ЙОХАН

Йохана бичсн Сән Зәңг

Йохан Исусиг Бурхна мөңк Үг гиҗ Сән Зәңгдән үзүлҗәнә. Тер Үг күн болҗ, мадн дунд бүүрлҗ (1.14). Исус Бурхнас илгәгдсн Аврач, Бурхна Көвүн гиҗ иткүлхин төлә, болв иткәд, Терүнә нернә төләд мөңк җирһл эдлтхә гиһәд эн дегтр бичүлгдсн бәәҗ (20.31).

Исус Бурхна мөңк Үгнь гиҗ нүр үгд бичәтә. Терүнә дару Сән Зәңгин негдгч әңгд зүсн-зүүл өвәрц йовдлмуд Исусиг урдаснь Аврач, Бурхна Көвүн гиҗ үзүлҗ. Цааранднь өвәрц йовдлмуд ю цәәлһҗәхинь медүлҗәнә. Дегтрин эн әңгднь зәрм улс Исуст яһҗ итксиг, Терүг дахҗ йовх улс болсна тускар бичәтә. Болв зәрмнь Терүнә өмнәс буцад итклән хайсна тускар бас бичгдҗ.

13–17 бөлгүд Исус Эврәннь сурһульчнртаһан чирәһәрн харһад күүндсиг, Терүг кирст телүләд хадхин өмн сө келсн үгмүд сурһульчнриг яһҗ белдсиг, теднд урмд өгсиг үзүлҗәнә. Сүүлңк бөлгүдт Исусиг бәрснә, Терүнә зарһин, Терүнә телүләд хадгдсна болн әмдрснә тускар, энүнә хөөн сурһульчнртан баралҗ үзгдснә тускар бичәтә. Хууль гүүһәд килнц һарһсн күүкд күүнә туск тууҗ дөрвлҗн хавсрт орулҗ бичҗ (8.1–11). Яһад гихлә, кесг түрүн зун җилмүдин бичгүдт болн орчулсн бичврт терүг орулсн уга, болв зәрмснь терүг талдан ормд орулцхаҗ.

Йохана бичсн Сән Зәңг Христосар дамҗад өггдҗәх мөңк жирһлин белг йилһән үзүлгдҗ. Эн белг ода өггдҗәнә. Исус – йовх хаалһ, үнн болн җирһл болҗана гиҗ эн белг иткҗәх улст нерәдгдҗ.

Сән Зәңгдән Йохан шаҗна бәәдл үзүлхәр өдгә җирһләс йирин юмсуд авч керглнә. Үлгүрнь: усн, өдмг, герл, хөөч болн хөд, уста үзмин иш, терүнә темснь. Тернь седклин тоолвр болна.

Учр-утхин зура

Орулгч үг 1.1–18

Уснд кирслдг Йохан болн Исусин түрүн сурһульчнр 1.19–51

Исусин церглт 2.1 – 12.50

Сүүлңк өдрмүд 13.1 – 19.42

Деед Эзнә әмдрллһн болн залрҗ ирлһн 20.1–31

Товчлгчднь: Һалильяд болсн бусд үзүллһн 21.1–25

Үг күн болҗ

¹ Орчлң үүдхәс урд Үг бәәҗ. Үг Бурхнла негн бәәҗ. Үг Бурхн бәәҗ. ² Орчлң үүдхәс урд Үг Бурхнла бәәҗ. ³ Цугнь Үгәр дамҗҗ үүдәгдҗ. Терүг угаһар юмн үүдсмн уга бәәҗ. ⁴ Цуг үүдәсн юмн Үглә нииләд җирһҗ. Җирһл күмни герл бәәҗ. ⁵ Герл харңһуд гилвкнә. Харңһу терүг диилсн уга. ⁶ Бурхн кү илгәҗ, күүнә нернь Йохан бәәҗ. ⁷ Цуһар соңсад итктхә гиһәд Йохан герлин туск герч болад ирҗ. ⁸ Бийнь герл биш бәәҗ. Герлин туск герч болад орчлңд ирҗ. ⁹ Үг гисн йосн герл мөн. Герл орчлңд ирәд күмн-әмтнд тусҗ герлтүлнә. ¹⁰ Үг орчлңд бәәҗ. Терүгәр дамҗҗ үүдсн орчлң Бийнь таньсн уга ¹¹ Эврә һазрур ирҗ. Эврә әмтн терүг седклдән орулсн уга. ¹² Седклдән орулсн әмтнд, Бийднь итксн әмтнд Бурхна үрдүд болх зөв Тер өгв. ¹³ Эн үрдүд экиннь геснәс, күүкд күн залу күн хойрин седвәрәс төрсн үрдүд биш, эдн Бурхнас төрсн үрдүд. ¹⁴ Үг күн болҗ, мадн дунд бүүрлҗ. Эн Үг маднд чилшго хәәрлтиг, Бурхна туск үнниг үзүлв. Эцкиннь һанцхн көвүн болҗ Эцкәс авсн Терүнә йосиг бидн лавта үзвидн. ¹⁵ Йохан Терүнә тускар чаңһ дууһар иигҗ герчлҗ: Эн күүнә тускар би иигҗ келләв: Мини хөөн ирхнь нанас ик чинртә, юңгад гихлә Тер нанас урд мөңкиндән бәәдг бәәҗ. ¹⁶ Тер эврәннь ик байлг хәәрлтәс маднд дам-дам сә кеһәд әдслв. ¹⁷ Бурхн Мошеһар дамҗад зака өглә, зуг хәәрлт болн үн Исус Христосар дамҗҗ үзүллә. ¹⁸ Бурхиг күн төрүц үзәд уга, зуг Эцкиннь өөр бәәсн ор һанцхн Бурхн маднд Бурхна тускар медүлв.

Уснд кирслдг Йохана герчллһн

¹⁹ Ерусалимд бәәдг евреймүдин ахлачнр Йоханур гелңгүдиг болн Левихниг илгәв. Тедн ирәд:

– Чи кембч? – гиҗ Йоханас сурв.

²⁰ – Би Христос бишв, – гиҗ тер дарунь Йохан иләр келв.

²¹ – Тиигхлә кен гидг күмбч? Чи Элья болвзач? – гиҗ тедн сурцхав.

– Уга, – гиҗ тер хәрү өгв.

– Чи Мошен келсн әәлдәч болвзач?

– Уга – гисн хәрү тенд соңсцхав.

²² – Чи кембч? Маднд келич. Бидн мадниг илгәсн улст хәрүһинь келҗ өгх йоставидн. Бийиннь тускар ю келнәч? – гиҗ тедн сурцхав.

²³ Йохан теднд әәлдәч Эшьян үгәр келҗ өгв: «Би эҗго көдәд хәәкрҗәх дунв: Деед Эзнә хаалһинь һо кетн». ²⁴ Тер әмтиг паршмуд илгәсн бәәҗ.

²⁵ – Кемр чи Христос биш, Элья биш, Мошен келсн әәлдәч биш болхла, юңгад чи әмтиг уснд кирслнәч? – гиҗ тедн сурцхав.

²⁶ – Би әмтиг уснд кирслнәв. Зуг тадн дунд таднд таньгддго күн бәәнә. ²⁷ Тер мини хөөн ирх. Би болхла Терүнә башмгиннь бүчинь тәәлх зөв угав, – гиҗ Йохан хәрүднь келв.

²⁸ Цуг эн йовдл Бетәнья өөр, Йордан һолын дорд үзгин көвәд, Йохан әмтиг уснд кирслсн һазрт, учрв. ²⁹ Маңһдуртнь Йохан өөрдҗ йовх Исусиг үзәд:

– Хәләтн, Эн әмтнә килнц уга кедг Бурхна хурһн. ³⁰ Энүнә тускар би келләв: Мини хөөн ирснь нанас ик чинртә, юңгад гихлә, Тер нанас урд мөңкиндән бәәдг бәәҗ. ³¹ Би чигн Исусиг кенинь медсн уга биләв, зуг би Энүг цуг Израиль орн-нутг медтхә гиһәд, әмтиг уснд кирслхәр ирв, – гиҗ келв.

³² Йохан эврәннь үгән батлад келв:

– Әрүн Сәкүсн ик деер Теңгрәс көглҗрһн мет бууһад, Терүнә деер үлдснь би үзв. ³³ Би Терүг меддго биләв. Зуг уснд кирслхәр намаг Илгәснь нанд: «Әрүн Сәкүсн нег күн деер бууһад үлдх. Тер күн әмтнд Әрүн Сәкүс өгх», – гиҗ келлә. ³⁴ Би цуг энүг үзв, тегәд чигн герчлҗәнәв, Эн – Бурхна Көвүн! – гив.

Исусин түрүн сурһульчнр

³⁵ Дарук өдртнь Йохан хойр сурһульчта хамдан бәәсмн. ³⁶ Аашсн Исусиг үзәд, тер:

– Эн – Бурхна Хурһн! – гив.

³⁷ Йохана хойр сурһульч тер үгмүдинь соңсад, Исусиг дахад йовв. ³⁸ Исус эргәд ардан хәләһәд, тедниг дахҗ йовсинь үзв.

– Таднд юн кергтә? – гиҗ Тер сурв.

– Рави, [хальмгаһар багш] Тана гер альдв? Келтн, – гиҗ тедн сурв.

³⁹ – Намаг дахад йовтн, эврән үзхит, – гиҗ Исус келв.

Цуг эн дөрвн часла болв. Тедн йовад, Исусин герт ирәд, асхн ора күртл бәәв. ⁴⁰ Исусин тускар келсн үг соңссн сурһульчнрин негнь Шимон Пётрин дүнь Андрей бәәҗ. ⁴¹ Тер эврәннь Шимон гидг ахан олҗ авад келв:

– Бидн Бурхна илгәсн Аврачиг – Христосиг олҗ аввидн!

⁴² Дәкәд тер ахан Исусур дахулҗ авч ирв. Исус Шимон тал хәләҗәһәд келв:

– Йохана көвүн Шимон эндр өдрәс авн Би чамд Кеп гидг нер өгчәнәв.

Исус Пилипиг болн Натаналиг дуудҗана

⁴³ Маңһдуртнь Исус Һалилья тал йовхар шиидв. Тер Пилипиг олҗ авад:

– Намаг дахад йов! – гив.

⁴⁴ Пилип Бетсәд гидг хотна көвүн бәәсмн. Тер хотн Андрейин болн Пётрин бас төрскн хотн бәәҗ. ⁴⁵ Пилип Натаналиг олҗ авад терүнд:

– Бидн закана дегтрт Моше болн әәлдәчнр бичсн кү олҗ аввидн. Тер Назарет хотна Йосипин көвүн Исус бәәҗ, – гиҗ келв.

⁴⁶ – Назаретас сән юмн ирдви? – гиҗ Натаналь хәрүднь келв.

– Эврән йовад хәлә, – гиҗ терүнд Пилип келв.

⁴⁷ Исус аашсн Натаналиг үзәд:

– Эн йосн Израилин күн. Энүнә седклд мек худл төрүц уга, – гиҗ келв.

⁴⁸ – Та намаг альдас меднәт? – гиҗ Натаналь өврҗ сурв.

– Чамаг дуудхас урд Би чамаг инҗр модна сүүдрт суусичнь үзләв, – гиҗ Исус хәрү өгв.

⁴⁹ – Багш, Та Бурхна Көвүнт. Та Израилин Хант! – гиҗ Натаналь келв.

⁵⁰ – Би чамаг инҗр модна сүүдрт үзв гиснд чи нанд иткҗәнәч. Зуг чи энүнәс ик өвәрц юм үзхич, – гиҗ Исус хәрү өгв.

⁵¹ – Би таднд үнәр келҗәнәв, тадн заагрсн теңгрәс Күмни Көвүнүр бууҗ ирсн болн терүнәс деер өрггдсн Бурхна элчнриг үзхит, – гиҗ Исус немҗ келв.

Канад болсн хүрм

¹ Хойр өдрин хөөн Һалильяд бәәсн Кана гидг балһснд хүрм болҗ. Исусин экнь тенд бас бәәҗ. ² Исусиг сурһульчнрта хамднь бас тер хүрмд дуудҗ. ³ Гиичнр чаһран ууһад чиләхләнь, Исусин экнь Терүнд келв:

– Чаһр дәкҗ уга.

⁴ Исус экдән: – Аак, юңгад Та нанд энүнә тускар келҗәнәт? Мини цаг ирәд уга, – гиҗ хәрү өгв.

⁵ Исусин экнь зарцнрт:

– Энүнә келсинь кетн, – гив.

⁶ Тенд зурһан ик чолун буһш зогсҗала. Еврей келн әмтн эврәннь йосар юм әрүслҗ уһахин төлә терүг бәрдг бәәсмн. Буһш болһнднь 80–120 литр ус багтдг бәәҗ.

⁷ – Сав болһниг дүүргәд ус кетн, – гиҗ Исус зарцнрт келв.

Тедн буһшмуд дүүргәд ус кев. ⁸ Исус:

– Ода эн савас ус утхҗ авад, хүрмин ахлачд авч одад өгтн, – гив.

Зарцнр келсинь күцәв. ⁹ Хүрмин ахлач чаһрт хүврсн усиг амсв, тер чаһриг альдас авсинь медсн уга бәәҗ, зуг һанцхн зарцнр медлә. Хүрмин ахлач күргиг дуудҗ авад келв:

¹⁰ – Әмтн сән һара чаһриг нәр эклхләнь хүрмин гиичнрт өгнә. Цуһар согтҗ одхла, му чаһр һарһҗ өгнә. Чи болхла сән чаһриг ода күртл бәрәд суусмч?

¹¹ Эн Исусин үзүлсн өвәрц йовдлмудын түрүңкнь бәәсмн. Цуг эн йовдл Һалильяд бәәсн Кана гидг балһснд учрсмн. Иигәд Исус эврәннь күчтә нерән туурулв, энүнә хөөн сурһульчнр Терүнд икәр иткв. ¹² Цааранднь Исус сурһульчнртаһан Капернам хот темцҗ йовв. Исусин экнь, дүүнрнь Терүнлә хамдан бас һарад йовцхав. Капернамд тедн цөөкн өдр бәәв.

Һол сүмиг цеврллһн

¹³ Евреймүдин Песах гидг нәр өөрдҗ йовсмн, тегәд Исус Ерусалим балһснур һарад йовв. ¹⁴ Исус Ерусалимин сүм дотр бухмуд, хөд, көглҗрһс хулдсн әмтиг үзв. Мөңг сольдг әмтиг чигн Тер үзв. Тедн ширән өөр сууцхаҗ. ¹⁵ Тиигхлә Исус деесәр маля гүрәд, хөөдиг, бухмудыг көөһәд һарһв. Мөңг сольдг әмтнә ширәһинь хольврулад, теднә мөңгинь тараһад хайв.

¹⁶ – Эднән авад цааран әрлтн! Мини Эцкин гериг хулд гүүлгәнә герт бичә хүврүлтн! – гиҗ Исус көглҗрһ хулдҗасн әмтнд келв.

¹⁷ Энүг үзсн сурһульчнр, Бурхна Бичгт бәәсн «Би тана герт дуртав. Тер дурн дотрким шатаҗана» гисн үгмүдиг тодлҗ санв.

¹⁸ – Иигҗ кех йосн чамд бәәхиг медүлхин кергт онц темдг үзүл, – гиҗ евреймүдин толһачнр Исусин өмнәс келцхәв.

¹⁹ – Эн сүмиг хамхлад таратн, Би һурвн хонгин болзгт цуг энүг хәрү тосххв, – гиҗ Исус хәрүднь келв.

²⁰ – Кезәнә эн сүмиг дөчн зурһан җилдән әмтн тосхсмн. Чи болхла Энүг һурвн өдрин туршт босхахар седҗәхмч? – гиҗ евреймүдин толһачнр хәрүцв.

²¹ Исус болхла сүмин тускар келсн цагт Эврәннь цогцин тускар келсмн. ²² Хөөннь Исус әмдрснә хөөн Терүнә сурһульчнр Исусин цуг эн үгиг тодлҗ санла. Тедн Бичгт болн Исусин келснд иткв.

Исус цуг әмтнә уха-седклинь меднә

²³ Исус Ерусалимд Песахин нәәрт бәәсн цагтан өвәрц йовдлмуд үзүлв. Тер учрар кесг әмтн Терүнд иткв. ²⁴ Зуг Исус теднд икәр нәәлсмн уга, юңгад гихлә, Исус әмтиг сәәнәр меддг бәәҗ. ²⁵ Исус әмтнә дотрк уха-седклиг сәәнәр меддг бәәсмн. Тер учрар Исуст күүнә тускар юм келх керг уга билә.

Исус болн Никодим хойр

¹ Паршмуд заагт нег күн бәәҗ. Терүнә нерн Никодим. Тер евреймүдин толһачнрин негнь бәәҗ. ² Нег дәкҗ Никодим сөөһәр Исусур ирәд келв:

– Багш, Тана кесн өвәрциг нег чигн күн Бурхн угаһар кеҗ чадшго билә. Тер учрар Таниг Бурхна илгәсн Багш болдгинь бидн меднәвидн.

³ – Күн болһн шинәс эс төрхлә, Бурхна ориг үзҗ чадшго гиҗ Би чамд үнәр келҗәнәв, – гиҗ Исус хәрү өгв.

⁴ – Көгшн күн шинәс яһҗ төрхмб? Тер хойрдад эврәннь экин геснд орад төрҗ һаршголм? – гиҗ Никодим Исуст келв.

⁵ – Һанцхн уснас төрснь, Сәкүснәс төрснь, Бурхна орнд тусҗ чадҗана гиҗ үнәр келҗәнәв. ⁶ Цогц бийәс төрснь, цогц бий болна. Һанцхн Сәкүснәс сәкүсн төрдг мөн. ⁷ Шинәс төрх кергтә гисндм бичә өврәд бә. ⁸ Салькн дурта һазртан шуугад көдлнә. Чи терүнә шууга соңснач, зуг альдас һарад, альдаран темцҗ үләҗәхинь медх арһ чамд уга. Сәкүснәс төрсн күн лавта тиим болна, – гиҗ Исус келв.

⁹ – Тиим юмн яһҗ болхмб? – гиҗ Никодим сурв.

¹⁰ – Чи Израиль әмтнә багш болнач, зуг цуг энүг эс медхшлмч? ¹¹ Үнәр келҗәнәв, Бидн медсән келнәвидн. Бидн үзсән герчлнәвидн, зуг тадн Мана герчллһиг үнн гиҗ ухандан авхшит. ¹² Кемр орчлңгин юмна тускар келхлә, тадн нанд эс иткхлә, теңгрин юмна тускар келсн цагт яһҗ нанд иткхмт? ¹³ Теңгрәс бууҗ ирсн Күмни Көвүнәс талдан күн Теңгрт бәәһәд уга. ¹⁴ Моше көдәд күрл моһаг модн деер өргсн кевәр Күмни Көвүн өрггдх зөвтә. ¹⁵ Тегәд Нанд иткдг күн мөңк җирһл эдлх. ¹⁶ Юңгад гихлә, Бурхн орчлңд дегд хәәртә болад, Исуст иткдг күн үкл уга, мөңк җирһл эдлтхә гиҗ ор һанцхн Көвүһән өгсн мөн. ¹⁷ Көвүһәрн орчлңгин зарһ кех биш Көвүһәрн орчлңгиг харсҗ аврхин төлә Бурхн Терүг һазрур илгәсмн. ¹⁸ Терүнд иткдг күн зарһла харһҗахш, эс иткдг күн зарһла харһҗ. Яһад гихлә, тер Бурхна ор һанцхн Көвүнд итксн уга. ¹⁹ Зарһнь иим: орчлңд герл тусҗ ирв. Зуг әмтн герлиг һолад, харңһуг таасҗ авсмн. Юңгад гихлә, теднә керг-үүлнь хар. ²⁰ Хар үүл күцәдг күн герлд дурго, үүлнь герлд илдкх гиһәд, тер герләс зулна. ²¹ Зуг үнн чикәр бәәснь герлүр ирнә. Бурхиг соңсад, цаһан үүлинь күцәсинь герл үзүлх гиһәд тер тиигнә, – гиҗ Исус келв.

Исус уснд кирслдг Йохан хойр

²² Энүнә хөөн Исус эврәннь сурһульчнрла Йудья һазрур йовв. Тенд бәәҗәһәд, Исус әмтиг уснд кирслдг бәәсмн. ²³ Йохан тер цагт Шалим балһсна өөр Анон гидг һазрт бас әмтиг уснд кирслв. Юңгад гихлә, тер һазрт дала усн бәәҗ. Әмтн Йоханар бийән уснд кирслүлхәр ирдг бәәсмн. ²⁴ Йоханыг түүрмд суулһхин өмн цуг эн учрсн бәәҗ. ²⁵ Йохана сурһульчнрин болн евреймүдин хоорнд усар әрүсллһнә хуучн авъясын тускар зүтклдән болв. ²⁶ Тедн Йоханур ирәд:

– Багш, урднь Йордана һолын телтр көвәд танта нег күн бәәлә. Та Терүнә тускар әмтнд келсн биләт. Ода тер эврән әмтиг уснд кирслнә. Цугтан Терүн тал ирнә, – гиҗ келцхәв.

²⁷ – Күн теңгр заяҗ келсәр кергән күцәҗ чадҗана, – гиҗ Йохан хәрү өгв.

²⁸ – Би Бурхна илгәсн Аврач бишв, зуг би Терүнә өмн йовхин төлә илгәгдләв, – гиҗ Мини келсн үгмүдин герчнр тадн эврән боллат. ²⁹ Хәрд һарчасн күүктә көвүн күргн болна. Күргнә үр күргиг соңсад зогсна. Терүнә ду соңсад, үрнь байрлна. Тиигҗ би ик байрта бәәнәв. ³⁰ Терүнә чинрнь өсҗ өрггдх зөвтә, мини цаг болхла чилҗ йовна, – гиҗ Йохан келв.

Теңгрәс бууҗ ирснь

³¹ Теңгрәс бууҗ ирснь һазр деерк әмтнәс деер. Һазрин үрн болхла һазрин үлмәд бәәнә, һазрин тускар келнә. Зуг Теңгрәс бууҗ ирснь Һазрин әмтнәс деер! ³² Тер Эврәннь үзсән, соңссан герчлнә. Зуг әмтн Терүнә келснд иткхш. ³³ Терүнә герчллһ седклдән авсн әмтн энүгәрн Бурхн – йосн үнн гиҗ лавта үзүлнә. ³⁴ Бурхна илгәсн күн Бурхна үгмүдәр келнә. Юңгад гихлә, Бурхн Терүг Сәкүсәрн дүүргнә. ³⁵ Эцк Көвүндән дегд хәәртә болад, цугинь һартнь бәрүлв. ³⁶ Көвүнднь иткдг күн мөңк җирһл эдлнә. Көвүнә үгинь эс соңсснь мөңк җирһл үзшго. Бурхна цааҗ терүнә толһа деер буув.

Исус болн Шамарья күүкд күн

¹ Йоханур ирдг сурһульчнрас тооһарн даву ик сурһульчнр Исусур ирәд, уснд кирслгдҗәнә гидг зәңг паршмуд медчкв. (Үнәртнь болхла, Исус эврән әмтиг уснд кирслдго бәәҗ, Терүнә сурһульчнр әмтиг уснд кирслдг бәәҗ.) ³ Исус энүнә тускар соңсад, Йудья һазриг үлдәһәд, хәрү Һалилья тал йовсмн. ⁴ Һалилья тал йовҗ йовад, Исус зууран Шамарья һазриг дәврҗ һарла. ⁵ Тегәд Исус Шамарья һазрт бәәсн Сухар гидг хотнур орҗ ирв. Кезәнә Яков Йосип гидг көвүндән нег һазр өгсн бәәҗ. Тер һазрин өөр Сухар гидг хотн бәәҗ. ⁶ Тенд Яковин нертә худг бәәҗ. Исус хаалһдан муурад, тер худгин өөр ирәд сууһад амрв. Үдин цаг өөрдҗ йовла. ⁷ Нег Шамарья күүкд күн тер худгур ус авхар ирҗ.

– Нанд уух ус өгич, – гиҗ Исус сурв.

⁸ Сурһульчнр болхла тер цагт хот хулдҗ авхар, өөрк хотнур йовҗ одсн бәәҗ.

⁹ – Та, еврей күн, нанас Шамарья күүкд күүнәс уух ус сурдмт? – гиҗ Шамарья күүкд күн Исусас сурв.

(Тер юңгад гихлә, евреймүд Шамарья әмтнлә төрүц дуһардго, хәрлцдго бәәсмн.)

¹⁰ – Кемр Бурхн әмтнд ю белглҗәхинь, Кен чамас уух ус сурҗахинь чи медсн болхла, эврән Нанас ус сурх биләч, болв Би чамд әмд ус өгх биләв, – гиҗ Исус хәрү өгв.

¹¹ – Ах Нойн минь, Та суулһ угат, худгтн болхла гүн. Әмд ус яһҗ авч чадхмт? ¹² Та мана өвк эцк Яковас деер болвзгот? Тертн маднд эн худг өгсн билә, болв бийнь эврәннь үрн-садтаһан, малтаһан энүнәс ус уудг бәәсмн! – гиҗ күүкд күн хәрүднь келв.

¹³ – Кен чигн эн уснас уухла, дәкәд ундасх. ¹⁴ Зуг Мини өгсн уснас ууснь төрүц ундасшго. Юңгад гихлә, Мини өгсн усн күүнә дотр мөңк җирһл өгдг булгт хүврх, – гиҗ Исус үгинь соңсчкад келв.

¹⁵ Тиигхлә күүкд күн келв:

– Ах Нойн минь, намаг хөөннь ундасдгоһар, эн худгур дәкҗ ирдгоһар тер уснасн өгит, – гив.

¹⁶ – Гер талан йовад, эврәннь залуһан нааран дахулҗ авч ир, – гиҗ Исус хәрүднь келв.

¹⁷ – Би залу угав, – гиҗ күүкд күн хәрүцв.

– Чи үнәр келвч. Чи залу угач. ¹⁸ Чи тавн залута биләч. Чи үнәр келвч. Ода чамла хамдан бәәсн залу күн, чини залу биш, – гиҗ Исус келв.

¹⁹ – Ах Нойн минь, би үзҗәнәв, Та әәлдәчд. ²⁰ Мана өвк эцкнр эн уулур ирәд, Бурхнд сөгдҗ зальврдг билә. Зуг тадн, евреймүд, Ерусалимд ирәд сөгдҗ мөргх кергтә гиҗ тоолнат, – гиҗ күүкд күн келв.

²¹ – Эгч, итк Нанд. Тиим цаг ирҗәнә: эн уул деер биш, Ерусалимд биш, тадн Мана Эцкд сөгдҗ мөргхит! ²² Тадн Шамарья әмтн юундан мөргҗәхән эврән медҗәхшит. Бидн болхла кенд сөгдҗәхән йосндан меднәвидн. Юңгад гихлә, Бурхн евреймүдәр дамҗад әмтиг килнцәснь аврх. ²³ Зуг цагнь өөрдҗ йовна. Цагнь лавта өөрдҗ ирв! Эн цагт Бурхнд йосндан сөгддг арһ Бурхна Сәкүсн әмтнд өгх. Бурхнд тиим сөгдәчнр кергтә. ²⁴ Бурхн гисн – Сәкүсн. Терүнд сөгдсн улс Сәкүсәр дамҗҗ деерәс төрх зөвтә. Тиим әмтн Эцкд йосндан сөгдх, – гиҗ Исус хәрүднь келв.

²⁵ – Бурхна илгәсн Аврач аашна гисинь би меднәв (Бурхна илгәсн Аврач – Христос). Тер ирхләрн, маднд цугинь цәәлһҗ өгх, – гиҗ күүкд күн келв.

²⁶ Исус:

– Би, чамла күүндҗәсн күн, Бурхна илгәсн Аврачв, – гив.

²⁷ Тер алднд сурһульчнр хәрү ирцхәв. Исусиг күүкд күүнлә күүндҗәхинь үзәд, цуһар алң болцхав. Зуг нег чигн күн яһад терүнлә күүндвт гиҗ сурсн уга. ²⁸ Күүкд күн эврәннь буһшан худгин өөр үлдәһәд, хотн тал йовад әмтнд келв:

²⁹ – Наартн, шулуһар йовтн, тадн мини җирһл бәәдлин тускар келҗ өгсн күүг үзхит. Тер Бурхна илгәсн Аврач болвзго? – гив.

³⁰ Әмтн хотнас һарад, Исусур йовцхав. ³¹ Тер цагт Терүнә сурһульчнр:

– Багш, буйн болтха, хотан уутн, – гив.

³² Зуг Тер:

– Нанд тиим хот бәәнә, тер хот ямаранынь тадн медхшт, – гиҗ келв.

³³ Тиигхлә сурһульчнр:

– Талдан күн Терүнд хот авч ирсн болвза? – гиҗ хоорндан күүндцхәв.

³⁴ Мини хот гисн – Намаг Илгәснә таалыг күцәһәд, Нанд даалһсн көдлмшиг күцәһәд төгсәх. ³⁵ Кеер тәрә тәрсн цагт: дөрвн сар болчкад, урһцан хурах цаг ирх, гиҗ тадн келнәт, тиим эсий? Тегәд Би таднд келҗәнәв: сәәнәр хәләтн! Тәрсн тәрән хурахд белн. ³⁶ Тәрә хадх күн көлстә олзан ода авчана. Мөңк җирһлин төлә урһцан хураҗана. Тегәд тәрснь чигн, хадснь чигн хамдан байрлх. ³⁷ Негнь тәрнә, дарукнь хадна гидгнь лавта батлгдҗана. ³⁸ Тегәд Би тадниг көлсән өгч эс көдлсн юмиг хадҗ хуратн гиҗ илгәҗәнәв. Тенд талдан әмтн көлсән өгч көдллә. Тадн болхла теднә көдлмшт орлцад, урһцинь хураҗанат, – гиҗ Исус үгән төгсәв.

³⁹ – Мини кезәнә кесн юмиг Тер келҗ өгв, – гиҗ күүкд күн әмтнд келсмн.

Тер учрар тер хотнд бәәсн кесг Шамарья улс Исуст иткдг болв. ⁴⁰ Шамарья әмтн Исусур ирәд:

– Буйн болтха, маднла үлдтн! – гиҗ сурв. Тегәд Тер теднлә хойр өдр бәәв. ⁴¹ Дәкәд кесг әмтн Исусин келсн үгд иткв.

⁴² – Түрүләд бидн чини келсиг соңсад итквидн. Ода болхла бидн Терүнд бийднь иткҗәнәвидн, тер юңгад гихлә, бидн эврәннь чикәрн Терүг соңсвидн. Эн Күн орчлңгин Аврач гиҗ бидн йосндан иткҗәнәвидн, – гиҗ тедн тер күүкд күүнд келцхәв.

Исус ямта күүнә көвүг эдгәснь

⁴³ Хойр өдр давхла Исус Һалилья һазрур һарад йовв. ⁴⁴ Тер юңгад гихлә, әәлдәчиг төрскн орн-нутгтнь күндлхш, – гиҗ урднь Исус эврән келсмн. ⁴⁵ Исус Һалильяд ирхлә, тер һазрин әмтн байртаһар Исусиг тосв. Тер әмтн Ерусалимд Песахин нәәрт Исусин кесн өвәрциг бас үзлә. ⁴⁶ Дәкәд Исус Һалильян Кана гидг хотнур һарад йовв. Урднь тенд Исус усиг чаһр кесмн. Тер цагт Капернамд хаана нег ямта күн бәәдг бәәсмн. Терүнә көвүнь өңгрхин өмн өргнд бәәҗ. ⁴⁷ Исусиг Йудья һазрас Һалильяд ирсинь соңсад, тер ямта күн Исусиг олҗ авад:

– Капернамд ирәд, мини көвүһим эдгәһит, тер үкн гиҗәнә, – гиҗ Терүг эрәд сурв.

⁴⁸ – Онц темдгүд Нанас үзлго, тадн иткхн угат! – гиҗ Исус терүнд келв.

⁴⁹ – Ах Нойн, мини үрн үкәд уга бәәтл шулуһар манаһур ирит! – гиҗ хаана ямта күн сурв.

⁵⁰ – Хәр, герүрн йов. Чини көвүнчн әмд үлдх, – гиҗ Исус келв.

Тер күн Исусин үгд иткәд, герүрн йовв. ⁵¹ Төрскн хотнурн йовҗ йовад, тер күн зууран эврәннь зарцнрлаһан харһв.

– Тана үрнтн эрүл-менд бәәнә, – гиҗ тедн келв.

⁵² – Кезә көвүм сән болв? – гиҗ тер зарцнрас сурв.

– Өцклдүр үдлә нег часла халунь уурв, – гиҗ тедн хәрү өгв.

⁵³ Көвүнчн әмд үлдх гисн Исусин үгин хөөн көвүнь эдгсинь эцкнь медв. Энүнә хөөн тер эврәннь гер-бүлтәһән, зарцнртаһан Исуст иткв. ⁵⁴ Тиигәд Йудьяс ирснәннь хөөн Исус Һалильяд бәәһәд хойрдгч темдг үзүлв.

Бэтсат гидг бийән уһадг бәәрнд кү эдгәлһн

¹ Удл уга еврей әмтнә нәр болв, тер учрар Исус Ерусалимур йовв. ² Ерусалимд «Хөөнә үүдн» гидг ормин өөр еврей келәр Бетсәд гидг бийән уһадг бәәрн бәәҗ. Тенд тав дәкҗ зергләд зогссн бахнс бәәсмн. ³ Кесг гемтә, сохр, доһлң болн тәкрсн һар-көлтә әмтн тенд бас кевтҗ. ⁵ Һучн нәәмн җилдән өвчтә нег күн әмтнә заагт кевтҗ. ⁶ Исус терүг үзәд, кесгтән гемнҗәхинь медәд:

– Чи эдгхәр седҗәнчи? – гиҗ сурв.

⁷ Өвчтә күн хәрүднь:

– Ах Нойн, усн көндрсн цагт уснд орхар седхлә, нанд нөкд болдг күн уга. Намаг уснур эврән өөрдхәр седхлә, күн мини өмнәһүр орҗ одна, – гив.

⁸ Тиигхлә Исус терүнд:

– Бос! Девскрән авад йов! – гив.

⁹ Агчмд тер күн эдгәд, эрүл-менд болҗ одв. Тер эврәннь девскрән авад экләд йовв. Цуг эн бемб өдрлә болв. ¹⁰ Тер учрар евреймүдин толһачнр эдгсн күүнд:

– Эндр бемб өдр, мана закаһар чи эврәннь девскрән зөөҗ авч йовх зөв угач, – гив.

¹¹ – Намаг эдгәсн күн: «Эврәннь девскрән авад йов» гиһәд нанд келлә, – гиҗ тер хәрү өгв.

¹² – Девскрән авад йов гисн күн кен гидг күмб? – гиҗ тедн сурцхав.

¹³ Эдгсн күн Терүг кенинь эврән медсн уга билә, юңгад гихлә, Исус олна заагт орад, тер дарунь йовҗ одв. ¹⁴ Хөөннь Исус тер күүг сүмд үзәд:

– Ода чи эрүл-менд болвч. Энүнәс хооран му юмн чамла учршгон төләд дәкҗ килнц бичә ке, – гиҗ келв.

¹⁵ Тер күн дәкәд евреймүдин толһачнр тал йовад:

– Намаг Исус эдгәв, – гив.

¹⁶ Исус бемб өдрлә кү эдгәсн учрар евреймүдин толһачнр Исусиг көөдг болв.

¹⁷ – Эцкм оньдин көдлнә, тегәд чигн Би бас көдлх зөвтәв, – гиҗ Исус келв.

¹⁸ Тиигхлә евреймүдин толһачнр Исусиг алх цаг улм шунҗ хәәцхәв. Тер юңгад гихлә, Исус һанцхн бемб өдрин йосиг эвдсн биш, дәкәд Бурхиг «Мини Эцкм» гиһәд Бийән Бурхнла әдлцүлсмн.

Бурхна өгсн йосн-күчн Исуст бәәнә

¹⁹ Исус евреймүдин толһачнрт иигҗ келв:

– Үнәр таднд келҗәнәв: Эцкиннь кесн юмиг эс үзтл, Көвүн эврә санаһарн юм кеҗ чадшго. Эцкиннь кеҗәх көдлмшиг Көвүн кенә. ²⁰ Эцк көвүндән хәәртә болад, кеҗәх кергән Көвүндән даалһҗ үзүлнә. Тер энүнәс ик үүл үзүлх. Тегәд тадн икәр өврхит. ²¹ Эцк үксн әмтиг үкәрәснь босхҗ әм орулдгла әдләр Көвүнь дурта күүнд әм орулна. ²² Эцк әмтнә зарһинь кехш. Көвүһинь Эцклә әдл күндләд, тевчтхә гиһәд, Тер Көвүндән әмтнә зарһ кех йос даалһҗ өгв. Көвүг эс тевчдг күн, Терүг илгәсн Эцкиг чигн тевчхш. ²⁴ Үнәр таднд келҗәнәв: Мини Үгим соңсад, Намаг Илгәсн Эцкдм иткснь мөңк җирһл эдлх. Тер күн зарһла харһшго. Тер үкләс һарад, әмн җирһл эдлҗ. ²⁵ Үнәр келҗәнәв: цагнь өөрдҗ йовна, цагнь лавта ирв! Үксн әмтн Бурхна Көвүнә дууһинь соңсх. Болв Терүг соңссн әмтн әмдрәд җирһлән эдлх. ²⁶ Эцк әмн җирһлин булг болдг әдләр Көвүндән әмн җирһлин булг болх арһ өгв. ²⁷ Тегәд чигн Бурхн Көвүндән Зарһч болх йос өгв. Юңгад гихлә, Терүнә Көвүн – Күмни Көвүн. ²⁸ Бичә энүнд өвртн. Юңгад гихлә, цагнь өөрдҗ йовна, үкәрт кевтсн, үксн әмтн Күмни Көвүнә ду соңсад, үкәрәсн босҗ ирх. ²⁹ Сә кедгнь мөңк җирһл эдлхәр әмдрҗ босх. Му кедгнь зарһла харһулгдхин төлә әмдрҗ босх. ³⁰ Би эврәннь йосарн юм күцәҗ чадхшв. Би Бурхна келсәр зарһинь кеҗәнәв. Мини зарһм үнн чик, юңгад гихлә, Би эврәннь санан-седвәриг күцәхәр шунҗахшв. Намаг илгәсн Эцкин санан-седвәриг күцәхәр шунҗанав.

Исусин тускар герчллһн

³¹ – Кемр Би эврән Бийиннь тускар герчлсн болхла Мини үгд үнн уга. ³² Зуг Мини тускар келдг дәкәд герч бәәнә. Би меднәв: Терүнә Үгнь йосн үнн. ³³ Тадн Йоханур әмтиг илгәләт. Тер Мини тускар үн келв. ³⁴ Күүнә герчллһн Нанд юмн биш болвчн, зуг тадниг аврулхин төлә Би энүг келҗәнәв. ³⁵ Йохан герл өгдг шатҗах шам мет бәәсмн. Тадн болхла цаг зуур терүнә герл авад, герлин толянд байрлхар седләт. ³⁶ Зуг Би Йоханас даву ик герчтәв. Эцкм Нанд даалһҗ өгсн олн керг-үүл Би күцәҗәнәв. Эн олн керг-үүл Эцкм Намаг илгәсинь герчлҗәнә. ³⁷ Намаг илгәсн Эцкм Мини тускар бас герчлҗәнә. Терүнә ду тадн төрүц соңсад угат. Терүнә дүр тадн төрүц үзәд угат. ³⁸ Тегәдчн тадн Терүнә үг зүркндән хадһлҗ бәрхшит. Тер Намаг илгәҗ гиснд тадн иткҗәхшит. ³⁹ Тадн Бурхна Бичг дасҗ умшнат. Энүгәр мөңк җирһл эдлхит гиҗ саннат. Зуг тенд Мини тускар бичәтә! ⁴⁰ Тер бийнь тадн мөңк җирһл эдлхин төлә Нан тал ирхәр седҗәхшит. ⁴¹ Әмтнә магтал нанд керго. ⁴² Зуг тадниг Бурхнд дурго болдгиг Би меднәв. ⁴³ Би тадн тал Эцкиннь нерн деерәс ирв. Тадн Нанд оньган өгчәхшит. Эврәннь нерн деерәс хәр күн ирхлә, тадн терүнд оньган өгнәт. ⁴⁴ Яһҗ тадн Намаг иткҗ чадхмт? Тадн иткҗ чадшгот. Учрнь иим: тадн нег-негнәннь буульмҗ магталыг таасҗ ик чинрт тоолнат. Зуг ор һанцхн Бурхна магталыг авхар икәр хәәҗәхшит? ⁴⁵ Намаг Эцкиннь өмн тадниг гемшәхәр ирҗ гиһәд бичә сантн. Тадна нәәлҗәсн Моше тадниг гемшәх. ⁴⁶ Кемр тадн Мошед итксн болхла, тадн Нанд чигн иткх биләт. Юңгад гихлә, тер Мини тускар бичлә. ⁴⁷ Зуг кемр тадн терүнә бичснд эс иткхлә, Мини келсн үгд яһҗ иткхмт?

Тавн миңһн кү цадхлһн

¹ Энүнә хөөн Исус Һалилья (талданар келхд, Тиберәд) нуурин телтр көвә тал һарад йовв. ² Терүнә ардас кесг әмтн дахҗ йовцхав, тер юңгад гихлә, гемтә әмтиг эдгәҗ, ямаран өвәрц юм Исус кесинь тедн үзлә. ³ Исус уул деер һарад, тенд сурһульчнртаһан суув. ⁴ Еврей әмтнә Песах гидг нәр өөрдҗ йовла. ⁵ Исус эргндән хәләһәд, кесг әмтиг аашсинь үзәд, Пилипд келв:

– Эн әмтиг цадххин төлә альдас тиим дала өдмг хулдҗ авхмб?

⁶ Исус Пилипиг яһна гилч гиҗ сурв, бийнь болхла эврән ю кехән медҗәлә.

⁷ – Күн болһнд бичкн өдмгин тасрха өгхин төлә маднд бүкл сардан көдләд мөңг шиңгәх кергтә, – гиҗ Пилип хәрү өгв.

⁸ Талдан нег Андрей гидг нертә сурһульч, Шимон Пётрин дү:

⁹ – Энд тавн ичмән өдмгтә болн хойрхн заһста нег көвүн бәәнә. Зуг цуг эн тиим олн күүнд дегд бичкн хот болжана, – гиҗ Исуст келв.

¹⁰ – Цуг әмтиг суулһ, – гиҗ Исус келв.

Теднә бәәсн һазрт дала ноһан бәәҗ, әмтн тер ноһан деер сууцхав. Тооһарн тедн тавн миңһн бәәҗ. ¹¹ Тегәд Исус өдмг авад, Бурхиг магтад, тер өдмгиг хуһлад, суусн әмтнд хуваһад өгв. Тиим кевәр Тер заһсиг бас хуваһад, әмтнд түгәҗ өгв. ¹² Әмтн хотан идәд цадсн хөөн Исус:

– Цуг үлдсн хотыг үрәшгоһар цуглулҗ автн, – гиҗ сурһульчнртан келв.

¹³ Әмтн экләд хотан идсн цагт тавхн ичмән өдмг бәәҗ, зуг сурһульчнр хотын үлдл цуглулхла, тернь хулсар гүрсн арвн хойр савд багтв.

¹⁴ – Эн күн орчлңд ирх Әәлдәч, – гиҗ әмтн Исусин кесн өвәрциг үзснә хөөн келв.

¹⁵ Исус әмтиг цуглрад, Терүг авад хаана ширәд суулһхар седжәхинь медәд, һанцарн үлдхәр уул темцҗ һарад йовҗ одв.

Исус усн деегүр йовҗана

¹⁶ Асхн болхла, Терүнә сурһульчнр уулас нур тал бууһад йовцхав. ¹⁷ Тедн оңһц дотр орад, нур һатлад, Капернам гидг балһснур йовцхав. Харңһурсн цаг билә, зуг Исус хәрү ирсн уга. ¹⁸ Ик салькнас көлтә нуурин дольган буслад, деврәд, усн ормасн һарн гив. ¹⁹ Тавн-зурһан дуунад сурһульчнр оңһцар усч йовхла, генткн нуурин усн деегүр Исусиг теднә оңһц тал йовҗ йовхинь үзв, тедн дегд икәр әәцхәв.

²⁰ – Энтн бив. Бичә әәтн, – гиҗ Исус теднд келв.

²¹ Тедн Исусиг оңһц дотр орулхар седхлә, оңһц тер алднд дарунь кергтә усна көвәд ирәд зогсв.

Исус – әмн-җирһлин хот

²² Маңһдуртнь нуурин телтр көвәд цуглрсн әмтн негхн оңһц бәәсинь үзв. Исусиг оңһц дотр эс орсинь, сурһульчнр Терүн угаһар йовсинь әмтн медв. ²³ Талдан оңһцс Тиберәдәс нег һазрур ирв. Тер һазрт урднь Исус Бурхиг магтҗ, өдмг әмтнд өгәд цадхасн билә. ²⁴ Исусиг болн терүнә сурһульчнриг тенд олҗ чадлго тедн оңһцсд сууһад Исусиг хәәһәд, Капернам балһснур темцҗ йовцхав. ²⁵ Нуурин телтр көвәд Исусиг олҗ авад тедн:

– Багш, Та кезә нааран ирвт? – гиҗ сурцхав.

²⁶ – Тадн онц темдг үзсн төләд намаг хәәҗәхшит, зуг өдмг идҗ цадсндан хәәҗәнәт гиҗ Би үнәр келҗәнәв. ²⁷ Дарунь үрҗ оддг хотын төлә бичә көдләд бәәтн, зуг төрүц үрдго мөңк җирһл өгдг хотын төлә көдлҗ бәәтн. Эн хотыг Күмни Көвүн таднд өгчәнә. Яһад гихлә, Тер Бурхн Эцкин онц темдгтә, – гиҗ Исус хәрүднь келв.

²⁸ – Бурхна керг-үүлмүд күцәхин төлә бидн ю кех зөвтәвидн? – гиҗ тедн сурцхав.

²⁹ – Бурхна керг-үүл күцәх гиснь – Бурхна илгәсн күүнд иткх гисн үг, – гиҗ Исус хәрү өгв.

³⁰ – Мадниг Танд итктхә гиһәд Та ямаран өвәрц юм үзүлҗ чадхвт? Терүг үзәд бидн иткх биләвидн. Ямаран кергиг күцәхвт? – гиҗ әмтн хәрүднь сурцхав.

³¹ – Мана өвк-эцкнр көдә һазрт «манна» гидг хот иддг бәәсмн. Энүнә тускар Бурхна Бичгт иигҗ бичәтә: «Идх өдмг Бурхн теднд теңгрәс өглә», – гицхәв.

³² – Моше биш Мини Эцкм таднд йосн өдмг теңгрәс белглҗәнә. ³³ Эн Бурхна өдмг теңгрәс бууҗ ирәд, күмн әмтнд җирһл өгнә, – гиҗ Исус әмтнд келв.

³⁴ – Деед Эзн! Эн өдмгиг маднд оньдиндан өгч белглич! – гиҗ тедн келцхәв.

³⁵ – Би әмн җирһлин өдмгв. Нан тал ирсн күн төрүц өлсш уга. Нанд иткҗәх күн төрүц ундасш уга. ³⁶ Зуг Би таднд урднь келләв: Тадн Намаг үзв чигн иткшгот! ³⁷ Болв Эцкинм өгсн улс Нан тал цугтан ирх. Ирҗәх күүг Би төрүц көөш угав. ³⁸ Юңгад гихлә, Эврәннь күсл күцәхәр биш Бийм илгәсн Эцкин күсл күцәхәр Би теңгрәс бууҗ ирләв. ³⁹ Намаг илгәсн Эцкин күсл иим: Нанд даалһсн әмтиг нег чигн кү геелго цугинь сүл өдрт әмдрүлхв. ⁴⁰ Мини Эцкин күсл эн: Бурхна Көвүг үздг, Терүнд иткдг күн болһн мөңк җирһлтә болх зөвтә. Сүл өдрт Би тедниг әмдрүлхв.

⁴¹ Терүг: Би теңгрәс буусн өдмг гисинь соңсад, евреймүд Исуст дурго болад һундлан келсмн.

⁴² – Эн Йосипин көвүн Исус биший? Бидн энүнә эк-эцкинь меднәвидн, тиим эсий? Ода юңгад эн теңгрәс бууҗ ирв гиһәд бәәдмб? – гиҗ тедн келцхәв.

⁴³ – Бичә һундл өргтн, – гиҗ Исус келв.

⁴⁴ – Намаг илгәсн Эцк угаһар, Нег чигн күн Нан тал ирҗ чадшго. Сүл өдрт Би тер күүг әмдрүлхв. ⁴⁵ Бурхн күн болһниг дасхх гиҗ әәлдәчнр бичҗ. Эцким соңсад, Терүнә ном авч дассн күн Нан тал ирнә. ⁴⁶ Эцкиг күн үзв гиҗ би келҗәхшв. Бурхнас ирсн Һанцхн Тер Эцкиг үзсн мөн. ⁴⁷ Иткдг күн мөңк җирһл эдлнә. ⁴⁸ Би – әмн-җирһлин өдмгв. ⁴⁹ Тана өвк экцнр көдәд «манна» гидг хот идсн бийнь цуһар өңгрҗ одла. ⁵⁰ Теңгрәс ирсн өдмг онц йилһрнә. Энүг эдлсн күн төрүц үкш уга. ⁵¹ Би теңгрәс ирсн әмд өдмгв. Эн өдмгиг эдлсн күн мөңк җирһлтә болх. Эн өдмг – Мини цогц-махмуд. Эн махмудан Би орчлңгин әмн җирһлин төлә өгхв.

⁵² – Эврәннь махмудан идтхә гиҗ маднд тер яһҗ өгхмб? – гиҗ евреймүд заагт зүтклдән болв.

⁵³ – Үнәр келҗәнәв. Кемр тадн Күмни Көвүнә махмудынь эс эдлхлә, Терүнә цусинь эс уухла, бий дотран әмн җирһл уга бәәхит. ⁵⁴ Махмудм эдлсн күн, цусим уусн күн мөңк җирһлтә болна. Сүл өдрт Би терүг әмдрүлхв. ⁵⁵ Юңгад гихлә, цогц бийим – йосн хот. Мини цусм – йосн ундн. ⁵⁶ Мини цогц бийиг эдлдгнь, Мини цусиг уудгнь Нанла негдәд бәәнә. Би терүнлә негдәд бәәнәв. ⁵⁷ Би әм өгчәх Эцкин илгәсн күмб. Тер Нанд җирһл өгчәнә. Цогц бийим эдлҗәх күүнд Би тиигҗ җирһл өгхв. ⁵⁸ Эн теңгрәс бууҗ ирсн өдмг мөн. Эн тана эцкнр идсн манна гидг хот биш. Тедн идсн бийнь өңгрҗ одла. Зуг эн өдмг эдлҗәх күн мөңкиндән бәәх, – гиҗ Исус теднд цәәлһҗ келв.

⁵⁹ Исус Капернам хотнд евреймүдин хурлд әмтиг сурһҗасн цагт келсмн.

Мөңк җирһлин туск үг

⁶⁰ – Эн ном дегд кецү. Кен энүг соңсҗ чадхмб? – гиһәд Исусиг соңссн әмтнә кесгнь келцхәв.

⁶¹ – Эн ном таднд харш болҗану? – гиҗ Исус сурһульчнриг хәрүцҗәхинь медәд келв.

⁶² – Күмни Көвүг урднь бәәсн орн-нутгурнь хәрү өөд болҗ ниссинь үзәд тадн ю келхмт? ⁶³ Бурхна Сәкүсн әм өгнә, күүнә чидл олз өгхш. Мини келсн үг әм җирһл өгдг Сәкүсәр дүүргнә. ⁶⁴ Зуг тадна зәрмнь иткҗәхш. (Исус Терүнд эс иткх болн хөөтндән урвх күүнә тускар урдаснь медлә.) ⁶⁵ Кемр Эцкм күүнд зая эс хәәрлсн болхла, тер Нанур ирҗ чадшго. Терүнә тускар Би таднд келләв, – гиҗ цааранднь Исус келв.

⁶⁶ Эн үгмүдин хөөн сурһульчнрас кесгнь Терүг үлдәһәд хәрү йовҗ одв, дәкҗ тедн Исусиг дахсн уга.

⁶⁷ – Тадн Намаг бас үлдәх санатавт? – гиҗ Исус арвн хойр сурһульчнрасн сурв.

⁶⁸ – Деед Эзн минь, бидн кен тал йовхмб? Мөңк җирһл өгдг үгмүд Танд бәәнә. ⁶⁹ Та Бурхнас ирсин гидгиг бидн медҗ иткләвидн, – гиҗ Шимон Пётр хәрү өгв.

⁷⁰ – Тадниг, арвн хойр кү Би йилһҗ эс авлу? Зуг тадна заагас негнтн – эрлг! – гиҗ Исус келв.

⁷¹ Тер Шимон Йуда Искериотин тускар келҗ. Тер арвн хойрин негнь болсн бийнь, зуг хөөннь Исусас урвҗ.

Исус болн Терүнә дүүнр

¹ Энүнә хөөн Исус Һалилья һазр эргәд йовҗ йовла. Евреймүдин толһачнр Терүг алх арһ хәәсн төләд Исус Йудья һазриг эргҗ йовхар седсн уга. ² Сегмүд гидг евреймүдин нәр өөрдҗ йовла .

³ – Эн һазриг үлдәһәд, Йудья һазр темцҗ байр-нәәрт йов. Тенд сурһульчнр Чини кеҗәх өвәрц йовдлмуд үзх. ⁴ Эврәннь кесн үүлән нуухмн биш, әмтнд медүлхин төлә терүгән үзүлх кергтә. Бәәсән олн әмтнд үзүл, – гиҗ Исусин дүүнр Терүнд келцхәв.

⁵ Исусин дүүнр чигн Терүнд иткдго бәәҗ.

⁶ – Зөвтә цаг Нанд ирәд уга. Таднд болхла ямаран чигн цаг амр. ⁷ Таднд орчлң дурго болҗ чадшго. Тедн Нанд дурго. Тер юңгад гихлә, Би теднә хар йовдлмуд илдкҗ герчлнәв. ⁸ Тер нәәрт тадн эврән йовтн, Би тиигәрән йовшгов, Мини цаг ирәд уга, – гиҗ Исус хәрүднь келв.

⁹ Тиигҗ келәд Тер Һалильяд үлдв.

Исус сегмүд гидг нәәрт

¹⁰ Терүнә дүүнр нәәрт йовцхав. Тедниг йовсна хөөн Исус Бийән медүллго нууцар бас тиигәрән йовв. ¹¹ Евреймүдин толһачнр нәәрт ирәд:

– Тер күн яһсмб? – гиһәд Исусиг хәәцхәв.

¹² Терүнә тускар әмтн кесгтән шимлдҗ күүндцхәв. Зәрмнь:

– Тер сән күн, – гиҗ келв.

Зәрмнь:

– Уга, тер әмтиг меклҗәнә, – гив.

¹³ Зуг цуһар евреймүдин толһачнрас әәһәд, Терүнә тускар күн иләр келсн уга. ¹⁴ Нәәрин өрәлнь давсна хөөн Исус сүмд ирәд экләд әмтиг сурһв. ¹⁵ Евреймүдин толһачнр өврәд:

– Эн күн альдас тиим дала юм меддг болхв? Энтн сурһуль дасдг уга биләлм? – гиҗ нег-негнәсн сурцхав.

¹⁶ – Эн ном Мини биш, Намаг илгәсн Бурхна ном. ¹⁷ Терүнә таалыг күцәхәр седснь эн номиг Бурхнас эс гиҗ Бийәсм һарчахиг лавта медх. ¹⁸ Эврәннь нернәс келҗәхнь эврәннь нерән дуудулхар шунна. Зуг Илгәснә нериг дуудулхар шунҗ йовсн күн йосн үн келнә. Түүнд худл уга. ¹⁹ Таднд Моше закан өгсн биший? Зуг таднас негн чигн күн тер закаг күцәҗәхш. Тадн юңгад Намаг алхар седҗәхмт? – гиҗ Исус сурв.

²⁰ – Чи хар сәкүстәч. Кен Чамаг алхар седҗәхмб? – гиҗ әмтн хәрүцв.

²¹ – Би негхн өвәрц үзүлв. Тадн цуһар алң болҗанат. ²² Моше болхла, таднд әмн бийин үзүрин керчлһнә авъяс өгв. Тер авъяс түрүләд Мошеһәс биш өвк-эцкнрәс ирв. Тегәд тадн бемб өдрлә нилх көвүдин әмн бийин үзүр керчнәт. ²³ Кемр Мошен закаг эвдшгоһар тадн бемб өдрлә нилхдин әмн бийин үзүринь керчдг болхла, Намаг бемб өдрлә күүнә бий цогциг эдгәв гиһәд юңгад тадн уурлҗахмбт? ²⁴ Өңг-зүсәрнь кү бичә гемшәтн. Үнн чикәр кү гемшәтн, – гиҗ Исус хәрүднь келв.

Бурхна илгәсн Аврач кемб?

²⁵ Тер цагт Ерусалимд бәәдг зәрм әмтн:

– Эн күүг толһачнр алхар седҗәнә эсий? ²⁶ Хәләтн, Энтн әмтнлә күүндҗәнә, болв толһачнр Энүг хөрҗ үг келхш. Энүг Бурхна илгәсн Аврач гиҗ тедн бас санҗахий? ²⁷ Эн күн альдас ирсинь бидн меднәвидн. Зуг йосн Христос альдас ирхинь күн медхш, – гиҗ келцхәв.

²⁸ – Тадн Намаг медвт. Намаг альдас ирсиг бас медвт. Үннәрий? Би эврә санаһарн ирсн угав. Намаг Илгәснь йосн үннч. Зуг тадн Терүг медхшт. ²⁹ Би Терүнәс ирв. Тер учрар Би Терүг меднәв. Тер Намаг илгәв, – гиҗ Исус әмтиг сүмд сурһсн цагт чаңһар келв.

³⁰ Тиигхлә тедн Исусиг бәрҗ авхар седв. Зуг нег чигн күн Исусиг көндәҗ чадсн уга. Учрнь иим: Исусин цагнь ирәд уга бәәҗ. ³¹ Олн заагт ик зунь Терүнд иткәд келв:

– Бурхна илгәсн Аврач ирхләрн Эн күүнә үзүлсн онц темдгүдәс үлү онц темдгүд үзүлхий?

Харулчнр Исусиг бәрҗ авхар илгәгдснь

³² Исусин тускар әмтн ю шимлдҗ келҗәхинь паршмуд соңсв. Терүг бәрҗ авхар паршмуд, ах гелңгүд харулчнриг илгәв. ³³ Исус иигҗ келв:

– Би таднла невчкн зуур бәәҗәһәд, Намаг Илгәснд йовхв. ³⁴ Тадн Намаг хәәхит. Мини бәәх һазр тал тадн ирҗ чадшго учрас Намаг олҗ чадшгот.

³⁵ Евреймүдин толһачнр нег-негнәсн:

– Мадниг ирҗ чадшго гиһәд альдаран эн йовхар седҗәхмб? Грек әмтиг сурһхар еврей әмтн бәәсн грек балһсд тал Эн йовҗахмн болвза? ³⁶ «Тадн Намаг хәәхит, зуг олҗ чадшгот. Мини бәәх һазр тал тадн ирҗ чадшгот» гисн үгмүд юн үгмүд болҗахмб? – гиҗ сурцхав.

³⁷ – Ундасҗаснь Нан тал ирәд уутн. ³⁸ Юңгад гихлә, Бурхна Бичгт иигҗ бичәтә: «Нанд иткдг күүнә дотрас әм өгчәх усна булг урсад бәәх», – гиҗ Исус байрин алдр сүл өдртнь босад, чаңһ дууһар келв.

³⁹ Энд Исус Әрүн Сәкүснә тускар келлә. Терүнд итксн күүнд, хөөннь Әрүн Сәкүсн өггдх. Итксн улст тер цагт Әрүн Сәкүсн өггдсн уга билә, юңгад гихлә, Бурхн Исусиг өөдлүләд уга бәәҗ.

Әмтн хоорндан әңгрснь

⁴⁰ Зәрмнь Исусин үгмүд соңсад:

– Эн йосн әәлдәч! – гиҗ келцхәв.

⁴¹ Зәрмнь:

– Эн Бурхна илгәсн Аврач, – гив.

– Бурхна илгәсн Аврач Һалильяс ирхий? ⁴² Бурхна Бичгт, Бурхна илгәсн Аврач Давидин тохмас Давид бәәсн Бетлехем гидг хотнас ирхинь бичәтә эсий? – гиҗ зәрмнь келцхәв.

⁴³ Әмтн Исусин тускар келәд хоорндан әңгрҗ. ⁴⁴ Зәрмнь Терүг бәрҗ авхар седлә, зуг нег чигн күн Исусиг көндәсн уга.

Евреймүдин толһачнрин эс итклһн

⁴⁵ Аш сүүлднь, паршмуд болн ах гелңгүд тал харулчнр хәрү ирцхәв.

– Юңгад тадн Исусиг бәрҗ эс авч ирвт? – гиҗ паршмуд болн ах гелңгүд сурцхав.

⁴⁶ – Нег чигн күн урднь тиигҗ келсн уга билә, – гиҗ харулчнр хәрү өгв.

⁴⁷ – Тер тадниг бас меклчкви? – гиҗ паршмуд сурв.

⁴⁸ – Ода күртл толһачнрас болн паршмудас нег чигн күн итксн уга биший? ⁴⁹ Уга. Зуг тер эгл әмтн закана тускар ю медх билә? Теднд Бурхна харал тусҗ, – гиҗ паршмуд хәрүднь келв.

⁵⁰ Паршмуд заагт бәәсн Никодим гидг күн бәәҗ. Тер урднь Исусла харһдг бәәсмн.

⁵¹ – Мана Закаһар бидн түрүләд күүг ю кесинь медхәр сурҗ соңслго бәәҗ, зарһинь кех зөв угавидн, – гиҗ Никодим келв.

⁵² – Чи бас Һалильясвч? Бурхна Бичг сәәнәр дасад медхич, Һалильяс нег чигн әәлдәч төрүц ирхш, – гиҗ тедн Никодимд хәрү өгв.

⁵³ Энүнә хөөн цуһар гер талан тарад йовцхав.

Аля күүкд күүнә йовдлын тускар

¹ Исус олив модна уул темцҗ һарад йовв. ² Өрүн өрлә Тер дәкн сүмин һаза ирәд зогсв. Цуһар Терүнә өөр ирәд хурцхав. Исус сууһад әмтнд сурһмҗ өгәд дасхв. ³ Тер цагт ном цәәлһәчнр болн паршмуд нег аля йовдл һарһад бәргдсн күүкд кү Терүнүр авч ирәд, әмтнә чирәд зогсав:

⁴ – Багш, эн күүкд күн хуульч йовдл кеһәд бәргдв. ⁵ Мошен закан тиим күүкд улсиг чолуһар цокҗ алтн гиҗ закна. Та ю келнәт? – гиҗ тедн сурв.

⁶ Тедн Исусиг сөрҗ тиигҗ сурцхав. Цааранднь Исусиг хәрүһинь өгч эс чадхлань, үгәрнь бәрҗ авхар эн күүндвриг эклцхәв. Зуг Исус өкәһәд, һазр деер юм бичәд суув. ⁷ Тедн зогсн бәәҗ сурҗахла, Исус босад:

– Тадн дундас килнц угань хамгин түрүн энүг чолуһар шивтн, – гиҗ келв.

⁸ Дәкәд Исус саак кевәрн өвдглҗ сууһад һазр деер юм бичв. ⁹ Энүг соңссн әмтнәс настань экләд йовв, тедниг дураһад наадкснь бас дахлдв. Исус һанцарн үлдв. Күүкд күн Исусин өмн зогса бәәҗ.

¹⁰ – Тедн цуһар яһсмб? Зарһичинь кех нег чигн күн үлдсн угай? – гиҗ Исус ормасн босад күүкд күүнд келв.

¹¹ – Уга күн үлдсн уга, Ах Нойн! – гиҗ тер күүкд күн келв.

– Би бас зарһичн кешгов. Эврәннь хаалһарн йов, эн өдрәс авн килнц бичә ке, – гиҗ Исус хәрүднь келв.

Исус – орчлңгин герл

¹² – Би орчлңгин герлв, Намаг дахҗах күн харңһуд йовшго. Тер әмн җирһл өгдг герлтә болна, – гиҗ хөөннь Исус дәкн әмтнд келв.

¹³ – Чи эврән Бийиннь тускар герчлҗәнәч. Чини герчллһн йосн үнн биш, – гиҗ паршмуд өмнәснь келцхәв.

¹⁴ – Би Бийиннь тускар герчлв чигн, Мини үгмүд үнн. Юңгад гихлә, Би альдас ирсән альдаран йовхан меднәв. Тадн Намаг альдас ирсинь альдаран йовҗахинь төрүц медҗ бәәхшит. ¹⁵ Тадн әмтнә хәләцәр кү гемшәнәт. Би кү төрүц гемшәхшв. ¹⁶ Кемр Би кү гемшәхләрн үнн кевәр гемшәнәв. Юңгад гихлә, Би һанцарн бишв. Намаг илгәсн Эцкм Нанла хамдан бәәнә. ¹⁷ Тана закаһар хойр күн герчлхлә, теднә герчллһн чик болна. ¹⁸ Би Бийиннь тускар герчлҗәнәв. Намаг илгәсн Эцкм бас Мини тускар герчлҗәнә, – гиҗ Исус хәрүднь келв.

¹⁹ – Чини Эцкчн альдв? – гиҗ тедн сурцхав.

– Тадн Намаг чигн болн Мини Эцким медхшит. Кемр тадн Намаг медсн болхла, Мини Эцким бас медх биләт, – гиҗ Исус келв.

²⁰ Цуг энүнә тускар Исус сүмд бәрц өгдг хәәрцгин өөр зогсҗ келсмн. Исусин цагнь ирәд уга бәәҗ, тер учрар нег чигн күн Исусиг бәрҗ авсн уга.

Мини йовх һазрт тадн ирҗ чадшгот

²¹ Дәкәд Исус иигҗ келв:

– Ода Би йовҗанав. Тадн Намаг хәәһәд, килнцдән даргдад үкхит. Мини йовх һазрт тадн ирҗ чадшгот.

²² – Энтн әмән хорлҗ үкхәр седҗәх бәәдлтә. Юңгад гихлә, Мини йовх һазрт тадн ирҗ чадшгот гиҗ келсмн, – гиҗ евреймүдин толһачнр хоорндан күүндцхәв.

²³ – Тадн цуһар дора бәәсн орчлңгас болҗанат. Би болхла деед теңгрәс. Тадн эн орчлңгин әмтн. Би эн орчлңгин бишв. ²⁴ Би таднд келлүсв: Тадн килнцдән даргдад үкхит. Кемр тадн Би бәәнәв гисн үгдм эс иткхлә, тадн килнцдән даргдад үкхит, – гиҗ Исус цаарандан келв.

²⁵ – Тиигхлә Та кембт? – гиҗ тедн сурцхав.

– Ю хәәҗ би таднла күүндәд суунав? ²⁶ Кесг юм тадна тускар Би келҗ гемшәҗ чадх биләв. Зуг Намаг Илгәснәс соңссан орчлңд герчлҗ келҗәнәв. Намаг Илгәснь йосн үннч, – гиҗ Исус келв.

²⁷ Тедн Исусиг Эцкиннь тускар келжәхинь медсн уга. ²⁸ Цааранднь Исус келҗ бәәнә:

– Күмни Көвүг деер һарсна хөөн Би бәәнәв гисм лавта медҗ авхит. Эврәннь дурарн Би юм кеҗәхшв. Эцкимм дасхсн үгиг Би әмтнд цәәлһҗ келнәв. ²⁹ Намаг Илгәснь Нанла хамдан бәәнә. Терүнд кергтә юм Би оньдин кедв. Тегәд Намаг һанцараһим Тер үлдәхш.

³⁰ Эн үгмүдин хөөн кесгнь Исуст иткв.

Исус килнцәс яһҗ сулдҗ һархин тускар келҗәнә

³¹ – Кемр тадн Мини номар бәәхлә, тадн йосн Мини сурһульчнр болҗанат. ³² Тадн йосн үнниг медхит, үнн тадниг сулдхх, – гиҗ Исус Бийднь итксн евреймүдт келв.

³³ – Бидн Абрахамин үлдл тохм, бидн нег чигн күүнд заргдад мухла болҗ йовсн угавидн. Яһҗ чи мадниг сулдххмч? – гиҗ тедн хәрүднь келцхәв.

³⁴ – Үнәр келҗәнәв, килнц кеҗәх күн килнцин мухла болҗана. ³⁵ Мухла күн герт оньдиндан бәәҗ чадхш. Көвүн болхла мөңкиндән гертән бәәнә. ³⁶ Кемр Көвүн тадниг сулдххла, тадн йосндан сул болхит. ³⁷ Тадниг Абрахамин үлдл тохминь меднәв. Мини үгм тадна седклд багтҗахш, тер учрар тадн Намаг алх санатат. ³⁸ Би таднд Эврәннь Эцкәсн үзсн юман келҗәнәв. Тадн болхла бас эврәннь эцкәсн соңссн юман келҗәнәт, – гиҗ Исус теднд келв.

³⁹ – Мана эцкмдн Абрахам, – гиҗ тедн хәрү өгв.

– Кемр тадн Абрахамин үрдүд болсн болхла, тадн Абрахамла әдл кергән күцәх биләт. ⁴⁰ Таднд Бурхнас соңссн үнниг келҗәнәв. Тадн Намаг зөрц алхар седҗәнәт. Абрахам тиигҗ бәәдго билә. ⁴¹ Тадн эврәннь эцкиннь кесн юмиг кеҗәнәт, – гиҗ Исус келв.

– Мадн нег эцктәвидн, Бурхн Бийнь – мана Эцк. Бидн йосар һарсн үрдүд, – гиҗ тедн келцхәв.

⁴² – Кемр Бурхн тадна Эцк бәәсн болхла, тадн Нанд дурта болх биләт. Юңгад гихлә, Би нааран Бурхнас ирләв. Эврәннь санаһарн Би ирсн уга биләв, Намаг Бурхн илгәв. ⁴³ Мини келсн үгм тадн яһад эс меднәт? Яһад гихлә, тадн Намаг соңсхар седҗәхшит. ⁴⁴ Тана Эцктн – эрлг. Тегәд тадн терүнә дурар бәәхәр седҗәнәт. Тер кезәнәс авн үннлә таардго алач бәәсмн. Терүнд төрүц үнн уга, худлч болн худлын эцк. Тегәд худл терүнә төрскн келн. ⁴⁵ Би үнәр келҗәнәв, тер учрар тадн Нанд иткҗәхшт. ⁴⁶ Тадна негнтн Намаг килнц һарһвч гиҗ гемшәҗ чадхий? Би таднд үнәр келхлә, юңгад тадн эс иткнәт? ⁴⁷ Бурхна үрдүд Терүнә үг соңсна. Тадн Бурхна биш болад, Мини үгм соңсҗахшт, – гиҗ Исус келв.

Абрахамас түрүләд Би бәәләв

⁴⁸ – Чи хар сәкүстә Шамарья күнч гиһәд бидн чикәр келсн биший? – гиҗ евреймүд Исуст келцхәв.

⁴⁹ – Би хар сәкүстә бишв. Би эврәннь Эцкән тевчнәв. Тадн Нанд му нер өгчәнәт. ⁵⁰ Би Эврәннь нерән туурулхар седҗәхшв. Зуг Мини туурмҗ хәәҗәх, Мини төлә әмтнә зарһинь кедгнь бәәнә. ⁵¹ Үнәр келҗәнәв: Үгм дахҗ күцәдг күн мөңкиндән үкшго! – гиҗ Исус келв.

⁵² – Чамаг хар сәкүснд эзлгдсинь ода бидн йосндан үзҗәнәвидн! Абрахам болн әәлдәчнр кезәнә өңгрҗ одв. Зуг үгим дахҗ күцәдг күн мөңкиндән үкшго гиҗ Чи келҗәнәч. ⁵³ Чи мана Абрахам эцкәс деер болҗахмчи? Абрахам өңгрв, болв әәлдәчнр кезәнә өңгрҗ одв. Бийән кенд тоолад тиигҗәхмч? – гиҗ евреймүд хәәкрцхәв.

⁵⁴ – Кемр Би Бийдән туурмҗ хәәҗәхлә, тер туурмҗ юмн биш. Зуг Мини Эцкм Намаг туурулҗана! Тадн Терүг Мана Бурхн гиҗ дууднат! ⁵⁵ Тадн Терүг төрүц меддго биләт. Зуг Би Терүг меднәв. Кемр Би Терүг медхшв гиҗ келсн болхла, Би таднла әдл худлч болх биләв. Зуг Би Терүг меднәв. Терүнә келсн үгмүдиг соңсҗ күцәдв. ⁵⁶ Абрахам эцктн цагм үзх гиҗ байрлҗала. Цагм үзәд ик байрта үлдв, – гиҗ Исус хәрү өгв.

⁵⁷ – Чи эврән тәв күрәд угач, яһҗ Абрахамиг үзсмч? – гиҗ евреймүд сурцхав.

⁵⁸ – Абрахам экиннь геснәс һарад уга бәәтл Би Бәәләв, үнәр таднд келҗәнәв, – гиҗ Исус келв.

⁵⁹ Тиигхлә тедн чолу авад Исус тал шивҗ алхар седв. Зуг Исус теднәс бултад, сүмәс һарад йовҗ одв.

Сохр кү эдгәлһн

¹ Нег дәкҗ Исус йовҗ йовад, нег сохр кү үзв. Тер күн һарснас авн сохр бәәҗ.

² – Багш, эн күн юңгад сохр һарсмб? Кен килнц һарһсмб, эн күн аль энүнә эк-эцкнь? – гиҗ сурһульчнр Исусас сурцхав.

³ – Тер чигн, эк-эцкнь чигн килнц һарһсн уга. Эн күүг эдгәһәд, әмтнд Бурхна күчиг үзүлхәр цуг эн учрв. ⁴ Өдр чиләд уга бәәтл бидн Намаг Илгәсн Эцкин керг күцәх зөвтәвидн. Удл уга харңһу сө болх, тиигхлә күн юм кеҗ чадшго. ⁵ Эн һазр деер бәәтл Би нарт делкән герл болҗанав, – гиҗ келәд, ⁶ Исус һазрт нульмад, шүлсәрн шора зуурч, сохр күүнә нүднднь түркв.

⁷ – Ода болхла йовад Шилоах гидг уснд нүүрән уһачк, – гиҗ Тер сохр күүнд келв.

(Шилоах гисн – «Илгәгдсн» гисн үг.) Сохр күн йовад, нүүрән уһаһад ирхләрн юм үздг болв. ⁸ Хам-хоша бәәсн әмтн терүг һууль һууҗ йовсинь үзсн әмтн сурцхав:

– Эн һууль һууҗасн күн мөн биший?

⁹ Зәрмнь:

– Тертн Бив, – гив.

– Уга, энтн терүнә дүрстә, – гиҗ зәрмнь келцхәв.

Эдгсн күн бийнь келв:

– Тертн Бив.

¹⁰ – Яһҗ чамд нүднә харан орв? – гиҗ тедн сурцхав.

¹¹ Тер хәрүднь:

– Исус гидг нертә күн шораһар бальчг кеһәд мини нүднд түркв. Дәкәд Тер Шилоах гидг уснд нүүрән уһа гив. Би йовад нүүрән уһасна хөөн үздг болв. Нүднә харан нанд орв, – гиҗ келв.

¹² – Тер күн альдв? – гиҗ тедн эдгсн күүнәс сурцхав.

– Би медҗәхшв, – гиҗ эдгсн күн хәрү өгв.

Паршмуд харан орсн күүг мөшкҗәнә

¹³ Тиигхлә тедн харан орсн күүг паршмуд тал авч ирцхәв. ¹⁴ Бемб өдр Исус шүлсәрн шора зуурч, эн күүнә нүдн хара орулв. ¹⁵ Паршмуд тер күүнәс:

– Нүднә харан чамд яһҗ орсмб? – гиҗ сурцхав.

– Исус мини нүдм бальчг түркв, би нүүрән уһаһад юм үздг болв, – гиҗ эдгсн күн келв.

¹⁶ Зәрм паршмуд:

– Чамаг эдгәсн күн Бурхнас ирсн күн биш, юңгад гихлә, энтн бемб өдриг бемб өдр гиҗ тоолхш, – гицхәв.

Зәрмнь болхла:

– Килнцтә күн тиим өвәрц юмиг яһҗ чадхмб? – гиҗ келцхәв.

Теднә хәләц-тоолврнь онц йилһгдв.

¹⁷ – Нүднчн Тер сексн учрас чи эврән Терүнә тускар ю келҗ чадхмч? – гиҗ паршмуд эдгсн күүг мөшкв.

Эдгсн күн:

– Тер әәлдәч, – гив.

¹⁸ Евреймүдин толһачнр терүг сохр бәәсинь, дәкәд нүднә харан орсинь итксн уга бәәҗ. Тедн тер күүнә эк-эцкинь дуудхар шиидв.

¹⁹ – Эн тана көвүнтн биший? Энүнә тускар тадн сохр билә гисн бишийт? Ода яһҗ энтн юм үздг болсмб? – гиҗ тедн сурцхав.

²⁰ – Эн мана көвүн гиҗ бидн таньҗанавидн, энүг һарснас авн сохр бәәсинь меднәвидн. ²¹ Зуг яһҗ эн юм үздг болсинь, кен нүдинь эдгәсинь бидн медхшвидн. Энүг бийәснь суртн. Мана көвүн нас күрсн күн, хәрүһинь таднд өгч чадх, – гиҗ эк-эцкнь келцхәв.

²² Эк-эцкнь евреймүдин толһачнрас әәһәд тиигҗ келцхәв. Юңгад гихлә, Исусиг Бурхна илгәсн Аврач гиҗ тоолснь хурлас көөгдх гисн шиидвр евреймүдин толһачнр батлсмн. ²³ Тегәд чигн эк-эцкнь:

– Энтн наста күн, бийәснь суртн, – гицхәв.

²⁴ Паршмуд эдгсн күүг хойрдад дуудв.

– Бурхна чирәд үн кел! – гиҗ тедн келцхәв, – Чамаг эдгәсн күүг килнцтәһинь бидн меднәвидн.

²⁵ – Терүг килнцтә эс килнцтәһинь би медхшв. Урднь сохр бәәһәд, дәкәд харата болсан сәәнәр меднәв! – гиҗ эдгсн күн келв.

²⁶ – Тер чамд ю кесмб? Чини нүдичн яһҗ эдгсмб? – гиҗ паршмуд мөшкв.

²⁷ – Би таднд келҗ өгләв, тадн соңссн угат. Намаг дәкн-дәкнәс соңсх дурн таднд яһад күрәд бәәнә? Тадн Терүнә сурһульчнр болхар бас седҗәхмбт? – гиҗ тер хәрү өгв.

²⁸ Тиигхлә тедн эдгсн күүг шоодад, му келәд:

– Чи эврән Терүнә сурһульч! Бидн Мошен сурһульчнрвидн! ²⁹ Бурхн Мошелә күүндсинь бидн меднәвидн. Эн күүнә тускар болхла бидн юм медхшвидн. Эн күн альдас ирсинь медхшвидн, – гиҗ тедн келцхәв.

³⁰ – Я-а! Акад юмб? Терүг альдас ирсинь чигн медхшийт? Тертн болхла мини нүдм секв. ³¹ Бурхн килнцтә әмтиг соңсхш гисинь бидн меднәвидн. Бийинь күндлдг Терүнә дурар бәәдг әмтиг Бурхн соңсдгинь бидн меднәвидн. ³² Орчлң үүдснәс авн ода күртл кен чигн һарснас авн сохр күүнд хара орулдгинь соңсгдад уга. ³³ Кемр Эн Күн Бурхна Күн биш болсн болхла, Тер иим юм үзүлҗ чадшго билә, – гиҗ эдгсн күн хәрүднь келв.

³⁴ – Чи килнцтә төрләч. Маднд уха заах зөв чамд уга, – гиҗ хәрүднь келәд, тедн эдгсн күүг хурлд ирдгинь уурулв.

Сохр ухан-седклин тускар

³⁵ Исус эдгсн күүг паршмуд тиигсинь соңсад, терүг олҗ авад сурв:

– Чи Күмни Көвүнд иткҗәнч?

³⁶ – Тертн кемб, Ах Нойн минь? – гиҗ тер сурв, – Келтн нанд, би Терүнд иткнәв.

³⁷ – Чи ода Терүг үзҗәнәч, Тер чамта күүндҗәнә, – гиҗ Исус келв.

³⁸ Тиигхлә күн:

– Деед Эзн, би иткҗәнәв, – гиһәд Исуст сөгдҗ мөргв.

³⁹ Исус келв:

– Сохр әмтнд хара орулҗ, харата әмтиг сохрулхар Би эн орчлңд ирв.

⁴⁰ Өөрнь бәәсн паршмуд:

– Бидн бас сохр болҗахмб? – гиһәд сурцхав.

⁴¹ Исус:

– Кемр тадн сохр бәәсн болхла, тадн эврәннь килнцдән буру уга болх биләт. Зуг тадн үзҗәнәвидн гисн төләдән, тадн деерән буру толһатат.

Хөөчин тускар

¹ – Хөөнә хаша дотр үүдәр орлго талдан орм олҗ авад орсн күн – хулхач болн деермч, гиҗ үнәр таднд келҗәнәв. ² Хашан үүдәр орсн күн эврәннь хөөдин хөөч мөн. ³ Манач терүнд үүдинь секнә. Хөд дууһинь соңсна. Тер эврәннь хөөдән нерәрнь дуудад, дахулад һазаран һарна. ⁴ Хөөч хөөдән цуглулҗ һазаран һарһад, бийнь өмннь һарад уралан йовна. Эзнә ду таньдг учрас тедн хөөчин ардаснь дахҗ йовна. ⁵ Күүнә ду хөд медхш. Тегәд күүнә күүг тедн дахшго. Хөд гүүһәд тарад йовҗ одх, – гив.

⁶ Исус үлгүрлҗ келсмн, зуг Терүнә үгмүдин чинринь әмтн медҗ чадсн уга.

Исус – сән хөөч

⁷ – Би хөөнә хашан үүднв, гиҗ үнәр келҗәнәв. ⁸ Нанас урд ирсн әмтн хулхачнр болн деермчнр. Хөд тедниг соңссн уга. ⁹ Би лавта үүднв. Нанар дамҗҗ орҗ һарснь әмән харсҗ аврх. Тер күн орҗ һарад, урһцта-идгтә һазр олҗ авх. ¹⁰ Хулхач юм хулхалхар, алхар, күүчҗ хамхлхар ирнә. Би болхла әмтнд йосн элвг-делвг әмн-җирһл өгхәр ирв. ¹¹ Би сән хөөчв. Сән хөөч эврәннь хөөдин төлә әмән әрвллго өгхдән белн. ¹² Ялч болхла йосн хөөч биш. Хөд терүнә биш. Ялч аашсн чоныг үзхләрн, хөөдиг хаяд, әәһәд, зулад йовҗ одна. Тиигхлә чон зәрм хөөдиг шүүрч авна, наадкснь тарад йовҗ одна. ¹³ Ялч йосн хөөч биш, тер ялч болад зулҗ одна. Тер хөөдиг йосндан асрҗ хәләхш. ¹⁴ Би сән хөөчв. Эцк Намаг меднә, Би Эцкән бас меддв. Тиим кевәр Би Эврәннь хөөдән сәәнәр меднәв, хөөдм Намаг бас меднә. Эврәннь хөөдин төлә Би әмән әрвллго өгхдән белнв. ¹⁶ Талдан хөд Нанд бас бәәнә. Тедн эн сүргин хөд биш. Би тедниг бас дахулҗ авч ирх зөвтәв. Тедн Мини ду бас соңсх. Удл уга цуһар нег хөөчтә нег сүрг болх! ¹⁷ Би әмән хәрү авхин төлә өгхдән белнв. Тер учрар Эцк Нанд хәәртә. ¹⁸ Кен чигн Мини әмиг булаҗ авч чадшго. Би эврә дурарн әмән өгчәнәв. Әмән өгх чигн, хәрү авх чигн йосн Нанд бәәнә. Тиигҗ Нанд Эцкм закв, – гиҗ Исус келв.

¹⁹ Эн үгмүдин хөөн еврей әмтн хоорндан хувагдв.

²⁰ – Эн – ухань көндрсн хар сәкүстә күн. Ю хәәҗ Энүг соңсҗант? – гиҗ кесгнь келцхәв.

²¹ Зәрмнь:

– Хар сәкүснд эзлгдсн күн тиигҗ келшго. Хар сәкүсн сохр күүнд хара орулҗ чадхмб? – гицхәв.

Евреймүд Исуст иткҗәхш

²² Үвл болсмн. Ерусалимд һол сүм шинрүлҗ нерәдлһнә нәр болв. ²³ Исус сүмин хашан дотрк Соломон хаана нертә бәәрн дотраһар йовҗ йовла. ²⁴ Әмтн Терүнә өөрнь зогсв.

– Кедү күртл Чи мадниг өврүлҗ зовахмч? Кемр Чи Бурхна илгәсн Аврач болхла, тодрхаһар кел маднд, – гиҗ тедн келцхәв.

²⁵ Исус иигҗ келв:

– Би таднд келләв. Тадн итксн угат. Эцкинм күчәр кесн йовдлмуд Мини тускар келҗәнә. ²⁶ Тадн Мини хөд биш болсн учрас Нанд иткҗәхшит. ²⁷ Мини хөд дууһим соңсна. Би тедниг таньҗ меднәв. Тедн Намаг дахҗ йовна. ²⁸ Би теднд мөңк җирһл өгнәв. Тедн мөңкиндән үкшго. Мини хөөдиг Нанас күн булаҗ авч чадшго. ²⁹ Нанд Эцкин өгсн юмн цуг юмнас деер. Тедниг Эцкәс күн булаҗ чадшго. ³⁰ Эцк Би хойр ни-негнвидн.

³¹ Тиигхлә евреймүд саак кевәрн Исусиг алхар чолу һартан авцхав.

³² Зуг Исус:

– Би тана чирәд Эцкин даалһсн кесг сән йовдлмуд күцәвүв. Ямаран йовдлас көлтә тадн Намаг чолуһар цокхар седҗәхмт? – гиҗ келв.

³³ – Бидн чамаг сән йовдлмудас көлтә цокхар седҗәхшвидн. Чамаг Бурхиг му келснә төләд, эгл күн Бийән Бурхнд тоолсн төләд чолуһар цокхар седҗәнәвидн, – гиҗ евреймүд хәрүцв.

³⁴ – «Тадн – бурхд» гиҗ Бурхн келснь тадна Заканд бичәтә биший? ³⁵ Бурхна Бичгт бәәсн үгмүд мөңкиндән үнн болдгинь бидн меднәвидн. Бурхна Үг авсн улсиг бурхд гиҗ Бурхн нерәдсн биший? Намаг Эцкм шүүҗ авад орчлңд илгәв. Би – Бурхна Көвүнв гиҗ келхлә, Бурхиг муурулҗана гиһәд яһад тадн Намаг гемшәҗәхмбт. ³⁷ Кемр Мини Эцкин даалһсн йовдлмудыг Намаг эс күцәхлә, бичә Нанд итктн! ³⁸ Кемр Мини Эцкин даалһсн йовдлмудыг Би күцәхлә, Мини үгд эс итквчн, Мини кесн йовдлмудт итктн. Тиигәд Би Эцклә негдәд, Эцк Нанла негдәд бәәдгинь медхит, – гиҗ Исус келв.

³⁹ Тедн саак кевәрн Исусиг бәрҗ авхар седв, зуг Исус теднд бәргдсн уга. ⁴⁰ Цааранднь Исус дәкәд Йордан һолын телтр эрг тал һарч йовад тенд үлдсмн. Тенд Йохан урднь әмтиг уснд кирслсмн. ⁴¹ Олн күн Исусур ирлә:

– Йохан өвәрц йовдлмуд эс үзүлв чигн, зуг эн күүнә тускар келснь цугнь үнн, – гиҗ тедн келцхәв.

⁴² Тенд олн әмтн Исуст итксмн.

Лазарин үкл

¹ Йудья һазрин Бетәнья хотнд Лазарь гидг күн гемтҗ. Тер Март Мирьям гидг хойр эгчтә бәәдг бәәҗ. ² Мирьям каңкнсн үнртә тосиг Деед Эзн Исусин көлднь түркәд, үсәрн арчдг күүкд күн. Терүнә дү Лазарь күнд гемтә бәәҗ.

³ – Деед Эзн, Тана хәәртә үр икәр гемтҗәнә, – гиҗ эгчнр Исус тал зәңг илгәв.

⁴ Исус энүг соңсад:

– Эн гемәс көлтә Лазарь үкшго. Бурхиг туурулхин төлә цуг эн учрх. Бурхна Көвүг бас туурулхин төлә эн гем ирҗ, – гиҗ келв.

⁵ Март, Мирьям болн Лазарь һурвнд Исус ик дурта бәәҗ. ⁶ Зуг Лазариг гемтә бәәсинь соңсв чигн, Исус бәәсн һазртан хойр өдртән бәәв. ⁷ Энүнә хөөн Исус эврәннь сурһульчнртан:

– Хәрү Йудья һазрур йовхмн, – гиҗ келв.

⁸ – Багш, тенд әмтн Таниг чолуһар цокхар седлә. Тер бийнь Та тиигәрән йовх санатавт?! – гиҗ сурһульчнр келв.

⁹ – Арвн хойр часин кемҗәнд өдр герлтә болна, тиим эсий? Өдрәр йовсн күн бүдршго, тер эн орчлңгин герлиг үзнә. ¹⁰ Ора сөөһәр йовдг күн бүдрх, юңгад гихлә, тер герл уга, – гиҗ Исус келв.

¹¹ – Мана үр Лазарь унтҗ одв, зуг Би терүг серүлхәр йовҗанав, – гиҗ Исус немҗ келв.

¹² – Деед Эзн, кемр тер унтсн болхла, тертн эдгҗәх болвза? – гиҗ сурһульчнр сурв.

¹³ Исус теднд Лазарь өңгрв гиҗ келлә, зуг сурһульчнр Исусиг нөөрин тускар келҗәхинь санв. ¹⁴ Тиигхлә Исус:

– Лазарь өңгрҗ одв, – гиҗ иләр келв.

¹⁵ – Терүнлә хамдан урднь эс бәәсндән Би байрлҗанав. Энүн деерәс тадн Нанд иткхит. Эн учрсн юмн таднд туста болх. Лазарь тал йовцхай, – гиҗ Исус немҗ келв.

¹⁶ Тиигхлә Томас гидг күн (тер Икрин өрәсн бәәсмн) наадк сурһульчнрт келв:

– Йовцхай! Исусла хамдан үкцхәй!

Исус эгч дү хойрин зүркинь тогтнулҗана

¹⁷ Исусиг ирхд Лазарин цогцнь дөрвн өдр үкәрт кевтсн бәәҗ. ¹⁸ Бетәнья Ерусалимас һурвн дууна шаху бәәсмн. ¹⁹ Урднь Март Мирьям хойрт кесг евреймүд ирәд, теднә ахиннь тускар һундл төрүлҗ. ²⁰ Исусиг аашсинь соңсад, Март Терүг тосхар һарв, Мирьям гертән үлдв.

²¹ – Деед Эзн минь, Таниг энд бәәсн болхла, дүм үкшго билә. ²² Болв би ода чигн меднәв, Бурхн сурсн юмитн Танд өгх, – гиҗ Март Исуст келв.

²³ – Чини дүүчн әмдрх, – гиҗ Исус хәрүднь келв.

²⁴ – Би меднәв, тертн сүл өдрт әмдрллһнә өдрт әмдрх, – гиҗ Март келв.

²⁵ – Би – әмдрллһн болн җирһл. Нанд иткдг күн үкв чигн әмдрх. ²⁶ Болв әмд деерән Нанд иткснь төрүц үкшго. Чи Мини келсн үгд иткҗәнчи? – гиҗ Исус сурв.

²⁷ – Э, иткҗәнәв, Деед Эзн, Таниг орчлңд ирсн Бурхна Көвүн – Бурхна илгәсн Аврач гисинь иткҗәнәв, – гиҗ Март хәрү өгв.

Исус уульҗана

²⁸ Цуг энүг келәд, Март хәрҗ ирәд, дү күүкән дуудад:

– Багш ирв, энд бәәнә. Тер чамаг дуудҗана, – гиҗ шимлдҗ келв.

²⁹ Мирьям үгинь соңсад, босад Исус тал адһҗ һарад йовв. ³⁰ Исус тер хотн дотр орад уга бәәсмн. Тер Мартан тоссн ормд зогсҗала. ³¹ Мирьямин герт ирсн евреймүд терүнд сана зовҗ төвкнүлҗәлә. Мирьямиг босад йовхлань, терүг үкәр тал уульхар йовҗана гиҗ санад, тедн ардаснь дахв. ³² Мирьям Исусин бәәсн һазрт ирәд, Терүг үзәд, көлднь киисәд келв:

– Деед Эзн минь! Таниг энд бәәсн болхла, дүм үкшго билә, – гив.

³³ Исус оркрҗ уульҗах Мирьямиг болн евреймүдиг үзәд, һашудҗ гейүрв.

³⁴ – Терүнә цогцинь тадн альд тәвсмт? – гиҗ Исус сурв.

– Йовхм, Та эврән үзхит, – гиҗ тедн келцхәв.

³⁵ Исус уульв.

³⁶ – Энтн үнәр Лазарьт хәәртә бәәҗ, – гиҗ евреймүд нег-негндән келцхәв.

³⁷ Тер бийнь зәрмнь:

– Сохр күүнд хара өгсн күн Лазариг өңгрүлшгоһар юңгад юм эс кесмб? – гиҗ келцхәв.

Исус Лазариг әмдрүлҗәнә

³⁸ Исус гейүрәд үкәр тал йовв. Үкәр гисн хадын көндә билә. Хадын амн чолуһар хаалһата бәәҗ.

³⁹ – Эн чолу түлкәд хооран кетн, – гиҗ Исус закв.

Үксн күүнә эгчнь Март:

– Деед Эзн минь, тендәс үмкә үнр һарчана, Лазарин цогцнь дөрвн өдр үкәрт кевтнә, – гив.

⁴⁰ Тиигхлә Исус:

– Би чамд келлүсв, кемр иткхләчн, Бурхна туурмҗ чамд үзгдх, – гиҗ хәрү өгв.

⁴¹ Чолуг түлкәд хооран кеснә хөөн Исус теңгр хәләһәд келв:

– Аав минь, Намаг соңсҗасн төләд Би Чамд ханлт өргҗәнәв. ⁴² Би меднәв, Чи Намаг оньдин соңснач. Би цуг энүг энд зогссн әмтнә төлә келҗәнәв. Чи Намаг илгәввч гиснд эдниг итктхә гиҗ келҗәнәв.

⁴³ Эн үгмүд келәд Исус чаңһар дуудв:

– Лазарь, һар нааран!

⁴⁴ Үксн күн һарв. Терүнә һар-көлнь еврей әмтнә заңшалар цаһан кенчрәр, чирәнь альчурар оралһата бәәсмн.

– Боодһаһинь тәәләд, йовултн, – гиҗ Исус келв.

Деед хург Исусиг алхар шиидснь

⁴⁵ Мирьям тал ирсн евреймүдин кесгнь Исусин кесн өвәрц үзәд Терүнд иткв. ⁴⁶ Зуг зәрмнь паршмуд тал йовад, учрсн йовдлын тускар цәәлһҗ келҗ өгв. ⁴⁷ Ах гелңгүд болн паршмуд Деед хург кев:

– Эн күн дала өвәрц йовдлмуд кенә. Ода яахмб? – гиҗ тедн сурцхав.

⁴⁸ – Кемр бидн Терүнд зөв өгәд бәәхлә, Тер кех юман цааранднь кех, тер учрар цуһар Терүнд иткх. Тиигхләнь Римин улс ирәд мана сүмиг болн келн әмтиг уга кеһәд тарах, – гиҗ тедн келцхәв.

⁴⁹ Кәәп гидг күн тер җилд ах гелң болҗ йовсмн тер:

– Тадн юм медҗәхшит. ⁵⁰ Нег келн-әмтн үкхин ормд нег күн цуг келн әмтнә төлә үкснь деер болхиг тадн медҗәхшийт? – гив.

⁵¹ Тер эврә уханасн эн үгмүд келсн уга, тер цагт ах гелң болсн төләд тер Исус еврей әмтнә төлә үкх гисн әәлдхлиг келҗ өгв. ⁵² Болв һанцхн еврей әмтнә төлә биш, цуг олн зүсн нутгт бәәсн Бурхна үрдүдин төлә, тедниг цуглулҗ негдүлхин төлә Исус әмнәсн хаһцулгдх.

⁵³ Тер өдрәс авн тедн Исусиг алх арһ хәәдг болв. ⁵⁴ Тер учрар Исус еврей әмтнә заагт ил йовдган уурв. Тер эҗго көдән өөр бәәсн Эпрам гидг хотнур йовҗ одв. Тенд Исус эврәннь сурһульчнртаһан бәәв.

⁵⁵ Йудья әмтнә Песах гидг нәр өөрдҗ йовла, әрвсллһнә йос күцәхин төлә, кесг әмтн еврей нутгин һазр болһнас Ерусалим балһснур ирцхәв. ⁵⁶ Тедн Исусиг хәәлдәд, сүмд ирәд нег-негнәсн:

– Эн байр-нәәрт Тертн иршго болвза? – гиҗ сурцхав.

⁵⁷ – Кемр Исусиг альд бәәхинь күн медхлә, Терүг бәрҗ авхар дарунь теднд келҗ өгх зөвтә, – гисн заквр ах гелңгүд болн паршмуд һарһв.

Мирьям Исусин көлднь каңкнсн үнртә тос асхснь

¹ Песах гидг нәр күртл зурһан өдр үлдҗ. Исус Бетәнья гидг Лазарь бәәсн хотнур ирв. Тер хотнд урднь Исус Лазариг әмдрүлсмн. ² Энд Исусин төлә байрин хот белдв. Март хотынь зөөһәд ширә деер тәвв. Лазарь талдан гиичнрлә болн Исусла хамдан ширә эргҗ сууҗ. ³ Мирьям савд [литрин өрәл дүңгә] кесн нард гидг үнтә каңкнсн үнртә тосиг авад, Исусин көл деернь асхад, үсәрн арчв. Гер каңкнсн үнрәр дүүрв. ⁴ Исусин нег сурһульч Йуда Искериот (хөөннь тер Исусас урвсмн):

⁵ – Эн тосиг һурвн зун цаһан мөңгнд хулдад, мөңгинь һуульһнч әмтнд өгх йоста бәәсн юмн, – гиҗ келв.

⁶ Тер энүг һуульһнч әмтнд санань зовад, теднә арһинь хәәхин төлә келсн биш тер хулхач болад тиигҗ келв. Йуда мөңг хадһлдг хәәрцгтә бәәҗ. Тегәд тер мөңгән бәәҗ-бәәҗәһәд эврән эдлдг бәәсмн.

⁷ – Эн күүкд күүг бичә гемшәтн. Эн тосиг Намаг оршахар эн хоршаҗ хадһлтха! ⁸ Тадна өөр угатя яду әмтн оньдин бәәх. Би болхла удл уга таднас салхв, – гиҗ Исус келв.

Лазарин тускар болсн нууц күүндлһн

⁹ Тер саамд кесг евреймүд Исусиг тенд бәәсинь медчкәд ирцхәв. Тедн һанцхн Исусиг хәләхәр биш дәкәд Лазариг үзхәр ирҗ. Юңгад гихлә, тедн Лазариг Исус әмдрүлҗ гисн зәңг соңсҗ. ¹⁰ Евреймүдин ик зунь Лазарас көлтә ах гелңгүдиг үлдәһәд, Исус тал ирәд, Терүнә итклд орсн төләд ах гелңгүд Лазариг бас алхар седв.

Ик байртаһар Ерусалим балһснур орҗ ирлһн

¹² Маңһдуртнь Песах гидг байрта нәәрт ирсн әмтн Исусиг Ерусалим тал ирҗ йовхинь соңсв. ¹³ Тедн шавар зандн модна бүчрмүд авад, Исусиг тосҗ һарв.

– Бурхн тууртха! Деед Эзнә нерн деерәс ирснь әдстә болтха! Израилин Хан әдстә болтха! – гиҗ олн әмтн хәәкрцхәв.

¹⁴ Исус баахн элҗгниг олҗ авад унад йовҗ. ¹⁵ «Сиона күүкн бичә ә! Хәлә! Баахн элҗгниг унҗ авсн чини Хан йовҗ йовна» гиҗ Бурхна Бичгт бичәтә бәәнә. ¹⁶ Түрүләд Исусин сурһульчнр яһад тиигҗәхинь медсн уга. Зуг Терүг өврмҗтә кевәр әмдрснә хөөн тедн Исусин тускар Бичгт тиигҗ бичгдсинь тодлв. Яһад иигҗ кесинь бас тедн тодлв. ¹⁷ Исус Лазариг үкәрәснь дуудҗ авад, цогцинь яһҗ әмдрүлсинь үзсн әмтн зогсл уга күн болһнд келдг бәәсмн. ¹⁸ Ода тедн тиим өвәрц йовдл кесн күн аашсиг медәд, һарч Исусиг тосв.

¹⁹ – Бидн ю эс кеввчн тус болҗахш. Цуг нарт делкә Терүг дахҗ йовна! – гиҗ паршмуд уурлад хоорндан келцхәв.

Исус эврәннь үклин тускар келснь

²⁰ Тер байрт ирсн әмтн заагт нег цөөкн грек келн әмтн Бурхнд сөгдхәр ирҗ. ²¹ Тедн Һалилья һазрин Бетсәд хотна Пилип гидг Исусин сурһульч тал өөрдәд:

– Тана зерг, бидн Исусиг үзх саната биләвидн, – гиҗ сурцхана.

²² Пилип Андрей тал йовад энүнә тускар келв, тедн хоюрн тер әмтнә тускар Исуст келв. ²³ Исус иигҗ келв:

– Күмни Көвүнә, Мини туурхин цаг ирв. ²⁴ Би үнәр келҗәнәв: Буудян экн һазрт унад эс үкхлә, негхн болҗ үлднә. Кемр буудян экн үкхлә, олн буудя өгч урһна. ²⁵ Тер учрар әмән әрвлснь әмән геех. Эн орчлңд әмән әрвлдгонь мөңк җирһл эдлх. ²⁶ Нанд церглҗәх күн Намаг дахҗ йовтха! Мини бәәсн һазрт зарцм бәәнә. Нанд церглҗәх күүнд Эцкм ачинь хәрүлх. ²⁷ Мини седклм икәр зовҗ бәәнә. Ю келхв ода? Аав минь, Намаг эн цагас гетлүлит! Зуг Би эн цагин төлә ирсн бәәнәв! ²⁸ Аав минь, нерән туурултн!

– Би туурлав, болв дәкн туурхв! – гисн дун генткн теңгрәс соңсгдв.

²⁹ Тенд зогссн олн әмтнәс зәрмнь тер дууг соңсад, эн оһтрһун дун һарв гиҗ келцхәв. Зәрмнь Бурхна элч Терүнлә күүндв гив.

³⁰ – Эн дун Мини төлә биш тадна төлә, – гиҗ Исус келв.

³¹ Ода эн орчлңгин зарһ келһнә цаг ирв, эн орчлңгин Нойн цааран көөгдх. ³² Һазрас деегшән өрггдх цагт цуг әмтнә оньг Нанд тусх. ³³ Эн үгмүдәр Исус ямаран үкләр үкхин тускар цәәлһҗ келв. ³⁴ Олна заагт бәәсн улс:

– Бидн Бурхна Бичгт Христос мөңкинд әмд бәәх гиҗ умшлавидн. Ода юңгад Та Күмни Көвүн деегшән өрггдх гиҗ келҗәхмт? Күмни Көвүн гиснь кемб? – гиҗ келцхәв.

³⁵ – Таднла бәәсн герлд бачм цаг үлдв. Харңһу эс болтл, өдрин герлтәд йовтн. Харңһуд йовсн күн альдаран йовсан медхш. ³⁶ Герл герлтҗәх кемд герлд итктн. Герлин көвүд болхит! – гиҗ Исус теднд келәд, һарад цааран йовҗ одв.

Евреймүд иткҗәхш

³⁷ Исусиг кесг өвәрц йовдлмуд үзүлвчн әмтн Терүнд итксн уга. ³⁸ Цуг эн Эшья гидг әәлдәчин келснь бүтдгәр учрв: «Деед Эзн! Кен мана келснд итксмб, кенә нүднд Деед Эзнә күч секгдсмб?» ³⁹ Тедн иткҗ чаддго бәәҗ, энүнә учринь Эшья гидг әәлдәч: ⁴⁰ «Нүдәрн бичә үзтхә гиһәд, ухаһарн бичә медтхә гиһәд, Бурхн теднә нүдинь сохлҗ, ухаһинь хаав. Тегәд тедн бийән эдгәхәр Нан тал эргҗ хәләшго гиҗ Деед Эзн келв», – гиҗ келв. ⁴¹ Эшья Деед Эзнә туурмҗ үзсн учрар Терүнә тускар иигҗ келсмн.

⁴² Тер цагт толһачнр дундас кесгнь Исуст иткв. Зуг паршмуд тедниг хурлас салһх гиһәд, эврәннь итклин тускар ил келдго бәәсмн. ⁴³ Әмтнә магтлһн Бурхна магталас теднд деер бәәҗ.

Исусин үг – зарһч

⁴⁴ – Нанд иткдг күн Нанд биш Бийим илгәсн Бурхнд иткнә. ⁴⁵ Намаг үздг күн Бийим илгәсн Бурхиг үзнә. ⁴⁶ Би – Йосн герлв. Нанд итксн күүг харңһуд үлдәшгоһар Би эн орчлңд ирв. ⁴⁷ Мини үгм соңсад эс күцәдг күүнд Би зарһч бишв. Би эн орчлңгиг гемшәхәр ирсн угав. Эн орчлңгиг харсҗ аврхар ирв. Намаг һолҗ Мини келсим эс күцәсн күүнд зарһчнь бәәнә. Үгм сүл өдрт терүнә зарһч болх. Би эврәннь нернәс келсн угав. Бийим илгәсн Эцкм иигҗ келх заавр өгв. Терүнә заавр – мөңк җирһл гисинь Би үнәртән меднәв. Мини Эцкимм зааҗ өгсн үг Би таднд келҗәнәв.

Исус сурһульчнриннь көл уһаҗана

¹ Песахин байрин өмнк өдр билә. Эн һазриг үлдәһәд, Эцкүрн хәрү йовх цаг ирсинь Исус медәд бәәлә. Исус эн Һазрт бәәх сурһульчнртан дегд эңкр билә, үктлән чигн эңкр билә. ² Сурһульчнр Исусла хамдан асхни хот эдлв. Тер цагт эрлг Шимона Искериотин көвүнд Йудад Багшас урвах уха-сана орулв. ³ Бурхн Эцк Исусин һарт бәәсн күчән өгсинь болн Тер Бурхнас ирәд ода Бурхн тал хәрҗ йовхинь Исус медв. Исус босад, деерк хувцан тәәлҗ, альчурарн бийән бүслв. Цааранднь Тер савд ус кеһәд, сурһульчнрин көл уһаһад, бүслсн альчурарн арчв. ⁶ Шимон Пётр тал Исус өөрдхләнь тернь:

– Деед Эзн минь! Та мини көл уһахар седҗәнт? – гив.

⁷ – Ода Намаг ю кеҗәхинь чи медҗәхшич, зуг хөөннь медхич, – гиҗ Исус хәрү өгв.

⁸ – Та мини көл төрүц уһашгот! – гиҗ Пётр келв.

– Кемр Би Чини көличнь эс уһахла, чи Нанла хамдан негдшгоч, – гиҗ Исус хәрүднь келв.

⁹ – Тиигхлә, Деед Эзн минь, һанцхн көл биш, һарм, толһаһм бас уһатн, – гиҗ Пётр келв.

¹⁰ – Цевр күүнә һанцхн көлинь уһах кергтә, юңгад гихлә, терүнә цогцнь цевр. Тадн цевр бәәнәт, зуг цуһар биш, – гиҗ Исус хәрүднь келв.

¹¹ Терүнәс урвх күүг Исус медлә, тегәд чигн цуһар цевр бишит гив. ¹² Сурһульчнрин көлинь уһаһад, Исус деерк хувцан өмсәд, Эврәннь ормдан ирәд суув. – Тадндан гиҗ Би ю кесинь медгдҗәнү? ¹³ Тадн Намаг Багш, Деед Эзн гинәт. Чик, тертн мөн. Би, Деед Эзн, Багшв. ¹⁴ Зуг көлитн уһаҗ өгләв. Ода тадн тиигҗ, нег-негнднь көл уһах зөвтәт. ¹⁵ Тадниг үлгүр автха гиһәд, тиигҗ кетхә гиһәд, уһаҗ өгләв. ¹⁶ Үнәр келҗәнәв. Зарц Эзнәс, элч Илгәснәс деер биш. ¹⁷ Энүг медәд, цугинь күцәҗәх күн буйн-кишгтә! ¹⁸ Цугтаннь тускар келҗәхшв. Кениг йилһҗ авсан меднәв. Зуг «Мини өдмг идҗәснь өмнәсм һаран өргв» гисн Бурхна Бичгин үгмүд бүттхә! Энүг учрхин өмн Би әәлдҗ келҗәнәв. Энүг учрсн хөөн БИ БӘӘНӘВ гисндм Тадн дарунь иткхит. ²⁰ Үнәр келҗәнәв. Мини илгәсн кү седклдән орулдгнь Намаг орулҗахнь мөн. Бийим орулдгнь – Бийим Илгәсиг орулх, – гиҗ Исус келв.

Исусиг бәрҗ өгх күн

²¹ Энүг келәд, цааранднь Исус икәр үүмәд:

– Тадн дундас негнь Намаг бәрҗ өгх гиҗ үнәр келҗәнәв, – гив.

²² Сурһульчнр нег-негнүрн хәләлдәд, кенә тускар келҗәхинь санад өврәд бәәцхәв. ²³ Исусин хамгин дурта нег сурһульч Терүнә өөр суув. ²⁴ Шимон Пётр – кенә тускар келҗәхинь сур – гиҗ терүнд докъялҗ келв. ²⁵ Тер сурһульч толһаһан Исусур өөрдүләд:

– Деед Эзн минь! Терчн кемб? – гиҗ сурв.

²⁶ – Мини шүүслҗ өгсн өдмгиг авсн күн тер болх, – гив.

Исус өдмг шүүсләд, Шимона Искериотин көвүнд Йудад өгв. ²⁷ Йуда өдмг авсн цагт терүн дотр эрлг орҗ одв.

– Кех юман шулуһар ке, – гиҗ Исус терүнд келв.

²⁸ Юңгад Исус терүнд тиигҗ келҗәхинь нег чигн күн медсн уга. ²⁹ Йуда мөңгнә хоршалһна хәәрцгтә болсн учрас зәрмнь Исусиг терүг байрин өдрт юм хулдҗ автха, эс гиҗ мөңгнә нег хүвинь угатя әмтнд өгтхә гиҗ зәрмнь санцхав. ³⁰ Өдмгинь авад, Йуда дарунь гертәс һарв. Харңһу сө бәәҗ.

Шин заавр

³¹ Йуда һарад йовҗ одхла Исус:

– Ода Күмни Көвүн туурв. Терүгәр дамҗад Бурхн туурв. Кемр Бурхн Күмни Көвүһәр дамҗад туурсн болхла, Терүг Бурхн Эврән туурулх, тер дарунь туурулх. Мини хәәртә үрдүд! Таднла бәәх цагм чилҗәнә. Намаг санад хәәхит. Толһачнрт келсн үгән таднд ода келҗәнәв: Мини йовх һазрур тадн ирҗ чадшгот. Шин заавр өгчәнәв: Нег-негндән дурта болтн. Би таднд дурта болсн кевәр нег-негндән дурта болтн. Кемр тадн тиигҗ бәәхлә, Мини сурһульч гиҗ тадниг әмтн медх, – гиҗ келв.

Исус Пётрин гөрдлһнә тускар келҗәнә

³⁶ – Деед Эзн Мини, Та альдаран йовҗант? – гиҗ Шимон Пётр Исусас сурв.

– Мини йовсн һазрур ода чи йовҗ чадшгоч, зуг хөөннь Намаг дахад йовхич, – гиҗ Исус хәрүднь келв.

³⁷ – Деед Эзн минь! Юңгад би Таниг ода дахҗ эс йовҗ чадҗахмб? Би Тана төлә әмән өгхд белнв, – гиҗ Пётр келв.

³⁸ – Чи Мини төлә әмән өгх белнч? Үнәр чамд келҗәнәв, эр така эс хәәкртл, чи һурв дәкҗ Нанас гөрдхч, – гиҗ Исус тиигхлә келв.

Бурхн Эцкүр йовх хаалһин тускар

¹ – Тадна седкл бичә үүмтхә! Бурхнд итктн, Нанд бас итктн! Эцкимм герт хорас дала. Тадндан бәәр белдхәр ода Би йовҗанав. Тиим эс бәәсн болхла, тиигҗ келшго биләв. Одад хорас белдснә хөөн бәәсн ормдан тадниг бәәлһхәр Би хәрү нааран ирҗ тадниг авнав. Альдаран йовх хаалһинь меднәт!

⁵ – Деед Эзн! Бидн Таниг альдаран йовхитн медҗәхшвидн. Йовх хаалһитн ода яһҗ бидн медхвидн, – гиҗ Томас Исуст келв.

⁶ Би – хаалһв, Би – үнн болн җирһлв, һанцхн Нанар дамҗҗ Эцкүрм күрч чадхит. Кемр тадн Намаг медсн болхла, Мини Эцкиг бас медх биләт. Эн өдрәс авн тадн Терүг медәд үзхит, – гиҗ Исус келв.

⁸ – Эцкән маднд үзүлтн, дәкҗ юмн керго, – гиҗ Пилип келв.

⁹ – Эцкән үзүл гиһәд юңгад келҗәхмч? Тиим дала цагт Би таднла бәәнәв, тер бийнь чи Намаг медҗәхшийч. Намаг үзснь Эцким үзнә. ¹⁰ Намаг Эцклә негдҗ бәәдгинь Эцкиг Нанла негдҗ бәәдгинь, чи иткҗәхшийч? Таднд келсн үгән Эврәннь нернәс келҗәхшв. Нанла негдҗ бәәдг Эцк үүлән күцәҗәнә. ¹¹ Намаг Эцклә негдҗ бәәдгинь, Эцкиг Нанла негдҗ бәәдгинь итктн! Тиим биш болхла Мини кесн үүлин төлә итктн. ¹² Үнәр келҗәнәв Намаг Эцк талан йовҗах учрас Нанд иткснь Мини кесн үүл күцәһәд, энүнәс икәр күцәх. ¹³ Мини нерн деерәс юм сурхлань цугинь күцәхв. Көвүһәрн дамҗҗ Эцк туурх. ¹⁴ Кемр Мини нерн деерәс тадн сурхлатн, Би сурсиг күцәхв.

Исус Әрүн Сәкүснә тускар келҗәнә

¹⁵ – Кемр тадн Нанд дурта болхла, Мини зааврмудыг күцәхит. ¹⁶ Би Эцкәсн сурнав. Тер таднд талдан Туслгчиг илгәх. Тер мөңкиндән таднла үлдх. ¹⁷ Тер Туслгч – Бурхна туск үн медүлдг Сәкүсн. Терүг үнн седкләрн орулҗ авх арһ орчлңд уга. Тер юңгад гихлә, тедн терүг үзҗәхш. Тедн Терүг медҗәхш, һанцхн тадн Терүг меднәт. Ода Тер таднта бәәнә. Цааранднь чигн тадна дотр бәәх. ¹⁸ Тадниг өнчәр үлдәлго, Би хәрү ирхв. ¹⁹ Удл уга орчлң Намаг үзшго. Зуг тадн Намаг үзхит. Би әмд бәәхв, тер учрар тадн бас әмд бәәхит. ²⁰ Тер өдрт тадн Намаг Эцктә негдҗ бәәдгинь, тадниг Нанта негдҗ бәәдгинь, Намаг таднла негдҗ бәәдгинь медхит. ²¹ Мини зааврмудыг хадһлдг, күцәдг күн Нанд дурта болна. Нанд дурта болдг күүнд Мини Эцкм дурлна. Би бас терүнд дурлхв. Бийән медүлхв, – гиҗ Исус хәрүднь келв.

²² – Деед Эзн, юңгад Та орчлңд биш һанцхн маднд бийән медүлхәр бәнт? – гиҗ Йуда (Искериот биш) келв.

²³ – Нанд дурта болдгнь Мини заасар бәәх. Эцкм терүнд дурта болх. Терүн тал ирәд, бидн хамдан бәәхвидн. ²⁴ Нанд дурго болдгнь Мини үгәр бәәшго. Тадна соңсчасн үгмүд Мини үгмүд биш, Намаг илгәсн Эцкинм үгмүд. ²⁵ Энүг Би таднла бәәсн цагт келҗәнәв. Туслгчиг, Әрүн Сәкүсиг, Мини нерн деерәс Эцкм илгәх. Тер таднд цугинь зааҗ өгх. Мини келсн үгиг тадна сананд орулх. ²⁷ Би таднд эв өгчәнәв. Эврәннь эвән таднд өгчәнәв. Эн орчлңгин кевәр эв өгчәхшв. Бичә үүмтн, бичә әәтн! ²⁸ Би таднас салад йовҗанав. Зуг Би хәрү ирхв гисн үгмүдм тадн урднь соңслат. Кемр тадн нанд йосндан дурта бәәсн болхла, тадн Намаг Эцкүрн йовҗана гиһәд икәр байрлх биләт. Тер юңгад гихлә, Эцкм Нанас үлү алдр. ²⁹ Би энүг урдаснь келҗәнәв. Цугтан эн күцхлә, тадн Нанд иткхит. Дәкҗ Би таднд юм келҗ чадшгов. Эн орчлңгин нойн аашна. Намаг нойлх йосн терүнд уга. ³¹ Зуг Би Эцкдән дуртав, Бурхна заасар үүлән күцәҗәнәв. Энүг орчлң медх зөвтә! Бостн, ода йовий! – гиҗ Исус келв.

Исус уста үзмин иш мөн

¹ Цааранднь Исус иигҗ келв:

– Би – уста үзмин ишв. Уста үзм урһадгнь – Эцкм. Мини деер бәәсн темс өгдго бүчриг Тер чавчад хайчкна. Зуг темс өгдг бүчриг урһцта болтха гиһәд цеврлнә. Тадн болхла ода Мини үгәр цеврлгдвт. ⁴ Нанла хамдан негдҗ бәәтн. Би таднла бас негдҗ бәәхв. Бүчр ишин әңг болсн учрас темс өгч чадна. Зуг бүчр эврән бийнь темс өгч чадшго. Тиим кевәр тадн Нанла негдҗ эс бәәхлә, темс өгч чадшгот. ⁵ Би ишв, тадн бүчрмүд. Нанла негдҗ бәәдг күн болн Би терүнлә негдҗ бәәхлә, тер олзта темс өгнә. Тадн Намаг угаһар юм күцәҗ чадшгот. ⁶ Нанла негдҗ эс бәәдг күн уста үзм урһҗасн ишәс салһад хайгдсн бүчр мет хумхарҗ хагсҗ одна. Тедниг цуглулҗ һалд хайҗ шатана. ⁷ Кемр тадн Нанла негдҗ бәәһәд үгм күцәхлә, сурх юман сурхлатн – цугнь таднд өггдх! ⁸ Кемр тадн дала темс өгхлә, Мини сурһульчнр болсан үзүлхит. Энүгәр дамҗад Эцкм туурх. ⁹ Эцк Нанд хәәртә бәәсн кевәр Би таднд хәәртәв. Мини хәәрнд багтад бәәтн! ¹⁰ Тадн зааврмудм күцәхлә, Мини хәәрнд багтхит. Тиигҗ Би Эцкин зааврмудыг күцәһәд, Эцкиннь хәәрнд багтҗанав. ¹¹ Эврәннь байрасн таднла хувалцхар, тадниг ик байрта бәәтхә гиһәд энүг таднд келләв. ¹² Мини заавр эн: Би таднд дурлсн кевәр нег-негндән дурлтн. ¹³ Үүрмүдин төлә әмән өгх дурнас деер дурн уга. ¹⁴ Мини заасн үгмүд күцәҗ бәәхләтн, тадн Мини үүрмүд. ¹⁵ Дәкҗ тадниг зарцнр гиҗ келҗәхшв. Зарц болхла Эзнә кесиг медхш. Би тадниг Мини үүрмүд гиҗ нерәдҗәнәв. Юңгад гихлә, Эцкәс медҗ авсан таднд медүлҗ өгләв. ¹⁶ Тадн Намаг шүүҗ авсн угат. Би тадниг онц шүүҗ авлав. Орчлңд одад төрүц үрдго темс өгтхә гиҗ Би таднд даалһлав. Тиигхлә Эцкм таднд Мини нерн деерәс сурситн өгх. ¹⁷ Мини заавр эн: Нег-негндән дурта болтн!

Орчлңгин дурго боллһн

¹⁸ Кемр орчлң таднд дурго болхла, тодлҗ автн: түрүләд орчлң Нанд дурго болв. ¹⁹ Тадн орчлңгин әмтн бәәсн болхла, орчлң тадниг эврә гиҗ дурта болх билә. Зуг тадн орчлңгин әмтн бишит, Би тадниг онц шүүҗ авад, орчлңгас салһв. Тегәд чигн орчлң таднд дурго. ²⁰ Зарц эзнәс деер биш гисм тадн тодлвт? Кемр Намаг көөсн болхла, тадниг бас көөх. Кемр Мини үгмүд күцәсн болхла, тадна үг бас күцәх. ²¹ Зуг тадниг Нанд итксн төләд тедн тиигҗ көөх. Юңгад гихлә, Намаг Илгәсиг тедн медхш. ²² Кемр Би орчлңд эс ирсн болхла, теднд эс келсн болхла, тедн килнцдән буру уга болх билә. Зуг ода тедн бурута, яһад гихлә, тедн Мини үгм кергтән авсн уга. ²³ Нанд дурго болсинь Мини Эцкдм дурго болна. ²⁴ Кемр Би талдан күн күцәҗ чаддго кергиг эс күцәсн болхла, тедн буру уга болх билә. Зуг ода тедн Мини керг-үүл үзв чигн одачн Нанд болн Эцкдм дурго. ²⁵ Зуг теднә Бичгт бәәсн «Учр угаһар Нанд дурго болҗ» гисн үгмүд бүтдгәр тиигх зөвтә. ²⁶ Зуг тадн тал Эцкәс һарчах Бурхна туск үнн медүлҗәх Сәкүсн, Туслгч, ирхлә, Би Терүг Эцкәсн тадн тал илгәхв. Тер Мини герч болх. ²⁷ Тадн бийстн бас Мини герчнр. Тер юңгад гихлә, эклцәс авн тадн Нанла хамдан бәәләт.

¹ Тадниг итклән бичә хайтха гиһәд Би энүг келв. ² Тадниг хурлас салһх. Цагнь ирхлә, тадниг алҗасн әмтн Бурхнд церглҗәсән санх. ³ Эцкм болн Намаг меддго төләд тедн тиигҗ кех. ⁴[а] Зуг Би энүг таднд урдаснь саглҗ келв. Тер цагнь ирхлә, тодлтн: Би Энүнә тускар таднд келләв.

Әрүн Сәкүснә үүлин тускар

⁴[б] Таднла хамдан бәәсн учрас түрүләд Би энүнә тускар таднд келсн угав. ⁵ Намаг илгәсн тал ода Би йовҗанав. Зуг тадн альдаран йовҗанат гиҗ Нанас сурҗахшит. ⁶ Мини келснәс көлтә седклтн зөвүрәр дүүрв. ⁷ Зуг Би үнәр келҗәнәв: тадна арһ хәәхәр би йовҗанав. Намаг эс йовхла, тадн тал Туслгч иршго. Би йовад Терүг таднур илгәхв. ⁸ Тер ирәд әмтнә килнцин тускар, Бурхта чик бәәхин тускар, Бурхна зарһин тускар ил цәәлһҗ секх. ⁹ Әрүн Сәкүснә секх килнцнь эн: әмтн Нанд иткхш. ¹⁰ Бурхта чик бәәх гиснь эн: Би Эцк талан йовҗанав, тадн Намаг дәкҗ үзшгот. ¹¹ Зарһ гиснь иим: эн орчлңгин нойн зарһла харһв. ¹² Би кесг юм таднд келҗ чадх биләв. Зуг ода тадн Мини Үг дааҗ чадшгот. ¹³ Бурхна туск үниг медүлдг Сәкүсн таднур ирхлә, таднд цуг үниг медүлх. Юңгад гихлә, Терүнә келснь Бийәснь һарчах үгмүд биш. Соңссан Тер таднд келх, иргчин тускар бас келх. ¹⁴ Тер Намаг туурулх. Юңгад гихлә, Терүнә келсн юмн Нанас авад, таднд медүләд келсн юмн болх. ¹⁵ Эцкдм бәәсн юмн – Мини. Тер төләд чигн Би келҗәнәв, Тер Нанас авад, таднд медүлх. ¹⁶ Удл уга тадн Намаг үзшгот. Зуг невчкн цаг давхла, дәкн үзхит.

Зөвүр болн байр

¹⁷ Сурһульчнрас зәрмнь нег-негндән:

– Удл уга тадн Намаг үзшгот, зуг невчкн цаг давхла тадн дәкәд Намаг үзхит гисн үгмүд юн үгмүд болҗахмб? Би Эцкүрн йовҗанав гисн юмб? Невчкн цаг гисн үгмүдәр ю келхәр седсмб? Энүнә келсн үгмүд маднд медгдҗ өгчәхш, – гиҗ келцхәв.

Исус тедниг ю сурхар седҗәхинь медәд:

– Тадн нег-негнәсн, удл уга тадн Намаг үзшгот, зуг невчкн цаг давхла, дәкн үзхит гисн үгмүдиг сурҗант эсий? – ²⁰ Үнәр келҗәнәв. Тадн оркрҗ уульхит. Орчлң болхла байрлх. Тадн зөвүртә бәәхит. Зуг тадна зөвүрин хөөн ик байр ирх. ²¹ Күүкд улс гиигрх цагтан басл зовна. Яһад гихлә, гиигрх цаг ирв. Үрән һарһсна хөөн эн орчлңд шин күн төрв гиҗ тер байрлад зовсан мартчкна. ²² Тадн бас ода зөвүртә бәәнәт. Зуг дәкәд тадниг үзхләм, тадна зүркн байрар дүүрх. Тер байр таднас күн булаҗ авшго. ²³ Тер өдр тадн Нанд сурвр өгшгот. Үнәр келҗәнәв, Мини нерн деерәс Эцкәс ю сурвчн, Эцк таднд сурситн өгх. ²⁴ Тадн одачн Мини нерн деерәс юм сурад угат. Сурх юман суртн, сурсан авад байрар дүүрхит!

Би эн орчлңгиг диилүв

²⁵ Би энүг таднд үлгүрлҗ келләв. Зуг цагнь ирхлә, Би Эцкиннь тускар үлгүр угаһар ил келхв. ²⁶ Тер өдрт тадн Мини нерн деерәс Эцкәсм юм сурхит. Тадна төлә гиҗ Эцкәсн эрҗ сурнав гиҗ таднд келҗәхшв. ²⁷ Тадниг Нанд дурлсн төләд, Намаг Эцкәс ирв гиҗ итксн төләд, Эцкм Бийнь таднд дурта. ²⁸ Би эн орчлңд Эцкәсн ирв. Ода дәкәд эн орчлңгиг үлдәһәд, Эцк талан йовҗанав, – гиҗ Исус келв.

²⁹ – Ода Та үлгүр угаһар ил келҗәнәт. ³⁰ Әмтиг сурврмуд өгтл Та теднә сурврмудиг урдаснь меднәт. Ода бидн энүг шиңкән медвидн. Тер учрар Таниг Бурхнас ирсинь бидн иткҗәнәвидн, – гиҗ сурһульчнр келцхәв.

³¹ – Ода тадн Нанд иткҗәнт? ³² Соңстн, цагнь өөрдҗ йовна. Цагнь лавта ирв. Намаг һанцараһим үлдәһәд, тадн тарад гер болһндан йовҗ одхт. Зуг Би һанцхн бишв, яһад гихлә, Нанта Эцк бәәнә. ³³ Нанла негн болҗ эв олтха гиҗ үүг Би таднд келләв. Эн орчлңд тадниг зовлң күләҗәнә, зуг бийән чаңһар бәртн. Би эн орчлңгиг диилв! – гиҗ Исус хәрүднь келв.

Исусин зальврлһн

¹ Үгән төгсәһәд, Исус толһаһан өргәд, теңгр хәләһәд:

– Аав минь! Цаг ирв. Көвүн Таниг туурулхин төлә Көвүг туурул. ² Та цуг күмн әмтиг залх йос Терүнд өгвт. Тер учрар Көвүнтн Тана даалһсн әмтнд мөңк җирһл өгх. Тер зөвиг Та Эврән Терүнд өгвт. ³ Мөңк җирһл гиснь: Таниг ор һанцхн Бурхиг болн Тана илгәсн Исус Христосиг медҗ авлһн. ⁴ Би Таниг эн һазрт туурулв. Тана даалһсн көдлмшиг күцәвүв. ⁵ Ода Аав минь! Орчлң үүдәд тана һарар бүтәгдснә өмн Би Танла хамдан алдр нернд орсн биләв. Дәкн намаг тер бәәдлд орулыт. Нарт делкәһәс авад, Нанд өгсн Тана даалһсн алдр неритн әмтнд секв. Эн әмтн Тана. Та эдниг Нанд өгвт. Эдн Тана үгиг зүркндән хадһлв. ⁷ Нанд өггдсн цугинь Танас һарчахинь эдн ода меднә. ⁸ Тана келсн үгмүдиг Би цугинь эднд келв. Тедн үгитн седкләрн орулв. Намаг Танас ирснд, Та Намаг илгәв гиснд тедн йосндан иткв. ⁹ Би эднә төлә сурҗанав. Би орчлңгин төлә биш, Тана өгсн әмтнә төлә сурҗанав. Тер юңгад гихлә, эдн Тана. ¹⁰ Нанд бәәсн юмн Тана. Танд бәәсн юмн Мини. Теднәр дамҗад Би туурв. ¹¹ Би эн орчлңгас һарад Танур йовҗанав. Зуг эдн әмтнә дунд үлдҗәнә. Әрүн Аав, эдн маднла әдл ни-негн болтха гиһәд, Эврәннь нернә күчәр Та эдниг харстн. Та эн нериг Нанд өгләт. Эднлә бәәсн цагт Тана нернә күчәр Би эдниг харсҗ йовлав. Та эн нериг Нанд өгләт. Эднәс негнь чигн геедрсн уга. Зуг негнь геедрх зөвтәнь геедрв. Тер юңгад гихлә, Бичгин үг бүтх зөвтә билә. ¹³ Ода Би Тан тал йовҗанав. Зуг һазр деер бәәсн цагт Мини ик байрар эдн дүүртхә гиҗ цугинь Би келҗәнәв. ¹⁴ Би эднд Тана үг келләв. Тер учрар орчлң эднд дурго болҗана. Юңгад гихлә, эдн Нанла әдл эн орчлңгин биш. ¹⁵ Би эдниг эн орчлңгас автн гиҗ сурҗахшв. Та эдниг хар сәкүснәс харстн гиҗ сурҗанав. ¹⁶ Эдн Нанла әдл эн орчлңгин биш. ¹⁷ Үнәр эдниг әрүтктн. Тана Үг йосн үнн. ¹⁸ Та Намаг орчлңд илгәсн метәр Би эдниг орчлңд илгәҗәнәв. ¹⁹ Эдниг Танд нерәдхәр экләд Бийән Танд нерәдҗәнәв. Эдниг үнәр Тана болтха гиһәд тиигҗәнәв. ²⁰ Би һанцхн эднә төлә сурҗахшв. Би эднә үгәр Нанд иткх әмтнә тускар бас сурҗ бәәнәв. ²¹ Тедн ни-негн бәәтхә гиҗ Би зальврҗанав. Аав, Та Нанла негдҗ, Би Танла негдҗ бәәдгәр тедн Мандла негдҗ бәәтхә. Тедн негдҗ бәәтхә! Тегәд Та Намаг илгәсиг орчлң иткх. ²² Тана өгсн туурмҗиг Би эднд өгләв. Эдн Маднла әдл ни-негн болтха гиһәд тиигләв. ²³ Тедниг негдүлхәр Би теднлә негдҗ бәәнәв, Та Нанла негдҗ бәәнәт. Эн учрас Та Намаг илгәвт гиҗ Нанд дурта болсн кевәр теднд дуран өгнәт гиҗ орчлң медх. ²⁴ Аав! Тана өгсн әмтн Нанла хамдан бәәтхә. Мини бәәсн һазрт тедн бас бәәтхә, гиҗ Танас сурҗанав. Тедн Мини туурмҗиг үзтхә. Тер туурмҗиг Та орчлң үүдәд уга бәәтл Нанд ик хәәртә болад өгләт. ²⁵ Үнн чик Аав! Орчлң Таниг медсн уга. Би Таниг меднәв. Болв Та Намаг илгәсиг эдн меднә. ²⁶ Тиигҗ Нанд өгсн Тана дурн эдниг дүүргтхә гиһәд болн Намаг теднлә негдҗ бәәтхә гиһәд, Би эднд Тана тускар секв. Болв цааранднь секәд бәәхв.

Исусиг бәрҗ өглһн болн бәрлһн

¹ Исус зальврсна хөөн сурһульчнртаһан Кедрон гидг салаг дәврәд, садт ирв. ² Йуда гидг урвач тер һазриг меддг билә, Исус сурһульчнртаһан оньдин тиигәрән ирдг бәәсмн. ³ Йуда тиигәрән Римин цергүдиг, гелңгүдин болн паршмудын илгәсн сүмин харулчнриг дахулсн бас ирв. Тедн шам бәрсн, зер-зевтәһән ирцхәв. ⁴ Исус Терүнлә юн учрхинь медәд бәәв.

– Кениг хәәҗәнәт? – гиҗ Исус өмәрән һарад теднәс сурв.

⁵ – Назаретин Исусиг, – гиҗ тедн хәрү өгв.

– Тертн Бив, – гиҗ Исус келв.

Йуда гидг урвач бас теднә өөр зогсҗала. ⁶ Исус «Бив» гисн цагт тедн цуһар ардагшан цухрад һазр элкдҗ унцхав.

⁷ – Кениг хәәҗәнәт? – гиҗ Исус давтад теднәс сурв.

– Назаретин Исусиг, – гиҗ тедн хәрү өгцхәв.

⁸ – Би таднд Тертн – Бив гисн бәәнәлм, кемр Би таднд кергтә болхла, эдниг тәвҗ йовултн, – гиҗ Исус келв.

⁹ «Тана өгсн әмтнәс негинь чигн Би геесн угав», гисн үгмүд тиигәд бүтв. ¹⁰ Симона Пётрт үлд бәәҗ. Тер үлдән өргәд, ах гелңгин зарцин барун чикинь тәәрәд хайчкв. Тер зарцин нернь Малх бәәҗ.

¹¹ – Үлдән дүр! Мини Эцкин белдсн зовлңгиг Би эдлх зөвтәв, тиим эсий? – гиҗ Исус Пётрт келв.

Исус ах гелңгин өмн

¹² Римин цергүд ахлачтаһан болн сүмин харулчнр Исусиг бәрҗ авв. Тедн Исусиг күләд, Анас тал авч ирв. ¹³ Юңгад гихлә, Ханас Кәәпин хадм эцк бәәҗ. Тер җилд Кәәп ах гелң болсмн.

¹⁴ – Нег күн цуг келн әмтнә төлә үксн деер болх, – гиҗ урднь Кәәп евреймүдин толһачнрт келсн билә.

Пётрин гөрдлһн

¹⁵ Симон Пётр болн дәкәд нег сурһульч Исусин ардас йовсн бәәҗ. Тер сурһульч ах гелңгин сән таньл бәәсн учрас Исусиг дахад, герин хашад орҗ чадв. ¹⁶ Пётр болхла үүднә ца үлдәд зогсв. Ах гелңгин таньдг сурһульч һарад, үүднә өөр зогсдг зарц күүкд күүнлә күүндәд, Пётриг герин хашад орулв.

¹⁷ – Та эн күүнә сурһульчнрин негнь биший? – гиҗ тер зарц күүкд күн сурв.

– Уга, – гиҗ Пётр хәрү өгв.

¹⁸ Һаза серүн билә. Зарцнр болн Римин цергүд һал шатаһад, терүнә цогин өөр дуладад зогсҗ. Пётр бас дуладхар тедн дунд зогсв.

Ах гелң Исусиг мөшкнә

¹⁹ Тер цагт ах гелң Исусиг сурһульчнриннь тускар болн номин тускар мөшкв.

²⁰ – Би цуг әмтнд иләр келдг биләв, Би хурлмудт эс гиҗ сүмд номан умшад, әмтиг сурһдг биләв. Тенд кесг евреймүд цуглрдг билә. Нууц юм Би келдго биләв. ²¹ Юңгад тадн Намаг мөшкәд бәәнәт? Намаг соңссн әмтнәс суртн. Тедн Мини келсн үг меднә, – гиҗ Исусиг эн үгмүд келснә хөөн, Терүнә өөр зогсҗасн сүмин харулчнрин негнь Исусиг халхарнь ташв:

– Чи ах гелңглә ямаран кевәр күүндҗәхмч! – гиһәд тернь келв.

²³ – Кемр Би буру үг келсн болхла, буруһинь йилһҗ кел. Кемр чик келсн болхла, яһад Намаг цоквч?

²⁴ Хана күләтә Исусиг Кәәп гидг ах гелңгүр илгәв.

Пётрин хойрдгч гөрдлһн

²⁵ Симона Пётр һалын өөр дуладҗ бәәхд, терүг дәкәд нег күн:

– Чи Энүнә сурһульчнрин негнь бишвч? – гиҗ сурла.

– Бишв, – гиҗ тер хәрүцв.

²⁶ Тиигхлә ах гелңгин зарц Пётр чикинь тәәрсн зарцин садн:

– Тер садт теднлә хамдан бәәсн чи мөн бишвч? – гив.

²⁷ Пётр саак кевәрн гөрдв, генткн эр така хәәкрв.

Исус Пилатын өмн

²⁸ Евреймүд Исусиг римин закрач Пилатын бәәшңд авч ирцхәв. Песахин байрин өрүнә цаг билә. Евреймүд бийән бузрдашгоһар бәәшң дотрнь орсн уга. Орсн болхла, тедн Песахин байрла асхни хот эдлх зөв уга болх билә. ²⁹ Тегәд чигн Пилат тедн тал һарв.

– Юунас көлтә тадн эн күүг гемшәҗәхмбт? – гиҗ тер сурв.

³⁰ – Эн йос эс эвдсн болхла, бидн Энүг чамур авч иршго биләвидн, – гиҗ тедн хәрү өгв.

³¹ Пилат:

– Энүг тадн бийстн авад, эврәннь Закаһар зарһинь кетн, – гив.

– Мадн кү үкүлхәр цааҗлх зөв угавидн , – гиҗ евреймүд хәрү өгв.

³² Тиим кевәр Исус ямаран үкләр үкх гисн үгмүд бүтәгдх зөвтә бәәсмн. ³³ Тиигхлә Пилат бәәшң дотран орад, Исусиг дуудҗ авад:

– Йудья улсин хан чивч? – гиҗ сурв.

³⁴ – Чи энүг эврән келҗәнч, али чамд Мини тускар тиигҗ талдан әмтн келв? – гиҗ Исус хәрүднь сурв.

³⁵ – Би кемб? Еврей болҗахмб? – гиҗ Пилат хәрү өгв.

– Эн чини келн-әмтн, чини ахлачнр чамаг мини һарт бәрүлв. Чи ю кесмбч?

³⁶ Исус:

– Мини алвт эн орчлңгин биш. Кемр алвтм эн орчлңгин бәәсн болхла, Мини алвтнр Намаг евреймүдин толһачнрас харсх билә. Мини алвт эн орчлңгин биш, – гив.

³⁷ – Чи хан болҗахмч? – гиҗ Пилат сурв.

– Чи үнәр келҗәнәч. Би – ханв, – гиҗ Исус келв, – Би төрәд, эн орчлң тал үннә тускар герчлхәр ирв. Зөвтә Үнниг медсн күн Намаг соңсна. ³⁸[а] Пилат:

– Үнн гидг юмб? – гиҗ сурв.

Исусиг үклин цааҗла харһулснь

³⁸[б] Цааранднь Пилат һазаран һарад евреймүдт келв:

– Би эн күүг гемшәх учр үзҗәхшв. ³⁹ Танад тиим авъяс бәәнә: Песахин байрт бәрәнд суусн әмтнәс негинь сулдхх кергтә. Йудья улсин хааг сулдххар седҗәнт?

⁴⁰ Тедн цуһар:

– Уга! Энүг биш! Бар-Абаг сулдх! – гиҗ хәәкрв.

Бар-Аба болхла деермч күн бәәсмн.

¹ Тиигхлә Пилат Исусиг маляһар цоктн, гиҗ цергүдт закв. ² Цергүд хатхдг көглин ацмудар титм гүрәд, Исусин толһа деернь өмскв. Дәкәд тедн улан лавшг Терүн деер хаяд, ³ даран-даранднь Исус тал өөрдәд:

– Йудья улсин хан менд болтха! – гиҗ хәәкрәд, наад бәрәд цокҗ зоваһад бәәв.

⁴ Пилат дәкн әмтнүр һарад:

– Хәләтн! Би Энүг цааҗла харһулх буру юм һарһснь нанд медгдхш. Тегәд таднур дәкәд Энүг һарһв, – гив.

⁵ Исусиг көгл титмтәһинь болн улан лавшгтаһинь һарһад зогсахлань:

– Тер күн эн бәәнә, – гиҗ Пилат келв.

⁶ Ах гелңгүд болн сүмин харулчнр Исусиг үзәд цуһар:

– Кирст хадул! Кирст Энүг хадул! – гиһәд хәәкрцхәв.

– Энүг авад бийстн кирст хадултн. Би болхла Энүнә кесн буруһинь үзҗәхшв, – гиҗ Пилат хәрүцв.

⁷ – Мана Закаһар Эн күн үкх зөвтә. Энтн бийән Бурхна Көвүн гиҗ нерәднә! – гиҗ евреймүд эврәһәрн кехәр келцхәв.

⁸ Цуг энүг соңссн Пилат улм сүрдв. ⁹ Тер дәкәд эврәннь бәәшңгүрн орад:

– Чи кенәхнәвч? – гиҗ Исусас сурв.

Зуг Исус тагчг, үг келлго зогсв.

¹⁰ – Чи нанла күүндхәр седҗәхшийч? Чамаг сулдхх эс гиҗ кирсд хадулх йосн нанд бәәдгинь Чи медҗәхшийчи? – гиҗ Пилат келв.

¹¹ – Кемр чамд эн йос теңгрәс эс өгсн болхла, чи Намаг бәрх йосн уга болх биләч. Тер учрар Намаг чини һарт бәрүлсн күүнә килнц чини килнцәс ик болх, – гиҗ Исус хәрү өгв.

¹² Терүг келснә хөөн Пилат Исусиг сулдхх арһ хәәв.

– Кемр чи Эн күүг сулдххла, чи Римин хаана үр биш болхич. Би ханв гисн күн Римин хаана өшәтн болҗана! – гиҗ евреймүд дәкн хәәкрцхәв.

¹³ Пилат теднә үгмүд соңсад, Исусиг һарһҗ авад, эврән зарһчин ормдан суув. Тер орм чолуһар кесн өндр орм бәәҗ, еврей келәр Габат гиҗ нерәдгдсмн. ¹⁴ Песах гидг байрин өмн басң өдр билә. Үдин цаг бәәҗ.

– Хәләтн, эн тана хан, – гиҗ Пилат евреймүдт келв.

¹⁵ – Энүг цааран йовул, цааран! Кирст хадул Энүг! Кирст! – гиҗ тедн хәәкрцхәв.

– Тадна хааг кирст хадулхмб? – гиҗ Пилат сурв.

– Мана Римин хаанас даву хан уга, – гиҗ ах гелңгүд хәрү өгцхәв.

¹⁶[а] Аш сүүлднь, Пилат Исусиг кирст хадулхар цергүдин һарт өгв.

Исусиг кирст хадулснь

¹⁶[б]-17 Тедн Исусиг авад йовцхав. Эврәннь кирсән авад, Исус Һавлын орм тал йовв. Еврей келәр Голгот гидг һазр бәәҗ. ¹⁸ Тенд Исусиг кирст хадулв, Терүнлә хамдан барун болн зүн талнь дәкәд хойр кү цааҗлв. Исус теднә тал дунднь бәәсмн. ¹⁹ Пилат харһа модыг белдәд, кирс деер хадултн гиһәд цергүдт закв. Тер харһа моднд: «Назаретин Исус – Йудья улсин хан» гиҗ бичәтә бәәсмн. ²⁰ Тер бичсн үгмүдиг кесг евреймүд умшсмн, юңгад гихлә, Исусиг цааҗлсн һазр балһсна өөр бәәҗ. Тер үгмүд еврей, Рим болн грек келнд бичәтә бәәҗ. ²¹ Ах гелңгүд Пилатд энтн хаҗһр гив.

– «Йудья улсин хан» гиҗ бичә бичтн. «Тер: Би Йудья улсин хан гиҗ келнә» гиһәд бичтн, – гиһәд тедн келцхәв.

²² – Бичх юман бичв, – гиҗ Пилат хәрү өгв.

²³ Цергүд Исусиг кирст хадсна хөөн Терүнә хувцинь авад, дөрвн әңгд хував, күн болһнд күрв. Хитон гидг Исусин хувцнь болхла уйдл уга бүкл билә.

²⁴ – Энүг хувахмн биш. Җирв хайхм, кенд тусна, тернь авчана, – гиҗ тедн шиидв.

Тиигҗ Бурхна Бичгт бәәсн үгмүд күцв: «Тедн хоорндан зәрм хувцим хувала, болв наадк хувцна төлә җирв хайла». Цергүд тер келсиг күцәв. ²⁵ Исусин кирсин өөр Терүнә эк, наһц эгч, Клөпән гергн Марий болн Магдален хотна Марий зогсла. ²⁶ Исус эврәннь экән болн хаҗуднь зогссн дурта сурһульчиг үзв.

– Аак, эн чини көвүн, – гиҗ Исус экдән келв.

²⁷ Эврәннь сурһульчдан Исус:

– Эн чини экчнь, – гив.

Тер өдрин хөөн сурһульч Исусин экинь герүрн авв.

Исусин үкл

²⁸ Исус цуг юмиг күцәгдсинь медлә, тегәд Бурхна Бичгиг бүклднь күцәхин төлә Тер келв:

– Би ундасҗанав.

²⁹ Тенд буһшт чаһр бәәҗ. Цергүд терүнд кенчр норһад, моднд өргәд, Исусин урлд күргв. ³⁰ Исус тер чаһриг амсад, келв:

– Күцв!

Эн үгмүдин хөөн Терүнә толһань өрч деернь унад, әмнь цогцасн һарв.

Цергч Исусиг хәврһәрнь шаасна тускар

³¹ Басң өдр билә, маңһдуртнь бемб өдр болх бәәҗ. Бемб өдрлә кирс деер үксн цогц бәәх йосн уга бәәҗ. Дәкәд болхла, бемб өдр – онц Песахин өдр билә. Тер учрар евреймүдин толһачнр кирс деер хадата әмтнә көлинь хамхлад, цогцснь кирс деерәс буулһх зөв Пилатас сурв. ³² Цергүд ирәд, нег хадата күүнә көлинь хамхлад, наадк күүнә көлинь хамхлв. ³³ Тедн Исусур өөрдлә, Исус әмн уга бәәҗ, тер учрар тедн Терүнә көлинь хамхлсн уга. ³⁴ Зуг нег цергч җидәр Исусиг хәврһәрнь шаав, цусн усн хойр Исусин цогцас асхрв. ³⁵ Цуг энүг үзсн күн тадниг итктхә гиһәд, энүнә тускар герчлҗәнә. Терүнә герчллһн үнн, болв тер үн келҗәсән меднә. ³⁶ Бурхна Бичгин «Терүнә нег чигн ясн хуһршго» гисн үгмүд күцхин төлә цуг эн йовдл учрв. ³⁷ Бичгт дәкәд нег халхд бичәтә билә: «Тедн шаагдсн күүнүр хәләх».

Исусиг оршалһн

³⁸ Хөөннь Ариматьяс ирсн Йосип Исусин цогциг Пилатас сурв. Йосип Исусин нууц сурһульч бәәсмн. Юңгад гихлә, тер евреймүдин толһачнрас әәдг бәәҗ. Пилат зөв өгхлә, тер ирәд, Исусин цогциг авв. ³⁹ Йосипла хамдан Никодим ирв. Тер Никодим Исусур сөөд ирдг билә. Никодим һучн килограмм каңкнсн смирн болн алоэ гидг сәәхн үнртә тос авч ирв. ⁴⁰ Тедн Исусин цогциг кирсәс сулдхад, цогцднь сәәхн үнртә тос түркәд, кенчрәр орав, еврей әмтнә йосар цогциг тиигҗ оршадг бәәҗ. ⁴¹ Исусиг цааҗлсн ормд сад бәәҗ, тер сад заагт шин кесн хадын көндә бәәсмн. Тер көндәд күн оршагдад уга бәәҗ. ⁴² Тегәд Песах байрин өдрмүд өөрдҗ йовсн цаг билә. Тер хадын көндә өөрхн бәәсн учрас Исусиг тенд оршав.

Исусин әмдрлһн

¹ Өр цәәтл шин долан хонгин түрүңк өдр эклхин өмн Магдален хотна Марий харңһуһар үкәр тал йовна. Өөрдәд ирхләнь, үкәр хаасн хад чолун тедүкнд кевтсинь үзв. Үкәрнь секәтә бәәҗ. ² Тер Симона Пётрүр болн Исусин дурта сурһульч тал гүүҗ ирәд:

– Тедн Деед Эзиг үкәрәснь һарһад авад йовҗ оч, цогцинь альд орксинь бидн медҗәхшвидн! – гиҗ келв.

³ Пётр тер сурһульчта хамдан тер дарунь үкәрүр йовцхав. ⁴ Тедн хоюрн гүүҗ. Зуг тер сурһульч Пётриг күцәд үкәрүр түрүләд гүүҗ ирв. ⁵ Үкәр дотр шаһаҗ хәләһәд, тенд Исусиг орасн оршалһна кенчр үзв. Зуг сурһульч үкәр дотр орсн уга. ⁶ Дәкәд терүнә ард йовсн Симон Пётр гүүҗ ирәд, үкәр дотр орв. Исусин цогциг орасн кенчр ⁷ болн толһаһинь боосн альчур бас үзв. Тер альчур наадк кенчрмүдәс талдан ормд эвкәд тәвгдсн бәәҗ. ⁸ Тиигхлә түрүләд үкәрүр гүүҗ ирсн наадк сурһульч бас үкәр дотр орв. Тер үзәд иткв. ⁹ Бурхна Бичгәр Исусиг әмдрхинь тедн ода чигн медәд уга бәәҗ. ¹⁰ Сурһульчнр герүрн хәрв.

Магдален хотна Марий Исус хойр

¹¹ Марий үкәрин өөр ууляд зогсв. Уульн бәәҗ тер үкәр дотр шаһаҗ хәләв. Генткн цаһан хувцта хойр Бурхна элчнриг тер үзв. Тедн Исусин цогц кевтсн ормд сууҗ, негнь толһаднь, дарукнь көлднь. ¹³ Бурхна элчнр Марийас:

– Күүкн, чи юңгад уульҗахмч? – гиҗ сурв.

– Тедн мини Деед Эзиг авад йовҗ одв. Болв Терүг альд тәвсинь би медҗәхшв, – гиҗ тер хәрү өгв.

¹⁴ Күүкд күн хәрү эргәд хәләв, генткн тенд Исусиг үзв. Зуг Исусиг Бийнь зогсҗахинь тер йосндан таньҗ медҗ чадсн уга.

¹⁵ – Күүкн, юңгад уульҗахмч, кениг хәәҗәхмч? – гиҗ Исус келв. Марий Исусиг сад хәләдг күн гиҗ санад келв:

– Эзн минь, кемр Чи Исусиг авад йовҗ одсн болхла, цогцинь альд тәвсән кел, би йовад авнав.

¹⁶ – Мирьям, – гиҗ Исус терүнд келв.

Күүкд күн Терүнүр эргҗ хәләһәд, еврей келәр:

– Раввуни! (Багш гидг үг), – гиҗ хәәкрв.

¹⁷ – Дәкҗ Нанур һаран бичә күрг! Би Эцкүрн деегшән һарад угав. Мини дүүнр тал йовад кел: Би эврәннь Эцкүр болн тадна Эцкүр хәрҗәнәв, Мини Бурхн тал, тадна Бурхн тал, – гиҗ Исус келв.

¹⁸ Магдален хотна Мирьям сурһульчнр тал йовад:

– Би Деед Эзиг үзв! – гиҗ келв.

Исусин келсн үгмүдиг теднд тер келҗ өгв.

Сурһульчнр әмдрсн Исусла харһҗана

¹⁹ Асхн долан хонгин түрүңк өдртнь сурһульчнр цуглрсмн. Тедн евреймүдин толһачнрас әәһәд, үүдән төдглҗ. Үүднь төдгтә бәәсн бийнь Исус ирәд:

– Бурхн тадниг өршәтхә! – гиҗ келәд,

²⁰ Сурһульчнртан эврәннь хойр һаран, хәврһән үзүлв. Тедн цуһар Деед Эзиг үзәд, икәр байрлцхав.

²¹ – Бурхн тадниг өршәтхә! Эцкм Намаг илгәсн кевәр Би тадниг илгәҗәнәв, – гиҗ Исус келәд, ²² тедн тал үләһәд, келв:

– Әрүн Сәкүсиг автн, – гив.

²³ – Кемр тадн күүнә килнц тәвҗ өгхлә, Бурхн терүнә килнц тәвҗ өгх. Болв кемр тадн күүнә килнцинь эс тәвҗ өгхлә, Бурхн терүнә килнц тәвҗ өгшго, – гиҗ Исус келв.

Исус Томас хойр

²⁴ Исусиг ирсн цагт Икрин өрәсн Томас, арвн хойр сурһульчнрин негнь уга бәәҗ.

²⁵ – Бидн Деед Эзиг үзләвидн! – гиҗ талдан сурһульчнр терүнд келв.

– Хадасн орсн ормиг һартнь үзәд эс көндәтл болв хәврһднь бәәсн шавинь эс көндәтл би төрүц иткшгов, – гиҗ Томас хәрү өгв.

²⁶ Долан хонг давсна хөөн сурһульчнр саак кевәрн нег герт цуглрв. Тер цагт Томас бас теднлә бәәв. Үүдн төдгтә бәәлә, зуг Исус дәкн үзгдәд, сурһульчнрин дунд зогсад:

– Бурхн тадниг өршәтхә! – гиҗ келв.

²⁷ – Эврәннь хурһан өг нааран, Мини һар хәлә. Һаран өгәд Мини хәврһм көндә. Маһдл уга итк! – гиҗ Исус Томаст келв.

²⁸ Томас:

– Деед Эзн минь болн мини Бурхн! – гиҗ хәрү өгв.

²⁹ Исус:

– Чи Намаг үзәд итквч. Намаг үзлго иткдг күн буйн-кишгтә! – гив.

Эн дегтрин тускар

³⁰ Кесг өвәрц темдг Исус сурһульчнртан үзүлв. Теднә тускар эн дегтрт бичгдсн уга. ³¹ Исус Бурхна илгәсн Аврач Бурхна Көвүн гиҗ иткүлхин төлә, болв иткәд Терүнә нернә төләд мөңк җирһл эдлҗ бәәтхә гиҗ эн дегтр бичгдсн бәәҗ.

Исус долан сурһульчнрт үзүлснь

¹ Хөөннь Исус Тиберәд нуурин өөр сурһульчнрт үзгдв. Эн иигҗ учрв. ² Шимона Пётр, Икрин өрәсн Томас, Һалилья Канын Натаналь, Зебедайин көвүн болн дәкәд хойр сурһульч хамдан цуглрҗ. ³ Шимона Пётр:

– Би заһс бәрхәр йовнав, – гив.

– Бидн бас чамта хамдан йовнавидн, – гиҗ тедн келцхәв.

Тедн нур тал ирәд оңһц дотр орцхав. Зуг тер сөөд юм бәрҗ авсн уга. ⁴ Өр цәәхлә, Исус тедниг усна көвәд күләҗ, зуг сурһульчнр Исусиг таньсн уга.

⁵ – Үүрмүд Мини, заһсн бәәнү? – гиҗ Исус тедниг дуудҗ сурв.

– Уга, – гиҗ сурһульчнр хәрү өгв.

⁶ – Оңһцин барун талан гөлм хайтн, заһс бәрҗ авхит, – гиҗ Исус келв.

Тедн гөлмән хаяд ик дала заһс бәрәд, әрә гиҗ терүг һарһҗ авв. ⁷ Исусин хамгин хәәртә сурһульч Пётрт:

– Энтн Деед Эзн! – гиҗ келв.

Шимон Пётр Деед Эзн гисинь соңсад, деерк хувцан бий деерән хаяд, (тер юңгад гихлә, белкүсцәһән нүцкн бәәҗ) оңһцас уснд орв. ⁸ Наадк сурһульчнр оңһц дотр бәәһәд, заһсар дүүрң гөлм татн бәәҗ Пётрин ардас дахҗ йовв, усна көвә күртл зу метр шаху үлдсн билә. ⁹ Тедн оңһцан тәвәд, эрг деер һархла, шачасн дендр үзв. Терүнә цог деернь шаргдҗах заһсн, өөрнь болһсн өдмг бәәҗ.

¹⁰ – Бәрҗ авсн заһснас тадн невчкниг нааран авч иртн, – гиҗ Исус теднд келв.

¹¹ Шимона Пётр оңһц дотр орад, гөлмиг уснас татҗ авад һазрт хайв. Тедн зун тәвн һурвн ик заһс бәрҗ авч. Тиим дала заһс дааһад, гөлм тасрсн уга бәәҗ.

¹² – Наартн, хотан уутн, – гиҗ Исус сурһульчнрт келв.

Сурһульчнрас нег чигн күн кембт? гиҗ зөрглҗ сурсн уга. Терүг Деед Эзн гиҗ тедн медв. ¹³ Исус өөрдәд өдмг заһс хойриг теднд өгв. ¹⁴ Әмдрснә хөөн Исус сурһульчнрт һурвдад үзгдсмн.

Исус Пётр хойр

¹⁵ Хотын хөөн Исус:

– Йохана көвүн Шимон, чи эднәс үлү Нанд дурта бәәснь үнәрий? – гиҗ Шимон Пётрт келв.

– Тиим, Деед Эзн. Би Танд яһҗ дурта болдгинь Та эврән меднәт, – гиҗ тер хәрү өгв.

– Тиигхлә Мини хурһдыг хәрүл, – гиҗ Исус келв.

¹⁶ – Йохана көвүн Шимон, чи Нанд дуртавч, угай? – гиҗ Исус Пётрәс хойрдад сурв.

– Тиим Деед Эзн. Яһҗ би Танд дурта болдгинь Та эврән меднәт, – гиҗ Пётр келв.

– Мини хөөдиг хәлә, – гиҗ Исус хәрү өгв.

¹⁷ – Йохана көвүн Шимон, чи Нанд дуртавчи? – гиҗ Исус Пётрәс һурвдад сурв.

Исусиг һурвдад сурҗаснд Пётр гейүрәд:

– Деед Эзн, Та цугинь меднәт, Намаг Танд икәр дуртаһинь бас меднәт, – гив.

– Мини хөөдиг хәрүл, – гиҗ Исус терүнд келв.

¹⁸ – Үнәр чамд келҗәнәв, баһ цагтан чи эврән бийән нег мөсләд, дурта һазрт йовдг арһта биләч. Зуг чамаг көгшрхлә, һаричнь бооһад талдан күн чамаг дурго һазрт авад йовх.

¹⁹ Эн үгәр Исус Пётриг ямаран үкләр үкхинь келсн бәәҗ. Тер үкләр Пётр Бурхиг туурулх. Цааранднь Исус Пётрт:

– Намаг дахад йов, – гив.

Исус болн Терүнә дурта сурһульч

²⁰ Пётр ардагшан хәләһәд, Исусин дурта сурһульчиг үзв. Тер сурһульч асхни хот уусн цагт Исуст толһаһан өөрдүләд: «Деед Эзн, кен Чамас урвх?» – гиҗ сурла.

²¹ Терүг үзәд, Пётр:

– Деед Эзн, энүнлә юн учрх? – гиҗ сурв.

²² – Кемр Намаг хәрү иртл энүг әмд бәәлһхәр седхлә, чамд юн кергв? Чи Намаг дахад йов, – гиҗ Исус хәрүднь келв.

²³ Эн үгмүдин хөөн сурһульчнр заагт тер сурһульч үкшго гисн зәңг тарв. Зуг Исус үкшго гиҗ келсн үга:

– Кемр Намаг хәрү иртл, энүг әмд бәәлһхәр седхлә, чамд юн кергв? – гиҗ келсмн.

²⁴ Цуг Энүг герчлҗәсн, цуг энүг бичснь Исусин келҗәсн сурһульч. Бидн цуһар меднәвидн, эн герчллһн үнн.

Сүл үгмүд

²⁵ Исус олн юм күцәв. Кемр цугинь бичҗ авхла, Терүнә тускар бичгдсн дегтрмүд цуг нарт делкәд багтлго чигн бәәх билә.