2 Tesalonikɩ

’Sbɛ ’ɛ ’sɔɔn ‑nɛ Pɔo pooa Kea ‑gbu ‑nɩa ’e

Tesalonikɩ

‑jei" ɛ

’Jewlu‑

¹Tesalonikɩ‑kɔʋn aopʋ ‑ɔ ‑nɩa ‑a "Bo Kea ke Tʋ"bo Sesi Klisɩ ’a nyʋ ɛ, ’mɔ Pɔo ke Silasɩ ke, Timote ke ‑apʋ ‑ɔɔ ja aopʋ ’sbɛ‑.

²‑A "Bo Kea ke Tʋ"bo Sesi Klisɩ po aopʋ "diwan ‑wɛe ɛ ’je aopʋ pɛe ’a blua’ "nyɩ !

Tesalonikɩ‑kɔʋn ’a Kea ‑kwlɩ" ‑tea’ ’a ‑kei"

³‑Aa de’di ‑wi", ‑a se Kea ’sɛpo ‑tɩ ’bɔ i ’de aoa’ ‑tɩ’ ’ʋn. Ɛ nɩɛ ka ‑cɔɔn’ ka ‑wɛe ‑a ‑je ɛɛ’ dɛ tu nʋ, dɛ‑nʋɛ’ aoa’ Kea ‑kwlɩ" ‑tea’ ke aoa’ ba ’a ‑tɩ’ kmaa’ a ’kpa "kpei sɔɔn‑ sɔɔn‑. ⁴Ɛmɛ ‑tɩ ‑a ’di nmɔ wɔn ‑wɛe ‑a po Kea ’sɛ ’de aoa’ ‑tɩ’ ’ʋn. Ka ‑aa jiia Kea ‑gbi ’dii ɛ, ’kamɔ ‑aa ‑si" aopʋ ’a ’nynɩ ’dɔe ’de nyʋ ‑pee, dɛ‑nʋɛ’ nyʋ a ‑tuɛ" aopʋ ’kle ‑wɛe aoa ’je aoa’ ‑cɛ" wɔn ’de aoa’ Kea ’a ‑jei" naa‑tɩ ’ʋn, ’kaa aoa’ ’wlʋ wlu’, ao ‑teɛ’ Kea ‑kwlɩ" ’de nai" ’blea ’ʋn. ⁵Ka Kea nɩa ’de aopʋ ’de ɛ, ɛmɛ ‑to ɛ. Kea ’srɛi", ’kle aoa ’jea ‑wɛe ao ’bɛɛa pɛe "wɔin ɛ, ɛmɛ ‑ɛɛ muɛ nʋa’ ‑wɛe ao ’je ’e ɛɛ’ ’kmʋ dee ’di pa ka nɩ‑. ⁶Tɔ’ ‑o, dɛ ‑srɛai" ɛ, ɛmɛ Kea a mu nʋa’ see. Nyʋ ‑ʋʋ ‑tua" aopʋ ’kle ɛ, ɛɛ muɛ ʋʋpʋ ’kle "kpei jaa’, ^7-8‑wɛe aopʋ ‑ɔɔ ‑jea ’kle ’de ‑sɩanwɩ ’di ɛ, ’de ao ke ‑a ‑je ‑kwlekwlɔ ’je ’de ‑a ‑je ‑kwle.

‑Sɔntɩ Tʋ"bo Sesi a mua ’de jaʋn ’di ’wlʋa’ ‑wɛe ɔ ’jea ‑tan a, ɔ ke ɔɔ’ "soa‑wi" ɔɔ’ "ikmaa’ nɩa ’e ’ʋn a muɛ jia’ ’bo nɛ‑gbauo ’a ‑kwea’‑. ’De ɛɛ’ nɔ" tu ’di mɔ ɔ ’je ‑aʋn ‑aa ‑kwlekwlɔ ’di paa‑. ’De nyʋ ‑ʋʋ se ɛ "inɩ ‑ʋʋ ‑jea Kea juo ‑wɛe ‑ʋʋ ‑na ‑ʋʋ se ‑aa Tʋ"bo Sesi ’a ‑pɔia" ‑tɩ wɔn ’jei ɛ, ’de ’pee ’je ʋʋpʋ kpʋʋn‑. ⁹Ʋʋa’ ’pee ’a kpʋn ’a mɛ ‑nɩ ʋʋ ’je isɔn‑ ’bode ‑bode ’bode. Ʋʋ se Tʋ"bo ’a "jua‑ ke ɔɔ’ kɛɛma’ dɛ ’ɛ "ikmaa’ ke ɛɛ’ fansʋn "jriɛ‑ ’jeei. ¹⁰‑Sɔntɩ ɔɔ mua jia’ a, ɔɔ’ "ikmaa’ a muɛ "jri "kpae’ poa’ ’de ɔɔ’ nyʋ ɔ ‑teea kpɔi" ’ʋn ‑wɛe nyʋ "klein ‑jea ɔɔ’ ‑tɩ’ tɔ’ ’ʋn ʋʋ ’je ɔ ’jraa‑ ’de ʋʋ ’je ɔ "juɔi ‑gbɛɛ’‑. Ʋʋa’ nyʋ tu ɛ, aopʋ a muɛ ’de ʋʋpʋ "klu nɩa’ ‑ke, dɛ‑nʋɛ’ wlu ‑a ‑tmʋa ’de ao ‑pee ɛ, ao ’je ɛ tɔ’ ’ʋn ’ɛ.

¹¹Ɛmɛ ‑tɩ ‑aa bae aoa’ Kea jeejee ‑aa ‑teeɛ’ i ‑wɛe ’kmʋnɩa’ ‑ɛɛ ’daa’ ɛ ’da aopʋ ɛ, ’de ao ’je ɛɛ’ ’je ka nɩ‑. Dɛ ‑aa ‑teea’ ɛ i ke’wlɛ ɛ, ɛmɛ ‑nɩ ’dɔe aoa ‑pɔan nʋa’ i ɛ, ɛ ’je aopʋ sʋn o po ’de ɛɛ’ "ikmaa’ ’ʋn ‑wɛe dbo aoa’ Kea ‑kwlɩ" ‑tea’ a nʋa ɛ ’je ’pepe nɩ‑. ¹²‑Bo ɛ nɩ kan’ ‑mɛ ‑aa Tʋ"bo Sesi ’a ’nynɩ a muɛ "i ’bɛɛa’ ’de aopʋ ’ʋn ‑wɛe ao mɔ ’ɔ ’nynɩ ’je "i ’bɛ ’de ɔmɔ ’ʋn ‑ke. Ɛɛ’ ’saaʋn tu ’wlʋɛ ’de ‑aa Kea ke ‑aa Tʋ"bo Sesi Klisɩ ’ʋn.

Dɩ ‑ɩa mua nʋʋa’ Sesi Klisɩ ’a deji nɔ" ɛ

¹Tɔ’ ‑o, ‑aa Tʋ"bo Sesi Klisɩ a muɛ jia’ ‑cɛɛn’‑, ‑wɛe ɔ ke ‑a ‑je "jrui ’kɩɩn‑. ’Kaa ’ma de’di ‑wi", ‑bo ɛ ‑tu" ’de ‑mɛ ’ɛ ‑tɩ’ ’ʋn ɛ, ‑mɛ dɛ ‑aa ‑teea’ aopʋ i ɛ, ²ɛmɛ ‑nɩ ao ’bo aoa’ ‑cɛi" "taiɛ ‑wɛe nyɔ ’bo ao faʋn’ poɛ, ’de ɔ ’bo aoa’ "jru ‑jei" ‑saa ‑too"‑. ‑Bo nyʋ jrʋ’ wlu ka ʋʋ ’na Kea ’a ‑Suu ‑po’ wlu ’bo ʋʋpʋ ‑kwlɩ" ‑wɛe ʋʋa ’tmʋ ɩ, ’de ʋʋa ’dɩɩ Kea ’a wlu ɛ, ‑bo nyʋ jrʋ’ ’crɩ ’sbɛ, ‑wɛe ʋʋ ’na ‑apʋ ‑crɩɛ’ ɛ, ‑bo nyʋ jrʋ’ ’tmʋ Kea ’a ‑tɩ’ ‑wɛe ʋʋ ’na Tʋ"bo ji’ ‑wɛ‑ sese ɛ, ‑mɛ ao ’bo ɩ tɔ’ ’ʋn ’jeɛ. ³Ao ’bo ’wɔɔɛn nyɔ ’bo ao ’srɛ ipooɛ ka "o ka ’de dɩ ‑nɩa ’mʋa‑ ’a ‑tɩ’ ’ʋn, dɛ‑nʋɛ’ nɔ" ‑tɩ Tʋ"bo ’a ’jrʋ ’je ’de nyʋ "jru nɩ ɛ, ‑mɛ nyiɔpʋ ’a Kea wɔn o toa’ a muɛ ’blʋa‑ "i "sia’. ’De "ju ‑ɔɔ ’nynɩ nɩa ’diwɔnynii ɛ, ‑wɛe ‑ɔ ‑tea isɔan’ ’a ‑teea’ ‑mɔ ’je ‑tan’ ke tɛin". ⁴Dɩ "klein nyiɔpʋ a ‑gbɛɛa’ "juɔi ‑wɛe ʋʋ ’daa‑ Kea ɔɔ muɛ ɩ ‑wee’ o ‑fɔan’, ɔɔ muɛ ɔɔ’ ‑cɛ" ’ɛ ’nynɩ "jɛi kpaa’ ’bo ɩ ‑wee’ "jru kpɔ’. Ɔɔ muɛ mua’ mamaʋ ’sʋ ɔ ’je ’e Kea ‑gbu ’di pa ‑wɛe ɔ ’je i ‑te ’demu, ’de ɔ ’je ɔɔ’ ‑cɛ" Kea ’daa‑.

⁵‑Ta ’ɩn nɩɩa ’de aopʋ "klu ’de ɛ, ’ɩn se ɩa’ dɩ tu ’tmʋ ’de ao ‑pee ’dee‑ ? ‑Aee’, ɛ se kan’ nɩ‑ ? Ao po ‑tɩ’ ‑kwlʋ o ke ! ⁶’De kaan la, ao ’je kan’ ’mɛ dɛ jrɛ’ mɛ ‑kaan ɔ ‑je de, ɛmɛ ‑tɩ ɔ se ji ke. Ɔɔ’ nɔ" ‑tuu" a ‑bo ɛ nyni ‑wɛe ɔ ’je ji. ⁷Ɔɔ’ ’diwɔnynii‑suu ‑jɛ ‑nɩa ’de nyiɔpʋ ’ʋn ɛ, ‑mɛ nɩɛ dbo nʋa’ wɔɔ‑ ’de kwie’. ’Kaa ‑sɔntɩ dɛ ‑ɛ ‑kaan ɔ ‑je de ɛɛ mua ’nɔ ’wlʋa’ a, ⁸’bomɔ "ju ‑ɔɔ ’nynɩ nɩa ’diwɔnynii ɛ, ɔɔ mu ɔɔ’ ‑cɛ" toa’. ’Kaa Tʋ"bo Sesi ’a wɔn ’dipoɔ’ ɔ muɛ ɔ ’dbaa’ ’de ɔɔ’ jisʋn ’a "ikmaa’ ’je ɔ i‑sa ’de nya. ⁹’Diwɔnynii ‑nɔ, ‑sɔntɩ ɔɔ mua jia’ Satan a mu ɔ "ikmaa’ "nyɩa’ ‑wɛe ɔ ’je jrii’ ke "jriɛ o siedɩ klae" klae" nʋ ’de ɔ ’je nyʋ ’srɛ ipoo‑. Ka ɔɔ’ "ikmaa’ ’wlʋa ’de Satan ’ʋn ɛ, ɩmɩ ‑toɛ. ¹⁰Ɔɔ muɛ ’de dɛsaʋn ’a kpɛ ‑wee’ "klein ’ʋn jiia’ ‑wɛe ɔ ’je nyʋ ‑ʋʋ ‑ma" ʋʋa’ ‑cɛ" pɛe ’di i ‑te. Ʋʋa’ nyʋ tu a muɛ isɔan’, dɛ‑nʋɛ’ tɔ’ ‑tɩ ’a ‑tɩ’ kmaa’ ‑ɛ ‑jea ʋʋpʋ ’pʋʋ ɛ, ʋʋ se ɛ "inɩ ʋʋ ’je ɛ sɩn ’sɔɔn kpʋʋn‑. ¹¹Ɛmɛ ‑tɩ Kea a muɛ nʋa’ ‑wɛe ʋʋ ’je idu ’de ʋʋ ’je sɩ tɔ’ ’daa‑, ¹²‑wɛe nyʋ "klein sea’ tɔ’ ‑tɩ ’a wlu tɔ’ ’ʋn ’je, ’de ‑ʋʋa ‑jea dɩsaɩn ’a "dia a, Kea ’a ’pee ’je ʋʋpʋ kpʋn.

Ao ’bo ’o tɔ’ ‑tɩ ’a ‑jei" ’wlʋɛ

¹³’Kaa aopʋ mɔ ɛ, ’ma de’di ‑wi", ao nɩɛ Tʋ"bo ’a ‑tɩ’ kmaʋn ‑o. ‑A se Kea ’sɛ po‑tɩ ’bɔi ’de aoa’ ‑tɩ’ ’ʋn, dɛ‑nʋɛ’ Kea ‑teeɛ aopʋ kpɔi" sese ‑wɛe ao ’je ’pʋʋa’ ’je. Ɛmɛ ‑tɩ ɛɛ’ ‑Suu a nʋ dbo ’de aopʋ ’ʋn ‑wɛe ao ’je tɔ’ ‑tɩ ’a wlu tɔ’ ’ʋn. ¹⁴Ɛmɛ ‑ɛɛ ’daa’ ɛ ’da aopʋ ’de ‑pɔia" ‑tɩ ‑a ‑tmʋa ’de ao ‑pee ’ʋn, ‑wɛe ao ke ‑aa Tʋ"bo Sesi Klisɩ ’je ’nynɩ i ’wlʋʋ‑. ¹⁵’Ma ’cɛ, ‑bo ɛ nɩ kan’ a, ‑mɛ wlu ‑a ‑tɔɔa aopʋ ’de ‑a wɔn ’di o, ‑jɩ ‑a ‑tɔɔa aopʋ ’de ’sbɛ ‑a ‑pooa aopʋ ‑jei" ’di o, ao ‑tɩ’ i ’de aopʋ ’ʋn ‑wɛe ao ’je ’sɩn po ’de Kea ’a wlu ’ʋn.

^16-17‑A "Bo Kea kma ‑aa ‑tɩ’ ‑wɛe ɛ nʋ ‑aʋn ’saaʋn "jrii ’de ɛ ‑tu" ‑a ‑tɩ’ ‑kwlɩ’ i ‑wɛe ‑a ‑je tɔ’ tba‑ta ‑cɛɛn’ ’ble. Ɛ ke ‑aa Tʋ"bo Sesi Klisɩ ’a ‑cɛ" ’kpa ‑kuu aoa’ pɛe i ‑wɛe ao ’je ’dɔe nʋa’ ke wlu ’dɔe ’tmʋa ’a ’kpɩ ’ble.

‑A ‑bae ba ’a Kea

¹’Ma de’di ‑wi", ‑ta ‑jɔ ’ma jia ‑craa’ la ’bomɔ ‑nɩ ao bae ‑aa Kea ‑wɛe Tʋ"bo ’a wlu ’je ’blʋa‑ ja ‑kɔ’ sɔɔn‑ sɔɔn‑ ’de ka ao ’je ɛ tɔ’ ’ʋn ‑wɛe ao kpʋʋn ɛ sɩn ’sɔɔn ɔ, ɛ ’je kan’ nɩ ‑ta "o ‑ta. ²Ao bae ‑aa baea’ ‑ke ‑wɛe Kea ’je ‑a seie ’de ’diwɔnyniʋn ’kwa, dɛ‑nʋɛ’ ɛ se nyʋ ‑wee’ ‑a ‑wɔɔn’ Kea ’a wlu tɔ’ ’ʋn ’je ‑tɩ kan’ nɩ‑.

³Tʋ"bo ’a ’wlʋ wlu "kpei, ɔɔ muɛ aopʋ ’a dɩ ikua’ ‑wɛe ɔ ’je aopʋ ifuo‑ ’de ‑siɔn’ se aopʋ sʋn ‑pʋn" kpai. ⁴‑A ‑je kan’ ’mɛ dɩ ‑a ‑sia" ’nynɩ ’de ao ‑pee ‑wɛe ao ’jea nʋ ɛ, ao nɩɛ ɩa’ nʋa’ ’de aoa mu ɩ nʋa’ ao ’je nya mu, dɛ‑nʋɛ’ ao ke Tʋ"bo "siiɛ "i, ɛmɛ ‑tɩ ‑a ‑te’ aopʋ ‑kwlɩ". ⁵Tʋ"bo po aoa’ pɛe ‑je o ’de ao ’je Kea ’a ‑tɩ’ kma, ‑wɛe pɛe "wɔin ’bɛɛa’ ‑ɛ ‑nɩa ’de Klisɩ ’ʋn ɛ, ɛ ’je ’de aopʋ ’ʋn nɩ‑.

Nyʋfɛn’ ‑saawlu

⁶‑Aa de’di ‑wi", ‑aa ‑teɛ’ aopʋ kɛ’ "i ’de Tʋ"bo Sesi Klisɩ ’a ’nynɩ ’ʋn ‑bo nyɔ nɩ ’de aopʋ "klu ‑wɛe ɔɔ sea ɔɔ’ ‑cɛ" ‑flaan’ "kpei po ɛ, ’de dɩ ‑a ‑tɔɔa aopʋ ‑wɛe ɔ ’na ɔ sɩ wɔn ’jei ɛ, ‑mɛ ao tɛɛn ‑mɔ ’ɔ jei tu o. ⁷Ka ao ’jea nʋ ‑wɛe ao ’jea ’bo ‑aa ‑kɔ ’de bla a, ao juɛ’, dɛ‑nʋɛ’ ‑ta ‑a ‑nɩɩa ’de aopʋ "klu ɛ, ao ’je kan’ ’mɛ ‑a se ‑flaʋn nɩ‑. ⁸‑A se bae’ ‑te ’bo nyɔ jrɔ’ "wɔin ‑wɛe ‑a se ɔɔ’ dɩ di "jɛi‑, ’kaa ‑aa ‑cɛ" ’kpa ‑nyɩa’ ‑su’ ’de "maʋ’ wɩ o, ’jrʋ‑gbao wɩ ’di ‑wɛe ‑ɔɔ ‑pɔn ɔɔ’ diidɛ ’de ‑bo ɛ nɩ kan’ ‑wɛe ‑a je ’bo aoa’ nyɔ jrɔ’ "jru ‑te. ⁹Dbo ‑a nʋa ’de aopʋ "klu ɛ, aopʋ ‑je ‑a diidɛ "nyɩ ‑wɛe ‑a ‑je di ’de‑. ‑Bo ‑a se kan’ ‑mɔ nʋ ɛ, ‑mɛ ɛ se ao se ‑aa diidɛ "nyɩ ka nɩ ko‑, ’kaa ‑a ‑nɩɛ "i ‑wɛe ao ’je ‑aa kplɩn ja ‑gbʋn ’de ao ’je ’bo ‑aa ‑kɔ ’de bla. ¹⁰’Ma ’cɛ, ‑ta ‑a ‑nɩɩa ’de aopʋ "klu ɛ, wlu ‑a ‑tmʋa ao si ɛ tɔ’ o. ‑A ‑wlu ka ‑a ’naa nyɔ ‑ɔ sea dbo nʋ ɛ, ɔ ’bo dɛ diɛ.

¹¹’De ‑mɛ ’kamɔ dɛ nyʋ a ’tmʋa ‑wɛe ‑aa ‑wɔan ’de aoa’ ‑tɩ’ ’ʋn mɛ ‑nɩ nyʋ jrʋ’ ‑nɩ ’de aopʋ "klu ‑wɛe ‑ʋʋ ‑te i ’sʋ ‑ʋʋ ‑na ‑ʋʋ se dbo nʋi ’de ‑ʋʋa na daɩn" ’ʋn ‑ʋʋa ‑sii’ʋn ‑wɛe ‑tɩ’ ʋʋ sea kɔn ʋʋa ’kpɩ ’ʋn ‑pluu ‑pluu. ¹²Ʋʋa’ nyʋ tu ɛ, ‑aa baeɛ ʋʋpʋ i ’de Tʋ"bo Sesi Klisɩ ’a ’nynɩ ’ʋn ʋʋ nʋ dbo ‑wɛe ʋʋ ’je ʋʋa’ ‑cɛ" ’kpa ’a ’kwadɛ ’je, ʋʋ ’je di ’de ku peeɛ ’ʋn. ¹³’Ma de’di ‑wi", aomɔ ’bo dɛ ’dɔe nʋa’ ’ʋn seaa. ¹⁴’Snɩ ‑a ‑tua" aopʋ ’de ’sbɛ ‑nɛ ’di ‑ta, ‑bo nyɔ nɩ ’de aopʋ "klu ‑wɛe ɔ ’na ɔ se ɛ wɔn ’jei ɛ, ‑mɛ ao sie ɔ "jriɛ‑ o, ao ’bo ɔ dbɛɛjua o kpaa, ‑wɛe ɔɔ’ ‑cɛ" ’ɛ ’kmʋ ’je ɔ ‑tɩn’ "i ’dbaa. ¹⁵’Kaa ao ’bo ɔ aoa’ tʋnyɔ ’ʋn nʋɛ, dɛ‑nʋɛ’ ɔ nɩɛ aoa’ de’di ‑o. Ao ’kpɔ ‑pʋn" ‑wɛe ao ’je ɔ fɛn’ ‑sa.

’Jewlu‑

¹⁶Tʋ"bo ‑ɔɔ ‑nyɩa" nyʋ pɛe ’a blua’ a, ɔɔ’ ‑cɛ" ’kpa "nyɩ aopʋ pɛe ’a blua’ ’wɩ "o ’wɩ ka "o ka ! Tʋ"bo sie ao ‑wee’ "klein o !

¹⁷’Mɔ Pɔo, ’mɔ ‑je aopʋ, ’ma ‑cɛ" ’kpa ’a sʋn ‑crɩ wlu ‑nɩ. ’De ’ma ’sbɩ ‑wee’ ’di ɛ, ka ’ma nʋa ’ma ’nynɩ ’crɩsʋn, ’kamɔ ‑nao.

¹⁸‑Aa Tʋ"bo Sesi Klisɩ ’a "diwan kpʋn ao ‑wee’ "klein !