SANTIAGO

SANTIAGO

¹ Ine Santiago, Dio aneburatu, Airamo Jesukirito aneburatu tane. Israeltuma awaraosebeira mojoreko kware manamo raina kokotukanea kayanajakutaisi isia yakeraubiara abayaine. ² Mawarao, kokotukanea yatu ayakara mijakore yatu ekeiraja ejobakitane ja. ³ Yatu nome abane yatu ayakara mijakore Dio yatu taeratamejerea. Yatu taisi naminaya. ⁴ Dio yatu taeratamejerea yatu taeraja ejobamejerei, ekirajenaka, kaikawitu, yakerajawitu tane ejobamejerei. ⁵ Yatu kawanamo musaberena jakutai Dio ebute musaberaja tane abamejerei. Dio ebukore kware abanaka yaorane moaya. ⁶ Tiarone Dio ebiaja nome abakitane ja. Nome abanaka bajinaka jakitane ja. Nome abanaka bajiakutai tai nojaba ai monuka. Nojaba ajaka ebe yeneru yeneriakutaisi monuka. ⁷ Warao yeneru yeneriakutai ribunaka jakunarai: Ine Airamo isimo nojotine, tanaka jakunarai. ⁸ Warao aobojona eraja jakutai taisi anona taerena ejoboya. ⁹ Nome abatu saneraja jakutai ribakunarai: Dio airamo tane mabanajame yakera, takunarai. ¹⁰ Sanerena jakutai ribakunarai: Dio eobo yajoto mabanajame yakera, takunarai. Sanerena jakutai jaka atokoyo monuka nakate jame tane ribakunarai. ¹¹ Ya ejobane jokoji ajeraja jakore jaka nawajane atokoyo nakaya. Nakane ayakara ekorea. Taisi monuka burata arotu jakutai anona isiko nakate. ¹² Waraoto ayakara mikore taeratane ekeiraja bajete. Ayakara mikore yakeraja ejobakore Dio taisi amoara moate. Amoara jakutai are ubakitane. Dio ribu moae: Warao maobonoyakutai amoara tane moatine are ubamejerei, tae. ¹³ Raisa iji asiraja nonamejereakore ribunaka jau: Dio ine asiraja nonamejerea, tanaka jau. Raisa Dio asiraja nonamejerekomoni. Taisi monuka Dio raisa asiraja nonamejerenaja. ¹⁴ Tiarone warao wite oria-obojona asirajasi eku oriyejebune, oriojiyabane tane asiraja nonaya. ¹⁵ Asiraja obonokore tira kwabu monuka. Auka nakajakutai tai obojona asiraja. Obojona asiraja iramotane anobotomo jakutai waba. ¹⁶ Mawarao ine obonoyakutai, raisa yatu imasibuterate. ¹⁷ Oko yakeraja nojoyakutai kokotuka, kaikawitu nojoyakutai kokotuka tane taisike kwaimo. Tai Dio isimo. Abije kwai jakutaisi anonatu tai Dio. Diosike kambiatanaka are ja. Dio jakutai imajana kambiatayakutaisi monuka kambiatanaja. ¹⁸ Dio oriaobojona eku abayaja ribu nomerajasi isia oko rijawaramejereae. Dio oko rijawaramejereae oko Dio anona kawanamo akwaja awajiabara tane ejobamejerei. ¹⁹ Tiame mawarao ine obonoyakutai, rubujira nokokotu. Tia-rone uria uria ribakotu. Uria uria orijisikotu. ²⁰ Warao orijisikore Dio anona nomeraja jakutaisi eku nonanaja. ²¹ Tametane nonakotu: Kokotuka anana jakutaisi iabakotu. Asiraja koko-tukanea jaja jakutaisi iabakotu. Taisi iabane ribu yatu aobojona eku namuajakutai taisi raoberaja oakotu. Tai ribu yakera yatu aobojona ibajukakitane. ²² Ribu eku abakotu. Ribu nokoyajawituana jakotu. Nokoya-jawitu jakore oriimasibia. ²³ Ribu nokone tiarone eku abanaja jakutai tai warao jisaka monuka. Warao jakutai musebuji eku mijaja oriamu mija. ²⁴ Mitane emo narune tane amu katukayaja ja tai tane emonia. ²⁵ Tiarone warao raisa kajotabu kaikawitu jakutaisi eku mija. Kajotabu jakutai kejeroya. Warao jakutai ribu nokone emoninaka yaorane eku nonaya. Tai are ribu eku nonayaja ekeiraja bajete. ²⁶ Yatu kawanamo warao jisaka ribate tai. Ine yaorane Dio yatomaneteaine, tate tai. Tane ribiarone ajono etuwaranaja ja-kore oriimasibia. Dio yatomanetearone amoara ekira. ²⁷ Yake-raja anana ekiraja tane yatomaneteakutai tai Dio Karima saba yakera. Dio saba yakeraja anana ekiraja tane jakutai tai tamaja: Raoana o tatu tewere sanamatayakore tatuma sanetakitane. Raina aobojona isia anana ijabanaka jakitane tane.

¹ Mawarao, yatu Kairamo Jesukirito yakerajawitu isia nome abaya. Nome abayaja warao jisaka raisama kwarika tanaba-naka jakotu. ² Waraoto anona sitatine. Yatu orikware nakakore warao jisaka nabakate. Amojosekuju burata simonona jaja. Ajiaka yakeraja jaja. Warao raisarakate naoya. Taisike saneraja ajiaka nobo jaja. ³ Yatu jiaka yakeraja ja jakutaisi isia ribate tai: Rujunoko yakerajasi arai rujanu, tate tai. Tiarone saneraja isia ribate tai: Tata karamanu, o marujunoko awere joika rujanu, tate tai. ⁴ Yatu tane nonakore warao jisaka raisama kwarika tanabaya. Yatu aobonobu asirajarone eobo aribu nome atoamo tane oriabaya. ⁵ Mawarao ine yatu obonoya. Tamaja ribu nokokotu. Dio ta-maja raina arao saneraubiajasi mibune nisanae. Tatuma nisanae tatuma nome abayaja aobojona isia sanerena monuka bajeme-jerei. Warao Dio obonoyakutai Dio ribu taisi moae arujuna ruja-mejerei. Dio saneraubiajasi nisanae tametane norujumejerei. ⁶ Tiarone yatu tanaja. Yatu saneraubiaja jakutai tomanamejerea. Sina yatu isanamataya? Sina yatu iawarai ribu nome toanokoata konaria? Burata araoanara? ⁷ Dio wai yakeraja yatu moae yatu isia ribamejerei: Tatuma Jesú isia nome abamo, tamejerei. Sina wai isia asiraja ribia? Burata araoanara? ⁸ Jabataja eku kajotabu eobo kwarika ja. Tai tamaja: Iji wite oriobonoyakutai taisi monuka jiraisama obonote. (Lev. 19:18) Yatu nomewitu tamaja ribu eku nonane yakeraja nonaya. ⁹ Tia-rone yatu warao jisaka raisama kwarika tanabane asiraja nonaya. Kajotabu akarata ribate: Yatu Dio aribu riboto nonaya, tate. ¹⁰ Wa-rao jisaka kajotabu aribu kokotuka eku abate. Tiarone ribu jisakawitu eku abanaja. Ribu jisakarone kajotabu kokotuka taisi kware abate. ¹¹ Dio ribane: Tatusebe tanaka jau, tae. (Ejo. 20:14 Kaj. 5:18) Diojase ribane: Nanaka jau, tae. (Ejo. 20:13 Kaj. 5:17) Warao tatusebeanarone raisama nate tai. Nakore Dio aribu riboto nonaya. ¹² Kajotabu ja. Taisike kejerote. Kajotabu kaika karibu nome toate jame yakeraja ribakotu yakeraja nonakotu tane. ¹³ Eobo isia akobe ajerena jakutai Dio taisi isia akobe ajerena jate. Akobe ajerayanaka aribu nome toate. Eobo isia akobe ajeraja jakutai taisi aribu nome toakore yakeraja ejobate. ¹⁴ Mawarao, warao jisaka anona yakeraja ekirarone ribate tai: Ine nome abaya, tate tai. Tane ribakore amoara ja mojoro? Nome abayajawitu aobojona bajukatera bajama? ¹⁵ Nome abatu nibora o tira ajiaka ekirate tai. O anajoro ekirate tai. ¹⁶ Ekirakore yatu kawanamo jisaka ribate tai: Inareraja naru. Ijiraja bajenu. Jajinánae tiaja bajenu, tate tai. Tiarone atejo isia ekirakutaisi moanaja jakore katukane yakeraja ejobate bajama? ¹⁷ Taisi monukajase nome abakitane jakutai. Nome abaitane ribu eku nonakitane ja. Tanaja jakore waraoto anome aba are waba bajia. ¹⁸ Tiarone warao jisaka ribate tai: Iji nome abaya tiarone ine yakeraja nonaya, tate tai. Iji yakeraja nonanaka nome abayakutai taisi memusabau. Inesike yakeraja nonayaja ine nome abayakutai taisi jiemusabatine. ¹⁹ Iji Dio jisakawitu ja tane yajorabaya. Tane yakera. Tiarone jeburakate Dio jisakawitu ja tane yajorabane nojane tane tororoya. ²⁰ Ijisike jiaobonobu amoara ekira. Warao yakeraja nonanaja jakutai anome aba waba bajia. Iji taisi naminanaja mojoro? ²¹ Kanobo Abraham jakutai auka Isaac jakutaisi Dio moae romu nae tiakutaisi monuka. Abraham anona aobojona Dio Abraham aobojona enometae. ²² Naminau rijana. Abraham nome abanajame yakeraja nonae. Yakeraja nonajame nome abatu kaikawitu ejobonae. ²³ Tame-tane Jabataja aribu eku nakae. Ribia: Abraham Dio isia nome abanae. Abraham nome abakore Dio taisi aobojona nomeraja tane abanae, tia. (Awa. 15:6) Tiame Abraham isia ribu ja: Abraham jakutai tai Dio amusaba. ²⁴ Warao nome abane yakeraja nonakore Dio waraoto aobo-jona enometaya. Nome abakitanewituana. Yatu taisi naminaya. ²⁵ Ateje nibosebe Rahab jakutai tamaja ribu eku ejobonae. Rahab oriajanokeku ainatabatuma etuwarane jojisi raisama ekia narumejerei sanetae. Rahab anona aobojona Dio Rahab aobojona enometae. ²⁶ Tejo eku mejokoji ekirakore waba bajia. Monu-kajase warao yakeraja nonanaja jakutai anome aba waba bajia.

¹ Mawarao, yatu kawanamo inaminamo erajawituana jakotu. Oko inaminamo jakutai karibu yaorane nome toate. Yatu taisi naminaya. ² Oko kokotuka eraja tane emo nonaya, ribia tane. Warao jisaka emo ribunakawitu jaja taisike warao kaikawitu. Atejo kokotuka etuwarakitane naminaya. ³ Oko kawayo aroko eku etuwaranoko abaya kaobojona eku abamejerei. Etuwaranoko abane atejo kokotuka inaria. ⁴ Waerarakate naminakotu. Waera jakutai uriraja. Ajaka waera yatabayakutai tairakate uriraja. Urirajarone awajukatu timona oane oriaobojona eku waera inaria. ⁵ Jono taisi monuka. Jono jakutai tejo akari sanukirajarone nona uriraja isia ribia. Miki anaka! Raina uriraja jekunu sanuka isia rokiaraji bajama! ⁶ Jono jakutai katejo eku jekunu monuka rokiaja bajia. Tai asirajawitu. Tejo anana ijabaya. Sanamatanoko ajekunuatukamo erokúnae tiajatiji waraoto aobojona erokia. ⁷ Kokotukanea raina eku jakutaisi iraobotakitane waraoto saba yakera: Raina arao, romu kwaia nijakayakutai, joboto araia anarumo, jo arao tane. Kokotuka iraobotae rijana. ⁸ Tiarone warao jisakarakate oriajono iraobotakomoni. Asiraja jame irao-botamejerenaja. Ayari isia kobu. ⁹ Jono jisaka isia ribu manamo ribia. Dio Karima jakutai tai yakeraja jae tane ribia. Tiarone warao Dio monuka nónae tiakutai kajono isia taisi yaribia. ¹⁰ Roko jisaka isia yakeraja ribia, yaribia tane. Mawarao, tane jakore asira. ¹¹ Jo ejobonoko jisaka ekumo jisaka tane jo rijaberaja jo ajeraja tane ejoboya mojoro? Ejobonaja. ¹² Ma-warao, iko arau oriwa kwajayara? O uwa arau iko kwajayara? Kwajanaja. Tiame jo ejobonoko ekumo jisaka tane jo rijaberaja jo ajeraja tane ejobakomoni. ¹³ Yatu kawanaya naminatu musaberaja jakutai sina tai? Musa-beraja jame eobo yajoto tane oriabakunarai. Anona yakerajasi isia musaberaja jakutaisi eobo emikunarai. ¹⁴ Yatu raisama kwana temiajine o oriaobojona eku abakitane obonone oko musaberaja tane ribunaka jakotu. Tane ribakore tona ejobakuna. Nome jakutaisi ekuana ejobakuna. ¹⁵ Dio tametane musaberaja tane abanaja. Raina isimo musaberaja bajekitane jakutai tai raisa. Tai raina aobojona ekumo, jebuira isimo tane. ¹⁶ Miajitoma jaja o wite oriaobojona eku abakitane obonoyaja wiyawiyaya. Asiraja kokotukanea nonaubia. ¹⁷ Dio musaberaja tane abakore anana ekira. Inareraja, rao-beraja, raisama aribu nokoya tane. Eobo taisi saba sanera. Yake-raja nonaya. Jisaka raisama kwarika abanaja. Aobojona manamo jaja ekira. ¹⁸ Inareraja bajekitane obonoyakutai inareraja jakutaisi namia. Anamuna akwaja jakutai obojona nomeraja.

¹ Yatu orikubaya. Oriaribu kwarikaya. Katukeme bajama? Yatu oriwakawitu obonoyame yatu eku orikubaya. Tiame yaka-reku orikubaya. ² Yatu kwana obonoyarone mikomoni. Miko-moni jame kubaya. Raisama aunukamo obonoyarone nisako-moni. Nisakomoni jame oriaribu kwarikaya orikubaya tane. Yatu Dio ebunaja jame, yatu obonoyakutai ekira. ³ Ebune asiraja ebuajame nojonaja. Yatu aoriwaka isia webotakitane ebuajame nojonaja. ⁴ Yatu Dio aribu iabayaraji bajama! Raina amuaraisatakitane obonoyakutai tai Dio isiko asiraja ejoboya. Yatu taisi namina-najara? Raina amuaraisatayakutai tai Dio isiko asiraja ejoboya. ⁵ Jabataja taisi isia ribia: Mejokojira Dio keku abanajakutai kakware miajitayaja kwana kaobonoya, tia. Jabataja tane ribiarone, iji tai ribu amoara ekira tia bajama? (Zac. 8:2) ⁶ Dio oriaobojona ayakara kamoayakutai eobo kwarikaya. Jaba-taja ribia: Eobo kwarika tane oriabayakutai Dio tatuma riboto ejo-boya. Eobo yajoto tane oriabayakutai Dio oriaobojona ayakara tatuma moaya. (Rei. 3:34) ⁷ Yatu aobojona iabane Dio aobojona eku abakotu. Yatu jebuira tainakore yatu ebikamo jakane narute. ⁸ Dio awere nabakakotu. Awere nabakakore Dio yatu awere nabakate. Yatu asiraja anonamo, yatu amojo berekotu. Yatu aobojona eraja jakutai, yatu aobojona berekotu. ⁹ Ekumoniraja jakotu. Onakotu. Yaonakotu. Eno iabane yaonakotu. Ekei iabane ekumoniraja jakotu. ¹⁰ Airamo amujaba eobo yajoto tane oriabakotu. Tane oriabakore Dio yatu airamo tane abate. ¹¹ Mawarao, oriisia asiraja ribunaka jakotu. Ajisaka isia asiraja ribane aribu nome toayakutai kajotabu isia asiraja ribane nome toaya. Iji kajotabu nome toane kajotabu eku abatuana tane ejoboya. Rijana kajotabu aribu nome atoatu tane ejoboya. ¹² Tiarone jisakawitu kajotabu abanae. Taijase ribu nome atoatu. Taijase ribu ja obojona ibajukakitane o obojona iekorakitane. Amasike iji raisama aribu nome toayakutai iji sina tai? ¹³ Yatu kawanamo ribane: Ama o jake tamaja janokoina tata narune inawaja jisaka jateko. Wabinoko abane burata nojoteko, tia. Yatu tane ribiakutai, maribu nokokotu. ¹⁴ Yatu jake kwaeabakitane jakutaisi naminanaka tane ribia. Yatu katukane ubaubia? Koje monuka sanuka ja tiarone rubujira eko tia. ¹⁵ Yatu tametane ribakuna: Airamo tane obonokore oko mate riko jaja tametane nonateko, takuna. ¹⁶ Tiarone yatu oriaobojona eku abane kaobojona, tia. Nona kokotuka tane jakutai asira. ¹⁷ Ya-keraja nonanaminayarone tiarone taisi eku nonanaja jakutai, taisi saba nona asiraja.

¹ Miki anaka, burata arao. Yatu sanamatakitane jakutai taisi aobojona onayaja rokojotakotu. ² Yatu aburata amena jujujuae rijana. Yatu ajiaka amena yawánae tiaja bajia. ³ Yatu aburata simo, yatu aburata joko tane amena mujo. Amujo jakutai yatu riboto ribate. Jekunu monuka yatu atejo najorote. Ama ya jakutai ya ayajurone burata uriraja orabanae. ⁴ Yatu anamuna arimo imasibune amoara abanatanae. Amoara rokojotaya. Arimo yatu riboto ribakore Najamutu Ayaoromo Airamo jakutai arimo aribu nokoae. ⁵ Yatu raina eku yakeraja oriwakayaja tane ubae. Baka iraurayakutaisi monuka yatu oriirauranae. Asinarija eku nakae rijana yatu kubakitane. ⁶ Yatu nome anonatu sanamata-mejerene naubuae. Tai yatu ribotonatanae. ⁷ Tiame, mawarao, Airamo mate naomoana jakore taeratakotu. Rajikabatu jakutai anamuna yawakayaja taerataya. Joira awajiabara naja eboya. Joira ayajuata naja eboya. Ebomejerei yawakaya. ⁸ Airamo anao kawere jame yawakakotu. Yatu aobojona taeraja tane abakotu. ⁹ Eobo isia asiraja nabuananaka jakotu yatu aribu nome toanaka jamejerei. Ribu nome Atoatuwitu anao kawere rijana. ¹⁰ Mawarao, Airamo kware are-waramo Airamo aribia rewarayaja sanamatane taeratanae. Tatuma sitakotu. ¹¹ Miki anaka. Sanamatane taeratayakutai tatuma ekei-raja tane ribiaoko. Job jakutai taeratanae. Yatu taisia nokoae. Job asanamata ayajuata Airamo Job sanetajakutai yatu taisi naminae. Oko Airamo saba sanerajawitu jame akobe kaisia ajera. ¹² Ribu eobo kwarika ribatine. Mawarao, ribu nome riba-kitane raisama awai waranaka jakotu. Ribane: Najamutu arotu maribu nome jakutaisi naminaya, tanaka jakotu. O raina arotu maribu nome jakutaisi naminaya, tanaka jakotu. Warao raisama awai warayaja maribu nome tane ribunaka jakotu. Nome, tane ribakore nomewitu jakunarai. Ekira, tane ribakore ekirawitu jakunarai. Tanaja jakore Dio yatu aribu nome toate. ¹³ Yatu kawanamo sanamatayakutai kwai ribakunarai. Ekei-raja jakutai rokotu warayaja Dio yakeraja jae tane warakunarai. ¹⁴ Wabayakutai ikeresia airamotuma yejebukunarai. Tatuma naone, kware kwai ribane Airamo awai warayaja toi isia ejoku-narai. ¹⁵ Nome abayaja kwai ribakore wabayakutai bajukate. Airamo taisi ikaramate. Aobojona asiraja jakore taisi kware abanaka berete. ¹⁶ Yatu Dio aribu riboto nonajakutai taisi ori-saba nowarakotu. Orikware kwai ribakotu Dio yatu ibajuka-mejerei. Yakeraja anonatu yaorane kwai ribiakore aribu taeraja ejoboya. ¹⁷ Elias jakutai kamonuka warao. Tiarone kwai ribiaja naja ebonaka jamejerei ebuae. Ebukore joira rijanamo kware autia naja raina araia ebonatanae. ¹⁸ Tatukamo atanejese ebuae. Ebu-kore naja eboae. Raina akwaja ejobonae. ¹⁹ Mawarao, yatu kawanamo jisaka nome iabane mumoni narute tai. Raisa taisi najabune ibajekore yakeraja nonate. ²⁰ Emo anarutu ajojisi asiraja ekumo ibajekore aibajetu aobojona emo anarutu wabanaka bajete. Aobojona asiraja eraja beréae tiaja bajete.