1 ТЕСАЛОНИКИНХН

Христост иткдг

Тесалоникин улст илгәсн негдгч бичг

Тесалоники Римин эргмд бәәсн Македонь һазрин хотл балһсн бәәҗ. Павел Пилипәс нүүһәд һархларн тенд чонҗ бүрдәнә. Болв тер удл уга евреймүдин сөрү йовдлла харһна. Павел еврей биш улс дунд христианмудын зәңг тархаҗаснд тедн үлү үзнә. Павлыг тедн Тесалоникас көөһәд Бэра тал йовулна. Теднә чонҗин тускар дахулч болн хамдан көдлҗ йовсн Тимофейәс тер хөөннь зәңг соңсна. Тегәд Павел Тесалоникид бәәсн иткдг улст урмд өгхәр эврәннь түрүн бичгән теднд илгәнә. Теднә байрин болн дурна туск зәңг соңссндан ханлтан өргҗәнә, эврән теднлә яһҗ бәәсән бичҗәнә. Дәкәд тер бичгтән Христосин хәрү ирлһнә туск суврмудт хәрү өгчәнә. Эннь иим суврмуд: Христосиг хәрү ирхин өмн өңгрсн иткдг улс терүг ирхлә, мөңк җирһл авч чадхий? Христос шинәс хәрү кезә ирхмб?

Цугтан тогтунар көдләд, Христосиг хәрү ирхиг ицҗ күләтн гиҗ Павел тер бичгтән бичҗ.

Учр-утхин зура

Нүр үг 1.1

Ханлт болн магтал 1.2 – 3.13

Христианмудын заң-бәәдл 4.1–12

Христосин хәрү ирлһнә туск ном 4.13 – 5.11

Сүүлңк сагллһн 5.12–22

Товчлгч үг 5.23–28

¹ Тесалоникид бәәх Бурхн Эцкин болн Деед Эзн Исус Христосин иткдг улст Павелас, Силас болн Тимофейәс. Цаһан сана, төвкнүн бәәдл таднд Бурхн өгтхә.

Тесалоникинхнә җирһл болн иткл

² Бидн кезә чигн тана төлә Бурхнд ханлтан өргнәвидн, бас зальврнавидн. Яһад гихлә, Христост иткснә ашт яһҗ көдлсиг, дурлсна ашт яһҗ күч-көлсән өгсиг, Деед Эзн Исус Христост нәәлснә ашт яһҗ тессиг бидн Бурхна болн мана Эцкин өмн төрүц мартхшвидн. ⁴ Ахнр-дүүнр, Бурхн таднд дурлад, тадниг эврәннь улс болтха гиҗ шүүҗ авсиг бидн меднәвидн. ⁵ Сән Зәңгиг тархахларн, бидн йирдән үг олзлв чигн, Әрүн Сәкүснә күчиг таднд бас үзүлвидн. Бидн Сән Зәңгд гүүнәр иткҗәхән медүлвидн. Таднла хамдан бидн яһҗ бәәсиг эврән меднәт. Тернь тана төлә бәәлһн билә. ⁶ Тадн маднла әдл болн Деед Эзнлә әдл бәәдг дасвт. Зовлңта бәәсн бийнь тадн Сән Зәңгиг авад, Әрүн Сәкүснәс байрт күртвт. ⁷ Бурхнд иткдг Македонь болн Ахья һазрин улст үлгүр болҗанат. ⁸ Тиигәд таднас Деед Эзнә үг Македонь болн Ахья һазрин эргнд тарв. Тадниг Бурхнд иткснә туск зәңг бас эргндән соңсгдв. Маднд келдг үг уга, әмтн цугтаһинь меднә. ⁹ Мана ирлһиг тадн яһҗ тоссиг, һарар кесн кегдлмүдт мөргдгән уурад, әмд йосн Бурхнд заргдхар болн үклин хөөн әмдрүлсн Бурхна көвүг теңгрәс бууҗ ирхиг күләҗәхиг әмтн келҗ өгҗәцхәнә. Исус Христос мадниг өөрдҗ йовх зарһас тач авх.

Тесалоникид Павелын кесн көдлмш

¹ Ахнр-дүүнр, мана нааран ирлһн хара бишинь тадн медҗәнәт. ² Тадн тал ирхин өмн Пилипд бидн зөвәр зовлң үзәд басгдсиг бас меднәт. Мана өмнәс боссн улс бәәсн бийнь, Бурхн маднд Терүнә Сән Зәңг цәәлһх көдлмш кехд зөрг өгв. ³ Мана дуудврт худл чигн, бузрдах чигн юмн уга. Бидн тадниг меклхәр седҗәхшвидн. Бурхн мадниг сөрәд, Сән Зәңг цәәлһх зөв өгв, тиигәд бидн Бурхна седсәр келҗәнәвидн. Бидн әмтнд биш мана седкл меддг Бурхнд таасгддг көдлмш кеҗәнәвидн. ⁵ Тиигәд бидн күүнәс олз хәәҗәхшвидн. Зуһудх үгмүд бидн эс келсиг тадн меднәлмт. Бурхн герч. ⁶ Маднд таднас чигн, талдан улсас чигн буульмҗ керг уга. ⁷ Болв апостолмуд болсндан бидн таднас дөң авч чигн чадх биләвидн. Түүнәс даву эк килмҗ өгчәх бичкдүдлә әдл бидн болвидн. ⁸ Бурхна Сән Зәңг биш, нам эврәннь әмән таднла хувалцх дүңгәһәр таднд ик дуртавидн. Тиим күндтәт тадн. ⁹ Ахнр-дүүнр, яһҗ бидн шунҗ көдлсиг тадн меддг болхит. Бурхна Сән Зәңг танад цәәлһхин төлә бидн цәәһәд унтлан тадниг зовашгоһар өдр сө уга көдлҗәнәвидн. ¹⁰ Мадниг тадн дунд бәәһәд, цугинь әрүнәр болн чикәр мел буру угаһар бәәсиг тадн болн Бурхн герч. ¹¹ Эцк күн эврәннь үрдүдтәһән яһҗ бәәнә, тедү мет бидн таднла бәәсиг тадн эврән меднәт. ¹² Таднд омг өгәд, тадниг эвләд, Бурхнд таасгдх бәәдләр җирһтхә гиҗ эрләвидн. Бурхн таниг эврәннь алдр орнд ортха гиҗ дуудҗана. ¹³ Тадн маднас Бурхна үг соңслат. Бурхна үг танд Исус Христост иткх урмд өглә. Бурхнд оньдин ханлт өргх бас нег учр бәәнә. Тер үгиг тадн күүнә үг гиҗ биш, Бурхна йосн үг гиҗ авлат. Иткдг улс, тана бийинтн дотр, тер үг сольлт кеҗәнә. ¹⁴ Ахнр-дүүнр, Исус Христосла ниилүлсн Йудьян зүсн-зүүл һазрар бәәх Бурхнд иткдг улсла учрсн тоот таднла харһв. Тадн эврәннь орн-нутгин әмтсәс, евреймүдәс иткдг улс көөгдснлә әдл зовлң үзвт. ¹⁵ Деед Эзн Исус Христосиг болн әәлдәчнриг Йудья улс алла. Мадниг болхла көөлә. Тедн Бурхнд таасгдҗахш, олн әмтнә дәәсн болҗана. ¹⁶ Яһад гихлә, тедн буру номта улс аврхин төлә мана кеҗәх цәәлһврин көдлмшт харш болҗана. Терүгәрн тедн эврәннь сүл килнцән немҗәнә. Ода Бурхн теднд зарһ кеҗәнә.

Дәкнәс Тесалоникин чонҗд одх Павелын седкл

¹⁷ Ахнр-дүүнр, бидн цөөкн болзгт ухан-седкләрн биш цогцарн салу йоввидн. Тиигәд тадниг үзхәр йир икәр седләвидн. ¹⁸ Би, Павел, тадн тал кесг дәкҗ йовхар седв. Болв хар сәкүснә нойн нанд харш болад бәәв. ¹⁹ Мана Деед Эзн Исус Христос ирхд тадн бас мана диилврин буульмҗ, мана ицл, мана байр болҗанат! Тадн мана буульмҗ, мана байр лавта болҗанат!

¹ Тиигәд бидн тесҗ ядад, эврән Афин балһснд үлдхәр седүвидн. ² Тадниг батлад, тана итклд туслхин төлә бидн маднла хамдан Исусин Сән Зәңг тархаҗ, Бурхна даалһвриг күцәҗ йовдг Тимофейиг илгәвидн. ³ Илгәсн учрнь иим: учрх зовлңд даргдлго нег чигн күн итклән бичә хайтха. Иим зовлңд Бурхн маднд заясиг тадн эврән меднәт. ⁴ Яһад гихлә, хамдан бәәсн цагтан бидн таднд зовлң үзхвидн гиҗ урдаснь келләвидн. Мана келсн тоот күцәгдсиг тадн меднәт. ⁵ Тиигәд би тесҗ ядад, тана итклин тускар медхәр Тимофейиг илгәвүв. Эрлг тадниг бичә җилвтүлтхә гиһәд, дәкәд мана кеҗәх көдлмш мел хоосн болҗ һарвза гиҗ би саглҗалав. ⁶ Ода Тимофей хәрү ирәд, тана итклин болн дурна туск Сән Зәңг авч ирв. Тадн даңгин мадна тускар байртаһар сандгиг, дәкәд тадн мадниг үзх күслтә бәәхиг тер маднд келҗ өгв. Бидн бас тиим седклтә бәәнәвидн. ⁷ Тиигәд һашута болн зовлңта бәәсн мадниг тана туск зәңг, тана иткл мадниг төвкнүлв. ⁸ Кемр тадн Деед Эзнлә нииләд бат бәәхләтн, тиигхлә бидн үнндән җирһхвидн. ⁹ Тадна төлә Бурхнд ханлтан бидн ода өргҗ чадхвидн. Тана туск зәңг мадниг байрлулснд бидн Бурхна өмн ханлтан өргҗәнәвидн. ¹⁰ Тадниг үзхин төлә болн Исуст тана итклһнд дуту тоотыг өгхин төлә өдр-сө уга бидн үнн седкләрн Бурхнд зальврдвидн. ¹¹ Тадн тал ирх хаалһиг мана Бурхн болн Эцк, мана Деед Эзн Исус Христос ясч өгг. ¹² Мадниг нег-негнтәһән болн олн улстаһан ни-негн, дурта бәәдгәр дүүргсн әдләр таниг Деед Эзн дүүргг. ¹³ Мана Деед Эзн Исус цуг иткдг улсла хамдан ирх цагт Бурхн мана Эцкин өмн тадниг килнц уга, әрүн болхин төлә Деед Эзн батрулх.

Бурхнд тааста җирһл

¹ Ахнр-дүүнр, Бурхнд тааста болдгар бәәдгиг маднас дасҗ авчит, ода тадн тиигҗ бәәнәт. Болв Деед Эзн Исусин нернә төлә түүнәс сәәнәр бәәтн гиҗ эрҗәнәвидн. ² Деед Эзн Исусин нерн деерәс ямаран заквр өгсиг тадн меднәт. ³ Бурхн тадниг әрүн җирһләр җирһтхә гиҗәнә. Тана дунд аля кедгнь уга болтха. ⁴ Күн болһн эврәннь цогц-махмудан әрүнәр болн күндтә кевәр бәрхиг медх зөвтә. ⁵ Бурхиг меддго, буру номта улсла әдл эврәннь аля седвәрт бичә авлгдтн. ⁶ Нег чигн күн эврәннь ахнр-дүүнртән му юм бичә үзүлтхә, нег-негән бичә меклтхә. Тиим нүүлтә йовдлмуд һарһсн күүг Бурхн засглх. Бидн таднд түүнә тускар өмнәснь келәд сагллавидн. ⁷ Бурхн мадниг бузр, аля биш, әрүн җирһлүр дуудла. ⁸ Эн номиг эс авсн күн, күүг биш, таднд Әрүн Сәкүс өгсн Бурхиг бийинь һолҗана. ⁹ Ахнр-дүүнрин дурна тускар таднд бичәд керг уга гиҗ санҗанав, тадн эврән нег-негндән дурта бәәдгиг Бурхн дасхла. ¹⁰ Македоньд бәәх ахнр-дүүнртән цугтаднь тадн дуртаг бидн меднәвидн. Болв энүнәс үлүһәр нег-негндән дурта болтн гиҗ эрҗәнәвидн. ¹¹ Урднь мана келснлә әдл тогтунар бәәһәд, күн болһн эврәннь кергән күцәһәд, хойр һартан нәәлтн. ¹² Бурхнд иткдго улс күндлдгәр бәәх кергтә болҗана. Тадн талдан күүнә үлмәд бичә ортн.

Деед Эзнә ирлһн

¹³ Ахнр-дүүнр, үксн күүнлә юн болдгинь тадниг медтхә гиҗәнәвидн. Ицл уга наадк улсла әдл тадниг зовашгоһин төлә тиигҗәнәвидн. ¹⁴ Кемр бидн Исус үкәд дәкәд әмдрснд иткҗәхлә, Терүнд иткәд үксн улсиг Бурхн Исуста дахулҗ ирх. ¹⁵ Деед Эзнә келсәр, Христосиг ирлһнд бидн әмд улс үксн улсас түрүлҗ Исуста харһшговидн гиҗ келҗәнәвидн. ¹⁶ Бурхн эврән чаңһар заквр өгәд, дарунь Бурхна ах элчин дун һарад, Бурхна бүшкүрин ә һарсн цагт теңгрәс Деед Эзн бууҗ ирх. Тер цагт Исус Христост иткәд үксн улс түрүлҗ әмдрх. ¹⁷ Дәкәд бидн, әмд улс, урднь үксн улсла хамдан Бурхна күчәр теңгрүр өрггдәд Исусла аһарт харһхвидн. Аш сүүлднь, оньдинд Деед Эзнлә хамдан бәәхвидн. ¹⁸ Тиигәд иим үгәр нег-негән төвкнүлтн.

Белн болтн

¹ Ахнр-дүүнр, цагин болн йовдлын тускар таднд бичәд керг уга. ² Деед Эзнә өдр генткн сөөһин хулхач мет ирхинь тадн эврән сән меднәт. ³ Әмтн «эв болн әәмшг уга» гиҗ келлдх, болв теднд күүкд һархин өмн генткн гесн мошклдг мет зовлң үзгдх. Тиигхлә нег чигн күн зовлңгас гетлшго. ⁴ Болв, ахнр-дүүнр, тадн харңһуд бәәхшит. Тиигәд чигн эн өдр генткн таднур хулхач мет иршго. ⁵ Бидн цугтан-герлин үрдүд, өдрин үрдүд болҗанавидн. Бидн сөөһин, таг сохр харңһуһин үрдүд бишвидн. ⁶ Тиигәд бидн олн улс дахад, унтхмн биш, серглң бәәҗ, бийән бәрхмн. ⁷ Унтдг улс сөөһәр унтна, әрк уудг улс сөөһәр уулдна. ⁸ Тадн өдрә үрдүд болсндан, Бурхнд иткәд дурлх йостат. Энтн таднд харслтын дуулх мет болх. Тадн аврлтд нәәлх йостат. Тертн таднд хуйг мет болх. ⁹ Бурхн мадниг цухлын төлә биш, мана Деед Эзн Исус Христосар дамҗад аврлт автха гиҗ урдаснь йилһв. ¹⁰ Исус Христос мана төлә үкв. Бидн Терүг ирхлә, әмд болну, үксн болну хамдан Терүнлә бәәхвидн. ¹¹ Тиигәд ода бәәснлә әдләр нег-негән төвкнүлҗ нөкд болҗ бәәтн.

Сүл селвг болн мендллһн

¹² Ахнр-дүүнр, тадниг христианск җирһлүр залҗ, дасхҗ, тадн дунд көдлҗ йовх улсиг күндлтн гиҗ эрҗәнәвидн. ¹³ Күцәҗ йовх кергин төлә тедниг хәәрлҗ, йир икәр күндлҗ йовтн. Хоорндан амулң-менд бәәтн. ¹⁴ Ахнр-дүүнр, хуурмг улст уха орултн, әәмтхәднь омг өгтн, чидл угаднь нөкд болтн. Цугталань тесвртә бәәтн, гиҗ тадниг эрҗәнәвидн. ¹⁵ Му йовдл һарһв гиҗ кенәс чигн өшә бичә нектн, хоорндан болн цугталань сәәнәр бәәтн. ¹⁶ Оньдин байртаһар бәәтн. ¹⁷ Оньдин зальврҗ йовтн. ¹⁸ Кезә чигн Бурхнд ханлтан өргтн, яһад гихлә, Христосла негдсн улст Бурхна седвәр тиим. ¹⁹ Әрүн Сәкүснә заль бичә унтратн. ²⁰ Әәлдхлиг бичә бастн. ²¹ Цугинь сәәнәр хәләтн, сәәһинь авад, мууһинь хайтн. ²³ Мана Деед Эзн Исус Христос ирхләг эвин Бурхн тадниг кевтнь әрүлтхә, тана сүмс, седкл болн цогц килнцәс кевтнь сулдхтха. ²⁴ Таниг дуудсн Бурхн келсән күцәх, яһад гихлә, Бурхн итклтә. ²⁵ Ахнр! Мана төлә бас зальвртн. ²⁶ Ахнр-дүүнрән цугтаһинь әрүнәр үмсҗ мендлтн. ²⁷ Деед Эзнә нерн деерәс би танас сурҗанав: Эн бичгиг цуг ахнр-дүүнрт умшҗ өгтн. ²⁸ Деед Эзн Исус Христос тадниг хәәрлтхә.