MATEO

MATEO

¹ Tamaja Jesukirito anobotuma awai. Jesukirito jakutai tai David ajisaka, Abraham ajisaka tane. ² Abraham jakutai Isaac arima. Isaac Jacob arima. Jacob Judá arima, awaraoto isiko. ³ Judá jakutai Fares, Zafa tane arima. Tatuma aranima awai Tamar. Fares Esrom arima. Esrom Aram arima. ⁴ Aram Aminadab arima. Aminadab Naasón arima. Naasón Salmón arima. ⁵ Salmón Booz arima. Aranima awai Rahab. Booz Obed arima. Aranima awai Rut. Obed Isaí arima. ⁶ Isaí airamo David arima. Airamo David Salomón arima. Ebe Urias atira jakutai tai Salomón arani. ⁷ Salomón jakutai Roboam arima. Roboam Abias arima. Abias Asa arima. ⁸ Asa Josafat arima. Josafat Joram arima. Joram Uzias arima. ⁹ Uzias Jotam arima. Jotam Acaz arima. Acaz Ezequias arima. ¹⁰ Ezequias Manasés arima. Manasés Amón arima. Amón Josias arima. ¹¹ Josias Jeconias arima awaraoto isiko. Eobo Israeltuma mojoju tane Babilonia tata konarukore Jeconiastuma jaja. ¹² Tatukamo Jeconias Salatiel arima. Salatiel Zorobabel arima. ¹³ Zorobabel Abiud arima. Abiud Eliaquim arima. Eliaquim Azor arima. ¹⁴ Azor Sadoc arima. Sadoc Aquim arima. Aquim Eliud arima. ¹⁵ Eliud Eleazar arima. Eleazar Matán arima. Matán Jacob arima. ¹⁶ Jacob José arima. José jakutai tai Maria anibora. Maria jakutai Jesú arani. Jesú jakutai tai Kirito. ¹⁷ Takore Abrahamatukamo David tata nabakayaja anobo-tomo tane anobotomo tane kokotuka mojoreko kware manamo-namojaseata ru tae. Davidatukamo Babilonieta nabakakitane, anobotomo tane anobotomo tane tatukamo mojoreko kware manamonamojaseata ru tane konaruaeyama. Ama tatukamo Kirito arijawareta nabakakitane tane anobotomo tane anobotomo tane mojoreko kware manamonamojaseata ru taeyama. ¹⁸ Jesukirito tametane rijawaraeyama. Arani Maria José isiko orinisakitane. Mate isiko ubamoana jakore kwabuaja miae. Kwabuajakutai Dio Amejokojira Yakerajawitu aobojona. ¹⁹ Maria ayamaretatu José jakutai tai nomeraja anonatu. Tai tira tomane-raja bajemejerenatanae. Tiame rijisane iabakitane obonoaeyama. ²⁰ José tametane obonobiaja ubane musibuae. Musibune Airamo ainataba miaeyama. Ainataba ribane: José David auka, Maria jitira tane nisakitane retanaka jau. Kwabuajakutai tai Dio Amejo-kojira Yakerajawitu aobojona. ²¹ Jorosimo nibora aranitate. Awai tane Jesú abate, tai awaraoto aobojona asirajasi ekumo ejerokitane jame, taeyama. ²² Ateje Airamo kware arewaratu rewarae. Taisi aribu eku nakamejerei tametane nonae. Rewaratu ribane: ²³ Miki anaka. Iboma niborama naminanaka kwabune jorosimo nibora aranitate. Awai tane Emanuel abate, taeyama. (Isa.7:14) Emanuel waraoto aribu isia ribia: Dio kakaika, tia. ²⁴ Takore José nominane Airamo ainataba akajotabu eku nonae. José Maria atira tane nisanaeyama. ²⁵ Tiarone tira mate jorosimo nibora aranitamoana jakore José atirasi isiko ubanatanae. Auka awajiabara jakutai nakakore awai tane Jesú abanaeyama.

¹ Airamowitu awai Herodes jakore Jesú janokoina Belén ina Judea tata nakae. Jesú nakakore nibo naminamo jakutai najamutu akajuatamo naoaeyama, Jerusalén tata. ² Ribane: Judio airamowitu tane nakajakutai kasaba nakae tai? Oko mate naja-mutu akajuata jaja kura miaeko. Tiame airamo yatomanetekitane naoaeko, taeyama. ³ Herodes airamowitu jakutai tamaja ribu nokoitane aobonobu eraja ejobonae. Jerusalén arao kokotuka monukajase aobonobu eraja ejobonae. ⁴ Takore Herodes saserote airamotuma, kajotabu akarata ainaminamo tane kokotuka orikware toae. Toaitane Akirito kasaba nakakitane ja tai tane renokoaeyama. ⁵ Tatuma ribane: Janokoina Belén ina Judea tata nakakitane ja. Dio kware arewaratu tametane jabatae. ⁶ Iji Belén ina Judea tata, Iji Judá airamotuma kawanaya ayabuarena. Airamo jiekumo ejobate. Tai mawarao Israeltuma airamo tane bajete. (Miq. 5:2) ⁷ Takore Herodes nibo naminamo rijisane yejebuaeyama. Yejebuitane yaorane renokoae. Kura katukakore ejobonae bajama tane renokoaeyama. ⁸ Herodes Belén tata naminamo inatabae. Ribane: Tata narune nebusanuka isia yaorane renokokotu. Mikore menokokotu. Inerakate tata narune yatomanetetine, taeyama. ⁹ Takore naminamo jakutai airamo aribu nokone naruae. Takore kura najamutu akajuata miajakutai tai tatuma ebe naruae-yama. Narune nebusanuka jakutaisi kwarika tuwaraeyama. ¹⁰ Ta-kore tatuma kura mitane kwana oriwakaeyama. ¹¹ Tane janoko eku yarune nebusanuka miae arani Maria isiko. Mitane mukunamane rujane, jinamane nebusanuka yatomaneteae. Aunukamo amoara taeraja jakutaisi anamu akojo ejerone nobeanaka nebusanuka moae. Nobeanaka jakutai burata simo, jonaba erokakitane, jonaba ejokitane tane. ¹² Tane tatuma musibukore Dio tatuma enokoae Herodes tata bajinaka jamejerei. Tiame jojisi raisama ekia aineta naruaeyama. ¹³ Tatuma narukore José musibu eku Airamo ainataba miae. Inataba ribane: Karamane nebusanuka aranima isiko emo konaru. Ina Egipto tata naru. Jiisia ribunaja jakore are Egipto tata bajete. Airamo Herodes nebusanuka nakitane najabukitia, taeyama. ¹⁴ Takore José nominane tai imaya nebusanuka konaruae aranima isiko. Egipto tata narukitane konaruae. ¹⁵ Are tata uba-yakore Herodes wabae. Egipto tata bajinae Airamo aribu eku nakamejerei. Dio kware arewaratu jabatae: Egiptoatamo Maukama yejebuaine, tae. (Ose.11:1) ¹⁶ Takore naminamo Herodes ekotubukore Herodes naminae. Kwana orijisiaeyama. Herodes nemokomoko kubamejerei kajo-tabuae. Herodes sinarija isia naminamo renokoae. Taisi monuka sinarija eku abanae. Mate ainawaja manamo kaikanaja jakutai kokotuka kubamejereae. Nemokomoko Belén arao jakutai, Belén awere jakutai tane kubamejereae. ¹⁷ Takore Dio kware arewaratu Jeremias aribu eku nakae. Tai jabatae: ¹⁸ Ramá tata yaonayakore nokoae. Kwana sanayakore, yaonayakore jeko jeko tiakore tane nokoae. Raquel jakutai anobotomo yaonaya. Anobotomo muanajame akobe tuwaramejerenaja, tae. (Jer. 31:15) ¹⁹ Tiarone Herodes wabakore Airamo ainataba José isia ejobonae Egipto tata. José musibu eku inataba miaeyama. ²⁰ Ainataba ribane: Karamane, nebusanuka aranima isiko konarune Israeltuma aina tata naru. Nebusanuka nakitane obonoajakutai muanae rijana, taeyama. ²¹ Takore karamane nebusanuka konaruaeyama aranima isiko. Israeltuma aina tata nabakanaeyama. ²² Nabakane Herodes wabakore auka ina Judea eku airamo tane bajinae tane nokoae. Aukama awai Arquelao. Takore José tata narukitane nojae. Tiarone José musibukore Dio taisi enokoae. Enokokore emo naruae ina Galilea tata. ²³ Janokoina Nazaret tata nabakane tata ubaeyama. Dio kware arewaramo ateje ribunae: Taisi awai Nazaret arotu tane warate, taeyama. Tiame Dio kware arewaramo aribu eku nakamejerei Nazaret tata ubae.

¹ Tai ya eku Juan Joni Ekobutu jakutai naoae. Ina Judea ajarawaja eku rewaraeyama. ² Ribane: Rijana yatu aobo-jona ibarekotu najamutu arotu arujuna rujakitane jakutai kawere jame. ³ Ateje Isaias Dio kware arewaratu jakutai akarata eku jaba-tae. Tametane jabatae: Jarawaja tata rokojotayakore ribu nokoya. Ribia: Jojisi iyakaratakotu. Airamo anarunokotuma enometakotu Airamo saba, tia, tae. (Isa. 40:3) Tane jabatae. Juan rewarayaja Isaias aribu eku nakae. ⁴ Juan ajiaka jakutai kameyo ajijinona. Akabea akoya joronona. Anajoro jabisara, simo ajo tane. ⁵ Eraja Juan aribu nokokitane naoae, Jerusalén arao, ina Judea kokotukanea arao, nojaba Jordán ajajarukaya arao tane. ⁶ Naoitane aobojona asiraja nowarakore Juan tatuma nojaba Jordán eku ekobuaeyama. ⁷ Bariseotuma Saduceotuma tane naoae joni ekobamejerei. Takore Juan tatuma mitane ribane: Yatu jubawitu anobotomo rijana! Dio orijisine yatu sanamatamejerete. Sina yatu inaminae sanamata naokitiakutaisi ebikamo kurujubumejerei? ⁸ Yatu aobojona ibarínae tiaja jakore, nona yakeraja nonakotu. ⁹ Yatu obonobia: Abraham jakutai tai karima, tia. Tane ribakitane obonobunaka jakotu. Yatu isia ribiaine: Tamaja joyo inamo-nekitane Dio saba yakera Abraham anobotomo tane jamejerei. ¹⁰ Ama rijana, jima rau kabatakitanewitu abánae tiaja ja. Rau kokotuka akwaja yakeraja ekirakore, rau kabatane jekuneku toate. ¹¹ Ine yatu joni ekobia rijana yatu aobojona ibarina-jakutaisi asinarija tane. Tiarone manokabukaya naoyakutai Dio Amejokojira Yakerajawitu eku yatu ekobate, jekuneku tane. Naoyakutaisi ajarata majarata kwarika. Tiame ine mamoara ekira taisi asabato omu isimo nisane konarukitane. ¹² Tai ayaotanoko amojeku ja tiriko ebujokitane. Tiriko yakeraja jakutai anamu eku abate. Tiarone uaja jakutai jekunu nareoni jakutaisi isia erokate, tae. ¹³ Takore Jesú ina Galilea tatamo naone nojaba Jordán ajomuku nabakanae. Juan jakutaisiata nabakanae Juan taisi ekobamejerei. ¹⁴ Tiarone wajiabara Juan Jesú ekobakitane obononatanae. Ribane: Iji mekobakore yakerakuna. Iji katukeme ineata naoae bajama ine jiekobamejerei? taeyama. ¹⁵ Jesú Juan riboto ribane: Ama tametane nonaki. Tametane nonakitane kasaba yakera Dio aobojona nomeraja jakutaisi koko-tuka kaika nakayaja, taeyama. Takore Juan saba yakeraja ejobo-naeyama. ¹⁶ Tane Jesú joni ekobakore jonimo ejobonaeyama. Takore najamutu akojo ijakanae. Dio Amejokojira kokojo monuka nana-kayakore Jesú miae. Amejokojira jakutai Jesú yajakanaeyama. ¹⁷ Takore najamutuata ribakore ribu nokoae. Ribane: Tamaja-sike Mauka ine obonoyakutai. Tai maobojona ekuwitu, taeyama.

¹ Tatukamo Mejokojira jarawaja tata Jesú konaruae jebuira Jesú ayakara mimejerei. ² Takore Jesú ya mojorekotuma manamonamojase ima mojo-rekotuma manamonamojase najoronatanae. Ya kwaeabakore nojeraja ejobonaeyama. ³ Nojeraja ejobakore ayakara amitu jakutai Jesú yanabakanae ayakara mikitane. Isia ribane: Iji Dio Auka jame tamaja joyo isia ribanu bãu tane namonemejerei, taeyama. ⁴ Takore Jesú taisi riboto ribane: Jabataja taisi isia ribia: Warao najorowitu isia ubanaja. Ribu kokotuka Dio aroko ekumo ejoboyakutaisi isia ubaya, taeyama. (Kaj. 8:3) ⁵ Takore jebuira Jerusalén janokoina yakeraja jakutaisiata Jesú konaruaeyama. Kwai ribunoko akari kwaerajasiata konaruae-yama. ⁶ Isia ribane: Iji Dio Auka jame joika buronu. Jabataja taisi isia ribia: Dio ainatabatuma kajotabute jiyaoromejerei. Tatuma amojo isia jikobukate Jiomu joyo isia boisinaka jamejerei, tia, taeyama. (Rok. 91:11-12) ⁷ Takore Jesú taisi riboto ribane: Jabataja raisa tametane ribia: Jiairamo Dio jakutai taisi ayakara minaka jau, tia, taeyama. (Kaj. 6:16) ⁸ Atanejese jebuira Jesú konaruae jotakwa kwaerajasiata. Tatamo ina kokotuka emiae. Ina ayakara emiae. ⁹ Isia ribane: Iji mukunamane rujane, jinamane mayatomanetekore tamaja kokotuka jisaba bajete, taeyama. ¹⁰ Takore Jesú taisi riboto ribane: Memo jau, Satanás. Jabataja taisi isia ribia: Jiairamo Dio jakutai taisiwitu yatomanetete. Taisiwitu akajotabu tane bajete, tia, taeyama. (Kaj. 6:13) ¹¹ Takore jebuira Jesú ebikamo naruaeyama. Narukore Dio ai-natabatuma naone Jesú sanetaeyama. ¹² Takore Jesú Juan isia nokoae. Juan mojojutae tane nokoae. Nokoitane ina Galileayata naruaeyama. ¹³ Janokoina Nazaret tata bajinaka janokoina Capernaum tata nabakanae tata ubakitane. Capernaum jakutai aotanaira amumi bajia ina Zabulón, ina Neftalí tane awere. ¹⁴ Tane nonae Dio kware arewaratu Isaias jakutaisi aribu eku nakamejerei. ¹⁵ Isaias ribane: Ina Zabulón, ina Neftalí tane ja. Aotanaira ajojisi awere ja. Jordanyatukamo ya riboto bajia. Ina awai Galilea. Ina jakutai tai Judioana aina. ¹⁶ Warao ebe imajana eku ubayakutai abije uriraja miae. Warao wabanoko eku ubayaja waba nojayakutai abije tatuma sinajarae. (Isa. 9:1-2) Tane Isaias jabatae. ¹⁷ Tatukamo Jesú rewarakitane jotananae. Ribane: Yatu aobo-jona ibarekotu. Najamutu arotu arujuna rujakitane jakutai awere jame obojona ibarekotu. ¹⁸ Taitane Jesú aotanaira Galilea amumia nariaja oriwarao manamo miae, araje araka tane. Araje jakutaisi awai Simón. Awai raisa Pedro. Araka jakutaisi awai Andrés. Tatuma rumo. Atarayaira toayakore miae. ¹⁹ Mitane tatuma isia ribane: Maiamo naokotu. Yatu ama jomakaba yabaya. Tiarone amayatukamo warao jomakaba monuka ayabamo tane yatu abatine, taeyama. ²⁰ Takore rijana nobatuma iabane Jesú iamo narubuaeyama. ²¹ Kemo sabuka Jesú atae oriwarao manamo jaja miaeyama. Araje jakutai Jacobo. Araka jakutai Juan. Tatuma Zebedeo ano-botomo. Tatuma arimasi isiko anobatuma waera eku iyakarata-yakore Jesú miaeyama. ²² Jesú tatuma yejebukore rijana waera iabanae arimasi isiko. Tane Jesú iamo naruaeyama. ²³ Takore ina Galilea kokotukanea kujuae. Orikware naka-noko janokoina kokotukanea ekia inaminaeyama. Dio arujuna rujuyakutaisi isia rewarae. Waraoto awaba taeraja taerajena tane kokotuka ibajukaubuaeyama. ²⁴ Ina Siria kokotukanea Jesú isia rewarae. Tiame Jesú tata muanayakutaisi konae. Awaba raisa raisa jakutai, atejo ajerakutai, jebu jaja jakutai, sinaka arotu jakutai, atejo maramárae tiakutai kokotuka Jesú tata konaeyama. Takore Jesú tatuma ibajukanaeyama. ²⁵ Ibajukakore warao-sebeira Jesú iamo naruae. Iamo naruajakutai tai tamaja: ina Galilea arao, ina Decápolis ajanokoina arao, Jerusalén arao, ina Judea arao, nojaba Jordán jabisabaya arao tane.

¹ Takore Jesú waraosebeira mitane jotakwa yaburune tata rujunaeyama. Rujakore anebu Jesú yanabakanaeyama. ² Takore Jesú tatuma inaminakitane jotananaeyama. Ribane: ³ Aobojona isia saneraja jakutai tatuma ekeiraja. Najamutu arotu arujuna rujuyakutai tatuma saba rujuya. ⁴ Yaonayakutai tatuma ekeiraja. Dio tatuma akobe etuwarate. ⁵ Aobojona isia ine eobo yajoto tane ribiakutai tatuma ekeiraja. Dio ribunajakutaisi eku raina tatuma moate aina tane. ⁶ Obojona nomeraja bajekitane obonoyakutai nojerakutaisi monuka, jobiajerakutaisi monuka tane tatuma ekeiraja. Dio tatuma ijajinaubute nomeraja nonaubumejerei. ⁷ Akobe raisama isia ajerakutai tatuma ekeiraja. Dio akobe tatuma isia ajerate. ⁸ Aobojona ananena ibásae tiakutai tatuma ekeiraja. Tatumasike Dio mite. ⁹ Obojona iabane raisama isiko yakeraja bajiakutai tatuma ekeiraja. Dio ribate: Tatumasike manobotomo, tate. ¹⁰ Anona nomerajasi aobojona sanamatayakutai tatuma ekei- raja. Najamutu arotu arujuna rujuyakutai tatuma saba rujuya. ¹¹ Yatu masabasabamotiji eobo yatu isanamatate. Yatu isanate. Tona ribiaja yatu isia ribu asiraja kokotuka ribate. Tiarone yatu ekeiraja. ¹² Tametane yatu isia nonakore oriwakakotu. Ekeiraja bajekotu. Najamutuata yatu amoara uriraja jame oriwakakotu. Tatuma are tane nonae Dio kware arewaramo ateje jakutaisi isia. ¹³ Yatu bamu monuka raina araoto saba. Tiarone bamu ajerena jakore katukane iyakaratate ajeramejerei? Amoara ekira rijana. Webotakore warao taisi sakaubute. ¹⁴ Yatu abije monuka raina araoto saba. Janokoina jotakwa arai jakutai rijisakomoni. ¹⁵ Abije erokane kajõ noika abanaja. Tia-rone abije abanoko eku abate janoko arao kokotuka sinajara-mejerei. ¹⁶ Yaturakate yatu abije eobo amujaba yi tamejerekotu. Takore tatuma yatu anona yakeraja mitane yatu Arima najamu-tuata jakutaisi isia ribate: Ijisike yakeraja, tate, taeyama. ¹⁷ Jesú inaminayaja ribane: Obonobunaka jakotu: Tamaja Moisés akajotabu webotakitane naoae. Dio kware arewaramo aribu webotakitane naoae, tane ribunaka jakotu. Webotakitane naonatanaine tiarone aribu eku nakakitane naoaine. ¹⁸ Nome-witu yatu isia ribiaine: Kajotabu ribia mate tametane kwaea-bakitane ja, tane ribia. Mate kajotabu aribu eku nakanaja jakore kajotabu ajaba sanukiraja jakutai atae ajaba akari sanukiraja jakutai tane ekoronatate. Mate najamutu, raina tane ekoronaja jakore kajotabu aribu kokotuka eku nakakitane ja. ¹⁹ Tiarone kajotabu aribu jisakarakate webotaterate. Ribu sanukirajarone webotaterate. Kajotabu amoara ekira tane waraoto inaminaterate. Tametane nonayakutai najamutu arotu arujuna rujuyakutaisiata eobo yajotowitu bajete. Tiarone kajotabu eku abayakutai tai yakeraja ejobate. Kajotabu eku abamejerei inaminayakutai tai yakeraja ejobate. Najamutu arotu arujuna rujuyakutaisiata tai eobo kwarika ejobate. ²⁰ Yatu aobojona kajotabu akarata ainaminamo aobojona nomeraja kwarika ejobakitane ja. Bariseo-tuma aobojona nomeraja kwarika ejobakitane ja. Tanaja jakore yatu najamutu arotu arujuna rujuyakutaisiata yarunajawitu. ²¹ Yatu iramotuma aribu naminaya. Ribia: Nanaka jau. Naijakutaisi aribu nome toakitane ja, tia. (Ejo. 20:13) ²² Tiarone ine yatu isia ribiaine: Arewitu awaraoto isiko oriji-siraja jakutai taisi aribu nome toate. Awaraoto isanayakutai ira-motuma taisi aribu nome toate. Awaraoto isia iji kayamoni tane ribiakutai oi takunarai. Sanamatanoko ajekunu eku nakaterate. ²³ Iji nobeanaka konate tai Dio moakitane. Konane jiaobojona jiwaraoto tata nakate. Iji ribate: Nomewitu mawarao aobojona maisiko asiraja ja, tate. ²⁴ Tane jinobeanaka moanoko awere iabane jiwaraotoata naru. Narune obojona jisaka nakau. Nakai-tane taisi isiko yakeraja bajenu. Yakeraja bajitane moanokoata naone nobeanaka Dio moate. ²⁵ Jisaka jiwabine ribu nome toanokoata jikonarute tai. Mate jojisi ekia nariaja obojona jisaka eku abanu ribu nome atoatu amojeku jitoanaka jamejerei. Amojeku toakore ribu nome atoatu jakutai oriakajotabu amojeku jitoate mojojutanoko eku jitoa-mejerei. ²⁶ Nomewitu jiisia ribiaine: Amoara kokotukawitu abanaja jakore tatamo ejobonaja. ²⁷ Yatu iramotuma aribu naminaya. Ribia: Tirabakarone tira raisama anibora tanaka jau, tia. (Ejo. 20:14) ²⁸ Tiarone ine yatu isia ribiaine: Tirasiata seorane kwana obono-yakutai tai aobojona isia anibora tae, tiaine. ²⁹ Jimu mojonome tajasaba jakutai jisaba omu esoakanoko tane ejobakore iji taisi nisane utiraja webotanu. Jitejo akari jisaka rijakore jisaba asira. Tiarone jitejo kokotuka sanamatanoko ajekunu eku toakore jisaba asirajawitu. ³⁰ Jimojonome jisaba omu esoakanoko tane ejobakore jewetane utiraja webotanu. Jitejo akari jisaka rijakore jisaba asira. Tiarone jitejo kokotuka sanamatanoko ajekunu eku toakore jisaba asirajawitu. ³¹ Ateje iramotuma ribunae: Tira iabayakutai karata moakunarai, tae. (Kaj. 24:1) ³² Tiarone yatu isia ribiaine: Tira jakutai nibora raisama iamo narukore anibora tirasi iabakore asirena. Tiarone tira jakutai raisama iamo narunaja jakore anibora tirasi iabakore tira nibosebe tane iejoboya. Nibora oriatirasi iabakore raisa taisi nisayakutai tatusebe tane ejoboya, tiaine. ³³ Yatu iramotuma aribu naminaya. Ribia: Airamo awai warayaja ribu moane ribu eku nonakitane ja, tia. (Kaj. 23:21-23) ³⁴ Tiarone yatu isia ribiaine: Ribu nome ribakitane raisama awai waranaka jakotu. Najamutu arotu maribu nome jakutaisi nami-naya, tane ribunaka jakotu. Najamutu jakutai tai Dio arujunoko. ³⁵ O raina arotu maribu nome jakutaisi naminaya tane ribunaka jakotu. Raina jakutai Dio omu abanoko. Jerusalén arotu maribu nome jakutaisi naminaya, tane ribunaka jakotu. Jerusalén jakutai Airamo Uriraja ajanokoina. ³⁶ Kwa isia maribu nome tane ribunaka jau. Iji kwajio jisakarakate kambiatakomoni aneraja ejobamejerei, o jokeraja ejobamejerei. ³⁷ Ribakitane yakeraja ribakotu. Nome, tane ribakore nomewitu jakunarai. Ekira, tane ribakore ekirawitu jakunarai. Ribusebe jakutai asiraja arotuma isimo. ³⁸ Yatu iramotuma aribu naminaya. Ribunae: Jimu eboisikore riboto amu eboisite. Jiai sikarekore riboto taisi ai sikarete, tae. (Ejo. 21:24 Lev. 24:20 Kaj. 19:21) ³⁹ Tiarone yatu isia ribiaine. Warao asiraja jakutaisi riboto oria-moara abanaka jakotu. Jimukaba jisaka nabakore jabisabarakate emi. ⁴⁰ Airamoata jiwabine jiebikamo juranera konarukitane obonokore jikamisarakate moau. ⁴¹ Airamo aunukamo konaru-mejerei jikajotabukore konaru. Aito milla jisaka kajotabukore aito milla manamo konaru. ⁴² Jiebukitane obonoyakutai taisi moau. Jiisimo nebakitane obonoyakutai taisi isia ribunaka: Jienebunajine, tanaka jau. ⁴³ Yatu iramotuma aribu naminaya. Ribunae: Jiraisa jakutai taisi obonote. Jiisiko asiraja jakutai taisi rarijatate, tae. (Lev. 19:18) ⁴⁴ Tiarone yatu isia ribiaine: Yatu isiko asiraja jakutai yatu tatuma obonote. Yatu isia asiraja ribiakutai yatu tatuma yakeraja tane abate. Yatu rarijatayakutai yatu tatuma isiko yakeraja nonate. Yatu isanamatayakutai yatu isanayakutai tane yatu tatuma kware kwai ribate. ⁴⁵ Tametane nonane yatu Rima najamutuata jakutaisi anobotomo tane ejobate. Rima najamutuata jakutai jokoji asiraja anonamo sinajaramejerea, yakeraja anonamo sinajaramejerea tane. Naja inatabaya nomeraja anonamo sebomejerei, nomerajena anonamo sebomejerei tane. ⁴⁶ Yatu obonoyakutai yatu tatumawitu riboto obonokore yatu amoara bitu ja? Ina Roma airamo aribia burata ebumo jakutairakate monukajase nonaya. ⁴⁷ Yatu oriwaraowitu isia yakeraubiara abakore katukane yakeraja nonaya? Dio naminanaja jakutai tatumarakate oriwaraoto isia yakeraubiara abaya. ⁴⁸ Yatu Arima najamutuata jakutai tai yakerajawitu. Taisi monuka yatu yakerajawitu jakotu.

¹ Yatu saneraubiajasi sanetakore eobo yatu mimejerei nona-terate. Mimejerei nonakore yatu Arima najamutuata jakutai yatu amoara moanaja. ² Takore iji saneraubiajasi sanetane eobo kokotuka saba rewaranaka jau. Aobojona manamo jakutai tane nonaya. Orikware nakanoko eku saneraubiajasi sanetaya. Janokoina anaru eku sanetaya. Tane nonaya warao iji yakeraja tane ribamejerei. Nomewitu yatu isia ribiaine: Tatuma amena anona amoara nojoae. ³ Tiarone iji saneraubiajasi sanetakore jimojonome anona jikajamojo naminanaka jakunarai. ⁴ Rijisane sanetate. Takore Jirima iji rijisane nonayakutaisi mite. Mine jinona amoara jimoate. ⁵ Yatu kwai ribakitane aobojona manamo jakutaisi monuka ribunaka jakotu. Obojona manamo jakutai orikware nakanoko eku karamane kwai ribia eobo mimejerei. Janokoina anaru ajituata karamane kwai ribia eobo mimejerei. Nomewitu yatu isia ribiaine: Tatuma amena anona amoara nojoae. ⁶ Iji kwai ribakitane obonone jijanoko anamu eku yarune akojo mukoranu. Taitane Jirima iji minajarone jiisiko ja jakutai taisi isia ribanu. Takore Jirima iji jisamuka nonayakutai taisi mite. Mine jinona amoara jimoate. ⁷ Iji kwai ribiaja ribu eko jakutaisi ribunaka jau Judioana jakutaisi monuka. Dio naminanaja jakutai tatuma tane nonaya. Tatuma ribia: Eraja tane ribakore Dio nokote, tia. ⁸ Tatuma monuka nonanaka jakotu. Yatu mate ebunaja jakore yatu Arima yatu ekirajakutai taisi naminaya. ⁹ Tamaja ribu monuka kwai ribakotu: Karima, najamutuata jakutai, Jiwai yatomanetekunarai. ¹⁰ Jirujuna rujanu. Najamutuata jiaobojona eku abaya. Raineta monukajase jiaobojona eku abakunarai. ¹¹ Kanajoro ama saba jakutai taisi kamoau. ¹² Kaisiko asiraja nonajakutai taisi kware abanaka kaobojona iabayaoko. Taisi monuka kaobojona asiraja kakware abanaka bere. ¹³ Kayakara minaka jau. Tiarone asiraja arotuma amojekumo kejeronu. Iji are Airamo tane rujakitane ja. Iji are jijara taeraja. Iji are Airamowitu. Amén. ¹⁴ Eobo yatu isia asiraja nonakore yatu oriaobojona iabane tatukamo kware abanaka jakitane ja. Tane jakore yatu Arima najamutuata jakutai tai yatu aobojona berete. ¹⁵ Tiarone yatu aobojona iabanaka eobo kware asiraja abate tai. Takore yatu Arima yatu Dio aribu riboto nonayaja, aobojona asiraja nonakore yatu kware abane berenaja. ¹⁶ Aobojona manamo jakutai obonekoyaja amu ekumoniraja abaya. Obonekoyaja eobo mimejerei amu ekumoniraja abaya. Yatu obonekoyaja tatuma sitanaka jakotu. Nomewitu yatu isia ribiaine: Tatuma amena anona amoara nojoae. ¹⁷ Iji obone-koyaja jonaberaja isia jikwa ejo. Jimujoro jojarau. ¹⁸ Iji obone-koyaja eobo naminanaka jamejerei tane nonate. Jirima iji mina-jarone jiisiko ja jakutai taisike naminate. Mine jinona amoara jimoate. ¹⁹ Unukamo eraja orabanaka jakotu raina eku. Raina eku unu-kamo mujotaya. Jiaka yawánae tiaja bajia. Erijisamo janoko yawanane yarune unukamo erijisaya. ²⁰ Tiarone najamutuata unukamo orabakotu. Najamutuata unukamo mujotanaja. Jiaka yawánae tiaja bajinaja. Erijisamo yarunaja unukamo erijisakitane. ²¹ Yatu aunukamo jakutaisiata yatu aobojona tata nakate. ²² Mu jakutai abije monuka katejo saba. Jimu yakeraja jakore jitejo kokotuka jokoma eku bajia. ²³ Tiarone jimu asiraja jakore jitejo kokotuka imajana eku bajete. Jiabije imajana jaja jakore imajanerawitu bajia. ²⁴ Warao jisaka airamo manamo akajotabu tane bajekomoni. Bajekomoni jame jisaka rarijatane araisama obonote. Jisaka aribu eku abane araisama aribu tainate. Yatu Dio akajotabu atae burata akajotabu tane bajekomoni. ²⁵ Yatu isia ribiaine: Obojona isia obonobunaka jakotu: Oko bitu najorote? Oko bitu jobite? Tane obonobunaka jakotu. Tejo isia obonobunaka jakotu: Kajiaka tane kasabamo mite? tanaka jakotu. Obojona amoara najoro amoara kwarikenara? Tejo amo-ara jiaka amoara kwarikenara? ²⁶ Romu kwaia nariakutai tatuma mikotu. Tatuma namunaja. Arinaja. Anamuna abanoko ekira orabakitane. Tiarone yatu Arima najamutuata jakutai tai najoro romu moaya. Yatu amoara romu amoara kwarikenara? ²⁷ Sina obonobiaja jaraboka jisaka atae kwarika kawajate? ²⁸ Tiarone katukeme jiaka isia obonobia bajama? Tokoyo rajikabeku irayakore mikotu. Tokoyo jakutai yaotanaja. Tene-jisanaja. ²⁹ Yatu isia ribiaine: Salomón jakutai jiaka yakera-jawitu orisabanae. Ajiaka yakerajarone Salomón tokoyo ayakara monuka orisabanatanae. ³⁰ Jakawaja jakutai ama rajikabeku ja. Jake kabatane rauwaja tane isia jisabate. Tiarone Dio jiaka jaka moaya. Taisi kwarika Dio jiaka yatu moanatatera? Yatusike sanuka nome abayaraji bajama! ³¹ Tiame obonobiaja ribunaka jakotu: Oko bitu najorote? O Oko bitu jobite? O Oko kajiaka tane kasabamo mite? tanaka jakotu. ³² Judioana tamaja kokotuka kwana najabia. Tiarone yatu Arima najamutuata ja. Tai kokotuka yatu ekirakutaisi naminaya. ³³ Wajiabara Dio arujuna rujuyakutaisi isia obonobukotu. Nona nomeraja Dio aobojona eku jakutai taisi isia obonobukotu. Tane jaja yatu tamaja kokotuka nojote. ³⁴ Jake isia obonobunaka jakotu. Jake jakore kwana obonobukitane ja. Ya jisaka eku sanamatakitane jakutai tai ya jisakawitu saba.

¹ Raisama aribu nome toanaka jakotu Dio yatu aribu nome toanaka jamejerei. ² Yatu raisama aribu nome toayakutai taisi monuka Dio yatu aribu nome toate. Yatu raisama sinarijayakutai taisi monuka Dio yatu sinarijate. ³ Rau akaboto jiwaraoto amu eku jakutaisi mija. Tiarone katukeme rau uriraja jimu eku jakutaisi minaja bajama? ⁴ Rau uriraja jimu eku jarone iji jiwaraoto isia ribia. Ribane: Rau akaboto jimu ekumo nisatine, tia. Iji katukeme tane ribia? ⁵ Jiaobojona manamoraji bajama! Wajiabara jimu ekumo rau uriraja jakutaisi nisanu. Tatukamo yakeraja mite jiwaraoto amu ekumo rau akaboto nisa-kitane. ⁶ Yakerajawitu jakutai taisi beoro moanaka jakotu. Joyo perla amoara uriraja jakutai taisi iburejubaka moanaka jakotu. Moakore beoro iburejubaka tane moajakutaisi sakaubune yatu tijakane naobote. ⁷ Ebukotu. Ebukore Dio yatu moate. Najabukotu. Najabune yatu mite. Janoko akojo nonarokotu. Nonarokore yatu saba ijakate. ⁸ Ebiakutai tai nojote. Najabiakutai tairakate mite. Janoko akojo nonaroyakutai taisi saba akojo ijakate. ⁹ Yatu auka bãu yatu ebukore joyo moate mojoro? Moanaja. ¹⁰ Auka jomakaba ebukore juba moate mojoro? Moanaja. ¹¹ Yatu aobojona asirajarone yatu aunukamo yakeraja yatu anobotomo moakitane naminaya. Yatu Arima najamutuata jakutaisi ebukore yakerajawitu jakutaisi yatu moate. ¹² Yatu eobo yatu isiko nonamejereakutai taijase tatuma isiko kokotuka nonakotu. Moisés akajotabu akarata tane inaminaya. Dio kware arewaramo akarata tane inaminaya. ¹³ Janoko akojo koberajasi ekia yarukotu. Atae janoko akojo ja. Uriraja, eraja saba tane. Jojisirakate ja. Uriraja, eraja saba tane. Tatuma ekia nariakutai ekoronokoata nabakaya. Ekia anarumo era. ¹⁴ Atae janoko akojo raisa ja. Koberaja, sanukiraja tane. Jojisirakate ja. Koberaja, sanukiraja tane. Tatuma ekia nariakutai obojona jiroata nabakaya. Jojisi anajabumo erajena. ¹⁵ Dio kware arewaramo tane oritoayakutai tatuma aribu yatu nokoterate. Tatuma obeja tane oritoayaja naoya, tiarone tatuma tobe jawanerajarone. ¹⁶ Yatu tatuma naminate anona isia. Jarujiro akwaja monoana. Boboroira akwaja merejiana. ¹⁷ Takore rau yakeraja jakutai kokotuka akwaja yakeraja ejoboya. Rau ayari jakutai taisi akwaja ayari tane ejoboya. ¹⁸ Rau yakeraja jakutai taisi akwaja ayari tane kwajakomoni. Rau ayari jakutaisi akwaja yakeraja kwajakomoni tane. ¹⁹ Rau akwaja yakeraja ekirakutai kokotuka kabatane jekuneku toate. ²⁰ Tametane yatu tatuma naminate anona isia. ²¹ Maisia Mairamo, Mairamo, tane ribiakutai tatuma kokotuka najamutu arotu arujuna rujuyakutaisiata yarunaja. Tiarone Marima najamutuata jakutai taisi aobojona eku abayakutai tai-sike yarute. ²² Tai ya eku warao eraja maisia ribate: Kairamo, Kairamo, jiribia rewaraeko. Jiribia jebu inatabaeko. Jiribia nona taeraja eraja nonaeko, tate. ²³ Tiarone ine ribatine: Yatu nami-nanakawitu jajaine. Memo jakotu. Yatu asirajasi anonamo jaku-tai memo jakotu, tatine. ²⁴ Takore maribu nokone eku abayakutai tai warao musabe-raja monuka. Warao jakutai ajanoko joyo arai nonae. ²⁵ Takore naja eboae. Nojaba joirae. Ajaka janoko riboto rubujuae. Tiarone janoko joyo arai nonajame are nakanatanae. ²⁶ Ama maribu nokone eku abanaja jakutai tai nibora bure monuka. Nibora jakutai ajanoko kajewaja arai nonae. ²⁷ Takore naja eboae. Nojaba joirae. Ajaka janoko riboto rubujuae. Takore janoko kwana nakae, taeyama. ²⁸ Tane Jesú rewara riwarakore waraosebeira kwana retaubu-yaja bajibuae ainamina aobojona. ²⁹ Jesú rewarayaja airamo aribu jaja rewarae. Kajotabu akarata ainaminamo monuka inaminanatanae. Tiame warao retaubuae.

¹ Takore Jesú jotakwayatamo nanakakore waraosebeira taisi iamo narubuae. ² Takore nibora jisaka aboisi sabana jaja jakutai Jesú tata nabakanae. Jesú amujaba jinamane rujane isia ribane: Mairamo, iji obonokore maberekitane jisaba yakera, taeyama. ³ Takore Jesú amojo isia taisi torene: Obonoyaine, tae. Jibere-aine rijana, taeyama. Tane ribakore wabayakutaisi aboisi ekko tae rijana. Beréae tiaja bajinae. ⁴ Takore Jesú taisi isia ribane: Noko anaka. Raisama saba rewaranaka naru. Saseroteata naba-kane jitejo emi. Ateje Moisés kajotabuae nobeanaka Dio moa-mejerei. Moisés aribu eku moau. Moakore warao iji beréae tiakutaisi naminate. ⁵ Taitane Jesú janokoina Capernaum eku yariakore, yaoromo siento jisaka akabitana Jesú tata nabakane ebuae. ⁶ Isia ribane: Mairamo, majanokoata maneburatu wabayaja ja. Atejo mara-márae tiaja ja. Atejo ajerajawituama. ⁷ Jesú ribane: Tata narune ibajukatine, tae. ⁸ Yaoromo akabitana jakutai Jesú riboto ribunae. Ribane: Mairamo, ine mamoara ekira iji majanoko eku nabakamejerei. Iji narunaka ribakore maneburatu bajukate. ⁹ Inerakate raisama akajotabu ine. Aribu eku abakitane jaine. Inerakate manebu jaine. Maribu eku abakitane ja. Ine jisaka isia ribane: Naru, ta-kore naria. Araisama isia ribane: Nao, takore naoya. Maneburatu isia ribane: Tamajasi nonau, takore nonaya, tae. ¹⁰ Takore Jesú kabitana aribu nokone retayaja bajinae. Taitane iamo anarumo isia ribane: Nomewitu yatu isia ribiaine: Israeltumarakate tamaja nibora monuka nome abayakore minatanaine. ¹¹ Yatu isia ribiaine: Warao eraja ya riboto tajasabamo naote. Warao eraja ya iamoatamo naote. Najamutu arotu arujuna rujuyakutaisiata tatuma najorokitane norujate. Tatuma Abraham, Isaac, Jacob tane isiko mesa yanorujate najorokitane. ¹² Tiarone najamutu arotu rujakore yatu najamutu arao monukarone yakareku yatu toate. Tata imajana ja. Tata yatu onate. Tata yatu ai kuokuo tate, taeyama. ¹³ Tane Jesú akabitana isia ribane: Jijanoko tata naru. Iji nome abanajakutai taisi eku ejobate, tae. Takore tai ya asinarijayatukamo kabitana aneburatu yakeraja bajinae. ¹⁴ Takore Jesú Pedro ajanokoata naruae. Nabakane Pedro arabai riara ebe wabayaja jakore miae. ¹⁵ Tane amojo torinae. Torekore ariara ekko tae. Takore karamane tatuma saba najoro jisabakitane jotananaeyama. ¹⁶ Takore ya soto takore warao jebu jaja eraja jakutai Jesú tata konae ibajukamejerei. Konakore Jesú ribu jisaka isia jebu inatabae. Muanayakutai kokotuka ibajukaubuae. ¹⁷ Tane nonae Isaias aribu eku nakamejerei. Isaias Dio kware arewaratu jakutai ribane: Tai kawaba taerena jakutai, kawaba taeraja jakutai tane konaruae, taeyama. (Isa. 53:4) ¹⁸ Takore waraosebeira Jesú sibaji takore Jesú anebutu isia ribane: Jabisabaya imakaki, tae. ¹⁹ Takore kajotabu akarata ainaminatu jisaka Jesú yanabakane ribunae. Ribane: Mainaminatu, iji nariakutaisi kaika inerakate jiiamo narutine, tae. ²⁰ Takore Jesú taisi riboto ribane: Ana jakutai toto eku ubaya. Romu kwaia jakutai aja eku ubaya. Tiarone warao tane nakaja-kutaisi aubanoko ekira, taeyama. ²¹ Anebu kawanamo jisaka ribane: Mairamo, mate jisaba yakerakore ine narune rimasi joitane tane jiiamo narutine, tae. ²² Takore Jesú taisi riboto ribane: Maiamo nao. Muánae tiakutai tatuma eobo muánae tiakutaisi joitakunarai, taeyama. ²³ Taitane Jesú waeku nabakanae. Aneburakate waeku naba-kaubuae. ²⁴ Takore rijana ajaka rubujuae. Kwana rubujuajame nojaba ai waeku nakae. Tiarone Jesú are ubaya. ²⁵ Takore anebu narune Jesú enominane ribane: Kairamo, kasanetau! Oko rija-kitia rijana! tae. ²⁶ Takore Jesú ribane: Yatu katukeme retaya? Yatu sanuka nome abayaraji bajama! Tane karamane ajaka, nojaba ai tane sabajiae. Sabajikore kokotuka yaorane najomonae. ²⁷ Takore anebu retayaja bajibuae. Ribane: Tamaja sina bajama? Ribakore ajaka, nojabarakate aribu nokoyaja jajaraji bajama! ²⁸ Takore Jesú aotanaira jabisaba nabakanae. Ina Gerasín tata nabakakore nibo manamo mujuina ekumo ejobane Jesú yanaba-kanae. Reko jebutuma isiko jaja. Jawaneraja jame warao jisakarakate jojisi ekia narukomoni. ²⁹ Tatuma rokojotae. Ribane: Iji katukeme jiaobojona kaisia abaya bajama? Iji Jesú Dio Auka. Mate asinarija ekuanarone rijana kaisanamatakitane naoaera? taeyama. ³⁰ Kemosabuka iburejubaka eraja najoroyaja jaja. ³¹ Jebu ja-kutai Jesú ebuae. Ribane: Emo kainatabakitane jakore ibure-jubakeku kaiyaru, tae. ³² Takore Jesú ribane: Yarukotu, tae. Takore jebu niboto ekumo ejobane iburejubakeku yaruae. Yaru-kore iburejubaka kokotuka jotakwa araimo kujurubune, joni borarane joni muanaeyama. ³³ Takore ibure ayaoromo nabukarene kurujubuae. Janokoi-neta nabakane kokotuka rewarae. Nibo jebutuma jaja jakutaisi isia rewarae. ³⁴ Rewarakore janokoina arao kokotuka Jesú tata ejobonae. Tatuma Jesú mitane ebuae aina ekumo narumejerei.

¹ Takore Jesú waeku nabakane atanejese aotanaira imakanae. Imakane oriajanokoineta nabakanae. ² Tata nibora atejo maramárae tiakutai taisi Jesú tata konaruae. Aubanoko isiko konaruae. Konakore Jesú niborama akonarumo nome abayakore naminae. Naminaitane maramárae tiakutaisi isia ribunae. Ribane: Mauka, retanaka jau. Jiaobojona asiraja jikware abanaka bereaine rijana, taeyama. ³ Amasike kajotabu akarata ainaminamo kawanamo obono-buae. Tamaja Dio isia asiraja ribiaraji, tae. ⁴ Obonobiakore Jesú tatuma aobonobu naminane ribane: Yatu katukeme asiraja obo-nobia? ⁵ Ribu kasikaja yatu saba yakera? Ribane: Ine jiaobojona asiraja jikware abanaka bereaine, tane takore yakerenara? O ribane: Karamane naru, tane takore yakerenara? ⁶ Warao tane nakajakutai raina eku ribu ja obojona asiraja waraoto kware abanaka berekitane. Yatu taisi naminamejerei ribatine, tae. Tane maramárae tiakutaisi isia ribane: Karamane jiaubanoko ekobo-tane jijanokoata naru, taeyama. ⁷ Takore wabayakutai karamane ajanokoata naruae. ⁸ Warao-sebeira taisi mitane retaubuae. Dio ribu taeraja waraoto moajame Dio yakeraja jae, tane ribunaeyama. ⁹ Takore Jesú tatukamo narune nibora awai Mateo jajasi miae. Mateo jakutai Roma airamo aribia burata ebutu. Burata ebunoko eku rujúnae takore miae. Mitane isia ribane: Maiamo nao, tae. Takore Mateo karamane iamo naruae. ¹⁰ Takore Jesú janokeku najoroyakore Roma airamo aribia burata ebumo Jesú isiko mesa yanorujuae, anebu isiko tane. Atae asirajasi anonamo jaja. ¹¹ Takore Bariseotuma mitane anebu renokoae: Yatu ainaminatu katukeme burata ebumo isiko asirajasi anonamo isiko tane najoroya bajama? tae. ¹² Takore Jesú tatuma aribu nokoitane ribane: Wabanaja jakutai tai yarokotatu najabunaja. Muanayakutaisike yarokotatu najabia. ¹³ Narune Jabataja aribu naminakotu. Ribia: Ine yatu romu masaba namejerenajine. Tiarone ine yatu akobe raisama isia ajeramejereaine, tia. (Ose.6:6) Ine nomerajasi anonamo yejebukitane naonatanaine. Tiarone asirajasi anonamo yejebukitane naoaine aobojona ibaremejerei, tae. ¹⁴ Takore Juan Joni Ekobutu jakutai taisi anebu Jesú yana-bakae. Yanabakane renokoae. Oko eraja tane obonekoya. Bari-seo aneburakate eraja tane obonekoya. Tiarone jinebu katukeme obonekonaja bajama? taeyama. ¹⁵ Takore Jesú ribane: Jotarao kasayaja noara abaya. Nibora kasatu mate jakore eobo obonekotera? Asinarija eku nakakore kasatu tatuma ebikamo konarute. Takoresike tatuma obonekote. ¹⁶ Warao jisakarakate jiaka nobo jiaka jiro isia iyakaratanaja. Iyakaratakore jiaka jiro kabukatane jiaka nobo yawanate. Tane ebe jakutaisi kwarika yawanate. ¹⁷ Warao jisakarakate bino jiro jakutai anamu joronona nobo eku esojonaja. Esojokore anamu obate. Obakore bino rijate. Anamurakate rijate. Tiame bino jiro jakutai anamu jiro eku esojote. Tane jakore anamu ajoka tane yakeraja ejobate, taeyama. ¹⁸ Tane Jesú mate ribiakore Judiotuma airamo jisaka Jesú yanabakane jinamane rujunae. Ribane: Maukatira amawitu wabae. Tiarone iji naone jimojo taisi arai abakore nominate, taeyama. ¹⁹ Takore Jesú karamane anebu isiko iamo naruae. ²⁰ Takore tira wabayaja jaja. Ajotu isia inawaja mojoreko kware manamo isia wabayaja jajayama. Tira Jesú arai tajasabaya naone ajiaka akojo torinae. ²¹ Tira obonobuae: Isia ribunaka ajiaka torekore bajukatine, tae. ²² Tiarone Jesú taisi kware barene miae. Mitane ribane: Retanaka, maukatira. Iji nome abanajame bajukanae, taeyama. Takore tatukamo tira bajukánae tiaja bajinae. ²³ Tatukamo Jesú airamo ajanokoata nabakaitane esemoi ekuitamo miae. Eobo wiyawiyayakore miae. ²⁴ Mitane ribane: Emo jakotu. Iboma jakutai wabayana. Tai ubaya, taeyama. Takore eobo Jesú ekotubiaja enoaeyama. ²⁵ Ta-kore Jesú eobo iejoboitane anamu eku yaruae. Eku yarune iboma amojo oakore karamunae. ²⁶ Tatukamo kwaeabanajakutaisi isia ina kokotukanea rewarae. ²⁷ Jesú tatukamo ejobakore mioni manamo Jesú iamo naruae. Rokojotayaja ribane: David Auka, oko jisaba sanerakore kakware barenu, taeyama. ²⁸ Takore Jesú janokeku yarukore mioni Jesú yanabakanae. Yanabakayakore Jesú tatuma renokoae. Ine yatu ibajukakitane jakutai yatu taisi nome abayara? tae. Takore: Airamo, nome abayaoko, taeyama. ²⁹ Takore Jesú tatuma amu torene ribane: Yatu nome abayakutaisi kaika bajukate, taeyama. ³⁰ Takore amu yakeraja bajinae. Takore Jesú tatuma reirine ribane: Tamajasi isia raisama saba rewaranaka jakotu, tae. ³¹ Tia-rone ejobanewitu ina kokotukanea Jesú nonajakutaisi isia rewa-raeyama. ³² Tatuma ejoboyakore eobo niborama Jesú tata konae. Nibora jakutai jebu jaja jame ribuoni jaja. ³³ Takore Jesú jebu niborama ekumo inatabakore ribuoni ribunae rijana. Ribakore warao retane ribane: Ebe Israeltuma kawanaya nona tamajasi minaja, taeyama. ³⁴ Tiarone Bariseo ribane: Tamaja jebuira aribia jebu inata-baya, taeyama. ³⁵ Takore Jesú janokoina kokotuka, janokoina aukamo koko-tuka tane ekia naruae. Kokotukanea orikware nakanoko eku ina-minae. Dio arujuna rujuyakutaisi isia rewarae. Waba taeraja ja-kutai, waba taerena jakutai tane kokotuka ibajukanae. ³⁶ Wa-raosebeira mitane akobe tatuma isia ajerae. Warao jakutai saneraja. Obeja ayaorotu ekiraja jaja monuka tatuma jisajísae tiaja. Tiame tatuma isia Jesú akobe ajerae. ³⁷ Tane anebu isia ribane: Nomewitu namuna akwaja eraja tiarone arimo erayana. ³⁸ Tiame namuna akwaja arimo tane waraoto inatabamejerei namuna arotuma ebukotu, taeyama.

¹ Taitane Jesú orianebu mojoreko kware manamo yejebuae. Yejebune ribu moae jebu Dio saba wisi jakutai waraoto ekumo inatabamejerei. Waba taeraja jakutai, waba taerena jakutai tane kokotuka ibajukamejerei Jesú ribu tatuma moae. ² Inatabatuma mojoreko kware manamo jakutai tatuma awai tamaja. Wajiabara Simón. Awai raisa Pedro. Pedro araka Andrés. Atae Jacobo, araka Juan tane. Tatuma Zebedeo anobotomo. ³ Atae Felipe, Bartolomé, Tomás, Mateo tane. Mateo jakutai, tai Roma airamo aribia burata ebutu. Atae Jacobo Alfeo auka. Atae Lebeo. Awai raisa Tadeo. ⁴ Atae Simón. Simón jakutai Ina Airamo Riboto sabasabamo. Atae Judas Kariot arotu. Judas jakutai tai Jesú awabitu. ⁵ Jesú tamaja nibo mojoreko kware manamo inatabae. Inata-bayaja ribane: Judio ainena jakutaisiata narunaka jakotu. Ina Samaria ajanokoineku yarunaka jakotu. ⁶ Israeltuma jakutai tatuma obeja rijánae tiakutai monuka. Tatumeta narukotu rewarakitane. ⁷ Naruitane tatuma saba rewarakotu: Najamutu arotu arujuna rujuyakutai yatu awere ja rijana, takotu. ⁸ Boisi sabana jakutaisi ibajukakotu. Muanayakutaisi ibajukakotu. Waba jakutaisi enominakotu. Jebu jakutai waraoto ekumo inatabakotu. Nobeanaka yatu moae. Tiajatiji nobeanaka raisama moakotu. ⁹ Yatu aburata abanoko eku burata simo konarunaka jakotu. Burata joko konarunaka. Besetarakate konarunaka. ¹⁰ Yatu akuju saba wanaba konarunaka narute. Kamisa jisaka isiko narute. Barukata jisaka isiko narute. Natorobu omi narute. Yatu yaotayakore najoro yatu moakitane ja. ¹¹ Janokoineta nabakane o janokoina sanuka tata nabakane obo-jonabaka jaja najabute ajanokeku ubakitane. Yaota riwarakore tatukamo ejobate. ¹² Janokeku yarune yakeraubiara abayaja, Inareraja bajekotu, takotu. ¹³ Janoko arao amoara ja jakore inareraja bajete. Janoko arao amoara ekiraja jakore inareraja tane abanaka jakotu. ¹⁴ Takore yatu etuwaranaja jakore o yatu aribu nokokitane obononaja jakore janoko ekumo ejobakotu. O jano-koina ekumo ejobakotu. Ejoboyaja joboto ajuju jakutai yatu omu isimo inarimakotu. ¹⁵ Nomewitu yatu isia ribiaine: Ya jisaka eku Dio ribu kokotuka nome toate. Nome toane Sodoma aina araoto isanamatate. Gomorra aina araoto isanamatate. Tiarone janokoina arao yatu etuwaranatanajakutai tatuma kwarika isanamatate, taeyama. ¹⁶ Miki anaka! Yatu obeja monuka tobe kawanaya inataba-yaine. Juba monuka musaberaja jakotu tiarone wiji monuka raoberaja bajekotu. ¹⁷ Seorobukotu. Eobo naone ribu nome atoanokoata yatu konarute. Orikware nakanoko eku yatu yewe-rete. ¹⁸ Yatu masabasabamotiji eobo yatu kobenajoroata kona-rute. Airamoata konarute. Yatu konarukore maisia rewarate tatuma saba. Judioana saba rewarate. ¹⁹ Tiarone yatu emojoju-takore Oko katukane ribate bajama tane obonobunaka jakotu. Asinarija eku nakakore Dio Amejokojira ribu yatu moate rewa-ramejerei. ²⁰ Ribakore yatuwitu ribunatate tiarone yatu Arimasi Amejokojira yatu kaika jakutai tai ribate. ²¹ Araje jakutai arakama wabite namejerei. Arima orianoboto wabite. Nobotomo jakutai oriairamotuma riboto ejobate. Namejerete. ²² Yatu masa-basabamotiji raina arao kokotuka yatu rarijatate. Ya ayajuata tae-ratayakutai Dio taisi aobojona ibajukate. ²³ Janokoina jisaka eku yatu isanamatakore janokoina raisameta jakakotu. Nomewitu yatu isia ribiaine: Mate Israeltuma ajanokoinatuma ekia jakakitane jeronaja jakore warao tane nakajakutai naote. ²⁴ Ateributu jakutai ainaminatu kwarikena. Aneburatu jakutai airamo kwarikena. ²⁵ Ateributu ainaminatu monuka ejobakore saba yakeraja bajekitane ja. Akajotabu airamo monuka ejobakore saba yakeraja bajekitane ja. Eobo janoko arotuma isia Iji Beel-zebú tane ribunae. Tane ribaitane janoko arotuma awaraoto isia asiraja kwarika ribate. ²⁶ Tiame waraoto nojanaka jakotu. Yaorane sijákae tiakutai kokotuka yakareku toate. Erijísae tiakutairakate kokotuka nami-nate. ²⁷ Ine imaya yatu isia ribiakutai jokomaya rewarakotu. Ine rijisane yatu isia ribiakutai janokotuma akwayatukamo rewarakotu. ²⁸ Tejowitu naijakutai taisi nojanaka jakotu. Tai obojona nakomoni. Atae raisa ja. Tai tejo, obojona tane sanamatanoko ajekunu eku iekorakitane ribu ja. Taisike nojate. ²⁹ Romu aukamo manamo amoara kwarutio jisakayanara? Romu aukamo amoara ekirarone Marima najamutuata jakutai namejerenaja jakore nanaja. ³⁰ Yatu akwajio kokotukarakate asinarija ja. ³¹ Tiame retanaka jakotu. Yatu amoara romu aukamo erajasi amoara kwarika, tiaine. ³² Kawanamo eobo amujaba ribate: Ine Jesú sabasabamo ine, tate. Takore inerakate Marima najamutuata jakutaisi isia riba-tine: Tai mamusaba, tatine. ³³ Tiarone kawanamo ribate: Ine Jesú naminanajine, tate. Takore inerakate Marima najamutuata jakutaisi isia ribatine: Taisi naminanajine, tatine, taeyama. ³⁴ Ribunaka jakotu: Jesú naoae raina araoto inareraja tane abakitane, tanaka jakotu. Raina araoto inareraja abakitane naona-tanaine. Tiarone orikuba abakitane naoaine. ³⁵ Ine naoaine auka arimasi riboto abakitane. Aukatira aranima riboto abakitane naoaine. Anatojorani arabaisi riboto abakitane naoaine. ³⁶ Takore janoko arao oriajisaka teorijisite. (Miq.7:6) ³⁷ Nibora jisaka makwarika arimasi obonoyakutai taisi amoara ekira mawarao takitane. Aranima makwarika obonoyakutai taisi amoara ekira mawarao takitane. Aukama o aukajisi makwarika obonoyakutai taisi amoara ekira mawarao takitane. ³⁸ Maiamo narukitane akuru oanaja jakutai taisi amoara ekira mawarao takitane. ³⁹ Wite are ubakitane obonoyakutai tai ubanatate. Tiarone maobojona wabayakutai tai are ubate. ⁴⁰ Yatu etuwarayakutai tai metuwaraya. Metuwarayakutai mainatabatu etuwaraya. ⁴¹ Dio kware arewaratu etuwarayakutai rewaratu Dio aribia naoajame, tai amoara nojote. Rewaratu moayakutaisi monuka moate. Nibora nomeraja etuwarayakutai nibora nomeraja jame, tai amoara nojote. Nibora nomerajasi moayakutaisi monuka moate. ⁴² Sanukiraja jo rairaja moaya-kutai maneburatu aribia tai amoara minaka bajinatate. Nomewitu yatu isia ribiaine: Taisi amoara mite, tiaine, taeyama.

¹ Tane Jesú anebu mojoreko kware manamo inaminaitane tatamo ejobonae. Tai ina ajanokoina ekia inaminakitane rewarakitane tane naruae. ² Juan mojojutanoko eku jaja, Jesú anona isia nokoae. No-koitane anebu manamo inatabae. ³ Jesú renokomejerei inatabae. Ribane: Juan ribia: Iji Akirito naokitane jakutaiyanara? O oko atae raisama yawakate mojoro? tia, taeyama. ⁴ Takore Jesú tatuma riboto ribane: Yatu miajakutai, yatu nokoajakutai tane, Juanata narune saba rewarakotu. ⁵ Mioni jakutai seoroya. Wakawaka jakutai yã tia. Boisi sabana jakutai beréae tiaja bajia. Kojokonare jakutai nokoya. Warao wabane nominia. Rewara yakera jakutai saneraubiajasi saba rewaraya. Tane rewarakotu. ⁶ Maobojona omu esoakanaja jakutai taisike ekeiraja bajete, takotu, taeyama. ⁷ Takore inatabatuma narukore Jesú waraoto saba rewara-kitane jotananae. Juan isia rewarae. Ribane: Yatu jarawaja tata ejobaitane katukayaja mikitane naruae? Sejoro aroko ajaka ebe rikoyakore mikitane ejobonae mojoro? ⁸ Tanaja jakore katuka-yaja mikitane naruae? Nibora ajiaka yakerajawitu jakutaisi mikitane naruaera? Jiaka yakerajawitu orisabayakutai tatuma airamowitu ajanokeku ubaya. ⁹ Amasike katukayaja mikitane naruae? Dio kware arewaratu mikitane naruaera? Yatu isia ribiaine: Nomewitu Juan jakutai tai Dio kware arewaratu. Juan amoara Dio kware arewaramo amoara kwarika. ¹⁰ Jabataja jakutai Juan isia ribia: Noko anaka. Mainataba jiebikaya inatabayaine. Tai jiebe jijojisi iyakaratate, tia. (Mal.3:1) ¹¹ Nomewitu yatu isia ribiaine: Juan Joni Ekobutu jakutai amoara raina arao kokotuka amoara kwarika. Tiarone najamutu arotu arujuna rujuyakutaisiata amoara ekirakutai taisi amoara Juan amoara kwarika ejoboya. ¹² Juan Joni Ekobutuatukamo ama saba warao najamutu arotu arujuna rujuyakutaisi riboto kwana orikubaya kwarikakitane. ¹³ Dio kware arewaramo ebe jakutai mate naokitane jakutaisi isia rewarae. Moisés akajotabu akarata eku naokitane jakutaisi isia rewarae. Juan mate naonaja jakore tatuma kokotuka rewarae. ¹⁴ Dio kware arewaratu ebe jakutai awai Elias. Tai naokitane ja. Tai Juan rijana. Yatu taisi yajorabakitane obonokore yajora-bakotu. ¹⁵ Akojoko ja jakutai maribu nokokunarai. ¹⁶ Warao ama jakutai katukane ine tatuma isia asita abate? Tatuma nemokomoko monuka. Nemokomoko jakutai wabinoko eku norujuya kotubukitane. Amusaba saba rokojotaya. ¹⁷ Ribia: Oko esemoiaerone yatu jojonatanae. Oko waba yaonaerone yatu onanaja, tia. ¹⁸ Juan naone janokoina arao monuka najoronaja, jobinaja tane naoae. Tiame warao ama jakutai ribia: Juan jebu jaja rijana, tia. ¹⁹ Tatukamo warao tane nakajakutai naone, najoroyaja jobiaja tane naoae. Tiame yatu ribia: Tamaja najoroira, binoroko tane. Tamaja asirajasi anonamo, Roma airamo aribia burata ebumo tane amuaraisataya, tia. Warao musaberakutai ribia: Musaberaja bajekitane jakutai tai nomeraja, tia, taeyama. ²⁰ Taitane Jesú janokoina araoto sabajikitane jotananae. Nona taeraja eraja janokoina eku nonaerone janokoina arao aobojona ibarinatanae. Tiame sabajiae. ²¹ Ribane: Yatu Corazín arao amájae tane ribate. Yatu Betsaida arao amájae tane ribate. Yatu ajanokoina eku nona taeraja nonae. Ina Tiro ajanokoina eku, ina Sidón ajanokoina eku tane nona taeraja taisi monuka nonajakore arao aobojona ibarekuna. Aobojona ibariaja jiaka jumatu abakuna, atejo isia juju abakuna tane. ²² Tiarone yatu isia ribiaine: Ribu nome toakitane jakutaisi aya eku Tiro arao Sidón arao tane sanamatate. Tiarone tatuma asanamata yatu asanamata yajoto ejobate. ²³ Yatu Capernaum arao, eobo ayakara kwarika yatu abanae. Tiarone waba atuwaranokoata yatu inanakate. Capernaum eku nona taeraja nonae. Sodoma aina eku nona taeraja taisi monuka nona-jakore Sodoma ama are jakuna. ²⁴ Tiarone yatu isia ribiaine: Ribu nome toakitane jakutaisi aya eku Sodoma arao sanamatate. Tiarone yatu asanamata Sodoma araoto asanamata kwarika ejo-bate, taeyama. ²⁵ Ya taisi eku Jesú riboto ribane: Marima, iji najamutu Aira-mo, atae raina Airamo tane. Jiisia yakeraja jae tane ribiaine. Iji naminamo jakutaisi ebikamo naminakitane jakutaisi erijisae naminanaka jamejerei. Iji musaberaja jakutaisi ebikamo nami-nakitane jakutaisi erijisae tane. Tiarone nemokomoko monuka jakutaisi emiae naminamejerei. ²⁶ Nomewitu, Rima, jiaobojona ekuwitu jame tametane iji nonae. ²⁷ Marima kokotuka mamojeku abanae. Jisakarakate Aukama yaorane naminanaja. Tiarone Rimasike Aukama naminaya. Jisaka-rakate Rimasi yaorane naminanaja. Aukasike Arimasi naminaya. Auka Arimasi isia raisama inaminamejerekore tairakate Arimasi naminate. ²⁸ Yatu kokotuka yaota ebe wakutayakutai ineata nabakakotu. Uru ebe wakutayakutai yaturakate ineata nabaka-kotu. Nabakakore ine yatu tuwaramejeretine. ²⁹ Maobojona rao-beraja jame, makoberakate raoberaja jame mayaota yaotakotu. Mainamina naminakotu. Tane takore yatu tuwara mite. ³⁰ Ma-yaota jakutai taerena. Uru ine abayakutai tai okera, tae.

¹ Ya tuatakore ya tuwara eku Jesú rajikaba ekia naruae. Anebu nojeraja jame tiriko ajojo arene arene tane aumu najoroae. ² Arikore Bariseotuma mitane Jesú isia ribane: Mi rijana. Kajotabu akarata aribu ya tuwara eku tametane yaota-mejerenaja. Yaotamejerenajarone jinebu are yaotaya, tae. ³ Tiarone Jesú ribane: Yatu David anona isia teribunatanaera? David anebu isiko nojeraja jaja. ⁴ Tane kwai ribunoko eku yarune bãu Dio amujaba abánae tiakutaisi najoroae. Kajotabu akarata aribu jakutai David najoromejerenaja. Anebu najoro-mejerenaja tane. Bãu jakutai saserotetumawitu anajoro. ⁵ Moisés akarata eku akajotabu teribunatanaera yatu? Saserotetuma kwai ribunoko eku yaotayakutai ya tuwara ekurakate tuwaranaja. Tuwaranajarone tatuma saba obojona asirajena. ⁶ Yatu isia ribiaine: Ine tamatuka jakutai mayakara kwai ribunoko ayakara kwarika. ⁷ Yatu Jabataja aribu nokonaja. Jabataja taisi isia ribia: Dio ribia: Ine yatu romu masaba namejerenajine. Tiarone ine yatu akobe raisama isia ajeramejereaine, tia, taeyama. (Ose. 6:6) Yatu tamaja ribu nokokore yatu warao sanamatamejerenatakuna. Tatuma asiraja nonanatanae. ⁸ Warao tane nakajakutai ribu ja ya tuwara isia. ⁹ Taitane Jesú tatukamo narune orikware nakanoko eku yaruae. ¹⁰ Orikware nakanoko eku nibora amojo wájae tiaja jaja. Eobo Jesú asiraja tane abakitane obonoajame Jesú renokoae. Ribane: Ya tuwara eku wabayakutaisi ibajukakitane Dio akajotabu ekuanara? tae. ¹¹ Renokokore Jesú tatuma riboto ribane: Ya tuwara eku yatu aobeja toto eku nakakore nisanatatera? ¹² Niborama amoara obeja amoara kwarikenara bajama! Tiame ya tuwara eku yakeraja nonakitane yakera, tae. ¹³ Taitane niborama isia ribane: Jimojo enometanu, tae. Takore amojo enometakore araisama monuka yakeraja bajinae. ¹⁴ Takore Bariseotuma ejobane Jesú nakitane oriisiko rewarae. ¹⁵ Takore Jesú taisi naminane tatukamo naruae. Narukore warao eraja taisi iamo naruae. Jesú muanayakutai kokotuka ibajukanae. ¹⁶ Ibajukaitane kajotabuae isia rewaranaka jamejerei. ¹⁷ Tane nonae Isaias aribu eku nakamejerei. ¹⁸ Isaias Dio kware arewa-ratu jakutai ribane: Tamaja makajotabu. Taisi mibune nisanaine. Mamejokojira taisi aobojona eku abatine. Taisi obonoyaine. Tai maobojona ekuwitu. Makajotabu jakutai ine nome toakitane jakutaisi isia rewarate. Warao kokotukanea saba rewarate. ¹⁹ Orikubanatate. Rokojotanatate. Janokoina anaru eku aribu nokonatate. ²⁰ Sejoro autia kasínae tai karinatate. Abije yakeraja rokunajarone taisi inarenatate. Mate arujuna yakeraja rujunaja jakore tane nonate. ²¹ Takore warao kokotuka taisi awai aobojona yawakate. (Isa. 42:1-4) Tane Isaias jabatae. ²² Takore nibora jebu jaja jakutaisi Jesú tata konaruae. Jebu aobojona nibora mioni, ribuoni tane. Jesú taisi ibajukakore seo-ronae ribunae tane. ²³ Takore amimo kokotuka kwana retayaja bajibuae. Ribane: Tamaja David Aukenara? tae. ²⁴ Tiarone Bariseotuma taisi nokoitane ribane: Tamaja Beel-zebú aribia jebu inatabaya. Beelzebú jakutai tai jebu airamo, taeyama. ²⁵ Takore Jesú tatuma aobonobu naminae. Naminane ribane: Ina arao jisajisane oriisiko orikubakore oriiekoroya. Janokoina arao jisajisane orikubakore o oriwarao jisajisane orikubakore ta-tuma kokotuka taeratakomoni. ²⁶ Satanás Satanasjase inata-bakore jisajisae rijana. Katukane arujuna taerate bajama? ²⁷ Ine Beelzebú aribia jebu inatabakore yatu anobotomo sinama aribia inatabaya? Tatuma rijana yatu aribu nome toate. ²⁸ Tiarone ine Dio Amejokojira aribia jebu inatabayakore nomewitu Dio yatu isiko arujuna rujunae rijana. ²⁹ Warao taerajasi ajanoko eku yarukitane obonoyakutai katukane yarute? Aunukamo konarukitane wajiabara janoko arotuma yejimaranaja jakore aunukamo erijisakomoni. ³⁰ Masabasabamoana jakutai tai mariboto. Maisiko yaotayaja orikware toanaja jakutai orikware toajakutaisi webiaraya. ³¹ Jesú ribane: Yatu isia ribiaine: Obojona asiraja waraoto kware abanaka kokotuka berekitane Dio saba yakera. Ribu asiraja waraoto kware abanaka berekitane Dio saba yakera. Tiarone Dio Amejokojira isia asiraja ribiakutai taisi kware abane are berekomoni. ³² Warao tane nakajakutai taisi isia asiraja ribiakutai taisi kware abanaka berekitane Dio saba yakera. Tiarone Dio Amejokojira Yakerajawitu isia asiraja ribiakutai taisi kware abane berekomoni. Ama berenaja. Ya naokitiaku-taisi ekurakate berenaja. ³³ Arau yakeraja jakore akwaja yakeraja ejoboya. Arau ayari jakore taisi akwaja ayari tane ejoboya. Akwaja isia arau yaorane naminaya. ³⁴ Yatu jubawitu anobotomo! Yatu asiraja jaja yatu katukane ribu yakeraja ribate bajama? Aobojona eku jakutai taisi ribia. ³⁵ Warao yakeraja jakutai ribu yakeraja ribia aobojona yakeraja jame. Warao asiraja jakutai ribu asiraja ribia aobojona asiraja jame. ³⁶ Ribu nome toakitane jakutaisi aya eku warao kokotuka aribu yawatanuka kokotuka nome toakitane ja. ³⁷ Ji-ribu eku iji nomeraja ejobate. O jiribu eku Dio iji sanamata-mejerete, taeyama. ³⁸ Takore Bariseotuma kawanamo kajotabu akarata ainami-namo kawanamo tane Jesú riboto ribunae. Ribane: Inaminatu, iji sinarija nonakore oko mikitane obonoyaoko, tae. ³⁹ Takore Jesú tatuma riboto ribane: Warao ama jakutai asi-raja jame sinarija nonamejerei kwana ebia. Warao Dio aribu aiabamo jakutai sinarija nonamejerei ebia. Jonás Dio kware arewaratu jakutai taisike sinarija tane yatu saba. Atae sinarija raisama nonanajine. ⁴⁰ Jonás jakutai ya rijanamo, ima rijanamo tane jomakabaira aobono eku bajinae. Taisi monuka warao tane nakajakutai ya rijanamo ima rijanamo tane joboto eku bajete. ⁴¹ Ribu nome toakitane jakutaisi asinarija eku janokoina Nínive arao karamane warao ama jakutaisi kware abane sanamatame-jerete. Nínive arao Jonás aribu nokoitane aobojona ibariae. Ine ama tamatuka jakutai mayakara Jonás ayakara kwarika. Tiame tatuma yatu aribu nome toate. ⁴² Ribu nome toakitane jakutaisi asinarija eku warao ama jakutaisi aribu nome toate. Ina ya jajaya kajamojo sabasaba ja. Ribu nome toakore ina airamo tira karamane yatu sanamatamejerete. Airamo tira jakutai raina akariatukamo naoae airamo Salomón ainamina nokokitane. Mikotu anaka. Ine ama tamatuka jakutai mayakara Salomón ayakara kwarika. ⁴³ Jebu Dio saba wisi jakutai niborama ekumo ejobane ina wajerajasi ekia kujuya tuwaranoko najabiaja. Tuwaranoko minaka obonobia. ⁴⁴ Ribia: Janoko ekumo ejobonajakutai-siatajase bajetine, tia. Bajene janoko eku warao ekiraja jakore mija. Janoko jakutai ekia beréae takore mija. Janoko iyakarátae takore mija. ⁴⁵ Mitane jebu narune jebu eobo asiraja kwarika mojoabasi kware manamo konaria. Tatuma janoko eku yarune tata ubaya. Ebe niborama saba asira. Amasike saba asirajawitu. Tamaja warao ama jakutai, asiraja jame taisi monukajase ejo-bate. ⁴⁶ Jesú waraoto saba rewarayakore arani, arakatuma tane yaronae. Yarone yakareku bajene Jesú isiko ribakitane obonoae. ⁴⁷ Takore jisaka Jesú tata naone enokoae. Jirani jirakatuma tane yakareku ja. Jiisiko ribakitane obonoya, taeyama. ⁴⁸ Takore Jesú nibora ribunajakutaisi riboto ribane: Rani sina tai? Rakatuma sinatuma tai? tae. ⁴⁹ Tane anebu emibune ribane: Tamatuma rani rakatuma tane. ⁵⁰ Rima najamutuata jakutaisi aobojona eku abayakutai taisike raka. Taisike rakoi sanuka. Taisike rani, taeyama.

¹ Taitane ya taisi eku Jesú janoko ekumo ejobane aotanaira ajomuku rujunae. ² Tata rujakore warao eraja taisiata nabakaubuae. Nabakaubukore Jesú wajibaka eku nabakane eku rujunae. Waraosebeira kokotuka wajaka bajinae. ³ Takore Jesú asita abane ribu eraja tatuma saba rewarae. Ribane: Namutu jakutai namukitane ejobonae. ⁴ Namuna wiarayakore namuna aumu kawanamo jojisi arai nakae. Jojisi arai nakakore romu naone najorobuae. ⁵ Atae namuna aumu kawanamo joyo arai nakae. Tata joboto sanuka. Namuna jakutai rubujira aroko ejobonae joboto sanuka jame. ⁶ Tiarone ya ejobakore ajokonamu ekirame jojane wajae. ⁷ Atae namuna aumu kawanamo jina eku nakae. Ji arau irane namuna eirawajae. ⁸ Atae namuna aumu ka-wanamo joboto yakerajasi eku nakae. Yakeraja kwajae. Kawanamo ajojo jisaka siento tane kwajae. Kawanamo ajojo jisaka siento ajabasi kware mojoreko tane kwajae. Kawanamo ajojo jisaka mojorekotuma rijanamo tane kwajae. ⁹ Akojoko ja jakutai maribu nokokunarai. ¹⁰ Takore anebu Jesú tata nabakane renokoae. Iji katukeme asita abane waraoto saba rewaraya? taeyama. ¹¹ Jesú tatuma riboto ribane: Ribu rijisa ja najamutu arotu arujuna rujuyakutaisi isia. Dio ribu rijisa yatu nokomejerea. Tiarone eobo nokomejerenaja. Tiame sinarija abane rewara-yaine. ¹² Warao ja jakutai atae kwarika taisi moate. Takore eraja ejobate. Tiarone ekirakutai, asanuka jarone ebikamo konarute. ¹³ Tiame asita abane tatuma saba rewaraya. Tatuma mijarone minaja monuka bajia. Tatuma nokoyarone naminanaja jame nokonaja monuka bajia. ¹⁴ Tiame tatuma aobojona Isaias aribu eku nakaya. Isaias jakutai Dio kware arewaratu. Tai ribunae: Nomewitu yatu nokote, tiarone naminanatate. Nomewitu mite, tiarone yaorane naminanatate. ¹⁵ Tamaja waraoto aobojona taeraja bajinae naminanaka jakitane. Yaorane nokonaja nokonaka jakitane. Amu eubae amu isia minaka jakitane. Akojoko isia nokonaja. Aobojona isia naminanaja. Makware barinaja ine tatuma ibajukamejerei. (Isa. 6:9-10) ¹⁶ Tiarone yatusike ekeiraja bajia. Yatu amu isia mijame ekei-raja ejobonae. Yatu akojoko isia nokoyame ekeiraja. ¹⁷ Nome-witu yatu isia ribiaine: Dio kware arewaramo eraja, warao nome-raja eraja tane mikitane kwana obonoae. Yatu miajakutaisi miki-tane obonoaerone minatanae. Yatu nokoyakutaisi nokokitane obonoaerone nokonatanae. ¹⁸ Namutu isia asita abane rewarajakutaisi nokokotu. ¹⁹ Warao kawanamo najamutu airamo arujuna isia nokoya. Nokoyarone naminanaja. Namuna aumu jojisi arai nakajakutai tai tatuma sitaya. Takore asiraja arotu naone ribu tatuma aobojona eku wiarajakutai taisi konaria. ²⁰ Namuna aumu joyo arai nakajakutai tai ribu anokomo eobo sitaya. Tatuma ribu nokone rijana ekeiraja oaya. ²¹ Tiarone ajokonamu sanukiraja jame taeratanaja. Takore ribu aobojona ayakara mikore o isanamatakore nakaya. ²² Namuna aumu ji ajokonamu eku nakajakutai tai ribu anokomo eobo sitaya. Ribu nokoya tiarone raina aobojona ama jakutaisi kware baria. Aunukamo jakutai tatuma imasibia. Tiame ribu eirawajaya. Tatuma eku kwajakomoni. ²³ Tiarone namuna aumu joboto yakerajasi eku nakajakutai ribu anokomo eobo sitaya. Tatumasike ribu nokone eku abaya. Akwaja yakeraja ejoboya. Kawanamo akwaja siento tane kwajaya. Kawanamo akwaja siento asibi kware mojoreko tane kwajaya. Kawanamo akwaja mojorekotuma rijanamo tane kwajaya. ²⁴ Jesú atae asita abane rewarae. Ribane: Najamutu arotu arujuna rujuyakutai tai nibora namutu monuka. Namutu jakutai arajikaba eku namuna aumu yakeraja namuae. ²⁵ Tiarone nibo ubayakore taisi isiko asiraja jakutai naone arajikaba eku namuna aumu asiraja toae. Tiriko kawanaya toane tane naruae. ²⁶ Takore tiriko irane kwajae. Kwajakore tiriko kawanaya namuna asiraja ejobonae. ²⁷ Ejobakore anebu namutu isia ribane: Airamo, namuna aumu yakeraja jirajikaba eku iji toanatanaera? Ama namuna asiraja katukane ejobonae bajama? taeyama. ²⁸ Takore yaota arotu anebu isia ribane: Maisiko asiraja jakutai toanae, tae. Takore anebu renokoae: Iji oko narune namuna asiraja bujumejereara? tae. ²⁹ Tiarone arotu ribane: Bujunaka jakotu. Namuna asirajasi bujuyaja tirikorakate bujate tai. ³⁰ Mate oriisiko irate. Ayakaramata yawakate. Ayakaramata eku arimo kajotabutine: Wajiabara namuna asiraja arine aka koyakotu erokakitane. Tiarone tiriko jakutai abanoko eku masaba yaorane abakotu, tatine, tae. Jesú tane rewaraeyama. ³¹ Jesú atae asita abane rewarae. Ribane: Najamutu arotu arujuna rujuyakutai tai motasa aumu monuka. Nibora jisaka arajikabeku motasa aumu jisaka namuae. ³² Nomewitu motasa aumu jakutai namuna aumu kokotuka yajoto. Tiarone irane rau aukamo eobo kwarika ejoboya. Rau tane ejoboya. Awakuwaku urirame romu kwaia nijakayakutai naone awakuwaku arai tuwarane ubaya. ³³ Atae asita abane rewarae: Najamutu arotu arujuna rujuya-kutai tai arina akwaruta monuka. Tira jakutai arina urirajasi eku akwaruta abanae. Takore kokotuka jokojokónae tiaja bajinae, taeyama. ³⁴ Tamaja kokotuka asita abane Jesú waraoto saba rewarae. Tatuma saba ribu raisama rewaranatanae. ³⁵ Tametane nonae Dio kware arewaratu aribu eku nakamejerei. Rewaratu jabatae: Asita abane rewaratine. Raina ajiromayatukamo ribu rijisa jaja jakutai taisi rewaratine, taeyama. (Rok. 78:2) ³⁶ Takore Jesú aribu anokomo inatabane janoko eku yaruae. Yarukore anebu Jesú tata nabakane isia ribunae. Ribane: Iji asita abane namuna asiraja rajikabeku jakutaisi isia rewarae. Tai kasaba yakeraja rewarau, taeyama. ³⁷ Takore Jesú tatuma riboto ribane: Namuna aumu yakerajasi namiakutai tai warao tane nakajakutaisi sitaya. ³⁸ Arajikaba jakutai raina araoto sitaya. Namuna aumu yakeraja jakutai tai warao najamutu arotu arujuna rujuyakutaisi anobotomo sitaya. Namuna asiraja jakutai asiraja arotuma anobotomo jakutaisi sitaya. ³⁹ Namutu isiko asiraja jakutai tai jebuira sitaya. Namuna ayakaramata jakutai raina ayaju sitaya. Arimo jakutai Dio ainatabatuma sitaya. ⁴⁰ Namuna asiraja jakutai taisi arine jekuneku toate erokakitane. Taisi monuka raina ayajuata nonate. ⁴¹ Warao tane nakajakutai ainatabatuma inatabate waraoto ori-kware toamejerei. Arujuna rujuyakutaisiatukamo webotate. Eobo ebisaba omu esoakanoko abayakutai taisi webotate. Warao kokotuka asirajasi nonayakutai taisi webotate. ⁴² Rokunoko eku webotate. Tata onate. Ai kuokuo tate. ⁴³ Takore nomeraja anonamo jakutai tatuma ya monuka yi tate. Arima arujuna rujuyakutaisiata yi tate. Akojoko ja jakutai maribu nokokunarai, taeyama. Tane Jesú rewarae. ⁴⁴ Najamutu arotu arujuna rujuyakutai tai burataira ijísae tiajasi monuka. Joboto eku ijísae tiaja ja. Nibora jisaka burataira mitane tatajase erijisaya. Saba yakeraja jame narune aunukamo kokotuka wabine joboto nisaya. ⁴⁵ Atae najamutu arotu arujuna rujuyakutai tai wabitu monuka. Wabitu jakutai joyo perla jakutai amoara taeraja jajasi najabia. ⁴⁶ Perla jisaka amoara taerajawitu mitane narune aunukamo kokotuka wabine, joyo nisaya. ⁴⁷ Atae najamutu arotu arujuna rujuyakutai tai trein monuka. Trein joni toane jomakaba raisa raisa tane oaya. ⁴⁸ Trein ajarako eraja oakore atoamo wajayata narune iyoya. Tata norujane jomakaba ayakaremo najabune nisaya. Yakeraja jakutai u eku abaya. Asiraja jakutai webotoya. ⁴⁹ Raina ayajuata tametane nonate. Dio ainatabatuma ejobate asiraja anonamo emo abaki-tane, nomeraja anonamo emo abakitane tane. ⁵⁰ Asiraja jakutai rokunoko eku toate. Tata onate. Ai kuokuo tate, taeyama. Tane Jesú rewarae. ⁵¹ Taitane Jesú tatuma renokoae. Ribane: Yatu tamaja koko-tuka nokoyara? tae. Tatuma ribane: Airamo, oko nokoya, taeyama. ⁵² Takore ribane: Kajotabu akarata ainaminatu najamutu arotu arujuna rujuyakutaisi isia naminate. Naminane janoko arotu monuka ejoboya. Janoko arotu jakutai aunukamo kawanamo ajiro jakutai nisakitane naminaya. Anobo jakutai nisakitane naminaya. ⁵³ Taitane Jesú asita abane rewara riwarane tatukamo naruae. ⁵⁴ Narune oriaineta nabakanae. Tata orikware nakanoko eku inaminae. Takore warao kwana retaubune ribane: Tamaja ribu musaberaja kasabamo naminae bajama? Katukane nona taeraja nonaya? ⁵⁵ Tamaja moijotu aukenara? Tamaja Maria aukenara? Arakatuma Jacobo, José, Simón, Judas tane ja. ⁵⁶ Arakoi sanukatuma kokotuka kajanokoina eku ubaya. Tamaja kasabamo naminae bajama? ⁵⁷ Tiame Jesú tatuma saba omu esoakanoko tane ejobonae. Tiarone Jesú ribane: Dio kware arewaratu aribu amoara uriraja ja. Tiarone oriaina eku oriawaraoto saba amoara ekira. Ajanoko araoto saba amoara ekira. ⁵⁸ Takore tatuma nome abanaja jame tata Jesú nona taeraja eraja nonanatanae.

¹ Tai ya eku Herodes Jesú isia nokoae. Herodes jakutai ina manamonamojase airamotuma kawanamo jisaka. ² Tane Herodes anebu isia ribane: Tamaja Juan Joni Ekobutu. Wabaerone nomininae rijana. Tiame ajara taeraja ja nona taerajasi nonakitane, taeyama. ³ Herodes Juan najame tane ribunae. Herodes Juan emojo-jutae. Karena isia motune emojojutanoko eku toanae. Tira Hero-dias aobojona emojojutae. Tira jakutai Herodes araka Felipe atira. ⁴ Juan Herodes isia ribane: Herodias jitira tane nisakitane Dio akajotabu ekuana, taeyama. ⁵ Tiame Herodes Juan nakitane obonoae. Tiarone waraoto nojane nanatanae. Warao Juan Dio kware arewaratu tane tana-bae. ⁶ Tatukamo Herodes arijawara aya eku Herodias aukatira ejobonae jojokitane. Yejebuajakutaisi amujaba jojokitane ejobonae. Jojokore Herodes saba yakeraja ejobonae. ⁷ Tiame ribu moae tira obonoyakutaisi moakitane. ⁸ Takore tira aranima aobojona nokojio taitane Herodes isia ribane: Juan Joni Ekobutu akwa mamoate. Jorujoko eku abane mamoau, taeyama. ⁹ Tamajasi ribunajame Herodes ekumoniraja bajinae. Tiarone ribu moajame moamejerei kajotabuae. Yejebuajakutai aribu nokoajame moamejerei kajotabuae. ¹⁰ Tane mojojutanoko eku Juan akwa jewetamejerei kajotabuae. ¹¹ Takore yaorotu jewe-taitane jorujoko eku konane iboma moae. Iboma jakutai akarimo aranima moae. ¹² Takore Juan anebu naone, Juan atejo konarune joitae. Joitaitane Jesú enokokitane naruaeyama. ¹³ Takore Jesú taisi naminane jisamuka tatukamo naruae. Waekia narune warao ekirakutaisiata nabakanae. Tiarone warao taisi naminane janokoina ekumo ejobane tane Jesú iamo naruae, wajakaya. ¹⁴ Takore Jesú waekumo nabakane waraosebeira miae. Akobe tatuma isia ajerae. Muanayaja konayakutaisi ibajukanae. ¹⁵ Ya soto takore anebu Jesú tata nabakane isia ribane: Amena ya anaya. Tamatuka jarawajawitu. Waraoto inatabau janokoinatuma tata narune najoro nisamejerei, taeyama. ¹⁶ Jesú ribane: Katukeme narute bajama? Najoro moakotu, taeyama. ¹⁷ Takore: Oko ekira. Bãu mojoabasiwitu ja. Atae jomakaba aukamo manamo, tae. ¹⁸ Jesú ribane: Ineata konakotu, tae. ¹⁹ Taitane kajotabuae waraosebeira jaka aukamo arai norujumejerei. Tane bãu mojoabasi kware jomakaba manamo oane, kwai yabusene najoro kware Dio yakeraja jae tane ribunae. Ribaitane enojutane anebu moae. Moakore anebu akarimo moaubuae. ²⁰ Takore warao kokotuka najorone jajinaubuae. Najoro riwarakore ayajuka bajiakutai u mojoreko kware manamo kwatae. ²¹ Anajoromo jakutai nibo sinarijaira mojoabasi monuka. Atae tatu nemokomoko tane sinarijanatanae. ²² Jesú orianebu orebe inatabayaja erujubuae waeku nabakane aotanaira imakamejerei. Taitane Jesú are bajinae waraoto inatabakitane. ²³ Inatabaitane Jesú jotakwa arai yaburuae jisamuka kwai ribakitane. Ya soto takore Jesú jisamuka bajinae. ²⁴ Anebu jakutai aotanaira autia naria. Ajaka ribototiji nojaba uriraubiaja jaja. ²⁵ Jokoyakore Jesú tatuma sabasaba naria, jo araia nariaja. ²⁶ Takore anebu Jesú jo araia nariakore mitane nojaubuae. Retane rokojotae: Mejokoji jae! taeyama. ²⁷ Takore Jesú tatuma isia ribane: Manojanaka jakotu. Ineine. Retaubunaka jakotu, taeyama. ²⁸ Ribakore Pedro riboto ribane: Mairamo, iji jakore mayejebu ine jo araia ijiata narumejerei, taeyama. ²⁹ Takore Jesú ribane: Nao rijana, tae. Takore Pedro waekumo nabakane jo araia narukitane jotananae Jesú tata nabakakitane. ³⁰ Tiarone ajaka rubujuyakore mitane retae. Joni rijaturuae. Rokojotae: Mairamo, masanetau! ³¹ Rokojotakore rijana Jesú Pedro amojo oane isia ribane: Iji sanuka nome abayaraji! Jiaobojona katukeme emo emo bajia? taeyama. ³² Takore tatuma waeku nabakakore ajaka tuwaranae. ³³ Tuwarakore waeku anarumo jakutai Jesú amujaba jinamane rujunae. Ribane: Nomewitu iji Dio Auka, taeyama. ³⁴ Takore aotanaira imakane ina Genesaret ajomuku sewirinae. ³⁵ Ina arao Jesú mitane kokotukanea ribu inatabae. Takore muanayakutai kokotuka Jesú tata konae. ³⁶ Konaubukore ebuae ajiaka akojowitu torekitane. Torinajakutai kokotuka bajukanaeyama.

¹ Takore Bariseo kawanamo kajotabu akarata ainaminamo kawanamo tane Jerusalén tatamo naoae. ² Jesú tata nabakane renokoae: Jinebu katukeme airamotuma inamínae tiakutaisi riboto nonaya? Tatuma bãu najorokitane oria-mojo jojaraubunaka najoroyaraji! tae. ³ Tiarone Jesurakate tatuma renokoae. Yatu katukeme Dio akajotabu riboto nonaya? Yatu iramotuma aribu eku abakitane Dio aribu iabaya. ⁴ Dio aribu ribia: Rimasi yatomanetete. Ranima yatomanetete, tia. (Ejo. 20:12 Kaj. 5:16) Atae ribia: Arimasi isia asiraja ribiakutai taisi nakitane ja. Aranima isia asiraja ribiakutai taisi nakitane ja. (Ejo. 21:17 Lev. 20:9) ⁵ Tiarone yatu aribu raisa. Jisaka arimasi isia o aranima isia ribate tai: Jisanetakunaine. Tiarone monira. Maunukamo kokotuka nobeanaka tane Dio moaine, tate tai. Tane ribakore yatu saba yakera. ⁶ Yatu ribia airamotuma sanetakitane ekira. Takore yatu iramotuma aribu eku abaya. Dio akajotabu amoara ekiraja tane ejoboya. ⁷ Yatu aobojona manamo. Dio kware arewaratu Isaias yatu isia ribu kaika ribunae. ⁸ Ribane: Tamaja warao aroko isia iji airamo, tia. Tiarone aobojona memo. ⁹ Mayatomanetearone aribu amoara ekiraja ejoboya. Ainamina waraoto ariburone Dio aribu tane inaminaya, taeyama. (Isa. 29:13) ¹⁰ Taitane Jesú waraoto yejebune saba rewarae. Ribane: Maribu nokokotu yatu akwa eku yarumejerei. ¹¹ Aroko isia najoro-yakutai tai warao wisi tane abanaja. Tiarone aroko ekumo ejobo-yakutai taisike wisi tane abaya, tae. ¹² Takore Jesú anebu Jesú tata nabakane isia ribunae. Ribane: Bariseotuma jiribu nokokore aobojona ekuana ejobonae. Iji taisi naminanajara? tae. ¹³ Tiarone Jesú riboto ribane: Marima najamutuata jakutai tai rau namunaja jakore kokotuka bujate. Ajokonamu isiko bu-jate. ¹⁴ Bariseotuma kware barinaka jakotu. Tatuma mionirone mioni eobo konaria. Mioni jisaka mioni raisama konariakore reko toto eku nakate, taeyama. ¹⁵ Takore Pedro Jesú isia ribunae: Asita abane rewarajakutai kasaba yakeraja rewarau, taeyama. ¹⁶ Jesú ribane: Yaturakate nokonaja mojoro? ¹⁷ Roko isia najoroyakutai kobe eku nakaya. Tatukamo tejo ekumo webotoya. Yatu taisi naminanajara? ¹⁸ Tiarone roko ekumo ejoboyakutai obojona ekumo ejoboya. Taisike asiraja tane abaya. ¹⁹ Obojona ekumo ejoboyakutai tai tamaja. Asiraja obonokitane, nakitane, tira jarone raisama najabukitane, nibora jarone raisama najabukitane, tatusebekitane, nibosebekitane, erijisakitane, raisama kware abayaja tona rewarakitane, raisama isia asiraja ribakitane tane. ²⁰ Tamatumasike warao asiraja abaya. Tiarone mojo jojaraubunaka najorokitane jakutai taisike warao asiraja abanaja, taeyama. ²¹ Taitane Jesú tatukamo ejobane ina raisameta naruae. Ina ajanokoinatuma awai Tiro Sidón tane. ²² Takore tira jakutai aina arotu. Ina Canaán arotu jaja. Rokojotayaja Jesú tata nabakanae. Ribane: Mairamo. Iji David auka. Jikobe maisia ajerakunarai. Maukatira jebu isiko jaja jame kwana sanamataya, tae. ²³ Tane ribakore Jesú taisi riboto ribunatanae. Takore anebu naone Jesú ebiaja ribane: Tirasi inatabau. Are kaiamo rokojota-yaja naoya, taeyama. ²⁴ Jesú riboto ribane: Israeltuma obeja monuka rijánae tiaja ja. Dio tatumawituata mainatabae, taeyama. ²⁵ Tiarone tira Jesú awere nabakane jinamane rujunae amujaba. Ribane: Mairamo, masanetau, taeyama. ²⁶ Takore Jesú riboto ribane: Anobotomo ebikamo najoro nisane beoro moakore asiraja jakuna, taeyama. ²⁷ Takore tira ribane: Nomewitu, Mairamo. Najoro ajuara aro-tuma amesa araimo nakakore aromu beororakate najoroya, taeyama. ²⁸ Takore Jesú riboto ribane: Tira, iji kwana nome abaya. Jiaobojona eku nonakunarai rijana, taeyama. Takore tai ya asinarijayatukamo aukatira yakeraja bajinae. ²⁹ Takore Jesú tatamo ejobane aotanaira Galilea amumiata nabakanae. Nabakane jotakwa arai yaburune rujunae. ³⁰ Ruja-kore warao eraja taisiata nabakaubuae. Tatuma muanamo isiko naoae: wakawaka, mujasi, ribuoni, jarakasi tane. Atae muanamo erajasi konae. Konaitane Jesú omu awere abakore ibajukanae. ³¹ Ibajukaubuajame warao retayaja bajibuae. Ribuoni jakutai ribunae. Jarakasi jakutai yakeraja bajinae. Wakawaka jakutai naruae. Mujasi jakutai seoronae. Warao taisi mitane ribakitane jotananae: Israeltuma Ario jakutai taisike yakeraja jae, taeyama. ³² Takore Jesú orianebutu yejebune isia ribane: Warao ya rijanamo ja makaika. Anajoro ekiraja. Tiame makobe tatuma isia ajera. Najoromoana jaja ajanokoata inatabakitane obononajine. Tane inatabakore jojisi autu sinakate tai, taeyama. ³³ Takore anebu ribane: Tiarone tamatuka waraoto ajanoko ekira. Oko kasabamo najoro mite bajama warao erajasi saba? taeyama. ³⁴ Ribakore Jesú renokoae. Bãu katamona ja? tae. Tatuma ri-bane: Bãu mojoabasi kware manamo ja. Atae jomakaba aukamo sanuka ja, taeyama. ³⁵ Takore Jesú warao joboto arai norujumejereae. ³⁶ Tane bãu mojoabasi kware manamo nisanae. Jomakaba nisanae. Nisane Dio isia yakeraja jae tane ribunae. Ribaitane enojutane anebu moae. Anebu jakutai akarimo waraoto moaubuae. ³⁷ Takore warao kokotuka najorone jajinaubuae. Najoro riwarakore ayajuka bajinajakutai u mojoabasi kware manamo ikwatae. ³⁸ Ana-joromo jakutaisi asebe nibo sinarijaira manamonamojase. Tatu nemokomoko tane sinarijanatanae. ³⁹ Tatukamo Jesú waraoto inatabaitane waeku nabakanae. Ina Magdala tata naruae.

¹ Bariseotuma Saduceotuma tane Jesú tata nabakanae. Sinarija ajarata najamutu tatamo jakutaisi nonamejereae ayakara mikitane. ² Tiarone tatuma riboto ribane: Ya sotakore yatu ribia: Najamutu simosimo tia. Tiame naja ekirate, tia. ³ Jokona anejeko yatu ribia: Najamutu simosimo tia. Koko-tukanea naja ja. Ama naja ebote, tia. Yatu aobojona manamoraji bajama! Yatu najamutu asinarija naminaya. Tiarone asinarija ama jakutai taisi naminanaja. ⁴ Warao ama jakutai asiraubiaja. Dio aribu iabaya. Tiarone sinarija Dioatukamo kwana ebia. Jonás Dio kware arewaratu jakutai taisike sinarija tane bajinae. Atae sinarija raisama nonanajine yatu saba, taeyama. Tane tatuma iabane naruaeyama. ⁵ Tatukamo Jesú anebu imakayaja najoro konarukitane emoniae. ⁶ Takore Jesú ribane: Oi! Bariseotuma arina akwaruta najoroterate. Saduceotuma arina akwaruta najoroterate, taeyama. ⁷ Ribakore anebu oriisia ribakitane jotananae. Oko bãu konanatanajame Jesú tametane ribia, taeyama. ⁸ Jesú tatuma aribu nokone ribane: Yatu katukeme bãu eribia bajama? Yatu sanuka nome abayaraji bajama! ⁹ Yatu mate maribu nokonajaraji bajama! Yatu aobojona bãu mojoabasi isia nakanajara? Ine niboto asebe sinarijaira mojoabasi saba bãu mojoabasi enojutane moaubuaine. Takore najoro ayajuka u sanuka katamona kaika orikware toae? ¹⁰ Yatu aobojona bãu mojoabasi kware manamo isia nakanajara? Niboto asebe sina-rijaira manamonamojase najoro moaubuae. Takore najoro aya-juka u katamona kaika orikware toae? ¹¹ Ine ribunaine: Bariseo-tuma arina akwaruta najoroterate, taine. Saduceo arina akwaruta najoroterate, taine. Ine bãu isia ribunaja jakutai, yatu katukeme taisi nokonaja bajama? taeyama. ¹² Takore anebu Jesú aribu nokoae. Arina akwaruta najoro-naka jakitane jakutaisi isia ribunatanae. Bariseo ainamina isia ribunae. Saduceo ainamina isia ribunae. ¹³ Jesú janokoina Cesarea Filipo awere nabakane anebu renokoae. Ine warao tane nakajakutai warao maisia rewarayaja katukane ribia? Ine sina tai? taeyama. ¹⁴ Takore tatuma ribane: Kawanamo ribia: Tai Juan Joni Eko-butu, tia. Eobo ribia: Tai Elias, tia. Atae eobo ribia: Tai Jeremias o Dio kware arewaratu raisa, tia, taeyama. ¹⁵ Takore Jesú ribane: Yatu katukane maisia ribia? Ine sina tai? taeyama. ¹⁶ Tane takore Simón Pedro riboto ribane: Ijisike Akirito. Iji Dio riko jakutaisi Auka, taeyama. ¹⁷ Jesú Pedro riboto ribane: Simón, Jonás auka jakutai, iji ekeiraja. Warao tamaja ribu jiainaminanatanae. Tiarone Marima najamutuata jakutai tai jiainaminae. ¹⁸ Amasike jiwai Pedro. Tiarone tamaja joyoira araimo maikeresia nonatine. Waba atu-waranoko arao ikeresia kwarikakomoni jate. ¹⁹ Najamutu arotu arujuna rujuyakutaisiata ayawetuma jimoatine. Iji raina eku itatabamejerenaja jakutai najamutuata monukajase itatabameje-renatate. Iji raina eku ejeromejereakutai najamutuata ejerome-jerete, tae. ²⁰ Tane Jesú anebu kwana kajotabuae raisama saba Jesú ja-kutai tai Akirito tane rewaranaka jamejerei. ²¹ Tatukamo Jesú anebu saba rewarakitane jotananae. Ine Jerusalén tata narukitane jaine. Tata Judio airamotuma, saserote airamotuma, kajotabu akarata ainaminamo tane tatuma kwana maisanamatate. Manaubute. Tiarone ya rijanamo takore nomi-natine. ²² Takore Pedro Jesú emo konarune sabajiae. Ribane: Mairamo, Dio tane obononajakunako! Tane jiisia nonakomoni mojoro! tae. ²³ Tiarone Jesú Pedro sabasaba barene isia ribane: Memo jau, Satanás. Iji omu esoakanoko tane mebe abaya. Iji Dio aobonobu eku obonobunaja, tiarone waraoto aobonobu eku obonobia, tae-yama. ²⁴ Tane Jesú anebu isia ribane: Warao maiamo naokitane obonoyakutai wite oriisia mamoara ekira tane ribakitane ja. Akuru rosiabane tane maiamo naokunarai. ²⁵ Warao wite ori-auba orisaba yaorane yaorabayakutai tai auba rijate. Tiarone maobojona wabayakutai tai auba are mite. ²⁶ Warao raina aya-kara kokotuka kanataitane tiarone aobojona rijakore, tai nibora jakutai katukane yakeraja ejobate? Obojona amoara katamona abate? ²⁷ Warao tane nakajakutai airamo tane naokitia. Arima airamo jakutai, taisi monuka airamo tane naote, ainatabatuma isiko. Tane warao jisaka jisaka amoara moate. Amoara jakutai anona kaika. ²⁸ Nomewitu yatu isia ribiaine: Warao tane nakajakutai arujuna rujakitane naote. Warao ama tamate jakutai tatuma kawanamo taisi anao mimoana jakore wabanaja, tae.

¹ Tatukamo ya mojoabasi kware jisaka ru takore Jesú jotakwayata naruae. Nariaja Pedro, Jacobo, araka Juan tane konaruae. Tata warao eobo ekira. ² Takore tata namoninae tatuma amujaba. Amujoro jomeraja ejobonae ya monuka. Ajiaka jokeraja ejobonae abije monuka. ³ Takore Moisés, atae Elias tane Jesú isiko rewarayaja ejobonae. Rewarayakore anebu miae. ⁴ Mitane Pedro Jesú isia ribane: Mairamo, oko tamatuka jakitane kasaba yakera. Iji tane obonokore sibako rijanamo tamate nama-teko. Jisaka jisaba, jisaka Moisés saba, jisaka Elias saba tane nonateko, taeyama. ⁵ Pedro ribiakore ajakajoko jokeraja naone tatuma sijakae. Ajakajoko ekumo Dio ribakore nokoae. Ribane: Tamajasike Mauka ine obonoyakutai. Tai maobojona ekuwitu. Taisi aribu nokokotu, taeyama. ⁶ Takore anebu ribu nokone mukunamane rujane jinamunae. Kwana retaubuae. ⁷ Retakore Jesú tatumeta nabakane, torene tane isia ribane: Nokaramakotu. Retanaka jakotu, taeyama. ⁸ Takore oriwerea seorobune raisama minatanae. Jesuwitu miae. ⁹ Tane takore jotayatamo nanakayaja Jesú tatuma kajotabuae: Warao tane nakajakutai wabaterone nominate. Mate nomina-moana jakore yatu miajakutai raisama saba rewaranaka jakotu, taeyama. ¹⁰ Takore anebu Jesú renokoae: Kajotabu akarata ainaminamo ribia: Wajiabara Elias naokitane ja, tia. Katukeme tane ribia bajama? taeyama. ¹¹ Jesú tatuma riboto ribane: Nomewitu Elias wajiabara naone kokotuka iyakaratate. ¹² Tiarone yatu isia ribiaine: Elias naoae rijana. Elias naokore tatuma taisi naminanatanae. Tiarone oriaobojona eku isiko nonae. Monukajase warao tane nakaja-kutai tatuma aobojona sanamatakitane ja, taeyama. ¹³ Takore anebu ribu nokoae. Jesú Juan Joni Ekobutu jakutaisi isia rewarae. Tane nokoae. ¹⁴ Tatukamo waraoata nabakaubuae. Nabakakore nibora jisaka Jesú tata nabakane amujaba jinamane rujunae. ¹⁵ Ribane: Mairamo, maukama isia jikobe ajerakunarai. Sina-kaya. Kwana sanamataya. Eraja tane jekuneku nakaya. Joni nakaya. ¹⁶ Jinebuata konaine. Konakore ibajukakomoni ejobonae, tae. ¹⁷ Jesú riboto ribane: Warao ama jakutai nome abanajaraji! Emo obonobiaraji! Yatu isiko ine ya katamona bajekitane ja? Yatu anona katukakore yakeraja ejobate bajama? Ine ya katamona yawakate? Nebusanuka konau, taeyama. ¹⁸ Taitane Jesú jebu sabajiae. Nebusanuka ekumo inatabae. Takore rijana nebusanuka bajukánae tiaja bajinae. ¹⁹ Nokabuka Jesú emo jakore anebu Jesú renokone ribane: Kajara taeraja ejobonatanae jebu webotakitane. Katukeme tai? ²⁰ Jesú ribane: Yatu sanuka nome abayame tanatanae. Motasa aumu jakutai sanukiraja. Nomewitu yatu isia ribiaine: Taisi monuka yatu ayajoraba sanukirajarone nome abayaja tamaja jotakwa isia ribakuna: Tamatukamo narune emo jau, takuna. Takore yatu aribu nokokuna. Yatu yaorane nome abakore yatu saba ribu moniraja ekira. ²¹ Tiarone webotatu jakutai kwai ribunaja jakore o obonekonaja jakore tane jebu tamaja monuka jakutai ejobonaja, taeyama. ²² Tatuma ina Galilea eku jaja Jesú rewarae. Warao tane nakajakutaisi wabine waraoto amojeku abakitia. ²³ Naubute. Tiarone ya rijanamo takore nominate, taeyama. Takore tatuma ribu nokoitane ekumonirajawitu bajinae. ²⁴ Takore anebu isiko janokoina Capernaum tata nabakanae. Nabakakore burata kwai ribunoko saba jakutaisi ebumo Pedroata nabakane renokoae. Jiairamo burata kwai ribunoko saba abayara? ²⁵ Pedro ribane: Abaya. Tane Pedro janoko eku yaruae Jesú renokokitane. Yarukore Jesú wajiabara Pedro renokoae. Ina airamo sinama isimo burata ebia? Aina araoto isimo ebiara? Tatukamoana isimo ebunajara? Iji katukane ribia? tae. ²⁶ Pedro ribane: Tatukamoana isimo ebia, tae. Jesú ribane: Takore aina arao burata abakitane ekira. ²⁷ Tiarone oko tatuma saba omu esoakanoko tane ejobonaka jamejerei oko burata abate. Narune osibukai joni toanu. Jomakaba wajiabara abiakutai natokanu. Taisi aroko eku burata mite. Burata jakutai jisaba masaba tane abakitane kaikate. Konarune abanu, tae.

¹ Ya taisi eku Jesú anebu Jesú tata nabakane renokoae. Najamutu arotu arujuna rujuyakutaisiata sina airamo tane ejoboya? tae. ² Takore Jesú nebusanuka yejebune autu abanae. ³ Ribane: Nomewitu yatu isia ribiaine yatu aobojona ibarekitane ja. Sanukiraja monuka ejobakitane ja. Tanaja jakore najamutu arotu arujuna rujuyakutaisiata yarunaja. ⁴ Tiame warao eobo yajoto oriabane sanukiraja monuka ejoboyakutai taisike tata airamo tane ejobate. Najamutu arotu arujuna rujuyakutaisiata taisike airamo tane ejoboya. ⁵ Sanukiraja tamaja monuka maribia etu-warayakutai tai metuwaraya. ⁶ Nemokomokorakate maisia nome abaya. Warao tatuma kawanamo jisaka jakutaisi ebisaba omu esoakanoko abakore asira. Joyo arina awerenoko koyane asiraja nonamejeretu jakutaisi aro isia koyane tane nojaba autu toakore yakerakuna. ⁷ Raina arao ebisaba omu esoakanoko abayakutai are ja. Tiame raina arao amájae tane ribate. Are jate. Tiarone esoakanoko abatu jakutai amájae tane ribate. ⁸ Jimojo o jiomu jisaba esoakanoko tane ejobakore jewetane jiebikamo webotate. Mojo reko isiko o omu reko isiko jekunu are jakutaisi eku jitoakore jisaba asirajawitu. Tiarone iji mojokaberone o kakaberone obojona jiro eku yarukitane jisaba yakera. ⁹ Jimu jisaba omu esoakanoko tane ejobakore iji nisane jiebikamo webotate. Jimu manamo isiko sanamatanoko ajekunu eku jitoakore jisaba asirajawitu. Tiarone jimu jisakarone are ubakore jisaba yakera. ¹⁰ Sanukiraja tainanaka jakotu. Dio ainatabatuma kawanamo sanukirajasi ayaoromo ja. Marima najamutuata jakutaisi amujaba are ja. ¹¹ Tiame warao tane nakajakutai rija jakutaisi aobojona ibajukakitane naoae. ¹² Katukete? Warao jakutai aromu obeja siento jisaka jate tai. Takore obeja jisaka mumoni tate. Arotu katukate? Aobeja eobo jakutaisi iabane araisama najabunajara? Jotakwayata narute najabukitane. ¹³ Obeja mitane oriwakate. Nomewitu yatu isia ribiaine: Obeja mumoni tanatanajame oriwakaya. Tiarone mumoni jakutaisi miajame kwarika oriwakate. ¹⁴ Taisi monuka yatu Arima najamutuata ja jakutai tai tamaja sanukirajatuma kawanamo jisakarakate rijamejerenaja. ¹⁵ Jiwarao jiisiko asiraja nonakore jisamuka tata narune isia ribanu. Tane enokote. Jiribu nokokore jijisaka tane bajete. ¹⁶ Jiribu nokonaja jakore eobo jisaka o manamo yejebu jiiamo narumejerei. Tametane ribu anokomo manamo o rijanamo aribu nokote. ¹⁷ Tiarone tatuma aribu nokonaja jakore ikeresia saba rewarate. Ikeresia araoto aribu nokonaja jakore Judioana jakutaisi monuka bajete. Roma airamo aribia burata ebutu monuka bajete. ¹⁸ Nomewitu yatu isia ribiaine: Yatu raina eku itatabu-mejerenaja jakutai najamutuata monukajase itatabumejerenaja. Yatu raina eku ejeromejereakutai najamutuata ejeromejerea, tiaine. ¹⁹ Suatana yatu isia ribiaine: Yatu manamo obojona jisaka abate raina eku kwai ribiaja Dio ebukitane. Tane ebukore Ma-rima najamutuata jakutai yatu ebiakutai taisi eku nonate. ²⁰ Warao manamo o rijanamo maribia orikware nakakore ine tatuma autu bajia. ²¹ Takore Pedro karamane Jesú renokoae: Mairamo, mawarao eraja tane asiraja maisiko nonate tai. Katamona tane taisi kware asiraja abanaka maobojona iabakitane ja? Mojoabasi kware manamo tane yakerenara? tae. ²² Jesú taisi riboto ribane: Mojoabasi kware manamo taneana. Sientotuma tane kware asiraja abanaka jakitane ja. ²³ Tiame najamutu arotu arujuna rujuyakutai taisi sitatine. Airamo jakutai anebu arewe nome toakitane obonoae. ²⁴ Wa-jiabara aneburatu jisaka konae. Taisi arewe tareneto sinarijaira-tuma sinarijairatuma. ²⁵ Aneburatu aburata ekiraja ejobonae rewe amoara abakitane. Tiame airamo neburatu wabimejereae. Atira, atae anobotomo, atae aunukamo kokotuka tane wabimejereae, amoara isia arewe amoara abamejerei. ²⁶ Takore aneburatu jakutai airamo amujaba mukunamane rujane jinamunae. Ribane: Mairamo, mayawakakore rewe amoara kokotuka abatine, tae. ²⁷ Takore aneburatu airamo saba saneraja jame arewe amoara ebunaka ejeronae. ²⁸ Tiarone aneburatu ejobane rijana amusaba miae. Tairakate airamo aneburatu. Amusaba jakutai aneburatu wajiabara isia rewe renario siento jisaka jaja. Takore aro oane tewakitane jotananae. Ribane: Rewe amoara abanu, tae. ²⁹ Takore amusaba taisi amujaba mukunamane rujane jinamunae. Ebiaja ribane: Mayawakakore rewe amoara kokotuka abatine, tae. ³⁰ Tiarone araisa tane obononatanae. Mate rewe amoara abanaja jakore karamane mojojutanokoata konarumejereae. ³¹ Takore airamo anebu eobo taisi mitane akobe ajeraja ejobonae. Narune kwaeabanajakutaisi kokotuka airamo saba rewarae. ³² Rewarakore airamo aneburatu jakutaisi yejebune isia ribane: Ijisike maneburatu asirajawitu! Iji mebiame jirewe amoara kokotuka kware barinaka jiejeronae. ³³ Ine makobe jiisia ajera. Monukajase iji jikobe jimusaba isia ajerakuna, tae. ³⁴ Taitane airamo kwana orijisiae. Orijisiajame aneburatu arewe amoara kokotuka abanaja jakore isanamatamejereae. ³⁵ Tane Jesú ribane: Yatu awarao Dio aribu riboto nonayaja yatu isia asiraja nonate tai. Yatu aobojona isia yatu awaraoto kware asiraja abanaka oriaobojona iabakitane ja. Tanaja jakore Marima najamutuata jakutai tai airamo monuka yatu isia nonate, taeyama.

¹ Rewara riwaraitane Jesú Galilea tatamo narune ina Judea akejenuka nabakanae, nojaba Jordán jabisaba. ² Takore waraosebeira taisi iamo naruae. Narukore tata muanamo erajasi ibajukanae. ³ Takore Bariseo kawanamo Jesú tata nabakanae. Jesú ayakara mikitane renokoae. Ribane: Yawatanuka aobojona nibora jakutai tirasi iabakore Dio akajotabu ekuanara? taeyama. ⁴ Jesú tatuma riboto ribane: Yatu Jabataja jakutaisi teribiara bajama? Jabataja taisi isia ribia: Awajiabarayatukamo nibora, tira, tane nonae, tia. (Awa. 1:27) ⁵ Atae Jabataja taisi isia ribia: Tiame nibora jakutai arimasi iabane, aranima iabane tane, atirasi kaika nakate. Takore tatuma warao jisaka tane ejobate, tia. ⁶ Tiame tatuma warao manamoana rijana. Warao jisaka ejoboya. Dio warao manamo jaja oreku jisaka tane abanajakutai warao oremo taisi abanaka jakunarai, taeyama. ⁷ Takore tatuma renokoae: Moisés akarata eku ribu ja. Nibora jakutai atirasi iabakitane karata moakitane ja iabayaja, tae. Moisés katukeme tane ribia bajama? tae. ⁸ Jesú ribane: Yatu aobojona taeraja jame Moisés ribu yatu moae tatu iabamejerei. Tiarone raina ajiromayatukamo ribu taneana. ⁹ Tira niborama ebikamo narune raisama iamo narukore ribu niborama saba ja tirasi iabamejerei. Tira tane nonanajarone nibora oriatirasi iabane raisama nisakore tatusebe tane ejoboya. Nibora raisa tira iabánae tiaja nisakore tatusebe tane ejoboya. ¹⁰ Takore anebu ribane: Ribu tirasi isia tametane jakore tirabakanaja jakore yakerakuna, taeyama. ¹¹ Jesú ribane: Warao kokotuka tamaja ribu nokonaja. Dio ribu nokomejereakutai tatumasike ribu nokoya. ¹² Nibo tiraba-kakomoni jakutai aobojona raisa raisa tane ja. Kawanamo arija-warayatukamo tirabakakomoni. Eobo tatuma tane nonaetiji tira-bakakomoni ejobonae. Eobo najamutu arotu arujuna rujuya-kutaisi aobojona tirabakaoni ejobonae. Ribu anokotu saba yake-raja jakutai tai nokote. ¹³ Takore eobo nemokomoko Jesú tata konae Jesú oriamojo tatuma arai abane kware ebumejerei. Konakore Jesú anebu nemokomoko akonamo sabajikitane jotananae. ¹⁴ Sabajikore Jesú ribane: Nemokomoko ineata nabakamejerekotu. Nabaka-naka jamejerenaka jakotu. Najamutu arotu nemokomoko jaku-taisi isiko arujuna rujuya, taeyama. ¹⁵ Taitane Jesú nemokomoko arai amojo abaitane tatukamo naruae. ¹⁶ Takore neburatu jakutai Jesú mikitane naoae. Renokoae: Ina-minatu yakeraja, ine katukane yakeraja nonate are ubakitane? tae. ¹⁷ Jesú ribane: Katukeme maisia yakeraja tia bajama? Jisa-kawitu yakeraja ja. Tai Diowitu. Tiarone iji obojona jiro eku yarukitane obonokore Dio akajotabu eku abanu, taeyama. ¹⁸ Takore: Kajotabu kasikaja? tae. Jesú ribane: Nanaka jau. Tira jarone raisama najabunaka jau. Erijisanaka jau. Jiraisama kware abayaja ribu tona rewaranaka jau. ¹⁹ Jirimasi, jiranima tane yatomanetete. (Ejo. 20:12-16 Kaj. 5:16-20) Jiraisamarakate obonote. Iji wite oriobonoyakutai taisi monuka jiraisama obonote, tae. (Lev. 19:18) ²⁰ Takore neburatu ribunae: Ine nebusanukayatukamo tamaja ribu kokotuka eku abayaine. Atae masaba kasikaja ja? tae. ²¹ Jesú ribane: Iji Dio aobojona kaikawitu ejobakitane obono-kore jiaunukamo wabine saneraubiajasi moau. Moaitane maiamo kujukitane nao. Nokabuka najamutuata jimoara jate, taeyama. ²² Tiarone neburatu jakutai tamaja ribu nokoitane ekumoni-raja naruae, aunukamo eraja jame. ²³ Takore Jesú anebu isia ribane: Nomewitu yatu isia ribiaine: Burata arotu jakutai najamutu arotu arujuna rujuyakutaisiata yarukitane taerajawituraji bajama! tiaine. ²⁴ Atae atanejese ribiaine: Kameyo jakutai akosa atoto ekia yarukitane moina. Tiarone burata arotu Dio arujuna rujuyakutaisiata yarukitane moinawitu, tiaine, tae. ²⁵ Jesú tane ribakore aribu aobojona anebu kwana retaubuae. Orirenokoae: Amasike sinama aobojona bajukate bajama? tae-yama. ²⁶ Takore Jesú tatuma mitane ribane: Tamaja ribu waraoto saba moina tiarone Dio saba kokotuka moinena, tae. ²⁷ Takore Pedro riboto ribane: Oko kokotuka iabane jiiamo naoaeko. Oko bituma nojote? tae. ²⁸ Jesú tatuma isia ribane: Nomewitu yatu isia ribiaine: Dio mate kokotuka jiro tane nonate. Warao tane nakajakutai airamo arujunoko yakerajasi arai rujate. Rujakore yatu taisi iamo nao-ajakutai yaturakate airamo arujunoko mojoreko kware manamo arai rujate. Rujane Israel awaraosebeira mojoreko kware manamo aribu nome toate. ²⁹ Warao aunukamo iabanae maobojona. Aja-noko iabanae tai. Arakatuma iabanae tai. Arakoituma iabanae tai. Arima, arani, atira, anobotomo tane iabanae tai. Arajikaba iaba-nae tai. Iabanajakutai tai siento tane nojote. Are ubakitane nojote. ³⁰ Tiarone ama wajiabara jakutai tatuma eraja ajotoata bajete. Ama ajotoata jakutai tatuma wajiabara ejobate, tiaine.

¹ Najamutu arotu arujuna rujuyakutai tai yaota arotu monuka. Yaota arotu jokona anejeko ejobonae yaotamo najabukitane. Yaotamo najabuae uwa arimejerei. ² Isia ribane: Ya jisaka yaota amoara burata renario jisaka abatine, tae. Taitane arajikaba uwa arauineta inatabae yaotamejerei. ³ Tatukamo ya kwai sabuka nebu raisatuma najabiaja naruae. Narune ayaota ekiraja jakutaisi miae jomakaba awabinokoata. ⁴ Isia ribane: Narukotu manamuna arikitane. Takore yaota amoara kaika yatu moatine, tae. Takore tatuma naruae. ⁵ Takore yaota arotu atanejese ejobonae, ya kwai. Atanejese ya anayakore ejobonae. Are monu-kajase nonae. ⁶ Atanejese tai ya anayakorewitu jomakaba awabinokoata ejobonae. Tata yaota ekiraja jakutaisi mitane isia ribane: Yatu katukeme yaotanaka ya anaya? tae. ⁷ Takore: Yaota arotu jisakarakate yaota kamoanaja oko yaotamejerei, tae. Takore: Narukotu manamuna arikitane. Takore yaota kaika yatu moatine, tae. ⁸ Ya soto takore yaota arotu kaboraru yejebune isia ribane: Yaotamo yejebune amoara moau. Ayaju jakutai taisi wajiabara moau. Tatukamo araisa araisa tane. Wajiabara jakutai taisi ayaju tane moate. ⁹ Takore ya anayakorewitu yaota jotana-najakutai wajiabara nojoae. Yaota amoara kaika renario jisaka nojoae. ¹⁰ Nokabuka wajiabara yaota jotananajakutai nojokitane ejobonae. Tatuma obonobuae: Oko kwarika nojote. Tiarone are monukajase renario jisaka nojoae. ¹¹ Nojoitane yaota arotuma isia eribubuae. ¹² Ribane: Tamatuma ayaju tane naone ya asinarija jisaka yaotae. Takorejone kamonuka amoara abanae. Okosike yaota kwaeabanaeko. Jokoji kwaeabanaeko, tae. ¹³ Takore yaota arotu tatuma kawanamo jisaka riboto ribunae. Maraisa, jiisiko asiraja nonanajine. Jiisia ribunatanaera: Yaota amoara renario jisaka, tanatanaera? ¹⁴ Jiburata nisane naru. Ayaju yaota jotananajakutai tai jimonuka moakitane obonoyaine. ¹⁵ Maburatenara? Ine tametane moakitane obonokore maobojonenara? Ine maobojona yakerame jiaobojona awerea ejoboyara? taeyama. ¹⁶ Amasike, ayaju jakutai wajiabara tane ejobate. Awajiabara jakutai ayaju tane ejobate. Erajasi yejebiarone erajena mibune nisaya, tae. Jesú tane rewarae. ¹⁷ Tatukamo Jesú Jerusalén sabasaba nariaja anebu mojoreko kware manamo emo konarune isia ribunae. ¹⁸ Ribane: Oko Jerusalén tata yaburia. Yatu taisi naminaya. Tata warao tane nakajakutaisi wabite. Saserote airamotuma amojeku abakitane wabite. Kajotabu akarata ainaminamo amojeku abakitane wabite. Tatuma tai wabamejerete. ¹⁹ Tane Judioana amojeku taisi abate ekotubune yewerene tane esijarimejerei. Tiarone ya rijanamo takore nominate, taeyama. ²⁰ Zebedeo anobotomo arani nabakanae. Anobotomo jakutaisi isiko Jesú tata nabakane amujaba jinamane rujunae ebukitane. ²¹ Takore Jesú ribane: Iji obonoyakutai bitu tai? tae. Tira ribane: Iji kajotabumejereaine. Jirujuna rujane mauka jisaka jimojonome tajasaba rujamejerei kajotabu. Mauka araisa jikajamojo tajasaba rujamejerei kajotabu, tae. ²² Takore Jesú tatuma riboto ribane: Yatu ebiakutai taisi naminanaja. Ine jobinoko ekumo jobikitia. Yatu saba yakerenara mamonuka jobikitane? Mekobakitane ja. Yatu saba yakerenara mamonuka yatu ekobakitane? tae. Tatuma ribane: Kasaba yakera, taeyama. ²³ Takore: Nomewitu yatu mamonuka jobinoko ekumo jobite. Mamonuka yatu ekobate. Tiarone ribu ekiraine yatu mamojo-nome tajasabaya, makajamojo tajasabaya tane norujamejerei. Maobojona eku rujakomoni, tiarone Marima iyakaratajakutai taisike rujate, tae. ²⁴ Takore Jesú anebu mojoreko jakutai eobo manamo aribu nokoitane isiko kwana orijisiae. ²⁵ Orijisikore Jesú tatuma yejebune isia ribane: Yatu Judioana airamo isia naminaya. Airamo jakutai anebu are inatabaubia. Tatuma airamo sabuka jakutai are kajotabubia. ²⁶ Tiarone yatu tametane nonanaka jakotu. Airamo tane ejobakitane obonoyakutai eobo akajotabu tane bajekitane ja. ²⁷ Kwarika ejobakitane obonoyakutai eobo akajotabu tane bajekitane ja. ²⁸ Warao tane nakajakutai tametane naoae. Eobo taisi akajotabu tane ejobamejerei naonatanae. Tiarone eobo akajotabu tane naoae. Tai naoae warao erajasi kware wabane amoara tane abakitane tatuma ejerokitane. ²⁹ Tatukamo janokoina Jericó ekumo ejobakore warao eraja Jesú iamo nariaja jaja. ³⁰ Mioni manamo jojisi ajaja norujubúae tiaja jaja. Jesú tatuma kwaeabakore nokoitane rokojotae. Kairamo, David Auka! Oko jisaba sanerakore kakware barenu, taeyama. ³¹ Rokojotakore warao tatuma sabajiae inaretamejerei. Saba-jikorejone kwarika rokojotae. Kairamo, David Auka, oko jisaba sanerakore kakware barenu, tae. ³² Takore Jesú tuwarane mioni yejebune renokoae: Yatu katukane ine yatu isia nonamejerea? tae. ³³ Tatuma Jesú riboto ribane: Kairamo, oko seorakunako! tae. ³⁴ Takore Jesú akobe tatuma isia ajerae. Amu torinae. Tore-kore rijana mioni jakutai seorobuae. Seorobuitane Jesú iamo naruae.

¹ Tatukamo Jerusalén awere nabakane janokoina Betfagé tata nabakanae. Janokoina jakutai jotakwa Oriwa Arauina awere. Tata nabakane Jesú anebu manamo inatabae. ² Isia ribane: Janokoina sanuka kawere jakutaisiata narukotu. Tata buro tira koyánae tiajasi mite. Auka isiko ja. Jajene tamate konakotu. ³ Jisaka yatu isia ribakore riboto ribakotu: Kairamo tatuma obonoya, takotu. Takore rubujira tatuma inatabate, taeyama. ⁴ Tametane ejobonae Dio kware arewaratu aribu eku naka-mejerei. ⁵ Rewaratu jakutai ribane: Janokoina Sion araoto isia ribakotu. (Isa. 62:11) Mikotu. Yatu Airamo yatuata naote. Saneraja monuka naote. Buro arai naote. Buro yaotayakutaisi aukama arai naote, takotu, taeyama. (Zac. 9:9) ⁶ Takore anebu narune Jesú aribu eku nonae. ⁷ Buro, aukama isiko Jesú tata konane ajiaka buro arai abanae. Abakore arai Jesú rujunae. ⁸ Takore waraosebeira jakutai ajiaka jojisi eku abanae. Eobo rau awaku jewetane jojisi eku ebujakaubuaeyama. ⁹ Warao ebe nariakutai rokojotakitane jotananae. Warao iamo naoyakutai monukajase rokojotakitane jotananae. Ribane: David Auka jakutaisi isia Hosanna! tane ribiaoko. Airamo aribia naoyakutai tai yakerajawitu! (Rok. 118:26) Kwai arao ribakunarai: Hosanna! takunarai, tae. ¹⁰ Takore Jesú Jerusalén eku yarukore janokoina arao koko-tuka wiyawiyae. Renokoae: Tamaja sina tai? tae. ¹¹ Eobo ribane: Tamaja Jesú Dio kware arewaratu. Tai jano-koina Nazaret ina Galilea arotu. ¹² Tatukamo Jesú kwai ribunoko Dio saba ribakitane nónae tiakutaisi yaruae. Yarune taisi eku awabimo, anisamo tane kokotuka webiarae. Burata akambiatamo amesa ejotinarinae. Kokojo awabimo arujunoko ejotinarinae. ¹³ Isia ribane: Jabataja eku ribia: Majanoko isia ribate: Tai kwai ribunoko, tate, tia. (Isa. 56:7) Tiarone yatu erijisa araoto ajanoko tane abanae, taeyama. (Jer. 7:11) ¹⁴ Jesú kwai ribunoko eku jakore mioni kawanamo tokotoko kawanamo tane taisiata naoae. Naokore tatuma ibajukanae. ¹⁵ Tia-rone saserote airamotuma, kajotabu akarata ainaminamo tane mitane orijisiae. Jesú mianare nonayakore mitane kwana ori-jisiae. Nemokomoko kwai ribunoko eku rokojotae: David Auka jakutaisi isia Hosanna! tane ribiaoko, tae. Tane rokojotaya-kore nokoitane kwana orijisiae. ¹⁶ Jesú isia ribane: Iji tatuma aribu nokonajara? tae. Takore: Nokoyaine. Tiarone yatu Jabataja teribunaja mojoro? Tamaja ribu isia ribia: Iji nemokomoko rokotu waramejereae. Ami oroyakutai waramejereae. Dio yakeraja jae tane waramejereae, tia. (Rok. 8:2) ¹⁷ Taitane tatuma iabane janokoina ekumo narune janokoina sanuka Betania tata yaronae. Tata yarone ima jokonae. ¹⁸ Tane jokona anejeko Jesú janokoineta bajiaja nojeraja baji-nae. ¹⁹ Jojisi ajaja ikoru miae. Mitane awere nabakane akwaja minatanae. Arokowitu miae. Taitane Jesú ikoru isia ribane: Tamatukamo iji kwajanatate, taeyama. Takore rijana ikoru wajae. ²⁰ Wajakore anebu miae. Mitane retaubuae. Ribane: Ikoru katukane rubujira wajae bajama? taeyama. ²¹ Takore Jesú tatuma riboto ribane: Nomewitu yatu isia ribiaine: Yatu nome abayaja, obojona emo emo bajinaka tane monukajase ribate. Ine ikoru isia ribunajakutai taisi monuka ribate. Atae kwarika ribate. Tamaja jotakwa isia ribakuna: Tatukamo narune nojabaira autu bajenu, takuna. Takore yatu aribu eku nonakuna. ²² Yatu nome abayaja yatu kokotuka kwai ribiaja ebiakutai taisi nojote, tae. ²³ Taitane Jesú kwai ribunoko eku yaruae. Yarune inaminae. Inaminakore saserote airamotuma, Judio airamotuma tane Jesu-ata nabakanae. Renokoae: Iji sinama aribia tamajasi nonaya? Sina ribu jimoae? taeyama. ²⁴ Jesú tatuma riboto ribane: Inerakate yatu riboto renokotine. Mariboto ribakore ine sina mainatabae tai tane yatu isia ribatine. ²⁵ Sina Juan inatabae joni ekobumejerei? Dio inatabaera o warao inatabae? tae. Renokokore tatuma oriaribu kwarikakitane jota-nanae. Ribane: Oko ribane: Dio kajotabuae tane ribakore kaisia ribate: Katukeme aribu eku abanatanae? tate. ²⁶ Oko ribane warao inatabae tane ribakore, oko waraoto nojaya. Warao koko-tuka jakutai Juan Dio kware arewaratu tane naoae tanabaya, taeyama. ²⁷ Taitane Jesú isia ribane: Naminanajaoko, tae. Takore: Yatu marenoko riboto ribunatanajame inerakate sinama aribia nonaya tai tane yatu saba rewaranajine. ²⁸ Suatana tatuma isia ribane: Yatu katukane obonobia? Nibora jakutai anobotomo manamo. Arajema isia ribane: Mauka, ama ya eku karamane uwa arikitane naru, tae. ²⁹ Takore auka riboto ribane: Obononajine, tae. Tiarone aobojona ibarene are naruae yaotakitane. ³⁰ Tatukamo arima jakutai auka araka jakutaisiata narune monukajase ribunae. Takore arimasi isia ribane: Mairamo, yakera, narutine, tae. Tiarone narunatanae. ³¹ Auka kasikaja arimasi aobojona eku nonae? tae. Tatuma ribane: Araje arimasi aobojona eku nonae, tae. Takore Jesú ribane: Yatu isia ribiaine: Eobo Dio arujuna rujuyakutaisiata yaria. Roma airamo aribia burata ebumo jakutai yatu ebisabuka yaria. Nibosebe yatu ebisabuka yaria tane. ³² Juan naoae jojisi nomeraja isia inaminakitane. Katukane nonakitane ja tane inaminakitane naoae. Tiarone yatu taisi aribu yajorabanatanae. Yatu yajorabanajarone burata ebumo yajorabae. Nibosebe yajo-rabae. Tiarone yatu miaerone, yatu aobojona ekumoniraja bajina-tanae yajorabakitane. ³³ Ine asita raisa abane rewarakore nokokotu. Joboto arotu jakutai arajikaba nonaitane uwa arauwitu namuae. Anamuna kware raratae. Uwa ajo anisanoko nonae. Janoko kwai nonae tatamo yaorokitane. Rajikaba rajikabamo enebane utiraja naruae. ³⁴ Taitane uwa akwaja ayakaramata eku anebu inatabae. Uwa akari arotuma saba jakutaisi ebumejerei inatabae. ³⁵ Ebuaerone rajikabamo anebu oane jisaka yewerene araisama nane, araisama joyo isia timiae. ³⁶ Takore arotu jakutai anebu eobo inatabae. Asebe kwarika inatabae. Tiarone rajikabamo jakutai monukajase kokotuka isia nonae. ³⁷ Takore ayaju tane arotu oriaukama inatabae. Ribane: Ine maukama inatabakore yatomanetete, tae. ³⁸ Tiarone aukama mi-tane rajikabamo oriisia ribane: Miki anaka. Arotu wabakore uwa arauina tamajasi amojeku bajete. Naki anaka. Naitane oko uwa arauina arao tane ejobateko, tae. ³⁹ Tane oane, rajikaba ekumo webotane, naubuae. ⁴⁰ Tane Jesú rewaraitane renokoae: Rajikaba arotu naoitane yaotamo isia katukane nonate bajama? tae. ⁴¹ Tatuma ribane: Akobe ajerenaka asiraja anonamo kubate. Arajikaba rajikabamo eobo enebate. Asinarija eku anamuna akari arotuma amojeku abamejerei enebate. ⁴² Takore Jesú ribane: Yatu Jabataja teribunajara? Jabataja taisi isia ribia: Janoko anonamo joyo tainae. Joyo tainajakutai tai janoko ajoyoira tane ejobonae. Tamaja Airamo anona. Oko taisi mitane retayaoko, tia. (Rok. 118:22-23) ⁴³ Tiame yatu isia ribiaine: Dio arujuna rujuyakutai tai yatu ebikamo konarute. Dio arujuna rujuyakutaisi warao akajotabu kaika nonayakutai taisi isiko Dio arujuna rujate. ⁴⁴ Warao joyo jakutaisi arai nakane asatate. Tiarone joyo waraoto arai nakane ejujute, taeyama. ⁴⁵ Jesú asita abane rewarakore saserote airamotuma, Bariseo-tuma tane Jesú aribu nokoae. Nokoitane kasitaya tane naminae. ⁴⁶ Naminane emojojutakitane obonoae tiarone moinaja ejobonae waraosebeira nojayame. Waraosebeira ribunae: Jesú Dio kware arewaratu, taeyama.

¹ Takore atanejese Jesú asita abane rewarakitane jotananae. ² Ribane: Najamutu arotu arujuna rujuyakutaisi sitatine. Airamo jakutai noara abanae auka kasajame. ³ Anebu inatabae yejebuajakutai naomejerei. Tiarone yejebuajakutai narukitane obononatanae. ⁴ Takore anebu eobo inatabae. Inatabayaja isia ribane: Yejebuajakutaisi isia ribakotu: Najoro iyakarátae tiaja ja rijana, takotu. Maromu baka nibo atae maromu irauraubúae tiakutai tane kubaine. Kokotuka iyakarátae tiaja ja rijana. Mauka kasakore mikitane naokunarai, tae. ⁵ Tiarone yejebuajakutai aribu nokonatanae. Jisaka arajikabeta naruae. Araisa awabinoko-ata naruae. ⁶ Eobo airamo anebu oaubune isiko asiraja nonane kubae. ⁷ Takore airamo taisi isia nokone kwana orijisiae. Yaoromo inatabae akobakamo kubane, ajanokoina erokamejerei. ⁸ Taitane anebu isia ribane: Kokotuka iyakarátae tiaja ja mauka kasamejerei tiarone yejebuajakutai amoara ekiraja ejobonae naokitane. ⁹ Narukotu janokoina anaru ajituata nokaramane mijakutaisi yejebukotu. Tatuma naone mauka kasayakore mite, taeyama. ¹⁰ Takore anebu ejobonae. Jojisi eku mijakutai koko-tuka orikware toae. Kawanamo asiraja, kawanamo yakeraja tane orikware toae. Tane janoko ikwatae. ¹¹ Takore airamo yejebuajakutaisi mikitane naoae. Tata nibora miae. Nibora jakutai auka kasayakore mikitane jakutaisi ajiaka orisabanaka yaruae. ¹² Airamo taisi isia ribane: Maraisa, iji katukeme kasayakore mikitane jakutaisi ajiaka orisabanaka yaruae bajama? Tane takore araisa inareraja bajinae. ¹³ Takore airamo najoro mesa arai abamo isia ribane: Omu, amojo tane koyane imajana yakareku jakutaisi eku toakotu. Tata onate. Tata ai kuokuo tate, tae. ¹⁴ Eraja yejebiarone erajena mibune nisaya. ¹⁵ Tatukamo Bariseotuma narune obojona jisaka eku abanae. Abanae Jesú saba kai abakitane tatuma aribu ebisaba nakamejerei. ¹⁶ Taitane akarata sabasabamo inatabae Herodes akarata sabasabamo isiko. Ribamejereae: Kainaminatu, iji nome rewarayakutai taisi naminayaoko. Dio ajojisi isia nomeraja inaminaya. Iji waraoto amuwitu minaja. Waraoto anona kaika ribu nome toanaja iji. ¹⁷ Ama ribanu. Airamo César isia burata abakitane kajotabu ekuanara? tamejereae. ¹⁸ Tatuma ribakore Jesú tatuma aobojona asirajasi naminae. Ribane: Yatu aobojona manamo. Katukeme mayakara mija bajama? ¹⁹ Burata airamowitu saba jakutaisi memi, tae. Takore renario konae. ²⁰ Konakore Jesú mitane renokoae. Tamaja mejokoji sinama amejokoji? Awai jabataja jakutai, sinama awai? taeyama. ²¹ Takore: Tai César, taeyama. Jesú ribane: Airamo César saba jakutai taisi César moate. Dio saba jakutai taisi Dio moate, taeyama. ²² Takore tamaja ribu nokone retaubuae. Jesú iabane naruae. ²³ Are tai ya eku Saduceo sabasabamo Jesú mikitane naruae. Saduceo jakutai ribia warao waba jakutai nomininaja, tia. Tatuma Jesú renokoae. ²⁴ Ribane: Inaminatu, Moisés akarata eku jabatae. Tai ribia: Araje tirabaka jakutai wabane anobotomo ekirakore araka ayabuaba jakutai arajema atirasi nisakitane ja. Takore arakama anoboto jakutai arajema anoboto monuka bajete, tia. ²⁵ Takore kawanamo oriwarao mojoabasi kware manamo jaja araje araka-tuma tane. Araje jakutai tirabakane nokabuka wabae. Anobotomo ekirame atira arakawitu amojeku bajinae. ²⁶ Tai monukajase araiyatuka amojeku bajinae. Araisa monukajase. Takore tira jakutai warao mojoabasi kware manamo atira tane ejobonae. ²⁷ Ayaju tane tirarakate wabae. ²⁸ Takore warao nominikore warao mojoabasi kware manamo atira jakutai sinama atira tane bajete? Tai nibo mojoabasi kware manamo kokotuka atira, taeyama. ²⁹ Jesú tatuma riboto ribane: Yatu Jabataja naminanaja jame, Dio ajarata naminanaja jame, emo ribia. ³⁰ Warao wabane nominane tirabakanaja niborabakanaja tane. Aukatira iboma jakutaisi moanatate niborabakamejerei. Dio ainataba najamutuata jakutaisi monuka bajia. ³¹ Atae waba anominina isia ribu ja. Dio wite ribunajakutai yatu taisi teribunajara? ³² Dio ribunae: Ine Abraham Ario, Isaac Ario, Jacob Ario tane, taeyama. (Ejo. 3:6) Dio jakutai waba Arioana. Tai riko jakutaisi Ario, taeyama. ³³ Takore warao Jesú aribu nokone kokotuka ainamina aobojona kwana retaubuae. ³⁴ Jesú Saduceo aribu kwarikakore Bariseotuma naminae. Orikware nakae. ³⁵ Tatuma kawanamo Dio akajotabu akarata anaminatu jakutai Jesú renokoae ayakara mikitane. ³⁶ Ribane: Inaminatu, Dio akajotabu kasikaja kajotabu kokotuka kwarika? taeyama. ³⁷ Jesú ribane: Airamo Jirio jakutai taisi obonote. Jikobe kokotuka isia obonote. Jiaobojona kokotuka isia obonote. Jiaobonobu kokotuka isia obonote. (Kaj. 6:5) ³⁸ Tamajasike Dio akajotabu urirajawitu. Tamaja eobo kwarika ejoboya. ³⁹ Araiyatuka jakutai tai tamaja. Iji wite obonoyakutai, taisi monuka jiraisama obonote. (Lev. 19:18) ⁴⁰ Tamaja ribu manamo isimo rewara kokotuka ejoboya. Moisés akajotabu ejoboya. Dio kware arewaramo aribu ejoboya tane, taeyama. ⁴¹ Takore Bariseotuma mate jakore Jesú tatuma renokoae. ⁴² Ri-bane: Akirito isia katukane obonobia yatu? Tai sinama Auka? taeyama. Takore: Tai David auka, taeyama. ⁴³ Takore Jesú ribane: David Dio Amejokojira aobojona ri-bane: Tai Mairamo, tae. Aukarone katukeme isia Mairamo tae bajama? ⁴⁴ David ribane: Airamo Mairamo isia ribunae: Jiisiko asiraja jakutai tai jiomu noika abatine. Mate abanaja jakore mamojonome tajasaba rujanu, tae, taeyama. (Rok. 110:1) ⁴⁵ Davidjase ribia: Tai Mairamo, tia. Airamo jakutai katukane David Auka tane ejobate? ⁴⁶ Jesú ribakore warao ribu jisaka-rakate riboto ribakomoni. Tai ya yatukamo warao retaya Jesú renokokitane.

¹ Takore Jesú waraoto saba anebu saba tane rewarae. ² Ribane: Kajotabu akarata ainaminamo Bariseo tane inaminamo tane oritoanae Moisés akajotabu inaminakitane. ³ Tiame aribu nokokotu. Inaminajakutaisi kokotuka eku nonakotu. Tiarone tatuma anona sitanaka jakotu. Aroko isia ribia. Tiarone anona aribu kaikena. ⁴ Uru uriraja okerajenawitu yejimarane waraoto erosiabaya konarumejerei. Tiarone tatuma wite mojo akwa isiarakate torinaja konarukitane. ⁵ Kokotukanea nonaya eobo mimejerei. Jabataja akari karata uriraja arai jabatane oriauto isia imajaya ajara isia imajaya tane. Ajiaka akojo uriraja abaya eobo kwarikakitane. ⁶ Noarayata narune rujunoko airamo saba jakutaisi eku norujakitane obonoya. Orikware nakanoko eku rujunoko airamo saba jakutaisi eku rujakitane tatuma saba yakera. ⁷ Wabinoko eku warao tatuma isia yakeraubiara abaubiakore tatuma saba yakera. Isia Inaminatu, Inaminatu, tane ribiakore tatuma saba yakera. ⁸ Tiarone yatu isia Inaminatu tane ribamejerenaka jakotu. Yatusike oriwarao. Yatu Ainaminatu jisakawitu. Yatu Ainami-natu jakutai tai Kirito. ⁹ Raina eku raisama isia Rima tane ribunaka jakotu. Yatu Arima jisakawitu ja. Yatu Arima jakutai najamutuata ja. ¹⁰ Yatu isia Airamo tane ribamejerenaka jakotu. Kirito jakutai tai Airamowitu. ¹¹ Eobo akajotabu tane bajiakutai tai eobo kwarika. ¹² Wite airamo tane oritoayakutai tai eobo yajoto bajete. Tiarone eobo yajoto oriabayakutai airamo tane bajete. ¹³ Yatu kajotabu akarata ainaminamo, Bariseotuma tane, yatu aobojona manamo. Yatu amájae tane ribate. Najamutu arotu arujuneta yarunaka jamejerea. Akojo mukoroya. Yatu wite yaru-naja. Eobo yarukitane obonoyakutai yatu tatuma yarumejere-naja. ¹⁴ Yatu kajotabu akarata ainaminamo, Bariseotuma tane, yatu aobojona manamo. Yatu amájae tane ribate. Yatu tira tewere ebikamo ajanoko nisaya. Tiarone yakeraja tane oritoakitane kawajeraja kwai ribia. Tiame Dio yatu kwarika sanamatameje-rete. ¹⁵ Yatu kajotabu akarata ainaminamo, Bariseotuma tane, yatu aobojona manamo. Yatu amájae tane ribate. Yatu kokotukanea jakaya waraoto najabiaja. Wajakaya jakaya. Jonia jakaya warao eobo yatu sabasabamo ejobamejerei. Ejobakore yatu kwarika asiraja nonamejerea. Anona amoara sanamatanoko ajekunuata narukitane. Yakerakore manata narukuna. ¹⁶ Yatu eobo akonarumorone mujasi. Yatu amájae tane ribate. Yatu ribia: Jisaka kwai ribunoko awai warayaja ribu moakore ribu eku abakitane ekira. Tiarone kwai ribunoko aburata simo awai warayaja ribakore ribu eku abakitane ja, tia. ¹⁷ Yatusike bure! Yatusike mujasi! Kwai ribunoko aobojona aburata simo Dio saba emo abánae tiaja bajia. Tane jakore kasikaja amoara ja? Burata simo amoara ja mojoro? O kwai ribunoko amoara ja? ¹⁸ Yatu atae ribia: Romu erokunoko awai warayaja ribu moakore ribu eku abakitane ekira. Tiarone nobeanaka erokunoko arai jakutaisi awai warayaja ribu moakore ribu eku abakitane ja, tia. ¹⁹ Yatusike bure! Yatusike mujasi! Erokunoko aobojona nobeanaka Dio saba emo abánae tiaja bajia. Tane jakore kasikaja amoara ja? Nobeanaka amoara ja mojoro? O erokunoko amoara ja? ²⁰ Rokunoko awai warayaja ribu moakore rokunoko isia-wituana tiarone kokotuka taisi arai jakutaisi isiarakate. ²¹ Kwai ribunoko awai warayaja ribu moakore kwai ribunoko isia-wituana. Dio kwai ribunoko eku ubayakutai taisi isia ribu moaya. ²² Najamutu arotuma awai warayaja ribu moakore Dio arujunoko isia ribu moaya. Dio rujunoko arai rujuyakutaisi awai warayaja ribu moaya. ²³ Yatu kajotabu akarata ainaminamo, Bariseotuma tane, yatu aobojona manamo. Yatu amájae tane ribate. Yatu namuna jonaberajasi asebe mojoreko mojoreko tane ekumo asebe jisaka jisaka Dio moaya. Namuna aukamo anis asebe mojoreko ekumo jisaka moaya. Namuna aukamo comino asebe mojoreko ekumo jisaka moaya. Moayarone kajotabu uriraja jakutaisi eku abanaja! Nomeraja nonakitane, kobe eobo isia ajerakitane, nome abakitane tane. Namuna akari moakitane yakera. Tiarone nomeraja nona-kitane, eobo isia kobe ajerakitane, nome abakitane tane tairakate yakerakuna. ²⁴ Yatu eobo akonarumorone mujasi! Yatu kojoboto enisabia korunaka jakitane. Tiarone kameyo koria. ²⁵ Yatu kajotabu akarata ainaminamo, Bariseotuma tane yatu aobojona manamo. Yatu amájae tane ribate. Yatu jobinoko, jorujoko tane araia jojarayakutaisi monuka araia jojaraya. Tia-rone yatu aobojona eku erijisa sabasabaya kobu. Orietuwa-rakomoni jakutaisi isia kobu. ²⁶ Bariseo jakutai, iji mujasi. Wajiabara jobinoko ekia jojarakuna jorujoko ekia jojarakuna tane. Takore araiarakate ananerena jakuna. ²⁷ Yatu kajotabu akarata ainaminamo, Bariseotuma tane yatu amájae tane ribate. Yatu aobojona manamo. Yatu joitanoko monuka. Araia jokeraja ejoya yakeraja ejobamejerei. Tiarone ekia waba amuju, koi kokotuka kobu tane. ²⁸ Yaturakate tane. Waraoto amujaba nomeraja monuka. Tiarone ekia obojona manamo isia kobu, nona asirajasi isia kobu tane. ²⁹ Yatu kajotabu akarata ainaminamo, Bariseotuma tane yatu aobojona manamo. Yatu amájae tane ribate. Yatu Dio kware arewaramo ebe jakutaisi ajoitanoko nonaya. Warao nomeraja anonamo jakutaisi isia obonobunoko iyakarataya. ³⁰ Tatukamo yatu ribia: Oko kanobotuma aya eku jakore Dio kware arewa-ramo nanatakuna, tia. ³¹ Tametane ribakore Oko Dio kware are-waramo akubamo anatoromo tane ribia. ³² Yatu anobotuma anona riwarakotu! ³³ Yatusike juba monuka! Yatu jubawitu anobotomo! Sanama-tanoko ajekunu eku sanamatakitane ribu jarone katukane jekete? ³⁴ Yatu sanamata jekemejerei nibo yatuata inatabatine. Dio kware arewaramo inatabatine. Inaminamo inatabatine. Tiarone yatu tatuma kawanamo kubate. Kawanamo kuru isia esijarite. Yatu eobo yewerete orikware nakanoko eku. Yatu tatuma janokoinatuma ekia iyajubute isanamatakitane. ³⁵ Tiame raina eku nomerajasi anonamo ateje kubajakutai taisi awaba yatu kware abate. Kubajakutai Abel nomeraja jakutaisiatukamo Zacarias Berequias auka jakutaisiata ru tane. Yatu Dio ajanoko romu ero-kunoko tane manakawanuka Zacarias jakutaisi nae. ³⁶ Nome-witu yatu isia ribiaine: Tatuma awaba kokotuka warao ama jakutaisi kware abate. ³⁷ Jerusalén arao, Jerusalén arao! Yatu Dio kware arewaramo kubaya! Dio yatuata inatabayakutai yatu tatuma timia joyo isia. Eraja tane yatu anobotomo orikware toakitane obonoaine. Karina ajarajuji isia aukamo kware namutayakutaisi monuka yatu namutakuine. Tiarone yatu tane obononatanae. ³⁸ Mikotu rijana. Yatu ajanoko ina arao ekiraja tane bajia. ³⁹ Yatu isia ribiaine: Mate asinarija eku nakanaja jakore maminaja. Asinarija eku nakakore ribate: Airamo aribia naoyakutai tai yakerajawitu, tate. (Rok. 118:26) Takore mamite, taeyama.

¹ Jesú kwai ribunoko ekumo ejobane narukitiakore anebu Jesú tata nabakanae. Kwai ribunoko ajanokotuma emi-kitane jotananae. ² Emikore Jesú ribane: Yatu tamaja kokotuka mijara? Nomewitu yatu isia ribiaine: Joyo jisakarakate raisama arai bajinatate. Kokotuka enojobone joika toate, taeyama. ³ Tatukamo jotakwa Oriwa Arauineta naruae. Narukore Jesú tata rujakore anebu abita Jesú tata nabakanae. Ribane: Iji rewara-yakutaisi eku katukakore nakate? Kasaba rewarau. Jinao asina-rija kasikaja? Raina ayaju asinarija kasikaja? tae. ⁴ Takore Jesú riboto ribane: Oi! Eobo yatu imasibumejere-naka jakotu! ⁵ Eraja maribia monuka naone ribate: Ine Akirito, tate. Tane ribiaja warao erajasi imasibute. ⁶ Yatu orikuba isia nokokitia. Orikuba ajawana isia nokokitia. Nokoitane retanaka jakotu. Tametane kokotuka kwaeabakitane ja. Tiarone ayaju mate. ⁷ Takore mate ina jisaka arao ina raisama araoto isiko orikubate. Ina airamo jisaka ina airamo raisama isiko orikubate. Nojoira jate. Waba eraja jate. Inariko kokotukanea jakate. ⁸ Kokotuka tametane kwaeabakore mate waraoto asanamata awajiabarawitu. ⁹ Takore eobo yatu wabite yatu isanamatamejerei. Yatu ku-bate. Yatu masabasabamotiji ina kokotuka arao yatu rarijatate. ¹⁰ Tane takore eraja omu esoakate. Orirarijatate. Oriwabite. ¹¹ Eraja Dio kware arewaramo tane oritoayaja ejobate. Tane warao erajasi imasibute. ¹² Asiraja anonamo eraja jame kawa-namo eobo obonokitane iabate. ¹³ Ya ayajuata taeratayakutai Dio taisi aobojona ibajukate. ¹⁴ Tamaja ribu Dio arujuna isia jakutai raina kokotukanea rewarate. Ina arao ribu nokomejerei rewarate. Rewara riwarakore ayaju eku rijana. ¹⁵ Dio kware arewaratu Daniel akarata eku iekoronoko isia jabatae. Tai Dio saba asirajawitu. Takore iekoronoko jakutai janoko yakerajayata karamate. (Dan. 9:27, 11:31, 12:11) Maribu ateributu nokokunarai. Karamakore naminate. ¹⁶ Nami-nane Judea arao jotakwayata kurujubukunarai. ¹⁷ Tai ya eku aja-noko akwabasa tata jate tai. Taisi naminane nanakane janoko eku yarunaka jakunarai aunukamo konarukitane. ¹⁸ Arajikabeku jakutai ajanokoata narunaka jakunarai ajiaka konarukitane. ¹⁹ Tatu tai ya eku kwabu jakutai amájae tane ribate. Tatu ajorosimo jorosimowitu jakutai saneraja bajete. ²⁰ Kwai ribiaja Dio ebukotu yatu nabukarekitane aya jakutai joira eku nakanaka jamejerei, ya tuwara eku nakanaka jamejerei tane. ²¹ Tai ya eku kwana sanamatate. Raina ajiromayatukamo sanamata taisi monuka ekira. Materakate sanamata taisi monuka ekirate. ²² Amasike Airamo sanamata aya kabuka abanae. Tanaja jakore warao jisakarakate bajukanatakuna. Tiarone Airamo waraoto mibune nisanajakutaisi obonoyame ya kabuka abanae. ²³ Yatu isia ribate tai: Mikotu anaka, tamatuka Akirito ja, tate tai. O mikotu anaka, ote ja, tate tai. Tane ribakore aribu eku abanaka jakotu. ²⁴ Imasibumo naote Kirito tane oritoayaja. Eobo Dio kware arewaramo tane oritoate. Sinarija uriraja nonate. Mianare nonate imasibukitane. Yakerakore tatuma Dio mibune nisanajakutaisi imasibukuna. ²⁵ Tamaja mate kwaeabamoana jakore yatu saba rewaraine. ²⁶ Tiame eobo ribu raisa yatu isia ribakore aribu eku abanaka jakotu. Ribate tai: Miki anaka, jarawaja eku ja, tate tai. Tane ribakore tata narunaka jakotu. Takore: Miki anaka, anamu eku ja, tate tai. Tane ribakore aribu eku abanaka jakotu. ²⁷ Najasimo bari, simo bari tiakore kokotukanea yakara tia. Ya ribotoatukamo ya iamoata yakara tia. Taisi monuka warao tane nakajakutai najasimo bari, simo bari tiakutaisi monuka naote. ²⁸ Tejo waba jakutaisiata buretuma orikware nakate. ²⁹ Sanamata ya taisi eku jakutai ekorakore jawaneraja ejobate. Ya narete. Waniku jakutai ajokoma ekorate. Kuratuma najamutu ekumo nakate. Dio airamo sabukatuma najamutuata jakutaisi etororote. (Isa. 13:10) ³⁰ Takore najamutuata warao tane nakajakutaisi asinarija mite. Rijana kokotuka arao onate. Warao tane nakajakutai naoyakore mite. Najamutuatamo ajokoma urirajasi eku naote. Ajara taeraja jaja naote. Airamowitu tane naote. ³¹ Ainatabatuma wana kwana ekuitamejerete mibune nisanajakutaisi orikware toamejerei. Kokotukaneatukamo orikware toate. Raina akariatukamo orikware toate. ³² Asita ikoru isia abane rewarajakutaisi nokokotu. Ikoru awaku irajiro jakore aroko ejobakore yatu joira kawere tane ribia. ³³ Monukajase ine ribunajakutai kokotuka kwaeabakore tane ribakotu. Kawere rijana. Kawerewitu ja rijana, takotu. ³⁴ Nomewitu yatu isia ribiaine: Warao ama jakutai mate wabamoana jakore maribu kokotuka eku ejobate. ³⁵ Najamutu, raina tane ekorate. Ekoroyarone are maribusike ekoronatate, tiaine. ³⁶ Tiarone ya kasikaja eku kwaeabate tai? Asinarija kasikaja eku kwaeabate tai? Warao jisakarakate naminanaja. Dio ainataba najamutuata jakutairakate naminanaja. Dio Rimawitu naminaya. ³⁷ Jesú ribane: Noé jakore warao nonaubuae. Warao tane nakajakutai naokore warao monukajase nonayaja jate. ³⁸ Ateje joiraira mate ekirakore warao najorobuae. Jobibuae. Tiraba-kaubuae. Airamotuma iboma niborama moae niborabakamejerei. Noé waeraira eku nabakakore warao jakutai are tane nonaubuae. ³⁹ Joiraira mate ekirakore tatuma taisi isia aobojona ekiraja bajinae. Takore joiraira naone kokotuka konaruae. Warao tane nakajakutai naokore warao monukajase nonayaja jate. ⁴⁰ Tai ya eku nibo manamo arajikabeku jate. Takore jisaka konarute. Arai-sama iabate. ⁴¹ Tatu manamo oriisiko wereaja jate. Takore jisaka konarute. Araisama iabate. ⁴² Yatu Airamo anao asinarija naminanaja jame oriyaorokotu. ⁴³ Tiarone tamaja ribu nokokotu. Janoko arotu jakutai biterijisa katukakore naote tai tane naminanaja. Asinarija naminakore yao-rane seorakuna. Ajanoko yawanane ekumo erijisamejerenata-kuna. ⁴⁴ Tiame yatu wite oriiyakaratakotu. Yatu obonobunaja jakore warao tane nakajakutai naote. ⁴⁵ Airamo jakutai sina anebutu akwa tane abate? Airamo aribu eku abayakutai tai anebutu akwa tane abate. Musaberaja jakutai anebutu akwa tane abate. Abakore anebutu akwa jakutai sinarija kaika najoro airamo anebu moaubute. ⁴⁶ Airamo emo narune naote. Airamo naone aneburatu ribu eku abayakore mite. Ribu eku abatu jame aneburatu ekeiraja bajete. ⁴⁷ Nomewitu yatu isia ribiaine: Airamo aunukamo kokotuka aneburatu amojeku abate yaoromejerei, tiaine. ⁴⁸ Tiarone aneburatu ejobane aobojona isia ribate tai: Mairamo mate naonaja, tate tai. ⁴⁹ Tane nebu eobo yewerekitane jotanate. Arijarokotuma isiko najorokitane jobikitane tane ejoboya. ⁵⁰ Takore neburatu oriairamo yawakanaja jakore airamo yarote. Asinarija naminanaja jakutaisi eku yarote. ⁵¹ Tane airamo jakutai aneburatu jakutaisi sibate. Obojona manamo jakutaisi isiko anona amoara abate. Takore onate. Ai kuokuo tate.

¹ Najamutu arotu arujuna rujuyakutai tai ibomamo mojo-reko anona monuka. Nibora kasakore ibomamo abije isiko naruae amuaraisatakitane. ² Ibomamo kawanamo mojoabasi aobojona ekira. Eobo mojoabasi jakutai aobojona ja. ³ Aobojona ekirakutai ore atoi konarunatanae abije ikwatakitane. ⁴ Aobojona jaja jakutai abije isiko anamu eku toi jaja konaruae. ⁵ Takore kasakitane jakutai kware majaba jame tatuma koko-tuka murejone ubae. ⁶ Takore imautu jakore eobo rokojotae: Kasakitane jakutai naoya. Riboto ejobakotu, tae. ⁷ Takore ibomamo kokotuka nokaramane abije iyakaratakitane jotananae. ⁸ Iyakaratayakore aobojona ekirakutai eobo isia ribane: Kabije narea. Yatu atoi ekumo sanuka kamoakotu, tae. ⁹ Tiarone aobojona ja jakutai riboto ribane: Taneana. Oko yatu moakore kasaba kaikanajakuna. Yatu wabinokoata narune orisaba nisa-kotu, taeyama. ¹⁰ Takore ibomamo aobojona ekirakutai toi nisa-kitane nariakore kasakitane jakutai nabakanae. Ibomamo oriiyakarátae tiakutai taisi isiko yaruae kasayakore mikitane. Takore janoko akojo mukoronae. ¹¹ Takore ibomamo eobo nabakane ribane: Kairamo, Kairamo, akojo ijakanu oko yarumejerei, taeyama. ¹² Takore airamo tatuma riboto ribane: Nomewitu yatu isia ribiaine, yatu naminanajine, taeyama. ¹³ Takore Jesú ribane: Oriyaorokotu. Warao tane nakajakutai yatu taisi anao aya naminanaja. Ya asinarija naminanaja tane. ¹⁴ Najamutu arotu arujuna rujuyakutai tai nibora narutu monuka. Airamo jakutai ina raisameta narukitane anebu yeje-bune burata amojeku abanae. ¹⁵ Jisaka tareneto mojoabasi moae. Araisa tareneto manamo moae. Araisa tareneto jisaka moae. Anebu aobonobu kaika moae. Moaitane naruae. ¹⁶ Aneburatu tareneto mojoabasi nojoajakutai tareneto isia yaotane atae tareneto mojoabasi miae. ¹⁷ Monuka-jase aneburatu tareneto manamo nojoajakutai atae tareneto manamo miae. ¹⁸ Tiarone tareneto jisaka nojoajakutai tai karamane joboto iwane toto eku airamo aburata yaorane abanae. ¹⁹ Inawaja eraja takore nebu airamo naoae. Aburata nome toakitane obonoae. ²⁰ Wajiabara tareneto mojoabasi nojoaja-kutai naoae. Atae tareneto mojoabasi miajakutai airamo moae. Ribane: Mairamo, iji tareneto mojoabasi mamojeku abanae. Ine atae tareneto mojoabasi miaine, tae. ²¹ Takore airamo ribane: Yakera rijana. Ijisike maneburatu yakeraja. Ribu eku abatu iji. Sanuka airamo aribu eku abajame eraja jimojeku abatine. Janoko eku yaru jiairamo isiko oriwarakitane, tae. ²² Tatukamo tareneto manamo nojoajakutai naoae. Naone ribane: Mairamo, iji tareneto manamo mamojeku abanae. Ine atae tareneto manamo miaine, taeyama. ²³ Takore airamo ribane: Yakera rijana. Iji maneburatu yakeraja. Ribu eku abatu iji. Sanuka airamo aribu eku abajame eraja jimojeku abatine. Janoko eku yaru jiairamo isiko oriwakakitane, tae. ²⁴ Takore tareneto jisaka nojoajakutai naone airamo isia ribane: Mairamo, jiaobojona taeraja ja tane naminaine. Iji namunajarone aria. Iji webiaranajarone orikware toaya. ²⁵ Tiame retaine. Tane narune jitareneto toto eku yaorane abanaine. Ma, jiburata, tae. ²⁶ Takore airamo neburatu riboto ribane: Ijisike maneburatu asiraja, inatoma tane. Ine namunajarone ariakutai taisi naminae iji. Ine webiaranajarone orikware toayakutai taisi naminae iji. ²⁷ Naminaetiji maburata banko eku abakuna. Abakore ine naokore maburata kwarika sabuka mamoakuna, taeyama. ²⁸ Tane eobo awere jakutaisi isia ribane: Tareneto taisi ebikamo nisane tareneto mojoreko jaja jakutaisi moate. ²⁹ Ja jakutai atae kwarika taisi moate. Takore aburata are bajete. Tiarone ekirakutai, amojeku sanukarone, ebikamo nisate. ³⁰ Tamaja neburatu asiraja jakutai yakareku toakotu imajana eku. Tata onate. Ai kuokuo tate. ³¹ Warao tane nakajakutai Airamo tane naote. Ainatabatuma kokotuka isiko naote. Naoitane airamo arujunoko yakerajasi arai rujate. ³² Rujakore ina kokotukanea arao taisiata orikware nakate. Takore emo emo enokaramute. Obeja ayaorotu obeja ja-kutaisi emo abaya. Taisi monuka airamo waraoto emo enoka-ramute. ³³ Obeja jakutai amojonome sabasabaya abate. Sibo jakutai akajamojo sabasabaya abate. ³⁴ Abaitane airamo warao amojonome sabasabaya jakutaisi isia ribate. Naokotu. Marima yatu yakeraja tane abanae. Dio raina ajiromayatukamo yatu airamo tane norujumejereae. Airamo tane norujakotu. ³⁵ Ine nojeraja jakore yatu najoro mamoae. Ine jobiajeraja jakore yatu jo mamoae. Ine yatu ainayatukamoanarone yatu ajanokeku metuwarae. ³⁶ Ine majiaka ekirakore yatu mamoae. Ine waba-yakore o mojojutanoko eku jakore yatu mamikitane naruae, tate. ³⁷ Takore Airamo awarao taisi riboto ribate: Kairamo, katuka-kore bajama? Iji nojeraja jakore oko katukakore najoro jimoae bajama? Iji jobiajerakore oko katukakore jo jimoae bajama? ³⁸ Iji kainayatukamoana jakore oko katukakore jietuwarae ba-jama? Iji jiaka ekirakore oko katukakore jimoae bajama? ³⁹ Iji wabayakore o mojojutanoko eku jakore oko katukakore jimiki-tane naruae bajama? tate. ⁴⁰ Takore Airamo tatuma riboto ri-bate: Nomewitu yatu isia ribia: Mawarao saneraja. Yatu tatuma saba nonajakutai, masaba nonae, tate. ⁴¹ Takore Airamo warao akajamojo sabasabaya jakutaisi isia ribate: Yatu memo jakotu. Yatu yaribúae tiaja bajinae rijana. Dio jekunu are rokiakutaisi iyakaratae. Jebuira saba iyakaratae, jebuira ainatabatuma saba tane. Tatuma saba jekunu iyakarata-jakutaisiata narukotu. ⁴² Ine nojeraja jakore yatu najoro mamo-anatanae. Ine jobiajerakore yatu jo mamoanatanae. ⁴³ Ine yatu ainayatukamoana. Tiarone yatu ajanoko eku metuwaranatanae. Majiaka ekirakore yatu jiaka mamoanatanae. Ine wabayakore o mojojutanoko eku jakore yatu mamikitane narunatanae, tate. ⁴⁴ Takore tatuma riboto ribate: Kairamo, katukakore bajama? Iji nojeraja jakore o jobiajerakore oko katukakore jimiae bajama? Iji kainayatukamoana jakore, o jijiaka ekirakore oko katukakore jimiae bajama? Iji wabayakore o mojojutanoko eku jakore oko katukakore jimine jisanetanatanae? tate. ⁴⁵ Takore Airamo tatuma riboto ribate: Nomewitu yatu isia ribiaine: Tamatuma saneraja. Yatu tatuma saba nonanaja jame, masaba nonanatanae, tate. ⁴⁶ Takore tatuma are sanamatakitane narute. Warao nomeraja jakutai are ubakitane narute, tate.

¹ Takore Jesú tamaja kokotuka rewaraitane anebu isia ribunae. ² Ribane: Tamatukamo ya manamo takore Oriwaka Kwaeaba eku nakaya. Yatu taisi naminaya. Takore warao tane nakajakutaisi wabite esijarimejerei, taeyama. ³ Takore saserote airamotuma, kajotabu akarata ainaminamo, Judio airamotuma tane orikware nakaeyama. Caifás ajanoko akara eku orikware nakae. Caifás jakutai tai saserote airamowitu. ⁴ Jesú imasibiaja oane nakitane obonoae. Tane oriaobojona eku abaubuaeyama. ⁵ Tiarone tatuma ribane: Oriwaka eku nakitane yakerena. Oriwaka eku nakore warao wiyawiya ejobakuna, taeyama. ⁶ Jesú Simón Boisi Sabana jakutaisi ajanokoata nabakanae. Simón ajanoko janokoina Betania tata ja. ⁷ Jesú tata jakore tira jakutai toi jonaba anamu joyo arabataronona isiko naoae. Tai jonaba jakutai amoara uriraja. Takore Jesú mesa yarujuyakore tira jonaba isia Jesú akwa yanajonae. ⁸ Takore Jesú anebu tirasi anona mitane kwana orijisine ribunae. Ribane: Katukeme jonaba webotoya bajama amoara ekiraja monuka? ⁹ Amoara uriraja wabine amoara saneraubiajasi moaubukuna, taeyama. ¹⁰ Jesú tatuma aribu nokone ribane: Yatu katukeme tirasi notoria bajama? Maisia nonajakutai yakeraja nonae. ¹¹ Saneraubiaja ja-kutai are yatu isiko jate tiarone ine are yatu isikoana jate. ¹² Tirasi anona toi jonaba isia matejo yanajonae. Ine mate wabamoana jakore matejo iyakaratae joitamejerei. ¹³ Nomewitu yatu isia ribiaine: Tamatukamo raina kokotukanea rewara yakerajasi rewa-rayaja tamaja tira nonajakutai taisi isia rewarate. Obojona tirasiata nakamejerei rewarate, tiaine, taeyama. ¹⁴ Takore jisaka awai Judas Kariot arotu jakutai saserote airamotumeta naruae. Tai Jesú anebu mojoreko kware manamo kawanamo jisaka. ¹⁵ Judas saserote airamotuma isia ribunae: Ine yatu isia Jesú wabikore yatu amoara katamona mamoate? tane ribunae. Takore tatuma burata joko asebe mojorekotuma rijanamo Judas moae. ¹⁶ Tatukamo Judas Jesú wabikitane obonoaeyama. ¹⁷ Oriwaka Arina Akwaruta Ekiraja jakutaisi aya awajiabara esewirakore Jesú anebu taisiata nabakane renokoae. Oko kasaba Kwaeaba anajoro iyakaratate iji najoromejerei? taeyama. ¹⁸ Tai ribane: Janokoineta narune nibora yakerajasi ajano-koata nabakakotu. Isia ribakotu: Kainaminatu ribia: Masinarija mawere. Jijanoko eku Kwaeaba anajoro najorotine manebu isiko, tia, takotu, taeyama. ¹⁹ Takore anebu Jesú kajotabuajakutaisi eku nonaeyama. Kwaeaba anajoro iyakarataeyama. ²⁰ Takore ya soto takore Jesú anebu mojoreko kware manamo isiko mesa yanorujuaeyama. ²¹ Najoroyaja Jesú ribane: Nome-witu yatu isia ribiaine: Yatu kawanamo jisaka mawabite, tiaine, taeyama. ²² Takore ekumoniraja bajinaeyama. Jisaka jisaka renokoae: Mairamo, ineanara? taeyama. ²³ Renokokore Jesú tatuma riboto ribane: Najorokitane joru-joko jisaka ekumo maisiko jisaka tane najoro nisayakutai tai mawabite. ²⁴ Warao tane nakajakutai Jabataja aribu eku wabate. Tiarone awabitu amájae tane ribate. Tai rijawaranatanajakore yakerakuna, taeyama.. ²⁵ Takore Judas Jesú awabitu jakutai renokoae: Inaminatu, ineanara? taeyama. Jesú ribane: Ijisike, taeyama. ²⁶ Mate najoroyakore Jesú bãu nisane, Dio yakeraja jae tane ribane nakariae. Nakarine anebutu moaubuae. Ribane: Najoro-kotu. Tamaja matejo, taeyama. ²⁷ Tatukamo jobinoko nisane Dio yakeraja jae tane ribunae. Ribaitane anebu moaubuae. Ribane: Yatu kokotuka jobikotu. ²⁸ Tamaja majotu. Majotu jakutai ajute jiro jakutai taisi asinarija. Majotu erajasi kware sororote obojona asirajasi kware abanaka berekitane. ²⁹ Yatu isia ribiaine: Tamatukamo Marima arujuna rujunaja jakore uwa ajo jobinajine. Rima rujakore yatu isiko uwa ajo jiro jobitine, tiaine, taeyama. ³⁰ Takore Dio arokotu waraitane Jotakwa Oriwa Arauina tata narukitane ejobonaeyama. ³¹ Takore Jesú tatuma isia ribane: Ama imaya yatu kokotuka nakate maobojona. Jabataja taisi isia ribia: Obeja ayaorotu natine. Takore obejatuma jisajisate, tia. (Zac. 13:7) ³² Tiarone ine nominitane yatu ebisabuka Galilea tata narutine, taeyama. ³³ Takore Pedro Jesú riboto ribane: Eobo kokotuka nakate-rone inesike nakanajine, taeyama. ³⁴ Takore Jesú ribane: Nomewitu jiisia ribiaine: Ama imaya karina mate kuitanaja jakore iji rijanamo tane ribate: Taisi naminanajine, tate, tiaine, taeyama. ³⁵ Pedro ribane: Jiisiko wabakitane jaja jakore jiisiko wabatine. Tiarone taisi naminanajine tane ribunajine, tae. Nebu eobo kokotuka monukajase ribunae. ³⁶ Takore Jesú anebu isiko jota awai Getsemaní tata naba-kanae. Anebu isia ribane: Tamatuka norujakotu. Ine emo naru-kitine kwai ribakitane, taeyama. ³⁷ Takore Jesú Pedro isiko Zebedeo anobotomo manamo isiko tane naruae. Tata nabakane Jesú aobonobu eraja ejobonae. Akobe ekumoniraja bajinae. ³⁸ Tane tatuma isia ribane: Makobe kwana onayaja wabakitane jakutaisiata ru tiaine. Tamatuka baje-kotu. Ubanaka seorobukotu maisiko, taeyama. ³⁹ Tane Jesú kemo sabuka narune mukunamane rujane jinamunae. Kwai ribiaja Dio ebuae. Ribane: Marima, tamaja jobinoko ekumo jobinaja jakore yakerakuna. Tiarone maobojona eku abakitaneana. Jiaobojona eku abakitane, taeyama. ⁴⁰ Tane anebuata bajene ubayakore miae. Pedro isia ribane: Ya asinarija jisaka eku maisiko ubanaka bajekomoniraji bajama? ⁴¹ Ubanaka bajene kwai ribakotu raisa yatu ayakara minaka jamejerei. Nomewitu yatu aobojona taera tiarone yatu atejo jotera, tae. ⁴² Atanejese narune kwai ribunae. Tane ribane: Rima, tama-jasi jobikitane jakore jobitine. Tiarone jiaobojona eku abanu, taeyama. ⁴³ Tatukamo atanejese bajene anebu ubayakore miae. Tatuma amu murejerajawitu jame ubae. ⁴⁴ Takore tatuma ubaubúae ta-kore iabane atanejese ekiajase naruae kwai ribakitane. Monu-kajase ribunaeyama. ⁴⁵ Tane anebuata nabakane isia ribane: Yakera rijana. Ubane tuwarakotu. Asinarija eku nakae rijana. Nibora jisaka warao tane nakajakutai asirajasi anonamo amojeku wabite. ⁴⁶ Karamakotu. Naruki rijana. Mawabikitane jakutai kawere rijana, taeyama. ⁴⁷ Jesú mate ribiakore Judas nabakanae. Judas jakutai Jesú anebu mojoreko kware manamo kawanamo jisaka. Judas isiko waraosebeira naoae. Buariwari isiko, rau isiko tane naoae. Saserote airamotuma aribia, waraoto airamotuma aribia tane naoae. ⁴⁸ Judas, Jesú awabitu jakutai, ribu tatuma moae sinarija tane. Ribane: Ine amukaba oroyakutai, tai rijana. Taisi oakotu, taeyama. ⁴⁹ Tane rijanawitu Jesú yanabakane isia ribane: Inaminatu, yakerara? tae. Tane yakerara abayaja amukaba oronae. ⁵⁰ Jesú Judas riboto ribane: Mamusaba, iji katukeme naoya bajama? taeyama. Takore eobo Jesú yanabakane oaubune emojojutaeyama. ⁵¹ Takore Jesú aneburatu jisaka abuariwari nisane saserote airamowitu aneburatu akojoko jewetenae. ⁵² Yaneberakore Jesú ribane: Jibuariwari anamu eku abanu. Kokotuka buariwari isia orikubayakutai buariwari isia muanate. ⁵³ Ine Marimasi ebukore ainatabasebeira mojoreko kware manamo masanetamejerei inatabakuna. Iji taisi naminanajara? ⁵⁴ Tane nonakore Jabataja taisi isia ribiakutai taisi eku nakanatakuna. ⁵⁵ Tane Jesú waraoto isia ribane: Yatu buariwari isiko atae rau isiko tane memojojutakitane yatu naoaeraji bajama! Ine erijisa arotu monuka memojojutakitane naoaeraji bajama! Ya kokotukanea kwai ribunoko eku yatu kawanaya rujunaine yatu inaminakitane. Tiarone memojojutanatanae. ⁵⁶ Jabataja eku Dio kware arewaramo aribu ja. Aribu eku nakakitane ja. Ama koko-tuka kwaeabaya rewaramo aribu eku nakakitane, taeyama. Takore anebu kokotuka Jesú jisamuka omoae. Omone kuru-jubuaeyama. ⁵⁷ Jesú emojojutane Caifás tata konaruae. Caifás jakutai tai saserote airamowitu. Kajotabu akarata ainaminamo, waraoto airamotuma tane amena Caifás ajanokoata orikware naka-jaeyama. ⁵⁸ Tiarone Jesú konarukore Pedro tatuma iamo utiraja yã tane naruae. Airamowitu ajanoko akara eku yarune, yaoromo airamotuma isiko rujunaeyama. Katukane ejobate tai tane mikitane rujunae. ⁵⁹ Saserote airamotuma, waraoto airamotuma, ribu nome toanoko arao kokotuka tane ribu najabuae Jesú kware abakitane. Ribu tonarone najabuae Jesú kware abane namejerekitane. ⁶⁰ Tiarone ribu ekirajawitu ejobonaeyama. Warao eraja naone tona taisi isia ribunaerone aribu amoara ekiraja ejobonae. ⁶¹ Ta-tukamo tona ribakitane manamo ejobonaeyama. Ribane: Tamaja ribunae: Ine Dio isia kwai ribunoko iekorane ya rijanamo isia atanejese nonatine, tane ribunae, taeyama. ⁶² Saserote airamowitu karamane Jesú isia ribane: Iji katu-keme riboto ribunaja bajama? Jikware abayakutai tai eku mojoro? taeyama. ⁶³ Tiarone Jesú inareraja bajinaeyama. Takore saserote aira-mowitu ribane: Dio riko jakutaisi amujaba nome ribakitane ja iji. Kaisia ribanu. Iji Akiritoanara? Iji Dio Aukenara? taeyama. ⁶⁴ Jesú ribane: Iji ribiakutai tai ine. Yatu isia ribiaine: Warao tane nakajakutai Dio taerajasi amojonome tajasabaya rujúnae takore yatu mite. Ajokoma urirajasi eku naoyakore yatu mite, taeyama. ⁶⁵ Takore saserote airamowitu oriajiaka yawanae. Yawanane ribane: Tamaja Dio isia asirajawitu ribia. Katukane eobo ribate bajama? Tamaja Dio isia asiraja ribiakore yatu nokoae. ⁶⁶ Ama katukate? taeyama. Takore tatuma riboto ribane: Asiraja nonae. Aribu amoara wabakitane, taeyama. ⁶⁷ Tane Jesú amukaba sojaubune mojo ekobotane nabaubuae. Eobo amukaba mojo abasaya nabaubuae. ⁶⁸ Isia ribane: Iji Akirito mojoro! Dio kware arewaratu monuka ribanu. Jinabana-jakutaisi awai waranu, taeyama. ⁶⁹ Tatuma Jesú ekotubiakore Pedro janoko akara eku rujúnae tiaja jaja. Takore nebutu kawanamo tira jisaka Pedro yanabakane isia ribane: Ijirakate Jesú Galilea arotu jakutaisi iamo kujuae, taeyama. ⁷⁰ Tiarone Pedro kokotuka amujaba ribane: Iji ribiakutai taisi naminanajine, taeyama. ⁷¹ Taitane Pedro janoko akojoata nariakore tira raisa taisi mi-tane eobo isia ribunae. Ribane: Tamaja Jesú Nazaret arotu iamo kujuae, taeyama. ⁷² Atanejese Pedro Dio awai warayaja ribane: Taisi namina-najine, taeyama. ⁷³ Kware majabane eobo Pedro awere jakutai Pedro isia ribunae. Ribane: Nomewitu, iji tatuma kawanamo. Jiribu tatuma aribu monuka, taeyama. ⁷⁴ Takore Pedro oriyaribiaja ribunae. Dio awai warayaja ribane: Nibora jakutai taisi naminanajine, taeyama. Takore Pedro mate ribiakore karina kuitaeyama. ⁷⁵ Karina kuitakore Pedro aobojona Jesú aribu tata nakae. Jesú ribunae: Karina mate kuitanaja jakore iji rijanamo tane ribate: Taisi naminanajine, tate, taeyama. Takore Pedro tatamo ejobane kwana onaeyama.

¹ Jokoyakore saserote airamotuma, waraoto airamotuma tane kokotuka obojona jisaka eku abane orireiriae Jesú nakitane. ² Tane Jesú koyane kobenajoroata konaruae amojeku abakitane. Kobenajoro jakutai taisi awai Poncio Pilato. ³ Takore Judas Jesú awabitu jakutai tai tatuma Jesú namejere- akore mitane aobojona ekumoniraja bajinae. Tane burata joko asebe mojorekotuma rijanamo konae saserote airamotuma, Judio airamotuma tane moakitane. ⁴ Ribane: Ine rijana nibora aobo-jona asiraja ekiraja jakutaisi namejerei wabiaine. Wabiajame asiraja nonaine, taeyama. Takore tatuma Judas riboto ribane: Oko katukate? Jiaobojona rijana, taeyama. ⁵ Takore Judas burata webiarae kwai ribunoko ekia. Tatu-kamo ejobane oriaro koyane orinaeyama. ⁶ Takore saserote airamotuma burata webiarajakutai taisi orikware toae. Ribane: Kwai ribunoko aburata kware abakomoni jotu amoaratiji, taeyama. ⁷ Tatukamo obojona jisaka eku abaubuae joboto nisakitane. Joboto jakutai tinaja anonatu ajoboto. Joitanoko tane nisanae. Tatukamoana wabakore joboto eku joitakitane nisanae. ⁸ Tiame ama ya eku joboto jakutai awai Jotuina tane waraya. ⁹ Tametane Dio kware arewaratu Jeremias aribu eku nakae. Tai jabatae: Waraoto amoara konarune isia joboto nisanae. Amoara jakutai burata joko asebe mojorekotuma rijanamo. Israeltuma waraoto amoara tane abanajae. ¹⁰ Amoara isia tinaja anonatu ajoboto nisanae. Airamo makajotabuajakutai taisi eku nisanae, tae. (Jer. 32:6-9 Zac. 11:12-13) ¹¹ Takore kobenajoroata Jesú konaruae. Kobenajoro jakutai Jesú renokoae: Iji Judiotuma airamowitu mojoro? tae. Jesú ribane: Iji ribiakutai tai ine, tae. ¹² Takore saserote airamotuma Judio airamotuma tane Jesú kware abakore Jesú tatuma riboto ribunatanaeyama. ¹³ Ribunaja jakore Pilato ribane: Ribu eraja jikware abayakutai iji taisi nokonajara? tae. ¹⁴ Tiarone Jesú taisi riboto ribunatanaewitu. Tiame kobena-joro retayaja bajinae. Tamaja katukane jaja tai tane obonobuae. ¹⁵ Pilato are oriwaka eku mojoju jisaka ejeroyaja jaja. Warao ebiakutai Pilato taisi ejeroya. ¹⁶ Takore tai sinarija eku mojoju jaja. Awai Barrabás. Kokotuka taisi naminayaja jaja. ¹⁷ Takore waraosebeira orikware nakakore Pilato renokoae. Mojoju kasikaja yatu saba yakera ejerokitane? Barrabás jakutai yake-renara? O Jesú, Kirito tane warayakutai tai yakerenara? taeyama. ¹⁸ Judiotuma Jesú temiajiajame Pilato amojeku abanae. Pilato taisi naminae. ¹⁹ Takore Pilato are ribu nome toanoko arujunoko eku rujúnae takore atira ribu Pilato saba inatabae. Ribane: Tai nibora nomeraja kware barinaka jau. Taisi aobojona isana imaya musibune musibu aobojona sanamataine, taeyama. ²⁰ Tiarone saserote airamotuma, Judio airamotuma tane waraosebeira inaminae Barrabás ebumejerei. Barrabás ejeronu tamejerei inaminae. Jesú namejerei kajotabu tamejerei inaminae. ²¹ Takore kobenajoro atanejese ribane renokoae. Manamo ja. Kasikaja yatu saba yakera ejerokitane? taeyama. Tatuma riboto ribane: Barrabás ejerote, taeyama. ²² Takore Pilato ribane: Takore Jesú, Kirito tane warayakutai taisi isia katukate ine? tae. Warao kokotuka riboto ribane: Esijarimejere! taeyama. ²³ Takore Pilato ribane: Katukeme bajama! Anona asiraja kasi-kaja bajama? Tiarone tatuma kwarika rokojotae: Esijarimejere! taeyama. ²⁴ Takore Pilato warao aobojona iabanaja jakutai taisi naminae. Tiarone suatana aobojona iabanaka wiyawiyae. Takore Pilato jo saba inatabae. Jo konakore waraoto amujaba amojo jojaraeyama. Ribane: Tamaja nibora nomeraja jakutai taisi ajotu webotakitane jakutai maobojonena. Yatu aobojona, taeyama. ²⁵ Takore warao kokotuka taisi riboto ribane: Tai wabakore ajotu webotoyakutai kakware abate. Kanobotomo kware abate, taeyama. ²⁶ Takore Pilato Barrabás ejeronae. Tane Jesú yewerene Judiotuma amojeku abanae esijarimejerei. ²⁷ Takore Pilato anebu yaoromo jakutai ribu nome atoanokoata Jesú konaruaeyama. Tane yaoromosebeira isiko orikware nakane Jesú sibaji tae. ²⁸ Tane Jesú ajiaka jiwarane jiaka simiraja isia Jesú arai simaranae. ²⁹ Jarujiro weko tane akwa isia inakasinae. Amojonome eku rau abanae. Tane amujaba yatomaneteaja monuka jinamane rujane ekotubuaeyama. Ribane: Judiotuma airamowitu, yakerara iji? tae. ³⁰ Tane arai sojane, amojekumo rau nisaitane akwa yewe-reaeyama. ³¹ Ekotubujio taitane jiaka simiraja jiwarane oriajiaka eorisabanaeyama. Tane kuru isia esijarekitane konaruaeyama. ³² Ejoboyaja niborama miae. Taisi awai Simón, ina Cirene arotu. Tatuma Jesú akuru Simón erosiabanae konarumejerei. ³³ Takore narune ina Golgota yanabakanae. Golgota waraoto aribu isia ribia Kwamujuina. ³⁴ Yanabakane tatuma bino yaro-kota ajerajasi isiko jakutai Jesú moae jobimejerei. Jesú bino sanuka aroko toritane jobikitane obononatanae. ³⁵ Takore yaoromo Jesú esijari riwaraitane Jesú ajiaka kana-takitane kware kotubuae. Sinama saba bajete tai? Tametane ori-moaubuae. Tatuma tametane nonayaja Dio kware arewaratu ateje jakutai taisi aribu eku nakae. Ribane: Tatuma majiaka jisaka jisaka orimoaubuae. Majiaka araisa kanatakitane kotubuae, tae. (Rok. 22:18) ³⁶ Takore yaoromo tata norujuae yaorokitane. ³⁷ Jesú akwa kwarika jabátae tiaja abanae. Katukeme nae tai tane jabatae. Tametane jabatae: TAMAJA JESÚ, JUDIOTUMA AIRAMOWITU. ³⁸ Takore Jesú awere erijisa arao manamo esijariae. Jisaka amojonome tajasaba esijariae. Araisa akajamojo tajasaba esijariae. ³⁹ Takore awerea kwaeabanajakutai Jesú isia asiraja ribubuae. Oriakwa ibarabarae. ⁴⁰ Ribane: Iji kwai ribunoko joika atoatu jakutairaji! Iji ya rijanamo isia atanejese anonaturaji! Iji wite oriejeronu rijana. Iji Dio Auka jakore kuru isimo nanakanu, tae. ⁴¹ Saserote airamotumarakate Jesú ekotubuaeyama. Kajotabu akarata ainaminamo, waraoto airamotuma tane monukajase Jesú ekotubuae. Orisaba rewarae. ⁴² Ribane: Eobo ibajukanaeyama, tiarone wite oriibajuka-komoni. Tai Israeltuma Airamowitu jakore kuru isimo nanaka-kunarai. Oko taisi isia nome abamejerei nanakakunarai. ⁴³ Dio aribu yajorabaeyama. Ama Dio taisi obonokore iejerokunarai. Kaisia ribunae: Ine Dio Auka, tane ribunae. Tiame Dio taisi ejerokunarai rijana, tae. ⁴⁴ Erijisa arao Jesú isiko esijariajakutai tatumarakate monuka-jase taisi isanaeyama. ⁴⁵ Tatukamo ya kwai takore ina kokotukanea seirinae. Ya anayakore atanejese jokonae. ⁴⁶ Jokakitane awere jakore Jesú kwana rokojotae. Ribane: Elí, Elí, lama sabactani? tae. Aribu waraoto aribu isia ribia: Mario, Mario, katukeme iji momoae bajama? tia. (Rok. 22:1) ⁴⁷ Tata jakutaisi kawanamo aribu nokone ribane: Tamaja Elias yejebia, taeyama. ⁴⁸ Takore jisaka jakane jarajara tiakutaisi konae. Konane bino ajíae tiakutaisi ejurae. Ejurane isoboru akari esekujane Jesú arokoata abanae jobimejerei. ⁴⁹ Tiarone eobo ribane: Mate moanaka. Miki anaka. Elias naote tai taisi ejerokitane. ⁵⁰ Takore Jesú atanejese kwana rokojotane oriaobojona Oria-rimasi moae. ⁵¹ Jesú oriaobojona moakore kwai ribunoko akojo ajiaka jakutai najinaeyama. Kwaimo, joika ru tane najinaeyama. Inariko jakanae. Joyoira nasibisibiae. ⁵² Joitanoko akojo emura-naeyama. Warao Dio saba emo abánae tane jaja muanajakutai tatuma kawanamo eraja atejo nomininaeyama. ⁵³ Takore Jesú anominina nokabuka tatuma ajoitanoko ekumo ejobane jano-koina yakeraja Jerusalén eku yaruaeyama. Warao eraja tatuma miaeyama. ⁵⁴ Takore yaoromo siento jisaka akabitana anebu isiko Jesú yaoroyakutai tatuma inariko jakakore miae. Kwaeabanajakutaisi miae. Mitane kwana retaubuaeyama. Ribane: Nomewitu tamaja Dio Aukaraji bajama! ⁵⁵ Tata tatu eraja jaja. Utirajamo seoroyaja bajinae. Jesú Galilea tatamo naokore tatu jakutai Jesú iamo naoae sanetakitane. ⁵⁶ Tatu kawanamo awai Maria Magdala arotu. Araisa Maria Jacobo José tane arani. Araisa Zebedeo anobotomo arani. ⁵⁷ Ya soto takore burata arotu naoaeyama. Awai José. Tai janokoina Arimatea arotu. Tairakate Jesú aneburatu. ⁵⁸ José jakutai Pilatoata narune Jesú atejo ebuae joitakitane. Takore Pilato José moamejerei kajotabuaeyama. ⁵⁹ Takore José tejo konarune jiaka arino ajaunona anana ekiraja jakutai taisi isia yejimarae. ⁶⁰ Tejo yejimarane oriajoitanoko jiro jakutaisi eku abanae. Amena joitanoko jakutai joyoira eku iwamejerei kajotabuaeyama. Tane joitanoko akojo joyo urirajasi isia mukoroitane naruae. ⁶¹ Taturakate tata mikitane naruae. Tata nabakane ajajaruka norujuae. Tatu jakutai Maria Magdala arotu, Maria araisama isiko. ⁶² Ya tuwara jakutaisi ebisabuka ya tuwara saba iyakarataya. Tai ya kwaeabakore saserote airamotuma Bariseotuma tane Pilatoata narubuae. ⁶³ Ribane: Kairamo, tai imasibutu jakutai taisi aribu isia obonobiaoko. Tai mate riko jakore ribunae: Ya rijanamo takore nominatine, tae. ⁶⁴ Tiame joitanoko taeraja abamejerei kajotabu, ya rijanamo isia. Tanaja jakore anebu naone atejo erijisate. Tatukamo waraoto isia ribate: Nomewitu wabaerone nomininae, tate. Tane jakore tona ayaju jakutai tona awajiabara jakutai asiraja kwarika ejobate, taeyama. ⁶⁵ Takore Pilato ribane: Yaoromo ja yatu saba. Yaoromo konarune joitanoko yaoranewitu yaorokotu, taeyama. ⁶⁶ Takore tata narune joitanoko taeraja tane abanae. Joitanoko akwamukoro joyo jakutai taisi isia asinarija abanae. Yaoromo yaoromejerei iabanae.

¹ Ya tuwara kwaeabakore misa aya awajiabara jokoyakore Maria Magdala arotu jakutai Maria araisama isiko naruaeyama. Joitanoko mikitane naruaeyama. ² Takore rijana inariko uriraja jakanae. Airamo ainataba najamutuatukamo nanakane joitanokoata nabakanae. Nabakane akwamukoro joyo jakutai emo abane arai rujunaeyama. ³ Taisi amu naja simo bariakutaisi monuka jajayama. Ajiaka jokerajawitu jonona ajuju ajoko monuka. ⁴ Takore yaoromo jakutai ainataba mitane retaubuaeyama. Retane kwana tororoaeyama. Joika nakane waba monuka bajinaeyama. ⁵ Takore ainataba tatu isia ribane: Manojanaka jakotu. Yatu Jesú kuru isia esijaríae tiakutai taisi najabia. Yatu anona naminayaine. ⁶ Tai tamatuka ekira rijana. Amena nomininae. Ebe ribunajakutaisi eku nomininae. Abanoko mikitane naokotu. ⁷ Tatukamo rubujira narune anebu saba rewarakotu. Ribakotu: Jesú wabaerone nomininae rijana. Galilea tata yatu ebisaba naria. Yatu tata narune taisi mite, takotu. Tai maribu kokotuka, taeyama. ⁸ Ribakorejase tatu joitanokoatukamo rubujiraja naruae. Retaerone oriwakayaja naruae. Jesú anebu saba rewarakitane kurujubuaeyama. ⁹ Tane mate nariakore Jesú tatuma riboto roro taeyama. Isia yakeraubiara abanaeyama. Tatu jakutai Jesú tata nabakane, amujaba jinamane rujane omu oanaeyama. ¹⁰ Takore Jesú tatuma isia ribane: Retanaka jakotu. Mawaraotoata narukotu saba rewarakitane. Galilea yata narumejerei ribakotu. Tata narune mamite, taeyama. ¹¹ Takore tatu nariakore yaoromo kawanamo janokoineta naru-buaeyama. Narune saserote airamotuma saba kwaeabanajakutaisi kokotuka rewaraeyama. ¹² Takore saserote airamotuma waraoto airamotumeta narune oriaobojona jisaka eku abaubuaeyama. Eku abaubune burata eraja yaoromo moaeyama. ¹³ Isia ribane: Yatu ribakotu: Oko imaya ubayakore Jesú anebu naone atejo erijisae, takotu. ¹⁴ Takore kobenajoro kwaeabanajakutaisi nokokore oko taisi aribu kwarikateko yatu asiraja ejobonaka jamejerei, taeyama. ¹⁵ Takore yaoromo burata nisane naruae isia ribunajakutaisi eku rewarakitane. Tatukamo ama ya ekurakate Judiotuma are tane rewaraya. ¹⁶ Takore Jesú anebu mojoreko kware jisaka Galilea tata naru-buae. Jotakwa Jesú ribunajakutaisiata nabakaubuae Jesú mikitane. ¹⁷ Tatuma Jesú mitane yatomaneteae. Tiarone kawanamo aobo-jona emo emo bajinae. ¹⁸ Takore Jesú tatuma yanabakane isia ribunae. Ribane: Najamutuata jakutai, raineta jakutai tane taisi isia ribu kokotuka jaine rijana. ¹⁹ Tiame ina kokotukanea araotoata narukotu. Tatuma manebu tane abakitane yaotakotu. Joni ekoba-kotu Rimasi aribia, Aukama aribia, Dio Amejokojira Yakeraja-witu aribia tane. ²⁰ Tatuma inaminakotu ine yatu kajotabuaja-kutaisi kokotuka eku abamejerei. Takore ya kokotukanea ine are yatu kaika jaine. Ya ayajuatarakate are yatu kaika jaine, taeyama. Amén.