ଯୋହାନ୍ସ୍କି ଲେଖ୍ଚ୍କା ତିସ୍ରା ଚିଠି
ଇ ବହିଘି ପରିଚୟ
ଯୋହାନ୍ସ୍କି ଲେଖ୍ଚ୍କା ତିସ୍ରା ଚିଠି “ପୁର୍ଖାର୍” ଘି ତାର୍ତି ମଣ୍ତ୍ଲୀନ୍ତା ଅଣ୍ଟା ଆଗୁୱାସ୍ ଗାୟୁସ୍ଗେ ଲେଖାକେର୍କିଚା। ଲେଖକସ୍ ଗାୟୁସ୍ସିନ୍ ଇଦ୍ଘିଲାଗାନ୍ ନାମେ କାମ୍ଦାସ୍, ଏନ୍ଦେର୍ଗେକା ଆସ୍ ଦୁସ୍ରା ଖ୍ରୀସ୍ତ୍ ବିଶ୍ୱାସୀର୍ଘି ବହୁତ୍ ମଦେତ୍ କାମ୍ଦାସ୍, ହୁଦ୍ଘି ସାଙ୍ଗେ-ସାଙ୍ଗେ ଦିୟୁତ୍ରିଫେସ୍ ନାମେଘି ଅଣ୍ଟା ଆଲାସ୍ସ୍ତି ସାବ୍ଧାନ୍ ରାଗେ ଚେତାବନୀହି ଚିଦାସ୍।
ରୂପ୍-ରେଖା:
ଇବହିଘି ପରିଚୟ ୧-୪
ଗାୟୁସ୍କି ପ୍ରଶଂସା ୫-୮
ଦିୟୁତ୍ରିଫେସ୍କି ଭର୍ସନା ୯,୧୦
ଦୀମିତ୍ରୀୟୁସ୍କି ସରାହନା ୧୧,୧୨
ଆଖ୍ରୀ କାତ୍ଥା ୧୩-୧୫
1ଯୋହାର୍
1ମଣ୍ତ୍ଲୀନ୍ତା ଆଗୁୱାନ୍ ଏନ୍, ଏନ୍ ପ୍ୟାରା ସାଙ୍ଗେ ଗାୟୁସ୍କି ନାମେନୁ ଚିଠି ଲେଖାଲ୍ଦାନ୍, ଏକାସିନ୍ କା ଏନ୍ ସତ୍ତୁନ୍ ବାନେ ହାଖ୍ଖଦାନ୍। 2ହେ ଏଙ୍ଘାଏ ବାନେ ସାଙ୍ଗେ, ଏନ୍ ବିନ୍ତି କାମାଲ୍ଦାନ୍ କା ଏସ୍କେ ନିନ୍ ଆତ୍ମିକ୍ ଉନ୍ନତି କାମ୍ତେ ବାରାଲ୍ଦାର୍, ଆନ୍ନେନିନ୍ ନିନ୍ ଜାମା କାତ୍ଥାନୁ ଆଘ୍ଲି ବାଢ଼୍ର୍ତେ କାଲା, ଆରୁ ବାନେକିରି ରା। 3ଏନ୍ଦେର୍ଗେକା ଯେତ୍କବାକେନ୍ ନାହ୍ମା ବିଶ୍ୱାସୀ ଭାଇଜାମାର୍ ବାରିକିରି ନିଙ୍ଘାଏ ଆ ସତ୍ତୁଘି ସାକ୍ଷୀ ଚିଚ୍ଚାର୍, ଏକାନୁ କା ନିନ୍ ସତ୍ତୁନିନ୍ ଚାଲ୍ର୍ରାଲ୍ଦାଏ ତା ଏନ୍ ବହୁତ୍ ଖୁସୀ ମାନ୍ଚ୍କାନ୍। 4ଏଙ୍ଗା ଇଦ୍ଘିନ୍ତି ବାଡ଼୍କା ଖୁସୀ ଆରୁ ଏନ୍ଦେର୍ନୁହି ମାଲ୍ଲାଦିନ୍ କା ଏନ୍ ମେନ୍ଚ୍କାନ୍ କା ଏଙ୍ଘାଏ ହାଦ୍ଦୁର୍ ସତ୍ତୁନୁ ଚାଲ୍ରାଲ୍ନାଏ।
ଗାୟୁସ୍କି ନାମେ କାମ୍ନା
5ହେ ଏଙ୍ଘାଏ ବାନେ ସାଙ୍ଗେ, ନିନ୍ ନାହ୍ମା ଭାଇ ଜାମାର୍ଘି, ଭାଲାଇଘି ଲାଗାନ୍ ଏନ୍ଦ୍ରିନ୍ କାମ୍ଦାୟ, ଆବନ୍ ନିନ୍ ବିଶ୍ୱାସ୍ତି କାମ୍ଦାୟ। ଯଦିଭି ଆବ୍ଡ଼ାର୍ ନିଙ୍ଘାଲାଗାନ୍ ପର୍ଦେଶୀ ରାନାଏ। 6ଆବ୍ଡ଼ାର୍ ମଣ୍ତ୍ଲୀଘି ଚାହାନୁ ନିଙ୍ଘାଏ ବାନେ ହାଖ୍ଖନାଘି ସାକ୍ଷୀ ଚିଚ୍କାଦାସ୍। ଯଦି ନିନ୍ ଆବ୍ଡ଼ାରିନ୍ ହନ୍ନେନ୍ ବିଦା କାମୟ ଏସ୍କେ କା ପାର୍ମେଶ୍ୱାର୍ସ୍କି ଆଲାର୍ଘି ଲାଗାନ୍ ଉଚିତ୍ ରାଇଦ୍ ତା ବାନେ କାମୟ। 7ଏନ୍ଦେର୍ଗେକା ଆବ୍ଡ଼ାର୍ ଖ୍ରୀସ୍ତ୍ସ୍କି ନାମେଘି ଲାଗାନ୍ ଉର୍କାନାଏ ଆରୁ ଦୁସ୍ରା ଜାତିୟାର୍ସ୍ତି ଏନ୍ଦେର୍ହି ମା ହନାଏ। 8ହୁଦ୍ଘିଲାଗାନ୍ ନାହ୍ମା ବିଶ୍ୱାସୀର୍ଗେ ଏନ୍ନେ ଆଲାରିନ୍ ମଦେତ୍ କାମ୍ନା କାତ୍ଥା, ତାକା ନାମ୍ହି ସତ୍ତୁ ନାଲ୍ଖୁନୁ ଆବ୍ଡ଼ାର୍ ଗାନେ ସାଙ୍ଗେନ୍ ନାଲ୍ଖୁ କାମ୍ନାବାଲା ମାନତ୍।
ଦିୟୁତ୍ରିଫେସ୍ ଆରୁ ଦୀମିତ୍ରୀୟୁସ୍
9ଏନ୍ ମଣ୍ତ୍ଲୀଗେ ଅଣ୍ଟା ଚିଠି ଲେଖ୍ଚ୍କାଚ୍କାନ୍, ଲେକିନ୍ ଦିୟୁତ୍ରିଫେସ୍ ଏକାସ୍ କା ଆବ୍ଡ଼ାର୍ଘି ମୁଖିଆ ମାନା ଚାହାଁଲିୟାସ୍। ଆସ୍ ଏଙ୍ଘା କାତ୍ଥାନ୍ ଗ୍ରହନ୍ ମା କାମ୍ଦାସ୍। 10ଆଦ୍ଘି ଲାଗାନ୍ ଏନ୍ ଯେତ୍କବାକେନ୍ ନିହ୍ମାସାନ୍ ବାରନ୍ ତା ଆସ୍କି କାମ୍ଚ୍କା ନାଲ୍ଖୁଘି ବାରେ ମନେ କାମ୍ତନ୍ କା ଆସ୍ ନାହ୍ମାଏ ବାରେନୁ ଖାରାପ୍ କାତ୍ଥା ତେଙ୍ଗିକିରି ନାହ୍ମାଏ ଅପ୍ମାନ୍ କାମ୍ଦାସ୍ ଆରୁ ଏଙ୍ଘା ବାରେ ଝୁଟ୍ଟ୍ କାତ୍ଥା ତେଙ୍ଗ୍ଦାସ୍; ଆରୁ ଏତ୍କନୁ ହି ଆସ୍ ଖୁସୀ ମା ମାନ୍ଦାସ୍। ବିଶ୍ୱାସୀ ଭାଇର୍ଘି ମାଇନ୍ ମା କାମ୍ଦାସ୍, ଲେକିନ୍ ଏକାର୍ ଏନ୍ନେ କାମା ବେଦ୍ଦନାଏ ଆବ୍ଡ଼ାରିନ୍ହି ମାନା କାମ୍ଦାସ୍ ଆରୁ ଆବ୍ଡ଼ାରିନ୍ ମଣ୍ତ୍ଲୀନ୍ତି ଅଥ୍ର୍ଦାସ୍ ଚିଦାସ୍।
11ହେ ଏଙ୍ଘାଏ ସାଙ୍ଗେ, ନିନ୍ ଖାରାପ୍ଘି ଅନୁସରଣ୍ ଆମା କାମା ଲେକିନ୍ ଭାଲାଇଘି ଅନୁସରଣ୍ କାମା। ଏକାର୍ ଭାଲାଇ କାମ୍ନାଏ, ଆବ୍ଡ଼ାର୍ ପାର୍ମେଶ୍ୱାର୍ସ୍କି ତାର୍ତି ରାନାଏ; ଲେକିନ୍ ଏକାର୍ ଖାରାପ୍ କାମ୍ନାଏ ଆବ୍ଡ଼ାର୍ ପାର୍ମେଶ୍ୱାର୍ସିନ୍ ମାଲ୍ଲା ଏରୁର୍। 12ଦୀମିତ୍ରୀୟସ୍କି ବାରେନୁ ଯେତ୍କର୍ ସାକ୍ଷୀ ଚିଚ୍କାନାଏ, ସତ୍ତୁଦ୍ହି ନିଜେନିନ୍ ସାକ୍ଷୀ ଚିଚ୍ଚକିଚି; ଆରୁ ଏମ୍ହି ସାକ୍ଷୀ ଚିଆଲ୍ଦାମ୍ ଆରୁ ନିନ୍ ଆହ୍ଦାଏକା ଏହ୍ମାଏ ସାକ୍ଷୀଦ୍ ସତ୍ତୁଦ୍।
ଆଖ୍ରୀ ଯୋହାର୍
13ଏଙ୍ଗା ନିଙ୍ଗାଗେ ବହୁତ୍କିଛି ଲେଖ୍ନାତା ରାଇ, ଲେକିନ୍ କଲମ୍ ଆରୁ ସେହିଇତି ଲେଖାଗେ ମା ଚାହଁଦାନ୍। 14ଲେକିନ୍ ଏଙ୍ଘାଏ ଭାର୍ଷା ରାଇ କା ନିଙ୍ଗାନ୍ ଚାଁଣେ ଭେଁଟ୍ ମାନନ୍, ଆଙ୍ଗେନ୍ ନାମ୍ ଆମ୍ନେ ସାମ୍ନେ କାତ୍ଥାବାର୍ତ୍ତା କାମତ୍।
15ନିଙ୍ଗାଗେ ଶାନ୍ତି ହାଖ୍ଖର୍ତେ ରାନାଦ୍, ଇସ୍ତା ସାଙ୍ଗେର୍ ନିମାନ୍ ଯୋହାର୍ ବାନାଏ। ଆସ୍ତା ଜାମା ସାଙ୍ଗେର୍ଘି ନାମେ ହୋଇକିରି ଯୋହାର୍ ତେଙ୍କେ ଚିକେ।