ପାତ୍ରାସ୍କି ପହେଲା ଚିଠି
ବହିଘି ପରିଚୟ
ପାତ୍ରାସ୍ ଇ ଚିଠିନ୍ ଲେଖ୍ଚ୍କାଦାସ୍। ଆସ୍ ବାର ଲୋକ୍ ଖାସ୍ଚେଲାର୍ଘି ଭିତର୍ନୁ ଅର୍ତୁସ୍। ଆସ୍କି ନାମେ ଶିମୋନ୍ ରାଚା। ଲେକିନ୍ ଯୀଶୁସ୍ ଆସ୍କି ନାମେ ବାଦ୍ଲିକିରି ପାତ୍ରାସ୍ ଉଇୟାସ୍ ଯୋହାନ୍ ୧:୪୨। ପାତ୍ରାସ୍କି ମତ୍ଲବ୍ ଚାଟ୍ଣୀ ଚାହେ ଚାଁଚା। ପାତ୍ରାସ୍ ଯୀଶୁ ଖ୍ରୀସ୍ତ୍କି ଖାସ୍ଚେଲା ଜାମାର୍ଘିନ୍ତି ଅଣ୍ଟା ମୁଖ୍ୟା ଖାସ୍ଚେଲା ରାଚାସ୍। ଇସ୍ ଆ ପାତ୍ରାସ୍ ଏକାସ୍ କା ଡଙ୍ଗାନ୍ତି ଏତ୍ତିକିରି ଯୀଶୁସ୍ଗାନେ ଆମ୍ମୁନୁ ଏକ୍କାଚାସ୍। ପାତ୍ରାସ୍ ପହ୍ଲେ ଖୁଲାଖୁଲି ଯୀଶୁସିନ୍ ଖ୍ରୀସ୍ତ୍ ବୁଲି ତେଙ୍ଗିୟାସ୍। (ମାତି ୧୬: ୧୬-୧୯) ଇ ପାତ୍ରାସ୍ ଯୀଶୁସିନ୍ ବାଲ୍ଦାନିନ୍ ବୁଲି ମାନା କାମ୍ଚାସ୍। (ଲୁକାସ୍ ୨୨: ୩୧-୩୪; ୫୪-୭୧) ପାତ୍ରାସ୍ ତାଙ୍ଘା ଭୁଲ୍ବନ୍ ଗ୍ରହନ୍ କାମ୍ଚାସ୍ ଆରୁ ପାସ୍ତାରାଚାସ୍, ଆରୁ ଯୀଶୁ ଖ୍ରୀସ୍ତ୍ତି ଛେମା ନିଚାସ୍, ପାଛ୍ଲି ଆସ୍ ଯୀଶୁ ଖ୍ରୀସ୍ତ୍ସିନ୍ ମୁରୁକ୍ ବାନେ ହାଖ୍ଖୀୟାସ୍ ଆରୁ ଯୀଶୁ ଖ୍ରୀସ୍ତ୍କି ସୁସାମାଚାର୍ ପ୍ରଚାର୍ କାମାଗେ ଭାର୍ ଅଚ୍ଚାସ୍। (ଯୋହାନ୍ ୨୧:୧୫-୧୯) ପେନ୍ତେକୋଶ୍ ଉଲ୍ଲାନୁ ଯେତ୍କବାକେନ୍ ପାବିତାର୍ ଆତ୍ମାଦ୍ ଆବ୍ଡ଼ାର୍ଘି ମିଆଁ ଏତ୍ତିୟା ହତ୍କବାକେନ୍ ଆସ୍ ମୁଖ୍ୟା କାତ୍ଥା ତେଙ୍ଗୁ ରାଚାସ୍। ପାତ୍ରାସ୍ ଆରୁ ଯୋହାନ୍ ଯେରୁଶାଲେମ୍ ତା ବିଶ୍ୱାସୀ ମଣ୍ତ୍ଲୀନ୍ତା ମୁଖ୍ୟା ରାଚାର୍। ପୁନା ନିୟମ୍ ସାମାୟନୁ ଢେର୍ ଆଲାର୍ ଗ୍ରୀକ୍ ଭାଷା କାଚ୍ନେଖ୍ରା ଆରୁ ପାଢ଼ା ଅଙ୍ଗାଲିୟାର୍। ପାତ୍ରାସ୍ ଇ ଚିଠିନ୍ ଗ୍ରୀକ୍ ଭାଷାନୁ ଲେଖ୍ଚ୍କାଚାସ୍। ଇଦ୍ଘି ମତ୍ଲବ୍ ଯୀଶୁସ୍କି ବାରେ ସୁସାମାଚାର୍ ଚାଁଣେ ଫାଏଲାରୋ।
ଇ ପହେଲା ଚିଠିନ୍ ପାତ୍ରାସ୍ ଖ୍ରୀସ୍ତ୍ ବିଶ୍ୱାସୀ ଜାମାର୍ଗେ ଲେଖ୍ଚ୍କାଦାସ୍। ଇନ୍ନୁ ଆବ୍ଡ଼ାରିନ୍ ପାର୍ମେଶ୍ୱାର୍ସ୍କି ଚାଜ୍ଜକା ଆଲାର୍ବୁଲି ତେଙ୍ଗାକେର୍କିଚି। ଆବ୍ଡ଼ାର୍ ଏସିଆଘି ଉତ୍ତର୍ତାରା ଛିଛିର୍ଛାନ୍ଦ୍ ମାନ୍ଚାର୍ କେର୍କାଚାର୍। ଇବ୍ଡ଼ା ଆଲାରିନ୍ ଯୀଶୁ ଖ୍ରୀସ୍ତ୍ସିନ୍ ବିଶ୍ୱାସ୍ କାମ୍ନାଘି ଲାଗାନ୍ ଆସାନ୍ ରାନାବାଲା ବିନାୟାହୁଦୀର୍ ଆବ୍ଡ଼ାରିନ୍ ସାତାବାଲିୟାର୍। ପାତ୍ରାସ୍ ଯୀଶୁ ଖ୍ରୀସ୍ତ୍କି ଆରୁ ତାଙ୍ଘା ଦୁଃଖୁଘି ବାରେନୁ ନମୁନା ଚିଇକିରି ଆବ୍ଡ଼ାରିନ୍ ଉତ୍ସାହିତ୍ କାମାଲିୟାସ୍।
ଏକାର୍ ଇବନ୍ ପାଢ଼ର୍ ଆବ୍ଡ଼ାର୍ ଆହାଅଙ୍ଗର୍ କା ନିଜର୍ ବିଶ୍ୱାସ୍ଘି ଲାଗାନ୍ ଆବ୍ଡ଼ାର୍ଗେ ଦୁଃଖୁ ତକ୍ଲିବ୍ ସାହା ଖାତ୍ରୋ। ଲେକିନ୍ ଦୁଃଖୁ ତକ୍ଲିବ୍ ଆବ୍ଡ଼ାରିନ୍ ହାରାବା ପଲ୍ଲୀଦ୍। ଏନ୍ଦେର୍ଗେକା ଆବ୍ଡ଼ାର୍ଘି ପାପ୍ ଛେମାଲାଗାନ୍ ଯୀଶୁ ଖ୍ରୀସ୍ତ୍ ଦୁଃଖୁ ସାହିକିରି କେଚ୍ଚାସ୍କେରାସ୍ ଆରୁ ପାର୍ମେଶ୍ୱାର୍ସ୍ ଯୀଶୁସିନ୍ କେଚ୍ଚକାର୍ସ୍ତି ଉଜ୍ଜତାଚାସ୍। ଯୀଶୁ ଖ୍ରୀସ୍ତ୍କି ଲାଗାନ୍ ଦୁଃଖୁ ତକ୍ଲିବ୍ ସାହ୍ନାଦ୍ ଇବନ୍ ଏଦିକା ପାର୍ମେଶ୍ୱାର୍ସ୍କି ଆତ୍ମାଦ୍ ତାହ୍ମାଏନୁ ରାଇଦ୍।
ପାତ୍ରାସ୍ ଖ୍ରୀସ୍ତ୍ ବିଶ୍ୱାସୀରିନ୍ ମନେ କାମ୍ତାଦାସ୍ କା ଆବ୍ଡ଼ାର୍ ପର୍ଦେଶୀୟାର୍। ଆବ୍ଡ଼ାର୍ ଆକ୍କୁନ୍ ତା ସମାଜ୍ ଆରୁ ଆକ୍କୁନ୍ ତା ଦୁନିଆଁନୁ କେତ୍କ ଉଲ୍ଲାଘି ଲାଗାନ୍ ରାନାଏ। ଖ୍ରୀସ୍ତ୍ ବିଶ୍ୱାସୀ ଜାମାର୍ହି ଭବିଷତ୍ନୁ ଆରୁଅହନ୍ ଉଜ୍ଜାଗେ ଆଶ୍ରା କାମର୍। ଏସ୍କେ ଯୀଶୁ ଖ୍ରୀସ୍ତ୍ହି ପାର୍ମେଶ୍ୱାର୍ସ୍ତି ମାଇନ୍ ହାଖ୍ଖନାଘି ପହ୍ଲେ ଦୁଃଖୁ କଷଟ୍ ସାହ୍ଚାସ୍। ହନ୍ନେନ୍ ଖ୍ରୀସ୍ତ୍ ବିଶ୍ୱାସୀର୍ହି ଯୀଶୁସ୍କି ଆରୁଅହନ୍ ବାର୍ନା ସାମାୟନୁ ଏକା ମାଇନ୍ ହାଖ୍ଖର୍, ଆଦ୍ଘି ପହ୍ଲେ ଆବ୍ଡ଼ାର୍ଗେହି ଦୁଃଖୁ କଷଟ୍ ସାହା ଖାତ୍ରୋ।
ନିମ୍ ଇ ଚିଠିନ୍ ବାନେକିରି ପାଢ଼ା। ନିହ୍ମା ଜୀବନ୍ନୁହି ଖ୍ରୀସ୍ତ୍କି ବିଶ୍ୱାସ୍ଘି ଲାଗାନ୍ ଭାଏଲ୍ ନିମାଗେ ଦୁଃଖୁ ସାହା ଖାତ୍ରୋ ତା, ନିମ୍ ହାତାଶ୍ ଆମ୍କେମାନା। ଲେକିନ୍ ଦୁଃଖୁଘି ସାମାୟନୁହି ଖ୍ରୀସ୍ତ୍ ନିହ୍ମାଗାନେ ରସ୍। ନିମାନ୍ ଦୁଃଖୁନ୍ ପାର୍ କାମାଗେ ଶକ୍ତି ଚିୟସ୍। ହୁଦ୍ଘିଲାଗାନ୍ ଦୁଃଖୁଘି ସାମାୟନୁ ବିଶ୍ୱାସ୍ନୁ ମଜ୍ବୁତ୍ ମାନିକିରି ଆଘ୍ଲି ବାଢ଼ର୍କେ, ଯୀଶୁ ଖ୍ରୀସ୍ତ୍ ନିମାଗେ ଆଶୀର୍ବାଦ୍ ଚସ୍।
ରୂପ୍-ରେଖା:
ଯୋହାର୍ ୧:୧,୨
ପାର୍ମେଶ୍ୱାରସ୍କି ନାହ୍ମା ପାପ୍ତି ବାଛାବାନାବନ୍ ମନେ କାମ୍ନା ୧:୩-୧୨
ପାବିତାର୍ ଜୀବନ୍ଘି ଲାଗାନ୍ ଉପ୍ଦେଶ୍ ୧:୧୩—୨:୧୦
ଦୁଃଖୁ ବାକେନ୍ ଖ୍ରୀସ୍ତ୍ ବିଶ୍ୱାସୀର୍ଘି ଜିମେଦାରୀ ୨:୧୧—୪:୧୯
ଖ୍ରୀସ୍ତ୍କି ନରମ୍ ଆରୁ ସେବା ୫:୧-୧୧
ଆଖ୍ରୀ କାତ୍ଥା ୫:୧୨-୧୪
1ଯୋହାର୍
1ଏନ୍ ପାତ୍ରାସ୍, ଯୀଶୁ ଖ୍ରୀସ୍ତ୍କି ଅଣ୍ଟା ଖାସ୍ଚେଲାନ୍। ଏନ୍ ପାର୍ମେଶ୍ୱାର୍ସ୍କି ଚାଜ୍ଜକା ପର୍ଦେଶୀୟାର୍ ଲେଖା ପନ୍ତୁସ୍, ଗାଲାତୀୟା, କାପ୍ପାଦୁକିୟା, ଆସିଆ, ଆରୁ ବୀଥୂନିଆନୁ ଛିଛିର୍ଛାନ୍ଦ୍ ମାନିକିରି ରାନାଏ, ଆଲାର୍ଘି ନାମେନୁ ଚିଠି ଲେଖାଲ୍ଦାନ୍ 2ବାଙ୍ଗ୍ ପାର୍ମେଶ୍ୱାର୍ସ୍ ନିମାନ୍ ତାଙ୍ଘା ଆଲାର୍ ଲେଖା ଚାଜ୍ଜିୟାସ୍ ଆରୁ ତାଙ୍ଘା ଆତ୍ମାଦ୍ ନିମାନ୍ ପାବିତାର୍ କାମ୍ଚାଦ୍, ନିମ୍ ଯୀଶୁ ଖ୍ରୀସ୍ତ୍ସ୍କି ହୁକୁମ୍ବନ୍ ମାନ୍ଚ୍କାଦାର୍ ଆରୁ ତାଙ୍ଘା ହେଁସୁତି ଛିଛ୍ଣାଗେ ଚାଜା କେର୍କାଦାର୍।
ନିମାଗେ କ୍ରିପା ଆରୁ ଶାନ୍ତି ଢେର୍ବାଗ୍ଗେ ହାଖ୍ଖର୍ତେ ରାନାଦ୍।
ଜୀବନ୍ ଚିନାବାଲା ଭାର୍ଷା
3ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍କି ପାର୍ମେଶ୍ୱାର୍ ଆରୁ ବାଙ୍ଗ୍ସ୍କି ଧାନ୍ୟାବାଦ୍ ମାନ୍ନାଦ୍। ଆସ୍ ଯୀଶୁ ଖ୍ରୀସ୍ତ୍ସ୍କି କେଚ୍ଚକାର୍ସ୍ତି ଉଜ୍ଜନାଘି ଦ୍ୱାର୍ନୁ ନାମାଗେ ଜୀବନ୍ ଚିନାବାଲା ଆଶ୍ରାବନ୍ ହାଖ୍ଖାଗେ ତାଙ୍ଘା ମାହାନ୍ ଦାୟାତି ନାମାଗେ ପୁନା ଜନମ୍ ଚିଚ୍ଚକାଦାସ୍। 4ମତ୍ଲବ୍ ଏକାଦ୍ ନାଶ୍ ମା ମାନିଦ୍, ଏକାଦ୍ ପୁରାପୁରୀ ଶୁଦ୍ଧ୍, ଆରୁ ଏକାଦ୍ ମା କିତ୍ତିଦ୍, ଏନ୍ନେ ବୁଆସ୍କି ସମ୍ପତ୍ତିଘି ହକ୍ଦାର୍ ନିମାଗେ ସରଗ୍ନୁ ଉଇୟା କେର୍କିଚି; 5ଆରୁ ଏକା ମୁକ୍ତି ଆଖ୍ରୀ ଉଲ୍ଲାନୁ ପ୍ରକଟ୍ ମାନ୍ନାବାଲା ରାଇ, ଆବନ୍ ହାଖ୍ଖାଗେ ପାର୍ମେଶ୍ୱାର୍ସ୍ ତାଙ୍ଘା ଶକ୍ତିତି ନିମାନ୍ ବାଛାବାଚାସ୍ ଉଇକାଦାସ୍। 6ହୁଦ୍ଘିଲାଗାନ୍ ନିମ୍ ମୁରୁକ୍ ରିଝ୍ରାଲ୍ଦାର୍। ଯଦିଭି ଆକ୍କୁନ୍ ଥୋଡ଼େ ଉଲ୍ଲାଘି ଲାଗାନ୍ ନିମାଗେ ନାନା ରକମ୍ଘି ପରୀକ୍ଷା ମାନ୍ନାଘି ଲାଗାନ୍ ଦୁଃଖୁ ମାନ୍ନା ଜରୁରୀ ରାଇ। 7ତାକା ନିହ୍ମା ବିଡ଼୍ଚେ ଏର୍କା ବିଶ୍ୱାସ୍ଦ୍ ଏକାଦ୍ କା ଚିଚ୍ଚୁନୁ ଟାଘ୍ଲାଚ୍କା ନାଶ୍ ମାନ୍ନା ସୋନାନ୍ତିହି ବାଗ୍ଗେ ଦାମିକା ରାଇଦ୍। ଇତ୍ତି ଯୀଶୁ ଖ୍ରୀସ୍ତ୍କି ପ୍ରକଟ୍ ମାନ୍ନା ଉଲ୍ଲାନୁ ନିମାଗେ ପ୍ରଶଂସା, ମାହିମା ଆରୁ ମାଇନ୍ ହାଖ୍ଖର। 8ଯଦିଭି ନିମ୍ ଆସିନ୍ ମାଲ୍ଲା ଏରୁର୍, ହାଲେହି ନିମ୍ ଆସିନ୍ ବାନେ ହାଖ୍ଖଦାର୍। ଆରୁ ଯଦିଭି ଆକ୍କୁନ୍ ନିମ୍ ଆସିନ୍ ଏରା ପଲ୍ଲାଲ୍ଦାର୍, ଲେକିନ୍ ହାଲେହି ଆସିନ୍ ବିଶ୍ୱାସ୍ କାମ୍ଦାର୍ ଆରୁ ଏନ୍ନେ ଲୀଝ୍ର୍ଦାର୍ ଏକାଦ୍ କା ତେଙ୍ଗ୍ନାଘି ବାହ୍ରି ରାଇ ଆରୁ ମାହିମାତି ଭାର୍ପୁର୍ ରାଇଦ୍। 9ଆରୁ ନିମ୍ ନିହ୍ମା ବିଶ୍ୱାସ୍ଘି ଫଲ୍ ମତ୍ଲବ୍ ନିହ୍ମା ଆତ୍ମାଘି ମୁକ୍ତି କାମାଲ୍ଦାର୍।
10ଇ ପାପ୍ତି ବାଛ୍ର୍ନାଘି ବାରେ ଆ ନାବୀର୍ ବହୁତ୍ ମେହ୍ନତ୍ତି ବେଦ୍ଦାବେଦ୍ଦି କାମ୍ଚାର୍ ଆରୁ ବହୁତ୍ ସାବ୍ଧାନ୍ତି ଯାଁଚ୍କାମ୍ଚାର୍, ଏକାର୍ କା ନିହ୍ମା ମିଆଁ ମାନ୍ନାବାଲା କ୍ରିପାଘି ବାରେ ଭବିଷତ୍ କାତ୍ଥା କାମ୍ଚ୍କାଚାର୍। 11ଖ୍ରୀସ୍ତ୍ସ୍କି ଆତ୍ମାଦ୍ ନାବୀ ଜାମାର୍ଘିନୁ ରାଚାଦ୍। ଆଦ୍ ପହ୍ଲେନ୍ତିନ୍ ଖ୍ରୀସ୍ତ୍ସ୍କି ଦୁଃଖୁଘି ବାରେ ଆରୁ ଆଦ୍ଘି ପାଛ୍ଲି ମାନ୍ନାବାଲା ମାହିମାଘି ବାରେ ତେଙ୍ଗାଲିୟାଦ୍। ନାବୀଜାମାର୍ ଯାଁଚ୍କାମ୍ଚାର୍ କା ଆତ୍ମାଦ୍ ଏକା ସାମାୟ ଆରୁ ଏସ୍କେ ଦାଶାବନ୍ ବାତାବାଲିୟାଦ୍। 12ଆବ୍ଡ଼ାର୍ ତେଙ୍ଗିୟାର୍ କା ଆବ୍ଡ଼ାର୍ଘି ବଚନ୍ଦ୍ ଆବ୍ଡ଼ାର୍ଘି ଲାଗାନ୍ ମାଲ୍ଲାରୁଦ୍, ନିହ୍ମା ଲାଗାନ୍ ରାଚା ଆରୁ ଆବ୍ଡ଼ା ଜାମା କାତ୍ଥାନ୍ ସରଗ୍ତି ତାଏକା ପାବିତାର୍ ଆତ୍ମାଘି ଶକ୍ତିତି ନିହ୍ମାସାନ୍ ସୁସାମାଚାର୍ ଶୁଣାବୁର୍ଘି ଦ୍ୱାର୍ନୁ ଆକ୍କୁନ୍ ନିମାନ୍ ବାତାବା କେର୍କିଚି; ଆରୁ ଇବ୍ଡ଼ା କାତ୍ଥାନ୍ ସରଗ୍ଦୂଁତ୍ ଜାମାର୍ହି ଆହାଗେ ବହୁତ୍ ଇଚ୍ଛା କାମ୍ନାଏ।
ପାବିତାର୍ ଜୀବନ୍ ବିତାବାଗେ ମେଁହ୍ନା
13ହୁଦ୍ଘିଲାଗାନ୍ ନିଜର୍-ନିଜର୍ ମନ୍ନୁ ଚେତ୍ରିକିରି ରା, ଆରୁ ନିଜର୍-ନିଜର୍ ମିଆଁ କାବୁ ଉଇୟା। ଆରୁ ଯୀଶୁ ଖ୍ରୀସ୍ତ୍କି ଏଥ୍ର୍ନାଘି ସାମାୟନୁ ନିମାଗେ ହାଖ୍ଖର୍ନାବାଲା ରାଇଦ୍, ଆ କ୍ରିପାଘି ମିଆଁ ପୁରା ଭାର୍ଷା ଉଇୟା। 14ହୁକୁମ୍ ମାନ୍ନା ହାଦ୍ଦୁର୍ ଲେଖା ମାନା, ନିହ୍ମା ଖାରାପ୍ ଇଚ୍ଛା ଲେଖା ଆମା ଚାଲ୍ରା ଏସ୍କେ କା ନିମ୍ ଆଘ୍ଲି ଚାଲ୍ରାଲ୍କାର୍, ଯେତ୍କବାକେନ୍ ନିମ୍ ପାର୍ମେଶ୍ୱାର୍ସିନ୍ ବାଲ୍ଲକାଚ୍କାର୍। 15ନିମାନ୍ ମେହୁଁସ୍ ଏସ୍କେ ପାବିତାର୍ ରାଦାସ୍, ଆନ୍ନେନ୍ ନିମ୍ ନିହ୍ମା ଜାମା ଚାଲିଚଲନ୍ନୁ ପାବିତାର୍ ମାନା। 16ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇଦ୍, ପାର୍ମେଶ୍ୱାର୍ସ୍ ତେଙ୍ଗ୍ଦାସ୍, “ପାବିତାର୍ ମାନା, ଏନ୍ଦେର୍ଗେକା ଏନ୍ ପାବିତାର୍ ରାଦାନ୍।” 17ଯେତ୍କବାକେନ୍ ନିମ୍ ବିନ୍ତି କାମ୍ଦାର୍ ତା ଆସିନ୍ “ହେ ବାଙ୍ଗ୍” ବୁଲି ତେଙ୍ଗ୍ଦାର୍, ଏକାସ୍ କା ଅନ୍ପାଖିଆ ମା ମାନିକିରି ଜାମାର୍ଘି ନିଜର୍-ନିଜର୍ ନାଲ୍ଖୁ ଅନୁସାର୍ ନ୍ୟାୟ କାମ୍ଦାସ୍, ତା ନିଜର୍-ନିଜର୍ ପର୍ଦେଶୀ ରାନା ସାମାୟବନ୍ ଏଲ୍ଚ୍କାତି ବିତାବା। 18ଏନ୍ଦେର୍ଗେକା ନିମ୍ ଆହ୍ଦାର୍ କା ନିହ୍ମାଏ ବେକାର୍ ଚାଲିଚଲନ୍ ଏକାଦ୍ କା ପୁର୍ଖାର୍ସ୍ତି ଚାଲ୍ର୍ତେ ବାରାଲିଦ୍, ଆସ୍ତି ନିହ୍ମା ଛୁଟ୍କାରା ସୋନା ରୂପା ଲେଖା ନାଶ୍ ମାନ୍ନାବାଲା ଜିନିଷ୍ତି ମାଲ୍ଲା ମାନୁଦ୍। 19ଦୋଷ୍ ମା ରାନା ଆରୁ ଦାଗି ମା ରାନା ଭେଡ଼ିହାଦ୍ଦୁ, ମତ୍ଲବ୍ ଖ୍ରୀସ୍ତ୍କି ବହୁତ୍ ଦାମିକା ହେଁସୁତି ମାନ୍ଚ୍କିଚି। 20ଇ ଦୁନିଆଁଘି ସୁରୁଘି ଆଘ୍ଲିନ୍ତି ଆସିନ୍ ଚାଜ୍ଜକା ରାଚା। ଲେକିନ୍ ଆସ୍ ନିହ୍ମା ଲାଗାନ୍ ଇ ଆଖ୍ରୀ ଯୁଗ୍ନୁ ପ୍ରକଟ୍ ମାନ୍ଚାସ୍। 21ଆ ଖ୍ରୀସ୍ତ୍କି ଦ୍ୱାର୍ନୁ ନିମ୍ ଆ ପାର୍ମେଶ୍ୱାର୍ସିନ୍ ବିଶ୍ୱାସ୍ କାମ୍ଦାର୍, ଏକାସ୍ କା ଆସିନ୍ କେଚ୍ଚକାର୍ତି ଉଜ୍ଜତାଚାସ୍ ଆରୁ ମାହିମା ଚିଚ୍ଚାସ୍, ତାକା ନିହ୍ମା ଆଶ୍ରା ଆରୁ ବିଶ୍ୱାସ୍ ପାର୍ମେଶ୍ୱାର୍ସ୍କି ମିଆଁ ମାନ୍ନାଦ୍।
22ନିମ୍ ସତ୍ତୁବନ୍ ମାନିକିରି କପଟ୍ ମା ରାନାବାଲା ଭାଇ ବାନେ ହାଖ୍ଖନାଘି ଲାଗାନ୍ ନିଜର୍-ନିଜର୍ ଆତ୍ମାବନ୍ ଶୁଦ୍ଧ୍ କାମ୍ଚ୍କାଦାର୍, ତା ମନ୍ ଜୀଆ ଲାଗାବିକିରି ଏକ୍ ଦୁସ୍ରାରିନ୍ ବାଗ୍ଗେ ବାନେ ହାଖ୍ଖା। 23ଏନ୍ଦେର୍ଗେକା ନିମ୍ ନାଶ୍ ମାନ୍ନାବାଲା ମାଞ୍ଜିତି ମାଲ୍ଲା ନିମ୍ ପାର୍ମେଶ୍ୱାର୍ସ୍କି ଉଜ୍ଜନା ଆରୁ ସବୁଦିନ୍ତା ବଚନ୍ତି ପୁନା ଜନମ୍ ହାକ୍କାଦାର୍। 24ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ଜାମା ଆଲାର୍ ଘାଁସି ଲେଖା ରାନାଏ, ଆରୁ ତାହ୍ମା ଜାମା ବାନେ ଏଥ୍ର୍ନା ଘାଁସିଘି ପୁଁପୁ ଲେଖା ରାଇଦ୍। ଘାଁସି ହାଇକାଇ ଆରୁ ପୁଁପୁ ହେତ୍ରିକାଇ, 25ଲେକିନ୍ ପ୍ରାଭୁସ୍କି ବଚନ୍ ସବୁଦିନ୍ଘି ଲାଗାନ୍ ଟିକ୍ରିକିରି ରାଇଦ୍।” ଆରୁ ଇଦ୍ ଆ ସୁସାମାଚାର୍ଘି ବଚନ୍ଦ୍ ଏକାନ୍ କା ନିହ୍ମାସାନ୍ ମେନ୍ତା କେର୍କିଚା।
2ଉଜ୍ଜନା ଚାଁଚା ଆରୁ ପାବିତାର୍ ଆଲାର୍
1ହୁଦ୍ଘିଲାଗାନ୍ ଜାମା ରକମ୍ଘି ଖାରାପ୍, ଠାକିକିରି ଧୋଖା ଚିନା, କପଟ୍ ଆରୁ ହିସ୍ଙ୍ଗା ଆରୁ ଚୁଗ୍ଲିବନ୍ ଆମ୍ବିକିରି, 2ପୁନା ଜନମ୍ ମାନ୍ଚ୍କା ହାଦ୍ଦୁର୍ଘି ଲେଖା ସାଫା ଆତ୍ମିକ ଗୁରୋସ୍ବନ୍ ହାଖ୍ଖାଗେ ଲାଲ୍ରା, ତାକା ଆତ୍ତି ନିମ୍ ନିହ୍ମା ବିଶ୍ୱାସ୍ ଜୀବନ୍ନୁ ଆଘ୍ଲି ବାଢ଼୍ରା ଅଙ୍ଗର୍। 3ଏନ୍ଦେର୍ଗେକା ପ୍ରାଭୁସ୍ କେତ୍କ ଦାୟାଲୁସ୍ ଆବନ୍ ନିମ୍ ଆକ୍କାର୍ କେର୍କାଦାର୍।
4ଯୀଶୁ ଖ୍ରୀସ୍ତ୍ସ୍କି ଚାହାଗେ ବାରା, ଆସ୍ ଉଜ୍ଜନା ଚାଁଚା ଲେଖାସ୍। ଏକାସିନ୍କା ଆଲାର୍ ତା ବେକାର୍ ସୋଚ୍ଚାର୍, ଲେକିନ୍ ଆସ୍ ପାର୍ମେଶ୍ୱାର୍ସ୍କି ନଜର୍ନୁ ଚାଜ୍ଜକା ଆରୁ ମୁରୁକ୍ ଦାମିକା ରାଦାସ୍। 5ନିମ୍ହି ଉଜ୍ଜନା ଚାଁଚା ଲେଖାର୍ ଆରୁ ଆତ୍ମିକ୍ ମନ୍ଦିର୍ଘି ରୂପ୍ନୁ ତିୟାର୍ ମାନାଲ୍ଦାର୍। ତାକା ଅଣ୍ଟା ପାବିତାର୍ ପୁରୋହିତ୍ ଦଲ୍ ମାନିକିରି ଏନ୍ନେ ଆତ୍ମିକ୍ ବଲୀ ଚାଢ଼ାବା, ଏକାଦ୍ କା ଯୀଶୁ ଖ୍ରୀସ୍ତ୍ସ୍କି ଦ୍ୱାର୍ନୁ ପାର୍ମେଶ୍ୱାର୍ସ୍କେ ଗ୍ରହନ୍ କାମ୍ନା ଲାଇଗ୍ ମାନୋ 6ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ: “ଏରା, ଏନ୍ ସିୟୋନ୍ନୁ ଅଣ୍ଟା ଚାଜ୍ଜକା ଆରୁ ମୁରୁକ୍ ଦାମିକା କୋଣାନ୍ତା ଅସ୍ଲି ଚାଁଚାବନ୍ ଉଇୟାଲ୍ଦାନ୍: ଆରୁ ନେଦିନ୍ ଆସ୍କି ମିଆଁ ବିଶ୍ୱାସ୍ କାମସ୍, ଆସ୍ ଏକ୍ଲାହି ମା ଲାଜରସ୍।” 7ଆରୁ ନିହ୍ମା ଲାଗାନ୍ ଏକାର୍ କା ବିଶ୍ୱାସ୍ କାମ୍ଦାର୍ ଆବ୍ଡ଼ାର୍ଗେ ତା ବହୁତ୍ ଦାମିକା ଚାଁଚାଦ୍, ଲେକିନ୍ ଏକାର୍ ବିଶ୍ୱାସ୍ ମା କାମ୍ନାଏ ଆବ୍ଡ଼ାର୍ଘି ଲାଗାନ୍ “ରାଜ୍ମିସ୍ତ୍ରୀଜାମାର୍ ଏକା ଚାଁଚାବନ୍ ବାଉନିକିରି ପାଖିଏଚିଚ୍ଚକାଚାର୍, ଆଦ୍ କୋଣାନ୍ତା ଅସ୍ଲି ଚାଁଚା ମାନ୍ଚାକେରା।” 8ଆରୁ “ଆଦ୍ ଠେସ୍ର୍ନାଘି ଚାଁଚା ଆରୁ ଚୋଟ୍ ଲାଗ୍ନାଘି ଚାଟ୍ଣୀ ମାନ୍ଚାକେରା।” ଏନ୍ଦେର୍ଗେକା ଆବ୍ଡ଼ାର୍ ତା ବଚନ୍ବନ୍ ମା ମାନିକିରି ଠେସ୍ର୍ନାଏ ଆରୁ ଇଦ୍ଘିଲାଗାନ୍ ନିନ୍ ତା ଆବ୍ଡ଼ାରିନ୍ ଚାଜ୍ଜକାଚାର୍। 9ଲେକିନ୍ ନିମ୍ତା ଅଣ୍ଟା ଚାଜ୍ଜକା ବାଉଁଶାର୍, ଆରୁ ରାଜ୍ପୁରୋହିତ୍ ଜାମାର୍ଘି ଦଲ୍, ଆରୁ ପାବିତାର୍ ଜାତି, ଆରୁ ପାର୍ମେଶ୍ୱାର୍ସ୍କି ନିଜର୍ ଆଲାର୍, ତାକା ନିମ୍ ପାର୍ମେଶ୍ୱାର୍ସ୍କି ଅଦ୍ଭୁତ୍ ନାଲ୍ଖୁଘି ବାରେ ତେଙ୍ଗା ଅଙ୍ଗର୍। ଏକାସ୍ କା ନିମାନ୍ ଉହାନ୍ତି ନିଜର୍ ଅଦ୍ଭୁତ୍ ବିଲ୍ଲୀନୁ ମେଁହ୍କାଦାସ୍। 10ପହ୍ଲେ ତା ନିମ୍ ପାର୍ମେଶ୍ୱାର୍ସ୍କି ଆଲ୍ ମାଲ୍ଲାରୁର୍ ଲେକିନ୍ ଆକ୍କୁନ୍ ନିମ୍ ଆସ୍କି ଆଲାର୍; ପହ୍ଲେ ତା ନିହ୍ମା ମିଆଁ ଦାୟା ମାଲ୍ଲା ମାନୁଦ୍, ଲେକିନ୍ ପାର୍ମେଶ୍ୱାର୍ସ୍କି ଦାୟା ଆକ୍କୁନ୍ ନିହ୍ମା ମିଆଁ ମାନ୍ଚ୍କିଚି।
ଖ୍ରୀସ୍ତ୍କି ବାନେ ନମୁନା
11ହେ ଏଙ୍ଘାଏ ପ୍ୟାରେରୋ, ଏନ୍ ନିମାନ୍ ଆର୍ଜୀବିନ୍ତି କାମାଲ୍ଦାନ୍ କା ନିମ୍ ଇ ଦୁନିଆଁନୁ ପର୍ଦେଶୀ ଆରୁ ପାବୁ ଏକୁର୍ ଲେଖା ରାଦାର୍। ନିମ୍ ନିଜର୍-ନିଜର୍ ମନ୍ତା ଖାରାପ୍ ଇଚ୍ଛାତି ବାଛ୍ରା ଆରୁ ରା ଏକାଦ୍ କା ନିହ୍ମା ଆତ୍ମାଗାନେ ଲାଡ଼ିଦ୍। 12ଦୁସ୍ରା ଜାତିୟାର୍ଘି ମାଝାନୁ ନିହ୍ମା ଚାଲିଚଲନ୍ଦ୍ ଠିକ୍ ମାନ୍ନାଦ୍; ତାକା ଏକା-ଏକା କାତ୍ଥାନୁ ଆବ୍ଡ଼ାର୍ ନିମାନ୍ ଖାରାପ୍ବୁଲି ବଦ୍ନାମ୍ କାମ୍ନାଏ, ଆବ୍ଡ଼ାର୍ ନିହ୍ମାଏ ବାନେ ନାଲ୍ଖୁନ୍ ଏରିକିରି ଆଦ୍ଘି ଲାଗାନ୍ ପାର୍ମେଶ୍ୱାର୍ସ୍କି ନ୍ୟାୟଘି ଉଲ୍ଲା ପାର୍ମେଶ୍ୱାର୍ସ୍କି ମାହିମା କାମର୍।
ଅଧିକାରୀର୍ଘି ହୁକୁମ୍ ମାନା
13ପ୍ରାଭୁସ୍କି ମାହିମାଘି ଲାଗାନ୍ ଜାମା ଅଧିକାରୀର୍ଘି ଅଧିନ୍ନୁ ରା, ରାଜାସ୍କି ଅଧିନ୍ନୁ ରା, ହୁଦ୍ଘିଲାଗାନ୍ କା ଆସ୍ ଜାମାର୍ଘିନ୍ତି ମୁଖ୍ୟାସ୍, 14ଆରୁ ଶାସନ୍ କାମୁର୍ଘି ଅଧିନ୍ନୁ ରା ଏନ୍ଦେର୍ଗେକା ଆବ୍ଡ଼ାର୍ ଖାରାପ୍ ନାଲ୍ଖୁ କାମୁରିନ୍ ଦଣ୍ଡ୍ ଚିୟାଗେ ଆରୁ ବାନେ ନାଲ୍ଖୁ କାମୁର୍ଘି ନାମେ କାମ୍ନାଘି ଲାଗାନ୍ ରାଜାସ୍ ଆବ୍ଡ଼ାରିନ୍ ତାଏକାଦାସ୍। 15ଏନ୍ଦେର୍ଗେକା ପାର୍ମେଶ୍ୱାର୍ସ୍ ଚାହଁଦାସ୍ କା ନିମ୍ ନିହ୍ମା ବାନେ ନାଲ୍ଖୁତି ନିର୍ବୁଦ୍ଧିଆ ଆଲାର୍, ଏକା ନାଲ୍ଖୁନ୍ ବାନେକିରି ମା ବୁଝ୍ରିକିରି କାମ୍ନାଏ, ଆ ନାଲ୍ଖୁନ୍ ବନ୍ଦ୍ କାମାଚିୟା। 16ନିମ୍ ଆଜାଦ୍ନୁ ରାନାବାଲା ଆଲାର୍ ଲେଖା ଚାଲ୍ରା, ଲେକିନ୍ ଇ ଆଜାଦ୍ବନ୍ ଖାରାପ୍ ନାଲ୍ଖୁଘି ବାହ୍ନା ଆମା କାମା; ଲେକିନ୍ ପାର୍ମେଶ୍ୱାର୍ସ୍କି ସେବକ୍ଜାମାର୍ ଲେଖା ଜୀବନ୍ ବିତାବା। 17ଜାମାର୍ଘି ମାଇନ୍ କାମା, ବିଶ୍ୱାସୀ ଭାଇ ବୁହୁଣୀଜାମାରିନ୍ ବାନେ ହାଖ୍ଖା, ପାର୍ମେଶ୍ୱାର୍ସିନ୍ ଏଲ୍ଚା, ରାଜାସ୍କି ମାଇନ୍ କାମା।
ଖ୍ରୀସ୍ତ୍ ନାହ୍ମାଏ ନମୁନା
18ହେ ସେବକ୍ ଜାମାରୋ, ଜାମା ରକମ୍ଘି ମାଇନ୍ତି ନିଜର୍-ନିଜର୍ ମାଲିକ୍ର୍ଘି କିୟାଁ ରା, ଆବ୍ଡ଼ାର୍ଘି କିୟାଁ ଖାଲି ମାଲ୍ଲା ଏକାର୍ ବାନେ ଆରୁ ନରମ୍ ରାନାଏ, ଏକାର୍ କାଠୋର୍ ରାନାଏ ଆବ୍ଡ଼ାର୍ଘି କିୟାଁହି ରା। 19ଏନ୍ଦେର୍ଗେକା ଯଦି ନେଦିନ୍ ପାର୍ମେଶ୍ୱାର୍ସ୍କି ବଚନ୍ ମାନିକିରି ରାନାଘି ଲାଗାନ୍ ଅନ୍ୟାୟତି ଦୁଃଖୁ ସାହ୍ଦାସ୍ ଆରୁ କଷଟ୍ ସାହ୍ଦାତ୍ ତା ଆଦ୍ ପାର୍ମେଶ୍ୱର୍ସ୍କି ନଜର୍ନୁ ପ୍ରଶଂସାଘି କାତ୍ଥାଦ୍। 20ଲେକିନ୍ ଯଦି ନିମ୍ ଦୋଷ୍ କାମିକିରି ମାର୍ ମହ୍ଁଦାର୍ ଆରୁ ଆବନ୍ ସାହ୍ଦାର୍ ତା, ଇଦ୍ ଏନ୍ଦେର୍ ବାଡ଼୍କା କାତ୍ଥାଦ୍? ଲେକିନ୍ ଯଦି ନିମ୍ ବାନେ ନାଲ୍ଖୁ କାମିକିରି ଦୁଃଖୁ ସାହ୍ଦାର୍ ଆରୁ ଧିରାଜ୍ ଧାର୍ଦାର୍ ତା, ଇଦ୍ ପାର୍ମେଶ୍ୱାର୍ସ୍କି ଆଘ୍ଲି ବାନେ ନାଲ୍ଖୁଦ୍। 21ଆରୁ ନିମାନ୍ ଇଦ୍ଘିଲାଗାନ୍ ମେହାଁକାରାଇ, ଏନ୍ଦେର୍ଗେକା ଖ୍ରୀସ୍ତ୍ହି ନିହ୍ମା ଲାଗାନ୍ ଦୁଃଖୁ ସାହିକିରି ଅଣ୍ଟା ନମୁନା ଏଦ୍କାଦାସ୍ ତାକା ନିମ୍ହି ଆସ୍କି ଲେଖା ଦୁଃଖୁ ସାହା। 22ଆସ୍ ଏନ୍ଦେର୍ହି ପାପ୍ ମାଲ୍ଲା କାମୁସ୍, ଆରୁ ନା ଆସ୍କି ଥୁମ୍ଣାନ୍ତି ଝୁଟ୍ଟୁ କାତ୍ଥା ଉର୍ଖା। 23ଆସ୍କି ନିନ୍ଦା କାମାକେରା ଲେକିନ୍ ଆସ୍ ନେଖାଏହି ନିନ୍ଦା ମା କାମ୍ଚାସ୍, ଆରୁ ଦୁଃଖୁ ସାହିକିରି ନେକାନ୍ହି ମା ଧାମ୍କାଚାସ୍, ଆସ୍ ନିଜ୍କେନିଜ୍ ସତ୍ତି ନ୍ୟାୟ କାମୁ ପାର୍ମେଶ୍ୱାର୍ସ୍କି ହେଖ୍ଖାନୁ ସୋଁପ୍ଚେଇଚାସ୍। 24ଆସ୍ ନିଜେ କ୍ରୁଶ୍ ମିଆଁ ନିଜର୍ ଶରୀର୍ନୁ ନାହ୍ମା ଜାମା ପାପ୍ବନ୍ ଅଚ୍ଚାସ୍, ତାକା ନାମ୍ ପାପ୍ କାମ୍ନାନ୍ ଆମ୍ବିକିରି ପାର୍ମେଶ୍ୱର୍ସ୍କି ନଜର୍ନୁ ଏକାଦ୍ ସତ୍ତୁଦ୍, ଆ ନାଲ୍ଖୁନ୍ କାମା: ତାଙ୍ଘା ଖାଦିଛେଦେତି ନିମ୍ ବାନେ ମାନ୍ଚ୍କାଦାର୍। 25ଏନ୍ଦେର୍ଗେକା ନିମ୍ ପହ୍ଲେ ଏଫ୍ସ୍ର୍କା ଭେଡ଼ିଘି ଲେଖା ରାଚ୍କାର୍, ଲେକିନ୍ ଆକ୍କୁନ୍ ନିମ୍ ନିହ୍ମା ଆତ୍ମାଘି ଚାର୍ୱାହ୍ ଆରୁ ଏରୁ ହଜୁସ୍କି ଚାହାଗେ କିର୍କାର୍ ବାର୍ଚ୍କାଦାର୍।
3ମାର୍ଦାନା ଆରୁ ମାଏକିନିଆଁଘି ସମ୍ପର୍କ
1ହେ ମାଏକିନିଆଁରୋ, ନିମ୍ ନିହ୍ମା ଆଲାର୍ଘି କିୟାଁ ରା। ଏସ୍କେ କା ଆବ୍ଡ଼ାର୍ଘି ଭିତର୍ନୁ ନେଦିନ୍ ପାର୍ମେଶ୍ୱାର୍ସ୍କି ବଚନ୍ବନ୍ ବିଶ୍ୱାସ୍ ମା କାମାଲ୍କାରର୍, 2ହାଲେହି ନିହ୍ମାଏ ପାବିତାର୍ ଆରୁ ଆଦର୍ଘି ଚାଲିଚଲନ୍ବନ୍ ଏରିକିରି ମା ତେଙ୍ଗିକିରିହି ନିଜର୍-ନିଜର୍ ମାଏକିନିଆଁର୍ଘି ଚାଲିଚଲନ୍ତି ବାଦ୍ଲାରର୍। 3ନିହ୍ମା ପୁରା ଧ୍ୟାନ୍ ଚୁଟ୍ଟି ଗଥ୍ନା, ସୋନାଘି ଗାହ୍ଣା ଆତ୍ତନା, ଚାହେ ବାନେ-ବାନେ ଚିଢ଼ା ଆତ୍ତିକିରି ସିଙ୍ଗାର୍ପାତାର୍ ମାନିକିରି ଦୁସ୍ରାରିନ୍ ମା ଏଦ୍ନା କାତ୍ଥା, 4ନିମ୍ ଇବନ୍ ବୁଝ୍ର୍ନା କାତ୍ଥା କା ନିହ୍ମା ମନ୍ତା ନୁହୁର୍କା ସାଭାବ୍ ନରମ୍ଭାବ୍ ଆରୁ ଦୀନ୍ତାତି ସିଙ୍ଗାର୍ପାତାର୍ ମାନ୍ନା କାତ୍ଥା। ଏନ୍ଦେର୍ଗେକା ପାର୍ମେଶ୍ୱାର୍ସ୍କି ନଜର୍ନୁ ଇଦ୍ ମୁଲ୍ୟାବାନ୍ଦ୍। 5ଏନ୍ଦେର୍ଗେକା ଆଘ୍ଲି ଯୁଗ୍ତା ପାବିତାର୍ ମାଏକିନିଆଁର୍ହି, ଏକାର୍ କା ପାର୍ମେଶ୍ୱାର୍ସ୍କି ମିଆଁ ଭାର୍ଷା ଉଇୟାଲିୟାର୍, ନିଜର୍-ନିଜର୍ ଆଲାର୍ଘି କିୟାଁ ରାଲିୟାର୍ ଆରୁ ନିଜ୍କେନିଜ୍ ଏନ୍ନେ ସାଜାବାଲିୟାର୍। 6ଏସ୍କେ କା ସାରାଦ୍ ଆବ୍ରାହାମ୍ସ୍କି ଅଧିନ୍ନୁ ରାଲିୟାଦ୍ ଆରୁ ଆସିନ୍ ମାଲିକ୍ ବୁଲି ମାନାଲିୟାଦ୍। ଏନ୍ନେନ୍ ଯଦି ନିମ୍ହି ଏନ୍ଦେର୍ହି ଏଲ୍ଚ୍କାତି ମା ଏଲ୍ଚିକିରି ବାନେ ନାଲ୍ଖୁ କାମ୍ଦାର୍ ତା ନିମ୍ହି ଆସ୍କି ହାଦ୍ଦୁ ମାନର୍।
7ହନ୍ନେନ୍ ହେ ମାର୍ଦ୍ନାରୋ, ନିମ୍ହି ସାମାଝ୍ଦାରିତି ନିଜର୍-ନିଜର୍ ମାଏକିନିଆଁର୍ଗାନେ ଜୀବନ୍ ବିତାବା। ଆରୁ ମାଏକିନିଆଁରିନ୍ କାମ୍ଜୋରି ସୋଚିକିରି ନିଜର୍ଗାନେ ସବୁଦିନ୍ତା ଜୀବନ୍ଘି କ୍ରିପାଘି ଅଧିକାରୀତ୍ ବୁଲି ଆହିକିରି ଆବ୍ଡ଼ାର୍ଘି ମାଇନ୍ କାମା। ଯଦି ନିମ୍ ଏନ୍ନେ କାମର୍ ତା, ନିହ୍ମା ବିନ୍ତିନୁ ଏନ୍ଦେର୍ହି ରୋକ୍ଟୋକ୍ ମା ମାନ।
ବାନେ ନାଲ୍ଖୁ କାମ୍ନାଘି ଲାଗାନ୍ ଦୁଃଖୁ ସାହ୍ନା
8ଆଖ୍ରୀନୁ, ନିମ୍ ଜାମାର୍ ଏକ୍ମନ୍ ଆରୁ ଏକ୍ ଦୁସ୍ରାର୍ଘି ସୁଃଖୁ ଦୁଃଖୁନୁ ଭାଗିଦାର୍ ମାନା, ବିଶ୍ୱାସୀ ଭାଇବୁହୁଣୀ ଜାମାର୍ଗାନେ ବାନେକିରି ରା, ଦାୟାଲୁ ଆରୁ ନରମ୍ ମାନା। 9ନୁକ୍ସାନ୍ଘି ବାଦ୍ଲା ନୁକ୍ସାନ୍ ଆମା କାମା, ଆରୁ ନିନ୍ଦାଘି ବାଦ୍ଲା ନିନ୍ଦା ଆମା କାମା; ଇଦ୍ଘି ବାଦ୍ଲା ଆଶିଷ୍ ଚିଆ, ଏନ୍ଦେର୍ଗେକା ଏନ୍ନେ କାମାଗେ ପାର୍ମେଶ୍ୱାର୍ସ୍ ନିମାନ୍ ମେଁହ୍କାଦାସ୍ ତାକା ନିମ୍ ବାପ୍ସ୍କି ସମ୍ପତ୍ତିଘି ହକ୍ଦାର୍ଘି ରୂପ୍ନୁ ଆଶିଷ୍ ହାଖ୍ଖର। 10ଏସ୍କେ କା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ଏକାସ୍ ସୁଃଖୁ ଜୀବନ୍ ବିତାବାଗେ ସୋଚ୍ଦାସ୍, ଆରୁ ବାନେ ଉଲ୍ଲା ଏରାଗେ ବେଦ୍ଦଦାସ୍, ଆସ୍ ତାଙ୍ଘା ତାଥାଲନ୍ବନ୍ ଖାରାପ୍ କାତ୍ଥାତି ଆରୁ ତାଙ୍ଘା ଚୋଲବନ୍ ଠାକିକିରି ଧୋଖା ଚିନା କାତ୍ଥା ତେଙ୍ଗ୍ନାତି ରୋକ୍ନାସ୍। 11ଆସ୍ ଖାରାପ୍ବନ୍ ଆମ୍ବିକିରି ବାନେ ନାଲ୍ଖୁ କାମ୍ନାସ୍; ଆରୁ ଶାନ୍ତିବନ୍ ବେଦ୍ଦିକିରି, ଆଦ୍ଘି ଲେଖା ଚାଲ୍ର୍ନାସ୍। 12ଏନ୍ଦେର୍ଗେକା ପ୍ରାଭୁସ୍କି ହାନ୍ନୁଦ୍ ଧାର୍ମିର୍ଘି ମିଆଁ ଲାକ୍କି ରାଇ, ଆରୁ ଆସ୍କି ହେବ୍ଦା ଆବ୍ଡ଼ାର୍ଘି ବିନ୍ତିବନ୍ ମେନିଦ୍, ଲେକିନ୍ ପ୍ରାଭୁସ୍ ଖାରାପ୍ ନାଲ୍ଖୁ କାମୁର୍ସ୍ତି ପାଖି ମୁହ୍ଡ଼ାରାଦାସ୍।”
13ଯଦି ନିମ୍ ବାନେ ନାଲ୍ଖୁ କାମ୍ନାନୁ ଲାକ୍କାରର୍ ତା ନେଦ୍ ନିହ୍ମାଏ ନୁକ୍ସାନ୍ କାମର୍? 14ଆରୁ ଯଦି ନିମ୍ ବାନେ ନାଲ୍ଖୁଘି ଲାଗାନ୍ ଦୁଃଖୁ ସାହ୍ଦାର୍ ତା, ନିମାଗେ ଆଶିଷ୍ ହାଖ୍ଖର; ଲେକିନ୍ ଆଲାର୍ଘି ଏଲ୍ଗ୍ତାନାତି ଆମା ଏଲ୍ଚା, ଆରୁ ଆମା ଘାବ୍ରାରା। 15ଲେକିନ୍ ଖ୍ରୀସ୍ତ୍ସିନ୍ ପ୍ରାଭୁ ବୁଲି ନିଜର୍-ନିଜର୍ ମନ୍ନୁ ମାଇନ୍ କାମା। ନେଦିନ୍ ନିମାନ୍ ଭାର୍ଷାଘି ବାରେ ମେନ୍ନାର୍ ତା, ଆବ୍ଡ଼ାରିନ୍ ନରମ୍ ମନ୍ତି ଆରୁ ଆଦର୍ତି ଉତ୍ତର୍ ଚିୟାଗେ ଜାମାବାକେନ୍ ତିୟାର୍ ରା। 16ଆରୁ ନିହ୍ମା ଜୀଆବନ୍ ସାଫା ଉଇୟା ତାକା ଏକାର୍ ନିହ୍ମାଏ ବଦ୍ନାମ୍ କାମ୍ନାଏ ଆରୁ ଖ୍ରୀସ୍ତ୍ସ୍କିନୁ ନିହ୍ମାଏ ବାନେ ଚାଲିଚଲନ୍ଘି ନିନ୍ଦା କାମ୍ନାଏ, ଆବ୍ଡ଼ାର୍ ଲାଜରର୍। 17ଏନ୍ଦେର୍ଗେକା ଯଦି ପାର୍ମେଶ୍ୱାର୍ସ୍କି ଏନ୍ନେ ଇଚ୍ଛା ରାଇ କା ନିମ୍ ବାନେ ନାଲ୍ଖୁ କାମ୍ନାଘି ଲାଗାନ୍ ଦୁଃଖୁ ସାହ୍ଦାର୍ ତା, ଇଦ୍ ଖାରାପ୍ କାମ୍ନାଘି ଲାଗାନ୍ ଦୁଃଖୁ ସାହ୍ନାନ୍ତି ବାନେଦ୍। 18ଏସ୍କେ କା ନାମାନ୍ ପାର୍ମେଶ୍ୱାର୍ସ୍କି ଚାହାଗେ ଅନ୍ଦ୍ରାଗେ ଖ୍ରୀସ୍ତ୍ ଧାର୍ମିକ୍ ହୋଇକିରି ହି, ଅଧର୍ମିୟାଁର୍ଘି ପାପ୍ଘି ଲାଗାନ୍ ଅହନ୍ କେଚ୍ଚାସ୍କେରାସ୍। ଆସ୍ ଶରୀର୍ତି ତା କେଚ୍ଚାସ୍କେରାସ୍ ଲେକିନ୍ ପାବିତାର୍ ଆତ୍ମାତି ଉଜ୍ଜିୟାସ୍ କେରାସ୍। 19ଆଙ୍ଗେନ୍ ଆସ୍ ବନ୍ଦୀ ଆତ୍ମାର୍ସାନ୍ହି କାଇକିରି ପ୍ରଚାର୍ କାମ୍ଚାସ୍। 20ଆଘ୍ଲି ଯୁଗ୍ନୁ ନୁଆସ୍କି ସାମାୟନୁ ଜାହାଜ୍ଦ୍ ତିୟାର୍ ମାନ୍ନା ବାକେନ୍, ଯେତ୍କବାକେନ୍ ପାର୍ମେଶ୍ୱାର୍ସ୍ ଧିରାଜ୍ ଧାରିକିରି ହଖାଲିୟାସ୍, ହତ୍କବାକେନ୍ ଆବ୍ଡ଼ାର୍ ହୁକୁମ୍ ମା ମାନ୍ଚାର୍, ଆରୁ ଆ ଜାହାଜ୍ନୁ ଅକ୍କିକିରି ଥୋଡ଼େ ଆଲାର୍ ମତ୍ଲବ୍ ଆଠ୍ ଲୋକ୍ ଆଲାର୍ ଆମ୍ମୁତି ବାଛ୍ରାର୍ କେରାର୍। 21ଇ ଆମ୍ମୁଦ୍ ଆ ଆସ୍ନାନ୍ଘି ଲେଖା ରାଇ, ଏକାତି କା ମୁକ୍ତି ହାଖ୍ଖରିଦ୍; ଇତ୍ତି ମେଦୁନ୍ତା ମାଏଲାନ୍ ଅଥର୍ନା ମାଲ୍ଲିଦ୍, ଶୁଦ୍ଧ୍ ମନ୍ଘି ଲାଗାନ୍ ପାର୍ମେଶ୍ୱାର୍ସ୍ତି ଆର୍ଜୀଦ୍। ଆକ୍କୁନ୍ ତା ଆସ୍ନାନ୍ ନିମାନ୍ ଯୀଶୁ ଖ୍ରୀସ୍ତ୍ସ୍କି ଆରୁଅହନ୍ ଉଜ୍ଜନାଘି ଦ୍ୱାର୍ନୁ ବାଛାବାଇଦ୍। 22ଆ ଯୀଶୁ ଖ୍ରୀସ୍ତ୍ ସରଗ୍ଗେ କାଇକିରି ପାର୍ମେଶ୍ୱାର୍ସ୍କି ତିନାତାରା ଅକ୍କାଦାସ୍; ଆରୁ ସରଗ୍ଦୂଁତ୍ ଆରୁ ଅଧିକାରୀର୍ ଆରୁ ଶକ୍ତିଶାଲୀର୍ ଆସ୍କି ଅଧିନ୍ନୁ ରାନାଏ।
4ବାଦ୍ଲାରାଚ୍କା ଜୀବନ୍
1ଖ୍ରୀସ୍ତ୍ସ୍ ତାଙ୍ଘା ମେଦୁନୁ ବହୁତ୍ ଦୁଃଖୁ ସାହ୍ଚାସ୍ ତା, ନିମ୍ହି ଆସ୍କି ସୋଚ୍ବନ୍ ହାଥିଆର୍ ଲେଖା ଧାରିକିରି ହିଁଆ ଉଇୟା, ଏନ୍ଦେର୍ଗେକା ଏକାସ୍ ମେଦୁନୁ ଦୁଃଖୁ ସାହ୍ଦାସ୍, ଆସ୍ ପାପ୍ତି ବାଛ୍ର୍ଦାସ୍ କାଦାସ୍। 2ତାକା ଭବିଷତ୍ନୁ ନିଜର୍ ବାକି ଶାରୀରିକ୍ ଜୀବନ୍, ଆଲାର୍ଘି ଇଚ୍ଛା ଲେଖା ମାଲ୍ଲା ପାର୍ମେଶ୍ୱାର୍ସ୍କି ଇଚ୍ଛା ଲେଖା ବିତାବା। 3ଏନ୍ଦେର୍ଗେକା ନିମ୍ ବିନାୟାହୁଦୀର୍ଘି ଇଚ୍ଛା ଲେଖା ନାଲ୍ଖୁ କାମିକିରି ବେଭିଚାର୍, ଖାରାପ୍ ଇଚ୍ଛା, ନିଶା ହାପ୍ପନା, ମଉଜ୍ମଜ୍ଲିସ୍, ମାତ୍ୱାଡ଼୍ ଆରୁ ଘିନ୍ଘିନା ମୂର୍ତ୍ତୀ ପୂଜା କାମ୍ନାନୁ ଆଘ୍ଲିନ୍ତା ସାମାୟବନ୍ ବିତାବାଚ୍କାର୍, ଇଦ୍ ବହୁତ୍ ମାନ୍ଚା। 4ଆରୁ ନିମ୍ ଏନ୍ନେ ମଉଜ୍-ମଜ୍ଲିସ୍ନୁ ଆବ୍ଡ଼ାର୍ଘି ସାଙ୍ଗେ ମା ଚିଦାର୍, ହୁଦ୍ଘିଲାଗାନ୍ ଆବ୍ଡ଼ାର୍ ଆଚ୍ମିତ୍ ମାନ୍ନାଏକାନାଏ ଆରୁ ନିମାନ୍ ନିନ୍ଦା କାମ୍ନାଏ। 5ଲେକିନ୍ ଏକାସ୍ ଉଜ୍ଜୁ ଆଲାର୍ଘି ଆରୁ କେଚ୍ଚକା ଆଲାର୍ଘି ନ୍ୟାୟ କାମାଗେ ତିୟାର୍ ରାଦାସ୍, ଆସ୍କି ଆଘ୍ଲି ଆବ୍ଡ଼ାର୍ଗେ ହିସାବ୍ ଚିୟାଗେ ଖାତ୍ରୋ। 6ଏନ୍ଦେର୍ଗେକା କେଚ୍ଚକାରିନ୍ହି ସୁସାମାଚାର୍ ଇଦ୍ଘିଲାଗାନ୍ ତେଙ୍ଗାକେରା କା ମୁନୁଷ୍ ଜାମାର୍ ଲେଖା ମେଦୁତି ତା ଆବ୍ଡ଼ାର୍ଘି ନ୍ୟାୟ ମାନ୍ଚ୍କିଚି, ଲେକିନ୍ ଆତ୍ମାନୁ ଆବ୍ଡ଼ାର୍ ପାର୍ମେଶ୍ୱାର୍ସ୍କି ଲେଖା ଉଜ୍ଜର୍।
ପାର୍ମେଶ୍ୱାର୍ସ୍କି ଚିଚ୍ଚକା ବାର୍ଦାନ୍
7ଜାମା କାତ୍ଥାଘି ଆଖ୍ରୀ ଚାଁଣେ ମାନ୍ନାବାଲା ରାଇଦ୍; ହୁଦ୍ଘିଲାଗାନ୍ ଚେତ୍ରିକିରି ରା ଆରୁ ନିଜ୍କେନିଜ୍ କାବୁନୁ ଉଇୟା ତାକା ନିମାଗେ ବିନ୍ତି କାମାଗେ ମଦେତ୍ ହାଖ୍ଖର। 8ଜାମାର୍ଘିନ୍ତି ବାଡ଼୍କା କାତ୍ଥା ଇଦ୍ କା ଏକ୍ ଦୁସ୍ରାରିନ୍ ବାଗ୍ଗେ ବାନେ ହାଖ୍ଖତେ ରା, ଏନ୍ଦେର୍ଗେକା ବାନେ ହାଖ୍ଖନାଦ୍ ଢେର୍ ପାପ୍ବନ୍ ଡାବିଚି। 9ବିନା କୁଡ଼୍କୁଡ଼୍ରିକିରି ଏକ୍ ଦୁସ୍ରାରିନ୍ ପାହି ଏରା। 10ନେକା ଏସ୍କେ ବାର୍ଦାନ୍ ହାଖ୍ଖର୍କିଚି, ଆବ୍ଡ଼ାର୍ ଆବନ୍ ପାର୍ମେଶ୍ୱାର୍ସ୍କି ନାନା ରକମ୍ଘି କ୍ରିପାଘି ବାନେ ଆଗୁୱାର୍ ଲେଖା ଏକ୍ ଦୁସ୍ରାର୍ଘି ସେବାନୁ ଲାଗାବର୍। 11ଯଦି ନେଦିନ୍ ପ୍ରଚାର୍ କାମ୍ଦାସ୍ ତା ଏନ୍ନେ କାମ୍ନାସ୍ ଏସ୍କେ କା ପାର୍ମେଶ୍ୱାର୍ସ୍କି ବଚନ୍ବନ୍ନିନ୍ ପ୍ରଚାର୍ କାମାଲ୍କାରସ୍। ଯଦି ନେଦିନ୍ ସେବା କାମ୍ଦାସ୍ ତା, ଆସ୍ ପାର୍ମେଶ୍ୱାର୍ସ୍ତି ଶକ୍ତି ହାକ୍କା ଆଲାସ୍ ଲେଖା ସେବା କାମ୍ନାସ୍, ଏସ୍କେ କା ଜାମା କାତ୍ଥାନୁ ଯୀଶୁ ଖ୍ରୀସ୍ତ୍କି ଦ୍ୱାର୍ନୁ ପାର୍ମେଶ୍ୱାର୍ସ୍କି ମାହିମା ମାନ୍ନାଦ୍। ମାହିମା, ଆରୁ ଶକ୍ତିଦ୍ ସବୁଦିନ୍ତକ୍ ଆସ୍କିଦ୍। ଆମେନ୍।
ଖ୍ରୀସ୍ତ୍କି ଦୁଃଖୁନୁ ଭାଗିଦାର୍ ମାନ୍ନା
12ହେ ପ୍ୟାରେରୋ, ଏକା ଦୁଃଖୁ ରୂପି ଚିଚ୍ଚୁ ନିମାନ୍ ପରୀକ୍ଷା କାମାଗେ ନିହ୍ମାଏନୁ ରାଇଦ୍, ଇବନ୍ ଅଦ୍ଭୁତ୍ ଘାଟ୍ଣା ବୁଲି ମନେ କାମିକିରି ଆଚ୍ମିତ୍ ଆମାମାନା। 13ନିମ୍ ଯେତ୍କ ଖ୍ରୀସ୍ତ୍ସ୍କି ଦୁଃଖୁନୁ ଭାଗିଦାର୍ ମାନାଲ୍ଦାର୍, ହତ୍କ ଖୁସୀ ମାନା ଏସ୍କେ କା ଆସ୍କି ମାହିମା ମାନ୍ନା ସାମାୟନୁହି ନିମ୍ ଖୁସୀ ମାନାବର୍ ଆରୁ ରିଝ୍ରର୍। 14ଆରୁ ଯଦି ଖ୍ରୀସ୍ତ୍ସ୍କି ନାମେଘି ଲାଗାନ୍ ନିହ୍ମାଏ ନିନ୍ଦା କାମ୍ନାଏ ତା ନିମାଗେ ଆଶୀର୍ବାଦ୍ ହାଖ୍ଖର୍ନାଦ୍। ଏନ୍ଦେର୍ଗେକା ମାହିମାମୟ ଆତ୍ମା, ଏକାଦ୍ କା ପାର୍ମେଶ୍ୱାର୍ସ୍କି ଆତ୍ମାଦ୍, ନିହ୍ମାଏନୁ ରାଇଦ୍। 15ନିହ୍ମା ଭିତର୍ନୁ ନେଦ୍ହି ଆଲ୍ପିଟୁ, ଚାହେ ଚୋରାହ୍, ଚାହେ ଖାରାପ୍ ନାଲ୍ଖୁ କାମୁ, ଚାହେ ଦୁସ୍ରାର୍ଘି ନାଲ୍ଖୁନ୍ ରୋକ୍ନାଘି ଲାଗାନ୍ ଦୁଃଖୁ ମା ହାଖ୍ଖନାର୍। 16ଲେକିନ୍ ଯଦି ନେଦିନ୍ ଖ୍ରୀସ୍ତ୍ ବିଶ୍ୱାସୀ ମାନ୍ନାଘି ଲାଗାନ୍ ଦୁଃଖୁ ହାଖ୍ଖସ୍ ତା ଆମ୍କେ ଲାଜରା, ଆସ୍କେ ତା ପାର୍ମେଶ୍ୱାର୍ସିନ୍ ମାହିମା ଚିନା କାତ୍ଥା କା, ଆସ୍ ଇ ନାମେନ୍ ହୋଦାସ୍। 17ଏନ୍ଦେର୍ଗେକା ନ୍ୟାୟ କାମ୍ନାଘି ଉଲ୍ଲା ଆଣ୍ସିୟା କେର୍କିଚି, ଆରୁ ପହ୍ଲେ ପାର୍ମେଶ୍ୱାର୍ସ୍କି ଆଲାର୍ଘି ନ୍ୟାୟ କାମାକୋ, ଆରୁ ଯଦି ପହ୍ଲେ ନାହ୍ମାସ୍ତି ସୁରୁ ମାନିଦ୍ ତା, ଏକାର୍ କା ପାର୍ମେଶ୍ୱାର୍ସ୍କି ସୁସାମାଚାର୍ବନ୍ ମା ମାନ୍ନାଏ ଆବ୍ଡ଼ାର୍ଘି ଆଖ୍ରୀ ଦାଶା କେତ୍କ ବାଗ୍ଗେ ଭାୟାନାକ୍ ମାନ? 18ଆରୁ “ଯଦି ଧର୍ମି ଆଲାର୍ହି ବହୁତ୍ କଷଟ୍ତି ବାଛ୍ର୍ନାଏ ତା, ଅଧାର୍ମିୟାଁ ଆରୁ ପାପୀ ଜାମାର୍ଘି ଏନ୍ଦେର୍ ମାନଦ୍?” 19ହୁଦ୍ଘିଲାଗାନ୍ ଏକାର୍ ପାର୍ମେଶ୍ୱାର୍ସ୍କି ଇଚ୍ଛାଘି ଲେଖା ଦୁଃଖୁ ସାହ୍ନାଏ, ଆବ୍ଡ଼ାର୍ ବାନେ-ବାନେ ନାଲ୍ଖୁ କାମ୍ତେ ରର୍ ଆରୁ ନିଜର୍-ନିଜର୍ ଜୀଆବନ୍ ବିଶ୍ୱାସ୍ କାମ୍ନାଘି ଲାଇଗ୍ ଦୁନିଆଁନ୍ ବାନାବୁସ୍କି ହେଖ୍ଖାନୁ ସୋଁପ୍ନାର୍ ଚିନାର୍।
5ପାତ୍ରାସ୍ ମଣ୍ତ୍ଲୀନ୍ତା ପୁର୍ଖାରିନ୍ ଆରୁ ଯୁୱାନ୍ କୁକ୍କରିନ୍ ଉପ୍ଦେଶ୍ ଚିଆଲ୍ଦାସ୍
1ନିହ୍ମା ମାଝାନୁ ଏକାର୍ ମୁଖ୍ୟା ରାନାଏ, ଆବ୍ଡ଼ାରିନ୍ ଏନ୍ ଅଣ୍ଟା ଆର୍ଜୀବିନ୍ତି କାମାଲ୍ଦାନ୍। ଏନ୍ହି ଅଣ୍ଟା ମୁଖ୍ୟାନ୍ ଆରୁ ଖ୍ରୀସ୍ତ୍ ଏକା ଦୁଃଖୁ ସାହ୍ଚ୍କାଦାସ୍ ଆଦ୍ଘି ସାକ୍ଷୀନ୍ ଆରୁ ପ୍ରକଟ୍ ମାନ୍ନାବାଲା ମାହିମାଘି ଭାଗିଦାର୍। 2କା ପାର୍ମେଶ୍ୱାର୍ସ୍ ନିମାଗେ ଏକା ବିଶ୍ୱାସୀରିନ୍ ସୋଁପ୍ଚେଇଚ୍କାଦାସ୍ ଆବ୍ଡ଼ାରିନ୍ ଏରାହଜା। ଆରୁ ଇବନ୍ ଯବର୍ଜସ୍ତି ମାଲ୍ଲା ଲେକିନ୍ ପାର୍ମେଶ୍ୱାର୍ସ୍କି ଇଚ୍ଛାଘି ଲେଖା ଖୁସୀତି ଆରୁ ପାଏସା କାମାବାଗେ ମାଲ୍ଲା ମନ୍ ଲାଗାବିକିରି ଆସ୍କି ସେବା କାମା। 3ଆରୁ ଏକାର୍ଘି ଜିମାବାରୀ ନିହ୍ମା ମିଆଁ ସୋଁପାକେର୍କିଚି, ଆବ୍ଡ଼ାର୍ଘି ମିଆଁ ହକ୍ ଆମା ଯାତାବା, ଆବ୍ଡ଼ାର୍ଘି ଲାଗାନ୍ ଅଣ୍ଟା ନମୁନା ମାନା। 4ଯେତ୍କବାକେନ୍ ମୁଖ୍ୟା ଚାର୍ୱାହାସ୍ ବାରସ୍ ତା, ନିମାଗେ ମାହିମାଘି ମୁକୁଟ୍ ଚିଆକୋ, ଏକାଦ୍ କା ଏକ୍ଲାହି ମା କୁମ୍ଲାରିଦ୍।
5ହୋନ୍ନେନ୍ ହେ ଯୁୱାନ୍ କୁକ୍କରୋ, ନିମ୍ ମଣ୍ତ୍ଲୀନ୍ତା ପୁର୍ଖାର୍ଘି କିୟାଁ ରା, ଲେକିନ୍ ନିମ୍ ଜାମାର୍ ଏକ୍ ଦୁସ୍ରାର୍ଘି ସେବାଘି ଲାଗାନ୍ ନରମ୍ ମାନିକିରି ରା, ଏନ୍ଦେର୍ଗେକା “ପାର୍ମେଶ୍ୱାର୍ସ୍ ବଡ଼୍ପଣୀରିନ୍ ବିରୋଧ୍ କାମ୍ଦାସ୍, ଲେକିନ୍ ନରମ୍ ଆଲାରିନ୍ କ୍ରିପା କାମ୍ଦାସ୍।”
6ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍କି ଶକ୍ତିଶାଲୀ ହେଖ୍ଖା କିୟାଁ ନରମ୍ ମାନିକିରି ରା, ଏସ୍କେ କା ଆସ୍ ନିମାନ୍ ଠିକ୍ ସାମାୟନୁ ବାଢ଼ାବସ୍। 7ନିହ୍ମା ଜାମା ଚିନ୍ତାବନ୍ ଆସ୍କି ମିଆଁ ସୋଁପାଚା, ଏନ୍ଦେର୍ଗେକା ଆସ୍ ନିହ୍ମା ଲାଗାନ୍ ଚିନ୍ତା କାମ୍ଦାସ୍। 8ସାବ୍ଧାନ୍ ରା ଆରୁ ଚେତ୍ରିକିରି ରା; ଏନ୍ଦେର୍ଗେକା ନିହ୍ମା ବିରୋଧି ଶାଏତାନ୍ ଗାର୍ଜାରାନାବାଲା ଡୁକ୍କା ଲେଖା ନେକାନ୍ ଚାର୍ରନ୍ ମହନ୍ବୁଲି ବେଦ୍ଦାଲ୍କିରି। 9ବିଶ୍ୱାସ୍ନୁ ମଜ୍ବୁତ୍ ରା ଆରୁ ଆଦ୍ଘି ସାମ୍ନା କାମା, ଆରୁ ଇବନ୍ ଆହା କା ଦୁନିଆଁନ୍ତା ନିହ୍ମା ଭାଇ ବୁହୁଣୀଜାମାର୍ହି ଏନ୍ନେନ୍ ଦୁଃଖୁ ସାହାଲ୍ନାଏ। 10ଆକ୍କୁନ୍ ପାର୍ମେଶ୍ୱାର୍ସ୍ ଏକାସ୍ କା ଜାମା ଲେଖା କ୍ରିପା ଚିଦାସ୍, ଆସ୍ ତାଙ୍ଘା ସବୁଦିନ୍ତା ମାହିମାନୁ ଭାଗିଦାର୍ ମାନାଗେ ନିମାନ୍ ଯୀଶୁ ଖ୍ରୀସ୍ତ୍କି ଦ୍ୱାର୍ନୁ ମେହ୍କାଦାସ୍, ନିହ୍ମା ଥୋଡ଼େ ଦେରିତକ୍ ଦୁଃଖୁ ସାହ୍ଚ୍କା ପାଛ୍ଲି ଆସ୍ ନିମାନ୍ ସିଦ୍ଧ୍ ଆରୁ ସ୍ଥିର୍ ଆରୁ ଶକ୍ତିଶାଲୀ କାମସ୍। 11ଆସ୍କି ଶକ୍ତି ଯୁଗ୍ଯୁଗ୍ ରାନାଦ୍। ଆମେନ୍।
ଆଖ୍ରୀ ଯୋହାର୍
12ଏନ୍ ନିମାଗେ ଇ ଛୋଟେ ଚିଠିନ୍, ସିଲ୍ବାନୁସ୍କି ମଦେତ୍ତି ଲେଖ୍ଚ୍କାନ୍, ନେକାନ୍ କା ଏନ୍ ବିଶ୍ୱାସ୍ କାମ୍ନାଘି ଲାଇଗ୍ ଭାଇସ୍ ବୁଲି ସୋଚ୍ଦାନ୍। ଏନ୍ ନିମାନ୍ ବିଶ୍ୱାସ୍ ଚିଆଲ୍ଦାନ୍ କା ଇନ୍ନୁ ଏକାଦ୍ ଲେଖ୍ଚ୍କା ରାଇଦ୍, ଆଦ୍ ପାର୍ମେଶ୍ୱାର୍ସ୍କି ସତ୍ତୁ କ୍ରିପାଦ୍, ଇଦ୍ଘି ବାରେନୁ ଦିଲାସା ଆରୁ ସାକ୍ଷୀ ଚିୟାଗେ ଲେଖ୍ଚ୍କାଦାନ୍। ନିମ୍ ଇ ସତ୍ତୁ କ୍ରିପାନୁ ଟିକ୍ରିକିରି ରା। 13ବାବିଲନ୍ନୁ ଏକାର୍ ନିହ୍ମା ଲେଖା ପାର୍ମେଶ୍ୱାର୍ସ୍କି ଚାଜ୍ଜକା ଆଲାର୍ ରାନାଏ, ଆବ୍ଡ଼ାର୍ ଆରୁ ବିଶ୍ୱାସ୍ନୁ ଏଙ୍ଘା ସତ୍ତୁନିନ୍ ହାଦ୍ଦୁ ଲେଖା ମାର୍କୁସ୍ ନିମାନ୍ ଯୋହାର୍ ତେଙ୍ଗାଲ୍ନାଏ। 14ଖ୍ରୀସ୍ତ୍କି ବାନେ ହାଖ୍ଖନାତି ଏକ୍ ଦୁସ୍ରାରିନ୍ ଯୋହାର୍ କାମା।
ଏକାର୍ ଖ୍ରୀସ୍ତ୍ସ୍କିନୁ ରାଦାର୍, ନିହ୍ମା ଜାମାର୍ଗେ ଶାନ୍ତି ହାଖ୍ଖର୍ତେ ରାନାଦ୍।