FILIPOS

FILIPOS

¹ Pablo, Timoteo tane karata jabataya. Oko Jesukirito anebu. Warao Dio saba emo abánae tiaja Filipos tata jakutai koko-tuka saba jabatayaoko. Yatu Kirito Jesú eku. Dio saba emo abánae tiakutaisi ayaoromo saba, asanetamo saba tane jabatayaoko. ² Dio Karima jakutai Airamo Jesukirito jakutai tane tatuma aobojona ayakara yatu moakunarai. Tatuma yatu inareraja tane abakunarai. ³ Ine yatu isia obonobiaja Dio yakeraja jae tane ribiaine. ⁴ Yatu kokotuka kware ebiaja are ekeiraja ebiaine. ⁵ Yatu ya awajia-barayatukamo ama ru tane rewara yakerajasi isia maisiko yaota-yame ekeiraja ine. ⁶ Dio yatu eku yaorane yaotakitane jotananae. Tai are yaotayaja Jesú asinarija eku ayaota riwarate. Tai nome-witu, tiaine. ⁷ Ine yatu obonoyame ine tametane yatu kokotuka isia obonobukitane jaine. Ine Dio aobojona ayakara nojokore yaturakate maisiko nojomo tane ejobonae. Ine mojoju jaja rewa-ra yakerajasi sabasabaya rewaraine. Rewara yakeraja jakutai tai nome, tiaine. ⁸ Ine yatu kwana obonoyakutai Dio taisi naminaya. Jesukirito yatu kwana obonoyakutai taisi monuka yatu kokotuka obonoyaine. ⁹ Ine kwai ribiaja yatu kwarika obonomejerei ebiaine. Yatu yaorane naminayaja tane, ribu yaorane nokoyaja tane obonomejerei Dio ebiaine. ¹⁰ Yatu yakerajawitu jakutaisi nisanaminamejerei ebiaine. Takore Kirito asinarija eku yatu ya-keraja ejobate. Obojona asiraja yatu kware abanatate. ¹¹ Nona nomerajasi akwaja arite. Nona nomeraja jakutai Jesukirito isimo. Takore yatu aobojona eobo ribate: Dio Airamo uriraja, tate. Dio anona uriraja, tate. ¹² Mawarao, makwaeabajakutai are yakeraja ejobonae. Rewa-ra yakeraja suatana narumejerei sanetae. Ine yatu taisi namina-mejereaine. ¹³ Ine mojoju Kirito aobojona. Airamo ayaoromo kokotuka taisi naminaya. Eoborakate naminaya. ¹⁴ Ine mojoju jaja tametane kwaeabakore Airamo eku nome abamo eraja jakutai taisi naminane retanaja rijana. Airamo eku suatana retanaka Dio aribu rewaraya. ¹⁵ Nomewitu kawanamo miajitayaja Kirito isia rewaraya. Ribu kwarikayaja rewaraya. Tiarone eobo obojona nomewitu isia rewaraya. ¹⁶ Tatuma maobonoyame rewaraya. Ine tamatuka ja rewara yakerajasi sabasabaya rewarakitane. Tatuma taisi nami-nane rewaraya. ¹⁷ Kawanamo ribu kwarikayaja Kirito isia rewa-raya. Aobojona raisa. Ine rewara yakerajasi sabasabatiji ine asiraja kwarika ejobamejerea. ¹⁸ Katukate? Eobo Kirito isia rewa-rayakore ine are oriwakaya. Aobojona nomerajasi isia rewarayakore ine oriwakaya. Aobojona nomerajenarone nomeraja tane oriabane rewarayakore ine oriwakaya. Suatana oriwakatine. ¹⁹ Yatu makware ebiame mejerote. Jesukirito Amejokojira masanetayame mejerote. Taisi naminayaine. ²⁰ Ine yaorane yawakaya tomaneraja ejobonaka jakitane. Ine retanaka rewara-kitane obonoyaine. Kirito matejo eku are airamo tane ejobame-jerei obonoyaine. Ebe jakutaisi monuka are ejobamejerei obono-yaine. Ine wabane o mate riko jaja Kirito airamo tane ejoba-mejerei obonoyaine. ²¹ Ubakitane jakutai tai masaba Kirito. Ine wabakore masaba amoara jaja tane ejoboya. ²² Ine mate riko bajekore mayaota jate tai. Kasikaja nisate tai? Naminanajine. ²³ Reko kwana obonoyaine. Ine wabane Kirito isiko jakitane masaba yakerawitu. ²⁴ Tiarone yatu aobojona ine riko bajekore are yakera. ²⁵ Taisi naminane mate riko bajetine. Taisi naminayaine. Yatu kokotuka isiko bajetine yatu nome abane suatana narumejerei. Yatu nome abane ekeiraja bajemejerei bajetine. ²⁶ Ine yatuata narukore yatu Kirito Jesú isia yakeraja jae tane kwana ribate, maobojona. ²⁷ Rewara yakeraja Kirito isia jakutaisi eku kujukitane ja. Kujukitane jakutaisi eku kujukotu. Taeraja jakitane kujukotu. Obojona jisaka eku jakitane kujukotu. Obonobu jisaka eku jakitane kujukotu. Rewara yakerajasi isia nome abakitane jaku-taisi kware orikubakitane ja. Obojona jisaka eku rewara yakera-jasi kware orikubakitane kujukotu. Ine yatu isia nokone yatu tametane nonayakutai taisi nokokitane obonoyaine. Ine yatuata narune mikitane, o narunaka jaja are yatu isia nokote. ²⁸ Yatu retanaka jaja eobo saba sinarija tane bajia. Tatuma ekorakitane jakutaisi asinarija. Yatu retanaka jaja yatu wite saba sinarija tane bajia. Yatu aobojona bajukakitane jakutaisi asinarija. Dio yatu aobojona ibajukaya. ²⁹ Dio yatu moae Kirito isia nome abamejerei. Tiarone nome abakitanewituana. Dio yatu moae Kirito aobojona sanamatamejerei. ³⁰ Ine orikubaya. Yatu mamonuka orikubaya. Ine ateje orikubayakore yatu miae. Ine are orikubayakore yatu nokoya.

¹ Yatu oriaobojona mikotu. Kirito aobojona yatu akobe tuwa-raya. Yatu Kirito obonoyaja yatu raisama akobe etuwaraya. Yatu Kirito aobojona Dio Amejokojira isiko orimuaraisataya. Yatu Kirito aobojona yakeraja obonoya. Kirito aobojona yatu akobe eobo isia ajerame sanetaya. ² Tiame ine ekeirajawitu bajemejerei yatu orimonuka obonobukotu. Orimonuka obono-kotu. Obojona jisaka eku bajekotu. Obonobu jisaka eku baje-kotu. ³ Raisama kwarikakitane najabunaka jakotu. Wite oriisia ine yakerajaine tane ribunaka jakotu. Tiarone ine eobo yajoto tane ribane eobo yatu kwarika tane abakotu. ⁴ Wite orisaba yakeraja jakutaisi najabunaka jakotu. Tiarone eobo saba yakeraja jakutaisi najabukotu. ⁵ Kirito Jesú aobojona jakutai yatu aobojona tane ejobaku-narai. ⁶ Jesú Diorone Dio monuka jakitane Jesú saba amoara ekiraja monuka ejobonae. ⁷ Diorone taisi amoara ekiraja monuka tane oriabanae. Raisama akajotabu tane ejobonae. Warao tane ejobonae. ⁸ Warao tane ejobane eobo yajoto tane oriabanae. Dio aribu eku abayaja wabae. Kuru isia wabae. ⁹ Tiame Dio Kirito airamo urirajawitu tane abanae. Dio taisi awai uriraja tane abanae. Taisi awai wai kokotuka kwarika ejobonae. ¹⁰ Tiame Jesú awai aobojona kokotuka taisi amujaba jinamane norujakitane ja. Najamutu arao, raina arao, raina noika arao tane jinamane norujakitane ja. ¹¹ Jono kokotuka ribakitane ja: Jesukirito jakutai tai Airamo, takitane ja. Dio Karima jakutai airamo tane ejobamejerei ribakitane ja. ¹² Mawarao ine obonoyakutai, yatu ribu eku are abaya. Are eku abakotu. Ine yatu kaika jakore yatu ribu eku abayaja jaja. Ama ine ekirarone are kwarika ribu eku abakotu. Retayaja tororoyaja tane obojona ibajukakitane jakutaisi eku bajene yaotakotu. ¹³ Dio oriaobojona eku abayaja yatu eku nonaya. Dio yatu eku nonaya Dio aobojona yatu aobojona tane ejobamejerei. Dio yatu eku nonaya yatu Dio aobojona eku nonamejerei. Tiame retayaja, tororoyaja tane bajukakitane jakutaisi eku nonakotu. ¹⁴ Yatu nonayaja kokotukanea eribunaka nonakotu. Oriaribu kwarikanaka nonakotu. ¹⁵ Tane nonakotu yatu kware obojona asi-rajasi abanaka jamejerei. Tane nonakotu yatu aobojona erajena jamejerei. Tane nonakotu Dio anobotomo tane. Dio anobotomo anana ibasanaja warao ama jakutaisi kawanaya. Warao ama jakutai aobojona kasi. Aobojona emo. Yatu raina imajanerajasi eku abijetuma tane sinajaraya warao ama jakutaisi kawanaya. ¹⁶ Yatu tane nonayaja ribu kobe jiro moayakutaisi isia inaminaya. Takore ine Kirito asinarija eku yatu isia yakeraja jae tane ribatine. Yatu yakeraja nonakore mayaota eko ejobonaja. Ine jakanajakutai tai eko ejobonaja. ¹⁷ Yatu nome abayaja nobeanaka tane yatu Dio orimoaya. Ine yatu kware wabakitane orimoakore yatu anobeanaka arai ine nobeanaka najo jakutaisi monuka bajete. Tane jakore masaba yakera. Yatu kokotuka isiko oriwakayaine. ¹⁸ Yaturakate oriwakakotu. Oriisiko oriwakaki. ¹⁹ Rubujira yatuata Timoteo inatabakitane obonoyaine Aira-mo Jesú tane obonokore. Ine yatu isia nokone oriwakakitane obonoyaine. ²⁰ Mamonuka obonobiakutai raisa tamatuka ekira. Timoteo yatu sanetakitane kwana obonoya. ²¹ Eobo kokotuka jakutai oriayaota eku yaotakitane obonoya. Kirito Jesú ayaota eku yaotanaja. ²² Tiarone Timoteo isia rewarayakutai yatu taisi naminaya. Tai makaika yaotaya rewara yakerajasi isia. Auka arimasi kaika yaotayakutai taisi monuka makaika yaotaya. ²³ Ine maisia kwaeabakitane jakutaisi naminane rijana yatuata Timoteo inatabakitane obonoyaine. ²⁴ Airamo masanetakore inerakate yatuata rubujira narutine, tiaine. ²⁵ Yatuata Epafrodito inatabakitane jaine. Tai nome abatu. Tai mamonuka yaotatu. Mamonuka yaorotu. Epafrodito jakutai tai yatu ainataba. Yatu taisi inatabae masanetamejerei. ²⁶ Amena yatu kokotuka mikitane kwana obonoya. Tai ebe waba nakajakutaisi isia yatu nokoae. Yatu tane nokoajame tai yatu iamo obonobiaja bajinae. ²⁷ Nomewitu waba nakane wabaturuae. Tiarone Dio akobe taisi isia ajerame sanetae. Sanetajakutai taiwituana. Inerakate masanetae, ine ekumonirajawitu bajinaka jamejerei. ²⁸ Tiame taisi inatabakitane masaba yakera. Taisi inatabayaine yatu taisi mine oriwakamejerei. Taisi inatabayaine mekumoni yajoto bajemejerei. ²⁹ Takore Airamo aobojona taisi etuwarakotu. Ekeirajawitu etuwarakotu. Taisi monuka jakutai raomata tane abakotu. ³⁰ Epafrodito Kirito ayaota aobojona wabaturuae. Tai yatu mate makware yaota riwaramoana jakutai taisi yaotae. Tai jawana kwaeabanae yatu aribia masanetakitane.

¹ Ama mawarao, Airamo eku oriwakakotu. Ebe jabatajakutai atanejese taisi jabatakitane masaba asirena. Yatu taeraja tane bajemejerei jabatayaine. ² Beoro monuka anonamo, asirajasi anonamo, tejo iasiratamo tane tatuma isia yatu aobojona jakotu. Tatuma isia oi! ³ Oko Dio Amejokojira isia Dio yatomaneteakutai okojase joro aseremo nomeraja. Oko ribia Kirito Jesú amoara ja. Obojona are jakutai amoara ekira kware barekitane. ⁴ Eobo ribia obojona are jakutaisi amoara ja. Ine tane obonobukore obojona are jakutaisi kware barekuine. Ine tatuma kwarika ribakuine. ⁵ Ine nakakore ya mojoabasi kware rijanamo jakore majoro serenae. Ine Israeltuma kawanamo ine. Ine Benja-mín awaraosebeira ajisaka. Ine ebereo isimo are ebereo tane ejo-bonaine. Ine Dio akajotabu eku abakitane Bariseo sabasabamo ejobonaine. ⁶ Ine nomeraja ejobakitane Dio akajotabu eku nona-jame makware abakomoni jaja. Dio aobojona eku abakitane kwana obonoyame ikeresia araoto isanamataine. ⁷ Tiarone ebe masaba amoara jaja jakutai ama masaba amoara ekiraja ejobonae, Kirito aobojona. ⁸ Nomewitu kokotuka masaba amoara ekiraja ejobonae. Ine Mairamo Kirito Jesú naminakitane jakutai taisi amoara uriraja ja, masaba. Kirito aobojona kokotuka rijanaine. Kokotuka masaba weboto rijana. Rijanaine ine Kirito nisakitane. ⁹ Kokotuka rijanaine Kirito eku maobojona enometánae tiaja bajemejerei. Wite oriaobojona enometanajine. Kirito isia nome abakore obojona enometánae tiaja ejoboya. Ine Dio akajotabu eku abakore maobojona enometanaja. Tiarone ine Kirito isia nome abakore Dio maobojona enometaya. ¹⁰ Ama ine yaorane obonoyakutai tai Kirito naminakitane. Jarata Kirito enomininaja-kutaisi naminakitane obonoyaine. Kirito kaika sanamatakitane taisi monuka wabakitane tane obonoyaine. ¹¹ Tane yakerakore inerakate wabarone nominatine. ¹² Ine mate kaikanaja. Ine mate kaikawitu ejobonatanaine. Kirito manisanae ine taisi isimo nisamejerei. Suatana nariaine nisa-kitane. ¹³ Mawarao, ine rijana kokotuka nisanae, tane ribunajine. Ebe jakutai taisi emoniaja suatana kwana jakayaine. Tametane nonayaine. ¹⁴ Nabakakitane jakutaisiata kwana jakayaine, amoara Dio mamoamejerei. Amoara jakutai Dio Kirito Jesú eku kwai mayejebute. Tai mamoara rijana. ¹⁵ Oko kaikawitu jakutai monukajase obonobukitane ja. Yatu aobojona raisa jakore Dio yatu inaminate. ¹⁶ Oko naminajaku-taisi eku nonaki. Orimonuka obonobuki. ¹⁷ Mawarao, obojona jisaka eku abane masitakotu. Oko rijana asita ejobonae yatu kasitamejerei. Eobo kasitayakutai tatuma nami-nakotu. ¹⁸ Warao eraja ja. Tatuma Kirito akuru riboto ejobonae. Eraja tane yatu saba rewaraine. Amarakate yatu saba onayaja rewa-rayaine. ¹⁹ Tatuma ekoronokoata naria. Najorokitane jakutai ta-tuma saba dio monuka ejobonae. Tomaneraja jakutai tatuma saba yakera. Raina aobojonawitu isia obonobia. ²⁰ Tiarone oko ri-jana najamutu arao. Obojona Aibajukatu anao yawakayaoko. Tai najamutuatukamo naoya. Kaibajukatu jakutai tai Airamo Jesukirito. ²¹ Tai katejo saneraja jakutaisi inamonite. Oriatejo yakerajawitu jakutaisi monuka katejo inamonite. Kirito ajara taeraja ja kokotuka akajotabu tane abakitane. Ajarata kaika katejo inamonite.

¹ Mawarao, yatu obonoyaine. Yatu mikitane kwana obonoyaine. Yatu aobojona ekeiraja ine. Yatu aobojona ma-moara ja. Airamo eku taeraja bajekotu. Yatu obonoyaine. ² Evodia, Síntique tane reiriaine. Airamo eku obojona jisaka eku abamejerei reiriaine. ³ Ijirakate jiebiaine. Iji mamusaba. Iji Dio aribu eku abaya. Tatuma tatu jakutai sanetau. Tatuma maisiko rewara yakerajasi rewarakitane kwana yaotae. Clemente isiko yaotae. Mamuaraisatuma eobo jakutaisi isiko yaotae. Dio tatuma awai obojona jiro akarata eku jabatae. ⁴ Airamo eku are oriwa-kakotu. Atanejese ribiaine oriwakakotu. ⁵ Yatu raoberaja jakore eobo kokotuka naminakunarai. Airamo kawere rijana. ⁶ Obonobu erajasi obonobunaka jakotu. Tiarone kokotukanea Dio saba rewarakotu. Kwai ribiaja rewarate. Ebiaja rewarate. Yakeraja jae tane ribiaja rewarate. ⁷ Takore Dio Kirito Jesú eku yatu aobojona yaorote, inareraja tane bajemejerei. Yatu aobonobu yaorote inareraja tane bajemejerei. Dio inareraja tane kabakore katukaya tai tane naminakomoni. ⁸ Ama, mawarao, tamajasi isia obonobukotu. Ribu nomerajasi isia obonobukotu. Tomanerena jakutaisi isia obonobukotu. Nona nomerajasi isia obonobukotu. Anana ibasanaka jakutaisi isia obonobukotu. Yakerajasi isia obonobukotu. Isia yakeraja rewarayakutai taisi isia obonobukotu. Amoara ja jakutai taisi isia obonobukotu. Isia yakeraja jae tane ribiakutai taisi isia obonobukotu. ⁹ Ine yatu inaminajakutai taisi eku nonakotu. Ine yatu moa-jakutai taisi eku nonakotu. Maisimo nokoajakutai taisi eku nona-kotu. Maisia miajakutai taisi eku nonakotu. Takore Dio yatu ina-reraja tane abayakutai tai yatu kaika bajete. ¹⁰ Ama yatu akariata atanejese maisia obonobuae. Taisi aobojona kwana oriwakayaine Airamo eku. Atejerakate maisia obonobuae tiarone masanetakomoni ejobonae. ¹¹ Ine ekiraja, tane ribunajine. Ine jakitane o ine ekirakitane are monukajase masaba yakera. ¹² Saneraja ubakitane masaba yakera. Burata uriraja jaja ubakitane masaba yakera. Kokotukanea nariakore makwaeabanajakutaisi naminaine. Jajinakitane, nojeraja jakitane, burata uriraja jakitane, ekiraja jakitane tane kokotuka naminaine. ¹³ Kirito maobojona taeraja tane abaya. Takore kokotuka nonakitane masaba yakera. ¹⁴ Tiarone ine ama sanamatayame yatu yakeraja nonae masanetakitane. ¹⁵ Ine wajiabara rewara yakerajasi rewarakore ikeresia jisaka-rakate masanetanatanae. Ine Macedonia tatamo ejobakore masa-netanatanae. Yatuwitu, Filipos arao, masanetae. Oko moaubia. Oko nisaubia. Yatu taisi naminaya. ¹⁶ Ine Tesalónica tata jakore yatu burata masaba inatabae. Jisatawituana. Manata inatabae. ¹⁷ Yatu isimo nobeanaka najabunajine. Yatu Dio saba kwarika kwajamejereaine. ¹⁸ Mamoajakutaisi kokotuka nisanaine. Uri-raja jame mate ekoronaja. Yatu anobeanaka inatabajakutai Epa-frodito taisi mamoae. Mamoajame jajinanaine rijana. Yatu ano-beanaka jonaba yakeraja monuka Dio saba yakera. Yatu anobe-anaka romu nae tiakutaisi monuka yakera. Dio saba yakera. ¹⁹ Yatu ekirakutai Mario Dio jakutai yatu kokotuka moate. Najamutuata Dio Kirito Jesú eku unukamo uriraja ja. Taisi kaika yatu moate. ²⁰ Dio Karima jakutai are airamo bajekunarai. Are suatana are airamo bajekunarai. Amén. ²¹ Warao Dio saba emo abánae tiaja Kirito Jesú eku jakutai tatuma kokotuka isia yakeraubiara abakotu maribia. Nome abamo maisiko jakutai yatu isia yakeraubiara abaya. ²² Warao Dio saba emo abánae tiaja tamatuka jakutai kokotuka yakerau-biara abaya. César airamo uriraja jakutaisi ajanoko arao eobo kwarika yakeraubiara abaya. ²³ Kairamo Jesukirito aobojona ayakara yatu kokotuka moa-kunarai. Amén.