1 Tesalonikɩ

"I‑saasbɛ Pɔo pooa Kea ‑gbu ‑nɩa ’e

Tesalonikɩ

‑jei" ɛ

’Jewlu‑

¹Tesalonikɩ ‑kɔʋn ‑ɔ ‑nɩa Kea ‑ɛ ‑nɩa ‑a "Bo ke ‑aa Tʋ"bo Sesi Klisɩ ’a nyʋ ɛ, ’mɔ Pɔo ke Silasɩ ke Timote ke ‑apʋ ‑ɔɔ ja aopʋ ’sbɛ‑.

Kea po aopʋ "diwan ‑wɛe ɛ ’je aopʋ pɛe ’a blua’ "nyɩ.

Tesalonikɩ‑kɔʋn ’a Kea ’a wlu kpʋnsʋn

²‑Aa poɛ ao ‑wee’ "klein ’a Kea ’sɛ‑ jeejee. ‑Bo ‑aa sea Kea bae ɛ, ‑aa cɛɛn aopʋ ’nynɩ ’de ‑aa baewlu ’di, ³dɛ‑nʋɛ’ ka ao ’jea Sesi ’a ‑tɩ’ tɔ’ ’ʋn ’sʋ aoa nʋa dɩ ’dɔe o, ’de ka aoa’ Kea ’a ‑tɩ’ kmaa’ nʋɛ ’sʋ aoa nʋʋa de’di ‑wi" "juɔi o, ’de ka ao sea ‑aa Tʋ"bo Sesi Klisɩ tɔ’ "i ‑sa a, ɩmɩ ‑a po ‑kwlʋ o, ‑wɛe ‑aa po ‑a "Bo Kea ’sɛ‑. ⁴‑Aa de’di ‑wi", ‑a ‑je kan’ ’mɛ Kea kma aopʋ ’a ‑tɩ’, ɛmɛ ‑tɩ ɛ ‑tee aopʋ kpɔi" ‑wɛe ao ’je ɛɛ’ ’cɛ nɩ‑. ⁵‑Ta ‑aa ‑tmʋa ‑pɔia" ‑tɩ ’de aopʋ ‑pee ɛ, ɛ se ’de ‑aa wlu ’a ’sʋ ’ʋn nɩ‑, ’kaa Kea ’a ‑Suu mɛ ‑ɛ ‑nɩ ’de ‑a ’de, ‑wɛe ‑ɛɛ ‑nyɩ" ‑a "ikmaa’, ɛmɛ ‑tɩ ‑ta ‑a ‑nɩɩa ɛɛ’ wlu tu ’tmʋa’ ’de ao ‑pee ɛ, ka ɛɛ mua aopʋ ’pʋʋa’ see ɛ, ‑a ‑je kan’ ’mɛ ’pepe. Ka ‑a ‑jua na ka ’de aopʋ "klu ’de aoa’ ’dɔe ’a ‑tɩ’ ’ʋn ɛ, aoa’ ‑cɛ" ’kpa juɩ’.

⁶Aopʋ mɔ ‑ke ɛ, ao bla ’bo ‑a ‑ke Tʋ"bo ’a ‑kɔ ’de. Ao ’jea Kea ’a ‑tɩ’ tɔ’ ’ʋn ’ɛ, ɛ se ’wɩ nʋ ’sʋ nyʋ je aoa’ ’kle ‑tua" ‑tee. ’Kamɔ ao nɩ ’de ’kle ’di kan’ ’sʋ Kea ’a ‑Suu "jii‑ aopʋ ’mʋa‑ pɛe o, ɛmɛ ‑tɩ ao se wlu’ ’wlʋ. ⁷’De ɛɛ’ ‑tɩ’ ’ʋn ɛ, Kea ’a ‑jei" naaʋn ‑nɩa ’de Masedoanɩ ke Akai ‑wee’ bla ’bo aoa’ ‑kɔ ’de. ⁸Tɔ’ ‑o ’ma ’cɛ, Sesi ’a ‑tɩ’ ‑ɩ ‑wlʋa ’de aopʋ o ɛ, ɩ se ’de Masedoanɩ ke Akai ’a ’sʋ "kpei "tii‑, aoa’ Kea ‑kwlɩ" ‑tea’ ’a ’nynɩ ‑kɔ’ ’blʋa‑ ja, ɛmɛ ‑tɩ ɩa’ ji ’de ‑apʋ mɔ ’wɔn la ’bode. ⁹Ka ‑a jia ’de aopʋ "bli ‑wɛe ao kpʋʋn ‑a sɩn ’sɔɔn ɔ, nyʋ ‑wee’ "klein a ’tmʋ ɩ ‑ta ‑wee’. Ka ao ’wɔan Kea ’a wlu ’sʋ ao ’bɔa kɔin "juɔi ‑gbɛɛ’ ‑tɩ ’de ao "biia ’de ’kmʋnɩ Kea ‑nɩa tɔ’ Kea o, ‑wɛe aoa ‑gbɛɛ’ ɛ "juɔi ɛ, ɩ "siiɛ ’blʋa‑ "i. ¹⁰Dɛ ʋʋa ’tmʋa ’de ‑a ‑pee ‑ke ɛ, ɛmɛ ‑nɩ aoa fuɛ Kea ’a "Ju Sesi ɛ ‑sa "kunyɩɔ’ ’de ‑ɔ jia ’kmʋ de ɛ. Ɔmɔ ‑ɔɔ mu ’e jaʋn ’di ’wlʋa’ ‑wɛe ‑ɔ ‑je ‑a seie ’de Kea ’a ’cɛn ‑ɛɛ jia ’kwa.

Dbo Pɔo nʋa ’bo Tesalonikɩ ɛ

¹’Ma de’di ‑wi", aoa’ ‑cɛ" ’kpa ’je kan’ ’mɛ, dbo ‑a ‑jia’ ’de aopʋ "klu ‑wɛe ‑a nʋa, ɛ se dbo foo" nɩ‑. ²Ka ‑a ‑jea ‑aa ‑cɛ" wɔn ’de ‑crei"‑ ke blati ’kwa ’bo Filipʋ‑kwlɔ ’di ɛ, ao juɩ’. ’Kaa ’kamɔ ‑a ‑nɩ ’de ’kle ’ʋn ‑wɛe Kea kuu ‑aa dɩ i ’de ‑a ‑bɛɛ’ ‑pɔia" ‑tɩ ’tmʋa’ ’de ao ‑pee. ³Tɔ’ ‑o, wlu ‑a ‑tmʋa ’de nyʋ ‑pee ɛ, ɛ se sɩ‑tɩ ke tɔ’ saɩn ‑gbɔo "jri tba, ‑a se ɛ "inɩ ‑ke ‑a ‑je nyʋ ’srɛ ipoo‑. ⁴’Kaa dɛ Kea nɩa "i mɛ ‑aa ‑tmʋ jeejee, ɛɛ’ ‑cɛ" ’kpa ‑po ‑aʋn ‑tɩ’ o ‑wɛe ‑ɛ ‑te’ ‑aʋn ‑pɔia" ‑tɩ ’a ’tmʋdbo kwa. ‑A se ɛ ‑pɔn nyiɔpʋ ’je ‑a ‑tɩ’ o po, ’kaa Kea ‑ɛɛ ‑gbʋan ’de nyʋ pɛe o ɛ, ɛmɛ ‑aa ‑pɔn ‑a ‑je ’e "jri ’dei nmɔɔ‑.

⁵Ao ’je kan’ ’mɛ ’pepe, ‑ta ‑a ‑tmʋʋa’ aopʋ Kea ’a ‑tɩ’ ɛ, ‑a se mɩɩɔ ’dɩdɩ nʋ due’ ‑wɛe ‑a se aopʋ ’srɛ ipoo‑. ’De ‑bo ‑a ‑tmʋ ɛɛ’ wlu tu ’de ‑cɛi" ’bɛɛa’ ’ʋn ‑wɛe ‑a ‑je aopʋ "jrui di ɛ, Kea juɩ’. ⁶‑A se ɛ ‑pɔn ‑wɛe ao ke nyʋ jrʋ’ ’je ‑a ‑tɩ’ o po. ⁷‑Apʋ ‑ɔ ‑nɩa Klisɩ ’a dboʋn ɛ, ‑a ‑je aopʋ ‑klaan" "kpei ‑te’ ’de‑, ’kaa ‑a ‑ble aopʋ ’mɛ dɛdɛ‑, ka ‑bo ‑gbaʋn ’ble ʋa’ "ju ‑kwlɩ" ‑wɛe ʋa ‑tua" ɔɔ’ ‑tɩ’ ɛ, ’kamɔ ‑a ‑tu" aoa’ ‑tɩ’. ⁸Aoa’ ’tʋn ‑nɩa ’de ‑a pɛe o ’a ‑tɩ’ ’ʋn ɛ, ‑a ‑nɩɛ "i ‑a ‑je aopʋ ‑aa nyiɔjɔ "nyɩ, ɛ se ‑pɔia" ‑tɩ ‑mɩ ’a ’sʋ nɩ‑, dɛ‑nʋɛ’ aoa’ kɛ’ kma’ ’de ‑a ‑kwa.

⁹‑Aa de’di ‑wi", ao ’je kan’ ’mɛ, dbo ‑a nʋa ’de aopʋ "klu ka ɛ kmai" ɛ, ao se ɛ o"mae’‑. ‑Ta ‑aa ‑tmʋʋa’ aopʋ Kea ’a ‑pɔia" ‑tɩ ɛ, ‑a kpʋɛn ’e "jri ‑cɛɛn’‑, ‑aa sʋn je dbo nʋ ’de "maʋ’wɩ o ’jrʋ‑gbaowɩ ’di ‑wɛe ‑a je ’o aoa’ due’ koʋn ‑gbai’ "jru nɩ‑. ¹⁰Ka ‑aa nasʋn nɩa ’pepe, ɛ ’srɛa "i ‑wɛe ɛ sea ‑kɔ ‑pʋn" nɩ‑ ’de aopʋ ‑ɔ ‑jea Kea ’a ‑tɩ’ tɔ’ ’ʋn dee ’ʋn ‑pee ɛ, ao juɛ’. Kea ’a ‑cɛ" ’kpa juɛ’ ‑ke. ¹¹Ao ’je kan’ ’mɛ ‑ke, ka "nynuu‑ "bo a ‑tua" ɔɔ’ "nynuu ’a ‑tɩ’ ɛ, ’kamɔ ‑aa ‑tu" aoa’ ‑tɩ’ due ’due. ¹²‑Aa kuuɛ aoa’ dɩ i, ‑aa ‑tu" ɛ ao ‑tɩ’ ‑kwlɩ’ i ‑wɛe ‑a ‑blee’ aopʋ wɔn ’dei ’de nai" ’blea’ ’ʋn ‑wɛe ka Kea nɩa "i ao ’je kan’ na‑. Ɛmɛ ‑ɛ ‑da aopʋ ’de ɛɛ’ kɛɛma’ dɛ ’ʋn ‑wɛe ɛ ke ao ’je ’nynɩ i’wlʋʋ‑.

¹³’De ɩa’ ‑tɩ’ ’ʋn ‑a se Kea ’sɛpo‑tɩ ’bɔi, dɛ‑nʋɛ’ ‑ta ‑aa ‑tmʋʋa’ aopʋ Kea ’a ‑tɩ’ ɛ, ao po ɛ doin" o ka ‑cɔɔn’ ka. Ao se ɛ nyiɔpʋ‑ ’a wlu ’daa‑, ’kaa ao ’dɛɛ Kea ’a wlu, ’de ’kamɔ ɛ nɩ ‑cɛɛn’‑. Ɛɛ’ wlu tu mɛ ao ’je tɔ’ ’ʋn ‑wɛe ‑ɛɛ nʋ dbo ’de aopʋ ’ʋn. ¹⁴’Ma de’di ‑wi", nyʋ ‑ʋʋ ‑ke Sesi Klisɩ "sia "i ‑wɛe ‑ʋʋa naa Kea ’a ‑jei" ’de Suideblʋa "kpei ɛ, ao bla ʋʋpʋ ’a ‑kɔ ’de. Ka ao ’jea Sesi ’a ‑tɩ’ tɔ’ ’ʋn ’sʋ nyʋ ‑ʋʋ ‑ke ao plaan ’blʋa‑ i a ‑tua" aopʋ ’kle ɛ, ’kamɔ ʋʋpʋ mɔ ’je Sesi ’a ‑tɩ’ tɔ’ ’ʋn tɛin" ‑wɛe Suifʋ‑wi" ‑tu" ʋʋpʋ ’kle ‑tu ‑tu ‑ke. ¹⁵Suifʋ ‑nʋ mʋ ‑dba Tʋ"bo Sesi, ʋʋpʋ ‑dba Kea ’a wlu ’kwajaaʋn ‑nɩa tɛin" ɛ, ʋʋpʋ ‑nɛɛ’ ‑apʋ mɔ ’mɩ ’mlai" ‑ke ‑wɛe ‑ʋʋ ‑tu" ‑a ’kle. Ʋʋa nyaa Kea i ‑wɛe ʋʋ nɩ nyʋ ‑wee’ ’a tʋnyʋ. ¹⁶Ʋʋa kaan ‑a ‑je de ‑wɛe ‑a je ’pʋwlu ’tmʋ ’de nyʋ ‑sea’ Suifʋ nɩ ‑pee. ‑Bo ʋʋa sea kan’ ‑mɔ nʋ ɛ, ‑mɛ dɩsaɩn ʋʋ nʋa ɩmɩ ʋʋa ‑tu" "kpei, ʋʋa muu "jru o. ’Kaa ʋʋ ’bɔɔ‑ ʋʋa’ ‑cɛ" Kea ’a ’pee "jru jaa’ ’ʋn.

Pɔo nɩɛ "i ɔ ke Tesalonikɩ ‑kɔʋn ’je ’jee‑

¹⁷’Ma de’di ‑wi", ‑ta ao ke ‑a ‑cɛɛan "i ’bo nʋ ’wɩ ‑wɛ‑, ‑aa nyiɔjɔ mɛ se ’de aopʋ "klu nɩ, ’kaa ‑aa tɔ’ ‑wee’ nɩɛ ’de aopʋ "kpei. ’De ɛɛ’ ‑tɩ’ ’ʋn ‑aa ‑pɔn’ ‑a ‑je ’de aopʋ o de ji ‑too"‑ ‑wɛe ao ke ‑a ‑je ’jee‑. ¹⁸‑A ‑nɩɛ "i ‑a ‑je ’de aopʋ o ji ’de‑, ’mɔ Pɔo, ’ma ‑cɛ" ’kpa ‑tɩn ’de aopʋ o jia’ i ’mɛ kpɛ ’sɔɔn, ’kaa Satan kaan ‑aʋn ‑je de. ¹⁹’Ma ’cɛ, ‑sɔntɩ ‑aa Tʋ"bo Sesi a mua de jia’ ’ee, dɛ ‑ɛ ‑je ‑aa dbo ‑a nʋa ɛɛ’ ‑kei" nɩ ɛ‑ ? ’Mɔ ’na : Aopʋ ‑o. Ɛmɛ ‑tɩ ‑a tba aopʋ tɔ’ "i, ‑wɛe ’de ɛɛ’ nɔ" tu ’di ɛ, ‑aa ’sao ’je ’ja, ’de ‑a ‑je ’de ’mʋa‑ ’ʋn nɩ‑. ²⁰Kɩɩn, tɔ’ ‑o, ’de aoa’ ‑tɩ’ ’ʋn ɛ, Sesi a muɛ ‑a ‑cian" "kpei ‑tu" ’a see, ‑aa nʋɛ ’mʋa‑.

¹‑A se ɛ ’bɛɛ‑ la ‑a ‑je ’ʋn ‑kwle ‑kwlee ‑kwlee"‑ ‑wɛe ao ke ‑a se "jriɛ‑ ’jeei. Ɛmɛ ‑tɩ ‑a ‑bɛɛ’ wlu ’ʋn ’de ‑aa ’sʋ sie ‑ta Atɛnɩ. ²’De ‑a ‑sa’ ‑aa de’di Timote ‑pʋn" ‑wɛe ‑aa dbo ɔ ’de aopʋ o. Ɔmɔ ‑ɔ ‑ke ‑aa nʋ Kea ’a dbo ‑wɛe ‑aa ‑tmʋ Klisɩ ’a ‑pɔia" ‑tɩ. ‑A dboɔ’ ’de aopʋ o, ‑wɛe ɔ ’je aopʋ ’kpɩ "nyɩ ’de ɔ ’je aoa’ dɩ ikuu, ‑wɛe aoa’ Kea ‑kwlɩ" ‑tea’ ’je ‑sisi’ nɩ‑. ³‑A se ɛ "inɩ ’de ’kle aoa ’jea ɩ ’je aoa’ due’ koʋn ‑gbai’ ka ’kpɩ "iwa. Aoa’ ‑cɛ" ’kpa ’je kan’ ’mɛ ‑apʋ ‑ɔɔ naa Kea ’a ‑jei" ɛ, nyiɔpʋ a muɛ ‑a ’kle ‑tuu" ’a see, ɛmɛ ‑ɛɛ ‑tea’ ‑a ‑te. ⁴Ao po ‑tɩ’ ‑kwlʋ o, ‑ta ‑a ‑nɩa ’de aopʋ "klu ’de ɛ, ‑a ‑tmʋɛ’ ‑a ‑na ‑apʋ ‑ɔɔ naa Kea ’a ‑jei" ɛ, ‑aa muɛ ‑aa ‑cɛ" wɔn ’jea’. Ao ’je kan’ ’mɛ ’kle ‑nɩ ɩmɩ ‑nyniia ’o ‑ta.

⁵’Ɩn se ɛ ’bɛɛ‑ ’ɩn ’je ’ʋn ‑kwle ‑kwlee ‑kwlee"‑, ɛmɛ ‑tɩ ’ɩn dbo Timote ‑wɛe ɔ ’je ’ʋn aoa’ Kea ‑kwlɩ" ‑tea’ ’a "kuan ja‑, dɛ‑nʋɛ’ faʋn a nʋ ’ʋn ’ɛ, ’ɩn nɩɛ "i ’ɩn ’je ɛ juo ‑bo ‑siɔn’ se aopʋ ’de dɛsaʋn ’di po ‑wɛe ‑aa dbo ‑a nʋa ’de aopʋ "klu se idooa‑. ⁶’Kaa Timote ‑wlʋa ’de aopʋ o ɛ, ɔ ja ‑aʋn aoa’ Kea ‑kwlɩ" ‑tea’ ke aoa’ nyiɔ ’ɔ ‑tɩ’ kmaa’ ’a "kuan ’dɔe ’mɛ. Ka ao se ‑a ‑wɛe ao nɩɛ "i ao ke ‑a ‑jea ’jee‑ ɛ, ɔ ’tmʋ ɩ ’de ‑a ‑pee. ‑Apʋ mɔ nɩɛ "i ‑a ‑ke ao ’je ’jee‑ ‑ke. ⁷’Ma de’di ‑wi", ’kle ‑a ‑nɩa ’e ’di ɛ, ɛ kmai", ’kaa aoa’ Kea ‑kwlɩ" ‑tea’ ’a "kuan ’dɔe Timote poa ’de ‑a ‑pee ɛ, ɛ "sii‑ ’bo ‑aa dɩ ’mɛ ’de aoa’ ‑tɩ’ ’ʋn. ⁸Kaan ka la ‑aa pɛe ji ja ‑wɛ‑, ‑aa ’kmʋ a jiɛ ‑tadue i ‑tea’, dɛ‑nʋɛ’ ao ke Tʋ"bo "siiɛ "i ’bode. ⁹’Ma ’cɛ, ɛɛ’ ’mʋa‑ Kea poa ’de ‑a pɛe o ɛ, wlu ‑jɛ ‑a ‑je ’ble ‑wɛe ‑a ‑je ɛɛ’ Kea ’sɛ po ’de aoa’ ‑tɩ’ ’ʋn ɛ‑ ? ¹⁰Dɛ ‑ɛɛ feeɛ’ ‑aa ‑wla i ‑wɛe ‑aa ‑teea’ Kea i ’de "maʋ’wɩ o, ’jrʋ‑gbaowɩ ’di ɛ, ɛmɛ ‑nɩ ɛ ’je ‑a ‑kɩn kwa ’wɔɔn‑ ‑wɛe ao ke ‑a ‑je ’jee‑. ’De ‑bo ao se dɛ jrɛ’ ’mii ’wɔn ’de aoa’ Kea ’a ‑jei" naasʋn‑ ’ʋn ɛ, ‑wɛe ‑a ‑je aopʋ sʋn o po.

¹¹’Ma de’di ‑wi", dɛ ‑aa ‑pɔan i ɛ, ɛmɛ ‑nɩ ‑a "Bo Kea ke ‑aa Tʋ"bo Sesi ’je ’de ‑aa ‑je ’a nya kɔn ‑wɛe ao ke ‑a ‑je ’jee‑. ¹²’Ɩn nɩɛ "i Tʋ"bo ’je aoa’ ba ’a ‑tɩ’ kmaa’ "kpei po sɔɔn‑ sɔɔn‑ ’de ao ’je nyʋ ‑wee’ ’a ‑tɩ’ kma ‑ke, ka aopʋ mɔ kma aopʋ ’a ‑tɩ’ ‑ke ɛ. ¹³‑Bo ɛ nɩ kan’ ‑wɛe aoa’ pɛe ’je ja ji ’de ao ’je ’pepe nɩ ’bo ‑a "Bo Kea "juɔi. ‑Mɛ ‑sɔntɩ ‑aa Tʋ"bo Sesi ke ɔɔ’ ’bleenyʋ ‑wee’ a mua jia’ a, ao se ‑kɔ ‑pʋn" nɩi.

Kea ’a ‑jei" naasʋn‑ ‑ɛ ‑nmɔɔa ’e Kea "jri ’dei ɛ

¹’Ma de’di ‑wi", dɛ ‑jɛ ’ɩn ’jea ’tmʋ ɛ ke’wlɛ, ɛmɛ ‑nɩ ka ao ’jea na ‑wɛe ao ’jea ’e Kea "jri ’dei nmɔɔ ɛ, ao ’cɩan ‑mɛ ’mɛ ’bo ‑a ‑pʋn". ’De ’kamɔ aoa’ na mɔ ɔ ‑cɛ". ’Kaa dɛ ‑jɛ ‑aa ‑teea’ aopʋ i kaan ka, ɛmɛ ‑nɩ ‑aa baeɛ aopʋ i ’de Tʋ"bo Sesi ’a ’nynɩ ’ʋn : ao na ao ’je nya mu ke’wlɛ. ²’Snɩ ‑a ‑tua" aopʋ ’de Tʋ"bo Sesi ’a ’nynɩ ’ʋn, ao juɛ’. ³Dɛ Kea nɩa "i ao ’jea nʋ, ɛmɛ ‑nɩ ao ’je ’pepe nɩ‑, ao ’je ’nynɩ‑san nʋ‑tɩ ’bɔ. ⁴Ao juo aoa’ ’nynɔ ’ble ka due ’due, ‑wɛe aoa’ ’nynɔ ’blesʋn ’je Kea ’tʋn nʋ, ’de ɛ ’je ni’ wɔn nɩ‑. ⁵Ao ’bo aoa’ ‑cɛi" "taiɛ tɔ’ saɩn ’bo aopʋ ‑je o poɛ ’de ɛɛ’ dɛ tu ’ʋn, ka nyʋ ‑sea’ Kea juo a nʋa. ⁶Nyɔ jrɔ’ ’bo ɔ ‑podɛi" ’a dɩ sʋn ’ʋn poɛ ’de aopʋ "klu. ’De ɛɛ’ ‑tɩ’ ’ʋn ɛ, ‑a siɛ nɔ" nya sese ‑a je ɩa’ dɩ tu ’a ‑cɩɛ cri ’de ao ‑pee. ‑A ‑na, nyʋ ‑ʋʋa nʋa ɩa’ dɩ tu ɛ, Kea ’a ’pee a muɛ ʋʋpʋ kpʋn ’a. ⁷Ɛ se ’nynɩ‑san nʋa’ mɛ ‑ɛɛ ’daa’ Kea ’da ‑aʋn nɩ‑. ’Kaa ɛ ’da ‑aʋn ‑ɛ, ‑wɛe ‑a ‑je kpɔi" ‑tee ’de ‑a ‑je ’pepe nɩ‑. ⁸’Ma ’cɛ, wlu ‑aa ‑tmʋa ’de ao ‑pee ‑ta, ɛ se nyiɔ ’ɔ wlu nɩ‑, ɛmɛ ‑tɩ nyɔ ‑ɔ po ɛ ’kleei ’ja a, ‑mɛ Kea ‑nyɩa" nyʋ ɛɛ’ ‑Suu ’a wlu mɛ ɔ po ’klee i.

⁹‑Bo ɛ ‑tu" ba ’a ‑tɩ’ kma‑tɩ ‑mɛ ɛ, ao se ɛ pɔn‑ la ‑a ‑je aopʋ ‑mɛ ’ɛ ’sbɛ ‑jei" poo‑, dɛ‑nʋɛ’ Kea ’a ‑cɛ" ’kpa mɛ ‑tɔɔ aopʋ ba ’a ‑tɩ’ kmaa’. ¹⁰’De ’kamɔ ao nɩa ’o nʋa’ mɔ ‑ke ’de aoa’ de’di ‑wi" ‑nɩa ’de Masedoanɩ ‑pee. ‑Aa de’di ‑wi", dɛ ‑aa ‑teea’ aopʋ i ɛ, ɛmɛ ‑nɩ aoa’ ba ’a ‑tɩ’ kmasʋn ‑nɛ ’je ’bo ‑tie" cɛn ke’wlɛ. ¹¹Ao kpʋʋn aoa’ ‑cɛ" i ao ‑te ’tɩɩn, ao ‑tu" aoa’ ‑cɛ" ’ɛ ‑tɩ’, aoa’ sʋn ’je dbo nʋ, ka ‑a sia aopʋ ɛɛ’ wlu o ’de ɛ. ¹²‑Bo aoa sea kan’ nʋ ɛ, ‑mɛ nyʋ ‑sea’ Kea ’a ‑jei" naa, se ɛ ’bɛɛ‑ ʋʋ ’je aopʋ ‑sɔn i ’je, ’de ao se nyɔ jrɔ’ "jru nɩ‑.

Klisɩ ’a dejisʋn

¹³’Ma ’cɛ, ‑a se ɛ "inɩ tai’ ’je aopʋ "maa ’de ao ’je "jrii "kae‑ ’de ‑aa de’di ‑wi" ‑mɛa ’a ‑tɩ’ ’ʋn, ka nyʋ ‑ʋʋ sea tɔ’ tba‑ta ’ble "kaea "jrii ɛ. ¹⁴Ka Sesi ’mɛa ‑wɛe ɔ sɔan "kunyɩɔ’ ‑bo ‑a ‑je ɛ tɔ’ ’ʋn ɛ, ‑mɛ nyʋ ‑jea Sesi ’a ‑tɩ’ tɔ’ ’ʋn ‑wɛe ‑ʋʋ ‑mɛa, ka Kea a muɛ ʋʋ ke Sesi de jaa’ a, ‑a ‑je ɛ tɔ’ ’ʋn ‑ke.

¹⁵Dɛ ‑a ‑tba’ Kea ’a wlu ‑gbɔo "jri ‑wɛe ‑aa ‑tmʋa ’de ao ‑pee ɛ, ɛ ka : ‑apʋ ‑nɩa ’kmʋ ‑wɛe ‑ɔɔ fua Tʋ"bo ’a jia’ a, ‑a se ‑aa de’di ‑wi" ‑mɛa "juɔi ‑sii’. ¹⁶’De ɛɛ’ nɔ" tu ’di ɛ, Tʋ"bo ’a ‑cɛ" ’kpa ‑je ’de jaʋn ’di ’wlʋ ‑wɛe ‑ɔ ‑je i "si. ’Bomɔ Kea ’a "soa‑wi" ’a "jru kpɔ’ i ‑tei klaa" o, Kea ’a dɔ‑kleɛ ’je wluu ‑tadue, ‑wɛe nyʋ ‑jea Sesi ’a ‑tɩ’ tɔ’ ’ʋn ’de ‑ʋʋ ‑mɛa ʋʋ ’je "kunyɩɔ’ sɔn tɛin". ¹⁷’Bo ‑mɛ ’de ‑apʋ ‑ɔɔ mua ’kmʋnɩa’ ’de ɛɛ’ nɔ" tu ’di ɛ, ‑aa muɛ o beea’ ‑wɛe ‑a ‑wee’ ’je ’ʋnsɔn ’de ‑a ‑je Tʋ"bo "i ’jaa‑ ’de bue" ’ʋn ’bo jaʋn ‑kwlʋ ‑wɛe ‑a ‑ke Tʋ"bo ’je i ‑te ’bode ‑bode ’bode. ¹⁸’Ma ’cɛ, wlu ‑nɩ, ɩmɩ ao ’je nʋ ‑wɛe ao ’je ba ‑tɩ’ ‑kwlɩ’ i ‑tu" due ’due.

¹’Ma de’di ‑wi", dɛ ‑nɩa Tʋ"bo ’a dejisʋn ’a ‑tɩ’ ɛ, ‑a se ɛ ’bɛɛ‑ ‑wɛe ‑a ‑je aopʋ ’sbɛ ja‑ la ’de ɛɛ’ ‑tɩ’ ’ʋn, ’de ‑a ‑je ɛɛ’ ‑sɔn’ ke ɛɛ’ nɔ" ‑tu" ’de ao ‑pee, ²dɛ‑nʋɛ’ ao ’je kan’ ’mɛ ’pepe Tʋ"bo ’a jia’ a muɛ nyʋ "jru ‑tiia’ ka "jrii ’a ‑kwlɔ paa’ nɩa. ³‑Sɔntɩ nyʋ ‑wee’ "klein a mua i "mae’ ’a plɛplɛ ‑wɛe ʋʋ ’jea wlu ka : ‑Pɔia" pa ’nɔ ’blʋa‑ "kpei ’mɛ ! ‑Tɩ’ se ka nɩ‑ ! ’Bomɔ ’kle klaa" ʋʋ ‑wee’ sea wɔin" ’pʋi ’je ʋʋpʋ "jru ‑tiee’‑, ka ‑bo ’nynɔkpao’ ’ble "kwli ‑wɛe ‑gbaandi a ‑ka’ ʋ "kpei i ɛ, ’kamɔ ɛɛ mu nɩa’.

⁴’Kaa ’ma de’di ‑wi", aomɔ ’di se i kpe ’bode ‑wɛe ɩa’ ’wɩ tu ’je aopʋ "jru ‑tiie’‑ ka "jrii a ‑tiia’ nyʋ "jru ɛ. ⁵’De ao ‑wee’ "klein ’ʋn flɔn i ’bode, ao nɩɛ ’de ‑sɔn’ ’ʋn, ao nɩɛ ‑sɔn’ ’ɔ "nynuu ‑o. ‑A se kwie ’a ’cɛ nɩ‑, ‑wɛe ‑a ‑je idu. ⁶‑A ‑bo muɛ ka nyʋ jrʋ’ a nʋa, ’kaa ‑a ‑te "jriɛ‑ "i, ‑a ‑juo ‑aa ‑cɛ" ’ɛ ka. ⁷Nyʋ ‑a ‑kpa "nyɩɔ’ ɔ, "maʋ" mɛ ʋʋa ’mʋ, ’de nyʋ ‑ʋʋa poa nmɔ "jru ɛ, ’de kwie ’di ’bo ʋʋa poo nmɔ "jru. ⁸’Kaa ‑apʋ mɔ ɛ, ‑a ‑nɩɛ ‑sɔn’ ’ɔ ’cɛ ‑o, ‑a ‑juo ‑aa ‑cɛ" ’ɛ ka. ‑A ‑duo" ‑aa Sesi ‑kwlɩ" ‑tea’ ke ‑aa ba ’a ‑tɩ’ kmaa’ ’ʋn ‑wɛe ɩ ’je ‑aa ’ʋnpaadɛ nɩ, ka "soai a paa nɩɩɛflae’ ’ʋn ɛ. ‑Wɛe ‑aa ’pʋʋa’ ‑a tba tɔ’ "i ‑mɛ ’je ‑aa "jru ‑tu" dɛ nɩ‑, ka nɩɩɛ‑gbla nɩa. ⁹Kea se ‑a ’da ‑wɛe ɛɛ’ ’pee ’je ‑a kpʋn, ’kaa ɛ ’da ‑aʋn ‑ɛ, ‑wɛe ‑a ‑je ’pʋʋa’ ’je ’de ‑aa Tʋ"bo Sesi Klisɩ ’kwa.

¹⁰Ɔmɔ ‑mɛ ‑aa ’mɛa’ ‑wɛe ‑bo ‑a ‑te "jriɛ‑ "i ke o, ’de ‑bo ‑a ‑mɛ o, ‑a ‑je ɔɔ’ ’kmʋ nɩ‑, ‑wɛe ɔ ke ‑a ‑je "ti.

¹¹’De ɩa’ ‑tɩ’ ’ʋn ao ’je ba ‑tɩ’ ‑kwlɩ’ i ‑tu", ‑wɛe ao ’je ba ’a dɩ ikuu‑ due ’due. ’De ’kamɔ ao nɩ nʋa’ mɔ ‑cɛɛn’‑.

De’bɔɔwlu ke ’jewlu ke

¹²’Ma de’di ‑wi", dɛ ‑aa ‑teea’ aopʋ i ɛ, ɛmɛ ‑nɩ nyʋ ‑ʋʋa nʋa Tʋ"bo ’a dbo ’de aopʋ "klu ‑wɛe ‑ʋʋa poa aopʋ ‑je o ’de ɔɔ’ ’nynɩ ’ʋn ɛ, ’de ‑ʋʋa tɔɔa aopʋ Tʋ"bo ’a wlu ɛ, ao ‑te’ ʋʋpʋ ’a ni’. ¹³Dbo ʋʋpʋ a nʋa ’de ɛɛ’ ‑tɩ’ ’ʋn ɛ, ao ’je ʋʋpʋ ’a "dia, ʋʋa’ ‑tɩ’ kmaa’ ‑si’ ‑jei" ’de aopʋ ’ʋn. pɛe ’a blua’ nɩ ’de aopʋ ’nynɩ.

¹⁴‑Aa de’di ‑wi", ‑aa bae aopʋ ’mɛ ‑wi" ‑wee’‑ : nyʋ ‑ʋʋa ’kmʋnɩa’ ‑flankaan a, ao ‑tu" ʋʋpʋ ’snɩ. Nyʋ faʋn nɩa ’de ’ʋn ɛ, ao kuu ʋʋpʋ ’a dɩ i. Nyʋ ’kpɩ wa "i ’de ’kle ’a ‑tɩ’ ’ʋn ɛ, ‑wɛe ‑ʋʋa dɩ a cɛan a, ao po ʋʋpʋ sʋn o. Ao ’bɛɛ‑ pɛe "wɔin ’de nyʋ ‑wee’ ‑pee. ¹⁵Ao ‑tu" aoa’ ‑cɛ" ’ɛ ‑tɩ’ ‑wɛe nyɔ je dɛsaʋn nʋ ’de ɔ je dɛsaʋn ’a kpan ‑sa. ’Kaa ao ‑pɔn ba dɛ ’dɔe "jrii nʋa’ i, ao ‑pɔn nyʋ ‑wee’ dɛ ’dɔe "jrii nʋa’ i ‑ke.

¹⁶Ao nɩ ’e ’mʋa‑ ’ʋn jeejee. ¹⁷Ao bae Kea jeejee. ¹⁸Ao po Kea ’sɛ‑ ’de dɛ "o dɛ ‑wee’ ’ʋn. Aopʋ ‑ɔ ‑jea Sesi ’a ‑tɩ’ tɔ’ ’ʋn ɛ, dɛ Kea a ‑pɔan i ’de aoa’ ‑tɩ’ ’ʋn, ɛmɛ ‑nao.

¹⁹Ao ’bo Kea ’a ‑Suu ’a dbo "i kaan. ²⁰Wlu Kea ’a ‑Suu poa ’de nyɔ ’wɔn ‑wɛe ɔ ’tmʋa, ao ’bo ɩ ‑flɩɩɛn. ²¹’Kaa ao "jrɛɛ‑ dɩ ‑wee’ "klein ‑wɛe ao ’je ɩa’ ’dɔe i ‑te ’de aopʋ ’ʋn. ²²Ao tɛɛn dɩsaɩn ’a kpɛ ‑wee’ "klein o.

²³Kea ‑ɛɛ ‑nyɩa" nyʋ pɛe ’a blua’ a, ɛɛ’ ‑cɛ" mɛ ‑tee aopʋ kpɔi" ‑cɛɛn’‑ ɛmɛ ‑je aoa’ nyiɔjɔ ‑wee’ "klein i fuo‑, ‑mɛ ‑sɔntɩ ‑aa Tʋ"bo Sesi Klisɩ a mua de jia’ a, aoa’ tɔ’ o, aoa’ ‑suu o, aoa’ pɛe o, aoa’ ’blʋku se ‑flɛn" ‑pʋn" nɩi. ²⁴Kea ‑ɛ ‑da aopʋ ɛ, ɛɛ’ ’wlʋ wlu "kpei, ɛmɛ ‑ɛɛ mu ɛɛ’ dbo tu nʋa’.

²⁵’Ma de’di ‑wi", ao bae ‑aa Kea. ²⁶Ao nynia ‑aa ’jewlu ’de ‑aa de’di ‑wi" ‑wee’ ‑pee, ao ‑gblee ʋʋpʋ ‑kwlɩ" ka de’dinynu a nʋa. ²⁷’Ma baeɛ aopʋ i ’de Tʋ"bo ’a ’nynɩ ’ʋn, ao nʋ ’sbɛ ‑nɛ ’dii ’bo ‑aa de’di ‑wee’ "klein juɔi".

²⁸‑Aa Tʋ"bo Sesi Klisɩ po aopʋ "diwan !