1 КӨРИНТИНХН

Христост иткдг Көринтин улст илгәсн негдгч бичг

Павел Көринтд чонҗ бүрдәв. Тенд христианск җирһлд болн итклднь учрсн төр хаһлхар Павел түрүн бичгән Көринтд бәәдг иткдг улст илгәнә. Тер цагт Көринт олн келн улсин Ахья хотл балһсн бәәҗ. Тиигхд грек балһсн хулд келһәрн делгрлт авчасмн, сойларн ик сана зүүҗәсмн, зүсн зүүл шаҗарн темдгтә бәәсмн. Апостол Павел чонҗд хувагдлһна болн әрүн седклин сөрүһин төр тәвҗ, гер-мал болсна болн алядлһна тускар, чонҗин диг-дарана, Әрүн Сәкүснә белгин тускар, үкләс әмдрллһнә тускар бәәх төрмүд халһхар санаһарн зовв. Эн сурврмудт Сән Зәңг ямаран хәрү өгчәхиг тер эврәннь бичгт йир гүүнәр үзүлҗәнә.

Эн дегтрт Бурхна өгчәх белгүдәс хамгин сәәннь дурн болҗахиг 13 бөлг үзүлҗәнә.

Учр-утхин зура

Нүр үг 1.1–9

Чонҗд болсн хувалһн 1.40 – 4.21

Өрк-бүлин мораль болн җирһл 5.1 – 7.40

Христианмуд болн буру номта улс 8.1 – 11.1

Чонҗин бәәдл болн сөгдлһн 11.2 – 14.40

Христосин болн иткдг улсин әмдрлт 15.1–58

Йудьяд бәәх иткдг улст дем цуглулһн 16.1–4

Эврә керг болн ашлвр 16.5–24

Мендллһн

¹ Бурхна таалар Христос Исусин апостол болтха гиҗ дуудгдсн Павелас болн мана ах Состенас Көринтд бәәх Бурхна баг улст менд. Мана Эцк Бурхн болн Деед Эзн Исус Христос цаһан сана болн амулң бәәдл таднд өгтхә. Христос Исусла нииләд Бурхна болсн цуг улсла, талдан һазрмудар цугталань хамдан мана Деед Эзн Исус Христосин нер дууддг улсла тадн Бурхна улс болтха гиҗ Терүнә дуудсн улс болҗанат. Исус Христос – теднә болн мана Деед Эзн.

Павел Бурхнд ханлтан өргҗәнә

⁴ Би тана төлә Бурхнд кезә чигн ханлтан өргнәв, яһад гихлә, Бурхн таднд Христос Исусар дамҗулад цаһан сана күртәлә. ⁵ Исус Христосла ниилсндән тадн цуг халхар, зүсн-зүүл үгтә болн медрлтә болсарн байн болвт.

⁶ Христосин туск ном таднд батрв. ⁷ Тиигәд тадн мана Деед Эзн Исус Христос ирхиг күләҗәхлә, Әрүн Сәкүснә альк чигн билг таднд бәәнә. ⁸ Христос тадниг тана итклд сүл күртл бәрх. Мана Деед Эзн Исус Христосин ирх өдрлә тадн буру уга болхит. ⁹ Бурхн итклтә. Тадниг Эврәннь Көвүн Исус Христосла – мана Деед Эзнлә – иньглтхә гиҗ Бурхн дуудвр кев.

Иткдг улс дунд болсн хувагдан

¹⁰ Ахнр-дүүнр, мана Деед Эзн Исус Христосин нерн деерәс би тадниг хоорндан зөвтән багтад бәәтн гиҗ эрҗәнәв. Тадн хоорндан бичә хувагдтн. Болв тадн ухан-седкләрн болн тоолврарн ни-негн болтн. ¹¹ Мини ахнр-дүүнр, Хлоин төрл-садн тадна хоорнд болҗах зүтклдәнә тускар нанд келлә. ¹² Эн метклдән иим болҗана: негнь – би Павелынв гиҗәнә, хойрдгчнь – би Аполынв, һурвдгчинь – би Кепинв, дөрвдгчнь – би Христосинв гицхәнә. ¹³ Христос тиигтлән хувагдви? Эс гихлә Павел тадна ормд кирст хадата билү? Эс гихлә тадн Павелын нернә төлә уснд кирслгдвт? ¹⁴ Крисп болн Гайяс талдан нег чигн күүг тадн дундас уснд эс кирслсндән би Бурхнд ханлтан өргҗәнәв. ¹⁵ Тер учр деерәс таднас нег чигн күн мини нернә төлә кирслгдлә гиҗ келҗ чадшго. ¹⁶ Э, би Степаниг болн терүнә өрк-бүлин улсиг бас уснд кирслләв. Дәкҗ нам кениг кирслсән би мел тодлҗ чадҗахшв.

¹⁷ Яһад гихлә, Христос намаг уснд кү кирслх көдлмш кетхә гиҗ биш, Сән Зәңг тархатха гиҗ илгәлә. Тиигхләрн Тер Христосин кирсин күч уга кешгоһар Сән Зәңгиг күүнә цецн ухана кел олзллго тархатха гиҗәнә.

Христос – Бурхна чидл-күчнь болн цецн ухань болҗана

¹⁸ Яһад гихлә, мөңк зовлңд орх улст кирсин туск ном эргү ном болҗана. Бурхн аврчах маднтн болхла, энтн Терүнә чидл-күчнь болҗана. ¹⁹ Бурхна Бичгт иигҗ бичәтә: «Би цецн улсин медрлинь уга кехв, Би ухата улсин серлинь һазалхв». ²⁰ Тиигхлә цецн күн альдв? Эс гихлә ном цәәлһәч альдв? Эс гихлә эн делкән меткәч альдв? Эн делкән цецн гисн юмиг һәргтә болҗахиг Бурхн үзүлв. ²¹ Яһад гихлә, Бурхн Эврәннь цецн ухаһан олзлад, Терүг әмтн цецн ухаһарн медҗ чадшгоһар кев. Болв Бурхн мана тархаҗах эргү номар Христост иткдг улсиг аврхар шиидв. ²² Евреймүд өвәрц юм некнә, грекмүд цецн уха хәәнә. ²³ Бидн болхла кирст хадгдсн Христосин тускар цәәлһҗәнәвидн. Евреймүдт Христосин туск цәәлһвр басгч болҗана, буру номта улст Эннь эргү болҗ медгдҗәнә. ²⁴ Болв Бурхна дуудсн улст, евреймүдт, буру номта улст Христос Бурхна чидл-күчнь болн Терүнә цецн ухань болҗана. ²⁵ Яһад гихлә, Бурхна чинән татунь күүнә чидл-күчнәс күчтә болҗана, Бурхна һәргнь күүнә цецн уханас цецн болҗана. ²⁶ Тиигәд, ахнр-дүүнр, Бурхн тадниг дуудсн цагт кен болҗ йовсан ухалтн. Күүнә медләр, тадн дунд цецн улс олн биш билә, чидл-күчтәнь олн биш билә, уңг-тохмарн бәәхтәнь олн биш билә. ²⁷ Болв цецнинь ичәхин төлә эн делкән улс һәргтә гиҗ тоолҗасн әмтиг Бурхн шүүҗ авв. Чидлтәһинь ичәхин төлә эн делкән улс күчн уга гиҗ тоолҗасн әмтиг Бурхн шүүҗ авв. ²⁸ Тоомсрта чинринь уга кехәр эн делкән һәәлҗәсн, күн биш гиҗ тоолҗасн болн эгл улсиг Бурхн шүүҗ авв. ²⁹ Эн учр деерәс Бурхна өмн кен чигн күн бийән буульҗ чадшго. ³⁰ Бурхн тадниг Исус Христосла ниилүлв, Бурхн Христосар мана цецн уха кев. Христосар дамҗад Бурхн мадниг чик седклтә Эврәннь улс кев, мадниг килнцәс сулдхв. ³¹ Тиигәд Бурхна Бичгт иигҗ бичәтә: «Бийән буульҗах күн Деед Эзән буультха!»

Кирст хадгдсн Христосин туск ном

¹ Ахнр-дүүнр, би Бурхна нуувчиг цәәлһхәр тадн тал ирхләрн, онц үгмүд болн цецн уха олзлсн угав. ² Тегәд би танад бәәхләрн, Исус Христосас болн Терүнә кирс деер үкснәс талдан юм медшго болҗ шиидләв. ³ Тиигәд би танад ирхләрн, чинән тату биләв, әәдг, үүмдг биләв. ⁴ Мини ном болн Христосин туск цәәлһвр күүнә цецн ухана иткүлҗәх үгмүдт бәәсмн биш. Терм Әрүн Сәкүснә күч үзүллһнд бәәнә. ⁵ Тиим учрас тана иткл күүнә цецн ухаһар түшг кеҗәхш, Бурхна чидл-күчиг түшҗәнә.

Бурхна цецн ухан

⁶ Итклдән батрсн улс дунд цецн уха бидн тархаҗ йовнавидн. Болв эн цецн ухан эн делкән болн эн делкәг һардҗах, даруһас алгдх йосна улсин цецн ухан биш. ⁷ Бидн Бурхна бултулҗасн нуувч цецн ухаг тархаҗанавидн. Болв делкә үүдәтл эн мана туурмҗин төлә бәәсмн. ⁸ Эн делкәг залҗах йосна һардачнр эн цецн ухаг медсн уга. Яһад гихлә, кемр тедн медсн болхла, туурмҗта Деед Эзиг телҗ кирст хадшго билә. ⁹ Болв Бурхна Бичгт бичгдсәр: «Кен чигн күн үзәд уга, соңсад уга, ухаһарн эс медсн юмиг Бурхн бийдән дурта улст белдв». ¹⁰ Маднд терүг Әрүн Сәкүсәр Бурхн секҗ өгв, яһад гихлә, Сәкүснд цугтан темдгтә, нам Бурхна мергн ухань кевтән темдгтә. ¹¹ Күүнә ухан-седклиг терүнә сүмснәс талдан кен медхмб? Тер кевәр Бурхна зүүҗәх ухаг Бурхна Сәкүснәс талдан кен чигн медхш. ¹² Бидн эн делкән сәкүсн биш, маднд Бурхна белглсн тоотыг меддгәр, Бурхнас Сәкүс аввидн. ¹³ Тиигәд бидн күүнә цецн уханас дассн үгмүдәр биш, Әрүн Сәкүснәс дассн үгмүдәр келҗәнәвидн. Бидн Әрүн Сәкүснә тоотыг Әрүн Сәкүстә улст цәәлһҗәнәвидн. ¹⁴ Бурхна Сәкүсн уга күн Бурхна Сәкүснә белгүд авч чадшго болҗана. Тиим күн тер белгүдиг медҗ чадл уга, эргү юмнд тоолҗана. Яһад гихлә, зуг Әрүн Сәкүстә күн терүнә чинринь үнлҗ чадх. ¹⁵ Бурхна Сәкүстә күн цугтаһинь үнлҗ чадна, болв терүнә тускар нег чигн күн тиигҗ чадшго. ¹⁶ Бурхна Бичгт иигҗ бичәтә: «Деед Эзнә ухан-седклинь кен медсмб? Терүнд селвг кен өгч чадхмб?» Зуг бидн Христосин ухан-седклтәвидн.

¹ Болв би, ахнр-дүүнр, Әрүн Сәкүстә улсла әдләр таднла күүндҗ чадҗасн уга биләв. Христост иткҗәх нилхлә әдл болн төрхәрә седвәрәр бәәдг таднла би күүндләв. ² Би тадниг акун хотар биш, үсәр асрлав. Яһад гихлә, тадн терүг эдлхит бас белн болад уга биләт. Нам ода чигн акун хот идхдән тадн белн бишит. ³ Яһад гихлә, тадн ода күртл килнцтә седвәрәр бәәһәт. Тадн үлү үзсндән, метклдсндән, килнцтә седвәрәр эс бәнт? Йирин улс мет бийән бәрдвт? ⁴ Негнь – «Би Павелынв», оңдань – «Би Аполынв» гиҗ келхләрн, тадн йирин улсла әдл болҗахшвт? ⁵ Апол гисн кемб? Павел гиснь кемб? Бидн – Бурхна зарцнр болҗанавидн. Мадниг дамҗад тадн Христост иткләт. Маднас кен чигн күн Деед Эзнә даалһсн көдлмш кеҗәнә. ⁶ Би эк тәрләв, Апол услла, урһаҗахнь – Бурхн. ⁷ Кен тәрснь, кен услснь учр уга. Чинртәнь Бурхн болҗана. Яһад гихлә, Тер урһана. ⁸ Тәрҗәхнь болн услҗахнь әдл чинртә. Күн болһн эврәннь кесн көдлмшәрн ачлгдх. ⁹ Яһад гихлә, бидн цугтан Бурхна көдлмш кеҗәнәвидн. Тадн Бурхна тәрәнә һазр болн Бурхна тосхлтс бас болҗанат.

¹⁰ Нанд Бурхна өгсн билг олзлад, би мергн тосхач мет ул тәвүв. Талдан күн терүн деер тосхҗана. Болв тадна кентн болв чигн тер яһҗ тосхҗахт оньган өгх зөвтәт. ¹¹ Яһад гихлә, тәвгдсн улас талданиг нег чигн күн тәвҗ чадшго болҗана. Эн улнь Исус Христос болҗана. ¹² Тер ул деер күн алт, цаһан мөңг, эрдни чолуд, мод, өвс болн салом олзлад тосхлтын көдлмш кеҗ чадҗана. ¹³ Күн болһна көдлмш үзгдәд бәәх. Юңгад гихлә, Деед Эзнә өдрт секгдхмн. Эн өдр һалар дамҗад ирх, күн болһн ямаран көдлмш кесиг һал сөрх.

¹⁴ Кемр эн ул деер кесн керг һалд авгдлго торхла, тер күн ачлвр авх. ¹⁵ Кемр терүнә кесн көдлмш шатҗ одхла, тер күн ачлвр авшго, болв һалас тач авгдсмн мет авргдх. ¹⁶ Тадн Бурхна сүм болҗахан, тадна дотртн Бурхна Сәкүсн бәәхиг меддговт? ¹⁷ Кемр кен чигн күн Бурхна сүмиг хамхлхла, терүг Бурхн уга кех. Яһад гихлә, Бурхна сүм әрүн, тадн тер сүм болҗанат. ¹⁸ Нег чигн күн бийән бичә меклтхә. Кемр эн делкән санаһар таднас кен негнь бийән цецнд тоолҗах күн йосндан цецн болхин төлә һәргтә болх йоста. ¹⁹ Яһад гихлә, эн делкән цецн гиҗәснь Бурхна нүднд һәргтә юмн болҗ үзгдҗәнә. Бурхна Бичгт иигҗ бичәтә: «Бурхн мергн улсиг худл йовдлднь бәрҗ авчана». ²⁰ Бурхна Бичгт бас иигҗ бичәтә: «Деед Эзн цецн улсин ухан керг угаһинь меднә». ²¹ Тиигәд кен чигн күн улсар бичә бардмнтха. Цугтан тадна болҗана. ²² Павел, Апол, Кеп, эн делкә, җирһл болн үкл, өдгә бәәдл, эс гихлә иргч – цугтан тадна. ²³ Тадн Христосин улс болҗанат, Христос Бурхна болҗана.

Христосин апостолмуд

¹ Тадн мадниг Христосин зарцнрт болн Бурхна нуувч даалһсн улст тоолх йостат. ² Иим даалһвр өгсн улс итклтә болх зөвтә. ³ Тадн эс гихлә талдан кен болв чигн мини тускар яһҗ ухалҗахиг би төртән авчахшв. Би эврән бийдән зарһ кешгов. ⁴ Мини седкл цевр. Болв эннь би буру уга күнв гиҗ лавлҗахш. Деед Эзн мини зарһч. ⁵ Тиигәд цагасн өмн Деед Эзиг эс иртл кен чигн күүнә зарһ бичә кетн. Деед Эзн таг харңһуд эс үзгдсн юмнд герл орулх, күүнә зүркнә күслиг илдкх. Тиигәд одҗ күн болһн Терүнәс эврәннь буульмҗ авх. ⁶ Ахнр-дүүнр, би энүг цугтаһинь бийиннь болн Аполын төлә келәв, тадниг Бурхна Бичгәр һардвр кетхә, дастха гиләв. Кен чигн күн негәрнь деерлкҗ, оңданднь дурго болх зөв уга.

⁷ Кен чамаг талдан улсас деегшән өөдлүлв? Чамд бәәсиг цугтаһинь Бурхн эс өглү? Кемр чамд энүг цугтаһинь Бурхн өгсн болхла, тиигхлә, яһад энүгәр эс авсн кевтәһәр чи бардмнҗахмч? ⁸ Таднд цуг кергтә тоот бәәнәлм! Тадн байн болвт! Тадн мадниг угаһар хаадуд болвт! Таднла хамдан бидн бас эзркхин төлә би тадниг йосндан хаадуд болтха гиҗ седләв. ⁹ Яһад гихлә, Бурхн мадниг, апостолмудыг, хамгин сүүлд олна чирәд үзүлхләрн, цааҗла харһсн улс кевтә һарһҗ үзүлсмн болҗана гиҗ би ухалнав. Мадниг цуг делкә, Бурхна элчнр болн әмтн цугтан хәләҗәнә. ¹⁰ Христосин төлә бидн эргү болвидн. Тадн болхла Христосла ниилсндән цецн улс болвт! Бидн күчн угавидн, тадн болхла күчтәт. Тадниг күндлҗәнә, мадниг күндлҗәхш. ¹¹ Эн кем күртл бидн өлсҗ ундасҗалавидн, бидн шуурха-буурха хувцта биләвидн, мадниг гүвддг билә, бидн эврә гер угавидн. ¹² Бидн эврәннь һарар күнд көдлмш кеҗәнәвидн. Кемр мадниг харахла, бидн хәрүднь йөрәнәвидн. Кемр мадниг көөхлә, бидн дааҗанавидн. ¹³ Кемр мадниг му келхлә, бидн тедниг тогтнулнавидн. Бидн делкәд буг мет болвидн, эн кем күртл олн улст һазалгдсн үлдл болвидн. ¹⁴ Энүнә тускар бичхләрн, би тадниг ичәхәр бичҗәхшв. Болв тадниг эврәннь дурта үрдүд мет сурһхар тиигҗәнәв. ¹⁵ Яһад гихлә, Христосла ниилснд таднд олн багшнр бәәнә, болв эцкнр тооһарн баахн. Исус Христосла нииләд Сән Зәңг таднд авч ирәд би тана эцк болв. ¹⁶ Тер учр деерәс нанас үлгүр автн гиҗ би тадниг эрҗәнәв. ¹⁷ Тиигәд би тадн тал Деед Эзнлә нииләд бәәх эврәннь хәәртә итклтә көвүнләм әдл Тимофейиг илгәҗәнәв. Тер көвүн таднд Христос Исусла нииләд бәәх мини җирһлин тускар сана орулх, иткдг баг болһниг эргндән яһҗ намаг сурҗахиг келх. ¹⁸ Тадна зәрмснь намаг иршго гиһәд санад, караглдг болв. ¹⁹ Зуг кемр Деед Эзнә таал учрхла, би тадн тал торлго ирхв. Тиигхләрн би теднә келҗәсн үгиг биш, зуг чидлинь сөрхв. ²⁰ Яһад гихлә, Бурхна йосн келсн үгд биш, чидл-күчнднь бәәнә. ²¹ Таднд юн кергтә? Би тадн тал маля бәрҗ ирхмб, аль дуртаһар, номһнар ирхмб?

Иткдг улс дунд аля йовдл һарһдг күүнә тускар

¹ Тадн дунд нам буру номта улс меддго аля йовдл һарһсн үлгүр бәәнә гиҗ йосндан келцхәлә. Тернь болхла тадна негнтн эврәннь эцкиннь гергтә бәәнә гиҗәнә. ² Тадн болхла караглнат. Түүнә ормд тадн гейүрхмн болвзат? Тиим йовдл һарһсн күн тадна багас көөгдтхә.

³ Би таднла эс бәәв чигн, седкләрн таднла бәәнәв. Тадн дунд бәәх метәр би тиим йовдл һарһсн күүг яахан меднәв. Мана Деед Эзн Исусин нернә төлә цуглрсн цагт би седкләрн таднла болхв. Маднла бәәх Исус Христосин күчәр тер күүнә цогц махмудынь уга кехин төлә ⁵ тадн терүг эрлгин үлмәд бәрүлх йостат. Терүнә сүмсн Деед Эзнә өдрт авргддгар тиигхмн.

⁶ Таднд бийән буульх учр уга. Элдх һуйриг невчкәхән экн кевтнь өскәдгиг тадн медвт. ⁷ Тадн бүклдән цеврддгәр экни хуучн килнцәс цеврдтн. Тиигхләрн тадн экн уга шин элдсн һуйрла әдл болхит. Мини медсәр, йосндан болхла тадн тиимит. Яһад гихлә, Песахин хурһар тәкл тәклә. Тер хурһн Христос болҗана. ⁸ Тиигәд килнцтә болн хар саната хуучн эктә биш экн уга өдмгтә, цевр болн үнн өдмгтә Песахин нәәриг кехмн. ⁹ Би эврәннь бичгтән тадниг аля улсла бичә харһтн гиҗ бичләв. ¹⁰ Эн делкән аля улсла цугталань биш, эс гихлә хармч, эс гихлә хулхач, эс гихлә худл шүтәнд мөргдг улсиг гиҗ би санҗасн угав. Яһад гихлә, тадн эн делкәһәс һарх йостат. ¹¹ Болв би таднд, бийән ах-дүүд тоолҗасн улс, эврән цалдң йовдл һарһад, хатуч, худл шүтәнд мөргдг, эс гихлә ховч, эс гихлә әркнч, эс гихлә хулхач улсла бичә харһтн гиҗ бичләв. Нам тиим улсла хамдан хот бичә идтн. ¹² Иткдг улсин багд эс ордг әмтнә зарһ келһн – мини керг биш. Бурхн теднә зарһ кешгов? Бурхна Бичгт иигҗ бичәтә: «Хар саната күүг эврәннь багас көөтн».

Христост иткдг улсин хоорндк зарһ

¹ Кемр тадн дунд кен чигн күн оңдан күүнлә зарһцад бәәхлә, Христост иткдго зарһчнр зарһ кетхә гиҗ сурх зөв бәәнү? Тиим зарһиг Бурхнд иткдг улс кех зөвтә. ² Бурхна улс делкән зарһ кехиг тадн меддговт? Кемр тадн делкән зарһ кех болхла, хоорндан болҗах метклдәг эврән тәәлҗ чадшговт? ³ Бидн Бурхна элчнрин зарһ кехиг тадн меддговт? Тер төләд бидн мана бәәдлин төрмүдиг хаһлх арһта болх зөвтәвидн. ⁴ Кемр тиим метклдән учрхла, иткдг улс дунд тоомср уга зарһчнр тал яһад одвта. ⁵ Ичкевт! Тадн дунд Христост иткдг улсин метклдәг хаһлх цецн күн уга болхви? ⁶ Болв ах талдан дүүтәһән зарһцҗана. Тедн Христост иткдго күүнд зарһ кех зөв өгчәнә. ⁷ Тадн нег-негнләһән зарһцхларн шүүгдсн болҗ һарчана. Таднд һарудсн улс болад үлдсн сән болвза? Меклгдсн күн болад үлдсн сән болвза? ⁸ Болв тадн бийән, эврәннь ах-дүүнрән му йовдлд орулад меклнәт.

⁹ Хар саната улс Бурхна орн-нутгар өнч кеҗ авч чадшгог тадн меддговта? Бийән бичә меклтн. Цалдң йовдл һарһдг күн биш, худл шүтәнд мөргдг улс биш, алячнр биш, гомосексуалистнр биш, ¹⁰ хулхачнр биш, хармч улс биш, әркнч улс биш, ховч улс биш, тонулчнр биш – эдн цугтан Бурхна орн-нутгар өнч кеҗ авч чадшго.

¹¹ Тадна зәрмтн тиим биләт. Болв тадн цеврлгдәд Бурхнд нерәдгдвт. Тадн Деед Эзн Исус Христосар болн мана Бурхна Сәкүсәр дамҗад чик седклтә болвт.

Эврәннь цогц-махмудар дамҗад Бурхиг туурултн

¹² «Нанд ямаран чигн йовдл һарһх зөв бәәнә» гиҗ зәрм улс келцхәнә, болв зәрм йовдлмуд туста биш. «Нанд ямаран чигн йовдл һарһх зөв бәәнә», болв би юунань чигн ялч болшго болҗанав. ¹³ «Хот – геснә төлә, гесн – хотын төлә» гиҗ зәрм улс бас келцхәнә, болв Бурхн терүг чигн, энүг чигн уга кех. Цогц-махмуд болхла цалдң йовдлын төлә бәәхш, Деед Эзнә төлә бәәнә. Деед Эзн цогц-махмудт килмҗән өгчәнә. ¹⁴ Бурхн Деед Эзиг үкхләнь әмдрүлв, мадниг бас Тер Эврәннь күчәр әмдрүлх. ¹⁵ Тадна цогц-махмуд Исус Христосин цогц-махмудын мөчмүд болҗахиг тадн меддговта? Тиигәд Христосин цогц-махмудын мөчмүдиг би авад, цалдң күүкд күүнә мөчмүд кехий? Төрүц уга! ¹⁶ Цалдң күүкд күүнлә ниилсн күн, терүнлә нег цогц-махмудта болҗ оддгиг тадн меддговта? Яһад гихлә, Бурхна Бичгт иигҗ бичәтә: «Хойрас нег махмуд болх». ¹⁷ Болв Деед Эзнлә ниилсн күн Терүнлә седкләрн негн болна. ¹⁸ Цалдң бәәдләс зултн! Күүнә һарһҗах талдан килнц терүнә цогц-махмудт харшлт болҗахш, болв цалдң йовдл һарһдг күн килнц һарһад эврәннь цогцан өвдкәҗәнә. ¹⁹ Тадна цогц-махмуд тадн дотр бәәх болн Бурхнас авсн Әрүн Сәкүснә сүм болҗахиг тадн меддговта? Тадн бийдән эзн бишит. ²⁰ Бурхн тадна ормд үнинь өглә, тадниг хулдҗ авла. Тер төләд Бурхиг эврәннь цогц-махмудар дамҗад туурултн.

Гер-малын туск төрмүд

¹ Тадна бичснә тускар. Күн гер эс авхла сән . ² Болв цалдң йовдл һаршгон төлә залу күн болһн гергтә болх, күүкд күн болһн залута болх йоста. ³ Залу күн эврәннь гер-мал болсна бооцана даалһвран гергнәннь өмн күцәх зөвтә, гергн күн эврә залуһиннь өмн бас гер-мал болсна бооцана даалһвран күцәх йоста. ⁴ Гергн күн эврәннь цогц-махмудтан эзн биш болҗана, залунь эзнь болҗана. Залу күн бас эврәннь цогц-махмудыннь эзн биш болҗана, гергнь эзн болҗана. ⁵ Нег-негнәсн бичә зултн. Зуг цаг зуур зөвшәрәд, мөргүл кехин төлә салҗ чадҗанат. Болв эрлг тадниг килнцд уңһадгоһар терүнә хөөн дәкн нег-негнләһән хамдан харһтн. Яһад гихлә, тадн бийән бәрҗ чадшгот. ⁶ Энүнә тускар би таднд заквр биш, селвг өгч келҗәнәв. ⁷ Цугтан нанла әдл болтха гиҗ би санлав. Зуг күн болһн Бурхнас авсн эврә билгтә, негнь нег билгтә, хойрдгчнь – талдан билгтә. ⁸ Гер-мал болад уга улст болн белвсн улст, нанла әдл һанцар үлдтн гиҗ би селвг өгчәнәв. ⁹ Болв кемр тедн бийән бәрҗ эс чадҗахла, тедн гер авх йоста. Яһад гихлә, гер авсн һал мет шатҗах седвәрәс деер болх. ¹⁰ Гер-мал болсн улст би биш Деед Эзн заавр өгчәнә: гергн күн залуһасн салх зөв уга. ¹¹ Болв кемр гергн залуһасн салсн болхла, һанцарн үлдтхә, эс гихлә залутаһан эвцх кергтә. Залу гергән хайшго йоста. ¹² Наадксднь Деед Эзн биш, би келхәр бәәнәв: кемр нег ахд Христост иткдго гергн бәәхлә, залутаһан тер бәәхәр седҗәхлә, тиим залу гергнәсн салх зөв уга. ¹³ Кемр күүкд күн эс иткдг залута болхла, тер залунь хамдан бәәхәр седҗәхлә, тиим гергн залуһасн салх зөв уга. ¹⁴ Яһад гихлә, Бурхнд эс иткдг залу гергәрн дамҗад Бурхнд нерәдгднә, эс иткдг гергн залуһарн дамҗад бас тиигнә. Кемр тиим эс болсмн болхла, теднә үрдүд буру номта улсин үрдүдлә әдл болх бәәсмн, болв тедн Бурхнд нерәдгдлә. ¹⁵ Зуг Бурхнд эс иткдг гергчүд болн залус салхар седҗәхлә, салтха. Иим саамд Бурхнд иткдг күн сул бәәдлд тусҗана. Юңгад гихлә, Бурхн тадниг эвтән багтад бәәтхә гиҗ дуудвр кев. ¹⁶ Бурхнд иткдг гергн, чи эврәннь залуһан аврч чадшгоһан альдас меднәч? Эс гихлә чи Бурхнд иткдг залу, эврәннь гергән аврч чадшгоһан альдас меднәч?

Бурхна таалар бәәтн

¹⁷ Зуг күн болһн Деед Эзнә шиидсәр болн Бурхна кесн дуудврар җирһтхә. Эн зокъялд цуг иткдг улсиг би сурһҗанав. ¹⁸ Кемр Бурхн дуудсн цагт керчүлгдсн күн бәәхлә, тиим күн эврәннь керчүлһән нуухмн биш болҗана. Кемр Бурхн дуудсн цагт эс керчүлгдсн күн бәәхлә, тиим күүнд керчүлһн керг уга. ¹⁹ Керчүлгдсн күн эс керчүлгдсн төр уга юмн. Хамгин чинртәнь – әмтн Бурхна заавр күцәлһн. ²⁰ Күн болһн Бурхн дуудсн цагт бәәсн бәәдләрн үлдх зөвтә. ²¹ Бурхн дуудсн цагт чи ялч бәәсмн болхла, бичә терүнәсн ич. Болв кемр чамд сулдхвр авх арһ бәәхлә, терүгән олзл. ²² Яһад гихлә, Христосла нииләд бәәтхә гиҗ Бурхна дуудсн ялч, Христосин сулдхсн күн болҗана. Түүшң Бурхна дуудсн сул күн Деед Эзнә ялч болҗана. ²³ Бурхн тадниг хулдҗ авла, тиигәд тадн күүнә мухла бичә болтн. ²⁴ Ахнр-дүүнр, күн болһн Бурхнла нииләд дуудгдсн цагт бәәсәрн үлдтн.

Гер-мал уга болн белвсн улсин тускар

²⁵ Гер-мал уга улсин тускар келхлә, Деед Эзнә заавр нанд уга. Болв Деед Эзнә хәәрлтәр итклтә бәәсәр би иим санатав: ²⁶ Өдгә цагин күнд-түрүг оньгтан авч, күн болһн урднь бәәснлә әдләр бәәсн деер гиҗ би санҗанав. ²⁷ Чамд гергн бәәнү? Тиигхлә терүнәс сулдхар бичә седәд бә. Чи гер-мал болад угавч? Тиигхлә герг бичә хә. ²⁸ Болв кемр гер авхла, тиигхлә килнц һарһшгоч. Кемр күүкн мордхла, тиигхлә килнц һаршго. Зуг гер-мал болсн улс өдгә җирһлин күнд-түрүлә харһх. Таднд би харм төрҗәнәв. ²⁹ Ахнр-дүүнр, темдглсн цаг өөрдҗ йовна гиҗ би келхәр седләв. Эн өдрәс авн гергтә әмтн гергн уга мет бәәх йоста. ³⁰ Һашудҗах улс эс һашудҗах метәр, байрта улс байр уга мет, хулд кедг улс мел юмн уга улсла әдл бәәтхә, ³¹ эн делкәг эдлҗәх улс энүг эс эдлҗәсәр бәәтхә. Юңгад гихлә, эн бәәдләрн делкә удлго җирһдгән уурх. ³² Би тадниг ямаран чигн килмҗәс сул бәәтхә гиләв. Гер авад уга күн Деед Эзнә кергт килмҗән өгнә, Деед Эзнд таасгдхар седнә. ³³ Гертә-малта күн өдгә тетквртән килмҗән өгнә, гергнәннь сә хәәнә. ³⁴ Терүнә седклнь хойр әңгрәд бәәнә. Гер-мал уга күүкд күн болн гиҗгтә күүкд Деед Эзнә төрт килмҗән өгнә, цогц-махмударн болн седкләрн Деед Эзнд бийән яһҗ нерәдхән ухална. Болв мордсн күүкд күн өдгә цага төрмүдт килмҗән өгнә, залуһиннь сә хәәнә. ³⁵ Би иигҗ келхләрн, таднд туста болтха гиҗәнәв. Би тадна юунд чигн харшлхар бәәхшв. Тадниг би чикәр бәәтхә гиҗәнәв, тиигәд бийән бүклднь мел харшлт угаһар, Деед Эзнә керг-үүлд церглтхә гиҗәнәв. ³⁶ Кемр кен чигн күн үг орулсн гиҗгтә күүкдтә чикәр бийән эс бәрҗәхт тоолҗахла, терүндән дегд дурта болад гер авхар седҗәхлә, тер эврәннь дурарн тер күүкән авх йоста. Энүнд килнц уга. ³⁷ Кемр күүнд гер бичә ав гиҗ эс келвчн, тернь гер авшго болад, бийән һартан бәрәд, ю кехән шиидәд, гиҗгтә күүк эс авхла, чик йовдл һарһх. ³⁸ Тиигәд гер авсн күн чик йовдл һарһҗана, гер эс авчах күн терүнәс үлү сән йовдл һарһҗана. ³⁹ Залу әмд бәәтл гергн залутаһан холвата. Кемр залунь өңгрхлә, тер сул күн болад, седкл туссн күүнд мордҗ чадҗана. Зуг тер күн Деед Эзнд иткдг болх йоста. ⁴⁰ Болв би хүвдән иигҗ тоолҗанав: сулдсн күүкд күн мордлго үлдхләрн буйн-кишгтә болх. Би болхла Бурхна Сәкүстәв гиҗ санҗанав.

Худл шүтәнд нерәдсн хотын тускар

¹ Тадна бичсн худл шүтәнд нерәдсн хотын тускар. «Бидн цугтан медрлтәвидн» гиҗ зәрм улсин келсиг бидн меднәвидн. Эннь чик, зуг тиим медрл күүнд ик сана зүүлһнә, дурн болхла терүг батрулна. ² Кемр кен чигн күн юм меддв гиҗәхлә, үнндән болхла, тиим күн медх дүңгәһән медҗәхмн уга болҗана. ³ Болв Бурхн Бийдән дурта күүг меднә. ⁴ Тиигәд худл шүтәнд нерәдсн хотын тускар келҗәнәв. Эн делкән худл шүтән мел чинр угаһинь бидн меднәвидн. Бурхн һанцхн, Түүнәс оңдань уга. ⁵ Теңгрт болн һазр деер бурхд бәәнә гиҗ келцхәдг болв чигн, үнндән болхла, олн бурхд болн деедс бәәнә. ⁶ Болв маднд болхла, һанцхн Бурхн болн Эцк бәәнә. Тер – цуг делкән Үүдәч, бидн Терүнә төлә бәәнәвидн. Мана төлә һанцхн Деед Эзн Исус Христос бәәнә. Терүгәр дамҗад цугтан үүдлә, терүгәр дамҗад бидн җирһл аввидн. ⁷ Болв терүг медҗәхнь цугтан биш. Зәрм улс худл шүтәнлә иҗлдәд, тиим хот уухларн, терүгән худл шүтәнә гиҗ санцхана. Тиигәд сәәг мууһас йилһх арһ баһ болсар, тедн бийән хотар бузрдасмн болҗ тоолҗана. ⁸ Болв эдлх хот мана холваг Бурхнла ясрулҗахмн уга. Кемр бидн хот эс эдлхлә, бидн мел юм гееҗәхшвидн. Кемр бидн хот эдлҗәхлә, мел юм олҗахшвидн. ⁹ Болв тана сул бәәдл баһ итклтә улсиг килнцд бичә орултха гиҗ болһатн. ¹⁰ Кемр сәәг мууһас йилһх тату арһта күн, медрлтә чамаг буру номта улсин сүмд сууһад хот ууҗахинь үзхләрн, эннь худл шүтәнд нерәдсн хот идхднь урмд өгхий? ¹¹ Тиигҗ күч уга улсиг, ах-дүүг тана медрл алшгой? Христос терүнә төлә үклүс. ¹² Тиигәд ахнр-дүүнриннь өмнәс килнц һарһхларн болн теднә сәәг мууһас йилһх арһ шавтахларн, тадн Христосин өмнәс килнц һарһҗанат. ¹³ Тер төләд кемр мини ах-дүүг эдлх хот килнцд уңһаҗахла, терүг килнцд уңһашгон төлә би мах төрүц идшгов.

Апостолмудын зөв болн даавр

¹ Би сул күн биший? Би апостол биший? Мана Деед Эзн Исусиг би үзәд угай? Тадн Деед Эзн мини кесн көдлмшин ашнь болҗахшийт? ² Кемр би талдан улст апостол биш болхла, яһв чигн би тадндан апостолв. Юңгад гихлә, Христосла ниилснд тадна җирһл намаг апостол болҗасна темдг. ³ Намаг шалһхла, би иигҗ бийән харсдув: ⁴ Нанд хот идх болн уух зөв угай? ⁵ Мини зуульчлһнд Бурхнд иткдг гергм талдан апостолмудла, Деед Эзнә ахнр-дүүнрлә, Кеплә әдл намаг дахҗ чадшгой? ⁶ Эс гиҗ һанцхн би болн Бар-Наба хойр эврәннь теткврән олхмби? ⁷ Ямаран салдс эврәннь һаруһан даңшдви? Уста үзм тәрчкәд, ямаран тәрәч терүнә темс эс идхмб? Мал хәрүлҗәх күн, терүнә үснәс эс уухмб? ⁸ Би энүнә тускар күүнә хәләцәс иштәһәр келҗәнү? Закан терүнә тускар эс келҗәнү? ⁹ Яһад гихлә, Мошен Заканд иигҗ бичәтә: «Буудя цокҗах царин ам бичә бо». Бурхн цард сана зовҗану? ¹⁰ Йирдән болхла, Бурхн мадна тускар келҗәхший? Мадна тускар боллго. Яһад гихлә, иигҗ бичәтә: «Һазр хаһлҗах болн буудя цокҗах күн, урһцин нег әңгнь авх нәәлвртәһәр көдлх зөвтә». ¹¹ Бидн тадн дунд Әрүн Сәкүснә эк тәрвидн. Кемр бидн хәрүднь теткврин дөң авчахла, тернь ик болхий? ¹² Кемр талдан улст таднас эн дөң күләх зөв бәәхлә, терүнәс үлү зөв маднд бәәнә. Болв бидн эн зөвән олзлҗахшвидн. Христосин туск Сән Зәңг торлго тардгар бидн цугинь даахдан белнвидн. ¹³ Сүмд церглҗәсн улс сүмәс тетквр авдгиг тадн меддговта? Тәкл тәкдг ормд церглҗәх улс тәклин малас эврәннь хүвән авх зөвтәй? ¹⁴ Сән Зәңг тархаҗах улс тедү мет терүнәс җирһлиннь тетквр олх йоста гиҗ Деед Эзн закв. ¹⁵ Болв би эн зөвин нег чигинь олзлсмн угав. Тиигәд би эн зөвиг бийиннь төлә эдлхәр бичҗәхшв. Тиим юм һарһхин орнд би шулуһар үксв. Нег чигн күн бардмнх учр нанас булаҗ чадшго. ¹⁶ Сән Зәңг тархасарн би бардмнҗ чадшгов. Эн нанд өгсн заавр. Кемр Сән Зәңг эс тархахла, би басл зовлң эдлхв! ¹⁷ Кемр энүг эврәннь дурар тархасмн болхла, тиигхлә би мөңгәр ачлгдх зөвтә бәәсмн. Зуг би даалһврар цәәлһвр кеҗәнәв, яһад гихлә, Бурхн нанд эн төриг күцәтхә гиҗ даалһв. ¹⁸ Тиигхлә мини ачлвр ямаранв? Сән Зәңгиг би өңгәр цәәлһҗәнәв, терүнә өгчәх зөвиг би олзлҗахшв. ¹⁹ Би кенә чигн ялч эс болсн бийнь олн улсиг Бурхнд иткүлхәр би бийән цугтаннь ялч кевв. ²⁰ Христост евреймүдиг иткүлхәр би еврей болв. Мошен закаһар эс бәәв чигн Мошен закаһар бәәдг улст, тедниг Христост иткүлхәр би зака күцәдг күн болв. ²¹ Закан угаһар бәәдг әмтнд тедниг Христост иткүлхин төлә би закан уга күн болв. Болв эннь намаг Бурхна зака эс күцәҗәнә гиҗәх темдг биш, терүнәс үлү би Христосин зака күцәҗәнәв. ²² Күчн уга улст, тедниг Христост иткүлхәр би күчн уга күн мет болв. Цугтаннь төлә би цугнь болв, тиигхләрн зәрмсинь яһад болв чигн Христост иткүлхәр тиигв. ²³ Энүг цугтаһинь би Сән Зәңгин төлә кеҗәнәв, эврән чигн Терүнә әдс авхар седләв. ²⁴ Урлданд олн улс гүүнә, болв һанцхн күн диилвр бәрнә. Тер төләд ачлвр авхар гүүтн. ²⁵ Бөкнр цугтан бийән чаңһ бәрнә. Энүгән тедн цаг зуур ачлврин төлә күцәнә, бидн болхла энүг мөңк ачлврин төлә кеҗәнәвидн. ²⁶ Тиигәд би керг угаһар гүүшгов, аһарт нудрмарн сегсрҗ ноолдшгов. ²⁷ Болв би эврәннь цогц-махмудан һарднав, терүг эврәннь седсәрн бәрнәв. Иигҗ би талдан улст ном цәәлһхләрн, урлданд орх зөвән геешгон төлә тиигнәв.

Худл шүтәнд бичә мөргтн

¹ Ахнр-дүүнр, мана өвкнр цаһан үүләр харсгдҗ йовҗ, тедн цугтан Улан теңгс һатлсиг тадниг медтхә гиҗ би санлав. ² Үүлнд болн теңгст орулсар тедн Мошелә ниилв.

³ Тедн цугтан Бурхна күчәр өггдсн өдмг идлә, ⁴ тедниг дахсн уулын хадар Бурхна гүүлгсн уснас уула. Тер хаднь Христос бәәҗ.

⁵ Болв тер бийнь Бурхн теднә ик зууһинь таассн уга, теднә үксн цогцнь эрм-цаһан көдәд эргндән хайгдв. ⁶ Мадн Израилин өвкнрлә әдл хар саната йовдлмуд һарһхар бичә седтхә гихлә, тернь үлгүр болҗана. ⁷ Теднә зәрмснь худл шүтәнд мөргснлә әдл бидн тиигх йосн угавидн. Бурхна Бичгт иигҗ бичәтә: «Әмтн сууһад хот идәд, ууһад, дәкәд экләд биилцхәв». ⁸ Бидн теднә зәрмсиг дураҗ, аля кех зөв угавидн. Аштнь тиим йовдл һарһснд нег өдр 23.000 күн үкв. ⁹ Зәрм улсиг дураһад, бидн Христосиг сөрх зөв угавидн. Аштнь тедн моһад зуулһад үкцхәв. ¹⁰ Зәрм улсиг дураһад бидн һундл келх зөв угавидн. Аштнь тедн алачар ка цокгдв. ¹¹ Эннь талдан улст үлгүр болдгар учрв, эннь маднд сагар бәәлһнә темдг болв. Яһад гихлә, бидн цагин чилгчд бәәнәвидн. ¹² Кемр тадн батар зогсаҗанавидн гиҗ санҗахла, саглтн, унҗ одвзат. ¹³ Тадна һатлҗ һарсн сөрү йовдлмуд йирин күүнә сөрү йовдлмуд болҗана. Болв Бурхн итклтә, таднд чидләстн даву юм сөрүлшго. Сөрүлсн цагт тадниг даахин төлә Бурхн хаалһ һарһҗ өгх. ¹⁴ Тиигәд күндтә ахнр-дүүнр, худл шүтәнд мөргхәсн зултн. ¹⁵ Би таднд, ухата улст гиһәд, келҗәнәв. Мини келсиг эврән йилһәд хәләтн. ¹⁶ Кемр бидн Бурхнд ханлтан өргәд йөрәлин ааһас ууҗахла, Христосин цусиг хувалцҗахший? Кемр бидн өдмгәс хуһлҗ авхларн бидн Христосин цогц-махмуд хувалцҗахший? ¹⁷ Негхн өдмг бәәдг болҗана. Бидн олн болв чигн нег цогц-махмуд болҗанавидн, яһад гихлә, бидн нег өдмгәс иднәвидн. ¹⁸ Израилин улсиг хәләлт: Тәкл тәксн хотас идсн улс тәклин ширән көдлмшт орлцачнр эс болшгой? ¹⁹ Тәкл тәксн хот эс гихлә, худл шүтән чинртә гиҗ би санҗану? ²⁰ Уга, зуг буру номта улс тәкл тәкхләрн, тер хотан Бурхнд биш, хар сәкүсдт өгчәнә гиҗ би келҗәнәв. Би тадниг хар сәкүсдлә бичә үүрлтхә гиҗәнәв. ²¹ Тадн Деед Эзнә ааһас болн хар сәкүснә ааһас дегц ууҗ чадшгот. Тадн нег кемлә дегц Деед Эзнә ширән ард болн хар сәкүсдин ширән ард сууҗ чадшгот. ²² Деед Эзиг бидн уурлулхмби? Бидн Терүнәс чидлтәй? ²³ «Ю болв чигн кех зөв бәәнә» гиҗ зәрм улс келцхәнә, зуг цугтад олз бәәнә гиҗ келҗ болшго. «Ю болв чигн кех зөв бәәнә», зуг цугтан батрҗахш. ²⁴ Кен чигн күн эврә бийиннь олз бичә хәәтхә, өөрхн улсиннь олз хәәтхә. ²⁵ Базрт хулдгдҗах махнас дуртаһан идтн. Зуг сәәг мууһас йилһхх арһин сурврмуд бичә тәвтн. ²⁶ Яһад гихлә, «һазр болн терүн деерк кевтән Деед Эзнә». ²⁷ Кемр Бурхнд иткдго күн таниг хот эдлтн гиһәд дуудхла, йовхар седхлә, йовад цугтаһинь идтн. Зуг сәәг мууһас йилһх арһин сурврмуд бичә тәвтн. ²⁸ Кемр таднд кен негнь иигҗ келхлә: «Энүгәр тәкл тәклә», тиигхлә тер хотыг энүг келсн күүнә төлә бичә идтн, сәәг мууһас йилһх арһин төлә бас бичә идтн: Би тадна арһин биш, терүнә арһин тускар санҗанав. «Болв мини сул бәәдлд талдан улсин сәәг мууһас йилһх арһ яһад боомтг болҗахмб? ³⁰ Кемр би зальврад хот эдлҗәхлә, тиигхлә тер хотас көлтә мини тускар яһад му келҗәхмб? Эн хот уусндан би Бурхнд ханлтан өргҗәнәв» гиҗ негнь келнә. ³¹ Тер төләд тадн кеҗәх тоотан идҗәхләрн, эс гихлә ууҗахларн Бурхн туурдгар кетн. ³² Тадн евреймүдт, буру номта улст, Христост иткдг Бурхна багд чигн харшлт болдгоһар җирһтн. ³³ Нанла әдл бәәтн. Би цугтаднь юунднь чигн тааста болхар седнәв, бийдән олз хәәҗәхшв, талдан улс авргдтха гиһәд теднә сә хәәнәв.

¹ Би Христосиг яһҗ дуранав, тиигҗ тадн намаг дуратн.

Хургин зокъялмуд

² Тадн намаг кезә чигн мартлго, мини өгсн номар бәәснд би тадниг буульҗанав. ³ Болв би тадниг иим юм медтхә гиҗәнәв: Христос залу болһна толһач, гергнә толһачнь залунь болҗана, Христосин толһачнь Бурхн болҗана. ⁴ Тиигәд залу болһн махлаһан авлго мөргҗәхлә эс гихлә әәлдхлә, тер күн Христосиг күндлдгон темдг. ⁵ Толһаһан бүрклго мөргҗәх эс гихлә әәлдхҗәх күүкд күн болһн эврәннь залуһан күндлҗәхш. Эннь күүкд күн толһаһан таахлулснла әдл болҗана. ⁶ Кемр күүкд күн толһаһан бүркшгоһар бәәхлә, тиигхлә тер толһаннь үсән ахрар хәәчлтхә. Болв күүкд күн үсән хәәчлх хусата толһата болхасн ичҗәхлә, тиигхлә тер толһаһан бүрктхә. ⁷ Залу күн Бурхна дүр болн Терүнә туурмҗ үзүлҗәсәрн толһаһан бүркшго болҗана. Күүкд күн болхла залуһиннь туурмҗ үзүлҗәнә. ⁸ Яһад гихлә, залу күн күүкд күүнәс үүдәгдсмн биш, күүкд күн залу күүнәс үүдәгдлә. ⁹ Залу күн күүкд күүнә төлә үүдәгдсн биш, күүкд күн залу күүнә төлә үүдәгдлә. ¹⁰ Тиигәд Бурхна элчнрин төлә күүкд күн толһадан боодг бүркәгтә болх зөвтә. ¹¹ Болв Деед Эзнә ниицәһәр гергн залуһиннь медлд бәәх йоста, залу гергнәннь медлд бәәх йоста. ¹² Яһад гихлә, күүкд күн яһҗ залу күүнәс үүдәгдсмб, тиигҗ ода залу күн күүкд күүнәс төрнә. Зуг цугтан Бурхнас үүднә. ¹³ Эврән ухалтн: күүкд күн Бурхнд толһаһан бүрклго мөргсн сән йовдлий? ¹⁴ Залу күн ут үстә болхла, ичртә бәәдгинь темдг. Күүкд күн ут үстә болхла, эннь күндллһнә темдг гиҗ йиртмҗин бийнь мадниг сурһҗахший? Ут үсн энүнд бүркәг болтха гиҗ өггдҗ. ¹⁶ Кемр энүнә тускар зүтклдх күн бәәхлә, би иигҗ келхв: маднд чигн, Бурхнд иткдг багмудт чигн оңдан авъяс уга.

Деед Эзнә асхна хотын тускар

¹⁷ Болв диг-дарани заавр өгхләрн, би тадниг буульхар бәәхшв. Яһад гихлә, тадна хургас мунь ик, олзнь баһ. ¹⁸ Тиигәд хамгин түрүнд тадн хургтан хурхларн, хоорндан хувагдна гиҗ соңслав. Би энүнә зәрмднь иткҗәнәв. ¹⁹ Таднас кен итклтәһинь медхин төлә тадн хоорнд хувагдлһн маһд уга бәәх зөвтә. ²⁰ Тадн хамдан хурхларн, Деед Эзнә хот ууҗахшит. ²¹ Юңгад гихлә, күн болһн наадксан күләлго эврәннь хотан иднә. Тиигәд зәрмснь хот уга үлднә, зәрмснь согтна. ²² Хот идх, уух эврә гер таднд угай? Эс гихлә тадн Бурхна иткдг улсиг күндлҗәхшт, хоосн улсиг дорацулҗант? Би таднд ю келхмб? Тадниг иим юм һарһснд буульхмби? Уга. Би буульшгов. ²³ Яһад гихлә, би Деед Эзнәс таднд өгсн ном авлав. Бәрүлҗ өггдсн сөөһәр Деед Эзн Исус өдмг авад, ²⁴ Бурхнд ханлтан өргәд, өдмгиг хуһлад Тер иигҗ келҗ: «Тадна төлә тәкл тәкҗәх эн мини цогц-махмуд. Намаг санад тиигҗ кетн». ²⁵ Терүнлә әдл асхна хотын хөөн ааһ авад иигҗ келв: «Мини цуснас тогтсн эн шин бооцана ааһ. Үүнәс уухларн, Намаг санад тиигҗ кетн». ²⁶ Яһад гихлә, тадн эн өдмг идхләрн болн эн ааһар уухларн, Деед Эзиг иртл, тадн Терүнә үклиг герчлҗәнәт. ²⁷ Тиигәд эн өдмг идсн, эс гихлә Деед Эзнә ааһас терүг күндллго уусн күн Деед Эзнә цогц-махмудын болн цусна өмнәс килнц һарһсндан бурута болх. ²⁸ Күн болһн бийән шинҗлчкәд Деед Эзнә өдмг идтхә, Терүнә ааһас уутха. ²⁹ Кемр эн өдмг идәд болн эн ааһас ууҗах күн Деед Эзнә цогц-махмудын тускар эс санхла, тер күн идх-уух цаглаһан бийән зарһд орулҗана. ³⁰ Тер учрар тадна ик зунь чинән уга болн гемтә, зәрмснь үкҗ одв. ³¹ Кемр бидн бийән шинҗләд бәәсмн болхла, Бурхн мана зарһ кешго билә. ³² Болв мадниг делкәлә хамдан цааҗла харһулшгон төлә Деед Эзн мана зарһ кеснд бидн сурһуль авнавидн. ³³ Тиигәд мини ахнр-дүүнр, кемр тадн хамдан хот идхәр цуглрхларн, нег-негән күләтн. ³⁴ Кемр тадн өлсҗ йовхла, хамдан цуглрхларн, Бурхна зарһла харһшгон төлә гертән хотан уучкад һартн. Оңдан төрмүдәр болхла, би таднд ирхләрн заавр өгнәв.

Әрүн Сәкүснә билгүд

¹ Тадна бичсн Әрүн Сәкүснә билгүдин тускар. Тадниг теднә тускар медтхә гиләв. ² Бурхн уга бәәдләр бәәхдән, тадниг күн түлкҗәх мет, келн уга худл шүтәдт мөргдгән тадн меднәлмт. ³ Тиигәд кемр Бурхна Сәкүсн күүһәр дамҗад келҗәхлә, күн Исусиг хараҗ чадшгог тадн медтхә гиҗәнәв. Зуг күүһәр дамҗад Әрүн Сәкүсн эс келхлә, нег чигн күн: «Исус – Деед Эзн» гиҗ келшго. ⁴ Зүсн-зүүл билгүд бәәнә, болв Сәкүсн нег кевтән. ⁵ Зүсн-зүүл церглтс бәәнә, болв Деед Эзн нег кевтән. ⁶ Бурхна зүсн-зүүл йовдлмуд бәәнә, болв Бурхн нег кевтән. Цугтаднь эн юмиг Бурхн өгнә. ⁷ Олна сән бәәдлин төлә күн болһнд билг өгчәхдән Сәкүсн Бийән үзүлҗәнә. ⁸ Негнднь Әрүн Сәкүсн цецнә үг өгнә, талдан күүнд медрлин үг өгнә. ⁹ Талдан күүнд Әрүн Сәкүсн иткл өгнә, зәрмсднь Әрүн Сәкүсн эдгәдг билг өгнә. ¹⁰ Зәрм күүнд Әрүн Сәкүсн өвәрц юм һарһх билг, зәрмднь – әәлдх билг, зәрмсднь – сәкүсд йилһҗ чадх билг, талдан күүнд – олн келәр келдг билг, зәрмсднь – олн улсин кел цәәлһҗ өгх билг өгнә. ¹¹ Болв эннь цугтан ор һанцхн Әрүн Сәкүснә йовдлмуд болҗана. Тиигәд Әрүн Сәкүсн Эврәннь таалар күн болһнд билг өгнә.

Олн мөчмүдтә цогц-махмуд

¹² Күүнә цогц-махмуд негн болв олн мөчмүдтә. Олн мөчмүдтә болв чигн, болв тедн нег цогц-махмуд бүрдәҗәнә. Тиигҗ Христосин тускар келҗ болҗана. ¹³ Яһад гихлә, нег Сәкүсн мадниг, евреймүдиг болн буру номта улсиг, ялчнриг болн сул бәәх улсиг нег цогц-махмудын мөчмүд кев. Бидн цугтан Бурхнас нег Сәкүс аввидн. ¹⁴ Цогц-махмуд нег әңгәс биш, олн әңгәс бүрднә. ¹⁵ Кемр көл иигҗ келсн болхла: «Би һар эс болсндан, цогц-махмудын мөч бишв». Энүнәс көлтә цогц-махмудын мөч биш болхви тер? ¹⁶ Кемр чикн иигҗ келсмн болхла: «Би нүдн эс болсндан цогц-махмудын мөч бишв». Энүнәс көлтә цогц-махмудын мөч биш болхв тер? ¹⁷ Кемр цогц-махмуд бүклдән нүдн болсн болхла, тиигхлә яһҗ тер соңсх бәәсмб? Кемр цогц-махмуд бүклдән чикнәс бүрдсмн болхла, яһҗ тер үнрчлх бәәсмб? ¹⁸ Болв Бурхн зүсн-зүүл мөчмүдиг Эврәннь седвәрәр цогц-махмудт тәвв. ¹⁹ Кемр цугтан нег мөч болсн болхла, тиигхлә цогц-махмуд уга болх билә. ²⁰ Болв олн мөчмүд бәәнә, зуг цогц негн болдг. ²¹ Нүдн һарт иигҗ келҗ чадшго: «Чи нанд керг угач». Толһа көлд бас иигҗ келшго: «Тадн нанд керг угат». ²² Түүнәс үлү чинән уга мөчмүд улм кергтә болҗана. ²³ Цогц-махмудын баһ чинртәд тоолгдҗах мөчмүдт бидн ик оньгтаһар килмҗән өгнәвидн. Күн үзшго мөчмүдиг бидн талдан нүднәс эвтәһәр далдлнавидн. ²⁴ Болв сәәхн мөчмүдт тиим килмҗ керг уга. Бурхн цогц-махмуд бүрдәхләрн, килмҗ керглгдҗәх мөчмүдт икәр килмҗ тусдгар бүрдәҗ. ²⁵ Тиигәд цогцд хувалһн уга, мөчмүд цугтан нег-негндән әдл килмҗ өгчәнә. ²⁶ Кемр цогцин нег мөч зовҗахла, терүнлә хамдан мөчмүд цугтан зовҗана. Кемр нег мөчиг туурулҗахла, терүнлә хамдан мөчмүд цугтан байрлна. ²⁷ Тадн Христосин цогц-махмуд болҗанат, таднас күн болһн Терүнә мөч болҗана. ²⁸ Христост иткдг улс дунд Бурхн түрүләд зәрмснь – апостол болтха, хойрдгчнь – әәлдәчнр, һурвдгчнь – багшнр болтха гиҗ шиидҗ. Зәрмстнь Бурхн өвәрц юм кех, зәрмстнь – эдгәх арһ, зәрмстнь – дөң болх, зәрмстнь – һардх, зәрмстнь – олн келәр келдг арһ өгч. ²⁹ Цугтан апостолмудый? Цугтан әәлдәчнрий? Цугтан багшнрий? Цугтан өвәрц юм һарһх арһтай? ³⁰ Цугтан әмдрүлдг билгтә болхий? Әмтн цугтан зүсн-зүүл келәр келҗ чаддви? Цугтан кел цәәлһҗ чадх арһтай? ³¹ Түүнәс чинртә билгтә болхар седтн.

Дурна тускар

31б Би таднд терүнәс үлү сән хаалһ үзүлсүв.

¹ Кемр би цуг әмтнә келәр, нам Бурхна элчнрин келәр келдг болад, зуг дурн уга болсмн болхла, тиигхләрн би хәңкнҗәх улан мөңгн көңкрг мет болн көгҗмин әәтә цаң мет болх биләв. ² Кемр нанд әәлдәчин билг бәәһәд, цуг нуувчиг меддг болад, цуг медрлтә болн итклтә болсарн уул көндәҗ чаддг болхла, зуг дурн уга бәәхлә, тиигхлә би юмн бишв. ³ Би кемр бәәсән цугтаһинь түгәһәд өгәд, нам эврәннь цогц-махмудан шататха гиһәд өгсмн бийнь, дурн уга болхла, нанд мел олз уга. ⁴ Дурн тесвртә болн цаһан саната, дурн үлү үзхш, караглхш. Дурн ик сана зүүхш, ⁵ модьрун биш. Дурн бийдән олз хәәхш, уурта биш, өшә некхш.

⁶ Дурн өшәтә юмнд байрлхш, болв үнн юмнд байрлна. ⁷ Дурн цугинь даана, цугтаһинь иткнә, цугтаднь нәәлнә, дурн тесвртә. ⁸ Дурн мөңк. Әәлдхл чилх, келн тагчгрх, медрл уга болх. ⁹ Яһад гихлә, мана медрл күцц биш, мана әәлдхлһн күцц биш. ¹⁰ Болв кемр күцц юмн ирхлә, дутунь уга болх. ¹¹ Би нилх цагтан нилхинәр келдг биләв, ухалдг биләв, нилх бичкнә тоолврта биләв. Болв бөдүн күн болхларн, би бичкнәк цага тоотыг авсн угав. ¹² Ода бидн цугтаһинь бүркг нүр үздгт үзҗәхәр үзҗәнәвидн, хөөннь бидн цугтаһинь чирәһәрн нүүрцҗ үзхвидн. Ода би юм күцц медхшв. Бурхн намаг меддг әдләр хөөннь би цугинь күццднь медхв. ¹³ Ода деерән һурвн юмн үлдҗәнә: иткл, нәәлвр, дурн. Эднәс хамгин чинртәнь дурн болҗана.

Әәлдхлин болн олн келәр келдг билг

¹ Дурнд седклән тәвтн. Әрүн Сәкүснә билгүд, түүнәс үлүһәр әәлдхлин билг авхар седтн. ² Медгддго келәр келҗәх күн күүнд биш Бурхнд келҗәнә. Яһад гихлә, терүнә келсиг күн медҗәхш. Әрүн Сәкүсәр дамҗад нуувч тер келҗәнә. ³ Болв әәлдәч әмтиг сурһҗана, урмд өгчәнә, тогтнулҗана. ⁴ Медгддго келәр келҗәх күн бийән сурһҗана. Әәлдәч болхла иткдг улс сурһҗана. ⁵ Би болхла таднас күн болһн медгддго келәр келтхә гиҗ санлав, болв тадн әәлдхлә деер болх. Бурхнд иткдг улс сурһхин төлә медгддго келәр келсиг кен болв чигн эс цәәлһхлә, әәлдхл келҗәх күн медгддго келәр келҗәх күүнәс даву. ⁶ Тиигәд, ахнр-дүүнр, кемр би тадн тал ирәд медгддго келәр келхлә, терүнәс таднд ямаран олз болхмб? Кемр би, нанд Бурхна сексн тоотыг эс гихлә медрл, эс гихлә әәлдхл, эс гихлә ном таднд авч эс ирхлә, мел олз уга. ⁷ Үлгүрнь, әмн уга көгҗмин инструментмуд авад хәләтн: флейтиг эс гихлә арфиг. Кемр тал-талдан ә эс һарһхла, ямаран айс наадҗахиг яһҗ медхмб? ⁸ Кемр бүрә бүшкүр шишлң докъя эс өгхлә, кен дәәнд белдхмб? ⁹ Түүшң таднла болҗана. Кемр тадн эврәннь келәр медгддго үг келхлә, тана келсиг яһҗ медхмб? Тадна келсн юмн биш. ¹⁰ Делкәд олн зүсн-зүүл келн бәәнә, тедн цугтан эврә чинртә. ¹¹ Кемр би келнә чинр эс медҗәхлә, тер келәр келҗәх улс нанд талдан орна улс болх, би теднд талдан орна күн болхв. ¹² Түүшң танад болҗана. Тадн Әрүн Сәкүснә билгүд авхар икәр седҗәхләрн, иткдг улс сурһхд церглҗәх билгүд икәр олзлтн. ¹³ Тиигәд талдан келәр келҗәх күн эврәннь келән цәәлһхин төлә зальвртха. ¹⁴ Яһад гихлә, кемр намаг талдан келәр зальврхла, мини сәкүсн зальврна, мини ухан терүнәс мел олз авчахш. ¹⁵ Тиигхлә би яахмб? Би Әрүн Сәкүсәрн зальврнав, болв ухаһарн бас зальврнав. Би Сәкүсәрн дуулнав, ухаһарн бас дуулнав. ¹⁶ Кемр чи Бурхнд Әрүн Сәкүсәрн ханлт өргҗәхлә, хаҗуд бәәх улсин кен негнь чини ханлтын хәрүд яһҗ «Тиигтхә!» гиҗ келхмб? Чамаг ю келҗәхиг тер медҗәхш. ¹⁷ Чи Бурхнд сәәнәр ханлт өргнәч, болв оңдан күн дасҗ чадҗахш. ¹⁸ Би талдан келмүдәр тадна кенәстн болв чигн икәр келҗәсндән Бурхнд ханлтан өргҗәнәв. ¹⁹ Болв иткдг улсин хургт медгддго келәр арвн миңһн үгин ормд талдан улсиг сурһхин төлә медгдх тавн үг би келсв.

²⁰ Ахнр-дүүнр, ухаһарн бичкдүд бичә болтн. Му юмнд бичкдүд мет болтн, болв ухан-санаһарн икчүдлә әдл болтн. ²¹ Бурхна Бичгт иигҗ бичәтә: «Би эн улст медгддго келәр келҗәх улсар дамҗад келнәв, талдан орна улсар дамҗад келнәв, болв тиигв чигн тедн Намаг соңсшго гиҗ Деед Эзн келҗәнә». ²² Тиигәд медгддго келәр келлһн иткдг улсин төлә биш, эс иткдг улсин төлә онц темдг болҗана. Әәлдхл эс иткдг улсин онц темдг биш, иткдг улсин онц темдг. ²³ Кемр иткдг улс цугтан цуглрад, медгддго келәр күүндҗәхлә, эгл улс эс гихлә Бурхнд иткдго улс орҗ ирхләрн, «тадн адрҗанат» гиҗ келшгой? ²⁴ Болв кемр цугтан әәлдҗәх цагт Бурхнд эс иткдг күн, эс гихлә эгл күн орҗ ирхлә, тер күүнә килнцнь әәлдхләр илдкгдх. Соңсҗасарн тер зарһла харһх. ²⁵ Терүнә нуувч седвәрнь илдкгдх, тер элкдәд, Бурхнд мөргәд келх: «Тадн дунд йосндан Бурхн бәәҗ!»

Иткдг улсин хургин диг-даран

²⁶ Ахнр-дүүнр, би иигҗ ухалҗалав. Тадн хамдан цуглрхларн, тадна негнд частр бәәнә, хойрдгчднь ном, талданднь Бурхнас илднь келх үг бәәнә, талданднь медгддго келәр келх арһ бәәнә, бас негнь медгддго келәр келсиг цәәлһх арһ бәәнә. Эдн цугтан иткдг улс батрулхин төлә бәәхмн болҗана. ²⁷ Кемр кен нег күн медгддго келәр келҗәхлә, тиигхлә хойрнь эс гихлә, зуг һурвнь чеерүдәр келтхә. Тиигхләрн негнь ю келҗәхиг цәәлһх зөвтә. ²⁸ Кемр медгддго келәр келсиг цәәлһдг күн уга болхла, тиигхлә медгддго келәр келхәр седҗәсн күн хургт тагчг бәәтхә, зуг бийдән болн Бурхнд келтхә. ²⁹ Хойр эс гихлә һурвн әәлдәчнр келтхә, цуглрсн улс цугтан келсн үгмүдинь үнлтхә. ³⁰ Кемр цуглрсн улс дундас негнь Бурхнас илдкл авчахла, тиигхлә келҗәсн күн тагчгрх йоста. ³¹ Тадн сурһмҗ болн урмд авхин төлә цугтан селгәһәр әәлдхл кеҗ чадҗанат. ³² Әәлдхлин билг әәлдәчин медлд бәәх йоста. ³³ Бурхн диг-дара эвдлһнә Бурхн биш, эвин Бурхн болҗана. Тадн Бурхна улсин цуг багмудар цуглрхла, ³⁴ күүкд улс тагчг бәәтхә. Теднд келх зөв өгчәхш, Закана некврәр тедн соңсхврта бәәх йоста. ³⁵ Кемр тедн ю болв чигн дасхар седҗәхлә, гертән эврәннь залуһасн сурх йостат. Яһад гихлә, күүкд күүнд хургт келхд ичртә. ³⁶ Бурхна үг таднас һарви? Эс гихлә зуг һанцхн таднд күрви? ³⁷ Кемр бийән әәлдәчд, эс гихлә Әрүн Сәкүсн һардҗах күүнд тоолҗахла, тиим күн мини бичҗәсиг цугтаһинь Деед Эзнә заавр мөн гиҗ нанла зөвшәрх йоста. ³⁸ Энүг һазалҗах күүг, тадн бас һазалтн. ³⁹ Тиигәд, ахнр-дүүнр, әәлдхәр шунтн, болв медгддго келәр келҗәхиг бичә хөртн. ⁴⁰ Зуг цугтан диг-даратаһар болн сән кевәр күцәгдх йоста.

Христосин әмдрлһн

¹ Ахнр-дүүнр, мини цәәлһҗ өгсн Сән Зәңгин тускар таднд бас нег дәкҗ сана орулхар седләв. Тадн терүг авад, эврәннь ул келәт. ² Кемр тадн мини цәәлһҗ өгсн Сән Зәңг бәрхлә, хара эс итксмн болхла, тадн Сән Зәңгәр дамҗад авргдвт. ³ Хамгин һол төрнь – авсан би таднд өгләв. Бурхна Бичгт бичгдсәр Христос мана килнцәс көлтә үкв. ⁴ Бурхна Бичгт бичгдсәр Христос оршагдла, дәкәд һурвдгч өдртән әмдрлә. ⁵ Хөөннь Кепт тер үзгдв. Дәкәд арвн хойр сурһульчнрт. ⁶ Дәкәд Христос тавн зу һар ахнр-дүүнрт дегц үзгдв. Теднә ик зунь ода чигн әмд, зәрмснь өңгрҗ одв. ⁷ Дарунь Христос Яковд болн апостолмудт цугтаднь үзгдв. ⁸ Би чик биш цагт һарсн күүнлә әдл болсн бийнь хамгин сүүлднь нанд үзгдв. ⁹ Би апостолмудын хамгин чинр угань болҗанав. Би, нам апостол гих нер зүүх зөв угав. Яһад гихлә, би Христост иткдг улсиг даҗрдг биләв. ¹⁰ Болв Бурхна цаһан санаһар би тиимв. Бурхна хәәрлт нанд киидән давсн уга: апостолмудас цугтаһаснь икәр би көдлв. Зуг би биш, мини дотрк Бурхна хәәрлт тиигв. ¹¹ Би эс гихлә тедн таднд тиигҗ цәәлһв, тадн тиигҗ итквт.

Үксн улсиг әмдрүллһн

¹² Кемр Христос үкәд әмдрлә гиҗ цәәлһгдҗәхлә, тадна зәрмснь үкснә хөөн әмдрдмн биш гиҗ келҗәхмб? ¹³ Болв үкснә хөөн әмдрдго болхла, тиигхлә Христос чигн әмдрүлгдсн уга. ¹⁴ Кемр Христос эс әмдрүлгдсн болхла, тиигхлә, бидн киидән Сән Зәңг цәәлһҗәнәвидн, тадн киидән иткҗәнәт. ¹⁵ Түүнәс даву бидн Бурхна тускар худл келдг улс болҗанавидн. Яһад гихлә, Христосиг үкснә хөөн Бурхн әмдрүлв гиҗ бидн терүнә тускар герчлләвидн. Болв кемр үксн улс дәкҗ әмдрдгонь үнн болхла, тиигхлә Бурхн Христосиг әмдрүлсмн уга. ¹⁶ Яһад гихлә, кемр үксн улс әмдрдго болхла, тиигхлә Христос әмдрүлгдсн уга. ¹⁷ Кемр Христос эс әмдрүлгдсн болхла, тадн харҗахар иткҗәнәт, тадн ода күртл килнцд авлгдҗ бәәнәт. ¹⁸ Түүшң Христост иткәд үксн улс мөңк зовлңд орв. ¹⁹ Кемр бидн эн җирһлдән Христост нәәлҗәхлә, бидн цугтаһаснь хөв уга улс болҗанавидн. ²⁰ Болв Христос үкәд әмдрүлгдлә! Эннь үксн улс бас әмдрүлгдх гисиг лавлҗана. ²¹ Эн делкәд үкл негхн күүһәр дамҗад ирснлә әдләр үкләс әмдрүллһн негхн күүһәр дамҗад ирв. ²² Цугтан Аадмла нииләд үксн мет мел тиим кевәр цугтан Христосла ниилсндән әмдрүлгдх. ²³ Зуг күн болһн чик диг-дараһар әмдрүлгдх: түрүләд Христос, Терүг ирхләг Терүнә болсн улс әмдрүлгдх. ²⁴ Тиигәд эн орчлңгин чилгч ирх. Һардҗах, йос бәрҗәх болн күчтә сәкүсдиг Христос уга кеснәннь дару залвран Эцк Бурхнд Тер бәрүлҗ өгх. ²⁵ Яһад гихлә, Бурхн цуг дәәсиг дииләд Христосин көлд хайтл, тер кем күртл Христос залх йоста. ²⁶ Уга кегдх сүүлңк дәәсн – үкл. ²⁷ Яһад гихлә, «Бурхн цугтаһинь Терүнә көлд кевтүлв». «Цугтан» гисн тоод Бурхн орҗахш, эн Эврән цугтаһинь Христосин медлд орулв. ²⁸ Бурхн цугтаһинь Христосин медлд орулхла, тиигхлә Көвүнь, Христос, Эврән Терүнә медлд цугтаһинь орулсн Бурхна медлд орх. Тиигәд Бурхн цугтаһинь залх. ²⁹ Үксн әмтнә төлә уснд кирслгдснь ю кеҗәхмб? Кемр үксн әмтиг әмдрүлдго болхла, теднә төлә ю хәәҗ уснд кирслгдхмб? ³⁰ Агчм болһн бидн ю хәәҗ әмәрн шордхмб? ³¹ Ахнр-дүүнр, би өдр болһн үкл үзнәв. Би энүнд ик санаһар андһар өгчәнәв. Мана Деед Эзн Исус Христосин өмн би таднар эн ик сана зүүнәв. ³² Әмтнә хәләцәр келхлә, Епест бәәх аңгудла ноолдхд нанд ямаран олз орла. Кемр үксн әмтиг әмдрүлдго болхла, «ода идәд уухмн, яһад гихлә, маңһдур үкч одхвидн». ³³ Бичә меклгдтн. «Му хань күүг үрәнә». ³⁴ Шинәс ухатаһар бәәһәд, килнц һарһдган хайтн. Тадна зәрмснь Бурхиг медхш гиҗ тадниг би ичәхәр бәәнәв.

Цогц-махмудыг әмдрүллһн

³⁵ Зәрмнь иигҗ сурх: «Үксн әмтн яһҗ әмдрдв? Тедн ямаран цогцта болхмб?» ³⁶ Һәргтәч! Тәрәнә эк чи тәрҗәхлә, үкчкәд тер урһад һарх. ³⁷ Урһмл кевтнь чи тәрҗәхшч, келхд буудян эс гихлә талдан йирин нег умш тәржәнәч. ³⁸ Эн экнд Бурхн эврәннь таалар урһц өгчәнә. Бурхн умш болһнд кергтә урһц өгнә. ³⁹ Цогц болһн әдл биш. Күн нег бәәдлтә цогц-махмудта, аңгуд талдан, шовуд – талдан, заһсд – талдан. ⁴⁰ Теңгрт болн һазр деер эврә дүрсн бәәнә. Теңгрин дүрснә туурмҗ һазр деерксин дүрснә туурмҗас йилһрнә. ⁴¹ Нарна туурмҗ негн, сарин туурмҗ оңдан, одд эврә туурмҗта. Одн болһн талдан оддас эврәннь туурмҗарн йилһрнә. ⁴² Үксн улс әмдрүлгдх цагт бас тиим болх. Үксн цогц һазрт булгдна, әмдрүлхлә мөңк болх. ⁴³ Мунь булгдна, сәнь әмдрүлгднә. Күчн татунь булгдна, чидлтәнь әмдрүлгднә. ⁴⁴ Һазра цогц-махмуд булгдна, Әрүн Сәкүснә өгсн цогц-махмуд әмдрх. Һазра цогц-махмуд бәәнә, Әрүн Сәкүснә өгсн цогц-махмуд бәәнә. ⁴⁵ Бурхна Бичгт иигҗ келгдҗәнә: «Түрүңк күн Аадм әмтә-киитә болв», сүүлңк Аадм болхла җирһл өгдг сәкүсн болв. ⁴⁶ Түрүләд Әрүн Сәкүснә өгчәх җирһл ирҗәхш, һазра ирҗәнә. Терүнә хөөн Әрүн Сәкүснә өгчәх җирһл ирх. ⁴⁷ Түрүңк күн һазрин шораһас үүдәгдҗ, хойрдгч күн – теңгрәс. ⁴⁸ Һазра улс һазрин күүнә бәәдлтә, теңгрин улс теңгрәс ирсн күүнлә әдл болх. ⁴⁹ Һазра күүнә дүрстә болснла әдләр теңгрин күүнә дүр зүүхвидн. ⁵⁰ Ахнр-дүүнр, махмуд болн цусн Бурхна орн-нутга өнч авачнь болдмн биш гиҗ би таднд келҗәнәв. Үкх юмн мөңк өнч эзлҗ чадшго. ⁵¹ Би таднд нуувч келҗәнәв: бидн цугтан үкшговидн, болв сүүлңк бүрә-бүшкүр татхла, генткн цугтан нег агчмд оңдархвидн. Юңгад гихлә, бүшкүр татхла, үксн әмтн әмдрәд мөңк бәәдлтә болх, бидн оңдархвидн. ⁵³ Эн үмкәрдг үмкәрдгод хүврх йоста, үкдгнь мөңк бәәдлтәд хүврх йоста. ⁵⁴ Үмкәрдгнь үмкәрдгод, үкдгнь мөңк бәәдлтәд хүврхлә, тиигәд: «Үкл алгдв, Диилвр!» – гиҗ бичсн үгмүд бүтх. ⁵⁵ «О, үкл, чини диилвр альдв? О, үкл, чини хорн альдв?» ⁵⁶ Үклин хорн – килнц. Килнцин күчнь – закан. ⁵⁷ Болв Бурхнд ханлт. Эн мана Деед Эзн Исус Христосар дамҗад маднд диилвр өгв. ⁵⁸ Тиигәд мини дурта ахнр-дүүнр, батар алмацлго бәәтн. Кезә чигн Деед Эзнә көдлмш кетн. Деед Эзнә төлә кесн тадна көдлмштн хара бишнь медтн.

Иткдг улсин төлә цуглулҗах мөңгн

¹ Бурхна улсин төлә цуглулгдҗах мөңгнә тускар. Һалатьяд бәәх иткдг улст мини келснлә әдләр тадн тиигҗ кетн. ² Олсн мөңгнләһән ирлцүлҗ долан хонгин нарн өдр күн болһн эврәннь мөңгнәсн хоршаһад бәәтхә. Намаг ирхлә, дәкҗ цуглуллго белн болдгар бәәтн. ³ Би ирхләрн, тадна шүүҗ авсн улст селвгтә бичг өгнәв. Тедниг тадна цуглулҗ авсн мөңгиг күргтхә гиһәд Ерусалим тал илгәнәв. ⁴ Кемр нанд тиигәрән йовх кергтә болхла, тедн нанла йовх.

Павелын зура

⁵ Би Македониг һатлад, тиигәд тадн тал ирхв. Яһад гихлә, би Македоняр дәврҗ йовх йостав. ⁶ Танад би цаг зуур бәәхв, болв үвлзәд чигн бәәхв. Нанд тадн цааранднь һазр эрглһнд дөңгән күргхит. ⁷ Яһад гихлә, ода би таднла адһмта йовад харһхар седҗәхшв. Кемр Деед Эзн зөв өгхлә, танад цаг зуур бәәхәр би нәәлҗәнәв. ⁸ Епест би тәвдгч өдрин нәр күртл бәәхв. ⁹ Яһад гихлә, тенд олн өшәтн бәәв чигн, туста көдлмш кехд үүдн өргәр нанд секәтә. ¹⁰ Кемр тадн тал Тимофей ирхлә, юмнас бичә әәтхә, тадн хәлән бәәтн. Юңгад гихлә, тер нанла әдл Деед Эзнә төлә көдлҗәнә. ¹¹ Нег чигн күн терүг бичә һолтха. Нан тал хәрү ирдгәр терүнд һазр эргәд йовлһнднь дөң болтн. Би терүг ахнр-дүүнрән дахулад ирхинь күләҗәнәв. ¹² Апол ахин тускар. Ахнр-дүүнртәһән тер таднд одтха гиҗ би терүг йир сурлав. Болв ода деерән тер йовхар седҗәхш, зуг чөлән болхла, тер ирх.

Товчлгч үг

¹³ Сагар бәәтн, итклдән бат болтн, зөргтә болн чидлтә болтн. ¹⁴ Кеҗәх тоотан дуран өгч кетн. ¹⁵ Тадн Степаниг болн терүнә өрк-бүлиг меднәлмт. Ахьяд бәәх Христост иткдг улсин түрүңкснь тедн болҗана. Бийән тедн Бурхна улст церглхәр нерәдв. Би сурҗанав, ¹⁶ теднлә көдлҗәх болн теднлә церглҗәх улсин һардврт соңсхврта болтн. ¹⁷ Степан Портунат болн Ахьяк ирснд би байрлҗанав. Тедн нанд тадн угаһар дуту болҗасн юм өгв. ¹⁸ Тедн нанд таднла әдл урмд өгв. Тиим улсиг күндлтн. ¹⁹ Азийд бәәх иткдг улс менд келүлҗәнә. Әкүль болн Приска, теднә герт хурдг иткдг улс бас тадниг Деед Эзнлә ниилснтн халунар мендлҗәнә. ²⁰ Ахнр-дүүнр цугтан таднд мендән илгәҗәнә. Нег-негнләһән әрүн үмслһәр мендлтн. ²¹ Би эврәннь һарар таднд бичҗәнәв: Павелас менд. ²² Деед Эзнд дурлдго күн мөңкинд харалла харһтха. О, Деед Эзн, ир! ²³ Таднла Деед Эзн Исусин хәәрлт бәәтхә. ²⁴ Цуг таднла Исус Христосла ниилснд мини дурн бәәтхә!