1 ЙОХАН

Йохана бичсн негдгч бичг

Йохан бичгтән хойр төр тәвҗәнә: негдвәрт, Бурхнла болн Терүнә Көвүн Исус Христосла нииһәр бәәтхә гиһәд умшачнртан урмд өгчәнә. Хойрдвар – тер ни бәәлһиг эвдшгон төлә тедниг деми номд бичә ортха гиҗ саглҗана. Тер номар болхла, хар санан эн орчлңгас һарчахас иштә, Исус – Бурхна Көвүн – күн биш билә гиҗ келҗәцхәнә. Тиим ном тархадг багшнр авргдх гиснь – һазр деерк җирһлин кергәс бийән сулдхлһн болҗана, дәкәд шаңшавдын болн өөрхн күүндән дурта боллһна төрмүдлә аврлт мел ирлцҗәхш гицхәнә.

Исус Христос йосндан күн билә гиҗ тер номас талданар Йохан лавлҗ келҗәнә. Исусиг иткҗәх, Бурхнд дурта цуг әмтн эврәннь өөрхн күүнд дурта болх йоста гиҗ тер бичҗәнә.

Учр-утхин зура

Нүр үг 1.1–4

Герл болн харңһу 1.5 – 2.29

Бурхна үрдүд болн эрлгин үрдүд 3.1–24

Үнн болн төөрлһн 4.1–6

Дурна даавр 4.7–21

Диилвртә иткл 5.1–21

Оршл

¹ Орчлң үүдхәс өмн бәәсн әмн җирһл өгдг Үгин тускар бидн зәңглҗәләвидн. Бидн Тер Үгиг соңславидн, эврәннь нүдәрн үзләвидн. Терүг лавтаһар харҗ, бий цогцинь һарарн бәрҗ үзләвидн. ² Әмн җирһл үзгдв, бидн энүг үзвидн. Тер учрар бидн энүнә тускар герчләд, мөңк җирһлин тускар зәңглҗәнәвидн. Эн мөңк җирһл Эцктә бәәһәд маднд үзгддг болв. ³ Тадниг маднла үүрлҗ бәәтхә гиһәд, үзсән, соңссан таднд зәңглҗәнәвидн. Мадн болхла Эцктә болн Терүнә Көвүтә Исус Христоста үүрлҗ бәәнәвидн. ⁴ Бийән икәр байрлулхар бидн энүг бичҗәнәвидн.

Бурхн гисн герл

⁵ Исус Христосас соңссн номиг ода таднд бидн зәңглҗәнәвидн. Эн ном: Бурхн гисн герл, Түүнд төрүц харңһу уга. ⁶ Кемр бидн Терүнлә үүрлҗәнәвидн гиһәд, харңһуд бәәхлә, бидн худл келҗәнәвидн, болв үнниг даххшвидн. ⁷ Кемр бидн Бурхнла әдл герлтә йовхла, бидн хоорндан үүрлҗ бәәнәвидн, болв Терүнә Көвүнә Исусин цусн мадниг ямаран чигн килнцәс цеврлнә. ⁸ Кемр бидн килнц угавидн гихлә, бидн бийән мекләд, Бурхна үнн угаһар бәәнәвидн. ⁹ Кемр бидн килнц кесндән Бурхнд медүлхлә, Бурхн мана килнциг тәвҗ өгх, ямаран чигн буру йовдлас цеврлх. Яһад гихлә, Бурхн итклтә болн үнн чик. ¹⁰ Зуг кемр бидн килнц кесн угавидн гихлә, Бурхиг худлчд тоолҗанавидн, тиим учрас тегәд Терүнә үг маднла бәәхш.

Исус Христос мана Харсач

¹ Үрдүд мини! Тадниг килнц бичә кетхә гиҗ энүг бичҗәнәв. Зуг тадн дундас күн килнц кехлә, чик седклтә Исус Христос бәәдгинь медтн. Тер Эцкиннь өмн мана Харсач болҗ йовна. ² Исус Христосин үкләс көлтә мана килнц тәвгдв, һанцхн мана килнц биш, цуг орчлңгин килнц тәвгдв. ³ Кемр бидн Бурхна зааврмуд күцәхлә, бидн Бурхиг меднәвидн гиҗ лавлҗанавидн. ⁴ Кемр күн «би Бурхиг меднәв» гиһәд, зуг Терүнә зааврмудыг эс күцәхлә, тер үнн уга, худлч күн. ⁵ Кен чигн күн Бурхна үг соңсхла, тер Бурхнд күццднь дурлдг күн. Бидн Бурхнла ни-негн бәәдгиг иигҗ меднәвидн. Бурхнла ни-негн бәәнәв гидг күн Исус Христосла әдл бәәх зөвтә.

Шин заавр

⁷ Хәәртә үүрмүд мини! Би таднд шин биш, кезәңк заавр бичҗәнәв. Эн кезәңк заавриг тадн эклцәс авн меднәт, эн мана соңссн үгмүд болҗана. ⁸ Эн саамд шин заавр бас бичҗәнәв. Эн заавр чик болдгинь Христосин болн тана җирһл үзүлҗәнә. Яһад гихлә, харңһу тархаһад, йосн герл ирнә. ⁹ Ахдан дурго болдг, зуг би герлд бәәнәв гидг күн харңһуд бәәнә. ¹⁰ Ахдан дурта күн герлд бәәнә. Тер эврәннь бәәдләрн килнцд орх учр хаҗудк күүнд өгхш. ¹¹ Ахдан дурго күн харңһуд бәәһәд төөрч йовна, альдаран йовҗ йовхан тер медхш, яһад гихлә, терүг харңһу сохлҗ. ¹² Бичкдүд! Би таднд бичҗәнәв. Яһад гихлә, тана килнц Христосин төлә тәвгдв. Эцкнр! Таднд бичҗәнәв. Яһад гихлә, орчлң үүдснәс авн Бәәдгиг тадн меднәт. ¹³ Эцкнр! Таднд бичҗәнәв. Яһад гихлә, тадн эрлгиг диилвт. Уйн наста көвүд! Таднд бичв. Яһад гихлә, тадн Эцкиг медвт. ¹⁴ Бичкдүд! Таднд бичв. Яһад гихлә, тадн орчлң үүдснәс авн Бәәдгиг меднәт. Уйн наста көвүд! Таднд бичв. Яһад гихлә, тадн чидлтәт. Бурхна үг таднта, тадн эрлгиг диилвт. ¹⁵ Эн орчлңд болн орчлңд бәәсн юмнд бичә дурлтн. Кемр тадн орчлңд дурта болхла, Эцкд дургот. ¹⁶ Яһад гихлә, орчлңд бәәсн юмн: күүнә тачал, нүднә тачал болн эн җирһлин омг Эцкәс биш, орчлңгас һарчана. ¹⁷ Орчлң уга болҗ одх, терүнә тачал уга болҗ одх, зуг Бурхна таалыг күцәдг күн мөңкиндән бәәх.

Христосин өшәтн

¹⁸ Үрдүд мини! Цагин чилгч өөрдҗ йовна. Эн цагт Христосин өшәтн ирхиг тадн соңслат. Өдгә цагт Христосин кесг өшәтнр һарч ирв. Эн учрар цагин чилгч өөрдҗ йовхинь бидн меднәвидн. ¹⁹ Эн улс маднас салад йовҗ одла, яһад гихлә, эдн манахна биш билә. Кемр эдн манахна бәәсн болхла, маднла хамдан үлдх билә. Эдн маднас салад, манахна бишән медүлв. ²⁰ Зуг Әрүн Сәкүсиг Бурхнас авсн учрас тадн цугтан үнниг меднәт. ²¹ Таниг үнниг эс медсн болхла, би энүг бичшго биләв. Зуг тадн үнниг болн ямаранчн худл үннәс эс һарчахиг меднәт. Эн учрар би бичҗәнәв. ²² Худлч гиснь кемб? Исусиг Христос биш гиҗ тоолдг күн худлч. Эцк Көвүн хойрт иткдго күн Христосин өшәтн. ²³ Көвүнд иткдго күн Эцк уга бәәнә. Көвүнд иткдгнь Эцклә хамдан бәәнә. ²⁴ Тегәд эклцәс авн соңссн юмнд цааранднь чигн итктн. Кемр тадн энүнд цааранднь чигн иткәд бәәхлә, Көвүн Эцк хойрла ни-негн бәәхит. ²⁵ Христосин өгхәр бәәсн юмн – мөңк җирһл. ²⁶ Тадниг меклхәр седсн улсин тускар би энүг бичв. ²⁷ Бурхнас авсн Әрүн Сәкүсн тана седклд бәәнә. Тегәдчн тадн күүһәр дасхулх керг угат. Яһад гихлә, Әрүн Сәкүсн тадниг цуг юмна тускар дасхна, тер үн келнә, худл төрүц келхш. Иим учрар Әрүн Сәкүснә дасхсар Исус Христосла ни-негн бәәтн.

Бурхна үрдүд

²⁸ Тегәд, үрдүд мини, Деед Эзнә ирх өдрт тадн ичҗ бултлго, әәмшг угаһар бәәхин төлә Терүнлә ниилҗ бәәтн. ²⁹ Христос чик седклтә болдгинь медхлә, чик седкләрн бәәдг улс Бурхнас төрсинь бас медтн.

¹ Эцкин дурн ямр ик болдгинь сантн! Тер мадниг Эврәннь үрдүдт тоолна. Бидн үнндән Бурхна үрдүд. Орчлң Бурхиг төрүц эс меддг учрас мадниг медхш. ² Хәәртә үүрмүд мини! Бидн Бурхна үрдүд, болв ямаран бәәдлтә болхан медҗәхшвидн. Болв Христосиг ирхлә, Терүнлә әдл болхвидн гиҗ меднәвидн. Яһад гихлә, Терүг ямаран болдгинь үзхвидн. ³ Христост нәәлдг күн бийән цеврлдг, яһад гихлә, Христос Бийнь цевр. ⁴ Килнц гиснь – зака эвдлһн болдг учрас килнц кесн күн Бурхна закаг эвднә. ⁵ Әмтиг килнцәснь сулдххар Христос ирв. Христос Бийнь нүл уга. ⁶ Терүнтә негдҗ бәәдг күн болһн килнц кедг авъясан хайна. Килнц кедг күн болхла, Терүг үзхш, Терүг төрүц медхш. ⁷ Үрдүд мини! Күн тадниг бичә меклтхә! Чик йовдлар бәәдг күн Христосла әдл чик седклтә болна. ⁸ Эклцәс авн эрлг килнц кедг учрас килнц кедг күн эрлгәс болҗана. Эрлгин кесн йовдлмудыг эвдхәр Бурхна Көвүн орчлңд ирҗ. ⁹ Бурхнас төрсн күн килнц кедг авъяс уга. Яһад гихлә, тер Бурхна өгсн шин җирһл эдлнә. Бурхн терүнә Эцк болсн учрас тер күн цааранднь килнц кеҗ чадхш. ¹⁰ Бурхна эс гиҗ эрлгин үрдүдиг иигҗ медҗ чадхит: чик кергән эс күцәдг күн, эс гиҗ ахдан дурго күн Бурхна үрн биш.

Нег-негндән дурта болтн

¹¹ Бидн нег-негндән дурта болх йоставидн. Энүг бидн экнәс авн соңславидн. ¹² Кәнлә әдл бичә болтн. Тер эрлгәс болсн төләд дүүһән алсмн. Яһад алҗ гихлә? Терүнә йовдлмуднь хар бәәҗ, дүүһиннь йовдлмуднь болхла чик бәәҗ. ¹³ Ахнр-дүүнр, кемр орчлң таднд дурго болхла, бичә өвртн. ¹⁴ Эврәннь ахнр-дүүнртән дурта болдг учрас бидн үкләс әмн-җирһлд орсан меднәвидн. Ахдан дурго күн үклин үлмәд бәәнә. ¹⁵ Ахдан дурго күн алач болдг мөн. Ямаран чигн алач мөңк җирһл эдлшгоһинь тадн меднәт. ¹⁶ Христос мана төлә әмән өгснд бидн дуриг үзвидн. Бидн бас эврәннь ахнр-дүүнриннь төлә әмән әрвллго бәәх йоставидн. ¹⁷ Кемр элвг-делвгәр бәәсн күн эврәннь ахан түрү бәәдгинь үзв чигн терүнд санань эс зовхла, «Би Бурхнд дуртав» гиҗ тер яһҗ келҗ чаддмб? ¹⁸ Үрдүд мини! Үгәрн болн хоосн келәрн биш, зуг керг-үүләрн үнндән дурлхмн.

Бурхна өмн әәмшг угаһар бәәлһн

¹⁹ Бидн Бурхна өмн әәмшг угаһар бәәдгиг болн үннә улс болдгиг иигҗ медхвидн: кемр мана зүркн мадниг гемшәхлә, Бурхн мана зүркнәс үлү ик болад, цугинь меднә. ²¹ Хәәртә үүрмүд мини! Кемр мана зүркн мадниг эс гемшәхлә, бидн зөргтәһәр Бурхна өмн зогсҗ чадҗанавидн. ²² Бурхна зааврмуд күцәдг болн Терүнә таалар бәәдг учрас бидн зальврад, Бурхнас юм эс сурв чигн, цугинь авч чадҗанавидн. ²³ Терүнә Көвүнә Исус Христосин нернд иткәд, Христос Бийнь маднд заасар нег-негндән дурта болх йоставидн. Эн Бурхна заавр. ²⁴ Бурхна зааврмуд күцәдг күн Бурхнла негн. Бурхн терүнлә бас ниилҗ бәәнә. Бурхн маднд Сәкүс өгсн учрас бидн Бурхиг маднла ниилҗ бәәдгинь меднәвидн.

Бурхна болн Христосин өшәтнә Сәкүсн

¹ Хәәртә үүрмүд мини! Сәкүсн болһнд бичә итктн! Зуг сәкүсн болһниг Бурхнас эс гиҗ Бурхнас бишинь шүүҗ медтн. Яһад гихлә, эн орчлңд ода деми әәлдәчнр олн болҗ. ² Бурхна Сәкүсиг иигҗ медтн: Исус Христосиг күн болҗ ирв гиҗ келдгнь Бурхна Сәкүсн. ³ Болв Исус Христосиг күн болҗ ирв гиҗ эс келдгнь Бурхна Сәкүсн биш. Тер Христосин өшәтнә сәкүсн. Терүг ирх гиҗ тадн соңслат, ода тер орчлңд ирсн бәәнә. ⁴ Үрдүд мини! Тадн Бурхнас, тадн деми әәлдәчнриг диилвт. Яһад гихлә, тана седклд Бәәдгинь орчлңд бәәдгәс деер. ⁵ Тедн эн орчлңгин улс, орчлңгин тускар келнә, орчлң тедниг соңсна. ⁶ Зуг бидн Бурхнас. Бурхиг меддг күн мадниг соңсна. Бурхна биш күн мадниг соңсхш. Тиигәд бидн үннә хаалһ заадг Сәкүсиг хаҗһр хаалһд орулдг сәкүснәс йилһҗ чадҗанавидн.

Бурхн гисн дурн

⁷ Хәәртә үүрмүд мини! Нег-негндән дурта болхмн. Дурн Бурхнас. Тер учрар дурлдг күн Бурхнас төрсн болн Бурхиг меднә. ⁸ Кү эс дурлдг күн Бурхиг медшго, яһад гихлә, Бурхн гисн дурн. ⁹ Ор һанцхн Көвүһән орчлңд илгәһәд, Бурхн Эврәннь дуран маднд үзүлв. Терүнә нилчәр мадниг мөңк җирһлтә болтха гиҗ Бурхн тиигҗ. ¹⁰ Дурн гисн эн: бидн Бурхнд дурлсн биш, Бурхн маднд дурлҗ, әмтнә килнциг Эврәннь Көвүһәрн тәвҗ өгүлхин төлә Терүг орчлңд илгәҗ. ¹¹ Хәәртә үүрмүд мини! Кемр Бурхн маднд тиигҗ дурлхла, бидн бас нег-негндән дурта болх зөвтәвидн. ¹² Бурхиг күн төрүц үзәд уга. Зуг кемр бидн нег-негндән дурта болхла, Бурхн маднла нииләд бәәнә, болв Бурхна дурн мадниг, талдан улсиг улм икәр дурлхиг дасхна. ¹³ Бурхн маднд Сәкүсән өглә. Тиим учрар Бурхн маднла ни-негн бәәдгинь болн мадн Терүнлә ни-негн бәәдгинь бидн меднәвидн. ¹⁴ Бурхн Эцк Көвүһән орчлңгин Аврач кехәр илгәсиг үзәд бидн герчнр болҗанавидн. ¹⁵ Исусиг Бурхна Көвүн гиҗ иләр келдг күн Бурхнла ни-негн бәәнә. Бурхн терүнлә бас ни-негн бәәнә. ¹⁶ Бидн Бурхиг маднд дурта болдгинь медвидн, Тер дурнд итквидн. Бурхн гисн дурн. Бурхнд болн хаҗудк улстан дурта күн Бурхнла ни-негн бәәнә. Бурхн терүнлә бас ни-негн бәәнә. ¹⁷ Бидн Бурхнд йосндан дуртавидн. Иим учрар бидн Зарһин өдрт әәмшг угаһар бәәхвидн. Яһад гихлә, бидн Исус Христосла әдл эн орчлңд бәәнәвидн. ¹⁸ Дурн әәнә гидг юм медхш. Зуг төгс дурна учрар әәмшг көөгднә. Яһад гихлә, күн цааҗ ирх гиһәд әәнә. Әәдг күн Бурхиг күццднь дурлхш. ¹⁹ Бурхн түрүләд маднд дурлсн учрар бидн Бурхнд дуртавидн. ²⁰ Би Бурхнд дуртав гисн, зуг ахдан дурго күн худлч болна. Яһад гихлә, үзгддг ахдан дурго күн үзгддго Бурхнд дурлҗ чадшго. ²¹ Христос маднд иим заавр үлдәв: Бурхнд дурта күн ахдан дурта болх зөвтә.

Орчлңгиг диилснә тускар

¹ Исусиг Бурхна илгәсн Аврач гиҗ иткдг күн Бурхнас төрҗ. Эцкд дурта күн үрнднь дурта болдг мөн. ² Бурхнд дурта болад, Терүнә заавриг күцәдг учрас бидн Бурхна үрдүдт дурта болдган меднәвидн. ³ Яһад гихлә, Бурхна заавриг күцәдг күн Бурхнд дуртаһан медүлнә. Бурхна зааврмуд маднд кецү биш. ⁴ Яһад гихлә, Бурхнас төрсн күн орчлңгиг диилҗ чадна. Бидн иткләрн орчлңгиг диилнә гидгнь эн: мана иткләр диилнәвидн. ⁵ Орчлңгиг кен диилхмб? Исусиг Бурхна Көвүн гиҗ иткдг күн.

Бурхна Көвүнә туск герчллһн

⁶ Исус Христос усн цусн хойрар дамҗҗ ирҗ. Тер һанцхн усар биш, зуг усн цусн хойрар дамҗад ирҗ. Әрүн Сәкүсн энүг үнн гиҗ герчлҗәнә, яһад гихлә, Әрүн Сәкүсн бийнь үнн болҗана. ⁷ Һурвн герч эн: ⁸ Әрүн Сәкүсн, усн болн цусн. Эн һурвн нег юмна тускар герчлҗәнә. ⁹ Бидн әмтнә герчллһнд иткнәвидн, зуг Бурхна герчллһн деер. Бурхн Бийнь Көвүнә тускар герчлҗәнә. ¹⁰ Бурхна Көвүнд иткдг күүнә седклд эн герчллһн бәәнә. Бурхнд эс иткдг күн Бурхиг худлчд тоолна, яһад гихлә, Бурхиг Эврәннь Көвүнә тускар герчлснд тер иткҗәхш. ¹¹ Герчллһн эн: Бурхн маднд мөңк җирһл өгв, Терүнә Көвүн мөңк җирһлин булг. ¹² Бурхна Көвүтә бәәдг күн мөңк җирһл эдлнә. Бурхна Көвүн уга күн мөңк җирһл эдлхш.

Мөңк җирһлин тускар

¹³ Тадниг мөңк җирһл эдлдгиг медтхә гиҗ би энүг Бурхна Көвүнә нернд, иткдг таднд бичв. ¹⁴ Бидн зөргтәһәр Бурхна өмн зогсҗанавидн. Яһад гихлә, Бурхна таалар ю эс сурв чигн, Бурхн мадниг соңсх. Энүг бидн Бурхна өмн лавта меднәвидн. ¹⁵ Кемр юуна тускар эс зальврв чигн, Терүг соңсдгинь бидн медхлә, сурсан авч чадхиг бас меднәвидн. ¹⁶ Кемр кен чигн ахан үклд орулдго килнц кеҗәхинь үзхлә, терүнә төлә зальвртха. Бурхн терүг әмд үлдәх. Зуг энд би үклд орулдго килнц кесн күүнә тускар келҗәнәв. Зуг үклд орулдг килнц бәәнә. Үклд орулдг килнц кесн күүнә төлә бичә зальвртн. ¹⁷ Ямаранчн буру йовдл килнц мөн. Болв үклд орулдго килнц бас бәәнә. ¹⁸ Бурхнас төрсн күн болһн цааранднь килнц кехш. Бурхна Көвүн терүг әрвлнә. Тиим күүнд эрлг му юм кеҗ чадшго. ¹⁹ Бидн Бурхна үрдүд болдган меднәвидн. Зуг эн орчлң эрлгин үлмәд бәәнә. ²⁰ Мадниг йосн Бурхиг медтхә гиһәд, Бурхна Көвүн ирәд маднд медрл өгв. Энүг бидн меднәвидн. Бидн йосн Бурхнла болн Терүнә Көвүн Исус Христосла ни-негн бәәнәвидн. Исус Христос болхла, йосн Бурхн болн мөңк җирһл. ²¹ Үрдүд мини! Шүтәнәс хол йовтн.