Titɩ

’Sbɛ Pɔo pooa

Titɩ

‑jei" ɛ

’Jewlu‑

¹’Mɔ Pɔo, ’mɔ ‑nɩa Kea ’a dbonʋi ‑wɛe Sesi Klisɩ dboa, ’sbɛ ’ma ’crɩa ‑ta, ‑mɔ Titɩ ‑mɔ ‑bleɛ. Kea ‑te’ ’o ’ʋn ‑wɛe nyʋ ɛ ‑sa ’e nyʋ "klu ’ɩn ’je ʋʋa’ Kea ‑kwlɩ" ‑tea’ ikuu, ’de ʋʋ ’je dɩ ‑cɛɛn’‑ Kea nɩɛ "i nyʋ ’jea nʋ juo‑. ²Tɛin" sese, Kea ’bleeɛ ’dii, ɛ ’je nyʋ ’kmʋnɩa’ ‑sea’ ‑kwɛ ‑ta ’ble "nyɩ, ’kamɔ ɛ nɩɛ "i ɛ ’je ɛ nʋ ‑mɛ ’kmʋ se nʋʋɛ ke. Kea ’a di sɩ, ɛmɛ ‑tɩ ɛɛ’ wlu ɛ cɛan ‑tie" ɛ, ɛɛ muɛ nʋa’ see. ³Nɔ" ɛ ‑tua" ‑wɛe nyʋ ’je ɛ juo‑, ɛ nyni’ ‑wɛ‑, ɛmɛ ‑tɩ Kea ‑ɛ ‑nɩa ‑aa ’Pʋʋi ɛ, ɛ ‑tu" ’ʋn ɛɛ’ wlu tu ’kwa ‑wɛe ’ma ’tmʋ ɛ.

⁴‑Mɔ Titɩ, ‑bo ’ma sea ‑ʋn ja ‑gbʋn’ ɛ, ka ’ma ’wlʋʋ‑ju nɩa, ’ka ‑ɩn ‑nɩ, ’de ‑ɩn ‑ke ’ma ‑a ‑nɩɛ dɛ due’ ’de Sesi ’a ‑tɩ’ tɔ’ ’ʋn ’je ’a ’ʋn.

‑A "Bo Kea ke ‑aa ’Pʋʋi Sesi Klisɩ "nyɩ ‑ʋn ’saa ke pɛe ’a blua’ ke.

Dbo ‑ɛ ‑teea Titɩ kwa ’de Klɛtɩ‑blʋa "kpei ɛ

⁵Dɛɛ‑tɩ ’ɩn sia ‑ʋn ’de Krɛtɩ‑blʋa "kpei ɛ, ɛmɛ ‑nɩ dɩ ‑ɩ sea "i ‑kwɛ‑ ke ’demu ɛ, ɩmɩ ‑ɩn ‑jei" ‑kɔ’, ’de ka ’ɩn ’tmʋ ɛ ’de ‑ʋn ‑pee sese ɛ, ‑ɩn nʋ kan’, ɛmɛ ‑nɩ : ‑Ɩn ‑je ’o nyʋsoa ‑te’ ‑kwlɛ ’dii due ’due ‑wɛe ʋʋ ’je Kea ‑gbi ‑je o po. ⁶Nyɔ ‑ma mua Kea ‑gbu "jru kpɔ’ i ‑tea’ a, ɔ ’bo ‑kɔ ‑pʋn" nɩɛ, ɔ ’je ’nynɔ due’ ’ble, ɔɔ’ "nynuu‑ ’je Sesi ’a ‑tɩ’ tɔ’ ’ʋn ’je. Ʋʋa’ ’kmʋ ’bo ‑flankaan nɩɛ ‑wɛe nyʋ je ʋʋpʋ ‑tɩ’ "kpei ‑tuu" ’de dɛsaʋn ’a ‑tɩ’ ’ʋn ’de ʋʋ ’je nyʋ wɔn ’je. ⁷Ɔɔ’ jei tu ɛ, Kea ’a dbo ‑teeɛ ɔ kwa, ’de ɛɛ’ ‑tɩ’ ’ʋn ɛ, ɔ se ‑kɔ ‑pʋn" nɩi, ɔ se ɔɔ’ ‑cɛi" ’bɛɛi, ɔ ’bo ’cɛn ’bleeɛ, ɔ ’bo nmɔ "jru pooɛ, ɔɔ’ sʋn ’bo i "feeɛ, ’wɛi ’a ’tʋn ’bo ɔ ’ʋn nɩɛ, ⁸’kaa ɔ ’je nyiiɔ nɩ‑, ‑wɛe ɔ ’je ’dɔe ’a "dia ’je. ’De ɔ ’je tɔ’di nɩ, ɔ ’je "isrɛ, ɔ ’je Kea ’a ‑tɩ’ kma, ɔ ’je ɔɔ’ ‑cɛ" "wɔin ’bɛɛ‑. ⁹Ɔ juo tɔ’ ‑tɩ ’a wlu ‑wɛe ka ‑a ‑tɔɔɛ nyʋ ɛ, ɔ ’je ɛ o ‑si’ kan’, ’de ɔ ’je Kea ‑gbu ’a dɩ i kuu‑. ’De nyʋ ‑ʋʋa ‑saa nyʋ ’a "jru ‑jei" ɛ, ka dɛ ʋʋ nʋa sea "jrii nmɔ ɔɔ muɛ toa’ ’de nyʋ dɛtɔɔsʋn ‑cɛɛn’ ’ʋn.

¹⁰Dɛɛ‑tɩ ’ɩn ’da kan’ a, ɛmɛ ‑nɩ nyʋ ‑tuu"‑tuu ‑nɩ ’de Suifʋ‑wi" ‑ʋʋ ‑jea Sesi ’a ‑tɩ’ tɔ’ ’ʋn "klu ‑ʋʋ ‑ku "jru ‑wɛe ‑ʋʋa ‑saa nyʋ ’a "jru ‑jei" ’de ʋʋa’ wlusʋn ’ʋn. ¹¹Ʋʋa’ nyʋ tu ɛ, ʋʋa’ wɔn ’je "mu ‑o, dɛ‑nʋɛ’ nyʋ ‑jea Sesi ’a ‑tɩ’ tɔ’ ’ʋn ʋʋ ke ʋʋa’ ‑gbu" ‑sɔnyʋ ‑wee’ "klein ʋʋa "maa ’de ʋʋa’ nyʋ dɛtɔɔsʋn ’ʋn. Dɩ ‑ɩa ‑dbaa’ nyʋ ‑tɩn’ "i ɛ, ɩmɩ ʋʋa tɔɔ nyʋ. Dɩ "klein ʋʋa nʋa ’mʋa‑, ʋʋa nʋɩ’ ‑wɛe ʋʋ ’je nyʋ "jru i di, ’de ʋʋ ’je ’wɛi ’je. ¹²Ʋʋa’ ‑cɛ" ’kpa ’a dɛ "ijuoi jrɔ’ ‑wlu ka, ɔ ’naa : Klɛtɩ‑kɔʋn, sɩ ’tmʋa ’a ’sʋ mɛ ‑ɛɛ "dia ʋʋa ’je jeejee. ’Diwɔnyniʋn ‑nʋ, ka ʋʋ ’jea nʋ ‑wɛe ‑bo ʋʋ ’je dɛ ʋʋ di, ’de ʋʋ ’jea "kwli sʋn "kpei‑ po ɛ, ɛɛ’ ’sʋ ʋʋa ‑pɔn i. ¹³Dɛ ɔ ’tmʋa ’de ʋʋpʋ ’a ‑tɩ’ ’ʋn ɛ, ɛ nɩɛ tɔ’ ‑o. Ɛmɛ ‑tɩ ‑ɩn ‑je ʋʋpʋ "bli ‑cɛ’ ka ‑cɔɔn’ ka, ‑wɛe ʋʋa’ tɔ’ ’je ’e Kea ’a dɩ ‑cɛɛn’ ‑a ‑tɔɔa nyʋ "kpei "biie‑. ¹⁴Ʋʋ ’bo Suifʋ‑wi" ’a wlu ’de ‑siiɛ, dɛ‑nʋɛ’ ɩ ‑kɔ’ "nɩɩa. ’De ʋʋ ’bo nyiɔ ’ɔ kɛ’ wɔn ’jeɛ. Dɩ ʋʋa ’daa‑ ‑gban’ ʋʋ ’na Kea ’na dɩ sea’ ’pepe nɩ ɛ, nyɔ ’bo ɩ "i blaa a, ’kaa Kea mɛ se kan’ ’da. Nyʋ ‑na ‑ʋʋ se ’o tɔ’ ‑tɩ ’de blai ɛ, ’de ʋʋpʋ ’ʋn mɔ ɩa’ kɛ’ tu ’wlʋ. ¹⁵Nyʋ ‑nɩa ’pepe ɛ, ʋʋa ‑gbʋɛn dɩ ‑wee’ "klein ’pepenɩ jriɛ ja, ’kaa nyʋ ‑ʋʋa tɔ’ nynia "jrii ɛ, dɛ "o dɛ jrɛ’ se ’pepe nɩ ’de ʋʋpʋ "jri ’de. Ʋʋ se ɛ "i nɩ ʋʋ ’je tɔ’ ‑tɩ wɔn ’je, ‑wɛe kplɩn fai" poo‑tɩ, dɛ‑nʋɛ’ ʋʋa’ tɔ’ ke ʋʋa’ pɛe "cruan‑ "i, ʋʋ se ’dɔe ke saʋn ’a "kpei ‑seea’ ka juo ’bode. ¹⁶Kea ’a ’nynɩ ’pɛn ’de ʋʋ ’wɔn i, ’kaa ʋʋa’ nʋʋdɩ toɛ Kea ’kpʋ "i. Ʋʋa’ nyʋ tu ɛ, ʋʋ se ‑tɩ’ o po ka nɩ‑. Ʋʋa nyaa Kea i, ʋʋa’ ’je nyʋ wɔn, ʋʋ se dɛ ’dɔe nʋa’ ’bɛɛ‑ mɔ "pɩ.

Dɛ Titɩ ’jea nyʋ tɔɔ ɛ

¹’De ‑mɔ ɛ, Titɩ, dɩ "klein ‑ma mua nyʋ tɔɔa’ a, ɩ ’je nyʋ dɛtɔɔsʋn ‑cɛɛn’‑ ’ʋn ’wlʋ ‑wɛe ka Kea nɩa "i nyʋ ’jea nʋ ɛ, ʋʋ ’je ɛ juo‑.

²‑Ɩn ‑tmʋʋ’ nyʋ ‑cɔʋn’‑wi" ‑wɛe ʋʋ ’je "i kpʋn, ʋʋ ’bo dɛ "o dɛ "ni ’di ‑siiɛ, ʋʋ ’bo nmɔ "jru poɛ ‑wɛe ʋʋ ’je wɔn ’je ka nɩ‑. Ʋʋ nɩ tɔ’di, ʋʋ juo‑ ʋʋa’ ‑cɛ" ’ɛ ka, ‑wɛe ʋʋ ’je Kea ‑kwlɩ" ‑te’ ‑gblein’, ʋʋ ’je nyʋ ’a ‑tɩ’ kma ’de pɛe ’dɔe ’ʋn, ’de ‑bo nyʋ ‑tu" ʋʋpʋ ’kle, ʋʋ ’je ’kpɩ ’ble ’de ʋʋ ’je pɛe "wɔin ’bɛɛ‑.

³’Nynʋkpae’ ‑ʋʋ ‑kpa nyʋ ‑cɔʋn’ ɛ, ‑ɩn ‑tmʋʋ’ ʋʋpʋ ‑wɛe ʋʋ ’je kplɩn ‑cɛɛn’ nʋ ‑ke. Ka nyʋ ‑ʋʋa pleea Kea nɩa, ’kamɔ ʋʋ ’je nɩ‑. Ʋʋ ’bo nyʋ ’a ’nynɩ dooa ’sʋ ʋʋ ’bo ’ʋn ‑siiɛ‑. Ʋʋ ’bo nmɔ "jru poɛ. Dɛ ‑jɛ ʋʋ ’jea nʋ ɛ, ɛmɛ ‑nɩ ʋʋ ’je nyʋ kplɩn ’dɔe tɔɔ‑. ⁴‑Bo ʋʋ nʋ kan’ a, ‑mɛ ʋʋ ’beeɛ’ ʋʋ ’je ’nynʋkpae’ ‑tɔe ’snɩ ‑tu", ‑wɛe ’nynʋkpae’ ‑tɔe ‑nɩa ’mʋa‑ ʋʋ ’je ʋʋa’ kʋan‑wi" ke "nynuu ’a ‑tɩ’ kma‑, ⁵ʋʋ ’je "i kpʋn, ’de ʋʋ ’bo ’nynɩadɛ nʋʋɛ. Ʋʋ ’je ʋʋa’ ‑gbu" ‑sɔndbo ’a ‑tɩ’ ‑tu" ka ‑cɔɔn’ ka, ʋʋ ’je "jru ja jaa ’de ʋʋa’ kʋan‑wi" ‑pee. ‑Bo ɛ nɩ kan’ ‑mɔ ɛ, ‑mɛ nyiɔpʋ se Kea ’a wlu ‑flɛɛn i.

⁶‑Ɩn ‑tɔɔ ‑kooa" mɩɩ" ‑wi" dɛ ‑ke, ‑wɛe ʋʋ ’je "i kpʋn‑. ⁷’De dɛ ‑ma ‑cɛ" ’kpa ’jea nʋ ɛ, ɛmɛ ‑nɩ ’de dɛ "o dɛ ‑wee’ "klein ’ʋn ɛ, ‑ɩn ‑to kplɩn ’dɔe ‑wɛe ʋʋ ’je ’o ‑ma ‑kɔ ’de bla. ‑Bo ‑ma sea nyʋ dɛ tɔɔ ɛ, ‑ɩn nʋ ɛ ’de "i kpʋn ’a ’ʋn, ‑ɩn ‑bo ‑ma crɔn’ i ‑pɔɛn. ⁸Dɩ ‑ma mua ’tmʋa’ a, ɩ ’je tɔ’ ‑tɩ nɩ, ɩ ’bo ‑kɔ ‑pʋn" nɩɛ, ‑wɛe ‑aa tʋnyʋ je ‑kɔ jrɛ’ ’je ’de ‑a ‑pʋn". ’De ‑tɩn’ ’je ʋʋpʋ "i ’dbaa, ʋʋa’ wɔn ’je "mu ’de ‑aa ‑tɩ’ ’ʋn.

⁹Nyʋ ‑ʋʋa nʋʋa nyʋ "juɔi ɛ, ‑ɩn ‑tmʋʋ’ ʋʋpʋ ‑wɛe ʋʋ ’je ʋʋa’ ’bleʋn wɔn ’je ’de dɛ "o dɛ ‑wee’ "klein ’ʋn. Ʋʋ ’je ’de ʋʋpʋ "jri ’dei nmɔɔ‑. Ʋʋ ke ʋʋa’ ’bleʋn ’bo ba o ‑too’ ɛ. ¹⁰Ʋʋ ’bo ʋʋa’ dɛ jrɛ’ "jriiɛ, ’kaa dɛ ‑jɛ ʋʋ ’jea nʋ ɛ, ɛmɛ ‑nɩ ʋʋ ’je kplɩn ’dɔe nʋ jeejee ’de ʋʋa’ ’bleʋn ’a pɛe ’je blu ’de ʋʋa’ ‑tɩ’ ’ʋn, ‑wɛe ka "o ka ɛ ’je ɛ nɩ ɛ, Kea ‑ɛ ‑nɩa ‑aa ’Pʋʋi ɛɛ’ ‑tɩ’ ’je dɛwɔn nɩ‑.

’Saaʋn Kea nʋa nyʋ "jrii ɛ

¹¹Dɛ ’ɩn ’wlʋa ’tmʋa’ ’mʋa‑ Kea ’a ‑cɛ" ‑jeɛ nʋ, dɛ‑nʋɛ’ Kea ’a ’saaʋn ɛ nʋa, ɛ poɛ "jri "kpae’ ‑wɛe nyʋ ‑wee’ ’je ’pʋ. ¹²Ɛɛ’ ’saaʋn ‑ɛ poa "jri "kpae’ ‑nɛ ɛ, dɛ ɛɛ tɔɔa ‑aʋn ɛ, ɛmɛ ‑nɩ ‑a ‑je ‑maa’ ‑te’ Kea ’a ni’ o ’bɔ, ‑a ‑je ’kmʋ "kpeidɩ ’a feeɛ’ i’wla‑tɩ ’bɔ, ‑wɛe ‑bo ‑a ‑nɩ ’kmʋ ’de ‑sɩanwɩ ’di ɛ, ‑a ‑je tɔ’di nɩ‑, ‑a ‑je Kea ’a ‑kwlʋtɩ nʋ, ‑wɛe ‑a ‑je ɛɛ’ ni’ ‑te’. ¹³’Kamɔ ‑a ‑je nʋ mamaʋ ’sʋ ’mʋa ‑sɔn ‑aa fua ‑wɛe ‑a tba tɔ’ "i ’je nyni. ’De ɛɛ’ ‑sɔn’ tu ’di mɔ Sesi Klisɩ ‑ɔ ‑nɩa ‑aa Kea klaa" ’de ‑ɔ ‑nɩa ‑aa ’Pʋʋi a mu ’nynɩ ’wlʋa’ ’de "ikmaa’ ’ʋn. ¹⁴Ɔmɔ ‑to ’e ɔɔ’ ‑cɛ" ’de ‑aa ‑teɩn ‑wɛe ‑ɔ ‑je ‑aʋn seie ’de dɛsaʋn ‑wee’ ’kwa. Ɔ ’wlʋɛ ‑aa dɩsaɩn "kpei ’de ‑a ‑je ɔɔ’ ’cɛ nɩ, ‑wɛe ‑a ‑je dɩ ’dɔe nʋa ’a ’kpɩ ’ble.

¹⁵Dɩ ‑ɩn ‑jea nyʋ ’tmʋʋ ɛ, ɩmɩ ‑nao. ‑Ɩn ‑kuu ʋʋpʋ ’a dɩ i. ‑Bo nyɔ nʋ "bli‑cɛdɩ ɛ, ‑ɩn ‑cɛ’ ɔ "bli, ‑ɩn ‑sɔɔ fɛn’. ‑Ɩn ‑duo" "ikmaa’ ‑wee’ Kea "nyɩa ‑ʋn ’ʋn ‑ɩn ‑je ɛɛ’ dbo tu nʋ. ‑Ɩn ‑bo ’wɔɔɛn nyɔ ’bo ‑ʋn wɔin ‑flɩɩɛn.

Kea ’a ‑jei" naasʋn‑

¹’Bo ‑mɛ ’de ɛ, ‑ɩn ‑poo ʋʋ ‑tɩ’ ‑kwlʋ o ‑wɛe ʋʋ ’je nyʋ ‑tea nyʋ "jru kpɔ’ i wɔn ’je ‑wɛe ʋʋ ’je ʋʋpʋ ’a ni’ ‑te’. ‑Ɩn ‑tmʋʋ’ ʋʋpʋ ke’wlɛ ’de ʋʋ ’je dɩ ’dɔe nʋa ’a kein"ke ‑te ’de dɛ "o dɛ ‑wee’ ’ʋn. ²Ʋʋ ’bo nyɔ "o nyɔ jrɔ’ ‑cree" ɛ, ʋʋ ’bo ‑cɛa’ i ‑pɔɛn, ʋʋ nɩ nyiiɔ. Ka ʋʋ nɩa kupeeɛ’ nyʋ ɛ, ʋʋ ’je ɛ to jeejee ’de nyʋ ‑wee’ ‑pee.

³Ʋʋ ’beeɛ’ ʋʋ ’je ɛ nʋ, dɛ‑nʋɛ’ ‑apʋ mɔ ‑ke ɛ, tɛin" ɛ, ‑a se tɔ’di nɩ‑. ‑Aa’ ’je Kea wɔn, ‑a ‑siɛ ’kwla ’de‑, ‑aa ’tʋn nʋ‑tɩ ’bleɛ ‑a kʋɔn ’ʋn, dɛ ’ɛ "jriitɩan’ mɛ ‑ɛɛ "dia ‑aa ‑je ’de‑, ‑a ‑podɛi" ‑wi" ’a ’bleedɩ a pooa ‑a pɛe "i. ‑Apʋ ‑jɔ ‑nɩa ’ʋn ’nyɛ ka a, ‑apʋ mɔ ‑ɔɔ ’sʋ ’nyɛ ba ’ʋn. ⁴’Kaa ‑sɔntɩ ‑aa ’Pʋʋi Kea ‑ɛ ‑kma nyʋ ‑wee’ ’a ‑tɩ’ ɛɛ’ ’diwɔnmɔa’ poa "jri "kpae’ ’sʋ ɛ, ɛ ’pʋʋ‑ ‑aʋn ‑ɛ ’de dɛsaʋn ’kwa. ⁵Ɛ se ’de ‑aa nʋʋdɩ ’a "isrɛ‑tɩ ’ʋn mɔ ɛ ’pʋʋ‑ ‑aʋn nɩ‑, ’kaa ɛ ’jeɛ ‑aa wɛe‑ ‑wɛe ɛ ’wlʋ ‑aa dɩsaɩn "kpei, ’de ‑a ‑wlʋ ’wlʋa’ dee‑. Ɛɛ’ ‑Suu mɛ ‑nʋɛ’ ‑wɛe ‑aa ’kmʋ po ‑gbɔdee "ni. ⁶Sesi Klisɩ ‑ɔ ‑nɩa ‑aa ’Pʋʋi ɛ, ’de ɔ ’ʋn mɔ ɛ cɛɛn‑, ‑wɛe ɛ dbaa ɛɛ’ ‑Suu ’de ‑a "kpei, ka "ni a dba ‑wɛe ɛɛ ‑sia’ i ɛ. ⁷Ka Kea nʋa ‑aa ’saaʋn "jrii nʋsʋn ‑wɛe ɛ ‑sa ‑a ‑tɩ’ "kpei, ’kamɔ ‑nao. Ɛ nʋ ɛɛ’ dɛ tu ’mɛ ‑wɛe ’kmʋnɩa’ ‑sea’ ‑kwɛ ‑ta ’ble, ɛ ’je ‑aa ’kɛn nɩ‑, ka ‑a tba ɛ tɔ’ "i see ɛ.

⁸Ɛɛ’ wlu tu nɩɛ tɔ’ ‑tɩ ‑o, ɛ nɩɛ ‑kwlɩ" ‑te’ ka. ’Ɩn nɩɛ "i, ‑bo ‑ma sea wlu ‑nɛ ’tmʋ ɛ, ‑ɩn ‑je ɛ "kpei‑ ’nyɛ ka ‑cɔɔn’ ka, ‑wɛe nyʋ ‑jea Kea ’a ‑tɩ’ tɔ’ ’ʋn ɛ, ʋʋ ’je ʋʋa’ ‑cɛ" i kpʋʋn‑, ’de ʋʋ ’je ’dɔe nʋ. Dɩ ‑jɩ ‑nmɔa "jrii ‑wɛe ‑ɩa nʋa nyiɔpʋ ’dɔe "jrii ɛ, ɩmɩ ‑nao. ⁹’Kaa ka Suifʋ‑wi" ’a "ji nʋa "itbaasʋn ɛɛ’ ‑cɛa’ ke kɛ’ wɔn ’je ‑tɩ ’a ba o ‑tooa’ ke, ‑mɩ nɩɛ foo" ’ʋndɩ ‑o, ɩa’ nʋ nyʋ ’dɔe "jrii. ‑Ɩn ‑bo ɩ o ’kpaa’. ¹⁰Nyɔ ‑ɔɔ ‑nʋɛ ‑wɛe nyiɔpʋ a ‑seea’ i ɛ, ‑ɩn ‑sɔɔ fɛn’ kpɛ due’. ‑Bo ɔ se ɛ "i nɩ ‑wɛe ɔ ’je ‑ma wlu doin" o po ɛ, ‑mɛ ‑ɩn ‑sɔɔ fɛn’ ke’wlɛ. ‑Bo ɔ se ɛ "i nɩ ‑wɛe ɔ ’je ɔɔ’ kplɩn fai" poo ɛ, ‑mɛ ‑ɩn poo ɔ sʋn i, ‑ma ‑tɩ’ ’bo ɔɔ’ ‑tɩ’ ’ʋn nɩɛ. ¹¹‑Ma ‑jee’, ɔɔ’ jei tu se ɛ "i nɩ ɔ ’je ɔɔ’ dɛsaʋn "i juo ‑wɛe tɔ’ ‑tɩ ’a ‑je o "biie. Ɔɔ’ ‑cɛ" ’kpa ’a dɩsaɩn mɩ ‑wlʋ ɔɔ’ ’pee.

Tuowlu‑

¹²‑Bo ’ɩn se Atemasɩ dbo ’de ‑ʋn o ɛ, ‑mɛ Tisikɩ ’ma mu dboa’. Nyʋ ’sɔɔn ‑nɩa ’mʋa‑, ‑bo ‑ɩn ‑je ʋʋpʋ ’a due’ "jriɛ‑ ɛ, ‑mɛ ‑ɩn ‑too"‑ ‑wɛe ‑ɩn ‑je ’ʋn jɛɛ‑ ’bo Nikopolisɩ, dɛ‑nʋɛ’ ’bomɔ ’ma mu nɩa’ mamaʋ ’sʋ dee ’a ji nɔ" ’e ‑si’. ¹³‑Ɩn ‑tu" kɛ’ juoi Senasɩ ke Apolɔsɩ "jriɛ‑, ‑ɩn ‑nmae ʋʋa’ ’dʋʋa’ mudɩ ‑wee’ "klein, ‑wɛe dɛ "o dɛ jrɛ’ ’bo ʋʋpʋ ’kwa ‑pɔɛn. ¹⁴Ɛ ’bo ‑ma ’sʋ ’a nʋʋdbo nɩɛ, ‑ɩn ‑tmʋʋ’ ‑aa de ’di‑wi" ‑wɛe ʋʋ ’je nyʋ sʋn o poa’ ’cɩan’ ‑ke. ‑Bo ʋʋa sea kan’ nʋ, ‑wɛe ʋʋa sea nyʋ jrʋ’ ‑tɩ’ "kpei ‑sa a, ‑mɛ dɩ Kea ’a ‑jei" naaʋn a nʋa, ɩmɩ ʋʋa nʋ.

¹⁵Nyʋ "klein ‑ʋʋ ‑ke ’ma ‑a ‑nɩa ’nɔ ɛ, ʋʋ ’na ʋʋpʋ ‑je ‑ʋn. ‑Aa de’di ‑wi" ‑ʋʋ ‑kma ‑aa ‑tɩ’ ’de Sesi Klisɩ ’ʋn ɛ, ’mɔ ‑je ʋʋpʋ.

Kea ’a "diwan kpʋn ao ‑wee’ "klein !