ଯୋହାନ୍ସ୍କି ଲେଖ୍ଚ୍କା ପହେଲା ଚିଠି
ଇବହିଘି ପରିଚୟ
ଇବହିଘି ଲେଖକସ୍ ତାଙ୍ଘା ନାମେ ମାଲ୍ଲା ବାତାବୁସ୍ ଲେକିନ୍ କେତ୍କ ଏନ୍ନେ କାତ୍ଥା ରାଇ ଏକାଦ୍ ସାଫାସାଫା ବାତାବିକା ଆସ୍ ଯୋହାନ୍ସ୍। ଯୋହାନ୍ସ୍ ଜେବେଦୀସ୍କି ହାଦ୍ଦୁ ରାଚାସ୍। ଆସ୍ କେଉଁଟା ରାଚାସ୍। ଆସ୍ ଯୀଶୁସ୍କି ଅଣ୍ଟା ଖାସ୍ଚେଲା ରାଚାସ୍ ଆରୁ ଯୀଶୁସ୍ ଆସିନ୍ ବାନେ ହାଖ୍ଖଦାସ୍। ଯୋହାନ୍ସ୍କି ଚିଠି ଆରୁ ଯୋହାନ୍ସ୍କି ଲେଖ୍ଚ୍କା ସୁସାମାଚାର୍ଘି ମାଝାନୁ ବଚନ୍ ଭିନେ କାମ୍ନାନୁ ଆରୁ କେତ୍କ ଭାଗ୍ ମେଶ୍ରାଲିଦ୍ ଆରୁ ଇଦ୍ ବାତାବିକା ଇବ୍ଡ଼ା ଜାମାନ୍ ଅଣ୍ଟା ଆଲାସିନ୍ ଲେଖ୍ଚ୍କାଦାସ୍।
ଯୋହାନ୍ସ୍କି ଲେଖଚ୍କା ପହ୍ଲେ ଚିଠିଘି ଯୋଡ଼େ ମୁଖ୍ୟା ଉଦ୍ଦେଶ୍ୟ ରାଇ: ନିଜର୍ ପାଢ଼ୁରିନ୍ ୧. ପାର୍ମେଶ୍ୱାର୍ସ୍ ଆରୁ ତାଙ୍ଘା ହାଦ୍ଦୁ ଯୀଶୁ ଖ୍ରୀସ୍ତ୍କି ସହଭାଗିତାନୁ ଜୀବନ୍ ବିତାବାଗେ ଉତ୍ସାହିତ୍ କାମ୍ନା ଆରୁ ୨. ଆବ୍ଡ଼ାରିନ୍ ଝୁଟ୍ଟୁ ଶିକ୍ଷାବନ୍ ପାଲନ୍ କାମ୍ନା ଦ୍ୱାର୍ନୁ, ଇ ସହଭାଗିତା ନଷ୍ଟ ମାନକୋ, ଆଦ୍ଘି ବିରୁଦ୍ଧନୁ ଚେତାବନୀ ଚିନା। ଇ ଝୁଟ୍ଟୁ ଶିକ୍ଷାଘି ଏନ୍ନେ ଧାର୍ଣା ରାଚା କା, ଖାରାପ୍ଦ୍ ଇ ଦୁନିଆଁଘି ସମ୍ପର୍କନୁ ବାର୍ଚ୍କୁନ୍ ମାନିଦ୍ ଆରୁ ହୁଦଘିଲାଗାନ୍ ଯୀଶୁସ୍, ପାର୍ମେଶ୍ୱାର୍ସ୍କି ହାଦ୍ଦୁସ୍, ପ୍ରକୃତ୍ନୁ ଅଣ୍ଟା ମୁନୁଷ୍ ମାନା ମା ଅଙ୍ଗ୍ଦାସ୍। ଇ ଶିକ୍ଷକ ଜାମାର୍ ଦାବି କାମାଲିୟାର୍ କା ମୁକ୍ତି ହାଖ୍ଖାଗେ ଅଣ୍ଟା ଆଲାସ୍ଗେ ଇ ଦୁନିଆଁନ୍ତା ଜୀବନ୍ଘି ସମ୍ବଦ୍ଧିତ୍ କାତ୍ଥାନ୍ତି ବାଛ୍ରିକିରି ରାନା ମାନୋ; ଆରୁ ଇବ୍ଡ଼ାର୍ ଇବନ୍ହି ଶିଖାବାଲିୟାର୍ କା ନିଜର୍ ଭାଇସିନ୍ ବାନେ ହାଖ୍ଖନା ଲେଖା କାତ୍ଥାଘି ମୁକ୍ତି ହାଖ୍ଖନାନୁ ଏନ୍ଦେର୍ହି ସମ୍ବନ୍ଧ ମାଲ୍ଲାଦିନ୍।
ଇ ଶିକ୍ଷାଘି ବିରୁଦ୍ଧ ଲେଖକସ୍ ସାଫାସାଫା ବାତାବାଦାସ୍ କା ଯୀଶୁ ଖ୍ରୀସ୍ତ୍ ପ୍ରକୃତ୍ନୁ ଅଣ୍ଟା ମୁନୁଷ୍ ରାଚାସ୍, ଆରୁ ଆସ୍ ଇ କାତ୍ଥାନ୍ହି ଯୋର୍ ଚିଦାସ୍ କା ଏକାର୍ ଯୀଶୁ ଖ୍ରୀସ୍ତ୍ସିନ୍ ବିଶ୍ୱାସ୍ କାମ୍ନାଏ ଆରୁ ପାର୍ମେଶ୍ୱାର୍ସିନ୍ ବାନେ ହାଖ୍ଖନାଏ, ଆବ୍ଡ଼ାର୍ ଜରୁର୍ ଏକ୍ ଦୁସ୍ରାରିନ୍ହି ବାନେ ହାଖ୍ଖର୍।
ରୂପ୍-ରେଖା:
ଭୂମିକା ୧:୧-୪
ବିଲ୍ଲୀ ଆରୁ ଉହା ୧:୫—୨:୨୯
ପାର୍ମେଶ୍ୱାର୍ସ୍କି ହାଦ୍ଦୁବଚ୍ଚର୍ ଆରୁ ଶାଏତାନ୍ଘି ହାଦ୍ଦୁବଚ୍ଚର୍ ୩:୧-୨୪
ସତ୍ତୁ ଆରୁ ଝୁଟ୍ଟୁ ୪:୧-୬
ପାର୍ମେଶ୍ୱାର୍ସ୍କି ତାର୍ତି ବାର୍ଚ୍କା ପ୍ୟାର ୪:୭-୨୧
ଏକା ବିଶ୍ୱାସ୍ଦ୍ ଦୁନିଆଁନୁ ଜିତ୍ଚିଦ୍ ୫:୧-୨୧
1ଜୀବନ୍ଘି ବଚନ୍
1ସୁରୁନ୍ତି ଏକାସ୍ ରାଚାସ୍, ଏକାସ୍କି ବଚନ୍ ନାମ୍ ମେନ୍ଚ୍କାଦାତ୍, ଏକାସିନ୍ ନାହ୍ମା ହାନ୍ନୁତି ଏର୍କାଦାତ୍, ଏକାସିନ୍ ଧ୍ୟାନ୍ସେ ଏର୍କାଦାତ୍ ଆରୁ ନିଜର୍ ହେଖ୍ଖାତି ଏସର୍କାଦାତ୍, ଆ ଜୀବନ୍ଘି ବଚନ୍ ବାରେ ନିମାନ୍ ତେଙ୍ଗାଲ୍ଦାନ୍। 2ଆ ଜୀବନ୍ଦ୍ ପ୍ରକଟ୍ ମାନ୍ଚା ଆରୁ ଏମ୍ ଆବନ୍ ଏର୍କାଦାମ୍ ଆରୁ ଇଦ୍ଘି ବାରେନୁ ସାକ୍ଷୀ ଚିଆଲ୍ଦାମ୍, ଆରୁ ଆ ଅନନ୍ତ ଜୀବନ୍ଘି ବାରେ ନିମାନ୍ ତେଙ୍ଗାଲ୍ଦାମ୍, ଏକାଦ୍ କା ବାଙ୍ଗ୍ସ୍ ଗାନେ ରାଚା ଆରୁ ଏକାଦ୍ ନାହ୍ମାସାନ୍ ପ୍ରକଟ୍ ମାନ୍ଚା। 3ଏକାନ୍ ଏମ୍ ଏର୍କାଦାମ୍ ଆରୁ ମେନ୍ଚ୍କାଦାମ୍ ଆବନ୍ ନିମାନ୍ହି ତେଙ୍ଗାଲ୍ଦାମ୍, ଏସ୍କେ କା ନିମ୍ହି ଏହ୍ମା ସାଙ୍ଗେନୁ ରର୍; ଆରୁ ଏହ୍ମା ସହଭାଗିତା ବାଙ୍ଗ୍ସ୍ ଗାନେ ଆରୁ ତାଙ୍ଘା ହାଦ୍ଦୁ ଯୀଶୁ ଖ୍ରୀସ୍ତ୍ଗାନେ ରାଇ। 4ଏମ୍ ଇବ୍ଡ଼ାଗୁଠିନ୍ ଇଦ୍ଘିଲାଗାନ୍ ଲେଖାଲ୍ଦାମ୍, କା ଏହ୍ମା ଖୁସୀ ପୁରା ମାନୋ।
ପାର୍ମେଶ୍ୱାର୍ସ୍ ନାହ୍ମା ବିଲ୍ଲୀସ୍
5ଏମ୍ ଯୀଶୁ ଖ୍ରୀସ୍ତ୍ସ୍ତି ଏକା ସୁସାମାଚାର୍ ମେନ୍ଚ୍କାଦାମ୍ ଆରୁ ନିମାନ୍ ତେଙ୍ଗାଲ୍ଦାମ୍, ଆଦ୍ ଇଦ୍ କା ପାର୍ମେଶ୍ୱାର୍ସ୍ ବିଲ୍ଲୀସ୍ ଆରୁ ଆସ୍କିନୁ ଏନ୍ଦେର୍ହି ଉହା ମାଲ୍ଲାଦିନ୍। 6ଯଦି ନାମ୍ ତେଙ୍ଗତ୍ କା ଆସ୍ଗାନେ ନାହ୍ମାଏ ସହଭାଗିତା ରାଇ, ଲେକିନ୍ ଉହା ପାବୁନୁ ଚାଲରତ୍ ତା ନାମ୍ ଝୁଟ୍ଟୁତ୍ ଆରୁ ସତ୍ତୁ ପାବୁନୁ ମା କାଦାତ୍। 7ଲେକିନ୍ ପାର୍ମେଶ୍ୱାର୍ସ୍ ଏସ୍କେ ବିଲ୍ଲୀନୁ ରାଦାସ୍, ହନ୍ନେନ୍ ନାମ୍ହି ବିଲ୍ଲୀନୁ ରତ୍ତା ନାମ୍ ଏକ୍ ଦୁସ୍ରାର୍ଗାନେ ସାଙ୍ଗେନୁ ରାଦାତ୍। ଆରୁ ଆସ୍କି ହାଦ୍ଦୁ ଯୀଶୁସ୍କି ହେଁସୁ ନାମାନ୍ ଜାମା ପାପ୍ତି ଶୁଦ୍ଧ୍ କାମିଦ୍। 8ଯଦି ନାମ୍ ତେଙ୍ଗତ୍ କା ନାହ୍ମାଏ ଏନ୍ଦେର୍ହି ପାପ୍ ମାଲ୍ଲାଦିନ୍, ତା ନାମ୍ ନିଜ୍କେନିଜ୍ ଧୋଖା ଚିଦାତ୍। ଆରୁ ନାହ୍ମାଏନୁ ସତ୍ତୁ ମାଲ୍ଲାଦିନ୍। 9ଯଦି ନାମ୍ ନିଜର୍-ନିଜର୍ ପାପ୍ବନ୍ ଗ୍ରହନ୍ କାମତ୍, ତା ପାର୍ମେଶ୍ୱାର୍ସ୍ ନାହ୍ମା ପାପ୍ବନ୍ ଛେମା କାମସ୍ ଆରୁ ନାମାନ୍ ଜାମା ଅଧରମ୍ତି ଶୁଦ୍ଧ୍ କାମସ୍। ଏନ୍ଦେର୍ଗେକା ପାର୍ମେଶ୍ୱାର୍ସ୍ ବିଶ୍ୱାସ୍ କାମ୍ନାଘି ଲାଇଗ୍ ରାଦାସ୍ ଆରୁ ନ୍ୟାୟିସ୍। 10ଯଦି ନାମ୍ ତେଙ୍ଗତ୍ କା ନାମ୍ ପାପ୍ ମାଲ୍ଲା କାମୁମ୍, ତା ପାର୍ମେଶ୍ୱାର୍ସିନ୍ ଝୁଟ୍ଟୁ ଠାହ୍ରାଦାତ୍, ଆରୁ ଆସ୍କି ବଚନ୍ ନାହ୍ମାଏନୁ ମାଲ୍ଲାଦିନ୍।
2ଯୀଶୁ ଖ୍ରୀସ୍ତ୍ ନାମାନ୍ ପାପ୍ତି ଛେମା ଚିଦାସ୍
1ହେ ଏଙ୍ଘାଏ ଦୁଲାଡ଼ି ହାଦ୍ଦୁବଚ୍ଚରୋ, ଏନ୍ ଇ କାତ୍ଥାନ୍ ନିମାଗେ ଇଦ୍ଘିଲାଗାନ୍ ଲେଖାଲ୍ଦାନ୍ କା ନିମ୍ ପାପ୍ ଆମା କାମା; ଆରୁ ଯଦି ନେଦିନ୍ ପାପ୍ କାମସ୍ତା ବାଙ୍ଗ୍ସାନ୍ ନାହ୍ମାଏ ଅଣ୍ଟା ମଦେଦ୍ତ୍ କାମୁ ରାଦାସ୍ ଆସ୍ ଯୀଶୁ ଖ୍ରୀସ୍ତ୍। ଏକାସ୍ କା ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ରାଦାସ୍। 2ଆରୁ ଆସିନ୍ ନାହ୍ମାଏ ପାପ୍ଘି ଲାଗାନ୍ କ୍ରୁଶ୍ନୁ କେଚ୍ଚାସ୍କେରାସ୍, ଆରୁ ନାହ୍ମାଏ ଖାଲି ମାଲ୍ଲା ଲେକିନ୍ ଦୁନିଆଁନ୍ତା ଜାମା ଆଲାର୍ଘି ପାପ୍ଘି ଲାଗାନ୍ହି କେଚ୍ଚାସ୍କେରାସ୍।
3ଯଦି ନାମ୍ ପାର୍ମେଶ୍ୱାର୍ସ୍କି ଆଦେଶ୍ବନ୍ ମାନତ୍, ତା ଇସ୍ତିନ୍ତି ନାମ୍ ଆହାଅଙ୍ଗତ୍ କା ନାମ୍ ଆସିନ୍ ଆହା ଅଙ୍କାଦାତ୍। 4ଏକାସ୍ ଏନ୍ନେ ତେଙ୍ଗସ୍ କା, “ଏନ୍ ଆସିନ୍ ଆହାଲ୍ଦାନ୍” ଆରୁ ଆସ୍କି ହୁକୁମ୍ ମା ମାନ୍ଦାସ୍ ତା ଆସ୍ ଝୁଟ୍ଟୁସ୍ ଆରୁ ଆସ୍କିନୁ ସତ୍ତୁ ମାଲ୍ଲାଦିନ୍। 5ଲେକିନ୍ ଏକାସ୍ ଆସ୍କି ବଚନ୍ବନ୍ ମାନ୍ଦାସ୍, ତା ଆସ୍କିନୁ ପାର୍ମେଶ୍ୱାର୍ସ୍କି ବାନେ ହାଖ୍ଖନାଦ୍ ସତ୍ତୁନିନ୍ ଶିଦ୍ଧ୍ ମାନ୍ଚ୍କିଚି। ଇଦ୍ଘି ଦ୍ୱାର୍ନୁ ନାମ୍ ଆହ୍ଦାତ୍ କା ନାମ୍ ପାର୍ମେଶ୍ୱାର୍ସ୍ଗାନେ ରାଦାତ୍। 6ନେଦ୍ ଏନ୍ନେ ତେଙ୍ଗ୍ନାଏ କା ଆସ୍ ପାର୍ମେଶ୍ୱାର୍ସ୍ଗାନେ ରାଦାସ୍, ତା ଆସ୍କେ ଯୀଶୁ ଖ୍ରୀସ୍ତ୍ ଏସ୍କେ ଜୀବନ୍ ବିତାବାଚ୍କାଚାସ୍ ଆନ୍ନେ ଜୀବନ୍ ବିତାବାନା କାତ୍ଥା।
ଜାମାରିନ୍ ବାନେ ହାଖ୍ଖା
7ହେ ଦୁଲାଡ଼ି ସାଙ୍ଗେରୋ, ଏନ୍ ନିମାଗେ ଏନ୍ଦେର୍ହି ପୁନା ନିୟମ୍ ମାଲ୍ଲା ଲେଖୁନ୍, ଲେକିନ୍ ଆ ପାଚ୍ଚା ନିୟମ୍ ଏକାଦ୍ କା ପହ୍ଲେନ୍ତି ନିମାଗେ ହାଖ୍ଖର୍କିଚି, ଆବନ୍ ଲେଖାଲ୍ଦାନ୍। ଇ ପାଚ୍ଚା ନିୟମ୍ଦ୍ ଆ ସନ୍ଦେଶ୍ ଏକାନ୍ କା ନିମ୍ ମେନ୍ଚ୍କାଦାର୍। 8ହାଲେହି ଏନ୍ ନିମାଗେ ପୁନା ନିୟମ୍ବନ୍ ଲେଖାଲ୍ଦାନ୍, ଇ ନିୟମ୍ଦ୍ ଖ୍ରୀସ୍ତ୍ସ୍କି ଜୀବନ୍ନୁ ଆରୁ ନିହ୍ମା ଜୀବନ୍ନୁ ସତ୍ତୁ ଠାହ୍ରା ରାଚ୍କିଚି; ଏନ୍ଦେର୍ଗେକା ଉହାଦ୍ ବୁଙ୍ଗ୍ତେ ରାଇଦ୍ ଆରୁ ସତ୍ତୁଘି ବିଲ୍ଲୀଦ୍ ଚାମ୍କାରାଗେ ଲାଗ୍ଗଦ୍। 9ଏକାସ୍ ଏନ୍ନେ ବାଦାସ୍ କା ଆସ୍ ବିଲ୍ଲୀନୁ ରାଦାସ୍ ଆରୁ ନିଜର୍ ଭାଇସିନ୍ ହାଁଣ୍ଦାସ୍ ତା, ଆସ୍ ଆକ୍କୁନ୍ତକ୍ହି ଉହାନୁ ରାଦାସ୍। 10ଏକାସ୍ ନିଜର୍ ଭାଇସିନ୍ ବାନେ ହାଖ୍ଖଦାସ୍ ଆସ୍ ବିଲ୍ଲୀନୁ ରାଦାସ୍, ହୁଦ୍ଘିଲାଗାନ୍ ଆସ୍କି ଜୀବନ୍ନୁ ଏନ୍ନେ ଏନ୍ଦେର୍ହି ମାଲ୍ଲାଦିନ୍, ଏକାଦ୍ କା ଆସିନ୍ ଗଲତ୍ କାମ୍ତି। 11ଲେକିନ୍ ନେଦ୍ ନିଜର୍ ଭାଇସିନ୍ ହାଁଣ୍ନାଏ, ଆବ୍ଡ଼ାର୍ ଉହାନୁ ରାନାଏ ଆରୁ ଆବ୍ଡ଼ାର୍ ଉହାନୁ ଏକ୍ନାଏ, ଆରୁ ବାଲ୍ଲନାଇନ୍ କା ଆବ୍ଡ଼ାର୍ ଏକାତାରା କାଲ୍ନାଏ, ଏନ୍ଦେର୍ଗେକା ଉହାଦ୍ ଆବ୍ଡ଼ାର୍ଘି ହାନ୍ନୁନ୍ କାଁଣା କାମ୍ଚେଇ ଚିଚ୍ଚକିଚି।
12ହେ ହାଦ୍ଦୁବଚ୍ଚରୋ, ଏନ୍ ନିମାନ୍ ଇଦ୍ଘିଲାଗାନ୍ ଲେଖାଲ୍ଦାନ୍ କା ଯୀଶୁ ଖ୍ରୀସ୍ତ୍କି ନାମେତି ନିହ୍ମାଏ ପାପ୍ ଛେମା ମାନ୍ଚ୍କିଚି। 13ହେ ବୁଆ ଜାମାରୋ, ଏନ୍ ନିମାଗେ ଇଦ୍ଘିଲାଗାନ୍ ଲେଖାଲ୍ଦାନ୍ କା ଏକାଦ୍ ସୁରୁନ୍ତି ରାଇ ଆଦିନ୍ ନିମ୍ ଆକ୍କାଦାର୍। ହେ ଯୁୱାନ୍ରୋ, ଏନ୍ ନିମାଗେ ଇଦ୍ଘିଲାଗାନ୍ ଲେଖାଲ୍ଦାନ୍ କା ନିମ୍ ଆ ବଦ୍ମାସ୍ରସ୍ତି ଜିତ୍କାଦାର୍। ହେ ହାଦ୍ଦୁବଚ୍ଚରୋ, ଏନ୍ ନିମାଗେ ଇଦ୍ଘିଲାଗାନ୍ ଲେଖାଲ୍ଦାନ୍ କା ନିମ୍ ବାଙ୍ଗ୍ସିନ୍ ଆକ୍କାର୍ କେର୍କାଦାର୍। 14ହେ ବୁଆ ଜାମାରୋ, ଏନ୍ ନିମାଗେ ଇଦ୍ଘିଲାଗାନ୍ ଲେଖାଲ୍ଦାନ୍ କା ଏକାଦ୍ ସୁରୁନ୍ତି ରାଇ ନିମ୍ ଆବନ୍ ଆକ୍କାର୍ କେର୍କାଦାର୍। ହେ ଯୁୱାନ୍ରୋ, ଏନ୍ ନିମାଗେ ଇଦ୍ଘିଲାଗାନ୍ ଲେଖାଲ୍ଦାନ୍ କା ନିମ୍ ଶକ୍ତିଶାଲୀର୍, ଆରୁ ପାର୍ମେଶ୍ୱାର୍ସ୍କି ବଚନ୍ଦ୍ ନିହ୍ମା ମିଆଁ ଜାମାବାକେନ୍ ରାଇଦ୍, ଆରୁ ନିମ୍ ଆ ବଦ୍ମାସ୍ର୍ତି ଜିତ୍କାଦାର୍।
ଦୁନିଆଁବନ୍ ବାନେ ଆମା ହାଖ୍ଖା
15ନିମ୍ ଦୁନିଆଁବନ୍ ଆରୁ ଦୁନିଆଁନ୍ତା ଜିନିଷ୍ବନ୍ ବାନେ ଆମା ହାଖ୍ଖା। ଯଦି ନେଦିନ୍ ଦୁନିଆଁବନ୍ ବାନେ ହାଖ୍ଖସ୍, ତା ଆସ୍କିନୁ ବାଙ୍ଗ୍ସ୍କି ପ୍ରତି ବାନେ ହାଖ୍ଖନା ମାଲ୍ଲାଦିନ୍। 16ଏନ୍ଦେର୍ଗେକା ଦୁନିଆଁନ୍ତା ଜାମା ଜିନିଷ୍ଦ୍: ଏକାଦ୍ କା ପାପ୍ତି ନିନ୍ଦକା ଜୀବନ୍ ବିତାବାଗେ ଲାଲଚ୍ କାମିଦ୍, ଆରୁ ଏକାନ୍ ନିହ୍ମା ହାନ୍ନୁଦ୍ ଲାଲଚ୍ କାମି, ଆରୁ ଇ ଦୁନିଆଁନ୍ତା ଜାମା ଆ ଜିନିଷ୍ଦ୍, ଏକାନ୍ କା ଆଲାର୍ ଏତ୍କ ବଡ଼୍ପଣି ଏଦ୍ର୍ନାଏ, ଆଦ୍ ବାଙ୍ଗ୍ସ୍କି ତାର୍ତି ମାଲ୍ଲା ଲେକିନ୍ ଦୁନିଆଁଘି ତାର୍ତି ରାଇ। 17ଦୁନିଆଁ ଆରୁ ଦୁନିଆଁନ୍ତା ଲାଲଚ୍ ଯୋଡ଼େଦିନ୍ ନଷ୍ଟ ମାନକୋ, ଲେକିନ୍ ଏକାର୍ ପାର୍ମେଶ୍ୱାର୍ସ୍କି ଇଚ୍ଛା ଲେଖା ଚାଲର୍ନାଏ ଆବ୍ଡ଼ାର୍ ଜାମାବାକେନ୍ ଜୀବିତ୍ ରର୍।
ଯୀଶୁ ଖ୍ରୀସ୍ତ୍କି ବିରୋଧିର୍ଘି ଅନୁସରଣ୍ ଆମା କାମା
18ହେ ପ୍ୟାରେ ହାଦ୍ଦୁବଚ୍ଚରୋ, ଇଦ୍ ଆଖ୍ରୀ ସାମାୟଦ୍; ଆରୁ ଏସ୍କେ ନିମ୍ ମେନ୍ଚ୍କାଦାର୍ କା ଯୀଶୁ ଖ୍ରୀସ୍ତ୍କି ବିରୋଧିର୍ ବାର୍ନାବାଲା ରାନାଏ, ଆଦ୍ଘି ଅନୁସାର୍ ଆକ୍କୁନ୍ହି ବହୁତ୍ ଯୀଶୁ ଖ୍ରୀସ୍ତ୍କି ବିରୋଧିର୍ ବାର୍ଚାର୍ କେର୍କାନାଏ; ଇଦ୍ଘି ଦ୍ୱାର୍ନୁ ନାମ୍ ଆହ୍ଦାତ୍ କା ଇଦ୍ ଆଖ୍ରୀ ସାମାୟଦ୍। 19ଖ୍ରୀସ୍ତ୍ସ୍କି ବିରୋଧିର୍ ଉର୍ଖାର୍ ତା ନାହ୍ମା ଭିତର୍ନୁନ୍, ଲେକିନ୍ ପ୍ରକୃତ୍ନୁ ଆବ୍ଡ଼ାର୍ ନାହ୍ମାଏ ମାଲ୍ନାଏ, ଏନ୍ଦେର୍ଗେକା ଯଦି ଆବ୍ଡ଼ାର୍ ନାହ୍ମାଏ ରର୍ନେ ତା ନାହ୍ମାଗାନେ ରର୍ନେ; ଲେକିନ୍ ଆବ୍ଡ଼ାର୍ ଉର୍ଖାର୍ କେରାର୍, ଆରୁ ଇତ୍ତି ନାମାଗେ ପାତା ଚାଲ୍ରାଲିଦ୍ କା ଆବ୍ଡ଼ାର୍ସ୍ତି ନେଦ୍ହି ପ୍ରକୃତ୍ନୁ ନାହ୍ମାଏ ମାଲ୍ଲାରୁର୍। 20ଲେକିନ୍ ନିହ୍ମାଏ ତା ଆ ପାବିତାର୍ ଆତ୍ମାତି ଆଭିଷେକ୍ ମାନ୍ଚ୍କିଚି, ହୁଦ୍ଘିଲାଗାନ୍ ନିମ୍ ଜାମାର୍ ସତ୍ତୁବନ୍ ଆହ୍ଦାର୍। 21ଏନ୍ ନିମାଗେ ଇଦ୍ଘିଲାଗାନ୍ ମାଲ୍ଲା ଲେଖୁନ୍ କା ନିମ୍ ସତ୍ତୁବନ୍ ବାଲ୍ଦାରିନ୍, ଲେକିନ୍ ନିମ୍ତା ସତ୍ତୁବନ୍ ଆହ୍ଦାର୍ ଆରୁ ସତ୍ତୁତି ଏନ୍ଦେର୍ହି ଝୁଟ୍ଟୁ ମା ଉର୍ଖି ବୁଲି ନିମ୍ ଆକ୍କାଦାର୍ ହୁଦ୍ଘିଲାଗାନ୍ ନିମାଗେ ଲେଖାଲ୍ଦାନ୍।
22ଲେକିନ୍ ନେଦ୍ ଯୀଶୁସିନ୍, ଖ୍ରୀସ୍ତ୍ ବୁଲି ଅସ୍ଵୀକାର୍ କାମ୍ଦାସ୍, ଆସ୍ ଝୁଟ୍ଟୁସ୍; ଆରୁ ଏନ୍ନେ ଆଲାସ୍ ଖ୍ରୀସ୍ତ୍କି ବିରୋଧିସ୍, ଆରୁ ଆସ୍ତା ବାଙ୍ଗ୍ସିନ୍ ଆରୁ ହାଦ୍ଦୁସିନ୍ହି ଅସ୍ଵୀକାର୍ କାମ୍ଦାସ୍। 23ଏକାସ୍ ହାଦ୍ଦୁସିନ୍ ମାନା କାମ୍ଦାସ୍, ଆସ୍ ବାଙ୍ଗ୍ସିନ୍ହି ମାନା କାମ୍ଦାସ୍: ଆରୁ ଏକାସ୍ ହାଦ୍ଦୁସିନ୍ ଗ୍ରହନ୍ କାମ୍ଦାସ୍ ଆସ୍ ବାଙ୍ଗ୍ସିନ୍ହି ଗ୍ରହନ୍ କାମ୍ଦାସ୍। 24ନିମ୍ ସୁରୁନ୍ତି ଏକାନ୍ ମେନ୍ଚ୍କାଦାର୍, ଆଦିନ୍ ନିହ୍ମାଏନୁ ରଦ୍, ଏକାନ୍ ନିମ୍ ସୁରୁନ୍ତି ମେନ୍ଚ୍କାଦାର୍, ଯଦି ଆଦ୍ ନିହ୍ମାଏନୁ ରଦ୍; ତା ନିମ୍ହି ହାଦ୍ଦୁ ଆରୁ ବାଙ୍ଗ୍ସ୍ ଗାନେ ରର୍। 25ଆରୁ ଆସ୍ ନାମାଗେ ସବୁଦିନ୍ତା ଜୀବନ୍ ଚିୟାଗେ ପ୍ରତିଜ୍ଞା କାମ୍ଚ୍କାଦାସ୍।
26ଏନ୍ ଇ କାତ୍ଥାନ୍ ନିମାଗେ ଆବ୍ଡ଼ାର୍ଘି ବାରେନୁ ଲେଖାଲ୍ଦାନ୍, ଏକାର୍ କା ନିମାନ୍ ଫୁସ୍ଲାଗେ କୋଶିଷ୍ କାମ୍ନାଏ; 27ଲେକିନ୍ ନିମ୍ ପାବିତାର୍ ଆତ୍ମା ଦ୍ୱାର୍ନୁ ଏକା ଆଭିଷେକ୍ ହାକ୍କାଦାର୍, ଆଦ୍ ନିହ୍ମାଏନୁ ରାଇଦ୍; ଆରୁ ଇଦ୍ଘିଲାଗାନ୍ ନିମାଗେ ଦାର୍କାର୍ ମାଲ୍ଲା କା ନେଦିନ୍ ନିମାନ୍ ଶିଖାବର୍, ଲେକିନ୍ ନିମାଗେ ଏକା ପାବିତାର୍ ଆତ୍ମାତି ଆଭିଷେକ୍ ହାଖ୍ଖର୍କିଚି ଆଦ୍ ନିମାନ୍ ଜାମା କାତ୍ଥାନ୍ ଶିଖାବି, ଆରୁ ଇଦ୍ ସତ୍ତୁଦ୍, ଝୁଟ୍ଟୁ ମାଲ୍ଲିଦ୍; ଆରୁ ଏସ୍କେ ଆଦ୍ ନିମାନ୍ ଶିଖାବାଚ୍କିଚି ଆନ୍ନେ ନିମ୍ ଖ୍ରୀସ୍ତ୍ନୁ ରା।
ପାର୍ମେଶ୍ୱାର୍ସ୍କି ହାଦ୍ଦୁ
28ହୁଦ୍ଘିଲାଗାନ୍ ହେ ହାଦ୍ଦୁବଚ୍ଚରୋ, ନିମ୍ ଖ୍ରୀସ୍ତ୍ନୁ ରା ତାକା ଯେତ୍କବାକେନ୍ ଆସ୍ ପ୍ରକଟ୍ ମାନସ୍ ତା ନାମ୍ ସାହସ୍ କାମତ୍, ଆରୁ ଆସ୍କି, ଆରୁଅହନ୍ ବାର୍ନା ସାମାୟନୁ ତାଙ୍ଘା ଆଘ୍ଲି ମା ଲାଜରତ୍। 29ଯଦି ନିମ୍ ଆହ୍ଦାର୍ କା, ଖ୍ରୀସ୍ତ୍ସ୍ ପାର୍ମେଶ୍ୱାର୍ସ୍କି ନଜର୍ନୁ ବାନେ ନାଲ୍ଖୁ କାମ୍ଦାସ୍ ତା ଇବନ୍ହି ଆହା କା ଏକାର୍ ପାର୍ମେଶ୍ୱାର୍ସ୍କି ନଜର୍ନୁ ବାନେ ନାଲ୍ଖୁ କାମ୍ନାଏ ଆବ୍ଡ଼ାର୍ ପାର୍ମେଶ୍ୱାର୍ସ୍କି ହାଦ୍ଦୁବଚ୍ଚର୍।
3ନାମ୍ ପାର୍ମେଶ୍ୱାର୍ସ୍କି ହାଦ୍ଦୁବଚ୍ଚତ୍
1ଏରା, ବାଙ୍ଗ୍ସ୍ ନାମାନ୍ ଏତ୍କ ବାନେ ହାଖ୍ଖୀୟାସ୍ କା ନାମ୍ ପାର୍ମେଶ୍ୱାର୍ସ୍କି ହାଦ୍ଦୁବଚ୍ଚତ୍ ବୁଲି ଆହାକତ୍; ଆରୁ ନାମ୍ ପାର୍ମେଶ୍ୱାର୍ସ୍କି ହାଦ୍ଦୁବଚ୍ଚତ୍ହି। ହୁଦ୍ଘିଲାଗାନ୍ ଇ ଦୁନିଆଁଦ୍ ନାମାନ୍ ବାଲ୍ଲିଦିନ୍, ଏନ୍ଦେର୍ଗେକା ଦୁନିଆଁଦ୍ ପାର୍ମେଶ୍ୱାର୍ସିନ୍ ବାଲ୍ଲିଦିନ୍। 2ହେ ପ୍ୟାରେରୋ, ଆକ୍କୁନ୍ ନାମ୍ ପାର୍ମେଶ୍ୱାର୍ସ୍କି ହାଦ୍ଦୁବଚ୍ଚତ୍, ନାମ୍ ଭବିଷତ୍ନୁ ଏନ୍ଦେର୍ ମାନତ୍ ଆଦ୍ ଆକ୍କୁନ୍ତକ୍ ପ୍ରକଟ୍ ମାଲ୍ଲା ମାନୁଦ୍! ଏତ୍କ ନାମ୍ ଆହ୍ଦାତ୍ କା ଯେତ୍କବାକେନ୍ ଖ୍ରୀସ୍ତ୍ ଆରୁଅହନ୍ ବାରସ୍ ତା ନାମ୍ ତାଙ୍ଘା ଲେଖା ମାନତ୍କତ୍। ଏନ୍ଦେର୍ଗେକା ଆସ୍ ଏସ୍କେ ରାଦାସ୍, ଆନ୍ନେ ନାମ୍ ଆସିନ୍ ଏରୋତ୍। 3ଆରୁ ନେଦିନ୍ ଆସ୍କି ମିଆଁ ଏନ୍ନେ ଭାର୍ଷା ଉଇଦାସ୍, ତା ଆସ୍ ନିଜ୍କେ ପାବିତାର୍ ଉଇଦାସ୍, ଏସ୍କେ କା ଖ୍ରୀସ୍ତ୍ ପାବିତାର୍ ରାଦାସ୍।
4ନେଦିନ୍ ପାପ୍ କାମ୍ଦାସ୍, ତା ଆସ୍ ପାର୍ମେଶ୍ୱାର୍ସ୍କି ନିୟମ୍ବନ୍ ତୋଡ଼୍ଦାସ୍; ଏନ୍ଦେର୍ଗେକା ନିୟମ୍ ତୋଡ଼୍ନାଦ୍ଦିନ୍ ପାପଦ୍। 5ନିମ୍ ଆହ୍ଦାର୍ କା ଖ୍ରୀସ୍ତ୍ ପାପ୍ବନ୍ ଦୁର୍ ହାଟାବାଗେ ପ୍ରକଟ୍ ମାନ୍ଚାସ୍; ହୁଦ୍ଘିଲାଗାନ୍ ଆସ୍କିନୁ ଏନ୍ଦେର୍ହି ପାପ୍ ମାଲ୍ଲାଦିନ୍। 6ନେଦିନ୍ ଖ୍ରୀସ୍ତ୍ଗାନେ ରାଦାସ୍ତା ଆସ୍ ପାପ୍ ମା କାମ୍ତେ ରାଦାସ୍: ଆରୁ ଏକାସ୍ ପାପ୍ କାମ୍ତେ ରାଦାସ୍ତା ଆସ୍ ପାର୍ମେଶ୍ୱାର୍ସିନ୍ ମାଲ୍ଲା ଏରୁସ୍ ଆରୁ ଆସିନ୍ ବାଲ୍ଦାସିନ୍। 7ହେ ଦୁଲାଡ଼ି ହାଦ୍ଦୁବଚ୍ଚରୋ, ନେଦ୍ହି ନିମାନ୍ ମା ଫୁସ୍ଲର୍। ଏକାସ୍ ବାନେ ନାଲ୍ଖୁ କାମ୍ଦାସ୍ ଆସ୍ ପାର୍ମେଶ୍ୱାର୍ସ୍କି ନଜର୍ନୁ ବାନେ ରାଦାସ୍ ଏସ୍କେ କା ଯୀଶୁ ଖ୍ରୀସ୍ତ୍ ପାର୍ମେଶ୍ୱାର୍ସ୍କି ନଜର୍ନୁ ବାନେ ରାଦାସ୍। 8ଏକାସ୍ ପାପ୍ କାମ୍ଦାସ୍ ଆସ୍ ଶାଏତାନ୍ଘି ତାର୍ତି କାମ୍ଦାସ୍। ଏନ୍ଦେର୍ଗେକା ଶାଏତାନ୍ ସୁରୁନ୍ତି ପାପ୍ କାମ୍ତେ ବାରାଲିଦ୍। ଶାଏତାନ୍ଘି ନାଲ୍ଖୁବନ୍ ନାଶ୍ କାମାଗେ ପାର୍ମେଶ୍ୱାର୍ସ୍କି ହାଦ୍ଦୁସ୍ ପ୍ରକଟ୍ ମାନ୍ଚାସ୍। 9ଏକାସ୍ ପାର୍ମେଶ୍ୱାର୍ସ୍କି ହାଦ୍ଦୁସ୍ ଆସ୍ ପାପ୍ ମା କାମ୍ତେ ରାଦାସ୍; ଏନ୍ଦେର୍ଗେକା ପାର୍ମେଶ୍ୱାର୍ସ୍କି ସ୍ୱାଭାବ୍ ଆସ୍କିନୁ ରାଇ। ଆସ୍ ପାର୍ମେଶ୍ୱାର୍ସ୍କି ହାଦ୍ଦୁସ୍ ହୁଦ୍ଘିଲାଗାନ୍ ଆସ୍ ପାପ୍ କାମ୍ତେ ରା ପଲ୍ଲଦାସିନ୍। 10ଇନ୍ନୁନ୍ତି ଆହ୍ତାରିଦ୍ କା ନେଦ୍ ପାର୍ମେଶ୍ୱାର୍ସ୍କି ହାଦ୍ଦୁର୍ ଆରୁ ନେଦ୍ ଶାଏତାନ୍ଘି ହାଦ୍ଦୁର୍; ଏକାସ୍ ସତ୍ତୁ ନାଲ୍ଖୁ ମା କାମ୍ଦାସ୍ ତା ଆରୁ ନିଜର୍ ଭାଇସିନ୍ ବାନେ ମା ହାଖ୍ଖଦାସ୍ ଆସ୍ ପାର୍ମେଶ୍ୱାର୍ସ୍କି ହାଦ୍ଦୁ ମାଲ୍ଦାସ୍।
ଏକ୍ ଦୁସ୍ରାରିନ୍ ବାନେ ହାଖ୍ଖା
11ଏକା ସାମାଚାର୍ ନିମ୍ ସୁରୁନ୍ତି ମେନ୍ଚ୍କାଦାର୍, ଆଦ୍ ଇଦ୍ କା ନାମ୍ ଏକ୍ ଦୁସ୍ରାରିନ୍ ବାନେ ହାଖ୍ଖତ୍। 12ନାମ୍ କାଇନ୍ସ୍ ଲେଖା ଆମ୍ବତ୍ ମାନା, ଏକାସ୍ କା ଶାଏତାନ୍ଘି ହାଦ୍ଦୁ ରାଚାସ୍। ଆସ୍ ତାଙ୍ଘା ଭାଇସିନ୍ ପିଟ୍ଟେଇଚାସ୍। ଆସ୍ ତାଙ୍ଘା ଭାଇସିନ୍ ଏନ୍ଦେର୍ଗେ ପିଟ୍ଟେଇଚାସ୍? ଇଦ୍ଘିଲାଗାନ୍ କା ଆସ୍କି ନାଲଖୁ ଖାରାପ୍ ରାଚା, ଲେକିନ୍ ଆସ୍କି ଭାଇସ୍ ଏକା ନାଲ୍ଖୁନ୍ କାମାଲିୟାସ୍ ଆଦ୍ ଠିକ୍ ରାଚା।
13ହେ ଭାଇ ଜାମାରୋ, ଯଦି ଦୁନିଆଁନ୍ତା ଆଲାର୍ ନିମାନ୍ ହାଁଣର୍ ତୁଫ୍ର୍ ତା ନିମ୍ ତାଜୁବ୍ ଆମ୍କେମାନା। 14ନାମ୍ ଆହ୍ଦାତ୍ କା ନାମ୍ ମରନ୍ବନ୍ ପାର୍ ମାନିକିରି ଜୀବନ୍ନୁ କରଚ୍କାଦାତ୍; ଏନ୍ଦେର୍ଗେକା ନାମ୍ ଭାଇଜାମାରିନ୍ ବାନେ ହାଖ୍ଖଦାତ୍। ନେଦ୍ ବାନେ ମା ହାଖ୍ଖନାଏ ଆବ୍ଡ଼ାର୍ ମରନ୍ଘି ଅଧିନ୍ନୁ ରାନାଏ। 15ଏକାସ୍ ନିଜର୍ ଭାଇସିନ୍ ହାଁଣଦାସ୍ ତୁଫ୍ଦାସ୍ ତା, ଆସ୍ ଆଲ୍ପିଟୁସ୍ ଆରୁ ନିମ୍ ଆହ୍ଦାର୍ କା ଅଣ୍ଟା ଆଲ୍ପିଟୁସ୍ ସବୁଦିନ୍ତା ଜୀବନ୍ ମା ହାଖ୍ଖଦାସ୍। 16ନାମ୍ ବାନେ ହାଖ୍ଖନାତି ଆକ୍କାତ୍ କା ଯୀଶୁ ଖ୍ରୀସ୍ତ୍ ନାହ୍ମାଲାଗାନ୍ ତାଙ୍ଘା ଜୀଆ ଚିଚ୍ଚାସ୍; ଆରୁ ହନ୍ନେନ୍ ନାମାଗେହି ନାହ୍ମା ଭାଇ ଜାମାର୍ଘି ଲାଗାନ୍ ଜୀଆ ଚିନା କାତ୍ଥା। 17ଆରୁ ଏକିନ୍ ଧନୀ ଆଲାସ୍, ନିଜର୍ ଭାଇସିନ୍ ଗରୀବ୍ ଏରିକିରିହି ଆସିନ୍ ଦାୟା ମା କାମ୍ଦାସ୍ ତା, ଆସ୍କିନୁ ପାର୍ମେଶ୍ୱାର୍ସ୍କି ବାନେ ହାଖ୍ଖନା ଏସ୍କେ ରା ଅଙ୍ଗିଦ୍? 18ହେ ହାଦ୍ଦୁବଚ୍ଚରୋ, ନାମ୍ ବାନେ ବଚନ୍ ଆରୁ କାତ୍ଥାତି ଖାଲି ଆମ୍ବତ୍ କାମା ଲେକିନ୍ ନାମ୍ ସତ୍ତୁ ବାନେ ହାଖ୍ଖତ୍, ଏକାଦ୍ କା ନାହ୍ମା ନାଲ୍ଖୁ ଦ୍ୱାର୍ନୁ ଆହାତାରୋ।
ପାର୍ମେଶ୍ୱାର୍ସ୍କି ଆଘ୍ଲି ଧିରାଜ୍ ଧାର୍ନା
19ଏନ୍ନେ କାମତ୍ ହାଲେ ନାମ୍ ଆହତ୍ କା ନାମ୍ ସତ୍ତୁଘି ହାଦ୍ଦୁବଚ୍ଚତ୍ ବୁଲି; ଆରୁ ଏନ୍ଦ୍ରିନ୍ କାତ୍ଥାନୁ ନାହ୍ମା ମନ୍ଦ୍ ନାମାନ୍ ଦୋଷ୍ ଚିଅଦ୍, ଆଦ୍ଘି ବାରେ ନାମ୍ ପାର୍ମେଶ୍ୱାର୍ସ୍କି ଆଘ୍ଲି ନିଜର୍-ନିଜର୍ ମନ୍ବନ୍ ଧିରାଜ୍ ଚିଆଅଙ୍ଗତ୍। 20ଏନ୍ଦେର୍ଗେକା ପାର୍ମେଶ୍ୱାର୍ସ୍ ନାହ୍ମା ମନ୍ତି ମାହାନ୍ସ୍, ଆସ୍ ଜାମାନ୍ ଆହ୍ଦାସ୍। 21ହେ ପ୍ୟାରେରୋ ହାଦ୍ଦୁବଚ୍ଚରୋ, ଯଦି ନାହ୍ମା ମନ୍ଦ୍ ନାମାନ୍ ଦୋଷ୍ ମା ଚିଅ, ହାଲେ ତା ପାର୍ମେଶ୍ୱାର୍ସ୍କି ଆଘ୍ଲି ନାହ୍ମାଏ ସାହସ୍ ରାଇ। 22ଆରୁ ନାମ୍ ଏକାନ୍ ଏକାନ୍ ନିଦାତ୍, ଆସ୍ତି ନାମ୍ ହାଖ୍ଖଦାତ୍, ଏନ୍ଦେର୍ଗେକା ନାମ୍ ଆସ୍କି ହୁକୁମ୍ବନ୍ ପାଲନ୍ କାମ୍ଦାତ୍ ଆରୁ ଆସ୍କେ ଏକାଦ୍ ବାନେ ଲାଗ୍ଗଦ୍ ଆବନ୍ କାମ୍ଦାତ୍। 23ଆସ୍କି ହୁକୁମ୍ ଇଦ୍ କା: ନାମ୍ ତାଙ୍ଘା ହାଦ୍ଦୁ ଯୀଶୁ ଖ୍ରୀସ୍ତ୍କି ନାମେନୁ ବିଶ୍ୱାସ୍ କାମତ୍ ଆରୁ ଆସ୍କି ଚିଚ୍ଚକା ହୁକୁମ୍ ଅନୁସାର୍ ଏକ୍ ଦୁସ୍ରାରିନ୍ ବାନେ ହାଖ୍ଖତ୍। 24ଏକାସ୍ ପାର୍ମେଶ୍ୱାର୍ସ୍କି ହୁକୁମ୍ ପାଲନ୍ କାମ୍ଦାସ୍, ଆସ୍ ପାର୍ମେଶ୍ୱାର୍ସ୍ଗାନେ ରାଦାସ୍: ଆରୁ ପାର୍ମେଶ୍ୱାର୍ସ୍ ଆସ୍ଗାନେ ରାଦାସ୍। ପାର୍ମେଶ୍ୱାର୍ସ୍କି ଚିଚ୍ଚକା ପାବିତାର୍ ଆତ୍ମାଘି ଦ୍ୱାର୍ନୁ ନାମ୍ ଆହ୍ଦାତ୍ କା ପାର୍ମେଶ୍ୱାର୍ସ୍ ନାହ୍ମାଗାନେ ରାଦାସ୍।
4ଝୁଟ୍ଟୁ ଶିକ୍ଷା ଚିଉର୍ସ୍ତି ସାବ୍ଧାନ୍ ରା
1ହେ ପ୍ୟାରେରୋ, ଜାମା ଆତ୍ମାବନ୍ ବିଶ୍ୱାସ୍ ଆମା କାମା, ଲେକିନ୍ ଆତ୍ମାବନ୍ ଯାଁଚ୍ କାମା, କା ଆବ୍ଡ଼ାଦ୍ ପାର୍ମେଶ୍ୱାର୍ସ୍କି ତାର୍ତି ରାଇ କା ମାଲ୍ଲା; ଏନ୍ଦେର୍ଗେକା ଢେର୍ ଠାକୁୱା ନାବୀର୍ ଦୁନିଆଁନୁ ଉର୍ଖାର୍ ଆରୁ ଫାଏଲାରାଚାର୍ କେର୍କାନାଏ। 2ପାର୍ମେଶ୍ୱାର୍ସ୍କି ଆତ୍ମାବନ୍ ନିମ୍ ଏନ୍ନେ ଚିହ୍ନା ଅଙ୍ଗର୍: ଏକା ଆତ୍ମାଦ୍ ମାନିଦ୍ କା ଯୀଶୁ ଖ୍ରୀସ୍ତ୍ ମୁନୁଷ୍କି ରୂପ୍ନୁ ଦୁନିଆଁନୁ ବାର୍ଚ୍କାଦାସ୍, ଆଦ୍ ପାର୍ମେଶ୍ୱାର୍ସ୍କି ତାର୍ତି ବାର୍ଚ୍କିଚି, 3ଆରୁ ଏକା ଆତ୍ମାଦ୍ ଯୀଶୁସିନ୍ ମା ମାନିଦ୍, ଆଦ୍ ପାର୍ମେଶ୍ୱାର୍ସ୍କି ତାର୍ତି ମାଲ୍ଲା ବାରୁଦ୍; ଆରୁ ଆଦ୍ତା ଖ୍ରୀସ୍ତ୍ ବିରୋଧିର୍ଘି ଆତ୍ମାଦ୍ ଏକାଘି କା ଚାର୍ଚା ନିମ୍ ମେନ୍ଚ୍କାଦାର୍ ଆସ୍ ବାର୍ନାବାଲା ରାଦାସ୍ ଆରୁ ଇନ୍ନାହି ଦୁନିଆଁନୁ ରାଦାସ୍। 4ହେ ପ୍ୟାରେ ହାଦ୍ଦୁବଚ୍ଚରୋ, ନିମ୍ ପାର୍ମେଶ୍ୱାର୍ସ୍କି ଆଲାର୍, ହୁଦ୍ଘିଲାଗାନ୍ ନିମ୍ ଝୁଟ୍ଟୁ ନାବୀର୍ସ୍ତି ଜିତ୍କାଦାର୍; ଏନ୍ଦେର୍ଗେକା ଏକା ପାର୍ମେଶ୍ୱାର୍ସ୍ ନିହ୍ମାଏନୁ ରାଦାସ୍, ଆସ୍ ଦୁନିଆଁନୁ ରାନାବାଲା ଶାଏତାନ୍ସ୍ତି ମାହାନ୍ସ୍। 5ଝୁଟ୍ଟୁ ନାବୀଜାମାର୍ ଦୁନିଆନ୍ତାର୍, ହୁଦ୍ଘିଲାଗାନ୍ ଆବ୍ଡ଼ାର୍ ଦୁନିଆଁନ୍ତା କାତ୍ଥା ତେଙ୍ଗ୍ନାଏ ଆରୁ ଦୁନିଆଁଦ୍ ଆବ୍ଡ଼ାର୍ଘି କାତ୍ଥାନ୍ ମେନିଦ୍। 6ଲେକିନ୍ ନାମ୍ ପାର୍ମେଶ୍ୱାର୍ସ୍କି ଆଲାତ୍। ହୁଦ୍ଘିଲାଗାନ୍ ଏକାର୍ ପାର୍ମେଶ୍ୱାର୍ସିନ୍ ଆହ୍ନାଏ, ଆବ୍ଡ଼ାର୍ ନାହ୍ମାଏ କାତ୍ଥାନ୍ ମେନ୍ନାଏ; ଆରୁ ଏକାର୍ ପାର୍ମେଶ୍ୱାର୍ସିନ୍ ବାଲ୍ନାଇନ୍ ଆବ୍ଡ଼ାର୍ ନାହ୍ମାଏ କାତ୍ଥାନ୍ ମା ମେନ୍ନାଏ ଆରୁ ଏନ୍ନେନ୍ ନାମ୍ ସତ୍ତୁଘି ଆତ୍ମା ଆରୁ ଝୁଟ୍ଟୁଘି ଆତ୍ମାବନ୍ ଚିହ୍ନା ଅଙ୍ଗ୍ଦାତ୍।
ବାନେ ହାଖ୍ଖନାଦ୍ ପାର୍ମେଶ୍ୱାର୍ସ୍ତି ହାଖ୍ଖରିଦ୍
7ହେ ପ୍ୟାରେରୋ, ନାମ୍ ଏକ୍ ଦୁସ୍ରାର୍ଗାନେ ବାନେକିରି ରତ୍; ଏନ୍ଦେର୍ଗେକା ବାନେ ହାଖ୍ଖନାଦ୍ ପାର୍ମେଶ୍ୱାର୍ସ୍ତି ହାଖ୍ଖରିଦ୍। ଆରୁ ନେଦ୍ ବାନେ ହାଖ୍ଖନାଏ, ଆବ୍ଡ଼ାର୍ ପାର୍ମେଶ୍ୱାର୍ସ୍କି ହାଦ୍ଦୁବଚ୍ଚ ମାନ୍ଚାର୍ କେର୍କାନାଏ ଆରୁ ପାର୍ମେଶ୍ୱାର୍ସିନ୍ ଆହ୍ନାଏ। 8ଏକାର୍ ବାନେ ମା ହାଖ୍ଖନାଏ ଆବ୍ଡ଼ାର୍ ପାର୍ମେଶ୍ୱାର୍ସିନ୍ ବାଲ୍ନାଇନ୍, ଏନ୍ଦେର୍ଗେକା ପାର୍ମେଶ୍ୱାର୍ସ୍ ତା ବାନେ ହାଖ୍ଖନାସ୍। 9ପାର୍ମେଶ୍ୱାର୍ସ୍ ନାମାନ୍ ବାଗ୍ଗେ ବାନେ ହାଖ୍ଖଦାସ୍, ଆବନ୍ ଏନ୍ନେ ପ୍ରକଟ୍ କାମ୍ଚ୍କାଦାସ୍ କା ଆସ୍ ନିଜର୍ ଅଣ୍ଟା ଖାଲି ହାଦ୍ଦୁସିନ୍ ଦୁନିଆଁନୁ ତାଇୟାସ୍, କା ନାମ୍ ଆସ୍କି ଦ୍ୱାର୍ନୁ ଜୀବନ୍ ହାଖ୍ଖା ଅଙ୍ଗତ୍। 10ସତ୍ତୁ ବାନେ ହାଖ୍ଖନାଦ୍ ଇନ୍ନୁ ମାଲ୍ଲାଦିନ୍ କା ନାମ୍ ପାର୍ମେଶ୍ୱାର୍ସିନ୍ ବାନେ ହାଖ୍ଖକାଦାତ୍, ଲେକିନ୍ ଇନ୍ନୁ ରାଇ କା ଆସ୍ ନାମାନ୍ ବାନେ ହାଖ୍ଖକାଦାସ୍ ଆରୁ ନାହ୍ମା ପାପ୍ଘି ଛେମାଘି ଲାଗାନ୍ ନିଜର୍ ଅଣ୍ଟା ଖାଲି ହାଦ୍ଦୁସିନ୍ ତାଇୟାସ୍। 11ହେ ପ୍ୟାରେରୋ, ଯଦି ପାର୍ମେଶ୍ୱାର୍ସ୍ ନାମାନ୍ ଏନ୍ନେ ବାନେ ହାଖ୍ଖଦାସ୍ ତା ନାମାଗେହି ଏକ୍ ଦୁସ୍ରାର୍ଗାନେ ବାନେକିରି ରାନା କାତ୍ଥା। 12ପାର୍ମେଶ୍ୱାର୍ସିନ୍ ନେଦ୍ହି ଏକ୍ଲାହି ମାଲ୍ଲା ଏରୁର୍; ଲେକିନ୍ ଯଦି ନାମ୍ ଏକ୍ ଦୁସ୍ରାରିନ୍ ବାନେ ହାଖ୍ଖତ୍ ତା, ପାର୍ମେଶ୍ୱାର୍ସ୍ ନାହ୍ମାଗାନେ ରସ୍ ଆରୁ ଆସ୍କି ବାନେ ହାଖ୍ଖନାଦ୍ ନାହ୍ମାଏନୁ ପୁରାପୁରୀ ରାଇଦ୍।
13ଇତ୍ତି ନାମ୍ ଆହ୍ଦାତ୍ କା ନାମ୍ ଆସ୍କିନୁ ରାଦାତ୍, ଆରୁ ଆସ୍ ନାହ୍ମାଏନୁ ରାଦାସ୍; ଏନ୍ଦେର୍ଗେକା ଆସ୍ ନିଜର୍ ଆତ୍ମାବନ୍ ନାମାଗେ ଚିଚ୍କାଦାସ୍। 14ନାମ୍ ଆସିନ୍ ଏର୍କାଦାତ୍ହି ଆରୁ ସାକ୍ଷୀ ଚିଆଲ୍ଦାତ୍ କା ବାଙ୍ଗ୍ ପାର୍ମେଶ୍ୱାର୍ସ୍ ତାଙ୍ଘା ହାଦ୍ଦୁସିନ୍ ଦୁନିଆଁନୁ ମୁକ୍ତିଦାତାସ୍କି ରୂପ୍ନୁ ତାଇୟାସ୍। 15ଯଦି ଏକାସ୍ ଇବନ୍ ମାନ୍ଦାସ୍ କା, “ଯୀଶୁସ୍ ପାର୍ମେଶ୍ୱାର୍ସ୍କି ହାଦ୍ଦୁସ୍,” ତା ପାର୍ମେଶ୍ୱାର୍ସ୍ ଆସ୍କିନୁ ରାଦାସ୍, ଆରୁ ଆସ୍ ପାର୍ମେଶ୍ୱାର୍ସ୍କିନୁ ରାଦାସ୍। 16ପାର୍ମେଶ୍ୱାର୍ସ୍ ନାମାନ୍ ଯେତ୍କ ବାନେ କାମ୍ଦାସ୍, ଆବନ୍ ନାମ୍ ଆହ୍ଦାତ୍ ଆରୁ ବିଶ୍ୱାସ୍ କାମ୍ଦାତ୍। ପାର୍ମେଶ୍ୱାର୍ସ୍ ବାନେ ହାଖ୍ଖନାସ୍ ଆରୁ ଏକାର୍ ପାର୍ମେଶ୍ୱାର୍ସିନ୍ ଆରୁ ଆଲାରିନ୍ ବାନେ ହାଖ୍ଖନାଏ, ଆବ୍ଡ଼ାର୍ ପାର୍ମେଶ୍ୱାର୍ସ୍କିନୁ ରାନାଏ ଆରୁ ପାର୍ମେଶ୍ୱାର୍ସ୍ ଆବ୍ଡ଼ାର୍ଘିନୁ ରାଦାସ୍। 17ଏନ୍ନେନ୍ ବାନେ ହାଖ୍ଖନାଦ୍ ନାହ୍ମାଏନୁ ଶିଦ୍ଧ୍ ମାନ୍ଚ୍କିଚି। ହୁଦ୍ଘିଲାଗାନ୍ ନାମାଗେ ନ୍ୟାୟଘି ଉଲ୍ଲାନୁ ସାହସ୍ ହାଖ୍ଖରଦ୍। ଏନ୍ଦେର୍ଗେକା ନାମ୍ ଇ ଦୁନିଆଁନୁ ଆନ୍ନେନ୍ ଜୀବନ୍ ବିତାବାଚ୍କାତ୍ ଏସ୍କେ କା ଖ୍ରୀସ୍ତ୍ ଜୀବନ୍ ବିତାବାଚ୍କାଚାସ୍। 18ବାନେ ହାଖ୍ଖନାନୁ ଏଲ୍ଚ୍କା ମା ରାଇ, ଲେକିନ୍ ଶିଦ୍ଧ୍ ବାନେ ହାଖ୍ଖନାଦ୍ ଏଲ୍ଚ୍କାବନ୍ ଦୁର୍ କାମିଚି; ଏନ୍ଦେର୍ଗେକା ଏଲ୍ଚ୍କାତି ସାଜାଦ୍ ମାନିଦ୍, ଆରୁ ନେଦ୍ ଏଲ୍ଚ୍ନାଏ ଆବ୍ଡ଼ାର୍ ବାନେ ହାଖ୍ଖନାନୁ ଶିଦ୍ଧ୍ ମାଲ୍ଲା ମାନୁର୍। 19ନାମ୍ ଇଦ୍ଘିଲାଗାନ୍ ବାନେ ହାଖ୍ଖଦାତ୍ କା, ପହ୍ଲେ ଆସ୍ ନାମାନ୍ ବାନେ ହାଖିୟାସ୍। 20ଯଦି ନେଦିନ୍ ତେଙ୍ଗର୍, “ଏନ୍ ପାର୍ମେଶ୍ୱାର୍ସିନ୍ ବାନେ ହାଖ୍ଖଦାନ୍” ଆରୁ ଯଦି ନିଜର୍ ଭାଇସିନ୍ ହାଁଣସ୍ ତୁପ୍ଫସ୍; ତା ଆସ୍ ଝୁଟ୍ଟୁସ୍। ଏନ୍ଦେର୍ଗେକା ଆସ୍ ନିଜର୍ ଭାଇସିନ୍, ଏକାସିନ୍ କା ଆସ୍ ଏର୍ଦାସ୍, ଆସିନ୍ ବାନେ ମା ହାଖ୍ଖଦାସ୍, ତା ଆସ୍ ପାର୍ମେଶ୍ୱାର୍ସିନ୍, ଏକାସିନ୍କା ଆସ୍ ଏକ୍ଲାହି ମାଲ୍ଲା ଏରୁସ୍, ଆସିନ୍ ବାନେ ହାଖ୍ଖା ପଲ୍ଲଦାସିନ୍। 21ଖ୍ରୀସ୍ତ୍ତି ନାମାଗେ ଏନ୍ନେ ଆଦେଶ୍ ହାଖ୍ଖର୍କିଚି କା, ନେଦିନ୍ ପାର୍ମେଶ୍ୱାର୍ସିନ୍ ବାନେ ହାଖ୍ଖନାଏ ତା ଆବ୍ଡ଼ାର୍ ନିଜର୍ ଭାଇସିନ୍ହି ବାନେ ହାଖ୍ଖନା କାତ୍ଥା।
5ଦୁନିଆଁନୁ ଜିତ୍ନା
1ନେଖାଏ ଏନ୍ନେ ବିଶ୍ୱାସ୍ ରାଇ କା ଯୀଶୁସିନ୍ ଖ୍ରୀସ୍ତ୍, ଆବ୍ଡ଼ାର୍ ପାର୍ମେଶ୍ୱାର୍ସ୍କି ହାଦ୍ଦୁବଚ୍ଚର୍; ଆରୁ ନେଦିନ୍ ବାଙ୍ଗ୍ସିନ୍ ବାନେ ହାଖ୍ଖନା କାମ୍ନାଏ ତା ଆବ୍ଡ଼ାର୍ ଆସ୍କି ହାଦ୍ଦୁବଚ୍ଚରିନ୍ହି ବାନେ କାମ୍ନାଏ। 2ଯେତ୍କବାକେନ୍ ନାମ୍ ପାର୍ମେଶ୍ୱାର୍ସିନ୍ ବାନେ ହାଖ୍ଖଦାତ୍ ଆରୁ ଆସ୍କି ହୁକୁମ୍ବନ୍ ପାଲନ୍ କାମ୍ଦାତ୍ ତା, ଇତ୍ତି ନାମ୍ ଆହ୍ଦାତ୍ କା ନାମ୍ ପାର୍ମେଶ୍ୱାର୍ସ୍କି ହାଦ୍ଦୁବଚ୍ଚରିନ୍ ବାନେ ହାଖ୍ଖଦାତ୍। 3ଏନ୍ଦେର୍ଗେକା ପାର୍ମେଶ୍ୱାର୍ସିନ୍ ବାନେ ହାଖ୍ଖନା ମତ୍ଲବ୍ ପାର୍ମେଶ୍ୱାର୍ସ୍କି ହୁକୁମ୍ବନ୍ ମାନ୍ନା; ଆରୁ ଆସ୍କି ହୁକୁମ୍ଦ୍ କଠିନ୍ ମାଲ୍ଲିଦ୍। 4ଏନ୍ଦେର୍ଗେକା ନେଦିନ୍ ପାର୍ମେଶ୍ୱାର୍ସ୍କି ହାଦ୍ଦୁବଚ୍ଚ୍ ମାନର୍କର୍, ଆବ୍ଡ଼ାର୍ ଦୁନିଆଁନୁ ଜିତର୍, ଆରୁ ଆ ଜିତଦ୍ ଏକାତି କା ଦୁନିଆଁନୁ ଜିତ୍ ମାନିଦ୍; ଆଦ୍ ନାହ୍ମାଏ ବିଶ୍ୱାସ୍ଦ୍। 5ଦୁନିଆଁନୁ ଜିତ୍ନା ବାଲାର୍ ନେଦ୍? ଖାଲି ଆବ୍ଡ଼ାର୍ ଏକାର୍ଘି ବିଶ୍ୱାସ୍ ରାଇ କା ଯୀଶୁସ୍ ପାର୍ମେଶ୍ୱାର୍ସ୍କି ହାଦ୍ଦୁସ୍।
ଯୀଶୁ ଖ୍ରୀସ୍ତ୍ସ୍କି ବାରେନୁ ସାକ୍ଷୀ
6ଆ ଯୀଶୁ ଖ୍ରୀସ୍ତ୍ସିନ୍ ଏକାସ୍ କା ଆମ୍ମୁ ଆରୁ ହେଁସୁତି ବାର୍ଚ୍କାଚାସ୍, ଆରୁ ଖାଲି ଆମ୍ମୁତି ମାଲ୍ଲା ଲେକିନ୍ ଆମ୍ମୁ ଆରୁ ହେଁସୁତି ବାର୍ଚ୍କାଚାସ୍। 7ଆରୁ ଆତ୍ମାଦ୍ହି ଇଦ୍ଘି ସାକ୍ଷୀ ଚିଦ୍ ଏନ୍ଦେର୍ଗେକା ଆତ୍ମାଦ୍ ସତ୍ତୁଦ୍। 8ସାକ୍ଷୀ ଚିନାବାଲାର୍ ତିନ୍ ଲୋକ୍ ରାନାଏ, ଆତ୍ମା, ଆମ୍ମୁ ଆରୁ ହେଁସୁ; ଆରୁ ତିହ୍ନି ଲୋକ୍ ଅଣ୍ଟା କାତ୍ଥାନୁ ସହମତ୍ ରାନାଏ। 9ନାମ୍ ଯେତ୍କବାକେନ୍ ଆଲାର୍ଘି ସାକ୍ଷୀବନ୍ ମେନ୍ଦାତ୍, ତା ପାର୍ମେଶ୍ୱାର୍ସ୍କି ସାକ୍ଷୀତା ଆଦ୍ଘିନ୍ତିହି ବାଢ଼୍ରିକିରି ରାଇ; ଆରୁ ପାର୍ମେଶ୍ୱାର୍ସ୍କି ସାକ୍ଷୀଦ୍ ଇଦ୍ କା ଆସ୍ ନିଜର୍ ହାଦ୍ଦୁସ୍କି ବାରେ ସାକ୍ଷୀ ଚିଚ୍କାଦାସ୍। 10ଏକାସ୍ ପାର୍ମେଶ୍ୱାର୍ସ୍କି ହାଦ୍ଦୁସ୍କି ମିଆଁ ବିଶ୍ୱାସ୍ କାମ୍ଦାସ୍ ଆସ୍ ନିଜର୍ ମନ୍ନୁ ସାକ୍ଷୀ ଉଇଦାସ୍। ଆରୁ ଏକାସ୍ ପାର୍ମେଶ୍ୱାର୍ସ୍କି ମିଆଁ ବିଶ୍ୱାସ୍ ମା କାମ୍ଦାସ୍ ଆସ୍ ଆସିନ୍ ଝୁଟ୍ଟୁ ଠାହ୍ରାଦାସ୍, ଏନ୍ଦେର୍ଗେକା ଆସ୍ ଆ ସାକ୍ଷୀବନ୍ ବିଶ୍ୱାସ୍ ମା କାମ୍ଚାସ୍ ଏକାନ୍ କା ପାର୍ମେଶ୍ୱାର୍ସ୍ ତାଙ୍ଘା ହାଦ୍ଦୁସ୍କି ବାରେ ତେଙ୍କାଦାସ୍। 11ଆରୁ ଆ ସାକ୍ଷୀ ଇଦ୍ କା ପାର୍ମେଶ୍ୱାର୍ସ୍ ନାମାଗେ ସବୁଦିନ୍ତା ଜୀବନ୍ ଚିଚ୍କାଦାସ୍, ଆରୁ ଇ ଜୀବନ୍ ତାଙ୍ଘା ହାଦ୍ଦୁସ୍କିନୁ ହାଖ୍ଖରିଦ୍। 12ନେଖାସାନ୍ ହାଦ୍ଦୁସ୍ ରାଦାସ୍, ଆସ୍ସାନ୍ ଜୀବନ୍ ରାଇ; ଆରୁ ନେଖାସାନ୍ ପାର୍ମେଶ୍ୱାର୍ସ୍କି ହାଦ୍ଦୁସ୍ ମାଲ୍ଲକାସିନ୍, ଆସ୍ସାନ୍ ଜୀବନ୍ହି ମାଲ୍ଲାଦିନ୍।
ସବୁଦିନ୍ତା ଜୀବନ୍
13ପାର୍ମେଶ୍ୱାର୍ସ୍କି ହାଦ୍ଦୁସ୍କି ନାମେନୁ ବିଶ୍ୱାସ୍ କାମ୍ନା ବାଲାରୋ, ଏନ୍ ନିମାଗେ ଇଦ୍ଘିଲାଗାନ୍ ଲେଖାଲ୍ଦାନ୍ କା ନିମ୍ ଆହା କା ସବୁଦିନ୍ତା ଜୀବନ୍ ନିହ୍ମାସାନ୍ ରାଇଦ୍। 14ଆରୁ ନାହ୍ମାଏ ପାର୍ମେଶ୍ୱାର୍ସ୍କି ମିଆଁ ଇ ଭାର୍ଷା ରାଇ କା ଯଦି ନାମ୍ ତାଙ୍ଘା ଇଚ୍ଛାଘି ଅନୁସାର୍ ଏନ୍ଦ୍ରିନ୍ହି ନିୟତ୍ ତା ଆସ୍ ନାହ୍ମାଏ କାତ୍ଥାନ୍ ମେନ୍ଦାସ୍। 15ଆରୁ ନାମ୍ ଆହ୍ଦାତ୍ କା ଏନ୍ଦ୍ରିନ୍ହି ନାମ୍ ନିଦାତ୍ ତା ଆସ୍ ଆବନ୍ ପୁରା କାମ୍ଦାସ୍, ତା ଇବନ୍ହି ଆହ୍ଦାତ୍ କା ଏନ୍ଦ୍ରିନ୍ହି ନାମ୍ ଆସ୍ତି ନିଦାତ୍ ଆବନ୍ ହାକ୍କାତ୍ କେର୍କାଦାତ୍।
16ଯଦି ନେଦିନ୍ ନିଜର୍ ଭାଇସିନ୍ ଏନ୍ନେ ପାପ୍ କାମ୍ନାନ୍ ଏରୋସ୍ କା ଏକାଘି ଫଲ୍ବଦ୍ ସବୁଦିନ୍ତା ଖିନା ମା ମାନଦ୍, ତା ବିନ୍ତି କାମା, ଆରୁ ପାର୍ମେଶ୍ୱାର୍ସ୍ ଆସ୍କେ ଜୀବନ୍ ଚିୟସ୍। ଏନ୍ ଆବ୍ଡ଼ାର୍ଘି ଜୀବନ୍ଘି ବାରେନୁ ତେଙ୍ଗାଲ୍ଦାନ୍ ଏକାର୍ କା ଏନ୍ନେ ପାପ୍ କାମ୍ନାଏ ଏକାଘି ଫଲଦ୍ ସବୁଦିନ୍ତା ମରନ୍ ମା ମାନିଦ୍। ଏନ୍ନେ ପାପ୍ଦ୍ହି ମାନିଦ୍ କା ଏକାଘି ଫଲ୍ବଦ୍ ସବୁଦିନ୍ତା ମରନ୍। ଏନ୍ ନିମାନ୍ ଏନ୍ନେ ପାପ୍ଘି ବାରେ ବିନ୍ତି କାମାଗେ ମାଲ୍ଲା ତେଙ୍ଗ୍ନା। 17ଜାମା ଲେଖାଘି ଭୁଲ୍ ନାଲ୍ଖୁଦ୍ ପାପ୍ଦ୍, ଲେକିନ୍ ଏନ୍ନେ ପାପ୍ହି ରାଇଦ୍ ଏକାଘି କା ଫଲ୍ବଦ୍ ସବୁଦିନ୍ତା ମରନ୍ ମାଲ୍ଲିଦ୍।
18ନାମ୍ ଆହ୍ଦାତ୍ କା ଏକାର୍ ପାର୍ମେଶ୍ୱାର୍ସ୍କି ହାଦ୍ଦୁବଚ୍ଚ ମାନ୍ଚାର୍ କେର୍କାନାଏ, ଆବ୍ଡ଼ାର୍ ପାପ୍ ମା କାମ୍ତେ ରାନାଏ; ଲେକିନ୍ ପାର୍ମେଶ୍ୱାର୍ସ୍କି ହାଦ୍ଦୁସ୍ ଆବ୍ଡ଼ାରିନ୍ ବାଛାବାଦାସ୍, ଆରୁ ଆବ୍ଡ଼ାରିନ୍ ଶାଏତାନ୍ଦ୍ ଏସ୍ରା ପଲ୍ଲୀଦ୍। 19ନାମ୍ ଆହ୍ଦାତ୍ କା ନାମ୍ ପାର୍ମେଶ୍ୱାର୍ସ୍କି ହାଦ୍ଦୁବଚ୍ଚତ୍, ଆରୁ ଜାମା ଦୁନିଆଁଦ୍ ଶାଏତାନ୍ଘି ଅଧିନ୍ନୁ ରାଇଦ୍। 20ନାମ୍ ଇବନ୍ହି ଆହ୍ଦାତ୍ କା ପାର୍ମେଶ୍ୱାର୍ସ୍କି ହାଦ୍ଦୁସ୍ ବାର୍ଚାସ୍ କେରାସିନ୍ ଆରୁ ଆସ୍ ନାମାଗେ ବୁଦ୍ଧି ଚିଚ୍କାଦାସ୍ ତାକା ନାମ୍ ସତ୍ତୁ ପାର୍ମେଶ୍ୱାର୍ସିନ୍ ଆହାଅଙ୍ଗତ୍ ଆରୁ ନାମ୍ ଆସ୍ଗାନେ ରାଦାତ୍ ଏକାସ୍ କା ସତ୍ତୁସ୍, ମତ୍ଲବ୍ ଯୀଶୁ ଖ୍ରୀସ୍ତ୍ଗାନେ ରାଦାତ୍। ସତ୍ତୁ ପାର୍ମେଶ୍ୱାର୍ସ୍ ଆରୁ ସବୁଦିନ୍ତା ଜୀବନ୍ ଇସିନ୍। 21ହେ ହାଦ୍ଦୁବଚ୍ଚରୋ, ମୂର୍ତ୍ତୀସ୍ତି ନିଜ୍କେନିଜ୍ ବାଛାବା ଉଇୟା।