"I‑saasbɛ
San
’crɩa
1’Kmʋnɩ wlu
1"Ju ‑ɔɔ ‑tɩ’ ‑aa jia aopʋ ’tmʋa’ ’de ’sbɛ ‑nɛ ’di ɛ, ɔmɔ ‑nɩ Kea ’a wlu ‑ɛɛ ‑nyɩa" nyiɔ ’kmʋnɩa’ ‑sea’ ‑kwɛ ‑ta ’ble ɛ. Ɔ nɩɛ ’kmʋ sese ‑mɛ dɩ ‑wee’ "klein se nʋʋɛ ke. ‑Ta ɔ nɩɩa ’nɔ ’kmʋ "kpei ɛ, ‑a poɛ ɔɔ’ wlu doin" o, ‑aa ‑cɛ" ’kpa ’je ɔ "jriɛ‑ ’mɛ, ‑wɛe ‑a ‑gbʋn ɔ ja ’pepe, ’de ‑aa sʋn blɔ "i. 2‑Bo ‑aa sea ’kmʋ ‑sea’ ‑kwɛ ‑ta ’ble ’a ‑tɩ’ ’tmʋ ɛ, ‑mɛ ɔmɔ ‑aa ‑da. Ɔmɔ ‑ɔ ‑nɩ ’bo ɔ "Bo ‑pʋn" ’de‑, ‑wɛe ‑ɔ ‑wlʋ ’o ’de ‑ɔ ji ’nɔ ’blʋa‑ "kpei, ‑wɛe ‑a ‑jee’ "jriɛ‑. Ɔ "Bo nʋɛ’, ‑wɛe ɔ ’wlʋ ’kwla ’de ‑a ‑pee. Ɛmɛ ‑tɩ ‑aa ‑tmʋ ɔɔ’ ‑tɩ’ ’de ao ‑pee. 3Dɩ "klein ‑a ‑jea ’de ‑a ‑wɔan ’de ɔ ’wɔn ɛ, ɩmɩ ‑aa ‑tmʋ ’de aopʋ ‑pee ‑ke, ‑wɛe ao ke ‑aa dbɛɛdɛ ’je "i "sii‑, dɛ‑nʋɛ’ ɛɛ’ dbɛɛdɛ tu ɛ, Kea ke ɛɛ’ "Ju Sesi Klisɩ ‑tu" ɛ ’bo ʋʋ ke ‑a ‑nynɩ. 4‑Bo ‑aa sea aopʋ ’sbɛ ja ’de dɩ ‑nɩa ’mʋa ’a ‑tɩ’ ’ʋn ɛ, ‑mɛ ‑a ‑nɩɛ "i ‑wɛe ‑a ‑wee’ ’a ’mʋa‑ ’je ’pepe nɩ‑.
Kea nɩɛ ‑sɔn’
5Dɛ ‑a ‑wɔan ’de Sesi Klisɩ ’wɔn ‑wɛe ‑aa ‑tmʋʋ’ a aopʋ‑ ɛ, ɛ ka : ɛmɛ ‑nɩ Kea nɩɛ ‑sɔn’ ‑o, kwie ’a dɛ‑saan" ka se ’de ɛ ’ʋn nɩ‑. 6‑Bo ‑a ‑na ‑a ‑ke Kea "siiɛ "i ɛ, ‑wɛe ‑aa sea kwie ’a dɩ ‑cɩɛi" i nʋ ɛ, ‑mɛ ‑aa ‑tmʋɛ sɩ, ‑aa’ nʋ tɔi" dɩ. 7’Kaa ka Kea nɩa ’de ‑sɔn’ ’ʋn ‑bo ‑a ‑nɩ ’de ‑sɔn’ ’ʋn kan’ a, ‑mɛ ka ‑a ‑tia ‑a ‑wee’ nɩɛ dɛ due’, ‑wɛe dɛ ɛɛ’ "Ju Sesi ’mɛa ’bo ‑aa ‑kɔi" ’de ɛɛ’ ‑tɩ’ ’ʋn ɛ, Kea ‑kɔ’ ‑aa dɩsaɩn ‑wee’ ’mɛ ’pepe.
8‑Bo ‑a ‑na dɛsaʋn ’a ‑kɔ se ‑a ‑pʋn" nɩ ɛ, ‑mɛ ‑aa pooɛ ‑aa ‑cɛ" ’srɛ i, tɔ’ ‑tɩ se ’de ‑a ’ʋn nɩ‑, dɛ‑nʋɛ’ dɛsaʋn ’a ‑kɔ ‑nɩ ‑a ‑pʋn" ’mɛ. 9’Kaa ‑bo ‑a ‑wɔɔn’ ‑aa dɩsaɩn "i ’de Kea ‑pee ɛ, ɛɛ muɛ ɩ ‑kɔa’ see, ‑wɛe ɛ ’je ‑aa ’di ’a wɔnynia’ ‑wee’ "klein "kpei ’wlʋ, dɛ‑nʋɛ’ ɛ ‑srɛi", ‑wɛe ɛɛ’ ’wlʋ wlu "kpei. 10‑Bo ‑a ‑na ‑a se dɛsaʋn nʋ ɛ, ‑mɛ Kea ‑ɛ ‑na ‑a ‑nɩɛ dɛsaʋnʋʋn ‑o ɛ, ‑aa nʋ ɛ sɩ ’tmʋi ’ʋn, ‑mɛ ɛɛ’ wlu se ’de ‑a ’ʋn nɩ‑.
2Sesi a po ‑aʋn sʋn o
1’Ma "nynuu‑, dɩ ’ma ’crɩa ’de ’sbɛ ’di ‑ta ‑wɛe ’ma ja aopʋ‑ ɛ, ɛmɛ ‑nɩ ao ’je dɛsaʋn nʋ‑tɩ ’bɔ, ɛmɛ ‑tɩ ’ma nʋ kan’. ’De ‑bo ‑aa jrɔ’ nʋ dɛsaʋn ɛ, ‑mɛ ‑a ‑bleɛ ‑tɩ’ "kpei ‑sai ’bo Kea "juɔi. Ɔmɔ ‑nɩ Sesi Klisɩ ‑ɔ ‑srɛai" ɛ, 2dɛ‑nʋɛ’ ɔ to ’e ɔɔ’ ‑cɛ" ’mɛ ‑wɛe ɔ ‑saa ɔɔ’ ‑cɛ" ’sraa‑ ’de ‑aa dɩsaɩn ’a ‑kwɛ‑ ‑tɩ ’ʋn. Ɛ se ’de ‑aa ’sʋ ’a ‑tɩ’ ’ʋn nɩ‑, ɔ nʋ ɛɛ’ dɛ tu ’mɛ ’de ’blʋa‑ ‑wee’ "klein ’a dɩsaɩn ’a ‑kwɛ‑tɩ ’ʋn ‑ke.
3‑Bo ‑aa sea Kea ’a wlu wɔn ’je ɛ, ‑mɛ ka ‑a ‑jua Kea ‑a ‑je kan’ ’mɛ. 4Nyɔ ‑ɔ ‑na ‑ɔ juo Kea ’mɛ, ‑wɛe ‑ɔɔ’ ’jea ɛɛ’ wlu wɔn ɛ, ‑mɛ ɔ nɩɛ sɩ ’tmʋi ‑o. tɔ’ ‑tɩ se ’de ɔ ’ʋn nɩ‑. 5’Kaa nyɔ ‑ɔɔ ‑jea ɛɛ’ wlu wɔn ɛ, ‑mɛ ɔmɔ ‑kma Kea ’a ‑tɩ’ ‑cɛɛn’‑. Ka ‑a ‑ke Kea "sia "i ɛ, ka ‑a ‑jea ɛɛ’ juosʋn nʋ, ’kamɔ ‑nao. 6Nyɔ ‑ɔ ‑na ‑ɔ ‑ke Kea "siiɛ "i ɛ, ‑mɛ ka Sesi na, ’kamɔ ɔ ’je na.
Kɛ’ dee‑
7’Ma ‑tɩ’ kmaʋn, dɛ ‑ɛɛ ‑tɩ’ ’ʋn ’ma ja aopʋ ’sbɛ ‑nɛ, ɛ se kɛ’ dee ’ma bla nɩ‑, ɛ kɛ’ soa soa ‑o. Ɛɛ’ kɛ’ tu ɛ, ɛmɛ ‑nɩ Kea ’a wlu ao ’wɔan tɛin" sese, ɛ ’na : ao kma ba ’a ‑tɩ’. 8’De ‑mɛ ’kamɔ dɛ ’ma ’crɩa ‑wɛe ’ma ja aopʋ‑ ɛ, ɛ nɩ kɛ’ dee. Dɛɛ‑tɩ ɛ nɩa kɛ’ dee ɛ, ɛmɛ ‑nɩ ɛɛ’ tɔ’ ‑tɩ poɛ "jri "kpae’ ’de Sesi ’a ’kmʋ ’ʋn, ‑wɛe ɛ po "jri "kpae’ ‑ke ’de aoa’ ’kmʋ ’ʋn. Kaan ka kwie nɩɛ mua’, ‑wɛe ‑sɔn’ ‑cɛɛn’ nɩ ‑sɩɩan’ la ’bode.
9Nyɔ ‑ɔ ‑na ‑ɔ ‑nɩɛ ’de ‑sɔn’ ’ʋn ‑wɛe ‑ɔ ‑nyɛa ɔɔ’ de ’di ’ʋn ɛ, ‑mɛ ɔɔ’ jei tu se ’de kwie ’di ’wlʋ ke. 10Nyɔ ‑kma ɔɔ’ de’di ’a ‑tɩ’ ɛ, ‑mɛ ‑mɔ "tiɛ ’de ‑sɔn’ ’ʋn, dɛ ‑ɛ ‑jea ɔɔ’ de’di ’de dɛsaʋn ’di po ɛ, ɛ se ’de ɔ ’ʋn nɩ‑. 11’Kaa nyɔ ‑ɔ ‑nyɛa ɔɔ’ de’di ’ʋn, ‑mɛ ‑mɔ nɩɛ ’de kwie ’di, ɔɔ’ ’je i. ‑Ta ɔɔ mua ɔ se ’o juo‑, dɛ‑nʋɛ’ kwie kpee ’de ɔ "jri ’de ’mɛ.
12’Ma "nynuu‑, ’ma pooɛ aopʋ ’sbɛ ‑nɛ ‑jei" ‑wɛe ka aoa’ dɩsaɩn ‑kwɛ‑a ’de Sesi ’a ’nynɩ ’ʋn ao ’je ɛ ‑kwlʋ o po. 13Ao ‑ɔ ‑nɩa "bo ‑wi" ɛ, ’ma ’crɩ ’sbɛ ‑nɛ ’mɛ ‑wɛe ’ma poo aopʋ ‑tɩ’ ‑kwlʋ o. Ka Kea nɩa ’kmʋ sese ɛ, ao juɩ’. Ao ‑kooa" mɩɩ" ‑wi" ’ma pooɛ aopʋ ’sbɛ ‑nɛ ‑jei" ‑wɛe ka ao kpa tʋ ’a "jru ’bo ’di ’a wɔnynii "kpei ɛ, ’de ao ’je ɛ ‑kwlʋ o po.
14’Ma "nynuu‑, ’ma ja aopʋ ’sbɛ‑ ‑wɛe ’ɩn ’je ao ‑tɩ’ ‑kwlʋ o poo‑, dɛ‑nʋɛ’ ao juo Kea ‑ɛ ‑nɩa ‑a "Bo ’mɛ. Ao nyʋ ‑cɔʋn’‑, ’ma pooɛ aopʋ ‑tɩ’ ‑kwlʋ o ‑ke ‑wɛe ka ao jua Kea ‑ɛ ‑nɩa ’kmʋ tɛin" sese ɛ, ao ’je ɛ ‑kwlɩ" ’blee‑. ‑Kooa" mɩɩ", ’ɩn ’tmʋʋ aopʋ wlu ‑nɩa ’mʋa‑ ’mɛ ‑ke ‑wɛe ’ɩn ’je aopʋ ‑tɩ’ ‑kwlʋ o poo ‑wɛe ka ao dia ‑kla a, ’de Kea ’a wlu "tia ’de aopʋ ’ʋn ’ɛ ‑wɛe ao kpa tʋ ’a "jru ’bo ’di ’a wɔnynii "kpei ɛ, ao ’jɩ juo‑.
15Ao ’bo ’kmʋ "kpeidɩ ’a ‑tɩ’ kmaa. ‑Bo nyɔ kma ’kmʋ "kpeidɩ ’a ‑tɩ’ ɛ, ‑mɛ Kea ’a ’tʋn se ‑teɩn ’ble ’de ɔ pɛe o. 16Dɩ "klein ‑ɩ ‑nɩa ’kmʋ ’a dɩ ɛ, ɩ ka : tɔ’ saɩn ‑ɩ ‑nɩa ’de nyʋ pɛe o, dɩ ‑wee’ "klein pooa ‑ʋn pɛe "i o, ‑cɛi" ’bɛɛa’ ‑ɛ ‑wlʋa ’de "wliiɛ‑ ’blea’ ’ʋn o, ɩ se ’de Kea ’ʋn ’wlʋ, ɩ nɩɛ ’kmʋ ’a dɩ ‑o. 17’Kmʋ a muɛ ‑sia’ ɛ ke ɛɛ’ dɩ "klein nyiɔ ɔ ‑pɔan i ke, ’kaa nyɔ ‑ɔɔ nʋa Kea ’a ‑kwlʋtɩ ɛ, ɔ ke Kea a muɛ ’kmʋnɩa’ mamaʋ ’sʋ.
Klisɩ ’a o ‑fɔn’ i‑
18’Ma "nynuu‑, de’bɔɔ‑ nɔ" "kʋʋan‑ i ! Klisɩ ’a o ‑fɔin ‑ɔɔ ji nynɩ ao ’wɔan ’de ɛ, ɔɔ ji’. Nɔ" ‑a ‑nɩa ’di ‑ta, Klisɩ ’a ’ʋn ’nyɛʋn ‑tuu"‑tuu nɩ ’de nyʋ "klu ‑wɛ‑, ɛmɛ ‑toɛ ka de ’bɔɔ‑ nɔ" "kʋʋan i ɛ. 19Ʋʋa’ nyʋ tu ’wlʋɛ ’de ‑a "klu, ’kaa ʋʋ se ‑aa nyʋ nɩ ’de‑, ɛmɛ ‑tɩ ʋʋ ’wlʋ ’de ‑a "klu. ‑Bo ʋʋ nɩ ‑aa nyʋ ’de ɛ, ‑mɛ ʋʋ se ɛ ’bɛɛ‑ ʋʋ ’je ’de ‑a "klu ’wlʋ. Ka nyʋ ‑ʋʋ ‑ke ‑aa na ʋʋ ‑wee’ sea kan’ ‑aa ’cɛ nɩ, ʋʋa’ ’de ‑a "klu ’wlʋa’ mɛ ‑to ɛ ’pepe.
20Aopʋ mɔ ’ja a, Kea ‑ɛ ‑nɩa ’pepe ɛ, ɛmɛ ‑nyɩ" aopʋ ɛɛ’ ‑Suu, ‑wɛe ao ‑wee’ "klein juo tɔ’ ‑tɩ. Ka nyʋ a poa Kea ’a dbonʋʋn ‑nɩa tɛin" ’cna "jru ɛ, ’kamɔ Kea po ɛɛ’ ‑Suu ’de aopʋ ’ʋn. 21Dɛɛ ‑tɩ ’ma poa aopʋ ’sbɛ ‑jei" ɛ, ɛ se ‑mɛ ao se tɔ’ ‑tɩ juo nɩ‑, ’kaa ao juo tɔ’ ‑tɩ ’mɛ, ɛmɛ ‑tɩ ’ma poo ao ’sbɛ ‑nɛ ‑jei" ’de ka sɩ sea ’bɛɛ‑ ɩ ’jea ’de tɔ’ ‑tɩ ’ʋn ’wlʋ ɛ, ao ’je kan’ ‑mɔ ’mɛ ‑ke.
22Nyɔ ‑ɔɔ wlua ‑wɛe ‑ɔ ‑na Sesi se Nyʋ ’pʋʋi Klisɩ nɩ ɛ, ɔmɔ ‑nɩ sɩ ’tmʋ i, ‑mɛ ɔmɔ ‑nɩ Klisɩ ’a ’ʋn ’nyɛi ‑wɛe ‑ɔ ‑na ɔ se ‑a "Bo Kea ke ɛɛ’ "Ju ’a ‑tɩ’ "i nɩ‑. 23’De nyɔ ‑ɔ ‑na ‑ɔ se "Ju juo ɛ, ‑mɛ ɔ ke "Bo se "i "sii‑. ’De nyɔ ‑ɔ ‑na ‑ɔ ‑juo "Ju ’mɛ ɛ, ‑mɛ ɔmɔ ‑ke "Bo "sii‑ "i.
24Ɛmɛ ‑tɩ ’ma ’tmʋʋ aopʋ ‑wɛe dɩ "klein ao ’wɔan "i‑saa nɔ" ɛ, ’de ao ’jɩ i ‑te’ ’de ao pɛe o. Dɩ ao ’wɔan "i‑saa nɔ" ‑bo ɩ "ti ’de ao pɛe o ɛ, ‑mɛ ao ke ‑a "Bo Kea ke ɛɛ’ "Ju "siiɛ "i ‑ke. 25Dɛ ‑ɛɛ wlu Klisɩ cɛan ‑tie" ‑wɛe ɔ ’jea ‑a ‑nyɩ" ɛ, ɛmɛ ‑nɩ ’kmʋ ‑sea’ ‑kwɛ‑ ‑ta ’ble ɛ.
26Dɩ ‑nɩ ’ma ’tmʋɩ ’de nyʋ ‑nɩɛ "i ‑ʋʋ ‑jea aoa’ "jru ‑jei" ‑saa ’a ‑tɩ’ ’ʋn. 27’De aopʋ mɔ ɛ, nyɔ se ɛ ’bɛɛ‑ ‑wɛe ɔ ’je aopʋ dɛ jrɛ’ tɔɔ la ’bode, dɛ‑nʋɛ’ Klisɩ "nyɩ aopʋ ɔɔ’ ‑Suu ‑mɛ ‑wɛe ɛ "ti ’de aopʋ ’ʋn, ɛmɛ ‑ɛɛ tɔɔ aopʋ dɩ ‑wee’. Dɩ ɛɛ tɔɔa aopʋ ɛ, ɩ nɩɛ tɔ’, ɩ se sɩ nɩ‑. Ɛmɛ ‑tɩ dɩ ɛɛ tɔɔa aopʋ ɛ, ao ’jɩ wɔn ‑wɛe ao ke Klisɩ ’je "i "sii‑.
28Kɩɩn ’ma "nynuu‑, ao ‑te ’de Sesi ’kwai la ’bode ! ‑Bo ‑a ‑wee’ nʋ kan’ a, ‑wɛe ‑sɔntɩ ɔɔ mua de jia’ a, ’de ‑tɩn’ je ‑a "i ’dbaa, ‑wɛe ‑a ‑je ɔ o tɛɛn‑. 29Ka Sesi ’srɛa "i ‑bo ao ’je kan’, ‑mɛ ka nyɔ ‑ɔɔ nʋa "isrɛdɩ ’wlʋa ’de Kea ’ʋn ɛ, ao ’wɔn ɛ ’mii ’pepe ‑ke.
3Kea ’a "nynuu‑
1’Ma ’cɛ, ao ‑gbʋn ’nɔ, dɛ Kea kma ‑aa ‑tɩ’ ka ! Ɛɛ’ nyʋ ’a ‑tɩ’ kmaa’ cɛn ‑je "kpei ‑tie", ɛ nʋɛ’ mɔ ‑wee’ ɛɛ jea ‑aʋn ɛɛ’ "nynuu‑ ’daa‑. ’De ‑a ‑nɩɛ’ mɔ ‑cɛɛn’‑. Dɛɛ‑tɩ ’kmʋ "kpeinyʋ se ‑a dɛ ’daa‑, ɛmɛ ‑nɩ ʋʋ se Kea juo‑. 2’Ma ‑tɩ’ kmaʋn, kaan ka la ‑a ‑nɩɛ Kea ’a "nynuu‑ ‑o, dɛ ‑jɛ ‑a ‑jea ’ʋn nɩ ’de nya, ‑mɛ se "jri "kpae’ po ke ’pepe. ’De dɛ ‑jɛ ‑a ‑jua ’pepe ɛ, ɛmɛ ‑nɩ ‑sɔntɩ ɛɛ muɛ "jri "kpae’ poa’ a, Kea ke ‑aa muɛ dɛ due’ nɩa’, dɛ‑nʋɛ’ ka ɛ nɩa, ’kamɔ ‑aa mu ɛ "jriɛ‑ ’jeea’. 3’De nyɔ "o nyɔ ‑tba’ ɛɛ’ dɛ tu tɔ’ "i ɛ, ‑mɛ ‑mɔɔ ‑pɔn ’pepe nɩa’ i, ka Sesi nɩa ’pepe ɛ.
4’De nyɔ "o nyɔ ‑ɔɔ nʋa dɛsaʋn ɛ, ‑mɛ ‑mɔɔ’ ’je Kea ’a kɛ’ wɔn. Dɛsaʋn nʋa’ mɛ ‑nɩ Kea ’a kɛ’ wɔnblaa’. 5’De ao juɛ’ ka Sesi jia ‑wɛe ɔ ’jea nyʋ dɛsaʋn ’a ‑gbɛ "jru ‑saa a, dɛsaʋn ’a ‑kɔ dɛ‑saan" ka se ɔ ‑pʋn" nɩ‑. 6Nyɔ "o nyɔ ‑ɔ ‑ke Sesi "sia "i ɛ, ‑mɛ ‑mɔ ’je dɛsaʋn nʋ ‑tɩ ’bɔ ‑o. ’Kaa nyɔ ‑ɔɔ kpa dɛsaʋn nʋa’ nya ’ja a, ‑mɛ ‑mɔ se ɔ ’je, ‑wɛe ɔɔ’ juo ‑tɩ.
7’Ma "nynuu‑, ao ’bo aoa’ ‑cɛi" "taiɛ ‑wɛe nyɔ ’bo ao ’srɛ i pooɛ. Nyɔ ‑ɔɔ nʋa "isrɛdɩ ɛ, ‑mɔ ’srɛi" ka Sesi ’a ‑cɛ" ’kpa ’srɛa "i ɛ. 8’De nyɔ ‑ɔɔ kpa dɛsaʋn nʋa’ nya a, ‑mɛ ‑mɔ nɩɛ ‑siɔn’ ’ɔ nyɔ ‑o, dɛ‑nʋɛ’ ‑siɔn’ mɔ nɩɛ dɛsaʋnʋi ‑o sese. ’De Kea ’a "Ju ‑mɔ ji’ ‑wɛe ɔ ’je ‑siɔn ’ɔ nʋʋdɩ i‑sa.
9Nyɔ "o nyɔ ‑wlʋa ’de Kea ’ʋn ɛ, ‑mɛ ‑mɔ ’bɔ dɛsaʋn nʋ‑tɩ, dɛ‑nʋɛ’ ’kmʋnɩa’ ‑cɛɛn’ ‑ɛ ‑wlʋa ’de Kea ’ʋn ɛ, ɛmɛ ‑nɩ ’de ɔ ’ʋn ’bode. Ɔ se ɛ ’bɛɛ‑ ɔ ’je dɛsaʋn nʋa’ nya kpa, dɛ‑nʋɛ’ Kea mɛ ‑nɩ ɔ "Bo. 10Nyɔ ‑ɔɔ’ nʋa "isrɛdɩ ‑wɛe ‑ɔ sea ɔɔ’ de ’di ’a ‑tɩ’ kma a, ‑mɛ ‑mɔ se Kea ’a "ju nɩ‑. Dɛ ‑ɛ ‑je ɛ nʋ ‑wɛe nyʋ ’jea Kea ’a "nynuu‑ ke ‑siɔn’ ’ɔ "nynuu ’a "kpei‑ ‑seea’ ka juo ɛ, ɛmɛ ‑nao.
Ba ’a ‑tɩ’ kma ‑tɩ
11Tɔ’ ‑o ’ma ’cɛ, wlu ao ’wɔan tɛin" sese ɛ, ɛ ’naa : ‑A ‑kma ba ’a ‑tɩ’ due ’due. 12‑A ‑ke Adam ’a "ju Kain ’bo ‑kɔɔɛ, ɔ nɩɛ ’di ’a wɔnynii ‑o. Ɛmɛ ‑tɩ ɔ ’dba ɔɔ’ "dei. Dɛɛ‑tɩ ɔ ’dbɔ ɛ‑ ? Ɛmɛ ‑nɩ ɔmɔ ’ɔ nʋʋdɩ nyniɛ "jrii ‑wɛe ɔɔ’ "dei ’a ‑nɩ nʋʋdɩ ’srɛi".
13’Ma de’di ‑wi", ‑bo nyʋ ‑sea’ Kea juo ’nyɛ aopʋ ’ʋn ɛ, tai’ ’bo aopʋ "maa. 14Ka ‑a ‑wlʋa ’de ’mɛa’ ’kwa ‑wɛe ‑a ‑jea ’kmʋ dee nɩa’ a, ‑a ‑je kan’ ’mɛ. Dɛɛ‑tɩ ‑a ‑jea kan’ a, ɛmɛ ‑nɩ ‑a ‑kma ba ’a ‑tɩ’. Nyɔ ‑jɔ sea’ ɔɔ’ de’di ’a ‑tɩ’ kma a, ‑mɛ ‑mɔ nɩɛ ’de ’mɛa ’a kʋɔnkwla’ ke. 15Nyɔ "o nyɔ ‑nyɛa ɔɔ’ de ’di ’ʋn ɛ, ‑mɛ ‑mɔ nɩɛ "ku ’dbai ‑o. ’De ka ’kmʋnɩa’ ‑sea’ ‑kwɛ ‑ta ’ble sea ’de "ku ’dbai ’ʋn nɩ ɛ, ao ’je kan’ ’mɛ. 16Ao ‑gbʋn ’nɔ, dɛ ‑nɩa ’de nyiɔ ’ɔ ‑tɩ’ kma ‑tɩ ’de ɛ, ‑a ‑juɛ’, dɛ‑nʋɛ’ ɛmɛ ‑nɩ Sesi to ’e ɔɔ’ ’kmʋ ’mɛ ’de ‑aa ‑kɔi". ‑Jɛ ɛ nɩa kan’ ‑mɔ ’ja a, ‑mɛ ‑amɔ ‑je ’de ‑aa ’kmʋ to ‑ke ’de ‑aa de ’di‑wi" ’a ‑tɩ’ ’ʋn. 17‑Bo nyɔ nɩ ’kmʋ ’a dɩ ‑wee’ "klein ’a jei ‑wɛe ‑bo ‑tɩ’ kpʋn ɔɔ’ de ’di, ’de ɔɔ’ ’je ɔɔ’ wɛe ’ee, ‑mɛ ka Kea ’a nyʋ ’a ‑tɩ’ kmaa’ nʋ ’de ɔɔ’ ’ʋn nɩsʋn ɛ‑ ? 18’Ma "nynuu‑, ‑a ‑bo nyʋ ’a ‑tɩ’ kmaa’ nʋɛ ’de wɔn ’di ke mɩɩɔ ’dɩdɩ ’ʋn, ’kaa ‑aa nyʋ ’a ‑tɩ’ kmaa’ po "jri "kpae’ ’de tɔ’ ‑tɩ nʋa’ ’ʋn ‑wɛe ka ‑a ‑kma ba ’a ‑tɩ’ ɛ, ’de ‑aa nʋʋdɩ ’je ɛ to‑.
19-20’Kamɔ ‑bo ‑a nʋ ɛ, ‑wɛe ka ‑a ‑nɩa ’bo tɔ’ ‑tɩ ’a ‑jei" ɛ, ‑a ‑je ɛ juo‑, ’de ‑aa pɛe ’je ja ji ’bo Kea "juɔi. ‑Bo ‑aa pɛe a sea ‑a ’pee kpʋʋn ɛ, ka ‑a ‑jea nʋ ‑wɛe ‑aa pɛe ’jea i ‑te, ’ka ka : Kea ‑jɛ ‑bɛa "i ‑ɛ ‑sia ‑aa pɛe ɛ, ‑mɛ juo dɩ ‑wee’ "klein ’mɛ. 21’Ma ‑tɩ’ kmaʋn, ‑bo ‑aa pɛe se ‑a ’pee kpʋʋn ɛ, ‑mɛ ‑a ‑bleɛ ‑kwlɩ" ‑tedɛ ’mɛ ’bo Kea "juɔi, dɛ jrɛ’ ’ɛ faʋn se ‑a nʋi. 22Dɛ "o dɛ ‑a ‑tee ’a i ɛ, ‑aa mu ɛ ’jea’, dɛ‑nʋɛ’ ‑aa ‑jeɛ ɛɛ’ kɛ’ wɔn, ‑wɛe ‑aa nʋ dɩ ‑nmɔɔa ’de ɛ "jri ’dei ɛ. 23’De ɛɛ’ kɛ’ mɛ ka, ɛmɛ ‑nɩ ‑a ‑je ɛɛ’ "Ju Sesi Klisɩ ’a ’nynɩ tɔ’ ’ʋn ’je, ‑wɛe ‑a ‑je ba ’a ‑tɩ’ kma due ’due, ’kamɔ Klisɩ ’da ’de ‑a ‑pee. 24’De nyɔ ‑ɔɔ ‑jea Kea ’a kɛ’ wɔn ɛ, ‑mɛ ‑mɔ "tiɛ ’de Kea ’ʋn, ‑wɛe Kea "ti ’de ɔ ’ʋn. Ka Kea "tia ’de ‑a ’ʋn ka ‑a ‑jea ɛɛ’ juosʋn nʋ ɛ, ɛɛ’ ‑Suu ɛ "nyɩa ‑aʋn ɛmɛ ‑nʋɛ ‑wɛe ‑a ‑juo ɛ.
4Kea ’a ‑Suu ke ‑siɔn ’ɔ ‑suu ke
1’Ma ‑tɩ’ kmaʋn‑, ao ’bo ‑suu "o ‑suu ’a ‑tɩ’ tɔ’ ’ʋn ’jeɛ, ’kaa ao juo ‑sii ’a "kpei‑ ‑seea’ ka‑, ‑wɛe ‑bo ɩ ’wlʋ ’de Kea ’ʋn ’de ao ’je kan’ ’je. Dɛɛ‑tɩ ’ɩn ’da kan’ a, ɛmɛ ‑nɩ sɩ ’tmʋʋn ‑tuu"‑tuu ‑ji’ ’de ’blʋa‑ "kpei ‑wɛe ‑ʋʋa ‑daa’ ʋʋa’ ‑cɛ" Kea ’a wlu ’kwajaaʋn. 2‑Suu ‑ɛ ‑wlʋa ’de Kea ’ʋn ka ao ’jea ɛɛ’ juosʋn nʋ, ’ka ka : nyɔ "o nyɔ ka Sesi Klisɩ ‑snɛɛa nyiɔ ’ʋn ‑wɛe ɔ jia ’nɔ ’blʋa‑ "kpei ‑ɔɔ mu ɛ ’tmʋa’ a, ‑mɛ Kea ’a ‑Suu ‑nɩ ’de ɔ ’ʋn. 3’De nyɔ "o nyɔ ‑ɔ ‑na Sesi se ’e Kea ’ʋn ’wlʋ ɛ, ‑mɛ Kea ’a ‑Suu se ’de ‑mɔ ’ʋn nɩ‑, ‑mɛ Klisɩ ’a ’ʋn ’nyɛi ‑ɔɔ ji nynɩ ao ’wɔan sese ɛ, ɔmɔ ‑ɔɔ ‑suu nɩ ’de ‑mɔɔ’ jei tu ’ʋn. Kaan ka la ’ja a, ’ma ’cɛ, Klisɩ ’a ’ʋn ’nyɛi ‑nɔ ɔ ji ’nɔ ’kmʋ "kpei ‑wɛ‑ ’bode.
4’Kaa ’ma "nynuu‑, aomɔ ɛ, ao nɩɛ Kea ’a nyʋ ‑o. Ao kpa tʋ ’a "jru ’mɛ ’bo ʋʋa’ sɩ ’tmʋʋn tu "kpei, dɛ‑nʋɛ’ ‑Suu ‑ɛ ‑nɩa ’de aopʋ ’ʋn ɛ, ɛ kmai", ɛ je ‑suu ‑ɛ ‑nɩa ’de ʋʋpʋ ’ʋn ‑sii. 5Ʋʋa’ nyʋ tu ’wlʋɛ ’de ’blʋa ’dinyʋ "klu, ɛmɛ ‑tɩ ’blʋa ’di nyʋ po ʋʋpʋ ’a wlu doin" o, dɛ‑nʋɛ’ ka ’blʋa ’dinyʋ nɩa "i, ’kamɔ ʋʋpʋ a wlu. 6’Kaa ‑apʋ mɔ ɛ, ‑a ‑nɩɛ Kea ’a nyʋ ‑o. Nyɔ ‑ɔ ‑jua Kea a, ɔmɔ ‑ɔɔ po ‑aa wlu doin" o ’de nyɔ ‑ɔ sea Kea juo ɛ, ‑mɔɔ’ po ‑aa wlu doin" o. ’Bomɔ ‑aa juo tɔ’ ‑tɩ ’a ‑Suu ke sɩ ‑suu ’a "kpei‑ ‑seea’ ’ɩn.
Kea kma nyʋ ’a ‑tɩ’
7’Ma ‑tɩ’ kmaʋn‑, ‑a ‑kma ba ’a ‑tɩ’ due ’due, dɛ‑nʋɛ’ ba ’a ‑tɩ’ kmaa’ ’wlʋɛ ’de Kea ’ʋn. Nyɔ "o nyɔ ‑kma nyʋ ’a ‑tɩ’ ɛ, ‑mɛ ɔ ’wlʋɛ ’e Kea ’ʋn, ‑wɛe ɔ juo Kea. 8Nyɔ ‑ɔ sea nyiɔ ’ɔ ‑tɩ’ kmaa’, ‑mɛ ‑mɔ se Kea juo‑, dɛ‑nʋɛ’ Kea mɛ ‑nɩ nyʋ ’a ‑tɩ’ kmaa’. 9Ka Kea ’a nyʋ ’a ‑tɩ’ kmaa’ nʋa "jri "kpae’ posʋn, ’ka ka : ɛɛ’ "Ju jɔ due’ koʋn ‑gbai’ mɔ ɛ dbo ’nɔ ’blʋa‑ "kpei ‑wɛe ‑a ‑je ’kmʋnɩa’ ‑cɛɛn’ ’je ’de ɔɔ’ ‑tɩ’ tɔ’ ’ʋn ’jea’ ’ʋn. 10Dɛ ɛɛ’ nyʋ ’a ‑tɩ’ kmaa’ tu tba ’de "jri, ɛ ka : ɛ se ‑apʋ mɔ ‑ɔ ‑kma Kea ’a ‑tɩ’ nɩ‑, ’kaa Kea mɛ ‑kma ‑aa ‑tɩ’ ‑wɛe ‑ɛ dbo ɛɛ’ "Ju ’de ɔ nʋ ɔɔ’ ‑cɛ" ’sraadɛ ’ʋn ’de ‑aa dɩsaɩn ’a ‑kwɛ‑tɩ ’ʋn.
11’Ma ‑tɩ’ kmaʋn, ‑bo Kea ‑mɛ kma ‑aa ‑tɩ’ kan’ ‑mɔ ɛ, ‑mɛ ‑a ‑je ba ’a ‑tɩ’ kma ‑o due ’due ‑ke. 12Nyɔ "o nyɔ se Kea "jriɛ‑ ’jee‑ due’, ‑bo ‑a ‑kma ba ’a ‑tɩ’ due ’due ɛ, ‑mɛ Kea "ti ’de ‑a ’ʋn ’ɛ, ‑wɛe ɛɛ’ nyʋ ’a ‑tɩ’ kmaa’ ’je "jri "kpae’ po ’pepe ’de ‑a ’ʋn.
13Kea "nyɩ ‑aʋn ɛɛ’ ‑Suu ’mɛ ɛmɛ ‑tɩ ka ɛ "tia ’de ‑a ’ʋn ‑wɛe ‑a ‑tia" ’de ɛ ’ʋn ɛ, ‑a ‑bɛɛ’ ‑a ‑je ɛ juo‑. 14Ka ‑a "Bo Kea ja ɛɛ’ "Ju ’de ɔ ’je nyʋ ‑wee’ ’a ’Pʋʋi nɩ ‑aa ‑cɛ" ’kpa ’jee ɛ "jriɛ‑ ‑wɛe ‑a ‑nɩ ɛɛ’ ‑ta ’jeʋn. 15Nyɔ ‑ɔ ‑na Sesi nɩɛ Kea ’a "Ju ‑o ɛ, ‑mɛ Kea "ti ’de ɔ ’ʋn ’ɛ, ‑wɛe ɔmɔ "ti ’de Kea ’ʋn. 16Ka "o ka ɛ ’je ɛ nɩ ɛ, ka Kea kma ‑aa ‑tɩ’ ɛ, ‑apʋ mɔ ’je kan’ ’mɛ ‑pepe, ‑wɛe ‑a ‑je ɛ tɔ’ ’ʋn.
’Ma ’cɛ, Kea nɩɛ nyiɔ ’ɔ ‑tɩ’ kmaa’, nyɔ nyiɔ ’ɔ ‑tɩ’ kmaa’ "tia ’de ’ʋn ɛ, ‑mɛ ‑mɔ "ti ’de Kea ’ʋn ’ɛ, ‑wɛe Kea "ti ’de ɔ ’ʋn. 17Dɛ Kea ‑pɔan ‑wɛe ɛ poa ɛɛ’ nyʋ ’a ‑tɩ’ kmaa’ ’de ‑a ’ʋn, ɛmɛ ‑nɩ ’nɔ ’kmʋ "kpei ‑a ‑nɩa ‑ta a, ka Sesi "tia ’de Kea ’ʋn ɛ, ’kamɔ ‑a ‑je ’de Kea ’ʋn "ti ‑ke, ‑wɛe ‑sɔntɩ ‑a mua ’pee ’a ’wɩ nɩa’ ’de ‑a ‑je tɔ’ tba ‑ta ’ble. 18’Ma ’cɛ, Kea ’a nyʋ ’a ‑tɩ’ kmaa’ ‑nɩa ’de ‑a ’ʋn ‑bo ɛ mu ɛ nyni ɛ, ‑mɛ faʋn se ‑a nʋi ’bode, dɛ‑nʋɛ’ ɛɛ’ nyʋ ’a ‑tɩ’ kmaa’ a ‑saa faʋn ‑jei". ’Kaa ‑bo faʋn nɩ ’de nyɔ ’ʋn ɛ, ‑mɛ ’pee ‑nɩ ɔ ’de, ‑mɛ ‑ta Kea nɩa "i ɛ, ɛɛ’ nyʋ ’a ‑tɩ’ kmaa’ se ’o nyni ke.
19‑A ‑kma Kea ’a ‑tɩ’, dɛ‑nʋɛ’ ɛmɛ ‑ɛ ‑kma ‑aa ‑tɩ’ tɛin". 20‑Bo nyɔ ’na ɔ kma Kea ’a ‑tɩ’ ‑wɛe ɔ ’nyɛ ɔɔ’ de ’di ’ʋn ɛ, ‑mɛ ɔ nɩɛ sɩ ’tmʋi ‑o, dɛ‑nʋɛ’ ɔɔ’ de’di ‑jɔ ɔɔ ’jeea "jriɛ‑ ‑bo ɔ ’nyɛ ‑mɔ ’ʋn ’ee, ‑mɛ Kea ‑jɛ ɔɔ’ ’jeea "jriɛ‑ ka ɔ ’je ‑mɛ ’ɛ ‑tɩ’ kmasʋn nʋ ɛ‑ ? 21Ao ‑gbʋn ’nɔ, kɛ’ Sesi "nyɩa ‑aʋn ɛ, ɛ ka : nyɔ ‑ɔ ‑kma Kea ’a ‑tɩ’ ɛ, ‑mɛ ɔ ’je ɔɔ’ de’di ’a ‑tɩ’ kma ‑o ‑ke.
5‑A kpa tʋ ’a "jru ’bo blʋa "kpei
1Ka Sesi nɩa Nyʋ’pʋʋi Kea ‑tea ’o ɛ, nyɔ ‑je ɛ tɔ ’ʋn ɛ, ɔmɔ ‑wlʋ ’de Kea ’ʋn. ’De nyɔ "o nyɔ ‑kma "bo ’a ‑tɩ’ ɛ, ‑mɛ ɔ kma ɔɔ’ "nynuu ’a ‑tɩ’ ‑ke. 2Ka ‑a ‑kma Kea ’a "nynuu ’a ‑tɩ’ ’ee, ka ‑a ‑je ɛɛ’ juosʋn nʋ ɛ‑ ? Ka ‑a ‑jea ɛɛ’ juosʋn nʋ ɛmɛ ‑nɩ, ‑bo ‑a ‑kma Kea ’a ‑tɩ’ ɛ, ‑mɛ ka ɛɛ’ wlu "sia ’nynɩ, ‑a nʋ kan’. 3‑Bo nyɔ kma Kea ’a ‑tɩ’ ɛ, ‑mɛ ɔ ’je ɛɛ’ kɛ’ wɔn. ’De Kea ’a kɛ’ wɔn ’jea’ se ’kle nɩ‑, 4dɛ‑nʋɛ’ nyʋ "klein ‑wlʋa ’de Kea ’ʋn ɛ, ‑mɛ ‑wi" ‑mʋ kpa tʋ ’a "jru ’mɛ ’bo dɩ "klein ‑ɩa’ nʋa Kea ’tʋn "kpei. ’De ‑aa Sesi ’a ‑tɩ’ tɔ’ ’ʋn ’jea’ ’ʋn mɔ ‑a ‑kpaa tʋ ’a "jru ’bo dɩ ‑nɩa ’mʋa‑ "kpei. 5Nyɔ ‑ɔ ‑beeɛ’ ‑ɔ ‑je tʋ ’a "jru kpa ’bo dɩ ‑ɩa’ nʋa Kea ’tʋn "kpei ɛ‑ ? Ka Sesi nɩa Kea ’a "Ju, nyɔ ‑je ɛ tɔ’ ’ʋn ɛ, ɔmɔ ‑ɔɔ ’sʋ ’bɛɛ‑ tʋ ’a "jru kpaa’ ’bo dɩ ‑ɩa’ nʋa Kea ’tʋn "kpei.
Sesi ’a ‑pʋn" ‑tɩ ’tmʋa’
6Tɔ’ ‑o, Sesi Klisɩ mɔ ‑ji’ ‑wɛe ɔɔ jii ’de "ni ke nymɔ ’ɔ i wlaa’ ’ʋn. Ɛ se ’de "ni ’a ’sʋ ’ʋn nɩ‑, ’kaa ɔ cɛɛn ’de "ni ke nymɔ ’ʋn, ‑wɛe ka dɩ ‑nɩa ’mʋa‑ nɩa tɔ’ ‑tɩ ɛ, Kea ’a ‑Suu ’tmʋ ɩ. ’De Kea ’a ‑Suu mɛ ‑nɩ tɔ’ ‑tɩ. 7‑Tɩ ’a ‑ta ’jeʋn taan ‑ʋʋ ‑tmʋa Sesi ’a "kpei ‑tɩ ɛ, ʋʋ ka : 8Kea ’a ‑Suu o, "ni o, nymɔ o, ka ʋʋ nɩa taan a, ʋʋ ‑wee’ ’tmʋɛ dɛ due’ ’de ɔɔ’ ‑tɩ’ ’ʋn. 9Nyʋ ‑ʋʋ ‑jea ‑tɩ’ ’a ‑ta dɛ ʋʋ ’tmʋa ‑aa ‑je ɛ tɔ’ ’ʋn ’ɛ see. ‑Bo ‑aa sea nyʋ ’a wlu tɔ’ ’ʋn ’je ’dee, ‑mɛ dɛɛ ‑tɩ dɛ Kea ’tmʋa, nyʋ se ɛ tɔ’ ’ʋn ’je ɛ‑ ? Dɛ Kea ’tmʋa, ɛ nɩɛ dɛwɔn, ɛ je ‑tɩ ’a ‑ta ’jeʋn ’a wlu ‑sii. Dɛ ɛ ’tmʋa ɛmɛ ‑nɩ Sesi nɩɛ ɛɛ’ "Ju ‑o. 10Nyɔ ‑ɔ ‑jea Kea’ a "Ju a ‑tɩ’ tɔ’ ’ʋn ɛ, ‑mɛ ka dɛ Kea ’tmʋa ɛ nɩa tɔ’ ‑tɩ ɛ, ɔ ’wɔɔn‑ ’ɛ. ’Kaa nyɔ ‑ɔ se ɔɔ’ ‑tɩ’ tɔ’ ’ʋn ’je ɛ, ‑mɛ ‑mɔ nʋɛ Kea sɩ ’tmʋi ’ʋn, dɛ‑nʋɛ’ dɛ Kea ’tmʋa ’de ɛɛ’ "Ju ’a ‑tɩ’ ’ʋn ɛ, ɔ se ɛ tɔ’ ’ʋn ’je. 11Dɛ ‑ɛ ‑nɩa ’de ɛɛ’ wlu tu ’de ɛ, ɛmɛ ‑nɩ Kea "nyɩ ‑a ’kmʋnɩa’ dee ‑sea’ ‑kwɛ ‑ta ’ble ’mɛ ‑wɛe ‑a ‑je ɛɛ’ ’kmʋ tu ’de ‑a ‑ke ɛɛ’ "ju ’a "i "sia’ ’ʋn. 12Nyɔ ‑ɔ ‑wɔɔan’ ɛɛ’ "Ju ’a ‑tɩ’ ɛ, ‑mɛ ɔ ’je ’kmʋnɩa’ dee ‑mɛ ’mɛ, ’de nyɔ ‑ɔ sea Kea ’a "Ju ’a ‑tɩ’ ’wɔɔn‑ ɛ, ‑mɛ ɔ se ’kmʋnɩa’ dee ’ble.
13’Ma ’crɩ wlu ‑nɛ ’mɛ ’de ’sbɛ ’di ‑wɛe ’ma poo aopʋ ‑jei", ’de aopʋ ‑ɔ ‑tea Kea ’a "Ju ’a ’nynɩ ‑kwlɩ" ɛ, ka ao ’jea ’kmʋnɩa’ dee sea’ ‑kwɛ ‑ta ’ble, ’de ao ’je kan’ ’je. 14Ao ‑gbʋn ’nɔ, tɔ’ tba ‑ta ‑a ‑blea ’bo Kea "juɔi ɛ, ɛmɛ ‑nɩ dɛ ‑aa ‑tee ɛ i, ‑bo ɛ nɩ ɛɛ’ ‑kwlʋtɩ ɛ, ‑mɛ ɛɛ muɛ ‑aa wlu doin" o poa’ see. 15Ka ɛɛ poa ‑aa baewlu doin" o, ‑bo ‑a ‑je kan’ ‑mɔ ’ja a, ‑mɛ ka dɛ ‑a ‑teea i ɛ ’kpa ’de ‑a ’kwa a, ‑a ‑je kan’ ‑mɔ ‑ke.
16‑Bo ‑ma de’di a sea dɛsaʋn ‑ɛɛ’ kpa nyʋ ’de ’mɛa’ ’ʋn nʋ, ‑wɛe ‑ɩn ‑je ɔ ’je ɛ, ‑mɛ ‑ɩn bae ɔɔ’ Kea, ‑wɛe Kea ’je ɔ ’kmʋnɩa’ "nyɩ. Dɛsaʋn ’ɩn "sia ’nynɩ ɛ, ɛ se ɔ ’de ’mɛa’ ‑sea’ ‑kwɛ ‑ta ’ble ’ʋn kpai. ’Kaa dɛsaʋn jrɛ’ ‑nɩ ’o, ‑wɛe ‑bo nyʋ nʋ ’de ‑ɛɛ kpa nyʋ ’de ’mɛa’ sea’ ‑kwɛ ‑ta ’ble ’ʋn, ’ɩn se ’na ao bae ‑mɛ ’ɛ dɛsaʋn tu ’a baea’. 17’Ma ’cɛ, kplɩn saɩn "o kplɩn saɩn nyiɔ ɔ nʋa ɩ nɩɛ dɛsaʋn ‑o, ’kaa dɩsaɩn jrɩ’ ‑nɩ ’o ‑wɛe ‑ɩa’ po ’mɛa’ "jru "kpei‑.
18‑A ‑je kan’ ’mɛ nyɔ ‑nɩa Kea ’a nyɔ ɛ, ‑mɔɔ’ kpa dɛsaʋn nʋa’ nya, dɛ‑nʋɛ’ Kea ’a "Ju Sesi ‑a fuo ɔ i, ’diwɔnynii se ɛ ’bɛɛ‑ ɔ ’je ɔ "ibla.
19‑Bo ’diwɔnynii ’ble ’kmʋ ‑wee’ "klein wlu "kpei mɔ ’de ɛ, ka ‑apʋ mɔ nɩa Kea ’a ’cɛ ɛ, ‑a ‑je kan’ ’mɛ.
20Ka Kea ’a "Ju jia ’nɔ ’kmʋ "kpei ‑wɛe ɔ po ‑a tɔ’di ’de ‑a ‑jua Kea ‑cɛɛn’ ɛ, ‑a ‑je kan’ ’mɛ ‑ke. Ɛmɛ ‑tɩ ‑a ‑ti" ’de Kea ‑cɛɛn’ ’ʋn ‑bo ‑a ‑ke ɛɛ’ "Ju Sesi Klisɩ "sii‑ "i ɛ. Ɛɛ’ Kea tu mɛ ‑nɩ Kea ‑cɛɛn’‑, ɛmɛ ‑nɩ ’kmʋnɩa’ sea’ ‑kwɛ ‑ta ’ble ɛ.
21’Ma "nynuu‑, ao ‑tu" aoa’ ‑cɛ" ’ɛ ‑tɩ’, kɔin nyiɔpʋ a ‑gbɛɛa’ "juɔi ‑ɩ sea Kea nɩ ɛ, ao ke ɩ ‑seea’ i.