2 ТЕСАЛОНИКИНХН

Христост иткдг

Тесалоникин улст илгәсн хойрдгч бичг

Христосиг хәрү ирх гисн зәңг Тесалоникид бәәх чонҗин төвкнүн бәәдл болн диг-дараг эвдҗәв. Христос хойрдад ирв гисн хәләцин тускар Павелын хойрдгч бичгт бичәтә. «Килнцин күн» гидг нертә нуувчар бәәсн күүнә һардврар Христос ирхин өмн хар санлһн улм өсх гиҗ темдгләд, Павел эн хәләцән чиклҗәнә. Тер күн Христосин өмнәс сөрлт кех.

Эн бичгин умшачнр түрү-зүдү юмнла харһв чигн, итклдән бат болҗ, Павелыг болн терүнә көдләчнриг дураһад бийән теткх, цаһан санаһан цаарандан әмтнд күртәх зөвтә гиҗ апостол темдглҗәнә.

Учр-утхин зура

Нүр үг 1.1–2

Магтал болн буульлһн 1.3–12

Христосин ирлһнә туск ном 2.1–17

Христианмудын заңгин тускар 3.1–15

Товчлгч үг 3.16–18

¹ Тесалоникид бәәх Бурхн-Эцкин болн Деед Эзн Исус Христосин иткдг улст Павелас, Силас болн Тимофейәс. ² Бурхн мана Эцк болн Деед Эзн Исус Христос таднд цаһан сана болн төвкнүн бәәдл өгтхә.

Бурхна зарһ күләлһн

³ Ахнр-дүүнр, бидн кезә чигн тадна төлә Бурхнд ханлтан өргх йоставидн. Тернь чик, яһад гихлә, тадн Бурхнд улм иткәд, нег-негндән улм икәр дурлҗанат. ⁴ Тиигәд талдан һазрт бәәдг Бурхнд иткдг улс дунд тана тесврин болн көөгдҗәсн, күнд-түрү дааҗах цагт һарһҗах итклин тускар бидн омгтаһар буульнавидн. ⁵ Энтн цугтан Бурхна чик зарһ бәәснә темдг. Аштнь тадниг Бурхн Эврәннь орнд бәәх дүңгә улс гиҗ тоолх. Ода тадн Бурхна орна төлә зовлң үзҗәнәт. ⁶ Бурхн үннч. Тиигәд таднд зовлң үзүлҗәх күүг зовлңла харһулх. ⁷ Тиим зовлң үзҗәсн таднд болн маднд Бурхн төвкнүн бәәдл өгх. Тиим бәәдл Деед Эзн Исус күчтә Бурхна элчнрлә хамдан теңгрәс асҗах һалын зальд үзгдхлә, тиигәд учрх. ⁸ Бурхиг һолҗасн болн мана Деед Эзн Исус Сән Зәңг эс авчах улсиг тер засглх. ⁹ Тедн мөңк үклд тусх. Тиигәд оньдинд Деед Эзнә болн Терүнә күчтә алдрас тер улс салһгдх. ¹⁰ Иим йовдл Деед Эзн ирх өдр болх. Бурхнд иткәд церглҗәх улсас туурмҗ болн күндллһ авхар Тер ирх. Тер тоод тадн бас бәәхит. Яһад гихлә, тадн мана келснд иткләт. ¹¹ Бидн кезә чигн тана төлә зальврнавидн. Тадниг Бурхн дуудсн җирһлә ирлцҗәнә гиҗ тоолх. Бурхн Эврәннь күчәрн сән йовдл кех седвәр өгх. Тадна иткл дамҗад тана кеҗәсн тоотыг цугтаһинь Бурхн күцәх, гиҗ бидн зальврҗанавидн. ¹² Тегәд Мана Бурхна болн Деед Эзн Исус Христосин хәәрлтәр Деед Эзн Исусин нерн таднас туургдад, тадн болхла, Терүнәс туургдх болхит.

Бурхна зака эвдҗәх күн

¹ Ахнр-дүүнр, Деед Эзн Исус Христос ирлһнә тускар болн мадна Терүнлә харһлтын тускар болхла, би тадниг эрҗәнәв: ² Тадн әәлдхлин үгәс, зәңгәс болн мана бичсн бичг кевтә бичгәс Деед Эзнә өдр ирв гиҗ соңсхларн, бичә адһҗ үүмтн, бичә седкләрн зовтн. ³ Тадниг ямаран чигн кевәр бичә меклтхә. Бурхна өмнәс буцлт эс болтл, мөңк һалд йилһгдәд, Бурхна зака эвдҗәх күн эс иртл, тер өдр иршго юмн. ⁴ Тертн Бурхн гиҗ нерәдсн тоотд, терүнд шүтсн тоотд өшәтн болх. Түүнәс даву бийән теднәс үлүд тоолад, һол сүмд орҗ орм эзләд: «Би, Бурхмб!» - гиҗ келх. ⁵ Танад бәәхдән мини энүнә тускар келсиг мартчквт? ⁶ Ода эн күүг юн бәрҗәхинь тадн медҗәнәт. Энтн эврәннь цагтан ирх. ⁷ Болв зака эвдлһнә нуувч күцәгдҗәнә. Бәрҗәх юмн эс авгдтл учрх юмн учршго. ⁸ Тиигхлә зака эвдҗәх күн бийән үзүлх. Болв Деед Эзн Исус ирлһнд терүг нег дәкҗ үләһәд алх. Исус Христосин бәәлһн терүг уга кех. ⁹ Бурхна зака эвдҗәх күн эрлгин йоста ирх. Тер күн ик чидл үзүләд, худл өвәрц юм болн онц темдг үзүлх. ¹⁰ Үкх әмтнә төлә тер зүсн-зүүл мек һарһх. Тедн аврлтын төлә үннд эс итксндән болн эс дурлсндан үкцхәх. ¹¹ Бурхн үкх әмтнд эндү һарһдг юм илгәх. Тиигәд тедн худлд иткх. ¹² Тиигәд үнниг эс иткәд килнц таасҗахинь Бурхн цааҗлх

Тадн аврлтын төлә шүүҗ авгдвт

¹³ Деед Эзнә дурлсн ахнр-дүүнр, тадна төлә бидн Бурхнд оньдинд ханлтан өргх йоставидн. Яһад гихлә, Бурхн тадниг Сәкүснә әрүллһнә көдлмшәр болн үннд итксәр дамҗад хамгин түрүнд аврхар шүүҗ авв. ¹⁴ Мана цәәлһсн Сән Зәңг дамҗад Бурхн тадниг Терүнә төлә болн мана Деед Эзн Исус Христосин туурмҗиг хувалцтха гиҗ дуудв. ¹⁵ Тиигәд, ахнр-дүүнр, батар бәәһәд, мана дасхсн тоотыг үгәр болн бичгәр дамҗад итктн. ¹⁶ Маднд дурлад, бат ицлт, мөңк төвкнүлт хәәрлтәр өгсн мана Деед Эзн Исус Христос болн Бурхн мана Эцк тадна зүрк тогтнулад, тадниг сән йовдлмуд һарһҗ, сән үг келүләд батлх болтха!

Мана төлә зальвртн

¹ Ахнр-дүүнр, аш сүүлднь, мана төлә зальвртн. Деед Эзнә үг цаарандан чигн шулун тарад, тадн дунд туурсн әдләр тууртха гиҗ зальвртн. ² Таарш уга болн хорта улсас мадниг сулдххин төлә зальвртн. Сән Зәңгд зәрмнь иткхш. ³ Деед Эзнд нәәлҗ болҗана. Тер таниг батраһад, эрлгәс харсҗ авх. ⁴ Деед Эзн мадниг таднд иткүлҗ, мана закҗасиг цугинь күцәһәд, цааранднь чигн күцәхит гиҗ ицҗәнәвидн. ⁵ Деед Эзн таднд Бурхна дур болн Христосин теслт күртәтхә гиҗ би зальврҗанав.

Көдлмш кех кергтә

⁶ Деед Эзн Исус Христосин нерн деерәс, ахнр-дүүнр, бидн таднд иигҗ закҗанавидн: залху болн мана өгсн номар эс бәәх күүнлә бичә үүрлтн. ⁷ Маднас үлгүр авад яһҗ бәәхинь тадн эврән меднәт. Танад бәәхдән бидн залхурҗ цаган давулсн угавидн. ⁸ Күүнә мөңг-эдлврәр бас бәәсн угавидн. Бидн күүнд ацан болшгоһар седәд, нам өдр сө уга шунҗ көдлвидн. ⁹ Бидн таднас күццднь дөң авч чадх бийнь, таднд үлгүр үзүлхәр тиигҗ бәәләвидн. ¹⁰ Танад бәәхдән бидн «эс көдлхәр седсн күүнд, хот бичә өгтн» гиҗ келдг биләвидн. ¹¹ Болв тадн дунд бәәх зәрм залху улс мел көдлхәр седхш. Тедн күүнә кергт орлцна! ¹² Деед Эзн Исус Христосин нерн деерәс тиим улсиг бидн чиктән бәәһәд, эврәннь теткврин мөңг экләд олтн гиҗ закад, өмнәснь хөрҗәнәвидн. ¹³ Тадн болхла, ахнр-дүүнр, цуцрлт угаһар әмтнд сә кеҗ йовтн. ¹⁴ Эн бичгт өгчәх заквр эс авчах улст шишлң оньган өгцхәтн. Эврәннь бәәдләс ичдгәр, тиим күүнлә бичә үүрлтн. ¹⁵ Зуг тиим күүг эврәннь дәәсн гиҗ бичә тоолтн. Терүг эврәннь дүүлә әдл хөртн.

Ашлгч үгмүд

¹⁶ Мана Эвин булг - Деед Эзн танд төвкнүн бәәдл кезә чигн юунд болвчн учратха. Деед Эзн таднла оньдин бәәтхә! ¹⁷ «Павелас менд!» бичг болһнаннь чилгчәр би һаран тәвҗәнәв. ¹⁸ Деед Эзн Исус Христос таниг цугтаһитн хәәрлтхә!