ଥେସଲନିକିୟା ମଣ୍ଡ୍ଲୀର୍ଘି ନାମେନୁ ଯୀଶୁ ଖ୍ରୀସ୍ତ୍କି ଖାସ୍ଚେଲା ପାଉଲୁସ୍କି ଦୁସ୍ରା ଚିଠି
ବହିଘି ପରିଚୟ
ଥେସଲନିକିୟା ମଣ୍ତ୍ଲୀନ୍ତା ଆଲାର୍ ଯୀଶୁ ଖ୍ରୀସ୍ତ୍ସିନ୍ ବିଶ୍ୱାସ୍ କାମ୍ଚାର୍ ହୁଦ୍ଘିଲାଗାନ୍ ଆଲାର୍ ବିଶ୍ୱାସୀ ଜାମାରିନ୍ ସାତାବାଚାର୍। ଏକା ବିଶ୍ୱାସୀ ଜାମାରିନ୍ ସାତାବାଚ୍କାଚାର୍ ପାର୍ମେଶ୍ୱାର୍ସ୍ ଆବ୍ଡ଼ାର୍ଗେ ପୁରସ୍କାର୍ ଚିୟସ୍। ଏକାର୍ ବିଶ୍ୱାସୀ ଜାମାରିନ୍ ସାତାବାଚାର୍ ପାର୍ମେଶ୍ୱାର୍ସ୍ ଆବ୍ଡ଼ାର୍ଗେ ଦଣ୍ଡ୍ ଚସ୍। ପ୍ରାଭୁ ଯୀଶୁସ୍କି ଆରୁଅହନ୍ ବାର୍ନାବନ୍ ହୋଇକିରି ଥେସଲନିକିୟା ସହର୍ନ୍ତା ମଣ୍ତ୍ଲୀନୁ ଭୁଲ୍ ଧାର୍ଣା ମାନ୍ଚା। ଥେସଲନିକିୟା ମଣ୍ତ୍ଲୀନ୍ତା କେତ୍କ ଲୋକ୍, ବିଶ୍ୱାସ୍ କାମାଲିୟାର୍ କା ପ୍ରାଭୁ ଯୀଶୁସ୍ ଆରୁଅହନ୍ ବାର୍ଚାସ୍ କେର୍କାଦାସ୍। ଖାସ୍ଚେଲା ପାଉଲୁସ୍ ଇ ସୋଚ୍ବନ୍ ଦୁର୍କାମିକିରି ତେଙ୍ଗ୍ଦାସ୍ କା ପ୍ରାଭୁ ଯୀଶୁସ୍କି ଆରୁଅହନ୍ ବାର୍ନାଘି ଆଘ୍ଲି ବଦ୍ମାସି ଆରୁ ଖାରାପ୍ ନାଲ୍ଖୁ ବହୁତ୍ ମାନଦ୍। ଆରୁ ଅଧର୍ମିରିନ୍ ଅଣ୍ଟା ରହସ୍ୟମୟ ଖ୍ରୀସ୍ତ୍ ବିରୋଧି ଶାଏତାନ୍ ତାଙ୍ଘା ଅଧିନ୍ନୁ କାମଦ୍। ଯେତ୍କବାକେନ୍ ଯୀଶୁ ଖ୍ରୀସ୍ତ୍ ଆରୁଅହନ୍ ବାରସ୍, ହତ୍କବାକେନ୍ ପାର୍ମେଶ୍ୱାର୍ସ୍ ଅଧର୍ମିରିନ୍ ଆରୁ ଖ୍ରୀସ୍ତ୍ ବିରୋଧି ଶାଏତାନ୍ବନ୍ ନରକ୍ନୁ ଦଣ୍ଡ୍ ଚସ୍।
ଖାସ୍ଚେଲା ପାଉଲୁସ୍ ଇ କାତ୍ଥାନ୍ ଯୋର୍ ଚିଦାସ୍ କା ଦୁଃଖୁ ତକ୍ଲିପ୍, ସାତାୱାଟ୍ ମାନ୍ଚ୍କୁନ୍ ହି ଖ୍ରୀସ୍ତ୍ ବିଶ୍ୱାସୀର୍ ନିଜର୍ ବିଶ୍ୱାସ୍ନୁ ମଜବୁତ୍ ରର୍ ଆରୁ ଏସ୍କେ ଖାସ୍ଚେଲା ପାଉଲୁସ୍ ଆରୁ ତାଙ୍ଘାଗାନେ ନାଲ୍ଖୁ କାମୁର୍ ଉଜ୍ଜାଗେ ମେହ୍ନତ୍ କାମାଲିଆର୍, ହନ୍ନେନ୍ ଥେସଲନିକିୟା ମଣ୍ତ୍ଲୀନ୍ତା ବିଶ୍ୱାସୀର୍ ଫାଲ୍ତୁ କାତ୍ଥାନୁ ଧ୍ୟାନ୍ ମା ଚିଇକିରି ମେହ୍ନତ୍ ଆରୁ ଭାଲାଇ କାମ୍ତେ ରର୍।
ରୂପ୍-ରେଖା
ଯୋହାର୍ ୧:୧,୨
ସ୍ତୁତି ଆରୁ ବାଡ଼ାଇ ୧:୩-୧୨
ଖ୍ରୀସ୍ତ୍କି ଆରୁଅହନ୍ ବାର୍ନାଘି ବାରେ ଶିକ୍ଷା ୨:୧-୧୭
ଖ୍ରୀସ୍ତ୍ ବିଶ୍ୱାସୀର୍ଘି ଚାଲିଚଲନ୍ଘି ବାରେ ଉପ୍ଦେଶ୍ ୩:୧-୧୫
ଆଖ୍ରୀ କାତ୍ଥା ୩:୧୬-୧୮
1ଯୋହାର୍
1ଏନ୍ ପାଉଲୁସ୍ ସିଲ୍ବାନୁସ୍ ଆରୁ ତୀମଥିଉସ୍ଗାନେ ମେଶ୍ରିକିରି ଥେସଲନିକିୟା ସହର୍ଘି ମଣ୍ତ୍ଲୀନ୍ତା ବିଶ୍ୱାସୀର୍ଘି ନାମେନୁ ଚିଠି ଲେଖାଲ୍ଦାନ୍ ଏକାର୍ କା ନାହ୍ମା ବାଙ୍ଗ୍ ପାର୍ମେଶ୍ୱାର୍ ଆରୁ ପ୍ରାଭୁ ଯୀଶୁ ଖ୍ରୀସ୍ତ୍ସ୍କି ଆଲାର୍:
2ନାହ୍ମା ବାଙ୍ଗ୍ ପାର୍ମେଶ୍ୱାର୍ ଆରୁ ପ୍ରାଭୁ ଯୀଶୁ ଖ୍ରୀସ୍ତ୍ସ୍ତି ନିମାଗେ ଦାୟା ଆରୁ ଶାନ୍ତି ହାଖ୍ଖର୍ତେ ରାନାଦ୍।
ଧାନ୍ୟାବାଦ୍ ଆରୁ ବିନ୍ତି
3ହେ ଭାଇ ବୁହୁଣୀଜାମାରୋ, ନିହ୍ମା ଜୀବନ୍ବନ୍ ଏରିକିରି ଏମାଗେ ଜାମାବାକେନ୍ ପାର୍ମେଶ୍ୱାର୍ସ୍ସିନ୍ ଧାନ୍ୟାବାଦ୍ ଚିନା କାତ୍ଥା, ଆରୁ ଇଦ୍ ଉଚିତ୍ଦ୍ ହି ଏନ୍ଦେର୍ଗେକା ନିହ୍ମା ବିଶ୍ୱାସ୍ଦ୍ ବହୁତ୍ ବାଢ଼୍ର୍ତେ କାଲିଦ୍, ଆରୁ ନିହ୍ମାଏ ଯେତ୍କର୍ଘି ବାନେ ହାଖ୍ଖନାଦ୍ ଏକ୍ ଦୁସ୍ରାର୍ଘି ଭିତ୍ରେ ବାଢ଼୍ର୍ତେ କାଲିଦ୍। 4ହୁଦ୍ଘିଲାଗାନ୍ ଏମ୍ ନିଜେ ପାର୍ମେଶ୍ୱାର୍ସ୍କି ମଣ୍ତ୍ଲୀନୁ ନିହ୍ମା ବାରେନୁ ବଡ଼୍ପଣି କାମ୍ଦାମ୍, ଏନ୍ଦେର୍ଗେକା ନିମ୍ ଯେତ୍କ ସାତାୱାଟ୍ ଆରୁ କଷଟ୍ ସାହ୍ଦାର୍ ହୁନ୍ନୁ ନିହ୍ମା ଧିରାଜ୍ ଆରୁ ବିଶ୍ୱାସ୍ ପ୍ରକଟ୍ ମାନିଦ୍।
ପ୍ରାଭୁ ଯୀଶୁସ୍କି ବାର୍ନା ସାମାୟନ୍ତା ନ୍ୟାୟ
5ଇ କାତ୍ଥାଦ୍ ସାଫା-ସାଫା ସାକ୍ଷୀ ଚିଇ କା ପାର୍ମେଶ୍ୱାର୍ସ୍ ନ୍ୟାୟ ସତ୍ତୁତି କାମ୍ଦାସ୍, ନିମ୍ ପାର୍ମେଶ୍ୱାର୍ସ୍କି ରାଜୀଘି ଲାଇଗ୍ ମାନା, ଇଦ୍ଘିଲାଗାନ୍ ତା ନିମ୍ ଦୁଃଖୁହି ସାହାଲ୍ଦାର୍। 6ଏନ୍ଦେର୍ଗେକା ପାର୍ମେଶ୍ୱାର୍ସ୍ ନ୍ୟାୟିସ୍ ଆରୁ ନେଦ୍ ନିମାନ୍ କଷଟ୍ ଚିନାଏ, ଆବ୍ଡ଼ାର୍ଗେ ପାର୍ମେଶ୍ୱାର୍ସ୍ କଷଟ୍ ଚସ୍। 7ଯେତ୍କବାକେନ୍ ପ୍ରାଭୁ ଯୀଶୁସ୍ ତାଙ୍ଘାଏ ଶକ୍ତିଶାଲୀ ଦୂଁତ୍ଜାମାର୍ ଗାନେ ଲାଘ୍ର୍ନା ଚିଚ୍ଚୁନୁ ସର୍ଗ୍ସ୍ତି ବାରସ୍ ହତ୍କବାକେନ୍ ନିମ୍ ଏକାର୍ କା କଷଟ୍ ସାହାଲ୍ଦାର୍, ପାର୍ମେଶ୍ୱାର୍ସ୍ ନିମାନ୍ ଏହ୍ମା ଗାନେ ଶାନ୍ତି ଚସ୍। 8ଏକାର୍ ପାର୍ମେଶ୍ୱାର୍ସିନ୍ ବାଲ୍ନାଏ ଆରୁ ନାହ୍ମା ପ୍ରାଭୁ ଯୀଶୁସ୍କି ସୁସାମାଚାର୍ବନ୍ ମା ମାନ୍ନାଏ ଆବ୍ଡ଼ାର୍ଗେ ଦଣ୍ଡ୍ ଚିଆକୋ। 9ଆବ୍ଡ଼ାର୍ ପ୍ରାଭୁସ୍କି ଚାହାନ୍ତି ଆରୁ ଆସ୍କି ଶକ୍ତିଘି ମାହିମାତି ଦୁର୍ ମାନିକିରି ସବୁଦିନ୍ଘି ଲାଗାନ୍ ନାଶ୍ଘି ଦଣ୍ଡ୍ ହାଖ୍ଖର୍ 10ଇଦ୍ ଆ ଉଲ୍ଲା ମାନ ଯେତ୍କବାକେନ୍ ଯୀଶୁସ୍, ତାଙ୍ଘା ପାବିତାର୍ ଆଲାର୍ଘି ମାଝାନୁ ମାହିମା ହାଖ୍ଖାଗେ ଆରୁ ଜାମା ବିଶ୍ୱାସ୍ କାମ୍ନାବାଲା ଆଲାର୍ଘି ଲାଗାନ୍ ଅଦ୍ଦଭୁତ୍ଘି କାରଣ୍ ମାନାଗେ ବାରସ୍; ତା ନିମ୍ହି ସାମିଲ୍ ମାନର୍ ଏନ୍ଦେର୍ଗେକା ଏକା କାତ୍ଥାନ୍ ଏମ୍ ତେଙ୍କାମ୍ ଆବନ୍ ନିମ୍ ବିଶ୍ୱାସ୍ କାମ୍ଚ୍କାର୍। 11ହୁଦ୍ଘିଲାଗାନ୍ ଏମ୍ ଜାମାବାକେନ୍ ନିହ୍ମା ଲାଗାନ୍ ବିନ୍ତି କାମ୍ଦାମ୍ କା ନାହ୍ମା ପାର୍ମେଶ୍ୱାର୍ସ୍ ନିମାନ୍ ଏକା ଜୀବନ୍ ବିତାବାଗେ ମେହ୍କାଦାସ୍ ଆଦ୍ଘି ଲାଇଗ୍ ସୋଚସ୍, ଆରୁ ବାନେ ଇଚ୍ଛାବନ୍ ଆରୁ ବିଶ୍ୱାସ୍ଘି ଜାମା ନାଲ୍ଖୁବନ୍ ଶକ୍ତିତି ପୁରା କାମସ୍। 12ଏନ୍ନେନ୍ ନାହ୍ମା ପାର୍ମେଶ୍ୱାର୍ସ୍ ଆରୁ ପ୍ରାଭୁ ଯୀଶୁ ଖ୍ରୀସ୍ତ୍ସ୍କି ଦାୟାତି ନାହ୍ମା ପ୍ରାଭୁ ଯୀଶୁସ୍କି ନାମେ ନାହ୍ମା ମାଝାନୁ ମାଇନ୍ ମାନଦ୍ ଆରୁ ନିମ୍ ତାଙ୍ଘା ଦ୍ୱାର୍ନୁ ମାଇନ୍ ହାଖ୍ଖର୍।
2ପ୍ରାଭୁସ୍କି ବାର୍ନା ଆଘ୍ଲି ଏନ୍ଦେର୍-ଏନ୍ଦେର୍ ମାନଦ୍
1ହେ ଭାଇ ବୁହୁଣୀଜାମାରୋ, ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍ସ୍କି ଆରୁଅହନ୍ ବାର୍ନା, ଆରୁ ତାଙ୍ଘା ଚାହାନୁ ନାମ୍ ଜାମାତ୍ ଠୁଡ଼ିୟା ରାନାଘି ବାରେନୁ ନିମାନ୍ ଆର୍ଜୀବିନ୍ତି କାମ୍ଦାମ୍। 2ଏକିନ୍ ଭବିଷତ୍ କାତ୍ଥା, ଉପ୍ଦେଶ୍, ଚାହେ ଲେଖ୍ଚ୍କା ବଚନ୍ ଦ୍ୱାର୍ନୁ ଏକାଦ୍ କା ଏହ୍ମାତାର୍ତି ବାର୍ଚ୍କିଚି ବୁଲି ଦୁସ୍ରା ଆଲାର୍ ତେଙ୍ଗ୍ନାଏ ଆରୁ ତେଙ୍ଗ୍ନାଏ କା ପ୍ରାଭୁସ୍କି ଉଲ୍ଲା ଆଣ୍ସିୟା କେର୍କିଚି, ଇବନ୍ ସୋଚିକିରି ନିହ୍ମା ମନ୍ ହଠାତ୍ ଅସ୍ଥିର୍ ମା ମାନଦ୍ ଆରୁ ନିମ୍ ଆମ୍କେ ଘାବ୍ରାରା। 3ନେଦ୍ହି ନିମାନ୍ ମା ଫୁସ୍ଲର୍, ଏନ୍ଦେର୍ଗେକା ଆ ଉଲ୍ଲାଦ୍ ହତ୍କତକ୍ ମା ବାରଦ୍ ଯେତ୍କତକ୍ କା ପାର୍ମେଶ୍ୱାର୍ସ୍କି ବିରୋଧ୍ ମା କାମର୍ ଆରୁ ଖାରାପ୍ ଆଲାସ୍ ପ୍ରକଟ୍ ମା ମାନସ୍ ଆରୁ ଆସିନ୍ ନାଶ୍ ମାନାଗେ ଉଇୟା କେର୍କିଚି। 4ଖାରାପ୍ ଆଲାସ୍, ଆ ଜାମା ଜିନିଷ୍ଘି ବିରୋଧ୍ କାମସ୍ ଆରୁ ନିଜ୍କେନିଜ୍ ଆବ୍ଡ଼ା ଜାମାର୍ଘିନ୍ତି ବାଡ଼୍କାନ୍ ବୁଲି ତେଙ୍ଗସ୍ ଏକାଦ୍ କା ପାର୍ମେଶ୍ୱାର୍ସ୍କି ନାମେନୁ ଆହାକାଇ ଚାହେ ଏକାନ୍ ପୂଜା କାମାକାଇ ଆ ଜାମା ଜିନିଷ୍ଘି ବିରୋଧ୍ କାମସ୍, ଏତ୍କତକ୍ କା ଆସ୍ ଯେରୁଶାଲେମ୍ ତା ମନ୍ଦିର୍ନୁ ଅକ୍କିକିରି ନିଜ୍କେନିଜ୍ ପାର୍ମେଶ୍ୱାର୍ ବୁଲି ଦାବି କାମସ୍। 5ଯେତ୍କବାକେନ୍ ଏନ୍ ନିହ୍ମାଗାନେ ରାଚ୍କାନ୍ ତା ନିମାନ୍ ଇବ୍ଡ଼ା କାତ୍ଥାଗୁଠିନ୍ ତେଙ୍ଗ୍ତେ ବାରାଲ୍କାନ୍, ଆବନ୍ କାଁଏ ନିହ୍ମାଏ ମନେ ମାଲ୍ଲାଦିନ୍? 6ଆରୁ ନିମ୍ ଆ କାତ୍ଥାନ୍ ଆହ୍ଦାର୍ ଏକାଦ୍, ଏନ୍ଦେର୍ହି ନିୟମ୍ ମାଲ୍ଲାଦିନ୍ ଏନ୍ନେ ସୋଚୁ ଆଲାସ୍କି ବାର୍ନାନ୍ ରୋକାଲିଦ୍ ତାକା ଆସ୍ ତାଙ୍ଘାଏ ଉଚିତ୍ ସାମାୟନୁ ପ୍ରକଟ୍ ମାନସ୍। 7ଅଧର୍ମଘି ଭେଦ୍ଦୁଦ୍ ଆକ୍କୁନ୍ହି ନାଲ୍ଖୁ କାମାଲିଦ୍, ଲେକିନ୍ ଅଣ୍ଟା ଛେକ୍ନା ବାଲା ଜିନିଷ୍ ରାଇଦ୍ ଯେତ୍କତକ୍ ଛେକ୍ନା ବାଲା ଜିନିଷ୍ଦ୍ ମା ପାଖିଆରୋ, ହତ୍କତକ୍ ଆଦ୍ ନୁହ୍ରିକିରି ନାଲ୍ଖୁ କାମାଲ୍କିରୋ। 8ହତ୍କବାକେନ୍ ଏନ୍ଦେର୍ହି ନିୟମ୍ ମାଲ୍ଲାଦିନ୍ ଏନ୍ନେ ସୋଚୁ ଆଲାସ୍ ଏଥ୍ରସ୍, ନେକାନ୍ କା ପ୍ରାଭୁ ଯୀଶୁସ୍ ତାଙ୍ଘା ଆଦେଶ୍ ଚିଇକିରି ପିଟସ୍ ଆରୁ ତାଙ୍ଘାଏ ଆରୁଅହନ୍ ବାର୍ନାଘି ବିଲ୍ଲୀତି ନାଶ୍ କାମସ୍। 9ଆ ଏନ୍ଦେର୍ହି ନିୟମ୍ ମାଲ୍ଲାଦିନ୍ ଏନ୍ନେ ସୋଚୁ ଆଲାସ୍ ଶାଏତାନ୍ଘି ଶକ୍ତିତି ବାରସ୍ ଆରୁ ଜାମା ଲେଖାଘି ଝୁଟ୍ଟୁ ଶକ୍ତି, ଚିହ୍ନା, ଅଦ୍ଭୁତ୍ ନାଲ୍ଖୁ ଏଦସ୍। 10ଆରୁ ଆସ୍ ନାଶ୍ ମାନ୍ନା ଆଲାରିନ୍ ଜାମା ରକମ୍ଘି ଅଧର୍ମ୍ଘି ଭୁଲ୍ନୁ ଟିଡ଼ିଦାସ୍; ଏନ୍ଦେର୍ଗେକା ଆବ୍ଡ଼ାର୍ ସତ୍ତୁ ବଚନ୍ବନ୍ ଖୁସୀତି ଗ୍ରହନ୍ ମା କାମ୍ଚାର୍, ଏକାତି କା ଆବ୍ଡ଼ାର୍ଘି ଉଦ୍ଧାର୍ ମାନ୍ଚ୍କିରଦ୍ନେ। 11ଇଦ୍ଘିଲାଗାନ୍ ପାର୍ମେଶ୍ୱାର୍ସ୍ ଆବ୍ଡ଼ାର୍ଗେ ଭାଟ୍କାରାନାଘି ଶକ୍ତିବନ୍ ତାଇୟସ୍ କା ଆବ୍ଡ଼ାର୍ ଝୁଟ୍ଟୁବନ୍ ବିଶ୍ୱାସ୍ କାମର୍। 12ଆରୁ ଯେତ୍କ ଆଲାର୍ ସତ୍ତୁବନ୍ ବିଶ୍ୱାସ୍ ମା କାମ୍ନାଏ ଲେକିନ୍ ଅଧର୍ମ୍ନୁ ଖୁସ୍ ମାନ୍ନାଏ, ଆବ୍ଡ଼ା ଯେତ୍କର୍ଗେ ଦଣ୍ଡ୍ ହାଖ୍ଖରଦ୍।
ନିମାନ୍ ପାପ୍ତି ଛୁଟ୍କାରା ହାଖ୍ଖାଗେ ଚାଜ୍ଜକାନାଏ
13ହେ ଭାଇ ଆରୁ ବୁହୁଣୀ ଜାମାରୋ, ପ୍ରାଭୁସ୍ ନିମାନ୍ ବାନେ ହାଖ୍ଖଦାସ୍, ନିହ୍ମା ବାରେନୁ ଏମାଗେ ଜାମାବାକେନ୍ ପାର୍ମେଶ୍ୱାର୍ସ୍ସିନ୍ ଧାନ୍ୟାବାଦ୍ ଚିନା କାତ୍ଥା, ଏନ୍ଦେର୍ଗେକା ପାର୍ମେଶ୍ୱାର୍ସ୍ ଦୁନିଆଁଘି ସୁରୁନ୍ତି ନିମାନ୍ ଚାଜ୍ଜକାଦାସ୍ କା ନିମ୍ ପାବିତାର୍ ଆତ୍ମାଘି ଦ୍ୱାର୍ନୁ ପାବିତାର୍ ମାନିକିରି, ସତ୍ତୁବନ୍ ବିଶ୍ୱାସ୍ କାମିକିରି ମୁକ୍ତି ହାଖ୍ଖର୍। 14ଏକାଘି ଲାଗାନ୍ ପାର୍ମେଶ୍ୱାର୍ସ୍ ନିମାନ୍ ଏହ୍ମା ସୁସାମାଚାର୍ଘି ଉପ୍ଦେଶ୍ ଦ୍ୱାର୍ନୁ ମେଁହେକାଦାସ୍, କା ନିମ୍ ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍ସ୍କି ମାହିମାବନ୍ ହାଖ୍ଖର୍। 15ହୁଦ୍ଘିଲାଗାନ୍ ହେ ଭାଇ ବୁହୁଣୀଜାମାରୋ, ବିଶ୍ୱାସ୍ନୁ ମଜ୍ବୁତ୍ ରା; ଆରୁ ଏକା କାତ୍ଥାଗୁଠିନ୍ ବଚନ୍ ଆରୁ ଚିଠି ଦ୍ୱାର୍ନୁ ଏହ୍ମାସ୍ତି ଶିଖ୍ର୍କାଦାର୍ ଆବନ୍ ଧାରା ଉଇୟା।
16ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍ସ୍ ନିଜେ, ଆରୁ ନାହ୍ମା ବାଙ୍ଗ୍ ପାର୍ମେଶ୍ୱାର୍ସ୍, ଏକାସ୍ ନାମାନ୍ ବାନେ ହାଖ୍ଖଦାସ୍ ଆରୁ ଦାୟାତି ସବୁଦିନ୍ଘି ଲାଗାନ୍ ଶାନ୍ତି ଆରୁ ବାନେ ମଜ୍ବୁତ୍ ଆଶ୍ରା ଚିଚ୍କାଦାସ୍। 17ନିହ୍ମା ମନ୍ନୁ ଶାନ୍ତି ଚିନାସ୍ ଆରୁ ନିମାନ୍ ଜାମା ଲେଖାଘି ବାନେ ନାଲ୍ଖୁନୁ ଆରୁ ବଚନ୍ନୁ ମଜ୍ବୁତ୍ କାମ୍ନାସ୍।
3ଏମାଗେ ବିନ୍ତି କାମା
1ଆଖ୍ରୀନୁ ହେ ଭାଇ ବୁହୁଣୀଜାମାରୋ, ଏହ୍ମାଲାଗାନ୍ ବିନ୍ତି କାମା କା ପ୍ରାଭୁସ୍କି ବଚନ୍ ଏନ୍ନେ ଚାଁଣେ ଫାଇଲା ରଦ୍ ଆରୁ ଆଲାର୍ ଆବନ୍ ମାଇନ୍ଘି ସାଙ୍ଗେ ଗ୍ରହନ୍ କାମର୍, ଏସ୍କେ କା ନିହ୍ମା ମାଝାନୁ ସୁସାମାଚାର୍ ଫାଇଲା ରାଚ୍କିଚା। 2ଆରୁହି ଏହ୍ମାଲାଗାନ୍ ବିନ୍ତି କାମା କା ନେଦ୍ ଯୀଶୁ ଖ୍ରୀସ୍ତ୍ସ୍କି ବଚନ୍ବନ୍ ଗ୍ରହନ୍ ମା କାମ୍ନାଏ ଆବ୍ଡ଼ାର୍ସ୍ତି, ଆରୁ ଖାରାପ୍ ଆଲାସ୍ସ୍ତି ବାଛ୍ରିକିରି ରମ୍, ଏନ୍ଦେର୍ଗେକା ଢେର୍ ଆଲାର୍ ଯୀଶୁସିନ୍ ବିଶ୍ୱାସ୍ ମା କାମ୍ନାଏ। 3ଲେକିନ୍ ପ୍ରାଭୁସ୍ ବିଶ୍ୱାସ୍ଘି ଲାଇଗ୍ ରାଦାସ୍; ଆସ୍ ନିମାନ୍ ଶକ୍ତିତି ମଜ୍ବୁତ୍ କାମସ୍: ଆରୁ ଖାରାପ୍ତି ବାଛାବସ୍ 4ଆରୁ ପ୍ରାଭୁ ଯୀଶୁସ୍ ଏମାନ୍ ନିହ୍ମା ମିଆଁ ପୁରା ବିଶ୍ୱାସ୍ ଚିଚ୍କାଦାସ୍ କା ଏକା-ଏକା ହୁକୁମ୍ ଏମ୍ ନିମାଗେ ଚିଚ୍କାଦାମ୍, ଆବନ୍ ନିମ୍ ମାନ୍ଦାର୍ ଆରୁ ମାନ୍ତେ ରର୍। 5ଆରୁ ପ୍ରାଭୁସ୍ ନିହ୍ମା ମନ୍ବନ୍ ପାର୍ମେଶ୍ୱାର୍ସ୍କି ବାନେ ହାଖ୍ଖନା ଆରୁ ଖ୍ରୀସ୍ତ୍ସ୍କି ଧିରାଜ୍ତି ସାହ୍ନା ତାରା ଆଗୁୱାଇ କାମ୍ନାସ୍।
କୁଢ଼ିୟାର୍ଘି ବିରୁଦ୍ଧ୍ନୁ ଚେତାବାନୀ
6ହେ ଭାଇ ବୁହୁଣୀଜାମାରୋ, ଏମ୍ ନିମାନ୍ ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍ସ୍କି ହକ୍ତି ଶକତ୍ ହୁକୁମ୍ ଚିଆଲ୍ଦାମ୍; କା ଏନ୍ନେ ଜାମା ଭାଇ ବୁହୁଣୀସ୍ତି ଭିନେ ରା, ଏକାର୍ କା ଏନ୍ଦେର୍ହି ନାଲ୍ଖୁ ମା କାମ୍ନାଏ, ଆରୁ ଏକା ଶିକ୍ଷା ନାମ୍ ଆବ୍ଡ଼ାର୍ଗେ ଚିଚ୍କାଦାତ୍ ଆଦ୍ଘି ଲେଖା ମା ଚାଲ୍ର୍ନାଏ। 7ଏନ୍ଦେର୍ଗେକା ନିମ୍ ନିଜେ ଆହ୍ଦାର୍ କା ଏହ୍ମା ଲେଖା ନିମାଗେ ଏସ୍କେ ଚାଲ୍ର୍ନା କାତ୍ଥା, ଏନ୍ଦେର୍ଗେକା ନିହ୍ମାଗାନେ ରାଚ୍କାମ୍ ବାକେନ୍ ଏମ୍ କୁଢ଼ିୟା ମାଲ୍ଲା ରୁମ୍। 8ଆରୁ ଏମ୍ ନେଖାସ୍ତିହି ହୋନ୍ନେନ୍ ମାଲ୍ଲା ଅନ୍ନାମହ୍ନା; ଆରୁ ନିହ୍ମା ଭିତର୍ନୁ ନେଖା ମିଆଁହି ଭାର୍ ମା ମାନମ୍ ହୁଦ୍ଘିଲାଗାନ୍ ନିଜେ ନାଲ୍ଖୁ କାମିକିରି ଆରୁ କଷଟ୍ ସାହିକିରି ଉଲ୍ଲାନ୍ ମାହାନ୍ ନାଲ୍ଖୁ କାମାଲ୍କାମ୍। 9ଏନ୍ନେ ମାଲ୍ଲା କା ନିହ୍ମାସ୍ତି ଅନାମହାଗେ ଏହ୍ମାଏ ହକ୍ ମାଲ୍ଲାଦିନ୍ ଲେକିନ୍ ଏସ୍କେ କା ନିମ୍ ଏହ୍ମା ଲେଖା ଚାଲ୍ରର୍ ହୁଦ୍ଘିଲାଗାନ୍ ଏମ୍ ନିହ୍ମାସାନ୍ ନିଜ୍କେନିଜ୍ ନମୁନା ଲେଖା ଏଦାଗେ ଏନ୍ନେ କାମ୍ଚ୍କାମ୍। 10ଏନ୍ଦେର୍ଗେକା ଯେତ୍କବାକେନ୍ ଏମ୍ ନିହ୍ମାଗାନେ ରାଚ୍କାମ୍, ହତ୍କବାକେନ୍ନିନ୍ ନିମାନ୍ ଏନ୍ନେ ହୁକୁମ୍ ଚିଚ୍କାଚ୍କାମ୍, କା ଏକାସ୍ ନାଲ୍ଖୁ କାମା ମା ବେଦ୍ଦସ୍ ତା ଆସ୍କେ ମା ଅନ୍ନା କାତ୍ଥା।
11ଏମ୍ ମେନାଲ୍ଦାମ୍ କା ନିହ୍ମା ମାଝାନୁ କେତ୍କ ଲୋକ୍ କୁଢ଼ିୟାର୍ ରାନାଏ, ଆରୁ ଏନ୍ଦେର୍ହି ନାଲ୍ଖୁ ମା କାମ୍ନାଏ ଆରୁ ଦୁସ୍ରାର୍ଘି ନାଲ୍ଖୁନୁ ବାଧା ଡାଲ୍ନାଏ। 12ଏନ୍ନେ ଆଲାରିନ୍ ଏମ୍ ପ୍ରାଭୁ ଯୀଶୁ ଖ୍ରୀସ୍ତ୍ସ୍କି ହକ୍ତି ହୁକୁମ୍ ଚିଆଲ୍ଦାମ୍ ଆରୁ ବୁଝାବାଲ୍କାମ୍ କା ଶାନ୍ତିସେ ନାଲ୍ଖୁ କାମା, ଆରୁ ନିଜର୍ କମାଣିନ୍ ଅନା। 13ଲେକିନ୍ ହେ ଭାଇ ବୁହୁଣୀଜାମାରୋ, ନିମ୍ ଭାଲାଇ କାମ୍ନାନୁ ଆମା ଥାକ୍ରା।
14ଆରୁ ଯଦି ନେଦିନ୍ ଚିଠି ଦ୍ୱାର୍ନୁ ଚିଚ୍କା ହୁକୁମ୍ବନ୍ ମା ମାନର୍ ତା ଆସ୍କି ମିଆଁ ନଜର୍ ଉଇୟା; ଆରୁ ଆସ୍ଗାନେ ଆମା ମେଶ୍ରା, ଏସ୍କେ କା ଆସ୍ ଲାଜରସ୍। 15ହାଲେହି ଆସିନ୍ ଦୁଶ୍ମାନ୍ ଆମା ସୋଚା, ଲେକିନ୍ ଭାଇ ବୁଲି ସୋଚିକିରି ଆସିନ୍ ବାନେ ହାଖ୍ଖନାତି ବୁଝାବା।
ଆଖ୍ରୀ ଆଶିଷ୍
16ଆକ୍କୁନ୍ ଶାନ୍ତିଦାତା ପ୍ରାଭୁସ୍ ନିଜେ ଜାମାବାକେନ୍ ଜାମା ଲେଖାଘି ଶାନ୍ତି ଚିନାସ୍। ପ୍ରାଭୁସ୍ ନିହ୍ମା ଜାମାର୍ଗାନେ ରାନାସ୍।
17ଏନ୍ ପାଉଲୁସ୍ ଏଙ୍ଘାଏ ହେଖ୍ଖାତି ଯୋହାର୍ ଲେଖାଲ୍ଦାନ୍: ଜାମା ଚିଠିନୁ ଏଙ୍ଘାଏ ଦସ୍କତ୍ ରାଇ: ଆରୁ ଇଦ୍ ଏଙ୍ଘା ଲେଖ୍ନାଘି ତାରିକା; ଆରୁ ଏନ୍ ଏନ୍ନେନିନ୍ ଲେଖ୍ଦାନ୍। 18ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍ସ୍କି ଦାୟା ନିହ୍ମା ଜାମାର୍ଘି ମିଆଁ ମାନ୍ନାଦ୍।