Dɩ’kwla‑sawlu

Dɩ Sesi Klisɩ

‑sa ’kwla

’de San ‑pee ɛ

’Sbɛ ‑nɛ ’ɛ bʋ ka

¹Dɩ Sesi Klisɩ ‑sa ’kwla ’de Kea ’a ‑jei" naaʋn ‑pee ɩmɩ ‑crɩɩɛ’ ’de ’sbɛ ‑nɛ ’di. Kea mɛ ‑nyɩ" ɩa’ dɩ tu Sesi Klisɩ ‑wɛe ɔ ’jɩ to ’de ɔɔ’ dbonʋʋn ‑pee, ’de ka ɩa mua ‑too" ’a ɩ ’jea ’o nyni ɛ, ʋʋ ’jɩ juo‑. Ɛmɛ ‑tɩ Sesi Klisɩ dbo ɔɔ’ "soai ’de ɔɔ’ dbonʋi San o ‑wɛe ɛ ’je ɔ ’tmʋʋ‑. ²Wlu Kea ’tmʋa ‑wɛe Sesi Klisɩ nynia ’o ɛ, ’mɔ San ‑nɩ ɩa’ ‑ta ’jei, ‑wɛe dɩ "klein ’ɩn ’jeea "jriɛ‑ ɛ, ’ɩn ’crɩɩ ’de ’sbɛ ’di.

³Nyɔ ‑ɔɔ nʋa ’sbɛ ‑nɛ ’dii ɔ ke nyɔ "o nyɔ ‑ɔɔ poa dɩ’kwla‑sawlu ‑nɩ doin" o ‑wɛe ‑ɔɔ ‑je ɛ wɔn ɛ, ’mʋa‑ nʋ ‑mɔ, dɛ‑nʋɛ’ nɔ" ‑tuu" ’a ‑wɛe ɩa’ dɩ tu ’jea ’o nyni ɛ, ɛ "kʋan ’mlai".

’Jewlu‑

^4-5’Mɔ San, ’mɔ ‑ɔɔ ‑crɩ ’sbɛ‑ ‑wɛe ‑ɔɔ poo ɛ Kea ‑gbi ‑mɛ" ’sɔn ‑nɩa ’de Asi ‑jei" : Kea ‑ɛ ‑nɩa ’kmʋ tɛin" ‑wɛe ‑ɛ ‑nɩa ’kmʋ ‑sɩan ’de ‑ɛɛ mua jia’ a, ɛ ke ‑sii ‑mɛ" ’sɔn ‑nɩa ’bo ɛɛ’ tʋ"bokpa‑tɛ "juɔi ke, Sesi Klisɩ ‑ɔɔ ‑tmʋa tɔ’ ‑tɩ ‑wɛe ‑ɔ sea wlu fai" poo‑ ɛ, ɛɛ’ nyʋ ’a pɛe blua’ ke ɛɛ’ "diwan kpʋn aopʋ ! Sesi Klisɩ mɔ Kea ‑saa "i, ɛ ‑sa "kunyɩɔ’ ’de ’mɛʋn "klu. ’Beɔ "klein ‑nɩa ’nɔ ’kmʋ "kpei ʋʋa’ nyɔ se ɔ ‑sii, ɔmɔ ‑nɩ ’bo ʋʋpʋ "jru kpɔ’. Ɔmɔ ‑kma ‑aa ‑tɩ’ ‑wɛe ‑ɔɔ nymɔ seie ‑aʋn ’de ‑aa dɩsaɩn ’kwa. ⁶Ɔmɔ ‑nʋɛ’ ‑wɛe ‑a ‑kpa ɔɔ’ ’bleenyʋ, ’de ɔmɔ ‑te ’o ‑aʋn ‑wɛe ‑a ‑je ɔ "Bo Kea "juɔi nʋʋ‑ ka ’sraa ‑saʋn ‑nɩa tɛin" nɩa. Ɔmɔ nyʋ ’je ’nynɩ ’wlʋa’ o, "ikmanynɩ kpaa‑ ’de ‑sʋn "o ‑sʋn ’di. ’Kamɔ ɛ ’je nɩ !

⁷Ao ‑gbʋn ’nɔ, ɔɔ ji’ ’bo buee" ’ʋn, nyʋ ‑wee’ "klein a mu ɔ "jriɛ‑ ’jeea’. Nyʋ ‑ʋʋ koɔ ɔ ’bo tu ‑kwlɩ" ɛ, ʋʋa mu ɔ "jriɛ‑ ’jeea’ ‑ke. ’Blʋa ’a blo’ wɔn‑ ‑wee’ "klein a muɛ kpleea’ ’de ɔɔ’ ‑tɩ’ ’ʋn. Kɩɩn, ’kɩ nɩ‑ ! ⁸Kea ‑nɩa ‑aa Blei, ɛ kmai" ɛ je dɩ ‑wee’ ‑sii. Ɛ nɩɛ ’kmʋ sese, ɛ nɩɛ ’kmʋ ‑sɩan ‑ke, ɛɛ muɛ jia’. Ɛɛ’ Kea tu mɛ ‑wlu ka, ɛ ’na : ’Mɔ ‑saa "i, ’mɔ ‑bɔɔ’ de.

San ’jeeɛ Sesi "jriɛ‑

⁹’Mɔ San ’ɩn nɩɛ aoa’ de ’di ’kle aoa ’jea ’de ‑a ‑ke Sesi ’a "i "sii ‑tɩ’ ’ʋn ɛ, ’ma ’je ɛ ‑ke. Ao ke ’mɔ ke ‑a ‑plaan ’beɔdɛ due’ i ‑wɛe ka "o ka ɛ ’je ɛ nɩ ɛ, ‑a ‑ke Sesi "sii "i. Dɛ ’ɩn ’tmʋa Kea ’a wlu ‑wɛe dɩ ’ɩn ’jea ’de Sesi ’ʋn ’ɩn ’tmʋ ɩ ɛ, ɛmɛ ‑nʋɛ’ ‑wɛe ʋʋ kpa ’ʋn ’bo ’tɔniɛ ’a du’. ’Bo ’a ‑ta ‑tu ɛ, nyʋ a ’daa‑ ’o Patimɔsɩ. ¹⁰’Bo Patimɔsɩ mɔ ’ɩn nɩ‑, ‑jɛ Tʋ"bo ’a ‑kwlewɩ o kaan ’sʋ ɛ, Kea ’a ‑Suu "ji ’de ’ʋn ’ɛ. ’Sʋ ’ɩn ’wɔn nyɔ jrɔ’ ’ɔ wlu ’bo ’ʋn ’de ‑wɛe ɔ kpa wlu "jɛi ka ‑kaʋn a wlua. ¹¹Ɔ ’na : Dɩ ‑ma ‑jeea’ "jriɛ‑ ɛ, ‑ɩn ‑crɩ ’de ’sbɛ ’di ‑wɛe ‑ɩn ‑jɩ Kea ‑gbi ‑mɛ" ’sɔn ‑nɩ ‑jei" poo‑. Ɩa’ Kea ‑gbi ‑tu ka : Kea ‑gbu ‑nɩa ’o Efɛsɩ o, Siminɩ o, Pɛɛkamʋ o, Tiatii o, Saadɩ o, Filadɛfi o, Laodise ke.

¹²‑Ta ’ma "biia i ‑wɛe nyɔ ‑ɔɔ wlua ’ʋn ‑pee ’ɩn ’je ɔ "jriɛ‑ ’jee‑ ’sʋ ɛ, ’ɩn ’jeeɛ ‑dam’ba ‑tuu"‑tuu "jriɛ‑ ’bo ‑dam’ba ’a "kpei ‑tedɩ ‑mɛ" ’sɔn "kpei. Ɩa’ ‑dam’ba ’a "kpei ‑tedɩ ‑tu ɛ, ’sani ‑nʋɩ’. ¹³’Sʋ ’ɩn ’jeeɛ "ju due’ "jriɛ‑ ’bo ɩa’ ‑kwea’‑, ‑ɔ ‑ke nyiɔ ’ɔ "ju ‑kooɔ’‑. "Bai ɔ paa ’ʋn ɛ, ɛ tba i ’de ɔ boin o kpɔ‑ kpɔ‑ ‑wɛe ɔ bla ’saniwlʋ ‑kwlʋ ’di. ¹⁴Ɔɔ’ "jru "pluu’ "puu’‑ ka jee" ‑fua" nɩa, ɔɔ’ "jri a wan’ ka nɛmɩɩɔ nɩa. ¹⁵Ɔɔ’ bɩ a fan’ ka ‑bo nyʋ tba ‑tiɛn ’o "jri ‑wɛe ɛ ‑sainya ’de nɛklɩn’ ’ʋn ɛ, ’kamɔ ɩ nɩ‑. Ɔɔ’ wlu ‑kɔ’ "ni‑gbuu klaa" ’a klu ’ɩn. ¹⁶Ɔɔ’ diansʋn ’bleɛ ’cʋ‑sɩɩn ‑mɛ" ’sɔn kwa. ‑Placnɛ ‑nma" ’a ‑wɛe ‑ɛɛ "jri nɩa ’sɔɔn ɛ, ɛmɛ ‑ɛɛ ‑wlʋ ’de ɔ ’wɔn. Ɔɔ’ "jua‑ a fan’ ka ‑bo ’jrʋ ‑te ‑gbao ‑wɛe ɛɛ fan.

¹⁷‑Ta ’ɩn ’jee ɔ "jriɛ‑ ’sʋ ɛ, ’ɩn ‑ka i ’bo ɔ bɩ o, ka nyɔ ɔ ’mɛa. ’Sʋ ɔ ‑teɛ’ ’ʋn ɔɔ’ diansʋn "kpei ‑wɛe ɔ wlu ka, ɔ ’na : Faʋn ’bo ‑ʋn ‑nʋɛ ! ’Mɔ ‑saa "i ’mɔ ‑bɔɔ’ de. ¹⁸’Ɩn nɩɛ ’kmʋ. ’Ɩn ’mɛɛ ’de‑, ’kaa kaan ka ’ɩn nɩɛ ’kmʋ ’bode ‑bode ’bode. ’Ɩn ’bleɛ "ikmaa’ ’bo ’mɛa’ ke ‑ta ’mɛʋn nɩa "kpei. ¹⁹San, dɩ ‑ɩn ‑jeea’ "jriɛ‑ ɩ ke dɩ ‑ɩa nʋʋa ke dɩ ‑ɩa mua nʋʋa’ ’bo ‑mɩ ’de ke ‑ɩn ‑crɩ ’de ’sbɛ ’di. ²⁰’Cʋ‑sɩɩn ‑mɛ" ’sɔn ‑ɩn ‑jeea’ "jriɛ‑ ’de ’ma diansʋn ’di o, ‑dam’ba ’a "kpei ‑tedɩ ‑mɛ" ’sɔn ’sani nʋa ‑wɛe ‑ɩn ‑jeea "jriɛ‑ ‑ke o, dɛ ‑ɛ pa ’kwla ’de ɩa’ dɩ tu ’de ɛ, ɛmɛ ’ma ji wɔ ‑saa’ ’de ‑ʋn ‑pee. ’Cʋ‑sɩɩn ‑mɛ" ’sɔn ‑nɩ, ɩmɩ ‑nɩ Kea ‑gbi ‑mɛ" ’sɔn ’ɔ "jru kpɔ’ i ‑teʋn. ’De ‑dam’ba ’a "kpei ‑tedɩ ‑mɛ" ’sɔn ‑nɩ, ɩmɩ ‑nɩ Kea ‑gbi ‑mɛ" ’sɔn ‑nɩ.

Wlu ‑tmʋʋa’ ’de Efɛsɩ Kea ‑gbu ‑pee ɛ

¹"Ju ’ɩn ’jeea "jriɛ‑ ‑nɔ, mɔ ‑wlu ’de ’ʋn ‑pee ka ‑ɔ ‑na : Wlu ‑ɩn ‑jea ’crɩ ‑wɛe ‑ɩn ‑jea Efɛsɩ Kea ‑gbu ’a "jrukpɔ’ i ‑tei kpa, ɛ ka :

’Mɔ ‑ɔɔ diansʋn ’blea ’cʋ‑sɩɩn ‑mɛ" ’sɔn kwa ‑wɛe ‑ɔɔ na ’bo ‑dam’ba ’a "kpei ‑tedɩ ‑mɛ" ’sɔn ’sani nʋa ’a ‑kwea’‑, ’ɩn ’naa :

²’Ɩn juo ‑ma nʋʋdɩ ’mɛ. Dbo ‑ɩn ‑kpʋʋn ‑a ‑ma ‑cɛ" i ‑wɛe ‑ɩn nʋa o, ka ‑ɩn ‑bɛɛa’ pɛe "wɔin o, ’ɩn juo ɩ ‑wee’ ’mɛ. ’Diwɔnyniʋn ‑nɩa ’de aopʋ‑ "klu ɛ, ʋʋ ke ‑ɩn se dbɛɛ‑. Nyʋ ‑ʋʋa ‑daa’ ʋʋa’ ‑cɛ" Sesi ’a dboʋn ‑wɛe ‑ʋʋ se ɛ nɩ ɛ, ‑ɩn ‑tɩɛn’ ʋʋpʋ i ’de ka ʋʋ nɩa sɩ ’tmʋʋn ‑ɩn ‑je kan’. ³‑Ɩn ‑bleɛ nai", ‑ɩn ‑jeɛ ‑ma ‑cɛ" wɔn ’de ’ma ’nynɩ ’a ‑tɩ’ ’ʋn, ’de ’kpɩ se ‑mii" wa mamaʋ ’sʋ. ⁴’Kaa dɛ ‑jɛ sea’ ’ʋn ’tʋn nʋ ɛ, ɛmɛ ‑nɩ ’ma ‑tɩ’ kmaa’ ‑ɛ ‑nɩa ’de ‑ʋn ’ʋn tɛin" ɛ, ‑ɩn ‑bɔ ‑mɛ o. ⁵‑Ta ‑ɩn ‑blua’ ‑ɩn po ’o ’a ‑tɩ’ ‑kwlʋ o ‑wɛe ‑ɩn ‑je ‑ma dɩsaɩn "i juo ’de ‑ɩn ‑jɩ ’kpʋ "i to‑, ‑wɛe ka ‑ɩn ‑kma ’ma ‑tɩ’ tɛin" ‑ɩn ‑je kan’ nʋ ke’wlɛ. ‑Bo ɛ se ‑mɛ nɩ ɛ, ’ma muɛ jia’ ‑wɛe ’ɩn ’je ‑ma ‑dam’ba ’a "kpei ‑tedɛ ‑kwlin ‑saa. ⁶Dɛ ‑jɛ ‑ɛɛ ‑tɩ’ ’ʋn ’ma poa ‑ʋn ‑tɩ’ o ɛ, ɛmɛ ‑nɩ nyʋ ‑kpa ’o Nikola ’de ɛ, ʋʋa’ nʋʋdɩ a nyaa ‑mii’ ka ɩa nyaa ’mii ‑ke ɛ.

⁷Nyɔ ‑nɩa doun" "jru ‑mɛ wlu Kea ’a ‑Suu a ’tmʋa Kea ‑gbi ‑pee ɔ po ɛ doin" o ! Nyɔ ‑ɔɔ mua tʋ ’a "jru kpaa’ a, ’kmʋnɩ tu ‑ɛ ‑nɩa ’de Kea ’a kɛɛma’ ‑kwlɔ ’di mɛ ‑ɛɛ ’jɔ ’ɩn ’je ɔ "nyɩ ‑wɛe ɔ ’je di.

Wlu ‑tmʋʋa’ ’de Siminɩ Kea ‑gbu ‑pee ɛ

⁸"Ju ’ɩn ’jeea "jriɛ‑ ɛ, ɔ wlu’ ’de ’ʋn ‑pee ka ke’wlɛ ɔ ’na : Wlu ‑ɩn ‑jea ’crɩ ‑wɛe ‑ɩn ‑jea Siminɩ Kea ‑gbu ’a "jru kpɔ’ i ‑tei kpa, ɛ ka :

’Mɔ ‑ɔ ‑kɔan ’de dɩ ‑wee’ ’a nya ‑wɛe ‑ɔ kan dɩ ‑wee’ "jru ɛ, ’de ‑ɔ ‑mɛa ’de‑ ‑wɛe ‑ɔ jia ’kmʋ de ɛ, ’ɩn ’naa :

⁹’Kle ‑ma ‑jea ’ɩn juɛ’. ’Ɩn juo ‑ma nɩɩa" ’a ’dba ‑tɩ ’mɛ, ’de ‑mɛ ’kamɔ ‑ɩn ‑nɩ dɩ ‑wee’ ’a jei. Nyʋ ‑ʋʋa ‑daa’ ʋʋa’ ‑cɛ" Suifʋ ‑wɛe ‑ʋʋ se ɛ nɩ ɛ, ka ʋʋa ‑cre" ’a ‑ʋn ɛ, ’ɩn juɩ’. Ʋʋa’ nyʋ tu ɛ, ʋʋ nɩɛ Satan ’a nyʋ ‑o. ¹⁰Dɛ ‑ma ‑jea ’kle ɛ, ɛɛ’ faʋn ’bo ‑ʋn nʋɛ. ‑Ɩn ‑gbʋn ’nɔ, ‑siɔn’ ɔ muɛ aoa’ jrʋ’ ‑kaso ’di poa’ ‑wɛe ao ’je i ‑tɩɩɛn’‑ ‑wɛe ao ’je ’kle ’je ’de ’wɩ ‑puue ’di. ‑Ɩn ‑bo wlu fai" pooɛ mamaʋ ’sʋ, ɛ ’je ‑ma ’mɛa’ jɛɛ‑, ‑wɛe ’ɩn ’je ‑ʋn ’kmʋnɩa’ ‑sea’ ‑kwɛ ‑ta ’ble "nyɩ. Ɛmɛ ‑ɛɛ mu ‑ma ‑kei" nɩa’.

¹¹Nyɔ ‑nɩa doun" "jru wlu Kea ’a ‑Suu a ’tmʋa Kea ‑gbi ‑pee ɔ po ɛ doun" o ! Nyɔ ‑ɔɔ mua tʋ ’a "jru kpaa’ a, ɔ se ‑tuɔn blui. ’Mɛa ’a kpɛ ’sɔɔn ‑nɛ se ɔ "i blai.

Wlu ‑tmʋʋa’ ’de Pɛɛkamʋ Kea ‑gbu ‑pee ɛ

¹²"Ju ’ɩn ’jeea "jriɛ‑ ‑nɔ, ɔmɔ ‑wlu ’ʋn ‑pee ka ‑ke, ɔ ’na : Wlu ‑ɩn ‑jea ’crɩ ‑wɛe ‑ɩn ‑jea Pɛɛkamʋ Kea ‑gbu ’a "jru kpɔ’ i ‑tei kpa, ɛ ka :

’Mɔ ‑blea ‑placnɛ ‑nma" ’a ‑wɛe ‑ɛɛ "jri nɩa ’sɔɔn ɛ, ka ’ɩn ’da ka, ’ɩn ’naa :

¹³’Ɩn juo ‑ma ‑teɩn ’mɛ. ’Bo ’a ‑ta ‑tu mɔ Satan "ti ‑wɛe ɔ ’ble nyʋ. Ka ‑ɩn ‑tua" ’ma ’nynɩ ’a ‑tɩ’ mamaʋ ’ɩn ’je kan’ ’mɛ ‑ke. ’Bo aopʋ o ‑kwlɔ Satan nɩa, Antipasɩ ‑ɔ ‑jea ’ma ‑tɩ’ tɔ’ ’ʋn ‑wɛe ‑ɔɔ ‑tmʋa ’ma ‑tɩ’ ’de nyʋ ‑pee, ‑sɔntɩ nyʋ ’dbɔ ɛ, ‑ɩn se ’ma ‑kwlɩ" ‑tea’ o ’bɔ, ’de ‑mɛ ’kamɔ ʋʋ ’dbɔ ’de ’ma ‑tɩ’ ’ʋn. ¹⁴’Kaa dɩ jrɩ’ mɩ ‑ma nʋ ’sʋ ‑ɩa nyaa ’mii. Ɩa’ dɩ tu mɩ ‑nɩ nyʋ jrʋ’ ‑nɩ ’de aopʋ "klu ‑wɛe dɩ Balaam tɔɔa nyʋ ‑ʋʋa nʋ ɩ. Ka ‑bo Israɛ‑kɔʋn nʋ ‑wɛe ʋʋ ’jea ’de dɛsaʋn ’di ’kpa a, ɛmɛ ɔ tɔɔ Balakɩ. Ɔmɔ ‑nʋɛ’ ‑wɛe nmi ʋʋ ‑saa ’sraa‑ ʋʋ "nyɩa kɔin ɛ, ’de Israɛ‑kɔʋn a di ɩa’ nmi tu. Ɔmɔ ‑nʋɛ’ ke’wlɛ ‑wɛe ʋʋ ’kpa ’de jɛi" ’jedɛsaʋn ’di. ¹⁵’De nyʋ jrʋ’ ‑nɩ ’de aopʋ "klu ke’wlɛ ‑wɛe dɩ nyʋ ‑ʋʋ bla ’o Nikola ’de a nʋa, ‑ʋʋa nʋ ɩ ‑ke. ¹⁶Ɛmɛ ‑tɩ ’ɩn ’naa ‑ɩn ‑juo ‑ma dɛsaʋn "i ‑ɩn ‑je ɛ ’kpʋ "i to‑. ‑Bo ɛ se ‑mɛ nɩ ’ja a, ’ma muɛ ‑too" ’a ’ɩn ’je ji ‑wɛe ’ɩn ’je ‑placnɛ ‑nɩa ’de ’ʋn ’wɔn nʋ ’de ’ɩn ’je ʋʋa’ nyʋ tu tʋ o ‑fɔn’.

¹⁷Nyɔ ‑nɩa doun" "jru ɛ, wlu Kea ’a ‑Suu a ’tmʋa Kea ‑gbi ‑pee ɛ, ɔ po ɛ doun" o ! Nyɔ ‑ɔɔ mua tʋ ’a "jru kpaa’ a, ’ma muɛ ɔ diidɛ ‑ɛ pa ’kwla ’de jaʋn ’di "nyɩa’, ‑wɛe ’ɩn ’je ɔ "soukpo plu "nyɩ ‑ke. ’Nynɩ dee ‑crɩɩa’ ’bo ɛ "kpei ɛ, nyɔ jrɔ’ se ɛ juo‑, ‑bo ɛ se nyɔ ‑ɔɔ mua ɛɛ’ "sou tu ’jea’ nɩ ɛ.

Wlu ‑tmʋʋa’ ’de Tiatii Kea ‑gbu ‑pee ɛ

¹⁸"Ju ’ɩn ’jeea "jriɛ‑ mɔ ‑wlu ’ʋn ‑pee ka ke’wlɛ, ‑ɔ ‑na : Wlu ‑ɩn ‑jea ’crɩ ‑wɛe ‑ɩn ‑jea Tiatii Kea ‑gbu ’a "jrukpɔ’ i ‑tei kpa, ɛ ka :

’Mɔ ‑ɔ ‑nɩa Kea ’a "Ju ‑ɔɔ "jri a wan ka nɛmɩɩɔ nɩa, ‑wɛe ‑ɔɔ bɩ a fan ka ‑tiɛn nɩa, ’ɩn ’naa :

¹⁹’Ɩn juo ‑ma nʋʋdɩ ’mɛ. ‑Ma nyʋ ’a ‑tɩ’ kmaa’ o, ‑ma Kea ‑kwlɩ" ‑tea’ o, ka ‑ma nʋʋa ‑ma de ’di‑wi" "juɔi o, ‑ma pɛe "wɔin ’bɛɛa’ o, ’de ka dɩ ’dɔe ‑ɩn ‑bɔɔa’ de ‑ma nʋa ɩ ‑tia "i ɩ ‑sia ‑jɩ ‑nɩa tɛin" ɛ, ’ɩn juo ‑mɩ ’mɛ ‑ke. ²⁰’Kaa dɛ ‑jɛ ‑sea’ ’ʋn ’tʋn nʋ ’de ‑ma ‑tɩ’ ’ʋn ɛ, ɛmɛ ‑nɩ "junynɔkpao’ ʋʋa ’daa‑ Sesabɛ ‑wɛe ‑ʋa ‑daa’ ʋa’ ‑cɛ" Kea ’a wlu ’kwajaanynɔkpao’ ɛ, ʋmʋ ‑ɩn ‑taai" ‑wɛe ‑ʋa ‑saa ’ma dbonʋʋn ’a "jru ‑jei" ‑wɛe ‑ʋa tɔɔ ʋʋpʋ jɛi" ’jedɛsaʋn, ’de nmi ʋʋ ‑saa ’sraa‑ ʋʋ "nyɩa kɔin ʋʋa di. ²¹’Ɩn "nyɩ ʋ nɔ" ’mɛ ‑wɛe ʋ ’je ʋa’ dɩsaɩn "i juo‑, ’kaa ʋ ’na ʋ se ʋa’ jɛi" ’jedɛsaʋn ’kpʋ "i toi. ²²Ɛmɛ ‑tɩ ’ma ji ʋ ’wɛ‑ "kpei jaa’ ‑wɛe ʋ ’je i ’pɛn ’de ʋ ’je ʋa’ ‑cɛ" wɔn ’je. Nyʋ ‑ʋʋ ‑ke ʋ ’kpa ’de jɛi" ’jedɛsaʋn ’di ɛ, ‑bo ʋʋ se ʋʋa’ dɛsaʋn "i juo ‑wɛe dɩ Sesabɛ a nʋa ʋʋ sɩ kwa ‑sɔn ‑saa a, ’ma muɛ ʋʋpʋ ’kle klaa" "kpei jaa’ ‑ke. ²³’Bo ‑mɛ ’de ɛ, ’ma muɛ ʋa’ "nynuu‑ ’mɛa’ "kpei jaa’ ‑wɛe ka ’ɩn nɩa "ju ‑ɔ ‑jua nyiɔ ’ɔ tɔ’ ’de ‑ɔɔ ‑gbʋn a ’de nyʋ pɛe o ɛ, Kea ‑gbi ‑wee’ "klein ’jɩ juo‑. Dɩ "klein ao nʋa ’mɔ ‑ɔɔ mu ao ɩa’ ‑kei" ‑saa’ due ’due.

²⁴’De aopʋ ‑jɔ ‑nɩa ’de Tiatii Kea ‑gbu ’di ‑wɛe dɩ Sesabɛ a tɔɔa nyʋ ‑ɔ sea ’bo ɩ ’de bla a, dɩ ‑ɩ pa ’kwla ‑wɛe ʋʋa ’daa‑ Satan ’a dɩ ɛ, ao sɩ ’cɩan. Aopʋ mɔ ɛ, ’ɩn se aopʋ kɛ’ jrɛ’ "i ‑tei. ²⁵’Kaa dɛ due’ koʋn ‑gbai’ mɛ ’ma ’tmʋʋ aopʋ‑, ɛmɛ ‑nɩ ‑ta ao kpʋn a ao kpʋn ’bo i mamaʋ ’sʋ ’ɩn ’je ji.

²⁶Nyɔ ‑ɔɔ mua tʋ ’a "jru kpaa’ ‑wɛe ka ’ɩn "sia ’nynɩ ‑ɔɔ mua kan’ nʋa’ mamaʋ ‑ɔ ‑jea nyni ɛ, ’ma muɛ ɔ "ikmaa’ "nyɩa’ ‑wɛe ɔ ’je ’blʋa‑ ‑tuu"‑tuu "jru kpɔ’ i ‑te, ²⁷’de ɔ ’je nɩɩɛkpa ’ble ‑wɛe ɔ ’jɩ i fuo‑. Ɔɔ muɛ ʋʋpʋ i waa’ ka nyɔ ɔ waa jae i ɛ. Ka ’ɩn "Bo "nyɩa ’ma ‑cɛ" ’kpa "ikmaa’ ’bo ’blʋa‑ ‑wee’ "klein "kpei ɛ, ’kamɔ ɔɔ mu nɩa’. ²⁸Nyɔ ‑ɔɔ mua tʋ ’a "jru kpaa’ a, ’ma muɛ ɔ ’cʋ‑sɩɩn ‑ɛɛ fan ‑sɔn’ wɔin" "nyɩa’. ²⁹Nyɔ ‑nɩa doun" "jru ɛ, wlu Kea ’a ‑Suu a ’tmʋa Kea ‑gbi ‑pee ɛ, ɔ po ɛ doun" o !

Wlu ‑tmʋʋa’ ’de Saadɩ Kea ‑gbu ‑pee ɛ

¹"Ju ’ɩn ’jeea "jriɛ‑ ‑nɔ, ɔmɔ ‑wlu ’ʋn ‑pee ka, ɔ ’na : Wlu ‑ɩn ‑jea ’crɩ ‑wɛe ‑ɩn ‑jea Saadɩ Kea ‑gbu ’a "jru kpɔ’ i ‑tei kpa, ɛ ka :

’Mɔ ‑ɔ ‑blea Kea ’a ‑sii ‑mɛ" ’sɔn ke ’cʋ‑sɩɩn ‑mɛ" ’sɔn ɛ, ka ’ɩn ’da ka, ’ɩn ’naa :

’Ɩn juo ‑ma nʋʋdɩ ’mɛ. Nyʋ a ’daa‑ ‑ʋn ’kmʋnɩ i ’mɛ kpɩɩn‑, ’kaa ‑ɩn ‑mɛɛ’. ²‑Ɩn ‑bo i "maeɛ ! Nyʋ ’pla ‑sia ’o ‑wɛe ’kmʋnɩa’ ’a dɛ‑saan" nɩa ’de ’ʋn ɛ, ‑ɩn ‑kuu ʋʋpʋ ’a dɩ i. Dɛ ’ɩn sia "jriɛ‑ o ɛmɛ ‑nɩ ‑ma nʋʋdɩ se ’de ’ma Kea "jri ’dei nmɔɔ‑ ‑ke. ³Ɛmɛ ‑tɩ ’ɩn ’naa : dɩ nyʋ tɔɔa ‑ʋn ɛ, ‑wɛe ‑ɩn ‑jea tɔ’ ’ʋn ɛ, ‑ɩn po ɩ ‑kwlʋ o, ‑ɩn kpʋn ɩa’ dɩ tu i ‑sisi’ ‑wɛe ‑ɩn ‑je ‑ma dɩsaɩn "i juo‑ ’de ‑ɩn ‑jɩ ’kpʋ "i to‑. ‑Bo ‑ɩn se "jriɛ "i ‑te ɛ, ’ma muɛ jia’ ‑wɛe ’ɩn ’je ‑ʋn "jru ‑tiie’, ka "jrii a pa ‑kwlɔ ɛ. Nɔ" ‑ɛ ’di ’ma mua jia’ a, ‑ɩn se ɛɛ juo i. ⁴’Bo Saadɩ Kea ‑gbu ’di ɩ, ‑ma ’cɛ jrʋ ‑nɩ ’o ‑ke ‑ʋʋ se ʋʋa’ ’ʋnpaadɩ ‑flɛn" kpʋʋn‑. Ʋʋa’ nyʋ tu ɛ, ʋʋa muɛ dɩ pli ’ʋnpaa ‑wɛe ʋʋ ke ’ma ‑a ‑je na‑, dɛ‑nʋɛ’ ʋʋ nɩɛ ɛɛ’ ka‑.

⁵Nyɔ ‑ɔɔ mua tʋ ’a "jru kpaa’ a, ɔɔ muɛ dɩ pli ’ʋnpaa kan’ ‑ke. ’Ɩn se ɔɔ’ ’nynɩ ’mʋʋi ’de ’kmʋnɩsbɛ ’di. ’Ma muɛ ɔɔ’ ’nynɩ "sia’ ’bo ’ʋn "Bo ke ɛɛ’ "sʋɩ "juɔi. ⁶Nyɔ ‑nɩa doun" "jru ɛ, wlu Kea ’a ‑Suu a ’tmʋa Kea ‑gbi ‑pee ɔ po ɛ doun" o !

Wlu ‑tmʋʋa’ ’de Filadɛfi Kea ‑gbu ‑pee ɛ

⁷"Ju ’ɩn ’jeea "jriɛ‑ mɔ ‑wlu ’ʋn ‑pee ka, ɔ ’na : Wlu ‑ɩn ‑jea ’crɩ ‑wɛe ‑ɩn ‑jea Filadɛfi Kea ‑gbu ’a "jrukpɔ’ i ‑tei kpa, ɛ ka :

’Mɔ ‑ɔ ‑wlʋa ’de Kea ’ʋn ‑wɛe ‑ɔ ‑nɩa tɔ’ ‑tɩ ɛ, ‑da’kle‑ ‑ɛ ‑nɩa ’de ’beɔ Dafidɩ ’kwa tɛin" ɛ, ’mɔ ɛ nɩ ’e ’kwa. ‑Bo ’mɔ kain ’bo ‑gbɛin" nyɔ ‑jea ’o kan, ɔ se nɩ‑. ’De ‑bo ’ɩn kan ’o ‑gbɛin" nyɔ ‑jea ’o kain, ɔ se nɩ‑. ’Ɩn ’naa :

⁸’Ɩn juo ‑ma nʋʋdɩ ’mɛ. ‑Ɩn ‑gbʋn ’nɔ, ’ɩn kaiɛn ‑gbɛin" ‑je wɔn ’bo ‑ʋn "juɔi, nyɔ jrɔ’ se ɛ ’bɛɛ‑ ɔ ’je ɛ "wɔin kan‑. ‑Ɩn se ’kpɩ ‑tuu" ’ble ‑mɔ, ’kaa ka ‑ma ‑jea ’ma wlu wɔn ‑wɛe ‑ɩn sea ’ma ’nynɩ ’a ‑tɩ’ o ’bɔ ɛ, ’ɩn juɩ’. ⁹‑Ɩn ‑gbʋn ’nɔ, nyʋ ‑ʋʋa ‑daa’ ʋʋa’ ‑cɛ" Suifʋ ‑wɛe ‑ʋʋ se ɛ nɩ ’de ‑ʋʋa ‑tmʋa sɩ ɛ, ʋʋa’ "jrui ’kɩɩn‑gbu Satan ’blea, ’ma muɛ nʋa’ nyʋ ’je ’de ’wlʋ ’de ʋʋ ’je ’kɔi‑ i "sii‑ ’bo ‑ʋn "juɔi, ’de ka ’ɩn kma ‑ma ‑tɩ’ ɛ, ʋʋ ’je ɛ juo‑. ¹⁰Dɛ ‑ɩn ‑bɛɛa’ pɛe "wɔin ‑wɛe ‑ɩn ‑jea ’ma wlu wɔn, ɛmɛ ‑tɩ ’ma mu ‑mi i fua’ ‑wɛe ‑sɔntɩ ’kle klaa" a mua jia’ ’de ’blʋa "kpei ɛ ’jea nyʋ ‑wee’ i ‑tɩn’, ɛ se ‑mii" blai. ¹¹’Ɩn se ’ʋn ‑kwlei ’ma jea ji. Dɛ ‑ɩn ‑blea ‑ɩn kpʋɛn i ‑sisi’, ‑wɛe nyɔ jrɔ’ je ‑ma ‑kei" Kea ‑teea ‑ʋn ’dei kpa.

¹²Nyɔ ‑ɔɔ mua tʋ ’a "jru kpaa’ a, ’ma muɛ ɔ ’ma Kea ’a ‑gbu" ’a ‑kwea’ ‑gbaatu ’ʋn nʋʋa’ ‑wɛe ɔ se ‑kwlin ’wlʋi ’bode. ’Ma muɛ ’ma Kea ’a ’nynɩ ke ɛɛ’ ‑kwlɔ ’ɔ ’nynɩ ’crɩa’ ’bo ɔ "kpei, ɛmɛ ‑nɩ Selisalɛm ‑kwlɔ ‑dee ‑ɛ ‑wlʋa ’bo ’ma Kea ‑pʋn" ’de jaʋn ’di, ɛ ke ’ma ’nynɩ dee ke. ¹³Nyɔ ‑nɩa doun" "jru, wlu Kea ’a ‑Suu a ’tmʋa Kea ‑gbi ‑pee ɛ, ɔ po ɛ doun" o !

Wlu ‑tmʋʋa’ ’de Laodise Kea ‑gbu ‑pee ɛ

¹⁴"Ju ’ɩn ’jeea "jriɛ‑ ‑nɔ, ɔmɔ ‑wlu ’ʋn ‑pee ka ke’wlɛ ‑ɔ ‑na : Wlu ‑ɩn ‑jea ’crɩ ‑wɛe ‑ɩn ‑jea Laodise Kea ‑gbu ’a "jru kpɔ’ i ‑tei kpa, ɛ ka :

’Mɔ ‑ɔɔ ’nynɩ nɩa Kɩɩn, ‑wɛe ‑ɔɔ ‑tmʋa tɔ’ ‑tɩ ’de ‑ɔɔ’ pooa wlu fai" ɛ, dɩ "klein Kea nʋa ’mɔ ɩ tba ’e "jri. ¹⁵Dɛ ’ma ’tmʋa ‑ʋn ‑pee, ɛ ka, ’ɩn ’naa :

’Ɩn juo ‑ma nʋʋdɩ ’mɛ. Ka ‑ɩn sea dee’ nɩ‑ ’de ‑ɩn sea ’jrʋ ’ʋn nɩ ɛ, ’ɩn juɩ’. ‑Bo ‑ɩn ‑je dee’ nɩ ɛ, ‑mɛ ‑ɩn ‑nɩ dee’, ’de ‑bo ‑ɩn ‑je nɛ’ nɩ ɛ, ‑mɛ ‑ɩn ‑nɩ nɛ’ ! ¹⁶‑Jɛ ‑ɩn ‑nɩa "blɛu blɛu ‑wɛe ‑ɩn sea dee’ nɩ‑, ’de ‑ɩn sea nɛ’ nɩ ɛ, ’ma muɛ ‑ʋn wɔn ‑saa’. ¹⁷‑Ɩn ‑na ‑ɩn ‑nɩɛ "wliiɛjei, ‑ma ’dɔɔ nmɔ’, dɛ jrɛ’ se ‑ʋn ’kwa ‑pɔn. ’De ka ‑ɩn ‑nɩa "nmianyɔ ‑wɛe ‑ɩn ‑blea wɛe‑, ’de nɩɩa" a ’dba ‑ʋn ‑wɛe ‑ma "jri wa ’de ‑ɩn cɛan kui’ ‑ɩn sɩ juo‑. ¹⁸’De ɛɛ’ ‑tɩ ’ʋn, ’ma ‑tuɛ" ‑ʋn ’snɩ ‑ɩn ji ’sani ‑tɩn’ ’nɔ ’ʋn o. Ɛɛ’ ’sani tu jiiɛ ’bo nɛ ’ʋn ‑wɛe ɛ nɩ ’pepe, ’de ‑ɩn ‑je "wliiɛjei ‑cɛɛn’ ’kpa. ‑Ɩn ji ’ʋnpaadɩ plu ‑tɩn’ ‑wɛe ‑ɩn ‑je ’ʋnpaa‑ ’de ‑ɩn je kui cɛn ‑wɛe ‑tɩn’ je ‑mii" ’dbaa. ‑Ɩn ji "jri kɔun ‑tɩn’ ‑wɛe ‑ɩn ‑je "jri po ’de ‑ma "jri ’je i ’je. ¹⁹Nyʋ ‑ʋʋa ‑tɩ’ ’ɩn kma a, ʋʋpʋ ’ma ‑cɛ’ "bli ‑wɛe ’ma ‑sa kplɩn ’kwa i. ‑Jɛ ɛ nɩa kan’ ‑mɔ ’ja a, ‑mɛ ‑ɩn ‑duo" ’kpɩ ’ʋn ‑wɛe ‑ɩn ‑je ‑ma dɩsaɩn "i juo‑ ’de ‑ɩn ‑jɩ ’kpʋ "i to‑. ²⁰‑Ɩn ‑gbʋn ’nɔ, ’ɩn ka, ’ɩn nɩɛ ’bo ‑gbu" wɔ, ‑wɛe ’ma bla klu. Nyɔ "o nyɔ ‑wɔan ’ma klublawlu ‑wɛe ‑ɔ ‑kain ‑a ’bo ‑gbɛin" ɛ, ’ma muɛ ’de ɔ o ‑gbu" paa’ ‑wɛe ’ɩn ke ɔ ’je sʋn ‑tadue po.

²¹Nyɔ ‑ɔɔ mua tʋ ’a "jru kpaa’ a, ’ma muɛ nʋa’ ‑wɛe ɔ ke ’ma ‑a ‑je ’o ’ma ’beɔkpa‑tɛ "kpei ‑te. Ka ’mɔ kpa tʋ ’a "jru ‑wɛe ’ɩn ke ’ɩn "Bo ‑tea i ’bo ɛɛ’ ’beɔkpa‑tɛ "kpei ɛ. ²²Nyɔ ‑nɩa doun" "jru ɛ, ‑mɛ wlu Kea ’a ‑Suu a ’tmʋa Kea ‑gbi ‑pee ɛ, ɔ po ɛ doun" o !

Kea "juɔi ‑gbɛɛ’ sʋn ‑nɩa ’e jaʋn ’di ɛ

¹Dɩ ‑nɩa ’mʋa‑ ‑mɩ ’wlʋa ’o ‑jei" ’sʋ ɛ, ’ɩn ’jeeɛ ‑gbɛin" ‑je "jriɛ‑ ‑ɛ ‑kain wɔn ’bo jaʋn‑kwlʋ. ’Sʋ wlu ’ɩn ’wɔan tɛin" ‑wɛe ka ‑kaʋn ’a wlu nɩa ‑ɛ ‑nɩa kan’ a, ɛ wluɛ ’ʋn ‑pee ke’wlɛ, ɛ ’na : ‑Ɩn ‑ja ‑ta, ‑wɛe dɩ ‑ɩ ‑jea nʋʋɛ ’bo ‑mɛ ’de, ’ɩn ’jɩ ‑ʋn tɔɔ‑.

²’Bo ɛ "sri Kea ’a ‑Suu "ji ’de ’ʋn ‑wɛe ’ɩn ’jee‑ ’beɔkpa‑tɛ due’ "jriɛ‑ ’de jaʋn ’di. ’Bo ɛɛ’ ’beɔkpa‑tɛ ‑tu "kpei, nyɔ jrɔ’ ‑te ’o. ³Ɔɔ’ "jua‑ a fan’ ka "sei‑kɩɩ ‑ɩ ‑nmɔa "jrii a fan, ’kamɔ ɛ nɩ‑. Ɩa’ "sei tu ’a ’nynɩ ‑nɩ Sasipʋ ke Sadoanɩ ke‑. "Ni ’a bli’ ɛɛ ’dba a, ɛmɛ ‑pin’ ɔɔ’ ’beɔkpa‑tɛ ’dei ‑wɛe ‑ɛɛ fan ka "sou‑kea’ nyʋ a ’daa‑ Emerodɩ nɩa.

⁴’Ɩn ’jeeɛ ’beɔkpae ’a kwla ’sɔɔn ’jɔ ‑nyiiɛ "jriɛ‑ ‑ke ‑wɛe ‑ɩ ‑gbae’ ɛɛ’ ’beɔkpa‑tɛ ‑tu ’dei. ’Bo ɩ "kpei ɛ, nyʋ‑cɔɩn’ ’a kwla ’sɔɔn ’jɔ ‑nyiiɛ ‑te ’o. Ʋʋ ‑wee’ paa dɩ plu ’ʋn ‑wɛe ʋʋ ‑tu" ’sani tʋ"bofan nʋa "jru. ⁵‑Ta ’beɔkpa‑tɛ ‑nɛ nɩa ’bo a crɛ "jrii ‑blɛ ‑blɛ ka "ni a crɛa "jrii ɛ, ‑wɛe wlu ‑tuu"‑tuu ke "ni ’a "planwlu a ’wlʋ ’o ‑ke. ’Bo ɛɛ’ ’beɔkpa‑tɛ ‑tu "juɔi ɛ, ’ɩn ’jeeɛ ‑tai ‑mɛ" ’sɔn "jriɛ‑ ‑wɛe ‑ɩa wan, ɩmɩ ‑nɩ Kea ’a ‑sii ‑mɛ" ’sɔn. ⁶’De ‑tai ‑mɛ" ’sɔn ‑nɩ "juɔi ɛ, "nifla’ klaa" ‑nɩ ’o ‑ɛ ‑te "jri tein kpee.

’Ɩn ’jeeɛ ’kmʋnɩdɩ ‑nyiiɛ’ "jriɛ‑ ’de ’beɔkpa‑tɛ ‑nɛ ‑pʋn" ‑ɩ ‑gbae’ ɛ ’dei. Ɩ ‑wee’ nɩɛ "jri kui’ ’de nya o ’de de o. ⁷Ɩa’ ‑jɛ ‑saa "i ɛ, ka ‑plaa nɩa, ’kamɔ ‑mɛ nɩ‑. Ɩa’ ’sɔɔn ‑nɛ ke bli’ beɔ ‑tɔo ‑kooɔ’. Ɩa’ taan ‑nɛ ’bleɛ nyiɔ ’ɔ "jua‑, ‑wɛe ɩa’ ‑nyiiɛ ‑nɛ ke ‑cii" ‑ɛɛ ‑wan" ‑kooɔ’‑. ⁸’De ’kmʋnɩdɩ ‑nyiiɛ’ ‑nɩ, ɩ ’bleɛ kpoa" wli ‑mɛɛo"‑ due ’due ‑wɛe ɩa’ ku ‑wee’ nɩ "jri ’a ’sʋ ‑ta "o ‑ta. ’Kamɔ ɩa ‑gbɛɛ’ Kea jeejee ’de "maʋ’wɩ o, ’jrʋ ‑gbaowɩ ’di, ɩa wlu’ ka, ɩ ’na :

Tʋ"bo Kea, ɛ ‑kwɛ‑ i, ɛ ‑kwɛ‑ i, ɛ ‑kwɛ‑ i ɛmɛ "ikmaa’ ‑wee’ "klein nɩa ’e ’kwa a, ɛ nɩɛ ’kmʋ tɛin" ‑wɛe ɛ nɩ ’kmʋ ‑sɩan, ’de ɛɛ mu jia’, ɛɛ’ dɩ ‑wee’ "klein ‑teeɛ "i ‑wɛe ɛ ‑kwɛ‑ i kpɛ taan !

^9-10"Ju ‑tea i ’bo ’beɔkpa‑tɛ "kpei ‑wɛe ‑ɔ ‑nɩa ’kmʋ jeejee ɛ, ka ’kmʋnɩdɩ ‑nyiiɛ ‑nɩ a ‑tea’ ɔɔ’ ni’ ‑wɛe ɩa ’bɛɛa ɔɔ’ ’nynɩ "i ’de ɩa po ɔ ’sɛ‑ ɛ, ’kamɔ nyʋ‑cɔɩn’ ’a kwla ’sɔɔn ’jɔ ‑nyiiɛ ‑nʋ a "sii‑ ’kɔi‑ i ’bo ɔ "juɔi ‑wɛe ʋʋa ‑gbɛɛ’ ɔ, ’de ʋʋ ‑sa ʋʋa’ tʋ"bofan "jru ‑wɛe ʋʋ po ɩ ’bo ɔɔ’ ’beɔkpa‑tɛ "juɔi, ’de ʋʋa ’nʋ :

¹¹‑Aa Tʋ"bo Kea, ɛ ‑nɩɛ ɛɛ’ ka ‑wɛe nyʋ ’je ɛɛ’ ni’ ‑te’, ’de nyʋ ’je ɛɛ’ ’nynɩ "i ’bɛɛ‑, ‑wɛe nyʋ ’je ɛɛ’ "ikmanynɩ kpaa‑, dɛ‑nʋɛ’ ɛmɛ ‑nʋ’ dɩ ‑wee’ "klein, ’de ɛɛ’ ‑kwlʋtɩ ’ʋn mɔ ɩ ‑wee’ nʋʋɛ ‑wɛe ɩ nɩ ’kmʋ !

’Sbɛpun‑ ke ’blaaju ke

¹’Sʋ ’ɩn ’jeeɛ ’sbɛpun‑ due’ "jriɛ‑ ’de "ju ‑tea i ’bo ’beɔkpa‑tɛ "kpei ’a diansʋn ’kwa. ’De ɛɛ’ ’sbɛ tu "kpei ke ’di ‑wee’ ’crɩɩɛ ‑wɛe dɩ ‑kɛn’ "wɔin ɛ, ɩ nɩ kpɛ ‑mɛ" ’sɔn. ²’De ’ɩn ’jee Kea ’a "soai ‑kmai" "jriɛ‑ ‑wɛe ɔɔ kpa wlu "jɛi ɔɔ ’tmʋʋ‑ nyʋ ‑wee’, ɔ ’naa : Nyɔ ‑jɔ ‑nɩ ’sbɛpun‑ ‑nɛ ’ɛ "wɔin kain ka ‑wɛe ‑ɔ ‑je ɛ’ ’kpɩn ’di ‑sa a‑ ? ³’Kaa nyɔ ‑jea ’e jaʋn ’di o, ’nɔ ’blʋa‑ "kpei o, ’de ‑klu’ ’wlʋ ‑wɛe ‑ɔ ‑je ɛ "wɔin kain ’de ‑ɔ ‑je ɛ ja ‑gbʋn, ɔ se nɩ‑. ⁴’Sʋ ’ma ‑fɩɩn", dɛ‑nʋɛ’ nyɔ ‑jea ’sbɛpun‑ ‑nɛ ’ɛ "wɔin kain ka o, ɛɛ’ ja ‑gbʋn ‑ka nɩ, ɔ se nɩ‑. ⁵Nyʋ‑cɔɩn’ ‑wi" ’a due’ wlu’ ’de ’ʋn ‑pee ɔ ’na : ‑Ɩn ‑bo ‑fɩn" ɛ, ‑ɩn ‑gbʋn ’nɔ, "ju ka ‑plaa nɩa ‑ɔ ‑nɩa kan’ ‑ɔ ‑wlʋa ’e Suida ’a ‑nɛ ‑kwlʋn ke Dafidɩ ’a "ji ’di ɛ, ɔ kpa tʋ ’a "jru ’mɛ ‑wɛe ɔ ’je ’sbɛpun‑ ’a ’kpɩn ‑mɛ" ’sɔn ‑nɩ cɛn ’de ɔ ’jeɛ "wɔin kain‑.

⁶’Ma ‑gbʋn a ’e ’sʋ ’ɩn ’jeeɛ ’blaaju due’ "jriɛ‑ ’bo ’beɔkpa‑tɛ ’ɛ ‑kwea’‑, ‑ɛ ‑nyna i ’bo ’kmʋnɩdɩ ‑nyiiɛ’ ke nyʋ‑cɔɩn’ ’a kwla ’sɔɔn ’jɔ ‑nyiiɛ ’a ‑kwea’‑. Ɛɛ’ ’blaaju ‑kɔ’ dɛ ʋʋ ‑saa ’sraa‑. Ɛ ’bleɛ ‑gbɩn ‑mɛ" ’sɔn ke "jri ‑mɛ" ’sɔn ‑ke, ɩmɩ ‑nɩ Kea ’a ‑sii ‑mɛ" ’sɔn ɛ dboa ’de ’blʋa‑ ‑wee’ "kpei ɛ. ⁷’Sʋ ’blaaju ’kpa ’o ’wɛ ‑wɛe ɛ kpʋn ’sbɛpun‑ ’de "ju ‑tea i ’bo ’beɔkpa‑tɛ "kpei ’a diansʋn ’di. ⁸Ɛ "dua ’sbɛpun‑ ‑nɛ ’ʋn ’sʋ, ’kmʋnɩdɩ ‑nyiiɛ ‑nɩ o, nyʋ‑cɔɩn’ ’a kwla ’sɔɔn ’jɔ ‑nyiiɛ ‑nʋ "siiɛ ’kɔi‑ i ’bo ɔ "juɔi ‑wɛe ʋʋ ’ble ‑siplʋ kwa due ’due, ’de ʋʋ ’ble ’sani ’sɛti ‑jia" ‑dai’kwlɔ ’di kwa. ‑Dai’klɔ ‑nɛ mɛ ‑nɩ Kea ’a ‑jei" naaʋn ’a baewlu. ⁹’Sʋ ʋʋ ‑teɛ ’dʋ dee ble ’a ‑pʋn" ʋʋ ’na :

‑Mɔ ‑nɩ ’sbɛpun‑ ‑nɛ ’ɛ ’ʋn "duo‑ ka, ‑wɛe ‑ɔ ‑jeɛ "wɔin kain‑, dɛ‑nʋɛ’ ʋʋ ‑saa ‑ʋn ’sraa‑, ‑wɛe ‑ma nymɔ seie nyʋ a "ji ‑wee’ o, wlu ’a kpɛ ‑wee’ nyʋ a poa o, ’blʋa ’a blo’ wɔn ‑wee’ o, nyʋ ’a ’blee‑blʋa ‑wee’ ’dii ’de ʋʋ ‑nyɩ" ʋʋpʋ Kea. ¹⁰‑Ɩn nʋɛ ʋʋpʋ Kea ’a nyʋ ’ʋn ‑wɛe ɛ ’je ’beɔ nɩ‑, ’de ʋʋ ’je ‑aa Kea "juɔi nʋʋ, ‑wɛe ʋʋ ’je ’blʋa‑ ’ble.

¹¹’Ma ‑gbʋn a ’e mu ’sʋ ’ma ’wɔn Kea ’a "soa ‑tuu"‑tuu ’a wlu ’beɔkpa‑tɛ ’dei ‑ta "o ‑ta, ‑wɛe ʋʋ ‑pin’ ’kmʋnɩdɩ ‑nyiiɛ ‑nɩ o, nyʋ‑cɔɩn’ ’a kwla ’sɔɔn ’jɔ ‑nyiiɛ ‑nʋ ’dei. Ʋʋa’ Kea ’a "soa tu cɛn ‑kwlʋ ‑te "wlu ’di "wlu ‑te ‑kwlʋ ’di "kpei ‑tie". ¹²Ʋʋa kpa wlu "jɛi ‑wɛe ʋʋa wlu ka, ʋʋ ’na :

’Blaaju ‑ɔ ‑saa ’sraa‑ ’ʋn ɛ, ɔ nɩɛ ɛɛ’ ka ‑wɛe nyʋ ’je ɔ "ikmaa’ o, "wliiɛ‑ ’bleea’ o, tɔ’ ’dinɩa’ o, ’kpɩ ’blea ’a ’nynɩ kpaa‑. Ɔ nɩɛ ɛɛ’ ka ‑wɛe nyʋ ’je ɔɔ’ ni’ ‑te’, ʋʋ ’je ɔɔ’ ’nynɩ "i ’bɛɛ‑ ’de nyʋ ’je ɔ "diwan po.

¹³’Sʋ dɩ "klein Kea nʋa ‑wɛe ‑ɩ ‑nɩa ’e jaʋn ’di o, ‑ɩ ‑nɩa ’nɔ ’blʋa‑ "kpei o, ‑ɩ ‑nɩa ’e ‑klu’ o, ‑ɩ ‑nɩa ’e ’tɔniɛ "kpei o, ‑ɩ ‑nɩa ’e ’tɔniɛ ‑sɔn o, ’ɩn ’wɔn ɩ ‑wee’ ’a wlu ɩ ’na :

"Ju ‑tea i ’bo ’beɔkpa‑tɛ "kpei ke ’blaaju ke, ‑a ‑bɛɛ’ ʋʋa’ ’nynɩ "i, ‑a po ʋʋpʋ ’sɛ‑, ‑a ‑te’ ʋʋa’ ni’, ‑a ‑kpa ʋʋpʋ "ikmaa ’a ’nynɩ ’de ‑sʋn "o ‑sʋn ’di.

¹⁴’Sʋ ’kmʋnɩdɩ ‑nyiiɛ’ ‑nɩ ’na : Kɩɩn, ’kamɔ ɛ nɩ‑. ‑Wɛe nyʋ ‑cɔɩn‑wi" ‑mʋ "sii‑ ’kɔi‑ i ’de ʋʋa ‑gbɛɛ’.

’Sbɛpun‑ ’a "wɔinkandɩ

¹’Ma ‑gbʋn a ’e mu ’sʋ, Kea ’a ’blaaju cɛn ’kpɩn ‑mɛ" ’sɔn ‑ɩ ‑blaa ’sbɛpun‑ pun ’di ‑nɩ ’a "i‑saa ‑nɛ ’mɛ ’sʋ ’kmʋnɩdɩ ‑nyiiɛ’ ‑nɩ ɩa’ due’ wlu’. Ɛɛ’ wlu ’ɩn ’wɔan a, ka ‑tɛn ɛ "plan a, ’kamɔ ɛ nɩ‑. Ɛ ’na : ‑Ɩn ji ! ²’Ma ‑gbʋn a ’e mu ’sʋ soo" plu due’ ‑taan’. "Ju ‑tea ’bo ɛ "kpei ɛ, ɔ ’bleɛ plʋ. Tʋ"bofan ‑bo nyɔ kpa tʋ ’a "jru ‑wɛe nyʋ a "nyɩ ɔ, ɛmɛ ʋʋ "nyɩ ɔ. Ɔ nɩɛ tʋ ’a "jru kpai ‑o ‑wɛe ɔ ’je tʋ ’a "jru kpa ke’wlɛ.

³’Bo ‑mɛ ’de ɛ, ‑bo Kea ’a ’blaaju kain ’sbɛpun‑ ’a ’kpɩn ’a kpɛ ’sɔɔn ‑nɛ "wɔin ’sʋ ɛ, ’ɩn ’wɔn ’kmʋnɩdɩ ‑nɩ ’a ’sɔɔn ‑nɛ ’ɛ wlu. Ɛ ’na : ‑Ɩn ji ! ⁴’Sʋ soo" jrɛ’ ‑taan’, ‑mɛ ‑sain’. "Ju ‑tea ’bo ɛ "kpei ʋʋ "nyɩ ɔ "ikmaa’ ‑wɛe ɔ ’je pɛe ’a blua’ ’de ’blʋa‑ "kpei ‑sa, ’de nyiɔpʋ‑ ’e ba ’dba. Ʋʋ "nyɩ ɔ ‑cnɛ klaa" ‑ke.

⁵’Bo ‑mɛ ’de ɛ, Kea ’a ’blaaju kaian ’sbɛpun‑ ’a ’kpɩn ’a kpɛ taan ‑nɛ "wɔin, ’sʋ ’ɩn ’wɔn ’kmʋnɩdɩ ‑nɩ ’a taan ‑nɛ ’ɛ wlu, ɛ ’na : ‑Ɩn ji ! ’Ma ‑gbʋn a ’e ’sʋ ’ɩn ’jeeɛ soo" jre due’ "jriɛ‑. "Ju ‑tea ’bo ɛ "kpei ɛ, ɔ ’bleɛ dɛ dbaadɛ kwa. ⁶’Sʋ ɛ ‑kɔ’ ‑na ’ɩn ’wɔn wlu jrɛ’ ‑ɛ ‑wlʋ ’e ’kmʋnɩdɩ ‑nyiiɛ’ ‑nɩ "klu, ɛɛ’ wlu tu ’na : Nyʋ ’je ’wɩ due’ dbo ’a ‑kei" ’ʋn "duo‑ ‑o, ‑wɛe ʋʋ ’je fai’pʋ ’a ’kɛinkɛ due’ ‑tɩn’. ’De nyʋ ’je ’wɩ due’ dbo ’a ‑kei" ’ʋn "duo‑ ke’wlɛ ‑wɛe ʋʋ ’je ko ’a ’kɛinkɛ taan ‑tɩn’. ’Kaa ‑ɩn ‑bo ’cna ke nmɔ ‑mɩ "i blaa.

⁷Kea ’a ’blaaju kaian ’sbɛpun‑ ’a ’kpɩn ’a kpɛ ‑nyiiɛ ‑nɛ "wɔin ’sʋ ɛ, ’ɩn ’wɔn ’kmʋnɩdɩ ‑nɩ ’a ‑nyiiɛ’ ‑nɛ ’ɛ wlu, ɛ ’na : ‑Ɩn ji ! ⁸’Ma ‑gbʋn a ’e ’sʋ ’ɩn ’jeeɛ soo" due’ "jriɛ‑, ‑mɛɛ’ soo" tu kpa kpea’ ‑jei". "Ju ‑tea ’bo ɛ "kpei ɛ, ɔɔ’ ’nynɩ ‑nɩ ’mɛa’. ‑Wɛe "ju ʋʋa ’daa‑ ’mɛʋn ’a ‑kwlɔ ‑mɔ kɔn ’bo ɔ ’de. Ʋʋ "nyɩ ʋʋpʋ "ikmaa’ ‑wɛe ʋʋ ’je ’blʋa ’a ’fɔ ‑nɩa ‑nyiiɛ ’ɛ due’ ’ble, ’de ʋʋa ’dbaa nyʋ ‑cnɛ "i, ʋʋa nʋɛ’ ‑wɛe ’mɩɩɛ‑ o, ’wɛ‑ o, ’kwla ’dinmi a ’dba nyʋ.

⁹Kea ’a ’blaaju kain a ’sbɛpun‑ ’a ’kpɩn ’a kpɛ ‑mm" ‑nɛ "wɔin ’sʋ ɛ, ’ɩn ’jeeɛ ‑sii ‑tuu"‑tuu "jriɛ‑ ’bo Kea ’a ’sraa ‑sa ’ɩn ‑sɔn. Nyʋ ‑ʋʋ ‑jea Kea ’a wlu tɔ’ ’ʋn ‑ʋʋ ‑tmʋ ɛ, ‑wɛe nyʋ ʋʋ ’dba ’de ɛɛ’ ‑tɩ’ ’ʋn ɛ, ʋʋa’ ‑sii ‑o. ¹⁰’De ʋʋa kpa wlu "jɛi ʋʋa wlu ka, ʋʋ ’na : Tʋ"bo Kea ! ‑Aa ’Blei, ‑mɔ ‑kwɛai ‑wɛe ‑ɔɔ ‑tmʋa tɔ’ ‑tɩ ɛ, blaanɔ" nyʋ ‑ʋʋ ‑dba’ ‑a ‑kwlɔi ’de ’blʋa‑ "kpei ‑ɩn ‑je ʋʋpʋ ’a ’pee ’je ‑wɛe ‑ɩn ‑je ‑aa nymɔ kpan o ‑sa a‑ ? ¹¹’Sʋ ʋʋ "nyɩ ʋʋpʋ "bai plu due ’due, ‑wɛe ʋʋ wlu ʋʋpʋ ‑pee ka, ʋʋ ’na : Ao ‑te i dɛ‑saan" ke, ao ’je ’o fɔn‑ mamaʋ ’sʋ aoa’ de’di ‑wi" ‑ʋʋ ‑ke ao nʋa Kea ’a dbo ‑tadue ɛ, ʋʋa’ ‑tisʋn ’je ’o nyni, dɛ‑nʋɛ’ ka ’kmʋ "kpeinyʋ ’dba aopʋ ɛ, ’kamɔ ʋʋa mu ʋʋpʋ ’dbaa’ ‑ke.

¹²’Ma ‑gbʋn a ’e ’sʋ Kea ’a ’blaaju kaiɛn ’sbɛpun‑ ’a ’kpɩn ’a kpɛ ‑mɛɛo"‑ ‑nɛ "wɔin ’sʋ ’blʋa‑ crɛ’ ‑klikli, ’jrʋ ‑wee’ ‑saa "i, ɛ kpe’ ‑plipli ka tae’ jre nɩa. ’Cʋ ‑wee’ ‑saa "i, ɛ ‑sain’ ‑crɩɩ’ ka nymɔ nɩa, ¹³‑wɛe ’cʋ‑sɩɩn a ’wlʋ ’e jaʋn ’di, ɩa blu ’nɔ ’blʋa‑ "kpei. Ka poɔ’ klaa" a jiia crootu ’ʋn ‑wɛe ɛɛ’ ‑pɔe" a ’wla a, ’kamɔ ɛ nɩ‑. ¹⁴’Sʋ jaʋn ’wlʋɛ ‑jei" ka nyɔ ɔ ’fea srɛ’, ’kamɔ ɛ nɩ‑. ’Sʋ crʋɩ o, ’blʋa‑ ‑nɩa "ni ’a du ’dii o, ɩ ‑wee’ ’wlʋɛ ‑kwlin’. ¹⁵’De ɛɛ’ nɔ" tu ’di ɛ, ’beɔ‑wi" ‑nɩa ’blʋa‑ "kpei‑ o, nyʋ ‑jeopoʋn o, "sʋɩ ’a klae" o, "wliiɛjeʋn o, "ikmaʋn o, kʋɔnpʋ‑ o, ‑cɛ" ‑peeteʋn ke ʋʋ ‑wee’ "klein a pa ’kwla ’de crʋɩ ’a ‑kwlewɔn ’dii ke "sʋɩ‑ klae" ‑sɔin. ¹⁶’De ʋʋa wlu crʋɩ ke ’soa‑ ‑pee, ʋʋ ’na : Ɩ blu ’de ‑a "kpei ‑wɛe ɩ ’je ‑a ’kwla ‑tu" ’de "ju ‑tea i ’bo ’beɔkpa‑tɛ "kpei je ‑a "jriɛ‑ ’jee‑ ‑wɛe ɛɛ’ ’blaaju je ‑a ’cɛn i kpaa’‑, ¹⁷dɛ‑nʋɛ’ ʋʋa’ ’cɛnkpa‑ sɔn klaa" ‑sɩn’ ‑wɛ‑. ’De nyɔ ‑jɔ ‑je ‑mɛ ’ɛ ‑sɔn’ tu "juɔi nyna ’nɔ ’kmʋ ɛ‑ ?

Nyʋ ’a ‑kwlʋ ’a ‑puue ’jɔ ‑nyiiɛ "wlu ‑nyiiɛ (144 000)

¹’Bo ‑mɛ ’de ɛ, ’ɩn ’jeeɛ Kea ’a "soa‑wi" ‑nyiiɛ "jriɛ‑ ‑wɛe ‑ʋʋ ‑nyna ’blʋa ’a ’fɔ ‑nɩa ‑nyiiɛ o i ’de ‑ʋʋ kpʋn poɔ’ ‑nɩa ‑nyiiɛ i ‑wɛe ɩ je ’blʋa‑ o, ’tɔniɛ o, tu "o tu ’ʋn jii ’nɔ ’kmʋ "kpei. ²‑Wɛe ’ɩn ’jee‑ Kea ’a "soai jrɔ’ "jriɛ‑ ’de ’jrʋ ’a ’wlʋ ’ɩn fɔ o, dɛ ’kmʋnɩ Kea a ‑tuu" a nyʋ juo’ɩn ɛ, ɛmɛ ‑mɔ ’ble kwa. ’De ɔ kpa wlu "jɛi kpleiin ‑wɛe ɔ wlu Kea ’a "soa ‑nyiiɛ ‑nʋ ‑pee. Ʋʋa’ Kea ’a "soa tu ɛ, ʋʋ ‑teɛ ’blʋa‑ ke ’tɔniɛ ’a dooa ‑tɩ’ ’a kein"ke. ³’Kaa ɔ ’na : Ao ’bo ’blʋa‑ ke ’tɔniɛ ke ti dɛsaʋn "jrii nʋʋɛ ! Ao fuo ‑aʋn, ‑bo ‑a ‑kɔ’ ‑aa Kea ’a dbonʋʋn ’a "jua‑ juo ’ɩn ‑tu" ’a ‑wɛe. ⁴’Sʋ nyʋ ‑ʋʋ ‑tuua" juo ’ɩn ɛ, ’ɩn ’wɔn ʋʋa’ ‑tisʋn ’a ’nynɩ : ʋʋ ’wlʋɛ ’de Israɛ‑kɔʋn ’a ‑kwlʋn ‑nɩa ‑puue ’jɔ ’sɔɔn ’dii ‑wɛe ʋʋ nɩɛ ‑kwlʋ ’a ‑puue ’jɔ ‑nyiiɛ "wlu ‑nyiiɛ (144 000). ⁵Nyʋ ’a ‑kwlʋ due’ "wlu ’sɔɔn (12 000) ‑wlʋ ’e ‑kwlʋn "o ‑kwlʋn ’di :

nyʋ ’a ‑kwlʋ due’ "wlu ’sɔɔn ’wlʋɛ ’e Suida ’a "ji ’di,

‑kwlʋ due’ "wlu ’sɔɔn ’wlʋɛ ’e Ruibɛn ’ɛ "ji ’di,

‑kwlʋ due’ "wlu ’sɔɔn ’wlʋɛ ’e Gaadɩ ’a "ji ’di,

⁶‑kwlʋ due’ "wlu ’sɔɔn ’wlʋɛ ’e Asɛɛ ’ɛ "ji ’di,

‑kwlʋ due’ "wlu ’sɔɔn ’wlʋɛ ’e Neftali ’a "ji ’di,

‑kwlʋ due’ "wlu ’sɔɔn ’wlʋɛ ’e Manase ’a "ji ’di,

⁷‑kwlʋ due’ "wlu ’sɔɔn ’wlʋɛ ’e Simeɔ ’ɔ "ji ’di,

‑kwlʋ due’ "wlu ’sɔɔn ’wlʋɛ ’e Lefi ’a "ji ’di,

‑kwlʋ due’ "wlu ’sɔɔn ’wlʋɛ ’e isaka ’a "ji ’di,

⁸‑kwlʋ due’ "wlu ’sɔɔn ’wlʋɛ ’e Sabilɔn ’ɔ "ji ’di,

‑kwlʋ due’ "wlu ’sɔɔn ’wlʋɛ ’e Sosɛʋ ’a "ji ’di,

‑wɛe ‑kwlʋ due’ "wlu ’sɔɔn ’wlʋ ’e Bɛnsamɛ ’ɛ "ji ’di, ’de ʋʋ ‑wee’ ‑tuu" ɛ juo ’ɩn.

Nyʋ ‑tuu"‑tuu a ‑gbɛɛ’ Kea "juɔi

⁹’Ma ‑gbʋn a ’e ’sʋ ’ɩn ’jeeɛ nyʋ ‑tuu" "jriɛ‑, ʋʋa’ nyʋ tu se ‑sro’ ‑ta ’ble. Nyʋ ‑ʋʋ ‑wlʋa ’beɔdɩ ‑wee’ ’dii o, nyʋ ’a ‑kwlʋn ‑wee’ ’dii o, nyʋ ‑wlʋa ’blʋa ’a blo’ wɔn ’dii ke wlu "klein nyʋ a poa ɩa’ nyʋ ke. Ʋʋ ‑wee’ paa dɩpli ’ʋn ’de ʋʋ ’ble ‑gbɩn’ kwa ‑wɛe ʋʋ nɩ ’o ’beɔkpa‑tɛ ke Kea ’a ’blaaju "juɔi. ¹⁰’De ʋʋ kpa wlu "jɛi ‑wɛe ʋʋa wlu ka, ʋʋ ’na : ’Pʋʋa’ nɩɛ ’de ‑aa Kea ‑ɛ ‑tea i ’bo ’beɔkpa‑tɛ "kpei ke ’blaaju ’kwa. ¹¹’Sʋ Kea ’a "soa‑wi" ‑pian’ ’beɔkpa‑tɛ ’dei o, nyʋ‑cɔɩn’ ‑nʋ o, ’kmʋnɩdɩ ‑nyiiɛ’ ‑nɩ o, ʋʋ ‑wee’ "siiɛ "jua‑ i ’bo ’beɔkpa‑tɛ "juɔi ‑wɛe ʋʋa ‑gbɛɛ’ Kea. ¹²Ʋʋ ’na : Kɩɩn, tɔ’ ‑o, ’kamɔ ɛ nɩ ‑cɛɛn’‑ ! ‑Aa Kea mɛ ‑ɛɛ ’nynɩ nyʋ ’je "i ’bɛɛ‑ ‑wɛe ‑ɛ ‑je ’nynɩ ’wlʋ, ɛmɛ ‑nɩ tɔ’di, ɛmɛ nyʋ ’je ’sɛ po ‑wɛe ‑ɛɛ ni’ nyʋ ’je ‑te’. Ɛmɛ ‑kmai" ‑wɛe ‑ɛ ‑ble ’kpɩ jeejee. Tɔ’ ‑o, ’kamɔ ɛ nɩ ‑cɛɛn’‑ !

¹³’Sʋ nyʋ‑cɔɩn’ ‑nʋ ’a due’ ‑teeɛ’ ’mii, ɔ ’na : Nyʋ ‑paa dɩpli ’ʋn ‑ta ’ee, ‑ɩn ‑juo ʋʋpʋ ’mɛɛ ? ’De ‑ta ʋʋ ’wlʋa ‑ɩn ‑juo ’o ’ɛɛ ? ¹⁴’Sʋ ’ɩn ’na : "Ɩɩn‑, nyɔ ‑cɔɔn’‑, ‑mɔ ‑juo ’o, ’mɔ se ’o juo‑. ‑Wɛe ɔ wlu ’ʋn ‑pee ka, ɔ ’na : Nyʋ ‑ma ‑jea i ‑ta, ɛ nyʋ ‑ʋʋ ‑jiia ’e ’kle klaa" ’ʋn, ʋʋpʋ ‑o. Kea ’wlʋɛ ʋʋa’ dɩsaɩn "kpei, dɛ‑nʋɛ’ ’blaaju ‑saa ’sraa‑ ’ʋn, ‑wɛe ‑ɛɛ nmɔ ’wla i ɛmɛ ‑nʋɛ’ ‑wɛe ʋʋa’ ’ʋnpaadɩ "plu. ¹⁵Ʋʋ ’wɔɔn‑ ɩa’ wɔɔ‑tɩ ’mɛ, ɛmɛ ‑tɩ ʋʋ nɩ ’o Kea ’a ’beɔkpa‑tɛ "juɔi. ’De "maʋ’wɩ o, ’jrʋ‑gbaowɩ ’di ɛ, ʋʋa nʋʋ ɛ "juɔi ’de ɛɛ’ ‑gbu" ’di. "Ju ‑tea i ’bo ’beɔkpa‑tɛ "kpei ɛ, ɔmɔ ‑ɔɔ ‑fli ‑cri" ʋʋ "kpei ‑wɛe ‑ɔɔ fuo ʋʋpʋ i. ¹⁶’Mɩɩɛ‑ ke "ni ’natʋn se ʋʋpʋ nʋi ’bode, ‑tɛnjrʋ se ʋʋpʋ faan i, mɔɔ’ jrɛ’ se ʋʋpʋ nʋ i ’bode, ¹⁷dɛ‑nʋɛ’ ’blaaju ‑nɩa ’o ’beɔkpa‑tɛ ’ɛ ‑kwea’ mɔ ‑ɔɔ mu ʋʋpʋ ’a ‑tɩ’ ‑tu" ’a, ɔmɔ ‑ɔɔ mu ʋʋpʋ ‑je o poa’ ‑wɛe ‑ta ’kmʋnɩ ni ’a "jru nɩa, ‑ɔ ‑je ’o ʋʋpʋ kpa, ‑wɛe Kea ’je ʋʋpʋ "miini "jri i‑sa.

’Sbɛpun‑ ’a ’kpɩn ’a kpɛ ‑mɛ" ’sɔn ‑nɛ

¹‑Ta ’blaaju kain a ’sbɛpun‑ ’a ’kpɩn ’a kpɛ ‑mɛ" ’sɔn ‑nɛ "wɔin ’sʋ ɛ, ’de jaʋn ’di ‑wee’ nʋɛ ‑tun" aa, ɛ ‑fɔn’ ’e ‑paii. ²’Sʋ ’ɩn ’jeeɛ Kea ’a "soa ‑mɛ" ’sɔn ‑nɩa ’o Kea "juɔi "jriɛ‑, ‑wɛe ʋʋ "nyɩ ʋʋpʋ dɔ‑kleɛ ‑mɛ" ’sɔn.

³’Sʋ Kea ’a "soai jrɔ’ ji ’de ɔ nyna i ’bo ’sraa ‑sa ’ɩn ‑ɛ ‑nɩa ’o ’beɔkpa‑tɛ "juɔi ‑pʋn". Ɔ ’bleɛ ’kwlan ‑ɛ ’di nyʋ a pooa ‑dai’klɔ "jri kwa. Ɛɛ’ ’kwlan tu ɛ, ’sani ‑nʋɛ’. ’Sʋ ʋʋ "nyɩ ɔ -dai’klɔ ‑tuu" ‑wɛe ɔ ’je ɛ ’sraa‑ ‑saa ’bo ’sraa‑sa’ɩn ’sani nʋa "kpei, ɛ ke Kea ’a ‑jei" naaʋn ‑wee’ "klein ’a baewlu ke. ⁴‑Dai’klɔ ɔ poa "jri ’de ’kwlan ’di ‑nɛ, ɛɛ’ dao’ ke Kea ’a ‑jei" naaʋn ’a baewlu a ’wlʋɛ ’e Kea ’a "soai ‑nɔ ’kwa ‑wɛe ɩa mu "jɛi ‑tadue ’de ɩa mu ’o Kea "juɔi. ⁵’Sʋ Kea ’a "soai ‑sa nɛ ’bo ’sraa ‑sa ’ɩn ‑wɛe ɔ "jiiɛ ’de ’kwlan ‑nɛ ’di. ’De ɔ ‑fi" e ɛ ke nɛ ‑wee’ ’nɔ ’blʋa‑ "kpei. Ɔ ‑fi" ɛ ’sʋ ɛ, "ni ’a "plan‑cruɛn" ɛ ’kpaa, ’blʋa‑ a crɛ’.

Kea ’a "soa‑wi" ‑teɛ dɔ‑kleɛ blaa’ ‑pʋn"

⁶’Bo ‑mɛ ’de ɛ, Kea ’a "soa‑wi" ‑mɛ" ’sɔn ‑ʋʋ ‑blea dɔ‑kleɛ ‑mɛ" ’sɔn ɛ, ʋʋa nmaeɛ dɩ ‑wɛe ʋʋ ’je ɩ bla. ⁷Ʋʋa’ ‑jɔ ‑saa "i bla dɔ‑kleɛ ’sʋ ɛ, "ni kɩɩn o, nɛ ‑ɛ ‑ke nmɔ "beea "jrii ‑fi" ɛ’ ’nɔ ’blʋa‑ "kpei. ’Sʋ ’blʋa‑ ‑ɛ ‑seea’ ’ʋn kpɛ taan a, ɛɛ’ ’fɔ due’ ’kpa "jri, ti ‑ɩ ‑seea’ ’ʋn kpɛ taan a, ‑mɩ ’a tɔo ’kpa "jri, ‑wɛe sii" ‑wee’ sin ‑ke.

⁸Ʋʋa’ ’sɔɔn ‑nɔ bla dɔ‑kleɛ ’sʋ ɛ, dɛ jrɛ’ ka crʋjɔ nɩa, ‑ɛ ‑nɩa kan’ a, ‑wɛe ‑ɛ ‑nɩa nɛmɩɩɔ ’ɔ ’sʋ ɛ, ɛ ‑fi" ɛ’ ’nɔ ’blʋa‑ "kpei ‑wɛe ɛ ‑ka i ’de ’tɔniɛ wɔn. ’Sʋ ’tɔniɛ ‑ɛ ‑seea’ ’ʋn kpɛ taan ɛɛ’ tɔo due’ ‑snɛɛ nymɔ ’ʋn. ⁹Dɩ ‑ɩ ‑nɩa ’kmʋ ’de ’tɔniɛ ‑sɔn ‑wɛe ‑ɩ ‑seea’ ’ʋn kpɛ taan ɩa’ kpɔ due’ ’mɛɛ ‑wɛe ‑bato’ ‑ɩ ‑seea’ ’ʋn kpɛ taan ɩa’ kpɔ due’ sɔn i ‑ke.

¹⁰Ʋʋa’ taan ‑nɔ bla dɔ‑kleɛ ’sʋ ɛ, ’cʋ‑sɩɩn ’a klaa" ‑ɛɛ fan ka ‑tau a wan ɛ ’wlʋɛ "jɛi ‑wɛe ɛ blu ’nɔ ’blʋa‑ "kpei. ’De ɛ ‑ka i ’de juuɔ ‑ɩ ‑seea’ ’ʋn kpɛ taan ’a due’ ke "ni ’a "jru ‑wee’ "kpei‑. ¹¹Ɛɛ’ ’cʋ‑sɩɩn tu ’a ’nynɩ ‑nɩ "Kae "kɩ. "Ni ‑seea’ ’ʋn kpɛ taan ɩa’ due’ ‑nɩ "kae’ "kɩkɩ. Nyʋ ‑tuu"‑tuu ‑na ɩa’ "ni tu ɛ, ʋʋ ‑wee’ "klein ’mɛɛ.

¹²Ʋʋa’ ‑nyiiɛ ‑nɔ bla dɔ‑kleɛ ’sʋ ’jrʋ o, ’cʋ o, ’cʋ‑sɩɩn o, dɩ ‑ɩa kpɛ nɩa taan ’mʋa‑, ‑ɩ ‑seea’ ’ʋn ’ɛ kpɛ tan tan, ɩa’ tɔo due ’due sɔn i ‑wɛe ɩ ’bɔ fan‑tɩ. ’Sʋ ’jrʋ ‑gbaowɩ ke "maʋ’wɩ ’a tɔo due’ kpe’ ‑plipli. ¹³’Ma ‑gbʋn ‑a ’e ’sʋ ’ɩn ’jeeɛ ‑cii" due’ "jriɛ‑ ’de jaʋn ’a ’keekei" ‑wɛe ‑ɛɛ ‑wan", ’de ‑ɛɛ kpa wlu "jɛi ‑wɛe ‑ɛɛ wlu ka : Wɛe ‑tɩ oo ! Wɛe‑tɩ oo ! Ɛ nɩɛ "nmia‑tɩ ‑o ’de ’blʋa "kpeinyʋ ’a ‑tɩ’ ’ʋn oo, ‑a ‑blu" ‑aa‑ ! ‑Ta Kea ’a "soa taan ‑sia ’o ʋʋa mua dɔ‑kleɛ blaa’ ‑mɛ "nmia ‑tɩ ‑a ji ’blʋa ’dinyʋ "kpei !

Dɔ‑kleɛ ’ɛ kpɛ ‑mm" ‑nɛ ke kpɛ ‑mɛɛo"‑ ‑nɛ ke

¹’Bo ‑mɛ ’de ɛ, Kea ’a "soa‑wi" ‑mɛ" ’sɔn ‑blea dɔ‑kleɛ ‑mɛ" ’sɔn kwa ‑nʋ, ʋʋa’ ‑mm" ‑nɔ bla dɔ‑kleɛ ’mɛ ’sʋ ’cʋ‑sɩɩn ‑ɛ ‑wlʋa ’e jaʋn ’di ‑wɛe ‑ɛ blua ’nɔ ’blʋa‑ "kpei ɛ, ’ɩn ’jee ɛ "jriɛ‑. Ʋʋ "nyɩ ɛ ‑da’kle ‑wɛe ɛ ’je "bie‑gbau" klaa" "wɔin kain. Ɛɛ’ "bie‑gbau" tu tɛn ’di ‑su’ bii. ²Ɛ kain a "bie ‑nɛ "wɔin ’sʋ ɛ, dao’ ‑gblʋn ‑a ’wlʋa ’de ɛ ’di ka nɛ‑gbauo klaa" ’a dao’ nɩa. ‑Wɛe ’jrʋ ke ’de "jɛi ‑wee’ nɩ ‑plipli ’de dao’ ‑nɛ ’ɛ ‑tɩ’ ’ʋn. ³’De dao’ ‑gblʋn ‑nɛ ’ʋn ’demɔ ’plaɩn‑too’ ’wlʋ ‑wɛe ɩ ‑gbaa ’blʋa‑ "kpei‑. ’Sʋ ʋʋ "nyɩ "ikmaa’ ‑wɛe ka ‑kɩan" ‑kɩan’ nɩa ’nɔ ’blʋa‑ "kpei ’a ‑ku’ nɩa, ɩa’ ‑ku’ nɩ kan’. ⁴‑Wɛe ʋʋ wlu ɩ ‑pee ka, ʋʋ ’na : Ɩ ’bɔ sii" o, ti o, dɩ ‑ɩa mɛa ’bo ’blʋa‑ "kpei dɛsaʋn "jrii nʋɛ, ’kaa nyʋ Kea ’a juo ’ɩn sea ’o "juɔi nɩ ɛ, ʋʋa’ ’sʋ mʋ ɩ ’je dɛsaʋn "jrii nʋ. ⁵Ʋʋ se ’o wlu cɛn ‑wɛe ’plaɩn ‑too’ ’je ʋʋa’ nyʋ tu ’dba, ’kaa ʋʋ ’na ɩ ‑tu" ʋʋpʋ ’kle ’de ’cʋɩ ‑mm" ’di, ‑wɛe ɛɛ’ ’kle tu ’je ʋʋpʋ i "wee‑ ka ‑bo ‑kɩan" ‑kɩan’ nmu nyʋ ‑wɛe ɛɛ "weea’, ’kamɔ ɛ nɩ‑. ⁶’De ɛɛ’ ’wɩ tu ’di ɛ, nyiɔpʋ a muɛ ’mɛa’ i ‑pɔan’, ’kaa ʋʋ se ɛ ’jei. Ʋʋa muɛ ’mɛa’ "i nɩa’, ’kaa ɛɛ muɛ ʋʋpʋ o tɛɛan’ fiin.

⁷Ɩa’ ’plaɩn ‑too’ tu ɛ, ɩ ‑kɔ’ soe" nyʋ nmaea tʋ ‑fɔn’ ‑tɩ ɛ, ‑wɛe dɛ jrɛ’ ɛ fan ’bo ɩ "jru ka ’sani ‑gbla nɩa. Ɩa’ "jua‑ ‑kɔ’ nyiɔ ’ɔ "jua‑. ⁸Ɩa’ "mɩɩ‑ ‑kɔ’ ’nynʋkpae’ ’a "mɩɩ‑, ‑wɛe ɩa’ ’nynɩ ‑kɔ’ ‑plaa ’a ’nynɩ. ⁹Dɛ ɩ paa ’ʋn ɛ, ka nɩɩɛ nɩa, ’kamɔ ɛ nɩ‑. Ɩa’ nai ’a ‑cruɛn" kmai", ka tʋ ‑fɔn’ soe" ‑tuu"‑tuu a plea ‑wɛe ɩa ‑cria’ tʋ ‑fɔn’ ’kamiɔ ’de ɩa’ ‑ciin ’a ‑cruɛn" beea o ɛ, ’kamɔ ɛ nɩ‑. ¹⁰Ɩa’ ‑kʋn’ ‑kɔ’ ‑kɩan" ‑kɩan’ ’a ‑kʋn’ ‑wɛe ɩ nɩ ’mɩmɩ. Ɩa’ "ikmaa’ nɩɛ ’e ɩa’ ‑kʋn’ ’ʋn, ‑wɛe ɩ ’je nyiɔpʋ‑ dɛsaʋn "jrii nʋ ’de ’cʋɩ ‑mm" ’di. ¹¹Ɩ ’bleɛ "jru kpɔ’ i ‑tei ɔmɔ ‑nɩ "bie‑gbau" klaa" ’a "soai. Ɔɔ’ ’nynɩ ‑nɩ Abadɔn ’de Suifʋ ‑wlu ’di, ‑wɛe ʋʋa ’dɔɔ‑ Apoliɔn ’de Glɛkɩ ‑wlu ’di, ɛ ’de mɛ ‑nɩ dɩ ’a "ma i ‑sai.

¹²"Nmia ‑tɩ ’a "i‑saa ‑nɛ ‑mɛ ‑si’ ‑wɛ‑. ‑Ɩn ‑gbʋn ’nɔ, ɩa’ kpɛ ’sɔɔn ‑sie ’o ke’wlɛ ‑ɩ ‑je ji.

¹³’Bo ‑mɛ ’de ’sʋ ɛ, Kea ’a "soa ‑nʋ, ʋʋa’ ‑mɛɛo"‑ ‑nɔ bla dɔ‑kleɛ ’mɛ. ’Sʋ ’ɩn ’wɔn wlu jrɛ’. ’Sraa ‑sa ’ɩn ’sani nʋa ‑wɛe ‑ɛ ‑nɩa ’o Kea "juɔi ɛ, ’de ɛɛ’ ‑gbɩn ‑nɩa ‑nyiiɛ o ’demɔ ɛɛ’ wlu tu ’wlʋ, ¹⁴‑wɛe ɛ wlu ’de Kea ’a "soai ‑ɔ bla dɔ‑kleɛ ‑nɔ ‑pee, ɛ ’na : Kea ’a "soa‑wi" ‑nyiiɛ ‑ʋʋ ‑mʋʋa i ’de juuɔ klaa" ‑ɛɛ ’nynɩ nɩa Eflatɩ "kpei ɛ, ‑ɩn ‑kain ʋʋpʋ i. ¹⁵’Sʋ Kea ’a "soa ‑nyiiɛ’ ‑nʋ kain ɛ i. Ʋʋa’ Kea ’a "soa tu ɛ, ʋʋ ‑teɛ kein"ke see ‑wɛe ʋʋa fuo nɔ" o, ’wɩ o, ’cʋ o, ‑sʋn ’a ’o nynia’, ’de nyiɔ ‑ʋʋ ‑seea’ ’ʋn kpɛ taan ʋʋ ’je ʋʋa’ kpɔ due’ ’dba. ¹⁶"Soa‑wi" ‑nyiiɛ ‑nʋ, ʋʋ kɔn ’e "soa‑wi" ‑tuu"‑tuu ’mla ‑wɛe ‑ʋʋ ‑te soe" "kpei. "Soa‑wi" ʋʋ kɔn a ’e ’mla ‑nʋ, ’ɩn ’wɔn ʋʋa’ ‑tisʋn ’a ’nynɩ ’mɛ, ʋʋ nɩɛ ‑kwlʋ ‑te "wlu ’di "wlu ‑te ‑kwlʋ ’di. ¹⁷’Ma ‑gbʋn a ’e ’sʋ ’ɩn ’jeeɛ soe" "jriɛ‑ ’de jajri ’di, ɩ ke nyʋ ‑tea ’bo ɩ "kpei ke. Ʋʋa’ nyʋ tu paa nɩɩɛbai" ’ʋn, ka nɛ nɩa ’kamɔ ɩa’ "bai tu ’a ku nɩ‑. Ɩa’ jrɩ’ kpa kpea’ ‑jei", ɩa’ jrɩ’ ’fasʋn. Ʋʋa’ soe" ʋʋ ‑tea "kpei ɛ, ɩa’ "jru ‑kɔ’ ‑plaa ’a "jru, ‑wɛe nɛ ke dao’ ke ’nʋ ‑nyniia "jrii ‑ɛ ‑dba nyʋ a ’wlʋ ’de ɩ ’wɔn. ¹⁸Nɛ o, dao’ o, ’nʋ ‑nyniia "jrii ‑ɛ ’dba nyʋ ‑ɩ ‑wlʋa ’e soe" ’wɔn ɛ, ɩ nɩɛ nyʋ ’kle ‑tu" dɩ ’a kpɛ taan ‑o, ɩmɩ ‑dba nyiɔ ‑ʋʋ ‑seea’ ’ʋn kpɛ taan ’a kpɔ due’. ¹⁹Soe" ‑nɩ ɩa’ "ikmaa’ nɩɛ ’e ɩ ’wɔn ‑wɛe ɛ nɩ ’de ɩa’ ‑kʋn’ ’ʋn ‑ke. Ɩa’ ‑kʋn’ ‑kɔ’ sɛn ɩ ’bleɛ "jru due ’due, ɩmɩ ɩa nʋ ‑wɛe ɩa nʋ nyiɔpʋ dɛsaʋn "jrii.

²⁰Nyʋ ‑sia ’o ‑wɛe nyʋ ’kle ‑tu" dɩ ‑ɩ ‑wlʋa ’e soe" ’wɔn ‑nɩ sea ’dba a, ʋʋ ’na ʋʋ se ʋʋa’ dɩsaɩn "i juoi ‑wɛe ʋʋ se ʋʋa’ nʋʋdɩ ’kpʋ "i to. Ʋʋ ’na ʋʋ se ‑siɔn’ ’ɔ "sʋɩ ’a ‑gbɛɛ’ ‑tɩ ’bɔi. Kɔin ’sani o, nɩɩɛ o, ’wɛi o, "sou ke tu nʋa, ’kamɔ ɩ seɛ ’bɛɛ ɩ ’je ɩ ’je, ɩ ’je i ’wɔn, ɩ ’je na‑. ²¹Ʋʋa’ nyʋ tu ɛ, ʋʋ ’na ʋʋ se ʋʋa’ "ku ’dbaa’ o, ʋʋa’ nyʋ ’srɛ i poojrii’ nʋa’ o, ʋʋa’ jɛi" ’jedɛsaʋn ke dɛ nyʋ sea ‑ʋn "nyɩ ‑ɩn ‑sɛɛ ‑jei" ’a ’kpʋ "i to ‑tɩ wɔɔ‑.

Kea ’a "soai due’ "nyɩɛ San ’sbɛpun‑ ‑saan"‑

¹’Ma ‑gbʋn a ’e ’sʋ ’ɩn ’jeeɛ Kea ’a "soai due’ ‑kmai" "jriɛ‑ ‑ɔɔ ‑wlʋ ’e jaʋn ’di, ‑wɛe ‑ɔɔ ‑si" i ’de ’blʋa‑ "kpei. Ɔɔ’ "soai tu paa bue" ’ʋn, "ni ’a bli’ mɛ ‑gban’ e i ’de ɔ "jru kpɔ’. Ɔɔ’ "jua‑ ‑kɔ’ ’jrʋ ‑wɛe ka nɛ‑gblʋn ’sɔɔn nɩa, ɔɔ’ bɩ nɩ kan’. ²Ɔ ’bleɛ ’sbɛpun‑ ‑saan" due’ kwa ‑wɛe ɛ kain ɛ "wɔin. Ɔ nynaa ɔɔ’ dianbʋ i ’de ’tɔniɛ wɔn ‑wɛe ɔ nynaa ɔɔ’ kʋanbʋ i ’de ’kpʋʋ "kpei. ³’Sʋ ɔ kpa wlu "jɛi ‑wɛe ɔ "wɔ ka ‑plaa a klua. Ɔ wlua ’sʋ ‑tɛn ‑nɩa ‑mɛ" ’sɔn "plaan’. ⁴‑Tɛn ‑nɩa ‑mɛ" ’sɔn "plan ’sʋ, ’ma jiɛ dɩ ’crɩa’ ‑teea’ ’de‑, ’kaa ’ɩn ’wɔn wlu jrɛ’ ‑ɛ ‑wlʋ ’de jaʋn ’di, ɛ ’na : Dɩ ‑tɛn ‑nɩa ‑mɛ" ’sɔn ’tmʋa ɩ sie ’e "sɩan, ‑ɩn ‑bo ɩ ’crɩɛ !

⁵’Sʋ Kea ’a "soai ‑ɔɔ bʋ due’ nyna ’e ’tɔniɛ wɔn ‑wɛe due’ nyna ’e ’blʋa‑ "kpei ‑nɔ ɔ toɛ ɔɔ’ diansʋn "jɛi ⁶‑wɛe ɔ ‑snɛɛ ’de Kea ‑nɩa ’kmʋ jeejee ’a ’nynɩ ’ʋn. Ɛmɛ ‑nʋ jaʋn ke dɩ "klein ‑nɩa ’e jaʋn ’di ke, ɛmɛ ‑nʋ ’blʋa‑ ke dɩ "klein ‑nɩa ’nɔ ɛ "kpei ke, ɛmɛ ‑nʋ ’tɔniɛ ke dɩ "klein ‑nɩa ’e ɛ wɔn ke, ’de ɔ ’na : ’Wɩ ‑tuu" a ɩ ‑kwɛ’ ’bode, ⁷’kaa ‑sɔntɩ Kea ’a "soa‑wi" ’a ‑mɛ" ’sɔn ‑nɔ ɔ mua dɔ‑kleɛ blaa’ a, ’bomɔ Kea ’a nmae dɩ ‑pa’ ’kwla ’je "jri "kpae’ poo‑. Ka ɛ ’tmʋ ɛ ’de ɛɛ’ wlu ’kwajaaʋn ‑ʋʋa nʋʋ ɛ "juɔi ‑pee, ’kamɔ ɩa mu ’o nynia’.

⁸’Sʋ wlu ‑ɛ ‑wlʋa ’e jaʋn ’di ’ɩn ’wɔan ’de ɛ, ɛ wluɛ ’ʋn ‑pee ke’wlɛ, ɛ ’na : ‑Ɩn mu, ‑wɛe Kea ’a "soai ‑ɔɔ bʋ due’ nyna ’e ’tɔniɛ wɔn ‑wɛe due’ nyna ’nɔ ’blʋa‑ "kpei ‑nɔ, ‑ɩn ‑kpɔ ‑pʋn" ‑wɛe ‑ɩn ‑je ’sbɛpun‑ ‑ɛ ‑kain a "wɔin ’de ɔ ’kwa ‑nɛ ’ʋn "duo‑. ⁹’Sʋ ’ɩn ’kpɔ ‑pʋn" ‑wɛe ’ɩn ’na : ‑Ɩn ‑nyɩ" ’ʋn ’sbɛpun‑ ‑saan" ‑nɛ. ’De ɔ wlu ’de ’ʋn ‑pee ɔ ’na : ‑Ɩn ‑duɛ" ’ʋn, ‑ɩn mlɛ, ɛɛ muɛ wɔn nmɔa’ ’de ‑ʋn ’wɔn ka dʋ ’a ’cna nɩa, ’kaa ɛɛ muɛ "kaea’ ’de ‑ʋn ’mɩ o. ¹⁰’Ɩn "duo‑ ’sbɛpun‑ ‑saan" ‑nɛ ’ʋn ’ɛ ’de Kea ’a "soai ’kwa, ‑wɛe ’ɩn po ɛ ’de ’wɔn ’sʋ ɛ ’dɩɩ’ ’de ’ʋn ’wɔn ka dʋ ’a ’cna nɩa, ’kaa ‑jɛ ’ɩn mlɛ ’sʋ ɛ, ’de ’ʋn ’mɩ o ‑wee’ nɩɛ "kɩkɩ.

¹¹’Sʋ ʋʋ wluɛ ’ʋn ‑pee ka ʋʋ ’na : Wlu Kea ‑sa ’kwla ’de ‑ʋn ‑pee ɛ, ‑ɩn ‑je ɩ ’tmʋa’ mu ‑o ke’wlɛ ’de ’blʋa‑ ‑tuu"‑tuu o, ’beɔdɛ ‑tuu"‑tuu o, nyʋ ‑ʋʋa poa wlu ’a kpɛ ‑tuu"‑tuu o, ’beɔ ‑tuu"‑tuu ‑pee.

‑Tɩ ’a ‑ta ’jeʋn ’sɔɔn

¹’Bo ‑mɛ ’de ɛ, nyɔ jrɔ’ "nyɩɛ ’ʋn ‑gblokpau due’, ɛ ‑kɔ’ itbatu ‑wɛe ɔ ’na : ‑Ɩn ‑sɔn ’ʋn, ‑ɩn ‑dbaa Kea ‑gbu klaa" ke ’sraa ‑sa ’ɩn ke, ‑ɩn ‑sro’ nyʋ ‑a ‑gbɛɛa’ ’de Kea ‑gbu ’di ke. ²’Kaa Kea ‑gbu klaa" ’a "kpaejriɛ ‑mɛ ɛ, ‑ɩn sie ’o ‑mɛ ‑ɩn ‑bo ɛ dbaa, dɛ‑nʋɛ’ ɛ ’bɔɔ ɛ nyʋ ‑ʋʋ sea Kea ’a ‑tɩ’ tɔ’ ’ʋn ’je kwa ‑wɛe ʋʋ ’je ‑kwlɔ ‑ɛ ‑teea kpɔi" "kpei‑ na‑ ’de ’cʋɩ ’a kwla ‑nyiiɛ ’jɔ ’sɔɔn ’di. ³’Sʋ ɔ wlu’, ɔ ’na : ’Ma muɛ ’ma ‑tɩ’ ’a ‑ta ’jeʋn ’sɔɔn dboa’ ʋʋ ’je blɔ ’ʋnpaa‑ ‑wɛe ’ɩn ’je ʋʋpʋ "ikmaa’ "nyɩ ’de ʋʋ ’je Kea ’a wlu ’tmʋ ’de nyʋ ‑pee ’de ’wɩ ’a "wlu due’ kmɛ’ ’sɔɔn kwla ‑mɛɛo"‑ ‑nɩ ’di.

⁴Ʋʋa’ ‑tɩ ’a ‑ta ’jeʋn ’sɔɔn tu ɛ, ʋʋa’ "ipoodɩ ‑nɩ olifieti ’sɔɔn ke ‑dam’ba ’a "kpei ‑tedɩ ’sɔɔn ‑ɩ ‑nɩa ’o ’blʋa‑ ‑wee’ "klein ’a Tʋ"bo "juɔi ɛ. ⁵‑Bo nyɔ jrɔ’ nɩɛ "i ɔ ’je ʋʋpʋ dɛsaʋn "jrii nʋ ɛ, ‑mɛ nɛ ɛ muɛ ’de ʋʋpʋ ’wɔn ’wlʋa’ ‑wɛe ɛ ’je ʋʋa’ tʋnyʋ siin‑. Kɩɩn, nyɔ "o nyɔ ‑nɩɛ "i ‑ɔ ‑jea ʋʋpʋ dɛsaʋn "jrii nʋ ɛ, ’kamɔ ɔɔ’ ’mɛsʋn a mu nɩa’. ⁶Ʋʋa’ "ikmaa’ ’bɛɛ‑ ɛ ’je jaʋn "wɔin kan i ‑wɛe nɔ" ‑ɛ ’di ʋʋ nɩa Kea ’a ‑tɩ’ ’tmʋa’ a, "ni se dbai. "Ikmaa’ ʋʋ ’blea a, ɛ ’bɛɛ‑ ɛ ’je "ni fai" poo‑ ‑wɛe ɛ ’je nymɔ ’ʋn ‑snɛɛ. Ʋʋ ’bɛɛ‑ ʋʋ ’je nyʋ ’kle ’a kpɛ ‑wee’ ‑tu" ’nɔ ’kmʋ "kpei ka ʋʋmʋ nɩa "i ɛ.

⁷‑Bo ʋʋ ‑kɔ’ Kea ’a ‑tɩ’ ’tmʋa’ ’sʋ ɛ, nmi ‑kwli klaa" jrɛ’ ɛ muɛ ’e "bie‑gbau" klaa" ‑nɛ ’di ’wlʋa’ ‑wɛe ɛ ’je ʋʋpʋ tʋ o ‑fɔn ’de ɛ ’je tʋ ’a "jru kpa ’bo ʋʋpʋ "kpei, ‑wɛe ɛ ’je ʋʋpʋ ’dba. ⁸Nyʋ ’sɔɔn ‑nʋ ɛ, ʋʋa’ "ku a muɛ i ’pɛɛan’ ’bo ‑jei" ’bo ‑kwlɔ klaa" ’di. ’Bo ɛɛ’ ‑kwlɔ tu ’di mɔ nyʋ kɔɔ ʋʋa’ Tʋ"bo ’bo tu ‑kwlɩ" tɛin". ‑Bo nyʋ a sea ɛɛ’ ‑kwlɔ tu ’a ’nynɩ "si ɛ, nyʋ a ’dɛɛ Sodɔm ke Esipʋ ke. Ɩa’ ’nynɩ tu mɩ nyʋ bla ’o ɛɛ’ ‑kwlɔ tu "kpei. ⁹Nyʋ ‑wlʋa ’blʋa ’a blo’wɔn ‑wee’ ’dii o, ‑kwlʋn ‑wee’ ’dii o, nyʋ ‑a poa wlu ’a "kwli ‑wee’ o, nyʋ ‑wlʋa ’beɔdɩ ‑wee’ ’dii ’je ʋʋa’ "ku ’jea’ ji ’de ’wɩ taan ’e tɔo ’di, ʋʋ se ʋʋa’ i nmae ‑tɩ ’wɔɔn i. ¹⁰Ʋʋa’ ’mɛa’ a muɛ ’kmʋ "kpeinyʋ a ’mʋa‑ ’blea’, ʋʋa muɛ blaa’ ʋʋ ’je dee‑, ‑wɛe ʋʋ ’je ba ‑paan’ "jrii nʋ due ’due, dɛ‑nʋɛ’ Kea ’a wlu ’kwa jaaʋn ’sɔɔn ‑nʋ cri nyʋ ’mɛ kpleiin.

¹¹’Wɩ taan ’e tɔo ‑sia’ ’sʋ Kea poɛ ʋʋpʋ ’kmʋnɩfeeɛ’ ’ʋn ’sʋ ʋʋ sɔn ’ʋn ’ɛ. Nyʋ "klein ‑ʋʋ ‑jeea ʋʋpʋ "jriɛ‑ ɛ, faʋn klaa" a nʋ ʋʋpʋ ’mɛ. ¹²’Sʋ nyʋ ’sɔɔn ‑nʋ, ʋʋ ’wɔn wlu jrɛ’ ‑ɛ ‑kmai" ‑ɛ ‑wlʋ ’e jaʋn ’di ‑wɛe ‑ɛ ‑wlu ’de ʋʋ ‑pee, ɛ ’na : Ao ’ja ‑ta ! ’Sʋ ʋʋ ‑teɛ ’e jaʋn ’di mua’ ‑pʋn" ’bo bue" "kpei ’bo ʋʋa’ tʋnyʋ "juɔi. ¹³’De ɛɛ’ nɔ" tu ’di ’sʋ ’blʋa‑ ‑teɛ crɛa’ ‑pʋn". Ɛɛ’ ’blʋa ’a crɛa’ kmai", ɛ nʋɛ’ ’sʋ ‑kwlɔ ‑ɛ ‑seea’ ’ʋn kpɛ ‑puue ɛ, ɛɛ’ ‑puue ‑nɛ je i waa‑ ‑wɛe nyʋ ’a "wlu ‑mɛ" ’sɔn ’mɛ ’bo ’blʋa‑ ‑ɛ crɛa ‑nɛ ’ɛ wɔin". ’Sʋ faʋn ’kpa ’e nyʋ ‑sia ’o mu ’ʋn ’ɛ ‑wɛe ʋʋ ‑te jaʋn ’di Kea ’a ni’ ‑tea’ ‑pʋn".

¹⁴"Nmia‑ ‑tɩ ’a kpɛ ’sɔɔn ‑nɛ ‑mɛ ‑si’ ‑wɛ‑. ‑Ɩn ‑gbɔn ’nɔ, ɩa’ kpɛ taan ‑nɛ se ’ʋn ‑kwlei, ɛ ’je ji.

Dɔ‑kleɛ ’ɛ kpɛ ‑mɛ" ’sɔn ‑nɛ

¹⁵’Bo ‑mɛ ’de ɛ, Kea ’a "soa ‑nʋ ʋʋa’ ‑mɛ" ’sɔn ‑nɔ bla ‑tiɛnkɔʋn ’sʋ ɛ, ’ɩn ’wɔn wlu ‑tuu"‑tuu ’de jaʋn ’di. Ɩa’ wlu tu kmai", ɩ ’na : ’Beɔdɛ ‑wee’ ‑nɩa ’e ’kmʋ "kpei ɛ, ɛ ’kpa ‑aa Tʋ"bo Kea ke ɛɛ’ ’o ‑tei Klisɩ ’a dɛ ‑wɛ‑ la. Kea a muɛ ’nynɩ ’wlʋa’ jeejee ’de ‑sʋn "o ‑sʋn ’di.

¹⁶’Sʋ nyʋ‑cɔɩn’ ’a kwla ’sɔɔn ’jɔ ‑nyiiɛ ‑ʋʋ ‑tea i ’bo ʋʋa’ ’beɔkpa‑tɛ "kpei ‑nʋ, ʋʋ "siiɛ "jua‑ i ’bo ’blʋɔ ‑wɛe ʋʋa ‑gbɛɛ’ Kea "juɔi. ¹⁷’De ʋʋ ’na :

Tʋ"bo Kea, ɛmɛ ‑kmai" ‑ɛ ‑sia dɩ ‑wee’ ‑wɛe ‑ɛ ‑nɩa ’kmʋ tɛin" ɛ, ’de ‑ɛ ‑nɩa ’kmʋ ’de ‑sɩanwɩ ’di, ‑aa poɛ ɛ ’sɛ‑, dɛ‑nʋɛ’ ɛɛ’ "ikmaa’ ‑ɛ ‑bɛa "i, mɛ ɛ "duo ’ʋn ‑wɛe ɛ ‑te ’nynɩ ’wlʋa’ ‑pʋn". ¹⁸‑blua ’dinyʋ ‑ʋʋ sea Kea juo ɛ, ʋʋ ’kpɛɛ ’cɛn i, ’kaa nɔ" ‑ɛ ’di ɛɛ’ ’cɛn ɛ mua "jri "kpae’ poa’ ’de ʋʋ ‑pee, ‑wɛe ɛ ‑jea ’mɛʋn ’a ’pee ’jee‑ ɛ, ’bomɔ ɛ ’je ɛɛ’ wlu ’kwajaaʋn o, nyʋ ‑ʋʋa ‑tea’ ɛɛ’ ’nynɩ ’a ni’ o, nyʋ "klein ‑ʋʋ ‑nʋʋa ɛ "juɔi ɛ, ɛ ’je ʋʋa’ mɩɩ" ke klae" ‑kei" ‑sa, ‑wɛe ɛ ’je nyʋ ‑ʋʋ ‑dooa ’blʋa‑ ‑wi" ‑mʋ i ‑sa.

¹⁹’Ma ‑gbʋn a ’e ’sʋ Kea ‑gbu klaa" ‑nɩa ’e jaʋn ’di kain ɛ "wɔin ‑wɛe ’ɩn ’jee dbɛɛdɛ ’ɛ ‑gbau’ "jriɛ‑ ’de ɛ ’di. ’Sʋ "ni a crɛ "jrii, ‑tɛn ɛ "plaan’, ’blʋa‑ a crɛ’ ‑wɛe "ni‑kɩɩn ‑tuu"‑tuu a ’wla.

’Nynɔkpao’ due’ ke ‑sre" ke

¹’Ma ‑gbʋn a ’e ’sʋ nyʋ tai’ "maa’ dɛ klaa" jrɛ’ ‑nʋʋɛ ’bo jaʋn‑kwlʋ : ’Nynɔkpao’ jrʋ’ mʋ ‑tan’ ’o ’jrʋ ’a ‑tɩaɩn ’ʋn ka nyɔ ɔ paa dɛ ’ʋn ɛ, ‑wɛe ’cʋ nɩ ’e bʋ ‑sɔn. Tʋ"bofan ʋ ‑tua" "jru ɛ, ’cʋ‑sɩɩn ’a ‑puue ’jɔ ’sɔɔn ‑nʋɛ’. ²Ʋ ’bleɛ "kwli, ‑jɛ ‑gbaandi ’kpʋ ’ʋn ’sʋ ʋ ‑teɛ "wɔɔa’ ‑pʋn".

³’Sʋ nyʋ tai’ "maa’ dɛ jrɛ’ nʋʋɛ’ ’bo jaʋn‑kwlʋ : ’ɩn ’jeeɛ ‑sre" ‑saan "jriɛ‑. Ɛ ’bleɛ "jru ‑mɛ" ’sɔn ‑wɛe ɛ ’ble ‑gbɩn ‑puue, ’de ɛɛ’ "jru ‑nɩ ‑tu" tʋ"bofan "jru due ’due. ⁴’Cɩ ‑sɩɩn ‑ɩ ‑seea’ ’ʋn kpɛ taan a, ɩmɩ ‑ɩa kpɔ due’ ɛ nʋ ɛɛ’ ‑kʋn’ ‑wɛe ɛɛ ’wla ’nɔ ’blʋa‑ "kpei. Ɛ ‑tan’ ’sʋ ɛ, ɛ nyna i ’bo ’nynɔkpao’ ‑ʋa jia ‑gbaan ‑di ‑nʋ "kpei ‑wɛe ‑bo ʋa’ "ju ’wlʋ ’de ɛ ’je ɔ mla. ⁵Ʋ ‑gbaan’ ’sʋ ɛ, ʋ ’wlʋɛ "junmɔu, ɔmɔ ‑je nɩɩɛkpa ’ble ‑wɛe ‑ɔ ‑je ’blʋa ’a blo’ wɔn ‑wee’ "klein i fuo‑. ’Kaa ʋa’ "ju ‑nɔ ’wlʋa, ’bo ɛ "sri ɔ mu ’o Kea ’a ’beɔkpa‑tɛ ‑pʋn" ’de jaʋn ’di, ka nyɔ ɔ "fla nyʋ ɛ ’kamɔ ɛ nɩ‑. ⁶’Sʋ ’nynɔkpao’ ‑nʋ ’kpa ’kwla, ʋ muɛ ’e ‑pɩɩɔn" blʋa "kpei, ’demɔ Kea nmae ʋa’ ‑teɩn ‑wɛe ɛ "nyɩ ʋ diidɛ ’de ʋ ’je i ‑te ’de ’wɩ ’a "wlu due’ kmɛ’ ’sɔɔn kwla ‑mɛɛo"‑ ’di.

⁷’Bo ‑mɛ ’de ’sʋ tʋ ‑fɔn’ ‑cruɛn" kpʋn’ ’de jaʋn ’di. Misɛlɩ ‑nɩa Kea ’a "soa‑wi" ’a klaa" ɔ ke ɔɔ’ ‑nɩ "soa ‑te ‑sre" ke ɛɛ’ "soa o ‑fɔan’ ‑pʋn", ‑wɛe ‑sre" ke ɛɛ’ ‑nɩ "soa‑wi" ‑te Misɛlɩ ke ɔɔ’ "soa o ‑fɔan’ ‑pʋn" ‑ke. ⁸’Kaa tʋ du ‑sre" ke ɛɛ’ "soa‑wi" ’mɛ, ʋʋ se ‑teɩn ’ble ’bode ’de jaʋn ’di. ⁹Ɛmɛ ‑nʋɛ’ ‑wɛe ‑sre" klaa" ‑nɛ ’wlʋ ’e jaʋn ’di, ɛ ‑fi" ’ɛ ‑sɔn. ‑Sre" ‑nɛ, ɛɛ’ ’nynɩ ‑nɩ Satan. Ɛmɛ ‑nɩ ‑siɔn’, ‑siisaɩn ’a klaa", ɛmɛ ‑nɩ sɛn soa soa ‑ɛ ‑pooa ’kmʋ ‑wee’ "klein ’srɛ i ɛ, ɛ ‑fi" ɛ ‑sɔn, ɛ ke ɛɛ’ "soa‑wi" "klein ‑fi" ’ɛ ‑sɔn ’nɔ ’blʋa‑ "kpei. ¹⁰’Sʋ ’ɩn ’wɔn "ikmawlu jrɛ’ ’e jaʋn ’di ‑wɛe ‑ɛ ‑naa’ :

Kaan ka la, ’pʋʋa’ ‑nɩa ’e Kea ’kwa o, ɛɛ’ ’beɔdɛ o, ɛɛ’ Klisɩ ‑ɛ ‑tea ’o ɔɔ’ ’nynɩ ’wlʋa’ po "jri "kpae’ ‑wɛ‑, dɛ‑nʋɛ’ ‑aa de’di ‑wi" ’a ‑tɩ’ "kpeiblai pooɛ ‑sɔn ’bode. Ɔmɔ ‑ɔɔ bla ʋʋpʋ ‑tɩ’ "kpei ’de "maʋ’wɩ o, ’jrʋ ‑gbaowɩ ’di ’de ɛ, ɔ ’wlʋ ’nɔ jaʋn ’di ’mɛ, ɔ ‑fii" ɛ ‑sɔn. ¹¹Kea ’a ’sraa ‑sablaaju ’a nmɔ ‑ɛ ‑wla i o, ɔɔ’ wlu ’a tɔ’ nɩ ‑tɩ ‑aa de ’di‑wi" ’tmʋa ’de nyʋ ‑pee o, ɩ mɩ ‑nʋɛ’ ‑wɛe ʋʋ kpa tʋ ’a "jru, ʋʋ se ’mɛa’ plee‑ mamaʋ ’sʋ ʋʋ se ʋʋa’ ’kmʋ "kpei‑ ’tʋan‑. ¹²Ɛmɛ ‑tɩ ka jaʋn ’a kpɛ ‑tia ɩ ’je ’mʋa‑ nʋ ɛ ke nyʋ "klein ‑nɩa ’e jaʋn ’di ke ! ’Kaa ɛ nɩɛ "nmia‑tɩ ‑o ’de ’blʋa‑ ke ’tɔniɛ ’a ‑tɩ’ ’ʋn, dɛ‑nʋɛ’ ‑siɔn’ "siɛ i ’de ɩ "kpei ! Ɔ ’bleeɛ ’cɛn ’mlai", ɔ ’je kan’ ’mɛ nɔ" ‑ɛ ‑sia’ ’bo ɔ "juɔi, ɛ se "i tɛn‑.

¹³Ka ‑sre" ‑fii" a ’nɔ ’blʋa‑ "kpei ɛ ’jea kan’ ’sʋ ɛ, ’nynɔkpao’ ‑ʋ ‑wlʋa "junmɔuju ‑nʋ, ɛ ‑teɛ ʋa’ i nʋa’ ‑pʋn". ¹⁴’Sʋ ʋʋ "nyɩɛ ’nynɔkpao’ ‑nʋ ‑cii" klaa" ’a kpoa" wli ’sɔɔn ‑wɛe ʋ ’je sɛn ‑nɛ wɔin" ’pʋ ’de ʋ ’je "wan ʋ ’je ’e ʋa’ ‑teɩn mu ’de ‑pɩɩɔn" blʋa "kpei. ’Bomɔ ʋ ‑te i ’de ʋa ’jee‑ dɛ ʋa di ’de ‑sɩn taan ’cʋɩ ‑mɛɛo"‑ ’di. ¹⁵’Sʋ juuɔ‑gbuu ’wlʋɛ ’e sɛn ‑nɛ ’wɔn ‑wɛe ɛ ‑si’ ’o ’nynɔkpao’ ‑nʋ ’de, ‑wɛe ɛ ’je ʋ kpa. ¹⁶’Kaa ’blʋa‑ kain ɛ wɔn ‑wɛe ɛ mla juuɔ ‑gbuu ‑wlʋa ’e ‑sre" ’wɔn ‑nɛ, ’kamɔ ɛ nʋ ‑wɛe ɛ po ’nynɔkpao’ ‑nʋ sʋn o. ¹⁷’Sʋ ‑sre" ’kpa ’cɛn ’de ’nynɔkpao’ ‑nʋ "kpei ‑wɛe ɛ mu ʋʋa’ "nynuu‑ ‑jʋ ‑sia ’o tʋ o ‑fɔan’. Nyʋ "klein ‑ʋʋa ‑jea Kea ’a kɛ’ wɔn ‑wɛe ka Sesi ’a wlu nɩa tɔ’ ‑ʋʋa ‑tmʋ ɩ ’de nyʋ ‑pee ɛ, ʋʋpʋ ɛ ‑fɔn’ tʋ o ‑ke.

Nmi‑kwli ’sɔɔn ’ɔ ‑tɩ’

¹⁸’Sʋ ‑sre" nyna i ’bo ‑pɩɩɔn" "kpei ’bo ’tɔniɛ wɔin".

¹’Bo ‑mɛ ’de ɛ, ’ɩn ’jeeɛ nmi‑kwli jrɛ’ "jriɛ‑ ‑ɛ ‑wlʋ ’e ’tɔniɛ wɔn. Ɛ ’bleɛ ‑gbɩn ‑puue ‑wɛe ɛɛ’ "jru nɩ ‑mɛ" ’sɔn. Ɛɛ’ ‑gbɩn ‑nɩa ‑puue ‑nɩ, ɩ ‑wee’ ’bleɛ tʋ"bofan due ’due ‑wɛe Kea ’a wɔn o to nynɩ ’crɩɩɛ ’bo ɛɛ’ "jru ‑nɩ "kpei due ’due. ²Nmi‑kwli ’ɩn ’jeea "jriɛ‑ ‑nɛ, ɛ ‑kɔ’ ‑ci’, ɛ ’bleɛ nmi klaa" jrɛ’ɛ bɩ. Ɛɛ’ nmi tu ’a bɩ ke ‑plaa ’a bɩ ‑kooɔ’, ‑wɛe ɛ ’ble ‑plaa ’a wɔn. Ɛɛ’ nmi‑kwli tu ɛ, ‑sre" "nyɩ ɛ ’kpɩ ‑wɛe ɛ "nyɩ ɛ ɛɛ’ ’beɔkpa‑tɛ ke ɛɛ’ "ikmaa’ klaa" ‑wee’. ³’Ma ‑gbʋn a ’e mu ’sʋ ka nyɔ ɔ nʋa ‑cnɛ ‑wɛe ɔ cɛan dɛ ‑pliɔn’ ɔ, ’de ɛɛ ’mɛa, ’kamɔ ɛɛ’ "jru due’ nɩ‑. ’Kaa ’bo ɛ "sri ɛɛ’ ‑kɔ ‑nɛ je ’bɔ. ’Sʋ ’blʋa ’dinyʋ ‑wee’ a ’jraa‑ nmi‑kwli ‑nɛ ’mɛ, ‑wɛe ʋʋ bla ’o ɛ ’de. ⁴’De ʋʋa ‑gbɛɛ’ ‑sre" "juɔi, dɛ‑nʋɛ’ ɛmɛ ‑nyɩ" nmi‑kwli ‑nɛ "ikmaa’. Ʋʋa ‑gbɛɛ’ nmi‑kwli ‑nɛ ’mɛ ‑ke ‑wɛe ʋʋa wlu ka, ʋʋ ’na : Nyɔ ‑jɔ ‑ke nmi‑kwli ‑jɛ ‑mɛ ’bɛɛ‑ ’ʋn ɛ‑ ? Nyɔ ‑jɔ ‑bɛɛ’ ‑ɔ ‑ke ɛ ’je tʋ ‑fɔn’ ɛ‑ ?

⁵‑Sre" ‑tuu" ɛ nmi‑kwli wlu wɔn ‑wɛe ɛ ’je ‑cɛi" ’bɛɛwlu klae" klae" ’tmʋ ’de ɛ ’je Kea wlu saɩn ‑pee ’tmʋ. Ɛ "taiɛ ɛɛ’ nmi tu "i ‑wɛe ɛ ’je dɩ ‑nɩa ’mʋa‑ nʋ ’de ’cʋɩ ’a kwla ‑nyiiɛ’ ’jɔ ’sɔɔn ’di (42). ⁶’Sʋ ɛ ‑teɛ Kea ’a ’nynɩ o, ɛɛ’ ‑teɩn o, nyʋ "klein ‑nɩa ’e jaʋn ’di ’a ’nynɩ dooa’ ‑pʋn". ⁷‑Sre" cɛn ’o wlu ’mɛ ‑wɛe nmi‑kwli ’je Kea ’a ‑jei" naaʋn tʋ o ‑fɔn’ ’de ɛ ’je tʋ ’a "jru kpa ’bo ʋʋpʋ "kpei. Ɛ cɛn ’o wlu ’mɛ ‑ke ‑wɛe nmi‑kwli ’je nyʋ ’a kpɛ ‑wee’ o, ’blʋa ’a blo’ wɔn ‑wee’ o, nyʋ ‑a ‑poa’ wlu ’a kpɛ ‑wee’ ke ’beɔdɩ ‑wee’ "klein ’a nyʋ ’ble. ⁸Nyʋ "klein ‑nɩa ’e ’blʋa‑ "kpei ɛ, ʋʋa mu ɛ "juɔi ‑gbɛɛa’. Ʋʋa’ nyʋ tu ɛ, ʋʋa’ ’nynɩ se ’crɩɩɛ tɛin" sese ’de Kea ’a ’blaaju ‑ɛ ‑saa ’sraa‑ ’ʋn ’a ’kmʋnɩsbɛ ’di.

⁹Nyɔ ‑nɩa doun" "jru ɛ, ‑mɛ ɔ ’wɔn i ! ¹⁰Nyɔ ‑jea ‑kaso ’di mu see ɛ, ɔɔ muɛ ‑kaso ’di mua’. Nyɔ nyʋ ’jea ‑cnɛ "i ’dbaa see ɛ, ɔɔ muɛ ‑cnɛ i" ’mɛa’. Dɛ ‑jɛ ‑kɔn a ‑tɩ’ ‑wɛe ‑ɛ ‑jea ’e Kea ’a ‑jei" naaʋn ’ʋn ‑nɩ ’de ɛɛ’ nɔ" tu ’di ɛ, ɛmɛ ‑nɩ pɛe "wɔin ’bɛɛa’ ke Kea ‑kwlɩ" ‑tea’ ke.

¹¹’Sʋ nmi‑kwli jrɛ’ ‑wlʋ ’e ‑klu’ ’ɩn ’jee‑ "jriɛ‑, ɛ ’bleɛ ‑gbɩn ’sɔɔn, ka ’blaa‑gblɔ ’ɔ ‑gbɩn nɩa ’kamɔ ɩ nɩ, ‑wɛe ɛɛ wlu ka "kuudɛ ɛ wlua. ¹²Nmi‑kwli ‑jɛ ‑nɩa tɛin" ‑wɛe ‑ɛ ‑pooa ’mɛ ka ’de‑, ’de ‑ɛɛ ‑kɔ "sria ’o ɛ ’bɔa ‑nɛ, ɛmɛ ‑nyɩ" nmi‑kwli ‑jɛ ‑bɔɔa’ de "ikmaa’ ‑wee’ ‑wɛe ɛ ’je ɛɛ’ ‑kwlʋtɩ nʋ ’bo ɛ "juɔi. ‑Jɛ ‑bɔɔa’ de ‑nɛ, ɛ nʋɛ’ ‑wɛe ’blʋa‑ o, nyʋ "klein ‑nɩa ’e ’blʋa‑ "kpei a ‑gbɛɛ’ nmi‑kwli ‑jɛ ‑saa "i "juɔi. ¹³Ɛɛ nʋɛ dɩ klae" klae" ’bo ‑mɛ ’de ‑ke. Ɛɛ nʋɛ’ mamaʋ ’sʋ nɛ ɛ jea ’e jaʋn ’di ’wlʋ ɛɛ jea blu ’nɔ ’blʋa‑ "kpei ’bo nyʋ ‑wee’ "juɔi. ¹⁴Dɩ klae" klae" ‑ɩ nʋa ‑nɩ, ɩmɩ ‑ɩ ’ʋn ɛ poo ’blʋa ’dinyʋ ’srɛ i, dɛ‑nʋɛ’ nmi‑kwli ‑jɛ ‑nɩa tɛin" ‑nɛ, ɛmɛ ‑nyɩ" ɛ "ikmaa’ ‑wɛe ɛɛ nʋ ɩa’ dɩ tu. Ɛ wlu’ ’de ’blʋa ’dinyʋ ‑pee, ɛ ’na : Nmi‑kwli ‑ɛɛ "jru due’ pooa ’mɛ ka tɛin" ’de ‑ɛ jia ’kmʋ de ɛ, ao ‑pa ɛɛ’ ‑kooɔdɛ. ¹⁵Ɛ ’bɛɛ‑ ɛ ’je ɛ nʋ ’sʋ nmi‑kwli ’a kooɔ’ dɛ ‑nɛ ’je wlu ‑wɛe nyʋ "klein ‑ʋʋ ‑na ‑ʋʋ se ɛ "juɔi ‑gbɛɛ’ i ɛ, ɛ ’je ʋʋpʋ ’dba. ¹⁶Nmi‑kwli ‑jɛ ‑bɔɔa’ de ‑nɛ, ɛ nʋɛ’ ‑wɛe ɛ ‑te mɩɩ" o, klae" o, "wliiɛjeʋn o, nɩɩa" nyʋ o, nyʋ ‑tea ʋʋa’ ‑cɛ" ‑pee o, kʋɔnpʋ‑ ‑wi" ‑klan" "kpei, ’de ʋʋa ‑tu" ɛ juo’ɩn. Ɛɛ’ juo’ɩn tu ɛ, ‑bo ɛ se ’o ʋʋa’ diansʋn "kpei nɩ ɛ, ‑mɛ ɛ nɩɛ ’o ʋʋ "jua ’a "pɛ "kpei. ¹⁷Nyɔ ɛɛ’ juo ’ɩn tu sea ‑pʋn" nɩ ɛ, ‑mɛ ɔ se ɛ ’bɛɛ‑ ɔ ’je dɛ ‑tɩn’ ’de ɔ ’je dɛ ple. ‑Bo ɛɛ’ juo ’ɩn tu se nmi‑kwli ’a ’nynɩ nɩ ɛ, ‑mɛ ɛɛ’ ’nynɩ ’a ‑kɔ o "siidɛ.

¹⁸Ao ‑gbʋn ’nɔ, tɔ’ ’dinɩa’ mɛ ‑kɔn ‑tɩ’. Nyɔ ‑ɔ ‑nɩa tɔ’di ɛ, ‑mɛ ɔ ’wɔn ’de nmi‑kwli ’a ’nynɩ ’a ‑kɔ o "sii dɛ ’dei, dɛ‑nʋɛ’ ɛ nɩɛ nyiɔ ’ɔ ‑kɔ o "siidɛ ‑o, ɛ ’de mɛ ‑nɩ kmɛ’ ‑mɛɛo"‑ kwla ‑mɛɛo"‑ ’jɔ ‑mɛɛo"‑.

Kea ’a ’blaaju ke ɛɛ’ nyʋ ke

¹’Ma ‑gbʋn a ’e ’sʋ ɛ, ’ɩn ’jeeɛ ’blaaju "jriɛ‑ ’bo crʋ nyʋ a ’daa‑ Siiɔn "jru. Ɛ ke nyʋ ’a ‑kwlʋ ’a ‑puue ’jɔ ‑nyiiɛ "wlu ‑nyiiɛ (144 000). Ʋʋa’ nyʋ tu mʋ ɔɔ’ ’nynɩ ke ɔ "Bo ’a ’nynɩ ’crɩɩɛ ’bo "juɔi. ²’Ɩn ’wɔn ‑cruɛn" jrɛ’ ‑ɛ ‑wlʋ ’e jaʋn ’di ‑wɛe ‑ɛɛ klu ka "ni‑gbuu klaa" a klua, ka ‑tɛn ɛ "plan a, ’kamɔ ɛɛ’ ‑cruɛn" tu nɩ ‑ke. Ɛɛ’ ‑cruɛn" tu nmɔɔ ’e nyʋ doin" i ka nyʋ ‑tuu"‑tuu a bla ‑siplʋ ‑wɛe ʋʋa blea, ’kamɔ ɛ nɩ‑. ³Ʋʋa bleɛ ’dʋ dee ’bo ’beɔkpa‑tɛ ke ’kmʋnɩdɩ ‑nyiiɛ’ ke nyʋ‑cɔɩn’ ‑nʋ "juɔi. ’Dʋ ʋʋa blea nyɔ jrɔ’ se ɛ ’bɛɛ‑ ɔ ’je ɛ ’cɩan ‑bo ɛ se nyʋ ’a ‑kwlʋ ’a ‑puue ’jɔ ‑nyiiɛ "wlu ‑nyiiɛ ‑nʋ nɩ ɛ, ʋʋpʋ Kea ’a ’blaaju seie ’de ’blʋa ’dinyʋ "klu. ⁴Ɛ nɩ ʋʋpʋ ‑ʋʋ se ʋʋa’ ‑Suu ‑flɛn" kpʋʋn‑ ’de ’nynɩ ‑san nʋa’ ’ʋn. Ʋʋ nɩɛ ’pepe ‑wɛe ʋʋ ‑te Kea ’a ’blaaju ’a ’nynɩ ’ʋn. ‑Ta "o ‑ta ɔɔ mua ʋʋpʋ ‑ke ɔɔ mu. Ka nyɔ ɔ ja diidɛ ’ɛ "i‑saajɔ ‑wɛe ɔɔ ‑saa Kea ke ’blaaju wɔn ɛ, ’kamɔ ʋʋ seiɛ ’de nyʋ "klu. ⁵Sɩ ‑tɩ se ’de ʋʋ ’wɔn jii due’, ʋʋ se ‑kɔ ‑pʋn" nɩ‑.

Kea ’a "soa‑wi" taan

⁶’Ma ‑gbʋan ’emu ’sʋ ’ɩn ’jeeɛ Kea ’a "soai jrɔ’ "jriɛ‑, ɔɔ "waan’ ’de jaʋn ’a ’keekei". ‑Pɔia" ‑tɩ ‑ɩ sea isɔn‑ta ’ble ɛ, ɩmɩ ɔɔ ’tmʋ ’de ’blʋa ’dinyʋ ‑pee, ‑wɛe ’beɔdɛ ’ɛ kpɛ ‑wee’ "klein o, nyʋ ’a kpɛ ‑wee’ o, wlu ’a kpɛ ‑wee’ nyʋ a poa o, ’blʋa ’a blo’wɔn ‑wee’ "klein ’jɩ ’wɔn. ⁷’De Kea ’a "soai ‑nɔ kpa wlu "jɛi kpleiin, ɔ ’na : Ao plee Kea, ao ‑te’ ɛɛ’ ni’, dɛ‑nʋɛ’ ɛɛ’ nyʋ ’a ’pee ’je nɔ" nyni’ ‑wɛ‑. Ao ‑gbɛɛ ɛ "juɔi ! Ɛmɛ ‑nʋ’ jaʋn, ‑ɛ ‑nʋ’ ’blʋa‑, ‑ɛ ‑nʋ’ ’tɔniɛ ‑wɛe ‑ɛ ‑nʋ’ "ni ’a "jru ‑wee’ !

⁸’Sʋ Kea ’a "soai jrɔ’ wan’ ke’wlɛ ’bo "i‑saa’ ‑nɔ ’de ‑wɛe ‑mɔ ɔ wlu ka, ɔ ’na : Ɛ blu’ ‑wɛ‑, ɛ blu’ ‑wɛ‑, Babilɔnɩ‑kwlɔ klaa" blu’ ‑wɛ‑ ! Ɛmɛ ‑ɛ tba ’blʋa‑ ‑wee’ "klein ’a nyʋ nmɔ wɔn. Ɛɛ’ nmɔ tu mɛ ‑nɩ ’nynɩsan‑ nʋ dɛsaʋn ke kao’blea’ ‑ɩ ‑sia ‑jei" ’bo ɛɛ’ ‑kwlɔ tu ’di ɛ.

⁹’Sʋ Kea ’a "soai jrɔ’ wan’ ’bo "soa‑wi" ’sɔɔn ‑nʋ ’de. ‑Mɔ kpa wlu "jɛi ‑wɛe ɔ wlu ka ɔ ’na : Nyɔ ‑ɔɔ mua nmi‑kwli o, ɛɛ’ ‑kooɔdɛ "juɔi ‑gbɛɛa’, ’de ɔ ’jea ɔɔ’ ‑cɛi" "tai‑ ‑wɛe ‑bo nyʋ se ɔɔ’ "jua‑ juo’ɩn ‑tu" ’de ɔɔ’ sʋn nyʋ ’jea juo’ɩn ‑tu" ɛ, ¹⁰‑mɛ ɔɔ muɛ Kea ’a ’cɛn nmɔ ’naa’. Ɛɛ’ ’cɛn tu ɛ, ka kmaanmɔ ‑ɛ ‑ke dɛ jrɛ’ sea "jrii bee‑ nɩa, ’kamɔ ɛ nɩ‑. Nyɔ ‑ɔɔ mu ɛ ’naa’, ɔɔ muɛ ɔɔ’ ‑cɛ" wɔn ’jeea’ ’de nɛ ke ’nʋ ‑nyniia "jrii ‑ɛ ’dba nyʋ ’ʋn ’bo Kea ’a "soa ‑kwɛai ke ’blaaju "juɔi. ¹¹Nɛ ‑ɛ ’ʋn ʋʋa ’jeea ’kle ɛ, ɛɛ’ dao’ a muɛ "bua’ jeejee. ’De "maʋ’wɩ o, ’jrʋ‑gbaowɩ ’di ɛ, nyʋ ‑ʋʋa ‑gbɛɛa’ nmi‑kwli ke ɛɛ’ ‑kooɔdɛ "juɔi ‑wɛe ‑ʋʋ "taia ʋʋa’ ‑cɛi" ’de nyʋ ‑tua" nmi‑kwli ’a juo’ɩn ɛ, ʋʋ se pɛe ’a blua’ ’ble due’, ʋʋ ‑wee’ nynaa ja.

¹²’De ao ‑gbʋn ’nɔ, Kea ’a ‑jei" naaʋn ‑ʋʋa ‑jea ɛɛ’ kɛ’ wɔn ’de ‑ʋʋ ‑tea’ Sesi ‑kwlɩ" ɛ, dɛ ‑kɔan ‑tɩ’ ‑wɛe ‑ɛ ‑jea ’de ʋʋpʋ ’ʋn nɩ ’de ɛɛ’ nɔ" tu ’di ɛ, ɛmɛ ‑nɩ pɛe "wɔin ’bɛɛa’ ke ‑maa’ poo wlu fai" ke.

¹³’Sʋ ’ɩn ’wɔn wlu due’ ‑ɛ ‑wlʋ ’e jaʋn ’di ‑wɛe ‑ɛ ‑na : Wlu ’ma jia ’tmʋa’, ‑ɩn ‑crɩ ɛ, ɛ ka : Nyʋ ‑ʋʋ ‑ke Tʋ"bo "siaa "i ‑wɛe ‑ʋʋ ‑mɛa a, ‑wi" ‑mʋ ’di nmɔ wɔn. Kɩɩn, tɔ’ ‑o, ɛmɛ Kea ’a ‑Suu ’tmʋ, dɛ ‑tba’ ’e ‑sɩanwɩ ’di ɛ, dbo ʋʋ nʋa ‑kwɛ’, ʋʋ ‑kwle’ ’bode ‑wɛe ʋʋa ‑sa ’e ’kpʋ, dɛ‑nʋɛ’ ʋʋa muɛ ʋʋa’ dbo ’a ‑kei" ’jea’.

Dɩjɔ ‑flua" ’a cɛn nɔ"

¹⁴’Ma ‑gbʋan ’emu ’sʋ ’ɩn ’jeeɛ bue" plu "jriɛ‑. "Ju ‑tea i ’bo ɛ "kpei ɛ, ka nyiɔ ’ɔ "ju nɩa, ’kamɔ ɔ nɩ‑. Tʋ"bofan ɔ ‑tua" "jru ɛ, ’sani ‑nʋɛ’, ‑wɛe ɔ ’ble bloa" kwa. ¹⁵’Sʋ ’ɩn ’jeeɛ Kea ’a "soai jrɔ’ "jriɛ‑ ‑mɔ ɔ ’wlʋɛ ’e Kea ‑gbu klaa" ’di ‑wɛe ɔ kpa wlu "jɛi ’de ɔ wlu "ju ‑tea i ’bo bue" "kpei ‑pee, ɔ ’na : ‑Ɩn nʋ ‑ma ‑cnɛ ‑wɛe ‑ɩn ‑je nyʋ ‑nɩa ’e ’blʋa‑ "kpei i‑sa ka nyɔ ɔ cɛan ko ɛ, dɛ‑nʋɛ’ dɩjɔ ‑nɩa ’e ’blʋa‑ "kpei ɛ, ɩ ‑wee’ ‑fluu" ‑wɛ‑, ɩa’ cɛn nɔ" nyni’. ¹⁶’Sʋ "ju ‑tea i ’bo bue" "kpei jaa ɔɔ ’blʋa ‑nɛ ’e ’blʋa‑ "kpei‑, ’sʋ dɩ ‑flu" ’a ’e ’blʋa‑ "kpei ɩ ‑wee’ cɩɩɛn’.

¹⁷’Ma ‑gbʋan ’emu ’sʋ Kea ’a "soai jrɔ’ ’wlʋɛ ’e Kea ‑gbu klaa" ’di ‑wɛe ‑mɔ ’ble bloa" kwa ‑ke. ¹⁸’Sʋ ’ɩn ’jeeɛ Kea ’a "soai jrɔ’ "jriɛ‑ ke’wlɛ. Nɛ ‑nɩa ’o ’sraa ‑saɩn’ ɔmɔ ‑ble ‑mɛ ’ɛ dbo, ɔmɔ ‑ji" ‑wɛe ‑ɔ kpa wlu "jɛi kpleiin ’de ‑ɔ ‑wlu Kea ’a "soai ‑ɔ ‑blea bloa" ‑nɔ ‑pee ɔ ’na : ‑Ɩn po ‑ma "nma ‑cnɛ ‑wɛe ‑ɩn ‑je rɛsɛn’jɔ ‑nɩa ’e ’blʋa‑ "kpei ‑sa, dɛ‑nʋɛ’ ɩa’ rɛsɛn jɔ ‑wee’ ‑fluu". ¹⁹’Sʋ Kea ’a "soai ‑nɔ jaa ɔɔ’ bloa" ’de ’blʋa‑ "kpei‑ ‑wɛe ɔ ‑sa rɛsɛn’ ‑ti ‑nɩa ’e ’blʋa‑ "kpei ’a ’jɔ ‑wee’, ‑wɛe ‑ta ‑bo nyʋ du dɛ ’de nyʋ a "nmu ɩ ’ʋn ɛ, ’bomɔ ɔ po ɩ. ’Bo ’a ‑ta ‑tu nɩɛ Kea ’a ’cɛn klaa" ’a "ipoodɛ ‑o. ²⁰’De ‑ta ʋʋa duua rɛsɛn jɔ ‑wɛe ʋʋa "nmu ɩ ’ʋn ɛ, ’bo ‑tan’ ‑kwlɔ ‑pʋn". Nmɔ mɛ ‑ɛɛ ‑wlʋ ’o ’a ‑ta ‑tu ‑wɛe ‑ɛɛ ‑si’ i ‑gbo’ ‑gbo’. Ɛɛ’ nmɔ ‑gbuu ‑tu ɛ, ɛɛ’ i‑tɛnsʋn nɩɛ ’cilo ’a kmɛ’ taan ‑wɛe ɛɛ’ ‑sɔn tɛnsʋn a kpʋʋn ’bo nyʋ ’wlan ‑sɔn.

Kea ’a "soa‑wi" ke nyʋ ’kle ‑tu" dɩ ke

¹’Bo ‑mɛ ’de ɛ, ’ɩn ’jeeɛ dɛ klaa" jrɛ’ "jriɛ‑ ’de jaʋn ’di. Ɛɛ’ dɛ tu "bɛi, ɛ nɩɛ ’jraa ka‑. Ɛmɛ ‑nɩ ’ɩn ’jeeɛ Kea ’a "soa ‑mɛ" ’sɔn "jriɛ‑. Ʋʋ ’bleɛ nyʋ ’kle ‑tu" dɩ ‑mɛ" ’sɔn kwa. ɩa’ de ’bɔɔ ‑nɩ, ‑bo ɩ ’wlʋ ’o ‑jei" ɛ, ‑mɛ jrɛ’ se ’o tbai ’bode, dɛ‑nʋɛ’ ’de ɩ ’ʋn mɔ Kea ’a ’cɛn ‑craa "jru.

²’Sʋ ’ɩn ’jeeɛ dɛ jrɛ’ "jriɛ‑, ɛɛ’ dɛ tu ‑kɔ’ "nifla’ klaa" ɛ ke nɛ ‑bee "jrii ‑wɛe ɛ nɩ "jri i ’srɩsrɩ ka "kleɛ‑ nɩa. ’De ’ɩn ’jee‑ nyʋ jrʋ’ "jriɛ‑ ‑ke, nyʋ ‑ʋʋ kpa tʋ ’a "jru ’bo nmi‑kwli ke ɛɛ’ ‑kooɔdɛ ke ɛɛ’ ’nynɩ ’a ‑kɔ o "siidɛ "kpei. Ʋʋ nyna i ’bo "nifla’ klaa" ‑nɛ wɔn ‑wɛe ‑siplʋ Kea "nyɩa ʋʋpʋ ɛ, ʋʋ ’blɩ kwa. ³Ka Kea ’a dbonʋi Moisɩ ’bɛɛa Kea ’a ’nynɩ "i tɛin" Israɛ‑kɔʋn ’a kʋɔnkwla’ ’wlʋ nɔ" ɛ, ’kamɔ nyʋ Kea ’a ’blaaju ‑seia ’bɛɛ‑ ɛɛ’ ’nynɩ "i ’de blewlu ’di ‑ke. Ɛɛ’ ’dʋ tu ’naa :

Tʋ"bo Kea, "ikmaa’ ‑ɛ ‑sia dɩ ‑wee’ "klein ɛ, ɛmɛ ‑nɩ ’e ɛ ‑kwa. Ɛɛ’ nʋʋdɩ kmai", ɩ se "jriɛ‑ i‑sa ka nɩ ! ’Beɔdɛ ‑wee’ "klein ’a jei‑, dɩ ‑ɩa ‑jeblʋ ɛ poa ɩ ‑srɛi" ‑wɛe ɩ nɩ tɔ’. ⁴Tʋ"bo, nyɔ ‑jɔ se ɛɛ’ ni’ ‑tei’ ɛ‑ ? ’De nyɔ ‑jɔ se ɛɛ’ ’nynɩ "i ’bɛɛi ɛ‑ ? Ɛɛ’ ’sʋ ‑nɩ Kea. ’Beɔdɛ ‑wee’ "klein ’a nyʋ a muɛ jia’ ‑wɛe ʋʋ ’je ɛ "juɔi ‑gbɛɛ’‑, dɛ‑nʋɛ’ ɛɛ’ "isrɛdɩ ɛ nʋa ɩ poɛ "jri "kpae’ ’pepe ʋʋ ‑wee’ jɩ ’je.

⁵’Bo ‑mɛ ’de ’sʋ, ’ɩn ’jeeɛ Kea ‑gbu klaa" ‑nɩa ’e jaʋn ’di "jriɛ‑ ‑wɛe ɛ kain "wɔin. ’De ‑ta Kea ’a kɛ’ ‑gbau’ nɩa ‑wɛe ‑ɛ ‑kwɛai ‑ɛ ‑sia ‑ta ‑wee’ ɛ, ’ɩn ’jee‑ ’o ‑mɔ "jriɛ‑ ‑ke. ⁶’Sʋ Kea ’a "soa ‑mɛ" ’sɔn ‑ʋʋ ‑blea nyʋ ’kle ‑tu" dɩ ‑mɛ" ’sɔn kwa ‑nʋ, ʋʋ ’wlʋɛ ’e Kea ‑gbu klaa" ’di ‑wɛe ʋʋ "si "kpae’. Ʋʋa’ ’ʋnpaadɩ "pluu’ ‑wɛe ɩa fan, ’de ʋʋ blaa ’saniwlʋ ’de ‑kwlʋ ’di. ⁷’Sʋ ’kmʋnɩdɩ ‑nyiiɛ ‑nɩ, ɩa’ due’ "nyɩɛ ʋʋpʋ ‑gblʋ ‑mɛ" ’sɔn ’sani nʋa. Kea ‑nɩa ’kmʋ jeejee ɛ, ɛɛ’ ’cɛn mɛ ‑jii" ’e ɩ ’di. ⁸’Sʋ dao’ "ji ’e Kea ‑gbu klaa" ’di ’mɛ, dɛ‑nʋɛ’ Kea ’a "i ’bɛɛ‑ o, ɛɛ’ "ikmaa’ ‑nɩ ’e ɛ ’di. Ɛmɛ ‑nʋɛ’ ‑wɛe nyɔ jrɔ’ se ɛ ’bɛɛ‑ ɔ ’je ’e ɛ ’di pa mamaʋ ’sʋ nyʋ ’kle ‑tu" dɩ ‑mɛ" ’sɔn ‑nɩa ’e Kea ’a "soa‑wi" ’kwa ‑nɩ, ɩ ’je ’o nyni.

Kea ’a ’cɛn‑gblʋ ‑mɛ" ’sɔn

¹’Bo ‑mɛ ’de ɛ, ’ɩn ’wɔn wlu ‑ɛ ‑wlʋ ’e Kea ‑gbu klaa" ’di, ’de ‑ɛ ‑wlu Kea ’a "soa ‑mɛ" ’sɔn ‑nʋ ‑pee, ɛ ’na : Ao mu, ‑wɛe ao ’je Kea ’a ’cɛn‑gblʋ ‑mɛ" ’sɔn ‑nɩ "i "cnii‑ ’de ’blʋa‑ "kpei !

²’Sʋ ʋʋa’ "i‑saa’ ‑nɔ mu’ ‑wɛe ɔ "cnii‑ ɔɔ’ ‑nɛ ‑gblʋ "i ’de ’blʋa‑ "kpei. ’Sʋ nyʋ "klein nmi‑kwli ’a juo’ɩn nɩa ‑pʋn" ‑wɛe ‑ʋʋa ‑gbɛɛa ɛɛ’ ‑kooɔdɛ "juɔi ɛ, nɛ‑pii pliin" ‑ɩa ‑wee’ ’a, ɩ "bu ʋʋa’ ku ‑wee’ ’mɛ.

³Ʋʋa’ ’sɔɔn ‑nɔ "cniiɛ ɔɔ’ ‑nɛ ‑gblʋ "i ’de ’tɔniɛ wɔn, ’sʋ "ni ‑nɩa ’o ɛ wɔn ɛ ‑snɛɛ nymɔ ’ʋn ka "ku ’a nymɔ nɩa. ’Sʋ dɛ "o dɛ ‑nɩa ’kmʋ ’bo ɛ wɔn ɛ ‑wee’ ’mɛɛ.

⁴Ʋʋa’ taan ‑nɔ "cniiɛ ɔɔ’ ‑nɛ ‑gblʋ "i ’de "ni‑gbii ke "kae‑ wɔn, ’sʋ ɩa’ "ni ‑wee’ ‑snɛɛ nmɔ ’ʋn. ⁵‑Wɛe ’ɩn ’wɔn Kea ’a "soai "ni ’a dbo nɩa ’e ’kwa ’a wlu, ɔ ’na : Kea, ɛmɛ ‑nɩa ’kmʋ tɛin" ‑wɛe ‑ɛ nɩa ’kmʋ ’de ‑sɩanwɩ ’di ɛ, ɛ ‑nɩɛ ’pepe, ɛ ‑srɛi", ɛ ‑sa tɔ’ ɛ je nyʋ ’a ’pee ’je kan’. ⁶Kea ’a ‑jei" naaʋn ke ɛɛ’ wlu ’kwajaaʋn ʋʋ ’dba ‑wɛe ‑ʋʋa nymɔ ’wla i ɛ, ɛmɛ ‑tɩ "ni ɛɛ ‑nyɩa" ʋʋpʋ ‑wɛe ʋʋa ’na a, ɛ ‑snɛɛ nymɔ ’ʋn. Ʋʋa’ nʋʋdɩ ’a ‑kao ‑nao. ⁷’Bo ‑mɛ ’de ɛ, ’ɩn ’wɔn wlu jrɛ’ ‑ɛ ‑wlʋ ’o ’sraa‑sa’ɩn ‑wɛe ‑ɛ ‑na : Tɔ’ ‑o, Tʋ"bo Kea, ɛmɛ ‑blea "ikmaa’ ‑wee’ ɛ, ɛɛ’ ‑tmʋɛ tɔ’ ‑tɩ, ɛɛ’ nyʋ ’a ’pee ’jesʋn ‑srɛi".

⁸’Ma ‑gbʋan ’e ke’wlɛ ’sʋ Kea ’a "soa‑wi" ‑nʋ, ʋʋa’ ‑nyiiɛ ‑nɔ "cniiɛ ɔɔ’ ‑nɛ ‑gblʋ "i ’de ’jrʋ "jri. ’Sʋ Kea cɛn ’o wlu ’mɛ ‑wɛe ’jrʋ ’je nyʋ isian‑, ka nɛ ɛ sian nyʋ i ɛ. ⁹’Sʋ ’jrʋ ‑teɛ nyiɔpʋ isian’ ‑pʋn", ’kaa ʋʋ se ɛ "inɩ ʋʋ ’je ʋʋa’ dɩsaɩn "i juo‑ ’de ʋʋ ’je ’e Kea o "biie‑, ‑wɛe ɛɛ’ ’nynɩ "i ’bɛɛ‑tɩ. Dɛ ‑jɛ ʋʋa nʋa, ɛmɛ ‑nɩ Kea nyʋ ’kle ‑tu" dɩ ‑nɩ nɩa ’e ’kwa a, ʋʋa dooa ɛɛ’ ’nynɩ ’mɛ.

¹⁰’Ma ‑gbʋan ’emu ke’wlɛ ’sʋ ʋʋa’ ‑mm" ‑nɔ "cniiɛ ɔɔ’ ‑nɛ ‑gblʋ "i ’bo nmi‑kwli ’a ’beɔkpa‑tɛ "kpei. ’Bo ɛ "sri "bɛɛ‑kwie je kpʋn ’de ɛɛ’ ’beɔdɛ ‑wee’ ’di. ’Sʋ ʋʋ ‑teɛ wɔn nmua’ ‑pʋn" ’de dɩ ‑ɩa pooa ʋʋpʋ i ’a ‑tɩ’ ’ʋn, ¹¹‑wɛe ʋʋa ’tmʋ Kea wlu saɩn ‑pee ’de ’kle ʋʋa ’jea ke nɛ‑pii pliin" ’a ‑tɩ’ ’ʋn. Ʋʋ se ɛ "inɩ ʋʋ ’je ʋʋa’ nʋʋdɩ "i juo‑ ‑wɛe ʋʋ ’jɩ o ’bɔ.

¹²Ʋʋa’ ‑mɛɛo"‑ ‑nɔ "cniiɛ ɔɔ’ ‑nɛ ‑gblʋ "i ’bo juuɔ‑gbuu klaa" nyʋ a ’daa‑ Eflatɩ wɔn. ’Sʋ ɛ ma’ ’pepe, ‑wɛe ’beɔ‑wi" ‑wlʋa ’e ’jrʋ’ ’a ’wlʋ ’ɩn ʋʋa’ ‑jeblʋ ’je wɔnflɔn‑. ¹³’Sʋ ’ɩn ’jeeɛ ‑siisaɩn taan "jriɛ‑ ‑wɛe ‑ɩa ‑wlʋ ’e ‑sre" o, nmi‑kwli o, sɩ ’tmʋi ‑ɔ ‑daa’ ɔɔ’ ‑cɛ" Kea ’a wlu ’kwajaai ’wɔn, ɩ ‑kɔ’ ‑crɔ". ¹⁴Ɩ nɩɛ ‑siɔn ’ɔ ‑sii ‑o, ɩa nʋɛ jrii’. ’De ɩa mu ’e ’blʋa‑ ‑wee’ "klein ’a ’beɔ‑wi" o, ‑wɛe ɩ ’je ʋʋpʋ "jrui ’kɩɩn‑, ’de ʋʋ ’je tʋ‑fɔn’ dɩ nmae‑, ‑wɛe Kea ‑ɛ ‑kmai" ‑ɛ ‑sia dɩ ‑wee’ ɛ, ‑sɔntɩ ɛɛ’ ‑sɔn’ klaa" a mua ‑sɩan’ a, ’de ʋʋ ’je ɛ tʋ o ‑fɔn’.

¹⁵Sesi ’na : Ao ‑gbʋn ’nɔ, ’ma muɛ jia’ ka "jrii a pa ‑kwlɔ ɛ, nyɔ ‑tea "jriɛ‑ "i ’de ‑ɔɔ ‑tua" ɔɔ’ ’ʋnpaadɩ ’a ‑tɩ’, ‑wɛe ‑ɔ sea ku icɛn ’bo nyʋ ‑wee’ "juɔi ’de ‑tɩn sea "i ’dbaa a, ‑mɔ ’di nmɔ wɔn.

¹⁶’Sʋ ‑siisaɩn ‑nɩ ’kɩɩɛn ’blʋa‑ ‑wee’ "klein ’a ’beɔ‑wi" "jrui ‑tajrɔ. ’Bo ’a ‑ta tu ɛ, nyʋ a ’daa‑ ’o Amakedɔn ’de Eble wlu ’di.

¹⁷’Bo ‑mɛ ’de ’sʋ ɛ, Kea ’a "soa ‑blea ‑gblɩ ‑mɛ" ’sɔn kwa ‑nʋ, ʋʋa’ ‑mɛ" ’sɔn ‑nɔ "cniiɛ ɔɔ’ ‑nɛ ‑gblʋ "i ’de "jɛi. ’Sʋ ’ɩn ’wɔn wlu klaa" jrɛ’ ‑ɛ ‑wlʋ ’e ’beɔkpa‑tɛ "kpei ’de Kea ‑gbu klaa" ’di ’de jaʋn ’di. Ɛɛ’ wlu tu ’na : Ɛ ‑kwɛ‑ ja la ! ¹⁸Wlu ‑nɛ ’tmʋʋa ’sʋ ɛ, "ni ‑teɛ "jri i crɛa’ ‑pʋn" nɩan ‑ɩ nɩan ‑ɩ, ‑wɛe ‑cruɛn" o, ‑tɛn ‑te "plaan’ ‑pʋn" ’sʋ ’blʋa‑ a crɛ’. Ɛɛ’ ’blʋa ’a crɛa’ tu kmai", ɛ ‑siɛ ‑jei". Dɛ ‑tba’ ’e nyiɔ ’ɔ ’nɔ ’kmʋ "kpei ’kpaa’ a, ’blʋa‑ se crɛ kan’ due’. ¹⁹Ɛ nʋɛ’ ’sʋ ‑kwlɔ klaa" ‑nɛ je ’fɔe taan ’wlʋ. ‑Kwlɛ "klein ‑nɩa ’e ’blʋa‑ ‑wee’ "kpei sɔn i. Babilɔnɩ ‑ɛ ‑nɩa ‑kwlɔ klaa" a, ka Kea nʋa ɛɛ’ ‑tɩ’ ‑kwlʋ oposʋn, ’ka ‑nao. Ɛɛ’ ‑kwlɔ tu ɛ, Kea ’a ’cɛn ke ɛɛ’ ’pee kpʋɛn’. Ka nyɔ ɔ tba nyʋ kmaanmɔ wɔn ɛ, ’kamɔ Kea ja ɛɛ’ ‑kwlɔ tu ’kle "kpei. ²⁰’Bo ‑mɛ ’de ɛ, ’blʋa‑ "klein ‑nɩa ’o "ni ’a ’duu dii ɛ, ɩ ‑wee’ sɔn i, nyɔ ’bɔ crʋɩ foo" ’sʋ ’a "jriɛ‑ ’jee‑tɩ ’mɛ ’bode. ²¹’Sʋ "ni‑kɩɩn klae" klae" a ’wlʋɛ "jɛi, ɩa jea blu ’de nyiɔpʋ "kpei. Ɩa’ due’ ‑gbaia kwakusʋn ke ‑da’soblɔ ’ɔ kwakusʋn ’bɛɛ’. ’De "ni‑kɩɩn ‑ɩ blua ’mʋa ’a ‑tɩ’ ’ʋn ɛ, nyiɔpʋ a ’tmʋɛ Kea wlu saɩn saɩn ‑pee, dɛ‑nʋɛ’ ’kle ɩa ‑tua" ʋʋpʋ ɛ, ɛ cɛn ‑je "kpei ‑tie".

Babilɔnɩ‑kwlɔ ke nmi‑kwli ke

¹’Bo ‑mɛ ’de ɛ, Kea ’a "soa ‑mɛ" ’sɔn ‑ʋʋ ‑blea ‑gblʋɩ kwa ‑nʋ, ʋʋa’ due’ ji’, ‑wɛe ɔ wlu ’ʋn ‑pee ɔ ’na : ‑Ɩn ji ‑wɛe ka Kea ’jea ‑kwlɔi ‑tenynɔkpao’ klaa" ‑nʋ ’a ’pee ’jesʋn nʋ ɛ, ’ɩn ’je ɛ ‑ʋn ‑tɔɔ‑. ‑Kwlɔi ‑tenynɔkpao’ ‑nʋ ɛ, ʋ nɩɛ ‑kwlɔ klaa" ‑ɛ ‑pooa ’bo "ni‑gbuu ‑tuu"‑tuu wɔin" ’a "ipoodɛ ‑o. ²’Beɔ‑wi" ‑nɩa ’e ’blʋa‑ "kpei ɛ, ʋʋ ke ʋ ’kpa ’e jɛi" ’jedɛsaʋn ’di ’mɛ ‑kpa ‑kpa. Ʋʋ se ʋʋa’ ‑cɛ" "ikpʋan’ ’bɛɛ‑ ’bode, ʋʋ nʋɛ’ mamaʋ ’sʋ nyʋ "klein ‑nɩa ’e ’blʋa‑ "kpei ke ʋ je ’e jɛi" ’jedɛsaʋn ’di ’kpa ‑wɛe ɛɛ’ dɛsaʋn tu a nʋ ʋʋpʋ ka nmɔ ɔ nʋa nyʋ ɛ.

³’Ma ‑gbʋan ’emu ‑nɛ ’sʋ Kea ’a ‑Suu "ji ’de ’ʋn ’ɛ ‑wɛe Kea ’a "soai kpa ’ʋn ’de ‑pɩɩɔn" blʋa "kpei ‑wɛe ’ɩn ’jee‑ ’nynɔkpao’ due’ "jriɛ‑, ʋ ‑teɛ i ’bo nmi‑kwli ‑saan "kpei. Ɛ ’bleɛ "jru ‑mɛ" ’sɔn ‑wɛe ɛ ’ble ‑gbɩn ‑puue. ’De ’nynɩ ‑cree" ’a Kea ‑kɔ’ ɛɛ’ ku ja. ⁴Dɩ ʋa’ ’nynɔkpao’ tu paa ’ʋn nmɔ "jrii, ɩ ‑sain’ ‑wɛe ɩ ‑wee’ nɩ ’sani ke "sei ’dɔe ’a "kwli ‑wee’ ’a ’sʋ, ‑wɛe ʋ ’ble ’sani‑kaun kwa. Ɛɛ’ Nyʋ sɩaɩn’‑ kpʋʋndɩ ke ‑flɛn" dɩ ’a ’sʋ ‑ji" ’e ɛ ’di. Ɩa’ dɩ tu ’wlʋɛ ’de ʋa’ jɛi" ’jekplɩn ’ʋn. ⁵"Nɩɩanynɩ ‑crɩɩa’ ’bo ʋ "juɔi ɛ, ɩ ’bleɛ ’de, ɛmɛ ‑nɩ Babilɔnɩ‑kwlɔ klaa", ’de ɛ ’ʋn ’demɔ ‑kwlɔi ‑tenynʋkpae’ o, ‑flɛn" dɩ ‑wee’ "klein ‑nɩa ’nɔ ’blʋa‑ "kpei ’wlʋ. ⁶’Ma ‑gbʋan ’emu ’sʋ ’nynɔkpao’ ‑nʋ "jri a ‑si’. Kea ’a ‑jei" naaʋn ‑ʋʋa ‑tmʋa Sesi ’a ‑tɩ’ ‑wɛe nyʋ ’dba a, ʋʋa’ nmɔ ‑ɛ ‑wla i ɛ, ɛmɛ ‑ɛɛ ‑si’ ’e ’nynɔkpao’ ‑nʋ "jri, ka nmɔ ɔ nʋa nyʋ ɛ. ’Ɩn ’jee ʋ "jriɛ‑ ’sʋ tai’ "maa’ ’ʋn ’ɛ.

⁷‑Wɛe Kea ’a "soai ‑tee’ ’mii, ɔ ’na : Dɛɛ‑tɩ tai’ "maa ‑ʋn ɛ‑ ? Dɛ ‑nɩa ’e ’nynɔkpao’ ‑nʋ ke nmi‑kwli ‑ɛ ‑blea "jru ‑mɛ" ’sɔn ‑wɛe ‑ɛ ‑blea ‑gbɩn ‑puue ’a ‑tɩ’ ’de ɛ, ’ma muɛ ɛ wɔ ‑saa’ ’de ‑ʋn ‑pee.

⁸Nmi‑kwli ‑ɩn ‑jeea "jriɛ‑ ‑nɛ, ɛ nɩɛ ’kmʋ ’de‑, ’kaa ɛ se ’kmʋ nɩ ’bode. Ɛɛ muɛ ’e "bie‑gbau" klaa" ’di ’wlʋa’ ‑wɛe ‑ta ‑bo ɛ mu ’de, ɛ ’jea isɔn ’bode ‑bode ’bode, ɛ ’je ’o mu. Nyʋ ‑nɩa ’e ’blʋa‑ "kpei ‑wɛe dɛ ‑tba’ ’e ’kmʋ ’a nʋʋa’ ‑ʋʋa ’nynɩ sea ’crɩɩɛ ’de ’pʋsbɛ ’di ɛ, tai’ ’je ʋʋpʋ "maa ’de nmi‑kwli ‑nɛ ’ɛ ‑tɩ’ ’ʋn. Dɛ ɛ nɩa ’kmʋ tɛin", ‑wɛe ɛ sea ’kmʋ nɩ ’bode, ’de ‑ɛɛ mua ‑taan’ ke’wlɛ ɛ, ɛmɛ ‑je ʋʋpʋ tai’ "maa mɔ kpleiin.

⁹Dɛ ‑jɛ ‑kɔan ‑tɩ’ ‑ta ‑mɔ ɛ, ɛmɛ ‑nɩ tɔ’di nɩa’ ‑a ‑wɔan ’de dɩ ‑wee’ ’dei ’de ‑ɛ ‑bɛɛ’ ‑ɛ ‑je ɩ wɔ ‑sa : Nmi‑kwli ’a "jru ‑mɛ" ’sɔn ‑nɩ, ɩ ’de mɛ ‑nɩ crʋɩ ‑mɛ" ’sɔn ‑ɩ "kpei ’nynɔkpao’ ‑nʋ ‑tea i ɛ. ¹⁰Ɩ nɩɛ ’beɔ ‑mɛ" ’sɔn ’ɔ "ipoodɛ ‑o ‑ke. Ʋʋa’ ‑mm" blu’, ʋʋa’ due’ nɩ ’o ’ɛ, ʋʋa’ ‑jɔ ‑sia ’o ‑mɔ se ji ke. ‑Bo ɔ ji ɛ, ɔɔ muɛ nyʋ ’blea’ ’de nɔ" dɛ‑saan" ka ’di. ¹¹Nmi‑kwli ‑jɛ ‑blea nyʋ tɛin" ‑wɛe ‑ɛ sea nɩ ’bode ɛ, ɛɛ’ ‑cɛ" ’kpa ‑nɩ ’beɔ‑wi" ’a ‑mɛ" na ‑nɔ, ’kaa ɛmɛ ‑nyniia ʋʋpʋ ‑mɛ" ’sɔn ‑ke. Ɛ se ’ʋn ‑kwlei, ɛɛ jea ‑ta ɛ ’jea isɔn mu.

¹²’De ɛɛ’ ‑gbɩn ‑puue ‑ɩn ‑jeea "jriɛ‑ ‑nɩ, ɩ nɩɛ ’beɔ‑wi" ‑puue ‑o, ‑wi" ‑mʋ se ’beɔdɛ ’ble ke, ’kaa ʋʋ ke nmi‑kwli a muɛ ’nynɩ ’wlʋa’ ‑tadue ’de nɔ" dɛ‑saan" ’di. ¹³Ka ʋʋ nɩa ‑puue ɛ, ʋʋa’ tɔ’ nɩɛ due’ ‑wɛe ʋʋ "nyɩ ʋʋa’ "ikmaa’ ke ʋʋa’ ’beɔdɛ nmi‑kwli. ¹⁴Ʋʋa muɛ Kea ’a ’blaaju tʋ o ‑fɔan’, ’kaa ’blaaju a muɛ tʋ ’a "jru kpaa’ ’bo ʋʋpʋ "kpei, dɛ‑nʋɛ’ ɔ nɩɛ tʋ"bo ‑wi" ’a Tʋ"bo ‑o ‑wɛe ɔ nɩ ’beɔ‑wi" ’a ’Beɔ. Ɔɔ’ nyʋ ɔ ’da‑ ‑wɛe ɔ ‑teea kpɔi" ’de ‑ʋʋ sea ɔɔ’ ‑kwlɩ" ‑tea’ o ’bɔ ɛ, ʋʋpʋ ‑ke ɔɔ mu tʋ ’a "jru kpaa’ ’bo ’beɔ‑wi" ‑nʋ "kpei.

¹⁵’Sʋ Kea ’a "soai ‑nɔ wlu’ ’de ’ʋn ‑pee ɔ ’na : "Ni‑gbii ‑ɩ "kpei ‑kwlɔi ‑te’nynɔ ‑tea i ‑wɛe ‑ɩn ‑jeea’ "jriɛ‑ ɛ, ɩ ’de mɛ ‑nɩ ’blʋa ’a blo’ wɔn ‑wee’ o, nyʋ ‑tuu"‑tuu o, ’beɔdɛ ’ɛ kpɛ ‑wee’ o, wlu ’a "kwli ‑wee’ nyʋ a poa ke. ¹⁶’De ‑gbɩn ‑puue ‑jɩ ‑ɩn ‑jeea’ "jriɛ‑ ke nmi‑kwli ke ɩa muɛ ‑kwlɔi ‑te’nynɔ ‑nʋ ‑flɛɛan’, ɩa muɛ ʋ dɩ ‑wee’ "klein ku i‑saa’ ‑wɛe ʋ ’je kui cɛn. Ɩa muɛ ʋa’ nmi dia’ ‑wɛe ɩ ’je ʋa’ ‑jɛ ‑sia ’o "jri po, ¹⁷dɛ‑nʋɛ’ Kea mɛ ‑po ɛɛ’ tɔ’ tu ’de ʋʋ pɛe o ‑wɛe ʋʋ ’je ɛɛ’ ‑kwlʋtɩ nʋ ‑tadue. Ɛmɛ ‑nʋɛ’ ‑ke ‑wɛe ʋʋ "nyɩ ʋʋa’ ’beɔdɛ nmi‑kwli. Ʋʋa’ ’beɔdɛ ‑nɛ, ɛɛ muɛ ’e nmi‑kwli ’kwa nɩa’ mamaʋ ’sʋ dɩ "klein Kea "sia ’nynɩ ‑ɩ ‑jea ’o nyni ɩ ’je nʋʋɛ‑.

¹⁸’Sʋ ɔ wlu’ ’de ’ʋn ‑pee ke’wlɛ, ɔ ’na : ’Nynɔkpao’ ‑ɩn ‑jeea "jriɛ‑ ‑nʋ, ʋmʋ ‑nɩ ‑kwlɔ klaa" ’a "ipoodɛ, ʋmʋ ‑ble ’beɔ ‑wee’ "klein ‑nɩa ’nɔ ’kmʋ "kpei ɛ.

Babilɔnɩ‑kwlɔ blu’

¹’Bo ‑mɛ ’de ɛ, ’ɩn ’jeeɛ Kea ’a "soai jrɔ’ "jriɛ‑ ‑ɔɔ ‑wlʋ ’e jaʋn ’di ‑ɔɔ ‑si" ii, ɔ ’bleɛ "ikmaa’ ‑tuu"‑tuu ‑wɛe ɔɔ’ ‑sɔn’ ‑sɩn’ ’nɔ ’blʋa‑ "kpei. ’Sʋ ’nɔ ‑wee’ nɩɛ "i "puu’‑. ²Ɔ kpa wlu "jɛi ɔ ’na : Ɛ blu’ ‑wɛ‑, ɛ blu’ ‑wɛ‑, Babilɔnɩ‑kwlɔ klaa" blu’ ‑wɛ‑ ! Ɛ ’kpa ‑siɔn’ ’ɔ "soa ’a "ti ‑ta, ɛ ’kpa ‑siisaɩn o, nʋʋɩ saɩn nyʋ a pleea ’a ‑kwlɔ, ³dɛ‑nʋɛ’ ’bo ɛɛ’ ‑kwlɔ tu ’di ɛ, ’blʋa‑ ‑wee’ "klein ’a nyʋ nʋ kao’bledɛsaʋn ’mɛ, ʋʋ se ʋʋa’ ‑cɛ" "ikpʋan’ ’bɛɛ‑. Ɛɛ nʋ ʋʋpʋ ’mɛ, ka nmɔ ɔ nʋa nyʋ ɛ. ’Blʋa‑ ‑wee’ "klein ’a ’beɔ nʋ jɛi" ’jedɛsaʋn ’mɛ ’bo ɛɛ’ ‑kwlɔ tu ’di. Ɛɛ’ ‑kwlɔ tu ’a ’kmʋ "kpeidɩ ’a "dia ’jea’ cɛn ‑je "kpei ‑tie", ɛ nʋɛ’ mamaʋ ’sʋ ’blʋa‑ ‑wee’ "klein ’a ’dɔɔpoʋn je "wliiɛjeʋn ’kpa.

⁴’Sʋ ’ɩn ’wɔn wlu jrɛ’ ‑ɛ ‑wlʋ ’e jaʋn ’di ‑ɛ ‑na : Ao ‑nɩa ’ma ’cɛ, ao ’wlʋ ’o ɛɛ’ ‑kwlɔ tu ’di ‑wɛe dɩsaɩn ‑a nʋʋa ’bo muɛ, ao jɩ nʋ, ’de ’kle ‑ɛɛ mua ɛɛ’ ‑kwlɔ tu "kpei jia’ a, ao je ɛ ’je. ⁵Dɩsaɩn ‑nʋʋa ’bo ɛɛ’ ‑kwlɔ tu ’di ɛ, Kea sɩ o "mae i, dɛ‑nʋɛ’ ɩ ‑tu" ɛ "kpei mamaʋ ’sʋ ɩ je ’e jaʋn ’di nyni. ⁶Dɩsaɩn ɛɛ’ ‑kwlɔ tu nʋa nyʋ "jrii ɛ, ɩmɩ nyʋ ’je ɛ "jrii nʋ. Nyʋ a muɛ ɩa’ kpan ‑saa’ kpɛ ’sɔɔn. Nmɔ nyʋ ’je ɛ "nyɩ ‑wɛe ɛ ’jea ’na a, ɛ "kae’ kpɛ ’sɔɔn ɛ je ɛɛ’ ‑nɛ nmɔ ɛ "nyɩa nyʋ tɛin" ‑sii. ⁷Ka ɛ ’bɛɛa ɛɛ’ ‑cɛi" tɛin" ‑wɛe ɛ ‑sia ’nynɩ‑san nʋa’ ke "wliiɛ‑ ’blea’ "ni ’di ɛ, ’kamɔ ’kle ke ‑fɩn" wlu ‑ɛɛ mua ’jea’ ɩa mu ‑jei" ‑sia’ ‑ke, dɛ‑nʋɛ’ ɛɛ’ ‑kwlɔ tu a naa tɔ’ i ɛ, ɛ ’na : Ɛ nɩɛ ’o dɩ ‑wee’ "klein "jru kpɔ’, ka tʋ"bo nynɔkpao’ nɩa. Ɛ ’na : Ka ‑tiɔn" ’nynɔ nɩa ’ɩn se kan’ nɩi ’nɔ ’kmʋ, ‑fɩn" wlu se ’o ’ma ‑kwlɔ ‑tu ’di jii. ⁸’De ɩa’ wlu tu ’a ‑tɩ’ ’ʋn ɛ, ɛɛ’ ‑nɛ ’kle ‑tea ɛ ’dei ɛ, ɛɛ muɛ jia’ ’de ’wɩ due’ koʋn ‑gbai’ ’di : ’mɛa’ o, "nmia‑ o, ’kwɛ‑ paa’ o, ’mɩɩɛ‑ ɛ muɛ ɛɛ’ ‑kwlɔ tu "kpei jia’ ‑wɛe nɛ ’je ɛ di, ’de ɛ ’je isɔn‑, dɛ‑nʋɛ’ Tʋ"bo Kea ‑ɛ ‑jea ɛɛ’ ’pee ɛ, ɛ kmai".

⁹’Blʋa‑ ‑wee’ "klein ’a ’beɔ ‑ʋʋ nʋa jɛi" ’jedɛsaʋn ’bo ɛɛ’ ‑kwlɔ tu ’di ‑wɛe ‑ʋʋ nʋa ʋʋa’ ’tʋn nʋdɩ ‑saɩn ‑bo ɛ ’kpa "jri ‑wɛe ʋʋ ’je ɛɛ’ dao’ "jriɛ‑ ’jee ‑ɛ, ʋʋa muɛ ‑fɩn" ’a ‑wɛe ʋʋ ’je kple ’de ɛɛ’ ‑tɩ’ ’ʋn. ¹⁰’Kle ‑jea ɛ "kpei ji ɛɛ’ faʋn a muɛ ʋʋpʋ nʋa’ ‑wɛe ʋʋ ’je ɛ o tɛɛn‑, ’de ʋʋ ’je wlu ka : ‑A ‑blu" ‑aa ! Ʋa’ dɩ ’je crɛ ! Babilɔnɩ ‑kwlɔ klaa" ‑ɛ ‑kmai" ka ’sʋ ɛ ’de "jri ’a ‑tɛ due’ ’di ’pee ’a ‑ma kpʋn sʋn ‑naoo ?

¹¹’Blʋa‑ ‑wee’ "klein ’a ’dɔɔpoʋn a ‑fɩɩn" ‑ke ‑wɛe ʋʋ pa ’kwɛ‑ ’de ɛɛ’ ‑tɩ’ ’ʋn, dɛ‑nʋɛ’ nyɔ jrɔ’ ’ɔ ‑tɩn’ ʋʋa’ pleedɩ ’bode. Dɩ ʋʋ plea ’bo ɛɛ’ ‑kwlɔ tu ’di ’de ɛ, ɩ ka : ¹²dɩ ’dɔe o, ’sani o, ’wɛi ‑tiɛn o, "sei ‑kɩɩ ’dɔe ’dɔe ke ‑srɔ ’ɔ kpɛ ‑wee’ nʋa o, ‑pʋn" ‑tu" dɩ ke "jii‑pae’ ’dɔe ’dɔe o, tae’ ‑saan ’a kpɛ ‑wee’ o, tae’ jree" jree ’a kpɛ ‑wee’ o, ɩ ke ‑paadɩ ti ’dɔe nʋa o, doɛ ’ɛ ’nynɩ o, ‑tiɛn o, nɩɩɛ ‑jɩ "sou nʋa ke‑. ¹³Dɩ ’a kpɛ ‑ɩa ’nʋ nmɔa ’e nyʋ ’mlai o, jrɩ’ nɩ ’cna, ‑wɛe jrɩ’ nɩ ‑dai’klɔ ’de jrɩ’ nɩ sii" wɩn, jrɩ’ nɩ tu ’a ’kwɩn nyʋ a ’dɩɩ Kanɛlɩ ke mii‑ ke tu jrɛ’ ɛ tɛn’ nyʋ a poa "jri ke‑. Ʋʋ ple dɩ nyʋ a ‑sa ’e ‑kle’ ɛ : nmɔ o, ’cna o, fai’pʋ o, "ple ke. Ʋʋ ple nmi : bli’ o, ’blae o, soe" o, ɩ ke kamiɔ ke‑. Ʋʋa’ ’dɔɔ poa’ nʋɛ’ mamaʋ ’sʋ ʋʋa jea nyiɔ ple. ¹⁴‑Wɛe ʋʋa’ ’dɔɔpoʋn tu wlu ‑kwlɔ ‑nɛ ‑pee ka, ʋʋ ’na : Dɩ "klein ‑ma pɛe poa "i ɛ, ɩ ‑wee’ tɛɛn ‑ʋn o ‑wɛ‑. ‑Ma dɩ ’dɔe ’dɔe o, ‑ma "wlii‑ ‑ɩa fan o, ɩ ‑wee’ "maa ‑wɛ‑ la. Ka "o ka ɩ ’je ɩ nɩ ɛ, nyʋ sɩ ’jei ’bode. ¹⁵’Dɔɔpoʋn ‑ʋʋa plea dɩ ‑nɩa ’mʋa‑ ’de ɛ, ‑wɛe ‑ʋʋ ‑kpa "wliiɛjeʋn ’bo ɛɛ’ ‑kwlɔ tu ’di ɛ, ʋʋa muɛ ’kle ‑ɛ ‑ji’ ɛ "kpei pleea’ ‑wɛe ʋʋ ’je ɛ o tɛɛn‑. ’De ʋʋ ’je ‑fɩn", ‑wɛe ʋʋ ’je ’kwɛ‑ pa, ¹⁶ʋʋ ’je nʋ : Wɛe‑tɩ oo ! Wɛe‑tɩ oo ! ‑A ‑blu" ‑aa, nyʋ ‑nɩa ɛɛ’ ‑kwlɔ klaa" tu ’di ‑paa dɩ ’dɔe ’dɔe ke tae’ ‑saan ’a kpɛ ‑wee’ ’ʋn, ‑wɛe dɛ ‑nɩa ’sani o, "sei ’dɔe ’a kpɛ ‑wee’ o, ‑srɔ ’ɔ "kwli ‑wee’ ’a ’sʋ ɛ, ¹⁷ɛmɛ ’de nɔ" dɛ‑saan" ’di ’sʋ ‑ɛɛ "wlii‑ ‑tuu" ‑nɩ sɔn i.

‑Bato’ tbaʋn o, ‑kwɛɛ" poʋn o, ‑bato’ kpaʋn o, nyʋ "klein ‑a nʋa "nidbo ’bo ’tɔniɛ "kpei o, ʋʋ ‑wee’ tɛɛn ’kpʋʋ ‑kwlɔ ‑nɛ nɩa "kpei o, ¹⁸‑wɛe ʋʋa ’je ɛɛ’ nɛ ’ɛ dao’ i ’de ʋʋa "wɔ, ʋʋ ’na : ‑Kwlɔ klaa" ‑nɛ, ‑ɛ ‑ke ‑kwlɔ jrɛ’ sea "i ‑tee’‑ ’sʋ ɛ ! ¹⁹’Sʋ ʋʋa bla pɛe, ʋʋa ‑fɩɩn", ‑wɛe ʋʋa kple, ʋʋ ’na : Wɛe‑tɩ oo ! Wɛe‑tɩ oo ! ‑Kwlɔ klaa" ‑nɛ ‑ɛ ‑nɩa "wliiɛ‑kwlɔ ‑wɛe ‑ɛ ’di nyʋ "klein ‑blea ‑bato’ ’kpaa’ "wliiɛjeʋn ɛ ! Ɛmɛ ‑sɔn i ’de "jriɛ ‑tɛ due’ ’di i !

²⁰Jaʋn, ɛ nʋ ’mʋa‑ ’de ‑kwlɔ ‑nɛ ’ɛ isɔn‑tɩ ’ʋn. Ao ‑nɩa Kea ’a nyʋ o, Sesi ’a dboʋn o, Kea ’a wlu ’kwajaaʋn o, ao nʋ ’mʋa‑ ‑ke ! Dɛ‑nʋɛ’ ‑bo Kea ’je ɛɛ’ ‑kwlɔ tu ’a ’pee kan’ a, ‑mɛ ɛ ’wlʋɛ aopʋ o ’de aoa’ "isrɛ ‑tɩ ’ʋn.

²¹’Sʋ Kea ’a "soai ‑ɔ ‑kmai" ɛ, ɔ "duɛ "soukpo klaa" due’ ’ʋn. Ɛɛ’ "sou tu kuɛ kwa, ’de ɔ ‑fii" ɛ ’de ’tɔniɛ wɔn ‑wɛe ɔ ’na : ’Kamɔ nyʋ a mu ’kpɩ ’ʋn "dua’ ‑wɛe nyʋ ’je Babilɔnɩ‑kwlɔ klaa" ‑sɔn po, ‑wɛe nyʋ se ɛɛ’ ‑kɔ ’jei ’bode ‑bode ’bode. ²²Nyʋ se ɛɛ’ ‑siplʋ blaʋn o, "kwi ‑kweɩn blaʋn ke ‑tɩɛn’kɔʋn blaʋn ’a blewlu ’wɔin ’bode. Nyʋ se ɛɛ’ dbaʋn o, maʋ o, ti ‑paʋn ’a jrɔ’ "jriɛ‑ ’jeei ’bode. Nyʋ se "sun ke ‑toe ’a wlu ’wɔin ’bo ɛ ’di, ²³nyʋ se ‑dam’ba ’a ‑sɔn’ "jriɛ‑ ’jeei ’bomu. ’De nyʋ se ’nynɔ ke kʋan ’a wlu ’wɔin ’bo ɛ ’di ’bode, dɛ‑nʋɛ’ ɛɛ’ ’dɔɔpoʋn mʋ ‑nɩ ’blʋa ‑nɛ ’ɛ "jrujeʋn klae" ’de‑, ‑wɛe ɛɛ’ ‑kwlɔ tu ’a "jriinmɔa’ ‑ɛ ‑nɩa jrii’ ‑sɔn ɛ, ɛ ‑cri’ ’blʋa‑ ‑wee’ "klein ’a nyʋ ’mɛ ‑wɛe ɛ poo ʋʋpʋ ’srɛ i.

²⁴Dɛɛ‑tɩ ’pee kpʋn a Babilɔnɩ‑kwlɔ ɛ, ɛmɛ ‑nɩ Kea ’a wlu ’kwajaaʋn o, Kea ’a ‑jei" naaʋn ke nyʋ "klein nyʋ ’dba ’de ’blʋa ‑wee’ "kpei ’bo ɛɛ’ ‑kwlɔ tu "jru mɔ ʋʋa’ nymɔ ’kpa.

’Mʋa klaa" ‑nɩ ’e jaʋn ’di

¹’Bo ‑mɛ ’de ɛ, ’ɩn ’wɔn wlu jrɛ’ ’e jaʋn ’di ka nyʋ ‑tuu"‑tuu a wlua, ɛ ’na :

Aleluia ! Ao ’bɛɛ‑ Kea ’a ’nynɩ "i ! ’Pʋʋa’ o, ’nynɩ ’wlʋa’ o, "ikmaa’ o, ɩ nɩɛ ‑aa Kea ’a dɛ ‑o ! ²‑Bo ɛ ’je nyʋ ’a ’pee ɛ, dɩ ɛɛ ’tmʋa ɩ nɩɛ tɔ’ ‑tɩ ‑wɛe ɩ ’srɛi". ’Kaa ‑kwlɔi ‑te ’nynɔ klaa" ‑ʋa dɛ "jriitɩan’ dooa ’blʋa‑ ‑wee’ "klein ’a "jru ɛ, ɛ ’je ʋa’ ’pee ‑wɛ‑. Ʋ ’dba Kea ’a dbonʋʋn, ɛmɛ ‑tɩ Kea ‑sa ʋʋpʋ kpan o.

³’Sʋ ʋʋ wlu’ ka ke’wlɛ, ʋʋ ’na : Ao ’bɛɛ‑ Kea ’a ’nynɩ "i ! Nɛ ‑poa’ ‑kwlɔ klaa" ‑nɛ "jri ɛ, ɛɛ’ dao’ se "bu ‑tɩ ’bɔi ’bode. ⁴’Sʋ nyʋ‑cɔɩn’ ’a kwla ’sɔɔn ’jɔ ‑nyiiɛ ‑nʋ o, ’kmʋnɩdɩ ‑nyiiɛ ‑nɩ "siiɛ‑ ’kɔi‑ i ‑wɛe Kea ‑tea i ’bo ’beɔkpa‑tɛ "kpei ɛ, ʋʋa ‑gbɛɛ’ nɛ, ʋʋ ’na : Tɔ’ ‑o, ’kamɔ ɛ nɩ‑ ‑cɛɛn’‑. Aleluia ! Ao ’bɛɛ‑ Kea ’a ’nynɩ "i !

⁵’Bo ‑mɛ ’de ɛ, wlu jrɛ’ ‑wlʋ ’o ’beɔkpa‑tɛ "kpei, ɛ ’na :

Ao nyʋ "klein, aopʋ ‑nɩa Kea ’a dbonʋʋn ‑wɛe ‑ɔɔ pleea Kea a, aoa’ mɩɩ" ke klae" ’bɛɛ‑ ‑aa Kea ’a ’nynɩ "i !

⁶’Sʋ ’ɩn ’wɔn wlu jrɛ’ ka nyʋ ‑tuu" ’a wlu nɩa, ’kamɔ ɛ nɩ‑. Ɛ ‑kɔ’ "ni‑gbuu klaa" a klu, ɛ ‑kɔ’ ‑na "ni ’a "plan wlu‑. Ɛɛ’ wlu tu ’na :

Aleluia ! Ao ’bɛɛ‑ Kea ’a ’nynɩ "i ! Dɛ‑nʋɛ’ ‑aa Tʋ"bo Kea ‑ɛ ‑kmai" ‑ɛ ‑sia dɩ ‑wee’ ɛ, ɛɛ’ ’beɔnɩsʋn po "jri "kpae’ ‑wɛ‑ ! ⁷‑A nʋ ’mʋa‑, ‑a ’di nmɔ wɔn, ‑a ‑bɛɛ’ Kea ’a ’nynɩ "i ! Dɛ‑nʋɛ’ ’blaaju ’a ’nynɔ ’ble‑kɔ ’ɔ ‑tu" wɩ nyni’. Ɔɔ’ ‑pɔin ‑tu" ‑kɔ’ dɩ ‑pʋn" ‑wɛ‑. ⁸Dɩplʋ ‑ɩ ‑plua" "puu’ ‑wɛe ‑ɩa fan a, ɩmɩ Kea "nyɩ ʋ ‑wɛe ʋ paa ’ʋn.

Ʋa’ ’ʋnpaadɩ ’dɔe ‑nɩ, ɩmɩ ‑nɩ Kea ’a ‑jei" naaʋn ’a "isrɛdɩ ʋʋa nʋa.

⁹’Sʋ Kea ’a "soai ‑nɔ wluɛ ’ʋn ‑pee, ɔ ’na : ‑Ɩn ‑crɩ wlu ‑nɛ : Nyʋ ‑ʋʋ ‑daa’ ‑wɛe ‑ʋʋ ‑jea Kea ’a ’sraa ‑sablaaju ’a ’nynɔ ’ble‑kɔ ‑sɔn mu ɛ, ‑wi" ‑mʋ nʋ ’mʋa‑ ! ‑Wɛe ɔ wlu ke’wlɛ, ɔ ’naa : Wlu ‑nɩ ɩ nɩɛ tɔ’ ‑tɩ, Kea ’a ‑cɛ" ’kpa ‑da kan’. ¹⁰’Sʋ ’ɩn "siiɛ ’kɔi‑ i ’bo ɔ "juɔi ‑wɛe ’ɩn ’je ɔ "juɔi ‑gbɛɛ’‑. ’Kaa ɔ wlu’ ’de ’ʋn ‑pee ɔ ’na : "Ɩɩn‑, ‑ɩn ‑bo ’ʋn "juɔi ‑gbɛɛ’ ɛ, Kea mɛ ‑ɩn ‑je "juɔi ‑gbɛɛ’ ka‑ ! ’Mɔ nɩɛ Kea ’a dbonʋi ‑o ‑ke, ka ‑ɩn ‑ke ‑ma de ’di‑wi" ‑poa’ Sesi ‑tɩ’ o nɩa, ’kamɔ ’ɩn nɩ‑. Sesi ‑tɩ’ o poa’ ‑nɛ, ɛmɛ Kea ’a ‑Suu a nʋ ’de Kea ’a dbonʋʋn ’ʋn, ‑wɛe ʋʋa ’tmʋ ɛɛ’ ‑tɩ’ ’de nyʋ ‑pee.

"Ju ‑tea soo" plu "kpei ɛ

¹¹’Ma ‑gbʋn a ’e ’sʋ jaʋn kain ɛ wɔn. ’Sʋ soo" plu due’ ‑tan’. "Ju ‑tea ’bo ɛ "kpei ɛ, nyʋ a ’dɔɔ‑ wlu "kpei‑ kpʋn i ke tɔ’ "i nyɔ ke ‑wɛe ɔɔ’ nyʋ ’a ’pee ’jesʋn ke ɔɔ’ tʋ ‑fɔn’ sʋn ’srɛi". ¹²Ɔɔ’ "jri ‑kɔ’ nɛmɩɩɔ, ‑wɛe ɔ ‑tu" tʋ"bofan ‑tuu"‑tuu "jru. Ɔɔ’ ’nynɩ ‑jɩ ‑crɩɩa’ nyɔ jrɔ’ se ‑mɩ ’a ’da ka juo‑ ‑bo ɛ se ɔɔ’ ’sʋ nɩ ɛ. ¹³"Bai ‑tɔɔn’ ɔ paa ’ʋn ɛ, ɛ ‑wee’ nɩɛ nymɔ ’ɔ ’sʋ. Ɔɔ’ ’nynɩ jrɩ’ ‑nɩ Kea ’a wlu. ¹⁴"Sʋɩ ‑nɩa ’e jaʋn ’di ɛ, ʋʋ ‑wee’ nɩɛ ’o ɔ ’de, ‑wɛe ʋʋ ‑wee’ ‑te soe" plu "kpei ’de ʋʋ paa dɩ pli ’dɔe ’ʋn "puu’‑. ¹⁵‑Placnɛ ‑nma" a, mɛ ‑wlʋ ’de ɔ ’wɔn ‑wɛe ‑ɛ ‑je tʋ ’a "jru kpa ’bo ’blʋa‑ ‑wee’ "klein ’a nyʋ "kpei. Ɔɔ’ ‑cɛ" ’kpa a muɛ nɩɩɛkpa ’ʋn "dua’ ‑wɛe ɔ ’je ʋʋpʋ ’dei ‑te. Ka nyɔ ɔ dua rɛsɛn jɔ ’ɔ, ɔɔ’ ‑cɛ" ’kpa ‑a mu ʋʋpʋ "kpei naa’. Kea ‑blea "ikmaa’ ‑ɛ ‑sia dɩ ‑wee’ ɛ, ’kamɔ ɛɛ’ ’cɛn klaa" a mu "jri "kpae’ poa’. ¹⁶’Nynɩ ‑crɩɩa’ ’bo ɔɔ’ "bai ke ɔɔ’ bʋ ’pɔo’ ‑pʋn" ɛ, ɩmɩ ‑nɩ : ’Beɔ‑wi" ’a ’Beɔ ke tʋ"bo ‑wi" ’a Tʋ"bo ke.

¹⁷’Sʋ ’ɩn ’jeeɛ Kea ’a "soa i "jriɛ‑ ‑ɔ ‑nyna i ’de ’jrʋ "jri ‑wɛe ‑ɔɔ kpa wlu "jɛi ’de ‑ɔɔ ‑da nʋʋɩ "klein ‑ɩa ‑wan" ’e "jɛi ɛ, ɔ ’na : Ɩ ji, ɩ ’kɩɛn‑ "jrui ! ‑Wɛe diidɛ klaa" Kea ’jea ɩ "nyɩ ɛ, ɩ ’je ɛ di. ¹⁸Ɩ ji ‑wɛe ɩ ’je ’beɔ‑wi" o, "sɛɩ ’a klae" o, "ikmaʋn o, soe" ke ɩa’ "kpei ‑teʋn o, nyʋ "klein ‑nɩa kʋɔnpʋ‑ o, ‑cɛ" ‑peeteʋn o, mɩɩ" ke klae" ’a nmi di.

¹⁹’Bo ‑mɛ ’de ’sʋ ’ɩn ’jeeɛ nmi‑kwli ‑nɛ ke ’blʋa ’a ’beɔ‑wi" ke ʋʋa’ tʋ‑fɔʋn "jriɛ‑. Ʋʋ ’kɩɩɛn "jrui ‑wɛe ʋʋ ’je "ju ‑tea i ’bo soo" plu "kpei ke ɔɔ’ "soa‑wi" tʋ o ‑fɔn’. ²⁰’Sʋ tʋ du nmi‑kwli ke ɛɛ’ ’cɛ ’mɛ ‑wɛe ʋʋ kpʋn ɛ ke ɛɛ’ sɩ ’tmʋi ‑nɔ ke. Ɔmɔ ‑ɔ ‑daa’ ɔɔ’ ‑cɛ" Kea ’a wlu ’kwajaai ’de‑, ‑wɛe ‑ɔ nʋ jrii’ klae" klae" ’bo nmi‑kwli "juɔi. ’De ɩa’ jrii’ tu ’ʋn ’bomɔ ɔ cɛɛn ‑wɛe nyʋ "klein nmi‑kwli ’a juo’ɩn nɩa ‑pʋn" ‑wɛe ʋʋ ‑gbɛɛa’ ɛɛ’ ‑kooɔdɛ "juɔi ɛ, ɔ pooɛ ʋʋpʋ ’srɛ i tɛin". Nmi‑kwli ke ɛɛ’ sɩ ’tmʋi ʋʋ kpʋn a ‑nʋ, ʋʋ se ’mɛ ’sʋ ʋʋ je ʋʋpʋ ’de ‑toun" klaa" ’di ’de nɛ‑gbauo klaa" ke ’nʋ ‑nyniia "jrii ‑ɛ ’dba nyʋ ’ʋn ‑fi" e‑. ²¹‑Placnɛ ‑ɛ ‑wlʋa ’e "ju ‑tea i ’bo soo"‑ "kpei ’wɔn ɛ, ɛmɛ ‑dba nyʋ ‑jʋ ‑sia ’o mu ɛ, ‑wɛe nʋʋɩ ‑wee’ "klein di ʋʋa’ nmi, ’sʋ ɩ dbo.

‑Sɩn ’a "wlu due’ ’a ‑tɩ’

¹’Ma ‑gbʋan ’emu ’sʋ ɛ, Kea ’a "soai due’ ‑wlʋ ’e jaʋn ’di ‑ɔ ‑si" ii ɔ ’bleɛ "bie‑gbau" klaa" ’a ‑da’kle ke ‑gbaacɛe’ "dbu klaa" kwa, ²‑wɛe ɔ kpʋn ‑sre" ‑nɛ, ɛmɛ ‑nɩ sɛn soa soa, ɛɛ’ ’nynɩ ‑nɩ ‑siɔn’ ke Satan ke, ‑wɛe ɔ sɔɔn ‑gbaacɛe’ "dbu ‑nɛ i ’de ɔ ’je isaan mamaʋ ’de ‑sɩn ’a "wlu due’ ’di. ³’Sʋ Kea ’a "soai ‑fii" ɔ ’de "bie‑gbau" klaa" ‑ɛ sea "ti ‑ta ’ble ’di ‑wɛe ɔ poɛ ‑da’kle "wɔin ’de ɔ kaan ɛ ’de woi "klɔklɔ ‑wɛe ‑sre" je nyʋ ’a "jru ‑jei" ‑saa mamaʋ ’sʋ ‑sɩn ’a "wlu due’ ‑nɩ ’je ‑si’. ‑Bo ‑sɩn ’a "wlu due’ ‑nɩ ’wlʋ ’o ‑jei" ɛ, ʋʋa muɛ ɔ ikaian’ ’de nɔ" dɛ‑saan" ka ’di.

⁴’Bo ‑mɛ ’de ɛ, ’ɩn ’jeeɛ ’beɔkpae ‑tuu" "jriɛ‑, ɩ ke nyʋ ‑tea i ’bo ɩ "kpei ke. Ʋʋ "nyɩɛ ʋʋa’ nyʋ tu "ikmaa’ ‑wɛe ʋʋ ’je nyʋ ’a ’pee ’je. Nyʋ ‑ʋʋ ‑jea Sesi ’a ‑tɩ’ tɔ’ ’ʋn, ‑wɛe ka ɔ nɩa ʋʋa’ ’Blei ‑ʋʋ ‑tmʋ ɛ ’de nyʋ ‑pee ‑wɛe ‑ʋʋ ‑tmʋa Kea ’a wlu ’de ʋʋ cɛan "jru "i ’de ɛɛ’ ‑tɩ ’ʋn ɛ, ’ɩn ’jeeɛ ʋʋa’ ‑sii "jriɛ‑ ‑ke. Nyʋ "klein ‑ʋʋ sea nmi‑kwli ke ɛɛ’ ‑kooɔdɛ "juɔi ‑gbɛɛ’ ‑wɛe ɛɛ’ juo’ɩn sea ’o "juɔi nɩ, ’de ɛ sea ’o sʋn "kpei nɩ, ‑ʋʋ ‑mɛa ’de ɛɛ’ ‑tɩ’ ’ʋn ɛ, ʋʋ ‑wee’ jiɛ ’kmʋ de, ’ɩn ’jee‑ ʋʋpʋ "jriɛ‑ ’mɛ ‑ke. ‑Wɛe ʋʋ ke Nyʋ’pʋʋi Klisɩ ’je ’nynɩ i ’wlʋʋ ’de ‑sɩn ’a "wlu due’ ’di. ⁵’Mɛʋn ‑sia ’o mu ɛ, ‑wi" ‑mʋ se ’kmʋ de jii mamaʋ ’sʋ ‑sɩn ’a "wlu due’ ‑nɩ ’je ’o ‑jei" ’wlʋ. Nyʋ ʋʋ ’dbaa ‑wɛe ‑ʋʋ ‑sɔan "kunyɩɔ’ ‑nʋ ɛmɛ ‑nɩ "kunyɩɔ’ sɔan ’a "i‑saa’ ‑nɛ.

⁶Nyʋ ‑ʋʋa mua "kunyɩɔ’ sɔan’ "i‑saa’ nɔ" nyɔ ‑ɔɔ mua ’e ‑wi" ‑mʋ "klu nɩa’ a, ‑mɔ nʋ ’mʋa‑, Kea ’a "diwan kpʋɔn’. ’Mɛa ’a kpɛ ’sɔɔn ‑nɛ se ɔ ’bɛɛ‑ ’bode. ’Kaa ʋʋa’ nyʋ tu ɛ, ʋʋa muɛ Kea ke Nyʋ’pʋʋi Klisɩ "juɔi nʋʋa’ ‑wɛe ʋʋ ke ɔ ’je ’nynɩ i ’wlʋʋ‑ ‑tadue ’de ‑sɩn ’a "wlu due’ ’di.

Tʋ du Satan ’mɛ ’bode ‑bode ’bode

⁷‑Bo ‑sɩn ’a "wlu due’ ‑nɩ ’wlʋ ’o ‑jei" ɛ, Satan a muɛ i kaian’ ‑wɛe ɔ ’je ‑kaso ’di ’wlʋ. ⁸’De ɔ ’je ’blʋa‑ ‑wee’ ’a nyʋ ’srɛ i pooa’ mu, ɛmɛ ‑nɩ ‑Gokɩ ke Magogɩ ‑kɩ ’de ɔ ’je ’e ’blʋa ’a ’fɔ ‑nɩa ‑nyiiɛ "kpei mu ‑wɛe ɔ ’je ’beɔdɛ ‑wee’ "klein ’a nyʋ ’srɛ ipoo‑. Ɔɔ muɛ ʋʋpʋ "jrui ’kɩɩan’ ‑tajrɔ ‑wɛe ʋʋ ’je Kea ’a nyʋ tʋ o ‑fɔn’. Ʋʋa muɛ "i ‑tia’ ka ’tɔniɛ ’a ‑pɩɩɔn" nɩa.

⁹Ʋʋa muɛ ’blʋa‑ ‑wee’ "kpei ‑gbaa’ ‑wɛe ʋʋ ’je Kea ’a ’cɛ ke ɛɛ’ ‑kwlɔ ‑ɛɛ ‑tɩ’ ɛ kma ’dei ‑pin. ’Kaa nɛ ɛ muɛ ’de jaʋn ’di ’wlʋa’ ‑wɛe ɛ ’je ʋʋpʋ i‑sa. ¹⁰’Sʋ ‑siɔn’ ‑ɔ ‑pooa ʋʋpʋ ’srɛ i ɛ, ɔ kpʋʋɛn’ ‑wɛe ɔ ‑fii" ’ɛ ’de ‑toun" klaa" ’di ’de nɛ‑gbauo klaa" ke ’nʋ ‑nyniia "jrii ‑ɛ ’dba nyʋ ’ʋn ‑ta nmi‑kwli ke sɩ ’tmʋi nɩa. ’Demɔ ʋʋ ’je nɩ‑ ‑wɛe ʋʋ ’je ʋʋa’ ‑cɛ" wɔn ’je jeejee ’de "maʋ’wɩ o ’jrʋ ‑gbaowɩ ’di mamaʋ ’sʋ.

De ’bɔɔ‑pee’

¹¹’Bo ‑mɛ ’de ɛ, ’ɩn ’jeeɛ ’beɔkpa‑tɛ ‑plu klaa" due’ "jriɛ‑ ɛ ke "ju ‑tea i ’bo ɛ "kpei ke. ’Blʋa‑ ke jaʋn sɔn i ’bo ɔ "juɔi, ɩ se ‑teɩn ’ble ’bode. ¹²’Sʋ ’ɩn ’jeeɛ ’mɛʋn ’a mɩɩ" ke klae" "jriɛ‑, ʋʋ nyna i ’bo ’beɔkpa‑tɛ "juɔi. ’Sʋ ’sbɩpin ‑tuu"‑tuu kaiɛn "wɔin. ‑Wɛe ’sbɛ jrɛ’ kaiɛn "wɔin ke’wlɛ ’bo ‑mɛ ’de ‑mɛ nɩ ’kmʋnɩsbɛ. ’Bo ’mɛʋn ’a nʋʋdɩ ‑ɩ ‑crɩɩa’ ’de ’sbɩ ‑nɩ ’di "kpei mɔ ʋʋa tba ‑wɛe ʋʋa ’je ʋʋa’ ’pee. ¹³’Sʋ nyʋ ‑mɛa ’e ’tɔniɛ wɔn ɛ, ’tɔniɛ ja ‑wi" ‑mʋ ’mɛ, ‑wɛe ’mɛa’ o, ’mɛʋn ’a ‑kwlɔ o, ‑mɩ ja ɩa’ ‑nɩ ’mɛʋn ‑ke. ‑Wɛe ka jrɔ’ ɔ nʋa, ’kamɔ ɔɔ’ ’pee ’je ’jeeɛ, ka jrɔ’ ɔ nʋa, ’kamɔ ɔɔ’ ’pee ’je ’jeeɛ. ¹⁴’Sʋ ʋʋ kpʋn ’mɛa’ ke ’mɛʋn ’a ‑kwlɔ ’mɛ, ʋʋ ‑fii" ɩ ’de nɛ‑gbauo klaa" ’di. Ʋʋa’ ’de nɛ‑gbauo klaa" ’di mua’ ‑nɛ, ɛmɛ ‑nɩ ’mɛa’ ’a kpɛ ’sɔɔn ‑nɛ. ¹⁵Nyɔ "o nyɔ ‑ɔɔ ’nynɩ sea ’crɩɩɛ ’de ’pʋsbɛ ‑nɛ ’di ɛ, ‑mɔ ‑fii" ɛ ’de nɛ‑gbauo klaa" ’ʋn.

Jaʋn dee ke ’blʋa‑ dee ke

¹Jaʋn ke ’blʋa‑ ‑jɩ ‑nɩa tɛin" ɛ, ‑mɩ sɔn i, ɩ ke ’tɔniɛ ke. ’Sʋ ’ɩn ’jeeɛ jaʋn dee ke ’blʋa‑ dee "jriɛ‑. ²’Sʋ Selisalɛm ‑kwlɔ ‑dee ‑ɛ ‑nɩa Kea ’a ‑kwlɔ ɛ, ɛ ’wlʋɛ ’e jaʋn ’di ɛɛ jea i "si ‑wɛe ’ɩn ’jee‑ ɛ "jriɛ‑. Ka ’nynɩa ‑saan" ‑ʋa ‑tia" jra dee ’ʋn a ‑tua" dɩ ’dɔe ‑pʋn" ‑wɛe ʋa ’jaa‑ ʋa’ kʋan "i ɛ, ’kamɔ ɛɛ’ ‑kwlɔ ‑tu nɩ‑. ³’Sʋ ’ɩn ’wɔn wlu klaa" jrɛ’ ‑ɛ ‑wlʋ ’e ’beɔkpa‑tɛ o fɔ o ‑wɛe ɛ ’na : Ao ‑gbʋn ’nɔ, Kea ji ’de nyiɔpʋ "klu "tia’ ‑wɛ‑ la. Ɛ ke ʋʋpʋ "tii’ ’bode ‑wɛe ʋʋa mu ɛɛ’ nyʋ nɩa’, ’de Kea ’a ‑cɛ" ’kpa ke ʋʋ ’je i ‑te ‑wɛe ɛ ’je ʋʋpʋ ’a Kea nɩ‑. ⁴Ɛɛ muɛ ʋʋpʋ "miini "jri i‑saa’. ’Mɛa’ o, ’kwɛ‑ paa’ se nɩi ’bode. Nyʋ se ‑fɩn" ‑cruɛn" ke kplewlu ’wɔin. Nyʋ se ’kle ’jei ’bode, dɛ‑nʋɛ’ dɩ ‑jɩ ‑nɩa tɛin" ɛ, ‑mɩ ‑si’.

⁵’Sʋ "ju ‑tea i ’bo ’beɔkpa‑tɛ "kpei wlu’ ka, ɔ ’na : ‑Ɩn ‑gbʋn ’nɔ, ’ɩn poɛ dɩ ‑wee’ "klein ’a ‑gbɔdee "ni. ’Sʋ ɔ ’na : ‑Ɩn ‑crɩ wlu ‑nɩ, dɛ‑nʋɛ’ ɩa’ wlu tu nɩɛ tɔ’ ‑tɩ, ɩ nɩɛ ‑kwlɩ" ‑te’ ka. ⁶‑Wɛe ɔ wlu ke’wlɛ, ɔ ’na : Ɛ ‑kwɛ‑ ja ‑wɛ‑ ! ’Mɔ ‑saa "i, ’mɔ ‑bɔɔ’ de, ’mɔ ‑kɔn nya, ’mɔ ‑kan dɩ ‑wee’ "jru. Nyɔ "o nyɔ "ni ’natʋn a nʋa, "ni ‑ɛ ‑wlʋa ’o ’kmʋnɩ ni ’a "jru "kpei ɛ, ɛmɛ ’ma mu ɔ "nyɩa’ foo" ’ʋn, ‑wɛe ɔ ’je ’na. ⁷Nyɔ ‑ɔɔ mua tʋ ’a "jru kpaa’ a, ɩa’ dɩ tu a muɛ ɔɔ’ ’kɛn nɩa’. ’Ɩn ’je ɔɔ’ Kea nɩ, ’de ɔmɔ ’je ’ma "ju nɩ‑. ⁸’Kaa nyʋ ‑ʋʋa pleea nyʋ ’a "jri ‑wɛe ‑ʋʋa’ ‑kwlea wlu fai" poo ‑tɩ o, nyʋ ‑ʋʋ sea Kea ‑kwlɩ" ‑te’ o, nyʋ ‑ʋʋa nʋa ‑flɛn" dɩ ’a "kwli ‑wee’ o, "ku ’dbaʋn o, kao’bleʋn o, jrii’ poʋn o, kɔun "juɔi ‑gbɛɛʋn o, sɩ ’tmʋ ʋn o, ʋʋa’ ‑nɩ ‑teɩn nɩɛ ’de nɛ‑gbauo klaa" ke ’nʋ ‑nyniia "jrii ‑ɛ ’dba nyʋ ’ʋn. Ʋʋa’ ’de ɛ ’ʋn mua’ mɛ ‑nɩ ’mɛa ’a kpɛ ’sɔɔn ‑nɛ.

Selisalɛm ‑kwlɔ ‑dee

⁹’Sʋ Kea ’a "soa ‑mɛ" ’sɔn ‑nʋ ‑ʋʋ ‑blea ‑gblɩ ‑mɛ" ’sɔn kwa ’de ‑ɩ ’di nyʋ ’kle ‑tu" dɩ ‑mɛ" ’sɔn ‑bɔɔa’ de nɩa ʋʋa’ due’ ji’ ‑wɛe ɔ wlu ’ʋn ‑pee, ɔ ’na : ‑Ɩn ji ‑wɛe ’ɩn ’je ‑ʋn Kea ’a ’sraa ‑sablaaju ’a ‑pɔin tɔɔ‑, ʋmʋ ‑nɩ ɔɔ’ ’nynɔ. ¹⁰’Sʋ Kea ’a ‑Suu "ji ’de ’ʋn ’ɛ ‑wɛe ’ma ‑gbʋan ’emu ’sʋ ’ɩn ’jeeɛ Kea ’a "soai ‑nɔ "jriɛ‑ ‑ɔ kpa ’ʋn ’de crʋ ‑tɔɔn’ ‑tɔɔn "jru pue’. ’De ɔ tɔɔ ’ʋn Selisalɛm ‑kwlɔ ‑dee ‑ɛ ‑nɩa Kea ’a ‑kwlɔ ɛ, ɛɛ ’wlʋɛ ’o Kea ‑pʋn" ’de jaʋn ’di ‑wɛe ɛɛ "si i. ¹¹Kea ’a ‑sɔn’ ‑sɩn’ ɛ ’de woi ‑ta ‑wee’. Ɛ nmɔ "jrii, ɛɛ fan’ ka "sou ’dɔe a fan’. Ɛɛ’ "jriinmɔa’ a ‑flaan’ ’e nyʋ "jri ka "sou ’dɔe nyʋ a ’daa‑ Klitalɩ nɩa. ¹²Blo’ ‑pian’ ɛ ’dei ɛ, ɛ ’bɛ "kpei‑ ‑wɛe ɛ tɛn ja. Ɛ ’bleɛ ‑gbɛin" ‑je ’a ‑puue ’jɔ ’sɔɔn, ‑wɛe Kea ’a "soa ‑puue ’jɔ ’sɔɔn ɔ fuo ɩa’ ‑gbɛin" ‑je tu i due ’due. Israɛ ’a ‑kʋn ‑nɩa ‑puue ’jɔ ’sɔɔn ɔ, ɩa’ ’nynɩ ’crɩɩɛ due ’due ’bo ‑gbɛin" ‑je ‑nɩ "kpei. ¹³‑Gbɛin" ‑je taan ‑nɩ ɛɛ’ ‑kwlɔ tu ’a ’fɔ ‑nɩa ‑nyiiɛ o i : ‑gbɛin" ‑je taan nɩ ’e ’jrʋ’ ’a ’wlʋ ’ɩn fɔ o, ‑wɛe taan nɩ ’e ’jrʋ’ ’a dianfɔ o, ‑wɛe taan nɩ ’e ’jrʋ’ ’a kʋanfɔ o, ’de taan nɩ ’e ’jrʋ’ ’a blu ’ɩn. ¹⁴Blo’ ‑pian’ ɛɛ’ ‑kwlɔ tu ’dei ‑nɛ, ɛ tba ’o "sei kpi ’a ‑puue ’jɔ ’sɔɔn "kpei. Kea ’a ’sraa ‑sablaaju ’a dboʋn ‑nɩa ‑puue ’jɔ ’sɔɔn ɔ, ʋʋpʋ ’a ’nynɩ ’crɩɩɛ ’bo "sei ‑nɩ "kpei due ’due.

¹⁵Kea ’a "soai ‑ɔɔ wlua ’ʋn ‑pee ‑nɔ, ɔ ’bleɛ tu ‑ɛɛ dbaa dɛ kwa, dɛdbaatu ‑nɛ ’sani ‑nʋ ɛ. Ɛmɛ ɔ "duo‑ ’ʋn ‑wɛe ɔ ’je ‑kwlɔ ‑nɛ ke ɛɛ’ blo’ ’a wɔn ke ɛɛ’ blo’ dbaa‑. ¹⁶‑Kwlɔ ‑nɛ, ɛ ’bleɛ ’fɔ ‑nyiiɛ, ɛɛ’ ’fɔ ‑wee’ tɛɛn ’ʋn ’ɛ. Kea ’a "soai nʋa ɔɔ’ tu ‑nɛ ‑wɛe ɔ dbaa ‑kwlɔ ‑nɛ ’sʋ ɛ, ɛ nɩɛ ‑jeblʋ‑ ’a ‑toe nyʋ a na ’ʋn ’a ‑kwlʋ due’ "wlu ’sɔɔn (12 000), ’kamɔ ɛɛ’ ’fɔ ‑nɩa ‑nyiiɛ o, ɛɛ’ blo’ ’a tɛnsʋn nɩ ‑ke. ¹⁷Ɔ dbaa ɛɛ’ blo’ ’a ja tɛnsʋn ’mɛ ‑ke, ‑wɛe ɛɛ’ ja tɛnsʋn nɩ sʋntɩɩ" ’a kmɛ’ ’due kwla ‑nyiiɛ ’jɔ ‑nyiiɛ (144). Ka nyiɔpʋ a dbaa dɩ ɛ, ’kamɔ ɔ dbaa dɩ ‑ke.

¹⁸"Sei ‑kɩɩ ’dɔe ’dɔe nyʋ a ’daa‑ Sasipʋ ɛ, ɩmɩ ‑te’ blo’ ‑nɩa ‑kwlɔ ’dei ɛ, ‑wɛe ‑kwlɔ ’ɔ ‑cɛ" ’kpa ‑mɛ nɩ ’sani ’a ’sʋ ‑wɛe ɛ nɩ "jrii ’srɩsrɩ ka "ni nɩa. ¹⁹"Sei ’a ‑puue ’jɔ ’sɔɔn blo’ ‑ɛ ‑pian’ ‑kwlɔ ‑nɛ ’dei tba ’o "kpei ‑nɩ, ʋʋ nʋɛ "sei ‑kɩɩ ’dɔe ’dɔe ’a "kwli ‑wee’ ‑wɛe ʋʋ ’crɩ ɩ.

‑Jɛ ‑saa "i ‑mɛ ‑nɩ Sasipʋ.

‑Jɛ tba ’o, ‑nɩ Safii‑.

Ɩa’ taan ‑nɛ, ‑mɛ ‑nɩ Agatɩ.

Ɩa’ ‑nyiiɛ ‑nɛ, nɩɛ Emerodɩ.

²⁰Ɩa’ ‑mm" ‑nɛ, ‑mɛ ‑nɩ Onisɩ.

Ɩa’ ‑mɛɛo"‑ mɛ ‑nɩ Sadoanɩ.

Ɩa’ ‑mɛ" ’sɔn ‑nɛ, nyʋ a ’daa‑ mɛ ‑nɩ Klisolitɩ.

Ɩa’ ‑mɛ" na ‑nɛ, ‑mɛ ‑nɩ Berilɩ.

Ɩa’ ‑mɛ" nyɛ ‑nɛ, ‑mɛ ‑nɩ Topasɩ.

Ɩa’ ‑puue ‑nɛ, ‑mɛ ‑nɩ Klisoplasɩ.

Ɩa’ ‑puue ’jɔ due’ ‑nɛ, ‑mɛ ‑nɩ Tuikoasɩ.

Ɩa’ ‑puue ’jɔ ’sɔɔn ‑nɛ, ‑mɛ ‑nɩ Ametistɩ.

²¹’Blʋa ’a wɔn ‑nɩa ‑puue ’jɔ ’sɔɔn ɔ, ʋʋ "duɛ "sei ’dɔe jrɩ’ ’a ‑puue ’jɔ ’sɔɔn ’ʋn ‑wɛe ʋʋ nʋ ɩa’ kludɩ due ’due. Ɩa’ "sei tu ’wlʋɛ ’e ‑klɛ" ‑ɛ ‑nɩa ’e ’tɔniɛ ‑sɔn ’di, ka ‑srɔjɔ nɩa, ’kamɔ ɩ nɩ‑. ‑Jeblʋ ‑ɛ cɛan ɛɛ’ ‑kwlɔ tu ’ʋn ɛ, ’sani ‑nʋ ɛ, ɛ ke dɛ jrɛ’ se "jrii bee‑, ɛ nɩɛ "jrii ’srɩsrɩ, "jriɛ‑ ɛ cɛn ɛ ’ʋn ’ɛ.

²²’Ɩn se Kea ‑gbu klaa" "jriɛ‑ ’jee‑ ’bo ɛɛ’ ‑kwlɔ tu ’di, dɛ‑nʋɛ’ Tʋ"bo Kea ‑ɛ ‑kmai" ‑ɛ ‑sia dɩ ‑wee’ ɛ, ɛmɛ ‑nɩ ɛɛ’ Kea ‑gbu ke ’blaaju ke. ²³’Jrʋ ke ’cʋ ’a fan ’bo ɛɛ’ ‑kwlɔ tu ’di, dɛ‑nʋɛ’ Kea ’a ‑sɔn’ ‑sɩn’ ’bomu ‑wɛe ’blaaju nɩ ɛɛ’ ‑tau. ²⁴‑blua ’dinyʋ ‑wee’ "klein a muɛ naa’ ’de ‑sɔn’ ’ʋn. ’Beɔ‑wi" ‑nɩa ’e ’blʋa‑ "kpei a muɛ ʋʋa’ "wlii‑ ke kɛɛma’ dɛ ’bo ‑kwlɔ ‑nɛ ’di jaa’. ²⁵Ɛɛ’ ‑gbɛin" ‑je se "wɔin kaain, dɛ‑nʋɛ’ ‑sɔn’ ɔ muɛ ‑sɩan’ jeejee, kwie se nɩi ’bode. ²⁶‑Wɛe ’beɔdɛ ‑wee’ "klein ’je ’o ʋʋa’ "wlii‑ o, ʋʋa’ kɛɛma’ dɛ ja. ²⁷’Kaa dɛ ‑nyniia "jrii se ’o ɛɛ’ ‑kwlɔ tu ’di pai. Nyʋ ‑ʋʋa nʋa ‑flɛn" dɩ o, nyʋ ‑ʋʋa ‑tmʋa sɩ o, ʋʋ se ’o pai ‑ke. Nyʋ ‑ʋʋa ’nynɩ ’crɩɩa ’de Kea ’a ’sraa ‑sablaaju ’a ’kmʋnɩsbɛ ’di ɛ, ʋʋa’ ’sʋ ‑je ’o pa.

¹’Sʋ Kea ’a "soai tɔɔ ’ʋn ’kmʋnɩ ni ’a ‑gbuu, ɛ nɩɛ "jrii ’srɩsrɩ ‑wɛe ɛɛ fan ka "sou ’dɔe nyʋ a ’daa‑ Klitalɩ nɩa. Ɛɛ’ "jru ’wlʋɛ ’o Kea ke ’blaaju ’a ’beɔkpa‑tɛ ‑sɔn, ‑wɛe ɛ cɛɛn ’bo ‑kwlɔ ’ɔ ‑kwea’‑. ²’De ’kmʋnɩ tu nɩ ɛɛ’ ’kpʋʋ ‑nɩa ’sɔɔn "kpei‑. Ɛɛ cro’ kpɛ ’ɛ ‑puue ’jɔ ’sɔɔn ’de ‑sʋn ’di ‑mɛ ɛ croɛ ’jɔ ’de ’cʋ "o ’cʋ ’di. Ɛɛ’ wɩn mɩ ‑ɩa ‑pʋʋ’ ’blʋa‑ ‑wee’ ’a nyʋ. ³’Daɩn se ’o ɛɛ’ ‑kwlɔ tu ’di nɩ i. Kea ke ’blaaju ’a ’beɔkpa‑tɛ nɩ ’o ɛ ’di, ‑wɛe ɛɛ’ dbonʋʋn ’je ɛ "juɔi ‑gbɛɛ’‑. ⁴Ʋʋa muɛ Kea ’a "jua‑ "jriɛ‑ ’jeea’, ‑wɛe ɛɛ’ ’nynɩ ’je ’crɩɩɛ ’bo ʋʋa’ "jua ’a "pɛ "kpei. ⁵Kwie se kpʋn i ’bo ɛɛ’ ‑kwlɔ tu ’di, ’jrʋ se fan i ’bomu. Nyʋ se ‑dam’ba tba i, dɛ‑nʋɛ’ Tʋ"bo Kea ’a ‑cɛ" ’kpa ‑nɩ ʋʋpʋ ’a ‑sɔn’, ‑wɛe ʋʋ ’je ’beɔ di jeejee ’de ‑sʋn "o ‑sʋn ’di.

Nyʋ ’snɩ ‑tu" wlu ‑ɛ ‑bɔɔa’ de ke Sesi ’a ji ‑tɩ ke

⁶’Sʋ Kea ’a "soai wluɛ ’ʋn ‑pee, ɔ ’na : Wlu ‑nɩ nɩɛ tɔ’, ɩ nɩɛ ‑kwlɩ" ‑te’ ka. Tʋ"bo Kea ‑ɛ ‑nyɩa" ɛɛ’ wlu ’kwajaaʋn ɛɛ’ ‑Suu ɛ, ɛmɛ ‑dbo’ ɛɛ’ "soai ‑wɛe dɩ ‑tea nʋʋ ‑tɩ ɔ ’je ɩ ’kwla ‑sa ’de ɛɛ’ dbonʋʋn ‑pee. ⁷Sesi ’na : Ao po doin" i, ’ɩn ‑teɛ ji ‑tɩ. Wlu Kea ‑sa ’kwla ‑wɛe ‑ɩ ‑crɩɩa’ ’de ’sbɛ ‑nɛ ’di, nyɔ ‑ɔɔ ‑jɩ wɔn ɛ, ‑mɔ nʋ ’mʋa‑ !

⁸’Mɔ ‑San, ’mɔ ‑ɔ ‑wɔn dɩ ‑nɩ ‑wɛe ‑ɔ ‑jee ɩ "jriɛ‑. ‑Ta ’ɩn ’wɔn ɩ ‑wɛe ’ɩn ’jee ɩ "jriɛ‑ ’sʋ ɛ, Kea ’a "soai ‑ɔ ‑tɔɔ ɩ ’ʋn ɛ, ’ɩn "siiɛ ’kɔi‑ i ’bo ɔ "juɔi, ‑wɛe ’ɩn ’je ɔ "juɔi ‑gbɛɛ. ⁹’Kaa ɔ wlu’ ’de ’ʋn ‑pee, ɔ ’na : "Ɩɩn‑, ‑ɩn ‑bo ’ʋn "juɔi ‑gbɛɛ’‑ ! Kea mɛ ‑ɩn ‑je "juɔi ‑gbɛɛ’ ka‑ ! ’Mɔ nɩɛ Kea ’a dbonʋi ‑o ‑ke, ka ‑ɩn ‑ke ‑ma de ’di‑wi" Kea jaa wlu ’kwa nɩa, ɛ ke nyʋ "klein ‑ʋʋa ‑jea wlu ‑crɩɩa’ ’nɔ ’sbɛ ‑nɛ ’di wɔn ke.

¹⁰‑Wɛe ɔ wlu ’ʋn ‑pee ka ‑ke, ɔ ’na : Wlu ‑saa ’kwla ‑wɛe ‑ɩ ‑crɩɩa’ ’nɔ ’sbɛ ‑nɛ ’di ɛ, ‑ɩn ‑bo ɩ ’kwla ‑tu" ɛ ! Dɛ‑nʋɛ’ nɔ" ‑ɛ ’di ɩa’ dɩ tu ’jea ’o nyni ɛ, ɛ se o tɛɛn‑. ¹¹Nyɔ ‑nyniia ’di wɔn ɛ, ‑mɔ kpa ɔɔ’ ’diwɔnynia’ nya ! ’De nyɔ ‑ɔɔ nʋa dɩ ‑ɩa kpʋʋn a nyʋ ‑flɛn" ɛ, ‑mɔ kpa ɩa’ nʋa’ nya ! ’Kaa nyɔ ‑ɔɔ nʋa "isrɛdɩ ‑cɩɛi" i ɛ, ‑mɔ kpa ɔɔ’ "isrɛdɩ nʋa’ nya ‑wɛe nyɔ ‑kwɛai ’pepe, ‑mɔ ’je ɔɔ’ i ‑kwɛa’ nya kpa !

¹²Sesi ’na : Ao ‑gbʋn ’nɔ, ’ɩn nɩɛ ‑jei", ’ɩn ke ‑kei" ’ɩn ’jea nyʋ ‑sa ke, ‑wɛe dɩ jrɔ’ nʋa ’ɩn ’je ɔ ɩa’ ‑kei" ‑sa due ’due. ¹³’Mɔ ‑saa "i, ’mɔ ‑bɔɔ’ de, ’mɔ ‑kɔn nya, ’mɔ ‑kan dɩ ‑wee’ "jru, ’mɔ dɩ ‑wee’ "klein tba ’de "jri ‑wɛe ‑ɔ ‑nynii ɩ ’o.

¹⁴Nyʋ ‑ʋʋa wɔɔa ʋʋa’ ’ʋnpaadɩ ʋʋ nʋ ’mʋa‑, ʋʋpʋ ‑nɩ ’kmʋnɩ tu ’a ’jɔ di ka, ‑wɛe ‑ʋʋ ‑je ’o ‑kwlɔ ‑nɛ ’di pa ! ¹⁵’Kaa nyʋ ka ‑gbe’ nɩa ‑ʋʋ ‑nɩa kan’, jrii’ nʋʋn, kao’bleʋn, "ku ’dbaʋn, kɔun "juɔi‑gbɛɛʋn, nyʋ "klein sɩ ’tmʋ ’a nʋa ’tʋn, ʋʋa’ nyʋ tu se ’o ɛɛ’ ‑kwlɔ tu ’di pai.

¹⁶’Mɔ Sesi ’mɔ ‑dbo’ ’ma "soai ‑wɛe ka dɩ ‑nɩ nɩa tɔ’ ‑tɩ ɛ, ɔ ’je aopʋ ’tmʋʋ‑ ’de Kea ‑gbi ’dii. ’Ɩn ’wlʋɛ ’de Dafidɩ ’a "ji ’di, ’mɔ ‑nɩ ’cʋ‑sɩɩn ‑ɛɛ fan ‑sɔn’ wɔin" ɛ.

¹⁷‑Suu ke ’sraa ‑sablaaju ’a ‑pɔin’ ’naa : ‑Ɩn ji ! Nyɔ "o nyɔ "ni ’natʋn a nʋa ɔ ji ! Nyɔ "o nyɔ ‑nɩɛ "i ɛ, ɔ "duo ’kmʋnɩ ni ’ʋn ɔ ’je ’na foo" ’ʋn !

Wlu "jru ‑cra’ ’ɩn

¹⁸Wlu "klein ‑ɩ ‑crɩɩa’ ’de ’sbɛ ‑nɛ ’di, nyɔ "o nyɔ ‑ɔ ‑wɔan ɩa’ wlu tu ɛ, ’mɔ San a ‑sɔɔ’ fɛn’ : ‑Bo nyɔ jrɔ’ "duo wlu jrɛ’ ’ʋn ‑wɛe ɔ po ɛ ’bo ɛ "kpei ɛ, ‑mɛ nyʋ ’kle ‑tu" dɩ ‑ɩa ‑tɩ’ ’crɩɩa ’nɔ ’sbɛ ‑nɛ ’di ɛ, Kea a mʋɩ ’ʋn "dua’ ‑wɛe ɛ ’jɩ ɔɔ’ ’kle "kpei ja‑. ¹⁹’De wlu ‑wlʋa ’kwla ‑wɛe ‑ɩ ‑crɩɩa’ ’nɔ ’sbɛ ‑nɛ ’di, ‑bo nyɔ "o nyɔ jrɔ’ ‑sa wlu jrɛ’ ’bo ɛ "kpei ɛ, ‑mɛ Kea a muɛ ɔɔ’ ‑nɩ ’kmʋnɩ tu ’a ’jɔ ke ‑kwlɔ ‑kwɛai ‑ɩa ‑tɩ’ ’crɩɩa’ ’de ’sbɛ ‑nɛ ’di ɛ, ɔ ’kwa ‑saa’.

²⁰Sesi ‑ɔ ‑na dɩ ‑nɩ nɩɛ tɔ’ ɔ, ɔ ’naa :

Kɩɩn, ’ɩn ‑teɛ ji ‑tɩ.

Ɛ nɩ kan’ ‑cɛɛn’‑, Tʋ"bo Sesi, ‑ɩn ji !

²¹Tʋ"bo Sesi ’a ’saaʋn nɩ nyʋ ‑wee’ "klein "kpei !