2 Piɛi

’Sbɛ ’ɛ ’sɔɔn ‑nɛ

Piɛi

’crɩa

’Jewlu‑

¹’Mɔ Simɔ Piɛi ‑ɔ ‑nɩa Sesi Klisɩ ’a dbonʋi ‑wɛe ‑ɔ ‑nɩa ɔɔ’ ‑tadboi ɛ, ’mɔ ‑ɔɔ ja aopʋ ‑ɔ ‑ke ‑aa Kea ‑kwlɩ" ‑tea’ nɩa dɛ due’ ’sbɛ‑. Sesi Klisɩ ‑aa Kea ‑ɛ ‑nɩa ‑aa ’Pʋʋi ɛ. Ɛmɛ ‑tɩ ɔ "nyɩ ‑a ‑wee’ Kea ‑kwlɩ" ‑tea’ due’, ɛɛ’ kɛ’ kma’ ’de ‑a ‑wee’ "klein ‑pee.

²Ao juo Kea ke Tʋ"bo Sesi, ao ’je nya mu, ‑wɛe "diwan ’je aopʋ kpʋn, ’de aoa’ pɛe ’je blu.

Nyʋ Kea ‑sa ’o ‑wɛe ɛ ’da‑

^3-4Sesi mɔ ‑nʋɛ’ ‑wɛe ‑a ‑juo Kea ‑cɛɛn’‑. Ɛmɛ ‑da ‑aʋn ‑wɛe ‑a ‑ke ɛ ’je i ‑te ’de ɛɛ’ tʋ"bodɛ ’ʋn, ’de ‑a ‑je ɛɛ’ ’diwɔnmɔa’ "jriɛ‑ ’jee‑. ‑Bo ‑a ‑juo Kea a, ‑mɛ ɛɛ muɛ ɛɛ’ "ikmasʋn tooa’, ɛ ’je ‑aʋn dɩ ‑kɔan ‑tɩ’ ‑ɩ ‑sia dɩ ‑wee’ "nyɩ ‑wɛe ‑a ‑je ’kmʋ nɩ, ’de ‑a ‑je ɛɛ’ ’tʋn nʋ‑tɩ nʋ. Dɩ ɛ "sia ’nynɩ ‑wɛe ɛ ’na ɛ ’je ‑a "nyɩ ’de ɛ, ka ɛ nʋa ‑aʋn ɩa’ "nyɩ sʋn, ’kamɔ ‑nao. ‑Bo ao ’je ɩa’ dɩ tu ‑wɛe ’kmʋ "kpeidɩ ‑ɩa muɛ isɔan’ ao ’je ɩa’ ’tʋn kwa ‑sɔn ‑saa. ‑Bo ɛ nɩ kan’ ‑wɛe ao ke Kea ’a nɩsʋn ’je due’ nɩ‑.

⁵’De ɛɛ’ ‑tɩ’ ’ʋn mɔ ‑wee’ ɛ, ao "duo aoa’ ’kpɩ ‑wee’ ’ʋn ‑wɛe ’bo aoa’ Sesi Klisɩ ‑kwlɩ" ‑tea’ "kpei ɛ, ao ’je ’o kplɩn ’dɔe nʋa’ po. ‑Wɛe ’bo aoa’ kplɩn ’dɔe nʋa’ "kpei ɛ, ao ’je ’o dɛ "jriijua’ po. ⁶Ao kpʋʋn aoa’ ‑cɛ" i, ‑wɛe ’bo dɛ "jriijua’ "kpei, ao ’je ’o ‑cɛ" "wɔin ’bɛɛa’ ke pɛe ikua’ po. ‑Wɛe ’bo ‑mɩ "kpei, ao ’je ’o Kea wɔn ’jea’ po. ⁷Ɛ se Kea wɔn ’jea’ ‑mɛɛ’ ’sʋ nɩ‑, ao kma aoa’ de’di ‑wi" ’a ‑tɩ’ ‑wɛe ’bo ‑mɛ ’de ɛ, ao ’je nyʋ ’a ‑tɩ’ kmaa’ ‑ɛ ‑wlʋa ’de Kea ’ʋn to‑ ’de nyʋ ‑wee’ ‑pee. ⁸Kplɩn ’dɔe ‑ɩ ‑nɩa nʋ ka ’bo Kea ’a ‑jei", ɩmɩ ‑nao. ‑Bo aoa sea ɩa’ kplɩn tu nʋ jeejee ɛ, ‑mɛ aoa’ ’kmʋ se idooa, ao se foo" ’ʋn ‑tei, dɩ ‑wee’ "klein a muɛ aopʋ kwa ’wɔan’, ‑wɛe ao ’je ‑aa Tʋ"bo Sesi Klisɩ juo‑ sɔɔn‑ sɔɔn‑, ao ’je nya mu. ⁹’Kaa nyɔ ‑mɩ ’a kplɩn tu sea ’e ’ʋn nɩ ɛ, ‑mɛ ɔɔ’ ’je ’e nyai, ka "dɔi nɩa, ’kamɔ ɔ nɩ‑. Ɔɔ’ dɩsaɩn ‑nɩa tɛin" ka Kea ‑kwɩ’ ɛ, ɔ "mae’ ɩ o.

¹⁰Ɛmɛ ‑tɩ ’ma de’di ‑wi", ao ’je aoa’ ‑cɛ" ikpʋʋn‑, ‑wɛe ao ’je ɩa’ kplɩn tu nʋ. Ɛmɛ ‑toɛ ka Kea ’da aopʋ ‑wɛe ɛ ‑teea ao kpɔi" ɛ. ‑Bo aoa sea kan’ nʋ ɛ, ‑mɛ ao se ’de dɛsaʋn ’di ’kpai ’nɔ ’kmʋ. ¹¹’Kamɔ ‑bo ao nʋ, ‑wɛe Kea ’je ao ‑kɩn kwa ’wɔɔn‑, ’de ao ’je ’e Kea ’a kɛɛma’ ‑kwlɔ ’di pa. ’Bomɔ ‑aa Tʋ"bo ke ‑aa ’Pʋʋi Sesi Klisɩ a ’wlʋʋ ’nynɩ.

¹²’Ma ’cɛ, ’ɩn ’je kan’ ’mɛ, dɩ ’ma ’tmʋa ‑ta ao juɩ’ sese, ao nyniɛ i ’de ɩ ’ʋn ‑sisi’, ¹³’kaa ‑ta ’ɩn nɩɩa ’nɔ ’kmʋ "kpei ke ɛ, ’ɩn ’je aopʋ ‑tɩ’ ‑kwlʋ o poo ‑o jeejee, ‑wɛe ao je i "mae’‑, ¹⁴dɛ‑nʋɛ’ nɔ" ‑ɛ ‑sia ’o ‑wɛe ’ɩn ’jea ’kmʋ ’wlʋ, ɛ se "i tɛn ’bode, ’kamɔ ‑aa Tʋ"bo Sesi Klisɩ ‑sɛ ’kwla ’de ’ʋn ‑pee. ¹⁵Ɛmɛ ‑tɩ ‑ta ’ɩn nɩɩa ’kmʋ ke ɛ, ’ma "duo ’ma nɔ" ‑wee’ "klein ’ʋn ’de ’ma sie aopʋ wlu o, ‑wɛe ‑bo ’ɩn ’wlʋ ’kmʋ ɛ, ’de ao ’jɩ ‑kwlʋ o po jeejee.

Nyʋ ‑jeea’ Klisɩ ’a ‑sɔn’ "jriɛ‑ ɛ

¹⁶Tɔ’ ‑o, tɛin" sese ɛ, ‑a ‑tmʋʋ’ aopʋ ’mɛ ‑a ‑na ‑aa Tʋ"bo Sesi Klisɩ a muɛ de jia’, ɔ ke ɔɔ’ "ikmaa’ ke. Ɩa’ wlu tu ɛ, ɩ se "nɩɩa ‑ɩ ‑wlʋa ’de nyiɔ ’ɔ tɔ’ ’ʋn nɩ‑, ’kaa ɔ to ɔɔ’ "ikmaa’ ’mɛ ‑aa ‑cɛ" ’kpa je ɛ "jriɛ‑ ’jee‑. ¹⁷Kea ‑nɩa ɔ "Bo, ɛɛ’ ‑cɛ" ‑tu" ɔ ‑cian" "kpei ‑wɛe ‑ɛ ‑bɛɛ’ ɔ "i. Kea ‑bɛa "i ‑ɛ ‑sia dɩ ‑wee’, ‑ta ɛ ’tmʋʋa ɛɛ’ wlu tu ’wɩ jrɛ’ o ɛ, ‑a ‑je ɛɛ’ ‑ta ’mɛ. Ɛ wlu’ ka ɛ ’naa : "Ju ‑nɔ, ɔ nɩɛ ’ma ‑tɩ’ kmaju ‑o, ’de ɔ ’ʋn mɔ ’ma ’mʋa‑tɩ ‑wee’ nɩ‑. ¹⁸‑Aa ‑cɛ" ’kpa ’wɔn wlu ‑nɛ ’mɛ, ‑ta ɔ ke ‑a ‑nɩɩa ’bo Kea ’a crʋ "kpei ɛ, ’bomɔ wlu ‑nɛ ’wlʋʋ ’de jaʋn ’di ‑wɛe ‑a ‑wɔn ɛ.

¹⁹’Bo ‑mɛ ’de ɛ, dɩ ‑a ‑jea ‑wɛe ‑a ‑wɔan ke ‑jɩ Kea ’a wlu ’kwajaaʋn ’tmʋa sese ke, ɩ nɩɛ tɔ’ ‑o ‑cɛɛn’‑. Wlu ʋʋ ’tmʋa aoa ɩa tɔ’ o sie ɛ, ‑mɛ nmɔ "jrii. Ka nɛbi a wan ’de kwie ’di mamaʋ ’sʋ ‑sɔn’ ɔ ‑sɩan, ’kamɔ ɩ nɩ‑. ’Kaa Klisɩ ka ‑klae" jrʋ a ’wlʋa ‑ɔ ‑nɩa kan’, ‑sɔntɩ ɔɔ mua ’de ao pɛe o paa’ a, ’de aopʋ ’ʋn a muɛ i iflɔan’, ‑wɛe ao ’je ’e dɩ ‑wee’ "klein ’dei ’wɔn. ²⁰Dɩ ao ’jea ‑kwlʋ o sie ’pepe, ɩ ka : ɛmɛ ‑nɩ wlu "klein Kea ’a wlu ’kwajaaʋn ’tmʋa ’nɔ ’sbɛ ’di ɛ, ʋʋ se ɩa’ wlu tu ’bo ʋʋa’ ‑cɛ" ‑kwlɩ" ‑sa, ²¹’de wlu Kea jaa nyʋ ’kwa, ɩ se ’e nyiɔ ’ɔ ‑kwlʋtɩ ’ʋn ’wlʋ due’, ’kaa Kea ’a ‑Suu ‑kwɛai mɛ ‑ɛɛ po ʋʋpʋ ‑je o, ɛmɛ ‑tɩ nyiɔpʋ ’bɛɛ‑ ʋʋ ’je wlu ‑wlʋa ’de Kea ’ʋn ’tmʋ.

Nyʋ ‑ʋʋa ‑tɔɔa nyʋ sɩ‑tɩ ɛ

¹Ka sɩ ’tmʋʋn nɩa ’e Suifʋ‑wi" "klu tɛin" ‑wɛe ʋʋa ’daa‑ ʋʋa’ ‑cɛ" Kea ’a wlu ’kwajaaʋn ɛ, ’kamɔ sɩ ’tmʋʋn a mu ’de aopʋ "klu nɩa’ ‑ke, ‑wɛe ʋʋ ’je ʋʋa’ ‑cɛ" kɛ’ wɔ ‑saʋn ’daa‑. Dɩ ‑ɩ sea tɔ’ nɩ ɛ, ɩmɩ ʋʋa mu nyʋ tɔɔa’ ‑wɛe ʋʋ ’je ʋʋa’ "jru ‑jei" ‑saa. Nyʋ ’blei ‑jɔ ‑seia ʋʋpʋ ɛ, ʋʋa muɛ ‑mɔ ’ɔ ‑tɩ’ o ’bɔa’ ‑wɛe ʋʋ ’je ʋʋa’ ‑cɛ" Kea ’a ’pee "jru ja‑ de ’bɔɔ‑ nɔ". ²Nyʋ ‑tuu"‑tuu a muɛ ’bo ʋʋa’ kplɩn saɩn ’de blaa’ ‑wɛe ’de ʋʋa’ nʋʋkplɩn ’a ‑tɩ’ ’ʋn ɛ, nyʋ ’je tɔ’ ‑tɩ ’a ‑jeblʋ wlaa‑. ³Sɩ ’tmʋʋn ‑nʋ, ʋʋa muɛ ’wɛi ’je ‑tɩ ‑tu" ’a ’sʋ ʋʋ ’je aopʋ sɩ wɔn dii‑, ‑wɛe ʋʋ ’je aopʋ ’ʋn dii‑. ’Kaa ʋʋa’ ’pee ’jeeɛ sese, ɛɛ’ ’o nynia’ se ’ʋn ‑kwlei ’de ʋʋ ‑teɛ isɔan’ ’a kein"ke.

⁴Dɛɛ‑tɩ ’ɩn ’da kan’ a, ɛmɛ ‑nɩ Kea "srɛi. Ɛɛ’ "soa‑wi" ‑nʋa dɛsaʋn tɛin" ɛ, ɛ se ʋʋpʋ "i "tai‑, ’kaa ʋʋ pooɛ "cɩn sɩn’ ‑wɛe ɛ po ʋʋpʋ ’de kwie blo’ ’di ’de "bie‑gbau" klaa" ’di, ‑wɛe ʋʋ ‑te i ’demu, ’de ʋʋa fuo ɛɛ’ nyʋ ’a ’pee ’jewɩ. ⁵’De nyʋ ‑ʋʋ nʋa dɛsaʋn tɛin" ɛ, Kea se ʋʋpʋ "i "tai‑, ’kaa ɛ dbaa "ni klaa" ‑wɛe ɛ ’plee‑ ’kmʋ "kpei, ’de ɛ ’dba dɛsaʋnʋʋn ‑wee’ "klein. ’Kaa ɛ ’pʋʋɛ Noe ke ɔɔ’ ’cɛ ‑mɛ" ’sɔn ke, dɛ‑nʋɛ’ ɔ nʋɛ "isrɛdɩ ’bo Kea "juɔi. ‑Ta nyiɔpʋ a nʋʋa dɩsaɩn ɛ, ɔ ’tmʋʋ‑ ʋʋpʋ ’mɛ, ɔ ’na : Dɩ aoa nʋa ɩ nyniɛ "jrii, ao ’bɔ ɩ o, ao nʋ dɛ ’dɔe. ⁶’Bo ‑mɛ ’de ɛ, Sodɔm ke Gomɔɔ ‑ɩ ‑nɩa dɛsaʋnʋ ‑kwlɔ ɛ, Kea ’wlʋ ɩa’ ’pee ’mɛ ‑ke, ɛ nʋɛ nɛ ‑wɛe ɛ ‑sa ɩa’ ‑kwlɛ ‑tu i. Nyʋ ‑ʋʋa’ ’je ɛɛ’ wlu wɔn ’de ‑sɩanwɩ ’di ɛ, dɛ ‑ɛɛ mua ʋʋpʋ "jrii nʋa’ mɛ ‑ɛɛ sʋn ɛ toa ’o ’mʋa‑. ⁷’Bo ɩa’ ‑kwlɛ ‑tu ’di ɛ, Lɔtɩ mɔ ‑srɛi", dɩsaɩn ʋʋa nʋa ’mʋa‑ ɩa "kaeɛ ɔ "jrii. Ɔɔ’ ’sʋ mɔ Kea ’pʋʋ‑. ⁸Dɛ‑nʋɛ’ ɔmɔ ‑ɔ ‑nɩa dɛ ’dɔenʋi ‑wɛe ‑ɔ ‑tia" ’bo ʋʋpʋ "klu ɛ, ‑bo ɔɔ sea ʋʋa’ kplɩn saɩn "jriɛ‑ ’jee‑, ‑wɛe ɔɔ sea ʋʋa’ wlu saɩn ’wɔn jeejee, ɩa kpʋn ɔ ‑kwlʋ ’sʋ ɔɔ’ ’mɩ a cɛn mlɛun" ’de ɔ ’di, dɛ‑nʋɛ’ ɔ ’srɛi".

⁹Nyʋ ‑srɛai" ɛ, Tʋ"bo juo ʋʋpʋ ’a seie ka ’mɛ ’de ’kle ’kwa. ’De ‑ta ɛ ’jea ’diwɔn nyniʋn ‑te’ ‑wɛe ɛɛ’ ’pee ’jea ʋʋpʋ kpʋn nyʋ ‑wee’ ’a ’pee ’jewɩ o ɛ, ɛ juo ’bo ‑mɔ ’mɛ. ¹⁰Nyʋ ɛɛ’ ’pee tu ’jea kpʋn mɔ ‑wee’ ɛ, ɛmɛ ‑nɩ nyʋ tɔ’ saɩn nɩa ’de ’ʋn ‑wɛe ‑ʋʋa ‑flɛɛan’ Kea ’a "ikmaa’ a, ’de ‑ʋʋ ‑na ‑ʋʋ se ɛ wɔn ’jei ʋʋpʋ ‑o. Ʋʋ kuɛ "jru, ʋʋa ’bɛɛ‑ ʋʋa’ ‑cɛi", ʋʋa’ ’je nyɔ "o nyɔ jrɔ’ ’ɔ wlu dɛ ’ʋn. Nyʋ klae" ‑ʋʋ ‑nɩa wɔn ’je ka a, ʋʋa’ plee ʋʋpʋ, ʋʋa’ wɔn o toa ’a faʋn ’a nʋ ʋʋpʋ. ¹¹Kea ’a "soa‑wi" ‑blea ’kpɩ ‑wɛe ‑ʋʋ ‑kmai", ʋʋ ‑sia sɩ ’tmʋʋn ‑nʋ ɛ, ʋʋ ’bɛɛ‑ ʋʋ ’je ʋʋpʋ wlaa‑ ’de‑, ’kaa ‑wi" ‑mʋ ’a nʋ kan’. Ʋʋa’ wluɛ ʋʋpʋ ’dei ’bo Kea "juɔi. ¹²’Kaa ʋʋa’ nyʋ tu ɛ, dɩ ʋʋ sea ’e ’de juo ɩmɩ ʋʋa ’tmʋ wlu saɩn ‑pee. Ʋʋa’ ‑cɛ" ’ɛ tɔ’ ‑ɔ po ʋʋpʋ ‑je o. Ka ’kwla ’dinmi ‑sea tɔ’di nɩ a nʋa, ’kamɔ ʋʋa nʋ. Ʋʋa muɛ ’mɛa’ ka ’kwla ’dinmi a mua ’mɛa’ ‑ke ɛ. Ʋʋa’ ‑cɛ" ’kpa ’a dɩsaɩn mɩ ‑ɩa mu ʋʋpʋ i‑saa’. ¹³’Kle ʋʋa mua ’jea’ ɛmɛ ‑ɛɛ mu ’kle ʋʋ ‑tua" nyʋ ’a ‑kei" nɩa’. Dɛ ʋʋpʋ nɩa "i ɛ, ɛmɛ ‑nɩ ʋʋ ’je ʋʋa’ ’tʋn nʋ‑tɩ saɩn nʋ ’jrʋ ‑gbao. Ʋʋa’ ’de aopʋ "klu nɩa’ ’bleɛ ‑tɩn’. Ʋʋ ke aoa po sʋn ‑tadue ’mɛ kpɩɩn‑, ’kaa ʋʋ pooɛ "jri de ‑wɛe ʋʋa poo aopʋ ’srɛ i. Ɛmɛ ‑ɛɛ nʋ ʋʋpʋ ’tʋn. ¹⁴Jɛi" ’jejriɛ ’ɛ ’sʋ ‑nɩ ’e ʋʋpʋ ’kʋn, ʋʋ se dɛsaʋn nʋa’ o ’bɔ due’. ‑Bo ʋʋ ’je nyʋ ‑ʋʋa Kea ’a ‑jei" naa’ sea iku ɛ, ʋʋa "tuɛn ʋʋpʋ ’de dɛsaʋn ’di. ’Wɛi ’a ’tʋn ’bleɛ ʋʋpʋ kʋɔn ’ʋn. Ʋʋa’ nyʋ tu ɛ, Kea ’a ’daɩn a muɛ ʋʋpʋ kpʋan’ ka "o ka. ¹⁵Ʋʋ ’wlʋ ’bo ‑je ‑cɛɛn’ "i ’mɛ ‑wɛe ʋʋ "maa ʋʋa’ ‑cɛ". Bosɔ ’ɔ "ju Balaam ‑ɔ ‑kma ’wɛi ’a ‑tɩ’ ‑wɛe ‑ɔ ‑wɔan dɛ ‑nyniia "jrii ’a nʋ‑tɩ tɛin" ’de ɛ, ɔmɔ ‑ɔɔ ‑kɔ ʋʋ bla ’o ’de. ¹⁶Dɛ ɔɔ’ Balaam ‑tu sea Kea wɔn ’je ɛ, ɛmɛ ‑nʋɛ’ ‑wɛe soofae’ ‑sea’ wlu ’ble wluu ɔ kwa, ka nyiɔ ɔ wlua ‑wɛe ɛ ‑cɛ’ ɔ "bli ’bo ‑jei". ’De ɛ kaan ɔɔ’ Kea ’a wlu ’kwajaai tu ‑je de ‑wɛe ɔ je kpɛɛn’ dɩ ‑cɩɛi" nʋ.

¹⁷Aoa ’jee, nyʋ ‑a tɔɔa nyʋ sɩ‑tɩ ɛ, ʋʋ se kpɔ ’ble. Ka "ni a ma ’o "kao‑ wɔn ɛ, ’kamɔ ʋʋpʋ nɩ‑. ’De ka poɔ’ ɔ sia "ni ’de ɛɛ’ dba, ’kamɔ ʋʋpʋ nɩ‑. Ʋʋa’ ‑teɩn nmaeɛ’ ’de kwie jre ’di, ’demɔ ʋʋ ’je mu. ¹⁸Dɩ ʋʋa nʋa see ɛ, ɛmɛ ‑nɩ ’de kpɛɛn’ ‑tɩ ’tmʋa’ ’di ’bo ʋʋa ’bɛɛ‑ ʋʋa’ ‑cɛi". Nyʋ ‑ʋʋ ‑wlʋa ’de nyʋ ‑se’ Kea juo "klu ‑wɛe ‑ʋʋa naa Kea ’a ‑jei" dee ’ʋn ɛ, ʋʋ ‑pʋ ʋʋa ‑pɔn ʋʋ ’je ’bo Kea ’a ‑jei" ‑sa. Ɛmɛ ‑tɩ ʋʋ ’blee‑ ʋʋ ‑pʋ wɛ‑ɛ" o ‑wɛe ʋʋ ’je ’o ʋʋ ‑pʋ ’a nyiɔtɔ’ saɩn ’de bla. ¹⁹Ʋʋa ‑teɛ ʋʋpʋ pɛe ’dii, ʋʋ ’na : Aoa muɛ aoa’ ‑cɛ" ‑pee ‑tea’. ’De ‑mɛ ’kamɔ ʋʋa’ ‑cɛ" ’kpa ’a kplɩn saɩn ‑jea ʋʋ i ‑sa a, ʋʋ nɩ ɩa’ kʋɔnpʋ‑, ’de ’kamɔ ɛ nɩ dɛ "o dɛ ‑sia ‑ʋn wɔn ɛ, ɛmɛ ‑ble ‑ʋn kʋɔn ’ʋn.

²⁰Tɔ’ ‑o, ‑bo nyɔ juo Sesi Klisɩ ‑nɩa Tʋ"bo ‑wɛe ‑ɔ ‑nɩa Nyʋ’pʋʋi ɛ, ‑mɛ ɔ ‑saa ’kmʋ "kpeidɩ ‑ɩa kpʋʋan nyʋ ‑flɛn" kwa ‑sɔn. ’Kaa ‑bo ʋʋ "tai‑ ʋʋa’ ‑cɛi" ‑wɛe ’kmʋ "kpeidɩ ’je tʋ ’a "jru kpa ’bo ʋʋpʋ "kpei ke’wlɛ ɛ, ‑mɛ ʋʋa’ tɛin" ‑nɛ "paa’ ɛ je ʋʋa’ de’bɔɔ‑ ‑nɛ ‑sii. ²¹’De ‑bo ɛ nɩ kan’ ‑mɔ ɛ, ‑mɛ ʋʋa’ ‑ɩn se "isrɛ ‑jeblʋ juo "paa’, ɛ je ‑ɩn ‑juo ɛ ‑wɛe ‑ɩn ‑wlʋ ’bo Kea ’a kɛ’ ‑sɔn ‑sii. ²²"Nɩɩ ‑aa nyʋ ‑cɔʋn’ poa tɛin" ’tmʋɛ tɔ’ ‑tɩ, ɩ ’naa : Dɩ ‑gbe’ ‑kwla’ ɩmɩ ɛ ’bɔɔ‑ de ɛ di. ’De be" nyʋ jrea, ɛmɛ ‑biie" ɛɛ’ ‑cɛ" ’pɔɔ "jrii. Ka ʋʋ nʋa ‑ke, ’ka ‑nao.

Tʋ"bo ’a deji‑tɩ

¹’Ma ‑tɩ’ kmaʋn, ’ma aopʋ ’a ’sbɛ ‑jei" poa ’a kpɛ ’sɔɔn ‑nɛ ka. Dɩ ’ɩn ’crɩa ’de ’ma ’sbɛ ‑nɩa kpɛ ’sɔɔn ’di ɛ, ɛmɛ ‑nɩ, ’ɩn nɩɛ "i ’ɩn ’je aopʋ ‑tɩ’ ‑kwlʋ o poo‑, ’de ao ’bo i "mae’‑ ‑wɛe aoa’ tɔ’ ’je ’pepe nɩ‑. ²Dɛ ’ma ‑pɔan i ɛ, ɛmɛ ‑nɩ ao ’bo wlu Kea ’a wlu ’kwa jaaʋn ’tmʋa tɛin" o "mae. Kɛ’ Sesi ‑nɩa ‑aa Tʋ"bo ‑wɛe ‑ɔ ‑nɩa ‑aa ’Pʋʋi "nyɩa ao, ‑wɛe ɔɔ’ dboʋn tɔɔa aopʋ ɛ, ao ’bo ɛ o"mae ‑ke. ³Dɛ ‑kɔan ‑tɩ’ ‑wɛe ao ’jea ‑kwlɩ" ’blee‑ ɛmɛ ‑nɩ ’de de ’bɔɔwɩ o ɛ, nyʋ ‑nʋa ʋʋa’ ‑cɛ" ’ɛ ’tʋn nʋ‑tɩ ɛ, ʋʋpʋ ‑a mu jia’ ‑wɛe ʋʋ ’je aopʋ‑ wlaa‑. ⁴Ʋʋa muɛ wlua’ ka ’de ao ‑pee : Aomɔ se ’na Sesi Klisɩ ’na ɔɔ jiɛ dee ? Ɔ ’de ɛ‑ la‑ ? ‑A "bo ‑wi" ‑fua ɔɔ’ dejia’ ‑ke ’de ɛ, ‑wi" ‑mʋ ’mɛɛ sese, ‑mɛ ɔ se ji ke. Dɛ ‑tba’ ’de sese o ɛ, ka ’kmʋnɩa ’de ɛ, ’kamɔ ’kmʋ nɩ‑, dɛ jrɛ’ se fai" pooɛ ke ! ⁵Nyʋ ‑a wlua kan’ ʋʋa’ nyʋ tu jʋɩ’ ’pepe ka Kea wlua ‑wɛe jaʋn ke ’blʋa‑ ‑nʋʋa, ‑wɛe ’blʋa‑ ke "ni poa ‑paʋn, ’de ka Kea cɛɛan ’de "ni ’ʋn ‑wɛe ɛ nʋa ’blʋa‑ a, ’kaa ʋʋ se ɛ "inɩ ʋʋ ’jɩ ‑kwlɩ" ’blee‑. ⁶Wlu due’ ‑nɛ, ɛmɛ Kea nʋ ‑wɛe "ni ’plee‑ ’kmʋ ‑nɩa tɛin" "kpei ’de ɛ sɔn i. ⁷’Kaa Kea ’a wlu due’ ‑nɛ, ɛmɛ ‑na ’blʋa‑ ke jaʋn ‑a ‑jeea "jriɛ‑ ’de ‑sɩanwɩ ’di ɛ, ɩ ‑teɛ nɛ ’ɛ ‑tea’. Ɩa muɛ i ‑tea’ mamaʋ ’sʋ ɩ ’je nyʋ ‑wee’ ’a ’pee ’jewɩ jɛɛ‑. ’De ɩa’ ’wɩ tu ’di ɛ, Kea a muɛ nyʋ sea ɛɛ’ wlu tɔ’ ’ʋn ’je ’a ‑ma" i‑saa’.

⁸’Ma ‑tɩ’ kmaʋn, dɛ ‑jɛ ‑kɔan ‑tɩ’ ‑wɛe ao sea o "mae’ i ɛ, ɛmɛ ‑nɩ ’bo Tʋ"bo "juɔi ɛ, ’wɩ due’ ‑kɔ’ ‑sɩn ’a "wlu due’ ’de ‑sɩn ’a "wlu due’ ‑kɔ’ ’wɩ due’. ⁹Tʋ"bo ’a ‑cnɩ’ ’de dɩ ɛ ’tmʋa ’a nʋʋ ‑tɩ ’ʋn ka nyʋ jrʋ’ a naa tɔ’ i ɛ. ’Kaa ɛ kuuɛ tɔ’ i ke ’de aoa’ ‑tɩ’ ’ʋn, dɛ‑nʋɛ’ ɛ se ɛ "i nɩ nyɔ jrɔ’ ’je isɔn‑. Dɛ ɛɛ ‑pɔan i ɛ, ɛmɛ ‑nɩ nyʋ ‑wee’ "klein ’je ʋʋa’ dɩsaɩn "i juo‑ ‑wɛe ʋʋ ’je ’de ɛ o "biie‑.

¹⁰’De ‑mɛ ’kamɔ Tʋ"bo ’a ’wɩ a mu nyʋ "jru ‑tiia’ ka "jrii ’a ‑kwlɔ paa’ nɩa. ’De ɛɛ’ ’wɩ tu ’di ɛ, jaʋn a muɛ isɔan’, ɛɛ’ kwiewlu a muɛ faʋn ’blea’, ɛ ’je dɩ ‑wee’ ‑sii. Nɛ ɛ muɛ dɩ ‑nɩa ’de jaʋn ’di ‑wee’ sian’ ‑wɛe ’blʋa‑ ke dɩ "klein ‑nɩa ’de ’blʋa‑ "kpei ’je isɔn ‑ke. ¹¹‑Jɛ dɩ ‑wee’ ’a isɔnsʋn a mua kan’ ‑mɔ nɩa’ ’ja a, ‑mɛ ka ao ’jea na ao juo kan’ ‑mɔ ’mɛ. Ao "nyɩ aoa’ ‑cɛ" ’ɛ ’kmʋ Kea ‑wɛe ao ’je ɛ wɔn ’je ’de dɛ "o dɛ ‑wee’ ’ʋn. ¹²‑Ta ao nɩɩa Kea ’a ‑nɩ ’wɩ ‑nɩa nynia’ fua’ a, ao "duo ’kpɩ ’ʋn, dɩ "klein ao ’bɛɛa nʋa’, ao ’jɩ nʋ ‑wɛe ɛɛ’ ’wɩ tu ’je nyni ‑too"‑. ’De ɛɛ’ ’wɩ tu ’a ‑tɩ’ ’ʋn, nɛ ɛ muɛ jaʋn dia’ ‑wɛe dɩ "klein ‑nɩa ’de ɛ ’ʋn ɩ ’je nyɛi ’de ɩ ’je isɔn‑. ¹³’Kaa Kea cɛn wlu ‑tie", ɛ ’naa ɛɛ muɛ jaʋn dee ke ’blʋa‑ dee nʋa’ ‑wɛe "isrɛʋn ’a ’sʋ ’je ’bo ɛ "kpei "ti. Ɛmɛ ‑aa fuo.

¹⁴Ɛmɛ ‑tɩ ’ma ‑tɩ’ kmaʋn, ‑ta ‑a ‑nɩɩa ɩa’ dɩ tu fua’ a, ao kpʋʋn aoa’ ‑cɛ" i ‑wɛe ‑sɔntɩ Tʋ"bo a muɛ de jia’ a, ’de ɔ ’bo aopʋ ‑kɔ ‑pʋn" jeeɛ, ‑wɛe pɛe ’a blua’ ’je ’o ao ke Kea ’nynɩ nɩ‑. ¹⁵Ao poɛ ‑kwlʋ o, dɛɛ‑tɩ Tʋ"bo sea de ji ke ɛ, ɛmɛ ‑nɩ ɔ nɩɛ "i nyʋ ’je ’pʋ. ‑Aa de’di Pɔo ‑ɔɔ ‑tɩ’ ‑a ‑kma, ɔ ’tmʋ ɩa’ dɩ tu ’mɛ ’de ao ‑pee ‑ke. Kea mɛ ‑po ɔ tɔ’di, ‑wɛe ɔ ’crɩ ɩa’ wlu tu ’de ’sbɛ ’di. ¹⁶’De ɔɔ’ ’sbɩ ‑wee’ ɔɔ ’crɩa ’di ‑bo ɔ bla ɛɛ’ dɛ tu ’a ‑tɩ’ "i ɛ, ka ɔɔ ’tmʋ ɩ, ’kamɔ ‑nao. ’De wlu jrɩ’ ‑nɩ ’e ‑wɛe ‑ɩa ’mii ’wɔan’ nɩ ’kle. Nyʋ sea tɔ’ ’ble ‑wɛe ‑ʋʋa’ ‑kwlea wlu ‑kwlin ‑saatɩ ɛ, ʋʋa poo ɩ fai", ka ʋʋa pooa wlu jrɩ’ ‑crɩɩa ’de Kea ’a ’sbɛ ’di fai" see ɛ. Ʋʋa’ nyʋ tu a ja ʋʋa’ ‑cɛ" Kea ’a ’pee "jru.

¹⁷’Kaa ’ma ‑tɩ’ kmaʋn, aopʋ mɔ ɛ, nyʋ ‑saa aopʋ fɛn’ ’mɛ sese, ɛmɛ ‑tɩ ao ’je aoa’ ‑cɛ" ’ɛ ‑tɩ’ ‑tu" ‑wɛe nyʋ ‑ʋʋa’ ’jea Kea ’a wlu wɔn je aopʋ ’a "jru ‑jei" ‑saa, ’de ʋʋa’ sɩ je ɛ nʋ ‑wɛe ao je ’bo ʋʋpʋ ’a ‑kɔ ’de bla. ¹⁸Dɛ ‑jɛ ao ’jea nʋ ɛ, ɛmɛ ‑nɩ ao bla ’bo ‑aa Tʋ"bo Sesi Klisɩ ‑ɔ ‑nɩa ‑aa ’Pʋʋi ’a ‑kɔ ’de, ao ’je nya mu, ‑wɛe ao ’je ɔ juo sɔɔn‑ sɔɔn‑, ’de ɔ ’je aopʋ "diwan po. Ka ‑a ‑bɛɛa’ ɔɔ’ ’nynɩ "i ’de ‑sɩanwɩ ’di ɛ, ‑a ‑bɛɛ’ kan’ ɔɔ’ ’nynɩ "i mamaʋ ’sʋ. Ɛ nɩ kan’ jeejee !