କୁରିନ୍ଥୀଆ ସହର୍ତା ଖ୍ରୀସ୍ତ୍ ମଣ୍ଡ୍ଲୀର୍ଘି ନାମେନୁ ଯୀଶୁ ଖ୍ରୀସ୍ତ୍କି ଖାସ୍ଚେଲା ପାଉଲୁସ୍କି ପହେଲା ଚିଠି
ବହିଘି ପରିଚୟ
ପାଉଲୁସ୍ ଯୀଶୁ ଖ୍ରୀସ୍ତ୍କି ଖାସ୍ଚେଲାସ୍ କୁରିନ୍ଥୀଆର୍ଘି ମଣ୍ଡ୍ଲୀବନ୍ ଏରାଗେ କେର୍କାଚାସ୍। ଯୀଶୁ ଖ୍ରୀସ୍ତ୍କି ବାରେନୁ ପ୍ରଚାର୍ କାମ୍ନା ବାକେନ୍ ଆସ୍ କେତ୍କ ଉଲ୍ଲା ଆସାନ୍ ରାଚାସ୍। ହତ୍କବାକେନ୍ କୁରିନ୍ଥୀଆର୍ଗାନେ ପାଉଲୁସ୍କି ସମ୍ବନ୍ଧ ବାଣିହାଁ ରାଚା। ଖ୍ରୀସ୍ତ୍ ବିଶ୍ୱାସୀର୍ଘି ଜୀବନ୍ ଆରୁ ବିଶ୍ୱାସ୍ବନ୍ ହୋଇକିରି ଆବ୍ଡ଼ାର୍ଘି ଭିତ୍ରେ ଭିନେ-ଭିନେ ସମସ୍ୟା ମାନ୍ଚା। ହୁଦ୍ଘିଲାଗାନ୍ ପାଉଲୁସ୍ ଇ ଚିଠିନ୍ ଲେଖ୍ଚ୍କାଚାସ୍। କୁରିନ୍ଥୀଆ ମଣ୍ଡ୍ଲୀନ୍ତା ବିଶ୍ୱାସୀଜାମାର୍ ତାହ୍ମା-ତାହ୍ମା ଭିତ୍ରେ ଭିନେ-ଭିନେ ଦଲ୍ନୁ ଭାଗ୍ ମାଞ୍ଚାର୍ କେର୍କାଚାର୍। ଆରୁ ତାହ୍ମା-ତାହ୍ମା ଭିତ୍ରେ ବାନେ ବେଭାର୍ ମା କାମାଲିୟାର୍, ହୁଦ୍ଘିଲାଗାନ୍ ପାଉଲୁସ୍ ବିଶେଷ୍କିରି ଚିନ୍ତା କାମାଲିୟାସ୍। ଆରୁ ମଣ୍ଡ୍ଲୀନୁ ଭାଗ୍ ମାନ୍ନା, ପାବିତାର୍ ଆତ୍ମାଘି ବାର୍ଦାନ୍, ଉଜ୍ଜନା, ମଣ୍ଡ୍ଲୀନ୍ତା ଆଗୁୱାର୍, ବେଞ୍ଜାଘି ବାରେନୁ ପ୍ରଶ୍ନ ଆରୁ ମୂର୍ତ୍ତୀନୁ ଚାଢ଼ାବାଚ୍କା ଜିନିଷ୍ଗୁଠିନ୍ ମହଁନାଘି ବାରେନୁ ଆବ୍ଡ଼ାର୍ଘି ପ୍ରଶ୍ନଘି ଯାବାବ୍ ଚିଦାସ୍। ପାଠ୍ ୧୩ ନୁ ପାଉଲୁସ୍ ତେଙ୍ଗ୍ଦାସ୍ କା ପାର୍ମେଶ୍ୱାର୍ସ୍କି ଆଲାର୍ଘି ହାଖ୍ଖର୍କା ବାର୍ଦାନ୍ତି ଜାମାର୍ଘିନ୍ତି ବାନେ ବାର୍ଦାନ୍ଦ୍ ବାନେ ହାଖ୍ଖନାଦ୍।
ରୂପ୍-ରେଖା
ଯୋହାର୍ ୧:୧-୯
ମଣ୍ତ୍ଲୀନୁ ଭାଗ୍ ମାନ୍ନା ୧:୧୦—୪:୨୧
ପାରିବାରିକ୍ ଜୀବନ୍ ୫:୧—୭:୪୦
ଖ୍ରୀସ୍ତ୍ ବିଶ୍ୱାସୀ ଆରୁ ମୂର୍ତ୍ତୀ ପୂଜା କାମୁର୍ ୮:୧—୧୧:୧
ଖ୍ରୀସ୍ତ୍ ବିଶ୍ୱାସୀର୍ଘି ଜୀବନ୍ ଆରୁ ସେବା ଆରାଧାନା ୧୧:୨—୧୪:୪୦
ଯୀଶୁ ଖ୍ରୀସ୍ତ୍ ଆରୁ ବିଶ୍ୱାସୀର୍ଘି ଆରୁଅହନ୍ ଉଜ୍ଜନା ୧୫:୧-୫୮
ୟାହୁଦାନ୍ତା ଖ୍ରୀସ୍ତ୍ ବିଶ୍ୱାସୀର୍ଗେ ଦାନ୍ ୧୬:୧-୪
ନିଜର୍ ବାରେ କାତ୍ଥା ଆରୁ ଆଖ୍ରୀ କାତ୍ଥା ୧୬:୫-୨୪
1ଯୋହାର୍
1ନାହ୍ମା ବିଶ୍ୱାସୀ ଭାଇ ସୋସ୍ଥିନେସ୍ଗାନେ ଯୀଶୁ ଖ୍ରୀସ୍ତ୍କି ଚେଲା ପାଉଲୁସ୍କି ତାର୍ତି ଏକାରିନ୍ ପାର୍ମେଶ୍ୱାର୍ସ୍ ତାଙ୍ଘା ଇଚ୍ଛାଘି ଲେଖା ଖ୍ରୀସ୍ତ୍ ଯୀଶୁସ୍କି ଖାସ୍ଚେଲା ମାନାଗେଲାଗାନ୍ ଚାଜ୍ଜକାଦାସ୍। 2ଆରୁ ପାର୍ମେଶ୍ୱାର୍ସ୍କି ଆ ମଣ୍ତ୍ଲୀଘି ନାମେନୁ ଲେଖାଲ୍ଦାନ୍ ଏକାଦ୍ କା କୁରିନ୍ଥୀ ସହର୍ନୁ ରାଇ, ମତ୍ଲବ୍ ଆବ୍ଡ଼ାର୍ଘି ନାମେ ଏକାରିନ୍ ଯୀଶୁ ଖ୍ରୀସ୍ତ୍କିନୁ ପାବିତାର୍ କାମା କେର୍କିଚି, ଆରୁ ପାବିତାର୍ ମାନାଗେଲାଗାନ୍ ପାର୍ମେଶ୍ୱାର୍ସ୍ ମେଁହ୍କାଦାସ୍; ଆରୁ ଆବ୍ଡ଼ା ଜାମାର୍ଘି ନାମେହି ରାଇ ଏକାର୍ କା ଜାମା ଆଡ୍ଡାନୁ ନାହ୍ମାଏ ଆରୁ ଆବ୍ଡ଼ାର୍ଘି ପ୍ରାଭୁ ଯୀଶୁ ଖ୍ରୀସ୍ତ୍କି ନାମେତି ବିନ୍ତି କାମ୍ନାଏ।
3ନାହ୍ମାଏ ବାଙ୍ଗ୍ ପାର୍ମେଶ୍ୱାର୍ ଆରୁ ପ୍ରାଭୁ ଯୀଶୁ ଖ୍ରୀସ୍ତ୍କି ତାର୍ତି ନିମାଗେ କ୍ରିପା ଆରୁ ଶାନ୍ତି ହାଖ୍ଖର୍ତେ ରାନାଦ୍।
ପାଉଲୁସ୍କି ତାର୍ତି ପାର୍ମେଶ୍ୱାର୍ସିନ୍ ଧାନ୍ୟାବାଦ୍
4ନିହ୍ମା ମିଆଁ ଖ୍ରୀସ୍ତ୍ ଯୀଶୁସ୍କି ଦ୍ୱାର୍ନୁ ପାର୍ମେଶ୍ୱାର୍ସ୍କି କ୍ରିପା ହାଖ୍ଖର୍କିଚି। ହୁଦ୍ଘିଲାଗାନ୍ ଏନ୍ ପାର୍ମେଶ୍ୱାର୍ସିନ୍ ଜାମାବାକେନ୍ ଧାନ୍ୟାବାଦ୍ ଚିଦାନ୍। 5ନିମ୍ ଯୀଶୁ ଖ୍ରୀସ୍ତ୍ଗାନେ ଅଣ୍ଟାନିନ୍ ମାନ୍ନାଘି ଲାଗାନ୍ ପାର୍ମେଶ୍ୱାର୍ସ୍ ନିମାନ୍ ଆତ୍ମିକ୍ ଜୀବନ୍ନୁ ଢେର୍ ମଦେତ୍ କାମ୍ଚାସ୍। ବିଶେଷ୍କିରି ଆଦ୍ ପାର୍ମେଶ୍ୱାର୍ସ୍କି ଆତ୍ମାଦ୍ ଜାମା କାତ୍ଥାନୁ ଏକା ବଚନ୍ଦ୍ ନିମାନ୍ ପ୍ରକଟ୍ କାମ୍ଚା ଆ ବଚନ୍ବନ୍ ଶୁଣାବାନାଘି ଲାଗାନ୍ ଢେର୍ ଶକ୍ତି ଚିଚ୍ଚାସ୍, ଆରୁ ଆ ବଚନ୍ ବୁଝ୍ରାଗେ ଲାଗାନ୍ ଢେର୍ ବୁଦ୍ଧି ଚିଚ୍ଚାସ୍। 6ଆରୁ ଏମ୍ ନିମାନ୍ ଖ୍ରୀସ୍ତ୍କି ବାରେନୁ ଏକା ସାକ୍ଷୀ ଚିଚ୍କାମ୍ ଆଦ୍ ସତ୍ତୁ ବୁଲି ନିହ୍ମା ମାଝାନୁ ପାକ୍କା ମାନ୍ଚାକେରା। 7ହୁଦ୍ଘିଲାଗାନ୍ ନିହ୍ମାସାନ୍ ପାର୍ମେଶ୍ୱାର୍ସ୍କି ଆତ୍ମାଘି ଚିଚ୍ଚକା ଜାମା ବାର୍ଦାନ୍ ରାଇ ଆରୁ ନିମ୍ ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍କି ଆରୁଅହନ୍ ପ୍ରକଟ୍ ମାନ୍ନାଘି ପାବୁ ଏର୍ତେ ରାଦାର୍। 8ପାର୍ମେଶ୍ୱାର୍ସ୍ ନିମାନ୍ ଆଖ୍ରୀତକ୍ ଯୀଶୁ ଖ୍ରୀସ୍ତ୍କି ମିଆଁ ବିଶ୍ୱାସ୍ କାମ୍ନାନୁ ମଜ୍ବୁତ୍ହି ଉଇୟସ୍, ହୁଦ୍ଘିଲାଗାନ୍ ନିମ୍ ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍ ନ୍ୟାୟ କାମ୍ନାଘି ଉଲ୍ଲାନୁ ପାର୍ମେଶ୍ୱାର୍ସ୍କି ନଜର୍ନୁ ନିମାନ୍ ନିର୍ଦ୍ଦୋଷ୍ ଠାହ୍ରସ୍। 9ଏନ୍ଦେର୍ଗେକା ଆସ୍ ବିଶ୍ୱାସ୍ କାମ୍ନାଘି ଲାଇଗ୍ ରାଦାସ୍, ଆରୁ ଆସ୍ ତାଙ୍ଘା ହାଦ୍ଦୁ ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍କି ଭାଗିଦାର୍ ମାନାଗେ ମେହ୍କାଦାସ୍।
କୁରିନ୍ଥୀ ତା ଖ୍ରୀସ୍ତ୍ ମଣ୍ତ୍ଲୀଘି ଭାଗ୍-ଭାଗ୍
10ହେ ଭାଇ ଆରୁ ବୁହୁଣୀ ଜାମାରୋ, ଏନ୍ ନିହ୍ମାସ୍ତି ନାହ୍ମାଏ ପ୍ରାଭୁସ୍ ଯୀଶୁ ଖ୍ରୀସ୍ତ୍ ଏକାସ୍ କା ଆସ୍କି ନାମେଘି ଦ୍ୱାର୍ନୁ ବିନ୍ତି କାମ୍ଦାନ୍ କା ନିମ୍ ଜାମାର୍ ଅଣ୍ଟାଇନ୍ କାତ୍ଥା ତେଙ୍ଗା, ଆରୁ ନିହ୍ମା ଭିତ୍ରେ ଭାଗ୍-ଭାଗ୍ ମା ମାନ୍ନାଦ୍, ଲେକିନ୍ ଅଣ୍ଟାଇନ୍ ସୋଚ୍ ଆରୁ ଅଣ୍ଟାଇନ୍ ମାନିକିରି ରା। 11ଏନ୍ଦେର୍ଗେକା ହେ ଏଙ୍ଘାଏ ଭାଇ ଆରୁ ବୁହୁଣୀ ଜାମାରୋ, ଖଲୋଏଘି ପରିବାର୍ତା ଆଲାର୍ ଏଙ୍ଗାନ୍ ନିହ୍ମା ବାରେନୁ ତେଙ୍କାନାଏ କା ନିହ୍ମା ମାଝାନୁ ଭାଗ୍-ଭାଗ୍ ମାନ୍ଚାକେର୍କିଚି। 12ଏଙ୍ଘା ତେଙ୍ଗ୍ନାଘି ମତ୍ଲବ୍ ଇଦ୍ କା, ନିହ୍ମାସ୍ତି ନେଦ୍ତା ନିଜ୍କେନିଜ୍ବନ୍ ପାଉଲୁସ୍କି, ନେଦ୍ତା ଆପଲ୍ଲସ୍କି, ନେଦ୍ତା ପାତ୍ରାସ୍କି, ଆରୁ ନେଦ୍ତା ଖ୍ରୀସ୍ତ୍କି ବୁଲି ତେଙ୍ଗ୍ର୍ନାଏ। 13ହାଲେ ଖ୍ରୀସ୍ତ୍ ଭାଗ୍-ଭାଗ୍ ମାନ୍ଚାସ୍ କେରାସ୍ କାଁଏ? ମାଲ୍ଲା! ନିହ୍ମା ଲାଗାନ୍ ପାଉଲୁସ୍ କ୍ରୁଶ୍ନୁ କେଚ୍ଚାସ୍କେରାସ୍ କାଁଏ? ମାଲ୍ଲା! ନିମ୍ ପାଉଲୁସ୍କି ନାମେନୁ ଆସ୍ନାନ୍ ଅଚ୍କାଚ୍କାର୍ କାଁଏ? ମାଲ୍ଲା! 14ଏନ୍ ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିଆଲ୍ଦାନ୍ କା, ନିହ୍ମା ଭିତର୍ତି ଏନ୍ ଭାଇ କ୍ରିସ୍ପୁସ୍ ଆରୁ ଭାଇ ଗାୟୁସ୍ସିନ୍ ଆମ୍ବିକିରି ଆରୁ ନେକାଗେହି ଆସ୍ନାନ୍ ମାଲ୍ଲା ଚିଉନ୍। 15ହୁଦ୍ଘିଲାଗାନ୍ ନେଦ୍ହି ଏନ୍ନେ ତେଙ୍ଗା ପଲ୍ଲନାଇନ୍ କା ନିମାରିନ୍ ଏଙ୍ଘା ନାମେତି ଆସ୍ନାନ୍ ଚିଆ କେର୍କିଚି। 16ଆରୁ ଏନ୍ ଭାଇ ସ୍ତିଫାନ୍ସ୍କି ପରିବାର୍ତାରିନ୍ହି ଆସ୍ନାନ୍ ଚିଚ୍କାଦାନ୍; ଏଙ୍ଗା ମନେ ମାଲ୍ଲାଦିନ୍ କା ଇବ୍ଡ଼ାରିନ୍ ଆମ୍ବିକିରି ଏନ୍ ଆରୁ ନେକିନ୍ଗେ ଆସ୍ନାନ୍ ଚିଚ୍କାଦାନ୍। 17ଏନ୍ଦେର୍ଗେକା ଖ୍ରୀସ୍ତ୍ ଏଙ୍ଗାନ୍ ଆସ୍ନାନ୍ ଚିୟାଗେ ମାଲ୍ଲା ତାଇୟୁସ୍, ବରନ୍ ସୁସାମାଚାର୍ ଶୁଣାବାଗେ ତାଏକାଦାସ୍, ଆରୁ ଏନ୍ ସୁସାମାଚାର୍ ଶୁଣାବାନା ବାକେନ୍ ଆଲାର୍ଘି ବାଢ୍ର୍କା ଚାଢ୍ର୍କା ଲେଖା ମା ତେଙ୍ଗ୍ଦାନ୍, ଏନ୍ ଏନ୍ନେ କାମନ୍ ତା ଖ୍ରୀସ୍ତ୍, କ୍ରୁଶ୍ଘି ମିଆଁ ଖିନା ସତ୍ତୁ କାତ୍ଥା ଆଲାର୍ଘି ମନ୍ନୁ ବେକାର୍ ମାନଦ୍କଦ୍।
ଖ୍ରୀସ୍ତ୍ ପାର୍ମେଶ୍ୱାର୍ସ୍କି ଶକ୍ତିସ୍ ଆରୁ ବୁଦ୍ଧିସ୍
18କ୍ରୁଶ୍ନୁ ଖ୍ରୀସ୍ତ୍କି ଖିନା ସତ୍ତୁ କାତ୍ଥାଦ୍, ନାଶ୍ତାରା କାନା ଆଲାର୍ ମୁରୁଖ୍ର୍ଘି କାତ୍ଥାଦ୍ବୁଲି ବୁଝ୍ର୍ନାଏ, ଲେକିନ୍ ନାହ୍ମା ମୁକ୍ତି ହାଖ୍ଖୁ ଆଲାର୍ଗେ ଆଦ୍ ପାର୍ମେଶ୍ୱାର୍ସ୍କି ଶକ୍ତିଦ୍। 19ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ଏନ୍ ବୁଦ୍ଧିୟାର୍ଘି ବୁଦ୍ଧିବନ୍ ନାଶ୍ କାମନ୍ଚନ୍ ଆରୁ ହୁସିୟାରି ଆଲାର୍ଘି ହୁସିୟାର୍ବନ୍ ବେକାର୍ କାମନ୍ ଚିଅନ୍।” 20ଏକାସାନ୍ ବୁଦ୍ଧିମାନ୍ ଜାମାର୍ ରାନାଏ? ଏକାସାନ୍ ୟାହୁଦୀ ଧରମ୍ଘି ପଣ୍ତିତ୍ଜାମାର୍ ରାନାଏ? ଆରୁ ଏକାସାନ୍ ଇ ଦୁନିଆଁନ୍ତା କାଁଟ୍ଛାଁଟ୍ କାମ୍ନା ଆଲାର୍ ରାନାଏ? ଏନ୍ଦେର୍ ପାର୍ମେଶ୍ୱାର୍ସ୍ ଇ ଦୁନିଆଁନ୍ତା ବୁଦ୍ଧିବନ୍ ମୁରୁଖ୍ବୁଲି ମାଲ୍ଲା ଠାହ୍ରୁସ୍? 21ଏନ୍ଦେର୍ଗେକା ଯେତ୍କବାକେନ୍ ପାର୍ମେଶ୍ୱାର୍ସ୍କି ବୁଦ୍ଧିଘି ଲେଖା ଦୁନିଆଁଦ୍ ବୁଦ୍ଧିତି ପାର୍ମେଶ୍ୱାର୍ସିନ୍ ବାଲ୍ଲିୟାଦିନ୍ ତା ପାର୍ମେଶ୍ୱାର୍ସ୍କେ ଇଦ୍ ବାନେ ଲାଗ୍ଗିୟା, କା ଏକା ଆଲାର୍ ସୁସାମାଚାର୍ ଏକାନ୍ ଆବ୍ଡ଼ାର୍ ମୁରୁଖ୍ ସୋଚ୍ନାଏ ଆରୁ ଆଦ୍ଘି ମିଆଁ ବିଶ୍ୱାସ୍ କାମ୍ନାଏ ଆବ୍ଡ଼ାରିନ୍ ବାଛାବସ୍। 22ୟାହୁଦୀର୍ ତା ଅଦ୍ଭୁତ୍ ନାଲ୍ଖୁ ବେଦ୍ଦ୍ନାଏ, ଆରୁ ବିନାୟାହୁଦୀର୍ ତା ବୁଦ୍ଧି ବେଦ୍ଦ୍ନାଏ। 23ଲେକିନ୍ ଏମ୍ତା କ୍ରୁଶ୍ନୁ ଠୋକ୍ଚ୍କା ଖ୍ରୀସ୍ତ୍କି ବାରେ ଶୁଣାବାଦାମ୍, ଏକାଦ୍ କା ୟାହୁଦୀର୍ଗେ ଠୋକର୍ଘି କାରଣ୍ଦ୍, ଆରୁ ବିନାୟାହୁଦୀ ଆଲାର୍ଘି ଚାହାନୁ ଇଦ୍ ମୁରୁଖ୍ କାତ୍ଥାଦ୍ବୁଲି ତେଙ୍ଗ୍ର୍ନାଏ। 24ଲେକିନ୍ ୟାହୁଦୀର୍ ଚାହେ ବିନାୟାହୁଦୀର୍, ଏକାରିନ୍ ପାର୍ମେଶ୍ୱାର୍ସ୍ ମେଁହ୍କାଦାସ୍, ଆବ୍ଡ଼ାର୍ଘି ଲାଗାନ୍ ଖ୍ରୀସ୍ତ୍ ପାର୍ମେଶ୍ୱାର୍ସ୍କି ଶକ୍ତିସ୍ ଆରୁ ପାର୍ମେଶ୍ୱାର୍ସ୍କି ବୁଦ୍ଧିସ୍। 25ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍କି ମୁରୁଖ୍ଦ୍, ଆଲାର୍ଘି ବୁଦ୍ଧିସ୍ତି ବୁଦ୍ଧିମାନ୍ ରାଇ; ଆରୁ ପାର୍ମେଶ୍ୱାର୍ସ୍କି କମ୍ଜୋର୍ଦ୍ ଆଲାର୍ଘି ତାକତ୍ତିହି ଢେର୍ ତାକତ୍ବାର୍ ରାଇଦ୍।
26ହେ ଭାଇ ଆରୁ ବୁହୁଣୀ ଜାମାରୋ, ଯେତ୍କବାକେନ୍ ନିମାନ୍ ପାର୍ମେଶ୍ୱାର୍ସ୍ ମେହ୍ଁକାଚାସ୍ ଆଦ୍ଘି ବାରେନୁ ସୋଚା, କା ଦୁନିଆଁଘି ନଜର୍ନୁ ବାଗ୍ଗେ ବୁଦ୍ଧିମାନ୍, ବାଗ୍ଗେ ତାକତ୍ବାର୍, ଆରୁ ସମାଜ୍ନୁ ଉଚ୍ଚା ପଦ୍ବୀ ଏଦ୍ର୍ନାରିନ୍ ମାଲ୍ଲା ମେହାଁକୁ। 27ଲେକିନ୍ ପାର୍ମେଶ୍ୱାର୍ସ୍ ବୁଦ୍ଧିୟାର୍ ଆଲାରିନ୍ ଲାଜ୍ଜେ ମହଁତାଗେ ଦୁନିଆଁନ୍ତା ନଜର୍ନୁ ମୁରୁଖ୍ର୍ରିନ୍ ଚାଜ୍ଜିୟାସ୍, ଆରୁ ପାର୍ମେଶ୍ୱାର୍ସ୍ ତାକତ୍ ବାଲାରିନ୍ ଲାଜ୍ଜେ ମହଁତାଗେ ଦୁନିଆଁନ୍ତା ନଜର୍ନୁ କମ୍ଜୋର୍ ଆଲାରିନ୍ ଚାଜ୍ଜିୟାସ୍। 28ପାର୍ମେଶ୍ୱାର୍ସ୍ ଇ ଦୁନିଆଁନୁ ନାମେଗାର୍ମେ ଆଲାର୍ଘି ବଡ଼୍ପଣି ନାଶ୍ କାମ୍ନାଘି ଲାଗାନ୍ ଏନ୍ନେ ଆଲାରିନ୍ ଚାଜ୍ଜିୟାସ୍ ଏକାରିନ୍ କା ଦୁନିଆଁଘି ନଜର୍ନୁ ହାଁଣ୍ନାଏ ଆରୁ ଛୋଟେ ବୁଝ୍ର୍ନାଏ। 29ଏନ୍ଦେର୍ଗେକା ନେଦ୍ହି ପାର୍ମେଶ୍ୱାର୍ସ୍କି ଆଘ୍ଲି ବଡ଼୍ପଣି ମା ଏଦ୍ରର୍। 30ଆ ପାର୍ମେଶ୍ୱାର୍ସ୍କି ବାର୍ଦାନ୍ତି ନିମ୍ ଯୀଶୁ ଖ୍ରୀସ୍ତ୍କି ଶରୀର୍ ମାନ୍ଚ୍କାର୍ କେର୍କାଦାର୍ ଆ ଯୀଶୁ ଖ୍ରୀସ୍ତ୍କି ଦ୍ୱାର୍ନୁ ନିମ୍ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ଠାହ୍ରାରାଚ୍କାଦାର୍। ତାକା ନିମ୍ ପାର୍ମେଶ୍ୱାର୍ସ୍କେ ସୋଁପ୍ରା ଅଙ୍ଗର୍ ଆରୁ ନିମାଗେ ପାପ୍ତି ମୁକ୍ତି ହାଖ୍ରା ଅଙ୍ଗ। 31ଏସ୍କେ କା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ଯଦି ନେକିନ୍ଗେ ଏନ୍ଦ୍ରିନ୍ ବଡ଼୍ପଣି ଏଦ୍ର୍ନା ରାଇ ତା ପ୍ରାଭୁସ୍ ଆସ୍କି ଲାଗାନ୍ ଏନ୍ଦେର୍ କାମ୍ଚ୍କାଦାସ୍ ଆଦ୍ଘି ବାରେନୁ ବଡ଼୍ପଣି କାମସ୍।”
2କ୍ରୁଶ୍ନୁ ଠୋକ୍ଚ୍କା ଖ୍ରୀସ୍ତ୍କି ବାରେ ଖବର୍
1ହେ ଭାଇ ଆରୁ ବୁହୁଣୀ ଜାମାରୋ, ଯେତ୍କବାକେନ୍ ଏନ୍ ନିହ୍ମାସାନ୍ ବାରୋନ୍, ତା ପାର୍ମେଶ୍ୱାର୍ସ୍କି ଆକ୍କୁନ୍ତକ୍ ନୁଡ୍କା ସତ୍ତୁ କାତ୍ଥାନ୍ ହୁସିୟାରିତି ତେଙ୍ଗିକିରି ମାଲ୍ଲା ବାରୁନ୍। 2ଏନ୍ ଏନ୍ନେ ସୋଚ୍କାନ୍ କା ଯେତ୍କବାକେନ୍ ଏନ୍ ନିହ୍ମା ମାଝାନୁ ରାଦାନ୍ ହତ୍କବାକେନ୍ ଏନ୍ ଯୀଶୁ ଖ୍ରୀସ୍ତ୍, ଆରୁ କ୍ରୁଶ୍ନୁ ମାନ୍ଚ୍କା ଆସ୍କି ମରନ୍ବନ୍ ଆମ୍ବିକିରି ଏନ୍ଦ୍ରିନ୍ହି ଆରୁ କାତ୍ଥାଘି ପ୍ରଚାର୍ ମା କାମନ୍। 3ସତ୍ତୁନିନ୍ ଏନ୍ ନିହ୍ମା ମାଝାନୁ ନରମ୍ଭାବ୍ତି ରାଚ୍କାନ୍ ଆରୁ ଏନ୍ କମ୍ଜୋର୍ ଆରୁ ଡାର୍ହ୍ୱା ରାଚ୍କାନ୍। 4ନିହ୍ମା ବିଶ୍ୱାସ୍ଦ୍ ଆଲାର୍ଘି ବୁଦ୍ଧିନୁ ମାଲ୍ଲା, ଲେକିନ୍ ପାର୍ମେଶ୍ୱାର୍ସ୍କି ଶକ୍ତିଘି ମିଆଁ ଭାର୍ଷା କାମ୍ନା କାତ୍ଥାଦ୍। 5ହୁଦ୍ଘିଲାଗାନ୍ ଏନ୍ ବଚନ୍ ଶୁଣାବାନା ବାକେନ୍ ଆଲାର୍ଘି ବୁଦ୍ଧି ଲେଖା ନିଜର୍ତାରା କାମ୍ନାବାଲା କାତ୍ଥା ମାଲ୍ଲା ତେଙ୍ଗ୍ନା, ଲେକିନ୍ ପାବିତାର୍ ଆତ୍ମାଘି ଶକ୍ତିତି ତେଙ୍କାନ୍।
ପାର୍ମେଶ୍ୱାର୍ସ୍କି ବୁଦ୍ଧି
6ଖ୍ରୀସ୍ତ୍କି ମିଆଁ ବିଶ୍ୱାସ୍ କାମିକିରି ପୁରାପୁରୀ ଚାଲ୍ର୍ନା ବାଲାର୍ଘି ମାଝାନୁ ଏମ୍ ବୁଦ୍ଧିଘି କାତ୍ଥା ଶୁଣାବାଦାମ୍, ଇ ବୁଦ୍ଧି ଦୁନିଆଁଘି ବୁଦ୍ଧି ମାଲ୍ଲିଦ୍ ଆରୁ ଇ ଦୁନିଆଁନ୍ତା ରାଜୀ ଚାଲାବୁର୍ଘି ବୁଦ୍ଧିହି ମାଲ୍ଲିଦ୍ ଏକାଦ୍ କା ନାଶ୍ ମାନ୍ନାବାଲା ବୁଦ୍ଧିଦ୍। 7ଲେକିନ୍ ଏମ୍ ପାର୍ମେଶ୍ୱାର୍ସ୍କି ଆ ବୁଦ୍ଧିବନ୍ ତେଙ୍ଗ୍ଦାମ୍ ଏକାଦ୍ ନୁହୁର୍କାରାଚା ଆରୁ ଏକାନ୍ ପାର୍ମେଶ୍ୱାର୍ସ୍ ଦୁନିଆଁଘି ସୁରୁ ମାନ୍ନାଘି ଆଘ୍ଲିନ୍ତିନିନ୍ ନାହ୍ମା ବାଡ଼ାଇଘି ଲାଗାନ୍ ଠାହ୍ରାଚ୍କାଚାସ୍। 8ଲେକିନ୍ ଆ ଯୋଜ୍ନାବନ୍ ରାଜୀ ଚାଲାବୁର୍ ନେଦ୍ହି ବାଲ୍ନାଇନ୍, ଯଦି ଆବ୍ଡ଼ାର୍ ଆକ୍କାରର୍ନେ ତା, ବାଡ଼ାଇତି ନିନ୍ଦ୍କା ପ୍ରାଭୁସିନ୍ କ୍ରୁଶ୍ନୁ ମା ଠୋକ୍ଚ୍କାରର୍ନେ। 9ଲେକିନ୍ ଏସ୍କେ କା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ପାର୍ମେଶ୍ୱାର୍ସ୍ ତାଙ୍ଗାନ୍ ବାନେ ହାଖ୍ଖୁର୍ଘି ଲାଗାନ୍ ଏକାନ୍ ତିଆର୍ କାମ୍ଚ୍କାଦାସ୍ ଆବନ୍ ନେଦ୍ହି ଏକ୍ଲାହି ମାଲ୍ଲା ଏରୁର୍, ଏକ୍ଲାହି ମାଲ୍ଲା ମେନୁର୍ ଆରୁ ଆଲାର୍ଘି ଜିଆନୁ ଏକ୍ଲାହି ମାଲ୍ଲା ସିର୍ଜାରୁ।” 10ପାର୍ମେଶ୍ୱାର୍ସ୍ ତାଙ୍ଘା ଆତ୍ମାଘି ଦ୍ୱାର୍ନୁ ଆବ୍ଡ଼ା କାତ୍ଥାବନ୍ ନିହ୍ମା ଲାଗାନ୍ ପ୍ରକଟ୍ କାମ୍ଚ୍କାଦାସ୍, ଏନ୍ଦେର୍ଗେକା ଆତ୍ମାଦ୍ ଜାମା କାତ୍ଥାବନ୍ ବେଦ୍ଦିଦ୍ ଅଥ୍ରିଦ୍। ପାର୍ମେଶ୍ୱାର୍ସ୍କି ନୁହୁର୍କା ଉଲ୍ତା କାତ୍ଥାନ୍ହି ଯାଁଚ୍ କାମିଦ୍।
11ଅଣ୍ଟା ଆଲାସ୍କି ଜୀଆନ୍ତା କାତ୍ଥାନ୍ ଆସ୍କି ଜୀଆନୁ ରାନାବାଲା ଆତ୍ମାଦ୍ ଖାଲି ଆହିଦ୍, ଲେକିନ୍ ଦୁସ୍ରା ଆଲାର୍ ଆରୁ ନେଦ୍ହି ବାଲ୍ନାଇନ୍। ହନ୍ନେନ୍ହି ପାର୍ମେଶ୍ୱାର୍ସ୍କି କାତ୍ଥାନ୍ ପାର୍ମେଶ୍ୱାର୍ସ୍କି ପାବିତାର୍ ଆତ୍ମାଦିନ୍ ଆହିଦ୍, ଆରୁ ନେଦ୍ହି ବାଲ୍ନାଇନ୍। 12ଲେକିନ୍ ନାମ୍ ଦୁନିଆଁଘି ଆତ୍ମା ମାଲ୍ଲା ହାଖ୍ଖୁତ୍, ବରନ୍ ପାର୍ମେଶ୍ୱାର୍ସ୍କି ଚିଚ୍ଚକା ପାବିତାର୍ ଆତ୍ମାନ୍ ହାକ୍କାଦାତ୍, ତାକା ନାମ୍ ଆ ସତ୍ତୁ କାତ୍ଥାବନ୍ ଆହାଅଙ୍ଗତ୍ ଏକାନ୍ ପାର୍ମେଶ୍ୱାର୍ସ୍ ନାମାଗେ ହନ୍ନେନ୍ ଚିଚ୍ଚକାଦାସ୍। 13ଇବ୍ଡ଼ା ସତ୍ତୁ କାତ୍ଥାଗୁଠିନ୍ ଏମ୍ ଆଲାର୍ଘି ବୁଦ୍ଧିତି ଶିଖାବାଚ୍କା କାତ୍ଥାଗୁଠିତି ମାଲ୍ଲା, ଲେକିନ୍ ପାର୍ମେଶ୍ୱାର୍ସ୍କି ପାବିତାର୍ ଆତ୍ମାତି ଶିଖାବାଚ୍କା କାତ୍ଥାତି ତେଙ୍ଗ୍ଦାମ୍, ଆରୁ ପାର୍ମେଶ୍ୱାର୍ସ୍କି ସତ୍ତୁ କାତ୍ଥାବନ୍ ଏମ୍ ପାବିତାର୍ ଆତ୍ମାଘି ମଦେତ୍ତି ଆବ୍ଡ଼ାରିନ୍ ଶିଖାବାଦାମ୍ ଏକାର୍ଘିନୁ ପାବିତାର୍ ଆତ୍ମା ରାଇ। 14ଲେକିନ୍ ଏକା ଆଲାସ୍କେ ପାବିତାର୍ ଆତ୍ମା ମାଲ୍ଲା ହାଖ୍ରୁ ଆରୁ ନେଖାସାନ୍ ପାବିତାର୍ ଆତ୍ମା ମାଲ୍ଲାଦିନ୍ ଆସ୍କେ ପାବିତାର୍ ଆତ୍ମାଘି ସତ୍ତୁ କାତ୍ଥାନ୍ ବୁଝ୍ରା ପଲ୍ଲଦାସ୍। ଆବ୍ଡ଼ାର୍ଗେ ଆ ସତ୍ତୁ କାତ୍ଥାଦ୍ ମୁରୁଖ୍ ଲାଗ୍ଗ ଏନ୍ଦେର୍ଗେକା ପାବିତାର୍ ଆତ୍ମାଘି ସତ୍ତୁ କାତ୍ଥା ପାବିତାର୍ ଆତ୍ମାଘି ମଦେତ୍ତି ଯାଁଚରା ଅଙ୍ଗ୍ଦାସ୍। 15ନେଖାସାନ୍ ପାବିତାର୍ ଆତ୍ମା ରାଇ ଆସ୍ ଜାମାକିଛିନ୍ ଯାଁଚରାଦାସ୍, ଲେକିନ୍ ଆସ୍ ନେଖ୍ରିନ୍ସ୍ତିହି ମା ଯାଁଚର୍ଦାସ୍। 16ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ପ୍ରାଭୁସ୍କି ମନ୍ବନ୍ ଏକାସ୍ ଆହ୍ଦାସ୍? ଆରୁ ଆସିନ୍ ଏକାସ୍ ଶିଖାବାଦାସ୍?” ଲେକିନ୍ ନାହ୍ମାଏ ସୋଚ୍ ତା ଖ୍ରୀସ୍ତ୍କି ସୋଚ୍ ଲେଖା ରାଇ।
3ପାର୍ମେଶ୍ୱାର୍ସ୍କି ସେବକ୍
1ହେ ଭାଇ ଆରୁ ବୁହୁଣୀ ଜାମାରୋ, ଏନ୍ ନିହ୍ମାଗାନେ ହୁଦ୍ଘି ଲେଖା ସତ୍ତୁ କାତ୍ଥା କାଚ୍ନେଖ୍ରା ପଲ୍ଲକାନିନ୍, ଏସ୍କେ କା ପାବିତାର୍ ଆଲାର୍ ଗାନେ କାମାକାଇ, ଏଙ୍ଗା ନିହ୍ମାଗାନେ ଆଦ୍ଘି ଲେଖା କାତ୍ଥା କାମାଖାତ୍ରା ଏସ୍କେ କା ଦୁନିଆଁନ୍ତା ଆଲାର୍ ଗାନେ କାମାକାଇ, ଚାହେ ଆବ୍ଡ଼ାର୍ ଗାନେ ଏକାର୍ ଆକ୍କୁନ୍ ଖ୍ରୀସ୍ତ୍କିନୁ ହାଦ୍ଦୁ ରାନାଏ। 2ଅଣ୍ଟା ଛୋଟେ ହାଦ୍ଦୁସ୍କେ ଗୁରସ୍ ଖାଲି ହାପ୍ପତା ଖାତ୍ରି, ନାନ୍ନା ଅନ୍ନାମହ୍ନା ମା ଚିନାଏ ହନ୍ନେନ୍ ହୁବାକେନ୍ ଏନ୍ ନିମାଗେ ପାର୍ମେଶ୍ୱାର୍ସ୍କି ବଚନ୍ନ୍ତି ସହଜ୍ ସତ୍ତୁ କାତ୍ଥାବନ୍ ଶିଖାବାଚ୍କାବନ୍। ଆରୁ ବିଶ୍ୱାସ୍ନୁ ମଜ୍ବୁତ୍ ରାନାବାଲା ବିଶ୍ୱାସୀରିନ୍ ଶିଖାବାନା ଲେଖା ନିମାନ୍ ମାଲ୍ଲା ଶିଖାବାନା, ଆନ୍ନେ ଶିଖାବାନା ଆହାର୍ଘି ଲେଖା। ଏନ୍ଦେର୍ଗେକା ହୁବାକେନ୍ ନିମ୍ ହନ୍ନେ ଶିଖାବାଚ୍କାବନ୍ ବୁଝ୍ରାଗେ ତିୟାର୍ ମାଲ୍ଲାରୁର୍। ଲେକିନ୍ ସୋଚ୍ନାଘି କାତ୍ଥାଦ୍ ଇଦ୍ କା ନିମ୍ ଆକ୍କୁନ୍ତକ୍ହି ବୁଝ୍ରାଗେ ତିୟାର୍ ମାଲ୍କାରିନ୍। 3ହୁଦ୍ଘିଲାଗାନ୍ ନିମ୍ ଆକ୍କୁନ୍ତକ୍ହି ଦୁନିଆଁନ୍ତା ଆଲାର୍ ଲେଖା ରାଦାର୍, ଏନ୍ଦେର୍ଗେକା ନିହ୍ମା ଭିତ୍ରେ ହିସ୍ଙ୍ଗା ଆରୁ ଝାଗ୍ଡ଼ା ମାନିଦ୍; ତା ନିମ୍ ଦୁନିଆଁନ୍ତା ଲେଖା ମାଲ୍ଦାର୍ କାଁଏ? ଆରୁ ନିମ୍ ଏନ୍ଦେର୍ ଦୁନିଆଁନ୍ତା ଆଲାର୍ ଲେଖା ବେଭାର୍ ମା କାମ୍ଦାର୍ କାଁଏ? 4ହୁଦ୍ଘିଲାଗାନ୍ ଯେତ୍କବାକେନ୍ ନିହ୍ମାସ୍ତିନିନ୍ ଅଣ୍ଟାସ୍ ତେଙ୍ଗ୍ଦାସ୍ କା, “ଏନ୍ ପାଉଲୁସ୍କି ଚେଲାନ୍” ଆରୁ ଦୁସ୍ରାସ୍ ତେଙ୍ଗ୍ଦାସ୍ କା, “ଏନ୍ ଆପଲ୍ଲସ୍କି ଚେଲାନ୍” ତା ନିମ୍ ଦୁନିଆଁନ୍ତା ଆଲାର୍ ଲେଖା ବେଭାର୍ ମା କାମ୍ଦାର୍ କାଁଏ?
5ହାଲେ ତେଙ୍ଗା ଆପଲ୍ଲସ୍ ଏନ୍ଦେର୍ସ୍ ଆରୁ ପାଉଲୁସ୍ ଏନ୍ଦେର୍ସ୍? ଏମ୍ତା ଖାଲି ପାର୍ମେଶ୍ୱାର୍ସ୍କି ସେବକ୍ମ୍ ଆରୁ ଏକାସ୍କି ଦ୍ୱାର୍ତି ନିମ୍ ବିଶ୍ୱାସ୍ବନ୍ ଗ୍ରହନ୍ କାମ୍ଚ୍କାର୍। ଆରୁ ଏହ୍ମା ଭିତର୍ତି ଅର୍ତୁ-ଅର୍ତୁ ଖାଲି ଆ ନାଲ୍ଖୁନ୍ କାମ୍ଚ୍କାମ୍ ଏକାନ୍ ପ୍ରାଭୁସ୍ ଏମାଗେ ସୋଁପେଇଚ୍କାଚାସ୍। 6ଏନ୍ଦେର୍ଗେକା ଏନ୍ ଇଦ୍ନା ବାଲାସ୍ ଲେଖା ନିହ୍ମାସ୍ତି ସୁସାମାଚାର୍ଘି ନାଲ୍ଖୁନ୍ ସୁରୁ କାମ୍ଚ୍କାନ୍ ଆରୁ ଆପଲ୍ଲସ୍ ଆ ଇଦ୍କାବନ୍ ଆମ୍ମୁ ପାଟାବାନାସ୍ ଲେଖା, ଏନ୍ଦେର୍ଗେକା ଏଙ୍ଘା ନାଲ୍ଖୁନ୍ ଆସ୍ ଆଘ୍ଲି ହୁଇକିରି କେରାସ୍ ଆରୁ ନିମାରିନ୍ ଶିଖାବାଚାସ୍। ଲେକିନ୍ ମାନ୍ନୁନ୍ ପାର୍ତାନାବାଲା ଏମ୍ ମାଲ୍ଦାମ୍। ଇ ନାଲ୍ଖୁନ୍ ପାର୍ମେଶ୍ୱାର୍ସ୍ କାମ୍ଚାସ୍, ମତ୍ଲବ୍ ନିମାନ୍ ଆତ୍ମିକ୍ ଜୀବନ୍ନୁ ମଜ୍ବୁତ୍ କାମ୍ନାବାଲା ପାର୍ମେଶ୍ୱାର୍ସ୍। 7ହୁଦ୍ଘିଲାଗାନ୍ ଏକାସ୍ ଇଦ୍ଦାସ୍ ଆରୁ ଏକାସ୍ ଆମ୍ମୁ ପାଟାବାଚାସ୍ ଆସ୍ ଏନ୍ଦେର୍ହି ମାଲ୍ଦାସ୍, ଲେକିନ୍ ଏକାସ୍ ପାର୍ତାଚାସ୍ ମତ୍ଲବ୍ ପାର୍ମେଶ୍ୱାର୍ସ୍ହି ଜାମାକିଛିସ୍। 8ଇଦୁସ୍ ଆରୁ ଆମ୍ମୁ ପାଟାବୁସ୍ ଦୁହି ଲୋକ୍ ଅଣ୍ଟାର୍; ଲେକିନ୍ ଅର୍ତୁ-ଅର୍ତୁ ଆଲାର୍ ନିଜର୍ ମେହ୍ନତ୍ଘି ଲେଖା ନିଜର୍ ଭୁତ୍ତି ହାଖ୍ଖର୍। 9ଆପଲ୍ଲସ୍ ଆରୁ ଏନ୍ ମେଶ୍ରିକିରି ପାର୍ମେଶ୍ୱାର୍ସ୍କି ସେବା କାମ୍ଦାମ୍; ଆରୁ ନିମ୍ ପାର୍ମେଶ୍ୱାର୍ସ୍କି ହାଲ୍ଲୁର୍ ଏକାନ୍ ପାର୍ମେଶ୍ୱାର୍ସ୍ ବାନାବାଲ୍ଦାସ୍ ଆ ମନ୍ଦିର୍ ଲେଖା ରାଦାର୍।
10ଏସ୍କେ କା ଅଣ୍ଟା ବାନେ ରାଜ୍ମିସ୍ତ୍ରୀସ୍ ଆଡ଼୍ପା କାମ୍ନାଘି ଆଘ୍ଲି ନାହିଗାଡ୍ଡି ଆର୍ହ୍ଦାସ୍ ହନ୍ନେନ୍ ଏଙ୍ଗାଗେ ପାର୍ମେଶ୍ୱାର୍ସ୍କି ଚିଚ୍ଚକା କ୍ରିପାତି ଏନ୍ ପହ୍ଲେ ନିହ୍ମାସାନ୍ ସୁସାମାଚାର୍ ଶୁଣାବାଚ୍କାନ୍। ଏନ୍ଦେର୍ଗେକା ଦୁସ୍ରାସ୍ ଅଣ୍ଟା ଆଦ୍ଘି ମିଆଁ ଆଡ଼୍ପା କାମ୍ନା ଲେଖା, ଦୁସ୍ରାର୍ ବାରିକିରି ନିମାନ୍ ଆତ୍ମିକ୍ ସତ୍ତୁ କାତ୍ଥା ଶିଖାବାନାଏ। ଲେକିନ୍ ନାହି ମିଆଁ ଏସ୍କେ ଆଡ଼୍ପା କାମାଲ୍ଦାସ୍ ଆଦ୍ଘି ବାରେନୁ ହୁସିୟାର୍ ରାନା ଲେଖା, ଅର୍ତୁ ଅର୍ତୁର୍ ହୁସିୟାର୍ ରାନା କାତ୍ଥା କା ଆସ୍ ଏସ୍କେ ପାର୍ମେଶ୍ୱାର୍ସ୍କି ବଚନ୍ ଶିଖାବାଲ୍ଦାସ୍। 11ଏକା ନାହିଗାଡ୍ଡି ଆର୍ହ୍ଖା ରାଇ, ଆବନ୍ ଆମ୍ବିକିରି ଆନ୍ନୁ ଆରୁ ନାନ୍ନା ନାହିଗାଡ୍ଡି ଆର୍ହା ମା କାଇ ଆରୁ ଆ ନାହିଗାଡ୍ଡି ଯୀଶୁ ଖ୍ରୀସ୍ତ୍ସିନ୍। 12ଆରୁ ଯଦି ପାର୍ମେଶ୍ୱାର୍ସ୍କି ସେବକ୍ଜାମାର୍ ଏକାର୍ କା ପାର୍ମେଶ୍ୱାର୍ସ୍କି ଚିଚ୍କା ନାଲ୍ଖୁନ୍ ବାନେକିରି କାମ୍ନାଏ, ଆବ୍ଡ଼ାର୍ ଏନ୍ନେ ଆଡ଼୍ପା କାମୁର୍ ଲେଖା ଏକାର୍ କା ନାହିଗାଡ୍ଡିନୁ ସୋନା, ରୂପା, ମୁରୁକ୍ ଦାମ୍ଘି ଚାଁଚାଘି ଲେଖା ତିୟାର୍ କାମ୍ନାଏ। ଲେକିନ୍ ପାର୍ମେଶ୍ୱାର୍ସ୍କି ସେବକ୍ଜାମାର୍, ଏକାର୍ ପାର୍ମେଶ୍ୱାର୍ସ୍କି ଚିଚ୍କା ନାଲ୍ଖୁନ୍ ବାନେକିରି ମା କାମ୍ନାଏ, ତା ଆବ୍ଡ଼ାର୍ ଏନ୍ନେ ନାଲ୍ଖୁ କାମୁର୍ ମାନ୍ନାଏ, କା ନାହିଗାଡ୍ଡିନୁ ଖୁଟା, ଘାଁସି ଆରୁ ଭୁସୁ ହି ଚିଇକିରି ତିୟାର୍ କାମ୍ନାବାଲାର୍ ଲେଖା। 13ତା ଅର୍ତୁ ଅର୍ତୁର୍ଘି ନାଲ୍ଖୁନ୍ ଆଲାର୍ଘି ଆଘ୍ଲି ପ୍ରକଟ୍ କାମାକୋ। ପ୍ରାଭୁସ୍କି ଉଲ୍ଲା, ଏକାସ୍ ଚିଚ୍ଚୁଗାନେ ବାରସ୍, ଆବନ୍ ପ୍ରକଟ୍ କାମସ୍ଚସ୍ ଆରୁ ଆ ଚିଚ୍ଚୁଘି ଦ୍ୱାର୍ନୁ ଅର୍ତୁ ଅର୍ତୁର୍ଘି ନାଲ୍ଖୁବନ୍ ଯାଁଚରା କଦ୍ କା ଆଦ୍ ଏସ୍କେ ନାଲ୍ଖୁଦ୍। 14ଯଦି ଆ ନାହିଗାଡ୍ଡିନୁ ଏକ୍ରିନ୍ ଆଲାସ୍କି ତିୟାର୍ କାମ୍ଚ୍କା ନାଲ୍ଖୁଦ୍ ଟିକ୍ରଦ୍ ଆରୁ ରଦ୍ ତା ଆସ୍ ଜରୁର୍ ଆଦ୍ଘି ଫାଡ଼ୁବନ୍ ହାଖ୍ଖସ୍। 15ଆରୁ ଯଦି ନେଖିନ୍ ନାଲ୍ଖୁଦ୍ ଅଲୋକୋ; ତା ଆସ୍କେ ଫଲ୍ ମା ହାଖ୍ରୋ ହାଲେହି ଆସ୍ ବାଛ୍ରସ୍କସ୍, ଲେକିନ୍ ଏସ୍କେ କା ନେରିନ୍ ଚିଚ୍ଚୁବନ୍ ପାର୍ କାମିକିରି ବାଛ୍ର୍ନାଏ କାନାଏ ଆନ୍ନେନିନ୍ ଆସ୍ହି ବାଛ୍ରସ୍କସ୍।
16ଏନ୍ଦେର୍ ନିମ୍ ବାଲ୍ଦାରିନ୍ କା, ନିମ୍ ପାର୍ମେଶ୍ୱାର୍ସ୍କି ମନ୍ଦିର୍, ଆରୁ ପାର୍ମେଶ୍ୱାର୍ସ୍କି ଆତ୍ମାଦ୍ ନିହ୍ମାଏନୁ ରାଇଦ୍? 17ଯଦି ନେଦିନ୍ ପାର୍ମେଶ୍ୱାର୍ସ୍କି ମନ୍ଦିର୍ବନ୍ ନାଶ୍ କାମସ୍ତା, ପାର୍ମେଶ୍ୱାର୍ସ୍ ଆସିନ୍ ନାଶ୍ କାମଚସ୍, ଏନ୍ଦେର୍ଗେକା ପାର୍ମେଶ୍ୱାର୍ସ୍କି ମନ୍ଦିର୍ ପାବିତାର୍ ରାଇଦ୍, ଆରୁ ଆ ମନ୍ଦିର୍ ନିମିନ୍।
18ଆରୁ ନେଦିନ୍ ନିଜ୍କେନିଜ୍ବନ୍ ଧୋଖା ଆମା ଚିଆ। ଯଦି ନିହ୍ମାସ୍ତି ନେଦିନ୍ ନିଜ୍କେ ଇ ଦୁନିଆଁନ୍ତା ନଜର୍ନୁ ବୁଦ୍ଧିୟାର୍ ବୁଲି ସୋଚ୍ଦାସ୍, ତା ଆସ୍ ସତ୍ତୁନିନ୍ ବୁଦ୍ଧିୟାର୍ ମାନାଗେ ନିଜ୍କେବନ୍ ନିର୍ବୁଦ୍ଧିଆନିନ୍ ମାନିକିରି ରାନା କାତ୍ଥା। 19ଏନ୍ଦେର୍ଗେକା ଇ ଦୁନିଆଁନ୍ତା ବୁଦ୍ଧିଦ୍ ପାର୍ମେଶ୍ୱାର୍ସ୍କି ନଜର୍ନୁ ନିର୍ବୁଦ୍ଧିଆ, ଏସ୍କେ କା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ଆସ୍ ବୁଦ୍ଧିୟାର୍ ଆଲାରିନ୍ ତାହ୍ମା ଚାଲାକ୍ତିନିନ୍ ଫାସାବସ୍।” 20ପାର୍ମେଶ୍ୱାର୍ସ୍କି ବଚନ୍ନୁ ଆରୁହି ଲେଖ୍ଚ୍କା ରାଇ, “ପ୍ରାଭୁସ୍ ଆହ୍ଦାସ୍ କା ବୁଦ୍ଧିୟାର୍ ଜାମାର୍ଘି ସୋଚ୍ନାଦ୍ ବେକାର୍ଦ୍।” 21ହୁଦ୍ଘିଲାଗାନ୍ ଏକ୍ରିନ୍ହି ଆଲାର୍ଘି ମିଆଁ ବଡ଼୍ପଣି ଆମା ଏଦ୍ରା, ଏନ୍ଦେର୍ଗେକା ଜାମାଦ୍ ତା ନିହ୍ମାଏଦିନ୍। 22ହାଲେ ଆସ୍ ପାଉଲୁସ୍ ରାଦାସ୍, ଚାହେ ଆପଲ୍ଲସ୍, ପାତ୍ରାସ୍, ଦୁନିଆଁ, ଜୀବନ୍, ଖିନା, ଇନ୍ନା, ଚାହେ ବାର୍ନାବାଲା ନେଲା, ଜାମାକିଛିନ୍ ନିଙ୍ଘାଏଦିନ୍। 23ଆରୁ ନିମ୍ ଖ୍ରୀସ୍ତ୍କିର୍ ଆରୁ ଖ୍ରୀସ୍ତ୍ ପାର୍ମେଶ୍ୱାର୍ସ୍କି।
4ଖ୍ରୀସ୍ତ୍କି ସେବକ୍
1ଆଲାର୍ ଏମାନ୍ ଖ୍ରୀସ୍ତ୍କି ସେବକ୍ ଆରୁ ପାର୍ମେଶ୍ୱାର୍ସ୍କି ସତ୍ତୁ କାତ୍ଥାବନ୍ ତେଙ୍ଗ୍ନାବାଲାବୁଲି ସୋଚ୍ନାର୍ ଆଘ୍ଲି ଉଲ୍ଲାନୁ ପାର୍ମେଶ୍ୱାର୍ସ୍କି ଇ ସତ୍ତୁ କାତ୍ଥାନ୍ ନେର୍ହି ବାଲ୍କାଚାର୍। 2ଆରୁ ପାର୍ମେଶ୍ୱାର୍ସ୍କି ସତ୍ତୁ କାତ୍ଥାନ୍ ତେଙ୍ଗ୍ନାଘି ଲାଗାନ୍ ଏକାର୍ଘି ହେଖ୍ଖାନୁ ସୋଁପାକେର୍କିଚି ଆବ୍ଡ଼ାର୍ ନିଜର୍ସାନ୍ ଚିଚ୍କା ନାଲ୍ଖୁନୁ ବିଶ୍ୱାସ୍ ଲାଇଗ୍ ରାନା କାତ୍ଥା। 3ନିମ୍ ଏଙ୍ଘା ନ୍ୟାୟ କାମା ଚାହେ ଆଲାର୍ଘି ଏକ୍ରିନ୍ କୋଟ୍କାଚେରୀଦ୍ ଏଙ୍ଗାନ୍ ନ୍ୟାୟ କାମଦ୍, ଆଦ୍ଘି ବାରେ ଏଙ୍ଘା ସୋଚ୍ନୁ ଆଦ୍ ଅଣ୍ଟା ଛୋଟେ କାତ୍ଥାଦ୍। ଏନ୍ତା ନିଜେ ଏଙ୍ଘା ନ୍ୟାୟ ମା କାମ୍ଦାନ୍। 4ଏନ୍ଦେର୍ଗେକା ଏନ୍ ନିଜ୍କେନୁ ଏନ୍ଦେର୍ହି ଦୋଷ୍ ମା ହାଖ୍ଖଦାନ୍, ଆରୁ ଇଦ୍ଘି ମତ୍ଲବ୍ ଇଦ୍ ମାଲ୍ଲା କା ଏନ୍ ବିନା ଦୋଷୀନ୍। ଲେକିନ୍ ପ୍ରାଭୁସ୍ହି ଏଙ୍ଘାଏ ନ୍ୟାୟ କାମ୍ନାବାଲାସ୍। 5ହୁଦ୍ଘିଲାଗାନ୍ ଯେତ୍କବାକେନ୍ତକ୍ ପ୍ରାଭୁସ୍ ମା ବାରସ୍, ହୁବାକେନ୍ତକ୍ ଏନ୍ଦ୍ରିନ୍ହି କାତ୍ଥାନୁ ନ୍ୟାୟ ଆମା କାମା। ଯେତ୍କବାକେନ୍ ପ୍ରାଭୁସ୍ ବାରସ୍ ଆସିନ୍ ଉହାନ୍ତା ନୁହୁର୍କା କାତ୍ଥାଗୁଠିନ୍ ବିଲ୍ଲୀନୁ ଏଦୋସ୍, ଆରୁ ମନ୍ତା ସୋଚ୍ନାଗୁଠିନ୍ ପ୍ରକଟ୍ କାମସ୍, ହତ୍କବାକେନ୍ ପାର୍ମେଶ୍ୱାର୍ସ୍କି ତାର୍ତି ଅର୍ତୁ ଅର୍ତୁର୍ଗେ ମାଇନ୍ ହାଖ୍ରୋଦ୍।
6ହେ ଭାଇ ଆରୁ ବୁହୁଣୀ ଜାମାରୋ, ଏନ୍ ନିମାଗେ ଇବ୍ଡ଼ା ଜାମା କାତ୍ଥାନ୍ ଶିଖ୍ରର୍ ବୁଲି ଏଙ୍ଘାଏ ଆରୁ ଆପଲ୍ଲସ୍କି ନମୁନା ଚିଚ୍ଚକାନ୍, ଏନ୍ଦେର୍ଗେକା ଏକାଦ୍ ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ ଆବନ୍ ମାନା। ଆରୁ ନିହ୍ମାସ୍ତି ନେଦ୍ହି ଅଣ୍ଟାସ୍କି ବାରେ ବଡ଼୍ପଣି କାତ୍ଥା ତେଙ୍ଗିକିରି ଆରୁ, ଆରୁ ଅଣ୍ଟାସିନ୍ ଆମା ହାଁଣା। 7ଏନ୍ଦେର୍ଗେକା ନିଙ୍ଗାନ୍ ଆରୁ ଦୁସ୍ରାର୍ଘିନୁ ନେଦ୍ ତୁଲ୍ନା କାମ୍ନାଏ? ଆରୁ ନିଙ୍ଘାସାନ୍ ଏନ୍ଦେର୍ ରାଇ ଏକାନ୍ ନିନ୍ ମାଲ୍ଲା ହାଖ୍ଖୁୟ; ଆରୁ ଯେତ୍କ ନିନ୍ ହାକ୍କାଦାଏ, ତା ଏନ୍ନେ ବଡ଼୍ପଣି ଏନ୍ଦେର୍ଗେ ଏଦ୍ର୍ନାଏ ଏସ୍କେ କା ମାଲ୍ଲା ହାଖ୍ଖୁୟ?
8ଓହୋ, ନିମ୍ ସୋଚ୍ଦାର୍ କା ନିହ୍ମାସାନ୍ ଜାମାକିଛିନ୍ ରାଇଦ୍, ଆରୁ ପାବିତାର୍ ଆତ୍ମାଘି ଜାମା ବାର୍ଦାନ୍ ହାଖ୍ଖୀକିରି ନିମ୍ ଧାନ୍ନୁବାଲା ମାନ୍ଚ୍କାର୍ କେର୍କାଦାର୍। ନିମ୍ ସୋଚାଲ୍ଦାର୍ କା ଏମ୍ ଖ୍ରୀସ୍ତ୍ଗାନେ ରାଜୀ ଚାଲାବାଲ୍ଦାମ୍। ଲେକିନ୍ ଏମ୍ ଯୀଶୁସ୍କି ଚେଲାମ୍ ହାଲେହି ଆକ୍କୁନ୍ତକ୍ ରାଜୀ ମାଲ୍ଲା ଚାଲାବୁମ୍। ଇ କାତ୍ଥାଦ୍ ସତ୍ତୁ ଆରୁ କେତ୍କ ବାନେ ମାନଦ୍ନେ କା ଯଦି ନିମ୍ ଅସଲ୍ନୁ ରାଜୀନ୍ ଚାଲାବର୍ନେ ତା ଏମ୍ହି ନିହ୍ମାଗାନେ ମେଶ୍ରିକିରି ରାଜୀ ଚାଲାବମ୍ନେ। 9ଏଙ୍ଗା ଏନ୍ନେ ଲାଗ୍ଗି କା ପାର୍ମେଶ୍ୱାର୍ସ୍ ନାହ୍ମା ଯୀଶୁସ୍କି ଖାସ୍ଚେଲାରିନ୍ ଜାମାର୍ଘିନ୍ତି ପାଛ୍ଲି ଆ ଆଲାର୍ଘି ଲେଖା ଠାହ୍ରାଚାସ୍, ଏକାର୍ଗେକା ମରନ୍ଘି ହୁକୁମ୍ ମାନ୍ଚାକେର୍କିଚି; ଏନ୍ଦେର୍ଗେକା ଏମ୍ ଦୁନିଆଁ, ସରଗ୍ ଦୂଁତ୍ର୍, ଆରୁ ଆଲାର୍ଘି ଆଘ୍ଲି ମାଜାକ୍ ମାନ୍ଚ୍କାମ୍ କେର୍କାଦାମ୍। 10ଏମ୍ ଖ୍ରୀସ୍ତ୍କି ଲାଗାନ୍ ନିର୍ବୁଦ୍ଧିଆ ମାନ୍ଚ୍କାମ୍ କେର୍କାଦାମ୍ ଲେକିନ୍ ନିମ୍ ଖ୍ରୀସ୍ତ୍କିନୁ ବାଗ୍ଗେ ବୁଦ୍ଧିୟାର୍ ରାଦାର୍। ଏମ୍ କାମ୍ଜୋର୍ ରାଦାମ୍ ଲେକିନ୍ ନିମ୍ତା ବାଗ୍ଗେ ତାକତ୍ ବାଲାର୍। ନିମ୍ ମାଇନ୍ ହାଖ୍ଖଦାର୍, ଆରୁ ଏମ୍ ମାଇନ୍ ମା ହାଖ୍ଖଦାମ୍। 11ଏମ୍ ଆକ୍କୁନ୍ତକ୍ କିଡ଼ା ଖିଆଲ୍ଦାମ୍, ଆମ୍ମୁକିଡ଼ା ସାରାଲ୍ଦାମ୍, ଏଟ୍ର୍କା ଚିଢ଼ା ଆତ୍ତାଲ୍ଦାମ୍, ମାର୍ ମହଁରାଲ୍ଦାମ୍, ଇୟା ହୁୟା କୁଦ୍ଦାଲ୍ଦାମ୍ ଆରୁ ଏହ୍ମାଏ ରାଗେ ଆଡ଼୍ପା ମାଲ୍ଲାଦିନ୍। 12ଆରୁ ଏମ୍ ଏହ୍ମା ହେଖ୍ଖାତି ମୁରୁକ୍ ଖାଟ୍କାମ୍, ଆଲାର୍ ଏମାନ୍ ଚୁଗ୍ଲି କାମ୍ନାଏ, ହାଲେହି ଏମ୍ ଆଶୀର୍ବାଦ୍ ଚିଦାମ୍, ଏମାନ୍ ସାଧ୍ନାଏ ହାଲେହି ଏମ୍ ସାହ୍ଦାମ୍। 13ଆଲାର୍ ଏମାନ୍ ବଦ୍ନାମ୍ କାମ୍ନାଏ ବାକେନ୍ ଏମ୍ ଆବ୍ଡ଼ାର୍ ଗାନେ ନରମ୍କିରି କାଚ୍ନେଖ୍ର୍ଦାମ୍, ଇନ୍ନାତକ୍ ଏମ୍ ଇ ଦୁନିଆଁଘି କାଚ୍ରା ଲେଖା ଆରୁ ଜାମା ଜିନିଷ୍ଘି ବାସ୍କା କାଚ୍ରାଗାଦା ଲେଖା ରାଦାମ୍।
ପାଉଲୁସ୍କି ଚେତାବାନୀ ଚିନା
14ଏନ୍ ନିମାନ୍ ଲାଜ୍ର୍ତାଗେ ଇବ୍ଡ଼ା କାତ୍ଥାନ୍ ମାଲ୍ଲା ଲେଖୁନ୍, ବରନ୍ ଏନ୍ ନିମାନ୍ ଏଙ୍ଘା ହାଦ୍ଦୁବଚ୍ଚ ଲେଖା ସୋଚିକିରି ବୁଝାବାଲ୍ଦାନ୍ ଆରୁ ଲେଖ୍ଦାନ୍। 15ଖ୍ରୀସ୍ତ୍କି ବାରେନୁ ନିମାନ୍ ଶିଖାବାନା ବାଲାର୍ ଦଶ୍ହାଜାର୍ ଆଲାର୍ହି ରର୍ନେ। ଖ୍ରୀସ୍ତ୍ ଯୀଶୁସ୍କି ସୁସାମାଚାର୍ ନିମାନ୍ ତେଙ୍ଗ୍ନାଘି ଦ୍ୱାର୍ନୁ ଏନ୍ ନିହ୍ମା ବୁଆ ମାନ୍ଚ୍କାନ୍, ହୁଦ୍ଘିଲାଗାନ୍ ନିହ୍ମା ବୁଆର୍ ଢେର୍ ମାଲ୍କାରିନ୍। 16ହୁଦ୍ଘିଲାଗାନ୍ ଏନ୍ ନିମାନ୍ ଆର୍ଜୀବିନ୍ତି କାମାଲ୍ଦାନ୍ କା ନିମ୍ ଏଙ୍ଘା ଲେଖା ଚାଲ୍ରା। 17ଏନ୍ ଇଦ୍ଘିଲାଗାନ୍ ତୀମଥିଉସ୍ସିନ୍ ନିହ୍ମାସାନ୍ ତାଇକାଦାନ୍, ଆସ୍ ଏଙ୍ଘାଏ ଦୁଲାଡ଼ି ଆରୁ ବିଶ୍ୱାସ୍ ଲାଇଗ୍ ହାଦ୍ଦୁ ରାଦାସ୍, ଆସ୍ ନିମାନ୍ ଖ୍ରୀସ୍ତ୍କି ବାରେନୁ ଏଙ୍ଘା ଶିକ୍ଷାଘି ମନେ କାମ୍ତସ୍, ଏକା ଶିକ୍ଷାନ୍ ଏନ୍ ଜାମା ଖ୍ରୀସ୍ତ୍ ମଣ୍ଡ୍ଲୀନୁ ଚିଦାନ୍।
18ନିହ୍ମାସ୍ତିନିନ୍ କେତ୍କ ଲୋକ୍ ଇ ସୋଚିକିରି ଘମଣ୍ଡି ମାନ୍ଚ୍କାର୍ କେର୍କାଦାର୍ କା ଏନ୍ ନିହ୍ମାସାନ୍ ମା ବାର୍ଦାନ୍। 19ଲେକିନ୍ ପ୍ରାଭୁସ୍ ଚାହଁସ୍ ତା ଏନ୍ ନିହ୍ମାସାନ୍ ଚାଁଣେନ୍ କନ୍, ଆରୁ ଆବ୍ଡ଼ା ବଡ଼୍ପଣି ଏଦ୍ରୁର୍ଘି କାତ୍ଥାନ୍ ମାଲ୍ଲା, ବରନ୍ ଆବ୍ଡ଼ାର୍ଘି ନାଲ୍ଖୁନ୍ ଏରୋନ୍। 20ଏନ୍ଦେର୍ଗେକା ପାର୍ମେଶ୍ୱାର୍ସ୍କି ରାଜୀଦ୍ କାତ୍ଥାନୁ ମାଲ୍ଲା, ଲେକିନ୍ ନାଲ୍ଖୁନୁ ଟିକ୍ରିକିରି ରାଇ। 21ନିମ୍ ଏନ୍ଦେର୍ ଚାହଁଦାର୍? ଏନ୍ଦେର୍ ଏନ୍ ହେଖ୍ଖାନୁ ଠେଙ୍ଗା ଧାରିକିରି ନିହ୍ମାସାନ୍ ବାରନ୍ ଚାହେ ବାନେ ହାଖ୍ଖନା ଆରୁ ନରମ୍ ଆତ୍ମାନୁ ବାରନ୍?
5ବେଭିଚାର୍ କାମୁରିନ୍ ଖ୍ରୀସ୍ତ୍ ମଣ୍ଡ୍ଲୀସ୍ତି ବାହ୍ରି ଅଥ୍ର୍ନା ଚିନା କାତ୍ଥା
1ଆରୁ ଏତ୍କତକ୍ ଏନ୍ନେ ମେନ୍ଦ୍ରାଲିଦ୍ କା ନିହ୍ମା ମାଝାନୁ ବେଭିଚାର୍ ମାନିଦ୍, ବରନ୍ ଏନ୍ନେ ବେଭିଚାର୍ଦ୍ ଏକାଦ୍ କା ବିନାୟାହୁଦୀର୍ଘିନୁ ହି ମା ମାନିଦ୍, କା ଅଣ୍ଟା ଆଲାସ୍ ନିଜର୍ ବୁଆସ୍କି ଛୁଟ୍କି ମାଏକିନିଆଁଗାନେ ସମ୍ବନ୍ଧ ଉଇଦାସ୍। 2ହାଲେହି ଇଦ୍ଘିଲାଗାନ୍ ନିମ୍ ଏସ୍କେ ବଡ଼୍ପଣି ଏଦ୍ର୍ଦାର୍? ନିମ୍ତା ଦୁଃଖୁ ମା ମାନ୍ଦାର୍ କାଁଏ? ଏନ୍ନେ ନାଲ୍ଖୁ କାମୁରିନ୍ ନିହ୍ମାସ୍ତି ଅଥ୍ର୍ନା ଚିନା କାତ୍ଥା ରାଚା। 3ଏନ୍ତା ମେଦୁଘି ରୂପ୍ନୁ ନିହ୍ମାସ୍ତି ଗେଚ୍ଛା ରାଦାନ୍, ହାଲେହି ସୋଚା କା ଏନ୍ ଆତ୍ମାଘି ଲେଖା ନିହ୍ମା ମାଝାନୁ ରାଦାନ୍। ଏକାର୍ ଇ ନାଲ୍ଖୁ କାମ୍ଚ୍କାନାଏ ଏନ୍ ଆବ୍ଡ଼ାର୍ଘି ନ୍ୟାୟ କାମ୍ଚ୍କାଦାନ୍ ସୋଚା କା ଏନ୍ ସତ୍ତୁନିନ୍ ଆସାନ୍ ରାଦାନ୍। 4-5ଯେତ୍କବାକେନ୍ ନିମ୍ ଏଙ୍ଘାଗାନେ ନାହ୍ମାଏ ପ୍ରାଭୁ ଯୀଶୁସ୍କି ନାମେନୁ ଏଙ୍ଘା ଆତ୍ମା ଆରୁ ନାହ୍ମାଏ ପ୍ରାଭୁ ଯୀଶୁସ୍କି ଶକ୍ତିଗାନେ ଅନ୍ଠାଣ୍ ମାନର୍କର୍ ହତ୍କବାକେନ୍ ଏନ୍ନେ ଆଲାସିନ୍ ଆସ୍କି ପାପ୍ ସାଭାବ୍ବନ୍ ନାଶ୍ କାମ୍ନାଚିନାଘି ଲାଗାନ୍ ଶାଏତାନ୍ଗେ ସୋଁପାଚିଆକୋ ତାକା ପ୍ରାଭୁସ୍କି ଉଲ୍ଲାନୁ ଆସ୍କି ଆତ୍ମାଘି ମୁକ୍ତି ହାଖ୍ରା ଅଙ୍ଗ।
6ଏତ୍କ ମାନ୍ଚାକେରା ହାଲେହି ନିମ୍ ବଡ଼୍ପଣି ଏଦ୍ରାଲ୍ଦାର୍, ଇଦ୍ ବାନେ କାତ୍ଥା ମାଲ୍ଲିଦ୍, ନିମ୍ ବାଲ୍ଦାରିନ୍ କାଁଏ କା କାଟେକେନ୍ ଫୁଲାବାନାବାଲା ଖାମୀର୍ଦ୍ ଜାମା ସାନ୍ଚ୍କା ଆଟାନ୍ ଖାମୀର୍ କାମିଚି? 7ନିମ୍ ନିଜ୍କେ ନିଜ୍ତି ପାଚ୍ଚା ଖାମୀର୍ ଲେଖା ପାପ୍ ସାଭାବ୍ବନ୍ ଅଥ୍ରିକିରି ଶୁଦ୍ଧ୍ ମାନାକାଲା ଏକାତି କା ନିମ୍ ପୁନା ଆଟା ଚାଟ୍କାଚ୍କା ଲେଖା ଶୁଦ୍ଧ୍ ମାନାକାଲା ଏନ୍ଦେର୍ଗେକା ନାହ୍ମାଏ ପାସ୍କାପରବ୍ଘି ଭେଡ଼ିହାଦ୍ଦୁସ୍ ମତ୍ଲବ୍ ଖ୍ରୀସ୍ତ୍କି ବଲୀ ଚାଢ଼ାବା କେର୍କିଚି। 8ହୁଦ୍ଘିଲାଗାନ୍ ବାରା ନାମ୍ ନାହ୍ମା ପାସ୍କାପରବ୍ ଖାରାପ୍ ଆରୁ ବାଦ୍ମାସ୍ଘି ପାଚ୍ଚା ଖାମୀର୍ଘି ଆସ୍ମାତି ମାଲ୍ଲା, ବରନ୍ ସାଧାସିଧା ଆରୁ ସତ୍ତୁ ମନ୍ଘି ବିନାଖାମୀର୍ ଆସ୍ମାତି ଲୀଝ୍ରିକିରି ପରବ୍ ମାନାବତ୍।
9ଏନ୍ ପହ୍ଲେ ଏଙ୍ଘା ଚିଠିନୁ ନିମାଗେ ଲେଖ୍ଚ୍କାଦାନ୍ କା, ବେଭିଚାରିର୍ ଗାନେ ଆମ୍କେ ମେଶ୍ରା। 10ଏଙ୍ଘା ତେଙ୍ଗ୍ନାଘି ମତ୍ଲବ୍ ଇଦ୍ ମାଲ୍ଲା କା ନିମ୍ ବିଲ୍କୁସ୍ ଇ ଦୁନିଆଁନ୍ତା ବେଭିଚାରୀ, ଲୁଭିର୍, ଦୁସ୍ରାର୍ଘି ଜିନିଷ୍ପତର୍ ଲୁଟ୍ନାବାଲାର୍, ଚାହେ ମୂର୍ତ୍ତୀ ପୂଜା କାମୁର୍ଗାନେ ଆମ୍କେ ମେଶ୍ରା; ଯଦି ନିମ୍ ଏନ୍ନେ କାମର୍ ତା ନିମାଗେ ଦୁନିଆଁନ୍ତିନ୍ ଉର୍ଖା ଖାତ୍ରୋଦ୍। 11ଲେକିନ୍ ଏଙ୍ଘା ତେଙ୍ଗ୍ନା ଇଦ୍ କା ଯଦି ଅଣ୍ଟା ଆଲାସ୍ ଖ୍ରୀସ୍ତ୍ ବିଶ୍ୱାସୀ ଭାଇ ବୁଲି ତେଙ୍ଗ୍ରସ୍ ଆରୁ ବେଭିଚାର୍, ଚାହେ ଲୁଭି, ମୂର୍ତ୍ତୀ ପୂଜା କାମ୍ନାବାଲା, କେବ୍ନାବାଲା, ଚାହେ ଉଙ୍ଖୁରସ୍ ଆରୁ ଦୁସ୍ରାର୍ଘି ଜିନିଷ୍ପତର୍ ହାଡ଼୍ନାବାଲା ରସ୍ତା ଆସ୍ଗାନେ ଆମ୍କେ ମେଶ୍ରା; ଏତ୍କତକ୍ କା ଏନ୍ନେ ଆଲାସ୍ ଗାନେ ଆମ୍କେହି ଅନା ମହାଁ। 12ଏକାର୍ ବାହ୍ରିନ୍ତାର୍ ମତ୍ଲବ୍ ମଣ୍ତ୍ଲୀନ୍ତା ମାଲ୍ନାଏ, ଆବ୍ଡ଼ାର୍ଘି ନ୍ୟାୟ କାମ୍ନା ଏଙ୍ଘାଏ ନାଲ୍ଖୁ ମାଲ୍ଲିଦ୍, ଲେକିନ୍ ମଣ୍ଡ୍ଲୀନୁ ରୁ ଏକାର୍ ପାପ୍ କାମ୍ନାଏ ଆବ୍ଡ଼ାର୍ଘି ନ୍ୟାୟ କାମ୍ନା ନିହ୍ମାଏଦିନ୍ ନାଲ୍ଖୁଦ୍କା। 13ଆରୁ ବାହ୍ରି ବାଲାର୍ଘି ମତ୍ଲବ୍ ଏକାର୍ ମଣ୍ତ୍ଲୀନ୍ତା ମାଲ୍ନାଏ, ଆବ୍ଡ଼ାର୍ଘି ନ୍ୟାୟତା ପାର୍ମେଶ୍ୱାର୍ସ୍ କାମସ୍, ଏସ୍କେ କା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ନିହ୍ମା ମାଝାନ୍ତି ଆ ପାପୀ ଆଲାସିନ୍ ଅଥ୍ରାଚା।”
6ବିଶ୍ୱାସୀ ଜାମାର୍ଘି ମାଝାନ୍ତା ଝାଗ୍ଡ଼ା ଆମ୍ୱନା
1ଯଦି ନିହ୍ମା ଆଲାର୍ଘି ମାଝାନୁ ନିଜର୍-ନିଜର୍ ଭିତ୍ରେ ଝାଗ୍ଡ଼ା ମାନିଦ୍ ତା ଆସ୍ ନ୍ୟାୟ କାମ୍ନାଘି ଲାଗାନ୍ ଶାନ୍ତ୍ ଆଲାର୍ସାନ୍ ମାଲ୍ଲା ବରନ୍ ଆବିଶ୍ୱାସୀର୍ସାନ୍ କାନାଘି ସାହସ୍ ଏସ୍କେ କାମାଅଙ୍ଗ୍ନାଏ? 2ଏନ୍ଦେର୍ ନିମ୍ ବାଲ୍ଦାରିନ୍ କା ପାର୍ମେଶ୍ୱାର୍ସ୍କି ଆଲାର୍ ଇ ଦୁନିଆଁନ୍ତା ଆଲାର୍ଘି ନ୍ୟାୟ କାମର୍। ଆରୁ ଯଦି ନିମ୍ ଦୁନିଆଁନ୍ତା ଆଲାର୍ଘି ନ୍ୟାୟ କାମର୍ ତା ନିମ୍ ଛୋଟେନ୍ତି ଛୋଟେ ଝାଗ୍ଡ଼ାବନ୍ ଏସ୍କେ ଫାଏସ୍ଲା କାମା ପଲ୍ଲଦାରିନ୍? 3ନିମ୍ ବାଲ୍ଦାରିନ୍ କାଁଏ ନାମ୍ ସରଗ୍ ଦୂଁତ୍ର୍ ଜାମାର୍ଘି ନ୍ୟାୟ କାମତ୍? ହାଲେ ନିମ୍ ଦୁନିଆଁନ୍ତା କାତ୍ଥାଗୁଠିନ୍ ଏସ୍କେ ଫାଏସ୍ଲା କାମା ପଲ୍ଲଦାର୍? 4ଯଦି ନିହ୍ମା ଭିତ୍ରେ ଏନ୍ଦ୍ରିନ୍ ନା ଏନ୍ଦ୍ରିନ୍ ଝାଗ୍ଡ଼ା ରାଇ ତା ଆବନ୍ ଫାଏସ୍ଲା କାମ୍ନାଘି ଲାଗାନ୍ ନିମ୍ ଏନ୍ନେ ଆଲାର୍ଗେ ଏନ୍ଦେର୍ଗେ ନାଲ୍ଖୁ ଚିଦାର୍ ଏକାର୍ଘି କା ଖ୍ରୀସ୍ତ୍ ମଣ୍ଡ୍ଲୀନୁ ଏନ୍ଦେର୍ହି ଆଡ୍ଡା ମାଲ୍ଲାଦିନ୍। 5ଏନ୍ ନିମାନ୍ ଲାଜ୍ର୍ତାଗେ ଏନ୍ନେ ତେଙ୍ଗାଲ୍ଦାନ୍; ଏନ୍ଦେର୍ ସତ୍ତୁନିନ୍ ନିହ୍ମାସ୍ତି ଅଣ୍ଟାହି ବୁଦ୍ଧିୟାର୍ ମାଲ୍କାର୍ କାଁଏ ଏକାର୍ ନିଜର୍ ବିଶ୍ୱାସୀ ଆଲାର୍ଘି ମାଝାନୁ ଝାଗ୍ଡ଼ାଘି ଫାଏସ୍ଲା କାମା ଅଙ୍ଗର୍? 6ନିହ୍ମାଏନୁ ବିଶ୍ୱାସୀ ବିଶ୍ୱାସୀର୍ଘି ଝାଗ୍ଡ଼ା ମାନିଦ୍ ତା ଆବନ୍ ଫାଏସ୍ଲା କାମ୍ନାଘି ଲାଗାନ୍ ଏନ୍ଦେର୍ଗେ ଆବିଶ୍ୱାସୀର୍ସାନ୍ କାଦାର୍। 7ଲେକିନ୍ ସତ୍ତୁନିନ୍ ନିହ୍ମାସାନ୍ ବାଡ଼୍କା ଦୋଷ୍ତା ଇଦ୍ କା ନିହ୍ମା ଭିତ୍ରେ ଝାଗ୍ଡ଼ା ମାନ୍ଦାର୍, ବରନ୍ ଅନ୍ୟାୟ ଏନ୍ଦେର୍ଗେ ମା ସାହ୍ଦାର୍? ନିହ୍ମା ହାନି ଏନ୍ଦେର୍ଗେ ମା ସାହ୍ଦାର୍? 8ଲେକିନ୍ ନିମ୍ତା ନିଜେ ଅନ୍ୟାୟ କାମ୍ଦାର୍, ଆରୁ ନିଜର୍ ଖ୍ରୀସ୍ତ୍ ବିଶ୍ୱାସୀ ଆଲାରିନ୍ ହାନି ଆଣ୍ସ୍ତାଦାର୍। 9ଏନ୍ଦେର୍ ନିମ୍ ବାଲ୍ଦାରିନ୍ କା ଖାରାପ୍ ନାଲ୍ଖୁ କାମୁ ଆଲାର୍ ପାର୍ମେଶ୍ୱାର୍ସ୍କି ରାଜୀନୁ ହକ୍ଦାର୍ ମା ମାନ୍ନାଏ? ଧୋଖା ଆମ୍କେ ମହାଁ, ବେଭିଚାରୀ, ମୂର୍ତ୍ତୀ ପୂଜା କାମୁର୍, ଦୁସ୍ରା ମାଏକିନିଆଁର୍ସାନ୍ କାନାବାଲାର୍, ଗାୟା, ମାର୍ଦ୍ନା ମାର୍ଦ୍ନାର୍ଘି ଭିତ୍ରେ ଖାରାପ୍ ନାଲ୍ଖୁ କାମ୍ନାବାଲାର୍। 10ଆରୁ ହାଡ଼୍ନା, ଲୁଭି, ଉଙ୍ଖୁ, କେବ୍ନାବାଲା, ଦୁସ୍ରାର୍ଘି ଜିନିଷ୍ ଲୁଟ୍ନାବାଲା ଆବ୍ଡ଼ା ଯେତ୍କ ଆଲାର୍ ପାର୍ମେଶ୍ୱାର୍ସ୍କି ରାଜୀନୁ ହକ୍ଦାର୍ ମା ମାନ୍ନାଏ। 11ପହ୍ଲେ ନିହ୍ମାସ୍ତିନିନ୍ କେତ୍କ ଆଲାର୍ ଏନ୍ନେନିନ୍ ରାଚ୍କାର୍ ଲେକିନ୍ ଆକ୍କୁନ୍ ନିମାରିନ୍ ନଣାକେରା ଆରୁ ପାବିତାର୍ କାମ୍ଚେଇଚା ଆରୁ ପାର୍ମେଶ୍ୱାର୍ସ୍କି ସେବାନୁ ସୋଁପାକେରା ପ୍ରାଭୁ ଯୀଶୁ ଖ୍ରୀସ୍ତ୍କି ନାମେ ନାହ୍ମାଏ ପାର୍ମେଶ୍ୱାର୍ସ୍କି ଆତ୍ମାଘି ଦ୍ୱାର୍ନୁ ନିମାନ୍ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ଠାହ୍ରାବାକେରା।
ନିଜର୍ ମେଦୁବନ୍ ପାର୍ମେଶ୍ୱାର୍ସ୍କି ମାହିମାନୁ ଲାଗାବା
12ପାର୍ମେଶ୍ୱାର୍ସ୍ ଏଙ୍ଗାନ୍ ଜାମାକିଛିନ୍ କାମାଗେ ଆମ୍ବେଇ ଚିଚ୍କାଦାସ୍ବୁଲି କେତ୍କ ଆଲାର୍ ତେଙ୍ଗ୍ନାଏ, ଲେକିନ୍ ଏନ୍ ନିମାନ୍ ତେଙ୍ଗାଲ୍ଦାନ୍ କା ଜାମାଜିନିଷ୍ ନିହ୍ମା ଲାଗାନ୍ ଠିକ୍ ମାଲ୍ଲିଦ୍। ଆରୁ ୟୋଁଲୋକ୍ ଆଲାର୍ ତେଙ୍ଗ୍ନାଏ କା, ଜାମାଜିନିଷ୍ ଏଙ୍ଘାଲାଗାନ୍ ବାନେଦ୍, ଲେକିନ୍ ଏନ୍ ତେଙ୍ଗ୍ଦାନ୍ କା ଏନ୍ ଏନ୍ଦ୍ରିନ୍ହି କାତ୍ଥାଘି ଗୁତ୍ତିୟା ମା ମାନନ୍। 13ଅନ୍ନା ମହ୍ଁନାଦ୍ କୁଲୁଘିଲାଗାନ୍ ଆରୁ କୁଲୁଦ୍ ଅନ୍ନାମହ୍ନାଘି ଲାଗାନ୍ ରାଇ। ଲେକିନ୍ ପାର୍ମେଶ୍ୱାର୍ସ୍ ଅନ୍ଦୁଲ୍ ଇବ୍ଡ଼ା ଯୋଡ଼େନିନ୍ ଖତମ୍ କାମଚସ୍। ଆରୁ ନାହ୍ମାଏ ମେଦୁଦ୍ହି ତା ବେଭିଚାର୍ଘି ଲାଗାନ୍ ମାଲ୍ଲିଦ୍ ବରନ୍ ପ୍ରାଭୁସ୍କି ସେବାଘି ଲାଗାନ୍ ରାଇ। ଆରୁ ପ୍ରାଭୁସ୍ ନାହ୍ମାଏ ମେଦୁଘି ବାନେଲାଗାନ୍ ଚିନ୍ତାଫିକିର୍ କାମ୍ଦାସ୍। ପ୍ରାଭୁସ୍ ନାହ୍ମାଏ ମେଦୁଘି ମାଲିକ୍ସ୍। 14ଆରୁ ପାର୍ମେଶ୍ୱାର୍ସ୍ ଏସ୍କେ ତାଙ୍ଘା ଶକ୍ତିତି ନାହ୍ମାଏ ପ୍ରାଭୁସିନ୍ କେଚ୍ଚ୍କାସ୍ତି ଉଜ୍ଜତାଚାସ୍, ହନ୍ନେନ୍ ଆସ୍ ନାମାନ୍ହି ଉଜ୍ଜ୍ତସ୍। 15ଏନ୍ଦେର୍ ନିମ୍ ବାଲ୍ଦାରିନ୍ କାଁଏ ନିହ୍ମା ମେଦୁଦ୍ ଖ୍ରୀସ୍ତ୍କି ଅଙ୍ଗଦ୍? ତା ଏନ୍ ଖ୍ରୀସ୍ତ୍କି ଅଙ୍ଗଗୁଠିନ୍ ରାଣ୍ଡିବାଜିଘି ଅଙ୍ଗ କାମନ୍କାଁଏ? ବିଲ୍କୁସ୍ ମାଲ୍ଲା! 16ଏନ୍ଦେର୍ ନିମ୍ ବାଲ୍ଦାରିନ୍ କାଁଏ? କା ଏକାସ୍ ରାଣ୍ଡିବାଜି ଆଲିଗାନେ ସମ୍ବନ୍ଧ ଉଇଦାସ୍ ଆସ୍ ଆଦ୍ଘିଗାନେ ଅଣ୍ଟା ମେଦୁ ମାନ୍ଦାସ୍କାଦାସ୍। ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ଆବ୍ଡ଼ା ଦୁହି ଲୋକ୍ ଅଣ୍ଟା ମେଦୁ ମାନର୍କର୍।” 17ହନ୍ନେନ୍ ଏକାସ୍ ପ୍ରାଭୁସ୍ଗାନେ ମେଶେର୍କାଦାସ୍ ଆସ୍ ପ୍ରାଭୁସ୍ଗାନେ ଅଣ୍ଟା ଆତ୍ମା ମାନ୍ଦାସ୍କାଦାସ୍। 18ବେଭିଚାର୍ତି ଗେଚ୍ଛା ରା। ଯେତ୍କ ଜାମା ପାପ୍ ଏକାନ୍ ଅଣ୍ଟା ଆଲାସ୍ କାମ୍ଦାସ୍ ଆଦ୍ ଆସ୍କି ମେଦୁଘି ବାହାରି ମାନିଦ୍, ଲେକିନ୍ ଏନ୍ନେ ଆଲାସ୍ ଏକାସ୍ ବେଭିଚାର୍ କାମ୍ଦାସ୍ ଆସ୍ତା ନିଜର୍ ମେଦୁଘିହି ବିରୁଦ୍ଧ୍ନୁ ପାପ୍ କାମ୍ଦାସ୍। 19ନିହ୍ମା ମେଦୁଦ୍ ପାବିତାର୍ ଆତ୍ମାଘି ମନ୍ଦିର୍ ଇବନ୍ ନିମ୍ ବାଲ୍ଦାରିନ୍ କାଁଏ? ଆରୁ ପାବିତାର୍ ଆତ୍ମା ନିମାଗେ ପାର୍ମେଶ୍ୱାର୍ସ୍କି ତାର୍ତି ହାଖ୍ଖର୍କିଚି। ଆଦ୍ ନିହ୍ମାଏନୁ ରାଇ, ଆରୁ ନିମ୍ ନିହ୍ମାଏ ମାଲ୍ଦାର୍। 20ପାର୍ମେଶ୍ୱାର୍ସ୍ ନିମାନ୍ ଯୀଶୁ ଖ୍ରୀସ୍ତ୍କି ହେଁସୁ ଚିଇକିରି ହେନ୍ଦ୍କାଦାସ୍। ହୁଦ୍ଘିଲାଗାନ୍ ନିହ୍ମା ମେଦୁତି ନିମ୍ ପାର୍ମେଶ୍ୱାର୍ସ୍କି ମାହିମା କାମା।
7ବେଞ୍ଜାଘି ବାରେନୁ ସାଲାହ୍ ଚିନା
1ଆ କାତ୍ଥାଘି ବାରେନୁ ଏକାନ୍ ନିମ୍ ଲେଖ୍ଚ୍କାଦାର୍ କା ଅଣ୍ଟା ଆଲାସ୍ ଅଣ୍ଟା ଆଲିଗାନେ ଶାରୀରିକ୍ ସମ୍ୱନ୍ଧ ମା ଉଇୟସ୍ତା ବାନେ ମାନଦ୍ନେ। 2ଲେକିନ୍ ନିହ୍ମା ମାଝାନୁ ବେଭିଚାର୍ ମା ମାନ୍ନାଦ୍, ହୁଦ୍ଘିଲାଗାନ୍ ଅର୍ତୁ-ଅର୍ତୁ ମାର୍ଦ୍ନାର୍ଗେ ଅଣ୍ଟା ଖାଲି ନିଜର୍ ମାଏକିନିଆଁ ରାନା କାତ୍ଥା। ଆରୁ ଅର୍ତୁ-ଅର୍ତୁ ଆଲିଗେ ଅଣ୍ଟା ଖାଲି ନିଜର୍ ମାର୍ଦ୍ନା ରାନା କାତ୍ଥା। 3ମାର୍ଦ୍ନାସ୍ ନିଜର୍ ମାଏକିନିଆଁଘି ଜିମାବାରୀ ପୁରା କାମ୍ନାସ୍; ଆରୁ ଆନ୍ନେନ୍ ମାଏକିନିଆଁଦ୍ ନିଜର୍ ମାର୍ଦ୍ନାସ୍କି ଜିମାବାରୀ ପୁରା କାମ୍ନାଦ୍। 4ମାଏକିନିଆଁଗେ ନିଜର୍ ମେଦୁଘି ମିଆଁ ହକ୍ ମାଲ୍ଲାଦିନ୍ ଲେକିନ୍ ଆଦ୍ଘି ମାର୍ଦ୍ନାସ୍କି ହକ୍ ରାଇ; ଆନ୍ନେନ୍ ମାର୍ଦ୍ନାସ୍କିହି ନିଜର୍ ମେଦୁଘି ମିଆଁ ହକ୍ ମାଲ୍ଲାଦିନ୍ ଲେକିନ୍ ଆସ୍କି ମାଏକିନିଆଁଘି ହକ୍ ରାଇ। 5ନିମ୍ ଏକ୍ ଦୁସ୍ରାସ୍ତି ଭିନେ ଆମା ରା; ଲେକିନ୍ ଖାଲି କେତ୍କ ସାମାୟଘି ଲାଗାନ୍ ଏକ୍ ଦୁସ୍ରାର୍ଘି ରାଜୀତି ବିନ୍ତି କାମାଗେ ଭିନେ ମାନା। ଆରୁ ଆଦ୍ଘି ପାଛ୍ଲି ସାଙ୍ଗେନ୍ ରା। ଏନ୍ନେ ମା ମାନ୍ନାଦ୍ କା ନିହ୍ମା ମନ୍ବନ୍ କାବୁନୁ ମା ଉଇନାଘି ଲାଗାନ୍ ଶାଏତାନ୍ ନିମାନ୍ ବିଡ଼୍ଚେ ଏରୋ। 6ଏନ୍ ଇବନ୍ ଆଦେଶ୍ ଲେଖା ମାଲ୍ଲା, ବରନ୍ ଅନୁମତି ଲେଖା ତେଙ୍ଗାଲ୍ଦାନ୍। 7ଏନ୍ ଇ ଚାହଁଦାନ୍ କା ଏସ୍କେ ଏନ୍ ମା ବେଞ୍ଜରିକିରି ରାଦାନ୍, ଆନ୍ନେନିନ୍ ନିମ୍ହି ରା ଏନ୍ନେ ଏନ୍ ଚାହଁଦାନ୍; ଲେକିନ୍ ଅର୍ତୁ ଅର୍ତୁର୍ଗେ ପାର୍ମେଶ୍ୱାର୍ସ୍କି ତାର୍ତି ଖାସ୍ ବାର୍ଦାନ୍ ହାଖ୍ଖର୍କିଚି; ନେକ୍ରିନ୍ଗେ ମା ବେଞ୍ଜରିକିରି ଉଜ୍ଜାଗେ ବାର୍ଦାନ୍ ହାଖ୍ର୍କିଚି ଲେକିନ୍ ଜାମା ଆଲାର୍ ମା ବେଞ୍ଜରିକିରି ରା ପଲ୍ଲନାଇନ୍।
8ଲେକିନ୍ ଏନ୍ ମା ବେଞ୍ଜରୁରିନ୍ ଆରୁ ରାଣ୍ଡିର୍ସ୍ତି ଇ ତେଙ୍ଗ୍ଦାନ୍ କା ଆବ୍ଡ଼ାର୍ଗେ ଏଙ୍ଘା ଲେଖା ମା ବେଞ୍ଜରିକିରି ରାନାଦ୍ ବାନେଦ୍। 9ଲେକିନ୍ ଯଦି ଆବ୍ଡ଼ାର୍ ନିଜ୍କେ କାବୁନୁ ଉଇୟା ପଲ୍ଲନାଏ ତା ବେଞ୍ଜର୍ନାର୍; ଏନ୍ଦେର୍ଗେକା ଶାରୀରିକ୍ ସମ୍ୱନ୍ଧ ଉଇନାଘି ଇଚ୍ଛା କାମ୍ନା ସାତ୍ଥୁ ବେଞ୍ଜର୍ନାଦ୍ ବାନେଦ୍।
10ଏକାର୍ଘି ବେଞ୍ଜା ମାନ୍ଚାକେର୍କିଚି, ଆବ୍ଡ଼ାରିନ୍ ଏନ୍ ମାଲ୍ଲା, ବରନ୍ ପ୍ରାଭୁସ୍ ହୁକୁମ୍ ଚିଦାସ୍ କା ମାଏକିନିଆଁଦ୍ ନିଜର୍ ମାର୍ଦ୍ନାସିନ୍ ମା ଆମ୍ବନାଦ୍। 11ଆରୁ ଯଦି ଆମ୍ବଦ୍ ତା ଆରୁ ନାନ୍ନା ମା ବେଞ୍ଜର୍ନା କାତ୍ଥା। ଚାହେ ନିଜର୍ ମାର୍ଦ୍ନାସ୍ଗାନେ ଆରୁଅହନ୍ ମେଶ୍ରିକିରି ରାନା ରାଇ। ଆରୁ ହନ୍ନେନ୍ ମାର୍ଦ୍ନାସ୍ହି ତାଙ୍ଘା ମାଏକିନିଆଁନ୍ ଆମ୍ୱସ୍ ଆମ୍ୱା।
12ନାନ୍ନାରିନ୍ ପ୍ରାଭୁସ୍ ମାଲ୍ଲା ଲେକିନ୍ ଏନ୍ ତେଙ୍ଗାଲ୍ଦାନ୍ କା, ଯଦି ଏକିନ୍ ବିଶ୍ୱାସୀ ଭାଇସ୍କି ମାଏକିନିଆଁଦ୍ ବିଶ୍ୱାସ୍ ମା ଉଇଦ୍ ଆରୁ ଆଦ୍ ତାଙ୍ଘା ଆଲାସ୍ ଗାନେ ରାଗେ ରାଜୀ ମାନିଦ୍ ତା ଆସ୍ ତାଙ୍ଘା ଆଲିନ୍ ମା ଆମ୍ବନାସ୍। 13ଆନ୍ନେନିନ୍ ଏକିନ୍ ମାଏକିନିଆଁଘି ଆଲାସ୍ ବିଶ୍ୱାସୀ ମା ରସ୍, ଆରୁ ଆସ୍ ତାଙ୍ଘା ଆଲିଗାନେ ସାଙ୍ଗେନ୍ ରାଗେ ବେଦ୍ଦସ୍ ତା, ଆଲି ଆସିନ୍ ମା ଆମ୍ବନାଦ୍। 14ଏନ୍ଦେର୍ଗେକା ବିଶ୍ୱାସୀ ମା ରାନାବାଲା ଆଲାସ୍ ତାଙ୍ଘା ଆଲିଘିଲାଗାନ୍ ପାବିତାର୍ ମାନସ୍କସ୍, ହନ୍ନେନ୍ ଅବିଶ୍ୱାସୀ ଆଲିଦ୍ ତାଙ୍ଘା ବିଶ୍ୱାସୀ ଆଲାସ୍କି ଲାଗାନ୍ ପାବିତାର୍ ମାନକୋ। ମାଲ୍ଲାହାଲେ ନିହ୍ମା ହାଦ୍ଦୁବଚ୍ଚର୍ ପାର୍ମେଶ୍ୱାର୍ସ୍କି ଲାଇଗ୍ ମା ମାନ୍ନାଏ ଲେକିନ୍ ଆକ୍କୁନ୍ ତା ଆବ୍ଡ଼ାର୍ ପାବିତାର୍ ରାନାଏ। 15ଲେକିନ୍ ଏକା ମାର୍ଦ୍ନାସ୍ ଚାହେ ମାଏକିନିଆଁ ବିଶ୍ୱାସୀ ମା ରାନାଏ, ଯଦି ଆବ୍ଡ଼ାର୍ ଭିନେ ମାନା ବେଦ୍ଦନାଏ ତା ଭିନେ ମାନାଗେ ଚିଆ। ଏନ୍ନେ ଦାଶାନୁ ଏକିନ୍ ବିଶ୍ୱାସୀ ଭାଇସ୍ ଚାହେ ବୁହୁଣୀନ୍ ବେଞ୍ଜା ବନ୍ଧନ୍ନୁ ରାଗେ ଯବର୍ଜସ୍ତି ଆମା କାମା ଏନ୍ଦେର୍ଗେକା ପାର୍ମେଶ୍ୱାର୍ସ୍ ନାମାନ୍ ଶାନ୍ତିନୁ ରାଗେ ମେହ୍କାଦାସ୍। 16ଏନ୍ଦେର୍ଗେକା ଏନ୍ନେହି ମାନା ଅଙ୍ଗିକା ମାଏକିନିଆଁଦ୍ ତାଙ୍ଘା ମାର୍ଦ୍ନାସ୍କି ଲାଗାନ୍ ମୁକ୍ତିଘି କାରଣ୍ ମାନଦ୍। ଆରୁ ଆଲାସ୍ ତାଙ୍ଘା ଆଲିଘିଲାଗାନ୍ ମୁକ୍ତିଘି କାରଣ୍ ମାନସ୍।
ପାର୍ମେଶ୍ୱାର୍ସ୍କି ମେହେଁକା ଲେଖା ଚାଲ୍ରା
17ପ୍ରାଭୁସ୍ ଅର୍ତୁ ଅର୍ତୁର୍ଗେ ଭିନେ-ଭିନେ ଦାଶାନୁ ଜୀବନ୍ ଚାଲ୍ରାଗେ ମେହ୍କାଦାସ୍। ହୁଦଘିଲାଗାନ୍ ପାର୍ମେଶ୍ୱାର୍ସ୍ ଜାମାରିନ୍ ତାଙ୍ଘା ପାଛ୍ଲି କାଲାଗେ ପହ୍ଲେ ଏସ୍କେ ଦାଶାନୁ ମେହେଁକାଚାସ୍, ଆନ୍ନେନ୍ ଦାଶାନୁ ରାଇକିରି ଜୀବନ୍ ଚାଲ୍ର୍ନା କାତ୍ଥା। ଏନ୍ ଜାମା ଖ୍ରୀସ୍ତ୍ ମଣ୍ତ୍ଲୀନ୍ତାରିନ୍ ଏନ୍ନେ ରାଗେ ଆଦେଶ୍ ଚିଦାନ୍। 18ଯଦି ଅଣ୍ଟା ଆଲାସିନ୍ ପାର୍ମେଶ୍ୱାର୍ସ୍ ଯେତ୍କବାକେନ୍ ମେହେଁକାଚାସ୍ ତା ଆସ୍ ଖାତ୍ନା କାମ୍ଚ୍କାଦାସ୍ ତା ଆବନ୍ ମା ହାଟାବାନାସ୍; ଆରୁ ଯଦି ଅଣ୍ଟା ଆଲାସ୍କି ଖାତ୍ନା ମା କାମ୍ଚ୍କା ଦାଶାନୁ ପାର୍ମେଶ୍ୱାର୍ସ୍ ଆସିନ୍ ମେହଁସ୍ତା ଆସ୍ ଖାତ୍ନା ମା କାମ୍ନାସ୍। 19ଖାତ୍ନା କାମ୍ନାଦ୍ ଏନ୍ଦେର୍ହି ମାଲ୍ଲିଦ୍ ଆରୁ ଖାତ୍ନା ମା କାମ୍ନାଦ୍ ଏନ୍ଦେର୍ହି ମାଲ୍ଲିଦ୍। ଲେକିନ୍ ପାର୍ମେଶ୍ୱାର୍ସ୍କି ହୁକୁମ୍ବନ୍ ମାନ୍ନାଦ୍ ଜାମାର୍ଘିନ୍ତି ଖାସ୍ଦ୍। 20ଯେତ୍କବାକେନ୍ ପାର୍ମେଶ୍ୱାର୍ସ୍ ନିମାନ୍ ଅର୍ତୁ ଅର୍ତୁରିନ୍ ମେହେଁକାଚାସ୍ ହତ୍କବାକେନ୍ ନିମ୍ ଏସ୍କେ ଦାଶାନୁ ରାଲ୍କାର୍ ଆସ୍ ଆନ୍ନେନ୍ ଦାଶାନୁ ରା। 21ନିମାନ୍ ମେହଁନାଘି ସାମାୟ ଗୁତ୍ତିୟା ରାଚ୍କାର୍ ତା ଇବନ୍ ଚିନ୍ତା ଆମା କାମା ଆରୁ ଯଦି ନିମ୍ ଆଜାଦୀ ମାନାଅଙ୍ଗର୍ ହାଲେହି ଗୁତ୍ତିୟା ମାନିକିରି ରାନାନ୍ ବାଗ୍ଗେ ବାନେ ବୁଝ୍ରର୍। 22ଏନ୍ଦେର୍ଗେକା ଏକାସିନ୍ ଗୁତ୍ତିୟାସ୍କି ଦାଶାନୁ ପ୍ରାଭୁସ୍କିନୁ ମେହାଁକେର୍କିଚି, ଆସ୍ ପ୍ରାଭୁସ୍କି ଦ୍ୱାର୍ନୁ ଆଜାଦୀ ମାନ୍ଚ୍କାସ୍: ଆରୁ ଆନ୍ନେନିନ୍ ଏକାସିନ୍ ଆଜାଦୀଘି ଦାଶାନୁ ମେହାଁକେର୍କିଚି, ଆସ୍ ଖ୍ରୀସ୍ତ୍କି ଗୁତ୍ତିୟାସ୍। 23ପାର୍ମେଶ୍ୱାର୍ସ୍ ନିମାନ୍ ଦାମ୍ ଚିଇକିରି ହେନ୍ଦ୍କାଦାସ୍ ହୁଦ୍ଘିଲାଗାନ୍ ନିମ୍ ଆଲାର୍ଘି ଗୁତ୍ତିୟା ଆମ୍କେମାନା। 24ହେ ଭାଇ ଆରୁ ବୁହୁଣୀ ଜାମାରୋ ନିମାନ୍ ଏସ୍କେ ଦାଶାନୁ ମେହେଁକାରାଇ; ପାର୍ମେଶ୍ୱାର୍ସ୍କି ଆଘ୍ଲି ଆନ୍ନେନ୍ ଦାଶାନୁ ରା।
ମା ବେଞ୍ଜ୍ରୁ ଆଲାର୍ଘି ଆରୁ ରାଣ୍ଡିର୍ଘି ବାରେନୁ ସାଲାହ୍
25ଡିଣ୍ଡା କୁକାଏର୍ ଆରୁ କୁକ୍କର୍ଘି ବାରେ ନିମ୍ ମେନ୍ଚ୍କାଚ୍କାର୍ ଆଦ୍ଘି ବାରେ ପ୍ରାଭୁସ୍କି ତାର୍ତି ଏନ୍ଦେର୍ହି ହୁକୁମ୍ ଏଙ୍ଗା ମାଲ୍ଲା ହାଖ୍ରୁ, ଲେକିନ୍ ବିଶ୍ୱାସ୍ କାମ୍ନାଘି ଲାଇଗ୍ ଆଲାସ୍କି ଲେଖା ରାଗେ ପ୍ରାଭୁସ୍ ଏଙ୍ଘା ମିଆଁ ଦାୟା କାମ୍ଚାସ୍, ହୁଦ୍ଘିଲାଗାନ୍ ଏଙ୍ଘା ସାଲାହ୍ ନିମାଗେ ଚିଆଲ୍ଦାନ୍। 26ଏଙ୍ଘାଏ ସାଲ୍ହାଦ୍ ଇଦ୍ କା ଇନ୍ନା ନେଲାନ୍ତା ଯୁଗ୍ନୁ ବିଶ୍ୱାସୀର୍ଗେ ତକ୍ଲିପ୍ ମାନାଲି, ହୁଦ୍ଘିଲାଗାନ୍ ଆଲାର୍ଗେ ମା ବେଞ୍ଜ୍ର୍ନାଘି ଦାଶାନୁ ରାନାଦ୍ ବାନେଦ୍। 27ଯଦି ନିମ୍ ବେଞ୍ଜର୍କାଦାର୍ ତା ନିହ୍ମା ଆଲିନ୍ ଆମ୍ୱାଗେ ଆମ୍କେ ସୋଚା; ଆରୁ ନିମ୍ ମାଲ୍ଲା ବେଞ୍ଜରୁର୍ ହାଲେ ବେଞ୍ଜରାଗେ ଆମ୍କେ ସୋଚା। 28ଆରୁ ନିମ୍ ବେଞ୍ଜରର୍ ତା ହୁନ୍ନୁ ଏନ୍ଦେର୍ହି ପାପ୍ ମାଲ୍ଲାଦିନ୍ ଆରୁ ଯଦି ଡିଣ୍ଡା କୁକାଏଦ୍ ବେଞ୍ଜରିଦ୍ ତା ଏନ୍ଦେର୍ହି ପାପ୍ ମାଲ୍ଲିଦ୍। ଲେକିନ୍ ଏନ୍ନେ ଆଲାର୍ଗେ ଏସ୍କ୍ରିନ୍ହି ତାହ୍ମା ରୋଜ୍ଦିନ୍ତା ବେଞ୍ଜର୍କା ଜୀବନ୍ନୁ କଷଟ୍ ସାହା ଖାତ୍ରୋ ହୁଦ୍ଘିଲାଗାନ୍ ଏନ୍ ଇ ଝନ୍ଝଟ୍ତି ନିମାନ୍ ବାଛାବା ବେଦ୍ଦାଲ୍ଦାନ୍। 29ହେ ଭାଇ ଆରୁ ବୁହୁଣୀଜାମାରୋ; ଏଙ୍ଘା ତେଙ୍ଗ୍ନାଘି ମତ୍ଲବ୍ ଇଦ୍ କା ଇ ଦୁନିଆଁନୁ ନାମାଗେ ବାଗ୍ଗେ ସାମାୟ ମାଲ୍ଲାଦିନ୍ ହୁଦ୍ଘିଲାଗାନ୍ ଇ ଦୁନିଆଁନୁ ନାମାଗେ ଯେତ୍କ ସାମାୟ ହାଖ୍ଖର୍କିଚି ଆ ସାମାୟନୁ ନାମ୍ ନିଜର୍ ଜୀଆଘି ଲାଗାନ୍ ବାଗ୍ଗେ ଚିନ୍ତାଫିକିର୍ ଆମ୍ୱତ୍ କାମା। ଆରୁ ବେଞ୍ଜର୍କା ଆଲାସ୍ ଏନ୍ନେ ସୋଚ୍ନା କାତ୍ଥା କା ଆସ୍ ମାଲ୍ଲା ବେଞ୍ଜରୁସ୍। 30ଆରୁ ଅହ୍ଲୁର୍ ମା ଅହ୍ଲନା ବାଲାର୍ ଲେଖା ସୋଚିକିରି ରାନାର୍, ଲୀଝ୍ରୁ ଆଲାର୍ ମା ଲିଝ୍ରୁର୍ ଲେଖା ସୋଚିକିରି ରାନାର୍, ଆରୁ ଦାମ୍ ଚିକିରି ହୋନାବାଲାର୍ ଏନ୍ଦେର୍ହି ମାଲ୍ଲା ହୁମ୍ ଲେଖା ସୋଚିକିରି ରାନାର୍। 31ଆରୁ ଏକାର୍ ଇ ଦୁନିଆଁଘି ଜିନିଷ୍ଗୁଠିନ୍ ବାଉରାନାଏ ଆବ୍ଡ଼ାର୍ ମାଲ୍ଲା ବାଉରୁମ୍ ଲେଖା ସୋଚ୍ନାର୍। ଏନ୍ଦେର୍ଗେକା ଏକା ଦୁନିଆଁବନ୍ ନାମ୍ ଏର୍ଦାତ୍, ଆଦ୍ ନାଶ୍ ମାନିକି।
32ହୁଦ୍ଘିଲାଗାନ୍ ଏନ୍ ଚାହଁଦାନ୍ କା ନିମ୍ ଚିନ୍ତାଫିକିର୍ ଆମା କାମା। ଅଣ୍ଟା ମା ବେଞ୍ଜ୍ରୁ ଆଲାସ୍ ପ୍ରାଭୁସ୍କି ସେବା ଏସ୍କେ କାମନ୍ ଆରୁ ପ୍ରାଭୁସିନ୍ ଏସ୍କେ ଖୁସୀ କାମନ୍ ଆଦ୍ଘି ବାରେନୁନିନ୍ ସୋଚ୍ଦାସ୍। 33ଲେକିନ୍ ବେଞ୍ଜ୍ରୁ ଆଲାସ୍ ଦୁନିଆଁନ୍ତା କାତ୍ଥାନ୍ ଚିନ୍ତାଫିକିର୍ କାମ୍ଦାସ୍ ଆରୁ ନିଜର୍ ମାଏକିନିଆଁନ୍ ଏସ୍କେ ଖୁସୀ ଉୟନ୍ ଆଦ୍ଘି ବାରେନୁ ଚିନ୍ତାଫିକିର୍ କାମ୍ଦାସ୍। 34ବେଞ୍ଜ୍ରୁ ଆରୁ ମା ବେଞ୍ଜ୍ରୁ ଆଲିନୁହି ଫରକ୍ ରାଇ: ମା ବେଞ୍ଜ୍ରୁ ଆଲିଦ୍ ଆରୁ ଡିଣ୍ଡା କୁକାଏଦ୍ ଆବ୍ଡ଼ାର୍ ତାହ୍ମା ମେଦୁ ଆରୁ ମନ୍ ଯୋଡ଼େନୁ ପାବିତାର୍ ରାଇକିରି ପ୍ରାଭୁସ୍କି ସେବା କାମାଗେ ଚିନ୍ତା କାମ୍ନାଏ, ଲେକିନ୍ ବେଞ୍ଜ୍ରୁ ଆଲିଦ୍ ଦୁନିଆଁନ୍ତା ଚିନ୍ତା କାମିଦ୍ ଆରୁ ନିଜର୍ ଆଲାସିନ୍ ଖୁସୀ କାମ୍ନାଘି ବାରେନୁ ଚିନ୍ତା କାମିଦ୍। 35ଏନ୍ ଇ କାତ୍ଥାନ୍ ନିହ୍ମା ବାନେଘି ଲାଗାନ୍ନିନ୍ ତେଙ୍ଗାଲ୍ଦାନ୍, ନିମାନ୍ ଆଡ଼ୁଆନୁ ଟିଡ଼ାଗେ ମାଲ୍ଲା ତେଙ୍ଗ୍ନା, ବରନ୍ ଇଦ୍ଘିଲାଗାନ୍ ତେଙ୍ଗାଲ୍ଦାନ୍ କା ଏକାଦ୍ ଠିକ୍ଦ୍ ଆବନ୍ କାମା, ଆରୁ ପୁରା ମନ୍ତି ପ୍ରାଭୁସ୍କି ସେବାନୁ ଲାକ୍କାରା।
36ମା ବେଞ୍ଜର୍କା କୁକାଏ ହାଦ୍ଦୁଘି ବାରେ ଏଙ୍ଗାନ୍ ଏକାନ୍ ମେନ୍ଚ୍କାଚାର୍, ଆ କାତ୍ଥାଘି ବାରେନୁ ଏଙ୍ଘା ତେଙ୍ଗ୍ନା ଇଦ୍ କା ଯଦି କୁକାଏଘି ତାମ୍ବାସ୍ ସୋଚସ୍ କା ଏନ୍ ଏଙ୍ଗ୍ଦାଘି ହକ୍ ମାରାଲ୍ଦାନ୍, ଆରୁ ଆଦ୍ଘି ବୟସ୍ ବୁଙ୍ଗାଲି, ତା ଆସ୍ ସୋଚ୍ଦାସ୍ କା ଏନ୍ ଏଙ୍ଗ୍ଦାଘି ବେଞ୍ଜା କାମନ୍ ତା ଆସ୍ ଆଦ୍ଘି ଇଚ୍ଛାଘି ଲେଖା ତାଙ୍ଗ୍ଦାଘି ବେଞ୍ଜା କାମସ୍। ଆ କାତ୍ଥାନୁ ଏନ୍ଦେର୍ହି ପାପ୍ ମାଲ୍ଲିଦ୍। 37ଲେକିନ୍ ଏକାସ୍ ନିଜର୍ ମନ୍ନୁ ମଜ୍ବୁତ୍ ରାଦାସ୍ ଆରୁ ଏକାସ୍କି ମିଆଁ ଏନ୍ଦେର୍ହି ଯବର୍ଜସ୍ତି ମାଲ୍ଲାଦିନ୍, ବରନ୍ ଏକାସ୍କି ନିଜର୍ ଇଚ୍ଛାଘି ମିଆଁ ପୁରା ହକ୍ ରାଇ ଆରୁ ଏକାସ୍ ନିଜର୍ ମନ୍ନୁ ପୁରା ସୋଚ୍କାଦାସ୍ କା ଆସ୍ ନିଜର୍ ଡିଣ୍ଡା ହାଦ୍ଦୁ ମା ବେଞ୍ଜନ୍ବୁଲି ସୋଚ୍ଦାସ୍ ତା ଆସ୍ ବାନେ କାମ୍ଦାସ୍। 38ହୁଦ୍ଘିଲାଗାନ୍ ଏକାସ୍ ତାଙ୍ଗ୍ଦାଘି ବେଞ୍ଜା କାମ୍ଦାସ୍, ଆସ୍ ବାନେ କାମ୍ଦାସ୍, ଆରୁ ଏକାସ୍ ତାଙ୍ଗ୍ଦାଘି ବେଞ୍ଜା ମା କାମ୍ଦାସ୍, ଆସ୍ ଆରୁହି ବାନେ କାମ୍ଦାସ୍।
39ଆରୁ ଅଣ୍ଟା ଆଲିଦ୍ ତାଙ୍ଘା ଆଲାସ୍କି ଉଜ୍ଜନାତକ୍ ଆସ୍ଗାନେ ହିରିକିରି ରାଇଦ୍; ଯଦି ଆସ୍କି ଆଲାସ୍ ଖିଅସ୍କସ୍ ହାଲେ ନେକାନ୍ ଚାହଁଦ୍ ଆସିନ୍ ବେଞ୍ଜ୍ରା ଅଙ୍ଗଦ୍, ଲେକିନ୍ ପ୍ରାଭୁ ବିଶ୍ୱାସୀ ଆଲାସିନ୍ ବେଞ୍ଜର୍ନା କାତ୍ଥା। 40ଲେକିନ୍ ଏଙ୍ଘା ତେଙ୍ଗ୍ନା ଇଦ୍ କା, ଆ ମାଏକିନିଆଁଦ୍ ମା ବେଞ୍ଜ୍ର ତା ଆରୁହି ବାନେଦ୍। ଆରୁ ଏନ୍ ଏନ୍ନେ ସୋଚ୍ଦାନ୍ କା ପାର୍ମେଶ୍ୱାର୍ସ୍କି ଆତ୍ମାଦ୍ ଏଙ୍ଘା ଜୀଆଉଲ୍ତି ଏନ୍ନେ ତେଙ୍ଗି।
8ମୂର୍ତ୍ତୀଗେ ଚାଢ଼ାବାଚ୍କା ଆହାର୍
1ଆକ୍କୁନ୍ ମୂର୍ତ୍ତୀଘି ଆଘ୍ଲି ଚାଢ଼ାବାଚ୍କା ଅନ୍ନାମହ୍ନାଘି ବାରେନୁ ଏଙ୍ଘା ତେଙ୍ଗ୍ନା ଇଦ୍ କା ନାମ୍ ଜାମାତ୍ ଆହ୍ଦାତ୍ କା ଜାମାର୍ଗେ ଇଦ୍ଘି ବୁଦ୍ଧି ରାଇ। ବୁଦ୍ଧିତି ଆଲାର୍ ବଡ଼୍ପଣି ଏଦ୍ର୍ନାର୍ ଲେକିନ୍ ବାନେ ହାଖ୍ଖନାତି ନାମ୍ ଦୁସ୍ରାରିନ୍ ମଦେତ୍ କାମ୍ଦାତ୍। ଆରୁ ଆତ୍ମିକ୍ ଜୀବନ୍ନୁ ବାଢ଼ାବାନାବାଲା ମାନତ୍କତ୍। 2ଯଦି ଏକାସ୍ ବୁଝୁର୍ଦାସ୍ କା ଆସ୍ ଜାମାକିଛିନ୍ ଆହ୍ଦାସ୍ ତା ଆସ୍ ଆକ୍କୁନ୍ତକ୍ ଇବନ୍ ବାଲ୍ଦାସ୍କା ଏକାଲେଖା ଆହ୍ନା କାତ୍ଥା। 3ଲେକିନ୍ ଏକାସ୍ ପାର୍ମେଶ୍ୱାର୍ସିନ୍ ବାନେ ହାଖ୍ଖଦାସ୍ ତା ପାର୍ମେଶ୍ୱାର୍ସ୍ ଆସିନ୍ ଆହ୍ଦାସ୍। 4ମୂର୍ତ୍ତୀଘି ଆଘ୍ଲି ଚାଢ଼ାବାଚ୍କା ଅନ୍ନାମହ୍ନାଘି ବାରେନୁ ନାମ୍ ଆହ୍ଦାତ୍ କା ମୂର୍ତ୍ତୀ ଦୁନିଆଁନୁ ଏନ୍ଦେର୍ହି ମାଲ୍ଲିଦ୍ ଆରୁହି ନାମ୍ ଆହ୍ଦାତ୍ କା ଅଣ୍ଟା ଖାଲି ପାର୍ମେଶ୍ୱାର୍ସ୍ ରାଦାସ୍। 5ହାଲେହି ଆଲାର୍ ତେଙ୍ଗ୍ନାଏ କା ଆକାଶ୍ ଆରୁ ଦୁନିଆଁନୁ ବାଗ୍ଗେ ଦେବ୍ତା ରାନାଏ ଏସ୍କେ କା ବାଗ୍ଗେ ପାର୍ମେଶ୍ୱାର୍ସ୍ ରାଦାସ୍ ଆରୁ ବାଗ୍ଗେ ପ୍ରାଭୁସ୍ ରାଦାସ୍। 6ହାଲେହି ନାହ୍ମାଏ ଅଣ୍ଟା ଖାଲି ପାର୍ମେଶ୍ୱାର୍ସ୍ ରାଦାସ୍; ମତ୍ଲବ୍ ବାଙ୍ଗ୍ସ୍ ଏକାସ୍କି ତାର୍ତି ହୁର୍ମିନ୍ ସିର୍ଜାଚାସ୍, ଆରୁ ନାମ୍ ଆସ୍କି ଲାଗାନ୍ ଉଜ୍ଜାଲ୍ଦାତ୍, ଆରୁ ନାହ୍ମାଏ ଅଣ୍ଟା ଖାଲି ପ୍ରାଭୁସ୍ ରାଦାସ୍, ଚାହେ ଯୀଶୁ ଖ୍ରୀସ୍ତ୍ ଏକାସ୍କି ଦ୍ୱାର୍ନୁ ହୁର୍ମି ଜିନିଷ୍ ମାନ୍ଚା, ଆରୁ ନାମ୍ହି ଆସ୍କି ଦ୍ୱାର୍ନୁ ଉଜ୍ଜାଲ୍ଦାତ୍। 7ହାଲେହି ଇ ବୁଦ୍ଧି ଜାମାର୍ସାନ୍ ମାଲ୍ଲାଦିନ୍। ଲେକିନ୍ କେତ୍କ ଆଲାର୍ ଏକାର୍ ଆକ୍କୁନ୍ତକ୍ ମୂର୍ତ୍ତୀ ପୂଜା କାମ୍ନାଏ, ଏନ୍ନେ ଜିନିଷ୍ବନ୍ ମହ୍ଁନାଏ ଆରୁ ସୋଚ୍ନାଏ ଏସ୍କେ କା ଆ ଜିନିଷ୍ ମୂର୍ତ୍ତୀଗେ ଚାଢ଼ାବାଚ୍କାନାଏ। ଆବ୍ଡ଼ାର୍ଘି ଇ ନାଲ୍ଖୁତି ଆବ୍ଡ଼ାର୍ଘି ବିବେକ୍ କାମ୍ଜୋର୍ ମାନ୍ନାଘି ଲାଗାନ୍ ଅଶୁଦ୍ଧ୍ ମାନିକାଇ। 8ଅନ୍ନା ମହ୍ଁନାଦ୍ ନାମାନ୍ ପାର୍ମେଶ୍ୱାର୍ସ୍କି ଚାହାଗେ ମା ଅନ୍ଦ୍ରିଦ୍। ଯଦି ନାମ୍ ମା ମହଁତ୍ ହାଲେହି ନାହ୍ମାଏ ଏନ୍ଦେର୍ହି ହାନି ମା ମାନିଦ୍ ଆରୁ ମହତ୍ ହାଲେହି ଏନ୍ଦେର୍ହି ଫାଏଦା ମା ମାନିଦ୍। 9ଲେକିନ୍ ହୁସିୟାର୍ ରା! ଏନ୍ନେ ମା ମାନ୍ନାଦ୍ କା ନିହ୍ମାଏ ଇ ଆଜାଦୀ ଆବ୍ଡ଼ାର୍ଘି ଲାଗାନ୍ ଏକାର୍ କାମ୍ଜୋର୍ ରାନାଏ, ପାପ୍ନୁ ଖାତ୍ର୍ନାଘି କାରଣ୍ ମା ମାନର୍କର୍। 10ଏନ୍ଦେର୍ଗେକା ନେଦିନ୍ ନିଙ୍ଘା ଲେଖା ବୁଦ୍ଧିୟାର୍ରିନ୍ ମୂର୍ତ୍ତୀଘି ମନ୍ଦିର୍ନୁ ଅନ୍ନାନ୍ ମହଁନାନ୍ ଏରସ୍, ଆରୁ ଆସ୍ କମ୍ଜୋର୍ ଆଲାସ୍ ରସ୍, ତା ଏନ୍ଦେର୍ ଆସ୍କି ମନ୍ନୁ ମୂର୍ତ୍ତୀଘି ଆଘ୍ଲି ଚାଢ଼ାବାଚ୍କା ଜିନିଷ୍ବନ୍ ଅନାମହାଗେ ସାହସ୍ ମା ମାନକୋ? 11ଇଦ୍ଘି ଲେଖା ନିହ୍ମାଏ ବୁଦ୍ଧିଘି ଲାଗାନ୍ ଆ କମ୍ଜୋର୍ ଭାଇ ଆରୁ ବୁହୁଣୀଘି ନାଶ୍ ମାନିଦ୍, ଏକାସ୍କି ଲାଗାନ୍ କା ଖ୍ରୀସ୍ତ୍ କେଚ୍ଚାସ୍କେରାସ୍। 12ଇଦ୍ଘି ଲେଖା ନିଜର୍ ବିଶ୍ୱାସୀ ଭାଇ ଆରୁ ବୁହୁଣୀର୍ଘି ବିରୁଦ୍ଧ୍ନୁ ପାପ୍ କାମ୍ତେ ଆରୁ ଆବ୍ଡ଼ାର୍ଘି କମ୍ଜୋର୍ ମନ୍ବନ୍ ଦୁଃଖୁ ଚିତେନିନ୍ ଖ୍ରୀସ୍ତ୍କି ବିରୁଦ୍ଧ୍ ନିମ୍ ପାପ୍ କାମାଲ୍ଦାର୍। 13ଏନ୍ ନିଜର୍ ବିଶ୍ୱାସୀ ଭାଇ ଆରୁ ବୁହୁଣୀଜାମାରିନ୍ ପାପ୍ କାମ୍ତାନାଘି କାରଣ୍ ମା ମାନ୍ନା କାତ୍ଥା। ହୁଦ୍ଘିଲାଗାନ୍ ଯଦି ଏଙ୍ଘା ଅନ୍ନାମହ୍ନାଦ୍ ଏଙ୍ଘାଏ ଭାଇ ଆରୁ ବୁହୁଣୀର୍ଘି ଲାଗାନ୍ ପାପ୍ଘି କାରଣ୍ ମାନିଦ୍ ତା ଏନ୍ ଏକ୍ଲାହି ଆହ୍ଡ଼ା ମା ମହନ୍।
9ଯୀଶୁ ଖ୍ରୀସ୍ତ୍କି ଖାସ୍ଚେଲାଜାମାର୍ଘି ନାଲ୍ଖୁ ଆରୁ ହକ୍
1ଏନ୍ଦେର୍ ଏନ୍ ଆଜାଦୀ ମାଲ୍କାନ୍? ଏନ୍ଦେର୍ ଏନ୍ ପ୍ରାଭୁସ୍କି ଖାସ୍ଚେଲା ମାଲ୍ଦାନ୍? ଏନ୍ଦେର୍ ଏନ୍ ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍ସିନ୍ ମାଲ୍ଲା ଏରୁନ୍, ଏନ୍ଦେର୍ ନିମ୍ ପ୍ରାଭୁନୁ ଏଙ୍ଘାଏ ମେହ୍ନତ୍ଘି ଫଲ୍ ମାଲ୍ଦାର୍? 2ଯଦି ନାନ୍ନାର୍ଘି ଲାଗାନ୍ ଏନ୍ ଯୀଶୁସ୍କି ଖାସ୍ଚେଲା ମାଲ୍ଦାନ୍ ହାଲେହି ନିହ୍ମା ଲାଗାନ୍ ଯୀଶୁସ୍କି ଖାସ୍ଚେଲା ରାଦାନ୍। ଏନ୍ଦେର୍ଗେକା ନିମ୍ ଅଣ୍ଟା ଏନ୍ନେ ମୋହର୍ ଲେଖା ରାଦାର୍ ଏକାଦ୍ ପ୍ରାଭୁସ୍କିନୁ ଏଙ୍ଘାଏ ଖାସ୍ଚେଲା ମାନ୍ନାଘି ସାବୁତ୍ ଚିଇଦ୍।
3ଯଦି ନେଦିନ୍ ଏଙ୍ଗାନ୍ ଖ୍ରୀସ୍ତ୍କି ଖାସ୍ଚେଲା ମା ମାନ୍ନାଏ ତା ଏନ୍ ଆସିନ୍ ଏନ୍ନେ ତେଙ୍ଗନ୍। 4ଯୀଶୁ ଖ୍ରୀସ୍ତ୍କି ସେବା ନାଲ୍ଖୁ କାମ୍ନା ବାକେନ୍ ଏଙ୍ଘାଏ ଦାର୍କାର୍ଘି ଲାଗାନ୍ ନିହ୍ମାସ୍ତି ନିନାଘି ହକ୍ ମାଲ୍ଲାଦିନ୍ କାଁଏ? 5ଖ୍ରୀସ୍ତ୍ ବିଶ୍ୱାସୀ କୁକାଏରିନ୍ ବେଞ୍ଜରିକିରି ଇୟାହୁଇୟା ହୁଆଗେ ଏହ୍ମାଏ ହକ୍ ମାଲ୍ଲାଦିନ୍ କାଁଏ? ଏସ୍କେ କା ପ୍ରାଭୁସ୍କି ନାନ୍ନା ଖାସ୍ଚେଲାର୍ ଆରୁ ପ୍ରାଭୁସ୍କି ତାଙ୍ଗ୍ଡ଼ି ଜାମାର୍ ଆରୁ ପାତ୍ରାସ୍ହି ଏନ୍ନେନ୍ କାମ୍ନାଏ। 6ଏନ୍ଦେର୍ ଖାଲି ଏଙ୍ଗାଗେ ଆରୁ ବାର୍ନାବାସ୍କେ ନିଜର୍ ଉଜ୍ଜନା ଅକ୍କନାଘି ଲାଗାନ୍ ଏନ୍ଦ୍ରିନ୍ ନାଲ୍ଖୁ କାମ୍ନାକାତ୍ଥା କାଁଏ? 7ଏନ୍ଦେର୍ ଏନ୍ନେ ଏକ୍ଲା ମେନ୍ଦ୍ରିକିଚି କା ନେଦିନ୍ ନିଜର୍ ଖାର୍ଚ୍ଚାତି ପଲ୍ଟନ୍ ନାଲ୍ଖୁ କାମ୍ନାଏ? ନେର୍ ଅଙ୍ଗୁର୍ ବାଟ୍କିନୁ ଅଙ୍ଗୁର୍ ଇଦିକିରି ଆଦ୍ଘି ଫାଡ଼ୁନ୍ ମା ମହ୍ଁନାଏ? ନେର୍ ଏଡ଼ା, ଓୟୁ ପୋସ୍ନାଏ ଆରୁ ଆଦ୍ଘି ଗୁରସ୍ ମା ହାପ୍ପନାଏ?
8ଏନ୍ ଇ କାତ୍ଥାନ୍ ଆଲାର୍ଘି ସୋଚ୍ନା ଲେଖା ମାଲ୍ଲା ତେଙ୍ଗ୍ନା। 9ପାର୍ମେଶ୍ୱାର୍ସ୍କି ନିୟମ୍ଦ୍ହି ଏନ୍ନେ ମା ତେଙ୍ଗିଦ୍ କାଁଏ? ଏନ୍ଦେର୍ଗେକା ମୁଶାସ୍କି ନିୟମ୍ନୁ ଲେଖ୍ଚ୍କା ରାଇ, “ଦାଉଁରୀ ଖେଦ୍ନା ବାକେନ୍ ଏକ୍ନା ଓୟୁଘି ଥୁମ୍ଣାନ୍ ଆମ୍କେ ଢାପା।” ଏନ୍ଦେର୍ ପାର୍ମେଶ୍ୱାର୍ସ୍ ଓୟୁଗୁଠିଗେ ଖାଲି ଚିନ୍ତା କାମ୍ଦାସ୍ କାଁଏ? ମାଲ୍ଲା! 10ଇବନ୍ ବିଶେଷ୍ କାମିକିରି ନାହ୍ମାଲାଗାନ୍ ତେଙ୍ଗାଲ୍ଦାସ୍, ହଁ ନାହ୍ମାଲାଗାନ୍ହି ଲେଖ୍ଚ୍କା ରାଇ, ଏନ୍ଦେର୍ଗେକା ଠିକ୍ ରାଇଦ୍ କା, ଗହ୍ଲା ପୁନ୍ଦୁସ୍ ତାଙ୍ଘା ଭାଗୁନ୍ ହାଖ୍ଖନାଘି ଆଶ୍ରାତି ଗହ୍ଲା ପୁନ୍ଦସ୍ ଆରୁ ଦାଉଁରୀ ଖେଦୁସ୍ ତାଙ୍ଘା ଭାଗୁନ୍ ହାଖ୍ଖନାଘି ଆଶ୍ରାତି ଦାଉଁରୀ ଖେଦସ୍। 11ଲେକିନ୍ ଏମ୍ ନିହ୍ମା ଲାଗାନ୍ ଆତ୍ମିକ୍ ବିହିନିନ୍ ଚାହ୍କାଦାମ୍ ତା, ଏନ୍ଦେର୍ ନିହ୍ମାସ୍ତି ବାନେ ଚାଷ୍ଘି ଆଶ୍ରା କାମ୍ନାଦ୍ ଏନ୍ଦ୍ରିନ୍ ବାଡ଼୍କା କାତ୍ଥାଦ୍? 12ଯେତ୍କବାକେନ୍ ନାନ୍ନା ଖାସ୍ଚେଲାର୍ଘି ନିହ୍ମା ମିଆଁ ଏନ୍ନେ ହକ୍ ରାଇ ତା, ଏହ୍ମାଏ ଇନ୍ନୁ ଆରୁହି ବାଗ୍ଗେ ହକ୍ ମାଲ୍ଲାଦିନ୍ କାଁଏ? ଲେକିନ୍ ଏମ୍ ଇ ହକ୍ବନ୍ ଆଲାର୍ଘି ମିଆଁ ମା ଚିଚ୍ଚକାମ୍। ବରନ୍ ଏମ୍ ଖ୍ରୀସ୍ତ୍କି ସୁସାମାଚାର୍ ଶୁଣାବାନାନୁ ଏନ୍ଦେର୍ହି ରୋକ୍ଟୋକ୍ ମା ମାନ୍ନାଦ୍ ହୁଦ୍ଘିଲାଗାନ୍ ଜାମାକିଛିନ୍ ସାହାଲ୍ଦାମ୍। 13ଏନ୍ଦେର୍ ନିମ୍ ବାଲ୍ଦାରିନ୍ କା ଏକାର୍ ପାବିତାର୍ ମନ୍ଦିର୍ଘି ସେବା କାମ୍ନାଏ, ଆବ୍ଡ଼ାର୍ ମନ୍ଦିର୍ତିନିନ୍ ଅନ୍ନାଏ ମହ୍ଁନାଏ; ଆରୁ ଏକାର୍ ବେଦୀଘି ସେବା କାମ୍ନାଏ; ଆବ୍ଡ଼ାର୍ ବେଦୀଘି ବଲୀନ୍ତି ଭାଗିଦାର୍ ମାନ୍ନାଏ। 14ଇଦ୍ଘି ଲେଖା ପ୍ରାଭୁସ୍ହି ଆଲାର୍ଘି ଲାଗାନ୍ ହୁକୁମ୍ ଚିଚ୍ଚକାଦାସ୍ କା ଏକାର୍ ସୁସାମାଚାର୍ ଶୁଣାବାନାଏ, ଆସ୍କି ଅନ୍ନାମହ୍ନା ସୁସାମାଚାର୍ ଶୁଣାବାନାଘି ମଜ୍ରୀତି ମାନିଦ୍।
15ଲେକିନ୍ ଏନ୍ ଇନ୍ନୁନ୍ତି ଜାମା ହକ୍ଘି କାତ୍ଥାନ୍ ଅଣ୍ଟାହି ବେଭାର୍ନୁ ମାଲ୍ଲା ଅନ୍ଦ୍ରୁନ୍। ଆରୁ ଏନ୍ ନିହ୍ମାସ୍ତି ଏନ୍ଦ୍ରିନ୍ ହାଖ୍ଖନ୍ବୁଲି ଏନ୍ନେ ମାଲ୍ଲା ଲେଖ୍ନା। ଏଙ୍ଘା ଅନ୍ନାମହ୍ନାଘି ଲାଗାନ୍ ନିହ୍ମାସ୍ତି ଏନ୍ଦେର୍ହି ମା ହାଖ୍ଖର୍କା ଆଦ୍ ଏଙ୍ଘାଲାଗାନ୍ ବାଡ଼ାଇଘି କାତ୍ଥାଦ୍, ଏନ୍ଦେର୍ଗେକା ଏନ୍ ଏନ୍ଦେର୍ହି ମା ହୋଇକିରି ସୁସାମାଚାର୍ ଶୁଣାବାଚ୍କାନ୍। ଏନ୍ନେ ବାଡ଼ାଇ କାମ୍ନାତି ଯଦି ନେଦିନ୍ ଏଙ୍ଗାନ୍ ରୋକର୍ ତା ଏଙ୍ଘାଲାଗାନ୍ ଖିନା କାନାଦ୍ଦିନ୍ ବାନେଦ୍। 16ଏନ୍ ସୁସାମାଚାର୍ ମେନ୍ତନ୍, ତା ଇଦ୍ଘିଲାଗାନ୍ ଏନ୍ ବଡ଼୍ପଣି ମା ଏଦ୍ର୍ଦାନ୍, ଏନ୍ଦେର୍ଗେକା ଏଙ୍ଗାଗେ ଇ ନାଲ୍ଖୁନ୍ ଚିଚ୍କା ରାଇ। ଯଦି ଏନ୍ ସୁସାମାଚାର୍ ମା ମେନ୍ତନ୍, ତା ଇଦ୍ ଏଙ୍ଘାଲାଗାନ୍ କେତ୍କ ଖାରାପ୍ କାତ୍ଥାଦ୍। 17ଏନ୍ଦେର୍ଗେକା ଏନ୍ ନିଜର୍ ଇଚ୍ଛାତି ଇବନ୍ କାମନ୍ ତା ଏଙ୍ଗାଗେ ଇନାମ୍ ହାଖ୍ଖରି, ଆରୁ ଯଦି ନିଜର୍ ଇଚ୍ଛାତି ମା କାମନ୍, ହାଲେହି ପାର୍ମେଶ୍ୱାର୍ସ୍ ଏଙ୍ଗାଗେ ଇ ନାଲ୍ଖୁନ୍ ଚିଚ୍ଚକାଦାସ୍ ବୁଲି ସୋଚିକିରି ଏଙ୍ଗା କାମାଇନ୍ ଖାତ୍ରୋ। 18ତା ଏଙ୍ଘାଏ ଏନ୍ଦେର୍ ଇନାମ୍ ରାଇ? କା ଇଦ୍ ସୁସାମାଚାର୍ ଶୁଣାବାନାନୁ ଏନ୍ ଖ୍ରୀସ୍ତ୍କି ସୁସାମାଚାର୍ବନ୍ ବିନାଦାମ୍ଘି କାମନ୍ଚନ୍; ଏତ୍କତକ୍ କା ସୁସାମାଚାର୍ନୁ ଏକାଦ୍ ଏଙ୍ଘାଏ ହକ୍ ରାଇ, ଆବନ୍ ଏନ୍ ପୁରାପୁରୀ ନିୟମ୍ତି ନାଲ୍ଖୁନୁ ଅନ୍ଦରନ୍।
19ଆରୁ ଏନ୍ ଆଜାଦ୍ନୁ ରାଦାନ୍ ନେଖାହି ଗୁତ୍ତିୟା ମାଲ୍ଦାନ୍ ହାଲେହି ଏନ୍ ନିଜ୍କେନିଜ୍ବନ୍ ଜାମାର୍ଘି ଗୁତ୍ତିୟା କାମ୍ଚ୍କାଦାନ୍, ହୁଦ୍ଘିଲାଗାନ୍ ଢେର୍ ଆଲାରିନ୍ ପାର୍ମେଶ୍ୱାର୍ସ୍କି ଚାହାଗେ ଟାଣନ୍ ଅନ୍ଦରନ୍। 20ଏନ୍ତା ୟାହୁଦୀ ଜାମାରିନ୍ ପାର୍ମେଶ୍ୱାର୍ସ୍କି ଚାହା ଅନ୍ଦରାଗେ ୟାହୁଦୀର୍ଗେ ଅଣ୍ଟା ୟାହୁଦୀ ଲେଖା ମାନ୍ଚ୍କାନ୍। ଆରୁ କେତ୍କର୍ ୟାହୁଦୀ ନିୟମ୍ବନ୍ ମାନ୍ନାଏ, ଏନ୍ ୟାହୁଦୀ ନିୟମ୍ଘି କିୟାଁ ମାଲ୍ଲକାନିନ୍, ହାଲେହି ୟାହୁଦୀ ନିୟମ୍ଘି କିୟାଁ ଚାଲ୍ର୍ନା ବାଲାରିନ୍ ପାର୍ମେଶ୍ୱାର୍ସ୍କି ଚାହାଗେ ଅନ୍ଦରନ୍ ବୁଲି ୟାହୁଦୀ ନିୟମ୍ଘି କିୟାଁ ରାଚ୍କାନ୍। 21ଆରୁ ଏକାର୍ ନିୟମ୍ଘି କିୟାଁ ମା ରାନାଏ, ଆବ୍ଡ଼ାରିନ୍ ଏନ୍ ଜିତ୍ତାଗେ ଅଙ୍ଗନ୍ ହୁଦ୍ଘିଲାଗାନ୍ ଏନ୍ ଆବ୍ଡ଼ାର୍ ଲେଖା ମାନ୍ଚ୍କାନ୍, ହାଲେହି ଖ୍ରୀସ୍ତ୍କି ନିୟମ୍ଘି କିୟାଁ ରାନାଘି ଲାଗାନ୍ ଏନ୍ ଅସଲ୍ନୁ ପାର୍ମେଶ୍ୱାର୍ସ୍କି ନିୟମ୍ତି ଆଜାଦୀ ମାଲ୍କାନ୍। 22ଏନ୍ ବିଶ୍ୱାସ୍ନୁ କମ୍ଜୋର୍ ରୁ ଆଲାର୍ଗେ କମ୍ଜୋର୍ ଲେଖା ମାନ୍ଚ୍କାନ୍, ହୁଦ୍ଘିଲାଗାନ୍ କମ୍ଜୋର୍ ରୁ ଆଲାରିନ୍ ଜିତା ଅଙ୍ଗନ୍; ଆରୁ ଏନ୍ ଜାମା ଆଲାର୍ଘି ଲାଗାନ୍ ଜାମାକିଛି ମାନ୍ଚ୍କାନ୍, କା ଏସ୍କ୍ରିନ୍ଭି କେତ୍କ ଆଲାରିନ୍ ବାଛାବନ୍। 23ଏନ୍ ଇବ୍ଡ଼ା ଜାମାନ୍ ସୁସାମାଚାର୍ ଫାଏଲାଗେ କାମ୍ଦାନ୍। ହୁଦ୍ଘିଲାଗାନ୍ ସୁସାମାଚାର୍ନୁ ପାର୍ମେଶ୍ୱାର୍ସ୍କି କ୍ରିପାଦ୍ ଏଙ୍ଗାହି ହାଖ୍ଖର।
24ନିମ୍ ଆହ୍ଦାର୍ କା କୁଦିୟାରାନାନୁ ଭାଗ୍ହୁ ଜାମାର୍ କୁଦିୟାରାନାର୍ ଲେକିନ୍ ଇନାମ୍ ଅଣ୍ଟାସ୍କେ ଖାଲି ହାଖ୍ଖରିଦ୍। ନିମ୍ ଏନ୍ନେ କୁଦ୍ୟାରା କା ନିମ୍ ଜିତର୍। 25ଆରୁ ଅଣ୍ଟା-ଅଣ୍ଟା କୁସ୍ତି ଲାଡ଼ୁ ଆଲାର୍ ଲାଡ଼ାଗେ ମୁରୁକ୍ ସାପ୍ଡ଼ାରାନାଏ, ଇବ୍ଡ଼ାର୍ ତା ନାଶ୍ ମାନ୍ନାବାଲା ମୁକୁଟ୍ ହାଖ୍ଖାଗେ ଏନ୍ନେ କାମ୍ନାଏ। ଲେକିନ୍ ନାମ୍ ତା ନାଶ୍ ମା ମାନ୍ନାବାଲା ଆ ମୁକୁଟ୍ବନ୍ ହାଖ୍ଖାଗେ ଏନ୍ନେ କାମ୍ଦାତ୍। 26ହୁଦ୍ଘିଲାଗାନ୍ ଏନ୍ତା ଅଣ୍ଟା ବାନେ ସୋଚ୍ ଉଇୟିକିରି କୁଦ୍ୟାରାଦାନ୍। ଆରୁ ଏନ୍ ଅଣ୍ଟା କୁସ୍ତି ଲାଡ଼ୁନ୍ ହାୱାନୁ ଲାଡ଼୍ନା ଲେଖା ବେମତ୍ଲବ୍ ଏନ୍ଦେର୍ହି ମା କାମ୍ଦାନ୍। 27ଏନ୍ ନିଜର୍ ଶରୀର୍ବନ୍ କଷଟ୍ ଚିଦାନ୍ ଆବନ୍ କାବୁନୁ ଉଇଦାନ୍ ଏନ୍ ଇବନ୍ ଇଦ୍ଘିଲାଗାନ୍ କାମ୍ଦାନ୍ କା ଦୁସ୍ରାରିନ୍ ପ୍ରଚାର୍ କାମ୍ନାଘି ପାଛ୍ଲି ନିଜେ ଏନ୍ ଏନ୍ଦ୍ରିନ୍ ନିୟମ୍ତି ପାର୍ମେଶ୍ୱାର୍ସ୍କି ନଜର୍ନୁ ଲାଇଗ୍ ମା ଠାହ୍ରାରନ୍।
10ଇସ୍ରାଏଲ୍ ଆଲାର୍ଘି ଇତିହାସ୍ତି ଚେତାବାନା
1ହେ ଭାଇ ଆରୁ ବୁହୁଣୀ ଜାମାରୋ, ଏନ୍ ଚାହଁଦାନ୍ କା ନିମ୍ ଇବ୍ଡ଼ା କାତ୍ଥାଘି ବାରେନୁ ଆହା କା ନାହ୍ମାଏ ଜାମା ପୁର୍ଖାର୍ ବାଦ୍ଲିଘି କିୟାଁ ବାଛ୍ରିକିରି ଆବ୍ଡ଼ାର୍ ଲାଲ୍ ସାମ୍ଧୁର୍ ମାଝାନୁ ପାର୍ କାଟ୍ଟିୟାର୍। 2ଆରୁ ଆବ୍ଡ଼ାଜାମାରିନ୍ ବାଦ୍ଲିଘି କିଆଁ, ସାମ୍ଧୁର୍ଘି ମାଝାନୁ ମୁଶାସ୍କି ଚେଲାର୍ଘି ରୂପ୍ନୁ ଆସ୍ନାନ୍ ଚିଆକେର୍କିଚା। 3ଆନ୍ତିନ୍ ଆବ୍ଡ଼ାର୍ ପାର୍ମେଶ୍ୱାର୍ସ୍କି ଚିଚ୍ଚକା ଅନ୍ନାମହ୍ନାନ୍ ଅଣ୍ଡାର୍ ମଖ୍ଖାର୍। 4ଆରୁ ଆବ୍ଡ଼ାର୍ ପାର୍ମେଶ୍ୱାର୍ସ୍କି ଚିଚ୍ଚକା ଆମ୍ମୁନ୍ ହାପ୍ପିୟାର୍। ଆରୁ ତାହ୍ମାଗାନେ କାନାବାଲା ଚାଟ୍ଣିନ୍ତି ଆମ୍ମୁ ହାପ୍ପିୟାର୍ ଆ ଚାଟ୍ଣୀବଦ୍ ଖ୍ରୀସ୍ତ୍ ରାଚାସ୍। 5ଲେକିନ୍ ଆନ୍ନୁନ୍ତି ଢେର୍ ଆଲାର୍ସ୍ତି ପାର୍ମେଶ୍ୱାର୍ସ୍ ଖୁସ୍ ମା ରାଚାସ୍, ହୁଦ୍ଘିଲାଗାନ୍ ଆବ୍ଡ଼ାର୍ ମରୁଭୂମିନୁ କେଚ୍ଚାର୍ କେରାର୍।
6ଇ କାତ୍ଥାନ୍ ନାହ୍ମାଲାଗାନ୍ ନମୁନା ଠାହ୍ରାରାଚା ଏସ୍କେ କା ଆବ୍ଡ଼ାର୍ ଲାଲଚ୍ କାମ୍ଚାର୍, ଆନ୍ନେନ୍ ନାମ୍ ଖାରାପ୍ ଜିନିଷ୍ଘି ଲାଲଚ୍ ଆମ୍ବତ୍ କାମା; 7ଆବ୍ଡ଼ାର୍ଘି ଭିତର୍ନୁ କେତ୍କ ଲୋକ୍ ମୂର୍ତ୍ତୀ ପୂଜା କାମାଲିୟାର୍ ହନ୍ନେନ୍ ନାମ୍ ଆମ୍ୱତ୍ କାମା, ନେଖା ବାରେନୁ କା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ଆଲାର୍ ଅନାମହାଗେ ଲାଗାନ୍ ଅକ୍କିୟାର୍। ଆରୁ ରୀଜ୍ଝୁ ରଙ୍ଗ୍ କାମାଗେ ଉସ୍କାରାଚାର୍।” 8ଆବ୍ଡ଼ାର୍ଘି ଭିତର୍ତି ଢେର୍ ଆଲାର୍ ବେଭିଚାର୍ କାମ୍ଚାର୍ ଆରୁ ଅନ୍ଦୁଲ୍ନୁ ତେଇସ୍ ହାଜାର୍ ଆଲାର୍ କେଚ୍ଚାର୍ କେରାର୍। ହୁବ୍ଡ଼ାର୍ଘି ଲେଖା ନାମ୍ ବେଭିଚାର୍ ଆମ୍ବତ୍ କାମା। 9ଆରୁ ନାମ୍ ପ୍ରାଭୁସିନ୍ ବିଡ଼୍ଚେ ଆମ୍ବତ୍ ଏରା, ଏସ୍କେ କା ଆବ୍ଡ଼ାର୍ସ୍ତି ୟୋଁଲୋକ୍ ବିଡ଼୍ଚେ ଏରିୟାର୍ ଆରୁ ନେର୍ରୁଘି ପାର୍ମ୍ର୍ନାଘି ଲାଗାନ୍ କେଚ୍ଚାର୍ କେରାର୍। 10ନିମ୍ ଆମା କୁର୍ବୁର୍ରାର୍ ଏସ୍କେ କା ଆବ୍ଡ଼ାର୍ସ୍ତିନିନ୍ କେତ୍କ ଲୋକ୍ କାମାଲିୟାର୍, ହୁଦ୍ଘିଲାଗାନ୍ ନାଶ୍ କାମ୍ନାବାଲା ସରଗ୍ଦୂଁତ୍ ଆବ୍ଡ଼ାରିନ୍ ପିଟ୍ଟେଇଚା। 11ଇ ଜାମା କାତ୍ଥାଦ୍ ନମୁନାଘି ରୂପ୍ନୁ ଆବ୍ଡ଼ାର୍ଘି ମିଆଁ ଘାଟ୍ରା ଆରୁ ନାମାରିନ୍ ଚେତାବାନୀ ଚିନାଘି ଲାଗାନ୍ ଲେଖାକେର୍କିଚି ଏକାଦ୍ କା ଯୁଗ୍ଗୁଘି ଆଖ୍ରୀନୁ ଆତ୍ଲି। 12ହୁଦ୍ଘିଲାଗାନ୍ ଏକାସ୍ ଇ ସୋଚ୍ଦାସ୍, କା ଆସ୍ ମଜ୍ବୁତ୍ତି ଉଜ୍ଜକାଦାସ୍, ଆସ୍କେ ହୁସିୟାର୍ ରାନା କାତ୍ଥା କା ଆସ୍ ମା ଖାତ୍ର୍ନାସ୍। 13ନିମ୍ ଏକ୍ରିନ୍ ଏନ୍ନେ ବିଡ଼୍ଚେ ଏର୍ନାନୁ ମାଲ୍ଲା ଖାତ୍ରୁର୍, ଏକାନ୍ କା ଆଲାର୍ ସାହା ପଲ୍ଲନାଇନ୍, ପାର୍ମେଶ୍ୱାର୍ସ୍ ଏକ୍ଲାହି ମା ଆମ୍ବଦାସ୍, ଆସ୍ ନିହ୍ମା ସାହ୍ନା ଶକ୍ତିନ୍ତି ବାଗ୍ଗେ ନିମାନ୍ ବିଡ଼୍ଚେ ଏର୍ନାନୁ ମା ଟିଡ଼୍ଦାସ୍। ଆରୁ ବିଡ଼୍ଚେ ଏର୍ନାଘି ସାଙ୍ଗେ-ସାଙ୍ଗେନ୍ ଆସ୍ ଆସ୍ତି ଏସ୍କେ ଉର୍ଖର୍ ଆଦ୍ଘି ପାବୁ ଏଦ୍ଦାସ୍ କା ନିମ୍ ଆସ୍ତି ବାହ୍ରି ଉର୍ଖା ଅଙ୍ଗର୍।
ମୂର୍ତ୍ତୀ ପୂଜା ଆମା କାମା
14ହୁଦ୍ଘିଲାଗାନ୍ ହେ ଏଙ୍ଘାଏ ବିଶ୍ୱାସୀ ଭାଇ ଆରୁ ବୁହୁଣୀ ଜାମାରୋ, ନିମ୍ ମୂର୍ତ୍ତୀ ପୂଜାସ୍ତି ଗେଚ୍ଛା ରା। 15ଏନ୍ ନିମାନ୍ ବୁଦ୍ଧିୟାର୍ ସୋଚିକିରି ତେଙ୍ଗାଲ୍ଦାନ୍: ଏକାନ୍ ଏନ୍ ତେଙ୍ଗ୍ଦାନ୍, ଆଦ୍ ସତ୍ତୁଦ୍ କା ମାଲ୍ଲିଦ୍ ଆବନ୍ ନିମ୍ ନିଜେ ଯାଁଚ୍ କାମା। 16ଆରୁ ଆ ଧାନ୍ୟାବାଦ୍ଘି ଗିନାଦ୍, ଏକାଘି ମିଆଁ ନାମ୍ ଧାନ୍ୟାବାଦ୍ ଚିଦାତ୍, ଏନ୍ଦେର୍ ଆଦ୍ ଖ୍ରୀସ୍ତ୍କି ହେଁସୁଘି ଭାଗିଦାର୍ ମାଲ୍ଲିଦ୍? ଆ ଆସ୍ମାନ୍ ଏକାବନ୍ ନାମ୍ ଖିଣ୍ଡ୍ଦାତ୍, ଏନ୍ଦେର୍ ଆଦ୍ ଖ୍ରୀସ୍ତ୍କି ମେଦୁଘି ଭାଗିଦାର୍ ମାଲ୍ଲିଦ୍? 17ହୁଦ୍ଘିଲାଗାନ୍ ଅଣ୍ଟା ଖାଲି ଆସ୍ମା ରାଇ ଆରୁ ନାମ୍ହି, ଏକାତ୍କା ବାଗ୍ଗେ ରାଦାତ୍ ହାଲେହି ଅଣ୍ଟା ମେଦୁତ୍: ଏନ୍ଦେର୍ଗେକା ନାମ୍ ଜାମାତ୍ ଆ ଅଣ୍ଟା ଆସ୍ମାନୁ ଭାଗିଦାର୍ ମାନ୍ଦାତ୍। 18ଆ ଇସ୍ରାଏଲ୍ର୍ଘି ବାରେନୁ ସୋଚା, ଏକାର୍ ବଲୀ ଚାଢ଼ାବାଚ୍କା ଜିନିଷ୍ବନ୍ ମହ୍ଁନାଏ। ଏନ୍ଦେର୍ ଆବ୍ଡ଼ାର୍ ଆ ବେଦୀଘି ଭାଗିଦାର୍ ମାଲ୍ଲନାଏ? 19ହାଲେ ଏନ୍ ଏନ୍ଦେର୍ ତେଙ୍ଗ୍ଦାନ୍? ଏନ୍ଦେର୍ ଇଦ୍ କା ମୂର୍ତ୍ତୀଗେ ବଲୀ ଚିଚ୍କା ଅନ୍ନା ମହଁନାଦ୍ ଏନ୍ଦ୍ରିନ୍ ବିଶେଷ୍ ଉଇଦ୍, ଆରୁ ମୂର୍ତ୍ତୀଦ୍ ଏନ୍ଦ୍ରିନ୍ ବିଶେଷ୍ ଉଇଦ୍? 20ଲେକିନ୍ ଏଙ୍ଘା ଆଶ୍ରାତା ଇଦ୍ କା ପାର୍ମେଶ୍ୱାର୍ସ୍ସିନ୍ ମା ମାନ୍ନାବାଲା ଆଲାର୍ ଏକା ବଲୀ ଚିନାଏ, ଆବ୍ଡ଼ାର୍ ଆବନ୍ ପାର୍ମେଶ୍ୱାର୍ସ୍କି ଲାଗାନ୍ ମାଲ୍ଲା, ବରନ୍ ଭୁତ୍ତୁଘି ଲାଗାନ୍ ଚିନାଏ। ହୁଦ୍ଘିଲାଗାନ୍ ଏନ୍ ମା ଚାହଁଦାନ୍ କା ନିମ୍ ଭୁତ୍ତୁଘି ପୂଜାନୁ ଭାଗିଦାର୍ ମାନର୍। 21ନିମ୍ ପାରାମ୍ ପ୍ରାସାଦ୍ଘି ଅଙ୍ଗୁର୍ ରାସେବନ୍ ହାପ୍ପଦାର୍ ଆରୁ ଆସ୍ମାନ୍ ମହ୍ଦାର୍, ହୁଦ୍ଘିଲାଗାନ୍ ଭୁତ୍ତୁଗେ ଚାଢ଼ାବାଚ୍କା ଜିନିଷ୍ବନ୍ ନିମ୍ ମହାଁ ଅନା ପଲ୍ଲଦାରିନ୍। 22ଏନ୍ଦେର୍ ନାମ୍ ପ୍ରାଭୁସିନ୍ ଖୀସାବାତାଦାତ୍? ଏନ୍ଦେର୍ ନାମ୍ ଆସ୍ତି ତାକତ୍ ବାଲାତ୍?
ଜାମାବାକେନ୍ ପାର୍ମେଶ୍ୱାର୍ସ୍କି ମାଇନ୍ କାମତ୍
23ଜାମାକିଛିନ୍ କାମ୍ନାଘି ଛୁଟି ରାଇଦ୍, ଲେକିନ୍ ଜାମାକିଛିଦ୍ ବାନେଘି ଲାଗାନ୍ ମାଲ୍ଲିଦ୍। ଆରୁ ଜାମାକିଛିନ୍ କାମ୍ନାଘି ଛୁଟିତା ରାଇ, ବରନ୍ ଜାମାକିଛି ଦୁସ୍ରାର୍ଘି ଆତ୍ମିକ୍ ବାଢ଼ର୍ନାଘି ଲାଗାନ୍ ମାଲ୍ଲିଦ୍। 24ନିହ୍ମାସ୍ତିନିନ୍ ନେଦ୍ହି ନିଜର୍ ବାନେଘି ଲାଗାନ୍ ଖାଲି ଆମା ସୋଚା ବରନ୍ ନାନ୍ନାର୍ଘି ବାନେଘି ଲାଗାନ୍ହି ସୋଚା। 25ହାଟ୍ଟେନୁ ଏକା ଆହ୍ଡ଼ା ବିଁସା କାଇଦ୍ ଆବନ୍ ନିମ୍ ବିବେକ୍ଘି ଲାଗାନ୍ ଏନ୍ଦେର୍ହି ମା ମେନିକିରି ମହାଁ ଅଙ୍ଗର୍। 26ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ କା, “ଇ ଦୁନିଆଁ ଆରୁ ଇନ୍ନୁ ରାନାବାଲା ଜାମାକିଛିଦ୍ ପ୍ରାଭୁସ୍କିଦ୍।” 27ଆରୁ ନେଦିନ୍ ଅବିଶ୍ୱାସୀସ୍ ନିମାନ୍ ଅନାଗେ ତାଙ୍ଘା ଆଡ଼୍ପା ମେହ୍କାଦାସ୍ ତା, ଆରୁ ନିମ୍ କାଲା ବେଦ୍ଦର୍ ତା ନିମ୍ କାଲା। ଆରୁ ଏନ୍ଦ୍ରିନ୍ହି ନିମାଗେ ଅନାମହାଗେ ଚିଆକୋ ଆବନ୍ ଏନ୍ଦେର୍ହି ମା ମେନିକିରି ଅନର୍ମହର୍। 28ଲେକିନ୍ ନେଦିନ୍ ନିମାନ୍ ତେଙ୍ଗର୍ କା, “ଇଦ୍ ତା ମୂର୍ତ୍ତୀଗେ ବଲୀ ଚିଚ୍ଚକା ରାଇ,” ଆବନ୍ ଆମା ମହାଁ। ଆରୁ ନେରିନ୍ ନିମାନ୍ ତେଙ୍କାନାଏ ଆସ୍କି ସୋଚ୍ବିଚାର୍ଘି ଲାଗାନ୍ ନିମ୍ ଆମା ମହାଁ। 29ଆରୁ ନିହ୍ମାଏ ସୋଚ୍ବିଚାର୍ ଇଦ୍ କା ନାମ୍ ଏନ୍ଦ୍ରିନ୍ହି ମହାଁ ଅଙ୍ଗତ୍। ଲେକିନ୍ ଏନ୍ ନିହ୍ମା ବିବେକ୍ତା ସୋଚ୍ବିଚାର୍ଘି ବାରେନୁ ମାଲ୍ଲା ତେଙ୍ଗୁନ୍, ବରନ୍ ଦୁସ୍ରା ଏକାସ୍ ନିମାନ୍ ତେଙ୍କାଦାସ୍, ଆସ୍କି ବିବେକ୍ତା ସୋଚ୍ବିଚାର୍ଘି ବାରେନୁ ତେଙ୍ଗାଲ୍ଦାନ୍। ଆରୁ ନେଦିନ୍ ଆସ୍କି ସୋଚ୍ବିଚାର୍ତି ନାମାନ୍ ଦୋଷୀ ମା ଠାହ୍ରାନା କାତ୍ଥା କା, ନାମ୍ ଇବନ୍ ଅନିମହିକିରି ଦୋଷ୍ କାମାଲ୍ଦାତ୍। 30ଆରୁ ନାମ୍ ଯେତ୍କହି ଅନ୍ଦାତ୍ ମହ୍ଦାତ୍, ତା ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିଇକିରି ମହ୍ଦାତ୍। ହୁଦ୍ଘିଲାଗାନ୍ ଏକା ଅନ୍ନାମହ୍ନାଘି ଲାଗାନ୍ ନାମ୍ ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିଦାତ୍, ଆବନ୍ ଅଣ୍ଡ୍କୁନ୍ ମକ୍କୁନ୍ ନେଦ୍ହି ନାହ୍ମା ମିଆଁ ଦୋଷ୍ ମା ଚିନା କାତ୍ଥା।
31ହୁଦ୍ଘିଲାଗାନ୍ ନିମ୍ ଅନା ମହାଁ, ଚାହେ ହାପ୍ପା ଆରୁ ଏନ୍ଦ୍ରିନ୍ହି କାମା, ଆବ୍ଡ଼ା ଜାମାନୁ ପାର୍ମେଶ୍ୱାର୍ସ୍କିହି ମାଇନ୍ ମାନ୍ନା କାତ୍ଥା। 32ୟାହୁଦୀର୍ଗେ ଚାହେ ବିନାୟାହୁଦୀର୍ଗେ ଆରୁ ଏକାର୍ ପାର୍ମେଶ୍ୱାର୍ସ୍କି ଆଲାର୍ଘି ମଣ୍ତ୍ଲୀଘି ଲାଗାନ୍, ଆବ୍ଡ଼ାର୍ଘି ଲାଗାନ୍ ଏକ୍ଲାହି ରୋକ୍ଟୋକ୍ ଆମାମାନା। 33ଏସ୍କେ ଏନ୍ହି ଜାମା କାତ୍ଥାନୁ ଜାମା ଆଲାରିନ୍ ଖୁସ୍ ଉଇୟାଗେ କୋଶିଷ୍ କାମ୍ଦାନ୍ ଉଇଦାନ୍, ଆରୁ ନିଜର୍ ଫାଏଦାଘି ଲାଗାନ୍ ଏକ୍ଲାହି ମା ଚାହଁଦାନ୍, ଲେକିନ୍ ଦୁସ୍ରାର୍ଘି ଫାଏଦାଘି ଲାଗାନ୍ କୋଶିଷ୍ କାମ୍ଦାନ୍। ତାକା ଆବ୍ଡ଼ାର୍ ପାପ୍ତି ବାଛ୍ରର୍।
111ନିମ୍ ଏଙ୍ଘା ଲେଖା ଜୀବନ୍ ବିତାବା, ଏସ୍କେ ଏନ୍ ଖ୍ରୀସ୍ତ୍କି ଲେଖା ଜୀବନ୍ ବିତାବାଲ୍ଦାନ୍।
କୁକ୍କୁନ୍ ଡାବ୍ର୍ନା
2ହେ ଭାଇ ଆରୁ ବୁହୁଣୀ ଜାମାରୋ, ନିମ୍ ଏଙ୍ଗାନ୍ ଜାମା କାତ୍ଥାନୁ ମନେ କାମ୍ଦାର୍; ଆରୁ ଏକାନ୍ ଏନ୍ ନିମାନ୍ ଶୁଣାବାଚ୍କାଦାନ୍, ଆବନ୍ ନିମ୍ କାମ୍ତେ ବାରାଲ୍ଦାର୍ ହୁଦ୍ଘିଲାଗାନ୍ ଏନ୍ ନିମାନ୍ ନାମେ କାମ୍ଦାନ୍। 3ଲେକିନ୍ ଏନ୍ ଚାହାଁଲ୍ଦାନ୍ କା, ଇବନ୍ ନିମ୍ ଆହା କା, ଜାମା ମାର୍ଦ୍ନାସ୍ଘି ମୁଖ୍ୟା ଖ୍ରୀସ୍ତ୍, ମାଏକିନିଆଁଘି ମୁଖ୍ୟା ତାହ୍ମା ମାର୍ଦ୍ନାସ୍, ଆରୁ ଖ୍ରୀସ୍ତ୍କି ମୁଖ୍ୟା ପାର୍ମେଶ୍ୱାର୍ସ୍। 4ହୁଦ୍ଘିଲାଗାନ୍ ଏକା ଆଲାସ୍ କୁକ୍କୁନୁ ଡାବ୍ରିକିରି ବିନ୍ତି କାମ୍ଦାସ୍ ଚାହେ ଭବିଷତ୍ କାତ୍ଥା ତେଙ୍ଗ୍ଦାସ୍ ତା ଆସ୍ ତାଙ୍ଘା କୁକ୍କୁଘି ମତ୍ଲବ୍ ଖ୍ରୀସ୍ତ୍କି ଅପ୍ମାନ୍ କାମ୍ଦାସ୍। 5ହନ୍ନେନ୍ ଏକା ଆଲିଦ୍ କୁକ୍କୁ ମା ଡାବ୍ରିକିରି ବିନ୍ତି କାମିଦ୍ ଚାହେ ଭବିଷତ୍ କାତ୍ଥା ତେଙ୍ଗିଦ୍, ତା ଆଦ୍ହି ତାଙ୍ଘା କୁକ୍କୁଘି ମତ୍ଲବ୍ ତାଙ୍ଘା ଆଲାସ୍କି ଅପ୍ମାନ୍ କାମିଦ୍। ଏନ୍ଦେର୍ଗେକା ଆ ଆଲିଦ୍ ନିଜର୍ କୁକ୍କୁନ୍ ଠୁର୍ଲି ମାନ୍ଚ୍କା ଲେଖା ରାଇ। 6ହୁଦ୍ଘିଲାଗାନ୍ ଅଣ୍ଟା ଆଲିଦ୍ ତାଙ୍ଘା କୁକ୍କୁନ୍ ମା ଡାବ୍ରି ତା ଆଦ୍ ତାଙ୍ଘା ଚୁଟ୍ଟିନ୍ ଠୁର୍ଲି ନାନ୍ନାଦ୍, ଆରୁ ଆ ଆଲିଘିଲାଗାନ୍ ଠୁର୍ଲି ମାନ୍ନାଦ୍ ଲାଜ୍ଜେଘି କାତ୍ଥାଦ୍ ତା ଆଦ୍ଗେ ତାଙ୍ଘା କୁକ୍କୁନ୍ ଡାବ୍ର୍ନା କାତ୍ଥା।
7ଲେକିନ୍ ମାର୍ଦ୍ନାର୍ଘି ଲାଗାନ୍ କୁକ୍କୁନ୍ ଡାବ୍ର୍ନାଦ୍ ଠିକ୍ ମାଲ୍ଲିଦ୍, ଏନ୍ଦେର୍ଗେକା ମାର୍ଦ୍ନାରିନ୍ ପାର୍ମେଶ୍ୱାର୍ସ୍ ତାଙ୍ଘା ଲେଖା ବାନାବାଚ୍କାଦାସ୍ ଆରୁ ଆବ୍ଡ଼ାର୍ଘି ଦ୍ୱାର୍ନୁ ପାର୍ମେଶ୍ୱାର୍ସ୍କେ ବାଗ୍ଗେ ମାଇନ୍ ହାଖ୍ଖରିଦ୍। ଲେକିନ୍ ମାଏକିନିଆଁର୍ଗେ ତାହ୍ମା କୁକ୍କୁନ୍ ଡାବ୍ର୍ନା କାତ୍ଥା ଏନ୍ଦେର୍ଗେକା ମାଏକିନିଆଁର୍ଘି ଦ୍ୱାର୍ନୁ ତାହ୍ମା ମାର୍ଦ୍ନାର୍ଗେ ବାଗ୍ଗେ ମାଇନ୍ ହାଖ୍ଖରିଦ୍। 8ଏନ୍ଦେର୍ଗେକା ମାର୍ଦ୍ନାସିନ୍ ମାଏକିନିଆଁସ୍ତି ମାଲ୍ଲା ବାନାବୁର୍, ଲେକିନ୍ ମାଏକିନିଆଁନ୍ ମାର୍ଦ୍ନାସ୍ତି ବାନାବାଚ୍କା ରାଇ। 9ଆରୁ ମାର୍ଦ୍ନାସିନ୍ ମାଏକିନିଆଁଘି ଲାଗାନ୍ ମାଲ୍ଲା କାମାକୁ, ବରନ୍ ମାଏକିନିଆଁନ୍ ମାର୍ଦ୍ନାସ୍କି ଲାଗାନ୍ କାମା କେର୍କିଚି। 10ହୁଦ୍ଘିଲାଗାନ୍ ମାଏକିନିଆଁର୍ଗେ ତାହ୍ମା କୁକ୍କୁନ୍ ଡାବ୍ର୍ନା କାତ୍ଥା, ଏନ୍ଦେର୍ଗେକା ସରଗ୍ ଦୂଁତ୍ର୍ହି ନାମାନ୍ ଏରାଲ୍ନାଏ। ଆରୁ କୁକ୍କୁନ୍ ଡାବ୍ର୍ନାତି ମାଏକିନିଆଁର୍ ଇବନ୍ ଏଦ୍ନାଏ କା, ଆବ୍ଡ଼ାର୍ ତାହ୍ମା ମାର୍ଦ୍ନାର୍ଘି କିୟାଁ ରାନାଏ।
11ହାଲେହି ପ୍ରାଭୁସ୍କି ନଜର୍ନୁ ମାଏକିନିଆଁଦ୍ ନିଜର୍ ମାର୍ଦ୍ନାର୍ଘି ବିନା ଏନ୍ଦେର୍ହି ମାଲ୍ଲିଦ୍ ଆରୁ ମାର୍ଦ୍ନାସ୍ହି ନିଜର୍ ମାଏକିନିଆଁଘି ବିନା ଏନ୍ଦେର୍ହି ମାଲ୍ଦାସ୍। 12ଯଦି ମାଏକିନିଆଁନ୍ ମାର୍ଦ୍ନାସ୍ତି ସିର୍ଜାକେରା, ତା ମାର୍ଦ୍ନାସ୍କି ଜନମ୍ ମାଏକିନିଆଁସ୍ତି ମାନିଦ୍ ଆରୁ ଜାମାକିଛିଘି ସିର୍ଜାନାବାଲାସ୍ ପାର୍ମେଶ୍ୱାର୍ସ୍। 13ନିମ୍ ନିଜେ ସୋଚା କା ଅଣ୍ଟା ଆଲିଗେ କୁକ୍କୁନ୍ ମା ଡାବ୍ରିକିରି ପାର୍ମେଶ୍ୱାର୍ସ୍ସାନ୍ ବିନ୍ତି କାମ୍ନାଦ୍ ବାନେ ଏଥ୍ରି କାଁଏ? 14ଆରୁ ନିମ୍ ଜାମାର୍ ଆହ୍ଦାର୍ କା, ଯଦି ଅଣ୍ଟା ଆଲାସ୍ ଲାମ୍ବା ଚୁଟ୍ଟି ଉଇୟସ୍ତା ଆସ୍କି ଲାଗାନ୍ ଲାଜ୍ଜେଘି କାତ୍ଥାଦ୍। 15ଲେକିନ୍ ଯଦି ଅଣ୍ଟା ଆଲିଦ୍ ଲାମ୍ବା ଚୁଟ୍ଟି ଉଇୟ ତା ଆଦ୍ ଆଦ୍ଘି ଲାଗାନ୍ ଶୋଭା ଏଥ୍ରିଦ୍, ଏନ୍ଦେର୍ଗେକା ଚୁଟ୍ଟି ଆଦ୍ଗେ କୁକ୍କୁନ୍ ଡାବାଗେନିନ୍ ପାର୍ମେଶ୍ୱାର୍ସ୍ ଚିଚ୍କାଦାସ୍। 16ଆରୁ ଯଦି ଇଦ୍ଘି ବାରେ ନେଦିନ୍ କାଁଟ୍ଛାଁଟ୍ କାମା ବେଦ୍ଦ୍ନାଏ ତା ଆସିନ୍ ଏନ୍ ତେଙ୍ଗାଲ୍ଦାନ୍ କା ଇଦ୍ଘିନ୍ତି ଭିନେ ଏହ୍ମାଏ ରୀତିନୀତି ମାଲ୍ଲାଦିନ୍ ଆରୁ ପାର୍ମେଶ୍ୱାର୍ସ୍କି ଦୁସ୍ରା ମଣ୍ଡ୍ଲୀନୁ ହି ମାଲ୍ଲାଦିନ୍।
ପ୍ରାଭୁସ୍କି ଭୋଜ୍
17ଆକ୍କୁନ୍ ଏନ୍ ଏକା କାତ୍ଥାନ୍ ନିମାନ୍ ତେଙ୍ଗ୍ନାବାଲା ରାଦାନ୍, ଇଦ୍ଘିଲାଗାନ୍ ଏନ୍ ନିମାନ୍ ନାମେ ମା କାମ୍ଦାନ୍, ଯେତ୍କବାକେନ୍ ନିମ୍ ଅନ୍ଠାଣ୍ ଠୁଡ଼ିୟାରାଦାର୍, ଆଦ୍ ନିହ୍ମା ବାନେଘି ଲାଗାନ୍ ମାଲ୍ଲା, ଲେକିନ୍ ନିହ୍ମାଏ ନୁକ୍ସାନ୍ଘି ଲାଗାନ୍ ମାନିଦ୍। 18ପହ୍ଲେ କାତ୍ଥାଦ୍ ତା ଇଦ୍ କା ଏନ୍ ମେନ୍ଚ୍କାଦାନ୍ କା ଯେତ୍କବାକେନ୍ ନିମ୍ ମଣ୍ଡ୍ଲୀନୁ ଅନ୍ଠାଣ୍ ଠୁଡ଼ିୟାରାଦାର୍, ହତ୍କବାକେନ୍ ନିହ୍ମା ମାଝାନୁ ଭାଗ୍-ଭାଗ୍ ମାନ୍ଦାର୍ କାଦାର୍। ଆରୁ ଏନ୍ ବିଶ୍ୱାସ୍ କାମ୍ଦାନ୍ କା ଇନ୍ନୁ କାଟେ-କାଟେ ସତ୍ତୁ ରାଇ। 19ହଁ, ହଁ ନିମ୍ ବାନେନ୍ କାମାଲ୍ଦାର୍! ହୁଦ୍ଘିଲାଗାନ୍ ଏନ୍ନେନ୍ କାମ୍ତେ ରା, ମାଲ୍ଲାହାଲେ ଏସ୍କେ ଆହ୍ତାରୋକା ନିହ୍ମା ମାଝାନୁ ଏକାର୍ ସତ୍ତୁ ବିଶ୍ୱାସୀର୍ ଆରୁ ଏକାର୍ ମାଲ୍ନାର୍।
20ଆରୁ ଯେତ୍କବାକେନ୍ ନିମ୍ ଏକା ରୀତିତି ଭୋଜ୍ ମହାଁଗେ ଅନ୍ଠାଣ୍ ଠୁଡ଼ିୟାରାଦାର୍ ଆବନ୍ ପ୍ରାଭୁଭୋଜ୍ ମହ୍ଁନା ତେଙ୍ଗା ମା କାଇ। 21ଏନ୍ଦେର୍ଗେକା ଅନ୍ନାମହ୍ନା ବାକେନ୍ ନିମ୍ ଏକ୍ ଦୁସ୍ରାରିନ୍ ମା ହୋଖିକିରି ଆଘ୍ଲି ନିଜର୍ ଅନ୍ନାମହ୍ନାନ୍ ପୁରାପୁରୀ ହାପ୍ପଦାର୍ଅନ୍ଦାର୍ ଚିଦାର୍। ହୁଦ୍ଘିଲାଗାନ୍ କେତ୍କ ଆଲାର୍ ଆଖ୍ରୀନୁ କିଡ଼ା ଖିନାଏ ଆରୁ କେତ୍କ ଆଲାର୍ ଉଙ୍ଖନାଏ କାନାଏ। 22ଏନ୍ଦେର୍ ଅନାମହାଗେ ନିହ୍ମା ଆଡ଼୍ପାନୁ ମାଲ୍ଲାଦିନ୍ କାଁଏ? ମାଲ୍ଲାହାଲେ ନିମ୍ ନିହ୍ମା ବାରେନୁ ଖାଲି ସୋଚିକିରି ପାର୍ମେଶ୍ୱାର୍ସ୍କି ଚାଜ୍ଜକା ଆଲାରିନ୍ ହିନିସ୍ତା ମା କାମ୍ଦାର୍ କାଁଏ? ଆରୁ ଏକା ଗରୀବ୍ ବିଶ୍ୱାସୀ ଆଲାର୍ସାନ୍ ଏନ୍ଦେର୍ହି ମାଲ୍ଲାଦିନ୍ ଆବ୍ଡ଼ାରିନ୍ ନିମ୍ ମା ଲାଜର୍ତାଦାର୍ କାଁଏ? ଇଦ୍ଘି ବାରେନୁ ଏନ୍ ନିମାନ୍ ଏନ୍ଦେର୍ ତେଙ୍ଗନ୍? ଇଦ୍ଘିଲାଗାନ୍ ଏନ୍ ନିହ୍ମାଏ ନାମେ କାମନ୍ କାଁଏ? ଏକ୍ଲାହି ମାଲ୍ଲା ଇଦ୍ଘିଲାଗାନ୍ ଏନ୍ ନିହ୍ମାଏ ନାମେ ମା କାମ୍ଦାନ୍।
23ଏନ୍ଦେର୍ଗେକା ପ୍ରାଭୁସ୍ ଏକାନ୍ ଏଙ୍ଗାନ୍ ଶିଖାବାଚାସ୍, ଆବନ୍ ଏନ୍ ନିମାନ୍ ତେଙ୍ଗାଲ୍ଦାନ୍। ଆବଦ୍ ଇଦ୍ କା, ଏକା ମାଁହା ପ୍ରାଭୁ ଯୀଶୁସିନ୍ ପିଟାଗେ ଧାର୍ତାଚାର୍, ହୁ ମାଁହାନୁ ଆସ୍ ଅଣ୍ଟା ଆସ୍ମା ଅଚ୍ଚାସ୍, 24ଆରୁ ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିଇକିରି ଆବନ୍ ଖିଣ୍ଡିୟାସ୍ ଆରୁ ତେଙ୍ଗିୟାସ୍, “ଇବନ୍ ମହାଁ ଇଦ୍ ଏଙ୍ଘା ମେଦୁଦ୍ ଏକାଦ୍ କା ନିହ୍ମା ଲାଗାନ୍ ଚିଆ କାଲିଦ୍, ଏଙ୍ଗାନ୍ ମନେ କାମାଗେ ଏନ୍ନେନ୍ କାମ୍ତେ ରା।” 25ଏନ୍ନେନିନ୍ ଆସ୍ ଆସ୍ମା ଅଚ୍ଚକା ଘି ପାଛ୍ଲି ଅଙ୍ଗୁର୍ ରାସେତି ନିନ୍ଦ୍କା ଗିନାନ୍ ଅଚ୍ଚାସ୍ ଆରୁ ତେଙ୍ଗିୟାସ୍, “ଇ ଅଙ୍ଗୁର୍ ରାସେଦ୍ ଏଙ୍ଘା ହେଁସୁଘି ପୁନା ନିୟମ୍ଦ୍; ଯେତ୍କବାକେନ୍ ଇବନ୍ ହାପ୍ପର୍, ତା ଏଙ୍ଗାନ୍ ମନେ ଉଇନାଘି ଲାଗାନ୍ ଇବନ୍ କାମ୍ତେ ରା।” 26ହୁଦ୍ଘିଲାଗାନ୍ ଏନ୍ ପାଉଲୁସ୍ ନିମାନ୍ ତେଙ୍ଗାଲ୍ଦାନ୍ କା, ଯେତ୍କଥର୍ ନିମ୍ ଇ ଆସ୍ମାନ୍ ମହ୍ଦାର୍ ଆରୁ ଅଙ୍ଗୁର୍ ରାସେବନ୍ ହାପ୍ପଦାର୍, ହତ୍କ ଥର୍ ନିମ୍ ପ୍ରାଭୁସ୍କି ଖିନାଘି ବାରେନୁ ଦୁସ୍ରାରିନ୍ ତେଙ୍ଗ୍ଦାର୍। ଆରୁ ଆସ୍କି ଆରୁଅହନ୍ ବାର୍ନାତକ୍ ନିମ୍ ଇବନ୍ ତେଙ୍ଗ୍ତେ ରାଦାର୍।
27ହୁଦ୍ଘିଲାଗାନ୍ ନେଦିନ୍ ପ୍ରାଭୁଭୋଜ୍ତା ଆସ୍ମାନ୍ ଚାହେ ଅଙ୍ଗୁର୍ ରାସେବନ୍ ବାନେ ନିୟମ୍ତି ମା ଅନ୍ଦାସ୍ ମହଁଦାସ୍, ତା ଆସ୍ ପ୍ରାଭୁସ୍କି ମେଦୁ ଆରୁ ଆସ୍କି ହେଁସୁଘି ମିଆଁ ଦୋଷୀ ଠାହ୍ରସ୍। 28ହୁଦ୍ଘିଲାଗାନ୍ ନିମ୍ ପହ୍ଲେ ନିଜ୍କେନିଜ୍ ଯାଁଚରା, ଆରୁ ଆଦ୍ଘି ପାଛ୍ଲି ନିମ୍ ପ୍ରାଭୁଭୋଜ୍ତା ଆସ୍ମାନ୍ ମହାଁ ଆରୁ ଗିନାନୁ ଅଙ୍ଗୁର୍ ରାସେନ୍ ହାପ୍ପା। 29ପ୍ରାଭୁସ୍ ନାହ୍ମାଲାଗାନ୍ ଦୁଃଖୁ ଉଠାବାଇକିରି ନିଜର୍ ଜୀବନ୍ ଚିଚ୍ଚଚାସ୍ ଆଦ୍ଘି ମହତ୍ତ୍ଵବନ୍ ମା ବୁଝ୍ରିକିରି ଯଦି ନେରିନ୍ ପ୍ରାଭୁଭୋଜ୍ ମହ୍ଁନାଏ ତା ଆବ୍ଡ଼ାର୍ ନିଜର୍ ମିଆଁ ପାର୍ମେଶ୍ୱାର୍ସ୍କି ଦଣ୍ଡ୍ ଅନ୍ଦ୍ରର୍ନାଏ। 30ହୁଦ୍ଘିଲାଗାନ୍ ତା ନିହ୍ମାସ୍ତି ଢେର୍ ଆଲାର୍ ବେମାର୍ ଆରୁ କମ୍ଜୋର୍ ରାନାଏ, ଆରୁ ଢେର୍ ଆଲାର୍ କେଚ୍ଚାର୍ କେର୍କାନାଏ। 31ଲେକିନ୍ ଯଦି ନାମ୍ ନିଜ୍କେନିଜ୍ବନ୍ ବାନେକିରି ଯାଁଚ୍ କାମତ୍ନେ ତା ନାମାଗେ ପାର୍ମେଶ୍ୱାର୍ସ୍କି ଦଣ୍ଡ୍ ସାହା ମା ଖାତ୍ରଦ୍ନେ। 32ଆରୁ ନାମ୍ ଦୁନିଆଁ ଗାନେ ଦୋଷୀ ମା ଠାହ୍ରାରତ୍, ହୁଦ୍ଘିଲାଗାନ୍ ପ୍ରାଭୁସ୍ ନାମାନ୍ ସୁଧ୍ରାଗେ ଦଣ୍ଡ୍ ଚିଦାସ୍।
33ହୁଦ୍ଘିଲାଗାନ୍ ହେ ଏଙ୍ଘାଏ ଭାଇ ଆରୁ ବୁହୁଣୀ ଜାମାରୋ, ଯେତ୍କବାକେନ୍ ନିମ୍ ପ୍ରାଭୁଭୋଜ୍ ମହାଁଗେ ଲାଗାନ୍ ଅନ୍ଠାଣ୍ ଠୁଡ଼ିୟାରାଦାର୍ ତା ଏକ୍ ଦୁସ୍ରାରିନ୍ ହଖ୍ଖା। 34ଆରୁ ନେକ୍ରିନ୍ଗେ ସତ୍ତୁନିନ୍ କିଡ଼ା ଲାଗ୍ଗାଲ୍କିରୋତା ଆସ୍କେ ଆଡ଼୍ପାନୁ ଅନ୍ନା କାତ୍ଥା। ତାକା ନିମ୍ ଅନ୍ଠାଣ୍ ଠୁଡ଼ିୟାରା ଅଙ୍ଗର୍ ଆରୁ ପାର୍ମେଶ୍ୱାର୍ସ୍ ନିହ୍ମାଏ ନ୍ୟାୟ କାମିକିରି ନିମାଗେ ଦଣ୍ଡ୍ ମା ଚିୟସ୍।
ଆରୁ ଯେତ୍କବାକେନ୍ ବାରନ୍, ତା ହତ୍କବାକେନ୍ ବାକି କାତ୍ଥାଗୁଠିନ୍ ଏନ୍ ନିମାନ୍ ତେଙ୍ଗନ୍।
12ପାବିତାର୍ ଆତ୍ମାଘି ତାର୍ତି ବାର୍ଦାନ୍
1ହେ ଭାଇ ଆରୁ ବୁହୁଣୀ ଜାମାରୋ, ଆକ୍କୁନ୍ ଏନ୍ ମା ଚାହଁଦାନ୍ କା ନିମ୍ ପାବିତାର୍ ଆତ୍ମାଘି ଚିଚ୍କା ବାର୍ଦାନ୍ଘି ବାରେନୁ ବାଲ୍ଲୁର୍ ଲେଖା ରର୍। 2ଆରୁ ନିମ୍ ନିଜେତା ଆହ୍ଦାର୍ କା ଯେତ୍କବାକେନ୍ ନିମ୍ତା, ପାର୍ମେଶ୍ୱାର୍ସିନ୍ ବାଲ୍ଲକାଚ୍କାର୍, ହତ୍କବାକେନ୍ ନିମ୍ କାତ୍ଥା କାଚ୍ନେଖ୍ରା ପଲ୍ଲନା ମୂର୍ତ୍ତୀତାରା ଏସ୍କେ ତେଙ୍ଗାଲିୟାର୍, ଆନ୍ନେ କାମାଲ୍କାର୍। 3ହୁଦ୍ଘିଲାଗାନ୍ ଆକ୍କୁନ୍ ଏନ୍ ନିମାନ୍ ତେଙ୍ଗାଲ୍ଦାନ୍ କା, ଯଦି ନେଦିନ୍ ପ୍ରକୃତ୍ନୁ ପାର୍ମେଶ୍ୱାର୍ସ୍କି ପାବିତାର୍ ଆତ୍ମାଘି ଆଗୁୱାଇତି ତେଙ୍ଗ୍ନାବାଲାସ୍ ନେରିନ୍ ଇବନ୍ ମା ତେଙ୍ଗ୍ଦାସ୍ କା, “ଯୀଶୁସ୍ ସାର୍ପାରାନାସ୍” ଆରୁ ପାବିତାର୍ ଆତ୍ମାଘି ଦ୍ୱାର୍ନୁ ତେଙ୍ଗ୍ନା ବାଲାସିନ୍ ଆମ୍ବିକିରି ନା ତା ନେଦିନ୍ ଇବନ୍ ତେଙ୍ଗା ଅଙ୍ଗର୍ କା, “ଯୀଶୁସ୍ସିନ୍ ପ୍ରାଭୁସ୍।”
4ବାର୍ଦାନ୍ତା ଭିନେ-ଭିନେ ରାଇ, ଲେକିନ୍ ପାବିତାର୍ ଆତ୍ମାତା ଅଣ୍ଟା ରାଇ। 5ଆରୁ ନାମ୍ ପାର୍ମେଶ୍ୱାରସ୍କି ସେବା ଭିନେ-ଭିନେ ରକମ୍ନୁ କାମ୍ଦାତ୍, ଲେକିନ୍ ଇବ୍ଡ଼ାଜାମାନୁ ଅଣ୍ଟା ଖାଲି ପ୍ରାଭୁସ୍କି ସେବା କାମ୍ଦାତ୍। 6ହନ୍ନେନିନ୍ ନାମ୍ ଜାମାତ୍ ଭିନେ-ଭିନେ ନାଲ୍ଖୁ କାମ୍ଦାତ୍, ଲେକିନ୍ ଇବ୍ଡ଼ା ଜାମା ନାଲ୍ଖୁନୁ ଅଣ୍ଟା ଖାଲି ପାର୍ମେଶ୍ୱାର୍ସିନ୍ ନାହ୍ମାଏନୁ ନାଲ୍ଖୁ କାମ୍ଦାସ୍ ଆରୁ ଅର୍ତୁ ଅର୍ତୁର୍ଘି ନାଲ୍ଖୁନୁ ଆସିନ୍ ମଦେତ୍ କାମ୍ଦାସ୍। 7ଆରୁ ଜାମାର୍ଘି ବାନେଘି ଲାଗାନ୍ ଅର୍ତୁ ଅର୍ତୁର୍ଗେ ପାବିତାର୍ ଆତ୍ମାଘି ଅଣ୍ଟା-ଅଣ୍ଟା ବାର୍ଦାନ୍ ହାଖ୍ଖର୍କିଚି। 8ନେକା-ନେକାଗେ ବୁଦ୍ଧିତି ତେଙ୍ଗାଗେ ବାର୍ଦାନ୍ ହାଖ୍ଖର୍କିଚି, ତା ଆରୁ ନେକା-ନେକାଗେ ବୁଝ୍ରାଗେ ଶକ୍ତି ହାଖ୍ର୍କିଚି, ଲେକିନ୍ ଇ ଯୋଡ଼େ ବାର୍ଦାନ୍ବନ୍ ଆ ଅଣ୍ଟା ଆତ୍ମାଦିନ୍ ଚିଚ୍ଚକିଚି। 9ହନ୍ନେନ୍ ନେକା-ନେକାଗେ ଆ ଆତ୍ମାଦିନ୍ ବିଶ୍ୱାସ୍ କାମ୍ନାଘି ବାର୍ଦାନ୍ ଚିଚ୍ଚକିଚି, ତା ଆରୁ ନେକା-ନେକାଗେ ବେମାର୍ଗୁଠିନ୍ତି ବାନେ କାମ୍ନାଘି ବାର୍ଦାନ୍ ଚିଚ୍ଚକିଚି। 10ଆରୁ ନେକା-ନେକାଗେ ଅଦ୍ଭୁତ୍ ନାଲଖୁ କାମାଗେ ବାର୍ଦାନ୍ ହାଖ୍ଖର୍କିଚି, ଆରୁ ନେକା-ନେକା ଭବିଷତ୍ କାତ୍ଥା ତେଙ୍ଗ୍ନାଘି ବାର୍ଦାନ୍ ହାଖ୍ଖର୍କିଚି ଆରୁ ନେକା-ନେକା ଖାରାପ୍ ଆରୁ ବାନେ ଆତ୍ମାବନ୍ ଚିହ୍ନନାଘି ବାର୍ଦାନ୍ ହାଖ୍ଖର୍କିଚି। ଆରୁ ନେର୍-ନେର୍ ଏକା ଭାଷାନ୍ ମାଲ୍ଲା ଶିଖ୍ରୁର୍ ଆ ଭାଷାନ୍ ତେଙ୍ଗାଗେ ବାର୍ଦାନ୍ ହାଖ୍ଖର୍କିଚିତା ଆରୁ ନେକା-ନେକା ଭାଷାଘି ମତ୍ଲବ୍ ତେଙ୍ଗାଗେ ବାର୍ଦାନ୍ ହାଖ୍ଖର୍କିଚି। 11ଆରୁ ଇବ୍ଡ଼ା ଜାମା ବାର୍ଦାନ୍ ଆ ଅଣ୍ଟା ଖାଲି ପାବିତାର୍ ଆତ୍ମାଘି ନାଲ୍ଖୁଦ୍। ଆରୁ ଆଦ୍ ଅର୍ତୁ-ଅର୍ତୁ ବିଶ୍ୱାସୀର୍ଗେ ତାଙ୍ଘା ଇଚ୍ଛାତି ଭିନେ-ଭିନେ ବାର୍ଦାନ୍ ଚିଇଦ୍।
ଅଣ୍ଟା ମେଦୁଦ୍ ଆରୁ ଅଙ୍ଗଦ୍ ବାଗ୍ଗେ
12ଏସ୍କେ କା ନାହ୍ମା ମେଦୁଦ୍ ଅଣ୍ଟା ରାଇ ଆରୁ ଆଦ୍ଘି ଅଙ୍ଗଦ୍ ବାଗ୍ଗେ ରାଇ, ଆରୁ ଆ ଅଣ୍ଟା ମେଦୁଘି ଜାମା ଅଙ୍ଗଦ୍ ଢେର୍ ରାଇଦ୍, ହାଲେହି ଜାମାଦ୍ ମେଶ୍ରିକିରି ଆଦ୍ ଅଣ୍ଟା ମେଦୁଦ୍, ହନ୍ନେନ୍ ଖ୍ରୀସ୍ତ୍ହି ରାଦାସ୍। 13ଏନ୍ଦେର୍ଗେକା ନାହ୍ମା ବିଶ୍ୱାସୀର୍ଘି ଭିତର୍ନୁ କେତ୍କ ଆଲାର୍ ୟାହୁଦୀର୍ ତା ଆରୁ କେତ୍କ ଆଲାର୍ ବିନାୟାହୁଦୀତ୍, ଆରୁ ୟୋଁଲୋକ୍ ଗୁତ୍ତିୟା ଆରୁ ୟୋଁଲୋକ୍ ଆଜାଦୀତ୍। ଲେକିନ୍ ନାମ୍ ଜାମାତ୍ ଅଣ୍ଟା ମେଦୁ ମାନାଗେଲାଗାନ୍ ନାହ୍ମାଏ ଅଣ୍ଟା ପାବିତାର୍ ଆତ୍ମାତି ଆସ୍ନାନ୍ ଅଚ୍ଚକାଦାତ୍, ଆରୁ ଅଣ୍ଟା ଗିନାନ୍ତି ହାପ୍ପନା ଲେଖା ନାହ୍ମାଏ ଜାମାର୍ଘିନୁ ଅଣ୍ଟା ପାବିତାର୍ ଆତ୍ମା ନାଲ୍ଖୁ କାମି।
14ପ୍ରକୃତ୍ନୁ ଆଲାର୍ଘି ମେଦୁନୁ ଅଣ୍ଟା ଖାଲି ଅଙ୍ଗ ମାଲ୍ଲାଦିନ୍, ଲେକିନ୍ ଢେର୍ ଅଙ୍ଗ ରାଇଦ୍। 15ସୋଚା କା ଯଦି ଦାବ୍ବି ତେଙ୍ଗିଦ୍ କା, “ଏନ୍ ହେଖ୍ଖା ମାଲ୍ଲିନ୍, ହୁଦ୍ଘିଲାଗାନ୍ ଏନ୍ ମେଦୁନ୍ତା ଅଙ୍ଗ ମାଲ୍ଲିନ୍” ତା ଇଦ୍ଘିଲାଗାନ୍ ଏନ୍ଦେର୍ ଆଦ୍ ମେଦୁନ୍ତା ଅଙ୍ଗ ମାଲ୍ଲିଦ୍ କାଁଏ? 16ହନ୍ନେନ୍ ଯଦି ହେବ୍ଦା ତେଙ୍ଗିଦ୍ କା, “ଏନ୍ ହାନ୍ନୁ ମାଲ୍ଲିନ୍, ହୁଦ୍ଘିଲାଗାନ୍ ଏନ୍ ମେଦୁନ୍ତା ଅଙ୍ଗ ମାଲ୍ଲିନ୍” ତା ଇଦ୍ଘିଲାଗାନ୍ ଏନ୍ଦେର୍ ଆଦ୍ ମେଦୁନ୍ତା ଅଙ୍ଗ ମାଲ୍ଲିଦ୍ କାଁଏ? 17ଆରୁ ଯଦି ନାହ୍ମା ଗୋଟା ମେଦୁଦ୍ ହାନ୍ନୁଦିନ୍ ରଦ୍ନେ ତା ଏସ୍କେ ମେନତ୍ନେ? ଆରୁ ଆନ୍ନେନିନ୍ ଯଦି ନାହ୍ମା ଗୋଟା ମେଦୁଦ୍ ହେବ୍ଦା ରଦ୍ନେ ତା ନାମ୍ ଏସ୍କେ ନୁସ୍କା ଅଙ୍ଗତ୍ନେ? 18ଲେକିନ୍ ପ୍ରକୃତ୍ ପାର୍ମେଶ୍ୱାର୍ସ୍ ତାଙ୍ଘା ଇଚ୍ଛା ଲେଖା ନାହ୍ମା ମେଦୁନୁ ଅଙ୍ଗଗୁଠିନ୍ ଅଣ୍ଟା-ଅଣ୍ଟା କାମିକିରି ଖାଞ୍ଜକାଦାସ୍। 19ଆରୁ ଯଦି ମେଦୁନ୍ତା ଜାମା ଅଙ୍ଗଦ୍ ଅଣ୍ଟା ଅଙ୍ଗ ମାନଦ୍ନେ ତା ଆବନ୍ ନାମ୍ ମେଦୁବତ୍ନେ କାଁଏ? 20ହୁଦ୍ଘିଲାଗାନ୍ ଅଙ୍ଗ ଗୁଠିଦ୍ ତା ଢେର୍ ରାଇଦ୍, ହାଲେହି ମେଦୁଦ୍ ଅଣ୍ଟାଦ୍। 21ହୁଦ୍ଘିଲାଗାନ୍ ହାନ୍ନୁଦ୍ ହେଖ୍ଖାନ୍ ତେଙ୍ଗା ପଲ୍ଲୀଦ୍ କା, “ଏଙ୍ଗାଗେ ନିଙ୍ଘା ଦାର୍କାର୍ ମାଲ୍ଲାଦିନ୍।” ଆରୁ ହନ୍ନେନ୍ କୁକ୍କୁଦ୍ ପାଦୁନ୍ ତେଙ୍ଗା ପଲ୍ଲିଦ୍ କା, “ଏଙ୍ଗାଗେ ନିଙ୍ଘା ଦାର୍କାର୍ ମାଲ୍ଲାଦିନ୍।” 22ଇଦ୍ଘି ବିଲ୍କୁଲ୍ ଉଲ୍ଟା ଶରୀର୍ଘି ଏକା ଅଙ୍ଗବନ୍ ନାମ୍ କମ୍ଜୋର୍ ସୋଚ୍ଦାତ୍, ଆଦ୍ ବାଗ୍ଗେ ଦାର୍କାର୍ ମାନିଦ୍। 23ଆରୁ ଏତ୍କରିନ୍ ମାଲ୍ଲା ଲେକିନ୍ ମେଦୁଘି ଏକା ଅଙ୍ଗନ୍ ଦୁସ୍ରାରିନ୍ ଏଦାଗେ ଲାଜ୍ଜେ ଲାଗ୍ଗଦ୍ ହୁଦ୍ଘିଲାଗାନ୍ ନାମ୍ ଚିଢ଼ାତି ଡାବିକିରି ଆ ଅଙ୍ଗବନ୍ ବାନେକିରି ଉଇଦାତ୍ କା ଆଦ୍ ଏଥ୍ର୍ନାଦ୍ ଠିକ୍ ମାଲ୍ଲିଦ୍। 24ଲେକିନ୍ ଏକା ଅଙ୍ଗନ୍ ନାମାଗେ ଦୁସ୍ରାରିନ୍ ଏଦାଗେ ଅସୁବିଧା ମା ମାନିଦ୍, ଆବନ୍ ନାମ୍ ଆନ୍ନେନିନ୍ ଚିଢ଼ାତି ଡାବିକିରି ମା ଉଇଦାତ୍। ଲେକିନ୍ ପାର୍ମେଶ୍ୱାର୍ସ୍ ନାହ୍ମା ମେଦୁନ୍ ଏନ୍ନେ କାମ୍ଚ୍କାଦାସ୍ କା ଆ ବିଶେଷ୍ ମାଲ୍କା ଅଙ୍ଗନ୍ହି ନାମ୍ ବାଗ୍ଗେ ଆଦର୍ କାମିକିରି ବାନେକିରି ଉଇଦାତ୍। 25ଇଦ୍ ଇଦ୍ଘିଲାଗାନ୍ ମାନ୍ଚା କା ଶରୀର୍ନୁ ଭାଗ୍-ଭାଗ୍ ମା ସିର୍ଜାରାନାଦ୍, ବରନ୍ ଆଦ୍ଘି ଜାମା ଅଙ୍ଗ ଏକ୍ ଦୁସ୍ରାର୍ଘି ଧ୍ୟାନ୍ ଉଇୟଦ୍। 26ହୁଦ୍ଘିଲାଗାନ୍ ଯଦି ଅଣ୍ଟା ଅଙ୍ଗଦ୍ ଦୁଃଖୁ ହାଖ୍ଖୀ, ତା ଜାମା ଅଙ୍ଗ ଆଦ୍ଘିଗାନେ ଦୁଃଖୁ ହାଖ୍ଖୀ, ଆରୁ ହନ୍ନେନ୍ ଅଣ୍ଟା ଅଙ୍ଗ ଆଦର୍ ହାଖ୍ଖୀ ତା ଆଦ୍ଘିଗାନେ ଜାମା ଅଙ୍ଗ ଲିଝ୍ରି।
27ଆରୁ ଏଙ୍ଘା ତେଙ୍ଗ୍ନାଘି ମତ୍ଲବ୍ ଇଦ୍ କା ନିମ୍ ଜାମା ବିଶ୍ୱାସୀର୍ ଖ୍ରୀସ୍ତ୍କି ମେଦୁର୍, ଆରୁ ମଣ୍ଡ୍ଲୀନ୍ତା ଅର୍ତୁ ଅର୍ତୁର୍ ଆ ମେଦୁନ୍ତା ଭିନେ-ଭିନେ ଅଙ୍ଗର୍। 28ଆରୁ ପାର୍ମେଶ୍ୱାର୍ସ୍ ମଣ୍ତ୍ଲୀନୁ କେତ୍କ ଲୋକ୍ ଆଲାରିନ୍ ଚାଜ୍ଜକାଦାସ୍, ପହ୍ଲେ କେତ୍କ ଆଲାରିନ୍ ଖାସ୍ଚେଲାର୍ଘି ରୁପ୍ନୁ, ଦୁସ୍ରା କେତ୍କ ଆଲାରିନ୍ ଭବିଷତ୍ କାତ୍ଥା ତେଙ୍ଗ୍ନାବାଲା ରୁପ୍ନୁ, ଆରୁ ତିସ୍ରା କେତ୍କ ଆଲାରିନ୍ ତାଙ୍ଘା ବଚନ୍ ଶିଖାବାନା ବାଲାର୍ଘି ରୁପ୍ନୁ ଚାଜ୍ଜକାଦାସ୍। ଆଦ୍ଘି ପାଛ୍ଲି ଆଚ୍ମିତ୍ ନାଲ୍ଖୁ କାମ୍ନାବାଲାରିନ୍, ବେମାର୍ଗୁଠିନ୍ତି ବାନେ କାମ୍ନାବାଲାରିନ୍, ଆରୁ ନାନ୍ନାରିନ୍ ମଦେତ୍ କାମୁରିନ୍, ମୁଖ୍ୟାରିନ୍ ଆରୁ ଭିନେ-ଭିନେ ଭାଷାନୁ ତେଙ୍ଗ୍ନା ବାଲାରିନ୍ ଚାଜ୍ଜକାଦାସ୍। 29ତା ଜାମାର୍ ଖାସ୍ଚେଲାର୍ କାଁଏ? ମାଲ୍ଲା! ଜାମାର୍ ନାବୀର୍ କାଁଏ? ମାଲ୍ଲା! ଜାମାର୍ ପାର୍ମେଶ୍ୱାର୍ସ୍କି ବଚନ୍ ଶିଖାବୁର୍ କାଁଏ? ମାଲ୍ଲା! ଜାମାର୍ ଆଚ୍ମିତ୍ ନାଲ୍ଖୁ କାମୁର୍ କାଁଏ? ମାଲ୍ଲା! 30ଏନ୍ଦେର୍ ଜାମାର୍ଗେ ବାନେ କାମ୍ନାଘି ବାର୍ଦାନ୍ ହାଖ୍ଖର୍କିଚି କାଁଏ? ମାଲ୍ଲା! ଏନ୍ଦେର୍ ଜାମାର୍ ଭିନେ-ଭିନେ ଭାଷା କାଚ୍ନେଖ୍ର୍ନାଏ କାଁଏ? ମାଲ୍ଲା! ଏନ୍ଦେର୍ ଜାମାର୍ ଭାଷାଘି ମତ୍ଲବ୍ ତେଙ୍ଗା ଅଙ୍ଗନାଏ କାଁଏ? ମାଲ୍ଲା! 31ଲେକିନ୍ ନିମ୍ ଜାମାର୍ ପାବିତାର୍ ଆତ୍ମାଘି ଜାମାର୍ଘିନ୍ତି ବାନେ ବାର୍ଦାନ୍ ହାଖ୍ଖାଗେ କୋଶିଷ୍ କାମା।
ଆକ୍କୁନ୍ ଏନ୍ ନିମାନ୍ ଆରୁହି ଜାମାର୍ଘିନ୍ତି ବାନେ ପାବୁ ଏଦନ୍।
13ବାନେ ହାଖ୍ଖନାଦ୍ ଜାମାର୍ଘିନ୍ତି ବାନେ ପାବୁଦ୍
1ଯଦି ଏନ୍ ଆଲାର୍ଘି ଭାଷା ଆରୁ ସରଗ୍ ଦୂଁତ୍ର୍ଘି ଭାଷା କାଚ୍ନେଖ୍ରା ଅଙ୍ଗନ୍, ଲେକିନ୍ ଏନ୍ ନାନ୍ନାର୍ଘି ମିଆଁ ବାନେ ମା ହାଖ୍ଖନ୍ ତା ଏନ୍ଦେର୍ ଫାଏଦା? ଏନ୍ଦେର୍ଗେକା ଏଙ୍ଘା ତେଙ୍ଗ୍ନା ଅଣ୍ଟା ଆସ୍ନାବାଲା ପିତ୍ତାଲିଘି ବାଡ଼୍କା ଥାଡ଼ି ଆରୁ କାର୍ତାଲ୍ଘି ଝନ୍ଝନ୍ ଶବଦ୍ ଲେଖା ରାଇ। 2ଆରୁ ଏନ୍ ପାର୍ମେଶ୍ୱାରସ୍କି ଭବିଷତ୍ କାତ୍ଥା ଆଲାରିନ୍ ତେଙ୍ଗାଅଙ୍ଗନ୍, ଆରୁ ଏଙ୍ଘାଏନୁ ପାର୍ମେଶ୍ୱାର୍ସ୍କି ଜାମା ନୁହୁର୍କା କାତ୍ଥାବନ୍ ବୁଝ୍ରାଗେ ଶକ୍ତି ଆରୁ ବୁଦ୍ଧି ରାଇ ଆରୁ ପାର୍ତ୍ତାବନ୍ ହାଟାବାନା ଲେଖା ପୁରା ବିଶ୍ୱାସ୍ହି ଏଙ୍ଘା ଜୀଆନୁ ରାଇ, ଲେକିନ୍ ଏନ୍ ନାନ୍ନାର୍ଘି ମିଆଁ ବାନେ ମା ହାଖ୍ଖନ୍ ତା ଏନ୍ ଏନ୍ଦେର୍ହି ମାଲ୍ଦାନ୍। 3ଆରୁ ଏନ୍ ଏଙ୍ଘା ଜାମା ଧାନ୍ନୁ ଗରୀବ୍ ଆଲାର୍ଗେ ଚନ୍ଲାଗନ୍ ଚାହେ ଏଙ୍ଘା ମେଦୁନ୍ ବାସ୍ସାଗେ ଚନ୍ଲାଗନ୍, ଲେକିନ୍ ନାନ୍ନାରିନ୍ ବାନେ ମା ହାଖ୍ଖନ୍ ତା ଏଙ୍ଘାଏ ଏନ୍ଦେର୍ହି ଫାଏଦା ମାଲ୍ଲାଦିନ୍।
4ଏକାସ୍ ସତ୍ତୁନିନ୍ ନାନ୍ନାରିନ୍ ବାନେ ହାଖ୍ଖଦାସ୍, ଆସ୍ ଧିରାଜ୍ ଉଇଦାସ୍ ଆରୁ ନାନ୍ନାରିନ୍ ସଗ୍ଗେ ଏର୍ଦାସ୍, ଆସ୍ ନେକାନ୍ହି ମା ହିସ୍ଙ୍ଗାଦାସ୍, ଆରୁ ନିଜର୍ ବାଡ଼ାଇ ମା କାମ୍ଦାସ୍ ଆରୁ ବଡ଼୍ପଣି ମା ଏଦ୍ର୍ଦାସ୍। 5ଆସ୍ ନାନ୍ନାର୍ଗାନେ ଖାରାପ୍ ବେଭାର୍ ମା କାମ୍ଦାସ୍, ନିଜର୍ ବାରେ ଖାଲି ମା ସୋଚ୍ଦାସ୍, ଚାଁଣେ ମା ଖୀସାରାଦାସ୍, ଆରୁ ଆସ୍ ତାଙ୍ଘାଗାନେ କାମ୍ଚ୍କା ଖାରାପ୍ ବେଭାର୍ଘି ହିସାବ୍ ମା ହୋଦାସ୍। 6ଆସ୍ ଖାରାପ୍ ନାଲ୍ଖୁନୁ ମା ଲୀଝ୍ର୍ଦାସ୍, ଲେକିନ୍ ବାନେ ନାଲ୍ଖୁନୁ ଲୀଝ୍ର୍ଦାସ୍। 7ଆସ୍ ତାଙ୍ଘା ଜୀବନ୍ନୁ ଜାମା କାତ୍ଥାନ୍ ସାହ୍ଦାସ୍, ଜାମାବାକେନ୍ ପାର୍ମେଶ୍ୱାର୍ସ୍କି ମିଆଁ ବିଶ୍ୱାସ୍ କାମ୍ଦାସ୍ ଆସ୍ ଜାମା କାତ୍ଥାନୁ ପାର୍ମେଶ୍ୱାର୍ସ୍କି ମିଆଁ ଭାର୍ଷା ଉଇଦାସ୍, ଆରୁ ଜାମା କାତ୍ଥାନୁ ଧିରାଜ୍ ଉଇଦାସ୍।
8ଭବିଷତ୍ କାତ୍ଥାଦ୍ ତେଙ୍ଗ୍ନା ଆରୁ ଭିନେ-ଭିନେ ଭାଷା ତେଙ୍ଗ୍ନାଦ୍ ବନ୍ଦ୍ ମାନକୋ। ହନ୍ନେନ୍ ଜାମାର୍ଘି ବୁଝୁର୍ନାଘି ଶକ୍ତି ଆରୁ ବୁଦ୍ଧି ମୁଞ୍ଜ୍ରକୋ। ଲେକିନ୍ ବାନେ ହାଖ୍ଖନାଦ୍ ଏକ୍ଲାହି ମା ମୁଞ୍ଜରିଦ୍। 9ଏନ୍ଦେର୍ଗେକା ନାମାଗେ ଏକା ବୁଝୁର୍ନାଘି ବୁଦ୍ଧି ଆରୁ ନାମାଗେ ଭବିଷତ୍ କାତ୍ଥା ତେଙ୍ଗ୍ନାଘି ଏକା ବାର୍ଦାନ୍ ଚିଆ କେର୍କିଚି ଆଦ୍ ପୁରା ମାଲ୍ଲାମାନୁ ଲେକିନ୍ ଆଧୁରା ରାଇଦ୍। 10ଲେକିନ୍ ଯେତ୍କବାକେନ୍ ଏକାସ୍ ଭାର୍ପୁର୍ ରାଦାସ୍ ଆସ୍ ବାରସ୍, ହତ୍କବାକେନ୍ ଏକାଦ୍ ଆଧୁରା ରାଇ ଆଦ୍ଘି ଆରୁ ଦାର୍କାର୍ ମା ମାନିଦ୍। 11ଇଦ୍ଘି ବାରେନୁ ଏନ୍ ନିମାନ୍ ଅଣ୍ଟା ନମୁନା ତେଙ୍ଗାଲ୍ଦାନ୍ ଯେତ୍କବାକେନ୍ ଏନ୍ ଛୋଟେ ରାଚ୍କାନ୍, ତା ଏନ୍ ଛୋଟେ ହାଦ୍ଦୁର୍ ଲେଖା କାଚ୍ଚନେଖ୍ରାଲ୍କାନ୍, ଆରୁ ଛୋଟେ ହାଦ୍ଦୁର୍ ଲେଖାନିନ୍ ସୋଚାଲ୍କାନ୍। ଆରୁ ଛୋଟେ ହାଦ୍ଦୁର୍ ଲେଖାନିନ୍ ଏଙ୍ଘା ବୁଦ୍ଧି ରାଚା ଲେକିନ୍ ଯେତ୍କବାକେନ୍ ଏନ୍ ବାଡ଼୍କା ମାନ୍ଚ୍କାନ୍ କେର୍କାନ୍ ତା ହତ୍କବାକେନ୍ ହାଦ୍ଦୁ ବାକେନ୍ତା ଜାମା କାତ୍ଥାବନ୍ ଏନ୍ ଆମ୍ୱେଇଚ୍କାନ୍। 12ଏନ୍ଦେର୍ଗେକା ନାମାଗେ ଆଇନାନୁ ଧୁନ୍ଦ୍ରା ଏଥ୍ରିଦ୍ ଲେକିନ୍ ଅନ୍ଦୁଲ୍ ନାମ୍ ଆସିନ୍ ସାମ୍ନାସାମ୍ନି ଏରତ୍ ଆରୁ ଆକ୍କୁନ୍ ନାମ୍ ଆସ୍କି ବାରେ କାଟେକେନ୍ ଆହ୍ଦାତ୍ ଲେକିନ୍ ଯେତ୍କବାକେନ୍ ଆସ୍ ବାରସ୍ ହତ୍କବାକେନ୍ ଏସ୍କେ ଆସ୍ ନାହ୍ମା ବାରେ ପୁରା ଆହ୍ଦାସ୍ ହନ୍ନେନ୍ ନାମ୍ହି ଆସ୍କି ବାରେ ଜାମାନ୍ ଆହତ୍। 13ହୁଦ୍ଘିଲାଗାନ୍ ନାମାଗେ ଜାମାବାକେନ୍ ପାର୍ମେଶ୍ୱାର୍ସ୍କି ମିଆଁ ବିଶ୍ୱାସ୍, ଆରୁ ଆଶ୍ରା ଉଇନା କାତ୍ଥା, ଆରୁ ଜାମାବାକେନ୍ ଏକ୍ ଦୁସ୍ରାର୍ଘି ମିଆଁ ବାନେ ହାଖ୍ଖନା କାତ୍ଥା। ଏନ୍ଦେର୍ଗେକା ଇବ୍ଡ଼ା ମୁନ୍ଟା କାତ୍ଥାଦ୍ ଜାମାବାକେନ୍ ଟିକ୍ରଦ୍, ଲେକିନ୍ ଇବ୍ଡ଼ା ଜାମାଘିନ୍ତି ବାଡ଼୍କାଦ୍ ବାନେ ହାଖ୍ଖନାଦ୍।
14ଭବିଷତ୍ କାତ୍ଥା ଆରୁ ନାନ୍ନା-ନାନ୍ନା ଭାଷା
1ନିମ୍ ଜାମାବାକେନ୍ ଏକ୍ ଦୁସ୍ରାରିନ୍ ବାନେ ହାଖ୍ଖତେ ରା। ଆରୁ ପାବିତାର୍ ଆତ୍ମାଘି ଦ୍ୱାର୍ନୁ ଚିଚ୍ଚକା ବାର୍ଦାନ୍ବନ୍ ହାଖ୍ଖାଗେ ନିମ୍ ମୁରୁକ୍ କୋଶିଷ୍ କାମା। ଆରୁ ବିଶେଷ୍ କାମିକିରି ଇବନ୍ କୋଶିଷ୍ କାମ୍ତେ ରା କା ନିମାଗେ ଭବିଷତ୍ କାତ୍ଥା ତେଙ୍ଗ୍ନାଘି ବାର୍ଦାନ୍ ହାଖ୍ଖରଦ୍। 2ଏନ୍ଦେର୍ଗେକା ଏକାସ୍ ନାନ୍ନା ଭାଷା ତେଙ୍ଗ୍ଦାସ୍ ଆସ୍ ଆଲାର୍ ଗାନେ ମାଲ୍ଲା, ଲେକିନ୍ ପାର୍ମେଶ୍ୱାର୍ସ୍ଗାନେ କାଚ୍ନେଖ୍ର୍ଦାସ୍, ହୁଦ୍ଘିଲାଗାନ୍ ଆସ୍କି କାତ୍ଥାନ୍ ନେଦ୍ହି ମା ବୁଝୁର୍ନାଏ, ଏନ୍ଦେର୍ଗେକା ଆସ୍ ଭେଦ୍ଦୁଘି କାତ୍ଥାନ୍ ପାବିତାର୍ ଆତ୍ମାତି ତେଙ୍ଗ୍ଦାସ୍। 3ଲେକିନ୍ ଏକାସ୍ ପାର୍ମେଶ୍ୱାର୍ସ୍କି ତାର୍ତି ତାଏକା ସନ୍ଦେଶ୍ କାତ୍ଥା ତେଙ୍ଗ୍ଦାସ୍, ଆସ୍ ଆଲାରିନ୍ ବିଶ୍ୱାସ୍ନୁ ମଜ୍ବୁତ୍ କାମାଗେ, ସାହସ୍ ବାଢ଼ାବାଗେ ଆରୁ ଦିଲାସା ଚିୟାଗେ ତେଙ୍ଗ୍ଦାସ୍। 4ଆରୁ ନାନ୍ନା ଭାଷା ତେଙ୍ଗୁସ୍ ଖାଲି ତାଙ୍ଗାନ୍ ବିଶ୍ୱାସ୍ନୁ ମଜ୍ବୁତ୍ କାମ୍ଦାସ୍, ଲେକିନ୍ ଏକାସ୍ ପାର୍ମେଶ୍ୱାର୍ସ୍କି ତାର୍ତି ତାଏକା ସନ୍ଦେଶ୍ଘି କାତ୍ଥା ତେଙ୍ଗ୍ଦାସ୍, ଆସ୍ ଜାମା ମଣ୍ଡ୍ଲୀନ୍ତା ଆଲାରିନ୍ ବିଶ୍ୱାସ୍ନୁ ମଜ୍ବୁତ୍ କାମ୍ଦାସ୍। 5ଏନ୍ ଚାହଁଦାନ୍ କା ନିମ୍ ଜାମା ଆଲାର୍ ନାନ୍ନା ଭାଷାନୁ କାଚ୍ନେଖ୍ରା, ଲେକିନ୍ ଇଦ୍ଘିନ୍ତି ହି ବାଗ୍ଗେ ଏନ୍ ଏନ୍ନେ ଚାହଁଦାନ୍ କା ନିମ୍ ପାର୍ମେଶ୍ୱାର୍ସ୍କି ତାର୍ତି ତାଏକା ସନ୍ଦେଶ୍ଘି କାତ୍ଥା ତେଙ୍ଗା। ଏନ୍ଦେର୍ଗେକା ଯଦି ନାନ୍ନା ଭାଷା ତେଙ୍ଗ୍ନାବାକେନ୍ ଆଲାରିନ୍ ବିଶ୍ୱାସ୍ନୁ ମଜ୍ବୁତ୍ କାମାଗେ ଆଦ୍ଘି ମତ୍ଲବ୍ବନ୍ ତେଙ୍ଗ୍ନାବାଲା ମଣ୍ତ୍ଲୀନୁ ନେରିନ୍ ମାଲ୍କାରିନ୍ ତା, ହାଲେ ନାନ୍ନା ଭାଷା ତେଙ୍ଗ୍ନାବାଲାସ୍ତି ପାର୍ମେଶ୍ୱାର୍ସ୍କି ତାର୍ତି ତାଏକା ସନ୍ଦେଶ୍ଘି କାତ୍ଥା ତେଙ୍ଗ୍ନାବାଲାସ୍ ମଣ୍ଡ୍ଲୀବନ୍ ବାଗ୍ଗେ ମଦେତ୍ କାମ୍ଦାସ୍।
6ହେ ଭାଇ ଆରୁ ବୁହୁଣୀ ଜାମାରୋ, ଯଦି ଏକାନ୍ ଏନ୍ ବାଲ୍ଲଦାନିନ୍ ଆ ଭାଷାନୁ କାଚ୍ନେଖ୍ତେ ଏନ୍ ନିହ୍ମାସାନ୍ ବାରନ୍ ତା ଯେତ୍କତକ୍ ଏନ୍ ନିହ୍ମା ଲାଗାନ୍ ଏନ୍ଦ୍ରିନ୍ହି ନୁହୁର୍କା କାତ୍ଥାବନ୍ ପ୍ରକଟ୍ ମା କାମନ୍ ଆରୁ, ଖାସ୍ ବୁଦ୍ଧି, ଚାହେ ପାର୍ମେଶ୍ୱାର୍ସ୍କି ଖବର୍ ଚାହେ ଏନ୍ଦ୍ରିନ୍ ଉପ୍ଦେଶ୍ ମା ଚିଅନ୍ ତା ଇତ୍ତି ନିହ୍ମାଏ ଏନ୍ଦେର୍ ଫାଏଦା ମାନଦ୍। 7ଇଦ୍ ଜୀଆ ମାଲ୍କା ବାଏଁସ୍ରୀ ଆରୁ କେନ୍ଦ୍ରା ଲେଖା ରାଇଦ୍, ଯଦି ଇବ୍ଡ଼ାନ୍ ଉର୍କୁନ୍ ଚାହେ ଆସ୍କୁନ୍ ଭିନେ-ଭିନେ ଶବଦ୍ ମା ଉର୍ଖ ତା, ଆଲାର୍ଗେ ଏସ୍କେ ଆହ୍ତାରୋକା ବାଏଁସ୍ରୀ ଉରାଲ୍ନାଏ କା କେନ୍ଦ୍ରା ବାଜାବାଲ୍ନାଏ। 8ଆରୁ ଯଦି ତୂରୀବାଜାଘି ଶବଦ୍ ସାଫା-ସାଫା ମା ମେନ୍ଦ୍ରତା ନେଦ୍ ଲାଡ଼ାଗେ ସାପ୍ଡ଼ାରର୍? 9ଇଦ୍ଘି ଲେଖା ଏକ୍ରିନ୍ଘି ନାନ୍ନା ଭାଷାନୁ ଯେତ୍କତକ୍ କା ନିମ୍ ସାଫା-ସାଫା ମା ତେଙ୍ଗର୍, ହତ୍କତକ୍ ନେରିନ୍ ଏସ୍କେ ବୁଝ୍ରା ଅଙ୍ଗର୍ କା ନିମ୍ ଏନ୍ଦେର୍ ତେଙ୍ଗ୍ଦାର୍। ଏନ୍ଦେର୍ଗେକା ଏନ୍ନେନୁ ନିମ୍ତା ଖାଲି ହାୱାନୁ କାତ୍ଥା କାମ୍ନାବାଲାର୍ ଲେଖାନିନ୍ ରର୍କର୍। 10ଇଦ୍ ସତ୍ତୁଦ୍ କା ଦୁନିଆଁନୁ ଭିନେ-ଭିନେ ଭାଷା ରାଇ, ଆରୁ ଜାମା ଭାଷାଘି ମତ୍ଲବ୍ ରାଇ। 11ହୁଦ୍ଘିଲାଗାନ୍ ଯଦି ଏନ୍ ଏନ୍ଦ୍ରିନ୍ ଭାଷାଘି ମତ୍ଲବ୍ ମା ବୁଝ୍ରନ୍, ତା ତେଙ୍ଗ୍ନାବାଲାସ୍କି ନଜର୍ନୁ ଏନ୍ ପର୍ଦେଶୀୟା ମାନନ୍କନ୍; ଆରୁ ତେଙ୍ଗ୍ନାବାଲାସ୍ ଏଙ୍ଘା ନଜର୍ନୁ ପର୍ଦେଶୀୟା ମାନସ୍କସ୍। 12ନିହ୍ମା ବାରେନୁହି ଇ କାତ୍ଥା ରାଇ କା ନିମ୍ହି ଯେତ୍କବାକେନ୍ ପାବିତାର୍ ଆତ୍ମାଘି ବାର୍ଦାନ୍ ହାଖ୍ଖାଗେ ବହୁତ୍ କୋଶିଷ୍ କାମ୍ଦାର୍ ତା ଏନ୍ନେ କୋଶିଷ୍ କାମା କା ନିହ୍ମା ବାର୍ଦାନ୍ଘି ଦ୍ୱାର୍ନୁ ମଣ୍ଡ୍ଲୀନ୍ତା ଆଲାର୍ ବିଶ୍ୱାସ୍ନୁ ଆଘ୍ଲି ବାଢ଼୍ରା ଅଙ୍ଗର୍।
13ହୁଦ୍ଘିଲାଗାନ୍ ଏକାସ୍ ଏକା ଭାଷାନ୍ ବାଲ୍ଲଦାସିନ୍ ଆ ଭାଷାନୁ ତେଙ୍ଗ୍ଦାସ୍, ଆସ୍ ବିନ୍ତି କାମ୍ନାସ୍ କା ଭାଷାଘି ମତ୍ଲବ୍ବନ୍ହି ତେଙ୍ଗା ଅଙ୍ଗସ୍। 14ଯଦି ଏନ୍ ମା ଶିଖ୍ର୍କା ଭାଷାନୁ ବିନ୍ତି କାମ୍ଦାନ୍ ତା ସତ୍ତୁନିନ୍ ଏଙ୍ଘା ଆତ୍ମାଦ୍ ଆବନ୍ କାମିଦ୍, ଲେକିନ୍ ଏଙ୍ଗାଗେ ଏନ୍ଦେର୍ହି ମା ବୁଝ୍ର୍ତାରିଦ୍। 15ତା ହାଲେ ଏନ୍ଦେର୍ କାମ୍ନାକାତ୍ଥା? ଏନ୍ ନିଜର୍ ଆତ୍ମାତିତା ବିନ୍ତି କାମ୍ଦାନ୍ ଲେକିନ୍ ସାଙ୍ଗେନିନ୍ ନିଜର୍ ବୁଦ୍ଧିତିହି ବିନ୍ତି କାମନ୍। ନିଜର୍ ଆତ୍ମାତିତା ଆସ୍କି ବାଡ଼ାଇ କାମନିନ୍ ଲେକିନ୍ ନିଜର୍ ବୁଦ୍ଧିତିହି ଆସ୍କି ବାଡ଼ାଇ କାମନ୍। 16ମାଲ୍ଲାହାଲେ ଯଦି ନିମ୍ ପାବିତାର୍ ଆତ୍ମାଘି ଦ୍ୱାର୍ନୁ ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିଦାର୍ତା ଆସାନ୍ ରୁ ନାନ୍ନା ଆଲାର୍ ଆ ଭାଷାବନ୍ ମା ବୁଝ୍ର୍ନାଏ ହାଲେ ଏସ୍କେ ଆମେନ୍ ବର୍? 17ନିମ୍ ବାନେକିରି ଧାନ୍ୟାବାଦ୍ ଚିଦାର୍ ଇଦ୍ ସତ୍ତୁଦ୍ ଲେକିନ୍ ଇତ୍ତି ନାନ୍ନାର୍ଘି ଫାଏଦା ମା ମାନିଦ୍। 18ଏନ୍ ନିହ୍ମା ଜାମାର୍ଘିନ୍ତି ବାଗ୍ଗେ ମା ଶିଖ୍ର୍କା ଭାଷାତି ତେଙ୍ଗା ଅଙ୍ଗ୍ଦାନ୍ ହୁଦ୍ଘିଲାଗାନ୍ ଏନ୍ ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିଦାନ୍। 19ଲେକିନ୍ ବିଶ୍ୱାସୀ ଆଲାର୍ଘି ମାଝାନୁ ମା ଶିଖ୍ର୍କା ଭାଷାତି ଦଶ୍ହାଜାର୍ କାତ୍ଥା ତେଙ୍ଗ୍ନା ସତ୍ତୁ ନିଜର୍ ବୁଦ୍ଧିଘି ବେଭାର୍ କାମ୍ତେ ଖାଲି ପାଞ୍ଚେଟା କାତ୍ଥା ତେଙ୍ଗ୍ନାନ୍ ବାନେ ସୋଚ୍ଦାନ୍, ହୁଦ୍ଘିଲାଗାନ୍ ନାନ୍ନାରିନ୍ହି ଶିଖାବା ଅଙ୍ଗନ୍।
20ହେ ଭାଇ ଆରୁ ବୁହୁଣୀ ଜାମାରୋ, ନିମ୍ ଛୋଟେ ହାଦ୍ଦୁର୍ଘି ଲେଖା ଆମା ସୋଚା। ଲେକିନ୍ ବାଡ଼୍କା ଆଲାର୍ ଲେଖା ସୋଚା। ଆରୁ ଏସ୍କେ ହାଦ୍ଦୁର୍ ଖାରାପ୍ କାମାଗେ ମା ସୋଚ୍ନାଏ ହନ୍ନେନ୍ ନିମ୍ହି ମାନା। 21ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ କା, ପ୍ରାଭୁସ୍ ତେଙ୍ଗ୍ଦାସ୍, “ଏନ୍ ଦୁସ୍ରା ଭାଷାଘି ଦ୍ୱାର୍ନୁ ବିଦେଶୀ ଭାଷାନୁ ଇ ବୁଦ୍ଧିତି ତେଙ୍ଗନ୍ ଆରୁ ଆବ୍ଡ଼ାର୍ ଏଙ୍ଘାଏ କାତ୍ଥାଘି ମିଆଁ ଧିୟାନ୍ ମା ଚିୟର୍।” 22ଇଦ୍ଘିଲାଗାନ୍ ନାମ୍ ଆହ୍ଦାତ୍ କା ଏକା ଭାଷାନ୍ ମାଲ୍ଲା ଶିଖ୍ରୁମ୍ ଆ ଭାଷାନ୍ ତେଙ୍ଗ୍ନାଘି ବାର୍ଦାନ୍ ଇଦ୍ଘିଲାଗାନ୍ ପାର୍ମେଶ୍ୱାର୍ସ୍ ଚିଦାସ୍ କା ବିଶ୍ୱାସୀର୍ଗେ ମାଲ୍ଲା ବରନ୍ ଅବିଶ୍ୱାସୀର୍ ଆହାଅଙ୍ଗର୍ ଇଦ୍ ପାର୍ମେଶ୍ୱାର୍ସ୍ତି ବାରିଦ୍। ଲେକିନ୍ ପାର୍ମେଶ୍ୱାର୍ସ୍କି ତାର୍ତି ସନ୍ଦେଶ୍ କାତ୍ଥା ତେଙ୍ଗ୍ନାଘି ବାର୍ଦାନ୍ ପାର୍ମେଶ୍ୱାର୍ସ୍ ହୁଦ୍ଘିଲାଗାନ୍ ଚିଚ୍କାଦାସ୍ କା ବିଶ୍ୱାସୀ ଆଲାର୍ଘି ବିଶ୍ୱାସ୍ ଆରୁହି ମଜ୍ବୁତ୍ ମାନକଦ୍। 23ହାଲେହି ଯଦି ଖ୍ରୀସ୍ତ୍ ମଣ୍ଡ୍ଲୀନ୍ତାର୍ ଅନ୍ଠାଣ୍ ଠୁଡ଼ିୟାରାଦାର୍ ଆରୁ ଅର୍ତୁ-ଅର୍ତୁର୍ ଏକା ମା ବାଲ୍କା ଏକା ଭାଷାନ୍ ମାଲ୍ଲା ଶିଖ୍ରୁର୍ ଆ ଭାଷାନୁ କାଚ୍ନେଖ୍ରାଲ୍କା ରର୍ ହତ୍କବାକେନ୍ ଅବିଶ୍ୱାସୀର୍ ଚାହେ ଏକାର୍ ଇ ବାର୍ଦାନ୍ଘି ବାରେ ବାଲ୍ଲକାରର୍ ଆବ୍ଡ଼ାର୍ ଆରୁ ବାହ୍ରିନ୍ତା ଆଲାର୍ ଉଲା ବାରର୍କର୍ ତା ଏନ୍ଦେର୍ ନିମାନ୍ ବାଏହାର୍ ମା ବର୍ କାଁଏ? 24-25ଲେକିନ୍ ଯଦି ଜାମାର୍ ପାର୍ମେଶ୍ୱାର୍ସ୍କି ତାର୍ତି ସନ୍ଦେଶ୍ଘି କାତ୍ଥା ତେଙ୍ଗାଲ୍କାରର୍, ଆରୁ ନେରିନ୍ ଅବିଶ୍ୱାସୀ ଚାହେ ମା ପାଢ଼ୁ ଆଲାସ୍ ଉଲା ବାରର୍କସ୍, ତା ଜାମାର୍ ଆସିନ୍ ଦୋଷୀ ଠାହ୍ରାବର୍ ଆରୁ ଯାଁଚର୍, ଆରୁ ଆସ୍କି ମନ୍ତା ନୁହୁର୍କା କାତ୍ଥା ପ୍ରକଟ୍ ମାନକୋ। ହତ୍କବାକେନ୍ ଆସ୍ ହାଁଠୁୱାରିକିରି ପାର୍ମେଶ୍ୱାର୍ସ୍କି ଆରାଧାନା କାମସ୍ ଆରୁ ସୋଚସ୍ କା, ସତ୍ତୁନିନ୍ ପାର୍ମେଶ୍ୱାର୍ସ୍ ନିହ୍ମା ମାଝାନୁ ରାଦାସ୍।
ଆରାଧାନା କାମ୍ନା ବାକେନ୍ ଅନ୍ଠାଣ୍ ବାନେକିରି ସାରିଆରିକିରି କାମ୍ନାକାତ୍ଥା
26ହୁଦ୍ଘିଲାଗାନ୍ ହେ ଏଙ୍ଘା ଭାଇ ଆରୁ ବୁହୁଣୀ ଜାମାରୋ ଏନ୍ଦେର୍ କାମ୍ନାକାତ୍ଥା? ଯେତ୍କବାକେନ୍ ନିମ୍ ଅନ୍ଠାଣ୍ ଠୁଡ଼ିୟା ରାଦାର୍ ତା ନିହ୍ମାସ୍ତି ନେଦିନ୍ ସ୍ତୁତିଘି ଗୀତୁ ପାଡ଼୍ଦାର୍, ନେଦିନ୍ ଶିଖାବାଦାର୍, ଆରୁ ନେଦିନ୍ ନୁହ୍ର୍କା କାତ୍ଥାନ୍ ପ୍ରକଟ୍ କାମ୍ଦାର୍ ଆରୁ ନେଦିନ୍ ଏକା ଭାଷାନ୍ ମାଲ୍ଲା ଶିଖ୍ରୁର୍ ଆ ଭାଷାନୁ ତେଙ୍ଗ୍ଦାର୍ ତା ନେଦିନ୍ ଆଦ୍ଘି ମତ୍ଲବ୍ ତେଙ୍ଗ୍ଦାର୍। ଇବ୍ଡ଼ା ଜାମା କାତ୍ଥା ଖ୍ରୀସ୍ତ୍ ମଣ୍ତ୍ଲୀଘି ଆତ୍ମିକ୍ ରୂପ୍ନୁ ମଜ୍ବୁତ୍ଘି ଲାଗାନ୍ ମାନ୍ନା କାତ୍ଥା।
27ଯଦି ଏକା ଭାଷାନ୍ ମାଲ୍ଲା ଶିଖ୍ରୁର୍ ଆ ଭାଷାନୁ କାଚ୍ନେଖ୍ର୍ନାଇନ୍ ରାଇ ତା ଦୁଇ ଲୋକ୍ ଚାହେ ତିନ୍ ଲୋକ୍ ପାଡ଼ି-ପାଡ଼ି ତେଙ୍ଗ୍ନା କାତ୍ଥା ଆରୁ ଆଦ୍ଘି ମତ୍ଲବ୍ ତେଙ୍ଗ୍ନାବାଲା ଅର୍ତୁ ରାନାଇନ୍ କାତ୍ଥା। 28ଲେକିନ୍ ଖ୍ରୀସ୍ତ୍ ମଣ୍ଡ୍ଲୀନୁ ଏକା ଭାଷାନ୍ ମାଲ୍ଲା ଶିଖ୍ରୁର୍ ଆ ଭାଷାଘି ମତ୍ଲବ୍ ତେଙ୍ଗ୍ନାବାଲା ନେରିନ୍ ମା ରର୍ତା ଆସ୍ କାଡ଼େ-କାଡ଼େ ରାନାସ୍ ଆରୁ ନିଜର୍ ମନ୍ନୁହି ପାର୍ମେଶ୍ୱାର୍ସ୍ଗାନେ କାଚ୍ନେଖ୍ର୍ନାସ୍। 29ହନ୍ନେନ୍ନିନ୍ ଖ୍ରୀସ୍ତ୍ ମଣ୍ତ୍ଲୀନୁ ଦୁଇ ଲୋକ୍ ଚାହେ ତିନ୍ ଲୋକ୍ ପାର୍ମେଶ୍ୱାର୍ସ୍କି ତାର୍ତି ସନ୍ଦେଶ୍ଘି କାତ୍ଥା ତେଙ୍ଗ୍ନାର୍, ଆରୁ ଏକାନ୍ ତେଙ୍ଗାକେର୍କିଚି ଆବନ୍ ବାକି ଆଲାର୍ ଆଦ୍ଘି ବାରେନୁ ଧ୍ୟାନ୍ ଚିକିରି ସୋଚର୍। 30ଲେକିନ୍ ଆସାନ୍ ଏକ୍ରିନ୍ ଅକ୍କୁ ଆଲାର୍ସ୍ତି ଏନ୍ଦ୍ରିନ୍ କାତ୍ଥାଘି ଭେଦ୍ଦୁ ପ୍ରକଟ୍ ମାନିତା, ପାର୍ମେଶ୍ୱାର୍ସ୍କି ତାର୍ତି ତେଙ୍ଗ୍ନାବାଲା ପହ୍ଲେ ଏକାସ୍ ପାର୍ମେଶ୍ୱାର୍ସ୍କି ତାର୍ତି ତେଙ୍ଗ୍ନାବାଲା ସନ୍ଦେଶ୍ଘି କାତ୍ଥା ତେଙ୍ଗ୍ଦାସ୍ ଆସ୍ କାଡ଼େ-କାଡ଼େ ରାନାସ୍। 31ଏନ୍ଦେର୍ଗେକା ନିମ୍ ଜାମାର୍ ଅଣ୍ଟା-ଅଣ୍ଟା କାମିକିରି ପାର୍ମେଶ୍ୱାର୍ସ୍କି ତାର୍ତି ସନ୍ଦେଶ୍ଘି କାତ୍ଥା ତେଙ୍ଗା ଅଙ୍ଗ୍ଦାର୍ ହୁଦ୍ଘିଲାଗାନ୍ ଜାମାର୍ ଶିଖ୍ରର୍ ଆରୁ ନିମାଗେ ଆତ୍ମିକ୍ ବାଡ଼ାଇଘି ଲାଗାନ୍ ହିମ୍ମତ୍ ହାଖ୍ଖରୋ। 32ଆରୁ ନାବୀର୍ଘି ଆତ୍ମା ନାବୀଜାମାର୍ଘି କାବୁନୁ ରାଇ। 33ଏନ୍ଦେର୍ଗେକା ପାର୍ମେଶ୍ୱାର୍ସ୍ ଗଡ଼୍ବଡ଼ି ମା ଚାହଁଦାସ୍ ଲେକିନ୍ ଶାନ୍ତିଘି ପାର୍ମେଶ୍ୱାର୍ସ୍ ଏସ୍କେ କା ପାବିତାର୍ ଆଲାର୍ଘି ଜାମା ଖ୍ରୀସ୍ତ୍ ମଣ୍ଡ୍ଲୀନୁ ଇଦ୍ ଠିକ୍ଦ୍।
34ହନ୍ନେନ୍ ମାଏକିନିଆଁର୍ ଖ୍ରୀସ୍ତ୍ ମଣ୍ଡ୍ଲୀଗୁଠିନୁ କାଡ଼େ-କାଡ଼େ ରାନାର୍, ଏନ୍ଦେର୍ଗେକା ଆବ୍ଡ଼ାର୍ଗେ କାଚ୍ନେଖ୍ରାଗେ ହୁକୁମ୍ ମାଲ୍ଲାଦିନ୍, ଲେକିନ୍ ଅଧିନ୍ନୁ ରାନାଘି ହୁକୁମ୍ ରାଇଦ୍: ଏସ୍କେ କା ମୁଶାସ୍କି ନିୟମ୍ନୁ ଲେଖ୍ଚ୍କା ରାଇଦ୍। 35ଯଦି ଆବ୍ଡ଼ାର୍ ଏନ୍ଦ୍ରିନ୍ ଶିଖ୍ରାଗେ ବେଦ୍ଦର୍ ତା ଆଡ଼୍ପାନୁ ନିଜର୍-ନିଜର୍ ମାର୍ଦାନାରିନ୍ ମେନ୍ନାର୍ ଏନ୍ଦେର୍ଗେକା ମାଏକିନିଆଁର୍ଗେ ଖ୍ରୀସ୍ତ୍ ମଣ୍ଡ୍ଲୀନୁ କାଚ୍ନେଖ୍ର୍ନାଦ୍ ବାନେ ମା ଏଥ୍ରିଦ୍। 36ହେ କୁରିନ୍ଥୀ ତା ବିଶ୍ୱାସୀରୋ ପାର୍ମେଶ୍ୱାର୍ସ୍କି ବଚନ୍ ନିହ୍ମାସ୍ତି ସୁରୁ ମାନ୍ଚା କାଁଏ? କା ନିହ୍ମାସାନ୍ ଖାଲି ବାର୍ଚା କାଁଏ? ବିଲ୍କୁସ୍ ମାଲ୍ଲା!
37ଯଦି ନେଦିନ୍ ନିଜ୍କେନିଜ୍ ନାବୀ ଚାହେ ପାବିତାର୍ ଆତ୍ମାସ୍ତି ବାର୍ଦାନ୍ ହାକ୍କା ଆଲ୍ବୁଲି ସୋଚ୍ଦାସ୍, ତା ଆସ୍ ଆହ୍ନାସ୍ କା ଏକା କାତ୍ଥାନ୍ ଏନ୍ ନିମାଗେ ଲେଖାଲ୍ଦାନ୍ ଆଦ୍ ପ୍ରାଭୁସ୍କି ହୁକୁମ୍ଦ୍। 38ଲେକିନ୍ ନେଦିନ୍ ଇବନ୍ ବାଲ୍ଲକା ଲେଖା ମାନର୍ ତା ନିମ୍ହି ଆସିନ୍ ବାଲ୍ଲକା ଲେଖା ମାନା।
39ହୁଦ୍ଘିଲାଗାନ୍ ହେ ଭାଇ ଆରୁ ବୁହୁଣୀ ଜାମାରୋ, ନିମ୍ ପାର୍ମେଶ୍ୱାର୍ସ୍କି ତାର୍ତି ସନ୍ଦେଶ୍ଘି କାତ୍ଥା ତେଙ୍ଗ୍ନାନୁ ଲାକ୍କାରା ଆରୁ ଏକା ଭାଷା ମାଲ୍ଲା ଶିଖ୍ରୁର୍ ଆ ଭାଷାନୁ କାଚ୍ନେଖ୍ରୁରିନ୍ହି ମାନା ଆମା କାମା। 40ଲେକିନ୍ ପାର୍ମେଶ୍ୱାର୍ସ୍କି ଆରାଧାନା କାମ୍ନା ବାକେନ୍ ବାନେକିରି ସାର୍ୟାରିକିରି କାମ୍ନା କାତ୍ଥା।
15ଖ୍ରୀସ୍ତ୍କି ଜିଉଠ୍ର୍ନା
1ହେ ଭାଇ ଆରୁ ବୁହୁଣୀ ଜାମାରୋ, ଏନ୍ ଏକା ସୁସାମାଚାର୍ବନ୍ ନିମାନ୍ ପହ୍ଲେ ଶୁଣାବାଚ୍କାଚ୍କାନ୍ ଆରୁ ଏକାନ୍ ନିମ୍ ଗ୍ରହନ୍ହି କାମ୍ଚ୍କାଚ୍କାର୍ ଆରୁ ଏକାନୁ କା ନିମ୍ ଆକ୍କୁନ୍ତକ୍ ମଜ୍ବୁତ୍ ରାଦାର୍। ଆ ସୁସାମାଚାର୍ବନ୍ ଏନ୍ ନିମାନ୍ ଆରୁଅହନ୍ ମନେ କାମ୍ତାଲ୍ଦାନ୍। 2ଇବନ୍ ନିମ୍ ମଜ୍ବୁତ୍ତି ବିଶ୍ୱାସ୍ କାମ୍ତେ ରା ଆରୁ ଇ ସୁସାମାଚାର୍ତି ନିମାଗେ ମୁକ୍ତି ହାଖ୍ଖର। ମାଲ୍ଲାହାଲେ ନିହ୍ମା ବିଶ୍ୱାସ୍ କାମ୍ନାଦ୍ ବେକାର୍ ମାନକୋ।
3ହୁଦ୍ଘିଲାଗାନ୍ ଏନ୍ ଜାମାର୍ଘିନ୍ତି ଇ ଖାସ୍ କାତ୍ଥା ତେଙ୍କାନ୍, ଏକାନ୍ ଏନ୍ ମେନ୍ଚ୍କାଚ୍କାନ୍ କା, ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ଖ୍ରୀସ୍ତ୍ ନାହ୍ମା ପାପ୍ଘି ଲାଗାନ୍ କେଚ୍ଚାସ୍କେରାସ୍।” 4ଆରୁ ଆସିନ୍ ମାସ୍ଣାନୁ ଉଇୟା କେରା ଆରୁ ତିସ୍ରା ଉଲ୍ଲା ପାର୍ମେଶ୍ୱାର୍ସ୍ ଆସିନ୍ ଉଜ୍ଜତାଚାସ୍, ଏସ୍କେ କା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ। 5ଆରୁ ଆସ୍ ପାତ୍ରାସ୍କେ ଏଥ୍ରାସ୍ ଆଦ୍ଘି ପାଛ୍ଲି ବାକି ବାର ଲୋକ୍ ଚେଲାଜାମାର୍ଗେହି ଏଥ୍ରାସ୍। 6ଆନ୍ତିନ୍ ଆସ୍ ପାଞ୍ଚ୍ ଶହ୍ନ୍ତି ବାଗ୍ଗେ ବିଶ୍ୱାସୀର୍ଗେ ଅହ୍ନାସାରେନ୍ ଏଥ୍ରାସ୍ ଆବ୍ଡ଼ାର୍ଘିନ୍ତି ଢେର୍ ଆଲାର୍ ଆକ୍କୁନ୍ତକ୍ ଉଜ୍ଜାଲ୍ନାଇନ୍, ଲେକିନ୍ କେତ୍କ ଆଲାର୍ କେଚ୍ଚାର୍ହି କେରାର୍। 7ଆଦ୍ଘି ପାଛ୍ଲି ଆସ୍ ୟାକୁବ୍ସ୍କେ ଏଥ୍ରାସ୍ ଆନ୍ତିନ୍ ବାକି ଜାମା ଖାସ୍ଚେଲାର୍ଗେ ଏଥ୍ରାସ୍। 8ଆରୁ ଜାମାର୍ଘିନ୍ତି ପାଛ୍ଲି ଆସ୍ ଏଙ୍ଗାଗେହି ଏଥ୍ରାସ୍, ଏକା ଠିକ୍ ସାମାୟନ୍ତି ପାଛ୍ଲି ଜନମ୍ ମାନ୍ଚ୍କା ହାଦ୍ଦୁସ୍ ଲେଖା ରାଦାନ୍। 9ହୁଦ୍ଘିଲାଗାନ୍ ଏନ୍ ଖାସ୍ଚେଲାର୍ସ୍ତି ଜାମାର୍ଘିନ୍ତି ଛୋଟେନ୍, ଏନ୍ଦେର୍ଗେକା ଏନ୍ ପାର୍ମେଶ୍ୱାର୍ସ୍କି ମଣ୍ଡ୍ଲୀବନ୍ ସାଧ୍କାଚ୍କାନ୍, ଆରୁ ଏତ୍କତକ୍ କା ଖାସ୍ଚେଲା ତେଙ୍ଗ୍ର୍ନାଘିହି ଲାଇଗ୍ ମାଲ୍ଦାନ୍। 10ଆରୁ ଆକ୍କୁନ୍ ଏନ୍ ଏକା ଖାସ୍ଚେଲା ରାଦାନ୍, ଆଦ୍ ପାର୍ମେଶ୍ୱାର୍ସ୍କି କ୍ରିପାତି ରାଦାନ୍। ଆରୁ ଏକା କ୍ରିପା ଆସ୍ ଏଙ୍ଘା ମିଆଁ କାମ୍ଚ୍କାଦାସ୍ ଆଦ୍ ବେକାର୍ ମାଲ୍ଲାମାନୁ, ଏନ୍ଦେର୍ଗେକା ଇବ୍ଡ଼ା ଦୁସ୍ରା ଖାସ୍ଚେଲାର୍ଘିନ୍ତିହି ଏନ୍ ବାଗ୍ଗେ ମେହ୍ନତ୍ କାମ୍ଚ୍କାନ୍। ସତ୍ତୁନ୍ ତେଙ୍ଗନ୍ ତା ଏନ୍ ନିଜେ ଆ ମେହ୍ନତ୍ ମାଲ୍ଲା କାମୁନ୍ ଲେକିନ୍ ଏଙ୍ଘା ମିଆଁ କ୍ରିପା କାମିକିରି ପାର୍ମେଶ୍ୱାର୍ସ୍ ଆ ନାଲ୍ଖୁନ୍ କାମ୍ଚ୍କାଦାସ୍। 11ହୁଦ୍ଘିଲାଗାନ୍ ଚାହେ ଏନ୍ ରାଦାନ୍, ଚାହେ ଆବ୍ଡ଼ାର୍ ରାନାଏ, ଏମ୍ ଇ ସୁସାମାଚାର୍ ଶୁଣାବାଦାମ୍। ଆରୁ ଇ ସୁସାମାଚାର୍ନୁ ନିମ୍ହି ବିଶ୍ୱାସ୍ କାମ୍ଚ୍କାର୍।
ଖିଉ ଆଲାର୍ଘି ଉଜ୍ଜନା
12ଏମ୍ ପ୍ରଚାର୍ କାମ୍ଦାମ୍ କା ଖ୍ରୀସ୍ତ୍ କେଚ୍ଚକାସ୍ତି ଉଜ୍ଜିୟାସ୍ ତା, ହାଲେ ନିହ୍ମାସ୍ତି ୟୋଁଲୋକ୍ ଏନ୍ନେ ଏନ୍ଦେର୍ଗେ ତେଙ୍ଗ୍ଦାର୍ କା କେଚ୍ଚକାର୍ ଆରୁଅହନ୍ ମା ଉଜ୍ଜନାଏ? 13ଯଦି କେଚ୍ଚକାର୍ଘିହି ଉଜ୍ଜନା ମା ରଦ୍ନେ ତା ଖ୍ରୀସ୍ତ୍ହି ମା ଉଜ୍ଜସ୍ନେ। 14ଆରୁ ଯଦି ଖ୍ରୀସ୍ତ୍ ମାଲ୍ଲା ଉଜ୍ଜୁସ୍ ତା ଏହ୍ମା ସୁସାମାଚାର୍ ଶୁଣାବାନାଦ୍ ନାଲ୍ଖୁଦ୍ ବେକାର୍ଦ୍ ଆରୁ ନିହ୍ମା ବିଶ୍ୱାସ୍ଦ୍ହି ବେକାର୍ଦ୍। 15ଆରୁ ଯଦି ଏନ୍ନେଦ୍ ତା ଏମ୍ ଖାଲି ବେକାର୍ନୁ ମା ଶୁଣାବାଦାମ୍ ଲେକିନ୍ ହୁଦ୍ଘିନ୍ତିନ୍ ହି ବାଗ୍ଗେ ଖାରାପ୍ ଇଦ୍ କା ଏମ୍ ପାର୍ମେଶ୍ୱାର୍ସ୍କି ବାରେନୁ ଝୁଟ୍ଟୁ ସାକ୍ଷୀ ଚିଦାମ୍। ଏନ୍ଦେର୍ଗେକା ଏମ୍ ସାକ୍ଷୀ ଚିଦାମ୍ କା ପାର୍ମେଶ୍ୱାର୍ସ୍ ଯୀଶୁ ଖ୍ରୀସ୍ତ୍ସିନ୍ କେଚ୍ଚ୍କାସ୍ତି ଉଜ୍ଜତାଚାସ୍। ଲେକିନ୍ କେଚ୍ଚ୍କାସ୍ତି ମା ଉଜ୍ଜର୍ନେତା ପାର୍ମେଶ୍ୱାର୍ସ୍ହି ଆସିନ୍ ମା ଉଜ୍ଜତସ୍ନେ। 16ଏନ୍ ଆରୁହି ତେଙ୍ଗାଲ୍ଦାନ୍ କା ଯଦି କେଚ୍ଚକାର୍ ମା ଉଜ୍ଜର୍ନେତା ଖ୍ରୀସ୍ତ୍ସିନ୍ହି ମା ଉଜ୍ଜତା ମାଲ୍ଲାକୁ। 17ଆରୁ ଯଦି ଖ୍ରୀସ୍ତ୍ସିନ୍ କେଚ୍ଚ୍କାର୍ସ୍ତି ମା ଉଜ୍ଜତାକେରା ହାଲେ ତା ନିହ୍ମା ବିଶ୍ୱାସ୍ କାମ୍ନାଦ୍ ବେକାର୍ଦ୍ ଆରୁ ନିମ୍ ଆକ୍କୁନ୍ହି ନିହ୍ମା ପାପ୍ନୁ ଫାସ୍ର୍କାଦାର୍। 18ବରନ୍ ଏକାର୍ ଖ୍ରୀସ୍ତ୍ସିନ୍ ବିଶ୍ୱାସ୍ କାମିକିରି କେଚ୍ଚାର୍ କେର୍କାନାଏ ଆବ୍ଡ଼ାର୍ହି ନାଶ୍ ମାନ୍ଚାର୍ କେର୍କାନାଏ। 19ଯଦି ନାମ୍ ଖାଲି ଇ ଦୁନିଆଁନ୍ତା ଜୀବନ୍ଘି ବାନେଲାଗାନ୍ ନାମ୍ ଖ୍ରୀସ୍ତ୍କି ମିଆଁ ଆଶ୍ରା ଉଇୟତ୍ ତା ନାମ୍ ଜାମା ଆଲାର୍ସ୍ତି ବାଗ୍ଗେ ଗୋଡ଼୍ଗୋଡ଼ା ରାଦାତ୍।
20ଲେକିନ୍ ଖ୍ରୀସ୍ତ୍ ସତ୍ତୁନିନ୍ କେଚ୍ଚକାର୍ସ୍ତି ଉଜ୍ଜିୟାସ୍, ଆରୁ ଏକାର୍ କେଚ୍ଚାର୍ କେର୍କାନାଏ, ଆବ୍ଡ଼ାର୍ସ୍ତି ଆସ୍ ପହ୍ଲେ ଫାଡ଼ୁ ମାନ୍ଚାସ୍। 21ଏନ୍ଦେର୍ଗେକା ଏସ୍କେ ପହିଲ୍ ଆଲ୍ ଆଦାମ୍ସ୍ ପାପ୍ କାମ୍ଚାସ୍ ହୁଦ୍ଘିଲାଗାନ୍ ଦୁନିଆଁନୁ ଖିନା ବାର୍ଚା। ହନ୍ନେନ୍ ଆରୁ ଅଣ୍ଟା ଆଲାସ୍ ଯୀଶୁ ଖ୍ରୀସ୍ତ୍କି ଦ୍ୱାର୍ନୁ କେଚ୍ଚ୍କା ଆଲାର୍ ଉଜ୍ଜନାଏ। 22ଆରୁ ଏସ୍କେ ଆଦାମ୍ସ୍ ପାପ୍ କାମ୍ଚାସ୍ ହନ୍ନେନ୍ ନାମ୍ହି ପାପ୍ କାମ୍ଚ୍କାତ୍, ହୁଦ୍ଘିଲାଗାନ୍ ନାମ୍ ଜାମାତ୍ ଖିଦାତ୍ ହନ୍ନେନ୍ ଏକାର୍ ଖ୍ରୀସ୍ତ୍କି ମିଆଁ ବିଶ୍ୱାସ୍ କାମ୍ନାଏ ଆବ୍ଡ଼ାର୍ହି ଅନ୍ଦୁଲ୍ କେଚ୍ଚ୍କାସ୍ତି ଉଜ୍ଜର୍। 23ଲେକିନ୍ ଜାମାର୍ଘି ଲାଗାନ୍ ସାମାୟ ରାଇଦ୍। ଆରୁ ପହିଲ୍ ଫାଡ଼ୁ ଲେଖା ଖ୍ରୀସ୍ତ୍ସିନ୍ ପହ୍ଲେ କେଚ୍ଚ୍କାସ୍ତି ଉଜ୍ଜତାକେରା, ଆନ୍ତିନ୍ ଖ୍ରୀସ୍ତ୍ ଯେତ୍କବାକେନ୍ ଆରୁଅହନ୍ ବାରସ୍, ହତ୍କବାକେନ୍ ଆସିନ୍ ବିଶ୍ୱାସ୍ କାମୁରିନ୍ହି ଅହ୍ନାସାରେନ୍ ଉଜ୍ଜତାକୋ। 24ଆଦ୍ଘି ପାଛ୍ଲି ଦୁନିଆଁଘି ଆଖ୍ରୀ ମାନଦ୍, ହତ୍କବାକେନ୍ ଦୁନିଆଁନୁ ରାଜୀ କାମୁ ଜାମା ଅଧିକାରୀରିନ୍ ଆରୁ ଜାମା ଖାରାପ୍ ଶକ୍ତିଗୁଠିନ୍ ଖ୍ରୀସ୍ତ୍ ନାଶ୍ କାମଚସ୍ ଆରୁ ରାଜୀନ୍ ବାଙ୍ଗ୍ ପାର୍ମେଶ୍ୱାର୍ସ୍କି ହେଖ୍ଖାନୁ ସୋଁପଚସ୍। 25ଏନ୍ଦେର୍ଗେକା ଯେତ୍କତକ୍ ପାର୍ମେଶ୍ୱାର୍ସ୍ ଖ୍ରୀସ୍ତ୍ଘି ତାଙ୍ଘା ଜାମା ବିରୋଧିରିନ୍ ଆସ୍କି ହେଡ୍ଡୁ କିୟାଁ ମା ଉଇୟସ୍ ହତ୍କତକ୍ ଆସ୍କେ ରାଜୀ ଚାଲାବାନାଦ୍ ଜରୁରୀ ରାଇଦ୍। 26ଆରୁ ଜାମାର୍ଘିନ୍ତି ଆଖ୍ରୀନୁ ଏକା ବିରୋଧିବନ୍ ନାଶ୍ କାମାକୋ ଆ ବିରୋଧି ମରନ୍। 27ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ ପାର୍ମେଶ୍ୱାର୍ସ୍ ଜାମାକିଛିନ୍ ଆସ୍କି କିୟାଁ କାମ୍ଚେଇଚ୍କାଦାସ୍। “ଇଦ୍ଘି ମତ୍ଲବ୍ ଇଦ୍ କା ଜାମାକିଛିନ୍ ଖ୍ରୀସ୍ତ୍କି ଅଧିନ୍ନୁ ଚିଆ କେର୍କିଚି। ଲେକିନ୍ ଏକା ପାର୍ମେଶ୍ୱାର୍ସ୍ ଜାମାକିଛିନ୍ ଆସ୍କି ଅଧିନ୍ନୁ ଚିଚ୍କାଦାସ୍ ଆସ୍ ଖାଲି ଆସ୍କି ଅଧିନ୍ନୁ ମାଲ୍କାସିନ୍।” 28ଆରୁ ଜାମାକିଛିନ୍ ପାର୍ମେଶ୍ୱାର୍ସ୍ ତାଙ୍ଘା ହାଦ୍ଦୁ ଖ୍ରୀସ୍ତ୍କି ଅଧିନ୍ନୁ କାମ୍ଚେଇଚ୍କାଦାସ୍। ଲେକିନ୍ ଯେତ୍କବାକେନ୍ ଆସ୍ ତେଙ୍ଗ୍ଦାସ୍, “ଜାମାକିଛି ଆସ୍କି ଅଧିନ୍ନୁ କାମାକେର୍କିଚିଦ୍,” ଇଦ୍ ସତ୍ତୁଦ୍ କା ପାର୍ମେଶ୍ୱାର୍ସ୍ ଇନ୍ନୁ ସାମିଲ୍ ମାଲ୍କାସିନ୍, ଏକାସ୍ କା ଜାମାକିଛିନ୍ ଆସ୍କି ଅଧିନ୍ନୁ କାମ୍ଚେଇଚ୍କାଦାସ୍।
29ଆରୁ ପାର୍ମେଶ୍ୱାର୍ସ୍ କେଚ୍ଚ୍କା ଆଲାରିନ୍ ଜରୁର୍ ମରନ୍ସ୍ତି ଉଜ୍ଜତସ୍। ଯଦି ନିମ୍ ଇ କାତ୍ଥାଘି ମିଆଁ ବିଶ୍ୱାସ୍ ମା କାମ୍ଦାର୍ ତା ନିହ୍ମାସ୍ତିନିନ୍ ଏକା ଆଲାର୍ କେଚ୍ଚକା ଆଲାର୍ଘି ଲାଗାନ୍ ଆସ୍ନାନ୍ ହୋନାଏ ତା ଆବ୍ଡ଼ାର୍ ଏକା ଆଶ୍ରା ହୋଇକିରି କାମ୍ନାଏ? 30ଆରୁ ଯଦି ପାର୍ମେଶ୍ୱାର୍ସ୍ କେଚ୍ଚକା ଆଲାରିନ୍ ମା ଉଜ୍ଜତ୍ସ୍ନେ ତା ନାମ୍ ଏନ୍ଦେର୍ଗେ ନାହ୍ମା ଜୀବନ୍ବନ୍ ଧ୍ୟାନ୍-ଧ୍ୟାନ୍ ବିପଦ୍ନୁ ଟିଡ଼୍ଦାତ୍? 31ହେ ଭାଇ ଆରୁ ବୁହୁଣୀ ଜାମାରୋ, ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍ନୁ ନିହ୍ମା ଲାଗାନ୍ ଏନ୍ ଏକା ବଡ଼୍ପଣି ଏଦ୍ର୍ଦାନ୍ ଇଦ୍ଘି କସମ୍ ମହିଁକିରି ଏନ୍ ତେଙ୍ଗାଲ୍ଦାନ୍ କା ଏନ୍ ରୋଜ୍ଦିନ୍ ମରନ୍ଘି ସାମ୍ନା କାମ୍ଦାନ୍। 32ଆରୁ ଇଫିସୁସ୍ ସହର୍ତା ଆଲାର୍ ଏଙ୍ଗାନ୍ ବାଗ୍ଗେ ବିରୋଧ୍ କାମ୍ଚାର୍ ଆରୁ ଆବ୍ଡ଼ାର୍ ହାର୍ବୁନ୍ତା ଜାନ୍ତୁ ଲେଖା ଏଙ୍ଘାଗାନେ ଲାଡ଼୍ଚାର୍। ଯଦି କେଚ୍ଚକା ଆଲାରିନ୍ ମା ଉଜ୍ଜତାକତା ଏଙ୍ଘା ଲାଡ଼୍ନାଦ୍ ଖାଲି ଇ ଦୁନିଆଁଘି ଲାଗାନ୍ନିନ୍ ମାନିକିରି ରୋକ ଆରୁ ଏନ୍ ଇବ୍ଡ଼ା ଜାମାନ୍ କାମିକିରି ଏନ୍ଦେର୍ହି ଫାଏଦା ମା ମାନିଦ୍। ଆରୁ ଏନ୍ନେ ମାନଦ୍ତା, “ବାରା ନାମ୍ ଅନତ୍ ମହତ୍ ଆରୁ ମଉଜ୍ମଜ୍ଲିସ୍ କାମତ୍, ଏନ୍ଦେର୍ଗେକା ନେଲାତା ନାମାଗେ ଖିନାଇନ୍ରାଇ।” 33ଏକାର୍ ଏନ୍ନେ ତେଙ୍ଗ୍ନାଏ ଆବନ୍ ମେନିକିରି ଧୋଖା ଆମା ମହାଁ, “ଏନ୍ଦେର୍ଗେକା ଖାରାପ୍ ସାଙ୍ଗେ ବାନେ ଆଦତ୍ବନ୍ ବାଗ୍ଡ଼ିଚି।” 34ନିମ୍ ହୋସ୍ନୁ ବାରା ଆରୁ ପାପ୍ ଆମା କାମା, ଏନ୍ଦେର୍ଗେକା ନିହ୍ମାସ୍ତି ୟୋଁଲୋକ୍ ପାର୍ମେଶ୍ୱାର୍ସ୍କି ସତ୍ତୁ ଶିକ୍ଷାବନ୍ ବାଲ୍ଲନାଇନ୍। ଏନ୍ ନିମାନ୍ ଲାଜର୍ତାଗେ ଏନ୍ନେ ତେଙ୍ଗାଲ୍ଦାନ୍।
ନାହ୍ମାଏ ଏନ୍ନେ ମେଦୁ ମାନଦ୍ ଏକାଦ୍ କା ନାଶ୍ ମା ମାନଦ୍
35ଆକ୍କୁନ୍ ନେଦ୍ ଏନ୍ନେ ତେଙ୍ଗର୍, “କା ଖିଉ ଆଲାର୍ ଏସ୍କେ ଉଜ୍ଜନାଏ? ଆରୁ ଆବ୍ଡ଼ାର୍ ଏକା ମେଦୁଗାନେ ବାର୍ନାଏ?” 36ଏନ୍ ଆବ୍ଡ଼ାରିନ୍ ତେଙ୍ଗାଲ୍ଦାନ୍ କା ହେ ନିର୍ବୁଦ୍ଧିଆରୋ! ଏକା ବିହିନି ନିମ୍ ଚାହ୍ଦାର୍ ଯେତ୍କତକ୍ ମା ଖିଇଦ୍ ଆଦ୍ ମା କୁନ୍ଦିଦ୍। 37ଆରୁ ଯେତ୍କବାକେନ୍ ନିମ୍ ଗହମ୍ ଚାହେ ଆରୁ ଦୁସ୍ରା ବିହ୍ନିନ୍ ଚାହ୍ଦାର୍ ତା ନିମ୍ ହୋପ୍ପାନ୍ ମା ଇଦ୍ଦାର୍ ଲେକିନ୍ ଖାଲି ବିହିନି ଚାହ୍ଦାର୍। 38ଲେକିନ୍ ପାର୍ମେଶ୍ୱାର୍ସ୍ ତାଙ୍ଘା ଇଚ୍ଛା ଲେଖା ଆ ବିହିନିଘି ଆକାର୍ ଚିଦାସ୍ ଆରୁ ଜାମା ବିହିନିଘି ନାନ୍ନା-ନାନ୍ନା ଆକାର୍ ଚିଦାସ୍। 39ଆରୁ ଜାମା ଉଜ୍ଜୁର୍ଘି ମେଦୁ ଅଣ୍ଟା ଲେଖା ମା ରାଇ। ଆଲାର୍ଘି ମେଦୁ ଅଣ୍ଟାଇନ୍ ରାଇଦ୍, ପଶୁଘି ମେଦୁ ନାନ୍ନା ରାଇ, ହନ୍ନେନ୍ ଓଡ଼ାଘି ମେଦୁହି ନାନ୍ନା ରାଇ ଆରୁ ଇଞ୍ଜୋଘି ମେଦୁଦ୍ହି ନାନ୍ନା ରାଇ। 40ହନ୍ନେନ୍ ଆକାଶ୍ନୁ ରାନାବାଲା ବିଡ଼ି, ଚାନ୍ଦୋ ଆରୁ ବିନ୍କୋଘି ରୂପ୍ ଦୁନିଆଁନୁ ରାନାବାଲାର୍ଘି ମେଦୁସ୍ତି ନାନ୍ନା ରାଇ। ଏନ୍ଦେର୍ଗେକା ଆକାଶ୍ନୁ ରାନାବାଲାର୍ଘି ବିଲ୍ଲୀ ଆରୁ ଶୋଭା ଆରୁ ଦୁନିଆଁନୁ ରାନାବାଲାର୍ସ୍ତି ନାନ୍ନା ରାଇ। 41ଆରୁ ଆକାଶ୍ନୁ ରାନାବାଲାର୍ଘି ବିଲ୍ଲୀହି ତାହ୍ମା ଭିତର୍ନୁ ଭିନେ-ଭିନେ ରାଇ। ଏସ୍କେ କା ବିଡ଼ିଘି ବିଲ୍ଲୀ ଅଣ୍ଟା ରାଇ ତା ଆରୁ ଚାନ୍ଦୋଘି ବିଲ୍ଲୀ ନାନ୍ନା ରାଇ। ଆନ୍ନେନିନ୍ ବିନ୍କୋଘି ବିଲ୍ଲୀଦ୍ହି ଭିନେ-ଭିନେ ରାଇ, ଏନ୍ଦେର୍ଗେକା ଅଣ୍ଟା ବିନ୍କୋଘି ବିଲ୍ଲୀ ନାନ୍ନା ବିନ୍କୋସ୍ତି ଭିନେ ରାଇଦ୍।
42ଆରୁ କେଚ୍ଚକା ଆଲାର୍ଘି ଉଜ୍ଜନାଦ୍ହି ଏନ୍ନେନ୍ ମାନଦ୍। ଏସ୍କେ ଅଣ୍ଟା ବିହିନି ଚାହ୍କୁନ୍ ଆଦ୍ ହେଁହ୍ଲାନୁ ଖାତ୍ରିକିରି ଖିଇ କାଇଦ୍, ହନ୍ନେନ୍ ଆଲାର୍ଘି କେଚ୍ଚ୍କା ପାଛ୍ଲି ଇ ଦୁନିଆଁଘି ଶରୀର୍ବନ୍ ମାଁଣାକାଇ ଆରୁ ଆଦ୍ହି କିତ୍ତିକାଇ। ଲେକିନ୍ ଏକା ମେଦୁନ୍ ଉଜ୍ଜତାକାଇ ଆଦ୍ ଜାମାବାକେନ୍ ରାନାବାଲାଦ୍। 43ଆରୁ ଯେତ୍କବାକେନ୍ ଦୁନିଆଁନ୍ତା ମେଦୁବନ୍ ମାଁଣାକାଇ ଆଦ୍ ଦୁନିଆଁନ୍ତା ଆଲାର୍ଘି ମେଦୁଦ୍ କାମ୍ଜୋର୍ ରାଇଦ୍। ଲେକିନ୍ ଏକା ମେଦୁବନ୍ ଉଜ୍ଜତାକୋ ଆଦ୍ ଶକ୍ତିତି ନିନ୍ଦିକିରୋ। 44ଆରୁ ଏକା ମେଦୁନ୍ ମାଁଣାକାଇ, ଆଦ୍ ଇ ଦୁନିଆଁନ୍ତାହି ମେଦୁ ରାଇ, ଲେକିନ୍ ଯେତ୍କବାକେନ୍ ଆବନ୍ ଉଜ୍ଜତାକତା ଆଦ୍ ଆତ୍ମିକ୍ ମେଦୁ ମାନିକାଇ ଏକାଦ୍ କା ସରଗ୍ଘି ଲାଇଗ୍ ମାନିଦ୍। ଏନ୍ଦେର୍ଗେକା ଆଲାର୍ଘି ଦୁନିଆଁନ୍ତା ମେଦୁଦ୍ ରାଇ ତା ଆତ୍ମିକ୍ ମେଦୁହି ରାଇଦ୍। 45ହୁଦ୍ଘିଲାଗାନ୍ ପାବିତାର୍ ଶାସ୍ତ୍ରନୁ ଏନ୍ନେ ଲେଖ୍ଚ୍କା ରାଇ କା, “ପହେଲା ଆଲାସ୍ ମତ୍ଲବ୍ ଆଦାମ୍ସ୍ ଉଜ୍ଜୁ ଆଲ୍ ମାନ୍ଚାସ୍।” ଆରୁ ଆଖ୍ରୀ ଆଦାମ୍ସ୍ ମତ୍ଲବ୍ ଯୀଶୁ ଖ୍ରୀସ୍ତ୍ ଆ ଆତ୍ମିକ୍ ମେଦୁନ୍ ଚିନାବାଲା ମାନ୍ଚାସ୍। 46ଲେକିନ୍ ଏକାଦ୍ ଦୁନିଆଁନ୍ତା ମେଦୁ ରାଚା ଆବନ୍ ପହ୍ଲେ ନାମାଗେ ଚିୟାକେରା, ଆଦ୍ଘି ପାଛ୍ଲିନିନ୍ ନାମାଗେ ଆତ୍ମିକ୍ ମେଦୁନ୍ ଚିୟାକେରା। 47ଆରୁ ପହ୍ଲେ ଆଲ୍ ଆଦାମ୍ସିନ୍ ଧାନ୍ତାରିନ୍ତା ହାଜ୍ଜୁତି କାମାକେରା; ଆରୁ ଯୀଶୁ ଖ୍ରୀସ୍ତ୍ ଏକାସ୍ କା ଦୁସ୍ରା ଆଲାସ୍ ଆସ୍ ସରଗ୍ତି ବାର୍ଚ୍କାଦାସ୍ 48ଆରୁ ଏସ୍କେ ଆସ୍ ପହ୍ଲେ ଆଲ୍ ଆଦାମ୍ସ୍ ହାଜ୍ଜୁତି ମାନ୍ଚ୍କାଦାସ୍, ହନ୍ନେନ୍ ଦୁନିଆଁନ୍ତା ଜାମା ଆଲାର୍ହି ଆସ୍କି ଲେଖା ରାନାଏ। ଲେକିନ୍ ଦୁସ୍ରା ଆଲ୍ ଯୀଶୁ ଖ୍ରୀସ୍ତ୍ ଏକାସ୍ କା ସରଗ୍ତାସ୍, ହୁଦ୍ଘିଲାଗାନ୍ ଏକା ଆଲାର୍ ସରଗ୍ନୁ ରାନାଏ ଆବ୍ଡ଼ାର୍ହି ଆସ୍ ଲେଖାଇନ୍ ରାନାଏ। 49ଆରୁ ଏସ୍କେ ଆଦାମ୍ସିନ୍ ହାଜ୍ଜୁତି କାମା କେର୍କିଚି ହନ୍ନେନ୍ ନାହ୍ମା ରୂପ୍ଧି ଆସ୍କି ଲେଖା ରାଇ, ଆନ୍ନେନିନ୍ ଦୁସ୍ରା ଆଲାସ୍ ସରଗ୍ତି ବାର୍ଚ୍କାଦାସ୍ ହୁଦ୍ଘିଲାଗାନ୍ ନାହ୍ମାଏ ମେଦୁଦ୍ହି ଆସ୍କି ଲେଖା ସରଗ୍ନୁ ମାନଦ୍।
50ହେ ଭାଇ ଆରୁ ବୁହୁଣୀ ଜାମାରୋ, ଏନ୍ ନିମାନ୍ ତେଙ୍ଗାଲ୍ଦାନ୍ କା ଇ ନାହ୍ମା ହେଁସୁ ଆରୁ ଆହ୍ଡ଼ାତି ମାନ୍ଚ୍କା ନାହ୍ମା ମେଦୁବନ୍ ହୋଇକିରି ସରଗ୍ନୁ କାଲା ପଲ୍ଲଦାତିନ୍। ଏନ୍ଦେର୍ଗେକା ଇ ଦୁନିଆଁନ୍ତା ନାହ୍ମା ମେଦୁଦ୍ ନାଶ୍ ମାନିକାଇଦ୍ ଲେକିନ୍ ସରଗ୍ ରାଜୀନୁ ନାମାଗେ ହାଖ୍ଖରାନାବାଲା ଶରୀର୍ ସବୁଦିନ୍ଘି ଲାଗାନ୍ ରଦ୍। 51ମେନା ଏନ୍ ନିମାନ୍ ପାର୍ମେଶ୍ୱାର୍ସ୍କି ନୁହୁର୍କା କାତ୍ଥା ତେଙ୍ଗାଲ୍ଦାନ୍। ନାହ୍ମାସ୍ତି ୟୋଁଲୋକ୍ ମା ଖିଦାତ୍, ଲେକିନ୍ ନାମ୍ ଜାମା ଆଲାତ୍ ବାଦ୍ଲାରତ୍କତ୍। 52ଆରୁ ଯେତ୍କବାକେନ୍ ଆଖ୍ରୀ ତୂରୀବାଜା ଉରାକୋ ହତ୍କବାକେନ୍ ଅହ୍ନାସାରେନ୍ କେଚ୍ଚ୍କା ଆଲାର୍ ଏକ୍ଲାହି ମା ଖିନାବାଲା ମେଦୁତି ଉଜ୍ଜର୍। ଆରୁ ନାହ୍ମା ଜାମାର୍ଘି ମେଦୁଦ୍ ବାଦ୍ଲାରକୋ। 53ଏନ୍ଦେର୍ଗେକା ନାହ୍ମା ଇ ଖିନାବାଲା ମେଦୁତି ନାମ୍ ସରଗ୍ କାଲା ପଲ୍ଲଦାତିନ୍ ହୁଦ୍ଘିଲାଗାନ୍ ଆସାନ୍ କାନାଘି ଲାଗାନ୍ ନାହ୍ମା ଇ ଖିନାବାଲା ମେଦୁନୁ ମା ଖିନାବାଲା ମେଦୁନୁ ବାଦ୍ଲାରାଇନ୍ ଖାତ୍ରୋ। 54ଆରୁ ଯେତ୍କବାକେନ୍ ଇ ଖିନାବାଲା ମେଦୁଦ୍ ମା ଖିନାବାଲା ମେଦୁନୁ ବାଦ୍ଲାରୋକ, ଆଙ୍ଗେନ୍ ଏକାଦ୍ ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ ଆଦ୍ ପୁରା ମାନକୋ। ଆଦ୍ ଏନ୍ନେ ରାଇଦ୍ କା “ଖିନାବନ୍ ନାଶ୍ କାମା କେର୍କିଚି ଆରୁ ଜିତ୍ ହାଖ୍ଖରା କେର୍କିଚି”।
55ହେ ଖିନା ଏକାତାରା କେରା ନିଙ୍ଘା ଜିତ୍ନା? ଆରୁ ଏକାସାନ୍ ରାଇ ନିଙ୍ଘା ଏଡ଼୍ତୁ-ଚାର୍? 56ଆରୁ ମୁଶାସ୍କି ନିୟମ୍ତି ଆହ୍ଦାତ୍ କା ନାମ୍ ପାପ୍ କାମ୍ଚ୍କାଦାତ୍ ଆରୁ ନାମ୍ ପାପ୍ କାମ୍ଦାତ୍ ହୁଦ୍ଘିଲାଗାନ୍ ମରନ୍ଗେ ଶକ୍ତି ହାଖ୍ଖରି ଆରୁ ନାମ୍ ଖିଦାତ୍। 57ଲେକିନ୍ ନାମାଗେ ପାର୍ମେଶ୍ୱାର୍ସିନ୍ ଧାନ୍ୟାବାଦ୍ ଚିନା କାତ୍ଥା କା ଆସ୍ ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍କି ଦ୍ୱାର୍ନୁ ନାମାନ୍ ପାପ୍ ଆରୁ ମରନ୍ସ୍ତି ଜିତ୍ତାଦାସ୍। 58ହୁଦ୍ଘିଲାଗାନ୍ ହେ ଏଙ୍ଘା ଦୁଲାଡ଼ି ଭାଇ ଆରୁ ବୁହୁଣୀ ଜାମାରୋ, ନିମ୍ ବିଶ୍ୱାସ୍ନୁ ମଜ୍ବୁତ୍ ରା ଆରୁ ବିଶ୍ୱାସ୍ତି ଆମ୍କେ ହାଟ୍ରା। ଆରୁ ପ୍ରାଭୁସ୍କି ନାଲ୍ଖୁନ୍ କାମାଗେ ନିମ୍ ନିଜ୍କେନିଜ୍ବନ୍ ପୁରାପୁରୀ ସୋଁପାଚା। ଏନ୍ଦେର୍ଗେକା ନିମ୍ ଆହ୍ଦାର୍ କା ପ୍ରାଭୁସ୍କି ଲାଗାନ୍ ଏକା ମେହ୍ନତ୍ କାମ୍ଦାର୍ ଆଦ୍ ବେକାର୍ ମାଲ୍ଲିଦ୍।
16ବିଶ୍ୱାସୀ ଆଲାର୍ଗେ ଦାନ୍ ଚିନା
1ହେ ଏଙ୍ଘାଏ ଭାଇ ଆରୁ ବୁହୁଣୀ ଜାମାରୋ, ଆକ୍କୁନ୍ ଏନ୍ ନିମାନ୍ ଯେରୁଶାଲେମ୍ ତା ବିଶ୍ୱାସୀର୍ଗେ ଦାନ୍ ଠୁଡ଼ିୟାନାଘି ବାରେନୁ ତେଙ୍ଗାଲ୍ଦାନ୍। ଇଦ୍ଘି ବାରେନୁ ଏନ୍ ଗାଲାତୀୟା ପ୍ରଦେଶ୍ତା ଖ୍ରୀସ୍ତ୍ ମଣ୍ତ୍ଲୀନ୍ ଏକାନ୍ ଏନ୍ ତେଙ୍କାନ୍, ଆନ୍ନେନିନ୍ ନିମ୍ହି କାମା। 2ଆରୁ ଆଦ୍ ଇଦ୍ କା, ନିହ୍ମାଏ କମାଣିଘି ଅନୁସାର୍ ଜାମା ହାପ୍ତାଘି ପହିଲ୍ ଉଲ୍ଲା ମତ୍ଲବ୍ ରାଏବାର୍ ଉଲ୍ଲା ନିହ୍ମାସ୍ତି ଅର୍ତୁ-ଅର୍ତୁ ଆଲାର୍ ନିଜର୍-ନିଜର୍ କମାଣିନ୍ତି ଥୋଡ଼େ ପାଏସା ଭିନେ ଉଇୟା। ଆରୁ ନିମ୍ ଏନ୍ନେ କାମର୍ ତା ଯେତ୍କବାକେନ୍ ଏନ୍ ବାରନ୍ ହତ୍କବାକେନ୍ ନିମାଗେ ଆରୁଅହନ୍ ପାଏସା ଠୁଡ଼ିୟାଗେ ଦାର୍କାର୍ ମା ଖାତ୍ରି। 3ଆରୁ ଯେତ୍କବାକେନ୍ ଏନ୍ ବାରନ୍, ତା ଏକାରିନ୍ ନିମ୍ ଚାଜର୍ ଆବ୍ଡ଼ାର୍ଗେ ଏନ୍ ଚିଠିନ୍ ଚିଇକିରି ତାଇୟନ୍ଚନ୍, କା ଆବ୍ଡ଼ାର୍ ନିହ୍ମାଏ ଦାନ୍ ପାଏସାନ୍ ଯେରୁଶାଲେମ୍ଗେ ଆଣ୍ସ୍ତଚର୍। 4ଆରୁ ଯଦି ନିମ୍ ସୋଚର୍ କା ଏଙ୍ଘାଏହି ଆସାନ୍ କାନାଦ୍ ବାନେ ମାନତା ଏନ୍ହି ଆବ୍ଡ଼ାର୍ ଗାନେ କନ୍।
ପାଉଲୁସ୍ ବିଶ୍ୱାସୀ ଆଲାର୍ ଗାନେ ଭେଁଟ୍ ମାନାଗେ ସୋଚାଲ୍ଦାସ୍
5ଆରୁ ଏନ୍ ମାକିଦୁନିଆଁ ପ୍ରଦେଶ୍ କରିକିରି ନିହ୍ମାସାନ୍ ବାରନ୍, ଏନ୍ଦେର୍ଗେକା ଏଙ୍ଗା ମାକିଦୁନିଆଁ କରିକିରିତା କାନାଇନ୍ ରାଇ। 6ଲେକିନ୍ ମାନା ଅଙ୍ଗିତା ଏନ୍ ନିହ୍ମାସାନ୍ ରନ୍କନ୍ ଆରୁ ପାୟାଁ ଉଲ୍ଲା ନିହ୍ମାସାନ୍ ବିତାବନ୍। ଏନ୍ଦେର୍ଗେକା ଆଦ୍ଘି ପାଛ୍ଲି ଏନ୍ ଏକ୍ରିନ୍ସାନ୍ହି କନ୍ ନିମ୍ ଏଙ୍ଗାନ୍ ଏଙ୍ଘାଏ କାନାନୁ ମଦେତ୍ କାମର୍। 7ଏନ୍ଦେର୍ଗେକା ଏନ୍ ଆକ୍କୁନ୍ ନିମାନ୍ ପାବୁନୁ ଭେଁଟ୍ ମାନାଗେ ମାଲ୍ଲା ବେଦ୍ଦନା; ଲେକିନ୍ ଏଙ୍ଗା ଆଶ୍ରା ରାଇ କା ଯଦି ପ୍ରାଭୁସ୍ ଚାହଁସ୍ ତା କେତ୍କ ସାମାୟତକ୍ ଏନ୍ ନିହ୍ମାଗାନେ ରନ୍। 8ଲେକିନ୍ ଏନ୍ ପେନ୍ତେକୋଶ୍ ପରବ୍ ଜୁଟି ଇଫିସୁସ୍ ସହର୍ନୁ ରନ୍। 9ଏନ୍ଦେର୍ଗେକା ଆସାନ୍ ଏଙ୍ଗାନ୍ ବିରୋଧ୍ କାମୁର୍ ଢେର୍ ରାନାଏ, ହାଲେହି ଆସାନ୍ ବାନେ ସେବା କାମାଗେଲାଗାନ୍ ଆକ୍କୁନ୍ ବାଡ଼୍କା ମୋଉକା ରାଇ।
10ଯେତ୍କବାକେନ୍ ତୀମଥିଉସ୍ ନିହ୍ମାସାନ୍ ବାରସ୍ ତା, ଆସିନ୍ ବାନେକିରି ସ୍ୱାଗାତ୍ କାମା। ଆରୁ ନିମ୍ ଏନ୍ନେ ବେଭାର୍ କାମା କା ଆସ୍ ବିନାଏଲ୍ଚିକିରି ନିହ୍ମାଗାନେ ରା ଅଙ୍ଗସ୍। ଏନ୍ଦେର୍ଗେକା ଏସ୍କେ ଏନ୍ ରାଦାନ୍ ଆନ୍ନେନ୍ ଆସ୍ହି ଏଙ୍ଘା ଲେଖା ପ୍ରାଭୁସ୍କି ନାଲ୍ଖୁ କାମ୍ଦାସ୍। 11ହୁଦ୍ଘିଲାଗାନ୍ ନେଦ୍ହି ଆସିନ୍ ହିନିସ୍ତା ଆମ୍କେ କାମା, ଲେକିନ୍ ନିମ୍ ଆସ୍କି ପାବୁ ଖାର୍ଚ୍ଚା ଯୋଗାଡ଼୍ କାମ୍କେଚିକେ ତାକା ଆସ୍ ବାନେକିରି ଇସାନ୍ ଆଣ୍ସସ୍। ଆସ୍ ଦୁସ୍ରା ବିଶ୍ୱାସୀ ଭାଇ ଜାମାର୍ଗାନେ ଏଙ୍ଘାସାନ୍ ବାନେକିରି ଆଣ୍ସସ୍ ଏନ୍ଦେର୍ଗେକା ଏନ୍ ଆସ୍କି ପାବୁ ଏରାଲ୍ଦାନ୍। 12ନାହ୍ମା ଭାଇ ଆପଲ୍ଲସ୍ସିନ୍ ଏନ୍ ମୁରୁକ୍ ଆର୍ଜୀ କାମ୍ଚ୍କାନ୍ କା ଆସ୍ ନିହ୍ମାସାନ୍ ଦୁସ୍ରା ଭାଇ ଜାମାର୍ଗାନେ କସ୍। ଲେକିନ୍ ଆକ୍କୁନ୍ ନିହ୍ମାସାନ୍ ବାର୍ନାଘି ଲାଗାନ୍ ପାର୍ମେଶ୍ୱାର୍ସ୍କି ଇଚ୍ଛା ମାଲ୍ଲାଦିନ୍। ଯେତ୍କବାକେନ୍ ଆସ୍କେ ମୋଉକା ହାଖ୍ଖର, ହତ୍କବାକେନ୍ ଆସ୍ ନିହ୍ମାସାନ୍ ବାରସ୍।
ଇ ଚିଠିଘି ଆଖ୍ରୀ କାତ୍ଥା
13ହେ ଏଙ୍ଘା ଭାଇ ଆରୁ ବୁହୁଣୀ ଜାମାରୋ, ନିମ୍ ହୁସିୟାର୍ ରା, ବିଶ୍ୱାସ୍ନୁ ମଜ୍ବୁତ୍ ରା, ଆରୁ ପାଛ୍ଲି ଆମା କିର୍ରା। ଆରୁ ବିଶ୍ୱାସ୍ନୁ ତାକତ୍ବାଲା ମାନା। 14ଆରୁ ନିମ୍ ଏନ୍ଦ୍ରିନ୍ହି କାମର୍ ଆବନ୍ ବାନେକିରି କାମର୍।
15ହେ ଭାଇ ଆରୁ ବୁହୁଣୀ ଜାମାରୋ, ନିମ୍ ସ୍ତିଫାନ୍ସ୍କି ପରିବାର୍ନୁ ରାନାବାଲା ଜାମାରିନ୍ ତା ଆହ୍ଦାର୍ କା ଆବ୍ଡ଼ାର୍ ଆଖାୟା ପ୍ରଦେଶ୍ ତା ପହ୍ଲେ ବିଶ୍ୱାସୀର୍ ଆରୁ ଆବ୍ଡ଼ାର୍ ପାର୍ମେଶ୍ୱାର୍ସ୍କି ଆଲାର୍ଘି ସେବା କାମାଗେ ଜାମାବାକେନ୍ ତିୟାର୍ ରାନାଏ। 16ହୁଦ୍ଘିଲାଗାନ୍ ଏନ୍ ନିମାନ୍ ଆର୍ଜୀ କାମାଲ୍ଦାନ୍ କା ନିମ୍ ଏନ୍ନେ ଆଲାର୍ଘି କିୟାଁ ରା। ଆରୁ ଏକାର୍ ଆବ୍ଡ଼ାର୍ ଗାନେ ମୁରୁକ୍ ମେହ୍ନତ୍ କାମ୍ନାଏ ଆବ୍ଡ଼ାର୍ଘି କିୟାଁହି ନିମ୍ ରା। 17ଆରୁ ନିହ୍ମାସ୍ତି ଭାଇ ସ୍ତିଫାନ୍ସ୍, ଫୁର୍ତୁନାତୁସ୍ ଆରୁ ଆଖାଇକୁସ୍ ହି ଏଙ୍ଗାନ୍ ଭେଁଟ୍ ମାନାଗେ ବାର୍ଚାର୍। ହୁଦ୍ଘିଲାଗାନ୍ ଏଙ୍ଗାଗେ ବାଗ୍ଗେ ରୀଜ୍ଝୁ ଲାଗ୍ଗିୟା। ଏନ୍ଦେର୍ଗେକା ନିମ୍ ଏଙ୍ଘାଗାନେ ମା ରାନାତି ଏକା ମଦେତ୍ ଏଙ୍ଗାଗେ କାମା ପଲ୍ଲିୟାରିନ୍, ଆବନ୍ ଆବ୍ଡ଼ାର୍ ପୁରା କାମ୍ଚାର୍। 18ଏସ୍କେ ଆବ୍ଡ଼ାର୍ ଏଙ୍ଘାଏ ଆରୁ ନିହ୍ମାଏ ଆତ୍ମାବନ୍ ଶାନ୍ତି ଚିଚ୍ଚକାନାଏ, ହୁଦ୍ଘିଲାଗାନ୍ ଏନ୍ନେ ଆଲାରିନ୍ ନିମ୍ ମାଇନ୍ କାମା।
19ଆସିଆ ପ୍ରଦେଶ୍ତା ବିଶ୍ୱାସୀ ଆଲାର୍ହି ନିମାନ୍ ଯୋହାର୍ ବାଲ୍ନାଏ। ଆରୁ ଭାଇ ଆକ୍ୱିଲା ଆରୁ ତାଙ୍ଘା ଆଲି ପ୍ରିସ୍କା ନିମାନ୍ ଯୋହାର୍ ତେଙ୍ଗାଲ୍ନାଏ ଆରୁ ତାହ୍ମା ଆଡ଼୍ପାନୁ ଠୁଡ଼ିୟା ରାନାବାଲା ଖ୍ରୀସ୍ତ୍ ମଣ୍ଡ୍ଲୀନ୍ତା ଆଲାର୍ହି ନିମାନ୍ ପ୍ରାଭୁସ୍କି ନାମେନୁ ପୁରା ଜୀଆତି ଯୋହାର୍ ବାଲ୍ନାଏ। 20ଜାମା ବିଶ୍ୱାସୀ ଭାଇ ଆରୁ ବୁହୁଣୀଜାମାର୍ ନିମାନ୍ ଯୋହାର୍ ବାଲ୍ନାଏ। ଆରୁ ନିମ୍ହି ଏକ୍ ଦୁସ୍ରାରିନ୍ ବାଗ୍ଗେ ବାନେ ହାଖ୍ଖୀକିରି ଯୋହାର୍ କାମା।
21ଏନ୍ ପାଉଲୁସ୍ ଆକ୍କୁନ୍ ନିଜର୍ ହେଖ୍ଖାତି ଲେଖିକିରି ନିମାନ୍ ଯୋହାର୍ ବାଲ୍ଦାନ୍। 22ଆରୁ ଯଦି ନେଦିନ୍ ପ୍ରାଭୁସ୍କି ମିଆଁ ବାନେ ମା ହାଖ୍ଖର୍ ତା ଆସ୍ଗେ ପାର୍ମେଶ୍ୱାର୍ସ୍ ସାରାପ୍ ଚିୟସ୍। ହେ ପ୍ରାଭୁ ନିନ୍ ଚାଁଣେ ବାରା (ମାରାନାଥା)। 23ନାହ୍ମାଏ ପ୍ରାଭୁ ଯୀଶୁସ୍କି କ୍ରିପା ନିହ୍ମା ମିଆଁ ମାନ୍ତେ ରାନାଦ୍। 24ଏନ୍ ଯୀଶୁ ଖ୍ରୀସ୍ତ୍କି ନାମେନୁ ଏଙ୍ଘାଏ ବାନେ ହାଖ୍ଖନାଦ୍ ନିହ୍ମା ଜାମାର୍ଘି ମିଆଁ ରାନାଦ୍। ଆମେନ୍।