କୁରିନ୍ଥୀଆ ସହର୍ତା ଖ୍ରୀସ୍ତ୍ ମଣ୍ଡ୍ଲୀର୍ଘି ନାମେନୁ ଯୀଶୁ ଖ୍ରୀସ୍ତ୍କି ଖାସ୍ଚେଲା ପାଉଲୁସ୍କି ଦୁସ୍ରା ଚିଠି
ବହିଘି ପରିଚୟ,
ଇ ଚିଠିଘି ପହ୍ଲେ ଭାଗ୍ନୁ ପାଉଲୁସ୍ କୁରିନ୍ଥୀସ୍ଘି ମଣ୍ଡ୍ଲୀ ଗାନେ ନିଜର୍ ଗେହ୍ରା ସମ୍ବନ୍ଧନୁ ବିଚାର୍ କାମ୍ଦାସ୍, ଆରୁ ଆବ୍ଡ଼ାରିନ୍ ବୁଝାବାଦାସ୍ କା ଏନ୍ଦେର୍ଗେ କୁରିନ୍ଥୀ ମଣ୍ଡ୍ଲୀନ୍ତା କେତ୍କ ଆଲାର୍ ଅପ୍ମାନ୍ ଆରୁ ବିରୁଦ୍ଧ୍ କାମ୍ନା ଲେଖା କାଠୋର୍ ବେଭାର୍ କାମ୍ଚାର୍, ହାଲେହି ପାଉଲୁସ୍ ଜାମାରିନ୍ ମେଲ୍-ମିଲାପ୍ କାମାଗେ ଇଚ୍ଛା କାମ୍ଦାସ୍ ଆରୁ ଏନ୍ନେ ମାନ୍ନାତି ନିଜର୍ ରିଜ୍ଝୁବନ୍ ପ୍ରକଟ୍ କାମ୍ଦାସ୍। ହତ୍କବାକେନ୍ ମାକିଦୁନିଆଁନ୍ତା ବିଶ୍ୱାସୀଜାମାର୍ ଗରୀବ୍ ରାଚାର୍ ହାଲେହି ଯେରୁଶାଲେମ୍ ତା ମଣ୍ତ୍ଲୀଗେ ନିଜର୍ ମନ୍ତି ଦାନ୍ ଚିୟାଗେ ଇଚ୍ଛା କାମ୍ଚାର୍। ଆଖ୍ରୀ ପାଠନୁ ପାଉଲୁସ୍ ନିଜ୍କେନିଜ୍ବନ୍ ଯୀଶୁ ଖ୍ରୀସ୍ତ୍କି ଖାସ୍ଚେଲାନ୍ ଏନ୍ଦେର୍ଗେକା ଏନ୍ ଯୀଶୁ ଖ୍ରୀସ୍ତ୍କି ଲାଗାନ୍ ବହୁତ୍ କଷଟ୍ ଆରୁ ତକ୍ଲିପ୍ ଉଠାବାଚ୍କାଦାନ୍ ବୁଲି ଚିଠିନୁ ଲେଖାଲ୍ଦାସ୍।
ଯୀଶୁ ଖ୍ରୀସ୍ତ୍କି ସୁସାମାଚାର୍ ତା ଅଣ୍ଟା କିମ୍ତି ଖାଜାନା ଲେଖା ରାଇ ଲେକିନ୍ ଇ ସୁସାମାଚାର୍ ତେଙ୍ଗ୍ନାଘି ଆ ସେବା ହାଜ୍ଜୁଘି ଖୁରୀ ଲେଖା ନାମା କାମ୍ଜୋର୍ ଆଲାର୍ଗେ ଚିଚ୍ଚାସ୍। ହୁଦ୍ଘିଲାଗାନ୍ ଜାମାର୍ଗେ ବୁଝୁର୍ନା କାତ୍ଥା କା ଇଦ୍ ଇ ଶକ୍ତି ଏହ୍ମାତାର୍ତିତା ମାଲ୍ଲା ଲେକିନ୍ ପାର୍ମେଶ୍ୱାର୍ସ୍କି ତାର୍ତି ସେବା କାମାଲ୍ଦାମ୍।
ରୂପ୍-ରେଖା:
ବହିଘି ପରିଚୟ ୧:୧-୧୧
ପାଉଲୁସ୍ ଆରୁ କୁରିନ୍ଥୀସ୍କି ମଣ୍ତ୍ଲୀ ୧:୧୨—୭:୧୬
ୟାହୁଦୀଆନ୍ତା ଖ୍ରୀସ୍ତ୍ ବିଶ୍ୱାସୀର୍ଘି ଲାଗାନ୍ ଦାନ୍ ୮:୧—୯:୧୫
ପାଉଲୁସ୍କି ଦ୍ୱାର୍ନୁ ଯୀଶୁ ଖ୍ରୀସ୍ତ୍କି ଖାସ୍ଚେଲାର୍ଘି ରୂପ୍ନୁ ନିଜର୍ ହକ୍ଘି ସମର୍ଥନ୍ ୧୦:୧—୧୩:୧୦
ଆଖ୍ରୀ କାତ୍ଥା ୧୩:୧୧-୧୪
1ଯୋହାର୍
1ପାର୍ମେଶ୍ୱାର୍ସ୍କି ଇଚ୍ଛାତି ଖ୍ରୀସ୍ତ୍ସ୍ ଯୀଶୁସ୍କି ଖାସ୍ଚେଲା ପାଉଲୁସ୍, ଆରୁ ନାହ୍ମାଏ ଭାଇ ତୀମଥିଉସ୍କି ତାର୍ତି କୁରିନ୍ଥୀ ସହର୍ନୁ ରାନାବାଲା ପାର୍ମେଶ୍ୱାର୍ସ୍କି ମଣ୍ତ୍ଲୀ ଆରୁ ଜାମା ଆଖାୟା ଆଡ୍ଡାନ୍ତା ଜାମା ପାବିତାର୍ ଆଲାର୍ଘି ନାମେନୁ ଚିଠି ଲେଖାଲ୍ଦାମ୍ 2ନାହ୍ମାଏ ବାଙ୍ଗ୍ ପାର୍ମେଶ୍ୱାର୍ ଆରୁ ପ୍ରାଭୁ ଯୀଶୁ ଖ୍ରୀସ୍ତ୍ସ୍କି ତାର୍ତି ନିମାଗେ କ୍ରିପା ଆରୁ ଶାନ୍ତି ହାଖ୍ର୍ତେ ରାନାଦ୍।
ପାଉଲୁସ୍ ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିଦାସ୍
3ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍ସ୍କି ମାହାନ୍ ବାଙ୍ଗ୍ ପାର୍ମେଶ୍ୱାର୍ସ୍ ଧଏନ୍ ରାଦାସ୍। ଆସ୍ ଦାୟାଲୁ ବାଙ୍ଗ୍ସ୍ ଆରୁ ଦିଲାସା ଚିନାବାଲାସ୍। 4ପାର୍ମେଶ୍ୱାର୍ସ୍ ନାମାଗେ ନାହ୍ମାଏ ଜାମା ଦୁଃଖୁ ତକ୍ଲିପ୍ନୁ ନାମାଗେ ଶାନ୍ତି ଚିଦାସ୍; ହୁଦ୍ଘିଲାଗାନ୍ ନାମ୍ହି ଜାମା ଲେଖାଘି ଦୁଃଖୁ ତକ୍ଲିପ୍ନୁ ଖାତ୍ର୍କା ଆଲାର୍ଗେହି ଆନ୍ନେନିନ୍ ଶାନ୍ତି ଚିଆଅଙ୍ଗତ୍। 5ଏନ୍ଦେର୍ଗେକା ଏସ୍କେ ନାମ୍ ଢେର୍ବାଗ୍ଗେ ଖ୍ରୀସ୍ତ୍ସ୍କି ଦୁଃଖୁ ତକ୍ଲିପ୍ନୁ ଭାଗିଦାର୍ ରାଦାତ୍। ଆନ୍ନେନିନ୍ ଖ୍ରୀସ୍ତ୍ସ୍କି ଦ୍ୱାର୍ନୁ ନାମାଗେ ଢେର୍ବାଗ୍ଗେ ଦିଲାସାହି ହାଖ୍ଖରିଦ୍। 6ଯଦି ଏମ୍ ଦୁଃଖୁ ଉଠାବାଦାମ୍ ତା, ଆଦ୍ ନିହ୍ମାଏ ଶାନ୍ତି ଆରୁ ମୁକ୍ତିଘି ଲାଗାନ୍ ରାଇଦ୍, ଆରୁ ଯଦି ଶାନ୍ତି ହାଖ୍ଖଦାମ୍ ତା, ଇଦ୍ ନିହ୍ମାଏ ଶାନ୍ତିଘି ଲାଗାନ୍ ରାଇଦ୍; ଏକାସ୍କି ଚାଲ୍ତେ ନିମ୍ ଧିରାଜ୍ଘି ସାଙ୍ଗେ ଆ ଦୁଃଖୁ ତକ୍ଲିପ୍ବନ୍ ସାହା ଅଙ୍ଗ୍ଦାର୍, ଏକାବନ୍କା ଏମ୍ହି ସାହ୍ଦାମ୍। 7ଏହ୍ମାଏ ଆଶ୍ରା ନିହ୍ମାଏ ବାରେନୁ ମଜ୍ବୁତ୍ ରାଇ; ଏନ୍ଦେର୍ଗେକା ଏମ୍ ଆହ୍ଦାମ୍ କା ଏସ୍କେ ନିମ୍ ଏହ୍ମାଏ ଦୁଃଖୁନୁ ଭାଗିଦାର୍ ମାନ୍ଦାର୍ ଆନ୍ନେନିନ୍ ନିମ୍ ଏହ୍ମାଏ ଦିଲାସାନୁହି ଭାଗିଦାର୍ ମାନର୍।
8ହେ ଭାଇ ଆରୁ ବୁହୁଣୀ ଜାମାରୋ, ଏମ୍ ମା ଚାହଁଦାମ୍ କା ନିମ୍ ଆ ଦୁଃଖୁଘି ବାରେନୁ ଆହା ଏକାନ୍ କା ଏମାଗେ ଆସିଆନୁ ସାହା ଖାତ୍ର୍କିଚା ଆସାନ୍ ଏମ୍, ଏହ୍ମାଏ ସାହ୍ନା ଶକ୍ତିଘି ସୀମାସ୍ତି କେତ୍କ ବାଗ୍ଗେ ବୋଝ୍ କିୟାଁ ଦାବ୍ର୍କାଚ୍କାମ୍, ଏତ୍କତକ୍ କା ଏହ୍ମାଏ ଉଜ୍ଜନାଘି ଏନ୍ଦେର୍ହି ଆଶ୍ରା ମାଲ୍ଲାରୁଦ୍। 9ଆରୁ ଏମ୍ ନିଜର୍ ମନ୍ନୁ ବୁଝ୍ର୍କାମ୍ କେର୍କାଚ୍କାମ୍ କା ଏହ୍ମା ମିଆଁ ମରନ୍ଘି ହୁକୁମ୍ ମାନ୍ଚାକେର୍କିଚି, ଲେକିନ୍ ଏମ୍ ନିଜର୍ ଭାର୍ଷା ମା ଉଇକିରି କେଚ୍ଚକାରିନ୍ ଆରୁଅହନ୍ ଉଜ୍ଜତାଦାସ୍ ଆ ପାର୍ମେଶ୍ୱାର୍ସ୍କି ମିଆଁ ଭାର୍ଷା କାମ୍ଚ୍କାମ୍। 10ଆସିନ୍ ଏମାନ୍ ଆ ବାଡ଼୍କା ଭାୟାନାକ୍ ମରନ୍ଘି ବିପଦ୍ତି ବାଛାବାଚାସ୍, ଆରୁ ଏହ୍ମାଏ ବାର୍ନାବାଲା ବିପଦ୍ତିହି ଆସ୍ ବାଛାବାତେ ରସ୍। ଏହ୍ମାଏ ଆଶ୍ରା ଆସ୍କି ମିଆଁନିନ୍ ଟିକ୍ରିକିରି ରାଇଦ୍, ଆସିନ୍ ଏମାନ୍ ଆଘ୍ଲିହି ବାଛାବାତେ ରସ୍। 11ଆରୁ ନିମ୍ହି ଏହ୍ମାତାର୍ତି ବିନ୍ତି କାମିକିରି ମଦେତ୍ କାମର୍ ତା ଏମାଗେ ବହୁତ୍ ଆଲାର୍ଘି ବିନ୍ତି ଦ୍ୱାର୍ନୁ ପାର୍ମେଶ୍ୱାର୍ସ୍କି ଏକା କ୍ରିପା ହାଖ୍ଖର୍କିଚି, ଆଦ୍ଘି ଲାଗାନ୍ ଢେର୍ ଆଲାର୍ଗେ ଏହ୍ମାତାର୍ତି ଧାନ୍ୟାବାଦ୍ ଚିନାଘି କାରଣ୍ ହାଖ୍ଖରକଦ୍।
ପାଉଲୁସ୍କି ଯୋଜ୍ନାନୁ ବାଦ୍ଲାରାନା
12ଏମାଗେ ଅଣ୍ଟା କାତ୍ଥାଘି ବଡ଼୍ପଣୀ ରାଇ ଏହ୍ମା ଜୀଆ ଉଲା ଏମାନ୍ ବିଶ୍ୱାସ୍ କାମ୍ତି କା ଏମ୍ ଆଲାର୍ ଗାନେ ଖାସ୍ କାମିକିରି ନିହ୍ମାଗାନେ ଏକା ବେଭାର୍ କାମ୍ଚ୍କାଦାମ୍, ଆଦ୍ ଦୁନିଆଁଘି ବୁଦ୍ଧିୟାର୍ ଲେଖା ମାଲ୍ଲା, ବରନ୍ ଆ ସତ୍ତୁ ଆରୁ ଇମାନ୍ଦାରି ଲେଖା ରାଚା, ଏକାଦ୍ ପାର୍ମେଶ୍ୱାର୍ସ୍କି କ୍ରିପାଘି ବାର୍ଦାନ୍ଦ୍। 13ଏନ୍ ଏନ୍ନେ ଏନ୍ଦେର୍ହି ମା ଲେଖାଲ୍ଦାନ୍, ଏକାନ୍ ନିମାଗେ ପାଢ଼ା ଆରୁ ବୁଝ୍ରାଗେ ମୁସ୍କିଲ୍ ମାନୋ। ଏନ୍ ଆଶ୍ରା କାମ୍ଦାନ୍ କା ଇବନ୍ ନିମ୍ ପୁରାପୁରୀ ବୁଝ୍ରା ଅଙ୍ଗର୍। 14ଏସ୍କେ ନିମ୍ ଏମାନ୍ କାଟେକେନ୍ ବୁଝୁର୍କାଦାର୍। ଆନ୍ନେନିନ୍ ନିମ୍ ଏହ୍ମା ଲାଗାନ୍ ବଡ଼୍ପଣୀ ଏଦ୍ରା ଅଙ୍ଗର୍ ଏସ୍କେ ଏମ୍ ନିହ୍ମା ଲାଗାନ୍ ଆ ଉଲ୍ଲା ବଡ଼୍ପଣୀ ଏଦ୍ରା ଅଙ୍ଗମ୍, ଯେତ୍କବାକେନ୍ ନାହ୍ମା ପ୍ରାଭୁ ଯୀଶୁସ୍ ଆରୁହନ୍ ବାରସ୍।
15ଆରୁ ନିମାଗେ ଆରୁହନ୍ ଆଶୀର୍ବାଦ୍ଘି ଫାଏଦା ହାଖ୍ରା ଅଙ୍ଗଦ୍, ହୁଦ୍ଘିଲାଗାନ୍ ଇ ବିଶ୍ୱାସ୍ଘି କାରଣ୍ ଏନ୍ ପହ୍ଲେ ନିହ୍ମାସାନ୍ ବାରାଗେ ସୋଚ୍କାଚ୍କାନ୍। 16ଆରୁ ନିହ୍ମା ଚାହାନୁ ମାନିକିରି ମାକିଦୁନିଆଁ ଏରିଆଗେ କନ୍, ଆରୁଅହନ୍ ମାକିଦୁନିଆଁସ୍ତି ନିହ୍ମାସାନ୍ ବାରିକିରି ନିହ୍ମାଏ ମଦେତ୍ତି ୟାହୁଦୀଆ ପ୍ରଦେଶ୍ଗେ କାଲାଅଙ୍ଗନ୍, ଇଦ୍ଘିଲାଗାନ୍ ଏନ୍ ଆ ବିଶ୍ୱାସ୍ତି ପହ୍ଲେ ନିହ୍ମା ଚାହା କାଲାଗେ ଯୋଜ୍ନା କାମାଲ୍କାନ୍। 17ଏନ୍ ଯେତ୍କବାକେନ୍ ଇ ଯୋଜ୍ନାବନ୍ କାମ୍ଚ୍କାଚ୍କାନ୍, ତା ଏଙ୍ଗାଗେ ଏନ୍ଦେର୍ହି ସନ୍ଦେହ୍ ମାଲ୍ଲା ରୁ। ଚାହେ ଏନ୍ ଏକା ଯୋଜ୍ନା କାମାଲ୍ଦାନ୍ ତା ଏନ୍ଦେର୍ ଆବନ୍ ଦୁନିଆଁଘି ଲେଖା ବାନା ବାଦାନ୍କା ଅଣ୍ଟା ସାମାୟନୁ “ହଁ, ହଁ” ହି ତେଙ୍ଗ୍ତେ ରାଦାନ୍ ଆରୁ “ମାଲ୍ଲା, ମାଲ୍ଲା” ହି ବାତେ ରାଦାନ୍। 18ଲେକିନ୍ ପାର୍ମେଶ୍ୱାର୍ସ୍ ବିଶ୍ୱାସ୍ ଲାଇଗ୍ ରାଦାସ୍ ଆରୁ ଆସ୍ ଇଦ୍ଘି ସାକ୍ଷୀ ଚିୟସ୍ କା ନିହ୍ମା ଲାଗାନ୍ ଏହ୍ମାଏ ଏକା ବଚନ୍ ରାଇ ଅହ୍ନାସାରେନ୍ “ହଁ” ଆରୁ “ମାଲ୍ଲା” ମା ବାଦାସ୍। 19ଏନ୍ଦେର୍ଗେକା ନିହ୍ମା ମାଝାନୁ ଏକା ପାର୍ମେଶ୍ୱାର୍ସ୍କି ହାଦ୍ଦୁ ଯୀଶୁ ଖ୍ରୀସ୍ତ୍ସ୍ଘି ଏମ୍ ଚାହେ ସିଲ୍ବାନୁସ୍, ତୀମଥିଉସ୍ ଆରୁ ଏମ୍ ପ୍ରଚାର୍ କାମ୍ଚ୍କାମ୍, ଆଦ୍ “ହଁ” ଆରୁ ମାଲ୍ଲା ଯୋଡ଼େଦିନ୍ ଅହ୍ନାସାରେନ୍ ମାଲ୍ଲାଦିନ୍ ବରନ୍ ଆସ୍କି ଦ୍ୱାର୍ନୁ ଅଣ୍ଟା ଜାମାବାକେନ୍ “ହଁ” ଘୋଷ୍ଣା କାମାକେରା। 20ଏନ୍ଦେର୍ଗେକା ପାର୍ମେଶ୍ୱାର୍ସ୍ ଏକା ଯେତ୍କ କାତ୍ଥା ଚିଚ୍ଚକାଦାସ୍, ଆବଦ୍ ଯୀଶୁସ୍କିନୁ ଜାମାର୍ଘି ଲାଗାନ୍ “ହଁ” ମାନିକାଇଦ୍। ହୁଦ୍ଘିଲାଗାନ୍ ନାମ୍ ଆସ୍କି ଦ୍ୱାର୍ନୁ ଏକାର୍ “ଆମେନ୍” ବାନାଏ, ଆଦ୍ ପାର୍ମେଶ୍ୱାର୍ସ୍କି ମାହିମାଘି ଲାଗାନ୍ ମାନିଦ୍। 21ଆରୁ ଏକାସ୍ ନାମାନ୍ ନିହ୍ମାଗାନେ ଖ୍ରୀସ୍ତ୍ସ୍ନୁ ମଜ୍ବୁତ୍ ଉଇଦାସ୍, ଆରୁ ଏକାସ୍ ନାହ୍ମାଏ ଆଭିଷେକ୍ କାମ୍ଚାସ୍ ଆସିନ୍ ପାର୍ମେଶ୍ୱାର୍ସ୍ ରାଚାସ୍। 22ଆସିନ୍ ନାହ୍ମା ମିଆଁ ନିଜର୍ ମଁହର୍ ଲାଗାବାଚାସ୍ ଆରୁ ଆଘ୍ଲିନ୍ତିନିନ୍ ଚିଚ୍ଚକା ଦାମ୍ଘି ରୂପ୍ତି ନାହ୍ମା ଜୀଆଗେ ପାବିତାର୍ ଆତ୍ମାନ୍ ଚିଚ୍ଚକାଦାସ୍।
23ଏନ୍ ନିମାଗେ ଦୁଃଖୁ ଚିଆ ମା ବେଦ୍ଦାଲ୍କାନ୍ ହୁଦ୍ଘିଲାଗାନ୍ ପାର୍ମେଶ୍ୱାର୍ସିନ୍ ସାକ୍ଷୀ ଚିକିରି ତେଙ୍ଗ୍ଦାନ୍ କା ଆକ୍କୁନ୍ତକ୍ କୁରିନ୍ଥୀସ୍ ସହର୍ନୁ ମାଲ୍ଲା ବାରୁନ୍। 24ନିହ୍ମା ବିଶ୍ୱାସ୍ନୁ ମନ୍ମର୍ଜୀ ହକ୍ ଜାମାବାନା ଏହ୍ମା ମତ୍ଲବ୍ ମାଲ୍ଲାଦିନ୍। ଏମ୍ ନିହ୍ମାଏ ସୁଃଖୁ ଶାନ୍ତିଘି ଲାଗାନ୍ ନିହ୍ମାଏ ଭାଗିଦାର୍ ରାଦାମ୍ ଆରୁ ନିମ୍ତା ଏନ୍ନେନିନ୍ ବିଶ୍ୱାସ୍ନୁ ମଜ୍ବୁତ୍ ରାଦାର୍।
21ଏନ୍ ନିଜର୍ ମନ୍ନୁ ଇ ସୋଚ୍କାଚ୍କାନ୍ କା ଆରୁହନ୍ ନିହ୍ମା ଚାହାନୁ ଦୁଃଖୁ ଚିୟାଗେ ମା ବାରନ୍। 2ଏନ୍ଦେର୍ଗେକା ଯଦି ଏନ୍ ନିମାନ୍ ଦୁଃଖୁ ଚିଅନ୍ ତା ଏଙ୍ଗାନ୍ ଖୁସୀ ଚିନାବାଲା ନେଦ୍ ମାନର୍, ଖାଲି ଆସ୍ ଏକାସିନ୍କା ଏନ୍ ଦୁଃଖୁ ଚିଚ୍ଚକାନ୍? 3ଆରୁ ଏନ୍ ଇ କାତ୍ଥାନ୍ ନିମାଗେ ଇଦ୍ଘିଲାଗାନ୍ ଲେଖ୍ଚ୍କାନ୍ କା ଏକାସାନ୍ ଏନ୍ନେ ମା ମାନ୍ନାଦ୍ କା ଏଙ୍ଘା ବାର୍ନାତି ଏକାର୍ସ୍ତି ଏଙ୍ଗାଗେ ଖୁସୀ ହାଖ୍ର୍ନା କାତ୍ଥା ଏନ୍ ଆବ୍ଡ଼ାର୍ସ୍ତି ଦୁଃଖୁ ମାନନ୍; ଏନ୍ଦେର୍ଗେକା ଏଙ୍ଗାଗେ ନିହ୍ମା ଜାମାର୍ସ୍ତି ଇ କାତ୍ଥାଘି ଭାର୍ଷା ରାଇ କା ଏକାନୁ ଏଙ୍ଘା ଖୁସୀ ରାଇ, ଆନ୍ନୁ ନିହ୍ମା ଜାମାର୍ଘିହି ଖୁସୀ ରାଇ। 4ଏନ୍ଦେର୍ଗେକା ନିମାଗେ ଏନ୍ ଦୁଃଖୁତି ନିନ୍ଦିକା ମନ୍ତି ଆରୁ ତକ୍ଲିପ୍ତି ହାଞ୍ଜାଲୋ ଆମ୍ମୁ ଟିଡ଼ି-ଟିଡ଼ିକିରି ଇବନ୍ ଲେଖ୍ଚ୍କାଦାନ୍। ଲେକିନ୍ ନିମାନ୍ ଦୁଃଖୁ କାମାଗେ ମାଲ୍ଲା, ବରନ୍ ଇଦ୍ଘିଲାଗାନ୍ କା ନିହ୍ମା ଲାଗାନ୍ ଏକା ଏଙ୍ଘା ବାନେ ହାଖ୍ନା ରାଇଦ୍, ଆଦ୍ କେତ୍କ ବାଡ଼୍କା ରାଇଦ୍, ନିମ୍ ଇବନ୍ ଆହାଅଙ୍ଗର୍।
ପାପ୍ କାମୁର୍ଗେ ଛେମା
5ଆରୁ ଯଦି ନେରିନ୍ ଦୁଃଖୁ ଚିଚ୍ଚକାନାଏ, ତା ଏଙ୍ଗାଗେ ଖାଲି ମାଲ୍ଲା ବରନ୍ (ଆସ୍ଗାନେ ବାଗ୍ଗେ କଠିନ୍ ମା କାମ୍ଦାନ୍) କାଟେ-କାଟେ ନିମା ଜାମାର୍ଗେହି ଦୁଃଖୁ ଚିଚ୍ଚକାନାଏ। 6ଏନ୍ନେ ଆଲାର୍ଘି ଲାଗାନ୍ ଇ ଦଣ୍ଡ୍ ଏକା ଭାଇର୍ଘିନ୍ତି ଢେର୍ ଆଲାର୍ ଚିଚ୍ଚାର୍, ବାଗ୍ଗେ ରାଇ। 7ହୁଦ୍ଘିଲାଗାନ୍ ନିମ୍ତା ଆକ୍କୁନ୍ ଆସ୍କି ତାର୍ତି ଆସିନ୍ ଛେମା କାମାଚା, ଆରୁ ଆସିନ୍ ଉତ୍ସାହିତ୍ କାମା ତାକା ଆସ୍ ଏକାସାନ୍ ବାଢ଼୍ରି ଚାଢ଼୍ରିକିରି ବାଗ୍ଗେ ଦୁଃଖୁନୁହି ମା ଖାତ୍ରସ୍କସ୍। 8ହୁଦ୍ଘିଲାଗାନ୍ ଏଙ୍ଘାଏ ନିହ୍ମାସ୍ତି ବିନ୍ତି ରାଇଦ୍ କା ନିମ୍ ଆସ୍କି ଲାଗାନ୍ ନିଜର୍ ବାନେ ହାଖ୍ଖନାବନ୍ ବାଢ଼ାବା। 9ଏନ୍ଦେର୍ଗେକା ଏନ୍ ଇଦ୍ଘି ଲାଗାନ୍ହି ଲେଖ୍ଚ୍କାଚ୍କାନ୍ କା ନିମାନ୍ ବିଡ଼୍ଚେ ଏରନ୍ କା ନିମ୍ ଏଙ୍ଘାଏ ଜାମା କାତ୍ଥାବନ୍ ମାନ୍ନାଘି ଲାଗାନ୍ ତିୟାର୍ ରାଦାର୍ କା ମାଲ୍ଲା। 10ଏକାସ୍କି କା ନିମ୍ ଏନ୍ଦ୍ରିନ୍ ଛେମା କାମ୍ଦାର୍ ଆସିନ୍ ଏନ୍ହି ଛେମା କାମ୍ଦାନ୍, ଏନ୍ଦେର୍ଗେକା ଏନ୍ହି ଏନ୍ଦ୍ରିନ୍ ଛେମା କାମ୍ଚ୍କାଦାନ୍, ଯଦି କାମ୍ଚ୍କାରନ୍ ତା, ନିହ୍ମା ଲାଗାନ୍ ଖ୍ରୀସ୍ତ୍ସ୍କି ଜାଗାନୁ ରାଇକିରି ଛେମା କାମ୍ଚ୍କାଦାନ୍। 11ଏନ୍ଦେର୍ଗେକା ଏମ୍ ଶାଏତାନ୍ଘି ଜାଲ୍ଲିନୁ ଫାସ୍ରାଗେ ମା ଚାହଁଦାମ୍। ଏମ୍ ଆଦ୍ଘି ହୁସିୟାରିବନ୍ ବାନେକିରି ଆହ୍ଦାମ୍।
ତ୍ରୋୟାସ୍ନୁ ପାଉଲୁସ୍କି ଅଶାନ୍ତି
12ଯେତ୍କବାକେନ୍ ଏନ୍ ଖ୍ରୀସ୍ତ୍ସ୍କି ସୁସାମାଚାର୍ ଶୁଣାବାଗେ ତ୍ରୋୟାସ୍ ସହର୍ଗେ ବାର୍ଚ୍କାନ୍ ତା, ଆସାନ୍ ଏଙ୍ଘାଲାଗାନ୍ ପ୍ରାଭୁସ୍କି ଅଣ୍ଟା ପାବୁ ଖୋଲ୍ଚ୍କା ରାଚା। 13ହାଲେହି ଏଙ୍ଘା ମନ୍ନୁ ଶାନ୍ତି ମା ହାଖ୍ଖରା, ଏନ୍ଦେର୍ଗେକା ଏନ୍ ଆସାନ୍ ନିଜର୍ ଭାଇ ତିତୁସ୍ସିନ୍ ମା ହାକ୍କାନ୍; ହୁଦ୍ଘିଲାଗାନ୍ ଏନ୍ ତ୍ରୋୟାସ୍ଘି ବିଶ୍ୱାସୀ ଜାମାର୍ସ୍ତି ବିଦା ମାନିକିରି ମାକିଦୁନିଆଁଗେ ବାର୍ଚ୍କାନ୍।
ଖ୍ରୀସ୍ତ୍ସ୍କିନୁ ଜିତ୍ନାଘି ପରବ୍
14ଲେକିନ୍ ପାର୍ମେଶ୍ୱାର୍ସ୍କି ଧାନ୍ୟାବାଦ୍ ମାନ୍ନାଦ୍, ଏକାସ୍ ଖ୍ରୀସ୍ତ୍ସ୍କିନୁ ଜାମାବାକେନ୍ ନାମାନ୍ ଶାଏତାନ୍ସ୍ତି ଜିତାବାଗେ ପାବୁ ଏଦ୍ଦାସ୍ ହୁଦ୍ଘିଲାଗାନ୍ ନାହ୍ମାଏ ଖ୍ରୀସ୍ତ୍ସାନ୍ ମଜ୍ବୁତ୍ ସମ୍ବନ୍ଧ ରାଇ, ପାର୍ମେଶ୍ୱାର୍ସ୍ ଆଲାରିନ୍ ଯୀଶୁ ଖ୍ରୀସ୍ତ୍ସିନ୍ ଆହାଗେ ମଦେତ୍ କାମ୍ଦାସ୍। ପାର୍ମେଶ୍ୱାର୍ସ୍ ଖ୍ରୀସ୍ତ୍ସ୍କି ବୁଦ୍ଧିବନ୍ ନାହ୍ମାସ୍ତି ଜାମାତାରା ପ୍ରଚାର୍ କାମାଗେଲାଗାନ୍ ବେଭାର୍ କାମ୍ଚ୍କାଦାସ୍। ଏସ୍କେ କା ବାସ୍ନା ଇସୁଙ୍ଗ୍ ଲେଖା ଫାଏଲା ରାଇଦ୍। 15ଏନ୍ଦେର୍ଗେକା ନାମ୍ ପାର୍ମେଶ୍ୱାର୍ସ୍କି ଚାହାନୁ ମୁକ୍ତି ହାଖ୍ଖନାବାଲାର୍ ଆରୁ ନାଶ୍ ମାନ୍ନାବାଲାର୍ ଯୋଡ଼େର୍ଘି ଲାଗାନ୍ ଖ୍ରୀସ୍ତ୍ସ୍କି ବାନେ ବାସ୍ନା ଇସୁଙ୍ଗ୍ ଲେଖା ରାଦାତ୍। 16ଲେକିନ୍ ଆବ୍ଡ଼ାର୍ଘି ଲାଗାନ୍ ଏକାର୍ ନାଶ୍ଘି ପାବୁନୁ ରାନାଏ, ଇଦ୍ ମରନ୍ଘି ଏନ୍ନେ ବାନେ ମା ବାସିଦ୍ ଏକାଦ୍ କା ମରନ୍ ତାରା ହୋଇକାଇଦ୍, ଲେକିନ୍ ଆବ୍ଡ଼ାର୍ଘି ଲାଗାନ୍ ଏକାର୍ ମୁକ୍ତିଘି ପାବୁନୁ ଆଘ୍ଲି ବାଢ଼୍ର୍ତେ କାଲ୍ନାଏ, ଇଦ୍ ଜୀବନ୍ଘି ଏନ୍ନେ ବାସ୍ନାଦ୍, ଏକାଦ୍ ଜୀବନ୍ଘି ତାରା ଆଘ୍ଲି ବାଢ଼୍ର୍ତେ ହୋଇକାଇଦ୍। ଲେକିନ୍ ଇ ନାଲ୍ଖୁଘି ଲାଗାନ୍ ନେର୍ ଲାଇଗ୍ ରାନାଏ? 17ପାର୍ମେଶ୍ୱାର୍ସ୍କି ବଚନ୍ବନ୍ ନିଜର୍ ଫାଏଦାଘି ଲାଗାନ୍ ଆନ୍ନୁ ମେଶାବାଇକିରି ବିଁସ୍ନାବାଲା ଢେର୍ ନାନ୍ନା ଆଲାର୍ ଲେଖା ଏମ୍ ମାଲ୍ଦାମ୍। ବରନ୍ ଏମ୍ତା ପାର୍ମେଶ୍ୱାର୍ସ୍କି ଆଘ୍ଲି ପାର୍ମେଶ୍ୱାର୍ସ୍କି ତାର୍ତି ତାଏକା ଆଲାର୍ଘି ଲେଖା ଖ୍ରୀସ୍ତ୍ସ୍ଗାନେ ରାଇକିରି, ସତ୍ତୁଘି ବଚନ୍ବନ୍ ତେଙ୍ଗ୍ଦାମ୍।
3ପୁନା ନିୟମ୍ଘି ସେବକ୍
1ଏନ୍ଦେର୍ ଏମ୍ ଆରୁଅହନ୍ ନିଜର୍ ନାମେ କାମାଗେ ଲାକ୍କାମ୍? ଚାହେ ଏମାଗେ ନାନ୍ନା ଆଲାର୍ଘି ଲେଖା ସୀଫାରିସ୍ଘି ଚିଠି ନିହ୍ମା ଚାହା ଅନ୍ଦ୍ରର୍ନା ଚାହେ ନିହ୍ମାସ୍ତି ହନା ରାଇଦ୍। 2ଏହ୍ମାଏ ଚିଠି ନିମିନ୍ ରାଦାର୍, ଏକାଦ୍ କା ଏହ୍ମା ଜୀଆନୁ ଲେଖ୍ଚ୍କା ରାଇଦ୍ ଆରୁ ଆବନ୍ ଜାମା ଆଲାର୍ ଚିହ୍ନାଏ ଆରୁ ପାଢ଼ାନାଏ ହି। 3ନିମ୍ ଜରୁର୍ ଖ୍ରୀସ୍ତ୍ସ୍କି ଆ ଚିଠିର୍, ଏକାନ୍ ଆସ୍ ଏହ୍ମାସ୍ତି ଲେଖ୍ତାଚ୍କାଦାସ୍। ଆ ଚିଠିଦ୍ ସେହିତି ମାଲ୍ଲା, ବରନ୍ ଜୀବିତ୍ ପାର୍ମେଶ୍ୱାର୍ସ୍କି ପାବିତାର୍ ଆତ୍ମାତି, ଚାଁଚାଘି ଚାଟ୍ଣୀନୁ ମାଲ୍ଲା, ଲେକିନ୍ ଆଲାର୍ଘି ଜୀଆଘି ଚାଟ୍ଣୀନୁ ଲେଖ୍ଚ୍କା ରାଇଦ୍।
4ଏମ୍ ଇ ବିଶ୍ୱାସ୍ ଇଦ୍ଘିଲାଗାନ୍ କାମା ଅଙ୍ଗ୍ଦାମ୍ କା ଏମାଗେ ଖ୍ରୀସ୍ତ୍ସ୍କି ଦ୍ୱାର୍ନୁ ପାର୍ମେଶ୍ୱାର୍ସ୍କି ମିଆଁ ଭାର୍ଷା ରାଇଦ୍। 5ଇଦ୍ ମାଲ୍ଲା କା, ଏମ୍ ନିଜ୍କେ ନିଜ୍ନୁ ଇ ଲାଇଗ୍ ରାଦାମ୍କା, ନିଜର୍ ତାର୍ତି ଏନ୍ଦ୍ରିନ୍ କାଥାଘି ବିଚାର୍ କାମାଅଙ୍ଗମ୍; ଲେକିନ୍ ଏହ୍ମାଏ ଲାଇଗ୍ ପାର୍ମେଶ୍ୱାର୍ସ୍କି ତାର୍ତି ରାଇ। 6ଏକାସ୍ ଏମାନ୍ ପୁନା ନିୟମ୍ଘି ସେବକ୍ ମାନାଗେ ଲାଇଗ୍ହି କାମ୍ଚାସ୍। ଇଦ୍ ଏନ୍ଦ୍ରିନ୍ ଲେଖ୍ଚ୍କା ମୁଶାସ୍କି ନିୟମ୍ ମାଲ୍ଲିଦ୍ ବରନ୍ ଆତ୍ମାଘି ନିୟମ୍ଦ୍ ଏନ୍ଦେର୍ଗେକା ଲେଖ୍ଚ୍କା ନିୟମ୍ଦ୍ ତା ଖିଇ କାଇଦ୍, ଲେକିନ୍ ଆତ୍ମାଦ୍ ଜୀବନ୍ ଚିଇଦ୍।
ମାହିମାଘି ପୁନା ନିୟମ୍
7ଯଦି ମରନ୍ଘି ଆ ନିୟମ୍ ଏକାଘି ଅକ୍ଷର୍ ଚାଁଚାନୁ ଲେଖ୍ଚ୍କାଚାର୍, ଏତ୍କତକ୍ ଆଦ୍ ବିଲ୍ଚିଆ କେରା, କା ମୁଶାସ୍କି ଚେହେରାଘି ମିଆଁ ବିଲ୍ଚ୍ନାଘି ଲାଗାନ୍ ଏକା ଘାଟ୍ଣାହି ଘାଟ୍ର୍ତେ କାଲ୍ଲିୟାଦ୍, ଇସ୍ରାଏଲୀର୍ ଆସ୍କି ଚେହେରାବନ୍ ଏରା ପଲ୍ଲିୟାରିନ୍। 8ତା ଆତ୍ମାଘି ନିୟମ୍ ଆରୁହି ଏନ୍ଦେର୍ଗେ ମା ଚାମ୍କାରଦ୍? 9ଏନ୍ଦେର୍ଗେକା ଯେତ୍କବାକେନ୍ ଦୋଷୀ ଠାହ୍ରାନାବାଲା ନିୟମ୍ ଚାମ୍କା ରାଲିୟାଦ୍, ତା ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ଠାହ୍ରାନାବାଲା ନିୟମ୍ଦ୍ ଆରୁହି ଏନ୍ଦେର୍ଗେ ମା ଚାମ୍କାରଦ୍? 10ଇ ଆକ୍କୁନ୍ ତା ଜାମାର୍ଘିନ୍ତି ବାଡ଼୍କା ମାହିମାଘି ଆଘ୍ଲି ଆ ଆଘ୍ଲିନ୍ତା ମାହିମା ଆକ୍କୁନ୍ କମ୍ରା କେର୍କିଚି। 11ଏନ୍ଦେର୍ଗେକା ଯେତ୍କବାକେନ୍ ଆଦ୍ ଏକାଦ୍ କା ଘାଟ୍ର୍ତେ କାଲିୟାଦ୍ ଆଦ୍ ଚାମ୍କା ରାଲିୟାଦ୍, ତା ଆଦ୍ ଏକାଦ୍ କା ସବୁଦିନ୍ଘି ଲାଗାନ୍ ରଦ୍ ତା ଆରୁହି ଏନ୍ଦେର୍ଗେ ମା ଚାମ୍କାରଦ୍?
12ହୁଦ୍ଘିଲାଗାନ୍ ଏନ୍ନେ ଆଶ୍ରା ଉଇୟିକିରି ଏମ୍ ମା ଏଲ୍ଚିକିରି ତେଙ୍ଗ୍ଦାମ୍। 13ଆରୁ ଇସ୍ରାଏଲୀଜାମାର୍ ଆ ଘାଟ୍ର୍ନାବାଲା ଚାମ୍କାରାନାଘି ଆଖ୍ରୀବନ୍ ମା ଏରର୍ ହୁଦ୍ଘିଲାଗାନ୍ ମୁଶାସ୍କି ଲେଖା ମାଲ୍ଲା, ଏକାସ୍ ନିଜର୍ ଚେହେରାନୁ ପାର୍ଦା ଡାବ୍ର୍କାଚାସ୍। 14ଲେକିନ୍ ଆବ୍ଡ଼ାର୍ଘି ବୁଦ୍ଧି ବାଣାଁ ମାନ୍ଚାକେର୍କିଚି, ଏନ୍ଦେର୍ଗେକା ଇନ୍ନାତକ୍ ପାଚ୍ଚା ନିୟମ୍ବନ୍ ପାଢ଼୍ନା ବାକେନ୍ ଆବ୍ଡ଼ାର୍ଘି ଜୀଆନୁ ଆ ପାର୍ଦାଦିନ୍ ରାଚା, ଲେକିନ୍ ଆ ପାର୍ଦାନ୍ ଖ୍ରୀସ୍ତ୍ସିନ୍ ହାଟାବା ଅଙ୍ଗସ୍। 15ଆରୁ ଇନ୍ନାତକ୍ ଯେତ୍କଥର୍ ମୁଶାସ୍କି ଲେଖ୍ଚ୍କା ବହିନ୍ ପାଢ଼ା କାଇଦ୍ ତା, ପାଢ଼୍ନା ବାଲାର୍ଘି ମନ୍ନୁ ଇନ୍ନାହି ଆ ପାର୍ଦାଦିନ୍ ଡାପ୍ର୍କି ରାଇଦ୍। 16ଲେକିନ୍ ଯେତ୍କବାକେନ୍ ନେରିନ୍ ପ୍ରାଭୁସ୍ତାରା ମାନ୍ନାଏକାନାଏ ତା ଆ ପାର୍ଦାବନ୍ ହାଟାବାକାଇ। 17ଏନ୍ଦେର୍ଗେକା ପ୍ରାଭୁସ୍ ତା ଆତ୍ମାସ୍, ଆରୁ ଏକାସାନ୍ ପ୍ରାଭୁସ୍କି ଆତ୍ମାଦ୍ ରାଇ, ଆସାନ୍ ଆଜାଦୀ ରାଇଦ୍। 18ଲେକିନ୍ ନାମ୍ ଜାମାତ୍ ଚିଢ଼ାତି ମା ଢାପ୍ର୍କା ଚେହେରାଗାନେ ଆଇନାନୁ, ପ୍ରାଭୁସ୍କି ଚାମ୍କାରାନାବନ୍ ଯେତ୍କବାକେନ୍ ଧ୍ୟାନ୍ କାମ୍ଦାତ୍ ତା ନାମ୍ହି ହନ୍ନେନ୍ ମାନ୍ତେ କାଦାତ୍ ଆରୁ ନାହ୍ମାଏ ଚାମ୍କାରାନାଦ୍ ବାଗ୍ଗେନ୍ତି ବାଗ୍ଗେ ବାଢ଼୍ର୍ତେ କାଇଦ୍। ଆ ଚାମ୍କାରାନାଦ୍ ପ୍ରାଭୁସ୍ ମତ୍ଲବ୍ ଆ ଆତ୍ମାଘି ନାଲ୍ଖୁଦ୍।
4ହାଜ୍ଜୁଘି ଭାଣ୍ତାନୁ ଖାଜାନା
1ଏନ୍ଦେର୍ଗେକା ପାର୍ମେଶ୍ୱାର୍ସ୍କି କ୍ରିପାତି ଏମାଗେ ଇ ସେବା ନାଲ୍ଖୁ ହାଖ୍ଖର୍କିଚି, ହୁଦ୍ଘିଲାଗାନ୍ ଏମ୍ ଏକ୍ଲାହି ହିମ୍ମତ୍ ମା ହାର୍ଦାମ୍। 2ଲେକିନ୍ ଏମ୍ତା ଲାଜ୍ଜେବାଲା ନୁହୁର୍କା ନାଲ୍ଖୁବନ୍ ଆମ୍ବେଇଚ୍କାଦାମ୍। ଏମ୍ ମା ହିସ୍ଙ୍ଗାଦାମ୍ ଆରୁ ନା ତା ଏମ୍ ପାର୍ମେଶ୍ୱାର୍ସ୍କି ବଚନ୍ବନ୍ ନିଜର୍ ତାର୍ତି ଏନ୍ଦେର୍ହି କାମାପଲ୍ଲଦାମ୍, ବରନ୍ ସତ୍ତୁବନ୍ ଖୁଲାଖୁଲି ରୂପ୍ତି ଏଦିକିରି ଆଲାର୍ଘି ମନ୍ନୁ ପାର୍ମେଶ୍ୱାରସ୍କି ଆଘ୍ଲି ନିଜ୍କେନିଜ୍ବନ୍ ମାଇନ୍ କାମ୍ନାଘି ଲାଇଗ୍ ସୋଚ୍ଦାମ୍। 3ଏକା ସୁସାମାଚାର୍ବନ୍ ଏମ୍ ପ୍ରଚାର୍ କାମ୍ଦାମ୍, ଆଦ୍ଘି ମିଆଁ ଯଦି ଏନ୍ଦ୍ରିନ୍ ପାର୍ଦା ଖାତ୍ର୍କିରାଇଦ୍ ହାଲେ ଆବ୍ଡ଼ାର୍ଘି ଲାଗାନ୍ ଖାତ୍ର୍କିରାଇ, ଏକାର୍ କା ନାଶ୍ଘି ପାବୁନୁ କାଲ୍ତେ ରାନାଏ। 4ଇ ଦୁନିଆଁଘି ଦେବ୍ତା ମତ୍ଲବ୍ ଶାଏତାନ୍, ଅବିଶ୍ୱାସୀର୍ଘି ବୁଦ୍ଧିବନ୍ ଏତ୍କ କାଁଣା କାମ୍ଚେଇ ଚିଚ୍ଚକିଚାକା, ଆବ୍ଡ଼ାର୍ ପାର୍ମେଶ୍ୱାର୍ସ୍କି ପ୍ରତିରୂପ୍, ଖ୍ରୀସ୍ତ୍ସ୍କି ମାହିମା ସୁସାମାଚାର୍ଘି ବିଲ୍ଲୀବନ୍ ଏରାଗେ ପଲ୍ଲିୟାରିନ୍। 5ଏନ୍ଦେର୍ଗେକା ଏମ୍ ନିଜର୍ ମାଲ୍ଲା ଲେକିନ୍ ଯୀଶୁ ଖ୍ରୀସ୍ତ୍ସ୍କି ସୁସାମାଚାର୍ ତେଙ୍ଗ୍ଦାମ୍ କା ଯୀଶୁ ଖ୍ରୀସ୍ତ୍ସିନ୍ ପ୍ରାଭୁସ୍। ଆରୁ ନିଜର୍ ବାରେନୁ ଇ ତେଙ୍ଗ୍ଦାମ୍ କା ଏମ୍ ଯୀଶୁସ୍କି ଦ୍ୱାର୍ନୁ ନିହ୍ମାଏ ସେବକ୍ମ୍। 6ଏନ୍ଦେର୍ଗେକା ଆ ପାର୍ମେଶ୍ୱାର୍ସିନ୍, ଏକାସ୍ କା ତେଙ୍କାଚାସ୍, “ଉହାନ୍ତିନିନ୍ ବିଲ୍ଲୀ ଚାମ୍କାରୋ” ଆରୁ ଆଦିନ୍ ନାହ୍ମା ଜୀଆନୁ ବିଲ୍ଲୀ ମାନ୍ଚ୍କିଚି, ତାକା ନାମାଗେ ଯୀଶୁ ଖ୍ରୀସ୍ତ୍କି ମୁନୁଷ୍ ରୁପ୍ନୁ ପାର୍ମେଶ୍ୱାର୍ସ୍କି ମାହିମା, ବୁଦ୍ଧିଘି ବିଲ୍ଲୀ ହାଖ୍ଖରା ଅଙ୍ଗଦ୍।
7ଲେକିନ୍ ଏହ୍ମାସାନ୍ ଆ ଆତ୍ମିକ୍ ଖାଜାନାବନ୍ ହାଜ୍ଜୁଘି ଭାଣ୍ତାନୁ ଇଦ୍ଘିଲାଗାନ୍ ଉଇୟା କେର୍କିଚିକା, ଇଦ୍ ଚାମ୍କାରାନା ଶକ୍ତିଦ୍ ଏହ୍ମାଏ ମାଲ୍ଲିଦ୍; ବରନ୍ ପାର୍ମେଶ୍ୱାର୍ସ୍କି ତାର୍ତିଇନ୍ ମାନ୍ନାଦ୍। 8ଏମ୍ କଷଟ୍ତି ଘେର୍ଚ୍କା ରାଦାମ୍, ଲେକିନ୍ ଏକ୍ଲାହି ହାର୍ ମା ମାନ୍ଦାମ୍, ଏମ୍ ପାରେସାନ୍ ମାନ୍ଦାମ୍ ଲେକିନ୍ ଏକ୍ଲାହି ହାତାଶ୍ ମା ମାନ୍ଦାମ୍। 9ଏମାନ୍ ଆଲାର୍ ଶାତାବାନାଏ ଲେକିନ୍ ଏମାନ୍ ପାର୍ମେଶ୍ୱାର୍ସ୍ ମା ଆମ୍ୱଦାସ୍ ଚିଦାସ୍, ଆଲାର୍ ଏମାନ୍ ଟିଡ଼୍ନାଏ ଚିନାଏ, ଲେକିନ୍ ନାଶ୍ ମା ମାନ୍ଦାମ୍। 10ଏମ୍ ଜାମାବାକେନ୍ ନିଜର୍ ମେଦୁନୁ ଖ୍ରୀସ୍ତ୍ସ୍କି ଦୁଃଖୁ ଆରୁ ମରନ୍ବନ୍ ସୋଚ୍ଦାମ୍ ଏକାତି କା ଯୀଶୁ ଖ୍ରୀସ୍ତ୍ସ୍କି ଜୀବନ୍ହି ଏହ୍ମା ଶରୀର୍ନୁ ଏଥ୍ରିକାଇଦ୍। 11ଏମାଗେ ଉଜ୍ଜତେ-ଉଜ୍ଜତେ ଯୀଶୁସ୍କି ଲାଗାନ୍ ଜାମାବାକେନ୍ ମରନ୍ଘି ସାମ୍ନା କାମା ଖାତ୍ରି, ଏକାତି କା ଯୀଶୁସ୍କି ଜୀବନ୍ହି ଏହ୍ମାଏ ଖିନାବାଲା ଶରୀର୍ନୁ ଏଥ୍ର୍ନାକାନାଦ୍। 12ହୁଦ୍ଘିଲାଗାନ୍ ଏମ୍ ମରନ୍ଘି ପାବୁନୁ ଖାତ୍ର୍ଦାମ୍, ଲେକିନ୍ ଇଦ୍ ନିହ୍ମା ଲାଗାନ୍ ସବୁଦିନ୍ତା ଜୀବନ୍ନୁ ଫଲ୍ ହାଖ୍ଖରିଦ୍।
13ପାବିତାର୍ ଶାସ୍ତ୍ରନୁ ତେଙ୍ଗି କା ଏନ୍ ବିଶ୍ୱାସ୍ କାମ୍ଚ୍କାନ୍ ଆରୁ ଏନ୍ ଇଦ୍ଘିଲାଗାନ୍ ତେଙ୍କାନ୍। ଏମ୍ ବିଶ୍ୱାସ୍ଘି ଆ ଆତ୍ମାତିନ୍ ଖାସ୍ଚେଲା ରାଦାମ୍। ଏମ୍ହି ବିଶ୍ୱାସ୍ କାମ୍ଦାମ୍ ଆରୁ ହୁଦ୍ଘିଲାଗାନ୍ ଏମ୍ ତେଙ୍ଗ୍ଦାମ୍। 14ଏନ୍ଦେର୍ଗେକା ଏମ୍ ଆହ୍ଦାମ୍ କା, ଏକାସ୍ ପ୍ରାଭୁ ଯୀଶୁସିନ୍ ଉଜ୍ଜତାଚାସ୍; ଆସିନ୍ ଏମାନ୍ହି ଯୀଶୁସ୍କିନୁ ଭାଗିଦାର୍ ଆହିକିରି ଉଜ୍ଜତସ୍, ଆରୁ ନିହ୍ମାଗାନେ ତାଙ୍ଘା ଆଘ୍ଲି ହାଜିର୍ କାମସ୍। 15ଏସ୍କେ ଢେର୍ ଆଲାର୍ଗେ କ୍ରିପା ବାଢ଼୍ର୍ତେ କାଇଦ୍, ଆନ୍ନେନିନ୍ ପାର୍ମେଶ୍ୱାର୍ସ୍କି ମାହିମାଘି ଲାଗାନ୍ ଧାନ୍ୟାବାଦ୍ଘି ବିନ୍ତି କାମ୍ନାବାଲାର୍ଘି ସଂଖ୍ୟା ବାଢ଼୍ର୍ତେକଦ୍, ହୁଦ୍ଘିଲାଗାନ୍ ଜାମାକିଛି ନିହ୍ମା ବାନେଘି ଲାଗାନ୍ ମାନାଲିଦ୍।
16ଇ କାରଣ୍ ରାଇଦ୍ କା ଏମ୍ ହିମ୍ମତ୍ ମା ହାର୍ଦାମ୍। ଏହ୍ମାଏ ଶରୀର୍ଘି ଶକ୍ତି ଭାଲେହି କମ୍ଜୋର୍ ମାନ୍ତେ କାଲିଦ୍, ଲେକିନ୍ ଏହ୍ମାଏ ଉଲ୍ତା ଜୀଆନୁ ସବୁଦିନ୍ ପୁନା ଜୀବନ୍ଘି ମଜ୍ବୁତ୍ ମାନ୍ତେ-ମାନ୍ତେ କାଇଦ୍। 17ଆରୁ ଇଦ୍ କେତ୍କ ସାମାୟଘି ଲାଗାନ୍ ଏମ୍ କାଟେକେନ୍ହି କଷଟ୍ ଏକାନ୍ ଏମ୍ ସାହ୍ଚ୍କାଦାମ୍ ଆଦ୍ ଏମାଗେ ସବୁଦିନ୍ତା ମହତ୍ତ୍ୱଦ୍ ବହୁତ୍ ବାଗ୍ଗେତି ହାଖ୍ଖରକୋ ଆରୁ ଏକା କଷଟ୍ ଏମ୍ ସାହାଲ୍ଦାମ୍ ଆଦ୍ଘିନ୍ତି ଇଦ୍ ବହୁତ୍ ବାଡ଼୍କାଦ୍। 18ହୁଦ୍ଘିଲାଗାନ୍ ଏହ୍ମା ହାନ୍ନୁ ଏଥ୍ର୍ନାବାଲା ଜିନିଷ୍ନୁ ମାଲ୍ଲା, ବରନ୍ ଏକାଦ୍ ମା ଏଥ୍ରିଦ୍ ଆଦ୍ଘି ମିଆଁ ନିଜର୍ ଧ୍ୟାନ୍ ଲାକ୍କି ରାଇଦ୍, ଏନ୍ଦେର୍ଗେକା ଏମ୍ ଏକା ଜିନିଷ୍ବନ୍ ଏର୍ଦାମ୍, ଆବ୍ଡ଼ାଦ୍ କେତ୍କ ସାମାୟଘି ଲାଗାନ୍ ରାଇଦ୍। ଆରୁ ମା ଏଥ୍ର୍ନା ଜିନିଷ୍ ସବୁଦିନ୍ଘି ଲାଗାନ୍ ରାଇଦ୍।
5ନାହ୍ମାଏ ସରଗ୍ତା ଆଡ଼୍ପା
1ନାମ୍ ଆହ୍ଦାତ୍ କା ଯେତ୍କବାକେନ୍ ନାହ୍ମା ଶରୀର୍ବନ୍ ଆଡ଼୍ପା ଗାନେ ତୁଲ୍ନା କାମ୍ଚ୍କାରାଇ, ଆରୁ ଦୁନିଆଁନୁ ନାହ୍ମାଏ ଇ ଆଡ଼୍ପାନ୍ ଟିଡ଼ାଚିଆକଦ୍, ତା ନାମାଗେ ପାର୍ମେଶ୍ୱାର୍ସ୍କି ଦ୍ୱାର୍ନୁ କାମ୍ଚ୍କା ସରଗ୍ନୁ ଅଣ୍ଟା ଆଡ଼୍ପା ହାଖ୍ଖର୍। ଆଦ୍ ଅଣ୍ଟା ଏନ୍ନେ ଆଡ଼୍ପାଦ୍, ଏକାଦ୍ କା ମୁନୁଷ୍ ହେଖ୍ଖାନ୍ତି କାମ୍ଚ୍କା ମାଲ୍ଲିଦ୍। ଲେକିନ୍ ସବୁଦିନ୍ଘି ଲାଗାନ୍ ସରଗ୍ନୁ ରଦ୍। 2ନାମ୍ ଯେତ୍କତକ୍ ଇ ଆଡ଼୍ପାନୁ ରାଦାତ୍, ନାମ୍ ଅହ୍ଲତେ ଚିହ୍ଁତେ ରାଦାତ୍, ଆରୁ ଇବନ୍ ଚାହ୍ଁତେ ରାଦାତ୍ କା ନିଜର୍ ସରଗ୍ତା ଆଡ଼୍ପାନୁ କାଇକିରି ରତ୍। 3ପାର୍ମେଶ୍ୱାର୍ସ୍ ଏକା ସରଗ୍ତା ଶରୀର୍ ଚୋସ୍ ଯଦି ଆ ଶରୀର୍ବନ୍ ଆତ୍ତତ୍ ତା ନାମ୍ ବିନାଚିଢ଼ାଘି ମା ରତ୍। 4ନାମ୍ ଇ ଆଡ଼୍ପାନୁ ରାନାବାକେନ୍ ନାହ୍ମା ଦୁଃଖୁ ତକ୍ଲିପ୍ନୁ ରାଇକିରି କୁହଁରାରାତେ ରାଦାତ୍; ଏନ୍ଦେର୍ଗେକା ନାମ୍ ପାଚ୍ଚା ଶରୀର୍ବନ୍ ମା ଇଁଚିକିରି ପୁନା ଶରୀର୍ବନ୍ ଆତ୍ତା ବେଦ୍ଦ୍ଦାତ୍, ଆରୁ ଇନ୍ନୁ ଏକାସ୍ ଖିନାବାଲା ରାଦାସ୍, ଆସ୍ ସବୁଦିନ୍ତା ଜୀବନ୍ନୁ ସାମିଲ୍ ମାନ୍ଦାସ୍କାଦାସ୍। 5ପାର୍ମେଶ୍ୱାର୍ସ୍ ଅଣ୍ଟା ଏକାସ୍ କା ନାମାନ୍ ବାଦ୍ଲାଗେ ଲାଗାନ୍ ତିୟାର୍ କାମ୍ଚ୍କାଦାସ୍ ଆସ୍ ନାମାଗେ ତାଙ୍ଘା ପାବିତାର୍ ଆତ୍ମାନ୍ ଚିଚ୍ଚକାଦାସ୍ ଏସ୍କେ ଜାମାଘି ଦାମ୍ ଚିଇକିରି ନାହ୍ମାଲାଗାନ୍ ଜାମା କାମ୍ଚ୍କାଦାସ୍। 6ହୁଦ୍ଘିଲାଗାନ୍ ନାମ୍ ଜାମାବାକେନ୍ ହିମ୍ମତ୍ ଉଇଦାତ୍ ଆରୁ ଇବନ୍ ଆହ୍ଦାତ୍ କା ଯେତ୍କବାକେନ୍ତକ୍ ନାମ୍ ଇ ଶରୀର୍ନୁ ରାଦାତ୍ ହତ୍କବାକେନ୍ତକ୍ ପ୍ରାଭୁସ୍ସ୍ତି ଭିନେ ରାଦାତ୍। 7ଏନ୍ଦେର୍ଗେକା ନାମ୍ ରୂପ୍ବନ୍ ଏରିକିରି ମାଲ୍ଲା, ଲେକିନ୍ ବିଶ୍ୱାସ୍ତି ଚାଲ୍ର୍ଦାତ୍। 8ହୁଦ୍ଘିଲାଗାନ୍ ହିମ୍ମତ୍ ଉଇକିରି ଏମ୍ ଶରୀର୍ଘି ଆଡ଼୍ପାନ୍ ଆମ୍ବିକିରି ପ୍ରାଭୁସ୍କି ଆଡ଼୍ପାନୁ ରାନାଘି ଲାଗାନ୍ ବାଗ୍ଗେ ପସନ୍ଦ୍ କାମ୍ଦାମ୍। 9ଇଦ୍ଘି ଲେଖା ଶରୀର୍ନୁ ରାଦାତ୍ ଚାହେ ଆମ୍ବଦାତ୍ ଆରୁ କାଦାତ୍, ଲେକିନ୍ ଇଚ୍ଛା ରାଇ କା ପାର୍ମେଶ୍ୱାର୍ସ୍ସିନ୍ ଖୁସୀ କାମତ୍। 10ଏନ୍ଦେର୍ଗେକା ନାମା ଜାମାରିନ୍ ଖ୍ରୀସ୍ତ୍ସ୍କି ରାଜ୍ଗାଦିଘି ଆଘ୍ଲି ଆଣ୍ସ୍ତାଚାକୋ। ଜାମା ଆଲାର୍ ଶରୀର୍ନୁ ରାନାବାକେନ୍ ଏନ୍ଦ୍ରିନ୍ହି କାମ୍ଚ୍କାରର୍, ଆଦ୍ ବାନେ ରଦ୍ ଚାହେ ଖାରାପ୍ ରଦ୍, ଆସ୍କେ ତାଙ୍ଘା ବାଦ୍ଲା କିର୍ତା କଦ୍।
ପାର୍ମେଶ୍ୱାର୍ସ୍ଗାନେ ଖ୍ରୀସ୍ତ୍ସ୍କି ଦ୍ୱାର୍ନୁ ମେଲ୍ମିଲାପ୍
11ହୁଦ୍ଘିଲାଗାନ୍ ଏମ୍ ପ୍ରାଭୁସିନ୍ ଏଲ୍ଚିକିରି ସତ୍ତୁବନ୍ ଗ୍ରହନ୍ କାମାଗେ ଆଲାରିନ୍ ବୁଝାବାଦାମ୍। ଆରୁ ଏମ୍ ଏସ୍କେମ୍ ଆବନ୍ ପାର୍ମେଶ୍ୱାର୍ସ୍ ବାନେକିରି ଆହ୍ଦାସ୍। ଆରୁ ଏଙ୍ଘାଏ ଆଶ୍ରା ଇଦ୍ ରାଇ କା ନିହ୍ମାଏ ବିବେକ୍ନୁହି ଆହ୍ତାରାଚ୍କିରୋ। 12ଏମ୍ ହାଲେହି ନିହ୍ମା ଚାହାନୁ ନିଜର୍ ନାମେ ମା କାମ୍ଦାମ୍। ଏମ୍ ଚାହଁଦାମ୍ କା ନିମାଗେ ଏହ୍ମା ମିଆଁ ବଡ଼୍ପଣୀ ଏଦ୍ରାଗେ ମଉକା ହାଖ୍ରୋ ଆରୁ ନିମ୍ ଆବ୍ଡ଼ା ଆଲାର୍ଘି ଥୁମ୍ଣାନ୍ ବନ୍ଦ୍ କାମା ଅଙ୍ଗର୍, ଏକାର୍ କା ଜୀଆ ଉଲ୍ତା କାତ୍ଥାଘି ମିଆଁ ମାଲ୍ଲା, ବରନ୍ ଏଦ୍ର୍ନାବାଲା କାତ୍ଥାଘି ମିଆଁ ବଡ଼୍ପଣୀ ଏଦ୍ର୍ନାଏ। 13ଏନ୍ଦେର୍ଗେକା ଯଦି ଏମ୍ ପାଗ୍ଲା ରାଦାମ୍ ତା ପାର୍ମେଶ୍ୱାର୍ସ୍କି ଲାଗାନ୍ ରାଦାମ୍। ଆରୁ ଯଦି ଏମ୍ ସିଆଁଣ୍ ରାଦାମ୍ ତା ଆଦ୍ ନିହ୍ମା ଲାଗାନ୍ ରାଦାମ୍। 14ଏନ୍ଦେର୍ଗେକା ଖ୍ରୀସ୍ତ୍ସ୍କି ବାନେ ହାଖ୍ଖନାଦ୍ ଏମାନ୍ କାବୁକାମି, ଆରୁ ଏମ୍ ଇ କାତ୍ଥାତି ବୁଝୁର୍କାମ୍ କେର୍କାଦାମ୍ କା ଯେତ୍କବାକେନ୍ ଅଣ୍ଟାସ୍ ଜାମାର୍ଘି ଲାଗାନ୍ କେଚ୍ଚାସ୍କେରାସ୍ ତା, ଜାମାର୍ କେଚ୍ଚାର୍ କେର୍କାନାଏ। 15ଆରୁ ଯୀଶୁସ୍ ଜାମାର୍ଘି ପାପ୍ଘି ଲାଗାନ୍ କେଚ୍ଚାସ୍ ଏନ୍ଦେର୍ଗେକା ଏକା ଆଲାର୍ ଉଜ୍ଜଲ୍ନାଏ; ଆବ୍ଡ଼ାର୍ ଆକ୍କୁନ୍ ଭବିଷତ୍ନୁ ଖାଲି ନିଜର୍ଲାଗାନ୍ ମା ଉଜ୍ଜତେ ରାନାଏ, ଲେକିନ୍ ଆସ୍କି ଲାଗାନ୍ ଉଜ୍ଜର୍ ଏକାସିନ୍କା କେଚ୍ଚକାସ୍ତି ଆରୁଅହନ୍ ଉଜ୍ଜତାକେରା।
16ହୁଦ୍ଘିଲାଗାନ୍ ଏମ୍ ଆକ୍କୁନ୍ତି ନେକାନ୍ହି ଦୁନିଆଁଘି ନଜର୍ତି ମାଲ୍ଲା ଏରୁମ୍। ଏମ୍ ଖ୍ରୀସ୍ତ୍ସ୍ସିନ୍ ପହ୍ଲେ ଦୁନିଆଁଘି ନଜର୍ନୁ ଏର୍କାମ୍, ଲେକିନ୍ ଆକ୍କୁନ୍ ଏମ୍ ଏନ୍ନେ ମା କାମ୍ଦାମ୍। 17ଇଦ୍ଘି ମତ୍ଲବ୍ ଇଦ୍ କା ଯଦି ନେଦିନ୍ ଖ୍ରୀସ୍ତ୍ସ୍ଗାନେ ଅଣ୍ଟା ମାନ୍ଚାର୍ କେରାର୍ ତା, ଆବ୍ଡ଼ାର୍ ପୁନା ଆଲ୍ ମାନ୍ଚାର୍ କେରାର୍। ପାଚ୍ଚା କାତ୍ଥାଦ୍ ମୁଞ୍ଜରା କେର୍କିଚିଦ୍, ଆରୁ ଜାମାକିଛି ପୁନା ମାନ୍ଚାକେର୍କିଚି। 18ଇବ୍ଡ଼ା ଜାମା କାତ୍ଥାଦ୍ ଆ ପାର୍ମେଶ୍ୱାର୍ସ୍କି ତାର୍ତି ମାନ୍ଚ୍କିଚି, ଏକାସ୍ ନାମାନ୍ ଖ୍ରୀସ୍ତ୍ସ୍କି ଦ୍ୱାର୍ନୁ ନିଜର୍ଗାନେ ମେଲ୍ମିଲାପ୍ କାମ୍ଚାସ୍। ଆରୁ ଆଲାର୍ଗେ ପାର୍ମେଶ୍ୱାର୍ସ୍ତି ମେଲ୍ମିଲାପ୍ଘି ସେବା ନାଲ୍ଖୁ ଏମାଗେ ସୋଁପ୍ଚ୍କାଦାସ୍। 19ଏହ୍ମା ଖବର୍ ରାଇ କା ପାର୍ମେଶ୍ୱାର୍ସ୍ ଆଲାର୍ଘି ପାପ୍ବନ୍ ମା ଏର୍କା ଲେଖା ମାନିକିରି ଖ୍ରୀସ୍ତ୍ସ୍କି ଦ୍ୱାର୍ନୁ ଆବ୍ଡ଼ାରିନ୍ ନିଜର୍ଗାନେ ମେଲ୍ମିଲାପ୍ ଆରୁ ଆସିନ୍ ଆଲାରିନ୍ ପାର୍ମେଶ୍ୱାର୍ସ୍ଗାନେ ମେଲ୍ମିଲାପ୍ ଖବର୍ ଏମାଗେ ସୋଁପ୍ଚ୍କାଦାସ୍।
20ହୁଦ୍ଘିଲାଗାନ୍ ଏମ୍ ଖ୍ରୀସ୍ତ୍ସ୍କି ଖବର୍ ଚିନାବାଲା ଦୂଁତ୍ର୍ଘି ଲେଖା ନାଲ୍ଖୁ କାମାଲ୍ଦାମ୍। ସୋଚା କା ପାର୍ମେଶ୍ୱାର୍ସ୍ ଏହ୍ମା ଦ୍ୱାର୍ନୁ ନିହ୍ମାସାନ୍ ଆର୍ଜୀ କାମାଲ୍ଦାସ୍। ଖ୍ରୀସ୍ତ୍କି ତାର୍ତି ଏମ୍ ନିହ୍ମାସ୍ତି ଆର୍ଜୀ କାମ୍ଦାମ୍ କା ପାର୍ମେଶ୍ୱାର୍ସ୍ଗାନେ ମେଶ୍ରାକାଲା। 21ଏକାତି କା ନାମ୍ ଆସ୍ଗାନେ ଯୋଡ଼୍ରି ରାଇକିରି ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନା ଅଙ୍ଗତ୍ ହୁଦ୍ଘିଲାଗାନ୍ ଖ୍ରୀସ୍ତ୍ସ୍କି ଏନ୍ଦେର୍ହି ପାପ୍ ମାଲ୍ଲା ରୁ ହାଲେହି ପାର୍ମେଶ୍ୱାର୍ସିନ୍ ନାହ୍ମା ପାପ୍ଘି ଲାଗାନ୍ ଯୀଶୁସିନ୍ ପାପୀ କାମ୍ଚାସ୍।
61ପାର୍ମେଶ୍ୱାର୍ସ୍ଗାନେ ନାଲ୍ଖୁନ୍ କାମ୍ନାଘି ଦ୍ୱାର୍ନୁ ଏମ୍ ନିହ୍ମା ଜାମାର୍ସ୍ତି ଇ ବିନ୍ତି କାମ୍ଦାମ୍ କା ନିମାଗେ ପାର୍ମେଶ୍ୱାର୍ସ୍କି ଏକା କ୍ରିପା ହାଖ୍ଖର୍କିଚି, ଆବନ୍ ବେକାର୍ ମାନା ଆମା ଚିଆ। 2ଏନ୍ଦେର୍ଗେକା ପାର୍ମେଶ୍ୱାର୍ସ୍ ପାବିତାର୍ ଶାସ୍ତ୍ରନୁ ତେଙ୍ଗ୍ଦାସ୍ କା “ଠିକ୍ ସାମାୟନୁ ଏନ୍ ନିହ୍ମା ଆର୍ଜୀବନ୍ ମେନ୍ଚ୍କାନ୍ ଆରୁ ମୁକ୍ତିଘି ଉଲ୍ଲା ଏନ୍ ନିହ୍ମାଏ ମଦେତ୍ କାମ୍ଚ୍କାନ୍।” ମେନା, ଆକ୍କୁନ୍ ଠିକ୍ ସାମାୟ ରାଇଦ୍, ଆରୁ ଆକ୍କୁନ୍ ମୁକ୍ତିଘି ଉଲ୍ଲାଦ୍। 3ଏମ୍ ଜାମା କାତ୍ଥାନୁ ଇଦ୍ଘି ଧ୍ୟାନ୍ ଉଇଦାମ୍କା ନେକ୍ରିନ୍ଗେ ଏହ୍ମାତାର୍ତି ଦୋଷ୍ ଲାଗାବାନାଘି ମଉକା ମା ହାଖ୍ଖରଦ୍। ଏକାସାନ୍ ଏନ୍ନେ ମା ମାନ୍ନାଦ୍ କା ଏହ୍ମାଏ ସେବା ନାଲ୍ଖୁଘି ମିଆଁ ଦୋଷ୍ ମା ବାରୋ। 4ବରନ୍ ପାର୍ମେଶ୍ୱାର୍ସ୍କି ସେବକ୍ ଜାମାର୍ଘି ଲେଖା ଏମ୍ ଜାମା ଲେଖାତି ନିଜ୍କେନିଜ୍ବନ୍ ବାନେ ଶିଦ୍ଧ୍ କାମ୍ତେ ରାଦାମ୍। ଧିରାଜ୍ଘି ସାଙ୍ଗେ ଜାମାକିଛିନ୍ ସାହିକିରି ତକ୍ଲିପ୍ନୁ, ବିପଦ୍ନୁ, କଷଟ୍ନୁ, 5ମାର୍ ମହଁରିକିରି, ଜେହେଲ୍ନୁ ରାଇକିରି, ଅଶାନ୍ତିଘି ମାଝାନୁ, ଖାଟିକିରି, ମାଁହାବିସ୍ତା ମା ହାନ୍ଦରିକିରି, କିଡ଼ା ଖିକିରି, 6ନିଜର୍ ପାବିତାର୍, ବୁଦ୍ଧିନୁ ଆରୁ ଧିରାଜ୍ତି, ନିଜର୍ କ୍ରିପାତି, ପାବିତାର୍ ଆତ୍ମାଘି ବାର୍ଦାନ୍ ଆରୁ ବିନା କପଟ୍ତି ବାନେ ହାଖ୍ଖନା। 7ଏମ୍ ପାର୍ମେଶ୍ୱାର୍ସ୍କି ସତ୍ତୁ ବଚନ୍ ଲେଖା ଚାଲ୍ର୍ଦାମ୍। ଏହ୍ମାଏ ସେବା କାମ୍ନାଘି ଶକ୍ତି ପାର୍ମେଶ୍ୱାର୍ସ୍କି ତାର୍ତି ରାଇ। ପାର୍ମେଶ୍ୱାର୍ସ୍କି ନଜର୍ନୁ ଏକାଦ୍ ବାନେ ଲାଗ୍ଗ ଆନ୍ନେ ଜୀବନ୍ ବିତାବିକିରି ଅଣ୍ଟା ଲାଡ଼ାଇ କାମୁସ୍ ଲେଖା ଆତ୍ତିକିରି ତିନା ଡେବ୍ବା ହେଖ୍ଖାନୁ ହାତିଆର୍ ଧାର୍ଚ୍କା ଲେଖା ରାଦାମ୍। 8ମାଇନ୍ ଆରୁ ଲାଜ୍ଜେମହ୍ର୍ନା, ନାମେ ଆରୁ ନିନ୍ଦା ଇବ୍ଡ଼ା ଜାମାଦ୍ ଏହ୍ମା କାପ୍ଡ଼େନୁ ରାଇଦ୍। ଏମ୍ ଠାକୁୱା ବୁଲି ବୁଝ୍ର୍ଦାମ୍, ଲେକିନ୍ ଏମ୍ ସତ୍ତୁ ତେଙ୍ଗ୍ଦାମ୍। 9ଏମ୍ ଚିହ୍ନାର୍ ମାଲ୍କାମ୍, ଲେକିନ୍ ଜାମା ଆଲାର୍ ଏମାନ୍ ମାଇନ୍ କାମ୍ନାଏ। ଏମ୍ ଖିନାଘି ମିଆଁ ରାଦାମ୍, ଲେକିନ୍ ଏମ୍ ଉଜ୍ଜାଲ୍ଦାମ୍। ଏମ୍ ମାର୍ ମହଁର୍ତେ ରାଦାମ୍, ଲେକିନ୍ ଏହ୍ମା ଜିଆ ମାଲ୍ଲା କୁଦ୍। 10ଏମ୍ ଦୁଃଖୁନୁ ରାଦାମ୍, ହାଲେହି ଏମ୍ ଜାମାବାକେନ୍ ଖୁସୀନୁ ରାଦାମ୍। ଏମ୍ ଗରୀବ୍ ରାଦାମ୍, ହାଲେହି ଏମ୍ ଢେର୍ ଆଲାରିନ୍ ଧନୀ କାମ୍ଦାମ୍। ଏହ୍ମାସାନ୍ ଏନ୍ଦେର୍ହି ମାଲ୍ଲାଦିନ୍; ହାଲେହି ଜାମାକିଛିଦ୍ ଏହ୍ମାଏଦ୍। 11ହେ କୁରିନ୍ଥୀ ତା ବିଶ୍ୱାସୀ ଭାଇ ଆରୁ ବୁହୁଣୀ ଜାମାରୋ, ଏମ୍ ନିହ୍ମାସାନ୍ ଖୁଲାଖୁଲି କାତ୍ଥା କାମ୍ଚ୍କାଦାମ୍। ଏହ୍ମା ମନ୍ ନିହ୍ମା ଲାଗାନ୍ ଖୁଲାରାଇ। 12ଏହ୍ମାଏ ବାନେ ହାଖ୍ଖନା ନିହ୍ମା ଲାଗାନ୍ କମ୍ ମାଲ୍ଲାମାନୁ। ଲେକିନ୍ ନିମ୍ ଏହ୍ମାସ୍ତି ବାନେ ହାଖ୍ଖନାନ୍ କମ୍ କାମ୍ଚେଇଚ୍ କାଦାର୍। 13ଇଦ୍ଘି ବାଦ୍ଲିନୁ ନିମ୍ହି ଦାୟାଲୁ ମାନା ଇବନ୍ ଏନ୍ ବାଙ୍ଗ୍ସ୍କି ଲେଖା ନିଜର୍ ହାଦ୍ଦୁରିନ୍ ତେଙ୍ଗାଲ୍ଦାନ୍।
ବିଶ୍ୱାସୀସ୍ ଅଣ୍ଟା ଅବିଶ୍ୱାସୀ ଗାନେ ସମ୍ବନ୍ଧ ମା ଯୋଡ଼୍ନା
14ଏକା ଆଲାର୍ ଖ୍ରୀସ୍ତ୍ସିନ୍ ବିଶ୍ୱାସ୍ ମା କାମ୍ନାଏ, ଆବ୍ଡ଼ାର୍ ଗାନେ ସାମାନ୍ ମା ରାନା ପାକ୍ସିତି ଆମ୍କେ ପୁନ୍ଦା, ହୁଦ୍ଘିଲାଗାନ୍ ଧାର୍ମିକ୍ ଆରୁ ଅଧର୍ମିଘି ଏକ୍ତା ଏସ୍କେ ମାନା ଅଙ୍ଗଦ୍? ଆରୁ ବିଲ୍ଲୀଘି ଉହା ଗାନେ ଏସ୍କେ ସମ୍ୱନ୍ଧ ରାଇଦ୍? 15ଏନ୍ନେନିନ୍ ବିଲିୟାର୍ଘି ଖ୍ରୀସ୍ତ୍ସ୍ଗାନେ ଏନ୍ଦେର୍ ସମ୍ୱନ୍ଧ ରାଇଦ୍? ଚାହେ ବିଶ୍ୱାସୀ ଆରୁ ଅବିଶ୍ୱାସୀର୍ ଗାନେ ଏନ୍ଦେର୍ ସମ୍ୱନ୍ଧ ରାଇଦ୍? 16ଆରୁ ପାର୍ମେଶ୍ୱାର୍ସ୍କି ମନ୍ଦିର୍ନୁ ମୂର୍ତ୍ତୀଗାନେ ଏନ୍ଦେର୍ ସମ୍ୱନ୍ଧ ରାଇ? ଏନ୍ଦେର୍ଗେକା ନାମ୍ ଜୀବିତ୍ ପାର୍ମେଶ୍ୱାର୍ସ୍କି ମନ୍ଦିର୍ତ୍, ଏସ୍କେ କା ପାର୍ମେଶ୍ୱାର୍ସ୍ ତେଙ୍କାଦାସ୍, ଏନ୍ ଆବ୍ଡ଼ାର୍ଘି ମାଝାନୁ ରନ୍ ଆରୁ ତାହ୍ମାଗାନେ ଚାଲ୍ର୍ରନ୍; ଏନ୍ ଆବ୍ଡ଼ାର୍ଘି ପାର୍ମେଶ୍ୱାର୍ ମାନନ୍ ଆରୁ ଆବ୍ଡ଼ାର୍ ଏଙ୍ଘା ଆଲାର୍ ମାନର୍। 17ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍ ତେଙ୍କାଦାସ୍ କା, ନିମ୍ ଅବିଶ୍ୱାସୀ ଜାମାର୍ସ୍ତି ବାହ୍ରି ଉର୍ଖାକାଲା, ଆବ୍ଡ଼ାର୍ସ୍ତି ନିଜ୍କେନିଜ୍ବନ୍ ଭିନେ କାମା, ଏକା ଜିନିଷ୍ ଅଶୁଦ୍ଧ୍ ରାଇ ଆବନ୍ ନିମ୍ ଏକ୍ଲାହି ଆମ୍କେ ଏସ୍ରା ତା, ଏନ୍ ନିମାରିନ୍ ଗ୍ରହନ୍ କାମନ୍। 18ହୁଦ୍ଘିଲାଗାନ୍ ପ୍ରାଭୁସ୍ ତେଙ୍କାଦାସ୍, “ଏନ୍ ନିହ୍ମାଏ ବାଙ୍ଗ୍ ମାନନ୍, ଆରୁ ନିମ୍ ଏଙ୍ଘାଏ ହାଦ୍ଦୁବଚ୍ଚ ମାନର୍, ଇଦ୍ ମାହାନ୍ ପ୍ରାଭୁ ପାର୍ମେଶ୍ୱାର୍ସ୍କି ବଚନ୍ଦ୍।”
71ହେ ଦୁଲାଡ଼ି ସାଙ୍ଗେ ଜାମାରୋ, ନାମାଗେ ଏକା କାତ୍ଥା ହାଖ୍ଖର୍କିଚି, ହୁଦ୍ଘିଲାଗାନ୍ ବାରା, କା ନାମ୍ ନିଜ୍କେନିଜ୍ବନ୍ ଶରୀର୍ ଆରୁ ଆତ୍ମାବନ୍ ଅଶୁଦ୍ଧ୍ କାମ୍ନାବାଲା ଜାମା ପାପ୍ତି ଶୁଦ୍ଧ୍ କାମତ୍, ଆରୁ ପାର୍ମେଶ୍ୱାର୍ସ୍କି ମିଆଁ ଭକ୍ତି ଉଇକିରି ପାବିତାର୍ଘି ପୁରାପୁରୀତକ୍ ଆଣ୍ସ୍ନାଘି କୋଶିଷ୍ କାମ୍ତେରତ୍।
ପାଉଲୁସ୍କି ରୀଜ୍ଝୁ
2ନିମ୍ ଏହ୍ମା ଲାଗାନ୍ ଦାୟାଲୁ ମାନା। ଏମ୍ ନେଖାଗାନେହି ଅନ୍ୟାୟ ମାଲ୍ଲା କାମୁମ୍, ନେକାନ୍ହି ପାଏସାଘି ନୁକ୍ସାନ୍ ମାଲ୍ଲା ଆଣ୍ସ୍ତୁମ୍ ଆରୁ ନେକାନ୍ହି ମାଲ୍ଲା ଠାକୁମ୍। 3ଏନ୍ ନିମାରିନ୍ ଦୋଷ୍ ଚିୟାଗେ ଇବନ୍ ମାଲ୍ଲା ତେଙ୍ଗୁନ୍। ଏନ୍ଦେର୍ଗେକା ଏନ୍ ପହ୍ଲେହି ତେଙ୍ଗା ମୁଞ୍ଜକାଦାନ୍ ନିମ୍ ଏହ୍ମାଏ ଜୀଆନୁ ଏନ୍ନେ ରାଚ୍କାର୍ କେର୍କାଦାର୍ କା ଏମ୍ ନିହ୍ମାଗାନେ ଉଜ୍ଜନା ଖିନାଘି ଲାଗାନ୍ ତିୟାର୍ ରାଦାମ୍। 4ଏନ୍ ନିହ୍ମା ଜାମାର୍ଗାନେ ଖୁଲିକିରି କାତ୍ଥା କାମ୍ଦାନ୍। ଏନ୍ ନିହ୍ମା ଜାମାର୍ଘି ମିଆଁ ବାଡ଼୍କା ବଡ଼୍ପଣି ଏଦ୍ର୍ଦାନ୍। ଇତ୍ତି ଏଙ୍ଗାଗେ ପୁରାପୁରୀ ଶାନ୍ତି ହାଖ୍ଖରିଦ୍ ଆରୁ ଏଙ୍ଘା ଜାମା କଷଟ୍ନୁ ରୀଜ୍ଝୁ ଉଛ୍ଲାରିଦ୍। 5ଯେତ୍କବାକେନ୍ ଏମ୍ ମାକିଦୁନିଆଁ ରାଜୀଗେ ବାର୍ଚ୍କାଚ୍କାମ୍ ହାଲେହି ଏମାଗେ ଶାନ୍ତି ମା ହାଖ୍ଖର୍କିଚା ଲେକିନ୍ ଏମାଗେ ତା ଜାମା ଲେଖାଘି ଦୁଃଖୁ ଉଠାବା ଖାତ୍ର୍କିଚା, ବାହ୍ରି ଝାଗ୍ଡ଼ାତି ଆରୁ ମନ୍ଘି ଉଲା ଏଲ୍ଚ୍କା ରାଚା। 6ଲେକିନ୍ ଗରୀବ୍ ଦୁଃଖିରିନ୍ ସୁଃଖୁ ଚିନାବାଲା ପାର୍ମେଶ୍ୱାର୍ସ୍ ତିତୁସ୍ସିନ୍ ଇସାନ୍ ଆଣ୍ସ୍ତିକିରି ଏମାଗେ ଦିଲାସା ଚିଚ୍ଚକାଦାସ୍। 7ଆରୁ ଆସ୍କି ବାର୍ନାତି ଖାଲି ମାଲ୍ଲା, ଲେକିନ୍ ଆ ଦିଲାସାତି, ଏକାଦ୍ ଆସ୍କେ ନିହ୍ମା ତାର୍ତି ହାଖ୍ର୍କିଚା। ଏଙ୍ଘାଗାନେ ଭେଁଟ୍ ମାନାଗେଲାଗାନ୍ ନିହ୍ମା ରୀଜ୍ଝୁ, ନିହ୍ମା ପସ୍ତାରାନା ଆରୁ ଏଙ୍ଘାଲାଗାନ୍ ନିହ୍ମା ଚିନ୍ତା, ଇଦ୍ଘି ବାରେନୁ ଆସ୍ ଏଙ୍ଗାନ୍ ତେଙ୍ଗିୟାସ୍ ଆରୁ ଇଦ୍ଘିଲାଗାନ୍ ଏଙ୍ଘା ରୀଜ୍ଝୁ ବାଢ଼୍ରା କେରାଦ୍। 8ଯଦିଭି ଏନ୍ ନିଜର୍ ଚିଠିତି ନିମାରିନ୍ ଦୁଃଖୁ ଚିଚ୍କାଚ୍କାନ୍, ହାଲେହି ଏଙ୍ଗାଗେ ଆବନ୍ ଲେଖ୍ନାଘି ଏନ୍ଦେର୍ହି ପାସ୍ତାୱା ମାଲ୍ଲାଦିନ୍। ଚାହେ ପହ୍ଲେ ଏଙ୍ଗାଗେ ଇଦ୍ଘି ଦୁଃଖୁ ଲାକ୍କିଚା ଲେକିନ୍ ଆକ୍କୁନ୍ ଏନ୍ ଏରାଲ୍ଦାନ୍ କା ଆ ଚିଠିତି ନିମାଗେ ଖାଲି ଥୋଡ଼େ ସାମାୟଘି ଲାଗାନ୍ ଦୁଃଖୁ ଲାକ୍କିଚା। 9ଆକ୍କୁନ୍ ଏନ୍ ଖୁସୀ ରାଦାନ୍ ଲେକିନ୍ ଇଦ୍ଘିଲାଗାନ୍ ମାଲ୍ଲା କା ନିମାଗେ ଦୁଃଖୁ ଲାଗ୍ଗିୟାଦ୍, ବରନ୍ ଇଦ୍ଘିଲାଗାନ୍ କା ଆ ଦୁଃଖୁଘି କାରଣ୍ତି ନିମ୍ ପାସ୍ତାରାଚ୍କାର୍। ଏନ୍ଦେର୍ଗେକା ନିମାଗେ ଆ ଦୁଃଖୁଦ୍ ପାର୍ମେଶ୍ୱାର୍ସ୍କି ତାର୍ତିନ୍ ହାଖ୍ଖର୍କିଚା ତାକା ନିମାଗେ ଏହ୍ମାତାର୍ତି ଏନ୍ଦ୍ରିନ୍ ହାନି ମା ମାନ୍ନାଦ୍। 10ଏନ୍ଦେର୍ଗେକା ଏକା ଦୁଃଖୁଦ୍ ପାର୍ମେଶ୍ୱାର୍ସ୍କି ଇଚ୍ଛା ଅନୁସାର୍ ଗ୍ରହନ୍ କାମାକାଇ, ଆତ୍ତି ଏନ୍ନେ ଭାଲାଇ କାମ୍ନା ଜୀଆ ବାଦ୍ଲାରିଦ୍କା ଦୁଃଖୁଘି ପ୍ରଶ୍ନ ମା ମାନିଦ୍। ଦୁନିଆଁଘି ଦୁଃଖୁତି ମରନ୍ ବାରିଦ୍। 11ନିମ୍ ଏର୍ଦାର୍ କା, ନିମ୍ ଏକା ଦୁଃଖୁନ୍ ପାର୍ମେଶ୍ୱାର୍ସ୍କି ଇଚ୍ଛା ଅନୁସାର୍ ଗ୍ରହନ୍ କାମ୍ଚ୍କାର୍, ଆତ୍ତି ନିହ୍ମାଏନୁ କେତ୍କ ଚିନ୍ତା ସିର୍ଜାରାଚା, ନିଜ୍କେବନ୍ ନିର୍ଦ୍ଦୋଷ୍ ସାବିତ୍ କାମାଗେ ସୋଚ୍, କେତ୍କ ଖିସ୍, କେତ୍କ ଏଲ୍ଚ୍କା, କେତ୍କ ଇଚ୍ଛା, ଚାହେ ଦୁସ୍ରାରିନ୍ ନ୍ୟାୟ କାମ୍ନାଘି କେତ୍କ ଇଚ୍ଛା ମାନ୍ଚାକେରା! ଇଦ୍ଘି ଲେଖା ନିମ୍ ଇ ମାମ୍ଲାନୁ ଜାମା ଲେଖାସ୍ତି ନିର୍ଦ୍ଦୋଷ୍ ମାନ୍ନାଘି ସାବୁତ୍ ଚିଚ୍କାଦାର୍। 12ଅସଲ୍ନୁ ଏନ୍ ଆ ଚିଠିନ୍ ଇଦ୍ଘିଲାଗାନ୍ ମାଲ୍ଲା ଲେଖ୍ଚ୍କାରୁନ୍ କା ଏଙ୍ଗାଗେ ଅନ୍ୟାୟ କାମ୍ନାବାଲାର୍ ଚାହେ ଅନ୍ୟାୟ ସାହ୍ନାବାଲା ଆଲାସ୍କି ବାଗ୍ଗେ ଚିନ୍ତା ରାଚା, ବରନ୍ ଇଦ୍ଘିଲାଗାନ୍ କା ନିମ୍ ଜାମାର୍ ପାର୍ମେଶ୍ୱାର୍ସ୍କି ଆଘ୍ଲି ଇବନ୍ ବାନେକିରି ବୁଝ୍ରର୍ କା ନିମାଗେ ଏଙ୍ଘାଏ କେତ୍କ ଚିନ୍ତା ରାଇଦ୍। 13ହୁଦ୍ଘିଲାଗାନ୍ ଏମାଗେ ଶାନ୍ତି ହାଖ୍ଖରା; ଆରୁ ଏହ୍ମାଏ ଇ ଶାନ୍ତିଗାନେ ତିତୁସ୍ଘି ଖୁସୀଘି ଲାଗାନ୍ ଆରୁହି ଖୁସୀ ମାନ୍ଚାସ୍ ଏନ୍ଦେର୍ଗେକା ଆସ୍କି ଜୀଆ ନିମା ଜାମାର୍ଘି କାରଣ୍ତି ହାରାଭାରା ମାନ୍ଚାକେରା। 14ଏନ୍ଦେର୍ଗେକା ଯଦି ଏନ୍ ଆସ୍କି ଚାହାନୁ ନିହ୍ମା ବାରେନୁ ବଡ଼୍ପଣି ଏଦ୍ର୍କାନ୍ ତା, ମାଲ୍ଲା ଲାଜରୁନ୍, ଲେକିନ୍ ଏସ୍କେ ନିହ୍ମାସାନ୍ ଜାମା କାତ୍ଥା ତେଙ୍କାଚ୍କାମ୍, ଆନ୍ନେନିନ୍ ଏହ୍ମା ନାମେ କାମ୍ନା ତିତୁସ୍କି ଆଘ୍ଲିହି ସତ୍ତୁ ଉର୍ଖାକେରା। 15ଆସ୍ ଯେତ୍କବାକେନ୍ ଇବନ୍ ମନେ କାମ୍ଦାସ୍ କା ନିମ୍ ଜାମାର୍ ଏସ୍କେ ଆସ୍କି ଆଦେଶ୍ବନ୍ ମାନ୍ଚ୍କାର୍ ଆରୁ ଏଲ୍ଚ୍କାତି ଥାର୍ଥାର୍ରିକିରି ନିମ୍ ଏସ୍କେ ଆସିନ୍ ନିଜର୍ କାମ୍ଚ୍କାର୍ ତା ନିହ୍ମା ଲାଗାନ୍ ତିତୁସ୍କି ବାନେ ହାଖ୍ଖନା ଆରୁହି ବାଢ଼୍ରି କାଇଦ୍। 16ଏନ୍ ବହୁତ୍ ଖୁସୀ ରାଦାନ୍ ଏନ୍ଦେର୍ଗେକା ଏଙ୍ଗାଗେ ଜାମା କାତ୍ଥାନୁ ନିହ୍ମା ମିଆଁ ପୁରା ଭାର୍ଷା ରାଇ।
8ନାହ୍ମାଏ ଦାନ୍
1ହେ ଭାଇ ବୁହୁଣୀଜାମାରୋ, ପାର୍ମେଶ୍ୱାର୍ସ୍ ଏକା କ୍ରିପାବନ୍ ମାକିଦୁନିଆଁଘି ମଣ୍ଡ୍ଲୀଗେ ଚିଚ୍କାଚାସ୍, ଆ କ୍ରିପାଘି ସାମାଚାର୍ବନ୍ ଏମ୍ ଚିୟାଲ୍ଦାମ୍। 2ଆବ୍ଡ଼ା ଆଲାର୍ ବହୁତ୍ ଦୁଃଖୁ ତକ୍ଲିପ୍ନୁ ରାଚାର୍ ହାଲେହି ଆବ୍ଡ଼ାର୍ ବହୁତ୍ ଖୁସୀନୁ ରାଚାର୍ ଆରୁ ବହୁତ୍ ଗରୀବ୍ ରାତେହି ଦୁସ୍ରା ଆଲାରିନ୍ହି ଢେର୍ବାଗ୍ଗେ ମଦେତ୍ କାମ୍ଚାର୍। 3ଏନ୍ ସାବୁତ୍ ଚିଦାନ୍ କା ଆବ୍ଡ଼ାର୍ ଯେତ୍କ ଚିଆ ଅଙ୍ଗିୟାର୍ ହତ୍କ ଚିଚ୍ଚଚାର୍। ଏତ୍କ ଖାଲି ମାଲ୍ଲା ବରନ୍ ନିଜର୍ ଶକ୍ତିତିହି ବାଗ୍ଗେ ମନ୍ ଭରିକିରି ଚିଚ୍ଚଚାର୍ ଆରୁ ନିଜେହି ତାଙ୍ଘା ତାର୍ତି ଆରୁହି ଚିଚ୍ଚଚାର୍। 4ଆରୁ ଇ ଚାନ୍ଦା ପାଏସା ଚିନାନୁ ଆରୁ ପାବିତାର୍ ଆଲାର୍ଘି ସେବାନୁ ଭାଗିଦାର୍ ମାନାଗେ କ୍ରିପାଘି ବାରେନୁ, ଏହ୍ମାସ୍ତି ବହୁତ୍ ବିନ୍ତି କାମ୍ଚାର୍। 5ଆବ୍ଡ଼ାର୍ ନିଜର୍ ଦାୟାଭାବ୍ନୁ ଏହ୍ମା ଆଶ୍ରାସ୍ତିହି ଢେର୍ବାଗ୍ଗେ ଆଘ୍ଲି ବାଢ଼୍ରାର୍ କେରାର୍। ଆବ୍ଡ଼ାର୍ ପହ୍ଲେ ପାର୍ମେଶ୍ୱାର୍ସ୍ଘି ଲାଗାନ୍ ଆରୁ ଆନ୍ତିନ୍ ପାର୍ମେଶ୍ୱାର୍ସ୍କି ଇଚ୍ଛା ଲେଖା ଏହ୍ମା ଲାଗାନ୍ ନିଜ୍କେ ନିଜ୍ରିନ୍ ସୋଁପ୍ଚାର୍। 6ହୁଦ୍ଘିଲାଗାନ୍ ଏମ୍ ତିତୁସ୍ସ୍ତି ବିନ୍ତି କାମ୍ଚ୍କାମ୍, କା ଏସ୍କେ ଆସ୍ ନିଜର୍ ନାଲ୍ଖୁବନ୍ ସୁରୁ କାମ୍ଚ୍କାଦାସ୍ ଆନ୍ନେନିନ୍ ଇ ଦାୟାଘି ନାଲ୍ଖୁବନ୍ ଆସ୍ ନିହ୍ମା ଲାଗାନ୍ ପୁରା କାମ୍ନାସ୍। 7ହୁଦ୍ଘିଲାଗାନ୍ ଏସ୍କେ ନିମ୍ ଜାମା କାତ୍ଥାନୁ ମତ୍ଲବ୍ ବିଶ୍ୱାସ୍ତି, ବଚନ୍, ବୁଦ୍ଧି, ଜାମା ଲେଖାଘି କୋଶିଷ୍ ଆରୁ ଆ ବାନେ ହାଖ୍ଖନାନୁ ଏକାନ୍ ଏହ୍ମାସ୍ତି ଉଇଦାର୍, ବାଢ଼୍ର୍ତେ କାଦାର୍, ଆନ୍ନେନିନ୍ ଇ ଦାନ୍ଘି ନାଲ୍ଖୁନୁହି ବାଢ଼୍ର୍ତେ କାଲା। 8ଇବନ୍ ଏନ୍ ଆଦେଶ୍ଘି ରୂପ୍ନୁ ମାଲ୍ଲା ତେଙ୍ଗୁନ୍, ଲେକିନ୍ ଦୁସ୍ରା ଆଲାର୍ଘି ଇଚ୍ଛାତି ନିହ୍ମାଏ ବାନେ ହାଖ୍ଖନାଘି ସତ୍ତୁବନ୍ ଯାଞ୍ଚ କାମାଗେ ତେଙ୍ଗ୍ଦାନ୍। 9ନିମ୍ ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍ସ୍କି କ୍ରିପାବନ୍ ଆହ୍ଦାର୍ କା ଆସ୍ ଧାନ୍ନୁ ରାତେହି ନିହ୍ମା ଲାଗାନ୍ ଗରୀବ୍ ମାନ୍ଚାସ୍କେରାସ୍, ତାକା ଆସ୍କି ଗରୀବ୍ ମାନ୍ନାତି ନିମ୍ ଧାନ୍ନୁବାଲା ମାନାକାଲା। 10ଏନ୍ ଇ ସମ୍ବନ୍ଧ୍ନୁ ଅଣ୍ଟା ଉପାୟ ଚିଦାନ୍। ନିମ୍ କେରାବଛର୍ ଏକା ନାଲ୍ଖୁନ୍ ସୁରୁ କାମ୍ଚ୍କାର୍ ଆରୁ ଏକାଘି ଯୋଜ୍ନାନ୍ ନିଜେ କାମ୍ଚ୍କାର୍, ଆକ୍କୁନ୍ ଆବନ୍ ପୁରା କାମ୍ନାନୁନିନ୍ ନିହ୍ମାଏ ଭାଲାଇ ରାଇଦ୍। 11ନିମ୍ ଏକା ଇଚ୍ଛାତି ଆବନ୍ ସୁରୁ କାମ୍ଚ୍କାଚ୍କାର୍, ଆ ଇଚ୍ଛାତିନିନ୍ ଆବନ୍ ପୁରା କାମର୍ ଆରୁ ନିଜର୍ ପାୟାଘି ଅନୁସାର୍ ଚାନ୍ଦା ଚିଆ। 12ଏନ୍ଦେର୍ଗେକା ଚାନ୍ଦା ଚିନାଘି ପାୟା ରାଇ ତା ଆଲାର୍ସାନ୍ ଏନ୍ଦ୍ରିନ୍ଭି ରାଇ, ଆଦ୍ଘି ଲେଖା ଆସ୍କି ଦାନ୍ ଗ୍ରହନ୍ କାମ୍ନାଘି ଲାଇଗ୍ ମାନ୍ଦାସ୍, ନା ତା ଆଦ୍ଘି ଲେଖା ଏକାଦ୍ ଆସ୍କିସାନ୍ ମାଲ୍ଲାଦିନ୍। 13ଏମ୍ ଇ ମା ଚାହଁଦାମ୍ କା ଦୁସ୍ରାର୍ଗେ ତା ସୁଃଖୁ ହାଖ୍ଖର, ଆରୁ ନିମାଗେ କଷଟ୍ ହାଖ୍ଖର, ବରନ୍ ଏମ୍ତା ବାରାବୁରି ଚାହଁଦାମ୍। 14ଲେକିନ୍ ବାରାବୁରିଘି ବିଚାର୍ତି ଇ ସାମାୟନୁ ନିହ୍ମାଏ ବାଗ୍ଗେ ରାନାଦ୍ ଆବ୍ଡ଼ାର୍ଘି ଘାଟିନୁ ଦାର୍କାର୍ ମାନଦ୍ ତାକା ଆବ୍ଡ଼ାର୍ଘି ବାଗ୍ଗେ ରାନାଦ୍ହି ନିହ୍ମାଏ କମ୍ ରାନାଗେ ଦାର୍କାର୍ନୁ ବାରଦ୍ ଆରୁ ବାରାବୁରି ମାନଦ୍କଦ୍। 15ଏସ୍କେ ଇଦ୍ ଲେଖାକେର୍କିଚା, “ଏକାସ୍ ବାଗ୍ଗେ ଠୁଡ଼ିୟାଚ୍କାଚାସ୍ ଆସ୍କି ବାଗ୍ଗେ ମା ମାନ୍ଚା। ଆରୁ ଏକାସ୍ ଥୋଡ଼େ ଠୁଡ଼ିୟାଚାସ୍ ଆସ୍ସାନ୍ ଥୋଡ଼େ ମା ମାନ୍ଚା।”
ତିତୁସ୍ସିନ୍ ସେବା ନାଲ୍ଖୁଘି ଲାଗାନ୍ କୁରିନ୍ଥୀ ସହର୍ଗେ ତାୟାଲ୍ଦାମ୍
16ଲେକିନ୍ ପାର୍ମେଶ୍ୱାର୍ସ୍କି ଧାନ୍ୟାବାଦ୍ ମାନ୍ନାଦ୍, ଆସ୍ ନିହ୍ମା ଲାଗାନ୍ ତିତୁସ୍କି ଜିଆନୁ ଆନ୍ନେନ୍ ଇଚ୍ଛା ସିର୍ଜାଚ୍କାଦାସ୍। 17ତିତୁସ୍ ଏହ୍ମା ଆର୍ଜୀବନ୍ ଗ୍ରହନ୍ କାମ୍ଚାସ୍ ଆବଦ୍ ଖାଲି ମାଲ୍ଲା ଲେକିନ୍ ଆସ୍ ନିଜେ ଖୁସୀ ମାନିକିରି ନିହ୍ମାସାନ୍ ବାରାଗେ ବିଦା ମାନାଲ୍ଦାସ୍। 18ଆରୁ ଏମ୍ ଆସ୍ଗାନେ ଆ ଭାଇସିନ୍ ତାଇୟାଲ୍ଦାମ୍, ଏକା ସୁସାମାଚାର୍ ପ୍ରଚାର୍ଘି କାରଣ୍ ଜାମା ମଣ୍ତ୍ଲୀଗୁଠିନୁ ମାଇନ୍ ହାଖ୍ଖୁସ୍। 19ଆରୁ ଏତ୍କ ଖାଲି ମାଲ୍ଲା, ପ୍ରାଭୁସ୍କି ମାହିମାଘି ଲାଗାନ୍ ଆରୁ ନିଜର୍ ଦାୟାଭାବ୍ବନ୍ ଏଦାଗେ ଲାଗାନ୍ ଏମ୍ ଏକ୍ ଦୁସ୍ରାର୍ଘି ସେବା ନାଲ୍ଖୁ କାମ୍ଦାମ୍, ଆଦ୍ଘି ଲାଗାନ୍ ମଣ୍ତ୍ଲୀଦ୍ ଆସିନ୍ ନାହ୍ମାଏ ମଦେତ୍ କାମ୍ନାଘି ସାଙ୍ଗେ ଚାଜ୍ଜିୟା। 20ଏମ୍ ଇ କାତ୍ଥାନୁ ହୁସିୟାର୍ ରାଦାମ୍କା ଇ ଦାନ୍ ଚିନା ନାଲ୍ଖୁଘି ବାରେନୁ ଏକାଘି ସେବା ଏମ୍ କାମ୍ଦାମ୍, ନେରିନ୍ ଏହ୍ମା ମିଆଁ ଦୋଷ୍ ଲାଗାବା ପଲ୍ଲର୍। 21ଏନ୍ଦେର୍ଗେକା ନା ଏମ୍ ଖାଲି ପ୍ରାଭୁସ୍କି ନଜର୍ନୁ, ବରନ୍ ଆଲାର୍ଘି ନଜର୍ନୁହି ବାନେ ଚାଲିଚଲନ୍ କାମାଗେ ଧ୍ୟାନ୍ ଉଇଦାମ୍। 22ଇ ଦୁହି ଲୋକ୍ ଗାନେ ଏମ୍ ଆରୁ ନିଜର୍ ଆରୁ ଅଣ୍ଟା ଭାଇସିନ୍ ତାଇୟାଲ୍ଦାମ୍। ଏମ୍ ଧିୟାନ୍-ଧିୟାନ୍ ଢେର୍ କାତ୍ଥାନୁ ଆସିନ୍ ଯାଁଚରାଚ୍କାମ୍ ଆସ୍ ସତ୍ତୁ ଉର୍ଖିୟାସ୍। ଇ ନାଲ୍ଖୁଘି ଲାଗାନ୍ ଆସ୍କି ଇଚ୍ଛା ଆରୁହି ବାଢ଼୍ରା କେରା, ଏନ୍ଦେର୍ଗେକା ଆସ୍କେ ନିହ୍ମା ଜାମାର୍ଘି ମିଆଁ ପୁରା ବିଶ୍ୱାସ୍ ରାଇଦ୍। 23ଯଦି ନେଦିନ୍ ତିତୁସ୍କି ବାରେନୁ ମେନ୍ଚାର୍ ତା ଆସ୍ ଏଙ୍ଘାଏ ସାଙ୍ଗେସ୍ ଆରୁ ନିହ୍ମା ଲାଗାନ୍ ଏଙ୍ଘାଏ ମଦେତ୍ କାମ୍ନାଘି ସାଙ୍ଗେସ୍। ଆରୁ ଯଦି ଏହ୍ମା ଭାଇର୍ଘି ବାରେନୁ ମେନର୍ ତା ଆବ୍ଡ଼ାର୍ ମଣ୍ତ୍ଲୀର୍ଘି ତାଏକା ଆରୁ ଖ୍ରୀସ୍ତ୍ସିନ୍ ଆଦର୍ ଚିନାବାଲାର୍। 24ହାଲେ ନିଜର୍ ବାନେ ହାଖ୍ଖନାବନ୍ ଆବ୍ଡ଼ାରିନ୍ ଏଦା, ଆରୁ ଜାମା ମଣ୍ତ୍ଲୀର୍ସାନ୍ ପ୍ରମାଣ୍ କାମା କା ଏହ୍ମାଏ ବଡ଼୍ପଣି ନିହ୍ମା ବାରେନୁ ଠିକ୍ ବୁଲି ଆବ୍ଡ଼ାରିନ୍ ଏଦା।
9ଖ୍ରୀସ୍ତ୍ ବିଶ୍ୱାସୀର୍ଘି ଲାଗାନ୍ ମଦେତ୍
1ଆକ୍କୁନ୍ ଆ ସେବାଘି ବାରେନୁ ଏକା ବିଶ୍ୱାସୀ ଆଲାର୍ଘି ଲାଗାନ୍ କାମାକାଇ ଆ ସେବାଘି ବାରେନୁ ଏଙ୍ଗା ନିମାଗେ ଲେଖ୍ନା ଜରୁରୀ ମାଲ୍ଲାଦିନ୍। 2ଏନ୍ଦେର୍ଗେକା ଏନ୍ ନିହ୍ମା ମନ୍ତା ମଦେତ୍ କାମ୍ନାଘି ଇଚ୍ଛାବନ୍ ଆହ୍ଦାନ୍, ଏକାଘି ଲାଗାନ୍ ଏନ୍ ନିହ୍ମା ବାରେନୁ ମାକିଦୁନିଆଁନ୍ତା ବିଶ୍ୱାସୀର୍ଘି ଆଘ୍ଲି ବଡ଼୍ପଣି ଏଦ୍ର୍ଦାନ୍, କା ଆଖାୟା ଏରିଆନୁ ରାନାବାଲା ଆଲାର୍ ଏକ୍ ବଛର୍ତି ତିୟାର୍ ମାନ୍ଚ୍କାନାଏ। ଆରୁ ନିହ୍ମା ଇଚ୍ଛାତି ଆରୁ ଢେର୍ ଆଲାର୍ଗେ ଜୋଶ୍ ହାଖ୍ଖର୍କିଚି। 3ଲେକିନ୍ ଏନ୍ ଇ ଭାଇଜାମାରିନ୍ ଇଦ୍ଘିଲାଗାନ୍ ତାୟାଲ୍ଦାନ୍ କା ଏମ୍ ନିହ୍ମା ମିଆଁ ଏକା ବଡ଼୍ପଣି ଏଦ୍ର୍ଦାମ୍, ଆଦ୍ ବେକାର୍ ମା ମାନ୍ନାଦ୍। ଏନ୍ ଚାହଁଦାନ୍ କା ନିମ୍ ତିୟାର୍ ରାଦାର୍, ଏସ୍କେ କା ଏନ୍ ତେଙ୍ଗ୍ତେ ବାରାଲ୍ଦାନ୍। 4ଏକାସାନ୍ ଏନ୍ନେ ମା ମାନ୍ନାଦ୍ କା କେତ୍କ ମାକିଦୁନିଆଁ ପ୍ରଦେଶ୍ତା ବିଶ୍ୱାସୀ ଆଲାର୍ ଏଙ୍ଘାଗାନେ ବାରିକିରି ଇବନ୍ ଏରର୍ କା ନିମ୍ ଦାନ୍ ଚିୟାଗେ ତିୟାର୍ ମାଲ୍କାରିନ୍ ଆରୁ ଏମାଗେ ଆରୁ ନିମାଗେହି ଲାଜ୍ରା ଖାତ୍ରୋ, ଯେତ୍କତକ୍ କା ଏମ୍ ଇଦ୍ଘି ବାରେନୁ ନିହ୍ମା ମିଆଁ ଏତ୍କ ଭାର୍ଷା ଏଦ୍ର୍କାଦାମ୍। 5ହୁଦ୍ଘିଲାଗାନ୍ ଏନ୍ ଭାଇ ଜାମାର୍ସ୍ତି ଇବନ୍ ତେଙ୍ଗ୍ନାନ୍ ଜରୁରୀ ବୁଝ୍ର୍କାନ୍ କା ଆବ୍ଡ଼ାର୍ ଏହ୍ମାସ୍ତିହି ପହ୍ଲେହି ନିହ୍ମା ଚାହାନୁ କର୍। ଆରୁ ଏକା ଦାନ୍ବନ୍ ନିମ୍ ଚିନାଘି କାତ୍ଥାନ୍ ପହ୍ଲେ ଚିଆ ମୁଞ୍ଜକାଦାର୍ ଆବନ୍ ପହ୍ଲେନ୍ତିନିନ୍ ନିଜର୍ ଇଚ୍ଛାତି ତିୟାର୍ ଉଇୟା। ହୁଦ୍ଘିଲାଗାନ୍ ଦାୟାତି ଇ ଦାନ୍ବନ୍ ନିଜର୍ ଇଚ୍ଛାତି ତିୟାର୍ ଉଇୟାକଦ୍ ନା ତା ଯବର୍ଜସ୍ତିଘି ସାଙ୍ଗେ ନିହ୍ମାସ୍ତି ଲୁଟ୍କା ଏନ୍ଦ୍ରିନ୍ ଜିନିଷ୍ ଲେଖା।
ଦାନ୍ ଏସ୍କେ ଚମ୍
6ଇବନ୍ ମନେ ଉଇୟା କା, ଏକାର୍ ଥୋଡ଼େ ଚାହ୍ନାଏ, ଆବ୍ଡ଼ାର୍ ଥୋଡ଼େ ହୟନାଏ, ଆରୁ ଏକାର୍ ବାଗ୍ଗେ ଚାହ୍ନାଏ, ଆବ୍ଡ଼ାର୍ ବାଗ୍ଗେ ହୟନାଏ। 7ଅର୍ତୁ-ଅର୍ତୁ ଆଲାର୍ ନିଜର୍ ମନ୍ନୁ ସୋଚ୍କାନାଏ, ଆନ୍ନେନିନ୍ ଦାନ୍ ଚିଅର୍; ନା ତା କୁଡ଼୍କୁଡ଼୍ରିକିରି ଆରୁ ଜବର୍ଜସ୍ତିତି ମାଲ୍ଲା, ଏନ୍ଦେର୍ଗେକା ପାର୍ମେଶ୍ୱାର୍ସ୍ ଖୁସୀତି ଦାନ୍ ଚିନାବାଲାରିନ୍ ବାନେ ହାଖ୍ଖଦାସ୍। 8ପାର୍ମେଶ୍ୱାର୍ସ୍ ଜାମା ଲେଖାଘି କ୍ରିପା ନିମାଗେ ଭାର୍ପୁର୍ ଚିଆ ଅଙ୍ଗସ୍। ଏକାତି କା ଜାମା ସାମାୟନୁ, ଜାମାକିଛିନ୍, ଏକାଦ୍ କା ନିମାଗେ ଦାର୍କାର୍ ରାଇଦ୍, ଆଦ୍ ନିହ୍ମାସାନ୍ ରଦ୍; ଆରୁ ଜାମା ଅଣ୍ଟା ବାନେ ନାଲ୍ଖୁଘି ଲାଗାନ୍ ନିହ୍ମାସାନ୍ ଢେର୍ବାଗ୍ଗେ ରଦ୍। 9ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ କା ଆସ୍ ଖୁଲାମନ୍ତି ଗରୀବ୍ ଆଲାର୍ଗେ ଦାନ୍ ଚିଚ୍କାଦାସ୍, ଆସ୍କି ବାନେ ନାଲ୍ଖୁବନ୍ ପାର୍ମେଶ୍ୱାର୍ସ୍ ଏକ୍ଲାହି ମା ମଦ୍ରସ୍। 10ଏକା ପାର୍ମେଶ୍ୱାର୍ସ୍ ଚାହୁର୍ଗେ ବିହ୍ନି ଆରୁ ଅନୁର୍ଗେ ଅନାଗେ ଚିଦାସ୍, ଆ ପାର୍ମେଶ୍ୱାର୍ସ୍ ନିମାଗେ ଚାହାଗେ ବିହିନି ଚୋସ୍, ଆବନ୍ ପାର୍ତସ୍ ଆରୁ ନିହ୍ମାଏ ଦାୟାଘି ବାନେ ଫସଲ୍ବନ୍ ଚୋସ୍। 11ହଁ ନିମ୍ ଜାମା ଲେଖା ଧାନ୍ନୁତି ଭାର୍ପୁର୍ ମାନର୍ ଆନ୍ତିନ୍ ଜାମାବାକେନ୍ ଦାୟାଲୁ ମାନର୍, ଆରୁ ଯେତ୍କବାକେନ୍ ଏମ୍ ନିହ୍ମାଏ ଦାନ୍ ଅଚ୍ଚକା ରାଦାମ୍ ଆରୁ ଏକାର୍ଗେ ଦାର୍କାର୍ ମାନ୍ଚ୍କି ରାଇ, ଆବ୍ଡ଼ାର୍ ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିନାଏ। 12ଏନ୍ଦେର୍ଗେକା ଇ ସେବା ନାଲ୍ଖୁନ୍ ପୁରା କାମ୍ନାତି ନା ତା ପାବିତାର୍ ଆଲାର୍ଘି ଦାର୍କାର୍ଦ୍ ପୁରା ମାନିଦ୍, ଲେକିନ୍ ଆଲାର୍ଘି ତାର୍ତି ପାର୍ମେଶ୍ୱାର୍ସ୍କିହି ବାଗ୍ଗେ ଧାନ୍ୟାବାଦ୍ ମାନିଦ୍। 13ନିହ୍ମାଏ ଇ ସେବା ନାଲ୍ଖୁନ୍ ଏରିକିରି ଆବ୍ଡ଼ାର୍ ପାର୍ମେଶ୍ୱାର୍ସ୍କି ମାହିମା କାମର୍, ଏନ୍ଦେର୍ଗେକା ନିମ୍ ଖ୍ରୀସ୍ତ୍ସ୍କି ସୁସାମାଚାର୍ଘି ଲେଖା ଚାଲ୍ର୍ଦାର୍ ଆରୁ ଆବ୍ଡ଼ାର୍ଘି ଚାହେ ଜାମାର୍ଘି ଲାଗାନ୍ ମନ୍ ଖୁଲା ରାଇଦ୍। 14ଆବ୍ଡ଼ାର୍ ଆହ୍ନାଏ କା ପାର୍ମେଶ୍ୱାର୍ସ୍ ନିହ୍ମା ମିଆଁ କେତ୍କ କ୍ରିପା କାମ୍ଚ୍କାଦାସ୍, ହୁଦ୍ଘିଲାଗାନ୍ ଆବ୍ଡ଼ାର୍ ନିମାନ୍ ବାନେ ହାଖ୍ଖନାଏ ଆରୁ ନିହ୍ମା ଲାଗାନ୍ ପାର୍ମେଶ୍ୱାର୍ସାନ୍ ବିନ୍ତି କାମର୍। 15ଏକା ବାର୍ଦାନ୍ବନ୍ ତେଙ୍ଗା ମା କାଇ, ଆ ବାର୍ଦାନ୍ଘି ଲାଗାନ୍ ପାର୍ମେଶ୍ୱାର୍ସିନ୍ ଧାନ୍ୟାବାଦ୍।
10ପାଉଲୁସ୍ ନିଜର୍ ସେବା ନାଲ୍ଖୁଘି ବାରେନୁ ତେଙ୍ଗ୍ଦାସ୍
1ଏନ୍ ପାଉଲୁସ୍ ଖ୍ରୀସ୍ତ୍ସ୍କି ନରମ୍ଭାବ୍ ଆରୁ ଦାୟାଘି ନାମେନୁ ନିହ୍ମାସ୍ତି ଇ ବିନ୍ତି କାମାଲ୍ଦାନ୍। କେତ୍କ ଆଲାର୍ ତେଙ୍ଗ୍ନାଏ କା ଏନ୍ ନିହ୍ମା ଆଘ୍ଲି ଗରୀବ୍ ରାଦାନ୍, ଲେକିନ୍ ଗେଚ୍ଛାନୁ ରାଚ୍କୁନ୍ ମା ଏଲ୍ଚ୍ଦାନ୍। 2ଆକ୍କୁନ୍ ଏଙ୍ଘାଏ ନିହ୍ମାସ୍ତି ବିନ୍ତି ରାଇ କା ଯେତ୍କବାକେନ୍ ଏନ୍ ନିହ୍ମା ମାଝାନୁ ରନ୍ତା ଆ ବିଶ୍ୱାସ୍ଗାନେ ଆନ୍ନେନ୍ ମା ଏଲ୍ଚ୍ନା ଲେଖା ଏଦ୍ରାଗେ ଏଙ୍ଘା ମିଆଁ ଯବର୍ଜସ୍ତି ଆମ୍କେ କାମା, ଏସ୍କେ କା ଏଙ୍ଘା ସୋଚ୍ନୁ ଏଙ୍ଗାଗେ ଏନ୍ଦ୍ରିନ୍ ଆ ଆଲାର୍ଘି ବିରୁଦ୍ଧ୍ ଏଦା ଖାତ୍ରଦ୍ ଏକାର୍ ସୋଚ୍ନାଏ କା, ଏମ୍ ଅଣ୍ଟା ଦୁନିଆଁନ୍ତା ଜୀବନ୍ ବିତାବାଦାମ୍। 3ଏନ୍ଦେର୍ଗେକା ଯଦିଭି ନାମ୍ହି ଇ ଦୁନିଆଁନୁହି ରାଦାତ୍ ଲେକିନ୍ ନାମ୍ ଦୁନିଆଁନ୍ତା ଆଲାର୍ଘି ଲେଖା ମା ଲାଡ଼୍ଦାତ୍। 4-5ଏହ୍ମାଏ ଆତ୍ମିକ୍ ଲାଡ଼ାଇଘି ହାଥିଆର୍ଦ୍ ଦୁନିଆଁନ୍ତା ମାଲ୍ଲିଦ୍, ବରନ୍ ଆନ୍ନୁ ପାର୍ମେଶ୍ୱାର୍ସ୍କି ଶକ୍ତି ରାଇଦ୍, ଏକାତି କା ଜାମା ଦୁଶ୍ମାନ୍ ଜାମାର୍ଘି ଶକ୍ତିବନ୍ ନାଶ୍ କାମ୍ନାଘି ଲାଗାନ୍, ଏମ୍ ଖାରାପ୍ କାଁଟ୍ଛାଁଟ୍ବନ୍ ଆରୁ ବଡ଼୍ପଣିତି କାଚ୍ନେଖ୍ର୍କା ଆ ଜାମା କାତ୍ଥାନ୍ ଖାଣ୍ତ୍ଦାମ୍, ଏକାଦ୍ ପାର୍ମେଶ୍ୱାର୍ସିନ୍ ଗ୍ରହନ୍ କାମ୍ନାନୁ ରୋକ୍ଟୋକ୍ କାମିଦ୍। ଏମ୍ ଜାମା ବୁଦ୍ଧିମାନ୍ ଆଲାରିନ୍ ଖ୍ରୀସ୍ତ୍ସ୍କି ଅଧିନ୍ବନ୍ ଗ୍ରହନ୍ କାମାଗେ ଯବର୍ଜସ୍ତି କାମ୍ଦାମ୍। 6ଯେତ୍କବାକେନ୍ ନିମ୍ ନିଜେ ଯୀଶୁ ଖ୍ରୀସ୍ତ୍କି କାତ୍ଥାବନ୍ ମାନର୍ ତା ଏମ୍ ବାରିକିରି ନେରିନ୍ ଯୀଶୁ ଖ୍ରୀସ୍ତ୍କି କାତ୍ଥାବନ୍ ମା ମାନାଲ୍ନାଏ ଆବ୍ଡ଼ାରିନ୍ ଦଣ୍ଡ୍ ଚିୟାଗେ ତିୟାର୍ ରାଦାମ୍। 7ନିମ୍ ଆବ୍ଡ଼ା କାତ୍ଥାବନ୍ ଏରା, ଏକାଦ୍ ହାନ୍ନୁଘି ଚାହାନୁ ରାଇଦ୍। ଯଦି ନେକ୍ରିନ୍ଗେ ନିଜର୍ ମିଆଁ ଇ ଭାର୍ଷା ରାଇ କା ଏନ୍ ଖ୍ରୀସ୍ତ୍କିନ୍ ତା, ଆସ୍ ଇବନ୍ହି ଆହ୍ନାସ୍ କା, ଏସ୍କେ ଆସ୍ ଖ୍ରୀସ୍ତ୍ସ୍କି ରାଦାସ୍, ଆନ୍ନେନିନ୍ ଏମ୍ହି ରାଦାମ୍। 8ଆରୁ ଯଦି ଏନ୍ ନିଜର୍ ଆ ହକ୍ଘି ବାରେନୁ ଆରୁହି ବଡ଼୍ପଣି ଏଦ୍ରନ୍ ତା, ଏକାନ୍ ପ୍ରାଭୁସ୍ ନିହ୍ମାଏ ନାଶ୍ଘି ଲାଗାନ୍ ମାଲ୍ଲା ବରନ୍ ଆତ୍ମିକ୍ ଜୀବନ୍ ତିୟାର୍ କାମ୍ନାଘି ଲାଗାନ୍ ଏମାଗେ ଚିଚ୍ଚକାଦାସ୍ ତା ଇଦ୍ଘିଲାଗାନ୍ ଏନ୍ ମା ଲାଜ୍ର୍ଦାନ୍। 9ଏନ୍ ନିଜର୍ ମିଆଁ କାବୁ ଉୟନ୍ କା ନିଜର୍ ଚିଠିଘି ଦ୍ୱାର୍ନୁ ନିମାନ୍ ଏଲ୍ଗ୍ତାନା ବାଲାର୍ଘି ଲେଖା ମା ଏରନ୍। 10କେତ୍କ ଆଲାର୍ଘି ତେଙ୍ଗ୍ନାଦ୍ ପାଉଲୁସ୍କି ଚିଠିଦ୍ କଠିନ୍ ଆରୁ ତାକତ୍ବାଲା ରାଇଦ୍, ଲେକିନ୍ ଯେତ୍କବାକେନ୍ ଆସ୍ ନିଜେ ବାର୍ଦାସ୍, ତା ଆସ୍କି ଶରୀର୍ କମ୍ଜୋର୍ ଲାଗ୍ଗଦ୍, ଆରୁ ଆସ୍କି ତେଙ୍ଗ୍ନାଦ୍ ଏନ୍ଦେର୍ହି ମତ୍ଲବ୍ ମାଲ୍ଲାଦିନ୍। 11ଲେକିନ୍ ଏନ୍ନେ ତେଙ୍ଗ୍ନାବାଲା ଆଲାସ୍କେ ବୁଝୁର୍ନାକାନା କାତ୍ଥାଦ୍ କା ନିହ୍ମା ମାଝାନୁ ମା ରାଇକିରିହି ଯେତ୍କବାକେନ୍ ଏମ୍ ନିଜର୍ ଚିଠିନୁ ଏନ୍ଦ୍ରିନ୍ ଲେଖ୍ଦାମ୍ ତା ଆନ୍ନୁ ଆରୁ ନିହ୍ମା ମାଝାନୁ ରାଇକିରି ଏମ୍ ଏକା ନାଲ୍ଖୁନ୍ କାମ୍ଦାମ୍, ଆନ୍ନୁ ଏନ୍ଦେର୍ହି ଫରକ୍ ମାଲ୍ଲାଦିନ୍।
12ଏମ୍ ଆ କେତ୍କ ଆଲାର୍ ଗାନେ ନିଜର୍ ଗନ୍ତି ଆରୁ ତୁଲ୍ନା କାମ୍ନାଘି ସାହସ୍ ମା କାମ୍ଦାମ୍ ଏକାର୍ ନିଜ୍କେନିଜ୍ବନ୍ ମାହାନ୍ ସୋଚ୍ନାଏ। ଲେକିନ୍ ଯେତ୍କବାକେନ୍ ଆବ୍ଡ଼ାର୍ ନିଜ୍କେନିଜ୍ବନ୍ ଏକ୍ ଦୁସ୍ରାର୍ଗାନେ ନାପ୍ର୍ନାଏ ଆରୁ ଏକ୍ ଦୁସ୍ରାର୍ଗାନେ ନିଜର୍ ତୁଲ୍ନା କାମ୍ନାଏ ତା ଆବ୍ଡ଼ାର୍ ଇବନ୍ ଏଦ୍ର୍ନାଏ, ଆବ୍ଡ଼ାର୍ ବାଲ୍ଲନାଇନ୍ କା ଆବ୍ଡ଼ାର୍ କେତ୍କ ମୁରୁଖ୍ ରାନାଏ। 13ଏମ୍ତା ସୀମାଘି ବାହ୍ରି ବିଲ୍କୁଲ୍ ବଡ଼୍ପଣି ମା ଏଦ୍ର୍ଦାମ୍, ଲେକିନ୍ ଆ ସୀମାତକ୍ ଏକାନ୍ ପାର୍ମେଶ୍ୱାର୍ସ୍ ଏମାଗେ ଠାହ୍ରାଚ୍କାଦାସ୍। ଆରୁ ଆନ୍ନୁନ୍ ନିମ୍ହି ବାର୍ଚ୍କାର୍ କେର୍କାଦାର୍, ଆରୁ ଆଦ୍ଘି ଲେଖା ବଡ଼୍ପଣି ଏଦ୍ରତ୍। 14ଏନ୍ଦେର୍ଗେକା ଏମ୍ ନିଜର୍ ସୀମାସ୍ତି ବାହ୍ରି ନିଜ୍କେନିଜ୍ବନ୍ ବାଢ଼ାବା ମା ଚାହଁଦାମ୍ ଏସ୍କେ କା ନିହ୍ମାଏତକ୍ ମା ଆଣ୍ସ୍ନାଘି ଦାଶାନୁ ରମ୍, ବରନ୍ ଖ୍ରୀସ୍ତ୍ସ୍କି ସୁସାମାଚାର୍ବନ୍ ମେନ୍ତିକିରି ନିହ୍ମାସାନ୍ ଆଣ୍ସ୍କାମ୍ କେର୍କାଦାମ୍। 15ଏମ୍ ସୀମାସ୍ତି ବାହ୍ରି ନାନ୍ନାର୍ଘି ସୁସାମାଚାର୍ଘି ସେବା ନାଲ୍ଖୁତି ବଡ଼୍ପଣି ମା ଏଦ୍ର୍ଦାମ୍; ଲେକିନ୍ ଏମାଗେ ଆଶ୍ରା ରାଇ କା ଏସ୍କେ-ଏସ୍କେ ନିହ୍ମାଏ ବିଶ୍ୱାସ୍ ବାଢ଼୍ର୍ତେକଦ୍ ଆନ୍ନେନ୍-ଆନ୍ନେନ୍ ଏମ୍ହି ନିଜର୍ ସୀମାଘି ଲେଖା ନିହ୍ମା ଚାଲ୍ତେ ଆରୁହି ବାଢ଼୍ର୍ତେ କମ୍। 16ତାକା ଏମ୍ ନିହ୍ମା ସୀମାଘି ଆଘ୍ଲି କାଇକିରି ସୁସାମାଚାର୍ ମେନ୍ତମ୍, ଆରୁ ଇଦ୍ ମାଲ୍ଲା କା ଏମ୍ ଦୁସ୍ରାର୍ଘି ସୀମାଘି ଉଲା ମାନ୍ଚ୍କା ସେବା ନାଲ୍ଖୁଘି ମିଆଁ ବଡ଼୍ପଣି ଏଦ୍ରମ୍। 17ଏସ୍କେ କା ପାବିତାର୍ ଶାସ୍ତ୍ରନୁ ତେଙ୍ଗିଦ୍: ଏକାସ୍ଗେ ବଡ଼୍ପଣି ଏଦ୍ର୍ନା ରାଇ ତା ଆସ୍, ପ୍ରାଭୁସ୍ ଏନ୍ଦ୍ରିନ୍ହି କାମ୍ଚ୍କାଦାସ୍, ଆଦ୍ଘି ମିଆଁ ବଡ଼୍ପଣି ଏଦ୍ରସ୍। 18ଏନ୍ଦେର୍ଗେକା ଏକାସ୍ ନିଜର୍ ବାଡ଼ାଇ କାମ୍ଦାସ୍ ଆବନ୍ ମାଲ୍ଲା, ଲେକିନ୍ ଏକାସ୍କି ବାଡ଼ାଇ ପ୍ରାଭୁସ୍ କାମ୍ଦାସ୍, ଆବନ୍ ଗ୍ରହନ୍ କାମାକାଇ।
11ପାଉଲୁସ୍ ଆରୁ ଝୁଟ୍ଟୁ ଚେଲାର୍
1ଏନ୍ ଚାହାଁଲ୍କାନ୍ କା ନିମ୍ ଏଙ୍ଘାଏ କାଟେକେନ୍ ନିର୍ବୁଦ୍ଦିଆବନ୍ ସାହର୍ନେ, ହଁ ନିମ୍ ଏଙ୍ଗାନ୍ ଜରୁର୍ ସାହ୍ତେ ବାରାଲ୍ଦାର୍। 2ଏନ୍ କେତ୍କ ଜୀଆଉଲ୍ତି ନିହ୍ମା ଲାଗାନ୍ ଚିନ୍ତା କାମ୍ଦାନ୍ ଆଦ୍ ପାର୍ମେଶ୍ୱାର୍ସ୍କି ଚିନ୍ତା ଲେଖା ରାଇଦ୍। ଏନ୍ ନିହ୍ମାଏ ଅଣ୍ଟା ଖାଲି ବର୍କୁକ୍କ ଖ୍ରୀସ୍ତ୍ସ୍ଗାନେ ନିହ୍ମାଏ ପିନ୍ଧେନ୍ କାମ୍ଚ୍କାନ୍, ଏକାତି କା ଏନ୍ ଅଣ୍ଟା ପାବିତାର୍ କାନ୍ୟାକୁକାଏ ଲେଖା ଆସ୍କି ଆଘ୍ଲି ତିୟାର୍ କାମାଅଙ୍ଗନ୍। 3ଲେକିନ୍ ଏନ୍ ଏଲ୍ଚ୍ଦାନ୍ କା ଏସ୍କେ ଆ ନେର୍ରୁଦ୍ ହେୱାବନ୍ ତାଙ୍ଘା ଚାଲାକ୍ତି ଠାକ୍ଚେଇଚା, ଆନ୍ନେନିନ୍ ନିହ୍ମା ମନ୍ଦ୍ହି ଆ ବିନାକପଟ୍ ଭକ୍ତି ଆରୁ ପାବିତାର୍ତି, ଏକାନ୍ ନାମାଗେ ଖ୍ରୀସ୍ତ୍ସ୍କି ଲାଗାନ୍ ଉଇନା କାତ୍ଥା, ଗେଚ୍ଛା କାମା ମା କଦ୍। 4ଏନ୍ଦେର୍ଗେକା ଯେତ୍କବାକେନ୍ ନେଦିନ୍ ନିହ୍ମାସାନ୍ ବାରିକିରି ଅଣ୍ଟା ଏନ୍ନେ ଯୀଶୁସ୍କି ପ୍ରଚାର୍ କାମାଗେ ବାର୍ନାଏ, ଏକାଦ୍ ଏହ୍ମାଏ ପ୍ରଚାର୍ ଯୀଶୁସ୍ସ୍ତି ଭିନେ ରାଇ, ଚାହେ ଇଦ୍ ଅଣ୍ଟା ଏନ୍ନେ ଆତ୍ମାତି ଚାହେ ସୁସାମାଚାର୍ବନ୍ ଗ୍ରହନ୍ କାମାଗେ ତେଙ୍ଗ୍ନାଏ, ଏକାନ୍ ନିହ୍ମା ଦ୍ୱାରା ଗ୍ରହନ୍ କାମ୍ଚ୍କା ଆତ୍ମା ଚାହେ ସୁସାମାଚାର୍ସ୍ତି ଭିନେ ରାଇ, ତା ନିମ୍ ଆବନ୍ ସ୍ୱାଗାତ୍ କାମ୍ଦାର୍। 5ଏନ୍ନେ ବାଡ଼୍କା ଖାସ୍ଚେଲାର୍ସ୍ତି ଏନ୍ ନିଜ୍କେନିଜ୍ବନ୍ ଏକ୍ରିନ୍ ତାର୍ତି କମ୍ ମା ବୁଝ୍ର୍ଦାନ୍। 6ମାନା ଅଙ୍ଗିଦ୍କା ଏଙ୍ଘା ତେଙ୍ଗ୍ନାଘି ଶକ୍ତିଦ୍ କମ୍ ରାଇଦ୍ ଲେକିନ୍ ଏଙ୍ଘା ବୁଦ୍ଧିଦ୍ ତା ବାଗ୍ଗେ ରାଇଦ୍। ଇ କାତ୍ଥାବନ୍ ଏମ୍ ଜାମା କାତ୍ଥାନୁ ନିମାନ୍ ସାଫା-ସାଫା ତେଙ୍ଗେଇଚ୍କାଦାମ୍। 7ନିମାରିନ୍ ମିଆଁ ଉଠାବାଗେ ଲାଗାନ୍ ଏନ୍ ନିଜ୍କେବନ୍ ଗରୀବ୍ କାମ୍ଚ୍କାନ୍ ଆରୁ ଏନ୍ଦେର୍ହି ମା ହୋଇକିରି ନିହ୍ମା ମାଝାନୁ ପାର୍ମେଶ୍ୱାର୍ସ୍କି ସୁସାମାଚାର୍ବନ୍ ପ୍ରଚାର୍ କାମ୍ଚ୍କାନ୍। ଏନ୍ଦେର୍ ଇନ୍ନୁ ଏଙ୍ଘାଏ ଏନ୍ଦ୍ରିନ୍ ଦୋଷ୍ ରାଚା? 8ଏନ୍ ଦୁସ୍ରା ମଣ୍ଡ୍ଲୀଗୁଠିନ୍ ଲୁଟ୍କାନ୍, ମତ୍ଲବ୍ ଏନ୍ ଆବ୍ଡ଼ାର୍ସ୍ତି ଭୁତ୍ତି ଅଚ୍କାନ୍ ତାକା ନିହ୍ମାଏ ସେବା କାମନ୍। 9ନିହ୍ମାଗାନେ ଇସାନ୍ ରାନାବାକେନ୍ ଏନ୍ ପାଏସାଘି ଅଭାବ୍ନୁ ଖାତ୍ର୍କୁନ୍ହି ନେକ୍ରିନ୍ଘି ଲାଗାନ୍ହି ଭାର୍ ମା ମାନାଲ୍କାନ୍। ମାକିଦୁନିଆଁନ୍ତି ବାରୁ ଭାଇଜାମାର୍ ଏଙ୍ଘା ଦାର୍କାର୍ବନ୍ ପୁରା କାମ୍ଚେଇଚାର୍। ଏନ୍ ନିହ୍ମା ଲାଗାନ୍ ଭାର୍ ମା ମାନ୍ଚ୍କାନ୍ ଆରୁ ଏକ୍ଲାହି ମା ମାନନ୍। 10ଯଦି ଖ୍ରୀସ୍ତ୍ସ୍କି ସତ୍ତୁଦ୍ ଏଙ୍ଘାସାନ୍ ରାଇଦ୍ ତା, ଆଖାୟା ପ୍ରଦେଶ୍ନୁ ନେଦିନ୍ ଏଙ୍ଗାନ୍ ଇ ବଡ଼୍ପଣିତି ମା ରୋକର୍। 11ଏନ୍ନେ ଏନ୍ଦେର୍ଗେ? ଏନ୍ଦେର୍ ଇଦ୍ଘିଲାଗାନ୍ ଏନ୍ ନିମାନ୍ ବାନେ ମା ହାଖ୍ଖଦାନ୍? ପାର୍ମେଶ୍ୱାର୍ସ୍ ଆହ୍ଦାସ୍ କା ଏନ୍ ନିମାନ୍ ବାନେ ହାଖ୍ଖଦାନ୍। 12ଏନ୍ ଏକାନ୍ କାମ୍ତେ ବାରାଲ୍ଦାନ୍, ଆବନ୍ କାମ୍ତେକନ୍, ଏକାତି କା ଆବ୍ଡ଼ା ଆଲାର୍ଗେ ଇ କାତ୍ଥାଘି ମିଆଁ ବଡ଼୍ପଣି ଏଦ୍ରାଗେ ମଉକା ମା ହାଖ୍ଖର୍କା ଆବ୍ଡ଼ାର୍ ପ୍ରଚାର୍ ନାଲ୍ଖୁନୁ ଏଙ୍ଘା ବାରାବୁରି ରାନାଏ। 13ଏନ୍ଦେର୍ଗେକା ଏନ୍ନେ ଆଲାର୍ ଠାକୁୱା ଚେଲା ରାନାଏ, ଆରୁ ଠାକିକିରି ନାଲ୍ଖୁ କାମ୍ନାଏ, ଆବ୍ଡ଼ାର୍ ଖ୍ରୀସ୍ତ୍ସ୍କି ଖାସ୍ଚେଲାଜାମାର୍ ଲେଖା ରୂପ୍ ହନାଏ। 14ଆରୁ ଇନ୍ନୁ ଏନ୍ଦେର୍ହି ଆଚ୍ମିତ୍ କାତ୍ଥା ମାଲ୍ଲାଦିନ୍, ଏନ୍ଦେର୍ଗେକା ଶାଏତାନ୍ହିତା ପାର୍ମେଶ୍ୱାର୍ସ୍କି ସରଗ୍ଦୂଁତ୍ ଲେଖା ରୂପ୍ବନ୍ ହୁଆ ଅଙ୍ଗି। 15ହୁଦ୍ଘିଲାଗାନ୍ ଇନ୍ନୁ ଏନ୍ଦେର୍ହି ବାଡ଼୍କା କାତ୍ଥା ମାଲ୍ଲାଦିନ୍ କା ଶାଏତାନ୍ଘି ସେବକ୍ ଖ୍ରୀସ୍ତ୍ସ୍କି ସେବକ୍ ଜାମାର୍ଘି ଲେଖା ରୂପ୍ ହନାଏ। ଲେକିନ୍ ଆଖ୍ରୀନୁ ଆବ୍ଡ଼ାର୍ଗେ ତାହ୍ମା ଖାରାପ୍ ନାଲ୍ଖୁଘି ଦଣ୍ଡ୍ ଏକାଦ୍ ହାଖ୍ଖର୍ନା କାତ୍ଥାଦ୍, ଆଦ୍ ଜରୁର୍ ହାଖ୍ଖରଦ୍।
ପାଉଲୁସ୍ ପାର୍ମେଶ୍ୱାର୍ସ୍କି ଲାଗାନ୍ ଦୁଃଖୁ ଉଠାବାଦାସ୍
16ଏନ୍ ଆରୁଅହନ୍ ତେଙ୍ଗ୍ଦାନ୍ କା, ନେଦିନ୍ ଏଙ୍ଗାନ୍ ମୁରୁଖ୍ ମା ସୋଚର୍; ମାଲ୍ଲାହାଲେ ମୁରୁଖ୍ ସୋଚିକିରି ଏଙ୍ଘାଏ ସାହା, ତାକା ଥୋଡ଼େକେନ୍ ଏନ୍ହି ବଡ଼୍ପଣି ଏଦ୍ରା ଅଙ୍ଗନ୍। 17ଆକ୍କୁନ୍ ଇବନ୍ ଏକାନ୍ ଏନ୍ ତେଙ୍ଗାଲ୍ଦାନ୍, ଆବନ୍ ପ୍ରାଭୁସ୍କି ଇଚ୍ଛା ଲେଖା ମା କାମାଲ୍ଦାନ୍, ବରନ୍ ଅଣ୍ଟା ମୁରୁଖ୍ସ୍କି ଲେଖା ପୁରା ବିଶ୍ୱାସ୍ଘି ସାଙ୍ଗେ ବଡ଼୍ପଣିତି ତେଙ୍ଗ୍ରାଲ୍ଦାନ୍। 18ଯେତ୍କବାକେନ୍ ଢେର୍ ଆଲାର୍ ଆ କାତ୍ଥାଘି ବଡ଼୍ପଣି ଏଦ୍ର୍ନାଏ, ଏକାଦ୍ ଦୁନିଆଁଘି ନଜର୍ନୁ ବିଶେଷ୍ ଉଇଦ୍, ତା ଏନ୍ହି ଆବନ୍ କାମନ୍। 19ଆରୁ ନିମ୍ତା ଏତ୍କ ବୁଦ୍ଧିୟାର୍ ରାଦାର୍ କା ମୁରୁଖ୍ର୍ଘି କାତ୍ଥାବନ୍ ଖୁସୀତି ସାହା ଅଙ୍ଗ୍ଦାର୍। 20ହାଲେ ଯଦି ନେରିନ୍ ନିମାରିନ୍ ଗୁତ୍ତିୟା କାମିକିରି ଉଇୟର୍, ନିହ୍ମାଏ ଧାନ୍ନୁ ହୁଅର୍କର୍, ଆରୁ ନିମାରିନ୍ ଜାଲ୍ଲିନୁ ଟିଡ଼ିକିରି ଧାରର୍, ହିସ୍ଙ୍ଗା କାମ୍ଦାସ୍ ଚାହେ ନିହ୍ମାଏ ଗାଲ୍ଲେନ୍ ଥାପ୍ଡ଼ାଦାସ୍ ହାଲେହି ନିମ୍ ଆବନ୍ ସାହ୍ଦାର୍। 21ଏନ୍ ଲାଜ୍ଜେଘି ସାଙ୍ଗେ ତେଙ୍ଗାଲ୍ଦାନ୍ ଏମ୍ ବହୁତ୍ କମ୍ଜୋର୍ ରାଚ୍କାମ୍। ଯଦି ଏକ୍ରିନ୍ ଆଲାସ୍ ଏକ୍ରିନ୍ ଜିନିଷ୍ଘି ମିଆଁ ବଡ଼୍ପଣି ଏଦ୍ର୍ନାଘି ସାହସ୍ କାମ୍ଦାସ୍ ତା ଆନ୍ନେନିନ୍ ସାହସ୍ ଏନ୍ହି କାମନ୍। (ଆରୁ ଏନ୍ ମୁରୁଖ୍ ଲେଖା ତେଙ୍ଗାଲ୍ଦାନ୍)। 22ଏନ୍ଦେର୍ ଇବ୍ରାନୀ ଆବ୍ଡ଼ାରିନ୍ ତା ମାଲ୍ନାଏ? ଏନ୍ହି ରାଦାନ୍: ଏନ୍ଦେର୍ ଇସ୍ରାଏଲ୍ ଆବ୍ଡ଼ାରିନ୍ ତା ମାଲ୍ନାଏ? ଏନ୍ହି ରାଦାନ୍: ଏନ୍ଦେର୍ ଆବ୍ରାହାମ୍ସ୍କି ହାଦ୍ଦୁର୍ ଆବ୍ଡ଼ାରିନ୍ ତା ମାଲ୍ନାଏ? ଏନ୍ହି ରାଦାନ୍। 23ଏନ୍ଦେର୍ ଆବ୍ଡ଼ାର୍ ଖ୍ରୀସ୍ତ୍ସ୍କି ଗୁତ୍ତିୟା ରାନାଏ? (ଏନ୍ ଅଣ୍ଟା ପାଗ୍ଲାସ୍ ଲେଖା ଇବନ୍ ତେଙ୍ଗ୍ଦାନ୍), କା ଏନ୍ ଆବ୍ଡ଼ାର୍ସ୍ତିହି ବାଡ଼୍କା ଖ୍ରୀସ୍ତ୍ସ୍କି ଗୁତ୍ତିୟାନ୍। ଏନ୍ ବାଗ୍ଗେ ଖାଟ୍କାନ୍। ଏନ୍ ବହୁତ୍ଥର୍ ଜେହେଲ୍ କେର୍କାଦାନ୍, ଏଙ୍ଗାନ୍ ବହୁତ୍ଥର୍ ଡେମ୍ଚ୍କାନାଏ, ଏନ୍ ବହୁତ୍ଥର୍ ମରନ୍ଘି ସାମ୍ନା କାମ୍ଚ୍କାଦାନ୍। 24ୟାହୁଦୀ ଆଲାର୍ ଏଙ୍ଗାନ୍ ପାଞ୍ଚ୍ ଥର୍ ଅନ୍ଚାଲିସ୍-ଅନ୍ଚାଲିସ୍ କୋଡ଼୍ରା ମାର୍ ଚିଚ୍ଚାର୍। 25ଏଙ୍ଗା ତିନ୍ ଥର୍ ଠେଙ୍ଗା ମାର୍ ହାଖ୍ଖରାଦ୍, ଆରୁଅହନ୍ ଚାଁଚାତି ଲେବ୍ଡ଼ାଚାର୍, ଆରୁ ତିନ୍ ଥର୍ ଏନ୍ନେ ମାନ୍ଚା କା ଏନ୍ ଏକା ଡଙ୍ଗାନୁ କାଲ୍କାନ୍, ଆଦ୍ ଏସ୍ରା କେରା ଆରୁ ମୁହ୍ଲିଆ କେରା, ଆନ୍ତିନ୍ ଆରୁଅହନ୍ ଏନ୍ ଉଲ୍ଲା ଆରୁ ମାଁହା ସାମ୍ଧୁର୍ନୁ ଇୟାହୁଇୟା ଅହ୍ଡ଼ାରିକିରି ବିତାବାଚ୍କାନ୍। 26ଏନ୍ ବହୁତ୍ଥର୍ ଦୁସ୍ରା-ଦୁସ୍ରା ଆଡ୍ଡା କାନାବାକେନ୍, ଏଙ୍ଗାଗେ ଯୋଡ଼ୁଘି ବିପଦ୍ତିହି ସାମ୍ନା କାମାଖାତ୍ରା, ଡାକୁର୍ଘି ବିପଦ୍ତିହି, ୟାହୁଦୀର୍ଘି ବିପଦ୍ତିହି, ବିନାୟାହୁଦୀର୍ଘି ବିପଦ୍ତିହି, ସହର୍ଘି ବିପଦ୍ତିହି, ଶୁନ୍ଶାନ୍ ଆଡ୍ଡାଘି ବିପଦ୍ତିହି, ସାମ୍ଧୁର୍ଘି ବିପଦ୍ତିହି ଆରୁ ଝୁଟ୍ଟୁ ବିଶ୍ୱାସୀ ଭାଇର୍ଘି ବିପଦ୍ତିହି ସାମ୍ନା କାମା ଖାତ୍ର୍କିଚା। 27ଏନ୍ ବହୁତ୍ ମେହ୍ନତ୍ କାମ୍ଚ୍କାନ୍ ଆରୁ ବହୁତ୍ଥର୍ ମାଁହାବିସ୍ତା ମା ହାନ୍ଦ୍ରିକିରି ବିତାବାଚ୍କାନ୍। ଏନ୍ ବହୁତ୍ଥର୍ ଆମ୍ମୁକିଡ଼ା ସାର୍କାନ୍, ଆରୁ ଏଙ୍ଘାସାନ୍ ବାରାବୁରି ଚିଢ଼ା ମା ରାନାତି ପାୟାଁ ସାହା ଖାତ୍ରା। 28ଆରୁ ଇବ୍ଡ଼ା କାତ୍ଥା ଆମ୍ବିକିରି ଜାମା ମଣ୍ତ୍ଲୀଘି ବାରେନୁ ଏଙ୍ଘା ଚିନ୍ତା ଜାମାବାକେନ୍ ରାଇଦ୍। 29ଯେତ୍କବାକେନ୍ ନେରିନ୍ କାମ୍ଜୋର୍ ରାନାଏ, ତା ଏନ୍ ଆସ୍କି କମ୍ଜୋରିସ୍ତି କମ୍ଜୋର୍ ରାଦାନ୍, ଯେତ୍କବାକେନ୍ ନେରିନ୍ ପାପ୍ନୁ ଖାତ୍ର୍ନାଏ କାନାଏ, ତା ଏଙ୍ଘାଏ ଜିଆ ଅଲି। 30ଯଦି ଏନ୍ଦ୍ରିନ୍ କାତ୍ଥାନୁ ବଡ଼୍ପଣି ଏଦ୍ର୍ନା ରାଇ ତା, ଏନ୍ ନିଜର୍ କମ୍ଜୋରିନୁ ବଡ଼୍ପଣି ଏଦ୍ରନ୍। 31ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍ସ୍କି ବାଙ୍ଗ୍ ପାର୍ମେଶ୍ୱାର୍ସ୍କି ଯୁଗ୍-ଯୁଗ୍ ମାହିମା ମାନ୍ନାଦ୍। ଆସ୍ ଆହ୍ଦାସ୍ କା ଏନ୍ ଝୁଟ୍ଟୁ ମାଲ୍ଲା ତେଙ୍ଗୁନ୍। 32ଯେତ୍କବାକେନ୍ ଏନ୍ ଦାମାସ୍କସ୍ ସହର୍ନୁ ରାଚ୍କାନ୍, ତା ରାଜା ଆରିତାସ୍କି ରାଜ୍ପାଲ୍ସ୍ ଏଙ୍ଗାନ୍ ଧାର୍ତାଗେ ଲାଗାନ୍ ସହର୍ନୁ ପାହ୍ରା ଅକ୍ତାଚ୍କାଚାସ୍ 33ଲେକିନ୍ ଏଙ୍ଗାନ୍ ସହର୍ନ୍ତା ଚାରିଖୁଟ୍ କାଥୀଘି ଅଣ୍ଟା ଖିଡ଼୍କିସ୍ତି ଡାଲାନୁ ଅକ୍ତିକିରି କିଆଁ ଏତ୍ତାଚାକେରା। ଆରୁ ଏନ୍ ଇଦ୍ଘି ଲେଖା ଆସ୍କି ହେଖ୍ଖାନ୍ତି ବାଛ୍ର୍କାନ୍ କେର୍କାନ୍।
12ପାଉଲୁସ୍କେ ପାର୍ମେଶ୍ୱାର୍ସ୍କି ଦର୍ଶନ୍
1ଯଦିଭି ବଡ଼୍ପଣି କାମ୍ନା ତା ଏଙ୍ଘାଲାଗାନ୍ ଠିକ୍ ମାଲ୍ଲିଦ୍ ହାଲେହି କାମା ଖାତ୍ରିଦ୍, ହୁଦ୍ଘିଲାଗାନ୍ ଏନ୍ ପ୍ରାଭୁସ୍କି ମହାନ୍ ଦର୍ଶନ୍ ଆରୁ ପ୍ରାଭୁସ୍କି ଦ୍ୱାର୍ନୁ ପ୍ରକଟ୍ କାମ୍ଚ୍କା ନୁହ୍ର୍କା କାତ୍ଥାବନ୍ ପ୍ରଚାର୍ କାମନ୍। 2ଏନ୍ ଖ୍ରୀସ୍ତ୍ସ୍କି ଅଣ୍ଟା ଆଲାସିନ୍ ଆହ୍ଦାନ୍, ଏକାସିନ୍କା ଚଉଦ ବଛର୍ ପହ୍ଲେ ତିସ୍ରା ସରଗ୍ତକ୍ ମିଆଁ ଉଠାବା କେର୍କିଚା ଶରୀର୍ ଚାହେ ଦୁସ୍ରା ପ୍ରକାର୍ତି, ଇବନ୍ ଏନ୍ ବାଲ୍ଦାନିନ୍, ପାର୍ମେଶ୍ୱାର୍ସ୍ସିନ୍ ଆହ୍ଦାସ୍। 3ଆରୁ ଇ ଆଲାସ୍କି ଶରୀର୍ ଗାନେ ଚାହେ ବିନାଶରୀର୍ତି ଇବନ୍ ଏନ୍ ବାଲ୍ଦାନିନ୍, ଇବନ୍ତା ପାର୍ମେଶ୍ୱାର୍ସିନ୍ ଆହ୍ଦାସ୍। 4ସରଗ୍ନୁ ଉଠାବା କେର୍କିଚା। ଆରୁ ଆସ୍ ଏନ୍ନେ ପାବିତାର୍ କାତ୍ଥା ମେନ୍ଚାସ୍ ଏକାଦ୍ କା ତେଙ୍ଗ୍ନାଘି ବାହ୍ରି ରାଇଦ୍ ଆରୁ ଏକାନ୍ ତେଙ୍ଗ୍ନାଘି ଅନୁମତି ଆଲାର୍ଗେହି ମାଲ୍ଲାଦିନ୍। 5ଏନ୍ନେ ଆଲାସ୍କି ବାରେନୁତା ଏନ୍ ବଡ଼୍ପଣି ଏଦ୍ରନ୍, ଯେତ୍କତକ୍ ନିଜର୍ ମିଆଁ ପ୍ରଶ୍ନ ରାଇଦ୍, ଲେକିନ୍ ଏନ୍ ନିଜର୍ କାମ୍ଜୋରିବନ୍ ଆମ୍ବିକିରି ଆରୁ ଏକ୍ରିନ୍ କାତ୍ଥାଘି ମିଆଁ ବଡ଼୍ପଣି ମା ଏଦ୍ରନ୍। 6ଯଦି ଏନ୍ ବଡ଼୍ପଣି ଏଦ୍ରନ୍ ହାଲେହି ଏନ୍ ମୁରୁଖ୍ ମା ସୋଚନ୍, ଏନ୍ଦେର୍ଗେକା ସତ୍ତୁବନ୍ନିନ୍ ତେଙ୍ଗନ୍। ହାଲେହି ଏନ୍ ଆଟ୍କା ରାଦାନ୍କାଦାନ୍, ଏନ୍ନେ ମା ମାନ୍ନାଦ୍ କା ଏସ୍କେ ନେଦିନ୍ ଏଙ୍ଗାନ୍ ଏର୍ଲ୍ନାଏ ଚାହେ ଏଙ୍ଘାସ୍ତି ମେନ୍ନାଏ, ଏଙ୍ଗାନ୍ ଆଦ୍ଘିସ୍ତି ବାଢ଼୍ରିକିରି ମା ବୁଝ୍ରର୍। 7ଏଙ୍ଘା ମିଆଁ ଢେର୍ବାଗ୍ଗେ ଆସାଧାରାନ୍ ନୁହ୍ର୍କା କାତ୍ଥାବନ୍ ଏଦାକେରା। ଏନ୍ ଇଦ୍ଘି ମିଆଁ ବଡ଼୍ପଣି ମା ଏଦ୍ରନ୍, ହୁଦ୍ଘିଲାଗାନ୍ ଏଙ୍ଘା ଶରୀର୍ନୁ ଅଣ୍ଟା ଆଚ୍ଚୁ ଜୋବା କେର୍କିଚିଦ୍। ଏଙ୍ଗାଗେ ଶାଏତାନ୍ଘି ଦୂଁତ୍ ହାଖ୍ର୍କିଚି, ତାକା ଆଦ୍ ଏଙ୍ଗାନ୍ ଘୁସାମାର୍ ଚିତେରଦ୍ ଆରୁ ଏନ୍ ବଡ଼୍ପଣି ମା ଏଦ୍ରନ୍। 8ଏନ୍ ତିନ୍ ଥର୍ ଦୁସ୍ରା-ଦୁସ୍ରା ସାମାୟନୁ ପ୍ରାଭୁସାନ୍ ଆର୍ଜୀ କାମ୍ଚ୍କାନ୍, କା ଇ କାଣ୍ଟିବନ୍ ଏଙ୍ଘାସ୍ତି ଅଥ୍ରାଚିଆ। 9ଲେକିନ୍ ଆସ୍ ଏଙ୍ଗାନ୍ ତେଙ୍ଗିୟାସ୍, “ଏଙ୍ଘା କ୍ରିପା ନିଙ୍ଘାଲାଗାନ୍ ବାଗ୍ଗେ ରାଇଦ୍; ଏନ୍ଦେର୍ଗେକା ଏଙ୍ଘାଏ ଶକ୍ତି କାମ୍ଜୋରିନୁ ଭାର୍ପୁର୍ ରୂପ୍ତି ଏଥ୍ରିକାଇଦ୍।” ହୁଦ୍ଘିଲାଗାନ୍ ବହୁତ୍ ଖୁସୀତି ନିଜର୍ କାମ୍ଜୋରିନୁ ବଡ଼୍ପଣି ଏଦ୍ର୍ଦାନ୍ କା ଖ୍ରୀସ୍ତ୍ସ୍କି ଶକ୍ତି ଏଙ୍ଘା ମିଆଁ ରାନାଦ୍। 10ଏନ୍ ଖ୍ରୀସ୍ତ୍ସ୍କି କାରଣ୍ ନିଜର୍ କାମ୍ଜୋରିନୁ, ନିନ୍ଦା, କଷଟ୍, ସାତାୱାଟ୍, ଆରୁ ବିପଦ୍ନୁହି ବଡ଼୍ପଣି ଏଦ୍ର୍ଦାନ୍; ଏନ୍ଦେର୍ଗେକା ଏନ୍ ଯେତ୍କବାକେନ୍ କାମ୍ଜୋର୍ ରାଦାନ୍, ହାଲେହି ଏନ୍ ଶକ୍ତିଶାଲୀ ରାଦାନ୍।
କୁରିନ୍ଥୀ ବିଶ୍ୱାସୀ ଆଲାର୍ଘି ଲାଗାନ୍ ପାଉଲୁସ୍କି ବାନେ ହାଖ୍ଖନା
11ଏନ୍ ମୁରୁଖ୍ ତା ମାନ୍ଚ୍କାନ୍, ଲେକିନ୍ ନିମିନ୍ ଏନ୍ନେ କାମାଗେ ଏଙ୍ଗାନ୍ ମଜ୍ବୁର୍ କାମ୍ଚ୍କାର୍। ନିମାଗେ ତା ଏଙ୍ଘାଏ ମାଇନ୍ କାମ୍ନାକାତ୍ଥା। ଲେକିନ୍ ଏନ୍ ଏନ୍ଦେର୍ହି ମାଲ୍ଦାନ୍ ହାଲେହି ଆ ବାଡ଼୍କାନ୍ତି ବାଡ଼୍କା ଖାସ୍ଚେଲାର୍ ଜାମାର୍ଘିନ୍ତି ଏନ୍ଦ୍ରିନ୍ କାତ୍ଥାନୁହି କମ୍ ମାଲ୍ଲକାନିନ୍। 12ସତ୍ତୁନିନ୍ ବାଡ଼୍କା ଧିରାଜ୍ଘି ସାଙ୍ଗେ ଅଣ୍ଟା ଖାସ୍ଚେଲାସ୍କି ସାବୁତ୍ ଚିହ୍ନାଦ୍, ଅଦ୍ଭୁତ୍ ନାଲ୍ଖୁ ଆରୁ ଶକ୍ତିଘି ନାଲ୍ଖୁନ୍ ନିହ୍ମା ମାଝାନୁ ଏଦା କେର୍କିଚା। 13ନାନ୍ନା ମଣ୍ତ୍ଲୀଘି ତୁଲ୍ନାନୁ ନିହ୍ମା ଆଲାସ୍ସ୍ତି ଏନ୍ଦ୍ରିନ୍ କାତ୍ଥାନୁ ଘାଟି ରାଚାକେର୍କିଚି? ହଁ, ଏନ୍ ନିହ୍ମା ଜାମାର୍ଘି ଲାଗାନ୍ ଭାର୍ ମା ମାନ୍ଚ୍କାନ୍। ନିମ୍ ଏଙ୍ଗାନ୍ ଇ ଅନ୍ୟାୟଘି ଲାଗାନ୍ ଛେମା କାମ୍କେଚିକେ। 14ମେନା, ଏନ୍ ନିହ୍ମା ଚାହାନୁ ବାରାଗେ ଆକ୍କୁନ୍ ତିସ୍ରା ଥର୍ ତିୟାର୍ ରାଦାନ୍। ଲେକିନ୍ ଏନ୍ ନିହ୍ମା ମିଆଁ ଏକ୍ରିନ୍ତାର୍ତିହି ଭାର୍ ମା ମାନନ୍। ଏଙ୍ଗାଗେ ନିହ୍ମାଏ ଧନ୍ସମ୍ପତ୍ତିବନ୍ ମାଲ୍ଲା ଲେକିନ୍ ନିହ୍ମାଏ ଚିନ୍ତା ରାଇଦ୍। ଏନ୍ଦେର୍ଗେକା ହାଦ୍ଦୁର୍ଗେ ନିଜର୍ ଆୟାଙ୍ଗ୍ ବାଙ୍ଗ୍ର୍ଘି ଲାଗାନ୍ ଏନ୍ଦେର୍ହି ଧନ୍ସମ୍ପତ୍ତିବନ୍ ମା ଠୁଡ଼ିୟାନା କାତ୍ଥା ବରନ୍ ନିଜର୍ ହାଦ୍ଦୁବଚ୍ଚର୍ଘି ଲାଗାନ୍ ଆୟାଙ୍ଗ୍ ବାଙ୍ଗ୍ର୍ଗେ ଠୁଡ଼ିୟାନା ଖାତ୍ରି। 15ଯେତ୍କତକ୍ ଏଙ୍ଘା କାତ୍ଥା ରାଇ, ଏଙ୍ଘାସାନ୍ ଯାହା କିଛି ରାଇଦ୍, ନିହ୍ମା ଲାଗାନ୍ ଖୁସୀଘି ସାଙ୍ଗେ ଖାର୍ଚ୍ଚା କାମନ୍ ଏତ୍କତକ୍ କା ନିଜ୍କେ ନିଜ୍ବନ୍ହି ନିହ୍ମା ଲାଗାନ୍ ଖାର୍ଚ୍ଚା କାମଚନ୍। ଯଦି ଏନ୍ ନିହ୍ମାସ୍ତି ବାଗ୍ଗେ ବାନେ ହାଖ୍ଖନ୍ ତା, ଏନ୍ଦେର୍ ଏଙ୍ଘାଲାଗାନ୍ ନିହ୍ମା ବାନେ ହାଖ୍ଖନାଦ୍ କମ୍ ମାନଦ୍କଦ୍? 16ନିହ୍ମାସ୍ତି କେତ୍କ ଆଲାର୍ ଇ ସୋଚ୍ନାଏ କା, ଏନ୍ ନିହ୍ମା ମିଆଁ ଭାର୍ ମା ମାନ୍ଚ୍କାନ୍, ହାଲେହି କେତ୍କ ଆଲାର୍ ସୋଚ୍ନାଏ କା ଚାଲାକ୍ତି ଏନ୍ ନିମାନ୍ ଧୋଖା ଚିଇକିରି ଫାଏଦା ଉଠାବାଚ୍କାନ୍। 17ଏକା ଆଲାରିନ୍ ଏନ୍ ନିହ୍ମା ଚାହାନୁ ତାଏକାଚ୍କାନ୍, ଏନ୍ଦେର୍ ଆବ୍ଡ଼ାର୍ଘି ତାର୍ତି ଏନ୍ ନିହ୍ମାସ୍ତି ଏନ୍ଦ୍ରିନ୍ ଫାଏଦା ଉଠାବାଚ୍କାନ୍? 18ଏନ୍ ତିତୁସ୍ସିନ୍ ନିହ୍ମାସାନ୍ କାଲାଗେ ଲାଗାନ୍ ଆର୍ଜୀ କାମ୍ଚ୍କାନ୍, ଆରୁ ଆ ଭାଇସିନ୍ହି ଆସ୍ଗାନେ ତାଇକାନ୍। ଏନ୍ଦେର୍ ତିତୁସ୍ ନିହ୍ମାସ୍ତି ଫାଏଦା ଉଠାବାଚାସ୍? ଏନ୍ଦେର୍ ନାମ୍ ଦୁହି ଲୋକ୍ ଅଣ୍ଟା ଖାଲି ଆତ୍ମାତି ଅଣ୍ଟାଇନ୍ ଇଚ୍ଛା ଉଇକିରି ଅଣ୍ଟାଇନ୍ ପାବୁନୁ ମାଲ୍ଲା ଏକୁତ୍? 19ଭାଏଲ୍ ନିମ୍ ଇବନ୍ ବୁଝ୍ରାଲ୍କାରର୍ କା ଏମ୍ ଇବ୍ଡ଼ା ଜାମାନ୍ ନିଜ୍କେନିଜ୍ବନ୍ ବାଛାବାନାଘି ଲାଗାନ୍ ତେଙ୍ଗାଲ୍ଦାମ୍। ଏନ୍ଦ୍ରିନ୍ହି ଏନ୍ ତେଙ୍ଗାଲ୍ଦାନ୍ ଆବ୍ଡ଼ା ଜାମାନ୍ ପାର୍ମେଶ୍ୱାର୍ସ୍ସିନ୍ ମାଝାନୁ ରାଦାସ୍ ଆହିକିରି ଖ୍ରୀସ୍ତ୍ସ୍ନୁ ତେଙ୍ଗାଲ୍ଦାନ୍। ହେ ଏଙ୍ଘା ଭାଇ ଆରୁ ବୁହୁଣୀଜାମାରୋ, ଏକାନ୍ ଏମ୍ କାମ୍ଦାମ୍, ଆଦ୍ ଜାମାଦ୍ ନିହ୍ମାଏ ଆତ୍ମିକ୍ ଉନ୍ନତିଘି ଲାଗାନ୍ ରାଇଦ୍। 20ଏନ୍ଦେର୍ଗେକା ଏଙ୍ଗାଗେ ଏଲ୍ଚ୍କା ରାଇ କା ଏକାସାନ୍ ଏନ୍ନେ ମା ମାନ୍ନାଦ୍ କା ଯେତ୍କବାକେନ୍ ଏନ୍ ନିହ୍ମା ଚାହାନୁ ବାରନ୍ ତା ନିମାନ୍ ଆନ୍ନେନ୍ ମା ହାଖ୍ଖନ୍, ଏସ୍କେ ହାଖ୍ଖାଗେ ବେଦ୍ଦାଲ୍ଦାନ୍ ଆରୁ ନିମ୍ହି ଏଙ୍ଗାନ୍ ଆନ୍ନେନ୍ ମା ହାଖ୍ଖର୍, ଏସ୍କେ କା ଏଙ୍ଗାନ୍ ହାଖ୍ଖାଗେ ବେଦ୍ଦାଲ୍ଦାର୍। ଏଙ୍ଗା ଏଲ୍ଚ୍କା ରାଇ କା ନିହ୍ମା ମାଝାନୁ ଏଙ୍ଗାଗେ ଏକାସାନ୍ ନିଜର୍-ନିଜର୍ ଭିତ୍ରେ ଝାଗ୍ଡ଼ା, ହିସ୍ଙ୍ଗା, ଖୀସ୍ତି ତେଙ୍ଗାତେଙ୍ଗି, ଖାଲି ନିଜର୍ ବାରେନୁ ସୋଚ୍ନା, ବେଇଜ୍ଜତ୍ କାମ୍ନା, ଚୁଗ୍ଲି, ବଡ଼୍ପଣି ଆରୁ ଗୋଲ୍ମାଲ୍ ହାଖ୍ଖନ୍। 21ଏଙ୍ଗାଗେ ଏଲ୍ଚ୍କା ରାଇ କା ଯେତ୍କବାକେନ୍ ଏନ୍ ଆରୁଅହନ୍ ନିହ୍ମାସାନ୍ ଭେଁଟ୍ ମାନାଗେ ବାରନ୍ ତା ନିହ୍ମାଏ ଆଘ୍ଲି ଏଙ୍ଘାଏ ପାର୍ମେଶ୍ୱାର୍ସ୍ ଏକାସାନ୍ ଏଙ୍ଗାନ୍ ଲାଜ୍ଜେ ମା ମହର୍ତସ୍; ଆରୁ ଏଙ୍ଗାନ୍ ଆ ଢେର୍ ଆଲାର୍ଘି ଲାଗାନ୍ ଦୁଃଖୁ ମାନା ମା ଖାତ୍ରଦ୍ ଏକାର୍ ପହ୍ଲେ ପାପ୍ କାମ୍ଚ୍କାନାଏ ଆରୁ ଖାରାପ୍ ନାଲ୍ଖୁ, ବେଭିଚାର୍ ଆରୁ ମଉଜ୍ମଜ୍ଲିସ୍ନୁ ଡୁବୁର୍କାରାନାଘି ଲାଗାନ୍ ମାଲ୍ଲା ପାସ୍ତାରୁର୍।
13ଇ ଚିଠିନୁ ପାଉଲୁସ୍କି ଆଖ୍ରୀ ଚେତାବାନୀ
1ଆକ୍କୁନ୍ ଏନ୍ ତିସ୍ରା ଥର୍ ନିହ୍ମାସାନ୍ ବାର୍ନାବାଲା ରାଦାନ୍। ପାବିତାର୍ ଶାସ୍ତ୍ର ତେଙ୍ଗିଦ୍ କା ଦୁଇ ଲୋକ୍ ଚାହେ ତିନ୍ ଲୋକ୍ ସାକ୍ଷୀର୍ଘି ଥୁମ୍ଣାନ୍ତି ଜାମା ଅଣ୍ଟା କାତ୍ଥାଘି ସାବୁତ୍ ଚିଆକୋ। 2ଯେତ୍କବାକେନ୍ ଏନ୍ ଦୁସ୍ରାଥର୍ ନିହ୍ମାଗାନେ ରାଚ୍କାନ୍, ଏନ୍ ନିମାନ୍ ଚେତାବାଚ୍କାଚ୍କାନ୍ ଆରୁ ଆକ୍କୁନ୍ ଯେତ୍କବାକେନ୍ ଏନ୍ ନିହ୍ମାସ୍ତି ଗେଚ୍ଛାନୁ ରାଦାନ୍, ଏନ୍ ଆରୁଅହନ୍ ନିମାନ୍ ଚେତାବାଲ୍ଦାନ୍ କା ଯଦି ଏନ୍ ନିହ୍ମାସାନ୍ ଆରୁଅହନ୍ ବାରନ୍ ତା ଏକାର୍ ପାପ୍ କାମ୍ଚ୍କାନାଏ ଆରୁ ଏକାର୍ ପାପ୍ କାମାଲ୍ନାଏ, ଆବ୍ଡ଼ାରିନ୍ ଆରୁ ବାକି ଦୁସ୍ରା ଆଲାରିନ୍ହି ମା ଆମ୍ୱନ୍। 3ଏନ୍ଦେର୍ଗେକା ନିମ୍ ଇଦ୍ଘି ସାବୁତ୍ ବେଦ୍ଦଦାର୍, କା ଖ୍ରୀସ୍ତ୍ସ୍ ଏଙ୍ଘା ତାର୍ତି ତେଙ୍ଗ୍ଦାସ୍, ଆରୁ ଖ୍ରୀସ୍ତ୍ ନିହ୍ମାପ୍ରତି କମ୍ଜୋର୍ ମାଲ୍କାସ୍; ଆସ୍ ନିହ୍ମାଏନୁ ନିଜର୍ ଶକ୍ତିନ୍ ଏଦ୍ଦାସ୍। 4ଯେତ୍କବାକେନ୍ ଆସିନ୍ କ୍ରୁଶ୍ନୁ ଆର୍ଗ୍ତା କେର୍କିଚା, ହତ୍କବାକେନ୍ କମ୍ଜୋର୍ ଏଥ୍ରାଲାସ୍, ଲେକିନ୍ ପାର୍ମେଶ୍ୱାର୍ସ୍କି ଶକ୍ତିତି ଉଜ୍ଜାଲ୍ଦାସ୍। ହୁଦ୍ଘିଲାଗାନ୍ ତା ଏମ୍ହି ଯୀଶୁ ଖ୍ରୀସ୍ତ୍କିନୁ କମ୍ଜୋର୍ ରାଦାମ୍, ଲେକିନ୍ ଏମ୍ ପାର୍ମେଶ୍ୱାର୍ସ୍କି ଶକ୍ତିତି ଯୀଶୁ ଖ୍ରୀସ୍ତ୍ସ୍ଗାନେ ଉଜ୍ଜତେରମ୍, ତାକା ନିହ୍ମା ସେବା ନାଲ୍ଖୁନ୍ କାମ୍ତେରମ୍। 5ନିମ୍ ନିଜ୍କେବନ୍ ବିଡ଼୍ଚେ ଏରର୍ କା ନିମ୍ ବିଶ୍ୱାସ୍ଘି ଲେଖା ଜୀବନ୍ ବିତାବାଦାର୍ କା ମାଲ୍ଲା। ନିମ୍ ନିଜର୍ବନ୍ହି ଯାଞ୍ଚ କାମର୍। ଏନ୍ଦେର୍ ନିମ୍ ଇବନ୍ ମା ସୋଚ୍ଦାର୍ କା ଯୀଶୁ ଖ୍ରୀସ୍ତ୍ସ୍ ନିହ୍ମାଏନୁ ନାଲ୍ଖୁ କାମାଲ୍ଦାସ୍? ଯଦି ମା କାମର୍, ତା ନିମ୍ ଖାସ୍ଚେଲାଘି ନାଲ୍ଖୁନୁ ବିଡ଼୍ଚେ ମା ଏର୍କାର୍ ଲେଖା ରାଦାର୍। 6ଲେକିନ୍ ଏନ୍ ଆଶ୍ରା କାମ୍ଦାନ୍ କା ଏମ୍ ବାନେ ଖାସ୍ଚେଲା ମାନାଗେ ବିଡ଼୍ଚେ ଏର୍ନାନୁ ଶିଦ୍ଧ୍ ରାଦାମ୍ ଇବନ୍ ନିମ୍ ଆହର୍। 7ଏମ୍ ପାର୍ମେଶ୍ୱାର୍ସାନ୍ ବିନ୍ତି କାମ୍ଦାମ୍ କା ନିମ୍ ଏନ୍ଦେର୍ହି ଖାରାପ୍ ନାଲ୍ଖୁ ଆମ୍ବର୍ କାମା। ଇଦ୍ଘିଲାଗାନ୍ ମାଲ୍ଲା କା ଏମ୍ ବାନେ ପ୍ରମାଣ୍ ମାନମ୍, ବରନ୍ ଇଦ୍ଘିଲାଗାନ୍ କା ନିମ୍ ଭାଲାଇ କାମା। ଚାହେ ଏମ୍ ଇ ବିଡ଼୍ଚେ ଏର୍ନାନୁ ହାର୍କା ଲେଖା ଏନ୍ଦେର୍ଗେ ମା ଏଥ୍ରମ୍। 8ହୁଦ୍ଘିଲାଗାନ୍ ତା ଏମ୍ ସତ୍ତୁଘି ବିରୁଦ୍ଧ୍ନୁ ଏନ୍ଦେର୍ହି କାମା ପଲ୍ଲଦାମିନ୍, ଲେକିନ୍ ସତ୍ତୁଘି ଲାଗାନିନ୍ କାମ୍ଦାମ୍। 9ଯେତ୍କବାକେନ୍ ଏମ୍ କମ୍ଜୋର୍ ଏଥ୍ର୍ଦାମ୍, ଲେକିନ୍ ନିମ୍ ବିଶ୍ୱାସ୍ନୁ ଶକ୍ତିଶାଲୀ ରାଦାର୍, ତା ଏମାଗେ ଖୁସୀ ହାଖ୍ଖରିଦ୍। ଏହ୍ମାଏ ବିନ୍ତି ଇଦ୍ ମାନିଦ୍ କା ନିମ୍ ପୁରାପୁରୀ ନିହ୍ମା ବେଭାର୍ନୁ ଲାଇଗ୍ ମାନାକାଲା। 10ଏମ୍ ଇଦ୍ଘି ଲାଗାନ୍ହି ବିନ୍ତି କାମ୍ଦାମ୍ କା ନିହ୍ମା ଲାଗାନ୍ ସୁଧାର୍ ମାନ୍ନାଦ୍। ଏନ୍ ଗେଚ୍ଛାନୁ ରାତେହି ଇ କାତ୍ଥା ଇଦ୍ଘିଲାଗାନ୍ ଲେଖାଲ୍ଦାନ୍ କା ନିହ୍ମାସାନ୍ ରାତେହି ଏଙ୍ଗାଗେ, ପ୍ରାଭୁସ୍କି ଦ୍ୱାର୍ନୁ ହାଖ୍ଖର୍କା ହକ୍ ଅନୁସାର୍, ନିହ୍ମାଗାନେ କାଠୋର୍ ବେଭାର୍ କାମା ମା ଖାତ୍ରୋ; ଏନ୍ଦେର୍ଗେକା ଏଙ୍ଗାଗେ ଇ ହକ୍ ନିହ୍ମାଏ ନାଶ୍ଘି ଲାଗାନ୍ ମାଲ୍ଲା, ବରନ୍ ନିହ୍ମାଏ ଆତ୍ମିକ୍ ଉନ୍ନତିଘି ଲାଗାନ୍ ହାଖ୍ଖର୍କିଚି।
ଯୋହାର୍
11ଆଖ୍ରୀନୁ ହେ ଏଙ୍ଘାଏ ଭାଇ ଆରୁ ବୁହୁଣୀ ଜାମାରୋ ରିଝ୍ରା, ନିଜର୍ ବେଭାର୍ବନ୍ ବାନେକିରି ଉଇୟା, ଆନ୍ନେନିନ୍ କାମ୍ତେ ରା ଏସ୍କେ କାମାଗେ ଏନ୍ ତେଙ୍କାଦାନ୍। ଅଣ୍ଟାଇନ୍ ସୋଚ୍ ଉଇୟା, ହିମ୍ମତ୍ ଉଇୟା, ଶାନ୍ତିନୁ ରା ଏକାତି କା ବାନେ ହାଖ୍ଖୁ ଆରୁ ଶାନ୍ତିଘି ପାର୍ମେଶ୍ୱାର୍ସ୍ ନିହ୍ମାଗାନେ ରସ୍। 12ଏକ୍ ଦୁସ୍ରାରିନ୍ ପାବିତାର୍ ଚୋଙ୍ଖ୍ନାତି ଯୋହାର୍ କାମା। 13ଜାମା ପାବିତାର୍ ଆଲାର୍ ନିମାନ୍ ଯୋହାର୍ କାମାଲ୍ନାଏ। 14ପ୍ରାଭୁ ଯୀଶୁ ଖ୍ରୀସ୍ତ୍ସ୍କି କ୍ରିପା, ପାର୍ମେଶ୍ୱାର୍ସ୍କି ବାନେ ହାଖ୍ଖନା ଆରୁ ପାବିତାର୍ ଆତ୍ମାଘି ଭାଗିଦାର୍ ନିହ୍ମା ଜାମାର୍ଗେ ହାଖ୍ଖରଦ୍।