Йохана бичсн хойрдгч бичг
Йохана хойрдгч бичгиг шүүҗ авсн аһд болн терүнә үрдүдт, бәәрн чонҗд болн терүнә гешүдт көгшә бичҗ. Эн ахрхн бичг нег негндән дурта болтн гиҗ дуудвр кеҗәнә, дәкәд деми багшнр бәәхиг болн теднә номин тускар саглҗана.
Учр-утхин зура
Нүр үг 1–3
Дурна диилвр 4–6
Худл номин тускар сагллһн 7–11
Товчлгч үг 12–13
1Мендллһн
1 Шүүҗ авсн аһ болн тана үрдүд! Би чонҗин ахлачин негньв, таднд менд илгәҗәнәв. Би үнн седкләрн таднд дуртав. Һанцхн би биш, Бурхна үн медсн улс чигн бас тиигҗ таднд дурта. 2 Яһад гихлә, Бурхна үнн маднла. Тер маднла мөңкиндән бәәх. 3 Бурхн Эцк болн Эцкин көвүн Исус Христос йосндан иткдг болн хоорндан дурта болдг маднд цаһан сана күргҗ амулң-менд бәәхиг өршәтхә!
Үнн болн дурн
4 Зәрм Тана үрдүдиг Эцкин заасн зааврар Бурхна үн дахҗ бәәдгинь соңсад, икәр байрлв. 5 Күндтә аһ! Нег-негндән дурта болтн, гиҗ сурҗанав. Би Танд шин заавр бичҗәхшв. Эн заавриг бидн эклцәс авн авлавидн. 6 Дурта болх гиснь, Бурхна заавриг күцәх. Тер заавр иим: нег-негндән дурта болтн. Энүг күцәхин төлә эн заавриг тадн эклцәс авн соңслат. 7 Кесг худлч улс һазрт ирҗ. Тедн: «Исус Христос һазр деер күн болҗ төрсн уга», – гиҗ келнә. Тиигҗ келсн күн худлч болн Христосин өшәтн мөн. 8 Болһатн! Мана кесн көдлмшиг бичә үрәтн. Болв ач-тусан күццднь эзлтн. 9 Христосин номас хаҗиһәд, Терүг дахҗ бәәдго күн Бурхн уга бәәнә. Христосин номиг дахҗ бәәдг күн Бурхн Эцклә болн Көвүнлә ниицңһү бәәнә. 10 Христосин номиг заадго күн тадн тал ирхлә, бичә гертән орултн, бичә терүнлә мендлтн. 11 Терүнлә мендлдг күн терүнлә хамдан му йовдл кенә.
Бичгин сүл үгмүд
12 Би дала үг чамд келхәр бәәләв: Зуг цугинь цааснд бекәр бичхәр седҗәхшв. Чамла чирәһәрн харһад йир икәр байрлхвидн гиҗ нәәлҗәнәв. 13 Шүүҗ авсн Тана эгчин үрдүд Танд менд илгәҗәнә.