ANONA

ANONA

¹ Teófilo yakerajasi saba karata jabatayaine. Makarata awajia-bara eku Jesú isia jabataine. Jesú anona awajiabarayatu-kamo kokotuka, ainamina awajiabarayatukamo kokotuka tane isia jabataine. ² Awajiabarayatukamo kwai yaburukitane jaku-taisi isia jabataine. Jesú najamutuata narukitane ebika ainataba-tuma mibune nisanaeyama. Nisane tatuma nonakitane jakutaisi isia inaminae. Amejokojira Yakerajawitu tatuma inaminamejerei abanaeyama. ³ Tane Jesú oriasanamata nokabuka riko ejobaitane tatuma oriemusabae. Ya mojorekotuma manamonamojase isia eraja tane oriemusabaeyama. Yakeraja oriemusabajame tatuma nome abanaka bajekomoni. Dio arujuna rujuyakutaisi isia rewaraeyama. ⁴ Tane Jesú mate ainataba isiko jaja tatuma reiriae Jerusalén tatukamo narunaka jamejerei. Ribane: Rima yatu ribu moae. Ribu moajakutaisi isia yatu saba rewaraine. Ribu eku nakamejerei yawakakotu. ⁵ Nomewitu Juan jakutai joni ekobuae. Tiarone tamatukamo ya erayana jakore Dio Oriamejokojira Yakerajawitu eku yatu ekobate, taeyama. ⁶ Takore ainatabatuma Jesú isiko orikware nakane renokoae-yama. Ribane: Kairamo, rijana asinarija ekuanara iji Israeltuma eobo amojekumo ejerokitane? Takore tatuma oriaina airamo tate, taeyama. ⁷ Takore Jesú tatuma riboto ribane: Taisi nonakitane jakutai Marimawitu ribu ja. Katukakore nonate tai tane yatu taisi naminakitane ribu ekira. ⁸ Tiarone Mejokojira Yakerajawitu yatu-ata naote. Tai naokore yatu jarata nojote. Nojoitane ejobate maisia rewarakitane. Jerusalén tata narute. Ina Judea kokotukanea tata narute. Ina Samaria tata narute. Raina akariata narute maisia rewarakitane, taeyama. ⁹ Taitane Jesú oriaribu rewara riwaranae. Riwarakore mate Jesú mijakore Dio Jesú kobukane najamutuata konaruaeyama. Ajakojoko eku Jesú soto taeyama. Takore tatuma taisi minata taeyama. ¹⁰ Jesú kwai yaburiakore are iamo seoroyaja bajiakore nibo manamo tatumeta ejobonae. Nibo jakutai ajiaka jokeraja. ¹¹ Nibo tatuma isia ribane: Galilea arao, yatu katukeme kwai seoroyaja bajia? Tamaja Jesú yatuatukamo kwai yaburuaja-kutai taijase atanejese naote. Anaru yatu miajakutai taisi monukajase naote, taeyama. ¹² Takore inatabatuma Jota Oriwa Arauina tatamo joika nanakanaeyama. Ekiajase Jerusalén tata bajinaeyama. Ajojisi jakutai utirena. Jojisi aito jakutai ya tuwara eku jakakitane jakutaisi kaika. ¹³ Jerusalén tata nabakane ajanokoata kwai yaburuae aubanokoata. Tata aubamo jakutaisi awai: Pedro, Jacobo, Juan, Andrés, Felipe, Tomás, Bartolomé, Mateo, Jacobo Alfeo auka jakutai. Atae Simón Ina Airamo Riboto sabasabamo jakutai. Atae Judas Jacobo araka jakutai. ¹⁴ Tatuma kokotuka are obojona jisaka eku bajene orikware nakae kwai ribakitane, Dio ebukitane tane. Eobo isiko orikware nakae. Eobo jakutai Jesú arakatuma, Jesú arani, tatu eobo taneyama. ¹⁵ Orikware nakajakutaisi asebe siento jisaka kware mojore-kotuma manamo monuka. Takore Pedro awaraoto autu kara-mane ribunaeyama. ¹⁶ Ribane: Mawarao, ateje David Dio Amejokojira Yakera-jawitu aobojona Judas isia rewarae Jabataja eku. Aribu kaika nakakitane tane ejobonae, taeyama. Judas jakutai Jesú emojo-jutamo akonarutu. ¹⁷ Judas jakutai kasebe ekumo jisaka. Tai kaisiko yaotae. ¹⁸ Eobo Judas anona nomeana jakutaisi amoara Judas amojeku abanaeyama. Takore burata nisane, narune taisi isia joboto amoara abanae. Taitane kwaimo kwajaya nakane, akobe sibane, aobono jiri taeyama. ¹⁹ Takore Jerusalén arao kokotuka taisi naminane joboto awai tane Acéldama abanae. Acéldama waraoto aribu isia ribia Jotuina. ²⁰ Rokotu akarata eku ribu ja. Ribia: Ajanoko raoana bajekunarai. Janoko arotu ekiraja bajekunarai, tia. (Rok. 69:25) Atae ribu ja. Warao raisa taisi ayaota eku nakakunarai, tia. (Rok. 109:8) ²¹ Kaisiko warao ja. Kairamo Jesú kaisiko kujuyakore tatuma are kaisiko jaja. ²² Juan joni ekobuajakutaisiatukamo Dio Jesú kobukanajakutaisiata ru takore tatuma are kaisiko jaja. Tatuma kawanamo jisaka mibune nisakitane jaoko kaisiko bajemejerei. Kaisiko bajete Jesú anominina isia rewarakitane, taeyama. ²³ Takore nibo manamo tejomonaeyama. Jisaka awai José, Barsabás tiakutai. Taisi awai raisa Justo. Araisama awai Matias. ²⁴ Takore inatabatuma kwai ribiaja ribane: Kairamo, iji warao kokotuka aobojona naminaya. Tamatuma kawanamo jisaka jisaba yakerakutaisi kemi. Tai kaisiko yaotate. ²⁵ Judas jakutai anona kajotabu ekuana jakutaisi aobojona ayaota rijanae. Taisi saba yakeraja jakutai taisiata naruae. Sina yakera rijana Judas riboto inataba tane yaotakitane? taeyama. ²⁶ Tane kotubukore Matias awai ejobonae. Tatukamo tai inatabatuma mojoreko kware jisaka jakutaisi isiko kaika ejobonaeyama.

¹ Takore Pentecostés aya nakakore kokotuka obojona jisaka eku nakane janoko jisaka eku bajinaeyama. Tatuma aobo-jona jisaka. ² Takore rijana akuita uriraja najamutuatamo naoya-kore nokoaeyama. Akuita jakutai ajaka kwana jakayakutaisi akuita monuka kuitaeyama. Tane janoko eku norujúae tiakutaisi kayanaeyama. ³ Jekunu monuka kayanaeyama. Jekunu monuka jakutai jono akari esibínae tiaja monuka. Ejobane warao jisaka jisaka isia bajiaeyama. ⁴ Takore tatuma kokotuka Dio Amejokojira Yakerajawitu ajarata urirajasi eku bajinaeyama. Ribu raisa naminanajarone ribakitane jotananae. Mejokojira ribamejereakutaisi eku tatuma rewarae. ⁵ Tai ya eku Jerusalén tata Judiotuma eraja ja. Ina kokotu-kaneayatukamo Jerusalén tata Dio yatomanetekitane naoaeyama. ⁶ Ribu raisa raisa ribiakore, eobo nokoitane mikitane orikware nakae. Jisaka jisaka oriaribu nokoitane aobonobu sebeaeyama. ⁷ Kokotuka nokoitane kwana retaubuaja bajibuaeyama. Aobojona eraja ejobonae. Ribane: Ribamo jakutai tatuma Galilea araoanara? ⁸ Amasike katukeme kaina aribu isia ribia oko nokomejerei? ⁹ Tamatuka jakutai Partia arao, Media arao, Elam arao, Mesopotamia arao, Judea arao, Capadocia arao, Ponto arao, Asia arao tane. ¹⁰ Eobo Frigia arao, Panfilia arao, Egipto arao tane. Ina Libia arao ja ina Cirene kemosa-bukayatukamo. Atae Roma arao tamate aubamo jakutai. Judio-tuma jakutai. Judioanarone Judiotuma ayajoraba ayajoraba-morakate. ¹¹ Atae eobo ja: Creta arao, Arábia arao tane. Oko karibu raisa raisarone tatuma Dio anona taerajasi isia rewarayakore oko karibu isia nokoyaoko, taeyama. ¹² Tatuma kokotuka kwana retaubuaja bajinae. Ribane: Ama oko katukate? Tamaja katukayaja bajama? taeyama. ¹³ Tiarone eobo ribane: Tatuma amuanaja ja, taeyama. ¹⁴ Takore Pedro inataba mojoreko kware jisaka isiko autu karamane kwana rewaraeyama. Ribane: Judea arao, kokotuka Jerusalén eku ubayakutai tane, maribu nokokotu. Maribu isia yatu aobojona abakotu. ¹⁵ Yatu ribia: Tamatuma amuanaja ja, tia. Mate ya kwai sabuka jame, amuanaja ekira. ¹⁶ Tamaja nona raisa. Dio kware arewaratu Joel ateje jabatajakutaisi eku nakae rijana. Joel ribane: ¹⁷ Dio ribia: Ya ayaju eku Mamejokojira warao kokotuka eku esojotine. Yatu anobotomo nibo, yatu anobotomo tatu tane makware rewarate. Nebu jakutai amu eku Dioatukamo jaja ejobakore mite. Iramo jakutai musibute. ¹⁸ Tai ya eku Mamejokojira manebu nibo eku, manebu tatu eku tane esojotine. Takore tatuma makware rewarate. ¹⁹ Kwai najamutuata mianare emitine. Joika raina eku sinarija tane abatine. Sinarija jakutai tai jotu, tai jekunu, tai jejuku tane. ²⁰ Ya jakutai imananate. Waniku jakutai jotu monuka bajete. Airamo aya eku mate nakamoana jakore, tane ejobate. Airamo aya jakutai uriraja. Taisi mikore emoninakawitu bajia. ²¹ Takore kokotuka Airamo awai warayakutai Dio tatuma aobojona ibajukate, tia, taeyama. (Joel 2:28-32) Tane Pedro rewarae. ²² Pedro are rewarayaja ribane: Israeltuma, maribu nokokotu. Jesú Nazaret arotu jakutai yatu kawanaya Dio aribia naoae. Nona taeraja nonae. Mianare nonae. Sinarija nonae tane. Nona tatuma jakutai Dio aribia nonae. Yatu taisi anona naminaya. ²³ Ateje-atukamo Dio kokotuka naminayame oriaobojona eku abanae eobo Jesú yatu amojeku abamejerei. Yatu amojeku abakore akarimo kajotabu atainamo amojeku abanae esijarene namejerei. ²⁴ Nae-rone Dio taisi enomininae. Waba asanamata ekumo ejeronae. Waba jakutaisi ajarata ekira taisi kwarikakitane. ²⁵ Ateje airamo David taisi isia rewarayaja ribunae. Ribane: Airamo are mamu jisika jakore miaine. Tai mamojonome tajasaba jame, raisarakate merikokomoni. ²⁶ Tiame makobe ekeiraja bajinae. Majono ribu ekeiraja ribunae. Matejo yawakayaja tuwarate. ²⁷ Ine jineburatu jisaba emo abánae tiakutai. Waba atuwaranoko eku maobojona iabanatate. Tiame matejo koimejerenatate. Tiame ine tuwaraya. ²⁸ Iji obojona jiro ajojisi mainaminae. Iji mawerejame iji ekeirajawitu tane mabaya. (Rok. 16:8-11) Tane David ribunae. ²⁹ Suatana Pedro rewarayaja ribane: Mawarao, amasike ine ribakitane yakera ine rijana. Kanobo David wabakore taisi joi-taeyama. Ajoitanoko are kakaika ja. ³⁰ Tiarone David jakutai tai Dio kware arewaratu. Dio oriawai warayaja ribu David moae David aukama isia. Dio ribane: Jinobotomo kawanamo jisaka airamo tane rujate jimonuka. Tai jakutai Akirito, taeyama. Takore David Dio aribu yajorabae. ³¹ Mate Dio aribu eku nakamoanarone David naminae. Kirito anominina isia rewarae. Tiame ribane: Iji waba atuwaranoko eku maobojona iabanatate. Matejo koimejerenatate, taeyama. (Rok. 16:10) ³² Amasike tamaja Jesú jakutai, Dio taisi enomininae. Oko taisi amimo. ³³ Tatukamo Dio amojonome isia taisi kobukaitane airamo uriraja tane abanae. Takore Arimasi aribu kaika nakakore tai Rimasi isimo Mejokojira Yakerajawitu nojoae. Jo esojoyakutaisi monuka Jesú Amejokojira Yakerajawitu yatu eku esojoae. Ama yatu taisi miae, taisi nokoae tane. ³⁴ David jakutai najamutuata yaburunatanae. Tiarone Davidjase ribunae. Ribane: Airamo Mairamo isia ribunae: ³⁵ Jisaba asiraja jakutai tai jiomu noika abatine. Mate abanaja jakore mamojonome tajasaba rujanu, tae, taeyama. (Rok. 110:1) ³⁶ Israeltuma kokotuka tamaja ribu yaorane naminakitane ja. Tamaja Jesú yatu esijariajakutai Dio Airamo tane taisi abanae. Akirito tane abanae. Tane Pedro rewaraeyama. ³⁷ Takore tatuma Pedro aribu nokone aobonobu eraja ejobo-nae. Takore ribu anokomo jakutai Pedro atae inatabatuma eobo tane jakutaisi renokobuae. Ribane: Kawarao, oko katukate rijana? taeyama. ³⁸ Takore Pedro ribane: Yatu jisaka jisaka obojona ibarekotu Jesukirito aribia yatu joni ekobamejerei. Takore Dio yatu aobo-jona asirajasi yatu kware abanaka berete. Takore Jesú Mejo-kojira Yakerajawitu nobeanaka tane yatu moate. ³⁹ Tamaja ribu yatu saba, yatu anobotomo saba tane. Utiraja jakutaisi saba. Warao kokotuka Kairamo Dio yejebiakutaisi saba, taeyama. ⁴⁰ Tamaja ribu isia ribu eobo isia tane Pedro tatuma reiriae-yama. Ribane: Warao ama jakutai jojisi kasikasi ekia anarumo. Tatuma kawanamo ejobakotu, taeyama. ⁴¹ Takore Pedro aribu eku abamo jakutaisi joni ekobuaeyama. Tai ya eku nome abamo jiro asebe sinarijaira rijanamoama. Tane nome abamo asebe irae. ⁴² Nome abamo kokotuka inatabatuma ainamina eku are taeraja bajinaeyama. Orikware nakane obojona jisaka bajinae. Bãu nakarine najoroae. Kwai ribunae tane. ⁴³ Warao kokotuka retaubuaja bajibuaeyama. Atae inatabatuma mianare eraja, sinarija eraja tane nonaeyama. ⁴⁴ Nome abamo kokotuka oriisiko bajene aunukamo jakutai warao kokotuka aunukamo tane ejobonae. ⁴⁵ Ajoboto wabine aunukamo wabine tane kokotuka orimoae ekirakutaisi kaika. ⁴⁶ Ya kokotukanea are obojona jisaka eku bajene kwai ribunokoata orikware nakae-yama. Janokoya kujuyaja bãu nakarine najoroaeyama. Ekeiraja airamo tane oritoayajenaka tane najoroaeyama. ⁴⁷ Dio yakeraja jae tane ribunaeyama. Tatuma eobo kokotuka saba yakeraja ejobo-naeyama. Ya kokotukanea Airamo waraoto aobojona ibajukau-bune ikeresia araoto asebe eiraeyama.

¹ Takore ya jisaka eku Pedro Juan tane kwai ribunokoata naruae. Kwai ribakitane jakutaisi asinarija eku naruaeyama. Ya bara jirii takore naruaeyama. ² Tatuma tata narune wakawaka jakutaisi miae. Tai arijawarayatukamo are wakawaka jaja. Ya kokotukanea eobo taisi konane janoko akojo awere abanaeyama. Janoko akojo awai Yakeraja. Takore wakawaka jakutai janoko eku ayarumo ebuae burata moamejerei. ³ Pedro, Juan tane kwai ribunoko eku yarukitiakore wakawaka jakutai tatuma mitane ebuae burata moamejerei. ⁴ Ebukore Pedro Juan tane taisi yaorane miaeyama. Pedro ribane: Kami rijana, taeyama. ⁵ Takore wakawaka jakutai yaorane tatuma miae burata moate tanabayatiji. ⁶ Tiarone Pedro ribane: Inesike maburata ekira. Maburata simorakate ekira. Tiarone ine ja jakutai taisi jimoatine. Jesukirito Nazaret arotuma aribia karamane naru rijana, taeyama. ⁷ Tane Pedro taisi amojonome oane ikaramunae. Takore rijana omu, omuru tane taeraja ejobonaeyama. ⁸ Taeraja ejobakore tai kau tane, karamunae. Taitane narukitane jotananaeyama. Tane tatuma iamo kwai ribunoko eku nariaja, burobiaja, Dio yakeraja jae tane ribiaja tatuma iamo yaruaeyama. ⁹ Tane nariaja Dio yakeraja jae tane ribiakore warao kokotuka taisi miaeyama. ¹⁰ Mitane burata ebutu kwai ribunoko akojo Yakeraja jaku-taisiata rujúnae tiakutairaji! Tane naminaeyama. Tiame nonajaku-taisi mitane tatuma aobojona eraja ejobane retaubuaja bajibuae-yama. ¹¹ Wakawaka bajukaitane Pedro Juan tane jakutaisi oanae-yama. Takore warao kokotuka retane tatumeta kurujubuaeyama. Amasike kwai ribunoko ajotobasa awai Salomón Anona jaku-taisiata jaja. ¹² Tane takore Pedro tatuma mitane ribane: Israel-tuma, yatu katukeme tamaja nona aobojona retaya? Katukeme yaorane kamija? Tamaja nona kanona tanabaya tai. Oko kajara taeraja jame wakawaka narumejereae tanabaya tai. Oko Dio aya-tomanetemo jame wakawaka narumejereae tanabaya tai. ¹³ Tane-ana. Dio jakutai tai kanobotuma Ario, Abraham Ario, Isaac Ario, Jacob Ario tane. Dio jakutai Oriauka Jesú Airamo tane abanae. Yatu airamotuma amojeku Jesú abanae. Pilato taisi ejerokitane obonoaerone yatu Pilato amujaba taisi tainae. ¹⁴ Taisike yakerajawitu, nomerajawitu tane. Tanerone yatu taisi tainane akobaka ejeromejerei ebuae. ¹⁵ Tane nonane obojona jiro amoatu naubuae. Tiarone wabaerone Dio taisi enomininae. Okosike taisi anominina amimo. ¹⁶ Takore Jesú awai isia nome abanajame tamaja nibora taeraja ejobonae. Jesú awai aobojona bajukanae. Yatu ama taisi mija, taisi naminaya tane. Jesú jakutai nibora nome abamejerea jame yaorane taisi ibajukanae. Yatu kokotuka taisi mija. ¹⁷ Mawarao, yatu atae yatu airamotuma tane Jesú sina tai tane naminanaka nae. Taisi naminayaine. ¹⁸ Ateje Dio kware arewa-ramo kokotuka ribunae: Akirito naone sanamatakitane ja, tae-yama. Dio yatu taisi isanamatamejereae aribu eku nakamejerei. ¹⁹ Tiame yatu aobojona ibarekotu. Dio sabasabaya ibarekotu. Takore Airamo Dio yatu aobojona asirajasi berete. Ya mate jakitane jakutaisi eku Airamo jakutai yatu asirajasi ekumo nisane yakerajasi eku yatu abate. ²⁰ Atejeatukamo Jesú isia yatu saba rewarayaja jaja. Jesú jakutai tai Akirito. Airamo taisi inatabate. ²¹ Dio mate kokotuka jiro tane nonamoana jakore are Jesú najamutuata bajekitane ja. Dio kware arewaramo yakeraja ateje ubajakutai tatuma tamajasi rewarae. Dio oriaribu tatuma aroko eku abanae rewaramejerei. ²² Moisés jakutai kanobotuma saba rewarae. Ribane: Yatu Airamo Dio jakutai jisaka inatabate. Kware arewa-ratu tane inatabate. Inatabakitane jakutai tai yatu ajisaka. Dio kware arewaratu jakutai mamonukajase jate. Takore taisi aribu kokotuka eku yatu abate. ²³ Rewaratu jaku-taisi aribu eku abanaja jakutai, tai Israeltuma ekumo nisane iekorate, taeyama. (Kaj. 18:15, 19) Moisés tane rewarae. ²⁴ Amasike Dio kware arewaramo kokotuka Samuelatukamo ya tamajasi isia rewarae. ²⁵ Dio rewaramo ribu moae. Ribu moajakutai tai yatu saba. Dio kanobo isia ajute nonae. Ajute nonajakutai taisike yatu saba. Dio Abraham isia ribunae. Ribane: Jinoboto aobojona raina arao kokotuka yakeraja bajete, taeyama. (Awa.12:3) ²⁶ Takore rijana Dio Oriaukama inatabayaja wajiabara yatu tata inatabae. Yatuata inatabae Auka yatu yakeraja tane abamejerei. Yatuata inatabae yatu jisaka jisaka yatu aobojona asirajasi iabamerejei, taeyama. Tane Pedro rewaraeyama.

¹ Pedro Juan tane mate waraoto saba rewarayakore saserotetuma naoaeyama. Saserotetuma isiko kwai ribunoko ayaoromo airamo, Saduceotuma tane naoaeyama. ² Pedro, Juan tane waraoto inaminayame tatuma orijisiaeyama. Pedro, Juan tane Jesú wabaerone anominina isia inaminayaja waraorakate nominite tane inaminae. Tiame eobo orijisiaeyama. ³ Tane tatuma emojojutane mojojutanoko eku abanaeyama. Ya anayame ubajokane saba iabanaeyama. ⁴ Takore ribu anokomo eraja nome abanaeyama. Nome abamo asebe, nibowitu jakutai, tai sinarijaira mojoabasiama. ⁵ Takore ya araisamaya Judio airamotuma Jerusalén eku ori-kware nakaeyama. Orikware nakajakutai tamaja: Judio airamo-tuma, airamotuma eobo, kajotabu akarata ainaminamo tane. ⁶ Atae Anás. Tai saserote airamowitu. Atae Caifás, Juan, Alejandro tane. Atae saserote airamowitu awarao eraja tane. ⁷ Tatuma orikware nakane Pedro, Juan tane konamejereaeyama. Konakore autu abane renokoaeyama. Ribane: Yatu sinama aribia tamajasi nonae? Yatu wai kasikaja waranae tamajasi nonakitane? taubu-aeyama. ⁸ Takore Pedro Dio Amejokojira Yakerajawitu ajarata urira-jasi eku jame ribane: Waraoto airamotuma, Israeltuma airamo-tuma tane, maribu nokokotu. ⁹ Nibora wabayakutaisi isia yakeraja nonajakutai, yatu taisi isia renokoya. Tamaja katukane bajukanae tai tane isia yatu karenokoya. ¹⁰ Yatu tane karenokoyakore yatu saba rewaratine rijana. Yatu kokotuka naminamejerei, Israeltuma kokotuka naminamejerei tane rewaratine. Nibora jakutai baju-kánae tiaja tamatuka ja yatu amujaba. Jesukirito Nazaret arotuma awai aobojona bajukanae rijana. Yatu Jesukirito esijariae. Tia-rone wabaerone Dio taisi enomininae. ¹¹ Jesú jakutai Jabataja aribu eku nakae. Jabataja taisi isia ribia: Yatu janoko anonamo jakutai joyo tainae. Joyo yatu tainajakutai tai janoko ajoyoira tane ejobonae, tia. (Rok. 118:22) ¹² Atae jisakarakate kaobojona ibajukanaja. Dio raina araoto awai jisakarakate waranatanae kaobojona ibajukamejerei, tae-yama. ¹³ Pedro, Juan tane tatuma retayajenaka rewarayakore airamotuma miaeyama. Tatuma inaminanoko eku teribúae tiajena jajasi naminaeyama. Tatuma warao are jakutai taisi naminaeyama. Tiame retaubuaeyama. Tane renokone Jesú iamo akujumo jakutaisi naminaeyama. ¹⁴ Nibora bajukanajakutai tai autu karamúnae tiaja ja. Tiame tatuma ekira tane ribakomoni. ¹⁵ Tane Pedro Juan tane emo inatabae orireirikitane. ¹⁶ Ribane: Ama katukate oko? Jerusalén arao kokotuka tamaja sinarija jakutaisi isia nokoae. Ekira takomoni. ¹⁷ Ribu suatana waraoto kawanaya jakanaka jamejerei tatuma tijaroteko. Oi, tamatukamo Jesú awai raisama saba rewaraterate, tateko, taeyama. ¹⁸ Tane tatuma yejebune kajotabuae Jesú awai raisama saba rewaranaka, awai isia inaminanaka tane jamejerei. ¹⁹ Tiarone Pedro, Juan tane tatuma riboto ribane: Obonobukotu. Ribu kasikaja Dio saba yakera? Oko yatu aribu eku abakitane yakera mojoro? O oko Dio aribu eku abakitane yakera? ²⁰ Oko miajakutai nokoajakutai tane ribunaka bajekomoni, taeyama. ²¹ Takore airamotuma kwana tatuma tijarone ejeronaeyama. Anona kware yewerekitane ekira. Nonajakutaisi aobojona warao kokotuka Diosike yakeraja jae, tane ribunaeyama. ²² Nibora jakutai taisi ainawaja mojorekotuma manamonamojase kwarika jaja-yama. Jajarone niborama isia sinarija nonajame bajukanaeyama. ²³ Pedro, Juan tane ejerokore awaraotoata naruaeyama. Sase-rote airamotuma, waraoto airamotuma tane ribunajakutai taisi kokotuka awaraoto saba rewaraeyama. ²⁴ Takore aribu nokone kokotuka obojona jisaka eku Dio saba kwai ribunaeyama. Ribane: Karotu, iji Dio jakutai kokotuka anonatu. Iji najamutu nonae, raina nonae, nojaba nonae tane. ²⁵ Ateje iji jiribu David aroko eku abanae rewaramejerei. David jakutai jikajotabu. David ribane: Israel araoana jakutai katukeme wiyawiyaya? Waraotuma katukeme ribu eko isia obonobia? ²⁶ Raina airamotuma oriiyakaratae orikubakitane. Waraoto airamotuma orikware nakae orikubakitane. Tatuma jakutai Airamo isiko, Akirito isiko tane oriku- bakitane obonoae, taeyama. (Rok. 2:1-2) ²⁷ Nomewitu Herodes, Poncio Pilato tane eobo isiko orikware nakae. Tamaja janokoina eku orikware nakae. Judioana isiko Israeltuma isiko tane orikware nakae. Jiauka Jesú yakeraja jakutai, iji toi jonaberajasi isia taisi yanajonae. Tatuma taisi riboto orikware nakae. ²⁸ Iji ateje jiaobojona isia, jijarata isia tane mate nonakitane jakutaisi abanae. Iji abanajakutai taisi eku nonakitane tatuma orikware nakae. ²⁹ Kairamo, katijaroyakutaisi anona mi rijana. Oko jinebu jakutai kasanetau retanaka jiribu rewaramejerei. ³⁰ Muanayakutai bajukamejerei jijara ejanu. Jiauka Jesú yakerajasi aribia sinarija, mianare tane ejobamejerei jijara ejanu, taeyama. ³¹ Taitane tatuma kwai ribu riwarakore ajanoko rikoaeyama. Tatuma jakutai tai janoko eku orikware nákae tiaja jaja. Tatuma kokotuka Dio Amejokojira Yakerajawitu ajarata urirajasi eku bajinajame, retanaka Dio aribu rewaraeyama. ³² Takore nome abamo asebe obojona jisaka eku, obonobu jisaka eku tane bajinaeyama. Jisakarakate oriaunukamo orisaba waninatanae. Tiarone unukamo jakutai warao kokotuka aunu-kamo tane bajinaeyama. ³³ Inatabatuma ajara taeraja Airamo Jesú anominina isia are rewaraeyama. Dio aobojona ayakara uriraja nome abamo kokotuka isiko bajinaeyama. ³⁴ Tatuma kawanaya aunukamo ekiraja jaja ekira. Joboto arao ajoboto wabine o ajanoko wabine amoara konae. ³⁵ Konane inatabatuma moae aunukamo ekirakutaisi moaubumejerei. ³⁶ Amoatu jisaka awai José. Tai Leví ajisaka. Tai burujo Chipre arotu. Inatabatuma taisi awai tane Bernabé tane abanaeyama. Wai Bernabé jakutai waraoto aribu isia ribia: Kobe Etuwaratu, tia. ³⁷ Bernabé jakutai ajoboto jajasi wabiaeyama. Wabine amoara konane inatabatuma omu awere abanaeyama.

¹ Atae nibora raisa jajayama. Awai Ananias. Atirasi awai Safira. Tatuma ajoboto jajasi wabiaeyama. ² Wabine amoa-ra akari orisaba nisanaeyama. Burata bajinajakutai kokotuka monuka konarune inatabatuma omu awere abakitane naruae-yama. Atira jakutai aniborama anona kokotuka naminayaja jajayama. ³ Ananias burata abakore Pedro ribane: Ananias, iji Dio Amejokojira Yakerajawitu saba tona ribunae. Joboto amoara akari orisaba emo abanae iji. Satanás katukeme jiaobojona ikwa-tae iji tane nonamejerei? ⁴ Joboto jakutai ijianara? Wabikore amoara jiburatenara? Iji katukeme emo obonobuae bajama? Iji tona waraoto isia ribunatanae, tiarone Dio isia tona ribunae, tae-yama. ⁵ Takore rijana Ananias Pedro aribu nokone wabane joika nakaeyama. Kwaeabanajakutaisi anokomo kokotuka kwana retaubuaeyama. ⁶ Takore nebu naone, Ananias atejo makane joitakitane konaruaeyama. ⁷ Tatukamo ya asinarija rijanamo ru takore Ananias atira naoaeyama. Kwaeabanajakutaisi naminanaka janoko eku yaruae-yama. ⁸ Pedro taisi renokoyaja ribane: Ribanu. Yatu joboto wabiajakutaisi amoara kokotuka mojoro? taeyama. Takore tira ribane: Amoara kokotuka, taeyama. ⁹ Pedro ribane: Yatu katukeme obojona jisaka eku abanae Airamo Amejokojira ayakara mikitane? Jiniborama joitakitane konaruajakutai tatuma yakareku ja. Ijirakate jikonarute, taeyama. ¹⁰ Takore rijana tirarakate Pedro amujaba wabane joika nakaeyama. Nakakore nebu yarune waba miaeyama. Tane kona-rune aniborama awere joitaeyama. ¹¹ Amasike ikeresia arao kokotuka, kwaeabanajakutaisi anokomo kokotuka tane kwana retaubuaeyama. ¹² Takore inatabatuma waraoto kawanaya sinarija eraja, mia-nare eraja tane nonae. Kokotuka obojona jisaka eku janoko ajo-tobasa Salomón Anona jakutaisiata orikware nakaeyama. ¹³ Tia-rone eobo retayaja tatuma isiko orikware nakaobononatanae-yama. Tiarone warao tatuma isia yakeraja rewaraeyama. ¹⁴ Warao eraja nome abajame Airamo awaraoto asebe irae. Nibo tatu tane eraja nome abaubuaeyama. ¹⁵ Eobo muanayakutaisi konane janokoina anaru eku abanaeyama. Aubanoko eku abanae o ayajinoko arai abanaeyama. Pedro muanamo awerea kwaeabayakore Pedro amejokoji muanayakutaisi kwarea jakamejerei abanaeyama. ¹⁶ Warao eraja janokoina Jerusalén awerea aubamorakate Jerusalén tata naobuaeyama. Muanayaja jakutaisi konaubuaeyama. Warao jebu Dio saba wisi jakutaisi isiko jaja jakutaisi konaubuaeyama. Takore kokotuka bajukaubuaeyama. ¹⁷ Takore saserote airamowitu isiko Saduceo sabasabamo jakutai tatuma jajayama. Tatuma kokotuka inatabatuma temia-jiaeyama. ¹⁸ Tane inatabatuma emojojutane mojojutanoko asirajasi anonamo saba jakutaisi eku abanaeyama. ¹⁹ Emojojutakore Airamo ainataba imaya narune mojojutanoko akojo ijakane tatuma ejeronaeyama. ²⁰ Ejerone ribane: Narune kwai ribunoko eku nokaramakotu. Ribu kokotuka obojona jiro isia jakutai tai waraoto saba rewa-rakotu, taeyama. ²¹ Takore aribu nokone ya araisamaya jokona anejeko kwai ribunoko eku yaruaeyama. Yarune, inaminakitane jotananae. Inaminayakore saserote airamowitu anebu isiko ribu nome atoamo orikware toae. Tatuma ribu nome atoamo jakutai, atae Israel-tuma airamo kokotuka. Tane orikware nakaitane inatabatuma konamejereae. ²² Konamejerekore yaoromo mojojutanokoata naruae tatuma konakitane, tiarone ekira. Takore ekiajase yao-romo naoae eobo enokokitane. ²³ Ribane: Oko mojojutanoko yaorane mukorónae tiakore miaeko. Ayaoromo akojoata yaoroyakore miaeko. Tiarone akojo ijakakore tatuma ekirae, taeyama. ²⁴ Takore saserote airamo, kwai ribunoko ayaoromo airamo, saserote airamo sabuka tane tatuma aribu nokoaeyama. Nokoitane aobojona eraja ejobaitane orirenokoae. Ribane: Katu-kakore tamaja ekorate bajama? taeyama. ²⁵ Tatuma mate ribia-kore nibora jisaka nabakane ribane: Nibo yatu emojojutajakutai tatuma kwai ribunokoata waraoto saba rewarayaja ja, taeyama. ²⁶ Takore yaoromo airamo anebu isiko narune tatuma konae-yama. Tiarone isanamatanatanae. Warao joyo isia yaoromo timite tanabayame nojaeyama. ²⁷ Tane inatabatuma konane ribu nome toanoko araoto amujaba abanaeyama. Amujaba abakore saserote airamowitu tatuma isia ribunaeyama. ²⁸ Ribane: Oko yaorane yatu kajotabuae tai wai warayaja ina-minanaka jamejerei. Ama yatu katukanae? Yatu ainamina Jeru-salén kokotukanea kayanae. Yatu tamaja niborama awaba ka-kware abakitane obonoya, taeyama. ²⁹ Takore Pedro inatabatuma eobo isiko riboto ribunaeyama. Ribane: Oko waraoto aribu eku abanaka Dio aribu eku abakitane ja. ³⁰ Yatu Jesú kuru isia esijarene nae. Tiarone kanobo Ario taisi enomininae. ³¹ Ama Dio taisi kwai abanae. Amojonome tajasabaya abanae. Airamo tane, obojona Aibajukatu tane taisi abanae. Taisi abanae Israeltuma aobojona ibaremejerei aobojona asirajasi tatuma kware abanaka berekitane. ³² Oko tamajasi isia arewaramo. Dio Amejokojirarakate tamajasi isia arewaratu. Eobo Dio aribu eku abakore Dio Oriamejokojira Yakerajawitu tatuma moaya, taeyama. ³³ Takore Pedro aribu nokoitane kwana orijisine obojona jisaka eku abanae tatuma kubakitane. ³⁴ Tiarone airamo kawa-namo Bariseo jisaka jaja awai Gamaliel. Gamaliel jakutai tai kajotabu akarata ainaminatu. Tai warao kokotuka saba raomata jaja. Tai karamane inatabatuma sanuka saba yakareku iejobame-jereaeyama. ³⁵ Ejobakore airamotuma saba rewarae. Ribane: Israeltuma, oi! Tamatuma isia asiraja nonaterate! ³⁶ Ebe kwaeabanajakutaisi isia yatu aobojona nakakunarai. Kaje sabuka nibora awai Teudas ejobonae. Airamo tane oritoayaja naoae. Anebu asebe siento manamonamojase monuka. Tiarone taisi nakore aribu eku abamo kokotuka jisajisane ekoronae. ³⁷ Tatu-kamo waraoto asebe sinarijakore atae raisa ejobonae. Awai Judas. Tai Galilea arotu. Anebu eraja ejobonae. Tiarone taisirakate nae. Nakore aribu eku abamo kokotuka jisajisae. ³⁸ Tiame ine ribia: Tamatuma iabakotu, tiaine. Aribu waraoto isimo jakore ekorate. ³⁹ Tiarone aribu Dio isimo jakore yatu taisi iekorakomoni. Oi! Dio riboto orikubaterate! taeyama. ⁴⁰ Takore tatuma Gamaliel aribu eku abanaeyama. Tane inatabatuma yejebune, yewerene tane kajotabuae Jesú awai warayaja rewaranaka jamejerei. Taitane tatuma ejeronaeyama. ⁴¹ Takore ribu nome toanoko araotoatukamo ejobonaeyama. Jesú awai aobojona Dio tatuma sanamatamejereajame ekeiraja ejobonaeyama. ⁴² Tatukamo ya kokotukanea are inaminaeyama. Kwai ribunoko eku, janokoya tane rewara yakerajasi rewarae-yama. Rewara yakeraja jakutai taisike Jesú jakutai tai Akirito, tane rewaraeyama.

¹ Tatukamo nome abamo asebe iraeyama. Irakore Grecia aribu aribamo Ebereo aribu aribamo tane oriaribu kwarikakitane jotananaeyama. Tatuma ribane: Ya kokotukanea najoro moaubiaja tatu tewere kasabasabamo jakutai taisi yaorane moanaja, taubuaeyama. ² Inatabatuma mojoreko kware manamo tatuma aribu nokone nome abamo kokotuka orikware toaeyama. Isia ribane: Oko Dio aribu iabane najoro moaubukitane yakerena. ³ Tiame, kawarao, nibo mojoabasi kware manamo yatu kawanamo najabukotu. Nibo arewara yakeraja jaja. Nibo musaberaja, Mejokojira Yakerajawitu ajarata urirajasi eku jaja tane najabukotu. Takore tamaja yaota tatuma amojeku abateko. ⁴ Okosike kwai ribakitane Dio aribu inaminakitane tane bajeteko, taeyama. ⁵ Tamaja ribu kokotuka aobojona eku nakaeyama. Taitane nibo mibune nisanaeyama. Nisajakutai tai tamaja: wajiabara Esteban. Esteban jakutai tai yaorane nome abayaja jaja. Dio Amejokojira Yakerajawitu ajarata urirajasi eku jaja tane. Eobo jakutaisi awai Felipe, Prócoro, Nicanor, Timón, Parmenas, Nicolás tane. Nicolás jakutai tai janokoina Antioquia arotu. Tai Judioanarone Judiotuma ayajoraba ayajorabatu jakutai. ⁶ Takore nisaitane inatabatumeta konaruaeyama. Konarukore inatabatuma kwai ribaitane amojo tatuma arai abanaeyama. ⁷ Tatukamo Airamo aribu kayanaeyama. Jerusalenyata nome abamo asebe kwana iraeyama. Saserote kawanamorakate eraja nome abanaeyama. ⁸ Takore Esteban yaorane nome abayaja jaja. Dio Esteban ajara taeraja tane abanaeyama. Tiame Esteban waraoto isia mia-nare uriraja, sinarija tane nonaeyama. ⁹ Nonakore eobo Esteban aribu kwarikakitane jotananaeyama. Aribu akwarikamo jakutai orikware nakanoko arao. Orikware nakanoko awai jakutai Oko Raisama Anebuana. Akwarikamo eobo ina Cirene arao, jano-koina Alejandria arao tane. Atae ina Cilicia arao kawanamo, ina Asia arao kawanamo taneama. ¹⁰ Mejokojira Esteban musabe-raja tane abanaeyama. Esteban musaberaja rewarajame tatuma Esteban aribu kwarikakomoni ejobonaeyama. ¹¹ Aribu kwarika-komoni jame burata raisama moae Esteban isia asiraja ribame-jerei. Esteban Moisés isia asiraja rewarayakore nokoaeko. Dio isia asiraja rewarayakore nokoaeko, tamejerei, burata moae-yama. ¹² Tametane waraoto ewiyawiyaeyama. Waraoto airamo-tuma, kajotabu akarata ainaminamo tane ewiyawiyaeyama. Takore tatuma Esteban tijakane oane tane ribu nome toanoko araotoata konaruaeyama. ¹³ Tane tatuma aribu eko arewaramo najabuae rewaramejerei. Ribane: Tamaja kwai ribunoko yakeraja jakutaisi isia are asiraja ribia. Kajotabu akarata isia are asiraja ribia. ¹⁴ Jesú Nazaret arotu jakutai kwai ribunoko iekorate tane ribiakore nokoaeko. Kanobo namínae tiakutai tai Moisés akarata eku ja. Jesú jakutai taisi kambiatate tane ribiakore nokoaeko, tae-yama. ¹⁵ Takore airamotuma ribu nome atoamo kokotuka tata noru-júae tiakutai tatuma Esteban amu miaeyama. Amu Dio ainataba amu monúkau tiakore miaeyama.

¹ Takore saserote airamowitu Esteban renokoaeyama. Ribane: Tamaja jikware abayakutai nomeanara? taeyama. ² Takore Esteban ribane: Yatusike mawarao, mairamotuma tane. Maribu nokokotu. Kario, ajokoma eku ubayakutai, kanobo Abraham oriemusabaeyama. Abraham mate ina Mesopotamia arai jaja. Mate ina Harán tata ubakitane narumoana jakore Dio taisi orie-musabaeyama. ³ Isia ribane: Jiaina iabane, jiwaraoto iabane tane ina ine jiemikitane jakutaisi tata naru, taeyama. (Awa. 12:1) ⁴ Takore Abraham ina Caldeatukamo narune ina Harán tata ubakitane nabakanaeyama. Abraham arima wabakore Dio Abra-ham tamaja ina tata konaeyama. Ina yatu ama eku ubayakutai taijase. ⁵ Tamate konaerone joboto moanatanaeyama. Omu saba-rakate moanatanaeyama. Tiarone mate moakitane ribu moaeyama. Abraham mate anobotomo ekirarone Dio ribane: Iji wabakore ina jakutai jinobotomo aina tane bajete, taeyama. ⁶ Suatana Dio ribane: Jinobotomo ina raisama araoanarone, tata arao tane ubate. Tai ina arao tatuma orianebu tane abate. Inawaja siento manamonamojase isia isanamatate, taeyama. ⁷ Suatana Dio ribane: Ina arao Israeltuma orianebu tane abanajakutai tatuma sanamata saba abatine. Takore jinobotomo tatamo ejo-bane tamatuka makajotabu tane bajete, taeyama. (Ejo. 3:12) ⁸ Dio ajute nonae Abraham isiko. Ajute asinarija jakutai joro serekitane. Tiame Abraham auka Isaac nakakore aya mojoabasi kware rijanamo jakore Abraham aukama ajoro serenaeyama. Isaac monukajase auka Jacob ajoro serenaeyama. Jacob anobotomo ajoro serenaeyama. Jacob anobotomo jakutai tatuma Israel awaraosebeira mojoreko kware manamo airamotuma. ⁹ Jacob anobotomo jakutai tatumasike kanobotuma. Tatuma José temiajine raisama isia wabiae Egipto tata konarumejerei. Tiarone Dio José yaoroaeyama. ¹⁰ Sanamata kokotuka ebikamo José ejeronaeyama. Dio José musaberaja tane abanaeyama. Egipto airamo, Faraón jakutai, taisi aobojona eku nakamejereae-yama. Faraón jakutai José Egipto akobenajoro tane abanae-yama. Airamo oriajanoko arao kokotuka airamo tane abanae-yama. ¹¹ Tatukamo nojoira ejobonajame ina Egipto tata, ina Canaán tata tane kwana sanamataeyama. Kanobo anajoro ekiraja ejobo-naeyama. ¹² Egipto tata najoro ja tane Jacob nokoaeyama. Nokoitane anobotomo inatabae najoro nisamejerei. Anobotomo jakutai kanobotuma. Tamaja anaru wajiabara. ¹³ Atanejese naru-kore José tatuma oriemusabaeyama. Takore Faraón José awarao isia nokoaeyama. ¹⁴ Takore José jakutai arima Jacob atae awa-rao kokotuka tane yejebiaja ribu inatabae naomejerei. Tatuma asebe siento ajabasi kware mojorekotuma manamo kware mojo-abasi. ¹⁵ Takore Jacob Egipto tata narune, tata ubane wabae-yama. Kanobotuma muanaeyama. ¹⁶ Tatuma amuju Siquem tata konaruae joitakitane. Ateje joitanoko Abraham nisanajakutai taisi eku tatuma amuju joitaeyama. Tai ebe Abraham jakutai oriaburata Hamor anobotomo moae joitanoko nisakitane. ¹⁷ Dio oriawai warayaja ribu Abraham moae. Ribu moajakutaisi asinarija eku nakakitiakore Israeltuma asebe iraeyama. Egipto tata eraja ejobonaeyama. ¹⁸ Asebe irakore airamo raisa Egipto airamo tane ejobonae. Airamo jakutai José naminanatanaeyama. ¹⁹ Airamo jakutai kawaraoto saba ribu nome monuka tatuma saba rewarayaja imasibuaeyama. Kanobo isanamataeyama. Ajorosimo jakutai emo webotamejereae muanamejerei. ²⁰ Tai airamo jakore Moisés jakutai rijawaraeyama. Tai Dio saba yakeraja. Jorosimo arimasi ajanoko eku waniku rijanamo isia yaoroaeyama. ²¹ Tiarone emo inatabakitane jakore Faraón aukatira Moisés mitane oriajanokoata konaruae oriauka tane yaorokitane. ²² Tiame Egipto araoto ainamina kokotuka jakutai Moisés taisi naminaeyama. Aribu taeraja, anonarakate taeraja tane ejobonaeyama. ²³ Takore Moisés ainawaja mojorekotuma manamonamojase jakore awaraoto mikitane obonoaeyama. Awarao jakutai tai Israeltuma. ²⁴ Ejobakore Egipto arotu Israel ajisaka isanamata-yakore miaeyama. Mitane karamane awarao sanamatayakutaisi amoara abayaja Egipto arotuma naeyama. ²⁵ Moisés obonobiaja ribane: Dio mawaraoto airamo tane mabanae. Raisama amoje-kumo ejerokitane jaine. Ine ina Egipto arotuma nakore tatuma manaminate, taeyama. Tane naerone tatuma naminanatanae-yama. ²⁶ Ya araisama eku Israeltuma manamo oriisiko orikuba-yakore miaeyama. Tatuma aobojona iabamejerei isia ribane: Yatu oriwarao. Yatu katukeme orisanamataya? taeyama. ²⁷ Takore araisama aisanamatatu jakutai Moisés jarajene ribane: Sina kairamo tane jiabanae? Sina jiabanae karibu nome toamejerei? ²⁸ Iji kaje Egipto arotuma nae. Ama monu- kajase manate mojoro? Iji katukate? taeyama. (Ejo. 2:13-14) ²⁹ Takore Moisés taisi aribu nokone ina Madián tata jakanae. Tatuka arotuanarone tata ubaeyama. Tata anobotomo manamo rijawaraeyama. ³⁰ Tatukamo inawaja mojorekotuma manamonamojase kwaeabanaeyama. Tata jotakwa Sinaí ja. Taisi awere Moisés jarawaja eku jakore Dio ainataba Moisés oriemusabaeyama. Rau sanuka rokiakutaisi ajekunu eku oriemusabaeyama. ³¹ Miajakutaisi aobojona Moisés retaeyama. Tane rau sanuka sabasaba naruae yaorane mikitane. Awere nabakayakore Airamo aribu Moisés isia ribunaeyama. ³² Ribane: Ine jinobotuma Ario. Ine Abraham Ario, Isaac Ario, Jacob Ario tane, taeyama. (Ejo. 3:6) Takore Moisés ribu nokone retane tororokitane jotananaeyama. Tiame suatana yaorane mi obononatanae. ³³ Takore Airamo ribane: Joboto iji sakayakutai tai joboto masaba emo abánae tiaja jame, jisabato jiomu isimo nisanu. ³⁴ Mawarao Egiptoata jakutai taisi asana miaine. Tatuma eribiakore nokoaine. Ine nanakanaine rijana tatuma ejerokitane. Nao rijana. Egipto tata jiainatabakitine, taeyama. (Ejo. 3:7-8,10) ³⁵ Ebe tatuma Moisés tainayaja isia ribane: Sina airamo tane jiabanae? Sina karibu nome atoatu tane jiabanae? taeyama. (Ejo. 2:14) Tane tatuma tainaerone ama Dio Moisés airamo tane inatabae. Aejerotu tane inatabae. Ainataba rau sanuka eku oriemusabaja-kutai tai Moisés inatabae. ³⁶ Tamaja Moisés jakutai kanobo Egipto tatamo iejobonaeyama. Mianare, sinarija tane nonae-yama. Ina Egipto tata nonaeyama. Nojabaira Simo tata nonaeyama. Jarawaja tata nonaeyama. Inawaja mojorekotuma manamo-namojase isia tane nonaeyama. ³⁷ Moisés Israeltuma isia ribunajakutai tai tamaja. Dio kware arewaratu yatuata inatabate. Dio kware are-waratu jakutai mamonukajase jate. Tai yatu kawanamo jisaka. Yatu taisi aribu eku abate, taeyama. (Kaj. 18:15) ³⁸ Israeltuma jarawaja tata jakore Moisés tatuma isiko jajayama. Kanobo isiko jaja. Dio ainataba jota Sinaí tatamo rewarakore Moisés jajayama. Dio aribuwitu riko jakutai taisi nojoae akarimo moayaja okoata nabakamejerei. ³⁹ Tiarone kanobotuma Moisés aribu eku abakitane obonona-tanaeyama. Egipto isia obonobune Moisés jarajene ekiajase baje-kitane obonoaeyama. ⁴⁰ Warao Aarón isia ribane: Diotuma kasaba nonau. Tatumasike kebika narute. Moisés ina Egipto tatamo kanisanajakutai tai katukanae tai tane naminanajaoko, taeyama. (Ejo. 32:1,23) ⁴¹ Taitane baka auka asita nonaeyama. Romu kubae nobeanaka tane diosita moakitane. Oriamojo isia nonajakutaisi teoriwa-kayaja bajibuaeyama. ⁴² Takore Dio tatuma ebikamo naritabinae. Najamutu akura yatomanetemejerei Dio tatuma iaba-naeyama. Tametane Dio kware arewaramo akarata eku jabátae tiaja ja. Israeltuma, yatu inawaja mojorekotuma manamonamo-jase isia jarawaja eku bajinae. Romu kubae. Nobeanaka konae. Yatu moajakutai masabara? ⁴³ Masabena. Yatu ariosita Moloc jakutaisi ajanoko enese-rao kokujuae. Yatu ariosita Renfán akurasita jakutaisi kokujuae. Yatu wite tatuma asita nonae yatomanetekitane. Tiame ine yatu aina ekumo nisane ina Babilonia kemo yatu inatabatine, tia. (Amós 5:25-27) ⁴⁴ Moisés janoko eneserao asita miaeyama. Dio Moisés kajo-tabiaja ribane: Janoko eneserao asita iji miajakutai taisi mo-núkau tane nonau, taeyama. Tai janoko eneserao jakutai kano-botuma kaika bajinae jarawaja eku. ⁴⁵ Moisés janoko eneserao kanobotuma anobotomo amojeku abanae. Tatukamo kanobotuma ina eku yaruajakutaisiata janoko eneserao konaruaeyama. Kanobotuma Josué iamo naruae ina orisaba nisakitane. Takore Dio ina araoto kanobotuma ebikamo webotonae. Josueatukamo David tata ru tane are janoko eneserao kanobotuma amojeku bajinae. ⁴⁶ David jakutai Dio saba yakeraja ejobonae. David Jacob Ario saba tuwaranoko nona obonoaeyama. ⁴⁷ Tiarone Salomonsike janoko nonae Dio saba. ⁴⁸ Dio Kokotuka Kwarika jakutai janoko yatomanetenoko waraoto anona jakutai taisi eku ubanaja. Dio kware arewaratu taisi isia jabataeyama. ⁴⁹ Ribane: Najamutu jakutai tai marujunoko. Raina jakutai momu abanoko. Airamo ribia: Janoko kasikaja masaba nonate? Matuwaranoko kasaba? ⁵⁰ Tamaja kokotuka manonenara? tia, taeyama. (Isa. 66:1-2) ⁵¹ Esteban suatana rewarae. Yatusike aobojona taerajaraji! Niborama ajoro serekitane jakutaisi monuka yatu aobojona seramoanaraji! Yatu akojokorakate seramoanaraji! Yatu are Dio Amejokojira Yakerajawitu riboto. Yatu yatu anobotuma monu-karaji! ⁵² Yatu anobotuma Dio kware arewaratu jisakarakate isanamatanaka bajinatanae. Ateje rewaramo Nomerajawitu jaku-taisi anao isia rewarae. Yatu anobotuma jakutai rewaramo kubae. Nomerajawitu jakutai naokore yatu taisi wabine naubuae. ⁵³ Yatu Dio akajotabu Dio ainatabatuma isimo nojoaerone yatu kajotabu eku abanatanae, taeyama. ⁵⁴ Takore Esteban aribu nome atoamo Esteban aribu nokone orijisiaeyama. Kwana orijisiajame Esteban riboto ai kuo-kuoae. ⁵⁵ Tiarone Esteban Dio Amejokojira Yakerajawitu aja-rata urirajasi eku jaja kwai seoronaeyama. Seorane Dio ajokoma miae. Jesú Dio amojonome tajasabaya karamúnae tiakore miae-yama. ⁵⁶ Esteban ribane: Mikotu. Najamutu emuránae tiakore miaine. Warao tane nakajakutai Dio amojonome tajasabaya karamúnae tiakore miaine, taeyama. ⁵⁷ Tiarone aribu anokomo oriakojoko sijakaeyama. Tane kwana rokojotayaja Esteban tijakanaeyama. ⁵⁸ Janokoina ekumo emo toane joyo isia timiaeyama. Kware abane arewaramo oriajiaka neburatu amojeku iabanaeyama. Neburatu awai Saulo. ⁵⁹ Eobo Esteban timiakore Esteban kwai ribiaja ribane: Mairamo Jesú, mamejokoji oanu, taeyama. ⁶⁰ Taitane jinamane rujane kwana rokojotaeyama. Ribane: Airamo, tatuma anona asiraja jakutai tatuma kware abanaka jau, taeyama. Tane wabaeyama.

¹ Esteban nakore Saulo saba yakeraja ejobonaeyama. Tai ya eku Jerusalén aikeresia araoto kwana isanamatakitane jotananaeyama. Nome abamo kokotuka ina Judea ekia ina Samaria ekia tane jisajisaeyama. Inatabatumawitu bajinaeyama. ² Warao Dio ayatomanetemo jakutai Esteban joitaeyama. Kwana yaonaeyama. ³ Tiarone Saulo ikeresia kwanawitu isanama-taeyama. Janokoya yarune nibo tatu tane iawarai konaruae emojojutakitane. ⁴ Tiarone jisajisajakutai kokotukanea naruae rewara yakera-jasi rewarayaja. ⁵ Tatuma kawanamo jisaka awai Felipe jakutai janokoina Samaria tata naruaeyama. Tata Akirito isia rewara-kitane jotananaeyama. ⁶ Samaria arao obojona jisaka eku bajene Felipe aribu yaorane nokoaeyama. Felipe sinarija nonayakore miaeyama. ⁷ Jebu Dio saba wisi jakutai tatuma asebe eraja jajayama. Tatuma kwana rokojotayaja waraoto ekumo ejobonae-yama. Wakawaka eraja, kakabe eraja tane bajukaubuaeyama. ⁸ Tiame Samaria arao ekeiraja bajinaeyama. ⁹ Tiarone tata nibora jisaka awai Simón jajayama. Tai jano-koina eku Simón jakutai wisiratu jaja. Simón ajoa isia orija-wanayaja Samaria araoto eretaeyama. Airamo uriraja tane ori-toayaja tatuma kwana eretaeyama. ¹⁰ Janokoina arao kokotuka taisi aribu yaorane yajorabae. Airamo, atae airamoana tane taisi aribu yajorabayaja ribane: Tamajasi awai Dio Ajarata Uriraja, taeyama. ¹¹ Simón ya eraja ajoa isia orijawanayaja waraoto kwana ere-tajame aribu eku abanaeyama. ¹² Tiarone Felipe rewara yakera-jasi rewarayaja Dio arujuna rujuyakutaisi isia, atae Jesukirito awai isia tane rewarae. Takore nibo tatu tane Felipe arewara eku abakore joni ekobuaeyama. ¹³ Simón jakutai tairakate arewara eku abakore joni ekobunaeyama. Takore Simón Felipe amua-raisatakitane jotananae. Felipe sinarija nonayakore o nona taeraja nonayakore miae. Mitane kwana retayaja bajinaeyama. ¹⁴ Takore inatabatuma mate Jerusalén tata jaja jakutai Samaria arao Dio aribu oaubuae tane nokoaeyama. Nokoitane Pedro, Juan tane inatabae Samaria tata narumejerei. ¹⁵ Tatuma tata nabakane nome abamo Samaria tata jakutaisi kware kwai ribuae Dio Amejokojira Yakerajawitu nojomejerei. ¹⁶ Mate jisakarakate Dio Amejokojira Yakerajawitu ekira. Airamo Jesú aribiawitu joni ekobunaeyama. ¹⁷ Takore Pedro, Juan tane amojo tatuma arai abakore Mejokojira Yakerajawitu nojoaeyama. ¹⁸ Inatabatuma amojo eobo arai abakore, Mejokojira Yake-rajawitu nojoyakore Simón taisi miaeyama. Mitane Simón burata inatabatuma moakitane obonoaeyama. ¹⁹ Ribane: Ribu mamoakotu, inerakate mamojo raisama arai abakore Mejokojira Yakerajawitu nojomejerei, taeyama. ²⁰ Takore Pedro ribane: Dio nobeanaka tane moayakutai burata isia nisanaja. Iji burata isia nisaya tane obonobia. Tiame iji jiburata tane rijakunarai. ²¹ Jiaobojona Dio saba yakerena jame iji kakaika bajekitane jisaba ribu ekira. Iji kasaba-sabamoana. ²² Tiame jiaobojona asirajasi ibarenu. Dio ebiaja ribanu: Maobonobu maobojona ekumo jakutai makware abanaka bere, tau. ²³ Jinona asirajawitu aija ajiajeraja jakutaisi monuka tane naminayaine. Iji jinona nomerajena jakutaisi amojoju, taeyama. ²⁴ Takore Simón jakutai Pedro riboto ribane: Yatu makware Airamo ebukotu iji ribiakutaisi eku nakanaka jamejerei, tae-yama. ²⁵ Tatukamo inatabatuma ebe miajakutaisi isia rewarayaja Airamo aribu rewaraeyama. Taitane ina Samaria ajanokoina erajasi ekia rewara yakerajasi rewaraeyama. Rewaraitane Jerusalén tata bajinaeyama. ²⁶ Tatukamo Airamo ainataba Felipe isia ribunae. Ribane: Karamane ya jajaya kajamojo sabasaba naru. Jerusalén tatukamo Gaza tata anarunoko ja. Tai jojisi ekia naru, taeyama. Jojisi jakutai jarawaja ekia nariaja jajayama. ²⁷ Takore Felipe karamane naruaeyama. Jojisi ekia nariaja ina Etiopia arotuma miaeyama. Tai tirabakakomoni jaja. Nibora jakutai ina Etiopia airamo sabukayama. Ina airamowitu jakutai tai tira. Tirasi awai Candace. Airamo tira jakutai oriaburata kokotuka ayaorotu tane nibora abanaeyama. Nibora Jerusalén tata Dio yatomanetekitane naruitane ekiajase aina tata nariaja jajayama. ²⁸ Tai raubarabara eku rujúnae tiaja Isaias akarata teribiaja naoae. Isaias jakutai ateje Dio kware arewaratu. ²⁹ Takore Mejokojira Felipe isia ribane: Raubarabara awere nabakane awerea naru, taeyama. ³⁰ Takore Felipe raubarabara awerea nariakore nibora Dio kware arewaratu Isaias akarata teribiakore nokoaeyama. Tane Felipe renokoae: Iji teribiakutaisi nokoyara bajama? taeyama. ³¹ Takore: Katukane nokote? Yakeraja masaba rewarakitane ekira, taeyama. Tane Felipe ebuae yaburune awere rujamejerei. ³² Jabataja akari teribiakutai tai tamaja. Obeja monuka konaruae nakitane. Obeja auka ajiji wijikitane konariakore inareraja bajia. Taisi monuka taisi konariakore ribunatanaewitu. ³³ Isanaubuae. Aribu are nome toanaka konaruae. Taisi anobotomo isia sina rewarate? Naetiji raina eku bajinaja rijana, tia. (Isa. 53:7-8) ³⁴ Takore airamo sabuka jakutai Felipe renokoyaja ribane: Dio kware arewaratu sinama isia rewaraya? Wite oriisia rewa-rayara? O raisama isia rewaraya? Masaba rewarau, taeyama. ³⁵ Tane renokokore Jabataja aribu teribiakutaisiatukamo Felipe Jesú arewara yakerajasi isia rewaraeyama. ³⁶ Rewarawakati takore joibi miaeyama. Airamo sabuka ribane: Mi. Tamatuka jo jae. Joni mekobakitane yakerenara? taeyama. ³⁷ Takore Felipe ribane: Iji jiaobojona kokotuka isia nome abakore yakera, taeyama. Nibora Felipe riboto ribane: Jesukirito jakutai tai Dio Auka. Taisi nome abayaine, taeyama. ³⁸ Ribaitane araubarabara tuwaramejereaeyama. Tuwarakore Felipe, atae airamo sabuka tane, reko joni nanakanaeyama. Tai-tane Felipe niborama ekobunaeyama. ³⁹ Jonimo wajaka nabaka-kore Airamo Amejokojira Felipe emo konaruaeyama. Tatukamo airamo sabuka jakutai Felipe minatanaeyama. Tiarone ajojisi ekia suatana oriwakayaja naruaeyama. ⁴⁰ Felipe jakutai jano-koina Azotoata ejobonaeyama. Janokoinatuma kokotuka ekia nariaja rewara yakerajasi rewaraeyama. Tane rewarayaja janokoina Cesarea tata nabakanaeyama.

¹ Saulo jakutai Airamo isia nome abamo jakutaisi are tijaroae nakitane. Tane saserote airamowituata naruaeyama ribu ebukitane. ² Janokoina Damasco tata narukitane obonoaeyama. Tiame karata ebuae orikware nakanokotuma airamotuma saba. Tamaja Jojisi araoto najabune mitane emojojutakitane obonoae-yama. Nibo, tatu tane najabukitane obonoae emojojutane Jeru-salén tata konarukitane. ³ Tane nariaja jojisi autu Damasco awere jakore rijana najamutuatamo jokoma taisi kwarea sinajaranaeyama. ⁴ Takore joika nakaeyama. Kwaimo ribiakore nokoaeyama. Ribane: Saulo, Saulo, katukeme maisanamataya? taeyama. ⁵ Takore Saulo taisi renokoae: Mairamo, iji sina bajama? taeyama. Ribu ribane: Ine Jesú. Iji isanamatayakutai, tai ine. Iji rau ejiróae tiajasi riboto kajuria monuka. Iji tane nonayame jisaba asiraja ejoboya, taeyama. ⁶ Saulo retayaja tororoyaja ribane: Mairamo, iji katukane ine nonamejerea? taeyama. Airamo ribane: Karamane janokoina eku yaru. Iji nonakitane jakutai tata jisaba rewarate, taeyama. ⁷ Nibo Saulo iamo nariakutai nomewitu ribu nokoae. Noko-aerone warao jisakarakate minatanaeyama. Tiame ribuoni monuka bajinaeyama. ⁸ Takore Saulo joikamo karamane amu emurane amena mikomoni bajinaeyama. Eobo taisi amojo oane Damascoata konaruaeyama. ⁹ Takore ya rijanamo isia minaka, najoronaka, jobinaka tane bajinaeyama. ¹⁰ Takore Damasco arotu jaja nome abatu. Awai Ananias. Takore Ananias amu eku Airamo ejobane ribane: Ananias, tae-yama. Takore: Jã. Tamatuka ine, Mairamo, taeyama. ¹¹ Airamo ribane: Janokoina anaru ja awai Nomeraja. Kara-mane tata naru. Judas ajanokoata renoko: Tamatuka Tarso arotu awai Saulo jakutai ja mojoro? tau. Tata Saulo kwai ribiaja ja. ¹² Kwai ribiaja amu eku niborama miae. Taisi awai Ananias. Ananias janoko eku yarune Saulo arai amojo abaya atanejese seoramejerei, taeyama. ¹³ Takore Ananias Airamo aribu nokone riboto ribane: Mai-ramo, eraja tamaja niborama isia masaba rewarae. Jerusalén tata warao jisaba emo abánae tiakutaisi isanamataeyama. ¹⁴ Ribu saserote airamotuma isimo nisane tamatuka naoaeyama. Jiwai warayakutai kokotuka emojojutane konarukitane naoaeyama, taeyama. ¹⁵ Tiarone Airamo ribane: Are naru. Tamajasi mibune ma-yaotanoko tane nisanaine mawai warayaja Judioana saba rewara-mejerei, airamo saba, Israeltuma saba tane. ¹⁶ Mawai aobojona kwana sanamatakitane jakutai taisi inaminatine, taeyama. ¹⁷ Takore Ananias narune janoko eku yarune tane amojo Saulo arai abane ribane: Raka Saulo, Airamo Jesú iji jojisi autu miaja-kutai tai mainatabae. Iji atanejese seoramejerei atae Dio Amejo-kojira Yakerajawitu ajarata urirajasi eku bajemejerei tane maina-tabae, taeyama. ¹⁸ Takore rijana Saulo amu isimo jomakaba ababa monuka nakakore atanejese seoronaeyama. Seoroitane karamakore joni eko-bunaeyama. ¹⁹ Tatukamo najoroaeyama. Atanejese taeraja baji-naeyama. Ya era sabuka Damasco tata nome abamo isiko baji-naeyama. ²⁰ Tatukamo rijana Saulo orikware nakanoko eku Kirito isia rewarakitane jotananaeyama. Ribane: Jesú jakutai taisike Dio Auka, taeyama. ²¹ Rewarakore aribu anokomo kokotuka kwana retaubuaja bajinaeyama. Ribane: Tamaja Jerusalén tata Jesú awai warayakutaisi aiekoratuanara? Tai tatamo naoae mojoju kona-rune saserote airamotuma amojeku abakitane. Tamaja taianara? taeyama. ²² Tiarone Saulo rewara jotanane are suatana rewarayaja kwarika taeraja rewaraeyama. Jesú jakutai tai Akirito tane yakeraja inaminaeyama. Yakeraja inaminayaja Judiotuma Damasco tata ubayakutaisi aribu kwarikanaeyama. ²³ Tatukamo ya eraja jakore Judiotuma obojona jisaka eku abanaeyama Saulo nakitane. ²⁴ Tiarone Saulo tatuma aobonobu naminaeyama. Imaya, jokomaya tane tatuma janokoina arara akojo yaoroae ejoboyakore nakitane. ²⁵ Takore nome abamo Saulo u urirajasi eku abane imaya janokoina arara kwarea joika inanakanaeyama. Takore naruaeyama. ²⁶ Tane narune Saulo Jerusalén tata nabakanaeyama. Taitane nome abamoata nabakakitane obonoaeyama. Tiarone tatuma Saulo nome abatuana tane tanabayatiji kokotuka taisi nojae-yama. ²⁷ Takore Bernabé jakutai Saulo amuaraisatane Jesukirito ainatabatumeta konaruaeyama. Bernabé Saulo isia tatuma saba rewaraeyama. Saulo jojisi autu Airamo miaeyama. Mikore Ai-ramo tametane Saulo isia ribunaeyama. Tatukamo Damascoata Jesú awai warayaja retayajenaka rewaraeyama. Tane Bernabé rewaraeyama. ²⁸ Takore Saulo tatuma isiko bajene Jerusalén ekia kokotukanea rewaraeyama. ²⁹ Airamo aribia retayajenaka rewarae. Judiotuma Grecia aribu aribamo jakutaisi saba rewarae aribu kwarikae tane. Tiarone tatuma Saulo nakitane obono-aeyama. ³⁰ Nakitiakore nokoitane nome abamo Saulo Cesarea tata konarune Tarsoata inatabaeyama. ³¹ Tatukamo ina Judea, ina Galilea, ina Samaria tane aikere-siatuma inareraja bajinaeyama. Taeraja ejobonaeyama. Airamo nojayaja bajinae. Dio Amejokojira Yakerajawitu tatuma sanetae-yama. Tiame asebe riraeyama. ³² Pedro jakutai kokotukanea naruaeyama. Tiaja janokoina Lida tata naruae janokoina eku aubamo Dio saba emo abánae tiakutaisi mikitane. ³³ Tata niborama awai Eneas miaeyama. Tai wakawakatiji inawaja mojoabasi kware rijanamo isia aubanoko arai yajínae tiaja jajayama. ³⁴ Takore Pedro Eneas isia ribane: Eneas, Jesukirito jiaibajukaya rijana. Karamane jiaubanoko iya-karatau, taeyama. Takore rijana Eneas karamunaeyama. ³⁵ Eneas bajukakore Lida arao, Sarón arao tane kokotuka naminaeyama. Tane Airamo sabasaba aobojona ibarinaeyama. ³⁶ Tai ya eku janokoina Jope tata nome abatu tira jaja. Awai Tabita. Grecia aribu isia ribia Dorcas. Tira jakutai are yakeraja nonayaja saneraubiajasi sanetayaja tane jajayama. ³⁷ Tane tai ya eku waba nakane wabaeyama. Takore atejo jojarane janoko anamu kwai jajasi eku abanaeyama. ³⁸ Jope jakutai Lida awere ja. Takore nome abamo Jope tata jakutai Pedro Lidayata ja tane nokoaeyama. Nokoitane nibo manamo inatabae Pedro ebume-jerei: Jawakati tanaka rubujira Jopeata naru, tamejerei. ³⁹ Takore Pedro karamane tatuma iamo naruaeyama. Nabaka-kore namu kwai jajasiata konaruaeyama. Tatu tewere kokotuka tata jakutai onayaja Pedro sibaji taeyama. Jiaka noikaya aba, jiaka kwarea aba tane Dorcas wabamoana jaja nonajakutai taisi emiaeyama. ⁴⁰ Takore Pedro warao kokotuka ejobameje-reaeyama. Tane jinamane rujane kwai ribunaeyama. Ribaitane wabeta seoroyaja ribane: Tabita, karamanu rijana, taeyama. Ribakore tira jakutai amu emurane, Pedro mitane tane ruju-naeyama. ⁴¹ Takore Pedro tirasi amojo oane ikaramunae. Tane warao Dio saba emo abánae tiakutaisi yejebune tatu tewere yejebune tane tira riko jajasi tatuma moaeyama. ⁴² Takore nona tamajasi isia janokoina Jope kokotukanea kayanaeyama. Warao eraja Airamo isia nome abaubuaeyama. ⁴³ Takore Pedro ya eraja Jope eku bajinaeyama. Niborama awai Simón ajanoko eku bajinaeyama. Simón jakutai romu ajoro aiyakaratatuama.

¹ Takore janokoina Cesarea tata nibora awai Cornelio jaja. Cornelio jakutai yaoromo siento jisaka akabitana. Anebu asebe awai Italia Arao. ² Cornelio jakutai tai Dio ayatomanetetu. Awarao kokotuka isiko Dio nojaeyama. Burata uriraja Judio saneraubiaja jakutaisi moaeyama. Are Dio isia kwai ribunae-yama. ³ Tane ya jisaka eku ya anayakore amu eku Dio ainataba ejobakore yakeraja miaeyama. Taisiata yariakore miaeyama. Inataba jakutai ribane: Cornelio! ⁴ Cornelio retane inatabeta seoroyaja bajinaeyama. Ribane: Katukayaja tai, Mairamo? taeyama. Takore inataba ribane: Iji kwai ribiakore, iji ekirakutaisi moayakore tane Dio taisi emoninaja. ⁵ Ama janokoina Jope tata nibora ja awai Simón. Awai raisa Pedro. Tata nibo inatabau Simón yejebiaja. ⁶ Pedro jakutai Simón joro aiyakaratatu ajanoko eku ja. Janoko nojabaira amumia bajia. Iji nonakitane jakutai tai Pedro jisaba rewarate, taeyama. ⁷ Tane inataba Cornelio isia ribaitane naruaeyama. Narukore Cornelio anebu manamo yejebuaeyama. Atae raisa yejebuae, yaorotu. Yaorotu jakutai Cornelio anebuwitu kawanamo jisaka, Dio ayatomanetetu tane. ⁸ Cornelio kokotuka tatuma saba rewarane Jopeata inatabaeyama. ⁹ Ubajokanea tatuma mate jojisi ekia janokoina yanabaka-yakore Pedro janoko akwa basa arai yaburuaeyama, kwai riba-kitane. Ya kwai monuka rijana. ¹⁰ Pedro nojerame najorokitane obonoaeyama. Tiarone najoro ajisabamo mate najoro jisaba-yakore Pedro Dio isiawitu obonobiakore tametane miaeyama. ¹¹ Najamutu emurakore miaeyama. Tatamo raina tata jiaka uri-raja monuka nanakanaeyama. Ajitu manamonamojase koyau-búae tiaja jajayama. ¹² Jiaka eku raina aromu raisa raisa kokotuka ja, waraoto aromu aka manamonamojase jakutai, waraoto aromuana jakutai, jubatuma, atae raisa akobejoro isia anarumo jakutai, romu kwaia nijakayakutai tane. ¹³ Takore ribu ribiakore Pedro nokoaeyama. Ribu ribane: Pedro, karamane, nane najoro, taeyama. ¹⁴ Tiarone Pedro taisi riboto ribane: Mairamo, taneana. Na-joro Judio saba asiraja jakutai, najoro wisi jakutai tane ine are najonaka jajaine, taeyama. ¹⁵ Takore atanejese ribu ribunae: Dio bereajakutai tai Judio saba asiraja tane ribunaka jau, taeyama. ¹⁶ Tametane rijanamo tane nonaeyama. Tatukamo jiaka jaku-tai najamutuata yaburuaeyama. ¹⁷ Takore Pedro aobonobu eraja ejobonaeyama. Tamaja katukayaja jaja tai tane obonobuaeyama. Tane obonobiakore nibo Cornelioatukamo jakutai janoko akojo-ata nabakaubuaeyama. Simón ajanoko kasikaja tai tane renoko-yaja naoaeyama. ¹⁸ Tata nabakane rokojotayaja renokoae. Ribane: Tamatuka Simón ja mojoro? Awai raisa Pedro, taeyama. ¹⁹ Takore Pedro mate amu eku ejobonajakutaisi isia obonobia-kore Mejokojira Pedro isia ribane: Mi anaka. Nibo rijanamo jinajabia. ²⁰ Ine tatuma inatabaine. Tiame karamane nanakane tane jiaobojona emo emo bajinaka tatuma iamo naru, taeyama. ²¹ Takore Pedro nibo Cornelio inatabajakutaisiata nanakanae-yama. Ribane: Nibora yatu najabiakutai tai ine. Katukeme naoae? taeyama. ²² Takore: Yaoromo siento jisaka akabitana Cornelio jakutai taisi akajotabu naoaeko. Cornelio jakutai nibora nomeraja. Tai Dio nojayaja jaja. Judio kokotuka saba raomata. Dio ainataba Cornelio isia ribunaeyama: Pedro jijanokoata naomejerei yejebu. Taisi aribu noko, tane ribunaeyama, taeyama. ²³ Takore Pedro tatuma etuwarane ima jokonaeyama. Ubajokanea Pedro tatuma iamo naruaeyama. Nome abamo eobo Jope arao jakutai tatuma iamo naruaeyama. ²⁴ Takore Cornelio awaraoto yejebune amusabatumawitu yejebune tane tatuma isiko Pedrotuma yawakaeyama. Yawakayakore ubajokanea Pedrotuma Cesarea tata nabakanaeyama. ²⁵ Takore Pedro janokoata nabakakore Cornelio ejobonae etuwarakitane. Amujaba mukunamane rujane, jinamane yatomaneteaeyama. ²⁶ Tiarone Pedro taisi ikaramane ribane: Karamanu. Ine jimonuka warao, taeyama. ²⁷ Tane oriisiko rewarayaja janoko eku yaruaeyama. Warao eraja orikware nákae tiakore miaeyama. ²⁸ Taitane Pedro ribane: Judioana isiko orikware nakakitane, Judioana ajanoko eku yaru-kitane tane Judio saba ribu ekirawitu. Yatu taisi naminaya. Tiarone Dio mainaminae warao jisakarakate isia tai masaba asiraja o wisi tane ribunaka jamejerei. ²⁹ Tiame yatu mayejebukore narunajine tanaka naoaine. Ama katukane isia mayejebuae bajama? taeyama. ³⁰ Takore Cornelio Pedro riboto ribane: Ine majanoko eku obonekoyaja kwai ribunaine. Anayakore tamaja ya asinarija monuka jakore nibora ajiaka jomeraja jaja orimemusabae. Tatukamo ya manamonamojase ja rijana. ³¹ Nibora jakutai maisia ribane: Cornelio, iji kwai ribiakore Dio nokoae. Iji saneraubiajasi sanetayakore Dio taisi emoninaja. ³² Jano-koina Jope tata inatabau Simón yejebiaja. Simón awai raisa Pedro. Pedro jakutai Simón joro aiyakaratatu ajanoko eku ja. Janoko jakutai nojabaira amumia bajia. Pedro naone jisaba rewarate, tae. ³³ Takore rijanawitu jinajabumejerei inatabaine. Iji naoajame yakera. Mi anaka. Oko kokotuka tamatuka Dio amujaba jaoko. Airamo iji kasaba rewaramejerei jikajotabuajakutai taisi kokotuka nokokitane obonoyaoko, taeyama. ³⁴ Takore Pedro rewarakitane jotananaeyama. Ribane: Nome-witu Dio saba warao jisaka warao raisama kwarika jaja ekira. Taisi ama nokoaine. ³⁵ Ina kokotukanea arao Dio nojayaja nomeraja nonayakutai Dio tatuma etuwaraya. ³⁶ Dio ribu Israeltuma saba inatabae. Ribu jakutai rewara yakeraja Jesukirito isia rewaraya. Jesukirito jakutai tai inareraja tane abatu. Tai warao kokotuka Airamo. ³⁷ Judio aineta kwaeabanajakutai yatu taisi naminaya. Juan ejobonae rewarayaja joni ekobiaja tane. Takore rijana ribu ina Galileayatukamo ina Judea kokotukanea kayanae. ³⁸ Yatu Jesú Nazaret arotuma isia naminaya. Dio Oriamejokojira Yakerajawitu Jesú moae. Ajarata taeraja jakutaisi moae tane. Jesú kokotukanea kujuae yakeraja nonayaja. Jebuira aribia sanamatayakutai taisi kokotuka ibajukanae. Dio Jesú isiko jame Jesú tane nonae. ³⁹ Oko Jesú anona kokotuka amimo. Judio aina eku nonajakutai, janokoina Jerusalén eku nonajakutai tane oko taisi amimo. Tatukamo kuru isia esijarene taisi naubuae. ⁴⁰ Tiarone ya rijanamo takore Dio taisi enomininae. Okoata inatabae oriemusabamejerei. ⁴¹ Warao kokotuka oriemusabanatanae. Tiarone okowitu orikemusabae. Anominina nokabuka oko taisi isiko najoroae jobiae tane. Dio mibune kanisanae Jesú wabaerone anominina isia rewaramo tane ejobamejerei. ⁴² Waraoto saba kaikawitu rewaramejerei kainatabae. Tametane rewaramejerea. Dio tamaja Jesú ribu nome atoatu tane abanae. Riko jakutaisi aribu nome toate. Waba jakutai tairakate aribu nome toate, tamejerea. ⁴³ Ateje Dio kware arewaramo kokotuka Jesú isia rewarae. Ribane: Jesú isia nome abayakutai Dio Jesú aribia tatuma aobojona asiraja tatuma kware abanaka berete, taeyama. ⁴⁴ Tane Pedro mate rewarayakore Dio Amejokojira Yake-rajawitu Pedro aribu anokomo kokotuka jakutaisiata nanakanae-yama. ⁴⁵ Nome abamo ajoro serebúae tiaja Pedro iamo naoa-jakutai kwana retaubuaeyama. Dio Amejokojira Yakerajawitu Judioana moayame retaubuaeyama. ⁴⁶ Tatuma ribu raisa nami-nanajarone rewarayakore nokoaeyama. Dio yakeraja jae tane ribiakore nokoaeyama. Tiame retaubuaeyama. ⁴⁷ Takore Pedro ribane: Oko Dio Amejokojira Yakerajawitu nojoajakutai taisi monuka tatuma nojoae rijana. Sina tatuma joni ekobunaka jamejerei ribate bajama? taeyama. ⁴⁸ Taitane Jesu-kirito aribia joni ekobumejereaeyama. Ekobakore tatuma Pedro ebuae ya era sabuka tatuma isiko bajemejerei.

¹ Takore ribu jakanaeyama. Jesukirito ainatabatuma, nome abamo tane Judea tata jakutai ribu nokoaeyama. Judioana Dio aribu oanae rijana tane nokoaeyama. ² Takore Pedro Jeru-salén tata bajekore nome abamo ajoro serebúae tiakutai Pedro kware abanaeyama. ³ Ribane: Iji katukeme joro seremoana jaku-taisiata naruae bajama? Katukeme tatuma isiko najoroae bajama? taeyama. ⁴ Renokokore Pedro kokotuka kwaeabanajakutaisi isia yaorane rewaraeyama. ⁵ Ribane: Ine janokoina Jopeata jaja kwai ribiaja jajaine. Ine Dio isiawitu obonobiakore mamu eku jiaka uriraja monuka ejobakore miaine. Jiaka ajitu manamonamojase koyaubúae tiaja jaja miaine. Najamutuatamo nanakane ineata nabakanae. ⁶ Ine taisi eku raina aromu kokotuka raisa raisa miaine. Waraoto aromu aka manamonamojase jakutai, waraoto aromuana jakutai, jubatuma, atae raisa akobejoro isia anarumo jakutai, romu kwaia nijakayakutai tane miaine. ⁷ Ribu maisia ribiakore nokoaine. Ribane: Pedro, karamane, nane najoro, tae. ⁸ Tiarone ine ribane: Mairamo, taneana. Najoro Judio saba asiraja jakutai, najoro wisi jakutai tane are najoronakawitu jajaine, taine. ⁹ Takore najamutu tatamo atanejese maisia ribunae. Ribane: Dio bereajakutai tai Judio saba asiraja tane ribunaka jau, tae. ¹⁰ Tametane rijanamo tane nonane kokotuka atanejese najamutuata kobukanae. ¹¹ Takore rijana nibo rijanamo janoko ine jakutaisiata nabakaubuae. Cesarea tatamo tatuma inatabae manajabumejerei. ¹² Takore Mejokojira makajotabuae maobojona emo emo bajinaka tatuma iamo narumejerei. Nome abamo mojoabasi kware jisaka maiamo naruae. Tai tamatuma. Oko niborama ajanoko eku yaruaeko. ¹³ Nibora jakutai kasaba rewarae: Ine majanoko eku Dio ainataba karamúnae tiaja jakore miaine. Maisia ribunae. Jope tata nibo inatabau Simón naomejerei. Simón awai raisa Pedro. ¹⁴ Dio katukane obojona ibajukaya tai tane jisaba rewarate. Arewara eku jiaobojona jiwarao kokotuka aobojona tane bajukate, taeyama. ¹⁵ Takore ine tatuma saba rewarakitane jotanakore Dio Amejokojira Yakerajawitu tatuma isia nanakanae. Wajiabara kaisia nanakanajakutai taisi monuka tatuma isia nanakanae. ¹⁶ Nanakakore maobojona Airamo aribu tata nakae. Airamo ribane: Nomewitu Juan joni ekobunae tiarone ine yatu Mejokojira Yakerajawitu eku ekobatine, tae. ¹⁷ Amasike oko Airamo Jesukirito isia nome abanajakutai Dio nobeanaka kamoae. Taisi monuka nobeanaka tatuma moae. Ine sina tai Dio aribu kwarikakitane? taeyama. ¹⁸ Takore nome abamo ajoro serebúae tiakutai tamajasi nokone inareraja bajinaeyama. Diosike yakeraja jae, tane ribunae. Ribane: Amasike Dio Judioana aobojona ibaremejerearaji bajama! Judio-ana are ubamejerearaji bajama! tane taeyama. ¹⁹ Ebe Esteban naitane nome abamo eobo isanamatakitane jotananaeyama. Tiame tametane jisajisaeyama. Kawanamo emo naruae Fenicia tata, Chipre tata, Antioquia tata tane. Emo narune rewara yakeraja Judiowitu saba rewaraeyama. Judioana saba rewaranatanaeyama. ²⁰ Tiarone nome abamo kawanamo Chipre arao jakutai, Cirene arao jakutai tane janokoina Antioquia tata nabakaubuaeyama. Tata Judiotumena jakutaisi sabarakate rewaraeyama. Rewara yakeraja Airamo Jesú isia rewaraeyama. ²¹ Airamo ajarata tatuma isiko jaja. Tiame warao eraja nome abane Airamo sabasaba aobojona ibarinaeyama. ²² Takore Jerusalén aikeresia arao Antioquia arao nome abaya tane nokoaeyama. Tiame Bernabé inatabae Antioquia tata naru-mejerei. ²³ Takore Bernabé narune Dio aobojona ayakara warao isiko bajiakutaisi miaeyama. Mitane oriwakaeyama. Tane tatuma kokotuka reiriae aobojona taeraja tane are suatana Airamo eku bajemejerei. ²⁴ Bernabé jakutai tai nibora yakeraja, Dio Amejokojira Yakerajawitu ajarata urirajasi eku jaja, nome aba-yaja jaja tane. Tiame warao eraja Airamo isia nome abau-buaeyama. ²⁵ Tatukamo Bernabé Tarsoata naruae Saulo najabukitane. Mitane Antioquia tata konaruaeyama. ²⁶ Tata inawaja jisaka kaika ikeresia araoto isiko bajibuae warao erajasi inaminayaja. Antioquia tata wajiabara nome abamo jakutaisi awai tane warao Kirito Sabasabamo tane waranaeyama. ²⁷ Tai inawaja eku Dio kware arewaramo kawanamo Jeru-salén tatukamo Antioquia tata naruaeyama. ²⁸ Tatuma kawa-namo jisaka awai Agabo jajayama. Tai nome abamo autu kara-mane Mejokojira aribia ribane: Raina kokotukanea nojoira jate, taeyama. Nomewitu Claudio jakutai Roma aina airamo jakore nojoira majanae. ²⁹ Takore nome abamo Antioquia tata jakutai obojona jisaka eku abanae nome abamo Judea tata ubayakutaisi sanetakitane. Jisaka jisaka jaja jakutai taisi kaika moakitane ribu abanaeyama. ³⁰ Taitane nome abamo aburata ikeresia airamo-tuma saba konarumejerei Bernabé Saulo tane inatabaeyama.

¹ Tai inawaja eku airamo Herodes ikeresia arao kawanamo isanamatakitane jotananaeyama. ² Herodes Jacobo buariwari isia namejereaeyama. Jacobo jakutai Juan araje. ³ Takore anona Judiotuma aobojona eku ejoboyakutaisi naminai-tane Pedro emojojutaeyama. Oriwaka Bãu Akwaruta Ekiraja jakutaisi eku emojojutaeyama. ⁴ Herodes Pedro emojojutane mojojutanoko eku yaorane abanaeyama. Yaoromo amojeku abanae yaoromejerei. Yaoromo asebetuma manamonamojase ja. Asebe jisaka jisaka eku yaoromo manamonamojase manamo-namojase tane ja. Oriwaka Kwaeaba kwaeabakore Herodes Pedro Judiotuma amujaba abakitane obonoaeyama. ⁵ Takore Pedro mojojutanoko eku jakore yaorane yaoroaeyama. Tiarone ikeresia arao taisi kware kwana Dio ebiaja kwai ribunaeyama. ⁶ Ya araisama eku Herodes Pedro mojojutanoko ekumo kona-rukitane obonobuae. Eobo amujaba abakitane obonobuae. Tai ima eku Pedro yaoromo manamo autu ubayaja jaja. Karena manamo isia koyánae tiaja jajayama. Yaoromo eobo mojoju-tanoko akojo yaoroaeyama. ⁷ Takore rijana Airamo ainataba naone mojojutanoko eku tora tae. Taitane Pedro kware ejokonae. Inataba Pedro ajajaruka torene enomininaeyama. Ribane: Rubujira karamanu, taeyama. Takore karena jakutai Pedro amojo isimo nakaeyama. ⁸ Nakakore inataba ribane: Jijiaka orisabane jisabato jiomu isia abanu, taeyama. Pedro tane nonakore inataba ribane: Jikamisa orisabane maiamo nao, taeyama. ⁹ Takore Pedro inataba iamo ejobonaeyama. Inataba anona nome tai o nomeana tai tane yajorabanatanaeyama. Are musibiaja jaja tane tanabaeyama. ¹⁰ Yaoromo wajiabara kwaeabanaeyama. Araisama kwaeabanaeyama. Kwaeabaitane janoko akojo najamutu yakareku ejobonoko jakutai taisiata nabakakore wite jakanaeyama. Jakakore tatuma ejobonaeyama. Tane narune jojisi akojo jisaka kwaeabakore inataba Pedro omoaeyama. ¹¹ Takore Pedro aobojona ejobane ribane: Maisia nonajakutai nomeraji bajama! Airamo oriainataba inatabae Herodes amojekumo mejeromejerei. Judio maisiko nonakitane obonoajakutai kokotuka taisi ekumo mejeronae, taeyama. ¹² Tane obonobiaja Pedro Maria ajanokoata nabakanaeyama. Maria jakutai Juan arani. Juan awai raisa Marcos. Maria ajano-koata warao eraja orikware nakane kwai ribunaeyama. ¹³ Tatuma kwai ribiakore Pedro janoko akojo yakareku jakutaisi nona-roaeyama. Nonarokore janoko arotu aneburatu tira awai Rode jaja sina tai tane nokokitane ejobonaeyama. ¹⁴ Tane Pedro aribu naminane ekeiraja jame akojo ijakanaka eobo enokokitane jakanaeyama. Tane Pedro jae, taeyama. ¹⁵ Takore eobo ribane: Iji buretae rijana, taeyama. Tiarone tira jakutai tatuma aribu kwarikayaja ribane: Nomewitu, Pedro jae, taeyama. Takore: Pedro-ana. Amejokoji, taubuaeyama. ¹⁶ Tatuma oriaribu kwarikayakore Pedro are akojo nonaro-yaja bajinaeyama. Takore akojo ijakane Pedro mitane retaubu-aeyama. ¹⁷ Takore Pedro amojo isia tatuma inare tamejereaeyama. Airamo mojojutanoko ekumo ejeronajakutai taisi tatuma saba rewaraeyama. Ribane: Tamaja Jacobo saba, nome abamo eobo sabarakate rewarakotu, taeyama. Ribaitane emo naruaeyama. ¹⁸ Takore jokona anejeko yaoromo jakutai kwana wiyawi-yaeyama. Pedro kasaba ja tai tane naminanatanajame wiyawi-yaeyama. ¹⁹ Takore Herodes Pedro najabumejereae tiarone miko-moni ejobonaeyama. Tiame Herodes yaoromo yaorane renokoitane kubamejereaeyama. Tane Herodes Judea tatamo ejobane Cesarea tata naruae ubakitane. ²⁰ Tatukamo Herodes Tiro arao, Sidón arao tane isiko orijisi-aeyama. Orijisikore tatuma obojona jisaka nakaitane Herodes mikitane naoaeyama. Wajiabara burata Blasto moae amuarai-satamejerei. Blasto jakutai airamo Herodes ajanoko airamo. Ta-kore tatuma aina anajoro jakutai Herodes aina arajikaba ekumo-tiji Herodes tata nabakane aobojona iabamejerei ebuaeyama. ²¹ Takore ya asinarija abanae tatuma mikitane. Asinarija eku nakakore Herodes airamo ajiaka orisabane ribu nome toanoko arujunoko arai rujunaeyama. Rujane tatuma saba rewaraeyama. ²² Rewarayakore warao rokojotakitane jotananaeyama. Ribane: Tamaja ribiakutai tai waraoana. Tai Dio, taeyama. ²³ Tane ribakore Herodes ine Dioana tane ribunaja jame Airamo ainataba waba Herodes imajanaeyama. Takore kimi ebe wabae rijana. ²⁴ Tiarone Airamo aribu kokotukanea kayane iraeyama. ²⁵ Takore Bernabé, Saulo tane ayaota Jerusalén tata jakutaisi riwarane ekiajase bajinaeyama. Bajene nariaja Juan konaruae-yama. Juan awai raisa Marcos.

¹ Antioquia aikeresia eku Dio kware arewaramo, inami-namo tane jajayama. Tatuma awai tamaja: Bernabé, Simón awai raisa Mekoro jakutai, Lucio Cirene arotu, Manaén tane. Manaén jakutai tai airamo Herodes isiko nojotonae. Herodes jakutai tai ina manamonamojase airamotuma kawa-namo jisaka. Atae Saulo tane. ² Tatuma Airamo akajotabu tane yaotayaja obonekoyaja tane jaja. Tane jaja jakore Mejokojira Yakerajawitu jakutai ribane: Ine Bernabé Saulo tane yejebuaine yaotamejerei. Masaba emo abakotu maobojona yaotamejerei, taeyama. ³ Takore obonekóae tiaja kwai ribane amojo tatuma arai aba-naeyama. Tane narumejerei inatabaeyama. ⁴ Takore Mejokojira Yakerajawitu jakutai Bernabé Saulo tane inatabakore tatuma Seleucia tata naruaeyama. Tata waeraira eku nabakanae burujo Chipre tata narukitane. ⁵ Tane janokoina Salamina tata nabakanae. Nabakaitane Judiotuma aorikware na-kanoko eku Dio aribu rewaraeyama. Tatuma akajotabu tane Juan konaruaeyama. ⁶ Takore burujo ekia kujune janokoina Pafos tata nabakanaeyama. Tata Judio awai Barjesús jajayama. Wisiratu-ama. Wisiraturone Dio kware arewaratu tane oritoanaeyama. ⁷ Wisiratu jakutai kobenajoro amusabayama. Kobenajoro jakutai awai Sergio Paulo, nibora musaberajayama. Kobenajoro Dio aribu kwana noko obonoajame Bernabé Saulo tane yejebuae-yama. ⁸ Tiarone wisiratu jakutai tatuma aribu kwarikae kobena-joro nome abanaka jamejerei. Wisiratu awai raisa Elimas. ⁹ Ta-kore Saulo, awai raisa Pablo jaja, Mejokojira Yakerajawitu ajarata urirajasi eku bajiaja wisiratuata yaorane seorane ribunae. ¹⁰ Ribane: Iji imasibutu. Iji asiraja anonatu. Iji jebuira auka. Nomeraja jakutai tai kokotuka jisaba asira. Iji Airamo ajojisi nomeraja jakutai ikasikasiakutaisi iabanatatera? ¹¹ Amasike Ai-ramo jiyewerete. Jimu jasínae tiaja bajete. Ya era sabuka iji ya ajokoji mikomoni bajete, taeyama. Takore rijana amu ekia jokkou tane tatukamo nome amu ekia imanau tane bajinaeyama. Raisama najabuae amojo oane konarumejerei. ¹² Takore kobenajoro taisi mine nome abanaeyama. Airamo ainamina isia kwana retaubuaeyama. ¹³ Tatukamo Pablo amusabatuma isiko waeraira eku naba-kane Pafos tatamo naruaeyama. Narune ina Panfilia ajanokoina Perge tata nabakanaeyama. Tata Juan tatuma iabane Jerusalén tatajase bajekitane naruaeyama. ¹⁴ Juan narukore tatuma Perge tatamo ejobane ina Pisidia ajanokoina Antioquia tata nabaka-naeyama. Tata jaja ya tuwara eku orikware nakanoko eku yarune norujuaeyama. ¹⁵ Takore orikware nakanoko arao kajotabu aka-rata, Dio kware arewaramo akarata tane teribuaeyama. Teribu-kore orikware nakanoko airamotuma ribu tatuma saba inatabae-yama. Ribane: Kawarao, yatu waraoto reirikitane obonokore reirikotu, taeyama. ¹⁶ Takore Pablo karamane amojo isia inare tamejereaeyama. Ribane: Israeltuma, maribu nokokotu. Yatu Dio nojayakutai, maribu nokokotu. ¹⁷ Israeltuma Ario kanobotuma mibune nisa-naeyama. Tatuma mate ina Egipto tata ubayakore Dio tatuma nisanae warao eraja ejobamejerei. Tane oriajara taeraja isia Egipto tatamo tatuma iejobonaeyama. ¹⁸ Jarawaja tata inawaja mojorekotuma manamonamojase isia Dio tatuma anona riboto taeratanae. ¹⁹ Ina mojoabasi kware manamo jakutaisi arao ina Canaán eku ubayakore Dio tatuma iekoronae. Iekoroitane tatuma aina kanobotuma moae. Ina kware kotubukore saba bajiakutai Dio tatuma moaeyama. ²⁰ Tatukamo Dio jakutai tatuma aribu nome atoamo tane abanae. Tane takore inawaja siento manamo-namojase kware siento asibi ru takore Dio kware arewaratu Samuel ejobonaeyama. ²¹ Samuel jakore Israeltuma airamo uriraja obonone ebuae-yama. Ebukore Dio Saul tatuma moaeyama airamo tamejerei. Saul jakutai Cis auka, Benjamín awaraosebeira ajisaka. Saul jakutai inawaja mojorekotuma manamonamojase isia bajinaeyama. ²² Tatukamo Dio Saul nisane David airamo tane abanaeyama. Dio David isia rewarae: David Isaí auka jakutai maobojona eku. Ine David nonamejereakutai taisi kokotuka David nonate, taeyama. (1 Sam. 13:14) ²³ Tatukamo David nokabuka ejobonajakutai tai Jesú. Tai David ajisaka. Dio oriaribu eku abayaja Jesú inatabae Israeltuma aobojona Aibajukatu tane. ²⁴ Jesú mate naomoana jakore Juan Israeltuma kokotuka saba rewaraeyama. Ribane: Yatu aobojona ibarene joni kobakotu, taeyama. ²⁵ Tane Juan awaba awere jakore Juan ribane: Yatu maisia obonobiakutai taiana ine. Raisa manokabuka naoya. Ine mamoara ekira taisi asabato akoya jajekitane, taeyama. ²⁶ Mawarao, Abraham awarao jakutai, yatu kawanamo Dio nojayakutai, yatu saba ribu obojona bajukakitane jakutaisi inatabae. ²⁷ Jerusalén arao, warao airamotuma tane tatuma Jesú jakutai tai obojona Aibajukatu tane naminanatanae. Ya tuwara kokotukanea orikware nakanoko eku Dio kware arewaramo akarata teribia. Akarata teribiarone aribu yaorane nokonaja. Tatuma Jesú namejerekore Dio kware arewaramo aribu eku nakae. ²⁸ Tatuma Jesú anona asiraja minatanae namejerekitane tiarone tatuma are Pilato ebuaeyama namejerei. ²⁹ Jabataja eku Jesú isia jabatajakutai taisi kokotuka eku nonae. Nonajio tane atejo kuru isimo inanakane joitaeyama. ³⁰ Takore Jesú wabaerone Dio taisi enomininae. ³¹ Tatukamo ya eraja isia Jesú orianebu oriemusabae. Anebu jakutai Galilea tatamo Jerusalén tata Jesú iamo narubuajakutai. Tatuma rijana Jesú isia waraoto saba rewaraya. ³² Tiame oko rewara yakerajasi yatu saba rewaraya. Dio tai ribu jakutaisi kanobotuma moae. ³³ Ama oko tatuma anobotomo jakutai Dio ribu moajakutaisi eku abayaja Jesú enominakore miaeko. Karata awai Rokotu ja. Rokotu manamo jakutaisi eku ribia: Iji Mauka. Ama ya eku Jirima tane ejobonaine, tia. (Rok. 2:7) ³⁴ Ateje Dio ribunae: Wábae takorejone enominatine atejo koinaka jamejerei. Jabataja taisi isia ribia: Ribu David moaine yakeraja tane abakitane. Tai ribu ekujase yatu yakeraja tane abatine, tia. (Isa. 53:3) ³⁵ Tiame rokotu raisama eku atae ribu ja: Jisaba Yakerajawitu jakutai taisi atejo koimejerenatate, tia. (Rok. 16:10) ³⁶ Nomewitu David jakutai aya eku Dio aobojona eku abayaja waraoto sanetaeyama. Tatukamo wabae. Anobotuma awere joitae-yama. Atejo koiae. ³⁷ Tiarone Dio enomininajakutai taisi atejo koinaja. ³⁸ Mawarao, ribu ja yatu saba. Ribu jakutai tai tamaja. Jesú isia Dio yatu aobojona asiraja yatu kware abanaka yatu aobojona berekitane obonoya. Taisi naminakotu. ³⁹ Kajotabu akarata Moisés jabatajakutai tai obojona asirajasi enometakomoni. Tiarone ko-kotuka Jesú isia nome abayakutai Dio taisi aobojona enometaya. ⁴⁰ Oi! Dio kware arewaramo aribu eku nakayaja yatu kwaeabaterate! ⁴¹ Tatuma Dio aribu rewarayaja ribane: Yatu ekotubumo jakutai, mikotu. Retane ekorakotu. Ine Dio jakutai yatu aya eku nonatine. Ine nonayarone yatu nome abanatate. Warao yatu saba rewarayarone yatu nome abanatate, tae, taeyama. (Hab. 1:5) Tane Pablo rewaraeyama. ⁴² Taitane Pablotuma Judiotuma aorikware nakanoko ekumo ejobakore Judioana jakutai tatuma ebuaeyama. Ya tuwara araisa-maya tamajasi isia tatuma saba rewaramejerei ebuaeyama. ⁴³ Orikware nakanoko ekumo ejobakore orikware nakanoko arao Judio jajayama. Eobo Judio monuka Dio yatomaneteakutairakate jajayama. Tatuma Pablo Bernabé tane iamo naruaeyama. Takore Pablotuma tatuma reiriae are Dio aobojona ayakara eku abamejerei. ⁴⁴ Takore ya tuwara araisamaya janokoina arao kokotuka sabuka orikware nakae Dio aribu nokokitane. ⁴⁵ Judiotuma warao-sebeira mine Pablo temiajiaeyama. Tatuma isia asiraja ribiaja, ekotubiaja tane Pablo aribu kwarikakitane jotananaeyama. ⁴⁶ Takore Pablo, Bernabé tane retanaka ribane: Wajiabara Dio aribu Judio saba rewarakitane ja. Tiarone yatu ribu oakitane obo-nonaja. Yatujase oriaribu nome toane ribia: Kamoara ekira are ubakitane, tia. Tiame tamatukamo Judioaneta narune saba rewa-rateko. ⁴⁷ Airamo tametane kakajotabuae. Ribane: Israeltumena saba abije tane jiabanaine. Raina kokotukanea araoto saba obojona ibajukanoko tane jiabanaine, tia, taeyama. (Isa. 49:6) ⁴⁸ Takore Judioana tamaja ribu nokoitane oriwakaubuaeyama. Airamo aribu yakeraja jae, tane ribunaeyama. Are ubamejerei emo abánae tiakutai tatuma kokotuka nome abanaeyama. ⁴⁹ Tiame Dio aribu ina kokotukanea kayanaeyama. ⁵⁰ Takore Judiotuma nokaramane tatu raomata Dio yatomaneteakutai atae janokoina airamo sabukatuma tane ewiyawiyaeyama. Tatuma Pablo Bernabé tane isanamatakitane jotananae ina ekumo webotakitane. ⁵¹ Webotakitiakore Pablotuma omu narimane jojisi ajujurakate iabanaeyama. Yatu karibu tainayame juju yatu saba bajia tane sitayaja juju narimaeyama. Tane tatamo narune janokoina Iconio tata nabakanaeyama. ⁵² Tiarone nome abamo ekei urirajasi eku, Dio Amejokojira Yakerajawitu jakutaisi ajarata urirajasi eku tane bajinaeyama.

¹ Iconio tata monukajase. Pablo Bernabé tane Judiotuma aorikware nakanoko eku yarune rewaraeyama. Rewa-rakore Judiotuma kawanamo Grecia aribu aribamo kawanamo tane eraja nome abanaeyama. ² Tiarone Judiotuma nome aba-moana jakutai Judioana ewiyawiyaeyama. Nome abamo isia asiraja obonobumejerei ewiyawiyaeyama. ³ Tiame Pablotuma ya eraja tata bajinaeyama. Airamo isia uru tane bajiaja retanaka rewaraeyama. Tatuma Airamo aobojona ayakara isia rewarajame Airamo tatuma aribu taeraja tane abanae. Jarata moae sinarija, mianare tane nonamejerei. ⁴ Takore janokoina arao jisajisae. Kawanamo Judiotuma sabasabamo bajinae. Kawanamo Jesuki-rito ainatabatuma sabasabamo bajinae. ⁵ Warao jisajisakore Ju-dioana, Judiotuma tane airamotuma isiko obojona jisaka nakae. Pablotuma ekotubune joyo isia timikitane rijana ejobonaeyama. ⁶ Tiarone Pablo Bernabé tane taisi naminane kurujubuae-yama. Ina Licaonia ajanokoinatumeta naruae. Janokoina awai Listra, Derbe tane. Ina awere jakutaisiata kurujubuaeyama. ⁷ Tatarakate rewara yakerajasi rewaraubuaeyama. ⁸ Takore Listra arotu wakawaka jaja. Arijawarayatukamo wakawakatiji tata rujúnae tiaja jajayama. ⁹ Pablo rewarakore wakawaka jakutai ribu nokoaeyama. Takore Pablo taisi yaorane mine tai bajukakitane nome abayakutaisi naminaeyama. ¹⁰ Tane kwana ribiaja ribane: Nomeraja karamanu, taeyama. Ribakore nibora jakutai burone nome karamunae. Tane narukitane jotana-naeyama. ¹¹ Takore warao Pablo anona mitane rokojotakitane jotananae. Licaonia aribu isia ribiaja ribane: Diotuma warao tane okoata nanakanaeraji! taeyama. ¹² Tane Bernabé jakutai tai dio Jupiter tane ribunae. Pablo rewaratutiji tai dio Mercurio tane ribunae. ¹³ Janokoina akojoata kwai ribunoko Jupiter saba jaja. Jupiter asaserote baka nibo, tokoyo tane janokoina akojoata konaeyama. Tai baka nibo kubayaja waraoto isiko Pablo Bernabé tane yatomanetekitane obonoaeyama. ¹⁴ Tiarone Pablo, Bernabé tane Jesukirito ainata-batuma jakutai taisi naminane oriajiaka yawanaeyama. Warao erajasi kawanaya yarune rokojotaeyama. ¹⁵ Ribane: Warao, katukeme tane nonaya bajama? Okorakate yatu monuka warao. Oko naoae yatu saba rewarakitane. Yatu tamaja nona amoara ekirajasi kware barinaka Dio riko kware baremejereaoko. Dio najamutu, raina, nojaba tane nonae. Kokotuka tatuma eku jaku-taisi nonae. ¹⁶ Ateje Dio warao kokotuka iabanae oriajojisi eku kujumejerei. ¹⁷ Tiarone yakeraja nonayaja are Dio ja tane oriemusabaya. Naja ebomejerea. Namuna yakeraja kwajame-jerea. Najoro kamoaya oko najorone oriwakamejerei, taeyama. ¹⁸ Tane rewaraerone warao baka nibo kubayaja tatuma yato-manetekitane tuwaranataturuaeyama. ¹⁹ Takore Judiotuma Antioquia arao, Iconio arao tane naba-kane waraoto aribu kwarikanae. Tane Pablo konarune joyo isia timiaeyama. Timitane waba tanabane janokoina ekumo iawarane webotonaeyama. ²⁰ Tiarone nome abamo orikware nakane Pablo sibaji takore Pablo karamunaeyama. Atanejese janokoina ekujase yaruaeyama. Tane ubajokanea Bernabé isiko Derbe tata naruaeyama. ²¹ Derbe tata rewara yakerajasi rewarakore warao eraja nome abakore inaminaeyama. Inaminaitane janokoina Listra, Iconio, Antioquia tane ekiajase bajinaeyama. ²² Janokoinatuma eku tatuma nome abamo aobojona taeraja tane abanaeyama. Tatuma reiriae nome abayaja taeratamejerei. Ribane: Kwana sanamata-yarone Dio arujuna rujuyakutaisiata yaruteko, taeyama. ²³ Ike-resia jisaka jisaka eku airamo tane abanaeyama. Tane obone-koyaja, kwai ribiaja tane Airamo isia nome abanajakutaisi amojeku iabanaeyama. ²⁴ Tatukamo ina Pisidia ekia kujune ina Panfilia tata nabakanaeyama. ²⁵ Janokoina Perge tata rewarane Atalia tata naruaeyama. ²⁶ Tata waeraira eku nabakane Antioquia tata naruaeyama. Ebe nome abamo Antioquia tata jakutai tatuma inatabae yaotamejerei. Dio aobojona ayakara eku abayaja inata-bae yaotamejerei. Ama yaota riwaraitane naoaeyama. ²⁷ Tane Antioquia tata nabakane ikeresia arao orikware toaeyama. Dio tatuma isia nonajakutai taisi kokotuka rewaraeyama. Dio Judio-anarakate nome abamejerea tane rewaraeyama. ²⁸ Tane Pablo Bernabé tane ya eraja bajinaeyama nome abamo isiko.

¹ Takore warao kawanamo Judea tatamo Antioquia tata naoaeyama. Nome abamo inaminayaja ribane: Yatu Moisés akajotabu eku joro serenaja jakore Dio yatu aobojona ibajukakomoni, taeyama. ² Tane inaminayakore Pablo Bernabé tane tatuma ribotoyaja aribu kwana kwarikayaja tane bajinaeyama. Moiname obojona jisaka eku abanae kawanamo Jerusalén tata inatabakitane. Inatabakitane jakutai, tai tamaja: Pablo, Bernabé, Antioquia arao eobo tane. Jerusalén tata inatabae tamaja inamina isia Jesukirito ainatabatuma, ikeresia airamotuma tane renokomejerei. ³ Antioquia aikeresia tatuma inatabaeyama. Ina Fenicia, ina Samaria tane ekia kujuaeyama. Judioana aobojona asiraja iabane Dio sabasaba barinajakutaisi rewaraeyama. Takore nome abamo tamaja ribu nokoitane oriwakaeyama. ⁴ Takore Pablo, Bernabé tane Jerusalén tata nabakanaeyama. Nanakakore ikeresia arao, Jesukirito ainatabatuma, ikeresia airamotuma tane tatuma etuwaraeyama. Takore Dio tatuma isia nonajakutai taisi kokotuka rewaraeyama. ⁵ Tiarone Bariseo sabasabamo nome abanajakutai kawanamo nokaramane ribane: Judioana ajoro serekitane ja. Moisés akajotabu eku abamejerei inaminakitane ja, taeyama. ⁶ Takore Jesukirito ainatabatuma, ikeresia airamotuma tane orikware nakae tamaja inamina isia obojona jisaka bajekitane. ⁷ Tatuma oriaribu kwana kwarikakore Pedro karamane ribane: Mawarao, ateje Dio mibune yatu kawanamo manisanae. Judio-ana saba rewara yakerajasi rewaramejerei manisanae tatumara-kate nome abamejerei. ⁸ Dio obojona kokotuka naminaya. Judioana isia rewarayaja Amejokojira Yakerajawitu tatuma moae. Kamoajakutaisi monuka tatuma moae. ⁹ Dio tatuma kwarika kabanatanae. Tatuma nome abakore Dio tatuma aobojona bereae. ¹⁰ Ama yatu katukeme Dio ayakara mija? Uru jakutai kanobotuma konarukomoni. Okorakate konarukomoni. Katu-keme nome abamo arai abate konarumejerei? ¹¹ Ribu raisa bajuka ja. Kairamo Jesú aobojona ayakara isia Dio tatuma aobojona ibajukaya. Monukajase ayakara isia kaobojona ibajukaya. Taisi nome abayaoko, taeyama. ¹² Takore kokotuka inareraja bajinaeyama. Bernabé, Pablo tane Dio anona isia rewarayakore are nokoae. Dio Judioana kawa-naya sinarija, mianare tane tatuma isia nonae. Dio nonajakutaisi rewaraeyama. ¹³ Rewarajio takore Jacobo ribunaeyama. Ribane: Mawarao, maribu nokokotu. ¹⁴ Simón Pedro kasaba rewarae. Dio Judioana mibune tatuma kawanamo nisakitane jotanane warao orisaba nisanae, taeyama. Pedro tane rewarae. ¹⁵ Tamaja ribu Dio kware arewaramo aribu eku. Jabataja taisi isia ribia: ¹⁶ Airamo ribia: Tatukamo bajetine. David ajanoko nakajakutai atanejese taisi nonatine. Bajiakutai iyakaratatine. Atanejese ikaramatine. ¹⁷ Tane nonatine warao eobo kokotuka Airamo najabumejerei. Tane nonatine Israeltumena kokotuka Airamo najabume-jerei. Tatumeta mawai waranae rijana, tia. ¹⁸ Airamo tane ribia. Airamo jakutai atejeatukamo tamaja nona kokotuka emusabae, tia. (Amós 9:11-12) ¹⁹ Tane Jacobo suatana ribunae. Ine ribu abaya rijana. Judio-ana Dio sabasaba bariakutai tatuma notorinaka jaki. ²⁰ Karata tatuma saba jabataki. Karata ribate: Najoro diosita moajakutai taisi najoronaka jakotu, tate. Tatusebe o nibosebe tanaka jakotu, tate. Romu aro koyane najakutai taisi najoronaka jakotu, tate. Jotu najoronaka jobinaka tane jakotu, tate. ²¹ Atejeatukamo janokoina kokotuka eku Moisés akarata arewaramo ja. Ya tuwara kokotukanea orikware nakanoko eku Moisés akarata teribia, taeyama. ²² Takore Jesukirito ainatabatuma, ikeresia airamotuma tane ikeresia arao kokotuka isiko, obojona jisaka eku abanae warao Antioquia tata inatabakitane. Pablo Bernabé tane iamo inataba-kitane obonoaeyama. Narumejerei abanajakutai tai tamaja: Judas, awai raisa Barsabás. Araisa Silas. Tatuma nome abamo airamo sabukatuma. ²³ Tatuma iamo tamaja karata inatabae. Oko Jesukirito ainatabatuma, ikeresia airamotuma, nome abamo tane karata jabatayaoko. Yatu, kawarao Judioana jakutai, yatu isia yakeraubiara abayaoko. Yatu Antioquia arao, ina Siria arao, ina Cilicia arao tane. ²⁴ Waraoto anona naminaeko. Karibienarone tamatukamo naruae yatuata. Tatuma oriaribu isia yatu notorine yatu akobe ewiyawiyae. Tatuma ribia: Joro serekitane ja, tia. Moisés akajotabu eku abakitane ja, tia. ²⁵ Oko obojona jisaka eku abane nibo mibune nisanaeko yatuata inatabakitane. Kawarao Bernabé, Pablo tane oko obonoyakutai tatuma iamo inatabayaoko. ²⁶ Pablotuma waba ajawana kwaeabanae Kairamo Jesukirito awai aobojona. ²⁷ Oko tatuma iamo Judas Silas tane inatabayaoko. Tatuma manamo jakutai yatu saba kokotuka yaorane rewarate. ²⁸ Dio Amejokojira Yakerajawitu saba, kasaba tane ribu yakeraja ejobonae. Tiame oko uru uriraja yatu arai abanaka tamaja ribuwitu yatu kajotabia. ²⁹ Romu diosita moajakutai taisi najoronaka jakotu. Jotu najoronaka jobinaka tane jakotu. Romu aro koyane najakutai taisi najoronaka jakotu. Tatusebe o nibosebe tanaka jakotu. Yatu tamaja ribu eku abakore yakeraja nonate. Tamaja karibu kokotuka, taeyama. ³⁰ Takore inatabajakutai Antioquia tata naruaeyama. Tata nome abamo orikware toane karata tatumeta inatabajakutaisi moaeyama. ³¹ Takore nome abamo karata teribune akobe tuwarajame oriwakaeyama. ³² Takore Judas, Silas tane Dio kware arewaramotiji aribu isia nome abamo akobe etuwaraeyama. Aobojona taeraja tane abanaeyama. ³³ Tane ya era sabuka takore nome abamo tatuma aobojona etuwarane tatuma Jesukirito ainatabatumetajase narumejerei inatabae. ³⁴ Tiarone Silas bajekitane aobojona abanaeyama. ³⁵ Pablo, Bernabé tane tatumarakate Antioquia tata bajinaeyama. Eobo eraja isiko Airamo aribu inaminayaja, rewara yakeraja rewarayaja tane bajinaeyama. ³⁶ Tatukamo ya eraja takore Pablo Bernabé isia ribunae. Ribane: Janokoina kokotukanea rewarajakutaisiata atanejese naruki. Kawarao katukayaja ja tai tane mikitane naruki, taeyama. ³⁷ Takore Bernabé Juan konarukitane obonoae. Juan awai raisa Marcos. ³⁸ Tiarone Juan konarukitane Pablo aobojona ekuana. Ebe Juan Panfilia tatukamo bajinae. Suatana tatuma iamo narunatanae yaotakitane. ³⁹ Pablo Bernabé tane oriaribu kwana kwarikaubuajame jisajisaeyama. Bernabé Marcos konarune waeraira eku nabakane Chipre tata naruaeyama. ⁴⁰ Takore Pablo Silas tejomonae iamo narumejerei. Nome abamo ribane: Airamo aobojona ayakara eku bajekotu, takore tatuma naruae. ⁴¹ Ina Siria, ina Cilicia ekia kujuae ikeresia araoto aobojona taeraja tane abayaja.

¹ Pablo Silas tane janokoina Derbe, Listra tane tata naba-kanaeyama. Tata arotu nome abatu jaja. Awai Timoteo. Timoteo arani Judio, nome abatu. Tiarone arima Grecia arotu-ama. ² Nome abamo Listra tata, Iconio tata tane Timoteo isia yakeraja rewaraeyama. ³ Takore Pablo Timoteo oriiamo konaru-kitane obonone ajoro seremejereaeyama. Ajoro seremejereae Judio-tuma tatuka ubayakutaisi aobojona, tatuma kokotuka taisi arima Grecia arotu tane naminajame. ⁴ Tatukamo janokoina raisa raisa ekia nariaja karata konajakutaisi nome abamo inaminaeyama. Jesukirito ainatabatuma, ikeresia airamotuma tane Jerusalén tata jakutai obojona jisaka nakane ribu abanae. Tatuma akajotabu jakutai tai karata. ⁵ Takore ikeresia arao nome abane taeraja bajinaeyama. Ya kokotukanea nome abamo asebe riraeyama. ⁶ Tatukamo tatuma ina Frigia ekia, ina Galacia ekia tane naruaeyama. Takore Mejokojira Yakerajawitu tatuma ina Asia eku rewaramejerenatanaeyama. ⁷ Tiame ina Misia tata nabaka-naeyama. Tatukamo ina Bitinia tata narukitane obonobuae tiarone Mejokojira jakutai tatuma tata narumejerenatanae. ⁸ Ta-kore Misia kwaeabane jomuku Troas tata nabakanaeyama. ⁹ Tata imaya Pablo amu eku ina Macedonia arotu ejobane karamu-naeyama. Ebiaja ribane: Macedonieta naone kasanetau, taeyama. ¹⁰ Pablo amu eku ejobakore rijana oko Macedonia tata narukitane oriiyakarataeko. Dio kayejebuae Macedonia araoto saba rewara yakerajasi rewaramejerei. Tane naminaeko. ¹¹ Taitane waeraira eku nabakane Troas tatamo ejobane nome-raja burujo Samotracia tata nabakanaeko. Ya araisamaya Neápolis tata nabakanaeko. ¹² Tatamo Filipos tata nabakanaeko. Filipos jakutai Roma araoto ajanokoina. Filipos jakutai ina Macedonia akari ajanokoinatuma akwa. Tata ya era sabuka bajinaeko. ¹³ Tane ya tuwara jisaka eku janokoina ekumo ejobane nojaba ajomuku nabakanaeko. Warao tata jakutaisi atuata namínae tiakutai tai jomukuata narune kwai ribakitane. Takore oko tata norujune tatu tata orikware nakajakutaisi saba rewaraeko. ¹⁴ Tatu kawanamo jisaka awai Lidia jaja. Lidia jakutai janokoina Tiatira arotu. Tai jiaka jebuaneraja awabitu. Tira jakutai Dio ayatomanetetutiji karibu nokoae. Nokokore Airamo tirasi aobojona sanetae Pablo aribu eku abamejerei. ¹⁵ Takore taisi joni ekobunae awaraoto isiko. Tai kayejebuae. Ribane: Maisia yatu: Tai rijana Airamo isia nome abaya. Tane yatu maisia ribiakore maiamo naokotu majanoko tata tuwarakitane, tae. Tane oko ajanokoata bajemejereae. ¹⁶ Tatukamo oko kwai ribakitane nariakore iboma kariboto naoae. Tai jebu aobojona naminatu jaja. Tira jakutai eobo aneburatu tira. Naminatutiji arao burata uriraja nojoya. ¹⁷ Pablo oko tane nariakore iboma jakutai kaiamo jakakitane jotananae. Rokojotayaja ribane: Tamatuma Dio Kokotuka Kwarika jaku-taisi akajotabutuma. Oko katukayaja isia kaobojona bajukakitane ja tane rewaraya, taeyama. ¹⁸ Tane ya eraja nonae. Takore Pablo aobojona awerea ejobonae. Tiame iboma sabasaba barene ajebu isia ribane: Jesukirito aribia jikajotabiaine iboma ekumo ejobamejerei, taeyama. Takore rijana ajebu iboma ekumo ejobonae. ¹⁹ Takore iboma arao jakutai iboma aobojona burata nojokomoni tane naminaeyama. Taisi naminaitane Pablo Silas tane oane wabinoko tata konarune jakutaisiata janokoina airamotumeta konaruae. ²⁰ Tane ribu nome atoamo amu ebisaba konarune ribane: Tamatuma, Judio jakutai, kajanokoina araoto ewiyawiyaya. ²¹ Tatuma ainamina kainamina ekuana. Oko Roma araotiji tatuma ainamina oakomoni eku abakitane, taeyama. ²² Takore waraosebeira tatuma riboto ejobonae. Ribu nome atoamo tatuma ajiaka nejiwarane rau isia yeweremejereae. ²³ Takore kwana yewerene mojojutanoko eku toanae. Mojo-jutanoko arotuma kajotabuae yaorane yaoromejerei. ²⁴ Tai ribu nokone mojojutanoko ekuwitu abanae. Omu rau isia itataubu-aeyama. ²⁵ Takore imautu Pablo Silas tane kwai ribiaja, Dio arokotu warayaja tane bajinaeyama. Tane nonayakore mojoju eobo no-koaeyama. ²⁶ Takore rijana inarikoira jakanae. Janoko anamuna erikoaeyama. Takore rijana janoko akojo kokotuka nojakae-yama. Mojoju kokotuka akarena nejeroaeyama. ²⁷ Takore mojojutanoko arotu nominane janoko akojo nojákae takore miaeyama. Mojojutuma naruae tanabayame abuariwari nisanae orinakitane. ²⁸ Tiarone Pablo rokojotane ribane: Oriisia asiraja nonanaka jau. Oko kokotuka tamatuka jaoko, taeyama. ²⁹ Pablo ribakore mojojutanoko arotu abije ebune jakayaja mojojutanoko eku yaruaeyama. Retane tororoyaja Pablo, Silas tane amujaba nakaeyama. ³⁰ Tane tatuma iejobane renokoae. Airamotuma, ine katukane nonate Dio maobojona bajukame-jerei? taeyama. ³¹ Takore tatuma ribane: Airamo Jesukirito isia nome abane Dio yatu aobojona ibajukate. Iji jiwarao tane, taeyama. ³² Tai-tane Airamo aribu taisi saba rewaraeyama. Ajanoko arao kokotuka saba rewarae tane. ³³ Takore imayarone rijanawitu aboisi jojaraeyama. Takore Pablotuma taisi ekobunae awarao kokotuka isiko. ³⁴ Takore mojojutanoko arotu oriajanokoata tatuma konarune najoro tatuma saba abanae. Awaraoto isiko oriwakayaja bajinae Dio isia nome abajame. ³⁵ Takore jokomaya ribu nome atoamo yaoromo mojojuta-nokoata inatabae Pablotuma ejeromejerei. ³⁶ Inatabakore mojo-jutanoko arotu Pablo isia ribane: Ribu nome atoamo ribu masaba inatabae yatu ejeromejerei. Tiame ama ejobane inareraja naru-kotu, taeyama. ³⁷ Tiarone Pablo yaoromo isia ribane: Oko Roma arao. Karibu nome toanaka kokotuka amujaba kayewereae. Kayewerene mojojutanoko eku katoanae. Ama rijisane kejerotera bajama? Taneana. Tatumawitu naote kaiejobakitane, taeyama. ³⁸ Takore yaoromo jakutai ribu nome atoamo saba tamaja ribu rewaraeyama. Pablotuma Roma arao tane nokoitane retaubuaeyama. ³⁹ Tane narune Pablo, Silas tane isia ribunae kware barinaka jamejerei. Mojojutanoko ekumo iejobane ebuae janokoina ekumo narumejerei. ⁴⁰ Takore Pablotuma mojojutanoko ekumo ejobane Lidia ajanokoata naruae. Tane nome abamo mitane akobe etuwarane tane naruae.

¹ Pablo, Silas tane Anfípolis, Apolonia tane ekia naruae-yama. Tatamo janokoina Tesalónica tata nabakanae-yama. Tata Judiotuma aorikware nakanoko ja. ² Are Pablo tane nonayaja jame orikware nakanokoata naruae. Ya tuwara rijanamo tata narune Jabataja aribu tatuma saba rewaraeyama. ³ Ribane: Jabataja inaminaya. Akirito sanamatakitane ja. Wabane nomina-kitane ja tane inaminaya. Ine Jesú isia yatu saba rewaraya. Tai jakutai Akirito, taeyama. ⁴ Takore Judio kawanamo nome abane Pablo, Silas tane isiko bajinaeyama. Grecia aribu aribamo Dio ayatomanetemo jakutai, atae tatu raomatatuma tane tatuma kawanamorakate eraja nome abanae. ⁵ Takore Judio nome abamoana jakutai tatuma temiaji-buaeyama. Tatuma nibo asiraja jojisi ekia joaa tiakutaisi kawa-namo orikware toane warao eraja ejobonaeyama. Tane janokoina ewiyawiyaeyama. Jasón ajanoko tijakanae orikubakitane. Ta-tuma Pablo, Silas tane najabuae iejobane waraoto amojeku abakitane. ⁶ Pablotuma tata ekirame tatuma Jasón iwarai kona-ruaeyama. Nome abamo eoborakate konaruae janokoina airamo-tumeta. Rokojotayaja ribane: Tamatuma raina ejotinarimo jakutai okoata nabakanae. ⁷ Jasón oriajanokoata tatuma etuwarae. Tatuma kokotuka Roma airamowitu aribu eku abanaja. Atae airamo raisa ja tane ribia. Awai Jesuama, taeyama. ⁸ Takore janokoina arao, janokoina airamotuma tane tamaja ribu nokoitane wiyawiyaeyama. ⁹ Tane Jasontuma burata moa-mejerei ebuae. Moakore ejeronaeyama. ¹⁰ Takore yawakanaka tai ima eku nome abamo Pablo, Silas tane Berea tata narumejerei inatabae. Takore tata nabakane Judio-tuma aorikware nakanokoata naruaeyama. ¹¹ Judiotuma Berea tata jakutai Judiotuma Tesalónica tata jakutaisi kwarika obojona ja. Tatuma ribu yaorane nokone ya kokotukanea Jabataja eku najabuae tamaja ribu nome ja tai tane naminakitane. ¹² Tiame tatuma kawanamo eraja nome abanaeyama. Grecia aribu aribamo kawanamo tatumarakate eraja nome abanae, tatu raomata, nibo tane. ¹³ Tiarone Judiotuma Tesalónica tata jakutai Pablo Dio aribu Berea tata rewaraya tane nokoaeyama. Nokoi-tane tata narune waraoto ewiyawiyaeyama. ¹⁴ Takore yawaka-naka nome abamo Pablo inatabae nojabaira amumiata narume-jerei. Silas Timoteo tane are Berea tata bajinae. ¹⁵ Pablo konaru-kore akonarumo janokoina Atenas ru tane are tatamojase baji-nae. Pablo ribu tatuma iamo inatabae Silas, Timoteo tane saba tatuma rubujiraja naomejerei. ¹⁶ Taitane Pablo Atenas tata Silas Timoteo tane yawakae-yama. Yawakayaja janokoina ekia ejobonae. Ejobane kokotu-kanea jebusita kobu tiaja miaeyama. Takore aobojona ekuana-witu ejobonaeyama. ¹⁷ Tiame Judiotuma aorikware nakanoko eku Judiotuma saba rewarae. Eobo Dio yatomaneteakutai tatuma saba rewarae. Ya kokotukanea wabinokoata warao nabakanajakutaisi saba rewaraeyama. ¹⁸ Tata nibo Epicuro ainamina sabasabamo jaja. Eobo Estoico ainamina sabasabamo jaja. Tatuma Pablo isia ribakitane jotananaeyama. Kawanamo ribane: Tamaja ribusebe jakutai katukayaja isia rewarakitane obonoya? taeyama. Takore eobo: Dio jirotuma isia rewaraya monuka, taeyama. Tatuma tametane ribunae Pablo Jesú isia Jesú anominina isia tane rewarajame. ¹⁹ Takore tatuma Pablo orikware nakanoko awai Areópago tata konaruaeyama. Isia ribane: Tamaja inamina jiro iji rewarayakutai taisi nokokitane obonoyaoko. ²⁰ Jiribu kawanamo kasaba mianare. Katukayaja jaja tai tane namina-kitane obonoyaoko, taeyama. ²¹ Atenas arao kokotuka jakutai, atae eobo tatukamoanarone tata ubayakutai tane are ribu jiro nokokitane o ribu jiro rewarakitane tanewitu obonoyayama. ²² Takore Pablo Areópago tata tatuma autu karamane rewa-raeyama. Ribane: Atenas arao, yatu ayajoraba kokotuka isia yatu jebutuma yatomaneteakutaisi miaine. ²³ Ine yatu ajebusita mibui nariaja nobeanaka abanoko jisaka miaine. Taisi arai ribu jabátae tiaja ja. DIO OKO NAMINANAJA JAKUTAISI SABA, tia. Yatu naminanaka yatomaneteakutai taisi yatu saba rewarayaine. ²⁴ Dio raina nonae. Kokotuka raina eku jakutai taisi nonae. Tai Dio najamutu, raina tane arotu. Janoko waraoto anona jakutaisi eku ubanaja. ²⁵ Dio jakutai kokotuka ja. Tiame Dio warao taisi saba nonamejerenaja. Tai oko ubamejerea. Ajaka kamoae jajinabuaramejerei. Kokotuka kamoae. ²⁶ Dio warao jisaka isimo ina kokotuka arao iejobonae kokotukanea ubamejerei. Tatuma kwaeabakitane jakutai taisi abanae. Aina akari abanae. ²⁷ Tane abanae tatuma Dio najabumejerei. Najabiaja mite tai. Tiarone nomewitu Dio jakutai warao jisaka jisaka awere bajia. ²⁸ Taisi aobojona oko ubaya, oko naria, oko ja tane. Ajabatamo yatu kawanamo raisa raisa jabataeyama. Oko Dio anobotomo, taeyama. ²⁹ Tiame oko Dio anobotomotiji tametane Dio isia obono-bukitane yakerena. Jebusita burata simonona jakutai tai Dio. O burata jokonona o joyonona o warao oriaobojona eku nona-jakutai tai Dio tane obonobukitane yakerena. ³⁰ Ateje warao Dio naminanaja jakore Dio tatuma kware barinaka wakae. Tiarone ama Dio warao kokotukanea ubayakutaisi kajotabia tatuma kokotuka aobojona ibaremejerei. ³¹ Dio ya abanae taisi eku raina arao kokotuka aribu nome toakitane. Nomeraja nome toate. Tiame aobojona ibaremejerea. Dio mibune niborama nisanae ribu nome atoatu tane. Warao kokotuka Dio aribu nome tane naminamejerei nisanajakutai wabaerone taisi enomininae, tae-yama. Pablo tane rewarae. ³² Takore aribu anokomo kawanamo waba anominina isia nokoitane Pablo ekotubuaeyama. Tiarone eobo ribane: Iji atane-jese kasaba rewarakore yakerakuna, taeyama. ³³ Takore Pablo tatuma iabane naruaeyama. ³⁴ Narukore warao kawanamo taisi iamo narune nome abanaeyama. Nomeabajiro kawanamo jisaka awai Dionisio jaja. Tai Areópago akarata saba-sabamo. Atae raisa tira awai Dámaris jaja. Eobo tatuma isiko jajayama.

¹ Tatukamo Pablo Atenas tatamo ejobane janokoina Corinto tata nabakanaeyama. ² Tata Judio awai Aquila miaeyama. Aquila jakutai ina Ponto arotu. Kaje sabuka atira Priscila isiko ina Italia tatamo naoaeyama. Roma airamowitu Claudio kajotabuae Judiotuma kokotuka Roma ekumo naru-mejerei. Tiame Aquilatuma tatamo naoae. ³ Yaota janoko enese-rao nonakitane jakutai tai Aquilatuma ayaota. Pablo yaota taijase naminayame tatuma isiko yaotakitane bajinaeyama. ⁴ Taitane ya tuwara kokotukanea Pablo orikware nakanokoata naruaeyama. Tata rewarayaja Judiotuma, Grecia arao tane taisi arewara iamo bajemejereaeyama. ⁵ Takore Silas, Timoteo tane Macedonietamo naokore kwa-rika rewarayaja tane bajinaeyama. Judiotuma saba rewarayaja Jesú jakutai tai Akirito, tane rewaraeyama. ⁶ Tiarone Judiotuma Pablo aribu ribotane, isia asiraja ribunaeyama. Tane ribakore Pablo oriajiaka narimae tatuma iabakitane. Ribane: Yatu oriao-bojonaya wabate. Maobojonena. Tamatukamo Judioaneta narutine, taeyama. ⁷ Taitane orikware nakanoko ekumo ejobane nibora awai Justo ajanokoata naruaeyama. Justo jakutai Dio ayatomanetetu. Ajanoko jakutai orikware nakanoko ajajaya jajayama. ⁸ Crispo, orikware nakanoko airamo jakutai, tai Airamo isia nome abanae awarao kokotuka isiko. Corinto arao eraja ribu nokone tatuma nome abakore joni ekobuaeyama. ⁹ Takore imaya Pablo amu eku Airamo ejobane ribunaeyama: Retanaka jau. Inare tanaka are rewarau. ¹⁰ Ine jikaika jaine. Jisakarakate jitorekomoni jiasiratakitane. Tamaja janokoina eku ine jaja warao eraja jaine. Tiame tatuma saba rewarau, taeyama. ¹¹ Takore Pablo inawaja jisaka kware autia Corinto tata baji-nae Dio aribu Corinto araoto inaminayaja. ¹² Takore Galión ina Acaya akobenajoro tane ejobakore Judio-tuma aobojona jisaka eku abane Pablo ribu nome toanokoata konaruaeyama. ¹³ Tane kobenajoro isia ribane: Tamaja warao Dio yatomanetemejerea. Tiarone aribu eku abane yatomanetea-kore kakajotabu ekuana ejoboya, taeyama. ¹⁴ Takore Pablo ribakitiakore Galión Judiotuma isia ribane: Yatu Judiotuma, yatu nona asirajasi aobojona o akobaka anona aobojona naoajakore yakerakuna. Tane jakore ine maobojona iabane yatu aribu nokokuine. ¹⁵ Tiarone taneana. Ributuma aobojona. Waituma aobojona. Yatu akajotabu akarata aobojona naoae. Yatu wite ribu nome toakotu. Ine tamaja ribu nome toakitane obononajine, taeyama. ¹⁶ Taitane tatuma webotonae ribu nome toanoko ekumo. ¹⁷ Ta-kore Judioana kokotuka ribu nome toanoko ekumo ejoboyaja orikware nakanoko airamo Sóstenes jakutaisi oane kobenajoro amujaba nanuaeyama. Tiarone kobenajoro tatuma anona kware barinatanaeyama. ¹⁸ Takore Pablo mate ya eraja bajinaeyama. Taitane nome abamo isia nariaine tane abane waeraira eku nabakanae ina Siria tata narukitane. Priscila, Aquila tane Pablo iamo naruaeyama. Mate Cencrea tata waeraira eku nabakamoana jaja oriakwa wijiae ribu Dio moajame. ¹⁹ Taitane janokoina Efeso tata nabakane Priscila Aquila tane iabanaeyama. Pablo arejase orikware nakanokoata narune Judiotuma saba rewaraeyama. ²⁰ Takore tatuma Pablo ebuae ya eraja bajemejerei. Tiarone Pablo tata bajekitane obononatanaeyama. ²¹ Tiame Pablo nariaine abane ribane: Oriwaka kawere jakutaisi eku Jerusalén tata oriwakakitane jaine. Tiarone Dio tane obonokore atanejese yatuata naotine yatu mikitane, taeyama. Taitane waeraira eku nabakane Efeso tatamo naruaeyama. ²² Waeraira Cesarea tata nabakakore Pablo wajiabara Jerusalén tata naruae ikeresia araoto isia yakerara abakitane. Tatukamo Antioquia tata nanakanae-yama. ²³ Taitane ya eraja takore Pablo atanejese ejobonaeyama. Ina Galacia, ina Frigia tane ekia kujuae nome abamo kokotuka aobojona taeraja tane abayaja. ²⁴ Tai inawaja eku Judio awai Apolos Efeso tata nabaka-naeyama. Tai Alejandria arotu. Tai rewaratu yakerajayama. Jabataja yaorane naminaeyama. ²⁵ Ebe eobo Airamo ajojisi isia taisi inaminae. Rewarakitane kwana obonoyaja jajayama. Ai-ramo isia yakeraja rewaraeyama. Tiarone Juan aribia warao joni ekobia, taiwitu naminaeyama. ²⁶ Apolos jakutai retayajenaka orikware nakanoko eku rewarakitane jotananaeyama. Takore Aquila, Priscila tane Apolos aribu nokone emo konaruae yakeraja Dio ajojisi taisi inaminakitane. ²⁷ Takore Apolos ina Acaya tata naruobonoyakore nome abamo taisi sanetaeyama. Karata nome abamo Acaya tata jakutaisi saba jabatae yakeraja Apolos etuwa-ramejerei. Acaya tata warao Dio aobojona ayakara isia nome abanaeyama. Takore Apolos Acaya tata nabakane nome abamo tata jakutaisi kwana sanetaeyama. ²⁸ Kokotuka amujaba yakeraja rewarane Judio aribu kwarikae. Jabataja inaminayaja Jesú jakutai tai Akirito tane inaminaeyama.

¹ Apolos Corinto tata jakore Pablo inabea kujune Efeso tata nabakanaeyama. Efeso tata nome abamo miaeyama. ² Mitane renokoae. Yatu nome abane Dio Amejokojira Yakerajawitu nojoaera? taeyama. Takore tatuma ribane: Mejokojira Yakerajawitu ja tane noko-nakawitu jajaoko, taeyama. ³ Takore Pablo renokoae. Yatu joni ekobiaja sinama aribia yatu ekobuae? taeyama. Takore: Juan aribia kekobuae, taeyama. ⁴ Pablo ribane: Warao aobojona ibarekore Juan tatuma joni ekobunaeyama. Tiarone tatuma isia ribunae. Manokabuka nao-yakutai taisi isia nome abakitane ja, taeyama. Nokabuka naoaja-kutai tai Jesú. Tai Akirito, taeyama. Pablo tane ribunaeyama. ⁵ Tatuma tamaja ribu nokokore Airamo Jesú aribia tatuma joni ekobunaeyama. ⁶ Takore Pablo oriamojo tatuma arai abakore Dio Amejokojira Yakerajawitu tatumeta naoaeyama. Ribu raisama naminanajarone ribunaeyama. Dio kware rewaraeyama. ⁷ Nibo kokotuka asebe mojoreko kware manamo monuka. ⁸ Takore Pablo waniku rijanamo isia orikware nakanokoata are nariaja retanaka rewaraeyama. Dio arujuna rujuyakutaisi isia rewaraji taeyama aribu iamo bajemejerei. ⁹ Tiarone warao kawa-namo oriaobojona taeraja tane abane nome abanatanaeyama. Tane eobo amujaba Dio ajojisi isia asiraja ribunaeyama. Takore Pablo tatuma iabane nome abamo emo konaruae Tiranno ainaminanoko tata. Tata ya kokotukanea rewaraeyama. ¹⁰ Tane nonae inawaja manamo isia. Takore ina Asia arao kokotuka rewara yakeraja Airamo Jesú isia jakutaisi nokoaeyama. Judio nokoae, Judioanarakate nokoae tane. ¹¹ Dio jakutai Pablo nona taeraja uriraja nonamejereae. ¹² Kwamotu o jiaka Pablo torina-jakutai muanayakutaisiata konaruaeyama. Tata konarukore muanayakutai bajukanae. Jebu asiraja tatuma ekumo ejobonae-yama. ¹³ Judiotuma kawanamo kujumo jakutai tatuma ayaota jakutai waraoto ekumo jebu inatabakitane. Tatuma kawanamo Airamo Jesú awai warayaja jebu asiraja inatabakitane obonoaeyama. Ribane: Pablo Jesú isia rewaraya. Oko Jesú aribia yatu kajotabia waraoto ekumo ejobamejerei, taeyama. ¹⁴ Judio awai Esceva anobotomo mojoabasi kware manamo jakutai tane nonaeyama. Arima jakutai saserotetuma airamo jajayama. ¹⁵ Taisi anobotomo tane ribakore jebu asiraja jakutai tatuma riboto ribane: Ine Jesú naminaya. Pablorakate naminayaine. Tiarone yatu sinatuma bajama? taeyama. ¹⁶ Taitane nibora jebu asiraja jaja tatuma tijakane taeraja orikubane kokotuka kwarikanaeyama. Takore tatuma waraojoro boisibune janoko ekumo kurujubuaeyama. ¹⁷ Tane takore Efeso arao kokotuka, Judio kokotuka jakutai, Judioana jakutai tane, taisi nokone kokotuka kwana retaubuae-yama. Ribane: Airamo Jesú awai yakerajawituraji bajama! tae-yama. ¹⁸ Takore eraja nome abayakutai naone anona ebe nonaja-kutaisi nowaraeyama. ¹⁹ Wisimorakate ajoa akarata konane kokotuka amujaba erokunaeyama. Karata amoara sinarijakore amoara burata joko sinarijaira siento asibi kaika ejobonaeyama. ²⁰ Tametane ajara taeraja isia Dio aribu are kayayaja ribu eobo kwarikanaeyama. ²¹ Tatukamo Pablo ina Macedonia, ina Acaya tane tata naru-kitane obonoaeyama Mejokojira aobojona. Tatukamo are narune Jerusalén tata nabakakitane obonoaeyama. Pablo ribane: Jeru-salén tata narune Romarakate mikitane jaine, taeyama. ²² Tai-tane mate ya era sabuka Asia tata bajene asanetamo manamo Macedonieta inatabaeyama. Asanetamo awai Timoteo, Erasto tane. ²³ Tai sinarija eku Airamo ajojisi aobojona Efeso tata kwana wiyawiyaeyama. ²⁴ Jisaka awai Demetrio eobo ewiyawi-yaeyama. Demetrio jakutai nona anonatu. Diotira Diana ajanoko asita burata jokonona nonae wabikitane. Demetriotuma janokosita wabine burata uriraja miaeyama. ²⁵ Taitane Demetrio yaotamo akwatuma eobo atae tatuma anebu tane orikware toane saba rewaraeyama. Ribane: Nebu. Oko kayaota isia yakeraja ubaya. Yatu taisi naminaya. ²⁶ Yatu tamaja Pablo naminaya. Aribu nokoya. Pablo ribia: Diosita waraoto amojo isia nonaya-kutai tatumasike dioana, tia. Tane ribiaja warao eraja emo inabajiae aribu eku abamejerei. Efesoatawituana. Tiarone ina Asia kokotukanea tane ejoboya. ²⁷ Kasaba jawanerajawitu. Oko kayaota rijate tai. Kariotira Diana uriraja jakutaisi ajanoko isia rewara yakeraja ja. Taisi arewara rijate tai. Ina Asia arao raina kokotukanea arao tane Diana yatomanetea. Tiarone Pablo aribu aobojona warao Diana airamo tane abaobononatate tai, taeyama. ²⁸ Takore eobo Demetrio aribu nokone kwana orijisiraja ejobonaeyama. Rokojotae: Diana Efeso ariotira jakutai urirajaraji! taeyama. ²⁹ Takore janokoina arao kokotuka wiyawiyaeyama. Tatuma Pablo amuaraisatuma oaubune iawarai orikware nakanokoira tata konaruaeyama. Amuaraisatuma awai Gayo, Aristarco tane. Tatuma Macedonia arao. ³⁰ Konarukore Pablo tata yarukitane obonoae waraoto saba rewarakitane. Tiarone nome abamo Pablo yarumejerenatanaeyama. ³¹ Asia airamotuma kawanamo Pablo amusaba jakutai ribu Pablo saba inatabae ebukitane tata yarunaka jamejerei. ³² Janokoina eku warao wiyawiyajame kawanamo obonobu jisaka isia ribiaja rokojotaeyama. Eobo obonobu raisama isia rokojotaeyama. Eraja katukeme orikware nakae tai tane namina-natanaeyama. ³³ Takore Judiotuma ajisaka awai Alejandro yejisinae kokotuka ebisaba karamamejerei. Eobo Alejandro saba katukeme orikware nakae tai tane rewaraeyama. Takore Alejan-dro amojo isia inaretamejereae tatuma kware ribakitane. ³⁴ Tiarone waraosebeira Alejandro Judio tane naminane kokotuka rokojotaeyama. Ya asinarija manamo isia rokojotaeyama. Ribane: Diana Efeso ariotira jakutai urirajaraji! taeyama. ³⁵ Takore janokoina airamo sabuka, jabatatu jakutai warao inaretamejerei isia ribane: Efeso arao, diotira Diana jakutai tai uriraja. Ajanoko Efesoata ja. Efeso arao jakutai taisi ajanoko yaoroya. Diana asita dio Jupiter tatamo nakajakutaisi yaoroya tane. Raina arao kokotuka taisi naminaya. ³⁶ Jisakarakate tane-ana tane ribakomoni. Tiame inareraja bajekotu. Obonobunaka nonanaka jakotu. ³⁷ Tamatuma yatu konajakutai tatuma kwai ribunoko ekumo erijisanatanae. Yatu ariotira isia asiraja ribu-natanae tane. ³⁸ Demetriotuma tatuma kware abakitane obono-kore ribu nome atoamo ja. Airamo ja. Tatumeta narune ribu nome toate. ³⁹ Yatu aobojona raisa jakore kajotabu eku orikware nakane nome toate. ⁴⁰ Ama nonajakutaisi aobojona airamotuma oko orikuba arao tane kakware abate tai. Karenokokore oko katukeme wiyawiyae tai tane ribakomoni, taeyama. ⁴¹ Tane ribaitane waraoto inatabae ajanokoata narumejerei.

¹ Wiyawiyajio takore Pablo nome abamo yejebuaeyama reirikitane. Reiritane rijana nariaine tane abane tatuma mejotane tane ina Macedonia tata naruaeyama. ² Kokotukanea kujuyaja ribu erajasi isia nome abamo reiriaeyama. Tane ina Grecia tata nabakanaeyama. ³ Grecia tata waniku rijanamo isia bajinaeyama. Tane waeraira eku Siria tata narukitane oriiyaka-rataeyama. Tiarone Judio Pablo isia asiraja nonaobonoajakutai taisi Pablo naminaeyama. Tiame wajakaya naruaeyama. Atane-jese Macedonia ekia naruaeyama. ⁴ Asia tata iamo nariakutai tai tamatuma: Sópater Berea arotu. Aristarco Segundo tane Tesa-lónica arao. Gayo Derbe arotu, Timoteo tane. Tíquico, Trófimo tane Asia arao tane. ⁵ Tamatuma kebe narune janokoina Troas tata kayawakae. ⁶ Oriwaka Bãu Akwaruta Ekiraja jakutai kwaeabakore oko waeraira eku nabakane Filipos tatamo ejobo-naeko. Ya mojoabasi takore Troas tata nabakanaeko. Tata ya mojoabasi kware manamo bajinaeko. ⁷ Takore misa ya wajiabara eku nome abamo orikware nakae bãu nakaríae tiajasi najorokitane. Orikware nakakore Pablo tatuma inaminae. Ya araisamaya narukitiame are rewarayaja imautu tae. ⁸ Tatuma namu kwai jajasi eku orikware nakae. Tata abije eraja rokiaja ja. ⁹ Neburatu jisaka awai Eutico janoko akojo sanuka eku rujúnae tiaja ja. Pablo rewaraji tajame neburatu murejeraja ja. Ubaútae tiaja, janoko aborojoro rijanamo tatamo joika nakae. Wabawitu kobukanae. ¹⁰ Takore Pablo nanakane neburatu arai yajene, mejotane tane ribane: Wiyawiyanaka jakotu. Tai riko ja, taeyama. ¹¹ Taitane atanejese kwai yaburuae. Tane bãu nakaríae tiajasi najorone rewaraji jokonae. Jokakore naruae. ¹² Takore neburatu jakutaisi awarao tai riko konaruae. Tiame tatuma akobe yaorane tuwarae. ¹³ Oko waeraira eku nariaja Pablo ebikaya Asón tata naru-aeko tata oriyanabakakitane. Pablo wajakaya narukitane obonoa-jame ribu tane abanae. ¹⁴ Takore Asón tata oko oriyanabakane Pablo kaisiko waeraira eku nabakanae. Taitane Mitilene tata nabakanaeko. ¹⁵ Tatukamo ejobane ubajokanea Quio kejenu-kaya naruaeko. Atae ubajokanea jomuku Samos tata sewiri-naeko. Trogilio tata tuwaraeko. Ya araisamaya Mileto tata naba-kanaeko. ¹⁶ Pablo nomeraja Efeso kwaeabakitane aobojona abanae ya eraja ina Asia tata bajinaka jakitane. Tiame Mileto tata nabakanaeko. Pablo Jerusalén tata rubujiraja nabakakitane obonoae. Yakerakore Oriwaka Pentecostés eku tata bajekitane obonoae. ¹⁷ Pablo Mileto tata jaja Efeso tata ribu inatabae ikeresia airamotuma naomejerei. ¹⁸ Naokore isia ribane: Ine ateje ina Asia tata naoaine. Manao awajiabarayatukamo yatu manona kokotuka yatu kawanaya nonajakutaisi naminaya. ¹⁹ Airamo akajotabu tane yaotaine. Eobo yajoto oriabayaja yaotaine. Eraja tane onaine. Judiotuma eraja tane mayakara mikitane obonoae. ²⁰ Tiarone yatu saba yakeraja jakutai ribu jisakarakate rewa-ranaka bajinatanaine. Yakareku eobo amujaba janokoya tane yatu inaminaine. ²¹ Judiotuma isia Judioana isia tane ribunaine. Yatu aobojona Dio sabasabaya ibarene Kairamo Jesukirito isia nome abakotu, taine. ²² Ama rijana Dio Amejokojira Yakera-jawitu makoyanae monuka ine Jerusalén tata narumejerei. Tata maisiko katukane kwaeabate tai tane naminanajine. ²³ Tamaja ribu jisaka naminayaine. Janokoina kokotukanea ine nariakutaisi eku Mejokojira Yakerajawitu maisia ribia: Mojojutanoko jiyawakaya. Sanamata eraja jiyawakaya, tia. ²⁴ Tiarone maobonobu eraja ejobonaja. Suatana ubakitane are masaba amoara ekira. Ine nonakitane jakutai ekeiraja taisi nona riwarakitane obonoyaine. Airamo Jesú yaota mamoae rewara yakeraja Dio aobojona ayakara isia rewaramejerei. Yaota riwarakitane obonoyaine. ²⁵ Ine rewárae kujuyaja Dio arujuna rujuyakutaisi isia yatu kokotuka saba rewarae. Amayatukamo yatu maribu anokomo jakutai yatu jisakarakate atanejese maminatate, tiaine. ²⁶ Tiame ama yatu isia ribiaine: Yatu wabakore maobojonena. ²⁷ Dio oriaobojona abanajakutai taisi kokotuka yatu saba rewaraine. Ribu jisakarakate rewaranaka bajinatanaine. ²⁸ Amasike oriyao-rokotu. Obejatuma kokotuka yaorokotu. Dio Amejokojira Yake-rajawitu yatu yaoromo tane abanae Airamo aikeresia yaorome-jerei. Airamo oriajotu isia ikeresia amoara abanae. ²⁹ Ine narukore eobo naote. Ikeresia iekorakitane obonoyaja naote. Tobe obeja iekoreakutai taisi monuka ikeresia iekorakitane obo-note. Taisi naminayaine. ³⁰ Yatu ekumojase nokaramane ribu tonarone ribu nome tane inaminate nome abamo ribu nome iabane tatuma iamo narumejerei. ³¹ Oi! Ine inawaja rijanamo isia jokomaya, imaya tane yatu jisaka jisaka reiriaine. Onayaja reiriaine. Yatu aobojona tata nakakotu. ³² Ama, mawarao, ine Dio amojeku yatu abayaine. Ribu Dio aobojona ayakara isia jakutai taisi eku yatu abayaine. Dio jakutai taeraja yatu aobojona taeraja tane abakitane. Dio warao emo abanae orisaba. Ribu jakutai tai taeraja yatu warao emo abánae tiakutaisi kokotuka Dio isimo nojomejerei. ³³ Ine wite orisaba raisama aburata joko o aburata simo o ajiaka obononatanaine. ³⁴ Ine mamojo isia yaotaine ekirakutaisi nisakitane. Maisiko akujumo sabarakate nisakitane jamejerei yaotaine. Yatu taisi naminaya. ³⁵ Tametane yaotayaja warao ajarata ekirakutaisi sanetakitane ja. Ine are tane kokotuka yatu inaminaine. Kaobojona Airamo Jesú aribu tata nakakitane ja. Jesú ribane: Moayakutaisi aekei, nojoyakutaisi aekei kwarika, taeyama. Tane Pablo rewarae. ³⁶ Pablo rewarajio tane jinamane rujane kokotuka isiko kwai ribunae. ³⁷ Kokotuka kwana onayaja, Pablo mejotane amukaba orobuae. ³⁸ Pablo atanejese maminatate tane ribunajame tatuma ekumoniraja bajinae. Tane iamo waeraireta naruae.

¹ Taitane nome abamo iabane waeraira eku nabakane nomeraja narune Cos tata sewirinaeko. Ya araisamaya Rodas tata. Tatukamo Pátara tata. ² Tata waeraira Fenicia tata narukitane jakutaisi miaeko. Eku nabakane naruaeko. ³ Burujo Chipre miaeko. Chipre akajamojo sabasaba bajinae. Oko are Siria sabasaba naruaeko. Waeraira ajoka Tiro tata iarakitane jame tata sewirinaeko. ⁴ Takore nome abamo najabune ya mojoabasi kware manamo tatuma isiko bajinaeko. Takore tatuma Mejokojira aobojona Pablo isia ribunae Jerusalén tata narunaka jamejerei. ⁵ Tiarone ya mojoabasi kware manamo jerokore are naruaeko. Oko nariakore nome abamo kokotuka atatu isiko, anobotomo isiko tane kaiamo naruae janokoina ekumo ejobakitane. Jomuku jinamane rujane kwai ribunaeko. ⁶ Taitane mejotane nariaine tane abane waeraira eku nabakanaeko. Takore tatuma ajanokoata bajinae. ⁷ Waeraira eku nariaja Tiro tatamo Tolemaida tata ru tane naruaeko. Tata nome abamo isia yakeraubiara abane isiko ya jisaka bajinaeko. ⁸ Ya araisamaya oko Pablo iamo narune janokoina Cesarea tata nabakanaeko. Tata Felipe ajanokoata nabakanaeko. Felipe jakutai rewara yakerajasi arewaratu. Tai ikeresia asanetamo mojoabasi kware manamo kawanamo jisaka. Taisi isiko bajinaeko. ⁹ Felipe anobotomo tatu saretuma mana-monamojase jaja. Tatuma Dio kware arewaramo. ¹⁰ Oko tata ya era sabuka jakore jisaka Judea tatamo naoae. Awai Agabo. Taisike Dio kware arewaratu. ¹¹ Okoata naone Pablo akabe-akoya oane taisi isia oriomu, oriamojo tane koyanae. Ribane: Mejokojira Yakerajawitu ribia: Jerusalén tata Judiotuma tamaja kabea akoya arotuma koyate. Judioana amojeku abate, tia, taeyama. ¹² Tamaja nokoitane oko Cesarea araorakate Pablo ebuaeko Jerusalén tata narunaka jamejerei. ¹³ Tiarone Pablo kariboto ribane: Yatu katukeme onayaja ekumoniraja tane mabaya? Makoyakore maobojona eku. Jerusalén tata Airamo Jesú awai aobojona ine wabakitane jakorerakate maobojona eku, taeyama. ¹⁴ Takore oko taisi aribu kwarikakomoni jame iabanaeko. Oko ribane: Airamo oriaobojona eku nonakunarai, taeko. ¹⁵ Tatukamo kaunukamo iyakaratane Jerusalén tata naruaeko. ¹⁶ Oko nariakore Cesarea arao nome abamo jakutaisi kawanamo kaiamo naruae. Jisaka awai Mnason, Chipre arotu. Tai ateje-atukamo nome abatu. Oko taisi ajanokoata tuwarakitane obo-none taisi konaruae. ¹⁷ Oko narune Jerusalén tata nabakakore nome abamo ekeiraja ketuwarae. ¹⁸ Ya araisamaya Pablo kaiamo naruae Jacobo mikitane. Ikeresia airamo kokotuka tata ja. ¹⁹ Pablo yakeraubiara abane kokotuka tatuma saba yaorane rewarae. Dio Judioana kawanaya Pablo nonamejereakutai taisi rewarae. ²⁰ Tatuma Pablo aribu nokone Diosike yakeraja jae, tane ribunae. Taitane Pablo isia ribane: Amasike, Raje, Judiotuma sinarijairatuma nome abajakutai iji taisi naminaya. Tiarone tatuma kokotuka are Moisés akajotabu eku abakitane kwana obonoya. ²¹ Tatuma isia ribunajae: Pablo ina raisama eku jakore Judio kokotuka emo inaminaya. Moisés akajotabu eku abanaka jamejerei inaminaya. Anobotomo ajoro serenaka jamejerei inaminaya. Tuata namínae tiakutaisi eku abanaka jamejerei inaminaya, tajae. ²² Oko katukate tai? Tatuma jinabakana nokoitane orikware nakate. ²³ Amasike oko jireirikore karibu eku abanu. Kaisiko nibo manamonamojase ja. Tatuma ribu Dio moae. Taisi eku bajekitane ja. ²⁴ Tatuma isiko naru. Tuata namínae tiakutaisi eku iji tatuma isiko berene tatuma amoara abate. Tatuma ribu eku bajiaja oriakwajio wijine jokko tane bajete. Iji tane nonakore kokotuka naminate. Jiisia rewarajakutai tai nomeana tane naminate. Ijirakate kajotabu eku abayakutai taisi naminate. ²⁵ Tiarone Judioana nome abajakutaisi isia ribu abane tatuma saba ribu jabataeko. Tuata namínae tiakutaisi eku abakitane ekira. Tiarone najoro diosita moajakutai taisi najoronaka jakitane ja. Jotu najoronaka jobinaka tane jakitane ja. Romu aro koyane najakutai taisi najoronaka jakitane ja. Tatusebe o nibosebe tanaka jakitane ja, tae. ²⁶ Takore tatuma aribu eku Pablo nibo manamonamojase isiko naruae. Ya araisamaya tuata namínae tiakutaisi eku tatuma isiko berene kwai ribunoko eku yaruae. Berekitane aya jeroki-tane awere tane enokokitane yaruae. Aya kaikakore jisaka jisaka nobeanaka Dio saba konane moakitane ja. ²⁷ Tiarone ya mojoabasi kware manamo kaika nakakitiakore Judiotuma Asia arao jakutai Pablo kwai ribunoko eku jakore miae. Mitane waraosebeira kokotuka ewiyawiyaeyama. Pablo oaubune rokojotaubuaeyama. ²⁸ Ribane: Israeltuma, kasanetakotu. Tamaja kokotukanea kujuyaja warao kokotuka inaminaya. Kawaraoto riboto, Moisés akajotabu riboto, tamaja kwai ribunoko riboto tane inaminaya. Atae nona asiraja kwarika jakutai: Grecia araoto konae kwai ribunoko eku. Tiame tamaja janoko yakerajawitu jakutai wisi tane bajinae, taeyama. ²⁹ Ebe Trófimo Efeso arotu jakutai Pablo isiko naruae jano-koina ekia. Nariakore tatuma miae. Tiame tametane ribunae Pablo Trófimo kwai ribunoko eku konaruae tanabajame. ³⁰ Tiame janokoina arao kokotuka wiyawiyaeyama. Tane kiririaeyama. Taitane Pablo oabune, kwai ribunoko ekumo iawaraubune, akojo rubujira mukoronaeyama. ³¹ Taitane Pablo nakitiakore ribu yaoromo airamoata konaruaeyama. Jerusalén arao kokotuka wiyawiyaya tane rewaraeyama. ³² Takore airamo jakutai ayaoromo orikware toae yaoromo siento jisaka akabitanatuma isiko. Tane waraotoata kurujubuaeyama. Takore warao airamo ayaoromo isiko mitane Pablo naniaja iabanaeyama. ³³ Iabakore airamo Pablo awere nabakane, emojojutane karena manamo isia koyamejereaeyama. Taitane tamaja sina tai? Katukayaja nonaya tai? tane renokoaeyama. ³⁴ Tiarone warao eobo emo ribunae. Eobo emo ribunae. Kwana rokojotayame airamo nokokomoni ejobonaeyama. Tiame Pablo yaoromo ajanokoata konarumejereae. ³⁵ Takore yaoromo ajanoko ayaburunokoata nabakanae. Yaoromo Pablo kobukane konaruae warao taisi nakitane obonoyame. ³⁶ Warao kokotuka tatuma iamo naoyaja rokojotae: Taisi nakitane ja! taeyama. ³⁷ Takore tatuma yaoromo ajanoko eku Pablo konarukitiakore Pablo yaoromo airamo isia ribunae. Ribane: Jiisia ribakitane yakerenara? taeyama. Takore: Iji Grecia aribu naminayara? ³⁸ Amasike. Ateje sabuka Egipto arotu orikubakitane jotananae. Akobakatuma sinarijairatuma manamonamojase jarawaja tata konaruae. Iji taianara? taeyama. ³⁹ Takore Pablo ribane: Ine raisa. Ine Judio janokoina Tarso ina Cilicia arotu. Ine janokoina uriraja arotu. Ine jiebiaine jisaba yakerakore ine waraoto saba rewaramejerei, taeyama. ⁴⁰ Takore airamo ribamejerekore Pablo yaburunoko arai kara-mane amojo isia warao inaretamejereaeyama. Inaretakore ebereo aribu isia ribiaja saba rewaraeyama.

¹ Ribane: Mawarao, iramotuma tane, ine ama orikware ribiakore maribu nokokotu, taeyama. ² Tane ebereo aribu isia ribiakore nokoitane kwarika inaretaeyama. ³ Takore Pablo ribane: Inesike Judio. Ine janokoina Tarso ina Cilicia eku nakaine. Tiarone tamatuka Jerusalén eku nojo-tonaine. Mainaminatu jakutai Gamaliel. Kanobotuma akajotabu ekuwitu mainaminae. Dio aobojona eku abakitane are mao-bojona ekuwitu. Yatu kokotuka ama Dio aobojona eku abakitane kwana obonoyakutai taisi monuka ine. ⁴ Rewara yakerajasi eku abamo iyajubuaine kubakitane. Nibo tatu tane emojojutane mojojutanokoata konaruaine. ⁵ Saserote airamowitu, iramotuma kokotuka tane taisi naminaya. Tatuma karata mamoae kawarao Judio Damasco arao jakutaisi saba. Mamoakore Damascoata naruaine nome abamo najabukitane. Nome abamo mitane emojojutane tane Jerusalén tata konaru-kitane obonoaine tata tatuma isanamatamejerei. ⁶ Tiarone ine jojisi ekia nariaja Damasco awere jakore ya kwai monuka najamutuatamo tatukawitu jokoma uriraja masinajaranae. ⁷ Masinajarakore joika nakaine. Tane maisia ribiakore nokoaine. Ribane: Saulo, Saulo, iji katukeme maisana-mataya? tae. ⁸ Takore ine ribane: Mairamo, iji sina bajama? taine. Takore maisia ribane: Ine Jesú Nazaret arotu. Iji isana-matayakutai tai ine, tae. ⁹ Maisiko jakutai jokoma mitane retaubuae. Tiarone ribu maisia ribunajakutai taisi nokonatanae. ¹⁰ Takore ine ribane: Mairamo, iji katukane ine nonamejerea? taine. Airamo maisia ribane: Karamane Damascoata naru. Kokotuka iji nonakitane jakutai tata jisaba rewarate, tae. ¹¹ Jokoma yi tajakutaisi aobojona ine mikomoni baji taine. Takore maiamo anarumo mamojo oane makonarukore Damas-coata nabakanaine. ¹² Tata nibora awai Ananias jaja. Ananias jakutai kajotabu akarata kaika Dio ayatomanetetu jaja. Judiotuma kokotuka Damasco arao jakutai Ananias isia yakeraja rewarae. ¹³ Ananias ineata naone, mawere karamane ribane: Raka Saulo, seoranu rijana, tae. Takore rijana seoronaine. ¹⁴ Takore Ananias maisia ribunae: Kanobotuma Ario ateje jimibune jinisanae aobojona naminamejerei. Jinisanae Nomerajawitu jakutaisi mimejerei, aroko ekumo aribu nokomejerei tane. ¹⁵ Iji taisi isia arewaratu tane bajete. Iji warao kokotuka saba iji miajakutai nokoajakutai tane rewarate. ¹⁶ Ama iji katukeme kware majabaya? Karamanu. Ine joni jiekobate. Jiaobojona asirajasi beremejerei Airamo awai waranu, tae. ¹⁷ Tatukamo Jerusalén tata bajene kwai ribunokoata naruaine kwai ribakitane. Kwai ribiaja Diowitu isia obonobiakore tametane miaine. ¹⁸ Airamo maisia ribiakore miaine. Tai ribane: Rubujira Jerusalén ekumo ejobanu, tatuma jirewara maisia jakutai taisi nokonatate jame, taeyama. ¹⁹ Tiarone ine ribane: Mairamo, tatuma manona naminaya. Ine orikware nakanoko kokotuka ekia nariaja jiisia nome abayakutaisi emojojutane yewereaine. ²⁰ Jiisia arewaratu Esteban jakutai wabakore ine tata karamúnae tiaja jajaine. Nakore maobojona eku ejobonae. Anamo ajiaka yaoroaine, taine. ²¹ Tiarone Airamo maisia ribane: Naru rijana. Utiraja jiainatabatine, Judioana saba rewaramejerei, tae, taeyama. Pablo tane rewaraeyama. ²² Pablo mate tamaja ribu ribamoana jakore aribu yaorane nokoaeyama. Tamaja ribu ribakore rijana rokojotakitane jotananaeyama. Ribane: Wabakunarai! Suatana ubakore asira rijana, taeyama. ²³ Taitane rokojotayaja ajiaka jiwarane joika toaubiaja, joboto ajuju kwai timiaja tane taeyama. ²⁴ Tane takore yaoromo airamo Pablo yaoromo ajanoko eku konarumejereaeyama. Ribamejerei yeweremejereae warao katukeme taisi riboto rokojotaya tai tane naminakitane. ²⁵ Tiame amojo koyanae yewerekitane. Koyakore Pablo yaoromo siento jisaka akabitana tata jakutaisi isia ribane: Roma arotu yewerekitane ribu ja mojoro? Aribu nome toanaka yewerekitane ribu ja mojoro? taeyama. ²⁶ Akabitana ribu nokone yaoromo airamo enokokitane naru-aeyama. Ribane: Tamaja Roma arotutiji yewereterate, taeyama. ²⁷ Takore yaoromo airamo Pabloata narune renokoae. Iji nome-witu Roma arotu mojoro? taeyama. Takore: Tai ine, taeyama. ²⁸ Takore airamo riboto ribane: Ine arotuanarone amoara uri-rajasi isia nisanaine arotu tane bajekitane, taeyama. Takore Pablo ribane: Ine Roma arotu tane nakaine, taeyama. ²⁹ Tiame Pablo yewerekitane jakutai iaba, taeyama. Yaoromo airamorakate retaeyama. Pablo Roma arotu tane naminane Pablo koyanajame retaeyama. ³⁰ Taitane yaoromo airamo Judiotuma katukeme Pablo kware abaya tai tane naminakitane obonoaeyama. Tane ya arai-samaya Pablo akarena ejerone saserote airamotuma orikware toae ribu nome toanoko arao kokotuka isiko. Tane Pablo iejo-bane tatuma amujaba abanaeyama.

¹ Takore Pablo ribu nome toanoko araoto amu mijaja ribane: Mawarao, ebeatukamo ama ru takore Dio amujaba yake-raja ubayaine, taeyama. ² Takore Ananias saserotetuma airamowitu jakutai Pablo awere jakutaisi kajotabuae Pablo aroko nabamejerei. ³ Tiame Pablo taisi riboto ribane: Ijisike rara ejóae tiaja monuka. Dio jinabate. Iji kajotabu eku rujunae maribu nome toakitane. Ama katukeme kajotabu riboto manabamejerea bajama? taeyama. ⁴ Takore eobo tata jakutai ribane: Iji katukeme saserotetuma airamowitu Dio abanajakutaisi isia asiraja ribia? taeyama. ⁵ Takore Pablo ribane: Mawarao, tai saserotetuma airamowitu tane naminanatanaine. Jabataja taisi isia ribia: Waraoto airamo isia asiraja ribunaka jau, tia, taeyama. ⁶ Ribaitane Pablo tatuma karata raisa raisa tane naminaeyama. Kawanamo Saduceo sabasabamo. Kawanamo Bariseo sabasabamo. Taisi naminane kwana ribunae: Mawarao, ine Bariseo sabasabamo ine. Mawaraorakate Bariseo sabasabamo. Ine waba nominia tane yawakayame yatu maribu nome toaya, taeyama. ⁷ Tane ribakore Bariseo sabasabamo Saduceo sabasabamo tane oriaribu kwarikakitane jotanane jisajisaeyama. ⁸ Saduceo jakutai ribia: Waba nomininaja. Dio ainatabatuma ekira. Mejo-kojituma ekira, tia. Tiarone Bariseo jakutai kokotuka ja tane ribia. ⁹ Takore kokotuka rokojotaubuaeyama. Takore kajotabu akarata anaminamo Bariseo sabasabamo jakutai nokaramane ribane: Tamaja anona asiraja ekira. Mejokoji taisi isia ribunae tai. Dio ainataba ribunae tai. Tiame Dio isiko orikubanaka iabaki, taeyama. ¹⁰ Tatuma oriaribu kwana kwarikajame yaoromo airamo tatuma Pablo enojutakitia tanabaeyama. Tiame anebu kajotabuae Pablo tatuma autumo nisane atanejese yaoromo ajanokoata konarumejerei. ¹¹ Tai ima eku Airamo Pablo awere karamane isia ribane: Pablo, retanaka jau. Jerusalén tata maisia rewarajakutai taisi monuka Roma tata maisia rewarate, taeyama. ¹² Takore ya araisamaya Judio kawanamo obojona jisaka eku abanae Pablo nakitane. Ribane: Oko Pablo nanaja jakore najo-naka, jobinaka tane bajeteko. Oko karibu eku abanaja jakore Dio kanakunarai, taeyama. ¹³ Nibo ribu moajakutaisi asebe mojo-rekotuma manamonamojase kwarika. ¹⁴ Tatuma saserote aira-motuma, Judio airamotuma tane tata narune isia ribane: Oko ribu orimoaeko Pablo nakitane. Nanaja jakore najonaka bajeteko. Oko karibu eku abanaja jakore Dio kanakunarai. ¹⁵ Amasike, yatu ribu nome toanoko arao eobo isiko yaoromo airamo imasibiaja ebute. Ribate: Jake Pablo okoata konau oko aribu yaorane nokomejerei, tate. Takore oko oriiyakaratate Pablo mate tatumeta nabakamoana jakore nakitane, taeyama. ¹⁶ Tiarone Pablo arakoi auka tatuma nonakitane jakutaisi isia nokone yaoromo ajanokoata naruae Pablo enokokitane. ¹⁷ Eno-kokore Pablo yaoromo siento jisaka akabitanatuma kawanamo jisaka jakutaisi yejebune isia ribane: Tamaja neburatu yaoromo airamoata konaru. Airamo saba ribakitane ribu konae, taeyama. ¹⁸ Takore airamoata konarune airamo isia ribane: Mojoju Pablo mayejebune mebuae tamaja neburatu ijiata konamejerei. Jisaba ribakitane ribu konaeyama, taeyama. ¹⁹ Takore yaoromo airamo neburatu amojo oane emo kona-rune renokoae: Iji ribu katukaja masaba konae? taeyama. ²⁰ Renokokore neburatu ribane: Judiotuma obojona jisaka eku abanae jiebukitane. Jiaimasibiaja jiebute jake ribu nome toanoko araoto amujaba Pablo konarumejerei. Oko taisi aribu yaorane nokokitane obonoyaoko tane ribate. ²¹ Tiarone aribu yajoraba-naka jau. Nibo asebe mojorekotuma manamonamojase kwarika rijisane Pablo yawakaya nakitane. Tatuma ribunae: Oko mate Pablo namoana jakore najoronaka jobinaka tane bajeteko. Oko karibu eku abanaja jakore Dio kanakunarai, tae. Amawitu oriiyakarátae tiaja ja jiribu yawakayaja, taeyama. ²² Takore yaoromo airamo neburatu inatabayaja ribane: Masaba rewarajakutai raisama saba rewaranaka jau, taeyama. ²³ Taitane yaoromo airamo yaoromo akabitana manamo yejebuaeyama. Tai tatuma kajotabuae Cesarea tata narukitane yaoromo iyakaratamejerei. Yaoromo ka isia anarumo siento manamo, yaoromo kawayo arai anarumo siento asibi kware mojorekotuma manamo, yaoromo raborabaka isiko anarumo siento manamo tane. Imautu sabuka narumejerei kajotabuae. ²⁴ Airamo kajotabuae kawayo iyakaratamejerei. Pablo kawayo arai abane kobenajoro Felix tata wabanaka nabakamejerei kajo-tabuae. ²⁵ Tametane karata jabataeyama. ²⁶ Tamaja Claudio Lisias aribu kobenajoro Felix saba. Ijisike kobenajoro yakerajawitu. Yakerara? ²⁷ Judiotuma tamaja niborama emojojutane nakitane obonoae. Nakitiakore ine tamaja Roma arotu tane naminane manebu isiko narune tatuma amojekumo ejeronaine. ²⁸ Katukeme taisi kware abaya tai tane naminakitane obonoaine. Tiame Judio airamotumeta taisi konaruaine aribu nome toamejerei. ²⁹ Tatuma akajotabu akarata ekumo Pablo kware abanae. Tiarone anona amoara wabakitane ekira. Emojojutakitanerakate amoara ekira. ³⁰ Tiarone Judiotuma rijisane rewaraeyama Pablo nakitane. Takore raisa menokoae. Menokokore rijana ijiata Pablo inatabaine. Taisi kware abamo isia ribunaine ijiata narumejerei kware abakitane. Tai maribu kokotuka, tane jabataeyama. ³¹ Takore yaoromo airamo aribu eku abayaja Pablo imaya kona-ruae. Antípatris tata konaruaeyama. ³² Ya araisamaya yaoromo ka isia naruajakutai yaoromo ajanokoatajase bajinaeyama. Kawayo arai naruajakutai are Pablo isiko naruaeyama. ³³ Naruakati tane Cesarea tata nabakane karata kobenajoro moaeyama. Pablo-rakate kobenajoro amojo eku abanaeyama. ³⁴ Kobenajoro jaku-tai karata teribuitane Pablo renokoae. Iji kasabamo? taeyama. Takore: Ine ina Cilicia arotu, taeyama. ³⁵ Kobenajoro ribane: Jikware abamo naokore jiribu nokotine, taeyama. Taitane airamo Herodes ajanoko eku Pablo yaoromejereae ribu nome atoanoko-ata.

¹ Ya mojoabasi ru takore Ananias, saserotetuma airamo-witu jakutai Cesarea tata nabakanaeyama. Judio airamo-tuma taisi iamo naoaeyama. Atae raisa awai Tértulo naoaeyama. Tértulo jakutai tai rewaratu. Takore tatuma kobenajoro amujaba nabakaubuae Pablo kware abakitane. ² Pablo konakore Tértulo Pablo kware abakitane jotananaeyama. Felix isia ribane: Jiaobojona oko inarerajawitu ubaya. Iji musaberaja jame tamaja ina araoto saba yakeraja nonaya. ³ Felix yakeraja jakutai, oko are kokotukanea jiisia yakeraja jae tane ribiaoko. ⁴ Jisaba asirajena ejobamejerei kawajeraja ribunajine. Jiaobojona yakeraja jame sanuka karibu noko. ⁵ Tamaja nibora are kasaba asiraja. Raina kokotukanea Judiotuma kokotuka ewiyawiyaya. Tai Nazaret arotuma sabasabamo jakutaisi airamo. Taisike inamina jiro. ⁶ Kwai ribunokorakate wisitane abakitane obonoae. Tiame oko taisi oane kakajotabu kaika aribu nome toakitane obonoae. ⁷ Tiarone yaoromo airamo Lisias jakutai autu nakasene Pablo kebikamo rao tane konaruae. ⁸ Taitane Lisias kaisia ribunae: Yatu Pablo kware abakitane obonokore Felix tata narukotu, tae. Iji tane obonokore wite Pablo renoko. Renokokore karibu kokotuka nome tane naminate, taeyama. ⁹ Tértulo ribiakore Judiotuma eobo taisi aribu nome tane ribunaeyama. ¹⁰ Takore kobenajoro Pablo tejomonae ribame-jerei. Takore Pablo riboto ribane: Iji inawaja eraja isia tamaja ina araoto aribu nome toaya. Ine taisi naminayame jimujaba orikware ribakitane masaba yakera. ¹¹ Iji tane obonokore maisia raisama renokone naminate. Kaje Jerusalén tata naruaine Dio yatomanetekitane. Ya mojoreko kware manamowitu ja rijana. ¹² Ine raisama aribu kwarikayakore maminatanaewitu. Kwai ribuno-koata o orikware nakanokoata o janokoina akariata waraoto ewi-yawiyayakore maminatanaewitu. ¹³ Tamatuma makware abaya-rone taisi amitu jaja ekirawitu. ¹⁴ Nomewitu ine ribatine. Mano-botuma Ario aneburatuine. Tamatuma inamina jiro tiakutai taisi eku Dio aneburatuine. Kajotabu akarata eku jabátae tiakutai, Dio kware arewaramo akarata eku jabátae tiakutai tane tai kokotuka nome tane ribiaine. ¹⁵ Tatuma Dio aribu eku yawakaya waba nominimejerei. Nomeraja anonamo nominite. Asiraja anonamo-rakate nominite. Ine tatuma monuka taisi yawakaya. ¹⁶ Tiame yakeraja nonayaine Dio amujaba waraoto amujaba tane are maobojona yakeraja jakitane. ¹⁷ Ine inawaja eraja isia kokotukanea kujuaine. Kujuitane mainetajase bajinaine saneraubiajasi moakitane, nobeanaka Dio moakitane tane. ¹⁸ Ine tane nonayakore Judiotuma Asia arao jakutai kwai ribunokoata mamiae. Katuata tane namínae tiakutaisi eku ine oriberéae tiaja jajaine. Warao maisiko eraja ekira. Waraoto ewiyawiyanaka jajaine. ¹⁹ Tatumasike ribu mari-boto jakore naone makware abakuna. ²⁰ Tanaja jakore tamatuma tamatuka jakutai manona asiraja isia ribakunarai. Ine ribu nome toanokoata jakore manona asiraja kasikaja tai? ²¹ Tata ine ribane: Ine waba nominia tane yawakayame yatu maribu nome toaya, taine. Tai maribu asira tai, taeyama. ²² Felix jakutai tamaja Jojisi yaorane anaminatu. Tiame Pablo aribu nokone mate ribu nome toakitane obononatanae. Ribane: Yaoromo airamo Lisias naokore yatu aribu yaorane naminatine, taeyama. ²³ Taitane Felix yaoromo akabitana kajotabuae Pablo are mojoju bajemejerei. Tiarone jerónae tiaja sabuka bajemejereae. Amusaba taisi mikitane o sanetakitane obonokore naomejereae-yama. ²⁴ Ya erayana jakore Felix atanejese naoae atira Drusila isiko. Atira jakutai Judio tira. Takore Felix Pablo yejebuae Jesukirito isia nome abayakutaisi isia rewarayakore nokokitane. ²⁵ Takore Pablo nomeraja nonakitane jakutai, oriaobojona arotu takitane jakutai, mate ribu nome toakitane jakutai tane taisi isia rewarae. Rewarakore Felix retane riboto ribane: Naru rijana. Masaba yakerakore jiyejebutine, taeyama. ²⁶ Felix obonobuae: Pablo burata mamoate tai ine ejeromejerei, taeyama. Tiame eraja tane yejebuae isia ribakitane. ²⁷ Tatukamo inawaja manamo ru takore raisa naoae kobenajoro takitane. Awai Porcio Festo. Takore Felix nariaja Judiotuma aobojona eku abakitane obonone Pablo mojoju iabanaeyama.

¹ Festo kobenajoro tane rujuitane ya rijanamo takore Cesarea tatamo Jerusalén tata yaburuaeyama. ² Jerusalén tata saserote airamotuma Judio eobo airamo sabuka jakutai tane Festoata nabakanae Pablo riboto ribakitane. ³ Tatuma Festo ebuae tatuma aobojona eku abamejerei Pablo saba inatabane Jerusalén tata konakitane. Tiarone tatuma jojisi autu rijisane yawakakitane obonobuae Pablo nakitane. ⁴ Tiarone Festo tatuma riboto ribane: Pablo Cesarea tata mojoju ja. Ya erayana jakore tata narutine. ⁵ Tiame yatu kawanamo saba yakerakutai Cesarea tata maiamo narukunarai. Tamaja nibora asiraja anonatu jakore kware abate, taeyama. ⁶ Taitane ya mojoreko taisia Festo Cesarea tata naruaeyama. Ya araisamaya ribu nome toanoko arujunoko arai rujane Pablo saba inatabaeyama. ⁷ Pablo nabakakore Judiotuma Jerusalén tatamo naoajakutai Pablo awerea nokaramune sibaji taeyama. Nona asi-rajawitu eraja taisi kware abanae tiarone ribu anome jakutai eki-raja ejobonaeyama. ⁸ Takore Pablo wite orikware ribiaja ribane: Ine Judio akajotabu riboto asiraja nonanatanaine. Kwai ribunoko riboto asiraja nonanatanaine. Roma airamowitu riboto asiraja nonanatanaine, taeyama. ⁹ Tiarone Festo Judiotuma aobojona eku abakitane obonone Pablo renokoae. Jerusalén tata narukitane yakera tai ine tata jiribu nome toamejerei. Jisaba yakerenara? taeyama. ¹⁰ Takore Pablo ribane: Roma airamowitu tamaja ribu nome toanoko abanae. Tamatuka maribu nome toakitane ja. Ine Judio-tuma isia asiraja nonanatanaine. Iji yaorane taisi naminaya. ¹¹ Manona amoara wabakitane jakore are wabatine. Tiarone tatuma makware abayakutai nomeana jakore jisakarakate tatuma amojeku mabakomoni. Airamowitu maribu nome toamejerei ebiaine, taeyama. ¹² Takore Festo reirimo isiko rewarae. Taitane Pablo riboto ribane: Iji ribia: Airamo César maribu nome toamejerei ebiaine, tia. Yakera, airamo César tata narute, taeyama. ¹³ Ya erayana jakore airamo Agripa Berenice isiko Cesarea tata naoae Festo isia yakerara abakitane. ¹⁴ Tata ya era sabuka kwaeabakore Festo Pablo isia Agripa saba rewaraeyama. Ribane: Tamatuka nibora ja. Felix taisi mojoju iabanae. ¹⁵ Ine Jerusalén tata jakore saserote airamotuma, Judiotuma airamotuma tane mamujaba taisi riboto ribunae. Mebuae namejerei. ¹⁶ Tiarone ine ribunae. Roma arao tanaja. Kware abamo jakutai mojoju amujaba kware abakitane ja. Mojoju jakutai orikware ribakitane ja. Tanaja jakore nakomoni, taine. ¹⁷ Tiame tatuma naokore ine rubujira aribu nokokitane obonoaine. Ya araisamaya ribu nome toanoko arujunoko arai rujane niborama saba inatabaine. ¹⁸ Tiarone ine obonobuajakutaisi eku kware abanatanae. ¹⁹ Tiarone tatuma ayajoraba isia taisi kware abanae. Jesú isia oriaribu kwarikae. Jesú wabarone Pablo ribia: Tai riko ja, tia. ²⁰ Ine katukane nonakitane ja tai, tane naminanatanaine. Tiame Pablo ebuaine: Jerusalén tata narukitane yakera tai jiribu nome toakitane. Jisaba yakerenara? taine. ²¹ Takore Pablo ebuae Roma airamowitu Augusto jakutai taisi aribu nome toamejerei. Tiame mate airamowituata inatabanaka mojoju iabanaine, taeyama. ²² Takore Agripa Festo isia ribane: Inerakate aribu noko-kuine, taeyama. Takore Festo: Jakesike nokote, taeyama. ²³ Ya araisamaya Agripa Berenice tane nabakane iamo ana-rumo erajasi isiko ribu nome toanoko eku yaruaeyama. Yaoromo airamotuma isiko, janokoina airamotuma isiko tane yaruaeyama. Yarukore Festo jakutai raisama kajotabuae Pablo konamejerei. ²⁴ Festo ribane: Airamo Agripa, eobo kokotuka kaisiko tama-tuka ja jakutai tane, tamaja niborama mikotu. Judiotuma asebeira jakutai tatuma kokotuka tamajasi riboto masaba rewarae. Jeru-salén tata, tamatuka tane masaba rewarae. Wabakitane ja, tane are maisia ribia. ²⁵ Tiarone anona amoara wabakitane ekira, tiaine. Tai wite ebuae airamowitu Augusto taisi aribu nome toamejerei. Tiame taisiata inatabakitine. ²⁶ Amasike ine tamaja isia ribu yakeraja ekiraine mairamo saba jabatakitane. Tiame yatu amujaba abakitane konaine. Ijisike, Airamo Agripa, jimujaba abakitane konaine. Iji taisi renokokore ribu jate tai ine jabatakitane. ²⁷ Ribu taisi kware abayaja jabatanaka inatabakore masaba amoara ekira.

¹ Takore Agripa Pablo isia ribane: Iji orikware ribanu rijana, taeyama. Takore Pablo amojo kobukane orikware ribakitane jotananae. ² Airamo Agripa, jimujaba rewarakitane masaba yakera. Kokotuka Judiotuma mariboto ribiakutai ama taisi isia jisaba rewarakitane jaine. ³ Oko Judiotuma namínae tiakutai iji kokotuka naminaya. Tiame iji ribu nokokore bajuka. Jiebiaine wakutanaka maribu noko. ⁴ Ine sanukirajetukamo mawaraoto kaika Jerusalén tata nojo-tonaine. Judiotuma kokotuka taisi naminaya. ⁵ Awajiabara-yatukamo Bariseo sabasabamo ine. Bariseotuma karata aribu ekuwitu Dio yatomanetea. Judiotuma wajiabarayatukamo mana-minaya. Maisia rewarakitane obonokore rewarakuna. ⁶ Dio ribu kanobotuma moae. Ama airamo Agripa, ine tai ribu yawaka-yame maribu nome toamejereae rijana. ⁷ Kawarao Israeltuma asebe mojoreko kware manamo kokotuka ribu eku nakamejerei yawakaya. Tiame jokomaya imaya tane Dio akajotabutuma tane bajia. Tai ribu aobojona Judiotuma makware abaya. ⁸ Yatu katukeme Dio waba enomininaja tia bajama? Oko taisi isia nome abakomoni, tia. ⁹ Nomewitu ebe Jesú Nazaret arotuma awai riboto nonakitane ja tane tanabaine. ¹⁰ Jerusalén tata tane nonaine. Saserote aira-motuma ribu mamoakore warao Dio saba emo abánae tiajasi eraja emojojutaine. Tatuma kubayakore maobojona eku kubae. ¹¹ Tatuma isanamataine Jesú isia asiraja ribamejerei. Orikware nakanoko kokotuka eku tane nonaine. Ine kwana orijisiraja jame ina raisama ajanokoineta tatuma iyajubuaine. ¹² Ine tatuma iyajubiakore saserote airamotuma ribu mamoae. Takore tatuma aribia Damascoata nariaja naruaine. ¹³ Tiarone, mairamo, ine jojisi ekia nariaja ya kwai jakore jokoma uriraja miaine. Jokoma jakutai ya ajokoma kwarika. Jokoma najamu-tuatamo jakutai ine maiamo anarumo tane kakwarea kasina-jaranae. ¹⁴ Takore kokotuka joika nakaeko. Tane ebereo aribu isia ribiakore nokoaine: Saulo, Saulo, katukeme maisanamataya? Iji rau ejiróae tiajasi riboto kajuria monuka. Iji tane nonayame jisaba asiraja ejoboya, taeyama. ¹⁵ Takore ribunaine: Mairamo, iji sina bajama? taine. Airamo maisia ribane: Ine Jesú. Iji isanamatayakutai tai ine. ¹⁶ Karamanu. Ine orijiemiaine ma-kajotabu tane bajemejerei. Iji ama miajakutai, ine mate jiemi-kitane jakutai tane taisi isia rewarate. ¹⁷ Judiotuma amojekumo Judioana amojekumo tane jiejerotine. Judioaneta jiainatabayaine rijana. ¹⁸ Tatumeta jiainatabaya tatuma amu eseoramejerei imajana ekia kujunaka jokoma ekia kujumejerei. Amu eseorate Satanás amojeku bajinaka Dio amojeku bajemejerei. Amu eseo-rate maisia nome abakore ine tatuma aobojona asiraja tatuma kware abanaka beremejerei. Takore Dio orisaba emo abánae tiakutaisi isiko tatuma nojote, taeyama. ¹⁹ Takore, airamo Agripa, najamutuatamo mamu eku miajakutaisi aribu eku abanaka tanatanaine. ²⁰ Wajiabara Damasco araoto saba rewaraine. Tatukamo Jerusalén araoto saba, ina Judea kokotukanea araoto saba tane rewaraine. Taitane Judioana saba rewaraine: Yatu aobojona ibarene Dio sabasaba narukotu. Obojona barínae tiakutaisi anona eku nonakotu, taine. ²¹ Tamaja nona aobojona Judiotuma kwai ribunoko eku maoau-bune manakitane obonoae. ²² Tiarone Dio masanetayame ine mate taerataya. Kokotuka saba rewaraya, airamo saba, airamo-ana saba tane. Dio kware arewaramo, Moisés tane mate kwaeabakitane jakutaisi isia rewarae. Ine tatuma ekuwitu rewarayaine. ²³ Mate kwaeabakitane jakutai tai tamaja. Kirito naone sanamatakitane ja. Wabane nominikitane jakutaisi awajiabara nominakitane ja. Abije isia kawaraoto saba, Judioana saba tane rewarakitane ja, taeyama. ²⁴ Pablo tametane orikware ribiakore Festo rokojotae: Pablo, iji buretae rijana. Karata eraja teribuajame jikwa bure rijana, taeyama. ²⁵ Tiarone Pablo ribane: Festo yakeraja, ine buretanaja. Maribu nome. Maribu kotubuana. ²⁶ Airamo Agripa tamaja nona yaorane naminaya. Tiame retanaka amujaba rewarayaine. Tamaja rijisane nonanatanajame kokotuka naminaya, tiaine. ²⁷ Airamo Agripa, iji Dio kware arewaramo aribu isia nome abanajara? Iji nome abaya tane yajorabayaine, taeyama. ²⁸ Takore Agripa ribane: Iji atae sanuka maribu kwarikakore inerakate Kirito sabasabamo jakuine, taeyama. ²⁹ Takore Pablo ribane: Sanuka o urirajarakate yakera. Ijiwi-tuana tiarone kokotuka ama maribu nokoyakutai mamonuka jakunako. Tiarone akarena ekirakitane ja. Dio tametane obono-kunako, taeyama. ³⁰ Pablo ribu riwarakore airamo karamunaeyama. Kobenajoro, Berenice, tatuma isiko norujúae tiakutai tane nokaramuaeyama. ³¹ Taitane emo naruae oriisiko rewarakitane. Oriisia ribane: Tamaja anona amoara wabakitane ekira. Mojoju bajekitanerakate amoara ekira, taeyama. ³² Takore Agripa Festo isia ribane: Pablo airamowitu taisi aribu nome toamejerei ebunatanajakore ejerokuna, taeyama.

¹ Tatukamo obojona jisaka eku abanae Italia tata kainatabakitane. Takore Pablo atae mojoju eobo tane yaoromo siento jisaka akabitana amojeku abanae. Kabitana awai Julio. Yaoromo asebe awai Augusto Anebu. ² Waera Adramitio tatamo jakutaisi eku nabakanaeko. Waera ina Asia ajomukia sewiribukitane jame eku nabakanaeko. Aristarco jakutai kaiamo naruae. Aristarco jakutai janokoina Tesalónica, ina Macedonia arotu. ³ Ya araisamaya Sidón tata sewirinaeko. Tata Julio Pablo isiko yakeraja nonae. Amusabatumeta narumejereae Pablo amu-sabatuma Pablo sanetamejerei. ⁴ Tatamo ejobane Chipre awerea jakanaeko ajaka kariboto jame. ⁵ Ina Cilicia, ina Panfilia tane ajomukia naruaeko. Tane janokoina Mira, ina Licia tata sewirinaeko. ⁶ Tata yaoromo akabitana waera Alejandria tatamo miae. Italia tata narukitane jame waeku kabanae. ⁷ Takore ya eraja uria jii tane naruaeko. Moniraja narune Gnido kejenuka nabakanaeko. Ajaka mate kariboto jame Salmón akejenukaya burujo Creta ajajaya jakanaeko. ⁸ Are moniraja narune jomuku awai Jomuku Yakeraja tata sewirinaeko. Tai janokoina Lasea awere. ⁹ Ya eraja kwaeabanae. Judiotuma obonekokitane aya jakutai kwaeabanajame waera narukitane saba jawanera. Takore Pablo tatuma reiriae. ¹⁰ Ribane: Iramotuma, ine ribia: Oko are naru-kore jawana miteko. Waera wanarene ajoka rijate. Okorakate muanate tai, tiaine, taeyama. ¹¹ Ribiakorejone yaoromo akabitana Pablo aribu eku abanaka waera arotuma aribu eku abanae. Waera akabitana aribu eku abanae. ¹² Inawaja kwaeabakitane saba jomuku yakerena. Tiame kokotuka sabuka orireiriae are suatana narukitane. Fenice tata nabakakitane obonoae inawaja kwaeabakitane. Fenice jakutai Creta ajomuku. Ya sotoyakutaisi sabasaba, ya jajaya mojonome tajasaba mija, ya jajaya akajamojo tajasaba mija tane. ¹³ Takore ajaka ya jajaya akajamojo tajasabamo uria uria naoajame suatana narukitane yakera tanabae. Tiame ejobane Creta ajajaya naruae. ¹⁴ Tiarone rubujira ajakaira waera riboto kwana rubujuae. Ajakaira awai Euroclidón. ¹⁵ Kwana rubujua-jame waera ajaka ebe nejeruae. Ajakaira riboto jakakomoni jame nejerumejereaeko. ¹⁶ Burujo sanuka awai Clauda arai tajasabaya naruaeko. Tata ajaka kwana jakanaja jame wajibaka oriiamo abánae tiakutai waera eku abakitane moinarone arejase aba-naeko. ¹⁷ Waera eku abaitane jakomaira isia waera autia koyanae. Tane waja awai Sirte arai naka nojane waera ajiaka joika abane ajaka ebe nejerumejereae. ¹⁸ Ya araisamaya mate ajaka kwana jakayame waera akonaru joni toakitane jotananae. ¹⁹ Ya rijanamo eku okojase kamojo isia waera ajoka joni toaeko. ²⁰ Ya eraja isia ya, kura tane minatanaeko. Ajaka kwana kariboto jakayame oko ribane: Oko kokotuka muanaeko rijana, taeko. ²¹ Takore oko ya eraja najoronaka jaja jakore Pablo autu karamane ribane: Iramotuma, yatu maribu nokokuna. Creta tatamo ejobonatanajakore tamaja jawana minatakuna. Waera ajoka rijanatakuna. ²² Tiarone rijana retanaka jakotu. Waera rijaterone warao jisakarakate rijanatate. ²³ Ine Dio aneburatu, akajotabu tane. Ama ima Dio ainataba mawere karamunae. ²⁴ Tane ribane: Pablo, retanaka jau. Iji Roma airamowitu amujaba karamakitane ja. Dio waera eku anarumo kokotuka muanaturuaerone, tatuma jiisiko jame Dio tatuma muanameje-renatate. Tiame retanaka jau, taeyama. ²⁵ Tiame iramotuma, retanaka jakotu. Ine Dio isia nome abaya. Inataba aribu eku ejobate tane yajorabayaine. ²⁶ Tiarone burujo arai nabaka-kitane jaoko, taeyama. ²⁷ Misa manamo ru takore tai ima eku nojabaira Adria eku jaoko. Ajaka ebe oko bajibajiaja jajaoko. Takore imautu waera arao mumi awerewitu takore naminae. ²⁸ Naminaitane nojaba aunu sinarijae. Aunu jara enotana asebe mojorekotuma manamo. Tatukamo jawakati sabukau takore atanejese aunu sinarijae. Takore aunu asebe mojoreko kware mojoabasi ejobonae. ²⁹ Ta-kore joyo sewiri nojane waera awajuatamo auru manamo-namojase joni toanae. Takore kwai ribiaja ebuae: Rubujira jokakunako, taeyama. ³⁰ Tane tiakore waera arao waera ekumo kujurubukitane obonobuae. Tiame wajibaka joni toakitane jota-nanae. Imasibiaja ribane: Aurutuma awajiatamo joni toakitiaoko, taeyama. ³¹ Tiarone Pablo yaoromo akabitana, ayaoromo tane isia ribane: Tamatuma waera eku bajinaja jakore yatu rijate, tae-yama. ³² Tane ribakore yaoromo wajibaka ajakoma kabatakore wite joni nakae. ³³ Takore jokona anejeko Pablo kokotuka sanuka najoro-mejerei reiriae. Ribane: Misa manamo ubanaka, najoronaka tane yatu kwaeabanae. ³⁴ Tiame yatu ebiaine sanuka najoromejerei. Najorokore yakerate jomukuata nabakakitane. Yatu akwajio jisakarakate rijanatate, taeyama. ³⁵ Ribaitane Pablo bãu oane kokotuka amujaba Dio yakeraja jae tane ribunae. Ribaitane enojutane tane najorokitane jotananae. ³⁶ Takore kokotuka aobojona tuwarane najoroae. ³⁷ Oko waera eku anarumo asebe siento manamo kware siento asibi kware mojorekotuma manamo kware mojoabasi kware jisaka. ³⁸ Takore obonoyakutaisi najorone tiriko joni webiarae waera nabutamejerei. ³⁹ Jokona yakara takore waera arao mitane ina naminana-tanae. Tiarone nojabaira akasi miae. Amumiata waja miae. Mitane waera nomeraja sewirakitane obonoae. ⁴⁰ Taitane auru ajakoma jewetane joni iabanae. Atimona akoya ejeronae. Awajiata waera ajiaka kobukakore waera waja sabasaba jakanae. ⁴¹ Tiarone ajominibaji manamo orisewiriakutaisi aobojona waja sewirinae. Awaji waja arai bajene ejobakomoni ejobonae. Awaju nojaba ebe uria uria nakarikariae. ⁴² Nakarikariakore yaoromo mojojutuma kubakitane obonoae tabotaboyaja narubunaka jame-jerei. ⁴³ Tiarone yaoromo akabitana Pablo wabanaka jamejereame yaoromo mojojutuma kubanaka jamejereae. Tiame ribane: Tabotabo naminayakutai joni nakane wajiabara jomukuata nabakate. ⁴⁴ Eobo raubasa oane waera akari oane tane nabakate, taeyama. Tane takore rijana kokotuka yakeraja wajaka nabakaeko.

¹ Oko kokotuka yakeraja wajaka nabakane burujo awai Malta tane naminaeko. ² Burujo arao oko kokotuka kaisiko yakeraja nonae. Rairaja naja eboyaja tane jame jekunuira nautane kayejebuae awere nabakane orijiajimejerei. ³ Takore Pablo rauwaja orikware toane jekuneku toayakore juba iji ebe jakane Pablo amojo abunae. ⁴ Burujo arao juba Pablo amojo isia batokónae tiakore mitane oriisia ribane: Tamajasike akobaka. Nojaba ekumo ejobonaerone ribu nome atoatu tai ubamejere-naja, taeyama. ⁵ Takorejone Pablo oriamojo narimakore juba jekunu eku nakae. Arejase Pablo asiraja bajinatanae. ⁶ Warao Pablo jokojo-kamejerei o rubujira wabamejerei yawakaubuae. Tiarone asiraja ekiraja jawakati tajame aobojona kambiatane ribakitane jota-nanae. Ribane: Tamajasike diotuma kawanamo jisaka, taeyama. ⁷ Oko nabakanajakutaisi awere burujo araoto airamo ajoboto ja. Airamo awai Publio. Publio jakutai raoberaja ajanoko eku ketuwarakore ya rijanamo bajinaeko. ⁸ Oko tata jakore Publio arima wabayaja ja. Riarayaja kimibiaja tane ja. Pablo taisi mikitane narune, kwai ribane, amojo wabayakutaisi arai abane tane ibajukanae. ⁹ Tatukamo burujo arao eobo muanayakutai Pabloata naoae. Naokore Pablo tatuma ibajukanae. ¹⁰ Bajuka-najame nobeanaka eraja kamoae. Nokabuka oko narukitane waera eku nabakayakore oko ekirakutaisi kamoae. ¹¹ Oko waniku rijanamo isia burujo eku bajinaeko. Waera Alejandria tatamo jakutai tata are inawaja kwaeabanae. Awaji isia jebusita jabátae tiaja ja. Jebutuma awai Cástor, Pólux tane. Oko waera taisi eku nabakane naruaeko. ¹² Tatukamo jomuku Siracusa tata sewirane ya rijanamo bajinaeko. ¹³ Tatamo amumia nariaja Regio tata sewirinaeko. Ya araisamaya ajaka ya jajaya akajamojo tajasabamo jakanae. Tatukamo ya araisamaya Puteoli tata sewirinaeko. ¹⁴ Puteoli tata nome abamo miaeko. Tatuma kebuae tatuma isiko misa jisaka bajemejerei. Takore tatuma isiko bajinaeko. Taitane Roma sabasaba naruaeko. ¹⁵ Oko nariakore nome abamo Roma arao jakutai kaisia nokoae. Nokoitane kariboto ejobonae. Najoro awabinoko awai Apio tata oriyanabakanaeko. Janokoina awai Ubanoko Rijanamo tata oko eobo yanabakanaeko. Pablo tatuma mitane Dio isia yakeraja jae tane ribane akobe tuwarae. ¹⁶ Takore oko Roma tata nabakakore yaoromo akabitana mojojutuma ina airamo ajanoko ayaoromo airamo amojeku abanae. Pablo yaorotu jisaka amojeku abane emo ubamejereae. ¹⁷ Nabakaitane ya rijanamo ru takore Pablo Judio airamotuma Roma arao jakutaisi yejebuae. Orikware nakakore isia ribane: Mawarao, Judio riboto nonanatanaine. Kanobotuma inamínae tiakutaisi riboto nonanatanaine. Manona ekirarone Judio Jerusalén tata memojojutane Roma araoto amojeku mabanae. ¹⁸ Tatuma marenokoitane mejerokitane obonoae manona amo-ara wabakitane ekirame. ¹⁹ Tiarone Judiotuma tatuma aribu kwarikae. Tiame ine ebukitane ejobonaine. Roma airamowitu maribu nome toamejerei ebuaine. Tane ebuaerone mawarao Judiotuma kware abakitane ekiraine. ²⁰ Tiame yatu yejebuaine yatu mitane, yatu saba rewarakitane. Israeltuma yawakayakutai taisi aobojona tamaja karena isia makoyánae tiaja jaine, taeyama. ²¹ Takore tatuma Pablo riboto ribane: Karata Judeayatamo jiisia jakutai minatanaeko. Kawarao Judiotuma tamate nabakau-buajakutai asiraja jikware abayaja rewaranatanaewitu. ²² Koko-tukanea tamaja inamina jiro isia asiraja ribia. Taisi naminaya-oko. Tiame iji obonobiakutai taisi nokokitane obonoaeko, tae-yama. ²³ Tane ya abaitane taisi eku eraja naoae Pablo atuwaranoko-ata. Takore Pablo ya kwai sabukayatukamo ya anayakore tatuma saba rewarae. Dio arujuna rujuyakutaisi isia rewarae. Jesú isia rewarayaja tatuma taisi arewara iamo bajemejerei obonoae. Moisés akajotabu akarata ekumo rewarae. Dio kware arewaramo akarata ekumo rewarae tane. ²⁴ Rewarakore tatuma kawanamo Pablo arewara iamo bajinae. Tiarone eobo yajorabanatanae. ²⁵ Tatuma ribu jisaka eku abakomoni jame narukitane jotananae. Takore Pablo tatuma isia ribane: Dio Amejokojira Yakerajawitu aobojona Isaias Dio kware arewaratu ribiaja kanobotuma saba rewarae. Yakeraja ribunae. ²⁶ Ribane: Tamaja waraotoata narune isia ribanu: Yatu yaorane nokoyarone nokonatate. Yatu yaorane mijarone minatate. ²⁷ Tamaja waraoto aobojona taeraja bajinae. Yaorane nokonaja. Amu eubánae tiaja ja. Tane nonae amu isia minaka jakitane, Akojoko isia nokonaka jakitane, Aobojona isia naminanaka jakitane. Tane nonae tatuma aobojona masabasaba ibarinaka jakitane ine tatuma ibajukanaka jamejerei. (Isa. 6:9-10) Isaias tane jabataeyama. ²⁸ Pablo suatana ribane: Rijana naminakotu. Tamatukamo Dio ribu obojona ibajukakitane jakutaisi isia Judioaneta inatabate. Tatumasike nokote, taeyama. ²⁹ Pablo tane ribakore Judiotuma oriaribu kwarikayaja naruae. ³⁰ Takore Pablo inawaja manamo isia janoko nebúnae tiajasi eku bajinae. Tata mikitane naruajakutaisi etuwarae. ³¹ Retanaka rewarae. Dio arujuna rujuyakutaisi isia rewarae. Airamo Jesu-kirito isia rewarae. Jisakarakate: Iji ribunaka, tane ribunatanae.