GALACIA

GALACIA

¹ Ine Pablo, Dio ainataba. Warao mainatabanatanae. Waraoto aribia naonatanaine. Jesukiritowitu mainatabae. Dio Rima mainatabae. Tai Jesú wabaerone enomininae. ² Nome abamo eobo kokotuka maisiko jakutai yakeraubiara abaya. Oko karata jabatayaoko ina Galacia aikeresia araoto saba. ³ Dio Karima jakutai Kairamo Jesukirito jakutai tane tatuma aobojona ayakara yatu isiko bajekunarai. Tatuma yatu inareraja tane abakunarai. ⁴ Kairamo Jesukirito kakware orimoae wabakitane kaobojona asirajasi amoara abakitane. Orimoae raina aobojona asiraja ama jakutaisi ekumo kejerokitane. Karima Kario jakutai taisi aobojona eku orimoae. ⁵ Tiame warao ribakunarai: Dio are airamo, takunarai. Amén. ⁶ Kirito aobojona ayakara eku Dio yatu yejebuae. Ama Dio rubujira iabane rewara raisama iamo naria. Yatu rewara raisama iamo nariame retaine. ⁷ Tiarone rewara raisa ekira. Eobo rewara yakeraja Kirito isia jakutai taisi kambiatakitane obonoya. Tane obonoyaja yatu ewiyawiyaya. Tiame tai rewara raisa tane tiaine. ⁸ Oko rewara yakerajasi yatu saba rewaraeko. Ama eobo naone rewara raisama rewarayakutai Dio amojeku bajekunarai iekoramejerei. O Dio ainataba monuka najamutuatamo naoya-rone Dio amojeku bajekunarai iekoramejerei. ⁹ Ebe tane ribu-naeko. Atanejese tane ribiaoko. Yatu rewara yakerajasi oanae. Eobo naone rewara raisama rewarayakutai Dio amojeku bajekunarai iekoramejerei. ¹⁰ Ine tametane ribiaja waraoto aobojona eku bajekitane obonoyara? Obononaja. Dio aobojona eku bajekitane obono-yaine. Ine warao maisia Iji yakera tamejereara? Tamejerenaja. Ine warao maisia Iji yakera tamejerekore Kirito aneburatuana jakuine. ¹¹ Mawarao, maribu nokokotu. Rewara yakeraja ine rewara-yakutai tai waraoto isimoana. ¹² Warao jisakarakate ribu mamoanatanae. Jisakarakate mainaminanatanae. Jesukiritowitu memusabajakutaisi aobojona naminaine. ¹³ Ine ateje Judiotuma aribu eku abayaja nonaine. Yatu taisi nokoae. Ine Dio aikeresia araoto iyajubiaja kwana isanamataine. Tatuma iekorakitane obonoaine. Yatu taisi naminaya. ¹⁴ Ine Judio aribu eku abamo jakutaisi kwarikawitu ribu eku abatu ja-jaine. Makobe kokotuka isia manobotuma ainamina eku aba-naine. ¹⁵ Tiarone ine mate rijawaramoana jakore Dio mibune manisanae. Dio aobojona ayakara eku mayejebuae akajotabu tane bajemejerei. ¹⁶ Dio ine Aukama naminamejereae ine rewara yakerajasi Judioana saba rewaramejerei. Takore warao raisama renokonatanaine. ¹⁷ Jerusalén tata narunatanaine ebe inatabatuma jakutaisi renokokitane. Yawakanaka ina Arábia tata naruaine. Ekiajase bajene Damascoata nabakanaine. ¹⁸ Tatukamo inawaja rijanamo ru takore Jerusalén tata naru-aine. Taitane Pedro naminaine. Isiko misa manamo kware ya jisaka bajinaine. ¹⁹ Inatabatuma eobo jisakarakate minatanaine. Jacobo, Airamo araka jakutai, taisike miaine. ²⁰ Ine jabatayakutai tai nome. Tona ribunajine. Diosike taisi naminaya. ²¹ Tatukamo ina Siria, ina Cilicia tane tata naruaine. ²² Ina Judea aikeresia arao Kirito sabasabamo jakutai mate amu isia maminatanae. ²³ Maisiawitu nokoae. Tametane nokoae. Ebe kaiyajubuajakutai ribu rewarayaja ina kokotukanea jakaya. Ribu nome abakitane jakutaisi isia ebe iekorakitane obonoajakutai taisike rewaraya. Tane nokoae. ²⁴ Tane Dio yakeraja jae, tane ribubuae, maobojona.

¹ Tatukamo inawaja mojoreko kware manamonamojase ru takore atanejese Jerusalén tata naruaine. Bernabé maiamo naruae. Titorakate konaruaine. ² Dio memusabajakutaisi aobojona naruaine. Tane Jerusalén tata nome abamo airamotuma tiakutai tatuma abita orikware toaine. Toaitane saba rewara yakerajasi rewaraine. Ine Judioana saba rewarajakutai tai tatuma saba rewaraine. Ine ebe rewarajakutai, ama rewarayakutai tane amoara ekiraja bajete tai tane mikitane obonoaine. ³ Tito maisiko jakutai tai Judioana. Judioanarone eobo Tito tuata namínae tiakutaisi eku abamejerenatanae ajoro serekitane. ⁴ Nomewitu eobo nome abamo tane oritoayaja rijisane okoata yaruae. Tatumasike Tito ajoro seremejerei ribunae. Oko Kirito Jesú ekutiji namínae tiakutaisi akajotabuana rijana. Taisi naminakitane naoae tatuma. Oko tuata namínae tiakutaisi akajotabu tane kabakitane obonoae. ⁵ Tiarone oko tatuma aribu eku sanukarakate abanatanaeko. Oko suatana rewara yakeraja nomeraja yatu saba rewarayaoko. Tiame eobo aribu eku abaobononatanaeko. ⁶ Nome abamo airamo tiakutai ribu jiro mamoanatanae. Tatuma airamo tai o airamoana tai. Ine naminanaja. Diosike waraoto amuwitu minaja. Obojona mija. ⁷ Tatuma ribu jiro mamoa-natanae. Dio Pedro inatabae rewara yakeraja Judio saba rewara-mejerei. Monukajase Dio mainatabae rewara yakerajasi Judioana saba rewaramejerei. Tatuma taisi naminae. ⁸ Dio Pedro inataba tane Judio ajoro serebúae tiakutaisi saba inatabajakutai taijase inataba tane mainatabae Judioana saba. ⁹ Isia airamo tiakutai tatuma Jacobo, Pedro, Juan tane. Dio oriao-bojona ayakara mamoajakutai tatuma taisi naminae. Tiame ma-mojo, Bernabé amojo tane esewae. Oko obojona jisaka eku tane ribakore kamojo esewae. Oko Judioana saba rewarate. Tatuma Judio ajoro serebúae tiakutaisi saba rewarate. ¹⁰ Ribu jisaka ribunae kaobojona saneraubiajasi tata nakamejerei. Amena ine tane sanetaine. ¹¹ Pedro janokoina Antioquia tata narukore taisi amu mii tane sabajiaine, anona emo jame. ¹² Pedro wajiabara Judioana isiko najoroae. Tiarone Judiotuma Jacobo aribia naoae. Tatuma joro aseremo sabasabamo jame Pedro tatuma nojane Judioana emo bajinae. Isiko najoronatanae rijana. ¹³ Pedro tametane nonakore aobojona manamo ejobonae. Nome abamo eobo Judio jakutai Pedro mitane sitae tatumarakate. Bernaberakate Pedro aobojona eku abane iamo naruae. ¹⁴ Tiarone tatuma anona rewara yake-rajasi anome ekuana jakore ine miaine. Mitane kokotuka amu-jaba Pedro isia ribunaine. Ribane: Iji Judiorone kaje Judioana monuka ubae. Ama iji katukeme Judioana Judio monuka uba-mejerea bajama? taine. ¹⁵ Oko Judio tane nakaeko. Oko Judioana asiraja anonamo monukena oko. ¹⁶ Kajotabu akarata eku abayakutai taisi aobo-jona nomeraja ejobonaja Dio saba. Tiarone Jesukirito isia nome abayakutai Dio taisi aobojona enometaya. Taisi naminayaoko. Tiame okorakate Jesukirito isia nome abanae Dio kaobojona enometamejerei. Oko nome abajame kaobojona enometaya. Ka-jotabu eku abakore kaobojona enometanaja. Kajotabu akarata eku abayarone jisakarakate aobojona nome tanaja. ¹⁷ Warao Kirito isia nome abakore Dio taisi aobojona enome-taya. Tatukamo warao asiraja anonamo monuka asiraja nonate tai. Asiraja nonakore Kirito kware abakitane ribu ja mojoro? Ribu ekirawitu! ¹⁸ Ine kajotabu akarata janoko nobo webotoya-kutaisi monuka webotonaine. Ama ine webotonajakutai taijase ikaramakore eobo maisia Pablo Dio aribu riboto anonatu tane ribakuna. ¹⁹ Rijana kajotabu akarata saba wabaine. Kajota-bujase manae ine Dio saba riko bajemejerei. ²⁰ Ine wabaine rijana. Kirito isiko kuru isia mesijariae. Ama ubayakutai tai ineana. Kirito meku ubaya. Ine ama ubayakutai Dio Aukama isia nome abayaja ubaya. Tai maobonone orimoae makware wabakitane. ²¹ Amasike ine Dio aobojona ayakara tainakitane obononajine. Warao kajotabu akarata eku abayakore obojona nome ejobakore Kirito awaba amoara ekirakuna.

¹ Yatu Galacia arao yatu akwa bureraji! Sina yatu yajoatae nome eku abanaka jamejerei? Oko rewarayaja yakeraja rewaraeko. Yatu akojoko eku rewarae. Jesukirito kuru isia kakware wabae, taeko. ² Maisia ribakotu. Yatu Moisés akajo-tabu eku abayaja Dio Amejokojira oanaera? O ribu nokone nome abayaja oanaera? ³ Yatu katukeme buretae bajama? Dio Amejo-kojira yatu eku yaotakitane jotananae. Ama yatu yaotayaja Me-jokojira sanetate mojoro? ⁴ Yatu sanamatajakutai amoara ekira mojoro? Amoara ekira tanabaya mojoro? ⁵ Dio Oriamejokojira yatu moae. Dio yatu kawanaya nona taeraja nonaya. Katukeme nonaya? Yatu kajotabu akarata eku abajame nonanaja. Tiarone yatu ribu nokone nome abayame nonaya. ⁶ Abraham Dio isia nome abanae. Abraham nome abakore Dio taisi aobojona nomeraja tane abanae. (Awa. 15:6) ⁷ Abraham monuka nome abayakutai tatumasike Abraham ano-botomo. Taisi naminakotu. ⁸ Ateje Dio mate nonakitane jaku-taisi naminane jabatamejereae. Judioana kawanamo nome abaya-kutai Dio taisi aobojona enometakitane jakutaisi naminae. Tiame Abraham isia ribunae: Jiaobojona Israeltumena kokotuka jakutaisi yakeraja tane abatine, tae. (Awa. 12:3, 18:18, 22:18) ⁹ Tane ribakore Abraham nome abanae. Abraham monuka nome abayakutai Abraham monuka yakeraja bajia. ¹⁰ Kajotabu akarata eku abakitane obonoyakutai tatuma yari-búae tiaja bajia. Jabataja taisi isia ribia: Are kajotabu akarata aribu kokotuka eku abakitane ja. Kokotuka eku abanaja jakutai yaribúae tiaja bajia, tia. (Kaj. 27:26) ¹¹ Amasike kajotabu akarata eku abayaja jisakarakate aobojona nomeraja bajinaja Dio saba. Jabataja taisi isia ribia: Warao aobojona enometánae tiakutai taisike nome abayaja ubate, tia. (Hab. 2:4) ¹² Kajotabu akarata eku abayakutai taisike Jesú isia nome abanaja. Jabataja taisi isia ribia: Kajotabu eku abayakutai kajotabu eku ubate, tia. (Lev. 18:5) ¹³ Kirito kejeronae oko kajotabu akarata aobojona yaribúae tiaja bajinaka jamejerei. Kirito yaribúae tiaja bajinae kaobojona. Jabataja taisi isia ribia: Rau isia batokónae tane wabajakutai taisike yaribúae tiaja bajia, tia. (Kaj. 21:23) ¹⁴ Dio oriaribu Abraham moae yakeraja ejobamejerei. Kirito Jesú eku tamaja ribu jakutai Judioana sabarakate bajia. Dio ribu abanae Amejokojira moakitane. Kirito Jesú yaribúae tiaja bajinae oko nome abayakutai Dio Amejokojira nojomejerei. ¹⁵ Mawarao, waraoto anona sitatine. Warao manamo obojona jisaka eku abane ribu jabatane awai jabataya. Tatukamo ribu webotakomoni atae kwarisaba abakomoni tane. ¹⁶ Taisi monuka Dio ribu Abraham moae atae Diojase ribu Abraham anoboto moae. Miki anaka, rijana. Jabataja eku ribu nobotomo ekira. Nobotomo jakutai eraja jakuna. Tiarone ribu abayaja, Jinoboto, tia. (Awa. 12:7) Noboto jakutai taisike jisaka. Tai Kirito. ¹⁷ Maribu tametane: Dio ribu Abraham moae. Moane eku abatine, tane ribunae. Tatukamo inawaja siento manamonamojase kware mojorekotuma rijanamo ru takore Moisés kajotabu akarata jabatae. Kajotabu akarata jarone ribu Dio Abraham moajakutai taisi kambiatanaja. Ribu webotakomoni atae kwarisaba abakomoni tane. ¹⁸ Dio ribu Abraham moae anojobita tane. Tiarone warao kawanamo ribia: Kajotabu akarata eku abayakutai tai Dio anojobita nojote, tia. Tai nome jakore ebe Dio Abraham ribu moanatakuna. Taneana jame Dio ribu Abraham moae. ¹⁹ Amasike kajotabu akarata amoara kasikaja? Dio kajotabu akarata jabatamejereae warao oriaobojona asirajasi naminame-jerei. Kajotabu akarata are bajekitane sabena. Abraham anoboto jakore karata amoara ekira rijana. Dio kajotabu moakore naja-mutu ainatabatuma rewarae. Takore Moisés inakasetu tane ribu jabatae waraoto saba. ²⁰ Tiarone warao jisaka jakore inakasetu amoara ekira. Diosike jisakawitu. ²¹ Dio ributuma warao moajakutai kajotabu Moisés jabata-jakutai tane oriribotora? Oriribotoana. Kajotabu jakutai obojona are jakutai jiro tane abanaja. Kajotabu jakutai jiro tane abakore warao kajotabu eku abakuna aobojona nome tamejerei. ²² Tia-rone Jabataja taisi isia ribia: Raina arao kokotuka obojona asirajasi amojeku bajia, tia. Tane bajia Jesú isia nome abamejerei Dio moakitane jakutaisi nojomejerei. ²³ Ateje Jesú isia nome abakitane jakutai ribu ekira. Ribu mate ekirakore oko kajotabu aribu eku mojoju monuka bajinaeko. Naminanajarone nome abakitane jakutaisi aribu yawakaeko. Yawakajakutai tai ama ja. ²⁴ Kajotabu jakutai nemokomoko ayaorotu monuka. Oko nemokomoko monuka kayaoroae Kirito mate naomoana jakore. Kirito naokore isia nome abanaeko Dio kaobojona enometamejerei. ²⁵ Ama oko Kirito isia nome abajame nemokomoko monuka kayaorokitane amoara ekira. ²⁶ Ama rijana yatu nome abajame kokotuka Dio anobotomo tane ejobonae Kirito Jesú eku. ²⁷ Yatu Kirito eku joni kobane Kirito orisabanae, jiaka monuka. ²⁸ Ama rijana obojona raisa raisa jakitane amoara ekira. Judio, Judioana tane. Raisama aneburatu jakutai, raisama aneburatuana jakutai tane. Nibora jakutai, tira jakutai tane. Tametane jakitane amoara ekira. Kokotuka Kirito Jesú eku jame jisaka monuka ejobonae. ²⁹ Tane yatu Kirito eku jame Abraham anobotomo tane ejobonae. Yatu Abraham anobo-tomotiji Dio ribu Abraham moajakutai taisi kaika yatu nojoya.

¹ Suatana ribatine. Auka jakutai iramo tane arimasi aunukamo isiko bajete. Kokotuka arotu jakitanerone mate sanukiraja jakore arimasi anebu eobo monuka. ² Arima sinarija aukama saba abaya. Mate sinarija eku nakanaja jakore aukama aina-minamo ja, ayaoromo ja tane. ³ Oko monukajase. Oko mate sanukiraja monuka jaja raina eku saneta awajiabara jakutaisi eku abanaeko. ⁴ Tiarone asinarija eku nakakore Dio Aukama inata-bae. Tira isimo nakae. Kajotabu akarata aribu eku nakakitane nakae. ⁵ Tametane naoae kejerokitane. Oko ebe kajotabu anebu tane bajinae. Oko Dio anobotomo tane ejobamejerei kejeronae. ⁶ Ama yatu Dio anobotomotiji Dio sinarija yatu moae obojona eku. Asinarija jakutai tai Aukama Amejokojira. Amejokojira jaku-tai ribia: Abba, Rima, tia. ⁷ Rijana iji raisama aneburatuana. Iji Dio auka rijana. Aukatiji Jirimasi aunukamo nojote Kirito aobojona. ⁸ Ateje yatu Dio naminanaka eobo anebu tane bajinae. Eobo jakutai are dioana. ⁹ Amasike yatu Dio naminaya. Bajuka ribatine: Dio yatu naminaya. Naminayarone yatu atanejese raina eku saneta awajiabara jakutaisi sabasaba bajiaraji bajama! Tatu-masike sanera. Tatumasike jotera. Atanejese tatuma anebu tane bajiaraji bajama! ¹⁰ Yatu mate yatuma eku oriwakakitane jakutaisi oriwakaya. Wanikutuma eku oriwakakitane jakutaisi oriwakaya. Namuna ayakaramata eku oriwakaya. Inawaja eku oriwakaya. ¹¹ Ine yatu isiko yaotajakutai eko ejobonae monuka. Tai nome mojoro? ¹² Mawarao, yatu ebiaine mamonuka nonamejerei. Inesike yatu monuka. Yatu maisiko asiraja nonanatanae. ¹³ Wajiabara ine wabayame yatuata bajinaine. Tane rewara yakeraja yatu saba rewaraine. Yatu taisi naminaya. ¹⁴ Mawaba yatu saba asiraja-rone yatu matainanatanae. Mainatabanatanae. Yatu metuwarae. Dio ainataba etuwarayakutaisi monuka yatu metuwarae. Jesukirito etuwarayakutaisi monuka yatu metuwarae. ¹⁵ Yatu ekeiraja metuwarae. Ama yatu aekei jakutai katukanae? Maribu nokokotu. Ebe mu nisakitane yakerakore yatu oriamu nisakuna mamoakitane. ¹⁶ Ama nome yatu saba rewarayaine. Rewara-yame yatu mararijataya mojoro? ¹⁷ Eobo akobe ekeiraja isia yatu kware baria tiarone aobojona yakerena. Tatuma yatu kebikamo konarukitane obonoyame yatu kware baria. ¹⁸ Nomewitu kobe ekeiraja bajekitane jakutai asirena, tiarone obojona yakerajasi isia. Ine jakore o ine ekirakore kobe ekeiraja bajekitane jakutai asirena. ¹⁹ Manobotomo, makobe yatu kware ajeraine. Tira jorosimo aranitakitiakutaisi monuka makobe yatu kware ajeraine. Kirito aobojona yatu eku iramoana jakore makobe yatu kware are ajerate. ²⁰ Ine amawitu yatuata jakunako! Ine yatuata jakore maobojona ribakuine. Ama yatu isia ine katukane obonobute tai? ²¹ Yatu kawanamo Moisés akarata eku abakitane obonoya. Yatu renokokitine: Kajotabu akarata aribu nokonatanaera? ²² Ka-rata ribia: Abraham anobotomo manamo. Jisaka aneburatu auka. Araisa Abraham atirasi auka. ²³ Neburatu auka jakutai tai jorosimo eobo monuka nakae. Atira auka jakutai Dio aribu eku rijawarae. ²⁴ Tatu jakutai ajute manamo sitaya. Ajute jisaka jota Sinaí tatamo. Tai Agar monuka. Tamaja ajute eku abayakutai tatuma ajute anebu. ²⁵ Agar jakutai jota Sinaí sitaya. Jota jakutai ina Arábia eku. Janokoina Jerusalén ama jakutaisi sitaya. Jeru-salén araoto isiko Agar anobotomo monuka nebu bajia. ²⁶ Atae Jerusalén ja. Tai kwai ja. Taisike raisama anebuana. Taisike oko kokotuka jakutaisi arani. ²⁷ Jabataja taisi isia ribia: Kwabuoni nobotomo ekiraja jakutai, ekeiraja bajenu. Mate jorosimo aranitakitane jikobe ajerenarone ekeiraja rokojotau. Tira raisa anobotomo ja. Tiarone iji taisi anobotomo kwarika jinobotomo eraja jate. Tiame ekeiraja bajenu. (Isa. 54:1) ²⁸ Mawarao, ateje Isaac Dio aribu eku auka tane rijawarae. Oko Isaac monuka Dio aribu eku anobotomo tane rijawaraeko. ²⁹ Ateje auka are nakajakutai araisama isanamatae. Dio Ame-jokojira aobojona nakajakutai taisi isanamatae. Ama monukajase ejoboya. ³⁰ Amasike Jabataja katukane ribia? Ribane: Jineburatu aukama isiko webotanu. Atirasi auka arima wabakore aunukamo saba bajete. Aneburatu auka saba bajinaja, tae. (Awa. 21:10) ³¹ Ama mawarao, kamonuka. Oko aneburatu anobotomoana. Oko atirasi anobotomo.

¹ Kirito yatu ejeronae raisama anebu tane bajinaka jamejerei. Jerónae tiaja taeraja bajekotu. Atanejese raisama anebu tane bajinaka jakotu. ² Maribu nokokotu. Yatu are joro serekore yatu saba Kirito amoara ekiraja ejoboya. ³ Atanejese ribatine. Joro sereakutai ribu jisaka eku abanaja. Rewe ja kajotabu akarata aribu kokotuka eku abakitane. ⁴ Yatu kajotabu eku abayaja obojona enometakitane obonoya. Tane Kirito aweremo naruae. Dio aobojona ayakara aweremo naruae. ⁵ Oko nome abajame Dio kaobojona enometamejerei yawakayaoko. Dio Amejokojira aobojona yawa-kayaoko. ⁶ Oko Kirito Jesú eku jakutai kasaba joro serekitane jakutai amoara ekirawitu. Joro serenajarone amoara ekirawitu tane. Tiarone nome abakitane jakutai taisike amoara jawitu. Nome abayame eobo obonoyaja ubayaoko. ⁷ Ebe yatu yakeraja naruae. Ama sina yatu emo inabajinae nome eku abanaka jamejerei? ⁸ Dio yatu yejebiakutai taisike emo inabajinaja. ⁹ Ribu nobo ja: Arina akwaruta sanuka arina uriraja ejokojokoya, tia. Yatu aobojona tata nakakunarai. ¹⁰ Ine Airamo isia nome abayaja yatu isia obonobiaine. Yatu obojona raisama eku abanatate, tiaine. Tiarone yatu ewiyawiyayakutai Dio taisi isanamatate. Airamorone o neburaturone isanamatate. ¹¹ Mawarao, maisia obonobukotu. Ine are joro serekotu tane ribakore Judiotuma maisanamatanatakuna. Taneanara? Tane ja-kore Kirito awaba isia rewarayarone Judiotuma saba omu esoa-kanoko ekirakuna. ¹² Ama yatu seremejerei ewiyawiyakutai tatuma yaorane oriserekore yakerakuna. ¹³ Mawarao, Dio yatu yejebuae jerónae tiaja bajemejerei. Oi! Jerónae tiaja jame obojona are jakutaisi eku abaterate! Tiarone oriobonoyaja oriakajotabu tane bajekotu. ¹⁴ Kajotabu akarata aribu orikware toane ribu jisaka ejoboya: Iji wite obonoyakutai taisi monuka jiraisama obonote, tia. (Lev. 19:18) ¹⁵ Tiarone yatu romu monuka oriabiakore o orinajoroyakore oi. Yatu oriekorate tai! ¹⁶ Ine ribiakutai tai tamaja. Dio Amejokojira aobojona eku abakotu. Amejokojira aobojona eku abayaja obojona are jaku-taisi eku abanaja. ¹⁷ Obojona are jakutai Dio Amejokojira anona obononaja. Amejokojira jakutai obojona are jakutaisi anona obononaja. Tatuma are oririboto. Tiame yatu nona obonoyakutai taisi nonakomoni. ¹⁸ Dio Amejokojira jojisi yatu inaminakore yatu kajotabu akarata anebuana rijana. ¹⁹ Obojona are jakutai yaorane naminaya. Obojona are jakutai tai tamaja: Tira jarone tira raisama najabukitane, nibora jarone raisama najabukitane, tatusebekitane, nibosebekitane, nona eobo kwarika nona asirajawitu nonakitane. Kokotuka asira. ²⁰ Diosita yatomanetekitane, wisiratu aribu eku abakitane, raisama rarijatakitane, orikubakitane, miajitakitane. Kwana orijisikitane, wite oriaobojona eku abakitane, ribu kwarikakitane, ejisajisakitane. Kokotuka asira. ²¹ Araisama kwarika ejoba-kitane, nakitane, awabakitane, awabane nonakitaneana jakutaisi nonakitane tane. Kokotuka asira. Taisi monukarakate asira. Yatu isia ribiaine: Tametane nonayakutai Dio arujuna rujuyakutai taisi tata ajanoko ekirate. ²² Tiarone Amejokojira akwaja jakutai tai tamaja: Obono-kitane, ekeiraja jakitane, inareraja jakitane, yawakakitane, raisama aribu kwarikanaka nokokitane, yakeraja jakitane, nome abayaja jakitane. ²³ Raoberaja jakitane, obojona bakakitane tane. Amasike ribu ekira tamaja obojona riboto. ²⁴ Kirito sabasabamo jakutai tatuma obojona are jakutaisi esijariae. Kobe obonoyakutai, obojona obonoyakutai tane jakutaisi isiko esijariae. ²⁵ Ama Dio Amejokojira eku ubayaoko. Mejokojira eku ubayame Mejokojira eku nonakitane ja. ²⁶ Raisama kwarika oriabakitane najabunaka jaki. Notorinaka jaki. Raisama kwarika ejobakitane najabunaka jaki.

¹ Mawarao, yatu kawanamo jisaka asiraja nonayaja nakate tai. Nakakore yatu obojona jiro jakutai sanetakotu karama-mejerei. Tiarone raoberaja sanetakotu. Yaturakate oi! Jebuira yatu asiraja nonamejerete tai. ² Orisanetakotu oriauru konaru-kitane. Orisanetayaja Kirito akajotabu eku abaya. ³ Jisaka ribate tai: Inesike mamoara ja, tate tai. Amoara eki-rarone tane ribiakutai oriimasibia. ⁴ Jisaka jisaka wite orianona nome toakitane ja. Yakeraja ejobane tai wite orianona isia yakeraja tate. Orianona raisama kware abanaja. ⁵ Jisaka jisaka oriauru konarukitane ja. ⁶ Rewara yakerajasi ateributu jakutai ainaminatu riboto kokotuka moakitane ja. ⁷ Raisa yatu imasibuterate. Warao Dio ekotubukomoni. Warao namiakutai taijase arite. ⁸ Obojona are jakutaisi eku namune obojona are jakutaisi ekumo waba arite. Mejokojira eku namune Mejokojira isimo arite are ubakitane. ⁹ Wakutanaka are yakeraja nonakitane jaoko. Tane wakutanaja jakore ayakaramata eku ariteko. ¹⁰ Tiame yakerakore karaisa kokotuka isia yakeraja nonaki. Nome abamo isia yakeraja nonakore yakerajawitu. ¹¹ Mikotu rijana. Mamojo isiawitu jabatayaine yatu saba. Ajaba urirajasi mikotu. ¹² Kirito kuru isia wabae. Oko taisi isia rewarayame sanama-tayaoko. Eobo sanamatakitane obononaka eobo isiko yakeraja bajekitane obonoya. Tiame tatuma yatu ajoro seremejerei kajotabia. ¹³ Tatuma oriajoro serearone kajotabu aribu kokotuka eku abanaja. Tatuma yatu ajoro seremejerea. Yatu atejo aobojona okosike yakeraja nonaeko, tane ribakitane obonoya. ¹⁴ Tiarone ine yawatanuka isia manona yakera tanajine. Tiarone Kairamo Jesukirito kuru isia wabajakutai taisike masaba yakera. Kirito awaba aobojona raina jakutai masaba wabae. Ine raina saba wabaine. ¹⁵ Oko Kirito Jesú eku jakore joro serekitane jakutai amoara ekira. O joro serenaka jakitane jakutai amoara ekira. Oko nonajiro jakitane jakutai taisike amoara ja. ¹⁶ Tamaja ribu eku abayakutai kokotuka inareraja bajekunarai. Dio akobe tatuma isia ajeraja sanetakunarai. Eoborakate Dio awarao jakutai yakeraja ejobakunarai. ¹⁷ Tamatuka jisakarakate manotorinaka jakunarai. Ine Jesú aneburatutiji matejo eboisiae. Matejo eku boisi yakárae tiaja ja. ¹⁸ Mawarao, Kairamo Jesukirito aobojona ayakara yatu aobojona yakeraja tane abakunarai. Amén.