EMUSABATAJA

EMUSABATAJA

¹ Jesukirito emusabatajakutai tamaja karata eku taisi jabata-yaine. Dio ribu Jesukirito moae anebu emusabamejerei. Mate kwaeabamoana tiarone rubujira kwaeabakitane jakutaisi isia ribu ja. Kirito oriainataba inatabae aneburatu Juan jakutaisiata. Ribu Juan emusabamejerei inatabae. ² Emusa-batajakutai kokotuka Juan rewarae. Ribu Dio isimo jakutai tai tamaja. Nome Jesú emusabatajakutai tai tamaja. ³ Asinarija kawere rijana. Tiame tamaja karata ateributu jakutai ekeiraja bajete. Tamaja ribu Dio isiko jaja jakutaisi anokomo jakutai, tamaja karata eku ribu jabátae tiajasi eku abamo jakutai tane tatuma ekeiraja bajete. ⁴ Ine Juan jakutai ikeresia mojoabasi kware manamo ina Asia tata jakutaisi saba jabatayaine. Dio jakutai are ja. Ateje are jaja. Naokitane ja. Dio arujunoko ebisaba mejokojituma mojoabasi kware manamo ja. Dio, Dioatukamo mejokojituma jakutai tane tatuma Dio aobojona ayakara yatu moakunarai. Inareraja tane yatu abakunarai. ⁵ Jesukiritorakate monukajase nonakunarai. Jesú jakutai tai Dio aribu ekuwitu arewaratu. Tai wabarone nominikitane jakutaisi awajiabara nomininae. Tai kaobonone oriajotu isia kaobojona asirajasi jojarae. Tai raina airamotuma airamo. ⁶ Kirito airamo tane kabanae. Saserote tane kabanae Dio Rima akajotabutuma tane bajemejerei. Kirito are airamo tane bajekunarai. Kirito are saba taeraja bajekunarai. Amén. ⁷ Mikotu anaka. Akirito jakutai ajakajoko eku naote. (Dan. 7:13) Naokore kokotuka taisi mite. Abamuju anatemorakate Kirito mite. Raina arao kokotuka Kirito mitane yaonate. (Zac. 12:10) Tane jate. Amén. ⁸ Airamo Taerajawitu jakutai ribia: Ine Alfa Omega tane monuka. Ine ajotana, akwa tane, tia. Airamo jakutai are ja. Ateje are jaja. Naokitane ja. ⁹ Ine Juan jakutai yatu araje. Yatu monuka sanamatayaine. Yatu monuka Dio isiko arujuna rujuyaine. Jesukirito oko taeratamejerei kabanae. Ine yatu monuka taerataya. Ine Dio aribu rewarajame Jesukirito isia rewarajame tane memojojutae. Memojojutane burujo Patmos tata maiabanae. ¹⁰ Takore Airamo aya eku ine Mejokojira eku jaja ribu nokoaine. Marai tajasaba ribu taeraja wana ekuitayakutaisi monuka nokoaine. ¹¹ Maisia ribane: Ine Alfa Omega tane monuka. Ine awajiabara ayaju tane. Iji miajakutai karata eku jabatate. Jabataitane ikeresia mojoabasi kware manamo ina Asia tata jakutaisi saba inatabau. Tamatuma janokoina eku ikeresia ja: Efeso, Esmirna, Pérgamo, Tiatira, Sardis, Filadelfia, Laodicea tane, tae. ¹² Takore ine oriarai tajasaba barinae sina maisiko rewaraya tai tane mikitane. Takore abije abanoko burata simonona mojoabasi kware manamo miaine. ¹³ Abije abanoko mojoabasi kware manamo autu warao tane nakajakutaisi monuka miaine. (Dan. 7:13) Ajiaka kawajeraja omuata ru tiaja jajasi miaine. Amejo akoya burata simo abánae tiaja jajasi miaine. ¹⁴ Akwa jokkou tiaja ajio jokeraja obeja ajiji ajoko monuka, o jonona ajuju ajoko monuka. Amu jekunu monuka. ¹⁵ Omu jommo tiaja, najamutu simosimo tiaja ejotánae tiajasi monuka. Aribu taeraja nojaba eraja ai akuita monuka. ¹⁶ Amojonome eku kura mojoabasi kware manamo ja. Aroko ekumo buariwari ejoboya. Orimatana ejiróae tiaja ja. Ya kwai sinajarayakutaisi monuka amujoro yi tiaja ja. ¹⁷ Taisi mitane ine waba monuka taisi amujaba joika nakaine. Tiarone tai oriamojonome marai abane maisia ribane: Retanaka jau. Ine awajiabara ayaju tane. ¹⁸ Are ubayakutai tai ine. Ine wabaerone nominane are ubayaja bajiaine. Amén. Ine waba ayawe jaine. Waba atuwaranoko ayawe jaine tane. ¹⁹ Iji miajakutaisi jabatau. Ama ja jakutai, mate kwaeabakitane jakutai tane jakutaisi jabatau. ²⁰ Ribu rijisa jiainaminatine. Kura mojoabasi kware manamo mamojonome eku miajakutai inatabatuma ikeresia mojoabasi kware manamo eku jakutaisi sitaya. Abije abanoko burata simonona mojoabasi kware manamo miajakutai tatuma ikeresia mojoabasi kware manamo sitaya, tae.

¹ Inataba Efeso aikeresia eku jakutai taisi saba jabatau: Mojonome eku kura mojoabasi kware manamo ja jakutai abije abanoko burata simonona mojoabasi kware manamo kawanaya kujuyakutai tane tametane ribia. ² Jinona kokotuka naminayaine. Iji kwana yaotayakutaisi naminayaine. Iji taeratayakutai taisi naminayaine. Asiraja anonamo jisaba asiraja jakutai taisi naminayaine. Jesukirito ainatabatuma tane oritoa-yakutai yatu tatuma aribu nome toanae. Aribu tona ejobonae. Taisi naminayaine. ³ Iji wakutanaka taeratae, sanamatae, kwana yaotae tane, mawai aobojona. ⁴ Tiarone obojona jisaka jikware abakitane ja. Iji wajiabara obonoajakutai taisi monuka suatana obononaja. ⁵ Jiobonobu ebe jakutaisiata nakau. Tane jiaobojona ibarene wajiabara nonaja-kutai taisi nonau. Iji jiaobojona ibarinaja jakore ine rubujira iji-ata narune jiabije abanoko jiebikamo konarutine. ⁶ Tiarone ribu yakeraja jisaka ja jiisia. Iji Nicolai sabasabamo anona rarijataya. Inerakate tatuma anona rarijatayaine. ⁷ Akojoko ja jakutai Mejokojira ikeresiatuma isia ribiakutai taisi nokokunarai. Kwarika ejoboyakutai taisi amoara moatine. Dio arajikaba eku rau ja. Rau akwaja najorone are ubakitane jakutai. Rau akwaja najoromejerei moatine. ⁸ Inataba Esmirna aikeresia eku jakutai taisi saba jabatau: Ine awajiabara ayaju tane jakutai jiisia ribiaine. Ine wabane nomininaine. ⁹ Jinona kokotuka naminayaine. Iji sanamata-yakutaisi naminayaine. Iji saneraja jakutaisi naminayaine. Tia-rone iji sanerena. Judio tane oritoayakutaisi naminayaine. Ta-tuma asiraja jiisia ribia. Tatumasike Satanás sabasabamo. ¹⁰ Iji sanamatakitane jakutaisi nojanaka jau. Jebuira yatu kawanamo emojojutamejerete yatu ayakara mikitane. Ya mojoreko sanama-takitane ja. Iji wabakitanerone are Dio aribu eku abanu. Takore amoara jimoate are ubamejerei. ¹¹ Akojoko ja jakutai Mejokojira ikeresiatuma isia ribiakutai taisi nokokunarai. Eobo manata wabayarone kwarika ejoboya-kutai manata wabanatate. ¹² Inataba Pérgamo aikeresia eku jakutai taisi saba jabatau: Ine buariwari orimatana ejiróae tiaja jaine. Jiisia ribiaine. ¹³ Ji-nona kokotuka naminayaine. Jiaineta Satanás airamo tane rujunae. Taisi naminayaine. Tiarone iji are maribu eku abaya. Kaje Antipas makware arewaratu maribu eku abayakutai eobo taisi nae. Satanás yatu aineta jakutaisiata Antipas nae. Naerone yatu are maisia nome abayaja bajia. ¹⁴ Tiarone ribu jikware abakitane jaine. Ateje Balaam Balac inaminae. Balac Israeltuma inatomejerei inaminae. Israeltuma najoro diosita moayakutaisi najoromejereae. Israeltuma tatuse-bemejereae tane. Ijiata inaminamo Balaam monuka ja. ¹⁵ Tata Nicolai ainamina eku abamo ja. Ine tatuma ainamina rarijataya. ¹⁶ Tiame jiaobojona ibarenu. Tanaja jakore ine ijiata narutine. Narune buariwari maroko ekumo ejoboyakutai taisi isia tatuma isiko orikubatine. ¹⁷ Akojoko ja jakutai Mejokojira ikeresiatuma isia ribiakutai taisi nokokunarai. Kwarika ejoboyakutai maná rijisa taisi moa-tine najoromejerei. Joyo jokeraja taisi moatine. Joyo arai wai jiro jabátae tiaja ja. Jisakarakate wai naminanaja. Anojotusike naminaya. ¹⁸ Inataba Tiatira aikeresia eku jakutaisi saba jabatau: Ine Dio Auka jakutai ribiaine. Mamu jekunu monuka. Momu najamutu simosimo ejóae tiajasi monuka. ¹⁹ Jinona kokotuka naminayaine. Iji obonoyakutai, nome abayakutai, yaotayakutai, taeratayakutai tane taisi naminayaine. Iji wajiabara nonajakutai ama taisi kwarika nonaya. Ine taisi naminaya. ²⁰ Tiarone ribu jikware abakitane jaine. Tira Jezabel ijiata jakutai tai jisaba yakera. Dio kware arewaratu tane oritoaya. Tira jakutai imasibiaja manebu nibo, manebu tatu tane inaminaya. Tatusebemejerei, nibosebemejerei, najoro diosita moayakutaisi najoromejerei tane inaminaya. ²¹ Ya eraja abanaine aobojona ibaremejerei. Tiarone aobojona ibarekitane obononaja nibosebe tanaka jakitane. ²² Ama nibosebe jakutai yajinoko arai inatotine. Isiko aubamo kwana sanamatamejeretine. Tatuma tai tirasi mo-nuka nonanaka jakitane aobojona ibarinaja jakore sanamata-mejeretine. ²³ Tirasi anobotomo natine. Ine waraoto aobonobu aobojona tane naminayaine. Ine tirasi anobotomo kubakore ikeresia kokotuka taisi naminate. Yatu nonajakutaisi kaika amoara yatu moatine. ²⁴ Yatu atae eobo Tiatira arao jakutai yatu tamaja inamina eku abanaja. Eobo Satanás aribu rijisa tane ribiakutai, yatu taisi naminanaja. Atae uru raisa yatu arai abanajine. ²⁵ Ine mate yatuata narumoana jakore yatu ja jakutai taisi eku yaorane abayaja bajekotu. ²⁶ Ya ayajuata are maobojona eku abayakutai taisi ribu moa-tine. Taeratayakutai taisi ribu moatine. Ina araoto airamo tane taisi abatine. ²⁷ Ribu Rima mamoajakutai taisi monuka ribu taisi moatine. Takore tai obeja ayaorotu tane najamutunona bumo tiajasi oane tatuma yaorote. Taisi isia ajene ina arao tinaja monuka yawanate. (Rok. 2:9) ²⁸ Jokona akura taisi moatine. ²⁹ Akojoko ja jakutai Mejokojira ikeresiatuma isia ribiakutai taisi nokokunarai.

¹ Inataba Sardis aikeresia eku jakutaisi saba jabatau: Ine mejokojituma mojoabasi kware manamo Dio isimo jakutai jaine. Kura mojoabasi kware manamo jaine. Jiisia ribiaine. Jinona kokotuka naminayaine. Iji wabarone jiisia riko ja tane ribia. Taisi naminayaine. ² Iji ja jakutai wabawitu bajekitia. Tiame seoroyaja, ja jakutaisi eku taeratanu. Jinona Mario saba mate yakerawituana. ³ Inamina jimoajakutai iji nokoajakutai tane taisiata jiaobojona nakau. Taisi eku abane jiaobojona ibarenu. Iji seoronaja jakore ine erijisa arotu monuka ijiata nabakatine. Iji manao asinarija naminanatate. ⁴ Tiarone mate Sardis arao kawanamo ajiaka anana ijabana-tanae. Tatuma amoara jame jiaka jokeraja orisabane maiamo kujute. ⁵ Kwarika ejoboyakutai jiaka jokeraja taisi isia abate. Obojona jiro jajasi awai karata eku jabátae tiaja ja. Kwarika ejoboyakutai taisi awai eneberenajine. Tiarone Marima amujaba Marimasi ainatabatuma amujaba tane yakeraja ribatine. Tatuma ine jaja, tatine. ⁶ Akojoko ja jakutai Mejokojira ikeresiatuma isia ribiakutai taisi nokokunarai. ⁷ Inataba Filadelfia aikeresia eku jakutai taisi saba jabatau: Ine yakerajawitu nomeraja tane. Ine airamo David ayawe jaine. Ine akojo ijakakore jisakarakate mukorakomoni. Ine akojo mukorakore jisakarakate ijakakomoni. ⁸ Jiisia ribia. Jinona kokotuka naminayaine. Jiebisaba janoko akojo ijakánae tiaja ja. Jisakarakate taisi mukorakomoni. Iji taera sabuka. Maribu eku abane taisi naminanajine tane ribunatanae. ⁹ Tata Satanás sabasabamo ja. Judiotuma tane oritoayarone aribu tona. Tatuma yatu amujaba naone ronamakamejeretine. Tatuma ine jiobonoae tane naminate. ¹⁰ Ine jiisia taeratanu tane ribakore maribu eku abanae. Asinarija naoya. Taisi eku raina arao kokotuka ayakara mite. Asinarija raina eku naokore yatu maribu eku abayame yatu yaorotine asinarija naokitane jakutaisi eku yatu nakanaka jame-jerei. ¹¹ Ine yatuata rubujira narutine. Yatu ja jakutaisi eku yaorane abayaja bajekotu. Yatu amoara warao raisa yatu ebikamo konaruterate. ¹² Kwarika ejoboyakutai tai kwai ribunoko Mario saba jakutaisi eku janoko anamuna akwa tane taisi abatine. Tatamo are ejobonatate. Mario awai taisi isia jabatatine. Mario ajanokoina awai taisi isia jabatatine. Janokoina jakutai tai Jerusalén jiro. Janokoina jakutai Marioatukamo najamutuatamo nanakate. Kwarika ejoboyakutaisi isia mawai jiro jabatatine. ¹³ Akojoko ja jakutai Mejokojira ikeresiatuma isia ribiakutai taisi nokokunarai. ¹⁴ Inataba Laodicea aikeresia eku jakutaisi saba jabatau: Ine nomeraja. Ine rewaratu ribu eku abane eku nonayaja ribu eku rewarayaine. Ine Dio anona kokotuka awajiabara. Jiisia ribiaine. ¹⁵ Jinona kokotuka naminayaine. Iji rairena ijirena tane. Rairaja jakunako! Ijiraja jakunako! ¹⁶ Tiarone iji ijira sabuka. Iji rairena jame ijirena jame tane maroko ekumo jierokoitine. ¹⁷ Iji ribia: Ine burata arotu. Kokotuka masaba yakeraja ejoboya. Ine kokotuka jaine, tia. Tiarone wite orinaminanaja. Iji sanamataya. Iji saneraja. Jiburata ekira. Mujasi waraojoro tane. Tanerone iji wite orinaminanaja. ¹⁸ Tiame jireiriaine. Burata simo jekunu eku yakeraja nónae tiakutai taisi maisimo nisanu. Taisi nisanu nomewitu burata arotu ejobakitane. Iji waraojoro jame tomanera. Tiame jiaka jokerajasi maisimo nisanu orisabakitane. Yarokota maisimo nisanu jimu eku esojone mikitane. ¹⁹ Ine obonoyaja jakutaisi sabajine yewereaine. Tiame obo-jona bakane jiaobojona ibarenu. ²⁰ Mi anaka. Ine janoko akojo-ata yejebiaine. Maribu nokone akojo ijakayakutai ine taisiata yarune isiko najorotine. Tai maisiko najorote. ²¹ Kwarika ejobo-yakutai airamo tane maisiko rujamejeretine. Ine kwarika ejobane Rimasi isiko rujunajakutai taisi monuka maisiko airamo tane rujate. ²² Akojoko ja jakutai Mejokojira ikeresiatuma isia ribia-kutai taisi nokokunarai.

¹ Tatukamo miaine. Najamutuata akojo ijakakore miaine. Wana akuita monuka jaja maisia ribiakore nokoaine. Ebe maisia ribunajakutai tai. Ribane: Tamate yaburu. Mate kwaeabakitane jakutai taisi jiemitine rijana, tae. ² Takore rijana ine Mejokojira eku jaja najamutuata airamo arujunoko abánae tiajasi miaine. Rujunoko arai jisaka rujúnae tiaja jae. ³ Rujúnae tiakutai tai joyo jaspe joyo cornalina tane monuka yi tiaja ja. Jubanasiko rujunoko sibajínae tiaja ja. Joyo esmeralda monuka yi tiaja ja. ⁴ Rujunokotuma airamowitu arujunoko awerea sibajínae tiaja ja. Asebe mojorekotuma manamo kware manamonamojase. Nibo iramotuma rujunoko-tuma arai norujúae tiaja ja. Ajiaka jokeraja. Nibo iramotuma jakutai airamo ayasi burata simonona jakutaisi kwatabaubúae tiaja ja. ⁵ Airamowitu arujunokoatamo naja monuka simo bari, simo bari tae, kuitae, ribunae tane. Rujunoko ebisaba abije mojoabasi kware manamo ja. Tatuma rokubúae tiaja. Abije jakutai mejokojituma mojoabasi kware manamo Dio isimo. ⁶ Rujunoko ebisaba joibira ja. Ajomo eremeta ajomo monuka. Rujunoko autu, rujunoko awerea tane warao monuka mana-monamojase nokaramúae tiaja ja. Amu eraja ja. Arai isia, amejo isia tane amu ja. ⁷ Awajiabara jakutai tobesimo monuka. Araisa baka auka monuka. Araisama amujoro waraoto amujoro monuka. Araisa otoira nijakayakutaisi monuka. ⁸ Warao monuka jakutai ajuji mojoabasi kware jisaka ja. Yakarekia, ajuji noikaya tane amu eraja ja. Jokomaya imaya tane tuwaranaka waraya: Airamo Dio Taerajawitu jakutai, Tai yakeraja, yakeraja, yakeraja. Tai jaja, tai ja. Tai naote, tane waraya. ⁹ Warao monuka jakutai waraya rujunoko arai rujúnae tiakutaisi isia. Tai are saba ubaya. Ribia: Rujunoko arai rujúnae tiakutai tai airamo, tai raomata, tai yakeraja, tia. ¹⁰ Tatuma warayakore iramo mojorekotuma manamo kware manamonamojase taisi amujaba mukunamane rujane jinamuya. Wabanaka are ubayakutaisi yatomanetea. Oriayasi nisane taisi arujunoko awere abaya. ¹¹ Tatuma ribia: Kairamo, iji jimoara ja jiisia ribamejerei: Iji airamo, iji raomata, iji taera, tamejerei. Iji kokotuka anonatu. Jiaobojona kokotuka nónae tiaja bajia. Jiaobojona nona kokotuka ja. Tiame jimoara ja, tiaoko, tia.

¹ Takore rujunoko arai rujúnae tiajasi amojonome eku karata miaine. Karata ekobótae tiaja ja. Orimatana jabátae tiaja ja. Asinarija mojoabasi kware manamo isia mukorónae tiaja ja. ² Dio ainataba taerajasi miaine. Tai rokojotayaja renokoae. Sina amoara ja karata asinarija yawanane emurakitane? tae. ³ Tiarone jisakarakate karata emurane eku mikitane ekiraja ejobonae. Kwai arotu, raina arotu, raina noika aroturakate ekiraja ejobonae eku mikitane. ⁴ Karata emurane eku teribukitane atae taisi mikitanerakate kokotuka amoara ekiraja ejobonae. Jisaka-rakate amoara jaja jakutai ekiraja ejoboyame kwana onaine. ⁵ Takore iramo jisaka maisia ribane: Onanaka jau. Tobesimo Judá awaraosebeira isimo ja. Tai airamo David ajisaka. Tai kwarika ejobonajame ribu ja karata asinarija mojoabasi kware manamo yawanane eku mikitane, tae. ⁶ Takore jisaka miaine. Obeja Auka nae tiakutaisi monuka jaja miaine. Tai rujunoko autu karamúnae tiaja ja. Warao monuka manamonamojase iramotuma tane taisi sibajínae tiaja ja. Obeja Auka ajioji mojoabasi kware manamo ja. Amu mojoabasi kware manamo ja. Dio mejokojituma mojoabasi kware manamo raina kokotuka ekia inatabajakutai tai. ⁷ Obeja Auka narune karata nisanae. Rujunoko arai rujúnae tiakutaisi amojonome ekumo karata nisanae. ⁸ Karata nisakore warao monuka manamonamojase, iramotuma mojorekotuma manamo kware manamonamojase tane Obeja Auka amujaba mukunamane rujane jinamunae. Iramotuma jisaka jisaka ekuitanoko sekeseke monuka ja. Anamu burata simonona ja. Anamu eku jonaba abánae tiaja ja. Jonaba jakutai warao Dio saba emo abánae tiakutaisi akwai ribu sitaya. ⁹ Tatuma tamaja rokotu jiro warae. Iji jimoara ja karata nisane asinarija yawanakitane. Jinae. Jijotu isia kanisanae Dio saba. Oko waraosebeira kokotukanea kawanamo, ribu kokotu-kanea kawanamo, warao kokotukanea kawanamo, ina kokotukanea kawanamo tane. Tiame iji jimoara ja. ¹⁰ Airamo saserote tane kabanae Kario saba. Raina airamo tane jateko, tae. ¹¹ Tatukamo miaine. Dio ainatabatuma aribu nokoaine. Tatuma asebe sinarijairatuma sinarijairatuma tane eraja. Rujunoko awere, warao monuka jakutaisi awere, iramotuma awere tane ja. ¹² Kwana ribunae: Obeja Auka monuka wabajakutai taisi amoara ja. Ribu moamejerei, burata moamejerei tane amoara ja. Musaberaja ejobakitane, taeraja ejobakitane tane amoara ja. Raomata tane, airamo tane abamejerei, isia yakeraja jae tane ribamejerei tane amoara ja, tae. ¹³ Atae ribu nokoaine. Dio anona kokotuka ribiakore nokoaine. Kwai jakutai, raina eku jakutai, raina noika jakutai, nojaba eku jakutai kokotuka ribiakore nokoaine. Ribane: Rujunoko arai rujúnae tiakutaisi isia, Obeja Auka isia tane are ribakunarai. Iji yakeraja. Iji raomata. Iji airamo. Iji taeraja, tane ribakunarai. Are tane ribakunarai, tae. ¹⁴ Takore warao monuka manamonamojase ribane: Tane ejo-bakunarai! tae. Iramotuma mojorekotuma manamo kware mana-monamojase jakutai mukunamane rujane, jinamane are ubayakutaisi yatomaneteae.

¹ Takore Obeja Auka karata asinarija mojoabasi kware manamo jakutaisi awajiabara yawanayakore miaine. Takore warao monuka manamonamojase kawanamo jisaka ribunae. Naja ribiakutaisi monuka kwana ribunae. Ribane: Naone mi! tae. ² Takore miaine. Kawayo jokeraja jae. Arai rujúnae tiakutaisi amojeku jataburu ja. Airamo ayasi taisi ikwatabanae. Kanatatu tane ejobonae eobo kanatakitane. ³ Takore Obeja Auka karata asinarija manamo yawanayakore warao monuka jakutaisi araisa ribunae. Ribiakore nokoaine: Naone mi, tae. ⁴ Kawayo raisa ejobonae. Jekunu monuka simo. Arai rujúnae tiakutai ribu ja raina arao orikuba jotanane muanamejerei. Ribu moayaja buariwari uriraja taisi moae. ⁵ Takore Obeja Auka karata asinarija rijanamo yawanayakore warao monuka jakutaisi araisa ribunae. Ribiakore nokoaine. Naone mi, tae. Takore miaine. Kawayo aneraja jae. Arai rujúnae tiakutaisi amojeku eurutanoko ja. ⁶ Takore warao monuka manamonamojase jakutaisi autumo ribiakore nokoaine. Arina auru koini jisaka amoara burata renario jisaka kaika. Sebara koini rijanamo amoara renario jisaka kaika. Tiarone toi jakutai bino jakutai tane mate iasiratanaka jau, tae. ⁷ Takore Obeja Auka karata asinarija manamonamojase yawanayakore warao monuka jakutaisi araisa ribunae. Ribiakore nokoaine. Naone mi! tae. ⁸ Miaine. Kawayo jenne tiaja ejobonae. Taisi arai rujúnae tiakutai taisi awai Waba. Taisi iamo naoajakutai taisi awai Waba Atuwaranoko. Ribu tatuma moae raina araoto asebe ajabasi autia namejerei. Orikuba isia, nojo isia, waba isia, raina aromu jawanerajasi isia tane kubate. ⁹ Takore Obeja Auka karata asinarija mojoabasi yawana-yakore miaine. Waraoto amejokojituma romu erokunoko noika jakore miaine. Dio aribu aobojona, ribu tatuma rewarajakutaisi aobojona tane tatuma kubajae. ¹⁰ Tatuma rokojotayaja ribia: Karotu, iji yakerajawitu, nomeraja tane. Raina arao kakubae. Iji katukakore tatuma aribu nome toane kajotu amoara abate? tia. ¹¹ Takore Dio jiaka jokeraja tatuma moae. Isia ribane: Mate sanuka tuwarakotu. Yatu kubajakutaisi monuka mate eobo yatu awarao, yatu isiko jisaka tane yaotayakutai tane tatuma kawanamo kubakitane ja. Asebe kaikakore raina araoto amoara abatine. ¹² Obeja Auka karata asinarija mojoabasi kware jisaka yawa-nayakore miaine. Inarikoira jakanae. Ya jakutai seirinae jiaka jumatu aneraja monuka. Waniku jakutai simiraja ejobonae jotu monuka. ¹³ Kuratuma joika nakae raina tata. Ajaka ikoru etokotokoyakore akwaja jioboto nakaya. Taisi monuka kuratuma nakae. ¹⁴ Najamutu jakutai karata ekobotayakutaisi monuka ekobotae. Tiaja emo bajinae. Jota, burujo tane kokotuka emo bajinae. ¹⁵ Raina arao totoira eku jota ajoyoira noika tane orierijisae. Orierijisajakutai tai tamaja: raina araoto airamotuma, airamo sabukatuma, burata arao tane. Yaoromo airamotuma, warao ajara taeraja jakutai, nebu kokotuka, nebuana kokotuka tane. ¹⁶ Jota isia joyoira isia tane ribia. Karai nakakotu. Rujunoko arai rujúnae tiakutai taisi amu kaminaka jamejerei kerijisakotu. Obeja Auka orijisiraja kayewerenaka jamejerei kerijisakotu. ¹⁷ Asinarija eku nakae rijana kaisiko orijisikitane. Sina taeratate?

¹ Tatukamo Dio ainataba manamonamojase miaine. Raina ajitu manamonamojaseata nokaramúae tiaja ja. Raina eku ajaka manamonamojase jakutai taisi etuwaraya rubujunaka jamejerei. Raina eku, nojabaira eku tane rubujunaka jamejerea. Rau etokonaka jamejerea tane. ² Atae Dio ainataba raisama miaine. Ya ribotoatamo naoya. Dio riko jakutaisi asinarija konaria. Inataba manamonamojase jakutai ribu ja raina, nojaba tane iasiratakitane. Araisa rokojotayaja tatuma isia ribia: ³ Oko mate Kario anebu auto isia sinarija abamoana jakore iasiratanaka jakotu. Raina, nojabaira, rau tane mate iasiratanaka jakotu, tia. ⁴ Sinaríjae tiaja bajinajakutai taisi asebe nokoaine. Asebe sinarijairatuma siento jisaka kware sinarijairatuma mojoreko-tuma manamonamojase kware sinarijaira manamonamojase. Sinaríjae tiakutai tai Israel awaraosebeira jisaka jisaka ekumo. ⁵ Judá awaraosebeira ekumo sinarijaira mojoreko kware sinarijaira manamo. Rubén awaraosebeira ekumo sinarijaira mojoreko kware sinarijaira manamo. Gad awaraosebeira ekumo sinarijaira mojoreko kware sinarijaira manamo. ⁶ Aser awaraosebeira ekumo sinarijaira mojoreko kware sinarijaira manamo. Neftalí awaraosebeira ekumo sinarijaira mojoreko kware sinarijaira manamo. Manasés awaraosebeira ekumo sinarijaira mojoreko kware sinarijaira manamo. ⁷ Simeón awaraosebeira ekumo sinarijaira mojoreko kware sinarijaira manamo. Leví awaraosebeira ekumo sinarijaira mojoreko kware sinarijaira manamo. Isacar awaraosebeira ekumo sinarijaira mojoreko kware sinarijaira manamo. ⁸ Zabulón awaraosebeira ekumo sinarijaira mojoreko kware sinarijaira manamo. José awaraosebeira ekumo sinarijaira mojoreko kware sinarijaira manamo. Benjamín awaraosebeira ekumo sinarijaira mojoreko kware sinarijaira manamo. ⁹ Tatukamo waraosebeira miaine. Warao jakutai ina kokotuka kawanamo, waraotuma kokotuka kawanamo, raina kokotuka ekumo, warao ribu raisa raisa jakutaisi kokotuka kawanamo tane. Tatuma rujunoko ebisaba, Obeja Auka ebisaba tane nokaramúae tiaja ja. Asebe uriraja jame sinarijakomoni. Ajiaka jokeraja orisábae tiaja ja. Amojeku jawara aroko ja. ¹⁰ Tatuma kokotuka rokojotaya. Kario jakutai tai kaobojona ibajukaya. Rujunoko arai rujúnae tiakutai, tai. Obeja Auka jakutai tairakate kaobojona ibajukaya, taubuae. ¹¹ Dio ainatabatuma kokotuka tata nokaramúae tiaja ja. Ruju-noko awerea, iramotuma awerea, warao monuka manamonamo-jase awerea tane ja. Rujunoko ebisaba mukunamane rujane, jinamane Dio yatomaneteae. ¹² Ribia: Are Kario isia tametane ribakitane ja. Amén! Dio yakeraja, Dio airamo, Dio musaberaja, tane. Isia yakeraja ribiaoko. Dio raomata. Ribu ja. Taeraja tane, Amén. Tane ribakitane ja, tae. ¹³ Takore iramo jisaka marenokoae: Tamatuma jiaka jokeraja orisabaubúae tiakutai sinatuma? Kasabamo naoae? ¹⁴ Takore: Mairamo, iji naminaya, taine. Takore: Sanamata Uriraja ekumo ejobonajakutai tai tamatuma. Ajiaka jojarae. Ajiaka Obeja Auka ajotu isia ejokonae. ¹⁵ Tiame Dio arujunoko ebisaba ja. Jokomaya imaya tane kwai ribunoko eku Dio akajotabutuma tane bajia. Rujunoko arai rujúnae tiakutai are tatuma kaika bajete. ¹⁶ Tamatukamo tatuma nojerena jate. Jobiajerena jate. Ya tatuma jojunatate. Iji ebe sanamatanatate. ¹⁷ Obeja Auka rujunoko autu jakutai tatuma yaorote. Jo sororoyajasiata tatuma konarute. Tatuma onayakutaisi amujo Dio taisi kokotuka berete.

¹ Takore Obeja Auka karata asinarija mojoabasi kware manamo yawanae. Yawanakore najamutuata kokotuka inareraja bajinae ya asinarija autia isia. ² Tatukamo Dio ainataba mojoabasi kware manamo miaine. Dio amujaba nokaramúae tiaja ja. Jisaka jisaka wana moae ekuitamejerei. ³ Takore Dio ainataba raisama miaine. Tai jonaba anamu burata simonona ja. Erokunoko ebisaba karamunae. Dio jonaba eraja inataba moae erokunoko burata simonona arai erokamejerei. Warao Dio saba emo abánae tiakutai kwai ribiakore jonaba erokia. Erokunoko jakutai airamo arujunoko ebisaba. ⁴ Warao Dio saba emo abánae tiakutai kokotuka kwai ribiakore aribu kwai yaburia. Inataba jonaba erokakore ajejuku nome abamo aribu isiko yaburia Dio tata. ⁵ Takore inataba jonaba anamu nisane, erokunoko akunu isia ikwatane raina araia webiarae. Webiarakore naja ribunae. Kuitae. Naja simo bari, simo bari tae. Inariko jakanae tane. ⁶ Takore inatabatuma awana ja jakutai oriiyakaratae ekuitakitane. ⁷ Inataba awajiabara aekuitanoko ekuitae. Ekuitakore naja jo-nona, jekunu tane raina seboae. Jotu isiko seboae. Rautuma akari rijanamo ekumo akari jisaka jojuae. Jaka irayaja jakutai kokotuka jojuae. ⁸ Takore inataba manamo aekuitanoko ekuitae. Ekuitakore jota uriraja rokiaja monuka nojabaira autu toanae. Takore nojabaira akari rijanamo ekumo akari jisaka jotu tane bajinae. ⁹ Nojabaira eku aubamo akari rijanamo ekumo akari jisaka muanae. Wajibakatuma nojabaira ekia nariakutai taisi akari rijanamo ekumo akari jisaka ekoronae. ¹⁰ Takore inataba rijanamo aekuitanoko ekuitae. Ekuitakore kura uriraja jekunu monuka rokiaja najamutu tatamo nakae. Nojabatuma akari rijanamo ekumo akari jisaka arai nakae. Jo ejobonoko arai nakae. ¹¹ Kura jakutaisi awai Aija. Jo akari rijanamo ekumo akari jisaka ajiajeraja ejobonae. Jo ajiajeraja jame warao eraja jo jobine muanae. ¹² Takore inataba manamonamojase aekuitanoko ekuitae. Ya akari rijanamo ekumo akari jisaka iasiratanae. Waniku kuratuma tane akari rijanamo ekumo akari jisaka iasiratanae. Akari jisaka imananamejereae. Akari jisaka sinajaramejerenatanae ya eku, ima eku tane. ¹³ Tatukamo miaine. Inataba najamutuataya nijakayakore aribu nokoae. Rokojotayaja ribane: Mate inatabatuma rijanamo ekuitakitane ja. Ekuitakore raina arao sanamatate jame amájae, amájae, amájae tane ribiaine! tae.

¹ Takore inataba mojoabasi aekuitanoko ekuitae. Ekuitakore kura najamutu tatamo raina eku nakajakutai taisi miaine. Totoira ayawe taisi moae. ² Tane totoira emuranae. Emurakore jejuku ejobonae. Jejuku jakutai jisabanoko uriraja ajekunu aje-juku monuka. Jejuku uriraja jame ya seirinae. Ajakarakate seirinae. ³ Jejuku ekumo jabisara eraja ejobone raina kayanae. Jarata tatuma moae kaje raina eku jakutaisi ajarata monuka. ⁴ Isia ribane: Jaka raina arai jakutai, yaroko jiro, rau tane iasiratanaka jakotu. Warao auto isia Dio asinarija ekirakutai taisi iasiratate, tae. ⁵ Ribu jabisara moanatanae waraoto kubamejerei. Tiarone ribu ja waniku mojoabasi isia waraoto tijikore roromejerei. Kaje tijikore roroyakutaisi monuka rorote. ⁶ Tai sinarija eku warao wabakitane kwana obonote tiarone wabakomoni jate. Wabaobonoyarone waba waraoto ebikamo emo jakate. ⁷ Jabisara jakutai kawayo orikuba saba iyakarátae tiakutaisi monuka. Yasi burata simonona monuka kwatabánae tiaja ja. Amujoro waraoto amujoro monuka. ⁸ Ajio tirasi ajio monuka. Ai tobesimo ai monuka. ⁹ Amejo najamutunona isia makánae tiaja ja. Nijakayakore ajuji atujuru kawayo eraja orikuba saba raubarabara isiko nariakutaisi atujuru monuka. ¹⁰ Aju eku ajitana ja kaje ajitana monuka. Jabisaratuma ribu ja waniku mojoabasi isia waraoto isanamatakitane. ¹¹ Jabisara jakutai airamo ja. Airamo jakutai tai inataba totoira tatamo. Awai ebereo aribu isia ribia: Abadón. Grecia araoto aribu isia ribia: Apolión. ¹² Wajiabara amájae ribakitane jakutai kwaeabanae tiarone mate manamo bajia. ¹³ Takore inataba mojoabasi kware jisaka aekuitanoko ekuitae. Erokunoko burata simonona Dio ebisaba ja jakutaisi ajioji manamonamojase ja. Inataba ekuitakore jioji autumo ribu nokoaine. ¹⁴ Ribu jakutai inataba mojoabasi kware jisaka awana ja jakutaisi isia ribane: Nojaba uriraja Eufrates tata Dio ainatabatuma manamonamojase yejimárae tiaja ja. Tatuma ejeronu, tae. ¹⁵ Takore ejeronae. Dio inatabatuma amena iyakaratae tamaja ya asinarija saba, tamaja ya saba, tamaja waniku saba, tamaja inawaja saba tane. Tatuma iyakaratae raina nomeira arao akari rijanamo ekumo akari jisaka kubamejerei. ¹⁶ Takore yaoromo kawayo arai nariakutaisi asebe nokoaine. Asebe sinarijairatuma sinarijairatuma siento manamo. ¹⁷ Mamu eku kawayo ejobakore miaine. Arai nariakutai amejo makánae tiaja ja. Amejo amaka jekunu monuka simiraja, jejuku monuka jeburiraja, ore rokiajasi monuka jaukwajeraja. Kawayo jakutaisi akwa tobesimo akwa monuka. Aroko ekumo, jekunu, jejuku, ore rokiaja tane ejobonae. ¹⁸ Jawana rijanamo kawayo aroko ekumo ejobonae: jekunu, jejuku, ore rokiaja tane. Takore raina nomeira arao akari rijanamo ekumo akari jisaka jawana rijanamo ebe muanae. ¹⁹ Kawayo ajarata aroko eku ja, aju eku ja tane. Aju juba monuka akwa jaja. Isia waraoto iasirataya. ²⁰ Tiarone warao eobo jawana ebe muananatanajakutai aobo-jona ibarinatanae anona iabakitane. Are jebu yatomaneteae. Are diosita yatomaneteae. Diosita jakutai burata simonona, burata joko-nona, najamutu simosimonona, joyonona, raunona tane. Diosita jakutai mikomoni, nokokomoni, yã takomoni tane. Tiarone eobo are diosita yatomaneteae. ²¹ Aobojona ibarinatanae obojona asiraja iabakitane. Obojona asiraja jakutai tai tamaja. Kuba-kitane, joa warakitane, tatusebekitane, nibosebekitane, erijisa-kitane tane.

¹ Takore inataba taeraja raisama miaine. Najamutu tatamo nanakayakore miaine. Ajakajoko jiaka monuka orisa-bánae tiaja ja. Jubanasiko kwatabánae tiaja ja. Amujoro ya monuka yi tiaja. Taisi aka jekunu bumo tiakutaisi monuka. ² Amojo eku karata sanuka emuránae tiaja ja. Aka mojonome tajasabaya jakutai nojabaira arai abanae. Aka kajamojo tajasabaya jakutai raina arai abanae. ³ Tane kwana rokojotae. Arokojota tobesimo akuita monuka. Rokojotayakore naja aribu mojoabasi kware manamo ribunae. ⁴ Naja aribu mojoabasi kware manamo ribakore ine aribu jabatakitiakore najamutu tatamo ribu maisia ribane: Naja aribu mojoabasi kware manamo jakutaisi yaorabanu. Jabatanaka jau, tae. ⁵ Tatukamo inataba ine miajakutai amojo kwai kobukanae ribakitane. Inataba aka nojabaira arai, aka raina arai tane jakutai, tai. ⁶ Inataba Dio awai warayaja ribunae. Dio jakutai are ja. Najamutu, raina, nojabaira tane anonatu. Tatuma eku jakutai taisi anonatu. Inataba ribane: Dio yawakanaka nonate rijana. ⁷ Inataba mojoabasi kware manamo aekuitanoko ekuitakitane jotanakore tai sinarija eku Dio aobojona rijisa eku nakate. Ateje Dio orianebu saba rewarajakutai tai. Tatuma Dio kware are-waramo, tae. ⁸ Takore ribu najamutuatamo ribiakore ine nokoajakutai atanejese maisia ribunae. Ribane: Karamane, inataba amojo eku-mo karata sanuka emuránae tiakutaisi nisanu. Inataba aka noja-baira arai, aka raina arai tane jakutai, tai, tae. ⁹ Takore ine inatabeta narune karata mamoamejerei ebuaine. Takore maisia ribane: Ma, karata najoro. Jiroko eku simo ajo monuka rijaberaja ejobate. Tiarone jikobe eku ajiajeraja ejobate, tae. ¹⁰ Takore inataba amojekumo karata nisane najoroaine. Maroko eku simo ajo rijaberaja ejobonae. Tiarone najorokore makobe eku ajiajeraja ejobonae. ¹¹ Tatukamo maisia ribane: Atanejese iji Dio aribu rewarakitane ja. Raina arao erajasi saba, ina arao erajasi saba, warao eraja ribu raisa raisa jakutaisi saba, airamo erajasi saba tane rewarakitane ja, tae.

¹ Tatukamo rau sinarijanoko monuka mamoae. Tane maisia ribane: Kwai ribunoko Dio saba jakutai taisi sinarijau. Taisi eku erokunoko jakutaisi sinarijau. Tata ayatoma-netemo jakutaisi sinarijau, tae. ² Tiarone kwai ribunoko ayakareku jakutaisi emo abanu. Taisi sinarijanaka jau. Tai Judioana amojeku abanae. Tatuma waniku mojorekotuma manamonamojase kware manamo isia janokoina yakerajasi sakaubute. ³ Ine rewaramo manamo inatabatine maribia rewaramejerei. Jiaka jumatu orisabane ya sinarijaira jisaka kware siento manamo kware siento ajabasi kware mojoreko isia rewarate. ⁴ Tamatuma rewaramo manamo oriwa arau manamo monuka. Tatuma abije abanoko manamo Dio amujaba abánae tiajasi mo-nuka. Dio jakutai tai raina Ario. ⁵ Jisaka tatuma iasiratakitane obonokore tatuma aroko ekumo jekunu ejobate isiko asiraja jakutaisi iekorakitane. Raisa tatuma iasiratakitane obonoyakutai tai jekunu ebe wabakitane ja. ⁶ Rewaramo manamo Dio kware rewarayakore Dio ribu tatuma moate. Dio aribia najamutu muko-rate naja ebonaka jamejerei. Dio aribia jo jotu tane inamonite. Tatuma Dio aribia raina arao jawana kokotuka ebe sanama-tamejerete. Tatuma nonakitane obonoyakutaisi kaika ribu ja. ⁷ Tiarone tatuma ayaota riwarakore raina aromuira totoira ekumo ejoboyakutai tai tatuma isiko orikubate. Orikubane, kanatane tane tatuma kubate. ⁸ Janokoina urirajasi anaru eku atejo te tane bajete. Obojona Dio aribu sabasabaya janokoina awai tane Sodoma Egipto tane waraya. Tai janokoina ekujase Kairamo esijariae. ⁹ Ya rijanamo kware autia isia warao tatuma atejo mite. Atejo joitamejerenatate. Amimo jakutai raina arao kawanamo, warao kawanamo, warao ribu raisa raisa jakutai kawanamo, ina arao kawanamo tane. ¹⁰ Rewaramo manamo wabajame raina arao oriwakate. Ekeiraja bajete. Orisaba nobeanaka inatabate. Tamatuma Dio kware arewaramo jakutai raina araoto isanamatae. Tiame wabakore raina arao oriwakaya. ¹¹ Tiarone ya rijanamo kware autia ru takore jajinabuara Dio isimo jakutai tatuma eku yarukore tatuma riko bajinae. Tane ata-nejese nokaramuae. Takore amimo kwana retaubuae. ¹² Tatu-kamo ribu taeraja najamutuata ribiakore rewaramo nokoae. Ribu ribane: Kwai yaburukotu, tae. Ajakajoko eku kwai yaburiakore tatuma isiko asiraja jakutai tatuma miae. ¹³ Tai sinarija eku inariko uriraja jakanae. Inariko ebe janokoina akari mojoreko ekumo akari jisaka nakae. Warao sinarijaira mojoabasi kware sinarijaira manamo muanae. Warao bajinajakutai kwana retaubune Dio najamutu arotuma isia ribane: Ijisike Airamo, tae. ¹⁴ Amájae tane ribakitane manamo kwaeabanae. Atae raisa rubujira naote. ¹⁵ Takore ainataba mojoabasi kware manamo aekuitanoko ekuitae. Ekuitakore ribu taeraja najamutuata ribunae. Ribane: Kairamo, Akirito tane ribu ja raina kokotukanea airamo tane rujakitane. Are saba airamo tane rujate, tae. ¹⁶ Takore iramotuma mojorekotuma manamo kware manamonamojase Dio ebisaba arujunoko arai norujúae tiakutai Dio amujaba mukunamane rujane, jinamane yatomaneteae. ¹⁷ Ribane: Kairamo, jiisia yakeraja jae, tane ribiaoko. Iji Dio Taerajawitu. Iji jaja. Iji ja. Iji naokitane ja. Iji taerajawitu ejobane Airamo tane rujunae. Tiame kasaba yakera. ¹⁸ Raina arao orijisiae. Ijirakate orijisiae. Asinarija eku nakae iji waba aribu nome toamejerei. Asinarija eku nakae amoara jinebu moamejerei. Jikware arewaramo moate. Warao jisaba emo abánae tiakutaisi moate. Jiwai ayato-manetemo moate. Airamo airamoana tane moate. Asinarija eku nakae iji raina iekoramo iekoramejerei, tae. ¹⁹ Takore kwai ribunoko Dio saba najamutuata ja jakutai taisi akojo ijakanae. Tata ajute akaja miae. Takore naja simo bari, simo bari tae. Kuitae. Naja ribunae. Inariko jakanae. Jonona kwana eboae.

¹ Tatukamo najamutuata sinarija uriraja ejobonae. Tira ya orisabánae tiaja ja. Waniku jakutai omu noika ja. Ayasi kura mojoreko kware manamo kwatabánae tiaja ja. ² Tira jakutai kwabu. Jorosimo ajiajame rokojotaya. Sanamataya. ³ Takore najamutuata sinarija raisa ejobonae. Merairaira simo ja. Akwa asebe mojoabasi kware manamo. Ajioji asebe mojoreko. Airamo ayasi mojoabasi kware manamo kwatabaubúae tiaja. ⁴ Aju isia najamutu akuratuma akari rijanamo ekumo akari jisaka iawarane raina eku toanae. Tira jorosimo aranitakitiakutai merairaira amujaba ja. Meraraira jorosimo nakakore najorokitane wakayaja ja. ⁵ Takore tira jorosimo nibora aranitae. Jorosimo tajakutai najamutunona bumo tiajasi oane raina arao kokotuka yaorote. Takore Dio tirasi ebikamo auka nisane oriata konaruae oriarujunokoata. ⁶ Konarukore tira jarawaja tata jakanae. Tata Dio tuwaranoko tirasi saba iyakaratae. Tata ya sinarijaira jisaka kware siento manamo kware siento ajabasi kware mojoreko isia tirasi yaoromejerei iyakaratae. ⁷ Tatuka najamutuata orikuba ejobonae. Miguel jakutai ainatabatuma isiko ejobonae merairaira isiko orikubakitane. Merairaira oriainatabatuma isiko ejobonae tatuma riboto orikubakitane. ⁸ Tiarone orikuba kanatakomoni. Takore tatuma saba najamutuata tuwaranoko ekiraja ejobonae. ⁹ Dio merairaira najamutu ekumo webotonae. Merairaira jakutai juba ateje jakutai tai. Taisi awai jebuira. Awai raisa Satanás, raina arao kokotuka aimasibutu jakutai. Dio raineta taisi webotonae ainatabatuma isiko. ¹⁰ Takore ribu taeraja najamutuata ribiakore nokoaine. Ribane: Kawarao nome abamo jakutaisi kware abatu ja. Jokomaya imaya tane Kario amujaba tatuma kware abaya. Tiarone Dio najamutu ekumo taisi webotonae. Tiame asinarija eku nakae Kario eobo aobojona ibajukamejerei. Kario taeraja, airamo tane arujuna rujate rijana. Akirito airamo tane ejobonae. ¹¹ Nome abamo imasibutu jakutaisi kanatae Obeja Auka ajotu isia. Aribu rewarayakutaisi isia kanatae. Wabakitanerone retanaka imasibutu isiko orikubae. ¹² Najamutu, oriwakau. Najamutu arao, oriwakakotu. Tiarone raina arao, nojabaira arao tane sanamatate jame amájae tane ribiaine. Jebuira yatuata nanakanae. Aya sanuka bajiakutaisi naminayame orijisirajawitu bajia, tae. ¹³ Takore merairaira raineta webotónae tiajasi naminane tirasi iyajubuae. Tira jakutai jorosimo nibora aranitajakutai tai. ¹⁴ Tia-rone Dio otoira ajuji manamo tirasi moae jarawaja tata atuwaranoko jakutaisiata nijakamejerei. Tata tira juba emo bajete. Tata inawaja rijanamo kware autia Dio tirasi yaorote. ¹⁵ Takore juba jakutai tirasi iamo sojanae nojaba tane joirane tirasi konarumejerei. ¹⁶ Takore joboto tirasi sanetae. Nojaba merairaira aroko ekumo ejobonajakutai joboto taisi korunae. ¹⁷ Tiame merairaira tirasi isiko orijisiae. Tirasi anobotomo eobo isiko orikubakitane naruae. Eobo jakutai Dio akajotabu eku abamo, Jesukirito aribu eku abamo tane.

¹ Ine nojabaira amumia kajewaja arai karamúnae tiakore raina aromuira nojabaira ekumo ejoboyakore miaine. Romuira jakutai akwa asebe mojoabasi kware manamo, ajioji mojoreko tane ja. Ajioji jisaka jisaka airamo ayasi kwatabanae. Akwa isia wai Dio saba asiraja ja. ² Romuira ine miajakutai tobe monuka. Omu raina aromu urirajasi omu monuka. Aroko tobesimo aroko monuka. Merairaira oriajarata taisi moae. Kware airamo tane rujamejerei moae. Oriaribu moae. ³ Romuira akwa jisaka eboisikore waba monuka bajinae. Tiarone aboisi waba sabarone rubujira yakarae. Yakarakore raina arao kokotuka retaubune romuira aribu eku abanae. ⁴ Merairaira ribu romuira moajame raina arao merairaira yatomaneteae. Tatuma romuirarakate yatomaneteae. Warao ribane: Atae sina romuira monuka ja? Romuira isiko orikubakitane sinama saba yakera? tae. ⁵ Jebuira ribu romuira moae ribu taeraja ribamejerei Dio isia asiraja ribamejerei tane. Ribu moae waniku mojorekotuma manamonamojase kware manamo isia airamo tane bajemejerei. ⁶ Takore romuira tane nonae. Dio isia asiraja ribunae. Dio awai isia ajanoko isia tane asiraja ribunae. Najamutuata ubayakutaisi isia asiraja ribunae tane. ⁷ Ribu romuira moae warao Dio saba emo abánae tiakutaisi isiko orikubane kanatamejerei. Ribu romuira moae warao kokotuka isia warao ribu raisa raisa koko-tuka isia, ina arao kokotuka isia tane. ⁸ Raina arao kokotuka romuira yatomanetete. Raina ajiroma ebe Obeja Auka waba-kitane jakutaisi isia ribu abánae tiaja ja. Obeja Auka akarata ja. Akarata eku obojona jiro jajasi awai jabátae tiaja ja. Akarata eku wai jabatamoana jakutai tatumasike romuira yatomanetete. ⁹ Akojoko ja jakutai nokokunarai. ¹⁰ Eobo emojojutayakutai riboto taisi emojojutate. Buari isia eobo kubayakutai riboto buariwari isia taisi nate. Tiame warao Dio saba emo abánae tiakutai suatana taeratane nome abakitane ja. ¹¹ Tatukamo raina aromuira raisama miaine. Joboto ekumo ejoboyakore miaine. Ajioji manamo obeja auka ajioji monuka, tiarone aribu merairaira aribu monuka. ¹² Romuira awajiabara jakutai ribu taeraja ja. Tamaja awajiabara jakutaisi aribia koko-tuka nonaya. Romuira awajiabara jakutai aboisi waba sabarone rubujira yakarae. Romuira araisa raina araoto isia ribia raina atae raina arao tane romuira awajiabara jakutaisi yatomanetemejerei. ¹³ Araisa jakutai sinarijatuma uriraja nonae. Jekunu waraoto amujaba najamutu tatamo raina ru tane inanakanae. ¹⁴ Romuira awajiabara aribia sinarijatuma nonajakutai taisi isia raina araoto imasibuae. Romuira awajiabara buariwari isia boisíae tiajarone riko bajinae. Romuira araisa warao taisi asita nonamejereae. ¹⁵ Ribu romuira araisama moae romuira awajiabara jakutaisi asita riko tane abamejerei. Takore asita ribunae. Yatomanetenaja jakutai taisi kubamejereae. ¹⁶ Romuira warao kokotuka isia sinarija abamejereae. Amojonome isia o auto isia abanae. Airamo, airamoana, burata arao, burata araoana, raisama anebu, raisama anebuana tane kokotuka isia asinarija abanae. ¹⁷ Tatukamo asinarija ekirakutai o romuira awai ekirakutai, o romuira awai asinarija ekirakutai tane jisakarakate nisakomoni wabikomoni tane. ¹⁸ Tamaja naminakitane musaberaja jakitane ja. Musaberaja jakutai romuira asinarija naminakunarai. Asinarija jakutai waraoto asinarija. Asinarija jakutai tai tamaja: sinarijaira ajabasi kware siento jisaka kware siento ajabasi kware mojoreko kware mojoabasi kware jisaka.

¹ Atanejese miaine. Obeja Auka Jotakwa Sion arai karamúnae tiaja ja. Taisi isiko warao eraja ja. Asebe sinarijairatuma siento jisaka kware mojorekotuma manamo-namojase kware manamonamojase. Tatuma auto isia wai jabátae tiaja ja. Wai jakutai Obeja Auka awai, Arimasi awai tane. ² Ta-tukamo najamutuatamo kuitayakore nokoaine. Akuita nojaba eraja ai akuita monuka. Naja kwana ribiakutaisi akuita monuka. Ekuitamo eraja oriasekeseke ekuitayakutaisi akuita monuka. ³ Waraosebeira rujunoko ebisaba nokaramuae, warao monuka ebisaba, iramotuma ebisaba tane. Nokaramane rokotu jiro warae. Jisakarakate tatuma arokotu naminakomoni. Waraosebeirawitu naminae. Dio tatuma amoara abanae raina araoto ekumo tatuma nisakitane. ⁴ Tatuma tirasi isiko ubanatanaewitu. Tane anana oriijabanatanae. Obeja Auka kokotukanea nariakore tatuma taisi iamo naria. Warao eobo kawanamo Dio tatuma amoara abanae. Dio saba Obeja Auka saba tane nobeanaka awajiabara monuka bajia. ⁵ Tatuma aroko eku ribu imasibiaja ekira. Dio rujunoko arai rujúnae tiakutaisi amujaba asiraja tatuma kware abakitane ekira. ⁶ Tatukamo Dio ainataba raisa najamutuataya nijakayakore miaine. Rewara yakeraja are saba jakutai taisi rewaraya. Raina eku aubamo saba rewaraya: ina kokotuka araoto saba, warao kokotuka saba, warao ribu raisa raisa kokotuka saba, raina kokotuka araoto saba tane. ⁷ Ribu taerajasi isia ribane: Dio nojakotu. Isia Iji Airamo, tane ribakotu. Asinarija eku nakae rijana. Dio waraoto aribu nome toate. Dio jakutai najamutu, raina, nojabaira, jo ejobonoko tane anonatu. Taisi yatomane-tekotu, tae. ⁸ Tai inataba iamo inataba raisa naoae. Ribane: Nakae! Babilonia janokoina uriraja jakutai nakaeraji! Dio kwana ori-jisine sanamata iyakaratae bino amutuwitu monuka. Babilonia jakutai tira nibosebe monuka. Tai bino jakutaisi moae ina koko-tuka arao jobibumejerei. ⁹ Inatabatuma manamo jakutaisi iamo inataba raisa naoae. Ribu taeraja isia ribane: Romuira, atae romuira asita tane yatomaneteterate. Auto isia o mojo isia asinarija abaterate. ¹⁰ Dio kwana orijisine sanamata iyakaratae bino amutuwitu monuka. Anamu eku abanae. Romuira iamo nariakutai tai sanamata bino monuka jobikitane ja. Jekunu isia ore rokiajasi isia tane Dio taisi isanamatate. Dio ainatabatuma Dio saba emo abánae tiakutaisi amujaba, Obeja Auka amujaba tane are sanamatate. ¹¹ Asanamata ajekunu ajejuku are yaburia. Jokomaya imaya tane tuwaranaja. Romuira o romuira asita yatomaneteakutai tane sanamatate. Isia romuira awai asinarija abayakutai tane sanamatate. ¹² Tiame nome abamo taeratakitane ja. Warao Dio saba emo abánae tiakutai Dio akajotabu eku abaya, suatana Jesú isia nome abaya tane, tae. ¹³ Takore najamutu tatamo ribiakore nokoaine. Maisia ribane: Tamaja ribu jabatau: Tamatukamo Airamo isia nome abayaja muanayakutai tatuma ekeiraja, tane jabatau, tae. Dio Amejo-kojira ribia: Nomewitu, tatuma yaotanaka tuwarate. Tatuma anona tatuma iamo naria. ¹⁴ Tatukamo miaine. Ajakajoko miaine. Warao tane nakajakutaisi monuka taisi arai rujúnae tiaja ja. (Dan. 7:13) Airamo ayasi burata simonona kwatabánae tiaja ja. Amojo eku buarikasi ejiróae tiaja ja. ¹⁵ Takore janoko yatomanetenoko ekumo inataba raisa ejobonae. Kwana rokojotayaja ajakajoko arai rujúnae tiakutaisi isia ribane: Jibuarikasi isia namuna ari rijana. Arikitane raina eku ayakaramata nakae rijana, tae. ¹⁶ Takore ajakajoko arai rujúnae tiakutai abuarikasi isia yaotane raina anamuna ariae. ¹⁷ Takore atae inataba raisa janoko yatomanetenoko najamutuata jakutaisi ekumo ejobonae. Tairakate abuarikasi ejiróae tiaja ja. ¹⁸ Takore atae inataba raisa jonaba erokunoko ekumo ejobonae. Tai ribu ja jekunu isia. Tai buarikasi ejiróae tiaja ja jakutaisi isia ribunae. Ribu taerajasi isia ribane: Jibuarikasi ejiróae tiakutaisi isia ari. Uwa raina eku jakutai ai jame, amujutu isiko ari, tae. ¹⁹ Takore inataba raina kokotukanea abuarikasi isia yaotayaja raina auwa ariae. Tane amutu anisanoko urirajasi eku toanae. Tamaja Dio kwana orijisine sanamata inatabakitane jakutai taisi sitaya. ²⁰ Janokoina yakareku uwa neotoae. Amutu nisanoko ekumo jotu uriraja ejobonae. Akwai kawayo aroko akoya ru tia. Aito estadio asebe sinarijaira jisaka kware siento mojoabasi kware siento jisaka ru tia.

¹ Tatukamo najamutuata atae sinarija raisama miae. Uriraja mitane Amasike! tae. Dio ainataba mojoabasi kware manamo jisaka jisaka sanamata ja. Tamaja sanamata ayaju. Tamatuma isia Dio aorijisi taeraja ekorate. ² Takore joibi monuka miaine. Joibi jakutai eremeta jekunu isiko ewíae tiajasi isia nonae. Kanatamo miaine. Tatuma romuira, romuira asita, romuira awai asinarija tane kwarikae. Tatuma joibi eremetanona amumia nokaramúae tiaja ja. Dio ekuitanoko sekeseke tatuma moae. Sekeseke isiko nokaramúae tiaja ja. ³ Tane tatuma Moisés Dio akajotabu jakutaisi arokotu warae. Obeja Auka arokotu warae. Ribane: Airamo, iji Dio Taerajawitu. Jinona kokotuka uriraja, jawaneraja tane. Jijojisi kasiana nomeraja ja. Jisaba emo abánae tiakutaisi Airamo iji. ⁴ Airamo, sina jinojanatate? Sina jiwai uriraja tane abanatate? Yakerajawitu jakutai tai iji. Ina arao kokotuka jinona nomeraja miajame Naone jiyatomanetete, tae. ⁵ Tatukamo miaine. Najamutu eku janoko yatomanetenoko ja. Taisi ijakayakore miaine. Taisi eku ajute akaja ja. ⁶ Dio ainatabatuma mojoabasi kware manamo sanamata mojoabasi kware manamo ja jakutai janoko yatomanetenoko ekumo ejobonae. Ajiaka arino ajaunona ananerena jokeraja tane ja. Amejoya burata simonona ja. ⁷ Takore warao monuka manamonamojase kawanamo jisaka inatabatuma mojoabasi kware manamo jisaka jisaka jakutaisi jobinoko moae. Jobinoko jakutai burata simonona. Dio are ubayakutai tai kwana orijisiae. Aorijisi jakutaisi isia jobinokotuma ikwátae tiaja bajia. ⁸ Dio Airamo jame, taeraja jame tane jejuku ejobonae. Jejuku jakutai janoko yatomanetenoko ikwatae. Sanamata mojoabasi kware manamo inatabatuma mojoabasi kware manamo isiko nariakutai mate ekoronaja jakore jisakarakate janoko eku yarukomoni.

¹ Takore janoko yatomanetenoko ekumo ribu taeraja ribia-kore nokoaine. Inatabatuma mojoabasi kware manamo isia ribane: Dio kwana orijisiae. Takore yatu narune jobinoko ekumo Dio aorijisi raina arai jinarokotu, tae. ² Takore Dio ainataba awajiabara jakutai narune ajobinoko ekumo raina arai jinaronae. Jinarokore romuira asinarija ja jakutaisi isia romuira asita yatomaneteakutaisi isia tane boisi ejobonae. Boisi sabanawitu ajeraja tane. ³ Takore inataba manamo ajobinoko ekumo nojabaira arai jinaronae. Takore nojabaira ajo jotu bajinae. Jotu jakutai waba ajotu monuka. Nojabaira eku ubayakutai kokotuka muanae. ⁴ Takore inataba rijanamo ajobinoko ekumo nojabatuma arai jo ejobonokotuma arai tane jinaronae. Tatumarakate jotu bajinae. ⁵ Takore inataba jo ayaorotu jakutai ribunae. Ribiakore noko-aine. Ribane: Airamo, iji nomerajawitu. Iji are ja. Iji are jaja. Iji tametane ribu nome toayame iji nomeraja ejoboya. ⁶ Tatuma warao Dio saba emo abánae tiakutaisi kubae. Jikware arewaramo kubae. Ama iji jotu tatuma moae jobimejerei. Anona amoara kaika moae, tae. ⁷ Takore erokunoko ekumo ribu ribunae. Ribiakore nokoaine. Ribane: Nomewitu Airamo, iji Dio Taerajawitu. Iji ribu nome toakore, ribu jakutai nome, nomeraja tane bajia, tae. ⁸ Takore inataba manamonamojase ajobinoko ekumo ya arai jinaronae. Ribu ya moae waraoto jojumejerei. ⁹ Takore warao kokotuka kwana jojúnae tiaja bajinae. Dio awai isia asiraja ribunae. Dio ribu ja sanamata jakutaisi inatabakitane. Dio ribu jajarone warao oriaobojona ibarinatanae, Dio isia Iji Airamo tane ribakitane. ¹⁰ Inataba mojoabasi ajobinoko ekumo romuira arujunoko arai jinaronae. Takore romuira arujuna rujuyakutaisiata imananae. Warao kwana ajerame ajono naoboae. ¹¹ Aji aobojona aboisi aobojona tane Dio najamutu arotuma isia asiraja ribubuae. Aobojona ibarinatanae anona asirajasi iabakitane. ¹² Inataba mojoabasi kware jisaka ajobinoko ekumo nojaba Eufrates arai jinaronae. Jinarokore nojaba ajo nawajanae. Nawajakore airamotuma ya riboto tajasabamo naoyakutaisi ajojisi tane bajinae. ¹³ Takore miaine. Merairaira aroko ekumo, raina aromuira aroko ekumo, raina aromuira kware arewaratu eko jakutaisi aroko ekumo tane jebu rijanamo Dio saba wisi jakutai ejobonae. Jebu jakutai siboi monuka. ¹⁴ Jebu jakutai sinarijatuma nonaya. Narune raina nomeira ekia ina airamotuma orikware toaya orikuba saba. Dio Taerajawitu jakutaisi aya urirajasi eku orikuba jate. ¹⁵ Ribu ribane: Mikotu anaka. Ine erijisa arotu monuka naotine. Ine naokore seoroyakutai ekeiraja bajete. Ajiaka yaoroyakutai ekeiraja bajete. Yaoronaja jakore waraojoro bajete. Eobo taisi atomana mite, tae. ¹⁶ Tai ina airamotuma inayata orikware toae. Ina awai ebereo aribu isia ribia: Armagedón, tia. ¹⁷ Inataba mojoabasi kware manamo ajobinoko ekumo ajaka ekia jinaronae. Jinarokore najamutuata janoko yatomanetenoko arujunokoatamo kwana ribunae. Ribane: Ekoronae rijana, tae. ¹⁸ Takore naja simo bari bari tae. Kuitaubuae. Naja ribunae. Inarikoira jakanae. Raina ajiroma yatukamo inarikotuma sanukiraja jakaya. Tamajasike uriraja. ¹⁹ Inariko jakakore janokoina uriraja jakutai autia nasibikore akari rijanamo bajinae. Inatuma ajanokoinatuma jakutai kokotuka nakae. Takore Dio janokoina uriraja Babilonia jakutaisi isia obonobuae. Tane kwanawitu orijisine sanamata bino monuka abanajakutai Babilonia taisi jobimejereae. ²⁰ Kurujubukore eko tiakutaisi monuka burujo kokotuka ekko tae. Jotatuma najabukore minatanae. ²¹ Joyoira jonona kwaimo waraoto arai nakae. Joyo jisaka auru tareneto jisaka. Sanamata urirajawitu jame warao Dio isia asiraja ribunae.

¹ Takore Dio ainatabatuma mojoabasi kware manamo ajobinoko mojoabasi kware manamo ja jakutaisi kawanamo jisaka ineata naoae. Maisia ribunae. Nao. Dio jakutai nibosebe uriraja yewereakutai taisi jiemitine. Nibosebe jakutai nojabatuma arai rujuya. ² Raina airamotuma nibosebe isiko ubae. Warao bino jobine awabaya. Taisi monuka raina arao tirasi isiko asiraja nonane awabae. ³ Tatukamo ine Mejokojira eku jakore Dio ainataba jarawaja tata makonaruae. Tata tira romuira simo arai rujúnae tiakore miaine. Romuira atejo kokotuka isia wai Dio saba asiraja jakutai ja. Romuira akwa mojoabasi kware manamo ajioji mojoreko tane ja. ⁴ Tamaja tira jakutai ajiaka jebuaneraja simiraja tane. Anasi burata simo, joyo amoara taeraja, joyo perla tane ja. Amojeku jobinoko burata simonona ja. Jobinoko eku Dio saba asiraja jakutai ja. Atae jobinoko eku tira nibosebe anona anana isia ikuátae tiaja ja. ⁵ Auto isia wai rijisa jabátae tiaja ja. TAMAJA BABILONIA URIRAJA. NIBOSEBEMO JAKUTAISI ARANI. RAINA EKU DIO SABA ASIRAJA JAKUTAI TAISI ARANI, tia. ⁶ Tira jakutai warao Dio saba emo abánae tiakutaisi ajotu jobiae. Jesú kware arewaramo kúbae tiakutaisi ajotu jobiae. Ajotu jobine awabae. Awábae tiaja jakore miaine. Mitane taisi isia kwana obonobiaja bajinaine. ⁷ Ine kwana obonobiakore inataba maisia ribane: Iji katukeme kwana obonobiaja bajia bajama? Ribu rijisa ja tamaja tirasi isia. Ribu rijisa ja romuira tirasi konayakutaisi isia tane. Romuira jakutai akwa mojoabasi ajioji mojoreko tane jaja jakutai tai. Ribu rijisatuma jiemusabatine. ⁸ Romuira iji miajakutai tai ateje jaja. Tatukamo ekira. Tiarone totoira ekumo yaburune ekorate. Raina arao romuira isia retaubuae. Romuira jakutai ateje jaja. Tatukamo ekira. Tiarone atanejese naote. Warao retaubuajakutai taisi awai Dio akarata eku jabátae tiajena. Obojona jiro jajasi awai raina ajiromayatukamo Dio akarata eku jabátae tiaja ja. ⁹ Ribu nokoyakutai taisi saba tamaja ribu ja. Akwa mojoabasi kware manamo jakutai jota mojoabasi kware manamo sitaya. Tira jakutai jota arai rujuya. ¹⁰ Akwajase airamo mojoabasi kware manamo sitaya. Airamo mojoabasi amena nakae. Jisaka ama airamotaya. Araisa mate. Airamo ayaju jakutai naone ya erajena taeratate. ¹¹ Romuira ateje jaja, tiarone ama ekirakutai airamo mojoabasi kware rijanamo tane ejobate. Tai mojoabasi kware manamo kawanamo jisaka. Tatukamo romuira ekorate. ¹² Ajioji mojoreko iji miajakutai airamo mojoreko sitaya. Airamotuma jakutai mate airamotakitane jotananatanae. Tiarone ribu tatuma moate ya asinarija jisaka isia romuira isiko airamo-tamejerei. ¹³ Tamatuma airamotuma obojona jisaka eku abane ajarata, aribu tane romuira moate. ¹⁴ Obeja Auka isiko oriku-bate. Orikubakore Obeja Auka tatuma kwarikate. Tai airamo-tuma Airamo, airamo sabukatuma Airamo tanetiji tai kanatate. Obeja Auka iamo nariakutai Dio tatuma yejebuae. Dio tatuma mibune nisanae. Tiame tatuma Dio aribu eku abaya. ¹⁵ Inataba jakutai are maisia ribunae. Nojabairatuma iji miajakutai nibosebe taisi arai rujúnae tiakutai tatuma waraoto sitaya. Tatuma raina arao, warao asebeiratuma, ina eraja arao, warao ribu raisa raisa jakutai tane. ¹⁶ Romuira ajioji mojoreko iji miajakutai tatuma nibosebe jakutaisi rarijatate. Rarijatane omote. Waraojoro iabate. Tane atoma najorote. Jekunu isia erokate. ¹⁷ Dio tatuma aobojona abanae Dio aobojona eku nonamejerei. Tatuma obojona jisaka eku abane airamotakitane jakutaisi iabane tane ribu romuira moae airamotamejerei. Dio aribu eku nakamoana jakore romuira airamo jate. ¹⁸ Tira iji miajakutai tai janokoina urirajasi sitaya. Janokoina raina airamotuma airamotayakutai tai.

¹ Tatukamo inataba raisa najamutuatamo nanakayakore miaine. Ribu uriraja ja. Inataba ajokoma isia raina sina-jaránae tiaja bajinae. ² Kwana rokojotae. Ribane: Nakae! Babilonia uriraja jakutai nakae. Jebu ajanoko, jebu Dio saba wisi jakutaisi abanoko, romu ananeraja asiraja tane jakutaisi aja tane bajinae. ³ Babilonia jakutai nibosebe monukatiji ina kokotuka arao taisi isiko ubae. Dio kwana orijisine sanamata iyakaratae bino amutuwitu monuka. Ina kokotuka arao bino jakutaisi jobibuae. Raina airamotuma tirasi isiko ubae. Wabimo raina arao jakutai nibosebe aobojona asirajasi eku abayaja burata arao tane ejobonae, tae. ⁴ Takore ribu raisa najamutuatamo ribiakore nokoaine. Ribane: Mawarao jakutai, tai janokoina ekumo ejobakotu. Ejobakotu anona asirajasi eku abanaka jakitane. Tira sanamatakore isiko sanamatanaka jakitane ejobakotu. ⁵ Tirasi anona asiraja orikware toane kwai te tane najamutuata nabakanae. Tirasi anona asirajasi tata Dio aobojona nakae. ⁶ Tira eobo moajakutai taisi monuka riboto moakotu. Anona amoara manata moakotu. Tira jobi taeraja iyakaratane eobo moae. Taisi monuka yaturakate jobi taerajawitu iyakaratane tirasi moakotu. ⁷ Tira jakutai oriisia Ine airamo, tane ribunae. Obojona asirajasi eku abayaja ubae. Taisi kaika isanamatakotu. Taisi kaika yaonamejerei tane abakotu. Tira aobojona isia ribia: Ine airamo tane rujúnae tiaja jaine rijana. Ine tira tewereana. Ine yaonanatate, tia. ⁸ Tiame ya jisaka eku tirasi asanamatatuma nabakate. Asanamata jakutai tai tamaja: waba, yaona, nojo tane. Jekunu isia rokate. Dio Airamo tira sanamata saba abanajakutai tai taerajawitu. ⁹ Raina airamotuma tirasi isiko ubae. Tirasi aobojona asira-jasi eku abanae. Tane tirasi kware onate. Ajekunu ajejuku mitane tirasi tekumonine yaonate. ¹⁰ Tirasi asanamata mine nojane utiraja nokaramane ribate: Amájae! Babilonia janokoina urira-jarone janokoina taerajarone sanasabukaraji! Ya asinarija jisaka eku Dio jiyewerea, tae. ¹¹ Wabimo raina arao jakutai aunukamo konakore anisamo ekiraja ejobonae. Tiame tatumarakate onayaja tai janokoina yao-nate. ¹² Aunukamo konajakutai tai tamaja: burata simo, burata joko, joyo amoara taeraja, joyo perla tane. Atae jiaka arino ajaunona yakerajawitu jakutai, jiaka sera, jiaka jebuaneraja, jiaka simiraja tane. Aunukamo eobo: rau jonaberaja kokotuka, elefante aiwarinona kokotuka, rau amoara taeraja kokotuka, najamutu simosimo, najamutuwitu, joyo marmolnona tane. ¹³ Aunukamo eobo: kanela, najoro akwaruta jonaberaja, jonaba erokakitane jakutai, jonaba ejokitane jakutai, rau amutu jonaba, bino, toi, arina yakeraja, tiriko tane. Romurakate konae: burotuma, obejatuma, kawayotuma tane. Atae raubarabaratuma, warao tane. Waraoto atejo, waraoto aobojona tane isia burata anojonoko. ¹⁴ Awabimo jakutai janokoina isia ribate: Rau akwaja yakeraja jiaobojona eku jakutai iji ekira rijana. Jiburata, burata nisajakutai kokotuka rijanae. Iji are taisi minatate. ¹⁵ Janokoina eku wabiaja burata arao tane ejobonajakutai utiraja bajete mikitane. Janokoina asanamata nojane utiraja bajene onayaja yaonayaja tane bajete. ¹⁶ Tatuma ribate: Amájae! Janokoina urirajarone sanasabukaraji! Ebe tira monuka jiaka arino ajaunona yakerajawitu jakutaisi orisabanae. Ajiaka jebuaneraja simiraja tane. Oriamejo isia ibatokonae: burata simo, joyo amoara taeraja, joyo perla tane. ¹⁷ Tiarone ya asinarija jisaka eku aunukamo kokotuka ekoronaeraji bajama! tate. Eoborakate utiraja bajete mikitane: waera akabitana kokotuka, waera eku anarumo, waera eku yaotamo, kokotuka nojabaira eku ayaotamo tane utiraja bajete. ¹⁸ Janokoina rokiakore ajejuku mitane rokojotaubuae. Tamaja janokoina monuka atae raisa uriraja ekirajaraji! tae. ¹⁹ Joboto ajuju oriakwa arai abaubuae. Onayaja yaonayaja tane rokojotaubuae: Amájae! Janokoina urirajarone sanasabukaraji! Waera arao janokoina aunukamo isia burata arao tane ejobonae. Tiarone ya asinarija jisaka eku janokoina aunukamo kokotuka ekoronaeraji bajama! tae. ²⁰ Dio janokoina iekoronaetiji najamutu oriwakau. Emo abánae tiakutai, Jesukirito ainatabatuma jakutai, Dio kware arewaramo jakutai tane, yatu oriwakakotu. Dio yatu amoara abayaja janokoina arao sanamatame-jereae, tae. ²¹ Takore Dio ainataba taeraja jakutai joyo kobukanae. Joyo aira joyo werenoko urirajasi aira monuka. Joyo kobukane nojabaira autu toane ribane: Tametane janokoina uriraja Babilonia jakutai joika webotate. Webotakore tatukamo atanejese minatate. ²² Tamatukamo sekeseke akuita, ekuitamo ekuitayakutaisi akuita, esemoi akuita, wana akuita tane jinaru eku are nokonatate. Yaotamo ijiata are ekirate. Joyo wereakutaisi akuita ijiata are nokonatate. ²³ Abije jisakarakate ijiata are sinajaranatate. Warao kasane oriwakayakutaisi atujuru ijiata are nokonatate. Wabimo jikaika ubajakutai ebe raina eku airamo taeraja bajinae. Iji jijoa isia ina kokotuka araoto imasibuae, tae. ²⁴ Janokoina eku jotu miae. Jotu jakutai Dio kware arewa-ramo ajotu, warao Dio saba emo abánae tiakutaisi ajotu, raina eku kubajakutai kokotuka ajotu tane.

¹ Tatukamo waraosebeira najamutuata jakutaisi aribu taeraja nokoaine. Ribu ribane: Kairamo yakeraja! Kariosike kaobojona Aibajukatu. Kario airamo, raomata, taeraja tane. ² Ribu nome toayaja nomeraja toaya. Nibosebe uriraja jakutai Dio taisi sanamata saba abanae. Nibosebe jakutai anona asirajasi isia raina araoto iasiratae. Dio jakutai nibosebe isanamatane orianebu amoara abanae, tae. ³ Tatukamo atanejese ribane: Kairamo yakeraja! Janokoina ajejuku are yaburute, tae. ⁴ Takore iramotuma mojorekotuma manamo kware manamo-namojase, warao monuka manamonamojase tane mukunamane rujane, jinamane Dio rujunoko arai rujúnae tiakutaisi yatomaneteae. Ribane: Amén. Kairamo yakeraja! tae. ⁵ Takore rujunokoatukamo ribu nokoae. Ribane: Yatu kokotuka Dio anebu jakutai, Yatu Dio nojayakutai, Yatu airamo, airamoana tane Kario isia yakeraja jae tane ribakotu. ⁶ Takore ribu waraosebeira aribu monuka nokoaine. Atujuru nojaba eraja atujuru monuka. Atujuru naja kwana ribiakutaisi monuka. Ribane: Kairamo yakeraja! Kairamo Kario Taerajawitu jakutai arujuna rujunae rijana. Tiame yakeraja. ⁷ Obeja Auka kasakitane jame oriwakaki. Ekeiraja bajeki. Airamo tane abaki. Obeja Auka isiko kasakitane tira oriiyakaratae. ⁸ Ribu tirasi moae jiaka arino ajaunona yakerajawitu jakutai ananerena, jokeraja tane isia oriejirotamejerei, tae. Jiaka arino ajaunona yakerajawitu jakutai warao Dio saba emo abánae tiakutaisi anona nomerajasi sitaya. ⁹ Takore ainataba maisia ribane: Tametane jabatau: Obeja Auka kasakitane noara abaya. Noarayata narumejerei yejebia-kutai tatuma ekeiraja bajete, tane jabatau, tae. Suatana maisia ribane: Tamaja ribu Dio aribu nomeraja, tae. ¹⁰ Takore inataba amujaba mukunamane rujane jinamunaine yatomanetekitane. Tiarone inataba maisia ribane: Tanaka jau. Iji jiwaraoto isiko Jesú aribu eku abaya. Ine yatu monuka Dio aneburatu. Mayatomanetenaka Dio yatomanetete. Jesú isia rewarayakutai taisike Dio kware rewaraya, tae. ¹¹ Takore najamutu emurakore kawayo joko miaine. Arai arujatu jakutai awai Ribu Eku Abatu, atae Nomeraja tane. Nomeraja ribu nome toaya nomeraja orikubaya tane. ¹² Amu jekunu monuka yi tia. Airamo ayasi eraja kwatabanae. Oriawai jabátae tiaja ja. Taiwitu oriawai naminaya. Raisa taisi awai naminanaja. ¹³ Jiaka jotu eku ejisane nisane tane orisabánae tiaja. Awai Dio Aribu. ¹⁴ Taisi iamo najamutu ayaoromosebeira naoae. Yaoromo jakutai jiaka arino ajaunona yakerajawitu jakutai jokeraja, ananerena tane orisabaubuae. Kawayo joko arai norujuae. ¹⁵ Taisi aroko ekumo buariwari ejiróae tiaja ejoboya ina araoto aribu nome toaya isanamatakitane. Obeja ayaorotu tane najamutunona bumo tiajasi oane tatuma yaorote. (Rok. 2:9) Omu isia uwa neotoyakutai taisi monuka ribu nome toate. Dio Taerajawitu jakutai kwanawitu orijisine sanamata bino monuka iyakaratae. ¹⁶ Ajiaka isia aroro isia tane wai jabátae tiaja ja. Awai jakutai tai tamaja: AIRAMOTUMA AIRAMO, AIRAMO SABUKATUMA AIRAMO TANE. ¹⁷ Tatukamo inataba ya ajokoma eku karamúnae tiaja jakore miaine. Tai romu kwaia nijakayakutai kokotuka isia ribiaja rokojotae. Ribane: Naone orikware nakakotu. Dio noara uriraja abanae yatu saba. ¹⁸ Naokotu airamo atoma najorokitane. Yao-romo airamo atoma, warao ajara taerajasi atoma, kawayo atoma, kawayo arai anorujumo atoma, warao kokotuka atoma, raisama anebu kokotuka atoma, raisama anebuana atoma, airamo atoma, airamoana atoma tane najorote. ¹⁹ Takore raina aromuira miaine. Raina airamotuma ayaoro-mosebeira isiko miaine. Tatuma orikware nakae orikubakitane. Kawayo arai arujatu isiko ayaoromosebeira isiko tane orikuba-kitane orikware nakae. ²⁰ Takore romuira jakutai mojoju baji-nae. Kware arewaratu eko jakutai tairakate mojoju bajinae. Rewaratu eko romuira amujaba sinarijatuma nonae. Sinarija isia warao romuira asinarija abánae tiakutaisi imasibuae. Romuira asita ayatomanetemo jakutaisi imasibuae. Dio romuira jakutai rewaratu eko jakutai tane joibi jekunu isia ore isia tane rokiakutaisi eku tatuma kubanaka toanae. ²¹ Buariwari kawayo arai arujatu aroko ekumo ejoboyakutai tai eobo kubae. Kubakore romu kokotuka tatuma atoma najorone jajinaubuae.

¹ Tatukamo inataba najamutu tatamo nanakayakore miaine. Taisi amojeku totoira ayawe ja karena uriraja ja tane. ² Inataba jakutai merairaira oane inawaja sinarijaira jisaka saba koyanae. Merairaira jakutai ateje juba jakutai, tai. Tai jebuira, Satanás tane. ³ Merairaira koyane totoira eku toanae. Tane mukorane akojo isia sinarija abanae. Inawaja sinarijaira jisaka mate kaika nakamoana jakore merairaira totoira eku bajekitane ja ina araoto imasibunaka jakitane. Inawaja sinarijaira jisaka kaikakore ya erayana saba ejerote. ⁴ Tatukamo airamotuma arujunoko miaine. Rujunoko arai rujúnae tiakutai ribu tatuma moae ribu nome toamejerei. Eobo amejokoji miaine. Tatuma Jesú isia rewarajame Dio aribu rewa-rajame tane aro jewetane naubuae. Tatuma romuira, romuira asi-tarakate yatomanetenatanae. Romuira asinarija auto isia amojo isia tane abamejerenatanae. Tatuma nominane Kirito isiko aira-mo tane norujuae inawaja sinarijaira jisaka saba. ⁵ Inawaja sinarijaira jisaka mate kaika nakamoana jakore waba eobo mate nomininatanae. Tamaja anominina awajiabara. ⁶ Nominina awajiabara jakutaisi eku nominiakutai tatumasike ekeiraja yakerajawitu tane. Ribu ekira tatuma atanejese wabamejerei. Dio asaserotetuma tane bajete. Kirito asaserotetuma tane bajete. Kirito isiko airamo tane norujute inawaja sinarijaira jisaka saba. ⁷ Inawaja sinarijaira jisaka kaikakore mojojutanoko ekumo Satanás ejerote. ⁸ Satanás jakutai ejobate raina kokotukanea araoto imasibukitane. Gog arao, Magog arao tane imasibute. Tatuma orikware toate orikuba saba. Tatuma asebe kajewaja nojabaira amumia jakutaisi asebe monuka. ⁹ Tatuma raina kokotukanea kayane warao Dio saba emo abánae tiakutaisi atuwaranoko sibaji tae. Janokoina Dio obonoyakutai taisi sibaji tae. Tiarone Dio najamutuatamo jekunu inatabane jekunu isia tatuma iekoronaewitu. ¹⁰ Jebuira tatuma aimasibutu jakutai joibi jekunu jaja are rokiaja jajasi eku toanae. Amena tata romuira, rewaratu eko jakutai tane toánae tiaja ja. Are tata tatuma isanamatate. Jokomaya imaya tane are isanamatate. ¹¹ Tatukamo airamo arujunoko ayakara uriraja jokeraja tane miaine. Rujunoko arai rujúnae tiajasi miaine. Taisi amujabamo raina, najamutu tane eko tae. Tatuma saba tuwaranoko ekiraja ejobonae. ¹² Waba jakutai Dio amujaba nokaramúae tiaja jakore miaine. Airamo ja, airamoanarakate ja. Dio karata emuraubuae eku mikitane. Atae karata ja. Tai obojona jiro jajasi akarata. Muanaubúae tiakutaisi anona karatatuma eku jabátae tiaja ja. Anona kaika aribu nome toaya. ¹³ Muanaubuajakutai kokotu-kaneayatukamo ejobonae. Nojabaira ekumo, awabanoko ekumo, waba atuwaranoko ekumo tane ejobonae. Jisaka jisaka anona kaika aribu nome toae. ¹⁴ Tane waba, waba atuwaranoko tane joibi jekunu jajasi eku toamejereae. Joibi jekunu jakutai tai waba manamo. ¹⁵ Warao obojona jiro jajasi awai akarata eku jabatamoana jakutai joibi jekunu jajasi eku taisi toanae.

¹ Tatukamo najamutu jiro, raina jiro tane miaine. Naja-mutu awajiabara jakutai raina awajiabara jakutai tane amena eko tajae. Nojabairarakate eko tae. ² Ine Juan janokoina yakerajawitu jakutaisi miaine. Janokoina jakutai Jerusalén jiro. Dio amujabamo najamutuatamo nanakayakore miaine. Yakeraja oriejirótae tiaja ja tira kasakitane jakutaisi monuka. ³ Takore najamutuatamo ribiakore nokoaine. Kwana ribane: Mi anaka. Dio waraoto kaika ubaya rijana. Waraoto kaika ubate. Tatuma taisi awarao tane bajete. Dio tatuma kaika jate tatuma Ario jakitane. ⁴ Dio tatuma amujo kokotuka berete. Tatuma atanejese wabanaja, onanaja, yaonanaja. Aji ekirate. Ebe jakutai kwaeabanae rijana, tae. ⁵ Takore rujunoko arai rujúnae tiakutai ribane: Mi anaka. Ine kokotuka jiro tane nonaya, tae. Suatana maisia ribane: Tamaja ribu nomeraja jame jabatau. Tamaja ribu jakutai yakeraja eku abakitane, tae. ⁶ Taitane maisia ribane: Ekoronae rijana. Ine Alfa, Omega tane ejobonae. Ine ajotana, akwa tane. Jobiajerakutai jo ejobonoko ekumo jobimejerei moatine. Jo ine moayakutai jobine are ubakitane jakutai. Jo amoara ebunaja. ⁷ Kanatatu jakutai kokotuka nojote: Ine taisi Ario tane jatine. Tai manoboto tane jate. ⁸ Tiarone eobo joibi jekunu ore tane rokiajasiata narute. Taisike waba manamo. Tata nariakutai tai tamaja: kobeiratuma, nome abamoana, asiraja anonamo, akobakamo, tatusebemo, nibosebemo, wisimo, diosita ayatomanetemo, tonairatuma koko-tuka tane, tae. ⁹ Ebe inatabatuma mojoabasi kware manamo ajobinoko isiko ejobonae. Ajobinoko mojoabasi kware manamo eku sanamata ayaju mojoabasi kware manamo ja. Jobinoko isiko ejobona-jakutai tatuma kawanamo jisaka ineata nabakane maisia ribunae. Ribane: Nao. Obeja Aukama atira jakutaisi jiemikitine. Obeja Auka jakutai taisi nisanae atira tane, tae. ¹⁰ Ine Mejokojira eku jaja jakore inataba jakutai jotakwa uriraja kwaeraja tane jajasiata makonaruae. Makonarune jano-koina Jerusalén uriraja yakerajawitu tane jakutaisi memiae. Dio amujabamo najamutuatamo nanakayakore miaine. ¹¹ Dio ajo-koma isia yi tiaja ja. Ajoko joyo amoara urirajasi ajoko monuka. Joyo jaspe ajoko monuka. Eremeta ajoko monuka jomeraja. ¹² Janokoina arara ja uriraja kwaeraja tane. Rara akojo mojoreko kware manamo ja. Inatabarakate mojoreko kware manamo ja. Akojo jisaka jisaka tata inataba jisaka jisaka ja. Israel awaraosebeira mojoreko kware manamo awai jakutai akojo isia jabátae tiaja ja. ¹³ Ya riboto akojo rijanamo ja. Ya jajaya mojonome sabasaba akojo rijanamo ja. Ya jajaya kajamojo sabasaba akojo rijanamo ja. Ya iamo akojo rijanamo ja. ¹⁴ Janokoina arara noikaya joyoira mojoreko kware manamo ja. Obeja Auka ainataba mojoreko kware manamo awai joyo isia jabátae tiaja ja. ¹⁵ Inataba maisia ribunajakutai burata simonona bumo tiaja ja, isia sinarijakitane. Janokoina sinarijate, akojo sinarijate, arara sinarijate tane. ¹⁶ Janokoina akawaja, eku aira, akwai tane orimonuka abane nónae tiaja. Akawaja aira tane orimonuka. Inataba jakutai sinarijanoko isia janokoina sinarijae. Aito estadio asebe sinarijairatuma mojoreko kware manamo. Akawaja, aira, akwai tane asinarija orimonuka ejobonae. ¹⁷ Takore inataba rara sinarijae. Inataba waraoto monuka sinarijayakore asinarija jaraboka siento jisaka kware mojorekotuma manamonamojase kware manamonamojase ejobonae. ¹⁸ Rara jakutai joyo jaspenona. Ajanokoina jakutai burata simowitunona, eremeta anana ekirakutaisi monuka. ¹⁹ Joyo rara noika aba jakutai kokotukanea joyo amoara uriraja abaubúae tiaja ja. Joyo awajiabara awai joyo jaspe, joyo manamo zafiro, joyo rijanamo agata, joyo manamonamojase esmeralda. ²⁰ Atae joyo mojoabasi ónice, joyo mojoabasi kware jisaka cornalina, joyo mojoabasi kware manamo crisolito, joyo mojoabasi kware rijanamo berilo, joyo mojoabasi kware manamonamojase topacio, joyo mojoreko crisopraso, joyo mojoreko kware jisaka jacinto, joyo mojoreko kware manamo amatista. ²¹ Rara akojo mojoreko kware manamo jakutai tatuma joyo perla mojoreko kware manamo. Akojo jisaka perla jisaka nónae tiaja ja. Janokoina anaru burata simowitu nona. Eremeta monuka ekia mija. ²² Janokoina eku yatomanetenoko minatanaine. Airamo Dio Taerajawitu jakutai taisike yatomanetenoko. Obeja Auka jakutairakate yatomanetenoko. Tiame janoko yatomanetenoko ekira. ²³ Dio ajokoma janokoina sinajaraya. Obeja Auka abije monuka sinajaraya. Tiame ya jakutai waniku jakutai tane tata obononaja sinajaramejerei. ²⁴ Ina arao Dio tatuma aobojona ibajukanajakutai janokoina ajokoma ekia kujute. Ina airamotuma oriayakara oriaraomata tane taisiata konarute. ²⁵ Janokoina akojo jokomaya are mukoronaja. Tata ima ekirame are mukoronaja. ²⁶ Ina arao tata narune Dio airamo, Dio raomata tane ribate. ²⁷ Tiarone wisi jakutai tata yarunaja. Dio saba asiraja jakutai, imasibutu jakutai tane yarunaja. Obeja Auka obojona jiro akarata eku wai jabátae tiaja ja. Awai karata eku jabátae tiakutai taisike janokoina eku yarute.

¹ Takore inataba nojaba memiae. Anana ekiraja ja. Nojaba ajo jobine are ubakitane jakutai. Ajo jakutai eremeta ajoko monuka jomeraja. Jo Dio arujunokoatukamo Obeja Auka arujunokoatukamo tane ejoboya. ² Janokoina anaru autu rau ja. Nojaba amumia rau ja. Nojaba jabisaba amumia rau ja. Rau akwaja najorone are ubakitane jakutai. Inawaja jisaka eku mojoreko kware manamo tane kwajaya. Waniku jisaka eku jisata kwajaya. Rau aroko yakeraja ina araoto ibajukakitane. ³ Jano-koineta yaribúae tiakutai ekira. Dio arujunoko Obeja Auka arujunoko tane janokoina eku ja. Taisi anebu taisi yatomanetete. ⁴ Tatuma taisi amu mite. Auto isia awai jate. ⁵ Tata ima ekira. Tata abije obononaja, ya obononaja, waniku obononaja tane. Airamo Dio jakutai tatuma sinajarate jame abije obononaja. Dio anebu are airamotuma tane norujute. ⁶ Tatukamo inataba maisia ribane: Tamaja ribu nomeraja. Ribu yakeraja eku abakitane. Airamo Dio jakutai tai kware arewaramo yakerajasi Ario. Tai ainataba anebuata inatabae rubujira kwaeabakitane jakutai taisi inaminamejerei. ⁷ Ine rubujira naoya. Ribu Dio isimo tamaja karata eku jabátae tiaja ja. Ribu eku abayakutai tai ekeiraja. ⁸ Ine Juan tamajasi nokoaine, miaine tane. Nokone, mine tane inataba memiajakutaisi amujaba mukunamane rujane jinamunaine yatomanetekitane. ⁹ Tiarone maisia ribane: Mayatomanetenaka jau. Ine jimonuka Dio aneburatu. Dio kware arewaramo jakutai tamaja karata aribu eku abamo jakutai tane tatuma Dio anebu. Tatuma monuka inerakate Dio aneburatu. Diosike yatomanetete, tae. ¹⁰ Atae ribane: Ribu Dio isimo tamaja karata eku ja jakutaisi yaorabanaka jau. Asinarija kawere ja rijana eku nakakitane. ¹¹ Mate eku nakamoana jakore nomerajena nonajakutai are nomerajena nonakunarai. Ananeraja jakutai are ananeraja bajekunarai. Nomeraja nonayakutai are nomeraja bajekunarai. Dio saba emo abánae tiakutai are Dio saba emo abánae tiaja jakunarai, tae. ¹² Ine rubujira naoya. Waraoto anona amoara konayaine moakitane. Waraoto anona kaika amoara moatine. ¹³ Ine Alfa, Omega tane monuka. Ine ajotana, akwa tane. Ine awajiabara, ayaju tane. ¹⁴ Dio akajotabu eku abayakutai tatuma ekeiraja. Ribu tatuma moaya rau akwaja najorone are ubamejerei. Tatuma janokoina akojo ekia yarute. ¹⁵ Tiarone eobo yakareku bajete. Bajiakutai tai tamaja: beoro monuka jakutai, wisimo, tatusebemo nibosebemo tane, akobakamo, diosita ayatomanetemo, saba tona yakerakutai, tona ribiakutai tane. ¹⁶ Ine Jesú jakutai mainataba inatabaine ribu tamaja ikeresia araoto saba rewaramejerei. Airamo David maisimo, ine David isimo tane. Ine jokona akura jokeraja. ¹⁷ Dio Amejokojira ribia: Nao, tia. Obeja Auka atira ribia: Nao, tia. Ribu nokoyakutai ribane: Nao, takunarai. Jobiajerakutai naokunarai. Obonoyakutai naokunarai jobikitane. Jo jobine are ubakitane jakutai. Jo jakutaisi amoara ebunaja. ¹⁸ Tamaja karata eku ribu Dio isimo jakutaisi anokomo kokotuka isia ribiaine. Atae ribu raisama tamajasi arai abakore Dio sanamata tamaja karata eku jabátae tiakutai ribu raisama abatuma arai abate. ¹⁹ Ribu Dio isimo tamaja karata eku ja. Warao karata ekumo ribu nisate tai. Nisakore waraoto saba obojona jiro akarata eku ja jakutai Dio waraoto ebikamo nisate. Ribu janokoina yakerajasi eku jakitane jakutai tai waraoto ebikamo nisate. Tamaja karata eku jabátae tiaja jakutai tai wa-raoto ebikamo nisate. ²⁰ Tamaja ribu rewarayakutai ribia: Nomewitu, rubujira nao-yaine, tia. Amén. Nao rijana, Airamo Jesú. ²¹ Kairamo Jesukirito aobojona ayakara yatu kokotuka moakunarai. Amén.