JUAN
11 Awajiabara ebe are Ribu jaja. Ribu jakutai tai Dio kaika jaja. Ribu jakutai tai Diojase. 2 Ribu jakutai awajiabara ebe are Dio kaika. 3 Tai kokotuka anonatu. Tai nonanatanajakore ekirakuna. 4 Tai obojona jiro arotu. Obojona jiro jakutai, tai abije tane ejobonae waraoto saba. 5 Abije imajana eku yi tia. Takore imajana jakutai abije kwarikakomoni. 6 Niborama awai Juan jakutai, Dio taisi inatabae. 7 Juan jakutai naoae. Abije isia rewarakitane naoae, kokotuka nome abamejerei arewara aobojona. 8 Juan jakutai tai abijeana. Tiarone abije isia rewarakitane naoae. 9 Abije jakutai, abije nomeraja. Taisike raina eku yariaja naoae. Tai warao kokotuka sinajaraya. 10 Ribu jakutai raina eku jaja. Tai raina anonaturone raina arao taisi naminanatanae. 11 Anona jakutaisiata naoae, tiarone taisi awaraowiturone taisi etuwaranatanae. 12 Tiarone etuwaramo jakutai Dio ribu tatuma moae Dio anobotomo tamejerei. Tatumasike Ribu jakutaisi awai isia nome abamo. 13 Tatuma rijawarae. Aranima ajotu isiena, tejo aobojonena, waraoto aobojonena tane rijawarae. Dio isimowitu rijawarae. 14 Ribu jakutai warao tane nakane kakaika ubae. Tai airamo tane naoyakore miaeko. Rimasi Auka jisakawitu airamo tane naoyakore miaeko. Dio aobojona ayakara taisi eku taeraja bajinae. Nome jakutairakate taisi eku taeraja bajinae. 15 Juan taisi isia rewarae. Rokojotayaja ribane: Ine ribunaine: Manoka-bukaya jisaka naoya. Tai airamo makwarika, tai mebetiji, taine. Tai tamaja, taeyama. 16 Tai kaikawitutiji isimo nisanaeko. Oko kokotuka taisi aobo-jona ayakara nisanaeko. Atae ayakara kwarika nisanaeko. 17 Dio oriakajotabu Moisés moae akarimo moamejerei. Tiarone Dio oriaobojona ayakara, atae aribu nome tane jakutai Jesukirito moae akarimo moamejerei. 18 Warao jisakarakate Dio minatanae. Tiarone Auka jisakawitu jakutai tai Arimasi atiaba. Taisike Arimasi isia inaminae. 19 Tamaja Juan Joni Ekobutu jakutaisi arewara. Judiotuma Jeru-salén tata jakutai saserotetuma, Levituma tane inatabae, Juan renokoyaja: Iji sina? tamejerei. 20 Renokokore Juan ribu anome ribane: Ine Akiritoanaine, taeyama. 21 Takore tatuma renokobuae: Tane jakore iji sina bajama? Iji Eliasyanara? Juan riboto ribane: Taianaine. Tatuma ribane: Dio kware arewaratu naokitane jakutai tai ijianara? taeyama. Takore: Taianaine, taeyama. 22 Tatuma ribane: Iji sina takore? Oko katukane kainatabamo saba rewarate bajama? Oriisia katukane rewaraya iji? taeyama. 23 Juan ribane: Isaias Dio kware arewaratu jakutai tametane jabataeyama. Jarawaja tata rokojotatu rokojotaya. Ribia: Airamo ajojisi enometakotu, tia. (Isa. 40:3) Tane Isaias jabataeyama. Taisi aribu eku ribiaine, taeyama. 24 Juan tata inataba naruajakutai tatuma Bariseo sabasabamo. 25 Suatana renokobuaeyama. Iji Akiritoanema. Iji Eliasyanema, tia. Iji Dio kware arewaratu naokitane jakutaianema. Amasike iji katukeme joni ekobia bajama? taeyama. 26 Juan tatuma riboto ribane: Ine joni ekobiaine. Tiarone yatu kawanaya jisaka ja. Yatu taisi naminanaja. 27 Tai manokabukaya naoyarone makwarika airamo. Mamoara ekira asabato akoya jajekitane, taeyama. 28 Tai Betabara tata nonajakutai nojaba Jordán jabisaba. Tata Juan joni ekobuae. Juan mate janokoina Betabara tata jaja tame-tane rewarae. 29 Tane ya araisamaya Jesú Juan tata naoyakore Juan taisi mitane ribane: Obeja Auka Dio tatamo jakutai, taisi mikotu. Obeja Auka jakutai tai raina araoto aobojona asirajasi akonarutu. 30 Ine ribunaine: Nibora naoya manokabukaya. Tai airamo ma-kwarika, tai mebetiji, taine. Tai tamaja. 31 Ateje taisi nami-nanajine. Tiarone joni ekobiaja naoaine, Israeltuma taisi namina-mejerei, taeyama. 32 Atae Juan rewarayaja ribane: Dio Amejokojira naja-mutuatamo kokojo monuka nanakane taisi isia bajiakore miaine. 33 Ateje taisi naminanajine. Joni ekobamejerei mainatabajakutai, tai maisia ribunae: Mejokojira nanakane jisaka isia bajete. Iji taisi mikore tai rijana. Tai Dio Amejokojira Yakerajawitu eku ekobutu. Tane maisia ribunae. 34 Ama taisi mine isia rewaraine rijana. Tamaja Dio Auka tane ribiaine, taeyama. 35 Tane ya araisamaya atanejese Juan anebu manamo isiko jaja. 36 Jesú kwaeabakore mitane Juan taisi yaorane mine ribane: Obeja Auka Dio tatamo jakutai, taisi mikotu, taeyama. 37 Juan tane ribakore anebu manamo aribu nokoitane, Jesú iamo naruae. 38 Takore Jesú tatuma kware barene, mitane riba-ne: Yatu bitu najabia? taeyama. Tatuma taisi isia ribane: Rabí, iji kasaba ubaya? Rabí jakutai waraoto aribu isia ribia Inaminatu. 39 Jesú ribane: Naone mikotu, taeyama. Takore narune aja-noko miae. Taisi kaika anae ya anayame. 40 Tatuma manamo Juan aribu nokoitane, Jesú iamo naruae. Tatuma kawanamo jisaka awai Andrés. Tai Simón Pedro araka. 41 Andrés jakutai wajiabara araje Simón najabune, isia ribane: Mesias miaeko, taeyama. Mesias jakutai Grecia araoto aribu isia ribia Akirito. 42 Tane arajema Jesú tata konaruaeyama. Jesú taisi mitane isia ribane: Iji Simón Jonás auka. Jiwai tane Cefas abatine. Cefas jakutai Grecia aribu isia ribia Pedro. 43 Tane ya araisamaya Jesú ina Galilea tata naruobonoae. Tane Felipe mitane isia ribane: Maiamo nao, taeyama. 44 Felipe jakutai Betsaida arotu. Betsaida jakutai Andrés Pedro tane ajanokoina. 45 Felipe Natanael najabune isia ribane: Moisés kajotabu akarata eku Mesias isia jabataeyama. Dio kware arewaramorakate taisi isia jabataeyama. Mesias jakutaisi miaeko rijana. Tai Jesú José auka, Nazaret arotu, taeyama. 46 Natanael ribane: Nazaret ekumo warao yakeraja jakutai ejobate mojoro? Felipe taisi isia ribane: Naone mi, taeyama. 47 Takore Natanael Jesú awere nabakayakore Jesú taisi mitane ribane: Mikotu, tamajasike Israel ajisakawitu. Tai imasibutuana, taeyama. 48 Takore Natanael ribane: Iji katukane manaminaya? tae-yama. Jesú taisi riboto ribane: Felipe mate jiyejebumoana jakore jimiaine. Iji ikoru noika jakore jimiaine, taeyama. 49 Natanael riboto ribane: Inaminatu, ijisike Dio Auka. Ijisike Israeltuma Airamowitu, taeyama. 50 Jesú taisi riboto ribane: Ine jiisia ribane: Iji ikoru noika jakore jimiaine. Tane tiame iji nome abaya mojoro! Iji atae nona kwarika mite, taeyama. 51 Atae ribane: Nomewitu, nomewitu yatu isia ribiaine: Tama-tukamo najamutu akojo ejerokore yatu mite. Warao tane nakaja-kutaisiata Dio ainatabatuma taisi isia nanakayakore yaburiakore tane yatu mite.
21 Tatukamo ya rijanamo takore warao kasayaja oriwaka abanae. Janokoina Caná ina Galilea eku kasae. Jesú arani tata jaja. 2 Kasayakutai Jesú atae anebu tane oriwakayata naru-mejerei yejebuae. 3 Takore bino oriwaka aya yajoto ejobakore Jesú arani Jesú isia ribane: Bino ekira, taeyama. 4 Jesú ribane: Tira, katukeme menokoya bajama? Mate masi-narija ekuana, taeyama. 5 Takore Jesú arani janoko eku ayaotamo isia ribane: Jesú yatu isia ribiakutai taisi eku nonakotu, taeyama. 6 Tata jo anamu joyonona mojoabasi kware jisaka jaja. Jo jakutai jojaraubukitane saba. Judiotuma are tane namínae tiame, tata jo anamu ja. Anamu jisaka cántaro manamo o rijanamo oaya. 7 Jesú ribane: Jo anamu ikwataubukotu jo isia, taeyama. Takore ikwataubune kobuwitu abanae. 8 Takore: Rijana ekumo joane oriwaka airamoata konarukotu, taeyama. Takore konarubuae. 9 Takore oriwaka airamo jo bino tane nónae tiaja jobene kasabamo tai tane naminanatanae. Tiarone ajoamosike naminae. Oriwaka airamo nibora kasayakutaisi yejebuae. 10 Tane taisi isia ribane: Oriwaka abayaja warao kokotuka wajiabara bino yakeraja abaya. Warao jobibukore nokabuka bino abayakutai bino sabana jakutaisi abaya. Tiarone iji ama saba bino yakerajawitu abaya, taeyama. 11 Jesú tamaja sinarija wajiabara nonajakutai tai janokoina Caná ina Galilea eku nonae. Oriayakara emiae. Anebu taisi isia nome abanae. 12 Tatukamo Jesú Capernaum tata nanakanae. Taisi isiko arani, arakatuma, anebu tane naruae. Tata ya erajena bajinae. 13 Takore Judiotuma aoriwaka awere rijana. Oriwaka jakutai Oriwaka Kwaeaba. Oriwaka aya nakakitiakore Jesú Jerusalén tata yaburuae. 14 Kwai ribunoko eku baka, obeja, kokojo tane awabimo tane miae. Burata akambiatamo norujubúae takore miae. 15 Mitane warari yewerenoko tane nonane kwai ribunoko ekumo kokotuka tiabuae. Aobeja, abaka tane webotonae. Burata akambiatamo aburata jinarone amesa ejotinarinae. 16 Kokojo awabimo isia ribane: Tamajasi konarukotu. Rimasi ajanoko wabinoko tane abanaka jakotu. 17 Takore anebu jabatajakutaisi tata aobojona nakae. Jabataja taisi isia ribia: Jijanoko kware makobe ekko tia, tia (Rok. 69:9) 18 Judiotuma Jesú isia ribane: Iji tane nonayaja sinarija kasi-kaja kemija? taeyama. 19 Jesú tatuma riboto ribane: Yatu tamaja janoko iekorakore ya rijanamo isia ikaramatine, taeyama. 20 Takore Judiotuma ribane: Tamaja janoko nonayaja inawaja mojorekotuma manamonamojase kware mojoabasi kware jisaka isia nonae. Iji ya rijanamo isia ikaramate mojoro? tae. 21 Tiarone Jesú oriatejo isia janoko monuka abane rewarae. 22 Tiame Jesú wabane nominakore Jesú anebu Jesú aribu tata aobojona nakae. Jabatajasi aribu, Jesú aribu tane nome abau-buae. 23 Oriwaka Kwaeaba eku Jesú Jerusalén eku sinarijatuma nonae. Nonayakore warao eraja asinarijatuma mitane Jesú awai isia nome abaubuae. 24 Tiarone Jesú warao kokotuka aobojona naminayame tatuma aribu eku abanatanae. 25 Jesú waraoto aobojona naminayame jisakarakate waraoto isia Jesú saba rewa-rakitane ekira.
31 Nibora jaja. Awai Nicodemo. Tai Bariseo sabasabamo. Judio airamo. 2 Nicodemo imaya Jesú tata nabakane ribane: Inaminatu, iji inaminatu tane Dioatamo naoae, tiaoko. Iji sinarijatuma nonaya. Dio jikaikena jakore nonakomoni jakuna, taeyama. 3 Jesú taisi riboto ribane: Nomewitu, nomewitu jiisia ribiaine: Atanejese rijawaranaja jakutai Dio arujuna rujuyakutaisi miko-moni, taeyama. 4 Takore Nicodemo ribane: Katukate? Nibora iramo jaja katukane rijawarate? Atanejese aranima aobono eku yarune rijawarate mojoro? taeyama. 5 Jesú taisi riboto ribane: Nomewitu, nomewitu jiisia ribiaine: Jo isia Dio Amejokojira isia tane rijawaranaja jakutai, tai Dio arujuna rujuyakutaisiata yarukomoni, tane ribiaine. 6 Tejo isimo rijawarajakutai, tai tejo. Mejokojira isimo rijawarajakutai, tai obojona jiro. 7 Jiisia ribunaine atanejese rijawarakitane ja. Tiame Tane mojoro! tanaka jau. 8 Ajaka kokotukanea naoya. Oo tiakore nokoyaoko. Tiarone kasabamo naoya tai, kasaba naria tai tane naminanajaoko. Mejokojira isimo rijawarajakutai tatuma kokotuka taisi monukajase, taeyama. 9 Takore Nicodemo Jesú riboto ribane: Tamaja nome mojoro! taeyama. 10 Jesú riboto ribane: Iji Israeltuma ainaminaturone namina-najaraji bajama! 11 Nomewitu, nomewitu jiisia ribiaine: Oko naminayakutai taisi rewarayaoko. Miajakutai taisi rewarayaoko tane. Tiarone yatu karewara eku abanaja. 12 Raina ainamina yatu isia ribunaine. Tiarone yatu yajorabanaja. Ama najamutu ainamina yatu isia ribakore, katukane yajorabate bajama? 13 Jisakarakate najamutuata yaburunatanae. Yaburuajakutaisike najamutuatamo ananakatu. Warao tane nakajakutai nanakanae-rone are najamutuata ja. 14 Jarawaja eku Moisés jubanona kobu-kanae. Taisi monukajase warao tane nakajakutaisi kobukakitane ja. 15 Taisi isia nome abayakutai rijanaka are ubaya. 16 Dio raina araoto kwana obonoae. Tiame Auka jisakawitu jakutaisi moae, taisi isia nome abayakutai rijanaka are ubame-jerei. 17 Raina araoto isanamatamejerei Dio Oriaukama raineta inatabanatanae. Tiarone Dio Oriaukama inatabae raina araoto aobojona ibajukamejerei. 18 Taisi isia nome abayakutai, tai sanamatamejerenaja. Nome abanaja jakutai tai sanamatamejerea rijana, Dio Auka jisakawitu jakutaisi awai isia nome abanatanajame. 19 Tiame aribu nome toane sanamatamejerea. Abije raineta nabakanae. Tiarone raina arao anona asiraja jame abije obononaka imajana obonoae. 20 Asi-rajasi anonatu abije rarijatane abijeata narunaja. Abijeata narunaja anona asirajasi aobojona sabajinaka jamejerei. 21 Tia-rone nomerajasi anonatu abijeata naria. Abijeata naria anona Dio aobojona eku nonayakore yaorane mimejerei. 22 Tamajasi nokabuka Jesú orianebutu isiko ina Judea tata naruae. Tane tatuma isiko tata bajene joni ekobuae. 23 Juan-rakate joni ekobuae Enón tata. Enón jakutai Salim awere. Tata jo uriraja jame tata ekobuae. Warao naokore Juan tatuma joni ekobuae. 24 Juan mate emojojutamoana. 25 Takore Judiotuma, atae Juan anebu tane oriaribu kwari-kaubuae. Jojaraubukitane tatuma atuata jakutaisi isia oriaribu kwarikae. 26 Taitane tatuma Juan tata nabakane ribane: Inami-natu, Jordán jabisaba jiisiko jatanajakutai, tai joni ekobia. Ebe iji taisi isia rewarae. Kokotuka taisiata yaroya, taeyama. 27 Juan tatuma riboto ribane: Najamutuatamo ribu waraoto moanaja jakore, nojokomoni. 28 Ine rewarayakore yatujase maribu anokomo. Ribunaine: Ine Akiritoana. Dio Kirito ebika mainatabae, taine. 29 Nibora tirabakakore tai tirasi aniborawitu tane bajia. Tirabaka jakutaisi amusaba taisi awere jakutai aribu nokoitane ekeirajawitu bajia. Taisi monuka inerakate ekeiraja-witu ejobonaine, taeyama. 30 Tai makwarika jakitane ja. Ine taisi yajoto jakitane ja. 31 Kwaimo naoajakutai, tai kokotuka kwarika. Raina tatamo jakutai, tai raina arotu. Raina isia rewaraya. Najamutuatamo naoajakutai, tai kokotuka kwarika. 32 Miajakutai, nokoajakutai tane, taisi rewaraya. Tiarone jisakarakate arewara eku abanaja. 33 Arewara eku abayakutai, tai Dio jakutai tai nome, tane ribia. 34 Dio inatabajakutai, tai Dio aribu rewaraya. Dio Oriamejokojira sinarijanaka taisi moaya. 35 Arima Aukama obonoyame kokotuka taisi amojeku abanae. 36 Aukama isia nome abayakutai tai are ubaya. Aukama aribu nokonaja jakutai tai obojona jiro minaja. Dio orijisine sanamata saba taisi abaya.
41 Jesú warao ekobune anebu asebe Juan anebu asebe kwarika ejobonae. Bariseotuma taisi nokoae. Jesú Bariseotuma nokoae tane naminae. 2 Jesú waraoto joni ekobunatanae. Anebusike waraoto ekobuae. 3 Airamo Bariseotuma nokoae tane naminane Judea tatamo ejobonae. Atanejese ina Galilea tata naruae. 4 Ina Galilea tata nariaja ina Samaria ekia narukitane jaja. 5 Jesú Samaria ajanokoina tata nabakanae. Janokoina awai Sicar. Janokoina Sicar jakutai Jacob auka José jakutaisi ajoboto awere. Ateje Jacob José joboto moaeyama. 6 Tata joiwa ja. Joiwa jakutai Jacob anona. Takore Jesú utirajamo wakutaja nabakane, joiwa awere rujunae. Ya kwai rijana. 7 Takore Samaria arotu tira naoae jo joakitane. Jesú taisi isia ribane: Jo mamoau, taeyama. 8 Jesú anebu janokoineta najoro nisakitane amena naruae. 9 Takore Samaria arotu tira ribane: Iji Judiorone katukeme jo mebia bajama? Ine Samaria arotu tira. Judiotuma, Samaria arao tane oriteribunaja, taeyama. 10 Jesú taisi riboto ribane: Iji Dio anobeanaka naminayakore mebukuna. Ine Jo mamoau tane ribia-kutai iji naminayakore mebukuna. Takore jo sororoyajasi jimoa-kuine, taeyama. 11 Takore tira ribane: Mairamo, iji jo ajoanoko ekira. Joiwa jakutai uniraja. Iji kasabamo jo sororoyajasi nisate bajama? 12 Iji kanobo Jacob airamo kwarika mojoro? Jacob jakutai tamaja joiwa kasaba iabanae. Taisi ekumo tai atae anobotomo, aromutuma tane jobiaeyama. 13 Jesú tirasi riboto ribane: Tamaja jo jobiakutai atanejese jobiajerate. 14 Jo ine moayakutaisi jobine are jobiajerena jate. Ine jo moajakutai taisi ekumo jo ejobonoko monuka bajete. Obo-jona jiro tane sororote, taeyama. 15 Takore tira ribane: Mairamo, tai jo mamoau, ine jobine jobiajerenaka jamejerei. Mamoau ine tamatuka joakitane nao-naka jamejerei, taeyama. 16 Jesú ribane: Ama narune, jiniborama yejebune tamate nao, taeyama. 17 Takore tira riboto ribane: Manibora ekira. Jesú ribane: Iji manibora ekira tane ribiaja yakeraja ribunae. 18 Jinibo mojo-abasi jaja. Ama jakutai tai jiniborena. Tiame nome ribunae iji, taeyama. 19 Takore tira ribane: Mairamo, iji Dio kware arewaratu tanabayaine. 20 Tamaja jota arai kanobo Dio yatomaneteae. Yatu ribia: Jerusalén tata yatomanetekitane ja, tia, taeyama. 21 Jesú ribane: Tira, maribu yajorabau. Asinarija naoya. Taisi eku tamaja jota arai Rimasi yatomanetenatate. Jerusalén tata yatomanetenatate tane. 22 Yatu yatomaneteakutai sina tai tane naminanaja. Oko yatomaneteakutai tai sina tai tane namina-yaoko. Obojona aibajukanoko jakutai tai Judiotuma isimo. 23 Asi-narija naoya. Taisi eku rijana. Taisi eku ayatomanetemo nomeraja Rimasi yatomanetete obojona isia. Nomeraja yatomanetete. Rima jakutai ayatomanetemo nomeraja yatomanetemejerea. 24 Dio jakutai tai Mejokoji. Ayatomanetemo obojona isia, nomeraja tane yatomanetekitane ja. 25 Takore tira ribane: Mesias naokitane jakutaisike naminaya-ine. Awai raisa Kirito. Tai naone kokotuka kasaba rewarate. 26 Jesú ribane: Tai ine. Ine jiisia ribiakutai, tai ine, taeyama. 27 Tane tirasi isiko rewarayakore anebu nabakane miae. Mitane retaubuae. Tiarone renokonatanae: Iji katukayaja isia renokoya? O Katukeme tirasi isiko rewaraya? tane renokonatanae. 28 Ta-kore tira jo anamu iabane, janokoineta naruae. 29 Nibo isia ribane: Naone, niborama mikotu. Tai manona kokotuka masaba rewarae. Tai Akiritoanara? 30 Takore warao janokoinetamo ejobone, Jesú tata yaroae. 31 Tira narukore, Jesú anebu Jesú isia ribane: Inaminatu, najoro rijana, taeyama. 32 Tai ribane: Manajoro ja. Yatu taisi naminanaja, taeyama. 33 Takore anebu oriisia ribane: Warao taisi saba najoro konae mojoro? taeyama. 34 Jesú ribane: Mainatabatu aobojona eku abakitane, ayaota riwarakitane tane, taisike manajoro. 35 Yatu tametane ribia: Namuna ayakaramata saba mate waniku manamonamojase ja, tia. Tane ribunaka jakotu. Maribu nokokotu: Yatu seorane, rajikaba mikotu. Rijana ayakaramata ekutiji simoya. 36 Aritu jakutai amoara nojoya. Akwaja ariakutai tai are ubakitane. Takore anamutu jakutai aritu jakutai tane orijika oriwakate. 37 Tamaja ribu nome: Jisaka anamutu, araisa aritu tane. 38 Yatu rajikabanajarone raisama anamuna akwaja arimejerei yatu inata-baine. Eobo rajikabae. Takore yatu tatuma anamuna ariae, tae-yama. Tane Jesú ribunae. 39 Takore Samaria arao eraja taisi isia nome abanae tirasi are-wara aobojona. Tira rewarae: Manona kokotuka masaba rewa-rae, taeyama. 40 Takore Samaria arao naone taisi ebuae tatuma isiko bajemejerei. Ebukore ya manamo bajinae. 41 Bajinajaku-taisi eku atae eraja taisi aribu nokone nome abaubuae. 42 Tane tirasi isia ribane: Jiribuwitu aobojona nome abanajaoko rijana. Okojase taisi aribu nokoae. Amasike tamaja Akirito rijana. Tamaja raina araoto aobojona Aibajukatu rijana. Taisi naminayaoko, taubuaeyama. 43 Ya manamo takore, Jesú tatukamo ejobane ina Galilea tata naruae. 44 Jesujase ribunae: Dio kware arewaratu aribu amoara uriraja warao eobo saba. Tiarone oriawaraoto saba amoara ekira, taeyama. 45 Taitane Galilea tata nabakakore, Galilea arao taisi etuwarae. Tatumarakate Oriwaka Kwaeaba mikitane narubuae. Tatuma Jerusalén tata jaja Jesú anona kokotuka mibuaeyama. 46 Tatukamo Jesú atanejese janokoina Caná ina Galilea tata nabakanae. Ebe tatuka jo bino tane kambiataeyama. Takore Capernaum tata airamo sabuka jaja. Taisi auka wabayaja jaja-yama. 47 Wabayakutaisi arima jakutai Jesú Judea tatamo Galilea tata nabakanae tane nokoae. Nokoitane tata naruae. Tane Jesú ebuae nanakane aukama ibajukamejerei. Auka amoniwitu jaja-yama. 48 Jesú taisi isia ribane: Yatu Dio asinarijatuma, mianare-tuma tane minaja jakore nome abanaja, taeyama. 49 Airamo sabuka ribane: Mairamo, mauka mate wabamoana jakore naru, taeyama. 50 Takore Jesú ribane: Naru, jiauka bajukanae rijana. Takore arima Jesú ribunajakutaisi isia nome abane naruae. 51 Ajano-koata nabakayakore anebu taisi riboto ejobonae. Ejobane ribane: Jiauka bajukanae, taeyama. 52 Takore arima renokoae: Ya asinarija kasikajasi eku baju-kanae? Tatuma ribane: Kaje ya bara takore kwarokonae, taeyama. 53 Tai sinarija ekuwitu Jesú ribane: Jiauka bajukanae, tane ri-bunae. Takore ya asinarija Jesú ribunajakutaisi ekuwitu auka baju-kanae tane arima naminae. Naminajame Jesú isia nome abanae awaraoto kokotuka isiko. 54 Jesú Judea tatamo Galilea tata narune tamaja sinarija nonae. Wajiabara sinarija nonajakutaisi araiyatuka nonae.
51 Taisi nokabuka Judiotuma aoriwaka nakakore Jesú Jerusalén tata yaburuae. 2 Jerusalén tata rara akojo jaja. Akojo awai Obeja Akojo. Taisi awere jo anamu uriraja ja. Taisi awai ebereo aribu isia ribia: Betesda, tia. Taisi awerea janoko aukamo mojoabasi ja. 3 Tata warao eraja muanejemo noajibúae tiaja. Tatuma jakutai mujasi, kakabe, maramárae tiaja tane jaja. Tatuma jo erikomejerei yawakayaja jaja. 4 Kawanuka Dio ainataba najamutuatamo nanakane jo erikoaeyama. Erikokore wajiabara joni nanakayakutai tai bajukanema. 5 Jo awere nibora wabayakutai jaja. Inawaja mojorekotuma rijanamo kware mojoabasi kware rijanamo are wabayaja jaja. 6 Takore Jesú tai yajínae tiakore miae. Wabayaja inawaja eraja jakutaisi naminae. Tane isia ribane: Iji bajukakitane obonoyara? taeyama. 7 Wabayakutai riboto ribane: Mairamo, jo erikokore joni mabatu ekiraine. Ine nariakore, raisa mebisabuka nanakaya, taeyama. 8 Takore Jesú ribane: Karamane, jiaubanoko ekobotane, naru, taeyama. 9 Takore rijana bajukane aubanoko ekobotane tane isiko naruae. Tai ya, ya tuwara. 10 Takore Judiotuma bajukanajakutaisi isia ribane: Tamaja ya, ya tuwara. Jiaubanoko konarukitane Dio akajotabu ekuana, taeyama. 11 Tai tatuma riboto ribane: Maibajukatu maisia ribunae: Jiaubanoko ekobotane, naru, tae, taeyama. 12 Tatuma renokoae: Sina jiisia ribunae: Jiaubanoko ekobo-tane naru tane tae bajama? 13 Amena Jesú naruajame bajukanajakutai Aibajukatu sina tai tane naminanatanae. Tata warao eraja jaja. 14 Nokabuka Jesú taisi miae kwai ribunoko eku. Isia ribane: Iji bajukanae rijana. Atae asiraja nonanaka, kwarika asiraja ejobonaka jakitane. 15 Nibora jakutai narune Judiotuma enokoaeyama. Jesú Maiba-jukatu, taeyama. 16 Tiame Judiotuma Jesú isanamataeyama. Naki-tane obonoae tamaja nona ya tuwara eku nonajame. 17 Takore Jesú tatuma isia ribane: Marima ama are yaotaya. Inerakate are yaotayaine, taeyama. 18 Tiame atae kwarika Judiotuma Jesú nakitane obonoae. Ya tuwara akajotabu aobojonawituana. Jesú ribane: Dio Marima tane, Dio monuka tane oriabanajame tatuma Jesú nakitane obonoae. 19 Takore Jesú tatuma isia ribane: Nomewitu, nomewitu yatu isia ribiaine: Auka jakutai wite oriaribia nonakomoni. Rima nonayakore miajakutai, taisi eku nonaya. Kokotuka Rima nonayakutai, taisi ekujase Auka nonaya. 20 Rima Aukama obonoya. Anona kokotuka Aukama emusabaya. Anona taisi kwarika mate Aukama emusabate yatu retaubumejerei. 21 Rima wabajakutaisi enominane obojona jiro moaya. Taisi monuka Auka oriaobojonaya obojona jiro waraoto moaya. 22 Rima jisakarakate aribu nome toanaja. Dio Oriaukama abanae warao kokotuka aribu nome atoatu tane. 23 Tane abanae kokotuka Aukama yatomanetemejerei. Rimasi yatomaneteakutaisi monuka Aukama yatomanetemejerea. Aukama yatomanetenaja jakutai Rimasi yatomanetenaja. Rima jakutai Aukama inatabae. 24 Nomewitu, nomewitu yatu isia ribiaine: Maribu nokone, mainatabatu isia nome abayakutai, tai are ubaya. Dio sanamata saba taisi abanatate. Obojona wabarone obojona jiro tane ejo-bonae. 25 Nomewitu, nomewitu yatu isia ribiaine: Asinarija eku nakate. Taisi eku rijana. Taisi eku waba jakutai Dio Aukama aribu nokote. Aribu anokomo nominite. 26 Dio jakutai obojona jiro arotu. Taisi monuka Aukama moae obojona jiro arotu jamejerei. 27 Auka warao tane nakajame Dio ribu taisi moae ribu nome toamejerei. 28 Maribu aobojona retaubunaka jakotu. Asinarija eku nakate. Eku nakakore warao kokotuka joitanoko eku jakutai Aukama aribu nokote. 29 Yakeraja anonamo obojona jiro saba nominite. Asiraja anonamo sanamata saba nominite. 30 Maribia nonakomonine. Ine nokoyakutai taisi eku ribu nome toayaine. Nome toayaja nomeraja toaya. Maobojona eku abakitane obononajine. Rima mainatabajakutai taisi aobojona eku abayaine. Tiame ine nomeraja ribu nome toayaine. 31 Ine oriisia rewarakore, marewara nomeana jakuna. 32 Raisa maisia rewaraya. Arewara maisia rewarayakutai tai nome. Taisi naminayaine. 33 Yatu inatabatuma Juan tata inatabae. Takore tai nomeraja rewarae. 34 Warao maisia arewaratu jaja ekira. Tamajasi ribiaine Dio yatu aobojona ibajukamejerei. 35 Juan jakutai abije rokiaja jaja sinajarayaja tane monuka. Ajoko eku sanuka oriwakakitane yatu saba yakera. 36 Atae maisia rewaratu ja. Taisi amoara Juan amoara kwarika. Dio nona abanae ine nonamejerei. Ine nonakore manona inaminaya. Dio tamajasi inatabae tane inaminaya. 37 Rima mainatabatu jakutai tairakate maisia rewaraya. Yatu taisi aribu nokomoana, amu mimoana tane. 38 Aribu yatu aobojona eku bajinaja, ainataba isia nome abanatanajame. 39 Yatu Jabataja yaorane teribia. Taisi eku obojona jiro ja tanabaya. Taijase maisia rewaraya. 40 Yatu ineata nabakakitane obononaja obojona jiro jakitane. 41 Warao maisia ribane: Tai airamo, tane ribamejerenajine. 42 Yatu Dio obononaja. Taisi naminayaine. 43 Ine Rimasi aribia naoaine, tiarone yatu metuwaranaja. Raisa oriaribia naokore yatu taisi etuwarate. 44 Yatu wite airamo tane oritoaya. Dio jisamuka jakutai yatu airamo tane abamejerei najabunaja. Yatu katukane nome abate bajama? 45 Marima amujaba yatu kware abanajine. Tai kakware abaya tanabanaka jakotu. Yatu kware abatu ja. Tai Moisesjase. Yatu taisi aribu eku abaya tanabane oriayakara waraya. 46 Moisés aribu isia nome abakore, maisia nome aba-kuna, Moisés maisia jabatajame. 47 Taisi ajabata isia nome abanaja jakore, katukane maribu isia nome abate bajama? tae-yama.
61 Taitane Jesú aotanaira Galilea jabisaba imakanae. Aotanaira awai raisa Tiberias. 2 Takore wabayakutaisi isia asinarija nonajame waraosebeira taisi iamo naruae. 3 Takore Jesú jotakwayata yaburune rujunae anebu isiko. 4 Judiotuma aoriwaka awere rijana. Tai Oriwaka Kwaeaba. 5 Jesú seorane waraosebeira taisiata nabakajakutaisi miae. Mitane Felipe isia ribane: Kasaba bãu nisate oko tamatuma najoromejerei? taeyama. 6 Jesú tane ribunae Felipe ayakara mikitane. Tiarone tai wite nonakitane jakutaisi naminaeyama. 7 Felipe riboto ribane: Burata renario siento manamo kaika bãu nisakorerakate, kokotuka sanuka sanuka najoromejerei kaikanaja, taeyama. 8 Aneburatu jisaka, Andrés, Simón Pedro araka jakutai ribane: 9 Tamatuka nebusanuka ja. Tai bãu mojoabasi sebaranona ja. Atae jomakaba aukamo manamo tane ja. Warao erajasi saba sanu-kawitu ejobonajara? 10 Takore Jesú ribane: Warao norujumejerekotu, taeyama. Amatuka jaka aukamo era. Takore nibo norujuae. Niboto asebe sinarijaira mojoabasi monuka. 11 Warao norujukore Jesú bãu nisane, yakeraja jae tane, anebu moaubuae. Takore anebu akarimo jaka arai anorujumo moaubuae. Jomakaba monukajase moae oriaobojona kaika najoromejerei. 12 Warao jajinaubukore Jesú anebu isia ribane: Ayajuka bajiakutai orikware toakotu rijanaka jamejerei, taeyama. 13 Takore orikware toane, u mojoreko kware manamo ikwatae bãu ayajuka isia. Bãu sebaranona mojoabasi anajoromo isimo bajinajakutai, tai. 14 Takore tatuma sinarija Jesú nonajakutaisi mitane ribane: Nomewitu Dio kware arewaratu raina tata naba-kakitane jakutai, tai tamajenara? taeyama. 15 Tane ribaitane, tatuma Jesú nisane, airamo tane abakitia. Tiarone Jesú taisi naminane, emo naruae jotakwayata, jisamuka. 16 Anayakore anebu nojaba tata nanakanae. 17 Tane wajibaka eku nabakane Capernaum sabasaba imakayaja jaja. Imaya rijana. Jesú mate tatumeta nabakamoana. 18 Takore ajakaira ebe nojaba rubujuae. 19 Aito estadio asebe mojorekotuma manamo kware mojoabasi o mojorekotuma rijanamo monuka wiriae. Wiriakore Jesú jo araia tatumeta nariakore miae. Wajibaka awere ja. Takore retaubuae. 20 Jesú ribane: Ineine. Retaubunaka jakotu, taeyama. 21 Tatuma taisi ekeiraja etuwarae. Takore rijana ina nariaku-taisiata sewirinae. 22 Ya araisamaya warao mate jabisaba bajinajakutai wajibaka jisakawitu jajasi naminae. Jesú anebu isiko wajibaka eku nabakanatanae. Are wajaka bajinajakutai tatuma Jesú anebu Jesú omi naruae tane naminae. 23 Tiarone wajibakatuma Tiberias tatamo jakutai bãu najorokitane ebika Airamo yakeraja jae tane ribunajakutai taisi awere sewiriae. 24 Takore warao Jesú ekira-kore mitane, anebu ekirakore mitane tane, wajibakatuma eku nabakaubuae. Nabakaubune Capernaum tata naruae, Jesú naja-bukitane. 25 Takore aotanaira jabisaba tatuma Jesú miae. Mitane isia ribane: Inaminatu, iji katukakore tamatuka nabakanae? taeyama. 26 Jesú tatuma riboto ribane: Nomewitu, nomewitu yatu isia ribiaine: Yatu sinarijatuma miajame manajabunaja. Ama bãu najorone, jajinaubuajame manajabia. 27 Yaotakotu najoro nisa-kitane. Tiarone najoro botoyakutaisi sabena. Najoro are ubakitane jakutai taisi saba yaotakotu. Taisike botonaja. Warao tane naka-jakutai najoro yatu moate. Rima Dio taisi isia asinarija abanae. 28 Takore tatuma ribane: Oko Dio anona nonakitane katu-kane nonate oko? taeyama. 29 Jesú tatuma riboto ribane: Tamaja Dio anona. Ainataba isia nome abakitane, taeyama. 30 Takore tatuma ribane: Iji sinarija katukaja nonaya, oko mine, jiisia nome abamejerei? Jinona katukaja? 31 Kanobo maná najoroae jarawaja eku. Jabataja taisi isia ribia: Najamutuatamo najoro tatuma moae najoromejerei, tia. (Ejo. 16:4 Neh. 9:15 Rok. 78:24) 32 Jesú ribane: Nomewitu, nomewitu yatu isia ribiaine: Moisés najoro najamutuatamo yatu moanatanae. Tiarone Marima najoro nomeraja yatu moaya najamutuatamo. 33 Najoro Dio isimo jaku-tai, tai najamutuatamo nanakanae. Tai obojona jiro raina araoto moaya, taeyama. 34 Tatuma ribane: Kairamo, najoro jakutai kamoau, taeyama. 35 Takore Jesú tatuma isia ribane: Ine obojona jiro anajoro. Ineata naoyakutai are nojerena jate. Maisia nome abayakutai are jobiajerena jate. 36 Yatu isia ribunaine: Yatu mamiaerone maisia nome abanaja, taine. 37 Kokotuka Marima mamoayakutai tai ineata naote. Ineata naoyakutai, taisi webotonajine. 38 Ine naja-mutuatamo maobojona eku abakitane nanakanatanaine. Mainata-batu aobojona eku abakitane nanakanaine. 39 Rima mainatabae. Taisi aobojona jakutai tai tamaja. Kokotuka mamoajakutaisi kawanamo ine jisakarakate erijanaka jamejerea. Ya ayajuata ine kokotuka enominamejerea. 40 Marima aobojona jakutai tai tamaja. Kokotuka Aukama mitane, isia nome abane tane are ubamejerea. Ya ayajuata taisi enominatine. 41 Takore Judiotuma Jesú riboto oriisiko rewarejemo taubuae. Jesú ribane: Najoro najamutuatamo nanakanajakutai, tai ine, tae-yama. Tiame rewarejemo taubuae. 42 Tatuma ribane: Tamaja Jesú, José aukayanara? Arimasi naminayaoko, aranima tane. Katukeme ine najamutuatamo nanakanae tia bajama? taeyama. 43 Takore Jesú tatuma riboto ribunae: Rewarejemo tanaka jakotu. 44 Rima mainatabajakutai tai iyonaja jakore jisakarakate ineata naokomoni. Tiarone ineata naoyakutai ya ayaju eku taisi enominatine. 45 Dio kware arewaramo akarata eku ribia: Dio warao kokotuka inaminate, tia. (Isa. 54:13) Tiame Rimasi aribu nokone aribu naminajakutai ineata naoya. 46 Warao jisakarakate Rimasi minatanae. Dioatukamo naoaja-kutai taiwitu Rimasi miae. 47 Nomewitu, nomewitu yatu isia ribiaine: Maisia nome abayakutai are ubaya. 48 Ine obojona jiro anajoro. 49 Yatu anobo jarawaja eku maná najoroaerone muanae. 50 Najoro najamutuatamo nanakayakutai tai tamaja. Taisi najorone wabanaja. 51 Najoro riko najamutuatamo nanakanajakutai tai ine. Tamaja najoro najoroyakutai tai are ubate. Najoro ine moayakutai tai matejo. Matejo raina araoto aobojona kware moatine. 52 Takore Judiotuma oriaribu kwarikane ribubune: Katukane atejo kamoate najoromejerei? taubuae. 53 Jesú ribane: Nomewitu, nomewitu yatu isia ribiaine: Warao tane nakajakutaisi atejo najoronaja jakore, ajotu jobinaja jakore yatu obojona jiro ekirate. 54 Matejo najoroyakutai, majotu jobia-kutai tane, obojona jiro ja. Ya ayajuata taisi enominatine. 55 Ma-tejo nomewitu najoro. Majotu nomewitu jobi. 56 Matejo najoroyakutai, majotu jobiakutai tane tai meku bajia. Ine taisi eku bajia tane. 57 Rima are ubayakutai tai mainatabae. Taisi aobojona ine are ubaya. Taisi monuka matejo najoroyakutai maobojona are ubate. 58 Najoro najamutuatamo nanakanajakutai, tai tamaja. Yatu anobo maná najoroaerone muanae. Taisi monukena. Tamaja najoro najoroyakutai, tai are ubate, taeyama. 59 Jesú Capernaum tata orikware nakanoko eku inaminayaja tamaja ribu rewarae. 60 Anebu eraja ribu nokone ribane: Tamaja ribu taera. Sina tamaja ribu nokote? taeyama. 61 Anebu rewarejemo takore Jesú tatuma aobojona naminae. Naminane ribane: Tamaja ribu yatu aobojona esoakanoko tane ejoboya mojoro? 62 Warao tane nakajakutai kwai yaburute wajiabara ubajakutaisiata. Yatu mitane katukate? 63 Dio Amejo-kojira jakutai obojona jiro moaya. Katejo jakutai obojona jiro moakomoni. Ributuma ine yatu isia ribunajakutai tatuma obo-jona isia. Tatuma obojona jiro isia tane. 64 Tiarone yatu kawa-namo nome abanaja, taeyama. Jesú wajiabarayatukamo sina nome abanaja tai tane naminae. Awabitu sina tai tane naminae. 65 Jesú ribane: Tiame yatu isia ribunaine: Rima iyonaja jakore jisakarakate ineata naokomoni, taine. 66 Tatukamo anebu eraja jojisi ekujase bajinae. Atae isiko kujunatanae. 67 Takore Jesú anebu mojoreko kware manamo isia ribane: Yaturakate naruobononajara? taeyama. 68 Takore Simón Pedro riboto ribane: Kairamo, oko sinameta narute? Iji ribu ja obojona jiro saba. 69 Iji Akirito Dio are ubaya-kutaisi Auka tane yajorabayaoko. Taisi naminayaoko, taeyama. 70 Jesú riboto ribane: Yatu nebu mojoreko kware manamo mibune nisanaine. Ama yatu kawanamo jisaka jebuira sabasaba-moanara? taeyama. 71 Jesú Judas Kariot arotuma isia rewaraya. Tai Simón auka. Judas jakutai tai Jesú wabikitia. Tai nebu mojoreko kware manamo kawanamo jisaka.
71 Tatukamo Jesú Galilea ekia kujuae. Judea ekia kujukitane obononatanae, Judiotuma Jesú nakitane obonoajame. 2 Ju-diotuma aoriwaka awere jaja. Tai Oriwaka Sibako. 3 Jesú araka-tuma taisi isia ribane: Tamatukamo ejobane, Judea tata naru, jineburakate jinona mimejerei. 4 Yaorane oriemusabakitane obo-noyakutai anona rijisane nonanaja. Iji tamaja nona nonayaja raina araoto amujaba nonau, taeyama. 5 Arakatumarone Jesú isia nome abanatanae. 6 Takore Jesú tatuma isia ribane: Mate masinarija ekuana. Yatu asinarija are. 7 Raina arao yatu rarijatakomoni. Inesike mararijataya, ine tatuma riboto rewarayame. Yatu anona asira, tiaine. 8 Oriwaka mikitane yaburukotu. Ine mate oriwaka mikitane yaburunajine, masinarija ekuanatiji, taeyama. 9 Tamaja ribu ribaitane Galilea tata bajinae. 10 Taitane arakatuma narukore Jesurakate oriwaka mikitane yaburuae. Eobo mimejerenaka rijisane naruae. 11 Takore Judio-tuma oriwaketa jakutai Jesú najabune ribane: Tai nibora kasaba? taeyama. 12 Takore waraosebeira taisi isia eribubune kawanamo ribane: Tai yakeraja. Eobo ribane: Yakerena. Waraoto imasibia, taeyama. 13 Eobo Judiotuma nojayame Jesú isia rijisane rewarae. 14 Oriwaka autia Jesú kwai ribunokoata yaburune, inaminae. 15 Judiotuma retayaja ribane: Naminanoko eku teribunatanae-rone tamaja katukane ribu taeraja naminaya bajama? 16 Jesú tatuma riboto ribane: Mainamina maisimoana, tiarone mainatabatu isimo. 17 Dio aobojona eku abaobonoyakutai ina-mina naminate. Ine wite maribia inaminayaja jakore naminate. O ine Dio aribia inaminayaja jakore naminate. 18 Wite oriaribia ribiakutai, tai wite airamo tane oritoakitane obonoya. Tiarone ainatabatu airamo tane abakitane najabiakutai taisike nomeraja. Aobojona eku nona nomerajena jakutai ekira. 19 Moisés kajotabu yatu moanatanaera? Yatu kajotabu eku abanaja. Katukeme manakitane obonoya? taeyama. 20 Waraosebeira taisi riboto ribane: Iji jebu ja. Sina jinakitane obonoya? taeyama. 21 Jesú tatuma riboto ribane: Ine nona jisaka nonaine. Tiame yatu kokotuka retaubuae. 22 Nomewitu Moisés yatu kajotabuae joro seremejerei. Moisés akajotabuana tiarone nobotuma akajotabu. Takore ya tuwara eku yatu niborama ajoro serea. 23 Yatu ya tuwara eku niborama ajoro serea Moisés akajotabu eku nakakitane. Ine ya tuwara eku niborama yaorane ibaju-kanajame maisiko orijisiara? 24 Muwitu isia ribu nome toanaka jakotu. Obojona nomerajasi isia nome toakotu, taeyama. 25 Takore Jerusalén arao kawanamo ribane: Nakitane obonoyakutai tamajenara? 26 Mikotu. Tai kokotuka amujaba rewarayarone, eobo taisi riboto ribunaja. Airamotuma jakutai tamaja Akirito tanabaya mojoro? 27 Tamajasi ajanokoina nami-nayaoko. Akirito naokore ajanokoina naminanatate, taeyama. 28 Takore Jesú kwai ribunoko eku inaminayaja rewarae: Yatu manaminaya. Majanokoina naminaya yatu. Ine wite maribia naonatanae. Mainatabatu jakutai tai nomeraja. Yatu taisi naminanaja, taeyama. 29 Ine taisi naminaya, taisi isimo naoaetiji. Tai mainatabae, taeyama. 30 Tatukamo tatuma taisi emojojutakitane najabuae. Tiarone jisakarakate oaubunatanae, mate asinarija ekuanatiji. 31 Takore waraosebeira kawanamo eraja taisi isia nome abanae. Ribane: Akirito naone asinarija tamajasi asinarija kwarika nonate mojoro? taeyama. 32 Warao taisi isia eribiakore Bariseotuma nokoae. Nokoitane saserote airamotuma, Bariseotuma tane yaoromo airamotuma inatabae Jesú emojojutamejerei. 33 Takore Jesú ribane: Mate sanuka yatu isiko jatine. Tatukamo mainatabatuata narutine. 34 Yatu manajabune maminatate. Ine nariakutaisiata, yatu naru-komoni, taeyama. 35 Takore Judiotuma orirenokoyaja ribane: Tai kasaba narukitia bajama? Oko minaja jateraji bajama? Judiotuma Grecia araoto kawana jakutaisiata narukitia mojoro? Grecia araoto inaminate mojoro? 36 Katukeme manajabune maminatate tia bajama? Katukeme ine nariakutaisiata yatu narukomoni tia bajama? taeyama. 37 Oriwaka aya ayaju eku, ya urirajasi eku, Jesú karamane kwana rewarae: Jobiajerakutai ineata naone jobikunarai. 38 Ma-isia nome abayakutai, taisi ekumo nojaba sororoyaja ejobate. Jabataja taisi isia ribia, tae. 39 Tamaja ribu Mejokojira isia rewarae. Nome abamo Mejo-kojira nojokitiakutai, tai. Mate Dio Amejokojira Yakerajawitu naomoana, Jesukirito airamo tane mate abanatanajame. 40 Takore waraosebeira kawanamo tamaja ribu nokone ribane: Nomewitu tamaja Dio Kware Arewaratu, taeyama. 41 Eobo ribane: Tamaja Akirito, taeyama. Tiarone eobo ribane: Akirito Galilea tatamo naotera bajama? 42 Jabataja taisi isia ribia: Akirito jakutai tai David ajisaka, Belén arotu. Davidrakate Belén arotu. Taneanara? taeyama. 43 Takore taisi aobojona Judiotuma oriaribu kwarikae. 44 Eobo Jesú emojojutakitane obonoae, tiarone oaubunatanae. 45 Takore yaoromo airamotuma ekiajase bajinae saserote aira-motuma tata, Bariseotuma tata tane. Tatuma yaoromo isia ribane: Katukeme konanatanae? taeyama. 46 Yaoromo airamotuma tatuma riboto ribane: Jisakarakate tamaja monuka ribunajaraji! taeyama. 47 Takore Bariseotuma riboto ribane: Tai yaturakate imasibu-natanaera? 48 Airamo kawanamo Bariseo kawanamo tane taisi isia nome abanae mojoro? 49 Tamaja warao kajotabu namina-naja jakutai sanamata saba abánae tiaja, taeyama. 50 Nicodemo ateje imaya Jesú tata naruajakutai, tai Bariseo sabasabamo. 51 Tai ribane: Niborama aribu wajiabara nokokitane ja. Anona naminakitane ja tane. Tanaja jakore kakajotabu taisi aribu nome toanaja. Taneanara? taeyama. 52 Tatuma taisi riboto ribane: Ijirakate Galilea arotuanara? Ja-bataja yaorane teribune naminau. Galilea arotu Dio kware arewaratu tane ejobonatanaewitu, taeyama. 53 Takore jisaka jisaka oriajanokoata narubuae.
81 Jesú jotakwa Oriwa Arauina tata naruae. 2 Ya araisamaya jokona anejeko kwai ribunokoata nabakanae. Takore warao kokotuka taisiata nabakakore Jesú rujane tatuma inaminae. 3 Ta-kore kajotabu akarata ainaminamo Bariseotuma tane tirasi konae. Tai niborabakarone raisama isiko jakore miaeyama. Autu taisi abanae. 4 Jesú isia ribane: Inaminatu, tamaja niborabakarone raisama isikowitu jakore miae. 5 Ateje Moisés kajotabuae tira tamaja monuka jakutai taisi joyo isia timimejerei. Iji katukane ribia? taeyama. 6 Tatuma tametane ribunae ayakara mikitane, kware abaki-tane. Renokokore Jesú wiyajene amojo isia joboto arai jaba-taeyama. 7 Tatuma suatana renokokore, Jesú karamane ribunae. Ribane: Yatu kawanamo aobojona asirajena jakutai, tai awajia-bara tirasi riboto joyo isia toate, taeyama. 8 Taitane atanejese wiyajene suatana joboto arai jabataeyama. 9 Takore tatuma ribu nokone, aobojona isia obonobiaja jisaka jisaka naruae. Wajiabara iramo. Tatukamo eobo. Takore Jesu-witu bajinae tirasi isiko. 10 Jesú karamane, tira jisamukawitu mitane, ribane: Jikware abamo kasaba? Jiribu nome toanajara? taeyama. 11 Tira ribane: Toanaja, Mairamo, taeyama. Takore Jesú ribane: Inerakate jiribu nome toanajine. Narune, atae atanejese asiraja nonanaka jau, taeyama. 12 Atae Jesú ribane: Ine raina araoto abije. Maiamo naoya-kutai imajana eku kujunaja. Tai obojona jiro abije jakutai tai jate, taeyama. 13 Takore Bariseotuma ribane: Iji oriisia rewarayame jirewara nomeana, taeyama. 14 Jesú tatuma riboto ribane: Ine oriisia rewarayarone mare-wara nome. Ine kasabamo naoae tai tane naminayaine. Ine kasaba naria tai tane naminayaine. Tiame marewara nome. Tiarone yatu ine kasabamo naoae tai tane naminanaja. Yatu ine kasaba naria tai tane naminanaja tane. 15 Yatu obojona nobo isia maribu nome toaya. Ine jisakarakate aribu nome toanaja. 16 Ine ribu nome toayaja nomeraja toaya. Ine jisamukena. Rima mainatabajakutai tai ribu nome toaya. Ine Rimasi isiko ribu nome toaya. 17 Yatu akajotabu akarata eku jabátae tiaja ja. Ribia: Warao manamo ribu jisaka eku rewarakore aribu yajorabakitane ja, tia. 18 Ine oriisia rewaraya. Marima mainatabajakutai tai maisia rewaraya tane, taeyama. 19 Tatuma ribane: Jirima kasaba? taeyama. Jesú tatuma riboto ribane: Yatu manaminanaja. Marimasi naminanaja tane. Manaminakore Rimasirakate naminakuna, taeyama. 20 Jesú kwai ribunoko eku inaminayaja tamaja ribu rewarae. Burata moanokoata rewarae. Jisakarakate taisi emojojutanatanae mate asinarija ekuanatiji. 21 Atae Jesú tatuma isia ribane: Ine narukore yatu manajabute. Tiarone yatu aobojona asirajasi eku muanate. Ine nariakutaisiata yatu narukomoni, taeyama. 22 Takore Judiotuma ribane: Wite orinate mojoro? Ribia: Ine nariakutaisiata yatu narukomoni, tia, taeyama. 23 Jesú ribane: Yatu joikamo. Ine kwaimo. Yatu tamaja raina arao. Ine tamaja raina arotuana. 24 Tiame ribunaine yatu aobo-jona asirajasi eku muanate, taine. Ine are ja jakutaisi isia yatu nome abanaja jakore obojona asirajasi eku muanate, taeyama. 25 Takore tatuma ribane: Iji sina tai? taeyama. Jesú ribane: Wajiabarayatukamo ribiakutai, tai ine. 26 Yatu isia ribu eraja rewarakitane jaine. Yatu aribu nome toakitane jaine. Maina-tabatu jakutai, tai nomeraja. Taisi isimo ine nokoajakutai tai raina araoto saba rewarayaine. 27 Jesú Oriarimasi isia rewarayarone tatuma nokonatanae. 28 Takore Jesú tatuma isia ribane: Yatu warao tane nakajakutaisi kobukakore yatu manaminate. Ine are ja tane manaminate. Ineine. Ine oriaribia nonanaja. Rima mainaminajakutai, taisi eku ribiaine. Yatu taisi naminate. 29 Mainatabatu jakutai tai makaika. Rima jisamuka momonatanae. Taisi saba yakeraja jakutai, are taisi nonayaine, taeyama. 30 Tane tamaja ribu ribakore warao eraja taisi isia nome abau-buae. 31 Judiotuma Jesú isia nome abaubuajakutai taisi isia Jesú ribane: Yatu maribu eku bajene nomewitu yatu manebu tane ejobate. 32 Tane ribu nomeraja naminate. Ribu nomeraja jakutai tai yatu ejerote, taeyama. 33 Tatuma taisi riboto ribane: Oko Abraham anobotomo oko. Ebe are raisama anebu jajenaoko. Iji katukeme Yatu ejerote, tane ribia bajama? taeyama. 34 Jesú riboto ribane: Nomewitu, nomewitu yatu isia ribiaine: Obojona asiraja nonaubiakutai, tai obojona asirajasi aneburatu rijana. 35 Neburatu jakutai are saba janoko eku bajinaja. Tiarone Auka are saba bajia. 36 Tiame Auka yatu ejerokore, jerónae tia-jawitu bajete. 37 Yatu Abraham anobotomo jakutaisi namina-yaine. Tiarone manakitane obonoya, maribu yatu aobojona eku yarunaja jame. 38 Rima memiajakutai taisi rewarayaine. Yatu arima yatu saba rewarajakutai taisi eku yatu nonaya, taeyama. 39 Tatuma Jesú riboto ribane: Abraham jakutai tai karima, taeyama. Jesú ribane: Yatu Abraham anobotomo jakore Abra-ham anona eku nonakuna. 40 Ine ribu nomeraja Dio isimo nokoajakutai taisi yatu saba rewaraine. Takore yatu ama manakitane obonoya. Abraham tametane nonanatanae. 41 Yatu arimasi anona eku nonaya, taeyama. Tatuma ribane: Oko maretamo anobotomoana. Karima jisaka. Tai Dio, taeyama. 42 Takore Jesú ribane: Dio yatu arima jakore nomewitu yatu maobonokuna. Ine Dioatukamo ejobane naoaine. Wite naonata-naine tiarone tai mainatabae. 43 Yatu katukeme maribu noko-komoni? Maribu noko obononaja jame nokokomoni. 44 Yatu arima jebuira jakutai taisi isimo yatu. Yatu arimasi aobojona eku nonakitane kwana obonoya. Tai wajiabarayatukamo akobaka. Ribu nome eku bajinaja. Taisi aribu nomeana. Tona ribiaja oriaobojona ribia. Tai tonaira, tona arotu tane. 45 Takore ine nomeraja jakutaisi ribiame, yatu maisia nome abanaja. 46 Yatu kawanamo sina makware obojona asiraja abate? Abakomoni. Ine nomeraja jakutaisi ribakore katukeme yajorabanaja? 47 Dio isimo jakutai, tai Dio aribu nokoya. Yatu Dio isimoanatiji ribu nokonaja, taeyama. 48 Judiotuma Jesú riboto ribane: Oko ribunaeko. Iji Samaria arotu. Iji jebu ja, tane ribunaeko. Karibu nome, taeyama. 49 Jesú tatuma riboto ribane: Ine jebu ekiraine. Marimasi ayatomanetetu jajaine. Yatu mayatomanetenaja. 50 Ine wite airamo tane oriaba-kitane obononajine. Raisa airamo tane mabaya. Taisike ribu nome atoatu. 51 Nomewitu, nomewitu yatu isia ribiaine: Maribu eku abayakutai are wabanatate, taeyama. 52 Takore Judiotuma ribane: Amasike iji jebu ja tane nami-nayaoko. Abraham wabaeyama. Dio kware arewaramo muanae-yama. Ama iji ribia: Maribu eku abayakutai are wabanatate, tia. 53 Iji kanobo Abraham airamo kwarika mojoro? Tai wabae. Dio kware arewaramo muanae. Iji sinama monuka oritoaya? tae-yama. 54 Jesú tatuma riboto ribane: Ine wite airamo tane oritoaya-kore eko ejobakuna. Marima airamo tane mabaya. Yatu tai Kario tane ribiakutai, tai Marima. 55 Tiarone yatu taisi naminanaja. Inesike taisi naminaya. Ine taisi naminanaja tane ribakore yatu monuka tonaira ejobakuine. Tiarone taisi naminayaine. Aribu eku abayaine tane. 56 Yatu anobo Abraham maya mikitane ekeiraja bajinae. Mitane oriwakae, taeyama. 57 Takore Judiotuma ribane: Iji mate inawaja mojorekotuma mojoabasi ekira. Iji Abraham miaeraji bajama? taeyama. 58 Jesú ribane: Nomewitu, nomewitu yatu isia ribiaine: Abraham ebe ine are ja, taeyama. 59 Takore tatuma joyo nisaubuae timikitane. Tiarone Jesú rijisane kwai ribunoko ekumo ejobonae. Tatuma kawanaya narune, naruae.
91 Jesú nariaja nibora mioni miae. Tai arijawarayatukamo are mioni. 2 Anebu Jesú renokoyaja ribane: Inaminatu, tamaja sinama aobojona mioni nakae? Tamaja aobojona asirajasi aobojonenara? Airamotuma aobojona asirajasi aobojonenara? taeyama. 3 Jesú tatuma riboto ribane: Tamajasi aobojona asirajasi aobojonena. Airamotuma aobojona asirajasi aobojonena. Tiarone Dio anona taisi eku emimejerei mioni nakae. 4 Mate jokoma jakore mainatabatu anona nonakitane jaine. Ima naokore jisakarakate yaotakomoni. 5 Ine raina eku jaja raina araoto abije ine, taeyama. 6 Tamaja ribu ribane, joboto sojane, joboto jinikani isia jobotoboto nonae. Nonaitane mioni amu ejoae joboto isia. 7 Isia ribane: Narune jo anamu awai Siloé jakutaisi eku jojarau. Siloé jakutai waraoto aribu isia ribia Inatabaja. Takore mioni jakutai narune, jojarane, seoroyaja naoae. 8 Takore mioni awere aubamo atae ebe tai mioni jakore amimo jakutai tane tatuma ribunae. Ribane: Ateje mioni rujane burata ebubuae. Tai tamajayanara? taeyama. 9 Kawanamo ribane: Tai, taeyama. Eobo ribane: Taisi monuka, taeyama. Tai ribane: Tai ine, taeyama. 10 Tatuma taisi isia ribane: Katukane jimu eseoronae? tae-yama. 11 Tai riboto ribane: Nibora awai Jesú jakutai, tai joboto nonane mamu ejoae. Ejoitane maisia ribane: Siloé tata narune jojarau, tae. Takore ine narune, jojarane tane, seoronaine, taeyama. 12 Tatuma ribane: Tai kasaba? Takore: Naminanajine, taeyama. 13 Ebe mioni jaja jakutai Bariseotumeta konarune amujaba abanae. 14 Jesú jobotoboto nonane taisi amu eseoronae. Tane nonayaja ya tuwara eku nonae. 15 Atanejese Bariseotuma iji katukane seoronae tane renokoae. Tai ribane: Tai joboto mamu isia abanae. Abakore ine jojarane, seoroyaja ejobonaine rijana, taeyama. 16 Takore Bariseotuma kawanamo ribane: Tamaja Dioatu-kamoana, ya tuwara akajotabu eku abanaja jame. Eobo ribane: Asiraja anonatu jakore katukane tamaja sinarija nonate bajama? Tane tatumajase oriaribu kwarikae. 17 Taitane atanejese mioni renokoae: Jimu eseoratu isia katukane ribia iji? Tai ribane: Tai Dio kware arewaratu, taeyama. 18 Tiarone Judiotuma tai ebe mioniana tanabae. Amu eseoro-naja tanabae. Tiame amu bajukanajakutaisi airamotuma yeje-buae. 19 Yejebune renokoae: Tamaja yatu aukenara? Tai mioni arijawarayatukamo jajayanara? Ama katukane seoroya? tae-yama. 20 Airamotuma tatuma riboto ribane: Tamaja kauka jakutaisi naminayaoko. Tai mioni rijawarae. 21 Tiarone ama katukane seoroya tai tane naminanajaoko. Sina taisi amu eseoronae tai tane naminanajaoko. Tai iramo rijana. Renokokotu. Wite ribate, taeyama. 22 Judiotuma nojane airamotuma tane ribunae. Judiotuma amena ribunae: Jesú jakutai tai Akirito tane ribiakutai, tai orikware nakanoko ekumo webotakitane ja, taeyama. 23 Tiame airamo-tuma ribane: Tai iramo rijana. Renokokotu, taeyama. 24 Takore atanejese mioni jaja jakutaisi yejebuae. Isia ribane: Dio airamo, tane ribanu. Tamaja nibora asiraja anonatu tane naminayaoko, taeyama. 25 Tai tatuma riboto ribane: Asiraja anonatu jakore namina-najine. Tiarone tamajasi naminayaine. Ine ebe mionirone ama seoroyaine, taeyama. 26 Tatuma suatana renokoae: Katukane jiisia nonae? Katukane jimu eseoronae? taeyama. 27 Tai riboto ribane: Rijana ribunaine, tiarone yatu maribu noko obononaja. Katukeme atanejese ribamejerea? Yaturakate anebu tane ejobakitane obonoyara? taeyama. 28 Takore tatuma isanayaja ribane: Ijisike aneburatu. Tiarone oko takore Moisés anebu oko. 29 Dio Moisés isia ribunae tane naminayaoko. Tiarone tamaja kasabamo tai tane naminanajaoko, taeyama. 30 Nibora jakutai tatuma riboto ribane: Taneraji bajama! Yatu tai kasabamo tai tane naminanajarone mamu eseoronae. 31 Dio asiraja anonamo aribu nokonaja. Taneanara? Tiarone Dio ayato-manetetu jakutai, Dio nojayaja Dio aobojona eku abayakutai tane, Dio taisi aribu nokoya. 32 Raina ajiromayatukamo jisakarakate mioni rijawarajakutai taisi amu eseoronaja. 33 Tamaja Dioatukamo naonatanajakore nonakomoni jakuna, taeyama. 34 Takore tatuma taisi riboto ribane: Iji obojona asirajasi eku nakae. Amasike iji kainaminayaraji bajama? taeyama. Taitane webotonaeyama. 35 Takore taisi webotakore Jesú nokoae. Jesú taisi mitane isia ribane: Iji Dio Aukama isia nome abanajara? taeyama. 36 Tai Jesú riboto ribane: Sina tai, Mairamo, ine nome aba-mejerei? taeyama. 37 Jesú ribane: Iji taisi miae. Jiisia ribiakutai, tai, taeyama. 38 Tai ribane: Mairamo, nome abayaine rijana. Tane ribaitane Jesú yatomaneteae. 39 Jesú ribane: Ribu nome toakitane naoaine raineta. Mioni jakutai seoramejerei naoaine. Mijakutai mioni tane bajemejerei naoaine, taeyama. 40 Takore Bariseotuma taisi isiko jaja. Kawanamo tamaja ribu nokone ribane: Oko mionianara? taeyama. 41 Jesú tatuma riboto ribane: Yatu mioni jakore obojona asiraja ekirakuna. Tiarone yatu ribia: Mijaoko, tia. Tiame obojona asiraja yatu kware abaya, taeyama.
101 Nomewitu, nomewitu yatu isia ribiaine: Obeja araukara akojo ekia yarunaja jakutai, tai biterijisa. Emoya raukara kwarea buroyakutai tane, tai erijisa arotu tane. 2 Tiarone namu akojo ekia yariakutai, taisike obeja ayaorotu. 3 Namu akojo ayaorotu taisi saba ejeroya. Takore obejatuma taisi aribu nokoya. Tai oriaobeja awai warane iejoboya. 4 Oriaobeja iejobane, obeja ebe naria. Takore obeja taisi iamo naria, aribu naminayame. 5 Obeja arotuana jakutaisi iamo obeja narunaja. Taisi ebikamo kurujubute. Arotuanatiji aribu naminanaja, taeyama. 6 Jesú obeja isia asita abane tamajasi rewarae. Rewarakore aribu anokomo katukayaja tai tane naminanatanae. 7 Jesú suatana ribane: Nomewitu, nomewitu yatu isia ribiaine: Ine obeja araukara akojo. 8 Kokotuka mebe narubuajakutai, tatuma biterijisamo, erijisa arao tane. Tiarone obeja tatuma aribu nokonatanae. 9 Ine araukara akojo. Maisia yariakutai Dio taisi aobojona ibajukate. Yariaja, ejoboyaja tane najoro mite. 10 Biterijisa jakutai erijisakitane naoya. Nakitane naoya. Iekorakitane tane naoya. Ine naoae obeja obojona jiro jamejerei. Yaorane jamejerei naoaine. 11 Ine obeja ayaorotu yakeraja. Obe-ja ayaorotu yakeraja jakutai orimoaya obeja kware wabakitane. 12 Tiarone obeja arotuma aneburatu burata nojoyaja obeja yaoroyakutai obejatuma taisi aromuanatiji tobe mitane obeja omone jakaya. Takore tobe obeja kawanamo oane eobo ejisa-jisaya. 13 Aneburatutiji jakaya. Akobe ajerena rijana. 14 Ine obeja ayaorotu yakeraja. Maobeja naminayaine. Ma-obeja manaminaya. 15 Rima manaminayakutaisi monuka ine-rakate Rimasi naminaya. Ine obeja kware wabakitane orimoa-yaine. 16 Obeja atae eobo jaine, tamaja raukara ekumoana. Tatu-marakate konakitane jaine. Maribu nokote. Tane tatuma asebe jisaka jate, ayaorotu jisaka tane. 17 Tiame Rima maobonoya, ine wabakitane orimoayame, atanejese nominakitane. 18 Jisakarakate mananaja. Ine orimoa-yaine wabakitane. Ribu jaine orimoakitane. Ribu jaine nomina-kitane tane. Rima tametane makajotabuae, taeyama. 19 Tamaja ribu aobojona Judiotuma atanejese oriaribu kwarikae. 20 Eraja ribane: Tamaja jebu ja. Buretae rijana. Katukeme aribu nokoya? taeyama. 21 Eobo ribane: Tamaja ribu, jebu jaja jakutaisi aribuana. Jebu jakutai, mioni amu eseoroyara bajama? taeyama. 22 Takore Jerusalén tata oriwaka jaja. Oriwaka awai Kwai Ribu-noko Dio Moae. 23 Joira rijana. Takore Jesú kwai ribunoko ekia kujuyaja jaja. Kwai ribunoko ajotobasa Salomón Anona jakutaisi eku nabakanae. 24 Judiotuma taisi sibajene ribane: Kaobonobu era jiaobojona. Iji Akirito jakore yaorane ribanu, taeyama. 25 Jesú tatuma riboto ribane: Ribunaine rijana, tiarone yatu yajorabanaja. Manona Rimasi aribia nonayakutai, tatuma maisia rewaraya. 26 Tiarone yatu nome abanaja maobejayanatiji. Tane ribiaine. 27 Maobeja maribu nokoya. Ine tatuma naminaya. Tatuma maiamo naoya. 28 Obojona jiro moayaine. Are rijanaja. Raisa obeja mamojo ekumo nisakomoni. 29 Marima obeja ma-moae. Tai kokotuka kwarika. Raisa obeja Rimasi amojo ekumo nisakomoni. 30 Ine Rima tane jisakaoko. 31 Takore Judiotuma atanejese joyo nisanae Jesú timikitane. 32 Jesú tatuma riboto ribane: Manona yakeraja Rimasi isimo jakutai taisi yatu emiaine. Yatu manona kasikajasi aobojona matimia bajama? taeyama. 33 Takore Judiotuma Jesú riboto ribane: Nona yakerajasi aobojona jitiminaja. Iji Dio isia asiraja rewarayame jitimia. Iji waraorone Dio tane oritoaya, taeyama. 34 Takore Jesú tatuma riboto ribane: Yatu akajotabu akarata eku ribia: Ine ribane: Yatu diotuma, tia. (Rok. 82:6) Taneanara? 35 Dio aribu anojomo isia yatu diotuma tane ribia. Jabataja aribu eku nakakitane ja tane naminayaoko. 36 Rima orisaba emo mabane raineta mainatabae. Ine oriisia Dio Aukaine tane ribakore yatu katukeme Dio isia asiraja ribia tia bajama? 37 Ine Marimasi anona eku nonanaja jakore, takore maisia nome abanaka jakotu. 38 Ine Rimasi anona eku nonayakore, nona isia nome abakotu maisia nome abanajarone. Nome abane Rima meku ja tane naminate. Ine Rimasi eku ja tane naminate, taeyama. 39 Takore atanejese Jesú emojojutaturuae tiarone tai tatuma amojekumo jeronae. 40 Tatukamo atanejese nojaba Jordán jabisaba imakanae. Juan wajiabara joni ekobunajakutaisiata narune tata bajinae. 41 Tiame tata eraja taisiata narune ribane: Nomewitu Juan sinarija jisaka-rakate nonanatanae. Tiarone kokotuka Juan tamajasi isia rewara-jakutai, tai nome, taeyama. 42 Tane tata warao eraja Jesú isia nome abanae.
111 Takore warao jisaka awai Lázaro jakutai tai wabayaja jaja. Tai janokoina Betania arotu. Janokoina jakutai tai Maria, araiba Marta tane ajanokoina jaja. 2 Lázaro wabayaja jakutai, tai Maria arakobo sanuka. Maria jakutai tai Airamo aya-najotu. Jonaba isia yanajonae. Ajio isia Airamo omu bereae. 3 Takore arakoituma ribu Jesú saba inatabae ribamejerei: Kai-ramo, iji obonoyakutai wabayaja ja, tamejerei. 4 Takore Jesú taisi nokone ribane: Tamaja wabawitu sabena wabaya, tiarone Dio airamo tane bajemejerei. Dio Auka airamo tane bajemejerei tane wabaya, taeyama. 5 Tane Jesú tatuma obonoae. Marta, arajia, Lázaro tane obo-noae. 6 Wabayaja ja tane nokoaerone are ina jakutaisiata ya manamo bajinae. 7 Taitane anebu isia ribane: Atanejese Judea tata naruki, taeyama. 8 Anebu ribane: Inaminatu, kaje sabuka Judiotuma jitimi-kitane obonoae. Amasike atanejese tata narute mojoro? taeyama. 9 Jesú tatuma riboto ribane: Ya jakutai asinarija mojoreko kware manamoanara? Jokomaya nariakutai omu esoakanaja, raina abije mijame. 10 Tiarone imaya nariakutai omu esoakaya taisi eku abije ekirame, taeyama. 11 Tane ribaitane, atae atanejese ribane: Kamuaraisa Lázaro jakutai ubaya. Enominakitane narutine, taeyama. 12 Takore anebu ribane: Kairamo, tai ubayaja jakore bajukate, taeyama. 13 Jesú Lázaro awaba isia rewarae. Tatuma auba isia tanabae. 14 Takore Jesú yaorane ribane: Lázaro wabae, taeyama. 15 Ine tata ekirame masaba yakera, yatu nome abamejerei. Rijana taisiata naruki, taeyama. 16 Takore Tomás awai Koromo jakutai eobo isia ribane: Okorakate tata naruki isiko wabakitane, taeyama. 17 Takore Jesú tata nabakane Lázaro ya manamonamojase joitanoko eku jakutaisi naminae. 18 Janokoina Betania jakutai tai Jerusalén awere. Jerusalén tatukamo aito estadio asebe mojoreko kware mojoabasi. 19 Takore Judiotuma eraja Marta, Maria tane tata narubuae. Arakobo sanuka wabajame aobojona etuwarakitane tatumeta narubuae. 20 Takore Marta Jesú naoya-kore nokoitane riboto ejobonaeyama yanabakakitane. Tiarone Maria are janoko eku rujúnae tiaja bajinaeyama. 21 Takore Marta Jesú isia ribane: Mairamo, iji tamatuka jakore, rakobo sanuka wabanatakuna. 22 Amasike kokotuka iji Dio ebiakutai Dio taisi jimoate. Taisi naminayaine, taeyama. 23 Jesú Marta riboto ribane: Jirakobo sanuka riko nominate, taeyama. 24 Takore Marta ribane: Ya ayajuata warao nominakore, rakobo sanuka nominate. Taisi naminayaine, taeyama. 25 Jesú ribane: Inewitu enominatu, obojona jiro tane. Maisia nome abayakutai wabarone nominate. 26 Warao kokotuka mate riko jaja maisia nome abayakutai are wabanatate. Iji taisi nome abayara? taeyama. 27 Tira ribane: Nome abayaine, Mairamo. Iji Akirito, Dio Auka tane raineta naoajakutai, taisi nome abayaine, taeyama. 28 Ribaitane, narune arajia Maria yejebuaeyama. Abita yejebune isia ribane: Inaminatu naone jiyejebia, taeyama. 29 Takore arajia ribu nokone rubujira karamane Jesú tata naruaeyama. 30 Jesú mate janokoina eku nabakamoana. Marta Jesú miajakutaisiata Jesú are jaja. 31 Takore Judiotuma janoko eku tatu aobojona etuwarayaja jakutai Maria rubujira karamane nariakore miae. Mitane iamo naruae. Ribane: Joitanokoata naria yaonakitane, taeyama. 32 Takore Maria Jesú tata nabakane, amujaba mukunamane rujane jinamunae. Ribane: Mairamo, iji tamatuka jakore rakobo sanuka wabanatakuna, taeyama. 33 Jesú tira onayakore mitane, Judiotuma tirasi isiko naoa-jakutai onayakore mitane tane akobe ekumoniraja ejobonae. Aobonobu eraja ejobonae tane. 34 Ribane: Kasaba abanae? taeyama. Tatuma ribane: Kairamo, naone mi, taeyama. 35 Jesú onae. 36 Judiotuma ribane: Mikotu, Lázaro kwana obonoaeraji bajama! taeyama. 37 Eobo ribane: Tamaja mioni amu eseoronae. Jesú saba yakerakore Lázaro mate wabanatakunenara? taeyama. 38 Jesú atanejese akobe ekumoniraja jaja joitanokoata nabakanae. Joitanoko jakutai joyo eku toto nónae tiaja. Taisi akwamukoro tane joyo abánae tiaja jaja. 39 Jesú ribane: Joyo emo abakotu, taeyama. Takore waba arakoi Marta ribane: Mairamo, ya manamonamojase ja rijana. Rijana koi, taeyama. 40 Jesú taisi isia ribane: Ine jiisia ribunatanaera: Iji nome abakore Dio airamo tane bajiakutaisi mite, tane ribunatanaera? taeyama. 41 Takore joitanoko akwamukoro joyo abanajakutaisi nisanae. Nisakore Jesú kwai yabusene ribane: Iji yakeraja. Maribu nokoae. 42 Iji are maribu nokoyakutaisi naminayaine. Tiarone waraosebeira maisiko jakutaisi aobojona ribiaine. Tatuma iji mainatabajakutaisi nome abamejerei ribiaine, taeyama. 43 Tane ribaitane rokojotae: Lázaro, ejobanu, taeyama. 44 Takore wabajakutai ejobonae. Jiaka isia yejimárae tiaja jaja. Akwa kwamotu isia koyánae tiaja jaja tane. Jesú ribane: Ejerokotu. Narukunarai, taeyama. 45 Takore Judiotuma eraja Maria isiko jakutai, Jesú anona mine, isia nome abanae. 46 Tatuma kawanamo Bariseotumeta narune Jesú anona isia rewaraeyama. 47 Takore saserote airamo-tuma Bariseotuma tane ribu nome toanoko araoto orikware toane ribane: Oko katukane nonate? Tamaja nibora sinarija eraja nona-yaraji! 48 Oko are tane iabakore kokotuka taisi isia nome abate. Takore Roma arao naone kwai ribunoko iekorate. Kaina araoto iekorate tane. 49 Takore tatuma kawanamo jisaka Caifás jakutai tai inawaja isia saserote airamowitu jaja. Tai ribane: Yatu naminanaja. 50 Warao jisaka warao kokotuka kware wabakore bajuka. Jisaka wabakore ina arao eraja wabakitane ekira. Yatu tametane obo-nobunaja, taeyama. 51 Tamaja ribu jakutai Caifás aobonobu isimoana. Tai inawaja isia saserote airamowitu jame ribunae. Jesú Judiotuma kokotuka kware wabakitane ja tane rewarae. 52 Wabakitane jakutai Judiotuma kwarewituana. Tiarone Dio anobotomo kokotukanea jisajisa emo emo jakutai tatuma orikware toakitane. 53 Rewa-rajakutaisi aya tatukamo airamotuma obojona jisaka nakae Jesú nakitane. 54 Tiame Jesú yaorane kujunatanae Judiotuma kawanaya. Tane jarawaja awere janokoina Efraín jakutaisiata narune tata bajinae anebu isiko. 55 Takore Judio aoriwaka awere rijana. Oriwaka jakutai Ori-waka Kwaeaba. Takore tai ina arao eraja Jerusalén tata yaburuae Kwaeaba ebisabuka oriberekitane. 56 Tane tatuma Jesú naja-buae. Tane kwai ribunokoata jaja orirenokobuae: Yatu katukane obonobia? Tai oriwaka mikitane naotera bajama? taeyama. 57 Takore saserote airamotuma Bariseotuma tane kajotabuae Jesú kasaba tai tane naminayakutai rewaramejereae Jesú emojo-jutakitane.
121 Takore kwaeaba yanabakakitane ya mojoabasi kware jisaka jakore Jesú Betania tata nabakanae. Betania jakutai tai Lázaro ajanokoina. Warao wabakore Jesú enomininajakutai, tai. 2 Jesú saba najoro abanae. Takore Marta jakutai najoro ajisabatu. Jesú isiko mesa ayanorujumo kaika Lázaro ja. 3 Takore Maria jonaba libra jisaka konae. Jonaba jakutai naruro jomeraja. Amoara uriraja jaja. Takore taisi isia Jesú omu yanajone, oriakwajio isia inawajanae. Jonaba ajuku ebe ajanoko kokotuka jonaberaja ejobonae. 4 Takore Judas Kariot arotu, Simón auka jakutai ribunae. Tai Jesú anebu kawanamo jisaka. Tai Jesú wabikitiakutai tai. 5 Ribane: Tamaja jonaba katukeme wabinaja? Amoara renario siento rijanamo isia wabine saneraubiajasi moaubukuna, taeyama. 6 Tiarone saneraubiajasi isia akobe ajerena. Tai biterijisa. Burata anamu ayaorotu jame, eku toajakutaisi akari orisaba nisanae. Tiame tametane ribunae. 7 Takore Jesú ribane: Tirasi iabakotu. Tai majoita saba nonae. 8 Saneraubiaja yatu isiko are jate. Ine yatu isiko are bajinatate, taeyama. 9 Judio eraja Jesú tata ja tane nokone tata nabakaubuae. Jesú mikitanewituana. Lázaro wabane nomininajakutaisi mikitane naoae. 10 Takore saserote airamotuma obojona jisaka nakae Lazarorakate nakitane. 11 Lázaro aobojona Judio eraja saserote ainamina iabane Jesú isia nome abanae. Tiame airamotuma Lázaro nakitane obonoae. 12 Takore ya araisamaya Judio eraja oriwaka mikitane naoajakutai Jesú Jerusalén tata naoya tane nokoae. 13 Nokoitane jawara aroko nisane riboto ejobonae etuwarakitane. Rokojotae: Hosanna! Airamo aribia naoyakutai tai yakerajawitu! Tai Israeltuma Airamowitu! (Rok. 118:26) 14 Takore Jesú buro auka mitane arai rujunae. Jabataja taisi isia ribia: 15 Sion aukatira, retanaka jau. Mi anaka, Jiairamowitu jakutai naoya. Buro arai rujane naoya, tia. (Zac. 9:9) 16 Tamaja ribu wajiabara anebu nokonatanae. Tiarone Jesú airamo tane bajekore tatuma jabata isia aobojona nakae. Tatuma Jesú isia nonajakutai taisi isiarakate aobojona nakae. 17 Takore Judiotuma Jesú isia rewarae. Jesú Lázaro joitanoko ekumo yejebune wabarone enominakore tatuma tata jaja. 18 Tia-mesike warao Jesú riboto ejobonae etuwarakitane. Tamaja asina-rija nonae tane nokoaetiji ejobonae. 19 Takore Bariseotuma oriisia ribunae: Taisi riboto nonakomoni rijana. Mikotu, warao kokotuka taisi iamo naria, taeyama. 20 Judiotuma oriwaka mikitane tata yatomanetekitane tane yaburuae. Yaburuajakutaisi kawanamo Grecia araorakate ja. 21 Ta-tuma Felipeata nabakane ebuae. Felipe jakutai tai janokoina Bet-saida ina Galilea arotu. Tatuma ribane: Kairamo, Jesú mikitane obonoyaoko, taeyama. 22 Takore Felipe Andrés saba rewarae. Takore Andrés, Felipe tane Jesú saba rewarae. 23 Jesú tatuma riboto ribane: Amasike warao tane nakajakutai asinarija eku rijana airamo tane baje-kitane. 24 Nomewitu, nomewitu yatu isia ribiaine: Tiriko aumu joboto eku nakane wabanaka jaja, jisamuka bajia. Tiarone waba-ne kwana kwajaya. 25 Oriaobojona obonoyakutai rijate. Oriao-bojona rarijatayakutai mate raina eku jaja are ubakitane saba aobojona yaorane abate. 26 Makajotabu tane bajiakutai, maiamo naokunarai. Ine jakutaisiata makajotaburakate tata jate. Makajo-tabu tane bajiakutai Marima taisi raomata tane abate. 27 Amasike maobonobu era. Ine katukane ribate? Rima, tamaja asinarija ekumo mejeronu, tatera? Tanajine. Tamaja asinarija eku nakakitane naoaine. 28 Rima, jiwai uriraja tane abanu. Takore najamutuatamo ribu ribane: Mawai uriraja tane abanaine. Atanejese uriraja tane abatine, taeyama. 29 Takore waraosebeira tata jakutai ribu nokone ribane: Naja ribunae, taubuae. Eobo ribane: Dio ainataba taisi isia ribunae, taubuaeyama. 30 Takore Jesú tatuma riboto ribane: Tamaja ribu maobojona ribunatanae. Yatu aobojona ribunae. 31 Raina araoto aribu nome toaya rijana. Raina airamo webotoya rijana. 32 Takore kwai ma-kobukakore, ine warao kokotuka orisabasaba natokatine, taeyama. 33 Tamaja ribu ribunae oriawaba isia rewarayaja, waba katukayaja isia wabakitia tai tane rewarae. 34 Takore warao taisi isia ribane: Oko kajotabu akarata eku teribuaeko. Tai Akirito are jate tane ribia. Iji katukeme warao tane nakajakutaisi kobukate tia bajama? Warao tane nakajakutai sina tai? taubuaeyama. 35 Jesú ribane: Mate sanuka abije yatu kawanaya ja. Abije jakore ajoko eku kujukotu imajana yatu kwarikanaka jamejerei. Imajana eku kujuyakutai kasaba naria tai tane naminanaja. 36 Abije yatu kawanaya jakore abije isia nome abakotu. Nome abane jokoma arao tane ejobate, taeyama. 37 Sinarijatuma eraja tatuma amujaba nonaerone tatuma are nome abanatanae. 38 Isaias aribu eku nakamejerei nome abana-tanae. Isaias Dio kware arewaratu jakutai tametane ribunaeyama: Kairamo, sina karewara yajorabae? Kairamo ajarata sinama emusabae? taeyama. (Isa. 53:1) 39 Tiame tatuma nome abakomoni. Isaias atae ribunaeyama. 40 Ribane: Dio tatuma amu inareae, aobojona taeraja tane abanae, Amu isia minaka jamejerei, aobojona isia naminanaka jamejerei tane. Tiame makware bajinaja, ine tatuma ibajukamejerei. (Isa. 6:10) 41 Isaias Dio airamo rujúnae takore mine taisi isia rewarayaja tamaja ribu ribunaeyama. 42 Takorejone airamo sabuka kawanamo eraja Jesú isia nome abanae. Tiarone tatuma Bariseo aobojona yaorane ribunatanae, orikware nakanoko ekumo webotonaka jamejerei. 43 Dio aobo-jona eku bajekitane tatuma saba yakera. Tiarone waraoto aobo-jona eku bajekitane tatuma saba kwarika yakera. 44 Takore Jesú rokojotayaja ribane: Maisia nome abayakutai, maisiawitu nome abanaja. Tiarone mainatabatu isia nome abaya. 45 Mamijakutai mainatabatu mija. 46 Ine abije tane raineta naoaine. Warao kokotuka maisia nome abayakutai imajana eku bajinaka jamejerei naoaine. 47 Maribu nokone, eku abanaja jakutai, taisi aribu nome toanajine. Ine raina araoto aribu nome toakitane naonatanaine. Tiarone raina araoto aobojona ibajuka-kitane naoaine. 48 Matainayakutai, maribu nisanaja jakutai tane, taisi aribu nome atoatu ja. Ribu ine ribuajakutai tai ya ayaju eku nome toate. 49 Ine wite maribia ribunatanaine. Marima mainatabajakutai makajotabuae ribamejerei. Rewaramejerei tane makajotabuae. 50 Marima akajotabu jakutai tai are ubakitane saba. Taisi naminayaine. Maribu Marima makajotabuajakutai taisi eku ribiaine.
131 Takore Oriwaka Kwaeaba aya ebika Jesú asinarija eku nakae tane naminae. Raina tatamo narune, Arimasiata nabakakitane jakutaisi asinarija. Awarao raina eku jakutaisi are obonoyaja Arimasiata nabakakitane jakutaisi asinarijayata ru tane are obonoae. 2 Anayakore tatuma najoroae. Najorokitane ebisabuka jebuira jakutai Judas aobojona eku abanae Jesú wabimejerei. Judas jaku-tai tai Kariot arotu, Simón auka. 3 Jesú tametane naminae. Jesú Dio tatamo naoae tane naminae. Atanejese Dio tata narukitane ja tane naminae. Arima kokotuka Jesú amojeku abanae tane Jesú naminae. 4 Naminane orianajoro iabane karamunae. Oriajiaka-wari jiwaraitane jiaka basau tiajasi isia oriakabea koyanae. 5 Tane jo anamu eku abane anebu omu jojarakitane jotananae. Jiaka oria-kabea koyánae tiakutaisi isia omu inawajakitane jotananae. 6 Tane Simón Pedroata nabakakore Pedro ribane: Mairamo, momu jojarate mojoro? taeyama. 7 Jesú Pedro riboto ribane: Ine nonayakutai iji mate namina-naja. Nokabuka naminate, taeyama. 8 Takore Pedro ribane: Momu jojaranajawitu, taeyama. Jesú Pedro riboto ribane: Jiomu jojaranaja jakore iji maisiko ekirate, taeyama. 9 Simón Pedro ribane: Mairamo, momuwituana. Mamojo, makwa tane jojarate, taeyama. 10 Jesú ribane: Amena jojarajakutai omuwitu jojarakitane ja. Tane kokotukanea ananerena ejoboya. Yatu ananerena, tiarone kokotukayana, taeyama. 11 Jesú awabitu sina tai tane naminae. Tiame ribunae: Anane-rena jakutai kokotukayana. 12 Taitane omu jojaraitane, oriajiaka orisabane, atanejese mesa yarujunae. Ribane: Ine nonajakutai yatu naminayara? 13 Yatu maisia Kainaminatu, Kairamo tane ribia. Yakeraja ribia. Tai ine. 14 Ine yatu airamo yatu ainaminatu tane yatu omu jojarae. Yaturakate oriomu jojarakitane ja. 15 Ine nonaine, yatu manona eku nonamejerei. 16 Nomewitu, nomewitu yatu isia ribiaine, aneburatu jakutai airamo kwarikena. Inataba jakutai ainatabatu kwarikena tane. 17 Tamaja obojona naminane, eku abane ekeiraja ejoboya. 18 Yatu kokotukawituana. Ine mibune nisajakutaisi namina-yaine. Jabatajasi eku nakakitane ja. Jabataja taisi isia ribia: Maisiko najoroyakutai mariboto ejobonae, tia. (Rok. 41:9) 19 Ama yatu saba rewaraya mate nonamoana jakore. Ribu eku kwaeabakore yatu ine jakutaisi nome abamejerei rewarayaine. 20 Nomewitu, nomewitu yatu isia ribiaine: Mainataba etuwa-rayakutai metuwaraya. Metuwarayakutai mainatabatu etuwaraya, tiaine, taeyama. 21 Taitane Jesú aobojona ekumoniraja bajinae. Yaorane ribane: Nomewitu, nomewitu yatu isia ribiaine yatu kawanamo jisaka mawabite, tiaine. 22 Takore anebu orimiae sina tai tane naminanaja jame. 23 Jesú aneburatu ajajaruka yajiaja jaja. Jesú aneburatu obonoyakutai, tai. 24 Simón Pedro taisi tejomonae sina tai tane renokomejerei. 25 Takore Jesú ajajaruka yajiakutai ribane: Mairamo, sina tai? taeyama. 26 Jesú taisi riboto ribane: Ine bãu ejuratine. Ine moayakutai, tai, taeyama. Taitane bãu ejurane Judas Kariot arotu Simón auka jakutaisi moae. 27 Bãu najorokore Satanás taisi eku yaruae. Takore Jesú Judas isia ribane: Iji nonakitane jakutai rubujira nonau, taeyama. 28 Mesa ayanorujumo katukeme ribunae tai tane namina-natanae. 29 Judas burata abanoko arotutiji Jesú taisi isia ribunae tanabae. Jesú ribunae tai: Oriwaka saba ekirakutaisi nisanu, o Burata saneraubiajasi moau, tae, tanabae. 30 Judas bãu najorone, ejobakore amena ya ánae tiaja. 31 Taitane Judas narukore Jesú ribane: Ama warao tane naka-jakutai airamo tane ejoboya. Dio airamo tane ejoboya taisi aobo-jona. 32 Dio taisi aobojona airamo tane ejobane Dio airamo tane taisi abate oriaobojona eku. Rubujira airamo tane taisi abate. 33 Manobotomo aukamo, mate sanuka yatu isiko jatine. Yatu manajabute. Judiotuma isia ribunajakutai ama yatu isia ribiaine: Ine nariakutaisiata yatu narukomoni, tiaine. 34 Kajotabu jiro yatu moayaine: Oriobonokotu. Ine yatu obonoyakutaisi monuka obonokotu. 35 Yatu oriobonokore rijana eobo kokotuka yatu manebu ja tane naminate, taeyama. 36 Takore Simón Pedro ribane: Mairamo, kasaba naria? Jesú Pedro riboto ribane: Ine nariakutaisiata iji mate maiamo naru-komoni. Nokabuka maiamo narute, taeyama. 37 Pedro ribane: Mairamo, katukeme ama jiiamo narukomoni? Jikware wabakuine, taeyama. 38 Jesú riboto ribane: Makware wabakunara? Nomewitu, nomewitu, jiisia ribiaine: Karina mate kuitanaja jakore, iji rijanamo tane ribate: Taisi naminanajine, tate, tiaine.
141 Yatu aobonobu eraja ejobonaka jakunarai. Yatu Dio isia nome abane, maisia nome abakotu. 2 Rimasi ajanokoata anamu era. Tanaja jakore yatu isia ribakuine. Janoko yatu saba iyakaratakitane nariaine. 3 Tane ine narune, yatu ajanoko iyaka-ratane atanejese naotine. Yatu konarutine, ine jakutaisiata yatu tata jamejerei. 4 Ine kasaba naria tai tane yatu naminaya. Ajojisi naminaya tane. 5 Takore Tomás ribane: Kairamo, iji kasaba naria tai tane naminanajaoko. Naminanaka jaja oko katukane ajojisi naminate bajama? taeyama. 6 Jesú ribane: Ine jojisi, nome, obojona jiro tane. Maisia narunaja jakutai Rimasiata narunaja. 7 Yatu manaminakore Rimarakate naminakuna. Amayatukamo taisi naminaya yatu. Taisi miae rijana, taeyama. 8 Takore Felipe ribane: Kairamo, Rimasi kemusabakore kaobojona ru tate, taeyama. 9 Jesú ribane: Felipe, ine yatu isiko ya eraja jarone, mate manaminanaja mojoro? Mamiajakutai tai Rimasi miae. Amasike katukeme Rimasi kemusabakuna tia bajama? 10 Ine Rimasi ekuine. Rima meku. Yatu taisi nome abanajara? Ribu ine ribiakutai maribia ribunajine. Rima meku ubayakutai orianona nonaya. 11 Ine Rimasi eku. Rima meku jakutai, taisi nome abakotu. Tanaja jakore manona aobojona maisia nome abakotu. 12 Nomewitu, nomewitu yatu isia ribiaine: Maisia nome abayakutai, manona monuka nonate. Nona kwarika nonate ine Rimasiata narukitiame. 13 Yatu maribia Rimasi ebiakutai taisi kokotuka nonatine Rima airamo tane ejobamejerei Aukama aobojona. 14 Maribia ebiakutai, ine taisi nonatine. 15 Maobonoyaja makajotabu eku abakotu. 16 Ine Rimasi ebukore Reiritu raisama yatu moate. Tai yatu kaika are bajeme-jerei moate. 17 Tai Mejokojira nomeraja. Raina arao taisi etuwa-rakomoni, minaja jame naminanaja jame tane. Tiarone yatu taisi naminaya, yatu kaika jaja yatu eku bajete jame. 18 Yatuata naotine. Yatu raoana tane iabanatatine. 19 Mate sabuka raina arao maminatate. Tiarone yatu mamite. Ine riko jame yaturakate ubate. 20 Tai ya eku ine Rimasi eku ja tane yatu naminate. Yatu meku, ine yatu eku ja tane naminate. 21 Makajotabu ja jakutai, makajotabu eku abayakutai tane taisike maobonoya. Maobonoyakutai Rima taisi obonote. Ine taisi obonote. Ine taisi oriemusabatine. 22 Takore Judas ribunae. Tai Judas jakutai raisa, Kariot arotu-ana. Tai ribane: Kairamo, iji katukeme kaisia oriemusabakitia tiarone raina araoto oriemusabanaja? taeyama. 23 Jesú taisi riboto ribane: Maobonoyakutai maribu eku abaya. Takore Marima taisi obonote. Oko taisiata narune, kaubanoko taisi kaika nonate. 24 Maobononaja jakutai maribu eku abanaja. Ribu yatu nokoajakutai tai maribuana. Rima mainatabajakutai, taisi aribu. 25 Ine mate yatu isiko jaja tamaja ribu ribiaine. 26 Reiritu jakutai tai Dio Amejokojira Yakerajawitu. Rima taisi inatabate maribia. Marewara kokotuka isia yatu aobojona nakamejerei tai kokotuka yatu inaminate. 27 Ine nariaja yatu inareraja tane abayaine. Raina arao inare-raja tane abayakutaisi monuka abanajine. Yatu aobonobu eraja ejobonaka jakotu. Retanaka jakotu. 28 Ine ribiakore yatu maribu nokoae. Ribunaine: Narune, atanejese yatuata naotine, taine. Ine ribane: Rimasiata narukitine tajame yatu maobonoyakore oriwa-kakuna. Rima makwarika jame oriwakakuna. 29 Takore mate kwaeabamoana jakore yatu saba rewarayaine. Ribu eku kwaeabakore yatu nome abamejerei rewarayaine. 30 Tane yatu isia ribu eraja ribunaja rijana, raina airamo naoyame. Tai maisia ribu ekira. 31 Marima makajotabuajakutai taisi eku abayaine, raina arao ine Rimasi obonoya tane namina-mejerei. Nokaramane tamatukamo naruki rijana.
151 Ine uwa arauwitu jakutai. Marima jakutai tai arajikabatu. 2 Uwa arau awaku kokotuka meku jakutai kwajanaja jakore kabatate. Kwajayakore kware esokate, yakerajawitu kwajamejerei. 3 Marima amena yatu esokae ribu ine yatu isia ribunajakutaisi isia. 4 Meku bajekotu. Ine yatu eku bajetine. Awaku uwa arau eku bajinaja jakore wite kwajakomoni. Yatu taisi monukajase. Meku bajinaja jakore kwajakomoni. 5 Ine uwa arau. Yatu awaku. Meku bajiakutai, ine taisi eku bajiakutai tane, tai kwana kwajaya. Memo nona jisakarakate nona-komoni. 6 Meku bajinaja jakutai awakuwaja monuka webotate. Takore wajate. Takore orikware toane, jekunu eku toakore rokate. 7 Yatu meku bajene, maribu yatu eku bajekore tane, obonoyakutaisi ebukotu. Takore yatu moate. 8 Yatu kwana kwajayaja Marima airamo tane abaya. Yatu kwana kwajayaja yatu nomewitu manebu tane ejoboya. 9 Marima maobonoyakutai taisi monuka yatu obonoyaine. Are ine yatu obonoyakutaisi eku bajekotu. 10 Yatu makajotabu eku bajiaja ine are yatu obonomejerea. Taisi monuka ine Marimasi akajotabu eku bajiaja are maobonomejereaine. 11 Tamaja ribu yatu isia ribiaine mekei yatu eku bajemejerei. Yatu ekei kaikawitu bajemejerei tane. 12 Makajotabu jakutai, tai tamaja: Yatu oriobonokotu, ine yatu obonoyakutaisi monuka. 13 Amuaraisa kware wabakore kwana obonoya. Kwarika obono-komoni. 14 Makajotabu eku abakore yatu mamuaraisatuma rijana. 15 Yatu isia manebu tane ribunajine rijana. Anebu airamo nona-yakutaisi naminanaja. Ama yatu isia mamuaraisatuma tane ribiaine. Ine Rimasi isimo nokoajakutai kokotuka yatu inaminaine. 16 Yatu manisanatanae. Ine yatu mibune nisaine. Ine abanaine rijana yatu narune kwajane takore yatu akwaja bajemejerei. Tane abanaine. Yatu Rimasi ebiakutai maribia, Rima taisi yatu moate. Tane abanaine. 17 Tamaja makajotabu: Yatu oriobonokotu. 18 Raina arao yatu rarijatayakore yatu aobojona ineata naka-kotu. Wajiabara mararijatae. Taisi naminakotu. 19 Yatu raina isimo jakore, raina arao oriwaraoto tane obonokuna. Yatu mibune nisaine raina ekumo. Tiame yatu raina isimoanatiji raina arao yatu rarijataya. 20 Ribu yatu isia ribunajakutai taisi obono-bukotu. Isia yatu aobojona nakakotu. Aneburatu jakutai airamo kwarikena. Maisanamatakore yaturakate isanamatate. Maribu eku abakore, yatu ariburakate eku abate. 21 Yatu isia tamajasi nonate mawai aobojona, mainatabajakutaisi naminanaja jame. 22 Ine naone tatuma isia ribunatanajakore tatuma aobojona asiraja ekiraja jakuna. Ama aobojona asirajasi kware sijakako-moni. 23 Mararijatayakutai Rimasi rarijataya. 24 Ine tatuma kawanaya mianare nonanatanajakore aobojona asiraja ekiraja ja-kuna. Ama miaerone mararijataya. Marimasi rarijataya tane. 25 Tane kwaeabanae kajotabu akarata aribu eku nakamejerei. Karata ribia: Makware obojona asiraja abakitane ekirarone are mararijatae, tia. (Rok. 35:19, 69:4) 26 Takore Reiritu naone maisia rewarate. Ine taisi inatabatine Rimasiatukamo. Tai Mejokojira nomeraja. Makware rewarate. 27 Yaturakate makware rewarate, awajiabarayatukamo maisiko jaja jame.
161 Tamaja ribu yatu isia ribiaine yatu omu esoakanaka ja-mejerei. 2 Orikware nakanoko ekumo yatu webotate. Asinarija naote. Taisi eku eobo yatu kubane Dio akajotabu eku nonaya tanabate. 3 Tamajasi nonate Rimasi naminanaja jame, manaminanaja jame tane. 4 Tamaja ribu yatu isia ribiaine asi-narija eku nakakore, yatu aobojona maribu tata nakamejerei. Awajiabarayatukamo tamaja ribu yatu isia ribunatanaine, ine yatu kaika jame. 5 Ama mainatabatuata narukitine. Yatu ekumo jisakarakate marenokonaja. Kasaba naria? tane ribunaja. 6 Tiarone tamaja ribu yatu isia ribunajame yatu aobojona eku-moniraja bajia. 7 Yatu isia nomeraja ribiaine: Ine narukore yatu saba bajuka. Ine narunaja jakore Reiritu jakutai yatuata naonaja jakuna. Ine narukore yatuata taisi inatabatine. 8 Takore Reiritu naone raina araoto reiriaja sabajite. Obojona asirajasi isia, nona nomerajasi isia, Dio ribu nome toakitane jakutaisi isia tane reiriaja sabajite. 9 Obojona asirajasi isia inaminate, tatuma maisia nome abanaja jame. 10 Nona nomerajasi isia inaminate, ine Rimasiata narukitane jame. Atae yatu maminatate. 11 Dio ribu nome toakitane jakutaisi isia inaminate, tamaja raina airamo aribu nome toane sanamata saba taisi abanaetiji, tiaine. 12 Mate ribu eraja yatu saba rewarakitane jaine. Tiarone yatu mate ribu nokokomoni. 13 Dio Amejokojira nome jakutai naone, tai nome kokotuka yatu inaminate. Tai oriaribia rewaranatate. Nokoyakutai taisi rewarate. Mate kwaeabakitane jakutai Mejo-kojira taisi yatu inaminate. 14 Tai airamo tane mabate. Ine jaja jakutaisi ekumo nisane, taisi yatu emusabate. 15 Marima jaja jakutai, tai kokotuka ine. Tiame ribunaine: Mejokojira ine jaja jakutaisi ekumo nisane, taisi yatu emusabate, taine. 16 Mate sabuka maminatate. Atanejese mate sabuka mamite, ine Rimasiata narukitane jame. 17 Takore anebu kawanamo oriisia ribane: Katukeme mate sabuka maminatate tia bajama? Katukeme atanejese mate sabuka mamite, ine Rimasiata naru-kitane jame tia bajama? taeyama. 18 Atae ribane: Mate sabuka tane ribiaja, tai katukane ribia? Aribu nokonajaoko, taeyama. 19 Tatuma Jesú renokokitane obonoyakore Jesú naminae. Naminane ribane: Ine ribunaine: Mate sabuka maminatate. Atanejese mate sabuka mamite, taine. Tiame yatu orirenokoyara? 20 Nomewitu, nomewitu yatu isia ribiaine: Yatu onate, yaonate tane. Tiarone raina arao oriwakate. Yatu ekumonirajarone, ekeiraja ejobate. 21 Tira jakutai uakayaja roroya, asinarija eku nakaetiji. Tane auka nakakore aji isia obonobunaja rijana. Auka raina eku nakaetiji ekeiraja bajia. 22 Yatu taisi monuka ama ekumoniraja. Tiarone yatu mikitane bajetine. Takore yatu aobojona ekeirate. Jisakarakate yatu ekei yatu ebikamo nisakomoni jate. 23 Tai ya eku marenokonatate. Nomewitu, nomewitu yatu isia ribiaine: Maribia Rimasi ebiakutai, tai kokotuka yatu moate. 24 Ebeatamo ama ya ru tane maribia yatu ebunatanae. Rijana ebune nojote, yatu ekei kaikawitu ejobamejerei, tiaine. 25 Ama asita abane yatu saba rewaraine. Asinarija naoya. Taisi eku asita abane rewaranatatine. Ribu Rimasi isia jakutai yatu saba yaorane ribatine. 26 Tai ya eku maribia ebute. Yatu saba Rimasi ebutine tane ribunajine. 27 Rimajase yatu obonoya, yatu maobonoajame. Ine Dioatukamo ejobonajakutaisi nome abajame, Rima yatu obonoya. 28 Rimasi tatamo ejobane, raineta nabakanaine. Atanejese raina iabane Rimasiata nariaine, taeyama. 29 Anebu ribane: Amasike yaorane ribia. Asita abane rewa-ranaja rijana. 30 Iji kokotuka naminayakutai, oko rijana taisi naminaya. Atae jirenokokitane ekira. Tiame iji Dioatukamo ejo-bonajakutaisi nome abayaoko, taeyama. 31 Jesú ribane: Rijana nome abayara? 32 Asinarija naoya, eku rijana. Taisi eku yatu oriaobojonaya jisajisate. Jisamuka momote. Tiarone ine jisamukena Marima are maisiko jame. 33 Tamaja ribu yatu isia ribiaine maobojona yatu inareraja bajemejerei. Raina eku sanamatayarone ekeiraja bajekotu. Ine raina aobojona kwarikanaine rijana, taeyama.
171 Jesú tamaja ribu ribane, amu kwai yabusene ribane: Rima, asinarija eku rijana. Jiauka airamo tane abanu, Jiauka airamo tane jiabamejerei. 2 Iji ribu Jiaukama moae warao kokotuka isia. Iji waraoto nisane Aukama moae. Auka tatuma are ubamejerei moae. 3 Are ubakitane jakutai tai tamaja: Iji Dio nomerajawitu jakutaisi naminamejerei, Jesukirito iji inataba-jakutaisi naminamejerei tane. 4 Ine raina eku jaja airamo tane jiabanaine. Yaota mamoa-jakutaisi riwaranaine rijana. 5 Ateje jiisiko ine airamo jajaine raina ajiroma ebe. Ama atanejese jiisiko airamo tane mabanu. 6 Iji waraoto mamoae raina ekumo. Tatuma iji sina tai tane ji-naminamejerei tatuma inaminaine. Tatuma iji. Takore iji ma-moae. Takore tatuma jiribu eku abanae. 7 Kokotuka mamoaja-kutai jiisimo. Ama tatuma taisi naminaya. 8 Ribu iji mamoaja-kutai tatuma moaine. Tatuma ribu oanae. Ine nome ijiatamo ejo-bonajakutai taisi naminae. Iji mainatabajakutaisi nome abanae. 9 Tatuma kware ebiaine. Raina araoto kware ebunajine. Mamoajakutaisi kware ebiaine tatuma iji jaja jame. 10 Ine jaku-tai tai iji. Iji jakutai tai ine. Ine airamo tane ejobonaine tatuma aobojona. 11 Ine raina ekuana. Tatuma mate raina eku. Ine ijiata naru-kitia. Rima yakeraja, jiribia mamoajakutaisi yaoro, aobojona jisakawitu ejobamejerei. Oko jisakawitu ja tane ejobamejerei yaoro. 12 Ine mate raina eku tatuma isiko jaja jiribia tatuma yaoroaine. Mamoajakutaisi yaoroaine. Takore rijanatanae. Tia-rone jisakawitu rijanae. Jabataja eku nakamejerei Dio taisi ieko-rakitane ja. 13 Ama ijiata narukitine. Tamaja ribu raina eku ribiaine, mekei tatuma eku kaikawitu ejobamejerei. 14 Jiribu tatuma moaine. Raina arao jakutai tatuma rarijatae, tatuma raina araoanatiji. Inerakate raina arotuana. 15 Iji tatuma raina ekumo konarumejerei jiebunajine. Tatuma yaoro, asiraja arotuma amojeku nakanaka jamejerei. 16 Tatuma raina araoana. Inerakate raina arotuana. 17 Nome isia tatuma orisaba emo abánae tiaja abanu. Jiribu jakutai tai nome. 18 Iji raineta mainatabae. Taisi monuka ine tatuma raina ekia inatabayaine. 19 Tatuma aobojona ine wite Dio saba emo oriabanaine, tatuma nome isia Dio saba emo abánae tiaja bajemejerei. 20 Tatumawitu kware ebunajine. Eobo tatuma aribu isia nome abakitane jakutai tatuma kwarerakate ebiaine. 21 Kokotuka warao jisakawitu ejobamejerei ebiaine. Rima, iji meku ine jieku tane. Tatuma keku jaja warao jisaka ejobate. Takore raina arao iji mainatabajakutaisi nome abate. 22 Iji airamo tane mabanae. Taisi monuka tatuma airamo tane abanaine. Oko jisakawitu jakutai taisi monuka tatuma warao jisakawitu jamejerei abanaine. 23 Ine tatuma eku jate iji meku tane tatuma warao jisakawitu bajene kaikawitu ejobamejerei. Takore raina arao iji mainatabajakutaisi naminate. Iji maobonoya. Taisi monuka ine tatuma obonoya. Ama raina arao taisi naminate. 24 Rima, mamoajakutai ine jakutaisiata tatuma maisiko jame-jereaine. Raina ajiroma ebe iji maobonone airamo tane mabanae. Ine airamo tane rujakore tatuma mamimejereaine. 25 Rima no-meraja, raina arao jinaminanatanae. Ine jinaminaine. Tamatuma iji mainatabajakutai taisi naminae. 26 Iji sina tai tane tatuma inaminaine. Atae mate inaminatine, iji maobonoajakutaisi mo-nuka tatuma raisama obonomejerei. Ine tatuma eku bajekitane jakutaisi inaminatine.
181 Tatukamo, Jesú jana sanuka Cedrón imakanae anebu isiko. Tata rajikaba jakutaisi eku yaruae anebu isiko. 2 Judas, Jesú awabitu jakutai tairakate rajikaba naminae. Jesú anebu isiko are tata narubuajame. 3 Takore Judas yaoromose-beira, yaoromo airamotuma tane konaruae. Tatuma saserote airamotuma tatamo, Bariseotuma tatamo tane. Tata nabakaubuae abije isiko, abi rokiajasi isiko, orikubanoko isiko tane. 4 Warao nonakitane jakutai Jesú kokotuka naminane suatana narune ribane: Yatu sinama najabia? taeyama. 5 Riboto ribane: Jesú Nazaret arotuma najabiaoko, taeyama. Jesú ribane: Tai ine, taeyama. Judas, Jesú awabitu jakutairakate tatuma isiko ja. 6 Jesú ribane: Tai ine, takore, tatuma raiya narune joika nakae. 7 Jesú atanejese renokoae: Sinama najabia? taeyama. Takore: Jesú Nazaret arotuma najabiaoko, taeyama. 8 Jesú riboto ribane: Yatu isia ribunaine: Tai ine, taine. Mana-jabiakore tamatuma narumejerei iabakotu, taeyama. 9 Tane ribunae oriaribu eku nakamejerei. Mamoajakutaisi kawanamo jisakarakate rijanatanae. Amena tane ribunae. 10 Ta-kore Simón Pedro, abuariwari jaja nisane, saserote airamowitu aneburatu ajene akojoko mojonome tajasaba jewetenae. Neburatu awai Malco. 11 Jewetakore Jesú Pedro isia ribane: Jibuariwari anamu eku abanu. Jobinoko Rima mamoajakutai, taisi ekumo jobinatatera bajama? 12 Tatuma Jesú emojojutane, amojo koyanae. Tatuma yaoro-motuma, yaoromo akabitana, yaoromo airamotuma Judiotuma tatamo jakutai tane. 13 Takore wajiabara Anás tata konaruae. Anás jakutai tai Caifás araji. Caifás jakutai tai inawaja isia saserote airamowitu jaja. 14 Ateje Caifás Judiotuma reiriae. Ribane: Warao jisaka warao kokotuka kware wabakore bajuka, taeyama. 15 Takore Simón Pedro Jesú aneburatu raisa tane Jesú iamo naruae. Neburatu raisa jakutai saserote airamowitu ebe míae tiaja jame saserote airamo ajanoko akara eku yaruae Jesú iamo. 16 Pedro jakutai akojoata bajinae. Takore neburatu raisa saserote airamowitu ebe míae tiakutai ejobonae. Ejobane, akojo ayaorotu isia ribunae Pedro iyarumejerei. 17 Takore akojo ayaorotu tira Pedro isia ribane: Iji taisi aneburatuanara? taeyama. Pedro ribane: Ineana, taeyama. 18 Takore rairame anebu, yaoromo airamotuma tane jekunu nautaeyama. Awere karamane oriijitayaja jaja. Pedrorakate tatu-ma isiko karamane oriijitayaja jaja. 19 Saserote airamowitu Jesú renokoae anebu isia ainamina isia tane. 20 Jesú taisi riboto ribane: Ine rijisanaka kokotuka saba rewaraine. Orikware nakanoko eku, kwai ribunoko eku tane are rewarayaja jajaine. Tata Judiotuma orikware nakaya. Rijisane ribunatanaine. 21 Katukeme marenokoya? Maribu anokomo renoko. Ine katukane ribunae tai tane tatuma naminaya. 22 Takore Jesú tametane ribakore, yaoromo airamo jisaka Jesú amukaba mojo abasaya nabane ribane: Saserote airamowitu riboto ribaterate! taeyama. 23 Jesú riboto ribane: Ine asiraja jakutaisi ribakore, maribu asiraja jakutaisi rewarau. Yakeraja jakore katukeme manabaya bajama? taeyama. 24 Takore Jesú koyánae tane Anás Caifás tata inatabae. Caifás jakutai saserote airamowitu. 25 Takore Pedro karamane oriijitayakore eobo taisi isia ribane: Iji aneburatu jisakenara? taeyama. Tai ribane: Ineana, taeyama. 26 Saserote airamowitu aneburatu jaja. Tai Pedro akojoko jewetenajakutaisi ajisaka. Tai ribane: Taisi isiko rajikabeta jiminatanaera? taeyama. 27 Atanejese Pedro ineana tane ribunae. Takore rijana karina kuitaeyama. 28 Takore jokoyakore Caifás ajanokoatukamo Judiotuma Jesú konaruae ribu nome atoanokoata. Tatuma kwaeaba anajoro najo-rokitane jame wisi ejobonaka jakitane ribu nome atoanoko eku yarunatanae. 29 Takore Pilato tatumeta ejobane ribane: Katukane isia tamaja niborama kware abaya? taeyama. 30 Tatuma riboto ribane: Tamaja asiraja anonatuana jakore oko jimojeku abanatakuna, taeyama. 31 Takore Pilato ribane: Konarune yatu akajotabu eku aribu nome toakotu, taeyama. Takore Judiotuma ribane: Oko nakitane ribu ekira, taeyama. 32 Tametane ribunae Jesú aribu eku nakamejerei. Jesú ateje oriawaba isia rewarae. Tuatane monuka rewarae. 33 Atanejese Pilato ribu nome atoanoko eku yarune, Jesú yejebune, ribane: Iji Judio airamowitu mojoro? taeyama. 34 Jesú riboto ribane: Iji wite jiaobojona isia ribiara o raisa jieno-koae? taeyama. 35 Pilato Jesú riboto ribane: Ine Judiora? Jiwarao, saserote airamotuma tane mamojeku jiabanae. Iji katukane nonae? taeyama. 36 Takore Jesú riboto ribane: Ine raina airamo tane rujunajine. Tanaja jakore manebu orikubakuna ine Judiotuma amojeku naka-naka jamejerei. Tiarone ine ama tamatuka airamoanaine, taeyama. 37 Takore Pilato ribane: Takore iji ina airamoanara? Jesú riboto ribane: Iji ribiakutai tai ine. Ine nakane raineta naoaine nome isia rewarakitane. Nome eku abamo kokotuka maribu nokoya, taeyama. 38 Takore Pilato ribane: Nome jakutai bitu tai? taeyama. Ribaitane Pilato atanejese Judiotumeta ejobane ribane: Ta-maja anona asirajasi minajine. 39 Tiarone yatu tuata namínae tiaja ja. Mojoju jisaka Oriwaka Kwaeaba eku ejeroyaine. Ine Judiotuma airamowitu ejerokore yatu saba yakerenara? taeyama. 40 Takore atanejese tatuma kokotuka rokojotayaja ribane: Taiana. Barrabás ejeronu, taeyama. Amasike Barrabás jakutai tai biterijisa.
191 Takore Pilato Jesú konarune yeweremejereae. 2 Takore yaoromo jarujiro wekotane Jesú akwa isia inakasinae. Jiaka jebuanerajasi isia Jesú arai simaranae. 3 Tane Jesú isia ribane: Iji Judio airamowitu. Yakerara iji! taeyama. Tane ribaitane amojo isia nabaubuae. 4 Takore atanejese Pilato ejobane ribane: Taisi anona asirajasi minajine. Yatu taisi naminamejerei atanejese yatuata iejobo-yaine, taeyama. 5 Takore Jesú ejobonae jarujiro isiko, jiaka jebuanerajasi isiko tane. Ejobakore Pilato ribane: Niborama mikotu! taeyama. 6 Takore saserote airamotuma, yaoromo airamotuma tane mitane rokojotayaja ribubune: Esijarimejere! Esijarimejere! tau-buae. Pilato ribane: Taisi anona asirajasi minajine. Tiarone yatu taisi konarune esijarikotu, taeyama. 7 Takore Judiotuma riboto ribane: Oko kakajotabu ja. Taisi eku anona amoara wabakitane, Dio Auka tane oritoanaetiji, taeyama. 8 Takore Pilato tamaja ribu nokoitane, kwarika retaeyama. 9 Atanejese ribu nome atoanoko eku yarune Pilato Jesú renokoae: Iji kasabamo? taeyama. Jesú taisi riboto ribunatanae. 10 Takore Pilato ribane: Maisia ribunajara? Ine ribu jaine jiesijarimejerekitane. Ribu jaine jiejerokitane tane. Iji taisi nami-nanajara? taeyama. 11 Jesú taisi riboto ribane: Kwaimo ribu jimoanaja jakore, mariboto ribu ekirakuna. Tiame nona asiraja nonae iji. Tiarone jimojeku mabayakutai taisi anona asirajawitu. 12 Takore tatukamo Pilato taisi ejerokitane obonobuae. Takore Judiotuma rokojotayaja ribane: Iji tamajasi ejerokore, iji César amuaraisayana. Airamo tane oritoayakutai tai César riboto, taeyama. 13 Takore Pilato tamaja ribu nokone, Jesú yakareku konarune ribu nome atoanoko arujunoko arai rujunae. Nome atoanoko waraoto aribu isia ribia: Borojoro Joyonona, tia. Ebereo aribu isia ribia: Gabata, tia. 14 Tai ya kwaeaba aya ebe. Ya kwai monuka takore Pilato Judiotuma isia ribane: Yatu airamowitu mikotu, taeyama. 15 Takore tatuma rokojotayaja ribane: Emo jakunarai, emo jakunarai! Esijarimejere! taeyama. Pilato ribane: Yatu Airamo-witu esijarite mojoro? taeyama. Takore saserote airamotuma ri-bane: Kairamowitu jisakawitu ja. Tai César, taeyama. 16 Takore Pilato Jesú tatuma amojeku abanae esijarimejerei. Abakore tatuma Jesú oane konaruae. 17 Takore Jesú akuru konariaja jota Kwamujuina sabasaba ejobonae. Jota awai ebereo aribu isia ribia Golgota. 18 Tata esijariae. Taisi awere eobo manamo esijariae. Jabisaba jisaka, jabisaba jisaka tane. Jesú autu bajinae. 19 Takore Pilato karata jabatane kuru isia abamejereae. Ajabata ribunae: TAMAJA JESÚ NAZARET AROTU. TAMAJA JUDIOTUMA AIRAMOWITU, taeyama. 20 Takore Judiotuma eraja jabata teribubuae, Jesú esijarinoko janokoina aweretiji. Jabata ribu rijanamo isia jabatae, ebereo aribu isia, Grecia araoto aribu isia, Roma araoto aribu isia tane. 21 Ju-diotuma saserote airamotuma tane Pilato isia ribane: Tamaja Judio Airamowitu tane jabatanaka. Ribu tametane jabatau: Tai ribane: Ine Judio Airamowitu, tane jabatau, taeyama. 22 Takore Pilato riboto ribane: Ine jabatajakutai are jabataja rijana. 23 Takore yaoromo Jesú esijarene ajiaka jiwarane, yaoromo manamonamojase jisaka jisaka jiaka akari akari orisaba nisanae. Tiarone ajiaka noikaya aba jakutai akose ekiraja nónae tiaja jaja. 24 Takore taisi isia tatuma ribane: Yawananaka jaki. Kotubuki. Sina jiaka kanatate? taeyama. Tametane nonae Jabataja aribu eku nakamejerei. Ribia: Majiaka jisaka jisaka orimoaubuae. Majiaka araisa kanatakitane kotubuae, tia. (Rok. 22:18) Tiame yaoromotuma tametane nonae. 25 Takore Jesú akuru awere arani jaja, arajisi isiko. Maria Cleofas atira, Maria Magdala arotu isiko tane jaja. 26 Takore Jesú aranima miae. Aneburatu obonoyakutai taisi awere karamúnae tiakore miae. Mitane, aranima isia ribane: Tira, jiaukama mi! taeyama. 27 Taitane aneburatu isia ribane: Jiranima mi! taeyama. Tai sinarijayatukamo aneburatu jakutai tirasi konaruae oriajanoko-ata. 28 Tatukamo kokotuka riwaranae tane Jesú naminae. Tiame Jabataja eku nakamejerei ribane: Jobiajeraine, taeyama. 29 Bino ajíae tiajasi anamu jaja. Jarajara tiakutaisi ejurane, isoboru akari esekujane arokoata ejinae. 30 Takore bino ajíae tiakutaisi jobene Jesú ribane: Riwaranae rijana, taeyama. Ribaitane akwa ronamakane oriaobojona Oriarimasi amojeku abanae. 31 Tai ya jakutai ya tuwara esewiriakutaisi ebisabuka. Ya tuwara ebisabuka ya tuwara saba iyakarataya. Tai ya tuwara jakutai tai ya uriraja. Ya tuwara eku tejo kuru isia bajemejerenatanajame Judiotuma naone Pilato ebuae niboto aka nakarine, atejo kuru isimo konarumejerei. 32 Takore yaoromo narune, awajiabara aka sikarinae. Araisarakate Jesú isiko esijarínae tiakutai, taisi akarakate sikarinae. 33 Tiarone Jesú tata nabakane amena wábae tane miajame aka sikarinatanae. 34 Tiarone yaorotu jisaka Jesú ajajaruka natinae raborabaka isia. Takore rijana jotu, jo tane ejobonae. 35 Ine tamaja karata jabatayakutai kwaeabakore miaine. Nome jabatayaine. Maribu nome tane naminayaine yaturakate nome abamejerei. 36 Tametane kwaeabanae Jabatajasi eku nakamejerei. Jabataja taisi isia ribia: Amuju jisakarakate karinatate, tia. (Ejo. 12:46 Sin. 9:12 Rok. 34:20) 37 Atae Jabataja taisi isia ribia: Anatemojase natinajakutaisi mite, tia. (Zac. 12:10) 38 Takore José janokoina Arimatea arotu jakutai Pilato ebuaeyama Jesú atejo konarukitane. Takore Pilato konarumejerei kajotabuaeyama. Kajotabukore atejo konaruae. José jakutai tai Jesú aneburatu. Tiarone Ine Jesú aneburatu tane yaorane ribunatanae Judiotuma nojayame. 39 Nicodemorakate naone, jo-naba konae. Jonaba awai mira, aroe tane. Auru kintare jisaka monuka. Nicodemo imaya ateje Jesú tata naruajakutai, tai. 40 Tatuma Jesú atejo nisane, jiaka arino ajaunona jakutaisi isia yejimarae jonaba isiko. Tametane Judiotuma tuata namínae tiaja ja joitakitane. 41 Jesú esijariajakutaisi awere rajikaba ja. Raji-kaba eku joitanoko jiro ja. Taisi eku mate joitamoana. 42 Tai ya jakutai ya tuwara esewiriakutaisi ebisabuka jaja. Ya tuwara ebi-sabuka Judiotuma ya tuwara saba iyakarataya. Tiame joitanoko jakutai Jesú esijariajakutaisi aweretiji Jesú atejo taisi eku abanaeyama.
201 Takore misa aya awajiabara eku Maria Magdala arotu jakutai joitanoko tata naruaeyama. Jokoyakore naruae. Tata nabakakore joyoira joitanoko akwamukoro jakutai emo abánae takore miaeyama. 2 Mitane jakane Simón Pedro tata nabakanae, Jesú aneburatu raisametarakate tane. Aneburatu Jesú obonoyakutai, tai. Tira tatuma isia ribane: Airamo joitanoko ekumo konarubuajae. Kasaba abánae tai tane naminanajaoko, taeyama. 3 Pedro, aneburatu araisa tane ejobane joitanoko tata naruae. 4 Reko tata kurujubuae. Tiarone aneburatu araisa Pedro kwa-rikane, wajiabara joitanokoata nabakanae. 5 Eku mikitane wiya-jene ajiaka abánae takore miae. Tiarone eku yarunatanae. 6 Takore taisi nokabuka Simón Pedro nabakane, joitanoko eku yarune, jiaka arino ajaunona jakutaisi emo abánae takore miae. 7 Akwa-motu, Jesú akwa isia jaja jakutai, tai jiaka raisama isikoana. Tiarone are ekobótae tiaja jaja. 8 Aneburatu araisa, wajiabara joitanokoata nabakanajakutai, tairakate yarune, mine tane, nome abanae. 9 Tatuma mate jabatajasi aribu nokonatanae. Jabataja taisi isia ribia: Jesú wabarone nominakitane ja, tia. 10 Joitanoko mijio taitane anebu awaraotoata bajinae. 11 Tiarone Maria joitanoko ayakareku onayaja bajinaeyama. Onayaja wiyajinae joitanoko eku mikitane. 12 Tane Dio ainataba manamo miaeyama. Ajiaka jokeraja jajayama. Jesú atejo abánae tiakutaisiata norujúae tiaja. Jisaka Jesú akwa abanajakutaisi tajasaba rujúnae tiaja. Araisa Jesú aka tajasaba rujúnae tiaja jakore miaeyama. 13 Takore tatuma ribane: Tira, katukeme onaya bajama? taeyama. Tira ribane: Airamo konaruae. Kasaba abanae tai tane naminanajine. Tiame onayaine, taeyama. 14 Tai ribaitane, oribarene tatuka Jesú karamúnae tiakore miaeyama. Tai Jesú tane naminanatanaeyama. 15 Jesú ribane: Tira, katukeme onaya bajama? Sinama najabia? taeyama. Tira Jesú rajikabatu tanabae. Ribane: Mairamo, iji konarune, kasaba konaruae tai tane menoko. Ine atejo konarutine, taeyama. 16 Takore Jesú ribane: Maria, taeyama. Tira oribarene ribane: Raboni! taeyama. Waraoto aribu isia ribia Mainaminatu! 17 Jesú ribane: Matorinaka, ine mate Rimasiata yaburunaja jame. Mawaraotoata narune, ribanu: Jesú ribane: Marimasiata yatu Arimasiata tane yaburiaine, taeyama. Marioata, yatu Arioata tane yaburiaine, tae, tau, taeyama. 18 Takore Maria Magdala arotu jakutai naruae Jesú anebu enokokitane. Airamo miaine, tane rewarae. Airamo ribunaja-kutaisi rewaraeyama. 19 Takore tai ya misa aya awajiabara. Tai ya eku anayakore Jesú anebu orikware nakae. Namu akojo emukoronae tatuma Judiotuma nojayame. Takore Jesú are yarune autu karamane ribane: Inareraja bajekotu, taeyama. 20 Ribaitane oriamojo, oriajajaruka tane emiae. Takore anebu Airamo mitane ekeiraja bajinae. 21 Takore atanejese Jesú ribane: Inareraja bajekotu. Marima mainatabae. Taisi monuka yatu inatabayaine, taeyama. 22 Ribaitane arai yatemoine ribane: Dio Amejokojira Yake-rajawitu nojokotu. 23 Yatu obojona asirajasi berekore, beréae tiaja bajia. Obojona asirajasi berenaja jakore berenaka bajia, taeyama. 24 Tane Jesú nabakakore Tomás tata ekira. Tomás jakutai Jesú anebu mojoreko kware manamo kawanamo jisaka. Awai raisa Koromo. 25 Jesú anebu eobo taisi saba rewarae: Airamo miaeko. Tai ribane: Amojo eku kurabo anoko minaja jakore, mamojo kurabo anoko eku abanaja jakore, ajajaruka raborabaka anoko eku mamojo abanaja jakore tane, nome abanajine, taeyama. 26 Tatukamo misa jisaka ru takore anebu atanejese orikware nakae. Tomás tatuma isiko jaja. Namu akojo mukorónae takore-jone Jesú yarune autu karamunae. Ribane: Inareraja bajekotu, taeyama. 27 Tane Tomás isia ribane: Jimojo isia torene, mamojo mi. Jimojo ejane majajaruka eku abanu. Jiaobojona emo emo bajinaka. Nome abanu, taeyama. 28 Takore Tomás riboto ribane: Iji Mairamo rijana! Iji Mario rijana! 29 Jesú ribane: Tomás, iji mamiajame nome abanae. Mami-naka nome abayakutai tatuma ekeiraja bajete. 30 Jesú sinarija atae eraja nonae, anebu amujaba. Tatuma isia tamaja karata eku jabatanajine. 31 Tiarone tamajasi jabataine yatu Jesú jakutai tai Akirito tane nome abamejerei. Jabataine yatu Jesú jakutai tai Dio Auka tane nome abamejerei. Nome abaitane taisi aribia obojona jiro jamejerei jabataine.
211 Nokabuka Jesú atanejese anebu oriemusabae aotanaira Tiberias ajomukuata. Tametane oriemusabae. 2 Anebu kawanamo orikware nakae. Simón Pedro, Tomás Koromo tiakutai tane. Atae Natanael janokoina Caná ina Galilea arotu jakutai. Atae Zebedeo anobotomo. Atae anebu manamo tane. 3 Takore Simón Pedro ribane: Yabakitane nariaine, taeyama. Eobo ribane: Okorakate jiisiko narute, taeyama. Takore narune, waeku nabakae. Tane jomakaba yabayaja are ekiraja ima jokonae. 4 Ta-kore jokoyakore Jesú jomukuata karamúnae takore miae. Tiarone anebu tai Jesú tane naminanatanae. 5 Jesú ribane: Nebu, najoro ja mojoro? taeyama. Riboto ribunae: Ekira, taeyama. 6 Jesú ribane: Noba mojonome tajasabaya toane mite, tae-yama. Takore toane, noba eku jomakaba erajawitu nakajame nisakomoni ejobonae. 7 Takore aneburatu Jesú obonoyakutai Pedro isia ribane: Tai Airamo! taeyama. Takore Pedro Tai Airamo tane nokone, akamisa ekiraja rujúnae tiaja jame akamisa orisabane joni nakae. 8 Nebu eobo wajibaka konae, anoba kobu iyoyaja. Mumi majakitane aito jaraboka siento manamo. 9 Wajaka nabakane jekunu akunu miae. Arai jomakaba, bãu tane jaja. 10 Jesú ribane: Ama jomakaba yatu yabajakutaisi kawanamo konakotu, taeyama. 11 Takore Simón Pedro waeku nabakane noba wajaka konabakanae. Noba jakutai kobu jomakaba uriraubiajasi isiko. Asebe siento jisaka kware siento asibi kware rijanamo. Jomakaba erajarone noba asatanatanae. 12 Jesú ribane: Naone najorokotu. Anebu jisakarakate Iji sina tai tane renokonatanae. Tai Airamo tane naminajame renokonatanae. 13 Takore Jesú naone, bãu nisane tatuma moae. Jomakabarakate nisane moae. 14 Jesú wabarone nominane anebu isia oriemusabae. Ebe manata. Ama atae jisata oriemusabae. 15 Takore najoroitane Jesú Simón Pedro isia ribane: Simón, Jonás auka, iji tamatuma kwarika maobonoyara? taeyama. Tai ribane: Mairamo, ine jiobonoyaine. Ine jiobonoyakutai iji taisi naminaya, taeyama. Jesú ribane: Maobeja aukamo iau. 16 Jesú atanejese ribane: Simón, Jonás auka, maobonoyara? taeyama. Pedro ribane: Mairamo, ine jiobonoyaine. Ine jiobono-yakutai iji taisi naminaya, taeyama. Jesú ribane: Maobejatuma yaoro, taeyama. 17 Atanejese ribane: Simón, Jonás auka, maobo-noyara? taeyama. Takore Pedro ekumoniraja bajinae rijanamo tane maobonoyara tane ribunajame. Tane Pedro ribane: Mairamo, iji kokotuka naminaya. Ine jiobonoyakutai iji taisi naminaya. Jesú ribane: Maobejatuma iau. 18 Nomewitu, nome-witu jiisia ribiaine: Iji neburatu jaja wite jiaka orisabane obonoyakutaisiata naruae. Ama iramo jaja jimojo ejakore raisa jiaka jieorisabane, iji obononaja jakutaisiata jikonarute, taine, taeyama. 19 Tametane ribiaja Pedro awaba isia rewarae. Awaba katukayaja jate tai tane rewarae. Awaba isia Dio airamo tane abate tane rewarae. Tatukamo ribane: Maiamo nao, taeyama. 20 Takore Pedro oribarene, aneburatu Jesú obonoyakutaisi miae. Ebe najoroyakore Jesú ajajaruka yajinajakutai, tai. Tai renokoae: Mairamo, jiwabitu sina tai? taeyama. 21 Takore Pedro taisi mine, Jesú isia ribane: Mairamo, tamaja katukate? taeyama. 22 Jesú ribane: Ine naoyaja tai mate jamejerekore, iji katukate? Iji maiamo nao, taeyama. 23 Tamaja ribu nome abamo kawanaya rewarae. Ribane: Tai aneburatu jakutai wabanatate, taeyama. Tiarone Jesú Tai wabanatate tanatanae. Emo ribunae: Ine naoyaja tai mate jamejerekore, iji katukate? tane ribunae. 24 Tai aneburatu jakutai, tai tamaja ribu arewaratu, ajabatatu tane. Arewara nomeraja tane naminayaoko. 25 Takore Jesú anona atae eraja nonae. Jisaka jisaka jabatakore akarata raina eku kaikanaja jakuna tanabayaine. Amén.