EBEREO

EBEREO

¹ Dio ateje kware arewaramo inatabae. Kanobotuma saba rewaramejerei eraja tane inatabae. Dio eraja tane inataba-yakutaisi kaika rewaramo jakutai nona raisa raisa nonayaja rewarae. ² Tiarone ama ya eku Dio Aukama inatabane kasaba rewarae. Dio Aukama isia sinarijatuma nonae. Auka jakutai kokotuka anojotu tane ejobonae. ³ Dio ajokoma jakutai tai Auka. Dio ja jakutai Auka jakutai tane orimonukawitu. Auka aribu taerajasi isia kokotuka jamejerea. Kaobojona asirajasi berene najamutuata Dio taerajasi amojonome tajasaba rujunae. ⁴ Dio Aukama amoara Dio ainatabatuma amoara kwarika ejobonae. Dio wai Aukama moae. Wai amoara inataba awai amoara kwarika. ⁵ Dio inataba isia ribunatanae: Iji Mauka. Ama Jirima taine, (Rok. 2:7) tanatanae. Inataba isia ribunatanae: Ine taisi Arima jatine. Tai Mauka jate, (2 Sam. 7:14,1 Rew. 17:13) tanatanae. ⁶ Tiarone Dio Auka awajiabara jakutai raineta konane ribane: Dio ainatabatuma kokotuka taisi yatomanetekunarai, tae. (Kaj. 32:43) ⁷ Dio inatabatuma isia ribane: Ainatabatuma ajaka monuka abanae. Akajotabutuma jekunu monuka abanae, tae. (Rok. 104:4) ⁸ Tiarone Aukama isia ribane: Dio, jirujunoko are saba jate. Iji airamo tane rujane nomeraja nonaya. ⁹ Iji nona nomeraja obonoya. Nona asiraja rarijataya. Tiame Jirio Dio jakutai, mibune jinisanae. Toi jonaberajasi isia jikwa yanajone jimusabatuma kwarika ekeiraja tane jamejerei jiabanae, tae. (Rok. 45:6-7) ¹⁰ Atae ribane: Airamo, iji wajiabara raina noika aba abanae. Jimojo isia najamutu nonae. ¹¹ Tatuma ekorate, tiarone iji are jate. Tatuma kokotuka jiaka monuka nobo tate. ¹² Iji jiaka monuka tatuma iyasikarite. Jiaka jiwarane raisama orisabayakutaisi monuka kambiatate. Tiarone iji kambiatanaka are jate. Iji wabanaka are jate, tae. (Rok. 102:25-27) ¹³ Dio inatabatuma jisakarakate isia ribunatanaewitu. Mamojonome tajasabaya rujanu. Jiisiko asiraja jakutai ine mate taisi jiomu noika abamoana jakore rujanu, tanatanae. (Rok. 110:1) ¹⁴ Inataba kokotuka jakutai mejokojituma. Tatuma Dio akajota-butuma. Dio tatuma inatabaya obojona bajukakitane jakutaisi anojomo sanetamejerei.

¹ Tiame oko nokoajakutaisi ekuwitu abakitane ja jojisi ekumo emo nabajinaka jakitane. ² Ateje Dio ainatabatuma Dio aribu rewarakore aribu eku nakae. Aribu riboto nonayaja eku abanaka asiraja nonajakutai anona kaika sanamatae. ³ Dio obojona aibajukanoko yakeraja nonae. Oko taisi eku abanaka jaja katukane sanamata akari jerote? Wajiabara Airamojase obojona ibajukakitane jakutaisi isia rewarae. Taisi aribu anokomo kasaba rewarae okorakate taisi aribu nome tane ribamejerei. ⁴ Diorakate tatuma sanetayaja sinarija, mianare, nona taeraja raisa raisa tane jakutaisi isia tatuma iamo ribunae. Dio Oriamejokojira Yakerajawitu oriaobojona eku abane obonobu raisa raisa tatuma moae. Moajakutaisi isia tatuma iamo ribunae. ⁵ Oko ribia: Dio raina nonakitia. Raina nonakitane jakutai oriainatabatuma amojeku abanatanae. ⁶ Tiarone jisaka Jabataja eku ribia: Dio, waraoto amoara katukayaja ja iji taisi isia obonobukitane? Warao tane nakajakutaisi amoara katukayaja ja iji taisi kware barekitane? ⁷ Inatabatuma yajoto sabuka tane waraoto nonae. Tiarone warao airamo raomata tane rujamejereae. Iji nonajakutai taisi airamo tane taisi abanae. ⁸ Kokotuka taisi omu noika abane tatuma airamo tamejerei ribunae, tia. (Rok. 8:5-7) Kokotuka airamo tamejereajame kokotuka taisi amojeku bajia. Tiarone mate kokotuka taisi amojekuwitu bajinae tane minajaoko. ⁹ Tiarone oko Jesú mija. Dio jakutai oriainatabatuma yajoto sabuka taisi abanae, tai sanamatane wabamejerei. Dio oriaobojona ayakara eku Jesú warao kokotuka kware wabame-jerei abanae. Jesú wabajame airamo raomata tane rujamejereae. ¹⁰ Dio orisaba kokotuka nonae. Dio anobotomo oriisiko airamo tane jamejereae. Tiame tatuma aobojona Aibajukatu Jesukirito jakutai kaikawitu ejobamejereae. Sanamatajakutaisi aobojona kaikawitu ejobonae. ¹¹ Orisaba emo abatu jakutai atae emo abánae tiakutai tane tatuma kokotuka jisaka isimo. Tiame Auka tatuma isia ribakitane Mawarao takitane, tomanerena. ¹² Jabataja taisi isia ribia: Jiisia mawaraoto saba rewaratine. Ikeresia orikware nakayakutaisi eku ine jiisia rokotu waratine, tia. (Rok. 22:22) ¹³ Atae ribia: Ine taisi isia uru tane bajiaine, tia. Atae ribia: Tamatuka nobotomo Dio mamoajakutaisi isiko jaine, tia. (Isa. 8:17-18) ¹⁴ Tejo anobotomo jakutai tejo, jotu tane. Taisi monuka Jesú waraoto atejo, ajotu tane ejobonae. Wabakitane ejobonae waba arotuma iekorakitane. Waba arotu jakutai tai jebuira. ¹⁵ Warao mate ubayaja waba nojane waba anebu tane are bajinae. Tiame Jesú wabae waba anebu ejerokitane. ¹⁶ Nomewitu Jesú Dio ainatabatuma sanetanaja. Tiarone Abraham awaraoto sanetaya. ¹⁷ Tiame awaraoto monukawitu ejobakitane ja. Tane ejobonae Dio amujaba saserote airamowitu ejobakitane. Saserote airamo Dio aribu eku abayaja tane ejobonae. Oko taisi saba saneraja ejobonae. Tai awaraoto monuka ejobonae waraoto aobojona asirajasi amoara kaikawitu abakitane. ¹⁸ Taisi ayakara mikore sanamatae. Tiame eobo ayakara mijakore tatuma sanetakitane tai naminaya.

¹ Mawarao Dio saba emo abánae tiakutai, suatana yatu saba rewaratine. Najamutuatamo Dio yatu yejebuajame Jesu-kirito isia obonobukotu. Oko yatomaneteakutai Jesukirito taisi ainataba. Taisi saba saserote airamowitu tane bajinae. ² Moisés Dio ajanoko eku Dio aribu eku nonae. Taisi monuka Jesú jakutai yejebuajakutaisi aribu eku nonae. ³ Janoko anonatu amoara anona amoara kwarika. Taisi monuka Jesú amoara Moisés amoara kwarika. ⁴ Janoko anonatu jakutai tai warao. Tiarone kokotuka ja jakutai taisi anonatu Dio. ⁵ Moisés jakutai Dio ajanoko eku kokotukanea Dio aribu eku abanae, Dio akajo-tabutiji. Moisés ayaota jakutai Dio mate ribakitane jakutaisi isia rewarakitane. ⁶ Tiarone Kirito Dio aukatiji Dio ajanoko eku Dio aribu eku abaya. Janoko jakutai tai oko. Oko yawaka jakutaisi eku ya ayajuata ekeiraja bajiaja taeratane janoko tane bajeteko. ⁷ Tiame Dio Amejokojira Yakerajawitu Jabataja eku ribia: Ama Dio aribu nokone ⁸ Yatu aobojona taeraja abanaka jakotu. Ateje eobo Dio aribu eku abanaka Dio aobojona awerea ejobonae. Jarawaja tata Dio ayakara miae. Tatuma monuka nonanaka jakotu. ⁹ Tata yatu anobotuma inawaja mojorekotuma manamo- namojase isia manona miaerone, Maribu eku abanaka mayakara miae. ¹⁰ Tiame ine tatuma isiko orijisiae. Ribane: Tatuma wite oriaobojona are mumoni naria. Majojisi naminanatanae, taine. ¹¹ Tiame orijisine ribu tatuma moaine, Oriawai warayaja ribunaine: Matuwaranoko eku yarunatate tuwarakitane, taine. (Rok. 95:7-11) ¹² Mawarao, oriyaorokotu jisakarakate aobojona asiraja tanaka jamejerei. Oriyaoronaja jakore Dio riko isia nome abanaka Dio emo narute tai. ¹³ Ama ya mate jakore, ya kokotukanea orirei-rikotu. Orireirikotu jisakarakate obojona asirajasi isia imasibúae tiaja, aobojona taeraja bajinaka jamejerei. ¹⁴ Oko wajiabaraya-tukamo eku abayakutai are taisi eku abakitane ja. Ya ayajuata oko taisi eku abayaja taeratayaja Kirito awarao tane bajeteko. ¹⁵ Jabataja tametane ribia: Ama yatu Dio aribu nokone Yatu aobojona taeraja abanaka jakotu. Ateje eobo aobojona taera abane Dio aobojona awerea ejobonae. Tatuma monuka nonanaka jakotu, tia. (Rok. 95:7-8) ¹⁶ Sinatuma Dio aribu nokoaerone aobojona awerea ejobo-nae? Moisés ina Egipto tatamo iejobonajakutai tatuma kokotuka. ¹⁷ Dio inawaja mojorekotuma manamonamojase sinama isiko orijisiae? Asiraja nonane jarawaja eku muanajakutai Dio tatuma isiko orijisiae. ¹⁸ Dio oriawai warayaja ribu moae. Dio ribu sinama moayaja ribane: Matuwaranoko eku yarunatate tuwarakitane, tae? Aribu eku abanatanajakutaisi isia ribunae. ¹⁹ Nome abanatanajame tuwaranoko eku yarukomoni. Tane mijaoko.

¹ Mate ribu kasaba ja Dio atuwaranoko eku yarukitane. Mate ribu jakore yaorane nonakitane jaoko jisakarakate eku yarunaka bajinaka jamejerei. ² Dio rewara yakerajasi tatuma saba rewarae. Monukajase kasaba rewarae. Tatuma saba rewaraerone ribu eko ejobonae, tatuma nome abanatanajame. ³ Tiarone oko ribu eku abayakutai tuwaranoko eku yaria. Dio tuwaranoko isia ribane: Ine orijisine ribu tatuma moaine. Oriawai warayaja ribunaine: Matuwaranoko eku yarunatate tuwarakitane, taine, tae. (Rok. 95:11) Tiarone raina ajiromayatukamo Dio ayaota riwaranae. ⁴ Jabataja akarata eku ya mojoabasi kware manamo isia tametane ribia: Dio ayaota riwaraitane ya mojoabasi kware manamo eku tuwarae, tia. (Awa. 2:2) ⁵ Atae ribu ja: Matuwaranoko eku yarunatate tuwarakitane, tia. (Rok. 95:11) ⁶ Mate kawanamo tuwaranoko eku yarukitane ja. Wajiabara ribu waraoto saba rewarae. Tiarone anokomo ribu eku abanatanajame tuwaranoko eku yarunatanae. ⁷ Atanejese Dio sinarija abayaja ribia. Ama ya, tia. Nokabukawitu David Dio aribu jabatae. Jabataja aribu ine ama ribunajakutai tai. Ama yatu Dio aribu nokoae. Yatu aobojona taeraja abanaka jakotu, tae. (Rok. 95:7-8) ⁸ Ateje Josué Israeltuma tuwaramejerekore Dio atanejese ya raisama isia ribunatakuna. ⁹ Amasike Dio ya mojoabasi kware manamo eku tuwaranajakutai taisi monuka Dio oriawarao tuwaramejerea. ¹⁰ Dioata yarune isiko tuwarakitane yaotanaka tuwaraya. Dio yaota riwarane tuwarayakutai taisi monuka tuwaraya. ¹¹ Tiame oko yaorane najabukitane ja tuwaranoko eku yarukitane. Tanaja jakore kawanamo ebe ribu eku abanata-najakutaisi sitate tai. ¹² Dio aribu riko ja, taeraja ja tane. Buariwari orimatana ejiróae tiakutaisi kwarika ejiróae tiaja bajia. Kobe eku jonika yaria. Obojona eku jonika yaria. Waraoto eku jonika yaria. Obonobu obojona tane nome toaya. ¹³ Dio anona jisakarakate Dio ebikamo jakane rijisakomoni. Dio karibu nome toakitane ja. Taisi saba kokotuka yakareku. ¹⁴ Saserote airamowitu jakutaisi kwarika Jesú Dio Auka jakutai saserote airamowitu ejobonae kasaba. Kakware Dioata yaruae. Tiame isia nome abayaja taeratakitane jaoko. ¹⁵ Kokotukanea kayakara mijakore taisi monuka saserote airamowitu kasaba jakutai taisi ayakara miae. Tiarone tai asiraja nonanatanae. Tiame oko joteraja jakore tai yaorane kanaminaya. ¹⁶ Dio oriaobojona ayakara kamoakitane obonoya. Tiame Dio arujuno-koata naruki kamoamejerei. Tata naruteko oko taisi saba sane-raja ejobakitane. Tata naruteko oko ekirakore tai aobojona aya-kara isia kasanetamejerei.

¹ Dio mibune saserotetuma airamowitu kokotuka waraoto kawanamo nisaya. Nisane taisi abaya waraoto kware Dio amujaba yarumejerei. Taisi abaya obojona asirajasi amoara tane nobeanaka moamejerei romu nae tiakutaisi moamejerei tane. ² Saserote airamowitu waraoto monuka joteraja jame eobo aobo-jona naminaya. Naminanaja jakutai, mumoni tane nariakutai tane taisi saba sanera. ³ Wite joteraja jame oriaobojona asirajasi amoara romu nae tiakutaisi moakitane ja warao eobo monuka. ⁴ Jisakarakate wite oriyejebunaja saserote airamowitu taki-tane. Tiarone Dio Aarón yejebuajakutaisi monuka waraoto yeje-bia saserote airamowitu tane abakitane. ⁵ Kiritorakate tanejase. Wite oriyejebunatanae saserote airamowitu takitane. Dio taisi yejebuae. Dio ribane: Iji Mauka. Ama Jirima taine, tae. (Rok. 2:7) ⁶ Atae Jabataja aribu raisa ja. Iji Melquisedec monuka Saserote ejobonae are saba, tia. (Rok. 110:4) ⁷ Kirito raina ekia jaja kwai ribunae Dio ebiaja. Kwana ribiaja onae. Dio ebuae Dio taeraja jame waba amojekumo ejeromejerei mate wabanaka jakitane. Kirito Dio nojayame Dio taisi aribu nokoae. ⁸ Kirito Dio Aukarone, asanamata aobojona ribu eku abakitane naminae. ⁹ Tametane kaikawitu ejobonae. Kaika ejo-bane obojona aibajukanoko ajotana tane bajinae. Aribu eku abamo kokotuka jakutaisi aobojona ibajukaya are bajukánae tiaja bajemejerei. ¹⁰ Dio taisi yejebune Melquisedec monuka saserote airamowitu tane abanae. ¹¹ Tamajasi isia karibu eraja ja. Tiarone yatu nokokitane obononaja jame moniraja ribiaoko. ¹² Yatu amena inaminamo jakuna. Tiarone mate atanejese Dio ainamina kawanamo ribu taerena jakutaisi yatu saba rewarakitane ja. Yatu amijo ajobimo ejobonae. Najorowitu najorokomoni. ¹³ Amijo ajobimo jakutai kokotuka mate nemokomoko. Tatumasike ribu nomeraja yaorane naminanaja. ¹⁴ Tiarone najorowitu jakutai tai iramo saba. Tatumasike aobojona ejobonae obojona kasikaja yakera tai obojona kasikaja asira tai tane naminakitane.

¹ Inamina Kirito isia jakutai ajotana abaitane suatana naruki ira-motakitane. Wajiabara ribunajakutai oko atanejese ribunaja jakore yakerakuna. Wajiabara ribunajakutai tai tamaja: Nona waba iabane obojona ibarekitane. Dio isia nome abakitane. ² Atae ribu inamina joni ekobakitane isia, mojo raisama arai abakitane isia, muanaerone nominikitane isia, are sanamatakitane isia tane. ³ Dio tane obonokore suatana iramotateko. ⁴ Warao kawanamo aobojona sinajarae. Najamutuatamo Dio moayakutaisi arijaba miae. Dio Amejokojira Yakerajawitu nojoae. ⁵ Dio aribu yakerajasi arijaba miae. Jarata mate naokitane jakutaisi arijaba miae. ⁶ Tatuma taisiatamo jerone nakakore ribu tatuma saba ekira obojona ibarene atanejese jiro tane bajemejerei. Tatuma atanejese Dio Aukama esijaria. Eobo amujaba tomanamejerea. Tiame ribu tatuma saba ekirawitu. ⁷ Naja eboyakore joboto najajo yesibajaya. Joboto rajikabamo saba namuna yakeraja eiramejereakutai Dio jakutai yakeraja tane taisi abaya. ⁸ Tiarone ji eiramejereakutai bebe eiramejereakutai tane joboto jakutai amoara ekira. Dio taisi yaribute. Ayajuata iekorate. ⁹ Mawarao ine obonoyakutai, oko tametane ribiarone oko ribia-kutaisi monukena yatu. Tane tiaoko. Dio yatu aobojona ibajukanajame yatu anona bajukánae tiakutaisi anona monuka jakuna. ¹⁰ Dio jakutai nomeraja nonaya. Yatu nonajakutaisi emoninatate. Yatu Dio obonone warao Dio saba emo abánae tiakutaisi sanetae. Are sanetaya. Dio taisi emoninatate. ¹¹ Tia-rone yatu ya ayajuata suatana yaorane nonamejerei kwana obonoyaoko. Yatu suatana nonate yatu yawakayakutaisi kaika ejobakitane. ¹² Inatoma bajinaka jakotu. Eobo nome abayaja taeratayaja tane Dio waraoto moakitane ribu abanajakutaisi nojoya. Tatuma sitakotu. ¹³ Dio ribu Abraham moayaja oriawai waranae. Wai raisa Dio awai kwarika ekirame oriawai waranae. ¹⁴ Ribane: Nomewitu yakeraja tane jiabatine. Jinobotomo eraja jimoatine, tae. (Awa. 22:17) ¹⁵ Takore Abraham ribu eku abayaja taeratane Dio ribuna-jakutaisi eku nojoae. ¹⁶ Warao ribakitane obonone raisa tatuma kwarika obojona jaja jakutaisi awai warane ribu moaya. Wai warane ribu taeraja abakore ribu kwarikakomoni rijana. ¹⁷ Tia-me Dio ribu taeraja abakitane oriawai waranae. Dio ribu ano-jomo inaminakitane obonoae. Ine maobojona kambiatanaka maribu eku nonatine tane inaminae. Tiame oriawai waranae. ¹⁸ Takore obojona manamo ja, kambiatakomoni jaja. Dio tatuma eku abane tona ribakomoni. Oko tatuma eku abayakore Dio kakobe yaorane etuwaraya. Oko Dioata jakanae kayaoro-mejerei. Dio kayawaka tane abanae. Tiame ribu eku yawaka-yaoko. ¹⁹ Waera auru jonika jame taeraja butuya. Oko yawaka jame kaobojona taeraja bajia. Najamutuata yatomanetenoko eku jiaka araitajasaba kauru ja, taeraja. ²⁰ Tata Jesú yaruae kakware, jojisi kasaba iyakaratakitane. Jesú jakutai saserotetuma airamo-witu are saba ejobonae Melquisedec monuka.

¹ Melquisedec jakutai janokoina Salem airamo. Dio Kokotuka Kwarika jakutaisi asaserote. Ateje Abraham airamotuma isiko orikubakitane naruaeyama. Tatuma kanatane naoyakore Melquisedec Abraham riboto ejobonae. Ejobane Abraham yakeraja tane abanaeyama. ² Abraham orikubetamo unukamo eraja konae. Unukamotuma kokotuka akari mojoreko mojoreko tane abane ekumo akari jisaka jisaka nisane Melquisedec moae. Melquisedec awai waraoto aribu isia ribia: Airamo nomeraja anonatu. Janokoina Salem waraoto aribu isia ribia: Inareraja. Tiame Melquisedec awai raisa: Airamo inareraja tane abatu. ³ Melquisedec ejoboyaja arima ekira, arani ekira, anobotomo isia jabátae tiaja ekira, arijawara ekira, awaba ekira tane. Tiame Dio Auka monuka ejobonae. Are saserote tane bajinae. ⁴ Melquisedec airamo uriraja jakutaisi naminakotu. Kanobo Abraham unukamo airamotuma ebikamo konaruajakutaisi akari Melquisedec moae. Akari mojoreko mojoreko tane abane ekumo akari jisaka jisaka nisane moae. ⁵ Moisés akajotabu eku saserotetuma Leví awarao jakutai eobo aunukamotuma akari mojoreko mojoreko tane ekumo akari jisaka jisaka jakutaisi nojoya. Eoborakate Abraham anobotomotiji saserotetuma awa-raowitu ejobonae. ⁶ Tiarone Melquisedec Leví anobotoanarone Abraham aunukamotuma akari mojoreko mojoreko tane ekumo akari jisaka jisaka jakutaisi nojoae. Abraham Dio aribu nojo-aerone Melquisedec Abraham yakeraja tane abanae. ⁷ Yakeraja tane abayakutai yakeraja abánae tiakutaisi kwarika ejoboya. Tamaja ribu nome. ⁸ Ama unukamo akari nojoyakutai warao jame wabate. Tiarone Jabataja taisi isia ribia Melquisedec unukamo nojoajakutai, tai are ubaya. ⁹ Atae ribu ja. Leví awarao unukamotuma akari mojoreko mojoreko tane ekumo akari jisaka jisaka nisaya. Tiarone Levijase Melquisedec moae. Abraham Melquisedec moakore Levirakate moae monuka. ¹⁰ Melquisedec Abraham riboto ejobakore Abraham anobotomo mate Abraham atejo eku jaja. ¹¹ Saserotetuma Leví awarao jakutai kajotabu Israeltuma inaminae. Saserotetuma jakutai Aarón anobotomo. Tatuma eobo kajotabu eku abamo jakutaisi kaikawitu abakomoni. Kaikawitu abakore atae saserote naokitane ribu ekirakuna. Tiarone kaikenajame raisa naoae. Naoajakutai Aarón anobotoana. Tai Melquisedec monuka naoae. ¹² Saserote kambiatakore kajotaburakate kambiatakitane ja. ¹³ Ama Kairamo, oko isia ribiakutai, taisi awaraosebeira raisa. Taisi awaraosebeira ekumo jisakarakate saserote tane ejobonakawitu jaja. ¹⁴ Kairamo Judá awaraosebeira ekumo. Oko amena taisi naminaya. Moisés Judá awaraosebeira isia jabatanatanae Judá awaraosebeira ekumo saserote tane ejobamejerei. ¹⁵ Ribu bajuka ja. Saserote jiro jakutai tai Melquisedec monuka. ¹⁶ Karata warao jabatajakutaisi aribia saserote tane naonatanae. Tiarone Melquisedec monukatiji are ubayakutaisi aribia naoae. ¹⁷ Dio taisi isia ribia: Iji Melquisedec monuka saserote ejobonae are saba. (Rok. 110:4) ¹⁸ Tiame kajotabu nobo jakutai taerena jame amoara ekiraja ba-jinae. ¹⁹ Kajotabu nobo warao kaikawitu ejobamejerei saneta-natanae. Kajotabu iabane kayawaka jiro eku jaoko. Yawaka jiro eku abayaja Dioata nabakayaoko. ²⁰ Dio oriawai warayaja ribu moae tamajasi nonakitane. ²¹ Wai warane abánae tiajenarone saserote eobo saserote tane ejobonae. Tiarone Dio oriawai warane tamaja saserote jiro aba-nae. Jabataja taisi isia ribia: Airamo oriawai warane kambiatanaja. Ribia: Iji Melquisedec monuka Saserote ejobonae are saba, tia. (Rok. 110:4) Tane ribia. ²² Tiame Jesú ajute jiro nonajame ajute jiro amoara ajute nobo amoara kwarika. ²³ Saserotetuma muanaya. Muanayame warao eobo saserote tane are ejoboya. Tiame saserote asebe uriraja ejobonae. ²⁴ Tia-rone Jesú jakutai are saba ubaya. Oriayaota raisama saba iaba-naja saserote tamejerei. ²⁵ Jesú are ubayame, warao Jesú aribia Dioata nabakayakutai Jesú tatuma aobojona ibajukaya. Obojona are bajukánae tiaja bajemejerei ibajukaya. Jesú are ubayaja tatuma kware Dio ebia. ²⁶ Tiame saserote airamowitu oko obonoyakutai tai Jesuwitu. Tai yakerajawitu. Anona asiraja ekira. Anana ijabanatanae. Asiraja anonamo monukena. Najamutu akwai kwarika taisi kobukanae. ²⁷ Jesú saserote airamotuma eobo monukena. Tatuma ya kokotukanea romu nane Dio moakitane ja. Wajiabara oriaobojona asirajasi kware moane waraoto aobojona asirajasi kware moae. Tiarone Jesú jisata romu nae tiakutaisi monuka orimoae. ²⁸ Kajotabu akarata eku abayaja warao joterajarone saserote airamowitu tane ejoboya. Tiarone kajotabu akarata nokabuka Dio oriawai warane ribu moae. Ribu eku Oriauka saserote airamo tane abanae. Auka jakutai are saba kaikawitu.

¹ Oko ribunajakutai tai tamaja. Saserote airamowitu kasaba jakutai tai tametane. Dio urirajasi arujunoko najamutuata ja. Saserote Dio amojonome tajasaba rujunae. ² Yatomanetenoko nomeraja Dio saba emo abánae tiakutaisi eku saserote tane yaotaya. Airamo yatomanetenoko nonae. Warao nonanatanae. ³ Saserote airamotumawitu kokotuka ribu ja nobeanaka Dio moakitane, romu nae tiakutaisi Dio moakitane tane. Tiame Jesukiritorakate Dio moakitane ribu ja. ⁴ Tai raina eku jaja sase-rote tane yaotanatakuna. Saserotetuma mate raina eku ja jakutai Moisés akajotabu akarata eku nobeanaka Dio moaya. ⁵ Sasero-tetuma raina eku yaotayarone najamutuata jakutaisi sitaya. Tatuma Moisés monuka. Moisés yatomanetenoko nonakitiakore Dio Moisés isia ribane: Jotakwayata janoko asita jiemiajakutai taisi eku kokotuka yaorane nonau, tae. (Ejo. 25:40) ⁶ Tiarone saserote airamo kasaba jakutai taisi ayaota sasero-tetuma eobo ayaota kwarika. Ribu jiro jakutai ribu nobo kwarika. Ajute jiro ribu jiro eku jame ajute nobo kwarika. Ajute jiro jame Jesú jakutai autu nakasinae. ⁷ Takore ajute wajiabara kaikawitu jakore atae ajute raisa ejobonatakuna. ⁸ Tiarone warao ebe jakutai Dio aobojona eku-ana. Tiame Jabataja tatuma isia ribia: Airamo ribane: Ya naoya. Taisi eku ajute jiro abatine. Israeltuma saba, ina Judá araoto saba tane abatine. ⁹ Ateje ajute Judio anobotuma saba abanaine. Tatuma amojo oanaine ina Egipto ekumo iejobakitane. Tai ya eku ajute tatuma saba abanaine. Tiarone tatuma ajute aribu eku abanatanae. Eku abanatanajame tatuma omoaine. Ajute ama jakutai ajute nobo monukena, Airamo tane ribia. ¹⁰ Airamo ribane: Tai ya nokabuka ajute Israeltuma saba abatine. Tametane ejobate. Makajotabutuma tatuma aobonobu eku abatine. Aobojona isia jabatatine. Tane ine tatuma Ario jatine. Tatuma mawarao jate. ¹¹ Takore airamo, airamoana tane kokotuka manaminate. Manaminayame warao jisaka warao raisama inamina-kitane ekira Airamo naminamejerei. Amusaba inaminanatate. Arakama inaminanatate tane. ¹² Tatuma aobojona asirajasi beretine. Tatukamo maobojona tatuma aobojona asirajasi tata are nakanatate. Anona asirajasi tata are nakanatate, tae. (Jer. 31:31-34) Airamo tane ribane. ¹³ Dio ribane: Ajute wajiabara jakutai nobo rijana. Tiame ajute jiro abayaine, tae. Nobo jakutai ekorea. Tiame rubujira eko tate.

¹ Atae ribu. Ajute wajiabara jakutai yatomanetenoko raisa jaku-taisi isia ribia. Yatomanetenoko jakutaisi eku Dio yatoma-netemejerei kajotabia. ² Yatomanetenoko tametane nónae tiaja ja. Anamu yakareku awai Namu Yakeraja. Taisi eku abije abanoko namunae. Atae mesa ja. Arai bãu Dio saba jakutai abánae tiaja ja. ³ Takore inabe jiaka raisama araitajasaba atae namu ja. Namu awai Namu Yakerajawitu. ⁴ Tata jonaba erokunoko burata simonona ja. Atae ajute akaja ja. Kaja kwarea burata simo nónae tiaja ja. Kaja eku unukamo rijanamo ja: Joru burata simonona maná ikwátae tiaja ja. Aarón anatorobu wajarone tanajakutai tai ja. Joyo arai ajute aribu jabátae tiaja ja. ⁵ Kaja arai kerubtuma asita ja. Dio ja tane sitaya. Kerubtuma ajuji obojona asirajasi aberenoko kwarika ja. Tiarone taisi isia suatana ribakomoniko rijana. ⁶ Janoko aunukamo tametane nonae. Nónae tiakore sasero-tetuma are namu wajiabara eku yaruae yatomanetekitane. ⁷ Tia-rone saserote airamowitu namu inabe jakutaisi eku jisamuka yaruae. Joira jisaka eku jisata yaruae. Yariaja jotu konaria ori-aobojona asirajasi amoara abakitane. Jotu konaria warao nami-nanaka obojona asirajasi nonajakutai taisi amoara abakitane. ⁸ Dio Amejokojira Yakerajawitu tametane kainaminaya. Yatomanetenoko wajiabara jakutai mate jakore Namu Yakerajawitu eku yarukitane jojisi yakeraja mate ekira. ⁹ Tamaja kokotuka ama jakutaisi sitaya. Ebe nobeanaka moaerone o romu nae tiakutaisi moaerone amoatu aobojona ribu kaika ejobonatanae. Tametane yatomaneteaerone ribu kaika ejobonatanae. ¹⁰ Ribu jakutai obojona isiayana. Ribu jakutai yakareku. Ribu jakutai najoro isia, jobi isia, jojarakitane isia, tejo isia tane. Dio mate ribu kambiatamoana jakore ribu amoara ja. ¹¹ Tiarone Kirito naoae. Mate yakeraja jakitane jakutaisi asaserote airamowitu tane naoae. Yatomanetenoko eku saserote tane yaotaya. Yatomanetenoko jakutai ebe jakutaisi ayakara kwarika, yakeraja riwaránae tiaja tane. Taisike waraoto anonena. Tai raina ekuana. ¹² Kirito Namu Yakerajawitu eku yaruae. Sibo ajotu o baka aukama ajotu konariaja yarunatanae. Tiarone wite oriajotu konariaja yaruae. Jisata yaruae kamoara abakitane oko are ejerónae tiaja bajemejerei. ¹³ Nomewitu romu ajotu amoara ja. Baka nibo ajotu o sibo ajotu o baka tira rokúnae tiakutaisi ajuju amoara ja. Tamatuma isia waraoto atejo ejurajuraya. Tane berea warao Dio saba emo abánae tiaja bajemejerei. ¹⁴ Tiarone Kirito ajotu romu ajotu amoara kwarikawitu. Kirito Dio Amejokojira are jakutaisi isia orimoae. Romu anana ijabanaka nae tiakutaisi monuka orimoae. Kirito oriatejo Dio moae. Ajotu yatu anona waba obojona eku jakutaisi berea. Yatu berea tatukamo yatu Dio riko jakutaisi yatomanetemejerei. ¹⁵ Tiame Jesukirito ajute jiro autu anakasetu tane ejobonae. Ajute nobo jakore warao are Dio aribu riboto asiraja nonae. Kirito wabae obojona asiraja ebe jakutaisi amoara abane tatuma ejerokitane. Dio ribu moae warao Dio isimo are nojomejerei. Kirito wabae warao Dio yejebuajakutai ribu eku nojomejerei. ¹⁶ Ajute anonatu aunukamo moaubukitane anonatu awaba wakakitane ja. ¹⁷ Mate wabamoana jakore ribu eku abakomoni aunukamo akarimo moaubukitane. ¹⁸ Ajute wajiabara jakutairakate jotu isia asinarija abanae. ¹⁹ Moisés kajotabu aribu kokotuka warao kokotuka saba rewarae. Rewaraitane jiaka obeja ajijinona simiraja oanae. Isoboru awaku aukamo oanae. Jiaka isoboru tane oane baka aukamo ajotu, sibo ajotu, jo tane eku torene taisi isia kajotabu akarata warao kokotuka tane ejurajurae. ²⁰ Taitane Moisés ribane: Dio ajute yatu saba abanae. Tamaja jotu ajute jakutaisi asinarija, tae. (Ejo. 24:8) ²¹ Suatana Moisés yatomanetenoko ejurajurae. Anamu kokotuka yatomanetenoko ayaota saba jakutaisi ejurajurae. ²² Kajotabu eku abayakore kokotuka sabuka jotu isia berea. Jotu webotonaja jakore obojona asirajasi berekomoni. ²³ Yatomanetenoko raina eku jakutai tai yatomanetenoko najamutuata jakutaisi sitaya. Sitayakutaisi romu ajotu isia berea. Romu ajotu ayakara kwarika jakutaisi isia najamutuata jakutaisi berekitane ja. ²⁴ Yatomanetenoko warao anona jakutai yatoma-netenoko nomerajasi sitaya. Kirito warao anona eku yarunatanae tiarone najamutuatawitu yaruae. Ama Dio amujaba nabakaitane are tata ja kakware Dio ebiaja. ²⁵ Saserote airamowitu Judio jakutai joira jisaka eku jisata Namu Yakerajawitu eku yaruae. Tata yaruae romu ajotu abakitane. Kirito tanaja. Eraja tane orimoanaja wabakitane. ²⁶ Tane jakore raina ajiromayatukamo eraja tane sanamatakuna. Tiarone ama ya kaika nakakore Kirito jisata naoae romu monuka wabakitane. Wabakitane naoae obo-jona asirajasi iekorakitane. ²⁷ Warao kokotuka jisata wabakitane ja. Wabakore aribu nome toate. ²⁸ Taisi monuka Kirito romu monuka wabae. Jisata wabae warao erajasi aobojona asirajasi konarukitane. Tatukamo atanejese naote. Naone obojona asirajasi konarukitane naonaja. Tiarone Kirito yawakayakutai, tatuma aobojona yaorane ibajukakitane naoya.

¹ Ayakara mate naokitane jakutai Moisés akajotabu jakutai taisi sitaya. Taisi ekuwituana tiarone sitaya. Sitayame warao inawaja kokotukanea are romu naija Dio moakitane. Tiame kajotabu jakutai Dio ayatomanetemo kaikawitu abako-moni. ² Kajotabu warao kaikawitu abakore warao suatana romu nanajakuna Dio moakitane. Amoamo aobojona jisatawitu berekore tatukamo obojona asiraja ekira tanabakuna. ³ Tane ejobonaja. Are romu kubaya Dio moakitane joira kokotukanea obojona asirajasi isia obonobia. ⁴ Baka nibo ajotu o sibo ajotu obojona asiraja konarukomoni jame are aobojona asirajasi isia obonobia. ⁵ Tiame Kirito rainayata nabakane Dio isia ribane: Iji romu namejerenaja. Romu jimoamejerenaja. Tiarone masaba tejo iyakaratae. ⁶ Romu nane erokiakutai jiaobojona ekuana. Romu nane obojona asirajasi konarumejereakutai jiaobojona ekuana. ⁷ Takore ine ribunaine: Dio, jiaobojona eku nonakitane nao-aine. Karata ekobótae tiajasi eku nonakitane naoaine, taine, tae. (Rok. 40:6-8) ⁸ Wajiabara Dio aobojona ekuana jakutaisi isia ribia. Romu nae tiakutaisi isia. Romu Dio moakitane jakutaisi isia, romu nane, erokane tane obojona asiraja konarukitane jakutaisi isia. Tama-tuma kajotabu aribu ekurone Dio aobojona ekuana. ⁹ Tatukamo suatana ribia: Dio, jiaobojona eku nonakitane naoaine, tia. Tane ribaitane romu naijakutaisi emo abane raisa wabamejerei abanae. ¹⁰ Jesukirito Dio aobojona eku abane oriatejo jisata moae romu nae tiakutaisi monuka. Taisi aobojona Dio orisaba emo kabanae are saba. ¹¹ Saserote Judiotuma jakutai ya kokotukanea yaotaya. Romu nae tiakutai arejase Dio moaya. Tatuma obojona asirajasi kona-rukomonirone are moaya. ¹² Tiarone Jesukirito jisata orimoae wabakitane obojona asirajasi amoara abakitane. Jisata orimoae atanejese moanakawitu jakitane. Orimoaitane Dio amojonome tajasaba rujunae. ¹³ Tata yawakaya Dio Kirito isiko asiraja jakutai omu noika abamejerei. ¹⁴ Kirito orisaba warao emo aba-nae. Jisata orimoane emo abanajakutai kaikawitu abanae. Are kaikawitu bajemejerei abanae. ¹⁵ Dio Amejokojira Yakerajawitu monukajase kasaba rewarae. Wajiabara ribane: ¹⁶ Airamo ribane: Tai ya nokabuka ajute tatuma saba abatine. Tametane ejobate. Makajotabu tatuma aobojona eku abatine. Aobonobu eku jabatatine, taine, tae. (Jer. 31:33) ¹⁷ Nokabuka ribane: Tatukamo maobojona tatuma aobojona asirajasi tata are nakanatate. Anona asirajasi tata are nakanatate, tae. (Jer. 31:34) ¹⁸ Tiame obojona asirajasi beréae tiakore atanejese moakitane ekira beremejerei. ¹⁹ Tiame mawarao, Jesú ajotu aobojona Namu Yakerajasi eku retayajenaka yarukitane kasaba yakera. ²⁰ Jesú jojisi jiro, riko tane abanae jiaka ekia yarumejerei. Jiaka jakutai Jesú atejo sitaya. ²¹ Jesú Dio awaraoto asaserote airamowitu tane ejo-bonae. ²² Tiame obojona nomerajasi isia, yaorane nome abayaja Dioata nabakakitane jaoko. Dio kaobojona bereae oko nona asiraja oriaobojona kware abanaka jamejerei. Jo anana ekirajasi isia katejo jojarae. ²³ Dio ribu kamoajakutaisi eku nonate. Eku nonate jame oko yawakayakutai suatana taeraja yawakaki. ²⁴ Orisanetakitane najabuki. Oko orisanetate obonokitane, yake-raja nonakitane tane. ²⁵ Eobo orikware nakanaja rokotu wara-kitane. Tatuma sitanaka orireiriki. Airamo aya kawere jakutaisi naminayame kwarika orireirikitane jaoko. ²⁶ Oko nome yaorane naminayarone are kaobojona eku aba-yaja asiraja nonakore monira rijana. Atanejese kakware waba-komoni obojona asirajasi amoara abakitane. ²⁷ Tane jakore karibu nome toate jame nojakitane jaoko. Jekunu rokiaja isia Dio saba asiraja jakutaisi iekorakitane jakutai taisi nojakitane jaoko. ²⁸ Judio kawanamo Moisés akajotabu akarata eku abanaja jakore anona amimo yejebia. Amimo manamo o rijanamo aribu nokone asiraja anonamo muanamejerea. Asiraja anonamo eobo saba sanerena ejoboya ribu nokonatanajame. ²⁹ Ama warao kawanamo Dio Aukama sakaubia. Ajotu tainaya. Dio Amejo-kojira aobojona ayakara moayakutai taisi ekotubia. Jotu jakutai ajute jiro asinarija. Jotu isia Dio tatuma emo abanae orisaba. Tatuma tametane nonakore asanamata ribu anokomoana asana-mata kwarika. ³⁰ Airamo ribunajakutaisi naminayaoko. Ribane: Ine ribu ja nona amoara abakitane. Nomewitu amoara abatine, tae. (Kaj. 32:35) Atae ribane: Airamo awaraoto aribu nome toate, tae. (Kaj. 32:36 Rok. 135:14) ³¹ Dio riko amojeku nakakore jawanerawitu. ³² Yatu aobojona ateje jakutaisiata nakakotu. Ateje sabuka yatu abije nisajiro jaja sanamatayarone taeratae. Kwana orikubae. ³³ Eobo yatu kawanamo ekotubune waraoto amujaba yatu isanamatae. Yatu kawanamo sanamatamo isiko sanamatae. ³⁴ Mojojutuma yatu saba saneraja ejobonae. Raisa yatu aunukamo konaruaerone yatu ekeiraja bajinae. Najamutuata yatu aunukamo bajuka ja. Ekoronaka are bajia. Yatu taisi naminaya. Tiame aunukamo konarukore ekeiraja bajinae. ³⁵ Yatu retanaka taeratanajakutai taisi monuka are retanaka taeratakotu. Dio taeratakitane jakutaisi amoara uriraja moakitane ribu ja. ³⁶ Yatu mate taeratakitane ja. Yatu Dio aobojona eku abane Dio waraoto moakitane ribu abanajakutai taisi nojokitane taeratakitane ja. ³⁷ Jabataja taisi isia ribia: Rubujira sabuka naokitane jakutai naote. Yawakanaka naote. ³⁸ Warao aobojona enometánae tiakutai taisike nome abayaja ubate. Tiarone bajene ekiajase narukore maobojona awerea ejoboya, tia. (Hab. 2:3-4) ³⁹ Tiarone bajene ekiajase nariakutai oko tatuma monukena. Tatu-masike ekorónae tiaja bajete. Okosike nome abajame kaobojona bajukánae tiaja bajete.

¹ Nome abakitane jakutai tametane. Oko yawakayakutai nomewitu tai kwaeabate tane yajorabakitane. Oko minaja jakutai minajarone tai nomewitu tane yajorabakitane. ² Kanobotuma nome abajame tatuma isia yakeraja rewarae. ³ Dio oriaribu isia kokotuka nonae. Taisi nome abayaja naminayaoko. Oko ama mijakutai ebe minaja jakutaisi isimo nonae. ⁴ Abel jakutai nome abayame romu nane Dio moae. Cainrakate Dio moae. Tiarone Abel moajakutai Caín moajakutaisi kwarika. Dio Abel anobeanaka isia warayaja ribane: Abelsike nomeraja, tae. Abel naerone mate arewara ja. ⁵ Enoc nome abayame Dio oriata konaruae. Eobo Enoc naja-bune minatanae Dio taisi konaruajame. Jabataja taisi isia ribia: Mate konarumoana jakore Enoc Dio aobojona eku ejobonae. ⁶ Warao nome abanaka jaja Dio aobojona eku ejobonaja. Dioata nabakakitane Dio ja tane nome abakitane ja. Yaorane Dio najabiakutai Dio taisi amoara moaya tane nome abakitane ja. ⁷ Noé nome abayame Dio aribu eku abanae. Mate kwaeaba-moana jakutai Dio taisi Noé enokoae. Enokokore Noé Dio aribu nojayaja jame waera nonae awarao muananaka jamejerei. Noé nome abayame raina araoto aribu nome toae. Nome abayame Dio taisi aobojona enometae nojobita tane. ⁸ Dio Abraham yejebukore Abraham nome abayame Dio aribu eku abanae. Aina ekumo ejobane ina raisameta naruae. Dio ribane: Ina jiro jiaina tamejerei jimoatine. Abraham kasaba narute tai tane naminanaka ainetamo ejobonae. ⁹ Abraham nome abayame, ina Dio taisi moakitane ribu abanajakutai taisiata na-rune ubae tatukamoanarone. Janoko eneserao nonane eku ubae. Isaac, Jacob tane Dio aribu eku nojoajame Abraham monuka janoko eneseraonona eku ubae. ¹⁰ Tane Abraham ubae janokoina eku ubakitane yawakajame. Janoko jakutai noika aba taeraja ja. Dio jakutai janokoina anonatu. Dio janokoina isia obonobune nonae. ¹¹ Sara jakutai nome abayame, taeraja ejobonae jorosimo arani-takitane. Taisi ajoira jorosimo aranitakitane kwarikarone joro-simo aranitae. Dio oriaribu eku abaya tane nome abayame Sara jorosimo nibora aranitae. ¹² Tiame Abraham iramowiturone anobotomo eraja ejobonae. Anobotomo asebe najamutu akura asebe monuka ejobonae. Nojabaira akajewaja asebe monuka ejobonae. Sinarijakomoni. ¹³ Dio tatuma moakitane ribunajakutaisi nojonaka tatuma koko-tuka muanae. Moakitane jakutaisi utirajamo mitane, nome abane tane saba yakeraja ejobonae. Tatuma ribane: Oko mate raina eku jaja raina araoana monuka jaoko. Sanuka saba raina raisama eku ubayakutaisi monuka jaoko, tae. ¹⁴ Tane yakeraja ribia: Ina raisama kwana najabiaoko, tia. ¹⁵ Inayatamo ejobonajakutaisi isia obonobiakore tatajase bajekuna. ¹⁶ Tiarone ina araisama kwarika yakeraja jakutaisi obonoae. Ina najamutuata jakutaisi obonoae. Tiame Dio ine tatuma Ario tane ribakitane atomana ekira. Tiame tatuma saba janokoina iyakarataya. ¹⁷ Dio Abraham ayakara mijakutaisi eku Abraham nome abayame auka Isaac konaruae romu monuka nakitane. Dio ribu Abraham moaerone Abraham auka jisakawiturone nakitane konaruae. ¹⁸ Dio ribane: Jiauka Isaac isimo jiwarao jate, tae. (Awa. 21:12) ¹⁹ Abraham ribane: Ine maukama naijarone Dio ajarata ja taisi enominakitane, tae. Abraham aukama nanatanaerone Dio are taisi enomininae monuka. ²⁰ Isaac jakutai nome abayame anobotomo Jacob, Esaú tane yakeraja tane abanae. Mate kwaeabakitane jakutaisi isia rewarayaja tatuma yakeraja abanae. ²¹ Jacob jakutai nome abayame, awaba awere jakore José anobotomo yakeraja tane abanae. Anatorobu akari yamunajene Dio yatomaneteae. ²² José jakutai nome abayaja, awaba awere ribane: Nokabuka Israeltuma ina Egipto ekumo ejobate. Ejoboyaja mamuju kona-rute, taeyama. (Awa. 47:31) ²³ Moisés jakutai rijawarakore airamotuma nome abayaja waniku rijanamo isia Moisés erijisae. Jorosimo yakeraja jame tatuma ina airamo akajotabu nojanaka erijisae. Ina airamo jorosimotuma namejereae. ²⁴ Moisés iramotane nome abayaja ribane: Maisia Iji airamo aukajisi auka, tamejerenajine. ²⁵ Tiarone sanuka isia obojona asirajasi eku oriwakanaka Dio sabasabamo jakutaisi isiko sanamatatine, taeyama. ²⁶ Kirito aobojona sanamatayakutaisi amoara Egipto araoto aburata amoara kwarika, taeyama. Tane Dio mate nona amoara moakitane jakutaisi isia obonobuae. ²⁷ Moisés are nome abayaja ina Egipto ekumo ejobonae. Ina airamo aorijisi taerajasi isia retanaka taeratanae. Dio mikomoni jakutaisi mija monuka taeratanae. ²⁸ Moisés nome abayaja Kwaeaba anajoro najoromejereae. Jotu isia janoko akojo ejurajurae. Jotu isia ejurajurae Dio ainataba Israeltuma anobotomo arajetuma kubanaka jamejerei. ²⁹ Israeltuma nome abayame nojabaira Simo autia waja araia imakanae. Egipto arao tametane imakakitane obonone joabane muanae. ³⁰ Israeltuma nome abayame, janokoina Jericó arara joika nakae. Israeltuma ya mojoabasi kware manamo isia janokoina sibajekore arara nakae. ³¹ Nibosebe Rahab jakutai nome abayame ribu eku abamoana muanakore isiko wabanatanae. Nibo rijisane janokoina mikitane naoajakutaisi inareraja etuwarae. Tira jakutai nome abayaja tane nonajame wabanatanae. ³² Atae katukane ribate bajama? Ya kaikanaja eobo isia rewa-rakitane: Gedeón, Barac, Sansón, Jefté, David, Samuel, eobo Dio kware arewaramo tane. ³³ Tatuma nome abayaja ina erajasi araoto kwarikanae. Nomeraja airamo tane norujuae. Dio ribu moa-jakutaisi nojoae. Tobesimo aroko emukoronae. ³⁴ Nome abamo jekunuira inareae. Tatuma buariwari ai esemuninaerone muana-natanae. Joteraja jakutai taeraja ejobonae. Orikubakitane taeraja ejobonae. Orikuba eku ina raisama araoto kwarikae. ³⁵ Nome abamo kawanamo muánae tiakutai nominine tane atatuata baji-nae. Eobo sanamata ebe muanae. Jerokitane jakutai tatuma aobo-jona ekuana nokabuka bajuka nominikitane. ³⁶ Eobo nome abamo kawanamo ekotubune, yewerene tane ayakara miae. Karena isia koyane emojojutae. ³⁷ Joyo isia timiae. Siera isia ejekene kabatanae. Ayakara miae. Buariwari isia kubae. Ajia-kenaka obeja ajoro o sibo ajoro isia orimakane kokotukanea kujuae. Saneraja, sanamatayaja, isanamátae tiaja tane bajinae. ³⁸ Raina arao jakutai amoara ekira asanatuma orikaika abakitane. Jarawaja tata, jotakwa tata, joyotototuma ekia, joboto atotoiratuma ekia tane kujuae. ³⁹ Tamatuma kokotuka nome abajame tatuma isia yakeraja rewarae. Dio aobojona eku ejobonaerone mate Dio ribunaja-kutaisi nojonatanae. ⁴⁰ Tatuma mate nojonatanae Dio kwarika yakeraja kaisiko nonakitane obonoyame. Tatuma komi kaikawitu ejobakomoni.

¹ Tatuma nome abayakutaisi isia rewarae. Oko rewaramo eraja kasibajínae tiaja jame nebu kurujubune orikwarikakitane obonoyakutaisi monuka kurujubuki. Ketuwarayakutaisi emo abaki. Obojona asiraja komu esoakayakutai kokotuka emo abaki. Tatuma emo abane taeratayaja kurujubuki. ² Jesú kebisaba jakutaisiata seorane kurujubuki. Jesú jakutai oko nome abayakutaisi ajotana, akwa tane. Kuru isia wabakitane tomane-rarone Jesú tomana isia obonobunaka kuru isia wabae. Wabane ekeiraja ejobakitane jakutaisi naminane are kuru isia wabae. Tatukamo Dio arujunoko amojonome tajasaba rujunae. ³ Jesú isia obonobukotu. Asirajasi anonamo Jesú ribotakore Jesú sanamata isiko taeratanae. Yatu taisi isia obonobune wakutanaka jakotu. Yatu aobojona joteraja bajinaka jakotu. ⁴ Yatu obojona asirajasi isiko orikubayaja yatu mate ajotu webotamoana. ⁵ Airamo yatu reiriae orianobotomo monuka. Airamo reiriajakutai yatu taisi emoniaera? Jabataja tametane ribia: Airamo jireiriaja jiyewerekore: Masaba asira tane ribunaka jau. Jisabajikore jiaobojona joteraja bajinaka jau. ⁶ Airamo warao obonoyame reiriaja yewerea. Anobotomo tane ejoboyakutai kokotuka yewerea, tia. (Rei. 3:11-12) ⁷ Dio yatu reiriaja yatu yewereakore taeratakotu. Dio orianobotomo monuka yatu reiriaja yewerea. Arima jakutai oriaukama reiriaja yewerenajara? ⁸ Dio orianobotomo kokotuka reiriaja yewerea. Tatuma monuka yatu reiriaja yewerenaja jakore yatu Dio anobotomoana. Yatu raisama anobotomo rijana. ⁹ Oko sanukiraja jakore kairamotuma kareiriaja kayewereae. Takore tatuma asiraja tanaka tatuma yatomaneteaeko. Oko kaobojona Arimasi akajotabu tane bajekore bajukenara? Akajotabu tane bajene ubateko. ¹⁰ Kairamotuma ya erajena isia oriaobojona eku abayaja kareiriaja kayewereae. Tiarone Dio kareiriaja kayewerea oko yakeraja ejobamejerei. Dio yakeraja jakutaisi monuka oko yakeraja ejobamejerei kareiriaja kayewerea. ¹¹ Kareiriaja ka-yewereakorewitu ekei tanajaoko. Ekumoniraja bajiaoko. Tiarone nokabuka reiriaja yewerekitane jakutai rau monuka kwajaya. Akwaja jakutai tai inareraja obojona nomeraja tane. Reiriaja yewere miajakutaisi saba kwajaya. ¹² Amasike yatu amojo wakutayakutai yatu akamukuru jote-raja jakutai tane taeraja tane abakotu. ¹³ Jojisi nomerajasi najabukotu. Najabukore omu kasi bajukane atanejese kasinaja. ¹⁴ Warao kokotuka isiko inareraja bajekitane najabukotu. Yakerajawitu ubakitane najabukotu. Yakerajawituana jakutai Airamo mikomoni. ¹⁵ Dio oriaobojona ayakara yatu moayakutai yatu taisi nojonataterate. Rau ajokonamu ajiajerakutaisi monuka jaterate. Ajiajeraja jakutai tai yatu notoria monuka jate. Takore warao eraja asiratate. ¹⁶ Tatusebe janaka jakotu. Ribu Dio isia jakutaisi tainanaka jakotu. Esaú jakutai tane tainae. Arajerone najoro sanuka isia ribu araje tane bajekitane jakutai arakama isia wabiae. ¹⁷ Nokabuka tatuma arima aukama yakeraja tane abakore Esaurakate yakeraja bajekitane obonoae. Tiarone moniraja ejobonae. Kwana onaerone anona kambiatakomoni. Yatu Esaú isia naminaya. ¹⁸ Yatu Israeltuma monukena. Tatuma jotakwa torekomoni jakutaisiata nabakanae. Jotakwayata jekunu, imajana, imajana torawitu, ajakaira tane ja. ¹⁹ Wana ekuitayakore nokoae. Dio ribiakore nokoae. Nokoitane ebuae atanejese ribunaka jamejerei. ²⁰ Atae ribu nokokitane obononatanae ribu tatuma saba moniraja jame. Ribu ribane: Romurakate jotakwa sakakore joyo isia timine o raborabaka isia natene nate, tae. (Ejo. 19:12-13) ²¹ Jawanerajasi mine Moisés ribane: Ine retane tororoyaine, tae. (Kaj. 9:19) ²² Yatu Israeltuma monukena. Yatu jotakwa Sion tata naba-kaubuae. Dio riko jakutaisi ajanokoineta nabakanae. Jerusalén najamutuata jakutai, tai. Yatu Dio ainatabasebeira tata naba-kaubuae. ²³ Dio anobotomo arajetuma jakutai orikware nakae. Awai najamutuata jabátae tiaja ja. Yatu tatumeta nabakaubuae. Yatu Dio warao kokotuka aribu nome atoatuata nabakaubuae. Dio nomeraja anonamo kaikawitu abanajakutai yatu tatuma aobojoneta nabakaubuae. ²⁴ Jesú ajute jiro autu anakasetu jakutai yatu taisiata nabakaubuae. Jesú ajotu ejurajúrae tiakutaisiata nabakaubuae. Inamina Jesú ajotu isia jakutai inamina Abel ajotu isia jakutaisi kwarika yakera. ²⁵ Tiame kaisia ribiakutaisi tainaterate. Raina eku Dio aribu ribakore anokomo ribu tainae. Tainajame sanamata jekenatanae. Ama najamutuatamo kaisia ribia. Oko aribu tainakore kwarika kaisanamatate. ²⁶ Ateje Dio ribakore raina rikoae. Tiarone ama ribia: Atanejese jisata erikotine. Tiarone rainawitu erikonatatine. Najamuturakate erikotine, tia. (Hag. 2:6) ²⁷ Atanejese jisata tane ribakore tametane nokoya. Dio anona rikokitane yakerakutai ekorate. Erikokomoni jakutai bajete. ²⁸ Dio oko airamo tane norujumejerea. Taisike erikokomoni. Tiame Dio yakeraja jae tane ribaki. Dio saba yakeraja jakutai taisi eku Dio akajotabu tane bajeki. Dio nojane yatomaneteki. ²⁹ Kario jekunu iekoreakutaisi monuka jame yatomaneteki. (Kaj. 4:24)

¹ Yatu oriwarao monuka are oriobonokotu. ² Tatukamo-ana yatuata nabakakore etuwarakotu. Tane etuwaraki-tane emoninaka jakotu. Tametane nonakitane jakutaisi aobojona eobo Dio ainataba naminanaka etuwarae. ³ Yatu mojojutuma isiko mojojútae tiaja monuka mojojutuma isia yatu aobojona abakotu. Tatuma sanamatayakutaisi isiko yatu sanamataya monuka yatu aobojona abakotu. ⁴ Kokotuka ribakunarai: Tirabakakitane o niborabakakitane yakera, takunarai. Tirabaka atirasi isiko ubakitane, niborabaka aniborama isiko ubakitane tane yakera, takunarai. Maretamo atae tirabakarone raisama atirasi isiko ubayakutai o niborabakarone raisama aniborama isiko ubayakutai Dio tatuma aribu nome toate. ⁵ Burata obononaka jakotu. Yatu amojeku ja jakutaisi isia yakeraja bajekotu. Dio ribane: Jiiabanatatine, jiomonatatine tane, tae. (Kaj. 31:6) ⁶ Tiame oko retanaka ribate: Airamo masanetayame Warao maisiko nonayakutaisi nojanajine. (Rok. 118:6) ⁷ Yatu airamotuma isia yatu aobojona nakakotu. Tatuma Dio aribu yatu saba rewarae. Tatu nome abane yakeraja nonaya-kutaisi sitakotu. ⁸ Jesukirito jakutai are kambiatanaja: Kaje, ama, are saba tane. ⁹ Inamina raisa o jiro tane ainaminamo yatu konarumejere-naka jakotu. Ribu najoro isia jakutai taisi isia kaobojona taeraja bajinaja. Ribu Dio aobojona ayakara isia kaobojona taeraja bajia. Ribu najoro isia jakutaisi eku abakitane obonoyakutai taisi saba are yakeraja ejobonaja. ¹⁰ Oko romu erokunoko raisa jaoko. Saserote yatomanetenoko nobo eku yaotajakutai ribu ekira erokunoko jiro isimo najorokitane. ¹¹ Ateje saserote airamowitu romu kubane ajotu Namu Yakerajawitu eku konaruae. Tata jotu Dio moae waraoto aobojona asirajasi amoara tane. Tiarone romu atejo janokoina araitajasaba konarune erokunae. ¹² Taisi monuka Jesú janokoina araitajasaba sanamatae. Wabae ajotu isia warao Dio saba emo abakitane. ¹³ Tiame okorakate janokoina araitajasaba Jesú tata naruki. Eobo Jesú tomana eku iabanae. Taisi monuka tomana eku kaiabamejerei Jesú tata naruki. ¹⁴ Oko tamate kajanokoina taeratakitane jakutaisi ekira. Janokoina mate jakitane jakutai yaorane yawakayaoko. ¹⁵ Tiame Jesukirito aobojona Dio yakeraja jae tane are ribaki-tane jaoko. Tane ribiaja karibu romu nae tiakutaisi monuka Dio moaya. Karoko isia yakeraja jae tane ribakitane ja. ¹⁶ Yakeraja nonakitane, eobo moaubukitane tane emoninaka jakotu. Tane nonakore romu nae tiakutaisi monuka Dio saba yakera. ¹⁷ Yatu airamo jakutaisi aribu nokokotu. Aribu eku abakotu. Tatuma yatu aobojona yaoroya. Tatuma Dioata nabakane yatu isia ribu anome jakutaisi rewarate. Tatuma taisi naminaya. Tiame aribu eku abakotu tatuma ekeiraja nonamejerei. Ekumoniraja nonakore yatu saba yakerena. ¹⁸ Kakware kwai ribakotu. Oko kokotukanea yakeraja nonakitane obonoyame kaobojona inareraja ja tane yajorabayaoko. ¹⁹ Inerakate yatu kwana ebiaine makware kwai ribamejerei. Makware kwai ribakotu ine atanejese yatuata rubujira narumejerei. ²⁰ Kairamo Jesukirito wabaerone Dio inare arotu jakutai taisi enomininae. Jesukirito jakutai ajotu isia ajute are bajemejerei asinarija abanae. Tiame obeja ayaorotu uriraja tane ejobonae. ²¹ Dio jakutai, inare arotutiji, nona yakeraja kokotukanea isia yatu kaikawitu abakunarai. Yatu kaikawitu abate yatu Dio aobo-jona eku abamejerei. Jesukirito isia oriaobojona eku abane yatu taisi aribu eku abamejerete. Jesukirito are saba airamo tane bajekunarai. Amén. ²² Mawarao, ribu kawajerajena isia yatu reiriaine. Tiame yatu reiri tainanaka orisaba nisamejereaine. ²³ Karaka Timoteo eje-ronae rijana. Ine taisi yatu enokoya. Rubujira nabakakore ine yatu-ata nariaja isiko narutine. ²⁴ Yatu airamo kokotuka jakutaisi isia yakeraubiara abakotu. Warao kokotuka Dio saba emo abánae tiakutaisi isia yakerau-biara abakotu. Italia arao yatu isia yakeraubiara abaya. ²⁵ Dio oriaobojona ayakara yatu kokotuka moakunarai. Amén.