EFESO

EFESO

¹ Ine Pablo, Jesukirito ainataba. Dio oriaobojona eku inataba tane mabanae. Yatu Efeso arao jakutai, yatu Dio saba emo abánae tiaja. Yatu Kirito Jesú aribu eku abamo. Yatu saba jaba-tayaine. ² Dio Karima jakutai, Airamo Jesukirito jakutai tane oriaobojona ayakara yatu moakunarai. Inareraja tane yatu abaku-narai. ³ Dio jakutai tai Kairamo Jesukirito Ario, Arima tane. Dio are yakeraja ja. Tai yakeraja tane kabanae, obojona yakeraja koko-tuka isia. Kirito eku yakeraja tane kabanae najamutuata. ⁴ Raina ajiroma ebe Dio Jesú eku kanisanae oko Dio saba emo abánae tiaja bajemejerei. Kaobojona eku bajinaka jamejerei kanisanae. ⁵ Dio kaobonone aobojona abanae orianobotomo tane kanisakitane. Tane Jesukirito isia kanisanae. Dio oriaobojona abane oriao-bojona ekuwitu nonae. ⁶ Dio tane nonae warao Dio aobojona ayakara waramejerei. Warao ribane: Diosike aobojona ayakara uriraja jae, tane ribamejerei abanae. Dio Oriauka obonoyakutaisi isia aobojona ayakara urirajasi kamoae. ⁷ Aobojona ayakara urirajasi kaika Jesú ajotu isia kamoara abane kejeroya. Kaobojona asiraja Dio aribu riboto jakutai kakware abanaka berea. Dio oriaobojona ayakara urirajasi kaika berea. ⁸ Dio kokotuka musaberaja, kokotuka naminayaja tane, oriaobojona ayakara uriraja kamoae. ⁹ Dio aobojona rijisa jakutai, taisi kainaminae. Kirito isia nonakitane jakutai amena taisi kaina-minakitane obonoya. Tiame oriaobojona eku nonae. ¹⁰ Dio oriaobojona abanae Kirito eku kokotuka orikware toakitane. Mate asinarija eku nakakore orikware toate. Eku nakakore raina eku jakutai, najamutuata jakutai tane kokotuka orikware toate akwa jisaka jamejerei. ¹¹ Dio atejeatukamo oriaobojona abanae oko Kirito eku nojo-kitane jakutai taisi nojomejerei. Dio jakutai kokotuka oriaobo-jona eku rewarayakutaisi nonaya. Tiame oko nojokitane jakutaisi nojoaeko. ¹² Oko wajiabara Kirito isia yawaka ja. Tiame Dio kabanae eobo Dio uriraja jae, tane ribamejerei. ¹³ Yaturakate Kirito eku ribu nomerajasi nokoae. Ribu nomeraja jakutai tai rewara yakeraja yatu aobojona ibajukakitane. Yatu ribu nokoi-tane Kirito isia nome abanae. Yatu nome abakore Dio Oria-mejokojira Yakerajawitu jakutaisi asinarija tane yatu isia abanae. Dio Oriamejokojira inatabakitane jakutai, tai tamaja. ¹⁴ Dio kamoara abanajame oko Dio awarao tane ejobonaeko. Mate kejerokitane jakutaisi ebika Amejokojira kamoae. Tai oko nojokitane jakutaisi awajiabara tane ejoboya. Tiame Dio uriraja jae tane ribakunarai. ¹⁵ Yatu Airamo Jesú isia nome abaya. Yatu warao kokotuka Dio saba emo abánae tiakutaisi obonoya. Tane nokoaine. ¹⁶ Tiame yatu aobojona Dio yakeraja jae tane are ribiaine. Yatu kware kwai ribiaja yatu awai warayaine. ¹⁷ Ine Kairamo Jesukirito Ario jakutaisi ebiaine. Rima jakutai yakerajawitu. Yatu Dio naminayaja yatu aobojona musaberaja ejobamejerei, Dio aina-mina yaorane naminamejerei tane, ebiaine. ¹⁸ Yatu aobonobu sinajaránae tiaja bajekore yatu Dio naminate. Dio ainamina naminate tane. Dio yatu yejebukore yatu ebisaba yawaka ja tane taisi naminate. Warao Dio saba emo abánae tiaja jakutai tatuma Dio saba nojobita tane bajia. Tane bajiakutaisi yatu naminate. Nojobita jakutaisi ayakara uriraja. ¹⁹ Yatu Dio ajarata taera-jawitu jakutaisi naminate. Dio ajarata jakutai oko nome abamo jakutaisi saba. Ajarata jakutai ina kokotukanea saba ajara taeraja ja. ²⁰ Dio oriajarata kaika nonayaja Kirito wabaerone enomininae. Enominane oriamojonome tajasabaya najamutuata taisi erujunae. ²¹ Taitane tai kokotuka akwa tane abanae. Jebu airamo kokotuka kwarika, jebu akajotabumo kokotuka kwarika, jebu taeraja jakutaisi kokotuka kwarika, jebu airamo tane norujuyakutai taisi kokotuka kwarika tane abanae. Raisatuma awai warayaja ajara taeraja bajiakutai Jesú tatuma kokotuka kwarika abanae. Ama jakutaisi kwarika, mate jakitane jakutaisi kwarika tane abanae. ²² Dio Kirito amojeku kokotuka abanae. Dio Kirito ikeresia arao kokotuka akwa tane abanae. ²³ Ikeresia arao jakutai tai Kirito atejo. Taisi atejotiji Kirito isia ikuátae tiaja bajia. Kirito ikwatayaja kokotuka ikwataya.

¹ Ateje yatu obojona asiraja Dio riboto jakutaisi eku, nona asirajasi eku tane muánae tiaja bajinae. Takore Dio yatu riko tane abanae. ² Ateje yatu obojona asirajasi eku naruae. Obojona are jakutaisi eku nonae. Yatu ajaka airamo aribu eku nonae. Tai jebu jakutai ama ribu eku abaonituma eku yaotaya. ³ Ateje oko kokotukarakate tatuma kawana ubayaja jajaoko. Obojona are jakutaisi aobojona eku nonaeko. Kaobonobu eku obonobiakutaisi eku nonaeko. Eobo aobojona asirame Dio ta-tuma isiko orijisiae. Monukajase kaisiko orijisiae. ⁴ Tiarone Dio akobe kaisia kwana ajerame kwana kaobonoae. ⁵ Tiame riko tane kabanae. Oko mate obojona asiraja Dio aribu riboto jakutaisi eku muánae tiakore Dio Kirito isiko riko tane kabanae. Dio aobojona ayakara isia yatu aobojona ibajukaya. ⁶ Dio Kirito Jesú isiko kenomininae. Taisi isiko najamutuata kenorujuae. ⁷ Tane nonae aobojona ayakara urirajawitu jakutai mate jakitane jakutaisi emikitane. Tane nonae kaisiko yakerajawitu nonayakutaisi emikitane. Kirito Jesú eku kaisiko yakerajawitu nonae. ⁸ Yatu nome abakore Dio oriaobojona ayakara isia yatu aobojona ibajukaya. Tai yatu isimoana. Tai nobeanaka tane Dio yatu moaya. ⁹ Yatu wite orianona isia bajukanaja, jisakarakate ine yakeraja tanaka jamejerei. ¹⁰ Oko Dio anona rijana. Kirito Jesú eku kabanae nona yakerajasi nonamejerei. Nona yakeraja jakutai, ateje Dio tatuma iyakaratae oko tatuma eku nonayaja kujumejerei. ¹¹ Yatu arijawarayatukamo are Judioana jaja. Tiame joro aseremo yatu isia rewarae. Tatuma joro aseremoana, tae. Tejowitu isiarone tane ribunae. Yatu aobojona tata nakakunarai. ¹² Taisiatukamo yatu Kirito emo bajinae. Yatu Israeltuma asebe emo bajinae. Dio ribu abane Israeltuma isiko ajutetuma nonae. Yatu ajutetuma Dio nonajakutaisi emo ina raisama arao tane bajinae. Yatu raina eku yawaka ekiraja, Dio omi tane bajinae. Yatu aobojona tata nakakunarai. ¹³ Ateje yatu utiraja jaja. Tiarone Kirito Jesú eku yatu Dio awere rijana, Kirito ajotu aobojona. ¹⁴ Kirito inareraja tane kabaya rijana. Warao reko jajasi warao jisaka tane abanae. Raukara oko abita abita bajemejereakutai Kirito taisi inatonae. ¹⁵ Kajotabu aribu, airamo akajotabu tane jakutaisi aobojona oko oriisiko asiraja bajinaeko. Tiarone Kirito atejo eku taisi iekoronae. Ebe warao manamo jaja jakutai ama warao jisaka tane nonae. Tai warao jakutai warao jiro. Tiame ama inareraja bajia. ¹⁶ Kirito warao manamo oriaobojona iabane tatuma Dio isiko yakeraja bajemejereae. Tane tejo jisaka tane ejobamejereae. Akuru isia wabane tatuma oriisiko asiraja jaku-taisi nae. ¹⁷ Kirito naone rewara yakerajasi rewarae. Yatu utiraja jakutaisi saba rewarae inareraja bajemejerei. Awere jakutaisi sabarakate rewarae inareraja bajemejerei. ¹⁸ Takore Judio ja-kutai Judioana jakutai tane reko Kirito isia Rimasiata nabaka-yaoko. Dio Amejokojira jisaka eku Rimasiata nabakayaoko. ¹⁹ Ateje yatu Dio ainayatukamoana monuka. Yatu sanuka saba emo nabakayakutaisi monuka. Tiarone ama yatu warao Dio saba emo abánae tiakutaisi isiko oriwarao tane nakae. Dio awarao tane nakae. ²⁰ Dio ainatabatuma, Dio kware arewaramo tane tatuma janoko noika aba tane abanae. Tatuma araimo yatu nonae, janoko monuka. Janoko ajoyoira jakutai, tai Jesu-kiritojase. ²¹ Kirito eku yatu orijika bajene janoko jisaka ejo-boya. Janoko jakutai Airamo eku iraya. Janoko akarituma kokotuka janoko jisaka ejoboya. Janoko jakutai Airamo saba emo abánae tiaja bajia. ²² Dio Kirito eku Oriamejokojira isia yatu orikware toane janoko jisaka nonaya. Janoko jakutai Dio aubanoko tane ejoboya.

¹ Tiame ine Pablo yatu kware ebiaine. Ine Kirito Jesú amojoju yatu Judioana jakutaisi saba. ² Dio yaota mamoae aobojona ayakara isia yatu inaminamejerei. Yatu taisi naminaya tai o naminanaja tai. ³ Dio ribu rijisa jakutaisi memusabayaja mainaminae. Ebe ine taisi isia sanuka jabataine. ⁴ Yatu makarata teribune yatu ribate: Pablosike ribu rijisa Kirito isia jakutaisi naminaya, tate. ⁵ Dio ateje ribu rijisa waraoto inaminanatanae. Tiarone ama Dio Amejokojira ribu rijisa Jesukirito ainatabatuma emusabae. Dio kware arewaramo jakutaisi emusabae. Inatabatuma, rewaramo tane Dio saba emo abánae tiaja ja. ⁶ Ribu rijisa jakutai, tai tamaja: Judioana jakutai Judio isiko nojomo rijana. Tatuma tejo jisaka rijana. Kirito Jesú eku, ribu abánae tiajasi anojomo rijana, rewara yakerajasi isia. ⁷ Dio oriaobojona ayakara nobeanaka tane mamoae. Dio ajarata meku yaotaya. Tiame ine rewara yakerajasi akajotabu tane bajinaine. ⁸ Warao Dio saba emo abánae tiaja jakutaisi kokotuka ayaju jakutai, ine taisi ayajuka sanuka. Tiarone oriaobojona ayakara mamoae rewara yakeraja Judioana jakutaisi saba rewaramejerei. Rewara yakeraja jakutai Kirito oriaobojona ayakara uriraja jakutaisi isia rewaraya. Tai katukane ja tai tane naminakomoni. ⁹ Ateje Dio Jesukirito isia kokotuka nonae. Tatukamo inawaja erajasi isia Dio ribu oriaobojona eku erijisae. Tiarone ama yaota ja ribu rijisa yakareku toakitane. Dio ayakara mamoae warao kokotuka saba ribu rijisa jakutaisi rewarayaja inaminamejerei. ¹⁰ Dio musaberaja jame obojona raisa raisa naminaya. Airamotuma, airamo aribu isiko ja jakutai tane tatuma najamutuata ja. Tatuma ikeresia araoto mine Diosike musa-berajaraji! tate. ¹¹ Atejeatukamo Dio tamajasi nonakitane isia oriaobojona abanae Kairamo Jesukirito isia. ¹² Kirito aobojona oko retanaka Dioata nabakaya. Oko Kirito isia nome abayame retanaka Dio isiko rewaraya. ¹³ Tiamesike ine yatu kware sanamataya. Tiame yatu ebiaine wakutanaka jamejerei. Ine sanamataya. Tiame yatu yakeraja ejobate. ¹⁴ Tiame ine Kairamo Jesukirito Arimasi amujaba jinamane rujane yatu kware ebiaine. ¹⁵ Najamutu arao, raina arao tane kokotuka Dioatamo wai mija, oriawai tane. ¹⁶ Dio ayakara uriraja ja. Tiame oriajarata isia Amejokojira yatu aobojona arotu tane bajemejerei ebiaine. Dio tametane nonamejerei ebiaine. ¹⁷ Obonokitane jakutaisi eku bajiaja yatu rau akarare monuka, janoko anamuna jonikamo abánae tiajasi monuka bajete. Tane yatu nome abakore Kirito yatu aobojona eku bajete. ¹⁸ Yatu taeraja bajene Kirito kaobonoyakutai yatu taisi yaorane naminamejerei ebiaine. Yatu warao Dio saba emo abánae tiakutai kokotuka isiko naminamejerei ebiaine. Kirito kaobonoyaja kawajeraja kaobonoya. Uriraja kaobonoya. Kwaimo kaobonoya. Noikamo kaobonoya tane. ¹⁹ Kirito kaobonoyakutai urirame yaorane naminakomonirone are yatu taisi naminamejerei ebiaine. Takore Dio kaikawitu jakutai yatu ikwatate, yaturakate taisi monuka kaikawitu ejobamejerei. ²⁰ Oko ebiakutai, obonobiakutai tane, tai kokotuka kaika nona-kitane Dio saba yakera. Taisi kwarikawitu nonakitane Dio saba yakera. Ajarata keku yaotayakutaisi kaika nonaya. ²¹ Tiame Kirito Jesú isia ikeresia araoto eku Dio Airamo tane bajekunarai. Ya mate jakitane jakutaisi saba are Airamo tane bajekunarai. Amén.

¹ Tiame ine yatu reiriaine: Dio yatu yejebuajakutai taisi eku yakeraja nonakotu. Ine rijana mojoju Airamo aobojona. ² Are eobo yajoto bajekotu. Are eobo isiko raoberaja jakotu. Oriyawakakotu. Obonoyaja eobo isiko taeratakotu. ³ Dio Amejokojira jakutai obojona jisaka eku kabaya. Are obojona jisaka eku inareraja bajekitane najabukotu. ⁴ Tejo jisaka ja. Dio Amejokojira jisaka ja. Dio yatu yejebuae obojona jisaka eku yawakamejerei. Tiame taisi eku bajekotu. ⁵ Airamo jisaka ja. Obojona jisaka isia nome abaya, obojona jisaka isiajase joni kobia tane. ⁶ Dio jisaka ja. Tai kokotuka Ario kokotuka Arima tane. Tai kokotuka kwarika, kokotuka ekia, yatu kokotuka eku tane. ⁷ Kirito oriaobojona ayakara jisaka jisaka kamoaya. Kirito oriaobojona kaika kamoaya. ⁸ Tiame Jabataja ribia: Tai yaburiaja oriamojoju tane mojoju erajasi konaruae. Anojobita waraoto moae, tia. (Rok. 68:18) ⁹ Yaburiaja tane ribakore katukanae? Yaburukitane ebisabuka joboto noikawitu nanakanae. Taneanara? ¹⁰ Nanakanajakutai taijase yaburuae. Yaburune najamutu kokotuka kwarika yaburuae kokotukanea ikwatakitane. ¹¹ Kirito ikeresia saba abanajakutai tai tamaja: Oriainatabatuma, Dio kware arewaramo, rewara yakerajasi arewaramo, nome abamo ayaoromo, inaminamo tane. ¹² Kirito tatuma abanae warao Dio saba emo abánae tiakutaisi yaorane inaminamejerei. Kirito tatuma abanae Dio anebu tane ejobane Dio saba ayaotamo jamejerei. Kirito tatuma abanae Kirito atejo eiramejerei. ¹³ Kirito tatuma abanae oko kokotuka nome abayaja, Dio Aukama yaorane naminamejerei. Tatuma abanae oko iramotayakutaisi monuka ejobamejerei. Tatuma abanae oko Kirito kaikawitu jakutai taisi eku kaikawitu ejobamejerei. ¹⁴ Dio oko mate nemokomoko tane bajemejerenaja. Nibo ja. Tatuma aribu eko isia rijisane najabia kaimasibukitane. Dio oko tatuma aribu eku abamejerenaja. Inamina yawatanuka jakutai ajaka monuka. Ajaka ebe nojaba yeneru yeneria. Dio oko tatuma ainamina ebe yeneru yenerumejerenaja. ¹⁵ Obonoyaja ribu nomerajasi rewarayaja suatana naruki. Nariaja yaorane iraki kakwa kaika ejobakitane. Kakwa jakutai, tai Kirito. ¹⁶ Tejo kokotuka jakutai tai akwayatamo orijika iraya. Tejo akono orieku bajene tenejisayaja tejo tane ejoboya. Tejo akarituma oriayaota eku orisanetayaja jisaka tane iraya. Orisanetayakore tejo iraya. Tejo akarituma oriobonoyaja tejo iraya. ¹⁷ Amasike maribu nokokotu. Airamo aribia kajotabiaine. Judioana eobo monuka kujukitane iabakotu. Tatuma obonobu eko jakutaisi eku kujuya. ¹⁸ Aobonobu imajana eku bajia. Uba jiro Dio moayakutai tatuma taisi emo. Naminanaja jame, obonobu taeraja jame tane emo bajia. ¹⁹ Anona asirajarone taisi isia obo-jona ekira. Anona asirajawitu nona eobo kwarika jakutaisi nami-nayarone iabakitane obononaja. Obojona ananeraja kokotuka jakutaisi nonakitane kwana obonoya. ²⁰ Tiarone yatu Kirito isia tane naminanatanae. ²¹ Yatu taisi isia nokonatanaera? Tane yatu taisi isimo naminanatanaera? Nome jakutai tai Jesú eku. ²² Obojona are jakutaisi jiwarakotu jiaka monuka. Obojona are jakutai obojona asirajasi obonoyaja oriimasibia. Oriimasibune asiraja kwarika ejoboya. ²³ Yatu aobojona yatu aobonobu tane ejirotakotu. ²⁴ Tane obojona jiro orisabakotu. Dio obojona nonae nomeraja jamejerei, Dio saba emo abánae tiaja tane bajemejerei tane. Obojona jiro jakutai Dio oriaobojona monuka nonae. Tiame obojona jiro orisabakotu. ²⁵ Oko rijana tejo jisaka akari. Tiame tona iabane, oriisia ribu nome ribakotu. ²⁶ Orijisine asirajasi nonanaka jakotu. (Rok. 4:4) Orijisine are orijisiraja ya ananaka jakotu. ²⁷ Jebuira saba moinaja tane abakotu. ²⁸ Ebe erijisayakutai, atae erijisanaka jakunarai. Erijisanaka amojo isia yakeraja nonayaja kwana yaotakunarai. Yaotane ekirakutaisi moakitane jate. ²⁹ Ribu ananeraja jisakarakate ribunaka jakotu. Tiarone ribu yakeraja, ribu eobo aobojona eirayaja tane ribakotu. Takore ribu anokomo yakeraja ejobate. ³⁰ Dio Amejokojira ekumoniraja tane abanaka jakotu. Dio Oriamejokojira Yakerajawitu asinarija tane kaisia abanae. Ya yaorane kejerokitane jakutaisi saba asinarija kaisia abanae. ³¹ Obojona asiraja iabakotu. Ajiajeraja bajekitane, kwana orijisikitane, orijisiraja bajekitane, wiyawiyakitane, oriisia asiraja ribakitane tane kokotuka iabakotu. Nona tametane jakutai kokotuka iabakotu. ³² Oriisiko raoberaja jakotu. Yatu akobe eobo isia ajeraja tane orisanetakotu. Yatu orisaba asiraja ejobakore orikware asiraja abanaka oriaobojona iabakotu. Dio yatu aobojona asiraja yatu kware abanaka yatu bereae. Dio sitayaja raisama kware asiraja abanaka yatu aobojona iabakotu.

¹ Yatu Dio anobotomo. Dio yatu obonoya. Tiame Dio sita-kotu. ² Kirito kaobonone kakware orimoae. Taisi monuka oriobonokotu. Kirito orimoae Dio saba nobeanaka tane. Dio saba romu nae tiakutaisi monuka orimoae. Takore ajonaba Dio saba yakeraja ejobonae. ³ Tiame yatu warao Dio saba emo abánae tiaja jakutai tatuse-bekitane o nibosebekitane eribunaka jakotu. Oriyamaretakitane eribunaka jakotu. Unukamo are obonokitane eribunaka jakotu. ⁴ Ribu tomaneraja jakutai yakerena. Ribu buretaja jakutai yakerena. Ribu awita sabana jakutai yakerena. Dio isia yakeraja jae takitane, taisike yakera. ⁵ Yatu tamajasi naminakotu. Dio arujuna rujuyakutaisiata tatusebe o nibosebe jakutai tata nojonatate. Maretatu jakutai nojonatate. Atae unukamo are obonotu jakutai nojonatate. Aunukamo are obonoyakutai tai diosita ayatomanetetu monuka. Dio arujuna rujuyakore Kiritorakate rujuya. Yatu tamaja ribu jakutaisi naminaya. ⁶ Raisa ribu eko isia yatu imasibuterate. Obojona asirajasi aobojona Dio warao ribu eku abaonituma jakutaisi isiko orijisiraja bajia. ⁷ Tiame yatu tatuma isiko kujunaka jakotu. ⁸ Ateje yatu imajana arao. Tiarone ama yatu jokoma arao Ai-ramo eku. Tiame jokoma arao monuka kujukotu. ⁹ Dio Ame-jokojira akwaja jakutai tai tamaja: Yakeraja kokotuka jakitane, nona nomeraja kokotuka nonakitane, ribu nomeraja kokotuka ribakitane tane. ¹⁰ Airamo saba yakeraja jakutai taisi naminakotu. ¹¹ Imajana araoto anona akwaja ekira. Tatuma anona eku nonanaka jakotu. Tiarone sabajikotu. ¹² Tatuma rijisane nonayaja tomaneraja nonaya. Tatuma anona isia eribiaja eribaturakate tomaneraja bajia. ¹³ Abije tatuma anona kokotuka sinajarayakore yaorane mija. Sinajarayakutai tai jokoma. ¹⁴ Tiame ribia: Ubatu, nominanu. Muanamo kawanamo karamanu. Karamakore Kirito jisinajarate, tia. ¹⁵ Oi! Naminajakutaisi ekuwitu nonayaja kujukotu. Nami-nanaka jakutaisi monuka kujunaka jakotu. Tiarone musaberaja kujukotu. ¹⁶ Yakeraja kujukitane ya wajanaka jakotu, ya asiraja jame. ¹⁷ Tiame obonobu ekiraja jakutaisi monukena jakotu. Tiarone Airamo aobojona katukane tai tane naminakotu ¹⁸ Bino isia awabanaka jakotu. Awabatu jakutai tai orietuwaranaja. Tiarone yatu Dio Amejokojira ajarata urirajasi eku bajekotu. ¹⁹ Jabatajasi arokotu isia orisaba rewarakotu. Dio arokotu isia orisaba rewarakotu. Obojona jiro arokotu isia orisaba rewara-kotu. Rokotu warayaja yatu akobe ekeirajasi isia Airamo saba kuitakotu. ²⁰ Ya kokotukanea Kairamo Jesukirito aribia yakeraja jae tane ribakotu. Kario Karima jakutai taisi isia kokotuka yakeraja jae tane ribakotu. ²¹ Oriakajotabu tane bajekotu, Dio yatomaneteame. ²² Nibo-rabakatuma, yatu Airamo akajotabu tane bajia. Taisi monuka yatu aniborama akajotabu tane bajekitane ja. ²³ Kirito jakutai tai ikeresia akwa. Monukajase anibora jakutai, tai tirasi akwa. Ike-resia arao jakutai Kirito atejo. Kirito jakutai ikeresia araoto aobojona Aibajukatu. ²⁴ Ikeresia arao Kirito akajotabu tane bajiakutai taisi monuka niborabaka jakutai wite aniborama akajotabu tane bajekunarai. Obojona kokotuka isia akajotabu tane bajete. ²⁵ Tirabakatuma, yatu atatusi obonokotu. Kirito ikeresia araoto obonoajakutai taisi monuka nibo atirasi obonokunarai. Kirito ikeresia araoto obonone orimoae kware wabakitane. ²⁶ Kirito orimoae ikeresia arao orisaba emo abakitane. Tiame oriaribu isia ikeresia araoto bereae. Jo isia jojarayakutaisi monuka jojarane bereae. ²⁷ Ikeresia bereae ikeresia yakerajawitu jajasi orimoa-kitane. Ikeresia beréae tiakutai amujoro waja ekira. Amukaba sorosoromoana. Atae asabana ekira. Orisaba emo abánae tiaja. Aobojona eku anana ekira. ²⁸ Tirabaka oriatejo obonoyakutai taisi monuka atirasi obonokitane ja. Atirasi obonoyakutai, wite oriobonoya. ²⁹ Jisakarakate oriatejo rarijatanaja. Tiarone wite oriatejo iaya. Oriatejo yaoroya. Monukajase Kirito ikeresia araoto iaya, yaoroya tane. ³⁰ Oko taisi atejo akaritiji kayaoroya. Tejo akari jakutai toma, muju tane. ³¹ Tiame nibora arima, arani tane iabane tirasi kaika nakate. Takore warao manamo jakutai tejo jisaka tane ejobate. (Awa. 2:24) ³² Tamaja inamina jakutai tai ribu rijisa uriraja. Ribu uriraja jajarone, Kirito isia ikeresia araoto isia tane rewarayaine. ³³ Tia-me wite oriobonoyakutai taisi monuka oriatirasi obonokunarai. Atira jakutai aniborama yatomanetekunarai.

¹ Nobotomo, yatu airamotuma aribu eku abakotu Airamo eku. Tane nonakitane yakera. ² Jirimasi jiranima tane yatomanete. Dio akajotabu kawanamo tametane ribia: Kajotabu eku abakore amoara ja, tia. (Kaj. 5:16) ³ Tane ribiakutaisi awajiabara jakutai tai tamaja: Oriairamotuma yatomanete yakeraja tane bajekitane. Yatomanetekotu raina eku inawaja eraja ubakitane, tane ribia. (Ejo. 20:12 Kaj. 5:16) ⁴ Airamotuma, yatu anobotomo notorinaka jakotu tatuma yatu aobojona orijisiraja tane ejobonaka jamejerei. Tiarone Airamo areiri isia ainamina isia tane enojotakotu. ⁵ Yatu raisama anebu jakutai, yatu airamo raina eku jakutaisi aribu eku abakotu. Retayaja tororoyaja tane kobe kokotuka isia airamo aribu eku abakotu. Raisama saba yaotayaja Kirito saba monuka yaotakotu. ⁶ Kawanamo yaota araoto amujaba yakeraja yaotaya. Yake-raja yaotaya yaota arao tai yakeraja, tane ribamejerei. Tane yao-takore yakerena. Yatu Kirito anebutiji yaorane yaotakotu. Yatu aobojona yakerajasi isia Dio aobojona eku abakotu. ⁷ Yaotayaja waraoto saba yaotayakutaisi monuka yaotanaka jakotu. Yatu akobe ekeiraja Airamo saba yaotayakutaisi monuka yaotakotu. ⁸ Yakeraja nonane Airamo isimo amoara nojote. Taisi nami-nakotu. Raisama aneburaturone amoara nojote. Raisama anebu-ratuanarone amoara nojote. ⁹ Yatu yaota arao, yatu anebu isia monukajase nonakotu. Tia-rokitane iabakotu. Airamo najamutuata jakutai taisike yatu anebu Airamo. Tai yatu Airamo tane. Taisi saba warao jisaka warao raisama kwarika jaja ekira. ¹⁰ Ina kokotukanea saba Airamo ajara taeraja ja. Tiame, mawarao, taisi kaika taeraja bajekotu. ¹¹ Orikubanoko Dio yatu moayakutai taisi kokotuka orisabakotu. Jebuira kabukakitane najabia. Taisi ribotakitane orikubanoko orisabakotu. ¹² Oko orikubayaja waraoto isiko orikubanaja. Jebu isiko orikubayaoko. Jebu airamotuma isiko orikubaya. Jebu akajotabumo isiko orikubaya. Ya tamaja asiraja jakutaisi eku jebu ina kokotukanea saba ajarata ja. Oko tatuma isiko orikubaya. Oko jebu asiraja najamutuata jakutaisi isiko orikubaya. ¹³ Tiame ya asirajasi eku oriribotakitane orikubanoko Dio moa-yakutai taisi kokotuka nisakotu. Tane oriiyakarata kokotuka riwa-raitane are tata taeraja bajekotu. ¹⁴ Tametane nonayaja taeraja bajekotu. Nome isia yatu akabea koyakotu. Nona nomerajasi isia yatu amejo makakotu. ¹⁵ Re-wara yakeraja warao inareraja tane abayakutai yatu omu isia abakotu. ¹⁶ Tamatuma kokotuka eku nonakotu. Tiarone tamaja-sisike eobo kwarika eku nonakotu. Nome abakotu. Nome abaki-tane jakutai tai orijisikaya abanoko tane ejoboya. Orijisikaya aba isia asiraja arotuma ajatabu rokiakutai kokotuka inarea. ¹⁷ Obo-jona aibajukanoko jakutaisi abakotu yaorotu ayasi monuka. Buariwari Dio Amejokojira isimo jakutai taisi nisakotu. Buariwari jakutai tai Dio aribu. ¹⁸ Ya kokotukanea are kwai ribakotu Dio Amejokojira eku. Kokotuka kware ebukotu. Tametane warao Dio saba emo abánae tiakutaisi kokotuka kware ebiaja, seoroyaja bajekotu. ¹⁹ Ine rewara yakerajasi aribu rijisa jakutaisi rewarayaine. Tiame makwarerakate Dio ebukotu ine retanaka rewaramejerei. Makware ebukotu Dio ribu mamoamejerei. Mamoakore ine yakeraja inaminamejerei tane ebukotu. ²⁰ Ine Jesukirito ainataba jakutai rewara yakerajasi aobojona mojoju rijana. Ine rewara yakerajasi rewarakitane jame makware ebukotu ine retanaka rewaramejerei. ²¹ Yatu maisia naminakitane obonote. Tiame Tíquico inata-baine maisia kokotuka yatu saba rewaramejerei. Tíquico jakutai tai nome abatu ine obonoyakutai. Tai Airamo aribu eku abayaja Airamo akajotabu tane yaotaya. ²² Yatu maisia nokokitane obo-noyame taisi inatabaine kaisia yatu saba rewaramejerei. Aribu nokone yatu akobe tuwaramejerei inatabaine. ²³ Dio Karima jakutai, Airamo Jesukirito jakutai tane nome abamo inareraja tane abakunarai. Nome abamo nome abayaja oriobonoyaja tane bajemejerekunarai. ²⁴ Kairamo Jesukirito are iabanaka obonoyakutai, Dio oriaobojona ayakara tatuma koko-tuka moakunarai. Amén.