ҺАЛАТЬЯНХН

Христост иткдг Һалатьян улст илгәсн бичг

Йосн христианин болхин төлә Мошена Зака күн болһн күцәхмб, угав гисн сурвр Сән Зәңг цәәлһәд тархасна хөөн һарч ирнә. Павел терүг күцәхмн биш гиҗ әмтнлә зүткәд цәәлһдг билә. Христоста нииләд бәәхин төлә һанцхн иткл кергтә, иткләр дамҗад цугтан чик седклтә болдмн гиҗ тер лавлҗ келҗәв. Болв Һалатьяд, Римин эргмдк Баһ Азийд бәәх чонҗсар Павелын өмнәс сөрлцдг улс һарч ирцхәнә. Үннч апостол болхин төлә зака күцәх кергтә гиҗ тедн келцхәв.

Эн бичг худл номд авлгдсн улсиг үнн итклд хәрү орулхин төлә бичгдсмн. Павел Исус Христосин апостол гисн нер зүүхәр эврәннь зөвән харсҗах кемәс экләд бичгән бичҗ. Апостол болтха гиҗ терүг күн биш, Бурхн дуудсиг тер зүткҗ лавлҗана. Павел буру номта улст күрх күн болҗана. Дәкәд күн болһн зуг иткләр дамҗад чик седклтә болдгиг тер бас күчлҗ келҗәнә.

Сүүлңк бөлгүдт Павел христианмудын заң-бәрц эклцән дурнас авчасиг бичгтән үзүлҗәнә. Эннь Христост иткснә ашнь болҗана.

Учр-утхин зура

Нүр үг 1.1–10

Апостол болсн Павелын һардгч йосн 1.11 – 2.21

Бурхна хәәрлтин туск Сән Зәңг 3.1 – 4.31

Христианмудын сүл бәәдл болн даавр 5.1 – 6.10

Товчлгч үг 6.11–18

Мендллһн

¹ Һалатьяд бәәх сүзгтни багмудт Павел иигҗ бичҗ. Нанла хамдан бәәх цуг ахнр-дүүнр танла мендлҗәнә. Намаг апостол болтха гиҗ күн чигн биш, күүһәр дамҗад чигн биш һанцхн Исус Христос болн Терүг үкләс әмдрүлсн Бурхн-Эцк дуудвр кев.

³ Мана Бурхн Эцк болн Деед Эзн Исус Христос цаһан сана, амулң-төвкнүн бәәдл таднд өгтхә.

⁴ Мадниг эн цагин му җирһләс сулдххин төлә мана килнцәс көлтә мана Бурхна болн Эцкин таалар Христос әмән өглә. ⁵ Бурхн мөңкинд тууртха. Тиигтхә!

Оңдан Сән Зәңг уга

⁶ Христосин хәәрлтәр дамҗад таниг дуудсн Бурхиг тиим шулуһар үлдәһәд, талдан Сән Зәңг авситн би өврҗәнәв. ⁷ Йосндан болхла, оңдан Сән Зәңг уга. Болв таниг үүмүлхәр седҗәх, Христосин Сән Зәңгиг хаҗилһхәр седҗәх улс бас бәәдг чигн. ⁸ Кемр бидн эврән, эс гихлә теңгрәс Бурхна элч таднд цәәлһсн Сән Зәңгәс оңдан Сән Зәңг цәәлһсн болхла, хамгин ик цааҗла харһтха. ⁹ Урднь мана келсиг би дәкн келҗәнәв: кемр таднд кен болв чигн тана авсн Сән Зәңгәс талдан Сән Зәңг цәәлһхлә, тер күн хамгин ик цааҗла харһтха.

¹⁰ Би күүнә зөв хәәҗәхшв. Би Бурхна зөвшәл хәәҗәнәв. Күүнд таасгдхар седҗәхшв. Кемр би эндр күртл күүнд таасгдҗасн болхла, Христосин зарц болшго биләв.

Павел апостол болсна тускар

¹¹ Ахнр-дүүнр, мини цәәлһҗ өгчәх Сән Зәңг күүнәс үүдсмн биш. Тедниг медтхә гиҗәнәв. ¹² Сән Зәңгиг би күүнәс авсн уга биләв. Терүг күүнәс дассн угав. Нанд терүг Исус Христос медүлв.

¹³ Намаг урднь евреймүдлә әдләр Бурхнд иткҗ йовсиг тадн соңссн болхит. Би Бурхна сүзгтни багмудыг догшар көөһәд, уга кехәр седләв. ¹⁴ Евреймүдин шаҗна кергиг күцәлһәрн би эврә үйин көвүдәс өмн йовлав. Мана өвкнрин авъясиг би йир халурхч күцәдг биләв.

¹⁵ Болв Бурхн намаг эврәннь хәәрлтәрн һазр деер төртлм шүүҗ авад, Бийдән церглтхә гиҗ дуудҗ. ¹⁶ Христосин туск Сән Зәңг буру номта улст тархахин төлә Бурхн нанд Эврәннь Көвүг үзүлв. Тер цагт би нег чигн күүнлә селвлцсн угав. ¹⁷ Нанас өмн болсн апостолмудла харһхин төлә би Ерусалим балһсн тал одсн угав. Түүнә ормд Арабья тал йовад, дәкәд Дамаск тал хәрҗ ирв. ¹⁸ Һурвн җил болад би Ерусалим тал Кеплә харһхар одв. Тенд би арвн тавн хонг бәәвв. ¹⁹ Деед Эзнә дү Яковас талдан апостолмудла би харһсн угав.

²⁰ Мини бичсн үнн. Би худл келҗәхшв. Бурхн меднә.

²¹ Түүнә хөөн Сирий болн Киликья Һазр тал һарв. ²² Тиигхд Йудья һазрт, Христосин сүзгтни багмудт намаг меддго бәәҗ. ²³ «Эн күн урднь мадниг көөҗ йовла. Ода болхла, урднь уга кехәр бәәсн иткл цәәлһҗ йовна», – гиҗ тедн соңсҗ. ²⁴ Мини төлә тедн Бурхиг магтдг чигн.

Павел болн оңдан апостолмуд

¹ Арвн дөрвн җил болад Бар-Набала хоюрн Титиг дахулад, дәкн Ерусалим тал одвидн. ² Би Бурхна заасар йовв. Би сүзгтни багин ахлачнрта нүүрлцәд харһад, теднд буру номта улст цәәлһҗ өгсн Сән Зәңгин тускар эврән келҗ өгв. Мини эндрк болн урдк кесн көдлмш йирдән бичә давтха гиләв. ³ Тедн Титиг грек болсар керчүлтхә гиҗ нексн уга. ⁴ Болв зәрмснь тиим йовдл һарһхар седв. Тедн худлар ахнр-дүүнр болад туршулчнр мет мадн дунд орцхаҗ. Тиигхләрн тедн Исус Христосла бәәсн ниицәһәр дамҗад мана сулдхврин тускар медхәр седв. Тедн маднар мухлаһан кехәр седҗәҗ. ⁵ Болв бидн агчмин зуур чигн теднд тәвҗ өгсн угавидн. Яһад гихлә, бидн тана төлә Сән Зәңгин үнниг хадһлхар седләвидн.

⁶ Әмтн һардачнр гиҗ тоолҗасн улс (нанд болхла, кен болсинь мел йилһл уга. Бурхн һазак бәәдләр күүнә зарһ кешго) нанд шин юм мел келсн уга. ⁷ Терүнә ормд Бурхн нанд буру номта улст Сән Зәңг цәәлһтхә гисн даалһвр өгсиг тедн үзлә. Бурхн Пётриг Сән Зәңг евреймүдт бас тиигҗ цәәлһтхә гилә. ⁸ Бурхна күчәр Пётр евреймүдин төлә апостол болла. Би бас Бурхна күчәр буру номта улсин төлә апостол болв. ⁹ Һардач гиҗ тоолгдҗасн Яков, Пётр болн Йохан нанд Бурхна өгсн эн шишлң даалһвр медв. Бар-Набаг болн терүнлә хамдан көдлҗәх улст тоолв. Аштнь бидн һаран атхлдад зөвшәрвидн. Би Бар-Набата буру номта улс дунд көдлх, тедн евреймүд дунд көдлх болҗ һарв. ¹⁰ Зуг тедн мадниг түрү-зүдү улсин тускар бичә марттн гиҗ сурцхав. Тер сурвриг би эврән күцәхәр седдг биләв.

Павел Пётриг бурушаҗана

¹¹ Пётр Антиохд ирхлә, би терүнә өмнәс иләр келләв. Яһад гихлә, тер хаҗһр йовдл һарһҗасмн. ¹² Яковин илгәсн улс иртл Пётр буру номта ахнр-дүүнрлә хамдан хот уудг бәәҗ. Зуг тедниг ирхлә, буру номта күүг керчүлтхә гиҗ некҗәсн әмтнәс әәһәд Пётр теднлә хамдан хот уудган уурв. ¹³ Еврей ах-дүүнр Пётрлә хамдан хойр чирәтә йовдл һарһад бәәв. Тернь нам Бар-Набаг бас чик хаалһаснь хаҗилһв. ¹⁴ Теднә һарһҗах йовдл Сән Зәңгин үннлә эс ирлцҗәхиг үзхләрн би теднә цугтаннь өмн Пётрт иигҗ келүв: «Чи, еврей болв чигн, буру номта күүнлә әдл бәәнәч. Тиигхлә буру номта улсиг евреймүдлә әдләр бәәтхә гиҗ яһад закҗахмбч? ¹⁵ Бидн төрхәрә евреймүдвидн. Бидн килнцтә буру номта улс бишвидн. ¹⁶ Исус Христост итксәр күн болһн чик седклтә болҗ тоолгдна. Эннь зака күцәсәр чигн биш. Тиигәд бидн зака күцәсәр биш, Христост итксәр, чик седклтә улс болҗ тоолгдхин төлә Исус Христост итквидн. Яһад гихлә, нег чигн күн зака күцәсәр чик седклтә күүнд тоолгдшго. ¹⁷ Бидн Христосла ниилснд чик седклтәд тоолгдхар седләвидн. Болв килнцтә улс бәәсән бидн үзввидн. Тиигхлә Христос килнцин цергч болхий? Уга. Төрүц уга. ¹⁸ Кемр би ода урднь хамхлсан босхҗахла, зака эвдсн күн болҗ һарчанав. ¹⁹ Би Бурхна төлә бәәхәр зака күцәсәрн Бурхна өмн бийән чик седклтәд тоолдган уурв. Зака күцәҗәсндән би үкснә тоод йовлав. Намаг Христосла хамдан кирст хадла. ²⁰ Иим учрас иштә би ода урдк күн бишв. Христос мини дотр бәәнә. Өдгә цагт мини бәәҗәх җирһл иим темдгтә: би Бурхна Көвүнд итксндән җирһҗәнәв. Тер нанд дурлад, мини төлә эврәннь әмән өгв. ²¹ Би Бурхна хәәрлтиг мел хайҗахшв. Кемр күн закаг күцәсәр чик седклтә гиҗ тоолхла, Христос киидән үксн болҗана».

Закан эс гиҗ иткл

¹ Эргү һалатмуд! Кен тана экитн эргүлв? Кирст хадгдсн Исус Христосин үклиг тодрхаһар таднд келҗ үзүлгдлүс? ² Би танас нег юм медхәр седҗәнәв: Әрүн Сәкүсиг тадн зака күцәһәд авлт, эс гихлә Сән Зәңг соңссндан иткәд аввт? ³ Тадн тиим эргү болвт? Әрүн Сәкүснәс экләд тадн эврәннь бәәдлән күчәр чиләхәр седҗәнт? ⁴ Тадна дамшлт, дааһад һатлсн тоот мел хара зөңдән давхий? ⁵ Таниг зака күцәснд Бурхн Әрүн Сәкүс өгәд, тадн дунд өвәрц юм үзүлҗәнә гиҗ сандг болвзат? Эс гихлә тадн Сән Зәңг соңсад итксн төләд тиигҗәнт? ⁶ Тиигәд Абрахамин тускар ухалтн. Абрахам Бурхнд иткәд, Бурхн терүг чик седклтә күүнд тоолв. ⁷ Иткҗәх улс цугтан Абрахамин үрдүд болсинь медҗ автн! ⁸ Бурхнд итксәр, буру номта улсиг чик седклтәд Бурхн тоолсиг Бурхна Бичгт урднь келгдҗ. Сән Зәңг Абрахамд иигҗ цәәлһгдҗ: «Чамар дамҗҗ Бурхн келн улсиг цугтаһинь әдслх». ⁹ Иткдг улс Бурхнд иткҗәсн Абрахамла хамдан ода әдс авчана. ¹⁰ Зака күцәсәр, чик седклтә болх гиҗ нәәлҗәсн улсиг Бурхн цааҗла харһулх. «Закана дегтрт цуг бичәтәг эс күцәҗәх кен чигн күн кезә чигн Бурхнар цааҗлгдх», – гиҗ бичәтә бәәнәлм. ¹¹ Зака күцәсн күүг Бурхн чик седклтәд тоолҗахнь медгдҗәнә. Яһад гихлә, иткләрн чик седклтә болсн күн әмд бәәх. ¹² Закан иткллә әдл биш. Бурхна Бичгт иигҗ бичәтә: «Зака күцәҗәх күн терүгәрн җирһх». ¹³ Христос мадниг му харал күртәҗәх Заканас сулдхв. Христос эврән мана ормд му харалла харһв. Энүнә тускар Бурхна бичгт иигҗ бичәтә бәәнә: «Моднд дүүҗлгдсн күн му харалла харһтха!» ¹⁴ Учрнь иим: Абрахамд өгхәр бәәсн әдсиг Бурхн Христос Исусар дамҗад буру номта улст күргх. Бидн болхла Бурхна өгхәр бәәсн Әрүн Сәкүсиг иткләрн авнавидн.

Закан болн үгән өглһн

¹⁵ Ахнр-дүүнр! Җирһләс авсн үлгүр соңстн: Күүнә бичсн герч бичгиг кен чигн оңдарулҗ эс гиҗ немҗ чадшго юмн. ¹⁶ Абрахамд болн терүнә хөөт үрнд Бурхн олн үг өглә. Бурхна Бичгт иигҗ бичәтә бәәнә: «Олн хөөт үрдүдт биш, зуг һанцхн хөөт үрнд». Эннь Христос болҗана! ¹⁷ Бурхн бооца батлсн хөөн дөрвн зун һучн җил болад Закан һарв. Эн закан тер бооцаг эвдҗ чадшго. Бурхна өгсн үгиг бас уга кеҗ чадшго. ¹⁸ Кемр Бурхна билг Заканас һардг болхла, тер өгсн үгәс авгдшго билә. ¹⁹ Закан юуни төлә бәәдв? Килнцәс көлтә Закан өгсн үг деер немгдв. Эн закан Абрахамин хөөт үрн иртл күчән геелго бәәҗ. Тер хөөт үрнд Бурхн үгән өгч. Бурхн эн закаг бийиннь болн күүнә хоорнд орлцачд эврәннь элчнрәр дамҗулад өгч. ²⁰ Бооцан хойр талас кегдхлә, хоорнд орлцдг күн кергтә болна. Болв Бурхн һанцарн Абрахамд үг өглә.

Закана учр-утх

²¹ Тегәд юн болҗахмб? Бурхна өгсн үглә закан ирлцҗәхший? Уга. Кемр авсн закан маднд җирһл өгх күчтә болсмн болхла, Бурхн күүг зака күцәсәр чик седклтәд тоолх билә. ²² Болв цуг улс килнцин үлмәд бәәнә гиҗ Бурхна Бичгт бичәтә. Иткдг улст Исус Христост итксәр үг өггдх. ²³ Итклин цаг иртл Закан мана харулч билә. Иткл медүлтл эн закан тиигҗ бәәлә. ²⁴ Христосиг иртл Закан мана сурһмҗлач болҗала. Бурхнд итксәр мадниг чик седклтәд тоолхин төлә Христос ирв. ²⁵ Итклин цаг ирв. Бидн дәкҗ сурһмҗлачин үлмәд бәәшговидн. ²⁶ Исус Христост иткснәс авн тадн Бурхна үрдүд болвт. ²⁷ Уснд кирслгдсн улс Христосла нииләд, Терүнә заң авв. ²⁸ Дәкҗ иудей, буру номта күн, ялч, сул күн залу, гергн гиҗ йилһл угат. Тадн цугтан Христос Исусла нииләд негн болвт. ²⁹ Кемр тадн Исус Христосин болхла, тиигхлә тадн Абрахамин хөөт үйнр болҗанат. Бурхна өгсн үг таднд күрх.

¹ Бас иигҗ келхәр седләв: хөөт үрн нилх бәәдлтә, – зөөр кевтән түүнә болв чигн – эврәннь зөвәрн ялчас йилһрҗәхмн уга. ² Эцкин кемҗәлсн цаг иртл, хөөт үриг бичкнднь сурһмҗлачнр болн зөөринь бүрткдг улс өсклә. ³ Бидн бас терүнлә әдл бичкн цагтан бәәсәр делкәг залдг сәкүсдин үлмәд мухла болҗ йовлавидн. Болв цаг ирхлә, Бурхн эврәннь Көвүг илгәв. Тер Күүкд күүнәс эн һазр деер төрәд, Закана бәәдләр бәәдг болв. ⁵ Терүгәрн закана үлмәд бәәсн улсиг цугтаһинь сулдхад, мадниг Бурхна үрдүд болтха гив. ⁶ Тадн Бурхна үрдүд! Тана зүркнд Бурхн эврәннь Көвүнә Сәкүс орулв. Тер Сәкүсн Бурхиг: «Аав-а! Эцк-ә!» – гиһәд дуудна. ⁷ Тадн дәкҗ мухла бишит. Ода тадн Бурхна үрдүдт. Кемр тадн үрдүд болсмн болхла, Бурхна зөөр эдлх хөөт үрдүд болҗанат.

Павел Һалатьяд бәәсн улсин тускар зовҗана

⁸ Бурхиг медәд уга цагтан тадн сәкүсдин мухла бәәҗит. Теднь Бурхн биш бәәҗ. ⁹ Ода тадн Бурхиг меднәт. Эс гиҗ чикәр келхлә, – Бурхн тадниг меднә. Тиигхлә тадн яһад әрә торсн, түрү бәәдлтә сәкүсд тал хәрү эргҗәхмбт? Эврәннь сән дурар яһад урдк кевәр теднә ялч болхар тадн седҗәнәт? ¹⁰ Тадн нам бемб өдр, шин сар, шин җил, байрин нәр темдглдг болҗанат. ¹¹ Би тадна төлә әәҗәнәв. Танад кесн мини көдлмш киидән давҗ одвза гиһәд әәҗәнәв. ¹² Ахнр-дүүнр, би таднас сурҗанав: Би буру номта улсла әдл болад заканд нәәлҗәхшв. Нанла әдл кетн. Тадн нанд мел му юм үзүлсн угат. ¹³ Хаалһдан гемтәд түрүн болҗ би таднд Сән Зәңг цәәлһхәр ирләв. Терүг тадн меднәт. ¹⁴ Тиигхд мини гем таднд чигн сөрлт болла. Намаг тадн һазалҗ һолсн угат. Тадн нанар Бурхна элч кеввт. Оңданар келхлә, Исус Христосиг тоссн мет тосвт. ¹⁵ Тана түрүн байр яһла? Кемр арһ бәәсн болхла, тиигхд тадн нанд эврәннь нүдән чигн өгх биләт. Терүг би лавлҗ келҗәнәв. ¹⁶ Эн үнн үг келхләрн, би тана өшәтн болсн болхий? ¹⁷ Танар оңдан улс йир икәр соньмсҗана. Болв теднә күсл му йорта күсл. Мадниг тедн танас салһҗ авхар седҗәнә. Тиигхләрн тадн теднәр соньмстха гиҗәнә. ¹⁸ Кемр күсл сән болхла, соньмслһн сән юмн. Намаг ирсәр биш, энтн кезә чигн үнн. ¹⁹ Мини эңкр үрдүд, эк күн үрән һарһхларн зовҗах мет, би тана төлә бас тиигҗ зовҗанав. Эн зовлңгиг Исус Христосин заңгиг тадн эс автл, би даах зөвтә болҗанав. ²⁰ Би таднла бәәхәр седләв. Таднла оңдан дууһар би күүндх биләв. Би тана төлә йир зовҗанав.

Әдлцүллһн

²¹ Закана үлмәд бәәхәр седҗәх улс, нанд келтн: заканд юуна тускар келгдҗәхиг соңсвта? ²² Терүнд иигҗ бичәтә бәәнә: Абрахам хойр көвүтә бәәҗ. Негнь ялчас һарч, хойрдгч көвүнь сулдан бәәсн күүкд күүнәс һарч. ²³ Ялчас һарсн көвүн йирдән үрн һардг әдләр һарч. Сулар бәәсн күүкд күүнәс Бурхна өгсн үгәр үрн төрҗ. ²⁴ Эннь теҗг болҗана. Хойр күүкд күн – хойр бооцан. Хагр Синай уулын хаҗуд кесн бооцанла әдлцүлгднә. Эн бооцана үрдүд мухла болҗанат. ²⁵ Бас Хагр Арабьяд бәәх Синай уул болҗана. Өдгә цагт энтн һазр деер бәәх Ерусалим. Түүнә келн әмтн цугтан мухла болв. ²⁶ Зуг теңгрин Ерусалим сулдан бәәнә. Тер мана эк. ²⁷ Бурхна Бичгт иигҗ бичәтә бәәнә: «Үрн уга болн үр эс һарһсн күүкд күн байрл! Үр һарлһлһна зовлң эс медсн күүкд күн хәәкр, бахмҗта бол! Залунь хайсн һанц күүкд күүнд үрн олар олдх». ²⁸ Ахнр-дүүнр, тадн Бурхнд үг өгснәс иштә төрсн Ицхакла әдл үрдүд. ²⁹ Тиигхд йирдән һарсн көвүн Әрүн Сәкүсн үг өгснәс көлтә һарсн үриг көөдг бәәҗ. Ода бас тиим йовдл һарчана. ³⁰ Энүнә тускар Бурхна Бичгт юн бичәтә? Тенд иигҗ келгдҗәнә: «Ялч гергиг көвүтәһинь көөһәд һарһ. Яһад гихлә, сул бәәсн күүкд күүнә көвүнд өгсн зөөр ялчин көвүнд күртшго юмн». ³¹ Тегәд, ахнр-дүүнр, бидн ялч күүкд күүнә биш, сулдан бәәх күүкд күүнә үрдүдвидн.

¹ Бидн сулвидн. Христос маднд сулдхвр өгв. Нег чигн күүнд бийән бичә даҗрултн, сулар бәәтн.

Мухла бичә болтн

² Намаг, Павелыг, танд ю келҗәхиг соңстн. Кемр тадн керчүлһ келгүлхлә, Христосас таднд олз уга. ³ Бас нег давтад келҗәнәв: Кемр кен чигн күн керчүлхлә, закаг кевтнь күцәх йоста болҗана. ⁴ Кемр тадн зака күцәсәр чик седклтәд тоолгдхар седҗәхлә, тадн Христосас йосндан салвт. Тиигхлә таднд Бурхна цаһан санан күртшго болҗана! ⁵ Мана тускар болхлаг Бурхн мадниг иткләр дамҗад чик седклтәд тоолхд Әрүн Сәкүсн нәәлвр өгчәнә. ⁶ Христосла ниилсн цагт күн керчүлсн эс керчүлснь төр уга. Төрнь болхла иткл болҗана. Мадниг итксн ашт – талдан улст мана өгчәх дурн болҗана. ⁷ Тадн сәәнәр йовҗ йовлат. Үнниг бичә соңстн гиҗ кен таниг чик хаалһас хаҗилһв? ⁸ Энүгәр таниг үгдән орулҗ авхар дуудснь Бурхн биш. ⁹ Бичкн идән һуйриг цугтнь искәнә. ¹⁰ Исус Христосла ниилсәр тадн эврәннь хәләцән сольшгот гиҗ лавлҗанав. Тадниг хутхҗах күн, кен болв чигн, засгла харһх. ¹¹ Ахнр-дүүнр! Кемр би керчүлһн кергтә гиҗ цәәлһҗ йовсмн болхла, намаг яһад көөлдх билә? Болв би эн керчүлһн кергтә гиҗ цәәлһсн болхла, кирсин туск мини цәәлһвр нег чигн еврей күүнд һундлта болшго билә. ¹² Тедн бийән мал мет ясхин керг күцәхлә, сән болх билә гиҗ ухалҗанав. ¹³ Мини ахнр-дүүнр, Бурхн тадниг сулар бәәтхә гиҗ дуудла. Иим сул бәәдл таниг му седвәрт бичә авлултха. Зуг нег-негндән дуран өгч, дөң болтн. ¹⁴ Юңгад гихлә, Закан кевтән нег зааврт багтҗана: «Эврәннь өөрхн күүнд бийләһән әдл дурл». ¹⁵ Болв кемр тадн нег-негән зууһад, зерлг аңгудла әдл идәд хайҗахла, саглтн. Мел бийән уга кечквзәт.

Әрүн Сәкүснә келсәр бәәх

¹⁶ Әрүн Сәкүсн тана җирһл залтха, гиҗ би таднд келҗәнәв. Тиигхлә тадн килнцтә седвәрт бәргдшгот. ¹⁷ Килнцтә седвәр кезә чигн Сәкүснә седвәрлә ирлцхш. Сәкүснә седвәр болхла килнцтә бәәдлин седвәрлә ирлцхш. Эннь нег-негнләһән ирлцҗәхш. Аштнь тадн кехәр седсән күцәҗ чадҗахшт. ¹⁸ Кемр тадниг Сәкүсн һардҗахла, тадн закана үлмәд бәәхшит. ¹⁹ Килнцтә бәәдлин керг темдгтә: аля һарһлһн, бузр болн ичртә йовдл һарһлһн, ²⁰ шүтәнд шүтх, бө келһн, дәәлдлһн, дурго боллһн, һалзурлһн, бийәрн төр келһн, керлдлһн, тарлһн, ²¹ үлү үзллһн, әркдлһн, буру номта улсин шаҗна нәәрт согтлһн болн нань чигн. Урднь келснлә әдләр Тадниг иим йовдлас саглтха гиҗ хөрҗәнәв. Тиигҗ бәәх улс Бурхна орн-нутгт оршго болҗана. ²² Сәкүсн күүнә җирһлд иим бәәдл үүдәнә: дурн, байр, төвкнүн бәәлһн, тесвр, цаһан санан, өр-өвч йовдл һарһлһн, итклтә бәәдл, номһн бәәдл, бийән бәрлһн. Тиим улст закан мел харшлҗ чадшго. ²⁴ Исус Христосин улс эврәннь му седвәртә бәәдлән кирст хадла. ²⁵ Сәкүсн маднд йосн җирһл өгв. Тер тиигәд мадниг һардх йоста. ²⁶ Маднд деерлкх зөв уга, нег-негән уурлулх, үлү үзх зөв бас уга.

Нег-негндән дөң болтн

¹ Ахнр-дүүнр! Кемр кен чигн күн килнц һарһсн болхла, Сәкүснә заасар бәәх тадн, тер күн килнц һарһдгоһар, номһнар зогсатн. Килнцд терүнлә әдл авлгдхас бийән саглтн. ² Күнд-түрү үзгдхлә, нег-негндән дөң болтн. Терүгәрн тадн Христосин зака күцәхит. ³ Кемр кен чигн күн ик күн эс бәәсн бийнь бийән ик күүнд тоолхла, тиим күн бийән меклҗәнә. ⁴ Күн болһн эврәннь йовдлан чик бишинь йилһх йоста. Терүнә йовдл сән болхла, тиигәд тер бийән магтҗ чадх. Эврәннь йовдлан кенлә чигн әдлцүлх йосн уга. ⁵ Күн болһн эврәннь ацаһан теех. ⁶ Сурһмҗ авчах күн багштаһан хувалцх йоста. ⁷ Бичә меклгдтн. Бурхиг наад бәрҗ болшго. Күн болһн эврәннь тәрсән авдмн. ⁸ Эврәннь му седвәрәр бәәсн күн аштнь үкҗ одх. Сәкүснә заасар бәәсн күн Әрүн Сәкүснәс мөңк җирһл эдлх. ⁹ Цаһан саната йовдл һарһхдан бичә цуцртн. Кемр цаһан саната йовдл цаарандан чигн һарһхла, бидн цагтан түүнә олзинь үзхвидн. ¹⁰ Тиигәд арһ бәәхлә, бидн күн болһнд цаһан санаһан күргх йоставидн. Тедн дундас онцар Бурхнд иткдг өрк-бүлин улст дөңгән күргтн.

Ашлвр

¹¹ Ода би энүгәс авн эврәннь һарар ямаран ик үзгүдәр бичҗәсиг тадн үзҗәнәт. ¹² Тадниг керчүлтхә гиһәд шахҗах улс эврәннь һазак бәәдлән бардмнҗана. Тиим йовдл кехләрн, зуг Христосин кирсәс көлтә бичә көөгдүлтхә гиҗәх йовдл. ¹³ Нам керчүлгдсн улс зака күцәҗәхмн уга. Тадниг керчүлхәр седҗәх улс хөөннь бидн тадниг келгүлләвидн гиҗ караглхар бәәнә. ¹⁴ Би болхла мана Деед Эзн Исус Христосин кирсәс оңдан юмар бардмнхар седҗәхшв. Нанд болхла делкәд бәәсн тоот кевтән кирст телүлгдлә. Би бас делкән төлә телүлгдләв. ¹⁵ Керчүлсн күн эс керчүлсн күн чигн төрүц йилһн уга юмн. Хамгин күчтәнь Бурхна үүдәсн шин күн. ¹⁶ Эн зокъялар бәәх улст Бурхн амулң бәәдл болн хәәрлт күргтхә. Тедн болн Бурхна цуг улс тиигҗ бәәтхә. ¹⁷ Дәкҗ нанд нег чигн күн зовх юм бичә үзүлтхә. Мини махмудт бәәх шархин орм Христосин ялч болҗах темдгнь. ¹⁸ Мини ахнр-дүүнр, таниг цуһар мана Деед Эзн Исус Христос хәәрлтхә! Тиигтхә!