ТИТ

Титд илгәсн бичг

Тит буру номта күн бәәҗ. Дәкәд эн христианин болад, Павелта хамдан көдләд, Терүнә миссионерск көдлмшт нөкднь болв. Крит гидг арл деер чонҗин көдлмш һардҗах баахн наста нөкдтән Павел эн бичгән илгәҗәнә.

Негдвәр болхла, чонҗин һардач Критин кесг улсин му заң тоодан авад, бийнь ямаран заңгта болхин тускар бичҗәнә. Цааранднь Павел чонҗд олн зүсн багмудыг, өвгд, эмгдүдиг (теднь баахн гергчүд сурһх йоста), баахн залусиг, ялчнриг яһҗ сурһхиг Титд зааҗана. Чилгчднь тер христианск заң-бәрцин тускар Титд селвг өгчәнә. Хамгин кергтәнь: төвкнүн бәәх, үүрсг болх. Дурго болснасн, метклдәнәс, чонҗд болдг хувалһнас хол йовтн гиҗ Павел бичҗәнә.

Учр-утхин зура

Нүр үг 1.1–4

Чонҗин цергләчнр 1.5–16

Чонҗин олн зүсн багмудын күцәх кергүд 2.1–15

Сагллһн 3.1–11

Товчлгч үг 3.12–15

Бичгин эклц

¹ Павелас, Бурхна зарцас болн Исус Христосин апостолас. Би Бурхна шүүҗ авсн улсиг иткл болн мана шаҗна сурҗах үнниг медүлх апостол болҗ илгәгдләв. Мөңк җирһлин нәәлт эн үннә ул болҗана. Бурхн эклцәсн авн маднд мөңк җирһл өгхәр үгән өглә. Бурхн төрүц худл келдмн биш. Бурхн кергтә цагтан нанд даалһсн үгәр дамҗад зураһан маднд үзүлв. Аврач Бурхна зааврар би эн зураг цәәлһҗ өгчәнәв. ⁴ Нанла хамдан нег иткл хувалцҗах, мини тоолгдсн көвүн Титд. Бурхн Эцк мана Деед Эзн Исус Христос хойр чамд цаһан сана, болн төвкнүн бәәдл өгтхә.

Титин даалһвр

⁵ Чамаг Критд эклсән күцц күцәһәд, балһсн болһна чонҗд мини заасар ахлачнриг тәвтхә гиһәд үлдәләв. ⁶ Ахлач күн урднь нег чигн буру уга болх зөвтә, һанцхн гергтә болх зөвтә. Терүнә үрдүд бас Христост иткәд, сән авъяста, соңсхврта болх зөвтә. ⁷ Һардачд Бурхна көдлмш даалһгдҗана. Тиигәд тер урднь нег чигн буру йовдл эс һарһсн болх йоста. Тер күн сөрсхр биш, ур уга, чаһрт авлгддго, ноолдач биш, мөңгнд хармч биш болх зөвтә. ⁸ Зуг тер кү гиичлүлхдән дурта, сә кехдән дурта, бийән сәәнәр бәрдг, чик седклтә болх. Тиим күн дигтә-дарата болад Бурхнд шүтх йоста. ⁹ Дәкәд тиим күн номас авсн чик үгд иткх зөвтә. Тиигәд иткдг улст чик ном сурһад, урмд өгх. Эн номиг бурушаҗах күүнд теднә эндүһин тускар иләр келҗ чадх. ¹⁰ Яһад гихлә, буцсн улс эврәннь эргү номарн әмтиг меклҗәхнь олар бәәнә. Христос иткдг улсас евреймүдин авъяс бәрҗәх багин улс тедн дунд йир олн. ¹¹ Худл ном тархахднь тедниг эрк биш зогсах кергтә. Тедн мөңг олхин төлә ичртә йовдлар өрк-бүлин иткл эвдәд, эс сурһшго юм сурһҗ заана. ¹² Нам теднә нег әәлдәчнь иигҗ келҗ: «Критин улс цугтан худлчнр, зерлг аңгуд, хуурмг болн ик хотта улс». ¹³ Эннь үнн. Тиигәд теднә иткл чик болдгар, евреймүдин келсн туульд болн үнниг һолҗах әмтнә зааврмудт оньган өгдгоһар иләр кел. ¹⁵ «Седкләрн цевр улст юн болвчн цевр болх», – гиҗ тедн келлә. Зуг килнцәр үрсн болн эс иткдг күүнд цевр юмн уга. Яһад гихлә, теднә ухан болн седклнь бас килнцәр үрҗ одҗ. ¹⁶ Тедн Бурхиг меднәвидн гинә. Болв эврәннь кергәрн Бурхиг эс медҗәхән үзүлнә. Теднәс Бурхн җигшҗәнә. Соңсхвр уга, сән йовдл һарһҗ чадшго улс болҗана тедн.

Иткдг улст йосн ном өглһн

¹ Чи чик номла ирлцүлҗ сурһх йостач. Медәтә улсиг чаһр ууҗ согтдгоһар, тоолвртаһар бийән бәрдгәр сурһх. Христост чикәр иткәд, улст дурта болад, зовлңгиг тесәд тедниг сурһх йостач. ³ Христост иткдг улсла әдл бийән бәрдгәр медәтә күүкд улсиг сурһ. Теднд хов зөөшго, икәр чаһр уушго заквр өг. Тедниг цаһан седклин йовдл һарһдгар сурһх зөвтә. ⁴ Баахн гергчүд эврәннь залудан болн үрдүдтән дурта болдгар медәтә күүкд улс тедниг сурһх йоста. Тедн бийән бәрәд, цеврәр бәәһәд, гериннь көдлмш сәәнәр кеһәд, залусан соңсад, кен чигн күн Сән Зәңгиг муурулдгоһар бәәх кергтә болҗана. ⁶ Баахн көвүд чикәр бийән бәрдгәр бәәлһх йоста . ⁷ Чи юн болв чигнд сән йовдлын үлгүр болхич. Сурһуль заахдан үннч, болһамҗта бол. ⁸ Күн чамаг бурушадгоһар келх чик үгән ухалад келҗә. Тиигхлә мана өшәтнр мадниг гемшәҗ чадшго, тедн чамла эсргүдсндән ичәгдх. ⁹ Эздүдиннь келсиг цугтаһинь күцәдгәр, юуһарн чигн таасгддгар зарцнран сурһ. ¹⁰ Тедн бичә зүтклдәд бәәтхә. Дәкәд бичә хулха кетхә. Итклтә күн кевтәһәр бәәтхә. Тиигәд теднә кеҗәсн тоот мана Аврач Бурхна Сән Зәңгд тус болх. ¹¹ Әмтн цугтан аврлтдгар Бурхн Эврәннь хәәрлтән үзүлв. ¹² Бурхна хәәрлт мадниг иигҗ сурһҗана: Бурхнд эс иткҗәх бәәдлән болн җирһлин му седвәрән хайтн. Эн җирһлдән бийән бәртн, чикәр җирһтн. ¹³ Бидн кишгтә өдр ирхиг күләҗәнәвидн. Терүнд бидн цугтан нәәлҗәнәвидн. Тер өдр алдр Бурхн, мана Аврач Исус Христос, туурмҗтаһар ирх. ¹⁴ Мадниг цуг килнцәс сулдххин болн цеврлхин төлә, зуг терүнә улс болдгар, сән йовдл һарһхдан белн болдгар Исус Христос бийән алулла. ¹⁵ Энүг чи теднд сурһх йостач. Эврәннь йосан күццднь олзлад, иткдг улст урмд өгәд, теднә килнцин тускар иләр кел. Нег чигн күн чамаг басхар бичә седтхә.

Иткдг улс яһҗ бәәх йоста

¹ Иткдг әмтн ахлачнриг болн йосна һардачнриг кевтнь соңстха гиҗ кел. Тедн сән йовдл һарһхдан белн болтха. ² Күн болһна тускар му келдгоһар, эвцтә болн үүрсг, нииһәр бәәһәд, цугтаһинь тевчдгәр теднд кел. ³ Урднь бидн эргү, соңсхвр угаһар бәәсндән меклгдҗ йовлавидн. Зүсн-зүүл седвәр болн бахта юмн мадниг авлҗ йовла. Бидн эврәннь җирһлдән хортаһар, үлү үзәд, әмтн маднд дурго болад, бидн әмтнд дурго болад бәәләвидн. ⁴ Бурхн, мана Аврач, эврәннь хәәрлт болн дуран өгсн цагтан мадниг аврла. Мана керг-үүл тоолҗ биш, зуг эврәннь хәәрлтәр мадниг аврла. ⁵ Бурхн мадниг Әрүн Сәкүсәр уһаһад, шин төрлт болн шин җирһл өгв. ⁶ Мана Аврач Исус Христосар дамҗад Бурхн маднд элвгәр Әрүн Сәкүс белглв. ⁷ Тиигәд бидн түүнә хәәрлтәр Бурхнла чикәр бәәнәвидн. Аштнь бидн күләҗәсн мөңк җирһлән эдлхвидн. Иигҗ келсн чик, энүнд итктн. Би чамаг иим юмнд оньган өгтхә гиҗәнәв. Христост иткдг улс цаһан седклтә йовдл һарһхд килмҗән өгтхә . Эннь сән, олнд туста. ⁹ Эргү зүткәнд болн уңг-тохма төр хаһллһнд, закана туск зүткәнд бичә орлц. Терүнәс олз уга, дәкәд мел керг уга. ¹⁰ Олниг цуцад хувахар седсн күүг нег дәкҗ, хойр дәкҗ келәд, цааранднь терүнлә бичә харһ. ¹¹ Тиим күн чик хаалһас салад, килнц цаарандан һарһҗахиг чи эврән меднәч. Терүгәрн тер бийиннь эндүһән үзүлҗәнә.

Сүл селвг

¹² Намаг, чам тал Артемиг эс гихлә, Тихикиг илгәхлә, Никополь тал адһҗ ир. Би тенд үвлзхәр бәәнәв. ¹³ Зину гидг закана күүнә болн Аполлосин хаалһин йовдлд дөңгән күрг. Теднд кергтә тоотынь белд. ¹⁴ Христост иткдг күн сән йовдл һарһад цаган давулдгар дастха . Тиигҗ бәәхләрн, тер эврәннь теткврән эврән олх. Иткдг улс тус угаһар бәәх йосн уга. ¹⁵ Энд нанла хамдан бәәх улс цугтан чамд менд илгәҗәнә. Маднла иткдг иньгүдт цугтаднь менд кел. Бурхн цугтаһитн хәәрлтхә!