2 ПЁТР

Пётрин бичсн хойрдгч бичг

Эн бичгән Пётр түрүн христианмуд болсн цуг әмтнд илгәҗәнә. Терүндән деми багшнрин болн ичр уга улсин өмнәс сөрлт кех төр тер тәвҗәнә. Тер төрмүдт зуг Бурхна медрләр бәәсн улс хәрү авчана. Исусиг үзсн, Терүнә ном соңссн улс тиим медрлтә. Христос дәкҗ иршго гиҗәх улсин ном Пётриг дегд үүмүлҗәнә. Кен чигн күн бичә үктхә, цугтан авртха гиҗәх Бурхна седвәр Исусин хәрү ирлһиг бәрҗәнә.

Учр-утхин зура

Нүр үг 1.1–2

Христианмудын дуудвр 1.3–21

Деми багшнр 2.1–22

Христосин сүүлңк ирлһн 3.1–18

Мендллһн

¹ Би Шимон Пётр Исус Христосин зарц болн апостол эн бичгиг таднд бичҗәнәв. Тадн мана Бурхн болн Аврач Исус Христосин үнн чик бәәдләр дамҗад, маднла әдл үнтә иткл авсн улс мөн. ² Бурхн Эврәннь болн мана Деед Эзн Исусин туск медрләр дамҗад, хәәрлтән болн амулң җирһлән таднд элвгәр өгтхә!

Бурхна дуудвр болн шүүҗ авлһн

³ Бурхна таалар бәәхин төлә цуг кергтә юмиг Бурхна күчн маднд өгсмн. Бурхна туск медрләр дамҗад тиигсмн. Эврәннь туурмҗарн болн күчтә үүләрн маднла хувалцхар Тер мадниг дуудсмн . ⁴ Энүгәр дамҗад Бурхн маднд алдр болн үнтә юм өгх гисмн. Тадниг кү үрәдг орчлңгин му седвәрмүдәс сулдад, Бурхна бәәдлд орлцҗ чадтха гиҗ тиигсмн.

⁵ Эн учрар эврәннь итклдән сән седклтә бәәдл немхәр зүтктн, сән седклтә бәәдлд медрл, медрлд бийән бәрлһн, бийән бәрлһнд тесвр, тесврт Бурхнд нерәддг бәәдл, Бурхнд нерәддг бәәдлд ахнр-дүүнрин цаһан санан, цаһан сананд дуриг немтн. ⁸ Кемр цуг эн тана седклд тогтҗ өсхлә, тадн Исус Христосиг медлһнд күцәмҗтә болн олзта болхит. ⁹ Кемр цуг эн седклд уга болхла, тиим күн сохр эс гиҗ мууһар үздг күн мет болна. Тер урдк килнцәсн цеврлгдсән мартв.

¹⁰ Тегәд ахнр-дүүнр, Бурхн таниг шүүҗ авсиг болн дуудгсиг лавлхар улм икәр шунтн. Яһад гихлә, иигҗ кехлә, тадн кезәчн бүдрҗ уншгот. ¹¹ Тиигхлә Мана Деед Эзн Аврач Исус Христосин мөңк орна үүдн тана өмн икәр секгдх.

¹² Тадн цуг энүг медвчн, авсн үннд батар итквчн, би таднд эн тоотыг оньдиндән тодлулнав. ¹³ Зуг би әмд бәәтлән таднд энүг тодлулхла, чик болх гиҗ санҗанав. ¹⁴ Удл уга бас эн цогцан үлдәһәд, насан бархв. Тиигҗ нанд Мана Деед Эзн Исус Христос медүлв. ¹⁵ Намаг өңгрснә хөөн энүг тадн оньдиндән тодлҗ йовтха гиҗ би арһ-чадсарн цугинь кехв.

Христосин туурмҗин туск герчллһн

¹⁶ Исус Христосин күчнә тускар болн Терүнә ирлһнә тускар келхләрн, бидн күүнә уханас һарһсн туульс олзлҗ келсн уга биләвидн. Түүнә алдр туурмҗиг бидн нүдәрн үзләвидн. ¹⁷ Бурхн Эцк Христосиг күндләд туурулсн цагт бидн Терүнлә хамдан әрүн уул деер биләвидн. Мадниг тенд бәәсн цагт Деед Эзнә туурмҗин дун Исуст иигҗ келсмн: «Эн Мини хәәртә Көвүн. Эн Намаг байрлулна». Бидн эн дууг теңгрәс соңсвидн.

¹⁹ Эн учрар бидн әәлдәчнрин үгд улм икәр нәәлҗәнәвидн. Тадн энүнд оньган өгсндтн йир чик юмн, яһад гихлә, эн үг харңһуд шачах герл мет. Өдр ирхин өмн, өрүни одн тана седклд герл өгхин өмн әәлдәчнрин үгмүд герл өгч гилвкнә. ²⁰ Хамгин түрүнд тодлтн: Бурхна Бичгт бәәсн әәлдхлиг күн эврән цәәлһҗ чадхш. ²¹ Яһад гихлә, әәлдхлин үгмүд күүнә дурар келгддго бәәҗ. Зуг Әрүн Сәкүсәр залгддг улс әәлдхлиг Бурхнас келдг бәәҗ.

Деми багшнр

¹ Әмтнә дунд деми әәлдәчнр бас бәәдг билә. Ода чигн тадн дунд бас деми багшнр һарч ирх. Тедн итклиг уга кедг буру ном нууцар авч ирәд, тедниг хулдҗ авсн Деед Эзиг һолх. Тиигәд тедн бийән шулуһар цааҗла харһулх. ² Кесг улс теднә аля йовдлыг дахх. Теднәс көлтә әмтн Үннә хаалһиг муурулх. ³ Иим багшнр хармч заңгасн көлтә худл үг келәд танас олз авх. Кесг цагтан теднә Зарһчнь белн билә. Тедниг цааҗлх Алач нөр уга сууна.

⁴ Яһад гихлә, Бурхн нам килнц кесн элчнрән чигн хәәрллго үксн улсин ормд хайсмн. Тендән тедн цевәр күләтә харңһуд сууна, Зарһин өдр күләҗәнә. ⁵ Бурхн кезәңк орчлңгиг чигн хәәрлсн уга. Тер килнцтә улсин һазрур усна аюл илгәв. Зуг Бурхнла чик седкләрн бәәтн гиҗ әмтиг сурһдг Ноахиг болн дәкәд долан күүг Бурхн аврсмн. ⁶ Бурхн Содом болн Гомора гидг балһсдиг гемшәһәд, хөөтк килнцтә улст үлгүр болтха гиһәд һалар шатасмн. ⁷ Зуг чик седклтә Лотыг аврсмн. Килнцтә улсин цалдң йовдлмуд Лотын седклинь дарсмн. ⁸ Эн чик седклтә Лот тедн дунд бәәһәд, йос эвддг йовдлмудынь үзәд, теднә тускар соңссн цагтнь өдр ирвәс седклднь му болдг бәәҗ. ⁹ Деед Эзнд иткдг улсин сөрлһнәс яһҗ харсхинь болн хар саната улсиг Зарһин өдр иртл яһҗ оньдиндән бәрҗәхинь Деед Эзн меднә. ¹⁰ Цогцин бузр седвәрмүдәр бәәдг болн Бурхна йосиг һолдг улсиг Бурхн онц кевәр цааҗна.

Тиим улс әср болн ик саната. Тедн Бурхна алдр элчнриг му келхәс әәхш. ¹¹ Бурхна элчнр тиим улсас улм ик күчтә болвчн, деми багшнриг му келхш Деед Эзнә өмн гемшәхш . ¹² Эн улс ухан уга, бәргдәд алгдх мал мет төрхәрә медсәрн йовдлмуд һарһна. Эдн бийснь эс меддг юмиг му келнә. Эдн мал кевтәһәр алгдх. ¹³ Эдн талдан улсиг яһҗ зовала, тиигҗ бийснь зовлңган эдлҗ цааҗлгдх. Эдн өдрин дуусн нәр-наадан кеһәд байрлна, әркдәд хуульч йовдлмуд кенә. Эн учрар эдн таднла хамдан хот уусн цагт тадниг һутаһад неритн муурулна. ¹⁴ Эдн күүкд улсиг үзхләрн, аля яһҗ кехән ухална. Эн улс килнц кеһәд цадцхахш. Эн деми багшнр батар иткдго улсиг килнцд уңһана. Эдн хармч болхд дасхгдсмн. Эдн харалд туссн улс. ¹⁵ Деми багшнр чик хаалһасн хаҗиһәд, Босрин көвүн Балам гидг әәлдәчин хаалһар йовна. Эн әәлдәч мөңгнд дурта билә, тер мөңгиг хар саната йовдл кесндән авдг билә. ¹⁶ Балам эврәннь килнцәсн көлтә бурушагдҗ. Энүнә элҗгн күүнә келәр келәд, әәлдәчин ухан уга йовдлыг зогсав.

¹⁷ Эн улс хагсҗ одсн булг мет, салькнд туугдсн үүлн мет. Бурхн теднд харңһуһар бәәдг орм белдҗ. ¹⁸ Эдн ик саната, эргү үгмүд келәд, цогц махмудын му седвәрмүд олзлна. Хаҗһр хаалһасн чик хаалһд шиңкән орсн улсиг хавхдан бәрҗ авхар тиигнә. ¹⁹ Эдн әмтнд сул җирһл өгнәвидн гилднә, зуг бийснь кү үрәдг му авъясмудын мухла болна. Яһад гихлә, күн юмнд диилгдсн болхла, тер юмна мухла болҗ үлднә. ²⁰ Кемр күн Мана Деед Эзн болн Аврач Исус Христосиг медсәр орчлңгин бузр йовдлмудас сулдсн хөөн дәкн терүндән оралдҗ диилгдхлә, тер күүнә бәәдл урдк бәәдләсн улм му болна. ²¹ Учрнь эн: тедн чик бәәдлин хаалһиг медәд, әрүн заавриг үлдәхин ормд эн хаалһиг эс медсн деер болх билә. ²² Эн учрсн йовдлын тускар үлгүрт: «Ноха бөөлҗсндән хәрү ирдг», болн «Уһагдсн һаха дәкн бальчгт ордг» – гиҗ чикәр келгдҗәнә.

Деед Эзн дәкн ирхин тускар

¹ Хәәртә үүрмүд, хойрдгч бичгән таднд бичҗәнәв. Эн хойр бичгт би тана уханд тодлулҗ цевр сана-седкл сергәхәр бәәләв. ² Әрүн әәлдәчнрин кезәнә келсн үгмүдиг болн тана апостолмудар дамҗҗ келсн Деед Эзнә болн Аврачин заквриг тадн тодлтха гиҗәнәв. ³ Хамгин түрүнд медтн: Сүл өдрмүдт танар наад бәрдг му седвәрәр бәәдг кесг улс һарч ирх. ⁴ Тедн: «Исус Христос ирнәв гилү? Тертн альдв? Мана өвкнр кезәнә үкҗ одла. Зуг орчлң үүдснәс авн цугнь нег кевәрн бәәһәтә», – гиҗ келцхәх. ⁵ Теңгр һазр хойриг Бурхн үгәрн кезәнә үүдәҗ гисн үнниг тедн медә бәәҗ керглхш. Һазр уснас болн усар дамҗад үүдәгдҗ. ⁶ Эн учрар бас усар эс гиҗ усна аюлар тер цагт бәәсн орчлң уга кегдҗ. ⁷ Һалар шатагдхин төлә өдгә цагин теңгр һазр хойр тер Үгәр чигн хадһлгдҗ бәәнә. Килнцтә улс засглгдх болн уга кегдх цаг күртл теңгр һазр хойр хадһлгдҗ бәәнә.

⁸ Зуг энүг бичә марттн, хәәртә үүрмүд. Деед Эзнд нег өдр миңһн җил мет болна, миңһн җил негхн өдр мет болна. ⁹ Деед Эзн ирхв гиҗ өгсн үгән күцәхдән удхш. Зәрмснь Энүг удҗана гинә. Зуг Деед Эзн тадниг уданд теснә. Яһад гихлә, Деед Эзн иим саната: Кен чигн күн бичә үктхә, цуг улс килнцтә җирһлән үлдәтхә. ¹⁰ Деед Эзнә өдр генткн сөөһәр ирдг хулхач метәр ирх. Теңгр ик күркрәнд уга болҗ одх. Теңгрт бәәдг тоотнь: нарн, сар, одд һалд шатҗ одх. Һазр деер бәәсн юмн һазрта хамдан шатх. ¹¹ Кемр цугнь тиигҗ каархла, тадн ямаран улс болх зөвтәвт? Бурхна өдриг күләһәд, Терүнә ирлһиг әрүн седкләрн үзхәр седҗәх цагт бийән Бурхнд нерәдәд әрүн җирһләр бәәтн. Тер өдрт теңгр шатад уга кегдх, сар, нарн, одд һалд хәәлҗ одх. ¹³ Зуг бидн шин теңгр һазр хойриг күләҗәнәвидн. Энүг Бурхн өгнәв гилә. Тенд әмтн Бурхна заасар оньдиндән бәәх.

¹⁴ Эн учрар ирхинь күләһәд, Бурхна өмн цевр болн буру уга болхар зүтктн. Бурхнла эвәр бәәхәр шунтн. ¹⁵ Деед Эзнә удан тесвр маднд авргдх арһ өгчәнә гиҗ тоолтн. Мана хәәртә ах Павел бийднь өггдсн цецн ухаг олзлад, эн төрин тускар бас бичлә. ¹⁶ Павел энүнә тускар бичг болһндан бичлә. Павелын бичгүдт зәрм медгддго юмн бәәнә. Кесг муңхг болн батар иткдго улс энүг Бурхна Бичгин нань чигн тасрхала әдл хаҗһр цәәлһнә. Тиигәд тедн бийән үклүр өөрдүлнә.

¹⁷ Тегәд хәәртә үүрмүд, энүг медәд бийән саглтн: Йос эвддг улсин эндү тадниг авлдг болвза, тадн бат итклән гееввзәт. ¹⁸ Зуг Мана Деед Эзн болн Аврач Исус Христосиг медлһнд болн Терүнә цаһан сананд цааранднь өстн. Эндр өдр болн оньдиндән Тер тууртха! Тиигтхә!