍ରା ଜାତିୟାରିନ୍ ଏତ୍କ କ୍ରିପା କାମ୍ଚାସ୍ କା ଆବ୍ଡ଼ାର୍ଘି ଭିତର୍ନୁ କେତ୍କ ଲୋକ୍ରିନ୍ ତାଙ୍ଘା ନାମେଘି ଲାଗାନ୍ ଚାଜ୍ଜିୟାସ୍। 15ଆରୁ ନାବୀଜାମାର୍ଘି ବଚନ୍ବଦ୍ ଇଦ୍ଘିଗାନେ ମେଶ୍ରାଲିଦ୍, ଏସ୍କେ କା ଲେଖ୍ଚ୍କା ରାଇ, 16‘ଇଦ୍ଘି ପାଛ୍ଲି ଏନ୍ କିର୍ରନ୍ ବାରନ୍ ଆରୁ ଦାଉଦ୍ସ୍କି ଧାସ୍କାରାଚ୍କା ଆଡ଼୍ପାନ୍ ଆରୁଅହନ୍ କାମନ୍, ଆରୁ ଆସ୍କି ଖାତ୍ର୍କା ଆଡ୍ଡାନ୍ ଆରୁଅହନ୍ କାମନ୍ ଆରୁ ଇଲ୍ତନ୍। 17ହୁଦ୍ଘିଲାଗାନ୍ କା ବାଛ୍ର୍କା ଆଲାର୍ ମତ୍ଲବ୍ ଜାମା ବିନାୟାହୁଦୀର୍ ଏକାର୍ ଏଙ୍ଘା ନାମେନୁ ଆହା କାନାଏ, ଆବ୍ଡ଼ାର୍ ପ୍ରାଭୁସ୍କି ଖୋଜ୍ କାମ୍ନାର୍, 18ଜାମାକିଛି କାମ୍ନାବାଲା ପ୍ରାଭୁସ୍ ଏନ୍ନେ ତେଙ୍କାଦାସ୍। ଏକାସ୍ କା ଦୁନିଆଁଘି ସୁରୁନ୍ତି ଇ ଜାମା କାତ୍ଥାନ୍ ତେଙ୍କତେ ବାରାଲ୍ଦାସ୍।’
19ହୁଦ୍ଘିଲାଗାନ୍ ଏଙ୍ଘାଏ ବିଚାର୍ ଇଦ୍ କା ବିନାୟାହୁଦୀର୍ ଏକାର୍ କା ପାର୍ମେଶ୍ୱାର୍ସ୍କି ତାରା କିର୍ନାଏ ବାର୍ନାଏ, ଆବ୍ଡ଼ାର୍ଗେ ନାମ୍ ଦୁଃଖୁ ମା ଚିନା କାତ୍ଥା। 20ଲେକିନ୍ ନାମାଗେ ତା ଆବ୍ଡ଼ାର୍ସାନ୍ ଲେଖ୍ନା ଆରୁ ତାଇନା କାତ୍ଥା କା ମୂର୍ତ୍ତୀଗେ ଚାଢ଼ାବାଚ୍କା ଅନ୍ନା ମହଁନାନ୍ ମା ମହଁନା କାତ୍ଥା, ଆରୁ ବେଭିଚାର୍ତି ବାଛ୍ରିକିରି ରର୍, ହଁଟନ୍ ପେଧିକିରି ପିଟ୍ଟକା ପଶୁଘି ଆହ୍ଡ଼ା ଆରୁ ହେଁସୁନ୍ ମା ମହଁନା କାତ୍ଥା। 21ଏନ୍ଦେର୍ଗେକା ଆଘ୍ଲି ଯୁଗ୍ଗୁତି ଜାମା ସହର୍ନୁ ମୁଶାସ୍କି ନିୟମ୍ବନ୍ ପ୍ରଚାର୍ କାମ୍ନାବାଲାର୍ ରାନାଏ, ଆଦ୍ଘି ଲାଗାନ୍ ଜାମା ଆରାମ୍ ଉଲ୍ଲାନୁ ସାଭା ଆଡ଼୍ପାଗୁଠିନୁ ଆସ୍କି ନିୟମ୍ବନ୍ ପାଢ଼ା କାଲି।”
ବିନାୟାହୁଦୀ ବିଶ୍ୱାସୀ ଜାମାର୍ଘି ନାମେନୁ ଚିଠି
22ହତ୍କବାକେନ୍ ଖାସ୍ଚେଲା ଆରୁ ପୁର୍ଖାଜାମାର୍ ଜାମା ମଣ୍ତ୍ଲୀଗାନେ ଏନ୍ନେ ସ୍ଥିର୍ କାମ୍ଚାର୍ କା ତାହ୍ମାସ୍ତି କେତ୍କ ଲୋକ୍ ଆଲାରିନ୍ ଚାଜିକିରି ପାଉଲୁସ୍ ଆରୁ ବାର୍ନାବାସ୍ଗାନେ ଆନ୍ତାଖିଆ ତାଇୟର୍। ତା ଆବ୍ଡ଼ାର୍ ଯୁଦାସ୍ ଏକାସିନ୍କା ବାର୍ସାବ୍ବା ବାନାଏ ଆରୁ ସିଲାସ୍ସିନ୍ ଚାଜ୍ଜିୟାର୍। ଇବ୍ଡ଼ାର୍ ଭାଇ ଜାମାର୍ସ୍ତି ମୁଖ୍ୟା ରାଚାର୍, 23ଆରୁ ଆବ୍ଡ଼ାର୍ ଆବ୍ଡ଼ାର୍ଘି ହେଖ୍ଖାନୁ ଏନ୍ନେ ଲେଖିକିରି ତାଇୟାର୍: “ନିହ୍ମା ବନ୍ଧୁ, ଖାସ୍ଚେଲା, ଆରୁ ପୁର୍ଖାର୍ଘି ତାର୍ତି ଆନ୍ତାଖିଆ, ସିରିଆ ଆରୁ କିଲିକିଆନୁ ରାନାବାଲା ବିନାୟାହୁଦୀ ବିଶ୍ୱାସୀରିନ୍ ଯୋହାର୍। 24ଏମ୍ ମେନ୍ଚ୍କାମ୍ କା ଏହ୍ମା ଭିତ୍ରୁ ଏନ୍ନେ କେତ୍କ ଲୋକ୍ ନିହ୍ମାସାନ୍ କାଇକିରି ନିଜର୍ କାତ୍ଥାତି ନିମାନ୍ ଦୁଃଖୁ ଚିଚ୍କାନାଏ ଆରୁ ନିହ୍ମା ମନ୍ବନ୍ ଅସ୍ଥିର୍ କାମ୍ଚେଇଚିଚ୍କାନାଏ। ଲେକିନ୍ ଏମ୍ ଆବ୍ଡ଼ାରିନ୍ ଏନ୍ଦେର୍ହି ହୁକୁମ୍ ମାଲ୍ଲା ଚିୟୁମ୍। 25ଆଦ୍ଘି ଲାଗାନ୍ ଏମ୍ ଜାମାମ୍ ଏକ୍ମତ୍ ମାନିକିରି ସ୍ଥିର୍ କାମ୍ଚ୍କାମ୍ କା ଏହ୍ମା ଭିତର୍ନୁ କେତ୍କ ଲୋକ୍ରିନ୍ ଚାଜମ୍ ଆରୁ ଆବ୍ଡ଼ାରିନ୍ ଏହ୍ମା ଦୁଲାଡ଼ି ବାର୍ନାବାସ୍ ଆରୁ ପାଉଲୁସ୍ଗାନେ ନିହ୍ମାସାନ୍ ତାଇୟମ୍। 26ଇବ୍ଡ଼ାର୍ ଏନ୍ନେ ଆଲାର୍ ଏକାର୍ କା ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍କି ନାମେଘି ଲାଗାନ୍ ନିଜର୍ ଜୀବନ୍ବନ୍ ବିପଦ୍ନୁ ଟିଡ୍ଡେ ଚିଚ୍କାନାଏ। 27ହୁଦ୍ଘିଲାଗାନ୍ ଏମ୍ ଯୁଦାସ୍ ଆରୁ ସିଲାସ୍ସିନ୍ ତାଇୟାଲ୍ଦାମ୍, ଏକାର୍ କା ତାହ୍ମା ଥୁମ୍ଣାନ୍ତି ଇ ଜାମା କାତ୍ଥାନ୍ହି ତେଙ୍ଗର୍। 28ପାବିତାର୍ ଆତ୍ମାବନ୍ ଆରୁ ଏମାଗେ ଇଦ୍ ଠିକ୍ ଆହ୍ତାରାଚା କା ଇ ଦାର୍କାରି କାତ୍ଥାନ୍ ଆମ୍ବିକିରି, ନିହ୍ମା ମିଆଁ ଆରୁ ଭାର୍ ମା ଚିଦାମ୍; 29କା ନିମ୍ ମୂର୍ତ୍ତୀଗେ ଚାଢ଼ାବାଚ୍କା ଅନ୍ନାମହ୍ନାନ୍ ମା ମହ୍ଁନା କାତ୍ଥା, ହଁଟନ୍ ପେଧିକିରି ପିଟ୍ଟକା ପଶୁଘି ଆହ୍ଡ଼ା ଆରୁ ହେଁସୁନ୍ ମା ମହଁନା କାତ୍ଥା, ବେଭିଚାର୍ତି ବାଛ୍ରିକିରି ରା। ଇ ଜାମାର୍ସ୍ତି ବାଛ୍ରିକିରି ରର୍ ହାଲେ ନିମାଗେ ବାନେ ମାନୋ। ନିହ୍ମାଏ ଭାଲେଇ ମାନ୍ନାଦ୍।”
30ଆରୁ ଆବ୍ଡ଼ାର୍ ବିଦା ମାନିକିରି ଆନ୍ତାଖିଆଗେ ବାର୍ଚାର୍। ଆରୁ ଆସାନ୍ ମଣ୍ତ୍ଲୀନ୍ତା ଆଲାରିନ୍ ଏକ୍ଜୁଟ୍ କାମିକିରି ଆ ଚିଠିନ୍ ଚିଚ୍ଚାର୍। 31ଆବ୍ଡ଼ାର୍ ଆଦିନ୍ ପାଢ଼୍ଚାର୍ ଆରୁ ଦିଲାସା ହାଖ୍ଖୀକିରି ଖୁସୀ ମାନ୍ଚାର୍। 32ଆରୁ ଯୁଦାସ୍ ଆରୁ ସିଲାସ୍ ତା ଖୁଦ୍ନିଜେ ନାବୀ ରାଚାର୍, ହୁଦ୍ଘିଲାଗାନ୍ ବହୁତ୍ କାତ୍ଥାତି ଭାଇଜାମାରିନ୍ ମଜ୍ବୁତ୍ କାମ୍ଚାର୍। 33ଆରୁ ଆବ୍ଡ଼ାର୍ ଆସାନ୍ କେତ୍କ ଉଲ୍ଲା ରାଚ୍କାଘି ପାଛ୍ଲି ଏକାର୍ ତାମାନ୍ ତାଏକାଚାର୍, ଆବ୍ଡ଼ାର୍ସାନ୍ କିର୍ରାଗେ ଭାଇ ଜାମାର୍ସ୍ତି ଶାନ୍ତିନୁ ବିଦାୟ ଅଚ୍ଚାର୍। 34ଲେକିନ୍ ସିଲାସ୍ଗେ ଆସାନ୍ ରାଗେ ବାନେ ଲାଗ୍ଗିୟା। 35ଲେକିନ୍ ପାଉଲୁସ୍ ଆରୁ ବାର୍ନାବାସ୍ ଆନ୍ତାଖିଆନୁ ରାଚାର୍ କେରାର୍: ଆରୁ ଦୁସ୍ରା ଢେର୍ ଆଲାର୍ ଗାନେ ପ୍ରାଭୁସ୍କି ବଚନ୍ଘି ଉପ୍ଦେଶ୍ ଚିତେ ଆରୁ ସୁସାମାଚାର୍ ଶୁଣାବାତେ ରାଚାର୍।
ପାଉଲୁସ୍ ଆରୁ ବାର୍ନାବାସ୍ ବିଛ୍ଡ଼ା ରାଲ୍ନାଏ
36କେତ୍କ ଉଲ୍ଲାଘି ପାଛ୍ଲି ପାଉଲୁସ୍ ବାର୍ନାବାସ୍ସିନ୍ ତେଙ୍ଗିୟାସ୍, “ଗୁଚା, ନାମ୍ ଏକା-ଏକା ସହର୍ନୁ ପ୍ରାଭୁସ୍କି ବଚନ୍ବନ୍ ପ୍ରଚାର୍ କାମ୍ଚ୍କାଦାତ୍, ଆ ଜାମା ସହର୍ଗେ ଆରୁଅହନ୍ କାଇକିରି ଭାଇଜାମାରିନ୍ ଭେଁଟ୍ ମାନତ୍ ଆରୁ ଆବ୍ଡ଼ାର୍ ଏସ୍କେ ରାନାଏ ଏରୋତ୍।” 37ଆଙ୍ଗେନ୍ ବାର୍ନାବାସ୍, ଯୋହାନ୍ସିନ୍ ଏକାସିନ୍ କା ମାର୍କୁସ୍ ବାନାଏ, ଆସିନ୍ ସାଙ୍ଗେନ୍ ହୁଆଗେ ସୋଚ୍ଚାସ୍। 38ଲେକିନ୍ ପାଉଲୁସ୍ ଆସିନ୍ ହୁଆଗେ ଉଚିତ୍ ମନେ ମା କାମ୍ଚାସ୍, ଏକାସ୍ କା ପଂଫୂଲିଆନୁ ଆବ୍ଡ଼ାରସ୍ତି ଭିନେ ମାନ୍ଚାସ୍ କେର୍କାଚାସ୍, ଆରୁ ଆବ୍ଡ଼ାର୍ ଗାନେ ନାଲ୍ଖୁ ମାଲ୍ଲା କାମୁସ୍। 39ହୁଦ୍ଘିଲାଗାନ୍ ପାଉଲୁସ୍ ଆରୁ ବାର୍ନାବାସ୍କି ଭିତ୍ରେ ବହୁତ୍ ଯୋର୍ସେ ଝାଗ୍ଡ଼ା ମାନ୍ଚା ଆରୁ ଆବ୍ଡ଼ାର୍ ଏକ୍ ଦୁସ୍ରାର୍ସ୍ତି ଭିନେ ମାନ୍ଚାର୍ କେରାର୍; ବାର୍ନାବାସ୍ ମାର୍କୁସ୍ସିନ୍ ସାଙ୍ଗେନ୍ ଅଚ୍ଚାସ୍ ଆରୁ ଜାହାଜ୍ନୁ ଅକ୍କିକିରି ସାଇପ୍ରସ୍ଗେ କେରାର୍। 40ଲେକିନ୍ ପାଉଲୁସ୍ ସିଲାସ୍ସିନ୍ ଚାଜ୍ଜିୟାସ୍ ଆରୁ ଭାଇଜାମାର୍ ଆସିନ୍ ପ୍ରାଭୁସ୍କି କ୍ରିପାନୁ ସୋଁପଚେଇଚାର୍ ଆରୁ ପାଉଲୁସ୍ ଆସ୍ତି ବୁଙ୍ଗିୟାସ୍ କେରାସ୍। 41ଆରୁ ପାଉଲୁସ୍ ସିରିଆ ଆରୁ କିଲିକିଆ ମାନିକିରି କାନାବାକେନ୍ ମଣ୍ତ୍ଲୀନ୍ତା ଆଲାରିନ୍ ବିଶ୍ୱାସ୍ନୁ ମଜ୍ବୁତ୍ କାମ୍ଚାସ୍।
16ତିମଥିଉସ୍, ପାଉଲୁସ୍ ଆରୁ ସିଲାସ୍ଗାନେ ପ୍ରଚାର୍ କାମାଲ୍ଦାସ୍
1ଆନ୍ତିନ୍ ପାଉଲୁସ୍ ଦର୍ବୀ ଆରୁ ଲୁସ୍ତ୍ରା ସହର୍ଗେହି କେରାସ୍। ଆସାନ୍ ତୀମଥିଉସ୍ ନାମେଘି ଅଣ୍ଟା ଚେଲାସ୍ ରାଚାସ୍। ଆସ୍କି ତାଙ୍ଗ୍ୟ ବିଶ୍ୱାସୀ ୟାହୁଦୀ ରାଚା ଆରୁ ତାମ୍ବାସ୍ ଅଣ୍ଟା ଗ୍ରୀକ୍ ରାଚାସ୍। 2ଲୁସ୍ତ୍ରା ଆରୁ ଇକନୀୟ ତା ଭାଇଜାମାର୍ ତିମଥିଉସିନ୍ ଆଦର୍ମାଇନ୍ କାମାଲିୟାର୍। 3ପାଉଲୁସ୍ ତିମଥିଉସିନ୍ ସାଙ୍ଗେନ୍ ହୁଆଗେ ବେଦ୍ଦାଲିୟାସ୍; ହୁଦ୍ଘିଲାଗାନ୍ ଆ ଆଡ୍ଡାଗୁଠିନୁ ରୁ ୟାହୁଦୀ ଜାମାର୍ଘି ଲାଗାନ୍ ଆସ୍ ତିମଥିଉସିନ୍ ଖାତ୍ନା କାମ୍ଚାସ୍, ଏନ୍ଦେର୍ଗେକା ତାହ୍ମା ବୁଆସ୍ ଅଣ୍ଟା ଗ୍ରୀକ୍ ଆଲାସ୍ବୁଲି ଆବ୍ଡ଼ାର୍ଜାମାର୍ ଆକ୍କାଚାର୍। 4ଆରୁ ଆବ୍ଡ଼ାର୍ ସହର୍-ସହର୍ ଚିଇକିରି କାନାବାକେନ୍ ଯେରୁଶାଲେମ୍ନ୍ତା ଖାସ୍ଚେଲା ଆରୁ ପୁର୍ଖାର୍ଘି ଦ୍ୱାର୍ନୁ ଠାହ୍ରାଚ୍କା ନିୟମ୍ଗୁଠିନ୍ ପାଲନ୍ କାମାଗେ ଆସ୍ତା ଆଲାରିନ୍ ତେଙ୍ଗାଲିୟାର୍। 5ଏନ୍ନେନ୍ ମଣ୍ତ୍ଲୀ ଗୁଠିଦ୍ ବିଶ୍ୱାସ୍ନୁ ମଜ୍ବୁତ୍ ମାନ୍ତେକେରା ଆରୁ ଆଦ୍ଘି ସଂଖ୍ୟା ଦିନ୍କୁଦିନ୍ ବାଢ଼ର୍ତେ କେରାଦ୍।
ତ୍ରୋୟାସ୍ନୁ ପାଉଲୁସ୍ ଦର୍ଶନ୍ ଏରାଲ୍ଦାସ୍
6ଆସିଆ ଦେଶ୍ନୁ ବଚନ୍ ପ୍ରଚାର୍ କାମାଗେ ପାବିତାର୍ ଆତ୍ମା ମାନା କାମ୍ଚା, ହୁଦ୍ଘିଲାଗାନ୍ ପାଉଲୁସ୍ ଆରୁ ତାଙ୍ଘା ସାଙ୍ଗେର୍ ଫ୍ରୁଗିଆ ଆରୁ ଗାଲାତୀୟା ରାଜୀ ଚିଇକିରି କେରାର୍। 7ଆରୁ ଆବ୍ଡ଼ାର୍ ମୂସିଆ ଘି ଚାହା ଆଣସିକିରି, ବୀଥୂନିଆଗେ କାଲା ବେଦ୍ଦାଲିୟାର୍; ଲେକିନ୍ ଯୀଶୁସ୍କି ଆତ୍ମାଦ୍ ଆବ୍ଡ଼ାରିନ୍ ଆସାନ୍ହି କାଲାଗେ ମା ଚିଚ୍ଚା। 8ହୁଦ୍ଘିଲାଗାନ୍ ଆବ୍ଡ଼ାର୍ ମୂସିଆ ଚିଇକିରି ତ୍ରୋୟାସ୍ଗେ କେରାର୍। 9ମାଁହାବାକେନ୍ ପାଉଲୁସ୍ ଅଣ୍ଟା ଦର୍ଶନ୍ ଏରିୟାସ୍ କା ମାକିଦୁନିଆଁନ୍ତା ଅଣ୍ଟା ଆଲାସ୍ ତାଙ୍ଗାନ୍ ଆର୍ଜୀ କାମିକିରି ତେଙ୍ଗାଲ୍ଦାସ୍, “ମାକିଦୁନିଆଁଗେ ବାରିକିରି ଏମାନ୍ ମଦେତ୍ କାମା।” 10ପାଉଲୁସ୍ ଇ ଦର୍ଶନ୍ ହାକ୍କା ପାଛ୍ଲି ଏମ୍ ମାକିଦୁନିଆଁଗେ କାଲାଗେ ସୋଚ୍କାମ୍, ଏନ୍ଦେର୍ଗେକା ଏମ୍ ହୁଙ୍ଗେନିନ୍ ବୁଝ୍ର୍କାମ୍ କେର୍କାମ୍ କା ପାର୍ମେଶ୍ୱାର୍ସ୍ ଏମାନ୍ ଆବ୍ଡ଼ାରିନ୍ ସୁସାମାଚାର୍ ଶୁଣାବାଗେ ମେହଁତାଲ୍ଦାସ୍।
ଫିଲିପ୍ପୀନୁ ଲୁଦିଆଘି ମନ୍ ପରିବର୍ତ୍ତନ୍ ମାନ୍ଚା
11ହୁଦ୍ଘିଲାଗାନ୍ ତ୍ରୋୟାସ୍ତି ଜାହାଜ୍ନୁ ଅକ୍କିକିରି ଏମ୍ ସିଧା ସାମଥ୍ରାକୀଗେ କେର୍କାମ୍ ଆରୁ ଆଦ୍ଘି ଦୁସ୍ରା ଉଲ୍ଲା ନିୟାପଲିଗେ କେର୍କାମ୍। 12ଆସ୍ତି ଏମ୍ ଫିଲିପ୍ପୀଗେ କେର୍କାମ୍। ଇଦ୍ ମାକିଦୁନିଆଁନ୍ତା ହୁ ଆଡ୍ଡାନ୍ତା ଅଣ୍ଟା ମୁଖ୍ୟା ସହର୍ ଆରୁ ଅଣ୍ଟା ରୋମୀୟ ଜାମାର୍ଘି ବସ୍ତିଦ୍। ହୁ ସହର୍ନୁ ଏମ୍ କେତ୍କ ଦିନ୍ତକ୍ ରାଚ୍କାମ୍। 13ଆରାମ୍ ଉଲ୍ଲାନୁ ଏମ୍ ସହର୍ଘି ଫାଟକ୍ତି ଉର୍ଖିକିରି ହଁସ୍ରା ଖାଁଣିଗେ କେର୍କାମ୍। ଆସାନ୍ ବିନ୍ତି କାମ୍ନାଘି ଆଡ୍ଡା ରାଇ ବୁଲି ଏମ୍ ସୋଚାଲ୍କାମ୍। ଆରୁ ଏମ୍ ଆସାନ୍ ଅକ୍କାମ୍ ଆରୁ ଠୁଡ଼ିୟାରାଚ୍କା ମାଏକିନିଆଁର୍ଗାନେ କାଚ୍ନେଖ୍ରାଗେ ଲାକ୍କାମ୍। 14ଏକା ମାଏକିନିଆଁର୍ ମେନାଲିୟାର୍ ଆବ୍ଡ଼ାର୍ଘି ଭିତ୍ରୁ ଥୁୟାଥୀରା ସହର୍ତା ଲୂଦିଆ ନାମେଘି ଅଣ୍ଟା ଆଲିଦ୍ ରାଚା। ଆଦ୍ ଅଣ୍ଟା ପାର୍ମେଶ୍ୱାର୍ସ୍କି ଭକ୍ତ ରାଚା ଆରୁ ଆଦ୍ ବାଇଗଣୀ ଚିଢ଼ା ବେପାର୍ କାମାଲିଆଦ୍। ଏସ୍କେ କା ଆଦ୍ ପାଉଲୁସ୍କି କାତ୍ଥାନ୍ ଧ୍ୟାନ୍ସେ ମେନଦ୍ ପ୍ରାଭୁସ୍ ତାଙ୍ଘା ମନ୍ବନ୍ ଖୋଲ୍ଚେଇଚାସ୍। 15ଆଦ୍ ତାଙ୍ଘା ପୁରା ପରିବାର୍ଗାନେ ଆସ୍ନାନ୍ ଅଚ୍ଚାଦ୍। ହୁଦ୍ଘିପାଛ୍ଲି ଆଦ୍ ଏମାନ୍ ଆର୍ଜୀ କାମିକିରି ତେଙ୍ଗିୟାଦ୍, “ଯଦି ନିମ୍ ଏଙ୍ଗାନ୍ ପ୍ରାଭୁସ୍କି ଅଣ୍ଟା ଭକ୍ତ ବୁଲି ସୋଚାଲ୍ଦାର୍, ହାଲେ ଏଙ୍ଘା ଆଡ଼୍ପାଗେ ବାରା ଆରୁ ରା।” ଆରୁ ଆଦ୍ ଏମାନ୍ ରାଜୀ କାମ୍ଚାଦ୍।
ପାଉଲୁସ୍ ଆରୁ ସିଲାସ୍ ଜେହେଲ୍ନୁ ରାନାଏ
16ଅନ୍ଦୁଲ୍ ଏମ୍ ବିନ୍ତି କାମ୍ନା ଆଡ୍ଡାଗେ କାଲ୍କାମ୍ ତା ଅଣ୍ଟା ଗୁତ୍ତିୟାନ୍ ହାକ୍କାମ୍, ଆଦ୍ଘିନୁ ଅଣ୍ଟା ଭବିଷତ୍ ତେଙ୍ଗୁ ଖାରାପ୍ ଆତ୍ମା କର୍ଚ୍କିଚା। ଆଦ୍ ଭବିଷତ୍ ତେଙ୍ଗିକିରି ତାଙ୍ଘା ମାଲିକ୍ ଜାମାର୍ଗେ ବହୁତ୍ ପାଏସା କାମାବାଲିୟାଦ୍। 17ଆ ଗୁତ୍ତିୟାଦ୍ ପାଉଲୁସ୍ ଆରୁ ଏହ୍ମା ପାଛ୍ଲି-ପାଛ୍ଲି ବାରିକିରି ଚିର୍ରାରାଗେ ଲାଗ୍ଗିୟାଦ୍, “ଇବ୍ଡ଼ା ଆଲାର୍ ମାହାନ୍ ପାର୍ମେଶ୍ୱାର୍ସ୍କି ସେବକର୍, ଇବ୍ଡ଼ାର୍ ନିମାନ୍ ମୁକ୍ତିଘି ପାବୁଘି ବଚନ୍ ଶୁଣାବାଲ୍ନାଏ।” 18ଆଦ୍ ବହୁତ୍ ଦିନ୍ତକ୍ ଏନ୍ନେ କାମ୍ତେ ରାଚାଦ୍; ଲେକିନ୍ ପାଉଲୁସ୍ ଦୁଃଖିତ୍ ମାନ୍ଚାସ୍ କେରାସ୍ ଆରୁ କିର୍ରେ ଏରିକିରି ଆ ଆତ୍ମାନ୍ ତେଙ୍ଗିୟାସ୍, “ଯୀଶୁ ଖ୍ରୀସ୍ତ୍କି ନାମେତି ଏନ୍ ନିଙ୍ଗାନ୍ ଆଦେଶ୍ ଚିଆଲ୍ଦାନ୍, ଇ କୁକାଏସ୍ତି ଉର୍ଖୁ କାଲ୍।” ହୁଙ୍ଗେନିନ୍ ଆ ଆତ୍ମାଦ୍ ଆଦ୍ଘିସ୍ତି ଉର୍ଖିଆ କେରା।
19ଲେକିନ୍ ଆଦ୍ଘି ମାଲିକ୍ସ୍ ଏରିୟାସ୍ କା ପାଏସା କାମାବାନାଘି ଆଶ୍ରା ମାଲ୍ଲାଦିନ୍, ତା ଆସ୍ ପାଉଲୁସ୍ ଆରୁ ସିଲାସ୍ସିନ୍ ଟାଣା-ଟାଣା ଛକ୍ଉଜ୍ଗନ୍ ମୁଖ୍ୟାର୍ସାନ୍ ଅଚ୍ଚାର୍। 20ଆରୁ ଆବ୍ଡ଼ାରିନ୍ ନ୍ୟାୟ କାମୁ ଆଲାର୍ସାନ୍ ଅନ୍ଦ୍ରିକିରି ତେଙ୍ଗିୟାର୍, “ଇବ୍ଡ଼ା ଆଲାର୍ ୟାହୁଦୀର୍, ଆରୁ ନାହ୍ମା ସହର୍ନୁ ଗୋଣ୍ଡଗୋଲ୍ କାମାଲ୍ନାଏ। 21ଆରୁ ଏନ୍ନେ ରୀତି ନୀତିବାତା ବାଲ୍ନାଏ, ଏକାନ୍ କା ଗ୍ରହନ୍ କାମ୍ନା ଚାହେ ପାଲନ୍ କାମ୍ନା ନାହ୍ମା ରୋମାନ୍ ଜାମାର୍ଗେ ଠିକ୍ ମାଲ୍ଲିଦ୍।” 22ଆଙ୍ଗେନ୍ ଆଲାର୍ହି ପାଉଲୁସ୍ ଆରୁ ସିଲାସ୍କି ବିରୁଦ୍ଧନୁ ଉସ୍କାରାଚାର୍, ଆରୁ ନ୍ୟାୟ କାମୁର୍ ଆବ୍ଡ଼ାର୍ଘି ଚିଢ଼ାବନ୍ ଚାର୍ରିକିରି, ଆବ୍ଡ଼ାରିନ୍ ଡେମାଗେ ହୁକୁମ୍ ଚିଚ୍ଚାର୍। 23ଆବ୍ଡ଼ାର୍ ଆବ୍ଡ଼ାରିନ୍ ବହୁତ୍ ଯୋର୍ସେ ଡେମ୍ତିକିରି ଜେହେଲ୍ନୁ ଗୁଡ୍ଡେଇଚାର୍। ଆରୁ ଆବ୍ଡ଼ାରିନ୍ ସାବ୍ଧାନ୍ସେ ଜାଗାଗେ ଦାର୍ୱାନ୍ସିନ୍ ହୁକୁମ୍ ଚିଚ୍ଚାର୍। 24ଏନ୍ନେ ହୁକୁମ୍ ହାଖ୍ଖୀକିରି ଦାର୍ୱାନ୍ସ୍ ଆବ୍ଡ଼ାରିନ୍ ଅଣ୍ଟା ଉଲ୍ତା ବାଖ୍ରାନୁ ଉଇୟାସ୍ ଆରୁ ତାହ୍ମା ହେଡ୍ଡୁନ୍ ପାଟାତି ହିଁଚେଇଚାସ୍।
ପାଉଲୁସ୍ ଆରୁ ସିଲାସ୍ ଜେହେଲ୍ତି ଛୁଟ୍ରାଲ୍ନାଏ
25ଲାଗ୍ଭାଗ୍ ଆଦ୍ ମାଁହାଗେ ପାଉଲୁସ୍ ଆରୁ ସିଲାସ୍ ବିନ୍ତି କାମାଲିୟାର୍ ଆରୁ ପାର୍ମେଶ୍ୱାର୍ସ୍କି ଗୀତୁ ପାଡ଼ାଲିୟାର୍ ଆରୁ ଜାମାର୍ ଜେହେଲ୍ନୁ ରୁର୍ ମେନାଲିୟାର୍। 26ହତ୍କବାକେନ୍ ହଠାତ୍ ଅଣ୍ଟା ବାଡ଼୍କା ଭୁଇଁଡୋଲ୍ ମାନ୍ଚା, ଆରୁ ଜେହେଲ୍ତା ନାହି ନୁକ୍ରା କେରା। ଆରୁ ହୁଙ୍ଗେନିନ୍ ଜାମା ବାଲି ଖୋଲ୍ରା କେରା; ଆରୁ ଜାମାର୍ଘି ବନ୍ଧନ୍ ଖୋଲ୍ରା କେରା। 27ଦାର୍ୱାନ୍ସ୍ ଏଜ୍ରାସ୍ କେରାସ୍ ଆରୁ ଯେତ୍କବାକେନ୍ ଏରିୟାସ୍ କା ଜେହେଲ୍ତା ବାଲି ଖୋଲ୍ରା କେର୍କିଚି ତା ଆସ୍ ସୋଚ୍ଚାସ୍ କା କାଇଦୀ ଜାମାର୍ ବୁଙ୍ଗିୟାର୍କେରାର୍ ତା ଆସ୍ ତାଲ୍ୱାର୍ ଅଥ୍ରିକିରି ନିଜ୍କେନିଜ୍ ପିଟା ବେଦ୍ଦାଲିୟାସ୍। 28ଲେକିନ୍ ପାଉଲୁସ୍ ଯୋର୍ସେ ଚିର୍ରା ରାଇକିରି ତେଙ୍ଗିୟାସ୍, “ନିଜର୍ ଏନ୍ଦେର୍ହି କ୍ଷତି ଆମା କାମା, ଏନ୍ଦେର୍ଗେକା ଏମ୍ ଜାମାମ୍ ଇସାନ୍ ରାଦାମ୍।” 29ଦାର୍ୱାନ୍ସ୍ ବିଲ୍ଲୀ ଅନ୍ଦ୍ରାଗେ ତେଙ୍ଗିୟାସ୍ ଆରୁ କୁଦ୍ୟାରାତେ କାଇକିରି, ଏଲ୍ଚ୍କାତି ଥାର୍-ଥାର୍ତେ ପାଉଲୁସ୍ ଆରୁ ସିଲାସ୍କି ହେଡ୍ଡମୁଲିନୁ ଖାତ୍ରାସ୍। 30ଦାର୍ୱାନ୍ସ୍ ପାଉଲୁସ୍ ଆରୁ ସିଲାସ୍ସିନ୍ ବାହ୍ରି ଅଥ୍ରାସ୍ ଆରୁ ମେନ୍ଚାସ୍, “ହେ ମହାଶୟ ଜାମାରୋ, ମୁକ୍ତି ହାଖ୍ଖାଗେ ଏଙ୍ଗା ଏନ୍ଦେର୍ କାମା ଖାତ୍ରୋ?” 31ଆବ୍ଡ଼ାର୍ ଉତ୍ତର୍ ଚିଚ୍ଚାର୍, “ପ୍ରାଭୁ ଯୀଶୁସ୍କି ମିଆଁ ବିଶ୍ୱାସ୍ କାମା ହାଲେ ନିନ୍ ଆରୁ ନିଙ୍ଘା ଜାମା ପରିବାର୍ ମୁକ୍ତି ହାଖ୍ଖର୍।” 32ହୁଦ୍ଘିପାଛ୍ଲି ଆବ୍ଡ଼ାର୍ ଆସିନ୍ ଆରୁ ତାଙ୍ଘା ପରିବାର୍ତା ଜାମା ଆଲାରିନ୍ ପ୍ରାଭୁସ୍କି ବଚନ୍ ଶୁଣାବାଚାର୍। 33ଆରୁ ଦାର୍ୱାନ୍ସ୍ ଆବ୍ଡ଼ାରିନ୍ ମାଁହା ହୁଙ୍ଗେନିନ୍ ହୋଇକିରି ଆବ୍ଡ଼ାର୍ଘି ଖାଦିଗୁଠିନ୍ ନଣୀୟାସ୍, ଆନ୍ତିନ୍ ଆସ୍ ଆରୁ ତାଙ୍ଘା ଆଡ଼୍ପାନ୍ତାର୍ ଜାମାର୍ ହୁଙ୍ଗେନିନ୍ ଆସ୍ନାନ୍ ଅଚ୍ଚାର୍। 34ଦାର୍ୱାନ୍ସ୍ ଆବ୍ଡ଼ାରିନ୍ ତାଙ୍ଘା ଆଡ଼୍ପାଗେ ଅଚ୍ଚାସ୍ ଆରୁ ଆବ୍ଡ଼ାର୍ଗେ ମଁହାଗେ ଚିଚ୍ଚାସ୍। ଆରୁ ତାଙ୍ଘା ପୁରା ପରିବାର୍ ପାର୍ମେଶ୍ୱାର୍ସ୍କି ମିଆଁ ବିଶ୍ୱାସ୍ କାମିକିରି ଖୁସୀ ମାନାବାଚାର୍।
35ପାଇରି ବିଜ୍ଜକା ପାଛ୍ଲି ନ୍ୟାୟ କାମୁ ଆଲାର୍ ତାହ୍ମା ସିପାହୀ ଜାମାରିନ୍ ଏନ୍ନେ ହୁକୁମ୍ ଚିଇକିରି ଦାର୍ୱାନ୍ସ୍କି ଚାହାଗେ ତାଇୟାର୍, ହୁବ୍ଡ଼ା ଆଲାରିନ୍ ଆମ୍ବାଚା। 36ଆଙ୍ଗେନ୍ ଦାର୍ୱାନ୍ସ୍ ପାଉଲୁସ୍ସିନ୍ ତେଙ୍ଗିୟାସ୍, “ନ୍ୟାୟ କାମୁର୍ ନିମାନ୍ ଆମ୍ବାଗେ ହୁକୁମ୍ ଚିଚ୍କାନାଏ। ହୁଦ୍ଘିଲାଗାନ୍ ଆକ୍କୁନ୍ ନିମ୍ ଉର୍ଖା ବାରା ଆରୁ ଶାନ୍ତିନୁ କାଲା।” 37ଲେକିନ୍ ପାଉଲୁସ୍ ସିପାହୀ ଜାମାରିନ୍ ତେଙ୍ଗିୟାସ୍, “ଏମ୍ ରୋମ୍ତା ଆଲାମ୍, ହାଲେହି ଏହ୍ମା ବିଚାର୍ ମା କାମିକିରି ଆଲାର୍ଘି ଆଘ୍ଲି ଡେମ୍ତାଚାର୍ ଆରୁ ଜେହେଲ୍ନୁ ଗୁଡ୍ଡେଇଚାର୍, ଆରୁ ଆକ୍କୁନ୍ କାଁଏ ଏମାନ୍ କାଡ଼େ-କାଡ଼େ ଆମ୍ବାଚା ବେଦ୍ଦାଲ୍ନାଏ? ଏନ୍ନେ ମା ମାନିଦ୍; ଲେକିନ୍ ଆବ୍ଡ଼ାର୍ ଖୁଦ୍ନିଜେ ବାରିକିରି ଏମାନ୍ ବାହ୍ରି ଅଥ୍ରୋର୍।” 38ଆଙ୍ଗେନ୍ ସିପାହୀଜାମାର୍ କାଇକିରି ଇ ଜାମା କାତ୍ଥାନ୍ ନ୍ୟାୟ କାମୁରିନ୍ ତେଙ୍ଗିୟାର୍, ଆଙ୍ଗେନ୍ ପାଉଲୁସ୍ ଆରୁ ସିଲାସ୍ ରୋମ୍ତା ଆଲାର୍ବୁଲି ଆହିକିରି ନ୍ୟାୟ କାମୁର୍ ଏଲ୍ଚିୟାର୍ କେରାର୍। 39ଆରୁ ଆବ୍ଡ଼ାର୍ ବାରିକିରି ପାଉଲୁସ୍ ଆରୁ ସିଲାସ୍ସିନ୍ ଛେମା ନିଚାର୍, ଆରୁ ଜେହେଲ୍ତି ବାହ୍ରି ଅଚ୍ଚାର୍ କେରାର୍ ଆରୁ ସହର୍ବନ୍ ଆମ୍ବିକିରି ବୁଙ୍ଗାଗେ ଆର୍ଜୀ କାମ୍ଚାର୍। 40ଆଙ୍ଗେନ୍ ପାଉଲୁସ୍ ଆରୁ ସିଲାସ୍ ଜେହେଲ୍ତି ଉର୍ଖିକିରି ଲୂଦିଆଘି ଆଡ଼୍ପାଗେ କେରାର୍। ଆସାନ୍ ଆବ୍ଡ଼ାର୍ ଭାଇ ଜାମାର୍ଗାନେ ଭେଁଟ୍ ମାନିକିରି ଆବ୍ଡ଼ାରିନ୍ ଉତ୍ସାହିତ୍ କାମ୍ଚାର୍, ଆନ୍ତିନ୍ ଆବ୍ଡ଼ାର୍ ଆସ୍ତି ବୁଙ୍ଗିୟାର୍କେରାର୍।
17ପାଉଲୁସ୍ ଥେସଲନିକି ସହର୍ନୁ ସୁସାମାଚାର୍ ପ୍ରଚାର୍ କାମାଲ୍ଦାସ୍
1ପାଉଲୁସ୍ ଆରୁ ସିଲାସ୍ ଆମ୍ପିପଲିସ୍ ଆରୁ ଆପଲ୍ଲୋନିଆ ସହର୍ ଚିଇକିରି ଥେସଲନିକିଗେ କେରାର୍। ଆସାନ୍ ୟାହୁଦୀ ଜାମାର୍ଘି ଅଣ୍ଟା ସାଭା ଆଡ଼୍ପା ରାଚା। 2ପାଉଲୁସ୍ ତାଙ୍ଘା ରୀତି ଅନୁସାର୍ ୟାହୁଦୀ ଜାମାର୍ଘି ସାଭା ଆଡ଼୍ପାଗେ କେରାସ୍। ଆରୁ ମୁନ୍ଟା ଆରାମ୍ ଉଲ୍ଲାତକ୍ ପାବିତାର୍ ଶାସ୍ତ୍ରନ୍ତା ବଚନ୍ବନ୍ ଆବ୍ଡ଼ାରିନ୍ ବୁଝାବାଲିୟାସ୍। 3ଆରୁ ଇବନ୍ ପ୍ରମାଣିତ୍ କାମାଲିୟାସ୍ କା ଖ୍ରୀସ୍ତ୍ଗେ ଦୁଃଖୁ ସାହ୍ନାଇନ୍ ରାଚା; ଆରୁ କେଚ୍ଚକାର୍ସ୍ତି ଜୀଉଠ୍ର୍ନାଇନ୍ ରାଚା। ଆସ୍ ତେଙ୍ଗିୟାସ୍, “ଏକା ଯୀଶୁସ୍କି କାତ୍ଥା ଏନ୍ ନିହ୍ମା ଆଘ୍ଲି ପ୍ରଚାର୍ କାମାଲ୍ଦାନ୍, ଆସ୍ ଖ୍ରୀସ୍ତ୍ସ୍।” 4ୟାହୁଦୀ ଜାମାର୍ଘି ଭିତର୍ନୁ କେତ୍କ ଲୋକ୍ ବିଶ୍ୱାସ୍ କାମିକିରି ପାଉଲୁସ୍ ଆରୁ ସିଲାସ୍ଗାନେ ମିଶ୍ରାର୍। ଆରୁ ଢେର୍ ବିନାୟାହୁଦୀର୍ହି ଆରୁ ବହୁତ୍ ମୁଖ୍ୟା ମାଏକିନିଆଁର୍ହି ଆବ୍ଡ଼ାର୍ ଗାନେ ମିଶ୍ରାର୍। 5ଲେକିନ୍ ୟାହୁଦୀଜାମାର୍ ହିସ୍ଙ୍ଗା କାମ୍ଚାର୍, ହୁଦ୍ଘିଲାଗାନ୍ ଆବ୍ଡ଼ାର୍ ହାଟ୍ଟେ ଗୁଠିନ୍ତି କେତ୍କ ଲୋକ୍ ବଦ୍ମାସ୍ ଆଲାରିନ୍ ଠୁଡ଼ିୟିକିରି ସହର୍ନୁ ଗଣ୍ଡଗଲ୍ କାମ୍ଚାର୍। ଆବ୍ଡ଼ାର୍ ପାଉଲୁସ୍ ଆରୁ ସିଲାସ୍ସିନ୍ ବେଦ୍ଦି ଅଥ୍ରିକିରି ଆଲାର୍ଘି ଆଘ୍ଲି ଅନ୍ଦ୍ରାଗେ ଯାସୋନ୍ସ୍କି ଆଡ଼୍ପାନ୍ ଚାଢ଼ାଉ କାମ୍ଚାର୍। 6ପାଉଲୁସ୍ ଆରୁ ସିଲାସ୍ସିନ୍ ଆସାନ୍ ମା ହାଖ୍ଖୀକିରି ୟାହୁଦୀଜାମାର୍ ଯାସୋନ୍ ଆରୁ ଆରୁ କେତ୍କ ଭାଇଜାମାରିନ୍ ସହର୍ତା ଶାସନ୍ କାମୁ ଆଲାର୍ଘି ଚାହାଗେ ଟାଣ୍ଚାର୍ ଅଚ୍ଚାର୍ ଆରୁ ଚିର୍ରା ରାଇକିରି ତେଙ୍ଗିୟାର୍, “ଇବ୍ଡ଼ା ଆଲାର୍ ଏକାର୍ କା ଦୁନିଆଁବନ୍ ଉଲ୍ଟା ପୁଲ୍ଟା କାମ୍ଚେଇଚ୍କାନାଏ। ଆବ୍ଡ଼ାର୍ ଆକ୍କୁନ୍ ଇସାନ୍ଗେ ହି ବାର୍ଚ୍କାନାଏ। 7ଆରୁ ଯାସୋନ୍ସ୍ ଆବ୍ଡ଼ାରିନ୍ ତାଙ୍ଘା ଆଡ଼୍ପାନୁ ଆଡ୍ଡା ଚିଚ୍କାଦାସ୍। ଆବ୍ଡ଼ାର୍ କାଇସର୍ସ୍କି ନିୟମ୍ବନ୍ ବିରୋଧ୍ କାମାଲ୍ନାଏ ଆରୁ ଯୀଶୁ ନାମେଘି ଆରୁ ଅଣ୍ଟା ରାଜା ଆତାଲ୍ଦାସ୍ ବୁଲି ତେଙ୍ଗାଲ୍ନାଏ।” 8ଆବ୍ଡ଼ାର୍ଘି ଇ କାତ୍ଥା ମେନିକିରି ଆଲାର୍ ଆରୁ ସହର୍ତା ଶାସନ୍ କାମୁର୍ ଘାବ୍ରାରାଚାର୍ କେରାର୍। 9ଇଦ୍ଘି ପାଛ୍ଲି ଆବ୍ଡ଼ାର୍ ଯାସୋନ୍ ଆରୁ ବାକି ଆଲାର୍ସ୍ତିନ୍ ଜାମାନାତ୍ଘି ପାଏସା ହୋଇକିରି ଆମ୍ବେଇଚାର୍।
ବିରିୟା ସହର୍ନୁ ସୁସାମାଚାର୍ ପ୍ରଚାର୍ କାମାଲ୍ନାଏ
10ଆରୁ ହୁଙ୍ଗେନିନ୍ ମାଁହା ମାଁହାନ୍ ଭାଇଜାମାର୍ ପାଉଲୁସ୍ ଆରୁ ସିଲାସ୍ସିନ୍ ବିରିୟାଗେ ତାଇୟାର୍ଚାର୍। ଆସାନ୍ ଆଣସିକିରି ଆବ୍ଡ଼ାର୍ ୟାହୁଦୀ ଜାମାର୍ଘି ସାଭା ଆଡ଼୍ପାଗେ କେରାର୍। 11ଥେସଲନିକିୟାନ୍ତା ୟାହୁଦୀ ଆଲାର୍ସ୍ତି ବିରିୟାନ୍ତା ୟାହୁଦୀ ଆଲାର୍ ବାଗ୍ଗେ ବାନେ ରାଚାର୍, ଏନ୍ଦେର୍ଗେକା ଇବ୍ଡ଼ାର୍ ବହୁତ୍ ଖୁସୀତି ବଚନ୍ବନ୍ ଗ୍ରହନ୍ କାମ୍ଚାର୍ ଆରୁ ପାଉଲୁସ୍କି ତେଙ୍କା କାତ୍ଥା ସତ୍ତୁଦ୍ କା ମାଲ୍ଲିଦ୍, ଆବନ୍ ଏରାଗେ ସବୁଦିନ୍ ପାବିତାର୍ ଶାସ୍ତ୍ରବନ୍ ବେଦ୍ଦତେ ରାଲିୟାର୍। 12ହୁଦ୍ଘିଲାଗାନ୍ ଆବ୍ଡ଼ାର୍ଘି ଭିତର୍ନୁ ବହୁତ୍ ୟାହୁଦୀଜାମାର୍ ଆରୁ ଗ୍ରୀକ୍ଜାମାର୍ଘି ଭିତର୍ନୁ ଢେର୍ ମୁଖ୍ୟା ମାଏକିନିଆଁର୍ ଆରୁ ମାର୍ଦ୍ନାର୍ହି ବିଶ୍ୱାସ୍ କାମ୍ଚାର୍। 13ଲେକିନ୍ ଯେତ୍କବାକେନ୍ ଥେସ୍ଲୁନୀକୀୟାନ୍ତା ୟାହୁଦୀଜାମାର୍ ଆଖ୍ଖାର୍ କା ପାଉଲୁସ୍ ବିରିୟାନୁହି ପାର୍ମେଶ୍ୱାର୍ସ୍କି ବଚନ୍ ଶୁଣାବାଲ୍ଦାସ୍, ତା ଆବ୍ଡ଼ାର୍ ଆସାନ୍ଗେହି ବାରିକିରି ଆଲାରିନ୍ ଚାଢ଼ାବାଗେ ଲାଗ୍ଗିୟାର୍ ଆରୁ ଗଣ୍ଡଗଲ୍ କାମାଗେ ଲାଗ୍ଗିୟାର୍। 14ଆଙ୍ଗେନ୍ ଭାଇଜାମାର୍ ଚାଁଣେନ୍ ପାଉଲୁସ୍ସିନ୍ ସାମ୍ଧୁର୍ ତାରା କାଲାଗେ ତାଇୟେର୍ଚାର୍; ଲେକିନ୍ ସିଲାସ୍ ଆରୁ ତୀମଥିଉସ୍ ବିରିୟାନୁନ୍ ରାଚାର୍। 15ଲେକିନ୍ ଏକାର୍ ପାଉଲୁସ୍ସିନ୍ ଅଚ୍ଚେଇଚାର୍ ଆବ୍ଡ଼ାର୍ ଆରୁ ପାଉଲୁସ୍ ଆବ୍ଡ଼ାରିନ୍ ଏନ୍ନେ ହୁକୁମ୍ ଚିଇକିରି ତାଇୟାସ୍ କା ସିଲାସ୍ ଆରୁ ତୀମଥିଉସ୍ ତାଙ୍ଘାସାନ୍ ଚାଁଣେ ସେ ଚାଁଣେ ବାରର୍।
ଏଥେନ୍ସ୍ ସହର୍ନୁ ପାଉଲୁସ୍ ସୁସାମାଚାର୍ ପ୍ରଚାର୍ କାମାଲ୍ଦାସ୍
16ଯେତ୍କବାକେନ୍ ପାଉଲୁସ୍ ଏଥେନ୍ସ୍ନୁ ସିଲାସ୍ ଆରୁ ତିମଥିଉସିନ୍ ହଖାଲିୟାସ୍, ହତ୍କବାକେନ୍ ସହର୍ବନ୍ ମୂର୍ତ୍ତୀତି ନିନ୍ଦିକା ଏରିକିରି ବହୁତ୍ ଦୁଃଖୁ ମାନ୍ଚାସ୍। 17ହୁଦ୍ଘିଲାଗାନ୍ ଆସ୍ ସାଭା ଆଡ଼୍ପାନୁ ୟାହୁଦୀ ଆରୁ ଖ୍ରୀସ୍ତ୍ ବିଶ୍ୱାସୀ ଗ୍ରୀକ୍ ଜାମାର୍ଗାନେ ଆରୁ ହାଟ୍ଟେନ୍ତା ଛକ୍ଗୁଠିନୁ ରୋଜ୍ଦିନ୍ ନେଖାଗାନେ ଭେଁଟ୍ ମାନାଲିୟାସ୍, ଆବ୍ଡ଼ାର୍ ଗାନେ କାଁଟ୍ଛାଁଟ୍ କାମାଲିୟାସ୍। 18ଆଙ୍ଗେନ୍ ଏପିକୁରୀୟ ଆରୁ ସ୍ତୋୟିକ୍ନ୍ତା କେତ୍କ ଲୋକ୍ ଦାର୍ଶନିକ୍ଜାମାର୍ ପାଉଲୁସ୍ଗାନେ କାଁଟ୍ଛାଁଟ୍ କାମାଗେ ଲାଗ୍ଗିୟାର୍। ଆବ୍ଡ଼ାର୍ଘି ଭିତ୍ରୁ କେତ୍କ ଲୋକ୍ ମେନ୍ଚାର୍, “ଇ ବେକାର୍ କାତ୍ଥା ତେଙ୍ଗୁ ଆଲାସ୍ ଏନ୍ଦେର୍ ତେଙ୍ଗାଗେ ବେଦ୍ଦାଲ୍ଦାସ୍?” ଆରୁ ଆଧାର୍ ତେଙ୍ଗିୟାର୍, “ଆସ୍ ଦୁସ୍ରା ଦେବ୍ତା ଜାମାର୍ଘି ପ୍ରାଚାରାକ୍ ଲେଖା ଆହ୍ତାରାଲ୍ଦାସ୍” ଏନ୍ଦେର୍ଗେକା ଆସ୍ ଯୀଶୁସ୍କି ବାରେ ଉପ୍ଦେଶ୍ ଚିଆଲିୟାସ୍ ଆରୁ ଆସ୍କି ଆରୁଅହନ୍ ଜୀଉଠ୍ର୍ନାଘି ବାରେନୁ ପ୍ରଚାର୍ କାମାଲିୟାସ୍। 19ହୁଦ୍ଘିପାଛ୍ଲି ଆବ୍ଡ଼ାର୍ ପାଉଲୁସ୍ସିନ୍ ଆରୟପାଗସ୍ନ୍ତା ସାଭା ଆଡ଼୍ପାଗେ ହୋଇକିରି ତେଙ୍ଗିୟାର୍, “ନିନ୍ ଇ ପୁନା ଶିକ୍ଷା ପ୍ରଚାର୍ କାମାଲ୍ଦାଏ ଆଦ୍ ଏନ୍ଦେଦ୍, ଆବନ୍ ଏମ୍ ଆହା ଅଙ୍ଗମ୍ କାଁଏ? 20ଏନ୍ଦେର୍ଗେକା ନିହ୍ମା କେତ୍କ ଅଦ୍ଭୁତ୍ ବିଷୟଗୁଠିନ୍ ଏମ୍ ମେନ୍ଚ୍କାଦାମ୍, ହୁଦ୍ଘିଲାଗାନ୍ ଏମ୍ ଆହା ବେଦ୍ଦାଲ୍ଦାମ୍ କା ଇ ଜାମାଘି ମତ୍ଲବ୍ ଏନ୍ଦେଦ୍?” 21ହୁଦ୍ଘିଲାଗାନ୍ ଏଥେନ୍ସ୍ ତା ଜାମା ଆଲାର୍ ଆରୁ ପର୍ଦେଶୀୟାର୍ ଏକାର୍ କା ଆସାନ୍ ରାଲିୟାର୍, ଆବ୍ଡ଼ାର୍ଜାମାର୍ ପୁନା-ପୁନା କାତ୍ଥା ତେଙ୍ଗ୍ନା ଆରୁ ମେନ୍ନାନ୍ ଆମ୍ବିକିରି ଆରୁ ଏନ୍ଦେର୍ହି ନାଲ୍ଖୁନୁ ଜୀବନ୍ ମା ବିତାବାଲିୟାର୍।
ଆରୟପାଗର୍ସ୍ନ୍ତା ସାଭାନୁ ପାଉଲୁସ୍ ଭାଷଣ୍ ଚିଆଲ୍ଦାସ୍
22ଆନ୍ତିନ୍ ପାଉଲୁସ୍ ଆରୟପାଗସ୍ନ୍ତା ସାଭା ମାଝାନୁ ଇଜ୍ଜାସ୍ ଆରୁ ତେଙ୍ଗିୟାସ୍, “ହେ ଏଥେନ୍ସ୍ ତା ଆଲାରୋ, ଏନ୍ ଏରାଲ୍ଦାନ୍ କା ନିମ୍ ଜାମା ବିଷୟନୁ ଦେବ୍ତାରିନ୍ ମାନ୍ନାବାଲା ଭକ୍ତର୍। 23ଏନ୍ଦେର୍ଗେକା ଏନ୍ କୁଦ୍ଦାଲ୍କାନ୍ ବାକେନ୍ ଯେତ୍କବାକେନ୍ ନିହ୍ମା ପୂଜା କାମ୍ନାଘି ଜିନିଷ୍ଗୁଠିନ୍ ଏରାଲ୍କାନ୍, ତା ଏନ୍ନେ ଅଣ୍ଟା ପୂଜା ବେଦୀ ଏର୍କାନ୍ ଏକାନୁ କା ଲେଖ୍ଚ୍କାରାଚା, ‘ଆନ୍ଜାନ୍ ଦେବ୍ତାଘି ଲାଗାନ୍।’ ହୁଦ୍ଘିଲାଗାନ୍ ନିମ୍ ବାଲ୍ଲିକିରି ନେଖାଏ ପୂଜା କାମାଲ୍ଦାର୍, ଏନ୍ ନିମାନ୍ ଆଦ୍ଘି ସୁସାମାଚାର୍ ଶୁଣାବାଲ୍ଦାନ୍। 24ଏକା ପାର୍ମେଶ୍ୱାର୍ସ୍ ଦୁନିଆଁ ଆରୁ ଦୁନିଆଁନ୍ତା ଜାମା ଜିନିଷ୍ବନ୍ ସିର୍ଜ୍କାଦାସ୍, ଆସିନ୍ ସରଗ୍ ଆରୁ ଦୁନିଆଁନ୍ତା ପ୍ରାଭୁସ୍, ଆରୁ ଆସ୍ ହେଖ୍ଖାତି ତିୟାର୍ କାମ୍ଚ୍କା ମନ୍ଦିର୍ନୁ ମା ରାଦାସ୍। 25ତାଙ୍ଘା ଏନ୍ଦେର୍ହି ଅଭାବ୍ ମା ମାନି ହୁଦ୍ଘିଲାଗାନ୍ ଆସ୍ ଆଲାର୍ଘି ସେବା ଗ୍ରହନ୍ ମା କାମ୍ଦାସ୍, ଏନ୍ଦେର୍ଗେକା ନିଜେତା ଜାମା ଆଲାର୍ଗେ ଜୀବନ୍ ଆରୁ ସାଁସ୍ ଆରୁ ଜାମାଜିନିଷ୍ ଚିଦାସ୍। 26ଆରୁ ଆସ୍ ଅଣ୍ଟା ଆଲାସ୍ସ୍ତି ଜାମା ମୁନୁଷ୍ ଜାତିବନ୍ ସୃଷ୍ଟି କାମ୍ଚାସ୍; ଏସ୍କେ କା ଆବ୍ଡ଼ାର୍ ପୁରା ଦୁନିଆଁନୁ ରର୍। ଆରୁ ଆସ୍ ଆବ୍ଡ଼ାର୍ଘି ଲାଗାନ୍ ସାମାୟବନ୍ ଠାହ୍ର୍ଚ୍କାଦାସ୍ ଆରୁ ରାନାଘି ଆଡ୍ଡାବନ୍ ଠାହ୍ରାଚ୍କାଦାସ୍। 27ଯଦିଭି ଆସ୍ ନାହ୍ମା ନେଖାସ୍ତିହି ଗେଚ୍ଛାନୁ ମାଲ୍କାସିନ୍, ହାଲେହି ଆଲାର୍ ଏସ୍କେ କା ଆସିନ୍ ବେଦ୍ଦର୍ ଆରୁ ଆସିନ୍ ବେଦ୍ଦତେ-ବେଦ୍ଦତେ ଆସିନ୍ ହାଖ୍ଖର୍, ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍ ଏନ୍ନେ କାମ୍ଚାସ୍। 28ଏନ୍ଦେର୍ଗେକା ତାଙ୍ଘାସାନ୍ ନାମ୍ ଉଜ୍ଜାଲ୍ଦାତ୍, କାନାବାର୍ନା କାମ୍ଦାତ୍ ଆରୁ ସ୍ଥିର୍ ରାଦାତ୍। ଏସ୍କେ କା ନିହ୍ମା କବିଜାମାର୍ଘି ଭିତ୍ରୁ କେତ୍କ ଲୋକ୍ ଏନ୍ନେ ତେଙ୍କାନାଏ, ‘ଏମ୍ ତାଙ୍ଘା ବାଉଁଶାମ୍।’”
29“ନାମ୍ ପାର୍ମେଶ୍ୱାର୍ସ୍କି ହାଦ୍ଦୁବଚ୍ଚତ୍ ହୁଦ୍ଘିଲାଗାନ୍ ନାମାଗେ ଏକ୍ଲାହି ଏନ୍ନେ ମା ସୋଚ୍ନା କାତ୍ଥା କା ପାର୍ମେଶ୍ୱାର୍ସ୍କି ମୂର୍ତ୍ତୀ ଆଲାର୍ଘି ସୋଚ୍ ଆରୁ କାରିଗରୀ ଦ୍ୱାର୍ନୁ ତିଆର୍ କାମ୍ଚ୍କା ସୋନା, ରୁପା ଆରୁ ଚାଁଚାଘି ମୂର୍ତ୍ତୀ ଲେଖା ରଦ୍। 30ଆଘ୍ଲି ଯୁଗ୍ନୁ ପାର୍ମେଶ୍ୱାର୍ସ୍ ଏନ୍ନେ ପ୍ରକାର୍ଘି ହୁକୁମ୍ବନ୍ ତୁଚ୍ଛ କାମ୍ଚ୍କାଦାସ୍, ଲେକିନ୍ ଆକ୍କୁନ୍ ଆସ୍ ଜାମାତାରା ଆଲାରିନ୍ ପାସ୍ତାରାଗେ ହୁକୁମ୍ ଚିଆଲ୍ଦାସ୍। 31ଏନ୍ଦେର୍ଗେକା ପାର୍ମେଶ୍ୱାର୍ସ୍ ଅଣ୍ଟା ଉଲ୍ଲା ଠାହ୍ରାଚ୍କାଦାସ୍, ଯେତ୍କବାକେନ୍ କା ଆସ୍ ତାଙ୍ଘା ଚାଜ୍ଜକା ଆଲାସ୍କି ଦ୍ୱାର୍ନୁ ନ୍ୟାୟତି ଦୁନିଆଁନ୍ତା ବିଚାର୍ କାମସ୍। ଆସ୍ ଆସିନ୍ କେଚ୍ଚକା ଆଲାର୍ସ୍ତି ଉଜ୍ଜତିକିରି ଜାମା ଆଲାର୍ଘି ଚାହାନୁ ଇଦ୍ଘି ସାକ୍ଷୀ ଚିଚ୍କାଦାସ୍।”
32କେଚ୍ଚକାର୍ସ୍ତି ଉଜ୍ଜନାଘି ବାରେନୁ ମେନିକିରି କେତ୍କ ଲୋକ୍ ମାଜାକ୍ ଉଡ଼ାବାଗେ ଲାଗ୍ଗିୟାର୍। ଆରୁ କେତ୍କ ଲୋକ୍ ତେଙ୍ଗିୟାର୍, “ଏମ୍ ଆରୁ ଏକିନ୍ ଉଲ୍ଲା ଇ କାତ୍ଥାନ୍ ନିଙ୍ଘାସ୍ତି ମେନମ୍।” 33ଆଙ୍ଗେନ୍ ପାଉଲୁସ୍ ସାଭା ଆଡ୍ଡାସ୍ତି ବୁଙ୍ଗେଇଚିଚାସ୍। 34ଲେକିନ୍ କେତ୍କ ଲୋକ୍ ପାଉଲୁସ୍ଗାନେ ମିଶ୍ରାର୍ ଆରୁ ଯୀଶୁ ଖ୍ରୀସ୍ତ୍ସିନ୍ ବିଶ୍ୱାସ୍ କାମ୍ଚାର୍। ଆବ୍ଡ଼ାର୍ଘି ଭିତ୍ରୁ ଆରିୟପାଗର୍ସ୍ନ୍ତା ସାଭାନ୍ତା ମେମ୍ବର୍ ଦୀୟନୂସୀୟ, ଆରୁ ଦାମାରି ନାମେଘି ଅଣ୍ଟା ମାଏକିନିଆଁ ରାଚା ଆରୁ ଆବ୍ଡ଼ାର୍ ଗାନେ ଆରୁହି କେତ୍କ ଲୋକ୍ ରାଚାର୍।
18କୁରିନ୍ଥୀ ସହର୍ନୁ ପାଉଲୁସ୍ ପ୍ରଚାର୍ କାମାଲ୍ଦାସ୍
1ଇଦ୍ଘି ପାଛ୍ଲି ପାଉଲୁସ୍ ଏଥେନ୍ସ୍ ଆମ୍ବିକିରି କୁରିନ୍ଥୀ ସହର୍ଗେ ବାର୍ଚାସ୍। 2ଆସାନ୍ ଆସ୍କେ ଆକ୍ୱିଲା ନାମେଘି ଅଣ୍ଟା ୟାହୁଦୀସ୍ ହାଖ୍ଖରାସ୍, ଏକାସ୍ କା ପନ୍ତୁସ୍ତା ରାଚାସ୍। ଆସ୍ ତାଙ୍ଘା ଆଲି ପ୍ରୀସ୍କିଲ୍ଲା ଗାନେ ଇଟାଲୀନ୍ତି ବାର୍ଚ୍କାଚାର୍। ଏନ୍ଦେର୍ଗେକା କ୍ଲାଉଦିୟାସ୍ ଜାମା ୟାହୁଦୀରିନ୍ ରୋମ୍ତି ଉର୍ଖା କାଲାଗେ ହୁକୁମ୍ ଚିଚ୍ଚାସ୍। ହୁଦ୍ଘିଲାଗାନ୍ ପାଉଲୁସ୍ ଆବ୍ଡ଼ାର୍ ଗାନେ ଭେଁଟ୍ ମାନାଗେ କେରାସ୍। 3ପାଉଲୁସ୍କି ଆରୁ ଆବ୍ଡ଼ାର୍ଘି ଅଣ୍ଟାଇନ୍ ନାଲ୍ଖୁ ରାଚା, ହୁଦ୍ଘିଲାଗାନ୍ ଆସ୍ ଆବ୍ଡ଼ାର୍ ଗାନେ ରାଚାସ୍ ଆରୁ ନାଲ୍ଖୁ କାମାଗେ ଲାଗ୍ଗିୟାସ୍; ଆବ୍ଡ଼ାର୍ଘି ନାଲ୍ଖୁ ତାମ୍ବୁ ବାନାବାନା ରାଚା। 4ପାଉଲୁସ୍ ଜାମା ଆରାମ୍ ଉଲ୍ଲା ସାଭା ଆଡ଼୍ପାନୁ ଉପ୍ଦେଶ୍ ଚିଇକିରି ୟାହୁଦୀ ଆରୁ ଗ୍ରୀକ୍ ଜାମାରିନ୍ ବୁଝାବାଗେ କୋଶିଷ୍ କାମାଲିୟାସ୍।
5ଯେତ୍କବାକେନ୍ ସିଲାସ୍ ଆରୁ ତୀମଥିଉସ୍ ମାକିଦୁନିଆଁନ୍ତି ବାର୍ଚାର୍ ତା ପାଉଲୁସ୍ ବଚନ୍ ଶୁଣାବାନାଘି ଧ୍ୟାନ୍ନୁ ରାଚାସ୍ ଆରୁ ଯୀଶୁସିନ୍ ଖ୍ରୀସ୍ତ୍ସ୍ ବୁଲି ଆସ୍ ୟାହୁଦୀ ଜାମାରିନ୍ ସାକ୍ଷୀ ଚିୟାଗେ ଲାଗ୍ଗିୟାସ୍। 6ଲେକିନ୍ ଯେତ୍କବାକେନ୍ ୟାହୁଦୀଜାମାର୍ ପାଉଲୁସ୍କି ବିରୋଧ୍ ଆରୁ ନିନ୍ଦା କାମାଗେ ଲାଗ୍ଗିୟାର୍, ତା ଆସ୍ ତାଙ୍ଘା ଚିଢ଼ା ହେତ୍ତିକିରି ଆବ୍ଡ଼ାରିନ୍ ତେଙ୍ଗିୟାସ୍, “ନିହ୍ମାଏ ହେଁସୁଦ୍ ନିହ୍ମାଏ କୁକ୍କୁନୁ ଖାତ୍ର୍ନାଦ୍! ଏନ୍ ନିର୍ଦ୍ଦୋଷ୍। ଆକ୍କୁନ୍ତି ଏନ୍ ଦୁସ୍ରା ଜାତିୟାର୍ସାନ୍ କୋନ୍।”
7ଆନ୍ତିନ୍ ପାଉଲୁସ୍ ଆସ୍ତି ବୁଙ୍ଗିକିରି ତୀତୁସ୍ ଯୁସ୍ତୁସ୍ ନାମେଘି ଅଣ୍ଟା ଆଲାସ୍କି ଆଡ଼୍ପାଗେ ବାର୍ଚାସ୍। ଆସ୍ ପାର୍ମେଶ୍ୱାର୍ସ୍କି ଆରାଧାନା କାମୁ ଆଲାସ୍ ରାଚାସ୍; ଏକାସ୍କି ଆଡ଼୍ପା କା ସାଭା ଆଡ଼୍ପା ଲାଗିକିରି ରାଚା। 8ସାଭା ଆଡ଼୍ପାନ୍ତା ମୁଖ୍ୟା କ୍ରିସ୍ପୁସ୍ ନିଜର୍ ପୁରା ପରିବାର୍ଗାନେ ପ୍ରାଭୁସିନ୍ ବିଶ୍ୱାସ୍ କାମ୍ଚାର୍; ଆରୁ ବହୁତ୍ କୁରିନ୍ଥୀ ତା ଆଲାର୍ ପାଉଲୁସ୍କି ବଚନ୍ ମେନିକିରି ବିଶ୍ୱାସ୍ କାମ୍ଚାର୍ ଆରୁ ଆସ୍ନାନ୍ ଅଚ୍ଚାର୍। 9ଅଣ୍ଟା ମାଁହା ପ୍ରାଭୁସ୍ ପାଉଲୁସ୍ସିନ୍ ଦର୍ଶନ୍ ଚିଇକିରି ତେଙ୍ଗିୟାସ୍, “ଆମା ଏଲ୍ଚା, ଲେକିନ୍ ତେଙ୍ଗ୍ତେ କାଲା ଆରୁ ଚୁପ୍ ଆମା ରା; 10ଏନ୍ଦେର୍ଗେକା ଏନ୍ ନିଙ୍ଘାଗାନେ ରାଦାନ୍, ଆରୁ ନେଦ୍ହି ନିଙ୍ଘା ମିଆଁ ହାମ୍ଲା କାମିକିରି ନିଙ୍ଘାଏ ନୁକ୍ସାନ୍ ମା କାମ୍ନାଏ; ଏନ୍ଦେର୍ଗେକା ଇ ସହର୍ନୁ ଏଙ୍ଘାଏ ବହୁତ୍ ଆଲାର୍ ରାନାଏ।” 11ହୁଦ୍ଘିଲାଗାନ୍ ପାଉଲୁସ୍ ଆସାନ୍ ଡେଢ଼୍ ବଛର୍ତକ୍ ପାର୍ମେଶ୍ୱାର୍ସ୍କି ବଚନ୍ ଶିଖାବାତେ ରାଚାସ୍।
12ଯେତ୍କବାକେନ୍ ଗାଲ୍ଲିୟୋନସ୍ ଆଖାୟା ଦେଶ୍ତା ରାଜ୍ପାଲ୍ ରାଚାସ୍, ତା ୟାହୁଦୀଜାମାର୍ ଏକ୍ଜୁଟ୍ ମାନିକିରି ପାଉଲୁସ୍କି ବିରୁଦ୍ଧନୁ ଉସ୍କାରାଚାର୍, ଆରୁ ଆସିନ୍ କୋଟ୍ କାଚେରୀଗେ ଅଚ୍ଚାର୍ କେରାର୍ ଆରୁ ତେଙ୍ଗାଗେ ଲାଗ୍ଗିୟାର୍, 13“ଇସ୍ ଆଲାରିନ୍ ପାର୍ମେଶ୍ୱାର୍ସ୍କି ଆରାଧାନା ଏନ୍ନେ ରୀତିନୁ କାମାଗେ ଫୁସ୍ଲାଲ୍ଦାସ୍, ଏକାଦ୍ କା ନିୟମ୍ଘି ଉଲ୍ଟା ରାଇଦ୍।” 14ଯେତ୍କବାକେନ୍ ପାଉଲୁସ୍ ତେଙ୍ଗା ବେଦ୍ଦାଲିୟାସିନ୍ କା ଗାଲ୍ଲିୟୋନସ୍ ୟାହୁଦୀରିନ୍ ତେଙ୍ଗିୟାସ୍, “ହେ ୟାହୁଦୀରୋ, ଯଦି ଇଦ୍ ଏନ୍ଦ୍ରିନ୍ ଅନ୍ୟାୟ ଆରୁ ବଦ୍ମାସ୍ କାତ୍ଥା ମାନଦ୍ନେ ତା, ନିହ୍ମା କାତ୍ଥାନ୍ ମେନ୍ନା ଏଙ୍ଗାଗେ ଉଚିତ୍ ରାଚା। 15ଲେକିନ୍ ଯଦି ଇବ୍ଡ଼ା କାତ୍ଥାଦ୍, ଶବ୍ଦ, ନାମେ ଆରୁ ନିହ୍ମାଏ ନିୟମ୍ଘି ବାରେନୁ ରାଇ ତା ନିମ୍ ନିଜେ ଆବନ୍ ବୁଝ୍ରା; ଏନ୍ଦେର୍ଗେକା ଏନ୍ ଇ ଜାମା କାତ୍ଥାଘି ନ୍ୟାୟ କାମୁ ମାନାଗେ ମା ଚାହଁଦାନ୍।” 16ଆରୁ ଆସ୍ ଆବ୍ଡ଼ାରିନ୍ କୋଟ୍ କାଚେରୀନ୍ତି ବାହାରି ଅଥ୍ରେଇ ଚିଚ୍ଚାସ୍। 17ଆନ୍ତିନ୍ ଜାମା ଆଲାର୍ ସାଭା ଆଡ଼୍ପାନ୍ତା ମୁଖ୍ୟା ସୋସ୍ଥିନେସ୍ସିନ୍ ଧାର୍ଚାର୍ ଆରୁ କୋଟ୍କାଚେରୀଘି ଆଘ୍ଲି ଡେମ୍ଚାର୍। ଲେକିନ୍ ଗାଲ୍ଲିୟୋନସ୍ ଇ କାତ୍ଥାନ୍ କାଟେହି ଧ୍ୟାନ୍ ମା ଚିଚ୍ଚାସ୍।
ପାଉଲୁସ୍ ଆନ୍ତାଖିଆଗେ କିର୍ରାଲ୍ଦାସ୍
18ପାଉଲୁସ୍ ଢେର୍ ଦିନ୍ତକ୍ କୁରିନ୍ଥୀ ସହର୍ନୁ ରାଚାସ୍, ଆନ୍ତିନ୍ ଭାଇ ଜାମାର୍ସ୍ତି ବିଦା ମାନିକିରି ଜାହାଜ୍ନୁ ଅକ୍କିକିରି ସିରିଆଗେ କେରାସ୍। ପ୍ରୀସ୍କିଲ୍ଲା ଆରୁ ଆକ୍ୱିଲା ହି ଆସ୍ଗାନେ କେରାର୍। ପାଉଲୁସ୍ ଅଣ୍ଟା ବିଶେଷ୍ ମତ୍ଲବ୍ ନିଚ୍କାଚାସ୍, ହୁଦଘିଲାଗାନ୍ ଆସ୍ କେଙ୍କ୍ରେୟାନୁ ତାଙ୍ଘା ଚୁଟ୍ଟିନ୍ ମୁଣ୍ଡରାସ୍। 19ଆନ୍ତିନ୍ ଆବ୍ଡ଼ାର୍ ଇଫିସୁସ୍ଗେ ଆଣସିୟାର୍ ଆରୁ ପାଉଲୁସ୍ ପ୍ରୀସ୍କିଲ୍ଲା ଆରୁ ଆକ୍ୱିଲାବନ୍ ଆସାନ୍ ଆମ୍ବେଇଚାସ୍ ଆରୁ ଆସ୍ ନିଜେ ସାଭା ଆଡ଼୍ପାନୁ କାଇକିରି ୟାହୁଦୀରିନ୍ ଉପ୍ଦେଶ୍ ଚିୟାଗେ ଲାଗ୍ଗିୟାସ୍। 20ଯେତ୍କବାକେନ୍ ଆସ୍ତା ଆଲାର୍ ଆସିନ୍ ଆର୍ଜୀ କାମ୍ଚାର୍ କା, “ଆରୁ ଥୋଡ଼େଉଲ୍ ଏହ୍ମା ଗାନେ ରା।” ତା ଆସ୍ ମାନା କାମ୍ଚାସ୍। 21ଲେକିନ୍ ପାଉଲୁସ୍ ଆସ୍ତି ବିଦା ମାନ୍ନା ବାକେନ୍ ତେଙ୍ଗିୟାସ୍, “ଯଦି ପାର୍ମେଶ୍ୱାର୍ସ୍ ଚାହଁସ୍ ତା ଏନ୍ ନିହ୍ମାସାନ୍ ଆରୁଅହନ୍ ବାରୋନ୍।” ଆନ୍ତିନ୍ ଆସ୍ ଇଫିସୁସ୍ତି ଜାହାଜ୍ନୁ ଅକ୍କିକିରି ବୁଙ୍ଗିୟାସ୍ କେରାସ୍; 22ଆରୁ ପାଉଲୁସ୍ କାଇସିରିଆନୁ ଏତ୍ତିକିରି ଯେରୁଶାଲେମ୍ଗେ କେରାସ୍ ଆରୁ ମଣ୍ତ୍ଲୀନ୍ତା ଆଲାରିନ୍ ଭେଁଟ୍ ମାନ୍ଚାସ୍ ଆନ୍ତିନ୍ ଆସ୍ ଆନ୍ତାଖିଆଗେ ବାର୍ଚାସ୍। 23ପାଉଲୁସ୍ ଆସାନ୍ କେତ୍କ ଉଲ୍ ରାଚାସ୍, ଆନ୍ତିନ୍ ଆସ୍ ଆସ୍ତି ଉରିଖିୟାସ୍, ଆରୁ ଗାଲାତୀୟା ଆରୁ ଫ୍ରୁଗିଆ ରାଜୀନୁ ଅଣ୍ଟା ଆଡ୍ଡାସ୍ତି ଆରୁ ଅଣ୍ଟା ଆଡ୍ଡା କୁଦ୍ଦତେ-କୁଦ୍ଦତେ ଜାମା ଚେଲାରିନ୍ ବିଶ୍ୱାସ୍ନୁ ମଜ୍ବୁତ୍ କାମ୍ଚାସ୍।
ଇଫିସୁସ୍ ସହର୍ନୁ ଆପଲ୍ଲସ୍
24ଆପଲ୍ଲସ୍ ନାମେଘି ଅଣ୍ଟା ୟାହୁଦୀସ୍ ଇଫିସୁସ୍ଗେ ବାର୍ଚାସ୍। ଆସ୍ ସିକାନ୍ଦାରିଆ ଦେଶ୍ତା ରାଚାସ୍। ଆରୁ ଆସ୍ ବିଦ୍ୱାନ୍ ରାଚାସ୍ ଆରୁ ପାବିତାର୍ ଶାସ୍ତ୍ରବନ୍ ବାନେକିରି ଆହାଲିୟାସ୍। 25ଆସ୍ ପ୍ରାଭୁସ୍କି ପାବୁଘି ଶିକ୍ଷା ହାକ୍କାଚାସ୍ ଆରୁ ମନ୍ ଲାଗାବାଇକିରି ଯୀଶୁସ୍କି ବାରେନୁ ଠିକ୍-ଠିକ୍ ଶୁଣାବାଲିୟାସ୍, ଆରୁ ଶିଖାବାଲିୟାସ୍, ଲେକିନ୍ ଆସ୍ ଖାଲି ଯୋହାନ୍ସ୍କି ଆସ୍ନାନ୍ଘି କାତ୍ଥାନ୍ ଆହାଲିୟାସ୍। 26ଆସ୍ ସାଭା ଆଡ଼୍ପାନୁ ସାହସ୍ କାମିକିରି ତେଙ୍ଗାଗେ ଲାଗ୍ଗିୟାସ୍, ଲେକିନ୍ ପ୍ରୀସ୍କିଲ୍ଲା ଆରୁ ଆକ୍ୱିଲା ଆସ୍କି କାତ୍ଥାନ୍ ମେନିକିରି ଆସିନ୍ ତାହ୍ମାସାନ୍ ଅଚ୍ଚାର୍ ଆରୁ ଆସିନ୍ ପାର୍ମେଶ୍ୱାର୍ସ୍କି ପାବୁଘି ବାରେ ଆରୁହି ବାନେକିରି ବାତାବାଚାର୍। 27ଯେତ୍କବାକେନ୍ ଆପଲ୍ଲସ୍ ଆଖାୟା ଦେଶ୍ କାଲା ବେଦ୍ଦିୟାସ୍ ତା ଭାଇଜାମାର୍ ଆସ୍କି ସାହସ୍ ବାଢ଼ାବାଚାର୍। ଆରୁ ଆସ୍ତା ବିଶ୍ୱାସୀଜାମାର୍ ଆପଲ୍ଲସିନ୍ ଗ୍ରହନ୍ କାମର୍ବୁଲି ଲେଖିକିରି ତାଇୟାର୍; ଆରୁ ଯେତ୍କବାକେନ୍ ଆସ୍ ଆସାନ୍ ଆଣ୍ସିୟାସ୍ ତା ଆସ୍ ଆବ୍ଡ଼ାର୍ଘି ବହୁତ୍ ମଦେତ୍ କାମ୍ଚାସ୍ ଏକାର୍ କା ପାର୍ମେଶ୍ୱାରସ୍କି କ୍ରିପାତି ବିଶ୍ୱାସ୍ କାମ୍କାଚାର୍। 28ଏନ୍ଦେର୍ଗେକା ଯୀଶୁସିନ୍ ଖ୍ରୀସ୍ତ୍ସ୍, ଇବନ୍ ଆସ୍ ପାବିତାର୍ ଶାସ୍ତ୍ର ଦ୍ୱାର୍ନୁ ପ୍ରମାଣ୍ କାମିକିରି ୟାହୁଦୀ ଜାମାରିନ୍ ଜାମାର୍ଘି ଆଘ୍ଲି ବାଡ଼େ ଜର୍ଦାର୍ନୁ ତେଙ୍ଗିକିରି ଆବ୍ଡ଼ାରିନ୍ ଚୁପ୍ କାମ୍ଚେଇଚାସ୍।
19ଇଫିସୁସ୍ ସହର୍ନୁ ପାଉଲୁସ୍
1ଯେତ୍କବାକେନ୍ ଆପଲ୍ଲସ୍ କୁରିନ୍ଥୀନୁ ରାଚାସ୍, ତା ପାଉଲୁସ୍ ଗାଲାତୀୟା ଆରୁ ଫ୍ରୁଗିଆ ରାଜୀ ମାନ୍ତେ ଇଫିସୁସ୍ଗେ ବାର୍ଚାସ୍। ଆସାନ୍ ଆସ୍ କେତ୍କ ଲୋକ୍ ଚେଲାରିନ୍ ଏରା ହାଖ୍ଖୀୟାସ୍। 2ଆସ୍ ଆବ୍ଡ଼ାରିନ୍ ମେନ୍ଚାସ୍, “ବିଶ୍ୱାସ୍ କାମ୍ନା ବାକେନ୍ କାଁଏ ନିମ୍ ପାବିତାର୍ ଆତ୍ମାବନ୍ ହାକ୍କାଚ୍କାର୍?” ଆବ୍ଡ଼ାର୍ ଉତ୍ତର୍ ଚିଚ୍ଚାର୍, “ଏମ୍ତା ମେନୁମ୍ତକ୍ ମାଲ୍ଲା କା ପାବିତାର୍ ଆତ୍ମାହି ରାଇଦ୍।” 3ଆଦ୍ଘି ଲାଗାନ୍ ପାଉଲୁସ୍ ମେନ୍ଚାସ୍, “ତା ନିମ୍ ନେଖାଏ ଆସ୍ନାନ୍ ଅଚ୍କାଚ୍କାର୍?” ଆବ୍ଡ଼ାର୍ ତେଙ୍ଗିୟାର୍, “ଯୋହାନ୍ସ୍କି ଆସ୍ନାନ୍।” 4ହୁଦ୍ଘିଲାଗାନ୍ ପାଉଲୁସ୍ ତେଙ୍ଗିୟାସ୍, “ଯୋହାନ୍ସ୍ ତା ପାସ୍ତାରାନାଘି ଆସ୍ନାନ୍ ଚିଆଲିୟାସ୍ ଆରୁ ଆସ୍କି ପାଛ୍ଲି ଏକାସ୍ ବାରସ୍, ଆସିନ୍ ମତ୍ଲବ୍ ଯୀଶୁସିନ୍ ବିଶ୍ୱାସ୍ କାମା ବୁଲି ଆଲାରିନ୍ ତେଙ୍ଗାଲିୟାସ୍।” 5ଇବନ୍ ମେନିକିରି ଆବ୍ଡ଼ାର୍ ପ୍ରାଭୁ ଯୀଶୁସ୍କି ନାମେନୁ ଆସ୍ନାନ୍ ଅଚ୍ଚାର୍। 6ଆରୁ ଯେତ୍କବାକେନ୍ ପାଉଲୁସ୍ ଆବ୍ଡ଼ାର୍ଘି ମିଆଁ ହେଖ୍ଖା ଉଇୟାସ୍ତା, ପାବିତାର୍ ଆତ୍ମା ଆବ୍ଡ଼ାର୍ଘି ମିଆଁ ଏତ୍ତିୟା ଆରୁ ଆବ୍ଡ଼ାର୍ ଭିନେ-ଭିନେ ଭାଷାତି କାତ୍ଥା ତେଙ୍ଗାଗେ ଆରୁ ଭବିଷତ୍ କାତ୍ଥା କାମାଗେ ଲାଗ୍ଗିୟାର୍। 7ଆବ୍ଡ଼ାର୍ଜାମାର୍ ପ୍ରାୟ ବାର ଲୋକ୍ ମାର୍ଦ୍ନାର୍ ରାଚାର୍।
8ଆନ୍ତିନ୍ ପାଉଲୁସ୍ ୟାହୁଦୀ ଜାମାର୍ଘି ସାଭା ଆଡ଼୍ପାନୁ କାଇକିରି ତିନ୍ ମାସ୍ତକ୍ ସାହସ୍ତି ତେଙ୍ଗ୍ତେ ରାଚାସ୍। ଆସ୍ ୟାହୁଦୀ ଜାମାର୍ଗାନେ ପାର୍ମେଶ୍ୱାର୍ସ୍କି ରାଜୀଘି ବାରେନୁ କାଁଟ୍ଛାଁଟ୍ କାମାଲିୟାସ୍ ଆରୁ ଆବ୍ଡ଼ାରିନ୍ ଉପ୍ଦେଶ୍ ଚିଇକିରି ବୁଝାବାଲିୟାସ୍। 9ଲେକିନ୍ ଆବ୍ଡ଼ାର୍ଘି ଭିତର୍ନୁ କେତ୍କ ଲୋକ୍ ବହୁତ୍ କାଠୋର୍ ରାଚାର୍। ଆବ୍ଡ଼ାର୍ ବିଶ୍ୱାସ୍ କାମାଗେ ମାନା କାମ୍ଚେଇଚାର୍। ଆରୁ ଆଲାର୍ଘି ମାଝାନୁ ଯୀଶୁ ଖ୍ରୀସ୍ତ୍କି ପାବୁଘି ବାରେନୁ ନିନ୍ଦା କାମାଗେ ଲାଗ୍ଗିୟାର୍, ହୁଦ୍ଘିଲାଗାନ୍ ଆସ୍ ଆବ୍ଡ଼ାରିନ୍ ଆମ୍ବେଇଚାସ୍ ଆରୁ ଚେଲାଜାମାରିନ୍ ତାଙ୍ଘାଗାନେ ଅଚ୍ଚାସ୍ ଆରୁ ସବୁଦିନ୍ ତୁରାନ୍ନର୍ ତା ସ୍କୁଲ୍ନୁ ଉପ୍ଦେଶ୍ ଚିୟାଗେ ଲାଗ୍ଗିୟାସ୍। 10ଏନ୍ନେନିନ୍ ଦୁଇ ବରଷ୍ତକ୍ ଚାଲ୍ରା; ଆଙ୍ଗେନ୍ ଏନ୍ନେ ମାନ୍ଚା କା ଆସିଆନୁ ରୁ ଜାମାର୍ ଏକାର୍ ୟାହୁଦୀ ଆରୁ ଏକାର୍ ଗ୍ରୀକ୍, ଜାମାର୍ ପ୍ରାଭୁସ୍କି ବଚନ୍ ମେନ୍ଚାର୍।
11ଆରୁ ପାର୍ମେଶ୍ୱାର୍ସ୍ ପାଉଲୁସ୍କି ହେଖ୍ଖାନ୍ତି ଶକ୍ତିଘି ଅଦ୍ଭୁତ୍ ନାଲ୍ଖୁ କାମାଲିୟାସ୍। 12ଏତ୍କତକ୍ କା ଆସ୍କି ଏସ୍ର୍କା ରୁମାଲ୍ ଆରୁ ଗାମ୍ଛା ବେହ୍ମରିୟାରିନ୍ ଏସ୍ର୍ତାଲିୟାର୍ ଆରୁ ଆବ୍ଡ଼ାର୍ସ୍ତି ବେମାର୍ ଛାଡ଼ା କାଲିୟା; ଆରୁ ଖାରାପ୍ ଆତ୍ମାହି ଆବ୍ଡ଼ାର୍ସ୍ତି ଉର୍ଖାକାଲିୟା। 13ଲେକିନ୍ କେତ୍କ ୟାହୁଦୀର୍ ଏକାର୍ କା ଇୟାହୁଇୟା କୁଦ୍ଦା-କୁଦ୍ଦା ଗୁନିଆଁ ମୋତି କାମାଲିୟାର୍। ଆବ୍ଡ଼ାର୍ ଏନ୍ନେ କାମାଗେ ଲାଗ୍ଗିୟାର୍ କା ଏକାର୍ଘି ମିଆଁ ଖାରାପ୍ ଆତ୍ମା ରାଚା, ଆବ୍ଡ଼ାର୍ଘି ମିଆଁ ପ୍ରାଭୁ ଯୀଶୁସ୍କି ନାମେନୁ ଏନ୍ନେ ତେଙ୍ଗିକିରି ଉରାଗେ କୋଶିଷ୍ କାମ୍ଚାର୍, “ଏକା ଯୀଶୁସ୍କି ପ୍ରଚାର୍ ପାଉଲୁସ୍ କାମ୍ଦାସ୍, ଏନ୍ ନିମାନ୍ ଆସ୍କି ନାମେତି ହୁକୁମ୍ ଚିଆଲ୍ଦାନ୍, ଇ ଆଲାର୍ସ୍ତି ଉର୍ଖା ବାରା।” 14ଆରୁ ସ୍କେବା ନାମେଘି ଅଣ୍ଟା ୟାହୁଦୀ ମୁଖ୍ୟା ପୁରୋହିତ୍ସ୍କି ସାତ୍ ଲୋକ୍ ହାଦ୍ଦୁ ରାଚାର୍, ଆରୁ ଆବ୍ଡ଼ାର୍ ଏନ୍ନେ କାମାଲିୟାର୍। 15ଲେକିନ୍ ଖାରାପ୍ ଆତ୍ମାଦ୍ ଆବ୍ଡ଼ାରିନ୍ ତେଙ୍ଗିୟାଦ୍, “ଏନ୍ ଯୀଶୁସିନ୍ ଆହେନ୍ ଆରୁ ପାଉଲୁସ୍ସିନ୍ ଚିହ୍ନେନ୍, ଲେକିନ୍ ନିମ୍ ନେଦ୍?” 16ହତ୍କବାକେନ୍ ଖାରାପ୍ ଆତ୍ମା ଲାକ୍କା ଆଲାସ୍ ଆବ୍ଡ଼ାର୍ଘି ମିଆଁ ଡେଗିକିରି ଏନ୍ନେ ଦାଶା କାମ୍ଚାସ୍ ଆରୁ ଆବ୍ଡ଼ାର୍ଘି ଆତ୍ତ୍କା ଚିଢ଼ାନ୍ ଚାର୍ରେଇଚାସ୍ କା ଆବ୍ଡ଼ାର୍ ଡୁଡ଼୍ଙ୍ଗୁ; ଆରୁ ଖାଦିଛେଦେ ମାନିକିରି ଆ ଆଡ଼୍ପାନ୍ତି ଉର୍ଖିକିରି ବୁଙ୍ଗିୟାର୍କେରାର୍। 17ଇ କାତ୍ଥାବନ୍ ଇଫିସୁସ୍ନୁ ରୁ ୟାହୁଦୀ ଆରୁ ଗ୍ରୀକ୍ ଜାମା ଆଲାର୍ ଆଖ୍ଖାର୍। ଆଙ୍ଗେନ୍ ଜାମାର୍ ଏଲ୍ଚିୟାର୍ କେରାର୍। ଆରୁ ଏନ୍ନେନ୍ ପ୍ରାଭୁ ଯୀଶୁସ୍କି ନାମେ ଫାଏଲାରାଗେ ଲାଗ୍ଗିୟା। 18ଆରୁ ଏକାର୍ ବିଶ୍ୱାସ୍ କାମ୍ଚ୍କାଚାର୍, ଆବ୍ଡ଼ାର୍ଘି ଭିତ୍ରୁ ବହୁତ୍ ଆଲାର୍ ବାରିକିରି ନିଜର୍-ନିଜର୍ କାମ୍ଚ୍କା ଖାରାପ୍ ନାଲ୍ଖୁବନ୍ ଜାମାର୍ଘି ଆଘ୍ଲି ଗ୍ରହନ୍ କାମ୍ଚାର୍। 19ଆରୁ ଯାଦୁ କାମୁ ଢେର୍ ଆଲାର୍ ନିଜର୍-ନିଜର୍ ବହି ଅନ୍ଦ୍ରିକିରି ଅଣ୍ଟାସାନ୍ ଠୁଡ଼ିୟାଚାର୍ ଆରୁ ଜାମାର୍ଘି ଆଘ୍ଲି ବାସ୍ସେଇଚାର୍। ଆବ୍ଡ଼ାର୍ ଆବନ୍ ହିସାବ୍ କାମ୍ଚାର୍ ଆରୁ ଆଦ୍ଘି ଦାମ୍ ପଚାଶ୍ ହାଜାର୍ ଚାନ୍ଦି ପାଏସାଘି ବାରାବୁରି ରାଚା। 20ଏନ୍ନେନିନ୍ ପ୍ରାଭୁସ୍କି ବଚନ୍ ଶକ୍ତିତି ବାଢ଼ର୍ତେ କେରାଦ୍ ଆରୁ ଫାଏଲାରାଗେ ଲାଗ୍ଗିୟା।
21ଇ ଜାମା ଘାଟ୍ଣାଘି ପାଛ୍ଲି ପାଉଲୁସ୍ ମାକିଦୁନିଆଁ ଆରୁ ଆଖାୟା ମାନିକିରି ଯେରୁଶାଲେମ୍ଗେ କାଲାଗେ ମନ୍ନୁ ସୋଚ୍ଚାସ୍। ଆରୁ ତେଙ୍ଗିୟାସ୍, “ଆସାନ୍ ଆଣ୍ସ୍କା ପାଛ୍ଲି ଏଙ୍ଗାଗେ ରୋମ୍ଗେହି ଏସ୍କିନ୍ଭି କାଲାଖାତ୍ରୋ।” 22ଆରୁ ଏକାର୍ ଆସ୍କି ମଦେତ୍ କାମାଲିଆର୍ ଆବ୍ଡ଼ାର୍ଘି ଭିତ୍ରୁ ତୀମଥିଉସ୍ ଆରୁ ଇରାସ୍ତୁସ୍ ଇ ଦୁଇ ଲୋକ୍ରିନ୍ ମାକିଦୁନିଆଁ ତାଇୟିକିରି ଆସ୍ ନିଜେ ଥୋଡ଼େ ଉଲ୍ ଆସିଆନୁ ରାଚାସ୍।
ଇଫିସୁସ୍ନୁ ମହା ଗଣ୍ଡଗଲ୍
23ହୁ ସାମାୟନୁ ଯୀଶୁ ଖ୍ରୀସ୍ତ୍କି ପାବୁଘି ଲାଗାନ୍ ମାହା ଗଣ୍ଡଗଲ୍ ମାନ୍ଚା। 24ଆସାନ୍ ଦାମୀତ୍ରିୟ ନାମେଘି ଅଣ୍ଟା ଚାନ୍ଦିଘି ନାଲ୍ଖୁ କାମୁ ସୋନାରିସ୍ ରାଚାସ୍। ଆସ୍ ଦେବୀ ଆର୍ତ୍ତେମୀଗେ ଚାନ୍ଦିଘି ମନ୍ଦିର୍ ତିଆର୍ କାମାଲିୟାସ୍, ଆରୁ କାରିଗର୍ ଜାମାର୍ଗେ ଢେର୍ ନାଲ୍ଖୁ ଚିତାଲିୟାସ୍। 25ଆସ୍ ଆବ୍ଡ଼ାରିନ୍ ଆରୁ ଏନ୍ନେ କାମୁ ଦୁସ୍ରା କାରିଗର୍ରିନ୍ ମେହିଁକିରି ତେଙ୍ଗିୟାସ୍, “ହେ ଭାଇ ଜାମାରୋ, ନିମ୍ ଆହ୍ଦାର୍ କା ଇ ବେପାର୍ ଦ୍ୱାର୍ନୁ ନାମାଗେ କେତ୍କ ଫାଏଦା ମାନିଦ୍। 26ନିମ୍ ଏରାଲ୍ଦାର୍ ଆରୁ ମେନାଲ୍ଦାର୍ କା ଇଫିସୁସ୍ନୁ ଖାଲି ମାଲ୍ଲା ଲେକିନ୍ ପ୍ରାୟ ଜାମା ଆସିଆନୁ ପାଉଲୁସ୍ ଢେର୍ ଆଲାରିନ୍ ବୁଝାବାଇକିରି ଆରୁ ଫୁସ୍ଲିକିରି ତେଙ୍ଗ୍ଦାସ୍ କା ଆଲାର୍ଘି ହେଖ୍ଖାତି ତିଆର୍ କାମ୍ଚ୍କା ଦେବ୍ତା, ପାର୍ମେଶ୍ୱାର୍ସ୍ ମାଲ୍ଦାସ୍। 27ଇତ୍ତି ଯେ ଖାଲି ନାହ୍ମା ଇ ବେପାର୍ଘି ବଦ୍ନାମ୍ ମାନ୍ନାଘି ଏଲ୍ଚ୍କା ରାଇ ଏନ୍ନେ ମାଲ୍ଲା, ଲେକିନ୍ ମାହା ଦେବୀ ଆର୍ତ୍ତେମୀଘି ମନ୍ଦିର୍ଘି ମାହିମା ଶେଷ୍ ମାନ୍ନାଘି ହି ଏଲ୍ଚ୍କା ରାଇ। ଆରୁ ଏକା ଦେବୀଘି ପୂଜା ଜାମା ଆସିଆ ଆରୁ ପୁରା ଦୁନିଆଁଦ୍ କାମି ଆଦ୍ଘି ବାଡ଼ାଇ ଖତମ୍ ମାନ୍ନାଘି ହି ଏଲ୍ଚ୍କା ରାଇ।”
28ଆବ୍ଡ଼ାର୍ ଇବନ୍ ମେନିକିରି ମୁରୁକ୍ ଖୀସାରାଚାର୍ କେରାର୍, ଆରୁ ଚିର୍ରାରା-ଚିର୍ରାରା ତେଙ୍ଗାଗେ ଲାଗ୍ଗିୟାର୍, “ଇଫିସୁସ୍ ଜାମାର୍ଘି ମାହା ଦେବୀ ଆର୍ତ୍ତେମୀ ମହାନ୍ଦ୍!” 29ଆଙ୍ଗେନ୍ ପୁରା ସହର୍ନୁ ମହା ଗଣ୍ଡଗଲ୍ ମାନ୍ଚା, ଆରୁ ଆଲାର୍ ମାକିଦୁନିଆଁନ୍ତା ବାର୍ଚ୍କା ଆରୁ ପାଉଲୁସ୍କି ସାଙ୍ଗେ କାଲୁ ଗାୟୁସ୍ ଆରୁ ଆରିସ୍ତାର୍ଖସ୍ସିନ୍ ଧାର୍ଚାର୍ ଆରୁ ଅହ୍ନାସାରେନ୍ ମେଶ୍ରିକିରି ନାଟକ୍ ଆଡ଼୍ପାଗେ କୁଦ୍ୟାରାତେ କେରାର୍। 30ଆଙ୍ଗେନ୍ ପାଉଲୁସ୍ ଆଲାର୍ଘି ମାଝାନୁ କାଲାଗେ ବେଦ୍ଦାଲିୟାସ୍, ଲେକିନ୍ ଚେଲାଜାମାର୍ ଆସିନ୍ କାଲାଗେ ମା ଚିଚ୍ଚାର୍। 31ଆରୁ ଆସିଆନ୍ତା ମୁଖ୍ୟା ଅଧିକାରୀ ଜାମାର୍ଘି ଭିତ୍ରୁ କେତ୍କ ଲୋକ୍ ପାଉଲୁସ୍କି ସାଙ୍ଗେ ରାଚାର୍, ଆବ୍ଡ଼ାର୍ ଆଲ୍ ତାଇୟିକିରି ଆର୍ଜୀବିନ୍ତି କାମ୍ଚାର୍ କା ନାଟକ୍ ଆଡ଼୍ପାଗେ ଆମ୍କେକାଲା। 32ସାଭାଦ୍ ଗଣ୍ଡଗଲ୍ତି ନିନ୍ଦିଆ କେର୍କିଚା, ହତ୍କବାକେନ୍ କେତ୍କ ଲୋକ୍ ଅଣ୍ଟା କାତ୍ଥା ତେଙ୍ଗିକିରି ଆରୁ, ଆରୁ କେତ୍କ ଲୋକ୍ ଆରୁ ଦୁସ୍ରା କାତ୍ଥା ତେଙ୍ଗିକିରି ଚିର୍ରାରାଲିୟାର୍, ଏନ୍ଦେର୍ଗେକା ଢେର୍ ଆଲାର୍ ବାଲ୍ଲାଲିଆର୍ କା ଆବ୍ଡ଼ାର୍ ଏନ୍ଦେର୍ଗେ ଆସାନ୍ ଠୁଡ଼ିୟା ରାଚ୍କାନାଏ। 33ଆରୁ, ଭିଡ଼୍ସ୍ତି କେତ୍କ ୟାହୁଦୀଜାମାର୍ ସିକାନ୍ଦାର୍ସିନ୍ ବୁଝାବାଇକିରି ଆଘ୍ଲି ଅନ୍ଦରାର୍; ଆଙ୍ଗେନ୍ ସିକାନ୍ଦାର୍ସ୍ ହେଖ୍ଖାତି ଠାରିଆଚାସ୍ କା ଆସ୍ ଆବ୍ଡ଼ାରିନ୍ ଉତ୍ତର୍ ଚିୟାଗେ ବେଦ୍ଦାଲ୍ଦାସ୍। 34ଲେକିନ୍ ଯେତ୍କବାକେନ୍ ଆବ୍ଡ଼ାର୍ ଆଖ୍ଖୀୟାର୍ କା ଆସ୍ ୟାହୁଦୀସ୍, ତା ଜାମାର୍ ଅଣ୍ଟା ଶବଦ୍ନୁ ପ୍ରାୟ ଦୁଇ ଘାଣ୍ଟାତକ୍ ଚିର୍ରା ରାଇକିରି ତେଙ୍ଗାଗେ ଲାଗ୍ଗିୟାର୍, “ଇଫିସୁସ୍ ଜାମାର୍ଘି ଦେବୀ ଆର୍ତ୍ତେମୀ ମାହାନ୍ଦ୍।” 35ଆଙ୍ଗେନ୍ ସହର୍ତା ମନ୍ତ୍ରୀସ୍ ଆଲାରିନ୍ ଶାନ୍ତ୍ କାମିକିରି ତେଙ୍ଗିୟାସ୍, “ହେ ଇଫିସୁସ୍ତା ଆଲାରୋ, ଇଫିସୁସ୍ ସହର୍ ଯେ ମାହା ଦେବୀ ଆର୍ତ୍ତେମୀ ଆରୁ ଆକାଶ୍ତି ଖାତ୍ର୍କା ପାବିତାର୍ ଚାଁଚାଘି ଦେଖ୍ଭାଲ୍ କାମୁଦ୍, ଇବନ୍ ନେଦ୍ ବାଲ୍ଲନାଏ? 36ଏନ୍ଦେର୍ଗେକା ଇ କାତ୍ଥାନ୍ ମାନା କାମା ପଲ୍ଲତାରିଦ୍, ହୁଦ୍ଘିଲାଗାନ୍ ନିମ୍ ଚୁପ୍ ରା, ଆରୁ ବିନା ସୋଚ୍ବିଚାର୍ତି ଏନ୍ଦେର୍ହି ଆମା କାମା। 37ଏନ୍ଦେର୍ଗେକା ଇ ଯେ ଆଲାରିନ୍ ନିମ୍ ଅନ୍ଦର୍କାଦାର୍, ନା ତା ଇବ୍ଡ଼ାର୍ ମନ୍ଦିର୍ବନ୍ ଲୁଟ୍ନାଏ, ଆରୁ ନା ତା ନାହ୍ମା ଦେବୀଘି ନିନ୍ଦା କାମ୍ନାଏ। 38ହୁଦ୍ଘିଲାଗାନ୍ ଦାମୀତ୍ରିୟ ଆରୁ ତାଙ୍ଘାଏ କାରିଗର୍ ଜାମାର୍ଘି ନେକିନ୍ ଏନ୍ଦ୍ରିନ୍ କାତ୍ଥା ରାଇ ତା କୋଟ୍ କାଚେରୀ ଖୁଲାରାଇ ଆରୁ ଶାସନ୍ କାମୁ ଜାମାର୍ହି ହାଜିର୍ ରାନାଏ; ଆବ୍ଡ଼ାର୍ ଏକ୍ ଦୁସ୍ରାର୍ଘି ମିଆଁ ଦୋଷ୍ ଲାଗାବର୍। 39ଲେକିନ୍ ଯଦି ନିହ୍ମାଏ ଦୁସ୍ରା ଏନ୍ଦ୍ରିନ୍ ଦାବି ରାଇ, ହାଲେ କାନୁନୀ ସାଭାନୁ ଆଦ୍ଘି ବିଚାର୍ କାମାକୋ। 40ଏନ୍ଦେର୍ଗେକା ପ୍ରକୃତ୍ନୁ ଇନ୍ନାନ୍ତା ଗଣ୍ଡଗଲ୍ଘି ଲାଗାନ୍ ଏହ୍ମା ମିଆଁ ଦୋଷ୍ ଲାଗାବାନାଘି ଏଲ୍ଚ୍କା ରାଇ, ଏନ୍ଦେର୍ଗେକା ଏମ୍ ଇ ଗଣ୍ଡଗଲ୍ଘି ଏନ୍ଦେର୍ହି କାରଣ୍ ଏଦା ହି ପଲ୍ଲଦାମ୍।” 41ଏତ୍କ ତେଙ୍ଗିକିରି ଆସ୍ ସାଭାନ୍ତା ଜାମାରିନ୍ ବିଦା କାମ୍ଚାସ୍।
20ମାକିଦୁନିଆଁ ଗ୍ରୀକ୍ ଆରୁ ତ୍ରୋୟାସ୍ନୁ ପାଉଲୁସ୍କି କାନା
1ଯେତ୍କବାକେନ୍ ଗଣ୍ଡଗଲ୍ ବନ୍ଦ ମାନ୍ଚାତା ପାଉଲୁସ୍ ଚେଲାଜାମାରିନ୍ ମେଁହିୟାସ୍ ଆରୁ ଆବ୍ଡ଼ାରିନ୍ ଧିରାଜ୍ ଧାରାଗେ ବୁଝାବାଚାସ୍। ଆନ୍ତିନ୍ ପାଉଲୁସ୍ ଆବ୍ଡ଼ାର୍ସ୍ତି ବିଦା ମାନିକିରି ମାକିଦୁନିଆଁଗେ କେରାସ୍। 2ମାକିଦୁନିଆଁ ରାଜୀନୁ କାନାବାକେନ୍ ପାଉଲୁସ୍ ଆସ୍ତା ଆଲାରିନ୍ ଉତ୍ସାହିତ୍ କାମାଲିୟାସ୍, ଆନ୍ତିନ୍ ଆସ୍ ଗ୍ରୀକ୍ଗେ କେରାସ୍। 3ପାଉଲୁସ୍ ଗ୍ରୀକ୍ନୁ ତିନ୍ ମାସ୍ ରାଚାସ୍। ହୁଦ୍ଘିପାଛ୍ଲି ଆସ୍ ଜାହାଜ୍ନୁ ସିରିଆ କାଲାଗେ ବେଦ୍ଦାଲିୟାସ୍, ତା ୟାହୁଦୀଜାମାର୍ ଆସିନ୍ ପିଟାଗେ ଉପାୟ କାମ୍ଚାର୍, ଆଙ୍ଗେନ୍ ଆସ୍ ମାକିଦୁନିଆଁ ହୋଇକିରି କିର୍ରାଗେ ସୋଚ୍ଚାସ୍। 4ଆରୁ ବିରିୟା ରାଜୀନ୍ତା ପୁରସ୍କି ହାଦ୍ଦୁ ସୋପାତ୍ର ଥେସ୍ଲୁନିକିୟାନ୍ତା ଆରିସ୍ତାର୍ଖସ୍ ଆରୁ ସେକୁନ୍ଦ୍, ଦର୍ବୀନ୍ତା ଗାୟୁସ୍ ଆରୁ ତୀମଥିଉସ୍ ଆରୁ ଆସିଆନ୍ତା ତୁଖିକୁସ୍ ଆରୁ ତ୍ରଫିମସ୍ ପାଉଲୁସ୍ଗାନେ କେରାର୍। 5ଇବ୍ଡ଼ା ଆଲାର୍ ଆଘ୍ଲିନ୍ତି ତ୍ରୋୟାସ୍ଗେ କାଇକିରି ଏମାନ୍ ହୋଖାଲିୟାର୍। 6ଆରୁ ମା ଫୁଲ୍ର୍ନାବାଲା ଆସ୍ମାଘି ପରବ୍ ପାଛ୍ଲି ଏମ୍ ଫିଲିପ୍ପୀନ୍ତି ଜାହାଜ୍ନୁ ଅକ୍କିକିରି ପାଞ୍ଚ୍ ଦିନ୍ଘି ପାଛ୍ଲି ତ୍ରୋୟାସ୍ଗେ ଆବ୍ଡ଼ାର୍ସାନ୍ ଆଣ୍ସ୍କାମ୍। ଆରୁ ଆସାନ୍ ଏମ୍ ସାତ୍ଦିନ୍ତକ୍ ରାଚ୍କାମ୍।
ତ୍ରୋୟାସ୍ନୁ ପାଉଲୁସ୍ ଆଖ୍ରୀ ଉପ୍ଦେଶ୍ ଚିଆଲ୍ଦାସ୍
7ହାପ୍ତାଘି ପହ୍ଲେ ଉଲ୍ଲା ଏମ୍ ଆସ୍ମା ଖିଣ୍ଡାଗେ ଠୁଡ଼ିୟା ରାଚ୍କାମ୍। ପାଉଲୁସ୍ ଆଦ୍ଘି ନାନ୍ନୁ ଉଲା ଆସ୍ତି ବୁଙ୍ଗାଗେ ସୋଚ୍କାଚାସ୍, ହୁଦ୍ଘିଲାଗାନ୍ ଆଲାରିନ୍ ଆଦ୍ମାଁହାତକ୍ ଉପ୍ଦେଶ୍ ଚିୟାଗେ ଲାଗ୍ଗିୟାସ୍। 8ମିଁତା ଏକା ବାଖ୍ରାନୁ ଏମ୍ ଠୁଡ଼ିୟା ରାଚ୍କାଚ୍କାମ୍, ଆସାନ୍ ବହୁତ୍ ବିଲ୍ଲୀ ଜାଲ୍ରାଲିୟା। 9ଆସାନ୍ ୟୁତୁଖୁସ୍ ନାମେଘି ଅଣ୍ଟା କୁକ୍କସ୍ ଝର୍କା ମିଆଁ ଅକ୍କାଚାସ୍, ଆସ୍କେ ମୁରୁକ୍ ହାନ୍ଦ୍ରା ଉର୍ଖାଲିୟାଦ୍। ପାଉଲୁସ୍ ଢେର୍ ଦେରିତକ୍ ଉପ୍ଦେଶ୍ ଚିଆଲ୍ୟାସ୍, ହୁଦ୍ଘିଲାଗାନ୍ ଆସ୍ ନିନ୍ଦ୍ରାସର୍ତି ତିସ୍ରା ମହଲ୍ତି କିୟାଁ ଖାତ୍ରାସ୍। ଆରୁ ଆସିନ୍ ଉଠାବାନା ବାକେନ୍ ଆସ୍ କେଚ୍ଚାସ୍ କେର୍କାଦାସ୍ ବୁଲି ଆଖ୍ଖାର୍। 10ଲେକିନ୍ ପାଉଲୁସ୍ କିୟାଁ ଏତ୍ତିୟାସ୍ ଆରୁ କୁକ୍କସ୍କି ମିଆଁ ଖାତ୍ରିକିରି ଆସିନ୍ ହୋଇଚିୟାସ୍ ଆରୁ ତେଙ୍ଗିୟାସ୍, “ନିମ୍ ଆମା ଘାବ୍ରାରା; ଇସ୍ ଉଜ୍ଜାଲ୍ଦାସ୍।” 11ଆନ୍ତିନ୍ ଆସ୍ ମିଁତା ମହଲ୍ଗେ କିର୍ୟାସ୍ କେରାସ୍ ଆରୁ ଆସ୍ମାବନ୍ ଖିଣ୍ଡିକିରି ମଖ୍ଖାସ୍। ଆସ୍ ପାଇରି ବିଜ୍ଜନାତକ୍ ଆବ୍ଡ଼ାର୍ ଗାନେ କାଚ୍ନେଖ୍ର୍ତେ ରାଚାସ୍, ହୁଦ୍ଘିପାଛ୍ଲି ଆସ୍ ବୁଙ୍ଗିୟାସ୍ କେରାସ୍। 12ଆଲାର୍ ଆ କୁକ୍କସିନ୍ ଉଜ୍ଜନା ଆଡ଼୍ପା ଅଚ୍ଚାର୍ ଆରୁ ଆବ୍ଡ଼ାର୍ଗେ ବହୁତ୍ ଶାନ୍ତି ହାଖ୍ଖରା।
ପାଉଲୁସ୍ ତ୍ରୋୟାସ୍ତି ମେଲେତୁସ୍ଗେ କାଲ୍ଦାସ୍
13ଲେକିନ୍ ଏମ୍ ଜାହାଜ୍ନୁ ଅକ୍କିକିରି ପହ୍ଲେ ଆସୋସ୍ଗେ କେର୍କାମ୍। ଆସ୍ତି ଏମ୍ ପାଉଲୁସ୍ସିନ୍ ଜାହାଜ୍ନୁ ହୁଆଗେ ସୋଚ୍କାଚ୍କାମ୍। ଏନ୍ଦେର୍ଗେକା ଆସ୍ ପଏଦଲ୍ କାଲାଗେ ସ୍ଥିର୍ କାମ୍ଚ୍କାଚାସ୍। 14ଯେତ୍କବାକେନ୍ ଆସ୍ ଏମାଗେ ଆସୋସ୍ନୁ ହାଖ୍ଖରାସ୍ ତା ଏମ୍ ଆସିନ୍ ଜାହାଜ୍ନୁ ଅକ୍ତିକିରି ମିତୁଲୀନୀ ସହର୍ଗେ ବାର୍ଚ୍କାମ୍। 15ଆସ୍ତି ଜାହାଜ୍ନୁ ଅକ୍କିକିରି ଏମ୍ ଦୁସ୍ରା ଉଲ୍ଲା ଖିଅସ୍ଗେ ଆଣ୍ସ୍କାମ୍। ଆରୁ ଆଦ୍ଘି ଦୁସ୍ରା ଉଲ୍ଲା ସାମସ୍ଗେ କେର୍କାମ୍; ଆରୁ ନାନ୍ନୁ ଉଲା ମୀଲୀତସ୍ଗେ ଆଣସ୍କାମ୍। 16ଆସିଆ ଦେଶ୍ନୁ ସାମାୟ ବାର୍ବାଦ୍ ମା କାମିକିରି ଇଫିସୁସ୍ ପାର୍ ମାନିକିରି କାଲାଗେ ପାଉଲୁସ୍ ସୋଚ୍ଚକାଚାସ୍, ଏନ୍ଦେର୍ଗେକା ମାନାଅଙ୍ଗତା ଆସ୍ ପେନ୍ତେକୋଶ୍ ପରବ୍ ଉଲ୍ଲାନୁ ଯେରୁଶାଲେମ୍ଗେ ଆଣସାଗେ ଚାଁଣେନୁ ରାଚାସ୍।
ପାଉଲୁସ୍ ଇଫିସୁସ୍ତା ପୁର୍ଖାରିନ୍ ଉପ୍ଦେଶ୍ ଚିଆଲ୍ଦାସ୍
17ମୀଲୀତସ୍ତିନ୍ ପାଉଲୁସ୍ ଇଫିସୁସ୍ଗେ ଆଲ୍ ତାଇୟିକିରି ମଣ୍ତ୍ଲୀନ୍ତା ପୁର୍ଖା ମୁଖ୍ୟାଜାମାରିନ୍ ତାଙ୍ଘାସାନ୍ ମେଁହ୍ତାଚାସ୍। 18ଯେତ୍କବାକେନ୍ ଆବ୍ଡ଼ାର୍ ତାଙ୍ଘା ଚାହାଗେ ବାର୍ଚାର୍, ତା ପାଉଲୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିମ୍ ଆହାଲ୍ଦାର୍କା ଏନ୍ ଆସିଆ ଦେଶ୍ ବାର୍ଚ୍କାନ୍ତି ପହ୍ଲେ ଉଲ୍ଲାନ୍ତି ଜାମାବାକେନ୍ ନିହ୍ମାଗାନେ ଏସ୍କେ ଜୀବନ୍ ବିତାବାଚ୍କାଚ୍କାନ୍। 19ୟାହୁଦୀ ଜାମାର୍ଘି ନାନ୍ନା ଲେଖା ଷଡ଼ଯନ୍ତ୍ରଘି ଲାଗାନ୍ ଏଙ୍ଗା ବହୁତ୍ ପରୀକ୍ଷାଘି ସାମ୍ନା କାମାଖାତ୍ରା, ହାଲେହି ଏନ୍ ବହୁତ୍ ନରମ୍ତି ଆରୁ ଅହ୍ଲା-ଅହ୍ଲା କିରି ପ୍ରାଭୁସ୍କି ସେବା କାମାଲ୍କାନ୍। 20ନିମ୍ ଆହ୍ଦାର୍ କା ଏନ୍ ନିମାନ୍, ଏକାଦ୍ ନିମାଗେ ବାନେଦ୍, ଏନ୍ନେ କାତ୍ଥାବନ୍ ପ୍ରଚାର୍ କାମାଗେ ମାଲ୍ଲା ହିଁଚ୍କିଚ୍ରୁନ୍, ଲେକିନ୍ ଏନ୍ ନିମାନ୍ ଆ କାତ୍ଥାନ୍ ଆଲାର୍ଘି ମାଝାନୁ ଆରୁ ଆଡ଼୍ପା, ଆଡ଼୍ପା କାଇକିରି ଉପ୍ଦେଶ୍ ଚିନାନୁ ମାଲ୍ଲା ହିଁଚ୍କିଚ୍ରୁନ୍। 21ଲେକିନ୍ ୟାହୁଦୀ ଆରୁ ଗ୍ରୀକ୍ଜାମାର୍ଘି ମାଝାନୁ ଏନ୍ ଘୋଷ୍ଣା କାମିକିରି ତେଙ୍କାଦାନ୍ କା ଆବ୍ଡ଼ାର୍ ପାସ୍ତାରାଇକିରି ପାର୍ମେଶ୍ୱାର୍ସ୍କି ଚାହାଗେ ବାର୍ନା ଆରୁ ପ୍ରାଭୁ ଯୀଶୁସ୍କି ମିଆଁ ବିଶ୍ୱାସ୍ କାମ୍ନା କାତ୍ଥା। 22ଆକ୍କୁନ୍ ଏନ୍ ପାବିତାର୍ ଆତ୍ମାଘି ପ୍ରେର୍ଣା ହାଖ୍ଖୀକିରି ଯେରୁଶାଲେମ୍ଗେ କାଲ୍ଦାନ୍। ଆସାନ୍ ଏଙ୍ଘାଗାନେ ଏନ୍ଦେର୍ ଘାଟ୍ରୋ, ଏନ୍ ବାଲ୍ଦାନିନ୍। 23ଖାଲି ଏତ୍କ ଆହ୍ଦାନ୍ କା ଏଙ୍ଗାଗେ ଜେହେଲ୍ ଆରୁ ଦୁଃଖୁ ସାହା ଖାତ୍ରୋ ବୁଲି ପାବିତାର୍ ଆତ୍ମାଦ୍ ଜାମା ସହର୍ନୁ ଏଙ୍ଗାନ୍ ଚେତାବାନୀ ଚିଆଲିଦ୍। 24ଲେକିନ୍ ଏନ୍ତା ଏଙ୍ଘା ଜୀବନ୍ବନ୍ ତୁଚ୍ଛ ସୋଚାଲ୍ଦାନ୍, ଆରୁ ଏତ୍କ ଖାଲି ଚାହଁଦାନ୍ କା ଅଣ୍ଟା କୁଦ୍ଦିଆରାନା ଲେଖା ଏକା ନାଲ୍ଖୁନ୍ ଯୀଶୁ ଖ୍ରୀସ୍ତ୍ ଏଙ୍ଗା ଚିଚ୍କାଦାସ୍ ଆବନ୍ ଏନ୍ ପୁରା କାମନ୍, ଆରୁ ପାର୍ମେଶ୍ୱାର୍ସ୍କି କ୍ରିପାଘି ସୁସାମାଚାର୍ଘି ବାରେନୁ ସାକ୍ଷୀ ଚିଇକିରି ପ୍ରାଭୁ ଯୀଶୁସ୍ ଏଙ୍ଗାଗେ ଚିଚ୍କା ସେବା ନାଲ୍ଖୁବନ୍ ପୁରା କାମାଅଙ୍ଗନ୍। 25ଆକ୍କୁନ୍ ଏନ୍ ଆହାଲ୍ଦାନ୍ କା ନିମ୍ ଜାମାର୍, ଏକାର୍ଘି ମାଝାନୁ କା ଏନ୍ କୁଦ୍ଦା-କୁଦ୍ଦା ପାର୍ମେଶ୍ୱାର୍ସ୍କି ରାଜୀଘି ବାରେନୁ ସୁସାମାଚାର୍ ପ୍ରଚାର୍ କାମ୍ଚ୍କାନ୍, ଏଙ୍ଗାନ୍ ଆରୁ ଏକ୍ଲାହି ମା ଏର୍ଦାର୍। 26ହୁଦ୍ଘିଲାଗାନ୍ ଏନ୍ ଇନ୍ନା ନିମାନ୍ ସାକ୍ଷୀ ଚିଇକିରି ତେଙ୍ଗା ଚିଆଲ୍ଦାନ୍, କା ଏନ୍ ଜାମା ଆଲାର୍ଘି ହେଁସୁତି ଏନ୍ ନିର୍ଦ୍ଦୋଷ୍ ରାଦାନ୍। 27ଏନ୍ଦେର୍ଗେକା ପାର୍ମେଶ୍ୱାର୍ସ୍କି ଜାମା ଇଚ୍ଛାବନ୍ ନିହ୍ମା ମାଝାନୁ ଘୋଷ୍ଣା କାମାଗେ ଏନ୍ ମାଲ୍ଲା ହିଁଚ୍କିଚ୍ରୁନ୍। 28ନିମ୍ ନିଜର୍-ନିଜର୍ ବାରେନୁ, ଆରୁ ପୁରା ମଣ୍ତ୍ଲୀଘି ଦେଖ୍ଭାଲ୍ କାମା, ଏକା ମଣ୍ତ୍ଲୀଘି ଦେଖ୍ଭାଲ୍ କାମାଗେ ପାବିତାର୍ ଆତ୍ମା ନିମାନ୍ ମୁଖିଆ ବାନାବାଚ୍କିଚି। ତାକା ନିମ୍ ପାର୍ମେଶ୍ୱାର୍ସ୍କି ଆ ମଣ୍ତ୍ଲୀଘି ଦେଖ୍ଭାଲ୍ କାମର୍ ଏକାନ୍ କା ଆସ୍ ତାଙ୍ଘା ନିଜର୍ ହେଁସୁତି ହେନ୍ଦ୍କାଦାସ୍। 29ଏନ୍ ଆହ୍ଦାନ୍ କା ଏଙ୍ଘା ବୁଙ୍କା ପାଛ୍ଲି ଚାବ୍ରା ଲାକ୍ଡ଼ା ଗୁଠିଦ୍ ନିହ୍ମା ମାଝାନୁ ବାରୋଦ୍ ଆରୁ ଗୁଠିବନ୍ ମା ଆମ୍ବିଦ୍। 30ଏତ୍କତକ୍ କା ନିହ୍ମା ମାଝାନ୍ତି ଏନ୍ନେ ଆଲାର୍ହି ଉର୍ଖର୍, ଏକାର୍ କା ବିଶ୍ୱାସୀ ଜାମାରିନ୍ ତାହ୍ମା ପାଛ୍ଲି ଟାଣା ହୁଆଗେ ଉଲ୍ଟା ସିଧା କାତ୍ଥା ତେଙ୍ଗର୍। 31ହୁଦ୍ଘିଲାଗାନ୍ ସାବ୍ଧାନ୍ ରା, ଆରୁ ମନେ କାମା କା ଏନ୍ ତିନ୍ ବଛର୍ତକ୍ ଉଲ୍ଲାନ୍ ମାଁହାନ୍ ଅହ୍ଲା-ଅହ୍ଲା କିରି ନିମା ଜାମାରିନ୍ ଚେତାବାନୀ ଚିୟାଗେ ମା ଥାକ୍ରାଲ୍କାନ୍।”
32“ଆକ୍କୁନ୍ ଏନ୍ ନିମାନ୍ ପାର୍ମେଶ୍ୱାର୍ସ୍ ଆରୁ ତାଙ୍ଘା କ୍ରିପାଘି ବଚନ୍ନୁ ସୋଁପା ଚିଆଲ୍ଦାନ୍। ଇ ବଚନ୍ ନିମାନ୍ ଗଠନ୍ କାମଦ୍ ଆରୁ ପାବିତାର୍ ଆଲାର୍ଘି ମାଝାନୁ ନିହ୍ମା ଅଧିକାର୍ ଚିଆ ଅଙ୍ଗ। 33ଏନ୍ ନେଖାହି ସୋନା, ରୂପାକା ଚିଢ଼ା ପାଟାଘି ଲାଲଚ୍ ମାଲ୍ଲା କାମ୍ନା। 34ନିମ୍ ନିଜେ ଆହ୍ଦାର୍ କା (ଏନ୍ ନାଲ୍ଖୁ କାମିକିରି) ଏଙ୍ଘା ଇ ଯୋଡ଼େ ହେଖ୍ଖାଦ୍ ଏଙ୍ଘାଏ ଆରୁ ଏଙ୍ଘା ସାଙ୍ଗେ ଜାମାର୍ଘି ଦାର୍କାର୍ବନ୍ ପୁରା କାମ୍ଚାଦ୍। 35‘ଗ୍ରହନ୍ କାମ୍ନାଘିନ୍ତି ଦାନ୍ ଚିନାନୁ ବାଗ୍ଗେ ଖୁସୀ ରାଇ।’ ଇ ଏକା କାତ୍ଥାନ୍ ନିଜେ ପ୍ରାଭୁ ଯୀଶୁସ୍ ତେଙ୍କାଚାସ୍: ଆବନ୍ ଏନ୍ ଏଙ୍ଘା ଜାମା ନାଲ୍ଖୁନୁ ନିମାନ୍ ଏଦ୍କାଦାନ୍ କା ଏନ୍ନେ କଷଟ୍ କାମିକିରି ଗରୀବ୍ ଆଲାରିନ୍ ମଦେତ୍ କାମ୍ନା କାତ୍ଥା।”
36ଏତ୍କ ତେଙ୍କା ପାଛ୍ଲି ପାଉଲୁସ୍ ଆବ୍ଡ଼ା ଜାମାର୍ଗାନେ ହାଁଠୁୱାରାଇକିରି ବିନ୍ତି କାମ୍ଚାସ୍। 37ଆବ୍ଡ଼ାର୍ଜାମାର୍ ଅହ୍ଲତେ-ଅହ୍ଲତେ ଆସିନ୍ ହଁଇଚିଆର୍ ଆରୁ ଚଙ୍ଖାଗେ ଲାଗ୍ଗିୟାର୍। 38ପାଉଲୁସ୍ ଆବ୍ଡ଼ାରିନ୍ ତେଙ୍କାଚାସ୍ କା ନିମ୍ ଆରୁ ଏକ୍ଲାହି ଏଙ୍ଗାନ୍ ମା ଏର୍ଦାର୍, ହୁଦ୍ଘିଲାଗାନ୍ ଆବ୍ଡ଼ାର୍ ବାଗ୍ଗେ ଦୁଃଖୁ ମାନ୍ଚାର୍। ଆନ୍ତିନ୍ ଆବ୍ଡ଼ାର୍ ଆସିନ୍ ଜାହାଜ୍ତକ୍ ଅଚ୍ଚେଇର୍ଚାର।
21ପାଉଲୁସ୍ ଯେରୁଶାଲେମ୍ କାଲ୍ଦାସ୍
1ଆନ୍ତିନ୍ ଏମ୍ (ପାଉଲୁସ୍ ଆରୁ ତାଙ୍ଘା ସାଙ୍ଗେର୍) ଆବ୍ଡ଼ାର୍ସ୍ତି ଭିନେ ମାନିକିରି ଜାହାଜ୍ନୁ ଅକ୍କାମ୍, ଆରୁ ସିଧା ପାବୁନୁ କୋସ୍ଗେ ବାର୍ଚ୍କାମ୍, ଆରୁ ଦୁସ୍ରା ଉଲ୍ଲା ରୋଦାଗେ ବାର୍ଚ୍କାମ୍ ଆରୁ ଆସ୍ତିଲେ ପାତାରା ସହର୍ଗେ ବାର୍ଚ୍କାମ୍। 2ଆସାନ୍ ଫିନୀକୀୟା କାନାବାଲା ଅଣ୍ଟା ଜାହାଜ୍ ହାକ୍କାମ୍ ଆରୁ ଆନ୍ନୁ ଅକ୍କିକିରି କେର୍କାମ୍। 3ଯେତ୍କବାକେନ୍ ସାଇପ୍ରସ୍ ଏଥ୍ରା, ତା ଏମ୍ ଆବନ୍ ଡେବ୍ବାତାରା ଆମ୍ବେଚ୍କାମ୍ ଆରୁ ସିରିଆ ତାରା କାଇକିରି ସୋରନୁ ଏତ୍ତକାମ୍; ଏନ୍ଦେର୍ଗେକା ଆସାନ୍ ଜାହାଜ୍ ତା ମାଲ୍ବନ୍ ଏତ୍ତାନା ରାଚା। 4ଚେଲାରିନ୍ ହାଖ୍ଖୀକିରି ଏମ୍ ଆସାନ୍ ସାତ୍ଦିନ୍ତକ୍ ରାଚ୍କାମ୍। ଆବ୍ଡ଼ାର୍ ପାବିତାର୍ ଆତ୍ମାଘି ପ୍ରେର୍ଣାତି ପାଉଲୁସ୍ସିନ୍ ତେଙ୍ଗିୟାର୍ କା ଯେରୁଶାଲେମ୍ ଆମାକାଲା। 5ଆସାନ୍ ସାତ୍ଦିନ୍ ରାଚ୍କା ପାଛ୍ଲି ଏମ୍ ଆସ୍ତି ବିଦା ମାନିକିରି ବୁଙ୍କାମ୍ କେର୍କାମ୍; ଆରୁ ଜାମା ଚେଲାଜାମାର୍ ଆରୁ ତାହ୍ମା ମାଏକିନିଆଁର୍ ଆରୁ ହାଦ୍ଦୁର୍ ସହର୍ଘି ବାହ୍ରିତକ୍ ଏମାନ୍ ଆଣ୍ସ୍ତାଚାର୍ ଚିଚ୍ଚାର୍; ଆରୁ ଏମ୍ ଆସାନ୍ ହଁସ୍ରା ଖାଁଣିନୁ ହାଠୁୱାରିକିରି ବିନ୍ତି କାମ୍ଚ୍କାମ୍। 6ଆନ୍ତିନ୍ ଏକ୍ ଦୁସ୍ରାସ୍ତି ବିଦା ମାନିକିରି ଏମ୍ ଜାହାଜ୍ନୁ ଆର୍ଗ୍କାମ୍, ଆରୁ ଆବ୍ଡ଼ାର୍ ନିଜର୍-ନିଜର୍ ଆଡ଼୍ପାଗେ କିର୍ରିୟାର୍ କେରାର୍।
7ଆନ୍ତିନ୍ ଏମ୍ ସୋରନ୍ତି ଜାହାଜ୍ନୁ କାଇକିରି ପତଲ୍ମାଇ ସହର୍ନୁ ଆଣସ୍କାମ୍ ଆରୁ ଭାଇଜାମାରିନ୍ ଯୋହାର୍ କାମିକିରି ଆବ୍ଡ଼ାର୍ ଗାନେ ଅନ୍ଦୁଲ୍ ରାଚ୍କାମ୍। 8ଦୁସ୍ରା ଉଲ୍ଲା ଏମ୍ ଆସ୍ତି ବୁଙ୍ଗିକିରି କାଇସିରିଆଗେ ବାର୍ଚ୍କାମ୍, ଆରୁ ଫିଲିପ୍ପସ୍ ସୁସାମାଚାର୍ ପ୍ରଚାର୍ କାମୁସ୍କି ଆଡ଼୍ପା କାଇକିରି ଆସ୍ଗାନେ ରାଚ୍କାମ୍। ଏକାସ୍ କା ସାତ୍ ଲୋକ୍ ସେବକ୍ ଜାମାର୍ସ୍ତି ଅଣ୍ଟା ରାଚାସ୍। 9ଆସ୍କି ଚାର୍ ଲୋକ୍ କୁଆଁରୀ ହାଦ୍ଦୁ ରାଚାର୍, ଏକାର୍ କା ଭବିଷତ୍ କାତ୍ଥା କାମାଲିୟାର୍। 10ଆନ୍ତିନ୍ ଏମ୍ ଯେତ୍କବାକେନ୍ ଢେର୍ ଦିନ୍ତକ୍ ଆସାନ୍ ରାଚ୍କାମ୍ କେର୍କାମ୍, ତା ଆଗାବ୍ ନାମେଘି ଅଣ୍ଟା ନାବୀସ୍ ୟାହୁଦାନ୍ତି ବାର୍ଚାସ୍। 11ଆସ୍ ଏହ୍ମା ଚାହାଗେ ବାରିକିରି ପାଉଲୁସ୍କି ବେଲ୍ଟ୍ବନ୍ ଅଚ୍ଚାସ୍ ଆରୁ ନିଜର୍ ହେଖ୍ଖା ହେଡ୍ଡୁନ୍ ହିଁଇକିରି ତେଙ୍ଗିୟାସ୍, “ପାବିତାର୍ ଆତ୍ମାଦ୍ ଏନ୍ନେ ତେଙ୍ଗି କା ଏକା ଆଲାସ୍କି ବେଲ୍ଟ୍ ଇଦ୍ ଆସିନ୍ ଯେରୁଶାଲେମ୍ନୁ ୟାହୁଦୀଜାମାର୍ ଏନ୍ନେନ୍ ହିଁଇକିରି ଦୁସ୍ରା ଜାତିୟାର୍ଘି ହେଖ୍ଖାନୁ ସୋଁପର୍ଚର୍।” 12ଯେତ୍କବାକେନ୍ ଏମ୍ ଇ କାତ୍ଥାନ୍ ମେନ୍ଚ୍କାମ୍, ତା ଏମ୍ ଆରୁ ଆସ୍ତା ଆଲାର୍ ଆସିନ୍ ଆର୍ଜୀବିନ୍ତି କାମ୍ଚ୍କାମ୍, କା ଆସ୍ ଯେରୁଶାଲେମ୍ଗେ ମା କସ୍। 13ଲେକିନ୍ ପାଉଲୁସ୍ ଉତ୍ତର୍ ଚିଚ୍ଚାସ୍, “ନିମ୍ ଏନ୍ଦେର୍ କାମାଲ୍ଦାର୍ କା ଅହ୍ଲା-ଅହ୍ଲା ଏଙ୍ଘା ମନ୍ବନ୍ ତୋଡ଼ାଲ୍ଦାର୍? ଏନ୍ତା ଯେରୁଶାଲେମ୍ନୁ ପ୍ରାଭୁ ଯୀଶୁସ୍କି ନାମେନୁ ହିଁଇରାଗେ ଖାଲି ମାଲ୍ଲା ଲେକିନ୍ ଖିଆଗେହି ତିଆର୍ ରାଦାନ୍।” 14ଯେତ୍କବାକେନ୍ ଆସ୍ ମା ମାନ୍ଚାସ୍ ତା ଏମ୍ ଏତ୍କ ତେଙ୍ଗିକିରି ଚୁପ୍ ରାଚ୍କାମ୍ କେର୍କାମ୍, “ପ୍ରାଭୁସ୍କି ଇଚ୍ଛା ପୁରା ମାନ୍ନାଦ୍।”
15ଇ ଉଲ୍ଲାଘି ପାଛ୍ଲି ଏମ୍ ତିଆର୍ ମାନ୍ଚ୍କାମ୍ ଆରୁ ଯେରୁଶାଲେମ୍ଗେ କେର୍କାମ୍। 16କାଇସିରିଆନ୍ତିହି କେତ୍କ ଚେଲାର୍ ଏହ୍ମା ଗାନେ କେରାର୍ ଆରୁ ଆବ୍ଡ଼ାର୍ ଏମାନ୍ ସାଇପ୍ରସ୍ନ୍ତା ମନାସୋନ୍ ନାମେଘି ଅଣ୍ଟା ଆଲାସ୍ସାନ୍ ଅଚ୍ଚାର୍ ଏକାସ୍ କା ଅଣ୍ଟା ପାଚ୍ଚା ଚେଲା ରାଚାସ୍। ଏମାଗେ ଆସ୍କି ଆଡ଼୍ପାନୁ ରାନା ରାଚା।
ପାଉଲୁସ୍ ୟାକୁବ୍ସିନ୍ ଭେଁଟ୍ ମାନ୍ଚାସ୍
17ଯେତ୍କବାକେନ୍ ଏମ୍ ଯେରୁଶାଲେମ୍ଗେ ଆଣ୍ସ୍କାମ୍ ତା ଭାଇଜାମାର୍ ବହୁତ୍ ଖୁସୀତି ଏମାନ୍ ଭେଁଟ୍ ମାନ୍ଚାର୍। 18ଦୁସ୍ରା ଉଲ୍ଲା ପାଉଲୁସ୍ ଏମାନ୍ ହୋଇକିରି ୟାକୁବ୍ସିନ୍ ଭେଁଟ୍ ମାନାଗେ କେରାସ୍, ଆସାନ୍ ଜାମା ପୁର୍ଖାର୍ ଅଣ୍ଟାସାନ୍ ଠୁଡ଼ିୟା ରାଚ୍କାଚାର୍। 19ଆନ୍ତିନ୍ ପାଉଲୁସ୍ ଆବ୍ଡ଼ାରିନ୍ ଯୋହାର୍ କାମିକିରି ଏକା-ଏକା ନାଲ୍ଖୁନ୍ ପାର୍ମେଶ୍ୱାର୍ସ୍ ଆସ୍କି ସେବାଘି ଦ୍ୱାର୍ନୁ ଦୁସ୍ରା ଜାତିୟାର୍ଘି ମାଝାନୁ କାମ୍ଚ୍କାଚାସ୍, ଆବନ୍ ଅଣ୍ଟା-ଅଣ୍ଟା କାମିକିରି ଜାମାନ୍ ତେଙ୍ଗିୟାସ୍। 20ଆବ୍ଡ଼ାର୍ ଇବନ୍ ମେନିକିରି ପାର୍ମେଶ୍ୱାର୍ସ୍କି ମାହିମା କାମ୍ଚାର୍, ଆରୁ ଆସିନ୍ ତେଙ୍ଗିୟାର୍, “ହେ ଭାଇ, ନିନ୍ ଏରାଲ୍ଦାଏ କା କେତ୍କ ହାଜାର୍ ୟାହୁଦୀଜାମାର୍ ରାନାଏ ଏକାର୍ କା ବିଶ୍ୱାସ୍ କାମ୍ଚାର୍ ଆରୁ ଆବ୍ଡ଼ାର୍ଜାମାର୍ ନିୟମ୍ବନ୍ ପାଲନ୍ କାମ୍ନାଘି ଲାଗାନ୍ ବହୁତ୍ ଉତ୍ସାହିତ୍ ରାନାଏ। 21ପୁର୍ଖାର୍ ପାଉଲୁସ୍ସିନ୍ ତେଙ୍ଗିୟାର୍ କା ନିଙ୍ଘା ବାରେନୁ ଆବ୍ଡ଼ାରିନ୍ ଶିଖାବାଚ୍କା ରାଇ କା ନିନ୍ ଦୁସ୍ରା ଜାତିୟାର୍ଘି ମାଝାନୁ ରାନାବାଲା ୟାହୁଦୀ ଜାମାରିନ୍ ମୁଶାସ୍କି ନିୟମ୍ବନ୍ ଆମ୍ବାଗେ ଶିଖାବାଦାଏ, ଆରୁ ଆବ୍ଡ଼ାରିନ୍ ତେଙ୍ଗ୍ଦାଏ କା ନିଜର୍-ନିଜର୍ ହାଦ୍ଦୁର୍ଘି ଖାତ୍ନା ଆମ୍କେ କାମା ଆରୁ ନୀତି ନିୟମ୍ଘି ଅନୁସାର୍ ଆମ୍କେ ଚାଲ୍ରା। 22ତା ଏନ୍ଦେର୍ କାମାକୋ? ଆଲାର୍ ତା ଜରୁର୍ ମେନର୍ କା ନିନ୍ ବାର୍ଚ୍କାଦାଏ। 23ହୁଦ୍ଘିଲାଗାନ୍ ଏମ୍ ନିଙ୍ଗାନ୍ ଏକାନ୍ ତେଙ୍ଗାଲ୍ଦାମ୍ ଆବନ୍ କାମା। ଏହ୍ମାସାନ୍ ଚାର୍ ଲୋକ୍ ଆଲାର୍ ରାନାଏ ଏକାର୍ କା ବିଶେଷ୍ ମତ୍ଲବ୍ ନିଚ୍କାନାଏ। 24ଆବ୍ଡ଼ାରିନ୍ ହୋଇକିରି ଆବ୍ଡ଼ାର୍ ଗାନେ ନିଜ୍କେ ଶୁଦ୍ଧ୍ କାମା; ଆରୁ ଆବ୍ଡ଼ାର୍ଗେ ଚୁଟ୍ଟି ମୁଣ୍ତରାଗେ ଖାର୍ଚ୍ଚା ଚିଆ, ତା ଜାମାର୍ ଆହର୍ କା ଏକା କାତ୍ଥାନ୍ ଆବ୍ଡ଼ାରିନ୍ ନିଙ୍ଘା ବାରେନୁ ତେଙ୍ଗାକେର୍କିଚି, ଆଦ୍ ସତ୍ତୁ ମାଲ୍ଲିଦ୍ ଲେକିନ୍ ନିନ୍ ତା ନିଜେ ନିୟମ୍ବନ୍ ମାନିକିରି ଆଦ୍ଘି ଅନୁସାର୍ ଚାଲ୍ରାଦାଏ। 25ଲେକିନ୍ ଆ ଦୁସ୍ରା ଜାତିୟାର୍ଘି ବାରେନୁ ଏକାର୍ କା ବିଶ୍ୱାସ୍ କାମ୍ଚାର୍, ଏମ୍ ବିଚାର୍ କାମିକିରି ଆବ୍ଡ଼ାର୍ଗେ ଲେଖିକିରି ତାଏକାଦାମ୍ କା ମୂର୍ତ୍ତୀଗେ ବଲୀ କାମ୍ଚ୍କା ଆହ୍ଡ଼ାତି, ଆରୁ ହେଁସୁତି ଆରୁ ହଁଟବନ୍ ପେଧିକିରି ପିଟ୍ଟକା ପଶୁଘି ଆହ୍ଡ଼ାତି ଆରୁ ବେଭିଚାର୍ତି ବାଛ୍ରିକିରି ରା।” 26ଆନ୍ତିନ୍ ପାଉଲୁସ୍ ଆ ଆଲାରିନ୍ ହୋଇକିରି ଦୁସ୍ରା ଉଲ୍ଲା ଆବ୍ଡ଼ାର୍ ଗାନେ ନିଜ୍କେନିଜ୍ ଶୁଦ୍ଧ୍ କାମ୍ଚାସ୍, ଆରୁ ମନ୍ଦିର୍ଗେ କେରାସ୍ ଆରୁ ଆସାନ୍ ତେଙ୍ଗିୟାସ୍ କା ଶୁଦ୍ଧ୍ ମାନ୍ନାଘି ଉଲ୍ଲା ଏକ୍ଲା ପୁରା ମାନୋ ଆରୁ ଏହ୍ମା ଜାମାର୍ଘିନ୍ତି ଅର୍ତୁ ଅର୍ତୁର୍ଘି ଲାଗାନ୍ ଦାନ୍ ଏକ୍ଲା ଚାଢ଼ାବା କୋଦ୍।
ମନ୍ଦିର୍ନୁ ପାଉଲୁସ୍ସିନ୍ ଧାର୍ନା
27ଯେତ୍କବାକେନ୍ ଆ ସାତ୍ଦିନ୍ ପୁରା ମାନ୍ନାଘି ମିଆଁ ରାଚା, ତା ଆସିଆନ୍ତା ୟାହୁଦୀଜାମାର୍ ପାଉଲୁସ୍ସିନ୍ ମନ୍ଦିର୍ନୁ ଏରିୟାର୍ ଆରୁ ଜାମା ଆଲାରିନ୍ ଚାଢ଼ାବାଚାର୍, ଆରୁ ଆସିନ୍ ଧାର୍ଚାର୍, ଆରୁ ଆବ୍ଡ଼ାର୍ ଚିର୍ରା ରାଇକିରି ତେଙ୍ଗିୟାର୍, 28“ହେ ଇସ୍ରାଏଲ୍ତା ଆଲାରୋ, ଏମାନ୍ ମଦେତ୍ କାମା; ଇସ୍ ଆ ଆଲାସ୍ ଏକାସ୍ କା ନାହ୍ମା ଆଲାର୍ଘି ଆରୁ ନାହ୍ମା ନିୟମ୍ଘି ଆରୁ ଇ ଆଡ୍ଡାଘି ବିରୁଦ୍ଧନୁ ଆଲାରିନ୍ ଶିଖାବାଦାସ୍। ଏତ୍କତକ୍ କା ଇସ୍ ଗ୍ରୀକ୍ ଆଲାରିନ୍ ମନ୍ଦିର୍ନୁ ଅନ୍ଦ୍ରିକିରି ପାବିତାର୍ ଆଡ୍ଡାବନ୍ ଆ ପାବିତାର୍ କାମ୍ଚେଇଚ୍କାଦାସ୍।” 29ଆବ୍ଡ଼ାର୍ ଇଦ୍ଘିନ୍ତି ଆଘ୍ଲି ଇଫିସୁସ୍ତା ତ୍ରଫିମସ୍ସିନ୍ ପାଉଲୁସ୍ଗାନେ ସହର୍ନୁ ଏର୍କାଚାର୍, ଆରୁ ସୋଚାଲିୟାର୍ କା ପାଉଲୁସ୍ ଆସିନ୍ ମନ୍ଦିର୍ନୁ ଅନ୍ଦ୍ରାସ୍ ବାର୍କାଦାସ୍। 30ଆନ୍ତିନ୍ ପୁରା ସହର୍ନୁ ଗଣ୍ଡଗଲ୍ ସୁରୁ ମାନ୍ଚାକେରା ଆରୁ ଆଲାର୍ କୁଦ୍ୟାରାଇକିରି ଅଣ୍ଟାସାନ୍ ଠୁଡ଼ିୟାରାଚାର୍ ଆରୁ ପାଉଲୁସ୍ସିନ୍ ଧାର୍ଚାର୍ ଆରୁ ଟାଣା-ଟାଣା ମନ୍ଦିର୍ଘି ବାହାରି ଅଚ୍ଚାର୍ କେରାର୍ ଆରୁ ସାଙ୍ଗେ ସାଙ୍ଗ୍ ବାଲିବନ୍ ବନ୍ଦ୍ କାମ୍ଚେଇଚାର୍। 31ଯେତ୍କବାକେନ୍ ଆସିନ୍ ଡେମା ପିଟା ବେଦ୍ଦାଲିୟାର୍, ତା ସିପାହୀର୍ଘି ମୁଖ୍ୟାସ୍ସାନ୍ ଖବର୍ ଆଣ୍ସିଆ କା ଜାମା ଯେରୁଶାଲେମ୍ନୁ ଗଣ୍ଡଗଲ୍ ଫାଇଲାରାଚା କେର୍କିଚି। 32ଆଙ୍ଗେନ୍ ଆସ୍ ହୁଙ୍ଗେନିନ୍ ସିପାହୀ ଜାମାରିନ୍ ଆରୁ ସିପାହୀଜାମାର୍ଘି ମୁଖ୍ୟାରିନ୍ ହୋଇକିରି ଆସ୍କି ଚାହାନୁ କିୟାଁ କୁଦିୟାରାନାତି ବାର୍ଚାସ୍; ଆରୁ ଆବ୍ଡ଼ାର୍ ସିପାହୀର୍ଘି ମୁଖ୍ୟାରିନ୍ ଆରୁ ସିପାହୀରିନ୍ ଏରିକିରି ପାଉଲୁସ୍ସିନ୍ ଡେମା ପିଟାଗେ ଆମ୍ବେଇ ଚିଚ୍ଚାର୍। 33ଆନ୍ତିନ୍ ସିପାହୀର୍ଘି ମୁଖ୍ୟାସ୍ ପାଉଲୁସ୍କି ଚାହାନୁ ବାରିକିରି ଆସିନ୍ ଧାର୍ଚାସ୍; ଆରୁ ଯୋଡ଼େ ସିକ୍ଡ଼ିତି ହିୟାଗେ ହୁକୁମ୍ ଚିଚ୍ଚାସ୍ ଆରୁ ମେନ୍ଚାସ୍ କା, “ଇସ୍ ନେଦ୍ ଆରୁ ଇସ୍ ଏନ୍ଦେର୍ କାମ୍ଚ୍କାଦାସ୍?” 34ଲେକିନ୍ ଭିଡ଼୍ତି କେତ୍କ ଆଲାର୍ ଅଣ୍ଟା କାତ୍ଥା ତା ଆରୁ କେତ୍କ ଆଲାର୍ ଦୁସ୍ରା କାତ୍ଥା ତେଙ୍ଗିକିରି ଚିର୍ରାରାଲିୟାର୍। ଆସ୍ ଇ ଚିର୍ରାବର୍ରାଘି ଚାଲ୍ତେ ସତ୍ତୁ କାତ୍ଥାନ୍ ଆହାଗେ ପଲ୍ଲିୟାସିନ୍, ହୁଦ୍ଘିଲାଗାନ୍ ଆସ୍ ଆସିନ୍ ମହଲ୍ଗେ ହୁଆଗେ ହୁକୁମ୍ ଚିଚ୍ଚାସ୍। 35ଯେତ୍କବାକେନ୍ ପାଉଲୁସ୍ ସିଢ଼ିଗେ ଆଣ୍ସିୟାସ୍, ତା ଏନ୍ନେ ମାନ୍ଚା କା ଭିଡ଼୍ଘି ଖୀସ୍ଘି ଲାଗାନ୍ ସିପାହୀର୍ଗେ ଆସିନ୍ ଟେକିକିରି ହୁଆଗେ ଖାତ୍ରା। 36ଏନ୍ଦେର୍ଗେକା ଆଲାର୍ଘି ଭିଡ଼୍ ଏନ୍ନେ ଚିର୍ରାରାତେ ଆସ୍କି ପାଛ୍ଲି-ପାଛ୍ଲି କାଲିୟାଦ୍, “ଆସିନ୍ ପିଟାଚା।”
37ଯେତ୍କବାକେନ୍ ଆବ୍ଡ଼ାର୍ ପାଉଲୁସ୍ସିନ୍ ମହଲ୍ଗେ ହୁନା ବାଲା ରାଚାର୍, ତା ପାଉଲୁସ୍ ସିପାହୀର୍ଘି ମୁଖ୍ୟାସିନ୍ ତେଙ୍ଗିୟାସ୍, “ଏନ୍ ନିମାନ୍ ଏନ୍ଦ୍ରିନ୍ ତେଙ୍ଗାଅଙ୍ଗନ୍ କାଁଏ?” ଆସ୍ ତେଙ୍ଗିୟାସ୍, “ନିନ୍ ଗ୍ରୀକ୍ ଭାଷା ଆହ୍ଦାଏ କାଁଏ? 38ହାଲେ ନିନ୍ ମିଶର୍ ଦେଶ୍ତା ଆ ଆଲାଏ ତା ମାଲ୍ଦାଏ, ଏକାସ୍ କା ଇଦ୍ଘି ଆଘ୍ଲି ବିଦ୍ରୋହ୍ କାମିକିରି ଶୁନ୍ଶାନ୍ ଜାଗାନୁ ଚାର୍ହାଜାର୍ ଡାକୁର୍ଘି ଆଗୁୱାଇ କାମ୍ଚ୍କାଚାସ୍।” 39ପାଉଲୁସ୍ ତେଙ୍ଗିୟାସ୍, “ଏନ୍ତା ତାର୍ସୁସ୍ ସହର୍ତା ୟାହୁଦୀ ଆଲାନ୍! କିଲିକିଆନ୍ତା ପ୍ରସିଦ୍ଧ୍ ସହର୍ନ୍ତା ଆଲାନ୍। ଏନ୍ ନିଙ୍ଗାନ୍ ଆର୍ଜୀବିନ୍ତି କାମାଲ୍ଦାନ୍ କା ଏଙ୍ଗାନ୍ ଇବ୍ଡ଼ା ଆଲାର୍ ଗାନେ କାତ୍ଥା କାମାଗେ ଚିଆ।” 40ଯେତ୍କବାକେନ୍ ଆସ୍ ହୁକୁମ୍ ଚିଚ୍ଚାସ୍ତା ପାଉଲୁସ୍ ସିଢ଼ିଘି ମିଆଁ ଇଲିକିରି ଆଲାରିନ୍ ହେଖ୍ଖାତି ଠାରିଆଚାସ୍। ଆରୁ ଯେତ୍କବାକେନ୍ ଆବ୍ଡ଼ାର୍ ଚୁପ୍ଚାପ୍ ରାଚାର୍ ତା ଆସ୍ ଇବ୍ରାନୀ ଭାଷାନୁ ତେଙ୍ଗାଗେ ଲାଗ୍ଗିୟାସ୍:
22ଭିଡ଼୍ଘି ମାଝାନୁ ପାଉଲୁସ୍ ଭାଷଣ୍ ଚିଆଲ୍ଦାସ୍
1“ହେ ଭାଇରୋ ଆରୁ ବୁଆ ଜାମାରୋ, ଏଙ୍ଘା କାତ୍ଥାବନ୍ ମେନା, ଏକାନ୍ ଏନ୍ ଆକ୍କୁନ୍ ନିହ୍ମା ଆଘ୍ଲି ତେଙ୍ଗାଲ୍ଦାନ୍।” 2ଆସ୍ ଆବ୍ଡ଼ାରିନ୍ ଇବ୍ରାନୀ ଭାଷାତି ତେଙ୍ଗାଲ୍ଦାସ୍ ବୁଲି ମେନିକିରି ଆବ୍ଡ଼ାର୍ ଆରୁହି କାଡ଼େ-କାଡ଼େ ରାଚାର୍ କେରାର୍।
3ଆଙ୍ଗେନ୍ ପାଉଲୁସ୍ ତେଙ୍ଗିୟାସ୍, “ଏନ୍ ଅଣ୍ଟା ୟାହୁଦୀ ଆଲାନ୍, କିଲିକିଆନ୍ତା, ତାର୍ସୁସ୍ ସହର୍ନୁ ଏଙ୍ଘାଏ ଜନମ୍ଦ୍; ଲେକିନ୍ ଏନ୍ ଇ ଯେରୁଶାଲେମ୍ ସହର୍ନୁ ପାର୍ଦ୍କାଦାନ୍, ନାହ୍ମା ପୁର୍ଖାର୍ଘି ନୀତି ନିୟମ୍ ଅନୁସାର୍ ଗମାଲିଏଲ୍ସ୍ତି ଏନ୍ ପୁରାପୁରୀ ଶିକ୍ଷା ହାକ୍କାନ୍; ନିମ୍ ଇନ୍ନା ଜାମାର୍ ଏସ୍କେ ଉତ୍ସାହିତ୍ ରାଦାର୍ ଆନ୍ନେନ୍ ଏନ୍ହି ପାର୍ମେଶ୍ୱାର୍ସ୍କି ଲାଗାନ୍ ଉତ୍ସାହିତ୍ ରାଚ୍କାନ୍। 4ଏନ୍ ଯୀଶୁ ଖ୍ରୀସ୍ତ୍କି ପାବୁନ୍ତା ମାର୍ଦାନାରିନ୍ ଆରୁ ମାଏକିନିଆଁରିନ୍ ହିଁକିରି ଜେହେଲ୍ନୁ ଗୁଡ଼ାଚାଲ୍କାନ୍ ଆରୁ ଖିନା ଜୁଟି ସାତାବାଲ୍କାନ୍। 5ଇଦ୍ଘି ବାରେନୁ ମାହାପୁରୋହିତ୍ ଆରୁ ପୁର୍ଖାଜାମାର୍ ଏଙ୍ଘାଏ ସାକ୍ଷୀର୍, ଆବ୍ଡ଼ାର୍ସ୍ତି ଏନ୍ ଭାଇ ଜାମାର୍ଘି ନାମେନୁ ଚିଠି ଅନ୍ଦ୍ରିକିରି ଦାମାସ୍କସ୍ କାଲ୍କାନ୍, ତାକା ଆସାନ୍ ରୁ ଆଲାରିନ୍ହି ଦଣ୍ଡ୍ ଚିଆକୋ, ହୁଦ୍ଘିଲାଗାନ୍ ଆବ୍ଡ଼ାରିନ୍ହି ହିଁଇକିରି ଯେରୁଶାଲେମ୍ଗେ ଅନ୍ଦ୍ରାଗେ ଆ ଆଡ୍ଡାଗେ କାଲ୍କାନ୍।”
ପାଉଲୁସ୍ ନିଜର୍ ମନ୍ ବାଦ୍ଲାରାନାଘି ବାରେନୁ ତେଙ୍ଗାଲ୍ଦାସ୍
6“ଲେକିନ୍ କାତେ-କାତେ ଏନ୍ ଯେତ୍କବାକେନ୍ ଦାମାସ୍କସ୍ ଚାହାଗେ ଆଣସ୍କାନ୍, ତା ଲାଗ୍ଭାଗ୍ ବାର ବାଜେଗେ ଅହ୍ନାସାରେନ୍ ଆକାଶ୍ତି ଅଣ୍ଟା ବାଡ଼୍କା ବିଲ୍ଲୀ ଏଙ୍ଘା ଚାରିପାଖା ବିଲ୍ଲୀ ମାନ୍ଚାକେରା। 7ଆରୁ ଏନ୍ ହେଁହ୍ଲାନୁ ଖାତ୍ର୍କାନ୍ କେର୍କାନ୍ ଆରୁ ଏନ୍ନେ ଶବଦ୍ ମେନ୍ଚ୍କାନ୍, ‘ହେ ଶାଉଲ୍, ହେ ଶାଉଲ୍ ନିନ୍ ଏଙ୍ଗାନ୍ ଏନ୍ଦେର୍ଗେ ସାତାବାଲ୍ଦାଏ?’ 8ଏନ୍ ଉତ୍ତର୍ ଚିଚ୍କାନ୍, ‘ହେ ପ୍ରାଭୁ ନିନ୍ ନେଦ୍?’ ଆଙ୍ଗେନ୍ ଆସ୍ ଏଙ୍ଗାନ୍ ତେଙ୍ଗିୟାସ୍, ‘ଏନ୍ ନାଜ୍ରେତ୍ତା ଆ ଯୀଶୁନ୍ ନେକାନ୍ ନିନ୍ ସାତାବାଲ୍ଦାଏ।’ 9ଏକାର୍ ଏଙ୍ଘାଗାନେ ରାଚାର୍, ଆବ୍ଡ଼ାର୍ ଆ ବିଲ୍ଲୀନ୍ ଏରିୟାର୍, ସତ୍ତୁଦ୍ ଲେକିନ୍ ଏକାସ୍ ଏଙ୍ଘାଗାନେ କାଚ୍ନେଖ୍ରାଲିୟାସ୍ ଆସ୍କି ଶବଦ୍ ମାଲ୍ଲା ମେନୁର୍। 10ଆଙ୍ଗେନ୍ ଏନ୍ ତେଙ୍କାନ୍, ‘ହେ ପ୍ରାଭୁ ଏନ୍ ଏନ୍ଦେର୍ କାମନ୍?’ ପ୍ରାଭୁସ୍ ଏଙ୍ଗାନ୍ ତେଙ୍ଗିୟାସ୍, ‘ଉସ୍କାରା ଦାମାସ୍କସ୍ଗେ କାଲା ଆରୁ ଏକା ଜାମା ନାଲ୍ଖୁନ୍ କାମାଗେ ନିଙ୍ଗାନ୍ ଚାଜା କେର୍କିଚି, ଆବନ୍ ନିଙ୍ଗାଗେ ଆସାନ୍ ତେଙ୍ଗାକୋ।’ 11ଆ ବିଲ୍ଲୀଘି ଚାମ୍କାରାନାଘି କାରଣ୍ତି ଏନ୍ ଏରା ପଲ୍ଲକାନିନ୍, ଆଙ୍ଗେନ୍ ଏଙ୍ଘା ସାଙ୍ଗେନୁ ରୁ ଆଲାର୍ ଏଙ୍ଘା ହେଖ୍ଖା ଧାରିକିରି ଅନ୍ଦରାର୍ ଆରୁ ଏନ୍ ଦାମାସ୍କସ୍ଗେ ବାର୍ଚ୍କାନ୍।”
12“ଆସାନ୍ ହାନ୍ନାନିୟାସ୍ ନାମେଘି ଅଣ୍ଟା ଆଲାସ୍ ରାଚାସ୍। ଆସ୍ ନିୟମ୍ଘି ଅନୁସାର୍ ଚାଲ୍ର୍ନାବାଲା ଅଣ୍ଟା ଧାର୍ମିକ୍ ଆଲାସ୍ ରାଚାସ୍। ଆସ୍ତା ରୁ ଜାମା ୟାହୁଦୀର୍ ହି ଆସିନ୍ ଆଦର୍ମାଇନ୍ କାମାଲିୟାର୍। 13ଆସ୍ ଏଙ୍ଘା ଚାହାଗେ ବାରିକିରି ଇଜ୍ଜାସ୍ ଆରୁ ଏଙ୍ଗାନ୍ ତେଙ୍ଗିୟାସ୍, ‘ହେ ଭାଇ ଶାଉଲ୍ ଏରା, ଆରୁ ହୁଙ୍ଗେନିନ୍ ଏନ୍ ଏରାଗେ ଲାକ୍କାନ୍।’” 14“ଆରୁ ହାନାନିୟାସ୍ ତେଙ୍ଗିୟାସ୍, ‘ନାହ୍ମା ପୁର୍ଖାର୍ଘି ପାର୍ମେଶ୍ୱାର୍ସ୍ ନିଙ୍ଗାନ୍ ଇଦ୍ଘିଲାଗାନ୍ ଚାଜ୍ଜକାଦାସ୍ ତାକା ନିନ୍ ଆସ୍କି ଇଚ୍ଛାନ୍ ଆହୟ ଆରୁ ଆ ଧାର୍ମିକ୍ ଆଲାସିନ୍ ଏରୟ ଆରୁ ଆସ୍କି ଥୁମ୍ଣାନ୍ତି ବଚନ୍ ମେନୟ 15ଏନ୍ଦେର୍ଗେକା ନିନ୍ ଏକାନ୍ ଏର୍କାଦାଏ ଆରୁ ମେନ୍ଚ୍କାଦାଏ ଆ ଜାମାଘି ବାରେନୁ ଜାମା ଆଲାର୍ଘି ମାଝାନୁ ଆସ୍କି ସାକ୍ଷୀ ମାନୟ। 16ଆରୁ ଆକ୍କୁନ୍ ନିନ୍ ଏନ୍ଦେର୍ଗେ ଡେରି କାମାଲ୍ଦାଏ? ଉସ୍କାରା, ଆସ୍ନାନ୍ ହୁଆ ଆରୁ ଆସ୍କି ନାମେନୁ ବିନ୍ତି କାମିକିରି ନିଜର୍ ପାପ୍ବନ୍ ନଣା।’”
ଦୁସ୍ରା ଜାତିୟାର୍ଘି ମାଝାନୁ ପ୍ରଚାର୍ କାମାଗେ ପାଉଲୁସିନ୍ ମେଁହ୍ନା
17“ହୁଦ୍ଘିପାଛ୍ଲି ଏନ୍ ଯେରୁଶାଲେମ୍ଗେ କିର୍ରିବାରିକିରି ମନ୍ଦିର୍ନୁ ବିନ୍ତି କାମ୍ନା ବାକେନ୍ ବେହସ୍ ମାନିକିରି ଅଣ୍ଟା ଦର୍ଶନ୍ ହାକ୍କାନ୍। 18ଆସ୍ ଏଙ୍ଗାନ୍ ତେଙ୍ଗିୟାସ୍, ‘ଡେରି ଆମା କାମା, ଚାଁଣେନିନ୍ ଯେରୁଶାଲେମ୍ତି ଉର୍ଖାକାଲା; ଏନ୍ଦେର୍ଗେକା ଆବ୍ଡ଼ାର୍ ଏଙ୍ଘା ବାରେନୁ ନିଙ୍ଘାଏ ସାକ୍ଷୀବନ୍ ଗ୍ରହନ୍ ମା କାମ୍ନାଏ।’ 19ଆଙ୍ଗେନ୍ ଏନ୍ ତେଙ୍କାନ୍, ‘ହେ ପ୍ରାଭୁ ଏନ୍ତା ନିଙ୍ଘା ମିଆଁ ବିଶ୍ୱାସ୍ କାମୁରିନ୍ ସାଭା ଆଡ଼୍ପାନୁ ଧାରିକିରି ଜେହେଲ୍ନୁ ଗୁଡ଼ାଚାଲ୍କାନ୍ ଆରୁ ଡେମାଲ୍କାନ୍, ଇବନ୍ ଆବ୍ଡ଼ାର୍ ନିଜେ ଆହାନାଏ। 20ଆରୁହି ଯେତ୍କବାକେନ୍ ନିଙ୍ଘା ସାକ୍ଷୀ ସ୍ତିଫାନ୍ସ୍କି ହେଁସୁ ବାହାବା କାଲିୟା, ହତ୍କବାକେନ୍ ଏନ୍ହି ଚାହାନୁ ଇଲିକିରି ସମର୍ଥନ୍ କାମାଲ୍କାନ୍, ଆରୁ ନେଦ୍ ଆସିନ୍ ପିଟାଲିଆର୍ ଆବ୍ଡ଼ାର୍ଘି ଚିଢ଼ାବନ୍ ଜାଗାଲ୍କାନ୍।’ 21ଆଙ୍ଗେନ୍ ପ୍ରାଭୁସ୍ ଏଙ୍ଗାନ୍ ତେଙ୍ଗିୟାସ୍, ‘କାଲା: ଏନ୍ଦେର୍ଗେକା ଏନ୍ ନିଙ୍ଗାନ୍ ଗେଚ୍ଛା-ଗେଚ୍ଛା ଦୁସ୍ରା ଜାତିୟାର୍ଘି ମାଝାନୁ ତାଇୟନ୍’।”
22ଆଲାର୍ ଆକ୍କୁନ୍ତକ୍ ଆସ୍କି କାତ୍ଥାନ୍ ମେନାଲିୟାର୍, ଆନ୍ତିନ୍ ଯୋର୍ସେ ଚିର୍ରା ରାଇକିରି ତେଙ୍ଗିୟାର୍, “ଏନ୍ନେ ଆଲାସିନ୍ ଦୁନିଆଁନ୍ତି ଦୁର୍କାମା, ଏନ୍ଦେର୍ଗେକା ଆସ୍କେ ଉଜ୍ଜନାଦ୍ ଉଚିତ୍ ମାଲ୍ଲିଦ୍।” 23ଆରୁ ଯେତ୍କବାକେନ୍ ଆବ୍ଡ଼ାର୍ ଚିର୍ରା ରାଇକିରି ନିଜର୍-ନିଜର୍ ଚିଢ଼ାନ୍ ଖେବ୍ଡ଼ାଲିୟାର୍ ଆରୁ ଆକାଶ୍ତାରା ଧୁଲିନ୍ ଖେବ୍ଡ଼ାଲିୟାର୍; 24ହତ୍କବାକେନ୍ ସିପାହୀର୍ଘି ମୁଖ୍ୟାସ୍ ଆସିନ୍ ମହଲ୍ ଉଲା ହୁଆଗେ ହୁକୁମ୍ ଚିଚ୍ଚାସ୍, ଆରୁ ଆଲାର୍ ଏନ୍ଦେର୍ଗେ ଆସ୍କି ବିରୁଦ୍ଧନୁ ଏନ୍ନେ ଚିର୍ରା ରାଲ୍ନାଏ, ଇବନ୍ ଆହାଗେନିନ୍ କୋଡ୍ରାତି ଡେମା-ଡେମାକିରି ଆସିନ୍ ମେନାମେନି କାମା। 25ଆବ୍ଡ଼ାର୍ ଆସିନ୍ କୋଡ୍ରାତି ଡେମାଗେ ହିଁୟାଲିୟାର୍ ତା ପାଉଲୁସ୍ ତାଙ୍ଘା ଚାହାନୁ ଇଜ୍ଜକା ସିପାହୀର୍ଘି ମୁଖ୍ୟାସ୍ସିନ୍ ତେଙ୍ଗିୟାସ୍, “ଅଣ୍ଟା ରୋମୀ ପାର୍ଜାସ୍କି ବିଚାର୍ ମା କାମିକିରି ଆସିନ୍ କୋଡ୍ରାତି ଡେମ୍ନାଦ୍ ନିମାଗେ ଠିକ୍ଦ୍ କାଁଏ?” 26ଆ ସିପାହୀସ୍ ଇବନ୍ ମେନିକିରି ସିପାହୀର୍ଘି ମୁଖ୍ୟାସାନ୍ କାଇକିରି ଆସିନ୍ ଇ କାତ୍ଥାନ୍ ତେଙ୍ଗିୟାସ୍, “ନିନ୍ ଏନ୍ଦେର୍ କାମାଗେ କାଲ୍ଦାଏ? ଇ ଆଲାସ୍ତା ଅଣ୍ଟା ରୋମୀସ୍।” 27ଆଙ୍ଗେନ୍ ସିପାହୀଜାମାର୍ଘି ମୁଖ୍ୟାସ୍ ବାରିକିରି ଆସିନ୍ ତେଙ୍ଗିୟାସ୍, “ଏଙ୍ଗାନ୍ ତେଙ୍ଗା ନିନ୍ ଅଣ୍ଟା ରୋମୀୟ କାଁଏ?” ଆସ୍ ତେଙ୍ଗିୟାସ୍, “ହଁ”। 28ଆଙ୍ଗେନ୍ ସିପାହୀର୍ଘି ମୁଖ୍ୟାସ୍ ଉତ୍ତର୍ ଚିଚ୍ଚାସ୍, “ବାଗ୍ଗେ ପାଏସା ଚିଇକିରି ଏନ୍ ଇ ରୋମୀ ପଦ୍ ହାକ୍କାଦାନ୍।” ପାଉଲୁସ୍ ତେଙ୍ଗିୟାସ୍, “ଲେକିନ୍ ଏନ୍ତା ଜନମ୍ତି ରୋମୀନ୍।” 29ଆଙ୍ଗେନ୍ ନେଦ୍ ଆସିନ୍ ମେନାମେନି କାମାଗେ ରାଚାର୍, ଆବ୍ଡ଼ାର୍ ଚାଁଣେନିନ୍ ଆସ୍ତି ହାଟ୍ରାର୍ କେରାର୍; ଆରୁ ସିପାହୀର୍ଘି ମୁଖ୍ୟାସ୍ହି ଆସ୍ ଅଣ୍ଟା ରୋମୀସ୍ ଇବନ୍ ଆହିକିରି ଆରୁ ଏନ୍ ଆସିନ୍ ହିଁଚ୍କାଦାନ୍ ବୁଲି ଏଲ୍ଚିୟାସ୍ କେରାସ୍।
ମାହା ସାଭାଘି ଆଘ୍ଲି ପାଉଲୁସ୍
30ଲେକିନ୍ ନାନ୍ନୁ ଉଲ୍ଲା ଆ ସିପାହୀର୍ଘି ମୁଖ୍ୟାସ୍ ଠିକ୍ଠିକ୍ ଆହାଗେ ବେଦ୍ଦାଲିୟାସ୍ କା ୟାହୁଦୀର୍ ଆସ୍କି ମିଆଁ ଏନ୍ଦେର୍ଗେ ଦୋଷ୍ ଲାଗାବାଚ୍କାନାଏ, ହୁଦଘିଲାଗାନ୍ ଆସ୍ ଆସ୍କି ବନ୍ଧନ୍ବନ୍ ଖୋଲ୍ଚେଇଚାସ୍; ଆରୁ ମୁଖ୍ୟା ପୁରୋହିତ୍ ଆରୁ ଜାମା ମାହା ସାଭାନ୍ତାରିନ୍ ଠୁଡ଼ିୟାରାଗେ ହୁକୁମ୍ ଚିଚ୍ଚାସ୍, ଆରୁ ପାଉଲୁସ୍ସିନ୍ ବାହ୍ରି ଅନ୍ଦ୍ରିକିରି ଆବ୍ଡ଼ାର୍ଘି ମାଝାନୁ ଇଲ୍ତାଚାସ୍।
23ମାହାସାଭାଘି ଆଘ୍ଲି ପାଉଲୁସ୍
1ପାଉଲୁସ୍ ମାହାସାଭା ତାରା ଏକ୍ ନଜର୍ ଏରିକିରି ତେଙ୍ଗିୟାସ୍, “ହେ ଭାଇ ଜାମାରୋ, ଏନ୍ ଇନ୍ନାତକ୍ ପୁରାପୁରୀ ନରମ୍ ମନ୍ତି ପାର୍ମେଶ୍ୱାର୍ସ୍କି ଲାଗାନ୍ ଜୀବନ୍ ବିତାବାଚ୍କାଦାନ୍।” 2ଆଙ୍ଗେନ୍ ପାଉଲୁସ୍କି ଚାହାନୁ ଇଜ୍ଜକା ଆଲାରିନ୍ ଆସ୍କି ଗାଲ୍ଲେନ୍ ଥାପ୍ଡ଼ାଗେ ମାହାପୁରୋହିତ୍ ହାନ୍ନାନିୟାସ୍ ହୁକୁମ୍ ଚିଚ୍ଚାସ୍। 3ଆଙ୍ଗେନ୍ ପାଉଲୁସ୍ ଆସିନ୍ ତେଙ୍ଗିୟାସ୍, “ହେ ଚୁନ୍ନେତି ପୋତ୍କା କାଥି, ପାର୍ମେଶ୍ୱାର୍ସ୍ ନିଙ୍ଗାନ୍ ଡେମସ୍। ନିନ୍ ନିୟମ୍ ଅନୁସାର୍ ଏଙ୍ଘା ନ୍ୟାୟ କାମାଗେ ଅକ୍କାଦାଏ, ଲେକିନ୍ ଏଙ୍ଗାନ୍ ଡେମାଗେ ହୁକୁମ୍ ଚିଇକିରି ନିନ୍ ନିଜେ ନିୟମ୍ବନ୍ ତଡ଼ାଲ୍ଦାଏ।” 4ଆଙ୍ଗେନ୍ ପାଉଲୁସ୍କି ଚାହାନୁ ଇଜ୍ଜକା ଆଲାର୍ ତେଙ୍ଗିୟାର୍, “ନିନ୍ ପାର୍ମେଶ୍ୱାର୍ସ୍କି ମାହା ପୁରୋହିତ୍ସିନ୍ ଅପ୍ମାନ୍ କାମାଲ୍ଦାଏ କାଁଏ?” 5ପାଉଲୁସ୍ ଉତ୍ତର୍ ଚିଚ୍ଚାସ୍, “ହେ ଭାଇ ଜାମାରୋ, ଇସ୍ ମାହାପୁରୋହିତ୍ସ୍ ବୁଲି ଏନ୍ ବାଲ୍କାଚ୍କାନ୍; ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ: ‘ନିମ୍ ନିଜର୍ ଆଲାର୍ଘି ମୁଖ୍ୟାର୍ଘି ନିନ୍ଦା ଆମା କାମା’।”
6ଆନ୍ତିନ୍ ପାଉଲୁସ୍ ଇବନ୍ ଆହିକିରିକା ଅଣ୍ଟା ଦଲ୍ ସାଦ୍ଦୂକୀ ଜାମାର୍ଘି ଆରୁ ଦୁସ୍ରା ଦଲ୍ ଫାରିସୀ ଜାମାର୍ଘିତା ଆସ୍ ସାଭାନୁ ଚିର୍ରା ରାଇକିରି ତେଙ୍ଗିୟାସ୍, “ହେ ଭାଇ ଜାମାରୋ, ଏନ୍ ଫାରିସୀନ୍ ଆରୁ ଅଣ୍ଟା ଫାରିସୀସ୍କି ହାଦ୍ଦୁନ୍। କେଚ୍ଚକା ଆଲାର୍ଘି ଉଜ୍ଜନାଘି ଆଶ୍ରା ବାରେନୁ ଏଙ୍ଘା ବିଚାର୍ ମାନାଲିଦ୍।” 7ଆସ୍ ଏନ୍ନେ ତେଙ୍ଗିୟାସ୍ ବାକେନ୍ ଫାରିସୀ ଆରୁ ସାଦ୍ଦୂକୀ ଜାମାର୍ଘି ଭିତ୍ରେ ଝାଗ୍ଡ଼ା ମାନ୍ଚାକେରା। ଆରୁ ସାଭାଦ୍ ଦୁଇ ଭାଗ୍ ମାନ୍ଚାକେରା। 8ଏନ୍ଦେର୍ଗେକା ସାଦ୍ଦୂକୀଜାମାର୍ ତେଙ୍ଗିୟାର୍ କା ଖିଉର୍ଘି ଜୀଉଠ୍ର୍ନା ମାଲ୍ଲାଦିନ୍, ସରଗ୍ଦୂଁତ୍ ଆରୁ ଆତ୍ମାଦ୍ହି ମାଲ୍ଲାଦିନ୍; ଲେକିନ୍ ଫାରିସୀଜାମାର୍ ଇବ୍ଡ଼ା ଜାମାନ୍ ବିଶ୍ୱାସ୍ କାମ୍ନାଏ। 9ଆଙ୍ଗେନ୍ ମୁରୁକ୍ ଗଣ୍ଡଗଲ୍ ମାନ୍ଚା ଆରୁ ଫାରିସୀ ଜାମାର୍ଘି ଦଲ୍ତା କେତ୍କ ଲୋକ୍ ପଣ୍ତିତ୍ଜାମାର୍ ଇଜ୍ଜାର୍ ଆରୁ କାଁଟ୍ଛାଁଟ୍ କାମିକିରି ତେଙ୍ଗିୟାର୍, “ଇ ଆଲାସ୍ସାନ୍ ଏମ୍ ଏନ୍ଦେର୍ହି ଦୋଷ୍ ମାଲ୍ଲା ହାଖ୍ଖୁମ୍, ଏନ୍ନେ ମାନା ଅଙ୍ଗିକା ଆତ୍ମାଦ୍ ମାଲ୍ଲାହାଲେ ସରଗ୍ଦୂଁତ୍ ତାଙ୍ଘାଗାନେ କାଚ୍ନେଖ୍କିରୋ।” 10ଯେତ୍କବାକେନ୍ ମୁରୁକ୍ ଝାଗ୍ଡ଼ା ମାନ୍ଚାତା ପାଉଲୁସ୍ସିନ୍ ଟୁକ୍ଡ଼ା-ଟୁକ୍ଡ଼ା କାମର୍ଚର୍ ବୁଲି ସିପାହୀଜାମାର୍ଘି ମୁଖ୍ୟାସ୍ ଏଲ୍ଚିୟାସ୍ କେରାସ୍। ହୁଦ୍ଘିଲାଗାନ୍ ଆସ୍ ଆବ୍ଡ଼ାର୍ଘି ଚାହାନ୍ତି ପାଉଲୁସ୍ସିନ୍ ଛୋଡ଼ାବାଇକିରି ଅନ୍ଦ୍ରାଗେ ଆରୁ ମହଲ୍ ଉଲା ହୁଆଗେ ସିପାହୀ ଜାମାରିନ୍ ହୁକୁମ୍ ଚିଚ୍ଚାସ୍।
11ହୁ ମାଁହା ପ୍ରାଭୁସ୍ ପାଉଲୁସ୍କି ଚାହାନୁ ଇଲିକିରି ତେଙ୍ଗିୟାସ୍, “ହେ ପାଉଲୁସ୍ ଧିରାଜ୍ ଧାରା, ଏନ୍ଦେର୍ଗେକା ଯେରୁଶାଲେମ୍ନୁ ଏସ୍କେ ନିନ୍ ଏଙ୍ଘା ବାରେନୁ ସାକ୍ଷୀ ଚିଚ୍ଚକାଏ, ହନ୍ନେ ରୋମ୍ନୁହି ଏଙ୍ଘା ବାରେନୁ ନିଙ୍ଗାଗେ ସାକ୍ଷୀ ଚିଆ ଖାତ୍ରୋ।”
ପାଉଲୁସ୍ସିନ୍ ପିଟାଗେ ଯୋଜ୍ନା କାମାଲ୍ନାଏ
12ଆଦ୍ଘି ନାନ୍ନୁ ଉଲା ୟାହୁଦୀଜାମାର୍ ଅଣ୍ଟା ଯୋଜ୍ନା କାମ୍ଚାର୍ ଆରୁ ପାଉଲୁସ୍ସିନ୍ ମା ପିଟ୍ଟନାତକ୍ ଏନ୍ଦେର୍ହି ମା ଅନ୍ଦାମ୍ ମହ୍ଁଦାମ୍ ବୁଲି ପ୍ରତିଜ୍ଞା କାମ୍ଚାର୍। 13ଏନ୍ନେ ଯୋଜ୍ନା କାମୁ ଆଲାର୍ ଚାଲିଶ୍ ଲୋକ୍ତି ବାଗ୍ଗେ ରାଚାର୍। 14ଆବ୍ଡ଼ାର୍ ମୁଖ୍ୟା ପୁରୋହିତ୍ ଆରୁ ପୁର୍ଖାର୍ସାନ୍ କେରାର୍ ଆରୁ ତେଙ୍ଗିୟାର୍, “ଏମ୍ ପାଉଲୁସ୍ସିନ୍ ମା ପିଟ୍ଟନା ଜୁଟି ଏନ୍ଦ୍ରିନ୍ ମକ୍କୁନ୍ ଅଭିଶାପ୍ ମାନ ବୁଲି ଏହ୍ମା ଭିତ୍ରେ ପ୍ରତିଜ୍ଞା କାମ୍ଚ୍କାଦାମ୍। 15ହୁଦ୍ଘିଲାଗାନ୍ ଆକ୍କୁନ୍ ପାଉଲୁସ୍କି ବାରେନୁ ଆରୁହି ବାନେକିରି ଯାଞ୍ଚ କାମମ୍ବୁଲି ବାହାନା କାମିକିରି ନିମ୍ ଆରୁ ମାହାସାଭାନ୍ତା ଜାମାର୍ ଆସିନ୍ ନିହ୍ମା ଚାହାଗେ ଅନ୍ଦ୍ରାଗେ ସିପାହୀଜାମାର୍ଘି ମୁଖ୍ୟାସ୍ସିନ୍ ଆର୍ଜୀ କାମା। ଆସ୍କି ଇସାନ୍ ଆଣ୍ସ୍ନାଘି ଆଘ୍ଲି ଏମ୍ ଆସିନ୍ ପିଟାଗେ ତିଆର୍ ରୋମ୍।”
16ଲେକିନ୍ ପାଉଲୁସ୍କି ଭାଣ୍ଜାସ୍ ମେନ୍ଚାସ୍ କା ପାଉଲୁସ୍ସିନ୍ ପିଟାଗେ ବେଦ୍ଦାଲ୍ନାଏ, ତା ଆସ୍ ଗାଢ଼ଗେ23:16 ଗାଢ଼ଘି ମତ୍ଲବ୍ (ସିପାହୀଜାମାର୍ଘି ଆଡ଼୍ପା) କେରାସ୍ ଆରୁ ପାଉଲୁସ୍ସିନ୍ ଇ କାତ୍ଥାନ୍ ବାତାବାଚାସ୍। 17ଆଙ୍ଗେନ୍ ପାଉଲୁସ୍ ଅଣ୍ଟା ଶହେ ସିପାହୀର୍ଘି ମୁଖ୍ୟାସ୍ସିନ୍ ମେଁହିକିରି ତେଙ୍ଗିୟାସ୍, “ଇ ଯୁୱାନ୍ କୁକ୍କସିନ୍ ଏକ୍ ହାଜାର୍ ସିପାହୀଜାମାର୍ଘି ମୁଖ୍ୟାସ୍ଘି ଚାହାଗେ ହୁଆ ଇସ୍ ଆସିନ୍ ଏନ୍ଦ୍ରିନ୍ ତେଙ୍ଗା ବେଦ୍ଦାଲ୍ଦାସ୍।” 18ଆଙ୍ଗେନ୍ ଆ ସିପାହୀସ୍ ଆ କୁକ୍କସିନ୍ ସିପାହୀଜାମାର୍ଘି ମୁଖ୍ୟାସ୍କି ଚାହାଗେ ଅଚ୍ଚାସ୍ ତେଙ୍ଗିୟାସ୍, “ବନ୍ଦୀ ପାଉଲୁସ୍ ଏଙ୍ଗାନ୍ ମେଁହିକିରି ଇ କୁକ୍କସିନ୍ ନିହ୍ମା ଚାହାଗେ ଅନ୍ଦ୍ରାଗେ ତେଙ୍ଗିୟାସ୍, ଏନ୍ଦେର୍ଗେକା ଇସ୍ ନିମାନ୍ ଏନ୍ଦ୍ରିନ୍ ତେଙ୍ଗା ବେଦ୍ଦାଲ୍ଦାସ୍”। 19ସିପାହୀଜାମାର୍ଘି ମୁଖ୍ୟାସ୍ ଆ କୁକ୍କସ୍କି ହେଖ୍ଖା ଧାରିକିରି ଆସିନ୍ ଭିନେ ତାରା ହୋଇକିରି ମେନ୍ଚାସ୍, “ନିନ୍ ଏଙ୍ଗାନ୍ ଏନ୍ଦେର୍ ତେଙ୍ଗା ବେଦ୍ଦାଲ୍ଦାଏ?” 20ଆସ୍ ତେଙ୍ଗିୟାସ୍, “ପାଉଲୁସ୍କି ବାରେନୁ ଆରୁହି ବାନେକିରି ବିଚାର୍ କାମ୍ନା ବାହ୍ନାତି ୟାହୁଦୀଜାମାର୍ ଆସିନ୍ ମାହା ସାଭାଗେ ହୁଆଗେ ନିମାନ୍ ଆର୍ଜୀ କାମାଗେ ଏକ୍ମତ୍ ମାନ୍ଚ୍କାନାଏ। 21ଲେକିନ୍ ନିମ୍ ଆବ୍ଡ଼ାର୍ଘି କାତ୍ଥାନୁ ବିଲ୍କୁଲ୍ ରାଜୀ ଆମ୍କେମାନା ଏନ୍ଦେର୍ଗେକା ଚାଲିଶ୍ତି ବାଗ୍ଗେ ଲୋକ୍ ଆଲାର୍ ଆସିନ୍ ପିଟାଗେ ଜୋହାଲ୍ନାଏ। ଆସିନ୍ ମା ପିଟ୍ଟନାତକ୍ ଏନ୍ଦେର୍ହି ମା ଅନ୍ଦାମ୍ ମହ୍ଁଦାମ୍ ବୁଲି ଆବ୍ଡ଼ାର୍ ପ୍ରତିଜ୍ଞା କାମ୍ଚକାନାଏ। ଆବ୍ଡ଼ାର୍ ଆକ୍କୁନ୍ନିନ୍ ତିଆର୍ ରାନାଏ ଆରୁ ଆବ୍ଡ଼ାର୍ ଖାଲି ନିହ୍ମା ଅନୁମତିବନ୍ ହଖାଲ୍ନାଏ।” 22ଆଙ୍ଗେନ୍ ସିପାହୀଜାମାର୍ଘି ମୁଖ୍ୟାସ୍ କୁକ୍କସିନ୍ ଏନ୍ନେ ଆଦେଶ୍ ଚିଇକିରି ବିଦା କାମ୍ଚାସ୍, “ନେକାନ୍ହି ଆମ୍କେ ତେଙ୍ଗା କା ନିନ୍ ଇ କାତ୍ଥାନ୍ ଏଙ୍ଗାନ୍ ତେଙ୍କାଦାଏ।”
ପାଉଲୁସ୍ସିନ୍ ଫେଲିକ୍ସ୍କି ଚାହାଗେ ତାଇୟାଲ୍ନାଏ
23ଇଦ୍ଘି ପାଛ୍ଲି ସିପାହୀଜାମାର୍ଘି ମୁଖ୍ୟାସ୍ ତାଙ୍ଘାଏ ଦୁଇ ଲୋକ୍ ସିପାହୀରିନ୍ ମେଁହିକିରି ଏନ୍ନେ ହୁକୁମ୍ ଚିଚ୍ଚାସ୍, “ଇନ୍ନା ମାଁହା ନଅ ବାଜେ ଦୁଇ ଶହ୍ ସିପାହୀ, ସତୁର୍ ଲୋକ୍ ଘୋଣ ସାବାରି ଆରୁ ଦୁଇ ଶହ୍ ବାର୍ଚ୍ଛା ଧାରୁରିନ୍ ହୋଇକିରି କାଇସିରିଆଗେ କାଲାଗେ ତିଆର୍ କାମା। 24ଆରୁ ପାଉଲୁସ୍କି କାନାଘି ଲାଗାନ୍ ଘୋଣ ତିଆର୍ ଉଇୟା, ଏସ୍କେ କା ପାଉଲୁସ୍ ବାନେକିରି ଫେଲୀକ୍ସ୍ ରାଜ୍ପାଲ୍ସ୍କି ଚାହାଗେ ଆଣସା ଅଙ୍ଗସ୍।” 25ଆସ୍ ଏନ୍ନେ ଚିଠିହି ଲେଖ୍ଚାସ୍:
26“ମାହାମହିମ୍ ରାଜ୍ପାଲ୍ ଫେଲୀକ୍ସିନ୍ କ୍ଲାଉଦିଆ ଲୂସିୟାସ୍କି ଯୋହାର୍। 27ଇ ଆଲାସିନ୍ ୟାହୁଦୀଜାମାର୍ ଧାରିକିରି ପିଟା ବେଦ୍ଦାଲିୟାର୍, ଲେକିନ୍ ଯେତ୍କବାକେନ୍ ଏନ୍ ଆକ୍କାନ୍ କା ଆସ୍ ଅଣ୍ଟା ରୋମୀସ୍, ତା ଏନ୍ ଏଙ୍ଘା ସିପାହୀ ଜାମାରିନ୍ ହୋଇକିରି ଛୋଡ଼ାବାଇକିରି ଅନ୍ଦର୍କାନ୍। 28ଏନ୍ ଆହା ବେଦ୍ଦାଲ୍କାନ୍ କା ଆବ୍ଡ଼ାର୍ ଆସ୍କି ମିଆଁ ଏନ୍ଦେର୍ ଦୋଷ୍ ଲାଗାବା ବେଦ୍ଦାଲ୍ନାଏ, ହୁଦ୍ଘିଲାଗାନ୍ ଆସିନ୍ ଆବ୍ଡ଼ାର୍ଘି ମାହା ସାଭାଗେ ଅଚ୍ଚକାନ୍। 29ଆଙ୍ଗେନ୍ ଏନ୍ ଆକ୍କାନ୍ କା ଆବ୍ଡ଼ାର୍ ତାହ୍ମା ନିୟମ୍ଘି ଝାଗ୍ଡ଼ାଘି ବାରେନୁ ଆସ୍କି ମିଆଁ ଦୋଷ୍ ଲାଗାବାଲ୍ନାଏ, ଲେକିନ୍ ପିଟ୍ଟନାଘି ଆରୁ ବନ୍ଦୀ କାମ୍ନାଘି ଏନ୍ଦେର୍ହି ଦୋଷ୍ ଆସ୍କି ମାଲ୍ଲାଦିନ୍। 30ଇ ଆଲାସ୍କି ବିରୁଦ୍ଧନୁ ଅଣ୍ଟା ଷଡ଼ଯନ୍ତ୍ର କାମ୍ନାଘି ଖବର୍ ହାଖ୍ଖୀକିରି ଏନ୍ ହୁଙ୍ଗେନିନ୍ ଆସିନ୍ ନିହ୍ମା ଚାହାଗେ ତାଇୟାଲ୍ଦାନ୍। ଆରୁହି ତାଙ୍ଘା ବିରୋଧିରିନ୍ ନିହ୍ମା ଆଘ୍ଲି ସାକ୍ଷୀ ଚିୟାଗେ ହୁକୁମ୍ ଚିଚ୍କାଦାନ୍।”
31ହୁଦ୍ଘିଲାଗାନ୍ ସିପାହୀଜାମାର୍ ଏସ୍କେ ହୁକୁମ୍ ହାକ୍କାଚାର୍, ଆନ୍ନେନ୍ ପାଉଲୁସ୍ସିନ୍ ମାଁହା-ମାଁହା ଆନ୍ତିପାତ୍ରିସ୍ତକ୍ ଅଚ୍ଚାର୍। 32ନାନ୍ନୁ ଉଲ୍ଲା ସିପାହୀଜାମାର୍ ଘୋଣ ଆର୍ଗୁରୀନ୍ ପାଉଲୁସ୍ଗାନେ କାଲାଗେ ଚିଇକିରି ତାମ୍ ଗାଢ଼ଗେ କିର୍ରିୟାର୍ କେରାର୍। 33ଘୋଣ ଆର୍ଗୁର୍ କାଇସିରିଆ ଆଣସିକିରି ରାଜ୍ପାଲ୍ସ୍ଗେ ଚିଠି ଚିଚ୍ଚାର୍; ଆରୁ ପାଉଲୁସ୍ସିନ୍ହି ରାଜାସ୍ଗେ ସୋଁପ୍ଚେଇଚାର୍। 34ଆସ୍ ଚିଠି ପାଢ଼ିକିରି ମେନ୍ଚାସ୍, “ଇସ୍ ଏକା ରାଜୀନ୍ତା ଆଲାସ୍?” 35ଯେତ୍କବାକେନ୍ ଆସ୍ ଆଖ୍ଖାସ୍ କା ପାଉଲୁସ୍ କିଲିକିଆନ୍ତା ଆଲାସ୍ ବୁଲିତା ଆସ୍ ପାଉଲୁସ୍ସିନ୍ ତେଙ୍ଗିୟାସ୍, “ଯେତ୍କବାକେନ୍ ନିଙ୍ଘା ମିଆଁ ଦୋଷ୍ ଲାଗାବୁ ଆଲାର୍ ଇସାନ୍ ବାରର୍ ତା ଏନ୍ ନିଙ୍ଘା କାତ୍ଥା ମେନନ୍।” ଆରୁ ରାଜ୍ପାଲ୍ସ୍ ପାଉଲୁସିନ୍ ହେରୋଦ୍ସ୍କି ମହଲ୍ନୁ ପାହ୍ରା ଉଇୟାଗେ ଆଦେଶ୍ ଚିଚ୍ଚାସ୍।
24ଫେଲିକସ୍କି ଆଘ୍ଲି ପାଉଲୁସ୍କି ବିଚାର୍ କାମାଲ୍ନାଏ
1ପାଞ୍ଚ୍ ଦିନ୍ଘି ପାଛ୍ଲି ମାହାପୁରୋହିତ୍ ହାନ୍ନାନିୟାସ୍, କେତ୍କ ଲୋକ୍ ପୁର୍ଖାରିନ୍ ଆରୁ ତିର୍ତୁଲ୍ଲସ୍ ନାମେଘି ଅଣ୍ଟା ଓକିଲ୍ସିନ୍ ସାଙ୍ଗେନ୍ ଅନ୍ଦ୍ରିକିରି ବାର୍ଚାସ୍। ଆବ୍ଡ଼ାର୍ ରାଜ୍ପାଲ୍ସ୍କି ଚାହାନୁ ପାଉଲୁସ୍କି ନାଲିସ୍ କାମ୍ଚାର୍। 2ଯେତ୍କବାକେନ୍ ପାଉଲୁସିନ୍ ମେହାଁକେରା ତା ତିର୍ତୁଲ୍ଲସ୍ ଆସ୍କି ମିଆଁ ଦୋଷ୍ ଲାଗାବାଇକିରି ଫେଲିକ୍ସିନ୍ ତେଙ୍ଗାଗେ ଲାଗ୍ଗିୟାସ୍, “ହେ ମାହାମହିମ୍ ଫେଲିସକ୍ ନିହ୍ମା ଲାଗାନ୍ ଏମ୍ ବହୁତ୍ ଶାନ୍ତିନୁ ରାଦାମ୍; ଆରୁ ନିହ୍ମା ଭବିଷତ୍ଘି ଚିନ୍ତାଧାରା ଇ ଜାତିଘି ଲାଗାନ୍ ବହୁତ୍ ଭୁଲ୍ବଦ୍ ସୁଧ୍ରାରାତେ କାଲିଦ୍। 3ଇବନ୍ ନାମ୍ ଜାମା ଲେଖା ଜାମା ଜାଗାନୁ ପୁରାପୁରୀ ଧାନ୍ୟାବାଦ୍ଘି ସାଙ୍ଗେନ୍ ମାନ୍ତେ ବାରାଲ୍ଦାମ୍। 4ଲେକିନ୍ ଇଦ୍ଘିଲାଗାନ୍ କା ନିମାନ୍ ଆରୁ ଦୁଃଖୁ ଚିୟାଗେ ମା ଚାଁହ୍ଦାମ୍, ଏନ୍ ନିମାନ୍ ଆର୍ଜୀବିନ୍ତି କାମାଲ୍ଦାନ୍ କା କ୍ରିପା କାମିକିରି ଏହ୍ମାଏ ଅଣ୍ଟା ଯୋଡ଼େ କାତ୍ଥା ମେନା। 5ଏନ୍ଦେର୍ଗେକା ଏମ୍ ଇ ଆଲାସ୍ସିନ୍ ଅଶାନ୍ତି କାମ୍ନାବାଲାସ୍ ଆରୁ ଦୁନିଆଁନ୍ତା ଜାମା ୟାହୁଦୀ ଜାମାର୍ଘି ମାଝାନୁ ଗଣ୍ଡଗଲ୍ କାମ୍ନାବାଲା ଆରୁ ନାଜ୍ରେତ୍ ଦଲ୍ଘି ଆଗୁୱାସ୍ ବୁଲି ଆହ୍ଦାମ୍। 6ଇସ୍ ମନ୍ଦିର୍ବନ୍ ଅଶୁଦ୍ଧ୍ କାମାଗେ ବେଦ୍ଦାଲିୟାସ୍, ଲେକିନ୍ ଏମ୍ ଇସିନ୍ ଧାର୍ଚ୍କାମ୍। (ଆରୁ ଏମ୍ ଇସ୍କି ନିଜର୍ ନିୟମ୍ଘି ଅନୁସାର୍ ନ୍ୟାୟ କାମ୍ଚ୍କା ରମ୍ନେ। 7ଲେକିନ୍ ସିପାହୀର୍ଘି ମୁଖ୍ୟା ଲୁସିୟାସ୍ ଆସିନ୍ ଯବର୍ଜସ୍ତି ଏହ୍ମା ହେଖ୍ଖାନ୍ତି ଲୁଟ୍ଟାସ୍ ଅଚ୍ଚାସ୍ କେରାସ୍। 8ଆରୁ ଇସ୍କି ମିଆଁ ଦୋଷ୍ ଲାଗାବୁ ଆଲାରିନ୍ ନିହ୍ମା ଚାହାନୁ ଅନ୍ଦ୍ରାଗେ ହୁକୁମ୍ ଚିଚ୍ଚାସ୍) ଏମ୍ ଇସ୍କି ମିଆଁ ଏକା ଦୋଷ୍ ଲାଗାବାଚ୍କାଦାମ୍ ଆବ୍ଡ଼ା ଜାମା କାତ୍ଥାଘି ବାରେନୁ, ନିମ୍ ନିଜେ ଇସିନ୍ ମେନା-ମେନି କାମିକିରି ଆହାଅଙ୍ଗର୍।” 9ୟାହୁଦୀଜାମାର୍ ଇ ଆପତ୍ତିନୁ ଆସ୍କି ସାଥ୍ ଚିଇକିରି ତେଙ୍ଗିୟାର୍, ଇ କାତ୍ଥାଦ୍ ସତ୍ତୁଦ୍।
ପାଉଲୁସ୍କି ଉପ୍ଦେଶ୍
10ଯେତ୍କବାକେନ୍ ରାଜ୍ପାଲ୍ସ୍ ପାଉଲୁସ୍ସିନ୍ ତେଙ୍ଗାଗେ ଠାରିଆଚାସ୍, ତା ଆସ୍ ଉତ୍ତର୍ ଚିଚ୍ଚାସ୍: “ନିମ୍ ବହୁତ୍ ବଛର୍ତି ଜାତିଘି ନ୍ୟାୟ କାମାଲ୍ଦାର୍, ଇବନ୍ ଆହିକିରି ଏନ୍ ଖୁସୀତି ନିଜର୍ ଉତ୍ତର୍ ଚିଆଲ୍ଦାନ୍। 11ନିମ୍ ନିଜେ ଆକ୍କୁନ୍ ଆହାଅଙ୍ଗର୍ କା ଯେତ୍କବାକେନ୍ତି ଏନ୍ ଯେରୁଶାଲେମ୍ନୁ ଆରାଧାନା କାମାଗେ ବାର୍ଚ୍କାଦାନ୍, ଏଙ୍ଗା ବାର ଦିନ୍ତି ବାଗ୍ଗେ ମାଲ୍ଲା ମାନୁଦ୍। 12ଆବ୍ଡ଼ାର୍ ନା ତା ମନ୍ଦିର୍ନୁ ଏଙ୍ଗାନ୍ ନେଖାଗାନେହି ଝାଗ୍ଡ଼ା କାମ୍ନାନ୍ ଏରିୟାର୍ ଆରୁ ନା ସାଭା ଆଡ଼୍ପାନୁ ଆରୁ ନା ସହର୍ନୁ ଆଲାରିନ୍ ଚାଢ଼ାବାନାନ୍ ଏରିୟାର୍; 13ଆରୁ ଆକ୍କୁନ୍ ନିହ୍ମା ଆଘ୍ଲି ଏକା କାତ୍ଥାଘି ବାରେନୁ ଏଙ୍ଘା ମିଆଁ ଦୋଷ୍ ଲାଗାବାଲ୍ନାଏ, ଆବନ୍ ସତ୍ତୁ ବୁଲି ପ୍ରମାଣିତ୍ କାମା ପଲ୍ଲନାଏ। 14ଲେକିନ୍ ଏନ୍ ନିଙ୍ଘା ଚାହାନୁ ଇ କାତ୍ଥାନ୍ ମାନାଲ୍ଦାନ୍ କା ଏକା ଦଲ୍ବନ୍ ଆବ୍ଡ଼ାର୍ ଅଧର୍ମ ବାନାଏ, ଆ ଦଲ୍ଘି ଅନୁସାର୍ ଏନ୍ ଏଙ୍ଘା ପୁରଖାର୍ଘି ପାର୍ମେଶ୍ୱାର୍ସ୍କି ସେବା କାମ୍ଦାନ୍; ଆରୁ ଏକା କାତ୍ଥାଦ୍ ନିୟମ୍ ଅନୁସାର୍ ଆରୁ ନାବୀଜାମାର୍ଘି ବହିନୁ ଲେଖ୍ଚ୍କା ରାଇ, ଆ ଜାମାଘି ମିଆଁ ଏନ୍ ବିଶ୍ୱାସ୍ କାମ୍ଦାନ୍। 15ଆରୁ ଏନ୍ ପାର୍ମେଶ୍ୱାର୍ସ୍କି ମିଆଁ ଭାରୋସା ଉଇଦାନ୍ ଏସ୍କେ କା ଇବ୍ଡ଼ା ଆଲାର୍ହି ଉଇନାଏ, କା ଧର୍ମି ଆରୁ ଅଧର୍ମି ଦୁହି ଲୋକ୍ଘି ଉଜ୍ଜନା ମାନଦ୍। 16ହୁଦ୍ଘିଲାଗାନ୍ ଏନ୍ ପାର୍ମେଶ୍ୱାର୍ସ୍କି ଆରୁ ଆଲାର୍ଘି ଆଘ୍ଲି ଏଙ୍ଘା ବିବେକ୍ବନ୍ ନିର୍ଦ୍ଦୋଷ୍ ଉଇୟାଗେ କୋଶିଷ୍ କାମ୍ଦାନ୍। 17ବହୁତ୍ ବଛର୍ଘି ପାଛ୍ଲି ଏନ୍ ନିଜର୍ ଆଲାର୍ଘି ଲାଗାନ୍ ଦାନ୍ ଅନ୍ଦ୍ରିକିରି ଭେଁଟ୍ ଚାଢ଼ାବାଗେ ଯେରୁଶାଲେମ୍ ବାର୍ଚ୍କାଚ୍କାନ୍। 18ଯେତ୍କବାକେନ୍ ଏନ୍ ଏନ୍ନେ କାମାଲ୍କାନିନ୍ କା ଆବ୍ଡ଼ାର୍ ଏଙ୍ଗାନ୍ ମନ୍ଦିର୍ନୁ ଏରିୟାର୍, ଆରୁ ହତ୍କବାକେନ୍ ଏନ୍ ଶୁଦ୍ଧ୍ ରାଚ୍କାନ୍। ନା ତା ଆସାନ୍ ଭିଡ଼୍ ରାଚା ଆରୁ ନା ଏନ୍ଦେର୍ହି ଗଣ୍ଡଗଲ୍, ହଁ ଆସିଆନ୍ତା କେତ୍କ ଲୋକ୍ ୟାହୁଦୀର୍ ଆସାନ୍ ରାଚାର୍ ଆବ୍ଡ଼ାର୍ଗେ ଉଚିତ୍ ରାଚା, 19କା ଯଦି ଏଙ୍ଘା ବିରୋଧ୍ନୁ ଆବ୍ଡ଼ାର୍ଘି ଏନ୍ଦ୍ରିନ୍ହି କାତ୍ଥା ରଦ୍ନେ ତା ଇସାନ୍ ନିହ୍ମା ଚାହାନୁ ବାରିକିରି ଏଙ୍ଘା ମିଆଁ ଦୋଷ୍ ଲାଗାବର୍ନେ। 20ଚାହେ ଇବ୍ଡ଼ା ଆଲାର୍ ଏକାର୍ କା ଇସାନ୍ ରାନାଏ ଆବ୍ଡ଼ାର୍ ତେଙ୍ଗ୍ନାର୍ କା ଯେତ୍କବାକେନ୍ ଏନ୍ ମାହାସାଭାଘି ଆଘ୍ଲି ଇଜ୍ଜକାଚ୍କାନ୍ ତା ଇବ୍ଡ଼ାର୍ ଏଙ୍ଘାଏନୁ ଏନ୍ଦେର୍ ଦୋଷ୍ ହାଖ୍ଖୀୟାର୍? 21ଇ ଅଣ୍ଟା କାତ୍ଥାବନ୍ ଆମ୍ବିକିରି କା ଯେତ୍କବାକେନ୍ ଏନ୍ ଆବ୍ଡ଼ାର୍ଘି ମାଝାନୁ ଇଲିକିରି ଜୋର୍ସେ ଚିର୍ରା ରାଇକିରି ତେଙ୍କାଚ୍କାନ୍: ‘ଖିଉ ଆଲାର୍ଘି ଉଜ୍ଜନାଘି ବାରେନୁ ଇନ୍ନା ନିହ୍ମା ଆଘ୍ଲି ଏଙ୍ଘାଏ ବିଚାର୍ ମାନାଲିଦ୍’।”
22ଫେଲୀକ୍ସ୍ ଏକାସ୍ କା ଯୀଶୁ ଖ୍ରୀସ୍ତ୍କି ପାବୁଘି ବାରେ ବାନେକିରି ଆହାଲିୟାସ୍, ଆବ୍ଡ଼ାରିନ୍ ଏନ୍ନେ ତେଙ୍ଗିକିରି ମାନା କାମ୍ଚେଇଚାସ୍, “ଯେତ୍କବାକେନ୍ ସିପାହୀର୍ଘି ମୁଖ୍ୟାସ୍ ଲୂସିୟାସ୍ ବାରସ୍ ତା ଏନ୍ ନିହ୍ମା କାତ୍ଥାଘି ବିଚାର୍ କାମନ୍।” 23ଆରୁ ସିପାହୀଜାମାର୍ଘି ମୁଖ୍ୟାସିନ୍ ହୁକୁମ୍ ଚିଚ୍ଚାସ୍ କା ପାଉଲୁସିନ୍ ପାହ୍ରାନୁ ବନ୍ଦୀ କାମିକିରି ଉଇୟସ୍ ଆରୁ ତାଙ୍ଘା ପ୍ରତି ବାନେ ବେଭାର୍ କାମସ୍ ଆରୁ ତାଙ୍ଘା ସାଙ୍ଗେରିନ୍ ତାଙ୍ଘା ସେବା କାମ୍ନାତି ମା ରୋକର୍।
ଫେଲିକ୍ସ୍ ଆରୁ ଦ୍ରୂସିଲ୍ଲାଘି ଚାହାନୁ ପାଉଲୁସ୍
24କେତ୍କ ଉଲ୍ଲାଘି ପାଛ୍ଲି ଫେଲିକ୍ସ୍ ତାଙ୍ଘା ଆଲି ଦ୍ରୂସିଲ୍ଲା ଗାନେ ବାର୍ଚାସ୍। ଏକାଦ୍ କା ଅଣ୍ଟା ୟାହୁଦୀ ରାଚା। ଫେଲୀକ୍ସ୍ ପାଉଲୁସ୍ସିନ୍ ମେଁହ୍ତିକିରି ଆସ୍ତି ଯୀଶୁ ଖ୍ରୀସ୍ତ୍କି ବିଶ୍ୱାସ୍ଘି ବାରେନୁ ମେନ୍ଚାସ୍। 25ଲେକିନ୍ ଯେତ୍କବାକେନ୍ ପାଉଲୁସ୍ ଧାର୍ମିକ୍ତା ଆରୁ ନିଜ୍କେ କାବୁନୁ ଉଇନା ଆରୁ ବାର୍ନାବାଲା ନ୍ୟାୟଘି ଚାର୍ଚା କାମାଲିୟାସ୍ ତା ଫେଲୀକ୍ସ୍ ଏଲ୍ଚିୟାସ୍ କେରାସ୍ ଆରୁ ତେଙ୍ଗିୟାସ୍, “ଆକ୍କୁନ୍ ତା ନିନ୍ କାଲା; ସାମାୟ ଅଥ୍ରିକିରି ଏନ୍ ନିଙ୍ଗାନ୍ ଆରୁଅହନ୍ ମେଁହତନ୍।” 26ହୁ ସାମାୟନୁ ଫେଲିକସ୍କି ପାଉଲୁସ୍ତି ଥୋଡ଼େ ପାଏସା ହାଖ୍ଖନାଘି ଆଶ୍ରା ରାଚା, ହୁଦ୍ଘିଲାଗାନ୍ ଆସ୍ ପାଉଲୁସିନ୍ ଧିୟାନ୍-ଧିୟାନ୍ ମେଁହତିକିରି ଆସ୍ଗାନେ କାତ୍ଥାବାର୍ତ୍ତା କାମାଲିୟାସ୍। 27ଲେକିନ୍ ଯେତ୍କବାକେନ୍ ଦୁଇ ବଛର୍ ବିତ୍ରାକେରା ତା ପୁରକିୟୁସ୍ ଫେସ୍ତୁସ୍, ଫେଲିକ୍ସ୍କି ଆଡ୍ଡାନୁ ବାର୍ଚାସ୍; ଆରୁ ଫେଲୀକ୍ସ୍ ୟାହୁଦୀ ଜାମାରିନ୍ ଖୁସ୍ କାମ୍ନାଘି ଇଚ୍ଛାତି ପାଉଲୁସ୍ସିନ୍ ବନ୍ଦୀ ଆମ୍ବିକିରି ବୁଙ୍ଗେଇଚାସ୍।
25ପାଉଲୁସ୍ ରାଜ୍ପାଲ୍ସିନ୍ ଆରୁଅହନ୍ ଆର୍ଜୀ କାମାଲ୍ଦାସ୍
1ଫେସ୍ତୁସ୍ ଆ ଆଡ୍ଡାନୁ ଆଣସ୍କାଘି ତିନ୍ ଦିନ୍ଘି ପାଛ୍ଲି କାଇସିରିଆନ୍ତି ଯେରୁଶାଲେମ୍ଗେ କେରାସ୍। 2ଆସାନ୍ ମୁଖ୍ୟା ପୁରୋହିତ୍ଜାମାର୍ ଆରୁ ୟାହୁଦୀ ଜାମାର୍ଘି ମୁଖ୍ୟାର୍ ଫେସ୍ତୁସ୍ସାନ୍ ପାଉଲୁସ୍କି ବିରୁଦ୍ଧ୍ନୁ ନାଲିସ୍ କାମ୍ଚାର୍। 3ଆରୁ ଆବ୍ଡ଼ାର୍ ଫେସ୍ତୁସିନ୍ ଆର୍ଜୀବିନ୍ତି କାମିକିରି ତେଙ୍ଗିୟାର୍ କା ନିମ୍ ପାଉଲୁସିନ୍ ଯେରୁଶାଲେମ୍ଗେ ଅନ୍ଦ୍ରା, ଏମ୍ ଆସ୍କି ପାଖା ମାନମ୍ ଏନ୍ଦେର୍ଗେକା ଆବ୍ଡ଼ାର୍ ଆସିନ୍ ପାବୁନୁନିନ୍ ପିଟାଚାଗେ ସୋଚ୍କାଚାର୍। 4ଫେସ୍ତୁସ୍ ଉତ୍ତର୍ ଚିଚ୍ଚାସ୍, “ପାଉଲୁସ୍ କାଇସିରିଆନୁ ଜେହେଲ୍ନୁ ରାଦାସ୍ ଆରୁ ଏନ୍ ନିଜେ ଚାଁଣେ ଆସାନ୍ କାନାବାଲା ରାଦାନ୍।” 5ଆରୁ ଆସ୍ ଆରୁହି ତେଙ୍ଗିୟାସ୍, “ନିହ୍ମା ଭିତର୍ତି କେତ୍କ ଲୋକ୍ ମୁଖ୍ୟାର୍ ଏଙ୍ଘାଗାନେ କର୍, ଆରୁ ଯଦି ଆ ଆଲାସ୍ ଏନ୍ଦ୍ରିନ୍ ଭୁଲ୍ ନାଲ୍ଖୁ କାମ୍ଚ୍କାଦାସ୍ ତା ଆସ୍କି ମିଆଁ ଦୋଷ୍ ଲାଗାବର୍।”
6ଫେସ୍ତୁସ୍ ଆବ୍ଡ଼ାର୍ ଗାନେ ଆଠ୍ ଦଶ୍ଦିନ୍ ରାଇକିରି ଆସ୍ କାଇସିରିଆ ରାଜୀ ବୁଙ୍ଗିୟାସ୍ କେରାସ୍; ଆରୁ ନାନ୍ନୁ ଉଲ୍ଲା ନ୍ୟାୟଘି ରାଜ୍ଗାଦିନୁ ଅକ୍କିକିରି ପାଉଲୁସ୍ସିନ୍ ଅନ୍ଦ୍ରାଗେ ହୁକୁମ୍ ଚିଚ୍ଚାସ୍। 7ଯେତ୍କବାକେନ୍ ପାଉଲୁସ୍ ବାର୍ଚାସ୍ ତା ଏକା ୟାହୁଦୀଜାମାର୍ ଯେରୁଶାଲେମ୍ତି ବାର୍ଚ୍କାଚାର୍, ଆବ୍ଡ଼ାର୍ ଆସ୍କି ଚାର୍ହି ପାଖା ଇଜ୍ଜାର୍ ଆରୁ ଆସ୍କି ମିଆଁ ବହୁତ୍ ଶକତ୍ ଦୋଷ୍ ଲାଗାବାଚାର୍ ଲେକିନ୍ ଆବନ୍ ଆବ୍ଡ଼ାର୍ ପ୍ରମାଣ୍ କାମା ପଲ୍ଲିୟାରିନ୍। 8ଲେକିନ୍ ପାଉଲୁସ୍ ଉତ୍ତର୍ ଚିଚ୍ଚାସ୍, “ଏନ୍ ୟାହୁଦୀ ଜାମାର୍ଘି ନିୟମ୍ଘି ବିରୁଦ୍ଧନୁ ଏନ୍ଦେର୍ହି ଦୋଷ୍ ମାଲ୍ଲା କାମୁନ୍, ଆରୁ ନା ମନ୍ଦିର୍ଘି ବିରୁଦ୍ଧନୁ ଆରୁ ନା ତା କାଇସର୍କି ବିରୁଦ୍ଧନୁ ଏନ୍ଦ୍ରିନ୍ ଦୋଷ୍ କାମ୍ଚ୍କାଦାନ୍।” 9ଲେକିନ୍ ଫେସ୍ତୁସ୍ ୟାହୁଦୀ ଜାମାରିନ୍ ଖୁସ୍ କାମାଗେ ବେଦ୍ଦାଲିୟାସ୍, ହୁଦ୍ଘିଲାଗାନ୍ ପାଉଲୁସ୍ସିନ୍ ତେଙ୍ଗିୟାସ୍, “ତା ନିନ୍ କାଁଏ ଯେରୁଶାଲେମ୍ କାଲାଗେ ଚାହାଁଲ୍ଦାଏ; ତାକା ଆସାନ୍ ଏଙ୍ଘା ଆଘ୍ଲି ନିଙ୍ଘା ନ୍ୟାୟ କାମାକୋ।” 10ପାଉଲୁସ୍ ଉତ୍ତର୍ ଚିଚ୍ଚାସ୍, “ଏନ୍ କାଇସର୍କି କୋଟ୍ କାଚେରୀନୁ ଇଜ୍ଜକାଦାନ୍; ଏଙ୍ଘା ନ୍ୟାୟ ଇସାନିନ୍ ମାନ୍ନା କାତ୍ଥା। ଏସ୍କେ ନିନ୍ ବାନେକିରି ଆହ୍ଦାଏକା ୟାହୁଦୀ ଜାମାର୍ଘି ବିରୁଦ୍ଧନୁ ଏନ୍ ଏନ୍ଦେର୍ହି ଦୋଷ୍ ମାଲ୍ଲା କାମୁନ୍। 11ଯଦି ଏନ୍ ଦୋଷୀନ୍ ଆରୁ ଖିନାଘି ଲାଇଗ୍ ଏନ୍ଦ୍ରିନ୍ ନାଲ୍ଖୁ କାମ୍ଚ୍କାଦାନ୍ ତା, ଏନ୍ ଖିଆଗେ ମାନା ମାଲ୍ଲା କାମୁନ୍; ଲେକିନ୍ ଏଙ୍ଘା ବିରୁଦ୍ଧନୁ ଇବ୍ଡ଼ାର୍ ଏକା ଦୋଷ୍ ଲାଗାବାଲ୍ନାଏ ଆନ୍ନୁ ଯଦି ଏନ୍ଦେର୍ହି ସତ୍ତୁ ମାଲ୍ଲାଦିନ୍ ତା ନେଦ୍ହି ଏଙ୍ଗାନ୍ ଇବ୍ଡ଼ାର୍ଘି ହେଖ୍ଖାନୁ ସୋଁପା ପଲ୍ଲନାଏ। ଏନ୍ କାଇସର୍ସିନ୍ ଆର୍ଜୀ କାମାଲ୍ଦାନ୍।” 12ଆନ୍ତିନ୍ ଫେସ୍ତୁସ୍ ମନ୍ତ୍ରୀ ଜାମାର୍ଗାନେ ସାଲାହ୍ କାମିକିରି ଉତ୍ତର୍ ଚିଚ୍ଚାସ୍, “ନିନ୍ କାଇସର୍ସିନ୍ ଆର୍ଜୀ କାମ୍ଚ୍କାଏ, ହୁଦ୍ଘିଲାଗାନ୍ ନିନ୍ କାଇସର୍ସାନ୍ କଏ।”
ଆଗ୍ରିପ୍ପା ରାଜାସ୍କି ଆଘ୍ଲି ପାଉଲୁସ୍
13କେତ୍କ ଉଲ୍ଲାଘି ପାଛ୍ଲି ଆଗ୍ରିପ୍ପା ରାଜାସ୍ ଆରୁ ବର୍ନିକୀସ୍ କାଇସିରିଆନୁ ବାରିକିରି ଫେସ୍ତୁସ୍ସିନ୍ ଭେଁଟ୍ ମାନ୍ଚାର୍। 14ଆବ୍ଡ଼ାର୍ ଆସାନ୍ ବହୁତ୍ ଉଲ୍ଲା ରାଚ୍କାଘି ପାଛ୍ଲି ଫେସ୍ତୁସ୍ ପାଉଲୁସ୍କି ବାରେ ରାଜାସିନ୍ ତେଙ୍ଗିୟାସ୍, “ଇସାନ୍ ଅଣ୍ଟା ଆଲାସ୍ ରାଦାସ୍, ଏକାସିନ୍ କା ଫେଲୀକ୍ସ୍ ବନ୍ଦୀ ଆମ୍ବେଇ ଚିଚ୍କାଦାସ୍। 15ଯେତ୍କବାକେନ୍ ଏନ୍ ଯେରୁଶାଲେମ୍ନୁ ରାଚ୍କାନ୍, ତା ୟାହୁଦୀର୍ଘି ମୁଖ୍ୟା ପୁରୋହିତ୍ ଆରୁ ପୁର୍ଖାର୍ ଆସ୍କି ବାରେନୁ ଏଙ୍ଘାସାନ୍ ନାଲିସ୍ କାମ୍ଚାର୍ ଆରୁ ଚାହାଁଲିୟାର୍ କା ଆସ୍କେ ଦଣ୍ଡ୍ ଚିଆକୋ। 16ଲେକିନ୍ ଏନ୍ ଆବ୍ଡ଼ାରିନ୍ ଉତ୍ତର୍ ଚିଚ୍କାନ୍ କା ରୋମୀୟ ଜାମାର୍ଘି ଏନ୍ନେ ନିୟମ୍ ମାଲ୍ଲାଦିନ୍ କା ଏକିନ୍ ଆଲାସିନ୍, ଯେତ୍କତକ୍ ଦୋଷ୍ ଲାଗାବୁ ଆଲାର୍, ଆରୁ ଦୋଷୀସ୍ ଆମ୍ନେ ସାମ୍ନେ ମା ମାନର୍, ଆରୁ ଆସ୍କି ମିଆଁ ଲାଗାବାଚ୍କା ଦୋଷ୍ଘି ବିରୁଦ୍ଧନୁ ଉତ୍ତର୍ ଚିଆଗେ ମଉକା ମା ହାଖ୍ଖରିଦ୍, ହତ୍କତକ୍ ଆସିନ୍ ଦଣ୍ଡ୍ଘି ଲାଗାନ୍ ମା ସୋଁପ୍ନାଏ। 17ଆନ୍ତିନ୍ ଯେତ୍କବାକେନ୍ ଆବ୍ଡ଼ାର୍ ଏଙ୍ଘାଗାନେ ଇସାନ୍ ବାର୍ଚାର୍ ତା ଏନ୍ ଡେରି ମା କାମିକିରି, ନାନ୍ନୁ ଉଲ୍ଲା ନ୍ୟାୟ ଆସନ୍ନୁ ଅକ୍କିକିରି ଆ ଆଲାସିନ୍ ଅନ୍ଦ୍ରାଗେ ହୁକୁମ୍ ଚିଚ୍ଚକାନ୍। 18ଯେତ୍କବାକେନ୍ ଆସ୍କି ମିଆଁ ଦୋଷ୍ ଲାଗାବୁ ଆଲାର୍ ତେଙ୍ଗାଗେ ଇଜ୍ଜାର୍ ତା ଏନ୍ନେ ଏନ୍ଦେର୍ହି ଦୋଷ୍ ମାଲ୍ଲା ଲାଗାବୁର୍, ଏସ୍କେ କା ଏନ୍ ସୋଚାଲ୍କାନ୍। 19ଲେକିନ୍ ଆବ୍ଡ଼ାର୍ ନିଜର୍ ଧର୍ମଘି ବାରେ ଆରୁ ଯୀଶୁ ନାମେଘି ଅଣ୍ଟା ଆଲାସ୍କି ବାରେ ଏକାସ୍ କା କେଚ୍ଚାସ୍ କେର୍କାଦାସ୍, ଲେକିନ୍ ପାଉଲୁସ୍ ଆସିନ୍ ଉଜ୍ଜାଲ୍ଦାସ୍ ବୁଲି ତେଙ୍ଗାଲିୟାସ୍, ଇବ୍ଡ଼ା ବାରେନୁ ଆସିନ୍ ଇବ୍ଡ଼ାର୍ ଝାଗ୍ଡ଼ା କାମାଲିଆର୍। 20ଏନ୍ ବୁଝ୍ରା ପଲ୍ଲକାନ୍ କା ଇ କାତ୍ଥାନ୍ ଏସ୍କେ ପାତା ଲାଗାବନ୍? ହୁଦ୍ଘିଲାଗାନ୍ ଏନ୍ ଆସିନ୍ ମେନ୍ଚ୍କାନ୍, ‘ନିନ୍ ଯେରୁଶାଲେମ୍ଗେ କୟ କାଁଏ, ଆସାନ୍ ନିଙ୍ଘା ଇ କାତ୍ଥାଘି ଫାଏସ୍ଲା ମାନଦ୍?’ 21ଲେକିନ୍ ଯେତ୍କବାକେନ୍ ପାଉଲୁସ୍ ଆର୍ଜୀ କାମ୍ଚାସ୍ କା ଆସ୍କି ଦୋଷୀଦାର୍ଘି ଫାଏସ୍ଲା ରାଜାସ୍ସାନ୍ ମାନତା ଏନ୍ ହୁକୁମ୍ ଚିଚ୍କାଚ୍କାନ୍ କା ଯେତ୍କବାକେନ୍ତକ୍ ଆସିନ୍ କାଇସର୍ସାନ୍ ମା ତାଇୟନ୍ ହତ୍କତକ୍ ଆସିନ୍ ଜେହେଲ୍ନୁ ଉଇୟାକଦ୍।” 22ଆଙ୍ଗେନ୍ ଆଗ୍ରିପ୍ପାସ୍ ଫେସ୍ତୁସ୍ସିନ୍ ତେଙ୍ଗିୟାସ୍, “ଏନ୍ହି ନିଜେ ଆ ଆଲାସ୍ସ୍ତି ମେନାଗେ ଚାହାଁଲ୍ଦାନ୍।” ଆସ୍ ତେଙ୍ଗିୟାସ୍, “ନିନ୍ ନେଲା ମେନୟ।”
23ଆନ୍ତିନ୍ ନାନ୍ନୁ ଉଲ୍ଲା ଯେତ୍କବାକେନ୍ ଆଗ୍ରିପ୍ପା ଆରୁ ବର୍ନିକୀସ୍ ବହୁତ୍ ଧୁମ୍ଧାମ୍ତି ବାର୍ଚାର୍, ଆରୁ ସିପାହୀର୍ଘି ମୁଖ୍ୟା ଆରୁ ସହର୍ତା ମୁଖ୍ୟା-ମୁଖ୍ୟା ଆଲାର୍ ଗାନେ ଆଦାଲାତ୍ନୁ କର୍ଚାର୍, ତା ଫେସ୍ତୁସ୍ ହୁକୁମ୍ ଚିଚ୍ଚାସ୍ କା ଆବ୍ଡ଼ାର୍ ପାଉଲୁସ୍ସିନ୍ ଅନ୍ଦ୍ରର୍ ବାରର୍। 24ଫେସ୍ତୁସ୍ ତେଙ୍ଗିୟାସ୍, “ହେ ରାଜା ଆଗ୍ରିପ୍ପା ଆରୁ ଏହ୍ମା ଗାନେ ଇସାନ୍ ରୁ ଜାମା ଆଲାରୋ, ନିମ୍ ଇ ଆଲାସିନ୍ ଏରାଲ୍ଦାର୍, ନେଖା ବାରେନୁ ଜାମା ୟାହୁଦୀର୍ ଯେରୁଶାଲେମ୍ନୁ ଆରୁ ଇସାନ୍ହି ଏଙ୍ଘାସାନ୍ ଚିର୍ରାରା-ଚିର୍ରାରା ଆର୍ଜୀ କାମାଲ୍ନାଏ କା ଇସ୍କି ଉଜ୍ଜନାଦ୍ ଠିକ୍ ମାଲ୍ଲିଦ୍। 25ଲେକିନ୍ ଏନ୍ ଆକ୍କାନ୍ କେର୍କାନ୍ କା ଇସ୍ ଖିନାଘି ଲାଇଗ୍ ଏନ୍ଦେର୍ହି ନାଲଖୁ ମାଲ୍ଲା କାମୁସ୍ ଆରୁ ଆସ୍ ତାନ୍ ନିଜେ ସାମ୍ରାଟ୍ସାନ୍ ଆର୍ଜୀ କାମ୍ଚାସ୍ ତା ଏନ୍ ଇସିନ୍ ଆସାନ୍ ତାଇୟାଗେ ସୋଚ୍କାନ୍। 26ଏନ୍ ଇସ୍କି ବାରେନୁ ଏନ୍ଦେର୍ହି ଏନ୍ନେ କାତ୍ଥା ମା ହାକ୍କାନ୍ କା ସମ୍ରାଟ୍ସ୍ଗେ ଲେଖିକିରି ତାଇୟନ୍। ହୁଦଘିଲାଗାନ୍ ଏନ୍ ନିହ୍ମା ଆଘ୍ଲି ଆରୁ ବିଶେଷ୍କିରି ରାଜା ଆଗ୍ରିପ୍ପା ନିହ୍ମାସାନ୍ ଇସିନ୍ ଅନ୍ଦର୍କାଦାନ୍ କା ଯାଁଚ୍ କାମ୍ଚ୍କା ପାଛ୍ଲି ଏଙ୍ଗା ଏନ୍ଦ୍ରିନ୍ ଲେଖାଗେ ହାଖ୍ଖରଦ୍। 27ଏନ୍ଦେର୍ଗେକା ବନ୍ଦୀସିନ୍ ତାଏନା ଆରୁ ଏକା ଦୋଷ୍ ଆସ୍କି ମିଆଁ ଲାଗାବା କେର୍କିଚି, ଆବନ୍ ଆସିନ୍ ମା ତେଙ୍ଗ୍ନାଦ୍ ଏଙ୍ଗାଗେ ବେକାର୍ ଲାଗ୍ଗାଲି।”
26ଆଗ୍ରିପ୍ପାସ୍କି ଚାହାନୁ ପାଉଲୁସ୍ ସାଫାଇ ଚିଆଲ୍ଦାସ୍
1ଆନ୍ତିନ୍ ଆଗ୍ରିପ୍ପାସ୍ ପାଉଲୁସ୍ସିନ୍ ତେଙ୍ଗିୟାସ୍, “ନିଙ୍ଗା ନିଙ୍ଘା ବାରେନୁ ତେଙ୍ଗ୍ନାଘି ଅନୁମତି ରାଇ।” ଆଙ୍ଗେନ୍ ପାଉଲୁସ୍ ହେଖ୍ଖା ବାଢ଼ାବାଇକିରି ତେଙ୍ଗାଗେ ଲାଗ୍ଗିୟାସ୍, 2“ହେ ରାଜା ଆଗ୍ରିପ୍ପା, ଯେତ୍କ କାତ୍ଥାଘି ଦୋଷ୍ ୟାହୁଦୀଜାମାର୍ ଏଙ୍ଘା ମିଆଁ ଲାଗାବାଲ୍ନାଏ, ଇନ୍ନା ନିଙ୍ଘା ସାମ୍ନାନୁ ଆଦ୍ଘି ଉତ୍ତର୍ ଚିୟାଗେ ମଉକା ହାଖ୍ଖର୍କିଚି, ହୁଦ୍ଘିଲାଗାନ୍ ଏନ୍ ନିଜ୍କେନିଜ୍ ଭାଗ୍ୟବାନ୍ ମନେ କାମ୍ଦାନ୍। 3ବିଶେଷ୍କିରି ଇଦ୍ଘିଲାଗାନ୍ କା ନିନ୍ ୟାହୁଦୀ ଜାମାର୍ଘି ରୀତିନୀତି ଆରୁ ଝାଗ୍ଡ଼ାବନ୍ ଆହ୍ଦାଏ, ହୁଦ୍ଘିଲାଗାନ୍ ଏନ୍ ନିଙ୍ଗାନ୍ ଆର୍ଜୀବିନ୍ତି କାମାଲ୍ଦାନ୍ କା, ଧିରାଜ୍ ଧାରିକିରି ଏଙ୍ଘା କାତ୍ଥାନ୍ ମେନା।”
4“ଜାମା ୟାହୁଦୀଜାମାର୍ ଆହ୍ନାଏ କା ପହ୍ଲେନ୍ତି ଏଙ୍ଘା ନିଜର୍ ଦେଶ୍ନୁ ଆରୁ ଯେରୁଶାଲେମ୍ନୁହି ହାଦ୍ଦୁ ବାକେନ୍ତିନ୍ ଏନ୍ ଏସ୍କେ ଜୀବନ୍ ବିତାବାଲ୍କାନ୍ 5ଆବ୍ଡ଼ାର୍ ଏଙ୍ଗାନ୍ ସୁରୁନ୍ତି ଆହ୍ନାଏ ଆରୁ ଯଦି ଆବ୍ଡ଼ାର୍ ଚାହଁର୍, ତା ସାକ୍ଷୀ ଚିଆ ଅଙ୍ଗର୍ କା ଏନ୍ ଫାରିସୀ ମାନିକିରି ନିଜର୍ ଧରମ୍ତା ଜାମାର୍ସ୍ତି କାଠୋର୍ ନିୟମ୍ଘି ଲେଖା ଜୀବନ୍ ବିତାବାଚ୍କାନ୍। 6ଆରୁ ଆକ୍କୁନ୍ ଏଙ୍ଘା ବିଚାର୍ ମାନ୍ନାଘି ଲାଗାନ୍ ଇଜ୍ଜକାଦାନ୍ ଆରୁ ଏଙ୍ଗାଗେ ଆ ବଚନ୍ଘି ମିଆଁ ଭାର୍ଷା ରାଇ ଏକାନ୍ କା ପାର୍ମେଶ୍ୱାର୍ସ୍ ନାହ୍ମାଏ ପୁର୍ଖାର୍ଗେ ଚିୟାଗେ ପ୍ରତିଜ୍ଞା କାମ୍ଚ୍କାଚାସ୍। 7ଆ ପ୍ରତିଜ୍ଞା ପୁରା ମାନ୍ନାଘି ଆଶ୍ରାନୁ ନାହ୍ମାଏ ବାର ବାଉଁଶାନ୍ତାର୍ ମନ୍ ଧ୍ୟାନ୍ସେ ଉଲ୍ଲାନ୍ ମାଁହାନ୍ ପାର୍ମେଶ୍ୱାର୍ସ୍କି ସେବା କାମ୍ତେ ବାର୍ଚ୍କାନାଏ। ହେ ରାଜା ଇ ଆଶ୍ରାଘି ବାରେନୁ ୟାହୁଦୀଜାମାର୍ ଏଙ୍ଘା ମିଆଁ ଦୋଷ୍ ଲାଗାବାଲ୍ନାଏ। 8ପାର୍ମେଶ୍ୱାର୍ସ୍ କେଚ୍ଚ୍କା ଆଲାରିନ୍ ଉଜ୍ଜତାଦାସ୍, ଇ କାତ୍ଥାଦ୍ ନିହ୍ମାସ୍ତି ନେକାହି ଏନ୍ଦେର୍ଗେ ବିଶ୍ୱାସ୍ କାମ୍ନାଘି ଲାଇଗ୍ ମା ଲାଗ୍ଗ।”
9“ଏନ୍ହି ସୋଚାଲ୍କାନ୍ କା ନାଜ୍ରେତ୍ତା ଯୀଶୁସ୍କି ନାମେଘି ବିରୁଦ୍ଧନୁ ଯେତ୍କ ମାନାଅଙ୍ଗ ଏଙ୍ଗା ବହୁତ୍କିଛି କାମ୍ନା କାତ୍ଥା। 10ଆରୁ ଏନ୍ ଯେରୁଶାଲେମ୍ନୁ ଏନ୍ନେନିନ୍ କାମ୍ଚ୍କାନ୍; ଆରୁ ମୁଖ୍ୟା ପୁରୋହିତ୍ସ୍ତି ହକ୍ ହାଖ୍ଖୀକିରି ବହୁତ୍ ଧାର୍ମିକ୍ ଆଲାରିନ୍ ଜେହେଲ୍ନୁ ଗୁଡ଼ାଚାଲ୍କାନ୍, ଆରୁ ଯେତ୍କବାକେନ୍ ଆବ୍ଡ଼ାରିନ୍ ପିଟା କେରା ତା ଏନ୍ ଆବ୍ଡ଼ାର୍ଘି ବିରୁଦ୍ଧନୁ ନିଜର୍ ସହମତି ଚିଆଲ୍କାନ୍। 11ଆରୁ ଜାମା ସାଭା ଆଡ଼୍ପାନୁ ପ୍ରାୟ ଏନ୍ ଆବ୍ଡ଼ାରିନ୍ ସାତାବାଲ୍କାନ୍ ଆରୁ ଯବର୍ଜସ୍ତି ଆବ୍ଡ଼ାରିନ୍ ଯୀଶୁସ୍କି ନିନ୍ଦା କାମ୍ତାଲ୍କାନ୍, ଆବ୍ଡ଼ାର୍ଘି ଲାଗାନ୍ ଏଙ୍ଘା ଖୀସ୍ ଏତ୍କ ବାଗ୍ଗେ ରାଚା କା ଏନ୍ ବାହ୍ରି ସହର୍ଗେ କାଇକିରି ହି ଆବ୍ଡ଼ାରିନ୍ ସାତାବାଲ୍କାନ୍।”
ପାଉଲୁସ୍ ନିଜର୍ ଜୀବନ୍ନୁ ପରିବର୍ତ୍ତନ୍ଘି ବର୍ଣ୍ଣନା କାମାଲ୍ଦାସ୍
12“ଇ କାରଣ୍ତି ଯେତ୍କବାକେନ୍ ଏନ୍ ମୁଖ୍ୟା ପୁରୋହିତ୍ ଜାମାର୍ସ୍ତି ହକ୍ ଆରୁ ହୁକୁମ୍ ହାଖ୍ଖୀକିରି ଦାମାସ୍କସ୍ଗେ କାଲ୍କାନ୍; 13ତା ହେ ରାଜା, ପାବୁନୁ ବାର ବାଜେଗେ ଏନ୍ ଆକାଶ୍ତି ଅଣ୍ଟା ବିଲ୍ଲୀ ବାର୍ନାନ୍ ଏର୍କାନ୍। ଆଦ୍ ବିଡ଼ିନ୍ତି ହି ବାଗ୍ଗେ ତେଜ୍ ରାଚା। ଆଦ୍ ଏଙ୍ଘାଏ ଆରୁ ଏଙ୍ଘାଗାନେ କାଲୁ ଆଲାର୍ଘି ଚାରିପାଖା ବିଲ୍ଲୀ ମାନ୍ଚାକେରା। 14ଆରୁ ଏମ୍ ଯେତ୍କମ୍ ହେହଁଲାନୁ ଖାତ୍ର୍କାମ୍ କେର୍କାମ୍, ତା ଏଙ୍ଗା ଅଣ୍ଟା ଶବଦ୍ ମେନ୍ଦ୍ରା। ଆଦ୍ ଇବ୍ରାନୀ ଭାଷାନୁ ଏଙ୍ଗାନ୍ ତେଙ୍ଗାଲିୟାଦ୍, ‘ହେ ଶାଉଲ୍, ହେ ଶାଉଲ୍, ନିନ୍ ଏଙ୍ଗାନ୍ ଏନ୍ଦେର୍ଗେ ସାତାବାଲ୍ଦାଏ? ପ୍ୟାନେନୁ ଲାଥ୍ନାଦ୍ ନିଙ୍ଗାଗେ କଠିନ୍ଦ୍।’ 15ଆଙ୍ଗେନ୍ ଏନ୍ ମେନ୍ଚ୍କାନ୍, ‘ହେ ପ୍ରାଭୁ, ନିନ୍ ନେଦ୍?’ ପ୍ରାଭୁସ୍ ତେଙ୍ଗିୟାସ୍, ‘ଏନ୍ ଯୀଶୁନ୍, ନେକାନ୍ ନିନ୍ ସାତାବାଲ୍ଦାଏ। 16ଲେକିନ୍ ନିନ୍ ଉସ୍କାରା, ନିଜର୍ ହେଡ୍ଡୁତି ଇଲା ଏନ୍ଦେର୍ଗେକା ଏନ୍ ନିଙ୍ଗାନ୍ ଇଦ୍ଘିଲାଗାନ୍ ଦର୍ଶନ୍ ଚିଚ୍କାନ୍ କା ନିଙ୍ଗାନ୍ ଏନ୍ ଅଣ୍ଟା ସେବକସ୍କି ରୂପ୍ନୁ ଚାଜନ୍ ଆରୁ ଏକାନ୍ କା ନିନ୍ ଏଙ୍ଘା ବାରେନୁ ଏର୍କାଦାଏ, ଆରୁ ଏକାନ୍ ଏନ୍ ନିଙ୍ଗାନ୍ ଏଦୋନ୍, ଆଦ୍ଘି ନିନ୍ ସାକ୍ଷୀ ରଏ। 17ଆରୁ ଏନ୍ ନିଙ୍ଗାନ୍ ନିଙ୍ଘା ଆଲାର୍ସ୍ତି ଆରୁ ଦୁସ୍ରା ଜାତିୟାର୍ସ୍ତି ବାଛାବନ୍, ନେଖା ଚାହାନୁ ଏନ୍ ଆକ୍କୁନ୍ ନିଙ୍ଗାନ୍ ଇଦ୍ଘିଲାଗାନ୍ ତାଇୟାଲ୍ଦାନ୍। 18କା ନିନ୍ ଆବ୍ଡ଼ାର୍ଘି ହାନ୍ନୁନ୍ ଖୋଲୟ କା ଆବ୍ଡ଼ାର୍ ଉହାନ୍ତି ବିଲ୍ଲୀ ତାରା, ଆରୁ ଶାଏତାନ୍ଘି ହକ୍ତି ପାର୍ମେଶ୍ୱାର୍ସ୍ ତାରା କିର୍ରର୍ ବାରର୍; ଇଦ୍ଘି ଦ୍ୱାର୍ନୁ ଆବ୍ଡ଼ାର୍ ପାପ୍ତି ଛେମା ହାଖ୍ଖର୍ ଆରୁ ଆ ଆଲାର୍ ଗାନେ ଏକାର୍ ଏଙ୍ଘା ମିଆଁ ବିଶ୍ୱାସ୍ କାମ୍ନାଘି ଦ୍ୱାର୍ନୁ ପାର୍ମେଶ୍ୱାର୍ସ୍କି ଲାଗାନ୍ ଭିନେ କାମା କେର୍କିଚି।’”
ପାଉଲୁସ୍ ନିଜର୍ ନାଲ୍ଖୁଘି ବର୍ଣ୍ଣନା କାମାଲ୍ଦାସ୍
19“ହୁଦ୍ଘିଲାଗାନ୍ ହେ ରାଜା ଆଗ୍ରିପ୍ପା, ଏନ୍ ଆ ସରଗ୍ତା ଦର୍ଶନ୍ଘି କାତ୍ଥାବନ୍ ମା ଟାଲ୍ଚ୍କାନ୍, 20ଲେକିନ୍ ପହ୍ଲେ ଦାମାସ୍କସ୍ ଆରୁ ଯେରୁଶାଲେମ୍ ତା ଆଲାରିନ୍, ଆନ୍ତିନ୍ ୟାହୁଦୀଆଘି ଜାମା ପ୍ରଦେଶ୍ନୁ ରାନାବାଲା ଆରୁ ବିନାୟାହୁଦୀରିନ୍ ଉପ୍ଦେଶ୍ ଚିୟାଗେ ଲାକ୍କାନ୍ କା ପାସ୍ତାରାଇକିରି ପାର୍ମେଶ୍ୱାର୍ସ୍ ତାରା କିର୍ରା ବାରା ଆରୁ ପାସ୍ତାରାଚ୍କାଘି ଲାଇଗ୍ ନାଲଖୁ କାମା। 21ଇ କାତ୍ଥାଘି ଲାଗାନ୍ ୟାହୁଦୀଜାମାର୍ ଏଙ୍ଗାନ୍ ମନ୍ଦିର୍ନୁ ଧାରିକିରି ପିଟାଗେ କୋଶିଷ୍ କାମାଲିଆର୍। 22ଲେକିନ୍ ଏନ୍ ପାର୍ମେଶ୍ୱାର୍ସ୍କି ଦାୟାତି ଇନ୍ନାତକ୍ ରାଦାନ୍ ଆରୁ ଛୋଟେ ବାଡ଼୍କା ଜାମାର୍ଘି ଆଘ୍ଲି ସାକ୍ଷୀ ଚିଆଲ୍ଦାନ୍। ଆରୁ ଏନ୍ ଆ କାତ୍ଥାନ୍ ଆମ୍ବିକିରି ଆରୁ ଏନ୍ଦେର୍ହି ମା ବାଦାନ୍, ଏକାନ୍ କା ନାବୀଜାମାର୍ ଆରୁ ମୁଶାସ୍ ହି ତେଙ୍ଗିୟାସ୍ କା ମାନ୍ନାବାଲା ରାଇ। 23କା ଖ୍ରୀସ୍ତ୍ଗେ ଦୁଃଖୁ ସାହା ଖାତ୍ରୋ ଆରୁ ଆସ୍ ଜାମାର୍ଘିନ୍ତି ଆଘ୍ଲି କେଚ୍ଚକାର୍ସ୍ତି ଉଜ୍ଜସ୍, ଆରୁ ୟାହୁଦୀ ଆରୁ ବିନାୟାହୁଦୀର୍ସାନ୍ ବିଲ୍ଲୀଘି ପ୍ରଚାର୍ କାମସ୍।”
24ଯେତ୍କବାକେନ୍ ଆସ୍ ଏନ୍ନେ ଉତ୍ତର୍ ଚିଆଲିୟାସ୍, ତା ଫେସ୍ତୁସ୍ ଯୋର୍ସେ ଚିର୍ରା ରାଇକିରି ତେଙ୍ଗିୟାସ୍, “ହେ ପାଉଲୁସ୍ ନିନ୍ ବାୟାହାଏ। ବହୁତ୍ ପାଠବଦ୍ ନିଙ୍ଗାନ୍ ପାଗ୍ଲା କାମ୍ଚେଇ ଚିଚ୍ଚକିଚି।” 25ଲେକିନ୍ ପାଉଲୁସ୍ ତେଙ୍ଗିୟାସ୍, “ହେ ମାହାମହିମ୍ ଫେସ୍ତୁସ୍ ଏନ୍ ପାଗ୍ଲା ମାଲ୍ଦାନ୍, ଲେକିନ୍ ସତ୍ତୁ ଆରୁ ବୁଦ୍ଧିଘି କାତ୍ଥାନ୍ ତେଙ୍ଗାଲ୍ଦାନ୍। 26ରାଜାସ୍ହି ନିଜେ ଇ କାତ୍ଥାନ୍ ଆହ୍ଦାସ୍ ଏକାସ୍କି ସାମ୍ନାନୁ ସାହସ୍ତି ଏନ୍ ତେଙ୍ଗାଲ୍ଦାନ୍; ଆରୁ ଏନ୍ ବିଶ୍ୱାସ୍ କାମାଲ୍ଦାନ୍ କା ଇବ୍ଡ଼ା ଜାମା କାତ୍ଥାଦ୍ ଆସ୍ତି ମାଲ୍ଲା ନୁହ୍ରୁ, ଏନ୍ଦେର୍ଗେକା ଇ ଘାଟ୍ଣାଦ୍ କାଡ଼େ-କାଡ଼େ ମାଲ୍ଲା ମାନୁଦ୍। 27ହେ ରାଜା ଆଗ୍ରିପ୍ପା, ନିନ୍ ନାବୀରିନ୍ ବିଶ୍ୱାସ୍ କାମ୍ଦାଏ? ହଁ, ଏନ୍ ଆହାଲ୍ଦାନ୍ କା ନିନ୍ ବିଶ୍ୱାସ୍ କାମ୍ଦାଏ।” 28ଆଙ୍ଗେନ୍ ଆଗ୍ରିପ୍ପା ପାଉଲୁସ୍ସିନ୍ ତେଙ୍ଗିୟାସ୍, “ନିନ୍ ଏତ୍କ ଥୋଡ଼େ ସାମାୟନୁ ଏଙ୍ଗାନ୍ ଖ୍ରୀଷ୍ଟିୟାନ୍ ବାନାବାଗେ ସୋଚାଲ୍ଦାଏ?” 29ପାଉଲୁସ୍ ତେଙ୍ଗିୟାସ୍, “ଥୋଡ଼େ ସାମାୟନୁ ଚାହେ ବାଗ୍ଗେ ସାମାୟନୁ ଏନ୍ ପାର୍ମେଶ୍ୱାର୍ସାନ୍ ବିନ୍ତି କାମାଲ୍ଦାନ୍ କା, ନିନ୍ ଖାଲି ମାଲ୍ଲା ଲେକିନ୍ ଇନ୍ନା ଯେତ୍କ ଆଲାର୍ ଏଙ୍ଘା କାତ୍ଥା ମେନାଲ୍ନାଏ, ଆବ୍ଡ଼ାର୍ଜାମାର୍ ଇ ବନ୍ଧନ୍ବନ୍ ଆମ୍ବିକିରି ଏଙ୍ଘା ଲେଖା ମାନର୍କର୍।”
30ଆଙ୍ଗେନ୍ ରାଜାସ୍ ଇଜ୍ଜାସ୍ ଆନ୍ତିନ୍ ଆସ୍ଗାନେ ଦେୱାନ୍ସ୍ ଆରୁ ବର୍ନିକୀ ଆରୁ ଆବ୍ଡ଼ାର୍ ଗାନେ ଅକ୍କୁ ଆଲାର୍ହି ଇଜ୍ଜାର୍କେରାର୍; 31ଆରୁ ଭିନେ ତାରା କାଇକିରି ତାହ୍ମା-ତାହ୍ମା ଭିତ୍ରେ କାତ୍ଥା କାମାଗେ ଲାଗ୍ଗିୟାର୍, “ଇ ଆଲାସ୍ତା ମରନ୍ଘି ଦଣ୍ଡ୍ ଚାହେ ଜେହେଲ୍ନୁ ଗୁଡ଼୍ନା ଚିନାଘି ଲାଇଗ୍ ଏନ୍ଦେର୍ହି ନାଲ୍ଖୁ ମାଲ୍ଲା କାମୁସ୍।” 32ଆଗ୍ରିପ୍ପାସ୍ ଫେସ୍ତୁସ୍ସିନ୍ ତେଙ୍ଗିୟାସ୍, “ଯଦି ଇ ଆଲାସ୍ କାଇସର୍ସାନ୍ ଆର୍ଜୀ ମା କାମ୍ଚ୍କା ରସ୍ନେ, ତା ଆସ୍ ଛୁଟ୍ରାସ୍ କେର୍କା ରସ୍ନେ।”
27ପାଉଲୁସ୍ସିନ୍ ରୋମ୍ଗେ ତାଇୟାଲ୍ନାଏ
1ଯେତ୍କବାକେନ୍ ବିଚାର୍ ମାନ୍ଚାକେରା କା ଏମ୍ ଜାହାଜ୍ନୁ ଇଟାଲୀ କମ୍, ତା ଆବ୍ଡ଼ାର୍ ପାଉଲୁସ୍ ଆରୁ ଦୁସ୍ରା ବନ୍ଦୀ ଆଲାରିନ୍ ଜୁଲିୟୁସ୍ ନାମେଘି ଆଗୁସ୍ତୁସ୍ଘି ସିପାହୀର୍ଘି ଅଣ୍ଟା ମୁଖ୍ୟାସ୍କି ହେଖ୍ଖାନୁ ସୋଁପ୍ଚେଇ ଚିଚ୍ଚାର୍। 2ଆଦ୍ରାମୁତ୍ତିୟୁମ୍ ଅଣ୍ଟା ଜାହାଜ୍ ଏକାଦ୍ କା ଆସିଆଘି ଖାଁଣି-ଖାଁଣି କାନାବାଲା ରାଚା, ଆନ୍ନୁ ଏମ୍ ଅକ୍କିକିରି କେର୍କାମ୍, ଆରୁ ଥେସଲନିକିନ୍ତା ଆରିସ୍ତାର୍ଖସ୍ ନାମେଘି ଅଣ୍ଟା ମାକିଦୁନିଆ ଆଲାସ୍ ନାହ୍ମାଗାନେ ରାଚାସ୍। 3ନାନ୍ନୁ ଉଲ୍ଲା ଏମ୍ ସିଦୋନ୍ଗେ ଆଣ୍ସ୍କାମ୍ ଆରୁ ଜୁଲିୟୁସ୍ ପାଉଲୁସ୍କି ମିଆଁ ଦାୟା କାମିକିରି ତାଙ୍ଘା ସାଙ୍ଗେର୍ସାନ୍ କାଲାଗେ ଆରୁ ଆବ୍ଡ଼ାର୍ସ୍ତି ସେବା ହାଖ୍ଖାଗେ ଅନୁମତି ଚିଚ୍ଚାସ୍। 4ଆସ୍ତି ଜାହାଜ୍ନୁ ଅକ୍କିକିରି କେର୍କାମ୍, ଲେକିନ୍ ଆଘ୍ଲିତାର୍ତି ଧୁକା ବାର୍ନାଘି କାରଣ୍ତି ଏମ୍ ସାଇପ୍ରସ୍ଘି ଖାଁଣି-ଖାଁଣି ଚିଇକିରି କେର୍କାତ୍; 5ଆରୁ କିଲିକିଆ ଆରୁ ପଂଫୂଲିଆଘି ଚାହାନ୍ତା ସାମ୍ଧୁର୍ନୁ ପାର୍ ମାନିକିରି ଲୂକିଆଘି ମୁରାନୁ ଏତ୍ତକାମ୍। 6ଆସାନ୍ ସିପାହୀଜାମାର୍ଘି ମୁଖ୍ୟାସ୍ ଇଟାଲୀ କାନାବାଲା ସିକାନ୍ଦାରିଆନ୍ତା ଅଣ୍ଟା ଜାହାଜ୍ ହାଖ୍ଖୀୟାସ୍ ଆରୁ ଆସ୍ ଏମାନ୍ ଆନ୍ନୁ ଆର୍ଗେତେଇ ଚିଚ୍ଚାସ୍।
7ଯେତ୍କବାକେନ୍ ଏମ୍ କେତ୍କ ଦିନ୍ତକ୍ ଧିରେ-ଧିରେ କାଇକିରି ବହୁତ୍ କଷଟ୍ତି କନିଦୁସ୍ଘି ଚାହାଗେ ଆଣ୍ସ୍କାମ୍ ତା ଧୁକାଦ୍ ଏମାନ୍ ଆଘ୍ଲି ବାଢ଼୍ରାଗେ ମା ଚିଆଲିୟାଦ୍, ହୁଦ୍ଘିଲାଗାନ୍ ଏମ୍ ସାଲ୍ମୋନେସ୍ ଟାପୁଘି ଚାହା ମାନିକିରି କ୍ରେତେଘି ଖାଁଣି-ଖାଁଣି କେର୍କାମ୍; 8ଆରୁ ଆଦ୍ଘି ଖାଁଣି-ଖାଁଣି କଷଟ୍ନୁ ଜାହାଜ୍ବନ୍ ଆଘ୍ଲି ବାଢ଼ାବାତେ ହୋଇକିରି “ସୁନ୍ଦର୍ ବନ୍ଦର୍” ନାମେଘି ଅଣ୍ଟା ଆଡ୍ଡାନୁ ଆଣ୍ସ୍କାମ୍। ଇସ୍ତି ଲାସାୟା ସହର୍ଦ୍ ଚାହାନୁ ରାଚା।
9ଯେତ୍କବାକେନ୍ ବହୁତ୍ଦିନ୍ ବିତ୍ରାକେରା ଆରୁ ଜାହାଜ୍ବନ୍ ଆଘ୍ଲି ବାଢ଼ାବାନାଦ୍ ହି ବିପଦ୍ ରାଚା ଏନ୍ଦେର୍ଗେକା ଉପାସ୍ଘି ଉଲ୍ଲା ଆକ୍କୁନ୍ ବିତ୍ରା କେର୍କିଚା, ହୁଦ୍ଘିଲାଗାନ୍ ପାଉଲୁସ୍ ଆବ୍ଡ଼ାରିନ୍ ଚେତାବାନୀ ଚିଇକିରି ତେଙ୍ଗିୟାସ୍, 10“ହେ ଆଲାରୋ, ଏଙ୍ଗା ଏନ୍ନେ ଲାଗ୍ଗାଲି କା ଯାତ୍ରାନୁ ବିପଦ୍ ଆରୁ ବହୁତ୍ ନାଶ୍ ମାନ୍ନାବାଲା ରାଇ, ମାଲ୍ ଆରୁ ଜାହାଜ୍ଘି ଖାଲି ମାଲ୍ଲା ଲେକିନ୍ ନାହ୍ମା ଜୀବନ୍ଘି ହି ନାଶ୍ ମାନ୍ନାବାଲା ରାଇ।” 11ଲେକିନ୍ ସିପାହୀଜାମାର୍ଘି ମୁଖ୍ୟାସ୍ ପାଉଲୁସ୍କି କାତ୍ଥାନ୍ନ୍ତି ହକ୍ ଆରୁ ଜାହାଜ୍ ଚାଲାବୁସ୍କି କାତ୍ଥାନ୍ ବାଗ୍ଗେ ଧ୍ୟାନ୍ ଚିଚ୍ଚାସ୍। 12ଆରୁ ଆ ଜାହାଜ୍ ଘାଟ୍ନୁ ପାଇଁୟା ଉଲ୍ଲା ବିତାବାକେ ସୁବିଧା ମାଲ୍ଲାରୁଦ୍, ହୁଦ୍ଘିଲାଗାନ୍ ବାଗ୍ଗେ ଆଲାର୍ଘି ମତ ରାଚା କା ଆସ୍ତି ଜାହାଜ୍ନୁ କାଇକିରି ଯଦି ମାନାଅଙ୍ଗତା ଏସ୍କିନ୍ହି ଫିନୀକସ୍ ଆଣସିକିରି ଆସାନ୍ ପାଇଁୟା ଉଲ୍ଲା ବିତାବାଗେ ସୋଚ୍ଚାର୍। ଇ ଫିନୀକସ୍ କ୍ରେତେନ୍ତା ଅଣ୍ଟା ଜାହାଜ୍ ଘାଟ୍, ଏକାଦ୍ କା ଦକ୍ଷିଣ୍ ପଶ୍ଚିମ୍ ଆରୁ ଉତ୍ତର୍ ପଶ୍ଚିମ୍ ତାରା ଖୋଲ୍ରିଦ୍।
ସାମ୍ଧୁର୍ନୁ ଆନ୍ଧିଧୁକା ବାରାଲିଦ୍
13ଯେତ୍କବାକେନ୍ କାଟେ-କାଟେ ଦକ୍ଷିଣ୍ ହାୱାବଦ୍ ଚାଲ୍ରାଗେ ଲାଗ୍ଗିୟା, ତା ଆବ୍ଡ଼ାର୍ ସୋଚ୍ଚାର୍ କା ଏସ୍କେ ଆବ୍ଡ଼ାର୍ ଚାହାଁଲିୟାର୍ ଆନ୍ନେ ମାନ୍ଚାକେରା, ତା ଆବ୍ଡ଼ାର୍ ୨୭:୧୩ ଲଙ୍ଗର୍ ମତ୍ଲବ୍ ଜାହାଜ୍ବନ୍ ରୋକାଗେ ପାନ୍ନାଘି ଅଣ୍ଟା ରାଡ଼୍ ଏକାନ୍ କା ଆମ୍ମୁନୁ ଗାଡ଼ା ଚାଲିୟାର୍ଲଙ୍ଗର୍ ଉଠାବାଇକିରି କ୍ରେତେଘି ଖାଁଣି-ଖାଁଣି ଜାହାଜ୍ବନ୍ ବାଢ଼ାବାଗେ ଲାଗ୍ଗିୟାର୍। 14ଲେକିନ୍ ଥୋଡ଼େ ଡେରିନୁ ଟାପୁ ତାର୍ତି ଅଣ୍ଟା ବାଡ଼୍କା ଆନ୍ଧିଧୁକା ବାର୍ଚା, ଏକାନ୍ କା “ଇଉରକ୍ୱିଲୋ” (ଉତ୍ତର୍ ପୁରୁବ୍ ଆନ୍ଧି) ବାନାଏ। 15ଯେତ୍କବାକେନ୍ ଆନ୍ଧି ଧୁକାଦ୍ ଜାହାଜ୍ନୁ ବାଜ୍ଡ଼ାରାଚା ତା ଜାହାଜ୍ଦ୍ ଆଘ୍ଲି ବାଢ଼୍ରା ପଲ୍ଲାଲିୟାଦ୍, ତା ଏମ୍ ଆବନ୍ ହନ୍ନେନ୍ ଆମ୍ବେଚିଚ୍କାମ୍ ଆରୁ ଜାହାଜ୍ଦ୍ ହାୱାତି ଭାସର୍ତେ ବୁଙ୍ଗାକେରା। 16ଆନ୍ତିନ୍ କ୍ଲାଉଦ୍ ନାମେଘି ଅଣ୍ଟା ଛୋଟେ ଟାପୁଘି ଖାଁଣିନୁ ବାହ୍ତେ-ବାହ୍ତେ ଏମ୍ ବହୁତ୍ କଷଟ୍ତି ବାଛାବାନା ଡଙ୍ଗାବନ୍ ଚାହାନୁ କାମା ଅଙ୍କାମ୍। 17ଆନ୍ତିନ୍ ଆବ୍ଡ଼ାର୍ ଡଙ୍ଗାବନ୍ ଉଠାବିକିରି ନାନା ଉପାୟତି ଜାହାଜ୍ବନ୍ କିଇତି ହିଁଚାର୍ ଆରୁ ସୁର୍ତ୍ତିସ୍ ନାମେଘି ଆମ୍ମୁ କିୟାଁ ଚାଲ୍କ୍ରୀ ରାନା ଆଡ୍ଡାନୁ ଫାସ୍ର୍ନାଘି ଏଲ୍ଚ୍କାତି ଜାହାଜ୍ ତା ଜିନିଷ୍ପତର୍ ଗୁଠିନ୍ ଖେବ୍ଡ଼ିୟାର୍ ଆରୁ ବାହ୍ତେ-ବାହ୍ତେ ବୁଙ୍ଗାର୍ କେରାର୍। 18ଯେତ୍କବାକେନ୍ ଆନ୍ଧିଧୁକାତି ଏହ୍ମାଏ ବହୁତ୍ କଷଟ୍ ମାନ୍ଚା, ତା ଆଦ୍ଘି ନାନ୍ନୁ ଉଲ୍ଲା ଆବ୍ଡ଼ାର୍ ଜାହାଜ୍ ତା ମାଲ୍ବନ୍ ଖେବ୍ଡ଼ାଗେ ଲାଗ୍ଗିୟାର୍। 19ଆରୁ ତିସ୍ରା ଉଲ୍ଲା ଆବ୍ଡ଼ାର୍ ନିଜର୍ ହେଖ୍ଖାତି ଜାହାଜ୍ଘି ସାମାନ୍ ପତର୍ହି ଖେବ୍ଡ଼େଚିଚ୍ଚାର୍। 20ଯେତ୍କବାକେନ୍ ଢେର୍ ଦିନ୍ତକ୍ ନା ବିଡ଼ି ନା ବିନ୍କୋ ଏଥ୍ରା ଆରୁ ବହୁତ୍ ଜୋର୍ସେ ଆନ୍ଧିଧୁକା ଚାଲ୍ର୍ତେ ରାଚା, ତା ଆଖ୍ରୀନୁ ଏହ୍ମାଏ ବାଛ୍ର୍ନାଘି ଜାମା ଆଶ୍ରା ବୁଙ୍ଗାକେରା।
21ଯେତ୍କବାକେନ୍ ଆବ୍ଡ଼ାର୍ ଢେର୍ ଦିନ୍ତକ୍ ଏନ୍ଦେର୍ହି ମାଲ୍ଲା ଅନୁର୍-ମହୁଁର୍, ତା ପାଉଲୁସ୍ ଆବ୍ଡ଼ାର୍ଘି ମାଝାନୁ ଇଜ୍ଜାସ୍ ଆରୁ ତେଙ୍ଗିୟାସ୍, “ହେ ଆଲାରୋ, ନିମ୍ ଏଙ୍ଘା କାତ୍ଥା ମେନିକିରି ଯଦି କ୍ରେତେନ୍ତି ଜାହାଜ୍ନୁ ମା ବାର୍ଚ୍କା ରର୍ନେ ତା ନିମ୍ ଇ ବିପଦ୍ ଆରୁ ଇ ହାନିନ୍ତି ବାଛ୍ର୍କା ରର୍ନେ। 22ଲେକିନ୍ ଆକ୍କୁନ୍ ଏନ୍ ନିମାନ୍ ବୁଝାବାଲ୍ଦାନ୍ କା ଧିରାଜ୍ ଧାରା, ଏନ୍ଦେର୍ଗେକା ନିହ୍ମା ଭିତର୍ତି ନେଖାଏହି ଜୀବନ୍ ନାଶ୍ ମା ମାନିଦ୍ ଲେକିନ୍ ଜାହାଜ୍ଘି ଖାଲି ନାଶ୍ ମାନଦ୍। 23ଏନ୍ଦେର୍ଗେକା ଏନ୍ ଏକା ପାର୍ମେଶ୍ୱାର୍ସ୍କି ଆଲାନ୍ ଆରୁ ଏକାସ୍କି ଏନ୍ ସେବା କାମାଲ୍ଦାନ୍, ଆସ୍କି ଅଣ୍ଟା ସରଗ୍ଦୂଁତ୍ ଇନ୍ନା ମାଁହା ଏଙ୍ଘା ଚାହାନୁ ବାରିକିରି ଇଜ୍ଜାଦ୍, 24ଆରୁ ତେଙ୍ଗିୟାଦ୍ ‘ହେ ପାଉଲୁସ୍, ଆମା ଏଲ୍ଚା! ନିଙ୍ଗାଗେ କାଇସର୍ସ୍କି ଆଘ୍ଲି ଇଲ୍ନା ଜରୁରୀ ରାଇ, ଏରା ପାର୍ମେଶ୍ୱାର୍ସ୍ ଆବ୍ଡ଼ା ଜାମାରିନ୍ ଏକାର୍ ନିଙ୍ଘା ସାଙ୍ଗେ ଯାତ୍ରା କାମାଲ୍ନାଏ ନିଙ୍ଗାଗେ ଚିଚ୍କାଦାସ୍।’ 25ହୁଦ୍ଘିଲାଗାନ୍, ହେ ଆଲାରୋ, ଧିରାଜ୍ ଧାରା; ଏନ୍ଦେର୍ଗେକା ଏଙ୍ଘାଏ ପାର୍ମେଶ୍ୱାର୍ସ୍କି ମିଆଁ ବିଶ୍ୱାସ୍ ରାଇ କା ଏସ୍କେ ଏଙ୍ଗାନ୍ ତେଙ୍ଗାକେର୍କିଚି ଆନ୍ନେନିନ୍ ମାନୋ। 26ଲେକିନ୍ ନାମ୍ ଏକ୍ରିନ୍ ଟାପୁନୁ କାଇକିରି ଜରୁର୍ ଫାସ୍ରତ୍।”
ଜାହାଜ୍ଘି ଏସ୍ର୍ନା
27ଯେତ୍କବାକେନ୍ ଚଉଦଦିନ୍ତା ମାଁହାନୁ ବାର୍ଚା ଆରୁ ଏମ୍ ଆଦ୍ରିଆ ସାମ୍ଧୁର୍ନୁ ଭାଟ୍କାରାତେ କାଲ୍କାମ୍, ତା ଲାଗ୍-ଭାଗ୍ ଆଧା ମାଁହାଗେ ଜାହାଜ୍ ଚାଲାବୁର୍ ଅନୁମାନ୍ କାମ୍ଚ୍କାର୍ କା ଏମ୍ ଏକିନ୍ ଜାଗାଘି ଚାହାନୁ ଆଣସାଲ୍ଦାମ୍। 28ଆରୁ ନାପିକିରି ଆବ୍ଡ଼ାର୍ ବିଶ୍ପୁର୍ସା ଗାଡ୍ଡିବନ୍ ହାଖ୍ଖୀୟାର୍ ଆରୁ କାଟେ ଆଘ୍ଲି କାଇକିରି ଆରୁଅହନ୍ ନାପ୍ଚାର୍ ତା ପନ୍ଦର ପୁର୍ସା ହାଖ୍ଖୀୟାର୍। 29ଆନ୍ତିନ୍ ଚାଁଚା ଆଡ୍ଡାନୁ ଠୋକର୍ ଲାଗ୍ନାଘି ଏଲ୍ଚ୍କାତି ଆବ୍ଡ଼ାର୍ ଜାହାଜ୍ଘି ପାଛ୍ଲି ତାର୍ତା ନାହ୍ଟା ଝାଗାର୍ବନ୍ ଖେବ୍ଡ଼େଇଚାର୍ ଆରୁ ପାଇରି ବିଜ୍ଜନାନ୍ ଏରାଲିୟାର୍। 30ଲେକିନ୍ ଯେତ୍କବାକେନ୍ ଜାହାଜ୍ ଚାଲାବୁ ଆଲାର୍ ଜାହାଜ୍ଘି ଆଘ୍ଲି ଭାଗ୍ ତାରା ଝାଗାର୍ ଟିଡ଼୍ନା ବାହ୍ନା ଡଙ୍ଗାବନ୍ ଆମ୍ମୁନୁ ଏତ୍ତେଚିଚ୍ଚାର୍ ଆରୁ ବୁଙ୍ଗା ବେଦ୍ଦାଲିୟାର୍। 31ତା ପାଉଲୁସ୍ ସିପାହୀଜାମାର୍ଘି ମୁଖ୍ୟା ଆରୁ ସିପାହୀରିନ୍ ତେଙ୍ଗିୟାସ୍, “ଯଦି ଇବ୍ଡ଼ା ଆଲାର୍ ଜାହାଜ୍ନୁ ମା ରର୍ତା ନିମ୍ହି ବାଛ୍ରା ପଲ୍ଲଦାର୍।” 32ଆଙ୍ଗେନ୍ ସିପାହୀଜାମାର୍ ଏପୁବନ୍ ମୁର୍କିକିରି ଡଙ୍ଗାନୁ କିୟାଁ ଟିଡ୍ଡେଇଚାର୍।
33ଯେତ୍କବାକେନ୍ ପାଇରି ବିଜ୍ଜାଲିୟାଦ୍ ତା, ପାଉଲୁସ୍ ଏନ୍ନେ ତେଙ୍ଗିକିରି, ଜାମାରିନ୍ ଅନା-ମହାଁଗେ ବୁଝାବାଚାସ୍, “ଇନ୍ନାଗାନେ ଚଉଦଦିନ୍ ମାନ୍ଚାଦ୍ ନିମ୍ ପାବୁ ଏରା-ଏରା କୀଡ଼ା ରାଚ୍କାର୍ ଆରୁ ଏନ୍ଦେର୍ହି ମାଲ୍ଲା ଅନୁର୍ ମହୁଁର୍। 34ଇଦ୍ଘିଲାଗାନ୍ ନିମାନ୍ ବୁଝାବାଲ୍ଦାନ୍ କା ଏନ୍ଦ୍ରିନ୍ ଅନା-ମଁହା ନିହ୍ମାଏ ବାଛ୍ର୍ନାଘି ଲାଗାନ୍ ଇଦ୍ଘି ଦାର୍କାର୍ ରାଇ ଏନ୍ଦେର୍ଗେକା ନିହ୍ମାସ୍ତି ନେକ୍ରିନ୍ଘି ଅଣ୍ଟା ଚୁଟ୍ଟିହି ନାଶ୍ ମା ମାନିଦ୍।” 35ଏତ୍କ ତେଙ୍ଗିକିରି ଆସ୍ ଆସ୍ମାବନ୍ ଅଚ୍ଚାସ୍ ଆରୁ ଜାମାର୍ଘି ଆଘ୍ଲି ପାର୍ମେଶ୍ୱାର୍ସ୍ସିନ୍ ଧାନ୍ୟାବାଦ୍ ଚିଚ୍ଚାସ୍ ଆରୁ ଆସ୍ମାବନ୍ ଖିଣ୍ଡିକିରି ମଁହାଗେ ଲାଗ୍ଗିୟାସ୍। 36ଆଙ୍ଗେନ୍ ଆବ୍ଡ଼ାର୍ଜାମାର୍ହି ଧିରାଜ୍ ଧାରିକିରି ଅନାମହାଗେ ଲାଗ୍ଗିୟାର୍। 37ଏମ୍ ଜାମାମ୍ ମେଶ୍ରିକିରି ଜାହାଜ୍ନୁ ଦୁଇ ଶହ୍ ଛୟସ୍ତୁର୍ ଲୋକ୍ ରାଚ୍କାମ୍। 38ଯେତ୍କବାକେନ୍ ଆବ୍ଡ଼ାର୍ କୁଲୁଭର୍ ଅଣ୍ଡାର୍ ମଖ୍ଖାର୍ ତା ଗହମ୍ବନ୍ ସାମ୍ଧୁର୍ନୁ ଖେବ୍ଡ଼ିକିରି ଜାହାଜ୍ବନ୍ ହାଲ୍କା କାମାଗେ ଲାଗ୍ଗିୟାର୍।
39ଯେତ୍କବାକେନ୍ ପାଇରି ବିଜ୍ଜ୍ୟା ତା ଆବ୍ଡ଼ାର୍ ହୁ ଦେଶ୍ବନ୍ ଚିହ୍ନା ପଲ୍ଲିୟାରିନ୍, ଲେକିନ୍ ସାମ୍ଧୁର୍ ଖାଁଣିନୁ ଚାଲ୍କ୍ରୀ ରାନାନ୍ ଏରିୟାର୍ ଆରୁ ବିଚାର୍ କାମ୍ଚାର୍ କା ଯଦି ମାନାଅଙ୍ଗତା ଇସାନିନ୍ ଜାହାଜ୍ବନ୍ ଉଇୟର୍। 40ଆନ୍ତିନ୍ ଆବ୍ଡ଼ାର୍ ଝାଗାର୍ବନ୍ ଖୋଲିକିରି ସାମ୍ଧୁର୍ନୁ ଆମ୍ବେଇଚିଚ୍ଚାର୍ ଆରୁ ହୁ ସାମାୟନୁ ୨୭:୪୦ “ପାତିୟା” ମତ୍ଲବ୍ ଜାହାଜ୍ବନ୍ ଚାଲାବାନା ଯନ୍ତ୍ରପାତିୟାବନ୍ ହିଁଚ୍କା ଏପୁନ୍ ଖୋଲ୍ଚେଇଚାର୍, ଆରୁ ହାୱାଘି ଆଘ୍ଲିତାରା ଚିଢ଼ାବନ୍ ହିଁଇକିରି ଖାଁଣିଗେ କେରାର୍। 41ଲେକିନ୍ ଯୋଡ଼େ ସାମ୍ଧୁର୍ଦ୍ ମେଶ୍ର୍ନା ଜାଗାନୁ ଜାହାଜ୍ବଦ୍ କାଇକିରି ଆଟ୍କା ରାଚାକେରା, ଆରୁ ଜାହାଜ୍ଘି ଆଘ୍ଲି ଭାଗ୍ଦ୍ ଆନ୍ନୁ ଫାସ୍ରିକିରି ମା ଚାଲ୍ରାଦ୍ ଆରୁ ଜାହାଜ୍ଘି ପାଛ୍ଲି ଭାଗ୍ଦ୍ ଲହ୍ଡ଼ିଘି ବାଜ୍ଡ଼ାରାନାତି ଏସ୍ରାଗେ ଲାଗ୍ଗିୟା। 42ଆନ୍ତିନ୍ ସିପାହୀଜାମାର୍ ବନ୍ଦୀ କାମ୍ଚ୍କା ଆଲାରିନ୍ ପିଟାଚାଗେ ବିଚାର୍ କାମ୍ଚାର୍, ତାକା ଆବ୍ଡ଼ାର୍ସ୍ତି ନେଦ୍ହି ପହଁରାରାଇକିରି ମା ବୁଙ୍ଗର୍। 43ଲେକିନ୍ ସିପାହୀଜାମାର୍ଘି ମୁଖ୍ୟାସ୍ ପାଉଲୁସ୍ସିନ୍ ବାଛାବାଗେ ବେଦ୍ଦାଲିୟାସ୍, ହୁଦ୍ଘିଲାଗାନ୍ ଆସ୍ ଆବ୍ଡ଼ାର୍ଘି ଇ ବିଚାର୍ବନ୍ ରୋକ୍ଚାସ୍, ଆରୁ ହୁକୁମ୍ ଚିଚ୍ଚାସ୍ କା ଏକାର୍ ପହରାରାଗେ ଆହ୍ନାଏ ଆବ୍ଡ଼ାର୍ ପହ୍ଲେ ସାମ୍ଧୁର୍ନୁ ଡେଗିକିରି ଖାଁଣିଗେ ଉର୍ଖର୍; 44ଆରୁ ବାକି ରୁର୍ ନେଦ୍-ନେଦ୍ ତାକ୍ତା, ଆରୁ ନେଦ୍-ନେଦ୍ ଜାହାଜ୍ଘି ଦୁସ୍ରା-ଦୁସ୍ରା ଟୁକ୍ଡ଼ାଘି ମଦେତ୍ତି ଉର୍ଖର୍କର୍, ଆରୁ ଏନ୍ନେନିନ୍ ଜାମାର୍ ଖାଁଣିଗେ ବାଛ୍ରାର୍ ଉର୍ଖିୟାର୍ କେରାର୍।
28ମାଲ୍ଟା ଟାପୁନୁ ପାଉଲୁସ୍
1ଯେତ୍କବାକେନ୍ ଏମ୍ ବାଛ୍ର୍କାମ୍ କେର୍କାମ୍ ତା ଆହ୍ତାରାଚା କା ଇ ଟାପୁବନ୍ ମାଲ୍ଟା ବାନାଏ। 2ଆସ୍ତା ଆଲାର୍ ଏହ୍ମା ମିଆଁ ବହୁତ୍ ଦାୟା କାମ୍ଚାର୍; ଏନ୍ଦେର୍ଗେକା ପାୟାଁ ଉଲ୍ଲା ରାଚା ଆରୁ ଚେପୁ ବାରାଲିୟାଦ୍, ଆଦ୍ଘି ଲାଗାନ୍ ଆବ୍ଡ଼ାର୍ ଚିଚ୍ଚୁ ଅଦିକିରି ଏମାନ୍ ଯେତ୍କରିନ୍ ମେହିଁଆର୍। 3ଯେତ୍କବାକେନ୍ ପାଉଲୁସ୍ କାଙ୍କୁବନ୍ ଠୁଡ଼୍ୟାଚାସ୍ ଆରୁ ଚିଚ୍ଚୁନୁ ଚିଚ୍ଚାସ୍, ତା ଅଣ୍ଟା ବିଷ୍ ରାନା ନେର୍ରୁଦ୍ ଚିଚ୍ଚୁଘି ସେକ୍ନାତି ବାହ୍ରି ଉର୍ଖିକିରି ଆସ୍କି ହେଖ୍ଖାନୁ ଗୁଢ଼ିୟା ରାଚାକେରା। 4ଯେତ୍କବାକେନ୍ ଆସ୍ତା ଆଲାର୍ ନେର୍ରୁବନ୍ ଆସ୍କି ହେଖ୍ଖାନୁ ଗୁଢ଼ିୟାରାଚ୍କାନ୍ ଏରିୟାର୍, ତା ଆବ୍ଡ଼ାର୍ ତାମ୍ତାମ୍ କାଚ୍ନେଖ୍ରାଗେ ଲାଗ୍ଗିୟାର୍, “ସତ୍ତୁନିନ୍ ଇ ଆଲାସ୍ ଆଲ୍ପିଟୁ ରସ୍, ଯଦିଭି ଇସ୍ ସାମ୍ଧୁର୍ତି ବାଛ୍ରାସ୍ କେରାସ୍ ହାଲେହି ନ୍ୟାୟ ଇସିନ୍ ଉଜ୍ଜାଗେ ମା ଚିଚ୍ଚା।” 5ଲେକିନ୍ ଆସ୍ ନେର୍ରୁବନ୍ ଚିଚ୍ଚୁନୁ ହେତ୍ତେ ଚିଚ୍ଚାସ୍ ଆରୁ ଆସ୍କି ଏନ୍ଦେର୍ହି ହାନି ମା ମାନ୍ଚା। 6ଲେକିନ୍ ଆବ୍ଡ଼ାର୍ ସୋଚାଲିୟାର୍ କା ଆସ୍ ପୁହ୍ରସ୍କସ୍ ଚାହେ ତା ଅହ୍ନାସାରେନ୍ ଖାତ୍ରିକିରି ଖିଅସ୍କସ୍, ଲେକିନ୍ ଯେତ୍କବାକେନ୍ ଆବ୍ଡ଼ାର୍ ଢେର୍ ଡେରିତକ୍ ଏରାଲିୟାର୍ ଆରୁ ଏରିୟାର୍ କା ଆସ୍କି ଏନ୍ଦେର୍ହି ହାନି ମାଲ୍ଲାମାନୁ ତା ଆବ୍ଡ଼ାର୍ ତାହ୍ମା ବିଚାର୍ ବାଦ୍ଲିକିରି ତେଙ୍ଗିୟାର୍, “ଇସ୍ତା ଅଣ୍ଟା ଦେବ୍ତାସ୍।”
7ଆ ଜାଗାଘି ଖଣେମଣେ ଆ ଟାପୁନ୍ତା ମୁଖିଆ ପୁବଲିୟୁସ୍କି ହାଲ୍ଲୁ ରାଚା। ଆସ୍ ତାଙ୍ଘା ଆଡ଼୍ପା ହୋଇକିରି ତିନ୍ ଦିନ୍ତକ୍ ଏମାନ୍ ପାହି ଏରିୟାସ୍। 8ପୁବଲିୟୁସ୍କି ତାମ୍ବାସ୍ ନାଣି ଆରୁ ସୁଲ୍ଝାଡ଼ାତି ନାଟ୍ରୁନୁ ଖାତ୍ର୍କାଚାସ୍। ପାଉଲୁସ୍ ଆସିନ୍ ଏରାଗେ ଉଲା କର୍ଚାସ୍, ଆରୁ ଆସ୍କି ଚାହା କାଇକିରି ବିନ୍ତି କାମ୍ଚାସ୍ ଆନ୍ତିନ୍ ଆସ୍କି ମିଆଁ ହେଖ୍ଖା ଉଇକିରି ଆସିନ୍ ଚାଙ୍ଗା କାମ୍ଚାସ୍। 9ଯେତ୍କବାକେନ୍ ଏନ୍ନେ ମାନ୍ଚାତା ଆ ଟାପୁନ୍ତା ବାକି ବେହ୍ମରିୟା ଆଲାର୍ ବାର୍ଚାର୍ ଆରୁ ଆବ୍ଡ଼ାର୍ ବାନେ ମାନ୍ଚାର୍ କେରାର୍। 10ଆବ୍ଡ଼ାର୍ ଏହ୍ମାଏ ବହୁତ୍ ଆଦର୍ମାଇନ୍ କାମ୍ଚାର୍, ଆରୁ ଏହ୍ମା ବୁଙ୍ଗ୍ନା ସାମାୟନୁ ଏମାଗେ ଯେତ୍କ ଜିନିଷ୍ ଦାର୍କାର୍ ରାଚା ଆବନ୍ ଜାହାଜ୍ନୁ ଉଇୟେର୍ଚାର୍।
ମାଲ୍ଟା ଟାପୁନ୍ତି ପାଉଲୁସ୍ ରୋମ୍ଗେ କାଲ୍ଦାସ୍
11ତିନ୍ ମାସ୍ଘି ପାଛ୍ଲି ଏମ୍ ସିକାନ୍ଦାରିଆଘି ଅଣ୍ଟା ଜାହାଜ୍ନୁ କେର୍କାମ୍। ଆ ଜାହାଜଦ୍ ପାଇଁୟା ଉଲ୍ଲା ଇ ଟାପୁନୁ ରୁକର୍କିଚା ଆରୁ ଜାହାଜ୍ଘି ଆଘ୍ଲିତାରା ଯାଅଁଣା ଭାଇର୍ଘି ଚିହ୍ନା ରାଚା। 12ସୁର୍କୂସାନୁ ଆଣସିକିରି ଏମ୍ ଆସାନ୍ ତିନ୍ ଦିନ୍ତକ୍ ରାଚ୍କାମ୍। 13ଆସ୍ତି ଏମ୍ ଜାହାଜ୍ ଦ୍ୱାର୍ନୁ ରେଗୀୟମ୍ଗେ ବାର୍ଚ୍କାମ୍, ଆରୁ ଆଦ୍ଘି ନାନ୍ନୁ ଉଲ୍ଲା ଦକ୍ଷିଣ୍ ହାୱା ବାର୍ଚା, ହୁଦ୍ଘିଲାଗାନ୍ ଏମ୍ ଦୁସ୍ରା ଉଲ୍ଲା ପୁତିୟୁଲିଗେ ବାର୍ଚ୍କାମ୍। 14ଆସାନ୍ ଏମାଗେ କେତ୍କ ଲୋକ୍ ଭାଇଜାମାର୍ ହାଖ୍ଖରାର୍ ଆରୁ ଆବ୍ଡ଼ାର୍ଘି ତେଙ୍କାତି ଏମ୍ ଆସାନ୍ ସାତ୍ଦିନ୍ତକ୍ ରାଚ୍କାମ୍; ଆରୁ ଏନ୍ନେନ୍ ଏମ୍ ରୋମ୍ଗେ ବାର୍ଚ୍କାମ୍। 15ଆସ୍ତା ଭାଇଜାମାର୍ ଏହ୍ମା ଖବର୍ ମେନିକିରି ଆପ୍ପୀୟସ୍କି ହାଟ୍ଟେ ଆରୁ ମୁନ୍ଟା ଭାଡ଼ା ଆଡ଼୍ପାତକ୍ ଏମାନ୍ ଭେଁଟ୍ କାମାଗେ ବାର୍ଚାର୍, ତା ଇବନ୍ ଏରିକିରି ପାଉଲୁସ୍ ପାର୍ମେଶ୍ୱାର୍ସ୍କି ଧାନ୍ୟାବାଦ୍ କାମ୍ଚାସ୍ ଆରୁ ଧିରାଜ୍ ଧାର୍ଚାସ୍।
16ଯେତ୍କବାକେନ୍ ଏମ୍ ରୋମ୍ଗେ ଆଣ୍ସ୍କାମ୍ ତା ପାଉଲୁସ୍ସିନ୍ ଅଣ୍ଟା ସିପାହୀସ୍ ଗାନେ ଏକାସ୍ କା ଆସ୍କି ଏରାହଜା କାମାଲିୟାସ୍, ଭିନେ ରାଗେ ଅନୁମତି ହାଖ୍ଖରା କେରା।
ରୋମ୍ନୁ ପାଉଲୁସ୍
17ତିନ୍ ଦିନ୍ଘି ପାଛ୍ଲି ପାଉଲୁସ୍ ୟାହୁଦୀର୍ଘି ମୁଖ୍ୟା-ମୁଖ୍ୟା ଆଲାରିନ୍ ମେଁହିୟାସ୍ ଆରୁ ଯେତ୍କବାକେନ୍ ଆବ୍ଡ଼ାର୍ ଅଣ୍ଟାସାନ୍ ଠୁଡ଼ିୟାରାଚାର୍ ତା, ଆସ୍ ତେଙ୍ଗିୟାସ୍, “ହେ ଭାଇ ଜାମାରୋ, ଏନ୍ ନିଜର୍ ଆଲାର୍ଘି ବିରୁଦ୍ଧନୁ ଆରୁ ନିଜର୍ ପୁର୍ଖାର୍ଘି ରୀତିନୀତି ବିରୁଦ୍ଧନୁ ଏନ୍ଦେର୍ହି ମାଲ୍ଲା କାମୁନ୍ ହାଲେହି ଯେରୁଶାଲେମ୍ତି ଏନ୍ ବନ୍ଦୀ ମାନିକିରି ରୋମୀୟର୍ଘି ହେଖ୍ଖାନୁ ସୋଁପ୍ଚେଇଚାର୍। 18ଆବ୍ଡ଼ାର୍ ଏଙ୍ଗାନ୍ ଯାଁଚ୍ କାମିକିରି ଆମ୍ବା ଚିୟାଗେ ବେଦ୍ଦାଲିୟାର୍, ଏନ୍ଦେର୍ଗେକା ଏଙ୍ଘାଏନୁ ମରନ୍ ଦଣ୍ଡ୍ ହାଖ୍ଖନାଘି ଲାଇଗ୍ ଏନ୍ଦେର୍ହି ଦୋଷ୍ ମାଲ୍ଲାରୁଦ୍। 19ଲେକିନ୍ ଯେତ୍କବାକେନ୍ ୟାହୁଦୀର୍ ଇଦ୍ଘି ବିରୁଦ୍ଧନୁ ତେଙ୍ଗାଗେ ଲାଗ୍ଗିୟାର୍ ତା ଏଙ୍ଗାଗେ କାଇସର୍ସ୍କି ଦୁହାଇ ଚିୟାଗେ ଖାତ୍ରା: ଇଦ୍ଘିଲାଗାନ୍ ମାଲ୍ଲା କା ଏଙ୍ଗା ନିଜର୍ ଆଲାର୍ଘି ମିଆଁ ଏନ୍ଦ୍ରିନ୍ ଦୋଷ୍ ଲାଗାବାନା ରାଚା। 20ଇଦ୍ଘିଲାଗାନ୍ ଏନ୍ ନିମାନ୍ ମେଁହ୍କାଦାନ୍ କା ନିମାନ୍ ଭେଁଟ୍ ମାନନ୍ ଆରୁ କାତ୍ଥାବାର୍ତ୍ତା କାମନ୍; ଏନ୍ଦେର୍ଗେକା ଇସ୍ରାଏଲ୍ ଜାମାର୍ଘି ଭାର୍ଷାଘି ଲାଗାନ୍ ଏନ୍ ଇ ସିକ୍ଡ଼ିତି ହିର୍କାନ୍ କେର୍କାଦାନ୍।” 21ୟାହୁଦୀ ଜାମାର୍ଘି ମୁଖ୍ୟାର୍ ପାଉଲୁସ୍ସିନ୍ ତେଙ୍ଗିୟାର୍, “ଏମ୍ ନିଙ୍ଘା ବାରେନୁ ୟାହୁଦା ଜାମାର୍ସ୍ତି ଏନ୍ଦେର୍ହି ଚିଠି ମାଲ୍ଲା ହାଖ୍ଖୁମ୍ ଆରୁ ନା ଭାଇ ଜାମାର୍ସ୍ତି ନେଦ୍ହି ବାରିକିରି ନିଙ୍ଘା ବାରେନୁ ଏନ୍ଦେର୍ହି ଖବର୍ ମାଲ୍ଲା ଚିଉର୍ ଆରୁ ନା ଏନ୍ଦେର୍ହି ଖାରାପ୍ କାତ୍ଥା ତେଙ୍ଗୁର୍। 22ଲେକିନ୍ ନିଙ୍ଘା ସୋଚ୍ ଏନ୍ଦେର୍? ଆବନ୍ ଏନ୍ ନିଙ୍ଘାସ୍ତି ମେନାଗେ ବେଦ୍ଦାଲ୍ଦାମ୍ ଏନ୍ଦେର୍ଗେକା ଏମ୍ ଆହାଲ୍ଦାମ୍ କା ଜାମା ଆଡ୍ଡାନୁ ଇ ଦଲ୍ଘି ବିରୁଦ୍ଧନୁ ଆଲାର୍ କାତ୍ଥା କାମାଲ୍ନାଏ।”
23ଆଙ୍ଗେନ୍ ଆବ୍ଡ଼ାର୍ ପାଉଲୁସ୍ଗାନେ ଅଣ୍ଟା ଉଲ୍ଲା ଉଇୟାର୍, ଆରୁ ଢେର୍ ଆଲାର୍ ଏକାସାନ୍ ଆସ୍ ରାଚାସ୍, ଆସାନ୍ ବାରିକିରି ଠୁଡ଼ିୟାରାଚାର୍ ଆରୁ ଆସ୍ ପାଇରିନ୍ତି ବିଡ଼ି ଅକ୍କନାତକ୍ ପାର୍ମେଶ୍ୱାର୍ସ୍କି ରାଜୀଘି ବାରେ ସାକ୍ଷୀ ଚିତେ ଆରୁ ମୁଶାସ୍କି ନିୟମ୍ ଆରୁ ନାବୀର୍ଘି ବହିନ୍ତି ଯୀଶୁସ୍କି ବାରେନୁ ଆବ୍ଡ଼ାରିନ୍ ବୁଝାବାଗେ ଲାଗ୍ଗିୟାସ୍। 24ଆଙ୍ଗେନ୍ କେତ୍କ ଲୋକ୍ ଆସ୍କି ତେଙ୍କା କାତ୍ଥାବନ୍ ମାନ୍ଚାର୍ କେରାର୍ ଆରୁ କେତ୍କ ଲୋକ୍ ବିଶ୍ଵାସ୍ ମା କାମ୍ଚାର୍। 25ଯେତ୍କବାକେନ୍ ଆବ୍ଡ଼ାର୍ ତାମ୍-ତାମ୍ ଏକ୍ମତ୍ ମା ମାନ୍ଚାର୍ ଆରୁ ଆସ୍ତି ବୁଙ୍ଗାଗେ ଲାଗ୍ଗିୟାର୍ ତା ପାଉଲୁସ୍ ଇ ଅଣ୍ଟା କାତ୍ଥା ତେଙ୍ଗିୟାସ୍: “ପାବିତାର୍ ଆତ୍ମାଦ୍ ଇଶାୟାହ୍ସ୍ ନାବୀସ୍କି ଦ୍ୱାର୍ନୁ ନିହ୍ମା ପୁର୍ଖାର୍ରିନ୍ ଠିକ୍ନିନ୍ ତେଙ୍ଗିୟା, 26‘କାଇକିରି ଇ ଆଲାରିନ୍ ତେଙ୍ଗା କା ନିମ୍ ମେନ୍ତେତା ରର୍ ଲେକିନ୍ ମା ବୁଝରର୍ ଆରୁ ଏର୍ତେ ତା ରର୍ ଲେକିନ୍ ମା ଆହର୍; 27ଏନ୍ଦେର୍ଗେକା ଇ ଆଲାର୍ ବୁଝ୍ରାଗେ କୋଶିଷ୍ ମା କାମ୍ନାଏ ଆରୁ ଆବ୍ଡ଼ାର୍ ମେନାଗେ ମା ବେଦ୍ଦନାଏ, ଆରୁ ଆବ୍ଡ଼ାର୍ ନିଜର୍ ହାନ୍ନୁନ୍ ବନ୍ଦ କାମ୍ଚେଇଚିଚ୍କାନାଏ, ଏନ୍ନେ ମା ମାନ୍ନାଦ୍ କା ଆବ୍ଡ଼ାର୍ ହାନ୍ନୁତି ଏରର୍ ଆରୁ ହେବ୍ଦାତି ମେନର୍ ଆରୁ ମନ୍ତି ବୁଝ୍ରର୍ ଆରୁ କିର୍ରର୍ ବାରର୍ ଆରୁ ଆବ୍ଡ଼ାରିନ୍ ଏନ୍ ଚାଙ୍ଗା କାମନ୍।’
28ହୁଦ୍ଘିଲାଗାନ୍ ନିମ୍ ଆହା କା ପାର୍ମେଶ୍ୱାର୍ସ୍କି ଇ ମୁକ୍ତି ଯୋଜ୍ନାବନ୍ ଦୁସ୍ରା ଜାତିୟାର୍ଘି ଚାହାନୁ ତାଇୟା କେର୍କିଚି ଆରୁ ଆବ୍ଡ଼ାର୍ ମେନର୍।” 29ଯେତ୍କବାକେନ୍ ପାଉଲୁସ୍ ଏନ୍ନେ ତେଙ୍ଗିୟାସ୍ ତା ୟାହୁଦୀଜାମାର୍ ତାହ୍ମା-ତାହ୍ମା ଭିତ୍ରେ ବହୁତ୍ ଝାଗ୍ଡ଼ା କାମାଗେ ଲାଗ୍ଗିୟାର୍ ଆରୁ ଆସ୍ତି ବୁଙ୍ଗେଇଚାର୍।
30ଆସାନ୍ ପାଉଲୁସ୍ ପୁରା ଦୁଇ ବଛର୍ତକ୍ ଭାଡ଼ା ଆଡ଼୍ପାନୁ ରାଚାସ୍, 31ଆରୁ ଏକାର୍ ଆସ୍କି ଚାହାଗେ ବାରାଲିୟାର୍, ଆବ୍ଡ଼ା ଜାମାର୍ଗାନେ ମିଲ୍ରାଲିୟାସ୍ ଆରୁ ବିନା ରୋକ୍ଟୋକ୍ ଆରୁ ସାହସ୍ତି ପାର୍ମେଶ୍ୱାର୍ସ୍କି ରାଜୀଘି ପ୍ରଚାର୍ କାମ୍ତେ ରାଚାସ୍ ଆରୁ ପ୍ରାଭୁ ଯୀଶୁ ଖ୍ରୀସ୍ତ୍କି ବାରେ ଶିଖାବାତେ ରାଚାସ୍।