ଯୋହାନ୍ସ୍କି ଲେଖ୍ଚ୍କା ଦୁସ୍ରା ଚିଠି
ଇବହିଘି ପରିଚୟ
ଯୋହାନ୍ସ୍କି ଦୁସ୍ରା ଚିଠି “ପୁରଖାର୍ଘି” ତାର୍ତି ଚାଜ୍ଜକା ମଣ୍ତ୍ଲୀନ୍ତା ବିଶ୍ୱାସୀର୍ଘି ନାମେନୁ ଲେଖାକେର୍କିଚି। ଇ ଚିଠିନୁ ଲେଖକସ୍କି ସନ୍ଦେଶ୍ ଇଦ୍ କା ଏକ୍ ଦୁସ୍ରାରିନ୍ ବାନେ ହାଖ୍ଖନା କାମ୍ନାଘି ବାରେ ଆରୁ ଝୁଟ୍ଟୁ ଶିକ୍ଷା ଚିଉର୍ସ୍ତି ଆରୁ ଆବ୍ଡ଼ାର୍ଘି ଶିକ୍ଷାଘି ବିରୁଦ୍ଧ ଚେତାବନୀ ଚିଆ କେର୍କିଚି।
ରୂପ୍ରେଖା:
ଇବହିଘି ପରିଚୟ ୧-୩
ବାନେ ହାଖ୍ଖନାଘି ମହତ୍ତ୍ୱ ୪-୬
ଝୁଟ୍ଟୁ ଶିକ୍ଷା ଚିଉର୍ଘି ବିରୁଦ୍ଧ ଚେତାବନୀ ୭-୧୧
ଆଖ୍ରୀ କାତ୍ଥା ୧୨,୧୩
1ଯୋହାର୍
1ମଣ୍ତ୍ଲୀନ୍ତା ଆଗୁୱାନ୍ ଏନ୍, ଏନ୍ ଆ ଚାଜ୍ଜକା୧:୧ ମାଏକିନିଆଁ ଆରୁ ତାହ୍ମା ହାଦ୍ଦୁର୍ ମତ୍ଲବ୍ ମଣ୍ତ୍ଲୀ ଆରୁ ମଣ୍ତ୍ଲୀନ୍ତା ସଦସ୍ୟର୍ ମାଏକିନିଆଁ ଆରୁ ତାହ୍ମା ହାଦ୍ଦୁର୍ଘି ନାମେନୁ ଇ ଚିଠିନ୍ ଲେଖାଲ୍ଦାନ୍, ଏକାରିନ୍ କା ଏନ୍ ସତ୍ତୁନ୍ ବାନେ ହାଖ୍ଖଦାନ୍ ଆରୁ ଏନ୍ ଖାଲି ମାଲ୍ଲା ଲେକିନ୍ ଆବ୍ଡ଼ାର୍ ଯେତ୍କର୍ହି ବାନେ ହାଖ୍ଖନାଏ ଏକାର୍ କା ସତ୍ତୁବନ୍ ଆହ୍ନାଏ। 2ଆ ସତ୍ତୁଦ୍ ଏକାଦ୍ କା ନାହ୍ମାଏନୁ ରାଇ ଆରୁ ସବୁଦିନ୍ ନାହ୍ମାଗାନେ ରଦ୍।
3ବାଙ୍ଗ୍ ପାର୍ମେଶ୍ୱାର୍ସ୍କି ତାର୍ତି ଆରୁ ବାଙ୍ଗ୍ସ୍କି ହାଦ୍ଦୁ ଯୀଶୁ ଖ୍ରୀସ୍ତ୍କି ତାର୍ତି କ୍ରିପା, ଦାୟା, ଶାନ୍ତି ସତ୍ତୁ ଆରୁ ବାନେ ହାଖ୍ଖନାଦ୍ ନାହ୍ମାଗାନେ ରୋଦ୍।
ସତ୍ତୁ ଆରୁ ବାନେ ହାଖ୍ଖନା
4ଏନ୍ ନିଙ୍ଘାଏ କେତ୍କ ଲୋକ୍ ହାଦ୍ଦୁରିନ୍ ନାହ୍ମାଏ ବାଙ୍ଗ୍ସ୍କି ତାର୍ତି ହାଖ୍ଖର୍କା ଆଦେଶ୍ଘି ଅନୁସାର୍, ସତ୍ତୁନୁ ଚାଲ୍ର୍ନାନ୍ ଏରିକିରି ବହୁତ୍ ଖୁସୀ ମାନ୍ଚ୍କାନ୍। 5ଆକ୍କୁନ୍ ହେ ପ୍ୟାରେ ମାଏକିନିଆଁ, ଏନ୍ ନିଙ୍ଗାଗେ ଏନ୍ଦେର୍ହି ପୁନା ହୁକୁମ୍ ମାଲ୍ଲା ଲେଖୁନ୍ ଲେକିନ୍ ଆ ଆଦେଶ୍ବନ୍ ଲେଖାଲ୍ଦାନ୍ ଏକାଦ୍ କା ସୁରୁନ୍ତି ନାହ୍ମାଗାନେ ରାଇ, ଆରୁ ନିଙ୍ଗାନ୍ ଆର୍ଜୀବିନ୍ତି କାମାଲ୍ଦାନ୍ କା ନାମ୍ ଏକ୍ ଦୁସ୍ରାରିନ୍ ବାନେ ହାଖ୍ଖତ୍। 6ଆରୁ ବାନେ ହାଖ୍ଖନାଘି ମତ୍ଲବ୍ ଇଦ୍ କା ନାମ୍ ପାର୍ମେଶ୍ୱାର୍ସ୍କି ହୁକୁମ୍ ଅନୁସାର୍ ଚାଲ୍ରତ୍; ଇଦ୍ ଆ ଆଦେଶ୍ଦ୍ ଏକାନ୍ କା ନିମ୍ ପହ୍ଲେନ୍ତି ମେନ୍ଚ୍କାଦାର୍ ଆରୁ ନିମାଗେ ବାନେକିରି ଚାଲ୍ର୍ନାଇନ୍ କାତ୍ଥା। 7ଏନ୍ଦେର୍ଗେକା ବହୁତ୍ ଏନ୍ନେ ଫୁସ୍ଲାନା ବାଲା ଆଲାର୍ ଦୁନିଆଁନୁ ଉର୍ଖାର୍ କେର୍କାନାଏ। ଏକାର୍ ଇବନ୍ ମା ମାନ୍ନାଏ କା ଯୀଶୁ ଖ୍ରୀସ୍ତ୍ ମୁନୁଷ୍କି ରୂପ୍ନୁ ଦୁନିଆଁନୁ ବାର୍ଚାସ୍; ଇବ୍ଡ଼ାରିନ୍ ଫୁସ୍ଲାନା ବାଲାର୍ ଆରୁ ଖ୍ରୀସ୍ତ୍ ବିରୋଧିର୍। 8ନିଜର୍ ବାରେନୁ ସାବ୍ଧାନ୍ ରା, କା ଏକା ମେହ୍ଁନତ୍ବନ୍ ଏମ୍ କାମ୍ଚ୍କାଦାମ୍ ଆବନ୍ ନିମ୍ ଆମ୍କେ ଏଫ୍ସାଚା, ଲେକିନ୍ ଆଦ୍ଘି ପୁରା ଫଲ୍ବନ୍ ହାଖ୍ଖା। 9ଏକାର୍ ଖ୍ରୀସ୍ତ୍କି ଶିକ୍ଷାନୁ ଟିକ୍ରିକିରି ମା ରାନାଏ ଲେକିନ୍ ବହୁତ୍ ଆଘ୍ଲି ବାଢ଼୍ରାନାଏ କାନାଏ ଆବ୍ଡ଼ାର୍ ପାର୍ମେଶ୍ୱାର୍ଗାନେ ମା ରାନାଏ, ଆରୁ ଏକାର୍ ଆସ୍କି ଶିକ୍ଷାନୁ ଟିକ୍ରିକିରି ରାନାଏ ଆବ୍ଡ଼ାର୍ ଗାନେ ବାଙ୍ଗ୍ସ୍ହି ରାଦାସ୍ ଆରୁ ହାଦ୍ଦୁସ୍ହି ରାଦାସ୍। 10ଯଦି ନିହ୍ମାସାନ୍ ନେଦିନ୍ ବାରର୍ ଆରୁ ଇ ଶିକ୍ଷାନ୍ ମା ଚିଅର୍, ତା ଆବ୍ଡ଼ାରିନ୍ ନିହ୍ମା ଆଡ଼୍ପାନୁ ପାହି ଆମା କାମା ଆରୁ ଯୋହାର୍ହି ଆମା କାମା। 11ଏନ୍ଦେର୍ଗେକା ନେଦିନ୍ ଏନ୍ନେ ଆଲାରିନ୍ ଯୋହାର୍ କାମ୍ନାଏ, ତା ଆସ୍ ଆବ୍ଡ଼ାର୍ଘି ବଦ୍ମାସି ନାଲ୍ଖୁନୁ ଭାଗିଦାର୍ ମାନ୍ନାଏ।
ଆଖ୍ରୀ ଯୋହାର୍
12ଏଙ୍ଗା ବହୁତ୍ କାତ୍ଥା ନିମାଗେ ଲେଖ୍ନା ରାଇ, ଲେକିନ୍ ଏନ୍ କାଗଜ୍ ଆରୁ ସିହାଇତି ଲେଖାଗେ ମା ଚାହାଁଲ୍ଦାନ୍, ଲେକିନ୍ ଏଙ୍ଗାଗେ ଆଶ୍ରା ରାଇ କା ଏନ୍ ନିହ୍ମାସାନ୍ ବାରନ୍ ଆରୁ ଆମ୍ନେ ସାମ୍ନେ କାତ୍ଥାବାର୍ତ୍ତା କାମନ୍। ଏସ୍କେ କା ନାହ୍ମାଏ ଖୁସୀ ପୁରା ମାନଦ୍।
13ନିଙ୍ଘାଏ ଚାଜ୍ଜକା ବୁହୁଣୀର୍ଘି ହାଦ୍ଦୁବଚ୍ଚର୍ ନିଙ୍ଗାନ୍ ଯୋହାର୍ କାମାଲ୍ନାଏ।