‑Pɔia" ‑tɩ
Makɩ
’tmʋa
1San Batisɩ ‑sa Sesi ’a ‑jeblʋ
(Matie 3.1-12 ; Luikɩ 3.1-18 ; San 1.19-28)
1‑Pɔia" ‑tɩ ‑ɛ ‑tmʋa Kea ’a "ju Sesi Klisɩ ’a ‑tɩ’ ɛɛ’ ‑teesʋn.
2Dɛ Kea ’a wlu ’kwajaai Esai ’crɩa ’de ɔɔ’ ’sbɛ ’di, ɛmɛ ‑nɩ, Kea wlu’ ’de ɛɛ’ "ju ‑pee ɛ ’na :
‑Ɩn ‑gbʋn ’nɔ, ’ma dboɛ ’ma weepoi nya ‑wɛe ɔ ’je ‑ma ‑jeblɩ ‑sa. 3Weepoi due’ a muɛ ’e ‑pɩɩɔn" blʋa "kpei nɩa’ ‑wɛe ‑ɔ ‑je wlu ka : Ao nmae Tʋ"bo ’a ‑je ! Ao tɛɛn ɔɔ’ ‑jeblɩ ‑wee’ ‑kwlʋ !
4Ɔɔ’ weepoi tu ‑nɩ San Batisɩ. Ɔ wlu’ ka ɔ ’na : Ao juo aoa’ dɩsaɩn "i, ao "biie ’de Kea o, ‑wɛe ao ’je "ni "jru pooɛ‑ ’de kea ’je aoa’ dɩsaɩn ‑kɔ’.
5Suideblʋa ‑wee’ o, nyʋ klein" ‑tia" ’o Selisalɛm o, ʋʋ ‑wee’ a muɛ ’e San o ‑wɛe ʋʋa ’tmʋ ʋʋa’ dɩsaɩn ’de ɔ ‑pee, ‑wɛe ɔɔ po ʋʋpʋ "ni "jru ’bo sudɛn ‑gbuu wɔn.
6Dɩ San paa ’ʋn ɛ, ‑sɛn "kpei soo" ’a "mɩɩ‑ mɩ ‑dbɩ’ ‑wɛe ɔ bla nmiku wlʋ ’di. ’Plaɩn ‑too’ ke dʋ ’a ’cna mɩ ‑nɩ ɔɔ’ diidɛ. 7Ɔ ’na : "Ju ‑a mua jia’ ’de ’ʋn ’de ɛ ɔ kmai", ɔ nɩɛ dɛwɔn ɔ je ’ʋn ‑sii. ’Ɩn se ’kɔi‑ i "sii‑ ka nɩ ’bo ɔ "juɔi ‑wɛe ɔɔ’ "kwlai‑ bɩ’ ‑sa ‑tɩ. 8’Mɔ ɛ, "ni mɛ ’ma po aopʋ "jru, ’kaa ɔmɔ ɛ, Kea ’a ‑suu mɛ ɔ ’je nʋ ‑wɛe ɔ ’je ao dɩsaɩn ’a ‑flɛn" kui ‑sa.
Sesi ’a "ni "jru po ‑tɩ ke ɔɔ’ ‑siɔn’ ’ɔ i ‑tɩn’ ‑tɩ ke
(Matie 3.13-4.11 ; Luikɩ 3.21-22; 4.1-13)
9’De ɛɛ’ nɔ" tu ’di ɛ, Sesi ’wlʋɛ ’e Nasarɛtɩ ’de Galile, ‑wɛe San po ɔ "ni "jru ’de Sudɛn ‑gbuu wɔn. 10Sesi ’wlʋa ’e "niɔ ’sʋ ɔ ’jeeɛ jaʋn "jriɛ ɛ kaiɛn wɔn ‑wɛe Kea ’a ‑suu "si i ’bo ɔ "kpei ka ‑gbɛɛ’ ’ɛ "siai ɛ. 11’Sʋ ɔ ’wɔn wlu due’ ’bo jaʋn ‑kwlʋ ‑ɛ ‑na : ‑Ɩn ‑nɩɛ ’ma ‑tɩ’ kmaju ‑o dɛ‑nʋɛ’ ‑ma nʋɛ ’ʋn ’mʋan "i.
12Sesi ’a ‑nɛɛ ‑wlʋ ’e "niɔ‑ ’sʋ Kea ’a ‑suu "tun ɔ ’de ‑pɩɩɔn" blʋa "kpei fɔ o. 13’Demɔ ɔ nʋʋ ’wɩ ’a kwla ‑nyiiɛ’ ‑wɛe ‑siɔn’ ‑tɩn’ ɔ i ‑wɛe ɔɔ ‑pɔn Sesi ’je ɔ wɔn ’je. Sesi nɩɛ ’e ’kwla ’dinmi "klu ‑wɛe Kea ’a "soa a nʋʋ ɔ "juɔi.
Sesi ’a "i‑saa klai" nynuu
(Matie 4.12-22 ; Luikɩ 4.14-15; 5.1-11)
14‑Ta San muua ‑kaso ’di mɛ Sesi mu ’e Galile ‑wɛe ɔ ’tmʋ Kea ’a ‑pɔia" ‑tɩ. 15’De ɔ ’naa : Nɔ" Kea ‑tua" ɛ nyni’ ‑wɛ‑, ɛɛ’ tʋ"bodɛ jɛɛ aopʋ‑ ’mɛ. Ao poo kplɩn fai" ‑wɛe ao ’je ‑pɔia" ‑tɩ tɔ’ ’ʋn ’je.
16‑Ta Sesi nɩa "ni wɔn i naa’ ’de Galile ɛ, ’bomɔ ɔ jɛɛ Simɔ ke ɔɔ’ "dei Ancre ’sai‑ poa ’de "niɔ‑. 17’Sʋ Sesi wluɛ ʋʋpʋ ‑pee ɔ ’na : Ao bla ’bo ’ʋn ’de ‑wɛe ao ’je nyiɔpʋ ‑cri’ ao ’je ’ʋn ja‑. 18’Bo ɛ "sri ʋʋ je ʋʋa’ ’sai‑ ’bɔ, ʋʋ je ’bo ɔ ’de bla. 19Ɔ ’kpaa ’o nya dɛ‑saan" ’sʋ ɔ ’jeɛ Sebede ’a "nynuu‑ Sakɩ ke ɔɔ’ "dei San, ‑mɛ ʋʋ ‑teɛi ’de ʋʋa’ ‑kwɛɛ" ’di ‑wɛe ʋʋa nmae ʋʋa’ ’sai‑. 20’Sʋ Sesi nynai ‑wɛe ɔ ’da ʋʋpʋ, ʋʋ sia ʋʋ "bo Sebede ke ɔɔ’ dbonʋʋn ’de ‑kwɛɛ" ’di ’sʋ ʋʋ bla ’o Sesi ’de.
Sesi ‑sa "ju due’ ‑suusaʋn ’ʋn
21Sesi ke ɔɔ’ klai" nynuu muɛ ’o Kapɛnaʋm. ‑Kwlewɩ o ’sʋ ɛ, Sesi pa ’e Suifʋ‑wi" ’a "jrui ’kɩɩn‑gbu ’di ‑wɛe ɔ ‑te nyʋ dɛ tɔɔa’ ‑pʋn". 22Ɔɔ’ nyʋ dɛtɔɔsʋn a "siɛ nyʋ ‑wee’ "i ɛ kuɛ ’e ’dei ɛ ke nyʋ ‑ʋʋa tɔɔa nyʋ kɛ’ɛ ‑nɩ se due’ nɩ‑.
23Ɔ siɛ nyʋ dɛ tɔɔa’ ’sʋ "ju due’ ‑suusaʋn nɩa ’e ’ʋn je "wɔ ’de nyʋ "kwlu, ɔ ’na : 24Sesi ‑wlʋa Nasarɛtɩ ɛ, ‑ma dɛɛ ‑tɩ ‑sie ‑aa ‑tɩ’ ’ʋn ɛ‑ ? ‑Ae’ ‑ɩn ji’ ‑ɩn ‑je ‑aa ‑ma" i‑saa ? Ka ‑ɩn ‑wlʋa ’e Kea o ‑wɛe ‑ɩn sea dɛsaʋn ’a ‑kɔ ‑pʋn" nɩ ɛ, ’ɩn ’je kan’ ’mɛ. 25’Sʋ Sesi "wɔɔ ‑suusaʋn "jrui ɔ ’na : Ɛ "mu wɔn, ’de ɛ ’wlʋ ’e "ju ‑nɔ ’ʋn ! 26’Sʋ ‑suusaʋn ‑suua’ "ju ‑nɩa ’mʋa‑ i ’di wɔn nyni ka‑ ‑wɛe ɛ ’wlʋ ’de ɔ ’ʋn ’de "wɔɔa’ ’ʋn. 27‑Crima kpʋn nyʋ "klein ‑nɩa ’o mu ’mɛ, ’sʋ ʋʋa ‑teeɛ’ ba i due ’due ʋʋ ’na : Dɛ ‑nɩ ka ‑mɔ ɛ‑ ? Nyʋ dɛtɔɔsʋn dee ‑jɛ ‑mɛ kmai". ‑Bo ɔ wlu ‑siisaɩn ‑pee ‑cɛɛn’ ‑nɛ ’sʋ ɩa ’je ɔ wɔn ! 28’Sʋ Sesi ’a ’nynɩ "siiɛ Galileblʋa ‑wee’ "kpei "i.
Sesi ’pʋʋɛ Simɔ ’ɔ "bianynɔ ke nyʋ ‑tuu" ke.
(Matie 8.14-17 ; Luikɩ 4.38-41)
29Ʋʋ ’wlʋa ’e Suifʋ‑wi" ’a "jrui ’kɩɩn‑gbu ’di ʋʋ "sia "kpae’ ɛ, Sesi ke Sakɩ ke San muɛ ’e Simɔ ke Ancre o ‑gbu" ’di. 30‑Ta ʋʋa muua, ‑mɛ Simɔ ’ɔ "bianynɔ ’pɛn i, ʋa’ "jru ‑a ‑bai’ ʋʋa’ ku ‑siɛ’ nɛ’. Sesi "sia i ’sʋ ʋʋ ’tmʋ ʋa’ ‑tɩ’ ’mɛ ’de ɔ o. 31Ɔ ’kpa ʋ ‑pʋn", ɔ kpʋn ʋa’ sʋn ‑wɛe ɔ kpʋ "jɛi ’sʋ ʋa’ "jru ’bɔɔ ʋʋa’ ku peeɛ’. Ʋ piɛ dɛ ʋ je ʋʋpʋ "nyɩ.
32’Jrʋ blua i, ’sʋ ʋʋ ja nyʋ "klein ’wɛ‑ ɛ nʋa ke nyʋ ‑siisaɩn nɩa ’ʋn ’de Sesi o. 33‑Kwlɔ ‑wee’ "klein ‑kwɛ‑ de ’bo ɔɔ’ ‑gbu" wɔin". 34Nyʋ "klein ‑jia’ ’mʋa‑, ka ʋʋa’ ’wɛ‑ ’ɛ kpɛ ‑tia ’kamɔ Sesi ’bɔɔ ɩ ‑wee’. Ɔ ‑sa nyʋ ‑siisaɩn ‑tuu" ’ʋn ‑ke. Ɔ se ‑siisaɩn "i "tai‑ ɩ se wlu‑, dɛ‑nʋɛ’ dɛ ɔ nɩa ’ʋn ɛ, ɩ juɛ’.
Sesi ’tmʋɛ Kea ’a ‑tɩ’ ’de Galile
35Ɛɛ’ ‑sɔn’ wɔin" ‑mɛ ‑sɔn’ kwie nɩɛ ’blʋɔi ke, Sesi sɔn ’ʋn ’ɛ, ɔ "siɛ "kpae’, ‑wɛe ɔ ’wlʋ ’o ‑kwlɔ, ɔ mu Kea baea’ ‑ta nyɔ jrɔ’ sea nɩɛ. 36Simɔ ke ɔɔ’ "dɛi‑wi" ‑teɛ ɔɔ’ i ‑pɔan’ ‑pʋn". 37Ʋʋ ’jeɔ i ’sʋ, ʋʋ wlu ɔ ‑pee ʋʋ ’na : Nyʋ ‑wee’ a ‑pɔn ‑mi i. 38’De Sesi ’na : ‑A mu ‑tajrɔ ke, ‑a mu ‑kwlɛ ‑nɩa ‑a ’dewei ’dii. ’Ɩn ’je Kea ’a ‑tɩ’ ’tmʋ ‑o ’demu ‑ke, ɛmɛ ‑tɩ ’ɩn ji. 39Kɔ nʋa ɔ jea Galileblʋa ‑wee’ "kpei‑ mu, ɔɔ jea Kea ’a ‑tɩ’ ’tmʋ ’de Suifʋ‑wi" ’a "jrui ’kɩɩn‑gbi ’dii, ɔɔ jea ‑siisaɩn inʋ ’ka ‑nao.
Sesi ’bɔɔ‑ "ju due’ ’a ’jrʋwɛ‑
40’Jrʋwɛ nʋi due’ jiɛ ’e Sesi o, ‑wɛe ɔ cniiɛ ’kɔi‑ ’bo ɔ "juɔi ɔ bae ɔ i ɔ ’na : ’Ma ’blei ‑bo ‑ɩn ‑nɩɛ "i ɛ, ‑ɩn ‑beeɛ’ ‑ɩn ‑je ’ma ’wɛ‑ ’bɔɔ‑ ’ɩn ’je ’pepe nɩ‑. Ɔ ’da kan’ ’sʋ, 41ɔɔ’ wɛe nʋ Sesi ’mɛ, ‑wɛe ɔ kpa sʋn, ɔ blɔ "i, ɔ ’na : ’Ɩn nɩɛ "i ’mɛ, ‑ma ’wɛ‑ ’bɔ ‑ɩn ‑je ’pepe nɩ‑. 42’Bo ɛ "sri ’jrʋwɛ‑ je "ju ‑nɩa ’mʋa ‑pʋn" ’wlʋ, ɔ je ’pepe nɩ‑. 43Sesi ’jea "ju ‑nɔ ‑jei" poɛ ɔ cri ɛɛ’ ‑cɩɛ ’de ɔ ‑pee, ɔ ’na : ‑Bo ‑ɩn mu ɛ, 44‑ɩn ‑bo dɛ jrɛ’ ’tmʋɛ ’de nyɔ jrɔ’ ‑pee. ’Kaa ‑ɩn ‑to ‑ma ‑cɛ" ’de Kea ’a ’sraa ‑sai o, ‑wɛe ‑ɩn ‑je ’sraa ‑sadɛ ja‑, ka Moisɩ bla ɛɛ’ kɛ’ ɛ, ’de ka ‑ma ’wɛ‑ ’bɔa ʋʋ ’je ɛ juo‑. 45’Kaa "ju ‑nɔ mua, dɛ ‑nʋʋa ɔ "jrii ɛ, ɔ ’jreeɛ ɛɛ’ "kuan i ‑ta ‑wee’ "klein. ’De ɛɛ’ ‑tɩ’ ’ʋn ɛ, Sesi se ɛ ’bɛɛ‑ ’bode ɔ ’je ’mii wa ɔ ’je ‑kwlɔ jrɛ’ ’di i "si, ɔɔ muɛ dɩ ’mii ‑ta nyʋ sea’ "i ‑ti ɛ, ‑wɛe nyʋ a ’wlʋ ‑ta "o ‑ta ʋʋa ji ’de ɔ o.
2Sesi ’pʋʋɛ klɔɔi due’
1Ɛ nʋa ’wɩ ɛ, Sesi jiɛ de ’bo Kapɛnaʋm. Ka ɔ nɩa ’de ‑gbu" jrɛ’ ’di ɛ, nyiɔpʋ‑ ’wɔɛn. 2’Sʋ ʋʋ ‑kwɛ de ‑kwɛ ‑kwɛ, ɛ nʋɛ’ ’sʋ ‑tein se ’o ‑gbu" "wɔin ‑cɔɔn’ ‑nɔ sie‑ ’de "kpae’ ‑wɛe Sesi a tɔɔ ʋʋpʋ Kea ’a wlu.
3’Sʋ nyʋ ‑nyiiɛ jrʋ’ ‑blee’ klɔɔi due’ ’sai ’di ‑ʋʋ ‑jɔ Sesi. 4’Kaa ’de nyiɔpʋ‑ ’a "i ‑tia’ ’ʋn ɛ, ka ʋʋ ’jea ɔɔ’ Sesi "itosʋn nʋ, ’ka se nɩ‑. ’Sʋ ʋʋ ’ja ’de ‑gbu" "kpei. Ʋʋ ‑sa ‑po" ’bomɔ ʋʋ jaa klɔɔi ‑nɔ ‑wɛe ʋʋ "sii ɔ i ’bo Sesi "juɔi. 5Sesi ’jea nyʋ ‑nɩa ’mʋa ’a dɛ tɔ’ "itbaa’ ’sʋ, ɔ wluɛ klɔɔi ‑pee ɔ ’na : ’Ma "ju, ‑ma dɩsaɩn‑ ‑kwɛ’.
6Kɛ’ wɔ‑saʋn jrʋ’ ‑jea ɛɛ’ ‑ta a, ʋʋ naa tɔ’ i ’de ʋʋa’ ‑cɛ" ‑kwlɩ" ʋʋ ’na : 7Ka "ju ‑nɔ ‑mɔɔ’ ’tmʋʋ ‑tɩ nɩ kan’ ‑a ? Ɔɔ toɛ Kea wɔn o. ‑Ɔ ‑bɛɛ’ dɛsaʋn ‑kɔa’ ‑bo ɛ se Kea due’ koun ‑gba’ i nɩ ɛ ? 8’Sʋ Sesi ’jeɛ ’e ʋʋa’ tɔ’ ’dei, ’de ɔ ’na : Dɛɛ‑tɩ aoa’ tɔ’ i naa sʋn nɩ kan’ a‑ ? 9‑Jɛ wɛ‑ ‑kʋan" "jrii ɛ‑ ? ‑Ɩn ‑wlu klɔɔi ‑pee, ‑ɩn ‑na ‑ma dɩsaɩn ‑kwɛ’ ‑ae, ‑ae’ ‑ɩn ‑na ‑ɩn ‑sɔn ’ʋn, ‑ɩn ‑duo" ‑ma "kpei ’pɛndɛ ’ʋn ‑ɩn ‑je na a‑ ? 10Ka ’mɔ nyiɔ ’ɔ "Ju ’bɛɛa ’de ’blʋa "kpei ‑ta, ’ɩn ’jea nyʋ ’a dɩsaɩn ‑kɔ’ ɛ, ka ao ’jea ɛɛ’ juo sʋn nʋ ’ka ka ? ’Sʋ ɔ wlu’ ’de klɔɔi ‑pee ka, ɔ ’na : 11’Mɔ ‑ɔɔ ‑tmʋʋ’ ‑ʋn, ‑ɩn ‑sɔn ’ʋn, ‑ɩn ‑duo" ‑ma "kpei ’pɛndɛ ’ʋn ‑ɩn ‑je ’de ‑ɩn ‑wɔin" de mu ! 12’Bo ɛ "sri ɔ je ’ʋn sɔn ’bo nyʋ ‑wee’ "jri "kpei, ɔ je ɔɔ’ dɩ ’ʋn "duo‑ ɔ je mu. ‑Crima kpʋn ʋʋpʋ ’mɛ. Ʋʋa ’bɛɛ‑ Kea ’a ’nynɩ "i ‑wɛe ʋʋ wlu ka : ʋʋ ’na : ‑A se ‑jɛ ‑mɛɛ’ dɛ tu ’a ‑ta ’je due’.
Sesi ’da Lefi
(Matie 9.9-13 ; Luikɩ 5.27-32)
13Ɛ ’wlʋa ’o muɛ, Sesi muɛ de ’bo "ni wɔin" ke’wlɛ. Nyiɔpʋ ‑tuu" ‑a ji ’de ɔ o ‑wɛe ɔɔ tɔɔ dɛ. 14‑Ta ɔɔ ‑sia’, ’bo ɔ ’jee Alfe ’a "ju Lefi ‑mɛ ɔ ‑teɛ i ’bo ’wɛi‑sagbu ’di. Sesi ’na : Lefi, ‑ɩn ‑bla ’bo ’ʋn ’de, ‑ɩn ‑ke ’ma ‑a ‑je na‑. ’Sʋ Lefi sɔn ’ʋn ɛ, ɔ bla ’bo ɔ ’de.
15‑Ta Sesi nɩa dɛ dɩa’ ’de Lefi o ‑gbu" ɛ, ’wɛi‑sanyʋ ‑tuu" o, nyiɔpʋ ’a "kwli saɩn jrʋ’ o, ɔɔ’ klai" nynuu o, ʋʋ ‑wee’ beeɛ o ʋʋa diiɛ ‑tadue, dɛ‑nʋɛ’ nyʋ ‑nɩa ’mʋa‑ ʋʋa’ ‑tuu" ke ɔɔ na’. 16Kɛ’ wɔ‑saʋn ‑nɩa ’e Fariseɛn "klu ’jea Sesi ɔ ke nyiɔpʋ ’a "kwli saɩn ke ’wɛi‑sanyʋ a diia ‑tadue ’sʋ ɛ, ʋʋ wluɛ ɔɔ’ klai" nynuu ‑pee ʋʋ ’na : Dɛɛ‑tɩ Sesi ke ’wɛi‑sanyʋ ke nyiɔpʋ ‑saɩn a dii ‑tadue ɛ‑ ? 17Sesi ’wɔan ʋʋpʋ ’a wlu ’sʋ ɔ ’na : Nyʋ ‑blea kui ‑sɔn i flɔan’ ʋʋa’ ‑pɔn ‑dɔ’crɔ i, ’kaa nyʋ ‑a dɛ ɛ pooa ʋʋ ‑a ‑pɔn’ ‑dɔ’crɔi i. ’Ɩn se "isrɛnyʋ ’a ‑tɩ’ ji, ’kaa dɩsaɩnʋʋn ’a ‑tɩ’ mɛ ‑tɩ ’ɩn ji, ‑wɛe ʋʋ ’je ’pʋʋa’ ’je.
Nyʋ ‑teeɛ’ Sesi i ’de wɔn ’bɔ‑tɩ ’ʋn
(Matie 9.14-17 ; Luikɩ 5.33-39)
18’Wɩ jrɛ’ o ‑ta San Batisɩ ’a klai" nynuu ke Fariseɛn‑wi" ’bɔa wɔn ɛ, ’bomɔ nyiɔpʋ ji ’e Sesi o, ‑wɛe ʋʋ ‑tee’ ɔ i ka, ʋʋ ’na : Dɛɛ‑tɩ San Batisɩ ’a klai" nynuu ke Fariseɛn‑wi" a ’bɔ wɔn ‑wɛe ‑maa ‑nɩ klai" nynuu ’a ’bɔ wɔn ɛ‑ ? 19’Bomɔ Sesi ‑sɛɛ "kpei ɔ ’na : Aoa naa tɔ’ i ’ee nyʋ ʋʋ ’da ’de ba "bliti ‑kɔ ‑sɔn, ʋʋ ’bɛɛ’ ʋʋ ’je wɔn ’bɔɔ ? "Ɩɩn‑, ‑ta ’nynɔjei ke ʋʋpʋ ‑tea i ke ɛ, ʋʋ se ɛ ’bɛɛ‑ ʋʋ ’je wɔn ’bɔ. 20’Kaa ‑sɔntɩ nyʋ a mua ’nynɔjei ’de ʋʋpʋ "klu ‑saa’ a, ’bomɔ ʋʋ ’je wɔn ’bɔɔ‑. 21Nyɔ se ɛ ’bɛɛ‑ ɔ ’je "wliiɛfɔ dee ’bo ’ʋnpaadɛ soa ‑pʋn" "paa‑. ‑Bo "wliiɛfɔ dee "paa‑ ’bo ’ʋnpaadɛ soa ’a ‑kɔi" ɛ, ‑mɛ ɛɛ’ ’faea’ a ’kpa "kpei ke’wlɛ. 22Nyɔ se ɛ ’bɛɛ‑ ɔ ’je nmɔ dee ’de bi ‑gbai" ’di po. ‑Bo ɛ nɩ kan’ a, ‑mɛ nmɔ ɔ muɛ i’wlaa’, ‑mɛ nmɔ ke bi a muɛ idooa’. ‑Bo ɛ ’je ’wɔn ɛ, ‑mɛ nyʋ a poɛ nmɔ dee ’de bi dee ’di.
Sesi ke ‑kwlewɩ ke
23’Wɩ jrɛ’ o ’bo Suifʋ‑wi" ’a ‑kwlewɩ "kpei Sesi ke ɔɔ’ klai" nynuu a cɛn ’o ‑kle’ jrɩ’ ’di ‑tie". ’Sʋ dɩ ɔɔ’ klai" nynuu ’jea ’bo ɩ di ɛ, ʋʋ ‑teɛ ɩa’ cɛan’ ‑pʋn" ‑wɛe ʋʋa di ‑je wei. 24’Sʋ Farisiɛn‑wi" ‑teeɛ’ Sesi, ʋʋ ’na : ‑Gbʋn ’nɔ, dɛɛ‑tɩ ‑ma klai" nynuu a nʋ dɛ ‑sea’ nʋ ka nɩ ’bo ‑kwlewɩ "kpei ɛ‑ ? 25Sesi wluɛ ʋʋ ‑pee ɔ ’na : ‑Ta ’mɩɩɛ‑ nʋa Dafidɩ ke ɔɔ’ ’cɛ ’wɩ jrɛ’ o, ‑wɛe ʋʋ ‑pɔan’ diidɛ ɛ, dɛ ɔ nʋa ao se ɛ ’dii ‑sroo’ ? 26Ɔ pa ’e Kea ‑gbu klaa" ’di, ‑wɛe ɔ di ‑di’pɛn ‑ɛɛ mua ’o Kea "juɔi ɛ. ‑Mɛ Abiataa ‑nɩ ’sraa ‑sai klaa" ’de ɛɛ’ nɔ" tu ’di. ’De ‑mɛ ‑aa kɛ’ ’na : ’Sraa ‑saʋn klae" ’a ’sʋ mʋ ‑bɛɛ’ ‑ʋʋ ‑je ‑di’pɛn ‑nɩa ’mʋa‑ di. ’Kaa Dafidɩ "duo ɛɛ’ jrɛ’ ’ʋn ’ɛ ɔ je ɛ di, ‑wɛe ɔ "nyɩ ɛɛ’ tɔo‑ ɔɔ’ ’cɛ ‑ke. 27Sesi wluɛ ʋʋpʋ ‑pee ke’wlɛ ɔ ’na : Kea nʋ ‑kwlewɩ ’mɛ ’de nyiɔ ’ɔ ’dɔe ’a ‑tɩ’ ’ʋn. Ɛ se nyiɔ mɔ ‑nʋʋɛ ’de ‑kwlewɩ ’a ‑tɩ’ ’ʋn nɩ‑. 28’De ’mɔ nyiɔ ’ɔ "Ju ’mɔ nɩɛ ‑kwlewɩ ’a jei ‑o ‑ke.
3Sesi ’pʋʋɛ "ju ‑ɔɔ kwa jɛa ’soɛ
(Matie 12.9-14 ; Luikɩ 6.6-11)
1Sesi pa ’e Suifʋ‑wi" ’a "jrui ’kɩɩn‑gbu ’di de ke’wlɛ. ’De "ju due’ nɩ‑ ’o ‑ɔɔ kwa jɛ ’soɛ. 2’Sʋ Fariseɛn‑wi" a ‑gbʋɛn Sesi ja ‑snii’ ‑wɛe ‑bo ɔ ’bɛɛ‑ ɔ ’je "ju ‑nɩa ’mʋa‑ ’pʋʋ ’bo ‑kwlewɩ "kpei ɛ, ʋʋ ’je kan’ ’je ’de ʋʋ ’je ɔ ‑tɩ’ "kpei ‑tuu"‑. 3Sesi wluɛ "ju ‑a kwa jɛa ’soɛ ‑pee ɔ ’na : "Bo, ‑sɔn ’ʋn ’bo nyʋ ‑wee’ "juɔi ‑ta ! 4‑Wɛe Sesi ‑tee’ ʋʋpʋ i, ɔ ’na : Ka kɛ’ ’da‑ ? Nyɔ ’beeɛ’ ɔ ’je dɛ ’dɔe nʋ ’bo ‑kwlewɩ "kpei ‑ae, ‑aee’ ɔ ’je dɛ saʋn nʋʋ ? Nyɔ ’beeɛ’ ɔ ’je nyɔ ’pʋʋ‑ ‑ae, ‑aee’ ɔ ’je nyɔ ’dbaa ? ’Kaa dɛ ɔɔ ’tmʋa ʋʋ se ɛ "kpei ‑sa. 5Sesi pleeɛ ʋʋpʋ ’cɛnjriɛ "kpei, ‑wɛe ɔ "kae‑ "jrii ’de ʋʋa’ pɛe ’a "ikmu‑tɩ ’ʋn. ’Sʋ ɔ wluɛ "ju ‑nɔ ‑pee ɔ ’na : ‑Sro’ sʋn ! Ɔ sroɛ’ kan’ ‑cɛɛn’‑ ’sʋ ɔɔ’ kwa jiɛ ’o tai" de.
6Fariseɛn‑wi" ’wlʋ ’a "jrui ’kɩɛn‑gbu ’di ɛ, ’bo ʋʋ ke Erodɩ ’a ’cɛ "sri ʋʋ ’kɩɩɛn "jrui, ‑wɛe ka ʋʋ ’jea nʋ ’de ʋʋ ’jea Sesi ’dba a ʋʋ ’je ɛ poo‑.
Nyʋ ‑tuu" ‑ji’ ’de Sesi o
7Sesi ke ɔɔ’ klai" nynuu ’kpaa ’de "ni ‑kwlɩ" fɔo, ’sʋ nyʋ ‑tuu"‑tuu ‑wlʋ Galile ‑ʋʋ bla ’o ɔ ’de. 8Ʋʋ ’wlʋɛ Suide ke Selisalɛm ke Edum blʋɩ ‑nɩa ’de Sudɛn ‑gbuu ’de ’dii ke, ɛ ke Tii ke Sidɔn blʋa ’a ‑kwlɛ ’dii ke‑. Dɛ‑nʋɛ’ ʋʋ ’wɔn ɔɔ’ nʋʋdɩ ’a ’nynɩ ɛmɛ ‑tɩ ʋʋ ji ’de ɔ o. 9’De nyɔpʋ‑ ’a "i‑tie ‑tɩ ’ʋn ɛ, Sesi ’tmʋʋɛ ɔɔ’ klai" nynuu ‑wɛe ʋʋ ’je ɔ ‑kwɛɛ" ’de i ‑tee ɔ ’jeɛ ’di ’ja ‑bo ɛ nɩ kan’ a ‑mɛ nyʋ se ɔ i ’tʋn i. 10Dɛ‑nʋɛ’ ’de ɔɔ’ nyʋ ‑tuu" ’a ’wɛ‑ ’bɔɔ‑ ‑tɩ ’ʋn ɛ, nyʋ "klein ’wɛ‑ ɛ kpʋn a ‑kwlʋ ɛ, ʋʋa ‑pɔn ʋʋ ‑wee’ ’je ɔ "i bla. 11Nyʋ ‑siisaɩn nɩa ’e ’ʋn ’je ɔ i ’sʋ ʋʋa "siiɛ ’kɔu‑ i ’bo ɔ "juɔi, ‑wɛe ʋʋa "wɔ ʋʋ ’na : ‑Ɩn ‑nɩɛ Kea ’a "Ju ‑oo ! 12’Kaa Sesi ‑teɛ’ ʋʋpʋ kɛ’ "i ɔ ’na : dɛ ’ɩn nɩa ’ʋn ɛ, ɛ se aomɔ ‑jeɛ ’tmʋ nɩ‑ !
Sesi ‑sa ’o dboʋn ’a ‑puue ’jɔ ’sɔɔn
(Matie 10.1-4 ; Luikɩ 6.12-16)
13‑Mɛ ’wlʋa ’o ‑jei" ɛ, Sesi muɛ ’e crʋ "kpei ‑wɛe ɔ ’da nyʋ ɔ nɩa "i, ‑ʋʋ ‑ke ɔ ’jea dbo nʋɛ. 14‑Wɛe ɔ ‑sa ’o nyʋ ’a ‑puue ’jɔ ’sɔɔn ’de ʋʋpʋ "kwlu ɔ ’daa‑ ɔɔ’ dboʋn ʋʋ ‑ke ɔ ’je na‑. 15Ʋʋpʋ ɔ "nyɩ "ikmaa’ ‑ʋʋ ‑je Kea ’a ‑tɩ’ ’tmʋ ’de ‑ʋʋ ‑je ‑siisaɩn i nʋ.
16Nyʋ ’a ‑puue ’jɔ ’sɔɔn ɔ ‑sa ’o ɛ, ʋʋa’ ’nynɩ ka : Simɔ ɔɔ ’daa Piɛi ke 17Sebede ’a "nynuu‑ Sakɩ ke ɔɔ’ "dei San ɔ ‑tuua" Boanɛkɛsɩ ‑nynɩ, ɛ ’de mɛ ‑nɩ "ni ’a "plaan’. 18Ʋʋ ke Ancre o, Filipʋ o, Batelemi o, Matie o, Toma o, Alfe ’a "ju Sakɩ o, Tade o, Simɔ ’kpɩ ’blei o. Ɔɔ’ Simɔ tu nyʋ ‑ʋʋ ‑nɩɛ "i Suifʋ‑wi" ’jea ʋʋa’ ‑cɛ" ‑pee ‑te ɛ, ɔ nɩɛ ʋʋpʋ ’a due’ ‑o, 19ʋʋ ke Suida Isikaio, ‑ɔɔ mua Sesi plea’ ’de ɔɔ’ tʋnyʋ ’kwa ke‑.
Sesi ’a ’cɛ nɩɛ "i ʋʋ ’je ɔ kpa
20Sesi jiɛ ‑gbɛin" de, ’kaa nyʋ ‑kɩɩan’ "jrui ’bomu ʋʋa’ "i ‑tisʋn se "cra, ’de ɛɛ’ ‑tɩ’ ’ʋn ɛ, ka Sesi ke ɔɔ’ klai" nynuu ’jea dɛdisʋn nʋ ’ka se nɩ‑. 21Ɔɔ’ ’cɛ ’wɔan dɩ ‑nɩa ’mʋa a, ʋʋ sɔn ’ʋn ’ɛ ’sʋ ʋʋ mu ɔ kpʋn ’a, dɛ‑nʋɛ’ ʋʋa naa tɔ’ i ʋʋ ’na ‑mɛ sɩɩan ‑kpɔ "jri.
Sesi ’a "ikmaa’ ’wlʋɛ ’de Kea ’ʋn
(Matie 12.22-32 ; Luikɩ 11.14-23; 12.10)
22Kɛ’ wɔ‑saʋn ‑wlʋa ’de Selisalɛm ‑ʋʋ jia ’mʋa‑, dɛ ʋʋ ’tmʋa ’de ɔɔ’ ‑tɩ’ ’ʋn ɛ, ɛ ka : ʋʋ ’na : Bɛsebuilɩ ‑ɛ ‑nɩa ‑siisaɩn ’a klaa" mɛ ‑nɩ ’de ɔ ’ʋn ’de ‑ɛ ‑nyɩ" ɔ "ikmaa’ ‑wɛe ɔɔ nʋ ‑siisaɩn i. 23’Sʋ Sesi ’da ʋʋpʋ ’mɛ ‑wɛe ɔ poo ‑tɩ’ "i, ɔ ’na : Ka ‑siɔn’ ’bɛɛ‑ ɔ ’je ɔɔ’ ‑cɛ" i nʋ ɛ‑ ? 24Aoa ’jee, ‑bo tʋ"bo ’a ’bleenyʋ ’a ’sʋ a sea ’ʋn ‑sa’ a, tʋ"bo ‑kwlɔ ‑nɩa ’mʋa‑ se dɛ ’ʋn ’wlʋ i. 25‑Bo ‑gbu" ’dinyʋ ’a ’sʋ a sea ’ʋn ‑sa a, ɛɛ’ ‑gbu" tu se dɛ ’ʋn ’wlʋ i. 26‑Bo ‑siɔn’ a sea ɔɔ’ ‑cɛ" o ‑fɔn’ ɛ, ‑bo "cɛi nɩ ’de ɔɔ’ tʋ"bo‑kwlɔ ’di ɛ, ɔɔ’ "ikmaa’ se ‑tajrɔ nynii, ɛ ’je "ti. 27Nyɔ se ɛ ’bɛɛ‑ ɔ ’je ’de "ikmai o ‑gbu" ’di pa ‑wɛe ɔ ’je ɔɔ’ dɩ "jri, ‑bo ɔ se "ju ‑kmai" ‑nɔ san kpɩɩn‑ ɛ. ’Kaa ‑bo ɔ sɔn, ‑mɛ ɔ ’bɛɛ‑ ɔ ’je dɩ "klein ‑nɩa ’de ɔ o ‑gbu" ’di "jri.
28’Ma ’tmʋʋɛ aopʋ tɔ’ ‑tɩ ’a tɔ’ ‑tɩ, nyiɔpʋ‑ ’a dɩsaɩn o, ʋʋa’ Kea ‑soo’ opoa’ ’beeɛ’ ɩ ’je ‑kwɛ‑. 29’Kaa nyɔ ‑ɔɔ mua Kea ’a ‑Suu ‑kwɛai ‑soo’ o poa’ a, ɔɔ’ dɛsaʋn se ‑kwɛi, ɛɛ muɛ ɔ "jru nɩa’ jeejee. 30Sesi ’wɔan ʋʋ ‑pee wlu ‑tɩ kan’ a, ʋʋ wlu’ ka, ʋʋ ’na : ‑Suusaʋn ‑nɩ ’de ɔ ’ʋn.
Sesi de ke ɔɔ’ "dei ‑wi" ke
(Matie 12.46-50 ; Luikɩ 8.19-21)
31Sesi de ke ɔɔ’ "dei ‑wi" ‑jiɔ’ ’jea a ʋʋ nynai ’de "kpae, ‑wɛe ʋʋ dbo nyɔ ɔ mu Sesi ’daa’. 32‑Ta ɛ nɩa kan’ ‑mɛ nyʋ ‑tuu"‑tuu ‑gbae’ ɔ ’de woi ’de ʋʋ wlu ɔ ‑pee ʋʋ ’na ‑ɩn de ke ‑ma "dei ‑wi" ‑nɩ ’e "kpae. Ʋʋa ’da ‑ʋn ‑ɛ. 33’Sʋ Sesi ’na : ‑ɔ ‑nɩ ’ɩn de ke ’ma "dei ‑wi" ɛ‑ ? 34‑Wɛe ɔ kpa "jri "jɛi ’de ɔ ‑gbʋʋn’ nyʋ ‑ʋʋ ‑gbae’ ɔ ’de woi "kpe i ’de ɔ ’na : nyʋ ‑nʋ ʋʋpʋ ‑nɩ ’ɩn de ke ’ma "dei "wi. 35’Kaa nyɔ ‑nʋa’ Kea ’a ’tʋn nʋ‑tɩ ɛ, ɔmɔ ‑nɩ ’ma de’dinmɔu, ɔmɔ ‑nɩ ’ma de’dinynɔkpao’, ɔmɔ ‑nɩ ’ɩn de.
4Kodbonʋi ’a "ipoo‑tɩ
1’Wɩ jrɛ’ o Sesi ‑teɛ Kea ’a ‑tɩ’ ’tmʋa’ ‑pʋn" ke’wlɛ ’bo "ni klaa" ‑nɩa ’e Galile ‑kwlɩ". ’De nyiɔpʋ‑ ’a "i‑tia’ ’ʋn ɛ, ’bo ɔ ’jaa‑ ’de ‑kwɛɛ" ’di ’bo "ni "kpei ‑wɛe ɔ ‑te i. Nyʋ ‑wee’ "klein ‑gbae’ ɛ "ni wɔn i. 2Sesi ’wɔan ʋʋpʋ dɛ tɔɔ ‑tɩ ɛ, ɔ pooɛ ‑tɩ’ ‑tuu"‑tuu "i.
3Ɔ ’na : Ao po doin" i ! Nyɔ due’ muɛ ko ‑gbaa’. 4‑Ta ɔɔ ‑gbaa’ ko ’sʋ ɛ, ɩa’ ’jɔ jrɩ’ blu’ ’bo ‑jei". Nʋɩ ji’ ɩ di ‑mɩ ’mɛ. 5Ɩa’ ’jɔ jrɩ’ blu’ ’de "soi ’ʋn ‑ta ’blʋ ‑tuu" sea nɩ ɛ. Ɩ ‑too" ɛ ’mɛa’. 6’Kaa ‑ta ’jrʋ a ‑tea ‑gbao ɛ, ɩa’ ’sɩn ‑wee’ jɛ ’soɛ, dɛ‑nʋɛ’ ɩa’ ’sɩn se ‑ta ‑tɔɔn’ nyni ’de ’blʋ ‑sɔn. 7Ɩa’ ’jɔ jrɩ’ blu’ ’de "wi ’ʋn. "Wi sɩn i, ɩ se dɛ ’ʋn ’wlʋ. 8’Kaa ɩa’ ’jɔ jrɩ’ blu’ ’de ’blʋa‑ ’dɔe ’ʋn, ‑mɩ mɛ’. Ɩ ’wlʋɛ dɛ ’ʋn, kpau due’ croɛ ’jɔ ’ɔ kwla taan, due’ croɛ kwla ‑mɛɛo"‑, due’ croɛ kmɛ’ ’due. 9‑Wɛe Sesi ’na : Nyɔ doun" nɩa ’o "jru ɛ, ‑mɛ ɔ ’wɔn i.
Dɛɛ‑tɩ Sesi poo ‑tɩ’ "i ɛ‑ ?
(Matie 13.10-17 ; Luikɩ 8.9-10)
10‑Ta Sesi tɛɛan nyiɔpʋ kɩɩn ɛ, ’bomɔ nyʋ pla ‑sia ’o ke ɔɔ’ klai" nynuu ‑nɩa ‑puue ’jɔ ’sɔɔn ‑tee’ ɔ i ’de "i poo‑tɩ ’a ‑tɩ’ ’ʋn. 11’Sʋ Sesi ’na : Aopʋ‑ mɔ ɛ, Kea ‑sa ɛɛ’ tʋ"bo ‑kwlɔ ’ɔ ‑tɩ’ ’kwla ’de ao ‑pee, ’kaa ‑bo ɛ ‑tu" "kpaenyʋ ‑wi" ‑mʋ ɛ, ʋʋa ’wɔɩn ’de "i poo‑tɩ ’a ’sʋ ’ʋn. 12’De ʋʋa ‑gbʋn ɩ ja ’mɛ ’pepe, ’kaa ʋʋa’ ’jee ɩ "jriɛ‑. Ʋʋa’ doin" a ’wɔɩn ’mɛ, ’kaa ʋʋa’ ’wɔɩn ’dei, ‑bo ʋʋa sɩ ’dei ’wɔn ’de ɛ, ‑mɛ ʋʋa muɛ ’e Kea o "biia’, ’de ɛ ’je ʋʋa’ dɩsaɩn ‑kɔ’ ’de‑.
Sesi ‑sa "i poo‑tɩ wɔ
(Matie 13.18-23 ; Luikɩ 8.11-15)
13’Sʋ Sesi ‑teeɛ’ ʋʋpʋ i ɔ ’na : Ao se "i poo ‑tɩ ‑nɩ ’mii ’wɔɔn ? ’De ‑mɛ ka ao ’je "i poo ‑tɩ jrɩ’ ’a ’mii ’wɔnsʋn nʋ ɛ‑ ?
14Kodbonʋi ‑ɔɔ ‑tɩ’ ’ɩn ’tmʋa, ɔ ‑kɔ’ nyɔ ‑tmʋa Kea ’a ‑tɩ’. 15’De nyʋ jrʋ’ pɛe o ɛ, wlu ‑tmʋʋa’ ɛ ‑kɔ’ kojɔ ‑blua" ’bo ‑je ‑kpae" ɛ. ‑Bo ʋʋ ’wɔn wlu ’mʋa‑ kaan ’sʋ ɛ, ‑siɔn’ ji’ ‑wɛe ɔɔ ‑sɛ ’de ʋʋ ’ʋn. 16Nyʋ jrʋ’ ’a pɛe o ke’wlɛ ɛ, wlu ‑tmʋʋa’ ‑kɔ’ kojɔ ‑blua ’de "soi "klu ɛ. ‑Ta ʋʋ "sria ʋʋ ’wɔan Kea ’a wlu ’bo ʋʋ ‑sɛɛ ’o mu ’de ’mʋa‑ ’ʋn. 17’Kaa ʋʋa’ "taiɛ "i ɛɛ’ "ti ’de ʋʋpʋ ’ʋn. Ʋʋa’ ’mʋa ’a nɔ" se "i tɛn‑. ‑Bo "ikma ‑tɩ ke ’kle ji ʋʋpʋ "kpei ’de Kea ’a ‑tɩ’ ’ʋn ɛ, ’sʋ ʋʋ ’bɔ Kea ‑kwlɩ" ‑tea’ ‑nɩa ’de ʋʋpʋ ’ʋn o. 18Kea ’a wlu nyʋ deejrʋ’ a ’wɔan a, ka kojɔ ‑blua’ ’de "wi ’ʋn nɩa, ’kamɔ ɛ nɩ ’de ʋʋpʋ ’ʋn. Ʋʋa’ nyʋ tu a ’wɔn Kea ’a wlu ’mɛ, 19’kaa ʋʋa naa ’kmʋ "kpeidɩ ’a tɔ’ i ’wɩ "o ’wɩ. "Wlii ’a ’tʋn ’a nyʋ ’srɛ i poa’, ɛ ke ’tʋn nʋdɩ jrɩ’ ‑nɩa ’de ʋʋpʋ ’ʋn a "fian wlu "jrui ‑wɛe ɩa’ ’wlʋ dɛ ’ʋn. 20’De nyʋ jrʋ’ pɛe o ke’wlɛ ɛ, wlu ‑tmʋʋa’ ‑kɔ’ kojɔ ‑blua’ ’de ’blʋa‑ ’dɔe ’ʋn. Wlu ʋʋ ’wɔan, ʋʋa ‑teɛ’ i ’de ʋʋpʋ ’ʋn, ʋʋa kpʋʋn ɛ sɩn ’sɔɔn, ‑wɛe ka ɛ "sia ’nynɩ ʋʋa nʋ kan’. Ʋʋa’ nyʋ tu ɛ, ʋʋ ‑kɔ’ ko ‑nmɔa ‑wɛe ‑ɛɛ kpau due’ croa ’jɔ ’ɔ kwla taan, due’ croa kwla ‑mɛɛo"‑, due’ croa kmɛ’ ’due ɛ.
Nɛbi ’a "ipoo‑tɩ
21Sesi pooɛ ‑tɩ’ jrɩ’ "i ke’wlɛ ’de Kea ’a wlu ’wɔnsʋn ’a ‑tɩ’ ’ʋn, ɔ ’na : Nyɔ ’beeɛ’ ɔ ’je nɛbi tba ‑wɛe ɔ ’je ɛ jae "jrui ‑crii"‑ ’de ɛ ’je i ’jee ? ’De nyɔ ’beeɛ’ ɔ ’je ɛ ’e ’dii ‑sɔn ‑tuu" ? Nyʋ a se ɛ ja ‑pee’ ‑wɛe ɛɛ sea i ’je ‑ta ‑wee’ ‑pesaa’ ? 22Dɩ "klein ‑pa’ ’kwla a, ɩa muɛ "kpae’ ’pɛɛan’. Dɩ "o dɩ ‑tuu" a i ɛ, ɩa muɛ ’e ‑sɔn’ ’ʋn jia’. 23Nyɔ doun" nɩa ’o "jru ɛ, ‑mɛ ɔ ’wɔn i.
24’Bo ‑mɛ ’de ɛ, ɔ ’na : Ao ‑tu" dɩ aoa ’wɔan ’a ‑tɩ’. Dɛ aoa dbaa nyɔ ’ʋn ɛ, mɛ nyɔɔ mu ao dbaa’ ‑ke, ‑wɛe nyʋ ’je aoa’ ‑nɩ "kpei ‑tu". 25’Kaa nyɔ ‑blea dɛ nyʋ a muɔ jrɛ’ nyɩa" ke’wlɛ, ’de nyɔ ‑sea’ dɛ ’ble ɛ, dɛ‑saan" ɔ ’blea nyʋa muɔ ɛ ’kwa ‑saa’.
Kojɔ ‑sea’ ‑klu’ sie ’a "i poo‑tɩ
26Sesi wlu’ ke’wlɛ ɔ ’na : Dɛ ‑ke Kea ’a kɛɛma’ ‑kwlɔ ’ɔ ‑tɩ’ ‑kɔɔa’ "i ɛ, ɛ ka : ɛ ‑kɔ’ nyɔ due’ ‑po’ ko ’de ɔ o ‑kle. 27‑Bo ɔ ’mʋ o, ‑bo ɔ ‑te "jriɛ "i "maʋ’ o, ’jrʋ ‑gbao o, ka ko a nʋa mɛsʋn, ɩa nʋa ’boasʋn ɔɔ’ juɩ. 28’Blʋa ’a ‑cɛ" mɛ ‑ɛɛ mɛɛ dɩ. "I‑saa nɔ" ko a bla "mɛɩ’, ‑jɛ ‑tba’ ’o ɛ, ɩa nʋɛ kpai‑, ‑wɛe de ’bɔɔ‑ nɔ" ɛ ɩa wa ɩa ku ‑tɩ. 29‑Bo ko ‑flu" ’sʋ ɛ, nyʋ "duɛ ‑cnɛ ’ʋn ‑wɛe nyʋ a cɩn, dɛ‑nʋɛ’ ɩa’ cɛn nɔ" ‑nyni’.
Tu jɔ ‑saan" ’a "i poo ‑tɩ
(Matie 13.31-32, 34 ; Luikɩ 13.18-19)
30Sesi wlu’ ke’wlɛ, ɔ ’na : Ka ‑a ‑je Kea ’a kɛɛma’ ‑kwlɔ ’ɔ "ipoo ɛ‑ ? Dɛ ‑ke ɛ ‑kooɔ’ "i ‑gblein’ ɛ‑ ? 31Ɛ ‑kɔ’ tu jɔ ‑saan" due’ nyɔɔ do‑ ’de ’blʋ ’ʋn. Ɛɛ’ tu jɔ tu ’piiɛ "i ’de tu jɔ ‑wee’ "klu. 32’Kaa ‑bo nyɔ do ɛ, ‑wɛe ɛ mɛ, ɛɛ ’booa ɛɛ jea doodɩ ‑wee’ "klein ‑sii’. Ɛɛ ‑sa’ ’dae‑ ka nʋʋɩ ’bɛɛ ɩ ’jea ’jro po ’de ɛ ja.
33"Ipoo‑tɩ ‑nɩ, mɩ Sesi a nʋ ‑wɛe ɔɔ ’tmʋʋ ʋʋpʋ Kea ’a wlu ka ʋʋ ’je ɛ ’mii ’wɔn ɛ. 34Ɔ se ɛ ’bɛɛ‑ ɔ ’je ʋʋpʋ ’tmʋʋ‑ ‑bo ɔ se ‑tɩ’ "i poo ɛ. ’Kaa ‑bo ɔ ke ɔɔ’ klai" nynuu ’a ’sʋ ‑te i ɛ, ɔɔ ‑sa’ dɩ ‑wee’ "klein wɔ ’de ʋʋpʋ ‑pee.
Sesi jaa ‑piie ja
(Matie 8.23-27 ; Luikɩ 8.22-25)
35’Wɩ due’ koʋn ‑nɛ ɛɛ’ ‑kwie" ka a, Sesi ’tmʋʋɛ ɔɔ’ klai" nynuu ɔ ’na : ‑A mu ’e "ni ’de. 36’Sʋ ʋʋ "taiɛ nyiɔ ‑pʋ "i ‑wɛe ʋʋ mu ‑gbɛin" woi. ‑Kwɛɛ" ‑ɛ ’di Sesi nɩa ‑wɛe ɔ ’tmʋa nyʋ ɛ, ɛmɛ ‑kpa’ ɔ ke ɔɔ’ klai" nynuu. ‑Kwɛɛ" jrɩ’ ‑nɩ ’o mu ‑ke. 37’Sʋ ‑piie ‑teɛ jia’ ‑pʋn". "Ni ’a ’plɩ a ’wla ’de ‑kwɛɛ" ’di, ɛɛ jea ‑kwɛɛ" "ji sɔɔn‑ sɔɔn‑. 38Sesi ’pɛn i ’de ‑kwɛɛ" ’ɛ ‑gbɔo o ‑wɛe ɔ po dɛ "jru "kpei ’de ɔɔ ’mʋ. Ɔɔ’ klai" nynuu ‑sɔ "nyɩɔ’ ‑wɛe ʋʋ ’na : Nyʋ dɛtɔɔi, ka ‑aa jia ’mɛa’ a, ɛ se ‑ʋn ka jrɔ’ "i ’daa ? 39Sesi sɔan ‑klu’ ɛ, ɔ "wɔɔɛ ‑piie ke "ni "jru i ɔ ’na : Ɩ ’bɔ, ɩ ji ja ! ’Sʋ ‑piie ’bɔ ji ‑tɩ ’mɛ, ‑ta ‑wee’ nɩɛ ‑snii’. 40’Sʋ Sesi wlu’ ’de klai" nynuu ‑pee ɔ ’na : Dɛɛ‑tɩ faʋn a nʋ aopʋ‑ ɛ‑ ? Kea ‑kwlɩ" ‑tea’ se ’de aopʋ‑ ’ʋn nɩ kee ? 41’Kaa dɛ waa ʋʋpʋ ’dii, ‑wɛe ʋʋ ‑te wlua’ ‑pʋn" ’de ʋʋpʋ ’a ’sʋ ’nynɩ ʋʋ ’na : Ka mɛ ‑nɩ kan’ a‑ ? Ɛ dɛ‑ ? ‑Ta "ju ‑nɔ ‑mɔ ’wlʋ ‑wɛe ‑piie ke "ni ‑cɛɛn’ ‑nɛ ɛ ’je ɔ wɔn ɛ‑ ?
5Sesi ‑seiɛ "ju due’ ’de ‑siisaɩn ’kwa
(Matie 8.28-34 ; Luikɩ 8.26-39)
1Sesi ke ɔɔ’ klai" nynuu nyniɛ ’de "ni ’de ’de Kelasa nyʋ "bli. 2Sesi ’wlʋa ’e ‑kwɛɛ" ’di ɔɔ "siai ’sʋ "ju due’ ‑suusaʋn nɩa ’e ’ʋn ’wlʋɛ ’e ‑gbaɩn’ "klu ‑ɔɔ ‑jɔɔ "i. 3’De ‑gbaɩn’ ’nynɩ mɔ ɔ "ti. Nyɔ jrɔ’ se ɔɔ’ saan’ ’bɛɛ‑ ‑bo ɛ nɩ ‑gbaacɩɛ’ "dbu mɔ ’de ɛ, ɛ se ɔɔ’ saan’ ’bɛɛ‑. 4’De ’wɩ ‑tuu"‑tuu ’di ʋʋ poɛ ɔ nɩɩ ‑gbii bʋ’ ‑wɛe ʋʋ saan ɔɔ’ sɩn ‑gbaacɩɛ’ "dbu, ’kaa ɔɔ cɛn ‑gbaacɩɛ’ "dbu ’mɛ, ‑wɛe ɔɔ wa nɩɩ ‑gbii. Nyɔ ‑jea "ikma ‑ɔ ‑je ɔ "wɔin ’bɛɛ‑ ɔ se nɩ‑. 5’Jrʋ‑gbao o, "maʋ" o, ɔ nɩɛ ‑gbaɩn’ ’nynɩ woi ke crʋɩ "kpei‑ ke‑. Ɔɔ "wɔɔ‑, ɔɔ nʋɛ "soi ɔɔ jea ɔɔ’ ‑cɛ" pooa.
6Ɔ ’jeea Sesi nya ’sʋ, ɔ mu’ ɔ "siiɛ ’kɔi‑ i ’bo ɔ "juɔi. 7‑Wɛe ɔ "wɔ kpleiin, ɔ ’na : Sesi, Kea ‑nɩa ’e jaʋn ’di ’a "Ju, dɛ ‑nɩ ‑ɩn ‑ke ’ma ‑a ’nynɩ ɛ‑ ? ’Ma naa ‑ma ‑so" ’ma kwɛe‑ ’de Kea ’a ’nynɩ ’ʋn, ‑ɩn ‑bo ’ʋn ’kle "kpei jaa. 8Ɔ ’tmʋa wlu ‑nɩa ’mʋa‑ ɛ, Sesi wluɛ ’e ‑suusaʋn ‑pee ɔ ’na : Ɛ ’wlʋ ’e "ju ‑nɔ ’ʋn ! 9‑Wɛe Sesi ‑tee’ ɔ i ɔ ’na : ‑Ma ’nynɩ wɛ‑ ? Ɔ wlu’ ’e Sesi ‑pee, ɔ ’na : ’Ma ’nynɩ mɩ ‑nɩ ‑pɔn ‑tun, ’kaa ‑a ‑tiɛi". 10’Sʋ ɔɔ bae Sesi ’mɛ ɔ ’na : ‑Ɩn ‑bo ‑a ’blʋa‑ ‑nɛ o tɩɩɛn !
11‑Ta ɛ nɩa kan’ ‑mɛ be" ’a ‑gbɔn’ jrɛ’ mɛ ‑ɛɛ dii ’de crʋ ‑kwlɩ" ’de ʋʋ ‑pʋn". 12’Sʋ ‑siisaɩn baeɛ Sesi i, ɩ ’na : ‑Ɩn ‑tun" ‑aʋn ’de be" ‑nɩ o, ‑wɛe ‑a ‑je ’de ɩ ’ʋn pa. 13Sesi cɛn ’o wlu ’mɛ. ’Sʋ ‑siisaɩn ’wlʋɛ ’e "ju ‑nɔ ’ʋn, ɩ "siɛ "kpae’, ‑wɛe ɩ mu ’e be" ’ʋn. Be" ’a ‑gbɔn’ ‑nɛ ‑sa plea’ ’de crʋ ‑kwlɩ" ɩ ’wla ’e "niɔ‑. Ɩ ’bɛɛ‑ be" ’a "wlu ’sɔɔn ’mɛ ɩmɩ blu’ "ni ‑tun.
14Nyʋ ‑tea be" ’dei ‑wee’ ‑gbuu", ʋʋ ’kpaa ‑kwlɔ ’dii ke ‑gbei" wei, ‑wɛe dɛ ‑nʋʋa ’de ʋʋa po ɛɛ’ "kuan. ’Sʋ nyiɔpʋ‑ a ‑kwɛ‑ i ʋʋa jiɛ dɛ ‑nʋʋa ’jea. 15Ʋʋ nynia ’de Sesi ‑pʋn" ’sʋ "ju ‑siisaɩn ’wlʋa ’e ’ʋn ‑nɔ ʋʋ ’jee ɔ "jriɛ‑ ‑mɛ ɔ ‑teɛ i, ɔ paa dɩ ’ʋn ka ‑cɔɔn’ ka, ɔ "jru ’di ‑teɛ ’tɩɩn. ’Sʋ dɛ waa ʋʋ ’dii. 16‑Wɛe dɩ "klein ‑nʋʋa ’de "ju ‑siisaɩn nɩa ’ʋn ’a ‑kɔ ’di ɛ, ɛ ke dɩ ‑nʋʋa be" "jrii ke, nyʋ ‑jea ɩa’ ‑ta a, ʋʋ po ʋʋpʋ ɩa’ "kuan. 17’Sʋ ʋʋ ‑teɛ Sesi ’a i baea’ ‑pʋn", ‑wɛe ɔ ’je ’de ʋʋpʋ ’a ’blʋa‑ ’di ’wlʋ.
18‑Ta Sesi a ’jaa ’de ‑kwɛɛ" ’di ’sʋ "ju ‑siisaɩn nɩa ’ʋn ’de ɛ, ɔ ’na : ’Ma bae ‑ʋn ‑ɛ ’ɩn ’bɛɛ‑ ’ɩn ke ‑ɩn ‑je muu ? 19Sesi se ɔ ke ɔɔ’ mu‑tɩ ’wɔɔn‑, ’kaa ɔ wlu ɔ ‑pee ka ɔ ’na : ‑Ɩn mu ’de ‑ɩn o ‑gbu" ‑sɔn, ‑wɛe dɩ ’dɔe Tʋ"bo nʋa ‑ʋn "jrii ke ka ɛ ’jea ‑ma wɛe ‑ɩn ‑je ɛ ’tmʋ ’de ‑ma ’cɛ‑wi" ‑pee. 20"Ju ‑nɔ mu’ ‑wɛe ɔ ’tmʋ dɛ Sesi nʋ ɔ "jrii ’de ’blʋa‑ ‑nɛ ’ɛ ‑kwlɛ ‑ɩ ‑nɩa ‑puue ’dii. ’Sʋ nyʋ ‑wɔan ɩa’ dɩ tu ɛ, tai’ "maa ʋʋpʋ ’mɛ.
Sairisɩ ’a "junynɔkpao’ ke ’nynɔkpao’ due’ ke
(Matie 9.18-26 ; Luikɩ 8.40-56)
21Sesi ’ja ’e ‑kwɛɛ" ’di ‑wɛe ʋʋ mu ’e "ni ’de de. ‑Ta ɔ nɩɩa ’o "ni ‑kwlɩ" ɛ, nyiɔpʋ‑ ‑tuu" ‑kɩɩɛn’ "jrui ’de ɔ ‑pʋn". 22Kea ‑gbu klaa" ’a ‑jeopoi due’ ‑ɔɔ ’nynɩ nɩa Sairisɩ ji’. Ɔ ’jeea Sesi ɛ, ɔ ‑gblee ɔ bʋ wɔ. 23Ɔ ‑teeɛ’ ɔɔ’ kwa ’di ɔɔ baeɔ’, ɔ ’na : ’Ma "junynɔkpao’ ‑saan" a jiɛ ’mɛa ’de. ’Ma bae ‑ʋn ‑ɛ, ‑ɩn ‑ji" ’ʋn o, ‑ɩn ‑je ʋ kwa "jru ‑te’, ‑wɛe ʋa’ ’wɛ‑ ’je ’bɔ ’de ʋ ’je ’kmʋ nɩ‑. 24’Sʋ Sesi ke ɔ mu’. Nyiɔpʋ ‑tuu"‑tuu ‑kaan ʋʋpʋ de, ‑wɛe ʋʋa "tuun ɔ ‑ta ‑wee’.
25’Nynɔkpao’ due’ ‑nɩ ’e nyʋ "klu ‑ʋa nymɔ ɔ ’wlʋ ’e ʋ ’ʋn ’sʋ. Ɛɛ’ ’wɛ‑ tu nʋɛ ‑sɩn ’a ‑puue ’jɔ ’sɔɔn ’bo ʋ ‑pʋn". 26Ʋa ’jeɛ ʋa’ ‑cɛ" wɔn jeejee ’de ‑dɔ’crɔ‑wi" ’kwa, ʋ ‑kwɛ‑ ’kwa i. ’Kaa ʋ se kui ‑sɔn i flɔan’ ’ble, ʋa’ ’wɛ‑ mɛɛ’ ‑cɛ" ɛ ’kpaa "kpei sɔɔn‑ sɔɔn‑. 27Ʋ ’wɔan dɩ ‑tmʋʋa’ ’de Sesi ’a ‑tɩ’ ’ʋn ’sʋ ʋ pa ’e nyiɔpʋ "klu ’de Sesi ’de fɔ o, ‑wɛe ʋ bla ɔɔ’ ’ʋnpaadɩ "i, 28dɛ‑nʋɛ’ ʋ wlu’ ’de ʋa’ ‑cɛ" ’ʋn ʋ ’na, ‑bo ’ɩn ’bɛɛ‑ ’ɩn ’je ɔɔ’ ’ʋnpaadɩ mɩ ’a ‑cɛ’ "i bla mɔ ’de ɛ, ’ma ’wɛ‑ ɛ muɛ ’bɔa’. 29’Bo ɛ "sri ʋa’ nymɔ je "i ’ka. ’Sʋ ka ʋa’ ’wɛ‑ ’bɔa ’de ʋ kui’ ʋ juɛ’. 30"Junynɔkpao’ ’a ‑nɛɛ blɔ "i ’sʋ ka "ikmaa’ jrɛ’ ’wlʋa ’e Sesi ’ʋn ɛ, ɔ ’je kan’ ’mɛ. Wɛe ɔ "biie i ’de nyiɔpʋ ’a ‑kwea’‑, ɔ ’na : ‑Ɔ bla ’ma ’ʋnpaadɩ "i ɛ‑ ? 31Ɔɔ’ klai" nynuu wlu ɔ ‑pee, ʋʋ ’na : Ka nyiɔpʋ‑ a "tuuan ‑ʋn i ‑ta ‑wee’ ‑ɩn se kan’ ’jee ‑wɛe ‑ɩn ‑na ‑ɔ bla ’mi "i ɛ‑ ? 32’Kaa Sesi a ‑gbʋɛn ɔ ’de woi ‑wɛe nyɔ ‑nʋa’ ɛɛ’ dɛ tu ɛ ɔ ’je ɔ ’je. 33Dɛ waa "junynɔkpao’ ’dii ʋa jea crɛ, dɛ‑nʋɛ’ ka dɛ jrɛ’ nʋ ʋ "jrii ʋ ’je kan’ ’mɛ. Ʋ ji’ ‑wɛe ʋ "sii‑ ’kɔi‑ i ’de ɔ "juɔi ’de ʋ ’tmʋʋ ɔ tɔ’ ‑tɩ ‑wee’. 34Sesi wluɛ ʋ ‑pee, ɔ ’na : ’Ma "ju, aa’ ’ma ‑kwlɩ" ‑tea’ mɛ ‑pʋʋ’ aʋn. A mu ’de pɛe ’a blua’ ’ʋn ‑wɛe a kui ‑sɔn ’je pee nɩ‑.
35‑Ta Sesi nɩa wlua’ a, nyʋ ’wlʋɛ ’e Sairisɩ o ‑gbu" ʋʋ je ji, ‑wɛe ʋʋ wlu ɔ ‑pee ʋʋ ’na : ‑Ɩn ‑bo nyʋ dɛtɔɔi seea ’bode. ‑Ma "ju ’mɛɛ. 36’Kaa Sesi se ʋʋa’ wlu ‑nɛ ‑kwlɔ kpa ɔ ’tmʋʋɛ Sairisɩ ɔ ’na : Faʋn ’bo ‑ʋn ‑nʋʋɛ, ‑te’ ’ʋn ‑kwlɩ". 37’Sʋ ɔ se nyɔ jrɔ’ ɔɔ’ ‑jei" kpa‑tɩ ’wɔɔn‑ ‑bo ɛ se Piɛi o, Sakɩ ke ɔɔ’ "dei San nɩ ɛ. 38‑Ta Sesi ke ʋʋpʋ a nynia ’de Sairisɩ o ‑gbu" ‑mɛ ‑fɩn" ‑cruɛn" ɛ ’kpaa, nyiɔpʋ a kple’, ʋʋa bla ʋʋa’ ‑cɛ" i. 39Ɔ pa ’e ‑gbu" ’di, ‑wɛe ɔ wlu ʋʋpʋ ‑pee ɔ ’na : Dɛ ‑ble ‑tiba ‑ti ka a, ’de dɛ ‑ɛɛ ‑fɩɩn" aopʋ‑ ɛ‑ ? "Ju‑saan" se ’mɛ, ʋa ’mʋʋ. 40’Sʋ ʋʋa wlɔɔ’. ‑Wɛe ɔ po nyʋ ‑wee’ "kpae’. ’De ɔ "duo "ju ‑saan" "bo ke ʋ de ke ɔɔ’ klai" nynuu ‑nɩa taan ’ʋn, ‑wɛe ʋʋ pa ’e ‑gbu" ’a wɔn ’di ‑ta "ju ‑saan" ’pɛan i ɛ. 41Ɔ kpʋn ɛ "ju ‑saan" ’a sʋn ‑wɛe ɔ wlu ’de ʋ ‑pee ’de ɔ "bliwlu ’di ɔ ’na : Talita kum, ɛ ’de mɛ ‑nɩ : ’Nynɔkpao’ ju ’ma ’tmʋʋ aʋn ’ɛ, a sɔn ’ʋn ! 42’Bo ɛ "sri, ʋ je ’ʋn sɔn‑, ʋ je naa’ ‑pʋn" ‑te’. "Junynɔkpao’ ‑saan" ‑nʋ ’bleɛ ‑sɩn ‑puue ’jɔ ’sɔɔn. ‑Ta ʋʋ ’jeea dɛ ‑nʋʋa ’mʋa‑ "jriɛ‑ ’sʋ tai’ "maa ʋʋpʋ ’mɛ, ɛ je ‑je "kpei ‑tie" cɛn. 43’Kaa Sesi criɛ ɛɛ’ ‑cɩɛ ’de ʋʋ ‑pee ‑wɛe nyɔ jrɔ’ je ɛ juo‑. ‑Wɛe ɔ ’tmʋʋ ʋʋpʋ ɔ ’na : Ao "nyɩ "ju ‑saan" dɛ ʋ ’je di.
6Nasarɛtɩ‑nyʋ se Sesi ’a ‑tɩ’ tɔ’ ’ʋn ’je
(Matie 13.53-58 ; Luikɩ 4.16-30)
1Sesi ’wlʋa ’de Sairisɩ o ‑gbu" ’sʋ ɔ ke ɔɔ’ klai" nynuu muɛ ’de ɔ o ‑kwlɔ.
2Ɔ ‑teɛ nyʋ dɛ tɔɔa’ ‑pʋn" ’bo ‑kwlewɩ "kpei, ’de "jrui ’kɩɩn‑gbu ’di. Nyiɔpʋ ‑tuu" ‑poa’ ɔɔ’ wlu doin" o tai’ "maa ʋʋ ‑wee’ ’mɛ, ʋʋ ’na : ‑Ta ɔ ‑sa ‑mɛ ɛ‑ ? ‑Ɔ ‑nyɩ" ɔ ɛɛ’ "ikmaa’ tu ɔɔ jea jrii’ ‑jɩ ‑mɩ nʋ ɛ‑ ? 3Ɛ se ɔ mɔ ‑nɩ Madi ’a "ju ‑ɔɔ koa ‑gbu" nɩ ‑taa ? Ɔɔ’ "dei ‑wi" se Sakɩ ke, Sosɩ ke, Suidɩ ke, Simɔ nɩɩ‑ ? Ɔɔ’ "deinynʋkpae’ ‑wi" se ’de ‑a "klu nɩ ‑taa ? Ɛ nʋɛ’ ’sʋ ʋʋ se ɔɔ’ ‑tɩ’ tɔ’ ’ʋn ’je. 4’De Sesi wlu ʋʋ ‑pee ɔ ’na : Nyɔ ’ɔ ‑flɛɛn Kea ’a wlu ’kwajaai ‑bo ɛ se ’bo ɔ o ‑kwlɔ ke ɔ o ‑gbɛin" ke ɔ o ‑gbu" ‑sɔn nɩ ɛ. 5’De ɛɛ’ ‑tɩ’ ’ʋn ɛ, ɔ se "ikmadɩ jrɩ’ nʋ ’mʋa‑ ‑bo ɛ se ɔ ‑teɛ ’wɛnʋʋn pla kwa "jru ‑wɛe ʋʋa’ ’wɛ‑ ’bɔ nɩ ɛ. 6Dɛ Kea ‑kwlɩ" ‑tea’ sea ’de ʋʋpʋ ’ʋn nɩ ɛ, ɛ "maa Sesi tai’, ɛmɛ ‑tɩ ɔ mu ‑kwlɔ jrɩ’ ‑nɩa ɔɔ’ ‑kwlɔ ’de woi ’dii, ’de ɔɔ tɔɔ nyʋ Kea ’a wlu.
Sesi dboɛ ɔɔ’ klai" nynuu ’sɔn ’sɔn
7Ɔ ’da ɔɔ’ klai" nynuu ‑nɩa ‑puue ’jɔ ’sɔɔn ’mɛ ‑wɛe ɔ dbo ʋʋpʋ ’sɔn ’sɔn. Ɔ "nyɩ ʋʋpʋ "ikmaa’ ‑wɛe ʋʋ ’je ‑siisaɩn wɔn ‑sii. 8‑Wɛe ɔ bla kɛ’ ɔ "nyɩ ʋʋpʋ ɔ ’na : Ao ’bo dɛ "o dɛ ’ʋn "duɛ ɛ ke ao ’bo muɛ, ‑bo ɛ se itbatu ’a ’sʋ nɩ ɛ. Ao ’bo ‑di’pɛn ke‑ ‑kebou" ’ʋn "duɛ ’de ao ’bo ’wɛi ’de aoa’ wlʋ ’di poɛ. 9’Kaa ao paa "kwlai‑ bɩ’, ao ’bo "bai ’sɔɔn ’ʋn paa‑. 10Ɔ wlu ʋʋpʋ ‑pee ke’wlɛ ɔ ’na : ‑Bo ao nyni ’o ‑kwlɔ due’ ’di ɛ, ‑mɛ ‑gbu" ‑ɛ ’di nyʋ a mu ao sɩn ’sɔɔn kpʋʋn ’a a, ao ‑te ’de ɛ ’di i mamaʋ ’sʋ ao ’je ’o ’wlʋ. 11’De ‑bo ao nyni ’o ‑kwlɔ jrɛ’ ’di ‑wɛe nyʋ se aopʋ sɩn ’sɔɔn kpʋʋn ɛ, ’de ʋʋ se aoa’ wlu doin" o po ɛ, ao ’wlʋ ’o ɛɛ’ ‑kwlɔ ‑tu ’di. Ao ‑gbao’ ʋʋa’ ‑kwlɔ ’ɔ ’blʋ ‑ɛ kpʋn a aoa’ bɩ ɛ. Ɛmɛ ‑ɛ ‑je ʋʋpʋ fɛn’ ‑saa ka ’pee a mua ʋʋpʋ kpʋn ’a a.
12Klai" nynuu mu’ ’sʋ ʋʋ ‑teɛ nyiɔpʋ‑ ’a ’tmʋa’ ‑pʋn" ʋʋ ’na : Ao juo aoa’ dɛsaʋn "i ‑wɛe ao ’je ɛ kwa ‑sɔn ‑saa. 13Ʋʋa nʋɛ ‑siisaɩn ‑tuu" i, ‑wɛe ʋʋa po ’wɛnʋʋn ‑tuu" ’cna "jru ‑wɛe ʋʋa’ ’wɛ‑ ɛ ’bɔ.
San Batisɩ ’a ’mɛ ‑tɩ
14Sesi ’a ’nynɩ ‑gbaa ‑ta ‑wee’ "klein i, ɩ mu’ ɩ je ’beɔ Erodɩ jɛɛ ‑ke. Nyʋ jrʋ’ wlu’ ka ʋʋ ’na : "Ju ‑nɔ, ɛ San Batisɩ ‑ji" ’kmʋ de, ɛmɛ ‑tɩ ɔ kmai", ‑wɛe ɔɔ nʋ jrii’ ka. 15Deejrʋ’ ’na : Ɛ Kea ’a wlu ’kwajaai Eli ‑o. Nyʋ jrʋ’ wlu’ ke’wlɛ ʋʋ ’na : Kea ’a wlu ’kwajaaʋn ‑nɩa ’de ɛ, ʋʋa’ due’ ‑o. 16‑Ta Erodɩ ’wɔan ɛɛ’ dɛ tu ɛ, ɔ ’na : San Batisɩ ‑ɔɔ "jru ’ɩn cɛan ’o ɛ, ɔmɔ ‑ji" ’kmʋ de.
17See ’de ɛ, Erodɩ mɔɔ’ ‑cɛ" dboɛ nyʋ ʋʋ je San kpʋn ʋʋ je ɔ san, ʋʋ je ɔ ‑kaso ’di po. Erodɩ nʋ ɛɛ’ dɛ tu ’mɛ ’de ɔɔ’ "dei Filipʋ ’a ’nynɔ Erodiadɩ ɔ ‑sɔ ’kwa ’a ‑tɩ’ ’ʋn. 18San Batisɩ ‑mɔ wluɛ Erodɩ ‑pee ’de‑, ɔ ’na : Ɛ se ka ‑cɔɔn’ ka nɩ‑ ‑wɛe ‑ɩn ‑je ‑ma "dei ’nynɔ ’kwa ‑sa. 19Erodiadɩ ’kpaa’ San ’cɛn i. Ʋ nɩɛ "i ʋ ’je ɔ ’dba. 20’Kaa ʋ se ɛ ’bɛɛ‑, dɛ‑nʋɛ’ Erodɩ ‑mɔɔ plee San ’mɛ. Dɛɛ ‑tɩ Erodɩ a pleea San a, ɛmɛ ‑nɩ ɔ ’srɛi" ɔ nɩɛ Kea ’a nyɔ ‑o, ɛmɛ ‑ɛɛ ‑tɩ’ ’ʋn ɔɔ ’wlʋ ɔ o. ‑Bo Erodɩ a sea San ’a wlu doin" o po ɛ, ’fɔ ‑jɛ ɔ ’jea ’o ‑sa ɔɔ’ ’jeɛ. ’Kaa ɔɔ’ wlu ’a doin" o poa’ a nʋ ɔ ’tʋn.
21’Wɩ ’dɔe jrɛ’ ’kpa Erodiadɩ ’kwa. Ʋʋa ‑tu" ɛ Erodɩ ’a ’wlʋwɩ ’a ‑kɔ’. Ɔ ’da ɔɔ’ nyʋ klae" o, "soa‑wi" ’a klae" o, dɛ "ijuoʋn ‑nɩa ’de Galile ‑kɔ’ ‑sɔn. 22Erodiadɩ ’a "junynɔkpao’ pa ‑gbu" ‑wɛe ʋ ‑te deea’ ‑pʋn". Ʋa’ deebʋ nʋɛ Erodɩ ke ɔɔ’ nyʋ ɔ ’da ’tʋn. ’Demɔ ɔ wlu ʋ ‑pee ɔ ’na : Dɛ a nɩa "i ɛ, a ‑teeɛ’ ’mi i ’ɩn ’je ɛ aʋn "nyɩ. 23‑Wɛe ɔ cɛn wlu ‑tie", ɔ ’na : ’Ma ‑snɛɛ’ dɛ aa mua i ‑teea’ a, ’ma muɛ aʋn "nyɩa’, ‑bo ɛ nɩ ’ma ’blʋa ’a ’fɔ mɔ ’de ɛ.
24’Sʋ ’nynɩa ‑tɔo ‑nʋ "siɛ "kpae’ ‑wɛe ʋ to ʋ de "jru "i ʋ ’na : Dɛ ’ɩn ’je i ‑tee’ ɛ‑ ? Ʋ de ’na : A ‑tee’ San Batisɩ ’a "jru i. 25’Sʋ ʋ jiɛ de ‑too"‑ ’de ’beɔ o ‑wɛe ʋ ’na : ’Ɩn nɩɛ "i ‑ɩn ‑je San Batisɩ "jru "i ‑sa ‑wɛe ‑ɩn ‑je ɛ ’sɛti ’di ‑te’ ‑ɩn ‑je ’ʋn "nyɩ ‑ta kaan. 26’Sʋ ’beɔ "kaeɛ "jrii, ’kaa ɔ se ɛ ’bɛɛ‑ ɔ ’je ʋ "nao‑ ’de wlu ɔ cɛan ‑tie" ’de nyʋ ɔ ’da "juɔi ’a ‑tɩ’ ’ʋn. 27’Bo ɛ "sri ɔ je "soai due’ dbo ɔ je San Batisɩ "jru "i cɛan’ mu. "Soai ‑nɔ muɛ ’e ‑kasogbu ’di, ɔ cɛn ’o San ’a "jru ’mɛ. 28‑Wɛe ɔ ‑teɛ’ ’e ’sɛti ’di ’de ɔ "nyɩɛ ’nynɩa ‑tɔo ‑nʋ, ‑wɛe ʋmʋ "duɛ ’ʋn ʋ "nyɩ ɛ ʋ de.
29San ’a klai" nynuu ’wɔan ɔɔ’ ’mɛ ‑tɩ ɛ, ʋʋ ji’ ʋʋ je ɔɔ’ "ku ’ʋn "duo‑, ʋʋ je ɔ i ‑te’.
Sesi "nyɩɛ nyiɔpʋ ‑di’pɛn ke ‑smii’ ke
(Matie 14.13-21 ; Luikɩ 9.10-17 ; San 6.1-14)
30Sesi ’a dboʋn jiɛ ’de Sesi o de, ‑wɛe dɩ ʋʋ nʋa o, dɩ ʋʋ tɔɔa nyʋ ʋʋ po ɩa’ "kuan ’de ɔ ‑pee. 31Nyiɔpʋ a nʋɛ ‑ɩn mu ‑ɩn ji. ’De ʋʋa’ "i ‑tie ‑tɩ’ ’ʋn ɛ, ka Sesi ke ɔɔ’ klai" nynuu ’jea dɛdisʋn nʋ ’ka se nɩ‑. Ɛmɛ ‑tɩ ɔ wlu ʋʋ ‑pee ɔ ’na : Ao ji ‑a ‑je ‑ta nyɔ jrɔ’ sea nɩ mu ‑wɛe ao ’je ’o fɔn dɛ‑saan"‑. 32‑Wɛe ʋʋ "duo ‑kwɛɛ" ’ʋn ’de ʋʋ mu ’de ‑ta ‑nɩa pee ɛ, 33’kaa nyiɔpʋ‑ ‑tuu" ’je ʋʋpʋ ’a mu ‑ta ’mɛ. Ʋʋ jua ʋʋpʋ "i ’sʋ ɛ, ʋʋ ’wlʋɛ ‑kwlɛ ’dii ‑ta ‑wee’, ʋʋ pleɛ ’blʋɔi ‑wɛe ʋʋ cɛɛn Sesi ke ɔɔ’ klai" nynuu nya i. ’Sʋ ‑ta ʋʋa muua, ʋʋpʋ ‑nyni’ ’o mu tɛin".
34‑Ta Sesi ’wlʋa ’de ‑kwɛɛ" ’di ɛ, ɔ ’jeeɛ nyiɔpʋ ‑tuu" "jriɛ‑, ʋʋpʋ ’a wɛe a nʋɔ’, dɛ‑nʋɛ’ ʋʋ ‑kɔ’ ’blae ‑sea’ ’dei ‑tei ’ble ɛ. ‑Wɛe ɔ ‑te ʋʋpʋ ’a dɩ ‑tuu" tɔɔa’ ‑pʋn". 35‑Ta ‑fli ’wla a ’sʋ ɔɔ’ klai" nynuu ’kpɔ ‑pʋn", ʋʋ ’na : Nɔ" ‑wee’ ‑si’ ’de ‑ta nɩɛ ’kpaa "kpei. 36‑Ɩn ‑tai"‑ ʋʋpʋ "i ʋʋ ’je ‑gbei" woi ke ‑kwlɛ ‑kʋʋan" i ’dii mu, ‑wɛe ʋʋ ’je diidɛ i ‑pɔn. 37’Sʋ Sesi wluɛ ʋʋ ‑pee ɔ ’na : Aoa’ ‑cɛ" ’kpa "nyɩ ʋʋ diidɛ. ’Sʋ ʋʋ ‑tee’ ɔ i ʋʋ ’na : ‑Ɩn ‑nɩɛ "i ‑a ‑je ’wɛi ’a kmɛ’ ’sɔɔn ’ʋn "duo‑ ‑a ‑je ɛ ‑di’pɛn ’ʋn ‑tɩan’ mu, ‑a ‑je ʋʋpʋ "nyɩ ʋʋ ’je dii ? 38Sesi ‑teeɛ’ ʋʋpʋ i ɔ ’na : ‑Di’pɛn ‑tiiɛ’ ao ’ble ɛ‑ ? Ao mu ’e ‑gbʋn. Ʋʋ ‑teeɛ’ ba i ʋʋ ’na : ‑A ‑bleɛ ‑di’pɛn kplɩ ‑mm" ke ‑smii’ jɔ ’sɔɔn ke‑.
39’Sʋ ɔ ’na : Ao ’tmʋʋ ʋʋpʋ ʋʋ ’je kpɔ cɛn ʋʋ ’je i ‑te ’bo sii" "kpei. 40’Sʋ ʋʋpʋ cɛn kpɔ kmɛ’ ’due ’due, kwla ‑mm" ‑mm" ʋʋ je i ‑te. 41‑Wɛe Sesi "duo ‑di’pɛn kplɩ ‑mm" ‑nɩ ke ‑smii’ jɔ ’sɔɔn ‑nɩ ’ʋn ‑wɛe ɔ kpa "jri "jɛi ɔ po Kea ’sɛ‑. ’Sʋ ɔ cɩɩɛn ‑di’pɛn i ‑wɛe ɔ "nyɩ ɔɔ’ klai" nynuu ’de ʋʋ ’je ɩ nyʋ "jrii ‑gble’. Ɔ ‑seea’ ‑smii’ jɔ ’sɔɔn ‑nɩa ’mʋa‑ ’ʋn ‑ke ɔ je nyʋ ‑wee’ "klein "nyɩ. 42Ʋʋ ‑wee’ "klein di’, ʋʋ je dbo. 43‑Di’pɛn ’ɛ tii ke ‑smii’ ’a ‑jɩ ‑sia ’e mu ‑wɛe klai" nynuu ’tɩan i ɛ, ɩ "jiɛ toe" ’a ‑puue ’jɔ ’sɔɔn. 44Nyʋ ‑dia’ dɩ "nynunmai ’a "wlu ‑mm" ‑nɩ ʋʋpʋ "klu.
Sesi na’ ’bo "ni "kpei
(Matie 14.22-33 ; San 6.15-21)
45‑Ta ʋʋ ‑kɔa’ dɛ dia’ ‑wɛe Sesi a poa ʋʋpʋ ‑jei" ɛ, ’bomɔ ɔ poo ɔɔ’ klai" nynuu ‑kwɛɛ" ’di, ‑wɛe ɔ ’na : Ao mu ’e "ni ’de, ’de Besaida fɔ o. 46Ɔ ke ʋʋpʋ cɛɛan "i ’sʋ ɛ, ɔ muɛ Kea baea’ ’de crʋ "kpei.
47‑Ta kwie a kpʋn a ‑mɛ ‑kwɛɛ" nɩɛ ’e "ni pɛʋn klaa" a ‑kwea’‑ ‑Wɛe Sesi sie due’ ’de ’kpʋʋ "kpei. 48Sesi ’je kan’ ’mɛ ka ɔɔ’ klai" nynuu a ’jea ’kle ‑kwɛɛ" tbaa ’de poɔɔ’ ‑ɔ sia’ ’a ‑tɩ’ ’ʋn ɛ. ‑Ta ‑sɔn’ ɔ "kʋan’ i ’sʋ Sesi a na’ ’bo "ni "kpei ɔɔ jea ʋʋpʋ kɩɩn mu, ɔ nɩɛ "i ɔ ’je ‑kwɛɛ" i naa‑. 49‑Ta ʋʋa ’je ɔ i ɔɔ na ’o "ni "kpei ɛ, ʋʋ mu ’na ‑mɛ "kwle‑sri" ‑o ’de‑, ’sʋ ʋʋa "wɔɔ’, 50dɛ‑nʋɛ’ ʋʋ ‑wee’ ‑a ‑je ɔ i, faʋn a nʋ ʋʋpʋ ’mɛ, ʋʋa dɩ a crɛ’. ’Sʋ Sesi wluɛ ʋʋ ‑pee, ɔ ’na : Ɛ ’mɔ ‑o, faʋn ’bo ao nʋɛ, ao "duo ’kpɩ ’ʋn ! 51’Sʋ Sesi ’ja ʋʋpʋ kɩɩn ’de ‑kwɛɛ" ’di ’sʋ poɔ’ ’bɔ ji ‑tɩ ’mɛ. Tai’ ‑maa"‑ klai" nynuu, ɛ ‑siɛ’ ‑jei". 52‑Ta Sesi cɛɛan ‑di’pɛn i ‑wɛe ɔ "nyɩ ɛ nyʋ ɛ, ʋʋ ’je ɛɛ’ ‑ta ’mɛ, ’kaa ka ɔ kmai" ɔ ’bɛɛa ɔ ’jea jrii’ nʋ ɛ, ʋʋ se ɛ ’mii ’wɔn ke, dɛ‑nʋɛ’ ʋʋa’ dɛ ’mii ’wɔan’ nɩɛ ’kle.
Sesi ’bɔɔ‑ nyʋ ’a ’wɛ‑ ’de Senesarɛtɩ
53Ʋʋ cɛan "ni ’sʋ ʋʋ nyniɛ ’e Senesarɛtɩ ’bomɔ ʋʋ kpʋʋn ’kpʋʋ. 54Ʋʋ ’wlʋa ’e ‑kwɛɛ" ’di ’sʋ nyiɔpʋ juuɛ Sesi "i. 55‑Wɛe ʋʋ ple ’blʋa‑ ‑wee’ "kpei‑, ʋʋ ’blee ’wɛnʋʋn ’sai‑ ’dii ‑wɛe ‑ta ʋʋ ’wɔɔan Sesi ’a ’nynɩ ʋʋa kpa ʋʋpʋ ’o mu. 56‑Ta "o ‑ta Sesi mua, ‑kwlɛ mɩɩ" ’di o, ‑kwlɛ klae" ’dii o, ‑gbei" woi o, nyʋ a ja ’wɛnʋʋn ’bo "kpae’ ‑kwea ‑wɛe ʋʋa bae Sesi i ’de ɔ ’je ʋʋ "i "tai‑, ʋʋ ’je ɔɔ’ "bai "i bla. Nyʋ "klein ‑blɔ’ "i ɛ, ʋʋa’ ’wɛ‑ ’bɔɔ.
7Fariseɛn‑wi" ’a ’tmʋʋ‑tɩ
1Fariseɛn o, kɛ’ wɔ‑saʋn jrʋ’ ‑wlʋa Selisalɛm ’kɩɩɛn "jrui ’bo Sesi ‑pʋn". 2Ʋʋ ’jeɛ ɔɔ’ klai" nynuu jrʋ’ ‑ʋʋ se kwa jre ‑ʋʋa di dɛ. 3‑Bo Fariseɛn‑wi" o, Suifʋ‑wi" ’je dɛ di ʋʋa jreɛ kwa ka ʋʋa’ tɛin" nyʋ "sia ’nynɩ ɛ. 4Ʋʋ ’bleɛ ʋʋa’ "ni kwa posʋn jrɛ’ see ’de ʋʋpʋ "bli. ‑Bo ʋʋ ’wlʋ "kpae’ woi ‑wɛe ʋʋ ’je dɛ di ɛ, ɛɛ’ "ni kwa posʋn tu mɛ ʋʋa nʋ, ‑wɛe ʋʋ ’je ’pepe nɩ‑. Ʋʋa’ tɛin" nyʋ ’a kplɩn ‑tuu" ‑nɩ ’e mu ʋʋa nʋ ke’wlɛ, ɛmɛ ‑nɩ ‑kaun"‑ o, "tiedɩ o nɩɩjae‑ wɔɔa’ ke‑. 5Fariseɛn ke kɛ’ wɔ‑saʋn ‑teeɛ’ Sesi i ʋʋ ’na : Dɛɛ‑tɩ ‑ma klai" nynuu ’a ’je tɛin" nyʋ ’a kɛ’ wɔn, ‑wɛe ʋʋa’ po "ni kwa ’sʋ ʋʋa di dɛ ɛ‑ ? 6Sesi wluɛ ʋʋpʋ ‑pee ɔ ’na : Ao "jridepooʋn ! Dɛ Esai ’tmʋa ’de aopʋ ’a ‑tɩ’ ’ʋn, ɔ ’bleɛ ‑kɩn. Ɔ ’naa :
Kea ’na : ’Ma ni’ ‑tea’ nɩɛ ’e nyʋ ‑nʋ wɔn ’di foo" ’ʋn, ’kaa ʋʋpʋ ’a pɛe tɛɛn ’ʋn o. 7Ʋʋa ‑gbɛɛ’ ’ʋn "juɔi foo" ’ʋn, nyiɔ ’ɔ kɛ’ mɛ ʋʋpʋ a ’daa‑ Kea ’a wlu.
8’De Sesi ’na : Ao ’bɔ Kea ’a kɛ’ ’mɛ ‑wɛe aoa ’je nyiɔ ’ɔ ‑nɩ wɔn. 9Ɔ wlu ʋʋpʋ ‑pee ke’wlɛ ɔ ’na : Aoa’ ‑blaa Kea ’a kɛ’ wɔin ‑wɛe ao di aoa’ ‑cɛ" ’ɛ kplɩn wɔn ’jea ‑mɛ ’ɛ ‑kla. 10Tɔ’ ‑o ‑cɛɛn’‑, Moisɩ ’na ‑ɩn ‑je ‑ɩn "bo ke ‑ɩn de wɔn, ’de nyɔ ‑ɔɔ mua ɔ "bo ke de ‑soo’ o poa’ a, nyʋ a mu ɔ ’dbaa’. 11’Kaa aopʋ mɔ ɛ, ao ’na ‑bo nyiɔ wlu ɔ "bo ke ɔ de ‑pee ɔ ’na : Dɛ ’ɩn ’blea ‑wɛe ’ɩn ’je ‑aʋn kwa wɔi ‑te’ ’de ɛ, ɛ nɩɛ Kea ’a dɛ ‑o. Ʋʋa ’daa‑ ɛ Korban ’de Suifʋwlu ’di. 12Aoa’ ’wɔn ɔɔ’ jei tu ’a ‑te’ ɔ "bo ke ɔ de kwa wɔi mɔ "pɩ. 13’Kamɔ aopʋ‑ a nʋ ’sʋ aoa ‑sa’ Kea ’a wlu i ’de aoa’ nyʋ dɛtɔɔsʋn ’ʋn. Aoa nʋ dɩ ‑tuu"‑tuu jrɩ’ ke’wlɛ ‑ɩ ‑ke ‑mɩ ‑koɔ’.
Dɩ ‑a kpʋʋn a nyiɔ ‑flɛn" ɛ
14Sesi ’da nyʋ ‑wee’ ’mɛ ke’wlɛ ɔ ’na : Ao ‑wee’ "klein po doin" i, ’de ao ’je dɛ ‑nɛ ’mii ’wɔn. 15Dɛ ‑ɛɛ ‑wlʋa ’e "kpae’ ‑wɛe ‑ɛɛ pa ’e nyiɔ wɔn ’di ɛ, ɛɛ’ kpʋʋn nyiɔ ‑flɛn", ’kaa dɩ ‑ɩa ‑wlʋa ’e nyiɔ ’ʋn ‑ɩa ‑sia" "kpae’ ɛ, ɩmɩ ‑ɩa kpʋʋn ɔ ‑flɛn". 16[‑Bo ao nɩ i’wɔnnyʋ ɛ, ‑mɛ ao po doin" i ’pepe, ‑wɛe ao ’je i ’wɔn.]
17‑Ta Sesi ’wlʋa ’e nyʋ "klu ‑wɛe ɔ pa ’e ‑gbu" jrɛ’ ’di ɛ, ɔɔ’ klai" nynuu ‑teeɛ’ "i poo ‑tɩ ɔ pooa "i ’dei. 18’Sʋ ɔ ’na : Aopʋ mɔ ‑ke ao se ɛ ’bɛɛ‑ ao ’je ɛ ’mii ’wɔɔn ? Ao se ɛ juo ka dɛ ‑ɛɛ ‑wlʋa ’e "kpae’ ‑wɛe ‑ɛɛ pa ’e nyiɔ wɔn ’di se ɛ ’bɛɛ‑ ɛ ’jea nyiɔ ‑flɛn" kpʋʋn ɛ ? 19Ɛɛ’ dɛ tu ’a pa ’e nyʋ pɛe o, ’kaa ’de ɔɔ’ "kwli ’di ’bo ɛɛ pa, ‑wɛe ɛɛ ’wlʋ ɔ ’ʋn ɛɛ "si "kpae’ ’de ɛɛ mu ’e ’kwla. ‑Bo Sesi a sea wlu ‑nɛ ’tmʋ ɛ, ‑mɛ ɔ ’na : Nyɔ ’beeɛ’ ɔ ’je dɩ ‑wee’ di.
20Sesi wlu’ ke’wlɛ ɔ ’na : Dɛ ‑wlʋa ’e nyiɔ ’ʋn ɛ, mɛ ‑ɛɛ kpʋʋn ɔ ‑flɛn". 21’De nyiɔ ’ʋn, ’de ɔ pɛe o, ’bo tɔ’ saʋn a ’wlʋ : Kao’ blea o, "jriia’ o, "ku’dbaa’ o, 22jɛi" ’jea’ o, "wliiɛ ’ɛ ’tʋn o, ’diwɔnynia’ o, nyʋ ’srɛ ipooa’ o, dɛ "ni ’di ‑sia’ o, dɛ ’ɛ pɛe "ipoa’ o, nyʋ ‑flɛɛn ’a o, ‑cɛi" ’bɛɛa’ o, ‑ɩn se tɔ’ ’ble o, 23dɩ "klein ‑nɩa ’mʋa‑, ɩa ’wlʋɛ ’e nyiɔ ’ʋn ɩmɩ ‑ɩa kpʋʋn ɔ ‑flɛn".
’Blʋa ’srʋ ’dinynɔ ‑teɛ Sesi ‑kwlɩ"
24Sesi ’wlʋa ’mʋa‑ ɔ muɛ ’e Tii ke Sidɔn‑blʋa "kpei. Ɔ pa ’e ‑gbu" jrɛ’ ’di, ɔ se ɛ "i nɩ ‑wɛe kɔ nɩa ’o nyʋ ’je ɛ juo‑, ’kaa ɛ se ’bɛɛ‑, ʋʋ ’jeɔ’. 25’Nynɔkpao’ due’ ‑ʋa "junynɔkpao’ ‑suusaʋn nɩa ’ʋn ɛ, ʋ ’wɔn Sesi ’a ’nynɩ ’mɛ ‑ke. Ʋ ji’ ‑wɛe ʋ ‑gblee ɔ bɩ wɔ. 26’Nynɔkpao’ ‑nʋ nɩɛ ’blʋa‑ ’srʋ ’di nyɔ ‑o. Ʋ ’wlʋɛ Fenisi ’de Siriblʋa "kpei. Ʋ baeɛ Sesi i, ɔ ’je ʋa’ "junynɔkpao’ ‑suusaʋn ’ʋn ‑sa. 27’Kaa Sesi wlu ʋ ‑pee ɔ ’na : A "tai‑ "nynuu‑ "i ʋʋ ’je dbo ke, nyʋ "duo "nynuu ’a diidɛ ’ʋn ‑wɛe ɔ "nyɩ ‑gbe’ nynuu‑, ɛ se "inmɔ‑. 28’Sʋ ʋ ’na : tɔ’ ‑tɩ ‑o ‑cɛɛn’‑, ’ɩn "bo, ’kaa dɩ ‑jɩ ‑a blua "nynuu‑ wɔi, ‑gbe’ mɛ ‑ɛɛ di. 29’Sʋ Sesi wlu ʋ ‑pee ɔ ’na : Dɛ a ’tmʋa ‑nɛ, ɛɛ’ ‑tɩ’ ’ʋn ɛ, a mu ! ‑Suusaʋn ’wlʋ ’e aa’ "ju ’ʋn ’ɛ. 30‑Ta ʋa mua ’de ʋ o ‑gbu" ’di kan’ ‑cɛɛn’ ɛ, ‑mɛ ʋa’ "ju ’pɛn i ’de ‑gbao" "kpei, ‑suusaʋn ’wlʋ ’e ʋ ’ʋn ’ɛ.
Sesi ’pʋʋɛ "muu‑ due’
31Sesi ’wlʋa ’o Tii‑blʋa "kpei ’sʋ ɛ, ɔ cɛɛn ’de Sidɔn ‑wɛe ɔ mu ’de ’blʋa‑ ‑blea ‑kwlɛ ‑puue ’di, ’bo "ni pɛʋn klaa" ‑nɩa ’e Galile o fɔ o.
32Ʋʋ jɔ "ju due’ ‑ɔɔ’ ’wɔan i ’de ‑ɔɔ’ wlua, ‑wɛe ɔ ’je ɔ kwa "jru ‑te’. 33‑Wɛe Sesi ke ɔ ’wlʋ ’e nyʋ "klu ʋʋ tɛɛn o kpɩɩn‑ ka, ɔ pɔɔ ‑cɩɛ doun" ’di, ɔ blaa ɔɔ’ mɩɩɔ tɔn. 34‑Wɛe ɔ kpa "jri "jɛi, ɔ ’wla feeɛ’ i, ’de ɔ wlu ɔ ’na : Efata ! ɛ ’de mɛ ‑nɩ : ‑Ɩn ‑bai’ wɔn ! 35’Bo ɛ "sri "ju ’a doin" je ‑gbai’‑, ɔɔ’ mɩɩɔ je ‑gbai’‑, ɔ je wlua’ ‑pʋn" ‑te’ ’pepe. 36’Bomɔ dɛ ‑nʋʋa ’mʋa‑ nyʋ a ’tmʋ ɛ ‑ta ‑wee’, ’de ‑mɛ ’kamɔ Sesi ‑tu" ʋʋ ’snɩ ɔ ’na : Ao ’bo nyɔ jrɔ’ ’tmʋʋɛ ! ’Kaa ʋʋa ’tmʋɛ ʋʋa jea nya mu. 37Tai’ ‑maa" nyʋ ‑wee’ "klein, ɛ ‑siɛ’ ‑jei", ’sʋ ʋʋ ’na ɔɔ’ nʋʋdɩ ‑wee’ nmɔ "jrii, ɔɔ nʋɛ’ mɔ ‑wee’ ’sʋ nyʋ ‑ʋʋ ‑suan" a jea i ’wɔn, "muu ‑tei" ‑wi" a jea wlu.
8Sesi "nyɩɛ nyiɔpʋ ‑di’pɛn kplɩ ke ‑smii’ ke
1’De ɛɛ’ ’wɩ tu ’di, nyʋ ‑tuu"‑tuu ’kɩɩɛn "jrui ke’wlɛ ’bo Sesi ‑pʋn" ’kaa dɛ ʋʋ ’jea di ɛ se nɩ. ‑Jɛ dɛ ʋʋ ’jea di sea nɩ ’sʋ ɛ, Sesi wluɛ ɔɔ’ klai" nynuu ‑pee ɔ ’na : 2Nyʋ ‑nʋ ’a wɛe a nʋ ’ʋn ’ɛ, dɛ‑nʋɛ’ nyʋ ‑nʋ ’a ’wɩ taan ka ‑sɩan ’bo ’ʋn ‑pʋn", ’kaa ʋʋ se diidɛ ’ble. 3‑Bo ʋʋ se dɛ di ‑wɛe ’ɩn ’je ʋʋpʋ ‑jei" po ɛ, ‑crigba a muɛ ʋʋpʋ ‑saa’ ‑je woi ’de ‑mɛ ’kamɔ ʋʋa’ jrʋ’ ’wlʋ ‑ta ‑tɔɔn’. 4’Sʋ klai" nynuu ’na : ‑Ta ‑a ‑nɩa ‑ta tɛɛn o, ‑kwlɔ jrɛ’ sea i"kʋʋan‑ ’ee, ‑ta ka nyʋ ’je diidɛ ‑sa, ‑wɛe nyʋ ‑tia ka ’je di ’de ʋʋ ’je dbo ɛ‑ ? 5‑Wɛe Sesi ‑tee’ ʋʋpʋ i ɔ ’na : ‑Di’pɛn kplɩ ‑tiiɛ’ ao ’ble ɛ‑ ? Ʋʋ ’na : ‑Di’pɛn kplɩ ‑mɛ" ’sɔn. 6’Sʋ Sesi wluɛ nyʋ ‑wee’ "klein ‑pee ɔ ’na : Ao ‑te i. ’Sʋ ɔ "duɛ ‑di’pɛn kplɩ ‑mɛ" ’sɔn ‑nɩ ’ʋn ’ɛ, ɔ poɛ Kea ’sɛ‑, ɔ cɛɛn ɩ i, ɔ "nyɩ ɔɔ’ klai" nynuu ‑wɛe ʋʋ ’jɩ ‑gble’. ’Sʋ ʋʋ ‑gblɩ’ nyʋ "jrii. 7Ʋʋ ’bleɛ ‑smii’ jɔ mɩɩ" jrɩ’ ke’wlɛ. Sesi poɛ ɩa’ Kea ’sɛ‑, ‑wɛe ɔ ’tmʋʋ ɔɔ’ klai" nynuu, ’de ʋʋ ’jɩ ‑gble’ ‑ke. 8Ʋʋ dia dɛ ʋʋ dboa a, ɩa’ tɔe ‑sia ’o ʋʋ ’tɩan i ɩ "jiɛ toe" ‑mɛ" ’sɔn. 9Nyʋ ‑dia’ dɛ ʋʋ ’bɛɛ‑ "wlu ‑nyiiɛ ’mɛ. Ʋʋ ‑kɔ "i ’sasa ‑wɛe Sesi po ʋʋ ‑jei".
10’Bo ‑mɛ ’de ɛ, Sesi ke ɔɔ’ klai" nynuu ’ja ‑kwɛɛ" ’di ‑wɛe ʋʋ mu ’e Dalmanutablʋa "kpei.
Fariseɛn‑wi" a ‑teeɛ’ jrii’ i
11Fariseɛn‑wi" ji’ ʋʋ ke Sesi a jea ‑too’, ʋʋ ’jeɔ i ‑tɩn’ ’sʋ ʋʋ ’na ‑ɩn nʋ jrii’ ‑wlʋa ’e jaʋn ’di ‑a ‑jeɛ ’je. 12Sesi ’wla feeɛ’ i, ‑wɛe ɔ ’na : Dɛɛ‑tɩ nyiɔ ‑nɩa ’e ‑sɩan wɩ ’di a ‑tee’ jrii’ i ɛ‑ ? ’Ma ’tmʋʋɛ aopʋ tɔ’ ‑tɩ, jrii’ jrɛ’ se nʋʋɛ i ao se ɛ ’jei.
13’Sʋ Sesi siɛ ʋʋpʋ ’mʋa‑, ɔ ’ja ’e ‑kwɛɛ" ’di, ‑wɛe ɔ mu ’e "ni ’a ’kpʋʋn jrɛ’ "kpei.
Jrii’ Sesi nʋa ɔɔ’ klai" nynuu ’a ’wɔn ɩ ’dei
14Sesi ’a klai" nynuu "mae’ ʋʋ se diidɛ ’ʋn "duo‑, ‑bo ɛ se ‑di’pɛn kpla due’ ‑gbai’ mɛ ‑ɛ ‑ke ʋʋpʋ ’ja ’e ‑kwɛɛ" ’di nɩ ɛ. 15Sesi ‑tuɛ" ɔɔ’ klai" nynuu ’snɩ ɔ ’na : Ao ‑tu" aoa’ ‑cɛ" ’ɛ ‑tɩ’ ’de Fariseɛn ke Erodɩ ’a ‑di’pɛn ’ɛ ‑puun" dɩ ’a ‑tɩ’ ’ʋn. 16’Sʋ klai" nynuu wluɛ ba ‑pee ʋʋ ’na : ‑A se ‑di’pɛn ’ble, ɛmɛ ‑tɩ ɔ ’da kan’. 17Ka ʋʋa ’tmʋa dɛ ‑nɛ ’sʋ Sesi ’je kan’ ’mɛ ’sʋ ɔ ‑teeɛ’ ʋʋpʋ i ɔ ’na : Dɛɛ ‑tɩ ao ’na ao se ‑di’pɛn ’ble mɛ ‑o ɛ‑ ? Aoa’ ’wɔn ɛ ’mii ? Ao se tɔ’ ’blee ? Aoa’ pɛe kmuɛii" ? 18Ao ’bleɛ "jri aoa’ ’je i, ao ’bleɛ doin" aoa’ ’wɔn ii ? Tɔ’ se aopʋ ’di ’kpa kee ? 19‑Ta ’ɩn cɛɛan ‑di’pɛn kplɩ ‑mm" i ’de nyʋ ’a "wlu ‑mm" ’a ‑tɩ’ ’ʋn ɛ, ɩa’ tɔe ’a toe" ‑tiiɛ’ ao ‑sa ’o ɛ‑ ? Ʋʋ ’na : Toe" ’a ‑puue ’jɔ ’sɔɔn. 20’De ‑ta ’ɩn cɛɛan ‑di’pɛn kplɩ ‑mɛ" ’sɔn i ’de nyʋ ’a "wlu ‑nyiiɛ ’nynɩ ’ee, toe" ‑tiiɛ’ ɩa’ tii‑ ‑sia ’o mu "ji ‑wɛe ao kpa ‑a ? Ʋʋ ’na : Toe" ‑mɛ" ’sɔn. 21Wɛe Sesi ’na : Ao se dɛ ’mii ’wɔn kee ?
Sesi ’baiɛ "dɔi due’ ’a "jri ’de Besaida
22Sesi ke ɔɔ’ klai" nynuu nyniɛ ’e Besaida, ’bomɔ ʋʋ jɔɔ "dɔi due’. Ʋʋ bae ɔ i ‑wɛe ɔ ’je ɔ "i bla. 23Sesi kpʋn ɛ "dɔi ‑cɩɛi", ɔ ke ɔ ’wlʋɛ ’o ‑kwlɔ ‑kpae", ‑wɛe ɔ po ɔ tɔn "jri. Ɔ ‑teɔ’ sʋn "jru, ’de ɔ ’na : ‑Ma ‑je i ’mɛɛ ? 24"Dɔi ’baiɛ "jri, ɔ ’na : ’Ma ’jeɛ nyʋ i, ʋʋa na’, ’kaa ɛ se ’pepe nɩ ke, ka ti nɩa ’ka ʋʋpʋ nɩ‑ ’de ’ʋn "jri ’de. 25Sesi ’tʋɛn ɔɔ’ "jri i ke’wlɛ ’sʋ ɔɔ’ "jri ’bai, ɔɔ ’jeɛ dɩ ‑wee’ "kpe i ’pepe. 26Sesi ’na : ‑Ɩn mu ’de ‑ɩn o ‑gbu" ’di, ‑ɩn ‑bo ’e ‑kwlɔ ‑kpae" muɛ.
Piɛi ’na Sesi nɩɛ Klisɩ, Kea ’a ’o‑tei ‑o
(Matie 16.13-20 ; Luikɩ 9.18-21)
27Sesi ke ɔɔ’ klai" nynuu a muɛ ’e Sesare Filipiblʋa "kpei, ‑wɛe ɔ ‑tee’ ʋʋpʋ i ’bo ‑jei", ɔ ’naa : Nyɔ nyʋ a ’daa‑ ’ʋn ɛ‑ ? 28Ɔɔ’ klai" nynuu ’na : Nyʋ jrʋ’ a ’daa‑ ‑ʋn San Batisɩ, jrʋ’ a ’daa‑ ‑ʋn Eli, jrʋ’ ’na ‑ɩn ‑nɩɛ Kea ’a weepoi due’ ‑o. 29’De Sesi ’na : ’Ɩn ’je ‑mɛ ‑wɛ‑ ’de nyɔ aopʋ mɔɔ ’daa‑ ’ʋn ɛ‑ ? ’Sʋ Piɛi ’na : ‑Ɩn ‑nɩɛ Klisɩ, Kea ’a ’o‑tei ‑o. 30’De Sesi cri ɛɛ’ ‑cɩɛ ’de ʋʋ ‑pee ‑wɛe ʋʋ je dɛ ‑nɩa ’mʋa‑ nyʋ jrʋ’ ‑pee ’tmʋʋ‑.
Sesi ’tmʋɛ ɔɔ’ ’mɛ ‑tɩ ke ɔɔ’ "kunyɩɔ’ sɔn‑tɩ ke
(Matie 16.21-28 ; Luikɩ 9.22-27)
31’Bo ‑mɛ ’de ɛ, Sesi ‑teɛ ɔɔ’ klai" nynuu dɛ tɔɔa’ ‑pʋn", ɔ ’na : nyiɔ ’ɔ "Ju a muɛ seaa’ ‑gblein’. Nyʋ ‑cɔʋn’‑wi" o, ’sraa ‑saʋn klae" o, kɛ’ wɔ‑saʋn a muɛ ɔ ’bɔa’, ʋʋa muɛ ɔ ’dbaa’, ‑wɛe ’bo ’wɩ ’a taan ‑nɛ "kpei ɔ ’je "kunyɩɔ’ sɔn‑. 32Sesi ’tmʋʋa ʋʋpʋ dɛ ‑nɩa ’mʋa‑, ɔ se ɛ ’kwla ‑tu". ’Sʋ Piɛi ’dɔɔ ’de ‑tajrɔ, ‑wɛe ɔɔ ‑cɛ’ ɔ "bli, ɔ ’na : ‑Ɩn ‑bo dɩ ‑nɩa kan’ ’tmʋɛ. 33’De Sesi "biie i, ɔ ‑gbʋn ɔɔ’ klai" nynuu ja, ‑wɛe ɔ ‑cɛ’ Piɛi "bli ɔ ’na : ‑Ɩn ‑tɛɛn ’ʋn kɩn, ‑siɔn’, ‑ɩn ‑bleɛ nyiɔtɔ’, ‑ma ’a ’wɔn ’e Kea ’a tɔ’ ’de i.
34Sesi ’da nyʋ ‑wee’ "klein ke ɔɔ’ klai" nynuu ke‑, ‑wɛe ɔ wlu ʋʋpʋ ‑pee ɔ ’na : ‑Bo nyɔ nɩɛ "i ‑wɛe ɔ ke ’ma ‑a ‑je na a, ‑mɛ ɔ ’bo ɔɔ’ ‑cɛ" ’ɛ ’tʋn nʋ‑tɩ nʋɛ, ɔ ’wɔɔn‑ ɔɔ’ ‑nɛ ’kle ’je ‑tɩ ‑wɛe ɔ ’je ’ʋn ’de bla. 35Nyɔ ‑nɩɛ "i ‑ɔɔ ‑cɛ" ’kpa ’je ɔɔ’ ’kmʋ "kpei‑ ’tʋan ’ja a ‑mɛ, ɛɛ mu ɔ kwa "maa’, ’kaa nyɔ ‑ɔɔ mua ɔɔ’ ’kmʋ ’bɔa’ ’de ’ma ‑tɩ’ ’ʋn ke Kea ’a wlu ’a ‑tɩ’ ’ʋn ɛ, ɔɔ muɛ ’pʋʋa’. 36’De ‑bo nyiɔ ’ble ’kmʋ ‑wee’ "klein ’de ɔ ’je ɔɔ’ ‑suu "maa ’dee, dɛ ɔ ‑sa ’o ɛ‑ ? 37Dɛ nyiɔ ’je ja ‑wɛe ɔ ’je ’o ɔɔ’ ‑suu ‑kɔ o poo ɛ‑ ? 38Nyʋ ‑ʋʋ sea Kea ’a ‑tɩ’ kma ‑wɛe ‑ʋʋa nʋa dɩsaɩn ’de ‑sɩanwɩ ’di ɛ, nyɔ ‑nɩa ’de ʋʋpʋ "klu ‑wɛe ‑ɔ nʋa ’ma ‑tɩ’ ‑tɩn’ ’ʋn ’de ‑ɔɔ pleea ’ma wlu ’tmʋa’ ’de ʋʋpʋ ‑pee ɛ, ‑sɔntɩ ’mɔ nyiɔ ’ɔ "Ju a mua de jia’ ’de ’ɩn "Bo ’a kɛɛma’ ’ʋn, ’de Kea ’a "soa‑wi" "klu ɛ, ’ma muɛ ɔɔ’ ‑tɩ’ ‑tɩn’ ’ʋn nʋa’ ‑ke.
91’De ɔ wluɛ ʋʋpʋ ‑pee ke’wlɛ ɔ ’na : ’Ma ’tmʋʋɛ aopʋ‑ tɔ’ ‑tɩ ’a tɔ’ ‑tɩ, nyʋ ‑nɩa ‑ta ʋʋa’ jrʋ’ se ’mɛi ʋʋ ’je Kea ’a Tʋ"bodɛ ’ɛɛ deji ‑ta ’je ’de "ikma’ ’ʋn.
Sesi ‑saa "i ’de ɔɔ’ klai" nynuu taan "jri ’de
(Matie 17.1-13 ; Luikɩ 9.28-36)
2’Wɩ ‑mɛɛo"‑ ‑sia’, Sesi "duɛ Piɛi ke Sakɩ ke San ’ʋn ‑wɛe ɔ ke ʋʋpʋ mu ’de crʋ klaa" jrɛ’ "jru, ‑wɛe ʋʋa’ ’sʋ ke ɔ nɩ ’e. ’Sʋ ɔ ‑saa "i ’de ʋʋpʋ "jri ’de. 3Ɔɔ’ ’ʋnpaadɩ a fan’, ‑wɛe ɩa’ "plua ‑si’ ‑jei" ɩa ‑flaan’ nyʋ "jri. Nyɔ "o nyɔ jrɔ’ se ɛ ’bɛɛ‑ ’de ’kmʋ "kpei ‑ta ɔ ’je dɩ wɔɔ‑ ‑wɛe ɛ ’je i‑kwɛ‑ kan’. 4‑Wɛe ɔɔ’ klai" nynuu ’jee Eli ke Moisɩ "jriɛ‑ ʋʋ ke Sesi a ’tmʋʋ. 5’Sʋ Piɛi wluɛ Sesi ‑pee ɔ ’na : ’Ma dɛtɔɔi, ‑bo ‑a ‑sie ‑ta a, ɛ nmɔ "jrii, ‑aa muɛ poe" taan poa’, ‑mɔ ‑ble due’, Moisɩ ’ble due’, Eli ’ble due’. 6Dɛ Piɛi ’tmʋa ’mʋa‑ ɔɔ’ ‑cɛ" ’kpa se ɛ ’mii ’wɔn, dɛ‑nʋɛ’ dɛ waa ɔ ke ɔɔ’ "dɛi ‑wi" ’dii. 7’Sʋ bue" ji’, ɛ "muuɛ ʋʋpʋ "jru i, ‑wɛe ’de bue" ’di ‑nɔ wlu ’wlʋ ’e, ɛ ’na : "Ju ‑nɔ, ’ma ‑tɩ’ kmaju ‑o, ao po ɔɔ’ wlu doun" o. 8’Bo ɛ "sri klai" nynuu je ʋʋ ’de woi ‑gbʋʋn’, ’kaa ʋʋ se nyɔ jrɔ’ ’je ‑bo ɛ se Sesi ’a ’sʋ nɩ ɛ.
9‑Ta ʋʋa ’wlʋa ’e crʋ "kpei ʋʋa "sia i ɛ, Sesi ‑teɛ’ ʋʋpʋ kɛ’ "i ɔ ’na : Dɛ ao ’jeea "jriɛ‑ ‑ta, ao ’bo ɛ "i blaa ’de nyɔ jrɔ’ ‑pee mamaʋ ’sʋ nyiɔ ’ɔ "Ju ’je "kunyɩɔ’ sɔn‑. 10Klai" nynuu ‑teɛ’ ɛɛ’ wlu tu i ’de ʋʋa’ ’sʋ ’nynɩ ‑wɛe ʋʋa ‑tee’ ba i ʋʋ ’na : "Kunyɩɔ’ sɔan’ ‑mɛ ’de ’de ɛ‑ ?
11‑Wɛe ʋʋ ‑tee’ Sesi i ʋʋ ’na : Dɛɛ‑tɩ kɛ’ wɔ‑sanyʋ a wlu ʋʋ ’na Eli mɔ ‑je "i‑saa ‑ɔ ‑je ji ɛ‑ ? 12’Sʋ ɔ ’na : Tɔ’ ‑o, Eli ‑je "i‑saa ɔ ‑je ji ‑cɛɛn’‑ ‑wɛe ‑ɔ ‑e dɩ kpɔ "i po. ’De ’ma ‑teeɛ’ aopʋ‑ i ‑ke, dɛɛ‑tɩ Kea ’a wlu ’na nyiɔ ’ɔ "Ju ’je ’kle ’je ‑o ‑gblein’ ‑wɛe nyʋ ’je ɔ ‑flɛɛn ɛ‑ ? 13’Kaa ’mɔ ’na Eli mɔ ji’ ‑wɛ‑ sese, ‑wɛe nyiɔpʋ ‑tuɔ" ’kle ʋʋa’ ‑kwlʋ ka‑, ka ɛ ’crɩa ’de ɔɔ’ ‑tɩ’ ’ʋn see ɛ.
Sesi ‑sa "ju‑saan"‑ due’ ‑suusaʋn ’ʋn
(Matie 17.14-21 ; Luikɩ 9.37-43)
14‑Ta ʋʋpʋ nynia ’e klai" nynuu jrʋ’ ‑sia’ ’e mu ‑pʋn" ɛ, ‑mɛ nyiɔpʋ‑ ‑tuu" ‑gbae’ ʋʋpʋ ’dei, ‑wɛe ʋʋ ke kɛ’ wɔ‑sanyʋ a ‑too’. 15Ʋʋpʋ ’jea Sesi i ’sʋ ʋʋ ‑keeɛ’ i, ’sʋ ʋʋa ’jaa ɔ "i ʋʋ ’je ɔ ‑gblee. 16Sesi ‑teeɛ’ klai" nynuu i ɔ ’na : Dɛɛ‑tɩ ao ke ʋʋa ‑too’ ’ʋn ɛ‑ ? 17’Sʋ "ju due’ ‑wlʋ ’e nyʋ "klu ‑ɔ ‑na : ’Ma dɛtɔɔi, ’ɩn ja ‑ʋn ’ma "ju. ‑Suusaʋn ‑nɩa ’e ɔ ’ʋn ɛɛ’ ’wɔn ɔɔ’ wlu‑. 18‑Ta "o ‑ta ɛ kpʋn ɔ ’sʋ ɛ blɔ i ’bo ’blʋɔ, tɔn ’ɔ fɩʋn’ a ji ɔ wɔn i, ɔɔ diiɛ ’nynɩ "i, ‑wɛe ɔɔ "srɛɛ‑ ’ʋn. ’Ɩn ‑teeɛ’ ‑ma klai" nynuu i ʋʋ ’je ɔ ‑suusaʋn ’ʋn ‑sa, ’kaa ʋʋ se ɛ kwa i ’bɛɛ‑. 19Sesi wlu ʋʋpʋ ‑pee ɔ ’na : Ao pɛe "i "ikmunyʋ, nɔ" ‑tiiɛ’ ‑sie ’o ao ke ’ma ‑a ‑je i ‑te ɛ‑ ? Kpɛ ‑tiiɛ’ ’ɩn ’je pɛe "wɔin ’bɛɛ‑ ’de aoa’ ‑tɩ’ ’ʋn ɛ‑ ? ‑Wɛe ɔ ’na : Ao ja ’ʋn "ju‑saan"‑ ! 20Ʋʋ jɔ’. ‑Suusaʋn ’jeea Sesi "jriɛ‑ ’sʋ ɛ ‑suua’ "ju ‑saan" i. Ɔ ‑ka i ’bo ’blʋɔ, ɔɔ "mɩɩɛ i, tɔn fɩʋn’ croo ɔ wɔin. 21Sesi ‑teeɛ’ "ju ‑saan" "bo i ɔ ’na : Ɔ nɩa kan’ ɛɛ’ ’wɩ ‑tiiɛ’‑ ? Ɔ "bo ’na : Ɛ ‑sɔ ’e ‑saan" ’ʋn. 22‑Bo ’wɩ jrɛ’ o ɛ, ‑suusaʋn po ɔ "jri, ’wɩ jrɛ’ o ɛ, ɛ po ɔ "niɔ‑ ‑wɛe ɛ ’je ɔ ’dba. ’Kaa ‑bo ‑ɩn ‑bɛɛ’ dɛ jrɛ’ nʋa’ a, ‑ɩn ‑je ‑aa wɛe‑, ‑ɩn ‑te’ ‑a kwa wɔi ’dee. 23’De Sesi ’na : ‑Mɔ ‑na, ‑bo ’ɩn ’bɛɛ dɛ jrɛ’ nʋa’ a‑ ? Nyɔ ‑tea’ Kea ‑kwlɩ" ɛ, dɩ ‑wee’ a ’wɔɔn ɔ kwa. 24’Bo ɛ "sri "ju ‑saan" "bo kpa wlu "jɛi, ɔ ’na : ’Ɩn ‑teɛ ‑ʋn ‑kwlɩ". ‑Ɩn ji ’ʋn o, ’ma dɛ tɔ’ ’ʋn ’jea’ nɩɛ ’kle. 25Sesi ’jea nyʋ ‑ʋʋa ‑kwea de ’de ʋʋ ’de woi ɔ kmaa wlu "i ’de ‑suusaʋn ‑pee ɔ ’na : Ɛ "si "kpae’ ! ɛmɛ ‑suusaʋn ‑a ‑suan" nyʋ ’a wɔn ‑ɛɛ wa nyʋ ’a doin" ɛ, ’ma ’tmʋʋɛ’, ɛ ’wlʋ ’e "ju ‑saan" ‑nɔ ’ʋn, ɛ ’bo ’de ɔ ’ʋn paa ’bode ! 26‑Suusaʋn "wɔɔ’, ɛ ‑suua’ "ju ‑saan" i kpleiin, ‑wɛe ɛ "si "kpae’. "Ju‑saan" ’kpa "jroa jroa ka nyɔ ɔ ’mɛa. Nyʋ ‑gbaea’ ʋʋa’ ‑tuu" ’na : Ɔ ’mɛɛ. 27’Kaa Sesi kpʋɛn ɔ ‑cɛ" i, ɔ kpɔ "jɛi ’sʋ ɔ nyna i.
28‑Ta Sesi paa ’de ‑gbu" ’di ‑wɛe ɔɔ’ klai" nynuu ’a ’sʋ ke ɔ nɩa ’emu ɛ, ’bo ʋʋ ‑tee’ ɔ i ʋʋ ’na : Dɛɛ‑tɩ ‑a se ‑suusaʋn ‑nɛ ’ɛ inʋa’ ’bɛɛ‑ ɛ‑ ? 29’De Sesi ’na : ‑Suusaʋn ka ‑jɛ ‑mɛ nɩa ‑ɛ ‑nɩa kan’ a, dɛ jrɛ’ se ɛ ’bɛɛ‑ ɛ ’je ɛ ’e ‑sa, ‑bo ɛ se ’de Kea baea’ ’ʋn nɩɛ.
Sesi ’tmʋɛ ɔɔ’ ’mɛ‑tɩ ke ɔɔ’ "kunyɩɔ’ sɔn‑tɩ ke’wlɛ
(Matie 17.22-23 ; Luikɩ 9.43-45)
30Ʋʋ ’wlʋa ’mʋa‑ a, ʋʋ cɛn Galileblʋa ’ʋn ‑tie". Sesi se ɛ "i nɩ ‑ta ɔ nɩa nyʋ ’je ’o juo‑, 31dɛ‑nʋɛ’ ɔɔ tɔɔ ɔɔ’ klai" nynuu dɛ. Ɔɔ ’tmʋʋ ʋʋpʋ ’mɛ ɔ ’na : Nyʋ a muɛ nyiɔ ’ɔ "Ju ’de nyiɔpʋ ’kwa ‑tu" ’a, ʋʋ ’je ɔ ’dba, ‑wɛe ’de ’wɩ taan "kpei ɔ ’je "kunyɩɔ’ sɔn‑. 32’Kaa klai" nynuu se dɛ ‑nɩa ’mʋa‑ ’dei ’wɔn, ’de ʋʋa plee ɔɔ’ i ‑tea’ ’mɛ.
‑Ɔ ‑nɩ klaa" a‑ ?
(Matie 18.1-5 ; Luikɩ 9.46-48)
33Ʋʋ ke Sesi nyniɛ ’o Kapɛnaʋm. ‑Ta ʋʋ pa ’e ‑gbu" due’ ’di ’sʋ ɛ, ɔ ‑teeɛ’ ɔɔ’ klai" nynuu i ɔ ’na : Dɛ aoa ‑too’ ’ʋn ’bo ‑jei" ’teɔ ’de ɛ‑ ? 34’Kaa ʋʋ ‑wee’ "muɛ wɔn, dɛ‑nʋɛ’ nyɔ ‑jea ʋʋa’ klaa" nɩ mɔ ‑ɔɔ ‑tɩ’ ʋʋa ‑too’ ’ʋn ‑je woi ʋʋ ’na. 35‑Wɛe Sesi ‑te i, ɔ ’da klai" nynuu ‑nɩa ‑puue ’jɔ ’sɔɔn, ’de ɔ ’na : Nyɔ ‑nɩɛ "i ‑ɔ ‑jea "i‑saa ‑mɛ ɔ ’bɔɔ‑ nyʋ ‑wee’ "klein ’a de, ɔ nɩ nyʋ ‑wee’ "klein ’a "juɔi nʋʋ i. 36’Sʋ ɔ "duɛ "ju ‑saan" due’ ’ʋn, ɔ nynaa ɔ i ’bo ʋʋa’ ‑kwɩa’‑, ‑wɛe ɔ "duɔ ’ʋn ’de ɔ ’na : 37Nyɔ ‑kpʋʋn ‑a "nynumɩɩ" ‑nɩa ka sɩn ’sɔɔn ɔ ’de ’ma ’nynɩ ’ʋn, ‑mɛ ’ma ‑cɛ" ɔ kpʋʋn sɩn ’sɔn. ’De nyʋ ‑kpʋʋn ‑a ’mɔ sɩn ’sɔɔn ɔ, ‑mɛ ɛ se ’mɔ ɔ kpʋʋn sɩn ’sɔɔn nɩ‑, "ju ‑dboa’ ’ʋn mɔ ɔ kpʋʋn sɩn ’sɔɔn.
Nyɔ ‑sea’ ‑a ‑dii ’blee‑ ɛ, ‑mɛ ɔ ke ‑a ‑na’
38San wluɛ Sesi ‑pee ɔ ’na : ’Ma dɛtɔɔi, ‑a ‑jeɛ "ju due’ ‑ɔɔ nʋ ‑siisaɩn i ’de ‑ma ’nynɩ ’ʋn, ’kaa ‑a ‑kaan ɔ ‑je de, dɛ‑nʋɛ’ ɔ ke ‑aa’ na‑. 39’De Sesi ’na : Ao ’bo ɔ ‑je de kaan. Nyɔ jrɔ’ se ɛ ’bɛɛ‑ ɔ ’je jrii’ nʋ ’de ’ma ’nynɩ ’ʋn, ‑wɛe ɔ ’je ’o "si ’de ɔ ’je ’ma ‑tɩ’ saɩn ’tmʋ. 40’Kaa nyɔ ‑sea’ ‑a ’dii ’blee ɛ, ‑mɛ ɔ ke ‑a kpa ’fɔ. 41’De ’ma ’tmʋʋ aopʋ tɔ’ ‑tɩ dɛ ao nɩa Klisɩ ’a nyʋ, ’de ɛɛ’ ‑tɩ’ ’ʋn ɛ, nyɔ "o nyɔ ‑nyɩa" ao "ni ‑kaʋn ɛ, ɔɔ muɛ ɛɛ’ ‑kei" ’jea’ see.
Dɛsaʋn ’a "ikmaa’
42Nyʋ ‑jea ’ma ‑tɩ’ tɔ’ ’ʋn ‑bo nyɔ po ʋʋa’ ‑saan" due’ ’de dɛsaʋn ’di ɛ, ‑mɛ dɛ ‑jea "paa’ ’de ɔɔ’ ‑tɩ’ ’ʋn mɛ ‑nɩ nyʋ saan ɔ "soukpo klaa" ‑plun ‑wɛe nyʋ ‑fii" ɔ ’tɔniɛ wɔn.
43‑Bo ‑ma sʋn a sea ‑ʋn ’de dɛsaʋn ’di bluua a, ‑ɩn cɩɛn ɛ ’o. ‑Ɩn ‑ble sʋn due’ ‑wɛe ‑ɩn ‑je ’kmʋnɩa’ ‑cɛɛn’‑ "paa’ ɛ je ‑ɩn ‑ble sɩn ’sɔɔn ‑wɛe ‑ɩn mu ’e ’kle ’jeɩn’ ’de nɛ‑gbauo klaa" ‑ɛɛ’ ’mʋa ’ʋn ‑sii. 44[Cɩaɩn" ‑ɩn ‑a pa nyʋ ’bo ’a ‑ta tu‑ ɩa’ ’mɛ, ’de nɛ ‑nɛ ’ɛ ’mʋ.] 45‑Bo ‑ma bʋ a sea ‑ʋn ’de dɛsaʋn ’di bluua a, ‑ɩn cɩɛn ɛ ’o. ‑Ɩn ‑too’ bʋ due’ "i ‑wɛe ‑ɩn ‑pʋ "paa’ ɛ je ‑ɩn ‑ble bɩ ’sɔɔn ‑wɛe ‑ɩn mu ’e nɛ sea’ ’mʋ‑ta ’ble ’ʋn ‑sii 46[Cɩaɩn" ‑ɩn ‑a pa nyʋ ’bo ’a ‑ta tu‑ ɩa’ ’mɛ, ’de nɛ ‑nɛ ’ɛ ’mʋ.] 47’De ‑bo ‑ma "jriɛ‑ ɛ sea ‑ʋn ’de dɛsaʋn ’di bluua a, ‑ɩn ‑sɛ ’de ‑ʋn kʋn’, ‑ɩn ‑ble "jriɛjɔ due’ ‑wɛe ‑ɩn pa ’de Kea ’a tʋ"bo ‑kwlɔ ’di, ɛ "paa’ ɛ je ‑ɩn ‑ble "jri ’sɔɔn ‑wɛe ‑ɩn mu ’de nɛ sea’ ’mʋ‑ta ’ble ’ʋn ‑sii 48[Cɩaɩn" ‑ɩn ‑a pa nyʋ ’bo ’a ‑ta tu‑ ɩa’ ’mɛ, ’de nɛ ‑nɛ ’ɛ ’mʋ.] 49Nɛ ɛ muɛ nyʋ ‑wee’ "kpei mua’ ka nyɔ ɔ poa ’tɔn ’de ’sraadɛ o ɛ.
50’Tɔn nɩɛ dɛ ’dɔe ‑o. ’Kaa ‑bo ’tɔn ‑kwɛ‑ wɔn ’dee, ka nyʋ ’je ɛɛ’ ‑tɩ’ nʋ ‑wɛe ɛ ’je wɔn nɩ ɛ‑ ? Ao nɩ ’tɔn wɔn. Pɛe ’a blua’ nɩ ’bo ao ke ao ‑ponyiɔ ’nynɩ.
10Sesi muɛ ’de Suideblʋa "kpei
1Sesi ’wlʋa ’mʋa‑, ɔ muɛ ’e Suide ’de Sudɛn ‑gbuu ’de fɔ o. Nyʋ ‑tuu" ‑gbae’ ɔ ’de woi ke’wlɛ ‑wɛe ɔ ‑te ʋʋa’ dɛ tɔɔa’ ‑pʋn" ka ɔɔ nʋa see ɛ.
Dɛ Sesi tɔɔa nyʋ ’de ’nynɔ’kwla‑satɩ ’ʋn ɛ
2Fariseɛn‑wi" ’kpɔ ‑pʋn" ‑wɛe ʋʋ ’je ɔ i ‑tɩn’, ʋʋ ‑tee’ ɔ i ʋʋ ’na : ’de ‑aa kɛ’ ‑nɛ ’di ’ee, "junmɔu ’beeɛ’ ’mɛ ‑ta ɔ ’je ɔɔ’ ’nynɔ ’kwla ‑saa ? 3’De Sesi ’na : Ka Moisɩ bla kɛ’ ɔ ’da ’de aopʋ ‑pee ɛ‑ ? 4Ʋʋ ’na : Moisɩ ’na "junmɔu ’crɩ ’kwla ‑sa ’sbɛ ‑wɛe ɔ ’je ɔɔ’ ’nynɔ "nyɩ ’de ɔ ’je ʋ ’kwla ‑sa. 5’De Sesi ’na : Aoa’ pɛe "ikmua’ mɛ ‑nʋɛ’ ‑wɛe Moisɩ je kɛ’ ‑nɩa ’mʋa‑ ’crɩ ’de aoa’ ‑tɩ’ ’ʋn. 6’Kaa tɛin" ’de ɛ, ‑ta Kea nʋa dɩ ‑wee’ ɛ, ɛ nʋɛ "junmɔu ke ’nynɔkpao’ ke‑. 7Ɛmɛ ‑tɩ "junmɔu a mu ɔ "bo ke ɔ de ‑pʋn" ’wlʋa’, ɔ ke ɔɔ’ ’nynɔ ’je "i "sii‑, 8‑wɛe ka ʋʋ nɩa ’sɔɔn, ʋʋ ’je nyɔ due’ ma. ‑Bo ɛ nɩ kan’ a, ‑mɛ ʋʋ se ’sɔɔn nɩ‑, ʋʋ ma dɛ due’. 9Dɛ Kea ‑tu" ’a "i ɛ, nyiɔ ’bo ɛ i ‑seea’.
10‑Ta ʋʋ nɩa ’e ‑gbu" ’di ɛ, klai" nynuu ‑teeɛ’ Sesi i ke’wlɛ ’de ‑tɩ’ ‑nɩa ’mʋa‑ "kpei. 11’De Sesi ’na : ‑Bo "junmɔu ‑sa ɔɔ’ ’nynɔ ’kwla ‑wɛe ɔ ’je ’nynɔ jrɔ’ ’ble ɛ, ɔ ’kpa ’e jɛi" ’jea’ ’di. 12’Kamɔ ‑bo ’nynɔkpao’ ’wlʋ ‑gbu" ‑wɛe ʋ "ti "junmɔu jrɔ’ "bli ɛ, ʋ ’kpa ’e jɛi" ’jea’ ’di ‑ke.
Sesi poɛ "nynumɩɩ" "diwan
(Matie 19.13-15 ; Luikɩ 18.15-17)
13Nyʋ jrʋ’ ja "nynumɩɩ" ’de Sesi o, ‑wɛe ɔ ’je ʋʋ "diwan po ’kaa klai" nynuu a ‑fuun ɛ ʋʋpʋ nya. 14Dɛ ʋʋ nʋa ɛ se Sesi ’tʋn nʋ, ‑wɛe ɔ ’tmʋʋ klai" nynuu ɔ ’na : Ao "tai "nynumɩɩ" "i ʋʋ ’je ’nɔ ’ʋn o ji. Ao ’bo ʋʋ ‑je de kaan, dɛ‑nʋɛ’ ka "nynumɩɩ" nɩa nyʋ ‑nɩa kan’ a, ʋʋpʋ ‑ble Kea ’a kɛɛma’ ‑kwlɔ. 15’Ma ’tmʋʋɛ aopʋ tɔ’ ‑tɩ ’a tɔ’ ‑tɩ, nyɔ ‑sea’ Kea ’a kɛɛma’ ‑kwlɔ ’ɔ ‑tɩ’ ’wɔɔn ka "ju ‑saan" nɩa, ɔ seɛ ’bɛɛ ɔ ’je ’o ɛ ’di pa. 16Ɔ ’tmʋa wlu ‑nɛ ’sʋ ɛ, ɔ "duo "nynumɩɩ" ’ʋn ’ɛ ’de ɔ ‑gblee ʋʋ ‑kwlɩ". Ɔ ‑te’ ʋʋ sʋn "jru due ’due, ‑wɛe ɔ po ʋʋpʋ "diwan.
"Ju "wliiɛ‑ ’blea kʋɔn ’ʋn ɛ
(Matie 19.16-30 ; Luikɩ 18.18-30)
17‑Ta Sesi ’kpaa ‑jei" ɛ, "ju due’ ‑ple’ ‑ɔ ‑ji’, ‑ɔ ‑sii" i ’kɔi‑ i ’de ɔ "juɔi, ‑wɛe ‑ɔ ‑na : Nyʋ dɛtɔɔi ’dɔe, dɛ ’ɩn ’je nʋ ‑wɛe ’ɩn ’je ’kmʋ ‑sea’ ‑kwɛ‑ ‑ta ’ble ’je ɛ‑ ? 18Sesi ’na : Dɛɛ‑tɩ ‑ma ‑daa’ ’ʋn nyɔ ’dɔe ɛ‑ ? Nyɔ jrɔ’ se ’dɔe nɩ ‑bo ɛ se Kea ’a ’sʋ nɩ ɛ. 19‑Ɩn ‑juo Kea ’a kɛ’ ’mɛ : Ɛ ’na : ‑ɩn ‑bo "ku ’dbaa, ‑ɩn ‑bo jɛi" ’jeɛ, ‑ɩn ‑bo "jriiɛ, ‑ɩn ‑bo nyʋ ‑pa "kpei blaa, ‑ɩn ‑bo nyʋ ’srɛ i pooɛ, ‑wɛe ‑ɩn ‑bo ʋʋ dɩ ’kwa i‑saa, ‑ɩn ‑te’ ‑ɩn "bo ke ‑ɩn de ’a ni’. 20"Ju ‑nɔ ’na : Nyʋ dɛtɔɔi, ’ɩn ‑sa kɛ’ ‑nɩa ’mʋa ’a wɔn ’jea’ ‑saan" ’ʋn. 21Sesi ‑gbʋn ɔ ‑tɩ’ kmajriɛ ja, ɔ ’na : Dɛ due’ ‑sie ’o ‑ɩn ‑je nʋ : ‑ɩn mu, ‑ɩn ple ‑ma dɩ ‑wee’, ‑ɩn ‑nyɩ" ɩa’ ’wɛi nɩɩa" nyʋ, ‑wɛe ‑ɩn ‑je "wliiɛ‑ ’ble ’de jaʋn ’di, ‑wɛe ‑ɩn ‑je ji ‑ɩn ‑ke ’ma ‑a ‑je na‑. 22’Kaa "ju ‑nɔ ’wɔan wlu ‑nɩa ’mʋa‑ a, ɔ ’kwlɔn "jua‑, ɔ "kaeɛ "jrii "kɩkɩ ɔɔ jea mu, dɛ‑nʋɛ’ ɔ nɩɛ "wliiɛjei klaa" ‑o.
23Sesi ‑gbʋan ɔɔ’ klai" nynuu ‑gbae’ ɔ ’de woi ja ɔ ’na : Ka "wliiɛjei ’a Kea ’a tʋ"bodɛ ’ʋn ’kpaa’ nɩ ’kle kaa‑ ! 24Wlu ‑nɩa ’mʋa‑ "maa klai" nynuu tai’. ’Kaa Sesi wluɛ ʋʋ ‑pee ke’wlɛ ɔ ’na : ’Ma "nynuu‑, ka ’de Kea ’a tʋ"bodɛ ’ʋn ’kpaa’ nɩ ’kle kaa‑ ! 25‑Sɛn "kpei soo" ’a ’bo "mɛʋn ’a ‑po" "i paa’ "feeɛ wɔn ɛ je "wliɛjei ’a ’de Kea ’a kɛɛma’ ‑kwlɔ ’di paa’ ‑sii. 26Dɛ ɔ ’tmʋa ’mʋa‑, ɛ "maa klai" nynuu tai’ ke’wlɛ ɛ je ‑jei" ‑si’. Ʋʋa ‑teeɛ’ ba i due ’due ʋʋ ’na : ’De ‑mɛ nyɔ ‑bɛɛ’ ‑ɔ ‑je ’pʋʋa’ ’je ɛ‑ ? 27Sesi ‑gbʋn ʋʋpʋ ja ɔ ’na : ‑Bo ɛ ‑tu" nyiɔpʋ‑wi" ‑mʋ ɛ, ‑mɛ ɛ kmai" ’de ʋʋpʋ "jri ’de, ’kaa ɛ se "ikma ’de Kea ‑pee, dɛ‑nʋɛ’ ɛ ’bɛɛ‑ dɩ ‑wee’ "klein ’a nʋa’ ’mɛ.
28’Sʋ Piɛi ’na : ‑Ɩn ‑gbʋn ’nɔ, ‑apʋ ‑jɔ ‑bɔa ɔɔ’ dɩ ‑wee’ "klein ‑wɛe ‑ɔ bla ’bo ‑ʋn ’de ’e ? 29’De Sesi ’na : ’Ma ’tmʋʋɛ ao tɔ’ ‑tɩ, nyɔ "o nyɔ ‑bɔa ɔɔ’ ‑gbu", ‑ɔ ‑bɔa ɔɔ’ de’dinmai, ɔɔ’ de’dinynʋkpae’, ɔ de, ɔ "bo, ɔɔ’ "nynuu‑, ɔɔ’ ‑kle’ ’de ’ma ‑tɩ’ ’ʋn ke ‑pɔia" wlu ’a ‑tɩ’ ’ʋn ɛ, 30ɔɔ muɛ ‑gbi" o, de’dinmai o, de’dinynʋkpae’ o, de‑wi" o, "nynuu‑ o, ‑kle’ a kmɛ’ ’due ’jea’, ɩ ke ‑cɛ" wɔn ’jea’ ’de kaanwɩ ’di ke. ‑Wɛe ’de nya, ɔ ’je ’kmʋnɩa’ ‑sea’ ‑kwɛ ‑ta ’ble ’je ‑ke. 31’Kaa nyʋ ‑saa "i kaan a, ʋʋa’ ‑ta ‑tuu" a muɛ de ’bɔɔa’, ‑wɛe nyʋ ‑bɔɔa’ de ɛ, ʋʋa’ ‑ta ‑tuu" ’je "i‑saa.
Kpɛ taan ‑nɛ mɛ Sesi ’tmʋ ɔɔ’ ’mɛ ‑tɩ ke ɔɔ’ "kunyɩɔ’ sɔn‑tɩ
(Matie 20.17-19 ; Luikɩ 18.31-34)
32‑Ta ʋʋ nɩɩa Selisalɛm muua’ a, Sesi ‑kɔn ’e ʋʋa’ nya, ’sʋ faʋn nʋ ɔɔ’ klai" nynuu ke nyʋ "klein ‑bla’ ’bo ɔ ’de ’mɛ ‑wɛe Sesi ’kɩɩɛn ɔɔ’ klai" nynuu ‑nɩa ‑puue ’jɔ ’sɔɔn "jrui, ɔɔ’ tai’ "maa ʋʋpʋ ’mɛ. Ɔɔ’ klai" nynuu a ‑tuɛ" ɔɔ’ ‑sɔɔn ’de ɔ ’de. Sesi ’bɔɔ‑ de ke’wlɛ ɔ je ɔɔ’ klai" nynuu ‑nɩa ‑puue ’jɔ ’sɔɔn "jrui ’kɩɩn‑ ’de dɩ ‑ɩ ‑jeɔ "jrii nʋʋɛ ɔɔ ’tmʋɩ ’de ʋʋ ‑pee. 33Ɔ ’na : Ao ‑gbʋn ’nɔ, ’de Selisalɛm ‑aa mua, nyiɔ ’ɔ "Ju a muɛ ’de ’sraa ‑saʋn klae" ke kɛ’ wɔ‑saʋn ’kwa ’kpaa’, ʋʋ ’je ɔɔ’ ’mɛ ‑tɩ ’a wlu ’ʋn ’bɛɛ‑, ‑wɛe ʋʋ ’je ɔ nyʋ ’srʋ kwa ’bɔɔ‑. 34’De ‑wi" ‑mʋ ’je ɔ wlaa‑, ʋʋ ’je ɔ tɔn "jri wlan, ʋʋ ’je ɔ klae ’ʋn kpa, ‑wɛe ʋʋ ’je ɔ ’dba. ’Kaa ’de ’wɩ taan "kpei ɛ, ɔɔ muɛ "kunyɩɔ’ sɔan’.
Nyʋ ’ble ‑tɩ ke nyʋ "juɔi nʋʋ‑tɩ ke
35Ɛ ’wlʋa ’mʋa‑ ’sʋ Sebede ’a "nynuu‑ Sakɩ ke San ’kpa Sesi ‑pʋn", ʋʋ ’na : ‑Aa dɛtɔɔi, ‑a ‑nɩɛ "i dɛ ‑aa mua ‑mi i ‑teea’ ‑ɩn ‑je ɛ nʋ. 36Sesi ‑teeɛ’ ʋʋpʋ i ɔ ’na : Dɛ ao nɩ "i ’ɩn ’je ao "nyɩ ɛ‑ ? 37’Sʋ ʋʋ ’na : ‑Sɔntɩ ‑ma mua ’nynɩ ’wlʋa’ ’de ‑ma tʋ"bodɛ ’ʋn ɛ, ‑ɩn ‑wɔn ‑a ‑je ’de ‑ʋn ‑pʋn" ‑te, due’ ’je ’de ‑ma dian o ‑te ‑wɛe due’ ’je ’de ‑ma kʋan o ‑te. 38’De Sesi ’na : Dɛ aoa ‑tee’ a i ao se ɛ juo‑. "Nmia ‑pɛ ’ma mua ’naa’, ao ’bɛɛ‑ ɛɛ’ ’naa’ ’mɛɛ ? ’De ‑cɛ" wɔn ’jea’ ’ma mua ’ʋn cɛan’, ao ’bɛɛ‑ ɛɛ’ ’ʋn cɛɛan ’mɛɛ ? 39’Sʋ ʋʋ ’na : ‑A ‑bɛɛ’ nɛ’. ’De Sesi ’na : Tɔ’ ‑o ‑cɛɛn’‑, "pɛ ’ma mua ’naa’ a, ao ’bɛɛ‑ ɛɛ’ ’naa’ ’mɛ, ’de ‑cɛ" wɔn ’jea’ ’ma mua ’ʋn cɛan’, aoa muɛ ɛ ’ʋn cɛan’. 40’Kaa ’de ’ma dian o ke ’ma kʋan o ‑tetɩ ‑mɛ ɛ, ɩa’ ‑tɩ’ se ’e ’ma ‑cɛ" ’kwa nɩ‑. Ɩa’ ‑teɩn ‑tu nyʋ ‑a ‑tɩ’ Kea nmaɩ ɛ, ʋʋpʋ ‑jɩ ’je.
41Klai" nynuu ‑puue ‑sia ’o ’wɔan wlu ‑nɩa ’mʋa‑, ʋʋ ’kpaa Sakɩ ke San ’cɛn i. 42’Sʋ Sesi ’da ʋʋ ‑wee’ ’mɛ, ‑wɛe ɔ ’na : Ao juɛ’ nyʋ nyiɔ ɔ ‑gbʋn ‑a ja ka "jrujeʋn nɩa ’de ’kmʋ "kpei ‑ta ʋʋpʋ ‑a cri nyiɔ bɩ ‑sɔn i, ’de nyʋ ‑nɩa nyʋ klae" ʋʋpʋ ‑a kmaa nyʋ wɔn "kpei. 43’Kaa ɛ ’bo kan’ nɩɛ ’de aopʋ "klu. ‑Bo aoa’ due’ nɩɛ "i ɔ ’je klaa" nɩ ‑mɛ ɔ nɩ aoa’ "jɔi nʋʋi. 44’De ‑bo aoa’ due’ ’na ɔ ’je nya kɔn ‑mɛ ɔ nɩ ao ‑wee’ ’a kʋɔn. 45Dɛ‑nʋɛ’ nyiɔ ’ɔ "Ju se ji ‑wɛe nyʋ ’je ɔ "juɔi nʋʋ, ’kaa ɔ ji’ ‑wɛe ɔmɔ ’je nyʋ "juɔi nʋʋ, ‑wɛe ɔ ’je ɔɔ’ ’kmʋ ’e to ’de ɛ ’je nyʋ ‑tuu" seie‑.
Sesi ’bɔɔ‑ "dɔi Batime ’a "jri
(Matie 20.29-34 ; Luikɩ 18.35-43)
46Sesi ke ɔɔ’ klai" nynuu nyniɛ ’o Seriko. ‑Ta ʋʋa ’wlʋa ’demu ɛ, nyiɔ ‑kwɛ‑ de, ’bo mɔ Time ’a "ju Batime, ‑doa" a, ɔ ‑teɛ i ’bo ‑je doun" ɔɔ jea ‑srɔ. 47Ka Sesi ‑wlʋa Nasarɛtɩ a ‑sia’ ɔ ’wɔɩn ’sʋ ɔɔ wee’ ɔ o, ɔ ’na : Dafidɩ ’a "Ju Sesi, ‑ɩn ‑je ’ma wɛe‑ ’de ! 48Nyʋ ’a ‑ta ‑tuu" a ’wlɔ wlu "jru ‑wɛe ɔ ’e wɔn "mu. ’Kaa ɔɔ kpa wlu "jɛi ɔɔ jea "wɔ ke’wlɛ ɔ ’na : Dafidɩ ’a "Ju, ‑ɩn ‑je ’ma wɛe‑ ! 49’Sʋ Sesi nyna i, ɔ ’na : Ao ’dɔ ! ’Sʋ ʋʋ ’da "dɔi ’mɛ, ʋʋ ’na : ‑Ɩn ‑duo" ’kpɩ ’ʋn ‑too"‑, ‑ɩn ‑je mu la ɔɔ ’da ‑ʋn ‑ɛ ! 50’Sʋ ɔ ‑fii" ɔɔ’ flae’‑ ’mɛ, ɔ ‑pliin" ɔ sɔn ’ʋn ’ɛ, ɔ jiɛ ’e Sesi o. 51Sesi "dua wlu ’ʋn ɛ, ɔ ’na : Dɛ ‑ɩn ‑nɩɛ "i ’ɩn ’je ‑ʋn "jrii nʋ ɛ‑ ? "Dɔi ’na : ’Ɩn "bo, ‑ɩn ‑nʋɛ ’ma "jri ’je ’bai‑ ’ɩn ’je i ’je. 52’De Sesi ’na : ‑Ɩn mu, ‑ma dɛ ‑kwlɩ" ‑tea’ ’pʋʋ ‑ʋn ‑ɛ. ’Bo ɛ "sri ɔɔ’ "jri je ’bai‑, ɔɔ jea i ’je ‑wɛe ɔ bla ’o Sesi ’de.
11Sesi pa ’bo Selisalɛm
(Matie 21.1-11 ; Luikɩ 19.28-40 ; San 12.12-19)
1‑Ta ʋʋa "kʋʋan Selisalɛm ‑kwlɔ i, ’de Befase ke Betani ‑pʋn", ’de olifɩ‑crʋ "kpei ɛ, Sesi dboɛ ɔɔ’ klai" nynuu ’sɔɔn, ɔ ’na : 2Ao mu ’e ‑kwlɔ ‑nɩa ’e nya ’di. ‑Bo aoa sea ‑kwlɔ i "si ɛ, aoa muɛ soofaeju due’ ‑mɔɔa i ’jea’. Nyɔ jrɔ’ se ɛ "kpei ‑te due’. Ao kain ɛ, ao ’je ɛ ’ʋn ja ‑ta. 3‑Bo nyɔ ‑tee’ aopʋ i ’de ɔ ’na dɛɛ‑tɩ aoa nʋ kan’ a‑ ? ‑Mɛ ao wlu ao ’na Tʋ"bo ‑nɩɛ "i. Ɔɔ mu ɛ ‑jei" pooa’, ɛ ’je ’nɔ ji kaan.
4Ʋʋ mua, ʋʋ jɛɛ soofae’ ju ’mɛ ’de ‑gbu" due’ "wɔin, ɛ mɔɔɛ i ’de "kpae’ ’bo ‑je ‑wɔin". Ʋʋ kain ɛ’. 5Nyʋ ‑nɩa ’mʋa‑ ’a jrʋ’ wlu ʋʋpʋ ‑pee ʋʋ ’na : Dɛɛ aoa nʋ kan’ a‑ ? ’De dɛɛ ‑tɩ aoa kain soofae’ ju i ɛ‑ ? 6Ka Sesi "sia ’nynɩ, ’ka klai" nynuu ’da ʋʋpʋ ‑pee. ’Sʋ ʋʋ "taiɛ ʋʋpʋ "i, ʋʋ je mu.
7Ʋʋ ja Sesi soofae’ ju, ʋʋ sroɛ ʋʋa’ ’ʋnpaadɩ "kpei, ‑wɛe ɔ ’jɛ "kpei, ɔ ‑tei. 8Nyʋ ‑tuu" sroɛ ʋʋa’ ’ʋnpaadɩ ‑je woi, nyʋ jrʋ’ cɛn ‑pɔa" wɩn ‑kle’ "kpei‑ ‑wɛe ʋʋ po ɩ ‑je woi. 9Nyʋ ‑kɔan ’e Sesi "juɔi ke nyʋ ‑kɔan ’e ɔ ’de ke, ʋʋa wee ɔ o, ʋʋ ’na :
Osana ! ɛ ’de mɛ ‑nɩ : ‑Kai" ’matɛ ! "Diwan kpʋn nyɔ ‑ɔ jia ’de Tʋ"bo ’a ’nynɩ ’ʋn ɛ ! 10Tʋ"bodɛ ‑ɛɛ jia, ‑a "bo Dafidɩ ’a tʋ"bodɛ, Kea ’a "diwan kpʋn ɛ ! ‑Kai" ’matɛ ’de jaʋn ’di !
11Sesi nynia ’bo Selisalɛm ɛ, ɔ pa ’e Kea ‑gbu klaa" ’di, ‑wɛe dɩ "klein ‑ɩa nʋʋa ’de mu, ɔ ‑gbʋn ɩ ‑wee’ ja. Kwie a kpʋn a ’sʋ ɛ, ɔ ke ɔɔ’ klai" nynuu a ‑puue ’jɔ ’sɔɔn muɛ ’e Betani.
Sesi se fikɩtu "buo ja jɛɛ
12Ɛɛ’ ‑sɔn’ ‑sɩan’, ‑ta Sesi ke ɔɔ’ klai" nynuu a ’wlʋa Betani ɛ, ’mɩɩɛ‑ ɛ nʋ Sesi ’mɛ. 13Ɔ tɛɛn o fikɩtu due’ wɩn "jia ja, ɔ je ɛ i ’je. Ɔ mua, ɔmɔ ’na ɔ ’jeɛ "buo ja ’je ‑o ’de‑, ’kaa ɔ ’kpaa’ ’bo ɛ ‑sɔn ɛ, wɩn ’a ’sʋ mɩ ɔ jɛɛ‑, dɛ‑nʋɛ’ ɛɛ’ "buo po nɔ" se nyni. 14’Sʋ Sesi "duɛ wlu ’ʋn ɔ ’na : Ɛmɛ fikɩtu ‑nɛ, nyɔ jrɔ’ ’bo ɛɛ’ "buo diɛ ’bode ! Dɛ ɔɔ ’tmʋa ’mʋa‑ ɔɔ’ klai" nynuu ’wɔɛn.
Sesi nʋɛ nɔ" dɩpleʋn i ’de Kea ‑gbu klaa" ’di
(Matie 21.12-17 ; Luikɩ 19.45-48 ; San 2.13-22)
15’Bo ‑mɛ ’de ɛ, ʋʋ nyniɛ Selisalɛm. Sesi pa ’e Kea ‑gbu klaa" ’di, ’sʋ ɔ ‑teɛ nyʋ ‑a plea dɩ ke nyʋ ‑a ‑tɩan’ dɩ ’de ɛ ’di inʋa’ ‑pʋn". ’Wɛi fai" poonyʋ ke "pai plenyʋ ’a "kpa ‑tɩ ke ɔ ‑gbɩ’ ‑wee’ "jɛi‑. 16Ɔɔ’ ’wɔn nyɔ jrɔ’ ’ɔ ’blee dɛ "jru ɔɔ’ cɛn Kea ‑gbu klaa" ’di ‑tie". 17‑Wɛe ɔ ‑te nyʋ dɛ tɔɔa’ ‑pʋn" ɔ ’na : Wlu ‑crɩɩa’ ’de Kea ’a ’sbɛ ’di ɛ, ɛ ’naa : ’Ma ‑gbu" a muɛ nyʋ ‑wee’ ’a Keabae‑gbu nɩa’, ’kaa aopʋ mɔ nʋ ɛ "jri‑gbu ’ʋn.
18’Sraa ‑saʋn klae" ke kɛ’ wɔ‑saʋn ’wɔan dɛ ‑nɩa ’mʋa‑ ’sʋ ɛɛ’ faʋn a nʋ ʋʋpʋ ’mɛ. Ʋʋa ‑pɔn Sesi ’a ’dba ‑kɔ i, dɛ‑nʋɛ’ wlu ɔ ’tmʋa ke dɩ ɔɔ ‑sa wɔ ɩa "siɛ nyʋ ‑kwea de "i.
19‑Fli bla ’sʋ Sesi ke ɔɔ’ klai" nynuu ’wlʋ ’o ‑kwlɔ ’mɛ.
Kea ‑kwlɩ" ‑tetɩ
20‑Sɔn’ ‑sɩan’ ‑klae" pɛɛn ‑ta ʋʋa ‑sia’, klai" nynuu ’jeeɛ fikɩtu ‑nɛ "jriɛ‑. ’Kaa ɛ ‑sa jɛa’ ’de "jɛi, ɛ je ’de ɛɛ’ ’sɩn o nyni. 21Piɛi poɛ dɛ ‑nʋʋa ‑kwlʋ o, ’sʋ ɔ wluɛ Sesi ‑pee ɔ ’na : ’Ma dɛtɔɔi, ‑ɩn ‑gbʋn fikɩtu ‑ɩn ‑pooa ‑soo’ o ɛ, ɛ ‑wee’ jɛ ’sɔɛ. 22’Sʋ Sesi "duɛ wlu ’ʋn, ɔ ’tmʋʋɛ ɔɔ’ klai" nynuu ɔ ’na : Ao ‑te’ Kea ‑kwlɩ" ! 23’Ma ’tmʋʋɛ aopʋ tɔ’ ‑tɩ, ‑bo ao ‑te’ Kea ‑kwlɩ" ɛ, ao ’bɛɛ’ ao ’je crʋ ‑nɛ ‑pee wlu, ao ’je nʋ : Ɛ ’wlʋ ‑ta, ɛ ’je ’e ’tɔniɛ wɔn ’kpa ! Dɛ ao ‑teea’ i, ’ka ɛɛ mua nʋa’ ‑bo ao se ɛɛ’ pɛe i plee ‑wɛe ao ’je ɛ ‑kwlɩ" ‑te’ ɛ, aoa muɛ ’jea’, ɛ ’je ’o nyni. 24Ɛmɛ ‑tɩ ’ma ’tmʋʋ aopʋ, dɩ "klein ao baea Kea ‑wɛe ao ‑teea’ i ɛ, ka dɛ ɛɛ ’kpa ao ’kwa, ao ‑te’ ɛ ‑kwlɩ" aoa muɛ ɛɛ’ dɛ tu ’jea’ see ɛ ’e nʋʋɛ‑. 25’De ‑ta ao nɩɩa baea’ ‑bo ao ’blee nyɔ jrɔ’ ’dii ‑mɛ ao ‑kɔ’ ɔɔ’ dɛsaʋn ‑wɛe ao "Bo ‑nɩa ’e jaʋn ’di ’je aoa’ dɩsaɩn ‑kɔ’ ‑ke. 26(’Kaa ‑bo ao se nyʋ ’a dɛsaʋn ‑kɔ’ ɛ, ao "Bo ‑nɩa ’e jaʋn ’di se aoa’ dɩsaɩn ‑kɔi’ ‑ke.)
‑Ta Sesi ’a "ikmaa’ ’wlʋ ɛ‑ ?
(Matie 21.23-27 ; Luikɩ 20.1-8)
27Ʋʋ ’bɔɔ‑ de ʋʋ je Selisalɛm mu ke’wlɛ. ‑Ta Sesi a naa i ’de Kea ‑gbu klaa" ’di ɛ, ’sraa ‑saʋn o, kɛ’ wɔ‑saʋn o, nyʋ ‑cɔʋn’‑wi" ’kpa ’de ɔ ‑pʋn". 28Ʋʋ ‑tee’ ɔ i ʋʋ ’na : ‑Ta ‑ɩn ‑sa "ikmaa’ ‑ma jea dɩ ‑nɩ nʋ ɛ‑ ? 29Sesi wlu ʋʋ ‑pee ɔ ’na : ’Ɩn nɩɛ "i ’ɩn ’je aopʋ‑ dɛ due’ i ‑tee’‑. ‑Bo ao ‑sɛ "kpei ɛ, ‑ta ’ma "ikmaa’ ’wlʋa ’ma muɛ ’o ’a ’nynɩ "sia’. 30Nyɔ ‑dbo’ San Batisɩ nyʋ "ni "jru pooa ’a‑ ? Kea ‑ae, ‑aee’ nyiɔ‑ ? Ao ‑sɛ "kpei. 31Ʋʋa’ ’sʋ ‑teɛ ba o ‑tooa’ ‑pʋn" ʋʋ ’na : ‑Bo ‑a ‑wlu ‑a ‑na Kea ‑dbo’ ɔ ɛ, ɔɔ muɛ nʋa’ dɛɛ‑tɩ ao se dɛ ɔ ’tmʋa tɔ’ ’ʋn ’je ɛ‑ ? 32’De ‑bo ‑a ‑na nyiɔ ‑dbo’ ɔ ɛ‑ ? Ʋʋa plee nyiɔpʋ ’mɛ, dɛ‑nʋɛ’ nyʋ ‑wee’ a naa tɔ’ i ʋʋ ’na San nɩɛ Kea ’a weepoi ’a ‑cɛ" ’kpa ‑o. 33’Sʋ ʋʋ wluɛ Sesi ‑pee ʋʋ ’na : ‑A se ɛ juo‑. ’De Sesi ’na : ’Mɔ ‑ke ɛ, ‑ta ’ma "ikmaa’ a ’wlʋa ‑wɛe ’ma nʋa dɩ ‑nɩ ɛ, ’ɩn se ’o ’a ’nynɩ "sii‑ ‑ke.
12‑Busan dinyʋ saɩn ’a "i poo‑tɩ
(Matie 21.33-46 ; Luikɩ 20.9-19)
1Sesi a cɛɛn ’e "ipoo‑tɩ ’ʋn ‑wɛe ɔɔ ’tmʋʋ ʋʋpʋ wlu ‑pee ɔ ’na : "Ju due’ mɔ ‑dba rɛsɛn’ ‑kle ɔ blɛ ‑klɛe ’de woi, ‑ɔ ‑blu" ‑ta nyʋ ’jea rɛsɛn ’ʋn "nmuu ɛ, ‑wɛe ɔ po "miɔ‑gbu due’. ’De ɔ siɛ ‑busan dinyʋ o, ‑wɛe ɔ mu ’dʋʋa’. 2Rɛsɛn’ ‑sa nɔ" nynia, ɔ dboɛ ɔɔ’ dbonʋi due’ ’de ‑busan dinyʋ o, ‑wɛe ʋʋ ’je ɔɔ’ ‑nɩ rɛsɛn’ jɔ ’de ‑sa ʋʋ ’je ɔ "nyɩ. 3’Kaa ʋʋ kpʋn ɔɔ’ dbonʋi ‑nɔ ’mɛ, ʋʋ blɔ’ ‑wɛe ʋʋ nʋ ɔ i, ʋʋ se ɔ dɛ jrɛ’ "nyɩ. 4‑Kle’ jei dboɛ ɔɔ’ dbonʋi jrɔ’ ke’wlɛ. Ʋʋ ‑sa ‑mɔ kpi "jrui ‑wɛe ʋʋ ‑cree" ɔ. 5‑Kle’ jei dboɛ taan ‑nɔ, ʋʋ ’dba ‑mɔ ’mɛ. ’Ka ʋʋ nʋ ɔɔ’ dbonʋnyʋ ‑tuu"‑tuu, ʋʋ bla jrʋ’, ʋʋ ’dba jrʋ’.
6Nyɔ due’ koʋn ‑gbai’ ‑sia ‑kle’ jei ’kwa a, ɛmɛ ‑nɩ ɔɔ’ ‑tɩ kmaju. Ɔmɔ ɔ dbo de ’bɔɔ‑ nɔ" ’de ʋʋpʋ o. Ɔ naa tɔ’ i ɔ ’na : Ʋʋa muɛ ’ma "ju ’a ni’ ‑tea’ see. 7’Kaa ‑busan dinyʋ ‑nʋ ’tmʋʋɛ ba ʋʋ ’na : "Ju ‑jea ’kɛn kpa ’de nya ɔ ka. Ao "nyɩ ‑a mu ‑a ‑je ɔ ’dba ‑wɛe ‑kle’ ’je ‑a ’kwa sie‑. 8‑Wɛe ʋʋ kpʋn ɔ ‑cɛɛn’‑, ʋʋ ’dbɔ, ’de ʋʋ ‑sa ɔɔ’ "ku ’bo ‑kle, ʋʋ po ɛ ’kwla.
9’De Sesi ’na : Aoa naa tɔ’ i ’ee, ka ‑kle’ jei ’je nyʋ ‑nʋ ’a ‑tɩ’ nʋ ɛ‑ ? Ɔɔ muɛ jia’, ɔ ’je ‑busan dinyʋ ’dba, ‑wɛe ɔ ’je ɔɔ’ ‑kle’ dbonʋnyʋ jrʋ’ "nyɩ. 10Wlu ‑crɩɩa’ ‑ta, ao seɛ ’dii nʋʋ ? Ɛ ’naa :
"Soukpo ‑gbu" ponyʋ pooa sʋn i ɛ, ɛmɛ ‑snɛɛ "soukpo ‑cɛɛn’‑ ’ʋn. 11Dɛ Tʋ"bo nʋa, ɛmɛ ‑nao. Ɛ nmɔɔ ‑a ’di wɔn.
12’Sʋ, Suifʋ‑wi" ’a "jrujeʋn a ‑pɔn Sesi ’a kpʋn ‑kɔ i, dɛ‑nʋɛ’ ʋʋ ’je kan’ ’mɛ ‑tɩ’ ɔ pooa "i ɛ, ʋʋpʋ ɔɔ ’da. ’Kaa ʋʋa pleea nyʋ ɛ, ʋʋ siɛ ɔ ’mʋa‑ ʋʋ je mu.
’Bluajei ’a ‑dɛɩnpo’
(Matie 22.15-22 ; Luikɩ 20.20-26)
13Ʋʋ dboɛ Fariseɛn jrʋ’ ke Erodɩ ’a ’cɛ jrʋ’ ’de Sesi o, ‑wɛe ʋʋ ’je ɔɔ’ ‑cɛ" ’ɛ wlu ’a "klɛ ‑pee ‑gba’ ’de ʋʋ ’je ɔ "kpei kpʋʋn‑. 14Ʋʋ jia, ʋʋ ’na : Nyʋ dɛtɔɔi, ‑a ‑juo ka ‑ma ‑tmʋa tɔ’ ‑tɩ ’a ’sʋ ’mɛ. Nyɔ jrɔ’ ’ɔ faʋn ’a nʋ ‑ʋn, dɛ‑nʋɛ’ ‑maa’ ‑gbʋn nyʋ ’a ’bɛsʋn ja, ’kaa ‑ma tɔɔɛ nyʋ Kea ’a ‑jeblʋ ’a ‑cɛ" ’kpa. ‑Aa ‑teeɛ’ ‑mi i nyʋ ’beeɛ’ nyʋ ’je ‑dɛɩnpo’ ‑sa, nyʋ ’je ɛ ’blʋajei Sesaa "nyɩɩ ? ‑A ‑sɩ ‑ae, ‑aee’ ‑a ‑bo ɩ ‑saa ? 15’Kaa Sesi juo ka ʋʋ pooa "jri de ’mɛ, ’sʋ ɔ ’na : Dɛɛ‑tɩ aoa ‑gba’ ’ʋn wlu ’a "klɛ ‑pee ɛ‑ ? Ao ja ’ʋn ’wɛijɔ due’ kea’ ’ɩn ’je ɛ ’je. 16’Sʋ ʋʋ jɔ ’wɛijɔ due’. ’De Sesi ‑tee’ ʋʋpʋ i ɔ ’na : Nyɔ ‑ble "jru kpa" ‑nɛ ke ’nynɩ ‑crɩɩa’ ‑taa ? ’Sʋ ʋʋ ’na : ’Blʋajei Sesaa ‑o.
17Sesi wlu ʋʋpʋ ‑pee ɔ ’na : Dɛ ‑nɩa Sesaa ’a dɛ, ao "nyɩ ɛ Sesaa, ’de dɛ ‑nɩa Kea ’a dɛ, ao "nyɩ ɛ Kea o. ’Sʋ dɛ ɔ ’tmʋa ɛɛ’ tai’ "maa ʋʋpʋ ’mɛ.
’Mɛʋn ’a "kunyɩɔ’ sɔn ‑tɩ
(Matie 22.23-33 ; Luikɩ 20.27-40)
18Sadiseɛn jrʋ’ jiɛ ’de Sesi o. ’De see ɛ, Sadiseɛn‑wi" ’na "kunyɩɔ’ sɔn‑tɩ se tɔ’ nɩ. Ʋʋ ‑teeɛ’ Sesi i ka ʋʋ ’na : 19Nyʋ dɛtɔɔi, Moisɩ ’crɩɛ kɛ’ ‑nɛ ɔ je ‑a ‑nyɩ", ɛ ’naa : ‑Bo "junmɔu due’ ’ble ’nynɔ ‑wɛe ɔ ke ʋ se "ju ’wlʋ ’de ɔ ’je ’mɛ ɛ, ɔɔ’ "dei "duo ‑tiɔn" ’nynɔ ‑sia ’ʋn, ɔ ke ʋ ’je "nynuu‑ ’wlʋ ’de ɔɔ’ ‑fɛin’ ‑mɛa ‑pee. 20’Kaa ‑a ‑jeɛ de’dinmai ‑mɛ" ’sɔn. ‑Jɔ ‑saa "i ’blea ’nynɔ, ɔ se "ju ’wlʋ, ɔ je ’mɛ. 21Ɔɔ’ ‑tiɔn" ’nynɔ ‑sia ɔɔ’ "dei "duo ʋ ’ʋn ’ɛ. ’Kaa ɔ ke ʋ se "ju ’wlʋ ‑ke, ɔ je ’mɛ. Dɛ due’ ‑nɛ mɛ ‑nʋʋɛ taan ‑nɔ "jrii ‑ke. 22Nyʋ ‑nɩa ‑mɛ" ’sɔn ʋ jiia ’kwa i ɛ, ʋʋa’ due’ koʋn ‑gbai’ ke ʋ se "ju ’wlʋ ʋʋ ‑wee’ je ’mɛ. Ʋʋ ‑wee’ ’wlʋ ’kmʋ kpɩɩn‑, ‑wɛe ʋmʋ ’mɛ ‑ke. 23‑Sɔntɩ nyʋ a mua "kunyɩɔ’ sɔan’ a, ‑wɛe nyʋ ‑mɛa ‑wee’ ’jea ’kmʋ de ji ɛ, nyɔ ʋ ’je "bli "ti ‑gbo’ ɛ‑ ? Nyʋ ‑nɩa ‑mɛ" ’sɔn ‑wee’ ’ble ʋ ’nynɔ ’ʋn.
24’De Sesi ’na : Ka aoa "maa aoa’ ‑cɛ" tai’ ao se ɛ juo‑ ? Aoa’ ’wɔn Kea ’a wlu ‑crɩɩa’ ’mii, ’de aoa’ ’wɔn Kea ’a "ikmaa’ ’dei ? 25’Kɛ ‑nɛ ‑cɛɛn’‑, ‑bo nyʋ sɔn "kunyɩɔ’, ‑mɛ "nynunmai ke ’nynʋkpae ’a ba "blitia’ ‑kwɛ’, ’kaa ka Kea ’a "soa‑wi" nɩa ’de jaʋn ’di ɛ, ’ka ʋʋa mu nɩa’. 26’De dɛ ‑nɩa ‑ɩn ‑mɛ ‑wɛe ‑ɩn ‑sɔn "kunyɩɔ’ ‑tɩ’ ’ʋn ɛ, dɛ ‑crɩɩa’ ’de Moisɩ ’a ’sbɛ ’di ’de "wi‑gbau’o ’a ‑tɩ’ ’ʋn, ao se ɛ ’dii nʋ duee’ ? Kea wluɛ Moisɩ ‑pee ɛ ’naa : ’Ɩn nɩɛ Ablaam ’a Kea, Isaakɩ ’a Kea, Sakɔbʋ ’a Kea. 27‑Bo ɛ nɩ kan’ a, ‑mɛ Kea nɩɛ nyʋ ‑nɩa ’kmʋ ’a Kea ‑o, ɛ se ’mɛʋn ’a Kea nɩ‑. Dɛ ao ‑sia’ "i ‑gblein’ ‑wɛe ‑ɛɛ tai’ "maa aopʋ‑, ɛmɛ ‑nao.
Kɛ’ɛ "jruojɔ
(Matie 22.34-40 ; Luikɩ 10.25-28)
28‑Ta ʋʋa ’tmʋɛ ɛ, kɛ’ wɔ‑sai due’ a poɛ doun" o. ‑Ta ɔ ’jea kan’ ka Sesi ‑sa ‑tɩ’ ʋʋpʋ ‑tee’ ɔ i wɔ ka ‑cɔɔn’ ka ’sʋ ɛ, ɔ ’kpa ɔ ‑pʋn" ‑wɛe ɔ ‑tee’ ɔ i ɔ ’na : Kɛ’ ‑wee’ "klein ’a "jruojɔ ’de ɛ‑ ? 29’De Sesi ’na : Kɛ’ɛ "jruojɔ ’ɔ "i‑saa’ ‑nɛ ka : ‑Ɩn ‑te’ doun" Israɛ, ‑aa Tʋ"bo klaa" Kea ’a ’sʋ mɛ ‑nɩ Tʋ"bo. 30‑Ɩn ‑kma ‑ma Tʋ"bo Kea ’a ‑tɩ’ ’de ‑ma pɛe ‑wee’ o, ’de ‑ma ‑suu ‑wee’ ’ʋn, ’de ‑ma tɔ’ ‑wee’ ’ʋn, ’de ‑ma ’kpɩ ‑wee’ ’ʋn. 31’De kɛ’ɛ ’sɔɔn ‑nɛ ka : ‑Ɩn ‑kma ‑ma ‑ponyiɔ ’ɔ ‑tɩ’ ka ‑ɩn ‑kma ‑ma ‑cɛ" ’ɛ ‑tɩ’ ɛ. Kɛ’ ‑jea "i ’bɛ ‑ɛ ‑jea kɛ’ ’sɔɔn ‑nɩa ’mʋa‑ ‑sii ɛ, ɛ se nɩ‑.
32’Demɔ kɛ’ wɔ‑sai "duo wlu ’ʋn ’de Sesi ‑pee ɔ ’na : ’Kɛ nɩ ‑cɛɛn’‑, nyʋ dɛtɔɔi, ‑ɩn ‑tmʋɛ tɔ’ ‑tɩ Tʋ"bo klaa" ’a ’sʋ ‑nɩ Kea, ‑kea’‑ jrɛ’ se ’e de nɩ‑. 33Nyʋ ’je Kea ’a ‑tɩ’ kma ‑o ’de ɔɔ’ pɛe ‑wee’ "klein o, ’de ɔɔ’ tɔ’ ‑wee’ "klein ’ʋn, ’de ɔɔ’ ’kpɩ ‑wee’ "klein ’ʋn, ‑wɛe ɔ ’je ɔ ‑ponyiɔ ’ɔ ‑tɩ’ kma ka ɔ kma ɔɔ’ ‑cɛ" ’ɛ ‑tɩ’ ɛ. Ɛ "paa’ ɛ je nmi "klein nyʋ a poa "jri ɔɔ "nyɩa Kea ke ’sraa‑ "klein nyʋ a ‑sa’ ɔɔ "nyɩ ɛ ‑sii. 34Sesi ’jea kan’ ka ɔ poa ‑tɩ’ wɔn o ’de tɔ’ ’dinɩa’ ’ʋn ɛ, ɔ ’na : ‑Ɩn se Kea ’a tʋ"bo‑kwlɔ o tɛɛn‑.
Ɛ ’wlʋa ’o mu ɛ, nyʋ ‑wee’ a plee ɔɔ’ i ‑teea’ ’mɛ ’bode.
Nyɔ ‑ɔɔ "Ju Klisɩ nɩ ɛ‑ ?
(Matie 22.41-46 ; Luikɩ 20.41-44)
35‑Ta Sesi a tɔɔa nyʋ dɛ ’de Kea ‑gbu klaa" ’di ɛ, ’bomɔ ɔ ‑tee’ ʋʋpʋ dɛ due’ i, ɔ ’na : Kɛ nʋ ‑wɛe kɛ’ wɔ‑saʋn a ’daa‑ Kea ’a ’o‑tei Dafidɩ ’a "ju ɛ‑ ? 36Dafidɩ mɔ ’ɔ ‑cɛ", Kea ’a ‑Suu po ɔ ‑je o ɛ, ɔ wlu’ ka :
Tʋ"bo wluɛ ’ma Tʋ"bo ‑pee, ɛ ’naa : ‑Ɩn ‑te i ’de ’ma dianfɔ o mamaʋ ’ɩn ’je ‑ma tʋnyʋ ’de ‑ɩn bʋ ‑sɔn ‑tu".
37Dafidɩ mɔ’ɔ ‑cɛ" ɛ ’daa‑ Kea ’a ’o‑tei Tʋ"bo. Ka ɔ nʋ ɔɔ’ "ju nɩsʋn ’ja a‑ ?
Sesi ‑saa nyʋ fɛn’ ’de kɛ’ wɔ‑saʋn ’a ‑tɩ’ ’ʋn
(Matie 23.1-36 ; Luikɩ 20.45-47)
Sesi ’a wlu doin" o poa’ a nʋɛ nyʋ ‑tuu" ‑kwea de ’tʋn. 38Nyʋ ɔɔ tɔɔa dɛ, ɔ wluɛ ʋʋpʋ ‑pee ɔ ’na : Ao ‑tu" aoa’ ‑cɛ" ’ɛ ‑tɩ’ ’de kɛ’ wɔ‑saʋn ’a ‑tɩ’ ’ʋn. ‑Ɩn ‑paa "bai ‑tɔɔn ’ʋn ‑wɛe ‑ɩn ‑na i ’de nyʋ ‑wee’ po ‑ʋn ’jewlu o "kpae’ woi ɛmɛ ʋʋa ‑pɔn. 39"Kpa‑tɩ klae" ‑nɩa Kea ‑gbi ’dii o, ‑tein ’dɔe ‑nɩa ‑kɔ’ ‑sɔn i mɩ ʋʋpʋ a ‑pɔn i. 40Ʋʋa ‑sa’ ‑tiɔn" nynʋkpae’ dɩ ’kwa i. ’Kaa ʋʋa ’jeɛ nyʋ ’srɛ i pooa’ ’a "dia, baewlu "tiɛ ʋʋpʋ wɔn ’di foo" ’ʋn. ’De ɛɛ’ ‑tɩ’ ’ʋn ɛ, ʋʋa’ ’pee a muɛ "ikmaa’.
‑Tiɔn" ’nynɔ ’ɔ nɩɩa" wɛi’ jɔ‑
41Sesi ‑kɔa’ nyʋ dɛ tɔɔa’ ’sʋ ɛ, ɔ ‑teɛ i ’bo ’wɛ‑ ’di podɛ ‑pʋn", ‑wɛe ka nyʋ a nʋa ’e ’wɛi posʋn ɔɔ ‑gbʋn’ ɛ ja. "Wliiɛjeʋn ’a ‑ta ‑tuu" a poɛ ’e ’wɛi ‑tuu". 42’Bomɔ ‑tiɔn" nynɔkpao’ due’ ‑sea’ dɛ ’ble jii‑, ‑wɛe ʋ po ’e ’wɛijɔ mɩɩ" ’sɔɔn, ‑bo ɩ bee o ‑wɛe ɩ nʋ ‑suujɔ ’ɔ tɔo ’a tɔo. 43’Sʋ Sesi ’da ɔɔ’ klai" nynuu ɔ ’na : ’Ma ’tmʋʋɛ aopʋ tɔ’ ‑tɩ, ‑tɩɔn" nynɔkpao’ nɩɩa" a ’dba ‑ta, dɛ ʋ poa ’e ’wɛi ’dipodɛ ’di ɛ, ɛ ‑tiɛi", ɛ je dɛ ʋʋ ‑wee’ "klein poa ’e ‑sii, 44dɛ‑nʋɛ’ ’wɛi ‑siia ʋʋpʋ i ɛ, ɩmɩ ʋʋ po ’e, ’kaa ʋmʋ se dɛ jrɛ’ ’ble ʋa’ nɩɩa" wɛi’ jɔ‑ ʋ ‑tea’ ‑kwlɩ" ɛ, ɛmɛ ʋ to ’e.
13Sesi ’tmʋɛ Kea ‑gbu klaa" ’a "jɛi ‑gba’ ‑tɩ
1‑Ta Sesi a ’wlʋa ’de Kea ‑gbu klaa" ’di ɔɔ "sia "kpae’ ɛ, ɔɔ’ klai" nynuu ’a due’ wlu ɔ ‑pee, ɔ ’na : ’Ma dɛtɔɔi, ‑gbʋn ’nɔ, "soikpi ‑ɩ poa ‑gbu" klaa" ‑nɩ ‑ɩn ‑gbʋn ɩa’ "jriinmɔsʋn ja kea’ ! 2’Sʋ Sesi ’na : ‑Ma ‑je ‑gbi" klae" ‑nɩ ’mɛɛ, ɩ ‑wee’ a muɛ blua’ ɩa’ "sou se "sou "kpei siei.
’kmʋ ’a ‑kwɛ‑tɩ
(Matie 24.3-14 ; Luikɩ 21.7-19)
3‑Wɛe ɔ ’ja ’e olifie crʋ "kpei, ɔ ‑tei ’de ɔ to Kea ‑gbu klaa" "jua "i. ’Sʋ Piɛi o, Sakɩ o, San o, Ancre, blɔ "jru ‑pʋn", ‑wɛe ʋʋ ‑tee’ ɔ i, ʋʋ ’na : 4‑Ɩn ‑tmʋʋ’ ‑aʋn ke blaa nɔ" ‑mɩ ’a dɩ tu ’je nʋʋ ɛ‑, dɛ ‑jeɛ ‑to ka ɩa mua ’o nynia’ a‑ ?
5’Sʋ Sesi ‑teɛ ʋʋpʋ ’tmʋa’ ‑pʋn", ɔ ’na : Ao ‑tu" aoa’ ‑cɛ" ’ɛ ‑tɩ’ nyɔ jrɔ’ je ao ’srɛ ipoo‑. 6Nyʋ ‑tuu" a muɛ ’ma ’nynɩ "jru ‑tea’ ʋʋ ’je ji, ʋʋa’ jrɔ’ ’e nʋ : ’Mɔ ‑nɩ Kea ’a ’o ‑tei, ’mɔ ‑nɩ Kea ’a ’o ‑tei. ’Kamɔ ʋʋa mu nʋa’ ’sʋ ʋʋ ’je nyʋ ‑tuu" ’srɛ ipoo‑. 7‑Bo aoa sea tʋ ’a ’nynɩ ’wɔn o, ‑bo aoa sea tʋ ’a ‑cruɛn" ’wɔn o, dɛ ’bo ao ’dii waa. Ɛɛ’ dɛ tu ’je nʋʋɛ‑ ‑o see. ’Kaa ‑mɛ se ’blʋa ’a ‑kwɛ‑ nɔ" nɩ ke. 8nyiɔ ’ɔ kpɛ jrʋ’ a muɛ ʋʋ ‑ponyiɔ o ‑fɔan’, ’blʋa ’a blo’ wɔn jrɛ’ ɛ muɛ ɛ ‑poblʋa o ‑fɔan’. ’Blʋa‑ a muɛ crɛa’ dɩ ’mii, ’mɩɩɛ‑ ɛ muɛ jia’. Ka "i‑saa ‑gbaan ‑di a kpʋn a ’nynɔkpao’ ‑kwlʋ ɛ, ’ka ɩa mu nyʋ ‑kwlʋ kpʋn ’a. 9’Kaa aopʋ mɔ ɛ, ao ‑tu" aoa’ ‑cɛ" ’ɛ ‑tɩ’. Nyʋ a muɛ ao "kuan poa’ ’de ’pee ’wlʋ ‑gbi ’dii. Nyʋ a muɛ ao blaa’ ’de "jrui ’kɩɩn‑gbi ’dii. Dɛ ao ke ’ma na ’de ɛɛ’ ‑tɩ’ ’ʋn ɛ, aoa muɛ ’blʋajeʋn ke tʋ"bo ‑wi" "juɔi mua’ ‑wɛe ao ’je ’ma ‑tɩ’ ’a ‑ta ’jeʋn nɩ‑. 10’Kaa ‑pɔia" ‑tɩ ’je ’tmʋʋɛ ‑o tɛin" ’de nyiɔ ’ɔ kpɛ ‑wee’ ‑pee. 11’De ‑bo nyɔ nynaa aopʋ‑ i ‑wɛe ɔ ’je ao ’pee ’ʋn kpa a, ao ’bo dɛ ao ’jea ’tmʋ ’a ‑sɔɔn ‑tu" ɛ. ‑Bo ao nyni ’e ɛ, ‑mɛ dɛ ‑ɛɛ mua aopʋ ’ʋn jia’ a, ao ’tmʋɛ. Dɛ aoa mua ’tmʋa’ ɛ se ’de aoa’ ‑cɛ" ’ʋn ’wlʋi, ’de Kea ’a ‑Suu ’ʋn ’de ɛ ’je ’wlʋ. 12Nyʋ jrʋ’ a muɛ ʋʋa’ ‑cɛ" ’kpa ’a de’di ’de toa’ ‑wɛe nyʋ ’je ʋʋpʋ ’dba. ’Ka "nynuu‑ "bo ‑wi" a mu ʋʋa’ "nynuu‑ nʋa’ ‑ke. "Nynuu‑ jrʋ’ a muɛ ʋʋpʋ "bo ‑wi" o ‑fɔan’ ‑ke, ʋʋ ’je ʋʋpʋ ’dba. 13Dɛ ao nɩa ’ma ’cɛ ’de ɛɛ’ ‑tɩ’ ’ʋn ɛ, nyʋ ‑wee’ "klein a muɛ aopʋ ’ʋn ’nyɛa’. ’Kaa nyɔ ‑ɔ sea "jru ‑jei" ‑saa mamaʋ, ‑wɛe ‑ɔ mua ‑ɔ nynia, ɔmɔ ‑je ’pʋ.
Nyʋ sɩaɩn’‑ kpʋʋndɩ
(Matie 24.15-28 ; Luikɩ 21.20-24)
14‑Bo ao ’je dɛsaʋn ’a ma" ‑ɛɛ kpʋʋn a nyʋ sɩaɩn’‑, ‑wɛe ɛ ‑te ‑ta ɛ sea "i kɔn ɛ, ‑mɛ nyɔ ‑ɔɔ ‑sroa’ ’e ’sbɛ ’dii ’wɔn ɛ ’mii‑. ’Sʋ ‑mɛ nyʋ ‑nɩa ’de Suide ple ʋʋ ’je crɩ ’dii mu. 15Nyɔ ‑wlʋa o ‑gbɛin" ‑wɛe ‑ɔ mua "kpae, ‑mɛ ɔ ’bo ’de jiɛ ɔ ’bo ɔɔ’ ’bleedɩ ’ʋn "duo ‑kɔ i ‑pɔɛn’. 16’De nyɔ ‑ɔɔ mua ’de ‑kle nɩa’, ɔ ’bo de "biiɛ, ɔ ’bo ɔɔ’ ’ʋnpaadɩ ’ʋn "dua’ muɛ. 17’Nynʋkpae’ ‑a mua "kwli ’blea’ ke ‑jʋ ‑ʋʋa mua "nynuu‑ ‑kwlɩ" ’blea’ ’de ɛɛ’ nɔ" tu ’di ɛ, ‑wi" ‑mʋ a muɛ ʋʋa’ ‑cɛ" wɔn ’jea’ ! 18Ao bae Kea ‑wɛe ɩa’ dɩ tu ’bo nʋʋɛ dee’ ’a ji nɔ", 19dɛ‑nʋɛ’ ’kle ‑a mua jia’ ’de ɛɛ’ nɔ" tu ’di ɛ, ɛɛ muɛ "ikmaa’ ɛ ’je ’kle ‑wee’ ‑sii. Dɛ ‑wlʋa ’de ’blʋa ’a ‑gbɔo ‑tee nɔ" o, ‑ta Kea nʋa dɩ ‑wee’ "klein ɛ, ‑wɛe ‑ɛ ‑jɛɛa kaanwɩ ɛ, nyɔ se ɛɛ’ ’kle tu ’je ke due’ ’de nyɔ se ɛ ’bɛɛ‑ ɔ ’je ɛ ’kle jrɛ’ "i poo‑ ’de nya. 20‑Bo Tʋ"bo se ɩa’ ’wɩ tu "i "kʋʋan‑ ’de ɛ, ‑mɛ nyɔ jrɔ’ se ’pʋi. ’Kaa nyʋ ɛ ’da ‑wɛe ‑ʋʋ ‑jea ɛɛ’ nyʋ nɩ ɛ, ’de ʋʋa’ ‑tɩ’ ’ʋn mɔ ɛ "kʋʋan‑ ɩa’ ’wɩ tu "i. 21‑Bo nyɔ jrɔ’ wlu ’de ao ‑pee ka ɔ ’na : Ao ‑gbʋn ’nɔ, Kea ’a ’o ‑tei nɩɛ ‑ta, ’de ɔ nɩɛ ’nɔ, ao ’bo ɛ tɔ’ ’ʋn ’jeɛ, 22dɛ‑nʋɛ’ nyʋ ‑ʋʋa ‑daa’ ʋʋa’ ‑cɛ" Kea ’a ’o ‑teʋn ke wlu ’kwajaaʋn a muɛ jia’. Ʋʋa muɛ jrii’ klae" klae nʋa’ ‑ɩ ‑bɛɛ’ mɔ ’de‑ ‑ɩ ‑je nyʋ ‑ʋʋa naa Kea ’a ‑jei" ka ‑cɔɔn’ ka ’a "jru ‑jei" ‑saa. 23Aopʋ‑ mɔ ɛ, ao ‑tu" aoa’ ‑cɛ" ’ɛ ‑tɩ’. ’Ɩn siɛ nɔ" nya ’ɩn je ao dɩ ‑nɩa ’mʋa ’a ‑tɩ’ ’tmʋʋ‑, ‑wɛe ao ’jɩ juo‑.
nyiɔ ’ɔ "Ju ’a dejisʋn
(Matie 24.29-31 ; Luikɩ 21.25-28)
24Ɛɛ’ nɔi" ɛ, ‑bo ’kle ’wlʋ ’o ‑jei" ɛ, ’jrʋ a muɛ "jri "mua’, ’cʋ se fain ’bode. 25Cʋ‑sɩɩn a muɛ "jɛi ’wlʋa’ ɩ ’je blu, ‑wɛe "ikmadɩ ‑nɩa ’e jaʋn ’di ’je i ‑suua’‑ ‑wɛe ɩ ’je ‑teɩn ’wlʋ. 26‑Wɛe nyʋ ’je nyiɔ ’ɔ "Ju "jriɛ‑ ’jee‑, ɔ ’je ji ’bo bue" "kpei, ɔ ke ɔɔ’ "ikmaa’ ke ɔɔ’ ’nynɩ ’wlʋa’ ke‑. 27Ɔɔ muɛ ɔɔ’ "soa‑wi" dboa’ ’de ’blʋa ’a ’fɔ ‑nyiiɛ ‑wee’ o, ‑wɛe ʋʋ ’je nyʋ Kea ‑sa ’o "jrui ’kɩɩn‑, dɛ ‑mua’ ‑ɛ ‑jɛɛa ‑ta ’blʋa‑ ke jaʋn "tia a.
28Dɛ ti a tɔɔa nyʋ ɛ, ao siɛ "jriɛ‑ o : ‑Bo ti ’a ’dae a sea tɔɔ ɛ ɩ ’je wɩn dee ‑tuu" ‑ɛ ‑o. ‑Mɛ ka ‑kua" sea o tɛɛn‑ ao juɛ. 29’Kamɔ ‑bo aoa sea dɩ ‑nɩa ’mʋa‑ i ’je ɩa sea nʋʋɛ ɛ, ‑mɛ ka nyiɔ ’ɔ "ju ’a ji nɔ" "kʋʋan‑ i ‑wɛe ɔ nɩa ’o ‑gbɛin" ‑jei" ɛ, ao ’jɩ juo ‑ke. 30’Ma ’tmʋʋɛ aopʋ tɔ’ ‑tɩ : Nyʋ ‑nɩa ’kmʋ kaan ’a jrʋ’ se ’mɛi dɩ ‑nɩa ’mʋa‑ ’je nyni. 31Jaʋn ke ’blʋa‑ a muɛ ‑sia’, ’kaa ’ma wlu se ‑sii ’nɔ ’kmʋ.
Kea due’ koʋn ‑gbai’ mɛ ‑juo ’blʋa ’a ‑kwɛ‑ nɔ"
32Nyɔ se ɛɛ’ ’wɩ ke ɛɛ’ nɔ" juo, Kea ’a "soa‑wi" ‑nɩa ’de jaʋn ’di foo" ’sʋ se ɛ juo‑, Kea ’a "Ju ’a ‑cɛ" ’kpa se ɛ juo‑, Kea due’ koʋn ‑gbai’ mɛ ‑juo ɛ. 33Ao ’bo i "maɛeɛ ao ‑tu" aoa’ ‑cɛ" ’ɛ ‑tɩ’, dɛ‑nʋɛ’ nɔ" ‑ɛ ’di ɛɛ’ dɛ tu a mua nʋʋa’ ao seɛ juo‑. 34Ka ‑gbu" jei ’a ’dʋʋa’ mua’ nɩa, ’ka ɛɛ mu nɩa’. Ɔ siɛ ɔɔ’ ‑gbu" ɔɔ’ dbonʋnyʋ o, ɔ ‑gble’ ɛ ʋʋpʋ dbo "jrii due ’due, ‑wɛe ɔ ’tmʋʋ‑ ‑gbu" ifuoi ɔ ’na : ‑Ɩn ‑te "jriɛ‑ "i. 35Ao ‑te "jriɛ‑ "i ’ja, dɛ‑nʋɛ’ nɔ" ‑gbu" jei ’jea de ji ɛ, ao se ɛ juo‑. Ɛ ’beeɛ’ ɛ ’je ‑kwie" ka nɩ‑, ɛ ’je ‑too’ ‑kwea nɩ‑, ɛ ’je sʋn" ’a ‑sro’ nɔ" nɩ‑, ɛ ’je ‑klae" pɛɛn nɩ‑. 36Ao ‑tu" aoa’ ‑cɛ" ’ɛ ‑tɩ’, ao je "nyɩɔ’ nɩ ‑wɛe ɔɔ’ dejia’ je aopʋ "jru ‑tiie’‑. 37Dɛ ’ma ’tmʋʋa aopʋ‑ ‑ta, ’ma ’tmʋɛ ’de nyʋ ‑wee’ "klein ‑pee : Ao ‑te "jriɛ‑ "i !
14"Jrujeʋn‑wi" a pa Sesi ’a jaa"
(Matie 26.1-5 ; Luikɩ 22.1-2 ; San 11.45-53)
1Kʋɔnkwla’ ’wlʋ ‑kɔ ke ‑kɔ’ jrɛ’ nyʋ a ’daa‑ ‑di’pɛn ‑sea’ ‑pun" ’a ‑kɔ’ ke ɩa’ ’wɩ siɛ ’sɔɔn. ’Sʋ ’sraa ‑saʋn ’a klae" ke kɛ’ wɔ‑saʋn a ‑pɔn Sesi ’a kpʋn ‑kɔ i ’srɛ ’ʋn, ‑wɛe ʋʋ ’je ɔ ’dba. 2Ʋʋ ’tmʋʋɛ ba ʋʋ ’na : ‑A ‑bo ɛ nʋɛ ’bo ‑kɔ’ ‑sɔn ‑wɛe ‑kli je ’kpa.
’Nynɔkpao’ due’ "cniiɛ -dai’klɔni "i ’de Sesi "jru
3Sesi nɩɛ ’o Betani, ’de ‑tee’ dii Simɔ o ‑gbu". ‑Ta ɔ ‑teea i ɔ nɩa dɛ dia’ a, "junynɔkpao’ due’ pa ‑gbu". Ʋ ’bleɛ kmaa -dai’klɔni ’ɔ ‑sooɛ due’. Ɛɛ’ ‑sooɛ tu ɛ, "sou ’dɔe ‑nʋɛ’ ‑ɛɛ ’nynɩ nɩ albatrɩ. ‑Dai’klɔni ‑nɩa ’e ɛ ’di ɛ, ɛɛ’ ’nynɩ ‑nɩ naadɩ. ɛ ke dɛ jrɛ’ se o bee‑, ɛɛ’ sɔɔn’ kma’. Ʋ cɩɛn ‑cun" "wɔin, ‑wɛe ʋ "cnii ɛ "i ’bo Sesi "jru. 4Nyʋ ‑nɩa ’e ‑gbu" ’di ’a jrʋ’ ’kpa ’cɛn ʋʋ ’na : Dɛ ‑ble ‑dai’klɔ ‑nɛ ‑mɛ ’ɛ i dooa’ kan’ a‑ ? 5’De ‑mɛ ’kamɔ nyʋ ’beeɛ’ nyʋ ’je ɛ ple ’wɛi ’a kwla mɛɛo"‑. ‑Wɛe nyʋ ’je ɛ nɩɩa" nyʋ "nyɩ. ’Sʋ ʋʋa ‑cɛ’ "junynɔkpao’ ‑nʋ "bli. 6’Sʋ Sesi wlu’ ɔ ’na : Ao ’wlʋ ʋ ‑pʋn". Dɛɛ ‑tɩ aoa kpʋn ʋ ‑kwlʋ ɛ‑ ? Dɛ ʋ nʋa ’de ’ma ‑tɩ’ ’ʋn ɛ, ɛ nmɔ "i, ɛ nɩɛ ’ma "jrii nʋ ka‑, 7dɛ‑nʋɛ’ ao ke nɩɩa" nyʋ ‑wi" a muɛ i ‑tea’ ’wɩ ‑wee’ ’di. ‑Sɔntɩ ao nɩɛ "i ɛ, ao ’beeɛ’ ao ’je ʋʋpʋ ’dɔe "jrii nʋ, ’kaa ’mɔ ke ao se i ‑tei ’de ’wɩ ‑wee’ ’di. 8Dɛ ʋ ’bɛɛa kwa i ɛmɛ ʋ nʋa ’o. Ʋ ’wla ’ʋn ‑dai’klɔ "jru ‑wɛ‑. Ʋ siɛ ’ma inmae nɔ" nya, ʋ je ’ʋn ‑pɛɛ. 9’Ma ’tmʋʋɛ aopʋ tɔ’ ‑tɩ : ‑ta "o ‑ta nyʋ a mua ‑pɔia" wlu ’tmʋa’ ’de ’blʋa‑ "kpei ɛ, nyʋ a muɛ "junynɔkpao’ ‑nʋ ’a ‑tɩ’ ‑kwlʋ o poa’, dɛ ʋ nʋa nyʋ ’je ɛ ’tmʋ.
Suida ‑nɩɛi" ɔ ’je Sesi ple
(Matie 26.14-16 ; Luikɩ 22.3-6)
10Suida Isikario, ‑ɔ ‑nɩa ’e klai" nynuu ‑nɩa ‑puue ’jɔ ’sɔɔn "klu, muɛ ’de ’sraa ‑saʋn ’a klae" ‑wi" o, ɔ ’na ɔ ’je Sesi ple ’de ʋʋpʋ ’kwa. 11Ʋʋ ’wɔan wlu ‑nɛ ’de Suida ’wɔn ɛ, ɛ ’bleɛ ʋʋpʋ ’a ’mʋa‑. Ʋʋ cɛn wlu ‑tie", ʋʋ ’na ʋʋ ’je ɔ ’wɛi "nyɩ. ’Sʋ Suida a ‑pɔn Sesi ’a kpʋn ‑kɔ i ‑wɛe ɔ ’je ɔ ’de ʋʋpʋ ’kwa ‑tu".
Sesi ke ɔɔ’ klai" nynuu diɛ ɔɔ’ de’bɔɔdiidɛ
(Matie 26.17-25 ; Luikɩ 22.7-14, 21-23 ; San 13.21-30)
12‑Di’pɛn ‑sea’ ‑pun" ɛɛ’ ‑kɔ’ɔ "i‑saawɩ o ɛ, ʋʋa a ‑saa’ ’blae‑tɔe ‑sraa ‑wɛe ʋʋa ‑tu" kʋɔnkwla’ ’wlʋ ‑kɔ. Ɛɛ’ ’wɩ tu ’di ɛ, Sesi ’a klai" nynuu ‑tee’ ɔ i ʋʋ ’na : ‑Ta ‑ɩn ‑nɩi" ‑a ‑je ‑ma ‑kɔ’ diidɛ pii ɛ‑ ? 13’Bomɔ Sesi dboo ʋʋa’ ’sɔɔn, ’de ɔ ’na : Ao mu ’e ‑kwlɔ. Ao ke "ju due’ ‑a ‑mu ‑gbʋʋan’ ɔ ’e "nibi "kpei po‑. Ao bla ’bo ɔ ’de. 14‑Gbu" ɔɔ mua ’di paa’ a, ao ’tmʋʋ ɛɛ’ jei ao ’na : ‑Aa dɛtɔɔi ’naa : ‑Gbu" ’a wɔn ‑jɛwɛ‑ ‑ɛ ’di ’ɩn ke ’ma klai" nynuu ’je ‑kɔ’ diidɛ dii ɛ‑ ? 15’Sʋ ɔɔ muɛ ao ‑gbu" ’a wɔn klaa" due’ ‑nɩa ’e "jɛi tɔɔa’. Dɩ ‑wee’ pooɛ kpɔi" ’de ɛ ’di sese. ’Demɔ ao ’je ‑aa diidɩ pii‑. 16Klai" nynuu mua ’de ‑kwlɔ ɛ, ʋʋ jɛɛ dɩ ‑wee’ ’mɛ ka Sesi "sia ɩa’ ’nynɩ ɛ, ‑wɛe ʋʋ pi ‑kɔ ’ɔ diidɩ.
17‑Fli ’wlaa ’sʋ, Sesi ke ɔɔ’ klai" nynuu ‑nɩa ‑puue ’jɔ ’sɔɔn ‑wee’ ji’. 18‑Ta ʋʋ nɩɩa dɛ dia’ a, Sesi ’na : ’Ma ’tmʋʋɛ aopʋ tɔ’ ‑tɩ, aoa’ due’ ‑ɔ ‑ke ’ma poa sʋn ‑tadue ‑ta a, ɔɔ muɛ ’ʋn plea’. 19Klai" nynuu ‑wee’ "kaeɛ "jrii, ʋʋa ‑tee’ ɔ i due ’due ʋʋ ’na : Ɛ se ’mɔ nɩ ’de ! ‑Aee’ ’mɔ ‑o ? 20’De Sesi ’na : Ao ‑nɩa ‑puue ’jɔ ’sɔɔn ɛ, aoa’ due’ ‑ɔ ‑ke ’ɩn nɩa ‑di’pɛn ’smaa’ ‑ta ‑due ‑ta ‑o. 21Tɔ’ ‑o, ’dɛ ‑crɩɩa’ ’de nyiɔ ’ɔ "Ju ’a ’mɛ ‑tɩ ’ʋn ’je ’o nynia’ ‑cɛɛn’‑, ’kaa nyɔ ‑ɔɔ mua ɔ ’e toa’ a, ɛ nɩɛ "nmia‑tɩ ‑o ’de ɔɔ’ jei tu ’a ‑tɩ’ ’ʋn ! Ɔɔ’ se ’kmʋ ji "paa’ ’de‑.
22‑Ta ʋʋ nɩɩa dɛ dia’ a, Sesi "duɛ ‑di’pɛn ’ʋn, ɔ poɛ ɛɛ’ Kea ’sɛ‑ ‑wɛe ɔ cɩɛn ɛ ‑tie" ɔ "nyɩ ɛ ɔɔ’ klai" nynuu, ’de ɔ ’na : Ao "duo ɛ ’ʋn, ao ’je ɛ di, ɛ nɩɛ ’ma ku ‑o. 23‑Wɛe ɔ "duo nmɔ ‑saan ’a "pɛ ’ʋn, ɔ po Kea ’sɛ‑. ’De ɔ "nyɩ ɛ ʋʋpʋ, ‑wɛe ʋʋ ‑wee’ "klein ’nɛɛ. 24’De Sesi wlu ʋʋpʋ ‑pee ɔ ’na : Ɛ ‑nɛ nɩɛ ’ma nymɔ ‑o, dbɛɛdɛ ’ɛ nymɔ ‑ɛ ‑wla i nyʋ ‑tuu" ’a ‑tɩ’ ɛ. 25’Ma ’tmʋʋ aopʋ tɔ’ ‑tɩ, ’ɩn se nmɔ ‑saan ’nai ’bode mamaʋ ’sʋ ’ɩn ’je ɛɛ’ dee’ ‑nɛ ’na ’de Kea ’a kɛɛma’ ‑kwlɔ ’di.
26Ɛ ’wlʋa ’mʋa‑ a, ʋʋ ‑kɔ’ Kea ’a ’nynɩ "i ’bɛɛdʋ blea’ ‑wɛe ʋʋ mu ’de olifɩ‑crʋ "kpei.
Sesi ’tmʋɛ Piɛi ’a ɔɔ’ wɔn ‑sa ‑tɩ
(Matie 26.31-35 ; Luikɩ 22.31-34 ; San 13.36-38)
27Ʋʋ nynia ’e crʋ "kpei ’sʋ ɛ, Sesi wlu’ ’de ɔɔ’ klai" nynuu ‑pee ɔ ’na : Ao ‑wee’ "klein a muɛ ’ʋn ’bɔa’, ’kamɔ wlu ‑crɩɩa’ ’de ’ma ‑tɩ’ ’ʋn ’da, ɛ ’na :
’Ma muɛ nɔ" dɩ ’dei ‑tei ’dbaa’, ‑wɛe ’blae ‑wee’ ’je dɩ ’mii ‑gbaa.
28’De ‑bo ’ɩn sɔn "kunyɩɔ’ ɛ, ’ma muɛ ao "juɔi ‑sia’ ’ɩn ’je ’de Galile mu. 29’Sʋ Piɛi ’na : ‑Bo nyʋ ‑wee’ ’bɔ ‑ʋn mɔ ’de ɛ, ’mɔ se ‑ʋn ’bɔi. 30Sesi ’na : ’Ma ’tmʋʋɛ ‑ʋn tɔ’ ‑tɩ, ’de "maʋ’ ’wɩ ’di ‑sɩan a, nɔ" ‑tɩ sʋn" ’je ‑sro’ kpɛ ’sɔɔn ɛ, ‑ma muɛ ’ʋn wɔn ‑sa ’a kpɛ taan. 31’Kaa Piɛi ’nyɛ ɛ "kpei ke’wlɛ ɔ ’na : ‑Bo ‑ɩn ‑ke ’ma ‑a ‑je ’mɛ ‑tadue mɔ ’de ɛ, ’ɩn se ɛ ’bɛɛ‑ ’ɩn ’je ‑ʋn wɔn ‑sa ’nɔ ’kmʋ. ’Kamɔ klai" nynuu ‑sia ’o ‑wee’ "klein ’da ‑ke.
Sesi baeɛ Kea ’de Sɛsemane
(Matie 26.36-46 ; Luikɩ 22.39-46)
32Ʋʋ ’wlʋa ’mʋa‑ ʋʋ nynia ‑ta nyʋ a ’daa‑ Sɛsemane ɛ, Sesi ’tmʋʋ ɔɔ’ klai" nynuu ɔ ’na : Ao ‑te i ‑ta, ’ma muɛ baea’. 33‑Wɛe ɔ "duo Piɛi ke San ke Sakɩ ’ʋn. ‑Wɛe ɔ ke ʋʋ ’kɩɩn‑ ’o nya dɛ‑saan"‑ ’sʋ dɛ ‑teɛ ɔɔ’ ’dii waa’ ‑pʋn", ɔɔ’ pɛe cɛn mlɛun". 34’De ɔ wlu ʋʋpʋ ‑pee ɔ ’na : ’Ɩn "kaeɛ "jrii "kɩkɩ. ’Ma pɛe ‑siɛ’ sro ɛ e ’mɛɛa’ jɛɛ‑. Ao sie ‑ta ao ’je "jriɛ‑ "i ‑te. 35‑Wɛe ɔ ’kpaa’ ’de nya dɛ‑saan" ka, ɔ tba "jua‑ i ’bo ’blʋɔ, ɔ bae Kea ‑bo ɛ se ɛ ’bɛɛ‑ ɛ ’je ɔ kuiwɔn ’je nɔ" ‑nɛ o tɛɛn. 36Ɔ ’na : ’Ɩn "Bo, ɛ ’bɛɛ‑ dɛ ‑wee’ ’mɛ, ɛ tɛɛn ’ʋn ’kle ’je nɔ" ‑nɛ o. ’Kaa ’ma ’tʋn nʋ‑tɩ ’bo nʋʋɛ, ɛɛ’ ‑nɩ mɛ ‑je nʋʋɛ‑. 37Ɔɔ jia de ‑mɛ ɔ jɛɛ klai" nynuu "nyɩɔ’. ’Sʋ ɔ ’na : Simɔ Piɛi, ‑ma ‑mʋʋ’ ? ‑Ɩn se ɛ ’bɛɛ‑ ‑ɩn ‑je "nyɩɔ’ mɛ i kpʋʋn kpɛ due’ ‑wee’‑ ? 38Ao ‑te "jriɛ‑ "i, ao bae Kea ‑wɛe ao je dɛsaʋn ’di blu. Nyiɔtɔ’ ‑teɛ ’dɔe nʋa ’a kein"ke, ’kaa ’blʋku se ’e ’de i ku‑. 39‑Wɛe ɔ tɛɛn o ke’wlɛ, ɔ po bae wlu due’ ‑nɛ. 40‑Ta ɔɔ jiia de ‑mɛ ɔ jɛɛ ɔɔ’ klai" nynuu "nyɩɔ’ ke’wlɛ, dɛ‑nʋɛ’ ʋʋa’ "jri kuɛ kwa. ’Sʋ dɛ ʋʋ ’je ɔ ‑pee ’tmʋʋ, ɛ se nɩ‑. 41Ɔ jia de kpɛ taan ‑nɛ ɛ, ɔ ’na : Ao ‑teɛ i ke aoa jea ’mʋʋ ? Ɛ sie kan’ ! Nɔ" nyni’ ‑wɛ‑. Ao ‑gbʋn ’nɔ, nyiɔ ’ɔ "Ju a jiɛ ’de dɛsaʋnʋʋn ’kwa ‑tuu" ’a. 42Ao sɔn ’ʋn, ‑a ‑je mu ! "Ju plea’ ’ʋn, ɔ ka ‑ta !
Sesi kpʋʋn ’ɛ
(Matie 26.47-56 ; Luikɩ 22.47-53 ; San 18.3-12)
43Sesi siɛ wlua’ ’sʋ Suida ‑ɔ ‑tuu" a klai" nynuu ‑puue ’jɔ ’sɔɔn je i "si. Ɔ ke nyʋ ‑tuu" ji’ ‑ʋʋ ‑ble ‑cnɩ ke tu tii ke. ’Sraa ‑saʋn klae" ke kɛ’ wɔ‑saʋn ke nyʋ‑cɔɩn’ ‑wi" ‑dbo’ ʋʋpʋ ‑wɛe ʋʋ ’je Sesi kpʋn. 44Suida ‑ɔ plea Sesi ɛ, ɔ tɔɔ nyʋ ‑ke ɔ jia dɛ jrɛ’ ‑bo ɔ nʋ ‑wɛe ʋʋ ’je Sesi "jriɛ o sie, ɔ ’na : "Ju ’ma mua ‑kwlɩ" ‑gblea’ ’teɔ ɛ, ɔmɔ ‑nao. Ao kpʋn ɔ ‑bo aoa se ɔ kpa ’ja a, ‑mɛ ao sie ɔ "jriɛ‑ o ! 45Suida nynia, ɔ ’kpa Sesi ‑pʋn" ɔ ’na : ’Ma dɛtɔɔi ! ’Sʋ ɔ blu ɔ "kpei ɔ ‑gblee ɔ ‑kwlɩ". 46Nyʋ ‑sia ’o ’wla ’e Sesi "kpei, ʋʋ kpʋn ’ɔ.
47’Sʋ ɔɔ’ klai" nynuu ‑nɩa ’mʋa ’a due’ ‑sa ɔɔ’ ‑cnɛ kpla’, ɔ pooɛ ’sraa ‑sai klaa" ’a dbonʋi, ɔ cɛn ɔ doun" "jru.
48Sesi "dua wlu ’ʋn ’de nyʋ ‑jiɔ’ kpʋan’ ‑pee ɔ ’na : Ao ’bleɛ ‑cnɩ ke tu tii ‑wɛe aoa ji ’ʋn kpʋan’, ɛ ‑kɔ’ ‑na ’ɩn nɩɛ "ku ’dbai ‑o. 49’Wɩ ‑wee’ "klein ’di ’ɩn ke ao nɩɛ ‑tadue, ’ma jea ao dɛ tɔɔ ’de Kea ‑gbu klaa" ’di, ao se ’ʋn kpʋn ’bo ‑mɔ. ’Kaa ɛ nʋɛ’ kaan ‑wɛe Kea ’a wlu ‑crɩɩa’ ’je ’o nyni.
50Ɔ ’da kan’ ’sʋ klai" nynuu ‑wee’ ’wlʋ ɔ ’de ’mɛ, ʋʋ ‑wee’ ’kpʋa ’kwlɩ ’dii.
51‑Kooa" i ‑tɔo due’ ‑ɔ ‑wla tae’ plu ’a ’sʋ "kpei, mɔ ‑bla ’o Sesi ’de. Nyʋ a ji ɔ kpʋn ’a ‑ke ’sʋ ɛ, 52ɔ nyɩa tae’ kui ɔɔ’ "kpaan ’kpa ’kwla.
Sesi ’de ‑gbajeʋn klae" "juɔi
(Matie 26.57-68 ; Luikɩ 22.54-55, 63-71 ; San 18.13-14, 19-24)
53Ʋʋ kpa Sesi ’de ’sraa ‑saʋn klae" "juɔi. ’Bomɔ ’sraa ‑saʋn ’a klae" ‑wee’ ‑ke nyʋ‑cɔɩn’ ‑wi" ke kɛ’ wɔ‑saʋn ‑wee’ ’kɩɩɛn "jrui. 54Piɛi a bla Sesi bʋ ‑kɔ o i mamaʋ ’sʋ ɔ ke ɔ je ’e ’sraa ‑sai klaa" o ‑gbu" pa. ’Bomɔ ɔ ‑te i ’de "soa‑wi" "klu, ‑wɛe ɔɔ ’wooa nɛ.
55’Sraa ‑saʋn ’a "jrujeʋn ke ‑gbajeʋn ‑wee’ ‑kɩɩan’ "jrui a ‑pɔn ʋʋ ’je Sesi ‑tɩ’ "kpei bla ‑wɛe ʋʋ ’je ɔɔ’ ’mɛ ‑tɩ wlu "kpei ’bɛɛ‑. ’Kaa ʋʋ se dɛ jrɛ’ ’je. 56Nyʋ ‑tuu"‑tuu a ‑tuu" ɛ Sesi sɩ ‑tɩ "kpei‑, ’kaa ʋʋa’ ’sʋ ’a wlu ’a kpʋn ba.
57’Bomɔ ʋʋa’ jrʋ’ sɔn ’ʋn, ‑wɛe ʋʋ ’nɩɩɔ sɩ ‑tɩ ‑nɛ "kpei‑ ʋʋ ’na : 58‑A ‑wɔn ɔɔ’ wlu ’mɛ. Ɔ ’na : ’Ma muɛ Kea ‑gbu klaa" nyiɔ poa ‑ta "jɛi‑ gbaa’, ‑wɛe ’de ’wɩ taan ’di ɛ, ’ɩn ’je ɛɛ’ ‑jɛ nyiɔ ’ɔ sʋn sea "i bla po. 59’Kaa ’bo ‑mɛ "kpei ke’wlɛ ɛ, ʋʋpʋ a’ wlu ’a kpʋn ba.
60’Bomɔ ’sraa ‑sai klaa" sɔɔn ’ʋn ’de nyʋ ‑wee’ "klein "juɔi, ɔ ‑tee’ Sesi i, ɔ ’na : Dɩ ‑tia ka nyʋ ‑nʋ a bla ‑ʋn "kpei ‑ta ‑ɩn se ɛ ’bɛɛ‑ ‑ɩn ‑je dɛ jrɛ’ "kpei ‑sa mɔ ‑wee’ ’sʋʋ ? 61’Kaa Sesi se dɛ jrɛ’ ’tmʋ. ’Sʋ ’sraa ‑sai klaa" ‑sa de ɔ ‑tee’ ɔ i, ɔ ’na : ‑Ɩn ‑nɩɛ Klisɩ "diwan Kea ’a ’o ‑te ju ‑oo ? 62’De Sesi ’na : Kɩɩn, ɛmɛ ’ɩn nɩ‑. ’Bo ‑mɛ ’de ɛ, aoa muɛ nyiɔ ’ɔ "Ju ’jea’, ɔ ’je i ‑te ’de "ikma Kea ’a dianfɔ o. Aoa muɛ ɔ "jriɛ‑ ’jeea’ ke’wlɛ ɔ ’e de ji ’de jaʋn ‑kwlʋ ’bo bue" "kpei.
63’Sʋ ’sraa ‑sai klaa" ’faeɛ ɔɔ’ ’ʋnpaadɩ i, ’de ɔ ’na : Dɛ ‑ɛɛ ‑tɩ’ ’a ‑ta ’jeʋn jrʋ’ ‑aa ‑pɔn i ke’wlɛ ɛ‑ ? 64Ka ɔ toa Kea wɔn o aoa’ ‑cɛ" ’kpa ’jee ɛ ‑wɛ‑, ka aoa naa tɔ’ i ɛ‑ ?
Ʋʋ ‑wee’ "klein cɛn ɔ wɔn "kpei ʋʋ ’na : Ɔ ’je ’mɛ ‑o ! 65Ʋʋa’ jrʋ’ ‑te ɔ tɔn "jri wlaan’ ‑pʋn". Ʋʋ blɔ dɛ "jri, ‑wɛe ʋʋ tbɔ kpiin’, ’de ʋʋ ’na : ‑Ɔ nʋ kan’ a‑ ? ‑Ɩn ‑si" ɔɔ’ ’nynɩ ! ‑Wɛe "soa‑wi" po ɔ ’kpɩ doin" i.
Piɛi ‑sa Sesi wɔn
(Matie 26.69-75 ; Luikɩ 22.56-62 ; San 18.15-18, 25-27)
66‑Ta Piɛi nɩa ’e ‑gbɛin" ‑sɔin ɛ, ’bomɔ ’sraa ‑sai klaa" ’a dbonʋnynɔkpao’ due’ ji. 67Ʋ jɛɛ Piɛi nɛ ’wooa’. Ʋ ‑gbʋn ɔ ja ’pepe ’sʋ ʋ ’na : ‑Mɔ ‑nɔ, ‑ɩn ‑ke Sesi ‑wlʋa Nasarɛtɩ ‑ta na’ ‑ke. 68’Kaa Piɛi‑ ‑too’ ɔ ’na : ’Ɩn se ɔ juo‑ ’de ! Dɛ aa ’tmʋa ’maa ’wɔɛn ’mii. Ɔ ’da kan’ ’sʋ ɔ ’wlʋ ’o ‑gbɛin" ’mɛ, ɔ "siɛ "kpae’ ’sʋ "sʋn ‑sro’.
69Dbonʋnynɔkpao’ ’jee ɔ "jriɛ‑ ke’wlɛ, ʋ wluɛ nyʋ ‑nɩa ’de ʋ ‑pʋn" ‑pee, ʋ ’na : "Ju ‑nɔ, ʋʋa’ due’ ‑o. ’Sʋ Piɛi ’na : ’Ɩn se ɔ juo‑.
70Ɛ fɔan ’o mu ‑paii‑ ka ’sʋ, nyʋ ‑nɩa ’mʋa‑ wluɛ Piɛi ‑pee ʋʋ ’na : Tɔ’ ‑o, ‑ɩn ‑nɩɛ nyʋ ‑nʋ ’a due’ ‑o ‑cɛɛn’‑, dɛ‑nʋɛ’ ‑ɩn ‑nɩɛ Galilei ‑o ‑ke. 71’Sʋ Piɛi ‑teɛ ‑snɛɛa’ ‑pʋn", ɔɔ bla’, ɔ ’na : ‑Bo ’ɩn ’tmʋ sɩ ɛ, Kea nʋ ’ʋn dɛ "jrii. "Ju aoa "sia ’nynɩ ’mʋa‑, ’ɩn se ɔ juo‑ ‑cɛɛn’‑. 72Ɛ "si ’de ɔ ’wɔn mɛ ’sʋ sʋn" ’a kpɛ ’sɔɔn ‑nɛ je ‑sro’. ’Sʋ Piɛi po ɛ dɛ Sesi ’tmʋa ‑kwlʋ o, ɔ wlu’ ka : nɔ" ‑tɩ sʋn" ’je ‑sro’ kpɛ ’sɔɔn ɛ, ‑ma muɛ wlua’ kpɛ taan ‑ɩn ‑je nʋ ‑ɩn se ’ʋn juo‑. Ɔ naa ɛ tɔ’ "kpei ’sʋ ɔ ‑teɛ ‑fɩn" ’a ‑pʋn".
15Sesi ’de Pilatɩ "juɔi
(Matie 27.1-2, 11-14 ; Luikɩ 23.1-5 ; San 18.28-38)
1‑Sɔn’ ‑sɩan’ ‑klae" pɛɛn, ’sraa ‑saʋn ’a klae" o, nyʋ‑cɔɩn’ ‑wi" o, kɛ’ wɔ‑saʋn o, ‑gbajeʋn ’kɩɩɛn "jrui ‑wɛe ʋʋ po wlu ‑tadue. Ʋʋ ‑koa’ Sesi saan’ ’sʋ, ʋʋ kpɔ’ ‑wɛe ʋʋ "nyɩ ɔ Pilatɩ. 2Pilatɩ ‑tee’ ɔ i ɔ ’na : ‑Ɩn ‑nɩɛ Suifʋ‑wi" ’a ’Beɔ ‑oo ? ‑wɛe Sesi ’na : Ɛ mɛ ‑ɩn ‑tmʋa ’o.
3’Sraa ‑saʋn ’a klae" ‑tu" ɔ sɩ ‑tɩ ‑tuu"‑tuu "kpei‑. 4‑Wɛe Pilatɩ ‑tee’ ɔ i ke’wlɛ ɔ ’na : ‑Ɩn se ’bɛɛ‑ ‑ɩn ‑je wluu‑ ? ‑Maa’ ’je dɩ "klein ʋʋa ‑tu" a ‑ʋn "kpei‑ ‑taa ? 5’Kaa Sesi se dɛ jrɛ’ ’tmʋ ’bode. ‑Mɛ ɛɛ’ dɛ tu "maa Pilatɩ tai’.
Sesi ’a ’mɛ ‑tɩ ’a wlu ’bɛɛ’
(Matie 27.15-26 ; Luikɩ 23.13-25 ; San 18.39-19.16)
6’De ‑kɔ’ "o ‑kɔ’ ‑sɔn ɛ, Pilatɩ a "siiɛ ‑kaso ’dii due’ i, ‑jɔ nyʋ ‑kwea de nɩai" ɛ. 7’De "ju due’ ‑nɩ ‑kaso ’di. Ɔɔ’ ’nynɩ ‑nɩ Barabasɩ. Ɔ ke ɔ "dɛi‑wi" ‑toa ’blʋajei wɔn o ‑wɛe ‑ʋʋ ‑dba "ku ‑kli ’a ’kpa nɔ" ke‑. 8Nyʋ ‑wee’ ’kpa ’de Pilatɩ ‑pʋn" ‑wɛe nyʋ ‑kwea de ’na : Dɛ ‑ma nʋa ’de ‑kɔ’ ‑sɔn see ɛ, ɛmɛ ‑aa ‑tee’ i ‑ɩn ‑je nʋ. 9Pilatɩ wlu ʋʋpʋ ‑pee ɔ ’na : Ao nɩɛ "i ’ɩn ’je Suifʋ‑wi" ’a ’Beɔ i "sii‑ ? 10’De ka ’sraa ‑saʋn ’a klae" a nʋa Sesi "cɛi o ɛ, ‑wɛe ʋʋ to ɔ ’e ’de ɔ ’jea ’mɛ ɛ, ɔ ’je kan’ ’mɛ ’pepe.
11’Kaa ’sraa ‑saʋn ’a klae" paa ’blʋa‑ ‑wee’ bʋ ‑sɔn ‑wɛe ʋʋ ’je Barabasɩ ’a i "sia’ Pilatɩ i ‑tee’‑. 12Pilatɩ ‑teeɛ’ nyʋ ‑gbaea’ i ke’wlɛ ɔ ’na : Dɛ ao nɩ "i ’ɩn ’je "ju aoa ’daa Suifʋ‑wi" ’a ’Beɔ "jrii nʋ ’jaa‑ ? 13Ʋʋ ‑wee’ "wɔɔ’ ‑tadue, ʋʋ ’na : ‑Ɩn koɔ ’o tu ‑kwlɩ". 14’De Pilatɩ ‑tee’ ʋʋpʋ i ɔ ’na : Dɛsaʋn ‑jɛ wɛ‑ ɔ nʋ ɛ‑ ? ’Kaa ʋʋpʋ "wɔɔ‑ ke’wlɛ ɛ je ɛ "kpei ‑tie" cɛn ʋʋ ’na : ‑Ɩn koɔ ’o tu ‑kwlɩ" !
15Pilatɩ nɩa "i ɔ ’jea nyʋ ‑kwea de ’di wɔn nmɔɔ ɛ, ɔ "siiɛ Barabasɩ i ‑wɛe ɔ ’tmʋʋ‑ "soa ʋʋ bla Sesi, ‑wɛe ɔ to ɔ ’e, ’de ɔ ’je ’o tu ‑kwlɩ" kɔɔɛ‑.
"Soa‑wi" a wlaa Sesi ’mɛ
16"Soa‑wi" kpa Sesi ’de ‑gbɛin" ’a ‑kwea’‑, ’de ’blʋajei o ‑gbu" ’di ‑wɛe ʋʋ ’da "soa ‑wee’ "klein. 17"Soa‑wi" a wlɔɔ’ ‑wɛe ʋʋ pɔɔ ’beɔbai" ‑saan ‑tɔɔn’ ‑tɔɔn ’ʋn, ʋʋ dba "wifan due’ ʋʋ ‑tuɔ" "jru. 18‑Wɛe ʋʋ ‑te ɔɔ’ ‑gbleea’ ‑pʋn" ʋʋa nʋ : ‑A ’snɛ ! Suifʋ‑wi" ’a ’beɔ ! 19’Sʋ ʋʋ blɔ ‑gblokpau "jru, ʋʋa wlɔn tɔn "jri, ʋʋa "siiɛ ’kɔi‑ i, ʋʋa tba "jua‑ i ’de ɔ "juɔi. 20Ʋʋ ‑kɔa’ ɔɔ’ wlaa’ kan’ ’sʋ ʋʋ ‑sɔ "bai ‑saan ‑tɔɔn ’ʋn, ʋʋ pɔɔ ɔɔ’ dɩ ’ʋn. ‑Wɛe ʋʋ kpɔ ’de tu ‑kwlɩ" kɔa’ ’de "kpae’.
Sesi kɔɔɛ’ ’bo tu ‑kwlɩ"
(Matie 27.32-44 ; Luikɩ 23.26-43 ; San 19.17-27)
21Sirɛnɩi due’ nyʋ a ’daa‑ Simɔ ɛ, Alɛsandrɩ ke Rifisɩ "bo, ‑ɔɔ ‑wlʋa ’de ‑kle ɛ, ɔ cɛɛn ’mʋa‑ de. "Soa‑wi" ‑te’ ɔ ‑klaan" "kpei, ʋʋpʋ ‑tu" ɔ Sesi ’a ’mɛtu "kpei. 22‑Wɛe ʋʋ kpa Sesi ’e ‑tajrɔ nyʋ a ’daa‑ Gogota a. Ɛ ’de mɛ ‑nɩ "jru kpa" ’a ‑ta. 23Ʋʋ bee nmɔ ‑saan ke sii" nyʋa ’daa ’mii‑ ’a "ni o, ɛmɛ ʋʋ "nyɩɔ ’na ‑tɩ, ’kaa ɔ se ’wɔn ɔ se ɛ ’na.
24’Demɔ ʋʋ koɔ ’o tu ‑kwlɩ". Ʋʋ ‑seea’ ɔɔ’ ’ʋnpaadɩ ’ʋn ’de ʋʋ po soa’ "jɛi ‑wɛe dɛ jrɔ’ ’jea kpa due ’due ’de ʋʋ ’je ɛ juo‑. 25‑Klae" jrʋ ‑gbao mɛ ʋʋ kɔ Sesi ’de tu ‑kwlɩ".
26Dɛ ‑ɛ ‑jea ɔɔ’ ’mɛa a, ɛ ’crɩɩɛ’ ’bo tufɔ ‑saan" "kpei. Dɛ ‑crɩɩa’ ɛ ka : Suifʋ‑wi" ’a Tʋ"bo.
27Ʋʋ kɔ dɛsaʋnʋʋn ’sɔɔn jrʋ’ ’bo tu ‑kwlɩ" ‑ke, due’ ’a tu ’bɔɔ‑ ’de Sesi ’a dianfɔ o, due’ ’a tu ’bɔɔ‑ ’de ɔɔ’ kʋaanfɔ o. 28[’Kamɔ Kea ’a wlu ’da, ɛ ’naa : Nyʋ ‑sroo ɔ dɛsaʋnʋʋn "i.]
29‑Je ‑siʋn a ‑fun" a "jru ʋʋa ‑cree" ɔ’, ‑wɛe ʋʋa wlu ɔ ‑pee ʋʋ ’na : ‑Ɩɩn’‑ ! ‑Mɔ ‑ɔ ‑na ‑ɔ ‑je Kea ‑gbu klaa" "jɛi‑ ‑gba’, ‑wɛe ‑ɔ ‑je ɛ po ’de ’wɩ taan ’di ɛ, 30‑ɩn ‑pʋʋ’ ‑ma ‑cɛ" la ’e, ‑ɩn ‑wlʋ ’o tu ‑kwlɩ", ‑ɩn ‑je i "si ! 31’Kamɔ ’sraa ‑saʋn ’a klae" ke kɛ’ wɔ‑sanyʋ a wlaa Sesi ‑ke ‑wɛe ʋʋa wlu ba ‑pee ka : Ɔ ’pʋʋ nyʋ jrʋ’ ‑wɛe ɔ se ɔɔ’ ‑cɛ" ’ɛ ’pʋʋa’ ’bɛɛ‑ ! 32Kea ’a ’o ‑tei Israɛ ’ɛ Tʋ"bo, "sii la ’ja, ɔ ’je ’o tu ‑kwlɩ" ’wlʋ ! ‑Bo ‑a ‑jee’ ‑mɛ "jriɛ‑ ‑wɛe ‑a ‑je ɔɔ’ ‑tɩ’ tɔ’ ’ʋn ’je. Nyʋ ‑kɔɔa ’o tu ‑kwlɩ" ’bo Sesi ‑pʋn" ɛ, ʋʋa wlɔɔ’ ‑ke.
Sesi ’a ’mɛa’
(Matie 27.45-56 ; Luikɩ 23.44-49 ; San 19.28-30)
33’Jrʋ‑gbao ’sʋ kwie kpʋn’ ’de ’blʋa‑ ‑wee’ "klein "kpei mamaʋ ’sʋ ɛ je ‑kwie" jrʋ‑gbao nyni. 34Dɛ ‑mua’ ‑kwie" jrʋ‑gbao o ’sʋ Sesi "wɔɔ’ ’bo tu ‑kwlɩ" ɔ ’na : Eloi, Eloi, lama sabatani ? Ɛ ’de mɛ ‑nɩ : ’Ma Kea, ’ma Kea, dɛɛ‑tɩ ɛ ‑sa ’ʋn "jriɛ‑ ‑pʋn" ɛ‑ ? 35Nyʋ ‑nɩa ’mʋa ’a jrʋ’ ’wɔan ɔɔ’ wlu ’sʋ, ʋʋ ’na : Ao po doin" i, ɔɔ ’da Eli la ! 36‑Wɛe ʋʋa’ due’ kpa plea’, ɔ crooɛ fuu’ ‑gblokpaui", ɔ blɛɛ ’e ‑koonmɔ o i ɔ "nyɩɛ Sesi ɔ ’je ɛ ’na. ’De ɔ ’na : Ao ’bɔ, ‑bo Eli ’bɛɛ‑ ɔɔ’ tu ‑kwlɩ" ‑saa’ ‑wɛe ɔ ’je ɔ i "sii‑ ɛ, ‑aa muɛ ’o ’jea’ kaan ! 37’Kaa Sesi "wɔa kpleiin ’sʋ ɔɔ’ feeɛ’ blu ’e ’wɛ‑.
38"Wliɛfɔ klaa" ‑peea’ ’de Kea ‑gbu klaa" ’di ’wlʋɛ ’fɔ ’sɔɔn, ɛ je ’de "jɛi ’wlʋ, ɛ je i "si ’de ‑sɔn.
39Jra’ jei due’ ‑nyna i ’de Sesi "juɔi, ɔ ‑gbʋan ɔɔ’ "wɔsʋn ke ’mɛsʋn ja ’sʋ ɛ, ɔ ’na : "Ju ‑nɔ, Kea ’a "Ju ’a ‑cɛ" ’kpa ‑o ‑cɛɛn’‑.
40’Nynʋkpae’ jrʋ’ ‑nɩ ’e ‑ʋʋ ‑tɛɛn o ‑ʋʋa ‑gbʋn ’e ‑ke. ’De ʋʋ "klu ’demɔ Madi ‑wlʋa Madala nɩ‑, ’demɔ Sakɩ ‑saan"‑ ke Sosɩ de Madi nɩ‑, ’demɔ Salome nɩ‑. 41‑Ta Sesi nɩɩa Galile ʋʋ ke ɔɔ na’ see, ʋʋa jea ɔ sʋn o po. ’Nynʋkpae’ ‑tuu"‑tuu jrʋ’ ‑nɩ ’o ‑ke, ‑wɛe ʋʋ ‑ke ɔ ji Selisalɛm.
Ʋʋ ‑teɛ’ Sesi i
(Matie 27.57-61 ; Luikɩ 23.50-56 ; San 19.38-42)
42‑Fli bla a, ɛ nɩɛ dɩnmaewɩ ‑o, ɛ ’de mɛ ‑nɩ ‑kwlewɩ ’a ‑kwie". 43’Sʋ Sosɛʋ ‑wlʋa Arimate ji’. Ɔ nɩɛ ‑gbajeʋn ’a due’ ‑o ‑ke. Nyʋ ‑wee’ "klein a ‑teɛ’ ɔɔ’ ni’. Ɔɔ fuɛ Kea ’a tʋ"bodɛ ‑ke. Ɔ poɛ ’e pɛe‑ ɔ je Sesi ’a "ku i ‑teea’ mu ’de Pilatɩ o. 44Sesi ’a ’mɛa’ ‑too"‑ "maa Pilatɩ tai’. Ɔ ’da jra’ jei ’mɛ ɔ ‑tee’ ɔ i ‑wɛe ‑bo Sesi ‑too"‑ ’mɛa’ a, ’de ɔ ’jɩ juo‑. 45Ɔ ’wɔan jra’ jei ’a wlu ɛ, ɔ ’na Sosɛʋ "duo Sesi ’a "ku ’ʋn. 46Sosɛʋ ‑tɩɛn’ tae’ plu due’ ɛmɛ ɔ "fian Sesi ’a "ku ɔ ‑sa ’o tu ‑kwlɩ" "jrui, ‑wɛe ɔ ‑teɔ’ i ’de ’soa ’a ‑kwlewɔn ʋʋ "blua ’di. Ɔ klin o "soukpo klaa" due’, ɔ kaan ’o ‑gbaɩn’ "wɔin. 47Madi ‑wlʋa Madala ke Madi ‑nɩa Sosɩ de ‑gbʋɛn ‑ta Sesi ‑teea i ja.
16Sesi sɔn "kunyɩɔ’
(Matie 28.1-8 ; Luikɩ 24.1-12 ; San 20.1-10)
1‑Kwlewɩ ‑sia’ ’sʋ, Madi ‑wlʋa Madala ke Sakɩ de Madi ke Salome ‑tɩɛn’ ‑dai’klɔcna, ʋʋ ’je ɛ Sesi ’a "ku "jru ’wla. 2’Dɔɔ ’ɔ "i‑saawɩ ’a ‑klae" pɛɛn, ’jrʋ ’a ’kwlawlʋ nɔ" ɛ, ʋʋ ‑cnuuɛ ’de ‑gbaɩn’ "kpei. 3Ʋʋa’ ’sʋ a ‑teeɛ’ ba i, ʋʋ ’na : ‑Ɔ ‑je "soukpo ’bo ‑gbaɩn’ "wɔin ‑sa ‑ɔ ‑je ‑a ‑nyɩ" ɛ‑ ? 4’Kaa ‑ta ʋʋa ‑gbʋan ’e mu ɛ, ‑mɛ "sou klaa" ‑nɛ klin ’o, ɛ je ’fɔ due’ o ‑te.
5Ʋʋ pa ’de ‑gbaɩn’ ’di, ’sʋ ʋʋ jɛɛ ‑kooa" i ‑tɔo due’ ‑ɔ ‑te i ’de dianfɔ o. Ɔ paa "baiplu "puu’‑ ’ʋn. ’Sʋ faʋn ’kpa ’e ʋʋpʋ ’ʋn ’ɛ. 6’De ɔ wlu ʋʋpʋ ‑pee ɔ ’na : Faʋn ’bo ao nʋɛ ! ’Ɩn ’je kan’ ’mɛ Sesi ‑wlʋa Nasarɛtɩ ‑wɛe ‑ɔ ‑kɔɔa ’bo tu ‑kwlɩ" mɔ aoa ‑pɔn i. ’Kaa ɔ sɔn "kunyɩɔ’, ɔ se ‑ta nɩ‑. Ao ‑gbʋn ’nɔ nyʋ po ɔ ’de ɛ. 7Ao mu ao ’je ɔɔ’ klai" nynuu ke Piɛi ’tmʋʋ‑. Ɔɔ fuo aopʋ‑ ’mɛ ’de Galile. ’Bomɔ ao ’je ɔ "jriɛ‑ ’jee‑ ka ɔ ’tmʋɛ ’de ɛ.
8Ʋʋ ’wɔan wlu ‑nɩ ’sʋ ɛ, ʋʋ ‑ka’ wɔn, tai’ "maa ʋʋpʋ ’mɛ, ʋʋa’ dɩ a crɛ’. Ʋʋ ’wlʋa ’e ‑gbaɩn’ ’di ’sʋ, ʋʋ ‑gbu" ɛ plea’ ʋʋa jea mu, ʋʋ se nyʋ dɛ jrɛ’ ’tmʋʋ‑ ’de faʋn ‑a nʋa ʋʋpʋ ’a ‑tɩ’ ’ʋn.
Sesi toɛ ɔɔ’ ‑cɛ" Madi ‑wlʋa Madala "i
(Matie 28.9-10 ; San 20.11-18)
9Sesi sɔan "kunyɩɔ’ ’dɔɔ ’ɔ "i‑saawɩ ’a ‑klae" pɛɛn, Madi ‑wlʋa Madala ɔ ‑sa ‑siisaɩn ‑mɛ" ’sɔn ’ʋn ʋmʋ ɔ to ɔɔ’ ‑cɛi" tɛin". 10Ʋmʋ ‑mu’ ‑ʋ po ɔɔ’ klai" nynuu "kuan. ‑Ta ʋa mua, ‑mɛ ʋʋ ‑wee’ "kaeɛ "jrii, ɔɔ’ ’kwɛ‑ pa ‑tɩ ’ʋn. 11Ka Sesi sɔan ‑klu’, ɔ nɩa ’kmʋ ‑wɛe ʋ ’je ɔ, ʋ ’tmʋ ɛ. Ʋʋ ‑wee’ ’wɔn ɛ, ’kaa ʋʋ se ɛ tɔ’ ’ʋn ’je.
Sesi toɛ ɔɔ’ ‑cɛ" klai" nynuu ’sɔɔn "i
12Ɛ ’wlʋa ’mʋa‑ a, Sesi to ɔɔ’ ‑cɛ" ’mɛ ka jrɔ’ ka ’de ɔɔ’ klai" nynuu ’sɔɔn ‑ʋʋa mua ‑gbei" ‑pee. 13Ʋʋ jia de ʋʋ ’tmʋʋa nyʋ ‑sia ’o ɛ, ʋʋ se ɛ tɔ’ ’ʋn ’je ‑ke.
Sesi toɛ ɔɔ’ ‑cɛ" klai" nynuu ‑nɩa ‑puue ’jɔ due’ "i
(Matie 28.16-20 ; Luikɩ 24.36-49 ; San 20.19-23 ; Nʋʋdɩ 1.6-8)
14Ɛ ’wlʋa ’o mu ɛ, Sesi toɛ ɔɔ’ ‑cɛ" klai" nynuu ‑nɩa ‑puue ’jɔ due’ "i, ‑mɛ ʋʋ nɩɛ dɛ diia’. ‑Wɛe ɔ ‑cɛ’ ʋʋpʋ "bli ’de ʋʋa’ ‑maa’ ‑te’ dɛ ‑kwlɩ" ke ʋʋa’ pɛe ’a "i "ikmuu ‑tɩ ’ʋn, dɛ‑nʋɛ’ nyʋ ‑ʋʋ poa ʋʋpʋ ɔɔ’ "kunyɩɔ’ sɔn ‑tɩ ’a "kuan a, ʋʋ se ʋʋpʋ ’a wlu tɔ’ ’ʋn ’je. 15‑Wɛe ɔ ’na : Ao mu ’blʋa‑ ‑wee’ "klein "kpei‑, ao ’je ’ma ‑pɔia" ‑tɩ ’tmʋ ’de nyiɔ ‑wee’ "klein ‑pee. 16Nyɔ ‑ɔɔ mu ɛ tɔ’ ’ʋn ’jea’, ‑wɛe ‑ɔɔ mua "ni "jru poa ’a, ɔɔ muɛ ’pʋʋa’. ’Kaa nyɔ se ɛ tɔ’ ’ʋn ’je ɛ, ’pee a muɛ ɔ kpʋn ’a. 17’De nyʋ ‑a mua ɛ tɔ’ ’ʋn ’jea’ a, ka Kea ’a "ikmaa’ ke ʋʋ na dɩ ‑ɩa muɛ toa’, ɩ ka : ʋʋa muɛ ‑siisaɩn i nʋa’ ’de ’ma ’nynɩ ’ʋn, ʋʋa muɛ wlu dee poa’. 18Ʋʋa muɛ sɛn ’kwa i kpʋan’, nyʋa muɛ diɛ dɛ o poa’ ʋʋ ’je ʋʋpʋ "nyɩ, ’kaa dɛ‑saan" ka se ʋʋpʋ nʋ i. Ʋʋa muɛ ’wɛ‑nʋʋ sʋn "jru ‑tea’ ʋʋa’ ’wɛ‑ ’je ’bɔ.
Sesi muɛ ’de Kea o de
(Luikɩ 24.50-53 ; Nʋʋdɩ 1.9-11)
19Tʋ"bo Sesi ‑kɔa’ ʋʋpʋ ’a ‑tɩ’ ‑pee ’tmʋa’ kan’ ’sʋ ɛ, ɔ sɔn ’ʋn ’ɛ, ɔ muɛ jaʋn ’di. ‑Wɛe ɔ ‑te i ’de Kea ’a dianfɔ o. 20Klai" nynuu muɛ Sesi ’a ‑pɔia" ‑tɩ ’tmʋa’ ‑ta ‑wee’ "klein. Tʋ"bo a siɛ ʋʋpʋ o ’de dboi". Ka wlu ʋʋa ’tmʋa nɩa tɔ’ ‑tɩ ɛ, ɛɛ jea ɛɛ’ sʋn to ’de nyʋ ’pʋʋjrii’ ʋʋa nʋa ’ʋn.