ଥେସଲନିକିୟା ମଣ୍ଡ୍ଲୀର୍ଘି ନାମେନୁ ଯୀଶୁ ଖ୍ରୀସ୍ତ୍କି ଖାସ୍ଚେଲା ପାଉଲୁସ୍କି ପହେଲା ଚିଠି
ଭୂମିକା
ରୋମ୍ ଦେଶ୍ନୁ ଢେର୍ ରାଜୀ ରାଚା। ଆନ୍ନୁନ୍ତି ମାକିଦୁନିଆଁ ଅଣ୍ଟା ରାଚା। ଆରୁ ଥେସଲନିକି ସହର୍ଦ୍ ମାକିଦୁନିଆଁଘି ରାଜ୍ଧାନୀ ରାଚା। ଫିଲିପି ସହର୍ସ୍ତି ବାର୍ଚ୍କା ପାଛ୍ଲି ପାଉଲୁସ୍ ଇସାନ୍ ଅଣ୍ଟା ମଣ୍ଡ୍ଲୀ ତିୟାର୍ କାମ୍ଚ୍କାଚାସ୍। ଆସ୍ ପ୍ରାଭୁ ଯୀଶୁସ୍କି ବଚନ୍ବନ୍ ବିନାୟାହୁଦୀରିନ୍ ଶୁଣାବାଚାସ୍, ଏକାର୍ କା ୟାହୁଦୀ ଧରମ୍ବନ୍ ପସନ୍ଦ୍ କାମାଲିଆର୍। ଲେକିନ୍ ଖାସ୍ଚେଲା ପାଉଲୁସ୍କି ସଫଲ୍ତାବନ୍ (ନାଲ୍ଖୁ ହାସଲ୍) ଏରିକିରି ୟାହୁଦୀ ଆଲାର୍ ଆସିନ୍ ହିସ୍ଙ୍ଗା କାମାଲିଆର୍, ଆଙ୍ଗେନ୍ ପାଉଲୁସ୍ଗେ ଥେସଲନିକି ସହର୍ ଆମ୍ବା ଖାତ୍ରା ଆରୁ ଆସ୍ ବିରିଆ ସହର୍ଗେ ବୁଙ୍ଗିୟାସ୍ କେରାସ୍। ଆରୁ ଆସ୍ ଆସ୍ତି ଅଥାସିନ୍ ଏଥେନ୍ସ୍ ସହର୍ ଚିଇକିରି କୁରିନ୍ଥୁସ୍ ସହର୍ଗେ ବାର୍ଚାସ୍। ଆଙ୍ଗେନ୍ ଆସ୍ଗେ ତୀମଥିଉସ୍କି ଦ୍ୱାର୍ନୁ ଥେସଲନିକିୟା ମଣ୍ତ୍ଲୀଘି ବାରେ ଖବର୍ ହାଖ୍ରା।
ଇ ଖବର୍ ହାକ୍କା ପାଛ୍ଲି ଥେସଲନିକି ମଣ୍ଡ୍ଲୀଘି ନାମେନୁ ଖାସ୍ଚେଲା ପାଉଲୁସ୍କି ପହ୍ଲେ ଚିଠି ଆସ୍ତା ଖ୍ରୀସ୍ତ୍ ବିଶ୍ୱାସୀରିନ୍ ଉତ୍ସାହିତ୍ କାମାଗେ ଆରୁ ଦିଲାସା ଚିୟାଗେ ଲେଖାକେର୍କିଚି। ପାଉଲୁସ୍ ଆବ୍ଡ଼ାର୍ଘି ବିଶ୍ୱାସ୍ ଆରୁ ବାନେ ହାଖ୍ଖନାଘି ଲାଗାନ୍ ଆବ୍ଡ଼ାରିନ୍ ଧାନ୍ୟାବାଦ୍ ଚିଦାସ୍। ଆସ୍ ଆବ୍ଡ଼ାରିନ୍ ତାଙ୍ଘା ଜୀବନ୍ଘି ବାରେନୁ ମନେ କାମ୍ତାଦାସ୍ କା ଯେତ୍କବାକେନ୍ ଆସ୍ ତୀମଥିଉସ୍ଗାନେ ଥେସଲନିକିୟା ସହର୍ନୁ ରାଚାସ୍ ତା ଆସ୍ ଏସ୍କେ ଜୀବନ୍ ବିତାବାଲିୟାସ୍। ଆନ୍ତିନ୍ ଆସ୍ ପ୍ରାଭୁ ଯୀଶୁସ୍କି ଆରୁଅହନ୍ ବାର୍ନାବନ୍ ହୋଇକିରି ଏକା ପ୍ରଶ୍ନ ମାନ୍ଚ୍କିଚା ଆଦ୍ଘି ଉତ୍ତର୍ ଚିଦାସ୍: ଯୀଶୁସ୍କି ଆରୁଅହନ୍ ବାର୍ନାଘି ସାମାୟନୁ ଏକା ସବୁଦିନ୍ତା ଜୀବନ୍ ନାମାଗେ ହାଖ୍ରୋ, ଇ ସବୁଦିନ୍ତା ଜୀବନ୍ କାଁଏ ଆ ବିଶ୍ୱାସୀର୍ଗେ ହାଖ୍ରୋ ଏକାର୍ କା ପ୍ରାଭୁ ଯୀଶୁସ୍କି ଆରୁଅହନ୍ ବାର୍ନାଘି ଆଘ୍ଲି କେଚ୍ଚାର୍ କେର୍କାରର୍? ପ୍ରାଭୁ ଯୀଶୁସ୍ ଆରୁଅହନ୍ ଏକ୍ଲା ବାରସ୍? ଖାସ୍ଚେଲା ପାଉଲୁସ୍ ଇ ମଉକାଘି ଫାଏଦା ଉଠାବିକିରି ଥେସଲନିକି ମଣ୍ଡ୍ଲୀନ୍ତା ବିଶ୍ୱାସୀରିନ୍ ତେଙ୍ଗ୍ଦାସ୍ କା ଆବ୍ଡ଼ାର୍ ବିଶ୍ୱାସ୍ ଆରୁ ଭାର୍ଷାତି ପ୍ରାଭୁ ଯୀଶୁସ୍କି ଆରୁଅହନ୍ ବାର୍ନାଘି ଆଶ୍ରା ଏରାଲ୍କା ରା ଆରୁ ନିଜର୍-ନିଜର୍ ନାଲ୍ଖୁନ୍ ବାନେକିରି କାମ୍ତେ ରା।
ରୂପ୍-ରେଖା:
ଯୋହାର୍ ୧:୧
ଧାନ୍ୟାବାଦ୍ ଆରୁ ସ୍ତୁତି ୧:୨—୩:୧୩
ଖ୍ରୀସ୍ତ୍ ବିଶ୍ୱାସୀର୍ଘି ଚାଲିଚଲନ୍ଘି ବାରେ ଉପ୍ଦେଶ୍ ୪:୧-୧୨
ଖ୍ରୀସ୍ତ୍କି ଆରୁଅହନ୍ ବାର୍ନାଘି ବାରେ ଶିକ୍ଷା ୪:୧୩—୫:୧୧
ଆଖ୍ରୀ ଉପ୍ଦେଶ୍ ୫:୧୨-୨୨
ଆଖ୍ରୀ କାତ୍ଥା ୫:୨୩-୨୮
1ଯୋହାର୍
1ଏନ୍ ପାଉଲୁସ୍ ସିଲ୍ବାନୁସ୍୧:୧ ସିଲ୍ବାନୁସ୍: ସିଲ୍ବାନୁସ୍କି ଯୋଡ଼େ ନାମେ ରାଇ। ହିବ୍ରୁ ନାମେ ସିଲାସ୍ ଆରୁ ଲାଟିନ୍ ନାମେ ସିଲ୍ବାନୁସ୍। ଆରୁ ତୀମଥିଉସ୍ଗାନେ ମେଶ୍ରିକିରି ଥେସ୍ଲୁନିକିୟା ସହର୍ନ୍ତା ମଣ୍ଡ୍ଲୀନ୍ତା ବିଶ୍ୱାସୀର୍ଘି ନାମେନୁ ଚିଠି ଲେଖାଲ୍ଦାନ୍, ଏକାର୍ କା ନାହ୍ମା ବାଙ୍ଗ୍ ପାର୍ମେଶ୍ୱାର୍ ଆରୁ ପ୍ରାଭୁ ଯୀଶୁ ଖ୍ରୀସ୍ତ୍କି ଆଲାର୍:
ନିମାଗେ ପାର୍ମେଶ୍ୱାର୍ସ୍କି ଆଶୀର୍ବାଦ୍ ଆରୁ ଶାନ୍ତି ମାନ୍ନାଦ୍।
ଥେସଲନିକିୟାନ୍ତା ବିଶ୍ୱାସୀର୍ଘି ଜୀବନ୍ ଆରୁ ବିଶ୍ୱାସ୍
2ଏମ୍ ଏହ୍ମା ବିନ୍ତିନୁ ନିମାନ୍ ମନେ କାମ୍ଦାମ୍ ଆରୁ ଜାମାବାକେନ୍ ନିହ୍ମା ଜାମାର୍ଘି ବାରେନୁ ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିଦାମ୍। 3ଆରୁ ନାହ୍ମା ପାର୍ମେଶ୍ୱାର୍ ଆରୁ ବାଙ୍ଗ୍ସାନ୍ ନିମ୍ ନିହ୍ମା ବିଶ୍ୱାସ୍ଘି ଲାଗାନ୍ ବାନେ ନାଲ୍ଖୁ କାମ୍ଦାର୍ ଆରୁ ନିହ୍ମା ବାନେ ହାଖ୍ଖନାଘି ଲାଗାନ୍ ଦୁସ୍ରାରିନ୍ ମଦେତ୍ କାମ୍ଦାର୍, ଆରୁ ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍ସ୍ନୁ ଆଶ୍ରାଘି ଦ୍ୱାର୍ନୁ ଏକା ଧିରାଜ୍ ମଜ୍ବୁତ୍ ମାନିଦ୍ ଆବନ୍ ଏମ୍ ଲାଗାତାର୍ ମନେ କାମ୍ଦାମ୍।
4ହେ ଭାଇ ବୁହୁଣୀଜାମାରୋ, ନିମାନ୍ ପାର୍ମେଶ୍ୱାର୍ସ୍ ବାନେ ହଖ୍ଖଦାସ୍, ଏମ୍ ଆହ୍ଦାମ୍ କା ପାର୍ମେଶ୍ୱାର୍ସ୍ ନିମାନ୍ ଚାଜ୍ଜକାଦାସ୍। 5ଏନ୍ଦେର୍ଗେକା ଏମ୍ ଏକା ସୁସାମାଚାର୍ ପ୍ରଚାର୍ କାମ୍ଚ୍କାଚ୍କାମ୍ ଆଦ୍ ଖାଲି କାତ୍ଥାତି ମାଲ୍ଲା ଲେକିନ୍ ପାବିତାର୍ ଆତ୍ମାଘି ଶକ୍ତି ଦ୍ୱାର୍ନୁ ପ୍ରଚାର୍ କାମ୍ଚ୍କାମ୍; ଆରୁ ପୁରାପୁରୀ ସତ୍ତୁତି ପ୍ରଚାର୍ କାମ୍ଚ୍କାମ୍; ନିମ୍ ଆହ୍ଦାର୍ କା ଯେତ୍କବାକେନ୍ ଏମ୍ ନିହ୍ମାଗାନେ ରାଚ୍କାମ୍ତା ନିହ୍ମା ଫାଏଦାଘି ଲାଗାନ୍ ଏସ୍କେ ଜୀବନ୍ ବିତାବାଲ୍କାମ୍। 6ଆରୁ ନିମ୍ ବହୁତ୍ ଦୁଃଖୁ ତକ୍ଲିପ୍ନୁ ରାଇକିରି ପାବିତାର୍ ଆତ୍ମାତି ହାଖ୍ଖର୍ନାବାଲା ଖୁସୀତି ସୁସାମାଚାର୍ ପାଲନ୍ କାମିକିରି, ଏହ୍ମାଏ ଆରୁ ଯୀଶୁ ଖ୍ରୀସ୍ତ୍ସ୍କି ଜୀବନ୍ ବିତାବାଗେ ଲାକ୍କାର୍। 7ଏତ୍କତକ୍ କା ନିମ୍ ମାକିଦୁନିଆଁ ଆରୁ ଆଖାୟା ସହର୍ନ୍ତା ଖ୍ରୀସ୍ତ୍ ବିଶ୍ୱାସୀ ଆଲାର୍ଘି ଲାଗାନ୍ ନମୁନା ମାନ୍ଚ୍କାର୍ କେର୍କାର୍। 8ଏନ୍ଦେର୍ଗେକା ନିହ୍ମା ଦ୍ୱାର୍ନୁ ସୁସାମାଚାର୍ଦ୍ ଖାଲି ମାକିଦୁନିଆଁ ଆରୁ ଆଖାୟା ସହର୍ନୁ ପ୍ରଚାର୍ କାମାକେରା ଏନ୍ନେ ମାଲ୍ଲା, ଲେକିନ୍ ପାର୍ମେଶ୍ୱାର୍ସ୍କି ମିଆଁ ନିହ୍ମା ବିଶ୍ୱାସ୍ଘି ବାରେନୁ ଏକା ଏକାସାନ୍ ନାମାଗେ ସୁସାମାଚାର୍ ପ୍ରଚାର୍ କାମ୍ଚ୍କାଚାସ୍ ଆବ୍ଡ଼ା ଆଡ୍ଡାଗୁଠିନୁ ଏନ୍ନେ ଫାଇଲାରାଚାକେରା କା ଇଦ୍ଘି ବାରେନୁ ଏନ୍ଦେର୍ହି ତେଙ୍ଗ୍ନା ଏମାଗେ ଦାର୍କାର୍ ମାଲ୍ଲାଦ୍। 9ଏନ୍ଦେର୍ଗେକା ମାକିଦୁନିଆଁ ଆରୁ ଆଖାୟାନ୍ତା ଆଲାର୍ ନିଜେ-ନିଜେ ତେଙ୍ଗ୍ନାଏ କା ନିହ୍ମାସାନ୍ କେର୍କାଚ୍କାମ୍ ବାକେନ୍ ଏସ୍କେ ଏହ୍ମା ସ୍ୱାଗାତ୍ କାମ୍ଚ୍କାର୍ ଆରୁ ନିମ୍ ଏସ୍କେ ମୂର୍ତ୍ତୀଗୁଠିନ୍ ଆମ୍ବିକିରି ଜୀବିତ୍ ଆରୁ ସତ୍ତୁ ପାର୍ମେଶ୍ୱାର୍ସ୍କି ସେବା କାମାଗେ ପାର୍ମେଶ୍ୱାର୍ସ୍ ତାରା କିର୍କାର୍ 10ଆରୁ ପାର୍ମେଶ୍ୱାର୍ସ୍କି ହାଦ୍ଦୁସ୍ ଯୀଶୁ ଖ୍ରୀସ୍ତ୍କି ଆରୁଅହନ୍ ବାର୍ନାଘି ପାବୁ ଏରାଲ୍କା ରା, ନେକାନ୍ କା ପାର୍ମେଶ୍ୱାର୍ସ୍ କେଚ୍ଚକାର୍ସ୍ତି ଉଜ୍ଜତାଚାସ୍, ଆ ଯୀଶୁ ଖ୍ରୀସ୍ତ୍ସିନ୍ ପାର୍ମେଶ୍ୱାର୍ସ୍କି ବାର୍ନାବାଲା ଦଣ୍ତ୍ନ୍ତି ବାଛାବସ୍।
2ଥେସଲନିକୀୟାନୁ ପାଉଲୁସ୍କି ସେବା ନାଲ୍ଖୁ
1ହେ ଥେସଲନିକିୟାନ୍ତା ଖ୍ରୀସ୍ତ୍ ବିଶ୍ୱାସୀ ଭାଇ ଆରୁ ବୁହୁଣୀ ଜାମାରୋ, ନିମ୍ ନିଜେନିନ୍ ଆହ୍ଦାର୍ କା ନିହ୍ମାସାନ୍ ଏହ୍ମା ବାର୍ନା ବେକାର୍ ମାଲ୍ଲା ମାନୁଦ୍। 2ଲେକିନ୍ ନିମ୍ ଆହ୍ଦାର୍ କା, ଏମ୍ ଫିଲିପ୍ପୀ ସହର୍ନୁ ଦୁଃଖୁ ଉଠାବାଚ୍କାମ୍ ଆରୁ ଅପ୍ମାନ୍ ସାହାଚ୍କାମ୍ ହାଲେହି ପାର୍ମେଶ୍ୱାର୍ସ୍ ଏମାଗେ ଏନ୍ନେ ସାହସ୍ ଚିଚ୍ଚାସ୍, କା ଏମ୍ ପାର୍ମେଶ୍ୱାର୍ସ୍କି ସୁସାମାଚାର୍ବନ୍ ବହୁତ୍ ବିରୋଦ୍ଧ କାମ୍ନାଏ ହାଲେହି ନିମାନ୍ ଶୁଣାବାଚ୍କାମ୍ 3ଏନ୍ଦେର୍ଗେକା ଏହ୍ମା ଉପ୍ଦେଶ୍ଦ୍, ଆହିବୁଝ୍ରିକିରି ଆଲାରିନ୍ ଫାସାବାନା ମାଲ୍ଲିଦ୍, ଆରୁ ଅଶୁଦ୍ଧ୍ ମାଲ୍ଲିଦ୍, ଆରୁ ଠାକ୍ନା ମାଲ୍ଲିଦ୍; 4ଲେକିନ୍ ଏସ୍କେ ପାର୍ମେଶ୍ୱାର୍ସ୍ ଏମାନ୍ ଲାଇଗ୍ ଠାହ୍ରିକିରି ସୁସାମାଚାର୍ ସୋଁପ୍ଚାସ୍ ଏମ୍ ହନ୍ନେନ୍ ପ୍ରଚାର୍ କାମ୍ଦାମ୍; ଏମ୍ ଆଲାରିନ୍ ମାଲ୍ଲା, ଲେକିନ୍ ପାର୍ମେଶ୍ୱାର୍ସିନ୍ ଖୁସ୍ କାମ୍ଦାମ୍, ଏକାସ୍ କା ନାହ୍ମାଏ ମନ୍ବନ୍ ଯାଞ୍ଚ୍ କାମ୍ଦାସ୍। 5ନିମ୍ ଆହ୍ଦାର୍ ଆରୁ ପାର୍ମେଶ୍ୱାର୍ସ୍ହି ସାକ୍ଷୀ ରାଦାସ୍କା ଏମ୍ ଏକ୍ଲାହି ଆଲାରିନ୍ ଖୁସ୍ କାମାଗେ ବାନେ-ବାନେ କାତ୍ଥା ମା ତେଙ୍ଗାଲ୍କାମ୍, ଆରୁ ନା ପାଏସାଘି ଲାଗାନ୍ ପ୍ରଚାର୍ କାମାଲ୍ଦାମ୍। 6ଆରୁ ଯଦି ଏମ୍ ଖ୍ରୀସ୍ତ୍ସ୍କି ପ୍ରେରିତ୍ ମାନ୍ନାଘି କାରଣ୍ତି ନିହ୍ମାସ୍ତି ସମ୍ମାନ୍ ଦାବି କାମା ଅଙ୍କାରମ୍ନେ, ହାଲେହି ଏମ୍ ଆଲାର୍ସ୍ତି ମାଇନ୍ ହାଖ୍ଖାଗେ ମାଲ୍ଲା ଚାହଁନା, ଆରୁ ନା ନିହ୍ମାସ୍ତି ଆରୁ ନା ନେଖାସ୍ତିହି 7ଲେକିନ୍ ଏସ୍କେ ଆୟାଙ୍ଗ୍ ନିଜର୍ ହାଦ୍ଦୁରିନ୍ ଲାଲନ୍ପାଲନ୍ କାମି, ଆନ୍ନେନ୍ ଏମ୍ହି ନିହ୍ମା ମାଝାନୁ ରାଇକିରି ନରମ୍ଭାବ୍ ଏଦ୍କାମ୍। 8ଆରୁ ହନ୍ନେନ୍ ନିହ୍ମା ମିଆଁ ଏହ୍ମାଏ ବାନେ ହାଖ୍ଖନା ରାଇ, ହୁଦ୍ଘିଲାଗାନ୍ ନିମାନ୍ ପାର୍ମେଶ୍ୱାର୍ସ୍କି ସୁସାମାଚାର୍ ଖାଲି ମାଲ୍ଲା ଲେକିନ୍ ନିଜର୍-ନିଜର୍ ଜୀଆ ଚିୟାଗେ ତିୟାର୍ ରାଚ୍କାମ୍, ଏନ୍ଦେର୍ଗେକା ନିମ୍ ଏହ୍ମା ନିଜର୍ ଆଲ୍ ମାନ୍ଚ୍କାର୍ କେର୍କାଚ୍କାର୍ 9ଏନ୍ଦେର୍ଗେକା ହେ ଭାଇ ବୁହୁଣୀଜାମାରୋ, ନିମ୍ ଏହ୍ମାଏ କଠିନ୍ ପରିଶ୍ରମ୍ ଆରୁ କଷଟ୍ବନ୍ ମନେ କାମ୍ଦାର୍, କା ଏମ୍ ଉଲ୍ଲାନ୍ ମାଁହାନ୍ ଇଦ୍ଘିଲାଗାନ୍ ନାଲ୍ଖୁବୁତା କାମ୍ତେ ପାର୍ମେଶ୍ୱାର୍ସ୍କି ସୁସାମାଚାର୍ ନିହ୍ମାଏ ମାଝାନୁ ପ୍ରଚାର୍ କାମ୍ଚ୍କାମ୍ ଏନ୍ଦେର୍ଗେକା ଏମ୍ ନିହ୍ମା ଭିତର୍ନୁ ନେଖା ମିଆଁହି ଭାର୍ ମା ମାନମ୍।
10ନିମ୍ ସାକ୍ଷୀ ରାଦାର୍ ଆରୁ ପାର୍ମେଶ୍ୱାର୍ସ୍ହି ସାକ୍ଷୀ ରାଦାସ୍କା ନିହ୍ମା ବିଶ୍ୱାସୀର୍ଘି ମାଝାନୁ ଏମ୍ ପାବିତାର୍, ଧାର୍ମିକ୍ତା ଆରୁ ନିର୍ଦ୍ଦୋଷ୍ ବେଭାର୍ କାମ୍ଚ୍କାମ୍। 11ନିମ୍ତା ଆହ୍ଦାର୍ କା ଏସ୍କେ ବୁଆସ୍ ନିଜର୍ ହାଦ୍ଦୁର୍ ଗାନେ ବେଭାର୍ କାମ୍ଦାସ୍, ଆନ୍ନେନ୍ ଏମ୍ହି ନିହ୍ମା ଭିତର୍ତି ଜାମାରିନ୍ ଉପ୍ଦେଶ୍ ଚିଆଲ୍କାମ୍ ଆରୁ ଶାନ୍ତି ଚିତେ ଆରୁ ବୁଝାବାଲ୍କାମ୍ 12କା ନିହ୍ମା ଚାଲିଚଲନ୍ ପାର୍ମେଶ୍ୱାର୍ସ୍କି ଲାଇଗ୍ ମାନ, ଏକାସ୍ କା ନିମାନ୍ ତାଙ୍ଘା ରାଜୀ ଆରୁ ମାହିମାଘି ହକ୍ଦାର୍ ମାନାଗେ ମେହ୍ଁଦାସ୍।
13ହୁଦ୍ଘିଲାଗାନ୍ ଏମ୍ ଲାଗାତାର୍ ପାର୍ମେଶ୍ୱାର୍ସ୍କି ଧାନ୍ୟାବାଦ୍ କାମ୍ତେ ରାଦାମ୍; କା ଯେତ୍କବାକେନ୍ ଏମ୍ ନିହ୍ମାସାନ୍ ପାର୍ମେଶ୍ୱାର୍ସ୍କି ସୁସାମାଚାର୍ ପ୍ରଚାର୍ କାମ୍ଚ୍କାମ୍ ତା, ଆବନ୍ ଆଲାର୍ଘି ବଚନ୍ ମାଲ୍ଲା ଲେକିନ୍ ପାର୍ମେଶ୍ୱାର୍ସ୍କି ବଚନ୍ ବୁଲି ନିମ୍ ଗ୍ରହନ୍ କାମ୍ଚ୍କାର୍ ଆରୁ ଆଦ୍ ସତ୍ତୁନିନ୍ ପାର୍ମେଶ୍ୱାର୍ସ୍କି ବଚନ୍ଦ୍ ଆରୁ ନିମ୍ ଖ୍ରୀସ୍ତ୍ସ୍ ବିଶ୍ୱାସୀର୍ ନିହ୍ମା ଜୀବନ୍ନୁ ବଚନ୍ ଲାଗାତାର୍ ନାଲ୍ଖୁ କାମିଦ୍। 14ଏନ୍ଦେର୍ଗେକା ହେ ଭାଇ ବୁହୁଣୀଜାମାରୋ, ନିମ୍ ଯୀଶୁ ଖ୍ରୀସ୍ତ୍ସିନ୍ ବିଶ୍ୱାସ୍ କାମୁ ୟାହୁଦା ପ୍ରଦେଶ୍ଘି ମଣ୍ଡ୍ଲୀନ୍ତା ଅନୁସରଣ୍ କାମ୍ନାବାଲାର୍, ଏସ୍କେ ଆବ୍ଡ଼ାର୍ ୟାହୁଦୀ ଜାମାର୍ଘି ଦ୍ୱାର୍ନୁ ଏସ୍କେ ଦୁଃଖୁ ସାହାଚ୍କାଚାର୍ ନିମ୍ହି ନିହ୍ମା ଆଲାର୍ଘି ଦ୍ୱାର୍ନୁ ଆନ୍ନେନ୍ ଦୁଃଖୁ ସାହାଚ୍କାର୍। 15ଆ ୟାହୁଦୀଜାମାର୍ ପ୍ରାଭୁ ଯୀଶୁସିନ୍ ଆରୁ ନାବୀ ଜାମାରିନ୍ହି ପିଟ୍ଟକାଚାର୍ ଆରୁ ଏମାନ୍ ବହୁତ୍ ସାତାବାଚ୍କାଚାର୍, ଆବ୍ଡ଼ାର୍ ପାର୍ମେଶ୍ୱାର୍ସିନ୍ ଖୁସ୍ ମା କାମ୍ଚାର୍, ଆରୁ ଆବ୍ଡ଼ାର୍ ଜାମା ଆଲାର୍ଘି ବିରୋଧ୍ କାମ୍ନାଏ, 16ଏନ୍ଦେର୍ଗେକା ବିନାୟାହୁଦୀ ଜାମାର୍ସାନ୍ ସୁସାମାଚାର୍ ପ୍ରଚାର୍ କାମ୍ନା ବାକେନ୍ ୟାହୁଦୀଜାମାର୍ ଏମାନ୍ ରୋକ୍ଟୋକ୍ କାମ୍ନାଏ, ଏନ୍ଦେର୍ଗେକା ଆବ୍ଡ଼ାର୍ ମା ଚାହଁନାଏ କା ବିନାୟାହୁଦୀଜାମାର୍ ମୁକ୍ତି ହାଖ୍ଖନାର୍। ଏନ୍ନେନ୍ ଆବ୍ଡ଼ାର୍ ଜାମାବାକେନ୍ ନିଜର୍-ନିଜର୍ ପାପ୍ନୁ ବାଢ଼୍ର୍ତେ କାନାଏ, ଲେକିନ୍ ଆବ୍ଡ଼ାର୍ଘି ମିଆଁ ପାର୍ମେଶ୍ୱାର୍ସ୍କି ବହୁତ୍ ଖୀସ୍ ବାର୍ଚା କେର୍କିଚି ଆରୁ ଆବ୍ଡ଼ାର୍ଗେ ଦଣ୍ଡ୍ ହାଖ୍ଖରା କେର୍କିଚି।
ବିଶ୍ୱାସୀ ଜାମାର୍ଗାନେ ପାଉଲୁସ୍ ଭେଁଟ୍ ମାନାଗେ ଇଚ୍ଛା କାମ୍ଦାସ୍
17ହେ ଭାଇ ବୁହୁଣୀଜାମାରୋ, ଏମ୍ ମନ୍ତି ମାଲ୍ଲା ଲେକିନ୍ ଶରୀର୍ତି କାଟେ ଡେରିଘି ଲାଗାନ୍ ନିହ୍ମାସ୍ତି ବିଛ୍ଡ଼ା ରାଚ୍କାମ୍ କେର୍କାଚ୍କାମ୍, ତା ଏମ୍ ନିହ୍ମାଗାନେ ଭେଁଟ୍ ମାନାଗେ ଆରୁହି ବହୁତ୍ ଇଚ୍ଛା କାମାଲ୍କାମ୍ 18ଇଦ୍ଘିଲାଗାନ୍ ଏମ୍ ନିହ୍ମାସାନ୍ କାଲାଗେ ସୋଚ୍କାଚ୍କାମ୍, ବିଶେଷ୍କିରି ଏନ୍ ପାଉଲୁସ୍ ବହୁତ୍ଥର୍ କାଲାଗେ ସୋଚ୍କାଚ୍କାନ୍ ଲେକିନ୍ ଶାଏତାନ୍ଦ୍ ଜାମାବାକେନ୍ ବାଧା ଚିଚ୍ଚା। 19ଏନ୍ଦେର୍ଗେକା ନାହ୍ମା ପ୍ରାଭୁ ଯୀଶୁସ୍କି ଆରୁଅହନ୍ ବାର୍ନା ସାମାୟନୁ ତାଙ୍ଘା ଚାହାନୁ ନାହ୍ମାଏ ଆଶ୍ରା, ଖୁସୀ ଆରୁ ବାଡ଼େଇଘି ମୁକୁଟ୍୨:୧୯ ମୁକୁଟ୍: ଆଘ୍ଲି ଯୁଗ୍ନୁ ଗ୍ରୀକ୍ନୁ ଖେଲ୍ନୁ ଜିତୁର୍ଗେ ସମ୍ମାନ୍ ଚିୟାଗେ ଏକା ମୁକୁଟ୍ଚିୟା କାଲିୟା, ଆଦ୍ ହାରା ଆଥାତି ତିୟାର୍ ମାନାଲିୟା। ଏନ୍ଦେଦ୍? ନିମ୍ ମାଲ୍ଦାର୍ କାଁଏ? 20ଏହ୍ମାଏ ବାଡ଼େଇ ଆରୁ ଖୁସୀ ନିମିନ୍।
3ତୀମଥିଉସିନ୍ ତାଏନା
1ଏନ୍ଦେର୍ଗେକା ଆବ୍ଡ଼ାର୍ଘି ହାଲ୍ ଖବର୍ ଆହାଗେ ଏମ୍ ଆରୁ ରା ପଲ୍ଲକାମିନ୍, ହୁଦ୍ଘିଲାଗାନ୍ ଏମ୍ ସୋଚ୍କାମ୍ କା ଏନ୍ ଅଥାନ୍ ଏଥେନ୍ସ୍ ବାଡ଼୍କା ସହର୍ନୁନିନ୍ ରନ୍କନ୍; 2ଆରୁ ତୀମଥିଉସିନ୍ ଏକାସ୍ କା ନାହ୍ମା ଭାଇସ୍। ଆରୁ ପାର୍ମେଶ୍ୱାର୍ସ୍କି ଅଣ୍ଟା ସେବକସ୍। ଆସ୍ ଏଙ୍ଗାନ୍ ଯୀଶୁ ଖ୍ରୀସ୍ତ୍ସ୍କି ସୁସାମାଚାର୍ ପ୍ରଚାର୍ କାମ୍ନାନୁ ମଦେତ୍ କାମ୍ଦାସ୍। ଆସିନ୍ ଏମ୍ ନିହ୍ମାସାନ୍ ନିହ୍ମା ବିଶ୍ୱାସ୍ବନ୍ ମଜ୍ବୁତ୍ କାମାଗେ ଆରୁ ନିମାନ୍ ଉତ୍ସାହ ଚିୟାଗେ ତାଏକାମ୍। 3ଏସ୍କେ କା ନେଦ୍ହି ଇବ୍ଡ଼ା ଜାମା ସାତାୱାଟ୍ଘି କାରଣ୍ତି ମା ଡାଗ୍ମାଗ୍ରର୍। ଏନ୍ଦେର୍ଗେକା ନିମ୍ତା ନିଜେନିନ୍ ଆହ୍ଦାର୍ କା ଇଦ୍ଘିଲାଗାନ୍ ତା ନାମ୍ ଠାହ୍ର୍ଚ୍କା କେର୍କାଦାତ୍। 4ଏନ୍ଦେର୍ଗେକା ଯେତ୍କବାକେନ୍ ଏମ୍ ନିହ୍ମାଗାନେ ରାଚ୍କାମ୍ତା ନିମାନ୍ ଆଘ୍ଲିନ୍ତି ଧିୟାନ୍-ଧିୟାନ୍ ତେଙ୍କାଚ୍କାମ୍ କା ନାମାଗେ କଷଟ୍ ସାହାଗେ ଖାତ୍ରୋ ଆରୁ ନିମ୍ ଆହ୍ଦାର୍ କା ଏନ୍ନେନିନ୍ ମାନ୍ଚା। 5ହୁଦ୍ଘିଲାଗାନ୍ ଯେତ୍କବାକେନ୍ ଏନ୍ ଆରୁ ସାହା ପଲ୍ଲକାନିନ୍ ତା ନିହ୍ମା ବିଶ୍ୱାସ୍କି ହାଲ୍ ଖବର୍ ଆହାଗେ ତୀମଥିଉସ୍ସିନ୍ ତାଏକାନ୍, ଏକାସାନ୍ ଏନ୍ନେ ମା ମାନ୍ନାଦ୍ କା ଶାଏତାନ୍ ନିହ୍ମା ପରୀକ୍ଷା କାମ୍ଚ୍କିରୋ, ଆରୁ ଏହ୍ମା ମେହ୍ନତ୍ ବେକାର୍ ମାନ୍ଚା କେର୍କିରୋ।
ତୀମଥିଉସ୍କି ଦ୍ୱାର୍ନୁ ଖବର୍ ହାଖ୍ଖରି
6ଲେକିନ୍ ଆକ୍କୁନ୍ ତୀମଥିଉସ୍ ନିହ୍ମାସ୍ତି ଏହ୍ମାସାନ୍ କିର୍ରିବାରିକିରି ନିହ୍ମା ବିଶ୍ୱାସ୍, ବାନେ ହାଖ୍ଖନାଘି ବାରେନୁ ଖୁସୀଘି ଖବର୍ ଶୁଣାବାଚାସ୍ ଆରୁ ଇବନ୍ହି ଶୁଣାବାଚାସ୍କା ନିମ୍ ଜାମାବାକେନ୍ ବାନେ ହାଖ୍ଖନାତି ଏମାନ୍ ମନେ କାମ୍ଦାର୍, ଆରୁ ଏମାନ୍ ଏରାଗେ ଇଚ୍ଛା କାମ୍ଦାର୍, ଏସ୍କେ କା ଏମ୍ହି ନିମାନ୍ ଏରାଗେ ଇଚ୍ଛା କାମ୍ଦାମ୍। 7ଇଦ୍ଘିଲାଗାନ୍ ହେ ଭାଇ ବୁହୁଣୀଜାମାରୋ, ଏମ୍ ଏହ୍ମାଏ ଜାମା ସାତାୱାଟ୍ ଆରୁ କଷଟ୍ନୁ ନିହ୍ମା ବିଶ୍ୱାସ୍ଘି ଦ୍ୱାର୍ନୁ ନିହ୍ମା ବାରେ ଶାନ୍ତି ହାକ୍କାମ୍। 8ଏନ୍ଦେର୍ଗେକା ଆକ୍କୁନ୍ ଯଦି ନିମ୍ ପ୍ରାଭୁସ୍କି ବିଶ୍ୱାସ୍ନୁ ମଜ୍ବୁତ୍ ରାଦାର୍ ଇବନ୍ ମେନିକିରି ତା ଏମ୍ ଖୁସୀତି ଉଜ୍ଜାଲ୍ଦାମ୍। 9ନିହ୍ମା କାରଣ୍ତି ଏକା ଖୁସୀ ଏମାଗେ ହାଖ୍ଖର୍କିଚି, ହୁଦ୍ଘିଲାଗାନ୍ ଏମ୍ ନିହ୍ମା ବାରେନୁ ପାର୍ମେଶ୍ୱାର୍ସ୍କି ଧାନ୍ୟାବାଦ୍ ଏସ୍କେ କାମମ୍? ପାର୍ମେଶ୍ୱାର୍ସ୍କି ଆଘ୍ଲି। 10ଏମ୍ ଉଲ୍ଲାନ୍ ମାଁହାନ୍ ବହୁତ୍ ବିନ୍ତି କାମ୍ତେ ରାଦାମ୍କା ନିହ୍ମାଗାନେ ଏସ୍କେ ଭେଁଟ୍ ମାନମ୍, ଆରୁ ନିହ୍ମା ବିଶ୍ୱାସ୍ନୁ ଏନ୍ଦ୍ରିନ୍ ଘାଟି ରାଇ ତା ଆବନ୍ ପୁରା କାମମ୍।
11ନାହ୍ମାଏ ବାଙ୍ଗ୍ ପାର୍ମେଶ୍ୱାର୍ସ୍ ନିଜେ ଆରୁ ନାହ୍ମା ପ୍ରାଭୁ ଯୀଶୁସ୍, ନିହ୍ମାସାନ୍ ବାରାଗେ ଏମାନ୍ ପାବୁ ଏଦ୍ନାର୍। 12ଆରୁ ପ୍ରାଭୁସ୍ ଏନ୍ନେ କାମ୍ନାସ୍ କା ଏସ୍କେ ଏମ୍ ନିମାନ୍ ବାନେ ହାଖ୍ଖଦାମ୍, ହନ୍ନେନ୍ନିନ୍ ନିହ୍ମା ବାନେ ହାଖ୍ଖନାନ୍ ଏକ୍ ଦୁସ୍ରାର୍ଘି ଭିତ୍ରେ ଆରୁ ଜାମା ଆଲାର୍ଘି ଲାଗାନ୍ ଆରୁ, ଆରୁ ବାଢ଼୍ର୍ତେକଦ୍। 13ତାକା ପ୍ରାଭୁ ଯୀଶୁସ୍ ନିହ୍ମା ମନ୍ବନ୍ ଏନ୍ନେ ମଜ୍ବୁତ୍ କାମ୍ନାସ୍ କା ଯେତ୍କବାକେନ୍ ନାହ୍ମା ପ୍ରାଭୁ ଯୀଶୁସ୍ ନିଜର୍ ଜାମା ପାବିତାର୍ ଆଲାର୍ ଗାନେ ଆରୁଅହନ୍ ବାରସ୍, ହତ୍କବାକେନ୍ ଥେସଲନିକିୟାନ୍ତା ବିଶ୍ୱାସୀର୍, ନାହ୍ମା ବାଙ୍ଗ୍ ପାର୍ମେଶ୍ୱାର୍ସ୍କି ଆଘ୍ଲି ପାବିତାର୍ ଆରୁ ନିର୍ଦ୍ଦୋଷ୍ ଠାହ୍ରାରର୍।
4ପାର୍ମେଶ୍ୱାର୍ସିନ୍ ଖୁସୀ କାମ୍ନାବାଲା ଜୀବନ୍
1ହେ ଭାଇ ଆରୁ ବୁହୁଣୀ ଜାମାରୋ, ଏମ୍ ନିମାନ୍ ଆର୍ଜୀବିନ୍ତି କାମ୍ଦାମ୍ ଆରୁ ନିମାନ୍ ପ୍ରାଭୁ ଯୀଶୁସ୍କି ହକ୍ତି ତେଙ୍ଗାଲ୍ଦାମ୍ କା ଏସ୍କେ ନିମ୍ ଏହ୍ମାସ୍ତି ବାନେ ଚାଲିଚଲନ୍ ଆରୁ ପାର୍ମେଶ୍ୱାର୍ସ୍ସିନ୍ ଏସ୍କେ ଖୁସ୍ କାମ୍ନାକାତ୍ଥା ଆବନ୍ ଶିଖ୍ର୍କାଦାର୍, ଆରୁ ଏସ୍କେ ନିମ୍ ଚାଲ୍ରାଲ୍ଦାର୍ ଆନ୍ନେନ୍ ଆରୁହି ବାଢ଼୍ର୍ତେ କାଲା। 2ଏନ୍ଦେର୍ଗେକା ନିମ୍ ଆହ୍ଦାର୍ କା ଏମ୍ ପ୍ରାଭୁ ଯୀଶୁସ୍କି ହକ୍ତି ନିମାନ୍ ଏନ୍ଦେର୍-ଏନ୍ଦେର୍ ଆଦେଶ୍ ଚିଚ୍କାଦାମ୍। 3ଏନ୍ଦେର୍ଗେକା ପାର୍ମେଶ୍ୱାର୍ସ୍ ଚାହଁଦାସ୍ କା ନିମ୍ ପାବିତାର୍ ରା: ବେଭିଚାର୍ତି ବାଛ୍ରିକିରି ରା। 4ଆରୁ ନିହ୍ମା ଭିତର୍ନୁ ଯେତ୍କର୍ ନିଜର୍-ନିଜର୍ ଶରୀର୍ବନ୍ କାବୁନୁ ଉଇନା କାତ୍ଥା, ଏସ୍କେ କା ଆଦ୍ ପାବିତାର୍ ଆରୁ ଆଦର୍ ମାନଦ୍ 5ଆରୁ ମନ୍ତା ଖାରାପ୍ ଇଚ୍ଛାତି ମାଲ୍ଲା ଆରୁ ନା ଆବ୍ଡ଼ାର୍ ଲେଖା ଏକାର୍ କା ପାର୍ମେଶ୍ୱାର୍ସ୍ସିନ୍ ବାଲ୍ନାଇନ୍ 6କା ବେଭିଚାର୍ଘି କାତ୍ଥାନୁ ନେଦିନ୍ ବିଶ୍ୱାସୀ ଭାଇ, ବୁହୁଣୀରିନ୍ ଆମ୍ୱନାର୍ ଠାକା ଆରୁ ନା ଆବ୍ଡ଼ାର୍ଘି ବିରୁଦ୍ଧ୍ ପାପ୍ କାମ୍ନାର୍, ଏନ୍ଦେର୍ଗେକା ପ୍ରାଭୁସ୍ ଇବ୍ଡ଼ା ଜାମା କାତ୍ଥା ଲାଗାନ୍ ଦଣ୍ଡ୍ ଚିୟସ୍; ଏସ୍କେ କା ଏମ୍ ପହ୍ଲେନ୍ତି ନିମାନ୍ ତେଙ୍କାଚ୍କାମ୍ ଆରୁ ଶକତ୍ ଚେତାବାନୀ ଚିଚ୍କାଚ୍କାମ୍। 7ଏନ୍ଦେର୍ଗେକା ପାର୍ମେଶ୍ୱାର୍ସ୍ ନାମାନ୍ ଅଶୁଦ୍ଧ୍ ମାନାଗେ ମାଲ୍ଲା, ଲେକିନ୍ ପାବିତାର୍ ଜୀବନ୍ ବିତାବାଗେ ମେହ୍କାଦାସ୍। 8ହୁଦ୍ଘିଲାଗାନ୍ ନେଦ୍ ଏକା କାତ୍ଥାନ୍ ପାଉଲୁସ୍ ପ୍ରଚାର୍ କାମ୍ଚ୍କାଦାସ୍ ଆବନ୍ ତୁଚ୍ଛ କାମ୍ନାଏ, ଆବ୍ଡ଼ାର୍ ଆଲାରିନ୍ ତୁଚ୍ଛ ମା କାମ୍ନାଏ, ଲେକିନ୍ ପାର୍ମେଶ୍ୱାର୍ସିନ୍ ତୁଚ୍ଛ କାମ୍ନାଏ, ଏକାସ୍ କା ନିଜର୍ ପାବିତାର୍ ଆତ୍ମା ନିମାଗେ ଚିଦାସ୍।
9ଆକ୍କୁନ୍ ଅଣ୍ଟା ଭାଇସ୍ ଦୁସ୍ରା ଭାଇସିନ୍ ବାନେ ହାଖ୍ଖନାଘି ବାରେନୁ ଲେଖ୍ନାଘି ଦାର୍କାର୍ ମାଲ୍ଲାଦିନ୍, ଏନ୍ଦେର୍ଗେକା ଏକ୍ ଦୁସ୍ରାରିନ୍ ବାନେ ହାଖ୍ଖନାନ୍ ନିମ୍ ପାର୍ମେଶ୍ୱାର୍ସ୍ତି ଶିଖ୍ର୍କାଦାର୍। 10ଆରୁ ପ୍ରକୃତ୍ନୁ ପୁରା ମାକିଦୁନିଆଁ ସହର୍ନ୍ତା ଜାମା ବିଶ୍ୱାସୀ ଭାଇର୍ ଗାନେ ଏନ୍ନେନ୍ ବାନେ ହାଖ୍ଖଦାର୍, ଲେକିନ୍ ହେ ଭାଇ ଆରୁ ବୁହୁଣୀ ଜାମାରୋ, ଏମ୍ ନିମାନ୍ ତେଙ୍ଗାଲ୍ଦାମ୍ କା ବାନେ ହାଖ୍ଖନାନୁ ଆରୁ, ଆରୁ ବାଢ଼୍ର୍ତେ କାଲା। 11ଆରୁ ଏସ୍କେ ଏମ୍ ନିମାଗେ ଆଦେଶ୍ ଚିଚ୍କାଦାମ୍, ହନ୍ନେନ୍ ଶାନ୍ତିତି ରାକେ ଆରୁ ନିଜର୍-ନିଜର୍ ନାଲ୍ଖୁ କାମାଗେ ଆରୁ ନିଜର୍-ନିଜର୍ ହେଖ୍ଖାତି ନାଲ୍ଖୁ କାମାଗେ କୋଶିଷ୍ କାମ୍କେ ଦୁସ୍ରାର୍ଘି ନାଲ୍ଖୁନୁ ବାଧା ଆମ୍କେ ଡାଲା। 12ଆରୁ ନେଦ୍ ବିଶ୍ୱାସୀ ମାଲ୍ନାଏ ଆବ୍ଡ଼ାର୍ ଗାନେ ବାନେ ବେଭାର୍ କାମା, ଏସ୍କେ କା ଆବ୍ଡ଼ାର୍ ନିହ୍ମାଏ ଆଦର୍ କାମର୍, ଆରୁ ନିହ୍ମା ଦାର୍କାର୍ଘି ଲାଗାନ୍ ନିମ୍ ଦୁସ୍ରାର୍ଘି ମିଆଁ ଭାର୍ଷା ମା କାମର୍।
ପ୍ରାଭୁସ୍କି ଆରୁଅହନ୍ ବାର୍ନା
13ହେ ଭାଇ ଆରୁ ବୁହୁଣୀ ଜାମାରୋ, ଏମ୍ ଚାହଁଦାମ୍ କା ନିମ୍ ଏକାର୍ କେଚ୍ଚାର୍ କେର୍କାନାଏ ଆବ୍ଡ଼ାର୍ଘି ବାରେନୁ ଆହା; ଏକାସାନ୍ ଏନ୍ନେ ମା ମାନ୍ନାଦ୍ କା ନିମ୍, ଏକାର୍ ବିଶ୍ୱାସୀ ମାଲ୍ନାଏ ଆରୁ ଏକାର୍ଘି ଏନ୍ଦେର୍ହି ଆଶ୍ରା ମାଲ୍ଲାଦିନ୍ ଆବ୍ଡ଼ାର୍ଘି ଲେଖା ଦୁଃଖୁ ମାନର୍। 14ଏନ୍ଦେର୍ଗେକା ଯଦି ନାମ୍ ବିଶ୍ୱାସ୍ କାମ୍ଦାତ୍ କା ଯୀଶୁସ୍ କେଚ୍ଚାସ୍କେରାସ୍ ଆରୁ ଆରୁଅହନ୍ ଉଜ୍ଜିୟାସ୍, ତା ହନ୍ନେନ୍ ନାମ୍ ବିଶ୍ୱାସ୍ କାମତ୍ କା ଏକାର୍ ଯୀଶୁ ଖ୍ରୀସ୍ତ୍ସିନ୍ ବିଶ୍ୱାସ୍ କାମିକିରି କେଚ୍ଚାର୍ କେର୍କାନାଏ, ଆବ୍ଡ଼ାରିନ୍ ପାର୍ମେଶ୍ୱାର୍ସ୍ ଯୀଶୁସ୍ଗାନେ ଅନ୍ଦ୍ରସ୍ବାରସ୍। 15ଏନ୍ଦେର୍ଗେକା ଏମ୍ ପ୍ରାଭୁସ୍କି ବଚନ୍ଘି ଅନୁସାର୍ ନିମାନ୍ ଏନ୍ନେ ତେଙ୍ଗାଲ୍ଦାମ୍ କା ଯୀଶୁସ୍କି ଆରୁଅହନ୍ ବାର୍ନା ସାମାୟନୁ ଯେତ୍କ ବିଶ୍ୱାସୀ ଆଲାର୍ ଉଜ୍ଜର୍ ଆରୁ ବାକି ରର୍, ଆବ୍ଡ଼ାର୍ ଏକାର୍ ଯୀଶୁ ଖ୍ରୀସ୍ତ୍ସିନ୍ ବିଶ୍ୱାସ୍ କାମିକିରି କେଚ୍ଚାର୍ କେର୍କାନାଏ ଆବ୍ଡ଼ାର୍ସ୍ତି ଆଘ୍ଲି ମା ମାନର୍। 16ଏନ୍ଦେର୍ଗେକା ପ୍ରାଭୁସ୍ ନିଜେ ଜୋର୍ସେ ଆଦେଶ୍ ଚିଇକିରି ମୁଖ୍ୟା ଦୂଁତ୍ଘି ଶବଦ୍ ଆରୁ ପାର୍ମେଶ୍ୱାର୍ସ୍ ତୂରୀବାଜା ଗାନେ ସର୍ଗ୍ତି ଏତ୍ତସ୍; ହତ୍କବାକେନ୍ ଏକାର୍ ଖ୍ରୀସ୍ତ୍ସିନ୍ ବିଶ୍ୱାସ୍ କାମିକିରି କେଚ୍ଚାର୍ କେର୍କାନାଏ, ଆବ୍ଡ଼ାର୍ ପହ୍ଲେ ଉଜ୍ଜର୍। 17ହତ୍କବାକେନ୍ ନାମ୍ ଯେତ୍କ ଲୋକ୍ ଉଜ୍ଜତ୍ ଆରୁ ବାକି ରତ୍ ଆବ୍ଡ଼ାତ୍, ଆବ୍ଡ଼ାର୍ ଗାନେ ବାଦ୍ଲିନୁ ମିଆଁ ଉଠାବାକୋତ୍ ଆରୁ ଆକାଶ୍ନୁ ପ୍ରାଭୁସ୍ଗାନେ ଭେଁଟ୍ ମାନତ୍; ଏନ୍ନେନ୍ ନାମ୍ ଜାମାବାକେନ୍ ପ୍ରାଭୁସ୍ଗାନେ ରତ୍। 18ହୁଦ୍ଘିଲାଗାନ୍ ଇବ୍ଡ଼ା ଜାମା ବଚନ୍ତି ଏକ୍ ଦୁସ୍ରାରିନ୍ ଶାନ୍ତି ଚିତେ ରା।
5ପ୍ରାଭୁସ୍କି ଆରୁଅହନ୍ ବାର୍ନାଘି ଲାଗାନ୍ ତିୟାର୍ ରା
1ହେ ଭାଇ ବୁହୁଣୀଜାମାରୋ, ସାମାୟ ଆରୁ ଉଲ୍ଲାଘି ବାରେନୁ ନିମାନ୍ ଏନ୍ଦେର୍ହି ଲେଖାଗେ ଦାର୍କାର୍ ମାଲ୍ଲାଦିନ୍। 2ଏନ୍ଦେର୍ଗେକା ନିମ୍ ନିଜେନିନ୍ ବାନେକିରି ଆହ୍ଦାର୍ କା ଏସ୍କେ ମାଁହାବାକେନ୍ ଚର୍ହାସ୍ ବାର୍ଦାସ୍, ଆନ୍ନେନ୍ ପ୍ରାଭୁସ୍କି ଆରୁଅହନ୍ ବାର୍ନାଘି ଉଲ୍ଲାଦ୍ ବାର୍ନାବାଲା ରାଇ। 3ଯେତ୍କବାକେନ୍ ଆଲାର୍ ତେଙ୍ଗାଲ୍କାରର୍ କା “ନାମ୍ ବାଛ୍ର୍କାତ୍ କେର୍କାତ୍ ଆରୁ ଶାନ୍ତିନୁ ରାଦାତ୍”, ହତ୍କବାକେନ୍ ଏସ୍କେ କା ଅଣ୍ଟା ଆଲିଘି ମେଦୁନୁ ରାନାବାକେନ୍, ହାଦ୍ମହଁର୍ନାଘି ଦୁଃଖୁ ହଠାତ୍ ବାରିଦ୍ ହନ୍ନେନ୍ ଆବ୍ଡ଼ାର୍ଘି ମିଆଁ ହଠାତ୍ ବିପଦ୍ ବାରୋଦ୍ ଆରୁ ଆବ୍ଡ଼ାର୍ ଏସ୍କିନ୍ହି ମା ବାଛ୍ର୍ନାଏ।
4ଲେକିନ୍ ହେ ଭାଇ ବୁହୁଣୀଜାମାରୋ, ନିମ୍ତା ଉହାନୁ ମାଲ୍କାରିନ୍ କା ଆ ଉଲ୍ଲାଦ୍ ଚର୍ହାସ୍କି ଲେଖା ନିହ୍ମା ମିଆଁ ବାରୋଦ୍। 5ଏନ୍ଦେର୍ଗେକା ନିମ୍ ଯେତ୍କର୍ ବିଲ୍ଲୀ ଆରୁ ଉଲ୍ଲାଘି ହାଦ୍ଦୁବଚ୍ଚର୍। ନାମ୍ ନା ତା ଉହାନ୍ତା ଆରୁ ନା ତା ଶାଏତାନ୍ଘି କାବ୍ଜାନୁ ରାନାବାଲାତ୍। 6ହୁଦ୍ଘିଲାଗାନ୍ ଅବିଶ୍ୱାସୀ ଜାମାର୍ ଲେଖା ଆମ୍ବତ୍ ମାନା ଏକାର୍ କା ଖାଲି ଚୁତ୍ନାଏ, ଲେକିନ୍ ଚେତ୍ରିକିରି ଆରୁ ସାବ୍ଧାନ୍ ରତ୍। 7ଏନ୍ଦେର୍ଗେକା ଏକାର୍ ଚୁତ୍ନାଏ ଆବ୍ଡ଼ାର୍ ମାଁହାନିନ୍ ଚୁତ୍ନାଏ, ଆରୁ ଏକାର୍ ମାତ୍ୱାଡ଼୍ର୍ ଆବ୍ଡ଼ାର୍ ମାଁହାନିନ୍ ଉଙ୍ଖ୍ନାଏ। 8ଲେକିନ୍ ନାମ୍ ତା ଉଲ୍ଲାନ୍ତା ହାଦ୍ଦୁବଚ୍ଚତ୍, ହୁଦ୍ଘିଲାଗାନ୍ ବିଶ୍ୱାସ୍ ଆରୁ ଝୀଲମ୍ ଆତ୍ତିକିରି ଆରୁ ମୁକ୍ତି ହାଖ୍ଖନାଘି ଆଶ୍ରାବନ୍ ହେଲ୍ମେଟ୍ ଲେଖା ଆତ୍ତିକିରି ସାବ୍ଧାନ୍ ରତ୍। 9ଏନ୍ଦେର୍ଗେକା ପାର୍ମେଶ୍ୱାର୍ସ୍ ନାମାନ୍ ଦଣ୍ଡ୍ ହାଖ୍ଖାଗେ ମାଲ୍ଲା, ଲେକିନ୍ ନାମାନ୍ ପ୍ରାଭୁ ଯୀଶୁ ଖ୍ରୀସ୍ତ୍ସ୍କି ଦ୍ୱାର୍ନୁ ମୁକ୍ତି ହାଖ୍ଖାଗେ ଚାଜ୍ଜ୍କାଦାସ୍। 10ପ୍ରାଭୁ ଯୀଶୁ ଖ୍ରୀସ୍ତ୍ସ୍ ନାହ୍ମାଲାଗାନ୍ କେଚ୍ଚାସ୍କେରାସ୍ ତାକା ଚାହେ ନାମ୍ ଉଜ୍ଜତ୍ ଚାହେ ଖିଅତ୍ ଯେତ୍କବାକେନ୍ ଯୀଶୁସ୍ ଆରୁଅହନ୍ ବାରସ୍ ତା ନାମ୍ ଆସ୍ଗାନେ ଉଜ୍ଜତ୍। 11ନିମ୍ ପାର୍ମେଶ୍ୱାର୍ସ୍ଗାନେ ଜାମାବାକେନ୍ ରାଦାର୍ ହୁଦ୍ଘିଲାଗାନ୍ ଏକ୍ ଦୁସ୍ରାରିନ୍ ଶାନ୍ତି ଚିଆ ଆରୁ ଏକ୍ ଦୁସ୍ରାରିନ୍ ଆତ୍ମିକ୍ ରୂପ୍ତି ମଜ୍ବୁତ୍ କାମ୍ତେ ରା, ଏସ୍କେ କା ନିମ୍ କାମ୍ତେ ବାରାଲ୍ଦାର୍।
ଆଖ୍ରୀ ଉପ୍ଦେଶ୍ ଆରୁ ଯୋହାର୍
12ଆକ୍କୁନ୍ ହେ ଭାଇ ବୁହୁଣୀଜାମାରୋ, ଏମ୍ ଆର୍ଜୀବିନ୍ତି କାମାଲ୍ଦାମ୍ କା ନେଦ୍ହି ନିହ୍ମା ମାଝାନୁ ନାଲ୍ଖୁ କାମ୍ନାଏ, ଆରୁ ଏକାର୍ ନିମାନ୍ ବିଶ୍ୱାସୀ ଜୀବନ୍ନୁ ଆଗୁୱାଇ କାମ୍ନାଏ, ଆରୁ ଶିକ୍ଷା ଚିନାଏ ଆବ୍ଡ଼ାରିନ୍ ମାଇନ୍ କାମା। 13ଆରୁ ଆବ୍ଡ଼ାର୍ଘି ନାଲ୍ଖୁଘି ଲାଗାନ୍ ବାନେ ହାଖ୍ଖନାତି ଆବ୍ଡ଼ାରିନ୍ ବହୁତ୍ ମାଇନ୍ କାମ୍ତେ ରା: ଏକ୍ ଦୁସ୍ରାର୍ଗାନେ ମେଲ୍ ପ୍ରେମ୍ସେ ରା।
14ହେ ଭାଇ ବୁହୁଣୀଜାମାରୋ, ଏମ୍ ନିମାନ୍ ଆର୍ଜୀବିନ୍ତି କାମାଲ୍ଦାମ୍ କା, ଏକାର୍ କୁଢ଼ିୟାର୍ ଆବ୍ଡ଼ାରିନ୍ ଚେତାବାନୀ ଚିଆ, ଡାର୍ପୋକ୍ରିନ୍ ଉତ୍ସାହିତ୍ କାମା, କାମ୍ଜୋରିଆରିନ୍ ମଦେତ୍ କାମା ଆରୁ ଯେତ୍କର୍ଗାନେ ଧିରାଜ୍ତି ରା। 15ସାବ୍ଧାନ୍ ରା! ନେଦ୍ହି ନେକାନ୍ହି ଖାରାପ୍ଘି ବାଦ୍ଲା ଖାରାପ୍ ଆମ୍କେ କାମା; ଲେକିନ୍ ଜାମାବାକେନ୍ ଭାଲାଇ କାମାଗେ ଇଚ୍ଛୁକ୍ ରାକେ, ଆରୁ ଏକ୍ ଦୁସ୍ରାର୍ଗାନେ ଆରୁ ଜାମାର୍ଗାନେ ଭାଲାଇ କାମାଗେନିନ୍ କୋଶିଷ୍ କାମା 16ଜାମାବାକେନ୍ ଖୁସୀନୁ ରା 17ଲାଗାତାର୍ ବିନ୍ତି କାମ୍ତେ ରା 18ଜାମା ପରିସ୍ଥିତିନୁ ପାର୍ମେଶ୍ୱାର୍ସ୍କି ଧାନ୍ୟାବାଦ୍ କାମା; ଏନ୍ଦେର୍ଗେକା ନିମ୍ ଖ୍ରୀସ୍ତ୍ସ୍ ଯୀଶୁକି ଆଲାର୍, ହୁଦ୍ଘିଲାଗାନ୍ ନିହ୍ମା ବାରେନୁ ପାର୍ମେଶ୍ୱାର୍ସ୍କି ଇଦ୍ ଇଚ୍ଛାଦ୍। 19ପାବିତାର୍ ଆତ୍ମା ନାହ୍ମା ଜୀବନ୍ନୁ ନାଲ୍ଖୁ କାମାଲିଦ୍ ଆବନ୍ ଆମା ରୋକା। 20ଭବିଷତ୍ କାତ୍ଥା କାମୁର୍ଘି ସନ୍ଦେଶ୍ବନ୍ ତୁଚ୍ଛ ଆମ୍କେ ସୋଚା। 21ଆବ୍ଡ଼ାର୍ଘି ସନ୍ଦେଶ୍ବନ୍ ପରୀକ୍ଷା କାମିକିରି; ଏକାଦ୍ ସତ୍ତୁଦ୍ ଆବନ୍ ଧାରା ଉଇୟା। 22ଆରୁ ଜାମା ପ୍ରକାର୍ଘି ଖାରାପ୍ତି ବାଛ୍ରିକିରି ରା।
23ଶାନ୍ତିଦାତା ପାର୍ମେଶ୍ୱାର୍ସ୍ ନିଜେ ନିମାନ୍ ପୁରାପୁରୀ ପାବିତାର୍ କାମସ୍; ଆରୁ ନିହ୍ମା ଆତ୍ମା, ଜୀଆ, ଆରୁ ଶରୀର୍, ନାହ୍ମା ପ୍ରାଭୁ ଖ୍ରୀସ୍ତ୍ ଯୀଶୁସ୍କି ବାର୍ନାତକ୍ ପୁରାପୁରୀ ନିର୍ଦ୍ଦୋଷ୍ ବାଛ୍ରିକିରି ରତ୍। 24ନିମାନ୍ ମେଁହ୍ନା ବାଲାସ୍ ସତ୍ତୁ ପାର୍ମେଶ୍ୱାର୍ସ୍ ଆରୁ ଆସ୍ ଏନ୍ନେନ୍ କାମସ୍।
25ହେ ଭାଇବୁହୁଣୀ ଜମାରୋ, ଏହ୍ମା ଲାଗାନ୍ ବିନ୍ତି କାମା। 26୫:୨୬ ୟାହୁଦୀ ଜାମାର୍ଘି ପରମ୍ପରାନୁ ଏକ୍ ଦୁସ୍ରାରିନ୍ ଯୋହାର୍ କାମ୍ନା ବାକେନ୍ ଚଙ୍ଖାଲିୟାର୍।ଖ୍ରୀସ୍ତ୍ସ୍କି ବାନେ ହାଖ୍ଖନାନୁ ଜାମା ଭାଇ ବୁହୁଣୀରିନ୍ ଯୋହାର୍। 27ଏନ୍ ନିମାନ୍ ପ୍ରାଭୁସ୍କି ହକ୍ତି ତେଙ୍ଗାଲ୍ଦାନ୍ କା ଇ ଚିଠିବନ୍ ଜାମା ଭାଇ ବୁହୁଣୀରିନ୍ ପାଢ଼ିକିରି ଶୁଣାବର୍।
28ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍ସ୍କି ଦାୟା ନିହ୍ମା ମିଆଁ ମାନ୍ନାଦ୍।