ROMA
11 Ine Pablo Jesukirito aneburatu. Dio mayejebuae ainataba tane mabakitane. Emo mabanae rewara yakeraja Dio isimo jaku-taisi rewaramejerei. 2 Ateje Dio rewara yakerajasi isia ribu moae. Dio kware are-waramo rewara yakerajasi isia rewarae Jabataja yakerajasi eku. 3 Rewara yakeraja jakutai tai Dio Aukama isia. Auka jakutai Kairamo Jesukirito. Tai tejo tane nakane David ajisaka tane ejo-bonae. 4 Dio Amejokojira Yakerajawitu jakutai tai Tamaja Dio Auka taeraja, tane rewarae. Wabaerone nomininajame Tamaja Dio Auka, tane rewarae. 5 Jesukirito isia Dio oriaobojona aya-kara kamoae. Ainataba tane kabanae aribia ina kokotukanea arao Jesú awai obonoitane nome abaitane aribu eku abamejerei. 6 Ya-turakate ina araoto kawanamo jaja. Dio yaturakate yejebuae Jesukirito sabasabamo jamejerei. 7 Yatu kokotuka Roma tata jakutai yatu saba jabatayaine. Dio yatu obonone yatu yejebuae warao Dio saba emo abánae tiaja ejobamejerei. Dio Karima jakutai, Kairamo Jesukirito jakutai tane aobojona ayakara yatu moakunarai. Yatu inareraja tane aba-kunarai. 8 Wajiabara Jesú aobojona Mario Dio jakutai yakeraja jae tiaine. Yatu nome abayakutaisi isia raina kokotukanea nokoae. Tiame yatu kokotuka aobojona Dio yakeraja jae tane ribiaine. 9 Ine are yatu kware kwai ribiaine. Dio taisi naminaya. Maobo-jona kokotuka isia Dio akajotabu tane bajiaine. Rewara yakeraja Aukama isia jakutai taisi rewarayaja are bajiaine. 10 Ine Dio ebiaine yakerakore, Dio tane obonokore ine yakeraja kujune yatuata nabakakitane. 11 Yatu mikitane kwana obonoyaine. Nobeanaka obojona saba yatu moakitane obonoyaine. Yatu tae-raja ejobamejerei moakitane obonoyaine. 12 Nobeanaka jakutai tai tamaja. Oko orimonuka nome abayame oriakobe etuwa-rakitane jaoko. Yatu nome abayame ine nome abayame tane oriakobe etuwarakitane jaoko. 13 Mawarao, eraja tane yatu mikitane naruobonoaine. Taisi naminakotu. Tiarone mate moina. Ina raisama araoto kawanaya akwaja ariaine. Monukajase yatu kawanaya akwaja arikitane obonoyaine. 14 Grecia araoto aribu aribamo saba rewarakitane jaine. Grecia araoto aribu aribamoana saba rewarakitane jaine. Musberakutaisi saba rewarakitane jaine. Musaberena jakutaisi saba rewarakitane jaine. 15 Tiame yatu Roma tata jakutaisi sabarakate rewara yakerajasi rewarakitane masaba yakera. Tai maobojona. 16 Rewara yakeraja Kirito isia jakutai, taisi isia toma-nerenaine. Rewara yakeraja jakutai tai Dio ajarata nome abamo kokotuka jakutaisi aobojona ibajukakitane. Wajiabara Judiotuma saba. Tatukamo Judioana saba. 17 Rewara yakeraja kainami-naya. Oko nome abakore Dio kaobojona enometaya. Wajiabara nome abakitane. Suatana nome abakitane. Jabataja taisi isia ribia: Warao aobojona enometánae tiakutai taisike nome abayaja ubate, tia. (Hab. 2:4) 18 Warao Dio yatomanetenaja jame asiraja nonajame Dio najamutuata jakutai orijisiae. Warao asirame inamina nomeraja kokotuka jakutaisi musabamejerenaja. 19 Dio isia naminakitane jakutai Dio taisi emiae. Tiame tatuma naminaya. Takorejone warao musabamejerenaja. 20 Dio jakutai ajara are taeraja. Diowitu are kokotuka kwarika. Taisi minajarone are naminaya. Ajara taeraja jakutai, kokotuka kwarika jakutai tane raina ajiromayatukamo naminaya. Dio anona aobojona naminaya. Tiame warao ine naminanaja tane ribakomoni. 21 Warao Dio naminaerone Dio tane yatomanetenatanae. Dio isia yakeraja jae tane ribunatanae. Tiarone emo obonobuae. Aobojona buretaja imajana eku bajinae. 22 Oko musaberaja, tane ribiarone buretaja bajinae. 23 Warao Dio wabakomoni jakutaisi ayakara kambiatae. Nibora wabakitane jakutaisi asita nonane Tamajasike Dio tane ribunae. Atae romu kwai jakutai, raina aromu aka manamonamojase jakutai, juba tane asita nonane Tamajasike Dio, tae. 24 Tiame Dio tatuma webotonae oriaobojona asirajasi eku abamejerei. Asiraja nonamejerei webotonae. Takore tatuma atejo isia tomaneraja nonae. 25 Tamatuma inamina nomeraja Dio isia jakutai taisi ibarene tona jakutaisi yajorabae. Dio anona yatoma-netene akajotabu tane bajinae. Dio kanonatu jakutai taisi yatomanetenatanae. Dio jakutai taisike are yakerajawitu. Amén. 26 Tiame Dio tatuma webotonae tomaneraja nonamejerei. Tatu jakutai orianiborama iabane, tatu aobojona are jakutaisi iabane tatumana oriobonoae. 27 Nibo monukajase atira iabane, nibo aobojona are jakutaisi iabane, nibomana oriobonoae. Anona tomaneraja ejobonae. Takore oriatejo eku anona emo jakutaisi amoara nojoya. 28 Tatuma Dio naminakitane obononatanajame Dio tatuma webotonae aobojona emo jakutaisi eku bajemejerei. Nonanaka jakitane jakutai taisi yaorane nonamejerei webotonae. 29 Tatuma aobojona nona kasikasi kokotuka isia kobu. Tatusebe jakitane. Obojona asiraja jakitane. Atae aunukamo are obonomo jakitane. Asirajasi anonamo jakitane. Miajitomatuma jakitane. Akobakatuma jakitane. Orikuba arao jakitane. Imasibumo jakitane. Raisama isia asiraja anonamo jakitane. 30 Rejorotuma jakitane. Raisama isia asiraja arewaramo jakitane. Dio atainamo jakitane. Kokotuka anaminamo monuka jakitane. Wite oriisia yakeraja obonobumo jakitane. Eobo kwarika tane oriabakitane. Obojona asirajasi obonobumo jakitane. Arani, arima tane aribu anokomoana jakitane. 31 Musaberena jakitane. Oriaribu eku abamoana jakitane. Raisama aobonomoana jakitane. Orikubakitane obojona iabamoana jakitane. Raisa tatuma saba saneraja ejobonaja. 32 Dio akajotabu ribia: Tametane nonayakutai wabakitane ja, tia. Tatuma kajotabu yaorane naminaya. Naminayarone suatana asiraja nonaya. Asiraja nonakitane jakutai taiwituana. Eobo asiraja nonayakorerakate tatuma saba yakera.
21 Iji raisama aribu nome toaya. Ijirakate jiaobojona tane. Iji airamorone o airamoanarone iji ejobonaja. Iji raisama aribu nome toayaja monukarone wite oriaribu nome toaya. Iji raisama isia ribia: Jinona asira, tiarone ijirakate tane nonaya. 2 Dio asirajasi anonamo aribu nome toayaja nome isia toaya. Taisi na-minayaoko. 3 Iji asirajasi anonamo aribu nome toaya, tiarone iji monukajase nonaya. Iji katukane obonobia? Iji asiraja anona-turone Dio jiejerote mojoro? 4 Dio ayakara ekoronaja. Dio kwana jiyawakaya. Dio yakeraja jiyawakaya. Iji Dio anona tainaya mojoro? Jiaobojona ibaremejerei Dio yakeraja ja. Iji taisi naminanajara? 5 Amasike jikobe taera. Jiaobojona ibarinaja. Mate ya eku Dio orijisine nomeraja ribu nome toate. Dio nome-raja ribu nome toakore eobo naminate. Ribu nome toane warao sanamata saba abate. Amasike jinona aobojona iji sanamata orisaba orabaya. 6 Dio jisaka jisaka amoara moate anona kaika. (Rok. 62:12) 7 Kawanamo amoara are ubakitane. Dio airamo tane ejobame-jerei obonoyakutai taisi amoara are ubakitane. Dio yatomanetea-kutai taisi amoara are ubakitane. Are yakeraja nonayaja are uba-kitane obonoyakutai taisi amoara are ubakitane. 8 Dio warao kawanamo isiko orijisine kwana orijisite. Oriaobojona eku abakitane obonoyakutai taisi isanamatate. Nome eku abakitane obononaka asiraja eku abakitane obonoyakutai taisi isanamatate. 9 Kokotuka asiraja nonayakutai tatuma kwana sanamatayaja ekumoniraja bajete. Wajiabara Judiotuma, tatukamo Judioana. 10 Tiarone kokotuka yakeraja nonayakutai Dio tatuma airamo tane abate, raomata tane abate, inareraja tane abate. Wajiabara Judiotuma, tatukamo Judioana. 11 Dio saba warao jisaka eobo kwarika jaja ekira. 12 Moisés akajotabu omi asiraja nonayakutai akajotabu omi ekorate. Eobo akajotabu jarone are asirajasi nonayakutai tatuma aribu aka-jotabu kaika nome toate. 13 Moisés akajotabu anokomowitu jakutai tatuma aobojona Dio saba nomerena. Akajotabu eku abamo jakutai tatuma aobojonasike Dio saba nomeraja. 14 Judioana jakutai Moisés akajotabu ekira. Ekirarone akobe isia kajotabu eku monuka nonakitane naminaya. Kajotabu ekirarone tatuma akobe wite orikajotabia. 15 Kajotabu jakutai tatuma akobe eku jabátae tiaja ja. Tatuma anona aobojona akobe eku jabátae tiajasi naminaya. Tatuma naminaya. Eoborakate naminaya tane. Tatuma aobonobu tatuma kware abaya, kware ribia tane. 16 Ya jisaka eku Dio waraoto akobe eku rijísae tiakutai taisi aribu nome toate. Kirito Jesú isia Dio ribu nome toakore waraoto aobonobu tatuma kware abate kware ribate tane. Ine rewara yakerajasi rewarayaja tametane rewarayaine. 17 Tiarone iji wite oriisia ribia: Ine Judio, tia. Iji ribia: Moisés akajotabu yakera, tia. Iji ribia: Mario Dio jakutai tai kokotuka kwarika, tia. 18 Iji Dio aobojona naminaya. Kajotabu jiainaminajame yakeraja jakutai taisi nisakitane naminaya. 19 Iji ribia: Ine yakera mujasi konarukitane, tia. Imajana eku nariakutai taisi sebujekitane yakeraine, tia. 20 Naminanaja jakutai inaminakitane yakeraine, tia. Ribu nokonaja jakutaisi inaminakitane yakeraine, tia. Naminakitane jakutai ribu anome jakutai tane Moisés akajotabu eku ja. Yatu taisi oanae monuka. 21 Amasike iji raisama inaminaya. Katukeme wite oriinami-nanaja bajama? Iji rewarayaja ribia: Erijisakitane asira, tia. Tiarone iji erijisaya mojoro? 22 Iji ribia: Tirabaka jakutai tira raisama najabukore asira, tia. Tiarone iji tametane nonaya mojoro? Iji diosita rarijataya. Tiarone iji diosita ajanoko ekumo burata erijisaya mojoro? 23 Iji ribia: Kajotabu jakutai tai yakerajawitu, tia. Tiarone iji kajotabu riboto nonajame iji warao eobo Dio tainamejerea. 24 Jabataja taisi isia ribia: Yatu aobojona Israeltumena jakutai Dio isia asiraja ribia, tia. (Isa. 52:5) 25 Iji Moisés akajotabu eku abayakore joro serekitane jisaba yakeraja ejoboya. Tiarone iji akajotabu riboto nonakore jijoro seremoana monuka ejoboya. 26 Ajoro serenaja jakutai akajotabu eku nonayaja ajoro serénae tiaja monuka ejoboya, serenajarone. 27 Atejo ajoro serenaka kajotabu eku abayakutai tai jiribu nome toate. Iji kajotabu akarata jarone kajotabu riboto nonaya. Jijoro serénae tiaja ja. Tiarone araisa jiribu nome toate. 28 Ama Judio-witu jakutai yakarekuwituana. Serekitane jakutai yakareku-wituana tejo isia. 29 Tiarone Judiowitu jakutai tai akobe eku Judio. Serekitanewitu jakutai tai obojona serekitane. Kajotabu jabataja kaikena, obojona kaika. Amasike obojona eku ejoboya. Tiarone waraoto aobojonena, Dio aobojona.
31 Ama rijana kasikajasi aobojona Judio amoara jaja bajia? Kasikajasi aobojona joro serekitane jakutai amoara jaja ejoboya? 2 Dio oriaribu Judio moae. Tiamesike amoara jaja ejoboya. 3 Katukate? Judio kawanamo are ribu eku abanakatuma jaja. Tiame Dio oriaribu eku abanatate mojoro? 4 Eku abate! Warao kokotuka tonarone Dio are nomeraja nonaya. Ama Jabataja taisi isia ribia: Iji ribakore jiribu nome ejoboya. Jiribu nome toayakore yakeraja ejobate, tia. (Rok. 51:4) 5 Oko asiraja jame Dio nomeraja, tane naminayaoko. Tane jakore oko katukane ribate? Ribatera: Dio orijisine kaisana-matakore asira, tatera? Waraoto monuka ribiaine. 6 Tanaja. Dio nomerena jakore katukane raina araoto aribu nome toate? 7 Ine tona ribakore Dio are nomerajawitu ejoboya. Dio Airamo kwarika ejoboya. Maobojona Dio airamo kwarika ejoboyakore katukeme ine asirajasi anonatu monuka maribu nome toaya bajama? 8 Tane jakore asirajasi nonaki Dio yakerajawitu ejobamejerei. Nomewitu kawanamo asiraja obonobune kaisia asiraja ribia. Ta-tuma tametane ribia, tia. Tiarone Dio tatuma sanamatamejerekore yakera. 9 Katukate? Oko Judio jakutai tatuma bajukara oko? Baju-kena. Oko amena ribia: Judio jakutai Judioana jakutai tane oko kokotuka orimonuka asirajasi amojeku. 10 Jabataja taisi isia ribia: Warao kawanamo nomeraja jakutai ekira. Jisakarakate ekira. 11 Jisakarakate Dio aribu nonanaja. Jisakarakate Dio najabunaja. 12 Kokotuka nojakubuaja naria. Kokotuka aobojona emo. Kawanamo yakerajasi anonatu ekira. Jisakarakate ekira. (Rok. 14:1-3) 13 Awaroba joitanoko emuránae tiaja monuka. Ajono isia imasibia. (Rok. 5:9) Aroko eku juba ayari ja. (Rok. 140:3) 14 Ribiakutai yaribiaja ribia. (Rok. 10:7) Ribu ajiajeraja ribia. 15 Omu isia rubujiraja jakaya nakitane. (Rei. 1:16) 16 Nariakutai iekoroyaja naria. Isanamatayaja naria. 17 Jojisi inareraja jakutaisi naminanaja. (Isa. 59:7-8) 18 Dio nojakitane obonobunaja. (Rok. 36:1) 19 Kajotabu ribiakutai tai kajotabu eku abamo saba ribia. Kajotabu tametane ribia riboto ribunaka jamejerei. Kajotabu ta-metane ribia Dio raina arao kokotuka aribu nome toamejerei. 20 Kajotabu eku abayakutai Dio saba nomeraja ejobonaja. Kajo-tabu ayaota jakutai kainaminayaja Yatu asirajasi anonamo, tane ribia. 21 Tiarone ama kajotabu omi Dio enometayakutaisi nami-nayaoko. Kajotabu akarata taisi isia rewaraya. Dio kware arewa-ramo akarata taisi isia rewaraya. 22 Kokotuka Jesukirito isia nome abayakutai Dio tatuma aobojona enometaya, kokotuka ori-monuka. 23 Warao kokotuka asiraja nonaubuajame tatuma Dio ayakara kaikayana ejoboya. 24 Tiarone Dio aobojona ayakara isia kokotuka obojona enometaya nobeanaka tane. Kirito Jesú tatuma amoara abanajame Dio tatuma ejeroya. 25 Dio Kirito Jesú inatabae waraoto aobojona asirajasi amoara kaikawitu abamejerei. Kirito ajotu isia nome abayakutai Dio taisi aobojona berea. Dio tametane nonae oriaobojona nomeraja jaja jakutaisi emikitane. Ateje eobo asiraja nonakore Dio Kirito inatabakitane jame yawakayaja tatuma kware barinatanae. 26 Dio Kirito inatabae ama oriaobojona nomeraja jaja jakutaisi emikitane. Diojase nomerajawitu. Jesú isia nome abayakutai Dio taisi aobojona enometaya. 27 Oko wite oriisia yakeraja tane ribatera? Ribunaja. Katu-keme oko tane ribate? Oko kajotabu eku abanatanaeko. Oko Jesú isia nome abanae. 28 Ama miaeko kajotabu eku abanatanaerone oko nome abayakore Dio kaobojona enometaya. 29 Dio jakutai Judiowitu Ario mojoro? Tai Judioanarakate Arioana mojoro? Tai Judio Ario, Judioana Ario tane. 30 Dio jisakawitu ja. Tiame ajoro serénae tiakutai nome abakore Dio taisi aobojona enometaya. Ajoro serenaja jakutai tairakate nome abakore Dio taisi aobojona enometaya. 31 Ine ribia nome abakitane ja, tiaine. Yatu renokote: Iji tametane ribiaja kajotabu amoara ekira tane ribiara? Tanaja. Ine tametane ribiaja kajotabu taeraja kwarika abayaine.
41 Ama tejo isia rewaraki. Kanobo Abraham jakutaisi isia rewa-raki rijana. Katukane rewarate oko? 2 Abraham anona yakerajasi aobojona Dio Abraham aobojona enometakore Abra-ham Ine yakeraja tane ribakuna. Tiarone Dio amujaba tane ribakomoni. 3 Jabataja katukane ribia? Ribia: Abraham Dio isia nome abanae. Abraham nome abakore Dio taisi aobojona nomeraja tane abanae, tia. (Awa. 15:6) 4 Amasike yaotatu jakutai aburata nojokore burata jakutai yaota arotu aobojona ayakara aobojonena. Taisi ayaota amoara nojoya. 5 Dio yatomanetenaja jakutai Moisés akajotabu eku nonanaja. Tiarone enometatu isia nome abakore Dio tatuma aobojona nomeraja tane abaya. 6 David jakutai taisi isiajase jabatae. Waraoto anona yakeraja ekirarone Dio taisi aobojona nomeraja tane abaya. Warao jakutai ekeiraja. 7 David ribane: Dio kajotabu atainamo kware asiraja abanaka aobojona bereakore warao ekeiraja bajia. Dio waraoto aobojona asiraja sijakakore warao ekeiraja bajia. 8 Airamo waraoto aobojona asirajasi kware abanaja jakore warao ekeiraja bajia. (Rok. 32:1-2) Tametane David jabatae. 9 Ekeiraja bajekitane jakutai tai warao ajoro seréae tiakutaisi sabawitu mojoro? Ajoro serenaja jakutaisi sabarakateana mojoro? Ebe ribunaine: Abraham nome abakore Dio taisi aobojona nomeraja tane abanae, taine. (Awa. 15:6) 10 Tiarone katukakore Dio taisi aobojona nomeraja tane abanae, mate ajoro seremoana jaja o ajoro serénae tiaja? Ajoro serénae tiajena. Seremoana jakore Dio taisi aobojona nomeraja tane abanae. 11 Tatukamo Abraham ajoro serenae sinarija tane. Abra-ham nome abane Dio saba nomeraja ejobonajakutai taisi asinarija tane ejobonae. Tiame Abraham nome abamo ajoro serenaja jakutaisi kokotuka arima tane ejobonae. Tatuma ajoro serenajarone Dio isia nome abane Dio saba nomeraja ejoboya. 12 Atae ribu. Abraham nome abamo ajoro seréae tiakutaisi arima tane ejobonae. Tiarone ajoro seréae tiakutaiwituana. Abraham jakutai mate ajoro seremoana jaja nome abanae. Tatumarakate kanobo Abraham sitayaja nome abaya. 13 Dio ribu Abraham moae. Jinobotomo raina nojote anojo-bita tane. Abraham Dio akajotabu eku abanajame ribu moanatanae, tiarone Abraham Dio isia nome abanajame Dio saba nomeraja ejobonae. Tiame Dio ribu Abraham moae. 14 Nojobita jakutai kajotabu eku abamo sabawitu jakore nome abakitane jakutaisi amoara ekirakuna. Ribu Dio moajakutai taisi amoara ekirakuna. 15 Kajotabu jakutai sanamata saba abaya. Kajotabu ekirakore kajotabu ayawanamo ekiraja jakuna. 16 Dio ribu moae nome abayakutaisi saba. Tiame ribu jakutai Dio aobojona ayakara kaika tane ejoboya. Tiame ribu jakutai Abraham anobotomo kokotuka saba nomewitu ejobonae. Kajo-tabu sabasabamo saba ejoboya. Abraham monuka nome abaya-kutai taisi sabarakate ejoboya. Tiame Abraham oko kokotuka karima tane ejoboya. 17 Abraham Dio isia nome abanae. Tiame Dio amujaba karima tane ejobonae. Jabataja taisi isia ribia: Ina erajasi araoto arima tane jiabanaine, tia. (Awa. 17:5) Dio jakutai waba enominia. Mate ekirakutai Dio saba are ja rijana. 18 Yawakakitane jakutai Abraham saba ekira. Ekirarone are nome abane ayawaka ejobonae. Tametane ina raisa raisa araoto arima tane ejobonae. Dio ribane: Jinobotomo asebe uriraja ejobate, tae. (Awa. 15:5) Dio tane ribakore Abraham Dio aribu eku abanae. 19 Abraham are nome abayaja taeraja bajinae. Ainawaja siento jisaka monuka jaja. Amena atejo waba monuka. Atira Sara jakutaisi atejo monukajase waba monuka auka jakitane. Tanerone moinaja jakutaisi isia obonobunatanae. 20 Tiarone are suatana nome abanae. Abraham Dio ribu moajakutai nome abanaka tanatanae. Tiarone kwarika nome abanae. Dio aribu yajorabae. Diosike yakeraja jae tane ribunae. 21 Ribane: Dio ribu moane ajarata ja oriaribu eku nonakitane, tane yajorabayaine, tane ribunae. 22 Tiamesike Jabataja taisi isia ribia: Abraham nome abakore Dio taisi aobojona nomeraja tane abanae, tia. (Awa. 15:6) 23 Jabataja aribu jakutai Abraham sabawituana, kasaba. 24 Oko Dio isia nome abakore Dio kaobojona nomeraja tane abaya. Dio jakutai Kairamo Jesú wabaerone enomininae. Dio tametane nonajakutai taisi isia nome abayaoko. 25 Dio Jesú jakutai kao-bojona asirajasi kware wabamejereae. Dio kaobojona enometa-kitane Jesú enomininae.
51 Amasike oko nome abayame Dio kaobojona enometae. Oko nometánae tiaja Dio isiko inareraja bajia Kairamo Jesukirito isia. 2 Oko Kirito isia nome abayaja Dio awere nakaeko. Dio aobojona ayakara eku taeraja bajiaoko. Oko Dio Airamo kaika jate jame oriwakayaja yawakayaoko. 3 Oko ama sanamatayame atae kwarika oriwakayaoko. Tametane naminayaoko: Sanamatayaja taeratakitane naminateko. 4 Oko taeratayaja kaobojona taeraja ejoboya. Kaobojona taeraja ejobane yawakayaoko. 5 Dio kaobo-noyakutai taisi isimo obonokitane jakutai kaobojona eku ja Dio Amejokojira Yakerajawitu kamoajakutaisi isia. Tiame oko kato-mana ekiraja yawakaya. 6 Oko are monirajawitu jakore asinarija eku Kirito Dio yatomanetenaja jakutaisi kware wabae. 7 Warao jisaka warao raisama kware wabakitane obononaja. Warao nomerajasi anonatu kware wabakitane obonokuna tai. Nomewitu warao yakerajawitu jakutaisi kware wabate tai. 8 Tiarone oko are asirajasi anonamorone Kirito are kakware wabae. Tiame Dio kaobonoyakutai taisi kainaminaya. 9 Ama Kirito ajotu aobojona Dio kaobojona enometae. Atae kwarika Kirito isia sanamata mate naokitane jakutai taisi ekumo kejerote. 10 Oko ebe Dio isiko are asirajarone Dio oriisiko yakeraja tane kabanae Aukama awaba isia. Oko Dio isiko inareraja jame Kirito riko jame Dio atae kwarika kejerote. 11 Mate ribu ja. Oko Dio isiko oriwakaya Kairamo Kirito Jesú isia. Kirito kaobojona asirajasi amoara abanae oko Dio isiko yakeraja bajemejerei. Tiame oriwakayaoko. 12 Tatukamo nibora jisaka aobojona obojona asiraja raina eku nakae. Obojona asiraja jame wabarakate raina eku nakae. Taisi monuka warao kokotuka muanate warao kokotuka obojona asi-raja nonayame. 13 Mate kajotabu akarata ekirakore obojona asi-raja are raina eku ja. Tiarone kajotabu ekirakore obojona asiraja rewe monuka jaja ekira. 14 Tiarone Adanyatukamo Moisesyata ru tane asirajasi anonamo are waba amojeku bajinae. Dio Adán isia ribunae: Tanaka jau, tae. Tiarone Adán Dio aribu eku abanatanae. Dio eobo isia tanaka jakotu mate ribunatanae. Tiarone eobo Dio aribu nokonatanaerone are asiraja nonae. Adán jakutai mate naokitane jakutaisi sitaya. 15 Adán asiraja nonae. Dio yakeraja nonae. Dio anona Adán anona kwarikawitu ejobonae. Jisaka asiraja nonajame warao eraja muanaya. Dio warao jisaka isia oriaobojona ayakara nobe-anaka tane moaya. Dio Jesukirito isia oriayakara moaya. Tiame Dio yakeraja nonajame warao eraja yakeraja ejoboya. 16 Atae ribu: Adán asiraja nonae. Dio yakeraja nonae. Adán jisata asiraja nonajame Dio warao kokotuka sanamata saba abaya. Tatukamo ama warao anona asiraja eraja ja. Erajarone Dio oriayakara nobeanaka tane waraoto moae aobojona enometakitane. Tiame Dio anona Adán anona kwarikawitu. 17 Warao jisaka asiraja nonajame warao kokotuka waba amojeku nakae. Ama warao jisaka isia warao eraja obojona jiro amojeku nakae. Tai Jesukirito. Warao eraja Dio aobojona ayakara nojoya. Dio tatuma aobojona enometaya nobeanaka tane. Jesú anona Adán anona kwarikawitu. 18 Atae ribu: Adán jakutai jisaka. Taisi aobojona asirajasi aobo-jona Dio warao kokotuka sanamata saba abanae. Jesukiritorakate jisaka. Taisi aobojona nomerajasi aobojona Dio warao kokotuka aobojona enometaya obojona jiro jamejerei. 19 Warao jisaka Dio aribu eku abanatanajame warao eraja asirajasi anonamo ejo-bonae. Taisi monuka warao jisaka Dio aribu eku abajame Dio warao erajasi aobojona enometate. 20 Tatukamo Dio oriakajotabu moae obojona asirajasi yaorane naminamejerei. Tiarone obojona asiraja urirarone Dio aobojona ayakara taisi aira kwarika ejobonae. 21 Tiame obojona asiraja jakutai warao wabamejerea. Tiarone Dio aobojona ayakara jakutai waraoto aobojona enometamejerea. Warao aobojona enometakore Kairamo Jesukirito isia are ubate.
61 Ama katukane ribate oko? Ribatera: Suatana asiraja nonaki Dio aobojona ayakara kwarikamejerei, tatera? 2 Tanaja. Oko obojona asirajasi saba wabae rijana. Oko wabaerone suatana are asiraja nonate mojoro? 3 Kirito Jesú isiko kekobane awaba eku kekobunae. Yatu taisi naminanajara? 4 Kekobiaja Kirito isiko kajoitae. Dio ajarata yakerajasi isia Jesú wabaerone enomininae. Taisi monuka wabaeko. Wabaeko nominakitane obojona jiro eku nonakitane. 5 Oko Jesú awaba monuka Jesú isiko wabaeko. Taisi monuka Jesú anominina monuka Jesú isiko nominiteko. 6 Tamajasi namina-yaoko. Kaobojona ebe jakutai Kirito isiko esijaríae tiaja bajinae. Esijariae obojona asiraja ekoramejerei. Esijariae oko obojona asiraja akajotabu tane bajinaka jamejerei. 7 Wabajakutai obojona asirajasi amojekumo ejobonae. 8 Takore oko Kirito isiko waba-jame Kirito isiko nominane ubateko. Tane yajorabayaoko. 9 Kirito jakutai wabaerone nomininajame atanejese wabanaja. Tatukamo tai waba amojeku nakanaja wabakitane. Taisi nami-nayaoko. 10 Kirito wabane obojona asirajasi saba wabae. Warao kokotuka kware jisata wabae. Tane ama riko ejobane Dio saba riko bajia. 11 Ama monukajase yatu ribakotu: Oko obojona asirajasi saba waba tiarone Dio saba oko riko Kairamo Kirito Jesú eku, takotu. 12 Tiame tamatukamo yatu obojona asiraja yatu atejo wabayakutaisi airamo jamejerenaka jakotu. Obojona asirajasi aobojona eku abanaka jakotu. 13 Yatu atejo akarituma obojona asirajasi amojeku abanaka jakotu asiraja nonakitane. Tiarone yatu wabarone nominínae tiakutai taisi monuka Dio amojeku oriabakotu. Yatu atejo akarituma Dio amojeku abakotu yakeraja nonakitane. 14 Rijana obojona asiraja jakutai yatu isia ribu ekira. Yatu kajotabu anebuana. Yatu Dio aobojona ayakara anebu. 15 Ama katukate? Oko kajotabu anebuana Dio aobojona aya-kara anebutiji suatana asiraja nonatera bajama? Nonanaja. 16 Yatu airamo amojeku oriabate taisi aobojona eku abakitane. Yatu airamo aobojona eku abayaja yatu taisi akajotabutuma tane bajia. Yatu taisi naminanajara? Obojona asirajasi akajotabutuma tane bajene muanate. Tiarone yatu Dio aobojona eku abakore Dio yatu nomeraja tane abate. 17 Yatu ateje obojona asiraja akajotabutuma. Tiarone inamina yatu saba rewarae. Yatu akobe isia taisi eku yaorane abajame Dio isia yakeraja jae tane ribiaine. 18 Yatu obojona asirajasi amojekumo ejerónae tiaja obojona nomerajasi akajotabutuma tane bajia. 19 Waraoto anona sita-yaine yatu yaorane nokonaja jame. Yatu ateje yatu atejo moae tomana akajotabu tane, asiraja akajotabu tane asiraja nonakitane. Taisi monuka ama yatu atejo moakotu nomeraja akajotabu tane Dio saba emo abánae tiaja bajekitane. 20 Yatu ateje obojona asirajasi akajotabu jaja obojona nome-raja akajotabuana ejobonae. 21 Amoara bituma nojoae? Ama taisi isia obonobune tomaneraja bajia. Taisike amoara. Obojona asiraja akariata wabakitane. 22 Tiarone ama obojona asirajasi amojekumo ejerónae tane bajene Dio akajotabu tane bajia. Taisike amoara ja. Ama yatu Dio saba emo abánae tiaja bajia. Dio akajotabu tane bajekitane jakutaisi amoara are ubakitane. 23 Obojona asirajasi amoara jakutai wabakitane. Tiarone Dio nobeanaka tane kamoaya. Nobeanaka kamoayakutai tai are ubakitane Kairamo Kirito Jesú eku.
71 Mawarao, yatu Dio akajotabu naminaya. Tametane inami-naya. Warao mate riko jaja kajotabu eku abakitane ja. Yatu taisi naminanajara? 2 Kajotabu ribia: Niborabaka jakutai mate anibora riko jakore aniborama kaika bajekitane ja, tia. Tiarone anibora wabakore tatukamo kajotabu eku abakitane ekira. Niborabakena monuka bajia. 3 Anibora mate riko jakore nibora raisama atira takore nibosebe tane ejoboya. Tiarone anibora wabakore are kajotabu eku abakitane ekira. Nibora raisama nisakore nibosebe tane ejobonaja. 4 Ama mawarao, yatu Kirito atejo akari. Tiame yatu kajotabu saba waba. Ama yatu anibora raisa. Yatu anibora raisa jakutai tai Kirito. Wabaerone nomininajakutai, tai. Yatu anibora jiro ja yatu Dio saba akwaja jamejerei. 5 Oko mate kaobojona are jakutaisi eku abayakore kajotabu jakutai kaobojona asirajasi yatijakae. Katejo eku yatijakae. Takore waba saba kwajae. 6 Tiarone ama wabaeko. Ebe amojeku jakutai taisi saba wabane jeronaeko. Ebe kajotabu jabata nobo eku abakitane jaja. Tiarone ama obojona jiro isia, Dio Amejokojira isia Dio akajotabutuma tane bajiaoko. 7 Ama katukane ribate oko? Kajotabu jakutai tai obojona asi-raja, tane ribatera? Tanaja. Tiarone kajotabu ekirakore maobo-jona asiraja jakutaisi naminanatakuine. Miki. Kajotabu ribia: Jiraisama aunukamo are obononaka jau, tia. (Ejo. 20:17) Tanaja jakore ine aunukamo are obonokitane jakutai tai asiraja tane naminanatakuine. 8 Kajotabu jakutaisi aobojona maobojona ejobonae obojona asiraja eraja naminamejerei. Kajotabu eki-rakore obojona asiraja amoara ekiraja monuka. 9 Ateje kajotabu naminamoana jakore ine riko monuka. Tiarone kajotabu namina-kore obojona asiraja ejobonae. Takore ine waba bajinae. 10 Ka-jotabu jakutai obojona jiro moakitane jakutaisi saba. Tiarone ine kajotabu naminajakutaisi aobojona waba bajinae. 11 Kajotabu aobojona maobojona asiraja ejobonae. Obojona asiraja jakutai maimasibune kajotabu eku manae. 12 Kajotabu jabata jakutai Dio saba emo abánae tiaja. Kajo-tabu aribu jakutai Dio saba emo abánae tiaja, nomeraja, yakeraja tane. 13 Katukane ribate oko? Ribatera: Tamaja yakeraja jakutai masaba waba ejobonae, tane ribatera? Tanaja. Obojona asiraja jakutai taisike manae. Tiame manajame obojona asiraja jakutai yaorane naminaya. Obojona asiraja ribu yakerajasi isia manae. Tiame obojona asiraja kajotabu kware abane asira kwarika ejoboya. 14 Kajotabu jakutai tai obojona jiro saba. Taisi naminayaoko. Tiarone obojona are jakutaisi eku jaine. Obojona asirajasi amo-jeku akajotabu tane mawabiae. 15 Ine katukane nonaya tai, tane naminanajine. Ine nonakitane obonoyakutai taisi nonanajine. Tiarone ine rarijatayakutai taijase nonayaine. 16 Tiarone ine obono-naja jakutai are nonakore kajotabu jakutai taisike yakera takitane jaine. 17 Ine asiraja nonayakore maobojonena. Obojona asiraja meku jakutai taisi aobojona. 18 Tiame meku, maobojona are jakutaisi eku yakeraja ekira. Taisi naminayaine. Yakeraja nona-kitane obonoyaine tiarone masaba monira. 19 Yakeraja nonakitane obonoyakutai taisi nonanajine. Tiarone asiraja nonakitane obononaja jakutai are taisi nonayaine. 20 Takore nonakitane obononaja jakutai are taisi nonayakore ineana. Obojona asiraja meku jakutai taisi aobojona. 21 Ama takore tametane ejoboya. Ine yakeraja nonakitane obonoyarone asiraja nonakitane jakutai are makaika ja. 22 Makobe Dio akajotabu eku abakitane obonoya. 23 Tiarone maobojona are jakutai makobe isiko orikubaya. Tai obojona asiraja akajotabu. Tai meku ja. Ine taisi amojoju. 24 Ine sanasabukaraji! Sina matejo waba saba jakutaisi ekumo mejerote bajama? 25 Diowitu mejerote Kairamo Jesukirito isia. Dio yakerajaraji! Takore maobojona isia Dio akajotabu jakutaisi akajotabu tane bajiaine. Tiarone maobojona are jakutai obojona asiraja akajotabu jakutaisi akajotabu tane bajia.
81 Ama Kirito Jesú eku jakutai Dio tatuma sanamatamejere-naja. Tatuma obojona are jakutaisi eku nonanaja tiarone Mejokojira aobojona eku nonaya. 2 Mejokojira isimo kajotabu jakutai obojona jiro moaya. Tiame Kirito Jesú eku kajotabu Me-jokojira isimo jakutai kajotabu obojona asirajasi isimo jakutaisi amojekumo mejeronae. Kajotabu waba isimo jakutaisi amojekumo mejeronae tane. 3 Kaobojona are jakutaisi aobojona Moisés akajotabu kejerokomoni. Tiarone Dio kejeronae. Dio Oriaukama inatabane kamonuka tejo jaja inatabae. Obojona asirajasi kware wabamejerei inatabae. Tametane atejo isia obojona asiraja sanamata saba abanae. 4 Dio tane nonae kajotabu aribu nomeraja jakutai keku kaikawitu ejobamejerei. Amasike oko obojona are jakutaisi eku nonanaja tiarone Mejokojira aobojona eku nonaya. 5 Obojona are jakutaisi eku nonayakutai tai obojona are jaku-taisi aobojona eku abaya. Tiarone Mejokojira aobojona eku nonayakutai tai Mejokojira aobojona eku abaya. 6 Obojona are eku abayakore akariata wabakitane. Tiarone Mejokojira aobo-jona eku abayakore akariata obojona jiro jakitane, inareraja bajekitane tane. 7 Obojona are eku abayakutai Dio saba asiraja ejoboya. Tatuma Dio akajotabu eku abakitane obononaja. Akajotabu eku abakomoni. 8 Obojona are jakutaisi eku ubaya-kutai tai Dio aobojona eku abakomoni. 9 Tiarone ama yatu obojona are jakutaisi eku ubanaja. Mejo-kojira aobojona eku ubaya, Dio Amejokojira yatu eku jame. Warao Kirito Amejokojira ekirakutai tai Kirito sabasabamoana. 10 Obojona asirajasi aobojona yatu atejo waba. Wabarone Kirito yatu eku ubakore yatu aobojona riko ja. Riko ja Dio yatu aobo-jona enometaetiji. 11 Jesú wabaerone Dio taisi enomininae. Dio Amejokojira yatu eku ubayakore Dio Kirito Aenominatu jakutai yatu atejo wabakitane jakutaisi ejirotate. Amejokojira yatu eku ubayakutaisi isia yatu atejo ejirotate. 12 Tiarone ama, mawarao, Dio isia rewe jaoko. Obojona are jakutaisi isia rewe ekiraoko taisi eku nonayaja ubakitane. 13 Yatu obojona are jakutaisi eku nonayaja wabakitane ja. Tiarone Mejokojira isia obojona are jakutaisi anona nane ubate. 14 Dio Amejokojira aobojona eku abayakutai tatuma kokotuka Dio anobotomo. 15 Yatu Mejokojira nojoajakutai tai yatu mojoju tane abanaja. Yatu atanejese nojamejerei abanaja. Tiarone Mejokojira jakutai Dio anobotomo tane kabaya. Tiame oko ribia: Abba, Rima, tiaoko. 16 Mejokojirajase ribia: Yatu Dio anobotomo rijana. Kaobojonarakate ribia: Oko Dio anobotomo rijana, tia. 17 Oko Dio anobotomo jaja oko Dio kenojokitane jakutaisi anojomo rijana. Kiritojase isiko oko nojomo ejobonae nojokitane. Ama Kirito isiko sanamatayakore nokabuka isiko airamo tane ejobateko. 18 Amasike, oko ama sanamatayakutai urirawituana, tiaine. Dio ayakara jakutai taisike urira. Dio ayakara keku jakutai eobo emikitane awere. Taisi kainaminate. 19 Dio anobotomo jakutaisi emikitane ja. Tiame Dio anona kokotuka emikitane jakutaisi asinarija kwana obonoya, kwana yawakaya tane. 20 Ateje Dio anona jakosana ejobonae. Anona oriaobojonena tiarone Dio tane abanae. Tiarone are ayawaka ja. 21 Dio anona ekorakitane jakutaisi ekumo ejerote. Dio anobotomo jakutai yakerajawitu jerónae tiakutaisi isiko bajemejerei ejerote. 22 Atejeatukamo ama saba Dio anona kokotuka joiro joiro tae tira uakayakutaisi monuka. Oko taisi naminaya. 23 Tiarone rainawituana. Okorakate. Oko Mejokojira ja Dio kenojokitane jakutaisi akwaja awajiabara tane. Mejokojira jarone okorakate kakobe joiro joiro tiaoko. Dio anobotomowitu tane kabamejerei yawakayaja joiro joiro tiaoko. Anobotomowitu tane kabane katejo ejerote. 24 Oko yawakayame Dio kaobojona ibajukanae. Yawakayakutaisi mitane atae yawakanaja rijana. Miaerone katukeme yawakate? 25 Tiarone oko yawakayakutai mate taisi minaka jaja yawakayaja taeratakitane jaoko. 26 Monukajase oko joteraja jame Mejokojira kasanetaya. Yakeraja kwai ribakitane naminanajaoko. Tiarone Mejokojira kakware Dio ebia. Oko ribakomoni jakutaisi ebiaja akobe koko-tuka isia tane ebia. 27 Mejokojira jakutai Dio sabasabamo jaku-taisi kware ebiaja Dio aobojona eku ebia. Tiame Dio obojona kokotuka naminayame Mejokojira ribiakutaisi naminaya. 28 Dio kokotuka iyakarataya obonoyakutaisi saba yakeraja ejobamejerei. Dio oriaobojona eku yejebuajakutai taisi saba yakeraja ejobamejerei iyakarataya. Taisi naminayaoko. 29 Dio sabasabamo jakitane jakutai Dio atejeatamo tatuma naminaya. Awajiabarayatukamo Dio tatuma emo abanae Aukama monuka ejobamejerei. Auka jakutai awarao eraja kawanaya araje tane ejobamejerei abanae. 30 Awajiabarayatukamo emo abanajakutai Dio tatuma yejebuae. Yejebuajakutai Dio tatuma aobojona eno-metae. Aobojona enometajakutai Dio tatuma airamo tane abanae. 31 Tane jakore katukane oko ribate? Dio kakware jakore sina kariboto ejobate bajama? 32 Dio Oriaukama waninatanae. Waninaka oko kokotuka kakware wabamejereae. Ama Aukama isiko kokotuka kamoanatate mojoro? 33 Dio mibune nisanajakutai sina taisi kware asiraja abate? Dio tatuma aobojona enometae. 34 Sina tatuma sanamatamejerete? Kirito kakware ribia. Taisike wabae. Atae kwarika Kirito nomininae. Tai Dio amojonome tajasaba ja kakware ribiaja. 35 Kirito kaobonoyakutai sina taisi emo kabate? Sanamatakitane jakutai emo kabatera? Sanakitane jakutai emo kabatera? Kaisanamatakitane jakutai emo kabatera? Nojeraja jakitane jakutai emo kabatera? Jiaka ekirakitane jakutai emo kabatera? Jawana kwaeabakitane jakutai emo kabatera? Wabakitane jakutai emo kabatera? Emo kabanaja. 36 Jabataja taisi isia ribia: Jiaobojona ya kokotukanea oko wabaturira. Obeja nakitane jakutaisi monuka kaisia nonaya, tia. (Rok. 44:22) 37 Takorejone oko kaobonoyakutaisi aobojona tamaja kokotuka eku eobo kwarikamowitu ejoboyaoko. 38 Jisakarakate Dio kao-bonoyakutaisi emo kabakomoni. Taisi naminayaine rijana. Wa-bakitane, ubakitane, ainatabatuma, jebu airamotuma, jebutuma taeraja jakutai, ama ja jakutai, mate jakitane jakutai tane emo kabakomoni. 39 Atae kwai jakutai, noika jakutai tane emo kabakomoni. Dio anona jisakarakate emo kabakomoni. Dio Kairamo Jesukirito eku kaobonoyakutai jisakarakate taisi emo kabakomoni.
91 Ine Kirito isia nome abatutiji nomeraja ribiaine. Ine tona ribunajine. Maobojonarakate Mejokojira Yakerajawitu isia makware rewaraya. 2 Maobojona ekumoniraja ja. Makoberakate ekumoniraja ja. 3 Yakerakore Kirito mawebotakunarai tane riba-kuine mawarao rijanaka jamejerei. Tatuma mawaraowitu tejo sa-basabaya. 4 Tatuma rijana Israel awarao. Dio orianobotomo tane tatuma abanae. Dio yakeraja jakutai taiwitu tatuma kaika bajinae. Dio ajutetuma tatuma moae. Dio akajotabu tatuma moae taisi eku Dio yatomanetemejerei. Atae ribu tatuma moae mate jakitane jakutaisi isia. 5 Ateje Dio isia nome abamo jakutai tatuma ajokonamuwitu. Akiritorakate warao tane nakane Israel ajisaka tane nakae. Akirito jakutai tai Dio, kokotuka kwarika. Taisi isia are yakeraja jae tane ribakunarai. Amén. 6 Dio ateje ribu moae. Ama eku nakanatate monukarone eku nakae. Israeltuma jakutai tatuma kokotuka Israeltuma nome-rajawitu monukena. Kawanamo aobojona raisa. 7 Abraham awarao jakutai tatuma kokotuka Abraham awarao nomerajawitu monukena. Tiarone Dio ribunae: Jiauka Isaac isimo jiwarao jate, tae. (Awa. 21 :12) 8 Tiame oko tametane naminaya: Judio tane nakayarone Dio ano-boto tane ejobonaja, tane oko naminaya. Dio aribu eku naka-jakutai tatumawitu Dio anobotomo nomeraja tane ejoboya. 9 Dio tametane ribu Abraham moae. Ribane: Asinarija eku naotine. Takore jitira Sara jakutai jorosimo aranitate, tae. (Awa. 18:10) 10 Tiarone atae mate ribu ja. Rebeca jakutaisi anobotomo koromo arima jisaka jaja. Arima jakutai kanobo Isaac. 11 Rebeca anobotomo koromo mate rijawaramoanarone Dio oriaobojona eku abakitane tatuma mibune kawanamo jisaka nisanae. Anona aobojona nisanatanae. Mate yakeraja nonamoana. Mate asiraja nonamoana tane. Mate ekirarone Dio taisi yejebuajame nisanae. 12 Tatuma arijawara ebika Dio Rebeca isia ribane: Araje jakutai arakama akajotabu tane bajete, tae. (Awa. 25:23) 13 Tamaja ribu Jabataja aribu eku. Jabataja taisi isia ribia: Jacob obonoaine. Esaú rarijataine, tia. (Mal. 1:2-3) 14 Ama oko katukane ribate? Dio aobojona nomerajena, tane ribate mojoro? Tanaja. 15 Dio Moisés akarata eku ribia: Ine makobe jisaka isia ajerakitane yakerakore ajerate. Jisaka masaba saneraja ejobakitane yakerakore masaba saneraja ejobate, tia. (Ejo. 33:19) 16 Takore waraoto aobojonena. Waraoto anonena. Dio akobe taisi isia ajeraja mibune nisaya. 17 Dio Jabataja eku Egipto airamo isia ribia: Jiabanaine majarata eobo emikitane jiaobojona. Ina kokotuka yata warao maisia nokomejerei jiabanaine, tia. (Ejo. 9:16) 18 Dio saba yakerakore akobe raisama isia ajera. Dio saba yake-rakore raisama aobojona taeraja tane abaya. 19 Iji ribate tai: Dio tametane oriaobojona eku abane katukeme waraoto kware abaya? Sina Dio riboto ejobate bajama? tate tai. 20 Tanaka jau. Amasike! Iji warao. Iji sina Dio riboto ribakitane? Jo anamu jakutai anonatuma isia ribatera: Iji katukeme tametane manonae bajama? tatera? Tanaja. 21 Anonatu jakutai jo anamu obonoyakutaisi eku nonaya. Jo anamu yaota yakerajawitu saba oamejerei nonate tai, o jo anamu yaota sabana saba oamejerei nonate tai. 22 Katukate? Warao kawanamo anona aobojona sanamata saba bajinae. Dio tatuma isiko orijisiraja bajinae. Orijisirajarone tatuma anona taeratakitane aobojona abanae. Aorijisi waraoto emikitane tane nonae. Warao taisi ajarata naminamejerei tane nonae tane. 23 Dio tane nonae warao Dio yakerajawitu ja tane naminamejerei. Dio akobe warao kawanamo isia ajeraja ejobonae. Dio atejeatamo abanae tatuma Dio isiko yakerajawitu bajemejerei. 24 Tatumasike oko. Dio kayejebuae. Judio kawanamowitu kayejebunatanae. Judioana kawanamorakate kayejebuae. 25 Dio Oseas akarata eku ribia: Mawaraoana jakutai mawarao tane yejebutine. Obonoajena jakutai taisi isia ine obonoyaine tane ribakitane yejebutine. (Hos. 2:23) 26 Yatu mawaraoana tane ribunajakutaisiatajase Dio ribate: Yatu Dio riko jakutaisi anobotomo, tate. (Hos. 1:10) 27 Tiarone Isaias Israeltuma isia rokojotae. Ribane: Israeltuma asebe kajewaja nojabaira awere jakutaisi asebe monuka jate. Asebe urirajarone tatuma ekumo akari sanukawitu bajete. 28 Airamo aribu Israel aina isia jakutai taisi eku nonate. Aribu ekuwitu nonate. Rubujiraja, nomeraja tane nonate. Tiame Israeltuma akari sanukawitu bajete, tae. (Isa. 10:22-23) 29 Isaiasjase ateje ribunae: Najamutu Ayaoromo Airamo jakutai tai kanobotomo kawanamo kasaba iabanatanajakore Oko janokoina Sodoma monuka o janokoina Gomorra monuka bajekuna, tae. (Isa. 1:9) Isaias tane jabatae. 30 Ama katukane oko ribate? Judioana jakutai Dio tatuma ao-bojona enometamejerei najabunatanae. Najabunatanaerone Dio tatuma aobojona enometae. Tatuma nome abajame Dio tatuma ao-bojona enometae. 31 Tiarone Israeltuma kajotabu jaja. Kajotabu jakutai enometanoko monuka. Tiarone kajotabu jakutai tatuma aobojona enometanatanae. 32 Katukeme? Obojona enometame-jerei nome abanatanae tiarone kajotabu akarata eku abayaja oriaobojona enometamejerei obonobuae. Tiame joyo omu esoakanoko jakutaisi isia esoakane nakae. 33 Jabatajarakate esoakanoko isia ribia: Ina Sion eku joyo abanaine omu esoakanoko tane. Joyo nakanoko tane abanaine. (Isa. 8:14) Taisi isia nome abayakutai tomanetenaja, tia. (Isa. 28:16)
101 Mawarao, Israeltuma nome abakore maobojona ekuwitu nakakuna. Kwai ribiaja Dio isia ribiaine tatuma aobojona ibajukamejerei. 2 Nomewitu tatuma Dio kwana yatomanetea. Nomewitu taisi yaorane naminayaine. Yatomanetearone musaberena. 3 Katukane Dio obojona enometaya tai, tane tatuma taisi naminanaja. Wite oriaobojona enometakitane obonobia. Dio obojona enometayakutaisi eku abanaja. 4 Kirito jakutai Moisés akajotabu kaikaya. Kirito isia nome abayakutai Dio taisi aobojona enometaya. 5 Kajotabu eku abayaja obojona enometakitane jakutai Moisés taisi isia jabatae. Ribane: Kajotabu eku abayakutai taisi eku ubate, tae. (Lev. 18:5) 6 Tiarone nome abakore Dio obojona enometakitane jakutai taisi isia jabatae: Jiaobojona isia ribunaka: Sina najamutuata yaburute? tanaka jau, tae. (Kaj. 30:12) Tane ribiaja Kirito najamutu tatamo inanakakitane tane ribia. 7 Atae ribunaka: Sina totoireta nanakate? tanaka jau, tia. (Kaj. 30:13) Tane ribiaja Kirito wabaerone enominakitane tane ribia. 8 Ribu yakeraja kasikaja? Tamaja ribu yakera. Ribu jiwere ja rijana. Jiroko eku ja rijana. Jiaobojona eku ja rijana. (Kaj. 30:14) Oko rewarajakutai tai ribu tamaja. Oko rewarae: Nome abakotu, taeko. 9 Jiroko isia Jesú Mairamo tane ribane, jiaobojona isia Jesú wabaerone Dio taisi enomininae tane nome abane tane, Dio jiaobojona ibajukate. 10 Obojona isia nome abayakutai Dio taisi aobojona enometaya. Roko isia Jesukirito Mairamo tane ribiakutai Dio taisi aobojona ibajukaya. 11 Jabataja taisi isia ribia: Kokotuka taisi isia nome abayakutai tomaneraja bajinaja, tia. (Isa. 28:16) 12 Judio jakutai, Judioana jakutai tane orimonuka. Airamo jaku-tai taijase kokotuka Airamo. Kokotuka Airamo awai waraya-kutai Airamo tatuma uriraja moaya. 13 Jabataja tametane ribia: Airamo awai warayakutai Dio taisi aobojona ibajukate, tia. (Joel 2:32) 14 Amasike nome abanaka jaja jakutai katukane wai warate? Isia nokonaka jaja jakutai katukane nome abate? Saba rewaranaja jakore katukane nokote? 15 Inatabanaja jakore katukane rewarate? Jabataja taisi isia ribia: Ribu inareraja tane abayakutaisi arewaramo omu yakerajasi isia sakaya. Rewara yakeraja arewaramo omu yakerajasi isia sakaya, tia. (Isa. 52:7) 16 Tiarone kawanamo rewara yakerajasi nokone eku abanaja. Isaias aribu eku ejoboya. Isaias ribane: Kairamo, oko rewarakore sina karibu yajorabaya bajama? tia. 17 Takore ribu nokoyame nome abaya. Ribu nokoyakutai tai Dio aribu. 18 Ine suatana renokoyaine. Israeltuma saba rewaranatanaera? Nomewitu rewarae. Jabataja taisi isia ribia: Tatuma rewarakore raina kokotukanea rewara nabakanae. Aribu raina akariata nabakanae, tia. (Rok. 19:4) 19 Suatana renokoyaine. Israeltuma tamaja naminanajara? Wajiabara Moisés ribia: Ina araoto aobojona yatu miajitoma tane abatine, tatuma oriainawitu jaja ekirarone. Ina arao musaberena jakutaisi aobojona yatu orijisiraja tane abatine, tia. (Kaj. 32:21) 20 Isaiasrakate Dio aribu taeraja jabatae: Manajabunatanajakutai tatumasike mamiae. Tai kasaba, tane ribunatanajakutai ine tatuma oriemiaine, tia, tae. (Isa. 65:1) 21 Isaias Israeltuma isia jabatae: Ya kokotukanea waraoto yejebiaine. Tiarone tatuma ribu nokonaja, ribu eku abanaja tane, tae. (Isa. 65:2)
111 Atae renokoyaine. Dio Israeltuma kokotuka tainaera? Tainanaja. Inesike Israel ajisaka ine. Ine Abraham ajisaka. Waraosebeira Benjamín jakutaisi ajisaka ine. 2 Ateje-atukamo Dio Israeltuma oriawarao tane abanae. Tiame ama tainanaja. Yatu Jabataja aribu Elias isia jakutaisi naminanajara? Ribia: Elias Dio isia kwai ribiaja Israeltuma kware abanae. 3 Ribane: Airamo, tatuma jikware arewaramo jakutaisi kubae. Romu erokunoko iji jaja jakutaisi yawanaubuae. Ine jisamuka bajinaine. Inerakate manakitane obonoya, taeyama. (1 Air. 19:10,14) 4 Tiarone Dio taisi riboto ribane: Mate orisaba warao sinarijaira mojoabasi kware sinarijaira manamo emo abanaine. Tatuma mate Baal asita amujaba jinamane norujunatanae, taeyama. (1 Air. 19:18) 5 Monukajase ama akari sanukawitu bajinae. Dio aobojona ayakara aobojona tatuma mibune nisanae. 6 Dio oriaobojona ayakara aobojona tatuma mibune nisakore tatuma anona aobojonena tatuma nisaya. Tatuma anona aobojona tatuma mibune nisakore Dio aobojona ayakara ekira monuka jakuna. Tatuma anona aobojona Dio tatuma mibune nisakore Dio oriaobojona ayakara isia tatuma nisanaja. Oriaobojona ayakara aobojona tatuma mibune nisakore tatuma anona nonena monuka ejoboya. 7 Ama katukate? Israeltuma kwana najabuajakutaisi mina-tanae. Tiarone Dio mibune nisanajakutai tatumasike miae. Eobo rijana aobojona taeraja bajinae. 8 Jabataja aribu eku ejobonae. Ribia: Dio tatuma aobojona ekiraja monuka tane abanae. Amu jarone minaja. Akojoko jarone nokonaja. Ama ya isia are tane bajia, tia. (Kaj. 29:4) 9 Davidrakate ribia: Tatuma anoara jakutai kai tane ejobakunarai. Kainabujata tane ejobakunarai. Tane ejobate tatuma omu esoakakitane. Tane ejobate tatuma anona asirajasi amoara abakitane. 10 Amu mujasi bajekunarai minaka jamejerei. Yaota ebe arai tobo tiaja are bajekunarai, tia. (Rok. 69:22-23) 11 Ama renokotine. Judiotuma omu esoakane nakane atae noka-ramunatatera? Nokaramate. Judiotuma asiraja nonajame Dio Judioana jakutaisi aobojona ibajukate. Dio Judioana aobojona ibajukaya Israeltuma tatuma mitane sitamejerei. 12 Takore tatuma asiraja nonajame raina arao yakeraja ejobonae. Judiotuma nokabasabawitu bajinajame Judioana jakutai yakeraja ejobonae. Ama Judiotuma ribu eku abakore eobo yakerajawitu ejobateraji. 13 Rijana yatu Judioana jakutaisi isia ribatine. Dio mainatabae Judioana saba rewaramejerei. Tiame mayaota amoara uriraja ja, tiaine. 14 Mawarao yatu temiajine yatu sitamejereaine. Yatu sitakore tatuma kawanamo aobojona bajukate maobojona. 15 Dio Judiotuma tainajame raina arao Dio amuaraisatae. Ama Dio Judiotuma etuwarakore katukate? Ebe waba jakutai obojona jiro tane ejobate. 16 Arina inamone akari Dio saba emo abaya. Emo abakore arina kokotuka inamóae tiakutairakate Dio saba emo abánae tiaja bajia. Rau ajokonamu Dio saba emo abakore awakurakate Dio saba emo abánae tiaja. 17 Judiotuma oriwa arau rajikaba eku jakutaisi monuka. Judiotuma kawanamo jewetenae rau awaku jeweteakutaisi monuka. Iji Judioana jakutai oriwa arau raina eku jakutaisi monuka. Takore Dio jikonane awaku kabatanajakutaisi eku jietimajanae. Tane takore iji jokonamu eku, oriwa arau yakerajasi eku tane bajinae. 18 Oi. Ine rau awaku ebe jakutaisi ayakara kwarikaine, tane ribunaka jau. Tiarone iji ribane: Ine yakeraja, tiaine, obonobu. Iji rau monuka jakutai jokonamu jiekumoana. Iji jokonamu ekumo. 19 Iji ribate tai: Nomewitu, tiarone Dio rau awaku jewetenae rau eku metimajakitane, tate tai. 20 Tai nome. Tiarone Dio ta-tuma jewetenae tatuma nome abanatanajame. Iji nome abanajamewitu rau eku bajinae. Tiame ine eobo kwarikaine tane ribunaka jau. Tiarone retau. 21 Dio rau rajikabeku jakutaisi awaku iabanaka jewetenae. Ijirakate rau raina ekumo jakutai jijewetenaka jiiabanatate. 22 Miki anaka. Diosike aobojona yakeraja, tiarone aobojona taera. Nakajakutaisi isia aobojona taeraja ejobonae. Tiarone jiisia aobojona yakeraja ejobonae. Ama iji are Dio aobojona yakerajasi eku bajekitane ja. Tanaja jakore ijirakate Dio jijewetate. 23 Ama atae ribu raisa. Judiotuma are nome abanaka bajinaja jakore Dio atanejese tatuma rau eku abate. Dio ajara taeraja atanejese rau eku abakitane. 24 Ama iji Judioana jakutai rau raina eku jakutaisi isimo jijewetenae. Jiaobojonenarone iji rau yakerajasi eku jiabanae. Judiosike rau yakerajasi ekumotiji atanejese rau yakerajasi eku abakitane moinena ejobakuna. 25 Mawarao, yatu Oko musaberaja, tane ribate tai. Tane ribunaka jamejerei yatu ribu rijisa naminamejereaine. Israeltuma kawanamo aobojona taeraja ejobonae. Judioana yariakutaisi asebe mate kaikena jakore are aobojona taeraja bajete. 26 Ju-dioana yariakutaisi asebe kaika ejobakore Dio Israeltuma kokotuka aobojona ibajukate. Jabataja taisi isia ribia: Ejerotu jakutai Sionatukamo naote. Naone Jacob awaraoto ebikamo obojona Dio yatomanetekitaneana jakutaisi nisate. 27 Ine tatuma aobojona asirajasi berene Tamaja ajute nonatine tatuma isiko, tia. (Isa. 59:20-21) 28 Judiotuma rewara yakerajasi nokoaerone Dio isiko asiraja ejobonae. Tane ejobonae yatu nome abamejerei. Tiarone Dio tatuma anobotuma mibune nisanae. Nisanajame Dio Judiotuma are obonoya. 29 Dio obonobu waraoto moaitane atanejese ebunaja. Yejebuitane ine yejebunaja tanaja. 30 Yatu ateje Dio aribu eku abanatanae. Tiarone Judiotuma ribu eku abanatanajame Dio akobe yatu isia ajeraja ejobonae. 31 Monukajase Judiotuma ama Dio aribu eku abanaja. Eku abanaja Dio akobe tatuma isia ajera-mejerei yatu isia ajerakutaisi monuka. 32 Dio tatuma kokotuka Dio aribu eku abanaka jamejereae. Tane abanae nokabuka akobe warao kokotuka isia ajerakitane. 33 Dio aobojona urirajawituraji! Dio musaberajaraji! Dio naminatuwituraji! Oko Dio aobonobu naminakomoni. Ajojisi naminakomoni tane. 34 Takore ribu ja: Sina Airamo aobojona naminae bajama? Sina Airamo reiria? (Isa. 40:13) 35 Sina wajiabara Airamo moae riboto moamejerei? (Job 41:11) 36 Kokotuka jakutai tai Dio isimo. Kokotuka Dio anona. Kokotuka Dio saba. Dio are airamo tane bajekunarai! Amén.
121 Amasike, mawarao, Dio akobe yatu isia ajerame yatu reiriaine. Yatu atejo Dio moamejerei reiriaine. Tejo no-beanaka riko tane moakitane ja. Dio saba emo abayaja moaki-tane ja. Dio aobojona eku ejobamejerei moakitane ja. Tametane Dio yatomanetekitane ja. 2 Raina aobojona ama jakutaisi eku abanaka jakotu. Yatu aobojona jiro tane ejobakunarai yatu koko-tuka jiro tane ejobamejerei. Tane Dio aobojona naminate. Dio aobojona jakutai tai yakeraja, aribu eku, kaikawitu tane. 3 Dio oriaobojona ayakara mamoae. Tiame yatu kokotuka isia ribiaine. Obonobunaka jau: Ine eobo ayakara kwarika. Tane obonobukore asira. Obojona bakane obonobukitane ja. Dio iji nome abamejereae. Nome abamejereakutaisi kaika obonobu. 4 Waraoto atejo jisakarone akari era. Akari kokotuka ayaota jisakena. Ayaota raisa raisa. 5 Taisi monuka oko nome abamo jakutai erarone Kirito eku tejo jisaka. Waraoto atejo akari oreku. Oko monukajase tejo jisaka tane oreku. 6 Dio oriaobojona ayakara eku abayaja warao jisaka aobo-nobu raisa, warao araisa aobonobu raisa tane moaubuae. Obo-nobu kamoajakutai taisi eku nonakitane jaoko. Obonobu Dio kware rewarakitane jaja nome abayakutaisi kaika rewarakitane jaoko. 7 Obonobu eobo akajotabu takitane jaja yakeraja akajotabu takitane jaoko. Inaminakitane naminayakutai inaminakitane ja. 8 Eobo akobe etuwarakitane naminane etuwarakitane ja. Moaubiakutai wite isia obonobunaka moakitane ja. Yaota akwa yaotayakutai yakeraja yaotakitane ja. Ekirakutaisi sanetayakutai ekeiraja moakitane ja. 9 Oriobonoyaja obojona manamo jakutaisi monuka nonanaka jakotu. Asiraja rarijatane yakerajasi iamo narukotu. 10 Oriwarao oriobonoyakutaisi monuka oriobonokotu. Eobo orikwarika tane abakotu oriyatomaneteaja. 11 Taeraja yaotakotu. Inetenaka jakotu. Yatu aobojona taeraja abane Airamo akajotabu takotu. 12 Yatu ayawaka jame ekeiraja bajekotu. Sanamatayaja taeratakotu. Are kwai ribakotu. 13 Warao Dio saba emo abánae tiakutaisi aunukamo ekirakore sanetakotu. Yatu mikitane naoyakutai yakeraja taisi etuwarakotu. 14 Yatu isiko asiraja nonayarone tatuma yakeraja tane abakotu. Dio tatuma yakeraja abamejerei ebukotu. Yaribunaka jakotu. 15 Oriwakayakutaisi isiko oriwakakotu. Yaonayakutaisi isiko onakotu. 16 Obojona jisaka eku abane oriwere ubakotu. Eobo kwarika tane oriabanaka jakotu. Eobo yajoto jakutaisi isiko bajekotu. Okosike musaberaja, tane ribunaka jakotu. 17 Araisa asiraja nonayarone riboto asiraja nonanaka jakotu. Warao kokotuka amujaba yakeraja nonakitane najabukotu. 18 Ya-kerakore yatu aobojona isia eobo kokotuka isiko inareraja uba-kotu. 19 Mawarao, ine yatu obonoya. Yatu oriamoara abanaka jakotu. Dio orijisine amoara abamejerei wakakotu. Jabataja taisi isia ribia: Airamo ribia: Amoara abakitane jakutai tai ine. Amoara abatine, tia. (Kaj. 32:35) 20 Atae ribia: Jirarijatayakutai nojerakore najoro taisi moau. Jobiajerakore jo taisi moau. Iji tane nonayame jekunu akunu taisi akwa arai abaya monuka, tia. (Rei. 25:21-22) 21 Asiraja jakutai jikwarikamejerenaka jau. Yakeraja nonayaja asirajasi kwarikau.
131 Warao kokotuka ina airamo aribu eku abakitane ja. Airamo ama jakutai Dio tatuma airamo tane abanae. Dio airamo tane abanaja jakore airamo tane ejobonaja. 2 Tiame airamo aribu riboto ejoboyakutai Dio abanajakutaisi riboto ejo-boya. Ribu riboto ejoboyakutaisi anona asira. Tiame amoara ja isanamatamejerei. 3 Yakerajasi anonatu eretamejerei Dio aira-mo abanatanae. Tiarone asirajasi anonatu eretamejerei abanae. Iji retanaka ubakitane obonoyara? Obojona bakane yakeraja nonau. Takore airamo jiisia ribate: Jinona yakera, tate. 4 Airamo jakutai Dio akajotabu tane yaotaya jiisiko yakeraja nonakitane. Tiame jinona naminate. Tiarone iji asiraja nonakore retakitane ja. Airamo arewitu buariwari kokujunaja. Tai Dio akajotabu rijana. Tai Dio amoara abayaja nona asirajasi anonatuma isana-mataya. Tiame iji retakitane ja. 5 Tiame airamotuma aribu eku abakitane ja. Sanamatanaka jakitane ribu eku abakitane ja. Obo-jona yakeraja bajemejerei ribu eku abakitane ja. 6 Tiame kobenajoro yatu ebukore burata kobenajoro isia abaya. Tatuma Dio akajotabutuma. Tatuma ayaota airamo aribia are burata ebukitane. 7 Yatu rewe jaja rewe kokotuka amoara abakotu. Burata moakitane jaja moakotu. Kobenajoro aribia bu-rata abakitane jaja abakotu. Yatomanetekitane jaja yatomanete-kotu. Raomata tane abakitane jaja raomata tane abakotu. 8 Raisama isia rewetanaka jakotu. Tiarone oriobonokitane rewe monuka amoara abakitane ja. Araisama obonoyakutai Dio akajotabu ekuwitu abaya. 9 Jabataja taisi isia ribia Dio akajotabu isia: Jitira jarone raisama najabunaka jau. Jinibora jarone raisama najabunaka jau. Nanaka jau. Erijisanaka jau. Raisama kware abayaja ribu tona ribunaka jau. Raisama aunukamo obononaka jau, tia. (Ejo. 20:13-17) Tamatuma ribu erajarone ribu jisaka eku nakaya. Ribu jisaka jakutai tai tamaja: Iji wite obonoyakutai taisi monuka jiraisama obonote, tia. (Lev. 19:18) 10 Araisama obonoyakutai isiko asiraja nonanaja. Tiame obono-yakutai kajotabu aribu ekuwitu abaya. 11 Rijana asinarija naminakitane ja. Ubanaka karamakitane aya asinarija nakae rijana. Oko nome abakore kaobojona Aibajukatu anao kawere. Amasike kawerewitu. 12 Ima ekoroya rijana. Jokoya rijana. Tiame imajana eku nonayakutai iabakitane ja. Orikuba ajiaka jokoma saba jakutai taisi orisabakitane ja. 13 Obojona bakane jokoma eku nonaki. Nonakitaneana jakutaisi iabakitane ja. Awabakitane, maretakitane, tatusebekitane, nibosebekitane, nona eobo kwarika nona asirajawitu nonakitane, orikubakitane, raisama kwarikakitane obonokitane tane. Tama-tuma iabakitane ja. 14 Iabaitane jiaka orikuba saba orisabayaku-taisi monuka Kairamo Jesukirito orisabakotu. Obojona are jakutaisi eku abakitane oriiyakaratanaka jakotu.
141 Warao jisaka nome abayaja taerena jakore etuwarakotu. Ribu emo emo isia oriaribu kwarikanaka jakotu. 2 Warao jisaka najoro kokotukanea najorokitane yakera, tane yajorabaya. Warao raisa nome abayaja taerena jakutai toma najoronaja. 3 Kokotukanea najoroyakutai toma najoronaja jakutaisi taina-kitane ekira. Monukajase najoronaja jakutai kokotukanea najo-royakutaisi kware abakitane ekira. Dio taisi etuwarajame kware abakitane ekira. 4 Iji sinama aribia raisama akajotabu kware abaya? Airamo oriakajotabu jakutaisi aribu nome toate. Airamo ajarata ja taeraja bajemejerei. Tiame taeraja bajete. 5 Warao ya jisaka isia obonobune ribu abaya. Tamaja ya jakutai ya eobo amoara kwarika, tia. Warao raisama saba ya ko-kotuka orimonuka. Wite oriayajoraba eku bajekitane ja. 6 Warao jisaka Airamo isia obonobiaja ya jisaka kware barekitane orisaba nisaya. Warao raisa are Airamo isia obonobiaja ya jisaka kware barekitane orisaba nisanaja. Warao jisaka Airamo isia obonobiaja kokotukanea najoroya. Dio isia yakeraja jae tane ribiame Airamo isia obonobia. Warao raisa Airamo isia obonobiaja kokotukanea najoronaja. Tairakate Dio isia yakeraja jae tane ribia. 7 Jisakarakate oriaobojona ubanaja. Oriaobojona wabanaja. 8 Mate riko jaja Airamo aobojona. Wabakore Airamo aobojona. Tiame oko riko jaja Airamo sabasabamo, o waba jaja Airamo sabasabamo tane. 9 Kirito wabane nomininae waba jakutaisi Airamo takitane, riko jakutaisi Airamo takitane tane. 10 Amasike iji katukeme jiwaraoto aribu nome toaya bajama? Katukeme tainaya? Oko kokotuka Kirito amujaba nabakakitane ja karibu nome toamejerei. 11 Jabataja taisi isia ribia: Airamo ribia: Ine riko jame warao kokotuka mamujaba jinamane norujate. Jono kokotuka eobo amujaba ribate: Taisike Dio, tate, tia. (Isa. 45:23) 12 Tiame oko jisaka jisaka Dio karibu nome toate. 13 Tiame oko raisama aribu nome toakitane ribu ekira. Tia-rone oko wite oriisia obonobukitane ja, kawaraoto saba omu esoakanoko abanaka jakitane, kawarao nakamejerenaka jakitane tane. 14 Nona yawatanuka jakutai, obojona asiraja tane abanaja. Taisi naminayaine. Kairamo Jesú isia nome abayame tane tiaine. Tiarone warao obonobune masaba nona asiraja ejoboyakutai are taisi saba asiraja ejoboya. 15 Ama iji najoroyakutaisi aobojona jiwaraoto saba asiraja ejobate tai. Tane jakore iji jiwaraoto obononaja. Iji najoro isia taisi aribu kwarikakore najoro aobojona rijate tai. Kirito taisi kwarerakate wabae. 16 Yatu yakeraja nonayarone yatu isia asiraja ribate tai. Yatu isia asiraja ribunaja jakore yakerakuna. 17 Dio arujuna rujuyakutai tai najoro isiena, jobi isiena tane. Dio arujuna jakutai tai obojona nomerajasi isia, inareraja bajekitane jakutaisi isia, oriwakakitane jakutaisi isia, Mejokojira Yakerajawitu aobojona tane. 18 Kirito akajotabu tane ejoboyakutai tai Dio aobojona eku nakaya. Waraoto saba yakeraja ejoboya tane. 19 Ama inareraja tane abayakutai taisi are najabuki. Taisi najabuki orisanetakitane obojona iramejerei. 20 Iji najoroyaku-taisi aobojona Dio ayaota asiraja ejobamejerenaka jau. Nome-witu najoro kokotuka yakera. Tiarone iji najoroyakutaisi aobo-jona raisa omu esoakamejerekore najoro asiraja ejoboya. 21 Iji najoroyakutaisi aobojona jiwarao omu esoakate tai. Tane nakate tai. Joteraja ejobate tai. Tane jakore iji toma najoronaja jakore yakerakuna. Bino jobinaja jakore yakerakuna. Yawatanuka nonanaja jakore yakerakuna. 22 Iji nome abanajara? Dio amujaba suatana nome abanu. Iji orikware abanaka jinona jiaobojona eku jakore jikobe ekeiraja bajete. 23 Tiarone aobojona emo emo bajiaja najoroyakutai tai wite asiraja orikware abaya, nome abanaka najoroyame. Nome abanaka nonayakutai taisike nona asiraja.
151 Oko taeraja nome abayakutai joteraja jakutaisi saneta-kitane jaoko. Oko wite oriaobojona eku abanaka jakitane jaoko. 2 Oko kokotuka karaisama aobojona eku abaki yakeraja ejobamejerei, aobojona suatana iramejerei tane. 3 Kiritojase oriaobojona eku abanatanae. Tiarone Jabataja aribu eku nakae. Ribane: Jiisia kayamoni tane ribunajakutai monukajase maisia ribunae, tia. (Rok. 69:9) 4 Ebe Jabataja eku jabatajakutai oko naminamejerei jabatae. Jabataja eku abayaja oko taerataya. Kakobe tuwaraya. Tane yawakayaoko. Tiame Jabataja jabatae. 5 Dio jakutai taerata-mejerea. Kakobe etuwaraya. Tiame Dio yatu sanetakunarai obojona jisaka eku ubamejerei Kirito Jesú eku. 6 Obojona jisaka eku ubamejerea obojona jisaka isia, ribu jisaka isia tane Dio yakeraja jae tane ribamejerei. Dio jakutai tai Kairamo Jesukirito Arima. 7 Amasike orietuwarakotu. Kirito ketuwarae Dio airamo tane ejobamejerei. Taisi monuka orietuwarakotu. 8 Ine yatu saba rewaraya. Kirito Jesú naoae warao ajoro seréae tiakutaisi akajo-tabu takitane. Tametane nonayaja ribu kanobotuma moajakutaisi eku abanae. Dio oriaribu eku nonaya, tane inaminae. 9 Kirito naoae ina eobo arao Diosike yakeraja jae tane ribamejerei. Dio akobe kaisia ajerame yakeraja jae tane ribamejerei naoae. Jabataja aribu eku ejoboya. Jabataja taisi isia ribia: Tiame ina eobo araoto kawanaya jiisia yakeraja jae tane ribatine. Jiwai warayaja rokotu waratine, tia. (Rok. 18:49) 10 Jabataja aribu raisa ja. Yatu ina eobo arao, oriwakakotu Dio sabasabamo jakutaisi isiko. (Kaj. 32:43) 11 Ribu raisa ribia: Ina eobo kokotuka arao Airamo isia ribakotu: Iji yakeraja jae, takotu. Yatu warao kokotuka Airamo anona urirajasi isia rewarakotu, tae, tia. (Rok. 117:1) 12 Isaiasrakate jabatae: Isaí ajokonamu ejobate. Tai ina eobo araoto airamo tane rujate. Ina eobo arao taisi aobojona yawakate, tae. (Isa. 11:10) 13 Dio oko yawakamejerea. Yatu taisi isia nome abayakore tai yatu ekeirajawitu tane abakunarai. Inarerajawitu tane abakuna-rai. Tane abate yatu yaorane yawakamejerei Amejokojira Yake-rajawitu ajarata kaika. 14 Mawarao, maobojona kokotuka isia yatu aobojona yake-rajawitu, tiaine. Yatu musaberajawitu, tiaine. Yatu orireirikitane naminaya, tiaine. 15 Yatu naminayarone ine are tamaja karata jabataine. Ribu yakerajasi isia jabataine yatu emoninaka jame-jerei. Dio ayakara mamoae ine rewaramejerei. Tiame retanaka jabataine. 16 Dio mainatabae Judioana kawanaya Jesukirito akajotabu tamejerei. Takore mayaota jakutai rewara yakeraja Dio isimo jakutaisi rewarakitane. Rewarayaine tatuma Dio moakitane. Nobeanaka Dio aobojona ayakara eku monuka moatine. Nobeanaka jakutai Dio Amejokojira Yakerajawitu taisi emo abaya Dio saba. 17 Dio ayaota ine Kirito Jesú eku nonayakutai taisi isia yatu enokokitane masaba yakera. 18 Ine rewarayame Judioana jakutai Dio aribu eku abaya. Tai Kirito anona. Ine rewaraine ribu isia, nona isia tane. Ine manona raisama isia rewarakomonine. 19 Sinarija ajarata kaika rewaraine, mianare ajarata kaika tane. Dio Amejokojira ajarata kaika rewaraine. Jerusalén tatukamo kokotukanea rewarayaja ina Ilírico tata ru tane rewaraine. Rewara yakeraja Kirito isia jakutaisi rewaraine. 20 Tametane rewara yakeraja jakutaisi rewarakitane najabuaine. Kirito awai waranaja jakutaisiata rewarakitane najabuaine. Eobo Kirito isia rewarakitane jotananae. Ine tatuma ajotana araimo nonakitane obononatanaine. 21 Takore Jabataja aribu eku nakae. Taisi isia enokomoana jakutai tatumasike nokote. Taisi isia nokomoana jakutai tatumasike naminate. (Isa. 52:15) 22 Ine ebe eraja tane yatuata narukitane obonoaine. Tiarone emo kujuyame narukomoni. 23 Ama tamajasia mayaota riwa-ranaine. Atejeatukamo yatuata narukitane kwana obonoyaine. 24 Tiame España sabasaba nariaja yatuata nabakakitane jaine. Ine yatu isiko oriwaka riwarakore yatu masanetate kemo narumejerei, tane ribiaine. 25 Tiarone ama Jerusalenyata naru-tine. Eobo nobeanaka inatabaya warao Dio saba emo abánae tiakutaisi saba. 26 Macedonia arao, Acaya arao tane burata orikware toae. Burata orikware toae warao saneraubiaja Jerusalén tata jakutaisi saba. Tatumarakate warao Dio saba emo abánae tiakutai. 27 Tane nonakitane tatuma aobojona ekuwitu. Nomewitu arewe ja eobo isia. Nome abamo Judiotuma jakutai aobojona isia Judioana sanetae. Amasike Judioana jakutai aburata isia Judiotuma sanetakitane ja. 28 Tiame ine tata naria burata konarukitane. Konarujio tane España sabasaba ejobatine. España sabasaba nariaja yatuata nabakatine. 29 Yatuata nabakane ekeiraja nabakatine, tiaine. Rewara yakeraja Kirito isia jakutai taisi aobojona ekeirajawitu nabakatine, tiaine. 30 Mawarao, Kairamo Jesukirito aobojona yatu ebiaine. Dio Amejokojira kaobonoyame yatu ebiaine. Yatu ebiaine makware Dio ebiaja masanetakotu. 31 Ina Judea tata nome abamoana ja. Dio ebukotu tatuma amojekumo mejeromejerei. Warao Dio saba emo abánae tiaja Jerusalén tata jakutaisi saba konariaine. Dio ebukotu konariakutaisi anojomo yakeraja nojomejerei. 32 Tane ebukotu ine oriwakayaja yatuata nabakamejerei, Dio tane obono-kore. Tane ebukotu ine yatuata tuwaramejerei. 33 Dio inareraja tane abayakutai tai yatu kokotuka isiko bajekunarai. Amén.
161 Yatu rakoi sanuka Febe etuwarakore yakerakuna. Febe jakutai tai ikeresia Cencrea tata jakutaisi araoto asa-netatu. 2 Airamo aobojona yakeraja etuwarakotu. Warao Dio saba emo abánae tiakutai yakeraja orietuwarakitane ja. Tametane tirasi etuwarakotu. Tira jakutai erajasi sanetae. Inerakate masa-netae. Tiame ekirakore sanetakotu. 3 Priscila, Aquila tane isia yakeraubiara abakotu. Tatuma Kirito Jesú aobojona kaisiko yaotaya. 4 Tatuma jawaneraja kwaeabanae ine wabanaka jamejerei. Tiame tatuma isia yatu yakeraja, tane ribiaine. Inewituana. Judioana aikeresia arao kokotuka yatu yakeraja tane ribia. 5 Ikeresia Priscila Aquila tane ajanokoata orikware nakaya. Tatuma isia yakeraubiara abakotu. Epeneto isia yakerara abakotu. Ine taisi obonoyaine. Epeneto jakutai tai Kirito isia nome abatu awajiabara ina Acaya eku. 6 Maria isia yakerara abakotu. Maria jakutai yatu kawanaya kwana yaotae. 7 Andrónico, Junias tane isia yakeraubiara abakotu. Tatuma mawaraowitu. Ine mojoju jakore tatumarakate mojoju. Inatabatuma kawanamo tatuma yakerajawitu. Tatuma mebe Kirito isia nome abanae. 8 Amplias isia yakerara abakotu. Ine Airamo aobojona taisi obonoya. 9 Urbano isia yakerara abakotu. Kirito Jesú aobojona kaisiko yaotaya. Estaquis isia yakerara abakotu. Taisi obonoyaine. 10 Apeles isia yakerara abakotu. Apeles jakutai Kirito aobojona eku ejobonae. Aristóbulo awaraoto isia yakeraubiara abakotu. 11 Herodión isia yakerara abakotu. Tai majisakawitu. Narciso awarao Airamo isia nome abayakutai tatuma isia yakeraubiara abakotu. 12 Rakoituma Trifena Trifosa tane isia yakeraubiara abakotu. Tatuma Airamo ayaota eku yaotaya. Rakoi sanuka Pérsida isia yakerara abakotu. Taisi obonoyaine. Pérsida jakutai Airamo ayaota eku kwana yaotae. 13 Rufo isia yakerara abakotu. Airamo taisi mibune nisanae. Aranima isia yakerara abakotu. Arani marani tane ejobonae. 14 Eobo isia yakeraubiara abakotu: Asíncrito, Flegonte, Hermas, Patrobas, Hermes tane. Nome abamo tatuma isiko jakutai tatuma isia yakeraubiara abakotu. 15 Eobo kokotuka isia yakeraubiara abakotu: Filólogo, Julia, Nereo, Nereo arakoi sanuka, Olimpas tane. Warao Dio saba emo abánae tiakutai tatuma isiko jakutaisi isia yakeraubiara abakotu. 16 Oriamukaba oroyaja oriisia yakeraubiara abakotu nome abamotiji. Kirito aikeresia kokotuka arao yatu isia yakeraubiara abaya. 17 Mawarao, yatu ebiaine: Ejisajisamo naminakotu. Omu esoakanoko abamo naminakotu. Tatuma anona yatu naminajaku-taisi ekuana. 18 Tatuma Kairamo Jesukirito akajotabutumena. Oriaobojona eku abaya. Warao aobojona ekiraja jakutaisi ima-sibia. Aribu rijaberajasi isia imasibia. Raisama ayakara warayaja imasibia tane. Tiame tatuma emo jakotu. 19 Yatu Dio aribu eku abayakutai kokotuka taisi naminaya. Tiame ine oriwakayaine. Yatu yakeraja nonakitane naminayaja tane jakunako. Asiraja nonakitane naminanakawitu bajiaja jakunako. Tane jakoresike maobojona eku. 20 Dio inareraja tane abayakutai rubujira Satanás yatu omu noika abate yatu taisi sakane kwarikamejerei. Kairamo Jesukirito aobojona ayakara yatu moakunarai. 21 Timoteo maisiko yaotayakutai yatu isia yakeraubiara abaya. Atae Lucio, Jasón, Sosípater tane yakeraubiara abaya. Tatumasike mawaraowitu. 22 Ine Tercio tamaja karata ajabatatu jakutai Airamo eku yatu isia yakeraubiara abayaine. 23 Gayo yatu isia yakeraubiara abaya. Ine Gayo ajanoko eku ubayaine. Nome abamorakate Gayo ajanokeku orikware nakaya. Erastorakate yatu isia yakeraubiara abaya. Tai janokoina aburata aorabatu. Raka Quarto yakeraubiara abaya. 24 Kairamo Jesukirito aobojona ayakara yatu kokotuka moaku-narai. Amén. 25 Ama Dio are Airamo takunarai tane ribaki. Yatu taeraja tane abakitane Dio saba yakera. Rewara yakeraja ine rewarayakutaisi eku Dio yatu taeraja tane abaya. Ine Jesukirito isia inaminaya-kutaisi eku Dio yatu taeraja tane abaya. Raina ajiroma ebea-tukamo ribu rijisa are erijísae tiaja ja. Dio ribu rijisa yatu emusabayakutaisi eku yatu taeraja tane abaya. 26 Ama Dio ribu rijisa jakutaisi yatu enokoae. Dio kware arewaramo ajabata isia enokoae. Dio are jakutaisi akajotabu eku enokoae. Ribu rijisa ina kokotukanea araoto enokoae isia nome abaitane taisi eku nona-mejerei. 27 Dio jakutai tai jisakawitu. Tai musaberajawitu. Jesu-kirito aobojona oko Dio isia ribia: Dio are Airamo bajekunarai, tia. Amén.