ପାତ୍ରାସ୍କି ଲେଖ୍ଚ୍କା ଦୁସ୍ରା ଚିଠି
ବହିଘି ପରିଚୟ
ଇ ଚିଠିନ୍ ପାତ୍ରାସ୍ ଲେଖ୍ଚ୍କାଦାସ୍। ଆସ୍କି ନାମେ ଶିମୋନ୍ ରାଚା। ଯୀଶୁସ୍ ଆସ୍କି ନାମେ ବାଦ୍ଲିକିରି ପାତ୍ରାସ୍ ଉଇୟାସ୍ ଯୋହାନ୍ ୧:୪୨। ଶିମୋନ୍ସ୍କି ତାଙ୍ଘା ନିଜର୍ ବେପାର୍ ରାଚା। ଆସ୍ କେଉଁଟା ରାଚାସ୍। ଲେକିନ୍ ଯୀଶୁସ୍ ଶିମୋନ୍ସିନ୍ ତାଙ୍ଘା ଖାସ୍ଚେଲା ମାନାଗେ ମେଁହିୟାସ୍। ଆସ୍ ବାର ଲୋକ୍ ଖାସ୍ଚେଲାର୍ଘି ଭିତର୍ନୁ ଅର୍ତୁସ୍। ପାଛ୍ଲି ଆସ୍ ବିଶ୍ୱାସୀ ଜାମାର୍ଘି ଅଣ୍ଟା ମୁଖିଆ ମାନ୍ଚାସ୍। ଆସ୍ ରୋମ୍ ଦେଶ୍ନୁ ରାଲିୟାସ୍। ପାତ୍ରାସ୍ ଆହାଲିୟାସ୍ କା ଖାରାପ୍ ଆଲାର୍ ତାଙ୍ଗାନ୍ ଚାଁଣେ ପିଟର୍ଚର୍, ଏନ୍ଦେର୍ଗେକା ଆସ୍ ଯୀଶୁସିନ୍ ବିଶ୍ୱାସ୍ କାମାଲିୟାସ୍। ଯୀଶୁସ୍ ସରଗ୍ଗେ କେର୍କାଘି ୩୫ ବଛର୍ଘି ପାଛ୍ଲି ପାତ୍ରାସ୍ କେଚ୍ଚାସ୍କେରାସ୍।
ପାତ୍ରାସ୍କି ଇ ଦୁସ୍ରା ଚିଠି ଆଘ୍ଲି ଯୁଗ୍ତା ଖ୍ରୀସ୍ତ୍ ବିଶ୍ୱାସୀ ଜାମାର୍ଗେ ଲେଖ୍ଚ୍କା ରାଇ। ଏକା ଝୁଟ୍ଟୁ ଶିକ୍ଷା ଚିଉର୍ ଆରୁ ଝୁଟ୍ଟୁ ନାବୀର୍ ଖ୍ରୀସ୍ତ୍ ବିଶ୍ୱାସୀରିନ୍ ସତ୍ତୁ ପାବୁନ୍ତି ହାଟାବାଗେ କୋଶିଷ୍ କାମ୍ନାଏ। ଆବ୍ଡ଼ାର୍ଘି ବାରେ ଲେଖୁସ୍ ଖ୍ରୀସ୍ତ୍ ବିଶ୍ୱାସୀ ଜାମାରିନ୍ ସାବ୍ଧାନ୍ ରାଗେ ତେଙ୍ଗାଲ୍ଦାସ୍। ଆସ୍ ପାଢ଼ୁରିନ୍ ତେଙ୍ଗାଲ୍ଦାସ୍ କା ପ୍ରାଭୁ ଯୀଶୁ ଖ୍ରୀସ୍ତ୍କି ବାର୍ନାଦ୍ ଜରୁରୀ ରାଇ, ଇବନ୍ ଆବ୍ଡ଼ାର୍ ମା ମଦ୍ର୍ନା କାତ୍ଥା, ଯଦିଭି ଢେର୍ ଆଲାର୍ ଆଶ୍ରା କାମ୍ନାଘି ଅନୁସାର୍ ଇଦ୍ ଚାଁଣେ ମାଲ୍ଲା ଘାଟ୍ରୁ, ଏନ୍ଦେର୍ଗେକା ପାର୍ମେଶ୍ୱାର୍ସ୍ ମା ଚାହ୍ଁଦାସ୍ କା ନେଦ୍ହି ନାଶ୍ ମାନ୍ନାର୍, ଲେକିନ୍ ଜାମାର୍ଗେ ପାସ୍ତାରାନାଘି ମଉକା ହାଖ୍ଖର୍ନାଦ୍।
ରୂପ୍-ରେଖା:
ଯୋହାର୍ ୧:୧,୨
ଖ୍ରୀସ୍ତ୍କି ମେଁହ୍ନା ୧:୩-୨୧
ଝୁଟ୍ଟୁ ଶିକ୍ଷା ଚିଉର୍ ୨:୧-୨୨
ଖ୍ରୀସ୍ତ୍କି ଆରୁଅହନ୍ ବାର୍ନା ୩:୧-୧୮
1ଯୋହାର୍
1ଏନ୍ ଶିମୋନ୍ ପାତ୍ରାସ୍, ଯୀଶୁ ଖ୍ରୀସ୍ତ୍କି ଅଣ୍ଟା ସେବକ୍ ଆରୁ ଖାସ୍ଚେଲା, ନାହ୍ମାଏ ପାର୍ମେଶ୍ୱାର୍ସ୍ ଆରୁ ପାପ୍ତି ବାଛାବୁ ଯୀଶୁ ଖ୍ରୀସ୍ତ୍କି ବାନେ ନାଲ୍ଖୁଘି ଦ୍ୱାର୍ନୁ ନାହ୍ମାଏ ଲେଖା ଏକା ଆଲାର୍ ବହୁତ୍ ଦାମିକା ବିଶ୍ୱାସ୍ ହାକ୍କାନାଏ ଆବ୍ଡ଼ାର୍ଘି ନାମେନୁ ଚିଠି ଲେଖାଲ୍ଦାନ୍। 2ନିମ୍ ପାର୍ମେଶ୍ୱାର୍ସ୍ ଆରୁ ନାହ୍ମା ପ୍ରାଭୁ ଯୀଶୁସିନ୍ ଆକ୍କାଦାର୍, ହୁଦ୍ଘିଲାଗାନ୍ ନିମାଗେ ପାର୍ମେଶ୍ୱାର୍ସ୍କି କ୍ରିପା ଆରୁ ଶାନ୍ତି ଢେର୍ବାଗ୍ଗେ ହାଖ୍ଖର୍ନାଦ୍।
ବିଶ୍ୱାସ୍ନୁ ବାଢ଼ର୍ତେ କାଲା
3ନାହ୍ମା ଜୀବନ୍ଘି ଲାଗାନ୍ ଆରୁ ଧାର୍ମିକ୍ ଜୀବନ୍ ବିତାବାନାଘି ଲାଗାନ୍ ଏକାଦ୍ ନାମାଗେ ଦାର୍କାର୍ ରାଇ, ପାର୍ମେଶ୍ୱାର୍ସ୍କି ଶକ୍ତିତି ଜାମାକିଛି ନାମାଗେ ହାଖ୍ଖର୍କିଚି। ଏନ୍ଦେର୍ଗେକା ନାମ୍ ଆସିନ୍ ଆହ୍ଦାତ୍, ଏକାସ୍ କା ନିଜର୍ ବାନେ ଗୁଣ୍ ଆରୁ ମାହିମାଘି ଲାଗାନ୍ ନାମାନ୍ ମେହ୍କାଦାସ୍। 4ଇତ୍ତି ଆସ୍ ନାମାଗେ ଆ ବାଡ଼୍କା ଆରୁ ଦାମିକା କାତ୍ଥା ଚିଚ୍ଚକାଦାସ୍, ତାକା ଆତ୍ତି ନିମ୍ ପାର୍ମେଶ୍ୱାର୍ସ୍କି ସାଭାବ୍ ଲେଖା ମାନାକାଲା ଆରୁ ଆ ନାଶ୍ତି ବାଛ୍ରା ଏକାଦ୍ କା ଇ ଦୁନିଆଁନୁ ଆଲାର୍ଘି ଖାରାପ୍ ଇଚ୍ଛାତି ମାନିଦ୍। 5ଇଦ୍ଘିଲାଗାନ୍ ନିମ୍ ଜାମା ଲେଖା ଜତନ୍ କାମିକିରି ନିଜର୍ ବିଶ୍ୱାସ୍ନୁ ବାନେ ଗୁଣ୍ ଆରୁ ବାନେ ଗୁଣ୍ନୁ ଜ୍ଞାନ୍। 6ଆରୁ ଜ୍ଞାନ୍ନୁ ନିଜ୍କେ କାବୁନୁ ଉଇନା, ନିଜ୍କେ କାବୁନୁ ଉଇନାନୁ ଧିରାଜ୍, ଆରୁ ଧିରାଜ୍ନୁ ଭକ୍ତିବନ୍, 7ଆରୁ ଭକ୍ତିନୁ ଭାଇ ବୁହୁଣୀଜାମାରିନ୍ ବାନେ ହାଖ୍ଖନା ଆରୁ ଭାଇ ବୁହୁଣୀଜାମାରିନ୍ ବାନେ ହାଖ୍ଖନାନ୍ ବାଢ଼ାବାତେ କାଲା। 8ଏନ୍ଦେର୍ଗେକା ଯଦି ଇବ୍ଡ଼ା ଗୁଣ୍ଦ୍ ନିହ୍ମାଏନୁ ରାଇଦ୍ ଆରୁ ବାଢ଼୍ର୍ତେ କାଇଦ୍ ତା, ନିମ୍ ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍କି ବାରେ ପୁରାପୁରୀ ବୁଦ୍ଧି ହାଖ୍ଖନାନୁ ବିନାଫାଡ଼ୁ ଆରୁ ବିନାଫାଏଦା ମାନା ମାଚି। 9ହାଲେ ନେଖାଏନୁ ଇ ଗୁଣ୍ ମାଲ୍ଲାଦିନ୍, ଆସ୍ କାଁଣାସ୍ ଆରୁ ଧୁନ୍ଦ୍ରା-ଧୁନ୍ଦ୍ରା ଏର୍ଦାସ୍, ଆରୁ ଆସ୍କି ଆଘ୍ଲିନ୍ତା ପାପ୍ବନ୍ ନଣୀକିରି ଶୁଦ୍ଧ୍ କାମା କେର୍କିଚି ଆବନ୍ ଆସ୍ ମଦ୍ରେ ଚିଚ୍ଚକାଦାସ୍। 10ଇଦ୍ଘିଲାଗାନ୍ ହେ ଭାଇ ବୁହୁଣୀଜାମାରୋ, ନିମାନ୍ ମେଁହ୍ନା ଆରୁ ଚାଜ୍ଜନାବନ୍ ସିଦ୍ଧ୍ କାମାଗେ ବାନେକିରି ଯତନ୍ କାମ୍ତେ କାଲା, ଏନ୍ଦେର୍ଗେକା ଯଦି ନିମ୍ ଏନ୍ନେ କାମର୍ ତା ଏକ୍ଲାହି ଠୋକର୍ ମା ମହ୍ଦାର୍; 11ଏନ୍ନେନ୍ ନିମ୍ ନାହ୍ମାଏ ପ୍ରାଭୁ ଆରୁ ପାପ୍ତି ବାଛାବୁ ଯୀଶୁ ଖ୍ରୀସ୍ତ୍କି ସବୁଦିନ୍ତା ରାଜୀନୁ ବିନା ରୋକ୍ଟୋକ୍ତି କରାଗେ ଅଙ୍ଗର୍।
ପାତ୍ରାସ୍କି ଆଖ୍ରୀ ସାମାୟ
12ହୁଦ୍ଘିଲାଗାନ୍ ଯଦିଭି ନିମ୍ ଇ କାତ୍ଥାନ୍ ଆହ୍ଦାର୍, ଆରୁ ଏକା ସତ୍ତୁ ବଚନ୍ଦ୍ ନିମାଗେ ହାଖ୍ଖର୍କିଚି, ଆନ୍ନୁ ଟିକ୍ରିକିରି ରାଦାର୍, ହାଲେହି ଏନ୍ ନିମାନ୍ ଇବ୍ଡ଼ା କାତ୍ଥାଗୁଠିନ୍ ମନେ କାମ୍ତାଗେ ଜାମାବାକେନ୍ ତିୟାର୍ ରନ୍। 13ଏନ୍ ଇବନ୍ ଠିକ୍ ସୋଚ୍ଦାନ୍ କା ଯେତ୍କବାକେନ୍ତକ୍ ଏନ୍ ଉଜ୍ଜନ୍ ହତ୍କବାକେନ୍ତକ୍ ନିମାନ୍ ମନେ କାମ୍ତିକିରି ସାବ୍ଧାନ୍ ରାଗେ ତେଙ୍ଗନ୍। 14ଏସ୍କେ କା ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍ ଏଙ୍ଗାନ୍ ବାନେକିରି ତେଙ୍କାଦାସ୍ କା ଏନ୍ ଆହ୍ଦାନ୍ ଏଙ୍ଗା ଇ ଦୁନିଆଁନ୍ତି ବିଦା ହୋନାଘି ସାମାୟ ଚାଁଣେ ବାର୍ନାବାଲା ରାଇ। 15ହୁଦ୍ଘିଲାଗାନ୍ ଏନ୍ ଏନ୍ନେ କୋଶିଷ୍ କାମନ୍ କା ଏଙ୍ଘା ବିଦା ମାନ୍ଚ୍କା ପାଛ୍ଲି ହି ନିମ୍ ଇବ୍ଡ଼ା କାତ୍ଥାଗୁଠିନ୍ ଜାମାବାକେନ୍ ମନେ କାମା ଅଙ୍ଗର୍।
ଏମ୍ ଖ୍ରୀସ୍ତ୍କି ମାହିମାବନ୍ ଏର୍କାଦାମ୍
16ଏନ୍ଦେର୍ଗେକା ଯେତ୍କବାକେନ୍ ଏମ୍ ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍କି ଶକ୍ତି ଆରୁ ଆରୁଅହନ୍ ବାର୍ନାଘି ବାରେ ନିମାନ୍ ବାତାବାଚ୍କାଚ୍କାମ୍ ତା, ଆଦ୍ ଚାଲାକ୍ତି ଗାଢ଼ଚ୍କା କାହାନୀଘି ସାହାରା ମାଲ୍ଲା ହୋନା, ଏନ୍ଦେର୍ଗେକା ଏମ୍ ନିଜେ ଆସ୍ କେତ୍କ ମାହାନ୍ସ୍ ଆବନ୍ ଏର୍କାମ୍। 17ଏନ୍ଦେର୍ଗେକା ଯେତ୍କବାକେନ୍ ଆସ୍ ବାଙ୍ଗ୍ ପାର୍ମେଶ୍ୱାର୍ସ୍ତି ଆଦର୍ ଆରୁ ମାହିମା ହାଖ୍ଖୀୟାସ୍ ତା ଆ ବିଲ୍ଚ୍ନା ବାଦ୍ଲିନ୍ତି ଇ ବଚନ୍ ମେନ୍ଦରା, “ଇସ୍ ଏଙ୍ଘାଏ ଦୁଲାଡ଼ି ହାଦ୍ଦୁସ୍, ଏକାସ୍କିନୁ କା ଏନ୍ ବହୁତ୍ ଖୁସ୍ ରାଦାନ୍।” 18ଯେତ୍କବାକେନ୍ ଏମ୍ ଆସ୍ଗାନେ ପାବିତାର୍ ପାର୍ତ୍ତାନୁ ରାଚ୍କାମ୍, ହତ୍କବାକେନ୍ ସରଗ୍ସ୍ତି ଇ ବଚନ୍ ବାର୍ନାନ୍ ମେନ୍ଚ୍କାମ୍। 19ନାହ୍ମାସାନ୍ ଏକା ନାବୀଜାମାର୍ଘି ବଚନ୍ଦ୍ ରାଇଦ୍, ଆଦ୍ ଇ ଘାଟ୍ଣାନ୍ତି ମଜ୍ବୁତ୍ ମାନ୍ଚା। ଏକାଦ୍ କା ଉହାନୁ ପାଇରି ମା ବିଜ୍ନାତକ୍ ଆରୁ ଭୋର୍ପାଇରିଘି ବିନ୍କୋ ନିହ୍ମା ମନ୍ନୁ ମା ବିଲ୍ଚ୍ନାତକ୍ ବିଲ୍ଚାଲି। ଇବନ୍ ଧ୍ୟାନ୍ ଚିଇକିରି ନିମ୍ ବାନେ କାମାଲ୍ଦାର୍, ଏନ୍ଦେର୍ଗେକା ନାବୀଜାମାର୍ଘି ବଚନ୍ଦ୍ ବିଲ୍ଲୀ ଲେଖା ରାଇ, 20ଲେକିନ୍ ପହ୍ଲେ ନିମ୍ ଇବନ୍ ଆହା କା ପାବିତାର୍ ଶାସ୍ତ୍ରନ୍ତା ଏକିନ୍ହି ଭବିଷତ୍ କାତ୍ଥା ଏକିନ୍ ନାବୀର୍ଘି ନିଜର୍ ସୋଚ୍ଇଚ୍ଛାଘି ଲେଖା ପୁରା ମା ମାନିଦ୍। 21ଏନ୍ଦେର୍ଗେକା ଏକ୍ରିନ୍ହି ଭବିଷତ୍ କାତ୍ଥା ଆଲାର୍ଘି ଇଚ୍ଛାତି ମା ମାନିଦ୍, ଭକ୍ତ ଆଲାର୍ ପାବିତାର୍ ଆତ୍ମାଘି ମଦେତ୍ତି ପାର୍ମେଶ୍ୱାର୍ସ୍କି ତାର୍ତି ତେଙ୍ଗାଲିୟାର୍।
2ଝୁଟ୍ଟୁ ଶିକ୍ଷା ଚିଉର୍ସ୍ତି ସାବ୍ଧାନ୍ ରା
1ଏସ୍କେ ୟାହୁଦୀ ଆଲାର୍ଘି ମାଝାନୁ ଝୁଟ୍ଟୁ ନାବୀର୍ ରାଚାର୍, ହୋନ୍ନେନ୍ ନିହ୍ମା ମାଝାନୁହି ଝୁଟ୍ଟୁ ଉପ୍ଦେଶ୍ ଚିଉର୍ ରର୍, ଆବ୍ଡ଼ାର୍ ନୁହ୍ରିକିରି ନାଶ୍ଘି ଭୁଲ୍ ଧାର୍ଣାବନ୍ ପ୍ରଚାର୍ କାମର୍ ଆରୁ ଏକା ମାଲିକ୍ସ୍ ଆବ୍ଡ଼ାରିନ୍ ହେନ୍ଦିୟାସ୍ ଆସିନ୍ ମା ମାନର୍, ଆରୁ ଏନ୍ନେ କାମିକିରି ଆବ୍ଡ଼ାର୍ ନିଜ୍କେନିଜ୍ ବହୁତ୍ ଚାଁଣେ ନାଶ୍ କାମର୍ଚର୍। 2ଢେର୍ ଆଲାର୍ ଆବ୍ଡ଼ାର୍ଘି ମଉଜ୍-ମଜ୍ଲିସ୍ଘି ପିଛା କାମର୍ ଆରୁ ଆବ୍ଡ଼ାର୍ଘି ଲାଗାନ୍ ସତ୍ତୁ ପାବୁଘି ବଦ୍ନାମ୍ ମାନୋ। 3ଆବ୍ଡ଼ାର୍ ଧାନ୍ନୁଘି ଲୋଭ୍ ଲାଗାନ୍ ମନ୍ଗଢ଼ା କାତ୍ଥା ତେଙ୍ଗିକିରି ନିମାନ୍ ଠାକର୍, ଲେକିନ୍ ପାର୍ମେଶ୍ୱାର୍ସ୍ ଆବ୍ଡ଼ାର୍ଗେ ଦଣ୍ତ୍ଘି ଆଦେଶ୍ ବହୁତ୍ ପହ୍ଲେ ଠାହ୍ରାଚ୍କାଦାସ୍। ଆରୁ ଆବ୍ଡ଼ାର୍ଘି ନାଶ୍ବଦ୍ ଡେରି ମାଲ୍ଲାଦିନ୍।
4ନ୍ୟାୟଘି ଉଲ୍ଲାତକ୍ ଆସାନ୍ ହିର୍କାରର୍ ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍ ପାପ୍ କାମୁ ସରଗ୍ଦୂଁତ୍ ଜାମାରିନ୍ ମା ଆମ୍ବିୟାସ୍, ଲେକିନ୍ ନରକ୍ନୁ ତାଇୟିକିରି ଉହା ଗାଡ୍ଡିନୁ ଟିଡ୍ଡେଇଚାସ୍। 5ପାର୍ମେଶ୍ୱାର୍ସ୍ ଅଧର୍ମିୟାଁର୍ଘି ଦୁନିଆଁନୁ ବହୁତ୍ ବାଡ଼୍କା ବାଢ଼ି ତାଇୟାସ୍, ଆରୁ ଆସ୍ ଆଘ୍ଲି ଯୁଗ୍ତା ଦୁନିଆଁବନ୍ହି ମା ଆମ୍ବିୟାସ୍, ଲେକିନ୍ ଆସ୍ ଧର୍ମ୍ଘି ପ୍ରଚାର୍ କାମୁ ନୁଆସ୍ଗାନେ ଆରୁ ସାତ୍ ଲୋକ୍ ଆଲାରିନ୍ ବାଛାବାଚାସ୍। 6ଆରୁ ସଦୋମ୍ ଆରୁ ଗମୋରା ସହର୍ବନ୍ ନାଶ୍ଘି ଏନ୍ନେ ଦଣ୍ଡ୍ ଚିଚ୍ଚାସ୍ କା ଆବନ୍ ଛାର୍ଖାର୍ କାମିକିରି ଚିନ୍ଦୁ ପାଲ୍ଟେଇ ଚିଚ୍ଚାସ୍। ତାକା ଇଦ୍ ବାର୍ନାବାଲା ଅଧର୍ମିୟାଁ ଆଲାର୍ଘି ଚେତାବାନୀଘି ଲାଗାନ୍ ଅଣ୍ଟା ନମୁନା ମାନ୍ନାଦ୍। 7ଲୋଟ୍ସ୍ ପାର୍ମେଶ୍ୱାର୍ସ୍କି ନଜର୍ନୁ ବାନେ ନାଲ୍ଖୁ କାମାଲିୟାସ୍ ଆରୁ ଆସ୍ ପାର୍ମେଶ୍ୱାର୍ସ୍କି ନଜର୍ନୁ ଖାରାପ୍ ନାଲ୍ଖୁ କାମୁର୍ଘି ଚାଲିଚଲନ୍ତି ବହୁତ୍ ଦୁଃଖି ରାଚାସ୍ ହୁଦ୍ଘିଲାଗାନ୍ ସଦୋମ୍ ଆରୁ ଗମୋରାତି ଲୋଟସ୍ସିନ୍ ବାଛାବାଚାସ୍। 8(ଏନ୍ଦେର୍ଗେକା ଆସ୍ ଅଣ୍ଟା ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ଆଲାସ୍ ରାଚାସ୍। ହୁଦ୍ଘିଲାଗାନ୍ ଲୋଟ୍ସ୍ ଆବ୍ଡ଼ାର୍ଘି ମାଝାନୁ ରାଇକିରି ସବୁଦିନ୍ ଆବ୍ଡ଼ାର୍ଘି ଖାରାପ୍ ନାଲ୍ଖୁବନ୍ ଏରିକିରି ଆରୁ ମେନିକିରି ଆସ୍ ତାଙ୍ଘାଏ ବାନେ ମନ୍ନୁ ବହୁତ୍ ଦୁଃଖୁ ମାନାଲିୟାସ୍।) 9ଏନ୍ନେନ୍ ପ୍ରାଭୁସ୍ ଆହ୍ଦାସ୍ କା ଧାର୍ମିକ୍ ଆଲାରିନ୍ ଆଖ୍ରୀ ନ୍ୟାୟଘି ଉଲ୍ଲାତକ୍ ଏସ୍କେ ବାଛାବା କୋ ଆରୁ ଅଧର୍ମିୟାଁ ଆଲାରିନ୍ ଦଣ୍ଡ୍ଘି ଲାଗାନ୍ ଏସ୍କେ ଉଇୟା କୋ। 10ଖାସ୍କିରି ଆବ୍ଡ଼ାର୍ ଏକାର୍ କା ଶରୀର୍ଘି ଖାରାପ୍ ଇଚ୍ଛା ଲେଖା ଚାଲ୍ର୍ନାଏ ଆରୁ ପ୍ରାଭୁସ୍କି ହକ୍ବନ୍ ତୁଚ୍ଛ ସୋଚ୍ନାଏ।
ଇବ୍ଡ଼ା ଆଲାର୍ ଘାମାଣ୍ଡି ଆରୁ ମାହିମାମୟ ସରଗ୍ ଦୂଁତ୍ଜାମାର୍ଘି ନିନ୍ଦା କାମାଗେହି ମା ଏଲ୍ଚ୍ନାଏ। 11ଲେକିନ୍ ସରଗ୍ଦୂଁତ୍ଜାମାର୍ ଏକାର୍ କା ଆବ୍ଡ଼ାର୍ସ୍ତି ବହୁତ୍ ଶକ୍ତିଶାଲୀ ରାନାଏ। ହାଲେହି ପ୍ରାଭୁସ୍କି ଆଘ୍ଲି ଆବ୍ଡ଼ାର୍ଘି ନିନ୍ଦା କାମିକିରି ଦୋଷ୍ ମା ଲାଗାବାନାଏ। 12ଲେକିନ୍ ନିଜର୍ ସାଭାବ୍ ଅନୁସାର୍ ନାଲ୍ଖୁ କାମ୍ନାବାଲା ଝୁଟ୍ଟୁ ଶିକ୍ଷା ଚିଉର୍ ଇବ୍ଡ଼ାର୍ ନାଶ୍ ମାନ୍ନାଘି ଲାଗାନ୍ ଜନମ୍ ମାନ୍ଚ୍କା ନିର୍ବୁଦ୍ଧିଆ ପଶୁ ଲେଖା ରାନାଏ, ଆରୁ ଏକାର୍ ଧାର୍ନା ଆରୁ ନାଶ୍ ମାନ୍ନାଘି; ଆରୁ ଏକା କାତ୍ଥାବନ୍ ଆବ୍ଡ଼ାର୍ ବାଲ୍ନାଏ ଆଦ୍ଘି ବାରେ ଦୁସ୍ରାର୍ଘି ନିନ୍ଦା କାମ୍ନାଏ। ଆବ୍ଡ଼ାର୍ହି ନାଶ୍ ମାନର୍କର୍। 13ଦୁସ୍ରାରିନ୍ ନୁକ୍ସାନ୍ କାମ୍ନାଘି ବାଦ୍ଲା ଆବ୍ଡ଼ାର୍ଘିଦିନ୍ ନୁକ୍ସାନ୍ ମାନଦ୍। ଆବ୍ଡ଼ାର୍ ଉଲ୍ଲା ବାକେନ୍ ମଉଜ୍ମଜ୍ଲିସ୍ କାମାଗେ ବାନେ ପାତ୍ତାରାନାଏ। ଇଦ୍ ଲାଜ୍ଜେଘି କାତ୍ଥା; ଆବ୍ଡ଼ାର୍ ନିହ୍ମାଗାନେ ଅନ୍ନାଏ ମହଁନାଏ ତା ତାହ୍ମା ତାର୍ତି ବାନେ ଭୋଜି କାମିକିରି ମଉଜ୍ମଜ୍ଲିସ୍ କାମ୍ନାଏ। 14ଆବ୍ଡ଼ାର୍ଘି ହାନ୍ନୁନୁ ବେଭିଚାର୍ ନିନ୍ଦିୟାକେର୍କିଚି, ଆରୁ ଆବ୍ଡ଼ାର୍ ପାପ୍ କାମାଗେ ମା ଥାକ୍ର୍ନାଏ। ଆବ୍ଡ଼ାର୍ ବିଶ୍ୱାସ୍ନୁ କମ୍ଜୋରି ଆଲାରିନ୍ ପାପ୍ କାମାଗେ ଫୁସ୍ଲାନାଏ। ଆବ୍ଡ଼ାର୍ଘି ମନ୍ବଦ୍ ଧାନ୍ନୁଘି ଲୋଭ୍ କାମ୍ନାନୁ ଆଦତ୍ ମାନ୍ଚାକେର୍କିଚି; ପାର୍ମେଶ୍ୱାର୍ସ୍ ଇବ୍ଡ଼ା ଆଲାର୍ଗେ ଦଣ୍ଡ୍ ଚିୟସ୍। 15ଆବ୍ଡ଼ାର୍ ସତ୍ତୁ ପାବୁବନ୍ ଆମ୍ବିକିରି ଭାଟ୍କାରାଚାର୍ କେର୍କାନାଏ ଆରୁ ବେସର୍କି ହାଦ୍ଦୁ ବିଲିୟାମ୍ସ୍କି ପାବୁନୁ କେର୍କାନାଏ, ଏକାସ୍ କା ଅନ୍ୟାୟ କାମିକିରି ପାଏସା କାମାବାଗେ ବାନେ ହାଖ୍ଖାଲିୟାସ୍। 16ଲେକିନ୍ ବିଲାମ୍ସ୍କି ଖାରାପ୍ ନାଲ୍ଖୁଘି ବାରେ ତାଙ୍ଘା ଗାଧାଦ୍, ଏକାଦ୍ କା କାଚ୍ନେଖ୍ରା ପଲ୍ଲୀଦ୍, ଆଲାର୍ ଲେଖା କାଚ୍ନେଖ୍ରିକିରି ଆ ନାବୀସିନ୍ ଧାମ୍କାଚା ଆରୁ ଆସିନ୍ ଖାରାପ୍ ନାଲ୍ଖୁ କାମ୍ନାନ୍ତି ରୋକ୍ଚାଦ୍।
17ଇବ୍ଡ଼ା ଝୁଟ୍ଟୁ ଶିକ୍ଷା ଚିଉର୍ ହାଏକା ତୁଷା ଆରୁ ଆନ୍ଧିଧୁକାତି ଉଢ଼ିୟାରାଚ୍କା ବାଦ୍ଲି ଲେଖାର୍; ଇବ୍ଡ଼ାର୍ଘି ଲାଗାନ୍ ନରକ୍ଘି ଘୋର୍ଉହା ଉଇୟା କେର୍କିଚି। 18ଏନ୍ଦେର୍ଗେକା ଇବ୍ଡ଼ାର୍ ଫାଲ୍ତୁ ବଡ଼୍ପଣୀଘି କାତ୍ଥା କାମିକିରି ଏକାର୍ କା ଭାଟ୍କାରାଚ୍କା ଆଲାର୍ସ୍ତି ବାଛ୍ରାର୍ କେରାର୍, ଆବ୍ଡ଼ାରିନ୍ ଖାରାପ୍ ନାଲ୍ଖୁତି ଶରୀର୍ଘି ଇଚ୍ଛାତି ଫାସାବାନାଏ ଚିନାଏ। 19ଇବ୍ଡ଼ା ଝୁଟ୍ଟୁ ଶିକ୍ଷା ଚିଉର୍ ଇବ୍ଡ଼ାରିନ୍ ଆଜାଦୀ ଚିୟାଗେ କାତ୍ଥା ତା ଚିନାଏ, ଲେକିନ୍ ତାମ୍ ନିଜେ ଖାରାପ୍ ନାଲ୍ଖୁଘି ଗୁତ୍ତିୟାର୍; ଏନ୍ଦେର୍ଗେକା ଏକା ଆଲାସ୍ ନେଖାସ୍ତି ହାର୍ଦାସ୍ କାଦାସ୍, ଆସ୍ ଆସ୍କି ଗୁତ୍ତିୟା ମାନ୍ଦାସ୍କାଦାସ୍। 20ଏକା ଆଲାର୍ ନାହ୍ମା ପ୍ରାଭୁ ଆରୁ ପାପ୍ତି ବାଛାବୁ ଯୀଶୁ ଖ୍ରୀସ୍ତ୍ସିନ୍ ଆହିକିରି ଦୁନିଆଁନ୍ତା ଖାରାପ୍ତି ବାଛ୍ରାର୍ କେରାର୍, ଆବ୍ଡ଼ାର୍ ଯଦି ଆରୁଅହନ୍ ଆନ୍ନୁନ୍ ଫାସ୍ରିକିରି ଆଦ୍ଘି ଲେଖା ଚାଲ୍ର୍ନାଏ ତା, ଆବ୍ଡ଼ାର୍ଘି ଆଘ୍ଲିନ୍ତା ଦାଶାନ୍ତି ପାଛ୍ଲିନ୍ତା ଦାଶାଦ୍ ବାଗ୍ଗେ ଖାରାପ୍ ମାନିକାଇ। 21ଏନ୍ଦେର୍ଗେକା ପାର୍ମେଶ୍ୱାର୍ସ୍କି ବାନେ ପାବୁବନ୍ ଆହିକିରି ତାମାଗେ ଏକା ପାବିତାର୍ ହୁକୁମ୍ବନ୍ ଚିଚ୍ଚକା ରାଚା ଆସ୍ତି ହାଟ୍ରାନ୍ନ୍ତି ଆବ୍ଡ଼ାର୍ଘି ଲାଗାନ୍ ବାନେ ମାନଦ୍ନେ କା ଆବ୍ଡ଼ାର୍ ପାର୍ମେଶ୍ୱାର୍ସ୍କି ବାନେ ପାବୁବନ୍ ବାଲ୍କାରର୍ନେ। 22ଆବ୍ଡ଼ାର୍ଘି ଲାଗାନ୍ ଇ ତେଙ୍କା ସତ୍ତୁ କାତ୍ଥାଦ୍ ଠିକ୍ ଖାପ୍ ମହିଁ କା, ଆଲ୍ଲାଦ୍ ତାଙ୍ଘା ପୁତ୍ର୍କାନ୍ ମହାଁଗେ ଆରୁ ଏମ୍ତାଚ୍କା କିସ୍ସୁଦ୍ ଚତର୍ନୁ ଆରୁଅହନ୍ ଲୋଟ୍ରାଗେ କାଇ।
3ପ୍ରାଭୁସ୍କି ଆରୁଅହନ୍ ବାର୍ନାଘି କାତ୍ଥା ଚିନା
1ହେ ପ୍ୟାରେରୋ, ଆକ୍କୁନ୍ ଏନ୍ ନିମାଗେ ଇ ଦୁସ୍ରା ଚିଠିନ୍ ଲେଖାଲ୍ଦାନ୍। ଆରୁ ଇ ଯୋଡ଼େ ଚିଠିନୁ ନିନ୍ ଇବ୍ଡ଼ା କାତ୍ଥାଗୁଠିନ୍ ମନେ କାମ୍ତିକିରି ନିହ୍ମାଏ ଶୁଦ୍ଧ୍ ମନ୍ବନ୍ ଉତ୍ସାହିତ୍ କାମାଲ୍ଦାନ୍। 2ତାକା ନିମ୍ ଆ କାତ୍ଥାଗୁଠିନ୍ ଏକାନ୍ କା ପାବିତାର୍ ନାବୀଜାମାର୍ ଆଘ୍ଲିନ୍ତିନ୍ ତେଙ୍କାଚାର୍, ଆରୁ ଖାସ୍ଚେଲାଜାମାର୍ଘି ଦ୍ୱାର୍ନୁ ଚିଚ୍ଚକା ନାହ୍ମା ପ୍ରାଭୁ ଆରୁ ପାପ୍ତି ବାଛାବୁସ୍କି ଆ ଆଦେଶ୍ବନ୍ ମନେ କାମା। 3ନିମ୍ ପହ୍ଲେ ଇବନ୍ ଆହା କା ଆଖ୍ରୀ ଉଲ୍ଲାନୁ ମାଜାକ୍ ଉଡ଼ାବୁ ଆଲାର୍ ବାରର୍, ଏକାର୍ କା ନିଜର୍ ଖାରାପ୍ ଇଚ୍ଛା ଲେଖା ଚାଲ୍ରର୍। 4ଆରୁ ତେଙ୍ଗର୍, “ଆସ୍କି ବାର୍ନାଘି କାତ୍ଥା ଚିଚ୍ଚକାଘି ଏନ୍ଦେର୍ ମାନ୍ଚା? ଏନ୍ଦେର୍ଗେକା ଯେତ୍କବାକେନ୍ତି ନାହ୍ମା ପୁର୍ଖାର୍ ଖିଆ ମୁଞ୍ଜରାର୍ କେରାର୍, ହତ୍କବାକେନ୍ତି ଦୁନିଆଁଘି ସୁରୁନ୍ତି ଜାମାକିଛି ଏସ୍କେ ରାଚା, ଆକ୍କୁନ୍ତକ୍ ଆନ୍ନେନ୍ ରାଇ?” 5ଆବ୍ଡ଼ାର୍ ଜାଣିବୁଝିକିରି ଇବନ୍ ମଦର୍ନାଏ ଚିନାଏ କା ପାର୍ମେଶ୍ୱାର୍ସ୍କି ବଚନ୍ତି ଆକାଶ୍ ଆଘ୍ଲି ଯୁଗ୍ତି ରାଇ ଆରୁ ଦୁନିଆଁଦ୍ହି ଆମ୍ମୁତି ତିୟାର୍ ମାନ୍ଚ୍କିଚି ଆରୁ ଆମ୍ମୁନୁ ରାଇ। 6ଆରୁ ଆଘ୍ଲି ଯୁଗ୍ତା ଦୁନିଆଁଦ୍ ବାଢ଼ିତି ନାଶ୍ ମାନ୍ଚାକେରା। 7ଲେକିନ୍ ଆକ୍କୁନ୍ ତା ଆକାଶ୍ ଆରୁ ଦୁନିଆଁଦ୍ ଆ ବଚନ୍ଘି ଦ୍ୱାର୍ନୁ ଚିଚ୍ଚୁତି ନାଶ୍ ମାନାଗେ ଉଇୟା କେର୍କିଚି; ଇବ୍ଡ଼ାରିନ୍ ଆ ଉଲ୍ଲାଘି ଲାଗାନ୍ ଉଇୟାକାଲିଦ୍, ଯେତ୍କବାକେନ୍ ପାର୍ମେଶ୍ୱାର୍ସ୍କି କାତ୍ଥାନ୍ ମା ମାନ୍ନାବାଲା ଆଲାର୍ଘି ନ୍ୟାୟ ମାନୋ ଆରୁ ଆବ୍ଡ଼ାର୍ ନାଶ୍ ମାନର୍କର୍।
8ଲେକିନ୍ ହେ ପ୍ୟାରେରୋ, ପ୍ରାଭୁସ୍କି ନଜର୍ନୁ ଅଣ୍ଟା ଉଲ୍ଲାଦ୍ ଏକ୍ ହାଜାର୍ ବଛର୍ ଲେଖା ଆରୁ ଏକ୍ ହାଜାର୍ ବଛର୍ଦ୍ ଅଣ୍ଟା ଉଲ୍ଲା ଲେଖା ରାଇଦ୍, ଇବନ୍ ନିମ୍ ଆମ୍କେ ମଦ୍ରା। 9ପ୍ରାଭୁସ୍ ତାଙ୍ଘା କାତ୍ଥା ଚିଚ୍ଚକାଘି ବାରେନୁ ଡେରି ମା କାମ୍ଦାସ୍, ଏସ୍କେ କା କେତ୍କ ଲୋକ୍ ଆଲାର୍ ଡେରିବୁଲି ସୋଚ୍ନାଏ; ଲେକିନ୍ ଆସ୍ ନିହ୍ମା ବାରେନୁ ଧିରାଜ୍ ଧାର୍ଦାସ୍, ଆରୁ ମା ଚାହଁଦାସ୍ କା ନେଦ୍ହି ନାଶ୍ ମାନ୍ନାର୍ ଜାମାର୍ଗେ ପାସ୍ତାରାନାଘି ମଉକା ହାଖ୍ଖର୍ନାଦ୍। 10ଲେକିନ୍ ପ୍ରାଭୁସ୍କି ଉଲ୍ଲାଦ୍ ଚୋରହାସ୍କି ଲେଖା ବାରଦ୍। ହୁ ଉଲ୍ଲା ଆକାଶ୍ଦ୍ ଅଣ୍ଟା ବାଡ଼୍କା ଶବଦ୍ କାମିକିରି ଲିଭ୍ରକୋ ଆରୁ ଆକାଶ୍ନୁ ରାନାବାଲା ଜିନିଷ୍ଗୁଠିଦ୍ ପୁରାପୁରୀ ଲାଘ୍ରକୋ, ଆରୁ ଦୁନିଆଁ ଆରୁ ଦୁନିଆଁନୁ ରାନାବାଲା ଏକାନ୍ କା ଆଲାର୍ ତିୟାର୍ କାମ୍ଚ୍କାନାଏ ଆବ୍ଡ଼ା ଜାମା ଜିନିଷ୍ଦ୍ ଲାଘ୍ରକୋ। 11ଇବ୍ଡ଼ା ଜାମା ଜିନିଷ୍ଦ୍ ଏନ୍ନେନ୍ ନାଶ୍ ମାନ୍ନାବାଲା ରାଇ ତା ନିମାଗେ ଏସ୍କେ ଜୀବନ୍ ବିତାବାନା କାତ୍ଥା? ନିମାଗେ ପାବିତାର୍ ଚାଲିଚଲନ୍ ଆରୁ ଜାମା ଲେଖା ବାନେ ନାଲ୍ଖୁ କାମ୍ନାକାତ୍ଥା। 12ଆରୁ ପାର୍ମେଶ୍ୱାର୍ସ୍କି ଆ ଉଲ୍ଲାଘି ପାବୁ ଏସ୍କେ ଏର୍ନା କାତ୍ଥା ଆରୁ ଆସ୍କି ଚାଁଣେ ବାର୍ନାଘି ଲାଗାନ୍ ଏସ୍କେ କୋଶିଷ୍ କାମ୍ନାକାତ୍ଥା, ଏକାଘି ଲାଗାନ୍ କା ଆକାଶ୍ ଚିଚ୍ଚୁତି ଲାଘ୍ରକୋ, ଆରୁ ଆକାଶନୁ ରାନାବାଲା ଜିନିଷ୍ଦ୍ ବାଗ୍ଗେ ଗରମ୍ ମାନିକିରି ଟାଘ୍ଲାରକୋ। 13ଲେକିନ୍ ନାମ୍ ଭାଲାଇ ରାନାବାଲା ଅଣ୍ଟା ପୁନା ଆକାଶ୍ ଆରୁ ପୁନା ଦୁନିଆଁଘି ଲାଗାନ୍ ପାର୍ମେଶ୍ୱାର୍ସ୍କି କାତ୍ଥା ଚିଚ୍ଚକାଘି ଅନୁସାର୍ ପାବୁଘି ଆଶ୍ରା ଏର୍ତେ ରତ୍।
ଚେତ୍ରିକିରି ରା ଆରୁ ତିୟାର୍ ରା
14ହୁଦ୍ଘିଲାଗାନ୍ ହେ ଦୁଲାଡ଼ି ଭାଇରୋ, ନିମ୍ ଇ ଜାମା କାତ୍ଥାଘି ଆଶ୍ରା ଏରାଲ୍ଦାର୍ ତା ନିମ୍ ଆସ୍କି ସାମ୍ନାନୁ ଏସ୍କେ ପାବିତାର୍ ଆରୁ ବିନାଦୋଷୀ ମାନିକିରି ଶାନ୍ତିନୁ ରାଗେ କୋଶିଷ୍ କାମା। 15ଆଲାରିନ୍ ପାପ୍ତି ବାଛାବାଗେ ଆରୁ ନିଜର୍ ଚାହାଗେ ବାରାଗେ ମଉକା ଚିଦାସ୍ ହୁଦ୍ଘିଲାଗାନ୍ ତାଙ୍ଘା ଆରୁଅହନ୍ ବାର୍ନାଘି ଡେରି ଉଇକିରି ଯୀଶୁ ଖ୍ରୀସ୍ତ୍ ଧିରାଜ୍ ଉଇଦାସ୍, ଏସ୍କେ କା ନାହ୍ମା ଦୁଲାଡ଼ି ଭାଇ ପାଉଲୁସ୍ ପାର୍ମେଶ୍ୱାର୍ସ୍ତି ହାକ୍କା ବୁଦ୍ଧିଘି ଅନୁସାର୍ ନିହ୍ମାସାନ୍ ଲେଖ୍ଚ୍କାଦାସ୍। 16ହନ୍ନେନ୍ ଆସ୍ ତାଙ୍ଘା ଜାମା ଚିଠିନୁହି ଇ ଜାମା କାତ୍ଥାଘି ବାରେ ତେଙ୍କାଦାସ୍, ଏକାନୁ କା କେତ୍କ କାତ୍ଥା ଏନ୍ନେ ରାଇ, ଏକାନ୍ କା ବୁଝ୍ର୍ନା ମୁସ୍କିଲ୍ଦ୍ ଆରୁ ମା ପାଢ଼୍ଚ୍କା, ଆରୁ ଆସ୍ଥିର୍ ଆଲାର୍ ଆଦ୍ଘି ମତ୍ଲବ୍ବନ୍ ପାବିତାର୍ ଶାସ୍ତ୍ରଘି ଦୁସ୍ରା କାତ୍ଥା ଲେଖା ଭୁଲ୍ ମତ୍ଲବ୍ ଅଥ୍ରିକିରି ନିଜର୍ ନାଶ୍ଘି କାରଣ୍ ମାନ୍ନାର୍।
ପାତ୍ରାସ୍କି ଆଖ୍ରୀ କାତ୍ଥା
17ହୁଦ୍ଘିଲାଗାନ୍ ହେ ଦୁଲାଡ଼ି ଭାଇରୋ, ନିମ୍ ଆଘ୍ଲିନ୍ତି ଇ କାତ୍ଥାବନ୍ ଆହ୍ଦାର୍, ହୁଦ୍ଘିଲାଗାନ୍ ସାବ୍ଧାନ୍ ରା, ତାକା ଅଧର୍ମିୟାଁର୍ଘି ଭୁଲ୍ନୁ ଖାତ୍ରିକିରି ନିମ୍ହି ନିହ୍ମାଏ ମଜ୍ବୁତ୍ ବିଶ୍ୱାସ୍ତି ମା ପାଖିଆରର୍। 18ନାହ୍ମାଏ ପ୍ରାଭୁ ଆରୁ ପାପ୍ତି ବାଛାବୁ ଯୀଶୁ ଖ୍ରୀସ୍ତ୍ସ୍କି କ୍ରିପା ଆରୁ ବୁଦ୍ଧିନୁ ବାଢ଼ର୍ତେ କାଲା। ଆସ୍କି ମାହିମା ଆକ୍କୁନ୍ ଆରୁ ସବୁଦିନ୍ତକ୍ ମାନ୍ତେ ରାନାଦ୍। ଆମେନ୍।