TITO

¹ Ine Pablo, Dio akajotabu, Jesukirito ainataba tane. Dio waraoto mibune kawanamo nisanae. Mainatabae tatuma suatana nome abamejerei. Mainatabae nome Dio aobojona eku jakutai, taisi yaorane naminamejerei. Nome jakutai, Dio yatoma-netekitane jakutai tane obojona jisaka eku ja. ² Are ubakitane yawakayaine. Dio tona ribakomoni. Tai raina ajiroma ebe ribu moae oko are ubamejerei. ³ Asinarija eku nakakore Dio aribu kemusabae. Rewara isia kemusabae. Dio kaobojona Aibajukatu jakutai makajotabuae ine aribu rewaramejerei. ⁴ Tito saba jabatayaine. Nomewitu iji mauka. Oko orimonuka nome abaya. Dio Karima jakutai, Kairamo Jesukirito kaobojona Aibajukatu jakutai tane aobojona ayakara jimoakunarai. Akobe jiisia ajerakunarai. Inareraja tane jiabakunarai tane. ⁵ Tiamesike Creta tata jiiabanaine ekirakutaisi iyakarata-mejerei. Jiiabanaine janokoina kokotuka eku airamo tane abamejerei maribu eku. ⁶ Airamo jakutai tametane jakitane ja. Nibora aobojona asiraja ekiraja, atira jisakautu, anobotomo ribu eku abamo tane. Anobotomo jakutaisi kware asiraja abakomoni jakunarai. Tatuma oriaobojonaya anonamoana, ayatomanetemo tane jakunarai. ⁷ Ikeresia arao ayaorotu jakutai, tai Dio ayaota ayaorotu. Tametane jakitane ja. Aobojona asiraja ekiraja, oriaobojona eku abatuana, orijisituana, arijarokoana, orikuba arotuana, burata kwana obonotuana. ⁸ Atae, ajanokoata etuwaratu, yakeraja aobonotu, wite aobojona arotu, nomeraja anonatu, Dio orisaba emo abánae tiaja, wite oriaobojona arotu tane. ⁹ Ribu nome isia amena inaminajakutai taisi eku are abaki-tane ja. Eku abaya eobo inamina yakerajasi isia reirikitane. Ribu eku abaya riboto aribamo aribu kwarikakitane tane. ¹⁰ Ama kajotabu eku abaonituma era. Ribu yawatanuka arewaramo era. Imasibumo era tane. Tatuma kawanamo joro aseremo jakutai tatumasike kwarika asirajawitu. ¹¹ Tatuma inare takitane ja. Inaminanaka jakitane jakutaisi inaminaya asiraja nonane burata nisakitane. Takore oriwaraotowitu ewiyawiyaya ainamina isia. ¹² Tatuma ajisaka, rewaratu jakutai, ribane: Creta arao jakutai are imasibumo, raina aromu jawaneraja, najoroiratuma, inatoma tane, tae. ¹³ Taisi aribu nome. Tiame tatuma kwana sabaji, nome abaitane yakeraja bajemejerei. ¹⁴ Sabaji Judio arenobo jakutaisi eku abanaka jamejerei, waraoto akajotabu eku abanaka jamejerei tane. Tatuma nome jakutaisi tainaya. ¹⁵ Yakeraja obonobiakutai taisi saba kokotuka yakeraja ejo-boya. Nome abatuana asiraja obonobiakutai taisi saba kokotuka asiraja ejoboya. Akobe aobojona tane koi. ¹⁶ Tatuma ribia: Oko Dio naminaya, tia. Tiarone anona isia Oko Dio naminanaja, tane ribia. Tatuma asirajawitu, ribu nokonajawitu, nona yakerajasi saba tatuma ayakara ekira.

¹ Amasike iji inamina yakerajasi kaika ribanu. ² Tane inami-nau: Airamo jakutai tametane jakitane ja. Obojona baka, raomata, wite aobojona arotu tane. Nome abayaja, obonoyaja, taeratayaja tane yakeraja bajekunarai. ³ Tatu iramotuma tametane jakitane ja. Dio ayatomanetemo, rejorotumena, arija araoana, yakerajasi ainaminamo jakitane ja. ⁴ Tatu nojotonajirotuma jakutaisirakate inaminate. Aniborama obonomejerei, anobotomo obonomejerei tane inaminate. ⁵ Tametane jakitane ja. Wite aobojona arotu jakitane, aobojona ijabanaka jakitane, ajanoko ayaoromo jakitane, yakeraja, aniborama akajotabu jakitane, eobo Dio aribu isia asiraja ribunaka jamejerei. ⁶ Nibo nojotonajirotuma jakutaisi reiri wite aobojona arotu tane jamejerei. ⁷ Iji kokotuka yakeraja nonayaja oriemi eobo jisitamejerei. Inaminayaja, nomeraja raomatanewitu inaminau. ⁸ Ribu yakerajasi isia inaminau, ribu asirajenakawitu isia tane. Takore yatu riboto jakutai tomanate. Ribu asiraja yatu riboto ribakitane ekirate tane. ⁹ Raisama anebu tane bajiakutaisi reiri, oriarotuma akajotabu tane bajemejerei, kokotukanea yaorane yaotayaja. Araoto aribu kwarikanaka jamejerei reiri. ¹⁰ Tatuma reiri erijisanaka jamejerei. Kokotuka isia ribu eku yaorane abamo tane bajemejerei reiri. Takore Dio kaobojona Aibajukatu jakutaisi ainamina eobo saba yakerajawitu ejobate. ¹¹ Dio oriaobojona ayakara kemusabae. Ayakara naoae warao kokotuka jakutaisi aobojona ibajukakitane. ¹² Ayakara kaina-minaya asirajasi iabamejerei, raina aobojona asirajasi iabame-jerei tane. Kainaminaya oko ama tamate ubayaja wite obojona arotu tayaja ubamejerei, nomeraja nonayaja ubamejerei, Dio yatomaneteaja ubamejerei tane. ¹³ Kaobojona Aibajukatu Airamo tane naoya oriemusabakitane. Taisi anao yawakayaoko. Tai yawaka yakeraja. Kaobojona Aibajukatu Jesukirito jakutai, tai Dio uriraja. ¹⁴ Tai kakware orimoae obojona asiraja kokotuka amoara abakitane. Kaberekitane orimoae oriawarao tane kabakitane. Tai orimoae oko nona yakerajasi kwana obonomejerei. ¹⁵ Tamaja obojona rewarau. Ribu taerajasi isia reiri, sabaji tane. Jisakarakate jitainanaka jakunarai.

¹ Eobo inaminau airamotuma aribu nokomejerei, airamo aribu jaja jakutaisi eku ubamejerei. Aribu nokomejerei. Yake-ratane yaota yakerajawitu nonamejerei tane inaminau. ² Tame-tane jakitane. Raisama isia asiraja ribunaka jakitane. Ribu akwa-rikamoana jakitane. Raoberaja jakitane. Kokotuka saba obojona jaja jakitane tane. ³ Okorakate ateje bure, ribu eku abamoana, mumoni anarumo tane. Maretamo. Oriwakamo. Obonobu asirajasi isiko, temiajiaja tane ubaeko. Eobo rarijataeko. Eoborakate kariboto kararijatae. ⁴ Tiarone Dio kaobojona Aibajukatu jakutai oriayakara kemu-sabae. Waraoto obonoae tane. ⁵ Tane kaibajukanae. Kanona nomerajasi aobojona kaibajukanatanae. Dio akobe kaisia ajerame kaobojona ibajukanae. Oko atanejese rijawarakore kajojarae. Amejokojira Yakerajawitu kaobojona jiro abanae. ⁶ Jesukirito kaobojona Aibajukatu aobojona Amejokojira uriraja kamoae. ⁷ Aobojona ayakara kamoae kaobojona enometakitane. Kamoae oko are ubakitane yawakayakutaisi anojomo ejobamejerei. ⁸ Tamaja ribu nome. Tamaja ribu iji kwana inaminameje-reaine. Dio isia nome abamo nona yakerajasi nonaubumejerei. Tai waraoto saba yakeraja. Eku abane yakeraja ejobate. ⁹ Ribu kwarikakitane jakutaisi iabanu. Oriwaraoto isia rewaraubiaja oriaribu kwarikanaka jau. Orisabajinaka jau. Moisés akajotabu akarata isia ribu kwarikanaka jau tane. Ribu kwarikakitane jakutai tai bure. Tai amoara ekira. Yakeraja sabena tane. ¹⁰ Nibora jisaka warao oririboto abatu jakutaisi sabaji. Jisata, o manata sabaji. Jiribu nokonaja jakore jijisakena monuka bajete. ¹¹ Tane jakutai aobojona raisa, aobojona asiraja tane. Oriao-bojona sanamata saba taisi abanae rijana. ¹² Ine ijiata Artemas o Tíquico inatabatine. Inatabakore ineata janokoina Nicópolis tata rubujira nao. Tata joira kwaeabakitane obonoyaine. ¹³ Zena, kajotabu ainaminatu jakutai, Apolos tane suatana inatabau. Tatuma ekirakutaisi moau. ¹⁴ Kasabasabamo jakutai nona yakerajasi nonakitane naminakunarai. Ekirakutaisi sanetakunarai, akwaja ekirayanaka jamejerei. ¹⁵ Warao kokotuka makaika jakutai jiisia yakeraubiara abaya. Nome abamo oko obonoyakutaisi isia yakeraubiara abanu. Dio aobojona ayakara yatu kokotuka moakunarai. Amén.