12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

2 TIMOTEO

1

1 Ine Pablo Dio aobojona Jesukirito ainataba. Dio ribu waraoto moae obojona jiro moakitane Kirito Jesú eku. Ribu jakutaisi kaika ine ainataba rijana. 2 Timoteo saba jabatayaine. Iji mauka ine obonoyakutai. Dio Karima jakutai, Kairamo Kirito Jesú tane oriaobojona ayakara jimoakunarai. Akobe jiisia ajerakunarai. Inareraja tane jiabakunarai tane. 3 Dio isia yakeraja jae tane ribiaine. Manobotuma nonayakutaisi monuka Dio akajotabu tane bajiaine obojona yakerajasi eku. Imaya jokomaya tane are jikware ebiaja kwai ribiaine. 4 Iji onajakutaisi tata maobojona nakaya. Tiame jimikitane kwana obonoyaine ine ekeirajawitu ejobakitane. 5 Iji obojona manamo isikoana nome abanajakutai taisi tata maobojona nakaya. Wajiabara jinotu Loida nome abanae. Tatukamo jirani Eunice nome abanae. Ijirakate nome abaya tane ribiaine. 6 Ine mamojo jikwa arai abakore Dio obonobu jimoae. Obo-nobu jimoajakutai jekunu monuka yatijakau. 7 Dio oko waraoto anojamo tane kabanatanae. Tiarone kajara taeraja tane kabanae. Obonomejerei kabanae. Wite kaobonobu arotu tane kabanae. 8 Tiame Kairamo isia rewarakitane tomanetenaka rewarau. Mao-bojona tomaneraja bajinaka jau. Ine Kairamo amojoju. Ijirakate rewara yakerajasi aobojona Dio ajarata jimoajakutaisi eku bajene sanamata akari sanamatau. 9 Dio kaobojona ibajukane kayejebuae orisaba emo kabakitane. Kanona aobojona kayeje-bunatanae. Tiarone oriaobojona kayejebuae. Oriaobojona aya-kara aobojona tane kayejebuae. Raina ajiroma ebe Dio oriao-bojona ayakara kamoae Kirito Jesú eku. 10 Rijana kaobojona Aibajukatu Jesukirito naone oriaobojona ayakara kemusabae. Tai waba iekoronae. Tane rewara yakerajasi isia obojona jiro iejobonae oko are ubamejerei. 11 Taisi isia rewaratu tane mabanae. Jesukirito ainataba tane mabanae. Judioana ainaminatu tane mabanae. 12 Tiamesike sanamatayaine. Tiarone ine matomana ekira. Sinama isia nome abaya tane taisi naminayaine. Tai Kirito. Ajara taeraja ja tane ribiaine. Ine Kirito amojo eku abanajakutai Kirito taisi orabate sinarija mate jakutaisi saba, tane ribiaine. 13 Iji ribu maisimo nokoae Kirito Jesú isia. Nome abayaja, taisi obonoyaja tane ribu yakerajasi eku are taeratanu. 14 Mejokojira Yakerajawitu keku ubayakutai tai ribu nome jimoae. Iji nojoajakutai are taisi yaoro. 15 Asia arao kokotuka momoae. Iji taisi naminaya. Tatuma kawanamo Figelo, Hermógenes tane. 16 Kairamo akobe Onesi-forotuma isia ajerakunarai. Onesíforo jakutai eraja tane masanetae. Ine mojojurone tai maisia tomanerenaka ineata naoae. 17 Tai Roma eku yaroitane yaorane manajabune mamiae. 18 Sinarija mate jakutaisi eku Airamo akobe Onesíforo isia ajerakunarai. Efesoata kwana kasanetajakutai taisi naminaya iji.

2

1 Mauka, iji rijana Kirito Jesú aobojona ayakara eku taera-tanu. 2 Iji maribu nokoae anokomo erajasi amujaba. Rijana iji ribu jakutaisi kaika ribu eku abamo inaminate, tatuma akarimo inaminamejerei. 3 Jesukirito jiabanae orikubatu yakeraja tane. Tiame sanamata akari sanamatau. 4 Orikubatu jakutai orikubamoana anona kware barinaja. Orikubatu tane abanajakutaisi aobojona eku abakitane obonoya. 5 Kotubutu jakutai ribu kaika kotubunaja jakore amoara nojonaja. 6 Rajikabatu jakutai anamuna akwaja awajiabara jakutaisi najorokitane ja. 7 Maribu isia obonobu. Takore Kairamo jisanetate ribu kokotuka nokomejerei. 8 Jesukirito isia obonobu. Tai David ajisaka. Tai wabaerone Dio taisi enomininae. Ine rewara yakerajasi rewarayaja tane rewaraine. 9 Ine rewara aobojona akobaka monuka sanamatayaine. Makoyanae. Tiarone Dio aribu emojojutakomoni. 10 Tiame Dio waraoto mibune nisanajakutai tatuma aobojona ine kokotuka isiko taerataya. Ine taerataya tatumarakate Kirito Jesú eku aobojona bajukamejerei. Obojona bajukakitane jakutai yakerajawitu. Are saba. 11 Tamaja ribu nome: Oko taisi isiko wabane, taisi isiko ubateko. 12 Oko sanamatane, taisi isiko airamo jateko. Taisi naminanajaoko takore, tairakate tatuma naminanajine, tate. 13 Oko taisi aribu eku abanajarone tai oriaribu eku abaya. Oriaribu iabakomoni. 14 Tamaja ribu inaminau tatuma aobojona ribu isia nakamejerei. Kairamo amujaba oriaribu kwarikanaka jamejerei reiri. Ribu kwarikakitane amoara ekira. Anokomo asiraja tane abaya. 15 Yaorane yaotau iji yaotatu Dio saba yakeraja ejobamejerei. Takore tomanakitane ekira yaota aobojona ribu nome eku yaorane yaotajame. 16 Ribu Dio isiayana jakutai, amoara ekira. Taisi kware barinaka jau. Ribu amoara ekiraja jakutai warao Dio yatomanetenaka jamejerea. 17 Ribu amoara ekirajasi aribamo jakutai tatuma aribu boisi monuka najoroya. Ribamo kawanamo Himeneo Fileto tane. 18 Tatuma nome eku abanaka emo jakaya. Nominikitane jakutai tai amena nomininae tane ribia. Tatuma nome abamo kawanamo iwanaria. 19 Tiarone noikaya aba Dio abanajakutai tai are taeraja. Tamaja sinarija ja: Airamo jakutai awaraoto naminaya. (Nah. 1:7) Atae ribia: Kirito awai warayakutai kokotuka asirajasi emo jakunarai. 20 Airamo ajanoko eku jorijoko eraja ja. Kawanamo burata simo nónae tiaja. Kawanamo burata joko nónae tiaja. Kawanamo rau, kawanamo joboto. Kawanamo ayaota yakerajawitu saba. Kawanamo ayaota yawatanuka saba. 21 Obojona asiraja jakore berekitane ja. Berekore jorijoko monuka yaota yakerajasi saba bajia. Taisi emo abate janoko arotuma saba. Nona yakerajasi saba yakera. 22 Nebu monuka maretanaka jakitane emo jakanu. Tiarone nona nomerajasi nonakitane najabu, nome abakitane, obono-kitane, inareraja jakitane tane. Eobo obojona yakerajasi isia Airamo awai warayakutai tatuma isiko bajenu. 23 Eobo ribu eko isia ribu amoara ekirajasi isia tane orisabajia. Tatuma aribu tainau. Aribu aobojona orikubaya. Yatu taisi naminaya. 24 Ai-ramo akajotabu jakutai tai ewiyawiyatuana jakitane ja. Kokotuka isiko raoberaja jakitane ja. Inaminatu jakitane ja. Taeratakitane ja. 25 Taisi riboto jakutaisi raoberaja reirikitane ja. Takore Dio tatuma aobojona ibaremejerete tai, nome yaorane naminamejerei. 26 Aobojona ibarene jebuira akai ekumo jerote. Jebuira amena tatuma oanae aobojona eku abamejerei.

3

1 Tamajasi naminau. Ya ayajuata jawaneraja jate. 2 Warao jakutai wite oriobonote. Burata obonomo jate. Oriisia oko yakera tane ribate. Airamo tane oritoate. Dio isia asiraja ribate. Arima arani tane aribu nokonatate. Yakera jae tane ribunatate. Dio yatomanetenatate. 3 Aobojona romu aobojona tane ejobate. Aorijisi ekoronatate. Rejorotuma jate. Maretamo jate. Jawaneraja jate. Yakeraja jakutaisi rarijatate. 4 Raisama awabimo jate. Nonakitane ebika obonobunaka nonate. Wite oriisia obonobute. Ekei eku ekei takitane tatuma saba yakera. Dio obonokitane tatuma saba asira. 5 Dio ayatomanetemo tane oritoate tiarone ajarata ekirate. Tatuma emo jau. 6 Tatuma kawanamo raisameta yarune atatu aobojona taerena jakutaisi imasibia. Tatu jakutai aobojona asiraja era. Tatu jakutai yawatanuka obonobune are obojona yawatanuka iamo naria. 7 Tatu jakutai kokotukanea inamina oriinaminayarone are nome jakutaisi yaorane naminakomoni. 8 Ateje Janes, Jambres tane Moisés ribotonaeyama. Warao tatuma monuka ribu nome jakutaisi ribotoya. Tamatuma aobojona koi. Dio tatuma tainae nome abanaka jamejerei. 9 Tatuma suatana narunatate. Janes, Jambres tane buretakore kokotuka miae. Taisi monuka tamatuma buretakore kokotuka mite. 10 Iji are mamiae. Mainamina miae. Manona miae. Ine obonoyakutaisi iji miae. Ine nome abayakore iji miae. Ine yawa-kayakore iji miae. Ine obonoyakore iji miae. Ine taeratakore iji miae. 11 Maisanamatayakore iji miae. Ine sanamatayakore iji miae. Antioquia tata makwaeabanajakutaisi iji miae, Iconio tata, Listra tata tane. Masanamata era. Tiarone Mairamo masanamata kokotuka ekumo mejeronae. 12 Nomewitu Kirito Jesú aobojona eku Dio yatomaneteaja ubakitane obonoyakutai, tatuma koko-tuka sanamatakitane ja. 13 Takore warao asiraja jakutai, imasi-bumo jakutai tane atae asiraja kwarika ejobate. Tatuma eobo imasibute. Eobo riboto tatuma imasibute tane. 14 Iji naminajakutaisi eku taeratanu. Iji yaorane nome abanajakutaisi eku taeratanu tane. Jiainaminatu sina tai tane iji naminaya. 15 Iji sanukirajasi tatamo Jabataja yakerajasi naminae. Jabataja jakutai jiainaminae Kirito Jesú isia nome abamejerei. Iji nome abanajame Dio jiaobojona ibajukanae. 16 Jabataja kokotuka Dio isimo. Tai inaminakitane saba yakera. Sabajikitane saba yakera. Reirikitane saba yakera. Nona nomerajasi isia inaminakitane saba yakera. 17 Jabataja inaminaya Dio aneburatu jakutai kaikawitu ejobamejerei nona kokotuka saba iyakarátae tiaja.

4

1 Dio amujaba jiisia ribiaine. Kairamo Jesukirito amujaba jiisia ribiaine. Tai riko jakutaisi aribu nome toate. Wabajakutaisi aribu nome toate. Tai airamo tane rujakitane naone ribu nome toate. 2 Jiisia ribiaine: Ribu rewarau. Yakerakore are rewarate. Yakerena jakore arejase rewarate. Aobojona asirajasi emite. Sabajite. Reirite. Yaorane taeratayaja, inaminayaja tane rewarate. 3 Asinarija naoya. Taisi eku warao inamina yakerajasi obononatate. Akojoko tijitijiame inaminamo eraja najabute akojoko jinamejerei, aobojona eku abakitane. 4 Ribu nome nokokitane obononaja jame emo narute. Tane renobo sabasaba narute. 5 Iji yaorane obojona bakanu. Iji sanamatayaja taeratanu. Rewara yakerajasi rewarau. Jiyaota eku yaotau. 6 Rijana ine nobeanaka najo monuka Dio manajoya. Manaru mawere rijana. 7 Ine yaorane orikubaine rijana. Jakanajakutaisi-ata nabakanaine rijana. Nome abaitane orabanaine rijana. 8 Tia-me mamoara ja. Airamo sabuka tane mabate nomeraja nona-jame. Mairamo jakutai tai ribu nome atoatu nomeraja. Tai mamoara mamoate sinarija mate jakutaisi eku. Amoara jakutai masabawituana. Kokotuka taisi anao obonoyakutai taisi sabarakate amoara ja. 9 Iji rubujira mamikitane naokore yakerakuna. 10 Demas jakutai raina aobojona ama jakutaisi obonoajame momoae. Tesalónica tata naruae. Crescente Galacia tata naruae. Tito Dalmacia tata naruae. 11 Lucaswitu maisiko. Marcos najabune isiko nao. Makajotabu tane taisi abakitane obonoyaine. 12 Tí-quico Efesoata inatabaine. 13 Iji naoyaja maraimaka konau. Maraimaka jakutai Troas tata iabanaine Carpo ajanoko eku. Makaratarakate konate. Kokotuka konakomoni jakore obeja ajoro karata nónae tiakutaisi konate. 14 Alejandro boroma anonatu jakutai tai maisia asiraja kwana nonae. Mairamo taisi anona amoara abakunarai. 15 Iji Alejandro amojeku nakaterate. Tai karibu kwana ribotonae. 16 Ine wajiabara orikware ribakore jisakarakate makware ribunatanae. Kokotuka momoae. Dio tatuma kware abanaka jakunarai. 17 Mairamo makaika bajinae. Majara taeraja tane abanae ine ribu yaorane rewaramejerei. Judioana jakutai kokotuka ribu nokomejerei majara taeraja tane abanae. Tane tobesimo aroko ekumo mejeronae. 18 Mairamo nona asiraja kokotuka ekumo mejerote. Dio najamutuata arujuna rujuya. Tata makonarukitane mayaoroya. Tai are Airamo tane bajekunarai. Amén. 19 Prisca, Aquila tane isia yakerara abanu. Onesiforotuma isia yakeraubiara abanu. 20 Erasto Corinto tata bajinae. Trófimo wabayame Mileto tata iabanaine. 21 Iji joira ebika naokore yakerakuna. Eubulo jiisia yakerara abaya. Pudente, Lino, Claudia tane yakeraubiara abaya. Nome abamo kokotuka yakeraubiara abaya. 22 Kairamo Jesukirito jiaobojona kaika bajekunarai. Oriaobojona ayakara yatu moakunarai. Amén.