Псалмс

Псалмс

Давидин псалм.

¹ Килнцтә күүнә селвг авдго,

Килнцтә күүг дахҗ дурадго,

Бурхиг муурулсн улсин сүүрт

Бурҗ эс орлцсн күн

Кезә чигн кишгтә болдг.

² Ухан-зүркәрн Бурхна номиг

Өдрин гегәнд, сөөһин герлд

Ухалад дасхдан дурта күн,

Оньдин терүг бәрҗ бәәхләрн

Кезә чигн кишгтә болдг.

³ Цевр усна урсхулд суулһсн,

Оньдин көк хамтхаста урһдг,

Цагтан темсән өгдг модн мет,

Кесн тоотдан күцәмҗтә күн

Кезә чигн кишгтә болдг.

⁴ Килнцтә күн мел оңдан,

Киидән көдлсн салькнд тер

Көөгдәд нисдг тоорм мет,

Көлврәд уга болна.

⁵ Килнцтә улсиг Бурхн засглх,

Теднә зарһиг Эврән кех.

Тегәд итклтә улсла хамднь

Тедниг Бурхн орулҗ авшго.

⁶ Чик седклтә улсиг Бурхн хәләнә,

Чикләд, хаалһднь тедниг харна.

Килнцтә улс Бурхнас хаҗинә,

Кецү хаалһдан тедн үкнә.

Давидин псалм.

¹ Олн улс үүмәтә бәәнә,

Ода яһад тиигҗәхмб?

Бослт кехәр тедн зурална,

Болв тернь тус угалм.

² Һазр деерк хаадуд буцлдна,

Һардачнр цугтан негднә,

Деед Эзнә өмнәс тедн

Дәкәд шүүҗ авсн хаананнь өмнәс

Хов цацад цоклдулна.

³ Хаадуд иигҗ келцхәнә:

«Төмр чөдр шалһлһ кеҗәх

Теднәс бидн алдрхм».

⁴ Тедниг Деед Эзн наадлна,

Теңгрт бәәсн Деед Эзн инәнә.

⁵ Тедниг Деед Эзн догшн бәәдләрн әәлһх,

Тегәд уурлхларн бурушаһад:

⁶ «Әрүн уул Сион деерән

Эврәннь шүүҗ авсн хааг Би зогсавув», –

гиҗ Бурхн келҗ бәәнә.

⁷ «Нанд Деед Эзнә келсиг

Нә, би зарлад келнәв:

„Чи мини көвүн.

Эндр чамаг хан болхла,

Би чини Эцк болув.

⁸ Зуг Нанас сур,

Би чамд олн улс өгнәв,

Цуг һазриг мөңкинд

Чини үлмәд орулнав.

⁹ Тедниг чи төмр мотрар диилхч,

Тедниг чи шавр сав мет күүлхч“», –

гиҗ хан келҗәнә.

¹⁰ Тегәд, хаадуд, цецн болтн!

Һазр деерк зарһчнр, медтн!

¹¹ Деед Эзнд күндтәһәр мөргтн,

Деед Эзнд соңсвртаһар байрлтн.

¹² Терүг бичә уурлтха гиһәд,

Тадн генткн үкшгон төлә,

Деед Эзнд күндлҗ мөргтн,

Дарунь эсклә цухл шатх.

Терүг түшҗ баралхсн улс

Терүнәс кишгән авч чадх.

Авесалом көвүнәсн зулҗ гүүснә хөөн Давидин үүдәсн псалм.

² О, Деед Эзн!

Өшәтнрм ямаран олн!

Кесгнь өмнәсм буцҗана.

³ Кесгнь мини тускар

Келхләрн иигҗ келҗәнә:

«Бурхн терүг авршго».

⁴ Болв Та, Деед Эзн,

Бийдм халхц болҗанат.

Та нанд алдр туурмҗ өгчәнәт,

Та нанд бат иткл өгчәнәт.

⁵ Деед Эзиг би дууднав,

Дуудсим әрүн уул деерәсн

Тер соңсад, дарунь

Тусан нанд күргнә.

⁶ Би кевтнәв, унтнав,

Би дәкн боснав,

Деед Эзн намаг

Даңгин харссар тиигнәв.

⁷ Миңһәд дәәсн дөрвн үзгәсм

Бийим бүсләд авсн бийнь

Би теднәс әәҗ бәәхшв.

⁸ Бостн, Деед Эзн!

Авртн намаг, мини Бурхн!

Та цуг дәәсиг халхарнь ташхларн,

Теднә хорлтан күргх күчинь авнат.

⁹ Деед Эзнәс аврлт ирҗәнә.

Тана улс деер

Тана евәл бууҗана.

Көгҗмин һардачд. Көгҗмин чивһстә зер-зев цокҗ наадх. Давидин псалм.

² Та, намаг харсдг Бурхн,

Таниг кемр би дуудхла,

Соңстн намаг, соңстн!

Түрҗ йовсн цагтм

Татҗ Та аввт.

О, Бурхн, хәәрлтән күргтн,

Ода мини зальврлһ соңстн!

³ Олн улс, тадн кедүдән

Ода мини нер һутахмбт?!

Кедү цагтан эндүрхдән дурлхмт,

Кедү цагтан худл бурхд хәәхмт?

⁴ Бийиннь төлә Деед Эзн

Бийдән итклтә улсиг йилһсиг

Тодлад автн. Намаг дуудхла,

Тегәд Тер соңсхнь лавта.

⁵ Учрх йовдлан санад, тадн

Урдаснь әәһәд бәәв чигн,

Буру юм бичә һарһтн.

Эн үгмүдин тускар дотран

Эврән ухалад тогтнтн.

⁶ Тадн цугтан Деед Эзнд

Тааста бәрц бәрәд,

Бәәсн җирһләрн Терүнд нәәлтн.

⁷ Кесг улс иигҗ келнә,

Кесг улс иигҗ зальврна:

«О, Деед Эзн, икәр евәлән илгәтн,

Ода маднд цаһан санаһан күртәтн!»

⁸ Байн урһцин буудя, чаһр

Буулһҗ авсн улсин кишгәс

Деед Эзнә өгсн кишг

Даңгин нанд күчтә белг.

⁹ Амрад кевтсн цагтан би

Амулң-менд зүүд бәрнәв,

Негхн Та, Деед Эзн,

Намаг әәмшг угаһар бәәлһнәт.

Көгҗмин һардачд. Флейтд наадх. Давидин псалм.

² О, Деед Эзн, мини келҗәсиг соңстн,

Ода би Таниг уульҗаһад дуудҗанав.

³ Та мини Хан, Та мини Бурхн,

Таниг дуудад хәәкрҗәсиг медтн.

Тандан, Тандан би зальврҗанав.

⁴ О, Деед Эзн, Та

Өрүнд мини ду соңснат,

Өрлә би шүтҗ зальврнав.

Тана хәрүг би күләнәв.

⁵ Та хаҗһр юмнд дурго Бурхнт,

Тана хаҗуд хар саната улс бәәшго юмн.

⁶ Тана хаҗуд ик саната улс бәәшго юмн,

Та хаҗһр юм һарһҗах цуг улст дургот.

⁷ Та худл келҗәх улсиг алхт,

Махч, хорта улсас Та җигшнәт.

⁸ Би болхла,

Тана итклтә дурар һардвр кеһәд,

Тана әрүн сүмд орҗ чадхв,

Тана әрүн хурлд дегд күндтәһәр мөргхв.

⁹ О, Деед Эзн, Та

Чикәр яһҗ бәәхиг нанд зааҗ өгтн,

Тана таалыг күцәхд дөң болтн,

Яһад гихлә, мини өшәтн йир олн.

¹⁰ Теднә келсн нег чигн үгд иткҗ болшго:

Теднә ухан-седклнь алх-булхд авлгдҗ,

Теднә амнь кү оршадг секәтә яршг мет,

Тедн худл, зуһу үгәрн әмтиг үклд орулна.

¹¹ О, Бурхн, тедниг бурушатн, засглтн,

Юңгад гихлә, тедн бурута;

Тәвсн хавхдан бийснь торг.

Ол дәкҗ килнц һарһснднь

Ода тедниг көөһәд һәәлтн,

Юңгад гихлә, тедн

Тана өмнәс буцла.

¹² Танд иткдг улс

Цугтан икәр байрлтха,

Цугтан мөңкинд байрлҗ җирһтхә.

Теднә төлә Тана кесн-күцәснд

Танд дурта улс ханлтан өргтхә.

Та тедниг делгүһәр харстн.

¹³ О, Деед Эзн,

Та соңсхврта улст әдс өгчәнәт;

Әдсәрн тедниг халхц мет бүслҗәнәт.

Көгҗмин һардачд. Көгҗмин чивһстә зер-зев цокҗ наадх. Давидин псалм.

² О, Деед Эзн!

Та дегд уурлв чигн,

Намаг бичә бурушатн,

Намаг Та ууртан бичә засглтн.

³ О, Деед Эзн,

Мини чинән дегд тату,

Хәәрлтн намаг.

О, Деед Эзн, өвчнәс көлтә

Ясм яарад унҗана,

Седкләрн би зовҗанав,

Эдгәтн намаг!

О, Деед Эзн, бичә удадтн.

⁵ О, Деед Эзн, хәләтн намаг,

Батта дурнаннь төлә

Намаг үкләс авртн.

⁶ Үксн хөөн Таниг

Ухандан күн бәршго,

Сәәни орнд төрсн күн

Седкләрн Таниг буульшго.

⁷ О, һундрхад бәәҗ би

Ода цуцрҗанав:

Сө болһн кевтрм

Шугшад уульснас норна;

Дуссн мини нульмсар

Дерлх дерм ивтрнә.

⁸ Мини өшәтн нанд

Мел зовлң өгнә.

Уульснас нүдм өвднә,

Улм харань буурна.

⁹ Йос эвдҗәх улс,

Йовтн. Бийәсм хольҗтн.

Дегд ууляд бәәсим

Деед Эзн соңсҗана.

¹⁰ Деед Эзн мини

Дуудад бәәсим соңсва.

Деед Эзн мини

Зальврсн тоотым күцәх.

¹¹ Мини цуг дәәсн

Му нер зүүх.

Тиигәд тедн генткн

Диилгдәд, терүнәсн ичх.

Деед Эзнд Кушан кергәр Давидин уульн дуулдг дун.

² О, Деед Эзн, мини Бурхн!

Танд би нәәлҗәнәв;

Намаг көөҗәх цуг әмтнәс авртн,

Намаг сулдхтн;

³ Эс гихлә, тедн намаг

Арслң мет дәврх,

Намаг мөч-мөчәр шуучад-тасчад алх;

Кен чигн күн намаг харсшго.

⁴ О, Деед Эзн, Бурхн минь!

Кемр би бурута болхла,

⁵ Кемр нанла эвәр бәәсн күүнд

Би хар санаһан күртәсн болхла,

Кемр би учр угаһар дәәсән дәврсн болхла,

Кемр би иим юмс һарһсн болхла,

⁶ Тиигхлә, намаг дәәсм мөрдәд күцг,

Тер намаг һазрт ишкәд орулг,

Намаг алад, тоормд хайтха.

⁷ О, Деед Эзн, ууртаһар бостн,

Мини һалзурсн дәәснә өмнәс сөрлт кетн,

Намаг дөңнхәр Бийдән урмд өгтн,

Юңгад гихлә, Та чик йовдл некнәт.

⁸ Цуг улсиг Бийиннь хаҗуд цуглултн,

Эврәннь дааҗах үүлин чинрәр

Теднә зарһинь кетн.

⁹ О, Деед Эзн, Та цуг улсин зарһ кенәт.

Мини зарһ кетн,

Деед Эзм, цеврлтн намаг.

Би чик седклтә, үннч күнлм.

¹⁰ Та чик седклтә Бурхнт,

Күүнә күслинь болн седвәринь зөрнәт.

Килнцтә әмтнә хар санаг уурултн,

Чик седклтә әмтиг ачлтн.

¹¹ Бурхн мини халхц.

Терүг соңссн әмтиг Тер аврна.

¹² Бурхн чик седклтә зарһч,

Килнцтә әмтиг Тер кезә чигн бурушана.

¹³ Кемр тедн бийән эс гемшәхлә,

Бурхн Эврәннь үлдән бүлүдх,

Эврәннь саадган углх, терүгән төвлх,

¹⁴ Әмт алдг зер-зев белдх,

Эврәннь һал асгч суман белдх.

¹⁵ Тиигәд килнцтә күн худлан тееһәд,

Хар санаһар дүүрәд, бийдән худл һарһна,

¹⁶ Урх малтад,

Белдсн нүкндән эврән унна:

¹⁷ Хар санань толһаднь буух,

Ора деернь тусх.

¹⁸ Деед Эзиг чик седклтәднь туурулнав,

Деед Эзнә нернд магтал дуулнав,

Хамгин Күчтә Деед Эзнд.

Көгҗмин һардачд. Көгҗмин чивһстә зер-зев цокҗ наадх. Давидин псалм.

² Бурхн, мана Деед Эзн!

Цуг делкәд Тана нерн ямаран алдр ик!

Теңгрәс давад делгрсн

Тана туурмҗиг әмтн магтҗана!

³ Бичкдүд болн нилх күүкд чигн

Танд магтал өргҗәнә.

Та Эврәннь цуг дәәсдәс харсгдсн бәәнәт.

Тана дәәсн цугтан тагчгрх.

⁴ Тана теңгр тал хәләхләрн,

Тана һарар тәвгдсн сар болн одд үзхләрн,

⁵ Би саннав:

Танд үзгддгәрн күмн әмтн юн болҗахмб?

Тертн зуг күмн әмтн болв чигн,

Та терүнд килмҗән күргҗәнәт.

⁶ Терүг Та зуг

Эврәннь медәнд орулвт ,

Туурмҗар болн әрүн нерәр батравт.

⁷ Тана һарар үүдәсн тоотыг

Толһалтха гиҗ терүг тәввт,

Цуг делкәг кевтнь терүнә медлд орулвт:

⁸ Хөд болн цуг малыг,

Деернь зерлг аңгудыг,

⁹ Теңгрин шовудыг болн теңгсин заһсдыг,

Теңгст бәәх юмсиг цугтаһинь.

¹⁰ Бурхн, мана Деед Эзн!

Цуг делкәд Тана нерн ямаран алдр ик!

Көгҗмин һардачд. «Мут-Лаббен» айсар, Давидин псалм.

² О, Деед Эзн, әрүн зүркәрн Таниг туурулнав,

Тана алдр цуг кергин тускар улст келнәв.

³ Би Танар байр-бахмҗ кехв.

Тана нернд магтал өргҗ дуулхв,

О, Деед Бурхн!

⁴ Таниг һарч ирхлә,

Мини дәәсн хәрү хәрх,

Бүдрәд үкҗ одх.

⁵ Юңгад гихлә, хаана ширә деер суух

Үннч зарһч мет,

Та мини зөв болн мини неквр батлҗанат.

⁶ Та буру номта улс бурушавт,

Килнцтә күүг алвт,

Теднә нердиг мөңкинд биллвт.

⁷ Дәәсн мөңкинд уга болв.

Та теднә балһсдыг уларнь сөңглвт,

Теднлә хамдан теднә туск санл уга болв.

⁸ Болв Деед Эзн мөңкинд зална.

Зарһин төлә тер Эврәннь хаана ширәһән белдв.

⁹ Делкәг Тер үннч кевәр залҗана,

Әмтнә зарһиг чикәр кенә.

¹⁰ Тиигәд Деед Эзн даҗргдсн улсин түшг болх,

Һашудсн цагтнь теднд дөңгән күргх.

¹¹ Тана нериг үнндән меддгнь Танд нәәлх.

Яһад гихлә, Деед Эзн,

Таниг хәәҗ йовсн улсиг Та хайҗ йовшгот.

¹² Сионас һардҗах Деед Эзнд дууһан өргтн!

Цуг әмтнд Терүнә кергин тускар соңсхҗ келтн!

¹³ Эс гиҗ Тер махч күүг засглна,

Даҗргдад цокгдҗ йовсн күүнә ә соңсна.

¹⁴ Хәәрлтн намаг, Деед Эзн.

Нанд дурго әмтнә өгсн зовлң медтн.

Та намаг үкләс авртн.

¹⁵ Тегәд Сиона цуг әмтнә өмн

Би Таниг туурулҗ магтнав,

Тана аврлтар байрлдгар тиигнәв.

¹⁶ Буру номта улс малтсн нүкндән эврән унцхав,

Эврән бултулсн гөлмстнь көлнь торв.

¹⁷ Деед Эзн Эврәннь үннч зарһарн туурсмн,

Килнцтә күн эврәннь һарһсн йовдлмударн бәргдсмн.

¹⁸ Бурхиг эс таасҗах цуг килнцтә әмтн тамд тусцхах.

¹⁹ Түрҗәх күн оньдинд мартгдшго.

Түрү бәәх әмтнә нәәлвр кевтән эвдршго.

²⁰ Деед Эзн, сөрлт кетн!

Күн Таниг бичә бастха,

Тана нүүрт улсин зарһ кегдтхә.

²¹ Деед Эзн, тедниг әәлһтн.

Тер әмтн зуг күн болҗахан медтхә.

²² Деед Эзн, юуна төлә холд зогсҗахмт,

Гейүрсн цагтан Бийән бултулҗахмбт?

²³ Караг болсндан килнцтә күн угатя күүг даҗрна.

Тедн эврән һарһсн мекдән бәргдтхә;

²⁴ Килнцтә күн седклиннь үүлдврәр бардмнна,

Хатуч-махч күн Бурхиг харана, керглхш.

²⁵ Караг болсндан килнцтә күн

Деед Эзиг хәәхш:

Терүнә цуг сансн тоотднь Бурхнд орм уга.

²⁶ Кезә чигн тер седсән авна.

Килнцтә күн Бурхна зарһ медхш,

Дәәсән тер җигшҗ хәләнә.

²⁷ Тер иигҗ санҗана:

«Мини җирһлд цугнь күцәмҗтә болх,

Күнд-түрү бәәдл төрүц учршго».

²⁸ Терүнә келсн үгнь мел харал, худл болн даҗрлт.

Кезә чигн тер худл болн хорта үг келхдән белн.

²⁹ Тиим күн хотна захд бултад сууна,

Угатя күүг тер бәрҗ авхар гетнә,

Дөң уга күүг бәрхәр бултад манна,

Нүкндән бәәх арслң мет нуувчар гетнә,

Бәрҗ авхларн, эврәннь бәрәнд татҗ орулна.

Әмтн үзшго һазрт килнц уга күүг тер ална.

³¹ Тиим күн бөгчиһәд, өкәһәд күләнә.

Дөң уга күн терүнә күчтә һарт бәргднә.

³² Тер иигҗ санҗана:

«Бурхн мини тускар ухалҗахш,

Нүдән аньчкад, намаг мел үзҗәхш».

³³ Бостн, Деед Эзн!

Килнцтә әмтиг засглтн, Бурхн!

Көөгдҗ йовх угатя улсиг бичә марттн.

³⁴ Килнцтә күн яһҗ Бурхнд деерлкәд дотран:

«Бурхн намаг засглшго юмн», –

гиҗ сандг болҗахмб?

³⁵ Болв Та Эврән йосндан үзҗәнәт,

Та зовлң болн гейүрлт медҗәнәт.

Терүг эврәннь һарт авч чадҗанат.

Танд угатя улс иткҗәнә.

Та керглгдҗәх күүнд дөң-түшгнь болҗанат.

³⁶ Дәкҗ хоран күргдгоһар

Килнцтә болн хар саната улсин күчинь

Ка цокад, уга кетн.

³⁷ Деед Эзн – мөңкинд хан,

Оньдинд хан.

Терүнә һазр деерәс

Буру номта улс уга болх.

³⁸ Деед Эзн,

Угатя улсин зальврлһ соңснат,

Теднд нәәлвр өгнәт.

³⁹ Өнчрсн болн даҗргдсн улсин зальврлһнд

Та оньган өгнәт,

Делкә-һазр деер дәкҗ күн тедниг

Даҗрдгоһар харснат.

Көгҗмин һардачд.

Давидин псалм.

¹ Деед Эзн – мини түшг.

Тиигхлә яһад нанд

Тедн иигҗ келҗәхмб:

«Шовун мет тагчгар

Шулуһар уулур нис.

² Килнцтә әмтн

Саадган татад,

Суман төвләд авчкҗ.

Чик седклтә әмтиг

Харңһуһас хахар седҗәнә.

³ Кемр йосна, диг-дарана улнь эвдрхлә,

Тиигхлә чик седклтә улс ю кехмб?»

⁴ Деед Эзн Эврәннь әрүн сүмд бәәнә,

Деед Эзнә ширә теңгрт бәәнә.

Терүнә нүдн үзҗәнә,

Терүнә хәләц әмтиг сөрҗәнә.

⁵ Деед Эзн чик седклтә әмтиг чигн,

Килнцтә әмтиг чигн сөрҗ хәләҗәнә.

Күч үзүлхдән дурта күүнд Тер дурго.

⁶ Килнцтә әмтн деер

Тер хур мет һал цог

Болн шатҗах мок асхх.

Һарһсн үүләрн тедн һаң салькнла харһх.

⁷ Деед Эзн чик седклтә, үннд дурта.

Чик седклтә күн Бурхиг үзх.

Көгҗмин һардачд. Көгҗмин чивһстә зер-зев цокҗ наадх. Давидин псалм.

² Деед Эзн, маднд дөң болтн!

Чик седклтә күн уга болв,

Итклтә күн дәкҗ олдшго болв.

³ Әрүн биш зүркнәсн зуһу үгмүдәр

Нег-негндән тедн худл келцхәнә.

⁴ «Бидн эврәннь мектә

Келәрн седсән авнавидн.

Седсн тоотан келнәвидн,

Кен чигн күн маниг зогсаҗ чадшго».

Иигҗ келҗәх әмтнә зуһу аминь хаатн,

Деегүр келинь таслтн.

⁶ «Угатя әмтиг дорацулад бәәснд,

Түрү үзҗәх әмтн

Түңшҗәхәс иштә,

Тедниг Би харснав.

Тиим әмтиг шалтг уга бәәдлд орулнав», – гиҗ Деед Эзн келҗәнә.

⁷ Деед Эзнә үгән өглһнь – үнн үгмүд болҗана.

Теднь Һалд дола дәкҗ хәәлгдәд

Цеврлгдсн цаһан мөңгн мет.

⁸ Төгәлңдән килнцтә улс йовна.

Тедн му, кишго юм буульна.

О, Деед Эзн, иим улсас

Мадниг мөңкинд хәәрлҗ авртн.

Көгҗмин һардачд. Давидин псалм.

² О, Деед Эзн,

Кедү цагтан Та намаг кергллго бәәхвт? Оньдиндий?

Кедү цагтан Та нанас чирәһән бултулад бәәхвт?

³ Кедү цагтан би седклдән зөвүртә йовхмби,

Өдр, сө уга зүркәрн һашудхмби?

Кедү цагтан намаг дәәсн дорацулхмби?

⁴ Хәләтн намаг, келтн нанд,

Мини Бурхн, Деед Эзн!

Дәкн нанд чаңһ-чиирг бәәдл хәрү өгтн,

Эс гихлә, би үкҗ одхв.

⁵ «Би терүг диилүв», – гиҗ

Мини дәәсн бичә келг.

Кемр нанд му йовдл учрхла,

Мини дәәсн бичә байрлг.

⁶ Би Тана цаһан седклд нәәлҗәнәв.

Тана аврлтд мини зүркн байрлх.

Таниг, Деед Эзн, би магтнав,

Та нанд цаһан санаһан элвгәр күртәвт.

Көгҗмин һардачд. Давидин псалм.

¹ «Бурхн уга», – гиҗ

Седкл уга күн дотран санна.

Тиим күн алятад,

хар саната йовдл һарһна.

Сә кедг нег чигн күн уга.

² Делкәд бәәх цуг улсиг

Деед Эзн теңгрәс хәләнә.

Бурхиг хәәҗәх ухата, адг ядхдан,

Ор һанцхн күн бәәх угаһинь

Тер үзхәр седҗәнә.

³ Болв цугтан чик хаалһас хаҗицхәв,

Цугтан әдлдән аля.

Цаһан саната йовдл һарһдг

Нег чигн күн уга, нам нег чигн.

⁴ Мини улсиг өдмглә әдл җаҗлад идҗәх

Йос эвддг әмтнд ухан оршго болхви?

Тедн Деед Эзиг мел хәәҗ дууддго болхви?

⁵ Тиигхлә тедн әәһәд чичрцхәх,

Яһад гихлә, Бурхн

чик седклтә әмтиг дөңнх.

⁶ Килнцтә әмтн угатя күүнә зураг басна,

Болв Деед Эзн терүнә халхц.

⁷ Сионд бәәх Деед Эзн

Израилиг авртха гиҗ,

Би зальврҗанав.

Деед Эзн Эврәннь улсан

Бәрәнәс хәрү авхла,

Тегәд Яковин хөөт үйнр байрлх,

Тегәд цуг Израиль байрлх.

Давидин псалм.

¹ Деед Эзн, Тана өргә герт

Кен орҗ чадхмб?

Тана әрүн уул Сион деер

Кен мөргҗ чадхмб?

² Һаң угаһар бәәһәд чик йовдл һарһдг,

Зүркнәсн үннәр келдг,

³ Келәрн хов тархадго,

Үүртән хар сандго,

Нәәҗнрән му келдго,

⁴ Бурхнд дурго болдг улст дурго күн,

Бурхнд шүтдг улст дурта,

Өгсн андһаран зовлңла харһв чигн эвддго күн,

⁵ Мөңгән өгйәһәр өгхләрн,

Терүнәсн олз хәәдго,

Килнц уга күүг бәрүлхин төлә авлһ авдго күн батта күн.

Давидин псалм.

¹ Деед Эзн, намаг хәәрлтн.

Би Танд нәәлҗәнәв.

² «Та – мини Ик Эзн,

Бийдм бәәх сән тоот Танас күртнә», – гиҗ

Би Деед Эзнд келнәв.

³ Һазр деер зуг иткдг әмтн цаһан саната,

Тедниг би күндлнәв.

⁴ Болв талдан улсин бурхнд шүтдг әмтнә зовлң икднә.

Би теднә тәкл тәклһнд орлцшгов,

Теднә бурхдт мөргшгов.

⁵ Нанд кергтә тоотм –

Та болҗанат, Деед Эзн.

Та нанд әдс өгнәт,

Мини җирһл Тана һарт бәәнә.

⁶ Би хүвтә бәәҗв.

Нанд Тана өгчәх тоот кецү сәәхн.

⁷ Нанд уха орулсн

Деед Эзнд магтал өргҗәнәв.

Сөөһәр чигн намаг мини седкл сурһна.

⁸ Деед Эзн бәәхиг би сәәнәр меднәв.

Тер оньдинд хаҗудм бәәнә,

Тегәд намаг юн чигн диилҗ чадшго.

⁹ Тиигәд мини зүркн байрта бәәнә,

Седклм серглң,

Цогц-махмудм халхцта болсндан тогтун.

¹⁰ Та мини сүмсиг үклин һазрт хайшгот,

Тана итклтә зарциг үкәрт үмкәрүлшгот.

¹¹ Та нанд җирһлин хаалһ заахт,

Тана хаҗуд мөңкинд байр болн кишг дүүрң.

Давидин зальврлһн.

¹ О, Деед Эзн, соңстн

Мини чикәр келсиг,

Мини ду соңстн,

Худлч биш күүнә эрлһ соңстн.

² Танас мини цеврдлһн ирх,

Та намаг чикәр хәләтн.

³ Кемр мини зүркнә гүүнд хәләхлә,

Кемр сөөһәр нан тал ирхлә,

Кемр намаг һалар сөрхлә,

Нанас нег чигн му юм үзшгот.

⁴ Талдан әмтнлә әдл

Би келәрн килнц һарһҗахшв.

Тана үг соңссар

Би догшн йовдлас һарув.

⁵ Би кезә чигн Тана хаалһар йовлав,

Нег чигн алхм терүнәс хооран ишксн угав.

⁶ Таниг би дуудҗанав, Бурхн,

Яһад гихлә, Та намаг соңсхт.

Чикән өгәд нанд шахлдтн,

Мини келсн үгмүдт оньган өгтн.

⁷ О, Аврач, хортнасн зулад,

Таниг темцәд дөң күләҗәх әмтнд

Эврәннь өврмҗтә хәәрлтән күргтн.

⁸ Нүднәннь цецгә мет намаг хадһлтн.

Намаг бүсләд дәврҗәх махч дәәснәсм

Эврәннь җивр дор бултултн.

¹⁰ Тедн мел өр-өвчәр биш,

Деерлкҗ күүндцхәнә.

¹¹ Тедн мини ардас мөрдәд йовцхав,

Ода тедн намаг бүсләд авчкв.

Тедн намаг һазрт унһахар седҗәнә.

¹² Тедн бәрсән шуучад таслхар седҗәх арслң мет,

Гетәд күләҗәх баахн арслңгин бәәдлтә болҗана.

¹³ О, Деед Эзн, бостн теднә өмнәс!

Босад диилтн тедниг!

Килнцтә улсас күчәрн намаг харстн.

¹⁴ Эн җирһлдән седсн хамган

Бийдән хураҗ авсн күүнәс намаг сулдхтн.

Теднд белдсн зовлңгиг деернь буулһтн.

Тертн теднә көвүдт

Болн көвүдиннь үрдтнь күрттхә.

¹⁵ Би болхла, чик седклтә болсар,

Тана чирә хәләҗ бәәхв.

Серсн цагтан хаҗудтн

Седклм йосндан ханх.

Көгҗмин һардачд. Хан Саулас болн талдан цуг дәәсдәс Деед Эзн Давидиг сулдхсн цагт Деедсин зарц Давидин Терүнд дуулсн дун.

Тер иигҗ келв:

² «Мини харсач, Деед Эзн,

Би Танд дуртав!»

³ Деед Эзн –

Мини чолун хад болн шивә,

Мини аврач.

Мини Бурхн –

Мини бәәрн.

Терүнд би әәмшг уга бәәхв.

Тер мини халхц,

Намаг татҗ авх күчн болн түшг.

⁴ Би Деед Эзиг дуудҗ

Дәәснәсн мөлтрхв.

Деед Эзнд туурмҗ!

⁵ Намаг үклин деесн орава,

Йос эвдсн йовдлмуд һундав.

⁶ Тамин һазра цев намаг орава,

Үклин хавхс гетҗәнә.

⁷ Һундрххларн, Деед Эзн Бурхнас

Би дөң авхар дуудув.

Тер Эврәннь сүмд мини ду соңсв,

Мини зальврлһн терүнә чикнд күрч.

⁸ Тегәд һазр чичрв, уулын сүүр көндрв,

Яһад гихлә, Бурхн уурлв.

⁹ Терүнә хамрин нүкнәс утан һарв,

Амнаснь шатаҗах һал һарв,

Терүнәс шатаҗах нүүрсн асхрв.

¹⁰ Теңгр шуулад,

Тер хар үүлд көл доран бәрҗ буув.

¹¹ Деер Бурхна күчтә элч

Деләд салькн җиврәр нисвә.

¹² Бийән Тер харңһуһар орав,

Терүнә бүркә нигт хар үүлн мет бәәдлтә.

¹³ Терүг бәәсәр герлнь үүл һатлад,

Мөндр болн һал цог орв.

¹⁴ Теңгрәс күрҗңнәд,

Хамгин Күчтә Бурхна дун соңсгдв.

¹⁵ Эврәннь сумар хаһад,

Тер дәәсән тарав,

Һал цәклүләд, тедниг ка цокв.

¹⁶ Деед Эзнә догшн дуунас,

Хамрарн киилсн кииһәс

Теңгсин йорал үзгдв,

Һазрин ул секгдв.

¹⁷ Деерәс һаран дорагшан суңһад,

Тер намаг өргв,

Гүн уснас татҗ авв.

¹⁸ Тиигҗ намаг күчтә дәәснәсм,

Нанд дурго улсас салһҗ сулдхв.

Тедн нанас даву чидлтә.

¹⁹ Намаг тедн түрү цагтм дәврв,

Болв Деед Эзн нанд түшгм болв.

²⁰ Әәмшг уга һазрт һарһад,

Тер намаг аврв,

Яһад гихлә, нанд байрлҗана-ханҗана.

²¹ Чик седклтә, буру уга болснд

Намаг Деед Эзн ачлв.

²² Би Деед Эзнә закаһар бәәләв,

Бурхнас хаҗиҗ хар саната юм һарһсн угав.

²³ Терүнә цуг закаг би күцәләв,

Терүнә зааврмуд би эвдсн угав.

²⁴ Намаг килнц һарһлго бийән бәрәд

Цеврәр бәәсиг Тер меднә.

²⁵ Би чик седклтә болсар,

Мини бәәдл цевриг медәд,

Деед Эзн нанд ачлвран өгчәнә.

²⁶ Итклтә күүнлә, Та,

Бийән итклтәһәр бәрнәт,

Цаһан седклтә күүнлә

Цаһан седклтәһәр,

²⁷ Цевр күүнлә – цеврәр,

Мектә-җуук күүнлә хурц ухатаһар Бийән бәрнәт.

²⁸ Соңсврта күүг Та аврнат,

Деегүр седклтә күүг дорацулнат.

²⁹ Та, Деед Эзн,

Мини җирһлин хаалһд герл өгчәнәт;

Мини хар таңгиг герлд хүврәҗәнәт.

³⁰ Та нанд церг диилх чидл өгчәнәт.

Тана дөңгәр би ямаран чигн саалтг диилҗ чадхв.

³¹ Мини Бурхна кесн-күцәсн тоотнь чик,

Деед Эзнә үг иткмҗтә.

Терүнәс түшг хәәҗәх әмтнд

Тер цугтаднь халхц.

³² Тегәд Деед Эзнәс

талдан кен Бурхн болҗахмб?

Мана Бурхнас

талдан кен мана харсач болҗахмб?

³³ Бурхн нанд чидл өгнә,

Хаалһим цеврлҗ хәәрлнә,

³⁴ Мини көлиг

буһ-марлын көллә әдлцүләд,

Өөдм деер батар зогсана.

³⁵ Нанд дәәлддг дасхна,

Күрл саадгиг матилһх күч өгнә.

³⁶ О, Деед Эзн, намаг аврх

Эврәннь халхцан Та нанд өгвт,

Намаг дөңнҗәх Эврәннь чидлән өгвт.

Тегәд Эврәннь дөңгәрн

Та намаг алдр кеввт.

³⁷ Та мини өмнк хаалһ цеврлвт,

Тегәд йовхлам көлм бүдрш уга.

³⁸ Би дәәсән мөрдҗ йовнав,

Би тедниг бәрхв.

Би тедниг ка цоктлан зогсшгов.

³⁹ Би ормаснь босхлго теднлә дәәлднәв.

Тедн диилгдәд, мини көлд унцхах.

⁴⁰ Юңгад гихлә, дәәлдхләм,

Та нанд чидл өгчәнәт,

Мини хортдыг көлдм сөгдүлҗәнәт.

⁴¹ Мини хортдыг зулад гүүдг кеввт,

Нанд дурго болҗах күүг би уга кенәв.

⁴² Тедн дөң сурцхана,

Болв нег чигн күн харсҗахш.

Тедн Деед Эзиг дуудцхана,

Болв Тернь ә өгхш.

⁴³ Би тедниг тоорм-тоос кеҗ үүлнәв,

Би тедниг хаалһин бальчг мет ишкнәв.

⁴⁴ Та намаг үүмәнд орлцсн улсас сулдхвт,

Та намаг һазадын улсин һардачд шиидвт,

Урднь мини таньдго әмтн ода нанд заргдҗана.

⁴⁵ Тедн мини тускар соңсн, үлмәдм орцхана.

Һазадын улс намаг үзхләрн, әәцхәнә.

⁴⁶ Һазадын улс зөргән алдад,

Бултсн ормасн чичрн бәәҗ һарцхана.

⁴⁷ Мини харсач Деед Эзн әмд,

Мини харсач Деед Эзнд ханлтан өргий!

Намаг аврсн Бурхн тууртха!

⁴⁸ Хортан дарх диилвр Тер нанд өгнә,

Олн улсиг мини көлд сөгдүлнә.

⁴⁹ Тер намаг хортнасм сулдхна.

Дәәсдм нанд күрдгоһар

Деед Эзн тедниг бәрҗәнә,

Деед Эзн намаг һалзу әмтнәс харсна.

⁵⁰ Цуг терүнә тускар һазадын улс дунд

Би Танд, Деед Эзн, туурмҗ дурднав,

Тана нернд магтал өргнәв.

⁵¹ Эврәннь хаанд Бурхн алдр диилвр өгнә,

Эврәннь шүүҗ авсн Давидт

Болн терүнә хөөт үйнрт

Эвдршго цаһан седклән мөңкинд күртәнә.

Көгҗмин һардачд. Давидин псалм.

² Бурхна туурмҗиг теңгр үзүлҗәнә,

Терүнә һарин үүдәлтин тускар

Теңгр келҗ өгчәнә.

³ Өдр болһн ирх өдрт соңсхна,

Сө болһн ирх сөөд медрл секҗ өгнә.

⁴ Дун эс гиҗ келсн үг уга,

Соңсгдх дүңгә ә чигн уга,

⁵ Болв цуг һазрар тер зәңг тарна,

Делкән меҗә күртл теднә үгмүд соңсгдна.

Бурхн нарна төлә теңгрт бәәр һарһв.

⁶ Өрүнд тер, гер буулһсн күргн

Өргәһәсн һарсн мет һарч ирнә.

Урлданд орхар бәәх урлдач мет байрлна.

⁷ Нарн нег үзгт босад оңдан үзг күртл

Эврәннь зураһар күцц эргнә.

Терүнә һаң халунас

Нег чигн юмн бултҗ чадшго.

⁸ Деед Эзнә закан дигтә, седклин сергмҗ.

Деед Эзнә сурһлһн ицлтә, эгл күүнд цецн ухан.

⁹ Деед Эзнә сурһмҗ төв, зүркнә байр.

Деед Эзнә заавр чилгр, нүднд ил цәәлһвр.

¹⁰ Деед Эзиг күндллһн әрүн, мөңкинд бәәх.

Деед Эзнә сурһмҗ чик, сурһмҗ болһнь үнн.

¹¹ Деед Эзнә сурһмҗ алтнас үнтә,

Нам хамгин цевр алтнас үнтә.

Деед Эзнә сурһмҗ балас әмтәхн,

Нам зөгин үүрт бәәх балас әмтәхн.

¹² Би, Тана итклтә зарц, сурһмҗас медрл авчанав,

Тедниг күцәснь нанд ик ачлвр болҗана.

¹³ Һарһсн эндүсән кен йилһҗ чадхмб?

Бийдм бәәх медгдәд уга дуту-дундасм цеврлтн,

¹⁴ Тана зарциг һарһх килнцәснь гетлгтн.

Тер намаг бичә авлтха.

Тегәд би ик хорта йовдл һарһлһнас

Килнц уга болн цевр болхв.

¹⁵ О, Деед Эзн,

Мини шивә болн харсач,

Амнасм һарсн үгмүд,

Зүркнәмм седвәр Танд

Тааста болтха!

Көгҗмин һардачд. Давидин псалм.

² Әәмшгтә цагт чамаг Деед Эзн авртха,

Яковин Бурхн чамаг харстха,

³ Эврәннь әрүн сүмәс чамд дөңгән илгәтхә,

Сион уулас чамаг батлтха.

⁴ Чини олн тәвциг цугинь Тер автха,

Чини һал тәәлһн Терүнд таасгдтха.

⁵ Тер чамд зүркнәнч седсиг өгтхә,

Чини цуг седвәриг күцәтхә.

⁶ Тегәд чини диилвриг бидн байртаһар магтхвидн.

Мана Бурхна нер дуудад,

Чини диилврин нәр кехвидн.

Деед Эзн чини сурсичнь цугтаһинь күцәтхә.

⁷ Деед Эзн Эврәннь шүүҗ авсн

Хааһан аврчахинь

Би ода медҗәнәв.

Терүнд әрүн теңгрәсн хәрү өгчәнә,

Эврәннь алдр күчәрн терүнд ик диилвр өгчәнә.

⁸ Зәрмснь дәәнә тергнд нәәлҗәнә,

Зәрмснь мөрндән нәәлҗәнә.

Бидн болхла,

Деед Эзн Бурхна нернд нәәлҗәнәвидн.

⁹ Деед Эзнд эс нәәлҗәх әмтн көмрәд унх,

Бидн болхла, босад, батар көлдән зогсхвидн.

¹⁰ О, Деед Эзн, хаанд диилвр өгтн.

Таниг дуудхла, хәрүһән маднд өгтн.

Көгҗмин һардачд. Давидин псалм.

² Хан байрта бәәнә, Деед Эзн,

Яһад гихлә, Та терүнд чидл өгвт.

Тер байрлҗана,

Яһад гихлә, Та терүнд диилвр өгвт.

³ Та терүнә зүркнднь таалмҗта юм өгвт,

Терүнә амлад сурсинь Та бурушасн угат.

⁴ Терүнә зальврлһна хәрүднь

Та онц евәл өгвт,

Терүнә толһад цевр алтар кесн титм өмсквт.

⁵ Тер Танас әмд үлдх җирһл сурв,

Та терүгинь өгвт.

Терүнд удандан бәәх җирһл өгвт.

⁶ Тана дөңгәр терүнә туурмҗ алдр.

Та терүнд әрүн нер болн сүрә өгвт.

⁷ Та терүг оньдинд әдслнәт.

Тана хаҗуд тер дүүрң байрта бәәнә.

⁸ Юңгад гихлә, хан Деед Эзнд нәәлҗәнә,

Тегәд Хамгин Күчтә Бурхна сольлт уга дурар

Тер кезә чигн әәмшг уга бәәх.

⁹ Хан эврәннь цуг хортдыг олх,

Терүнә чидлтә барун һарнь

Бийдән дурго әмтиг бәрҗ авна.

¹⁰ Терүнә хаҗуд дәәсднь

Һулмтд бәәх һал мет шатцхана.

Деед Эзн уурлхларн, тедниг зальгх,

Һал тедниг үмкәд идчкх.

¹¹ Та, хан, теднә хөөт үйнриг һазр деерәс уга кехт,

Теднә хөөн ирх хөөт үйнриг күүнә тохмас уга кехт.

¹² Тедн Тана өмнәс хар сана зүүв чигн,

Хар санхар седв чигн,

Терүгән төрүц күцәҗ чадшго.

¹³ Яһад гихлә, Та суман

Теднд илгәхәр төвлхләрн,

Тедниг һарад зулдгар кеҗәнәт.

¹⁴ Тиим күчтә болсндтн, Деед Эзн,

Тана нериг бидн туурулҗанавидн.

Тана күчтә кергиг бидн буульн магтхвидн.

Көгҗмин һардачд. Өрүн өрлә цагин айст орулх Давидин псалм.

² Бурхн минь! Бурхн минь!

Та намаг яһад үлдәввт?

Та нанас яһад хольҗвт?

Та нанд дөңгән күргхәр седҗәхшийт,

Нам мини зовад чаңһар хәәкрҗәхиг соңсчахшийт?

³ Бурхн минь! Би өдрт хәәкрнәв,

Та нанд хәрүһинь өгхшит.

Би сөөд хәәкрнәв,

Та намаг тогтнулхшит.

⁴ Болв Та әрүн Хан болҗанат,

Израиль Таниг магтҗана.

⁵ Танд мана өвкнр нәәлдг бәәҗ,

Нәәлснднь Та тедниг сулдхдг бәәҗит.

⁶ Таниг дуудхла,

Та тедниг аврдг бәәҗит.

Танд нәәлхлә,

Та теднә седклинь һундадго бәәҗит.

⁷ Би болхла, күн бишв, хорхав.

Күн намаг басна, әмтн нанд дурго болна.

⁸ Намаг үзсн әмтн наад бәрцхәнә,

Тедн җигшҗ урлан коочилһнә,

Тедн җигшҗ толһаһан зәәлнә.

⁹ «Чи Деед Эзнд нәәлнәч,

Чамаг Тер яһад эс сулдхна?

Чамд Деед Эзн дурта гиҗ келнәч,

Яһад Тер дөңгән эс күргнә?» – гиҗ тедн келцхәнә.

¹⁰ Болв намаг экин геснәс һарһҗ авснь Та биләт,

Уург көкчәхдм Та намаг

Танд нәәлдг дасхлат.

¹¹ Һархасн өмн би Тана хәләврт бәәҗв,

Экиннь геснд бәәхдән би Тана бәәҗв.

¹² Бичә нанас хольҗтн,

Яһад гихлә, зовлң өөрхн,

Нанд дөңгән күргх күн уга.

¹³ Бухмудын сүрг мет

Намаг олн хортн бүслҗәнә.

Башана һазра һалзу бухмуд мет

Тедн намаг бүслҗәнә.

¹⁴ Хот хәәҗ аман аңһасн арслң мет

Тедн нанур күркрнә.

¹⁵ Мини чидлм усн мет урсҗ одв,

Мини ясд булһрҗ одв,

Мини зүркн халун хорһн мет хәәлҗ одв.

¹⁶ Мини хол тоорм мет хагсҗ одв,

Мини келн таңнадан наалдҗ одв.

Та намаг үклин өргнд күргвт.

¹⁷ Намаг һалзу әмтн зерлг нохас мет бүслҗәнә.

Тедн арслң мет мини һар-көлим тасчад хайв.

¹⁸ Би эврәннь ясдан цугтаһинь тоолҗ чадхв;

Әмтн намаг хәләнә, тавлҗ байрлна.

¹⁹ Мини хортн җирв хаяд,

Хувцим хоорндан хувацхана.

²⁰ Зуг Та, Деед Эзн, намаг бичә үлдәтн!

Бурхн, мини Күчн! Намаг аврхар адһтн.

²¹ Мини әмиг үлдәс харстн,

Мини эңкр әмиг эн һалзу нохасас харстн,

²² Мини әмиг арслңгин амнас авртн,

Мини зовҗах седклиг

зерлг бухмудын өврәс харстн.

²³ Би эврәннь улстан

Тана кесн көдлмшин тускар келнәв,

Би Таниг олн улс хурад

Бурхнд мөргдг һазрт магтнав:

²⁴ «Деед Эзиг күндлдг цуг улс,

Магттн Терүг!

Яковин цуг хөөт үйнр,

Терүнә нериг туурултн!

Израилин цуг әмтн,

Терүг күндлҗ сөгдтн!

²⁵ Яһад гихлә, зовлңта күүг Тер басшго,

Зовлңта күүнәс Тер зулшго,

Зовлңта күүнәс Тер чирәһән бултулшго,

Болв Терүг дуудхла, соңсхнь лавта».

²⁶ Олн улс дунд би Таниг магтнав.

Таниг күндлдг әмтнә нүүрт

Би күцәх болсн тәклән тәкнәв.

²⁷ Угатя күн цадтлан хот идх,

Бурхиг хәәҗ йовснь Терүг магтх.

Деед Эзн мөңк кишг заятха.

²⁸ Һазрин үзг болһнд әмтн Терүг санад,

Деед Эзнүр хәрү ирцхәх.

Терүнә өмн әмтнә цуг отг улс сөгдх.

²⁹ Деед Эзн цугтаннь Эзн,

Цуг улсиг Тер зална.

³⁰ Һазр деерк әмтн цугтан

Деед Эзнд мөргх,

Һазр деерк байн, байн бишнь

Терүнә өмн сөгдх.

Һазр деерк улс цугтан

Терүнә өмн сөгдх.

³¹ Ирх хөөт үйнр Терүнд церглцхәх,

Тедн Деед Эзнә тускар

Эврәннь хөөт үйнрт келцхәх.

³² Тедн ирәд,

Төрәд уга хөөт үйнрт иигҗ келцхәх:

«Деед Эзн Эврәннь улсан аврла».

Давидин псалм.

¹ Деед Эзн нанд хөөч мет болҗана,

Тиигәд би дуту уга бәәнәв.

² Тер намаг тетквртә ормд бәрнә,

Тер намаг номһн уснд күргнә.

³ Тер нанд шин чидл өгнә,

Тер нанд үгән өгсәрн,

Таасмҗта җимәр дахулҗ йовх.

⁴ Би нам сүүдрин болн үклин хотхрар

Йовв чигн, әәмшгәс әәшгов.

Та нанла йовнат.

Тана герлыг, Тана тайг намаг тогтнулна.

⁵ Та мини төлә ширә деер хот тәвхт,

Терүг мини дәәсн үзх.

Та намаг халунар тосад,

Толһадм тос түркхт.

Та мини савиг амнднь күргәд дүүргҗәнәт.

⁶ Цуг җирһлин туршарт

Тана цаһан санан болн сольгдшго дурнтн

Намаг дахлдҗ йовхиг би меднәв.

Деед Эзн, Тана герт би мөңкинд бәәхв.

Давидин псалм.

¹ Һазр Деед Эзнә болҗана,

Һазр деерк цугтан Терүнә.

Делкә кевтән Деед Эзнә,

Делкәд бәәснь цугтан Терүнә.

² Деед Эзн далан гүүнд ул тәвәд,

Гүн уснд һазр батлв.

³ Деед Эзнә уул деер һарх зөв кенд бәәдви?

Терүнә әрүн сүмд кен орҗ чадхмби?

⁴ Чик йовдл һарһдг,

Цевр седклтә, шүтәнд шүтдго,

Худлахар үгән өгдго күн

⁵ Деед Эзнәс әдс авх,

Бурхнас – эврәннь аврачас – цеврллһ авх.

⁶ Деед Эзиг хәәҗәх,

Яковин Бурхна нүүр хәәҗәх әмтнә тохм тиим.

⁷ Өргн үүдән сек,

Кезәңк үүдән өргәр сек,

Туурсн Хан орҗ ирх!

⁸ Эн туурсн Хан кемб?

Энтн күчтә болн чидлтә Деед Эзн,

Энтн дәәнд диилвр бәрсн Деед Эзн.

⁹ Өргн үүдән сек,

Кезәңк үүдән өргәр сек,

Туурсн Хан орҗ ирх!

¹⁰ Эн туурсн Хан кемб?

Энтн Хамгин Күчтә гидг Деед Эзн,

Энтн нернь туурсн Хан.

Давидин псалм.

¹ О, Деед Эзн, Танд би зальврҗанав.

² Бурхн минь! Танд нәәлҗәнәв.

Намаг му нернәс харсҗ автн,

Мини хортн бичә тавлҗ байрлтха.

³ Танд нәәлҗәх цуг әмтн

Бичә му нер зүүтхә.

Болв итклән барсн улс му нер зүүтхә.

⁴ О, Деед Эзн, хаалһан нанд зааҗ өгтн,

Ишкәд йовх йовдлан нанд дасхтн.

⁵ Намаг Эврәннь иткл тал залтн, дасхтн намаг.

Та намаг аврҗах Бурхн болҗанат.

Танд би оньдин нәәлнәв.

⁶ Деед Эзн,

Кезәнәс авн эндр өдр күртл

Эврәннь улстан

Цаһан санаһан,

батта дуран үзүлсән тодлтн.

⁷ Баһ наснамм килнц болн мини буру йовдл һарһсим бичә тодлтн.

О, Деед Эзн,

Та батта дурн бәәсәр намаг тодлтн,

Та цаһан саната болсарн намаг тодлтн.

⁸ Деед Эзн сән седклтә болн үннч,

Тегәд килнцтә әмтиг хаалһинь зааҗ чиклнә,

⁹ Номһн әмтиг үнн бәәдлүр йовулна,

Номһн әмтнд Эврәннь бәәдл дасхна.

¹⁰ Деед Эзн Бийиннь

Герәснә сурһалинь хадһлҗах улст

Цаһан санаһан болн итклән медүлнә.

¹¹ О, Деед Эзн, Тана нернә төлә

Мини килнц тәвҗ өгтн,

Яһад гихлә килнцм ик.

¹² Деед Эзиг күндлдг күн кен болҗахмб?

Бийән күндлҗәх күүнд

Деед Эзн йовх хаалһинь зааҗ өгх.

¹³ Тиим күн насн турш сәәнәр бәәх,

Терүнә хөөт үйнр һазриг зөөр кеҗ эдлх.

¹⁴ Деед Эзн Бийән күндлсн күүнд

Эврәннь нуувчан иткҗ келнә,

Эврәннь герәсән күцәх кергин тускар

Теднд илднь келнә.

¹⁵ Би оньдин Терүнд нәәлнәв;

Тер намаг әәмшгтә йовдлас харсҗ авна.

¹⁶ О, Деед Эзн, хәләтн намаг,

О, Деед Эзн, хәәрлтн намаг,

Би һанцв, би седкләрн үрүдсн күмб.

¹⁷ Мини зүркнә зовлң икдв,

Терүнәсм намаг сулдхтн.

¹⁸ Мини гейүрлһнд,

Мини зовлңд оньган өгтн,

Кесн цуг килнцим тәвҗ өгтн.

¹⁹ Мини хортыг хәләтн,

Тедн ямаран олн болҗ.

Тедн нанд йир икәр дурго.

²⁰ Мини әмиг хәәрлтн, Деед Эзн,

Хортнас намаг салһҗ автн,

Теднд диилгддгоһар намаг харстн,

Би Танд нәәлҗ бәәнәв.

²¹ Үнн болн Зөв намаг хартха.

Би Танд нәәлҗ бәәнәв.

²² О, Бурхн,

Израилиг цуг зовлңгас сулдхтн.

Давидин псалм.

¹ О, Деед Эзн, намаг цеврлтн,

Мини бәәдлд һаң уга.

Деед Эзнд би

Маһдл уга иткҗәнәв.

² Хәләтн намаг, Деед Эзн,

Сөртн намаг.

Мини седкл шинҗләд хәләтн,

Мини зүрк шинҗләд хәләтн.

³ Яһад гихлә, би оньдинд

Тана итклтә дуриг медҗәнәв,

Тана иткмҗ оньдин намаг залх.

⁴ Би худлч күүнлә үүрлдгов,

Зуһу күүнлә күүнддгов.

⁵ Би хар саната әмтнә хургт дургов,

Би му нертә әмтнәс зулнав.

⁶ Би буру уга болсндан

Һаран уһаҗ цеврлҗәнәв,

Тегәд, Деед Эзн,

Тана тәклин ширәг эргҗ йовхдан белмб.

⁷ Тана туурмҗта кергин тускар келгдҗәх частр

Би Танд ханлтан өргҗ дуулҗанав.

⁸ О, Деед Эзн, Тана туурмҗ буусн

Сәәхн Тана сүмд би дуртав.

⁹ Та мини седклиг

килнцтә әмтнә седкллә хамднь бичә үрәтн.

Та мини җирһлиг

алач-махч әмтнлә хамднь бичә үрәтн.

¹⁰ Теднә һарнь хар санаһар дүүрң.

Теднә барун һарнь авлһас күндрҗәнә.

¹¹ Би болхла, цевр җирһләр җирһҗәнәв.

Та сулдхтн намаг, хәәрлтн намаг.

¹² Би чик хаалһ деер зогсчанав;

Бурхна улсин хургт

Би Деед Эзнә нер туурулнав.

Давидин псалм.

¹ Деед Эзн мини герл,

Деед Эзн мини аврлһн.

Би кенәс әәхмб?

Деед Эзн мини җирһлин шивә.

Би кенәс сүрдхмб?

² Кемр намаг уга кехәр

Хар саната әмтн дәврхлә,

Тедн, мини өшәтн болн хортн,

Бүдрәд, бийснь унцхах.

³ Кемр намаг бүкл әәрм дәврв чигн,

Теднәс мини зүркн әәшго.

Кемр нанур дән эклв чигн,

Би тер бийнь Бурхнд иткхв.

⁴ Һанцхн юм Деед Эзнәс би сурҗанав,

Һанцхн юм би зуг хәәҗәнәв:

Деед Эзнә цаһан седкләр өврмҗ кеһәд,

Терүнә һардвр хәәһәд,

Сүл өдр күртлән

Деед Эзнә герт бәәхәр седләв.

⁵ Яһад гихлә, зовлңта мини өдрмүдт

Тер намаг харсх,

Тер намаг Эврәннь шатр дотран бултулх,

Тер намаг күн күршго хад деер өргҗ тәвх.

⁶ Тегәд би эргндән бәәх хортан диилхв.

Терүнә сүмд би байртаһар бәрц авч ирхв.

Тиигәд Деед Эзнә туурмҗинь магтад буульхв.

⁷ О, Деед Эзн,

Кемр намаг дуудхла, соңстн.

О, Деед Эзн,

Хәәрлтән күргтн,

Хәрүһән нанд өгтн.

⁸ Та, Деед Эзн:

«Йовад Нанд мөрг», – гиҗ келхлә,

Би Танд иигҗ хәрү өгләв:

«Одад мөргнәв».

⁹ Бичә нанас нүүрән бултултн,

Намаг, Эврәннь зарцан,

Бичә уурлҗ көөтн.

Та оньдинд мини нөкд биләт.

О, Бурхн, мини аврач,

Намаг бичә хайҗ йовтн,

Намаг бичә һанцараһим үлдәтн.

¹⁰ Мини эцк, мини эк

Намаг хаяд йовв чигн,

Деед Эзн

Нанд килмҗән тусхах.

¹¹ О, Деед Эзн,

Эврәннь сансн-седсән нанд дасхтн,

Намаг җирһлинм һо хаалһд орултн.

Юңгад гихлә, нанд хортн бәәнә.

¹² Мини хортнд намаг бичә идүлтн;

Мини өмнәс худл герчнр сөрлцҗәнә,

Тедн чидл-күчән үзүлх саната бәәнә.

¹³ Кемр эн җирһлдән

Деед Эзнә цаһан сананд эс иткҗәсн болхла,

Би үүмҗ һашудх биләв.

¹⁴ Деед Эзнд нәәл, зөргтә бол.

Тер чини зүрк батрах,

Бурхнд нәәл.

Давидин псалм.

¹ О, Деед Эзн,

Та бийим харсх һазр деерк хад болҗанат,

Танур дуудвр кеҗәнәв.

Мини төлә тагчг бичә болтн,

Кемр Та нанд хәрү эс өгхлә,

Би үкәрт орсн күүнлә әдл болхв.

² Таниг би дуудхла,

Тана әрүн сүм тал би һаран өргәд зальврхла,

Та намаг соңсит.

³ Килнцтә болн хар саната әмтнлә,

Чирәд инәһәд, нурһнд утх үзүлдг әмтнлә

Намаг бичә засглтн.

⁴ Тедниг һарһсн үүләрнь,

Хар сансн йовдларнь,

Хорта һариннь ашарнь засглтн.

Һарһсн гемин кирцәһәр засглтн.

⁵ Деед Эзнә кергиг

Болн Терүнә кеҗәх көдлмшиг

Басҗах тедниг

Деед Эзн мөңк үкләр засглх.

⁶ Деед Эзн цаһан саната,

Мини дуудсиг Тер соңсв.

⁷ Деед Эзн мини күчн,

Деед Эзн мини халхц.

Терүнд би күцц иткүв,

Тер нанд нөкд болв.

Зүркм байрар дүүрв,

Терүг би дуундан орулҗ магтнав.

⁸ Деед Эзн Эврәннь улсин күчн,

Шүүҗ авсн хаананнь эркн түшг мөн.

⁹ О, Деед Эзн, Эврәннь улсан авртн,

О, Деед Эзн, Эврәннь улсан әдслтн.

Та теднәннь хөөч мет болтн,

Теднән дахулад, мөңкинд килмҗән өгтн.

Давидин псалм.

¹ Бурхна элчнр, Деед Эзән магттн,

Терүнә әвртә болн күчтә бәәдл магттн.

² Деед Эзнә туурсн нернд магтал өргтн,

Деед Эзнә әрүн алдр бәәдлднь сөгдтн.

³ Деед Эзнә дун теңгсәр соңсгдҗана.

Туурмҗин Бурхн күрҗңнх,

Деед Эзнә дун цуг теңгсәр соңсгдҗана.

⁴ Деед Эзнә дун күчтә,

Деед Эзнә дун алдр.

⁵ Деед Эзнә дун хошун мод күүчнә.

Деед Эзн нам

Ливанон гидг һазра хошун мод күүчнә,

⁶ Ливанон уулмуд чичрүлнә,

Тедн туһл мет өсрәд көндрх.

Сирион гидг уул

Зерлг бүрү бух мет өсрх.

⁷ Деед Эзнә дун һал цәклүлнә,

⁸ Деед Эзнә дун көдә һазр чичрүлнә.

Деед Эзн Кадеш гидг көдәг чичрүлнә.

⁹ Деед Эзнә дун

Хар модд сөңглнә,

Ө-моддыг нүцклнә.

Терүнә сүмд цугтан:

«Деед Эзнд туурмҗ!» – гицхәнә.

¹⁰ Деед Эзн күчтә ус эзлҗ нойлхҗана.

Деед Эзн мөңкинд хан болҗ суух.

¹¹ Деед Эзн Эврәннь улстан чидл өгчәнә,

Деед Эзн Эврәннь улстан эв өгч әдслҗәнә.

Давидин псалм. Сүмиг әрүлсн цагт дуулдг дун.

² О, Деед Эзн, Та намаг аврсн төләд,

Хар санхар седсн дәәсим зогсасн төләд

Би Таниг магтҗ буульнав.

³ О, Деед Эзн, мини Бурхн!

Би Таниг дуудув,

Та намаг эдгәввт.

⁴ О, Деед Эзн,

Та намаг үкәрәс халхлвт.

Би гүн нүкнә амнд күрләв,

Болв Та нанд хәрү җирһл өгвт.

⁵ Деед Эзнд иткдг улс,

Терүнд нерәдәд дуултн,

Терүнд ханлтан өргтн,

Терүнә әрүн бәәдлинь тодлтн.

⁶ Деед Эзн удандан уурлхш,

Болв терүнә хәәрлт җирһлин туршарт бәәнә.

Сөөни дуусн уульсн болхла, өрүнднь байр ирх.

⁷ Би әәмшг уга бәәсндән иигҗ келүв:

«Би диилгдшгов».

⁸ Эврәннь цаһан санаһарн

Та намаг уул мет батраввт.

Болв дәкәд Та нанас бултвт.

Би нам әәвүв.

⁹ Тиигхд, Деед Эзн,

Таниг би дуудад,

Танас хәәрлт сурлав:

¹⁰ «Кемр би үкәрт орхла,

Мини үкләс Танд ямаран олз болҗана?

Үксн күн Таниг магтҗ чадхий?

Үксн күн Тана сольгдшго

Цаһан санана тускар келҗ чадхий?

¹¹ О, Деед Эзн, соңстн намаг.

О, Деед Эзн, хәәрлтән нанд күргтн.

О, Деед Эзн, сулдхтн намаг».

¹² Та мини зовлңгиг мартулвт, би биилҗәнәв,

Та мини зовлңта бәәдлиг байрт хүврәввт.

¹³ Таниг би седкләрн магтҗ зогсдгоһар Та тиигвт.

О, Деед Эзн, мини Бурхн!

Таниг би мөңкинд магтхв.

Көгҗмин һардачд. Давидин псалм.

² О, Деед Эзн, Танас би түшг хәәҗәнәв.

Намаг кезәд чигн, кенчн бичә диилтхә.

Намаг Та сулдхтн,

Та чик седклтә болҗанат.

³ О, Деед Эзн, соңстн намаг,

Та намаг шулуһар ирҗ авртн.

Та күрч болшго аврлтын хад

Болн намаг халхлх шивә болтн.

⁴ Та мини хад болн уул шивә болҗанат.

Та нернәннь төлә намаг залҗ һардтн.

⁵ Намаг бәрхәр нуувчар тәвсн гөлмәс гетлгтн,

Та мини хорһдх бәәрн болҗанат.

⁶ Тана һарт би бийән даалһҗанав.

Та, Деед Эзн – үннә Бурхнт,

Та намаг аврлат.

⁷ Би керг уга шүтәнд шүтдг әмтнд дургов.

Болв би Танд, Деед Эзн, нәәлҗәнәв.

⁸ Тана өгсн итклтә дурнд би байрлнав, нәәрлнәв.

Та мини зовлң үзвт,

Мини седклин гейүр медвт.

⁹ Та намаг дәәснәнм һарт бәрүлҗ өгсн угат.

Болв намаг әәмшг уга ормд зогсаввт.

¹⁰ Хәәрлтн намаг, Деед Эзн,

Би зовлңта бәәнәв.

Зовлңгас көлтә нүдм муурчана,

Зовлңгас көлтә седклм, цогц-махмудм элҗәнә.

¹¹ Зовлңгас көлтә мини җирһл муурв,

Мини насн чигн баргдад чилҗәнә,

Зовлңгас көлтә чидлм чилҗәнә,

Мини ясн-үсм акчҗана.

¹² Мини дәәсн, хам-хоша бәәх әмтн

Намаг һәәлҗәнә,

Таньдг әмтн нанас сүрдҗәнә.

Намаг һаза үзсн улс зулад гүүлдцхәнә.

¹³ Би үкҗ одсн кевтә цугтан намаг мартв.

Би хайгдсн сав мет болҗанав.

¹⁴ Дәәсән шимлдҗәхиг би соңсҗанав.

О-о, әәмшг намаг бүсләд авчкв.

Тедн намаг алх зура зуралҗ авчана.

¹⁵ О, Деед Эзн, би Танд нәәлҗәнәв.

– Та мини Бурхнт, – гиҗ би келҗәнәв.

¹⁶ Мини җирһлин агчм болһн

Тана һарт бәәнә.

О, Деед Эзн, көөлдҗ йовх дәәснәсм намаг харсҗ автн.

¹⁷ Та намаг, Эврәннь зарцан, цаһан седкләрн хәләтн,

Та намаг итклтә дурарн авртн.

¹⁸ О, Деед Эзн, би Таниг дуудҗанав.

Терүнәсн би ичҗәхшв.

Килнцтә әмтн ичтхә,

Тегәд тедн үкәрт ә уга кевттхә.

¹⁹ Иткдг әмтнә өмнәс ичлго бахмҗтаһар,

Дургоһар келдг худлчнрин амнь зууньртха.

²⁰ Танд иткдг улсин төлә бәәх цаһан санантн ямаран элвг.

Терүгән Та әмтнә нүүрт иткдг улстан белглнәт.

²¹ Та тедниг Эврәннь бәәдләрн халхлнат,

Та тедниг олн, әмтнә нуувч зураһас харсҗ авнат.

Та тедниг хорта келнәс

Эврәннь әәмшг уга һазрт бултулнат.

²² Бәрәнд авгдсн балһсн мет бәәхдм,

Эврәннь ончта итклтә дуран нанд өгсн

Деед Эзн тууртха.

²³ Әәмсҗәсн цагтан би

Танас көөгдүв гиҗ санҗалав,

Болв Та мини сурсн дөңгин тускар соңсвт.

²⁴ Деед Эзиг итклтәһәр дахҗ йовсн улс,

Терүнд дуран өгтн.

Деед Эзн иткдг улсиг саглулна,

Болв караг улсиг

Һарһсн йовдларнь засглх.

²⁵ Деед Эзнд нәәлҗәх цуг улс,

Зөргтә болтн, батрҗ автн.

Давидин псалм. Ном.

¹ Килнцнь тәвгдсн күн кишгтә,

Килнцнь хайгдсн күн кишгтә.

² Хар санан уга гиҗ

Деед Эзнә тоолҗах күн кишгтә.

Тер күүнә седклд худл уга болхла,

бас кишгтә.

³ Намаг эврәннь килнцин тускар тагчг бәәсн цагт,

Өдр болһна зовлңгас көлтә ясн-үсм урсв.

⁴ Өдр сө уга Тана һар нанд күнд болад бәәв.

Зуни тесҗ болшго

Һаң халунд әгрҗәх ноһан мет

Мини әмн тасрҗана.

⁵ Тиигхләрн би

Танд эврәннь килнцин тускар

Илднь келҗ өгүв,

Би йос эвддг бәәдлән нуусн угав.

Би иигҗ келүв:

«Деед Эзнд эврәннь

Буру йовдлын тускар келҗ өгнәв».

Та мини килнцим тәвҗ өгвт.

⁶ Тегәд Таниг дахҗ йовх күн

Һашудсн цагтан зальврх зөвтә.

Тиим күүнд зовлң аюл мет ирвчн,

Терүнд күрш уга юмн.

⁷ Та мини аврлтт,

Та намаг зовлңгас харнат,

Та намаг диилврин дууһар саатулнат.

⁸ Деед Эзн иигҗ келнә:

– Чамд ном дасхнав,

Йовх хаалһичнь чиклнәв.

Чамаг би һарднав,

Чамаг би хәләнәв.

⁹ Мөрн болн элҗгн мет бичә һацтн,

Тедниг соңсхврта кехин төлә

Теднд хазар болн ууд зүүх кергтә.

¹⁰ Килнцтә күүнд олн зовлң үзгднә,

Деед Эзнд нәәлсн күүнд итклтә дурн тусна.

¹¹ Бурхнд иткдг улс,

Деед Эзнә кесн тоотд байрлҗ нәәрлтн.

Соңсхврта улс,

Байртаһар дуултн.

Давидин псалм.

¹ Бурхнд иткдг улс,

Деед Эзнд нерәдәд дууһан

Байртаһар дуултн.

Бурхнд соңсхврта улс

Терүг магттха.

² Деед Эзнд бичкн ятх татад,

Ик ятх татад магтал өргтхә.

³ Тадн байрар бахмҗ кеһәд, билгтәһәр татад,

Терүнд шин ду нерәдәд дуултн.

⁴ Деед Эзнә үг чик болн үнн.

Тегәд Терүнә кеҗәх юмн кезә чигн итклтә.

⁵ Тер чик болн үнн юмнд дурта.

Деед Эзнә бат дурн һазр-делкә дүүргҗәнә.

⁶ Деед Эзнә закврар теңгр үүдлә.

Нарн, сар болн одд Терүнә келсәр үүдлә.

⁷ Теңгсин усиг ова мет Тер цуглулад,

Йорал уга гүн һазрт орулв.

⁸ Деед Эзиг цуг делкәд күндлтхә,

Делкәд бәәх цуг әмтн

Терүнәс йир икәр әәтхә.

⁹ Тер келвә – делкә үүдв.

Тер заква – кергтә тоотнь элвҗв.

¹⁰ Деед Эзн келн-улсин шиидвр эвднә,

Деед Эзн келн-улсин седвәр уга кенә.

¹¹ Болв Деед Эзнә селвг-шиидвр мөңкинд бәәх.

Деед Эзнә седвәр үйәс үй һатлад бәәх.

¹² Деед Эзиг Бурхн гисн

келн-улс кишгтә,

Деед Эзнә Бийиннь төлә шүүҗ авсн

келн-улс кишгтә.

¹³ Деед Эзн теңгрәс хәләнә, әмтиг үзнә.

¹⁴ Деед Эзн ширәһәсн һазр деер бәәх

Цуг әмтә-киитә тоотыг хәләнә.

¹⁵ Деед Эзн күүнә ухан-таалынь үүдәлә.

Тегәд теднә һарһсн цуг йовдлмуднь

Деед Эзнд иләр үзгднә.

¹⁶ Хааг ик церг харсч чадшго,

Дәәч күн бийән

Эврәннь чидләрн харсч чадшго.

¹⁷ Зуг мөрндән нәәләд

Авргдхар седснь эндүрҗәнә.

Мөрнь чидлтә болв чигн,

Дәәчиг тер аврч чадшго.

¹⁸ Бийән күндлҗәх

Болн Терүнә бат дурнд нәәлҗәх күүг,

Деед Эзн яһҗ аврчахинь хәлә.

¹⁹ Үкләс яһҗ гетлҗәхинь,

Харһнсн цагтнь терүнә җирһлинь

Яһҗ харсҗахинь хәлә.

²⁰ Бидн Деед Эзнд нәәлҗәнәвидн.

Тер мана дөң, мана харсач.

²¹ Бидн Терүнә кесн-күцәсн тоотднь байрлҗанавидн;

Бидн Терүнә әрүн нернд нәәлҗәнәвидн.

²² О, Деед Эзн, мадниг

Тана бат дурн бәртхә;

Бидн зуг Танд иткҗәнәвидн.

Давидин псалм. Авимелехин өмн тер худлар донта күүнә бәәдл һарһад, көөгдәд уга болсна туск .

² Оньдин дөрвн цагт

Би Деед Эзнд магтал өргнәв.

Терүнд тасрхан уга магтал өргнәв.

³ Деед Эзнә кесн-күцәсн тоотднь

Седкләрн йир байрлҗанав.

Мини магталыг

даҗргдсн әмтн соңсҗ нәәрлтхә.

⁴ Деед Эзиг нанла хамдан туурултн.

Терүнә нериг нанла хамдан өргтн.

⁵ Би Деед Эзнд зальврув.

Тер нанд хәрүһән өгв.

Тер намаг цуг әәмшгәсм сулдхв.

⁶ Даҗргдсн улс

Терүнд нәәлҗәнә, байрлҗана.

Тедн төрүц һундрхшго.

⁷ Зовлң үзхләрн би Деед Эзиг дуудув.

Тер намаг соңсад

Цуг зовлңгасм татҗ авв.

⁸ Деед Эзнә элч

Терүг күндлсн әмтиг харсна,

Тедниг сулдхна.

⁹ Хәләтн, Деед Эзн

Ямаран цаһан санатаһинь эврән медхт!

Терүнд итксн күн кишгтә.

¹⁰ Деед Эзнә цуг әрүн улс,

Терүг күндлтн.

Терүнд соңсхврта улс

Юуһарн чигн дуту уга бәәцхәх.

¹¹ Чидлтә арслң аңгс чигн дуту үзҗ харһнхмн болҗана,

Болв Деед Эзн тал ирсн әмтн

Юуһарн чигн дуту уга болх.

¹² Мини көвүд, иртн, намаг соңстн.

Би таднд Деед Эзиг күндлдг дасхнав.

¹³ Таднас кен җирһл эдлхәр седҗәнә?

Кен буйн-кишг эдлхин төлә ут нас наслхар бәәнә?

¹⁴ Тиигхлә хар сана санхас келән тат.

Хорта йовдлас аман тат.

¹⁵ Хар саната йовдлас зул,

Цаһан саната йовдл үзүл,

Эвин хаалһ хәәһәд, терүн тал темц.

¹⁶ Деед Эзн Бурхнд иткдг улсиг хәләнә.

Теднә дуудвриг Тер соңсна.

¹⁷ Хорта йовдл үзүлсн улсин туск тодлвр

Һазр деерәс биллхин төлә

Деед Эзн теднә өмнәс сөрнә.

¹⁸ Бурхнд иткдг улс дуудхла,

Деед Эзн тедниг соңсна,

Цуг зовлңгаснь гетлгнә.

¹⁹ Деед Эзн санан-седкләрн үрүдсн

Улст килмҗән өгнә.

Деед Эзн нәәлврән геесн

Улсиг аврна.

²⁰ Иткдг улс олн зовлңта.

Болв цуг терүнәснь тедниг Деед Эзн сулдхх.

²¹ Бурхн тедниг кевтнь хадһлх.

Нег чигн ясн хуһршго.

²² Хар санан килнцтә әмтиг алх.

Бурхнд иткдг улст дурго әмтн засглгдх.

²³ Деед Эзн Эврәннь зарцнран сулдхх,

Терүнд нәәлҗәх нег чигн күн зарһла харһшго.

Давидин псалм.

¹ О, Деед Эзн, мини өмнәс сөрлт кесн әмтнә өмнәс

Та сөрлт кетн.

О, Деед Эзн, нанла ноолдсн әмтнлә

Та ноолдтн.

² О, Деед Эзн, халхцан, дәәнә хувцан авад намаг дөңнхәр бостн.

³ О, Деед Эзн, намаг даҗрҗах әмтнә өмнәс үлдәр болн җидәр хүрүлтн.

О, Деед Эзн, намаг аврх болҗ седклим тогтнултн.

⁴ Мини әм авхар седҗәх әмтн ичтхә,

Теднә нерн һутагдтха.

Нанд хоран күргхәр бәәх әмтн бийснь зултха.

⁵ Тедн салькнд тоорм мет цокгдтха.

Деед Эзнә элч тедниг көөтхә.

⁶ Теднә хаалһ харңһу, хальтрха болтха.

Деед Эзнә элч тедниг мөрдх.

⁷ Мини дәәсн учр угаһар

Эврәннь гөлмән нанас бултулв.

Мини дәәсн учр угаһар әмим таслхар нүк малтв.

⁸ Нанас нуувчар тәвсн гөлмдән эврән торад,

Теднд генткн үкл иртхә.

Малтсн нүкндән эврән унад үктхә.

⁹ Тегәд Деед Эзнә кесн-күцәснд мини седкл байрлх.

Намаг Тер сулдхснд мини седкл җирһх.

¹⁰ Мини седкл иигҗ байрлх:

«О, Деед Эзн, кен Тана бәәдлтәв?

Та күчн уга күүг чидлтә күүнәс харснат,

Түрү-зүдү күүг даҗрдг әмтнәс харснат».

¹¹ Килнцтә әмтнә герчнр мини өмнәс босцхав.

Тедн намаг эс кесн юмнд гемшәҗәнә.

¹² Тедн мини цаһан сананд

Хар санаһан үзүлнә.

Тиигхләнь би цөкрнәв.

¹³ Болв тедниг гемнхлә,

Би хар өңгтә хувц өмсдг биләв, мацг бәрдг биләв,

Дорагшан өкәҗ мөргдг биләв.

¹⁴ Би тедниг ах-дүүһән мет санҗ, зовҗ уульдг биләв.

Би экән геесн мет зовад,

Толһаһан һудылһад йовдг биләв.

¹⁵ Болв намаг зовлңла харһхла,

Тедн байр кехәр мини хаҗуд цуглрцхана.

Таньдго әмтн хаҗуһас

Намаг зогслт уга зована.

¹⁶ Тедн хамгин му үгмүд келҗ,

Шүдән хәврҗ, намар наад бәрцхәнә.

¹⁷ О, Деед Эзн, Та тиим юм удан хәләхвт?

Мини әмиг теднә хар сананас авртн,

Арслң мет дәврҗәх дәәснәсм намаг харстн.

¹⁸ Би хург болсн һазрт

Танд иләр ханлтан өргнәв.

Би Таниг олна нүүрт магтнав.

¹⁹ Мини өмнәс

Учргоһар ноолдхар седҗәх әмтнд

Диилвр бәрх зөв бичә өгтн.

Нанд дурго болҗах әмтн

Учргоһар чирмҗ хар сандгинь зогсатн.

²⁰ Тедн талдан улсла

Эвтәһәр бәәхәр седҗәхш.

Болв эвәр бәәҗәх әмтнә өмнәс

Худл үгмүд келцхәнә.

²¹ – Э, э! Чини кесиг

Бидн нүдәрн үзләвидн! – гиҗ намаг гемшәҗ келцхәнә.

²² Та, Бурхн, терүг Эврән үзләт.

О, Деед Эзн, бичә тагчг бәәтн,

Нанас бичә холдтн.

²³ Та босад намаг харстн.

О, Нойн, Бурхн минь,

Мини төлә ноолдтн.

²⁴ О, Деед Эзн, Бурхн минь,

Намаг цеврлтн,

Юңгад гихлә, Та Эврән чик седклтәт.

Мини дәәсн намаг бичә тавлҗ байрлтха.

²⁵ – Э, энтн мана седсәр болв, – гиҗ

бичә тедн сантха.

– Бидн терүг мел уга кечквидн, – гиҗ

бичә келтхә.

²⁶ Мини зовлң тавлҗах әмтн ичтхә,

Зута бәәдлән медтхә.

Намаг дөөглсн әмтн ичтхә,

Зута бәәдлән медтхә.

²⁷ Намаг цеврлхәр седҗәх әмтн

Байрта, бахмҗта болтха:

– Эврәннь зарцдан цаһан сана сансн

Деед Эзн тууртха! – гиҗ тедн мел келәд бәәтхә.

²⁸ Мини келәр

Тана цаһан санана тускар келгдх,

Танд нерәдәд өдрин дуусн

Би магтал өргҗ дуулхв.

Көгҗмин һардачд. Деед Эзнә зарц Давидин псалм.

² Хар саната күүнә зүркиг килнц авлчкҗ.

Терүнә санаһар Бурхнас әәх учр уга.

³ Бурхн терүнә килнциг мел үзшго,

Терүг засглшго гиҗ ухалҗана.

Юнгад гихлә, тиим күн деегүр саната.

⁴ Терүнә келсн үгнь хар саната болн хорта.

Тер дәкҗ цаһан саната, ухата йовдл һарһҗахш.

⁵ Нам орндан кевтв чигн,

Йос эвдх седкл зүүнә.

Бийнь тер килнцтә хаалһар йоввчн,

Му йовдлас зулхш.

⁶ О, Деед Эзн, Тана бат дурн теңгрт күрх.

Тана иткмҗ үүлд һатлҗ деер йовна.

⁷ Тана цаһан санан ик өндр уулмуд мет бат.

Тана зарһ-зерг дала мет күчтә.

Та, Деед Эзн,

Олн улсиг, мал-аһурсиг теткнәт.

⁸ О, Бурхн минь!

Тана бат дурн ямаран ик үнтә.

Тана җиврин сүүдрт цуг әмтн аврлт олна.

⁹ Тана герин зөөрәс идәд,

Тедн нәәрлҗәнә.

Тана цаһан санана уурхан зөөрәс

Тедн ундан хәрүлҗәнә.

¹⁰ Та цуг җирһлин булг болҗанат.

Тана герләр бидн цецн уха авчанавидн.

¹¹ Танд дурта улст

Эврәннь итклтә дуран

Цааранднь өгчәтн.

Үннч әмтнд делгү седклән өгтн.

¹² Деермч седклтә күүнә көл

Намаг бичә ишктхә.

Килнцтә күүнә һар

Намаг бичә көндәтхә.

¹³ Йос бурушасн әмтнә унсн,

Алгдсн орминь хәләтн.

Тедн дәкҗ босч чадшго.

Давидин псалм.

¹ Хорта йовдл һарһдг әмтнәс көлтә бичә уурл,

Йос эвдҗәх әмтнд бичә үлү үз.

² Тедн ноһан мет хумхарх,

Урһмл мет хатх.

³ Деед Эзнд нәәләд сә ке,

Тегәд чи һазр деер әәмшг угаһар бәәхич,

Кех-күцәх кергчнь бүтәд бәәх,

⁴ Эврәннь хөв-кишгән Деед Эзнд хә.

Тер чини седклин хәәвр күцәх.

⁵ Эврәннь әмән Деед Эзнд бәрүл,

Терүнд итк, Тер чамд дөң болх.

⁶ Деед Эзн чини цаһан санаг

Өрүни солңтрлһ мет һарһҗ өгх.

Деед Эзн чини үнн седклиг

Һал үдин нарн мет герлтдгәр кех.

⁷ Деед Эзнә өмн чи тогтун су,

Тесвртәһәр Терүг күлә.

Кемр кен чигн күн кергәрн уралан йовхла,

Кемр кен чигн күн хар санани зураһарн күцәмҗтә болхла, бичә зов.

⁸ Бичә уурл,

Бичә үлү үзәд бә,

Яһад гихлә, энчн зуг му юм үзүлх.

⁹ Хар саната әмтн уга болцхах.

Деед Эзнд нәәлҗәх әмтн

Бурхна өгнәв гисн һазр эдлх.

¹⁰ Удлго ичр уга әмтн уга болцхах.

Тедниг хәәв чигн олҗ чадшгот.

¹¹ Ичртә-соңсхврта әмтн

Бурхна өгнәв гисн һазриг өнч кеҗ авх.

Тедн дала-нала болсн цецгәрлт үзх.

¹² Килнцтә күн чик седклтә күүнд

Хар санаһан күртәнә,

Дурго болад, шүдән хәврнә.

¹³ Деед Эзн терүг үзҗ инәнә,

Юңгад гихлә, килнцтә күн удлго алгдх.

¹⁴ Түрү-зүдү болн басгдсн күүг хольвлхин төлә,

Чик саната күүг алхин төлә

Килнцтә әмтн үлдән һарһад,

Саадган төвлнә.

¹⁵ Болв теднә үлд бийсиннь зүркнд шаагдх,

Саадгнь бу тусх.

¹⁶ Цаһан саната улст бәәсн чимк юмн

Килнцтә улсин цуглулсн цуг зөөрәс деер;

¹⁷ Хар саната әмтнә йосн нурх.

Цаһан саната әмтнә күч Деед Эзн икдүлнә.

¹⁸ Деед Эзн цевр әмтнә теткврт килмҗән өгнә.

Теднәс үлдсн зөөр мөңкинд бәәх.

¹⁹ Цевр әмтн аюл ирв чигн, зовлң үзшго,

Тедн харһнх өдрмүдт чигн цадхлң бәәх.

²⁰ Хар саната әмтн үкцхәх,

Деед Эзнә хортн

Теегин цецгүд мет уга болцхах.

Тедн утан мет уга болцхах.

²¹ Хар саната күн өгйәһәр авчкад,

Хәрү өгхш.

Цевр седклтә күн сән седкләрн өгнә.

²² Деед Эзнә әдстә әмтн

Һазрар өнчән авх,

Деед Эзнә харасн әмтн үкцхәх.

²³ Цаһан саната күүнә ишкдл болһинь Деед Эзн һардна.

Дурта күүнәннь хаалһинь Деед Эзн харсна.

²⁴ Тер күн бүдрв чигн, унш уга.

Деед Эзн терүг һараснь бәрҗ дөңнҗәнә.

²⁵ Би баахн биләв, ода көгшрүв.

Болв цаһан саната күүг

Бурхн хайсиг мел үзәд угав.

Терүнә хөөт үйнр

Өдмг сурҗасинь үзәд угав.

²⁶ Терүнә ормд

Цаһан саната күн элвгәр өгнә,

Талдан әмтнд өгйәһәр өгнә.

Терүнә үрд әдстә болна.

²⁷ Хар санаһан хаяд, сән йовдл һарһ.

Тегәд чини хөөт үйнр

Һазр деер мөңкинд бәәх.

²⁸ Деед Эзн үнн юмнд дурта.

Эврәннь иткдг улсан Тер хайшго.

Тиим улс мөңкинд хадһлгдҗ бәәх.

Хар саната улсин хөөт үйнр уга болцхах.

²⁹ Бурхнд иткдг улс һазрар өнчән авх.

Терүндән мөңкинд җирһцхәх.

³⁰ Бурхнд иткдг улсин келснь цецн болн үнн.

³¹ Теднә зүркнд Бурхна герәсн бәәнә.

Тиим күн кезә чигн тер герәсәр бәәнә.

³² Килнцтә күн Бурхнд иткдг күүг гетнә.

Терүг алх арһ хәәнә.

³³ Болв Деед Эзн

Терүг хортна һарт үлдәшго,

Терүнә зарһиг чик бишәр келһүлшго.

³⁴ Чи Деед Эзнд нәәл,

Терүнә герәс күцә.

Тер чамд һазр өгәд тевчх.

Хар саната әмтн туугдхиг чи үзхч.

³⁵ Би нег дәкҗ уурта, аврлт уга даҗрач кү үзләв.

Тер күн төрскн һазртан цецгәрҗәх модна бәәдлтә билә.

³⁶ Болв хөөннь би дәкн хаҗуһарнь давҗ һарув.

Тер уга болҗ одҗ.

Би терүг хәәвүв, зуг олдсн уга.

³⁷ Буру уга әмтиг шинҗл,

Бурхнд иткдг әмт хәлә;

Теднә иргчнь эв болҗана.

³⁸ Килнцтә әмтн кудгдх.

Теднә иргчнь уңгарнь тасллһн болҗана.

³⁹ Бурхнд иткдг әмтнд

Деед Эзнәс аврлт ирнә.

Тернь зовлңта цагиннь

Теднә харслт болна.

⁴⁰ Деед Эзн теднд дөңгән күргнә,

Тедниг сулдхна.

Иткдг әмтн Терүнд нәәлнә,

Тедниг килнцтә әмтнәс сулдхҗ аврна.

Давидин псалм. Тодлвр.

² О, Деед Эзн, уурлхларн,

Та намаг бичә бурушатн,

Догшрхларн,

Та намаг бичә засглтн.

³ Тана сумн дотрм гүүнд сууна,

Тана һар намаг чаңһар дарҗана.

⁴ Тана уурас мини махмуд өвдҗәнә.

Килнцәсн көлтә би эрүл-мендән геевүв.

⁵ Йос эвдсн йовдлм бийим ацан мет дарла,

Терүг даахд йир күнд билә.

⁶ Мини шарх өөрәр дүүрв.

Мини эргү йовдлас терм җигшүртә болв.

⁷ Бөкм унад, үрүдәд,

Би өдрин дуусн уульнав.

⁸ Мини цогц-махмуд безгт бәргдв,

Мини эрүл-менд йосндан муурв.

⁹ Би менрүв, дегд икәр цокгдв.

Би зүркнәннь шаркллһнас түңшчәнәв.

¹⁰ О, Деед Эзн!

Би дәкнәс эрүл-менд болхар седҗәхиг

Та меднәлмт.

Та мини түңшлһ болһниг соңсчанат.

¹¹ Мини зүркн йир икәр цокҗана,

Мини чинән алдрҗана,

Мини нүднә герл буурчана.

¹² Гемәс көлтә мини үүрмүд,

Хоша бәәх әмтн нанла харһхар седҗәхш.

Нам мини төрл-садн нанас хольҗв.

¹³ Намаг алхар седҗәх әмтн хавх тәвҗәнә.

Нанд хар санҗах әмтн намаг үкләр әәлһнә.

Тедн өдрин дуусн мини өмнәс

Зүсн-зүүл му юм кехәр седнә.

¹⁴ Би дүлә, таңх мет соңсхшив,

Келн уга юмн кевтә ам аңһахшив.

¹⁵ Би ода таңх, хәрү өгч чаддго күн мет болув.

¹⁶ Би Танд, Деед Эзн, нәәлҗәнәв.

Та, Деед Эзн, мини Бурхн, хәрү өгхт.

¹⁷ Та мини дәәснд байрлх саам бичә учратн.

Намаг күүрәд унхиг тедн бичә үзҗ тавлтха.

¹⁸ Би йир муурад ирүв,

Би оньдин зовдг болув.

¹⁹ Йос эвдсән би медҗәнәв,

Килнц һарһсндан би һундл төрҗәнәв.

²⁰ Мини дәәсд чидлтә, эрүл-менд.

Учр угаһар нанд дурго болҗах

Улсин то өсәд йовна.

²¹ Мини сә кеснд хар санаһан үзүлҗәх әмтн

Намаг му келҗ хов зөөцхәнә.

²² О, Деед Эзн, бичә намаг үлдәтн!

Та, мини Бурхн, нанас бичә хольҗтн.

²³ О, Деед Эзн, мини Аврач,

Намаг дөңнхәр адһтн!

Көгҗмин һардач, Едутунд. Давидин псалм.

² – Келәрн килнц һарһдгоһар

Би эврәннь бәәдлән шинҗлнәв.

Хаҗудм дәәсн бәәтл

Би аман хазарлнав, – гиҗ

Би бийдән келүв.

³ Би тагч бәәһәд тогтун суулав,

Нам нег чигн үг келсн угав.

Болв мини зовлң икдв.

⁴ Зүркм шатад һарчана.

Намаг ухала бәәтлм,

Бийм халад, амнасм үг алдрв:

⁵ «О, Деед Эзн,

Кезә мини сүүлңк өдр ирхмби?

Кедү өдр үлдв?

Би ямаран удан

Бәәхән медхәр седҗәнәв».

⁶ Та нанд альхн дүңгә өдрмүд өгвт.

Мини җирһлин ут-ахрнь Танд юмн биш.

Күн болһна җирһл әмсхллә әдл.

⁷ Күүнә җирһл сүүдр мет урсна.

Күн киидән зөөр зөөһәд үүмнә.

Тернь кенд күртхнь темдг уга.

⁸ О, Деед Эзн,

Мини иргч ямаран болхви?

Мини иткл зуг Танд болҗана.

⁹ Цуг килнцәсм намаг сулдхтн,

Ухан тату күүнә баслһнд

Бичә намаг орултн.

¹⁰ Би тагчгрнав, ам аңһашгов.

Та намаг тиигҗ засглвт.

¹¹ Дәкҗ намаг бичә засглтн.

Би Тана һарас үкн гиҗәнәв.

¹² Та күн болһниг

Килнцәрнь бурушаҗ засглнат.

Күүнә зөөринь гүр мет Та уга кенәт.

Күн болһна җирһл, маһд уга, әмсхллә әдл.

¹³ О, Деед Эзн, мини зальврлһ соңстн.

Мини келснд оньган өгтн,

Мини уульсиг чикән өгч соңстн.

Би Танад цаг зуура күн болҗанав.

Цуг өвкнрләһән әдл зуульчлҗ йовнав.

Эн һазр деер.

¹⁴ Би эн җирһләс салад һархиннь өмн

Бас нег дәкҗ кишгән үздгәр,

Та Эврәннь бурушасн бәәдлтә хәләцәрн

Нанур бичә хәләтн.

Көгҗмин һардачд. Давидин псалм.

² Би тесәд Деед Эзиг күләвүв.

Тер нанд оньган өгәд, мини дуудвриг соңсв.

³ Тер намаг хайгдсн нүкнәс, улмта һазрас татҗ авв,

Тер намаг чолун деер зогсаһад, әәмшгәс гетлгв.

⁴ Нанд Тер шин ду өгв.

Тернь мана Бурхнд магталын частр болҗана.

Олн-әмтн үзәд өврцхәх,

Деед Эзнд иткцхәх.

⁵ Деед Эзнд иткдг күн кишгтә болҗана.

Деед Эзнд нәәлсн күн

Худл шүтәнд мөргдго болҗана.

Худл бурхнд иткдг әмтнлә негддго күн

Кишгтә болҗана.

⁶ О, Деед Эзн, мини Бурхн,

Та олн өвәрц йовдлмуд һарһвт.

Танла нег чигн күүг әдлцүлҗ болшго.

Мана төлә күцәх

Танд олн сәәхн седвәр бәәнә.

Теднә тускар би кемр келхәр седсн болхла,

Тоолхд дегд олн болх билә.

⁷ Та тәкл тәкүлхәр седҗәхшит,

Килнцсән хәрүлхин төлә

Та һалд шаталһҗ

Тәвц бәрхиг некҗәхшит.

Терүнә ормд соңсхврта болх арһ

Та нанд өгвт.

⁸ – Тана заавр Әрүн Бичгт

Мини төлә бичәтә бәәнә, – гиҗ

Би келүв.

⁹ О, Бурхн минь,

Тана таалыг күцәхәр

Би йир икәр седҗәнәв.

Тана герәсн мини зүркнд батар бәрәтә.

¹⁰ Бурхнд мөргхәр цуглрсн улст

Би Тана аврлтын туск сән зәңг соңсхлав.

Терүнә тускар тасрлт угаһар келҗәсим

Та, Деед Эзн, меднәлмт.

¹¹ Тана чик седкл мини зүркнд даргдшго.

Тана иткмҗин,

Тана аврлтын тускар би келләв.

Тана нәәлвртә дурна тускар,

Тана үннә тускар цуглрсн

Тана әмтнә хургт

Би келлго бәәшго биләв.

¹² О, Деед Эзн,

Эврәннь хәәрлтән нанас хаҗилһшгот.

Тана итклтә дурн,

Тана үнн намаг зогслт угаһар харх.

¹³ Намаг эң-зах уга зовлң бүслҗәнә.

Би килнцдән бәргдүв.

Килнцм дегд ик болад,

Эврәннь хаалһан үзҗ чадҗахшив.

Зовлңм тооһарн толһа деерк үснәсм олн болҗана.

Би зөргән геевүв.

¹⁴ О, Деед Эзн, намаг сулдхх зөвән өгтн.

О, Деед Эзн, нанд дөң болхар адһтн.

¹⁵ Мини үкл хәәҗәхнь

Цугтан даргдтха, ичтхә!

Нанд хар санҗах әмтн

Эврәннь килнцдән хәрү бәргдтхә.

¹⁶ – Э, э, – гиҗ намар наад бәрҗәсн улс

Эврәннь ичртән даргдтха.

¹⁷ Таниг хәәҗәх әмтн байрлҗ нәәрлтхә.

– Деед Эзн алдр! – гиҗ

Тана аврлтд ханснь келтхә.

¹⁸ Би угатя, күчн уга күмб.

Болв Деед Эзн нанд килмҗән өгнә.

О, Бурхн минь!

Та мини дөң болн харсачт.

Та дөңгән күргхәр нан тал адһтн.

Көгҗмин һардачд.

Давидин псалм.

² Угатя күүнд килмҗән өгсн күн хөвтә;

Деед Эзн терүг түрү цагтнь аврх.

³ Деед Эзн терүг харсх,

Терүнә җирһл хадһлх.

Тиим күн һазр деер кишгтә болх.

Деед Эзн терүг дәәснә үлмәд үлдәшго.

⁴ Деед Эзн терүг гемнсн цагтнь батрах.

Терүнд эрүл-мендинь хәрү өгх.

⁵ – О, Деед Эзн,

Тана өмнәс килнц би һарһув.

Хәәрлтн намаг, эдгәтн намаг, – гиҗ би зальврув.

⁶ Мини дәәсн мини тускар:

«Тер шулуһар үкәд мартгдтха», – гиҗ догшн үгмүд келнә.

⁷ Кемр нан тал мини дәәсдәс кен негнь ирхләрн,

Худл келәд, хов цуглулна.

Дәкәд йовхларн, мини тускар хов цацна.

⁸ Нанд дурго әмтн хоорндан

Намаг муурулҗ шимлдцхәнә.

Тедн нанд хар санна:

⁹ «Терүг үкүд гем ээрчәнә.

Орнасн тер мел босшго болҗ одв», – гиҗ келцхәнә.

¹⁰ Мини нәәлҗәсн,

Нам хоорндан хотан хуваҗ идҗәсн

Хамгин өөрхн иньгм

Намаг бәрҗ өгв.

¹¹ О, Деед Эзн,

Та намаг хәәрлтн.

О, Деед Эзн,

Та нанд хәрү эрүл-мендим өгтн.

Тегәд би дәәснәсн өшәһән авхв.

¹² Кемр мини дәәсн намаг эс диилхлә,

Тегәд Та, Деед Эзн,

Цаһан санаһан нанд күртәҗәхиг

би медхв.

¹³ Намаг цеврәр бәәсн төләд

Та нанд дөң болхт.

Намаг Та хаҗудан мөңкинд хадһлтн.

¹⁴ Израилин Бурхнд,

Деед Эзнд,

Мөңкинд туурмҗ!

Тиигтхә! Тиигтхә!

Көгҗмин һардачд.

Корахна көвүдин ном.

² Бульглсн уснд күрхәр седҗәх

Буһ гидг адусн мет,

Тиигҗ би, Бурхн минь,

Танд күрхәр седҗәнәв.

³ Цаңһҗах күн мет,

Би санан-седкләрн Таниг,

Күчтә, әмд Бурхн,

Керглҗ хәәҗ бәәнәв.

⁴ – Чини Бурхн альдв? – гиҗ

Өдр болһн нанас сурдм,

Өдр, сөөдән эдлх өдмгм

Асхрсн нульмсм болдг билә.

⁵ Би олн дунд орад,

Бурхна өргәд тедниг

Байртаһар, Бурхиг магтсн дуута

Дахулҗ одсан санхлам,

Зүркм хаһрхдан күрнә.

⁶ – Яһад би гейүрчәхмб,

Яһад үүмәтә бәәнәв? – гиҗ

Би бийәсн сурнав.

Бурхнд нәәл.

Тер юңгад гихлә,

Би Эврәннь Аврачан,

Эврәннь Бурхан

Бас туурулҗ магтхв.

⁷ Кемр санан-седклм уйдад ирхлә,

Тана тускар би Йордана, Ермона һазрас,

Мицар уул деерәс тодлҗ саннав.

⁸ Тана цуг усн, цуг дольгас намаг дәврсн мет,

Күүрсн юмн намаг дарҗана.

⁹ Өдрт Деед Эзн Эврәннь

Сольлт уга дуран илгәнә.

Сөөд Терүнд дууһан нерәднәв,

Җирһл өгчәх Бурхнд зальврнав.

¹⁰ Эврәннь харсач Бурхнд би келнәв:

– Юңгад Та намаг мартвт?

Юңгад би дәәснәсн көөгдәд,

Му келүләд зовҗахмб?

¹¹ – Чини Бурхн альдв? – гиҗ

Өдр болһн дәәсм сурдм,

Мини яс кемлҗәхәр,

Намар тедн наад бәрцхәдм.

¹² – Яһад би гейүрчәхмб?

Яһад үүмәтә бәәнәв?

Бурхнд нәәл гиҗ келнәв.

Тер юңгад гихлә би

Эврәннь Аврачан,

Эврәннь Бурхан

Бас туурулҗ магтхв.

¹ О, Бурхн намаг цеврлтн,

Намаг харстн.

Та хар саната улсин өмнәс ноолдтн,

Намаг мектә, зөв уга күүнәс сулдхтн.

² Та мини харсач Бурхнт.

Юңгад Та намаг һазалвт?

Юңгад би дәәснәсн көөгдәд,

Му келүләд зовҗахмб?

³ Эврәннь герлән нанд үзүлтн,

Эврәннь үнн үгән нанд келтн.

О, Бурхн, тедн намаг

Тана бәәх әрүн уулд күргтхә.

⁴ Бурхна тәклин ширәд өөрднәв,

Байр, нәәр нанд өгдг

Бурхн талан өөрднәв.

О, Бурхн, мини Бурхн,

Би ятх татад, Тана нериг туурулнав.

⁵ – Яһад би гейүрчәхмб?

Яһад үүмәтә бәәнәв?

Бурхнд нәәл гиҗ келнәв.

Тер юңгад гихлә би

Эврәннь Аврачан,

Эврәннь Бурхан

Бас туурулҗ магтхув.

Көгҗмин һардачд. Корахна көвүдин ном.

² О, Бурхн минь,

Мана өвкнрин цагт,

Кезәнә, кезәнә Тана

Кеҗ, күцәҗ йовсна тускар

Тедн маднд келдг билә,

Терүгинь бидн соңславидн.

³ Эврәннь Һарарн Та

Буру номта улсиг ка цоквт.

Эврәннь улст Та

Бәәх һазр өгвт.

Талын улсиг Та

Тараһад салһвт,

Эврәннь улст Та

Сән белг өгвт.

⁴ Бәәх һазран тедн

Үлдәр булаҗ авсн уга.

Чидл-күчәрн чигн

Тедн диилсн уга.

Болв Тана күчн,

Болв Тана чидл,

Болв Тана бәәдлин герл

Теднд тусад әдслв.

⁵ Та мини Бурхн!

Та мини Хан!

Эврәннь улстан Та

Эн диилвр өгхәр шиидвт.

⁶ Тана дөңгәр бидн дәәсән бәрхвидн,

Тана күчәр бидн дәәсән ка цокхвидн.

⁷ Би эврәннь саадгт нәәлҗәхшив,

Би эврәннь үлдәрн харсулгдшгов.

⁸ Та мадниг дәәснәсмдн аврхт,

Та маднд дурго улсиг ичәхт.

⁹ Бидн даңгин Бурхан магтхм,

Бидн мөңкинд Бурхна неринь туурулхм.

¹⁰ Болв ода Та

Мадниг һазалад ичәввт,

Мана улсиг дәәнд

Дахулад орҗ бәәхшт.

¹¹ Та мадниг дәәснәс

Эргүләд зулҗ гүүлгүлвт.

Дурго болҗахнь мадниг

Даҗрад тонҗ бәәнә.

¹² Та мадниг, хөд мет алулад, идүлхәр өгвт.

Олн келн-улс дунд

Ода тараһад мадниг хайвт.

¹³ Олн-әмтән хулдхларн,

Олз хәәсн угат Та.

Өөдән үн терүндән

Ода сурсн угат.

¹⁴ Та мадниг әәлмүдин

Керүл-цүүгәнд бәрүлвт.

Та мадниг таньл-үзлин

Керүл-нааднд бәрүлвт.

¹⁵ Та мадниг олн улсин

Тав деер һарһвт.

Та маднар келн-улсин

Наад-инәд кеввт.

¹⁶ Цүүгә татдг, ховч әмтнә келсн үгәс,

Хортна болн өшәтнә хәләцәс

Даңгин ичр намаг ээрнә,

Даңгин ичрәс чирәм улана.

¹⁸ Таниг бидн эс мартсн бийнь,

Тана герәсиг эс эвдсн бийнь,

Тиим тоот маднд учрв.

¹⁹ Бидн зүркн-седкләрн хольҗсн угавидн,

Бидн Тана хаалһас хаҗисн угавидн.

²⁰ Та мадниг мусин һазрт орулвт,

Та мадниг үклин сүүдрәр бүрквт.

²¹ Кемр бидн эврә Бурхндан мөрглго,

Талын бурхнд мөргдг болхла,

²² Бурхн терүг медшго болх бәәсмби?

Бурхн зүркнә нуувч күртл меднәлм.

²³ Болв Танас көлтә дәәсн

Мадниг даңгин үкүлнә.

Алад идх хөөдт

Тедн мадниг тоолна.

²⁴ Деед Эзн, бостн!

Юңгад унтад кевтнәт!

Деед Эзн, сертн!

Бичә оньдинд мадниг һазалтн.

²⁵ Та юңгад маднас бултҗахмт?

Та юңгад мадна зовлң,

Мадна даҗрлт мартҗахмт?

²⁶ Седкләрн бидн элснәс дор болувидн,

Элкәрн бидн һазр шудрувидн.

²⁷ Бостн, Деед Эзн, дөңнтн мадниг!

Тана сольлт уга дурна төлә

Мадниг сулдхтн.

Көгҗмин һардачд. «Лилия» гидг дууна айс. Корахна көвүдин дурна дун.

² Мини зүркн сәәхн үгмүдәр дүүрң,

Магталын дууһан би хаанд өргҗәнәв.

Мини келн болхла,

Медрлтә бичәчин билгтә үг.

³ Та цуг әмтнәс сәәхнт,

Тана келсн үг болһн цаһан саната.

Таниг Бурхн мөңкинд әдсллә.

⁴ Чидлтә дәәч!

Та ташадан үлдән зүүтн.

Та туурсн хант,

Та алдр хант.

⁵ Лавта үннә төлә

Ик санаг уга кехәр,

Чикәр бәәхин төлә

Алдр кевәрн та

Адһҗ диилвртә харслт кетн.

Та күчтә болсндан

Алдр керг күцәҗәнәт.

⁶ Хаана дәәснә зүркнд

Хурц сумн шигднә,

Тана өмн түргүр

Цуг улс унна.

⁷ Хаана ширәд таниг

Бурхн мөңкинд залв.

Тана һардвр, хан,

Чик һардвр болҗана.

⁸ Та чик юмнд дуртат,

Та хар сананд дургот.

Тегәд Бурхн, тана эврә Бурхн,

Тер төләд таниг

Цугтаһаснь икәр байрин тосар тослв.

⁹ Тана өмссн хувцн

Зүсн-зүүл өвснә

Сәәхн үнрәр ивтрәгдҗ,

Тана бәәсн бәәшң

Занын ясар кеерүлгдҗ,

Тана санан-седклиг

Чивһстә зевсгүд авлна.

¹⁰ Хаадын күүкд тана

Хәәртә гергчүдин дунд бәәнә.

Тана келсн күүкн

Офир һазра цевр алтн хувцта

Тана хаҗуд бәәнә.

¹¹ Намаг соңстн, хаана келсн күүкн,

Намаг оньган өгәд соңсит.

Та олн улсан марттн,

Та эцкиннь гериг марттн.

¹² Юңгад гихлә, хан

Тана сәәхнд дурлҗана.

Юңгад гихлә, хан

Тана нойн болҗана.

Та терүг күндлтн.

¹³ Тир балһсна улс

Танд белгтә ирх.

Хамгин байн улс

Хәәрлт танас сурх.

¹⁴ Алтн утцар шаглгдсн

Әвртә ке хувцта

Хәрд һарх хаана күүкн

Хорад күләҗ бәәнә.

¹⁵ Хатхмр хувцар кеерүлгдсн

Хәәртә келсн күүкинь

Хан тал авч одна.

Терүг дахад, ардаснь

Таньл күүкднь йовцхана.

¹⁶ Байрта нәр кеһәд,

Күүкиг буулһад, хаанад орулна.

¹⁷ Тана өвкнр мет,

Тана көвүд хад болх.

Тадн цуг һазрар

Теднәр нойд кехт.

¹⁸ Тана нериг би

Тиигҗ үйәс үйд туурулхв.

Тегәд олн улс

Таниг мөңкинд туурулх.

Көгҗмин һардачд.

Корахна көвүдин дун.

Көгҗмин зевсгүдт наадх.

² Бурхн – мана түшг,

Бурхн – мана күчн,

Түрү-зүдү цагт

Тер мана дөң.

³ Тегәд һазр чичрв чигн,

Тегәд уулмуд нурад,

Теңгсин йоралд тусв чигн,

Терүнәс бидн әәҗәхшивидн.

⁴ Теңгс дольгалад буслтха,

Терүнәс уулмуд чичртхә.

⁵ Бурхна балһснд –

Деед Эзнә әрүн герт –

Һолын усн байр авч ирнә.

⁶ Терүнә дунднь Бурхн бәәнә,

Тер балһсиг күн буйсашго,

Өр цәәснәс авн терүг

Өлзәһән күргҗ Бурхн харна.

⁷ Олн-әмтн әәмҗ шуугна,

Орн-нутг тарна.

Дууһан Бурхн чаңһахла,

Делкән һазр урсна.

⁸ Күчтә гисн Деед Эзн

Кезә чигн маднла бәәнә.

Мана өвк Яковин Бурхн

Маднд шивә болна.

⁹ Деед Эзн яһҗ

Делкән һазр дееркиг

Уга кеһәд хоосрулсиг

Бийстн ирәд хәләтн.

¹⁰ Һазрин меҗә күртл Тер

Керлдән, цүүгә зогсана,

Һазрин меҗә күртл Тер

Кегдсн саадг, җид хуһлна,

Һазрин меҗә күртл Тер

Кегдсн халхц һалд шатана.

¹¹ «Эврәннь кергән зогсаһад тадн,

Намаг Бурхнд тоолтн.

Олн келн-улс цугтан,

Орчлң кевтән нерим туурултн», –

гиҗ Бурхн келнә.

¹² Күчтә гисн Деед Эзн

Кезә чигн маднла бәәнә,

Мана өвк Яковин Бурхн

Маднд шивә болна.

Көгҗмин һардачд.

Корахна көвүдин дун.

² Цуг келн-улс, байртаһар сүрә өргтн,

Цуг келн-улс, байртаһар Бурхиг дуундан орултн!

³ Хамгин Күчтә Деед Эзн

Күндлгдх зөвтә,

Цуг делкә деер

Тер алдр Хан болҗана.

⁴ Мадна төлә Тер

Олн-әмт диилнә,

Мадна төлә Тер

Келн-улс дорацулна.

⁵ Бурхн мана өнч йилһв,

Бурхн Яковин хөөт үйнрт дурта.

Мана өнч – теднә омг.

⁶ Эврә ширәдән Бурхн

Әмтнә дуудврар өөдлв,

Эврә ширәдән Деед Эзн

Бүрә татулҗ өөдлв.

⁷ Дуултн дууһан Бурхнд, дуултн!

Дуулҗ өгтн мана Хаанд, дуултн!

⁸ Юңгад гихлә Бурхн

Цуг делкән Хан.

Цугтан дууһан дуулад,

Терүнд магтал өргтн.

⁹ Олн улсиг Бурхн

Хан болҗ зална.

Әрүн ширә деерән

Эврән Тер сууна.

¹⁰ Бурхнд магтал өргхәр

Олн улсин нойд

Абрахамин Бурхна әмтнлә хамдан цуглрна.

Юңгад гихлә харсачнр

Бурхна үлмәд бәәнә.

Бурхн делгүдән өрггдв.

Псалм. Корахна көвүдин дун.

² Деед Эзн ямаран Алдр!

Мана Бурхна балһснд,

Эврәннь әрүн уул деер

Магталар Тер буульгдв.

³ Сәәхн ке сеертә һазр,

Сион гидг нертә уул

Цуг һазрин байр болҗана.

Терүнә ар үзг бийднь

Алдр Хаана балһсн бәәнә.

⁴ Бурхн терүнә шивә болҗана,

Бурхн терүнә харсач болҗана.

⁵ Һазр деерк хаад

Бәәсн чидлән негдүлнә,

Балһс авхар босна.

⁶ Болв Сион уул үзәд,

Басл тедн өврнә,

Уха алдад дарунь

Уга болад гүүцхәнә.

⁷ Тедниг тенд әәмшг бәрнә,

Тедниг тенд, үр һарһҗах мет, зовлң ээрнә.

⁸ Эс гихлә дорд үзгин салькн көдләд,

Таршин кермс хамхлна.

⁹ Күчтә Деед Эзн балһснд

Келсинь бидн соңсвидн,

Кесинь бидн үзвидн.

Тер мана Бурхна балһсн,

Терүг Бурхн мөңкинд хәрүлнә.

¹⁰ О, Бурхн! Тана сүм дотр

Тана сольгдшго дурна тускар

Бидн ухалҗ бәәнәвидн.

¹¹ О, Бурхн! Тана нерн ямаран күндтә,

Тедү мет цуг делкәд

Таниг магтҗ туурулх.

О, Бурхн! Тана чидлтә барун һартн

Зөв-үннәр дүүрң бәәнә.

¹² Сиона әмтн нәәрлҗәнә,

Йудайин балһсдар байрлҗана.

Юңгад гихлә Та йосар зарһ кенәт.

¹³ Сион уул тал одад,

Терүг эргәд йовтн.

Терүн деерк башньсиг

Тоолад тадн хәләтн.

¹⁴ Иргч үйнртән келхин төлә

Энүнә бат тосхлтынь оньһтн.

Иргч үйнртән күргхин төлә

Энүнә шивәһинь шинҗлтн.

¹⁵ Юңгад гихлә эн Бурхн –

Йосндан мөңкинд мана Бурхн.

Энүгәр бидн үкн үктлән

Эврәннь залачан кеҗәнәвидн.

Көгҗмин һардачд. Корахин көвүдин дун.

² Цуг улс, энүг соңстн.

Һазр деерк цуг улс энүнд оньган өгтн!

³ Эгл улс, эгл биш, ямтань чигн,

Байн улс угатьнрла хамдан

Энүг ода соңстн:

⁴ Би цецн үгмүд келхәр бәәнәв,

Би зүркнәсн ухананнь медрл өгнәв.

⁵ Домглҗ дуулсндан би оньган өгнәв,

Би ятх татад, нуувчан илдкнәв.

⁶ – Мини хортн намаг

Бүсләд бәрхәр седхлә,

Түрү цагтан би

Тегәд яһад әәхмб?

⁷ Хортн бийдән нәәлнә,

Эврәннь ик зөөрәрн бардмнна.

⁸ Талдан күүнә җирһлиг

Төрүц хулдҗ авч болшго,

Бийиннь төлә хәрү

Бурхнд алв күн өгшго.

⁹ Күүнә җирһлин хәрүнь

Кецү ик үнтә.

Мел үкл уга,

Мөңкинд бәәхин төлә

Нег чигн күн

Күцц үнинь хәрүлҗ чадшго.

¹¹ Цецн әмтнь чигн,

Эргүнь чигн әдләр

Үкдгиг цугтан меднә.

Тедн эврәннь өлг-эдән

Талдан әмтнд үлдәнә.

¹² Болв эврәннь һазртан

Бийиннь нер өгсн бийнь,

Теднә бәәх мөңк гермүднь

Бийстнь үкәрнь болх.

Теднә бәәх бәәрнь

Тохм-уңгднь мөңк болх.

¹³ Күчтә болсарн күн

Удан әмд йовхш,

Болв адусд мет

Үклд тедн бәргднә.

¹⁴ Тиим күүнә хөвнь

Тоолвр уган бәәдл.

Болв терүг дахснь

Басл келсинь таасна.

¹⁵ Хәрнь тедн урдаснь

Хөөдлә әдл үкх хөвтә.

Хөөч хөөдән хәрүлсн мет,

Түүшң үкл тедниг хәрүлнә.

Тегәд Бурхнд иткдг улс

Теднд өрүндән нойрхх.

Теднә цогц-махмуднь шүүрх,

Бәәсн гернь үкәрт хүврх.

¹⁶ Болв мини җирһлиг

Бурхн үкләс сулдхх.

Тер намаг бий талан авх.

¹⁷ Кен негнь байҗад,

Гернь зөөрәр дүүрхлә,

Терүг үзсн чи

Төрүц бичә һундрх.

¹⁸ Тиим күн үкхләрн,

Төрүц юм авшго,

Терүнә олсн зөөрнь

Төрүц бийинь дахшго.

¹⁹ Әмд бәәхләрн, күн

Әвр байҗхар седнә.

Күцәмҗс бәрснднь терүг

Кесгнь буульҗ туурулна.

²⁰ Зуг тер хорх,

Өдрин герл үзшго

Өвкнрләһән әдл болх.

²¹ Алдр болад туурсндан

Әмтн удан бәәхш,

Адусдла әдл тедн

Алд уга үкх.

Асафин псалм.

¹ Алдр Бурхн Деед Эзн келҗәнә.

Цуг һазр деерк әмтиг

Нарн һарх үзгәс нарн суух үзг күртл

Тер дуудҗана.

² Ке сәәхн Сион уулас

Бурхн герл мет мандлҗана.

³ Мана Бурхн ирх,

Мел тагчгар биш:

Өмнән һал асаһад,

Эргндән һалв көдлгәд,

Мана Бурхн ирх.

⁴ Эврәннь улсин зарһ кехләрн,

Теңгр, һазриг герчд дуудад,

Бурхн иигҗ келх:

⁵ «Негт тәкл тәкәд

Нанта бооца кесн

Мини итклтә әмтиг

Нанд цуглулад өгтн».

⁶ Теңгр Терүнә чик седкл медүлх.

Юңгад гихлә делкәд

Йосн зарһчнь – Бурхн.

⁷ – Мини улс, соңстн!

Би келхәр бәәнәв.

Израиль!

Би өмнәсчнь иигҗ герчлхв:

Би Бурхмб, чини Бурхмб гиһәд.

⁸ Чини бәрсн бәрцәр би

Чамаг гемшәхәр бәәхшив.

Чини шатасн тәклиг би

Оньдин өмнән үздүв.

⁹ Би чини гертәс

Бүрү туһл авшгов,

Би чини хашаһас

Тек мал авшгов.

¹⁰ Юңгад гихлә Мини цуг аңгуд

Ө-шуһуд йовцхана,

Юңгад гихлә Мини мал

Миңһн уулд йовцхана.

¹¹ Уулын цуг шовуд,

Теегт бәәх аңгуд

Цугтан Мини болҗана.

¹² Кемр Би харһнсн болхла,

Келшго биләв чамд.

Юңгад гихлә делкә Мини,

Терүнд бәәхнь цугтан Мини.

¹³ Нанд царин махн керго,

Нанд текин цусн керго.

¹⁴ Нанд – чини Бурхнд – Магталар бәрц бәрүл.

Нанд – Хамгин Күчтә Бурхнд –

Өгсн андһаран күцә.

¹⁵ Чамд һундлта өдрмүд үзгдхлә,

Чи нанд дуудвр ке.

Чамдан Би аврлт илгәнәв,

Чи мини нер туурулхч, – гиҗ Бурхн келнә.

¹⁶ Килнцтә әмтнд Бурхн иигҗ келнә:

«Тадн Мини шиидвр давтҗант?

Тадн Мини бооцана тускар күүндвт?

¹⁷ Тадн Мини сурһмҗд дургот,

Тадн Мини келсиг баснат.

¹⁸ Тадн хулхачнр үзхләрн,

Теднлә таарад үүрлнәт.

Тадн аля кү үзхләрн,

Теднлә үүрлнәт.

¹⁹ Амарн хар сана,

Келәрн худл келнәт.

²⁰ Ах-дүүһән керлднәт,

Нам һарлцсн улсан ховлнат.

²¹ Тиим юм һарһвчн,

Тагчг Би бәәләв.

Тегәд тадн Намаг

Бийләһән әдлд саннат.

Болв ода тадна килнцитн

Би таднд илднь үзүлнәв.

²² Бурхиг басчах улс,

Бийән тасчулшгоһар бәәхлә,

Энүг тодлад авчктн.

Энүнәс тадниг күн сулдхшго.

²³ Магталар бәрц бәрснь –

Намаг күндлҗәх темдг.

Чикдән бәәсн улсиг

Би аврнав».

Көгҗмин һардачд.

Давид Батшава гидг күүкнлә килнц һарһсна хөөн, терүн тал Натан гидг әәлдәч ирсн цага Давидин псалм .

³ О, Бурхн,

Эврәннь итклтә дурарн

Намаг хәәрлтн.

О, Бурхн,

Эврәннь аһу ик цаһан санаһарн

Йоснд уга йовдл һарһснасм цеврлтн.

⁴ Та мини буруһим тәвҗ өгтн,

Та намаг килнцәсм цеврлтн.

⁵ Юңгад гихлә,

Би тиим йовдл һарһсан медҗәнәв.

Би эврәннь килнцән оньдинд меднәв.

⁶ Тана өмнәс би килнц һарһув,

һанцхн Тана өмнәс.

Таниг һундах йовдл би һарһув.

Тегәд мини зарһ кех йосн Танд бәәнә.

Танд намаг цааҗлх зөв бәәнә.

⁷ Би төрхәрә килнцтәв,

Би нам түрүн тогтсн кемәс авн килнцтәв.

⁸ Күн болһн үнн зүрктә болтха гиҗ

Та некҗәнәт.

Та нанд Эврәннь цецн ухаһан өгтн.

⁹ Та мини килнциг уга кетн,

Тегәд би цеврдхв. Та намаг уһатн,

Тегәд би шүднәс цаһан болхв.

¹⁰ Буруһим тәвҗ өгвт гиһәд

Та нанд келтн,

Тегәд би байрлҗ дүрклхв.

Та намаг күүчсн бийнь,

Би шинәс байрлхв.

¹¹ Та нанас килнцим салһтн,

Та йоснд уга йовдл һарһсим дартн.

¹² О, Бурхн, цевр седкл чееҗдм үүдәтн.

О, Бурхн, нанд шин итклтә бәәдл өгтн.

¹³ Та намаг Бийәсн бичә көөтн,

Та нанас әрүн Сәкүсән бичә булаҗ автн.

¹⁴ Та Эврәннь аврлтын байран нанд хәрү өгтн.

Танд соңсхврта болдгар,

Та нанд седклин сергмҗ өгчәтн.

¹⁵ Тегәд би йос эвдсн әмтнд

Тана заавр дасхнав.

Тан тал килнцтә улс хәрү ирцхәх.

¹⁶ Мини аврлтын Бурхн,

Намаг үкләс татҗ автн.

Тегәд би Тана чик хәләциг туурулнав.

¹⁷ О, Деед Эзн, келх арһ нанд өгтн,

Тегәд би Танд магталан өргнәв.

¹⁸ Та бәрц авх седкл зүүҗәхшит,

Би терүг Танд өгх биләв.

Та тәкл тәклһиг таасхшит.

¹⁹ Бурхнд бәрх дүңгә бәрцнь –

Соңсхврта седкл болҗана.

О, Бурхн, бийән гемшәҗәх седкл

Та һәәлшгот.

²⁰ Та Сион балһсиг әдслтн,

Та терүнд дөңгән күргтн.

Та Ерусалимин эрсинь шинәс босхтн.

²¹ Тегәд Танд мадна сән бәрц,

Мадна тәкл тәклһн таасгдх.

Тегәд Тана тәклин ширәд

Бидн бух-малар бәрц бәрнәвидн.

Көгҗмин һардачд.

Доик Идумеянин Саул тал одад, Ахимелехин герт Давид ирвә гиҗ келснә хөөн кесн Давидин ном .

³ О, догшн залач,

Хар сансндан юм бардмнҗахмбч?

Бурхна итклтә дурн оньдинд.

⁴ Чи алх-булх седклтә йовнач.

Чини келн хурц утхла әдл.

Чи мел худл юм һарһхар ухалнач.

⁵ Чи сән сананас хар сананд икәр дурлнач,

Чи үннәс худлд ик дуртач.

⁶ О, билгтә худлч,

Чи зүсн-зүүл му үгмүдт дуртач.

⁷ Бурхн, маһд уга,

Чамаг мөңкинд угарулх.

Тер чамаг бәрҗ авад, герәсчнь салһх.

Әмд улсин һазр деерәс

Тер чамаг уңгарнь уга кех.

⁸ Бурхнд иткдг әмтн чамаг үзн, әәмҗ өврцхәх.

Тедн чамаг һәәхәд инәҗ келх:

⁹ «Бийән харсх зөв

Бурхнд эс өгсн күн эн бәәнә.

Тегәд энтн эврәннь ик зөөрт нәәлҗәлә,

Энтн му йовдл һарһлһндан батрҗала».

¹⁰ Би болхла,

Бурхна итклтә дурнд мөңкинд нәәләд,

Көкрҗәх модн мет,

Бурхна герт цецгәрҗәнәв.

¹¹ О, Бурхн,

Тана кесн-күцәсиг медҗ

Би мөңкинд Тана нер туурулхв.

Тана шүүҗ авсн әмтн цуглрсн һазрт

Би Тана цаһан санана тускар зәңглхв.

Көгҗмин һардачд. Давидин псалм.

² «Бурхн уга», – гиҗ

Седкл уга күн дотран санна.

Тиим күн алятад,

хар саната йовдл һарһна.

Сә кедг нег чигн күн уга.

³ Делкәд бәәх цуг улсиг

Бурхн теңгрәс хәләнә.

Бурхиг хәәҗәх ухата, адг-ядхдан,

Ор һанцхн күн бәәх угаһинь

Тер үзхәр седҗәнә.

⁴ Болв Цугтан чик хаалһас хаҗицхәв,

Цугтан әдлдән аля.

Цаһан саната йовдл һарһдг

Нег чигн күн уга,

Нам нег чигн.

⁵ Мини улсиг өдмглә әдл җаҗлад идҗәх

Йос эвддг әмтнд ухан оршго болхви?

Тедн Деед Эзиг хәәҗ дууддго болхви?

⁶ Тиигхлә теднд урднь үзгдәд уга әәмшг харһх.

Бурхн дәәснәннь ясинь тараһад хайх.

Тедн диилгдх,

Юңгад гихлә, Бурхн тедниг бурушала.

⁷ Сионд бәәх Деед Эзн

Израилиг авртха гиҗ

Би зальврҗанав.

Бурхн Эврәннь улсан

Бәрәнәс хәрү авхлаг,

Тегәд Яковин хөөт үйнр байрлх,

Тегәд цуг Израиль байрлх.

Көгҗмин һардачд. Көгҗмин чивһстә зер-зев цокҗ наадх. Зифа гидг балһснас әмтн ирәд, Давидиг тер һазрт бултҗ бәәнә гиҗ Саулд келснә туск . Давидин псалм.

³ О, Бурхн!

Та чидлтә болсндан намаг авртн.

О, Бурхн!

Та күчтә болсндан намаг харстн.

⁴ О, Бурхн! Мини зальврлһ соңстн.

О, Бурхн! Мини келсн үг чиңнтн.

⁵ Талын әмтн намаг дәврҗәнә,

Догшн әмтн намаг алхар седҗәнә.

Теднд Бурхн керг уга.

⁶ Болв Бурхн мини түшг.

Деед Эзн – мини харсач.

⁷ Теднә хар санаг мини хортн тал

Бурхн хәрү илгәтхә.

О, Деед Эзн, тедниг ка цоктн.

Юңгад гихлә, Та итклтәт.

⁸ Би Танд зүркнәсн бәрц бәрнәв.

Би, Деед Эзн, Тана нер туурулнав.

Юңгад гихлә, Тана нерн әрүн.

⁹ Та намаг цуг зовлңгас сулдхвт.

Би эврәннь хортдан диилгдсинь үзүв.

Көгҗмин һардачд. Көгҗмин чивһстә зер-зев цокҗ наадх. Давидин псалм.

² О, Бурхн, мини зальврлһ соңстн!

О, Бурхн, мини сурсиг бичә бастн!

³ Та нанд оньган өгтн,

Та нанд хәрү өгтн.

Би зовлңдан бәргдсн бәәнәв.

Хортнаннь әәлһлһнәс көлтә,

Килнцтә әмтнә даҗрлһнас көлтә

Би ухаһан гееҗәнәв.

Тедн нанд зовлң өгчәнә,

Нанд уурлад дурго болҗана.

⁵ Би зовҗанав,

Үклин әәмшг намаг дарҗана.

⁶ Би әәмшгтә бәәнәв,

Би чичрҗ бәәнәв,

Би әәмшгт бәргдүв.

⁷ Көглҗрһн мет далвагта болхнь,

Би нисәд амрх биләв.

⁸ Би зулад, холд күрәд,

Көдә һазрт үлдх биләв.

⁹ Би чаңһ салькнас адһҗ бултх биләв.

¹⁰ О, Деед Эзн,

Мини хортна келинь оралдултн;

Балһснд күчәр болҗах даҗрлт, үүмә

Би үзҗ бәәнәв.

¹¹ Терүг тедн өдр сө уга бүслҗ авчана.

Тенд хортн йос эвдҗәнә,

Тенд хортн зовлң үзүлҗәнә.

¹² Тер балһсиг хамхлҗ тараҗана,

Уульнцснь даҗрдг әмтәр дүүрң,

Тенд мекч әмтн олн.

¹³ Кемр намаг хортм наад бәрсн болхла,

Би дааһад тесх биләв.

Кемр хортм нанд караглсн болхла,

Би терүнәс бултх биләв.

¹⁴ Болв эннь чи болҗанач,

Нанла әдл мини нәәҗ,

Мини өөрхн иньг.

¹⁵ Чамла бидн үгән илднь күүндәд,

Бурхна герт хамдан одлавидн.

¹⁶ Мини хортнд үкл генткн иртхә,

Тедн әмдәр тамд тустха.

Юңгад гихлә, бүүрлсн һазртнь

Теднлә хамдан хар санан бәәнә.

¹⁷ Би болхла, Бурхан дууднав,

Тегәд Деед Эзн намаг аврх.

¹⁸ Би өрүһәр, һал үдлә, асхар

Эврәннь һундлан келҗ эңгснәв.

Тегәд Тер намаг соңсна.

¹⁹ Кесгнь мини өмнәс сөрлцсн бийнь,

Тер намаг һаң угаһар ноолданас һарһх.

²⁰ Мөңкинд залҗах Бурхн намаг соңсх.

Хортым дииләд, Тер нанд дөңгән күргх.

Юңгад гихлә, тедн оңдархар седҗәхш,

Тедн Бурхнас әәҗәхш.

²¹ Мини урднь үүрлҗәсн нәәҗм

Эврәннь үүрмүдән дәврҗ.

Тер эврәннь келсн үгән эвдҗ.

²² Терүнә келнь бал мет әмтәхн,

Болв зүркнь өшәһәр дүүрң.

Терүнә үгнь тоснас җөөлн,

Болв хурц үлд мет керчнә.

²³ Чи Деед Эзнд

Эврәннь килмҗән даалһ,

Тер чамаг дөңнх.

Терүнә чик седклтә улс

Кезәд чигн диилгдшго.

²⁴ О, Бурхн, эн алачнриг

Та хамгин гүн нүкнд тәвхт.

Алачнр, хар саната әмтн наснаннь өрәлднь күршго.

О, Деед Эзн, би Танд нәәлҗәнәв.

Көгҗмин һардачд. Давидин псалм. Пилистин улс Давидиг Гатд бәрҗ авсн цага .

² О, Бурхн, хәәрлтн намаг!

Бий талм дәврлһ кеҗ йовна.

Мини дәәсн намаг оньдин даҗрна.

³ Мини дәәсн намаг өдр болһн зована.

О, Күчтә Бурхн,

Олн улс мини өмнәс дәәлдҗәнә.

⁴ Би әәхләрн, Танд нәәлнәв.

⁵ Бурхнд нәәлхләрн,

Би юмнас әәхшив.

Терүг би магтнав;

Тер намаг аврх болла.

Йирин күн нанд ю кехмб?

⁶ Мини дәәсн нанд даңгин хар санаһан күргҗәнә.

Тедн нанд кезәчн хоран күргхәр санна.

⁷ Тедн мини өмнәс негднә,

Мини әм авхар нуувчар ардасм мөрднә.

⁸ О, Бурхн, хар санснднь

Теднд «ачлвринь» бәрүлтн,

Эврәннь цухлар тедниг засглтн.

⁹ Та мини зовлң тоолтн,

Та мини уульсн нульмсиг савдан хуратн.

Тедн Тана дегтрт бичәтә эсий?

¹⁰ Кемр би Танд дуудвр кехлә,

Мини хортн зулна.

Бурхн намаг дөңнҗәхиг би меднәв.

¹¹ О, Бурхн, кенә келсиг би буульҗахмб,

¹² Би Танд нәәлҗәнәв, юмнас әәҗәхшив.

Кен чигн күн нанд ю кехмб?

¹³ О, Деед Эзн,

Би Танд өгсн андһаран күцәнәв.

Би эврәннь магталар

Танд бәрц бәрүлнәв.

¹⁴ Та намаг үкләс сулдхвт,

Та намаг диилгдх саамас бас сулдхвт,

Тиигәд би Бурхна хаҗуд герлтә җирһләр бәәнәв.

Көгҗмин һардачд. Давидин псалм. Саулас уулын көдәд гүүҗ бултсна цага .

² О, Бурхн, хәәрлтн намаг, хәәрлтн!

Та мини түшг болҗанат.

Күчтә аюл давтл,

Шовуд һууҗмулмудан

Далвагарн бүркәд харсчах мет,

Тиигҗ Та намаг харсчанат.

³ Хамгин Күчтә Бурхнд дуудвр кенәв,

Нанд кергтә тоотым өгчәх

Бурхнд дуудвр кенәв.

⁴ Тер нанд теңгрәс аврлт илгәх,

Тер намаг шахҗ йовх әмтиг ичәх.

Бурхн Эврәннь итклтә дуран күргх,

Бурхн Эврәннь иткмҗән өгх.

⁵ Хурц үлд мет келтә,

Җид болн сумн мет шүдтә

Әмт иддг арслңгин бәәдлтә дәәсдәр

Би бүслгдүв.

⁶ О, Бурхн, теңгрт Эврәннь алдран үзүлтн.

Цуг һазр деер Тана туурмҗ делгртхә.

⁷ Мини дәәсд көлим тушхар гөлм белдҗ.

Би зовлңд бәргдүв.

Тедн нанд нүк малтад бел кеҗ,

Болв терүндән бийснь унв.

⁸ О, Бурхн, би Танд бүклднь иткҗәнәв.

Би дуулад, Таниг туурулнав.

⁹ Би серәд ду дуулнав!

Би серәд ятх чимкәд цокнав!

Би өрәс өмн сернәв.

¹⁰ О, Деед Эзн,

Би Таниг олн-әмтн дунд туурулнав,

Би Таниг келн-улс дунд буульхв.

¹¹ Тана итклтә дурн теңгрт күрх.

Тана иткмҗ үүлд деегүр делгрҗәнә!

¹² О, Бурхн, Эврәннь алдран теңгрт үзүлтн.

Цуг һазр деер Тана туурмҗ делгртхә!

Көгҗмин һардачд. Давидин псалм.

² Һардачнр, тадн чик шиидвр һарһдвт?

Цуг улсин зарһинь чикәр кедвт?

³ Уга, тадна зүркн зуг килнцәр дүүрң,

Һазр деер хаҗһр йовдл һарһад, әмт даҗрҗанат.

⁴ Килнцтәнь геснд үүдснәсн авн хаҗисн бәәнә,

Тедн төрхәрә худл келәд төөрҗ йовцхана.

⁵ Тедн моһала әдл хорар дүүрң,

Тедн таңх моһа мет чикән бөглнә.

⁶ Тедн илвтә күүнә ду соңсчахш,

Нам әвртә илвтә күүнә ду соңсчахш.

⁷ О, Бурхн, теднә шүдинь амнднь күүлтн.

О, Деед Эзн, арслң аңгудын сояһинь хамхлтн.

⁸ Тедн урсчах усн мет уга болтха,

Саадган татхлань,

Теднә сумн мука болтха.

⁹ Тедн урсчах хорханцгин бәәдлтә болтха,

Тедн, әмн угаһар һарсн нилхлә әдл, нар бичә үзтхә.

¹⁰ Теднд сегән ортл,

Буг өвсн мет чавчгдад хайгдх.

Тедниг әмд деернь

Бурхн ик ууртаһар үләһәд көөх.

¹¹ Килнцтә әмтнә засглһ үзхләрн,

Чик седклтә күн байрлх.

Тегәд тер тавган килнцтә улсин цуснд уһах.

¹² – Чик седклтәд өгсн ачлвр үнн,

Һазр деер зарһ кедг Бурхн бәәснь үнн, – гиҗ әмтн келх.

Көгҗмин һардачд. Давидин псалм. Саул Давидиг алхин төлә геринь мантха гиһәд, әмт йовулсна цага .

² О, Бурхн мини!

Намаг дәәснәсм аврҗ автн,

Намаг дәврҗәх әмтнәс харсҗ автн,

³ Йоснд уга йовдл һарһҗах әмтнәс намаг сулдхтн,

Эн догшн әмтнәс намаг харсч автн.

⁴ Тедн намаг алхар гетәд суулдна.

О, Деед Эзн,

Өмнәсм хәәрлт уга әмтн негдхләрн,

Мини һарһсн йовдлар биш,

Мини килнцәс көлтә биш.

⁵ О, Деед Эзн,

Тедн адһад дәврлһ кехләрн,

Мини һарһсн буруһас көлтә биш.

О, Деед Эзн, Та босад намаг дөңнтн,

Та мини бәәдл хәләтн.

⁶ О, Деед Эзн,

Күчтә Бурхн, Израилин Бурхн!

Та босад, буру номта улсиг засглтн.

Нег чигн килнцтә урвачиг

Та бичә хәәрлтн.

⁷ Тедн асхнд хәрҗ ирхләрн,

Нохас мет күркрәд,

Балһсн дотраһур бултад йовцхана.

⁸ Күүндхләрн, тедн бийән бәрҗ чаддгоһинь хәләлт!

Теднә амнас һарчах догшн үгмүд үлд мет.

Болв тедн санҗана:

«Намаг күн соңсчахш».

⁹ Зуг Та, Деед Эзн, теднд инәнәт.

Та цуг буру номта улсар наад бәрнәт.

¹⁰ Мини күчн, Танд би нәәлҗәнәв.

Та, Бурхн, мини шивә болҗанат.

¹¹ Нанд дурта Бурхн ирәд намаг аврх.

Бурхн нанд дәәсм диилгдсиг үзх зөв өгх.

¹² О, Деед Эзн, мана халхц,

Эврәннь дәәсән яһҗ Та засглдгиг

Мини улс мартдгоһар

Тедниг дарунь бичә алтн,

Болв Эврәннь чидләрн

Тедниг тараһад хайтн, хамх цоктн.

¹³ Теднә келсн тоотнь килнцтә.

Тедн деерлксн седклдән эдлтхә!

Тедниг харал тәвәд, худл келдг төләднь

Та догшар уңгарнь уга кетн.

Израильд Бурхн нойлҗахиг

Тегәд цугтан медтхә,

Терүнә һардврт цуг һазр орҗана.

¹⁵ Мини хортн асхнд хәрҗ ирхләрн,

Нохас мет күркрәд,

Балһсн дотраһур бултад йовцхана.

¹⁶ Тедн хот хәәҗ йовх нохас мет гүүлднә,

Хотан элвгәр эс олҗ авхларн, күркрнә.

¹⁷ Би болхла, Тана күчиг магтнав,

Тана итклтә дурна тускар

Би өрүн өрләһәс авн чаңһар келнәв.

Зовҗах цагтм

Та мини харсач,

Та мини шивә болҗанат.

¹⁸ Та мини күчн!

Таниг би дуундан орулнав!

Та мини харсачт,

Та йосндан нанд дурта мини Бурхнт.

Көгҗмин һардачд. Давидин псалм. Давидиг Арам-Нахараимта болн Арам-Цобата ноолдҗах цагт, дәкәд Иоав хәрҗ йовад «Давста» гидг тегш һазрт 12 миңһн эдомудыг диилснә тускар дасх .

³ О, Бурхн! Та мадниг хаяд һарвт.

Та мана харслтыг күүчвт,

Та маднд уурлвт.

Та ода хәрү мадн тал эргтн.

⁴ Та һазр чичрүләд шуулвт.

Эвдсн һазран Та ястн,

Юңгад гихлә, тер хотаҗана.

⁵ Та Эврәннь улст ик зовлң үзүлвт,

Тана засглад өгсн чаһрас бидн дәәвлвидн.

⁶ Эврәннь улсан бичә диилтхә гиһәд,

Та туг өргәд саглвт.

⁷ Та Эврәннь күчәрн мадниг авртн.

Бидн, Тана дурта әмтн, сулддгар,

Мана эрлһиг соңстн.

⁸ Эврәннь сүмәс Бурхн иигҗ келҗ:

«Би диилвр бәрсн төләдән

Шехем балһс хуваҗанав,

Соккот гидг тиньгр һазр түгәҗәнәв.

⁹ Гилад гидг орн-нутг Мини,

Манаше гидг һазр Мини,

Эприм гидг һазр – Мини дуулх,

Йуда – Мини очр.

¹⁰ Моав гидг нутгар

Би нүр уһадг сав мет кенәв.

Едом нутг деер

Би һосан хайнав.

Тернь Би эзньв гисн темдг болх.

Пилистмүдин һазр Намаг ода диилсн болҗ һархий?»

¹¹ Кен намаг тер батрсн балһснд орулхмб?

Кен нанд Эдомиг диилх диилвр өгчәнә?

¹² Та, Бурхн, мадниг хайсн болвзат?

Та мана дәәчнрлә хамдан

Мадна хортна өмнәс дәәлдхәр йовшговт?

¹³ Мана хортна өмнәс

Та маднд дөңгән күргтн;

Әмтнә харслтд тус уга.

¹⁴ Бурхна дөңгәр

Бидн ноолданд диилхвидн.

Тер мана хортниг дарх.

Көгҗмин һардачд. Чивһстә зер-зев цокҗ наадх. Давидин псалм.

² О, Бурхн, мини дуудсиг соңстн!

О, Бурхн, мини зальврлһнд оньган өгтн!

³ Би эврәннь төрскнәсн холд бәәнәв,

Би дәкҗ тесч чадҗахшив.

Намаг әәмшг уга хад деер һарһтн.

⁴ Та мини шивә болҗанат,

Дәәснәсм харсх мини

Та бат түшг болҗанат.

⁵ Тана әрүн шатрт би мөңкинд бәәсв,

Тана далваг дор би бәәр олҗ авсв.

⁶ О, Бурхн, Та мини андһар соңсвт,

Таниг күндлдг нанд Та әдс өгвт.

⁷ Хаанд Та ут нас өгтн.

Үйнриннь җирһл үзәд,

Удандан тер бәәтхә.

⁸ О, Бурхн, Тана евәләр,

Хан мөңкинд залтха.

Та терүг итклтә дурарн,

Иткмҗәрн хәләтн.

⁹ Танд би мөңкинд магтал дуулнав,

Танд өгсн андһаран

Би өдр болһн күцәнәв.

Көгҗмин һардач, Едутунд. Давидин псалм.

² Би бийән тогтунар бәрҗ

Бурхиг күләҗәнәв.

Зуг Терүнәс нанд аврлт ирҗәнә.

³ Зуг Бурхн мини түшг,

Мини аврлт, мини шивә.

Би диилгдх юм мел үзәд угав.

⁴ Өкәһәд кольчисн эрсәс,

Нәәхлсн хашаһас чидләрн тату күүг

Кедүдән тадн дәврхмт?

⁵ Тадн терүг зуг күндтә ормаснь

Көндәхәр седҗәнәт,

Тадн худл келлһән таасчанат.

Тадна амнас йөрәл асхрв чигн,

Тадна зүркнәс харал һарна.

⁶ Би бийән тогтунар бәрҗ

Бурхиг күләҗәнәв.

Зуг Терүнд би нәәлҗәнәв.

⁷ Зуг Бурхн мини түшг,

Мини аврлт, мини шивә.

Би диилгдх юм мел үзәд угав.

⁸ Зуг Бурхнас би эврәннь аврлтан, туурмҗан үзҗәнәв.

Тер мини итклтә харсач,

Тер мини шивә болҗана.

⁹ Олн-әмтн! Кезәд чигн Терүнд нәәлтн.

Терүнд эврәннь зовлңган келҗ өгтн;

Бурхн мана шивә.

¹⁰ Күмн әмтн хоосн әмсхллә әдл,

Икднь чигн, баһднь чигн мел үн уга.

Кемр тедниг чиңнүрдәд хәләхлә,

Тедн хамдан аһарас гиигн болх.

¹¹ Чи кү меклсндән бичә нәәл,

Хулха-була кесн олзта гиҗ бичә сан.

Нам зөөрчнь өсәд бәәсн бийнь,

Терүнд бичә нәәл.

¹² Бурхн иләр келҗ:

«Күчн-чидл Мини болҗана».

Терүг би кесг дәкҗ соңслав.

¹³ О, Деед Эзн,

Тана дурн итклтә.

Та күн болһна ашиг кесн-күцәсәрнь кехт.

Йудайин көдә һазрт бәәсн цага . Давидин псалм.

² О, Бурхн! Та мини Бурхнт!

Таниг би шунҗ хәәнәв,

Таниг би санан-седкләрн хәәнәв.

Шатҗ одсн, хагссн һазр ус хәәҗәх мет,

Тиигҗ Таниг седклм хәәҗәнә.

³ Таниг сүмд үзх зөв нанд өгтн.

Тана күчиг болн кецү туурмҗитн

хәләх зөв нанд өгтн.

⁴ Тана итклтә дурн әмнәс үнтә.

Тегәд би Таниг магтнав.

⁵ Таниг би наснаннь туршарт туурулнав.

Танд мөргәд, һаран намчлнав.

⁶ Өөк идсн мет, седклм байҗад,

Би бахмҗта бәәнәв.

Би байрта дууһарн Таниг магтнав.

⁷ Би орндан орхларн, Таниг саннав.

Тана тускар сөөни дуусн ухалнав;

⁸ Та оньдинд нанд дөң болнат.

Тана далвагин дор би байртаһар дуулнав.

⁹ Танд би йосндан иткҗәнәв.

Тана һар намаг батар харсчана.

¹⁰ Мини седклин чилгчиг күләҗәх әмтн

Үклин һазрт орх.

¹¹ Тедн дәәлдәндән үкх,

Теднә цогциг чон идх.

¹² Хан теңкән уга байрлх;

Бурхн терүнд диилвр өгчәнә.

Бурхна нернд үгән өгсн әмтн Терүг магтцхах.

Болв худлчнрин амнь хаагдх.

Көгҗмин һардачд. Давидин псалм.

² О, Бурхн, мини һашута һундл соңстн.

О, Бурхн, әәмшгтә дәәснәсм намаг харсч автн.

³ О, Бурхн, хар саната әмтнә зураһас намаг харсч автн,

Өршәңгү уга ик баг әмтнәс харстн.

⁴ Теднә келн хәврсн үлд мет,

Тедн хорта үгмүдән сумн мет төвлнә.

⁵ Тедн бултҗаһад буру уга улсиг хана.

Генткн тедниг хахларн, әәҗәхмн уга.

⁶ Тедн нег-негән хар саната йовдлд дөңннә.

Тедн эврәннь мекән нууна.

– Мадниг кен үзх билә? – гиҗ тедн санҗана.

⁷ Тедн хорта зура тогтана.

– Бидн хаҗһр йовдл һарһлһиг

Әвртә сәәнәр олҗ аввидн, – гиҗ тедн келнә.

Күүнә ухан-седкл йосндан мел нуувч.

⁸ Болв Бурхн тедниг сумар хах,

Тедн генткн диилгдх.

⁹ Теднә келснь бийсднь тусх, бийсинь дәврх.

Тедниг үзсн улс дурго болҗ толһаһан чичрүлх.

¹⁰ Тегәд цуг әмтн әәцхәх.

Тедн Бурхна алдр кергин тускар келцхәх.

Бурхна кесн-күцәсиг тедн ухалх.

¹¹ Чик седклтә әмтн

Деед Эзнә кесн-күцәснд икәр байрлх.

Тегәд тедн Терүнд нәәлх.

Деед Эзиг цуг чик седклтә улс магтх.

Көгҗмин һардачд. Давидин псалм.

² О, Бурхн, Сион балһснд

Танд магтал өргҗәнә.

Эврәннь андһаран

Тана төлә бидн күцәҗәнәвидн.

³ Та мадна зальврлһ соңсчанат.

Тан тал әмтн альдас болвчн гүүҗ ирнә.

⁴ Мадна зүркн килнцәр дүүрң болвчн,

Та терүг цугтаһинь тәвҗ өгчәнәт.

⁵ Тана хаҗудан бәәлһхәр шүүҗ авад

Өөрдүлсн әмтн хөвтә!

Тана герт,

Тана әрүн сүмд авчах әдсәр

Бидн ханлтта бәәхмн.

⁶ О, Бурхн, мана аврач!

Та мана зальврлһна хәрүд

Өврмҗтә йовдл һарһнат.

Та цуг делкән,

Нам хол теңгст бәәх улсин

Нәәлвр болҗанат.

⁷ Та Эврәннь чидләрн уулмуд босхвт,

Та күчн-чидләрн дүүрң бәәнәт.

⁸ Та догшн далан ус болн

Терүнә дольгаг тогтнулнат.

Та олн улсин үүмә зогсанат.

⁹ Тана алдр кергин өмн

Цуг делкә күндлҗ әәнә.

Нарн һарх үзгәс нарн суух үзг күртл

Та әмтнә байрт урмд өгнәт.

¹⁰ Та һазрт хур илгәһәд,

Терүг шимтә, эдлвртә кеһәд,

Эврәннь килмҗән үзүлнәт.

О, Бурхн, әмтнд буудя өгхин төлә

Тана һолмуд усар дүүрң.

Та тиигҗ зураллат.

¹¹ Та хаһлсн һазриг усар ивтрәнәт,

Довута моһлцгинь норһад тегшлнәт.

Та тер һазриг хурин дусалар җөөлдүләд,

Тәрән урһхт евәлән күртәнәт.

¹² Та маднд байн урһцар белглнәт,

Бурхна ишксн җим болһн шаргад шавшна.

¹³ Тег байн идгтә һазрт хүврнә,

Довута-толһата һазр байрар цецгәрнә.

¹⁴ Хадлһна һазр малар дүүрнә,

Тегш һазр тәрәһәр бүркгднә.

Цугтан байртаһар хәәкрҗ дуулцхана.

Көгҗмин һардачд. Дун.

¹ Цуг делкән улс,

Бурхиг байрта көгҗмәр магттн!

² Деед Эзнә алдр нериг һарһад дуултн!

Терүг туурулад дуултн.

³ – Тана кесн-күцәсн ямаран өврмҗтә!

Тана өмн хортн әәҗ диилгдх дүңгә,

Чидлтн йир ик күчтә.

⁴ Танд делкә кевтән гекҗ мөргнә.

Танд тедн ду дуулна,

Тана нериг тедн туурултха, – гиҗ

Тадн Бурхнд келтн.

⁵ Бурхна кесн-күцәсиг ирәд хәләтн,

Олна төлә Терүнә күцәсн керг

Ямаран өврмҗтә!

⁶ Теңгсиг Тер хүүрә һазрт хүврәв.

Мана өвкнр һолыг йовһар һатлцхав.

Терүнә кесн-күцәснд

Тенд бидн нәәрлвидн.

⁷ Эврәннь күчәрн

Тер мөңкинд нойлхна,

Олн улсиг шинҗлнә.

Терүнә өмнәс буцлт кедг әмтн

Бичә караглтха.

⁸ Цуг олн келн-улс,

Мана Бурхнд магтал өргтн!

Тадна магтал

Терүнд чаңһар соңсгдтха.

⁹ Тер мадна әм хадһлв,

Тер мадниг гүрмәс татҗ авв.

¹⁰ О, Бурхн,

Та мадниг сөрҗ шинҗлвт.

Цаһан мөңг хәәлсн мет,

Та мадниг хәәлҗ хәләвт.

¹¹ Та мадниг гөлмд бәрвт,

Та мадна нурһнд аца үүрүлвт.

¹² Мана хортн мадниг даҗрдгар,

Та зөв өгчәвт.

Бидн һалыг, усиг һатлҗ һарувидн.

Болв ода Та мадниг

Әәмшг уга һазрт һарһвт.

¹³ Тана сүмд би тәкл тәкдг

Тоотан авад орнав.

Танд өгсн андһаран би күцәнәв.

¹⁴ Тер андһар би

зовҗ йовх цагтан өгләв.

¹⁵ Танд би бордсн малар тәкл тәкнәв.

Тәклин хөөһәр ута һарһнав,

Танд би бух, тек авч ирнәв.

¹⁶ Бурхнд шүтдг улс,

Цугтан ирәд соңстн,

Бурхн нанд ю кесинь

Би таднд келҗ өгнәв.

¹⁷ Би Терүг дуудув,

Би Терүг дуундан орулад магтув.

¹⁸ Кемр би һарһсн килнцән нуусн болхлаг,

Деед Эзн намаг соңсшго билә.

¹⁹ Болв Бурхн соңсад,

Мини эрлһнд оньган өгв.

²⁰ Мини зальврлһ эс һолсн,

Эврәннь итклтә дуран нанас эс хармнсн

Бурхнд туурмҗ дурдтн.

Көгҗмин һардачд. Чивһстә зер-зев цокҗ наадх псалм. Дун.

² Тана хаалһиг делкәд медтхә гиһәд,

Танд аврч чадх күчн бәәхиг

цуг улс медтхә гиһәд,

Деед Эзн маднд цаһан санаһан күртәтхә,

Деед Эзн мадна сә хәәтхә.

⁴ О, Бурхн, әмтн Танд магтал өргтхә,

О, Бурхн, цуг улс Танд магтал өргтхә.

⁵ Отг-отгин улс ода нәәрләд байрлтха.

Та әмтнә зарһиг чикәр кенәт.

Та һазр деерк әмтиг залнат.

⁶ О, Бурхн, әмтн Танд магтал өргтхә,

О, Бурхн, цуг улс Танд магтал өргтхә.

⁷ Һазр маднд урһцан өгв,

Бурхн, мана Бурхн мадниг әдслв.

⁸ Бурхн мадниг цаарандан чигн әдслтхә,

Эргндән цуг улс Терүг күндлтхә.

Көгҗмин һардачд. Давидин псалм. Дун.

² Бурхн сөрлц кетхә.

Терүнә дәәсн тарагдҗ хайгдтха,

Терүнд дурго әмтн уга болад гүүтхә!

³ Салькнд көөгдәд урсчах утан мет,

Түүшң Та тедниг уга кетн.

Һалд хәәлҗәх хорһн мет,

Түүшң килнцтәнь Бурхна өмн үктхә.

⁴ Чик седклтә әмтн нәәрлҗ байрлтха,

Тедн Бурхна өмн дүрклтхә.

⁵ Бурхнд нерәдәд дууһан дуултн,

Бурхна нериг дуудад дуултн.

Теңгрт үүләр йовҗах

Терүнд дууһан өргәд дуултн.

Терүнә нернь Деед Эзн.

Терүнә нүүрт байр кетн.

⁶ Мана Бурхн Эврәннь әрүн сүмдән

Өнчн улсин эцк,

Белвсн күүнә харсачнь болҗана.

⁷ Һанц күүг Бурхн өрк-бүлтә кенә.

Бәрәнд бәәсн күүг хөвинь өгч сулдхна,

Зәкрмҗ авдгонь һаң хагсу көдәд үлднә.

⁸ О, Бурхн, Эврәннь улсан

Та көдә дәврәд дахулхд,

⁹ Бурхна нүүрт,

Эн Синай уулас цәәлһҗәсн

Израилин Бурхна нүүрт

Һазр чичрлә, теңгрәс хур асхрла.

¹⁰ О, Бурхн!

Эврәннь цуцрсн һазран шинрүлхин төлә

Та ик хур илгәввт.

¹¹ Тана улс тенд бүүрлвә,

О, Бурхн, Эврәннь цаһан седкләрн

Та түрү әмтиг теткләт.

¹² Деед Эзн диилврин тускар зәңглҗәнә.

Олн гергчүд сән зәңг хәәкрҗ келҗәцхәнә:

¹³ «Хортнрин хаадуд, дәәчнр зулхар адһна».

Тер цагт гергчүд олвран хувацхана.

¹⁴ Тедн урднь хөөнә хош дунд бәәсн бийнь,

Далвагарн бүркәтә көглҗрһн шовун мет,

Тедн ода алтар, цаһан мөңгәр бүркәтә.

¹⁵ Хамгин Күчтә Бурхн,

Цалмон уул деерк шуурһн мет,

Хортнрин хаадыг тараҗ көөв.

¹⁶ Башана уул деегшән теңгрүр өөдлнә.

¹⁷ Чолун уул, ю хәәҗ

Бурхна шүүҗ авад, Мөңкинд бәәхәр седҗәх

Сион уул тал үлү үзҗ хәләҗәхмч?

¹⁸ Деед Эзн Синай уулас

То уга олн мөр татсн гиигн тергдәр

Эврәннь әрүн һазрур одҗ йовна.

¹⁹ Өөдм деер Тер һарна,

Олн-әмтиг Бийләһән бәрәнд авад,

Олн-әмтнәс Тер алв авна.

Нам Бийднь сөрлц кеснәснь чигн авна.

Деед Эзн Бурхн тенд мөңкинд бәәх.

²⁰ Деед Эзиг буультн,

Бурхн мана аврач.

Бурхн мана күнд тоотыг өдр болһн дааҗана.

²¹ Мана Бурхн – аврач Бурхн.

Эн мана Деед Эзн,

Мана Деед Эзн маниг үкләс аврна.

²² Йоснд уга йовдл цаарандан һарһҗах

Эврәннь хортна толһаһинь

Бурхн үнндән хамхлад хайх.

²³ – Тадна дәәсиг

Башана уулас хәрү буулһнав,

Тадна дәәсиг

теңгсин йоралас бәрҗ һарһнав,

²⁴ Тадн көлән теднә цуснд булхулдгар,

Тадна нохас терүг цадтлан доладгар тиигнәв, – гиҗ Деед Эзн келнә.

²⁵ О, Бурхн, Тана диилвртә йовдл үзвидн,

Мини Бурхн, мини Хан

Әрүн сүм тал йовсиг үзвидн.

²⁶ Түрүләд дуучнр йовна,

Теднә ардас көгҗмин зевсгүд цокдг әмтн,

Тал дунднь кеңкргтә күүкд йовцхана.

²⁷ – Израилин цуг келн-улс,

Бурхна нер туурултн.

Израилин җирһлин экн

Деед Эзиг туурултн, – гиҗ тедн дуулна.

²⁸ Энд түрүлҗ Бенямина бичкн отг йовна,

Дарунь Йудан нойдуд,

Завулуна болн Напталин нойдуд

йовцхана.

²⁹ Бурхн чамд чидл урдаснь белдҗ.

О, Бурхн, урднь мадна төлә кесн әдләр

Эврәннь күчән үзүлтн.

³⁰ Ерусалимд бәәх Тана сүмин төлә

Хаадуд Танд алв авч ирцхәх.

³¹ О, Бурхн, дәәснә келн-улсиг бурушатн,

Хулсн дунд бултҗ бәәх тер аңгудыг,

Эн күчн уга бүрүс дунд бәәх бухин сүргиг бурушатн.

Басгдсн әмтн цаһан мөңгн алв авч иртхә,

Дә босххар седҗәх улсиг тараһад хайтн.

³² Египетәс үнтә алтн, цаһан мөңгн белгтә иртхә,

Эфиопихн Бурхн тал

белгтә һаран суңһтха.

³³ Цуг делкән келн-улс, Бурхнд дууһан нерәдтн.

Тадн Деед Эзиг бууляд дуултн.

³⁴ Кезәнәс авн теңгрәр йовҗах Бурхнд,

Күчтә дунь теңгрәс һарчах Бурхнд

дуулҗ өгтн.

³⁵ Бурхн алдр гиҗ зәңглтн!

Израилиг Тер ик сүртәһәр залҗана,

Терүнә күчнь теңгрт үзүлгдҗәнә.

³⁶ Бурхн Эврәннь әрүн һазртан өвәрц.

Израилин Бурхн Эврәннь улстан

чидл, күч өгчәнә.

Бурхиг туурултн!

Көгҗмин һардачд. Давидин псалм.

² О, Бурхн, намаг авртн.

Юңгад гихлә, усн күзүцә болҗ одв.

³ Би гүн улмд чивҗәнәв,

Нанд зогсдг орм уга.

Би усна гүүнд тусв,

Намаг усна дольган бүркҗәнә.

⁴ Би хәәкрн гиҗ цуцрув,

Мини хоол хагсад хаг-таш болв.

Танас дөң күлән гиҗ

Мини нүдн муурад ирв.

⁵ Учр угаһар нанд дурго болдг әмтн

Толһанм үснәс ик.

Мини хортн мини тускар худл келнә.

Тедн дегд олн,

Тедн намаг алхар седҗәнә.

Тедн мини эс булаҗ авсн юм хәрү өгтхә гиһәд закҗана.

⁶ О, Бурхн! Та

Мини тоолвр угаһар кесн килнциг меднәт,

Би килнцән Танас нуусн угав.

⁷ О, Деед Эзн, Хамгин Күчтә Бурхн,

Танд нәәлҗәх улс,

нанас көлтә бичә ичәгдтхә.

О, Израилин Бурхн, Таниг хәәҗәх улс

Нанас көлтә бичә һутагдтха.

⁸ Тана төлә би керлдүләд,

Му нер зүүҗәнәв.

⁹ Нег һазра улст

Би таньдго күн болв.

Нег экәс һарсн ахнр-дүүнрт

Би күүнә күн болв.

¹⁰ Тана сүмд туссн мини дурн

Чееҗдм һал мет шатҗана.

Таниг наад бәрҗәх әмтнә баслһн бий деерм бууҗана.

¹¹ Намаг мацг бәрәд уульхлаг,

Тедн намаг басна.

¹² Би һашудлһна хувц өмснәв,

Тедн намаг наад бәрәд инәнә.

¹³ Тедн мини тускар күүндцхәнә,

Согту әмтн мини тускар ду һарһцхана.

¹⁴ О, Деед Эзн, би Танд мөргнәв.

О, Бурхн, Та Эврәннь седсәрн нанд хәрү өгтн.

Та Эврәннь алдр седкләрн намаг соңстн,

Юңгад гихлә, Та аврх болҗ үгән өгләт.

¹⁵ Та намаг чивүллго замгас татҗ автн,

Та намаг бийдм дурго болҗах улсас сулдхтн.

Та намаг йорал уга уснас татҗ автн.

¹⁶ Усна урсхул намаг бичә авч одтха,

Теңгсин йорал намаг бичә сорҗ автха.

Гүн нүкн бий деерм бичә хаагдтха.

¹⁷ О, Деед Эзн,

Эврәннь итклтә дурарн хәрүһән өгтн,

О, Деед Эзн,

Эврәннь ик цаһан санаһарн бий талм хәләтн.

¹⁸ Та Эврәннь зарцас бичә чирәһән бултултн,

Би зовлңта бәәнәв,

Та нанд ода хәрүһән өгтн.

¹⁹ О, Деед Эзн, бий талм өөрдтн,

О, Деед Эзн, намаг сулдхтн,

Та намаг хортнасм сулдхтн.

²⁰ Намаг әмтн му келсиг,

Намаг әмтн ичәсиг,

Намаг һутасиг Та меднәлмт.

Та мини цуг хортнриг үзҗәнәт.

²¹ Му келүлсндән би зүркән геевүв.

Ода би икәр цөкрҗәнәв.

Өр-өвч йовдл күләвүв,

Бийән тогтнулх кү хәәвүв,

Болв олҗ чадсн угав.

²² Нанд хот кетхә гиҗ цөс өгцхәв,

Нанд ундан хәрүлтхә гиҗ иссн чаһр өгцхәв.

²³ Элвг хотнь теднд хавхнь болтха,

Әрүн нәәрнь теднд бәрәнь болтха.

²⁴ Юм үздгоһар теднә нүднь харңһуртха.

Теднә цогц-махмуднь өдр ирвәс сулдад йовтха.

²⁵ О, Деед Эзн,

Эврәннь уурарн тедниг засглтн,

О, Деед Эзн,

Эврәннь догшн цухлд тедниг бәртн.

²⁶ Теднә балһсн хоосртха.

Теднә гермүдт әмд күн бичә үлдтхә.

²⁷ Юңгад гихлә, Тана шавтасн әмтиг

Ода күртл тедн көөлдҗ йовцхана.

Тана шавтасн әмтнә зовлңгиг

Тедн икдәҗәнә.

²⁸ О, Деед Эзн, тедниг һарһсн килнцәрнь засглтн,

О, Деед Эзн, Танас тедн кезә чигн зөв бичә автха.

²⁹ Тедн әмдин дегтрәс хусгдтха,

Тедн чик седклтә улсла бичә бичгдтхә.

³⁰ Би болхла, угатя күмб,

Би болхла, зовҗ йовнав.

Та намаг аврад,

Әәмшг уга һазрт һарһтн.

³¹ Би Бурхна нериг дууһарн туурулнав,

Би Бурхна нериг ханлтан өргҗ амлнав.

³² Бухар бәрц бәрснәс,

Өссн бүрүһәр бәрц бәрснь деер болҗ

Терм Деед Эзнд таасгдх.

³³ Мини аврлт үзхләрн,

Зовҗахнь байрлх.

Бурхиг хәәҗәх улс,

Тадна зүркн урмд автха!

³⁴ Деед Эзн угатя әмтиг соңсна,

Эврәннь туугдсн улсан Тер басхш.

³⁵ Теңгр һазр хойр Терүг буультха,

Теңгс цуг әмд юмстаһан Терүг буультха.

³⁶ Юңгад гихлә, Бурхн Ерусалимиг аврх,

Йудайын балһсд босхх.

Терүнә әмтн тенд бүүрләд

Тер һазриг эдлцхәх.

³⁷ Терүнә зарцнрин хөөт үйнр

Тер һазрар өнч авцхах.

Бурхнд дурлсн улс тенд бәәцхәх.

Көгҗмин һардачд. Давидин псалм. Тодлвр.

² О, Деед Эзн, намаг сулдхтн,

О, Деед Эзн, нанд дөң болхар адһтн.

³ Мини үкл хәәҗәхнь цугтан диилгдтхә, ичтхә!

Нанд хар санҗах әмтн

эврән му нер зүүһәд хәрү гүүтхә.

⁴ – Э, э, – гиҗ наад бәрәд нанд келҗәсн улс

Эврәннь ичртән даргдтха.

⁵ Таниг хәәҗәх әмтн байрлҗ нәәрлтхә.

– Деед Эзн алдр! – гиҗ

Тана аврлтд ханснь тасрлт уга келтхә.

⁶ Би үгатя, күчн уга күмб.

О, Бурхн, бий талм адһтн.

О, Деед Эзн, Та мини дөң болн харсачт!

Та бий талм дөңгән күргхәр адһтн.

¹ О, Деед Эзн, Танас би түшг хәәҗәнәв.

Намаг кезәд чигн, кен чигн бичә диилтхә.

² О, Деед Эзн, намаг сулдхтн;

Та үннч болҗанат.

Та намаг соңстн,

Та намаг ирҗ авртн.

³ О, Деед Эзн, Та күрч болшго

Харслтын хад болтн,

Та намаг аврх боллат.

Та мини хад,

Та мини уул шивә болҗанат.

⁴ О, Бурхн, намаг килнцтә әмтнә чидләс сулдхтн,

Та намаг

һалзу, уурта күүнә шалһлһнас сулдхтн.

⁵ О, цугинь һардҗах Деед Эзн!

Та мини ицг болҗанат,

Би Танд баһ наснасн иткҗәнәв.

⁶ Би Танд насн туршар нәәлҗәнәв.

Та намаг һарсн өдрәсм хәләләт.

Таниг би мөңкинд буульхв.

⁷ Олн улст би үлгүр болҗ йовлав;

Та мини бат харсач болҗанат.

⁸ Таниг би кезәд чигн буульхв.

Тана туурмҗиг буульхв.

⁹ Намаг көгшрхлә, Та бичә һазалтн.

Намаг күчн уга болхла, Та бичә үлдәтн.

¹⁰ Юңгад гихлә, мини хортн өмнәсм хәрүцнә,

Намаг гетҗәх әмтн хоорндан үгцнә.

¹¹ – Бурхн терүг үлдәвә,

Терүг гетәд бәрҗ авцхай,

Сулдхдгнь ода уга, – гиҗ келцхәнә.

¹² О, Бурхн минь, нанас бичә хольҗтн.

О, Бурхн минь, дөңгән күргхәр адһтн.

¹³ Намаг ховлҗах күн цокгдад уга болтха,

Нанд хоран күргхәр бәәхнь ичәгдәд нерән геетхә.

¹⁴ Би оньдинд Танд иткхв,

Би Таниг улм икәр магтхв.

¹⁵ Мини медлһнәс даву болв чигн,

Би Тана цаһан санана тускар зәңглхв,

Би Тана аврлтын тускар

цуцрлт угаһар келхв.

¹⁶ Деед Эзн Бурхн,

Тана алдр күчиг магтнав,

Тана цаһан седклиг өөдлүлҗ магтнав,

Һанцхн Тана цаһан седклиг өөдлүлнәв.

¹⁷ О, Бурхн,

Та нанд баһ цагасм сурһмҗ өгләт.

Ода күртл би

Тана өвәрц кергүдин герч болҗанав.

¹⁸ Мини ардас аашх баһ насна үйнрт

Тана чидлин тускар,

Тана күчнә тускар келҗ өгдгәр,

О, Бурхн, кемр намаг буурл көгшә болсн бийнь

Бичә үлдәһит гиҗ сурҗанав.

¹⁹ О, Бурхн, тана чик бәәдл теңгрт күрч делгрвә,

Та алдр керг күцәввт.

О, Бурхн, кен Танла әдлцхмб?!

²⁰ Та нанд кесг даашго зовлң илгәввт,

Болв нанд хәрү чинәһим орулхт.

Та намаг үкләс татҗ авхт.

²¹ Та мини нериг өөдлүлхит,

Та намаг кишгтә кү кехит.

²² Би ятх чимкҗ цокад,

Тана итклдтн Таниг туурулхв.

О, Израилин Әрүн Бурхн,

Таниг би домбр цокад дуундан орулнав!

²³ Тана төлә дуулхларн,

Би чаңһар хәәкрхв.

Юңгад гихлә, Та намаг аврвт.

²⁴ Оньдинд би

Тана чик седклин тускар келхв.

Юңгад гихлә, нанд

Хоран күргхәр седсн әмтн

Цугтан цокгдад һутагдв.

Соломона псалм.

¹ О, Бурхн! Эврәннь хаанд зарһан даалһтн,

Хаана көвүнд Эврәннь зөвән даалһтн.

² Тегәд тер Тана улсин зарһиг чикәр кетхә,

Тана даҗргдсн улсиг йосар толһалтха.

³ Уулмуд әмтнд төвкнүн делгрлт үүдәтхә,

Довута һазрмудас үнн иртхә.

⁴ Даҗргдсн улсин зарһинь хан кетхә,

Түрү әмтнә үрдиг авртха,

Тедниг дорацулсн күүг күүчтхә.

⁵ Нарн сар хойр бәәтл,

Таниг үйәс үйд соңсч күндлх.

⁶ Тәрәнә һазрт орҗах хур мет,

Тегш һазриг ивтрәҗәх усн мет,

Тиигҗ хан бууҗ ирх.

⁷ Тер өдрмүдт чик бәәдл делгрх,

Тегәд сар һардган ууртл,

Төвкнүн бәәдл тогтх.

⁸ Теңгсәс теңгсмүд күртл,

Епрат һолас һазрин меҗә күртл

Тер эзлх болтха.

⁹ Терүнә өмн көдә һазрин әмтн сөгдх,

Терүнә хортн шора долах.

¹⁰ Таршишин болн арлын хаад

Терүнд алв өгцхәх.

Шебән болн Себән хаад белгән өгцхәх.

¹¹ Терүнә өмн цуг хаад сөгдцхәх,

Терүнд цуг улс церглцхәх.

¹² Юңгад гихлә Тер

Дөң эрҗәх түрү әмтиг сулдхх,

Дөңндгнь уга даҗргдсн улсиг сулдхх.

¹³ Түрү-зүдү, дөң хәәҗәхднь

Тер цаһан санаһан күртәх,

Теднә әминь Тер аврх.

¹⁴ Теднә җирһлиг хар сананас, күч һарһлһнас

Тер сулдхҗ өгх.

Тиигәд теднә бәәдл

Терүнд йир хәәртә болҗана.

¹⁵ Удандан тер бәәтхә,

Шебән алтнас терүнд өгтхә.

Терүнә тускар тасрлт уга зальвртха,

Терүнә төлә өдр болһн Бурхнас әдс суртха.

¹⁶ Һазр деер буудя элвҗтхә,

Нам уул деер тиим болтха.

Терүнә экн, Ливанд бәәснлә әдл, дольгалтха.

Балһсдар әмтн тооһарн өвсн мет өстхә.

¹⁷ Мөңкинд терүнә нерн һартха.

Нарн һазр деер бәәтл

Терүнә нерн һарч йовтха.

Цуг улс хаанла әдл әдслгдтхә,

Цуг улс хааг хөвтәд тоолтха.

¹⁸ Деед Эзн Бурхн, Израилин Бурхн тууртха!

Өвәрц юм һарһҗах Тер ор һанцхн болҗана.

¹⁹ Терүнә туурмҗин нернд мөңкинд магтал буутха!

Цуг һазр Терүнә туурмҗар дүүрх.

Тиигтхә, тиигтхә.

²⁰ Ишайин Давид көвүнә зальврлһн төгсв.

Асафин псалм.

¹ Бурхн үнәртән Израильта ямаран сән,

Бурхн үнәртән цевр седклтәләнь ямаран сән.

² Би болхла, көлм темтрн гив,

Мини тавг тошн алдв.

³ Килнцтә әмтн делгрҗәхиг үзәд,

Би ик санатаднь үлү үзүв.

⁴ Юңгад гихлә, тедн үктлән зовшго,

Тегәд тедн эрүл-менд.

⁵ Теднд күнд бәәдл үзгдшго,

Тедн талдан әмтнлә зовлңла харһшго.

⁶ Тиим учрар, ик санан

Тедниг, күзүнә кеерүл мет, эргүлв.

Аврлт уга йовдл

Тедниг, хувцн мет, бүркв.

⁷ Теднә догшн зүркнәс

Тегәд хар саната йовдл һарна.

Тедн гиигн ухата.

⁸ Цуг әмтнд тедн дөөглнә,

Хар санад ховлна,

Караглад әәлһҗ шахна.

⁹ Тедн Бурхиг хар санҗ келхәр седнә,

Теднә хоосн үг һазрар киидән түвнә.

¹⁰ Тегәд Бурхна улс тедниг соңсна,

Келсн үгинь

дүүрң ааһта уснла әдләр эдлнә.

¹¹ – Бурхн медхш.

Деед Эзн мадниг ю кеҗәхиг медшго, – гиҗ килнцтә әмтн келцхәнә.

¹² Тегәд эн килнцтә әмтн

Оньдинд делгрнә, зөөрән икдүлнә.

¹³ Болв би киидән зүркән цеврлҗәҗв,

Буру угадан бәәҗув.

¹⁴ Өдр болһн зовлң харһад,

Өрүн болһн намаг засглдг билә.

¹⁵ Кемр би: «Терүнлә әдл ухалнав», – гиҗ келсн болхла,

Бурхна улсин өмн

Би бурута болх биләв.

¹⁶ Энүг яһҗ медҗ авхмб гиҗ

би санҗалав.

Болв Бурхна сүмд эс ортл,

Эннь нанд күчр болад бәәв.

Тегәд теднә җирһл яһҗ чилхинь би медүв.

¹⁸ Та тедниг үнәртән

Хальтрха хаалһд зогсанат.

Та тедниг гүн садргт хайнат.

¹⁹ Тедн агчмд яһҗ хоосрна,

Тедн агчмд әәмшгәс яһҗ үкнә!

²⁰ Сергснә хөөтк зүүдн мет,

Түүшң, Деед Эзн, Таниг босхла,

Тедн уга болла.

²¹ Мини седкл хордхла,

Мини зүркн шарклхла,

²² Би харңһу, юм меддго күн бәәҗв.

Тана өмн би малла әдл болҗанав.

²³ Болв би оньдинд Танла бәәнәв –

Та намаг чидлтә һарасм бәрҗәнәт.

²⁴ Та намаг Эврәннь селвгәрн һарднат,

Тегәд хөөннь намаг туурмҗдан орулхт.

²⁵ Теңгрт мини кен бәәнә?

Һанцхн Та бәәнәт!

Таниг бәәсәр, нанд

Һазр деер юмн керго.

²⁶ Мини цогц-махмуд муурчана,

Мини седкл зовҗана.

Бурхн – мини зүркнә түшг,

Бурхн – мөңкинд мини зөөр.

²⁷ Танас бийән холҗулснь үкнә.

Танд эс иткдго кенинь чигн

Та уга кенәт.

²⁸ Бурхн тал өөрдлһн нанд

Сән җирһлин көрң болна.

Деед Эзн Бурхна кесн-күцәсиг зәңглсәрн

Би бийдән шивә олнав.

Асафин псалм.

¹ О, Бурхн, юңгад Та мадниг

Оньдинд һолад бәәнәт?

Тана ур Тана идгин хөөдт күрчәнү?

² Та кезәнәс авн хәәҗ авсн хургиннь тускар,

Зөөр болтха гиҗ аврсн отгиннь тускар,

Тана бәәх эн Сион уулын тускар сантн.

³ Кезәнә хамхрсн һазрмудар

Та ишкәд йовад хәләтн,

Сүмд бәәсиг цугинь хортн хамхлҗ.

⁴ Мадниг хурадг Тана бәәрнд

Тана хортн хүүкрнә.

Диилврин темдгин ормд

Тедн эврәннь туган өргнә.

⁵ Модна урһҗах ац чавчхар

Сүкән өргҗәснлә әдл болҗ,

Тедн бийән үзүлв.

⁶ Бурхна сүмд цуг эрәсдинь сүкәр,

Ик алхар цокад хамхлҗ.

⁷ Тана сүм кевтән шатв,

Тана нер зүүҗәсн бәәрн кевтән бузрдв.

⁸ «Тедниг кевтнь күүчхм», – гиҗ хортн санв.

Тегәд һазр деер

Бурхн мадниг цуглулад харһдг

Бәәрн болһиг кевтнь тедн шатав.

⁹ Бидн эврәннь онц темдгүдән үзҗәхшивидн,

Әәлдәч уга ода.

Кедү цагтан иим бәәдләр бәәхиг

Меддг күн мадн заагт бас уга.

¹⁰ О, Бурхн, кедү цагтан хортн

Таниг наад бәрхмб?

Тана нериг өшәтн мөңкинд му келхмб?

¹¹ Юуна төлә күчтә барун һаран Та бултулҗахмт?

Хувцнаннь нуһларас терүг һарһад,

Та тедниг ка цоктн.

¹² Болв чигн Та кезәнәс нааран

Һазр деер аврлт тогтаҗах мини Хан болҗанат.

¹³ Та күчәрн теңгс заагллат,

Та теңгсин сүркә адусдын толһаһинь хамх цоклат.

¹⁴ Та теңгсин адусна толһаһинь хамх цоклат.

Терүг көдән аңгудт идүлләт.

¹⁵ Та булгуд болн урсхулмуд теслләт,

Та әвртә ик һолмуд хагсалат.

¹⁶ Өдр Тана,

Сө Тана,

Сариг, нариг Та үүдәләт.

¹⁷ Та һазрин цуг меҗәг тогталат.

Та зун болн үвл бүрдәләт.

¹⁸ О, Деед Эзн, Таниг хортн наад бәрҗәнә,

Тана нериг ухан уга әмтн му келҗәнә, –

Терүнә тускар ода сантн.

¹⁹ Та Эврәннь көглҗрһн шовудан аңгудт бичә өгтн,

Тана зовҗах өрк-бүлиг мөңкинд бичә марттн.

²⁰ Та Эврәннь герәсән хәләтн,

Юңгад гихлә һазр деерк

Цуг харңһу бәәрн күч үзүлдг улсар дүүрв.

²¹ Даҗргдсн күн һутагдҗ бичә хәрү иртхә,

Һуульһнч болн угатя әмтн Тана нер магттха.

²² О, Бурхн, буцлт кетн,

Эврәннь кергән харстн.

Тана нериг ухан уга күн

Өдр болһн наад бәрҗәхиг ухалтн.

²³ Тана хортна хәәкрлһ бичә марттн,

Тана өмнәс босчах әмтнә шууган

Тасрлт уга өсчәнә.

Көгҗмин һардачд. Бичә эвдтн. Асафин псалм. Дун.

² О, Бурхн, туурулнавидн

Таниг, туурулнавидн!

Юңгад гихлә Та өөрдҗ одвт.

Тана өвәрц йовдлмудын тускар әмтн зәңглҗәнә.

³ – Өдрән йилһҗ авхларн,

Би чикәр зарһ кехв.

⁴ Һазр чичрҗәнә,

Терүн деер бәәснь бас чичрҗәнә.

Би терүнә улынь батлнав.

⁵ Ик саната әмтнд иигҗ келнәв:

«Бичә дөөгләд бәәтн».

Килнцтә әмтнд иигҗ келнәв:

«Бичә караглхар седәд бәәтн».

⁶ Бичә караглхар седәд бәәтн,

Бичә дөөглҗ күүндтн, – гиҗ Бурхн келх.

⁷ Юңгад гихлә алдр нерн

Зүн үзгәс биш, барун үзгәс биш,

Көдә һазрас чигн өөдлҗәхн уга.

⁸ Зуг һанцхн Бурхн зарһч:

Зуг Тер негинь бурушана,

Талдан күүнднь зөв өгнә.

⁹ Цухлар дүүрсн сав

Деед Эзнә һарт бәрәтә.

Терүн дотр амтлсн чаһр көөстҗәнә.

Деед Эзн тер савас кеҗ өгчәнә.

Һазр деерк килнцтә цуг әмтн

Чаһр чилтл ууцхах.

¹⁰ Би болхла, мөңкинд зәңглхв,

Яковин Бурхиг туурулхв.

¹¹ – Килнцтә әмтнә караглсинь дархв,

Чик седклтә әмтнә күчинь икдүлхв, – гиҗ Бурхн келх.

Көгҗмин һардачд.

Чивһстә зер-зев цокҗ наадх Асафин псалм. Дун.

² Йудайд нернь туурсн Бурхн,

Израильд Терүнә нернь алдр.

³ Салимд Терүнә сүм бәәнә,

Сионд Тер бәәрлҗ йовна.

⁴ Тенд хортнаннь саадгин сум,

Тенд өшәтнриннь халхц,

үлд, зер-зевинь

Тер каачад хамхлв.

⁵ Хортна хамгин күчтә уулмудас

Та алдр болҗанат.

⁶ Бат зүрктә хортн бәргдв,

Бийиннь бәәдләрн тедн үкцхәв.

Һариннь чидл чигн дәәчнр

Һарһҗ чадсн уга.

⁷ Та, Яковин Бурхн,

тедниг бурушахла,

Мөртә күн чигн,

Мөрнь чигн үкцхәв.

⁸ Танас цугтан әәцхәнә,

Таниг уурлсн цагт

Тегәд кен тесч даахмб?

⁹ Та теңгрәс зарһ тархавт.

Делкән даҗргдсн әмтиг аврхар

Та зарһ кеһәд босхла,

Һазр дееркс әәһәд тагчгрцхав.

¹¹ Тегәд күүнә цухл

Тана туурмҗд хүврх.

Цухлын үлдлиг

Та дархт.

¹² Деед Эзнд, тана Бурхнд, өгсн андһаран күцәтн.

Терүнә эргнд бәәх цуг әмтн

Сүркә Терүнд белгән авч ирцхәтхә.

¹³ Деед Эзн, тана Бурхн,

Һардачнрин седкл номһрулна.

Деед Эзн, тана Бурхн,

Һазр деерк хаадт әәмшгнь болна.

Идитумовин көгҗмин һардачд. Асафин псалм.

² Бурхиг би дууднав.

Бурхнд би дуудвр кенәв.

Тер намаг соңсх.

³ Би һашудсн өдрмүдт Деед Эзиг хәәнәв.

Сөөни дуусн зальврсар

Өргсн һарм буулһгдхш,

Мини седкл амрхар бәәхш.

⁴ Би Бурхна тускар санҗ түңшнәв,

Би ухалнав, седкләрн цуцрнав.

⁵ Та намаг унтулҗахшит,

Би үүмхләрн үгән келҗ чадҗахшив.

⁶ Кезәңк өдрмүдин тускар ухалҗанав,

Давсн кезәңк зун җилмүдин тускар тодлҗанав.

⁷ Сөөд бийләһән күүнднәв,

Би седклдән иигҗ ухалнав:

⁸ «Деед Эзн мадниг мөңкинд һазалҗ,

Дәкҗ маднд цаһа саншго болхви?

⁹ Терүнә итклтә дурн

оньдинд геедрсн болхви?

Терүнә өгсн андһар күцшго болхви?

¹⁰ Бурхн хәәрлтән күртәдгән мартсн болхви?

Уурлхларн, Эврәннь өршәңгү седклән оньслсн болхви?»

¹¹ – Хамгин Күчтә Бурхн дәкҗ чидл уга болснь –

Мини зовлң болҗана, – гиҗ би келүв.

¹² О, Деед Эзн,

Би Тана көдлмшин тускар санхв,

О, Деед Эзн,

Би Тана кезәңк өвәрц юмна тускар санхв.

¹³ Би Тана кеҗәх цуг көдлмш медҗ авнав,

Би Тана алдр кергин тускар ухалнав.

¹⁴ О, Бурхн, Тана хаалһ әрүн,

Танла әдл алдр бурхн уга!

¹⁵ Та өвәрц йовдл һарһҗах Бурхнт,

Та келн-улс дунд Эврәннь күчн-чидлән үзүлвт.

¹⁶ Та Эврәннь улсан,

Яковин болн Йосипин хөөт үйнриг чидләрн сулдхвт.

¹⁷ Таниг ик усн үзәд әәв,

Теңгс йорал күртлән чичрв.

¹⁸ Үүлн ус асхв,

Үүлнд оһтрһун дун һарв,

Тана һал цәкләд, сумн мет нисв.

¹⁹ Тана оһтрһун дун хү салькнла соңсгдна,

Цәклсн һал делкәг цәәлһнә,

Һазр догдлад, әәһәд чичрнә.

²⁰ Тана хаалһ теңгс һатлна,

Тана җим ик ус һатлна,

Тана йовсн мөриг үзҗ болшго.

²¹ Та Эврәннь улсан, сүрг мет,

Моисеяр болн Ахаронар залулҗ дахулвт.

Асафин ном.

¹ Мини улс, өгчәх номим соңстн,

Мини келҗәх үгиг оньһад чиңнтн.

² Би цецн келвр келҗ өгнәв,

Кезәңк цага тәәлвртә туульс цәәлһнәв.

³ Терүг бидн соңсад медләвидн,

Терүг маднд мана өвкнр келҗ өгцхәлә.

⁴ Деед Эзнә туурсн кергин тускар,

Терүнә күчнә тускар,

Терүнә һарһсн өвәрц йовдлын тускар

Эврәннь үрдүдәс нуухмн биш,

Эврәннь хөөт үйнрт келҗ йовхмн.

⁵ Деед Эзн Яковд сурһлһ тогтав,

Деед Эзн Израильд зака һарһв.

Терүгәр мана эцкнр

эврәннь үрдән сурһтха гиҗ Тер герәслҗ.

⁶ Терүг ирх үйнр медтхә гиҗәнә:

Шинәс төрх үрн

цагтан эврәннь үрдтән келтхә гиҗәнә.

⁷ Тиигҗ тедн Бурхнд нәәлх,

Бурхна кесн кергиг мартшго,

Терүнә заавриг күцәх.

⁸ Тегәд тедн зүткә, үүмәнд орлцсн өвкнрән дурашго,

Тегәд тедн зүркәрн эс итксн,

Седклән Бурхнд эс тәвсн өвкнрән дурашго.

⁹ Сумта, саадгта Епраимовин көвүд дәәлдсн өдртән хәрү цухрцхав.

¹⁰ Тедн Бурхна заавриг хадһлсн уга,

Тедн Бурхна йосар бәәхән бурушав.

¹¹ Тедн Бурхна кесн-күцәсиг мартв,

Тедн Бурхна һарһсн өвәрц йовдлыг мартв.

¹² Бурхн Израилин өвкнрин нүднд

Цоана тегш һазрт, Египетд өвәрц юм һарһла.

¹³ Тер Теңгс хуваһад,

Теңгсин усар эрс босхад,

Израилин улсиг дотраһурнь көтләд һарһла.

¹⁴ Өдрт тедниг Бурхн үүлн деерәһүр,

Сөөһәр һалын герләр дахулад йовб.

¹⁵ Эҗго һазрт чолу хамхлад,

Йорал уга гүн һазрас мет,

Теднә ундынь Бурхн хәрүлв.

¹⁶ Бурхн уулын хадас ус һарһв,

Тернь урсхулта һол мет асхрв.

¹⁷ Болв Израилин улс

Бурхна өмнәс килнц цаарандан һарһҗав.

Хамгин Күчтә Бурхна өмнәс

Эҗго һазрт буцлт кецхәв.

¹⁸ Израилин улс зүркәрн

Бурхиг зөрц сөрҗ хәләцхәв.

Бурхнас седклдән тааста хот некҗәв.

¹⁹ Тедн Бурхиг басад иигҗ келцхәв:

– Эҗго һазрт Бурхн тоовр белдҗ чадхий?

²⁰ Э, э, чолу Тер цокла,

Усн һооҗв, һооҗур турглв.

Болв Тер өдмг өгч чадхий?

Болв Эврәннь улст мах белдҗ чадхий?

²¹ Бурхн тедниг соңсад уурлна.

Яковин өмнәс һал мет асна,

Израильд Бурхн йир икәр уурлна.

²² Юңгад гихлә тедн Бурхнд итксн уга,

Тедн Бурхна аврлтд нәәлсн уга.

²³ Үүлд Тер закв,

Үүд секҗәхәр, теңгр Тер секв.

²⁴ Тедн деер Тер «ман» гидг хот асхв,

Теңгрин өдмг теднд илгәв.

²⁵ Тедн Бурхна элчнрин өдмг идв,

Теднд Бурхн цадтлнь хот өгв.

²⁶ Теңгрәс теднд дорд үзгә сальк дуудв,

Тер Эврәннь чидләр өмн үзгә сальк илгәв.

²⁷ Бурхн тедн деер, тоосн мет, икәр мах хайҗ өгв.

Бурхн теднд, теңгсин элсн мет, олн шовуд өгв.

²⁸ Тер шовуд әмтнә бәәрнд,

гермүдиннь хаҗуд унтха гиҗ Бурхн залв.

²⁹ Әмтн хотыг идәд цадна.

Седкл туссинь Бурхн теднд өгв.

³⁰ Теднә сансн-седсн давад уга,

Амнднь хот бәәһә бәәтл,

³¹ Бурхн икәр уурлна,

Хамгин чидлтәһинь ална,

Хамгин сән Израилин көвүдиг ка цокна.

³² Тер бийнь тедн килнц һарһҗав,

Бурхна өвәрц йовдлд итклго бәәцхәв.

³³ Тегәд теднә өдрмүдиг

Бурхн үүмәнд чиләв,

Теднә насиг ик әәмшгтәһәр барв.

³⁴ Тедн алгдҗасн цагтан

Талдан улсин

Бурхиг хәәцхәв,

Тедн хаҗһран медәд,

Бурхиг шунҗ хәәцхәв.

³⁵ Бурхн теднә шивә болҗасиг,

Хамгин Күчтә Бурхн аврачнь болҗасиг

Израилин улс ухална.

³⁶ Тедн Бурхнд үгәрн зуһудна,

Тедн Бурхнд келәрн худл келнә.

³⁷ Тедн зүркәрн нәәлвр уга билә,

Тедн Бурхна герәснд иткдго билә.

³⁸ Болв Бурхн цаһан саната,

Һарһсн килнц тәвҗ өгнә.

Килнцтә әмтиг алҗахмн уга.

Кесг дәкҗ Эврәннь цухлан Тер зогсав,

Ик ууран һарһсн уга.

³⁹ Юңгад гихлә тедн зуг цогц-махмуд бәәсинь,

Салькн мет давад, хәрү иршгоһинь Деед Эзн меддг билә.

⁴⁰ Терүнә өмнәс Израилин улс көдә һазрт

Кедү дәкҗ буцлт келә,

Тегәд Терүг эҗго һазрт һундала.

⁴¹ Бурхиг шинәс сөрлә,

Израилин Әрүн Бурхиг уурлулла.

⁴² Тедниг дәәснәснь сулдхсн

Деед Эзнә күчиг, тер өдринь

Тедн ухалҗахмн уга.

⁴³ Египетд Эврәннь темдгән кезә үүдәсинь,

Цоана тегш һазрт Эврәннь өвәрц йовдлан

Деед Эзн кезә һарһсинь

тедн ухалҗахмн уга.

⁴⁴ Египетин һолмудын усиг

Тер цуснд хүврәв,

Тегәд терүнәс ус ууҗ болшго болв.

⁴⁵ Египет тал хортан зовахар

Бурхн батхн илгәлә.

Теднә һазриг үрәхәр мекләс илгәлә.

⁴⁶ Теднә хураҗ авсн урһцинь (эрвәкән күүкдт) өглә,

Теднә цуглулсн тәрән-темсиг царцахаст идүллә.

⁴⁷ Уста үзминь мөндр илгәҗ цокулла,

Инҗирин модн деер мөндр, цас асхла.

⁴⁸ Бод малынь мөндрт цокулҗ алла,

Бәәсн сүргинь һал цәклүләд алла.

⁴⁹ Деед Эзн теднд

Эврәннь цухлын залян,

Һалзурлһан, догшн ууран, зовлңган,

Үкл авч ирдг Бурхна элчнрин баган илгәлә.

⁵⁰ Деед Эзн Эврәннь цухлан Египетин улст илгәлә.

Теднә җирһлиг үкләс харсч авсн уга,

Теднд Тер маальг гем өглә.

⁵¹ Египетин өрк-бүл болһна түрүн үринь

Деед Эзн алла.

⁵² Эврәннь улсан дахулҗ һарад,

Тер эҗго һазрар хөд мет теднән туула.

⁵³ Деед Эзн тедниг

әәмшг угаһар дахулла.

Теднь юмнас әәсн уга.

Теднә дәәсднь теңгст чивцхәлә.

⁵⁴ Деед Эзн Эврәннь улсан

Әрүн һазриннь меҗәд авч ирлә,

Уул тал авч ирлә.

Эн уулыг Тер Эврән булаҗ авсмн.

⁵⁵ Израилин улс ирхин өмн

Тендәс талын әмтиг Тер көөлә.

Тер һазриг хуваһад,

Эврәннь улстан өнч өглә,

Талын әмтн бәәсн гермүдт

Израилин отга улсан бәәлһлә.

⁵⁶ Болв Израилин улс

Хамгин Күчтә Бурхиг бас сөрәд,

Өмнәснь буцлт кедг билә.

Терүнә сурһлһиг эвддг билә.

⁵⁷ Тедн Бурхнас хольҗад,

Өвкнрләһән әдл ухаһан сольдг билә.

Тедн, матьхр саадг мет, хәрү эргцхәдмн.

⁵⁸ Израилин улс талдан бурхдт шүтәд,

Эврәннь худл шүтәһәрн

Терүнә харллһинь көндәлә.

⁵⁹ Бурхн тедниг соңсад икәр уурлла.

Тегәд Израилиг һолад һазалла.

⁶⁰ Эврәннь улс дунд бүүрлҗ бәәсн өргә герән

Силом балһснд Тер үлдәлә.

⁶¹ Эврәннь герәсән бәрдг хәәрцгән

Деед Эзн хортна һарт өглә.

Эн хәәрцг

Бурхна чидлин, туурмҗин темдг.

⁶² Деед Эзн Эврәннь улсан үлдлә харһулла,

Деед Эзн Эврәннь әмтнд уурлла.

⁶³ Теднә баахн көвүдинь дәәнә һал зальгв,

Тегәд хүрм кедго,

Хәрд һарх күүкдт ду дуулҗ өгдго билә.

⁶⁴ Израилин гелңгүд үлдәс үкҗәв,

Теднә гергчүдт уульдг арһ уга билә.

⁶⁵ Болв Деед Эзн

нөөрәсн серсн мет серглә,

Чаһр ууһад үүмсн дәәчин бәәдл һарла.

⁶⁶ Эврәннь хортан ар талднь ка цокла,

Тедниг тер мөңк му нернднь ичәлә.

⁶⁷ Йосипин хөөт үйнриг Тер һолла,

Эпримин отга улсиг шүүҗ авсн уга.

⁶⁸ Болв Йудайин отга улс шүүҗ авла.

Эврәннь дурлсн Сион уулыг шүүҗ авла.

⁶⁹ Деед Эзн әрүн бәәрән

Теңгрлә әдл өндр келә,

Деед Эзн әрүн бәәрән

Һазрла әдл мөңкрүлҗ тогтала.

⁷⁰ Деед Эзн Эврәннь ялч Давидиг шүүҗ авла,

Терүг малын хашаһас авла.

⁷¹ Деед Эзн Давидиг хурһта хөөдәс салһҗ авч ирлә,

Терүгәр Эврәннь улсан, Яковиг, Эврәннь шишлң улсан,

Израилиг хәләлһхәр авч ирлә.

⁷² Давид тедниг цевр зүркнәсн хәләлә,

Давид тедниг дамшлтта һарарн залла.

Асафин псалм.

¹ О, Бурхн, буру номта улс Тана һазрт ирцхәв,

Тана әрүн сүмиг бузрдав.

Ерусалимиг хамхрха бәәрнд хүврәв.

² Тана зарцнрин цогцсиг зерлг шовудт идүлҗәнә,

Тана иткдг улсин цогцсиг зерлг аңгудт идүлҗәнә.

³ Израилин улсин цусиг

Ерусалим эргәд усн мет хортн асхв.

Тедниг оршадг күн уга болв.

⁴ Бидн хоша бәәх әмтнә инәдн болувидн,

Бидн мана эргнд бәәх талын улст җигшүр болувидн,

Бидн теднд наадн болвидн.

⁵ О, Деед Эзн, кедү цагтан Та уурлхмт? Оньдиндий?

Тана харллһн һал болҗ цааран асхий?

⁶ Таниг меддго улст Эврәннь ууран илгәтн,

Тана нериг дууддго орн-нутгт ууран илгәтн.

⁷ Тедн Яковин хөөт үйнриг зальгчкв,

Теднә һазриг хоосрулв.

⁸ Та мадниг давсн килнцәрмдн бичә гемшәтн.

Тана аһу ик цаһан санан маднд удл уга күрттхә.

Юңгад гихлә бидн дегд муурвидн.

⁹ О, Бурхн, мана Аврач!

Тана туурмҗин төлә маднд дөң болтн.

Тана нернә төлә сулдхтн,

Мадна килнциг тәвҗ өгтн.

¹⁰ «Теднә Бурхн альдв?» – гиҗ талын улс сурх зөв уга.

Тана зарцнрин цус асхсна өшәг

Мадна нүүрт талын улс медҗ зовтха.

¹¹ О, Бурхн, Тана өмн зогсчах бәрәнә улсин түңшлһиг соңстн.

Та үкллә харһсн әмтиг Эврәннь күчәрн сулдхтн.

¹² О, Деед Эзн, Таниг ичәсн

Маднла хоша бәәх улсиг

Дола дәкҗ өшәнлә харһултн.

¹³ Тегәд бидн, Тана улс, Тана идгин хөд,

Таниг мөңкинд туурулхвидн,

Танд бидн үйәс үй һатлад, магтал өргхвидн.

Көгҗмин һардачд. Асафин псалм. «Лилия» гидг дууна айс. Герәсн.

² Израилин улсин Хөөч, соңстн!

Керубиман деер суудгнь,

Йосипин хөөт үйнриг хөд мет дахулҗ йовхнь

Бийән үзүлтхә.

³ Эпримин, Бенямина болн Манашен хөөт үйнрин өмн

Та Эврәннь чидлән үзүлтн,

Та ирәд мадниг авртн.

⁴ О, Бурхн, мадниг босхҗ тохратн.

Та цаһан санаһан күртәтн,

Та мадниг авртн!

⁵ О, Деед Эзн, Хамгин Күчтә Бурхн,

Кедү цагтан Та Эврәннь улсин зальврлһнд уурлнат?

⁶ Та тедниг зовлңта хотар цадхаввт,

Та теднд дала нульмс уулһулвт.

⁷ Та маднар хоша бәәх әмтнә керүл кеввт,

Мана хортн мадниг басчана.

⁸ Хамгин Күчтә Бурхн, мадниг босхҗ тохратн!

Та цаһан санаһан күртәтн,

Та мадниг авртн!

⁹ Та Египетәс Эврәннь улсан уста үзмин иш мет авч ирләт,

Та Канана бәәрн улсиг көөһәд,

Тенд тер уста үзмин иш тәрләт.

¹⁰ Та терүнә төлә һазр цеврлвт.

Уста үзмин уңгнь батрад, һазр бүркв.

¹¹ Уулмуд терүнә сүүдрәр бүркгдв,

Терүнә ацмуднь хошун моднас икәр өсв.

¹² Терүнә ацмуд теңгст күрв,

Епрат һолд күрв.

¹³ Та, Деед Эзн, юуна төлә

Терүнә хашаһинь хамхлвт?

Хаалһар йовсн болһнь терүнәс таслна.

¹⁴ Ө-шуһу модна зерлг һахас терүг хадрна,

Зерлг аңгуд терүнәс идцхәнә.

¹⁵ Хамгин Күчтә Бурхн!

Теңгрәс оньган өгтн, хәләтн, темдглтн,

Та тер уста үзмд килмҗән тусхатн.

¹⁶ Тәрсн ишән, өскәд батрасн урһцан

Та хәләтн.

¹⁷ Тертн һалд шатла,

Тертн хортнд цокулгдла.

Тана уурас хортн алгдтха.

¹⁸ Та шүүҗ авсн залу күүһән харстн,

Та Эврәннь төлә батрасн күүһән харстн.

¹⁹ Бидн Танас хольҗсн угавидн.

Та мадниг әмдрүлтн.

Тегәд бидн Тана нер дуудхвидн.

²⁰ О, Деед Эзн, Хамгин Күчтә Бурхн!

Та мадниг босхҗ тохратн!

Та цаһан санаһан күртәтн,

Та мадниг авртн!

Көгҗмин һардачд. Асафин псалм. Көгҗмин чивһстә зер-зев цокҗ татх.

² Түшг болҗах мана Бурхнд

байртаһар дуултн.

Яковин Бурхнд байрлтн.

³ Псалм авад, көгҗмән эклтн, кеңкрг цоктн,

Айста бичкн ятхан, ик ятхан таттн.

⁴ Мана нәәрин өдр шин сар һархла,

Дүүрң сар һархла бүшкүрдтн.

⁵ Энтн Израилин төлә һарһсн закан,

Энтн Яковин Бурхна шиидвр.

⁶ Израилин улс Египетин һазрас һархд,

Энүг теднә төлә сурһлһ кехәр Тер тогтала.

Би меддго кел соңсув:

⁷ «Тадна нурһн деерк ацаг Би буулһув,

Тадн бәрәнәс сулдхгдвт.

⁸ Тадн зовхларн намаг дуудвт,

Тадниг Би сулдхув.

Би оһтрһун дун дотр тадниг соңсув,

Би тадниг Мерибан уснд сөрүв.

⁹ Мини улс, Намаг соңстн!

Би тадниг саглнав:

О, Израиль, Намаг чи соңссн болхнь!

¹⁰ Талдан бурхн таднд олдшго,

Терүнәс давхла, талын улсин бурхнд

бичә шүттн.

¹¹ Би Деед Эзмб,

Египетин һазрас тадниг дахулҗ йовх тана Бурхмб.

Аман аңһатн, Би дүүргәд хот өгнәв.

¹² Зуг Мини улс Мини дуудсиг соңссн уга,

Израиль Мини үлмәд орсн уга.

¹³ Тегәд Би теднә һацата зүркдинь үлдәвв,

Тедн эврәннь седвәрәр бәәтхә.

¹⁴ О, кемр Мини улс Намаг соңссн болхнь,

О, кемр Израиль Мини хаалһар йовсн болхнь!

¹⁵ Тиигхлә Би теднә хортыг шулун диилх биләв,

Би Эврәннь һаран

даҗрачнрин өмнәс өргх биләв.

¹⁶ Деед Эзнд дурго әмтн зуһудхар седх билә,

Болв тедн цаарандан мөңкинд засглгдад бәәх.

¹⁷ Би, Израиль, чамаг хамгин сән буудяһар асрх биләв.

Би чамаг хадын зерлг зөгин балар бордх биләв».

Асафин псалм.

¹ Бурхн бурхд дунд орв,

Тедн дунд зарһ Тер кев:

² – Кедү цагтан тадн буруһар зарһ кехмт?

Кедү цагтан хар саната әмтнд

тадн зуһудхмт?

³ Түрү, өнчн күүнә зарһиг чикәр кетн,

Даҗргдҗах, һуульһнч күүнд чик зөв өгтн.

⁴ Түрү бәәх, дөң хәәҗәх күүг сулдхтн,

Тедниг хар саната әмтнәс авртн.

⁵ Юм меддго, юм ухалдго,

Харңһу бәәдләр әмтн бәәцхәнә.

Делкән һазрин цуг улнь нурчана.

⁶ – Тадн бурхд болҗанат,

Тадн цугтан Хамгин Күчтә Бурхна

көвүд болҗанат.

⁷ Болв тадн күүнлә

әдләр өңгрхт,

Кен нег хаанла

әдләр үүләсн буулһгдхит, – гиҗ Бурхн келв.

⁸ О, Бурхн, бостн!

Һазр деер зарһ кетн.

Юңгад гихлә цуг әмтн Тана болҗана.

Дун. Асафин псалм.

² О, Бурхн, бичә тагчг бәәтн,

Бичә ә уга бәәтн.

О, Бурхн, бичә тогтнхар седтн!

³ Юңгад гихлә тана хортн шуугҗана,

Танд дурго әмтн

сөрлцхәр толһаһан өндәлһҗәнә.

⁴ Тана улст догшн хоран күртәхәр тедн бәәнә.

Тана зөөр болҗах улсин өмнәс тедн күүндҗәнә.

⁵ – Тедниг келн-улс болдгинь одад уурулхмн,

Израиль гидг нерн дәкҗ бичә келгдтхә, –

Гиҗ тедн келцхәнә.

⁶ Тана хортн негдв,

Тана өмнәс ниицә бүрдәв:

⁷ Едомин болн Ишмаилин улс,

Моавин болн Хагряна улс,

⁸ Гевалан, Аммона болн Амаликин улс,

Пилистмүдин һазра әмтн

Тир гидг балһсна улста хамдан,

⁹ Ашуриг теднлә ниилүлв.

Тедн Лотин хөөт үйнрт күчнь болцхав.

¹⁰ Мидьянд болн Кишона гидг һолын хаҗуд

Сисар Йавин хойрд кесән теднд бас кетн.

¹¹ Тедн Эндорд алгдла,

Теднә цогц һазрт үмкәрҗәнә.

¹² Теднә һардачнрла, Оревла болн

Зеевла әдл Та кетн,

Теднә цуг хаадла, Зэбемла болн Цалмунла әдл, кетн.

¹³ – Бидн Бурхна идгтә һазриг

бийдән авнавидн, –

Гиҗ тедн келцхәнә.

¹⁴ Бурхн минь! Теднәр хүүһин тоорм кетн,

Теднәр салькнд цокгддг өвс кетн.

¹⁵ Ө-шуһу моддыг һал авчахла әдләр,

Уулмудыг һал шатаҗахла әдләр,

¹⁶ Тиигҗ Та Эврәннь хү көдлгҗ тедниг көөтн,

Та тедниг Эврәннь аюлар әәлһтн.

¹⁷ Тедн, Деед Эзн,

Тана нер хәәдгәр

Та тедниг ичәтн!

¹⁸ Тедн мөңкинд ичәгдтхә, әәлһгдтхә,

Тедн һутагдад алгдтха.

¹⁹ Та, Деед Эзн, һазр деер һанцхн,

Хамгин Күчтә болҗахитн медцхәтхә.

Көгҗмин һардачд. Көгҗмин чивһстә зер-зев цокҗ наадх. Корахин көвүдин псалм.

² О, Күчтә гидг Деед Эзн!

Тана сүм ямаран дурта бәәрн.

³ Деед Эзнә сүмд тусхар седәд,

би йир үрүдҗәнәв.

Әмд Бурхиг цогц-махмудм, седклм

байртаһар дуудҗана.

⁴ О, Күчтә гидг Деед Эзн,

Мини Хан, Мини Бурхн,

Тана тәклин ширән хаҗуд

Нам богшурһан бийнь бәәр олҗ авна,

Эврәннь һууҗмулмудан

терүнә хаҗуд тәвхин төлә,

Нам харада чигн үүрән бәрнә.

⁵ Тана бәәшңд бәәснь хөвтә,

Таниг тедн зогслго магтна.

⁶ Танас чидл авсн күн хөвтә,

Тан тал зүркәрн хаалһ олсн күн хөвтә.

⁷ Һашуддг тегш һазрар йовхла,

Тер һазр булгта болна.

Хур орҗ терүг әдслнә.

⁸ Түшләс түшлүр йовцхана,

Сион тал Бурхна өмн ирцхәнә.

⁹ О, Деед Эзн, Хамгин Күчтә Бурхн,

Мини зальврлһ соңстн.

Яковин Бурхн, соңстн!

¹⁰ О, Бурхн, Тана шүүҗ авсн

Мана харсач хааг

цаһан санаһан күртәҗ хәләтн.

¹¹ Юңгад гихлә Тана сүмд бәәсн нег өдр

Талдан һазрт йовсн миңһәд өдрмүдәс деер.

Килнцтә улсин сег дор бәәхәр,

Би Бурхна бәәшңгин үүднд зогссув.

¹² Юңгад гихлә Деед Эзн Бурхн нарн болҗана,

Халхц болҗана!

Деед Эзн цаһан седкл, туурмҗ өгнә.

Чикәр бәәсн әмтнд Тер

сән юмиг бәрлго күртәнә.

¹³ О, Күчтә гидг Деед Эзн!

Танд нәәлсн күн хөвтә!

Көгҗмин һардачд. Корахин көвүдин псалм.

² О, Деед Эзн, Эврә һазра улст

цаһан санаһан күртәввт,

Та Яковин зөөриг хәрү өгвт.

³ Та Эврәннь улсин

йосн уга йовдлынь тәвҗ өгвт,

Та теднә цуг килнцинь тәвҗ өгвт.

⁴ Та Эврәннь цухлан бәрәд,

Ик ууран тогтнулвт.

⁵ Мана аврлтын Бурхн,

Мадна урдк бәәдл тогтатн.

Та Эврәннь керлдлһән зогсатн.

⁶ Та маднд оньдинд уурлхвт?

Тана цухл үйәс үйд күрхмби?

⁷ Маһд уга, Тана улс Танд байрлдгар,

Та мадниг дәкн әмдрүлҗәнәт.

⁸ О, Деед Эзн,

Эврәннь сольлт уга дуран Та күртәтн,

Та Эврәннь аврлтан маднд белглтн.

⁹ Деед Эзн Бурхн ю келҗәхиг соңсчанав.

Эврәннь улстан, иткдг улст

Тер төвкнүн бәәдл өгхәр бәәнә.

Тедн дәкҗ бичә ухаһан геетхә.

¹⁰ Маһд уга, Терүнә туурмҗ мана һазрт бәәсәр

Терүнә аврлт Терүг күндлдг әмтнд өөрхн!

¹¹ Сольлт уга дурн болн иткмҗ харһцхах,

Чик бәәдл эв хойр теврлцхәх.

¹² Иткл һазрас эклх,

Чик бәәдл теңгрәс хәләх.

¹³ Нег сәнь – Деед Эзн әдсән йирдән өгх.

Тегәд мана һазр темсән өгх.

¹⁴ Чик бәәдл Терүнә өмн йовх,

Тегәд Терүнд хаалһинь белдх.

Давидин зальврлһн.

О, Деед Эзн, чикән өгәд соңстн намаг, хәрү өгтн.

Би түрҗәнәв, дөң кергтә.

² Мини җирһл хәләтн;

Би Танд үнн седклән тәвҗәнәв.

Танд нәәлҗәх намаг, Эврәннь зарцан, авртн.

Та мини Бурхнт.

³ О, Деед Эзн, цаһан санаһан күртәтн;

Таниг би өдрин дуусн дууднав.

⁴ О, Деед Эзн, Эврәннь зарцин седкл байрлултн;

Танд би мөргнәв.

⁵ О, Деед Эзн, Та цаһан седклтәт,

О, Деед Эзн, Та цугтаһиннь килнц тәвҗ өгхдән белнт.

О, Деед Эзн, Таниг дуудсн әмтнд

Та цугтаднь итклтә дуран өгнәт.

⁶ О, Деед Эзн, мини зальврлһ соңсит,

Мини зальврсн дуунд оньган өгит.

⁷ Кемр би зовлңла харһхла,

Таниг би дууднав.

Та нанд хәрү өгхит.

⁸ О, Деед Эзн, бурхд дунд Танла әдлнь уга.

Тана керглә әдлнь бас уга.

⁹ О, Деед Эзн, Та цуг улс үүдәввт,

Тедн ирәд Тана өмн мөргх.

Тегәд Тана алдр нер туурулх.

¹⁰ Та алдрт,

Та өвәрц йовдл һарһнат,

Та ор һанцхн Бурхн болҗанат.

¹¹ О, Деед Эзн, Тана үннд бәәдгәр,

Та Эврәннь хаалһан нанд заатн.

Таниг итклтә зүркәрн күндлтхә гиһәд

Та нанд урмд өгит.

¹² О, Деед Эзн, Таниг би зүркнәсн туурулнав,

О, Деед Эзн, Тана алдр бәәдлиг мөңкинд туурулнав.

¹³ Нанд өгчәх Тана итклтә дурн дегд ик!

Та намаг үкәрәс татҗ аввт.

¹⁴ О, Бурхн! Деегүр саната улс намаг дәврнә,

Догшн әмтн намаг алхар седнә.

Тиим улс Таниг күндлҗәхш.

¹⁵ Болв Та, Деед Эзн, өр-өвч, цаһан саната,

Удан тесвртәт, дурарн болн иткләрн байнт.

¹⁶ О, Деед Эзн, бий талм эргтн,

О, Деед Эзн, намаг хәәрлтн.

Та Эврәннь чидлән нанд, Эврәннь зарцд, белглтн.

Та Эврәннь зарцин көвү – намаг авртн.

¹⁷ Та Эврәннь цаһан санана темдг нанд үзүлтн,

Нанд дурго әмтн терүг үзәд ичтхә.

Та, Деед Эзн, нанд дөңгән күргәд, намаг тогтнулвт.

Корахин көвүнә псалм. Дун.

² Деед Эзнә балһсна ул әрүн уул деер бәәнә.

Деед Эзн Сиона үүднд Яковин цуг бәәрмүдәс икәр дурта.

³ Бурхна балһсн! Чини тускар сәәнәр келцхәнә.

⁴ Намаг таньдг улст

Египетин, Вавилона тускар уха орулнав.

Пилистмүд, Тирахн болн Эфиопихн келцхәх:

«Күн болһн терүнә бәәрн күн болв».

⁵ Сиона тускар иигҗ келцхәх:

«Энд күн болһн бәәрн күн болв,

Эн балһсиг Хамгин Күчтә Деед Эзн Эврән батлла».

⁶ Деед Эзн олн келн-улсин то кехләрн,

Күн болһн тенд терүнә бәәрн күн болв гиҗ бичх.

⁷ Дуучнр, биичнр иигҗ дуулцхах:

«Сион! Мини сән тоот

Чамас эклцән авчана».

Дун. Корахин көвүнә псалм.

Макалафин көгҗмин һардачд, Езрахитин Хемана ном.

² О, Деед Эзн, мини аврлтын Бурхн!

Өдрин дуусн би уульнав,

Сөөни дуусн Тана өмн зогснав.

³ Та мини зальврлһ соңстн,

Та чикән өгәд мини эрлһ соңстн.

⁴ Юңгад гихлә, седклм зовлңгар дүүрчәнә,

Мини җирһл унтрхдан өөрдв.

⁵ Би үкҗәх күүнә тоод орув,

Би чинән уга күүнлә әдл болув.

⁶ Намаг үксн әмтн дунд хайцхав.

Би Тана эс ухалҗах,

Тана килмҗән эс өгчәх,

Алгдад яршгт кевтх күүнлә әдл болув.

⁷ Та намаг үклин нүкнд,

Харңһуд, йорал уга һазрт тәввт.

⁸ Тана цухл намаг зоваҗана,

Тана дольганла әдл намаг сорад авчана.

⁹ Та нанас таньл-үзлим хольҗулвт.

Та тедниг нанас җигшүлвт.

Би бәрәнд бәәнәв,

Би тендәс һарч чадҗанав.

¹⁰ Зовлңгас нүдм цуцрҗана.

О, Деед Эзн, би өдр болһн Таниг дууднав.

О, Деед Эзн, би өдр болһн Танур һаран делгнәв.

¹¹ Та үксн күүнә төлә өвәрц юм һарһхвт?

Таниг үксн күн босад туурулхий?

¹² Үксн күүнә яршг дотр

Тана сольлт уга дурна тускар келгдхий?

Тана үннә тускар тегәд тенд келгдхий?

¹³ Харңһу там дотр

Тана өвәрц йовдлыг күн үзхий?

Үклин һазрт Тана чик һардвриг медхий?

¹⁴ О, Деед Эзн, Таниг би дуудҗанав,

О, Деед Эзн, өрүн өрлә би Тана өмн зальврнав.

¹⁵ О, Деед Эзн, Та намаг яһад һазалҗахмт?

О, Деед Эзн, Та нанас

яһад чирәһән бултулҗахмт?

¹⁶ Би зовҗанав,

Би баһ наснасн үкхин нааһар бәәнәв,

Би Танас сүркәһәр әәҗәнәв,

Би чидлән гееҗәнәв.

¹⁷ Тана цухл намаг ээрчәнә,

Тана әәмшгтә йовдл намаг уга кеҗәнә.

¹⁸ Өдр болһн цухл, әәмшг,

усна аюл мет, намаг ээрчәнә.

Тедн намаг дөрвн үзгәсм бүслҗәнә.

¹⁹ О, Деед Эзн, Та нанас

Мини иньг-үүрмүдим хольҗулвт.

Мини һанцхн үр ода харңһу там болҗана.

Езрахитин Хетана ном.

² О, Деед Эзн, Тана сольлт уга дурна

тускар би мөңкинд дуулхв.

Тана иткмҗин тускар би үйәс үй һатлад,

Эврәннь амарн келҗ өгнәв.

³ Тегәд иигҗ би келҗәнәв:

Тана сольлт уга дурн мөңкинд тогтагдла,

Тана иткмҗ теңгрлә әдл бат.

⁴ – Би Эврәннь шүүҗ авсн әмтнлә бооца келәв,

Би Эврәннь ялч Давидт андһаран иигҗ өгләв:

⁵ «Би мөңкинд чини тохмичнь батлнав,

Би чини хаана ширәг үйәс үйд күргҗ тогтанав», – гиҗ Та келләт.

⁶ О, Деед Эзн, Тана өвәрц кергиг теңгрт цугтан туурулх,

О, Деед Эзн, Тана иткмҗиг әрүн улсин хургт туурулх.

⁷ Эс гихлә теңгрт кен Деед Эзнлә әдлцҗ чадхмб?

Теңгрт бәәх юмнас кен Деед Эзиг дураҗ чадхмб?

⁸ Бурхн теңгрт бәәх әрүн юмст әәмшг болҗана.

Бурхн эргндән бәәх цуг юмст әәмшг болҗана.

⁹ О, Деед Эзн, Хамгин Күчтә Бурхн,

Танла әдл күчтәнь бәәхий?

Таниг Тана иткмҗ бүслҗәнә.

¹⁰ Та сүркә теңгсмүдт эзркҗәнәт,

Теңгсин дольгас деегшән өрггдәд буслхла,

Та тедниг номһрулнат.

¹¹ Та теңгсин маңһсиг балцлҗ хайвт,

Та чидләрн Эврәннь хортан ка цоквт.

¹² Теңгр Тана, һазр Тана,

Делкәг дүүргҗәх юмсиг Та үүдәләт.

¹³ Та ар үзг, өмн үзг үүдәләт.

Тана нериг Тавор болн Ермон гидг уулмуд туурулҗана.

¹⁴ Та ямаран алдрт!

Тана чидл ямаран күчтә!

¹⁵ Чик бәәдл болн үнн йовдл

Тана ширән ул болҗана.

Тана сольлт уга дурн иткмҗ хойр

Тана өмн йовцхана.

¹⁶ Таниг дуундан орулад туурулҗах улс буйн кишгтә!

О, Деед Эзн, Тана цаһан санана герлд тедн бәәцхәнә.

¹⁷ Тана нернд өдрин туршарт тедн байрлцхана,

Тана чик кергәр тедн Таниг магтна.

¹⁸ Та теднә туурулҗах күчн болҗанат,

Тана әдсәр бидн диилнәвидн.

¹⁹ Деед Эзнәс маднд халхц ирҗәнә,

Әрүн Израиляс маднд хан күртҗәнә.

²⁰ Тиигхд, Та

Танд иткдг улст үзгдлән келләт,

Тегәд иигҗ келләт:

«Би баатр дәәчд дөң боллав,

Би әмтн дундас шүүҗ авсан өөдлүлләв.

²¹ Би Давидиг, Эврәннь ялчан, олҗ авлав,

Би Эврәннь каңкнсн әрүн тосар терүг тосллав.

²² Би терүг бәәсн чидләрн дөңнҗәнәв,

Мини күчн терүг батлх.

²³ Хортн терүг шахшго,

Килнцтә әмтн терүг көөҗ диилшго.

²⁴ Терүнә нүүрт хортынь ка цокнав,

Терүнд дурго әмтиг алнав.

²⁵ Мини иткмҗ,

Мини сольлт уга дурн терүнлә бәәх.

Мини нерәр тер хортан диилх.

²⁶ Терүнә орн-нутгин меҗәг

Би теңгсәс Епрат һол күртл күргхв.

²⁷ Давид нанд иигҗ келх:

„Та мини Эцк,

Та мини Бурхн,

Та мини аврлтын ул болҗанат“.

²⁸ Би терүгәр түрүн үрән кенәв,

Би терүгәр һазр деерк хаадас хамгин күчтә хан кенәв.

²⁹ Би терүнд өгчәх дуран мөңкинд харнав,

Терүнлә кесн мини бооцанд сольлт уга.

³⁰ Би терүнә тохм-уңгинь тогтаҗанав.

Терүнә ширә теңгр бәәтл бат болх.

³¹ Кемр терүнә көвүд мини закаг хаяд,

Мини тогтасн диг-дараһар эс бәәхлә,

³² Кемр тедн Мини заавр эвдхлә,

Кемр тедн Мини шиидвр эс хадһлхла,

³³ Тиигхлә, Би тедниг килнцднь тайгарн засглнав,

Тедниг буру йовдл һарһхлань, маляһарн цокнав.

³⁴ Зуг Давидт дурллго бәәшгов,

Би Эврәннь иткмҗән сольшгов.

³⁵ Би Эврәннь бооцаһан эвдшгов,

Би Эврәннь андһаран сольшгов.

³⁶ Би Эврәннь әрүн бәәдләрн

негл дәкҗ андһар өгләв.

Би Давидт худл келшгов.

³⁷ Терүнә тохм мөңкинд бәәх,

Терүнә ширә өмнм нарн мет болх,

³⁸ Сарла әдл мөңкинд хату болх,

Теңгрт сар Мини иткмҗтә герч болх».

³⁹ Болв Эврәннь шүүҗ авсн хааһан

Та һолад хайвт.

Терүнд уурлвт.

⁴⁰ Та Эврәннь ялчла кесн бооцаһан эвдвт,

Та терүнә титминь һазрт хайвт.

⁴¹ Та терүнә балһсна эрсинь күүлвт,

Та терүнә шивәһинь хамхлсн бәәрнд хүврәввт.

⁴² Хаҗуһарнь давсн күн болһн терүг тонна,

Хоша бәәх келн-улс болһнд тер наадн болҗана.

⁴³ Та терүнә хортнд сүрә өгвт.

Та терүнә цуг хортыг байрлулвт.

⁴⁴ Та терүнә үлдиг хәрү эргүлвт,

Та терүг ноолданд батлсн угат.

⁴⁵ Та терүнә хаана күчинь булаҗ аввт,

Та терүнә ширәһинь һазр деер хайвт.

⁴⁶ Та терүнә баһ насна өдрмүдинь хасвт,

Та терүг ичәввт.

⁴⁷ О, Деед Эзн, кедү цагтан

Та зогслго бултхмт?

Тана ур, һал мет, кедүдән шатхмб?

⁴⁸ Мини җирһл ямаран ахринь,

Та, ухалхнта.

Та цуг әмтиг үкдгәр үүдәҗит.

⁴⁹ Үкл эс үзсн күн бәәхий?

Нег чигн күн үкләс алдршго.

⁵⁰ О, Деед Эзн, Давидт иткх андһар өгсн

Тана урдк сольлт уга дурн яһла?

⁵¹ О, Деед Эзн, Тана ялчнрин керүлин тускар сантн,

Олн улсин тер керүлиг би бийдән бәрҗәнәв.

⁵² О, Деед Эзн, Тана хортд яһҗ му келҗәнә,

Тедн Тана шүүҗ авсн хааг агчм болһнд ичәнә.

⁵³ Деед Эзн мөңкинд тууртха!

Тиигтхә, тиигтхә.

Бурхна күн Моисеин зальврлһн.

² О, Деед Эзн,

Та үйәс үйд мадна хорһдх бәәрн болҗанат.

³ Та уулмуд, һазр, делкә үүдәхәс урд,

Та мөңкинәс мөңкинд Бурхн болҗанат.

⁴ Та күүг хәрү тооснд хүврәнәт,

«Күмн әмтн тооснд хәрү хүвртн!» – гиҗ Та келнәт.

⁵ Миңһн җил Танд

өцклдүрк давсн өдрлә әдл,

Болзгарн сөөни харулла әдл.

⁶ Та күмн әмтиг усна урсхул мет урсулнат,

Тедн болзгарн нөөрлә әдл давх.

Тедн өрүһәр бултаһад һарна, цецгәләд көкрнә,

Асхар хагсад, хумхарҗах өвсн мет болна.

⁷ Тана цухлас бидн алгдҗанавидн,

Тана уурас бидн әәҗәнәвидн.

⁸ Та мана йос эвдсн йовдлыг

Бийиннь өмн бәрҗәнәт.

Та мана нуувчин килнциг

Бийиннь нүүрт бәрҗәнәт.

⁹ Тана цухлас көлтә

Мадна бәәх өдрмүд ахрдҗана.

Бидн җилмүдән әмсхллә әдл чиләҗәнәвидн.

¹⁰ Мадна наслх насмдн – 70 җил,

Бат күн – 80 җилдчн бәәх.

Зуг хамгин сән җилмүдт

Күүг көдлмш авлна, гем ээрнә.

Күүнә җирһл шулун давна,

Тегәд бидн үкх болзг талан нисч йовнавидн.

¹¹ Тана цухлын күчиг кен меднә?

Тана уурас бидн әәҗәнәвидн.

¹² Цецн ухан ордгар,

Эврәннь өдрмүд тоолдгиг

Та маднд дасхтн.

¹³ О, Деед Эзн, хәрү иртн!

Кедүдән Таниг күләхмб?

Эврәннь ялчнран хармнтн.

¹⁴ Та өрүһәр мадниг

Эврәннь сольлт уга дурарн хаңһатн,

Тегәд бидн җирһлиннь туршарт

Байртаһар дуулад нәәрлхвидн.

¹⁵ Кедү өдртән Та мадниг зовалат,

Тедү өдрт мадниг байрлултн.

Кедү җилдән бидн зовҗ йовлавидн,

Тедү җилдән Та мадниг байрлултн.

¹⁶ Тана күцәсн кергиг Тана ялчнр үзтхә,

Тана туурмҗиг теднә көвүд үзтхә.

¹⁷ Мана Бурхн Деед Эзнә евәл маднд күрттхә.

Мадна көдлмшт күцәмҗ өгтхә!

Э, э! Деед Эзн Бурхн күцәмҗ маднд өгтхә.

¹ Хамгин Күчтә Бурхна шивәд бәәснь,

Хамгин Күчтә Бурхна харслт авснь үлдцхәх.

² «Та мини хорһдх бәәрн болн шивә болҗанат,

Та мини Бурхн болҗанат.

Би Танд иткҗәнәв», – гиҗ

Би Деед Эзнд келҗәнәв.

³ Юңгад гихлә, Тер чамаг

Нуувчар тәвсн хавхас, үклин гемәс сулдхх.

⁴ Шовун мет Тер чамаг өрвлгәрн хучх,

Терүнә далваг дор чи әәмшг уга бәәхч.

Бурхн иткмҗтә,

Тер чамаг халхц мет харсх.

⁵ Чи сөөни әәмшгәс чигн,

Өдрәр хагдсн сумнас чигн,

⁶ Харңһуд һарчах шархас чигн,

Һал үдлә алдг хальдврта гемәс чигн әәшгоч.

⁷ Чини өмн миңһнь үкх,

Чини эргнд арвад миңһнь үкх,

Зуг тедн чамаг көндәшго.

⁸ Зуг чи нүдәрн үзхч,

Хар саната әмтиг засглсинь үзхч.

⁹ «Деед Эзн мини бәәрн», – гиҗ чамаг келснәс иштә,

Чи Хамгин Күчтә Бурхар эврәннь шивә кеввч.

¹⁰ Чамд му юмн учршго,

Чини бәәсн герүр

үклин гем өөрдшго.

¹¹ Бурхн Эврәннь элчнртән

Чамаг альдаран одв чигн,

Әрвләд хәләтхә гиҗ зәрлг өгх.

¹² Чини көл чолунд бичә цокгдтха гиһәд,

Чамаг һар деерән

Тедн теврәд авад йовцхах.

¹³ Чи арслң аң, хорта моһа билцлхч,

Чи баахн арслң аң, лу аң ишкхч.

¹⁴ «Тер нанд дурта болсар,

Би терүг аврнав.

Би терүг харснав,

Тер Мини нер күндлҗәнә.

¹⁵ Намаг тер дуудла,

Би терүг соңсхв.

Би терүнлә зовлңта цаглань бәәхв.

Би терүг аврнав,

Би терүнд туурмҗ өгнәв.

¹⁶ Би терүнә җирһлин өдрмүд уттулнав,

Би терүнд Эврәннь аврлтан өгнәв», – гиҗ

Бурхн келҗәнә.

Псалм. Деед Эзнә амрлһна өдрин дун.

² Деед Эзиг тууруллһн – чик йовдл.

Хамгин Күчтә Бурхн,

Тана нернд дууллһн,

³ Тана сольлт уга дурна тускар өрүнд зәңгллһн,

Тана иткмҗин тускар сөөд зәңгллһн,

⁴ Арвн чивһстә арфд айслад,

Ятх цокад, ду дуулад зәңгллһн – чик йовдл.

⁵ Деед Эзн, Та намаг

Эврәннь кергәрн байрлулвт.

Би Тана һарарн кесн

Кергин тускар байртаһар дуулҗанав.

⁶ Деед Эзн, Тана керг ямаран алдр!

Деед Эзн, Тана ухаг медхд ямаран күнд!

⁷ Терүг эргү күн медшго,

Медрлнь тату күүнә ухань терүнд күршго.

⁸ Болв хар саната әмтн,

буг өвсн мет, босв чигн,

Йос эвддг әмтн цецгәрв чигн,

Тедн мөңкинд алгдх.

⁹ Деед Эзн, Та мөңкинд өөдлүлгдләт!

¹⁰ Тана хортн, маһд уга, алгдҗана.

Йос эвддг әмтн цугтан тарагдв.

¹¹ Та нанд зерлг бухин чидл өгнәт,

Та нанд байртаһар әдс өгвт.

¹² Би эврәннь хортан нүдәрн үзүв,

Би эврәннь хортан диилгдсиг чикәрн соңсув.

¹³ Бурхнд иткдг әмтн

шавар занднла әдл цецгәлҗәнә,

Ливанд бәәх хошун моднла әдл өснә.

¹⁴ Деед Эзнә бәәшңд тәрсн моддла тедн әдл,

Тедн Бурхна бәәшңгин эргнд цецгәлҗәнә.

¹⁵ Тедн көгшрсн бийнь өслттә, шимтә, чидлтә.

¹⁶ Деед Эзн чик седклтә,

Тер мини түшг,

Терүнд худл уга.

¹ Деед Эзн – Хан.

Терүнд алдр бәәдл хувцн мет өггдлә,

Терүнд чидл өггдлә.

Делкә бат, көндрш уга.

² Тана Хаана ширә кезәнә батлгдла.

Та мөңкинд бәәнәт.

³ О, Деед Эзн, һолмуд буслҗана.

Һолмуд әәһән өгәд шуугҗана.

Һолмуд дольгасан хамхлад шуугҗана.

⁴ Деед Эзн теңгрт алдр,

Деед Эзн усна шууганас күчтә,

Деед Эзн теңгсин дольганас күчтә.

⁵ Тана йосн маһд уга иткмҗтә.

О, Деед Эзн, Тана бәәшң мөңкинд әрүн.

¹ О, Деед Эзн, засглдг Бурхн,

Засглдг Бурхн, Бийән үзүлтн!

² Цуг делкән Зарһч, бостн!

Та деегүр саната әмтиг һарһсн йовдларнь засглтн.

³ О, Деед Эзн, кедү цагтан,

Кедү цагтан хар саната әмтн караглхмби?

⁴ Тедн деегүр үг келцхәнә,

Тедн йос эвдсн йовдл һарһсарн караглна.

⁵ О, Деед Эзн, Тана әмтиг тедн дорацулҗана,

О, Деед Эзн, Тана шүүҗ авсн әмтиг даҗрна.

⁶ Белвсн күүг, талын әмтиг ална,

Өнчн күүг үкүлнә.

⁷ Тедн:

«Деед Эзн үзшго,

Яковин Бурхн медшго», – гиҗ келцхәнә.

⁸ Эргү әмтн, медтн!

Медрл тату әмтн, кезә таднд ухан орхмби?

⁹ Чикән өгсн Бурхн соңсшго болхви?

Нүдән өгсн Бурхн үзшго болхви?

¹⁰ Әмтнд шоодвр өгдг Бурхн,

Әмтнд медрл дасхдг Бурхн

Тедниг засглдго болхви?

¹¹ Күүнә ухан үүмәтә болдгинь

Деед Эзн меднә.

¹² О, Деед Эзн, Тана чиклсн күн буйн кишгтә.

Тана сурһҗах сурһмҗиг дасчах күн буйн кишгтә.

¹³ Килнцтә күүнд нүк малттл,

Та буйн кишгтә күүнд түрү цагтнь амулң бәәдл учранат.

¹⁴ Юңгад гихлә, Деед Эзн Эврәннь улсан үлдәшго,

Эврәннь зөөрән хайшго.

¹⁵ Юңгад гихлә, зарһчнр чикәр зарһ кех,

Тедниг цуг чик седклтә улс дахцхах.

¹⁶ Хар саната әмтнәс кен намаг харсла?

Йос эвдсн әмтнәс харсһлнд кен намаг дахла?

¹⁷ Кемр Деед Эзн намаг эс дөңнсн болхла,

Би удлго үкҗ одх биләв.

¹⁸ «Би унҗанав», – гиҗ сандг биләв.

Деед Эзн, Тана сольлт уга дурн намаг дөңндг билә.

¹⁹ Кемр би әәһәд үүмхлә,

Тана саатуллһн седклим тогтнулна.

²⁰ Йос эвдәд, диг-даран уга йовдл һарһхар бәәх авлһд дурта зарһчнрла

Та негдшгот.

²¹ Чик седклтә күүг тедн дәврхәр негднә,

Буру уга күүг тедн алхар шииднә.

²² Болв Деед Эзн – мини халхц,

Мини Бурхн – мини шивән ул.

²³ Теднә йосн уга йовдл һарһсинь

Тер бийстнь хәрүлнә.

Хорта болснднь тедниг алх

Деед Эзн, мана Бурхн.

¹ Цугтан иртн!

Деед Эзнд байртаһар дууһан өргий!

Мана аврлтын шивәг –

Деед Эзиг – байртаһар дуудый!

² Деед Эзнд магтал өргәд ирий,

Дууһар Терүг дуудый.

³ Юңгад гихлә, Деед Эзн – алдр Бурхн,

Цуг бурхдас хамгин алдр Хан болҗана.

⁴ Һазрин гүн йорал – Терүнә,

Уулмудын орас – бас Терүнә.

⁵ Теңгс – терүнә,

Юңгад гихлә, теңгсиг Тер үүдәлә.

Хагсу һазриг Терүнә һар үүдәлә.

⁶ Цугтан иртн!

Мадна Үүдәһәч Деед Эзнә өмн мөргий,

Толһаһан гекәд мөргий,

Терүнә өмн сөгдий.

⁷ Юңгад гихлә, Тер мана Бурхн,

Бидн Терүнә хәрүлҗәх хөд болҗанавидн.

Бидн Терүнә килмҗән өгчәх идгин әмтн болҗанавидн.

О, эн өдр, кемр Терүнә ду тадн соңссн болхла:

⁸ «Көдән Масса гидг һазрт буцснла әдл,

Бүдүн күзүһән Мериба гидг һазрт бичә үзүлтн.

⁹ Мини керг-үүлмүдиг үзв чигн,

Тана өвкнр Намаг тенд сөрдг билә.

¹⁰ Дөчн җилдән эн учрар

Би тер әмтнд уурлад келләв:

Тедн иткл уга,

Мини келсн үгиг күцәхәр седхш.

¹¹ Тегәд чигн Би уурлад:

Эдн мини амрлһна ормд төрүц оршго, – гиҗ андһар тәвләв».

¹ Деед Эзнд шин ду дуулҗ өгтн!

Цуг делкә, Деед Эзнд дуулҗ өгтн!

² Деед Эзнд дуулҗ өгтн,

Терүнә нериг туурултн!

Терүнә аврсн өдр болһнднь сән зәңг соңсхатн.

³ Олн улс дунд

Терүнә туурмҗин тускар келцхәтн,

Цуг келн-улс дунд

Терүнә өвәрц кергин тускар келцхәтн.

⁴ Юңгад гихлә, Деед Эзн алдр,

Терүг буульх кергтә.

Цуг бурхд дундас хамгин икәр

Энүг күндлх кергтә.

⁵ Әмтнә цуг бурхд зуг шүтән болҗана.

Деед Эзн болхла, теңгр үүдәлә.

⁶ Туурмҗ болн алдр бәәдл Бийднь бәәнә.

Күчн-чидл болн сән-сәәхнь

Терүнә сүмд бәәнә.

⁷ Келн-улсин цуг әмтн, Деед Эзиг магттн.

Деед Эзнә туурмҗинь, күчинь магттн.

⁸ Деед Эзнә нернә туурмҗиг магттн,

Терүнд белгән авч одтн,

Терүнә сүмд ортн.

⁹ Деед Эзнә әрүн алдр бәәдлднь сөгдтн.

Цуг делкә, Терүнә өмн чичртн!

¹⁰ – Деед Эзн – Хан! – гиҗ әмтнд келтн.

Делкә бат, көндрш уга.

Келн-улсин зарһиг Тер чикәр кех.

¹¹ Теңгр кевтән байрлтха,

Һазр кевтән дүрклтхә!

Теңгс дольгалад шуугтха,

Теңгс дүүргҗәх цуг тоот байрлтха.

¹² Тәрән, тәрәнд урһҗах тоот байрлтха.

Тегәд ө-шуһуд бәәх цуг модд

Терүнә өмн байртаһар дуулцхах.

Тер һазр дееркиг залхар аашна.

Цуг делкәг Тер чикәр залх,

Цуг келн-улсиг итклтәһәр залх.

¹ Деед Эзн – Хан!

Һазр кевтән дүрклтхә!

Олн арлмуд байрлтха!

² Терүг үүлн, харңһу бүслҗәнә.

Чик седкл болн чик зарһ

Терүнә ширән ул болҗана.

³ Деед Эзнә өмн һал йовна,

Тегәд Терүг бүслҗәх хортиг шатана.

⁴ Деед Эзнә цәкллһнә һал делкәд герл орулна,

Терүг үзәд, һазр чичрнә.

⁵ Деед Эзнә өмн уулмуд хорһн мет урсна.

Цуг делкә Деед Эзнә өмн урсна.

⁶ Терүнә чик седклин тускар Теңгрәхн зәңглнә,

Цуг келн-улс Терүнә туурмҗиг үзҗәнә.

⁷ Һарарн кесн кегдлмүдтән церглҗәх цуг әмтн,

Шүтәһәрн бардмнҗах цуг әмтн ичтхә.

Цуг бурхд, Деед Эзнә өмн сөгдтн.

⁸ О, Деед Эзн, Тана чик седклд

Сион соңсчана,

Сион байрлҗана,

Йудайин балһсдын әмтн икәр байрлҗана.

⁹ Юңгад гихлә, Та, Деед Эзн,

Һазр деер хамгин негдгчнь болҗанат,

Та цуг бурхдас йир деегшән өөдлгдвт.

¹⁰ Хар саната юмнд дурго күүнд

Деед Эзн дурта.

Эврәннь иткмҗтә улсин әм Тер харна.

Деед Эзн тедниг хар саната әмтнәс аврна.

¹¹ Чик седклтә күүнд герл тусна,

Цевр зүрктә күүнд байр ирнә.

¹² Чик седклтә улс,

Тадна төлә Деед Эзнә кесн тоотд байрлтн,

Терүнә әрүн неринь туурултн.

¹ Деед Эзнд шин ду дуултн,

Юңгад гихлә, Тер өвәрц керг күцәв.

Эврәннь күчәрн, әрүн чидләрн

Тер хортан диилв.

² Эврәннь диилврин тускар

Деед Эзн зәңглв,

Эврәннь чик седклән

Келн-улсин нүүрт үзүлв.

³ Деед Эзн Эврәннь сольлт уга дуран,

Израилин улст өгсн иткмҗән тодлв.

Мана Бурхна аврлтыг цуг делкә үзв.

⁴ Цуг делкә, Деед Эзиг буультн!

Цугтан туурмҗин байрта дууһар дүрклтн!

⁵ Ятх татад, Деед Эзән туурултн,

Ятх дахад, айста дууһар дуултн!

⁶ Деед Эзн Хаана өмн

Бүрә-бүшкүрән татад байртаһар хәәкрцхәтн!

⁷ Теңгс дольгалад шуугтха,

Терүг дүүргҗәх цуг тоот байрлтха!

Цуг делкә кевтән байрлтха,

Терүнд бәәсн тоот байрлтха!

⁸ Цуг һолмуд шуугтха!

Цуг уулмуд хамдан байртаһар

Деед Эзнә өмн дуултха.

Тер һазр дееркиг залхар аашна.

Цуг делкәг Тер чикәр залх.

Келн-улсин зарһиг чикәр кех.

¹ Деед Эзн – Хан.

Терүнә өмн келн-улс догдлад бәәтхә!

Тер Керубимуд хоорнд сууна:

Һазр чичртхә!

² Сион деер Деед Эзн алдр,

Цуг келн-улсас өөдән Тер бәәнә.

³ Тана алдр болн әвртә нериг туурултха.

Деед Эзн әрүн!

⁴ Күчтә Хан чик зарһд дурта.

Та чик бәәдл тогтаввт.

Та Израильд чик зарһ болн үнн юм кеввт.

⁵ Мана Бурхн, Деед Эзиг туурултн,

Терүнә ширән өмн сөгдтн.

Тер әрүн!

⁶ Моисей Ахарон хойр Терүнә гелңгүд бәәҗ,

Деед Эзнә нер дуудсн улсин негнь Самуил бәәҗ.

Тедн Деед Эзиг дуудла,

Деед Эзн теднд хәрү өглә.

⁷ Бахнын бәәдлтә үүлн дундас

Тер теднлә күүндҗ.

Деед Эзнә өгсн заавр

Тер әмтн күцәцхәҗ.

⁸ Деед Эзн, мана Бурхн!

Та теднд хәрү өгвт.

Та теднд килнцинь тәвҗ өгдг Бурхнт,

Та тедниг му йовдл һарһхлань засгллат.

⁹ Деед Эзн, Мана Бурхиг туурултн,

Терүнә әрүн уул деер сөгдтн,

Юңгад гихлә, мана Бурхн Деед Эзн әрүн!

Буульмҗин псалм.

¹ Цуг делкә, Деед Эзнд нерәдәд,

Байртаһар чаңһар дуулцхатн!

² Деед Эзиг байртаһар, күндлтн,

Терүнә өмн бахмҗтаһар ирҗ дуултн!

³ Деед Эзн Бурхн болҗахинь медҗ авцхатн.

Бурхн мадниг үүдәв,

Бидн Терүнәвидн.

Бидн Терүнә улс,

Терүнә идгин хөд болҗанавидн.

⁴ Терүнә үүдәр ханлтан өргҗ ортн,

Терүнә хашад магтал өргәд ортн.

Терүг туурултн,

Терүнә нернд цаһан санаһан күртәтн.

⁵ Деед Эзн цаһан саната,

Терүнә сольлт уга дурн мөңк,

Терүнә иткмҗ үйәс үй һатлад бәәх.

Давидин псалм.

¹ Би итклтә дурна, чик йовдлын тускар дуулнав.

Би Таниг, Деед Эзн, магтнав.

² Би чирмәҗ чик бәәдләр җирһнәв.

О, Та кезә нан тал ирхәр бәәнәт?

Би эврәннь гертән үнн зүркәрн бәәнәв.

³ Би хар сана һарһулшгов.

Бурхнас хаҗилһҗах әмтнә кергүдт би дургов.

Тиим улсла би төрүц үүрлшгов.

⁴ Би хаҗһр йовдлас зүркән холд бәрнәв,

Би хар саната юмнас зулнав.

⁵ Өөрхн улсан нуувчар му келсн күүг би уга кенәв,

Деегүр болн караг күүг би көөнәв.

⁶ Һазр деер Бурхнд иткҗәх әмтиг би тааснав.

Тедн нанла ни бәәх.

Үннч седклтәнь мини селвгч болх.

⁷ Хорта йовдл һарһдг күн мини герт бәәшго,

Худл келҗәх күн мини селвгч болшго.

⁸ Би өдр болһн ичр-һутр уга улсиг алхв,

Би зака эвдсн улсиг

Деед Эзнә балһснас уга кехв.

Деед Эзнд эврәннь һундлан келҗ өгчәх зовлңта күүнә чинән уга цагтан кесн зальврлһн.

² О, Деед Эзн, мини зальврлһ соңстн,

О, Деед Эзн, мини дөң сурҗах дуудвр Танд күртхә.

³ Мини һашута өдрмүдт

Нанас чирәһән бичә бултултн.

Намаг чикән өгәд соңстн.

Таниг дуудхла,

Та нанд шулуһар хәрүһән өгтн.

⁴ Мини җирһл утан мет урсч одв,

Мини ясн һалын нүүрсн мет шатв.

⁵ Мини зүркн шавтад өвсн мет, хагсв.

Тегәд би хот уухан мартҗанав.

⁶ Би зовлңгасн көлтә арсн ясн хойр болув.

⁷ Би көдәд бәәх зерлг шовудла әдл болув.

Би нурсн бәәрнд буусн

һурвлһ шовунла әдл болув.

⁸ Би унтдган уурад,

Герин ора деер суух

һанц шовунла әдл болув.

⁹ Намаг мини хортн өдрин дуусн му келнә,

Намаг наад бәрҗәх әмтн нерим харана.

¹⁰ Тана цухлас көлтә,

Тана догшн уурас көлтә

Би өдмгин ормд үмс идҗәнәв,

Би нульмсан дуссн унд ууҗанав.

Та намаг олҗ авчкад хайвт.

¹² Мини җирһл асхни ут сүүдрлә әдл,

Би өвсн мет хагсчанав.

¹³ Та, Деед Эзн, мөңкинд Хан болҗанат,

Тана туурмҗ үйәс үйд делгрҗәнә.

¹⁴ Та босад Сиониг хәәрлтн,

Терүнд цаһан санаһан күртәх цаг ирв.

Тегәд зуралсн цагнь ирв.

¹⁵ Юңгад гихлә, Тана зарцнр

Терүнә чолунднь чигн дурлв,

Терүнә тоосинь чигн хармнҗана.

¹⁶ Олн улс Деед Эзнә нернәс әәтхә,

Һазр деерк цуг хаадуд

Терүнә туурмҗас әәтхә.

¹⁷ Деед Эзн Сиониг оңдарулад,

Эврәннь туурмҗта ирх.

¹⁸ Йир түрү бәәх әмтнә зальврлһ Тер соңсх,

Тер теднә зальврлһ һазалшго.

¹⁹ Үүдәд уга әмтн

Деед Эзиг иргчдән магттха гиһәд,

Энүнә тускар ирх үйнрт бичгдх.

²⁰ Тер Эврәннь әрүн өөдм деерәс хәләв,

Деед Эзн теңгрәс һазр тал хәләв.

²¹ Тер бәрәнд бәәх әмтнә түңшлһ соңсв,

Тер үкллә харһсн үрдиг сулдхв.

²² Тегәд Сион уул деер

Деед Эзнә нериг дуудна,

Ерусалимд Терүнд магтал өргнә.

²³ Терүгән тедн Деед Эзнд мөргхәр әмтн,

орн-нутг цугтан цуглрхла тиигҗ кенә.

²⁴ Хаалһдм Тер мини баһ насна чидлим хәрүлв,

Мини җирһлин өдрмүд хасв.

²⁵ – Мини Бурхн! Өдринм өрәлд

Җирһлим бичә автн, – гиҗ келүв.

Та мөңкинд бәәнәт.

²⁶ Деед Эзн, Та хамгин эклц һазр үүдәввт,

Теңгр Тана һарар кесн керг болҗана.

²⁷ Цугтан уга болҗ одх,

Зуг Та үлдхт.

Цугтан хувцнла әдл элҗ одх.

Та тедниг хувцнла әдл сольхит,

Тедн уга болх.

²⁸ Болв Та,

Та оңдаршгот,

Тана насн чилшго.

²⁹ Тана улсин үрд әәмшг уга бәәх,

Теднә хөөт үйнр Тана хаҗуд батрцхах.

Давидин псалм.

¹ Деед Эзнд би ханлтан өргнәв.

Терүнә әрүн нериг седкләсн магтнав.

² Деед Эзнд би ханлтан өргнәв,

Терүнә цаһан санаг би мартшгов.

³ Деед Эзн мини цуг килнциг тәвҗ өгнә,

Тер намаг цуг гемәс эдгәнә.

⁴ Деед Эзн намаг үкәрәс халхлна,

Тер намаг итклтә дурарн, цаһан санаһарн әдслнә.

⁵ Деед Эзн мини җирһлиг цаһан санаһарн дүүргнә,

Тегәд би шинәс баһрад, күчтә һәрдин бәәдлтә болнав.

⁶ Деед Эзн чик керг күцәҗәнә.

Тер даҗргдсн улсиг харсна.

⁷ Деед Эзн Эврәннь зураһан Моисейд келҗ өглә,

Тер Эврәннь алдр кергин тускар Израильд келҗ өглә.

⁸ Деед Эзн өр-өвч, цаһан саната, тесвртә, итклтә дурар байн.

⁹ Деед Эзн даңгин бурушаҗахш, даңгин уурлҗахш.

¹⁰ Тер мадниг һарһсн йовдлын кирцәһәр засглҗахш,

Тер мадниг һарһсн килнцәрмдн ашлҗахш.

¹¹ Теңгр һазрас ямаран өндр,

Тедү мет Терүг күндлҗәх улст өгчәх

Деед Эзнә итклтә дурн йир ик.

¹² Дорд үзг барун үзгәс ямаран хол,

Тиим холд маднас мана килнциг Тер хольҗулв.

¹³ Эцк күн эврәннь үрдән яһҗ өкәрлҗ таална,

Тиигҗ Деед Эзн

Бийән күндлсн улсиг таална.

¹⁴ Бидн юунас бүрдсиг Тер меднә,

Бидн зуг тоосн болҗахиг сәәнәр меднә.

¹⁵ Күүнә җирһх өдрмүд ноһан мет болзгта,

Теегин цецг мет күн өсәд цецгәлнә.

¹⁶ Кемр ноһан деер салькн көдлхлә,

Тер уга болҗ одх.

Терүнәс юмн үлдшго.

¹⁷ Болв Деед Эзнә итклтә дурн

Терүг күндлҗәх күүнд мөңкинәс мөңкинд күртх.

¹⁸ Деед Эзнә чик седкл

Терүнә заавр хадһлҗах әмтнә цуг үйнрт,

Терүнә йосиг итклтәһәр күцәдг әмтнд тусна.

¹⁹ Деед Эзн теңгрт Эврәннь ширәһән батлв,

Деед Эзн хан болад, цугтаһинь залҗана.

²⁰ Деед Эзнә заавриг килмҗтәһәр,

Соңсхвртаһар күцәҗәх

Бурхна күчтә элчнр,

Цугтан Терүг магттн.

²¹ Теңгрин үүлдәчнр цугтан,

Терүнә таал күцәҗәх цергләчнр,

Деед Эзиг магттн.

²² Деед Эзнә үүдәсн юмн цугтан,

Терүнә цуг делкәд, Терүг магттн.

Деед Эзнд би ханлтан өргнәв.

¹ Деед Эзнд би ханлтан өргнәв!

О, Деед Эзн, мини Бурхн,

Та йир алдрт.

Та туурмҗар, сүрәһәр бийдән немнә кеввт.

² Та герләр хувцлгдсн мет болвт,

Та сег татсн мет теңгр делгҗәнәт.

³ Та усн деер Эврәннь герән бәрнәт,

Та үүләр Эврәннь көлгән кенәт,

Та салькна җиврәр йовнат.

⁴ Та салькар Эврәннь зәңгән күргнәт,

Та асчах һалар зарцан кенәт.

⁵ Та һазриг бат улднь тогтаввт.

Тертн мөңкинд көндршго юмн.

⁶ Та терүг бүркәһәр мет теңгсәр бүрквт.

Та уулмудыг усар бүрквт.

⁷ Тана шоодлһнас усн зулҗ гүүв.

Тана чаңһ дуунас тер шулуһар гүүнә.

⁸ Усн өөдләд, уулд күрнә,

Усн бууһад, тиньгр һазр авна,

Тана залсн ормд орна.

⁹ Та давҗ һаршго меҗә һарһвт,

Терүнәс усн алдрҗ хәрү һазр авшго.

¹⁰ Түргәр гүүдг урсхулмудыг

Та уулын хавчгт орулвт.

Уулмудын хоорнд тер турглна,

¹¹ Зерлг аңгуд услна,

Зерлг элҗгнсин унд хаңһана.

¹² Тер урсхулмудын хаҗуд шовуд үүрән ясна,

Тедн ацмуд дунд дууһан дуулна.

¹³ Та теңгрәс уулмуд услнат,

Та күцәмҗтә көдлмшәрн делкә цадхнат.

¹⁴ Та малын төлә өвс урһанат,

Һазрас хот-хол өгхәр,

Зүрк байрлулх чаһр өгхәр,

Чирә гилвкүлдг каңкнсн тос өгхәр,

Зүрк батрах хот өгхәр,

Та күүнә төлә урһмл урһанат.

¹⁶ Деед Эзнә модд девтнә,

Терүнә тәрсн Ливана хошуд модд девтнә.

¹⁷ Тедн деер шовуд үүрән ясна:

Җөөлн цаһан модн деер

Ханчилду шовун үүрән ясна.

¹⁸ Өндр уулмуд зерлг ямана төлә,

Чолун хад тууласин төлә тогтагдв.

¹⁹ Цаг медхин төлә сариг үүдәҗ.

Нарн суух цаган меднә.

²⁰ Таниг харңһу кехлә, сө болна.

Тер цагт ө-шуһу моддын цуг аңгуд йовцхана.

²¹ Баахн арслң аңгуд олз хәәҗ күркрнә.

Бурхна илгәсн хот тедн хәәцхәнә.

²² Нарн һархла,

Тедн хәрү ирцхәнә,

Кевтртән орад кевтцхәнә.

²³ Кергән күцәхәр әмтн һарна,

Көдлмшән асхн күртл кенә.

²⁴ О, Деед Эзн, Тана күцәсн керг олн!

Цугтаһинь Та цецнәр кеввт.

Тана үүлдврәр һазр дүүрв.

²⁵ Тенд өргн, делгү теңгс бәәнә.

Терүнд ик-баһ адусд,

То-тоомҗ уга мөлкдг тоот әмтәнр бәәнә.

²⁶ Тенд керм усчҗ йовна.

Тенд наадҗ бәәтхә гиһәд

Тана үүдәсн теңгсин маңһс бәәнә.

²⁷ Та хотынь цагтнь өгхиг

Тедн цугтан күләҗәнә.

²⁸ Таниг хот өгхлә – авцхана.

Таниг һарарн өгхлә – цадцхана.

²⁹ Таниг чирәһән буру хандхла,

Тедн әәцхәнә.

Таниг кииһинь бәрхлә,

Тедн үкнә,

Тооснд хәрү хүврнә.

³⁰ Таниг кииһинь орулхла,

Шин юмн үүднә.

Та һазр шинрүлнәт.

³¹ Деед Эзнә туурмҗ мөңкинд бәәтхә!

Тер Эврәннь күцәсн кергүдтән байрлтха!

³² Деед Эзн һазр хәләнә,

Тернь чичрнә.

Деед Эзн уулмуд көндәнә,

Тендәс утан һарна.

³³ Би насн турш Деед Эзнд нерәдҗ дуулнав.

Би әмд бәәтлән эврәннь Бурхнд нерәдҗ дуулнав.

³⁴ Мини дун Терүнд тааста болтха,

Би Деед Эзәр байр-бахмҗан кенәв.

³⁵ Һазр деерәс килнцтәнь уга болтха.

Һазр деерәс хар саната әмтн уга болтха.

Деед Эзнд би ханлтан өргнәв!

Деед Эзиг магттн!

¹ Деед Эзиг туурултн.

Терүнә нериг дуудтн.

Деед Эзнә кергин тускар олнд келтн.

² Деед Эзнд нерәдәд дуултн!

Деед Эзнә нериг дуудад дуултн!

Деед Эзнә цуг өвәрц кергин тускар зәңглтн.

³ Деед Эзнә әрүн нернд байрлтн.

Деед Эзиг хәәҗәх әмтнә зүркн байрлтха.

⁴ Деед Эзиг хәәтн.

Терүнә күчиг хәәтн.

Терүнлә оньдинд харһлт хәәтн.

⁵ Деед Эзнә күцәсн сән кергин тускар,

Деед Эзнә өвәрц йовдлын тускар,

Деед Эзнә кесн зарһин тускар,

⁶ Абрахамин хөөт үйнр,

Терүнә ялчнр,

Деед Эзнә шүүҗ авсн Яковин көвүд –

Цугтан теднә тускар тодлад келтн.

⁷ Деед Эзн мадна Бурхн.

Цуг һазрт Тер зарһ кенә.

⁸ Бийиннь бооцаһан Тер мөңк тодлна.

Бийиннь үгән миңһәд үйин улст герәсллә.

⁹ Эннь Абрахамд герәслсн герәсн,

Эннь Ицхакд өгсн андһар болҗана.

¹⁰ Терүгән Яковин заканд орулҗ.

Терүгән Израилин герәснд мөңкинд орулҗ.

¹¹ – Зөөр кеҗ таднд

Канана һазр һарһҗ өгнәв, – гиҗ Тер келҗ.

¹² Тиигхд тедн тооһарн баһ билә,

Тооһарн йир баһ билә.

Тедн Канана һазрт

Талын улс болҗ бәәлә.

¹³ Нег келн-улсас талын улс тал,

Нег орн-нутгас талдан орн-нутг тал

Тедн орҗ йовцхала.

¹⁴ Деед Эзн тедниг

Нег чигн күүнд даҗрулдго билә,

Деед Эзн тедниг харсад хаадыг шооддг билә:

¹⁵ – Мини шүүҗ авсн улсиг бичә көндәтн,

Мини әәлдәчнрт бичә хар сантн.

¹⁶ Бурхн Канана һазрт харһнлт илгәв,

Бурхн хотын умшта юмиг уга кев.

¹⁷ Терүнәс урд тиигәрән кү илгәнә.

Тернь ялчд хулдгдсн Йосип болна.

¹⁸ Терүнә көлинь түүрмд цевләд шавтана,

Терүнә күзүнд төмр өлгнә.

¹⁹ Йосипин келснь эс күцәгдтл

Бурхн терүг зөрҗ үзв.

²⁰ Египетин хан Йосипиг сулдхна,

Олн улсин һардач терүг сулдхна.

²¹ Хан гериннь эдл-ахуһин эзнә ям

Йосипд даалһна.

Хан терүгәр цугтаннь һардач кенә.

²² Тегәд Йосип хаана нойдудыг

Эврәннь седвәрәр сурһх зөвтә билә.

²³ Тиигхд Яков Египетд ирнә,

Тиигхд Израиль Хамовин һазрт бәәлә.

²⁴ Бурхн Бийиннь улсин тооһинь дегд икдүлв,

Тедниг хортнаснь чидлтә кев.

²⁵ Терүгәрн Бурхн Бийиннь улсин өмнәс

Хортынь босхҗ дурго болулв.

Бийиннь ялчнрин өмнәс мек һарһулв.

²⁶ Бурхн Бийиннь ялч Моисеиг илгәв,

Бурхн шүүҗ авсн Ахарониг илгәв.

²⁷ Египетин улст тедн

Бурхна онц темдг үзүлв.

Хамовин һазрт өвәрц йовдл һарһв.

²⁸ Бурхн харңһу кев – харңһу болв.

Терүнә үгиг күн бурушасн уга.

²⁹ Египетин усиг цуснд хүврәв,

Цуг заһсдыг алв.

³⁰ Һазрас олн мекләс һарв,

Нам хаана хорад чигн

Тедн һарч ирцхәв.

³¹ Бурхн келнә – орн-нутгар

Батхн, иләсн дүүрнә.

³² Бурхн хурин ормд мөндр илгәнә,

Египетин һазрт һал цәклүлнә.

³³ Теднә уста үзм, фига нерәдлһтә модд үрнә,

Теднә орн-нутгт модд хуһрҗ унна.

³⁴ Бурхн келнә – тиигәрән то уга

Царцахас, хорхас бууҗ ирнә.

³⁵ Тедн һазр деерк урһмлыг

Цугинь темстәһинь иднә.

³⁶ Деед Эзн Египетин өрк-бүл болһна

Түрүн үрдинь ална.

³⁷ Бурхн Бийиннь улсан Египетәс

цаһан мөңгтә, алтта дахулҗ һарһна.

Тедн дунд гемтә улс уга болна.

³⁸ Тедниг йовхла, египетихн амрна,

Тедн Израилин улсас әәҗәҗ.

³⁹ Бурхн үүлниг бүркәг болтха гиҗ тәвв,

Һалыг сөөһәр герл өгтхә гиҗ тәвв.

⁴⁰ Израилинхн сурцхав –

Хот кех шовуд Бурхн илгәв.

Теңгрин өдмгәр тедниг цадхв.

⁴¹ Бурхн чолуд көндәв –

Терүнәснь хагсу һазрар усн турглв.

⁴² Бурхн Бийиннь ялч Абрахамд өгсн әрүн үгән тодлв.

⁴³ Тер Бийиннь улсан байртаһар дахулҗ һарв,

Терүнә шүүҗ авсн улс байрлхларн хәәкрцхәв.

⁴⁴ Бурхн теднд талдан келн-улсин һазр өгв.

Тедн талдан келн-улсин күч-көлс авцхав.

⁴⁵ Тедн Бурхна герәс хадһлх,

Терүнә закаһар бәәх зөвтә болҗана.

Деед Эзиг магттн!

¹ Деед Эзиг магттн!

Деед Эзн цаһан саната!

Деед Эзнд ханлтан өргтн.

Терүнә дурн мөңкинд бәәнә.

² Деед Эзнә керг хамгин күчтә гиҗ кен келхмб?

Деед Эзиг кен күццднь магтҗ чадхмб?

³ Чик йовдл харсдг күн кишгтә,

Чик йовдл кезә чигн һарһдг күн кишгтә.

⁴ О, Деед Эзн, Бийиннь улстан

Цаһан седклән күртәҗ, мини тускар ухалтн.

О, Деед Эзн, Бийиннь аврлтд намаг орултн.

⁵ Тана шүүҗ авсн улсин күцәмҗ үздгәр,

Тана улсла хамдан байрлдгар,

Тана улсар үлдл зөөр кеһәд бардмндгар тиигтн.

⁶ Бидн мана өвкнрлә әдл

Бас килнцтә йовдл һарһвидн.

Бас хар саната юм кеввидн.

⁷ Мана өвкнр Египетд

Тана өвәрц йовдлын тускар ухалсн уга.

Тана кесг итклтә дурна тускар сансн уга.

Тедн теңгсин көвәд уурлцхав,

Улан теңгсин көвәд уурлцхав.

⁸ Болв Бийиннь чидл медүлхин төлә,

Бийиннь нернә төлә тедниг Бурхн аврла.

⁹ Бурхн Улан теңгсиг закла,

Тернь хагсла.

Бийиннь улсан Тер теңгсин йоралар,

Хагсу һазрар йовулҗ йовсар дахулҗ һарһв.

¹⁰ Бурхн тедниг дурго улсин һарас аврв,

Бурхн тедниг хортна һарас аврв.

¹¹ Теднә хортн уснд авгдв,

Теднәс нег чигн күн әмд үлдсн уга.

¹² Тегәд тедн Бурхна үгд иткнә,

Терүнд магтал өргнә.

¹³ Болв удл уга Терүнә кергиг мартцхана.

Терүнә өгх селвг күләҗ чадсн уга.

¹⁴ Тедн эҗго һазрт йир икәр хот идхәр седцхәв.

Тенд Бурхиг тедн сөрҗ үзнә.

¹⁵ Бурхн теднә сурлһинь күцәнә.

Болв теднд гем өгәд гемтәнә.

¹⁶ Бәәрн һазртнь тедн Моисейд,

Деед Эзнә әрүн гелң Ахаронд үлү үзнә.

¹⁷ Һазр зааград,

Датаниг зальгна,

Дәкәд Абирамиг таньлмудтаһинь дарна.

¹⁸ Теднә багт түүмр шатна,

Түүмрин һал килнцтә улсиг авна.

¹⁹ Хоривин хаҗуд бүрүһин дүрстә шүтә кеһәд,

Терүндән тедн мөргнә.

²⁰ Эврәннь туурмҗан тедн

Эн өвс иддг бүрүһин шүтәнәс сольцхав.

²¹ Египетд алдр керг күцәсн

Бурхиг, эврәннь Аврачиг тедн мартҗ.

²² Бурхн Хамовин һазрт өвәрц йовдл һарһсинь,

Улан теңгсин көвәд өврмҗтә керг Күцәсинь тедн мартҗ.

²³ Тегәд Бурхн тедниг уга кехв гиҗ.

Болв Бурхна шүүҗ авсн Моисей

Терүнә цухлынь зогсахар,

Әмт алулшгон төлә

Бурхна өмн һарад, бийәрн тедниг халхлна.

²⁴ Канана һазриг тедн керго гиҗ.

Бурхна келсн үгиг итклго бәәҗ.

²⁵ Тедн сег дотран керлдәд,

Деед Эзиг соңслго бәәҗ.

²⁶ Бурхн андһар тәвәд,

Тедниг эҗго һазрт хамх цокх болад,

Теднә өмнәс һаран өргнә.

²⁷ Бурхн теднә хөөт үйнриг

Талын келн-улс дунд тараҗ хайх болна.

Тедниг һазр болһар нүүлһх болна.

²⁸ Тедн талын келн-улсин

Пеора гидг уулын хаҗуд бәәсн

Баал гидг бурхнд өөрднә.

Өңгрсн әмтнд тәвсн бәрц тедн идҗ.

²⁹ Тедн һарһсн йовдларн

Бурхиг уурлулад бәәҗ.

Тегәд моом гемәр гемнҗ.

³⁰ Болв Пинехас босад орлцна,

Моом гем давна.

³¹ Иим йовдл һарһсн Пинехас

Тохмас тохмд,

Мөңкинд тоомсрта болна.

³² Израилин улс Мериба гидг усна көвәд

Бурхиг уурлулҗ.

Тегәд Моисей теднәс көлтә зовҗаҗ.

³³ Тер әмтн Моисеиг уурлулҗ,

Тер ухаллго келҗ.

³⁴ Деед Эзнә заасн келн-улсиг Израиль алсмн уга.

³⁵ Болв тедн буру номта улсла нииләд,

Теднә авъяс дасч авцхаҗ.

³⁶ Бәрәнә гөлм болҗасн шүтәнд

Тедн церглдг бәәҗ.

³⁷ Тедн эврәннь көвүд, күүкдәрн

Чөткрмүдт бәрц бәрдг бәәҗ,

³⁸ Буру уга әмтнә цус асхдг бәәҗ.

Канана шүтәнд бәрц бәрәд,

Тедн көвүд, күүкдин цус асхдг бәәҗ.

Тегәд тер һазр цуснас бузрдҗ.

³⁹ Израилин улс кергәрн бийән бийснь бузрдав,

Тедн бәәсн бәәдләрн Бурхнд иткл уга билә.

⁴⁰ Тегәд Деед Эзн Бийиннь улст йир уурлна,

Бийиннь улст дурго болна.

⁴¹ Деед Эзн тедниг буру номта улст орулҗ өгнә.

Тегәд дурго болҗах әмтн теднә эзн болна.

⁴² Хортн тедниг даҗрҗасмн уга,

Израилин әмтн теднә йосна үлмәд орна.

⁴³ Бурхн кесг дәкҗ тедниг сулдхла,

Болв тедн седкләрн буцлт кецхәлә,

Бийиннь килнцәс көлтә уга кегдцхәлә.

⁴⁴ Бурхн теднә хәәкрсиг соңсхларн,

Тедниг зовҗахинь үзлә.

⁴⁵ Теднд үлдәсн Бийиннь герәсән тодлад,

Тер чилгч уга дурта болсндан җөөлрв.

⁴⁶ Тедниг бәрәнд авсн улс дунд

Бурхн өр-өвч бәәдл сергәв.

⁴⁷ О, Деед Эзн, мадна Бурхн,

Авртн мадниг.

Тана әрүн нер туурулдгар,

Тана туурмҗар бардмндгар,

Та келн-улс дундас мадниг цуглулҗ автн.

⁴⁸ Деед Эзн, Израилин Бурхн

Мөңкинд цаһан саната болтха!

Цуг әмтн «Тиигтхә!» гиҗ келтхә.

Деед Эзиг магттн!

¹ Деед Эзн цаһан саната!

Деед Эзнд ханлтан өргтн.

Терүнә дурн мөңкинд бәәнә.

² Тиигҗ Деед Эзнә сулдхсн әмтн келтхә,

Тедниг дәәснәснь Тер сулдхла.

³ Тедниг Тер орн-нутгудас,

Барун болн зүн үзгәс,

Ар болн Өмн үзгәс цуглулҗ авв.

⁴ Зәрмснь күн йовдго көдә һазрар төөрв.

Тедн әмтн бәәдг балһсд олҗ чадсн уга.

⁵ Тедн харһнад, мәәртәд бәәцхәв,

Үклин өмн өргнд күрцхәв.

⁶ Болв тедн һашудхларн

Деед Эзиг дуудцхав,

Деед Эзн тедниг түрү бәәдләснь татҗ авв.

⁷ Деед Эзн тедниг һо хаалһар

Әмтн бәәдг балһсн тал дахулв.

⁸ Деед Эзиг итклтә дурнаснь көлтә туурултха,

Деед Эзиг әмтнд үзүлсн өвәрц йовдларнь туурултха.

⁹ Юңгад гихлә, мәәртҗ, харһнҗ йовсн күүг

Тер сән теткврәр дүүргнә.

¹⁰ Зәрмснь харңһуд, сүүдрин гүүнд

Зовлңдан, төмр чөдрт бәргдсн сууцхав.

¹¹ Тедн Бурхна үг соңссн уга,

Терүнә таал авсн уга.

¹² Деед Эзн тедниг көдлмшәр номһрулв.

Тедн көдлмшәс цуцрад унцхав,

Теднд дөң ирсн уга.

¹³ Болв тедн һашудхларн,

Деед Эзиг дуудцхав,

Деед Эзн тедниг түрү бәәдләс аврв.

¹⁴ Деед Эзн тедниг харңһуһас татҗ авв,

Сүүдрин гүүнәс татҗ һарһв,

Теднә бәрәг хамх цокв.

¹⁵ Деед Эзиг итклтә дурнаснь көлтә туурултха,

Деед Эзиг әмтнд үзүлсн өвәрц йовдларнь туурултха.

¹⁶ Деед Эзн улан мөңгн өргн үүдд болн төмрәр кесн боомтс хамх цокв.

¹⁷ Эргү әмтн килнцтә йовдласн көлтә,

Йосн угаһар бәәснәсн көлтә зовцхав.

¹⁸ Тедн цуг хотас җигшцхәв,

Тедн үклин амнд өөрдәд ирв.

¹⁹ Болв тедн һашудхларн, Деед Эзиг дуудцхав,

Деед Эзн тедниг түрү бәәдләс аврв.

²⁰ Деед Эзн эврәннь үгән теднд күргв,

Тедниг эдгәв,

Тедниг үкләс һарһв.

²¹ Деед Эзиг итклтә дурнаснь көлтә туурултха,

Деед Эзиг үзүлсн өвәрц йовдларнь туурултха.

²² Деед Эзнд магталын бәрц бәртхә,

Деед Эзнә кергин тускар дуулад зәңглтхә.

²³ Теңгст кермәр йовсн улс

Тенд эврәннь кергән кецхәв.

²⁴ Тедн Деед Эзнә кесн кергиг,

Терүнә өвәрц йовдлыг усна гүүнд үзцхәв.

²⁵ Деед Эзиг келхлә,

Чаңһ салькн көдләд,

Теңгсин дольгас өргнә.

²⁶ Теңгст йовсн улс теңгрт күрәд өрггдв,

Тедн йоралд күрәд унцхав.

Тедн зовхларн, зөргән геецхәв.

²⁷ Тедн согту мет эргәд дәәвлцхәв,

Теднә цецнь уга болв.

²⁸ Болв тедн һашудхларн,

Деед Эзиг дуудцхав,

Деед Эзн тедниг

түрү бәәдләснь татҗ авв.

²⁹ Деед Эзн аюлыг төвшүн бәәдлд хүврәв,

Теңгсин дольгас тогтнулв.

³⁰ Эргндән тогтнхла,

теңгст йовсн улс байрлцхав,

Тедниг Тер седклнь туссн эрг тал авч ирв.

³¹ Деед Эзиг итклтә дурнаснь көлтә туурултха,

Деед Эзиг үзүлсн өвәрц йовдларнь туурултха.

³² Деед Эзиг улсин хургт туурултха,

Деед Эзиг медәтнрин хургт туурултха.

³³ Деед Эзн һолмудыг көдә һазрт хүврәнә,

Деед Эзн усна булгудыг хагсу һазрт хүврәнә.

³⁴ Деед Эзн килнцтә әмтнәс көлтә

Теднә урһцта һазриг давста һазрт хүврәнә,

³⁵ Көдә һазриг уста нуурт хүврәнә,

Хагссн һазриг усна булгт хүврәнә.

³⁶ Деед Эзн тенд харһнҗах улс бәәлһнә,

Тедн бәәрлх балһс тосхна.

³⁷ Тер улс тәрә тәрнә,

Уста үзмин модд тәрнә,

Терүнәсн ик урһц авна.

³⁸ Деед Эзн теднд цаһан санаһан күртәнә,

Тер улс тооһарн йир өснә,

Теднә малын тонь баһрхш.

³⁹ Даҗргдснас көлтә,

Түрү бәәдләс, зовлңгас көлтә

Бурхна улсин тонь баһрла.

⁴⁰ Тиигәд Деед Эзн хортна нойдудт дурго болна.

Тедниг хаалһ уга көдә һазрт төөрүлнә.

⁴¹ Угатя улсиг түрү бәәдләс татҗ авна,

Теднә тохма улсиг хөөнә сүрг мет өскнә.

⁴² Энүг чик седклтә улс үзәд байрлна,

Килнцтә улсин дууһинь күчәр таслна.

⁴³ Цецн күн цуг терүнә тускар медх,

Деед Эзнә итклтә дурна тускар ухалх.

Дун. Давидин псалм.

² О, Бурхн, би Танд бүклднь иткҗәнәв,

Би дуулад, Таниг туурулнав.

³ Би серәд ду дуулнав!

Би серәд ятх чимкәд цокнав!

Би өрәс өмн сернәв.

⁴ О, Деед Эзн, би Таниг

олн-әмтн дунд туурулнав.

Таниг би келн-улс дунд буульхв.

⁵ Тана итклтә дурн теңгрәс өөдлх,

Тана иткмҗ үүлд деер делгрнә!

⁶ О, Бурхн, теңгрәс деегшән өрггдтн,

О, Бурхн, цуг һазр деер

Тана туурмҗ делгртхә!

⁷ Та Эврәннь күчәр мадниг авртн,

Бидн, Тана дурта әмтн, сулддгар

Мини эрлһиг соңстн.

⁸ Эврәннь сүмәс Бурхн иигҗ келҗ:

«Би диилвр бәрсн төләдән

Шекем балһс хуваҗанав,

Соккот гидг тиньгр һазр түгәҗәнәв.

⁹ Гилад гидг орн-нутг Мини,

Манаше гидг һазр Мини,

Эприм гидг һазр Мини дуулх,

Йуда Мини очр.

¹⁰ Моав гидг нутгар

Би нүр уһадг сав мет кенәв,

Едом нутг деер Би һосан хайнав.

Тернь би эзньв гисн темдг болх.

Би пилистмүдин һазр диилҗ авсндан байр-бахмҗ кенәв».

¹¹ Кен намаг тер батрсн балһснд орулхмб?

Кен нанд Эдомиг диилх диилвр өгчәнә?

¹² Та, Бурхн, мадниг хайсн болвзат?

Та мана дәәчнрлә хамдан

Мадна хортна өмнәс дәәлдхәр йовшговт?

¹³ Та мана хортна өмнәс маднд дөңгән күргтн,

Юңгад гихлә, әмтнә харслтд тус уга.

¹⁴ Бурхна дөңгәр бидн

ноолданд диилхвидн.

Тер мана хортниг дарх.

Көгҗмин һардачд.

Давидин псалм.

¹ О, мини буульҗах Бурхн,

Бичә тагчг бәәтн.

² Намаг килнцтә болн

хорта әмтн бурушаһад,

Му нер өгнә,

Мини тускар тедн худл келнә.

³ Намаг бүсләд, дурго болсн үгмүд соңсхна,

Намаг учр угаһар дәврцхәнә.

⁴ Би теднә төлә зальврсн бийнь,

Мини дурна хәрүд тедн дәврцхәнә.

⁵ Мини цаһа санснд хар санцхана.

Мини дурна хәрүд дурго болцхана.

⁶ О, Бурхн, мини хортна зарһиг

Буру бәәдлтә зарһч кетхә гиҗ тәвтн.

Тегәд терүг эврә хортн бурушатха.

⁷ Хортнамм зарһ кехлә, бурута болҗ тер һартха,

Нам терүнә зальврлһн килнц болҗ тоолгдтха.

⁸ Мини хортна насн ахр болтха,

Терүнә ормд талдан күн ортха.

⁹ Терүнә үрд өнчртхә,

Терүнә гергн белвсртхә!

¹⁰ Терүнә үрд тенәд, һууль һуутха,

Тедниг нурсн герәснь көөтхә.

¹¹ Өгйәлч күн бәәсинь кевтнь булаҗ автха,

Талын әмтн терүнә күч-көлснә зөөринь таратха.

¹² Нег чигн күн терүнд сән юм бичә кетхә,

Нег чигн күн терүнә өнчрсн үрдтнь бичә сана зовтха.

¹³ Мини хортна хөөт үйнр цугтан алгдтха,

Хөөт үйнриннь нерн шулуһар мартгдтха.

¹⁴ Деед Эзн

Мини хортна эцкнрин килнц бичә марттха,

Деед Эзн

Мини хортна экин килнц бичә тәвҗ өгтхә,

¹⁵ Деед Эзн

Теднә килнцин тускар кезә чигн сантха,

Деед Эзн

Теднә туск санлыг һазр деерәс уга кетхә.

¹⁶ Талдан әмтнд хортн дөң күргсн уга.

Нам түрү бәәх, дөң хәәҗәх, зовҗ йовх әмтиг

Тер мөрдәд алдг билә.

¹⁷ Тер кү харахдан дурта,

Эврән харалла харһтха.

Тер йөрәл тәвхдән дурго,

Терүг нег чигн күн бичә йөрәтхә.

¹⁸ Хувцан таслвр уга өмсдглә әдләр

Тер харал тәвнә.

Терүнә харал, ууҗах уснла әдл, гиигнәр бийднь орг,

Каңкнсн тоснла әдл терүнә яснд ивтрг.

¹⁹ Мини хортнд харал, өмсчәх лавшг мет,

Оньдинд бүслҗәх бүснь мет болтха.

²⁰ Тиим өшән мини хортнд, нанд хар санҗах әмтнд

Деед Эзнәс иртхә.

²¹ Болв Та, Деед Эзн Бурхн,

өгсн үгиннь төлә нанд сә кетн,

Тана итклтә дурн сән болснд

Та намаг авртн!

²² Би түрҗәнәв, дөң кергтә.

Мини зүркн икәр зовҗана.

²³ Би асхни сүүдр мет урсчанав.

Би салькнд цокгдҗах

царцахала әдл болҗанав.

²⁴ Хот тату болсар

мини өвдгт чинән уга,

Өөкн тату болсар

мини цогц-махмуд эццн.

²⁵ Намаг бурушадг улст

би наадн болҗанав,

Намаг үзхләрн, тедн дурго болад,

толһаһан заальна.

²⁶ О, Деед Эзн, мини Бурхн,

Дөңгән нанд күргтн!

О, Деед Эзн, мини Бурхн,

Итклтә дурнаннь төлә намаг авртн!

²⁷ О, Деед Эзн,

Энтн Тана һарин керг болҗахиг медтхә!

О, Деед Эзн,

Та намаг аврсн Бурхн болҗахиг медтхә!

²⁸ Мини хортн намаг харахла,

Та нанд әдс өгтн.

Мини хортн намаг дәврхлә,

Та тедниг ичәтн.

Болв би, Тана зарц, байрлсув.

²⁹ Тедн ичр уга бәәдлдән бәргдтхә.

Хувц өмсснлә әдләр Тедн ичрәрн бүркгдтхә.

³⁰ Би седклән тәвҗ Деед Эзиг туурулнав.

Би цуг әмтнә өмн Терүг туурулнав.

³¹ Юңгад гихлә, түрү бәәх күүг

Хаҗһрар бурушаҗах улсас харсхин төлә

Деед Эзн терүнә барун бийднь бәәнә.

Давидин псалм.

¹ Деед Эзн мини эзнд иигҗ келнә:

«Чини дәәсдиг дииләд

көл дорчнь эс тәвтл

Чи Мини барун бийд су».

² Деед Эзн Сион деерәс чамд хаана йосна мотр өгх.

– Бийән бүслҗәх дәәсдиннь нойн бол, – гиҗ келх.

³ Эврәннь әәрмән дәәнд дахулҗ йовхла,

Чини улс сән дурар чамд орҗ өгх.

Әрүн күчәр дүүрчәх чи

Өрүнд үзгддг чиг мет

Өдр ирвәс шинрҗәнәч.

⁴ – Мелкицедекин ямар чи

мөңкинд гелң болҗанач, – гиҗ

Деед Эзн андһар өглә, терүгән сольшго.

⁵ Деед Эзн чамаг харсхин төлә

Чини барун бийд бәәнә.

Кемр Тер уурлхларн, олн хаадудыг диилх.

⁶ Деед Эзн келн-улсин зарһ кех,

Һазриг үксн улсин цогцар бүтәх.

Һазр деерк залачнриг ка цокх.

⁷ Хан хаалһдан булгас ус уух,

Тегәд чидл авад, диилвртә зогсх.

¹ Деед Эзиг магттн!

Чик седклтә улсин цуглрсн хургт

Деед Эзиг зүркнәсн магтнав.

² Деед Эзнә керг алдр!

Терүгәр бахмҗ кеҗәх улс

Терүнә тускар ухалцхах.

³ Деед Эзнә керг

Терүнә туурмҗинь, ик сүринь үзүлҗәнә,

Терүнә үнн мөңкинд бәәнә.

⁴ Деед Эзн

Бийиннь өвәрц йовдлан мартгдшгоһар кев.

Деед Эзн цаһан саната, өр-өвч.

⁵ Деед Эзн

Бийән күндлснд хот өгнә,

Деед Эзн мөңкинд бийиннь бооцаһан тодлна.

⁶ Бийиннь күчтә кергән әмтндән

Тер үзүлв,

Теднд буру номта улсин һазр

Тер һарһҗ өгв.

⁷ Деед Эзнә һарин керг – үнн болн зарһ болҗана.

Деед Эзнә цуг заавр иткмҗтә.

⁸ Теднь оньдинд бат,

Теднь үннәс болн зөвәс үүдв.

⁹ Деед Эзн

Бийиннь улстан сулдхвр илгәв,

Деед Эзн

Бийиннь бооцаһан мөңкинд батлв.

Терүнә нерн әрүн болн өврмҗтә.

¹⁰ Деед Эзиг икәр күндллһн –

цецн ухана эклц болҗана.

Энүг күцәсн цуг әмтнә ухань чик.

Деед Эзнд мөңкинд

магтал тәвгддг.

¹ Деед Эзиг магттн!

Деед Эзиг күндлсн күн кишгтә.

Деед Эзнә зааврар бәәхдән дурта күн кишгтә.

² Тиим күүнә үрднь һазр деер батрх.

Чик седклтә улсин тохм әдслгдх.

³ Терүнә герт зөөр дала-нала болад бәәх.

Терүнә үнн мөңкинд бәәнә.

⁴ Чик седклтә улсин төлә харңһуд герл һарһх.

Тедн цаһан саната, өр-өвч, үннч.

⁵ Цаһан саната күн өгйәһәр икәр өгнә,

Тиим күн үннәр кергән күцәнә.

⁶ Тер мөңкинд көндршго,

Тиим күн оньдинд уханд орад бәәх.

⁷ Тер му зәңгәс әәхш,

Деед Эзнд итксәр

Терүнә зүркн бат.

⁸ Терүнә зүркн тогтун,

Эврәннь хортна шүүгдлһ эс үзтлән,

Тер әәшго болҗана.

⁹ Цаһан саната күн һуульһнчд икәр өгнә.

Тиим күүнә чик санан оньдинд бәәнә.

Тиим күн чидлтә, сән заңта.

¹⁰ Килнцтә күн терүг үзәд,

Уурлх, шүдән хәврх, уга болх.

Тиим күүнә седвәрнь хоцрх.

¹ Деед Эзиг магттн!

Зарцнр, Деед Эзиг магттн!

Деед Эзнә нериг магттн!

² Деед Эзнә нерн эндрәс авн

мөңкинд туурмҗта болтха.

³ Нарн һарх үзгәс суух үзг күртл

Деед Эзнә нерн тууртха!

⁴ Деед Эзн цуг келн-улсас өөдән бәәнә.

Деед Эзнә туурмҗ теңгрәс ик.

⁵ Деед Эзнәс, мадна Бурхнас, өөдән кен бәәдви?

⁶ Теңгр һазр хойриг Тер өкәҗ хәләнә?

⁷ Деед Эзн тоормас угатя күүг босхна,

Деед Эзн һуульһнчиг түрү бәәдләснь һарһна.

⁸ Терүг нойдудла суулһхар тиигнә.

Бийиннь улсин нойдудла суулһхар тиигнә.

⁹ Деед Эзн үр һарһдго күүкд күүг

Бичкдүдтән байрлҗах эк кеһәд,

Гертнь орулна.

Деед Эзиг магттн!

¹ Израилиг Египетәс һархла,

Яковин гер талын улсас сулдхла,

² Йуда – Бурхна әрүн сүмнь болв.

Израиль – Бурхна зөөрнь болв.

³ Терүг теңгс үзәд заагрв,

Йордана нертә һол хәрү эргҗ урсв.

⁴ Уулмуд хөд мет чичрцхәнә,

Довуд хурһд мет өсрцхәнә.

⁵ Теңгс, чамла юн болв?

Юңгад заагрвч?

Йордана һол, яһад хәрү гүүввч?

⁶ Уулмуд, тадн яһад хөөдлә әдл чичрцхәвт?

Довуд, тадн хурһдла әдл яһад тогльцхавт?

⁷ Цуг һазр, Деед Эзнә нүүрт,

Яковин Бурхна нүүрт әәцхәтн.

⁸ Деед Эзн цуг һазра уулын хадыг нуурин уснд,

Хату чолуг усна булгт хүврәлә.

⁹ Тана бат дурн бәәсәр,

Тана иткмҗ бәәсәр,

Деед Эзн, маднд биш,

Бийиннь нернд магтал өргтн.

¹⁰ Тегәд «Теднә Бурхн альдв?» гиҗ

Талын улс яһад келнә.

¹¹ Мадна Бурхн теңгрәс деегшән бәәнә.

Тер седсән үүдәнә.

¹² Талын улсин шүтән күүнә һарар

Цаһан мөңгнәс, алтн төмрәс кегдсмн.

¹³ Теднд амн бәәнә,

Болв тедн келхш.

Теднд нүдн бәәнә,

Болв үзхш.

¹⁴ Теднд чикн бәәнә,

Болв соңсхш.

Теднә хамрт нүкн бәәнә,

Болв үнр соңсхш.

¹⁵ Теднд хойр һар бәәнә,

Болв әмн уга.

Теднд хойр көл бәәнә,

Болв йовҗ чадхш.

Теднә хоолас ә һархш.

¹⁶ Тедниг тиим бәәдлтәһәр кеснь,

Теднд нәәлснь,

Тедниг бийсинь дуратха.

¹⁷ Израилинхн! Деед Эзнд нәәлтн.

Тер тана дөң болн халхц.

¹⁸ Ахарона хөөт үйнр! Деед Эзнд нәәлтн.

Тер тана дөң болн халхц.

¹⁹ Деед Эзнәс әәҗәх улс!

Терүнд нәәлтн.

Тер тана дөң болн халхц.

²⁰ Деед Эзн мадна тускар ухална,

Деед Эзн мадниг әдслнә.

Деед Эзн Израилин гериг әдслҗәнә,

Деед Эзн Ахарона гериг әдслҗәнә.

²¹ Деед Эзн Бийәсн әәсн улс әдслҗәнә –

Эгл улс болн ямта улс әдслҗәнә.

²² Теднә өрк-бүлин тоог Тер икдүлтхә.

Тана хөөт үйнр өстхә.

²³ Теңгр һазр хойр үүдәсн

Деед Эзнәс әдс автн.

²⁴ Теңгр Деед Эзнә,

Һазриг Тер делкән улст өгв.

²⁵ Өңгрсн улс

Деед Эзиг буульшго,

Үкәрин тагчг бәәдлд орснь

Деед Эзиг буульшго.

²⁶ Болв бидн Терүг эндрәс авн мөңкинд магтхвидн.

Деед Эзиг магттн!

¹ Деед Эзнд би дуртав, юңгад гихлә,

Тер мини ду соңсна.

Тер мини зальврлһ соңсна.

² Тер нанд чикән өгәд соңсна,

Терүг би насн туршартан дууднав.

³ Намаг үклин гем авн алдв,

Би үкәрин амнд күрүв,

Би түрәд зовҗалав.

⁴ Тиигхләрн би Деед Эзиг дуудув:

– О, Деед Эзн, Таниг сурҗанав!

Намаг авртн!

⁵ Деед Эзн цаһан саната,

Деед Эзн чик седклтә.

Мадна Бурхн өр-өвч.

⁶ Деед Эзн эгл улсиг хәләнә,

Би даҗргдув.

Тер намаг аврв.

⁷ О, седклм, тогтн. Юңгад гихлә,

Деед Эзн чамд буйн кишг өгчәнә.

⁸ Та мини седклиг үкләс сулдхвт,

Мини нүднә нульмс хагсаввт,

Мини көлиг бүдрлһнәс саглулвт.

⁹ Тана хаҗуд би әмд улсин дунд йовхв.

¹ Би Деед Эзнд иткләв,

Тегәд келләв:

– Би дегд цокгдув.

² Би әәхләрн келҗв:

– Цуг улс худлч, – гиҗ.

³ Деед Эзн цаһан санаһан күртәснд

Би ю өгхмби?

⁴ Деед Эзн намаг аврснд

Би ханлтан өргәд,

Чаһр авч ирнәв.

⁵ Деед Эзнә улсин нүүрт

Би андһаран күцәнәв.

⁶ Әрүн улсиннь үкл даахд

Терүнд йир күнд болҗана.

⁷ О, Деед Эзн, би Тана ялчв.

Би Тана ялч болн ялчин көвүмб.

Та намаг бәрәнәсм сулдхвт.

⁸ Танд ханлтан өргәд,

Би бәрц бәрнәв,

Тана нер дууднав.

⁹ Тана улсин нүүрт,

Тана әрүн герин һаза,

Ерусалимин дунд,

Би андһаран күцәнәв.

Деед Эзиг магттн!

¹ Цуг келн-улс, Деед Эзиг магттн!

Цуг отга улс, Терүг магттн!

² Юңгад гихлә, маднд өгчәх

Терүнә сольлт уга дурн алдр,

Терүнә иткмҗ мөңк болҗана.

Деед Эзиг магттн!

¹ Деед Эзн цаһан саната!

Деед Эзнд ханлтан өргтн.

Терүнә дурн мөңкинд бәәнә.

² Израилинхн иигҗ келтхә:

«Деед Эзнә дурн мөңкинд бәәнә».

³ Ахарона хөөт үйнр иигҗ келтхә:

«Деед Эзнә дурн мөңкинд бәәнә».

⁴ Деед Эзнәс әәдг әмтн иигҗ келтхә:

«Деед Эзнә дурн мөңкинд бәәнә».

⁵ Зовхларн, би

Деед Эзиг дуудув,

Деед Эзн намаг соңсна.

Деед Эзн намаг сулдхна.

⁶ Деед Эзн намаг харсна.

Би тас юмнас әәҗәхшв.

Нег чигн күн нанд хоран күргшго.

⁷ Деед Эзн нанд дөң болна.

Би хортан диилгдсинь үзхәр бәәнәв.

⁸ Күүг иткхәр,

Деед Эзиг итксн деер.

⁹ Нойдудыг иткхәр,

Деед Эзиг итксн деер.

¹⁰ Намаг олн улс эргәд бүслв,

Болв би Деед Эзнә нериг дуудад

тедниг уга кевв.

¹¹ Тедн намаг бүсләд авчкла,

Болв би Деед Эзнә нериг дуудад

тедниг уга кевв.

¹² Тедн зөг мет нан деер бигшҗәнә,

Тедн хагсу өвснә һал мет унтрв.

Болв би тедниг

Деед Эзнә нерәр уга кевв.

¹³ Намаг унтха гиһәд чаңһар түлкцхәв,

Болв Деед Эзн намаг дөңнв.

¹⁴ Деед Эзн мини чидл, мини дун.

Тер мини аврлт болв.

¹⁵ Байрин болн аврлтын дун

Бурхна улсин герт бәәнә:

Деед Эзнә күчн диилвр өгчәнә!

¹⁶ Деед Эзнә күчн өөдлҗәнә,

Деед Эзнә күчн диилвр өгчәнә!

¹⁷ Би үкшгов, әмд бәәһәд,

Деед Эзнә кергин тускар зәңглнәв.

¹⁸ Тер намаг йир икәр засглв,

Болв үкүлсн уга.

¹⁹ Бурхна улсин өргн үүд нанд сектн,

Терүгәр орад, би Деед Эзиг магтнав.

²⁰ Деед Эзнә өргн үүдн эн,

Терүгәр чик седклтә улс орх.

²¹ Намаг соңсснтн, намаг аврҗ авснтн би Таниг магтҗанав.

²² Тосхачнрин һолсн чолун

Өнцгин һол чолун болв.

²³ Бурхн энүг күцәв.

Бидн терүг үзәд өврвидн.

²⁴ Эн өдриг Бурхн үүдәв,

Бидн тер өдрт байрлад нәәрлнәвидн.

²⁵ О, Деед Эзн, авртн мадниг!

О, Деед Эзн, маднд күцәмҗс өгтн!

²⁶ Деед Эзнә нерәр ирҗәхнь әдслгдтхә!

Деед Эзнә сүмәс тадниг әдслҗәнәвидн.

²⁷ Деед Эзн – Бурхн.

Тер маднд герл өгнә.

Нәәрт бәрх бәрцән деесәр боотн,

Терүгән бәрцин ормд күргтн.

²⁸ Та мини Бурхнт,

Тана нериг би туурулнав.

Та мини Бурхнт,

Таниг би икәр күндлнәв.

²⁹ Деед Эзн цаһан саната!

Деед Эзнд ханлтан өргтн.

Терүнә дурн мөңкинд бәәнә.

¹ Деед Эзнә зааврар бәәсн цевр седклтә улс җирһлтә,

кишгтә болна.

² Терүнә сурһалиг хадһлсн,

Терүг зүркәрн хәәдг улс кишгтә.

³ Тиим улс му юм һарһхш,

Тедн Деед Эзнә седсәр бәәнә.

⁴ Та Тана заавриг батар хадһлтха гиҗ заквт.

⁵ О, кемр мини хаалһ

Тана заавр күцәх үзг тал һарсн болхнь!

⁶ Тиигхләг би Тана цуг зааврт оньган өгхдән ичшго биләв.

⁷ Би Тана чик зарһиг дасч авн,

Таниг цевр зүркнәсн магтнав.

⁸ Би Тана заавр күцәнәв.

Та намаг бичә хайтн.

⁹ Баахн көвүн эврәннь җирһлән яһҗ цеврәр бәрхмби?

Зуг Тана үгиг хадһлад бәәх кергтә.

¹⁰ Би Таниг үнн седкләрн хәәҗәнәв.

Тана зааврас хаҗих йовдл бичә нанд учратн.

¹¹ Тана өмнәс килнц һарһдгоһар,

Тана үгиг би зүркндән бәрәд йовнав.

¹² О, Деед Эзн, Та цаһан санатат!

Та заавран нанд дасхтн.

¹³ Тана өгсн цуг заавриг

Би чееҗәр келҗ давтнав.

¹⁴ Тана сурһаляс би

Ик зөөр олсарн байрлнав.

¹⁵ Тана зааврин тускар ухалнав,

Тана бәәдлд оньган өгнәв.

¹⁶ Тана заканд би байрлнав,

Тана үгиг би басчахшв.

¹⁷ Тана үгиг хадһлад йовдгар,

Та нанд, Эврәннь зарцд, хәәрлтән күргтн.

¹⁸ Тана закана өвәрц бәәдлинь үздгәр,

Та мини нүдим сектн.

¹⁹ Би һазр деер йовдсн күмб.

Та нанас Бийиннь заавран бичә бултултн.

²⁰ Тана зарһин седвәр намаг оньдинд авлна.

²¹ Тана зааврас хаҗисн деегүр саната, харалла харһсн улсиг Та гемшәввт.

²² О, Деед Эзн, әмтнә харалас, му келнәс намаг сулдхтн.

Юңгад гихлә, би Тана сурһаль хадһлҗанав.

²³ Хаад негдәд, нанд хар санна.

Би, Тана зарц,

Тана закана тускар ухалҗанав.

²⁴ Тана сурһаль нанд байр болҗана,

Мини багш болҗана.

²⁵ Би үкҗәнәв,

Та намаг үгәрн әмдрүлтн.

²⁶ Би Танд бийиннь җирһлин тускар келләв,

Та намаг соңсвт.

Та нанд закаһан дасхтн.

²⁷ Та нанд заавриннь учр-утхинь медх арһ өгтн.

Би Тана өвәрц йовдлын тускар ухалнав.

²⁸ Би һундрхҗанав,

Та үгәрн намаг батратн.

²⁹ Та намаг худлас хольҗултн.

Та нанд Эврәннь закаһан дасхтн.

³⁰ Би итклин хаалһ шүүҗ авув,

Би Тана зарһар һардвр кеҗәнәв.

³¹ О, Деед Эзн,

Би Тана сурһальд седклән тәвүв.

Та намаг ичх учрла бичә харһултн.

³² Би Тана заавр күцәхәр адһҗанав,

Та нанд икәр уха орулҗанат.

³³ О, Деед Эзн, Тана закад медх арһ нанд өгтн,

Тегәд би терүгәр оньдинд һардвр кесв.

³⁴ Та нанд серглң бәәдл өгтн,

Тана закаһар би һардвр кенәв,

Терүг би зүркндән хадһлнав.

³⁵ Та намаг Эврәннь зааврин хаалһд орултн,

Юңгад гихлә, би терүнд йир байрлҗанав.

³⁶ Та мини зүркнд ик зөөр биш,

Тана сурһалиг медҗ авх арһ өгтн.

³⁷ Керг уга юм үздгоһар,

Та мини нүдиг хаатн.

Эврәннь үгәр намаг әмдрүлтн.

³⁸ Таниг соңсдг нанд,

Тана зарцд, өгсн үгән күцәтн.

³⁹ Мини әәҗәх баслһнас намаг сулдхтн,

Тана зарһ сән.

⁴⁰ Тана сурһмҗ би авхар седҗәнәв.

Та намаг чик седкләрн әмдрүлтн.

⁴¹ О, Деед Эзн, Тана итклтә дурн нанд иртхә,

Тана өгсн үгәр Тана аврлт иртхә.

⁴² Намаг басчах күүнд

Тегәд би хәрүһинь өгхв.

Би Тана үгд нәәлҗәнәв.

⁴³ Та нанас чик үг бичә булаҗ автн,

Би Тана зарһд нәәлҗәнәв.

⁴⁴ Би Тана закаг оньдинд хадһлхв,