Sakɩ

’Sbɛ

Sakɩ

’crɩa

’Jewlu‑

¹’Mɔ Sakɩ ‑ɔ ‑nɩa Kea ke Tʋ"bo Sesi Klisɩ ’a "juɔi nʋʋi ɛ, ’mɔ ‑ɔɔ ja Kea ’a ‑jei" naaʋn ‑ʋʋ ‑nɩa ’blʋa‑ ‑wee’ "klein "kpei‑ ’jewlu.

Kea ‑kwlɩ" ‑tea’ ke tɔ’ ’dinɩa’ ke

²’Ma de’di ‑wi", ’bo Kea ’a ‑jei" ao nɩa, ‑bo aoa sea ’e ’kle ’a kpɛ ‑wee’ ’ʋn cɛɛn ɛ, ‑mɛ ao ‑gbʋn ɩ ja ka ’mʋa‑tɩ nɩa. ³Ao ’je kan’ ’mɛ, ‑bo aoa’ Kea ‑kwlɩ" ‑tea’ ku ’e ’dei ’de ’kle ’di ɛ, ɛmɛ ‑ɛɛ muɛ nʋa’ ‑wɛe aoa’ pɛe ’je iku‑. ⁴’Kaa aoa’ pɛe "wɔin ’bɛɛa’ ‑mɛ ’je mu mamaʋ ’sʋ ɛ ’je nyni, ‑wɛe ka Kea nɩai" ao ’jea nɩ ɛ, ’de ao ’je kan’ nɩ, ‑wɛe dɛsaʋn ’a ‑kɔ ’bo aopʋ ‑pʋn" nɩɛ. ‑Bo ɛ nɩ kan’ a, ‑mɛ dɩ Kea "sia ’nynɩ ɩ ‑wee’ ‑kwɛ‑ de ’de aopʋ ’ʋn, ao se dɛ jrɛ’ ’ʋn ‑pɔɔn.

⁵’De ‑bo nyɔ nɩ ’e aopʋ "klu ‑wɛe ɔ se tɔ’ ’ble ɛ, ‑mɛ ɔ ‑tee’ Kea tɔ’ i. Ɛɛ mu ɔ tɔ’di poa’ see, dɛ‑nʋɛ’ Kea a ‑sa’ dɛ kwai ’de nyʋ ‑wee’ ‑pee. ‑Bo nyʋ ‑tee’ ɛ dɛ i ɛ, ɛɛ’ ‑cɛ’ nyʋ "bli, ’sʋ ɛɛ je ɛ nyʋ "nyɩ. ⁶’Kaa ‑bo ɔɔ sea dɛ i ‑tee’ ɛ, ‑mɛ ɔ ‑te’ Kea ‑kwlɩ" ‑sisi’, ɔ ’bo tɔ’ ipleeɛ, dɛ‑nʋɛ’ nyɔ ‑ɔɔ pleea tɔ’ i ɛ, ‑mɛ ka poɔ’ ɔ "tuan ’tɔniɛ ‑wɛe ɛɛ’ ‑tea ‑tadue i ɛ, ’kamɔ ɔ nɩ. ⁷’De nyɔ ‑jɔ ‑nɩa kan’ ‑mɔ ’ja a, ‑mɛ ‑mɔ ’bo Tʋ"bo ’a dɛ ’kwa ’je ‑tɩ tɔ’ inaa. ⁸Ɔɔ’ jei tu ’a pɛe ’wlʋɛ ’sɔɔn ’de ɔɔ’ nʋʋkplɩn ‑wee’ "klein ’ʋn, ‑ta ɔ ’jea ‑foo, ’bo se nɩ‑.

Nɩɩa" ke "wliiɛ‑ ’blea’ ke

⁹‑Bo nyɔ nɩ ’e aopʋ "klu ‑wɛe ɔ se "wliiɛ‑ ’ble ɛ, ɔ ’bo sɩn ‑kwlɩ" ‑tu" ɛ, ɔ wa’ i ɔ ’je na, dɛ‑nʋɛ’ ɔ nɩɛ dɛwɔn ’de Kea "jri ’de ‑wɛe ɛ kpa ɔɔ’ ’nynɩ "jɛi ’de ɛɛ’ nyʋ ’a ‑tɩ’ kmaa’ ’ʋn. ¹⁰’De "wliiɛjei ‑mɔ ɛ, ɔ ’bo ɔɔ’ ‑cɛi" ’beeɛ‑ ’de ɔɔ’ "wlii ’a ‑tɩ’ ’ʋn. ’Kaa dɛ ‑jɛ ɔ ’je ‑kwlʋ o po ɛ, ɛmɛ ‑nɩ ka ɔɔ’ ’kmʋnɩa’ ‑wee’ nɩa ’e Kea ’kwa a. Ka sii" ’a ‑faɩn’ a ‑kwlea "joo ‑tɩ ɛ, ’kamɔ ɔ nɩ‑. ¹¹‑Bo ’jrʋ ’wlʋ ’kwla ‑wɛe ɛ ‑te faan’ ‑pʋn" ’sʋ ɛ, sii" jɛ’, ‑wɛe ɛɛ’ ‑faɩn’ blu. ’Sʋ ɛɛ’ ‑faɩn’ ’a "jriinmɔa’ ‑wee’ sɔn i, ’kamɔ "wliiɛjei a mu dɛ i ‑pɔan’ "sia’ ’sʋ ɔ ’je isɔn‑.

Dɩ ‑a poa nyɔ dɛsaʋn ’di ɛ

¹²Nyɔ dɛsaʋn a ‑cria’ ‑wɛe ‑ɔ ‑kuua pɛe i mamaʋ ’sʋ ‑ɔ se ɛ nʋ ɛ, ‑mɛ ‑mɔ nʋ ’mʋa‑, dɛ‑nʋɛ’ dɛ dɛsaʋn ‑tɩn’ ɔ i, ‑wɛe ɔ nyna ‑sisi’ ɛ, ɛmɛ ‑tɩ ’kmʋnɩa’ ‑sea’ ‑kwɛ ‑ta ’ble nɩ ɔɔ’ ‑kei". Ɛɛ’ ‑kei" tu mɛ Kea ’a ‑cɛ" ’kpa cɛn wlu ‑tie" ɛ ’na ɛɛ muɛ nyʋ ‑ʋʋ ‑kma ɛɛ’ ‑tɩ’ "nyɩa’. ¹³‑Bo dɛsaʋn a sea nyɔ ‑cri’ ɛ, ɔ ’bo wluɛ ka : Kea mɛ ɛɛ ‑tun" ’ʋn ’de dɛsaʋn ’di ! Dɛsaʋn se ɛ ’bɛɛ‑ ɛ ’je Kea i ‑tɩn’. ’De Kea se ɛ ’bɛɛ‑ ɛ ’je nyɔ ’e dɛsaʋn nʋa’ "tun. ¹⁴’Kaa nyɔ "o nyɔ dɛsaʋn a ‑cria’, ‑mɛ dɩ ‑ɩa poo ɔ pɛe "i ɛ, ɩmɩ ‑a ‑cri ɔ, ‑wɛe ‑ɩa poo ɔ ’srɛ i. ¹⁵’De ‑bo nyɔ "tai‑ tɔ’ saɩn "i ‑wɛe ɩ ’je snɩ’ ‑te’ ’de ɔ ’ʋn ɛ, ‑mɛ ɛɛ muɛ dɛsaʋn ’wlʋa’ see, ’de ‑bo dɛsaʋn ‑mɛ ’boa ‑boa ‑boa ’sʋ ɛ, ɛɛ poɛ ’mɛa’ "jru "kpei‑.

¹⁶’Ma de’di ‑wi" ‑ɔɔ ‑tɩ’ ’ɩn kma, ’de dɩ ‑nɩa ’mʋa ’a ‑tɩ’ ’ʋn ɛ, ao ’bo aoa’ ‑cɛ" ’srɛ ipooɛ. ¹⁷Dɩ ’dɔe ’a "kwli ‑wee’ ke ’saaʋn ‑cɛɛn’ a ’wlʋɛ ’e ‑a "Bo Kea ‑nɩa ’de jaʋn ’di ’kwa. Ɛmɛ ‑nɩ ‑sɔn’ ‑nɩa ’e jaʋn ’di ’a nʋi, ɛ se fai" poo ‑ta ’ble. Ɛ nɩɛ ’e ‑sɔn’ ’ʋn jeejee. ¹⁸Ɛmɛ ‑nʋ’ tɔ’ ‑tɩ ’a wlu, ‑wɛe ‑ɛ ‑nyɩ" ‑aʋn ’kmʋnɩa’ ’de ɛɛ’ ‑cɛ" ’kpa ’a ‑kwlʋtɩ ’ʋn. Dɩ "klein ɛ nʋa, ɛ ‑kɔ’ ‑na ‑apʋ ‑nɩ ɩa’ "i‑saadɩ jɔ.

Dɛ ’ɛ ’wɔan’ ke ɛɛ’ nʋa’ ke

¹⁹’Ma de’di ‑wi" ‑ɔɔ ‑tɩ’ ’ɩn kma, ao sie ɛ ‑kwlʋ o, ao ‑wee’ "klein ‑too"‑, ao ’je dɛ doin" o po, ’kaa ao ‑cnɛ’ wlua’ i, ao ’bo ’cɛn ’kpaa’ ‑too"‑, ²⁰dɛ‑nʋɛ’ nyɔ ‑ɔɔ ‑kpa ’cɛn ɛ, ‑mɛ ɔɔ’ nʋ "isrɛdɩ ’de Kea "jri ’de. ²¹Ɛmɛ ‑tɩ ’ma ’tmʋ aopʋ ‑wɛe ao ’je dɩ ‑a kpʋʋan nyʋ ‑flɛn" o, dɩsaɩn ’a "kwli ‑wee’ kwa ‑sɔn ‑saa. ’De Kea ’a wlu nyʋ ’tmʋa ’de aopʋ ‑pee ɛ, ao ’je ɛ sɩn ’sɔɔn kpʋʋn ’de ‑cɛi" ’piia’ ’ʋn ‑wɛe ɛ ’je ’sɩn po ’de ao pɛe o, dɛ‑nʋɛ’ ɛmɛ ‑bɛɛ’ ‑ɛ ‑je aoa’ ‑suu ’pʋʋ‑.

²²Kea ’a wlu aoa ’wɔan, ka ɛ "sia ’nynɩ ɛ, ao nʋ kan’, ao ’bo ɛɛ’ doin" o poa ’a ’sʋ kpaa. Ao ’bo aoa’ ‑cɛ" pɛe ’di i ‑teɛ. ‑Bo aoa sea aoa’ ‑cɛ" pɛe ’di i ‑te ɛ, ‑mɛ aoa pooɛ aoa’ ‑cɛ" ’srɛ i, ²³dɛ‑nʋɛ’ ‑bo nyɔ ɔ sea Kea ’a wlu doin" o po ‑wɛe ka ɛ "sia ’nynɩ ɔɔ’ nʋ kan’ a, ‑mɛ ɔ ‑kɔ’ "jɩɩan‑ ’di ‑gbʋin. ²⁴Ɔ ‑kɔa’ ɔɔ’ ‑cɛ" ’ɛ nɩsʋn ja ‑gbʋan’ ’de "jɩɩan‑ ’di ’sʋ ɛ, ɔ ’kpa ’o ’ɛ, ’sʋ ’bomɔ ɔ "sri ɔ je ɔɔ’ nɩsʋn o"mae’‑, ɔ se dɛ jrɛ’ nmae‑. ’De Kea ’a wlu ‑mɛ ɛ, ka "jɩɩan‑ nɩa, ’kamɔ ɛ nɩ‑. ²⁵Ɛ nɩɛ Kea ’a kɛ’ ‑cɛɛn’ ‑ɛɛ ‑nyɩa" nyɔ ‑cɛ" ‑pee‑tea’ a. Nyɔ ‑gbʋan ’e ɛɛ’ kɛ’ tu ’di ‑wɛe ‑ɔɔ ‑jree" ɛ jeejee ’de nai" ’blea’ ’ʋn ɛ, ‑mɔɔ nʋɛ dɛ ‑cɛɛn’‑. ‑Bo ɔ se dɛ doin" o poa ’a ’sʋ kpa a, dɛ ɔ nʋa ’dii, ‑bo ɔɔ’ "mae’‑ ɛ o ‑wɛe ka ɛ "sia ’nynɩ, ɔɔ sea kan’ nʋ ɛ, ‑mɛ ɔɔ’ nyɔ tu ɛ, Kea a muɛ ɔ "diwan poa’ ’de ɔɔ’ nʋʋdbo ’ʋn.

²⁶’De ‑bo nyɔ ’na ɔɔ naa Kea ’a ‑jei" ‑wɛe ɔ se ɔɔ’ mɩɩɔ "wɔin ’bɛɛ‑, ‑mɛ ɔ pooɛ ɔɔ’ ‑cɛ" ’srɛ i, ɔɔ’ Kea ’a ‑jei" naa’ se dɛwɔn nɩ‑. ²⁷Kea ’a ‑jei" naa’ ‑jɛ ‑nɩa dɛwɔn ɛ, ɛmɛ ‑nɩ ‑bo "kwienynuu ke ‑tiɔn"nynʋkpae’ nɩ ’e ’kle ’di ɛ, nyʋ ’je ʋʋpʋ "i ‑tee’‑. Dɛ ‑jɛ ‑a "Bo Kea a ’daa‑ ɛɛ’ ‑jei" naa’ ‑cɛɛn’‑, ɛmɛ ‑nao. ’De dɛ nyɔ ’jea nʋ ke’wlɛ ɛ, ɛmɛ ‑nɩ nyɔ ’je ɔɔ’ ‑cɛ" ’ɛ ‑tɩ’ ‑tu" ’de dɩsaɩn "klein ‑a kpʋʋan nyʋ ‑flɛn" ’nɔ ’kmʋ "kpei ’a ‑tɩ’ ’ʋn.

Nyʋ i’craa’

¹’Ma de’di ‑wi", aopʋ ‑ɔ ‑tea ‑aa kɛɛma’ Sesi Klisɩ ‑kwlɩ" ɛ, ao ’bo nyʋ i’craa. ²Ao ‑gbʋn ’nɔ, nyɔ se o juo, "ko ’wɩ jrɛ’ o ’sʋ "wliiɛjei due’ pa ’de aoa’ "jrui ’kɩɩn‑gbu ’di ‑wɛe ’sani‑cɩɛpodɛ nɩ ’de ɔ ‑cɩɛ, ’de ɔ ‑tu" "wliiɛ‑ ’dɔe ‑pʋn", ‑wɛe nɩɩa" nyɔ paa "saɩn‑sɩn ’ʋn ’de ɔ pa ’e aopʋ "klu ‑ke. ³‑Bo ao ‑gbʋn nyɔ ‑ɔ ‑tua" dɩ ’dɔe ‑pʋn" ja ‑wɛe ao ’na : Klaa" ‑nɔ, ‑ɩn ‑jii ‑ta "kpa‑tɛ ’dɔe ‑nɛ "kpei, ‑ɩn ‑je i ‑te ! ‑Wɛe ao ’je wlu ’e nɩɩa" nyɔ ‑pee ao ’je nʋ : ‑Ɩn ‑nyna i ‑ta, ’de ‑ɩn ‑jii ‑ta ’ma "kpa‑tɛ ‑pʋn", ‑wɛe ‑ɩn ‑je i ‑te ’bo ’blʋɔ, ⁴‑mɛ aoa ’cra nyʋ ’mii ’bo aoa’ ’sʋ ’nynɩ. ’De ‑bo aoa sea kan’ ‑mɔ nʋ ɛ, ‑mɛ tɔ’ saɩn mɩ ‑a po aopʋ ‑je o, ‑wɛe aoa blaa ba ’blʋɔ.

⁵Ao ’ma de’di ‑wi" ‑ɔɔ ‑tɩ’ ’ɩn kma, ao po doin" i, nyʋ ‑ʋʋ ‑nɩa nɩɩa" nyʋ ’nɔ ’kmʋ "kpei ɛ, ʋʋpʋ Kea ’cra i, ’de ʋʋ ’je ɛɛ’ ‑kwlɩ" ‑teʋn nɩ‑, ‑wɛe ʋʋ ’je kɛɛma’ dɛ kpa ka ʋʋa’ ’kɛn nɩa. Ɛmɛ Kea ’na ɛɛ muɛ nyʋ ‑ʋʋ kma ɛɛ’ ‑tɩ’ "nyɩa’. ⁶’Kaa aopʋ mɔ ɛ, aoa’ ’wɔn aoa’ ’je nɩɩa" nyʋ dɛ ’ʋn. ’Mɔ ’na, "wliiɛjeʋn mʋ ‑ʋʋa bla aopʋ ‑tɩ’ "kpei ‑wɛe ‑ʋʋ ‑ke aoa ’jrɛ ’pee ’je ‑gbi ’dii o, ‑aee’ ɛ se kan’ nɩɩ‑ ? ⁷Klisɩ ’a ’nynɩ ’dɔe ‑nɩa aopʋ "kpei ɛ, ʋʋpʋ ‑a sɩ doaa ?

⁸Ka Tʋ"bodɛ ’ɛ kɛ’ "sia ’nynɩ, ‑bo aoa sea kan’ nʋ ɛ, ‑mɛ nmɔ "jrii. Kea ’a wlu ‑crɩɩa’ kɛ ’da ka, ɛ ’naa : ‑Ɩn ‑kma ‑ma ‑ponyiɔ ’ɔ ‑tɩ’ ka ‑ɩn ‑kma ‑ma ‑cɛ" ’kpa ’a ‑tɩ’ ɛ. ⁹’Kaa ‑bo aoa sea nyʋ ’mii ’cra a, aoa nʋɛ dɛsaʋn, ao se kɛ’ wɔn ’je, ‑mɛ ’pee kpʋn aopʋ ’mɛ, ¹⁰dɛ‑nʋɛ’ nyɔ "o nyɔ ‑je kɛ’ ‑wee’ wɔn ‑wɛe ‑ɔ sia ’o ɛ due’ koun ‑gbai’ ɛ, ‑mɛ ka nyɔ a sea ɩ ‑wee’ wɔn ’je, ’kamɔ ɔ nɩ‑. ¹¹Tɔ’ ‑o, "ju ‑ɔ ‑na’ : ‑Ɩn ‑bo jɛi" ’jeeɛ, ɔmɔ ‑na : ‑Ɩn ‑bo "ku ’dbaa ‑ke. ’De ‑bo ‑ɩn se jɛi" ’je, ‑wɛe ‑ɩn ‑je "ku ’dba a, ‑mɛ ‑ɩn ‑saa kɛ’ ’mɛ. ¹²’De aoa’ wlusʋn ke aoa’ nasʋn ’ʋn ɛ, ka kɛ’ ‑ɛ ‑nyɩa" ‑aʋn ‑cɛ" ‑pee ‑tea’ ‑wɛe ‑ɛ ‑jea ‑aa ’pee ’je ’da a, ‑a nʋ kan’, ¹³Nyɔ ‑ɔɔ’ ’jea nyʋ ’a wɛe ɛ, ‑bo nyʋ a sea ɔɔ’ ’pee ’je ɛ, nyʋ se ɔɔ’ wɛe ’jei ‑ke. ‑Bo nyɔ ’je nyʋ ’a wɛe ɛ, ɛ "paa’, ɛ je nyʋ ’a ’pee ’jea’ ‑sii.

Kea ‑kwlɩ" ‑tea’ ke ɛɛ’ nʋʋdbo ke

¹⁴’Ma de’di ‑wi", ‑bo nyɔ ’na ɔ ‑teɛ Kea ‑kwlɩ", ’de ɛ se "jri "kpae’ po ’de ɔɔ’ kplɩn ’ʋn ’ee, ɛɛ’ Kea ‑kwlɩ" ‑tea’ tu ’beeɛ’ ɛ ’je ɔ ’pʋʋ‑ ? ¹⁵"Ko aoa’ de ’di nmɔu jrɔ’ ke aoa’ de’di nynɔkpao’ ‑nɩ ’e aopʋ "klu, ‑wɛe ‑ʋʋ se ’ʋnpaadɩ ke diidɛ ’ble ɛ, ¹⁶’sʋ aoa’ due’ wlu’ ’de ʋʋ ‑pee ɔ ’na : Ao mu ’de pɛe ’dɔe ’ʋn ! Ao ’je dɛ "kpei‑ ’wla ‑wɛe ao ’je dɛ di, ao ’je dbo ! ’De ‑mɔ se ʋʋpʋ dɛ ‑ɛɛ ‑tɩ’ kma ʋʋpʋ "bli "nyɩ ’ee, ‑mɛ dɛ ‑mɛ ’da‑ ? ¹⁷’Kamɔ ɛ nɩ‑ ’de Kea ‑kwlɩ" ‑te’ ‑tɩ ’ʋn ‑ke. ‑Bo ɛ se nʋʋdbo ’ble ‑wɛe ɛ ’je wɔn ’di poɔɔ’ ’sʋ nɩ ɛ, ‑mɛ ɛ ’mɛɛ.

¹⁸"Ko nyɔ jrɔ’ ’bɛɛ‑ ɔ ’je wlu ka, ɔ ’e nʋ : ’Ɩn ‑teɛ Kea ‑kwlɩ" ɛ sie kan’, ’de ‑mɔ ‑ma a nʋɛ dɩ ’dɔe. "Ju ‑wlua kan’ a, ’ma muɛ ɔ ‑pee wlua’ ’ɩn ’je nʋ : ‑Bo ‑ɩn ‑te Kea ‑kwlɩ" ‑wɛe ‑maa’ po ɛ "kpae’ ’de ‑ma nʋʋdɩ ’ʋn ’ee, ‑mɛ ka nyɔ ’je ɛɛ’ ’jesʋn nʋ ɛ‑ ? Ka Kea ‑kwlɩ" ‑tea’ nɩa ’de ‑ɩn ’ʋn ɛ, nyɔ jrɔ’ se ɛ ’bɛɛ‑ ɔ ’je ɛ juo‑. ’Mɔ ’na ‑ɩn ‑bɔ ke, ’ma muɛ ‑ʋn ’ma Kea ‑kwlɩ" ‑tea’ tɔɔa’ ’de ’ma nʋʋdɩ ’ʋn. ¹⁹Ka Kea nɩa due’ koʋn ‑gbai’ ɛ, ‑ɩn ‑je ɛ tɔ’ ’ʋn ’ɛ, ‑mɛ nmɔi", ’kaa ‑siɔn ’ɔ ‑sii ’je ɛ tɔ’ ’ʋn ‑ke, ’kaa faʋn a nʋ ɩ, ɩa dɩ a crɛ’.

²⁰’Oo nyiɔ, ka ‑ɩn se tɔ’ ‑tuu" ’ble kan’ a ! Ka Kea ‑kwlɩ" ‑tea’ ‑sea’ nʋʋdbo ’ble ‑mɛ nɩa wɔn ’dipoɔ’ ɛ, ‑ɩn se ɛ "inɩ ‑ɩn ‑je ɛ ’mii ’wɔn ? ²¹‑Ɩn ‑gbʋn ’nɔ, ’de ‑a ’mɩa Ablaam ’a nʋʋdɩ ’a ‑tɩ’ ’ʋn mɔ Kea ’dɔɔ‑ "isrɛi. ‑Ta ɔ ’wɔɔan ɔɔ’ "ju Isaakɩ ’sraa‑ ’ʋn‑saatɩ ‑wɛe ɔ kpɔ mamaʋ ’sʋ ɔ nynia ’o ’sraa‑sa’ɩn ’bomɔ ɔ ‑tee Kea ‑kwlɩ" ka ɛ kmai". ²²Ka ɔ ’jea Kea ’a ‑tɩ’ tɔ’ ’ʋn ɛ, ɔɔ’ nʋʋdɩ mɩ ‑toɛ. Ka ɛ nʋa ‑wɛe ɔɔ’ nʋʋdɩ nynia ɔɔ’ Kea ’a ‑tɩ’ tɔ’ ’ʋn ’jea’ "i, ’ka ‑nao. ²³Ka ɛ ’crɩɩa’ ’de Kea ’a ’sbɛ ’di ’ka ka : Ablaam ‑teɛ’ Kea ‑kwlɩ", ɛmɛ ‑tɩ Kea nʋ ɔ "isrɛi ’ʋn, ‑wɛe ɛɛ ’dɔɔ‑ ɛ ba. ²⁴Aoa ’jee, ‑bo nyiɔ ’kpa "isrɛi ’bo Kea "juɔi ɛ, ‑mɛ ’de ɔɔ’ nʋʋdɩ ’a ‑tɩ’ ’ʋn ‑o, ɛ se ’de ɔɔ’ Kea ‑kwlɩ" ‑tea’ ’a ’sʋ ’ʋn nɩ‑. ²⁵’Kamɔ ɛ nɩ ‑ke ’de ‑kwlɔite ’nynɔ Raabʋ ’a ‑tɩ’ ’ʋn. ‑Bo Kea ’dʋʋ "isrɛ nynɔkpao’ ’bo ɛ "juɔi ɛ, ‑mɛ ’de ʋa’ nʋʋdɩ ’ʋn ‑o. ‑Ta ʋ "nyɩa nyʋ Sosue dboa ‑teɩn, ‑wɛe ʋ tɔɔa ʋʋpʋ ‑je jrɛ’ ɛ, ’bomɔ ʋa’ Kea ‑kwlɩ" ‑tea’ poo "jri "kpae’ ‑ke. ²⁶Tɔ’ ‑o, ka ’blʋku ‑suu sea ’ʋn nɩ ’mɛa, ’kamɔ ‑bo nyiɔ ’ɔ Kea ‑kwlɩ" ‑tea’ se "jri "kpae’ po ’de ɔɔ’ nʋʋdɩ ’ʋn ɛ, ‑mɛ ɔɔ’ Kea ‑kwlɩ" ‑tea’ ‑nɛ ’mɛɛ ‑ke.

Mɩɩɔ ’ɔ ‑tɩ’

¹’Ma de’di ‑wi", nyʋ ‑tuu"‑tuu ’bo ’de aopʋ "klu nɩɛ, ‑wɛe ʋʋ ’bo nyʋ dɛ tɔɔa’ i‑pɔɛn, dɛ‑nʋɛ’ ao ’je kan’ ’mɛ ‑apʋ ‑ɔɔ tɔɔa nyʋ dɛ ‑aa ’pee a muɛ "ikmaa’ ɛ ’je nyʋ jrʋ’ ‑sii.

²‑A ‑wee’ "klein a ‑si’ ‑tɩ’ "i ’mɛ due ’due ’de ba ‑pee ’de dɩ ‑tuu"‑tuu ’ʋn. Nyɔ ‑ɔɔ’ ‑sia ‑tɩ’ "i ’de ɔɔ’ ’tmʋ‑tɩ ’ʋn ɛ, ‑mɛ ɔɔ’ nyiɔ tu nɩɛ ’pepe, ɔ ’bɛɛ‑ ɔɔ’ ku "wɔin ’bɛɛa’ ’mɛ ‑ke. ³Ao ‑gbʋn ’nɔ ‑bo ‑a ‑nɩɛi" ‑wɛe soo" ’je ‑a wɔn ’je ’sʋ ɛ, ‑a ‑jaa ɛ ‑ka’pee ’wɔn, ’kamɔ ‑bo ‑a nʋ ɛ, ‑wɛe ‑aa po soo" ‑wee’ ‑je o.

⁴’Bo ‑mɛ ’de ɛ, ao naa ‑bato’ ’a ‑tɩ’ tɔ’ "kpei‑ ke’wlɛ. Ɛ ’bɛi", ‑wɛe ‑bo ‑sɔn’ jrɔ’ ɔ, poɔ’ klaa" a "tun ɛ ‑tajrɔ. ’Kaa nɩɩɛ dɛ‑saan" ka mɛ ‑ɛɛ po ɛ ‑je o, ‑wɛe ‑ta ɛɛ’ tbaai nɩai" ɛ, ’de ɛɛ muu ’o. ⁵Aoa ’jee, ’kamɔ mɩɩɔ nɩ ‑ke ’bo nyiɔ ‑pʋn". Ɛ ’piiɛ "i, ’kaa ɛ ’beeɛ’ ɛ ’je wlu klae" klae" ’tmʋ. Ka nɛ dɛ‑saan" ka ’bɛɛa ɛ ’jea ’kwlajeea "jri po ɛ, ao nɛɛ tɔ’ "kpei‑ ‑ke. ⁶Ka nɛ nɩa, ’kamɔ mɩɩɔ nɩ ‑ke. ’Bo mɩɩɔ "kpei mɔ dɩsaɩn ’a "kwli ‑wee’ a ’wlʋ. Mɩɩɔ ’ɔ dɛ tu ‑nɩa ’o nyiɔ ‑pʋn" ɛ, ɛɛ ja nyiɔ nʋʋa’ o, ‑wɛe ɛɛ kpʋʋn nyiɔ ‑flɛn". Dɛ ‑tba’ ’e nyiɔ ’ɔ ’wlʋa’ o ɛ, ɛɛ’ nɛ tu ‑tbaa’ ’bo ɔɔ’ mɩɩɔ "kpei ‑wɛe ɛɛ jɔ ‑tɩ’ ‑pʋn", dɛ‑nʋɛ’ nɛ ‑ɛ ’ʋn ‑siɔn’ ’jea mu ɛ, ’demɔ ɛ ’wlʋ. ⁷Nyiɔ ’bɛɛ‑ ɔ ’je ’kwla ’dinmi ’a kpɛ ‑wee’ kplɩn ‑tuu"‑, ‑wɛe ɩ ’je ɔ wɔn ’je : nmi o, nʋʋɩ o, cniɛ ‑pɛɛ’ o, ‑smii’ o, nyiɔ ‑tuu"‑ ɩ kplɩn ’mɛ ‑wɛe ɩa ’je ɔ wɔn, ⁸’kaa mɩɩɔ ‑mɛ ɛ, nyɔ se ɛ ’bɛɛ‑ ɔ ’je ɛ kplɩn ‑tuu"‑. Mɩɩɔ nɩɛ nyʋ ’kle "kpei jadɛ ‑o. Ɛɛ’ ‑te ‑tadue i. Dɛ jrɛ’ ‑nɩ ’e mɩɩɔ ’ʋn ‑ɛ ‑ke sɛn ’ɛ ‑ku’ ‑kooɔ’‑, ‑wɛe ‑ɛɛ ‑dba nyʋ. ⁹Mɩɩɔ mɛ ‑aa nʋ ‑wɛe ‑aa po ‑a "Bo Kea ‑ɛ ‑nɩa ‑aa Tʋ"bo ’sɛ‑, ‑wɛe nyʋ Kea nʋa ’de ɛɛ’ ‑kooɔ’ i ’ʋn ɛ, ’de ‑aa poo ʋʋpʋ ‑soo’ o. ¹⁰Wɔn due’ koun ‑nɛ ɛmɛ ‑ɛɛ po nyʋ "diwan, ɛmɛ ‑ɛɛ poo nyʋ ‑soo’ o. ’Ma de’di ‑wi", ɛ ’bo kan’ ‑mɔ nɩɛ ’bo ‑a ‑nynɩ. ¹¹"Ni ’dɔe ke "ni saʋn ’beeɛ’ ɩ ’je ’o "kao‑ due’ wɔn ’wlʋʋ ? "Ɩɩn‑, ɛ se kan’ nɩ‑. ¹²’Ma de’di ‑wi", ’mawlotu se ɛ ’bɛɛ‑ ɛ ’je ‑kwɛn’ mua" cro, ’de ‑kao se ɛ ’bɛɛ‑ ɛ ’je ’mawlobuo cro‑. ’Tɔni se ɛ ’bɛɛ‑, ɛ ’je ’dɩɩ.

Tɔ’ ‑wlʋa ’e jaʋn ’di ɛ

¹³‑Bo ao ’na ao nɩɛ tɔ’di ‑wɛe ao juo dɛ "i ɛ, ‑mɛ ao to ɛ ’de aoa’ ’kmʋ ’ʋn. Aoa’ tɔ’di nɩa’ ’je "jri "kpae’ po ’de ‑cɛ" ja jaa’ ke pɛe ’dɔe ’ʋn. ¹⁴’Kaa ‑bo ao ’bɛɛ‑ aoa’ ‑cɛi" ‑wɛe ao ’na ao nɩɛ tɔ’di, ’de aoa’ ‑kwlɛn nʋ pɛe ke aoa’ "cɛi nʋ pɛe a sea aopʋ i ’sʋan a, ‑mɛ aoa ’tmʋɛ sɩ, tɔ’ ‑tɩ se ’de aopʋ ’ʋn nɩ‑. ¹⁵‑Bo aoa sea dɩ ‑nɩa kan’ ‑mɔ nʋ ɛ, ‑mɛ aoa’ tɔ’ ’dinɩa’ se ’e jaʋn ’di ’wlʋ, ɛ ’wlʋɛ ’nɔ ’kmʋ "kpei. Ɛ nɩ aoa’ nyiɔtɔ’ ‑o, ɛ ’wlʋɛ ’e ‑siɔn’ ’ʋn, ¹⁶dɛ‑nʋɛ’ ‑ta ba ‑kwlɛn o nʋa’ ke ba "cɛi o nʋa’ nɩa, ’bomɔ ‑puaa’ ‑pua ‑puaa’ ke dɩsaɩn ’a "kwli ‑wee’ nɩ‑. ¹⁷Tɔ’ ‑jɛ ‑wlʋa ’e jaʋn ’di ‑mɛ ɛ, ɛ nɩɛ ’pepe, ‑flɛn" se ɛ ‑pʋn" nɩ‑ ‑wɛe ɛɛ ‑pɔn pɛe ’a blua’ i. Ɛɛ’ ‑pɔn ‑kɩn i, ɛɛ ‑teɛ nyiɔ ’ɔ ni’, ɛɛ ’jeɛ nyʋ ’a wɛe‑, ɛɛ nʋɛ dɩ ’dɔe ‑tuu"‑tuu. Ɛɛ’ nʋ nyʋ "cɛi o, ɛɛ’ ’cra nyʋ ’mii, ɛɛ’ poo "jri de. ¹⁸Nyʋ ‑ʋʋa ‑pɔan pɛe ’a blua’ i ’bo ʋʋ ke ʋʋa’ ‑ponyiɔ ’nynɩ ɛ, ʋʋa’ ‑cɛ" ’kpa ’a pɛe blu’, ʋʋa’ ’kmʋ a muɛ ’e Kea "jri ’dei nmɔɔa’.

’Kmʋ "kpeidɩ ’a "dia ’jeea’

¹‑Taka tʋ ke ‑cɛa’ a ’wlʋ ’de aopʋ "klu ɛ‑ ? Aoa’ ‑cɛ" ’ɛ ’tʋn nʋdɩ ‑ɩa ‑fɔan’ ‑gba ’de aopʋ ’ʋn, ɩmɩ ‑a nʋɛ ‑wɛe tʋ ke ‑cɛa’ a ’kpa ’de aopʋ "klu. ²Ao ‑nɩɛi" ao ’je dɩ ’ble, dɛ‑nʋɛ’ ɩa pooa aopʋ pɛe "i, ’kaa aoa’ ’ble ɩ ’sʋ aoa ’dba "ku, aoa nʋɛ ba ‑kwlɛn o. Ao ’bleɛ dɛ i ‑pɔan’ ’a ’kpɩ, ’kaa aoa’ ’je dɛ aoa ‑pɔan’ i ɛ, dɛ‑nʋɛ’ aoa ‑cɛ’ ba o ‑wɛe aoa ‑fɔn’ ba tʋ o. Dɛ ao nɩai" ɛ, aoa’ ’je ɛ, dɛ‑nʋɛ’ aoa’ ‑tee’ Kea dɛ i. ³Dɛɛ‑tɩ ‑bo ao ‑tee’ dɛ i ’de aoa’ ’je ɛ, ɛmɛ ‑nɩ aoa ‑tee’ ɛ i ka saʋn ka‑, ‑wɛe ao ’je ɛ aoa’ ‑cɛ" ’ɛ ‑kwlʋtɩ ’ʋn nʋʋ‑.

⁴Ao ‑gbʋn ka aoa’ kpʋan wlu "kpei‑ i ɛ ! Ka nyʋ ‑a ‑pɔan dɩ ’a kpɛ ’sɔɔn i ‑tadue nɩa, ’kamɔ ao nɩ‑. ‑Bo ao ke ’kmʋ "kpeidɩ dbɛɛ ɛ, ‑mɛ ao ke Kea ’nyɛɛa ’ʋn ɛ, ao se ɛ juoo‑ ? Nyɔ ‑ɔ ‑nɩai" ‑ɔ ‑jea ’o ’kmʋ "kpeidɩ ’de bla ’ja a, ‑mɛ ɔ ke Kea se dbɛɛ. ⁵Wlu ‑crɩɩa’ ’de Kea ’a ’sbɛ ’di ɛ, ɛ ’naa :

Kea ’a ‑Suu ɛ "nyɩa ‑aʋn ɛ, ɛ ’bleɛ ‑kwlɛn, ɛ ‑nɩɛi" ‑aa ’kmʋ ‑wee’ ’je ɛɛ’ ‑tea’ ‑te.

Aomɔ naa tɔ’ i, ‑bo Kea ’a wlu ’da kan’ ’ee, ‑mɛ foo" ’ʋn ‑tɩ’ ‑oo ? ⁶"Ɩɩn‑, ɛ se kan’ nɩ‑, ’kaa nyʋ ‑kma Kea ’a ‑tɩ’ ɛ, ɛ nʋɛ ‑wi" ‑mʋ ’saaʋn ‑cɛɛn’ "jrii, ’kamɔ wlu ‑crɩɩa’ ’da, ɛ ’naa :

Kea a ‑fɔn’ ‑cɛi" ’bɛɛʋn o. ’Kaa ɛɛ ’jeɛ nyʋ ‑ʋʋa ‑piia’ ʋʋa’ ‑cɛi" ’a wɛe‑.

⁷‑Bo ɛ nɩ kan’ ‑mɔ ’ja a, ‑mɛ ao jaa "jru ja ’de Kea ‑pee, ao ‑fuun ‑siɔn’ nya ‑wɛe ɔ ’je aopʋ kɩɩn tɛɛn‑. ⁸Ao ’kpa Kea ‑pʋn", ‑wɛe ɛ ’je ao ‑pʋn" ’kpa. Ao dɛsaʋn nʋʋ, ao ‑sa dɩsaɩn ’a ‑flɛn" kwa i ! Ao "jridepooʋn, ao wɔɔ aoa’ pɛe ! ⁹Ao nɩ ’e "jrii "kaea’ ’ʋn, ao ‑fɩn", ao kplee‑, aoa’ ’keeɛ nynɩ ‑srɛɛn ’kwɛ‑ paa’ ’ʋn, ‑wɛe aoa’ ’mʋa‑ ’je "jrii "kaea’ ’ʋn ‑srɛɛn. ¹⁰Ao jaa aoa’ ‑cɛ" ja ’bo Tʋ"bo ‑sɔn ‑wɛe ɛ ’je aopʋ "jɛi kpa.

Ao ’bo ba ’a ’pee ’jeɛ

¹¹’Ma de ’di‑wi", ao ’bo ba cɩɩɛn. Nyɔ ‑ɔɔ dooa ɔɔ’ de’di ’a ’nynɩ, ‑wɛe ‑ɔɔ ‑jea ɔɔ’ ’pee ɛ, ‑mɛ ɔɔ blaa Kea ’a kɛ’ wɔn i, ‑mɛ ɔɔ wluuɛ Kea ’a kɛ’ ’dei. ’De ‑bo ‑ma sea Kea ’a kɛ’ ’dei wluu ɛ, ‑mɛ ‑ɩn se ɛɛ’ wɔn’jei nɩ‑, ‑ma ‑jeɛ ɛɛ’ ’pee. ¹²’Kaa ’pee ’jei nɩɛ due’ koʋn ‑gbai’, ɛmɛ ‑nɩ Kea. Nyɔ "o nyɔ jrɔ’ se ɛ ’bɛɛ‑ ɔ ’je ɔ ‑ponyiɔ ’pee kpʋʋn‑. Kea ‑ɛ ‑nyɩa" nyʋ kɛ’ ɛ, ɛɛ’ ’sʋ mɛ ‑bɛɛ’ ‑ɛ ‑je nyʋ ’pʋʋa’ "nyɩ ’de ‑ɛ ‑bɛɛ’ ‑ɛ ‑je nyʋ i‑sa. ‑Mɔ ‑ɔɔ kpʋʋan ɔ ‑ponyiɔ ’pee ɛ, dɛ ‑ma ‑daa’ ‑ma ‑cɛ" ɛ‑ ?

‑Cɛi" ’bɛɛa’ se "inmɔ

¹³Ao po ’ma wlu doin" o la, aopʋ, kaan ‑ɔ ‑na : ‑Sɩan wɩ o, ‑klae"‑ o, ‑aa muɛ ’o ‑kwlɔ ‑nɛ ’di mua’, ‑wɛe ‑a ‑je ’dɔɔ po, ’de ‑a ‑je ’wɛi ’je. ¹⁴Dɛ ‑ɛɛ mua ao "jrii nʋʋa’ ‑klae" ɛ, ao se ɛ juo‑. Dɛ aoa’ ’kmʋ nɩ ’ʋn ‑ɛ ? Ɛ ‑kɔ’ "ni smua ’a fuu". ‑Bo ɛ mu "jɛi dɛ‑saan" ka ’sʋ, ɛ cɩɛn i. ¹⁵Ka ‑jɔ ao ’jea ’da ’de ɛ, ɛmɛ ‑nɩ : ‑Bo Kea ‑nɩɛi" ɛ, ‑mɛ ‑aa muɛ ’kmʋnɩa’ ‑wɛe ‑a ‑je dɛ ‑jɛ ke dɛ ‑nɩ nʋ. ¹⁶’Kaa kaan ka aoa’ ’bɛɛ‑ aoa’ ‑cɛi" ’de tɔ klae" ’ʋn. ‑Cɛi" ’bɛɛa’ ‑jɛ ‑nɩa kan’ ‑mɔ ɛ, ɛ nyniɛ "jrii.

¹⁷Nyɔ ‑jua dɛ ’dɔe ‑ɔ ‑jea nʋ ’pepe ‑wɛe ‑ɔ se ɛ nʋ ɛ, ‑mɛ ‑mɔ nʋɛ dɛsaʋn.

"Wliiɛjeʋn ’a fɛn’ ‑saa’

¹Aomɔ "wliiɛjeʋn kaan la ! ’Kle ‑ɛɛ mua aopʋ "kpei jia’, ’de ɛɛ’ ‑tɩ’ ’ʋn ɛ, ao ‑fɩn", ao kplee‑. ²Aoa’ "wlii‑ ‑sɔɔn, ‑wɛe wlɔn di aoa’ ’ʋnpaadɩ. ³Aoa’ ’sani ke aoa’ ’wɛi kpʋɛn ’kɩn. Ɩa’ ’kɩn ‑nɩa ’mʋa‑ ɩmɩ ‑a mu aoa’ "kpei ‑tɩ ’tmʋi nɩa’ ’pee ’jewɩ o, ‑wɛe ɩ ’je ao ‑siian’, ka nɛ ɛ siian dɩ ɛ. Aopʋ de ’bɔɔ ‑sɔn nɩa ’e nyʋ "jru, ‑wɛe ‑ɔɔ ‑sii" a "wlii‑ ‑pɔan ’a "jru i ke mamaʋ ɛ, ao ‑gbʋn ’nɔ ! ⁴Nyʋ ‑ʋʋa nʋa dbo ’de aopʋ o ‑kle’ ɛ, ʋʋa wluuɛ ’mii, dɛ‑nʋɛ’ ao se ʋʋpʋ ‑kei" ‑sa. Ʋʋa’ ‑fɩn" wlu mu’ mamaʋ ’sʋ ɛ je ’e ’kmʋ ‑wee’ "klein ’a Tʋ"bo doin" ’kpa. ⁵’De ’kmʋ "kpei aopʋ nɩa dɩ ‑wee’ "klein siiɛ aopʋ i. Dɛ ‑ɛ nʋa aopʋ ’tʋn ɛ, aoa nʋɛ’. Ao diɛ dɩ ’dɔe ‑di’pɛn ’sʋ ao je ’cna pa pɔn pɔn, ’de ‑mɛ ’kamɔ aoa’ ’mɛ nɔ" "kʋʋan‑ i. ⁶"Isrɛi ‑ɔ sea ’bɛɛ‑ ‑ɔ ‑jea ɔɔ’ ‑cɛ" "kpei‑ ’tʋan‑ ’de ao ’kwa a, ao kpʋʋn ɔ ’pee, ‑wɛe ao ’dbɔ.

Pɛe ikua’ ke Kea baea’ ke

⁷’Ma de’di ‑wi", ao kuu pɛe i mamaʋ ’sʋ Tʋ"bo ’je de ji. Aoa ’je ‑tiɔnʋi ’mɛɛ ? ‑Bo ɔ po ko ’de ‑kle ɛ, ɔ kuuɛ tɔ’ i mamaʋ ’sʋ ɔɔ jea ɩa’ ‑flu" nɔ" fuo, ɛmɛ ‑kɔn ‑tɩ’. Tɔ’ due’ ‑nɛ ɛmɛ ɔɔ kuu i mamaʋ ’sʋ ‑kua" a jea ’nɔ ‑sɔn ’kpa. ⁸Aopʋ mɔ ‑ke ɛ, ao kuu pɛe i, dɛ‑nʋɛ’ Tʋ"bo ’a deji nɔ" se o tɛɛn‑.

⁹’Ma ’cɛ, ao ’bo ba ’dei wluuɛ, ‑wɛe Kea je aoa’ ’pee ’je. Ao ‑gbʋn ’nɔ, ’pee ’jei ‑teɛ ji ‑tɩ. Ɔ nɩɛ ’o ‑gbɛin" ‑jei". ¹⁰’Ma ’cɛ, Kea ’a wlu ’kwajaaʋn ‑ʋʋ ‑tmʋa Tʋ"bo ’a ‑tɩ’ tɛin" ɛ, ao po ʋʋpʋ ’a ‑tɩ’ ‑kwlʋ o, ’bo ʋʋpʋ "kpei mɔ ao ’je ’kle ’jea’ ’cɩan‑ ’de pɛe "wɔin ’bɛɛa’ ’ʋn. ¹¹Aoa ’jee, nyʋ ‑ʋʋ ‑kuua tɔ’ i ’de ’kle ’di ɛ, "diwan nyʋ ‑o, ‑aa poɛ ʋʋpʋ ‑tɩ’ o. Ka Sɔbʋ kuua pɛe i ɛ, ao ’wɔɛn’, ’de ’dɔe ‑jɛ Kea "nyɩ ɔ de’bɔɔ‑ nɔ" ɛ, ao juo ‑mɛ ’mɛ. ’Ma ’cɛ, Kea nmɔ ’di wɔn, ɛɛ ’jeɛ nyʋ ’a wɛe‑.

¹²Dɛ ‑jɛ ‑kɔan ‑tɩ’ ke’wlɛ ‑wɛe ’ma ’tmʋa ’de ao ‑pee ɛ, ’ma de’di ‑wi", ɛmɛ ‑nɩ, ao ’bo ’blʋa‑ ke jaʋn ’ʋn ‑snɛɛn ɛ. Dɛ ao ’jea nʋ ɛ, ɛmɛ ‑nɩ aoa’ kɩɩn nɩ kɩɩn, aoa’ "ɩɩn‑ nɩ "ɩɩn‑, ‑wɛe ’pee je aopʋ kpʋn.

’Wɛnʋi ’a Kea baea’

¹³‑Bo nyɔ jrɔ’ nɩ ’e aopʋ "klu, ‑wɛe ɔ nɩ ’de ’kle ’di ɛ, ‑mɛ ɔ ’tmʋ ɛ ’de Kea ‑pee ’de baewlu ’di. ’De ‑bo jrɔ’ nɩ ’de ’mʋa‑ ’ʋn ɛ, ‑mɛ ɔ ble, ɔ ’je Kea ’a ’nynɩ "i ’bɛɛ‑. ¹⁴‑Bo nyɔ jrɔ’ nɩ ’de aopʋ "klu ‑wɛe ɔɔ’ dɛ ɛ sea pooa a, ‑mɛ ɔ ’da Kea ‑gbu ’a nyʋsoa ‑wɛe ʋʋ ’je ɔ ’cna "jru po ’de Tʋ"bo ’a ’nynɩ ’ʋn, ‑wɛe ʋʋ ’je ɔɔ’ Kea bae‑. ¹⁵‑Bo ʋʋ bae Kea ’de ɛɛ’ ‑kwlɩ" ‑tea’ ’ʋn ɛ, ’wɛ‑nʋi ‑nɔ ɔɔ muɛ ’pʋʋa’. Tʋ"bo a mu ɔ kui‑sɔn iflɔan’ "nyɩa’. Ɛ ’je ɔ "jɛi kpa, ‑wɛe ‑bo ɔ nʋ dɩsaɩn ɛ, ’de ɛ ’jɩ ‑kɔ’. ¹⁶Ɛmɛ ‑tɩ ao ’je aoa’ dɩsaɩn ’a ‑kɩn cɛn ’de ba ‑pee, ‑wɛe ao ’je ba ’a Kea bae ’de ao ’je ’pʋ. ‑Bo nyɔ ‑srɛi" ɛ, ɔɔ’ baewlu a cɛn dɛ. ¹⁷Kea ’a wlu ’kwajaai Eli nɩɛ nyiɔ ‑o, ka ‑a ‑nɩa, ’kamɔ ɔ nɩ‑. ’Wɩ jrɛ’ o ɛ, ɔ baeɛ Kea i, ‑wɛe "ni se dbai, ’sʋ ’bo ɔɔ’ baewlu "i ɛ, "ni se dba ‑cɛɛn’‑ ’de ’blʋa‑ "kpei ’de ‑sɩn taan ’cʋɩ ‑mɛɛo"‑ ’di. ¹⁸’De ɔ bae Kea ke’wlɛ ‑wɛe "ni ’je dba ’sʋ "ni ‑teɛ dbaa’ ‑pʋn", ‑wɛe doodɩ ‑wee’ "klein mɛ ’de ɩ ‑te croa’ ‑pʋn".

¹⁹’Ma de’di ‑wi", ‑bo aoa’ due’ "tai‑ tɔ’ ‑tɩ ’a ‑jeblʋ "i ɛ, ‑wɛe nyɔ due’ jɔ ’o tɔ’ ‑tɩ ’a ‑jei" de ɛ, ‑mɛ nmɔ "jrii. ²⁰Dɛ ao ’jea ‑kwlʋ o sie ɛ, ɛ ka : nyɔ ‑ɔɔ muɛ nʋa’ ‑wɛe nyɔ jrɔ’ ’jea ’o ɔɔ’ dɛsaʋnʋ ‑jei" ’wlʋ ’de ɔ ’jea ’o Kea ’a ‑jei" de ji ɛ, ‑mɛ ɔɔ muɛ ɔɔ’ jei tu ’a ‑suu ’pʋʋa’ ’de ɔ ’je dɩsaɩn ‑tuu"‑tuu ’a ‑kɔ "puue’ "kpei po ’de ɩ ’je ‑kwɛ‑.