ତିମଥିଉସ୍କି ନାମେନୁ ଯୀଶୁ ଖ୍ରୀସ୍ତ୍କି ଖାସ୍ଚେଲା ପାଉଲୁସ୍କି ଦୁସ୍ରା ଚିଠି
ବହିଘି ପରିଚୟ
ଯେତ୍କବାକେନ୍ ପାଉଲୁସ୍ ରୋମ୍ତା ଜେହେଲ୍ନୁ ରାଚାସ୍, ହତ୍କବାକେନ୍ ଇ ଚିଠିବନ୍ ତିମଥିଉସ୍କେ ଲେଖ୍ଚ୍କାଚାସ୍। ରୋମାନ୍ ସିପାହୀଜାମାର୍ ପାଉଲୁସ୍ସିନ୍ ପିଟାଗେ ଜେହେଲ୍ଗେ ତାଇୟାର୍। ପାଉଲୁସ୍ ଯେତ୍କବାକେନ୍ ଜେହେଲ୍ନୁ ରାଚାସ୍ ତା ଆସ୍ ଜେହେଲ୍ତି ଉର୍ଖାଗେ ବହୁତ୍ କୋଶିଷ୍ କାମ୍ଚାସ୍, ଲେକିନ୍ ଆସ୍ ଉର୍ଖା ପଲ୍ଲିୟାସିନ୍। ପାଉଲୁସ୍ ଆହାଲିୟାସ୍ କା ଆସ୍ ଚାଁଣେ ଖିଅସ୍କସ୍। ଆସ୍ ବହୁତ୍ ଇଚ୍ଛା କାମାଲିୟାସ୍ କା ତାଙ୍ଘା ଖିନାଘି ଆଘ୍ଲି ତିମଥିଉସ୍ ତାଙ୍ଘା ଚାହାଗେ ବାରସ୍। ଆରୁ ଆସ୍-ଆସ୍ଗାନେ କେତ୍କ ସାମାୟ ବିତାବସ୍। ଏନ୍ନେ ପରିସ୍ଥିତିନୁ ପାଉଲୁସ୍ ଇ ଚିଠିବନ୍ ଖ୍ରୀଷ୍ଟାଦ୍ଦ ୬୭ ନୁ ଲେଖ୍ଚ୍କାଚାସ୍। ପାଉଲୁସ୍ସିନ୍ ପ୍ରଚାର୍ କାମ୍ନା ନାଲ୍ଖୁନୁ ମଦେତ୍ କାମୁ ତିମଥିଉସ୍ସିନ୍ ପାଉଲୁସ୍ ସାଲାହ୍ ଚିଦାସ୍। ଇଦ୍ଘି ମୁଖ୍ୟା ବିଷୟ ଧିରାଜ୍ଦ୍। ପାଉଲୁସ୍ ତିମଥିଉସ୍ସିନ୍ ସାଲାହ୍ ଆରୁ ଉତ୍ସାହ ଚିଦାସ୍ କା ସାତାୱାଟ୍ ଆରୁ ବିରୋଧ୍ କାମ୍ଚ୍କୁନ୍ହି ଆସ୍ ବିଶ୍ୱାସ୍ଘି ଲାଇଗ୍ ମାନିକିରି ଯୀଶୁ ଖ୍ରୀସ୍ତ୍କି ସାକ୍ଷୀ ଚିତେ ରସ୍। ସୁସାମାଚାର୍ ଆରୁ ପାଚ୍ଚା ନିୟମ୍ଘି ସତ୍ତୁ ଶିକ୍ଷାନୁ ମାଜ୍ବୁତ୍ ରସ୍। ଆରୁ ଯୀଶୁ ଖ୍ରୀସ୍ତ୍କି ବଚନ୍ବନ୍ ବାନେକିରି ଶିଖାବାନାବାଲା ଆରୁ ପାର୍ଚାର୍ଘି ରୂପ୍ନୁ ନିଜର୍ କର୍ତ୍ତବ୍ୟବନ୍ କାମ୍ତେ ରସ୍।
ତିମଥିଉସ୍ସିନ୍ ବିଶେଷ୍କିରି ମୁର୍ଖ୍ର୍ଘି ଫାଲ୍ତୁ ଝାଗ୍ଡ଼ା ଝାଟିସ୍ତି ବାଛ୍ରିକିରି ରାଗେ ଚେତାବନୀ ଚିଆ କେର୍କିଚି। ଇତ୍ତି ଏନ୍ଦେର୍ହି ଫାଏଦା ମା ମାନିଦ୍ ଲେକିନ୍ ମେନୁ ଆଲାର୍ଗେ ନାଶ୍ଘି କାରଣ୍ ମାନି।
ଇବ୍ଡ଼ାଜାମାନୁ ତିମଥିଉସ୍ସିନ୍ ନିଜେନିନ୍ ଲେଖକସ୍ ନିଜର୍ ଜୀବନ୍ ଆରୁ ଯୋଜ୍ନା-ଆସ୍କି ବିଶ୍ୱାସ୍, ସାହ୍ନାଘି ଶକ୍ତି, ବାନେ ହାଖ୍ଖନା, ଧିରାଜ୍, ଆରୁ ସାତାୱାଟ୍ଘି ସାମାୟନୁ ଦୁଃଖୁଘି ନମୁନାବନ୍ ମନେ କାମ୍ତା କେର୍କିଚି।
ରୂପ୍-ରେଖା
ଯୋହାର୍ ୧:୧,୨
ସ୍ତୁତି ଆରୁ ଉପ୍ଦେଶ୍ ୧:୩—୨:୧୩
ସାଲାହ୍ ଆରୁ ଚେତାବନୀ ୨:୧୪—୪:୫
ପାଉଲୁସ୍କି ନିଜର୍ ପରିସ୍ଥିତି ୪:୬-୧୮
ଆଖ୍ରୀ କାତ୍ଥା ୪:୧୯-୨୨
1ଯୋହାର୍
1ଏନ୍ ପାଉଲୁସ୍ ଆରୁ ପାର୍ମେଶ୍ୱାର୍ସ୍ ଏଙ୍ଗାନ୍ ତାଙ୍ଘା ଇଚ୍ଛାଘି ଅନୁସାର୍ ଖ୍ରୀସ୍ତ୍ ଯୀଶୁସ୍କି ଲାଗାନ୍ ଚାଜ୍ଜ୍କାଦାସ୍, ଏକାର୍ ଖ୍ରୀସ୍ତ୍ ଯୀଶୁସ୍କି ମିଆଁ ବିଶ୍ୱାସ୍ କାମ୍ନାଏ ଆବ୍ଡ଼ାର୍ଗେ ସବୁଦିନ୍ତା ଜୀବନ୍ ଚିୟାଗେ ପାର୍ମେଶ୍ୱାର୍ସ୍ ଏକା ପ୍ରତିଜ୍ଞା କାମ୍ଚ୍କାଦାସ୍, ଇଦ୍ଘି ବାରେନୁ ଆଲାରିନ୍ ବାତାବାଗେ ପାର୍ମେଶ୍ୱାର୍ସ୍ ଏଙ୍ଗାନ୍ ତାଏକାଦାସ୍। 2ହେ ଏଙ୍ଘା ହାଦ୍ଦୁ ତୀମଥିଉସ୍, ଏନ୍ ନିଙ୍ଗାଗେ ଇ ଚିଠିନ୍ ଲେଖାଲ୍ଦାନ୍:
ଆରୁ ଏନ୍ ବିନ୍ତି କାମାଲ୍ଦାନ୍ କା ବାଙ୍ଗ୍ ପାର୍ମେଶ୍ୱାର୍ସ୍ ଆରୁ ନାହ୍ମା ପ୍ରାଭୁ ଖ୍ରୀସ୍ତ୍ ଯୀଶୁସ୍ ନିଙ୍ଗାଗେ ଦାୟା, କ୍ରିପା, ଆରୁ ଶାନ୍ତି ଚିତେ ରସ୍।
ପାଉଲୁସ୍ ତିମଥିଉସ୍ସିନ୍ ଉତ୍ସାହିତ୍ କାମାଲ୍ଦାସ୍
3ଏନ୍ ପାର୍ମେଶ୍ୱାର୍ସ୍ସିନ୍ ଧାନ୍ୟାବାଦ୍ ଚିଆଲ୍ଦାନ୍ ଆରୁ ଆସ୍କି ସେବା ଏଙ୍ଘା ପୁର୍ଖାର୍ଘି ରୀତି ଅନୁସାର୍ ଶୁଦ୍ଧ୍ ମନ୍ତି କାମ୍ଦାନ୍, ଆରୁ ଏନ୍ ନିଙ୍ଘାଲାଗାନ୍ ଉଲ୍ଲାନ୍ ମାଁହାନ୍ ଲାଗାତାର୍ ବିନ୍ତି କାମ୍ଦାନ୍। 4ଏଙ୍ଘା ଜେହେଲ୍ କାନାବାକେନ୍ ନିନ୍ ବହୁତ୍ ଅହ୍ଲାଲ୍କାଏ ଆବନ୍ ମନେ କାମିକିରି ଏନ୍ ଉଲ୍ଲାନ୍ ମାଁହାନ୍ ନିଙ୍ଘାଗାନେ ଭେଁଟ୍ ମାନାଗେ ବହୁତ୍ ଇଚ୍ଛା କାମାଲ୍କାନ୍ ତାକା ଏନ୍ ଖୁସୀତି ଉଛୁଲାରନ୍କନ୍। 5ନିଙ୍ଘାଏ ଯୀଶୁ ଖ୍ରୀସ୍ତ୍ସ୍କି ମିଆଁ ଏକା ସତ୍ତୁ ବିଶ୍ୱାସ୍ ରାଇ ଆବନ୍ ଏନ୍ ମନେ କାମ୍ଦାନ୍, ଏକା ବିଶ୍ୱାସ୍ଦ୍ ପହ୍ଲେ ନିଙ୍ଘା ଆଜ୍ଜି ଲୋଇସ୍ ଆରୁ ନିଙ୍ଘା ଆୟାଙ୍ଗ୍ ଇଉନୀକେନୁ ରାଚା ଆରୁ ଏଙ୍ଘାଏ ଭାର୍ଷା ରାଇ କା ଆ ବିଶ୍ୱାସ୍ଦ୍ ନିଙ୍ଘାଏନୁ ହି ରାଇଦ୍। 6ହୁଦ୍ଘିଲାଗାନ୍ ଏନ୍ ନିଙ୍ଗାନ୍ ମନେ କାମ୍ତାଲ୍ଦାନ୍ କା ଯେତ୍କବାକେନ୍ ଏନ୍ ନିଙ୍ଘା ମିଆଁ ହେଖ୍ଖା ଉଇୟିକିରି ବିନ୍ତି କାମ୍ଚ୍କାନ୍ ହତ୍କବାକେନ୍ ପାର୍ମେଶ୍ୱାର୍ସ୍କି ଏକା ବାର୍ଦାନ୍ ନିଙ୍ଗାଗେ ହାଖ୍ଖର୍କିଚା ଆବନ୍ ଜାଲାବାକେ ଉଇକେ। 7ଏନ୍ଦେର୍ଗେକା ପାର୍ମେଶ୍ୱାର୍ସ୍ ନାମାଗେ ଏଲ୍ଚ୍ନାଘି ପାବିତାର୍ ଆତ୍ମା ମାଲ୍ଲା ଚୁସ୍, ଲେକିନ୍ ଶକ୍ତି, ବାନେ ହାଖ୍ଖନା, ଆରୁ ନିଜ୍କେ କାବୁନୁ ଉଇନାଘି ପାବିତାର୍ ଆତ୍ମା ଚିଚ୍କାଦାସ୍।
8ହୁଦ୍ଘିଲାଗାନ୍ ନାହ୍ମା ପ୍ରାଭୁସ୍କି ବାରେ ଦୁସ୍ରାରିନ୍ ଶୁଣାବାଗେ ଆମା ଲାଜରା, ଆରୁ ଏନ୍ ପ୍ରାଭୁସ୍କି ଲାଗାନ୍ ଜେହେଲ୍ନୁ ରାଦାନ୍ ହୁଦ୍ଘିଲାଗାନ୍ ଏଙ୍ଘାଗାନେ ଭେଁଟ୍ ମାନାଗେ ଆମା ଲାଜରା, ଲେକିନ୍ ପାର୍ମେଶ୍ୱାର୍ସ୍ ନିଙ୍ଗାଗେ ଏକା ଶକ୍ତି ଚିଚ୍କାଦାସ୍, ଆ ଶକ୍ତିତି ସୁସାମାଚାର୍ଘି ଲାଗାନ୍ ଏନ୍ ଏସ୍କେ ଦୁଃଖୁ ସାହାଲ୍ଦାନ୍ ଆନ୍ନେନ୍ ନିନ୍ହି ଦୁଃଖୁ ସାହା। 9ଆସିନ୍ ନାମାନ୍ ବାଛାବାଚ୍କାଦାସ୍ ଆରୁ ପାବିତାର୍ ଜୀବନ୍ ଉଜ୍ଜାଗେ ନାମାନ୍ ମେଁହେକାଦାସ୍। ନାହ୍ମା ବାନେ ନାଲ୍ଖୁ କାମ୍ଚ୍କାଘି ଲାଗାନ୍ ମାଲ୍ଲା; ଲେକିନ୍ ନାହ୍ମା ମିଆଁ ଦାୟା କାମିକିରି ତାଙ୍ଘା ଯୋଜ୍ନାବନ୍ ପୁରା କାମାଗେ ନାମାନ୍ ମେହ୍କାଦାସ୍, ଏନ୍ଦେର୍ଗେକା ଦୁନିଆଁଘି ସୁରୁଘି ପହ୍ଲେନ୍ତି ପାର୍ମେଶ୍ୱାର୍ସ୍ ତାଙ୍ଘା ଦାୟାତି ଖ୍ରୀସ୍ତ୍ ଯୀଶୁସ୍କି ଦ୍ୱାର୍ନୁ ଆ ମୁକ୍ତି ଚିୟାଗେ ଯୋଜ୍ନା କାମ୍ଚ୍କାଚାସ୍। 10ଲେକିନ୍ ଆକ୍କୁନ୍ ନାହ୍ମା ଉଦ୍ଧାର୍କାର୍ତ୍ତା ଖ୍ରୀସ୍ତ୍ ଯୀଶୁସ୍ ଦୁନିଆଁନୁ ବାର୍ଚାସ୍, ଆଙ୍ଗେନ୍ ଆ ଦାୟାବନ୍ ପ୍ରକଟ୍ କାମାକେରା, ଆ ଖ୍ରୀସ୍ତ୍ ଯୀଶୁସିନ୍ ମରନ୍ଘି ଶକ୍ତିବନ୍ ଖତମ୍ କାମ୍ଚେଇଚାସ୍, ଆରୁ ଯେତ୍କ ଆଲାର୍ ସୁସାମାଚାର୍ବନ୍ ଗ୍ରହନ୍ କାମ୍ଚାର୍, ଆବ୍ଡ଼ାର୍ଗେ ପାର୍ମେଶ୍ୱାର୍ସ୍ଗାନେ ସବୁଦିନ୍ଘି ଲାଗାନ୍ ଜୀବନ୍ ବିତାବାଗେ ମଉକା ଚିଚ୍ଚାସ୍। 11ଇ ସୁସାମାଚାର୍ବନ୍ ଫାଏଲାଗେ ପାର୍ମେଶ୍ୱାର୍ସ୍ ଏଙ୍ଗାନ୍ ପାର୍ଚାର୍, ଖାସ୍ଚେଲା ଆରୁ ଗୁରୁ ଲେଖା ଚାଜ୍ଜକାଦାସ୍। 12ହୁଦ୍ଘିଲାଗାନ୍ ଇବ୍ଡ଼ା ଜାମା ଦୁଃଖୁ ସାହାଲ୍ଦାନ୍, ହାଲେହି ମାଲ୍ଲା ଲାଜ୍ରୁନ୍, ଏନ୍ଦେର୍ଗେକା ଏନ୍ ନେକାନ୍ ବିଶ୍ୱାସ୍ କାମ୍ଚ୍କାଦାନ୍ ଆସିନ୍ ଏନ୍ ଆହ୍ଦାନ୍ ଆରୁ ଏନ୍ ପୁରା ବିଶ୍ୱାସ୍ କାମାଲ୍ଦାନ୍ କା ଏକା ସୁସାମାଚାର୍ବନ୍ ପାର୍ମେଶ୍ୱାର୍ସ୍ ଏଙ୍ଗାଗେ ଚିଚ୍କାଦାସ୍, ଆବନ୍ ଆସ୍କି ଆରୁଅହନ୍ ବାର୍ନାଘି ଉଲ୍ଲାତକ୍, ବାଛାବାଗେ ଶକ୍ତି ରାଇ।
13ଏକା ସତ୍ତୁ ଶିକ୍ଷା ନିନ୍ ଏଙ୍ଘାସ୍ତି ମେନ୍ଚ୍କାଦାଏ ଆବନ୍ ଆ ବିଶ୍ୱାସ୍ ଆରୁ ବାନେ ହାଖ୍ଖନାତି, ଏକାଦ୍ କା ଖ୍ରୀସ୍ତ୍ ଯୀଶୁସ୍କିନୁ ରାଇଦ୍ ଆବନ୍ ନିଜର୍ ନମୁନା କାମିକିରି ଉଇୟା। 14ନାହ୍ମାଏନୁ ରାନାବାଲା ପାବିତାର୍ ଆତ୍ମାଘି ଦ୍ୱାର୍ନୁ ନିନ୍ ଆ ସୁସାମାଚାର୍ଘି ରାଖ୍ବାଲୀ କାମା ଏକାନ୍ କା ନିଙ୍ଗାଗେ ସୋଁପାକେର୍କିଚି।
15ନିନ୍ ଆହ୍ଦାଏକା ଆସିଆ ରାଜୀନ୍ତା ଜାମା ବିଶ୍ୱାସୀର୍ ଏଙ୍ଗାନ୍ ଆମ୍ବେଚିଚ୍କାନାଏ। ଆବ୍ଡ଼ାର୍ଘି ଭିତର୍ନୁ ଫୁଗିଲୁସ୍ ଆରୁ ହିର୍ମୁଗିନେସ୍ ହି ରାନାଏ। 16ଅନୀସିଫରସ୍କି ପରିବାର୍ବନ୍ ପ୍ରାଭୁସ୍ ଦାୟା କାମ୍ନାସ୍, ଏନ୍ଦେର୍ଗେକା ଆସ୍ ବହୁତ୍ଥର୍ ଏଙ୍ଘାଏ ସାହସ୍ ବାଢ଼ାବାଚାସ୍ ଆରୁ ଯେତ୍କବାକେନ୍ ଏନ୍ ଜେହେଲ୍ନୁ ରାଚ୍କାନ୍ ତା ଏଙ୍ଘାଗାନେ ଭେଁଟ୍ ମାନାଗେ ମା ଲାଜରାସ୍। 17ଯେତ୍କବାକେନ୍ ଆସ୍ ରୋମ୍ ସହର୍ଗେ ବାର୍ଚାସ୍, ତା ବହୁତ୍ କୋଶିଷ୍ କାମିକିରି ଏଙ୍ଗାନ୍ ଭେଁଟ୍ ମାନ୍ଚାସ୍। 18ପ୍ରାଭୁସ୍ କାମ୍ନାସ୍ କା ନ୍ୟାୟଘି ଉଲ୍ଲା ପ୍ରାଭୁସ୍ ଆସ୍କି ମିଆଁ ଦାୟା କାମସ୍ ଆରୁ ଆସ୍ ଏକା-ଏକା ସେବା ନାଲ୍ଖୁ ଇଫିସୁସ୍ନୁ କାମ୍ଚ୍କାଦାସ୍ ଆବନ୍ତା ନିନ୍ ବାନେକିରି ଆହ୍ଦାଏ।
2ଖ୍ରୀସ୍ତ୍ ଯୀଶୁସ୍କି ବାନେ ସିପାହୀ
1ହୁଦ୍ଘିଲାଗାନ୍ ହେ ଏଙ୍ଘାଏ ହାଦ୍ଦୁ ବାବୁ, ଖ୍ରୀସ୍ତ୍ ଯୀଶୁସ୍ ନିଙ୍ଗା ଏକା କ୍ରିପା ଚିଚ୍କାଦାସ୍ ଆ କ୍ରିପାତି ଆତ୍ମିକ୍ ଜୀବନ୍ନୁ ସାହସୀ ମାନାକାଲା। 2ଏନ୍ ବହୁତ୍ ଆଲାର୍ଘି ଆଘ୍ଲି ପାର୍ମେଶ୍ୱାର୍ସ୍କି ବଚନ୍ ଶୁଣାବାନାନ୍ ନିନ୍ ମେନ୍ଚ୍କାଦାଏ, ଆବନ୍ନିନ୍ ଏକା ଆଲାର୍ ବିଶ୍ୱାସ୍ଘି ଲାଇଗ୍ ରାନାଏ ଆରୁ ଏକାର୍ ଦୁସ୍ରାରିନ୍ ଶିଖାବା ଅଙ୍ଗର୍, ଏନ୍ନେ ଆଲାର୍ଗେ ଇବ୍ଡ଼ା ଜାମାନ୍ ସୋଁପାଚା।
3ଖ୍ରୀସ୍ତ୍ ଯୀଶୁସ୍କି ଅଣ୍ଟା ବାନେ ସିପାହୀସ୍ ଲେଖା ଏଙ୍ଘାଗାନେ ଦୁଃଖୁ ଉଠାବା। 4ଯେତ୍କବାକେନ୍ ଅଣ୍ଟା ଆଲାସ୍ ସିପାହୀ ନାଲ୍ଖୁ କାମ୍ଦାସ୍ ତା ଆସ୍ ଦୁନିଆଁନ୍ତା ଦୁସ୍ରା-ଦୁସ୍ରା ନାଲ୍ଖୁନ୍ ଧ୍ୟାନ୍ ମା ଚିଦାସ୍, ଲେକିନ୍ ଜାମାବାକେନ୍ ତାଙ୍ଘା ମୁଖ୍ୟା ଅଧିକାରୀସିନ୍ ଖୁସ୍ କାମାଗେ କୋଶିଷ୍ କାମ୍ଦାସ୍। 5ଆରୁ ଯଦି ଅଣ୍ଟା ଆଲାସ୍ କୁଦିୟାରାନାନୁ ଭାଗ୍ ହସ୍ତା ଆସ୍ ନିୟମ୍ ଅନୁସାର୍ ମା ଚାଲ୍ରସ୍ ହାଲେ ପୁରସ୍କାର୍ ମା ହାଖ୍ଖଦାସ୍। 6ଏକା ଚାଷୀ ଆଲାସ୍ କଠିନ୍ ପରିଶ୍ରମ୍ କାମ୍ଦାସ୍, ଫସଲ୍ତା ପହ୍ଲେ ଭାଗ୍ ଆସ୍କେ ହାଖ୍ଖର୍ନା କାତ୍ଥା। 7ଏନ୍ ଏକାନ୍ ତେଙ୍ଗାଲ୍ଦାନ୍ ଆବନ୍ ବିଚାର୍ କାମା, ପ୍ରାଭୁସ୍ ନିଙ୍ଗାଗେ ଜାମା କାତ୍ଥାନ୍ ବୁଝ୍ରାଗେ ଶକ୍ତି ଚସ୍।
ଜୀଉଠ୍ର୍କା ଖ୍ରୀସ୍ତ୍ସିନ୍ ବାରାବର୍ ମନେ କାମ୍ତେ ରା
8ଏଙ୍ଘା ତେଙ୍କା ସୁସାମାଚାର୍ଘି ଅନୁସାର୍ ଏକା ଖ୍ରୀସ୍ତ୍ ଯୀଶୁସ୍ ଦାଉଦ୍ସ୍କି ବାଉଁଶାନୁ ଜନମ୍ ମାନ୍ଚାସ୍ ଆରୁ କେଚ୍ଚକାର୍ସ୍ତି ଉଜ୍ଜିୟାସ୍ ଆ ଖ୍ରୀସ୍ତ୍ ଯୀଶୁସିନ୍ ମନେ କାମା। 9ଆ ସୁସାମାଚାର୍ଘି ଲାଗାନ୍ ଦୋଷୀର୍ ଲେଖା ଏନ୍ ଦୁଃଖୁ ସାହାଲ୍ଦାନ୍, ଆରୁ ଏତ୍କତକ୍ କା ଏନ୍ ଜେହେଲ୍ନୁ ହିର୍କାନ୍ କେର୍କାଦାନ୍; ଲେକିନ୍ ପାର୍ମେଶ୍ୱାର୍ସ୍କି ବଚନ୍ ମାଲ୍ଲା ହିରୁଦ୍। 10ହୁଦ୍ଘିଲାଗାନ୍ ଏକା ଆଲାରିନ୍ ପାର୍ମେଶ୍ୱାର୍ସ୍ ଚାଜ୍ଜ୍କାଦାସ୍ ଆବ୍ଡ଼ାର୍ଘି ଲାଗାନ୍ ଏନ୍ ଇବ୍ଡ଼ା ଦୁଃଖୁ ସାହାଲ୍ଦାନ୍, ଏସ୍କେ କା ଆବ୍ଡ଼ାର୍ହି ଖ୍ରୀସ୍ତ୍ ଯୀଶୁସ୍କି ଦ୍ୱାର୍ନୁ ମୁକ୍ତି ହାଖ୍ଖର୍ ଆରୁ ଏକା ଆଡ୍ଡାନୁ ପାର୍ମେଶ୍ୱାର୍ସ୍ଗାନେ ବହୁତ୍ ଆଦର୍ ହାଖ୍ଖରି, ଆ ଆଡ୍ଡାନୁ ଆବ୍ଡ଼ାର୍ ଜୀବନ୍ ବିତାବର୍। 11ଇ କାତ୍ଥା ସତ୍ତୁଦ୍ କା ଯଦି ନାମ୍ ଯୀଶୁ ଖ୍ରୀସ୍ତ୍ସ୍ଗାନେ କେଚ୍ଚକାତ୍ କେର୍କାଦାତ୍, ତା ଆସ୍ଗାନେ ଉଜ୍ଜତ୍ହି। 12ଯଦି ନାମ୍ ଧିରାଜ୍ ଧାରିକିରି ଯୀଶୁ ଖ୍ରୀସ୍ତ୍ସ୍ଗାନେ ଦୁଃଖୁ ସାହ୍ତେ ରତ୍ତା ନାମ୍ ଆସ୍ଗାନେ ଶାସନ୍ହି କାମତ୍। ଯଦି ନାମ୍ ଆସିନ୍ ଗ୍ରହନ୍ ମା କାମତ୍ ତା, ଆସ୍ହି ନାମାନ୍ ଗ୍ରହନ୍ ମା କାମସ୍। 13ଯଦି ନାମ୍ ବିଶ୍ୱାସ୍ କାମ୍ନାଘି ଲାଇଗ୍ ମା ରତ୍, ହାଲେହି ଆସ୍ ବିଶ୍ୱାସ୍ କାମ୍ନାଘି ଲାଇଗ୍ ରାଦାସ୍ ଏନ୍ଦେର୍ଗେକା ଆସ୍ ନିଜ୍କେନିଜ୍ ମାନା କାମା ପଲ୍ଲଦାସିନ୍।
ବାନେ ନାଲ୍ଖୁ କାମ୍ନାବାଲା
14ଇବ୍ଡ଼ା କାତ୍ଥାନ୍ ବିଶ୍ୱାସୀ ଆଲାରିନ୍ ମନେ କାମ୍ତା ଆରୁ ପ୍ରାଭୁସିନ୍ ସାକ୍ଷୀ ଉଇୟିକିରି ଚେତାବାନୀ ଚିଆ କା, ଆବ୍ଡ଼ାର୍ କେତ୍କ ଶବ୍ଦଘି ଅର୍ଥବନ୍ ହୋଇକିରି କାଁଟ୍ଛାଁଟ୍ ଆମ୍ୱର୍ କାମା, ଏକାଘି କା ଏନ୍ଦେର୍ହି ଫାଏଦା ମା ମାନିଦ୍, ଲେକିନ୍ ମେନୁ ଆଲାର୍ ବିଶ୍ୱାସ୍ତି ଭାଟ୍କାରାନାଏ କାନାଏ। 15ନିଙ୍ଗାନ୍ ପାର୍ମେଶ୍ୱାର୍ସ୍ ଗ୍ରହନ୍ କାମସ୍ ଏନ୍ନେ ନାଲ୍ଖୁ କାମା, ଆରୁ ଏନ୍ନେ ନାଲ୍ଖୁ କାମୁସ୍ ଲେଖା ମାନାଗେ କୋଶିଷ୍ କାମା, ଏକାସ୍ଗେ କା ତାଙ୍ଘାଏ ନାଲ୍ଖୁଘି ଦ୍ୱାର୍ନୁ ଲାଜ୍ଜେ ମହାଁ ମା ଖାତ୍ରିଦ୍, ଆରୁ ଏକାସ୍ ପାର୍ମେଶ୍ୱାର୍ସ୍କି ସତ୍ତୁ ବଚନ୍ବନ୍ ବାନେକିରି ଶିଖାବାତେ ରାଦାସ୍। 16ଲେକିନ୍ ବେକାର୍ କାତ୍ଥାସ୍ତି ବାଛ୍ରିକିରି ରା, ଏନ୍ଦେର୍ଗେକା ଏନ୍ନେ ଆଲାର୍ ପାର୍ମେଶ୍ୱାର୍ସ୍ତି ଗେଚ୍ଛା ମାନ୍ନାଏକାନାଏ। 17ଆରୁ କେନ୍ସର୍ ଏସ୍କେ ପୁରା ଶରୀର୍ନୁ ଫାଇଲାରି କାଇ ଆନ୍ନେ ଏକାର୍ ଝୁଟ୍ଟୁ ଶିକ୍ଷା ଚିନାଏ, ଆବ୍ଡ଼ାର୍ଘି ଝୁଟ୍ଟୁ ଶିକ୍ଷାଦ୍, ଆଲାର୍ଘି ମାଝାନୁ ଫାଇଲାରିକି। ହୁମିନିୟୁସ୍ ଆରୁ ଫେଲେତୁସ୍ ଝୁଟ୍ଟୁ ଶିକ୍ଷା ଚିନାବାଲା ଆଲାର୍ଘି ଭିତ୍ରୁ ରାନାଏ। 18ଏକାର୍ ଝୁଟ୍ଟୁ ଶିକ୍ଷା ଚିନାଏ ଆବ୍ଡ଼ାର୍ ପ୍ରାଭୁସ୍କି ବଚନ୍ତି ଭାଟ୍କାରାଚାର୍ କେର୍କାନାଏ, ଆରୁ ଆବ୍ଡ଼ାର୍ ତେଙ୍ଗ୍ନାଏ କା କେଚ୍ଚକା ଆଲାର୍ ଉଜ୍ଜିୟାର୍ କେର୍କାନାଏ ଆରୁ କେତ୍କ ଆଲାର୍ଘି ବିଶ୍ୱାସ୍ବନ୍ ଭାଟ୍କାନାଏ ଚିନାଏ। 19ହାଲେହି ଏକାର୍ ପାର୍ମେଶ୍ୱାର୍ସ୍କି ମିଆଁ ବିଶ୍ୱାସ୍ କାମ୍ନାଏ ଆବ୍ଡ଼ାର୍ ପାର୍ମେଶ୍ୱାର୍ସ୍କି ଦ୍ୱାର୍ନୁ ତିୟାର୍ କାମ୍ଚ୍କା ଆଡ଼୍ପାନ୍ତା ମଜ୍ବୁତ୍ ନାହିଗାଡ୍ଡି ଲେଖା ରାନାଏ। ଆବ୍ଡ଼ାର୍ଘି ବିଶ୍ୱାସ୍ ଏକ୍ଲାହି ନାଶ୍ ମା ମାନିଦ୍, ଲେକିନ୍ ଅଣ୍ଟା ଆଡ଼୍ପାନ୍ତା ମଜ୍ବୁତ୍ ନାହିଗାଡ୍ଡି ଲେଖା ଜାମାବାକେନ୍ ଟିକ୍ରିକିରି ରାଇଦ୍। ଆରୁ ଆବ୍ଡ଼ାର୍ଘିନୁ ପାର୍ମେଶ୍ୱାର୍ସ୍କି ବଚନ୍ ମୋହର୍ ଲେଖା ଲେଖାକେର୍କିଚି। ପ୍ରାଭୁସ୍ ନିଜର୍ ଆଲାରିନ୍ ଆହ୍ଦାସ୍ ଆରୁ ନେଦିନ୍ ପାର୍ମେଶ୍ୱାର୍ସ୍ସିନ୍ ତାଙ୍ଘା ପ୍ରାଭୁସ୍ ବୁଲି ଗ୍ରହନ୍ କାମ୍ଦାସ୍, ଆସ୍ ଜାମା ଖାରାପ୍ତି ବାଛ୍ରିକିରି ରାନା କାତ୍ଥା।
20ଅଣ୍ଟା ଧନୀ ଆଲାସ୍କି ଆଡ଼୍ପାନୁ ସୋନା ରୁପାଘି ଖୁରୀ ଗିନା ଖାଲି ମାଲ୍ଲା, ଲେକିନ୍ ମାନ୍ନୁ ଆରୁ ହାଜ୍ଜୁଘି ଜିନିଷ୍ ପତର୍ହି ରାଇ। ଏକାନ୍-ଏକାନ୍ ବିଶେଷ୍ ନାଲ୍ଖୁଘି ଲାଗାନ୍ ବେଭାର୍ କାମାକାଇ, ଆରୁ ଏକାନ୍, ଏକାନ୍ ରୋଜ୍ଦିନ୍ ବେଭାର୍ କାମାକାଇ। 21ଯଦି ନେଦିନ୍ ଖାରାପ୍ ନାଲ୍ଖୁନ୍ତି ନିଜ୍କେ ଶୁଦ୍ଧ୍ କାମସ୍ତା, ଆସ୍ ମାଇନ୍ଘି ଖୁରୀ ଗିନା ଲେଖା ଠାହ୍ରାରସ୍; ଆରୁ ପାବିତାର୍ ଠାହ୍ରାରସ୍ ଆରୁ ମାଲିକ୍ସ୍କି ନାଲ୍ଖୁନୁ ବାରସ୍। ଆରୁ ଆସ୍ ଯେତ୍କ ବାନେ ନାଲ୍ଖୁଘି ଲାଗାନ୍ ତିୟାର୍ ରସ୍।
22ହୁଦ୍ଘିଲାଗାନ୍ ହେ ତିମଥିଉସ୍, ନିନ୍, ଯୁୱାନ୍ ସାମାୟନ୍ତା ଲାଲ୍ସାନ୍ତି ଦୁର୍ ରା, ଆରୁ ପାବିତାର୍ ମନ୍ତି ନେଦ୍ ପ୍ରାଭୁସ୍କି ସେବା ଆରାଧାନା କାମ୍ନାଏ ଆବ୍ଡ଼ାର୍ ଗାନେ ପାର୍ମେଶ୍ୱାର୍ସ୍କେ ଏକାଦ୍ ବାନେ ଲାଗ୍ଗଦ୍ ଆନ୍ନେ ଜୀବନ୍ ବିତାବା, ବିଶ୍ୱାସ୍ଘି ଲାଇଗ୍ ମାନା, ଦୁସ୍ରାରିନ୍ ବାନେ ହାଖ୍ଖା ଆରୁ ଯେତ୍କର୍ଗାନେ ମେଲ୍ ପ୍ରେମ୍ସେ ରା। 23ଲେକିନ୍ ମୁର୍ଖ୍ର୍ଘି ଝାଗ୍ଡ଼ାସ୍ତି ଆରୁ ବିନା ମତ୍ଲବ୍ଘି ଝାଗ୍ଡ଼ାସ୍ତି ଗେଚ୍ଛା ରା, ଏନ୍ଦେର୍ଗେକା ନିନ୍ ଆହ୍ଦାଏକା ଇବ୍ଡ଼ାସ୍ତି ଝାଗ୍ଡ଼ା ମାନିଦ୍। 24ପ୍ରାଭୁସ୍କି ସେବକ୍ସ୍ଗେ ଝାଗ୍ଡ଼ାଲୁ ମା ମାନ୍ନା କାତ୍ଥା, ଲେକିନ୍ ଆସ୍ ଜାମାର୍ଗାନେ ଦାୟାତି ବେଭାର୍ କାମ୍ନା କାତ୍ଥା ଆରୁ ପାର୍ମେଶ୍ୱାର୍ସ୍କି ବଚନ୍ବନ୍ ବାନେକିରି ଶିଖାବାନାବାଲା ମାନ୍ନା କାତ୍ଥା ଆରୁ ଜାମା କାତ୍ଥାନ୍ ସାହ୍ନାବାଲା ମାନ୍ନା କାତ୍ଥା। 25ଏକାର୍ ନିଙ୍ଘା ଶିକ୍ଷାବନ୍ ବିରୋଧ୍ କାମ୍ନାଏ ଆବ୍ଡ଼ାରିନ୍ ନରମ୍ ମନ୍ତି ବୁଝାବା, ମାନାଅଙ୍ଗତା ପାର୍ମେଶ୍ୱାର୍ସ୍ ଆବ୍ଡ଼ାର୍ଗେ ମନ୍ ପରିବର୍ତ୍ତନ୍ଘି ମନ୍ ଚସ୍। ତାକା ଆବ୍ଡ଼ାର୍ ଏକା ସତ୍ତୁ ବଚନ୍ ନାମ୍ ଶିଖାବାଦାତ୍ ଆବନ୍ ଗ୍ରହନ୍ କାମର୍। 26ଆରୁ ଆବ୍ଡ଼ାର୍ ଚେତ୍ରିକିରି ଶାଏତାନ୍ଘି ଫାନ୍ଦାନ୍ତି ଉର୍ଖର୍ ଏକାନୁ କା ଶାଏତାନ୍ ଆବ୍ଡ଼ାରିନ୍ ହିଁଚା ଉଇକିଚି, ତାକା ଆବ୍ଡ଼ାର୍ ପାର୍ମେଶ୍ୱାର୍ସ୍କି ବଚନ୍ ଲେଖା ଚାଲ୍ରର୍।
3ଆଖ୍ରୀ ଉଲ୍ଲାଗୁଠିନ୍ତା ଅଶୁଭ୍ ଘାଟ୍ଣା
1ଲେକିନ୍ ହେ ତିମଥିଉସ୍ ନିନ୍ ମନେ ଉଇୟା କା ଇ ଯୀଶୁସ୍କି ଆରୁଅହନ୍ ବାର୍ନାଘି ଆଘ୍ଲି ବହୁତ୍ ଖାରାପ୍ ସାମାୟ ବାରୋ। 2ଏନ୍ଦେର୍ଗେକା ଆଲାର୍ ନିଜ୍କେନିଜ୍ ଖାଲି ବାନେ ହାଖ୍ଖର୍, ଆରୁ ବାଗ୍ଗେ ଧାନ୍ନୁ କାମାବାଗେ ଆଶ୍ରା କାମର୍। ଆବ୍ଡ଼ାର୍ ନିଜର୍ ବାରେନୁ ବଡ଼୍ପଣି ଏଦ୍ରର୍, ଆବ୍ଡ଼ାର୍ ସୋଚର୍ କା ଆବ୍ଡ଼ାର୍ ଜାମାର୍ଘିନ୍ତି ବାନେର୍, ଆବ୍ଡ଼ାର୍ ଦୁସ୍ରାର୍ଘି ନିନ୍ଦା କାମର୍, ନିଜର୍ ଆୟାଙ୍ଗ୍ ବାଙ୍ଗ୍ଘି କାତ୍ଥା ମା ମେନର୍, ଆବ୍ଡ଼ାର୍ ତାହ୍ମା ମଦେତ୍ କାମୁରିନ୍ ଧାନ୍ୟାବାଦ୍ ମା ଚିଅର୍, ଆରୁ ଜାମାବାକେନ୍ ଖାରାପ୍ ନାଲ୍ଖୁ କାମର୍, ଆରୁ ପାର୍ମେଶ୍ୱାର୍ସ୍କି ମାଇନ୍ ମା କାମର୍। 3ଆବ୍ଡ଼ାର୍ ଦୁସ୍ରାରିନ୍ ବାନେ ମା ହାଖ୍ଖର୍ ଆରୁ ଦୁସ୍ରାର୍ଘି ଦୋଷ୍ବନ୍ ଛେମା ମା କାମର୍। ଆବ୍ଡ଼ାର୍ ଦୁସ୍ରାର୍ଘି ମିଆଁ ଦୋଷ୍ ଚିଅର୍, ଖାରାପ୍ ନାଲ୍ଖୁ କାମ୍ନାନୁ ନିଜ୍କେ କାବୁନୁ ମା ଉଇୟର୍, ଦୁସ୍ରାର୍ଘି ନୁକ୍ସାନ୍ କାମାଗେ ମା ଏଲ୍ଚର୍, ଆବ୍ଡ଼ାର୍ ବାନେ ନାଲ୍ଖୁବନ୍ ପସନ୍ଦ୍ ମା କାମର୍। 4ଆବ୍ଡ଼ାର୍ ତାହ୍ମା ସାଙ୍ଗେର୍ ଗାନେ ଧୋଖା ଚିଅର୍, ଆରୁ ଆବ୍ଡ଼ାର୍ ଏନ୍ଦେର୍ ମାନ ଆବନ୍ ବାଲ୍ଲିକିରି ଚାଁଣେ ତେଙ୍ଗର୍ ଆରୁ କାମର୍, ଆବ୍ଡ଼ାର୍ ଏଙ୍ଘାଏ ଜାମାକିଛି ରାଇ ବୁଲି ବଡ଼୍ପଣି ଏଦ୍ରର୍, ଆରୁ ଆବ୍ଡ଼ାର୍ ପାର୍ମେଶ୍ୱାର୍ସ୍ସିନ୍ ବାନେ ହାଖ୍ଖନା ପସନ୍ଦ୍ ମା କାମର୍, ଲେକିନ୍ ମଉଜ୍ମଜ୍ଲିସ୍ ଜୀବନ୍ ବିତାବାଗେ ପସନ୍ଦ୍ କାମର୍। 5ଆବ୍ଡ଼ାର୍ ପାର୍ମେଶ୍ୱାର୍ସ୍କି ଆରାଧାନା କାମାଲ୍ଦାମ୍ବୁଲି ଏଦ୍ରର୍, ଲେକିନ୍ ପାର୍ମେଶ୍ୱାର୍ସ୍କି ଶକ୍ତିବନ୍ ତାହ୍ମା ଜୀବନ୍ବନ୍ ବାଦ୍ଲାଗେ ଗ୍ରହନ୍ ମା କାମର୍। ନିନ୍ ଏନ୍ନେ ଆଲାର୍ସ୍ତି ଗେଚ୍ଛା ରାକେ।
6ଏନ୍ଦେର୍ଗେକା ଝୁଟ୍ଟୁ ଶିକ୍ଷା ଚିଉର୍, ନୁହ୍ରା-ନୁହ୍ରାକିରି ଆଡ଼୍ପାନୁ କର୍ନାଏ ଆରୁ ଆ ନିର୍ବୁଦ୍ଧିଆ ମାଏକିନିଆଁରିନ୍ କାବୁନୁ କାମ୍ନାଏ ନେଖା ମନ୍ ପାପ୍ତି ନିନ୍ଦିଆ କେର୍କିରି, ଆରୁ ଏକାର୍ ଜାମା ରକମ୍ଘି ମଉଜ୍ମଜ୍ଲିସ୍ନୁ ଉଜ୍ଜନାଏ। 7ଆରୁ ଆବ୍ଡ଼ା ମାଏକିନିଆଁର୍ ଜାମାବାକେନ୍ ଶିଖର୍ନାଏ ଲେକିନ୍ ଆବ୍ଡ଼ାର୍ ସତ୍ତୁ ଶିକ୍ଷାବନ୍ ଧାରା ପଲ୍ଲନାଇନ୍। 8ଏସ୍କେ କା ବହୁତ୍ ବଛର୍ଘି ଆଘ୍ଲି ୟନ୍ନେସ୍ ଆରୁ ୟମ୍ରେସ୍ ମୁଶା ନାବୀସ୍କି ବିରୁଦ୍ଧ୍ କାମ୍ଚ୍କାଚାର୍, ଆନ୍ନେନ୍ ଝୁଟ୍ଟୁ ଶିକ୍ଷା ଚିଉର୍ ଖ୍ରୀସ୍ତ୍ସ୍କି ସତ୍ତୁ ଶିକ୍ଷାଘି ବିରୁଦ୍ଧ୍ କାମ୍ନାଏ। ଝୁଟ୍ଟୁ ଶିକ୍ଷା ଚିଉର୍ ମନ୍ନୁ ଖାରାପ୍ ସୋଚ୍ନାଏ ଆରୁ ଆବ୍ଡ଼ାର୍ ଖ୍ରୀସ୍ତ୍ସ୍କି ସତ୍ତୁ ଶିକ୍ଷାବନ୍ ବିଶ୍ୱାସ୍ ମା କାମ୍ନାଏ। 9ଲେକିନ୍ ଇବ୍ଡ଼ା ଝୁଟ୍ଟୁ ଶିକ୍ଷା ଚିଉର୍ ଆଲାରିନ୍ ଢେର୍ ସାମାୟତକ୍ ଧୋଖା ଚିଆ ପଲ୍ଲନାଇନ୍, ଏନ୍ଦେର୍ଗେକା ଏସ୍କେ ୟନ୍ନେସ୍ ଆରୁ ୟମ୍ରେସ୍କି ମୁର୍ଖ୍ବନ୍ ଯେତ୍କ ଆଲାର୍ ଆଖିୟାର୍, ହନ୍ନେନ୍ ଝୁଟ୍ଟୁ ଶିକ୍ଷା ଚିଉର୍ଘି ବାରେ ଆଲାର୍ ଆହର୍ କା ଇବ୍ଡ଼ାର୍ ଝୁଟ୍ଟୁ ଶିକ୍ଷା ଚିୟାଲ୍ନାଏ।
ପାଉଲୁସ୍ ତିମଥିଉସ୍ସିନ୍ ପାର୍ମେଶ୍ୱାର୍ସ୍କି ନାଲ୍ଖୁ ବାନେକିରି କାମାଗେ ହୁକୁମ୍ ଚିଆଲ୍ଦାସ୍
10ଲେକିନ୍ ହେ ତିମଥିଉସ୍ ଏକାନ୍ ଏନ୍ ଆଲାରିନ୍ ଶିଖାବାଚ୍କାନ୍ ଆବନିନ୍ ବାନେକିରି ଆହ୍ଦାଏ ଏଙ୍ଘା ଚାଲିଚଲନ୍, ପାର୍ମେଶ୍ୱାର୍ସ୍କି ଇଚ୍ଛା ଲେଖା ରାଚା, ନିନ୍ ଆହ୍ଦାଏକା ଏଙ୍ଘା ମତଲବ୍ ଆଲାରିନ୍ ପାର୍ମେଶ୍ୱାର୍ସ୍କି ବଚନ୍ ଶୁଣାବାନାଦ୍, ଏସ୍କେ ଏନ୍ ପାର୍ମେଶ୍ୱାର୍ସିନ୍ ବିଶ୍ୱାସ୍ କାମ୍ଚ୍କାନ୍, ଆରୁ ଏସ୍କେ ଏନ୍ ଜାମା କଷଟ୍ବନ୍ ସାହାଚ୍କାନ୍ ଆରୁ ଏସ୍କେ ଜାମାରିନ୍ ବାନେ ହାଖ୍ଖକାନ୍ କାମ୍ଚ୍କାନ୍ ଏସ୍କେ ଜାମା ଆଲାର୍ ଗାନେ ଧିରାଜ୍ ଉଇକାନ୍ ନିନ୍ ଇବ୍ଡ଼ା ଜାମାନ୍ ବାନେକିରି ଆହ୍ଦାଏ ଆରୁ ଏଙ୍ଘା ସାତାୱାଟ୍ ଆରୁ ଦୁଃଖୁ ସାହ୍ନାନୁ ଏଙ୍ଘା ସାଙ୍ଗେ ଚିଚ୍କାଏ। 11ଯେତ୍କବାକେନ୍ ଏନ୍ ଆନ୍ତାଖିଆ, ଇକନୀୟମ୍ ଆରୁ ଲୁସ୍ତ୍ରା ସହର୍ନୁ ରାଚ୍କାନ୍ ତା ଆଲାର୍ ଏଙ୍ଗାନ୍ ବହୁତ୍ ସାତାବାଚ୍କାର୍ ଆରୁ ପିଟା ହି ବେଦ୍ଦାଲିୟାର୍ ଆରୁ ଏନ୍ ଏସ୍କେ ଇବ୍ଡ଼ାଘି ସାମ୍ନା କାମ୍ଚ୍କାନ୍, ଆବନ୍ତା ନିନ୍ ଆହ୍ଦାଏ ଲେକିନ୍ ପ୍ରାଭୁସ୍ ଏଙ୍ଗାନ୍ ଇବ୍ଡ଼ା ସାତାବାନାନ୍ତି ବାଛାବାଚାସ୍। 12ଲେକିନ୍ ପ୍ରକୃତ୍ନୁ ଯେତ୍କ ଆଲାର୍ ଖ୍ରୀସ୍ତ୍ ଯୀଶୁସ୍କି ମିଆଁ ବିଶ୍ୱାସ୍ କାମିକିରି ପାର୍ମେଶ୍ୱାର୍ସ୍କି ଇଚ୍ଛା ଲେଖା ଜୀବନ୍ ବିତାବର୍ ଆବ୍ଡ଼ା ଜାମାରିନ୍ ସାତାବା କୋ; 13ଲେକିନ୍ ବଦ୍ମାସ୍ ଆରୁ ଧୋଖା ଚିଉ ଆଲାର୍, ଦୁସ୍ରାରିନ୍ ଧୋଖା ଚିନାଏ ଆରୁ ନିଜ୍କେନିଜ୍ ଧୋଖା ହାଖ୍ଖନାଏ। 14ଲେକିନ୍ ହେ ତିମଥିଉସ୍, ନିନ୍ ଆ ଶିକ୍ଷାଘି ମିଆଁ ବିଶ୍ୱାସ୍ କାମ୍ତେ ରା, ଏକାନ୍ କା ନିନ୍ ଏହ୍ମାସ୍ତି ଶିଖ୍ର୍କାଦାଏ ଆରୁ ନିନ୍ ଆହ୍ଦାଏକା ଇ ଶିକ୍ଷା ସତ୍ତୁଦ୍ ଏନ୍ଦେର୍ଗେକା ଏକା ଆଲାର୍ ନିଙ୍ଗାନ୍ ଇବନ୍ ଶିଖାବାଚ୍କାନାଏ ଆବ୍ଡ଼ାର୍ ନିଙ୍ଘାଲାଗାନ୍ ବିଶ୍ୱାସ୍ ଲାଇଗ୍ ରାନାଏ। 15ଆରୁ ହାଦ୍ଦୁ ବାକେନ୍ତିନିନ୍, ନିନ୍ ପାର୍ମେଶ୍ୱାର୍ସ୍କି ବଚନ୍ ଶିଖର୍କାଦାଏ ଏକାଦ୍ ଇବନ୍ ଆହାଗେ ଶକ୍ତି ଚିଦ୍ କା, ନେଦ୍ ଯୀଶୁ ଖ୍ରୀସ୍ତ୍ସ୍କି ମିଆଁ ବିଶ୍ୱାସ୍ କାମ୍ନାଏ ଆବ୍ଡ଼ାର୍ ମୁକ୍ତି ହାଖ୍ଖନାଏ। 16ଯେତ୍କ ପାର୍ମେଶ୍ୱାର୍ସ୍କି ବଚନ୍ ପାବିତାର୍ ଆତ୍ମାଘି ପ୍ରେର୍ଣାତି ଲେଖାକେର୍କିଚି। ପାର୍ମେଶ୍ୱାର୍ସ୍କି ବଚନ୍ ଆଲାରିନ୍ ସତ୍ତୁଘି ଶିକ୍ଷା ଚିଦ୍ ଆରୁ ଆଲାର୍ ଏନ୍ଦେର୍ ଭୁଲ୍ କାମ୍ଚ୍କାନାଏ ଆବନ୍ ତେଙ୍ଗିଦ୍, ଆରୁ ଆବ୍ଡ଼ାର୍ ଏକା ଭୁଲ୍ ନାଲ୍ଖୁ କାମ୍ଚ୍କାନାଏ, ଆବ୍ଡ଼ାନ୍ ସୁଧ୍ରାଗେ ଶିଖାବିଦ୍, ଆରୁ ଏକାଦ୍ ବାନେଦ୍ ଆ ନାଲ୍ଖୁନ୍ ଏସ୍କେ କାମର୍ ଆଦ୍ଘି ବାରେନୁ ଶିଖାବିଦ୍। 17ତାକା ପାର୍ମେଶ୍ୱାର୍ସ୍କି ସେବକସ୍ ପାର୍ମେଶ୍ୱାର୍ସ୍କି ବଚନ୍ ଦ୍ୱାର୍ନୁ ଜାମା ରକମ୍ଘି ବାନେ-ବାନେ ନାଲ୍ଖୁ କାମାଗେ ତିୟାର୍ ରସ୍ ଆରୁ ଲାଇଗ୍ ମାନସ୍।
41ହେ ତିମଥିଉସ୍ ପାର୍ମେଶ୍ୱାର୍ସ୍ସିନ୍ ସାକ୍ଷୀ ଉଇୟିକିରି ଆରୁ ଏକା ଖ୍ରୀସ୍ତ୍ ଯୀଶୁସ୍ ଆଲାରିନ୍ ଶାସନ୍ କାମାଗେ ବାରସ୍ ଆରୁ ଏକାସ୍ ଉଜ୍ଜୁ ଆଲାର୍ଘି ଆରୁ କେଚ୍ଚକା ଆଲାର୍ଘି ନ୍ୟାୟ କାମସ୍, ଆସିନ୍ ସାକ୍ଷୀ ଉଇୟିକିରି ଏନ୍ ନିଙ୍ଗାନ୍ ହୁକୁମ୍ ଚିଇକିରି ତେଙ୍ଗାଲ୍ଦାନ୍। 2କା ନିନ୍ ପାର୍ମେଶ୍ୱାର୍ସ୍କି ବଚନ୍ବନ୍ ପ୍ରଚାର୍ କାମା, ପ୍ରଚାର୍ କାମାଗେ ସୁବିଧା ମାନ ଚାହେ ମା ମାନ ଜାମାବାକେନ୍ ତିୟାର୍ ରା, ଧିରାଜ୍ତି ଆଲାରିନ୍ ଶିଖାବାତେ ରା, ଚେତାବାନୀ ଚିଆ ଆରୁ ବୁଝାବା। 3ଏନ୍ଦେର୍ଗେକା ଏନ୍ନେ ସାମାୟ ବାରୋ ଯେତ୍କବାକେନ୍ ଆଲାର୍ ସତ୍ତୁ ଉପ୍ଦେଶ୍ବନ୍ ମେନାଗେ ମା ବେଦ୍ଦର୍, ଲେକିନ୍ ଏକାନ୍ ଆବ୍ଡ଼ାର୍ଗେ ଇଚ୍ଛା ରାଇ ଆନ୍ନେନ୍ କାମର୍ ଆରୁ ତାହ୍ମାଲାଗାନ୍ ବହୁତ୍ ଉପ୍ଦେଶ୍ ଚିଉରିନ୍ ଠୁଡ଼ିୟର୍। ଆରୁ ଏକାଦ୍ ଆବ୍ଡ଼ାର୍ଗେ ମେନାଗେ ବାନେ ଲାଗ୍ଗ ଆବନ୍ ଉପ୍ଦେଶ୍ ଚିଉର୍ ଶୁଣାବର୍। 4ଆବ୍ଡ଼ାର୍ ନାମ୍ ଏକା ସତ୍ତୁ ବଚନ୍ ଶୁଣାବାଦାତ୍ ଆବନ୍ ଆମ୍ବିକିରି ମନ୍ ଗାଢ଼ଚ୍କା କାହାନୀ ମେନାଗେ ବେଦ୍ଦର୍। 5ଲେକିନ୍ ନିନ୍ ଇ ଜାମା କାତ୍ଥାନୁ ସାବ୍ଧାନ୍ ରା, ଦୁଃଖୁ ସାହା, ସୁସାମାଚାର୍ ପ୍ରଚାର୍ କାମା ଆରୁ ପାର୍ମେଶ୍ୱାର୍ସ୍ ନିଙ୍ଘାଏ ହେଖ୍ଖାନୁ ଏକା ସେବା ଚିଚ୍କାଦାସ୍ ଆବନ୍ ପୁରା କାମା।
6ଏନ୍ଦେର୍ଗେକା ଆକ୍କୁନ୍ ଏନ୍ ଜୀବନ୍ ଅଣ୍ଟା ବଲୀଘି ଲେଖା ପ୍ରାଭୁସ୍କି ଲାଗାନ୍ ଚାଢ଼ାବା କେର୍କାଦାନ୍ ଆରୁ ଏଙ୍ଘାଏ ତା ଇ ଦୁନିଆଁନ୍ତି ବିଦା ହୋନାଘି ସାମାୟ ଆଣ୍ସିଆ କେରାଦିନ୍। 7ଅଣ୍ଟା ଲାଡ଼ାଇ ଲେଖା, ଏନ୍ ପାର୍ମେଶ୍ୱାର୍ସ୍କି ସେବା କାମ୍ଚ୍କାଦାନ୍, ଅଣ୍ଟା କୁଦ୍ଦିଆରାନା ଲେଖା ଏକା ନାଲ୍ଖୁନ୍ ପାର୍ମେଶ୍ୱାର୍ସ୍ ଏଙ୍ଗା ଚିଚ୍କାଦାସ୍ ଆବନ୍ ଏନ୍ ପୁରା କାମ୍ଚ୍କାଦାନ୍ ଆରୁ ଏନ୍ ବିଶ୍ୱାସ୍ବନ୍ ଆଖ୍ରୀତକ୍ ଧାର୍ଚ୍କାନ୍ ଉଇକାଦାନ୍। 8ଆକ୍କୁନ୍ ଏଙ୍ଘାଲାଗାନ୍ ସରଗ୍ନୁ ଅଣ୍ଟା ପୁରସ୍କାର୍ ଉଇୟା କେର୍କିଚି, ଆଦ୍ ଜୀବନ୍ ବିତାବାନା ବାଲାର୍ଗେ ଚିନାବାଲା ମୁକୁଟ୍। ଯେତ୍କବାକେନ୍ ନ୍ୟାୟ କାମ୍ନାବାଲାସ୍ ଠିକ୍ସେ ନ୍ୟାୟ କାମାଗେ ବାରସ୍, ହତ୍କବାକେନ୍ ଆସ୍ ଏଙ୍ଗାଗେ ଆ ମୁକୁଟ୍ ଚସ୍। ଆରୁ ଏଙ୍ଗା ଖାଲି ମାଲ୍ଲା ଲେକିନ୍ ଏକା ଆଲାର୍ ଆସ୍କି ଆରୁଅହନ୍ ବାର୍ନାଘି ଆଶ୍ରା ଏରାଲ୍ନାର୍ ଆବ୍ଡ଼ା ଜାମାର୍ଗେହି ଚସ୍।
ପାଉଲୁସ୍ ତିମଥିଉସ୍ସିନ୍ ସନ୍ଦେଶ୍ ଚିଆଲ୍ଦାସ୍
9ହେ ତିମଥିଉସ୍ ଏଙ୍ଘାସାନ୍ ଚାଁଣେ ବାରାଗେ ପୁରା କୋଶିଷ୍ କାମା। 10ଏନ୍ଦେର୍ଗେକା ଇ ଦୁନିଆଁନ୍ତା ମଉଜ୍ ମଜ୍ଲିସ୍ବନ୍ ବାନେ ହାଖ୍ଖୀକିରି ଦେମାସ୍ ଏଙ୍ଗାନ୍ ଆମ୍ବେଇ ଚିଚ୍କାଦାସ୍ ଆରୁ ଥେସ୍ଲୁନୀକୀ ସହର୍ଗେ ବୁଙ୍ଗେଇ ଚିଚ୍କାଦାସ୍। କ୍ରେସ୍କେନ୍ ଗାଲାତୀୟା ରାଜୀଗେ ବୁଙ୍ଗେଇ ଚିଚ୍କାଦାସ୍ ଆରୁ ତିତୁସ୍ ଦାଲ୍ମାତିଆ ଜିଲ୍ଲାଗେ ବୁଙ୍ଗେଇ ଚିଚ୍କାଦାସ୍। 11ଲେକିନ୍ ଲୁକାସ୍ ଖାଲି ଏଙ୍ଘାଗାନେ ସେବା ନାଲ୍ଖୁ କାମାଲ୍ଦାସ୍। ମାର୍କୁସ୍ସିନ୍ ହୋଇକିରି ଏଙ୍ଘାସାନ୍ ବାରା; ଏନ୍ଦେର୍ଗେକା ଆସ୍ ସେବା ନାଲ୍ଖୁନୁ ଏଙ୍ଗାନ୍ ମଦେତ୍ କାମସ୍। 12ତୁଖିକୁସ୍ସିନ୍ ଏନ୍ ଇଫିସୁସ୍ ସହର୍ଗେ ତାଏକାଦାନ୍। 13ତ୍ରୋୟାସ୍ ସହର୍ନୁ କାର୍ପୁସ୍ସାନ୍ ଏନ୍ ଏକା କୋଟ୍ବନ୍ ଆମ୍ବେଚିଚ୍କାଦାନ୍, ଆବନ୍ ଯେତ୍କବାକେନ୍ ନିନ୍ ବାରୟ ତା ଅନ୍ଦର୍କେ ବାର୍କେ, ଆରୁ ବହିଗୁଠିନ୍ ହି ଅନ୍ଦର୍କେ ବାର୍କେ ବିଶେଷ୍କିରି ଭେଡ଼ିଘି ଚାପ୍ଟାତି ତିୟାର୍ ମାନ୍ଚ୍କା ବହିବନ୍ ଅନ୍ଦର୍କେ ବାର୍କେ 14ତାମ୍ବା ଘି ଜିନିଷ୍ପତର୍ ତିୟାର୍ କାମୁ ସିକାନ୍ଦାର୍ସ୍ ଏଙ୍ଘାଏ ବହୁତ୍ କ୍ଷତି କାମ୍ଚ୍କାଦାସ୍; ପ୍ରାଭୁସ୍ ଆସିନ୍ ତାଙ୍ଘା ନାଲ୍ଖୁଘି ଅନୁସାର୍ ଫଲ୍ ଚିୟସ୍। 15ନିନ୍ହି ଆସ୍ତି ସାବ୍ଧାନ୍ ରା, ଏନ୍ଦେର୍ଗେକା ନାମ୍ ଏକା ସୁସାମାଚାର୍ ପ୍ରଚାର୍ କାମ୍ଚ୍କାଦାତ୍ ଆବନ୍ ଆସ୍ ବହୁତ୍ ବିରୁଦ୍ଧ୍ କାମ୍ଚ୍କାଦାସ୍।
16ଯେତ୍କବାକେନ୍ ପହ୍ଲେ ଥର୍ ଏଙ୍ଘା ନ୍ୟାୟ କାମାଗେ ଏଙ୍ଗାନ୍ ରୋମ୍ ସହର୍ଗେ ହୁଆକେରା। ହତ୍କବାକେନ୍ ଏଙ୍ଗାନ୍ ଛୁଡ଼ାବାଗେ ନେଦ୍ହି ଏନ୍ଦେର୍ହି ସାକ୍ଷୀ ମା ଚିଚ୍ଚାର୍, ଲେକିନ୍ ଜାମାର୍ ଏଙ୍ଗାନ୍ ଆମ୍ବେଇ ଚିଚ୍କାଚାର୍। ଏନ୍ ବିନ୍ତି କାମାଲ୍ଦାନ୍ କା ପାର୍ମେଶ୍ୱାର୍ସ୍ ଆବ୍ଡ଼ାରିନ୍ ଛେମା କାମସ୍। 17ଲେକିନ୍ ପ୍ରାଭୁସ୍ ଏଙ୍ଘାଗାନେ ରାଚାସ୍ ଆରୁ ଏଙ୍ଗା ଶକ୍ତି ଚିଚ୍ଚାସ୍, ଡୁକ୍କାଘି ହାବୁଡ଼୍ତି ବାଛାବାନା ଲେଖା ଖ୍ରୀସ୍ତ୍ସ୍ ଏଙ୍ଗାନ୍ ମରନ୍ସ୍ତି ବାଛାବାଚାସ୍ ତାକା ଏଙ୍ଘା ଦ୍ୱାର୍ନୁ ସୁସାମାଚାର୍ ପୁରାପୁରୀ ପ୍ରଚାର୍ କାମାକୋ ଆରୁ ଜାମା ବିନାୟାହୁଦୀ ଆଲାର୍ ମେନର୍ 18ଆରୁ ପ୍ରାଭୁସ୍ ଏଙ୍ଗାନ୍ ଜାମା ରକମ୍ଘି ଖାରାପ୍ସ୍ତି ବାଛାବସ୍, ଆରୁ ଏଙ୍ଗାନ୍ ବାଛାବିକିରି ତାଙ୍ଘା ସରଗ୍ ରାଜୀଗେ ହୋସ୍। ଆସ୍କି ସ୍ତୁତି ମାହିମା ଯୁଗ୍-ଯୁଗ୍ ମାନ୍ନାଦ୍। ଆମେନ୍।
ପାଉଲୁସ୍ ଏଫିସୁସ୍ ସହର୍ତା ବିଶ୍ୱାସୀର୍ଗେ ଯୋହାର୍ ତାଇୟାଲ୍ଦାସ୍
19ପ୍ରିସ୍କା, ଆକ୍ୱିଲା ଆରୁ ଅନୀସିଫରସ୍କି ପରିବାର୍ତା ଜାମାରିନ୍ ଏଙ୍ଘାଏ ଯୋହାର୍ ତେଙ୍କେ ଚିକେ। 20ଇରାସ୍ତୁସ୍ କୁରିନ୍ଥୀ ସହର୍ନୁ ରାଚାସ୍କେରାସ୍, ଆରୁ ତ୍ରଫିମସ୍ ବେମାର୍ ଖାତ୍ରାସ୍ କେରାସ୍ ହୁଦ୍ଘିଲାଗାନ୍ ଏନ୍ ଆସିନ୍ ମୀଲୀତସ୍ନୁ ଆମ୍ବକାନ୍ ଆରୁ ବାର୍ଚ୍କାନ୍। 21ପାୟାଁ ଉଲ୍ଲାଘି ଆଘ୍ଲି ଏସ୍କେ ହାଲେହି ବାରାଗେ କୋଶିଷ୍ କାମା। ଇଉବୁଲ୍ ପୁନ୍ଦେସ୍, ଲିନୁସ୍ ଆରୁ କ୍ଲାଉଦିଆ ଆରୁ ଜାମା ଭାଇବୁହୁଣୀ ନିଙ୍ଗାନ୍ ଯୋହାର୍ ତେଙ୍କାନାଏ।
22ଏନ୍ ବିନ୍ତି କାମାଲ୍ଦାନ୍ କା ପ୍ରାଭୁସ୍ ନିଙ୍ଘାଗାନେ ରାନାସ୍। ନିହ୍ମା ଯେତ୍କର୍ଘି ମିଆଁ ପ୍ରାଭୁସ୍କି କ୍ରିପା ମାନ୍ତେ ରାନାଦ୍।