ତିମଥିଉସ୍କି ନାମେନୁ ଯୀଶୁ ଖ୍ରୀସ୍ତ୍କି ଖାସ୍ଚେଲା ପାଉଲୁସ୍କି ପହେଲା ଚିଠି
ଭୂମିକା
ପ୍ରେରିତ୍ ପାଉଲୁସ୍ ଇ ଚିଠିନ୍ ତିମଥିଉସ୍କି ନାମେଘି ଅଣ୍ଟା ଖ୍ରୀସ୍ତ୍ ବିଶ୍ୱାସୀ ଯୁୱାନ୍ କୁକ୍କସ୍ଗେ ଲେଖ୍ଚ୍କାଦାସ୍, ଏକାସ୍ କା ଏସିଆ ଦେଶ୍ନୁ ରାଲିୟାସ୍ ଆରୁ ତାଙ୍ଗ୍ୟଦ୍ ୟାହୁଦୀ ରାଚା ଆରୁ ତାମ୍ବାସ୍ ଗ୍ରୀକ୍ ରାଚାସ୍। ଯେତ୍କବାକେନ୍ ତିମଥିଉସ୍ ହାଦ୍ଦୁ ରାଚାସ୍ ହତ୍କବାକେନ୍ ତାଙ୍ଗ୍ୟଦ୍ ଆରୁ ତାଙ୍ଘା ଆଜ୍ଜିଦ୍ ତିମଥିଉସିନ୍ ପାଚ୍ଚା ନିୟମ୍ବନ୍ ଶିଖାବାଚ୍କାଚାର୍। ଯେତ୍କବାକେନ୍ ପାଉଲୁସ୍ ତାଙ୍ଘା ପହ୍ଲେ ସୁସାମାଚାର୍ ପ୍ରଚାର୍ କାମ୍ନା ନାଲ୍ଖୁନୁ ଲୁସ୍ତ୍ରା ସହର୍ଗେ କେର୍କାଚାସ୍। ହତ୍କବାକେନ୍ ତିମଥିଉସ୍କି ତାଙ୍ଗ୍ୟ ଆରୁ ତାଙ୍ଘା ଆଜ୍ଜିଦ୍ ବିଶ୍ୱାସୀ ମାନ୍ଚାର୍, ଆନ୍ତିନ୍ ତିମଥିଉସ୍ହି ବିଶ୍ୱାସୀ ମାନ୍ଚାସ୍। ଯେତ୍କବାକେନ୍ ପାଉଲୁସ୍ ଦୁସ୍ରାଥର୍ ଲୁସ୍ତ୍ରାଗେ କେରାସ୍ ତା ଆସ୍ ତିମଥିଉସ୍ସିନ୍ ତାଙ୍ଘାଗାନେ ପ୍ରଚାର୍ ନାଲ୍ଖୁ କାମସ୍ ବୁଲି ଚାଜ୍ଜିୟାସ୍। ପାଉଲୁସ୍ ଆରୁ ତିମଥିଉସ୍ ବହୁତ୍ ସାମାୟ ସାଙ୍ଗେନ୍ ବିତାବାଚାର୍ ଆରୁ ଆବ୍ଡ଼ାର୍ କେତ୍କ ଭିନେ-ଭିନେ ଆଡ୍ଡାନୁ କାଇକିରି ପ୍ରାଭୁ ଯୀଶୁସ୍କି ବାରେନୁ ପ୍ରଚାର୍ କାମାଲିଆର୍। ପାଉଲୁସ୍ ତିମଥିଉସ୍ସିନ୍ ଭିନେ-ଭିନେ ସହର୍ଗେ ବିଶ୍ୱାସୀ ଜାମାରିନ୍ ଉପ୍ଦେଶ୍ ଆରୁ ଉତ୍ସାହିତ୍ କାମାଗେ ତାଇୟାସ୍। ଯେତ୍କବାକେନ୍ ପାଉଲୁସ୍ ମାକିଦୁନିଆଁନୁ ରାଚାସ୍ ଆରୁ ତିମଥିଉସ୍ ଏଫିସୁସ୍ନୁ ରାଚାସ୍ ହତ୍କବାକେନ୍ ପାଉଲୁସ୍ ତିମଥିଉସ୍କେ ଇ ଚିଠିନ୍ ଲେଖ୍ଚ୍କାଚାସ୍। ପାଉଲୁସ୍ ଇ ଚିଠିନ୍ ୬୩ ଖ୍ରୀଷ୍ଟାଦ୍ଦ ୬୫ ଭିତ୍ରେ ଲେଖ୍ଚ୍କାଦାସ୍। ପାଉଲୁସ୍ ଇ ପହ୍ଲେ ଚିଠିନୁ ତିମଥିଉସ୍ସିନ୍ ବିଶ୍ୱାସୀ ଜାମାର୍ଘି ବାନେକିରି ଏରାହଜା କାମାଗେ ତେଙ୍କାଦାସ୍। ଏକା ଆଲାର୍ ଝୁଟ୍ଟୁ ଶିକ୍ଷା ଚିୟାଲ୍ନାଏ ଆବ୍ଡ଼ାର୍ଘି ଝୁଟ୍ଟୁ ଶିକ୍ଷାବନ୍ ବନ୍ଦ କାମ୍ତାଗେ ତିମଥିଉସ୍ସିନ୍ ସାଲାହ୍ ଚିଆ କେର୍କିଚି। ଆରୁ ମଣ୍ତ୍ଲୀନ୍ତା ଆଗୁୱା ଆରୁ ମଦେତ୍ କାମୁର୍ଗେ ଏସ୍କେ ମାନ୍ନା କାତ୍ଥା, ଇଦ୍ଘି ବାରେନୁ ସାଲାହ୍ ଚିଆ କେର୍କିଚି।
ଆରୁ ଆଖ୍ରୀନୁ ତିମଥିଉସ୍ସିନ୍ ବୁଝାବା କେର୍କିଚିକା ପ୍ରାଭୁ ଯୀଶୁ ଖ୍ରୀସ୍ତ୍କି ବାନେ ସେବକ୍ ଏସ୍କେ ମାନର୍।
ରୂପ୍-ରେଖା
ଯୋହାର୍ ୧:୧,୨
ମଣ୍ଡ୍ଲୀ ଆରୁ ମଣ୍ଡ୍ଲୀନ୍ତା ଆଗୁୱାର୍ଘି ବାରେ ନିର୍ଦ୍ଦେଶ୍ ୧:୩—୩:୧୬
ତିମଥିଉସ୍ସିନ୍ ତାଙ୍ଘା ନାଲ୍ଖୁଘି ବାରେ ନିର୍ଦ୍ଦେଶ୍ ୪:୧—୬:୨୧
1ପାଉଲୁସ୍ ତିମଥିଉସ୍ସିନ୍ ଯୋହାର୍ ତେଙ୍ଗାଲ୍ଦାସ୍
1ଏନ୍ ପାଉଲୁସ୍ ଯୀଶୁ ଖ୍ରୀସ୍ତ୍ସ୍କି ଅଣ୍ଟା ଖାସ୍ଚେଲାନ୍। ନାହ୍ମା ପାପ୍ତି ବାଛାବୁ ପାର୍ମେଶ୍ୱାର୍ସ୍ ଆରୁ ଯୀଶୁସ୍ ଖ୍ରୀସ୍ତ୍ ନେଖା ମିଆଁ ନାମ୍ ଭାର୍ଷା କାମ୍ଦାତ୍ ଏଙ୍ଗାନ୍ ହୁକୁମ୍ ଚିଚ୍କାନାଏ। 2ତିମଥିଉସ୍କି ନାମେନୁ ଏକାସ୍ କା ବିଶ୍ୱାସ୍ନୁ ଏଙ୍ଘା ହାଦ୍ଦୁସ୍ ଇ ଚିଠିନ୍ ଲେଖାଲ୍ଦାନ୍:
ଆରୁ ଏନ୍ ବିନ୍ତି କାମାଲ୍ଦାନ୍ କା ବାଙ୍ଗ୍ ପାର୍ମେଶ୍ୱାର୍ସ୍ ଆରୁ ନାହ୍ମା ପ୍ରାଭୁ ଖ୍ରୀସ୍ତ୍ ଯୀଶୁସ୍ ନିଙ୍ଗାଗେ କ୍ରିପା, ଦାୟା ଆରୁ ଶାନ୍ତି ଚିତେ ରର୍।
ଝୁଟ୍ଟୁ ଶିକ୍ଷା ଚିଉର୍ଘି ବିରୁଦ୍ଧ୍ ଚେତାବାନୀ
3ଏନ୍ ମାକିଦୁନିଆଁ ପ୍ରଦେଶ୍ କାନାବାକେନ୍ ନିଙ୍ଗାନ୍ ଏସ୍କେ ତେଙ୍କାଚ୍କାନ୍, ଆନ୍ନେନ୍ ଆରୁହି ତେଙ୍ଗାଲ୍ଦାନ୍ କା ନିନ୍ ଇଫିସୁସ୍ନୁ ରା ଆରୁ କେତ୍କ ଲୋକ୍ ଆଲାର୍ ଏକାର୍ କା ଝୁଟ୍ଟୁ ଶିକ୍ଷା ଚିନାଏ ଆବ୍ଡ଼ାରିନ୍ ତାହ୍ମା ଝୁଟ୍ଟୁ ଶିକ୍ଷାବନ୍ ବନ୍ଦ୍ କାମାଗେ ହୁକୁମ୍ ଚିଆ। 4ଆରୁ ମନ୍ ଗାଢ଼ଚ୍କା କାହାନୀ ଆରୁ ପୁର୍ଖାର୍ଘି ନାମେଘି ଲାମ୍ବାସୂଚୀ ବାରେନୁ ଧ୍ୟାନ୍ ଆମ୍କେ ଚିଆ, ଏକାଘି ଦ୍ୱାର୍ନୁ ଝାଗ୍ଡ଼ା ମାନିଦ୍ ଆରୁ ଇବ୍ଡ଼ା ଶିକ୍ଷାଗୁଠିଦ୍ ପାର୍ମେଶ୍ୱାର୍ସ୍ସିନ୍ ବିଶ୍ୱାସ୍ କାମ୍ନାନୁ ଆରୁ ତାଙ୍ଘା ଇଚ୍ଛା ଲେଖା ଚାଲ୍ରାଗେ ମଦେତ୍ ମା କାମିଦ୍, ଲେକିନ୍ ପ୍ରାଭୁସ୍କି ଶିକ୍ଷାଘି ବିରୁଦ୍ଧ୍ କାମିଦ୍ 5ଇ ହୁକୁମ୍ଘି ମତ୍ଲବ୍ ଇଦ୍ କା ଶୁଦ୍ଧ୍ ମନ୍, ବାନେ ସୋଚ୍ ଆରୁ ପାର୍ମେଶ୍ୱାର୍ସ୍ସିନ୍ ପୁରାପୁରୀ ବିଶ୍ୱାସ୍ କାମ୍ନାତି ବାନେ ହାଖ୍ଖନାଦ୍ ପ୍ରକଟ୍ ମାନିଦ୍। 6ଏକାର୍ ଝୁଟ୍ଟୁ ଶିକ୍ଷା ଚିନାଏ, ଆବ୍ଡ଼ାର୍ ସତ୍ତୁ ଶିକ୍ଷାବନ୍ ଆମ୍ବ୍ନାଏ ଚିନାଏ ଆରୁ ବେକାର୍ କାତ୍ଥାଗୁଠିନ୍ କାମିକିରି ବିଶ୍ୱାସ୍ତି ଦୁର୍ ମାନ୍ଚାର୍ କେର୍କାନାଏ। 7ଆରୁ ଆବ୍ଡ଼ାର୍ ପାର୍ମେଶ୍ୱାର୍ସ୍କି ନିୟମ୍ଘି ଗୁରୁ ମାନାଗେ ବେଦ୍ଦ୍ନାଏ, ଲେକିନ୍ ଏକା କାତ୍ଥାନ୍ ତେଙ୍ଗ୍ନାଏ ଆରୁ ଏକାନ୍ ଶକତ୍ ବିଶ୍ୱାସ୍ତି ଶିଖାବାନାଏ ଆବନ୍ ଆବ୍ଡ଼ାର୍ ନିଜେ ବୁଝ୍ରା ପଲ୍ଲଲ୍ନାଇନ୍।
8ନାମ୍ ଆହ୍ଦାତ୍ କା ପାର୍ମେଶ୍ୱାର୍ସ୍କି ନିୟମ୍ ବାନେଦ୍, ଯଦି ନାମ୍ ବାନେକିରି ଶିଖାବାଦାତ୍। 9ନାମ୍ ଇବନ୍ହି ଆହ୍ଦାତ୍ କା ପାର୍ମେଶ୍ୱାର୍ସ୍କି ନିୟମ୍ ଧର୍ମି ଆଲାର୍ଗେ ମାଲ୍ଲା, ଲେକିନ୍ ଏକା ଆଲାର୍ ସାହି ମା କାମ୍ନାଏ, ଏକା ଆଲାର୍ ପାର୍ମେଶ୍ୱାର୍ସ୍କି ନିୟମ୍ବନ୍ ମା ମାନ୍ନାଏ ଆରୁ ନିୟମ୍ଘି ବିରୁଦ୍ଧ କାମ୍ନାଏ, ନେଦ୍ ପାର୍ମେଶ୍ୱାର୍ସ୍କି ଆରାଧାନା ମା କାମ୍ନାଏ, ପାପୀ, ଆରୁ ଆବ୍ଡ଼ାର୍ଗେ ଏକାର୍ ଖାରାପ୍ ନାଲ୍ଖୁ କାମ୍ନାଏ ଆରୁ ପାର୍ମେଶ୍ୱାର୍ସ୍ଗାନେ ଏନ୍ଦେର୍ହି ସମ୍ୱନ୍ଧ ମା ଉଇନାଏ ଆରୁ ଏକାର୍ ନିଜର୍ ଆୟାଙ୍ଗ୍ ବାଙ୍ଗ୍ରିନ୍ ପିଟ୍ଟନାଏ ଆରୁ ଦୁସ୍ରାରିନ୍ହି ପିଟ୍ଟନାଏ। 10ଆରୁ ଏକାର୍ ବେଭିଚାର୍ କାମ୍ନାଏ, ଏକାର୍ ନିଜର୍ ଲେଖା ଦୁସ୍ରା ଆଲାର୍ ଗାନେ ଖାରାପ୍ ନାଲ୍ଖୁ କାମ୍ନାଏ, ଏକାର୍ ଚୋରି କାମିକିରି ଆଲାରିନ୍ ବିଶ୍ନାଏ, ଠାକୁୱାରିନ୍, ଝୁଟ୍ଟୁ କସମ୍ ମହୁଁରିନ୍ ଆରୁ ଇବନ୍ ଆମ୍ବିକିରି ଏକା ଆଲାର୍ ସତ୍ତୁ ଶିକ୍ଷାଘି ବିରୁଦ୍ଧ କାମ୍ନାଏ ଆବ୍ଡ଼ାର୍ଗେ ଇ ନିୟମ୍ ଠାହ୍ରା କେର୍କିଚି। 11ସୁସାମାଚାର୍ଘି ଅନୁସାର୍ ଏକା ସତ୍ତୁ ଶିକ୍ଷା ରାଇ ଆଦ୍ ପାର୍ମେଶ୍ୱାର୍ସ୍କି ମାହାନ୍ତାବନ୍ ବାତାବି, ଏକାସ୍କି କା ଆଲାର୍ ସ୍ତୁତି କାମ୍ନାଏ। ଆ ସୁସାମାଚାର୍ବନ୍ ଆଲାରିନ୍ ଶୁଣାବାଗେ ପାର୍ମେଶ୍ୱାର୍ସ୍ ଏଙ୍ଗାଗେ ଜିମେଦାରୀ ଚିଚ୍କାଦାସ୍।
ପାଉଲୁସ୍ ପାର୍ମେଶ୍ୱାର୍ସ୍କି ଦାୟାଘି ଲାଗାନ୍ ଧାନ୍ୟାବାଦ୍ ଚିଆଲ୍ଦାସ୍
12ଏନ୍ ନାହ୍ମା ପ୍ରାଭୁ ଖ୍ରୀସ୍ତ୍ ଯୀଶୁସିନ୍ ଧାନ୍ୟାବାଦ୍ ଚିଆଲ୍ଦାନ୍, ଏକାସ୍ କା ଏଙ୍ଗାନ୍ ସୁସାମାଚାର୍ ପ୍ରଚାର୍ କାମାଗେ ଶକ୍ତି ଚିଚ୍ଚକାଦାସ୍, ଏନ୍ଦେର୍ଗେକା ଆସ୍ ଏଙ୍ଗାନ୍ ବିଶ୍ୱାସ୍ଘି ଲାଇଗ୍ ସୋଚ୍ଚାସ୍ ଆରୁ ପାର୍ମେଶ୍ୱାର୍ସ୍କି ସେବା କାମାଗେ ଚାଜ୍ଜିୟାସ୍। 13ଏନ୍ ଯୀଶୁ ଖ୍ରୀସ୍ତ୍ସ୍ସିନ୍ ବିଶ୍ୱାସ୍ କାମ୍ନାଘି ଆଘ୍ଲି ପାର୍ମେଶ୍ୱାର୍ସ୍କି ନିନ୍ଦା କାମ୍ନାବାଲା ଆରୁ ବିଶ୍ୱାସୀ ଆଲାରିନ୍ ସାତାବାନାବାଲା, ଆଲାରିନ୍ ନୁକ୍ସାନ୍ କାମ୍ନାବାଲା ରାଚ୍କାନ୍, ହାଲେହି ପାର୍ମେଶ୍ୱାର୍ସ୍ ଏଙ୍ଘା ମିଆଁ ଦାୟା କାମ୍ଚାସ୍ ଏନ୍ଦେର୍ଗେକା ଏନ୍ ହୁବାକେନ୍ ଯୀଶୁ ଖ୍ରୀସ୍ତ୍ସିନ୍ ବାଲ୍କାଚ୍କାନ୍, ହୁଦ୍ଘିଲାଗାନ୍ ଏନ୍ ବାଲ୍କାଚ୍କାନ୍ କା ଏନ୍ ଭୁଲ୍ କାମାଲ୍ଦାନ୍। 14ନାହ୍ମା ପ୍ରାଭୁସ୍ ତାଙ୍ଘା କ୍ରିପା ଏଙ୍ଗାଗେ ଢେର୍ବାଗ୍ଗେ ଚିଚ୍ଚାସ୍ ତାକା ଏନ୍ ତାଙ୍ଘା ମିଆଁ ବିଶ୍ୱାସ୍ କାମନ୍ ଆରୁ ଦୁସ୍ରାରିନ୍ ବାନେ ହାଖ୍ଖା ଅଙ୍ଗନ୍ ଏନ୍ଦେର୍ଗେକା ଖ୍ରୀସ୍ତ୍ ଯୀଶୁସ୍ଗାନେ ଏଙ୍ଘାଏ ମଜ୍ବୁତ୍ ସମ୍ୱନ୍ଧ ରାଇଦ୍।
15ଇ କାତ୍ଥାଦ୍ ସତ୍ତୁଦ୍ ଆରୁ ବିଶ୍ୱାସ୍ କାମ୍ନାଘି ଲାଇଗ୍ ରାଇ କା, ଖ୍ରୀସ୍ତ୍ ଯୀଶୁସ୍ ପାପୀ ଜାମାରିନ୍ ପାପ୍ଘି ଦଣ୍ତ୍ସ୍ତି ବାଛାବାଗେ ଦୁନିଆଁନୁ ବାର୍ଚାସ୍ ଆରୁ ଏନ୍ ଜାମା ପାପୀ ଜାମାର୍ସ୍ତି ବାଗ୍ଗେ ପାପ୍ କାମ୍ଚ୍କାଦାନ୍। 16ହାଲେହି ପାର୍ମେଶ୍ୱାର୍ସ୍ ଏଙ୍ଗାନ୍ ଦାୟା କାମ୍ଚାସ୍ ଏନ୍ଦେର୍ଗେକା ଏଙ୍ଘା ଲେଖା ଜାମାର୍ଘିନ୍ତି ବାଡ଼୍କା ପାପୀସ୍କିନୁ ପାର୍ମେଶ୍ୱାର୍ସ୍ ତାଙ୍ଘାଏ ସାହ୍ନା ଶକ୍ତିବନ୍ ଏଦିୟାସ୍। ତାକା ଆଲାର୍ ଖ୍ରୀସ୍ତ୍ ଯୀଶୁକି ମିଆଁ ବିଶ୍ୱାସ୍ କାମର୍ ଆରୁ ସବୁଦିନ୍ତା ଜୀବନ୍ ହାଖ୍ଖର୍। ଆବ୍ଡ଼ାର୍ଘି ଲାଗାନ୍ ଏନ୍ ଅଣ୍ଟା ନମୁନା ମାନନ୍। 17ଆକ୍କୁନ୍ ଯୁଗ୍ଯୁଗ୍ ଶାସନ୍ କାମ୍ନାବାଲା ରାଜା, ଏକ୍ଲାହି ମା ଖିନାବାଲା, ନେକାନ୍ ନେଦ୍ହି ଏରା ପଲ୍ଲନାଇନ୍ ଅଣ୍ଟା ଖାଲି ପାର୍ମେଶ୍ୱାର୍ସ୍କି ମାଇନ୍ ଆରୁ ସ୍ତୁତି ଯୁଗ୍ଯୁଗ୍ ମାନ୍ନାଦ୍। ଆମେନ୍।
18ହେ ଏଙ୍ଘା ହାଦ୍ଦୁ ତିମଥିଉସ୍, ଆ ଭବିଷତ୍ କାତ୍ଥାଘି ଅନୁସାର୍ ଏକାଦ୍ କା ପହ୍ଲେନ୍ତି ନିଙ୍ଘା ବାରେନୁ ଭବିଷତ୍ କାତ୍ଥା କାମା କେର୍କିଚା, ଏନ୍ ନିଙ୍ଗାନ୍ ହୁକୁମ୍ ଚିଆଲ୍ଦାନ୍ କା ଏସ୍କେ ଅଣ୍ଟା ସିପାହୀସ୍ ଯୁଦ୍ଧନୁ ଜିତାଗେ ବାନେ ଲାଡ଼ାଇ ଲାଡ଼୍ଦାସ୍ ହନ୍ନେନ୍ ନିନ୍ହି ଏକାର୍ ଝୁଟ୍ଟୁ ଶିକ୍ଷା ଚିନାଏ ଆବ୍ଡ଼ାରିନ୍ ବିରୋଧ୍ କାମା। 19ଆରୁ ଲାଗାତାର୍ ବିଶ୍ୱାସ୍ କାମା ଆରୁ ସାଫା ମନ୍ବନ୍ ଧାରା ଉଇୟା, ଏନ୍ଦେର୍ଗେକା କେତ୍କ ଲୋକ୍ ଆଲାର୍ ପାର୍ମେଶ୍ୱାର୍ସ୍କି ବିଶ୍ୱାସ୍ସ୍ତି ଗେଚ୍ଛା ମାନ୍ଚାର୍ କେରାର୍ ଆବ୍ଡ଼ାର୍ଘି ବିଶ୍ୱାସ୍ ବେକାର୍ ମାନିକାଇ ଏସ୍କେ କା ଜାହାଜ୍ ମୁହ୍ଲିକାଇ ତା ଆଦ୍ ପୁରା-ପୁରି ନାଶ୍ ମାନିକାଇ। 20ଆବ୍ଡ଼ାର୍ଘି ଭିତର୍ନୁ ହୁମିନିୟୁସ୍ ଆରୁ ସିକାନ୍ଦାର୍ସ୍ ହି ରାନାଏ। ଏନ୍ ଇବ୍ଡ଼ାରିନ୍ ଶାଏତାନ୍ଗେ ସୋପଁଚେଇଚ୍କାଦାନ୍, ତାକା ଇବ୍ଡ଼ାର୍ ଶିଖରର୍କା ପାର୍ମେଶ୍ୱାର୍ସ୍କି ବିରୁଦ୍ଧ ନିନ୍ଦା ଆମ୍ବର୍ କାମା।
2ଆରାଧାନା କାମ୍ନାଘି ବାରେ ନୀତି ନିୟମ୍
1ଜାମାର୍ଘିନ୍ତି ପହ୍ଲେ ଏନ୍ ନିଙ୍ଗାନ୍ ଉପ୍ଦେଶ୍ ଚିଆଲ୍ଦାନ୍ କା ଯେତ୍କ ଆଲାର୍ଘି ଲାଗାନ୍ ଆର୍ଜୀବିନ୍ତି, ବିନ୍ତି କାମା ଆରୁ ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିଆ। 2ଆରୁ ରାଜା ଜାମାର୍ଘି ଲାଗାନ୍ ଆରୁ ଏକାର୍ ନିହ୍ମା ମିଆଁ ଶାସନ୍ କାମ୍ନାଏ ଆବ୍ଡ଼ାର୍ଘି ଲାଗାନ୍ହି ବିନ୍ତି କାମା ତାକା ପାର୍ମେଶ୍ୱାର୍ସ୍ ଆବ୍ଡ଼ାର୍ଗେ ନ୍ୟାୟତି ଶାସନ୍ କାମାଗେ ମଦେତ୍ କାମସ୍ ତାକା ନାମ୍ ଶାନ୍ତିନୁ ଆରୁ ସୁରକ୍ଷିତ୍ନୁ ଜୀବନ୍ ବିତାବତ୍ ଆରୁ ପାର୍ମେଶ୍ୱାର୍ସ୍କି ଆରାଧାନା କାମତ୍ ଆରୁ ପାର୍ମେଶ୍ୱାର୍ସ୍କି ଇଚ୍ଛା ଲେଖା ଉଜ୍ଜତ୍। 3ଯେତ୍କ ଆଲାର୍ଘି ଲାଗାନ୍ ବିନ୍ତି କାମ୍ନାଦ୍, ନାହ୍ମା ପାପ୍ଘି ଦଣ୍ତ୍ତି ବାଛାବୁ ପାର୍ମେଶ୍ୱାର୍ସ୍ଗେ ବାନେ ଲାଗ୍ଗିଦ୍ ଆରୁ ଆସ୍ ଖୁସ୍ ମାନ୍ଦାସ୍।
4ଆରୁ ଆସ୍ ଚାହଁଦାସ୍ କା ଜାମା ଆଲାର୍ ତାହ୍ମା ପାପ୍ତି ବାଛ୍ରର୍ ଆରୁ ଜାମା ଆଲାର୍ ପାର୍ମେଶ୍ୱାର୍ସ୍କି ସତ୍ତୁ ବଚନ୍ବନ୍ ବାନେକିରି ଆହର୍। 5ଏନ୍ଦେର୍ଗେକା ପାର୍ମେଶ୍ୱାର୍ସ୍ ଅଣ୍ଟା ଖାଲି ରାଦାସ୍ ଆରୁ ପାର୍ମେଶ୍ୱାର୍ ଆରୁ ଆଲାର୍ଘି ମାଝାନୁ ମେଲ୍-ମିଲାପ୍ କାମ୍ତାନା ବାଲାସ୍ ହି ଅଣ୍ଟା ଖାଲି ରାଦାସ୍, ଆସ୍ ଖ୍ରୀସ୍ତ୍ ଯୀଶୁସ୍ ଏକାସ୍ କା ଦୁନିଆଁନୁ ମୁନୁଷ୍ ରୂପ୍ନୁ ବାର୍ଚ୍କାଚାସ୍। 6ଏକାସ୍ କା ପାପୀ ଆଲାରିନ୍ ବାଛାବାଗେ ନିଜେନିନ୍ ଜୀବନ୍ ଚିଚ୍ଚାସ୍। ଖ୍ରୀସ୍ତ୍ ଯୀଶୁସ୍କି ମରନ୍ ସାମାୟ ପାର୍ମେଶ୍ୱାର୍ସ୍କି ଠାହ୍ରାଚ୍କା ଠିକ୍ ସାମାୟ ଆରୁ ଇ ସାମାୟନୁ ପାର୍ମେଶ୍ୱାର୍ସ୍ ସାକ୍ଷୀ ଚିଚ୍ଚାସ୍ କା ଆସ୍ ଆଲାରିନ୍ ବାଛାବାଗେ ବେଦ୍ଦାଲ୍ଦାସ୍। 7ହୁଦ୍ଘିଲାଗାନ୍ ଇ ସାକ୍ଷୀବନ୍ ପ୍ରଚାର୍ କାମାଗେ ପାର୍ମେଶ୍ୱାର୍ସ୍ ଏଙ୍ଗାନ୍ ପାର୍ଚାର୍ ଆରୁ ଖାସ୍ଚେଲା ଚାଜ୍ଜ୍କାଦାସ୍। (ଏନ୍ ଏକାନ୍ ତେଙ୍ଗାଲ୍ଦାନ୍ ଆଦ୍ ସତ୍ତୁଦ୍, ଏନ୍ ଝୁଟ୍ଟୁ ମାଲ୍ଲା ତେଙ୍ଗୁନ୍) ଆସ୍ ଏଙ୍ଗାନ୍ ବିନାୟାହୁଦୀର୍ଘି ମାଝାନୁ ପ୍ରଚାର୍ କାମାଗେ ଚାଜ୍ଜ୍କାଦାସ୍ ତାକା ଆଲାର୍ ପାର୍ମେଶ୍ୱାର୍ସ୍କି ସତ୍ତୁ ବଚନ୍ବନ୍ ବିଶ୍ୱାସ୍ କାମା ଅଙ୍ଗର୍।
8ହୁଦ୍ଘିଲାଗାନ୍ ଏନ୍ ଚାହାଁଲ୍ଦାନ୍ କା ଜାମା ଆଡ୍ଡାନୁ ନିମ୍ ଯେତ୍କବାକେନ୍ ଆରାଧାନା କାମର୍ ତା ମାର୍ଦ୍ନାର୍ ପାର୍ମେଶ୍ୱାର୍ସ୍କି ଇଚ୍ଛା ଲେଖା ଚାଲ୍ରା ଆରୁ ନେକାନ୍ହି ଖୀସ୍ ମା ଉଇୟିକିରି ଆରୁ ନେଖାଗାନେହି କାଁଟ୍ଛାଁଟ୍ ମା କାମିକିରି ଶୁଦ୍ଧ୍ ମନ୍ତି ପାବିତାର୍ ହେଖ୍ଖାବନ୍ ଟେକିକିରି ପାର୍ମେଶ୍ୱାର୍ସାନ୍ ବିନ୍ତି କାମା।
9ହନ୍ନେନ୍ ଯେତ୍କବାକେନ୍ ନିମ୍ ଜାମାର୍ ଆରାଧାନା କାମାଗେ ଠୁଡ଼ିୟା ରାଦାର୍ ତା ଏନ୍ ଚାହାଁଲ୍ଦାନ୍ କା ମାଏକିନିଆଁର୍ ତାହ୍ମା ଆତ୍ତନା ପୁନ୍ଦର୍ନାନୁ ସାଧାସିଧା ଏଥ୍ରର୍। ଜାମାର୍ଘି ପାତ୍ତାରାନା ଲେଖା ଚିଢ଼ା ଆତ୍ତର୍। ଆରୁ ଦୁସ୍ରାରିନ୍ ଏଦାଗେ ଚୁଟ୍ଟିଘି ବେନି ଚାହେ ସୋନା ଆରୁ ମୋତି ଆରୁ ଦାମିକା ଚିଢ଼ାତି ନିଜ୍କେନିଜ୍ ମା ସିଙ୍ଗରର୍। 10ଲେକିନ୍ ଆରାଧାନା କାମୁ ମାଏକିନିଆଁର୍ଗେ ବାନେ-ବାନେ ନାଲ୍ଖୁ କାମ୍ନା କାତ୍ଥା, ଏସ୍କେ କା ଦୁସ୍ରାର୍ଗେ ମଦେତ୍ ହାଖ୍ଖର।
11ବିଶ୍ୱାସୀ ମାଏକିନିଆଁର୍ ଏନ୍ଦେର୍ହି ପ୍ରଶ୍ନ ମା ମେନିକିରି ଶାନ୍ତିତି ମେନର୍ ଆରୁ ନେଦ୍ ଆବ୍ଡ଼ାରିନ୍ ଶିଖାବାନାଏ ଆବ୍ଡ଼ାର୍ଘି ମାଇନ୍ କାମର୍। 12ଏନ୍ ମା ଚାହଁଦାନ୍ କା ମାଏକିନିଆଁର୍ ଉପ୍ଦେଶ୍ ଚିଅର୍ ଆରୁ ମାର୍ଦ୍ନାର୍ଘି ମିଆଁ ହକ୍ ଯାତାବର୍, ଲେକିନ୍ ଚୁପ୍ଚାପ୍ ରାନା କାତ୍ଥା। 13ଏନ୍ଦେର୍ଗେକା ପାର୍ମେଶ୍ୱାର୍ସ୍ ପହ୍ଲେ ଆଦାମ୍ସିନ୍ ବାନାବାଚାସ୍ ଆରୁ ହୁଦ୍ଘିପାଛ୍ଲି ତାଙ୍ଘା ଆଲି ହେୱାବନ୍ ବାନାବାଚାସ୍। 14ଆରୁ ଆଦାମ୍ସ୍ ମାଲ୍ଲା ଫୁସ୍ଲାରୁସ୍, ଲେକିନ୍ ହେୱା ଫୁସ୍ଲାରାଚା ଆରୁ ପାର୍ମେଶ୍ୱାର୍ସ୍କି ନିୟମ୍ବନ୍ ତୋଡ଼ିୟା ଆରୁ ପାପ୍ କାମ୍ଚା। 15ହାଲେହି ମାଏକିନିଆଁର୍ ହାଦ୍ଦୁ ଜନମ୍ କାମିକିରି ବାଛ୍ରା ଅଙ୍ଗର୍, ଯଦି ଆବ୍ଡ଼ାର୍ ପାର୍ମେଶ୍ୱାର୍ସ୍କି ମିଆଁ ବିଶ୍ୱାସ୍ କାମ୍ତେ ରର୍, ଏକ୍ ଦୁସ୍ରାରିନ୍ ବାନେ ହାଖ୍ଖତେ ରର୍, ଆରୁ ପାର୍ମେଶ୍ୱାର୍ସ୍କି ଇଚ୍ଛା ଲେଖା ଚାଲ୍ର୍ତେ ରର୍ ଆରୁ ଦୁସ୍ରାର୍ଗାନେ ବାନେ ବେଭାର୍ କାମ୍ତେ ରର୍।
3ମଣ୍ତ୍ଲୀନ୍ତା ଆଗୁୱା
1ଇ କାତ୍ଥାଦ୍ ସତ୍ତୁଦ୍ କା ଯଦି ନେଦିନ୍ ମଣ୍ଡ୍ଲୀନ୍ତା ଆଗୁୱା ମାନା ବେଦ୍ଦସ୍ ତା, ଆସ୍ ବାନେ ନାଲ୍ଖୁ କାମାଗେ ଇଚ୍ଛା କାମ୍ନା କାତ୍ଥା। 2ମଣ୍ଡ୍ଲୀନ୍ତା ଆଗୁୱାସ୍ଗେ ଏନ୍ନେ ଜୀବନ୍ ବିତାବାନା କାତ୍ଥା କା ନେଦ୍ହି ଆସ୍କି ନିନ୍ଦା ମା କାମର୍ ଆରୁ୩:୨ ଆସ୍ ତାଙ୍ଘା ଆଲିଗାନେ ବିଶ୍ୱସ୍ତ ରାନା କାତ୍ଥା ଆସ୍କି ଅଣ୍ଟା ଖାଲି ମାଏକିନିଆଁ ରାନା କାତ୍ଥା, ଆସ୍ ନିଜ୍କେ କାବୁନୁ ଉଇନାବାଲା, ଆଲାର୍ ଗାନେ ବାନେ ବେଭାର୍ କାମ୍ନାବାଲା, ନେକାନ୍ ଆଲାର୍ ଆଦର୍ କାମ୍ନାଏ ଆନ୍ନେ ମାନ୍ନା କାତ୍ଥା ଆରୁ ଖୁସୀତି ମାଇନ୍ କାମ୍ନାବାଲା, ଆରୁ ଶିଖାବାନାଘି ଗୁଣ୍ ରାନା କାତ୍ଥା। 3ଆସ୍ ମାତୁୱାଡ଼୍, ଚାହେ ମାର୍ପିଟ୍ କାମ୍ନାବାଲା ମା ମାନ୍ନା କାତ୍ଥା; ଲେକିନ୍ ନରମ୍ ମାନ୍ନା କାତ୍ଥା, ଆରୁ କାତ୍ଥାନୁ ଝାଗ୍ଡ଼ା କାମ୍ନାବାଲା ଆରୁ ଧନ୍ସମ୍ପତ୍ତିଘି ମିଆଁ ଲୋଭ୍ଲାଲଚ୍ କାମ୍ନାବାଲା ମା ମାନ୍ନା କାତ୍ଥା। 4ନିଜର୍ ଆଡ଼୍ପାନ୍ତା ଆଲାରିନ୍ ବାନେକିରି ସାମ୍ଭଡ଼ାଲ୍କାରସ୍ ଆରୁ ନିଜର୍ ହାଦ୍ଦୁବଚ୍ଚରିନ୍ ନିଜର୍ ଅଧିନ୍ନୁ ଉଇୟାଲ୍କାରସ୍ ଆରୁ ହାଦ୍ଦୁ-ବଚ୍ଚର୍ ଆସ୍କି ମାଇନ୍ କାମାଲ୍କାରର୍। 5ଯଦି ନେଦିନ୍ ନିଜର୍ ଆଡ଼୍ପାନ୍ତା ଆଲାରିନ୍ ବାନେକିରି ମା ସାମ୍ଭଡ଼ାଲ୍କାରସ୍ ତା, ପାର୍ମେଶ୍ୱାର୍ସ୍କି ମିଆଁ ବିଶ୍ୱାସ୍ କାମୁ ଆଲାରିନ୍ ଏସ୍କେ ସାମ୍ଭଡ଼ସ୍? 6ଆସ୍ ପୁନା ବିଶ୍ୱାସୀ ମା ମାନ୍ନା କାତ୍ଥା, ଏକାସାନ୍ ଏନ୍ନେ ମା ମାନ୍ନାଦ୍ କା ଆସ୍ ବଡ଼୍ପଣି ଏଦ୍ରସ୍ ଆରୁ ଶାଏତାନ୍ଗେ ଏସ୍କେ ଦଣ୍ଡ୍ ଚିଆ କେର୍କିଚା ଆନ୍ନେନ୍ ଦଣ୍ଡ୍ ଆସ୍ଗେ ଚିଆକୋ। 7ଆରୁ ଆସିନ୍ ଅବିଶ୍ୱାସୀ ଆଲାର୍ ମାଇନ୍ କାମ୍ନା କାତ୍ଥା କା ଏକାସାନ୍ ଏନ୍ନେ ମା ମାନ୍ନାଦ୍ କା ନିନ୍ଦା ମାନିକିରି, ଏସ୍କେ ଅଣ୍ଟା ପଶୁ, ଶିକାର୍ କାମୁ ଆଲାର୍ଘି ଫାନ୍ଦାନୁ ଫାସ୍ରି କାଇ ଆରୁ ଉର୍ଖା ପଲ୍ଲୀ ଆନ୍ନେନ୍ ଆସ୍ହି ଶାଏତାନ୍ଘି ହେଖ୍ଖାନୁ ମା ଫାସ୍ରସ୍।
ମଣ୍ଡ୍ଲୀନ୍ତା ସେବକ୍ସ୍ ଏସ୍କେ ମାନ୍ନା କାତ୍ଥା
8ହନ୍ନେନ୍ ମଣ୍ଡ୍ଲୀନ୍ତା ସେବକ୍ ଜାମାର୍ଗେହି, ନେକାନ୍ ଆଲାର୍ ମାଇନ୍ କାମ୍ନାଏ ଆନ୍ନେ ମାନ୍ନା କାତ୍ଥା, ନେଦ୍ ଆଘ୍ଲି ଅଣ୍ଟା କାତ୍ଥା ତେଙ୍ଗ୍ଦାସ୍ ଆରୁ ପାଛ୍ଲି ଅଣ୍ଟା ଦୁସ୍ରା କାତ୍ଥା ତେଙ୍ଗ୍ଦାସ୍ ହନ୍ନେ ମା ମାନ୍ନା କାତ୍ଥା। ଆରୁ ମାତୁୱାଡ଼୍ ଆରୁ ଲାଲଚ୍ କାମିକିରି ପାଏସା କାମାବାନା ବାଲା ମା ମାନ୍ନା କାତ୍ଥା; 9ଲେକିନ୍ ବିଶ୍ୱାସ୍ଘି ବାରେନୁ ଏକା ସତ୍ତୁ ବଚନ୍ ପାର୍ମେଶ୍ୱାର୍ସ୍ ପ୍ରକଟ୍ କାମ୍ଚ୍କାଦାସ୍ ଆବନ୍ ଶୁଦ୍ଧ୍ ମନ୍ତି ଧାରିକିରି ଉଇନା କାତ୍ଥା। 10ଆରୁ ମଣ୍ଡ୍ଲୀନ୍ତା ସେବକ୍ ଜାମାରିନ୍ ସେବକ୍ ମାନ୍ନାଘି ଆଘ୍ଲି ଯାଞ୍ଚ୍ କାମ୍ନା କାତ୍ଥା ଆରୁ ଯଦି ଆବ୍ଡ଼ାର୍ ନିର୍ଦ୍ଦୋଷ୍ ରର୍ତା ଆବ୍ଡ଼ାର୍ ମଣ୍ଡ୍ଲୀନ୍ତା ସେବକ୍ ମାନର୍।
11ଏନ୍ନେନ୍ ସେବକ୍ ଜାମାର୍ଘି ଆଲିର୍ଗେହି ଏନ୍ନେ ଜୀବନ୍ ବିତାବାନା କାତ୍ଥା କା ଆଲାର୍ ଆଦ୍ଘି ମାଇନ୍ କାମର୍; ନେଖା ମିଆଁହି ଦୋଷ୍ ମା ଲାଗାବାନା କାତ୍ଥା ଲେକିନ୍ ଜାମାର୍ଗାନେ ବାନେ ବେଭାର୍ କାମ୍ନା କାତ୍ଥା ଆରୁ ଜାମା ବାରେନୁ ବିଶ୍ୱାସ୍ କାମ୍ନାଘି ଲାଇଗ୍ ରାନା କାତ୍ଥା।
12ମଣ୍ତ୍ଲୀନ୍ତା ସେବକ୍ସ୍ ଅଣ୍ଟା ଖାଲି ଆଲିନ୍ ବେଞ୍ଜର୍ନା କାତ୍ଥା ଆରୁ ହାଦ୍ଦୁବଚ୍ଚ ଆରୁ ନିଜର୍ ପରିବାର୍ତା ଆଲାରିନ୍ ବାନେକିରି ସାମ୍ଭଡ଼ାଗେ ଆହାଲ୍କାରସ୍। 13ଏନ୍ଦେର୍ଗେକା ଏକାର୍ ବାନେକିରି ସେବକ୍ ନାଲ୍ଖୁ କାମ୍ନାଏ, ଆବ୍ଡ଼ାରିନ୍ ଆଲାର୍ ମାଇନ୍ କାମ୍ନାଏ ଆରୁ ଖ୍ରୀସ୍ତ୍ ଯୀଶୁକି ମିଆଁ ଏକା ବିଶ୍ୱାସ୍ ଆସ୍ ଉଇକାଦାସ୍ ଆ ବିଶ୍ୱାସ୍ବନ୍ ଦୁସ୍ରାରିନ୍ ବାତାବାଗେ ଆସ୍କେ ବହୁତ୍ ସାହସ୍ ହାଖ୍ଖରଦ୍।
ପାର୍ମେଶ୍ୱାର୍ସ୍କି ଭେଦ୍ଦୁ
14ଏନ୍ ଚାଁଣେ ନିଙ୍ଘାସାନ୍ ବାରାଗେ ଇଚ୍ଛା କାମାଲ୍ଦାନ୍ ହାଲେହି ଇ ଚିଠିନ୍ ଲେଖାଲ୍ଦାନ୍। 15ଏନ୍ଦେର୍ଗେକା ଯଦି ଏଙ୍ଘା ବାର୍ନା ଡେରି ମାନତା ନିଙ୍ଗାଗେ ଆହ୍ନା କାତ୍ଥା କା ପାର୍ମେଶ୍ୱାର୍ସ୍କି ମଣ୍ଡ୍ଲୀନ୍ତା ଆଲାର୍ ଏସ୍କେ ଚାଲ୍ର୍ନା କାତ୍ଥା, ଏକା ମଣ୍ଡ୍ଲୀଦ୍ କା ଜୀବିତ୍ ପାର୍ମେଶ୍ୱାର୍ସ୍କିଦ୍ ଆରୁ ଜାମା ବିଶ୍ୱାସୀର୍ ସୁସାମାଚାର୍ଘି ସତ୍ତୁଘି ଖୁଟା ଆରୁ ନାହିଗାଡ୍ଡି ଲେଖା ରାନାଏ। ଏସ୍କେ ଖୁଟା ଆରୁ ନାହିଗାଡ୍ଡି ଆଡ଼୍ପାନ୍ ସାହାରା ଆରୁ ଶକ୍ତି ଚିଦ୍, ହନ୍ନେନ୍ ମଣ୍ଡ୍ଲୀନ୍ତା ବିଶ୍ୱାସୀ ଆଲାର୍ ତାହ୍ମା ଜୀବନ୍ ଦ୍ୱାର୍ନୁ ଦୁସ୍ରା ଆଲାର୍ସାନ୍ ସୁସାମାଚାର୍ଘି ସତ୍ତୁବନ୍ ପ୍ରକଟ୍ କାମ୍ଚାର୍। 16ନାମ୍ ଏକା ସୁସାମାଚାର୍ବନ୍ ବିଶ୍ୱାସ୍ କାମ୍ଦାତ୍ ଆଦ୍ଘି ସତ୍ତୁଘି ଭେଦ୍ଦୁଦ୍ ବହୁତ୍ ବାଡ଼୍କା ରାଇଦ୍, ଇନ୍ନୁ ଏନ୍ଦେର୍ହି ସନ୍ଦେହ୍ ମାଲ୍ଲାଦିନ୍। ଆ ସତ୍ତୁଦ୍ ଏନ୍ନେ ରାଇ କା: ଯୀଶୁ ଖ୍ରୀସ୍ତ୍ସ୍ ମୁନୁଷ୍କି ରୂପ୍ନୁ ଜନମ୍ ମାନ୍ଚାସ୍ ଆରୁ ପାବିତାର୍ ଆତ୍ମାଦ୍ ଆସିନ୍ ଧାର୍ମି ଠାହ୍ରାଚା, ସର୍ଗ୍ ଦୂଁତ୍ଜାମାର୍ ଯୀଶୁସିନ୍ ଏରିୟାର୍, ଆରୁ ଆସ୍କି ବାରେନୁ ଦୁସ୍ରା ଜାତିୟାର୍ସାନ୍ ପ୍ରଚାର୍ କାମାକେରା ଆରୁ ଦୁନିଆଁନ୍ତା ଆଲାର୍ ଆସ୍କି ମିଆଁ ବିଶ୍ୱାସ୍ କାମ୍ଚାର୍, ଆରୁ ପାର୍ମେଶ୍ୱାର୍ସ୍ ବହୁତ୍ ଆଦର୍ ସମ୍ମାନ୍ତି ଆସିନ୍ ସର୍ଗ୍ଗେ ଅଚ୍ଚାସ୍ କେରାସ୍।
4ଝୁଟ୍ଟୁ ଶିକ୍ଷା ଚିୟୁରସ୍ତି ସାବ୍ଧାନ୍ ରା
1ପାବିତାର୍ ଆତ୍ମା ସାଫା-ସାଫା ତେଙ୍ଗି କା ଯୀଶୁ ଖ୍ରୀସ୍ତ୍ସ୍କି ଆରୁଅହନ୍ ବାର୍ନାଘି ଆଘ୍ଲି କେତ୍କ ଆଲାର୍ ପାର୍ମେଶ୍ୱାର୍ସ୍କି ସତ୍ତୁ ଶିକ୍ଷାବନ୍ ବିଶ୍ୱାସ୍ କାମାଗେ ଆମ୍ବର୍ଚର୍ ଆରୁ ଭାଟ୍କାନାବାଲା ଖାରାପ୍ ଆତ୍ମାଘି ଫୁସ୍ଲାନାନୁ ବାରିକିରି ଝୁଟ୍ଟୁ ଶିକ୍ଷାବନ୍ ବିଶ୍ୱାସ୍ କାମାଗେ ଲାଗ୍ଗର୍। ଏକାନ୍ କା ଭୁତ୍ତୁ ଆଲାର୍ସ୍ତି କାମ୍ତା ବେଦ୍ଦିଦ୍। 2ଇଦ୍ ଆ ଝୁଟ୍ଟୁ ଶିକ୍ଷା ଚିଉର୍ଘି ଚାଲ୍ବାଜିଘି ଲାଗାନ୍ ମାନୋ, ଏସ୍କେ କା ନେଖା ଅକଲ୍ବନ୍ ଗରମ୍ କାମ୍ଚ୍କା ପାନ୍ନାତି ଦାଗା କେର୍କିଚି। 3ଏକାର୍ ଝୁଟ୍ଟୁ ଶିକ୍ଷା ଚିଉର୍ ଆଲାର୍ ବେଞ୍ଜରାଗେ ମାନା କାମର୍, ଆରୁ ମହଁନା ଜିନିଷ୍ଘି ଭିତ୍ରୁ କେତ୍କ ଜିନିଷ୍ବନ୍ ମହାଁଗେ ମାନା କାମର୍। ଏକାବନ୍ ପାର୍ମେଶ୍ୱାର୍ସ୍ ଇଦ୍ଘିଲାଗାନ୍ ସିର୍ଜାଚାସ୍ କା ବିଶ୍ୱାସ୍ କାମୁର୍ ଆରୁ ସତ୍ତୁବନ୍ ଆହ୍ନାବାଲାର୍ ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିଇକିରି ମହଁର୍। 4ଏନ୍ଦେର୍ଗେକା ପାର୍ମେଶ୍ୱାର୍ସ୍ ଏକାନ୍ କାମ୍ଚ୍କାଦାସ୍ ଆଦ୍ ଜାମାଦ୍ ବାନେଦ୍, ଏକାଦ୍ହି ଗ୍ରହନ୍ କାମ୍ନାଘି ଲାଇଗ୍ ମାଲ୍ଲିଦ୍; ଲେକିନ୍ ଆବନ୍ ଧାନ୍ୟାବାଦ୍ ଚିଇକିରି ମହଁନା କାତ୍ଥା। 5ଏନ୍ଦେର୍ଗେକା ପାର୍ମେଶ୍ୱାର୍ସ୍କି ବଚନ୍ ଚାହେ ବିନ୍ତିଘି ଦ୍ୱାର୍ନୁ ଶୁଦ୍ଧ୍ କାମାକାଇ।
ଖ୍ରୀସ୍ତ୍ ଯୀଶୁସ୍କି ବାନେ ସେବକ୍ ମାନା
6ଏନ୍ ନିଙ୍ଗାଗେ ଏକା ହୁକୁମ୍ ଚିଚ୍କାଦାନ୍ ଆବନ୍ ଯେତ୍କ ବିଶ୍ୱାସୀରିନ୍ ଶିଖାବା ତା ନିନ୍ ଖ୍ରୀସ୍ତ୍ ଯୀଶୁସ୍କି ବାନେ ସେବକ୍ ମାନୟ ଆରୁ ବିଶ୍ୱାସ୍ ଆରୁ ପାର୍ମେଶ୍ୱାର୍ସ୍କି ସତ୍ତୁ ବଚନ୍ବନ୍ ଶିଖାବା, ଏକାନ୍ ନିନ୍ ମାନ୍ତେ ବାରାଲ୍ଦାଏ ତାକା ନିଙ୍ଘାଏ ବିଶ୍ୱାସ୍ ବାଢ଼୍ରଦ୍। 7ଲେକିନ୍ ମନ୍ ଗାଢ଼ଚ୍କା କାହାନୀ ଏକାଦ୍ କା ସତ୍ତୁ ମାଲ୍ଲିଦ୍ ଆରୁ ଏକାନ୍ କା ଆଘ୍ଲିନ୍ତା ଆଲାର୍ ତେଙ୍ଗାଲିୟାର୍, ଆସ୍ତି ଦୁର୍ ରା; ଆରୁ ନିନ୍ ଲାଗାତାର୍ ପାର୍ମେଶ୍ୱାର୍ସ୍କି ହୁକୁମ୍ବନ୍ ମାନ୍ତେ ରା। 8ଏନ୍ଦେର୍ଗେକା ଶରୀର୍ତା ବ୍ୟାୟାମ୍ତି କାଟେକେନ୍ ଫାଏଦା ମାନିଦ୍, ଲେକିନ୍ ପାର୍ମେଶ୍ୱାର୍ସ୍କି ସେବା ଜାମାତାର୍ତି ଫାଏଦାଦ୍, ଏନ୍ଦେର୍ଗେକା ଇ ସେବାଦ୍ ପ୍ରତିଜ୍ଞା କାମିଦ୍ କା ନାହ୍ମାଏ ଇ ସାମାୟ ଆରୁ ବାର୍ନାବାଲା ଜୀବନ୍ଗେ ହି ଫାଏଦା ମାନିଦ୍।
9ଇ କାତ୍ଥାଦ୍ ସତ୍ତୁଦ୍ ଆରୁ ଜାମାତାର୍ତି ଗ୍ରହନ୍ କାମ୍ନାଘି ଲାଇଗ୍ ରାଇ। 10ଏନ୍ଦେର୍ଗେକା ନାମ୍ କଠିନ୍ ମେହ୍ନତ୍ ଆରୁ କଷଟ୍ ଇଦ୍ଘିଲାଗାନ୍ କାମ୍ଦାତ୍ କା ନାହ୍ମା ଭାର୍ଷା ଆ ଉଜ୍ଜୁ ପାର୍ମେଶ୍ୱାର୍ସ୍କି ମିଆଁ ରାଇ, ଏକାସ୍ ଜାମା ଆଲାରିନ୍ ବିଶେଷ୍କିରି ବିଶ୍ୱାସୀ ଜାମାରିନ୍ ବାଛାବାଦାସ୍।
11ଏନ୍ ଏକା କାତ୍ଥାନ୍ ନିଙ୍ଗାଗେ ଲେଖ୍ଚ୍କାଦାନ୍ ଆବନ୍ ଜାମା ବିଶ୍ୱାସୀରିନ୍ ହୁକୁମ୍ ଚିଆ ଆରୁ ଶିଖାବା। 12ନେଦ୍ହି ନିଙ୍ଗାନ୍ ତୁଚ୍ଛ ମା କାମର୍ ଏନ୍ଦେର୍ଗେକା ନିନ୍ ଯୁୱାନ୍ ରାଦାଏ; ହୁଦ୍ଘିଲାଗାନ୍ ନିନ୍ ନିଙ୍ଘା କାତ୍ଥା ବାର୍ତ୍ତାନୁ, ଚାଲିଚଲନ୍ନୁ, ଏକ୍ ଦୁସ୍ରାରିନ୍ ବାନେ ହାଖ୍ଖନାନୁ, ବିଶ୍ୱାସ୍ନୁ, ଜାମା ପ୍ରକାର୍ଘି ପାପ୍ତି ଗେଚ୍ଛା ରାଇକିରି ବିଶ୍ୱାସୀ ଜାମାର୍ଘି ଲାଗାନ୍ ଅଣ୍ଟା ନମୁନା ମାନା। 13ଯେତ୍କବାକେନ୍ତକ୍ ଏନ୍ ନିଙ୍ଘାସାନ୍ ମା ବାରନ୍, ହତ୍କତକ୍ ଜାମା ବିଶ୍ୱାସୀର୍ ପାର୍ମେଶ୍ୱାର୍ସ୍କି ଆରାଧାନା କାମର୍ ତା, ନିନ୍ ପାର୍ମେଶ୍ୱାର୍ସ୍କି ବଚନ୍ ଜୋର୍ସେ ପାଢ଼ୟ, ପାର୍ମେଶ୍ୱାର୍ସ୍କି ବଚନ୍ଘି ଉପ୍ଦେଶ୍ ଚିଅୟ ଆରୁ ଆଦ୍ଘି ମତ୍ଲବ୍ବନ୍ ସାଫାସାଫା ବୁଝାବାନାନୁ ଲାକ୍କା ରୟ। 14ହେ ତିମଥିଉସ୍ ପାର୍ମେଶ୍ୱାର୍ସ୍ ନିଙ୍ଗାଗେ ଏକା ବାର୍ଦାନ୍ ଚିଚ୍କାଦାସ୍ ଆଦ୍ଘି ଲାପାର୍ହ୍ୱା ଆମ୍କେ କାମା, ଏକାଦ୍ କା ନିଙ୍ଗାଗେ ଯେତ୍କବାକେନ୍ ଭବିଷତ୍ କାତ୍ଥା କାମୁର୍ ନିଙ୍ଘା ବାରେନୁ ମଣ୍ଡ୍ଲୀନ୍ତା ଆଗୁୱାରୀନ୍ ତେଙ୍ଗିୟାର୍ ଆଙ୍ଗେନ୍ ଆବ୍ଡ଼ାର୍ ନିଙ୍ଘା ମିଆଁ ହେଖ୍ଖା ଉଇୟିକିରି ବିନ୍ତି କାମ୍ଚ୍କାଚାର୍ ହତ୍କବାକେନ୍ ନିଙ୍ଗାଗେ ହାଖ୍ଖର୍କିଚା।
15ଏନ୍ ଏକାନ୍ ନିଙ୍ଗାନ୍ ତେଙ୍କାଦାନ୍ ଆ ସେବାନ୍ କାମାଗେ ନିଜ୍କେନିଜ୍ ପୁରାପୁରୀ ସୋଁପାଚା, ତାକା ଖ୍ରୀସ୍ତ୍ସ୍କି ସେବକ୍ ଲେଖା ନିଙ୍ଘା ପ୍ରଚାର୍ କାମ୍ନା ଆରୁ ଶିଖାବାନାଘି ଶକ୍ତିଘି ଉନ୍ନତିଘି ବାରେନୁ ଯେତ୍କର୍ ଆହାଅଙ୍ଗର୍। 16ନିଙ୍ଘା ଜୀବନ୍ ଆରୁ ନିନ୍ ଏକାନ୍ ଶିଖାବାଲ୍ଦାଏ, ଆଦ୍ଘି ବାରେନୁ ସାବ୍ଧାନ୍ ରା, ଏକା ହୁକୁମ୍ ଏନ୍ ନିଙ୍ଗାନ୍ ତେଙ୍କାଦାନ୍ ଆବନ୍ ଲାଗାତାର୍ କାମ୍ତେ ରା, ଏନ୍ନେ କାମୟ ହାଲେ ନିନ୍ ନିଜ୍କେନିଜ୍ ତା ବାଛାବୟ ଆରୁ ନେଦ୍ ପାର୍ମେଶ୍ୱାର୍ସ୍କି ବଚନ୍ ନିଙ୍ଘାସ୍ତି ମେନର୍ ଆବ୍ଡ଼ାର୍ହି ମୁକ୍ତି ହାଖ୍ଖର୍।
5ମଣ୍ତ୍ଲୀନ୍ତା ଆଲାର୍ଘି ପ୍ରତି ଜିମେଦାରୀ
1ହେ ତିମଥିଉସ୍ ନିଙ୍ଘାସ୍ତି ନେଦ୍ ବାଡ଼୍କାର୍ ଆବ୍ଡ଼ାରିନ୍ ଜୋର୍ସେ ଚିର୍ରା ରାଇକିରି ଆମ୍କେ ତେଙ୍ଗା, ଲେକିନ୍ ଆବ୍ଡ଼ାର୍ରିନ୍ ନିଜର୍ ବୁଆସ୍ ଲେଖା ସୋଚିକିରି ବୁଝାବା ଆରୁ ନିଙ୍ଘାସ୍ତି ଛୋଟେରିନ୍ ଭାଇ ଲେଖା ସୋଚିକିରି ବୁଝାବା। 2ନିଙ୍ଘାସ୍ତି ଏକାର୍ ବାଡ଼୍କାର୍ ଆବ୍ଡ଼ା ମାଏକିନିଆଁ ଜାମାରିନ୍ ନିଜର୍ ଆୟାଙ୍ଗ୍ ଲେଖା ସୋଚିକିରି ବୁଝାବା ଆରୁ ନିଙ୍ଘାସ୍ତି ନେଦ୍ ଛୋଟେର୍ ଆବ୍ଡ଼ା ମାଏକିନିଆଁରିନ୍ ମନ୍ନୁ ଏନ୍ଦେର୍ହି ଖାରାପ୍ ସୋଚ୍ ମା ଉଇକିରି ବୁହୁଣୀର୍ ଲେଖା ବୁଝାବା।
3ବେସାହାରା ରାଣ୍ଡି ମାଏକିନିଆଁରିନ୍ ମଦେତ୍ କାମା। 4ଯଦି ଏକିନ୍ ରାଣ୍ଡି ମାଏକିନିଆଁଘି ହାଦ୍ଦୁବଚ୍ଚ ଚାହେ ନାତ୍ତି ପୁତ୍ତି ରର୍, ତା ଆବ୍ଡ଼ାର୍ ପହ୍ଲେ ନିଜର୍ ଆଡ଼୍ପାନ୍ତାର୍ ଗାନେ ଏନ୍ନେ ବେଭାର୍ କାମର୍ କା ଆବ୍ଡ଼ାର୍ ପାର୍ମେଶ୍ୱାର୍ସ୍ସିନ୍ ଭକ୍ତି କାମାଲ୍ନାଏ ଆରୁ ନିଜର୍ ଆୟାଙ୍ଗ୍ ବାଙ୍ଗ୍ର୍ ହାଦ୍ଦୁରିନ୍ ବାନେକିରି ଲାଲନ୍ପାଲନ୍ କାମ୍ଚାର୍, ହାଦ୍ଦୁର୍ ହି ଏନ୍ନେ କାମ୍ନାଘି ବାରେନୁ ଶିଖ୍ରା ଏନ୍ଦେର୍ଗେକା ଇଦ୍ ପାର୍ମେଶ୍ୱାର୍ସ୍କେ ବାନେ ଲାଗ୍ଗଦ୍। 5ଏକାଦ୍ ବେସାହାରା ରାଣ୍ଡି ଆରୁ ଆଦ୍ଘି ଏରାହଜା କାମାଗେ ନେଦ୍ହି ମାଲ୍କାରିନ୍, ଆଦ୍ ପାର୍ମେଶ୍ୱାର୍ସ୍କି ମିଆଁ ଭାର୍ଷା ଉଇୟିକିରି, ଉଲ୍ଲାନ୍ ମାଁହାନ୍ ମଦେତ୍ଘି ଲାଗାନ୍ ବିନ୍ତି କାମ୍ତେ ରାଇ କା ତାଙ୍ଗାଗେ ମଦେତ୍ ହାଖ୍ଖର୍ନା କାତ୍ଥା। 6ଲେକିନ୍ ଏକା ବିଧ୍ବାଦ୍ ମଉଜ୍ମଜ୍ଲିସ୍ଘି ଲାଗାନ୍ନିନ୍ ଉଜ୍ଜିଦ୍, ତା ଆଦ୍ ଶରୀର୍ତି ଉଜ୍ଜିଦ୍, ଲେକିନ୍ ଆତ୍ମାତି କେଚ୍ଚା କେର୍କିଚି। 7ଇବ୍ଡ଼ା ଜାମା କାତ୍ଥାଘି ବାରେନୁ ବିଶ୍ୱାସୀ ଆଲାରିନ୍ ହୁକୁମ୍ ଚିଆ ଆରୁ ଶିଖାବାତେ ରା ତାକା ଆବ୍ଡ଼ାର୍ଘି ମିଆଁ ନେଦ୍ହି ଦୋଷ୍ ମା ଲାଗାବର୍। 8ଲେକିନ୍ ଯଦି ନେଦିନ୍ ନିଜର୍ ରିସ୍ତେଦାର୍ ବିଶେଷ୍କିରି ନିଜର୍ ଆଡ଼୍ପାନ୍ତା ଆଲାରିନ୍ ଏରାହଜା ମା କାମସ୍ତା, ଆସ୍ ବିଶ୍ୱାସ୍ତି ଭାଟ୍କାରାଚାସ୍ କେର୍କାଦାସ୍ ଆରୁ ଅବିଶ୍ୱାସୀର୍ସ୍ତି ହି ଖାରାପ୍ ମାନ୍ଚାସ୍ କେର୍କାଦାସ୍।
9-10ଏକା ରାଣ୍ଡିଘି ଷାଠିଏ ବରଷ୍ ମାନ୍ଚ୍କିରୋ ଆରୁ ଖାଲି ଅଣ୍ଟା ଆଲାସ୍କି ମାଏକିନିଆଁ ରଦ୍, ଆରୁ ବାନେ-ବାନେ ନାଲ୍ଖୁ କାମ୍ନାନୁ ଆଦ୍ଘି ନାମେ ରୋ, ଆରୁ ନେଦ୍ ବାନେକିରି ନିଜର୍ ହାଦ୍ଦୁବଚ୍ଚରିନ୍ ଲାଲନ୍ପାଲନ୍ କାମ୍ଚ୍କିରୋ; ପାହିୟାରିନ୍ ମାଇନ୍ କାମ୍ଚ୍କିରୋ, ନରମ୍ ମାନିକିରି ବିଶ୍ୱାସୀ ଆଲାର୍ଘି ସେବା କାମ୍ଚ୍କିରୋ, ଗରୀବ୍ ଦୁଃଖିର୍ଘି ସେବା କାମ୍ଚ୍କିରୋ ଆରୁ ଜାମା ବାନେ-ବାନେ ନାଲ୍ଖୁନ୍ କାମ୍ତେ ରାଇ। ଏନ୍ନେ ରାଣ୍ଡି ମାଏକିନିଆଁଘି ନାମେ ମଣ୍ଡ୍ଲୀନ୍ତା ମଦେତ୍ ହାଖ୍ଖନାଘି ସୂଚୀନୁ ଲେଖାକଦ୍। 11ଲେକିନ୍ ଯୁୱାନ୍ ବିଧ୍ବାର୍ଘି ନାମେ ମଦେତ୍ ହାଖ୍ଖନାଘି ସୂଚୀନୁ ଆମ୍କେ ଲେଖା, ଏନ୍ଦେର୍ଗେକା ଯେତ୍କବାକେନ୍ ଆବ୍ଡ଼ାର୍ ଶାରୀରିକ୍ ସମ୍ବନ୍ଧ୍ ଉଇୟାଗେ ବେଦ୍ଦନାଏ ଆରୁ ବେଞ୍ଜରାଗେ ବେଦ୍ଦନାଏ ତା ଖ୍ରୀସ୍ତ୍ସ୍କି ମିଆଁ ଆବ୍ଡ଼ାର୍ଘି ବିଶ୍ୱାସ୍ କମ୍ରି କାଇ। 12ଆରୁ ଆବ୍ଡ଼ାର୍ ଏକା ପ୍ରତିଜ୍ଞା ପହ୍ଲେ କାମ୍ଚ୍କାଚାର୍ ଆବନ୍ ତୋଡ଼୍ନାଏ ଚିନାଏ, ହୁଦ୍ଘିଲାଗାନ୍ ଆବ୍ଡ଼ାର୍ ଦୋଷୀ ଠାହ୍ରାରାନାଏ। 13ଆରୁହି ଆବ୍ଡ଼ାର୍ ଆଡ଼୍ପା-ଆଡ଼୍ପା କୁଦ୍ଦିକିରି କୁଢ଼ି ମାନାଗେ ଶିଖର୍ନାଏ, ଖାଲି କୁଢ଼ିୟା ମାନାଗେ ମାଲ୍ଲା ଲେକିନ୍ ବକର୍ବକର୍ ମାନ୍ନାଏ ଆରୁ ଦୁସ୍ରାର୍ଘି ନାଲ୍ଖୁନୁ ବାଧା ଡାଲ୍ନାଏ ଆରୁ ଏକା କାତ୍ଥା ଉଚିତ୍ ମାଲ୍ଲି ଆବନ୍ ତେଙ୍ଗ୍ନାଏ। 14ହୁଦ୍ଘିଲାଗାନ୍ ଏନ୍ ପାଉଲୁସ୍ ଚାହାଁଲ୍ଦାନ୍ କା ଯୁୱାନ୍ ମାଏକିନିଆଁର୍ ବେଞ୍ଜର୍ନାର୍ ଆରୁ ହାଦ୍ଦୁବଚ୍ଚ ଜନମ୍ କାମ୍ନାର୍ ଆରୁ ଆଡ଼୍ପାପାଲି ସାମ୍ଭଡ଼ାନାର୍ ଆରୁ ଏକାର୍ ଖ୍ରୀସ୍ତ୍ସ୍କି ବିରୋଧିର୍ ଆବ୍ଡ଼ାର୍ଗେ ବଦ୍ନାମ୍ କାମାଗେ ମଉକା ମା ଚିନାର୍। 15ଏନ୍ଦେର୍ଗେକା କେତ୍କ ଲୋକ୍ ରାଣ୍ଡି ମାଏକିନିଆଁର୍ ପାର୍ମେଶ୍ୱାର୍ସ୍କି ହୁକୁମ୍ବନ୍ ମା ମାନିକିରି ଶାଏତାନ୍ଘି ଇଚ୍ଛା ଲେଖା ଚାଲ୍ର୍ନାଏ। 16ଯଦି ଏକିନ୍ ବିଶ୍ୱାସୀ ମାଏକିନିଆଁଘି ଆଡ଼୍ପାନୁ ବିଧବାର୍ ରର, ତା ଆଦ୍ଗେ ଆବ୍ଡ଼ାର୍ଘି ମଦେତ୍ ନିଜେନିନ୍ କାମ୍ନା କାତ୍ଥା ଆରୁ ମଣ୍ଡ୍ଲୀଘି ମିଆଁ ଏନ୍ଦେର୍ହି ଭାର୍ ମା ଚିନା କାତ୍ଥା, ତାକା ମଣ୍ଡ୍ଲୀଦ୍ ବେସାହାରା ବିଧ୍ବାରିନ୍ ମଦେତ୍ କାମା ଅଙ୍ଗ।
17ଏକା ମଣ୍ଡ୍ଲୀନ୍ତା ଆଗୁୱାର୍ ମଣ୍ତ୍ଲୀନ୍ତା ନାଲ୍ଖୁନୁ ମଦେତ୍ କାମ୍ନାଏ ଆରୁ ବାନେକିରି ଦେଖ୍ଭାଲ୍ କାମ୍ନାଏ, ବିଶେଷ୍କିରି ଆବ୍ଡ଼ାରିନ୍ ଏକାର୍ କା ପାର୍ମେଶ୍ୱାର୍ସ୍କି ବଚନ୍ ଶୁଣାବାନାଏ ଆରୁ ଶିଖାବାନାନୁ ମେହ୍ନତ୍ କାମ୍ନାଏ। ଆବ୍ଡ଼ାରିନ୍ ଦୁଇଗୁଣ୍ ବାଗ୍ଗେ ଆଦର୍ କାମ୍ନା କାତ୍ଥା। 18ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ଏକା ଓୟୁ ନିହ୍ମା ଲାଗାନ୍ ନାଲ୍ଖୁ କାମିଦ୍ ଆଦ୍ଗେ ଅନାଗେ ହାଖ୍ଖର୍ନା କାତ୍ଥା ଆରୁ ମଜ୍ରୀୟାର୍ଗେ ମଜ୍ରୀ ହାଖ୍ଖର୍ନାଇନ୍ କାତ୍ଥା।” 19ମଣ୍ଡ୍ଲୀନ୍ତା ଆଗୁୱାର୍ଘି ବିରୁଦ୍ଧ୍ନୁ ଏନ୍ଦ୍ରିନ୍ ଦୋଷ୍ ଲାଗାବର୍ତା ନିନ୍ ଦୁଇ ଚାହେ ତିନ୍ ଲୋକ୍ର୍ଘି ସାକ୍ଷୀ ବିନା ଆବନ୍ ଗ୍ରହନ୍ ଆମ୍କେ କାମା। 20ଏକା ମଣ୍ତ୍ଲୀନ୍ତା ଆଗୁୱାର୍ ପାପ୍ କାମ୍ନାଏ ଆବ୍ଡ଼ାରିନ୍ ଜାମାର୍ଘି ଆଘ୍ଲି ବୁଝାବା, ଏସ୍କେ କା ଆରୁ ଦୁସ୍ରା ଆଲାର୍ହି ଏଲ୍ଚର୍। 21ପାର୍ମେଶ୍ୱାର୍ସ୍ ଆରୁ ଖ୍ରୀସ୍ତ୍ ଯୀଶୁସ୍ ଆରୁ ଏକା ସର୍ଗ୍ ଦୂଁତ୍ଜାମାରିନ୍ ପାର୍ମେଶ୍ୱାର୍ସ୍ ଚାଜ୍ଜକାଦାସ୍ ଆବ୍ଡ଼ାରିନ୍ ସାକ୍ଷୀ ଉଇୟିକିରି ଏନ୍ ନିଙ୍ଗାନ୍ ହୁକୁମ୍ ଚିଆଲ୍ଦାନ୍ କା ନିନ୍ ପୁରା ମନ୍ତି ଇବ୍ଡ଼ା କାତ୍ଥାଗୁଠିନ୍ ମାନା ଆରୁ ଭେଦ୍ଭାବ୍ ଉଇୟିକିରି ଏନ୍ଦ୍ରିନ୍ ନାଲ୍ଖୁ ଆମ୍କେ କାମା। 22ମଣ୍ତ୍ଲୀନ୍ତା ଆଗୁୱାରୀନ୍ ଚାଜ୍ନା ସାମାୟନୁ ଆମ୍କେ ହାଡ଼୍ବାଡ଼୍ରା, ଲେକିନ୍ ଯାଞ୍ଚ୍ କାମିକିରି ଏର୍କେ ଏସ୍କେ କା ଇବ୍ଡ଼ାର୍ ଏକା ପାପ୍ କାମ୍ନାଏ ଆ ପାପ୍ଘି ଭାଗିଦାର୍ ନିନ୍ ମା ମାନୟ ଆରୁ; ନିଜ୍କେନିଜ୍ ପାବିତାର୍ ଉଇକେ।
23ଭବିଷତ୍ନୁ ନିନ୍ ଖାଲି ଆମ୍ମୁ ଆମ୍କେ ହାପ୍ପା ଲେକିନ୍ ନିଙ୍ଘା କୁଲୁଘି ବେମାର୍ ଲାଗାନ୍ ଆରୁ ଧିୟାନ୍-ଧିୟାନ୍ ବେମାର୍ ମାନ୍ନାଘି ଲାଗାନ୍ ନିନ୍ କାଟେ-କାଟେ ଅଙ୍ଗୁର୍ ରାସେ ହାପ୍ପ୍କେ।
24କେତ୍କ ଲୋକ୍ ଆଲାର୍ଘି ପାପ୍ବନ୍, ପାର୍ମେଶ୍ୱାର୍ସ୍ ଆବ୍ଡ଼ାର୍ଘି ନ୍ୟାୟ କାମ୍ନାଘି ଆଘ୍ଲି ଆଲାର୍ ଆହ୍ନାଏ କା ଆବ୍ଡ଼ାର୍ ପାପୀର୍, ଲେକିନ୍ ଆରୁ କେତ୍କ ଲୋକ୍ ନୁହୁରିକିରି ପାପ୍ କାମ୍ନାଏ ଆରୁ ନ୍ୟାୟଘି ଉଲ୍ଲାତକ୍ ନେଦ୍ହି ବାଲ୍ଲନାଇନ୍। 25ହନ୍ନେନ୍ ବାନେ ନାଲ୍ଖୁଦ୍ହି ଆଘ୍ଲିନ୍ତିନ୍ ପ୍ରକଟ୍ ମାନିଦ୍; ଲେକିନ୍ ଏକାଦ୍ ପ୍ରକଟ୍ ମା ମାନିଦ୍ ଆଦ୍ହି ନୁହୁରିକିରି ରା ପଲ୍ଲିଦ୍।
61ଏକାର୍ ହେନ୍ଦ୍କା ଗୁତ୍ତିୟାର୍ ଆବ୍ଡ଼ାର୍ଜାମାର୍ ନିଜର୍-ନିଜର୍ ମାଲିକ୍ରିନ୍ ଜାମା କାତ୍ଥାନୁ ମାଇନ୍ କାମ୍ନା କାତ୍ଥା, ତାକା ପାର୍ମେଶ୍ୱାର୍ସ୍କି ନାମେ ଆରୁ ଏକା ବଚନ୍ ନାମ୍ ଶିଖାବାଦାତ୍ ଆଦ୍ଘି ନିନ୍ଦା ନେଦ୍ହି ମା କାମର୍। 2ଆରୁ ଏକା ଗୁତ୍ତିୟାର୍ଘି ମାଲିକ୍ ଜାମାର୍ ବିଶ୍ୱାସୀ ରାନାଏ, ତା ଆବ୍ଡ଼ା ଗୁତ୍ତିୟାର୍ ମାଲିକ୍ରିନ୍ ବିଶ୍ୱାସୀ ଭାଇ ସୋଚିକିରି ମାଇନ୍ କାମ୍ନାନୁ କମି ମା କାମ୍ନାର୍, ଲେକିନ୍ ବାନେକିରି ଆବ୍ଡ଼ାର୍ଘି ସେବା କାମ୍ନାର୍, ଏନ୍ଦେର୍ଗେକା ସେବା ଦ୍ୱାର୍ନୁ ଏକାର୍ ଫାଏଦା ଉଠାବାନାଏ ଆବ୍ଡ଼ାର୍ ପାର୍ମେଶ୍ୱାର୍ସ୍କି ମିଆଁ ବିଶ୍ୱାସ୍ ଉଇନା ବାଲାର୍ ଆରୁ ନେକାନ୍ ପାର୍ମେଶ୍ୱାର୍ସ୍ ବାନେ ହାଖ୍ଖଦାସ୍। ଇବ୍ଡ଼ା ଜାମା କାତ୍ଥାଘି ବାରେନୁ ଶିଖାବାତେ ରା ଆରୁ ବୁଝାବାତେ ରା।
ଝୁଟ୍ଟୁ ଶିକ୍ଷା ଆରୁ ଧାନ୍ନୁଘି ଲୁଭି
3ଯଦି ନେଦିନ୍ ଝୁଟ୍ଟୁ ଶିକ୍ଷା ଚିନାଏ ଆରୁ ନାହ୍ମାଏ ପ୍ରାଭୁ ଖ୍ରୀସ୍ତ୍ ଯୀଶୁସ୍କି ସତ୍ତୁ ବଚନ୍ବନ୍ ଆରୁ ଏକାଦ୍ ଆଲାରିନ୍ ପାର୍ମେଶ୍ୱାର୍ସ୍କି ଇଚ୍ଛାଘି ଲେଖା ବେଭାର୍ କାମାଗେ ମଦେତ୍ କାମିଦ୍, ଆବନ୍ ମା ମାନ୍ଦାସ୍। 4ତା ଆସ୍ ବହୁତ୍ ବଡ଼୍ପଣି ଏଦ୍ର୍ଦାସ୍ ଆରୁ ଆସ୍ ଆଲାରିନ୍ ଏକାନ୍ ଶିଖାବାଦାସ୍ ଆବନ୍ ନିଜେ ବାଲ୍ଦାସିନ୍; ଲେକିନ୍ ଝାଗ୍ଡ଼ା ଆରୁ କେତ୍କ ଶବଦ୍ବନ୍ ହୋଇକିରି କାଁଟ୍ଛାଁଟ୍ କାମ୍ନାଦ୍ ଆସ୍କି ଖାରାପ୍ ଆଦତ୍, ଇବ୍ଡ଼ା କାତ୍ଥାତି ହିସ୍ଙ୍ଗା, ଆରୁ ଝାଗ୍ଡ଼ା କାମ୍ନା, ନିନ୍ଦା କାତ୍ଥା ଆରୁ ଦୁସ୍ରାର୍ଘି ମିଆଁ ଝୁଟ୍ଟୁ ଶାକ୍ କାମ୍ନା ସୁରୁ ମାନିଦ୍। 5ଆରୁ ଆବ୍ଡ଼ାର୍ଘି ଭିତର୍ନୁ ନେଖାଏ-ନେଖାଏ ବାନେ ଆରୁ ଖାରାପ୍ ସୋଚ୍ନାଘି ଜ୍ଞାନ୍ ମା ରାଇ ଆରୁ ସତ୍ତୁଦ୍ ଏନ୍ଦେଦ୍ ଆବନ୍ ଆବ୍ଡ଼ାର୍ ବାଲ୍ନାଇନ୍। ଆରୁ ଆବ୍ଡ଼ାର୍ ସୋଚ୍ନାଏ କା ପାର୍ମେଶ୍ୱାର୍ସ୍କି ବଚନ୍ ଶୁଣାବାନାଘି ଦ୍ୱାର୍ନୁ ନାମ୍ ବହୁତ୍ ପାଏସା କାମାବା ଅଙ୍ଗତ୍। ଏନ୍ନେ ଆଲାର୍ଘି ମାଝାନୁ ଜାମାବାକେନ୍ ଝାଗ୍ଡ଼ା ମାନ୍ତେ ରାଇ।
6ଯଦି ଅଣ୍ଟା ଆଲାସ୍ ଖୁସୀତି ପାର୍ମେଶ୍ୱାର୍ସ୍କି ସେବା ଆରାଧାନା କାମ୍ଦାସ୍ ତା ଆତ୍ତି ଆସ୍କି ବହୁତ୍ ଫାଏଦା ମାନିଦ୍। 7ଏନ୍ଦେର୍ଗେକା ନାମ୍ ଦୁନିଆଁନୁ ଏନ୍ଦେର୍ହି ମାଲ୍ଲା ଅନ୍ଦ୍ରୁତ୍ ଆରୁ ଦୁନିଆଁନ୍ତି ଏନ୍ଦେର୍ହି ହୁଆ ପଲ୍ଲଦାତିନ୍। 8ଯଦି ନାହ୍ମାସାନ୍ ଅନାଗେ ଆରୁ ଆତ୍ତାଗେ ରଦ୍ ତା, ନାମାଗେ ଖୁସୀ ମାନ୍ନା କାତ୍ଥା। 9ଲେକିନ୍ ଏକାର୍ ଧନୀ ମାନାଗେ ବେଦ୍ଦ୍ନାଏ, ଆବ୍ଡ଼ାର୍ ଲୋଭ୍ ଲାଲଚ୍ନୁ ଆରୁ ଫାନ୍ଦାନୁ ଖାତ୍ର୍ନାଏ କାନାଏ। ଆରୁ ଏକା ଇଚ୍ଛାଘି ଦ୍ୱାର୍ନୁ ଏନ୍ଦେର୍ହି ଫାଏଦା ମା ମାନିଦ୍ ଲେକିନ୍ ନିଜର୍ ନୁକ୍ସାନ୍ ମାନିଦ୍ ଏନ୍ନେ ଫାନ୍ଦାନୁ ଖାତ୍ର୍ନାଏ କାନାଏ, ଇବ୍ଡ଼ାଗୁଠିଦ୍ ଆଲାରିନ୍ ନାଶ୍ଘି ପାବୁନୁ ହୋଇକାଇ। 10ଏନ୍ଦେର୍ଗେକା ଏକାର୍ ପାଏସାଘି ଲୋଭ୍ କାମ୍ନାଏ ଆବ୍ଡ଼ାର୍ ଆବନ୍ ହାଖ୍ଖାଗେ ଖାରାପ୍ ପାବୁନୁ କାନାଏ ଆରୁ ଇବନ୍ ହାଖ୍ଖାଗେ ଢେର୍ ଆଲାର୍ ସତ୍ତୁ ବଚନ୍ତି ଭାଟ୍କାରାନାଏ କାନାଏ ଆରୁ ନିଜର୍ ମିଆଁ ନାନାପ୍ରକାର୍ଘି ଦୁଃଖୁ ଅନ୍ଦ୍ର୍ନାଏ।
ପାଉଲୁସ୍ ତିମଥିଉସ୍ସିନ୍ ସାଲାହ୍ ଚିଆଲ୍ଦାସ୍
11ଲେକିନ୍ ହେ ତିମଥିଉସ୍ ପାର୍ମେଶ୍ୱାର୍ସ୍କି ଆଲାଏ, ନିନ୍ ଇବ୍ଡ଼ା ଜାମାର୍ସ୍ତି ବୁଙ୍ଗା ଆରୁ ଧରମ୍, ଭକ୍ତି, ବିଶ୍ୱାସ୍, ବାନେ ହାଖ୍ଖନା, ଧିରାଜ୍, ଆରୁ ନରମ୍ଘି ପିଛା କାମା। 12ବିଶ୍ୱାସ୍ନୁ ଆଘ୍ଲି ବାଢ଼୍ରାଗେ ନିଙ୍ଘା ମିଆଁ ବହୁତ୍ କଷଟ୍ ବାରୋ, ହତ୍କବାକେନ୍ ନିନ୍ ଏସ୍କେ ଅଣ୍ଟା ବାନେ ସିପାହୀସ୍ ଯୁଦ୍ଧନୁ ଲାଡ଼ାଇ କାମାଗେ ପାଛ୍ଲି ମା ହାଟ୍ର୍ଦାସ୍ ହନ୍ନେନ୍ ନିନ୍ହି ପାର୍ମେଶ୍ୱାର୍ସ୍କି ମିଆଁ ବିଶ୍ୱାସ୍ କାମ୍ନାନୁ ପାଛ୍ଲି ମା ହାଟ୍ଟରୟ; ଏକା ବିଶ୍ୱାସ୍ବନ୍ ନିନ୍ ଢେର୍ ଆଲାର୍ଘି ଆଘ୍ଲି ଗ୍ରହନ୍ କାମ୍ଚ୍କାଚ୍କାଏ, ଆରୁ ଆ ସବୁଦିନ୍ତା ଜୀବନ୍ବନ୍ ଆମ୍କେ ଏଫ୍ସା ଏନ୍ଦେର୍ଗେକା ଇଦ୍ଘିଲାଗାନ୍ ତା ପାର୍ମେଶ୍ୱାର୍ସ୍ ନିଙ୍ଗାନ୍ ମେହ୍କାଦାସ୍। 13ଏକା ପାର୍ମେଶ୍ୱାର୍ସ୍ ଜାମାର୍ଗେ ଜୀବନ୍ ଚିଦାସ୍, ଆସିନ୍ ସାକ୍ଷୀ ଉଇୟିକିରି ଆରୁ ଏକା ଖ୍ରୀସ୍ତ୍ ଯୀଶୁସ୍ ପନ୍ତୁସ୍ ପିଲାତୁସ୍କି ଆଘ୍ଲି ନିଜର୍ ବାରେନୁ ବହୁତ୍ ବାନେ ସାକ୍ଷୀ ଚିଚ୍କାଦାସ୍, ଆସିନ୍ ସାକ୍ଷୀ ଉଇୟିକିରି ଏନ୍ ନିଙ୍ଗାନ୍ ହୁକୁମ୍ ଚିଆଲ୍ଦାନ୍। 14କା ନିନ୍ ନାହ୍ମା ପ୍ରାଭୁ ଖ୍ରୀସ୍ତ୍ ଯୀଶୁସ୍କି ଆରୁଅହନ୍ ବାର୍ନାତକ୍ ନିଙ୍ଗା ଯେତ୍କ ହୁକୁମ୍ ଚିଆ କେର୍କିଚି ଆବନ୍ ବିନାଦାଗି ମାନିକିରି ଆରୁ ବିନାଦୋଷୀ ମାନିକିରି ମାନ୍ତେ ରା। 15ଆ ପ୍ରାଭୁ ଯୀଶୁ ଖ୍ରୀସ୍ତ୍ସିନ୍, ସ୍ତୁତିଘି ଲାଇଗ୍ ପାର୍ମେଶ୍ୱାର୍ସ୍ ଏକାସ୍ କା ଅଣ୍ଟା ଖାଲି ରାଜାସ୍ ଆରୁ ରାଜା ଜାମାର୍ଘି ରାଜା ଆରୁ ପ୍ରାଭୁ ଜାମାର୍ଘି ପ୍ରାଭୁସ୍ ଆସ୍ ତାଙ୍ଘା ଠାହ୍ର୍ଚ୍କା ଉଚିତ୍ ସାମାୟନୁ ପ୍ରକଟ୍ କାମସ୍। 16ଆରୁ ଖାଲି ଆସ୍ ଜାମାବାକେନ୍ ଜୀବିତ୍ ରାଦାସ୍, ଆରୁ ଆସ୍ ଏନ୍ନେ ବିଲ୍ଲୀନୁ ରାଦାସ୍, ଏକାଘି ଚାହା ନେଦ୍ହି କାଲା ପଲ୍ଲନାଇନ୍। ଆରୁ ଆସିନ୍ ଏକା ଆଲାର୍ହି ମାଲ୍ଲା ଏରୁର୍ ଆରୁ ଏକ୍ଲାହି ଏରା ପଲ୍ଲନାଇନ୍। ଆସ୍କି ମାନ୍ ସମ୍ମାନ୍ ଆରୁ ରାଜୀଦ୍ ଜାମାବାକେନ୍ ରଦ୍। ଆମେନ୍।
17ଇ ଦୁନିଆଁନ୍ତା ଧନୀ ଆଲାରିନ୍ ହୁକୁମ୍ ଚିଆ କା ଆବ୍ଡ଼ାର୍ ବଡ଼୍ପଣି ଆମ୍ୱର୍ ଏଦ୍ରା ଆରୁ ଚାଁଣେ ମୁଞ୍ଜର୍ନାବାଲା ଧାନ୍ନୁଘି ମିଆଁ ଭାର୍ଷା ମା ଉଇୟର୍, ଲେକିନ୍ ଏକା ପାର୍ମେଶ୍ୱାର୍ସ୍ ନାହ୍ମା ଖୁସୀଘି ଲାଗାନ୍ ଜାମାକିଛି ଭାର୍ପୁର୍ ଚିଦାସ୍, ଆସ୍କି ମିଆଁ ଭାର୍ଷା ଉଇୟର୍। 18ଆରୁ ଆବ୍ଡ଼ାର୍ ଦୁସ୍ରାର୍ଘି ଭାଲାଇ କାମର୍ ଆରୁ ଭାଲାଇ ନାଲ୍ଖୁ କାମ୍ନାନୁ ଧନୀ ମାନର୍ ଆରୁ ଖୁଲାମନ୍ତି ଦାନ୍ ଚିଅର୍ ଆରୁ ଦୁସ୍ରାରିନ୍ ମଦେତ୍ କାମ୍ତେ ରର୍। 19ଆରୁ ଏକା ଧାନ୍ନୁ ଆବ୍ଡ଼ାରିନ୍ ସର୍ଗ୍ଗେ ହଦ୍ ଆବନ୍ ଆବ୍ଡ଼ାର୍ ଠୁଡ଼ିୟର୍, ଆରୁ ଆ ଧାନ୍ନୁଦ୍ ଭବିଷତ୍ଘି ଲାଗାନ୍ ଅଣ୍ଟା ବାନେ ନାହିଗାଡ୍ଡି ଲେଖା ମାନଦ୍। ତାକା ଏକା ସତ୍ତୁ ଜୀବନ୍ ରାଇ ଆବନ୍ ହାଖ୍ଖର୍।
20ହେ ତୀମଥିଉସ୍ ଏକା ସତ୍ତୁ ବଚନ୍ ନିଙ୍ଗାଗେ ସୋଁପାକେର୍କିଚି ଆବନ୍ ଆଲାରିନ୍ ଶିଖାବାତେ ରା। ଆରୁ ଏକା ଶିକ୍ଷା ପାର୍ମେଶ୍ୱାର୍ସ୍କି ବିରୁଦ୍ଧ ଶିଖାବି ଆସ୍ତି ଗେଚ୍ଛା ରା, ଆରୁ ବେକାର୍ କାତ୍ଥାନ୍ତି ଗେଚ୍ଛା ରା। କେତ୍କ ଆଲାର୍ ଭୂଲ୍ତି ଇବ୍ଡ଼ା ଜାମାନ୍ ଜ୍ଞାନ୍ ବୁଲି ତେଙ୍ଗ୍ନାଏ। 21ଆରୁ କେତ୍କ ଆଲାର୍ ଇ ଝୁଟ୍ଟୁ ଶିକ୍ଷାବନ୍ ଗ୍ରହନ୍ କାମିକିରି ବିଶ୍ୱାସ୍ତି ଗେଚ୍ଛା ମାନ୍ଚାର୍ କେର୍କାନାଏ।
ଏନ୍ ବିନ୍ତି କାମାଲ୍ଦାନ୍ କା ପାର୍ମେଶ୍ୱାର୍ସ୍ ନିହ୍ମା ଜାମାର୍ଘି ମିଆଁ କ୍ରିପା କାମ୍ତେ ରାନାସ୍।