ПИЛИПИНХН

Христост иткдг Пилипин улст илгәсн бичг

Эн бичгиг Павел түрүн чонҗд нерәдҗ бичсмн. Тер чонҗиг Римин хаҗудк Македонь гидг һазрт Павел бүрдәҗ. Тер цагт Павел түүрмд бәрәтә бәәҗ. Христианск талдан көдләчнр Павелд оппозиц болхла, түүнә санань зовна, дәкәд Пилипин чонҗд худл ном тархаҗаснд бас үрүднә. Тер бийнь Павел Исус Христост батар иткәд бичсн бичгнь йир байрта, итклтә болҗ медгднә. Иим бичг илгәснә учрнь юундв гихлә, Пилипид бәәх иткдг улс түрү цагтнь бийинь дөңнәд белг илгәснд Павел ханлтан өргҗәнә. Тер саамиг бас нег олзлад, тедн чигн, бийнь түрү-зүдү үзсн болв чигн зөргтә болн бийдән итклтә болтн гиҗ дәкн урмд өгнә. Павел тедниг бийән Исусла әдл бәрәд, ядардган, деерлкдгән хаяд тогтун бәәтхә гиҗ сурҗана.

Исус Христосла негдәд бәәсн иткдг улсын җирһл Бурхна белг болҗахиг Павел теднд сергәһәд келҗәнә. Тер белгиг тедн евреймүдин Зака күцәһәд биш, зуг иткләр дамҗад авчана. Христоста негдәд бәәсн улст Бурхн байрта, тогтун җирһл өгчәхин тускар Павел бичҗәнә.

Эн бичг байрин, иткмҗтә бәәдлин, негдлтин, итклһнә болн җирһлин тесвр үзүлҗәнә. Тедү мет Павел Пилипид бәәх чонҗд ямаран дуртаһинь медүлҗәнә.

Учр-утхин зура

Нүр үг. 1.1–11

Павелын эврә керг 1.12–26

Христосла нииләд бәәлһн 1.27 – 2.18

Тимофейин болн Эпапродитин төлә кесн зура 2.19–30

Өшәтнәс болн әмшгәс сагллһн 3.1 – 4.9

Павел болн терүнә иньгүд Пилипид 4.10–20

Товчлгч үг 4.21–23

Мендллһн

¹ Исус Христосин зарцнр Павелас болн Тимофеяс Христос Исусла ниилснд Пилип хотнд бәәх Бурхна улст, чонҗин ахлачнрт болн нөкднрт. Мана Эцк Бурхн болн Деед Эзн Исус Христос цаһан сана болн амулң бәәдл таднд өгтхә!

Павелын зальврснь

³ Тана тускар санҗасн цагтан би Бурхндан оньдин ханлт өргнәв. ⁴ Тана тускар зальврҗасн цагтан оньдин байртаһар зальврнав. ⁵ Учрнь иим: тадн намаг Сән Зәңг тархахд түрүңк өдрәс авн ода күртл нөкд болҗ йовнат. ⁶ Тана седклд тиим сән көдлмш эклҗ үүдәсн Бурхн эн көдлмшән Исус Христосиг иртл күцәх гиҗ би лавта меднәв. ⁷ Тана тускар тиигҗ ухалсм чик болҗана, яһад гихлә, тадн оньдин мини зүркнд. Нанд өггдсн церглтд тадн цуһар оньдин орлцҗ йовлат. Ода чигн, намаг түүрмд суусн цагтм чигн, Сән Зәңг харсҗ батлсн цагтм чигн тадн тиигҗ йовлат. ⁸ Исус Христосла әдл би таднд дурта болдгиг Бурхн герч. ⁹ Тана дурн улм өстхә, тадниг улм икәр медтхә, чикәр ухалтха гиҗ би зальврҗанав. ¹⁰ Тиигхлә тадн сәәнинь йилһҗ чадхит. Христосиг ирхлә, тадн цевр болн буру уга болхит. ¹¹ Тадн Христосин өгдг чик бәәдлин дала сән йовдлта болхит. Эн цугтан Бурхнд туурмҗ болн магтал ирүлх.

Мини җирһл – Христос

¹² Ахнр-дүүнр! Нанла учрсн йовдл күцәмҗтәһәр Сән Зәңг тархахд нөкд болсинь би таднд зәңглхәр седҗәнәв. ¹³ Намаг Христосин төлә түүрмд суусиг хаана бәәшңд бәәсн улс болн наадк улс цугтан меднә. ¹⁴ Намаг түүрмд суусн учрас ахнр-дүүнрин ик зунь Деед Эзнд батар иткдг болв, тедн Сән Зәңгиг улм зөргтәһәр болн әәмшг угаһар тархадг болв.

¹⁵ Үнәр келхд, зәрм әмтн нанд үлү үзәд, нанла дөрлдхәр Христосин туск ном цәәлһҗәнә. Болв зәрмснь болхла, сән седвәрәр тиигҗәнә. ¹⁶ Сән Зәңг харсх көдлмшт Бурхн намаг орулсинь медәд, эдн нанд дурта болад цәәлһҗәнә. ¹⁷ Талдан улс болхла эврәннь сә хәәһәд, Христосин туск номиг әрүн седкләрн цәәлһҗәхш. Түүрмд бәәсн цагтм намаг икәр зоваҗ чадх гиҗ тедн санҗана. ¹⁸ Тиигв чигн юмб?! Тедн ямаран чигн учрар: сән седвәрәр эс гиҗ эврәннь сә хәәсн учрар Христосин туск ном цәәлһдгнь йилһл уга. Христосин тускар тедн келҗәхнь хамгин ик чинртә. Энүнд би байрлҗанав. Би цааранднь чигн байрта бәәхв. ¹⁹ Яһад гихлә, тана зальврсар болн нанд Исус Христосин Сәкүсн нөкд болсар би эн түүрмәс һархв гиҗ санҗанав. ²⁰ Би кех зөвтә кергән оньдин күцәхв гиҗ халун зүркәрн күсл кеҗ нәәлҗәнәв. Ода болн оньдинд би әмд бәәв чигн, үкв чигн эврәннь цогцарн Христосиг зөргтәһәр туурулхв. ²¹ Мини җирһлин күсл – Христос. Кемр намаг өңгрхлә, нанд олзта болх. ²² Кемр нанд әмд бәәх цаг бәәхлә, би олн туста йовдлмуд кеҗ күцәхв. Зуг юуһинь шүүҗ авхинь би медҗәхшв. ²³ Би хойраһинь шүүҗ авх санатав. Эн җирһләс салҗ Христосла харһад бәәхәр седҗәнәв. Эннь хамгин деер болх. ²⁴ Зуг тана төлә нанд әмд бәәх кергтә. ²⁵ Би әмд бәәхән лавта меднәв. Тадниг итклдән өсхд, иткләс һарсн байр авхд нөкд болхар би таднла үлдхв. ²⁶ Намаг таднур дәкәд ирхләрн Исус Христосла ниилсндтн нанар буульмҗ кехд танад дала учр олдх.

²⁷ Зуг Христосин Сән Зәңглә ирлцҗ бәәтн. Ни-негн бәәтн. Сән Зәңгин итклин төлә ноолдтн. Кемр би ирхлә, тана эн бәәдлиг үзхв, кемр эс ирхлә, энүнә тускар соңсхв. ²⁸ Юунд чигн өшәтнрәс бичә әәтн. Эн бәәдл теднд үкх гисн темдг, маднд аврх гисн темдг. Цуг эн Бурхнас. ²⁹ Христост һанцхн иткх биш, болв Терүнә төлә зовх зөв Бурхн таднд өглә. ³⁰ Тадн нанла әдл ноолдҗанат. Намаг яһҗ ноолдсинь тадн үзсн биләт, болв яһҗ би ноолдҗахинь ода соңсҗанат.

¹ Кемр тадн Христосла нииләд нөкд авчахла, Терүнә дурн тадниг төвкнүлҗәхлә, Әрүн Сәкүснлә хамдан бәәхлә, санан зовҗ өр өвчәхлә, намаг улм ик байрта кетн. Хоорндан таарч нег-негндән әдл дурта болтн, ухан-седкләрн негдҗ нег күслтә болтн. ³ Бийдән олз хәәҗ, нер хәәҗ юм бичә кетн. Бийән номһрулҗ хоорндан бәәтн. Кен чигн талдан күүг бийәсн деер тоолтн. ⁴ Тадна кен чигн һанцхн эврәннь арһ хәәлго, әмтнә арһ хәәтхә.

⁵ Исус Христосла әдл ухалтн. ⁶ Исус Бурхн болв чигн Бийән Бурхнла әдлцхәр зүткх йостав гиҗ сансн уга. ⁷ Зуг зарц болн күн болҗ төрәд сән дурарн бәәсн юмнасн хаһцв. Тер бәәсн кевәрн күүнлә әдл болв, ⁸ Бийән номһрулад үктлән, кирст үктлән соңсхврта бәәҗ. ⁹ Тиим учрар Бурхн Терүг хамгин деерк ормд өргҗ, цуг нердәс хамгин алдр нер өгч. ¹⁰ Тегәд теңгр деер, һазр деер, Һазр дор бәәсн цуг әмтә тоотнь Исусин нериг күндләд сөгдх. ¹¹ Бурхн Эцкиг туурулхин төлә Исус Христос Деед Эзн гиҗ күн болһн иләр келх.

Одд мет гилвктн

¹² Тегәд, хәәртә үүрмүд мини, намаг таднла бәәсн цагт тадн соңсврта биләт. Ода таднла эс бәәв чигн тадн соңсхврта болнат. Бурхиг күндләд, аврлтын көдлмш күцәхәр зүтктн. ¹³ Яһад гихлә, Бурхн Эврәннь таал күцәх седвәр болн күч таднд өгчәнә.

¹⁴ Һундл төрл угаһар болн зүтклдән угаһар цугинь күцәтн. ¹⁵ Тиигхлә тадн Бурхна нүл уга, цевр болн дуту уга үрдүд болхит. Тедн хар саната болн килнцтә улс дунд бәәцхәнә. Тедн одд мет әмтнә заагт гилвкнә. ¹⁶ Тадн җирһл өгдг үгмүд тер улст келнәт. Тегәд Исус Христосин ирх өдрт би хара зөңдән марһанд орлцсн угав, хара зөңдән көдлсн угав гиҗ байрлхв. ¹⁷ Болв кемр мини цусн тана тәкл деер асхрв чигн (тана тәкл гисн иткләр дамҗад Бурхнд церглт) би байрлхв, таднла хамдан байрлхв. ¹⁸ Тадн бас байрлтн, нанла байрлтн.

Тимофей Эпапродит хойрин тускар

¹⁹ Кемр Деед Эзн Исусин таал бәәхлә, би Тимофейиг тадн тал удл уга илгәхв, тиигәд тадниг яһҗ бәәхинь медәд седкләрн төвкнхв. ²⁰ Тер үнн седкләрн таднд ик килмҗ өгнә. Терүнәс даву нанд тиим күн уга. ²¹ Наадкснь болхла Исус Христосин төлә арһ хәәл уга эврәннь арһан хәәнә. ²² Тадн Тимофейиг итклтәһинь меднәт. Тер болхла нанла көвүн эцктәһән бәәсн метәр бәәҗ Сән Зәңг цәәлһҗ көдлҗ йовла. ²³ Тегәд нанла юн учрхиг сәәнәр медҗ авад, би удл уга энүг тадн тал йовулхв гиҗ нәәлҗәнәв. ²⁴ Деед Эзнә таал бәәхлә, би тадн тал эврән ирхв гиҗ лавта меднәв.

²⁵ Зуг ода нанла хамдан көдлдг болн ноолддг ах Эпапродитиг тадн тал илгәх кергтә гиҗ би санҗанав. Тер таднас ирсн элч болад нанд нөкд болҗ йовла. ²⁶ Эн тадниг үзхәр икәр седҗәнә. Бийнь таасго болсинь тадн соңсв гиҗ зовҗана. ²⁷ Эннь үнн, дегд күндәр гемтәд Эпапродит үкн гив, зуг Бурхн энүг хәәрлв. Бурхн һанцхн энүг биш намаг чигн хәәрлв. Бурхн намаг улм икәр бичә зовтха гиҗ тиигсмн. ²⁸ Эн учрар Эпапродитиг үзәд, тадниг байрлтха гиһәд би энүг шулуһар тадн тал йовулнав. Тиигәд мини зовлң баһрх. ²⁹ Деед Эзнлә ниилсн ахиг тоссн метәр энүг байртаһар тостн. Энүнлә әдл улсиг күндлтн. ³⁰ Яһад гихлә, Эпапродит Христосин көдлмшин төлә эн әәмшгтә керг күцәһәд үкн гив. Тадниг нөкд болҗ эс чадсн цагт, эн тана элч болад нанд нөкд болҗ йовла.

Йоста чик бәәдл

¹ Ахнр-дүүнрм! Деед Эзнлә нииләд байрта бәәтн гиҗ би аш сүүлднь келҗәнәв. Нег юм давтад бичәд бәәдгм нанд ацан биш, болв таднд болхла, әәмшгәс эн харслт болх.

² Һалзу нохас мет бәәдг улсас бийән саглтн. Хар саната йовдл һарһдг улсас бийән саглтн. Керчүлһ кедг улсас саглтн. ³ Яһад гихлә, тедн биш бидн йоста керчүлгдсн улсвидн. Бидн Әрүн Сәкүсәрн дамҗад Бурхнд мөргнәвидн. Бидн шаҗна һазак кергт нәәллго Исус Христосар буульмҗ кенәвидн. ⁴ Болвчн би шаҗна һазак кергт нәәлх учртав. Кемр нег чигн күүнд шаҗна һазак кергт нәәлх учр бәәхлә, нанд тиим учр улм дала. ⁵ Төрснә хөөн нәәмдгч өдртм Мошен закаһар би керчүлгдв. Би Израилин күмб, Беньяминә уңг-тохмтав. Цевр тохмта еврейв. Зака күцәлһнә тускар келхлә, би перушмв. ⁶ Би иткдг улсиг шунлтта кевәр көөләв. Зака күцәсәр чик бәәдлтә болхин тускар келхлә, би нүл уга күн биләв. ⁷ Тер бийнь кезәнә чинртә, олзта гиҗ тоолсн юмиг, ода болхла, би Христосин төлә юмн биш гиҗ тоолҗанав. ⁸ Цуг юмсудыг мини Деед Эзн Исус Христосин туск медрллә дүңцүлхлә, эннь юмн биш гиҗ би тоолҗанав. Исус Христосин төлә би бәәсән һолад күүнд керго хог-богд тоолҗанав. Христосиг олҗ авхин төлә болн Терүнлә бүклдән ниилхәр би тиигҗәнәв. Күн зака күцәсәр чик бәәдл авна. Би тиим кевәр чик бәәдлтә бишв. Зуг би Христост итксәр тогтсн чик бәәдлтә болв. Эн чик бәәдл Бурхнас һарчана. ¹⁰ Би Христосин болн Терүг әмдрүлсн күчиг медх санатав. Би Терүнлә әдл зовх санатав. Исусла әдл үкх санатав. ¹¹ Тиигхлә би әмдрхв гиҗ нәәлҗәнәв.

Күслд күрхәр темцҗ зүтктн

¹² Күслдән күрләв, дуту уга болв гиҗ би келҗәхшв. Зуг би тер күслд күрхәр зүткҗәнәв. Тер күслин төлә Христос Исус намаг аврла. ¹³ Ахнр-дүүнр! Күслдән күрләв гиҗ би тоолҗахшв. Зуг би ардк юман мартад, өмнк күслдән күрхәр зүткнәв. ¹⁴ Би диилврин ач авхар күслд күрхәр зүткҗәнәв. Исус Христосар дамҗад энүг автха гиҗ Бурхн мадниг дуудв.

¹⁵ Бидн дуту уга улс тиигҗ ухалх зөвтәвидн. Кемр тадн дундас күн талданар ухалдг болхла, Бурхн терүнд цәәлһҗ өгх. ¹⁶ Эн цаг күртл дахсн зокалмудар бәәҗ яһв чигн уралан йовий.

¹⁷ Ахнр-дүүнр! Талдан улсла хамдан нанас үлгүр автн. Таднд үзүлсн мана үлгүрәр бәәдг улсиг хәләтн. ¹⁸ Яһад гихлә, кесг улс Христосин кирсин өшәтнр болҗ бәәнә. Эднә тускар би таднд урднь давтад келләв. Ода би уульн бәәҗ эднә тускар давтад келҗәнәв. ¹⁹ Аш-сүүлднь, эн улс үкх. Эднә бурхн – гесн. Теднә буульмҗ кесн юмс бийснь һутана. Тедн һанцхн эн һазрин юмна тускар ухална. ²⁰ Зуг Мана Төрскн теңгр деер. Аврач болн Деед Эзн Исус Христосиг тендәс ирхиг бидн күләжәнәвидн. ²¹ Тер мана арһ уга үклд ордг цогц-махмудыг хүврүлҗ Эврәннь туурмҗта цогц-махмудла әдл күчәрн кех. Эн күчәр Тер цугиг медәндән орулна.

Павелын сурһмҗ

¹ Мини хәәртә ахнр-дүүнр! Би тадниг икәр санҗанав. Тадн – мини байр, тадн – мини титм. Хәәртә ахнр-дүүнр, Деед Эзнлә нииләд батар зогстн.

² Эвода болн Синтих, буйн болтха, Деед Эзнлә нииләд хоорндан ни-негн бәәтн гиҗ би эрҗәнәв. ³ Мини итклтә нөкд, чамаг сурҗанав эн хойр күүкд улст нөкд бол. Эдн Клементлә болн нань чигн нөкднрлә хамдан нанд дөң болҗ Сән Зәңг делгрүллһнд орлцад көдлдг билә. Эн улсин нерд Җирһлин Дегтрт бичәтә. ⁴ Деед Эзнлә ниилҗ оньдин байрта бәәтн. Байрта бәәтн гиҗ бас келҗәнәв. ⁵ Тана номһн бәәдлин тускар цугтан медтхә. Деед Эзн өөрхн. ⁶ Юмнд бичә зовад бәәтн. Юн учрв чигн Бурхндан ханлт өргәд эрҗ зальврад, эврәннь сансн-санаһан Терүнд келтн. ⁷ Тиигхлә әмтнә ухана медәнәс ик деер бәәсн Бурхна эв тана ухан-седклиг Христосла ниилүләд харсх.

⁸ Аштнь ахнр-дүүнр: үннч, ачта, үнн чик, цевр, тааста, өврмҗтә, буйн болн буульмҗ авх ачта юмна тускар оньдин ухалтн. ⁹ Нанас дассн, тодлҗ авсн, соңссн, үзсн юман күцәтн. Тиигхлә эвин Бурхн таднла бәәх.

Белг авснд ханлт

¹⁰ Тадниг шинәс нанд килмҗән өгснд би Христосла ниилҗ байрлв. Тадн нанд урднь чигн нөкд болдг биләт, зуг нанд нөкд болх арһ таднд кесг цагт уга билә. ¹¹ Нанд юмн кергтә гиһәд би энүг келҗәхшв. Яһад гихлә, би бәәсндән байн болдг дасув. ¹² Түрү цагт болн юмн элвг цагт бәәдг дасув. Альд бәәв чигн, кезә бәәв чигн, өлсв чигн, эс гиҗ цадхлң бәәв чигн, дала юмта болн төрүц юмн уга бәәв чигн би бәәсндән байн болдг даслав. ¹³ Нанд чидл өгдг Христос Исусла нииләд, би цугиг дааҗ күцәҗ чадҗанав.

¹⁴ Тадн мини зовлңгиг хувалцлат. Эннь йир сән. ¹⁵ Урднь, Сән Зәңг экләд делгрүлсн цагт, намаг Македонь һазрас һарч йовхд, таднас даву талдан чонҗ нанд нөкд болҗ, мөңгиг цуглулҗ илгәсн угаһинь тадн, Пилип хотна әмтн, бийстн меднәт. ¹⁶ Намаг Тесалоник гидг һазрт бәәхд тадн кесг дәкҗ нанд нөкд болдг биләт. ¹⁷ Би таднас белг авхин төлә энүг келҗәхшв. Зуг тадниг бийдән сә авхин төлә тиигҗ кетхә гиҗәнәв. ¹⁸ Эпапродитәр дамҗад тадн нанд кергтәһәс үлү юм илгәвт, тегәд чигн ода нанд цуг юмн бәәнә. Тана илгәсн юмн Бурхнд нерәдсн күҗ мет болн тааста таалмҗта бәрц мет. ¹⁹ Мини Бурхн Исус Христосар дамҗад алдр зөөрәсн авад тадниг кергтә юмар теткх.

²⁰ Мана Бурхн болн Эцк мөңкиндән тууртха! Тиигтхә.

Төгсвр

²¹ Христос Исусла ниилснд Бурхна улст цугтаднь менд келтн. Нанла хамдан бәәсн ахнр-дүүнр бас таднд менд илгәҗәнә. ²² Бурхна цуг улс таднд менд келҗәнә. Онц кевәр хаана бәәшңд көдлҗәсн улс бас менд келҗәнә.

²³ Деед Эзн Исус Христосин хәәрлт таднла бәәтхә!