1 Piɛi

"I‑saasbɛ

Piɛi

’crɩa

’Jewlu‑

¹’Mɔ Piɛi, ’ɩn nɩɛ Sesi Klisɩ ’a ‑tadboi ‑o. Aopʋ Kea ’cra i ‑wɛe ‑ɔ ‑nɩa ’dʋɩ‑ ’de ’blʋa‑ ’srʋ "kpei ɛ, ’de ‑ɔ ‑kɔa Pɔnblʋa ke, Galasiblʋa ke, Kapadosɩ‑blʋa ke, Asiblʋa ke, Bitiniblʋa ja, ’mɔ ‑ɔɔ ja aopʋ ’sbɛ ‑nɛ. ²Kea ‑ɛ ‑nɩa ‑a "Bo ɛ, ɛmɛ ‑tee aopʋ kpɔi" ’de ɛɛ’ ‑Suu ’ʋn, ao nɩɛ ɛɛ’ nyʋ ‑o. ’Kamɔ ɛ nɛɛ tɔ’ "kpei‑ sese, ‑wɛe ao ’je Sesi Klisɩ wɔn ’je, ’de ɔɔ’ nymɔ ‑wla i ’je aoa’ dɩsaɩn ‑kɔ’.

Kea po ao "diwan ‑wɛe ɛ ’je aopʋ ’saaʋn "jrii nʋ, ’de aoa’ pɛe ’a blua’ ’je "kpei ’kpa jeejee !

Tɔ’ tba‑ta

³Kea ‑ɛ ‑nɩa ‑aa Tʋ"bo Sesi Klisɩ "Bo ɛ, ‑a ‑bɛɛ’ ɛɛ’ ’nynɩ "i, dɛ‑nʋɛ’ ɛ nmɔ ’di wɔn ’pepe ’de ‑a ‑pee. Ɛ ‑sa Sesi ‑klu’ ‑wɛe ‑a ‑mɔ ‑ke Sesi "sia "i ɛ, ɛ "nyɩ ‑a ’kmʋ dee nɩa’ ’de ɔ ’ʋn. ’De ɛɛ’ ‑tɔ’ ’ʋn ɛ, ‑a tba ’kmʋ dee nɩa’ ‑nɛ tɔ’ "i. ⁴‑Bo ɛ nɩ kan’ a, ‑mɛ ‑a ‑beeɛ’ ’kɛn Kea ‑teea ɛɛ’ ’cɛ ’dei ’de jaʋn ’di ɛ, ‑a ‑je ɛɛ’ ’mʋa‑ nʋ. Ɛɛ’ ’kɛn tu se dooa‑ta ’ble, ɛ se ‑flɛn" kpʋn ‑ta ’ble, ɛ se "jrii‑kwɛ ‑ta ’ble, ɛmɛ Kea ‑tee ao ’dei ’de jaʋn ’di. ⁵Aopʋ ‑ɔ ‑tea’ Kea ‑kwlɩ" ɛ, ɛɛ’ "ikmaa’ a fuɛ aopʋ i mamaʋ ’sʋ, ɛ ’je ’blʋa ’a ‑kwɛ‑ nɔ" jɛɛ‑, ‑wɛe ’pʋʋa’ ɛ ‑teea ao ’dei ɛ, ao ’je ɛ ’je.

⁶’De ɛɛ’ ‑tɔ’ ’ʋn ɛ, ‑bo aoa sea ’kle ’a kpɛ ‑wee’ ’je ’de ‑sɩanwɩ ’di mɔ ’de ɛ, ao nʋ ’mʋa‑, dɛ‑nʋɛ’ ɛɛ’ nɔ" tu se "itɛn ’bode. ⁷’Ma ’cɛ, ’kle ’a kpɛ aoa cɛɛan ’ʋn ɛ, ɛmɛ ‑ɛɛ muɛ nʋa’ ‑wɛe aoa’ Kea ‑kwlɩ" ‑tea’ ’je ’pepe nɩ‑. Aoa ’jee, ’sani ‑ɛɛ mua isɔan’ a, ka ɛ nɩa ’pepe ‑bo nyɔ ‑nɩɛi" ɔ ’je ɛ juo ɛ, ɔ nyɛiɛ’ ’bo "jri. ’Kamɔ ɛ nɩ ‑ke ’de aoa’ ‑tɔ’ ’ʋn. Aoa’ Kea ‑kwlɩ" ‑tea’ ‑ɛ ‑nɩa dɛwɔn kpɛ ‑puue ‑ɛ ‑sia ’sani ɛ, ɛ ’je ’de ’kle ’ʋn cɛɛn ‑o. ‑Bo ɛɛ sea ’e ’kle ’ʋn cɛɛn ɛ, ‑mɛ ɛɛ muɛ ’pepe nɩa’, ‑wɛe ‑sɔntɩ Sesi Klisɩ a mua de jia’ ’de Kea ’je aoa’ ’nynɩ "jɛi kpa. ⁸Ao se Sesi Klisɩ "jriɛ‑ ’jee‑ due’, ’kaa ao kma ɔɔ’ ‑tɩ’. ’Kamɔ ao se ɔ "jriɛ‑ tba ’de ‑sɩanwɩ ’di ke, ‑wɛe ao ‑te’ ɔ ‑kwlɩ". Ɛmɛ ‑tɩ ’di ’a wɔn nmɔa’ ke ’mʋa‑ klaa" nɩ ’de aopʋ ’ʋn. ⁹Ao ’je kan’ ’mɛ aoa’ Klisɩ ‑kwlɩ" ‑tea’ mɛ ‑ɛɛ mu aoa’ ‑suu ’a ’pʋʋa’ "jru "kpei poa’.

¹⁰’De ɛɛ’ ’pʋʋa’ tu ’a ‑tɔ’ ’ʋn ɛ, Kea ’a wlu ’kwajaaʋn "jrɛɛ‑ Kea ’a ’sbɛ ’mɛ tɛin" sese, ‑wɛe ’saaʋn Kea ’na ɛ ’je aopʋ "jrii nʋ ɛ, ’de ʋʋ ’tmʋ ɛɛ’ ‑tɩ’. ¹¹Klisɩ ’a ‑Suu ‑ɛ ‑nɩa ’de ʋʋpʋ ’ʋn ɛ, ɛmɛ ka Klisɩ a mua ’kle ’jea’ ‑wɛe Kea ’jea dɩ klae" nʋ ’de ɔɔ’ ‑kɔ ’di ɛ, ɛmɛ ‑tmʋ ɛ ’de ʋʋ ‑pee. Ɛmɛ ‑tɩ ʋʋ "jrɛɛ‑ ’sbɩ ‑wɛe ʋʋ ‑pɔn ɛɛ’ ’o nyni nɔ" ke ɛɛ’ ‑sɔn’ i. ¹²’Sʋ ka ɩa’ dɩ tu sea "jri "kpae’ poi ’de ʋʋa’ ‑nɛ nɔ" ’di ‑wɛe ɩa mua "jri "kpae’ poa’ ’de aoa’ ‑nɛ nɔ" ’di ɛ, ʋʋ ’wɔn ɛ ’mii. ’De ‑sɩanwɩ ’di ɛ, dɩ ʋʋ ‑sa ’kwla a, ɩmɩ Kea ’a ‑Suu a po ɛɛ’ dbonʋʋn ‑je o ‑wɛe ʋʋa ’tmʋ ’de ao ‑pee. Ɩa’ dɩ tu ɛ, Kea ’a "soa‑wi" ‑nɩa ’e jaʋn ’di ‑nɩɛi" ʋʋ ’jɩ ja ‑gbʋn ‑ke.

Kea ’a ‑jei" naaʋn ’a nɩsʋn‑

¹³Ɛmɛ ‑tɩ ao ’je aoa’ ‑cɛ" ikpʋʋn‑, ao kpʋn ’e "jri ao ’je Kea ’a ‑kwlʋtɩ nʋ. ’Saaʋn Kea a mua ao "jrii nʋa’ Sesi Klisɩ ’a deji nɔ" ɛ, ɛmɛ ao ’je tɔ’ "itba ‑sisi’. ¹⁴Ao ’je Kea wɔn jeejee, dɩ ‑nɩa aoa’ ’tʋn nʋdɩ tɛin" ‑mɛ ao se Klisɩ ’a ‑tɩ’ tɔ’ ’ʋn ’je ke ɛ, ao ’bo ’e ɩ ’di de muɛ. ¹⁵’Kaa ao nɩ ’pepe ’de aoa’ nʋʋkplɩn ‑wee’ ’ʋn ka Kea ‑ɛ ‑da aopʋ nɩa ’pepe ɛ. ¹⁶Tɔ’ ‑o, Kea ’tmʋ ɛɛ’ wlu tu ’mɛ sese ɛ ’naa : Ao nɩ ’pepe, ka ’mɔ nɩa ’pepe ɛ.

¹⁷’De aoa’ baewlu ’di ɛ, aoa ’daa‑ Kea "Bo, ‑wɛe aoa poo ɛ ‑too"‑ "i. Dɩ "klein nyiɔ ɔ nʋa due ’due ɛ, Kea mɛ ‑ɛɛ mu ɩa’ ’pee ’jea’ ka due’ ka‑. ‑Jɛ ɛ nɩa kan’ ‑mɔ ’ja a, ‑mɛ nɔ" ‑sia ’o aoa mua nʋa’ ’de ’blʋa‑ "kpei ɛ, ao kpa ɛɛ’ ni’ ‑tea’ nya ’de aoa’ nʋʋkplɩn ‑wee’ ’ʋn. ¹⁸Sɔɔn’ ‑jɛ ɛ ja ‑wɛe ɛ ‑seia aopʋ ’de ao "bo ‑wi" ’a kplɩn ’kwa a, ao juo ‑mɛ ’mɛ. Ɛ se dɩ ‑jɩ ‑a mua isɔan’ ka ’sani ke ’wɛi nɩa mɩ Sesi Klisɩ nʋ ‑wɛe ɔ seie aopʋ nɩ‑. ¹⁹’Kaa Klisɩ ’a nymɔ ‑ɛɛ sɔɔn’ɔ kɛ’ kma’, ɛmɛ seie aopʋ, ka ’blaaju ‑ɛ sea ‑kɔ ‑pʋn" nɩ ’a ’sraa‑ nɩa. ²⁰’De nyiɔ ’ɔ ‑seie ‑tɩ ’ʋn ɛ, Kea ‑teeɛ Klisɩ kpɔi" sese ‑mɛ ’kmʋ se nʋʋɛ ke, ’de ɛ ‑sɔ ’kwla ’de de’bɔɔ‑ nɔ" ‑a ‑nɩa ’di ‑ta ’di, ‑wɛe ɔ ’je aopʋ seie‑. ²¹Ɔmɔ ‑nʋɛ’ ‑wɛe ao ’bɛɛ‑ Kea ‑kwlɩ" ‑tea’. Kea mɛ ‑sɔ "kunyɩɔ’ ‑wɛe ‑ɛ nʋ ɔ kɛɛma’ ’ʋn. Ɛmɛ ‑tɩ ao ‑te’ ’e Kea ’kwa ‑kwlɩ" ‑wɛe ao ’jeɛ tɔ’ "itba.

²²Tɔ’ ‑tɩ ao ’wɔan ‑wɛe ao ’jea wɔn ɛ, ɩmɩ ‑wɔɔ aoa’ pɛe ɛmɛ ‑tɩ ao ’bɛɛ‑ ba ’a ‑tɩ’ kmaa’ ka ‑cɔɔn’ ka. ‑Jɛ ɛ nɩa kan’ ‑mɔ ’ja a, ‑mɛ ’de aoa’ pɛe ‑wee’ "klein ’ʋn ao kma ba ’a ‑tɩ’ due ’due. ²³Ao ’je kan’ ’mɛ Kea ’a wlu ‑ɛ sea isɔn‑ta ’ble ɛ, ɛmɛ ‑nʋɛ’ ‑wɛe ao ’wlʋ ’wlʋa’ dee‑. Ɛ se nyiɔ ‑ɔɔ mua ’mɛa’ mɔ ‑nyɩ" aopʋ ɛɛ’ ’kmʋnɩa’ tu nɩ‑, Kea ‑sea’ ’mɛ‑ta ’ble ɛ, ɛmɛ ‑nyɩ" aopʋ ɛɛ’ ’kmʋnɩa’ tu. ²⁴Dɛ ‑crɩɩa’ ’de Kea ’a wlu ’di sese ɛ, ɛ ’na :

Ka sii" ’a ‑faɩn’ nɩa, ’kamɔ nyʋ ’a dɛwɔnɩa’ ke ʋʋa’ "jriinmɔa’ ‑wee’ nɩ‑, ‑bo sii" jɛ ’sʋ ɛɛ’ ‑faɩn’ blu’. ²⁵’Kaa Kea ’a wlu mɛ ‑nɩ ’kmʋ jeejee. Ɛ se isɔn‑ta ’ble.

Ɛɛ’ wlu tu mɛ ‑nɩ ‑pɔia" ‑tɩ nyʋ ’tmʋa ’de ao ‑pee ɛ.

’Kmʋnɩ sou" ke Kea ’a nyʋ ke

¹‑Jɛ ao ’wlʋa ’wlʋa’ dee‑ ‑mɔ kaan ’ja a, ‑mɛ ao ’bɔ dɩsaɩn ’a kpɛ ‑wee’ o, ao ’bɔ sɩ ’tmʋ‑tɩ, ao ’bɔ "jridepoo‑tɩ, ao ’bɔ ba ‑kwlɛn o nʋ‑tɩ, ao ’bɔ ‑sɔɔ wlu‑tɩ. ²Ka nyɩɩɛ ’nya tʋn a nʋa "nynupliiɛ ɛ, ’kamɔ Kea ’a wlu ɛ ke dɛ jrɛ’ ‑sea’ "jrii bee a’ ’tʋn ’je ao nʋ ‑ke, ‑wɛe ao ’je ’boa ’de ɛ ’ʋn ’bo Kea ’a ‑jei" mamaʋ ’sʋ ɛ ’je aoa’ ’pʋʋa’ ’a "jri "kpae’ powɩ jɛɛ‑. ³Tɔ’ ‑o, ao ‑tɩn’ Kea ’a ’diwɔnmɔa’ wɔn ’mɛ, ao je ɛ ’je.

⁴Ao ’kpa Tʋ"bo ‑pʋn", ka ‑gbu" ’a "sou nɩa ’kamɔ ɔ nɩ, ’kaa ɔ nɩɛ ’kmʋ, ɔ se ’mɛ. Ɛɛ’ "sou tu ɛ, nyiɔ poo ɛ sʋn i, ka "sou sea nʋʋdbo ’ble nɩa. ’Kaa ’de Kea "jri ’de ɛɛ’ "sou tu nɩɛ dɛwɔn, ɛmɛ ‑tɩ ɛ ‑tee’ ɛ kpɔi". ⁵Aopʋ mɔ ‑ke ɛ, ao ’kpa ‑gbu" ’a "sei ‑nɩa ’kmʋ ɛ. Ao "tai aoa’ ‑cɛi" ‑wɛe Kea ’je aopʋ ’ʋn "duo‑ ’de ɛ ’je ao ɛɛ’ ‑gbu" ‑tee, ‑wɛe ɛɛ’ ‑Suu ’je ’de ɛ ’di "ti. Ao ’je kpɔi" ‑tee, ’de ɛ ’je aopʋ dbonʋʋn ’ʋn nʋ ’de ɛɛ’ ‑gbu" ’di. ‑Mɛ aoa’ jeʋn tu ɛ, ao ’je Kea wɔn ‑saa ’de Sesi Klisɩ ’ʋn, ɛmɛ ‑ɛɛ nʋ Kea ’tʋn. ⁶Dɛ ‑ɛ ‑crɩɩa’ ’de Kea ’a wlu ’di ’de ɛ, ɛ ka :

"Sou ‑nɩa dɛwɔn ɛmɛ ’ɩn ’cra i ‑wɛe ’ɩn ‑te i ’bo Selisalɛm, ’de ‑ɛ "kpei ’ɩn ’je ’ma ‑gbu" poo‑. Nyɔ ‑ɔɔ mua ɛɛ’ ‑tɩ’ tɔ’ ’ʋn ’jea’ a, ‑tɩn’ se ɔ "i ’dbaai.

⁷Aopʋ ‑ɔ ‑jea Klisɩ ’a ‑tɩ’ tɔ’ ’ʋn ɛ, ɛɛ’ "sou tu nɩɛ dɛwɔn ’de aoa’ ‑tɔ’ ’ʋn. ’Kaa nyʋ ‑ʋʋ sea Klisɩ ’a ‑tɩ’ tɔ’ ’ʋn ’je, ’de ‑wi" ‑mʋ ’a ‑tɔ’ ’ʋn Kea ’a wlu ’naa :

"Sou ‑gbu"poʋn pooa sʋn i ɛ, ɛmɛ ‑ɛɛ "sou tu ‑snɛɛ "sou ‑cɛɛn’ ’ʋn de’bɔɔ‑ nɔ", ‑ɛ ‑sii "sei ‑wee’ "klein.

⁸’De fɔ’ jrɛ’ o ke’wlɛ, wlu ‑ɛ ‑crɩɩa’ ɛ ’naa :

Ɛɛ’ "sou tu a muɛ nyiɔpʋ ’a bɩɩ ‑tiia’ ‑wɛe ʋʋ ’je i ‑ka ’bo ɛ "kpei.

Dɛɛ‑tɩ ʋʋa’ nyʋ tu ‑ka i ɛ, ɛmɛ ‑nɩ, ʋʋ se ɛ "inɩ ʋʋ ’je Kea ’a wlu wɔn ’je. Nyʋ ‑ʋʋ ‑na" o a dɛ tɔ’ ’ʋn ’je ‑tɩ ɛ, dɛ Kea ‑tea’ ’de ʋʋpʋ ’a ’kmʋ ’a nya i ɛ, ɛmɛ ‑nao. ⁹’Kaa aopʋ mɔ ɛ, ao nɩɛ Kea ’a nyʋ ‑o, ao ‑teeɛ kpɔi", ao nɩɛ ’beɔ ’ɔ dbonʋʋn ‑o. Ɛ ‑tɩn’ aopʋ ’mɛ, ‑wɛe ɛ ‑sa aopʋ ’de kwie ’di ’de ɛ ja aopʋ ’de ɛɛ’ ‑sɔn’ ‑cɛɛn’ ’ʋn, ‑wɛe ao ’je ɛɛ’ nʋʋdɩ ’dɔe ’a ‑tɩ’ ’tmʋ ’de nyʋ ‑pee. ¹⁰Ao se Kea ’a ’cɛ nɩ tɛin" ’de‑, ’kaa kaan ka ao nɩɛ ɛɛ’ ’cɛ ‑o. Ka Kea a ’jea nyʋ ’a wɛe‑, tɛin" ’de ɛ, ao sɩ juo‑, ’kaa kaan ka la ɛ ’jeɛ aoa’ wɛe‑ ‑ke.

Kea ’a "juɔinʋʋn ’a nasʋn

¹¹’Ma ‑tɩ’ kmaʋn, ka ’dʋɩ‑ nɩa, ’kamɔ ao nɩ ’nɔ ’kmʋ "kpei, ao nɩɛ nabʋ ja. Ao ‑tu" aoa’ ‑cɛ" ’ɛ ‑tɩ’, ao ’bo ’o aoa’ ’tʋn nʋdɩ saɩn ’de blaa, dɛ‑nʋɛ’ ɩa ‑fɔn’ aoa’ ‑suu tʋ o. ¹²’De nyʋ ‑ʋʋ sea Kea juo "klu ao nɩa, ao ‑tu" aoa’ ‑cɛ" ’ɛ ‑tɩ’ ‑wɛe ao ’je kplɩn ’dɔe nʋ. ‑Bo ɛ nɩ kan’ a, ‑mɛ ‑bo ʋʋa sea aopʋ dɛsaʋnʋʋn ’daa‑ mɔ ’de ɛ, ʋʋa muɛ aoa’ kplɩn ’dɔe "jriɛ‑ ’jeea’ ‑wɛe ‑sɔntɩ Kea a mua ɛɛ’ ‑cɛ" ’kwla ‑saa’ ’de ʋʋ ‑pee ɛ, ‑wɛe ʋʋ ’je ɛɛ’ ’nynɩ "i ’bɛɛ‑.

¹³’De Tʋ"bo ’a ‑tɔ’ ’ʋn ɛ, ao ’je nyʋ ‑tea nyʋ "jru kpɔ’ i wɔn. ‑Bo ɛ nɩ ‑bluajei ’a ‑cɛ" ’kpa o, ¹⁴‑bo ɛ nɩ nyʋ ɔ ‑tea’ ’o ‑wɛe ‑ʋʋ ‑jea dɛsaʋn nʋʋn ’a ’pee ’je, ’de ‑ʋʋ ‑jea dɛ ’dɔe nʋʋn ‑tɩ’ o po, ao ‑te’ ʋʋpʋ ’a ni’. ¹⁵’Ma ’cɛ, dɛ Kea a ‑pɔan i ɛ, ɛmɛ ‑nɩ ‑bo aoa sea dɩ ’dɔe nʋ ɛ, ‑mɛ nyʋ ‑ʋʋ sea tɔ’di nɩ ‑wɛe ‑ʋʋa wlaa aopʋ ɛ, aoa muɛ ʋʋa’ wɔn "muua’. ¹⁶Ka nyʋ ‑tea ʋʋa’ ‑cɛ" ‑pee a na, ao na kan’, ao se dɛ jrɛ’ɛ kʋɔn kwla’ nɩ‑. ’Kaa ao ’bo aoa’ ‑cɛ" ‑pee‑tea’ ‑nɛ "i ’nɩɛ ’sʋ ao ’bo dɩsaɩn nʋɛ. Ka Kea ’a dbonʋʋn a na, ’kamɔ ao ’je na‑. ¹⁷Ao ‑te’ nyʋ ‑wee’ ’a ni’. Aoa’ de’di ‑wi" ‑ʋʋ ‑ke aoa naa Kea ’a ‑jei" ɛ, ao kma ʋʋpʋ ’a ‑tɩ’. Ao plee Kea jeejee. Ao ‑te’ ‑bluajei ’a ni’.

Ao ‑gbʋn Klisɩ ja

¹⁸Aopʋ ‑ɔɔ nʋʋa nyʋ "juɔi ɛ, ao jaa aoa’ ‑cɛ" ja ’de aoa’ ’bleʋn ‑sɔn, ‑wɛe ao ’je ʋʋpʋ ’a ni’ ‑te’ ’de dɛ "o dɛ ‑wee’ "klein ’ʋn. ‑Bo ʋʋa’ kplɩn nmɔ "jrii o, ‑bo ʋʋa’ kplɩn nyni "jrii o, ao ’je ʋʋpʋ wɔn jeejee. ¹⁹‑Bo nyɔ ‑nɩɛi" ɔ ’je Kea wɔn ’je ‑wɛe ɔɔ sea ’kle ’je ’de ɛɛ’ ‑tɔ’ ’ʋn ɛ, Kea a po ɔ "diwan. ²⁰‑Bo nyɔ ’ɔ ‑cɛ" ’kpa ’a dɛsaʋn ja ɔ ’kle "kpei ‑wɛe ɔɔ ’bɛɛ‑ pɛe "wɔin ’de ɛɛ’ ‑tɔ’ ’ʋn ɛ, nyʋ se ɛ ’bɛɛ‑ nyʋ ’je ɔ ‑tɩ’ o po. ’Kaa ‑bo nyʋ a sea aopʋ ’kpɩ doin" ipo ’de aoa’ dɩ ’dɔe nʋ‑tɩ ’ʋn ‑wɛe ao ’bɛɛ‑ ɛɛ’ ’kle tu "wɔin ɛ, ‑mɛ Kea a muɛ aopʋ ‑tɩ’ o poa’. ²¹Ao ’je pɛe "wɔin ’bɛɛ‑ ’de ’kle ’di, ɛmɛ ‑tɩ Kea ’da aopʋ, dɛ‑nʋɛ’ Klisɩ ’a ‑cɛ" ’kpa ’jeɛ ’kle ’de aoa’ ‑tɔ’ ’ʋn ‑ke. Ao bla ’o ɔɔ’ ‑kɔ ’de, ‑wɛe ka ɔ na ao ’je kan’ na‑. ²²Ɔmɔ se dɛsaʋn nʋ due’, ɔ se sɩ ’tmʋ kpɛ due’. ²³‑Ta nyʋ a ‑cree" ɔ, ɔ se ʋʋpʋ ‑cree" ‑ke, ‑ta ʋʋa ‑tu" ɔ ’kle ɛ, ɔ se wlu ’wlʋ. ’Kaa Kea ‑ɛɛ ‑jea nyʋ ’a ’pee ka ‑cɔɔn’ ka, ɛmɛ ɔ ‑te’ ɔɔ’ ’kmʋ kwa. ²⁴Ɔɔ’ ‑cɛ" ’kpa mɔ ‑duo" ‑aa dɩsaɩn ’ʋn ’bo ɔ "jru, ’de ‑a ‑ke dɛsaʋn ’a ’wlʋa’ ’je cɩɩɛn ‑wɛe ‑a ‑je dɩ ’dɔe nʋa ’a ’kmʋ nɩ‑. Ɔɔ’ blati ’a ‑kɔ mɩ ‑bɔɔ’ aoa’ ’wɛ‑. ²⁵Ao ‑wee’ siɛ ’kwla tɛin" ’de‑, ka ’blae ‑sea’ ’dei ‑tei ’ble nɩa, ’kaa kaan ka la Sesi Klisɩ ‑nɩa aoa’ ’dei ‑tei ‑cɔɔn’‑ ‑wɛe ‑ɔɔ ‑tua" aoa’ ‑suu ’a ‑tɩ’ ɛ, ɔmɔ ao "biie‑ ’e o.

Jranynʋkpae’ ke ʋʋa’ kʋan‑wi" ke

¹’Nynʋkpae’, aopʋ mɔ ‑ke ɛ, ao jaa "jru ja ’de aoa’ kʋan‑wi" ‑pee ‑wɛe ‑bo ʋʋa’ jrʋ’ se Kea ’a wlu tɔ’ ’ʋn ’je ke ɛ, ’de aoa’ Kea ’a ‑jei" naasʋn‑ ’je ɛ nʋ ‑wɛe ʋʋ ’je ’e Kea o "biie‑. ‑Bo ao se ʋʋpʋ Kea ’a ‑tɩ’ ‑pee ’tmʋ mɔ ’de ɛ, ʋʋa muɛ aoa’ kplɩn "jriɛ‑ o sia’ see, ²dɛ‑nʋɛ’ ka aoa’ nʋʋdɩ ’srɛai" ‑wɛe aoa pleea Kea a, ʋʋa muɛ kan’ ’jea’. ³"Jriinmɔdɩ ‑jɩ ‑poa’ "jri "kpae’ ’bo ku ‑pʋn" ɛ, ao ’bo ‑mɩ i‑pɔɛn, ka "mɩɩ‑ dbaa’ ke ’sani doin" poa’ ke, dɩ ’dɔe ‑pʋn" ‑tuu" a’ nɩa. ⁴’Kaa aoa’ "jriinmɔa’ ‑mɛ ɛ, ’de ao pɛe o mɔ ɛ ’je kɩn poo‑. Ao nmɔ ’di wɔn, ao nɩ kupeeɛ’ nyʋ, dɛ‑nʋɛ’ ɛɛ’ "jriinmɔa’ tu se wɔsɔn ‑ta ’ble, ɛmɛ ‑nɩ dɛwɔn ’bo Kea "juɔi. ⁵’Nynʋkpae’ ‑ʋʋ ‑naa Kea ’a ‑jei" tɛin" ‑wɛe ‑ʋʋ ‑tea’ Kea ‑kwlɩ" ɛ, "jriinmɔa’ ‑ɛ ‑nɩa ’de ʋʋpʋ ’ʋn, ɛmɛ ‑nao. ⁶Ka Sara nɩa ’de ’nynʋkpae’ ‑nʋ "klu ɛ, Ablaam ‑nɩa ʋa’ kʋan, ʋa ’je ɔ wɔn ‑wɛe ʋa ’dɔɔ‑ ʋa’ ’blei. ‑Bo ao ’srɛi" ‑wɛe dɛ ’dɔe nʋa ’a faʋn ’a nʋ aopʋ ɛ, ‑mɛ ao nɩɛ ʋa’ "nynuunynʋkpae’ ‑tu ‑o.

⁷Kʋan‑wi", aopʋ mɔ ‑ke ɛ, ‑bo ao ke aoa’ ’nynʋkpae’ ‑te i ɛ, ‑mɛ ao nɩ tɔ’di. Ka ’nynʋkpae’ sea ’di ikuu ɛ, ao sie ɛ ‑kwlʋ o. Ao nmɔ ʋʋpʋ ’kwa, ao ‑te’ ʋʋpʋ ’a ni’, dɛ‑nʋɛ’ ’kmʋnɩa’ dee Kea "nyɩa nyʋ "jɛi‑ ɛ, ʋʋ ke ao ‑wee’ plɛɛn i. Ao nʋ kan’, ao ‑tu" aoa’ ‑cɛ" ’ɛ ‑tɩ’ ‑wɛe dɛ jrɛ’ je aoa’ baewlu ‑je de kaan‑.

Ao nʋ "isrɛdɩ ’de ’kle ’ʋn

⁸Dɛ ‑jɛ ’ma ’tmʋa ao ‑wee’ "klein ‑pee ɛ, ‑mɛ ka : ao ’ble tɔ’ due’, ao ’wɔɔn‑ wlu’ i, ao kma ba ’a ‑tɩ’, ao ’je ba ’a wɛe‑, ao jaa aoa’ ‑cɛ" ja ’de ba ‑pee due ’due. ⁹‑Bo nyʋ nʋ aopʋ dɛsaʋn "jrii ɛ, ao ’bo ɛɛ’ kpan ‑saa ’de dɛsaʋn nʋa’ ’ʋn. ‑Bo nyɔ ‑cree" aopʋ ɛ, ao ’bo ɔ ‑cree" ɛ. ’Kaa ao po ɔ "diwan ka‑, dɛ‑nʋɛ’ ɛmɛ ‑ɛɛ ’daa’ Kea ’da aopʋ ‑wɛe ɛ ’je ao "diwan po ‑ke. ¹⁰Dɛ ‑crɩɩa’ ’de Kea ’a wlu ’di tɛin" ɛ, kɛ ’da ka, ɛ ’na :

‑Bo nyɔ nɩɛ "i, Kea ’je ɔ "diwan po, ’de ɔ ’je ’e ’mʋa‑ ’ʋn nɩ ɛ, ‑mɛ ɔ tɛɛn ɔɔ’ wɔn dɛsaʋn o, ɔ ’bɔ sɩ ’tmʋ‑tɩ. ¹¹Ɔ to dɛsaʋn ’kpʋ "i ‑wɛe ɔ ’je dɛ ’dɔe nʋ. Pɛe ’a blua ’a ’sʋ mɛ ɔ ’je ’o ’de bla ‑wɛe ɔ ’je i‑pɔn ’bo ɔ ke ɔɔ’ ‑ponyiɔ ’nynɩ, ¹²dɛ‑nʋɛ’ nyʋ ‑srɛai", ʋʋpʋ Tʋ"bo a naa "jriɛ‑ o, ‑wɛe ‑ʋʋa baewlu ɛɛ po doin" o. ’Kaa nyʋ ‑a nʋa dɛsaʋn ɛ, ɛɛ toɛ ‑wi" ‑mʋ ’kpʋ "i.

¹³‑Bo ao ’ble dɛ ’dɔe nʋa ’a ’kpɩ ’ee, ‑mɛ nyɔ wɛ‑ ‑je aopʋ dɛsaʋn "jrii nʋ ɛ‑ ? ¹⁴’De ‑bo aoa sea ’kle ’je ’de aoa’ "isrɛ‑tɩ ’ʋn mɔ ’de ɛ, ‑mɛ aomɔ nʋ ’mʋa‑. ’De ɛɛ’ ‑tɔ’ ’ʋn ɛ, nyʋ ‑a ‑tua" aopʋ ’kle ’a faʋn ’bo aopʋ nʋɛ, ’de tai’ ’bo aopʋ "maa. ¹⁵’Kaa ao "biie aoa’ tɔ’ ’de Tʋ"bo Klisɩ ’a ’sʋ "kpei, ao "tai‑ ɔ "i, ‑wɛe ɔɔ’ ’sʋ ’je aopʋ ’a ’kmʋ ‑je o po. ‑Bo nyɔ "o nyɔ ‑tee’ aopʋ i ɔ ’na dɛɛ‑tɩ ao tba Kea tɔ’ "i ɛ‑, ‑mɛ ao ‑te ɛɛ’ wɔ ‑saa ’a kein"ke ’de ɔ ‑pee. ¹⁶‑Bo aoa sea ɛ wɔ ‑sa ’de ɔ ‑pee ɛ, ‑mɛ ao ‑tu" aoa’ ‑cɛ" ’ɛ ‑tɩ’ ‑wɛe ao ’je ɛ nʋ ’de ku peeɛ’ ke nyʋ ’a ni’ ‑tea’ ’ʋn, dɛ‑nʋɛ’ dɛ ‑ɛ ‑srɛai" "i ’de ao pɛe o, ɛmɛ ao ’je nʋ, ‑wɛe nyʋ ‑ʋʋa ‑sia" aoa’ ’nynɩ saɩn ɛ, ‑tɩn’ ’je ʋʋpʋ "i ’dbaa, ‑wɛe ka nyʋ ‑ke Klisɩ a na ’a kplɩn nmɔa "jrii ɛ, ’de ʋʋ ’je ɛ juo‑. ¹⁷‑Bo ‑ma sea ’kle ’je ’de ’dɔe nʋa ’a ‑tɔ’ ’ʋn, ‑wɛe Kea "tai ɛ "i ’de ‑ʋn "kpei ɛ, ‑mɛ "paa’, ɛ je ‑nʋ’ dɛsaʋn ‑wɛe ‑je ’kle ’de ɛɛ’ ‑tɩ’ ’ʋn ‑sii.

¹⁸Klisɩ foo" ’sʋ ’jeɛ ’kle ‑ke, ɔ ’mɛɛ kpɛ due’ koʋn ‑gbai’ ’de nyiɔ ’ɔ dɛsaʋn ’a ‑tɔ’ ’ʋn. Ɔmɔ ‑ɔ ‑srɛai" ɛ, ɔmɔ ‑mɛ ’diwɔnyniʋn ’a ’mɛa’ ‑wɛe ‑ɔ ‑je ‑aʋn ’bo Kea "juɔi kpa. Ʋʋ ’dba ɔɔ’ ’blʋku ‑kwlɔ i, ’kaa Kea jɔ ’kmʋ de ’de ɛɛ’ ‑Suu ’ʋn. ¹⁹’De ɛɛ’ ‑Suu ‑tu ɛ, ɛ dboɔ’ ‑wɛe ɔ mu, ɔ je ’mɛʋn ’a ‑sii ‑nɩa ’mɛʋn o ‑kwlɔ wlu ‑pee ’tmʋ. ²⁰Ɩa’ ‑sii ‑tu ɛ, ɩ se Kea wɔn ’je tɛin". ’De ‑mɛ ’kamɔ Kea kuu tɔ’ i mamaʋ ’sʋ Noe ‑pa ‑bato’, ‑wɛe nyʋ ‑mɛ" na ‑gbai’ pa ’de ɛ ’di, ’de ʋʋ ’pʋ "ni wɔin". ²¹"Ni nyʋ ‑mɛ"na ‑nʋ ’pʋa wɔin" ’mʋa‑ a, ɛɛ’ "ipoo‑tɩ mɛ ‑nɩ "ni aoa pooa "jru ’de ‑sɩanwɩ ’di ɛ. "Ni ʋʋa pooa aopʋ "jru ɛ, ɛ se mɛ ‑ɛɛ ‑sa aoa’ ku ‑flɛn" kui nɩ‑. ’Kaa ‑bo aoa sea "ni "jru pooɛ, ‑mɛ aoa ‑teeɛ’ Kea i, ‑wɛe ɛ ’je aoa’ pɛe wɔɔ‑. ‑Bo aoa’ "ni pooa’ ’pʋʋ‑ aopʋ ɛ, ‑mɛ Sesi Klisɩ ‑mɛa ‑wɛe ‑ɔ ‑sɔan "kunyɩɔ’ ’saaʋn ‑o. ²²Ɔmɔ mu ’de jaʋn ’di ‑wɛe ‑ɔ ‑te i ’de Kea ’a dianfɔ o, ’de ‑ɔ ‑nɩ ’o Kea ’a "soa‑wi" o, dɛwɔn ‑siiʋn o, "ikmadɩ ‑wee’ "jru kpɔ’.

’Kmʋ ‑ɩ ‑pooa fai" ɛ

¹Ka Klisɩ ’jea kui wɔn, ao ’je kan’ ’mɛ. Ɛmɛ ‑ɛɛ ‑tɔ’ ’ʋn ao ’je ɔ ja ‑gbʋn ‑wɛe ao ’je kui wɔn’je ‑tɩ ’wɔɔn‑. Nyɔ ‑jea ɔɔ’ ‑cɛ" wɔn ɛ, ɔmɔ ‑ke dɛsaʋn cɩɩɛn. ²‑Bo ao ke Klisɩ ’ble tɔ’ due’ ɛ, ‑mɛ aoa’ ‑cɛ" ’kpa ’a ’tʋn nʋdɩ saɩn se ɛ ’bɛɛ‑ ɩ ’je aoa’ ’kmʋ ‑je o po. ‑Bo ɛ nɩ kan’ a, ‑mɛ nɔ" ‑sia ’o ao ’jea nʋ ’de ’kmʋ "kpei ɛ, aoa mua Kea ’a ‑kwlʋtɩ ’a ’sʋ nʋa’. ³Tɔ’ ‑o, nɔ" ao "dua ’ʋn ‑wɛe ka nyʋ sea Kea juo a nʋa ’de aoa nʋa kan’ a, ɛ ‑tiɛi" ‑wɛ‑, ao "ti la. Tɛin" ’de‑ ɛ, dɩ ‑sea’ nʋ ka nɩ ɛ, ɩmɩ aoa nʋ : aoa’ ’tʋn nʋdɩ saɩn ’bleɛ aopʋ kʋɔn ’ʋn, dɛ ’ɛ pɛe "ipoa’ ’a ‑tɩn’ ’a nʋ aopʋ, ao "duo aoa’ nɔ" ‑wee’ ’ʋn ’ɛ, ‑wɛe aoa ‑tu" ‑kɔ’ jeejee, ’de aoa po nmɔ "jru, ‑wɛe kɔin "juɔi ‑gbɛɛa’ ‑a nyaa Kea i ɛ, ’de aoa nʋ ‑mɛ. ⁴’Kaa kaan ka, tai’ "maa nyʋ ‑sea’ Kea juo ’mɛ, dɛ‑nʋɛ’ ʋʋ ke ao ’bɔ dɛ ’ɛ "jriitɩan ’a bɩ’ "bee ‑tɩ ’mɛ, ɛmɛ ‑tɩ ʋʋa ‑cree" aopʋ. ⁵’Kaa ’wɩ ‑sia ’o ‑wɛe Kea ’jea ’kmʋnɩʋn ke ’mɛʋn ’a ’pee ’je, ɩ se "itɛn, ’bomɔ nyʋ ‑a ‑cree" ’a aopʋ ’je ʋʋa’ nʋʋdɩ ’a "kuan po ’bo Kea "juɔi. ⁶’De ɛɛ’ ‑tɔ’ ’ʋn ‑pɔia" ‑tɩ ’tmʋʋɛ ‑ke ’de ’mɛʋn ‑pee. ‑Bo ʋʋ ’mɛ ’de ɛ, ‑mɛ ka nyʋ ‑wee’ "klein a ’mɛa, ’kamɔ ʋʋ ’mɛ, ka nyʋ ‑wee’ "klein ’jea ’pee ’wlʋ ɛ, ’kamɔ ʋʋpʋ ’je ’pee ’wlʋ ‑ke. ’Kaa ʋʋa’ ‑suu ’bɛɛ‑ ɛ ’je ’kmʋnɩa’ ‑wlʋa ’de Kea ’ʋn ’je ‑ke.

Kplɩn Kea ’a ‑jei" naaʋn ’jea nʋ ’de ba ‑pee ɛ

⁷’Blʋa ’a ‑kwɛ‑ nɔ" "kʋʋan‑ i. ’De ɛɛ’ ‑tɔ’ ’ʋn ɛ, ao nɩ tɔ’di, ao juo aoa’ ‑cɛ" ’ɛ ka, ‑wɛe ao ’je bae ka ’je. ⁸Dɛ ‑jɛ ‑kɔan ‑tɩ’ ɛ, ɛmɛ ‑nɩ ao ’bo ba ’a ‑tɩ’ kmaa’ o ’bɔɛ. ‑Bo nyɔ kma nyʋ ’a ‑tɩ’ ɛ, ‑mɛ ɔɔ poɛ ʋʋa’ ‑kɔ "puue’ "kpei. ⁹Ao kpʋʋn ba sɩn ’sɔɔn ’de aoa’ ‑gbi" ‑sɔn i due ’due, ao ’bo ’mii wluɛ ’de ɛɛ’ ‑tɔ’ ’ʋn. ¹⁰Kea po aopʋ "diwan ’de dɩ ’a kpɛ ‑tuu"‑tuu ’ʋn. Ɛmɛ ‑nʋɛ’ ‑wɛe jrɔ’ ’bɛɛ‑ ɔ ’je ɔɔ’ ‑nɛ dɛ ’dɔe nʋ, ’de dɛ ’dɔe nʋa ’a ’kpɩ Kea "nyɩa aopʋ ɛ, ao ’jɩ ’ʋn "duo‑ ‑wɛe ao ’je ba sʋn o po. ¹¹‑Bo nyɔ ’ble wlua ’a ’kpɩ ɛ, ‑mɛ Kea ’a ‑tɩ’ mɩ ɔ ’je ’tmʋ, ‑bo Kea "nyɩ nyɔ nyʋ sʋn o poa ’a ’kpɩ ɛ, ‑mɛ ɔ "duo ɔɔ’ ’kpɩ ‑wee’ "klein ’ʋn, ‑wɛe ɔ ’je ɛɛ’ dbo tu nʋ. Aopʋ ‑bla ’o Sesi Klisɩ ’de ɛ, ao nʋ kan’, ‑wɛe dɛ "o dɛ aoa mua nʋa’ a, Kea ’a ’nynɩ ’je "i ’bɛ ’de ɔ ’ʋn jeejee. Ɛmɛ ‑ble ’nynɩ ’wlʋa’ ke "ikmaa’ ’de ‑sʋn "o ‑sʋn ’di. ’Kamɔ ɛ ’je nɩ mamaʋ ’sʋ.

’Kle ’jeea’ ke Kea ’a ‑jei" naasʋn‑ ke

¹²’Ma ‑tɩ’ kmaʋn, nai" ‑tɩ aoa ’jea ‑bo ɩa’ mɔɔ’ nyna aopʋ ’ʋn ɛ, ao ’bo ɩ dɩ dee‑ ’daa‑, ɩ ’bo ao tai’ "maa, dɛ‑nʋɛ’ ɩa’ dɩ tu mɩ Kea a nʋ ‑wɛe ɛɛ ‑tɩn aopʋ i, ’de ‑bo ao ‑te ɛ ‑kwlɩ" ‑wɛe ɛ ’je ɛ juo‑. Ao ’bo nʋɛ ɩ se ka ‑cɔɔn’ ka nɩ‑. ¹³’Kaa ’kle Klisɩ ’jea, ɛmɛ aoa ’je ‑ke. ’De ɛɛ’ ‑tɔ’ ’ʋn ɛ, ao ’di nmɔ wɔn, ‑wɛe ‑sɔntɩ ɔɔ’ tʋ"bodɛ ɛ mua "jri "kpae’ poa’ a, ’de aoa’ ’mʋa‑ ’je "i ’bɛ, ɛ ’je "jri "kpei ‑tie" cɛn. ¹⁴Dɛ ao ke Klisɩ a na, ‑bo nyʋ a sea aopʋ ‑cree" ’de ɛɛ’ ‑tɔ’ ’ʋn ɛ, ‑mɛ ao nʋ ’mʋa‑, dɛ‑nʋɛ’ Kea ’a ‑Suu ‑ɛ ‑bɛa "i ‑ɛ ‑sia dɩ ‑wee’ ɛ, ɛmɛ ‑nɩ ’de aopʋ ’ʋn. ¹⁵Nyɔ ’bo ’de aopʋ "klu nɩɛ, ‑wɛe ɔɔ’ dɩsaɩn nʋa’ o, ɔɔ’ "ku’dbaa’ o, ɔɔ’ "jriia’ o, ɔɔ’ ‑tɩ’ ‑ɩn sea kɔn ɩa’ wɔn ’ʋn poa’ ’bo ɔ ’kle "kpei jaa‑. ¹⁶’Kaa ‑bo nyɔ nɩ Klisɩ ’a nyɔ ‑wɛe ɔɔ sea ’kle ’je ’de ɛɛ’ ‑tɔ’ ’ʋn ɛ, ɛ ’bo ɔɔ’ ‑tɩn’ ’bleeɛ, ɔ po Klisɩ ’a ’nynɩ ‑nɩa ɔ "kpei ’a Kea ’sɛ‑.

¹⁷’Ma ’cɛ, Kea ‑tee ’pee ’jea’ ‑wɛ‑ ’de ɛɛ’ ‑gbu" ‑sɔnyʋ "klu. ’De ‑bo ’pee ‑mɛ ‑tee ’de ‑apʋ mɔ "kpei tɛin" ’dee, ‑mɛ ka ɛɛ mu nɩa’ ’de nyʋ ‑na ‑ʋʋ se Kea ’a ‑tɩ’ tɔ’ ’ʋn ’jei "kpei ɛ‑ ? ¹⁸Dɛ ‑crɩɩa ’de Kea ’a wlu ’di, ɛ ’naa :

‑Bo nyʋ ‑srɛai", ‑wi" ‑mʋ ’jee‑ ’pʋʋa’ ’kle i ’dee, ‑mɛ ka ɛɛ mu nɩa’ ’de ’diwɔn nyniʋn ke dɛsaʋn nʋʋn ‑wi" ‑mʋ ’a ‑tɔ’ ’ʋn ɛ‑ ?

¹⁹‑Jɛ ɛ nɩa kan’ ‑mɔ ’ja a, ‑mɛ nyʋ ‑ʋʋa ‑jea ’kle ’de Kea ’a ‑kwlʋtɩ ’ʋn ɛ, ʋʋ kpa dɛ ’dɔe nʋa’ nya ‑wɛe ʋʋ ’je ʋʋa’ ’kmʋ nyiɔ ’ɔ Nʋi ‑ɛɛ’ pooa wlu fai" kwa ‑te’.

Ao ‑tu" Kea ’a nyʋ ’a ‑tɩ’

¹’Ɩn nɩɛ "i ’ɩn ’je nyʋ ‑nɩa Kea ‑gbu ’a nyʋsoa ’de aopʋ "klu wlu ‑pee ’tmʋʋ‑, dɛ‑nʋɛ’ ’mɔ nɩɛ Kea ‑gbu ’a nyɔsoa ‑o ‑ke. ‑Ta Klisɩ a ’jeea ’kle tɛin" ɛ, ’ɩn ’je ɛɛ’ ‑ta ’mɛ. Ɔɔ’ kɛɛma’ dɛ ‑ɛɛ ‑mua’ "jri "kpae’ poa’, ‑a ‑wee’ a muɛ ɛɛ’ ‑ta ’jea’. ²Ɛmɛ ‑tɩ ’ma bae aopʋ i ‑wɛe nyʋ Kea ‑tea’ aopʋ kwa ao ’je ʋʋpʋ ’a ‑tɩ’ ‑tu" ka ’blae ’dei ‑tei a fua ɔɔ’ ’blae i ɛ. ‑Bo aoa sea ɛɛ’ dbo tu nʋ ɛ, ao nʋ ɛ ’de pɛe ’dɔe ’ʋn, ka Kea nɩɛ "i ɛ. Ka nyɔ ɔ ‑tea’ nyʋ ‑klaan" "kpei ɛ, ɛ ’bo kan’ nɩɛ. Ao "duo aoa’ pɛe ‑wee’ "klein ’ʋn, ao ’je ɛɛ’ dbo tu nʋ, ao ’bo ɛ nʋɛ ’de ’wɛi ’je ‑tɩ ’ʋn. ³Nyʋ Kea ‑tea’ aopʋ kwa ao ’bo ’o ʋʋpʋ "jru ’jaa i‑pɔɛn, ’kaa ao ‑tu" aoa’ ‑cɛ" ’ɛ ‑tɩ’ ‑wɛe ʋʋ ’je ’bo aoa’ kplɩn ’dɔe ’de bla. ⁴‑Bo aoa sea kan’ nʋ ɛ, ‑mɛ Sesi Klisɩ ‑ɔ fua ‑a ‑wee’ "klein i ɛ, ‑sɔntɩ ɔɔ mua jia’ a, ɔɔ muɛ aopʋ "i ’bɛɛa, ‑wɛe ɔ ’je aopʋ ’dɔe "jrii nʋ. Ɛɛ’ ’dɔe tu se "jrii ‑kwɛ ‑ta ’blei.

⁵’De aopʋ ‑jɔ ‑nɩa ‑kooa" mɩɩ" ‑wi" ɛ, ao jaa "jru ja ’de nyʋ ‑cɔʋn’ ‑pee. ’De dɛ ao ‑wee’ "klein ’jea nʋ ɛ, ɛmɛ ‑nɩ ao ’je aoa’ ‑cɛi" ’piie ‑wɛe ao ’je ba sʋn o po due ’due, dɛ‑nʋɛ’ dɛ ‑crɩɩa’ ’de Kea ’a wlu ’di kɛ ’da ka, ɛ ’naa :

Nyʋ ‑a ‑bɛɛa’ ʋʋa’ ‑cɛi" ɛ, Kea ’nyɛ ʋʋpʋ ’ʋn ’ɛ, ’kaa nyʋ ‑piia’ ʋʋa’ ‑cɛi" ɛ, ɛɛ nʋɛ ‑wi" ‑mʋ ’saaʋn "jrii.

⁶‑Jɛ ɛ nɩa kan’ ‑mɔ ’ja a, ‑mɛ ao jaa aoa’ ‑cɛ" ja ’bo Kea ’a "ikmasʋn ‑sɔn, ‑wɛe ‑bo nɔ" ɛ ‑tua" nyni ɛ, ’de ɛ ’je aopʋ "jɛi kpa. ⁷Dɩ "klein ‑ɩa ‑sɔɔn aoa ‑tua" ‑wɛe ao "kaea "jrii ɛ, ao ‑tɩ’ Kea kwa. Ao ‑sa aoa’ ‑sɔɔngbɛ "jru ’bo Kea ’kwa, dɛ‑nʋɛ’ ɛmɛ ‑ɛɛ ‑tu" aopʋ ’a ‑tɩ’.

⁸Ao juo aoa’ ‑cɛ" ’ɛ ka, ao ’bo i"mae, ‑siɔn’ ‑nɩa aoa’ tʋnyɔ ɛ, ɔɔ ‑piɛn’ aopʋ ’dei ɔ ’je ao ’dba, ka ‑plaa a ‑pɔan nmi i, ɛ ’jea ’dba i ɛ. ⁹Ao ’bo ’wɔɔɛn ɔ ’bo aopʋ kpʋɛn, ao ’bo Kea ‑kwlɩ" ‑tetɩ ’bɔɛ. Ao ’ble ’kpɩ, dɛ‑nʋɛ’ ao ’je kan’ ’mɛ, aoa’ de’di ‑wi" ‑kɔa ’blʋa‑ ja, ’kle due’ ‑nɩa ’mʋa‑ ɛmɛ ʋʋpʋ a ’je ‑ke.

¹⁰Ka ’diwɔn nmɔa’ ‑wee’ ke ’saaʋn pooa ’de Kea ’ʋn kɩn ɛ, ao ’bo ɛ o"mae. Kea mɛ ‑da aopʋ ‑wɛe ao ke Klisɩ ’je "i "sii‑. ’De ao ’je ’de ɔɔ’ kɛɛma’de ‑ɛ sea ‑kwɛ ‑ta ’ble ’ʋn nɩ‑. ‑Bo ’kle ao ’jea ’mʋa‑ ’de nɔ" pla ’di ’wlʋ ’o ‑jei" ɛ, ‑mɛ Kea a muɛ nʋa’ ‑wɛe aoa’ ’kmʋ ’je inyni, ’de ao ’je ’sɩn po, ‑wɛe ao ’je dɩ ikuu ‑sisi’, ’de ka ɛ nɩa "i ɛ, ao ’je kan’ nɩ. ¹¹’Ma ’cɛ, ka Kea ’blea "ikmaa’ ‑wee’ "klein, nyʋ ’je ɛ juo ‑o ’de nɔ" ‑wee’ ’di. ’Kamɔ ɛ ’je nɩ‑ !

’Jewlu‑

¹²Silasɩ ‑ɔ ‑nɩa ’ma de’di ’ɩn ‑tea’ ‑kwlɩ", ɔmɔ ‑po ’ʋn sʋn o, ‑wɛe ’ma ’tmʋʋ aopʋ wlutie ‑nɛ ‑pee. ’Ɩn nɩɛ "i ’ɩn ’je aopʋ ’a dɩ ikuu‑, ‑wɛe ’saaʋn ‑cɛɛn’‑ Kea nʋa aopʋ "jrii, ao ’je ɛ juo ‑wɛe ao ’je ɛ i "klii‑.

¹³Nyʋ Kea ‑teea kpɔi" ‑ta Babilɔnɩ, ka ɛ ‑teea aopʋ kpɔi" ‑ke ɛ, ʋʋ ’na ʋʋpʋ ‑je aopʋ. Makɩ ‑ɔ ‑nɩa ’ma "ju ’de Klisɩ ’ʋn ɛ, ɔ ’na ɔmɔ ‑je aopʋ ‑ke. ¹⁴Ao ‑gblee ba ‑kwlɩ" ’de ba ’a ‑tɩ’ kmaa’ ’ʋn.

Aopʋ "klein ‑ɔ ‑nɩa Klisɩ ’a nyʋ ɛ, pɛe ’a blua’ nɩ ’de aopʋ ’ʋn