ЕПЕСИНХН

Христост иткдг Епесин улст илгәсн бичг

Эн бичгт «үүдәгдсн тоотыг цугтаһинь теңгрт бәәсиг болн һазр дееркиг ниилүләд, Христосар толһалулхмн» гисн зура үзүлгдҗәнә (1.10). Энүнд цуг әмтн Христоста ниилх алдр зураг Бурхна улс күцәтхә гиҗ бас дуудвр кегдҗәнә. Бичгин түрүңк әңгднь негдлтин туск төрәр күүндвр кенә. Терүндән Эцк Бурхн Эврәннь улс шүүҗ авсна тускар, теднә килнц Эврәннь Исус Христос гидг Көвүһәрн дамҗад тәвҗ өгәд, терүнәснь сулдхсна тускар, дәкәд Әрүн Сәкүсн Бурхна өгсн алдр үгин иткл болҗасна тускар бичҗәнә.

Бичгин хойрдгч әңгднь эврәннь умшачнриг Христоста негдәд чикәр бәәтн гиҗ Павел сурҗана. Энд автор Бурхна улс Христоста негдсиг үзүлхин төлә, зәрмдән үгин дүңцүлт үзүлнә. Үлгүрнь: чонҗ цогц-махмуд болхла, Христос терүнә толһа болҗана гиҗ дүңцүлгднә. Эс гихлә чонҗ тосхгдсн бәәшңглә дүңцүлгдхлә, терүнә һол чолунь Христос болҗана гиҗ келгднә. Эс гиҗ чонҗ гергнлә дүңцүлгднә, тиигхлә терүнә залунь – Христос болхмн болҗана.

Учр-утхин зура

Нүр үг 1.1–2

Христос болн чонҗ 1.3 – 3.21

Христоста ирсн шин җирһл 4.1 – 6.20

Товчлгч үг 6.21–24

Мендллһн

¹ Бурхна седвәрәр шүүҗ авсн Исус Христосин апостол Павелас Епест Христос Исусла ни-негн итклтә бәәх Бурхна улст. ² Мана Эцк Бурхн болн Деед Эзн Исус Христос цаһан сана, амулң бәәдл таднд өгтхә.

Христосла мадниг ни-негн болснд Бурхн әдслв

³ Бурхн болн мана Деед Эзн Исус Христосин Эцк магтгдх болтха. Мадниг Христосла ни-негн болсн учрас Бурхн маднд әдс өгхләрн цуг цаһан седклин әдсиг теңгрин орн-нутгт өгв. ⁴[а] Терүнә өмн әрүн, буру уга болтха гиһәд, делкә үүдтл мадниг Христосла ни-негн болсар Эврәннь улс кехәр шүүҗ авв. ⁴[б]-5 Бурхн Исус Христосар дамҗад Эврәннь дурна ашт көвүдән кеҗ авхар мадниг заяв. Эннь Бурхна таал болн зура. ⁶ Мадниг хәәрлсн учрас бидн Бурхиг туурулхмн. Дурта Көвүһәрн дамҗулҗ Тер маднд хәәрлтән күртәв. ⁷ Христосла ни-негн болад, бидн Терүнә цусар сулдххвидн. Терүнә элвг евәләр мана килнц тәвгдв. ⁸ Бурхн маднд цуг цецн уха болн медлһ өгсәрн хәәрлт заяв. ⁹ Эврәннь тааларн Бурхн маднд нуувчин зураһан медүлв. Энүг Тер Христосар дамҗад күцәхәр шиидв. ¹⁰ Бурхн эн зураг кергтә цагтан күцәх. Эн зура иим: үүдәгдсн тоотыг цугтаһинь теңгрт бәәсиг болн һазр дееркиг ниилүләд Христосар толһалулх. ¹¹ Бурхн мадниг Христосла нииләд Түүнә улс болтха гиҗ заяһад шүүҗ авв. Тер тиигҗ кехәр өмнәснь шиидв, яһад гихлә, эннь Терүнә күсл болҗала. Бурхн цугтаһинь Эврәннь таалын шиидврлә ирлцүлҗ кенә. ¹² Бидн хамгин түрүнд Христост экләд нәәлсәрн Бурхна туурмҗиг магтх зөвтәвидн. ¹³ Тадн бас үнн үгин болн аврлтын туск Сән Зәңг соңсхларн Бурхна улс болвт. Тадн Христост итквт, тиигәд Бурхн эзнә тамһ тадн деер тәвв. Тер өгх болсн Әрүн Сәкүс таднд өгв. ¹⁴ Мана авх өвиг Әрүн Сәкүсн батлҗана. Энүнә ашар Бурхн Эврәннь улсиг кевтнь сулдххиг бидн лавта меднәвидн. Бурхна туурмҗд магтал өргтхә!

Павелын зальврлһн

¹⁵[а] Би таниг Исус Христост итксиг болн Бурхна цуг улст дурлсиг соңсснас авн тана төлә Бурхнд йөрәл өргхән мартхшв. ¹⁶[б]-17 Мана Деед Эзн Исус Христосин Бурхн, алдр Эцк, таднд Әрүн Сәкүс өгтхә гиҗ би зальврнав. Әрүн Сәкүсн таднд цецн уха зааһад, Бурхна тускар медүлх. Тиигәд тадн Бурхиг сәәнәр медхит. ¹⁸[а] Ямаран нәәлврт Бурхн таниг дуудв? Бурхна улсин байн алдр өвнь юмб? Терүнә ямаран ик күчн мана дотр бәәнә? Тадн Бурхна герлиг үзәд, энүг медхин төлә би зальврҗанав. ¹⁹[б] Мана, иткдг улсин дотр бәәх күчн, әвртә күчн болҗана. ²⁰ Эн күчәр Бурхн Христосиг үкснә хөөн әмдрүлв. Бурхн Терүг теңгрин орн-нутгт бийиннь барун талан суулһв. ²¹ Христос цуг һардҗах, йос бәрҗәх, чидлтә болн нойлҗах сәкүсдәс өөдән бәәнә, цуг зүсн-зүүл нердәс болн цол нернәс, һанцхн эн җирһлд биш хөөтк җирһлд, өөдән йовхинь мөн. ²² Бурхн Христост цугтаг һардх йос өгв, терүгәр цугтаннь толһач кев, хамгин түрүнд иткдг улсин толһач тәвв. ²³ Иткдг улс Христосин цогц-махмуд болҗана. Христос иткдг улсиг бүклднь дүүргҗәнә. Христос үүдәлтән төгсәҗәнә.

Шин җирһл

¹ Тадн зака эвдснәс иштә болн килнцәсн көлтә үкҗ одлат. ² Тиигхд тадн эн делкәд бәәх әмтнлә әдл килнцтә җирһләр бәәләт. Тадн му һардачин үлмәд бәәләт. Тер теңгртк хар сәкүсдиг һардҗана, Бурхна соңсхвр уга улсин седкл эзлҗәнә. ³ Цагтан бидн цугтан бас теднлә әдл биләвидн. Цогц-махмудыннь болн ухананнь седвәрәр бәәләвидн. Наадк улсла әдл бәәснд мадниг Бурхн засглх бәәсмн. ⁴ Болв хәәрлтәр байн, маднд дегд дурта Бурхн зака эвдснәс көлтә үксн мадниг Христосла хамдан әмдрүлв. Тадн Бурхна хәәрлтәр авргдвт. ⁶ Терүнлә хамдан теңгрин орн-нутгт залхин төлә Бурхн мадниг Христос Исусла әмдрүлв. ⁷ Тиигҗ кехләрн, Бурхн эврәннь кемҗән уга хәәрлтән мөңкинд үзүлв. Эн хәәрлтән Бурхн маднд Христос Исусин дурар күргв. ⁸ Яһад гихлә, тадн хәәрлтин ашт иткләр дамҗад авргдвт. Тадн хәәрлтд күршго биләт. Болв Бурхн терүг таднд белглв. ⁹ Тадн эврәннь кергәр авргдсн угат. Кен чигн күн бичә көөртхә! ¹⁰ Бидн Бурхна үүдәсн улсвидн. Терүнә белдсн цаһан саната керг мадниг күцәтхә гиһәд Бурхн мадниг Исус Христосла нииләд үүдәв.

Христос улсиг цугтаһинь негдүлв

¹¹ Төрхәрә тадн керчүлгдсн улсин келсәр, керчүлгдәд уга буру номта улс болҗахан бичә марттн. ¹² Тиигхд тадн Христос угаһар бәәсән бас бичә марттн. Тадн Бурхна шүүҗ авсн улс биш биләт, тадн Бурхна өгх болсн бооцанд орлцшго биләт. Ицл уга болн Бурхн уга бәәләт тадн. ¹³ Болв ода Христосла ниилснә күчәр урднь холд бәәсн улс тадн өөрхн болвт. Юңгад гихлә, Христос тадна төлә цусан асхв. ¹⁴ Христос маднд эвин хәрлцә авч ирв. Евреймүдиг болн буру номта улсиг нег улст негдүлв. Христос кирс деер үкхләрн таднд дәәсн болҗасн эрсинь нурав. ¹⁵ Хойр оңдан улсиг Бийтәһән ниилүләд нег шин улс Тер үүдәһәд, тедниг хоорнднь эвцүлхин төлә закврта болн зокалта зака уурулв. ¹⁶ Христос кирс деер болсн үкләрн теднә хоорндк дәәсиг дарв. Кирсәр хойр улсиг негдүләд, тедниг Бурхнд хәрү өгв. ¹⁷ Тиигәд Христос ирәд, таднд эвин туск Сән Зәңгиг Бурхнас хол йовсн буру номта улст, Бурхнд өөрхн бәәсн евреймүдт тархав. ¹⁸ Христосин кесн көдлмшин ашар бидн цугтан нег Әрүн Сәкүсәр дамҗад Эцк талан ирҗ чадҗанавидн.

¹⁹ Ода тадн тиигәд күүнә, йовцсн улс бишит. Тадн Бурхна улсла нег улс болад, Терүнә өрк-бүлин улс болҗанат. ²⁰ Тадн тосхгдсн гер мет апостолмудын болн әәлдәчнрин номин ул деер тосхгдвт. Тадна тосхлтын хамгин һол чолунь Христос Исус болҗана. ²¹ Һол чолун деер гер кевтән зогсҗана. Деед Эзнд нерәдсн әрүн сүм болтл Терүг өөдән өскҗәнә. ²² Христосла нииләд, гер мет тадн цугталань хамдан тосхгдҗанат. Тер герт Бурхн Әрүн Сәкүсәр дамҗад бәәнә.

Буру номта улс дунд Павелын кесн көдлмш

¹ Тиигәд би, Павел, Христос Исуст церглсндән, тадн буру номта улсин төлә көдлсндән бәрәнд бәәнәв. ² Эн даалһвриг тадна төлә Бурхн эврәннь хәәрлтәрн нанд өгсиг тадн маһд уга соңссн болхит. ³ Бурхн нанд эн нуувчиг медүлв. Би ахрар энүнә тускар таднд бичләв. Кемр тадн мини бичсиг умшхларн, Христосин нуувчиг намаг медҗәхиг үзхит. ⁵ Урднь әмтнд эн нуувчин тускар келгдәд уга билә. Болв Бурхн энүг ода эврәннь әрүн апостолмудт болн әәлдәчнрт Әрүн Сәкүсәр медүлв. ⁶ Нуувчнь эн: буру номта улс Сән Зәңгәр дамҗад евреймүдтә хамдан өнч авх улс болҗана. Тедн нег цогц-махмудын мөчмүд болҗана. Евреймүдтә хамдан тедн Исус Христосар дамҗад Бурхна өгхәр келсиг авх. ⁷ Хәәрлтин белгәр дамҗад Бурхн намаг Сән Зәңгин цергч кев. Эн белг нанд Бурхн эврәннь чидл-күчән һарһад өгв. ⁸ Би Бурхна улс дундас хамгин баһ чинртә күн болҗанав. Бурхн буру номта улст Христосин кемҗән уга зөөрин туск Сән Зәңг тархатха гиҗ эврәннь хәәрлтәрн нанд даалһвр өгв. ⁹ Бурхна нуувч яһҗ күцәгдхиг цугтаднь намаг цәәлһтхә гиҗ даалһв. Цугтаһинь үүдәсн Бурхн давсн цагт Эврәннь нуувчан дарв. ¹⁰ Учрнь иим: өдгә цагт һардҗах болн йос бәрҗәх сәкүсд теңгрин орн-нутгт Бурхна зүсн-зүүл цецн ухана тускар кевтнь иткдг улсар дамҗҗ меддгәр тииглә. ¹¹ Бурхн эврәннь мөңк күсллә ирлцүлҗ тиигв. Эн күслән мана Деед Эзн Христос Исусар дамҗулҗ күцәв. ¹² Христосла ниилснәс иштә болн Терүнд итксәрн бидн зөргтәһәр, бат итклтәһәр Бурхн тал ирҗ чадхвидн. ¹³ Тиигәд тана төлә дааҗах мини зовлңгас көлтә тадниг бичә зовтн гиҗ би сурҗанав. Би таднд тус болтха гиһәд зовҗанав.

Христосин дурн

¹⁴ Тиигәд теңгрт болн һазр деер бәәх өрк-бүл болһниг үүдәсн Эцкин өмн би сөгдҗәнәв. ¹⁶ Тадниг седкләрн күчтә болтха гиһәд би Бурхиг алдр туурмҗасн Әрүн Сәкүсәр дамҗулҗ күч өгтхә гиҗ сурҗанав. ¹⁷ Иткләр дамҗад тана зүркнд Христос бүүрлтхә гиҗ би зальврҗанав. Дәкәд модна уңг гүүнд урһснла әдләр болн уул деер бәрсн гертә әдләр тана кеҗ-күцәҗәснә тоотын улнь дурн болтха гиҗ зальврҗанав. Тадн Бурхна цуг улсла хамдан Христосин дурн ямаран өргн, ут, өндр болн гүүнинь медтхә гиҗәнәв. ¹⁹ Таниг күүнә медлһнәс даву бәәх Христосин дуриг медтхә гиһәд зальврҗанав. Бурхн бийнь кевтән тадна седклд бәәдгәр тиигҗәнәв. ²⁰ Бурхн Эврәннь күчәр мадн дотр бәәнә. Тер мана сурҗаснас эс гихлә ухалҗаснас икәр кеҗ чадна. Бурхнд иткдг улсар, Исус Христосар оньдин тууртха! Тиигтхә!

Иткдг улс негдх зөвтә

¹ Би Деед Эзнд церглҗәсәрн бәрәнә күн болҗанав. Тадниг Бурхна дуудврла ирлцтәһәр бәәтн гиҗ эрҗәнәв. ² Кезә чигн тогтун, номһн болн тесвртә болтн. Нег-негнләһән тесвртәһәр дуран өгч бәәтн. ³ Тадн нииһәр бәәхин арһ хәәтн. Тиим негдлтиг Әрүн Сәкүсн тадниг негдүлҗәх эвәр дамҗад таднд өгчәнә. ⁴ Негхн цогц-махмуд болн негхн Сәкүсн бәәдг болҗана. Бурхн тадниг бас негхн нәәлврт дуудв. ⁵ Һанцхн Деед Эзн, негхн иткл, негхн уснд кирсллһн бәәнә. ⁶ Негхн Бурхн бәәнә. Тер цуг күмнә Эцк болҗана. Хамг әмтнә деер Эн бәәнә. Цугтаһар дамҗад эврәннь седвәр күцәнә. Күн болһнд Бурхн бәәнә . ⁷ Христосин аһу ик зөөрәс мадн дундас күн болһн шишлң билг авв. ⁸ Бурхна Бичгт иигҗ бичәтә: «Хамгин ик өндрт өөдлхләрн Тер бәрәд авсн улс дахулҗ авад, күмнд олн билг өгв». ⁹ «Өөдлв» – гисн юмб? Урднь Христос һазрин ик гүүнднь күрсн күн болҗана. ¹⁰ Күрсн күн альд чигн бәәхин төлә теңгрәс деегшән һарсмн болҗана. ¹¹ Тиигәд теднә негнь – апостолмуд, хойрдгчнь – әәлдәчнр, һурвдгчинь – Сән Зәңг тархачнр, зәрмснь иткдг улст килмҗән өгдг улс болн багшнр болтха гиҗ шиидв. ¹² Эврәннь цогц-махмуд өскхин төлә Христос цуг иткдг улсиг Бурхна церглтд белдхәр тиигв. ¹³ Тиигәд одҗ бидн цугтан эврәннь итклдән болн Бурхна Көвүг медхдән негдлтд күрхвидн. Бидн иткләрн Христосла әдл бөдүн улс болхвидн. ¹⁴ Дәкҗ бидн дольганд болн зүсн-зүүл номин салькнд цокгдҗ, үзг болһн тал дәәвлҗ йовх бичгүд болшговидн. Эн зүсн-зүүл худлчнрин ном. Тедн худл ¹⁵ Терүнә ормд бидн үнн үг келәд, нег-негндән дурлх зөвтәвидн. Мана толһа болҗах Христосла нииләд өсх зөвтәвидн. ¹⁶ Христосин һардврар цогц-махмудын мөчмүд негднә. Теднә залһлдаһар цогц-махмуд кевтән бәрәтә. Мөч болһн эврәннь кергән даахла, цогц-махмуд тегәд кевтән өсәд, дурар батрна.

Урдк җирһл болн шин җирһл

¹⁷ Тиигәд би Деед Эзнә нерн деерәс таднд закҗанав: буру номта улс кевтә бәәдгән ууртн. Теднә седвәр хоосн, теднә ухань харңһутрҗ одҗ, теднд Бурхна җирһл уга. Яһад гихлә, медрл уга көндлң улс. ¹⁹ Тедн ичрән гееһәд оньдин кемҗән угаһар аля болн зүсн-зүүл бузр юмнд авлгдна. ²⁰ Тиим җирһл Христосин тускар тана медснлә ирлцҗәхш. Юңгад гихлә, тадн Христосин тускар соңсвт. Исуст иткдг улс болад тадн Терүнә туск үнн медрл аввт. ²² Кезәңк күүнә бәәдлән хайтн. Тер урдк бәәдл тадниг худл седвәрәрн алҗаҗ. ²³ Эврәннь ухан-седклән тадн шинрүлх йостат. ²⁴ Тадн шин күн болх йостат. Тер шин күүг Бурхн Бийән дуралһад үүдәҗ. Тер күн үннлә ирлцҗ чик седклтәһәр болн әрүнәр бәәнә. ²⁵ Күн болһн худл келдгән ууртн. Цугтан нег цогц-махмудын мөчмүд болсар, хаҗудк улстан үнн үг келтн. ²⁶ Уурлхларн бичә килнц һарһтн, нарн суутл ууран һарһтн. ²⁷ Тадниг сөрх арһ эрлгт бичә өгтн. ²⁸ Хулха кедг күн дәкҗ бичә хулхалтха. Кергтә мөңгән эврәннь чик күч-көлсәрн тер олтха. Олснасн түрү бәәх улсла хувалцтха. ²⁹ Күүнд му үг бичә келтн. Зуг соңсҗах күүнд сурһх, кергтнь дөң болх үгмүд келтн. ³⁰ Бурхна Әрүн Сәкүс бичә һундатн. Тертн тадниг Бурхна улс гисн тамһ болҗана. Цагнь ирхлә, Бурхн мадниг кевтнь сулдххиг тер лавлҗана. ³¹ Һундлас, уурас, һалзуһас, хәәкрлһнәс, му, бузр үгәс болн талдан күүнд хоран күргх юмнас гетлтн. ³² Нег-негнтәһән цаһан санатаһар бәәтн, хәәрлтән күргтн. Бурхн Христосар дамҗад тадна гем тәвҗ өгсн әдләр нег-негнәннь гем тәвтн.

Герлд җирһлһн

¹ Тадн Бурхна дурта үрдүд болсарн Терүнлә әдл бәәтн. ² Христос таднд дурлснла әдләр дурта болтн. Тана төлә Бурхна таалта бәрсн күҗ мет болн бәрц мет җирһлән Тер өгв. ³ Тадн дунд цалдң йовдл, эс гихлә талдан бузр юмн, эс гихлә күүнә юм авхдан дурта йовдлын тускар төрүц бичә келтн. Иим күүндврт Бурхна улс дунд мел орм уга. ⁴ Тана келсн үгд ичртә, эргү күүндвр болн бузр шог уга болх йоста. Энүнә ормд Бурхнд ханлтан өргҗ йөрәтн. ⁵ Цалдң йовдл һарһсн болн му бәәдләр бәәсн улс, хармч улс Бурхна болн Христосин орн-нутгт оршгоһинь лавтаһар медтн. Хармндг йовдл худл шүтәнд шүтлһнлә әдл болҗана. ⁶ Тадниг эргү үгәр кен чигн күн бичә авлтха. Соңсхвр уга күн Бурхна зарһла харһх ⁷ Иим улсас хол йовтн. ⁸ Цагтан тадн харңһуд бәәләт. Болв ода тадн герлд йовнат. Яһад гихлә, тадн Деед Эзнә улс болҗанат. Герлин бичкдүд мет бәәтн. ⁹ Герл күүнд ямаран чигн цаһан саната йовдл һарһхд, үнәр болн чикәр бәәх арһ өгнә. ¹⁰ Деед Эзнд таалта тоотыг тадн медҗ автн. ¹¹ Тадн харңһу бәәдлин олз уга кергт бичә орлцтн. Иим йовдл һарһдг улсиг чиклтн. ¹² Иим улс нуувчар ю кеҗәхинь нам келхд ичртә. ¹³ Болв герлин үзүлҗәх тоотнь цугтан илдкгдх. ¹⁴ Иләр үзүлсн тоот герл болҗана. Тиигәд чигн иигҗ бичәтә: «Унтсн күн, сер! Үксн күн, бос! Христос чамд герл тусхах». ¹⁵ Тадн оньган өгч эврәннь бәәдлән хәләтн. Медрл угаһар биш, ухатаһар бәәтн. Таднд бәәх ямаран чигн арһан олзлтн. ¹⁶ Яһад гихлә, эн цаг – килнцтә улсин цаг болҗана. ¹⁷ Бичә эргү күн болтн. Болв тадн Деед Эзнә таал юунд бәәхинь медхәр шунтн. ¹⁸ Тадн чаһр бичә икәр уутн. Тиим күн һәргтә йовдл һарһна. Терүнә ормд Әрүн Сәкүсн тадниг закртха. ¹⁹ Нег-негндән Бурхна дуудас, частрас болн Әрүн Сәкүснә дуудас үгмүд келҗәтн. Дуултн, Деед Эзиг зүркнәсн туурултн. ²⁰ Мана Деед Эзн Исус Христосин нерәр Эцк Бурхиг цугтаннь төлә оньдин йөрәтн.

Залус болн гергчүд

²¹ Тадн нег-негән соңстн. Яһад гихлә, тадн Христосиг күндлҗәнәт. ²² Гергчүд, тадн Деед Эзиг соңсснла әдләр залусан соңстн. ²³ Юңгад гихлә, Христос иткдг улсин толһа. Тедү мет залу күн гергнәннь толһа болҗана. Тиигәд цогц-махмуднь болҗасн иткдг улсиг Христос аврв. ²⁴ Иткдг улс яһҗ Христосиг соңсна, түүшң гергчүд цуг халхар эврәннь залусан соңсх йоста. ²⁵ Залус, эврәннь улст Христос дурта болснла әдләр гергчүдтән тадн дурта болтн. ²⁶ Христост иткдг улсиг усар уһаһад, үгәр цеврдүләд, Бурхнд нерәдхин төлә эврәннь әмән Тер өгв. ²⁷ Иигхләрн Христос эврәннь улсан ке-сәәхнән үзүлҗ өмннь һартха гив. Тедн цевр болн буру, севг, хурнясн уга нег чигн һаң уга улс болх. ²⁸ Тиигәд залус, эврәннь цогц-махмудтан дурлснла әдләр гергчүдтән дурта болх йостат. Гергндән дурта күн бийдән дурта болҗана. ²⁹ Эврәннь цогц-махмудтан дурго күн уга. Күн болһн цогцан асрад, килмҗән тусхана. Тедү мет Христос иткдг улст килмҗән өгнә. ³⁰ Бидн Христосин цогц-махмудын мөчмүд болҗанавидн. ³¹ Иигҗ бичәтә: «Тер учрар күн эцк-экән үлдәһәд гергтәһән ниилх. Залу гергн хойр нег цогц болх». ³² Эн ик нуувч. Эн үгмүд Христос иткдг улс хойрин тускар келгдҗәнә. ³³ Зуг эн үгмүдт тадна тускар бас келгдҗәнә. Залу болһн гергндән бийдән мет дурта болх зөвтә. Гергн залуһан тевчх йоста.

Бичкдүд болн эцк-экнр

¹ Бичкдүд, Деед Эзнд итксәрн эврәннь эцк-экән соңстн. Энтн чик керг. ² «Эврәннь эцкән болн экән тевч», – эн Бурхна үгән өгснлә хамдан түрүн заавр болҗана. ³ Бурхн иигҗ үгән өгв: «Эврәннь эцкән болн экән тевчхлә, һазр деер сәәнәр болн удандан бәәхич». ⁴ Эцк-экнр, үрдүдән бичә уурлултн. Деед Эзнә таал юунд бәәхинь үзүләд, теднән сурһҗ өсктн.

Зарцнр болн эздүд

⁵ Зарцнр, һазр деер эздүдән күндләд, теднәс әәһәд, тедниг соңстн. Әрүн зүркнәсн Христост церглҗәснлә әдләр тадн тиигҗ кетн. ⁶ Таниг шинҗлҗәх кемд эзндән сәәнд үзгдхәр биш, болв иим йовдл әрүн седкләсн Бурхна таал күцәхәр Христосин зарцнр болҗ кетн. ⁷ Күүнд биш Деед Эзнд церглҗәснлә әдләр Бийиннь дурар эздүдтән заргдтн. ⁸ Күн болһниг – зарц, эс гихлә сулдан бәәх күн – йилһл уга кесн сән кергәрнь ашлх зөвтә гиҗ тадн ухалтн. ⁹ Тадн, эздүд, эврәннь зарцнртаһан дигтә бәәтн, бичә тедниг әәлһтн. Теңгр деер тадна болн теднә Деед Эзн бәәхиг тодлад авчктн. Деед Эзн кениг чигн йилһлго зарһинь кех.

Иткдг күүнә зер-зев

¹⁰ Аштнь иигҗ келхәр седләв: Деед Эзнлә нииләд, Терүнә алдр күчәр батртн. ¹¹ Бурхна өгсн цуг зер-зев бийдән өмстн. Тиигхләрн эрлгин мектә зурала сөрлцлҗ чадхит. ¹² Бидн әмтнлә ноолда кеҗәхшвидн. Болв бидн һардҗах, йос бәрҗәх, эн харңһу делкәд эзркҗәх болн теңгрин хар сәкүсдин өмнәс ноолда кеҗәнәвидн. ¹³ Тер төләд Бурхна өгсн зер-зев кевтнь автн. Кемр му өдр ирхлә, тадн дәврсн тоотыг сөрәд цугинь даахит. ¹⁴ Белн бәәтн. Белкүсндән бүс зүүтн. Эн бүс – үнн болҗана. Цө болд өмстн. Бурхна өмн тана чикәр бәәлһн цө болд болҗана. ¹⁵ Башмг өмстн. Эвин туск Сән Зәңг цәәлһхд белн боллһн тана башмг болҗана. ¹⁶ Халц бас автн. Иткл тана халц болҗана. Энүгәр тадн эрлгин цуг халун сумнас бийән харсҗ чадҗанат. ¹⁷ Бас дуулх өмстн. Аврлт – дуулх болҗана. Әрүн Сәкүснә үлд автн. Эннь Бурхна үг. ¹⁸ Әрүн Сәкүсн һарддгар кезә чигн Бурхнд зальврад дөң суртн. Тиигәд оньдин сергг бәәтн. Цуг иткдг улсин төлә Бурхнас дөң суртн. ¹⁹ Мини тускар бас зальвртн. Нанд кергтә үг Бурхн өгтхә, юмнас әәлго Сән Зәңгин нуувчинь тархах зөрг өгтхә. ²⁰ Сән Зәңгин төлә түүрмд суусн бийнь би илгәгдсн күн болҗанав. Сән Зәңгин тускар би зөргтәһәр, йоста кевәр келдгәр тадн зальвртн.

Бичгин сүл үгмүд

²¹ Түхк, мана күндтә ах болн Деед Эзнә итклтә цергләч, таднд мини тускар цугинь келҗ өгх. Намаг бийән яһҗ бәрҗәхин тускар бас келх. Тиигәд тадн намаг ямаран бәәхиг медхит. ²² Энүнә төлә би терүг тадн тал илгәҗәнәв. Тадн мана тускар медхит. Түхк таднд урмд өгх. ²³ Ахнр-дүүнр, таднд Эцк Бурхн болн Деед Эзн Исус Христос эв, дур болн иткл өгтхә. ²⁴ Мана Деед Эзн Исус Христост күүрдго мөңк дурта улсиг Бурхн хәәрлтхә!